Saundarya Lahari — Kannada Script

ಪ್ರಥಮ ಭಾಗಃ - ಆನನ್ದ ಲಹರಿ

ಭುಮೌಸ್ಖಲಿತ ಪಾದಾನಾಂ ಭೂಮಿರೇವಾ ವಲಮ್ಬನಮ್ ।

ತ್ವಯೀ ಜಾತಾ ಪರಾಧಾನಾಂ ತ್ವಮೇವ ಶರಣಂ ಶಿವೇ ॥

ಶಿವಃ ಶಕ್ತ್ಯಾ ಯುಕ್ತೋ ಯದಿ ಭವತಿ ಶಕ್ತಃ ಪ್ರಭವಿತುಂ

ನ ಚೇದೇವಂ ದೇವೋ ನ ಖಲು ಕುಶಲಃ ಸ್ಪನ್ದಿತುಮಪಿ ।

ಅತಸ್ತ್ವಾಮಾರಾಧ್ಯಾಂ ಹರಿಹರವಿರಿಞ್ಚಾದಿಭಿರಪಿ

ಪ್ರಣನ್ತುಂ ಸ್ತೋತುಂ ವಾ ಕಥಮಕೃತಪುಣ್ಯಃ ಪ್ರಭವತಿ ॥ 1 ॥

ತನೀಯಾಂಸಂ ಪಾಂಸುಂ ತವ ಚರಣಪಙ್ಕೇರುಹಭವಂ

ವಿರಿಞ್ಚಿಸ್ಸಞ್ಚಿನ್ವನ್ ವಿರಚಯತಿ ಲೋಕಾನವಿಕಲಮ್ ।

ವಹತ್ಯೇನಂ ಶೌರಿಃ ಕಥಮಪಿ ಸಹಸ್ರೇಣ ಶಿರಸಾಂ

ಹರಸ್ಸಙ್ಕ್ಷುದ್ಯೈನಂ ಭಜತಿ ಭಸಿತೋದ್ಧೂಲನವಿಧಿಮ್ ॥ 2 ॥

ಅವಿದ್ಯಾನಾಮನ್ತ-ಸ್ತಿಮಿರ-ಮಿಹಿರದ್ವೀಪನಗರೀ

ಜಡಾನಾಂ ಚೈತನ್ಯ-ಸ್ತಬಕ-ಮಕರನ್ದ-ಸ್ರುತಿಝರೀ ।

ದರಿದ್ರಾಣಾಂ ಚಿನ್ತಾಮಣಿಗುಣನಿಕಾ ಜನ್ಮಜಲಧೌ

ನಿಮಗ್ನಾನಾಂ ದಂಷ್ಟ್ರಾ ಮುರರಿಪು-ವರಾಹಸ್ಯ ಭವತಿ ॥ 3 ॥

ತ್ವದನ್ಯಃ ಪಾಣಿಭ್ಯಾಮಭಯವರದೋ ದೈವತಗಣಃ

ತ್ವಮೇಕಾ ನೈವಾಸಿ ಪ್ರಕಟಿತವರಾಭೀತ್ಯಭಿನಯಾ ।

ಭಯಾತ್ ತ್ರಾತುಂ ದಾತುಂ ಫಲಮಪಿ ಚ ವಾಞ್ಛಾಸಮಧಿಕಂ

ಶರಣ್ಯೇ ಲೋಕಾನಾಂ ತವ ಹಿ ಚರಣಾವೇವ ನಿಪುಣೌ ॥ 4 ॥

ಹರಿಸ್ತ್ವಾಮಾರಾಧ್ಯ ಪ್ರಣತಜನಸೌಭಾಗ್ಯಜನನೀಂ

ಪುರಾ ನಾರೀ ಭೂತ್ವಾ ಪುರರಿಪುಮಪಿ ಕ್ಷೋಭಮನಯತ್ ।

ಸ್ಮರೋಽಪಿ ತ್ವಾಂ ನತ್ವಾ ರತಿನಯನಲೇಹ್ಯೇನ ವಪುಷಾ

ಮುನೀನಾಮಪ್ಯನ್ತಃ ಪ್ರಭವತಿ ಹಿ ಮೋಹಾಯ ಮಹತಾಮ್ ॥ 5 ॥

ಧನುಃ ಪೌಷ್ಪಂ ಮೌರ್ವೀ ಮಧುಕರಮಯೀ ಪಞ್ಚ ವಿಶಿಖಾಃ

ವಸನ್ತಃ ಸಾಮನ್ತೋ ಮಲಯಮರುದಾಯೋಧನರಥಃ ।

ತಥಾಪ್ಯೇಕಃ ಸರ್ವಂ ಹಿಮಗಿರಿಸುತೇ ಕಾಮಪಿ ಕೃಪಾಮ್

ಅಪಾಙ್ಗಾತ್ತೇ ಲಬ್ಧ್ವಾ ಜಗದಿದ-ಮನಙ್ಗೋ ವಿಜಯತೇ ॥ 6 ॥

ಕ್ವಣತ್ಕಾಞ್ಚೀದಾಮಾ ಕರಿಕಲಭಕುಮ್ಭಸ್ತನನತಾ

ಪರಿಕ್ಷೀಣಾ ಮಧ್ಯೇ ಪರಿಣತಶರಚ್ಚನ್ದ್ರವದನಾ ।

ಧನುರ್ಬಾಣಾನ್ ಪಾಶಂ ಸೃಣಿಮಪಿ ದಧಾನಾ ಕರತಲೈಃ

ಪುರಸ್ತಾದಾಸ್ತಾಂ ನಃ ಪುರಮಥಿತುರಾಹೋಪುರುಷಿಕಾ ॥ 7 ॥

ಸುಧಾಸಿನ್ಧೋರ್ಮಧ್ಯೇ ಸುರವಿಟಪಿವಾಟೀಪರಿವೃತೇ

ಮಣಿದ್ವೀಪೇ ನೀಪೋಪವನವತಿ ಚಿನ್ತಾಮಣಿಗೃಹೇ ।

ಶಿವಾಕಾರೇ ಮಞ್ಚೇ ಪರಮಶಿವಪರ್ಯಙ್ಕನಿಲಯಾಂ

ಭಜನ್ತಿ ತ್ವಾಂ ಧನ್ಯಾಃ ಕತಿಚನ ಚಿದಾನನ್ದಲಹರೀಮ್ ॥ 8 ॥

ಮಹೀಂ ಮೂಲಾಧಾರೇ ಕಮಪಿ ಮಣಿಪೂರೇ ಹುತವಹಂ

ಸ್ಥಿತಂ ಸ್ವಾಧಿಷ್ಠಾನೇ ಹೃದಿ ಮರುತಮಾಕಾಶಮುಪರಿ ।

ಮನೋಽಪಿ ಭ್ರೂಮಧ್ಯೇ ಸಕಲಮಪಿ ಭಿತ್ವಾ ಕುಲಪಥಂ

ಸಹಸ್ರಾರೇ ಪದ್ಮೇ ಸಹ ರಹಸಿ ಪತ್ಯಾ ವಿಹರಸೇ ॥ 9 ॥

ಸುಧಾಧಾರಾಸಾರೈಶ್ಚರಣಯುಗಲಾನ್ತರ್ವಿಗಲಿತೈಃ

ಪ್ರಪಞ್ಚಂ ಸಿಞ್ಚನ್ತೀ ಪುನರಪಿ ರಸಾಮ್ನಾಯಮಹಸಃ ।

ಅವಾಪ್ಯ ಸ್ವಾಂ ಭೂಮಿಂ ಭುಜಗನಿಭಮಧ್ಯುಷ್ಟವಲಯಂ

ಸ್ವಮಾತ್ಮಾನಂ ಕೃತ್ವಾ ಸ್ವಪಿಷಿ ಕುಲಕುಣ್ಡೇ ಕುಹರಿಣಿ ॥ 10 ॥

ಚತುರ್ಭಿಃ ಶ್ರೀಕಣ್ಠೈಃ ಶಿವಯುವತಿಭಿಃ ಪಞ್ಚಭಿರಪಿ

ಪ್ರಭಿನ್ನಾಭಿಃ ಶಮ್ಭೋರ್ನವಭಿರಪಿ ಮೂಲಪ್ರಕೃತಿಭಿಃ ।

ಚತುಶ್ಚತ್ವಾರಿಂಶದ್ವಸುದಲಕಲಾಶ್ರತ್ರಿವಲಯ- [ತ್ರಯಶ್ಚತ್ವಾರಿ]

ತ್ರಿರೇಖಾಭಿಃ ಸಾರ್ಧಂ ತವ ಶರಣಕೋಣಾಃ ಪರಿಣತಾಃ ॥ 11 ॥ [ಚರಣಕೋಣಾಃ, ಭವನಕಿಣಾಃ]

ತ್ವದೀಯಂ ಸೌನ್ದರ್ಯಂ ತುಹಿನಗಿರಿಕನ್ಯೇ ತುಲಯಿತುಂ

ಕವೀನ್ದ್ರಾಃ ಕಲ್ಪನ್ತೇ ಕಥಮಪಿ ವಿರಿಞ್ಚಿಪ್ರಭೃತಯಃ ।

ಯದಾಲೋಕೌತ್ಸುಕ್ಯಾದಮರಲಲನಾ ಯಾನ್ತಿ ಮನಸಾ

ತಪೋಭಿರ್ದುಷ್ಪ್ರಾಪಾಮಪಿ ಗಿರಿಶಸಾಯುಜ್ಯಪದವೀಮ್ ॥ 12 ॥

ನರಂ ವರ್ಷೀಯಾಂಸಂ ನಯನವಿರಸಂ ನರ್ಮಸು ಜಡಂ

ತವಾಪಾಙ್ಗಾಲೋಕೇ ಪತಿತಮನುಧಾವನ್ತಿ ಶತಶಃ ।

ಗಲದ್ವೇಣೀಬನ್ಧಾಃ ಕುಚಕಲಶವಿಸ್ರಸ್ತಸಿಚಯಾ

ಹಠಾತ್ ತ್ರುಟ್ಯತ್ಕಾಞ್ಚ್ಯೋ ವಿಗಲಿತದುಕೂಲಾ ಯುವತಯಃ ॥ 13 ॥

ಕ್ಷಿತೌ ಷಟ್ಪಞ್ಚಾಶದ್ ದ್ವಿಸಮಧಿಕಪಞ್ಚಾಶದುದಕೇ

ಹುತಾಶೇ ದ್ವಾಷಷ್ಟಿಶ್ಚತುರಧಿಕಪಞ್ಚಾಶದನಿಲೇ ।

ದಿವಿ ದ್ವಿಷ್ಷಟ್ತ್ರಿಂಶನ್ಮನಸಿ ಚ ಚತುಷ್ಷಷ್ಟಿರಿತಿ ಯೇ

ಮಯೂಖಾಸ್ತೇಷಾಮಪ್ಯುಪರಿ ತವ ಪಾದಾಮ್ಬುಜಯುಗಮ್ ॥ 14 ॥

ಶರಜ್ಜ್ಯೋತ್ಸ್ನಾಶುದ್ಧಾಂ ಶಶಿಯುತಜಟಾಜೂಟಮಕುಟಾಂ

ವರತ್ರಾಸತ್ರಾಣಸ್ಫಟಿಕಘಟಿಕಾಪುಸ್ತಕಕರಾಮ್ ।

ಸಕೃನ್ನ ತ್ವಾ ನತ್ವಾ ಕಥಮಿವ ಸತಾಂ ಸನ್ನ್ನಿದಧತೇ

ಮಧುಕ್ಷೀರದ್ರಾಕ್ಷಾಮಧುರಿಮಧುರೀಣಾಃ ಭಣಿತಯಃ ॥ 15॥ [ಫಣಿತಯಃ]

