Saundarya Lahari — Oriya Script

ପ୍ରଥମ ଭାଗଃ - ଆନନ୍ଦ ଲହରି

ଭୁମୌସ୍ଖଲିତ ପାଦାନାଂ ଭୂମିରେଵା ଵଲମ୍ବନମ୍ ।

ତ୍ଵଯୀ ଜାତା ପରାଧାନାଂ ତ୍ଵମେଵ ଶରଣଂ ଶିଵେ ॥

ଶିଵଃ ଶକ୍ତ୍ଯା ଯୁକ୍ତୋ ଯଦି ଭଵତି ଶକ୍ତଃ ପ୍ରଭଵିତୁଂ

ନ ଚେଦେଵଂ ଦେଵୋ ନ ଖଲୁ କୁଶଲଃ ସ୍ପନ୍ଦିତୁମପି ।

ଅତସ୍ତ୍ଵାମାରାଧ୍ଯାଂ ହରିହରଵିରିଞ୍ଚାଦିଭିରପି

ପ୍ରଣନ୍ତୁଂ ସ୍ତୋତୁଂ ଵା କଥମକୃତପୁଣ୍ଯଃ ପ୍ରଭଵତି ॥ 1 ॥

ତନୀଯାଂସଂ ପାଂସୁଂ ତଵ ଚରଣପଙ୍କେରୁହଭଵଂ

ଵିରିଞ୍ଚିସ୍ସଞ୍ଚିନ୍ଵନ୍ ଵିରଚଯତି ଲୋକାନଵିକଲମ୍ ।

ଵହତ୍ଯେନଂ ଶୌରିଃ କଥମପି ସହସ୍ରେଣ ଶିରସାଂ

ହରସ୍ସଙ୍କ୍ଷୁଦ୍ଯୈନଂ ଭଜତି ଭସିତୋଦ୍ଧୂଲନଵିଧିମ୍ ॥ 2 ॥

ଅଵିଦ୍ଯାନାମନ୍ତ-ସ୍ତିମିର-ମିହିରଦ୍ଵୀପନଗରୀ

ଜଡାନାଂ ଚୈତନ୍ଯ-ସ୍ତବକ-ମକରନ୍ଦ-ସ୍ରୁତିଝରୀ ।

ଦରିଦ୍ରାଣାଂ ଚିନ୍ତାମଣିଗୁଣନିକା ଜନ୍ମଜଲଧୌ

ନିମଗ୍ନାନାଂ ଦଂଷ୍ଟ୍ରା ମୁରରିପୁ-ଵରାହସ୍ଯ ଭଵତି ॥ 3 ॥

ତ୍ଵଦନ୍ଯଃ ପାଣିଭ୍ଯାମଭଯଵରଦୋ ଦୈଵତଗଣଃ

ତ୍ଵମେକା ନୈଵାସି ପ୍ରକଟିତଵରାଭୀତ୍ଯଭିନଯା ।

ଭଯାତ୍ ତ୍ରାତୁଂ ଦାତୁଂ ଫଲମପି ଚ ଵାଞ୍ଛାସମଧିକଂ

ଶରଣ୍ଯେ ଲୋକାନାଂ ତଵ ହି ଚରଣାଵେଵ ନିପୁଣୌ ॥ 4 ॥

ହରିସ୍ତ୍ଵାମାରାଧ୍ଯ ପ୍ରଣତଜନସୌଭାଗ୍ଯଜନନୀଂ

ପୁରା ନାରୀ ଭୂତ୍ଵା ପୁରରିପୁମପି କ୍ଷୋଭମନଯତ୍ ।

ସ୍ମରୋଽପି ତ୍ଵାଂ ନତ୍ଵା ରତିନଯନଲେହ୍ଯେନ ଵପୁଷା

ମୁନୀନାମପ୍ଯନ୍ତଃ ପ୍ରଭଵତି ହି ମୋହାଯ ମହତାମ୍ ॥ 5 ॥

ଧନୁଃ ପୌଷ୍ପଂ ମୌର୍ଵୀ ମଧୁକରମଯୀ ପଞ୍ଚ ଵିଶିଖାଃ

ଵସନ୍ତଃ ସାମନ୍ତୋ ମଲଯମରୁଦାଯୋଧନରଥଃ ।

ତଥାପ୍ଯେକଃ ସର୍ଵଂ ହିମଗିରିସୁତେ କାମପି କୃପାମ୍

ଅପାଙ୍ଗାତ୍ତେ ଲବ୍ଧ୍ଵା ଜଗଦିଦ-ମନଙ୍ଗୋ ଵିଜଯତେ ॥ 6 ॥

କ୍ଵଣତ୍କାଞ୍ଚୀଦାମା କରିକଲଭକୁମ୍ଭସ୍ତନନତା

ପରିକ୍ଷୀଣା ମଧ୍ଯେ ପରିଣତଶରଚ୍ଚନ୍ଦ୍ରଵଦନା ।

ଧନୁର୍ବାଣାନ୍ ପାଶଂ ସୃଣିମପି ଦଧାନା କରତଲୈଃ

ପୁରସ୍ତାଦାସ୍ତାଂ ନଃ ପୁରମଥିତୁରାହୋପୁରୁଷିକା ॥ 7 ॥

ସୁଧାସିନ୍ଧୋର୍ମଧ୍ଯେ ସୁରଵିଟପିଵାଟୀପରିଵୃତେ

ମଣିଦ୍ଵୀପେ ନୀପୋପଵନଵତି ଚିନ୍ତାମଣିଗୃହେ ।

ଶିଵାକାରେ ମଞ୍ଚେ ପରମଶିଵପର୍ଯଙ୍କନିଲଯାଂ

ଭଜନ୍ତି ତ୍ଵାଂ ଧନ୍ଯାଃ କତିଚନ ଚିଦାନନ୍ଦଲହରୀମ୍ ॥ 8 ॥

ମହୀଂ ମୂଲାଧାରେ କମପି ମଣିପୂରେ ହୁତଵହଂ

ସ୍ଥିତଂ ସ୍ଵାଧିଷ୍ଠାନେ ହୃଦି ମରୁତମାକାଶମୁପରି ।

ମନୋଽପି ଭ୍ରୂମଧ୍ଯେ ସକଲମପି ଭିତ୍ଵା କୁଲପଥଂ

ସହସ୍ରାରେ ପଦ୍ମେ ସହ ରହସି ପତ୍ଯା ଵିହରସେ ॥ 9 ॥

ସୁଧାଧାରାସାରୈଶ୍ଚରଣଯୁଗଲାନ୍ତର୍ଵିଗଲିତୈଃ

ପ୍ରପଞ୍ଚଂ ସିଞ୍ଚନ୍ତୀ ପୁନରପି ରସାମ୍ନାଯମହସଃ ।

ଅଵାପ୍ଯ ସ୍ଵାଂ ଭୂମିଂ ଭୁଜଗନିଭମଧ୍ଯୁଷ୍ଟଵଲଯଂ

ସ୍ଵମାତ୍ମାନଂ କୃତ୍ଵା ସ୍ଵପିଷି କୁଲକୁଣ୍ଡେ କୁହରିଣି ॥ 10 ॥

ଚତୁର୍ଭିଃ ଶ୍ରୀକଣ୍ଠୈଃ ଶିଵଯୁଵତିଭିଃ ପଞ୍ଚଭିରପି

ପ୍ରଭିନ୍ନାଭିଃ ଶମ୍ଭୋର୍ନଵଭିରପି ମୂଲପ୍ରକୃତିଭିଃ ।

ଚତୁଶ୍ଚତ୍ଵାରିଂଶଦ୍ଵସୁଦଲକଲାଶ୍ରତ୍ରିଵଲଯ- [ତ୍ରଯଶ୍ଚତ୍ଵାରି]

ତ୍ରିରେଖାଭିଃ ସାର୍ଧଂ ତଵ ଶରଣକୋଣାଃ ପରିଣତାଃ ॥ 11 ॥ [ଚରଣକୋଣାଃ, ଭଵନକିଣାଃ]

ତ୍ଵଦୀଯଂ ସୌନ୍ଦର୍ଯଂ ତୁହିନଗିରିକନ୍ଯେ ତୁଲଯିତୁଂ

କଵୀନ୍ଦ୍ରାଃ କଲ୍ପନ୍ତେ କଥମପି ଵିରିଞ୍ଚିପ୍ରଭୃତଯଃ ।

ଯଦାଲୋକୌତ୍ସୁକ୍ଯାଦମରଲଲନା ଯାନ୍ତି ମନସା

ତପୋଭିର୍ଦୁଷ୍ପ୍ରାପାମପି ଗିରିଶସାଯୁଜ୍ଯପଦଵୀମ୍ ॥ 12 ॥

ନରଂ ଵର୍ଷୀଯାଂସଂ ନଯନଵିରସଂ ନର୍ମସୁ ଜଡଂ

ତଵାପାଙ୍ଗାଲୋକେ ପତିତମନୁଧାଵନ୍ତି ଶତଶଃ ।

ଗଲଦ୍ଵେଣୀବନ୍ଧାଃ କୁଚକଲଶଵିସ୍ରସ୍ତସିଚଯା

ହଠାତ୍ ତ୍ରୁଟ୍ଯତ୍କାଞ୍ଚ୍ଯୋ ଵିଗଲିତଦୁକୂଲା ଯୁଵତଯଃ ॥ 13 ॥

କ୍ଷିତୌ ଷଟ୍ପଞ୍ଚାଶଦ୍ ଦ୍ଵିସମଧିକପଞ୍ଚାଶଦୁଦକେ

ହୁତାଶେ ଦ୍ଵାଷଷ୍ଟିଶ୍ଚତୁରଧିକପଞ୍ଚାଶଦନିଲେ ।

ଦିଵି ଦ୍ଵିଷ୍ଷଟ୍ତ୍ରିଂଶନ୍ମନସି ଚ ଚତୁଷ୍ଷଷ୍ଟିରିତି ଯେ

ମଯୂଖାସ୍ତେଷାମପ୍ଯୁପରି ତଵ ପାଦାମ୍ବୁଜଯୁଗମ୍ ॥ 14 ॥

ଶରଜ୍ଜ୍ଯୋତ୍ସ୍ନାଶୁଦ୍ଧାଂ ଶଶିଯୁତଜଟାଜୂଟମକୁଟାଂ

ଵରତ୍ରାସତ୍ରାଣସ୍ଫଟିକଘଟିକାପୁସ୍ତକକରାମ୍ ।

ସକୃନ୍ନ ତ୍ଵା ନତ୍ଵା କଥମିଵ ସତାଂ ସନ୍ନ୍ନିଦଧତେ

ମଧୁକ୍ଷୀରଦ୍ରାକ୍ଷାମଧୁରିମଧୁରୀଣାଃ ଭଣିତଯଃ ॥ 15॥ [ଫଣିତଯଃ]

