𑌪𑍍𑌰𑌥𑌮 𑌭𑌾𑌗𑌃 - 𑌆𑌨𑌨𑍍𑌦 𑌲𑌹𑌰𑌿
𑌭𑍁𑌮𑍗𑌸𑍍𑌖𑌲𑌿𑌤 𑌪𑌾𑌦𑌾𑌨𑌾𑌂 𑌭𑍂𑌮𑌿𑌰𑍇𑌵𑌾 𑌵𑌲𑌮𑍍𑌬𑌨𑌮𑍍 ।
𑌤𑍍𑌵𑌯𑍀 𑌜𑌾𑌤𑌾 𑌪𑌰𑌾𑌧𑌾𑌨𑌾𑌂 𑌤𑍍𑌵𑌮𑍇𑌵 𑌶𑌰𑌣𑌂 𑌶𑌿𑌵𑍇 ॥
𑌶𑌿𑌵𑌃 𑌶𑌕𑍍𑌤𑍍𑌯𑌾 𑌯𑍁𑌕𑍍𑌤𑍋 𑌯𑌦𑌿 𑌭𑌵𑌤𑌿 𑌶𑌕𑍍𑌤𑌃 𑌪𑍍𑌰𑌭𑌵𑌿𑌤𑍁𑌂
𑌨 𑌚𑍇𑌦𑍇𑌵𑌂 𑌦𑍇𑌵𑍋 𑌨 𑌖𑌲𑍁 𑌕𑍁𑌶𑌲𑌃 𑌸𑍍𑌪𑌨𑍍𑌦𑌿𑌤𑍁𑌮𑌪𑌿 ।
𑌅𑌤𑌸𑍍𑌤𑍍𑌵𑌾𑌮𑌾𑌰𑌾𑌧𑍍𑌯𑌾𑌂 𑌹𑌰𑌿𑌹𑌰𑌵𑌿𑌰𑌿𑌞𑍍𑌚𑌾𑌦𑌿𑌭𑌿𑌰𑌪𑌿
𑌪𑍍𑌰𑌣𑌨𑍍𑌤𑍁𑌂 𑌸𑍍𑌤𑍋𑌤𑍁𑌂 𑌵𑌾 𑌕𑌥𑌮𑌕𑍃𑌤𑌪𑍁𑌣𑍍𑌯𑌃 𑌪𑍍𑌰𑌭𑌵𑌤𑌿 ॥ 1 ॥
𑌤𑌨𑍀𑌯𑌾𑌂𑌸𑌂 𑌪𑌾𑌂𑌸𑍁𑌂 𑌤𑌵 𑌚𑌰𑌣𑌪𑌙𑍍𑌕𑍇𑌰𑍁𑌹𑌭𑌵𑌂
𑌵𑌿𑌰𑌿𑌞𑍍𑌚𑌿𑌸𑍍𑌸𑌞𑍍𑌚𑌿𑌨𑍍𑌵𑌨𑍍 𑌵𑌿𑌰𑌚𑌯𑌤𑌿 𑌲𑍋𑌕𑌾𑌨𑌵𑌿𑌕𑌲𑌮𑍍 ।
𑌵𑌹𑌤𑍍𑌯𑍇𑌨𑌂 𑌶𑍗𑌰𑌿𑌃 𑌕𑌥𑌮𑌪𑌿 𑌸𑌹𑌸𑍍𑌰𑍇𑌣 𑌶𑌿𑌰𑌸𑌾𑌂
𑌹𑌰𑌸𑍍𑌸𑌙𑍍𑌕𑍍𑌷𑍁𑌦𑍍𑌯𑍈𑌨𑌂 𑌭𑌜𑌤𑌿 𑌭𑌸𑌿𑌤𑍋𑌦𑍍𑌧𑍂𑌲𑌨𑌵𑌿𑌧𑌿𑌮𑍍 ॥ 2 ॥
𑌅𑌵𑌿𑌦𑍍𑌯𑌾𑌨𑌾𑌮𑌨𑍍𑌤-𑌸𑍍𑌤𑌿𑌮𑌿𑌰-𑌮𑌿𑌹𑌿𑌰𑌦𑍍𑌵𑍀𑌪𑌨𑌗𑌰𑍀
𑌜𑌡𑌾𑌨𑌾𑌂 𑌚𑍈𑌤𑌨𑍍𑌯-𑌸𑍍𑌤𑌬𑌕-𑌮𑌕𑌰𑌨𑍍𑌦-𑌸𑍍𑌰𑍁𑌤𑌿𑌝𑌰𑍀 ।
𑌦𑌰𑌿𑌦𑍍𑌰𑌾𑌣𑌾𑌂 𑌚𑌿𑌨𑍍𑌤𑌾𑌮𑌣𑌿𑌗𑍁𑌣𑌨𑌿𑌕𑌾 𑌜𑌨𑍍𑌮𑌜𑌲𑌧𑍗
𑌨𑌿𑌮𑌗𑍍𑌨𑌾𑌨𑌾𑌂 𑌦𑌂𑌷𑍍𑌟𑍍𑌰𑌾 𑌮𑍁𑌰𑌰𑌿𑌪𑍁-𑌵𑌰𑌾𑌹𑌸𑍍𑌯 𑌭𑌵𑌤𑌿 ॥ 3 ॥
𑌤𑍍𑌵𑌦𑌨𑍍𑌯𑌃 𑌪𑌾𑌣𑌿𑌭𑍍𑌯𑌾𑌮𑌭𑌯𑌵𑌰𑌦𑍋 𑌦𑍈𑌵𑌤𑌗𑌣𑌃
𑌤𑍍𑌵𑌮𑍇𑌕𑌾 𑌨𑍈𑌵𑌾𑌸𑌿 𑌪𑍍𑌰𑌕𑌟𑌿𑌤𑌵𑌰𑌾𑌭𑍀𑌤𑍍𑌯𑌭𑌿𑌨𑌯𑌾 ।
𑌭𑌯𑌾𑌤𑍍 𑌤𑍍𑌰𑌾𑌤𑍁𑌂 𑌦𑌾𑌤𑍁𑌂 𑌫𑌲𑌮𑌪𑌿 𑌚 𑌵𑌾𑌞𑍍𑌛𑌾𑌸𑌮𑌧𑌿𑌕𑌂
𑌶𑌰𑌣𑍍𑌯𑍇 𑌲𑍋𑌕𑌾𑌨𑌾𑌂 𑌤𑌵 𑌹𑌿 𑌚𑌰𑌣𑌾𑌵𑍇𑌵 𑌨𑌿𑌪𑍁𑌣𑍗 ॥ 4 ॥
𑌹𑌰𑌿𑌸𑍍𑌤𑍍𑌵𑌾𑌮𑌾𑌰𑌾𑌧𑍍𑌯 𑌪𑍍𑌰𑌣𑌤𑌜𑌨𑌸𑍗𑌭𑌾𑌗𑍍𑌯𑌜𑌨𑌨𑍀𑌂
𑌪𑍁𑌰𑌾 𑌨𑌾𑌰𑍀 𑌭𑍂𑌤𑍍𑌵𑌾 𑌪𑍁𑌰𑌰𑌿𑌪𑍁𑌮𑌪𑌿 𑌕𑍍𑌷𑍋𑌭𑌮𑌨𑌯𑌤𑍍 ।
𑌸𑍍𑌮𑌰𑍋𑌽𑌪𑌿 𑌤𑍍𑌵𑌾𑌂 𑌨𑌤𑍍𑌵𑌾 𑌰𑌤𑌿𑌨𑌯𑌨𑌲𑍇𑌹𑍍𑌯𑍇𑌨 𑌵𑌪𑍁𑌷𑌾
𑌮𑍁𑌨𑍀𑌨𑌾𑌮𑌪𑍍𑌯𑌨𑍍𑌤𑌃 𑌪𑍍𑌰𑌭𑌵𑌤𑌿 𑌹𑌿 𑌮𑍋𑌹𑌾𑌯 𑌮𑌹𑌤𑌾𑌮𑍍 ॥ 5 ॥
𑌧𑌨𑍁𑌃 𑌪𑍗𑌷𑍍𑌪𑌂 𑌮𑍗𑌰𑍍𑌵𑍀 𑌮𑌧𑍁𑌕𑌰𑌮𑌯𑍀 𑌪𑌞𑍍𑌚 𑌵𑌿𑌶𑌿𑌖𑌾𑌃
𑌵𑌸𑌨𑍍𑌤𑌃 𑌸𑌾𑌮𑌨𑍍𑌤𑍋 𑌮𑌲𑌯𑌮𑌰𑍁𑌦𑌾𑌯𑍋𑌧𑌨𑌰𑌥𑌃 ।
𑌤𑌥𑌾𑌪𑍍𑌯𑍇𑌕𑌃 𑌸𑌰𑍍𑌵𑌂 𑌹𑌿𑌮𑌗𑌿𑌰𑌿𑌸𑍁𑌤𑍇 𑌕𑌾𑌮𑌪𑌿 𑌕𑍃𑌪𑌾𑌮𑍍
𑌅𑌪𑌾𑌙𑍍𑌗𑌾𑌤𑍍𑌤𑍇 𑌲𑌬𑍍𑌧𑍍𑌵𑌾 𑌜𑌗𑌦𑌿𑌦-𑌮𑌨𑌙𑍍𑌗𑍋 𑌵𑌿𑌜𑌯𑌤𑍇 ॥ 6 ॥
𑌕𑍍𑌵𑌣𑌤𑍍𑌕𑌾𑌞𑍍𑌚𑍀𑌦𑌾𑌮𑌾 𑌕𑌰𑌿𑌕𑌲𑌭𑌕𑍁𑌮𑍍𑌭𑌸𑍍𑌤𑌨𑌨𑌤𑌾
𑌪𑌰𑌿𑌕𑍍𑌷𑍀𑌣𑌾 𑌮𑌧𑍍𑌯𑍇 𑌪𑌰𑌿𑌣𑌤𑌶𑌰𑌚𑍍𑌚𑌨𑍍𑌦𑍍𑌰𑌵𑌦𑌨𑌾 ।
𑌧𑌨𑍁𑌰𑍍𑌬𑌾𑌣𑌾𑌨𑍍 𑌪𑌾𑌶𑌂 𑌸𑍃𑌣𑌿𑌮𑌪𑌿 𑌦𑌧𑌾𑌨𑌾 𑌕𑌰𑌤𑌲𑍈𑌃
𑌪𑍁𑌰𑌸𑍍𑌤𑌾𑌦𑌾𑌸𑍍𑌤𑌾𑌂 𑌨𑌃 𑌪𑍁𑌰𑌮𑌥𑌿𑌤𑍁𑌰𑌾𑌹𑍋𑌪𑍁𑌰𑍁𑌷𑌿𑌕𑌾 ॥ 7 ॥
𑌸𑍁𑌧𑌾𑌸𑌿𑌨𑍍𑌧𑍋𑌰𑍍𑌮𑌧𑍍𑌯𑍇 𑌸𑍁𑌰𑌵𑌿𑌟𑌪𑌿𑌵𑌾𑌟𑍀𑌪𑌰𑌿𑌵𑍃𑌤𑍇
𑌮𑌣𑌿𑌦𑍍𑌵𑍀𑌪𑍇 𑌨𑍀𑌪𑍋𑌪𑌵𑌨𑌵𑌤𑌿 𑌚𑌿𑌨𑍍𑌤𑌾𑌮𑌣𑌿𑌗𑍃𑌹𑍇 ।
𑌶𑌿𑌵𑌾𑌕𑌾𑌰𑍇 𑌮𑌞𑍍𑌚𑍇 𑌪𑌰𑌮𑌶𑌿𑌵𑌪𑌰𑍍𑌯𑌙𑍍𑌕𑌨𑌿𑌲𑌯𑌾𑌂
𑌭𑌜𑌨𑍍𑌤𑌿 𑌤𑍍𑌵𑌾𑌂 𑌧𑌨𑍍𑌯𑌾𑌃 𑌕𑌤𑌿𑌚𑌨 𑌚𑌿𑌦𑌾𑌨𑌨𑍍𑌦𑌲𑌹𑌰𑍀𑌮𑍍 ॥ 8 ॥
𑌮𑌹𑍀𑌂 𑌮𑍂𑌲𑌾𑌧𑌾𑌰𑍇 𑌕𑌮𑌪𑌿 𑌮𑌣𑌿𑌪𑍂𑌰𑍇 𑌹𑍁𑌤𑌵𑌹𑌂
𑌸𑍍𑌥𑌿𑌤𑌂 𑌸𑍍𑌵𑌾𑌧𑌿𑌷𑍍𑌠𑌾𑌨𑍇 𑌹𑍃𑌦𑌿 𑌮𑌰𑍁𑌤𑌮𑌾𑌕𑌾𑌶𑌮𑍁𑌪𑌰𑌿 ।