ಕವೀನ್ದ್ರಾಣಾಂ ಚೇತಃಕಮಲವನಬಾಲಾತಪರುಚಿಂ

ಭಜನ್ತೇ ಯೇ ಸನ್ತಃ ಕತಿಚಿದರುಣಾಮೇವ ಭವತೀಮ್ ।

ವಿರಿಞ್ಚಿಪ್ರೇಯಸ್ಯಾಸ್ತರುಣತರಶೃಙ್ಗಾರಲಹರೀ-

ಗಭೀರಾಭಿರ್ವಾಗ್ಭಿರ್ವಿದಧತಿ ಸತಾಂ ರಞ್ಜನಮಮೀ ॥ 16 ॥

ಸವಿತ್ರೀಭಿರ್ವಾಚಾಂ ಶಶಿಮಣಿಶಿಲಾಭಙ್ಗರುಚಿಭಿಃ

ವಶಿನ್ಯಾದ್ಯಾಭಿಸ್ತ್ವಾಂ ಸಹ ಜನನಿ ಸಞ್ಚಿನ್ತಯತಿ ಯಃ ।

ಸ ಕರ್ತಾ ಕಾವ್ಯಾನಾಂ ಭವತಿ ಮಹತಾಂ ಭಙ್ಗಿರುಚಿಭಿಃ

ವಚೋಭಿರ್ವಾಗ್ದೇವೀವದನಕಮಲಾಮೋದಮಧುರೈಃ ॥ 17 ॥

ತನುಚ್ಛಾಯಾಭಿಸ್ತೇ ತರುಣತರಣಿಶ್ರೀಸರಣಿಭಿಃ

ದಿವಂ ಸರ್ವಾಮುರ್ವೀಮರುಣಿಮನಿ ಮಗ್ನಾಂ ಸ್ಮರತಿ ಯಃ ।

ಭವನ್ತ್ಯಸ್ಯ ತ್ರಸ್ಯದ್ವನಹರಿಣಶಾಲೀನನಯನಾಃ

ಸಹೋರ್ವಶ್ಯಾ ವಶ್ಯಾಃ ಕತಿ ಕತಿ ನ ಗೀರ್ವಾಣಗಣಿಕಾಃ ॥ 18 ॥

ಮುಖಂ ಬಿನ್ದುಂ ಕೃತ್ವಾ ಕುಚಯುಗಮಧಸ್ತಸ್ಯ ತದಧೋ

ಹರಾರ್ಧಂ ಧ್ಯಾಯೇದ್ಯೋ ಹರಮಹಿಷಿ ತೇ ಮನ್ಮಥಕಲಾಮ್ ।

ಸ ಸದ್ಯಃ ಸಙ್ಕ್ಷೋಭಂ ನಯತಿ ವನಿತಾ ಇತ್ಯತಿಲಘು

ತ್ರಿಲೋಕೀಮಪ್ಯಾಶು ಭ್ರಮಯತಿ ರವೀನ್ದುಸ್ತನಯುಗಾಮ್ ॥ 19 ॥

ಕಿರನ್ತೀಮಙ್ಗೇಭ್ಯಃ ಕಿರಣನಿಕುರಮ್ಬಾಮೃತರಸಂ

ಹೃದಿ ತ್ವಾಮಾಧತ್ತೇ ಹಿಮಕರಶಿಲಾಮೂರ್ತಿಮಿವ ಯಃ ।

ಸ ಸರ್ಪಾಣಾಂ ದರ್ಪಂ ಶಮಯತಿ ಶಕುನ್ತಾಧಿಪ ಇವ

ಜ್ವರಪ್ಲುಷ್ಟಾನ್ ದೃಷ್ಟ್ಯಾ ಸುಖಯತಿ ಸುಧಾಧಾರಸಿರಯಾ ॥ 20 ॥

ತಟಿಲ್ಲೇಖಾತನ್ವೀಂ ತಪನಶಶಿವೈಶ್ವಾನರಮಯೀಂ

ನಿಷಣ್ಣಾಂ ಷಣ್ಣಾಮಪ್ಯುಪರಿ ಕಮಲಾನಾಂ ತವ ಕಲಾಮ್ ।

ಮಹಾಪದ್ಮಾಟವ್ಯಾಂ ಮೃದಿತಮಲಮಾಯೇನ ಮನಸಾ

ಮಹಾನ್ತಃ ಪಶ್ಯನ್ತೋ ದಧತಿ ಪರಮಾಹ್ಲಾದಲಹರೀಮ್ ॥ 21 ॥

ಭವಾನಿ ತ್ವಂ ದಾಸೇ ಮಯಿ ವಿತರ ದೃಷ್ಟಿಂ ಸಕರುಣಾ-

ಮಿತಿ ಸ್ತೋತುಂ ವಾಞ್ಛನ್ ಕಥಯತಿ ಭವಾನಿ ತ್ವಮಿತಿ ಯಃ ।

ತದೈವ ತ್ವಂ ತಸ್ಮೈ ದಿಶಸಿ ನಿಜಸಾಯುಜ್ಯಪದವೀಂ

ಮುಕುನ್ದಬ್ರಹ್ಮೇನ್ದ್ರಸ್ಫುಟಮಕುಟನೀರಾಜಿತಪದಾಮ್ ॥ 22 ॥

ತ್ವಯಾ ಹೃತ್ವಾ ವಾಮಂ ವಪುರಪರಿ-ತೃಪ್ತೇನ ಮನಸಾ

ಶರೀರಾರ್ಧಂ ಶಮ್ಭೋರಪರಮಪಿ ಶಙ್ಕೇ ಹೃತಮಭೂತ್ ।

ಯದೇತತ್ತ್ವದ್ರೂಪಂ ಸಕಲಮರುಣಾಭಂ ತ್ರಿನಯನಂ

ಕುಚಾಭ್ಯಾಮಾನಮ್ರಂ ಕುಟಿಲಶಶಿಚೂಡಾಲಮಕುಟಮ್ ॥ 23 ॥

ಜಗತ್ಸೂತೇ ಧಾತಾ ಹರಿರವತಿ ರುದ್ರಃ ಕ್ಷಪಯತೇ

ತಿರಸ್ಕುರ್ವನ್ನೇತತ್ಸ್ವಮಪಿ ವಪುರೀಶಸ್ತಿರಯತಿ ।

ಸದಾಪೂರ್ವಃ ಸರ್ವಂ ತದಿದಮನುಗೃಹ್ಣಾತಿ ಚ ಶಿವ-

ಸ್ತವಾಜ್ಞಾಮಾಲಮ್ಬ್ಯ ಕ್ಷಣಚಲಿತಯೋರ್ಭ್ರೂಲತಿಕಯೋಃ ॥ 24 ॥

ತ್ರಯಾಣಾಂ ದೇವಾನಾಂ ತ್ರಿಗುಣಜನಿತಾನಾಂ ತವ ಶಿವೇ

ಭವೇತ್ ಪೂಜಾ ಪೂಜಾ ತವ ಚರಣಯೋರ್ಯಾ ವಿರಚಿತಾ ।

ತಥಾ ಹಿ ತ್ವತ್ಪಾದೋದ್ವಹನಮಣಿಪೀಠಸ್ಯ ನಿಕಟೇ

ಸ್ಥಿತಾ ಹ್ಯೇತೇ ಶಶ್ವನ್ಮುಕುಲಿತಕರೋತ್ತಂಸಮಕುಟಾಃ ॥ 25 ॥

ವಿರಿಞ್ಚಿಃ ಪಞ್ಚತ್ವಂ ವ್ರಜತಿ ಹರಿರಾಪ್ನೋತಿ ವಿರತಿಂ

ವಿನಾಶಂ ಕೀನಾಶೋ ಭಜತಿ ಧನದೋ ಯಾತಿ ನಿಧನಮ್ ।

ವಿತನ್ದ್ರೀ ಮಾಹೇನ್ದ್ರೀ ವಿತತಿರಪಿ ಸಮ್ಮೀಲಿತದೃಶಾ

ಮಹಾಸಂಹಾರೇಽಸ್ಮಿನ್ ವಿಹರತಿ ಸತಿ ತ್ವತ್ಪತಿರಸೌ ॥ 26 ॥

ಜಪೋ ಜಲ್ಪಃ ಶಿಲ್ಪಂ ಸಕಲಮಪಿ ಮುದ್ರಾವಿರಚನಾ

ಗತಿಃ ಪ್ರಾದಕ್ಷಿಣ್ಯಕ್ರಮಣಮಶನಾದ್ಯಾಹುತಿವಿಧಿಃ ।

ಪ್ರಣಾಮಸ್ಸಂವೇಶಸ್ಸುಖಮಖಿಲಮಾತ್ಮಾರ್ಪಣದೃಶಾ

ಸಪರ್ಯಾಪರ್ಯಾಯಸ್ತವ ಭವತು ಯನ್ಮೇ ವಿಲಸಿತಮ್ ॥ 27 ॥

ಸುಧಾಮಪ್ಯಾಸ್ವಾದ್ಯ ಪ್ರತಿಭಯಜರಾಮೃತ್ಯುಹರಿಣೀಂ

ವಿಪದ್ಯನ್ತೇ ವಿಶ್ವೇ ವಿಧಿಶತಮಖಾದ್ಯಾ ದಿವಿಷದಃ ।

ಕರಾಲಂ ಯತ್ಕ್ಷ್ವೇಲಂ ಕಬಲಿತವತಃ ಕಾಲಕಲನಾ

ನ ಶಮ್ಭೋಸ್ತನ್ಮೂಲಂ ತವ ಜನನಿ ತಾಟಙ್ಕಮಹಿಮಾ ॥ 28 ॥

ಕಿರೀಟಂ ವೈರಿಞ್ಚಂ ಪರಿಹರ ಪುರಃ ಕೈಟಭಭಿದಃ

ಕಠೋರೇ ಕೋಟೀರೇ ಸ್ಖಲಸಿ ಜಹಿ ಜಮ್ಭಾರಿಮುಕುಟಮ್ ।

ಪ್ರಣಮ್ರೇಷ್ವೇತೇಷು ಪ್ರಸಭಮುಪಯಾತಸ್ಯ ಭವನಂ

ಭವಸ್ಯಾಭ್ಯುತ್ಥಾನೇ ತವ ಪರಿಜನೋಕ್ತಿರ್ವಿಜಯತೇ ॥ 29 ॥

ಸ್ವದೇಹೋದ್ಭೂತಾಭಿರ್ಘೃಣಿಭಿರಣಿಮಾದ್ಯಾಭಿರಭಿತೋ

ನಿಷೇವ್ಯೇ ನಿತ್ಯೇ ತ್ವಾಮಹಮಿತಿ ಸದಾ ಭಾವಯತಿ ಯಃ ।

ಕಿಮಾಶ್ಚರ್ಯಂ ತಸ್ಯ ತ್ರಿನಯನಸಮೃದ್ಧಿಂ ತೃಣಯತೋ

ಮಹಾಸಂವರ್ತಾಗ್ನಿರ್ವಿರಚಯತಿ ನಿರಾಜನವಿಧಿಮ್ ॥ 30 ॥

ಚತುಷ್ಷಷ್ಟ್ಯಾ ತನ್ತ್ರೈಃ ಸಕಲಮತಿಸನ್ಧಾಯ ಭುವನಂ

ಸ್ಥಿತಸ್ತತ್ತತ್ಸಿದ್ಧಿಪ್ರಸವಪರತನ್ತ್ರೈಃ ಪಶುಪತಿಃ ।

ಪುನಸ್ತ್ವನ್ನಿರ್ಬನ್ಧಾದಖಿಲಪುರುಷಾರ್ಥೈಕಘಟನಾ-

ಸ್ವತನ್ತ್ರಂ ತೇ ತನ್ತ್ರಂ ಕ್ಷಿತಿತಲಮವಾತೀತರದಿದಮ್ ॥ 31 ॥

ಶಿವಃ ಶಕ್ತಿಃ ಕಾಮಃ ಕ್ಷಿತಿರಥ ರವಿಃ ಶೀತಕಿರಣಃ

ಸ್ಮರೋ ಹಂಸಃ ಶಕ್ರಸ್ತದನು ಚ ಪರಾಮಾರಹರಯಃ ।

ಅಮೀ ಹೃಲ್ಲೇಖಾಭಿಸ್ತಿಸೃಭಿರವಸಾನೇಷು ಘಟಿತಾ

ಭಜನ್ತೇ ವರ್ಣಾಸ್ತೇ ತವ ಜನನಿ ನಾಮಾವಯವತಾಮ್ ॥ 32 ॥

ಸ್ಮರಂ ಯೋನಿಂ ಲಕ್ಷ್ಮೀಂ ತ್ರಿತಯಮಿದಮಾದೌ ತವ ಮನೋ-

ರ್ನಿಧಾಯೈಕೇ ನಿತ್ಯೇ ನಿರವಧಿಮಹಾಭೋಗರಸಿಕಾಃ ।

ಭಜನ್ತಿ ತ್ವಾಂ ಚಿನ್ತಾಮಣಿಗುನನಿಬದ್ಧಾಕ್ಷವಲಯಾಃ

ಶಿವಾಗ್ನೌ ಜುಹ್ವನ್ತಃ ಸುರಭಿಘೃತಧಾರಾಹುತಿಶತೈಃ ॥ 33 ॥

ಶರೀರಂ ತ್ವಂ ಶಮ್ಭೋಃ ಶಶಿಮಿಹಿರವಕ್ಷೋರುಹಯುಗಂ

ತವಾತ್ಮಾನಂ ಮನ್ಯೇ ಭಗವತಿ ನವಾತ್ಮಾನಮನಘಮ್ ।

ಅತಶ್ಶೇಷಶ್ಶೇಷೀತ್ಯಯಮುಭಯಸಾಧಾರಣತಯಾ

ಸ್ಥಿತಃ ಸಮ್ಬನ್ಧೋ ವಾಂ ಸಮರಸಪರಾನನ್ದಪರಯೋಃ ॥ 34 ॥

ಮನಸ್ತ್ವಂ ವ್ಯೋಮ ತ್ವಂ ಮರುದಸಿ ಮರುತ್ಸಾರಥಿರಸಿ

ತ್ವಮಾಪಸ್ತ್ವಂ ಭೂಮಿಸ್ತ್ವಯಿ ಪರಿಣತಾಯಾಂ ನ ಹಿ ಪರಮ್ ।

ತ್ವಮೇವ ಸ್ವಾತ್ಮಾನಂ ಪರಿಣಮಯಿತುಂ ವಿಶ್ವವಪುಷಾ

ಚಿದಾನನ್ದಾಕಾರಂ ಶಿವಯುವತಿ ಭಾವೇನ ಬಿಭೃಷೇ ॥ 35 ॥

ತವಾಜ್ಞಾಚಕ್ರಸ್ಥಂ ತಪನಶಶಿಕೋಟಿದ್ಯುತಿಧರಂ

ಪರಂ ಶಮ್ಭುಂ ವನ್ದೇ ಪರಿಮಿಲಿತಪಾರ್ಶ್ವಂ ಪರಚಿತಾ ।

ಯಮಾರಾಧ್ಯನ್ ಭಕ್ತ್ಯಾ ರವಿಶಶಿಶುಚೀನಾಮವಿಷಯೇ

ನಿರಾಲೋಕೇಽಲೋಕೇ ನಿವಸತಿ ಹಿ ಭಾಲೋಕಭುವನೇ ॥ 36 ॥

ವಿಶುದ್ಧೌ ತೇ ಶುದ್ಧಸ್ಫಟಿಕವಿಶದಂ ವ್ಯೋಮಜನಕಂ

ಶಿವಂ ಸೇವೇ ದೇವೀಮಪಿ ಶಿವಸಮಾನವ್ಯವಸಿತಾಮ್ ।

ಯಯೋಃ ಕಾನ್ತ್ಯಾ ಯಾನ್ತ್ಯಾಃ ಶಶಿಕಿರಣಸಾರೂಪ್ಯಸರಣೇ-

ವಿಧೂತಾನ್ತರ್ಧ್ವಾನ್ತಾ ವಿಲಸತಿ ಚಕೋರೀವ ಜಗತೀ ॥ 37 ॥

ಸಮುನ್ಮೀಲತ್ ಸಂವಿತ್ ಕಮಲಮಕರನ್ದೈಕರಸಿಕಂ

ಭಜೇ ಹಂಸದ್ವನ್ದ್ವಂ ಕಿಮಪಿ ಮಹತಾಂ ಮಾನಸಚರಮ್ ।

ಯದಾಲಾಪಾದಷ್ಟಾದಶಗುಣಿತವಿದ್ಯಾಪರಿಣತಿ-

ರ್ಯದಾದತ್ತೇ ದೋಷಾದ್ ಗುಣಮಖಿಲಮದ್ಭ್ಯಃ ಪಯ ಇವ ॥ 38 ॥

ತವ ಸ್ವಾಧಿಷ್ಠಾನೇ ಹುತವಹಮಧಿಷ್ಠಾಯ ನಿರತಂ

ತಮೀಡೇ ಸಂವರ್ತಂ ಜನನಿ ಮಹತೀಂ ತಾಂ ಚ ಸಮಯಾಮ್ ।

ಯದಾಲೋಕೇ ಲೋಕಾನ್ ದಹತಿ ಮಹತಿ ಕ್ರೋಧಕಲಿತೇ

ದಯಾರ್ದ್ರಾ ಯಾ ದೃಷ್ಟಿಃ ಶಿಶಿರಮುಪಚಾರಂ ರಚಯತಿ ॥ 39 ॥

ತಟಿತ್ತ್ವನ್ತಂ ಶಕ್ತ್ಯಾ ತಿಮಿರಪರಿಪನ್ಥಿಸ್ಫುರಣಯಾ

ಸ್ಫುರನ್ನಾನಾರತ್ನಾಭರಣಪರಿಣದ್ಧೇನ್ದ್ರಧನುಷಮ್ ।

ತವ ಶ್ಯಾಮಂ ಮೇಘಂ ಕಮಪಿ ಮಣಿಪೂರೈಕಶರಣಂ

ನಿಷೇವೇ ವರ್ಷನ್ತಂ ಹರಮಿಹಿರತಪ್ತಂ ತ್ರಿಭುವನಮ್ ॥ 40 ॥

ತವಾಧಾರೇ ಮೂಲೇ ಸಹ ಸಮಯಯಾ ಲಾಸ್ಯಪರಯಾ

ನವಾತ್ಮಾನಂ ಮನ್ಯೇ ನವರಸಮಹಾತಾಣ್ಡವನಟಮ್ ।

ಉಭಾಭ್ಯಾಮೇತಾಭ್ಯಾಮುದಯವಿಧಿಮುದ್ದಿಶ್ಯ ದಯಯಾ

ಸನಾಥಾಭ್ಯಾಂ ಜಜ್ಞೇ ಜನಕಜನನೀಮಜ್ಜಗದಿದಮ್ ॥ 41 ॥

ದ್ವಿತೀಯ ಭಾಗಃ - ಸೌನ್ದರ್ಯ ಲಹರೀ

ಗತೈರ್ಮಾಣಿಕ್ಯತ್ವಂ ಗಗನಮಣಿಭಿಃ ಸಾನ್ದ್ರಘಟಿತಂ

ಕಿರೀಟಂ ತೇ ಹೈಮಂ ಹಿಮಗಿರಿಸುತೇ ಕೀರ್ತಯತಿ ಯಃ ।

ಸ ನೀಡೇಯಚ್ಛಾಯಾಚ್ಛುರಣಶಬಲಂ ಚನ್ದ್ರಶಕಲಂ

ಧನುಃ ಶೌನಾಸೀರಂ ಕಿಮಿತಿ ನ ನಿಬಧ್ನಾತಿ ಧಿಷಣಾಮ್ ॥ 42 ॥

ಧುನೋತು ಧ್ವಾನ್ತಂ ನಸ್ತುಲಿತದಲಿತೇನ್ದೀವರವನಂ

ಘನಸ್ನಿಗ್ಧಶ್ಲಕ್ಷ್ಣಂ ಚಿಕುರನಿಕುರುಮ್ಬಂ ತವ ಶಿವೇ ।

ಯದೀಯಂ ಸೌರಭ್ಯಂ ಸಹಜಮುಪಲಬ್ಧುಂ ಸುಮನಸೋ

ವಸನ್ತ್ಯಸ್ಮಿನ್ ಮನ್ಯೇ ವಲಮಥನವಾಟೀವಿಟಪಿನಾಮ್ ॥ 43 ॥

ತನೋತು ಕ್ಷೇಮಂ ನಸ್ತವ ವದನಸೌನ್ದರ್ಯಲಹರೀ-

ಪರೀವಾಹಸ್ರೋತಃಸರಣಿರಿವ ಸೀಮನ್ತಸರಣಿಃ ।

ವಹನ್ತೀ ಸಿನ್ದೂರಂ ಪ್ರಬಲಕಬರೀಭಾರತಿಮಿರ-

ದ್ವಿಷಾಂ ಬೃನ್ದೈರ್ಬನ್ದೀಕೃತಮಿವ ನವೀನಾರ್ಕಕಿರಣಮ್ ॥ 44 ॥

ಅರಾಲೈಃ ಸ್ವಾಭಾವ್ಯಾದಲಿಕಲಭಸಶ್ರೀಭಿರಲಕೈಃ

ಪರೀತಂ ತೇ ವಕ್ತ್ರಂ ಪರಿಹಸತಿ ಪಙ್ಕೇರುಹರುಚಿಮ್ ।

ದರಸ್ಮೇರೇ ಯಸ್ಮಿನ್ ದಶನರುಚಿಕಿಞ್ಜಲ್ಕರುಚಿರೇ

ಸುಗನ್ಧೌ ಮಾದ್ಯನ್ತಿ ಸ್ಮರದಹನಚಕ್ಷುರ್ಮಧುಲಿಹಃ ॥ 45 ॥

ಲಲಾಟಂ ಲಾವಣ್ಯದ್ಯುತಿವಿಮಲಮಾಭಾತಿ ತವ ಯ-

ದ್ದ್ವಿತೀಯಂ ತನ್ಮನ್ಯೇ ಮಕುಟಘಟಿತಂ ಚನ್ದ್ರಶಕಲಮ್ ।

ವಿಪರ್ಯಾಸನ್ಯಾಸಾದುಭಯಮಪಿ ಸಮ್ಭೂಯ ಚ ಮಿಥಃ

ಸುಧಾಲೇಪಸ್ಯೂತಿಃ ಪರಿಣಮತಿ ರಾಕಾಹಿಮಕರಃ ॥ 46 ॥

ಭ್ರುವೌ ಭುಗ್ನೇ ಕಿಞ್ಚಿದ್ಭುವನಭಯಭಙ್ಗವ್ಯಸನಿನಿ

ತ್ವದೀಯೇ ನೇತ್ರಾಭ್ಯಾಂ ಮಧುಕರರುಚಿಭ್ಯಾಂ ಧೃತಗುಣಮ್ ।

ಧನುರ್ಮನ್ಯೇ ಸವ್ಯೇತರಕರಗೃಹೀತಂ ರತಿಪತೇಃ

ಪ್ರಕೋಷ್ಠೇ ಮುಷ್ಟೌ ಚ ಸ್ಥಗಯತಿ ನಿಗೂಢಾನ್ತರಮುಮೇ ॥ 47 ॥

ಅಹಃ ಸೂತೇ ಸವ್ಯಂ ತವ ನಯನಮರ್ಕಾತ್ಮಕತಯಾ

ತ್ರಿಯಾಮಾಂ ವಾಮಂ ತೇ ಸೃಜತಿ ರಜನೀನಾಯಕತಯಾ ।

ತೃತೀಯಾ ತೇ ದೃಷ್ಟಿರ್ದರದಲಿತಹೇಮಾಮ್ಬುಜರುಚಿಃ

ಸಮಾಧತ್ತೇ ಸನ್ಧ್ಯಾಂ ದಿವಸನಿಶಯೋರನ್ತರಚರೀಮ್ ॥ 48 ॥

ವಿಶಾಲಾ ಕಲ್ಯಾಣೀ ಸ್ಫುಟರುಚಿರಯೋಧ್ಯಾ ಕುವಲಯೈಃ

ಕೃಪಾಧಾರಾಧಾರಾ ಕಿಮಪಿ ಮಧುರಾಭೋಗವತಿಕಾ ।

ಅವನ್ತೀ ದೃಷ್ಟಿಸ್ತೇ ಬಹುನಗರವಿಸ್ತಾರವಿಜಯಾ

ಧ್ರುವಂ ತತ್ತನ್ನಾಮವ್ಯವಹರಣಯೋಗ್ಯಾ ವಿಜಯತೇ ॥ 49 ॥

ಕವೀನಾಂ ಸನ್ದರ್ಭಸ್ತಬಕಮಕರನ್ದೈಕರಸಿಕಂ

ಕಟಾಕ್ಷವ್ಯಾಕ್ಷೇಪಭ್ರಮರಕಲಭೌ ಕರ್ಣಯುಗಲಮ್ ।

ಅಮುಞ್ಚನ್ತೌ ದೃಷ್ಟ್ವಾ ತವ ನವರಸಾಸ್ವಾದತರಲಾ-

ವಸೂಯಾಸಂಸರ್ಗಾದಲಿಕನಯನಂ ಕಿಞ್ಚಿದರುಣಮ್ ॥ 50 ॥

ಶಿವೇ ಶೃಙ್ಗಾರಾರ್ದ್ರಾ ತದಿತರಜನೇ ಕುತ್ಸನಪರಾ

ಸರೋಷಾ ಗಙ್ಗಾಯಾಂ ಗಿರಿಶಚರಿತೇ ವಿಸ್ಮಯವತೀ ।

ಹರಾಹಿಭ್ಯೋ ಭೀತಾ ಸರಸಿರುಹಸೌಭಾಗ್ಯಜನನೀ (ಜಯಿನೀ)