କଵୀନ୍ଦ୍ରାଣାଂ ଚେତଃକମଲଵନବାଲାତପରୁଚିଂ

ଭଜନ୍ତେ ଯେ ସନ୍ତଃ କତିଚିଦରୁଣାମେଵ ଭଵତୀମ୍ ।

ଵିରିଞ୍ଚିପ୍ରେଯସ୍ଯାସ୍ତରୁଣତରଶୃଙ୍ଗାରଲହରୀ-

ଗଭୀରାଭିର୍ଵାଗ୍ଭିର୍ଵିଦଧତି ସତାଂ ରଞ୍ଜନମମୀ ॥ 16 ॥

ସଵିତ୍ରୀଭିର୍ଵାଚାଂ ଶଶିମଣିଶିଲାଭଙ୍ଗରୁଚିଭିଃ

ଵଶିନ୍ଯାଦ୍ଯାଭିସ୍ତ୍ଵାଂ ସହ ଜନନି ସଞ୍ଚିନ୍ତଯତି ଯଃ ।

ସ କର୍ତା କାଵ୍ଯାନାଂ ଭଵତି ମହତାଂ ଭଙ୍ଗିରୁଚିଭିଃ

ଵଚୋଭିର୍ଵାଗ୍ଦେଵୀଵଦନକମଲାମୋଦମଧୁରୈଃ ॥ 17 ॥

ତନୁଚ୍ଛାଯାଭିସ୍ତେ ତରୁଣତରଣିଶ୍ରୀସରଣିଭିଃ

ଦିଵଂ ସର୍ଵାମୁର୍ଵୀମରୁଣିମନି ମଗ୍ନାଂ ସ୍ମରତି ଯଃ ।

ଭଵନ୍ତ୍ଯସ୍ଯ ତ୍ରସ୍ଯଦ୍ଵନହରିଣଶାଲୀନନଯନାଃ

ସହୋର୍ଵଶ୍ଯା ଵଶ୍ଯାଃ କତି କତି ନ ଗୀର୍ଵାଣଗଣିକାଃ ॥ 18 ॥

ମୁଖଂ ବିନ୍ଦୁଂ କୃତ୍ଵା କୁଚଯୁଗମଧସ୍ତସ୍ଯ ତଦଧୋ

ହରାର୍ଧଂ ଧ୍ଯାଯେଦ୍ଯୋ ହରମହିଷି ତେ ମନ୍ମଥକଲାମ୍ ।

ସ ସଦ୍ଯଃ ସଙ୍କ୍ଷୋଭଂ ନଯତି ଵନିତା ଇତ୍ଯତିଲଘୁ

ତ୍ରିଲୋକୀମପ୍ଯାଶୁ ଭ୍ରମଯତି ରଵୀନ୍ଦୁସ୍ତନଯୁଗାମ୍ ॥ 19 ॥

କିରନ୍ତୀମଙ୍ଗେଭ୍ଯଃ କିରଣନିକୁରମ୍ବାମୃତରସଂ

ହୃଦି ତ୍ଵାମାଧତ୍ତେ ହିମକରଶିଲାମୂର୍ତିମିଵ ଯଃ ।

ସ ସର୍ପାଣାଂ ଦର୍ପଂ ଶମଯତି ଶକୁନ୍ତାଧିପ ଇଵ

ଜ୍ଵରପ୍ଲୁଷ୍ଟାନ୍ ଦୃଷ୍ଟ୍ଯା ସୁଖଯତି ସୁଧାଧାରସିରଯା ॥ 20 ॥

ତଟିଲ୍ଲେଖାତନ୍ଵୀଂ ତପନଶଶିଵୈଶ୍ଵାନରମଯୀଂ

ନିଷଣ୍ଣାଂ ଷଣ୍ଣାମପ୍ଯୁପରି କମଲାନାଂ ତଵ କଲାମ୍ ।

ମହାପଦ୍ମାଟଵ୍ଯାଂ ମୃଦିତମଲମାଯେନ ମନସା

ମହାନ୍ତଃ ପଶ୍ଯନ୍ତୋ ଦଧତି ପରମାହ୍ଲାଦଲହରୀମ୍ ॥ 21 ॥

ଭଵାନି ତ୍ଵଂ ଦାସେ ମଯି ଵିତର ଦୃଷ୍ଟିଂ ସକରୁଣା-

ମିତି ସ୍ତୋତୁଂ ଵାଞ୍ଛନ୍ କଥଯତି ଭଵାନି ତ୍ଵମିତି ଯଃ ।

ତଦୈଵ ତ୍ଵଂ ତସ୍ମୈ ଦିଶସି ନିଜସାଯୁଜ୍ଯପଦଵୀଂ

ମୁକୁନ୍ଦବ୍ରହ୍ମେନ୍ଦ୍ରସ୍ଫୁଟମକୁଟନୀରାଜିତପଦାମ୍ ॥ 22 ॥

ତ୍ଵଯା ହୃତ୍ଵା ଵାମଂ ଵପୁରପରି-ତୃପ୍ତେନ ମନସା

ଶରୀରାର୍ଧଂ ଶମ୍ଭୋରପରମପି ଶଙ୍କେ ହୃତମଭୂତ୍ ।

ଯଦେତତ୍ତ୍ଵଦ୍ରୂପଂ ସକଲମରୁଣାଭଂ ତ୍ରିନଯନଂ

କୁଚାଭ୍ଯାମାନମ୍ରଂ କୁଟିଲଶଶିଚୂଡାଲମକୁଟମ୍ ॥ 23 ॥

ଜଗତ୍ସୂତେ ଧାତା ହରିରଵତି ରୁଦ୍ରଃ କ୍ଷପଯତେ

ତିରସ୍କୁର୍ଵନ୍ନେତତ୍ସ୍ଵମପି ଵପୁରୀଶସ୍ତିରଯତି ।

ସଦାପୂର୍ଵଃ ସର୍ଵଂ ତଦିଦମନୁଗୃହ୍ଣାତି ଚ ଶିଵ-

ସ୍ତଵାଜ୍ଞାମାଲମ୍ବ୍ଯ କ୍ଷଣଚଲିତଯୋର୍ଭ୍ରୂଲତିକଯୋଃ ॥ 24 ॥

ତ୍ରଯାଣାଂ ଦେଵାନାଂ ତ୍ରିଗୁଣଜନିତାନାଂ ତଵ ଶିଵେ

ଭଵେତ୍ ପୂଜା ପୂଜା ତଵ ଚରଣଯୋର୍ଯା ଵିରଚିତା ।

ତଥା ହି ତ୍ଵତ୍ପାଦୋଦ୍ଵହନମଣିପୀଠସ୍ଯ ନିକଟେ

ସ୍ଥିତା ହ୍ଯେତେ ଶଶ୍ଵନ୍ମୁକୁଲିତକରୋତ୍ତଂସମକୁଟାଃ ॥ 25 ॥

ଵିରିଞ୍ଚିଃ ପଞ୍ଚତ୍ଵଂ ଵ୍ରଜତି ହରିରାପ୍ନୋତି ଵିରତିଂ

ଵିନାଶଂ କୀନାଶୋ ଭଜତି ଧନଦୋ ଯାତି ନିଧନମ୍ ।

ଵିତନ୍ଦ୍ରୀ ମାହେନ୍ଦ୍ରୀ ଵିତତିରପି ସମ୍ମୀଲିତଦୃଶା

ମହାସଂହାରେଽସ୍ମିନ୍ ଵିହରତି ସତି ତ୍ଵତ୍ପତିରସୌ ॥ 26 ॥

ଜପୋ ଜଲ୍ପଃ ଶିଲ୍ପଂ ସକଲମପି ମୁଦ୍ରାଵିରଚନା

ଗତିଃ ପ୍ରାଦକ୍ଷିଣ୍ଯକ୍ରମଣମଶନାଦ୍ଯାହୁତିଵିଧିଃ ।

ପ୍ରଣାମସ୍ସଂଵେଶସ୍ସୁଖମଖିଲମାତ୍ମାର୍ପଣଦୃଶା

ସପର୍ଯାପର୍ଯାଯସ୍ତଵ ଭଵତୁ ଯନ୍ମେ ଵିଲସିତମ୍ ॥ 27 ॥

ସୁଧାମପ୍ଯାସ୍ଵାଦ୍ଯ ପ୍ରତିଭଯଜରାମୃତ୍ଯୁହରିଣୀଂ

ଵିପଦ୍ଯନ୍ତେ ଵିଶ୍ଵେ ଵିଧିଶତମଖାଦ୍ଯା ଦିଵିଷଦଃ ।

କରାଲଂ ଯତ୍କ୍ଷ୍ଵେଲଂ କବଲିତଵତଃ କାଲକଲନା

ନ ଶମ୍ଭୋସ୍ତନ୍ମୂଲଂ ତଵ ଜନନି ତାଟଙ୍କମହିମା ॥ 28 ॥

କିରୀଟଂ ଵୈରିଞ୍ଚଂ ପରିହର ପୁରଃ କୈଟଭଭିଦଃ

କଠୋରେ କୋଟୀରେ ସ୍ଖଲସି ଜହି ଜମ୍ଭାରିମୁକୁଟମ୍ ।

ପ୍ରଣମ୍ରେଷ୍ଵେତେଷୁ ପ୍ରସଭମୁପଯାତସ୍ଯ ଭଵନଂ

ଭଵସ୍ଯାଭ୍ଯୁତ୍ଥାନେ ତଵ ପରିଜନୋକ୍ତିର୍ଵିଜଯତେ ॥ 29 ॥

ସ୍ଵଦେହୋଦ୍ଭୂତାଭିର୍ଘୃଣିଭିରଣିମାଦ୍ଯାଭିରଭିତୋ

ନିଷେଵ୍ଯେ ନିତ୍ଯେ ତ୍ଵାମହମିତି ସଦା ଭାଵଯତି ଯଃ ।

କିମାଶ୍ଚର୍ଯଂ ତସ୍ଯ ତ୍ରିନଯନସମୃଦ୍ଧିଂ ତୃଣଯତୋ

ମହାସଂଵର୍ତାଗ୍ନିର୍ଵିରଚଯତି ନିରାଜନଵିଧିମ୍ ॥ 30 ॥

ଚତୁଷ୍ଷଷ୍ଟ୍ଯା ତନ୍ତ୍ରୈଃ ସକଲମତିସନ୍ଧାଯ ଭୁଵନଂ

ସ୍ଥିତସ୍ତତ୍ତତ୍ସିଦ୍ଧିପ୍ରସଵପରତନ୍ତ୍ରୈଃ ପଶୁପତିଃ ।

ପୁନସ୍ତ୍ଵନ୍ନିର୍ବନ୍ଧାଦଖିଲପୁରୁଷାର୍ଥୈକଘଟନା-

ସ୍ଵତନ୍ତ୍ରଂ ତେ ତନ୍ତ୍ରଂ କ୍ଷିତିତଲମଵାତୀତରଦିଦମ୍ ॥ 31 ॥

ଶିଵଃ ଶକ୍ତିଃ କାମଃ କ୍ଷିତିରଥ ରଵିଃ ଶୀତକିରଣଃ

ସ୍ମରୋ ହଂସଃ ଶକ୍ରସ୍ତଦନୁ ଚ ପରାମାରହରଯଃ ।

ଅମୀ ହୃଲ୍ଲେଖାଭିସ୍ତିସୃଭିରଵସାନେଷୁ ଘଟିତା

ଭଜନ୍ତେ ଵର୍ଣାସ୍ତେ ତଵ ଜନନି ନାମାଵଯଵତାମ୍ ॥ 32 ॥

ସ୍ମରଂ ଯୋନିଂ ଲକ୍ଷ୍ମୀଂ ତ୍ରିତଯମିଦମାଦୌ ତଵ ମନୋ-

ର୍ନିଧାଯୈକେ ନିତ୍ଯେ ନିରଵଧିମହାଭୋଗରସିକାଃ ।

ଭଜନ୍ତି ତ୍ଵାଂ ଚିନ୍ତାମଣିଗୁନନିବଦ୍ଧାକ୍ଷଵଲଯାଃ

ଶିଵାଗ୍ନୌ ଜୁହ୍ଵନ୍ତଃ ସୁରଭିଘୃତଧାରାହୁତିଶତୈଃ ॥ 33 ॥

ଶରୀରଂ ତ୍ଵଂ ଶମ୍ଭୋଃ ଶଶିମିହିରଵକ୍ଷୋରୁହଯୁଗଂ

ତଵାତ୍ମାନଂ ମନ୍ଯେ ଭଗଵତି ନଵାତ୍ମାନମନଘମ୍ ।

ଅତଶ୍ଶେଷଶ୍ଶେଷୀତ୍ଯଯମୁଭଯସାଧାରଣତଯା

ସ୍ଥିତଃ ସମ୍ବନ୍ଧୋ ଵାଂ ସମରସପରାନନ୍ଦପରଯୋଃ ॥ 34 ॥

ମନସ୍ତ୍ଵଂ ଵ୍ଯୋମ ତ୍ଵଂ ମରୁଦସି ମରୁତ୍ସାରଥିରସି

ତ୍ଵମାପସ୍ତ୍ଵଂ ଭୂମିସ୍ତ୍ଵଯି ପରିଣତାଯାଂ ନ ହି ପରମ୍ ।

ତ୍ଵମେଵ ସ୍ଵାତ୍ମାନଂ ପରିଣମଯିତୁଂ ଵିଶ୍ଵଵପୁଷା

ଚିଦାନନ୍ଦାକାରଂ ଶିଵଯୁଵତି ଭାଵେନ ବିଭୃଷେ ॥ 35 ॥

ତଵାଜ୍ଞାଚକ୍ରସ୍ଥଂ ତପନଶଶିକୋଟିଦ୍ଯୁତିଧରଂ

ପରଂ ଶମ୍ଭୁଂ ଵନ୍ଦେ ପରିମିଲିତପାର୍ଶ୍ଵଂ ପରଚିତା ।

ଯମାରାଧ୍ଯନ୍ ଭକ୍ତ୍ଯା ରଵିଶଶିଶୁଚୀନାମଵିଷଯେ

ନିରାଲୋକେଽଲୋକେ ନିଵସତି ହି ଭାଲୋକଭୁଵନେ ॥ 36 ॥

ଵିଶୁଦ୍ଧୌ ତେ ଶୁଦ୍ଧସ୍ଫଟିକଵିଶଦଂ ଵ୍ଯୋମଜନକଂ

ଶିଵଂ ସେଵେ ଦେଵୀମପି ଶିଵସମାନଵ୍ଯଵସିତାମ୍ ।

ଯଯୋଃ କାନ୍ତ୍ଯା ଯାନ୍ତ୍ଯାଃ ଶଶିକିରଣସାରୂପ୍ଯସରଣେ-

ଵିଧୂତାନ୍ତର୍ଧ୍ଵାନ୍ତା ଵିଲସତି ଚକୋରୀଵ ଜଗତୀ ॥ 37 ॥

ସମୁନ୍ମୀଲତ୍ ସଂଵିତ୍ କମଲମକରନ୍ଦୈକରସିକଂ

ଭଜେ ହଂସଦ୍ଵନ୍ଦ୍ଵଂ କିମପି ମହତାଂ ମାନସଚରମ୍ ।

ଯଦାଲାପାଦଷ୍ଟାଦଶଗୁଣିତଵିଦ୍ଯାପରିଣତି-

ର୍ଯଦାଦତ୍ତେ ଦୋଷାଦ୍ ଗୁଣମଖିଲମଦ୍ଭ୍ଯଃ ପଯ ଇଵ ॥ 38 ॥

ତଵ ସ୍ଵାଧିଷ୍ଠାନେ ହୁତଵହମଧିଷ୍ଠାଯ ନିରତଂ

ତମୀଡେ ସଂଵର୍ତଂ ଜନନି ମହତୀଂ ତାଂ ଚ ସମଯାମ୍ ।

ଯଦାଲୋକେ ଲୋକାନ୍ ଦହତି ମହତି କ୍ରୋଧକଲିତେ

ଦଯାର୍ଦ୍ରା ଯା ଦୃଷ୍ଟିଃ ଶିଶିରମୁପଚାରଂ ରଚଯତି ॥ 39 ॥

ତଟିତ୍ତ୍ଵନ୍ତଂ ଶକ୍ତ୍ଯା ତିମିରପରିପନ୍ଥିସ୍ଫୁରଣଯା

ସ୍ଫୁରନ୍ନାନାରତ୍ନାଭରଣପରିଣଦ୍ଧେନ୍ଦ୍ରଧନୁଷମ୍ ।

ତଵ ଶ୍ଯାମଂ ମେଘଂ କମପି ମଣିପୂରୈକଶରଣଂ

ନିଷେଵେ ଵର୍ଷନ୍ତଂ ହରମିହିରତପ୍ତଂ ତ୍ରିଭୁଵନମ୍ ॥ 40 ॥

ତଵାଧାରେ ମୂଲେ ସହ ସମଯଯା ଲାସ୍ଯପରଯା

ନଵାତ୍ମାନଂ ମନ୍ଯେ ନଵରସମହାତାଣ୍ଡଵନଟମ୍ ।

ଉଭାଭ୍ଯାମେତାଭ୍ଯାମୁଦଯଵିଧିମୁଦ୍ଦିଶ୍ଯ ଦଯଯା

ସନାଥାଭ୍ଯାଂ ଜଜ୍ଞେ ଜନକଜନନୀମଜ୍ଜଗଦିଦମ୍ ॥ 41 ॥

ଦ୍ଵିତୀଯ ଭାଗଃ - ସୌନ୍ଦର୍ଯ ଲହରୀ

ଗତୈର୍ମାଣିକ୍ଯତ୍ଵଂ ଗଗନମଣିଭିଃ ସାନ୍ଦ୍ରଘଟିତଂ

କିରୀଟଂ ତେ ହୈମଂ ହିମଗିରିସୁତେ କୀର୍ତଯତି ଯଃ ।

ସ ନୀଡେଯଚ୍ଛାଯାଚ୍ଛୁରଣଶବଲଂ ଚନ୍ଦ୍ରଶକଲଂ

ଧନୁଃ ଶୌନାସୀରଂ କିମିତି ନ ନିବଧ୍ନାତି ଧିଷଣାମ୍ ॥ 42 ॥

ଧୁନୋତୁ ଧ୍ଵାନ୍ତଂ ନସ୍ତୁଲିତଦଲିତେନ୍ଦୀଵରଵନଂ

ଘନସ୍ନିଗ୍ଧଶ୍ଲକ୍ଷ୍ଣଂ ଚିକୁରନିକୁରୁମ୍ବଂ ତଵ ଶିଵେ ।

ଯଦୀଯଂ ସୌରଭ୍ଯଂ ସହଜମୁପଲବ୍ଧୁଂ ସୁମନସୋ

ଵସନ୍ତ୍ଯସ୍ମିନ୍ ମନ୍ଯେ ଵଲମଥନଵାଟୀଵିଟପିନାମ୍ ॥ 43 ॥

ତନୋତୁ କ୍ଷେମଂ ନସ୍ତଵ ଵଦନସୌନ୍ଦର୍ଯଲହରୀ-

ପରୀଵାହସ୍ରୋତଃସରଣିରିଵ ସୀମନ୍ତସରଣିଃ ।

ଵହନ୍ତୀ ସିନ୍ଦୂରଂ ପ୍ରବଲକବରୀଭାରତିମିର-

ଦ୍ଵିଷାଂ ବୃନ୍ଦୈର୍ବନ୍ଦୀକୃତମିଵ ନଵୀନାର୍କକିରଣମ୍ ॥ 44 ॥

ଅରାଲୈଃ ସ୍ଵାଭାଵ୍ଯାଦଲିକଲଭସଶ୍ରୀଭିରଲକୈଃ

ପରୀତଂ ତେ ଵକ୍ତ୍ରଂ ପରିହସତି ପଙ୍କେରୁହରୁଚିମ୍ ।

ଦରସ୍ମେରେ ଯସ୍ମିନ୍ ଦଶନରୁଚିକିଞ୍ଜଲ୍କରୁଚିରେ

ସୁଗନ୍ଧୌ ମାଦ୍ଯନ୍ତି ସ୍ମରଦହନଚକ୍ଷୁର୍ମଧୁଲିହଃ ॥ 45 ॥

ଲଲାଟଂ ଲାଵଣ୍ଯଦ୍ଯୁତିଵିମଲମାଭାତି ତଵ ଯ-

ଦ୍ଦ୍ଵିତୀଯଂ ତନ୍ମନ୍ଯେ ମକୁଟଘଟିତଂ ଚନ୍ଦ୍ରଶକଲମ୍ ।

ଵିପର୍ଯାସନ୍ଯାସାଦୁଭଯମପି ସମ୍ଭୂଯ ଚ ମିଥଃ

ସୁଧାଲେପସ୍ଯୂତିଃ ପରିଣମତି ରାକାହିମକରଃ ॥ 46 ॥

ଭ୍ରୁଵୌ ଭୁଗ୍ନେ କିଞ୍ଚିଦ୍ଭୁଵନଭଯଭଙ୍ଗଵ୍ଯସନିନି

ତ୍ଵଦୀଯେ ନେତ୍ରାଭ୍ଯାଂ ମଧୁକରରୁଚିଭ୍ଯାଂ ଧୃତଗୁଣମ୍ ।

ଧନୁର୍ମନ୍ଯେ ସଵ୍ଯେତରକରଗୃହୀତଂ ରତିପତେଃ

ପ୍ରକୋଷ୍ଠେ ମୁଷ୍ଟୌ ଚ ସ୍ଥଗଯତି ନିଗୂଢାନ୍ତରମୁମେ ॥ 47 ॥

ଅହଃ ସୂତେ ସଵ୍ଯଂ ତଵ ନଯନମର୍କାତ୍ମକତଯା

ତ୍ରିଯାମାଂ ଵାମଂ ତେ ସୃଜତି ରଜନୀନାଯକତଯା ।

ତୃତୀଯା ତେ ଦୃଷ୍ଟିର୍ଦରଦଲିତହେମାମ୍ବୁଜରୁଚିଃ

ସମାଧତ୍ତେ ସନ୍ଧ୍ଯାଂ ଦିଵସନିଶଯୋରନ୍ତରଚରୀମ୍ ॥ 48 ॥

ଵିଶାଲା କଲ୍ଯାଣୀ ସ୍ଫୁଟରୁଚିରଯୋଧ୍ଯା କୁଵଲଯୈଃ

କୃପାଧାରାଧାରା କିମପି ମଧୁରାଭୋଗଵତିକା ।

ଅଵନ୍ତୀ ଦୃଷ୍ଟିସ୍ତେ ବହୁନଗରଵିସ୍ତାରଵିଜଯା

ଧ୍ରୁଵଂ ତତ୍ତନ୍ନାମଵ୍ଯଵହରଣଯୋଗ୍ଯା ଵିଜଯତେ ॥ 49 ॥

କଵୀନାଂ ସନ୍ଦର୍ଭସ୍ତବକମକରନ୍ଦୈକରସିକଂ

କଟାକ୍ଷଵ୍ଯାକ୍ଷେପଭ୍ରମରକଲଭୌ କର୍ଣଯୁଗଲମ୍ ।

ଅମୁଞ୍ଚନ୍ତୌ ଦୃଷ୍ଟ୍ଵା ତଵ ନଵରସାସ୍ଵାଦତରଲା-

ଵସୂଯାସଂସର୍ଗାଦଲିକନଯନଂ କିଞ୍ଚିଦରୁଣମ୍ ॥ 50 ॥

ଶିଵେ ଶୃଙ୍ଗାରାର୍ଦ୍ରା ତଦିତରଜନେ କୁତ୍ସନପରା

ସରୋଷା ଗଙ୍ଗାଯାଂ ଗିରିଶଚରିତେ ଵିସ୍ମଯଵତୀ ।

ହରାହିଭ୍ଯୋ ଭୀତା ସରସିରୁହସୌଭାଗ୍ଯଜନନୀ (ଜଯିନୀ)