𑌮𑌨𑍋𑌽𑌪𑌿 𑌭𑍍𑌰𑍂𑌮𑌧𑍍𑌯𑍇 𑌸𑌕𑌲𑌮𑌪𑌿 𑌭𑌿𑌤𑍍𑌵𑌾 𑌕𑍁𑌲𑌪𑌥𑌂
𑌸𑌹𑌸𑍍𑌰𑌾𑌰𑍇 𑌪𑌦𑍍𑌮𑍇 𑌸𑌹 𑌰𑌹𑌸𑌿 𑌪𑌤𑍍𑌯𑌾 𑌵𑌿𑌹𑌰𑌸𑍇 ॥ 9 ॥
𑌸𑍁𑌧𑌾𑌧𑌾𑌰𑌾𑌸𑌾𑌰𑍈𑌶𑍍𑌚𑌰𑌣𑌯𑍁𑌗𑌲𑌾𑌨𑍍𑌤𑌰𑍍𑌵𑌿𑌗𑌲𑌿𑌤𑍈𑌃
𑌪𑍍𑌰𑌪𑌞𑍍𑌚𑌂 𑌸𑌿𑌞𑍍𑌚𑌨𑍍𑌤𑍀 𑌪𑍁𑌨𑌰𑌪𑌿 𑌰𑌸𑌾𑌮𑍍𑌨𑌾𑌯𑌮𑌹𑌸𑌃 ।
𑌅𑌵𑌾𑌪𑍍𑌯 𑌸𑍍𑌵𑌾𑌂 𑌭𑍂𑌮𑌿𑌂 𑌭𑍁𑌜𑌗𑌨𑌿𑌭𑌮𑌧𑍍𑌯𑍁𑌷𑍍𑌟𑌵𑌲𑌯𑌂
𑌸𑍍𑌵𑌮𑌾𑌤𑍍𑌮𑌾𑌨𑌂 𑌕𑍃𑌤𑍍𑌵𑌾 𑌸𑍍𑌵𑌪𑌿𑌷𑌿 𑌕𑍁𑌲𑌕𑍁𑌣𑍍𑌡𑍇 𑌕𑍁𑌹𑌰𑌿𑌣𑌿 ॥ 10 ॥
𑌚𑌤𑍁𑌰𑍍𑌭𑌿𑌃 𑌶𑍍𑌰𑍀𑌕𑌣𑍍𑌠𑍈𑌃 𑌶𑌿𑌵𑌯𑍁𑌵𑌤𑌿𑌭𑌿𑌃 𑌪𑌞𑍍𑌚𑌭𑌿𑌰𑌪𑌿
𑌪𑍍𑌰𑌭𑌿𑌨𑍍𑌨𑌾𑌭𑌿𑌃 𑌶𑌮𑍍𑌭𑍋𑌰𑍍𑌨𑌵𑌭𑌿𑌰𑌪𑌿 𑌮𑍂𑌲𑌪𑍍𑌰𑌕𑍃𑌤𑌿𑌭𑌿𑌃 ।
𑌚𑌤𑍁𑌶𑍍𑌚𑌤𑍍𑌵𑌾𑌰𑌿𑌂𑌶𑌦𑍍𑌵𑌸𑍁𑌦𑌲𑌕𑌲𑌾𑌶𑍍𑌰𑌤𑍍𑌰𑌿𑌵𑌲𑌯- [𑌤𑍍𑌰𑌯𑌶𑍍𑌚𑌤𑍍𑌵𑌾𑌰𑌿]
𑌤𑍍𑌰𑌿𑌰𑍇𑌖𑌾𑌭𑌿𑌃 𑌸𑌾𑌰𑍍𑌧𑌂 𑌤𑌵 𑌶𑌰𑌣𑌕𑍋𑌣𑌾𑌃 𑌪𑌰𑌿𑌣𑌤𑌾𑌃 ॥ 11 ॥ [𑌚𑌰𑌣𑌕𑍋𑌣𑌾𑌃, 𑌭𑌵𑌨𑌕𑌿𑌣𑌾𑌃]
𑌤𑍍𑌵𑌦𑍀𑌯𑌂 𑌸𑍗𑌨𑍍𑌦𑌰𑍍𑌯𑌂 𑌤𑍁𑌹𑌿𑌨𑌗𑌿𑌰𑌿𑌕𑌨𑍍𑌯𑍇 𑌤𑍁𑌲𑌯𑌿𑌤𑍁𑌂
𑌕𑌵𑍀𑌨𑍍𑌦𑍍𑌰𑌾𑌃 𑌕𑌲𑍍𑌪𑌨𑍍𑌤𑍇 𑌕𑌥𑌮𑌪𑌿 𑌵𑌿𑌰𑌿𑌞𑍍𑌚𑌿𑌪𑍍𑌰𑌭𑍃𑌤𑌯𑌃 ।
𑌯𑌦𑌾𑌲𑍋𑌕𑍗𑌤𑍍𑌸𑍁𑌕𑍍𑌯𑌾𑌦𑌮𑌰𑌲𑌲𑌨𑌾 𑌯𑌾𑌨𑍍𑌤𑌿 𑌮𑌨𑌸𑌾
𑌤𑌪𑍋𑌭𑌿𑌰𑍍𑌦𑍁𑌷𑍍𑌪𑍍𑌰𑌾𑌪𑌾𑌮𑌪𑌿 𑌗𑌿𑌰𑌿𑌶𑌸𑌾𑌯𑍁𑌜𑍍𑌯𑌪𑌦𑌵𑍀𑌮𑍍 ॥ 12 ॥
𑌨𑌰𑌂 𑌵𑌰𑍍𑌷𑍀𑌯𑌾𑌂𑌸𑌂 𑌨𑌯𑌨𑌵𑌿𑌰𑌸𑌂 𑌨𑌰𑍍𑌮𑌸𑍁 𑌜𑌡𑌂
𑌤𑌵𑌾𑌪𑌾𑌙𑍍𑌗𑌾𑌲𑍋𑌕𑍇 𑌪𑌤𑌿𑌤𑌮𑌨𑍁𑌧𑌾𑌵𑌨𑍍𑌤𑌿 𑌶𑌤𑌶𑌃 ।
𑌗𑌲𑌦𑍍𑌵𑍇𑌣𑍀𑌬𑌨𑍍𑌧𑌾𑌃 𑌕𑍁𑌚𑌕𑌲𑌶𑌵𑌿𑌸𑍍𑌰𑌸𑍍𑌤𑌸𑌿𑌚𑌯𑌾
𑌹𑌠𑌾𑌤𑍍 𑌤𑍍𑌰𑍁𑌟𑍍𑌯𑌤𑍍𑌕𑌾𑌞𑍍𑌚𑍍𑌯𑍋 𑌵𑌿𑌗𑌲𑌿𑌤𑌦𑍁𑌕𑍂𑌲𑌾 𑌯𑍁𑌵𑌤𑌯𑌃 ॥ 13 ॥
𑌕𑍍𑌷𑌿𑌤𑍗 𑌷𑌟𑍍𑌪𑌞𑍍𑌚𑌾𑌶𑌦𑍍 𑌦𑍍𑌵𑌿𑌸𑌮𑌧𑌿𑌕𑌪𑌞𑍍𑌚𑌾𑌶𑌦𑍁𑌦𑌕𑍇
𑌹𑍁𑌤𑌾𑌶𑍇 𑌦𑍍𑌵𑌾𑌷𑌷𑍍𑌟𑌿𑌶𑍍𑌚𑌤𑍁𑌰𑌧𑌿𑌕𑌪𑌞𑍍𑌚𑌾𑌶𑌦𑌨𑌿𑌲𑍇 ।
𑌦𑌿𑌵𑌿 𑌦𑍍𑌵𑌿𑌷𑍍𑌷𑌟𑍍𑌤𑍍𑌰𑌿𑌂𑌶𑌨𑍍𑌮𑌨𑌸𑌿 𑌚 𑌚𑌤𑍁𑌷𑍍𑌷𑌷𑍍𑌟𑌿𑌰𑌿𑌤𑌿 𑌯𑍇
𑌮𑌯𑍂𑌖𑌾𑌸𑍍𑌤𑍇𑌷𑌾𑌮𑌪𑍍𑌯𑍁𑌪𑌰𑌿 𑌤𑌵 𑌪𑌾𑌦𑌾𑌮𑍍𑌬𑍁𑌜𑌯𑍁𑌗𑌮𑍍 ॥ 14 ॥
𑌶𑌰𑌜𑍍𑌜𑍍𑌯𑍋𑌤𑍍𑌸𑍍𑌨𑌾𑌶𑍁𑌦𑍍𑌧𑌾𑌂 𑌶𑌶𑌿𑌯𑍁𑌤𑌜𑌟𑌾𑌜𑍂𑌟𑌮𑌕𑍁𑌟𑌾𑌂
𑌵𑌰𑌤𑍍𑌰𑌾𑌸𑌤𑍍𑌰𑌾𑌣𑌸𑍍𑌫𑌟𑌿𑌕𑌘𑌟𑌿𑌕𑌾𑌪𑍁𑌸𑍍𑌤𑌕𑌕𑌰𑌾𑌮𑍍 ।
𑌸𑌕𑍃𑌨𑍍𑌨 𑌤𑍍𑌵𑌾 𑌨𑌤𑍍𑌵𑌾 𑌕𑌥𑌮𑌿𑌵 𑌸𑌤𑌾𑌂 𑌸𑌨𑍍𑌨𑍍𑌨𑌿𑌦𑌧𑌤𑍇
𑌮𑌧𑍁𑌕𑍍𑌷𑍀𑌰𑌦𑍍𑌰𑌾𑌕𑍍𑌷𑌾𑌮𑌧𑍁𑌰𑌿𑌮𑌧𑍁𑌰𑍀𑌣𑌾𑌃 𑌭𑌣𑌿𑌤𑌯𑌃 ॥ 15॥ [𑌫𑌣𑌿𑌤𑌯𑌃]
𑌕𑌵𑍀𑌨𑍍𑌦𑍍𑌰𑌾𑌣𑌾𑌂 𑌚𑍇𑌤𑌃𑌕𑌮𑌲𑌵𑌨𑌬𑌾𑌲𑌾𑌤𑌪𑌰𑍁𑌚𑌿𑌂
𑌭𑌜𑌨𑍍𑌤𑍇 𑌯𑍇 𑌸𑌨𑍍𑌤𑌃 𑌕𑌤𑌿𑌚𑌿𑌦𑌰𑍁𑌣𑌾𑌮𑍇𑌵 𑌭𑌵𑌤𑍀𑌮𑍍 ।
𑌵𑌿𑌰𑌿𑌞𑍍𑌚𑌿𑌪𑍍𑌰𑍇𑌯𑌸𑍍𑌯𑌾𑌸𑍍𑌤𑌰𑍁𑌣𑌤𑌰𑌶𑍃𑌙𑍍𑌗𑌾𑌰𑌲𑌹𑌰𑍀-
𑌗𑌭𑍀𑌰𑌾𑌭𑌿𑌰𑍍𑌵𑌾𑌗𑍍𑌭𑌿𑌰𑍍𑌵𑌿𑌦𑌧𑌤𑌿 𑌸𑌤𑌾𑌂 𑌰𑌞𑍍𑌜𑌨𑌮𑌮𑍀 ॥ 16 ॥
𑌸𑌵𑌿𑌤𑍍𑌰𑍀𑌭𑌿𑌰𑍍𑌵𑌾𑌚𑌾𑌂 𑌶𑌶𑌿𑌮𑌣𑌿𑌶𑌿𑌲𑌾𑌭𑌙𑍍𑌗𑌰𑍁𑌚𑌿𑌭𑌿𑌃
𑌵𑌶𑌿𑌨𑍍𑌯𑌾𑌦𑍍𑌯𑌾𑌭𑌿𑌸𑍍𑌤𑍍𑌵𑌾𑌂 𑌸𑌹 𑌜𑌨𑌨𑌿 𑌸𑌞𑍍𑌚𑌿𑌨𑍍𑌤𑌯𑌤𑌿 𑌯𑌃 ।
𑌸 𑌕𑌰𑍍𑌤𑌾 𑌕𑌾𑌵𑍍𑌯𑌾𑌨𑌾𑌂 𑌭𑌵𑌤𑌿 𑌮𑌹𑌤𑌾𑌂 𑌭𑌙𑍍𑌗𑌿𑌰𑍁𑌚𑌿𑌭𑌿𑌃
𑌵𑌚𑍋𑌭𑌿𑌰𑍍𑌵𑌾𑌗𑍍𑌦𑍇𑌵𑍀𑌵𑌦𑌨𑌕𑌮𑌲𑌾𑌮𑍋𑌦𑌮𑌧𑍁𑌰𑍈𑌃 ॥ 17 ॥
𑌤𑌨𑍁𑌚𑍍𑌛𑌾𑌯𑌾𑌭𑌿𑌸𑍍𑌤𑍇 𑌤𑌰𑍁𑌣𑌤𑌰𑌣𑌿𑌶𑍍𑌰𑍀𑌸𑌰𑌣𑌿𑌭𑌿𑌃