ಸಖೀಷು ಸ್ಮೇರಾ ತೇ ಮಯಿ ಜನನೀ ದೃಷ್ಟಿಃ ಸಕರುಣಾ ॥ 51 ॥

ಗತೇ ಕರ್ಣಾಭ್ಯರ್ಣಂ ಗರುತ ಇವ ಪಕ್ಷ್ಮಾಣಿ ದಧತೀ

ಪುರಾಂ ಭೇತ್ತುಶ್ಚಿತ್ತಪ್ರಶಮರಸವಿದ್ರಾವಣಫಲೇ ।

ಇಮೇ ನೇತ್ರೇ ಗೋತ್ರಾಧರಪತಿಕುಲೋತ್ತಂಸಕಲಿಕೇ

ತವಾಕರ್ಣಾಕೃಷ್ಟಸ್ಮರಶರವಿಲಾಸಂ ಕಲಯತಃ ॥ 52 ॥

ವಿಭಕ್ತತ್ರೈವರ್ಣ್ಯಂ ವ್ಯತಿಕರಿತಲೀಲಾಞ್ಜನತಯಾ

ವಿಭಾತಿ ತ್ವನ್ನೇತ್ರತ್ರಿತಯಮಿದಮೀಶಾನದಯಿತೇ ।

ಪುನಃ ಸ್ರಷ್ಟುಂ ದೇವಾನ್ ದ್ರುಹಿಣಹರಿರುದ್ರಾನುಪರತಾನ್

ರಜಃ ಸತ್ತ್ವಂ ಬಿಭ್ರತ್ತಮ ಇತಿ ಗುಣಾನಾಂ ತ್ರಯಮಿವ ॥ 53 ॥

ಪವಿತ್ರೀಕರ್ತುಂ ನಃ ಪಶುಪತಿಪರಾಧೀನಹೃದಯೇ

ದಯಾಮಿತ್ರೈರ್ನೇತ್ರೈರರುಣಧವಲಶ್ಯಾಮರುಚಿಭಿಃ ।

ನದಃ ಶೋಣೋ ಗಙ್ಗಾ ತಪನತನಯೇತಿ ಧ್ರುವಮಮುಂ

ತ್ರಯಾಣಾಂ ತೀರ್ಥಾನಾಮುಪನಯಸಿ ಸಮ್ಭೇದಮನಘಮ್ ॥ 54 ॥

ನಿಮೇಷೋನ್ಮೇಷಾಭ್ಯಾಂ ಪ್ರಲಯಮುದಯಂ ಯಾತಿ ಜಗತೀ

ತವೇತ್ಯಾಹುಃ ಸನ್ತೋ ಧರಣಿಧರರಾಜನ್ಯತನಯೇ ।

ತ್ವದುನ್ಮೇಷಾಜ್ಜಾತಂ ಜಗದಿದಮಶೇಷಂ ಪ್ರಲಯತಃ

ಪರಿತ್ರಾತುಂ ಶಙ್ಕೇ ಪರಿಹೃತನಿಮೇಷಾಸ್ತವ ದೃಶಃ ॥ 55 ॥

ತವಾಪರ್ಣೇ ಕರ್ಣೇಜಪನಯನಪೈಶುನ್ಯಚಕಿತಾ

ನಿಲೀಯನ್ತೇ ತೋಯೇ ನಿಯತಮನಿಮೇಷಾಃ ಶಫರಿಕಾಃ ।

ಇಯಂ ಚ ಶ್ರೀರ್ಬದ್ಧಚ್ಛದಪುಟಕವಾಟಂ ಕುವಲಯಮ್

ಜಹಾತಿ ಪ್ರತ್ಯೂಷೇ ನಿಶಿ ಚ ವಿಘಟಯ್ಯ ಪ್ರವಿಶತಿ ॥ 56 ॥

ದೃಶಾ ದ್ರಾಘೀಯಸ್ಯಾ ದರದಲಿತನೀಲೋತ್ಪಲರುಚಾ

ದವೀಯಾಂಸಂ ದೀನಂ ಸ್ನಪಯ ಕೃಪಯಾ ಮಾಮಪಿ ಶಿವೇ ।

ಅನೇನಾಯಂ ಧನ್ಯೋ ಭವತಿ ನ ಚ ತೇ ಹಾನಿರಿಯತಾ

ವನೇ ವಾ ಹರ್ಮ್ಯೇ ವಾ ಸಮಕರನಿಪಾತೋ ಹಿಮಕರಃ ॥ 57 ॥

ಅರಾಲಂ ತೇ ಪಾಲೀಯುಗಲಮಗರಾಜನ್ಯತನಯೇ

ನ ಕೇಷಾಮಾಧತ್ತೇ ಕುಸುಮಶರಕೋದಣ್ಡಕುತುಕಮ್ ।

ತಿರಶ್ಚೀನೋ ಯತ್ರ ಶ್ರವಣಪಥಮುಲ್ಲಙ್ಘ್ಯ ವಿಲಸ-

ನ್ನಪಾಙ್ಗವ್ಯಾಸಙ್ಗೋ ದಿಶತಿ ಶರಸನ್ಧಾನಧಿಷಣಾಮ್ ॥ 58 ॥

ಸ್ಫುರದ್ಗಣ್ಡಾಭೋಗಪ್ರತಿಫಲಿತತಾಟಙ್ಕಯುಗಲಂ

ಚತುಶ್ಚಕ್ರಂ ಮನ್ಯೇ ತವ ಮುಖಮಿದಂ ಮನ್ಮಥರಥಮ್ ।

ಯಮಾರುಹ್ಯ ದ್ರುಹ್ಯತ್ಯವನಿರಥಮರ್ಕೇನ್ದುಚರಣಂ

ಮಹಾವೀರೋ ಮಾರಃ ಪ್ರಮಥಪತಯೇ ಸಜ್ಜಿತವತೇ ॥ 59 ॥

ಸರಸ್ವತ್ಯಾಃ ಸೂಕ್ತೀರಮೃತಲಹರೀಕೌಶಲಹರೀಃ

ಪಿಬನ್ತ್ಯಾಃ ಶರ್ವಾಣಿ ಶ್ರವಣಚುಲುಕಾಭ್ಯಾಮವಿರಲಮ್ ।

ಚಮತ್ಕಾರಶ್ಲಾಘಾಚಲಿತಶಿರಸಃ ಕುಣ್ಡಲಗಣೋ

ಝಣತ್ಕಾರೈಸ್ತಾರೈಃ ಪ್ರತಿವಚನಮಾಚಷ್ಟ ಇವ ತೇ ॥ 60 ॥

ಅಸೌ ನಾಸಾವಂಶಸ್ತುಹಿನಗಿರಿವಂಶಧ್ವಜಪಟಿ

ತ್ವದೀಯೋ ನೇದೀಯಃ ಫಲತು ಫಲಮಸ್ಮಾಕಮುಚಿತಮ್ ।

ವಹನ್ನನ್ತರ್ಮುಕ್ತಾಃ ಶಿಶಿರತರನಿಶ್ವಾಸಗಲಿತಂ

ಸಮೃದ್ಧ್ಯಾ ಯತ್ತಾಸಾಂ ಬಹಿರಪಿ ಚ ಮುಕ್ತಾಮಣಿಧರಃ ॥ 61 ॥

ಪ್ರಕೃತ್ಯಾ ರಕ್ತಾಯಾಸ್ತವ ಸುದತಿ ದನ್ತಚ್ಛದರುಚೇಃ

ಪ್ರವಕ್ಷ್ಯೇ ಸಾದೃಶ್ಯಂ ಜನಯತು ಫಲಂ ವಿದ್ರುಮಲತಾ ।

ನ ಬಿಮ್ಬಂ ತದ್ಬಿಮ್ಬಪ್ರತಿಫಲನರಾಗಾದರುಣಿತಂ

ತುಲಾಮಧ್ಯಾರೋಢುಂ ಕಥಮಿವ ವಿಲಜ್ಜೇತ ಕಲಯಾ ॥ 62 ॥

ಸ್ಮಿತಜ್ಯೋತ್ಸ್ನಾಜಾಲಂ ತವ ವದನಚನ್ದ್ರಸ್ಯ ಪಿಬತಾಂ

ಚಕೋರಾಣಾಮಾಸೀದತಿರಸತಯಾ ಚಞ್ಚುಜಡಿಮಾ ।

ಅತಸ್ತೇ ಶೀತಾಂಶೋರಮೃತಲಹರೀಮಮ್ಲರುಚಯಃ

ಪಿಬನ್ತಿ ಸ್ವಚ್ಛನ್ದಂ ನಿಶಿ ನಿಶಿ ಭೃಶಂ ಕಾಞ್ಜಿಕಧಿಯಾ ॥ 63 ॥

ಅವಿಶ್ರಾನ್ತಂ ಪತ್ಯುರ್ಗುಣಗಣಕಥಾಮ್ರೇಡನಜಪಾ

ಜಪಾಪುಷ್ಪಚ್ಛಾಯಾ ತವ ಜನನಿ ಜಿಹ್ವಾ ಜಯತಿ ಸಾ ।

ಯದಗ್ರಾಸೀನಾಯಾಃ ಸ್ಫಟಿಕದೃಷದಚ್ಛಚ್ಛವಿಮಯೀ

ಸರಸ್ವತ್ಯಾ ಮೂರ್ತಿಃ ಪರಿಣಮತಿ ಮಾಣಿಕ್ಯವಪುಷಾ ॥ 64 ॥

ರಣೇ ಜಿತ್ವಾ ದೈತ್ಯಾನಪಹೃತಶಿರಸ್ತ್ರೈಃ ಕವಚಿಭಿರ್-

ನಿವೃತ್ತೈಶ್ಚಣ್ಡಾಂಶತ್ರಿಪುರಹರನಿರ್ಮಾಲ್ಯವಿಮುಖೈಃ ।

ವಿಶಾಖೇನ್ದ್ರೋಪೇನ್ದ್ರೈಃ ಶಶಿವಿಶದಕರ್ಪೂರಶಕಲಾ

ವಿಲೀಯನ್ತೇ ಮಾತಸ್ತವ ವದನತಾಮ್ಬೂಲಕಬಲಾಃ ॥ 65 ॥

ವಿಪಞ್ಚ್ಯಾ ಗಾಯನ್ತೀ ವಿವಿಧಮಪದಾನಂ ಪಶುಪತೇಃ

ತ್ವಯಾರಬ್ಧೇ ವಕ್ತುಂ ಚಲಿತಶಿರಸಾ ಸಾಧುವಚನೇ ।

ತದೀಯೈರ್ಮಾಧುರ್ಯೈರಪಲಪಿತತನ್ತ್ರೀಕಲರವಾಂ

ನಿಜಾಂ ವೀಣಾಂ ವಾಣೀ ನಿಚುಲಯತಿ ಚೋಲೇನ ನಿಭೃತಮ್ ॥ 66 ॥

ಕರಾಗ್ರೇಣ ಸ್ಪೃಷ್ಟಂ ತುಹಿನಗಿರಿಣಾ ವತ್ಸಲತಯಾ

ಗಿರೀಶೇನೋದಸ್ತಂ ಮುಹುರಧರಪಾನಾಕುಲತಯಾ ।

ಕರಗ್ರಾಹ್ಯಂ ಶಮ್ಭೋರ್ಮುಖಮುಕುರವೃನ್ತಂ ಗಿರಿಸುತೇ

ಕಥಙ್ಕಾರಂ ಬ್ರೂಮಸ್ತವ ಚಿಬುಕಮೌಪಮ್ಯರಹಿತಮ್ ॥ 67 ॥

ಭುಜಾಶ್ಲೇಷಾನ್ ನಿತ್ಯಂ ಪುರದಮಯಿತುಃ ಕಣ್ಟಕವತೀ

ತವ ಗ್ರೀವಾ ಧತ್ತೇ ಮುಖಕಮಲನಾಲಶ್ರಿಯಮಿಯಮ್ ।

ಸ್ವತಃ ಶ್ವೇತಾ ಕಾಲಾಗುರುಬಹುಲಜಮ್ಬಾಲಮಲಿನಾ

ಮೃಣಾಲೀಲಾಲಿತ್ಯಂ ವಹತಿ ಯದಧೋ ಹಾರಲತಿಕಾ ॥ 68 ॥

ಗಲೇ ರೇಖಾಸ್ತಿಸ್ರೋ ಗತಿಗಮಕಗೀತೈಕನಿಪುಣೇ

ವಿವಾಹವ್ಯಾನದ್ಧಪ್ರಗುಣಗುಣಸಙ್ಖ್ಯಾಪ್ರತಿಭುವಃ ।

ವಿರಾಜನ್ತೇ ನಾನಾವಿಧಮಧುರರಾಗಾಕರಭುವಾಂ

ತ್ರಯಾಣಾಂ ಗ್ರಾಮಾಣಾಂ ಸ್ಥಿತಿನಿಯಮಸೀಮಾನ ಇವ ತೇ ॥ 69 ॥

ಮೃಣಾಲೀಮೃದ್ವೀನಾಂ ತವ ಭುಜಲತಾನಾಂ ಚತಸೃಣಾಂ

ಚತುರ್ಭಿಃ ಸೌನ್ದರ್ಯಂ ಸರಸಿಜಭವಃ ಸ್ತೌತಿ ವದನೈಃ ।

ನಖೇಭ್ಯಃ ಸನ್ತ್ರಸ್ಯನ್ ಪ್ರಥಮಮಥನಾದನ್ಧಕರಿಪೋ-

ಶ್ಚತುರ್ಣಾಂ ಶೀರ್ಷಾಣಾಂ ಸಮಮಭಯಹಸ್ತಾರ್ಪಣಧಿಯಾ ॥ 70 ॥

ನಖಾನಾಮುದ್ದ್ಯೋತೈರ್ನವನಲಿನರಾಗಂ ವಿಹಸತಾಂ

ಕರಾಣಾಂ ತೇ ಕಾನ್ತಿಂ ಕಥಯ ಕಥಯಾಮಃ ಕಥಮುಮೇ ।

ಕಯಾಚಿದ್ವಾ ಸಾಮ್ಯಂ ಭಜತು ಕಲಯಾ ಹನ್ತ ಕಮಲಂ

ಯದಿ ಕ್ರೀಡಲ್ಲಕ್ಷ್ಮೀಚರಣತಲಲಾಕ್ಷಾರಸಛಣಮ್ ॥ 71 ॥

ಸಮಂ ದೇವಿ ಸ್ಕನ್ದದ್ವಿಪವದನಪೀತಂ ಸ್ತನಯುಗಂ

ತವೇದಂ ನಃ ಖೇದಂ ಹರತು ಸತತಂ ಪ್ರಸ್ನುತಮುಖಮ್ ।

ಯದಾಲೋಕ್ಯಾಶಙ್ಕಾಕುಲಿತಹೃದಯೋ ಹಾಸಜನಕಃ

ಸ್ವಕುಮ್ಭೌ ಹೇರಮ್ಬಃ ಪರಿಮೃಶತಿ ಹಸ್ತೇನ ಝಡಿತಿ ॥ 72 ॥

ಅಮೂ ತೇ ವಕ್ಷೋಜಾವಮೃತರಸಮಾಣಿಕ್ಯಕುತುಪೌ

ನ ಸನ್ದೇಹಸ್ಪನ್ದೋ ನಗಪತಿಪತಾಕೇ ಮನಸಿ ನಃ ।

ಪಿಬನ್ತೌ ತೌ ಯಸ್ಮಾದವಿದಿತವಧೂಸಙ್ಗರಸಿಕೌ

ಕುಮಾರಾವದ್ಯಾಪಿ ದ್ವಿರದವದನಕ್ರೌಞ್ಚದಲನೌ ॥ 73 ॥

ವಹತ್ಯಮ್ಬ ಸ್ತಮ್ಬೇರಮದನುಜಕುಮ್ಭಪ್ರಕೃತಿಭಿಃ

ಸಮಾರಬ್ಧಾಂ ಮುಕ್ತಾಮಣಿಭಿರಮಲಾಂ ಹಾರಲತಿಕಾಮ್ ।

ಕುಚಾಭೋಗೋ ಬಿಮ್ಬಾಧರರುಚಿಭಿರನ್ತಃ ಶಬಲಿತಾಂ

ಪ್ರತಾಪವ್ಯಾಮಿಶ್ರಾಂ ಪುರದಮಯಿತುಃ ಕೀರ್ತಿಮಿವ ತೇ ॥ 74 ॥

ತವ ಸ್ತನ್ಯಂ ಮನ್ಯೇ ಧರಣಿಧರಕನ್ಯೇ ಹೃದಯತಃ

ಪಯಃಪಾರಾವಾರಃ ಪರಿವಹತಿ ಸಾರಸ್ವತಮಿವ ।

ದಯಾವತ್ಯಾ ದತ್ತಂ ದ್ರವಿಡಶಿಶುರಾಸ್ವಾದ್ಯ ತವ ಯತ್

ಕವೀನಾಂ ಪ್ರೌಢಾನಾಮಜನಿ ಕಮನೀಯಃ ಕವಯಿತಾ ॥ 75 ॥

ಹರಕ್ರೋಧಜ್ವಾಲಾವಲಿಭಿರವಲೀಢೇನ ವಪುಷಾ

ಗಭೀರೇ ತೇ ನಾಭೀಸರಸಿ ಕೃತಸಙ್ಗೋ ಮನಸಿಜಃ ।

ಸಮುತ್ತಸ್ಥೌ ತಸ್ಮಾದಚಲತನಯೇ ಧೂಮಲತಿಕಾ

ಜನಸ್ತಾಂ ಜಾನೀತೇ ತವ ಜನನಿ ರೋಮಾವಲಿರಿತಿ ॥ 76 ॥

ಯದೇತತ್ ಕಾಲಿನ್ದೀತನುತರತರಙ್ಗಾಕೃತಿ ಶಿವೇ

ಕೃಶೇ ಮಧ್ಯೇ ಕಿಞ್ಚಿಜ್ಜನನಿ ತವ ಯದ್ಭಾತಿ ಸುಧಿಯಾಮ್ ।

ವಿಮರ್ದಾದನ್ಯೋಽನ್ಯಂ ಕುಚಕಲಶಯೋರನ್ತರಗತಂ