ସଖୀଷୁ ସ୍ମେରା ତେ ମଯି ଜନନୀ ଦୃଷ୍ଟିଃ ସକରୁଣା ॥ 51 ॥

ଗତେ କର୍ଣାଭ୍ଯର୍ଣଂ ଗରୁତ ଇଵ ପକ୍ଷ୍ମାଣି ଦଧତୀ

ପୁରାଂ ଭେତ୍ତୁଶ୍ଚିତ୍ତପ୍ରଶମରସଵିଦ୍ରାଵଣଫଲେ ।

ଇମେ ନେତ୍ରେ ଗୋତ୍ରାଧରପତିକୁଲୋତ୍ତଂସକଲିକେ

ତଵାକର୍ଣାକୃଷ୍ଟସ୍ମରଶରଵିଲାସଂ କଲଯତଃ ॥ 52 ॥

ଵିଭକ୍ତତ୍ରୈଵର୍ଣ୍ଯଂ ଵ୍ଯତିକରିତଲୀଲାଞ୍ଜନତଯା

ଵିଭାତି ତ୍ଵନ୍ନେତ୍ରତ୍ରିତଯମିଦମୀଶାନଦଯିତେ ।

ପୁନଃ ସ୍ରଷ୍ଟୁଂ ଦେଵାନ୍ ଦ୍ରୁହିଣହରିରୁଦ୍ରାନୁପରତାନ୍

ରଜଃ ସତ୍ତ୍ଵଂ ବିଭ୍ରତ୍ତମ ଇତି ଗୁଣାନାଂ ତ୍ରଯମିଵ ॥ 53 ॥

ପଵିତ୍ରୀକର୍ତୁଂ ନଃ ପଶୁପତିପରାଧୀନହୃଦଯେ

ଦଯାମିତ୍ରୈର୍ନେତ୍ରୈରରୁଣଧଵଲଶ୍ଯାମରୁଚିଭିଃ ।

ନଦଃ ଶୋଣୋ ଗଙ୍ଗା ତପନତନଯେତି ଧ୍ରୁଵମମୁଂ

ତ୍ରଯାଣାଂ ତୀର୍ଥାନାମୁପନଯସି ସମ୍ଭେଦମନଘମ୍ ॥ 54 ॥

ନିମେଷୋନ୍ମେଷାଭ୍ଯାଂ ପ୍ରଲଯମୁଦଯଂ ଯାତି ଜଗତୀ

ତଵେତ୍ଯାହୁଃ ସନ୍ତୋ ଧରଣିଧରରାଜନ୍ଯତନଯେ ।

ତ୍ଵଦୁନ୍ମେଷାଜ୍ଜାତଂ ଜଗଦିଦମଶେଷଂ ପ୍ରଲଯତଃ

ପରିତ୍ରାତୁଂ ଶଙ୍କେ ପରିହୃତନିମେଷାସ୍ତଵ ଦୃଶଃ ॥ 55 ॥

ତଵାପର୍ଣେ କର୍ଣେଜପନଯନପୈଶୁନ୍ଯଚକିତା

ନିଲୀଯନ୍ତେ ତୋଯେ ନିଯତମନିମେଷାଃ ଶଫରିକାଃ ।

ଇଯଂ ଚ ଶ୍ରୀର୍ବଦ୍ଧଚ୍ଛଦପୁଟକଵାଟଂ କୁଵଲଯମ୍

ଜହାତି ପ୍ରତ୍ଯୂଷେ ନିଶି ଚ ଵିଘଟଯ୍ଯ ପ୍ରଵିଶତି ॥ 56 ॥

ଦୃଶା ଦ୍ରାଘୀଯସ୍ଯା ଦରଦଲିତନୀଲୋତ୍ପଲରୁଚା

ଦଵୀଯାଂସଂ ଦୀନଂ ସ୍ନପଯ କୃପଯା ମାମପି ଶିଵେ ।

ଅନେନାଯଂ ଧନ୍ଯୋ ଭଵତି ନ ଚ ତେ ହାନିରିଯତା

ଵନେ ଵା ହର୍ମ୍ଯେ ଵା ସମକରନିପାତୋ ହିମକରଃ ॥ 57 ॥

ଅରାଲଂ ତେ ପାଲୀଯୁଗଲମଗରାଜନ୍ଯତନଯେ

ନ କେଷାମାଧତ୍ତେ କୁସୁମଶରକୋଦଣ୍ଡକୁତୁକମ୍ ।

ତିରଶ୍ଚୀନୋ ଯତ୍ର ଶ୍ରଵଣପଥମୁଲ୍ଲଙ୍ଘ୍ଯ ଵିଲସ-

ନ୍ନପାଙ୍ଗଵ୍ଯାସଙ୍ଗୋ ଦିଶତି ଶରସନ୍ଧାନଧିଷଣାମ୍ ॥ 58 ॥

ସ୍ଫୁରଦ୍ଗଣ୍ଡାଭୋଗପ୍ରତିଫଲିତତାଟଙ୍କଯୁଗଲଂ

ଚତୁଶ୍ଚକ୍ରଂ ମନ୍ଯେ ତଵ ମୁଖମିଦଂ ମନ୍ମଥରଥମ୍ ।

ଯମାରୁହ୍ଯ ଦ୍ରୁହ୍ଯତ୍ଯଵନିରଥମର୍କେନ୍ଦୁଚରଣଂ

ମହାଵୀରୋ ମାରଃ ପ୍ରମଥପତଯେ ସଜ୍ଜିତଵତେ ॥ 59 ॥

ସରସ୍ଵତ୍ଯାଃ ସୂକ୍ତୀରମୃତଲହରୀକୌଶଲହରୀଃ

ପିବନ୍ତ୍ଯାଃ ଶର୍ଵାଣି ଶ୍ରଵଣଚୁଲୁକାଭ୍ଯାମଵିରଲମ୍ ।

ଚମତ୍କାରଶ୍ଲାଘାଚଲିତଶିରସଃ କୁଣ୍ଡଲଗଣୋ

ଝଣତ୍କାରୈସ୍ତାରୈଃ ପ୍ରତିଵଚନମାଚଷ୍ଟ ଇଵ ତେ ॥ 60 ॥

ଅସୌ ନାସାଵଂଶସ୍ତୁହିନଗିରିଵଂଶଧ୍ଵଜପଟି

ତ୍ଵଦୀଯୋ ନେଦୀଯଃ ଫଲତୁ ଫଲମସ୍ମାକମୁଚିତମ୍ ।

ଵହନ୍ନନ୍ତର୍ମୁକ୍ତାଃ ଶିଶିରତରନିଶ୍ଵାସଗଲିତଂ

ସମୃଦ୍ଧ୍ଯା ଯତ୍ତାସାଂ ବହିରପି ଚ ମୁକ୍ତାମଣିଧରଃ ॥ 61 ॥

ପ୍ରକୃତ୍ଯା ରକ୍ତାଯାସ୍ତଵ ସୁଦତି ଦନ୍ତଚ୍ଛଦରୁଚେଃ

ପ୍ରଵକ୍ଷ୍ଯେ ସାଦୃଶ୍ଯଂ ଜନଯତୁ ଫଲଂ ଵିଦ୍ରୁମଲତା ।

ନ ବିମ୍ବଂ ତଦ୍ବିମ୍ବପ୍ରତିଫଲନରାଗାଦରୁଣିତଂ

ତୁଲାମଧ୍ଯାରୋଢୁଂ କଥମିଵ ଵିଲଜ୍ଜେତ କଲଯା ॥ 62 ॥

ସ୍ମିତଜ୍ଯୋତ୍ସ୍ନାଜାଲଂ ତଵ ଵଦନଚନ୍ଦ୍ରସ୍ଯ ପିବତାଂ

ଚକୋରାଣାମାସୀଦତିରସତଯା ଚଞ୍ଚୁଜଡିମା ।

ଅତସ୍ତେ ଶୀତାଂଶୋରମୃତଲହରୀମମ୍ଲରୁଚଯଃ

ପିବନ୍ତି ସ୍ଵଚ୍ଛନ୍ଦଂ ନିଶି ନିଶି ଭୃଶଂ କାଞ୍ଜିକଧିଯା ॥ 63 ॥

ଅଵିଶ୍ରାନ୍ତଂ ପତ୍ଯୁର୍ଗୁଣଗଣକଥାମ୍ରେଡନଜପା

ଜପାପୁଷ୍ପଚ୍ଛାଯା ତଵ ଜନନି ଜିହ୍ଵା ଜଯତି ସା ।

ଯଦଗ୍ରାସୀନାଯାଃ ସ୍ଫଟିକଦୃଷଦଚ୍ଛଚ୍ଛଵିମଯୀ

ସରସ୍ଵତ୍ଯା ମୂର୍ତିଃ ପରିଣମତି ମାଣିକ୍ଯଵପୁଷା ॥ 64 ॥

ରଣେ ଜିତ୍ଵା ଦୈତ୍ଯାନପହୃତଶିରସ୍ତ୍ରୈଃ କଵଚିଭିର୍-

ନିଵୃତ୍ତୈଶ୍ଚଣ୍ଡାଂଶତ୍ରିପୁରହରନିର୍ମାଲ୍ଯଵିମୁଖୈଃ ।

ଵିଶାଖେନ୍ଦ୍ରୋପେନ୍ଦ୍ରୈଃ ଶଶିଵିଶଦକର୍ପୂରଶକଲା

ଵିଲୀଯନ୍ତେ ମାତସ୍ତଵ ଵଦନତାମ୍ବୂଲକବଲାଃ ॥ 65 ॥

ଵିପଞ୍ଚ୍ଯା ଗାଯନ୍ତୀ ଵିଵିଧମପଦାନଂ ପଶୁପତେଃ

ତ୍ଵଯାରବ୍ଧେ ଵକ୍ତୁଂ ଚଲିତଶିରସା ସାଧୁଵଚନେ ।

ତଦୀଯୈର୍ମାଧୁର୍ଯୈରପଲପିତତନ୍ତ୍ରୀକଲରଵାଂ

ନିଜାଂ ଵୀଣାଂ ଵାଣୀ ନିଚୁଲଯତି ଚୋଲେନ ନିଭୃତମ୍ ॥ 66 ॥

କରାଗ୍ରେଣ ସ୍ପୃଷ୍ଟଂ ତୁହିନଗିରିଣା ଵତ୍ସଲତଯା

ଗିରୀଶେନୋଦସ୍ତଂ ମୁହୁରଧରପାନାକୁଲତଯା ।

କରଗ୍ରାହ୍ଯଂ ଶମ୍ଭୋର୍ମୁଖମୁକୁରଵୃନ୍ତଂ ଗିରିସୁତେ

କଥଙ୍କାରଂ ବ୍ରୂମସ୍ତଵ ଚିବୁକମୌପମ୍ଯରହିତମ୍ ॥ 67 ॥

ଭୁଜାଶ୍ଲେଷାନ୍ ନିତ୍ଯଂ ପୁରଦମଯିତୁଃ କଣ୍ଟକଵତୀ

ତଵ ଗ୍ରୀଵା ଧତ୍ତେ ମୁଖକମଲନାଲଶ୍ରିଯମିଯମ୍ ।

ସ୍ଵତଃ ଶ୍ଵେତା କାଲାଗୁରୁବହୁଲଜମ୍ବାଲମଲିନା

ମୃଣାଲୀଲାଲିତ୍ଯଂ ଵହତି ଯଦଧୋ ହାରଲତିକା ॥ 68 ॥

ଗଲେ ରେଖାସ୍ତିସ୍ରୋ ଗତିଗମକଗୀତୈକନିପୁଣେ

ଵିଵାହଵ୍ଯାନଦ୍ଧପ୍ରଗୁଣଗୁଣସଙ୍ଖ୍ଯାପ୍ରତିଭୁଵଃ ।

ଵିରାଜନ୍ତେ ନାନାଵିଧମଧୁରରାଗାକରଭୁଵାଂ

ତ୍ରଯାଣାଂ ଗ୍ରାମାଣାଂ ସ୍ଥିତିନିଯମସୀମାନ ଇଵ ତେ ॥ 69 ॥

ମୃଣାଲୀମୃଦ୍ଵୀନାଂ ତଵ ଭୁଜଲତାନାଂ ଚତସୃଣାଂ

ଚତୁର୍ଭିଃ ସୌନ୍ଦର୍ଯଂ ସରସିଜଭଵଃ ସ୍ତୌତି ଵଦନୈଃ ।

ନଖେଭ୍ଯଃ ସନ୍ତ୍ରସ୍ଯନ୍ ପ୍ରଥମମଥନାଦନ୍ଧକରିପୋ-

ଶ୍ଚତୁର୍ଣାଂ ଶୀର୍ଷାଣାଂ ସମମଭଯହସ୍ତାର୍ପଣଧିଯା ॥ 70 ॥

ନଖାନାମୁଦ୍ଦ୍ଯୋତୈର୍ନଵନଲିନରାଗଂ ଵିହସତାଂ

କରାଣାଂ ତେ କାନ୍ତିଂ କଥଯ କଥଯାମଃ କଥମୁମେ ।

କଯାଚିଦ୍ଵା ସାମ୍ଯଂ ଭଜତୁ କଲଯା ହନ୍ତ କମଲଂ

ଯଦି କ୍ରୀଡଲ୍ଲକ୍ଷ୍ମୀଚରଣତଲଲାକ୍ଷାରସଛଣମ୍ ॥ 71 ॥

ସମଂ ଦେଵି ସ୍କନ୍ଦଦ୍ଵିପଵଦନପୀତଂ ସ୍ତନଯୁଗଂ

ତଵେଦଂ ନଃ ଖେଦଂ ହରତୁ ସତତଂ ପ୍ରସ୍ନୁତମୁଖମ୍ ।

ଯଦାଲୋକ୍ଯାଶଙ୍କାକୁଲିତହୃଦଯୋ ହାସଜନକଃ

ସ୍ଵକୁମ୍ଭୌ ହେରମ୍ବଃ ପରିମୃଶତି ହସ୍ତେନ ଝଡିତି ॥ 72 ॥

ଅମୂ ତେ ଵକ୍ଷୋଜାଵମୃତରସମାଣିକ୍ଯକୁତୁପୌ

ନ ସନ୍ଦେହସ୍ପନ୍ଦୋ ନଗପତିପତାକେ ମନସି ନଃ ।

ପିବନ୍ତୌ ତୌ ଯସ୍ମାଦଵିଦିତଵଧୂସଙ୍ଗରସିକୌ

କୁମାରାଵଦ୍ଯାପି ଦ୍ଵିରଦଵଦନକ୍ରୌଞ୍ଚଦଲନୌ ॥ 73 ॥

ଵହତ୍ଯମ୍ବ ସ୍ତମ୍ବେରମଦନୁଜକୁମ୍ଭପ୍ରକୃତିଭିଃ

ସମାରବ୍ଧାଂ ମୁକ୍ତାମଣିଭିରମଲାଂ ହାରଲତିକାମ୍ ।

କୁଚାଭୋଗୋ ବିମ୍ବାଧରରୁଚିଭିରନ୍ତଃ ଶବଲିତାଂ

ପ୍ରତାପଵ୍ଯାମିଶ୍ରାଂ ପୁରଦମଯିତୁଃ କୀର୍ତିମିଵ ତେ ॥ 74 ॥

ତଵ ସ୍ତନ୍ଯଂ ମନ୍ଯେ ଧରଣିଧରକନ୍ଯେ ହୃଦଯତଃ

ପଯଃପାରାଵାରଃ ପରିଵହତି ସାରସ୍ଵତମିଵ ।

ଦଯାଵତ୍ଯା ଦତ୍ତଂ ଦ୍ରଵିଡଶିଶୁରାସ୍ଵାଦ୍ଯ ତଵ ଯତ୍

କଵୀନାଂ ପ୍ରୌଢାନାମଜନି କମନୀଯଃ କଵଯିତା ॥ 75 ॥

ହରକ୍ରୋଧଜ୍ଵାଲାଵଲିଭିରଵଲୀଢେନ ଵପୁଷା

ଗଭୀରେ ତେ ନାଭୀସରସି କୃତସଙ୍ଗୋ ମନସିଜଃ ।

ସମୁତ୍ତସ୍ଥୌ ତସ୍ମାଦଚଲତନଯେ ଧୂମଲତିକା

ଜନସ୍ତାଂ ଜାନୀତେ ତଵ ଜନନି ରୋମାଵଲିରିତି ॥ 76 ॥

ଯଦେତତ୍ କାଲିନ୍ଦୀତନୁତରତରଙ୍ଗାକୃତି ଶିଵେ

କୃଶେ ମଧ୍ଯେ କିଞ୍ଚିଜ୍ଜନନି ତଵ ଯଦ୍ଭାତି ସୁଧିଯାମ୍ ।

