Ghata Stavah — Sinhala Script

ආනන්දමන්ථරපුරන්දරමුක්තමාල්යං

මෞලෞ හඨේන නිහිතං මහිෂාසුරස්ය .

පාදාම්බුජං භවතු මේ විජයාය මඤ්ජු-

-මඤ්ජීරශිඤ්ජිතමනෝහරමම්බිකායාඃ .. 1 ..

දේවි ත්ර්යම්බකපත්නි පාර්වති සති ත්රෛලෝක්යමාතඃ ශිවේ

ශර්වාණි ත්රිපුරේ මෘඩානි වරදේ රුද්රාණි කාත්යායනි .

භීමේ භෛරවි චණ්ඩි ශර්වරිකලේ කාලක්ෂයේ ශූලිනි

ත්වත්පාදප්රණතානනන්යමනසඃ පර්යාකුලාන්පාහි නඃ .. 2 ..

දේවි ත්වාං සකෘදේව යඃ ප්රණමති ක්ෂෝණීභෘතස්තං නම-

-න්ත්යාජන්මස්ඵුරදඞ්ඝ්රිපීඨවිලුඨත්කෝටීරකෝටිච්ඡටාඃ .

යස්ත්වාමර්චති සෝ(අ)ර්ච්යතේ සුරගණෛර්යඃ ස්තෞති ස ස්තූයතේ

යස්ත්වාං ධ්යායති තං ස්මරාර්තිවිධුරා ධ්යායන්ති වාමභ්රුවඃ .. 3 ..

උන්මත්තා ඉව සග්රහා ඉව විෂව්යාසක්තමූර්ඡා ඉව

ප්රාප්තප්රෞඪමදා ඉවාර්තිවිරහග්රස්තා ඉවාර්තා ඉව .

යේ ධ්යායන්ති හි ශෛලරාජතනයාං ධන්යාස්ත ඒවාග්රතඃ

ත්යක්තෝපාධිවිවෘද්ධරාගමනසෝ ධ්යායන්ති තාන්සුභ්රුවඃ .. 4 ..

ධ්යායන්ති යේ ක්ෂණමපි ත්රිපුරේ හෘදි ත්වාං

ලාවණ්යයෞවනධනෛරපි විප්රයුක්තාඃ .

තේ විස්ඵුරන්ති ලලිතායතලෝචනානාං

චිත්තෛකභිත්තිලිඛිතප්රතිමාඃ පුමාංසඃ .. 5 ..

ඒතං කිං නු දෘශා පිබාම්යුත විශාම්යස්යාඞ්ගමඞ්ගෛර්නිජෛඃ

කිං වා(අ)මුං නිගරාම්යනේන සහසා කිං වෛකතාමාශ්රයේ .

යස්යේත්ථං විවශෝ විකල්පලලිතාකූතේන යෝෂිජ්ජනඃ

කිං තද්යන්න කරෝති දේවි හෘදයේ යස්ය ත්වමාවර්තසේ .. 6 ..

විශ්වව්යාපිනි යද්වදීශ්වර ඉති ස්ථාණාවනන්යාශ්රයඃ

ශබ්දඃ ශක්තිරිති ත්රිලෝකජනනි ත්වය්යේව තථ්යස්ථිතිඃ .

ඉත්ථං සත්යපි ශක්නුවන්ති යදිමාඃ ක්ෂුද්රා රුජෝ බාධිතුං

ත්වද්භක්තානපි න ක්ෂිණෝෂි ච රුෂා තද්දේවි චිත්රං මහත් .. 7 ..

ඉන්දෝර්මධ්යගතාං මෘගාඞ්කසදෘශච්ඡායාං මනෝහාරිණීං

පාණ්ඩූත්ඵුල්ලසරෝරුහාසනගතා ස්නිග්ධප්රදීපච්ඡවිම් .

වර්ෂන්තීමමෘතං භවානි භවතීං ධ්යායන්ති යේ දේහිනඃ

තේ නිර්මුක්තරුජෝ භවන්ති රිපවඃ ප්රෝජ්ඣන්ති තාන්දූරතඃ .. 8 ..