ತನೂಭೂತಂ ವ್ಯೋಮ ಪ್ರವಿಶದಿವ ನಾಭಿಂ ಕುಹರಿಣೀಮ್ ॥ 77 ॥

ಸ್ಥಿರೋ ಗಙ್ಗಾವರ್ತಃ ಸ್ತನಮುಕುಲರೋಮಾವಲಿಲತಾ-

ಕಲಾವಾಲಂ ಕುಣ್ಡಂ ಕುಸುಮಶರತೇಜೋಹುತಭುಜಃ ।

ರತೇರ್ಲೀಲಾಗಾರಂ ಕಿಮಪಿ ತವ ನಾಭಿರ್ಗಿರಿಸುತೇ

ಬಿಲದ್ವಾರಂ ಸಿದ್ಧೇರ್ಗಿರಿಶನಯನಾನಾಂ ವಿಜಯತೇ ॥ 78 ॥

ನಿಸರ್ಗಕ್ಷೀಣಸ್ಯ ಸ್ತನತಟಭರೇಣ ಕ್ಲಮಜುಷೋ

ನಮನ್ಮೂರ್ತೇರ್ನಾರೀತಿಲಕ ಶನಕೈಸ್ತ್ರುಟ್ಯತ ಇವ ।

ಚಿರಂ ತೇ ಮಧ್ಯಸ್ಯ ತ್ರುಟಿತತಟಿನೀತೀರತರುಣಾ

ಸಮಾವಸ್ಥಾಸ್ಥೇಮ್ನೋ ಭವತು ಕುಶಲಂ ಶೈಲತನಯೇ ॥ 79 ॥

ಕುಚೌ ಸದ್ಯಃಸ್ವಿದ್ಯತ್ತಟಘಟಿತಕೂರ್ಪಾಸಭಿದುರೌ

ಕಷನ್ತೌ ದೋರ್ಮೂಲೇ ಕನಕಕಲಶಾಭೌ ಕಲಯತಾ ।

ತವ ತ್ರಾತುಂ ಭಙ್ಗಾದಲಮಿತಿ ವಲಗ್ನಂ ತನುಭುವಾ

ತ್ರಿಧಾ ನದ್ಧಂ ದೇವಿ ತ್ರಿವಲಿ ಲವಲೀವಲ್ಲಿಭಿರಿವ ॥ 80 ॥

ಗುರುತ್ವಂ ವಿಸ್ತಾರಂ ಕ್ಷಿತಿಧರಪತಿಃ ಪಾರ್ವತಿ ನಿಜಾ-

ನ್ನಿತಮ್ಬಾದಾಚ್ಛಿದ್ಯ ತ್ವಯಿ ಹರಣರೂಪೇಣ ನಿದಧೇ ।

ಅತಸ್ತೇ ವಿಸ್ತೀರ್ಣೋ ಗುರುರಯಮಶೇಷಾಂ ವಸುಮತೀಂ

ನಿತಮ್ಬಪ್ರಾಗ್ಭಾರಃ ಸ್ಥಗಯತಿ ಲಘುತ್ವಂ ನಯತಿ ಚ ॥ 81 ॥

ಕರೀನ್ದ್ರಾಣಾಂ ಶುಣ್ಡಾನ್ ಕನಕಕದಲೀಕಾಣ್ಡಪಟಲೀ-

ಮುಭಾಭ್ಯಾಮೂರುಭ್ಯಾಮುಭಯಮಪಿ ನಿರ್ಜಿತ್ಯ ಭವತೀ ।

ಸುವೃತ್ತಾಭ್ಯಾಂ ಪತ್ಯುಃ ಪ್ರಣತಿಕಠಿನಾಭ್ಯಾಂ ಗಿರಿಸುತೇ

ವಿಧಿಜ್ಞೇ ಜಾನುಭ್ಯಾಂ ವಿಬುಧಕರಿಕುಮ್ಭದ್ವಯಮಸಿ ॥ 82 ॥

ಪರಾಜೇತುಂ ರುದ್ರಂ ದ್ವಿಗುಣಶರಗರ್ಭೌ ಗಿರಿಸುತೇ

ನಿಷಙ್ಗೌ ಜಙ್ಘೇ ತೇ ವಿಷಮವಿಶಿಖೋ ಬಾಢಮಕೃತ ।

ಯದಗ್ರೇ ದೃಶ್ಯನ್ತೇ ದಶಶರಫಲಾಃ ಪಾದಯುಗಲೀ-

ನಖಾಗ್ರಚ್ಛದ್ಮಾನಃ ಸುರಮಕುಟಶಾಣೈಕನಿಶಿತಾಃ ॥ 83 ॥

ಶ್ರುತೀನಾಂ ಮೂರ್ಧಾನೋ ದಧತಿ ತವ ಯೌ ಶೇಖರತಯಾ

ಮಮಾಪ್ಯೇತೌ ಮಾತಃ ಶಿರಸಿ ದಯಯಾ ಧೇಹಿ ಚರಣೌ ।

ಯಯೋಃ ಪಾದ್ಯಂ ಪಾಥಃ ಪಶುಪತಿಜಟಾಜೂಟತಟಿನೀ

ಯಯೋರ್ಲಾಕ್ಷಾಲಕ್ಷ್ಮೀರರುಣಹರಿಚೂಡಾಮಣಿರುಚಿಃ ॥ 84 ॥

ನಮೋವಾಕಂ ಬ್ರೂಮೋ ನಯನರಮಣೀಯಾಯ ಪದಯೋ-

ಸ್ತವಾಸ್ಮೈ ದ್ವನ್ದ್ವಾಯ ಸ್ಫುಟರುಚಿರಸಾಲಕ್ತಕವತೇ ।

ಅಸೂಯತ್ಯತ್ಯನ್ತಂ ಯದಭಿಹನನಾಯ ಸ್ಪೃಹಯತೇ

ಪಶೂನಾಮೀಶಾನಃ ಪ್ರಮದವನಕಙ್ಕೇಲಿತರವೇ ॥ 85 ॥

ಮೃಷಾ ಕೃತ್ವಾ ಗೋತ್ರಸ್ಖಲನಮಥ ವೈಲಕ್ಷ್ಯನಮಿತಂ

ಲಲಾಟೇ ಭರ್ತಾರಂ ಚರಣಕಮಲೇ ತಾಡಯತಿ ತೇ ।

ಚಿರಾದನ್ತಃಶಲ್ಯಂ ದಹನಕೃತಮುನ್ಮೂಲಿತವತಾ

ತುಲಾಕೋಟಿಕ್ವಾಣೈಃ ಕಿಲಿಕಿಲಿತಮೀಶಾನರಿಪುಣಾ ॥ 86 ॥

ಹಿಮಾನೀಹನ್ತವ್ಯಂ ಹಿಮಗಿರಿನಿವಾಸೈಕಚತುರೌ

ನಿಶಾಯಾಂ ನಿದ್ರಾಣಂ ನಿಶಿ ಚರಮಭಾಗೇ ಚ ವಿಶದೌ ।

ವರಂ ಲಕ್ಷ್ಮೀಪಾತ್ರಂ ಶ್ರಿಯಮತಿಸೃಜನ್ತೌ ಸಮಯಿನಾಂ

ಸರೋಜಂ ತ್ವತ್ಪಾದೌ ಜನನಿ ಜಯತಶ್ಚಿತ್ರಮಿಹ ಕಿಮ್ ॥ 87 ॥

ಪದಂ ತೇ ಕೀರ್ತೀನಾಂ ಪ್ರಪದಮಪದಂ ದೇವಿ ವಿಪದಾಂ

ಕಥಂ ನೀತಂ ಸದ್ಭಿಃ ಕಠಿನಕಮಠೀಕರ್ಪರತುಲಾಮ್ ।

ಕಥಂ ವಾ ಬಾಹುಭ್ಯಾಮುಪಯಮನಕಾಲೇ ಪುರಭಿದಾ

ಯದಾದಾಯ ನ್ಯಸ್ತಂ ದೃಷದಿ ದಯಮಾನೇನ ಮನಸಾ ॥ 88 ॥

ನಖೈರ್ನಾಕಸ್ತ್ರೀಣಾಂ ಕರಕಮಲಸಙ್ಕೋಚಶಶಿಭಿ-

ಸ್ತರೂಣಾಂ ದಿವ್ಯಾನಾಂ ಹಸತ ಇವ ತೇ ಚಣ್ಡಿ ಚರಣೌ ।

ಫಲಾನಿ ಸ್ವಃಸ್ಥೇಭ್ಯಃ ಕಿಸಲಯಕರಾಗ್ರೇಣ ದದತಾಂ

ದರಿದ್ರೇಭ್ಯೋ ಭದ್ರಾಂ ಶ್ರಿಯಮನಿಶಮಹ್ನಾಯ ದದತೌ ॥ 89 ॥

ದದಾನೇ ದೀನೇಭ್ಯಃ ಶ್ರಿಯಮನಿಶಮಾಶಾನುಸದೃಶೀ-

ಮಮನ್ದಂ ಸೌನ್ದರ್ಯಪ್ರಕರಮಕರನ್ದಂ ವಿಕಿರತಿ ।

ತವಾಸ್ಮಿನ್ ಮನ್ದಾರಸ್ತಬಕಸುಭಗೇ ಯಾತು ಚರಣೇ

ನಿಮಜ್ಜನ್ಮಜ್ಜೀವಃ ಕರಣಚರಣಃ ಷಟ್ಚರಣತಾಮ್ ॥ 90 ॥

ಪದನ್ಯಾಸಕ್ರೀಡಾಪರಿಚಯಮಿವಾರಬ್ಧುಮನಸಃ

ಸ್ಖಲನ್ತಸ್ತೇ ಖೇಲಂ ಭವನಕಲಹಂಸಾ ನ ಜಹತಿ ।

ಅತಸ್ತೇಷಾಂ ಶಿಕ್ಷಾಂ ಸುಭಗಮಣಿಮಞ್ಜೀರರಣಿತ-

ಚ್ಛಲಾದಾಚಕ್ಷಾಣಂ ಚರಣಕಮಲಂ ಚಾರುಚರಿತೇ ॥ 91 ॥

ಗತಾಸ್ತೇ ಮಞ್ಚತ್ವಂ ದ್ರುಹಿಣಹರಿರುದ್ರೇಶ್ವರಭೃತಃ

ಶಿವಃ ಸ್ವಚ್ಛಚ್ಛಾಯಾಘಟಿತಕಪಟಪ್ರಚ್ಛದಪಟಃ ।

ತ್ವದೀಯಾನಾಂ ಭಾಸಾಂ ಪ್ರತಿಫಲನರಾಗಾರುಣತಯಾ

ಶರೀರೀ ಶೃಙ್ಗಾರೋ ರಸ ಇವ ದೃಶಾಂ ದೋಗ್ಧಿ ಕುತುಕಮ್ ॥ 92 ॥

ಅರಾಲಾ ಕೇಶೇಷು ಪ್ರಕೃತಿಸರಲಾ ಮನ್ದಹಸಿತೇ

ಶಿರೀಷಾಭಾ ಚಿತ್ತೇ ದೃಷದುಪಲಶೋಭಾ ಕುಚತಟೇ ।

ಭೃಶಂ ತನ್ವೀ ಮಧ್ಯೇ ಪೃಥುರುರಸಿಜಾರೋಹವಿಷಯೇ

ಜಗತ್ತ್ರಾತುಂ ಶಮ್ಭೋರ್ಜಯತಿ ಕರುಣಾ ಕಾಚಿದರುಣಾ ॥ 93 ॥

ಕಲಙ್ಕಃ ಕಸ್ತೂರೀ ರಜನಿಕರಬಿಮ್ಬಂ ಜಲಮಯಂ

ಕಲಾಭಿಃ ಕರ್ಪೂರೈರ್ಮರಕತಕರಣ್ಡಂ ನಿಬಿಡಿತಮ್ ।

ಅತಸ್ತ್ವದ್ಭೋಗೇನ ಪ್ರತಿದಿನಮಿದಂ ರಿಕ್ತಕುಹರಂ

ವಿಧಿರ್ಭೂಯೋ ಭೂಯೋ ನಿಬಿಡಯತಿ ನೂನಂ ತವ ಕೃತೇ ॥ 94 ॥

ಪುರಾರಾತೇರನ್ತಃಪುರಮಸಿ ತತಸ್ತ್ವಚ್ಚರಣಯೋಃ

ಸಪರ್ಯಾಮರ್ಯಾದಾ ತರಲಕರಣಾನಾಮಸುಲಭಾ ।

ತಥಾ ಹ್ಯೇತೇ ನೀತಾಃ ಶತಮಖಮುಖಾಃ ಸಿದ್ಧಿಮತುಲಾಂ

ತವ ದ್ವಾರೋಪಾನ್ತಸ್ಥಿತಿಭಿರಣಿಮಾದ್ಯಾಭಿರಮರಾಃ ॥ 95 ॥

ಕಲತ್ರಂ ವೈಧಾತ್ರಂ ಕತಿಕತಿ ಭಜನ್ತೇ ನ ಕವಯಃ

ಶ್ರಿಯೋ ದೇವ್ಯಾಃ ಕೋ ವಾ ನ ಭವತಿ ಪತಿಃ ಕೈರಪಿ ಧನೈಃ ।

ಮಹಾದೇವಂ ಹಿತ್ವಾ ತವ ಸತಿ ಸತೀನಾಮಚರಮೇ

ಕುಚಾಭ್ಯಾಮಾಸಙ್ಗಃ ಕುರವಕತರೋರಪ್ಯಸುಲಭಃ ॥ 96 ॥

ಗಿರಾಮಾಹುರ್ದೇವೀಂ ದ್ರುಹಿಣಗೃಹಿಣೀಮಾಗಮವಿದೋ

ಹರೇಃ ಪತ್ನೀಂ ಪದ್ಮಾಂ ಹರಸಹಚರೀಮದ್ರಿತನಯಾಮ್ ।

ತುರೀಯಾ ಕಾಪಿ ತ್ವಂ ದುರಧಿಗಮನಿಃಸೀಮಮಹಿಮಾ

ಮಹಾಮಾಯಾ ವಿಶ್ವಂ ಭ್ರಮಯಸಿ ಪರಬ್ರಹ್ಮಮಹಿಷಿ ॥ 97 ॥

ಕದಾ ಕಾಲೇ ಮಾತಃ ಕಥಯ ಕಲಿತಾಲಕ್ತಕರಸಂ

ಪಿಬೇಯಂ ವಿದ್ಯಾರ್ಥೀ ತವ ಚರಣನಿರ್ಣೇಜನಜಲಮ್ ।

ಪ್ರಕೃತ್ಯಾ ಮೂಕಾನಾಮಪಿ ಚ ಕವಿತಾಕಾರಣತಯಾ

ಕದಾ ಧತ್ತೇ ವಾಣೀಮುಖಕಮಲತಾಮ್ಬೂಲರಸತಾಮ್ ॥ 98 ॥

ಸರಸ್ವತ್ಯಾ ಲಕ್ಷ್ಮ್ಯಾ ವಿಧಿಹರಿಸಪತ್ನೋ ವಿಹರತೇ

ರತೇಃ ಪಾತಿವ್ರತ್ಯಂ ಶಿಥಿಲಯತಿ ರಮ್ಯೇಣ ವಪುಷಾ ।

ಚಿರಂ ಜೀವನ್ನೇವ ಕ್ಷಪಿತಪಶುಪಾಶವ್ಯತಿಕರಃ

ಪರಾನನ್ದಾಭಿಖ್ಯಂ ರಸಯತಿ ರಸಂ ತ್ವದ್ಭಜನವಾನ್ ॥ 99 ॥

ಪ್ರದೀಪಜ್ವಾಲಾಭಿರ್ದಿವಸಕರನೀರಾಜನವಿಧಿಃ

ಸುಧಾಸೂತೇಶ್ಚನ್ದ್ರೋಪಲಜಲಲವೈರರ್ಘ್ಯರಚನಾ ।

ಸ್ವಕೀಯೈರಮ್ಭೋಭಿಃ ಸಲಿಲನಿಧಿಸೌಹಿತ್ಯಕರಣಂ

ತ್ವದೀಯಾಭಿರ್ವಾಗ್ಭಿಸ್ತವ ಜನನಿ ವಾಚಾಂ ಸ್ತುತಿರಿಯಮ್ ॥ 100 ॥

ಸೌನ್ದರ್ಯಲಹರಿ ಮುಖ್ಯಸ್ತೋತ್ರಂ ಸಂವಾರ್ತದಾಯಕಮ್ ।

ಭಗವದ್ಪಾದ ಸನ್ಕ್ಲುಪ್ತಂ ಪಠೇನ್ ಮುಕ್ತೌ ಭವೇನ್ನರಃ ॥

॥ ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ

ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ

ಶ್ರೀಮಚ್ಛಙ್ಕರಭಗವತಃ ಕೃತೌ ಸೌನ್ದರ್ಯಲಹರೀ ಸಮ್ಪೂರ್ಣಾ ॥

॥ ಓಂ ತತ್ಸತ್ ॥

(ಅನುಬನ್ಧಃ)

ಸಮಾನೀತಃ ಪದ್ಭ್ಯಾಂ ಮಣಿಮುಕುರತಾಮಮ್ಬರಮಣಿ-

ರ್ಭಯಾದಾಸ್ಯಾದನ್ತಃಸ್ತಿಮಿತಕಿರಣಶ್ರೇಣಿಮಸೃಣಃ ।

(ಪಾಠಭೇದಃ - ಭಯಾದಾಸ್ಯ ಸ್ನಿಗ್ಧಸ್ತ್ಮಿತ, ಭಯಾದಾಸ್ಯಸ್ಯಾನ್ತಃಸ್ತ್ಮಿತ)