ଵିମର୍ଦାଦନ୍ଯୋଽନ୍ଯଂ କୁଚକଲଶଯୋରନ୍ତରଗତଂ

ତନୂଭୂତଂ ଵ୍ଯୋମ ପ୍ରଵିଶଦିଵ ନାଭିଂ କୁହରିଣୀମ୍ ॥ 77 ॥

ସ୍ଥିରୋ ଗଙ୍ଗାଵର୍ତଃ ସ୍ତନମୁକୁଲରୋମାଵଲିଲତା-

କଲାଵାଲଂ କୁଣ୍ଡଂ କୁସୁମଶରତେଜୋହୁତଭୁଜଃ ।

ରତେର୍ଲୀଲାଗାରଂ କିମପି ତଵ ନାଭିର୍ଗିରିସୁତେ

ବିଲଦ୍ଵାରଂ ସିଦ୍ଧେର୍ଗିରିଶନଯନାନାଂ ଵିଜଯତେ ॥ 78 ॥

ନିସର୍ଗକ୍ଷୀଣସ୍ଯ ସ୍ତନତଟଭରେଣ କ୍ଲମଜୁଷୋ

ନମନ୍ମୂର୍ତେର୍ନାରୀତିଲକ ଶନକୈସ୍ତ୍ରୁଟ୍ଯତ ଇଵ ।

ଚିରଂ ତେ ମଧ୍ଯସ୍ଯ ତ୍ରୁଟିତତଟିନୀତୀରତରୁଣା

ସମାଵସ୍ଥାସ୍ଥେମ୍ନୋ ଭଵତୁ କୁଶଲଂ ଶୈଲତନଯେ ॥ 79 ॥

କୁଚୌ ସଦ୍ଯଃସ୍ଵିଦ୍ଯତ୍ତଟଘଟିତକୂର୍ପାସଭିଦୁରୌ

କଷନ୍ତୌ ଦୋର୍ମୂଲେ କନକକଲଶାଭୌ କଲଯତା ।

ତଵ ତ୍ରାତୁଂ ଭଙ୍ଗାଦଲମିତି ଵଲଗ୍ନଂ ତନୁଭୁଵା

ତ୍ରିଧା ନଦ୍ଧଂ ଦେଵି ତ୍ରିଵଲି ଲଵଲୀଵଲ୍ଲିଭିରିଵ ॥ 80 ॥

ଗୁରୁତ୍ଵଂ ଵିସ୍ତାରଂ କ୍ଷିତିଧରପତିଃ ପାର୍ଵତି ନିଜା-

ନ୍ନିତମ୍ବାଦାଚ୍ଛିଦ୍ଯ ତ୍ଵଯି ହରଣରୂପେଣ ନିଦଧେ ।

ଅତସ୍ତେ ଵିସ୍ତୀର୍ଣୋ ଗୁରୁରଯମଶେଷାଂ ଵସୁମତୀଂ

ନିତମ୍ବପ୍ରାଗ୍ଭାରଃ ସ୍ଥଗଯତି ଲଘୁତ୍ଵଂ ନଯତି ଚ ॥ 81 ॥

କରୀନ୍ଦ୍ରାଣାଂ ଶୁଣ୍ଡାନ୍ କନକକଦଲୀକାଣ୍ଡପଟଲୀ-

ମୁଭାଭ୍ଯାମୂରୁଭ୍ଯାମୁଭଯମପି ନିର୍ଜିତ୍ଯ ଭଵତୀ ।

ସୁଵୃତ୍ତାଭ୍ଯାଂ ପତ୍ଯୁଃ ପ୍ରଣତିକଠିନାଭ୍ଯାଂ ଗିରିସୁତେ

ଵିଧିଜ୍ଞେ ଜାନୁଭ୍ଯାଂ ଵିବୁଧକରିକୁମ୍ଭଦ୍ଵଯମସି ॥ 82 ॥

ପରାଜେତୁଂ ରୁଦ୍ରଂ ଦ୍ଵିଗୁଣଶରଗର୍ଭୌ ଗିରିସୁତେ

ନିଷଙ୍ଗୌ ଜଙ୍ଘେ ତେ ଵିଷମଵିଶିଖୋ ବାଢମକୃତ ।

ଯଦଗ୍ରେ ଦୃଶ୍ଯନ୍ତେ ଦଶଶରଫଲାଃ ପାଦଯୁଗଲୀ-

ନଖାଗ୍ରଚ୍ଛଦ୍ମାନଃ ସୁରମକୁଟଶାଣୈକନିଶିତାଃ ॥ 83 ॥

ଶ୍ରୁତୀନାଂ ମୂର୍ଧାନୋ ଦଧତି ତଵ ଯୌ ଶେଖରତଯା

ମମାପ୍ଯେତୌ ମାତଃ ଶିରସି ଦଯଯା ଧେହି ଚରଣୌ ।

ଯଯୋଃ ପାଦ୍ଯଂ ପାଥଃ ପଶୁପତିଜଟାଜୂଟତଟିନୀ

ଯଯୋର୍ଲାକ୍ଷାଲକ୍ଷ୍ମୀରରୁଣହରିଚୂଡାମଣିରୁଚିଃ ॥ 84 ॥

ନମୋଵାକଂ ବ୍ରୂମୋ ନଯନରମଣୀଯାଯ ପଦଯୋ-

ସ୍ତଵାସ୍ମୈ ଦ୍ଵନ୍ଦ୍ଵାଯ ସ୍ଫୁଟରୁଚିରସାଲକ୍ତକଵତେ ।

ଅସୂଯତ୍ଯତ୍ଯନ୍ତଂ ଯଦଭିହନନାଯ ସ୍ପୃହଯତେ

ପଶୂନାମୀଶାନଃ ପ୍ରମଦଵନକଙ୍କେଲିତରଵେ ॥ 85 ॥

ମୃଷା କୃତ୍ଵା ଗୋତ୍ରସ୍ଖଲନମଥ ଵୈଲକ୍ଷ୍ଯନମିତଂ

ଲଲାଟେ ଭର୍ତାରଂ ଚରଣକମଲେ ତାଡଯତି ତେ ।

ଚିରାଦନ୍ତଃଶଲ୍ଯଂ ଦହନକୃତମୁନ୍ମୂଲିତଵତା

ତୁଲାକୋଟିକ୍ଵାଣୈଃ କିଲିକିଲିତମୀଶାନରିପୁଣା ॥ 86 ॥

ହିମାନୀହନ୍ତଵ୍ଯଂ ହିମଗିରିନିଵାସୈକଚତୁରୌ

ନିଶାଯାଂ ନିଦ୍ରାଣଂ ନିଶି ଚରମଭାଗେ ଚ ଵିଶଦୌ ।

ଵରଂ ଲକ୍ଷ୍ମୀପାତ୍ରଂ ଶ୍ରିଯମତିସୃଜନ୍ତୌ ସମଯିନାଂ

ସରୋଜଂ ତ୍ଵତ୍ପାଦୌ ଜନନି ଜଯତଶ୍ଚିତ୍ରମିହ କିମ୍ ॥ 87 ॥

ପଦଂ ତେ କୀର୍ତୀନାଂ ପ୍ରପଦମପଦଂ ଦେଵି ଵିପଦାଂ

କଥଂ ନୀତଂ ସଦ୍ଭିଃ କଠିନକମଠୀକର୍ପରତୁଲାମ୍ ।

କଥଂ ଵା ବାହୁଭ୍ଯାମୁପଯମନକାଲେ ପୁରଭିଦା

ଯଦାଦାଯ ନ୍ଯସ୍ତଂ ଦୃଷଦି ଦଯମାନେନ ମନସା ॥ 88 ॥

ନଖୈର୍ନାକସ୍ତ୍ରୀଣାଂ କରକମଲସଙ୍କୋଚଶଶିଭି-

ସ୍ତରୂଣାଂ ଦିଵ୍ଯାନାଂ ହସତ ଇଵ ତେ ଚଣ୍ଡି ଚରଣୌ ।

ଫଲାନି ସ୍ଵଃସ୍ଥେଭ୍ଯଃ କିସଲଯକରାଗ୍ରେଣ ଦଦତାଂ

ଦରିଦ୍ରେଭ୍ଯୋ ଭଦ୍ରାଂ ଶ୍ରିଯମନିଶମହ୍ନାଯ ଦଦତୌ ॥ 89 ॥

ଦଦାନେ ଦୀନେଭ୍ଯଃ ଶ୍ରିଯମନିଶମାଶାନୁସଦୃଶୀ-

ମମନ୍ଦଂ ସୌନ୍ଦର୍ଯପ୍ରକରମକରନ୍ଦଂ ଵିକିରତି ।

ତଵାସ୍ମିନ୍ ମନ୍ଦାରସ୍ତବକସୁଭଗେ ଯାତୁ ଚରଣେ

ନିମଜ୍ଜନ୍ମଜ୍ଜୀଵଃ କରଣଚରଣଃ ଷଟ୍ଚରଣତାମ୍ ॥ 90 ॥

ପଦନ୍ଯାସକ୍ରୀଡାପରିଚଯମିଵାରବ୍ଧୁମନସଃ

ସ୍ଖଲନ୍ତସ୍ତେ ଖେଲଂ ଭଵନକଲହଂସା ନ ଜହତି ।

ଅତସ୍ତେଷାଂ ଶିକ୍ଷାଂ ସୁଭଗମଣିମଞ୍ଜୀରରଣିତ-

ଚ୍ଛଲାଦାଚକ୍ଷାଣଂ ଚରଣକମଲଂ ଚାରୁଚରିତେ ॥ 91 ॥

ଗତାସ୍ତେ ମଞ୍ଚତ୍ଵଂ ଦ୍ରୁହିଣହରିରୁଦ୍ରେଶ୍ଵରଭୃତଃ

ଶିଵଃ ସ୍ଵଚ୍ଛଚ୍ଛାଯାଘଟିତକପଟପ୍ରଚ୍ଛଦପଟଃ ।

ତ୍ଵଦୀଯାନାଂ ଭାସାଂ ପ୍ରତିଫଲନରାଗାରୁଣତଯା

ଶରୀରୀ ଶୃଙ୍ଗାରୋ ରସ ଇଵ ଦୃଶାଂ ଦୋଗ୍ଧି କୁତୁକମ୍ ॥ 92 ॥

ଅରାଲା କେଶେଷୁ ପ୍ରକୃତିସରଲା ମନ୍ଦହସିତେ

ଶିରୀଷାଭା ଚିତ୍ତେ ଦୃଷଦୁପଲଶୋଭା କୁଚତଟେ ।

ଭୃଶଂ ତନ୍ଵୀ ମଧ୍ଯେ ପୃଥୁରୁରସିଜାରୋହଵିଷଯେ

ଜଗତ୍ତ୍ରାତୁଂ ଶମ୍ଭୋର୍ଜଯତି କରୁଣା କାଚିଦରୁଣା ॥ 93 ॥

କଲଙ୍କଃ କସ୍ତୂରୀ ରଜନିକରବିମ୍ବଂ ଜଲମଯଂ

କଲାଭିଃ କର୍ପୂରୈର୍ମରକତକରଣ୍ଡଂ ନିବିଡିତମ୍ ।

ଅତସ୍ତ୍ଵଦ୍ଭୋଗେନ ପ୍ରତିଦିନମିଦଂ ରିକ୍ତକୁହରଂ

ଵିଧିର୍ଭୂଯୋ ଭୂଯୋ ନିବିଡଯତି ନୂନଂ ତଵ କୃତେ ॥ 94 ॥

ପୁରାରାତେରନ୍ତଃପୁରମସି ତତସ୍ତ୍ଵଚ୍ଚରଣଯୋଃ

ସପର୍ଯାମର୍ଯାଦା ତରଲକରଣାନାମସୁଲଭା ।

ତଥା ହ୍ଯେତେ ନୀତାଃ ଶତମଖମୁଖାଃ ସିଦ୍ଧିମତୁଲାଂ

ତଵ ଦ୍ଵାରୋପାନ୍ତସ୍ଥିତିଭିରଣିମାଦ୍ଯାଭିରମରାଃ ॥ 95 ॥

କଲତ୍ରଂ ଵୈଧାତ୍ରଂ କତିକତି ଭଜନ୍ତେ ନ କଵଯଃ

ଶ୍ରିଯୋ ଦେଵ୍ଯାଃ କୋ ଵା ନ ଭଵତି ପତିଃ କୈରପି ଧନୈଃ ।

ମହାଦେଵଂ ହିତ୍ଵା ତଵ ସତି ସତୀନାମଚରମେ

କୁଚାଭ୍ଯାମାସଙ୍ଗଃ କୁରଵକତରୋରପ୍ଯସୁଲଭଃ ॥ 96 ॥

ଗିରାମାହୁର୍ଦେଵୀଂ ଦ୍ରୁହିଣଗୃହିଣୀମାଗମଵିଦୋ

ହରେଃ ପତ୍ନୀଂ ପଦ୍ମାଂ ହରସହଚରୀମଦ୍ରିତନଯାମ୍ ।

ତୁରୀଯା କାପି ତ୍ଵଂ ଦୁରଧିଗମନିଃସୀମମହିମା

ମହାମାଯା ଵିଶ୍ଵଂ ଭ୍ରମଯସି ପରବ୍ରହ୍ମମହିଷି ॥ 97 ॥

କଦା କାଲେ ମାତଃ କଥଯ କଲିତାଲକ୍ତକରସଂ

ପିବେଯଂ ଵିଦ୍ଯାର୍ଥୀ ତଵ ଚରଣନିର୍ଣେଜନଜଲମ୍ ।

ପ୍ରକୃତ୍ଯା ମୂକାନାମପି ଚ କଵିତାକାରଣତଯା

କଦା ଧତ୍ତେ ଵାଣୀମୁଖକମଲତାମ୍ବୂଲରସତାମ୍ ॥ 98 ॥

ସରସ୍ଵତ୍ଯା ଲକ୍ଷ୍ମ୍ଯା ଵିଧିହରିସପତ୍ନୋ ଵିହରତେ

ରତେଃ ପାତିଵ୍ରତ୍ଯଂ ଶିଥିଲଯତି ରମ୍ଯେଣ ଵପୁଷା ।

ଚିରଂ ଜୀଵନ୍ନେଵ କ୍ଷପିତପଶୁପାଶଵ୍ଯତିକରଃ

ପରାନନ୍ଦାଭିଖ୍ଯଂ ରସଯତି ରସଂ ତ୍ଵଦ୍ଭଜନଵାନ୍ ॥ 99 ॥

ପ୍ରଦୀପଜ୍ଵାଲାଭିର୍ଦିଵସକରନୀରାଜନଵିଧିଃ

ସୁଧାସୂତେଶ୍ଚନ୍ଦ୍ରୋପଲଜଲଲଵୈରର୍ଘ୍ଯରଚନା ।

ସ୍ଵକୀଯୈରମ୍ଭୋଭିଃ ସଲିଲନିଧିସୌହିତ୍ଯକରଣଂ

ତ୍ଵଦୀଯାଭିର୍ଵାଗ୍ଭିସ୍ତଵ ଜନନି ଵାଚାଂ ସ୍ତୁତିରିଯମ୍ ॥ 100 ॥

ସୌନ୍ଦର୍ଯଲହରି ମୁଖ୍ଯସ୍ତୋତ୍ରଂ ସଂଵାର୍ତଦାଯକମ୍ ।

ଭଗଵଦ୍ପାଦ ସନ୍କ୍ଲୁପ୍ତଂ ପଠେନ୍ ମୁକ୍ତୌ ଭଵେନ୍ନରଃ ॥

॥ ଇତି ଶ୍ରୀମତ୍ପରମହଂସପରିଵ୍ରାଜକାଚାର୍ଯସ୍ଯ

ଶ୍ରୀଗୋଵିନ୍ଦଭଗଵତ୍ପୂଜ୍ଯପାଦଶିଷ୍ଯସ୍ଯ

ଶ୍ରୀମଚ୍ଛଙ୍କରଭଗଵତଃ କୃତୌ ସୌନ୍ଦର୍ଯଲହରୀ ସମ୍ପୂର୍ଣା ॥

॥ ଓଁ ତତ୍ସତ୍ ॥

(ଅନୁବନ୍ଧଃ)

ସମାନୀତଃ ପଦ୍ଭ୍ଯାଂ ମଣିମୁକୁରତାମମ୍ବରମଣି-

ର୍ଭଯାଦାସ୍ଯାଦନ୍ତଃସ୍ତିମିତକିରଣଶ୍ରେଣିମସୃଣଃ ।

(ପାଠଭେଦଃ - ଭଯାଦାସ୍ଯ ସ୍ନିଗ୍ଧସ୍ତ୍ମିତ, ଭଯାଦାସ୍ଯସ୍ଯାନ୍ତଃସ୍ତ୍ମିତ)