𑌦𑌿𑌵𑌂 𑌸𑌰𑍍𑌵𑌾𑌮𑍁𑌰𑍍𑌵𑍀𑌮𑌰𑍁𑌣𑌿𑌮𑌨𑌿 𑌮𑌗𑍍𑌨𑌾𑌂 𑌸𑍍𑌮𑌰𑌤𑌿 𑌯𑌃 ।
𑌭𑌵𑌨𑍍𑌤𑍍𑌯𑌸𑍍𑌯 𑌤𑍍𑌰𑌸𑍍𑌯𑌦𑍍𑌵𑌨𑌹𑌰𑌿𑌣𑌶𑌾𑌲𑍀𑌨𑌨𑌯𑌨𑌾𑌃
𑌸𑌹𑍋𑌰𑍍𑌵𑌶𑍍𑌯𑌾 𑌵𑌶𑍍𑌯𑌾𑌃 𑌕𑌤𑌿 𑌕𑌤𑌿 𑌨 𑌗𑍀𑌰𑍍𑌵𑌾𑌣𑌗𑌣𑌿𑌕𑌾𑌃 ॥ 18 ॥
𑌮𑍁𑌖𑌂 𑌬𑌿𑌨𑍍𑌦𑍁𑌂 𑌕𑍃𑌤𑍍𑌵𑌾 𑌕𑍁𑌚𑌯𑍁𑌗𑌮𑌧𑌸𑍍𑌤𑌸𑍍𑌯 𑌤𑌦𑌧𑍋
𑌹𑌰𑌾𑌰𑍍𑌧𑌂 𑌧𑍍𑌯𑌾𑌯𑍇𑌦𑍍𑌯𑍋 𑌹𑌰𑌮𑌹𑌿𑌷𑌿 𑌤𑍇 𑌮𑌨𑍍𑌮𑌥𑌕𑌲𑌾𑌮𑍍 ।
𑌸 𑌸𑌦𑍍𑌯𑌃 𑌸𑌙𑍍𑌕𑍍𑌷𑍋𑌭𑌂 𑌨𑌯𑌤𑌿 𑌵𑌨𑌿𑌤𑌾 𑌇𑌤𑍍𑌯𑌤𑌿𑌲𑌘𑍁
𑌤𑍍𑌰𑌿𑌲𑍋𑌕𑍀𑌮𑌪𑍍𑌯𑌾𑌶𑍁 𑌭𑍍𑌰𑌮𑌯𑌤𑌿 𑌰𑌵𑍀𑌨𑍍𑌦𑍁𑌸𑍍𑌤𑌨𑌯𑍁𑌗𑌾𑌮𑍍 ॥ 19 ॥
𑌕𑌿𑌰𑌨𑍍𑌤𑍀𑌮𑌙𑍍𑌗𑍇𑌭𑍍𑌯𑌃 𑌕𑌿𑌰𑌣𑌨𑌿𑌕𑍁𑌰𑌮𑍍𑌬𑌾𑌮𑍃𑌤𑌰𑌸𑌂
𑌹𑍃𑌦𑌿 𑌤𑍍𑌵𑌾𑌮𑌾𑌧𑌤𑍍𑌤𑍇 𑌹𑌿𑌮𑌕𑌰𑌶𑌿𑌲𑌾𑌮𑍂𑌰𑍍𑌤𑌿𑌮𑌿𑌵 𑌯𑌃 ।
𑌸 𑌸𑌰𑍍𑌪𑌾𑌣𑌾𑌂 𑌦𑌰𑍍𑌪𑌂 𑌶𑌮𑌯𑌤𑌿 𑌶𑌕𑍁𑌨𑍍𑌤𑌾𑌧𑌿𑌪 𑌇𑌵
𑌜𑍍𑌵𑌰𑌪𑍍𑌲𑍁𑌷𑍍𑌟𑌾𑌨𑍍 𑌦𑍃𑌷𑍍𑌟𑍍𑌯𑌾 𑌸𑍁𑌖𑌯𑌤𑌿 𑌸𑍁𑌧𑌾𑌧𑌾𑌰𑌸𑌿𑌰𑌯𑌾 ॥ 20 ॥
𑌤𑌟𑌿𑌲𑍍𑌲𑍇𑌖𑌾𑌤𑌨𑍍𑌵𑍀𑌂 𑌤𑌪𑌨𑌶𑌶𑌿𑌵𑍈𑌶𑍍𑌵𑌾𑌨𑌰𑌮𑌯𑍀𑌂
𑌨𑌿𑌷𑌣𑍍𑌣𑌾𑌂 𑌷𑌣𑍍𑌣𑌾𑌮𑌪𑍍𑌯𑍁𑌪𑌰𑌿 𑌕𑌮𑌲𑌾𑌨𑌾𑌂 𑌤𑌵 𑌕𑌲𑌾𑌮𑍍 ।
𑌮𑌹𑌾𑌪𑌦𑍍𑌮𑌾𑌟𑌵𑍍𑌯𑌾𑌂 𑌮𑍃𑌦𑌿𑌤𑌮𑌲𑌮𑌾𑌯𑍇𑌨 𑌮𑌨𑌸𑌾
𑌮𑌹𑌾𑌨𑍍𑌤𑌃 𑌪𑌶𑍍𑌯𑌨𑍍𑌤𑍋 𑌦𑌧𑌤𑌿 𑌪𑌰𑌮𑌾𑌹𑍍𑌲𑌾𑌦𑌲𑌹𑌰𑍀𑌮𑍍 ॥ 21 ॥
𑌭𑌵𑌾𑌨𑌿 𑌤𑍍𑌵𑌂 𑌦𑌾𑌸𑍇 𑌮𑌯𑌿 𑌵𑌿𑌤𑌰 𑌦𑍃𑌷𑍍𑌟𑌿𑌂 𑌸𑌕𑌰𑍁𑌣𑌾-
𑌮𑌿𑌤𑌿 𑌸𑍍𑌤𑍋𑌤𑍁𑌂 𑌵𑌾𑌞𑍍𑌛𑌨𑍍 𑌕𑌥𑌯𑌤𑌿 𑌭𑌵𑌾𑌨𑌿 𑌤𑍍𑌵𑌮𑌿𑌤𑌿 𑌯𑌃 ।
𑌤𑌦𑍈𑌵 𑌤𑍍𑌵𑌂 𑌤𑌸𑍍𑌮𑍈 𑌦𑌿𑌶𑌸𑌿 𑌨𑌿𑌜𑌸𑌾𑌯𑍁𑌜𑍍𑌯𑌪𑌦𑌵𑍀𑌂
𑌮𑍁𑌕𑍁𑌨𑍍𑌦𑌬𑍍𑌰𑌹𑍍𑌮𑍇𑌨𑍍𑌦𑍍𑌰𑌸𑍍𑌫𑍁𑌟𑌮𑌕𑍁𑌟𑌨𑍀𑌰𑌾𑌜𑌿𑌤𑌪𑌦𑌾𑌮𑍍 ॥ 22 ॥
𑌤𑍍𑌵𑌯𑌾 𑌹𑍃𑌤𑍍𑌵𑌾 𑌵𑌾𑌮𑌂 𑌵𑌪𑍁𑌰𑌪𑌰𑌿-𑌤𑍃𑌪𑍍𑌤𑍇𑌨 𑌮𑌨𑌸𑌾
𑌶𑌰𑍀𑌰𑌾𑌰𑍍𑌧𑌂 𑌶𑌮𑍍𑌭𑍋𑌰𑌪𑌰𑌮𑌪𑌿 𑌶𑌙𑍍𑌕𑍇 𑌹𑍃𑌤𑌮𑌭𑍂𑌤𑍍 ।
𑌯𑌦𑍇𑌤𑌤𑍍𑌤𑍍𑌵𑌦𑍍𑌰𑍂𑌪𑌂 𑌸𑌕𑌲𑌮𑌰𑍁𑌣𑌾𑌭𑌂 𑌤𑍍𑌰𑌿𑌨𑌯𑌨𑌂
𑌕𑍁𑌚𑌾𑌭𑍍𑌯𑌾𑌮𑌾𑌨𑌮𑍍𑌰𑌂 𑌕𑍁𑌟𑌿𑌲𑌶𑌶𑌿𑌚𑍂𑌡𑌾𑌲𑌮𑌕𑍁𑌟𑌮𑍍 ॥ 23 ॥
𑌜𑌗𑌤𑍍𑌸𑍂𑌤𑍇 𑌧𑌾𑌤𑌾 𑌹𑌰𑌿𑌰𑌵𑌤𑌿 𑌰𑍁𑌦𑍍𑌰𑌃 𑌕𑍍𑌷𑌪𑌯𑌤𑍇
𑌤𑌿𑌰𑌸𑍍𑌕𑍁𑌰𑍍𑌵𑌨𑍍𑌨𑍇𑌤𑌤𑍍𑌸𑍍𑌵𑌮𑌪𑌿 𑌵𑌪𑍁𑌰𑍀𑌶𑌸𑍍𑌤𑌿𑌰𑌯𑌤𑌿 ।
𑌸𑌦𑌾𑌪𑍂𑌰𑍍𑌵𑌃 𑌸𑌰𑍍𑌵𑌂 𑌤𑌦𑌿𑌦𑌮𑌨𑍁𑌗𑍃𑌹𑍍𑌣𑌾𑌤𑌿 𑌚 𑌶𑌿𑌵-
𑌸𑍍𑌤𑌵𑌾𑌜𑍍𑌞𑌾𑌮𑌾𑌲𑌮𑍍𑌬𑍍𑌯 𑌕𑍍𑌷𑌣𑌚𑌲𑌿𑌤𑌯𑍋𑌰𑍍𑌭𑍍𑌰𑍂𑌲𑌤𑌿𑌕𑌯𑍋𑌃 ॥ 24 ॥
𑌤𑍍𑌰𑌯𑌾𑌣𑌾𑌂 𑌦𑍇𑌵𑌾𑌨𑌾𑌂 𑌤𑍍𑌰𑌿𑌗𑍁𑌣𑌜𑌨𑌿𑌤𑌾𑌨𑌾𑌂 𑌤𑌵 𑌶𑌿𑌵𑍇
𑌭𑌵𑍇𑌤𑍍 𑌪𑍂𑌜𑌾 𑌪𑍂𑌜𑌾 𑌤𑌵 𑌚𑌰𑌣𑌯𑍋𑌰𑍍𑌯𑌾 𑌵𑌿𑌰𑌚𑌿𑌤𑌾 ।
𑌤𑌥𑌾 𑌹𑌿 𑌤𑍍𑌵𑌤𑍍𑌪𑌾𑌦𑍋𑌦𑍍𑌵𑌹𑌨𑌮𑌣𑌿𑌪𑍀𑌠𑌸𑍍𑌯 𑌨𑌿𑌕𑌟𑍇
𑌸𑍍𑌥𑌿𑌤𑌾 𑌹𑍍𑌯𑍇𑌤𑍇 𑌶𑌶𑍍𑌵𑌨𑍍𑌮𑍁𑌕𑍁𑌲𑌿𑌤𑌕𑌰𑍋𑌤𑍍𑌤𑌂𑌸𑌮𑌕𑍁𑌟𑌾𑌃 ॥ 25 ॥
𑌵𑌿𑌰𑌿𑌞𑍍𑌚𑌿𑌃 𑌪𑌞𑍍𑌚𑌤𑍍𑌵𑌂 𑌵𑍍𑌰𑌜𑌤𑌿 𑌹𑌰𑌿𑌰𑌾𑌪𑍍𑌨𑍋𑌤𑌿 𑌵𑌿𑌰𑌤𑌿𑌂
𑌵𑌿𑌨𑌾𑌶𑌂 𑌕𑍀𑌨𑌾𑌶𑍋 𑌭𑌜𑌤𑌿 𑌧𑌨𑌦𑍋 𑌯𑌾𑌤𑌿 𑌨𑌿𑌧𑌨𑌮𑍍 ।
𑌵𑌿𑌤𑌨𑍍𑌦𑍍𑌰𑍀 𑌮𑌾𑌹𑍇𑌨𑍍𑌦𑍍𑌰𑍀 𑌵𑌿𑌤𑌤𑌿𑌰𑌪𑌿 𑌸𑌮𑍍𑌮𑍀𑌲𑌿𑌤𑌦𑍃𑌶𑌾
𑌮𑌹𑌾𑌸𑌂𑌹𑌾𑌰𑍇𑌽𑌸𑍍𑌮𑌿𑌨𑍍 𑌵𑌿𑌹𑌰𑌤𑌿 𑌸𑌤𑌿 𑌤𑍍𑌵𑌤𑍍𑌪𑌤𑌿𑌰𑌸𑍗 ॥ 26 ॥