ದಧಾತಿ ತ್ವದ್ವಕ್ತ್ರಮ್ಪ್ರತಿಫಲನಮಶ್ರಾನ್ತವಿಕಚಂ

ನಿರಾತಙ್ಕಂ ಚನ್ದ್ರಾನ್ನಿಜಹೃದಯಪಙ್ಕೇರುಹಮಿವ ॥ 101 ॥

ಸಮುದ್ಭೂತಸ್ಥೂಲಸ್ತನಭರಮುರಶ್ಚಾರು ಹಸಿತಂ

ಕಟಾಕ್ಷೇ ಕನ್ದರ್ಪಃ ಕತಿಚನ ಕದಮ್ಬದ್ಯುತಿ ವಪುಃ ।

ಹರಸ್ಯ ತ್ವದ್ಭ್ರಾನ್ತಿಂ ಮನಸಿ ಜನಯನ್ತಿ ಸ್ಮ ವಿಮಲಾಃ

ಪಾಠಭೇದಃ - ಜನಯಾಮಾಸ ಮದನೋ, ಜನಯನ್ತಃ ಸಮತುಲಾಂ, ಜನಯನ್ತಾ ಸುವದನೇ

ಭವತ್ಯಾ ಯೇ ಭಕ್ತಾಃ ಪರಿಣತಿರಮೀಷಾಮಿಯಮುಮೇ ॥ 102 ॥

ನಿಧೇ ನಿತ್ಯಸ್ಮೇರೇ ನಿರವಧಿಗುಣೇ ನೀತಿನಿಪುಣೇ

ನಿರಾಘಾತಜ್ಞಾನೇ ನಿಯಮಪರಚಿತ್ತೈಕನಿಲಯೇ ।

ನಿಯತ್ಯಾ ನಿರ್ಮುಕ್ತೇ ನಿಖಿಲನಿಗಮಾನ್ತಸ್ತುತಿಪದೇ

ನಿರಾತಙ್ಕೇ ನಿತ್ಯೇ ನಿಗಮಯ ಮಮಾಪಿ ಸ್ತುತಿಮಿಮಾಮ್ ॥ 103 ॥

Roman (IAST) Transliteration

prathama bhāgaḥ - ānanda lahari

bhumauskhalita pādānāṃ bhūmirevā valambanam |

tvayī jātā parādhānāṃ tvameva śaraṇaṃ śive ||

śivaḥ śaktyā yukto yadi bhavati śaktaḥ prabhavituṃ

na cedevaṃ devo na khalu kuśalaḥ spanditumapi |

atastvāmārādhyāṃ hariharaviriñcādibhirapi

praṇantuṃ stotuṃ vā kathamakṛtapuṇyaḥ prabhavati || 1 ||

tanīyāṃsaṃ pāṃsuṃ tava caraṇapaṅkeruhabhavaṃ

viriñcissañcinvan viracayati lokānavikalam |

vahatyenaṃ śauriḥ kathamapi sahasreṇa śirasāṃ

harassaṅkṣudyainaṃ bhajati bhasitoddhūlanavidhim || 2 ||

avidyānāmanta-stimira-mihiradvīpanagarī

jaḍānāṃ caitanya-stabaka-makaranda-srutijharī |

daridrāṇāṃ cintāmaṇiguṇanikā janmajaladhau

nimagnānāṃ daṃṣṭrā muraripu-varāhasya bhavati || 3 ||

tvadanyaḥ pāṇibhyāmabhayavarado daivatagaṇaḥ

tvamekā naivāsi prakaṭitavarābhītyabhinayā |

bhayāt trātuṃ dātuṃ phalamapi ca vāñchāsamadhikaṃ

śaraṇye lokānāṃ tava hi caraṇāveva nipuṇau || 4 ||

haristvāmārādhya praṇatajanasaubhāgyajananīṃ

purā nārī bhūtvā puraripumapi kṣobhamanayat |

smaro'pi tvāṃ natvā ratinayanalehyena vapuṣā

munīnāmapyantaḥ prabhavati hi mohāya mahatām || 5 ||

dhanuḥ pauṣpaṃ maurvī madhukaramayī pañca viśikhāḥ

vasantaḥ sāmanto malayamarudāyodhanarathaḥ |

tathāpyekaḥ sarvaṃ himagirisute kāmapi kṛpām

apāṅgātte labdhvā jagadida-manaṅgo vijayate || 6 ||

kvaṇatkāñcīdāmā karikalabhakumbhastananatā

parikṣīṇā madhye pariṇataśaraccandravadanā |

dhanurbāṇān pāśaṃ sṛṇimapi dadhānā karatalaiḥ

purastādāstāṃ naḥ puramathiturāhopuruṣikā || 7 ||

sudhāsindhormadhye suraviṭapivāṭīparivṛte

maṇidvīpe nīpopavanavati cintāmaṇigṛhe |

śivākāre mañce paramaśivaparyaṅkanilayāṃ

bhajanti tvāṃ dhanyāḥ katicana cidānandalaharīm || 8 ||

mahīṃ mūlādhāre kamapi maṇipūre hutavahaṃ

sthitaṃ svādhiṣṭhāne hṛdi marutamākāśamupari |

mano'pi bhrūmadhye sakalamapi bhitvā kulapathaṃ

sahasrāre padme saha rahasi patyā viharase || 9 ||

sudhādhārāsāraiścaraṇayugalāntarvigalitaiḥ

prapañcaṃ siñcantī punarapi rasāmnāyamahasaḥ |

avāpya svāṃ bhūmiṃ bhujaganibhamadhyuṣṭavalayaṃ

svamātmānaṃ kṛtvā svapiṣi kulakuṇḍe kuhariṇi || 10 ||

caturbhiḥ śrīkaṇṭhaiḥ śivayuvatibhiḥ pañcabhirapi

prabhinnābhiḥ śambhornavabhirapi mūlaprakṛtibhiḥ |

catuścatvāriṃśadvasudalakalāśratrivalaya- [trayaścatvāri]

trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]

tvadīyaṃ saundaryaṃ tuhinagirikanye tulayituṃ

kavīndrāḥ kalpante kathamapi viriñciprabhṛtayaḥ |

yadālokautsukyādamaralalanā yānti manasā

tapobhirduṣprāpāmapi giriśasāyujyapadavīm || 12 ||

naraṃ varṣīyāṃsaṃ nayanavirasaṃ narmasu jaḍaṃ

tavāpāṅgāloke patitamanudhāvanti śataśaḥ |

galadveṇībandhāḥ kucakalaśavisrastasicayā

haṭhāt truṭyatkāñcyo vigalitadukūlā yuvatayaḥ || 13 ||

kṣitau ṣaṭpañcāśad dvisamadhikapañcāśadudake

hutāśe dvāṣaṣṭiścaturadhikapañcāśadanile |

divi dviṣṣaṭtriṃśanmanasi ca catuṣṣaṣṭiriti ye

mayūkhāsteṣāmapyupari tava pādāmbujayugam || 14 ||

śarajjyotsnāśuddhāṃ śaśiyutajaṭājūṭamakuṭāṃ

varatrāsatrāṇasphaṭikaghaṭikāpustakakarām |

sakṛnna tvā natvā kathamiva satāṃ sannnidadhate

madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]

kavīndrāṇāṃ cetaḥkamalavanabālātaparuciṃ

bhajante ye santaḥ katicidaruṇāmeva bhavatīm |

viriñcipreyasyāstaruṇataraśṛṅgāralaharī-

gabhīrābhirvāgbhirvidadhati satāṃ rañjanamamī || 16 ||

savitrībhirvācāṃ śaśimaṇiśilābhaṅgarucibhiḥ

vaśinyādyābhistvāṃ saha janani sañcintayati yaḥ |

sa kartā kāvyānāṃ bhavati mahatāṃ bhaṅgirucibhiḥ

vacobhirvāgdevīvadanakamalāmodamadhuraiḥ || 17 ||

tanucchāyābhiste taruṇataraṇiśrīsaraṇibhiḥ

divaṃ sarvāmurvīmaruṇimani magnāṃ smarati yaḥ |

bhavantyasya trasyadvanahariṇaśālīnanayanāḥ

sahorvaśyā vaśyāḥ kati kati na gīrvāṇagaṇikāḥ || 18 ||

mukhaṃ binduṃ kṛtvā kucayugamadhastasya tadadho

harārdhaṃ dhyāyedyo haramahiṣi te manmathakalām |

sa sadyaḥ saṅkṣobhaṃ nayati vanitā ityatilaghu

trilokīmapyāśu bhramayati ravīndustanayugām || 19 ||

kirantīmaṅgebhyaḥ kiraṇanikurambāmṛtarasaṃ

hṛdi tvāmādhatte himakaraśilāmūrtimiva yaḥ |

sa sarpāṇāṃ darpaṃ śamayati śakuntādhipa iva

jvarapluṣṭān dṛṣṭyā sukhayati sudhādhārasirayā || 20 ||

taṭillekhātanvīṃ tapanaśaśivaiśvānaramayīṃ

niṣaṇṇāṃ ṣaṇṇāmapyupari kamalānāṃ tava kalām |

mahāpadmāṭavyāṃ mṛditamalamāyena manasā

mahāntaḥ paśyanto dadhati paramāhlādalaharīm || 21 ||

bhavāni tvaṃ dāse mayi vitara dṛṣṭiṃ sakaruṇā-

miti stotuṃ vāñchan kathayati bhavāni tvamiti yaḥ |

tadaiva tvaṃ tasmai diśasi nijasāyujyapadavīṃ

mukundabrahmendrasphuṭamakuṭanīrājitapadām || 22 ||

tvayā hṛtvā vāmaṃ vapurapari-tṛptena manasā

śarīrārdhaṃ śambhoraparamapi śaṅke hṛtamabhūt |

yadetattvadrūpaṃ sakalamaruṇābhaṃ trinayanaṃ

kucābhyāmānamraṃ kuṭilaśaśicūḍālamakuṭam || 23 ||

jagatsūte dhātā hariravati rudraḥ kṣapayate

tiraskurvannetatsvamapi vapurīśastirayati |

sadāpūrvaḥ sarvaṃ tadidamanugṛhṇāti ca śiva-

stavājñāmālambya kṣaṇacalitayorbhrūlatikayoḥ || 24 ||

trayāṇāṃ devānāṃ triguṇajanitānāṃ tava śive

bhavet pūjā pūjā tava caraṇayoryā viracitā |

tathā hi tvatpādodvahanamaṇipīṭhasya nikaṭe

sthitā hyete śaśvanmukulitakarottaṃsamakuṭāḥ || 25 ||

viriñciḥ pañcatvaṃ vrajati harirāpnoti viratiṃ

vināśaṃ kīnāśo bhajati dhanado yāti nidhanam |

vitandrī māhendrī vitatirapi sammīlitadṛśā

mahāsaṃhāre'smin viharati sati tvatpatirasau || 26 ||

japo jalpaḥ śilpaṃ sakalamapi mudrāviracanā

gatiḥ prādakṣiṇyakramaṇamaśanādyāhutividhiḥ |

praṇāmassaṃveśassukhamakhilamātmārpaṇadṛśā

saparyāparyāyastava bhavatu yanme vilasitam || 27 ||

sudhāmapyāsvādya pratibhayajarāmṛtyuhariṇīṃ

vipadyante viśve vidhiśatamakhādyā diviṣadaḥ |

karālaṃ yatkṣvelaṃ kabalitavataḥ kālakalanā

na śambhostanmūlaṃ tava janani tāṭaṅkamahimā || 28 ||

kirīṭaṃ vairiñcaṃ parihara puraḥ kaiṭabhabhidaḥ

kaṭhore koṭīre skhalasi jahi jambhārimukuṭam |

praṇamreṣveteṣu prasabhamupayātasya bhavanaṃ

bhavasyābhyutthāne tava parijanoktirvijayate || 29 ||

svadehodbhūtābhirghṛṇibhiraṇimādyābhirabhito

niṣevye nitye tvāmahamiti sadā bhāvayati yaḥ |

kimāścaryaṃ tasya trinayanasamṛddhiṃ tṛṇayato

mahāsaṃvartāgnirviracayati nirājanavidhim || 30 ||

catuṣṣaṣṭyā tantraiḥ sakalamatisandhāya bhuvanaṃ

sthitastattatsiddhiprasavaparatantraiḥ paśupatiḥ |

punastvannirbandhādakhilapuruṣārthaikaghaṭanā-

svatantraṃ te tantraṃ kṣititalamavātītaradidam || 31 ||

śivaḥ śaktiḥ kāmaḥ kṣitiratha raviḥ śītakiraṇaḥ

smaro haṃsaḥ śakrastadanu ca parāmāraharayaḥ |

amī hṛllekhābhistisṛbhiravasāneṣu ghaṭitā

bhajante varṇāste tava janani nāmāvayavatām || 32 ||

smaraṃ yoniṃ lakṣmīṃ tritayamidamādau tava mano-

rnidhāyaike nitye niravadhimahābhogarasikāḥ |

bhajanti tvāṃ cintāmaṇigunanibaddhākṣavalayāḥ

śivāgnau juhvantaḥ surabhighṛtadhārāhutiśataiḥ || 33 ||

śarīraṃ tvaṃ śambhoḥ śaśimihiravakṣoruhayugaṃ

tavātmānaṃ manye bhagavati navātmānamanagham |

ataśśeṣaśśeṣītyayamubhayasādhāraṇatayā

sthitaḥ sambandho vāṃ samarasaparānandaparayoḥ || 34 ||

manastvaṃ vyoma tvaṃ marudasi marutsārathirasi

tvamāpastvaṃ bhūmistvayi pariṇatāyāṃ na hi param |

tvameva svātmānaṃ pariṇamayituṃ viśvavapuṣā

cidānandākāraṃ śivayuvati bhāvena bibhṛṣe || 35 ||

tavājñācakrasthaṃ tapanaśaśikoṭidyutidharaṃ

paraṃ śambhuṃ vande parimilitapārśvaṃ paracitā |

yamārādhyan bhaktyā raviśaśiśucīnāmaviṣaye

nirāloke'loke nivasati hi bhālokabhuvane || 36 ||

viśuddhau te śuddhasphaṭikaviśadaṃ vyomajanakaṃ

śivaṃ seve devīmapi śivasamānavyavasitām |

yayoḥ kāntyā yāntyāḥ śaśikiraṇasārūpyasaraṇe-

vidhūtāntardhvāntā vilasati cakorīva jagatī || 37 ||

samunmīlat saṃvit kamalamakarandaikarasikaṃ

bhaje haṃsadvandvaṃ kimapi mahatāṃ mānasacaram |

yadālāpādaṣṭādaśaguṇitavidyāpariṇati-

ryadādatte doṣād guṇamakhilamadbhyaḥ paya iva || 38 ||

tava svādhiṣṭhāne hutavahamadhiṣṭhāya nirataṃ

tamīḍe saṃvartaṃ janani mahatīṃ tāṃ ca samayām |

yadāloke lokān dahati mahati krodhakalite

dayārdrā yā dṛṣṭiḥ śiśiramupacāraṃ racayati || 39 ||

taṭittvantaṃ śaktyā timiraparipanthisphuraṇayā

sphurannānāratnābharaṇapariṇaddhendradhanuṣam |

tava śyāmaṃ meghaṃ kamapi maṇipūraikaśaraṇaṃ

niṣeve varṣantaṃ haramihirataptaṃ tribhuvanam || 40 ||

tavādhāre mūle saha samayayā lāsyaparayā

navātmānaṃ manye navarasamahātāṇḍavanaṭam |

ubhābhyāmetābhyāmudayavidhimuddiśya dayayā

sanāthābhyāṃ jajñe janakajananīmajjagadidam || 41 ||

dvitīya bhāgaḥ - saundarya laharī

gatairmāṇikyatvaṃ gaganamaṇibhiḥ sāndraghaṭitaṃ

kirīṭaṃ te haimaṃ himagirisute kīrtayati yaḥ |

sa nīḍeyacchāyācchuraṇaśabalaṃ candraśakalaṃ

dhanuḥ śaunāsīraṃ kimiti na nibadhnāti dhiṣaṇām || 42 ||

dhunotu dhvāntaṃ nastulitadalitendīvaravanaṃ

ghanasnigdhaślakṣṇaṃ cikuranikurumbaṃ tava śive |

yadīyaṃ saurabhyaṃ sahajamupalabdhuṃ sumanaso

vasantyasmin manye valamathanavāṭīviṭapinām || 43 ||

tanotu kṣemaṃ nastava vadanasaundaryalaharī-

parīvāhasrotaḥsaraṇiriva sīmantasaraṇiḥ |

vahantī sindūraṃ prabalakabarībhāratimira-

dviṣāṃ bṛndairbandīkṛtamiva navīnārkakiraṇam || 44 ||

arālaiḥ svābhāvyādalikalabhasaśrībhiralakaiḥ

parītaṃ te vaktraṃ parihasati paṅkeruharucim |

darasmere yasmin daśanarucikiñjalkarucire

sugandhau mādyanti smaradahanacakṣurmadhulihaḥ || 45 ||

lalāṭaṃ lāvaṇyadyutivimalamābhāti tava ya-

ddvitīyaṃ tanmanye makuṭaghaṭitaṃ candraśakalam |

viparyāsanyāsādubhayamapi sambhūya ca mithaḥ

sudhālepasyūtiḥ pariṇamati rākāhimakaraḥ || 46 ||

bhruvau bhugne kiñcidbhuvanabhayabhaṅgavyasanini

tvadīye netrābhyāṃ madhukararucibhyāṃ dhṛtaguṇam |

dhanurmanye savyetarakaragṛhītaṃ ratipateḥ

prakoṣṭhe muṣṭau ca sthagayati nigūḍhāntaramume || 47 ||

ahaḥ sūte savyaṃ tava nayanamarkātmakatayā

triyāmāṃ vāmaṃ te sṛjati rajanīnāyakatayā |

tṛtīyā te dṛṣṭirdaradalitahemāmbujaruciḥ

samādhatte sandhyāṃ divasaniśayorantaracarīm || 48 ||

viśālā kalyāṇī sphuṭarucirayodhyā kuvalayaiḥ

kṛpādhārādhārā kimapi madhurābhogavatikā |

avantī dṛṣṭiste bahunagaravistāravijayā

dhruvaṃ tattannāmavyavaharaṇayogyā vijayate || 49 ||

kavīnāṃ sandarbhastabakamakarandaikarasikaṃ

kaṭākṣavyākṣepabhramarakalabhau karṇayugalam |

amuñcantau dṛṣṭvā tava navarasāsvādataralā-

vasūyāsaṃsargādalikanayanaṃ kiñcidaruṇam || 50 ||

śive śṛṅgārārdrā taditarajane kutsanaparā

saroṣā gaṅgāyāṃ giriśacarite vismayavatī |

harāhibhyo bhītā sarasiruhasaubhāgyajananī (jayinī)