ଦଧାତି ତ୍ଵଦ୍ଵକ୍ତ୍ରମ୍ପ୍ରତିଫଲନମଶ୍ରାନ୍ତଵିକଚଂ

ନିରାତଙ୍କଂ ଚନ୍ଦ୍ରାନ୍ନିଜହୃଦଯପଙ୍କେରୁହମିଵ ॥ 101 ॥

ସମୁଦ୍ଭୂତସ୍ଥୂଲସ୍ତନଭରମୁରଶ୍ଚାରୁ ହସିତଂ

କଟାକ୍ଷେ କନ୍ଦର୍ପଃ କତିଚନ କଦମ୍ବଦ୍ଯୁତି ଵପୁଃ ।

ହରସ୍ଯ ତ୍ଵଦ୍ଭ୍ରାନ୍ତିଂ ମନସି ଜନଯନ୍ତି ସ୍ମ ଵିମଲାଃ

ପାଠଭେଦଃ - ଜନଯାମାସ ମଦନୋ, ଜନଯନ୍ତଃ ସମତୁଲାଂ, ଜନଯନ୍ତା ସୁଵଦନେ

ଭଵତ୍ଯା ଯେ ଭକ୍ତାଃ ପରିଣତିରମୀଷାମିଯମୁମେ ॥ 102 ॥

ନିଧେ ନିତ୍ଯସ୍ମେରେ ନିରଵଧିଗୁଣେ ନୀତିନିପୁଣେ

ନିରାଘାତଜ୍ଞାନେ ନିଯମପରଚିତ୍ତୈକନିଲଯେ ।

ନିଯତ୍ଯା ନିର୍ମୁକ୍ତେ ନିଖିଲନିଗମାନ୍ତସ୍ତୁତିପଦେ

ନିରାତଙ୍କେ ନିତ୍ଯେ ନିଗମଯ ମମାପି ସ୍ତୁତିମିମାମ୍ ॥ 103 ॥

Roman (IAST) Transliteration

prathama bhāgaḥ - ānanda lahari

bhumauskhalita pādānāṃ bhūmirevā valambanam |

tvayī jātā parādhānāṃ tvameva śaraṇaṃ śive ||

śivaḥ śaktyā yukto yadi bhavati śaktaḥ prabhavituṃ

na cedevaṃ devo na khalu kuśalaḥ spanditumapi |

atastvāmārādhyāṃ hariharaviriñcādibhirapi

praṇantuṃ stotuṃ vā kathamakṛtapuṇyaḥ prabhavati || 1 ||

tanīyāṃsaṃ pāṃsuṃ tava caraṇapaṅkeruhabhavaṃ

viriñcissañcinvan viracayati lokānavikalam |

vahatyenaṃ śauriḥ kathamapi sahasreṇa śirasāṃ

harassaṅkṣudyainaṃ bhajati bhasitoddhūlanavidhim || 2 ||

avidyānāmanta-stimira-mihiradvīpanagarī

jaḍānāṃ caitanya-stabaka-makaranda-srutijharī |

daridrāṇāṃ cintāmaṇiguṇanikā janmajaladhau

nimagnānāṃ daṃṣṭrā muraripu-varāhasya bhavati || 3 ||

tvadanyaḥ pāṇibhyāmabhayavarado daivatagaṇaḥ

tvamekā naivāsi prakaṭitavarābhītyabhinayā |

bhayāt trātuṃ dātuṃ phalamapi ca vāñchāsamadhikaṃ

śaraṇye lokānāṃ tava hi caraṇāveva nipuṇau || 4 ||

haristvāmārādhya praṇatajanasaubhāgyajananīṃ

purā nārī bhūtvā puraripumapi kṣobhamanayat |

smaro'pi tvāṃ natvā ratinayanalehyena vapuṣā

munīnāmapyantaḥ prabhavati hi mohāya mahatām || 5 ||

dhanuḥ pauṣpaṃ maurvī madhukaramayī pañca viśikhāḥ

vasantaḥ sāmanto malayamarudāyodhanarathaḥ |

tathāpyekaḥ sarvaṃ himagirisute kāmapi kṛpām

apāṅgātte labdhvā jagadida-manaṅgo vijayate || 6 ||

kvaṇatkāñcīdāmā karikalabhakumbhastananatā

parikṣīṇā madhye pariṇataśaraccandravadanā |

dhanurbāṇān pāśaṃ sṛṇimapi dadhānā karatalaiḥ

purastādāstāṃ naḥ puramathiturāhopuruṣikā || 7 ||

sudhāsindhormadhye suraviṭapivāṭīparivṛte

maṇidvīpe nīpopavanavati cintāmaṇigṛhe |

śivākāre mañce paramaśivaparyaṅkanilayāṃ

bhajanti tvāṃ dhanyāḥ katicana cidānandalaharīm || 8 ||

mahīṃ mūlādhāre kamapi maṇipūre hutavahaṃ

sthitaṃ svādhiṣṭhāne hṛdi marutamākāśamupari |

mano'pi bhrūmadhye sakalamapi bhitvā kulapathaṃ

sahasrāre padme saha rahasi patyā viharase || 9 ||

sudhādhārāsāraiścaraṇayugalāntarvigalitaiḥ

prapañcaṃ siñcantī punarapi rasāmnāyamahasaḥ |

avāpya svāṃ bhūmiṃ bhujaganibhamadhyuṣṭavalayaṃ

svamātmānaṃ kṛtvā svapiṣi kulakuṇḍe kuhariṇi || 10 ||

caturbhiḥ śrīkaṇṭhaiḥ śivayuvatibhiḥ pañcabhirapi

prabhinnābhiḥ śambhornavabhirapi mūlaprakṛtibhiḥ |

catuścatvāriṃśadvasudalakalāśratrivalaya- [trayaścatvāri]

trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]

tvadīyaṃ saundaryaṃ tuhinagirikanye tulayituṃ

kavīndrāḥ kalpante kathamapi viriñciprabhṛtayaḥ |

yadālokautsukyādamaralalanā yānti manasā

tapobhirduṣprāpāmapi giriśasāyujyapadavīm || 12 ||

naraṃ varṣīyāṃsaṃ nayanavirasaṃ narmasu jaḍaṃ

tavāpāṅgāloke patitamanudhāvanti śataśaḥ |

galadveṇībandhāḥ kucakalaśavisrastasicayā

haṭhāt truṭyatkāñcyo vigalitadukūlā yuvatayaḥ || 13 ||

kṣitau ṣaṭpañcāśad dvisamadhikapañcāśadudake

hutāśe dvāṣaṣṭiścaturadhikapañcāśadanile |

divi dviṣṣaṭtriṃśanmanasi ca catuṣṣaṣṭiriti ye

mayūkhāsteṣāmapyupari tava pādāmbujayugam || 14 ||

śarajjyotsnāśuddhāṃ śaśiyutajaṭājūṭamakuṭāṃ

varatrāsatrāṇasphaṭikaghaṭikāpustakakarām |

sakṛnna tvā natvā kathamiva satāṃ sannnidadhate

madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]

kavīndrāṇāṃ cetaḥkamalavanabālātaparuciṃ

bhajante ye santaḥ katicidaruṇāmeva bhavatīm |

viriñcipreyasyāstaruṇataraśṛṅgāralaharī-

gabhīrābhirvāgbhirvidadhati satāṃ rañjanamamī || 16 ||

savitrībhirvācāṃ śaśimaṇiśilābhaṅgarucibhiḥ

vaśinyādyābhistvāṃ saha janani sañcintayati yaḥ |

sa kartā kāvyānāṃ bhavati mahatāṃ bhaṅgirucibhiḥ

vacobhirvāgdevīvadanakamalāmodamadhuraiḥ || 17 ||

tanucchāyābhiste taruṇataraṇiśrīsaraṇibhiḥ

divaṃ sarvāmurvīmaruṇimani magnāṃ smarati yaḥ |

bhavantyasya trasyadvanahariṇaśālīnanayanāḥ

sahorvaśyā vaśyāḥ kati kati na gīrvāṇagaṇikāḥ || 18 ||

mukhaṃ binduṃ kṛtvā kucayugamadhastasya tadadho

harārdhaṃ dhyāyedyo haramahiṣi te manmathakalām |

sa sadyaḥ saṅkṣobhaṃ nayati vanitā ityatilaghu

trilokīmapyāśu bhramayati ravīndustanayugām || 19 ||

kirantīmaṅgebhyaḥ kiraṇanikurambāmṛtarasaṃ

hṛdi tvāmādhatte himakaraśilāmūrtimiva yaḥ |

sa sarpāṇāṃ darpaṃ śamayati śakuntādhipa iva

jvarapluṣṭān dṛṣṭyā sukhayati sudhādhārasirayā || 20 ||

taṭillekhātanvīṃ tapanaśaśivaiśvānaramayīṃ

niṣaṇṇāṃ ṣaṇṇāmapyupari kamalānāṃ tava kalām |

mahāpadmāṭavyāṃ mṛditamalamāyena manasā

mahāntaḥ paśyanto dadhati paramāhlādalaharīm || 21 ||

bhavāni tvaṃ dāse mayi vitara dṛṣṭiṃ sakaruṇā-

miti stotuṃ vāñchan kathayati bhavāni tvamiti yaḥ |

tadaiva tvaṃ tasmai diśasi nijasāyujyapadavīṃ

mukundabrahmendrasphuṭamakuṭanīrājitapadām || 22 ||

tvayā hṛtvā vāmaṃ vapurapari-tṛptena manasā

śarīrārdhaṃ śambhoraparamapi śaṅke hṛtamabhūt |

yadetattvadrūpaṃ sakalamaruṇābhaṃ trinayanaṃ

kucābhyāmānamraṃ kuṭilaśaśicūḍālamakuṭam || 23 ||

jagatsūte dhātā hariravati rudraḥ kṣapayate

tiraskurvannetatsvamapi vapurīśastirayati |

sadāpūrvaḥ sarvaṃ tadidamanugṛhṇāti ca śiva-

stavājñāmālambya kṣaṇacalitayorbhrūlatikayoḥ || 24 ||

trayāṇāṃ devānāṃ triguṇajanitānāṃ tava śive

bhavet pūjā pūjā tava caraṇayoryā viracitā |

tathā hi tvatpādodvahanamaṇipīṭhasya nikaṭe

sthitā hyete śaśvanmukulitakarottaṃsamakuṭāḥ || 25 ||

viriñciḥ pañcatvaṃ vrajati harirāpnoti viratiṃ

vināśaṃ kīnāśo bhajati dhanado yāti nidhanam |

vitandrī māhendrī vitatirapi sammīlitadṛśā

mahāsaṃhāre'smin viharati sati tvatpatirasau || 26 ||

japo jalpaḥ śilpaṃ sakalamapi mudrāviracanā

gatiḥ prādakṣiṇyakramaṇamaśanādyāhutividhiḥ |

praṇāmassaṃveśassukhamakhilamātmārpaṇadṛśā

saparyāparyāyastava bhavatu yanme vilasitam || 27 ||

sudhāmapyāsvādya pratibhayajarāmṛtyuhariṇīṃ

vipadyante viśve vidhiśatamakhādyā diviṣadaḥ |

karālaṃ yatkṣvelaṃ kabalitavataḥ kālakalanā

na śambhostanmūlaṃ tava janani tāṭaṅkamahimā || 28 ||

kirīṭaṃ vairiñcaṃ parihara puraḥ kaiṭabhabhidaḥ

kaṭhore koṭīre skhalasi jahi jambhārimukuṭam |

praṇamreṣveteṣu prasabhamupayātasya bhavanaṃ

bhavasyābhyutthāne tava parijanoktirvijayate || 29 ||

svadehodbhūtābhirghṛṇibhiraṇimādyābhirabhito

niṣevye nitye tvāmahamiti sadā bhāvayati yaḥ |

kimāścaryaṃ tasya trinayanasamṛddhiṃ tṛṇayato

mahāsaṃvartāgnirviracayati nirājanavidhim || 30 ||

catuṣṣaṣṭyā tantraiḥ sakalamatisandhāya bhuvanaṃ

sthitastattatsiddhiprasavaparatantraiḥ paśupatiḥ |

punastvannirbandhādakhilapuruṣārthaikaghaṭanā-

svatantraṃ te tantraṃ kṣititalamavātītaradidam || 31 ||

śivaḥ śaktiḥ kāmaḥ kṣitiratha raviḥ śītakiraṇaḥ

smaro haṃsaḥ śakrastadanu ca parāmāraharayaḥ |

amī hṛllekhābhistisṛbhiravasāneṣu ghaṭitā

bhajante varṇāste tava janani nāmāvayavatām || 32 ||

smaraṃ yoniṃ lakṣmīṃ tritayamidamādau tava mano-

rnidhāyaike nitye niravadhimahābhogarasikāḥ |

bhajanti tvāṃ cintāmaṇigunanibaddhākṣavalayāḥ

śivāgnau juhvantaḥ surabhighṛtadhārāhutiśataiḥ || 33 ||

śarīraṃ tvaṃ śambhoḥ śaśimihiravakṣoruhayugaṃ

tavātmānaṃ manye bhagavati navātmānamanagham |

ataśśeṣaśśeṣītyayamubhayasādhāraṇatayā

sthitaḥ sambandho vāṃ samarasaparānandaparayoḥ || 34 ||

manastvaṃ vyoma tvaṃ marudasi marutsārathirasi

tvamāpastvaṃ bhūmistvayi pariṇatāyāṃ na hi param |

tvameva svātmānaṃ pariṇamayituṃ viśvavapuṣā

cidānandākāraṃ śivayuvati bhāvena bibhṛṣe || 35 ||

tavājñācakrasthaṃ tapanaśaśikoṭidyutidharaṃ

paraṃ śambhuṃ vande parimilitapārśvaṃ paracitā |

yamārādhyan bhaktyā raviśaśiśucīnāmaviṣaye

nirāloke'loke nivasati hi bhālokabhuvane || 36 ||

viśuddhau te śuddhasphaṭikaviśadaṃ vyomajanakaṃ

śivaṃ seve devīmapi śivasamānavyavasitām |

yayoḥ kāntyā yāntyāḥ śaśikiraṇasārūpyasaraṇe-

vidhūtāntardhvāntā vilasati cakorīva jagatī || 37 ||

samunmīlat saṃvit kamalamakarandaikarasikaṃ

bhaje haṃsadvandvaṃ kimapi mahatāṃ mānasacaram |

yadālāpādaṣṭādaśaguṇitavidyāpariṇati-

ryadādatte doṣād guṇamakhilamadbhyaḥ paya iva || 38 ||

tava svādhiṣṭhāne hutavahamadhiṣṭhāya nirataṃ

tamīḍe saṃvartaṃ janani mahatīṃ tāṃ ca samayām |

yadāloke lokān dahati mahati krodhakalite

dayārdrā yā dṛṣṭiḥ śiśiramupacāraṃ racayati || 39 ||

taṭittvantaṃ śaktyā timiraparipanthisphuraṇayā

sphurannānāratnābharaṇapariṇaddhendradhanuṣam |

tava śyāmaṃ meghaṃ kamapi maṇipūraikaśaraṇaṃ

niṣeve varṣantaṃ haramihirataptaṃ tribhuvanam || 40 ||

tavādhāre mūle saha samayayā lāsyaparayā

navātmānaṃ manye navarasamahātāṇḍavanaṭam |

ubhābhyāmetābhyāmudayavidhimuddiśya dayayā

sanāthābhyāṃ jajñe janakajananīmajjagadidam || 41 ||

dvitīya bhāgaḥ - saundarya laharī

gatairmāṇikyatvaṃ gaganamaṇibhiḥ sāndraghaṭitaṃ

kirīṭaṃ te haimaṃ himagirisute kīrtayati yaḥ |

sa nīḍeyacchāyācchuraṇaśabalaṃ candraśakalaṃ

dhanuḥ śaunāsīraṃ kimiti na nibadhnāti dhiṣaṇām || 42 ||

dhunotu dhvāntaṃ nastulitadalitendīvaravanaṃ

ghanasnigdhaślakṣṇaṃ cikuranikurumbaṃ tava śive |

yadīyaṃ saurabhyaṃ sahajamupalabdhuṃ sumanaso

vasantyasmin manye valamathanavāṭīviṭapinām || 43 ||

tanotu kṣemaṃ nastava vadanasaundaryalaharī-

parīvāhasrotaḥsaraṇiriva sīmantasaraṇiḥ |

vahantī sindūraṃ prabalakabarībhāratimira-

dviṣāṃ bṛndairbandīkṛtamiva navīnārkakiraṇam || 44 ||

arālaiḥ svābhāvyādalikalabhasaśrībhiralakaiḥ

parītaṃ te vaktraṃ parihasati paṅkeruharucim |

darasmere yasmin daśanarucikiñjalkarucire

sugandhau mādyanti smaradahanacakṣurmadhulihaḥ || 45 ||

lalāṭaṃ lāvaṇyadyutivimalamābhāti tava ya-

ddvitīyaṃ tanmanye makuṭaghaṭitaṃ candraśakalam |

viparyāsanyāsādubhayamapi sambhūya ca mithaḥ

sudhālepasyūtiḥ pariṇamati rākāhimakaraḥ || 46 ||

bhruvau bhugne kiñcidbhuvanabhayabhaṅgavyasanini

tvadīye netrābhyāṃ madhukararucibhyāṃ dhṛtaguṇam |

dhanurmanye savyetarakaragṛhītaṃ ratipateḥ

prakoṣṭhe muṣṭau ca sthagayati nigūḍhāntaramume || 47 ||

ahaḥ sūte savyaṃ tava nayanamarkātmakatayā

triyāmāṃ vāmaṃ te sṛjati rajanīnāyakatayā |

tṛtīyā te dṛṣṭirdaradalitahemāmbujaruciḥ

samādhatte sandhyāṃ divasaniśayorantaracarīm || 48 ||

viśālā kalyāṇī sphuṭarucirayodhyā kuvalayaiḥ

kṛpādhārādhārā kimapi madhurābhogavatikā |

avantī dṛṣṭiste bahunagaravistāravijayā

dhruvaṃ tattannāmavyavaharaṇayogyā vijayate || 49 ||

kavīnāṃ sandarbhastabakamakarandaikarasikaṃ

kaṭākṣavyākṣepabhramarakalabhau karṇayugalam |

amuñcantau dṛṣṭvā tava navarasāsvādataralā-

vasūyāsaṃsargādalikanayanaṃ kiñcidaruṇam || 50 ||

śive śṛṅgārārdrā taditarajane kutsanaparā

saroṣā gaṅgāyāṃ giriśacarite vismayavatī |

harāhibhyo bhītā sarasiruhasaubhāgyajananī (jayinī)