𑌜𑌪𑍋 𑌜𑌲𑍍𑌪𑌃 𑌶𑌿𑌲𑍍𑌪𑌂 𑌸𑌕𑌲𑌮𑌪𑌿 𑌮𑍁𑌦𑍍𑌰𑌾𑌵𑌿𑌰𑌚𑌨𑌾
𑌗𑌤𑌿𑌃 𑌪𑍍𑌰𑌾𑌦𑌕𑍍𑌷𑌿𑌣𑍍𑌯𑌕𑍍𑌰𑌮𑌣𑌮𑌶𑌨𑌾𑌦𑍍𑌯𑌾𑌹𑍁𑌤𑌿𑌵𑌿𑌧𑌿𑌃 ।
𑌪𑍍𑌰𑌣𑌾𑌮𑌸𑍍𑌸𑌂𑌵𑍇𑌶𑌸𑍍𑌸𑍁𑌖𑌮𑌖𑌿𑌲𑌮𑌾𑌤𑍍𑌮𑌾𑌰𑍍𑌪𑌣𑌦𑍃𑌶𑌾
𑌸𑌪𑌰𑍍𑌯𑌾𑌪𑌰𑍍𑌯𑌾𑌯𑌸𑍍𑌤𑌵 𑌭𑌵𑌤𑍁 𑌯𑌨𑍍𑌮𑍇 𑌵𑌿𑌲𑌸𑌿𑌤𑌮𑍍 ॥ 27 ॥
𑌸𑍁𑌧𑌾𑌮𑌪𑍍𑌯𑌾𑌸𑍍𑌵𑌾𑌦𑍍𑌯 𑌪𑍍𑌰𑌤𑌿𑌭𑌯𑌜𑌰𑌾𑌮𑍃𑌤𑍍𑌯𑍁𑌹𑌰𑌿𑌣𑍀𑌂
𑌵𑌿𑌪𑌦𑍍𑌯𑌨𑍍𑌤𑍇 𑌵𑌿𑌶𑍍𑌵𑍇 𑌵𑌿𑌧𑌿𑌶𑌤𑌮𑌖𑌾𑌦𑍍𑌯𑌾 𑌦𑌿𑌵𑌿𑌷𑌦𑌃 ।
𑌕𑌰𑌾𑌲𑌂 𑌯𑌤𑍍𑌕𑍍𑌷𑍍𑌵𑍇𑌲𑌂 𑌕𑌬𑌲𑌿𑌤𑌵𑌤𑌃 𑌕𑌾𑌲𑌕𑌲𑌨𑌾
𑌨 𑌶𑌮𑍍𑌭𑍋𑌸𑍍𑌤𑌨𑍍𑌮𑍂𑌲𑌂 𑌤𑌵 𑌜𑌨𑌨𑌿 𑌤𑌾𑌟𑌙𑍍𑌕𑌮𑌹𑌿𑌮𑌾 ॥ 28 ॥
𑌕𑌿𑌰𑍀𑌟𑌂 𑌵𑍈𑌰𑌿𑌞𑍍𑌚𑌂 𑌪𑌰𑌿𑌹𑌰 𑌪𑍁𑌰𑌃 𑌕𑍈𑌟𑌭𑌭𑌿𑌦𑌃
𑌕𑌠𑍋𑌰𑍇 𑌕𑍋𑌟𑍀𑌰𑍇 𑌸𑍍𑌖𑌲𑌸𑌿 𑌜𑌹𑌿 𑌜𑌮𑍍𑌭𑌾𑌰𑌿𑌮𑍁𑌕𑍁𑌟𑌮𑍍 ।
𑌪𑍍𑌰𑌣𑌮𑍍𑌰𑍇𑌷𑍍𑌵𑍇𑌤𑍇𑌷𑍁 𑌪𑍍𑌰𑌸𑌭𑌮𑍁𑌪𑌯𑌾𑌤𑌸𑍍𑌯 𑌭𑌵𑌨𑌂
𑌭𑌵𑌸𑍍𑌯𑌾𑌭𑍍𑌯𑍁𑌤𑍍𑌥𑌾𑌨𑍇 𑌤𑌵 𑌪𑌰𑌿𑌜𑌨𑍋𑌕𑍍𑌤𑌿𑌰𑍍𑌵𑌿𑌜𑌯𑌤𑍇 ॥ 29 ॥
𑌸𑍍𑌵𑌦𑍇𑌹𑍋𑌦𑍍𑌭𑍂𑌤𑌾𑌭𑌿𑌰𑍍𑌘𑍃𑌣𑌿𑌭𑌿𑌰𑌣𑌿𑌮𑌾𑌦𑍍𑌯𑌾𑌭𑌿𑌰𑌭𑌿𑌤𑍋
𑌨𑌿𑌷𑍇𑌵𑍍𑌯𑍇 𑌨𑌿𑌤𑍍𑌯𑍇 𑌤𑍍𑌵𑌾𑌮𑌹𑌮𑌿𑌤𑌿 𑌸𑌦𑌾 𑌭𑌾𑌵𑌯𑌤𑌿 𑌯𑌃 ।
𑌕𑌿𑌮𑌾𑌶𑍍𑌚𑌰𑍍𑌯𑌂 𑌤𑌸𑍍𑌯 𑌤𑍍𑌰𑌿𑌨𑌯𑌨𑌸𑌮𑍃𑌦𑍍𑌧𑌿𑌂 𑌤𑍃𑌣𑌯𑌤𑍋
𑌮𑌹𑌾𑌸𑌂𑌵𑌰𑍍𑌤𑌾𑌗𑍍𑌨𑌿𑌰𑍍𑌵𑌿𑌰𑌚𑌯𑌤𑌿 𑌨𑌿𑌰𑌾𑌜𑌨𑌵𑌿𑌧𑌿𑌮𑍍 ॥ 30 ॥
𑌚𑌤𑍁𑌷𑍍𑌷𑌷𑍍𑌟𑍍𑌯𑌾 𑌤𑌨𑍍𑌤𑍍𑌰𑍈𑌃 𑌸𑌕𑌲𑌮𑌤𑌿𑌸𑌨𑍍𑌧𑌾𑌯 𑌭𑍁𑌵𑌨𑌂
𑌸𑍍𑌥𑌿𑌤𑌸𑍍𑌤𑌤𑍍𑌤𑌤𑍍𑌸𑌿𑌦𑍍𑌧𑌿𑌪𑍍𑌰𑌸𑌵𑌪𑌰𑌤𑌨𑍍𑌤𑍍𑌰𑍈𑌃 𑌪𑌶𑍁𑌪𑌤𑌿𑌃 ।
𑌪𑍁𑌨𑌸𑍍𑌤𑍍𑌵𑌨𑍍𑌨𑌿𑌰𑍍𑌬𑌨𑍍𑌧𑌾𑌦𑌖𑌿𑌲𑌪𑍁𑌰𑍁𑌷𑌾𑌰𑍍𑌥𑍈𑌕𑌘𑌟𑌨𑌾-
𑌸𑍍𑌵𑌤𑌨𑍍𑌤𑍍𑌰𑌂 𑌤𑍇 𑌤𑌨𑍍𑌤𑍍𑌰𑌂 𑌕𑍍𑌷𑌿𑌤𑌿𑌤𑌲𑌮𑌵𑌾𑌤𑍀𑌤𑌰𑌦𑌿𑌦𑌮𑍍 ॥ 31 ॥
𑌶𑌿𑌵𑌃 𑌶𑌕𑍍𑌤𑌿𑌃 𑌕𑌾𑌮𑌃 𑌕𑍍𑌷𑌿𑌤𑌿𑌰𑌥 𑌰𑌵𑌿𑌃 𑌶𑍀𑌤𑌕𑌿𑌰𑌣𑌃
𑌸𑍍𑌮𑌰𑍋 𑌹𑌂𑌸𑌃 𑌶𑌕𑍍𑌰𑌸𑍍𑌤𑌦𑌨𑍁 𑌚 𑌪𑌰𑌾𑌮𑌾𑌰𑌹𑌰𑌯𑌃 ।
𑌅𑌮𑍀 𑌹𑍃𑌲𑍍𑌲𑍇𑌖𑌾𑌭𑌿𑌸𑍍𑌤𑌿𑌸𑍃𑌭𑌿𑌰𑌵𑌸𑌾𑌨𑍇𑌷𑍁 𑌘𑌟𑌿𑌤𑌾
𑌭𑌜𑌨𑍍𑌤𑍇 𑌵𑌰𑍍𑌣𑌾𑌸𑍍𑌤𑍇 𑌤𑌵 𑌜𑌨𑌨𑌿 𑌨𑌾𑌮𑌾𑌵𑌯𑌵𑌤𑌾𑌮𑍍 ॥ 32 ॥
𑌸𑍍𑌮𑌰𑌂 𑌯𑍋𑌨𑌿𑌂 𑌲𑌕𑍍𑌷𑍍𑌮𑍀𑌂 𑌤𑍍𑌰𑌿𑌤𑌯𑌮𑌿𑌦𑌮𑌾𑌦𑍗 𑌤𑌵 𑌮𑌨𑍋-
𑌰𑍍𑌨𑌿𑌧𑌾𑌯𑍈𑌕𑍇 𑌨𑌿𑌤𑍍𑌯𑍇 𑌨𑌿𑌰𑌵𑌧𑌿𑌮𑌹𑌾𑌭𑍋𑌗𑌰𑌸𑌿𑌕𑌾𑌃 ।
𑌭𑌜𑌨𑍍𑌤𑌿 𑌤𑍍𑌵𑌾𑌂 𑌚𑌿𑌨𑍍𑌤𑌾𑌮𑌣𑌿𑌗𑍁𑌨𑌨𑌿𑌬𑌦𑍍𑌧𑌾𑌕𑍍𑌷𑌵𑌲𑌯𑌾𑌃
𑌶𑌿𑌵𑌾𑌗𑍍𑌨𑍗 𑌜𑍁𑌹𑍍𑌵𑌨𑍍𑌤𑌃 𑌸𑍁𑌰𑌭𑌿𑌘𑍃𑌤𑌧𑌾𑌰𑌾𑌹𑍁𑌤𑌿𑌶𑌤𑍈𑌃 ॥ 33 ॥
𑌶𑌰𑍀𑌰𑌂 𑌤𑍍𑌵𑌂 𑌶𑌮𑍍𑌭𑍋𑌃 𑌶𑌶𑌿𑌮𑌿𑌹𑌿𑌰𑌵𑌕𑍍𑌷𑍋𑌰𑍁𑌹𑌯𑍁𑌗𑌂
𑌤𑌵𑌾𑌤𑍍𑌮𑌾𑌨𑌂 𑌮𑌨𑍍𑌯𑍇 𑌭𑌗𑌵𑌤𑌿 𑌨𑌵𑌾𑌤𑍍𑌮𑌾𑌨𑌮𑌨𑌘𑌮𑍍 ।
𑌅𑌤𑌶𑍍𑌶𑍇𑌷𑌶𑍍𑌶𑍇𑌷𑍀𑌤𑍍𑌯𑌯𑌮𑍁𑌭𑌯𑌸𑌾𑌧𑌾𑌰𑌣𑌤𑌯𑌾
𑌸𑍍𑌥𑌿𑌤𑌃 𑌸𑌮𑍍𑌬𑌨𑍍𑌧𑍋 𑌵𑌾𑌂 𑌸𑌮𑌰𑌸𑌪𑌰𑌾𑌨𑌨𑍍𑌦𑌪𑌰𑌯𑍋𑌃 ॥ 34 ॥
𑌮𑌨𑌸𑍍𑌤𑍍𑌵𑌂 𑌵𑍍𑌯𑍋𑌮 𑌤𑍍𑌵𑌂 𑌮𑌰𑍁𑌦𑌸𑌿 𑌮𑌰𑍁𑌤𑍍𑌸𑌾𑌰𑌥𑌿𑌰𑌸𑌿
𑌤𑍍𑌵𑌮𑌾𑌪𑌸𑍍𑌤𑍍𑌵𑌂 𑌭𑍂𑌮𑌿𑌸𑍍𑌤𑍍𑌵𑌯𑌿 𑌪𑌰𑌿𑌣𑌤𑌾𑌯𑌾𑌂 𑌨 𑌹𑌿 𑌪𑌰𑌮𑍍 ।
𑌤𑍍𑌵𑌮𑍇𑌵 𑌸𑍍𑌵𑌾𑌤𑍍𑌮𑌾𑌨𑌂 𑌪𑌰𑌿𑌣𑌮𑌯𑌿𑌤𑍁𑌂 𑌵𑌿𑌶𑍍𑌵𑌵𑌪𑍁𑌷𑌾
𑌚𑌿𑌦𑌾𑌨𑌨𑍍𑌦𑌾𑌕𑌾𑌰𑌂 𑌶𑌿𑌵𑌯𑍁𑌵𑌤𑌿 𑌭𑌾𑌵𑍇𑌨 𑌬𑌿𑌭𑍃𑌷𑍇 ॥ 35 ॥