sakhīṣu smerā te mayi jananī dṛṣṭiḥ sakaruṇā || 51 ||

gate karṇābhyarṇaṃ garuta iva pakṣmāṇi dadhatī

purāṃ bhettuścittapraśamarasavidrāvaṇaphale |

ime netre gotrādharapatikulottaṃsakalike

tavākarṇākṛṣṭasmaraśaravilāsaṃ kalayataḥ || 52 ||

vibhaktatraivarṇyaṃ vyatikaritalīlāñjanatayā

vibhāti tvannetratritayamidamīśānadayite |

punaḥ sraṣṭuṃ devān druhiṇaharirudrānuparatān

rajaḥ sattvaṃ bibhrattama iti guṇānāṃ trayamiva || 53 ||

pavitrīkartuṃ naḥ paśupatiparādhīnahṛdaye

dayāmitrairnetrairaruṇadhavalaśyāmarucibhiḥ |

nadaḥ śoṇo gaṅgā tapanatanayeti dhruvamamuṃ

trayāṇāṃ tīrthānāmupanayasi sambhedamanagham || 54 ||

nimeṣonmeṣābhyāṃ pralayamudayaṃ yāti jagatī

tavetyāhuḥ santo dharaṇidhararājanyatanaye |

tvadunmeṣājjātaṃ jagadidamaśeṣaṃ pralayataḥ

paritrātuṃ śaṅke parihṛtanimeṣāstava dṛśaḥ || 55 ||

tavāparṇe karṇejapanayanapaiśunyacakitā

nilīyante toye niyatamanimeṣāḥ śapharikāḥ |

iyaṃ ca śrīrbaddhacchadapuṭakavāṭaṃ kuvalayam

jahāti pratyūṣe niśi ca vighaṭayya praviśati || 56 ||

dṛśā drāghīyasyā daradalitanīlotpalarucā

davīyāṃsaṃ dīnaṃ snapaya kṛpayā māmapi śive |

anenāyaṃ dhanyo bhavati na ca te hāniriyatā

vane vā harmye vā samakaranipāto himakaraḥ || 57 ||

arālaṃ te pālīyugalamagarājanyatanaye

na keṣāmādhatte kusumaśarakodaṇḍakutukam |

tiraścīno yatra śravaṇapathamullaṅghya vilasa-

nnapāṅgavyāsaṅgo diśati śarasandhānadhiṣaṇām || 58 ||

sphuradgaṇḍābhogapratiphalitatāṭaṅkayugalaṃ

catuścakraṃ manye tava mukhamidaṃ manmatharatham |

yamāruhya druhyatyavanirathamarkenducaraṇaṃ

mahāvīro māraḥ pramathapataye sajjitavate || 59 ||

sarasvatyāḥ sūktīramṛtalaharīkauśalaharīḥ

pibantyāḥ śarvāṇi śravaṇaculukābhyāmaviralam |

camatkāraślāghācalitaśirasaḥ kuṇḍalagaṇo

jhaṇatkāraistāraiḥ prativacanamācaṣṭa iva te || 60 ||

asau nāsāvaṃśastuhinagirivaṃśadhvajapaṭi

tvadīyo nedīyaḥ phalatu phalamasmākamucitam |

vahannantarmuktāḥ śiśirataraniśvāsagalitaṃ

samṛddhyā yattāsāṃ bahirapi ca muktāmaṇidharaḥ || 61 ||

prakṛtyā raktāyāstava sudati dantacchadaruceḥ

pravakṣye sādṛśyaṃ janayatu phalaṃ vidrumalatā |

na bimbaṃ tadbimbapratiphalanarāgādaruṇitaṃ

tulāmadhyāroḍhuṃ kathamiva vilajjeta kalayā || 62 ||

smitajyotsnājālaṃ tava vadanacandrasya pibatāṃ

cakorāṇāmāsīdatirasatayā cañcujaḍimā |

ataste śītāṃśoramṛtalaharīmamlarucayaḥ

pibanti svacchandaṃ niśi niśi bhṛśaṃ kāñjikadhiyā || 63 ||

aviśrāntaṃ patyurguṇagaṇakathāmreḍanajapā

japāpuṣpacchāyā tava janani jihvā jayati sā |

yadagrāsīnāyāḥ sphaṭikadṛṣadacchacchavimayī

sarasvatyā mūrtiḥ pariṇamati māṇikyavapuṣā || 64 ||

raṇe jitvā daityānapahṛtaśirastraiḥ kavacibhir-

nivṛttaiścaṇḍāṃśatripuraharanirmālyavimukhaiḥ |

viśākhendropendraiḥ śaśiviśadakarpūraśakalā

vilīyante mātastava vadanatāmbūlakabalāḥ || 65 ||

vipañcyā gāyantī vividhamapadānaṃ paśupateḥ

tvayārabdhe vaktuṃ calitaśirasā sādhuvacane |

tadīyairmādhuryairapalapitatantrīkalaravāṃ

nijāṃ vīṇāṃ vāṇī niculayati colena nibhṛtam || 66 ||

karāgreṇa spṛṣṭaṃ tuhinagiriṇā vatsalatayā

girīśenodastaṃ muhuradharapānākulatayā |

karagrāhyaṃ śambhormukhamukuravṛntaṃ girisute

kathaṅkāraṃ brūmastava cibukamaupamyarahitam || 67 ||

bhujāśleṣān nityaṃ puradamayituḥ kaṇṭakavatī

tava grīvā dhatte mukhakamalanālaśriyamiyam |

svataḥ śvetā kālāgurubahulajambālamalinā

mṛṇālīlālityaṃ vahati yadadho hāralatikā || 68 ||

gale rekhāstisro gatigamakagītaikanipuṇe

vivāhavyānaddhapraguṇaguṇasaṅkhyāpratibhuvaḥ |

virājante nānāvidhamadhurarāgākarabhuvāṃ

trayāṇāṃ grāmāṇāṃ sthitiniyamasīmāna iva te || 69 ||

mṛṇālīmṛdvīnāṃ tava bhujalatānāṃ catasṛṇāṃ

caturbhiḥ saundaryaṃ sarasijabhavaḥ stauti vadanaiḥ |

nakhebhyaḥ santrasyan prathamamathanādandhakaripo-

ścaturṇāṃ śīrṣāṇāṃ samamabhayahastārpaṇadhiyā || 70 ||

nakhānāmuddyotairnavanalinarāgaṃ vihasatāṃ

karāṇāṃ te kāntiṃ kathaya kathayāmaḥ kathamume |

kayācidvā sāmyaṃ bhajatu kalayā hanta kamalaṃ

yadi krīḍallakṣmīcaraṇatalalākṣārasachaṇam || 71 ||

samaṃ devi skandadvipavadanapītaṃ stanayugaṃ

tavedaṃ naḥ khedaṃ haratu satataṃ prasnutamukham |

yadālokyāśaṅkākulitahṛdayo hāsajanakaḥ

svakumbhau herambaḥ parimṛśati hastena jhaḍiti || 72 ||

amū te vakṣojāvamṛtarasamāṇikyakutupau

na sandehaspando nagapatipatāke manasi naḥ |

pibantau tau yasmādaviditavadhūsaṅgarasikau

kumārāvadyāpi dviradavadanakrauñcadalanau || 73 ||

vahatyamba stamberamadanujakumbhaprakṛtibhiḥ

samārabdhāṃ muktāmaṇibhiramalāṃ hāralatikām |

kucābhogo bimbādhararucibhirantaḥ śabalitāṃ

pratāpavyāmiśrāṃ puradamayituḥ kīrtimiva te || 74 ||

tava stanyaṃ manye dharaṇidharakanye hṛdayataḥ

payaḥpārāvāraḥ parivahati sārasvatamiva |

dayāvatyā dattaṃ draviḍaśiśurāsvādya tava yat

kavīnāṃ prauḍhānāmajani kamanīyaḥ kavayitā || 75 ||

harakrodhajvālāvalibhiravalīḍhena vapuṣā

gabhīre te nābhīsarasi kṛtasaṅgo manasijaḥ |

samuttasthau tasmādacalatanaye dhūmalatikā

janastāṃ jānīte tava janani romāvaliriti || 76 ||

yadetat kālindītanutarataraṅgākṛti śive

kṛśe madhye kiñcijjanani tava yadbhāti sudhiyām |

vimardādanyo'nyaṃ kucakalaśayorantaragataṃ

tanūbhūtaṃ vyoma praviśadiva nābhiṃ kuhariṇīm || 77 ||

sthiro gaṅgāvartaḥ stanamukularomāvalilatā-

kalāvālaṃ kuṇḍaṃ kusumaśaratejohutabhujaḥ |

raterlīlāgāraṃ kimapi tava nābhirgirisute

biladvāraṃ siddhergiriśanayanānāṃ vijayate || 78 ||

nisargakṣīṇasya stanataṭabhareṇa klamajuṣo

namanmūrternārītilaka śanakaistruṭyata iva |

ciraṃ te madhyasya truṭitataṭinītīrataruṇā

samāvasthāsthemno bhavatu kuśalaṃ śailatanaye || 79 ||

kucau sadyaḥsvidyattaṭaghaṭitakūrpāsabhidurau

kaṣantau dormūle kanakakalaśābhau kalayatā |

tava trātuṃ bhaṅgādalamiti valagnaṃ tanubhuvā

tridhā naddhaṃ devi trivali lavalīvallibhiriva || 80 ||

gurutvaṃ vistāraṃ kṣitidharapatiḥ pārvati nijā-

nnitambādācchidya tvayi haraṇarūpeṇa nidadhe |

ataste vistīrṇo gururayamaśeṣāṃ vasumatīṃ

nitambaprāgbhāraḥ sthagayati laghutvaṃ nayati ca || 81 ||

karīndrāṇāṃ śuṇḍān kanakakadalīkāṇḍapaṭalī-

mubhābhyāmūrubhyāmubhayamapi nirjitya bhavatī |

suvṛttābhyāṃ patyuḥ praṇatikaṭhinābhyāṃ girisute

vidhijñe jānubhyāṃ vibudhakarikumbhadvayamasi || 82 ||

parājetuṃ rudraṃ dviguṇaśaragarbhau girisute

niṣaṅgau jaṅghe te viṣamaviśikho bāḍhamakṛta |

yadagre dṛśyante daśaśaraphalāḥ pādayugalī-

nakhāgracchadmānaḥ suramakuṭaśāṇaikaniśitāḥ || 83 ||

śrutīnāṃ mūrdhāno dadhati tava yau śekharatayā

mamāpyetau mātaḥ śirasi dayayā dhehi caraṇau |

yayoḥ pādyaṃ pāthaḥ paśupatijaṭājūṭataṭinī

yayorlākṣālakṣmīraruṇaharicūḍāmaṇiruciḥ || 84 ||

namovākaṃ brūmo nayanaramaṇīyāya padayo-

stavāsmai dvandvāya sphuṭarucirasālaktakavate |

asūyatyatyantaṃ yadabhihananāya spṛhayate

paśūnāmīśānaḥ pramadavanakaṅkelitarave || 85 ||

mṛṣā kṛtvā gotraskhalanamatha vailakṣyanamitaṃ

lalāṭe bhartāraṃ caraṇakamale tāḍayati te |

cirādantaḥśalyaṃ dahanakṛtamunmūlitavatā

tulākoṭikvāṇaiḥ kilikilitamīśānaripuṇā || 86 ||

himānīhantavyaṃ himagirinivāsaikacaturau

niśāyāṃ nidrāṇaṃ niśi caramabhāge ca viśadau |

varaṃ lakṣmīpātraṃ śriyamatisṛjantau samayināṃ

sarojaṃ tvatpādau janani jayataścitramiha kim || 87 ||

padaṃ te kīrtīnāṃ prapadamapadaṃ devi vipadāṃ

kathaṃ nītaṃ sadbhiḥ kaṭhinakamaṭhīkarparatulām |

kathaṃ vā bāhubhyāmupayamanakāle purabhidā

yadādāya nyastaṃ dṛṣadi dayamānena manasā || 88 ||

nakhairnākastrīṇāṃ karakamalasaṅkocaśaśibhi-

starūṇāṃ divyānāṃ hasata iva te caṇḍi caraṇau |

phalāni svaḥsthebhyaḥ kisalayakarāgreṇa dadatāṃ

daridrebhyo bhadrāṃ śriyamaniśamahnāya dadatau || 89 ||

dadāne dīnebhyaḥ śriyamaniśamāśānusadṛśī-

mamandaṃ saundaryaprakaramakarandaṃ vikirati |

tavāsmin mandārastabakasubhage yātu caraṇe

nimajjanmajjīvaḥ karaṇacaraṇaḥ ṣaṭcaraṇatām || 90 ||

padanyāsakrīḍāparicayamivārabdhumanasaḥ

skhalantaste khelaṃ bhavanakalahaṃsā na jahati |

atasteṣāṃ śikṣāṃ subhagamaṇimañjīraraṇita-

cchalādācakṣāṇaṃ caraṇakamalaṃ cārucarite || 91 ||

gatāste mañcatvaṃ druhiṇaharirudreśvarabhṛtaḥ

śivaḥ svacchacchāyāghaṭitakapaṭapracchadapaṭaḥ |

tvadīyānāṃ bhāsāṃ pratiphalanarāgāruṇatayā

śarīrī śṛṅgāro rasa iva dṛśāṃ dogdhi kutukam || 92 ||

arālā keśeṣu prakṛtisaralā mandahasite

śirīṣābhā citte dṛṣadupalaśobhā kucataṭe |

bhṛśaṃ tanvī madhye pṛthururasijārohaviṣaye

jagattrātuṃ śambhorjayati karuṇā kācidaruṇā || 93 ||

kalaṅkaḥ kastūrī rajanikarabimbaṃ jalamayaṃ

kalābhiḥ karpūrairmarakatakaraṇḍaṃ nibiḍitam |

atastvadbhogena pratidinamidaṃ riktakuharaṃ

vidhirbhūyo bhūyo nibiḍayati nūnaṃ tava kṛte || 94 ||

purārāterantaḥpuramasi tatastvaccaraṇayoḥ

saparyāmaryādā taralakaraṇānāmasulabhā |

tathā hyete nītāḥ śatamakhamukhāḥ siddhimatulāṃ

tava dvāropāntasthitibhiraṇimādyābhiramarāḥ || 95 ||

kalatraṃ vaidhātraṃ katikati bhajante na kavayaḥ

śriyo devyāḥ ko vā na bhavati patiḥ kairapi dhanaiḥ |

mahādevaṃ hitvā tava sati satīnāmacarame

kucābhyāmāsaṅgaḥ kuravakatarorapyasulabhaḥ || 96 ||

girāmāhurdevīṃ druhiṇagṛhiṇīmāgamavido

hareḥ patnīṃ padmāṃ harasahacarīmadritanayām |

turīyā kāpi tvaṃ duradhigamaniḥsīmamahimā

mahāmāyā viśvaṃ bhramayasi parabrahmamahiṣi || 97 ||

kadā kāle mātaḥ kathaya kalitālaktakarasaṃ

pibeyaṃ vidyārthī tava caraṇanirṇejanajalam |

prakṛtyā mūkānāmapi ca kavitākāraṇatayā

kadā dhatte vāṇīmukhakamalatāmbūlarasatām || 98 ||

sarasvatyā lakṣmyā vidhiharisapatno viharate

rateḥ pātivratyaṃ śithilayati ramyeṇa vapuṣā |

ciraṃ jīvanneva kṣapitapaśupāśavyatikaraḥ

parānandābhikhyaṃ rasayati rasaṃ tvadbhajanavān || 99 ||

pradīpajvālābhirdivasakaranīrājanavidhiḥ

sudhāsūteścandropalajalalavairarghyaracanā |

svakīyairambhobhiḥ salilanidhisauhityakaraṇaṃ

tvadīyābhirvāgbhistava janani vācāṃ stutiriyam || 100 ||

saundaryalahari mukhyastotraṃ saṃvārtadāyakam |

bhagavadpāda sankluptaṃ paṭhen muktau bhavennaraḥ ||

|| iti śrīmatparamahaṃsaparivrājakācāryasya

śrīgovindabhagavatpūjyapādaśiṣyasya

śrīmacchaṅkarabhagavataḥ kṛtau saundaryalaharī sampūrṇā ||

|| oṃ tatsat ||

(anubandhaḥ)

samānītaḥ padbhyāṃ maṇimukuratāmambaramaṇi-

rbhayādāsyādantaḥstimitakiraṇaśreṇimasṛṇaḥ |

(pāṭhabhedaḥ - bhayādāsya snigdhastmita, bhayādāsyasyāntaḥstmita)

dadhāti tvadvaktrampratiphalanamaśrāntavikacaṃ

nirātaṅkaṃ candrānnijahṛdayapaṅkeruhamiva || 101 ||

samudbhūtasthūlastanabharamuraścāru hasitaṃ

kaṭākṣe kandarpaḥ katicana kadambadyuti vapuḥ |

harasya tvadbhrāntiṃ manasi janayanti sma vimalāḥ

pāṭhabhedaḥ - janayāmāsa madano, janayantaḥ samatulāṃ, janayantā suvadane

bhavatyā ye bhaktāḥ pariṇatiramīṣāmiyamume || 102 ||

nidhe nityasmere niravadhiguṇe nītinipuṇe

nirāghātajñāne niyamaparacittaikanilaye |

niyatyā nirmukte nikhilanigamāntastutipade

nirātaṅke nitye nigamaya mamāpi stutimimām || 103 ||

Sanskrit — Devanagari (original)