sakhīṣu smerā te mayi jananī dṛṣṭiḥ sakaruṇā || 51 ||

gate karṇābhyarṇaṃ garuta iva pakṣmāṇi dadhatī

purāṃ bhettuścittapraśamarasavidrāvaṇaphale |

ime netre gotrādharapatikulottaṃsakalike

tavākarṇākṛṣṭasmaraśaravilāsaṃ kalayataḥ || 52 ||

vibhaktatraivarṇyaṃ vyatikaritalīlāñjanatayā

vibhāti tvannetratritayamidamīśānadayite |

punaḥ sraṣṭuṃ devān druhiṇaharirudrānuparatān

rajaḥ sattvaṃ bibhrattama iti guṇānāṃ trayamiva || 53 ||

pavitrīkartuṃ naḥ paśupatiparādhīnahṛdaye

dayāmitrairnetrairaruṇadhavalaśyāmarucibhiḥ |

nadaḥ śoṇo gaṅgā tapanatanayeti dhruvamamuṃ

trayāṇāṃ tīrthānāmupanayasi sambhedamanagham || 54 ||

nimeṣonmeṣābhyāṃ pralayamudayaṃ yāti jagatī

tavetyāhuḥ santo dharaṇidhararājanyatanaye |

tvadunmeṣājjātaṃ jagadidamaśeṣaṃ pralayataḥ

paritrātuṃ śaṅke parihṛtanimeṣāstava dṛśaḥ || 55 ||

tavāparṇe karṇejapanayanapaiśunyacakitā

nilīyante toye niyatamanimeṣāḥ śapharikāḥ |

iyaṃ ca śrīrbaddhacchadapuṭakavāṭaṃ kuvalayam

jahāti pratyūṣe niśi ca vighaṭayya praviśati || 56 ||

dṛśā drāghīyasyā daradalitanīlotpalarucā

davīyāṃsaṃ dīnaṃ snapaya kṛpayā māmapi śive |

anenāyaṃ dhanyo bhavati na ca te hāniriyatā

vane vā harmye vā samakaranipāto himakaraḥ || 57 ||

arālaṃ te pālīyugalamagarājanyatanaye

na keṣāmādhatte kusumaśarakodaṇḍakutukam |

tiraścīno yatra śravaṇapathamullaṅghya vilasa-

nnapāṅgavyāsaṅgo diśati śarasandhānadhiṣaṇām || 58 ||

sphuradgaṇḍābhogapratiphalitatāṭaṅkayugalaṃ

catuścakraṃ manye tava mukhamidaṃ manmatharatham |

yamāruhya druhyatyavanirathamarkenducaraṇaṃ

mahāvīro māraḥ pramathapataye sajjitavate || 59 ||

sarasvatyāḥ sūktīramṛtalaharīkauśalaharīḥ

pibantyāḥ śarvāṇi śravaṇaculukābhyāmaviralam |

camatkāraślāghācalitaśirasaḥ kuṇḍalagaṇo

jhaṇatkāraistāraiḥ prativacanamācaṣṭa iva te || 60 ||

asau nāsāvaṃśastuhinagirivaṃśadhvajapaṭi

tvadīyo nedīyaḥ phalatu phalamasmākamucitam |

vahannantarmuktāḥ śiśirataraniśvāsagalitaṃ

samṛddhyā yattāsāṃ bahirapi ca muktāmaṇidharaḥ || 61 ||

prakṛtyā raktāyāstava sudati dantacchadaruceḥ

pravakṣye sādṛśyaṃ janayatu phalaṃ vidrumalatā |

na bimbaṃ tadbimbapratiphalanarāgādaruṇitaṃ

tulāmadhyāroḍhuṃ kathamiva vilajjeta kalayā || 62 ||

smitajyotsnājālaṃ tava vadanacandrasya pibatāṃ

cakorāṇāmāsīdatirasatayā cañcujaḍimā |

ataste śītāṃśoramṛtalaharīmamlarucayaḥ

pibanti svacchandaṃ niśi niśi bhṛśaṃ kāñjikadhiyā || 63 ||

aviśrāntaṃ patyurguṇagaṇakathāmreḍanajapā

japāpuṣpacchāyā tava janani jihvā jayati sā |

yadagrāsīnāyāḥ sphaṭikadṛṣadacchacchavimayī

sarasvatyā mūrtiḥ pariṇamati māṇikyavapuṣā || 64 ||

raṇe jitvā daityānapahṛtaśirastraiḥ kavacibhir-

nivṛttaiścaṇḍāṃśatripuraharanirmālyavimukhaiḥ |

viśākhendropendraiḥ śaśiviśadakarpūraśakalā

vilīyante mātastava vadanatāmbūlakabalāḥ || 65 ||

vipañcyā gāyantī vividhamapadānaṃ paśupateḥ

tvayārabdhe vaktuṃ calitaśirasā sādhuvacane |

tadīyairmādhuryairapalapitatantrīkalaravāṃ

nijāṃ vīṇāṃ vāṇī niculayati colena nibhṛtam || 66 ||

karāgreṇa spṛṣṭaṃ tuhinagiriṇā vatsalatayā

girīśenodastaṃ muhuradharapānākulatayā |

karagrāhyaṃ śambhormukhamukuravṛntaṃ girisute

kathaṅkāraṃ brūmastava cibukamaupamyarahitam || 67 ||

bhujāśleṣān nityaṃ puradamayituḥ kaṇṭakavatī

tava grīvā dhatte mukhakamalanālaśriyamiyam |

svataḥ śvetā kālāgurubahulajambālamalinā

mṛṇālīlālityaṃ vahati yadadho hāralatikā || 68 ||

gale rekhāstisro gatigamakagītaikanipuṇe

vivāhavyānaddhapraguṇaguṇasaṅkhyāpratibhuvaḥ |

virājante nānāvidhamadhurarāgākarabhuvāṃ

trayāṇāṃ grāmāṇāṃ sthitiniyamasīmāna iva te || 69 ||

mṛṇālīmṛdvīnāṃ tava bhujalatānāṃ catasṛṇāṃ

caturbhiḥ saundaryaṃ sarasijabhavaḥ stauti vadanaiḥ |

nakhebhyaḥ santrasyan prathamamathanādandhakaripo-

ścaturṇāṃ śīrṣāṇāṃ samamabhayahastārpaṇadhiyā || 70 ||

nakhānāmuddyotairnavanalinarāgaṃ vihasatāṃ

karāṇāṃ te kāntiṃ kathaya kathayāmaḥ kathamume |

kayācidvā sāmyaṃ bhajatu kalayā hanta kamalaṃ

yadi krīḍallakṣmīcaraṇatalalākṣārasachaṇam || 71 ||

samaṃ devi skandadvipavadanapītaṃ stanayugaṃ

tavedaṃ naḥ khedaṃ haratu satataṃ prasnutamukham |

yadālokyāśaṅkākulitahṛdayo hāsajanakaḥ

svakumbhau herambaḥ parimṛśati hastena jhaḍiti || 72 ||

amū te vakṣojāvamṛtarasamāṇikyakutupau

na sandehaspando nagapatipatāke manasi naḥ |

pibantau tau yasmādaviditavadhūsaṅgarasikau

kumārāvadyāpi dviradavadanakrauñcadalanau || 73 ||

vahatyamba stamberamadanujakumbhaprakṛtibhiḥ

samārabdhāṃ muktāmaṇibhiramalāṃ hāralatikām |

kucābhogo bimbādhararucibhirantaḥ śabalitāṃ

pratāpavyāmiśrāṃ puradamayituḥ kīrtimiva te || 74 ||

tava stanyaṃ manye dharaṇidharakanye hṛdayataḥ

payaḥpārāvāraḥ parivahati sārasvatamiva |

dayāvatyā dattaṃ draviḍaśiśurāsvādya tava yat

kavīnāṃ prauḍhānāmajani kamanīyaḥ kavayitā || 75 ||

harakrodhajvālāvalibhiravalīḍhena vapuṣā

gabhīre te nābhīsarasi kṛtasaṅgo manasijaḥ |

samuttasthau tasmādacalatanaye dhūmalatikā

janastāṃ jānīte tava janani romāvaliriti || 76 ||

yadetat kālindītanutarataraṅgākṛti śive

kṛśe madhye kiñcijjanani tava yadbhāti sudhiyām |

vimardādanyo'nyaṃ kucakalaśayorantaragataṃ

tanūbhūtaṃ vyoma praviśadiva nābhiṃ kuhariṇīm || 77 ||

sthiro gaṅgāvartaḥ stanamukularomāvalilatā-

kalāvālaṃ kuṇḍaṃ kusumaśaratejohutabhujaḥ |

raterlīlāgāraṃ kimapi tava nābhirgirisute

biladvāraṃ siddhergiriśanayanānāṃ vijayate || 78 ||

nisargakṣīṇasya stanataṭabhareṇa klamajuṣo

namanmūrternārītilaka śanakaistruṭyata iva |

ciraṃ te madhyasya truṭitataṭinītīrataruṇā

samāvasthāsthemno bhavatu kuśalaṃ śailatanaye || 79 ||

kucau sadyaḥsvidyattaṭaghaṭitakūrpāsabhidurau

kaṣantau dormūle kanakakalaśābhau kalayatā |

tava trātuṃ bhaṅgādalamiti valagnaṃ tanubhuvā

tridhā naddhaṃ devi trivali lavalīvallibhiriva || 80 ||

gurutvaṃ vistāraṃ kṣitidharapatiḥ pārvati nijā-

nnitambādācchidya tvayi haraṇarūpeṇa nidadhe |

ataste vistīrṇo gururayamaśeṣāṃ vasumatīṃ

nitambaprāgbhāraḥ sthagayati laghutvaṃ nayati ca || 81 ||

karīndrāṇāṃ śuṇḍān kanakakadalīkāṇḍapaṭalī-

mubhābhyāmūrubhyāmubhayamapi nirjitya bhavatī |

suvṛttābhyāṃ patyuḥ praṇatikaṭhinābhyāṃ girisute

vidhijñe jānubhyāṃ vibudhakarikumbhadvayamasi || 82 ||

parājetuṃ rudraṃ dviguṇaśaragarbhau girisute

niṣaṅgau jaṅghe te viṣamaviśikho bāḍhamakṛta |

yadagre dṛśyante daśaśaraphalāḥ pādayugalī-

nakhāgracchadmānaḥ suramakuṭaśāṇaikaniśitāḥ || 83 ||

śrutīnāṃ mūrdhāno dadhati tava yau śekharatayā

mamāpyetau mātaḥ śirasi dayayā dhehi caraṇau |

yayoḥ pādyaṃ pāthaḥ paśupatijaṭājūṭataṭinī

yayorlākṣālakṣmīraruṇaharicūḍāmaṇiruciḥ || 84 ||

namovākaṃ brūmo nayanaramaṇīyāya padayo-

stavāsmai dvandvāya sphuṭarucirasālaktakavate |

asūyatyatyantaṃ yadabhihananāya spṛhayate

paśūnāmīśānaḥ pramadavanakaṅkelitarave || 85 ||

mṛṣā kṛtvā gotraskhalanamatha vailakṣyanamitaṃ

lalāṭe bhartāraṃ caraṇakamale tāḍayati te |

cirādantaḥśalyaṃ dahanakṛtamunmūlitavatā

tulākoṭikvāṇaiḥ kilikilitamīśānaripuṇā || 86 ||

himānīhantavyaṃ himagirinivāsaikacaturau

niśāyāṃ nidrāṇaṃ niśi caramabhāge ca viśadau |

varaṃ lakṣmīpātraṃ śriyamatisṛjantau samayināṃ

sarojaṃ tvatpādau janani jayataścitramiha kim || 87 ||

padaṃ te kīrtīnāṃ prapadamapadaṃ devi vipadāṃ

kathaṃ nītaṃ sadbhiḥ kaṭhinakamaṭhīkarparatulām |

kathaṃ vā bāhubhyāmupayamanakāle purabhidā

yadādāya nyastaṃ dṛṣadi dayamānena manasā || 88 ||

nakhairnākastrīṇāṃ karakamalasaṅkocaśaśibhi-

starūṇāṃ divyānāṃ hasata iva te caṇḍi caraṇau |

phalāni svaḥsthebhyaḥ kisalayakarāgreṇa dadatāṃ

daridrebhyo bhadrāṃ śriyamaniśamahnāya dadatau || 89 ||

dadāne dīnebhyaḥ śriyamaniśamāśānusadṛśī-

mamandaṃ saundaryaprakaramakarandaṃ vikirati |

tavāsmin mandārastabakasubhage yātu caraṇe

nimajjanmajjīvaḥ karaṇacaraṇaḥ ṣaṭcaraṇatām || 90 ||

padanyāsakrīḍāparicayamivārabdhumanasaḥ

skhalantaste khelaṃ bhavanakalahaṃsā na jahati |

atasteṣāṃ śikṣāṃ subhagamaṇimañjīraraṇita-

cchalādācakṣāṇaṃ caraṇakamalaṃ cārucarite || 91 ||

gatāste mañcatvaṃ druhiṇaharirudreśvarabhṛtaḥ

śivaḥ svacchacchāyāghaṭitakapaṭapracchadapaṭaḥ |

tvadīyānāṃ bhāsāṃ pratiphalanarāgāruṇatayā

śarīrī śṛṅgāro rasa iva dṛśāṃ dogdhi kutukam || 92 ||

arālā keśeṣu prakṛtisaralā mandahasite

śirīṣābhā citte dṛṣadupalaśobhā kucataṭe |

bhṛśaṃ tanvī madhye pṛthururasijārohaviṣaye

jagattrātuṃ śambhorjayati karuṇā kācidaruṇā || 93 ||

kalaṅkaḥ kastūrī rajanikarabimbaṃ jalamayaṃ

kalābhiḥ karpūrairmarakatakaraṇḍaṃ nibiḍitam |

atastvadbhogena pratidinamidaṃ riktakuharaṃ

vidhirbhūyo bhūyo nibiḍayati nūnaṃ tava kṛte || 94 ||

purārāterantaḥpuramasi tatastvaccaraṇayoḥ

saparyāmaryādā taralakaraṇānāmasulabhā |

tathā hyete nītāḥ śatamakhamukhāḥ siddhimatulāṃ

tava dvāropāntasthitibhiraṇimādyābhiramarāḥ || 95 ||

kalatraṃ vaidhātraṃ katikati bhajante na kavayaḥ

śriyo devyāḥ ko vā na bhavati patiḥ kairapi dhanaiḥ |

mahādevaṃ hitvā tava sati satīnāmacarame

kucābhyāmāsaṅgaḥ kuravakatarorapyasulabhaḥ || 96 ||

girāmāhurdevīṃ druhiṇagṛhiṇīmāgamavido

hareḥ patnīṃ padmāṃ harasahacarīmadritanayām |

turīyā kāpi tvaṃ duradhigamaniḥsīmamahimā

mahāmāyā viśvaṃ bhramayasi parabrahmamahiṣi || 97 ||

kadā kāle mātaḥ kathaya kalitālaktakarasaṃ

pibeyaṃ vidyārthī tava caraṇanirṇejanajalam |

prakṛtyā mūkānāmapi ca kavitākāraṇatayā

kadā dhatte vāṇīmukhakamalatāmbūlarasatām || 98 ||

sarasvatyā lakṣmyā vidhiharisapatno viharate

rateḥ pātivratyaṃ śithilayati ramyeṇa vapuṣā |

ciraṃ jīvanneva kṣapitapaśupāśavyatikaraḥ

parānandābhikhyaṃ rasayati rasaṃ tvadbhajanavān || 99 ||

pradīpajvālābhirdivasakaranīrājanavidhiḥ

sudhāsūteścandropalajalalavairarghyaracanā |

svakīyairambhobhiḥ salilanidhisauhityakaraṇaṃ

tvadīyābhirvāgbhistava janani vācāṃ stutiriyam || 100 ||

saundaryalahari mukhyastotraṃ saṃvārtadāyakam |

bhagavadpāda sankluptaṃ paṭhen muktau bhavennaraḥ ||

|| iti śrīmatparamahaṃsaparivrājakācāryasya

śrīgovindabhagavatpūjyapādaśiṣyasya

śrīmacchaṅkarabhagavataḥ kṛtau saundaryalaharī sampūrṇā ||

|| oṃ tatsat ||

(anubandhaḥ)

samānītaḥ padbhyāṃ maṇimukuratāmambaramaṇi-

rbhayādāsyādantaḥstimitakiraṇaśreṇimasṛṇaḥ |

(pāṭhabhedaḥ - bhayādāsya snigdhastmita, bhayādāsyasyāntaḥstmita)

dadhāti tvadvaktrampratiphalanamaśrāntavikacaṃ

nirātaṅkaṃ candrānnijahṛdayapaṅkeruhamiva || 101 ||

samudbhūtasthūlastanabharamuraścāru hasitaṃ

kaṭākṣe kandarpaḥ katicana kadambadyuti vapuḥ |

harasya tvadbhrāntiṃ manasi janayanti sma vimalāḥ

pāṭhabhedaḥ - janayāmāsa madano, janayantaḥ samatulāṃ, janayantā suvadane

bhavatyā ye bhaktāḥ pariṇatiramīṣāmiyamume || 102 ||

nidhe nityasmere niravadhiguṇe nītinipuṇe

nirāghātajñāne niyamaparacittaikanilaye |

niyatyā nirmukte nikhilanigamāntastutipade

nirātaṅke nitye nigamaya mamāpi stutimimām || 103 ||

Sanskrit — Devanagari (original)