𑌤𑌵𑌾𑌜𑍍𑌞𑌾𑌚𑌕𑍍𑌰𑌸𑍍𑌥𑌂 𑌤𑌪𑌨𑌶𑌶𑌿𑌕𑍋𑌟𑌿𑌦𑍍𑌯𑍁𑌤𑌿𑌧𑌰𑌂
𑌪𑌰𑌂 𑌶𑌮𑍍𑌭𑍁𑌂 𑌵𑌨𑍍𑌦𑍇 𑌪𑌰𑌿𑌮𑌿𑌲𑌿𑌤𑌪𑌾𑌰𑍍𑌶𑍍𑌵𑌂 𑌪𑌰𑌚𑌿𑌤𑌾 ।
𑌯𑌮𑌾𑌰𑌾𑌧𑍍𑌯𑌨𑍍 𑌭𑌕𑍍𑌤𑍍𑌯𑌾 𑌰𑌵𑌿𑌶𑌶𑌿𑌶𑍁𑌚𑍀𑌨𑌾𑌮𑌵𑌿𑌷𑌯𑍇
𑌨𑌿𑌰𑌾𑌲𑍋𑌕𑍇𑌽𑌲𑍋𑌕𑍇 𑌨𑌿𑌵𑌸𑌤𑌿 𑌹𑌿 𑌭𑌾𑌲𑍋𑌕𑌭𑍁𑌵𑌨𑍇 ॥ 36 ॥
𑌵𑌿𑌶𑍁𑌦𑍍𑌧𑍗 𑌤𑍇 𑌶𑍁𑌦𑍍𑌧𑌸𑍍𑌫𑌟𑌿𑌕𑌵𑌿𑌶𑌦𑌂 𑌵𑍍𑌯𑍋𑌮𑌜𑌨𑌕𑌂
𑌶𑌿𑌵𑌂 𑌸𑍇𑌵𑍇 𑌦𑍇𑌵𑍀𑌮𑌪𑌿 𑌶𑌿𑌵𑌸𑌮𑌾𑌨𑌵𑍍𑌯𑌵𑌸𑌿𑌤𑌾𑌮𑍍 ।
𑌯𑌯𑍋𑌃 𑌕𑌾𑌨𑍍𑌤𑍍𑌯𑌾 𑌯𑌾𑌨𑍍𑌤𑍍𑌯𑌾𑌃 𑌶𑌶𑌿𑌕𑌿𑌰𑌣𑌸𑌾𑌰𑍂𑌪𑍍𑌯𑌸𑌰𑌣𑍇-
𑌵𑌿𑌧𑍂𑌤𑌾𑌨𑍍𑌤𑌰𑍍𑌧𑍍𑌵𑌾𑌨𑍍𑌤𑌾 𑌵𑌿𑌲𑌸𑌤𑌿 𑌚𑌕𑍋𑌰𑍀𑌵 𑌜𑌗𑌤𑍀 ॥ 37 ॥
𑌸𑌮𑍁𑌨𑍍𑌮𑍀𑌲𑌤𑍍 𑌸𑌂𑌵𑌿𑌤𑍍 𑌕𑌮𑌲𑌮𑌕𑌰𑌨𑍍𑌦𑍈𑌕𑌰𑌸𑌿𑌕𑌂
𑌭𑌜𑍇 𑌹𑌂𑌸𑌦𑍍𑌵𑌨𑍍𑌦𑍍𑌵𑌂 𑌕𑌿𑌮𑌪𑌿 𑌮𑌹𑌤𑌾𑌂 𑌮𑌾𑌨𑌸𑌚𑌰𑌮𑍍 ।
𑌯𑌦𑌾𑌲𑌾𑌪𑌾𑌦𑌷𑍍𑌟𑌾𑌦𑌶𑌗𑍁𑌣𑌿𑌤𑌵𑌿𑌦𑍍𑌯𑌾𑌪𑌰𑌿𑌣𑌤𑌿-
𑌰𑍍𑌯𑌦𑌾𑌦𑌤𑍍𑌤𑍇 𑌦𑍋𑌷𑌾𑌦𑍍 𑌗𑍁𑌣𑌮𑌖𑌿𑌲𑌮𑌦𑍍𑌭𑍍𑌯𑌃 𑌪𑌯 𑌇𑌵 ॥ 38 ॥
𑌤𑌵 𑌸𑍍𑌵𑌾𑌧𑌿𑌷𑍍𑌠𑌾𑌨𑍇 𑌹𑍁𑌤𑌵𑌹𑌮𑌧𑌿𑌷𑍍𑌠𑌾𑌯 𑌨𑌿𑌰𑌤𑌂
𑌤𑌮𑍀𑌡𑍇 𑌸𑌂𑌵𑌰𑍍𑌤𑌂 𑌜𑌨𑌨𑌿 𑌮𑌹𑌤𑍀𑌂 𑌤𑌾𑌂 𑌚 𑌸𑌮𑌯𑌾𑌮𑍍 ।
𑌯𑌦𑌾𑌲𑍋𑌕𑍇 𑌲𑍋𑌕𑌾𑌨𑍍 𑌦𑌹𑌤𑌿 𑌮𑌹𑌤𑌿 𑌕𑍍𑌰𑍋𑌧𑌕𑌲𑌿𑌤𑍇
𑌦𑌯𑌾𑌰𑍍𑌦𑍍𑌰𑌾 𑌯𑌾 𑌦𑍃𑌷𑍍𑌟𑌿𑌃 𑌶𑌿𑌶𑌿𑌰𑌮𑍁𑌪𑌚𑌾𑌰𑌂 𑌰𑌚𑌯𑌤𑌿 ॥ 39 ॥
𑌤𑌟𑌿𑌤𑍍𑌤𑍍𑌵𑌨𑍍𑌤𑌂 𑌶𑌕𑍍𑌤𑍍𑌯𑌾 𑌤𑌿𑌮𑌿𑌰𑌪𑌰𑌿𑌪𑌨𑍍𑌥𑌿𑌸𑍍𑌫𑍁𑌰𑌣𑌯𑌾
𑌸𑍍𑌫𑍁𑌰𑌨𑍍𑌨𑌾𑌨𑌾𑌰𑌤𑍍𑌨𑌾𑌭𑌰𑌣𑌪𑌰𑌿𑌣𑌦𑍍𑌧𑍇𑌨𑍍𑌦𑍍𑌰𑌧𑌨𑍁𑌷𑌮𑍍 ।
𑌤𑌵 𑌶𑍍𑌯𑌾𑌮𑌂 𑌮𑍇𑌘𑌂 𑌕𑌮𑌪𑌿 𑌮𑌣𑌿𑌪𑍂𑌰𑍈𑌕𑌶𑌰𑌣𑌂
𑌨𑌿𑌷𑍇𑌵𑍇 𑌵𑌰𑍍𑌷𑌨𑍍𑌤𑌂 𑌹𑌰𑌮𑌿𑌹𑌿𑌰𑌤𑌪𑍍𑌤𑌂 𑌤𑍍𑌰𑌿𑌭𑍁𑌵𑌨𑌮𑍍 ॥ 40 ॥
𑌤𑌵𑌾𑌧𑌾𑌰𑍇 𑌮𑍂𑌲𑍇 𑌸𑌹 𑌸𑌮𑌯𑌯𑌾 𑌲𑌾𑌸𑍍𑌯𑌪𑌰𑌯𑌾
𑌨𑌵𑌾𑌤𑍍𑌮𑌾𑌨𑌂 𑌮𑌨𑍍𑌯𑍇 𑌨𑌵𑌰𑌸𑌮𑌹𑌾𑌤𑌾𑌣𑍍𑌡𑌵𑌨𑌟𑌮𑍍 ।
𑌉𑌭𑌾𑌭𑍍𑌯𑌾𑌮𑍇𑌤𑌾𑌭𑍍𑌯𑌾𑌮𑍁𑌦𑌯𑌵𑌿𑌧𑌿𑌮𑍁𑌦𑍍𑌦𑌿𑌶𑍍𑌯 𑌦𑌯𑌯𑌾
𑌸𑌨𑌾𑌥𑌾𑌭𑍍𑌯𑌾𑌂 𑌜𑌜𑍍𑌞𑍇 𑌜𑌨𑌕𑌜𑌨𑌨𑍀𑌮𑌜𑍍𑌜𑌗𑌦𑌿𑌦𑌮𑍍 ॥ 41 ॥
𑌦𑍍𑌵𑌿𑌤𑍀𑌯 𑌭𑌾𑌗𑌃 - 𑌸𑍗𑌨𑍍𑌦𑌰𑍍𑌯 𑌲𑌹𑌰𑍀
𑌗𑌤𑍈𑌰𑍍𑌮𑌾𑌣𑌿𑌕𑍍𑌯𑌤𑍍𑌵𑌂 𑌗𑌗𑌨𑌮𑌣𑌿𑌭𑌿𑌃 𑌸𑌾𑌨𑍍𑌦𑍍𑌰𑌘𑌟𑌿𑌤𑌂
𑌕𑌿𑌰𑍀𑌟𑌂 𑌤𑍇 𑌹𑍈𑌮𑌂 𑌹𑌿𑌮𑌗𑌿𑌰𑌿𑌸𑍁𑌤𑍇 𑌕𑍀𑌰𑍍𑌤𑌯𑌤𑌿 𑌯𑌃 ।
𑌸 𑌨𑍀𑌡𑍇𑌯𑌚𑍍𑌛𑌾𑌯𑌾𑌚𑍍𑌛𑍁𑌰𑌣𑌶𑌬𑌲𑌂 𑌚𑌨𑍍𑌦𑍍𑌰𑌶𑌕𑌲𑌂
𑌧𑌨𑍁𑌃 𑌶𑍗𑌨𑌾𑌸𑍀𑌰𑌂 𑌕𑌿𑌮𑌿𑌤𑌿 𑌨 𑌨𑌿𑌬𑌧𑍍𑌨𑌾𑌤𑌿 𑌧𑌿𑌷𑌣𑌾𑌮𑍍 ॥ 42 ॥
𑌧𑍁𑌨𑍋𑌤𑍁 𑌧𑍍𑌵𑌾𑌨𑍍𑌤𑌂 𑌨𑌸𑍍𑌤𑍁𑌲𑌿𑌤𑌦𑌲𑌿𑌤𑍇𑌨𑍍𑌦𑍀𑌵𑌰𑌵𑌨𑌂
𑌘𑌨𑌸𑍍𑌨𑌿𑌗𑍍𑌧𑌶𑍍𑌲𑌕𑍍𑌷𑍍𑌣𑌂 𑌚𑌿𑌕𑍁𑌰𑌨𑌿𑌕𑍁𑌰𑍁𑌮𑍍𑌬𑌂 𑌤𑌵 𑌶𑌿𑌵𑍇 ।
𑌯𑌦𑍀𑌯𑌂 𑌸𑍗𑌰𑌭𑍍𑌯𑌂 𑌸𑌹𑌜𑌮𑍁𑌪𑌲𑌬𑍍𑌧𑍁𑌂 𑌸𑍁𑌮𑌨𑌸𑍋
𑌵𑌸𑌨𑍍𑌤𑍍𑌯𑌸𑍍𑌮𑌿𑌨𑍍 𑌮𑌨𑍍𑌯𑍇 𑌵𑌲𑌮𑌥𑌨𑌵𑌾𑌟𑍀𑌵𑌿𑌟𑌪𑌿𑌨𑌾𑌮𑍍 ॥ 43 ॥
𑌤𑌨𑍋𑌤𑍁 𑌕𑍍𑌷𑍇𑌮𑌂 𑌨𑌸𑍍𑌤𑌵 𑌵𑌦𑌨𑌸𑍗𑌨𑍍𑌦𑌰𑍍𑌯𑌲𑌹𑌰𑍀-
𑌪𑌰𑍀𑌵𑌾𑌹𑌸𑍍𑌰𑍋𑌤𑌃𑌸𑌰𑌣𑌿𑌰𑌿𑌵 𑌸𑍀𑌮𑌨𑍍𑌤𑌸𑌰𑌣𑌿𑌃 ।
𑌵𑌹𑌨𑍍𑌤𑍀 𑌸𑌿𑌨𑍍𑌦𑍂𑌰𑌂 𑌪𑍍𑌰𑌬𑌲𑌕𑌬𑌰𑍀𑌭𑌾𑌰𑌤𑌿𑌮𑌿𑌰-
𑌦𑍍𑌵𑌿𑌷𑌾𑌂 𑌬𑍃𑌨𑍍𑌦𑍈𑌰𑍍𑌬𑌨𑍍𑌦𑍀𑌕𑍃𑌤𑌮𑌿𑌵 𑌨𑌵𑍀𑌨𑌾𑌰𑍍𑌕𑌕𑌿𑌰𑌣𑌮𑍍 ॥ 44 ॥