प्रथम भागः - आनन्द लहरि

भुमौस्खलित पादानां भूमिरेवा वलम्बनम् ।

त्वयी जाता पराधानां त्वमेव शरणं शिवे ॥

शिवः शक्त्या युक्तो यदि भवति शक्तः प्रभवितुं

न चेदेवं देवो न खलु कुशलः स्पन्दितुमपि ।

अतस्त्वामाराध्यां हरिहरविरिञ्चादिभिरपि

प्रणन्तुं स्तोतुं वा कथमकृतपुण्यः प्रभवति ॥ 1 ॥

तनीयांसं पांसुं तव चरणपङ्केरुहभवं

विरिञ्चिस्सञ्चिन्वन् विरचयति लोकानविकलम् ।

वहत्येनं शौरिः कथमपि सहस्रेण शिरसां

हरस्सङ्क्षुद्यैनं भजति भसितोद्धूलनविधिम् ॥ 2 ॥

अविद्यानामन्त-स्तिमिर-मिहिरद्वीपनगरी

जडानां चैतन्य-स्तबक-मकरन्द-स्रुतिझरी ।

दरिद्राणां चिन्तामणिगुणनिका जन्मजलधौ

निमग्नानां दंष्ट्रा मुररिपु-वराहस्य भवति ॥ 3 ॥

त्वदन्यः पाणिभ्यामभयवरदो दैवतगणः

त्वमेका नैवासि प्रकटितवराभीत्यभिनया ।

भयात् त्रातुं दातुं फलमपि च वाञ्छासमधिकं

शरण्ये लोकानां तव हि चरणावेव निपुणौ ॥ 4 ॥

हरिस्त्वामाराध्य प्रणतजनसौभाग्यजननीं

पुरा नारी भूत्वा पुररिपुमपि क्षोभमनयत् ।

स्मरोऽपि त्वां नत्वा रतिनयनलेह्येन वपुषा

मुनीनामप्यन्तः प्रभवति हि मोहाय महताम् ॥ 5 ॥

धनुः पौष्पं मौर्वी मधुकरमयी पञ्च विशिखाः

वसन्तः सामन्तो मलयमरुदायोधनरथः ।

तथाप्येकः सर्वं हिमगिरिसुते कामपि कृपाम्

अपाङ्गात्ते लब्ध्वा जगदिद-मनङ्गो विजयते ॥ 6 ॥

क्वणत्काञ्चीदामा करिकलभकुम्भस्तननता

परिक्षीणा मध्ये परिणतशरच्चन्द्रवदना ।

धनुर्बाणान् पाशं सृणिमपि दधाना करतलैः

पुरस्तादास्तां नः पुरमथितुराहोपुरुषिका ॥ 7 ॥

सुधासिन्धोर्मध्ये सुरविटपिवाटीपरिवृते

मणिद्वीपे नीपोपवनवति चिन्तामणिगृहे ।

शिवाकारे मञ्चे परमशिवपर्यङ्कनिलयां

भजन्ति त्वां धन्याः कतिचन चिदानन्दलहरीम् ॥ 8 ॥

महीं मूलाधारे कमपि मणिपूरे हुतवहं

स्थितं स्वाधिष्ठाने हृदि मरुतमाकाशमुपरि ।

मनोऽपि भ्रूमध्ये सकलमपि भित्वा कुलपथं

सहस्रारे पद्मे सह रहसि पत्या विहरसे ॥ 9 ॥

सुधाधारासारैश्चरणयुगलान्तर्विगलितैः

प्रपञ्चं सिञ्चन्ती पुनरपि रसाम्नायमहसः ।

अवाप्य स्वां भूमिं भुजगनिभमध्युष्टवलयं

स्वमात्मानं कृत्वा स्वपिषि कुलकुण्डे कुहरिणि ॥ 10 ॥

चतुर्भिः श्रीकण्ठैः शिवयुवतिभिः पञ्चभिरपि

प्रभिन्नाभिः शम्भोर्नवभिरपि मूलप्रकृतिभिः ।

चतुश्चत्वारिंशद्वसुदलकलाश्रत्रिवलय- [त्रयश्चत्वारि]

त्रिरेखाभिः सार्धं तव शरणकोणाः परिणताः ॥ 11 ॥ [चरणकोणाः, भवनकिणाः]

त्वदीयं सौन्दर्यं तुहिनगिरिकन्ये तुलयितुं

कवीन्द्राः कल्पन्ते कथमपि विरिञ्चिप्रभृतयः ।

यदालोकौत्सुक्यादमरललना यान्ति मनसा

तपोभिर्दुष्प्रापामपि गिरिशसायुज्यपदवीम् ॥ 12 ॥

नरं वर्षीयांसं नयनविरसं नर्मसु जडं

तवापाङ्गालोके पतितमनुधावन्ति शतशः ।

गलद्वेणीबन्धाः कुचकलशविस्रस्तसिचया

हठात् त्रुट्यत्काञ्च्यो विगलितदुकूला युवतयः ॥ 13 ॥

क्षितौ षट्पञ्चाशद् द्विसमधिकपञ्चाशदुदके

हुताशे द्वाषष्टिश्चतुरधिकपञ्चाशदनिले ।

दिवि द्विष्षट्त्रिंशन्मनसि च चतुष्षष्टिरिति ये

मयूखास्तेषामप्युपरि तव पादाम्बुजयुगम् ॥ 14 ॥

शरज्ज्योत्स्नाशुद्धां शशियुतजटाजूटमकुटां

वरत्रासत्राणस्फटिकघटिकापुस्तककराम् ।

सकृन्न त्वा नत्वा कथमिव सतां सन्न्निदधते

मधुक्षीरद्राक्षामधुरिमधुरीणाः भणितयः ॥ 15॥ [फणितयः]

कवीन्द्राणां चेतःकमलवनबालातपरुचिं

भजन्ते ये सन्तः कतिचिदरुणामेव भवतीम् ।

विरिञ्चिप्रेयस्यास्तरुणतरशृङ्गारलहरी-

गभीराभिर्वाग्भिर्विदधति सतां रञ्जनममी ॥ 16 ॥

सवित्रीभिर्वाचां शशिमणिशिलाभङ्गरुचिभिः

वशिन्याद्याभिस्त्वां सह जननि सञ्चिन्तयति यः ।

स कर्ता काव्यानां भवति महतां भङ्गिरुचिभिः

वचोभिर्वाग्देवीवदनकमलामोदमधुरैः ॥ 17 ॥

तनुच्छायाभिस्ते तरुणतरणिश्रीसरणिभिः

दिवं सर्वामुर्वीमरुणिमनि मग्नां स्मरति यः ।

भवन्त्यस्य त्रस्यद्वनहरिणशालीननयनाः

सहोर्वश्या वश्याः कति कति न गीर्वाणगणिकाः ॥ 18 ॥

मुखं बिन्दुं कृत्वा कुचयुगमधस्तस्य तदधो

हरार्धं ध्यायेद्यो हरमहिषि ते मन्मथकलाम् ।

स सद्यः सङ्क्षोभं नयति वनिता इत्यतिलघु

त्रिलोकीमप्याशु भ्रमयति रवीन्दुस्तनयुगाम् ॥ 19 ॥

किरन्तीमङ्गेभ्यः किरणनिकुरम्बामृतरसं

हृदि त्वामाधत्ते हिमकरशिलामूर्तिमिव यः ।

स सर्पाणां दर्पं शमयति शकुन्ताधिप इव

ज्वरप्लुष्टान् दृष्ट्या सुखयति सुधाधारसिरया ॥ 20 ॥

तटिल्लेखातन्वीं तपनशशिवैश्वानरमयीं

निषण्णां षण्णामप्युपरि कमलानां तव कलाम् ।

महापद्माटव्यां मृदितमलमायेन मनसा

महान्तः पश्यन्तो दधति परमाह्लादलहरीम् ॥ 21 ॥

भवानि त्वं दासे मयि वितर दृष्टिं सकरुणा-

मिति स्तोतुं वाञ्छन् कथयति भवानि त्वमिति यः ।

तदैव त्वं तस्मै दिशसि निजसायुज्यपदवीं

मुकुन्दब्रह्मेन्द्रस्फुटमकुटनीराजितपदाम् ॥ 22 ॥

त्वया हृत्वा वामं वपुरपरि-तृप्तेन मनसा

शरीरार्धं शम्भोरपरमपि शङ्के हृतमभूत् ।

यदेतत्त्वद्रूपं सकलमरुणाभं त्रिनयनं

कुचाभ्यामानम्रं कुटिलशशिचूडालमकुटम् ॥ 23 ॥

जगत्सूते धाता हरिरवति रुद्रः क्षपयते

तिरस्कुर्वन्नेतत्स्वमपि वपुरीशस्तिरयति ।

सदापूर्वः सर्वं तदिदमनुगृह्णाति च शिव-

स्तवाज्ञामालम्ब्य क्षणचलितयोर्भ्रूलतिकयोः ॥ 24 ॥

त्रयाणां देवानां त्रिगुणजनितानां तव शिवे

भवेत् पूजा पूजा तव चरणयोर्या विरचिता ।

तथा हि त्वत्पादोद्वहनमणिपीठस्य निकटे

स्थिता ह्येते शश्वन्मुकुलितकरोत्तंसमकुटाः ॥ 25 ॥

विरिञ्चिः पञ्चत्वं व्रजति हरिराप्नोति विरतिं

विनाशं कीनाशो भजति धनदो याति निधनम् ।

वितन्द्री माहेन्द्री विततिरपि सम्मीलितदृशा

महासंहारेऽस्मिन् विहरति सति त्वत्पतिरसौ ॥ 26 ॥

जपो जल्पः शिल्पं सकलमपि मुद्राविरचना

गतिः प्रादक्षिण्यक्रमणमशनाद्याहुतिविधिः ।

प्रणामस्संवेशस्सुखमखिलमात्मार्पणदृशा

सपर्यापर्यायस्तव भवतु यन्मे विलसितम् ॥ 27 ॥

सुधामप्यास्वाद्य प्रतिभयजरामृत्युहरिणीं

विपद्यन्ते विश्वे विधिशतमखाद्या दिविषदः ।

करालं यत्क्ष्वेलं कबलितवतः कालकलना

न शम्भोस्तन्मूलं तव जननि ताटङ्कमहिमा ॥ 28 ॥

किरीटं वैरिञ्चं परिहर पुरः कैटभभिदः

कठोरे कोटीरे स्खलसि जहि जम्भारिमुकुटम् ।

प्रणम्रेष्वेतेषु प्रसभमुपयातस्य भवनं

भवस्याभ्युत्थाने तव परिजनोक्तिर्विजयते ॥ 29 ॥

स्वदेहोद्भूताभिर्घृणिभिरणिमाद्याभिरभितो

निषेव्ये नित्ये त्वामहमिति सदा भावयति यः ।

किमाश्चर्यं तस्य त्रिनयनसमृद्धिं तृणयतो

महासंवर्ताग्निर्विरचयति निराजनविधिम् ॥ 30 ॥

चतुष्षष्ट्या तन्त्रैः सकलमतिसन्धाय भुवनं

स्थितस्तत्तत्सिद्धिप्रसवपरतन्त्रैः पशुपतिः ।

पुनस्त्वन्निर्बन्धादखिलपुरुषार्थैकघटना-

स्वतन्त्रं ते तन्त्रं क्षितितलमवातीतरदिदम् ॥ 31 ॥

शिवः शक्तिः कामः क्षितिरथ रविः शीतकिरणः

स्मरो हंसः शक्रस्तदनु च परामारहरयः ।

अमी हृल्लेखाभिस्तिसृभिरवसानेषु घटिता

भजन्ते वर्णास्ते तव जननि नामावयवताम् ॥ 32 ॥

स्मरं योनिं लक्ष्मीं त्रितयमिदमादौ तव मनो-

र्निधायैके नित्ये निरवधिमहाभोगरसिकाः ।

भजन्ति त्वां चिन्तामणिगुननिबद्धाक्षवलयाः

शिवाग्नौ जुह्वन्तः सुरभिघृतधाराहुतिशतैः ॥ 33 ॥

शरीरं त्वं शम्भोः शशिमिहिरवक्षोरुहयुगं

तवात्मानं मन्ये भगवति नवात्मानमनघम् ।

अतश्शेषश्शेषीत्ययमुभयसाधारणतया

स्थितः सम्बन्धो वां समरसपरानन्दपरयोः ॥ 34 ॥

मनस्त्वं व्योम त्वं मरुदसि मरुत्सारथिरसि

त्वमापस्त्वं भूमिस्त्वयि परिणतायां न हि परम् ।

त्वमेव स्वात्मानं परिणमयितुं विश्ववपुषा

चिदानन्दाकारं शिवयुवति भावेन बिभृषे ॥ 35 ॥

तवाज्ञाचक्रस्थं तपनशशिकोटिद्युतिधरं

परं शम्भुं वन्दे परिमिलितपार्श्वं परचिता ।

यमाराध्यन् भक्त्या रविशशिशुचीनामविषये

निरालोकेऽलोके निवसति हि भालोकभुवने ॥ 36 ॥

विशुद्धौ ते शुद्धस्फटिकविशदं व्योमजनकं

शिवं सेवे देवीमपि शिवसमानव्यवसिताम् ।

ययोः कान्त्या यान्त्याः शशिकिरणसारूप्यसरणे-

विधूतान्तर्ध्वान्ता विलसति चकोरीव जगती ॥ 37 ॥

समुन्मीलत् संवित् कमलमकरन्दैकरसिकं

भजे हंसद्वन्द्वं किमपि महतां मानसचरम् ।

यदालापादष्टादशगुणितविद्यापरिणति-

र्यदादत्ते दोषाद् गुणमखिलमद्भ्यः पय इव ॥ 38 ॥

तव स्वाधिष्ठाने हुतवहमधिष्ठाय निरतं

तमीडे संवर्तं जननि महतीं तां च समयाम् ।

यदालोके लोकान् दहति महति क्रोधकलिते

दयार्द्रा या दृष्टिः शिशिरमुपचारं रचयति ॥ 39 ॥

तटित्त्वन्तं शक्त्या तिमिरपरिपन्थिस्फुरणया

स्फुरन्नानारत्नाभरणपरिणद्धेन्द्रधनुषम् ।

तव श्यामं मेघं कमपि मणिपूरैकशरणं

निषेवे वर्षन्तं हरमिहिरतप्तं त्रिभुवनम् ॥ 40 ॥

तवाधारे मूले सह समयया लास्यपरया

नवात्मानं मन्ये नवरसमहाताण्डवनटम् ।

उभाभ्यामेताभ्यामुदयविधिमुद्दिश्य दयया

सनाथाभ्यां जज्ञे जनकजननीमज्जगदिदम् ॥ 41 ॥

द्वितीय भागः - सौन्दर्य लहरी

गतैर्माणिक्यत्वं गगनमणिभिः सान्द्रघटितं

किरीटं ते हैमं हिमगिरिसुते कीर्तयति यः ।

स नीडेयच्छायाच्छुरणशबलं चन्द्रशकलं

धनुः शौनासीरं किमिति न निबध्नाति धिषणाम् ॥ 42 ॥

धुनोतु ध्वान्तं नस्तुलितदलितेन्दीवरवनं

घनस्निग्धश्लक्ष्णं चिकुरनिकुरुम्बं तव शिवे ।

यदीयं सौरभ्यं सहजमुपलब्धुं सुमनसो

वसन्त्यस्मिन् मन्ये वलमथनवाटीविटपिनाम् ॥ 43 ॥

तनोतु क्षेमं नस्तव वदनसौन्दर्यलहरी-

परीवाहस्रोतःसरणिरिव सीमन्तसरणिः ।

वहन्ती सिन्दूरं प्रबलकबरीभारतिमिर-

द्विषां बृन्दैर्बन्दीकृतमिव नवीनार्ककिरणम् ॥ 44 ॥

अरालैः स्वाभाव्यादलिकलभसश्रीभिरलकैः

परीतं ते वक्त्रं परिहसति पङ्केरुहरुचिम् ।

दरस्मेरे यस्मिन् दशनरुचिकिञ्जल्करुचिरे

सुगन्धौ माद्यन्ति स्मरदहनचक्षुर्मधुलिहः ॥ 45 ॥

ललाटं लावण्यद्युतिविमलमाभाति तव य-

द्द्वितीयं तन्मन्ये मकुटघटितं चन्द्रशकलम् ।

विपर्यासन्यासादुभयमपि सम्भूय च मिथः

सुधालेपस्यूतिः परिणमति राकाहिमकरः ॥ 46 ॥

भ्रुवौ भुग्ने किञ्चिद्भुवनभयभङ्गव्यसनिनि

त्वदीये नेत्राभ्यां मधुकररुचिभ्यां धृतगुणम् ।

धनुर्मन्ये सव्येतरकरगृहीतं रतिपतेः

प्रकोष्ठे मुष्टौ च स्थगयति निगूढान्तरमुमे ॥ 47 ॥

अहः सूते सव्यं तव नयनमर्कात्मकतया

त्रियामां वामं ते सृजति रजनीनायकतया ।

तृतीया ते दृष्टिर्दरदलितहेमाम्बुजरुचिः

समाधत्ते सन्ध्यां दिवसनिशयोरन्तरचरीम् ॥ 48 ॥

विशाला कल्याणी स्फुटरुचिरयोध्या कुवलयैः

कृपाधाराधारा किमपि मधुराभोगवतिका ।

अवन्ती दृष्टिस्ते बहुनगरविस्तारविजया

ध्रुवं तत्तन्नामव्यवहरणयोग्या विजयते ॥ 49 ॥

कवीनां सन्दर्भस्तबकमकरन्दैकरसिकं

कटाक्षव्याक्षेपभ्रमरकलभौ कर्णयुगलम् ।

अमुञ्चन्तौ दृष्ट्वा तव नवरसास्वादतरला-

वसूयासंसर्गादलिकनयनं किञ्चिदरुणम् ॥ 50 ॥

शिवे शृङ्गारार्द्रा तदितरजने कुत्सनपरा

सरोषा गङ्गायां गिरिशचरिते विस्मयवती ।

हराहिभ्यो भीता सरसिरुहसौभाग्यजननी (जयिनी)