පූර්ණේන්දෝඃ ශකලෛරිවාතිබහලෛඃ පීයූෂපූරෛරිව

ක්ෂීරාබ්ධේර්ලහරීභරෛරිව සුධාපඞ්කස්ය පිණ්ඩෛරිව .

ප්රාලේයෛරිව නිර්මිතං තව වපුර්ධ්යායන්ති යේ ශ්රද්ධයා

චිත්තාන්තර්නිහිතාර්තිතාපවිපදස්තේ සම්පදං බිභ්රති .. 9 ..

යේ සංස්මරන්ති තරලාං සහසෝල්ලසන්තීං

ත්වාං ග්රන්ථිපඤ්චකභිදං තරුණාර්කශෝණාම් .

රාගාර්ණවේ බහලරාගිණි මජ්ජයන්තීං

කෘත්ස්නං ජගද්දධති චේතසි තාන්මෘගාක්ෂ්යඃ .. 10 ..

ලාක්ෂාරසස්නපිතපඞ්කජතන්තුතන්වීං

අන්තඃ ස්මරත්යනුදිනං භවතීං භවානි .

යස්තං ස්මරප්රතිමමප්රතිමස්වරූපාඃ

නේත්රෝත්පලෛර්මෘගදෘශෝ භෘශමර්චයන්ති .. 11 ..

ස්තුමස්ත්වාං වාචමව්යක්තාං හිමකුන්දේන්දුරෝචිෂම් .

කදම්බමාලාං බිභ්රාණාමාපාදතලලම්බිනීම් .. 12 ..

මූර්ධ්නීන්දෝඃ සිතපඞ්කජාසනගතාං ප්රාලේයපාණ්ඩුත්විෂං

වර්ෂන්තීමමෘතං සරෝරුහභුවෝ වක්ත්රේ(අ)පි රන්ධ්රේ(අ)පි ච .

අච්ඡින්නා ච මනෝහරා ච ලලිතා චාතිප්රසන්නාපි ච

ත්වාමේවං ස්මරතඃ ස්මරාරිදයිතේ වාක්සර්වතෝ වල්ගති .. 13 ..

දදාතීෂ්ටාන්භෝගාන් ක්ෂපයති රිපූන්හන්ති විපදෝ

දහත්යාධීන්ව්යාධීන් ශමයති සුඛානි ප්රතනුතේ .

හඨාදන්තර්දුඃඛං දලයති පිනෂ්ටීෂ්ටවිරහං

සකෘද්ධ්යාතා දේවී කිමිව නිරවද්යං න කුරුතේ .. 14 ..

යස්ත්වාං ධ්යායති වේත්ති වින්දති ජපත්යාලෝකතේ චින්තය-

-ත්යන්වේති ප්රතිපද්යතේ කලයති ස්තෞත්යාශ්රයත්යර්චති .

යශ්ච ත්ර්යම්බකවල්ලභේ තව ගුණානාකර්ණයත්යාදරාත්

තස්ය ශ්රීර්න ගෘහාදපෛති විජයස්තස්යාග්රතෝ ධාවති .. 15 ..

කිං කිං දුඃඛං දනුජදලිනි ක්ෂීයතේ න ස්මෘතායාං

කා කා කීර්තිඃ කුලකමලිනි ඛ්යාප්යතේ න ස්තුතායාම් .

කා කා සිද්ධිඃ සුරවරනුතේ ප්රාප්යතේ නාර්චිතායාං

කං කං යෝගං ත්වයි න චිනුතේ චිත්තමාලම්බිතායාම් .. 16 ..

යේ දේවි දුර්ධරකෘතාන්තමුඛාන්තරස්ථාඃ

යේ කාලි කාලඝනපාශනිතාන්තබද්ධාඃ .

යේ චණ්ඩි චණ්ඩගුරුකල්මෂසින්ධුමග්නාඃ

තාන්පාසි මෝචයසි තාරයසි ස්මෘතෛව .. 17 ..

ලක්ෂ්මීවශීකරණචූර්ණසහෝදරාණි

ත්වත්පාදපඞ්කජරජාංසි චිරං ජයන්ති .