𑌅𑌰𑌾𑌲𑍈𑌃 𑌸𑍍𑌵𑌾𑌭𑌾𑌵𑍍𑌯𑌾𑌦𑌲𑌿𑌕𑌲𑌭𑌸𑌶𑍍𑌰𑍀𑌭𑌿𑌰𑌲𑌕𑍈𑌃
𑌪𑌰𑍀𑌤𑌂 𑌤𑍇 𑌵𑌕𑍍𑌤𑍍𑌰𑌂 𑌪𑌰𑌿𑌹𑌸𑌤𑌿 𑌪𑌙𑍍𑌕𑍇𑌰𑍁𑌹𑌰𑍁𑌚𑌿𑌮𑍍 ।
𑌦𑌰𑌸𑍍𑌮𑍇𑌰𑍇 𑌯𑌸𑍍𑌮𑌿𑌨𑍍 𑌦𑌶𑌨𑌰𑍁𑌚𑌿𑌕𑌿𑌞𑍍𑌜𑌲𑍍𑌕𑌰𑍁𑌚𑌿𑌰𑍇
𑌸𑍁𑌗𑌨𑍍𑌧𑍗 𑌮𑌾𑌦𑍍𑌯𑌨𑍍𑌤𑌿 𑌸𑍍𑌮𑌰𑌦𑌹𑌨𑌚𑌕𑍍𑌷𑍁𑌰𑍍𑌮𑌧𑍁𑌲𑌿𑌹𑌃 ॥ 45 ॥
𑌲𑌲𑌾𑌟𑌂 𑌲𑌾𑌵𑌣𑍍𑌯𑌦𑍍𑌯𑍁𑌤𑌿𑌵𑌿𑌮𑌲𑌮𑌾𑌭𑌾𑌤𑌿 𑌤𑌵 𑌯-
𑌦𑍍𑌦𑍍𑌵𑌿𑌤𑍀𑌯𑌂 𑌤𑌨𑍍𑌮𑌨𑍍𑌯𑍇 𑌮𑌕𑍁𑌟𑌘𑌟𑌿𑌤𑌂 𑌚𑌨𑍍𑌦𑍍𑌰𑌶𑌕𑌲𑌮𑍍 ।
𑌵𑌿𑌪𑌰𑍍𑌯𑌾𑌸𑌨𑍍𑌯𑌾𑌸𑌾𑌦𑍁𑌭𑌯𑌮𑌪𑌿 𑌸𑌮𑍍𑌭𑍂𑌯 𑌚 𑌮𑌿𑌥𑌃
𑌸𑍁𑌧𑌾𑌲𑍇𑌪𑌸𑍍𑌯𑍂𑌤𑌿𑌃 𑌪𑌰𑌿𑌣𑌮𑌤𑌿 𑌰𑌾𑌕𑌾𑌹𑌿𑌮𑌕𑌰𑌃 ॥ 46 ॥
𑌭𑍍𑌰𑍁𑌵𑍗 𑌭𑍁𑌗𑍍𑌨𑍇 𑌕𑌿𑌞𑍍𑌚𑌿𑌦𑍍𑌭𑍁𑌵𑌨𑌭𑌯𑌭𑌙𑍍𑌗𑌵𑍍𑌯𑌸𑌨𑌿𑌨𑌿
𑌤𑍍𑌵𑌦𑍀𑌯𑍇 𑌨𑍇𑌤𑍍𑌰𑌾𑌭𑍍𑌯𑌾𑌂 𑌮𑌧𑍁𑌕𑌰𑌰𑍁𑌚𑌿𑌭𑍍𑌯𑌾𑌂 𑌧𑍃𑌤𑌗𑍁𑌣𑌮𑍍 ।
𑌧𑌨𑍁𑌰𑍍𑌮𑌨𑍍𑌯𑍇 𑌸𑌵𑍍𑌯𑍇𑌤𑌰𑌕𑌰𑌗𑍃𑌹𑍀𑌤𑌂 𑌰𑌤𑌿𑌪𑌤𑍇𑌃
𑌪𑍍𑌰𑌕𑍋𑌷𑍍𑌠𑍇 𑌮𑍁𑌷𑍍𑌟𑍗 𑌚 𑌸𑍍𑌥𑌗𑌯𑌤𑌿 𑌨𑌿𑌗𑍂𑌢𑌾𑌨𑍍𑌤𑌰𑌮𑍁𑌮𑍇 ॥ 47 ॥
𑌅𑌹𑌃 𑌸𑍂𑌤𑍇 𑌸𑌵𑍍𑌯𑌂 𑌤𑌵 𑌨𑌯𑌨𑌮𑌰𑍍𑌕𑌾𑌤𑍍𑌮𑌕𑌤𑌯𑌾
𑌤𑍍𑌰𑌿𑌯𑌾𑌮𑌾𑌂 𑌵𑌾𑌮𑌂 𑌤𑍇 𑌸𑍃𑌜𑌤𑌿 𑌰𑌜𑌨𑍀𑌨𑌾𑌯𑌕𑌤𑌯𑌾 ।
𑌤𑍃𑌤𑍀𑌯𑌾 𑌤𑍇 𑌦𑍃𑌷𑍍𑌟𑌿𑌰𑍍𑌦𑌰𑌦𑌲𑌿𑌤𑌹𑍇𑌮𑌾𑌮𑍍𑌬𑍁𑌜𑌰𑍁𑌚𑌿𑌃
𑌸𑌮𑌾𑌧𑌤𑍍𑌤𑍇 𑌸𑌨𑍍𑌧𑍍𑌯𑌾𑌂 𑌦𑌿𑌵𑌸𑌨𑌿𑌶𑌯𑍋𑌰𑌨𑍍𑌤𑌰𑌚𑌰𑍀𑌮𑍍 ॥ 48 ॥
𑌵𑌿𑌶𑌾𑌲𑌾 𑌕𑌲𑍍𑌯𑌾𑌣𑍀 𑌸𑍍𑌫𑍁𑌟𑌰𑍁𑌚𑌿𑌰𑌯𑍋𑌧𑍍𑌯𑌾 𑌕𑍁𑌵𑌲𑌯𑍈𑌃
𑌕𑍃𑌪𑌾𑌧𑌾𑌰𑌾𑌧𑌾𑌰𑌾 𑌕𑌿𑌮𑌪𑌿 𑌮𑌧𑍁𑌰𑌾𑌭𑍋𑌗𑌵𑌤𑌿𑌕𑌾 ।
𑌅𑌵𑌨𑍍𑌤𑍀 𑌦𑍃𑌷𑍍𑌟𑌿𑌸𑍍𑌤𑍇 𑌬𑌹𑍁𑌨𑌗𑌰𑌵𑌿𑌸𑍍𑌤𑌾𑌰𑌵𑌿𑌜𑌯𑌾
𑌧𑍍𑌰𑍁𑌵𑌂 𑌤𑌤𑍍𑌤𑌨𑍍𑌨𑌾𑌮𑌵𑍍𑌯𑌵𑌹𑌰𑌣𑌯𑍋𑌗𑍍𑌯𑌾 𑌵𑌿𑌜𑌯𑌤𑍇 ॥ 49 ॥
𑌕𑌵𑍀𑌨𑌾𑌂 𑌸𑌨𑍍𑌦𑌰𑍍𑌭𑌸𑍍𑌤𑌬𑌕𑌮𑌕𑌰𑌨𑍍𑌦𑍈𑌕𑌰𑌸𑌿𑌕𑌂
𑌕𑌟𑌾𑌕𑍍𑌷𑌵𑍍𑌯𑌾𑌕𑍍𑌷𑍇𑌪𑌭𑍍𑌰𑌮𑌰𑌕𑌲𑌭𑍗 𑌕𑌰𑍍𑌣𑌯𑍁𑌗𑌲𑌮𑍍 ।
𑌅𑌮𑍁𑌞𑍍𑌚𑌨𑍍𑌤𑍗 𑌦𑍃𑌷𑍍𑌟𑍍𑌵𑌾 𑌤𑌵 𑌨𑌵𑌰𑌸𑌾𑌸𑍍𑌵𑌾𑌦𑌤𑌰𑌲𑌾-
𑌵𑌸𑍂𑌯𑌾𑌸𑌂𑌸𑌰𑍍𑌗𑌾𑌦𑌲𑌿𑌕𑌨𑌯𑌨𑌂 𑌕𑌿𑌞𑍍𑌚𑌿𑌦𑌰𑍁𑌣𑌮𑍍 ॥ 50 ॥
𑌶𑌿𑌵𑍇 𑌶𑍃𑌙𑍍𑌗𑌾𑌰𑌾𑌰𑍍𑌦𑍍𑌰𑌾 𑌤𑌦𑌿𑌤𑌰𑌜𑌨𑍇 𑌕𑍁𑌤𑍍𑌸𑌨𑌪𑌰𑌾
𑌸𑌰𑍋𑌷𑌾 𑌗𑌙𑍍𑌗𑌾𑌯𑌾𑌂 𑌗𑌿𑌰𑌿𑌶𑌚𑌰𑌿𑌤𑍇 𑌵𑌿𑌸𑍍𑌮𑌯𑌵𑌤𑍀 ।
𑌹𑌰𑌾𑌹𑌿𑌭𑍍𑌯𑍋 𑌭𑍀𑌤𑌾 𑌸𑌰𑌸𑌿𑌰𑍁𑌹𑌸𑍗𑌭𑌾𑌗𑍍𑌯𑌜𑌨𑌨𑍀 (𑌜𑌯𑌿𑌨𑍀)
𑌸𑌖𑍀𑌷𑍁 𑌸𑍍𑌮𑍇𑌰𑌾 𑌤𑍇 𑌮𑌯𑌿 𑌜𑌨𑌨𑍀 𑌦𑍃𑌷𑍍𑌟𑌿𑌃 𑌸𑌕𑌰𑍁𑌣𑌾 ॥ 51 ॥
𑌗𑌤𑍇 𑌕𑌰𑍍𑌣𑌾𑌭𑍍𑌯𑌰𑍍𑌣𑌂 𑌗𑌰𑍁𑌤 𑌇𑌵 𑌪𑌕𑍍𑌷𑍍𑌮𑌾𑌣𑌿 𑌦𑌧𑌤𑍀
𑌪𑍁𑌰𑌾𑌂 𑌭𑍇𑌤𑍍𑌤𑍁𑌶𑍍𑌚𑌿𑌤𑍍𑌤𑌪𑍍𑌰𑌶𑌮𑌰𑌸𑌵𑌿𑌦𑍍𑌰𑌾𑌵𑌣𑌫𑌲𑍇 ।
𑌇𑌮𑍇 𑌨𑍇𑌤𑍍𑌰𑍇 𑌗𑍋𑌤𑍍𑌰𑌾𑌧𑌰𑌪𑌤𑌿𑌕𑍁𑌲𑍋𑌤𑍍𑌤𑌂𑌸𑌕𑌲𑌿𑌕𑍇
𑌤𑌵𑌾𑌕𑌰𑍍𑌣𑌾𑌕𑍃𑌷𑍍𑌟𑌸𑍍𑌮𑌰𑌶𑌰𑌵𑌿𑌲𑌾𑌸𑌂 𑌕𑌲𑌯𑌤𑌃 ॥ 52 ॥
𑌵𑌿𑌭𑌕𑍍𑌤𑌤𑍍𑌰𑍈𑌵𑌰𑍍𑌣𑍍𑌯𑌂 𑌵𑍍𑌯𑌤𑌿𑌕𑌰𑌿𑌤𑌲𑍀𑌲𑌾𑌞𑍍𑌜𑌨𑌤𑌯𑌾
𑌵𑌿𑌭𑌾𑌤𑌿 𑌤𑍍𑌵𑌨𑍍𑌨𑍇𑌤𑍍𑌰𑌤𑍍𑌰𑌿𑌤𑌯𑌮𑌿𑌦𑌮𑍀𑌶𑌾𑌨𑌦𑌯𑌿𑌤𑍇 ।
𑌪𑍁𑌨𑌃 𑌸𑍍𑌰𑌷𑍍𑌟𑍁𑌂 𑌦𑍇𑌵𑌾𑌨𑍍 𑌦𑍍𑌰𑍁𑌹𑌿𑌣𑌹𑌰𑌿𑌰𑍁𑌦𑍍𑌰𑌾𑌨𑍁𑌪𑌰𑌤𑌾𑌨𑍍
𑌰𑌜𑌃 𑌸𑌤𑍍𑌤𑍍𑌵𑌂 𑌬𑌿𑌭𑍍𑌰𑌤𑍍𑌤𑌮 𑌇𑌤𑌿 𑌗𑍁𑌣𑌾𑌨𑌾𑌂 𑌤𑍍𑌰𑌯𑌮𑌿𑌵 ॥ 53 ॥