सखीषु स्मेरा ते मयि जननी दृष्टिः सकरुणा ॥ 51 ॥

गते कर्णाभ्यर्णं गरुत इव पक्ष्माणि दधती

पुरां भेत्तुश्चित्तप्रशमरसविद्रावणफले ।

इमे नेत्रे गोत्राधरपतिकुलोत्तंसकलिके

तवाकर्णाकृष्टस्मरशरविलासं कलयतः ॥ 52 ॥

विभक्तत्रैवर्ण्यं व्यतिकरितलीलाञ्जनतया

विभाति त्वन्नेत्रत्रितयमिदमीशानदयिते ।

पुनः स्रष्टुं देवान् द्रुहिणहरिरुद्रानुपरतान्

रजः सत्त्वं बिभ्रत्तम इति गुणानां त्रयमिव ॥ 53 ॥

पवित्रीकर्तुं नः पशुपतिपराधीनहृदये

दयामित्रैर्नेत्रैररुणधवलश्यामरुचिभिः ।

नदः शोणो गङ्गा तपनतनयेति ध्रुवममुं

त्रयाणां तीर्थानामुपनयसि सम्भेदमनघम् ॥ 54 ॥

निमेषोन्मेषाभ्यां प्रलयमुदयं याति जगती

तवेत्याहुः सन्तो धरणिधरराजन्यतनये ।

त्वदुन्मेषाज्जातं जगदिदमशेषं प्रलयतः

परित्रातुं शङ्के परिहृतनिमेषास्तव दृशः ॥ 55 ॥

तवापर्णे कर्णेजपनयनपैशुन्यचकिता

निलीयन्ते तोये नियतमनिमेषाः शफरिकाः ।

इयं च श्रीर्बद्धच्छदपुटकवाटं कुवलयम्

जहाति प्रत्यूषे निशि च विघटय्य प्रविशति ॥ 56 ॥

दृशा द्राघीयस्या दरदलितनीलोत्पलरुचा

दवीयांसं दीनं स्नपय कृपया मामपि शिवे ।

अनेनायं धन्यो भवति न च ते हानिरियता

वने वा हर्म्ये वा समकरनिपातो हिमकरः ॥ 57 ॥

अरालं ते पालीयुगलमगराजन्यतनये

न केषामाधत्ते कुसुमशरकोदण्डकुतुकम् ।

तिरश्चीनो यत्र श्रवणपथमुल्लङ्घ्य विलस-

न्नपाङ्गव्यासङ्गो दिशति शरसन्धानधिषणाम् ॥ 58 ॥

स्फुरद्गण्डाभोगप्रतिफलितताटङ्कयुगलं

चतुश्चक्रं मन्ये तव मुखमिदं मन्मथरथम् ।

यमारुह्य द्रुह्यत्यवनिरथमर्केन्दुचरणं

महावीरो मारः प्रमथपतये सज्जितवते ॥ 59 ॥

सरस्वत्याः सूक्तीरमृतलहरीकौशलहरीः

पिबन्त्याः शर्वाणि श्रवणचुलुकाभ्यामविरलम् ।

चमत्कारश्लाघाचलितशिरसः कुण्डलगणो

झणत्कारैस्तारैः प्रतिवचनमाचष्ट इव ते ॥ 60 ॥

असौ नासावंशस्तुहिनगिरिवंशध्वजपटि

त्वदीयो नेदीयः फलतु फलमस्माकमुचितम् ।

वहन्नन्तर्मुक्ताः शिशिरतरनिश्वासगलितं

समृद्ध्या यत्तासां बहिरपि च मुक्तामणिधरः ॥ 61 ॥

प्रकृत्या रक्तायास्तव सुदति दन्तच्छदरुचेः

प्रवक्ष्ये सादृश्यं जनयतु फलं विद्रुमलता ।

न बिम्बं तद्बिम्बप्रतिफलनरागादरुणितं

तुलामध्यारोढुं कथमिव विलज्जेत कलया ॥ 62 ॥

स्मितज्योत्स्नाजालं तव वदनचन्द्रस्य पिबतां

चकोराणामासीदतिरसतया चञ्चुजडिमा ।

अतस्ते शीतांशोरमृतलहरीमम्लरुचयः

पिबन्ति स्वच्छन्दं निशि निशि भृशं काञ्जिकधिया ॥ 63 ॥

अविश्रान्तं पत्युर्गुणगणकथाम्रेडनजपा

जपापुष्पच्छाया तव जननि जिह्वा जयति सा ।

यदग्रासीनायाः स्फटिकदृषदच्छच्छविमयी

सरस्वत्या मूर्तिः परिणमति माणिक्यवपुषा ॥ 64 ॥

रणे जित्वा दैत्यानपहृतशिरस्त्रैः कवचिभिर्-

निवृत्तैश्चण्डांशत्रिपुरहरनिर्माल्यविमुखैः ।

विशाखेन्द्रोपेन्द्रैः शशिविशदकर्पूरशकला

विलीयन्ते मातस्तव वदनताम्बूलकबलाः ॥ 65 ॥

विपञ्च्या गायन्ती विविधमपदानं पशुपतेः

त्वयारब्धे वक्तुं चलितशिरसा साधुवचने ।

तदीयैर्माधुर्यैरपलपिततन्त्रीकलरवां

निजां वीणां वाणी निचुलयति चोलेन निभृतम् ॥ 66 ॥

कराग्रेण स्पृष्टं तुहिनगिरिणा वत्सलतया

गिरीशेनोदस्तं मुहुरधरपानाकुलतया ।

करग्राह्यं शम्भोर्मुखमुकुरवृन्तं गिरिसुते

कथङ्कारं ब्रूमस्तव चिबुकमौपम्यरहितम् ॥ 67 ॥

भुजाश्लेषान् नित्यं पुरदमयितुः कण्टकवती

तव ग्रीवा धत्ते मुखकमलनालश्रियमियम् ।

स्वतः श्वेता कालागुरुबहुलजम्बालमलिना

मृणालीलालित्यं वहति यदधो हारलतिका ॥ 68 ॥

गले रेखास्तिस्रो गतिगमकगीतैकनिपुणे

विवाहव्यानद्धप्रगुणगुणसङ्ख्याप्रतिभुवः ।

विराजन्ते नानाविधमधुररागाकरभुवां

त्रयाणां ग्रामाणां स्थितिनियमसीमान इव ते ॥ 69 ॥

मृणालीमृद्वीनां तव भुजलतानां चतसृणां

चतुर्भिः सौन्दर्यं सरसिजभवः स्तौति वदनैः ।

नखेभ्यः सन्त्रस्यन् प्रथममथनादन्धकरिपो-

श्चतुर्णां शीर्षाणां सममभयहस्तार्पणधिया ॥ 70 ॥

नखानामुद्द्योतैर्नवनलिनरागं विहसतां

कराणां ते कान्तिं कथय कथयामः कथमुमे ।

कयाचिद्वा साम्यं भजतु कलया हन्त कमलं

यदि क्रीडल्लक्ष्मीचरणतललाक्षारसछणम् ॥ 71 ॥

समं देवि स्कन्दद्विपवदनपीतं स्तनयुगं

तवेदं नः खेदं हरतु सततं प्रस्नुतमुखम् ।

यदालोक्याशङ्काकुलितहृदयो हासजनकः

स्वकुम्भौ हेरम्बः परिमृशति हस्तेन झडिति ॥ 72 ॥

अमू ते वक्षोजावमृतरसमाणिक्यकुतुपौ

न सन्देहस्पन्दो नगपतिपताके मनसि नः ।

पिबन्तौ तौ यस्मादविदितवधूसङ्गरसिकौ

कुमारावद्यापि द्विरदवदनक्रौञ्चदलनौ ॥ 73 ॥

वहत्यम्ब स्तम्बेरमदनुजकुम्भप्रकृतिभिः

समारब्धां मुक्तामणिभिरमलां हारलतिकाम् ।

कुचाभोगो बिम्बाधररुचिभिरन्तः शबलितां

प्रतापव्यामिश्रां पुरदमयितुः कीर्तिमिव ते ॥ 74 ॥

तव स्तन्यं मन्ये धरणिधरकन्ये हृदयतः

पयःपारावारः परिवहति सारस्वतमिव ।

दयावत्या दत्तं द्रविडशिशुरास्वाद्य तव यत्

कवीनां प्रौढानामजनि कमनीयः कवयिता ॥ 75 ॥

हरक्रोधज्वालावलिभिरवलीढेन वपुषा

गभीरे ते नाभीसरसि कृतसङ्गो मनसिजः ।

समुत्तस्थौ तस्मादचलतनये धूमलतिका

जनस्तां जानीते तव जननि रोमावलिरिति ॥ 76 ॥

यदेतत् कालिन्दीतनुतरतरङ्गाकृति शिवे

कृशे मध्ये किञ्चिज्जननि तव यद्भाति सुधियाम् ।

विमर्दादन्योऽन्यं कुचकलशयोरन्तरगतं

तनूभूतं व्योम प्रविशदिव नाभिं कुहरिणीम् ॥ 77 ॥

स्थिरो गङ्गावर्तः स्तनमुकुलरोमावलिलता-

कलावालं कुण्डं कुसुमशरतेजोहुतभुजः ।

रतेर्लीलागारं किमपि तव नाभिर्गिरिसुते

बिलद्वारं सिद्धेर्गिरिशनयनानां विजयते ॥ 78 ॥

निसर्गक्षीणस्य स्तनतटभरेण क्लमजुषो

नमन्मूर्तेर्नारीतिलक शनकैस्त्रुट्यत इव ।

चिरं ते मध्यस्य त्रुटिततटिनीतीरतरुणा

समावस्थास्थेम्नो भवतु कुशलं शैलतनये ॥ 79 ॥

कुचौ सद्यःस्विद्यत्तटघटितकूर्पासभिदुरौ

कषन्तौ दोर्मूले कनककलशाभौ कलयता ।

तव त्रातुं भङ्गादलमिति वलग्नं तनुभुवा

त्रिधा नद्धं देवि त्रिवलि लवलीवल्लिभिरिव ॥ 80 ॥

गुरुत्वं विस्तारं क्षितिधरपतिः पार्वति निजा-

न्नितम्बादाच्छिद्य त्वयि हरणरूपेण निदधे ।

अतस्ते विस्तीर्णो गुरुरयमशेषां वसुमतीं

नितम्बप्राग्भारः स्थगयति लघुत्वं नयति च ॥ 81 ॥

करीन्द्राणां शुण्डान् कनककदलीकाण्डपटली-

मुभाभ्यामूरुभ्यामुभयमपि निर्जित्य भवती ।

सुवृत्ताभ्यां पत्युः प्रणतिकठिनाभ्यां गिरिसुते

विधिज्ञे जानुभ्यां विबुधकरिकुम्भद्वयमसि ॥ 82 ॥

पराजेतुं रुद्रं द्विगुणशरगर्भौ गिरिसुते

निषङ्गौ जङ्घे ते विषमविशिखो बाढमकृत ।

यदग्रे दृश्यन्ते दशशरफलाः पादयुगली-

नखाग्रच्छद्मानः सुरमकुटशाणैकनिशिताः ॥ 83 ॥

श्रुतीनां मूर्धानो दधति तव यौ शेखरतया

ममाप्येतौ मातः शिरसि दयया धेहि चरणौ ।

ययोः पाद्यं पाथः पशुपतिजटाजूटतटिनी

ययोर्लाक्षालक्ष्मीररुणहरिचूडामणिरुचिः ॥ 84 ॥

नमोवाकं ब्रूमो नयनरमणीयाय पदयो-

स्तवास्मै द्वन्द्वाय स्फुटरुचिरसालक्तकवते ।

असूयत्यत्यन्तं यदभिहननाय स्पृहयते

पशूनामीशानः प्रमदवनकङ्केलितरवे ॥ 85 ॥

मृषा कृत्वा गोत्रस्खलनमथ वैलक्ष्यनमितं

ललाटे भर्तारं चरणकमले ताडयति ते ।

चिरादन्तःशल्यं दहनकृतमुन्मूलितवता

तुलाकोटिक्वाणैः किलिकिलितमीशानरिपुणा ॥ 86 ॥

हिमानीहन्तव्यं हिमगिरिनिवासैकचतुरौ

निशायां निद्राणं निशि चरमभागे च विशदौ ।

वरं लक्ष्मीपात्रं श्रियमतिसृजन्तौ समयिनां

सरोजं त्वत्पादौ जननि जयतश्चित्रमिह किम् ॥ 87 ॥

पदं ते कीर्तीनां प्रपदमपदं देवि विपदां

कथं नीतं सद्भिः कठिनकमठीकर्परतुलाम् ।

कथं वा बाहुभ्यामुपयमनकाले पुरभिदा

यदादाय न्यस्तं दृषदि दयमानेन मनसा ॥ 88 ॥

नखैर्नाकस्त्रीणां करकमलसङ्कोचशशिभि-

स्तरूणां दिव्यानां हसत इव ते चण्डि चरणौ ।

फलानि स्वःस्थेभ्यः किसलयकराग्रेण ददतां

दरिद्रेभ्यो भद्रां श्रियमनिशमह्नाय ददतौ ॥ 89 ॥

ददाने दीनेभ्यः श्रियमनिशमाशानुसदृशी-

ममन्दं सौन्दर्यप्रकरमकरन्दं विकिरति ।

तवास्मिन् मन्दारस्तबकसुभगे यातु चरणे

निमज्जन्मज्जीवः करणचरणः षट्चरणताम् ॥ 90 ॥

पदन्यासक्रीडापरिचयमिवारब्धुमनसः

स्खलन्तस्ते खेलं भवनकलहंसा न जहति ।

अतस्तेषां शिक्षां सुभगमणिमञ्जीररणित-

च्छलादाचक्षाणं चरणकमलं चारुचरिते ॥ 91 ॥

गतास्ते मञ्चत्वं द्रुहिणहरिरुद्रेश्वरभृतः

शिवः स्वच्छच्छायाघटितकपटप्रच्छदपटः ।

त्वदीयानां भासां प्रतिफलनरागारुणतया

शरीरी शृङ्गारो रस इव दृशां दोग्धि कुतुकम् ॥ 92 ॥

अराला केशेषु प्रकृतिसरला मन्दहसिते

शिरीषाभा चित्ते दृषदुपलशोभा कुचतटे ।

भृशं तन्वी मध्ये पृथुरुरसिजारोहविषये

जगत्त्रातुं शम्भोर्जयति करुणा काचिदरुणा ॥ 93 ॥

कलङ्कः कस्तूरी रजनिकरबिम्बं जलमयं

कलाभिः कर्पूरैर्मरकतकरण्डं निबिडितम् ।

अतस्त्वद्भोगेन प्रतिदिनमिदं रिक्तकुहरं

विधिर्भूयो भूयो निबिडयति नूनं तव कृते ॥ 94 ॥

पुरारातेरन्तःपुरमसि ततस्त्वच्चरणयोः

सपर्यामर्यादा तरलकरणानामसुलभा ।

तथा ह्येते नीताः शतमखमुखाः सिद्धिमतुलां

तव द्वारोपान्तस्थितिभिरणिमाद्याभिरमराः ॥ 95 ॥

कलत्रं वैधात्रं कतिकति भजन्ते न कवयः

श्रियो देव्याः को वा न भवति पतिः कैरपि धनैः ।

महादेवं हित्वा तव सति सतीनामचरमे

कुचाभ्यामासङ्गः कुरवकतरोरप्यसुलभः ॥ 96 ॥

गिरामाहुर्देवीं द्रुहिणगृहिणीमागमविदो

हरेः पत्नीं पद्मां हरसहचरीमद्रितनयाम् ।

तुरीया कापि त्वं दुरधिगमनिःसीममहिमा

महामाया विश्वं भ्रमयसि परब्रह्ममहिषि ॥ 97 ॥

कदा काले मातः कथय कलितालक्तकरसं

पिबेयं विद्यार्थी तव चरणनिर्णेजनजलम् ।

प्रकृत्या मूकानामपि च कविताकारणतया

कदा धत्ते वाणीमुखकमलताम्बूलरसताम् ॥ 98 ॥

सरस्वत्या लक्ष्म्या विधिहरिसपत्नो विहरते

रतेः पातिव्रत्यं शिथिलयति रम्येण वपुषा ।

चिरं जीवन्नेव क्षपितपशुपाशव्यतिकरः

परानन्दाभिख्यं रसयति रसं त्वद्भजनवान् ॥ 99 ॥

प्रदीपज्वालाभिर्दिवसकरनीराजनविधिः

सुधासूतेश्चन्द्रोपलजललवैरर्घ्यरचना ।

स्वकीयैरम्भोभिः सलिलनिधिसौहित्यकरणं

त्वदीयाभिर्वाग्भिस्तव जननि वाचां स्तुतिरियम् ॥ 100 ॥

सौन्दर्यलहरि मुख्यस्तोत्रं संवार्तदायकम् ।

भगवद्पाद सन्क्लुप्तं पठेन् मुक्तौ भवेन्नरः ॥

॥ इति श्रीमत्परमहंसपरिव्राजकाचार्यस्य

श्रीगोविन्दभगवत्पूज्यपादशिष्यस्य

श्रीमच्छङ्करभगवतः कृतौ सौन्दर्यलहरी सम्पूर्णा ॥

॥ ॐ तत्सत् ॥

(अनुबन्धः)

समानीतः पद्भ्यां मणिमुकुरतामम्बरमणि-

र्भयादास्यादन्तःस्तिमितकिरणश्रेणिमसृणः ।

(पाठभेदः - भयादास्य स्निग्धस्त्मित, भयादास्यस्यान्तःस्त्मित)

दधाति त्वद्वक्त्रम्प्रतिफलनमश्रान्तविकचं

निरातङ्कं चन्द्रान्निजहृदयपङ्केरुहमिव ॥ 101 ॥

समुद्भूतस्थूलस्तनभरमुरश्चारु हसितं

कटाक्षे कन्दर्पः कतिचन कदम्बद्युति वपुः ।

हरस्य त्वद्भ्रान्तिं मनसि जनयन्ति स्म विमलाः

पाठभेदः - जनयामास मदनो, जनयन्तः समतुलां, जनयन्ता सुवदने

भवत्या ये भक्ताः परिणतिरमीषामियमुमे ॥ 102 ॥

निधे नित्यस्मेरे निरवधिगुणे नीतिनिपुणे

निराघातज्ञाने नियमपरचित्तैकनिलये ।

नियत्या निर्मुक्ते निखिलनिगमान्तस्तुतिपदे

निरातङ्के नित्ये निगमय ममापि स्तुतिमिमाम् ॥ 103 ॥