प्रथम भागः - आनन्द लहरि

भुमौस्खलित पादानां भूमिरेवा वलम्बनम् ।

त्वयी जाता पराधानां त्वमेव शरणं शिवे ॥

शिवः शक्त्या युक्तो यदि भवति शक्तः प्रभवितुं

न चेदेवं देवो न खलु कुशलः स्पन्दितुमपि ।

अतस्त्वामाराध्यां हरिहरविरिञ्चादिभिरपि

प्रणन्तुं स्तोतुं वा कथमकृतपुण्यः प्रभवति ॥ 1 ॥

तनीयांसं पांसुं तव चरणपङ्केरुहभवं

विरिञ्चिस्सञ्चिन्वन् विरचयति लोकानविकलम् ।

वहत्येनं शौरिः कथमपि सहस्रेण शिरसां

हरस्सङ्क्षुद्यैनं भजति भसितोद्धूलनविधिम् ॥ 2 ॥

अविद्यानामन्त-स्तिमिर-मिहिरद्वीपनगरी

जडानां चैतन्य-स्तबक-मकरन्द-स्रुतिझरी ।

दरिद्राणां चिन्तामणिगुणनिका जन्मजलधौ

निमग्नानां दंष्ट्रा मुररिपु-वराहस्य भवति ॥ 3 ॥

त्वदन्यः पाणिभ्यामभयवरदो दैवतगणः

त्वमेका नैवासि प्रकटितवराभीत्यभिनया ।

भयात् त्रातुं दातुं फलमपि च वाञ्छासमधिकं

शरण्ये लोकानां तव हि चरणावेव निपुणौ ॥ 4 ॥

हरिस्त्वामाराध्य प्रणतजनसौभाग्यजननीं

पुरा नारी भूत्वा पुररिपुमपि क्षोभमनयत् ।

स्मरोऽपि त्वां नत्वा रतिनयनलेह्येन वपुषा

मुनीनामप्यन्तः प्रभवति हि मोहाय महताम् ॥ 5 ॥

धनुः पौष्पं मौर्वी मधुकरमयी पञ्च विशिखाः

वसन्तः सामन्तो मलयमरुदायोधनरथः ।

तथाप्येकः सर्वं हिमगिरिसुते कामपि कृपाम्

अपाङ्गात्ते लब्ध्वा जगदिद-मनङ्गो विजयते ॥ 6 ॥

क्वणत्काञ्चीदामा करिकलभकुम्भस्तननता

परिक्षीणा मध्ये परिणतशरच्चन्द्रवदना ।

धनुर्बाणान् पाशं सृणिमपि दधाना करतलैः

पुरस्तादास्तां नः पुरमथितुराहोपुरुषिका ॥ 7 ॥

सुधासिन्धोर्मध्ये सुरविटपिवाटीपरिवृते

मणिद्वीपे नीपोपवनवति चिन्तामणिगृहे ।

शिवाकारे मञ्चे परमशिवपर्यङ्कनिलयां

भजन्ति त्वां धन्याः कतिचन चिदानन्दलहरीम् ॥ 8 ॥

महीं मूलाधारे कमपि मणिपूरे हुतवहं

स्थितं स्वाधिष्ठाने हृदि मरुतमाकाशमुपरि ।

मनोऽपि भ्रूमध्ये सकलमपि भित्वा कुलपथं

सहस्रारे पद्मे सह रहसि पत्या विहरसे ॥ 9 ॥

सुधाधारासारैश्चरणयुगलान्तर्विगलितैः

प्रपञ्चं सिञ्चन्ती पुनरपि रसाम्नायमहसः ।

अवाप्य स्वां भूमिं भुजगनिभमध्युष्टवलयं

स्वमात्मानं कृत्वा स्वपिषि कुलकुण्डे कुहरिणि ॥ 10 ॥

चतुर्भिः श्रीकण्ठैः शिवयुवतिभिः पञ्चभिरपि

प्रभिन्नाभिः शम्भोर्नवभिरपि मूलप्रकृतिभिः ।

चतुश्चत्वारिंशद्वसुदलकलाश्रत्रिवलय- [त्रयश्चत्वारि]

त्रिरेखाभिः सार्धं तव शरणकोणाः परिणताः ॥ 11 ॥ [चरणकोणाः, भवनकिणाः]

त्वदीयं सौन्दर्यं तुहिनगिरिकन्ये तुलयितुं

कवीन्द्राः कल्पन्ते कथमपि विरिञ्चिप्रभृतयः ।

यदालोकौत्सुक्यादमरललना यान्ति मनसा

तपोभिर्दुष्प्रापामपि गिरिशसायुज्यपदवीम् ॥ 12 ॥

नरं वर्षीयांसं नयनविरसं नर्मसु जडं

तवापाङ्गालोके पतितमनुधावन्ति शतशः ।

गलद्वेणीबन्धाः कुचकलशविस्रस्तसिचया

हठात् त्रुट्यत्काञ्च्यो विगलितदुकूला युवतयः ॥ 13 ॥

क्षितौ षट्पञ्चाशद् द्विसमधिकपञ्चाशदुदके

हुताशे द्वाषष्टिश्चतुरधिकपञ्चाशदनिले ।

दिवि द्विष्षट्त्रिंशन्मनसि च चतुष्षष्टिरिति ये

मयूखास्तेषामप्युपरि तव पादाम्बुजयुगम् ॥ 14 ॥

शरज्ज्योत्स्नाशुद्धां शशियुतजटाजूटमकुटां

वरत्रासत्राणस्फटिकघटिकापुस्तककराम् ।

सकृन्न त्वा नत्वा कथमिव सतां सन्न्निदधते

मधुक्षीरद्राक्षामधुरिमधुरीणाः भणितयः ॥ 15॥ [फणितयः]

कवीन्द्राणां चेतःकमलवनबालातपरुचिं

भजन्ते ये सन्तः कतिचिदरुणामेव भवतीम् ।

विरिञ्चिप्रेयस्यास्तरुणतरशृङ्गारलहरी-

गभीराभिर्वाग्भिर्विदधति सतां रञ्जनममी ॥ 16 ॥

सवित्रीभिर्वाचां शशिमणिशिलाभङ्गरुचिभिः

वशिन्याद्याभिस्त्वां सह जननि सञ्चिन्तयति यः ।

स कर्ता काव्यानां भवति महतां भङ्गिरुचिभिः

वचोभिर्वाग्देवीवदनकमलामोदमधुरैः ॥ 17 ॥

तनुच्छायाभिस्ते तरुणतरणिश्रीसरणिभिः

दिवं सर्वामुर्वीमरुणिमनि मग्नां स्मरति यः ।

भवन्त्यस्य त्रस्यद्वनहरिणशालीननयनाः

सहोर्वश्या वश्याः कति कति न गीर्वाणगणिकाः ॥ 18 ॥

मुखं बिन्दुं कृत्वा कुचयुगमधस्तस्य तदधो

हरार्धं ध्यायेद्यो हरमहिषि ते मन्मथकलाम् ।

स सद्यः सङ्क्षोभं नयति वनिता इत्यतिलघु

त्रिलोकीमप्याशु भ्रमयति रवीन्दुस्तनयुगाम् ॥ 19 ॥

किरन्तीमङ्गेभ्यः किरणनिकुरम्बामृतरसं

हृदि त्वामाधत्ते हिमकरशिलामूर्तिमिव यः ।

स सर्पाणां दर्पं शमयति शकुन्ताधिप इव

ज्वरप्लुष्टान् दृष्ट्या सुखयति सुधाधारसिरया ॥ 20 ॥

तटिल्लेखातन्वीं तपनशशिवैश्वानरमयीं

निषण्णां षण्णामप्युपरि कमलानां तव कलाम् ।

महापद्माटव्यां मृदितमलमायेन मनसा

महान्तः पश्यन्तो दधति परमाह्लादलहरीम् ॥ 21 ॥

भवानि त्वं दासे मयि वितर दृष्टिं सकरुणा-

मिति स्तोतुं वाञ्छन् कथयति भवानि त्वमिति यः ।

तदैव त्वं तस्मै दिशसि निजसायुज्यपदवीं

मुकुन्दब्रह्मेन्द्रस्फुटमकुटनीराजितपदाम् ॥ 22 ॥

त्वया हृत्वा वामं वपुरपरि-तृप्तेन मनसा

शरीरार्धं शम्भोरपरमपि शङ्के हृतमभूत् ।

यदेतत्त्वद्रूपं सकलमरुणाभं त्रिनयनं

कुचाभ्यामानम्रं कुटिलशशिचूडालमकुटम् ॥ 23 ॥

जगत्सूते धाता हरिरवति रुद्रः क्षपयते

तिरस्कुर्वन्नेतत्स्वमपि वपुरीशस्तिरयति ।

सदापूर्वः सर्वं तदिदमनुगृह्णाति च शिव-

स्तवाज्ञामालम्ब्य क्षणचलितयोर्भ्रूलतिकयोः ॥ 24 ॥

त्रयाणां देवानां त्रिगुणजनितानां तव शिवे

भवेत् पूजा पूजा तव चरणयोर्या विरचिता ।

तथा हि त्वत्पादोद्वहनमणिपीठस्य निकटे

स्थिता ह्येते शश्वन्मुकुलितकरोत्तंसमकुटाः ॥ 25 ॥

विरिञ्चिः पञ्चत्वं व्रजति हरिराप्नोति विरतिं

विनाशं कीनाशो भजति धनदो याति निधनम् ।

वितन्द्री माहेन्द्री विततिरपि सम्मीलितदृशा

महासंहारेऽस्मिन् विहरति सति त्वत्पतिरसौ ॥ 26 ॥

जपो जल्पः शिल्पं सकलमपि मुद्राविरचना

गतिः प्रादक्षिण्यक्रमणमशनाद्याहुतिविधिः ।

प्रणामस्संवेशस्सुखमखिलमात्मार्पणदृशा

सपर्यापर्यायस्तव भवतु यन्मे विलसितम् ॥ 27 ॥

सुधामप्यास्वाद्य प्रतिभयजरामृत्युहरिणीं

विपद्यन्ते विश्वे विधिशतमखाद्या दिविषदः ।

करालं यत्क्ष्वेलं कबलितवतः कालकलना

न शम्भोस्तन्मूलं तव जननि ताटङ्कमहिमा ॥ 28 ॥

किरीटं वैरिञ्चं परिहर पुरः कैटभभिदः

कठोरे कोटीरे स्खलसि जहि जम्भारिमुकुटम् ।

प्रणम्रेष्वेतेषु प्रसभमुपयातस्य भवनं

भवस्याभ्युत्थाने तव परिजनोक्तिर्विजयते ॥ 29 ॥

स्वदेहोद्भूताभिर्घृणिभिरणिमाद्याभिरभितो

निषेव्ये नित्ये त्वामहमिति सदा भावयति यः ।

किमाश्चर्यं तस्य त्रिनयनसमृद्धिं तृणयतो

महासंवर्ताग्निर्विरचयति निराजनविधिम् ॥ 30 ॥

चतुष्षष्ट्या तन्त्रैः सकलमतिसन्धाय भुवनं

स्थितस्तत्तत्सिद्धिप्रसवपरतन्त्रैः पशुपतिः ।

पुनस्त्वन्निर्बन्धादखिलपुरुषार्थैकघटना-

स्वतन्त्रं ते तन्त्रं क्षितितलमवातीतरदिदम् ॥ 31 ॥

शिवः शक्तिः कामः क्षितिरथ रविः शीतकिरणः

स्मरो हंसः शक्रस्तदनु च परामारहरयः ।

अमी हृल्लेखाभिस्तिसृभिरवसानेषु घटिता

भजन्ते वर्णास्ते तव जननि नामावयवताम् ॥ 32 ॥

स्मरं योनिं लक्ष्मीं त्रितयमिदमादौ तव मनो-

र्निधायैके नित्ये निरवधिमहाभोगरसिकाः ।

भजन्ति त्वां चिन्तामणिगुननिबद्धाक्षवलयाः

शिवाग्नौ जुह्वन्तः सुरभिघृतधाराहुतिशतैः ॥ 33 ॥

शरीरं त्वं शम्भोः शशिमिहिरवक्षोरुहयुगं

तवात्मानं मन्ये भगवति नवात्मानमनघम् ।

अतश्शेषश्शेषीत्ययमुभयसाधारणतया

स्थितः सम्बन्धो वां समरसपरानन्दपरयोः ॥ 34 ॥

मनस्त्वं व्योम त्वं मरुदसि मरुत्सारथिरसि

त्वमापस्त्वं भूमिस्त्वयि परिणतायां न हि परम् ।

त्वमेव स्वात्मानं परिणमयितुं विश्ववपुषा

चिदानन्दाकारं शिवयुवति भावेन बिभृषे ॥ 35 ॥

तवाज्ञाचक्रस्थं तपनशशिकोटिद्युतिधरं

परं शम्भुं वन्दे परिमिलितपार्श्वं परचिता ।

यमाराध्यन् भक्त्या रविशशिशुचीनामविषये

निरालोकेऽलोके निवसति हि भालोकभुवने ॥ 36 ॥

विशुद्धौ ते शुद्धस्फटिकविशदं व्योमजनकं

शिवं सेवे देवीमपि शिवसमानव्यवसिताम् ।

ययोः कान्त्या यान्त्याः शशिकिरणसारूप्यसरणे-

विधूतान्तर्ध्वान्ता विलसति चकोरीव जगती ॥ 37 ॥

समुन्मीलत् संवित् कमलमकरन्दैकरसिकं

भजे हंसद्वन्द्वं किमपि महतां मानसचरम् ।

यदालापादष्टादशगुणितविद्यापरिणति-

र्यदादत्ते दोषाद् गुणमखिलमद्भ्यः पय इव ॥ 38 ॥

तव स्वाधिष्ठाने हुतवहमधिष्ठाय निरतं

तमीडे संवर्तं जननि महतीं तां च समयाम् ।

यदालोके लोकान् दहति महति क्रोधकलिते

दयार्द्रा या दृष्टिः शिशिरमुपचारं रचयति ॥ 39 ॥

तटित्त्वन्तं शक्त्या तिमिरपरिपन्थिस्फुरणया

स्फुरन्नानारत्नाभरणपरिणद्धेन्द्रधनुषम् ।

तव श्यामं मेघं कमपि मणिपूरैकशरणं

निषेवे वर्षन्तं हरमिहिरतप्तं त्रिभुवनम् ॥ 40 ॥

तवाधारे मूले सह समयया लास्यपरया

नवात्मानं मन्ये नवरसमहाताण्डवनटम् ।

उभाभ्यामेताभ्यामुदयविधिमुद्दिश्य दयया

सनाथाभ्यां जज्ञे जनकजननीमज्जगदिदम् ॥ 41 ॥

द्वितीय भागः - सौन्दर्य लहरी

गतैर्माणिक्यत्वं गगनमणिभिः सान्द्रघटितं

किरीटं ते हैमं हिमगिरिसुते कीर्तयति यः ।

स नीडेयच्छायाच्छुरणशबलं चन्द्रशकलं

धनुः शौनासीरं किमिति न निबध्नाति धिषणाम् ॥ 42 ॥

धुनोतु ध्वान्तं नस्तुलितदलितेन्दीवरवनं

घनस्निग्धश्लक्ष्णं चिकुरनिकुरुम्बं तव शिवे ।

यदीयं सौरभ्यं सहजमुपलब्धुं सुमनसो

वसन्त्यस्मिन् मन्ये वलमथनवाटीविटपिनाम् ॥ 43 ॥

तनोतु क्षेमं नस्तव वदनसौन्दर्यलहरी-

परीवाहस्रोतःसरणिरिव सीमन्तसरणिः ।

वहन्ती सिन्दूरं प्रबलकबरीभारतिमिर-

द्विषां बृन्दैर्बन्दीकृतमिव नवीनार्ककिरणम् ॥ 44 ॥

अरालैः स्वाभाव्यादलिकलभसश्रीभिरलकैः

परीतं ते वक्त्रं परिहसति पङ्केरुहरुचिम् ।

दरस्मेरे यस्मिन् दशनरुचिकिञ्जल्करुचिरे

सुगन्धौ माद्यन्ति स्मरदहनचक्षुर्मधुलिहः ॥ 45 ॥

ललाटं लावण्यद्युतिविमलमाभाति तव य-

द्द्वितीयं तन्मन्ये मकुटघटितं चन्द्रशकलम् ।

विपर्यासन्यासादुभयमपि सम्भूय च मिथः

सुधालेपस्यूतिः परिणमति राकाहिमकरः ॥ 46 ॥

भ्रुवौ भुग्ने किञ्चिद्भुवनभयभङ्गव्यसनिनि

त्वदीये नेत्राभ्यां मधुकररुचिभ्यां धृतगुणम् ।

धनुर्मन्ये सव्येतरकरगृहीतं रतिपतेः

प्रकोष्ठे मुष्टौ च स्थगयति निगूढान्तरमुमे ॥ 47 ॥

अहः सूते सव्यं तव नयनमर्कात्मकतया

त्रियामां वामं ते सृजति रजनीनायकतया ।

तृतीया ते दृष्टिर्दरदलितहेमाम्बुजरुचिः

समाधत्ते सन्ध्यां दिवसनिशयोरन्तरचरीम् ॥ 48 ॥

विशाला कल्याणी स्फुटरुचिरयोध्या कुवलयैः

कृपाधाराधारा किमपि मधुराभोगवतिका ।

अवन्ती दृष्टिस्ते बहुनगरविस्तारविजया

ध्रुवं तत्तन्नामव्यवहरणयोग्या विजयते ॥ 49 ॥

कवीनां सन्दर्भस्तबकमकरन्दैकरसिकं

कटाक्षव्याक्षेपभ्रमरकलभौ कर्णयुगलम् ।

अमुञ्चन्तौ दृष्ट्वा तव नवरसास्वादतरला-

वसूयासंसर्गादलिकनयनं किञ्चिदरुणम् ॥ 50 ॥

शिवे शृङ्गारार्द्रा तदितरजने कुत्सनपरा

सरोषा गङ्गायां गिरिशचरिते विस्मयवती ।

हराहिभ्यो भीता सरसिरुहसौभाग्यजननी (जयिनी)