𑌪𑌵𑌿𑌤𑍍𑌰𑍀𑌕𑌰𑍍𑌤𑍁𑌂 𑌨𑌃 𑌪𑌶𑍁𑌪𑌤𑌿𑌪𑌰𑌾𑌧𑍀𑌨𑌹𑍃𑌦𑌯𑍇
𑌦𑌯𑌾𑌮𑌿𑌤𑍍𑌰𑍈𑌰𑍍𑌨𑍇𑌤𑍍𑌰𑍈𑌰𑌰𑍁𑌣𑌧𑌵𑌲𑌶𑍍𑌯𑌾𑌮𑌰𑍁𑌚𑌿𑌭𑌿𑌃 ।
𑌨𑌦𑌃 𑌶𑍋𑌣𑍋 𑌗𑌙𑍍𑌗𑌾 𑌤𑌪𑌨𑌤𑌨𑌯𑍇𑌤𑌿 𑌧𑍍𑌰𑍁𑌵𑌮𑌮𑍁𑌂
𑌤𑍍𑌰𑌯𑌾𑌣𑌾𑌂 𑌤𑍀𑌰𑍍𑌥𑌾𑌨𑌾𑌮𑍁𑌪𑌨𑌯𑌸𑌿 𑌸𑌮𑍍𑌭𑍇𑌦𑌮𑌨𑌘𑌮𑍍 ॥ 54 ॥
𑌨𑌿𑌮𑍇𑌷𑍋𑌨𑍍𑌮𑍇𑌷𑌾𑌭𑍍𑌯𑌾𑌂 𑌪𑍍𑌰𑌲𑌯𑌮𑍁𑌦𑌯𑌂 𑌯𑌾𑌤𑌿 𑌜𑌗𑌤𑍀
𑌤𑌵𑍇𑌤𑍍𑌯𑌾𑌹𑍁𑌃 𑌸𑌨𑍍𑌤𑍋 𑌧𑌰𑌣𑌿𑌧𑌰𑌰𑌾𑌜𑌨𑍍𑌯𑌤𑌨𑌯𑍇 ।
𑌤𑍍𑌵𑌦𑍁𑌨𑍍𑌮𑍇𑌷𑌾𑌜𑍍𑌜𑌾𑌤𑌂 𑌜𑌗𑌦𑌿𑌦𑌮𑌶𑍇𑌷𑌂 𑌪𑍍𑌰𑌲𑌯𑌤𑌃
𑌪𑌰𑌿𑌤𑍍𑌰𑌾𑌤𑍁𑌂 𑌶𑌙𑍍𑌕𑍇 𑌪𑌰𑌿𑌹𑍃𑌤𑌨𑌿𑌮𑍇𑌷𑌾𑌸𑍍𑌤𑌵 𑌦𑍃𑌶𑌃 ॥ 55 ॥
𑌤𑌵𑌾𑌪𑌰𑍍𑌣𑍇 𑌕𑌰𑍍𑌣𑍇𑌜𑌪𑌨𑌯𑌨𑌪𑍈𑌶𑍁𑌨𑍍𑌯𑌚𑌕𑌿𑌤𑌾
𑌨𑌿𑌲𑍀𑌯𑌨𑍍𑌤𑍇 𑌤𑍋𑌯𑍇 𑌨𑌿𑌯𑌤𑌮𑌨𑌿𑌮𑍇𑌷𑌾𑌃 𑌶𑌫𑌰𑌿𑌕𑌾𑌃 ।
𑌇𑌯𑌂 𑌚 𑌶𑍍𑌰𑍀𑌰𑍍𑌬𑌦𑍍𑌧𑌚𑍍𑌛𑌦𑌪𑍁𑌟𑌕𑌵𑌾𑌟𑌂 𑌕𑍁𑌵𑌲𑌯𑌮𑍍
𑌜𑌹𑌾𑌤𑌿 𑌪𑍍𑌰𑌤𑍍𑌯𑍂𑌷𑍇 𑌨𑌿𑌶𑌿 𑌚 𑌵𑌿𑌘𑌟𑌯𑍍𑌯 𑌪𑍍𑌰𑌵𑌿𑌶𑌤𑌿 ॥ 56 ॥
𑌦𑍃𑌶𑌾 𑌦𑍍𑌰𑌾𑌘𑍀𑌯𑌸𑍍𑌯𑌾 𑌦𑌰𑌦𑌲𑌿𑌤𑌨𑍀𑌲𑍋𑌤𑍍𑌪𑌲𑌰𑍁𑌚𑌾
𑌦𑌵𑍀𑌯𑌾𑌂𑌸𑌂 𑌦𑍀𑌨𑌂 𑌸𑍍𑌨𑌪𑌯 𑌕𑍃𑌪𑌯𑌾 𑌮𑌾𑌮𑌪𑌿 𑌶𑌿𑌵𑍇 ।
𑌅𑌨𑍇𑌨𑌾𑌯𑌂 𑌧𑌨𑍍𑌯𑍋 𑌭𑌵𑌤𑌿 𑌨 𑌚 𑌤𑍇 𑌹𑌾𑌨𑌿𑌰𑌿𑌯𑌤𑌾
𑌵𑌨𑍇 𑌵𑌾 𑌹𑌰𑍍𑌮𑍍𑌯𑍇 𑌵𑌾 𑌸𑌮𑌕𑌰𑌨𑌿𑌪𑌾𑌤𑍋 𑌹𑌿𑌮𑌕𑌰𑌃 ॥ 57 ॥
𑌅𑌰𑌾𑌲𑌂 𑌤𑍇 𑌪𑌾𑌲𑍀𑌯𑍁𑌗𑌲𑌮𑌗𑌰𑌾𑌜𑌨𑍍𑌯𑌤𑌨𑌯𑍇
𑌨 𑌕𑍇𑌷𑌾𑌮𑌾𑌧𑌤𑍍𑌤𑍇 𑌕𑍁𑌸𑍁𑌮𑌶𑌰𑌕𑍋𑌦𑌣𑍍𑌡𑌕𑍁𑌤𑍁𑌕𑌮𑍍 ।
𑌤𑌿𑌰𑌶𑍍𑌚𑍀𑌨𑍋 𑌯𑌤𑍍𑌰 𑌶𑍍𑌰𑌵𑌣𑌪𑌥𑌮𑍁𑌲𑍍𑌲𑌙𑍍𑌘𑍍𑌯 𑌵𑌿𑌲𑌸-
𑌨𑍍𑌨𑌪𑌾𑌙𑍍𑌗𑌵𑍍𑌯𑌾𑌸𑌙𑍍𑌗𑍋 𑌦𑌿𑌶𑌤𑌿 𑌶𑌰𑌸𑌨𑍍𑌧𑌾𑌨𑌧𑌿𑌷𑌣𑌾𑌮𑍍 ॥ 58 ॥
𑌸𑍍𑌫𑍁𑌰𑌦𑍍𑌗𑌣𑍍𑌡𑌾𑌭𑍋𑌗𑌪𑍍𑌰𑌤𑌿𑌫𑌲𑌿𑌤𑌤𑌾𑌟𑌙𑍍𑌕𑌯𑍁𑌗𑌲𑌂
𑌚𑌤𑍁𑌶𑍍𑌚𑌕𑍍𑌰𑌂 𑌮𑌨𑍍𑌯𑍇 𑌤𑌵 𑌮𑍁𑌖𑌮𑌿𑌦𑌂 𑌮𑌨𑍍𑌮𑌥𑌰𑌥𑌮𑍍 ।
𑌯𑌮𑌾𑌰𑍁𑌹𑍍𑌯 𑌦𑍍𑌰𑍁𑌹𑍍𑌯𑌤𑍍𑌯𑌵𑌨𑌿𑌰𑌥𑌮𑌰𑍍𑌕𑍇𑌨𑍍𑌦𑍁𑌚𑌰𑌣𑌂
𑌮𑌹𑌾𑌵𑍀𑌰𑍋 𑌮𑌾𑌰𑌃 𑌪𑍍𑌰𑌮𑌥𑌪𑌤𑌯𑍇 𑌸𑌜𑍍𑌜𑌿𑌤𑌵𑌤𑍇 ॥ 59 ॥
𑌸𑌰𑌸𑍍𑌵𑌤𑍍𑌯𑌾𑌃 𑌸𑍂𑌕𑍍𑌤𑍀𑌰𑌮𑍃𑌤𑌲𑌹𑌰𑍀𑌕𑍗𑌶𑌲𑌹𑌰𑍀𑌃
𑌪𑌿𑌬𑌨𑍍𑌤𑍍𑌯𑌾𑌃 𑌶𑌰𑍍𑌵𑌾𑌣𑌿 𑌶𑍍𑌰𑌵𑌣𑌚𑍁𑌲𑍁𑌕𑌾𑌭𑍍𑌯𑌾𑌮𑌵𑌿𑌰𑌲𑌮𑍍 ।
𑌚𑌮𑌤𑍍𑌕𑌾𑌰𑌶𑍍𑌲𑌾𑌘𑌾𑌚𑌲𑌿𑌤𑌶𑌿𑌰𑌸𑌃 𑌕𑍁𑌣𑍍𑌡𑌲𑌗𑌣𑍋
𑌝𑌣𑌤𑍍𑌕𑌾𑌰𑍈𑌸𑍍𑌤𑌾𑌰𑍈𑌃 𑌪𑍍𑌰𑌤𑌿𑌵𑌚𑌨𑌮𑌾𑌚𑌷𑍍𑌟 𑌇𑌵 𑌤𑍇 ॥ 60 ॥
𑌅𑌸𑍗 𑌨𑌾𑌸𑌾𑌵𑌂𑌶𑌸𑍍𑌤𑍁𑌹𑌿𑌨𑌗𑌿𑌰𑌿𑌵𑌂𑌶𑌧𑍍𑌵𑌜𑌪𑌟𑌿
𑌤𑍍𑌵𑌦𑍀𑌯𑍋 𑌨𑍇𑌦𑍀𑌯𑌃 𑌫𑌲𑌤𑍁 𑌫𑌲𑌮𑌸𑍍𑌮𑌾𑌕𑌮𑍁𑌚𑌿𑌤𑌮𑍍 ।
𑌵𑌹𑌨𑍍𑌨𑌨𑍍𑌤𑌰𑍍𑌮𑍁𑌕𑍍𑌤𑌾𑌃 𑌶𑌿𑌶𑌿𑌰𑌤𑌰𑌨𑌿𑌶𑍍𑌵𑌾𑌸𑌗𑌲𑌿𑌤𑌂
𑌸𑌮𑍃𑌦𑍍𑌧𑍍𑌯𑌾 𑌯𑌤𑍍𑌤𑌾𑌸𑌾𑌂 𑌬𑌹𑌿𑌰𑌪𑌿 𑌚 𑌮𑍁𑌕𑍍𑌤𑌾𑌮𑌣𑌿𑌧𑌰𑌃 ॥ 61 ॥
𑌪𑍍𑌰𑌕𑍃𑌤𑍍𑌯𑌾 𑌰𑌕𑍍𑌤𑌾𑌯𑌾𑌸𑍍𑌤𑌵 𑌸𑍁𑌦𑌤𑌿 𑌦𑌨𑍍𑌤𑌚𑍍𑌛𑌦𑌰𑍁𑌚𑍇𑌃
𑌪𑍍𑌰𑌵𑌕𑍍𑌷𑍍𑌯𑍇 𑌸𑌾𑌦𑍃𑌶𑍍𑌯𑌂 𑌜𑌨𑌯𑌤𑍁 𑌫𑌲𑌂 𑌵𑌿𑌦𑍍𑌰𑍁𑌮𑌲𑌤𑌾 ।
𑌨 𑌬𑌿𑌮𑍍𑌬𑌂 𑌤𑌦𑍍𑌬𑌿𑌮𑍍𑌬𑌪𑍍𑌰𑌤𑌿𑌫𑌲𑌨𑌰𑌾𑌗𑌾𑌦𑌰𑍁𑌣𑌿𑌤𑌂
𑌤𑍁𑌲𑌾𑌮𑌧𑍍𑌯𑌾𑌰𑍋𑌢𑍁𑌂 𑌕𑌥𑌮𑌿𑌵 𑌵𑌿𑌲𑌜𑍍𑌜𑍇𑌤 𑌕𑌲𑌯𑌾 ॥ 62 ॥
𑌸𑍍𑌮𑌿𑌤𑌜𑍍𑌯𑍋𑌤𑍍𑌸𑍍𑌨𑌾𑌜𑌾𑌲𑌂 𑌤𑌵 𑌵𑌦𑌨𑌚𑌨𑍍𑌦𑍍𑌰𑌸𑍍𑌯 𑌪𑌿𑌬𑌤𑌾𑌂
𑌚𑌕𑍋𑌰𑌾𑌣𑌾𑌮𑌾𑌸𑍀𑌦𑌤𑌿𑌰𑌸𑌤𑌯𑌾 𑌚𑌞𑍍𑌚𑍁𑌜𑌡𑌿𑌮𑌾 ।