යානි ප්රණාමමිලිතානි නෘණාං ලලාටේ

ලුම්පන්ති දෛවලිඛිතානි දුරක්ෂරාණි .. 18 ..

රේ මූඪාඃ කිමයං වෘථෛව තපසා කායඃ පරික්ලිශ්යතේ

යජ්ඤෛර්වා බහුදක්ෂිණෛඃ කිමිතරේ රික්තීක්රියන්තේ ගෘහාඃ .

භක්තිශ්චේදවිනාශිනී භගවතීපාදද්වයී සේව්යතාං

උන්නිද්රාම්බුරුහාතපත්රසුභගා ලක්ෂ්මීඃ පුරෝ ධාවති .. 19 ..

යාචේ න කඤ්චන න කඤ්චන වඤ්චයාමි

සේවේ න කඤ්චන නිරස්තසමස්තදෛන්යඃ .

ශ්ලක්ෂ්ණං වසේ මධුරමද්මි භජේ වරස්ත්රීඃ

දේවී හෘදි ස්ඵුරති මේ කුලකාමධේනුඃ .. 20 ..

නමාමි යාමිනීනාථලේඛාලඞ්කෘතකුන්තලාම් .

භවානීං භවසන්තාපනිර්වාපණසුධානදීම් .. 21 ..

ඉති ශ්රීකාලිදාස විරචිත පඤ්චස්තව්යාං තෘතීයඃ ඝටස්තවඃ .