सखीषु स्मेरा ते मयि जननी दृष्टिः सकरुणा ॥ 51 ॥

गते कर्णाभ्यर्णं गरुत इव पक्ष्माणि दधती

पुरां भेत्तुश्चित्तप्रशमरसविद्रावणफले ।

इमे नेत्रे गोत्राधरपतिकुलोत्तंसकलिके

तवाकर्णाकृष्टस्मरशरविलासं कलयतः ॥ 52 ॥

विभक्तत्रैवर्ण्यं व्यतिकरितलीलाञ्जनतया

विभाति त्वन्नेत्रत्रितयमिदमीशानदयिते ।

पुनः स्रष्टुं देवान् द्रुहिणहरिरुद्रानुपरतान्

रजः सत्त्वं बिभ्रत्तम इति गुणानां त्रयमिव ॥ 53 ॥

पवित्रीकर्तुं नः पशुपतिपराधीनहृदये

दयामित्रैर्नेत्रैररुणधवलश्यामरुचिभिः ।

नदः शोणो गङ्गा तपनतनयेति ध्रुवममुं

त्रयाणां तीर्थानामुपनयसि सम्भेदमनघम् ॥ 54 ॥

निमेषोन्मेषाभ्यां प्रलयमुदयं याति जगती

तवेत्याहुः सन्तो धरणिधरराजन्यतनये ।

त्वदुन्मेषाज्जातं जगदिदमशेषं प्रलयतः

परित्रातुं शङ्के परिहृतनिमेषास्तव दृशः ॥ 55 ॥

तवापर्णे कर्णेजपनयनपैशुन्यचकिता

निलीयन्ते तोये नियतमनिमेषाः शफरिकाः ।

इयं च श्रीर्बद्धच्छदपुटकवाटं कुवलयम्

जहाति प्रत्यूषे निशि च विघटय्य प्रविशति ॥ 56 ॥

दृशा द्राघीयस्या दरदलितनीलोत्पलरुचा

दवीयांसं दीनं स्नपय कृपया मामपि शिवे ।

अनेनायं धन्यो भवति न च ते हानिरियता

वने वा हर्म्ये वा समकरनिपातो हिमकरः ॥ 57 ॥

अरालं ते पालीयुगलमगराजन्यतनये

न केषामाधत्ते कुसुमशरकोदण्डकुतुकम् ।

तिरश्चीनो यत्र श्रवणपथमुल्लङ्घ्य विलस-

न्नपाङ्गव्यासङ्गो दिशति शरसन्धानधिषणाम् ॥ 58 ॥

स्फुरद्गण्डाभोगप्रतिफलितताटङ्कयुगलं

चतुश्चक्रं मन्ये तव मुखमिदं मन्मथरथम् ।

यमारुह्य द्रुह्यत्यवनिरथमर्केन्दुचरणं

महावीरो मारः प्रमथपतये सज्जितवते ॥ 59 ॥

सरस्वत्याः सूक्तीरमृतलहरीकौशलहरीः

पिबन्त्याः शर्वाणि श्रवणचुलुकाभ्यामविरलम् ।

चमत्कारश्लाघाचलितशिरसः कुण्डलगणो

झणत्कारैस्तारैः प्रतिवचनमाचष्ट इव ते ॥ 60 ॥

असौ नासावंशस्तुहिनगिरिवंशध्वजपटि

त्वदीयो नेदीयः फलतु फलमस्माकमुचितम् ।

वहन्नन्तर्मुक्ताः शिशिरतरनिश्वासगलितं

समृद्ध्या यत्तासां बहिरपि च मुक्तामणिधरः ॥ 61 ॥

प्रकृत्या रक्तायास्तव सुदति दन्तच्छदरुचेः

प्रवक्ष्ये सादृश्यं जनयतु फलं विद्रुमलता ।

न बिम्बं तद्बिम्बप्रतिफलनरागादरुणितं

तुलामध्यारोढुं कथमिव विलज्जेत कलया ॥ 62 ॥

स्मितज्योत्स्नाजालं तव वदनचन्द्रस्य पिबतां

चकोराणामासीदतिरसतया चञ्चुजडिमा ।

अतस्ते शीतांशोरमृतलहरीमम्लरुचयः

पिबन्ति स्वच्छन्दं निशि निशि भृशं काञ्जिकधिया ॥ 63 ॥

अविश्रान्तं पत्युर्गुणगणकथाम्रेडनजपा

जपापुष्पच्छाया तव जननि जिह्वा जयति सा ।

यदग्रासीनायाः स्फटिकदृषदच्छच्छविमयी

सरस्वत्या मूर्तिः परिणमति माणिक्यवपुषा ॥ 64 ॥

रणे जित्वा दैत्यानपहृतशिरस्त्रैः कवचिभिर्-

निवृत्तैश्चण्डांशत्रिपुरहरनिर्माल्यविमुखैः ।

विशाखेन्द्रोपेन्द्रैः शशिविशदकर्पूरशकला

विलीयन्ते मातस्तव वदनताम्बूलकबलाः ॥ 65 ॥

विपञ्च्या गायन्ती विविधमपदानं पशुपतेः

त्वयारब्धे वक्तुं चलितशिरसा साधुवचने ।

तदीयैर्माधुर्यैरपलपिततन्त्रीकलरवां

निजां वीणां वाणी निचुलयति चोलेन निभृतम् ॥ 66 ॥

कराग्रेण स्पृष्टं तुहिनगिरिणा वत्सलतया

गिरीशेनोदस्तं मुहुरधरपानाकुलतया ।

करग्राह्यं शम्भोर्मुखमुकुरवृन्तं गिरिसुते

कथङ्कारं ब्रूमस्तव चिबुकमौपम्यरहितम् ॥ 67 ॥

भुजाश्लेषान् नित्यं पुरदमयितुः कण्टकवती

तव ग्रीवा धत्ते मुखकमलनालश्रियमियम् ।

स्वतः श्वेता कालागुरुबहुलजम्बालमलिना

मृणालीलालित्यं वहति यदधो हारलतिका ॥ 68 ॥

गले रेखास्तिस्रो गतिगमकगीतैकनिपुणे

विवाहव्यानद्धप्रगुणगुणसङ्ख्याप्रतिभुवः ।

विराजन्ते नानाविधमधुररागाकरभुवां

त्रयाणां ग्रामाणां स्थितिनियमसीमान इव ते ॥ 69 ॥

मृणालीमृद्वीनां तव भुजलतानां चतसृणां

चतुर्भिः सौन्दर्यं सरसिजभवः स्तौति वदनैः ।

नखेभ्यः सन्त्रस्यन् प्रथममथनादन्धकरिपो-

श्चतुर्णां शीर्षाणां सममभयहस्तार्पणधिया ॥ 70 ॥

नखानामुद्द्योतैर्नवनलिनरागं विहसतां

कराणां ते कान्तिं कथय कथयामः कथमुमे ।

कयाचिद्वा साम्यं भजतु कलया हन्त कमलं

यदि क्रीडल्लक्ष्मीचरणतललाक्षारसछणम् ॥ 71 ॥

समं देवि स्कन्दद्विपवदनपीतं स्तनयुगं

तवेदं नः खेदं हरतु सततं प्रस्नुतमुखम् ।

यदालोक्याशङ्काकुलितहृदयो हासजनकः

स्वकुम्भौ हेरम्बः परिमृशति हस्तेन झडिति ॥ 72 ॥

अमू ते वक्षोजावमृतरसमाणिक्यकुतुपौ

न सन्देहस्पन्दो नगपतिपताके मनसि नः ।

पिबन्तौ तौ यस्मादविदितवधूसङ्गरसिकौ

कुमारावद्यापि द्विरदवदनक्रौञ्चदलनौ ॥ 73 ॥

वहत्यम्ब स्तम्बेरमदनुजकुम्भप्रकृतिभिः

समारब्धां मुक्तामणिभिरमलां हारलतिकाम् ।

कुचाभोगो बिम्बाधररुचिभिरन्तः शबलितां

प्रतापव्यामिश्रां पुरदमयितुः कीर्तिमिव ते ॥ 74 ॥

तव स्तन्यं मन्ये धरणिधरकन्ये हृदयतः

पयःपारावारः परिवहति सारस्वतमिव ।

दयावत्या दत्तं द्रविडशिशुरास्वाद्य तव यत्

कवीनां प्रौढानामजनि कमनीयः कवयिता ॥ 75 ॥

हरक्रोधज्वालावलिभिरवलीढेन वपुषा

गभीरे ते नाभीसरसि कृतसङ्गो मनसिजः ।

समुत्तस्थौ तस्मादचलतनये धूमलतिका

जनस्तां जानीते तव जननि रोमावलिरिति ॥ 76 ॥

यदेतत् कालिन्दीतनुतरतरङ्गाकृति शिवे

कृशे मध्ये किञ्चिज्जननि तव यद्भाति सुधियाम् ।

विमर्दादन्योऽन्यं कुचकलशयोरन्तरगतं

तनूभूतं व्योम प्रविशदिव नाभिं कुहरिणीम् ॥ 77 ॥

स्थिरो गङ्गावर्तः स्तनमुकुलरोमावलिलता-

कलावालं कुण्डं कुसुमशरतेजोहुतभुजः ।

रतेर्लीलागारं किमपि तव नाभिर्गिरिसुते

बिलद्वारं सिद्धेर्गिरिशनयनानां विजयते ॥ 78 ॥

निसर्गक्षीणस्य स्तनतटभरेण क्लमजुषो

नमन्मूर्तेर्नारीतिलक शनकैस्त्रुट्यत इव ।

चिरं ते मध्यस्य त्रुटिततटिनीतीरतरुणा

समावस्थास्थेम्नो भवतु कुशलं शैलतनये ॥ 79 ॥

कुचौ सद्यःस्विद्यत्तटघटितकूर्पासभिदुरौ

कषन्तौ दोर्मूले कनककलशाभौ कलयता ।

तव त्रातुं भङ्गादलमिति वलग्नं तनुभुवा

त्रिधा नद्धं देवि त्रिवलि लवलीवल्लिभिरिव ॥ 80 ॥

गुरुत्वं विस्तारं क्षितिधरपतिः पार्वति निजा-

न्नितम्बादाच्छिद्य त्वयि हरणरूपेण निदधे ।

अतस्ते विस्तीर्णो गुरुरयमशेषां वसुमतीं

नितम्बप्राग्भारः स्थगयति लघुत्वं नयति च ॥ 81 ॥

करीन्द्राणां शुण्डान् कनककदलीकाण्डपटली-

मुभाभ्यामूरुभ्यामुभयमपि निर्जित्य भवती ।

सुवृत्ताभ्यां पत्युः प्रणतिकठिनाभ्यां गिरिसुते

विधिज्ञे जानुभ्यां विबुधकरिकुम्भद्वयमसि ॥ 82 ॥

पराजेतुं रुद्रं द्विगुणशरगर्भौ गिरिसुते

निषङ्गौ जङ्घे ते विषमविशिखो बाढमकृत ।

यदग्रे दृश्यन्ते दशशरफलाः पादयुगली-

नखाग्रच्छद्मानः सुरमकुटशाणैकनिशिताः ॥ 83 ॥

श्रुतीनां मूर्धानो दधति तव यौ शेखरतया

ममाप्येतौ मातः शिरसि दयया धेहि चरणौ ।

ययोः पाद्यं पाथः पशुपतिजटाजूटतटिनी

ययोर्लाक्षालक्ष्मीररुणहरिचूडामणिरुचिः ॥ 84 ॥

नमोवाकं ब्रूमो नयनरमणीयाय पदयो-

स्तवास्मै द्वन्द्वाय स्फुटरुचिरसालक्तकवते ।

असूयत्यत्यन्तं यदभिहननाय स्पृहयते

पशूनामीशानः प्रमदवनकङ्केलितरवे ॥ 85 ॥

मृषा कृत्वा गोत्रस्खलनमथ वैलक्ष्यनमितं

ललाटे भर्तारं चरणकमले ताडयति ते ।

चिरादन्तःशल्यं दहनकृतमुन्मूलितवता

तुलाकोटिक्वाणैः किलिकिलितमीशानरिपुणा ॥ 86 ॥

हिमानीहन्तव्यं हिमगिरिनिवासैकचतुरौ

निशायां निद्राणं निशि चरमभागे च विशदौ ।

वरं लक्ष्मीपात्रं श्रियमतिसृजन्तौ समयिनां

सरोजं त्वत्पादौ जननि जयतश्चित्रमिह किम् ॥ 87 ॥

पदं ते कीर्तीनां प्रपदमपदं देवि विपदां

कथं नीतं सद्भिः कठिनकमठीकर्परतुलाम् ।

कथं वा बाहुभ्यामुपयमनकाले पुरभिदा

यदादाय न्यस्तं दृषदि दयमानेन मनसा ॥ 88 ॥

नखैर्नाकस्त्रीणां करकमलसङ्कोचशशिभि-

स्तरूणां दिव्यानां हसत इव ते चण्डि चरणौ ।

फलानि स्वःस्थेभ्यः किसलयकराग्रेण ददतां

दरिद्रेभ्यो भद्रां श्रियमनिशमह्नाय ददतौ ॥ 89 ॥

ददाने दीनेभ्यः श्रियमनिशमाशानुसदृशी-

ममन्दं सौन्दर्यप्रकरमकरन्दं विकिरति ।

तवास्मिन् मन्दारस्तबकसुभगे यातु चरणे

निमज्जन्मज्जीवः करणचरणः षट्चरणताम् ॥ 90 ॥

पदन्यासक्रीडापरिचयमिवारब्धुमनसः

स्खलन्तस्ते खेलं भवनकलहंसा न जहति ।

अतस्तेषां शिक्षां सुभगमणिमञ्जीररणित-

च्छलादाचक्षाणं चरणकमलं चारुचरिते ॥ 91 ॥

गतास्ते मञ्चत्वं द्रुहिणहरिरुद्रेश्वरभृतः

शिवः स्वच्छच्छायाघटितकपटप्रच्छदपटः ।

त्वदीयानां भासां प्रतिफलनरागारुणतया

शरीरी शृङ्गारो रस इव दृशां दोग्धि कुतुकम् ॥ 92 ॥

अराला केशेषु प्रकृतिसरला मन्दहसिते

शिरीषाभा चित्ते दृषदुपलशोभा कुचतटे ।

भृशं तन्वी मध्ये पृथुरुरसिजारोहविषये

जगत्त्रातुं शम्भोर्जयति करुणा काचिदरुणा ॥ 93 ॥

कलङ्कः कस्तूरी रजनिकरबिम्बं जलमयं

कलाभिः कर्पूरैर्मरकतकरण्डं निबिडितम् ।

अतस्त्वद्भोगेन प्रतिदिनमिदं रिक्तकुहरं

विधिर्भूयो भूयो निबिडयति नूनं तव कृते ॥ 94 ॥

पुरारातेरन्तःपुरमसि ततस्त्वच्चरणयोः

सपर्यामर्यादा तरलकरणानामसुलभा ।

तथा ह्येते नीताः शतमखमुखाः सिद्धिमतुलां

तव द्वारोपान्तस्थितिभिरणिमाद्याभिरमराः ॥ 95 ॥

कलत्रं वैधात्रं कतिकति भजन्ते न कवयः

श्रियो देव्याः को वा न भवति पतिः कैरपि धनैः ।

महादेवं हित्वा तव सति सतीनामचरमे

कुचाभ्यामासङ्गः कुरवकतरोरप्यसुलभः ॥ 96 ॥

गिरामाहुर्देवीं द्रुहिणगृहिणीमागमविदो

हरेः पत्नीं पद्मां हरसहचरीमद्रितनयाम् ।

तुरीया कापि त्वं दुरधिगमनिःसीममहिमा

महामाया विश्वं भ्रमयसि परब्रह्ममहिषि ॥ 97 ॥

कदा काले मातः कथय कलितालक्तकरसं

पिबेयं विद्यार्थी तव चरणनिर्णेजनजलम् ।

प्रकृत्या मूकानामपि च कविताकारणतया

कदा धत्ते वाणीमुखकमलताम्बूलरसताम् ॥ 98 ॥

सरस्वत्या लक्ष्म्या विधिहरिसपत्नो विहरते

रतेः पातिव्रत्यं शिथिलयति रम्येण वपुषा ।

चिरं जीवन्नेव क्षपितपशुपाशव्यतिकरः

परानन्दाभिख्यं रसयति रसं त्वद्भजनवान् ॥ 99 ॥

प्रदीपज्वालाभिर्दिवसकरनीराजनविधिः

सुधासूतेश्चन्द्रोपलजललवैरर्घ्यरचना ।

स्वकीयैरम्भोभिः सलिलनिधिसौहित्यकरणं

त्वदीयाभिर्वाग्भिस्तव जननि वाचां स्तुतिरियम् ॥ 100 ॥

सौन्दर्यलहरि मुख्यस्तोत्रं संवार्तदायकम् ।

भगवद्पाद सन्क्लुप्तं पठेन् मुक्तौ भवेन्नरः ॥

॥ इति श्रीमत्परमहंसपरिव्राजकाचार्यस्य

श्रीगोविन्दभगवत्पूज्यपादशिष्यस्य

श्रीमच्छङ्करभगवतः कृतौ सौन्दर्यलहरी सम्पूर्णा ॥

॥ ॐ तत्सत् ॥

(अनुबन्धः)

समानीतः पद्भ्यां मणिमुकुरतामम्बरमणि-

र्भयादास्यादन्तःस्तिमितकिरणश्रेणिमसृणः ।

(पाठभेदः - भयादास्य स्निग्धस्त्मित, भयादास्यस्यान्तःस्त्मित)

दधाति त्वद्वक्त्रम्प्रतिफलनमश्रान्तविकचं

निरातङ्कं चन्द्रान्निजहृदयपङ्केरुहमिव ॥ 101 ॥

समुद्भूतस्थूलस्तनभरमुरश्चारु हसितं

कटाक्षे कन्दर्पः कतिचन कदम्बद्युति वपुः ।

हरस्य त्वद्भ्रान्तिं मनसि जनयन्ति स्म विमलाः

पाठभेदः - जनयामास मदनो, जनयन्तः समतुलां, जनयन्ता सुवदने

भवत्या ये भक्ताः परिणतिरमीषामियमुमे ॥ 102 ॥

निधे नित्यस्मेरे निरवधिगुणे नीतिनिपुणे

निराघातज्ञाने नियमपरचित्तैकनिलये ।

नियत्या निर्मुक्ते निखिलनिगमान्तस्तुतिपदे

निरातङ्के नित्ये निगमय ममापि स्तुतिमिमाम् ॥ 103 ॥