Roman (IAST) Transliteration

ānandamantharapurandaramuktamālyaṃ

maulau haṭhena nihitaṃ mahiṣāsurasya |

pādāmbujaṃ bhavatu me vijayāya mañju-

-mañjīraśiñjitamanoharamambikāyāḥ || 1 ||

devi tryambakapatni pārvati sati trailokyamātaḥ śive

śarvāṇi tripure mṛḍāni varade rudrāṇi kātyāyani |

bhīme bhairavi caṇḍi śarvarikale kālakṣaye śūlini

tvatpādapraṇatānananyamanasaḥ paryākulānpāhi naḥ || 2 ||

devi tvāṃ sakṛdeva yaḥ praṇamati kṣoṇībhṛtastaṃ nama-

-ntyājanmasphuradaṅghripīṭhaviluṭhatkoṭīrakoṭicchaṭāḥ |

yastvāmarcati so'rcyate suragaṇairyaḥ stauti sa stūyate

yastvāṃ dhyāyati taṃ smarārtividhurā dhyāyanti vāmabhruvaḥ || 3 ||

unmattā iva sagrahā iva viṣavyāsaktamūrchā iva

prāptaprauḍhamadā ivārtivirahagrastā ivārtā iva |

ye dhyāyanti hi śailarājatanayāṃ dhanyāsta evāgrataḥ

tyaktopādhivivṛddharāgamanaso dhyāyanti tānsubhruvaḥ || 4 ||

dhyāyanti ye kṣaṇamapi tripure hṛdi tvāṃ

lāvaṇyayauvanadhanairapi viprayuktāḥ |

te visphuranti lalitāyatalocanānāṃ

cittaikabhittilikhitapratimāḥ pumāṃsaḥ || 5 ||

etaṃ kiṃ nu dṛśā pibāmyuta viśāmyasyāṅgamaṅgairnijaiḥ

kiṃ vā'muṃ nigarāmyanena sahasā kiṃ vaikatāmāśraye |

yasyetthaṃ vivaśo vikalpalalitākūtena yoṣijjanaḥ

kiṃ tadyanna karoti devi hṛdaye yasya tvamāvartase || 6 ||

viśvavyāpini yadvadīśvara iti sthāṇāvananyāśrayaḥ

śabdaḥ śaktiriti trilokajanani tvayyeva tathyasthitiḥ |

itthaṃ satyapi śaknuvanti yadimāḥ kṣudrā rujo bādhituṃ

tvadbhaktānapi na kṣiṇoṣi ca ruṣā taddevi citraṃ mahat || 7 ||

indormadhyagatāṃ mṛgāṅkasadṛśacchāyāṃ manohāriṇīṃ

pāṇḍūtphullasaroruhāsanagatā snigdhapradīpacchavim |

varṣantīmamṛtaṃ bhavāni bhavatīṃ dhyāyanti ye dehinaḥ

te nirmuktarujo bhavanti ripavaḥ projjhanti tāndūrataḥ || 8 ||

pūrṇendoḥ śakalairivātibahalaiḥ pīyūṣapūrairiva

kṣīrābdherlaharībharairiva sudhāpaṅkasya piṇḍairiva |

prāleyairiva nirmitaṃ tava vapurdhyāyanti ye śraddhayā

cittāntarnihitārtitāpavipadaste sampadaṃ bibhrati || 9 ||

ye saṃsmaranti taralāṃ sahasollasantīṃ

tvāṃ granthipañcakabhidaṃ taruṇārkaśoṇām |

rāgārṇave bahalarāgiṇi majjayantīṃ

kṛtsnaṃ jagaddadhati cetasi tānmṛgākṣyaḥ || 10 ||

lākṣārasasnapitapaṅkajatantutanvīṃ

antaḥ smaratyanudinaṃ bhavatīṃ bhavāni |

yastaṃ smarapratimamapratimasvarūpāḥ

netrotpalairmṛgadṛśo bhṛśamarcayanti || 11 ||

stumastvāṃ vācamavyaktāṃ himakundendurociṣam |

kadambamālāṃ bibhrāṇāmāpādatalalambinīm || 12 ||

mūrdhnīndoḥ sitapaṅkajāsanagatāṃ prāleyapāṇḍutviṣaṃ

varṣantīmamṛtaṃ saroruhabhuvo vaktre'pi randhre'pi ca |

acchinnā ca manoharā ca lalitā cātiprasannāpi ca

tvāmevaṃ smarataḥ smarāridayite vāksarvato valgati || 13 ||

dadātīṣṭānbhogān kṣapayati ripūnhanti vipado

dahatyādhīnvyādhīn śamayati sukhāni pratanute |

haṭhādantarduḥkhaṃ dalayati pinaṣṭīṣṭavirahaṃ

sakṛddhyātā devī kimiva niravadyaṃ na kurute || 14 ||

yastvāṃ dhyāyati vetti vindati japatyālokate cintaya-

-tyanveti pratipadyate kalayati stautyāśrayatyarcati |

yaśca tryambakavallabhe tava guṇānākarṇayatyādarāt

tasya śrīrna gṛhādapaiti vijayastasyāgrato dhāvati || 15 ||

kiṃ kiṃ duḥkhaṃ danujadalini kṣīyate na smṛtāyāṃ

kā kā kīrtiḥ kulakamalini khyāpyate na stutāyām |

kā kā siddhiḥ suravaranute prāpyate nārcitāyāṃ

kaṃ kaṃ yogaṃ tvayi na cinute cittamālambitāyām || 16 ||

ye devi durdharakṛtāntamukhāntarasthāḥ

ye kāli kālaghanapāśanitāntabaddhāḥ |

ye caṇḍi caṇḍagurukalmaṣasindhumagnāḥ

tānpāsi mocayasi tārayasi smṛtaiva || 17 ||

lakṣmīvaśīkaraṇacūrṇasahodarāṇi

tvatpādapaṅkajarajāṃsi ciraṃ jayanti |

yāni praṇāmamilitāni nṛṇāṃ lalāṭe

lumpanti daivalikhitāni durakṣarāṇi || 18 ||

re mūḍhāḥ kimayaṃ vṛthaiva tapasā kāyaḥ parikliśyate

yajñairvā bahudakṣiṇaiḥ kimitare riktīkriyante gṛhāḥ |

bhaktiścedavināśinī bhagavatīpādadvayī sevyatāṃ

unnidrāmburuhātapatrasubhagā lakṣmīḥ puro dhāvati || 19 ||

yāce na kañcana na kañcana vañcayāmi

seve na kañcana nirastasamastadainyaḥ |

ślakṣṇaṃ vase madhuramadmi bhaje varastrīḥ

devī hṛdi sphurati me kulakāmadhenuḥ || 20 ||

namāmi yāminīnāthalekhālaṅkṛtakuntalām |

bhavānīṃ bhavasantāpanirvāpaṇasudhānadīm || 21 ||

iti śrīkālidāsa viracita pañcastavyāṃ tṛtīyaḥ ghaṭastavaḥ |

Sanskrit — Devanagari (original)

आनन्दमन्थरपुरन्दरमुक्तमाल्यं

मौलौ हठेन निहितं महिषासुरस्य ।

पादाम्बुजं भवतु मे विजयाय मञ्जु-

-मञ्जीरशिञ्जितमनोहरमम्बिकायाः ॥ 1 ॥

देवि त्र्यम्बकपत्नि पार्वति सति त्रैलोक्यमातः शिवे

शर्वाणि त्रिपुरे मृडानि वरदे रुद्राणि कात्यायनि ।

भीमे भैरवि चण्डि शर्वरिकले कालक्षये शूलिनि

त्वत्पादप्रणताननन्यमनसः पर्याकुलान्पाहि नः ॥ 2 ॥

देवि त्वां सकृदेव यः प्रणमति क्षोणीभृतस्तं नम-

-न्त्याजन्मस्फुरदङ्घ्रिपीठविलुठत्कोटीरकोटिच्छटाः ।

यस्त्वामर्चति सोऽर्च्यते सुरगणैर्यः स्तौति स स्तूयते

यस्त्वां ध्यायति तं स्मरार्तिविधुरा ध्यायन्ति वामभ्रुवः ॥ 3 ॥

उन्मत्ता इव सग्रहा इव विषव्यासक्तमूर्छा इव

प्राप्तप्रौढमदा इवार्तिविरहग्रस्ता इवार्ता इव ।

ये ध्यायन्ति हि शैलराजतनयां धन्यास्त एवाग्रतः

त्यक्तोपाधिविवृद्धरागमनसो ध्यायन्ति तान्सुभ्रुवः ॥ 4 ॥

ध्यायन्ति ये क्षणमपि त्रिपुरे हृदि त्वां

लावण्ययौवनधनैरपि विप्रयुक्ताः ।

ते विस्फुरन्ति ललितायतलोचनानां

चित्तैकभित्तिलिखितप्रतिमाः पुमांसः ॥ 5 ॥

एतं किं नु दृशा पिबाम्युत विशाम्यस्याङ्गमङ्गैर्निजैः

किं वाऽमुं निगराम्यनेन सहसा किं वैकतामाश्रये ।

यस्येत्थं विवशो विकल्पललिताकूतेन योषिज्जनः

किं तद्यन्न करोति देवि हृदये यस्य त्वमावर्तसे ॥ 6 ॥

विश्वव्यापिनि यद्वदीश्वर इति स्थाणावनन्याश्रयः

शब्दः शक्तिरिति त्रिलोकजननि त्वय्येव तथ्यस्थितिः ।

इत्थं सत्यपि शक्नुवन्ति यदिमाः क्षुद्रा रुजो बाधितुं

त्वद्भक्तानपि न क्षिणोषि च रुषा तद्देवि चित्रं महत् ॥ 7 ॥

इन्दोर्मध्यगतां मृगाङ्कसदृशच्छायां मनोहारिणीं

पाण्डूत्फुल्लसरोरुहासनगता स्निग्धप्रदीपच्छविम् ।

वर्षन्तीममृतं भवानि भवतीं ध्यायन्ति ये देहिनः

ते निर्मुक्तरुजो भवन्ति रिपवः प्रोज्झन्ति तान्दूरतः ॥ 8 ॥

पूर्णेन्दोः शकलैरिवातिबहलैः पीयूषपूरैरिव

क्षीराब्धेर्लहरीभरैरिव सुधापङ्कस्य पिण्डैरिव ।

प्रालेयैरिव निर्मितं तव वपुर्ध्यायन्ति ये श्रद्धया

चित्तान्तर्निहितार्तितापविपदस्ते सम्पदं बिभ्रति ॥ 9 ॥

ये संस्मरन्ति तरलां सहसोल्लसन्तीं

त्वां ग्रन्थिपञ्चकभिदं तरुणार्कशोणाम् ।

रागार्णवे बहलरागिणि मज्जयन्तीं

कृत्स्नं जगद्दधति चेतसि तान्मृगाक्ष्यः ॥ 10 ॥

लाक्षारसस्नपितपङ्कजतन्तुतन्वीं

अन्तः स्मरत्यनुदिनं भवतीं भवानि ।

यस्तं स्मरप्रतिममप्रतिमस्वरूपाः

नेत्रोत्पलैर्मृगदृशो भृशमर्चयन्ति ॥ 11 ॥

स्तुमस्त्वां वाचमव्यक्तां हिमकुन्देन्दुरोचिषम् ।

कदम्बमालां बिभ्राणामापादतललम्बिनीम् ॥ 12 ॥

मूर्ध्नीन्दोः सितपङ्कजासनगतां प्रालेयपाण्डुत्विषं

वर्षन्तीममृतं सरोरुहभुवो वक्त्रेऽपि रन्ध्रेऽपि च ।

अच्छिन्ना च मनोहरा च ललिता चातिप्रसन्नापि च

त्वामेवं स्मरतः स्मरारिदयिते वाक्सर्वतो वल्गति ॥ 13 ॥

ददातीष्टान्भोगान् क्षपयति रिपून्हन्ति विपदो

दहत्याधीन्व्याधीन् शमयति सुखानि प्रतनुते ।

हठादन्तर्दुःखं दलयति पिनष्टीष्टविरहं

सकृद्ध्याता देवी किमिव निरवद्यं न कुरुते ॥ 14 ॥

यस्त्वां ध्यायति वेत्ति विन्दति जपत्यालोकते चिन्तय-

-त्यन्वेति प्रतिपद्यते कलयति स्तौत्याश्रयत्यर्चति ।

यश्च त्र्यम्बकवल्लभे तव गुणानाकर्णयत्यादरात्

तस्य श्रीर्न गृहादपैति विजयस्तस्याग्रतो धावति ॥ 15 ॥

किं किं दुःखं दनुजदलिनि क्षीयते न स्मृतायां

का का कीर्तिः कुलकमलिनि ख्याप्यते न स्तुतायाम् ।

का का सिद्धिः सुरवरनुते प्राप्यते नार्चितायां

कं कं योगं त्वयि न चिनुते चित्तमालम्बितायाम् ॥ 16 ॥

ये देवि दुर्धरकृतान्तमुखान्तरस्थाः

ये कालि कालघनपाशनितान्तबद्धाः ।

ये चण्डि चण्डगुरुकल्मषसिन्धुमग्नाः

तान्पासि मोचयसि तारयसि स्मृतैव ॥ 17 ॥

लक्ष्मीवशीकरणचूर्णसहोदराणि

त्वत्पादपङ्कजरजांसि चिरं जयन्ति ।

यानि प्रणाममिलितानि नृणां ललाटे

लुम्पन्ति दैवलिखितानि दुरक्षराणि ॥ 18 ॥

रे मूढाः किमयं वृथैव तपसा कायः परिक्लिश्यते

यज्ञैर्वा बहुदक्षिणैः किमितरे रिक्तीक्रियन्ते गृहाः ।

भक्तिश्चेदविनाशिनी भगवतीपादद्वयी सेव्यतां

उन्निद्राम्बुरुहातपत्रसुभगा लक्ष्मीः पुरो धावति ॥ 19 ॥

याचे न कञ्चन न कञ्चन वञ्चयामि

सेवे न कञ्चन निरस्तसमस्तदैन्यः ।

श्लक्ष्णं वसे मधुरमद्मि भजे वरस्त्रीः

देवी हृदि स्फुरति मे कुलकामधेनुः ॥ 20 ॥

नमामि यामिनीनाथलेखालङ्कृतकुन्तलाम् ।

भवानीं भवसन्तापनिर्वापणसुधानदीम् ॥ 21 ॥

इति श्रीकालिदास विरचित पञ्चस्तव्यां तृतीयः घटस्तवः ।