𑌅𑌤𑌸𑍍𑌤𑍇 𑌶𑍀𑌤𑌾𑌂𑌶𑍋𑌰𑌮𑍃𑌤𑌲𑌹𑌰𑍀𑌮𑌮𑍍𑌲𑌰𑍁𑌚𑌯𑌃
𑌪𑌿𑌬𑌨𑍍𑌤𑌿 𑌸𑍍𑌵𑌚𑍍𑌛𑌨𑍍𑌦𑌂 𑌨𑌿𑌶𑌿 𑌨𑌿𑌶𑌿 𑌭𑍃𑌶𑌂 𑌕𑌾𑌞𑍍𑌜𑌿𑌕𑌧𑌿𑌯𑌾 ॥ 63 ॥
𑌅𑌵𑌿𑌶𑍍𑌰𑌾𑌨𑍍𑌤𑌂 𑌪𑌤𑍍𑌯𑍁𑌰𑍍𑌗𑍁𑌣𑌗𑌣𑌕𑌥𑌾𑌮𑍍𑌰𑍇𑌡𑌨𑌜𑌪𑌾
𑌜𑌪𑌾𑌪𑍁𑌷𑍍𑌪𑌚𑍍𑌛𑌾𑌯𑌾 𑌤𑌵 𑌜𑌨𑌨𑌿 𑌜𑌿𑌹𑍍𑌵𑌾 𑌜𑌯𑌤𑌿 𑌸𑌾 ।
𑌯𑌦𑌗𑍍𑌰𑌾𑌸𑍀𑌨𑌾𑌯𑌾𑌃 𑌸𑍍𑌫𑌟𑌿𑌕𑌦𑍃𑌷𑌦𑌚𑍍𑌛𑌚𑍍𑌛𑌵𑌿𑌮𑌯𑍀
𑌸𑌰𑌸𑍍𑌵𑌤𑍍𑌯𑌾 𑌮𑍂𑌰𑍍𑌤𑌿𑌃 𑌪𑌰𑌿𑌣𑌮𑌤𑌿 𑌮𑌾𑌣𑌿𑌕𑍍𑌯𑌵𑌪𑍁𑌷𑌾 ॥ 64 ॥
𑌰𑌣𑍇 𑌜𑌿𑌤𑍍𑌵𑌾 𑌦𑍈𑌤𑍍𑌯𑌾𑌨𑌪𑌹𑍃𑌤𑌶𑌿𑌰𑌸𑍍𑌤𑍍𑌰𑍈𑌃 𑌕𑌵𑌚𑌿𑌭𑌿𑌰𑍍-
𑌨𑌿𑌵𑍃𑌤𑍍𑌤𑍈𑌶𑍍𑌚𑌣𑍍𑌡𑌾𑌂𑌶𑌤𑍍𑌰𑌿𑌪𑍁𑌰𑌹𑌰𑌨𑌿𑌰𑍍𑌮𑌾𑌲𑍍𑌯𑌵𑌿𑌮𑍁𑌖𑍈𑌃 ।
𑌵𑌿𑌶𑌾𑌖𑍇𑌨𑍍𑌦𑍍𑌰𑍋𑌪𑍇𑌨𑍍𑌦𑍍𑌰𑍈𑌃 𑌶𑌶𑌿𑌵𑌿𑌶𑌦𑌕𑌰𑍍𑌪𑍂𑌰𑌶𑌕𑌲𑌾
𑌵𑌿𑌲𑍀𑌯𑌨𑍍𑌤𑍇 𑌮𑌾𑌤𑌸𑍍𑌤𑌵 𑌵𑌦𑌨𑌤𑌾𑌮𑍍𑌬𑍂𑌲𑌕𑌬𑌲𑌾𑌃 ॥ 65 ॥
𑌵𑌿𑌪𑌞𑍍𑌚𑍍𑌯𑌾 𑌗𑌾𑌯𑌨𑍍𑌤𑍀 𑌵𑌿𑌵𑌿𑌧𑌮𑌪𑌦𑌾𑌨𑌂 𑌪𑌶𑍁𑌪𑌤𑍇𑌃
𑌤𑍍𑌵𑌯𑌾𑌰𑌬𑍍𑌧𑍇 𑌵𑌕𑍍𑌤𑍁𑌂 𑌚𑌲𑌿𑌤𑌶𑌿𑌰𑌸𑌾 𑌸𑌾𑌧𑍁𑌵𑌚𑌨𑍇 ।
𑌤𑌦𑍀𑌯𑍈𑌰𑍍𑌮𑌾𑌧𑍁𑌰𑍍𑌯𑍈𑌰𑌪𑌲𑌪𑌿𑌤𑌤𑌨𑍍𑌤𑍍𑌰𑍀𑌕𑌲𑌰𑌵𑌾𑌂
𑌨𑌿𑌜𑌾𑌂 𑌵𑍀𑌣𑌾𑌂 𑌵𑌾𑌣𑍀 𑌨𑌿𑌚𑍁𑌲𑌯𑌤𑌿 𑌚𑍋𑌲𑍇𑌨 𑌨𑌿𑌭𑍃𑌤𑌮𑍍 ॥ 66 ॥
𑌕𑌰𑌾𑌗𑍍𑌰𑍇𑌣 𑌸𑍍𑌪𑍃𑌷𑍍𑌟𑌂 𑌤𑍁𑌹𑌿𑌨𑌗𑌿𑌰𑌿𑌣𑌾 𑌵𑌤𑍍𑌸𑌲𑌤𑌯𑌾
𑌗𑌿𑌰𑍀𑌶𑍇𑌨𑍋𑌦𑌸𑍍𑌤𑌂 𑌮𑍁𑌹𑍁𑌰𑌧𑌰𑌪𑌾𑌨𑌾𑌕𑍁𑌲𑌤𑌯𑌾 ।
𑌕𑌰𑌗𑍍𑌰𑌾𑌹𑍍𑌯𑌂 𑌶𑌮𑍍𑌭𑍋𑌰𑍍𑌮𑍁𑌖𑌮𑍁𑌕𑍁𑌰𑌵𑍃𑌨𑍍𑌤𑌂 𑌗𑌿𑌰𑌿𑌸𑍁𑌤𑍇
𑌕𑌥𑌙𑍍𑌕𑌾𑌰𑌂 𑌬𑍍𑌰𑍂𑌮𑌸𑍍𑌤𑌵 𑌚𑌿𑌬𑍁𑌕𑌮𑍗𑌪𑌮𑍍𑌯𑌰𑌹𑌿𑌤𑌮𑍍 ॥ 67 ॥
𑌭𑍁𑌜𑌾𑌶𑍍𑌲𑍇𑌷𑌾𑌨𑍍 𑌨𑌿𑌤𑍍𑌯𑌂 𑌪𑍁𑌰𑌦𑌮𑌯𑌿𑌤𑍁𑌃 𑌕𑌣𑍍𑌟𑌕𑌵𑌤𑍀
𑌤𑌵 𑌗𑍍𑌰𑍀𑌵𑌾 𑌧𑌤𑍍𑌤𑍇 𑌮𑍁𑌖𑌕𑌮𑌲𑌨𑌾𑌲𑌶𑍍𑌰𑌿𑌯𑌮𑌿𑌯𑌮𑍍 ।
𑌸𑍍𑌵𑌤𑌃 𑌶𑍍𑌵𑍇𑌤𑌾 𑌕𑌾𑌲𑌾𑌗𑍁𑌰𑍁𑌬𑌹𑍁𑌲𑌜𑌮𑍍𑌬𑌾𑌲𑌮𑌲𑌿𑌨𑌾
𑌮𑍃𑌣𑌾𑌲𑍀𑌲𑌾𑌲𑌿𑌤𑍍𑌯𑌂 𑌵𑌹𑌤𑌿 𑌯𑌦𑌧𑍋 𑌹𑌾𑌰𑌲𑌤𑌿𑌕𑌾 ॥ 68 ॥
𑌗𑌲𑍇 𑌰𑍇𑌖𑌾𑌸𑍍𑌤𑌿𑌸𑍍𑌰𑍋 𑌗𑌤𑌿𑌗𑌮𑌕𑌗𑍀𑌤𑍈𑌕𑌨𑌿𑌪𑍁𑌣𑍇
𑌵𑌿𑌵𑌾𑌹𑌵𑍍𑌯𑌾𑌨𑌦𑍍𑌧𑌪𑍍𑌰𑌗𑍁𑌣𑌗𑍁𑌣𑌸𑌙𑍍𑌖𑍍𑌯𑌾𑌪𑍍𑌰𑌤𑌿𑌭𑍁𑌵𑌃 ।
𑌵𑌿𑌰𑌾𑌜𑌨𑍍𑌤𑍇 𑌨𑌾𑌨𑌾𑌵𑌿𑌧𑌮𑌧𑍁𑌰𑌰𑌾𑌗𑌾𑌕𑌰𑌭𑍁𑌵𑌾𑌂
𑌤𑍍𑌰𑌯𑌾𑌣𑌾𑌂 𑌗𑍍𑌰𑌾𑌮𑌾𑌣𑌾𑌂 𑌸𑍍𑌥𑌿𑌤𑌿𑌨𑌿𑌯𑌮𑌸𑍀𑌮𑌾𑌨 𑌇𑌵 𑌤𑍇 ॥ 69 ॥
𑌮𑍃𑌣𑌾𑌲𑍀𑌮𑍃𑌦𑍍𑌵𑍀𑌨𑌾𑌂 𑌤𑌵 𑌭𑍁𑌜𑌲𑌤𑌾𑌨𑌾𑌂 𑌚𑌤𑌸𑍃𑌣𑌾𑌂
𑌚𑌤𑍁𑌰𑍍𑌭𑌿𑌃 𑌸𑍗𑌨𑍍𑌦𑌰𑍍𑌯𑌂 𑌸𑌰𑌸𑌿𑌜𑌭𑌵𑌃 𑌸𑍍𑌤𑍗𑌤𑌿 𑌵𑌦𑌨𑍈𑌃 ।
𑌨𑌖𑍇𑌭𑍍𑌯𑌃 𑌸𑌨𑍍𑌤𑍍𑌰𑌸𑍍𑌯𑌨𑍍 𑌪𑍍𑌰𑌥𑌮𑌮𑌥𑌨𑌾𑌦𑌨𑍍𑌧𑌕𑌰𑌿𑌪𑍋-
𑌶𑍍𑌚𑌤𑍁𑌰𑍍𑌣𑌾𑌂 𑌶𑍀𑌰𑍍𑌷𑌾𑌣𑌾𑌂 𑌸𑌮𑌮𑌭𑌯𑌹𑌸𑍍𑌤𑌾𑌰𑍍𑌪𑌣𑌧𑌿𑌯𑌾 ॥ 70 ॥
𑌨𑌖𑌾𑌨𑌾𑌮𑍁𑌦𑍍𑌦𑍍𑌯𑍋𑌤𑍈𑌰𑍍𑌨𑌵𑌨𑌲𑌿𑌨𑌰𑌾𑌗𑌂 𑌵𑌿𑌹𑌸𑌤𑌾𑌂
𑌕𑌰𑌾𑌣𑌾𑌂 𑌤𑍇 𑌕𑌾𑌨𑍍𑌤𑌿𑌂 𑌕𑌥𑌯 𑌕𑌥𑌯𑌾𑌮𑌃 𑌕𑌥𑌮𑍁𑌮𑍇 ।
𑌕𑌯𑌾𑌚𑌿𑌦𑍍𑌵𑌾 𑌸𑌾𑌮𑍍𑌯𑌂 𑌭𑌜𑌤𑍁 𑌕𑌲𑌯𑌾 𑌹𑌨𑍍𑌤 𑌕𑌮𑌲𑌂
𑌯𑌦𑌿 𑌕𑍍𑌰𑍀𑌡𑌲𑍍𑌲𑌕𑍍𑌷𑍍𑌮𑍀𑌚𑌰𑌣𑌤𑌲𑌲𑌾𑌕𑍍𑌷𑌾𑌰𑌸𑌛𑌣𑌮𑍍 ॥ 71 ॥
𑌸𑌮𑌂 𑌦𑍇𑌵𑌿 𑌸𑍍𑌕𑌨𑍍𑌦𑌦𑍍𑌵𑌿𑌪𑌵𑌦𑌨𑌪𑍀𑌤𑌂 𑌸𑍍𑌤𑌨𑌯𑍁𑌗𑌂
𑌤𑌵𑍇𑌦𑌂 𑌨𑌃 𑌖𑍇𑌦𑌂 𑌹𑌰𑌤𑍁 𑌸𑌤𑌤𑌂 𑌪𑍍𑌰𑌸𑍍𑌨𑍁𑌤𑌮𑍁𑌖𑌮𑍍 ।
𑌯𑌦𑌾𑌲𑍋𑌕𑍍𑌯𑌾𑌶𑌙𑍍𑌕𑌾𑌕𑍁𑌲𑌿𑌤𑌹𑍃𑌦𑌯𑍋 𑌹𑌾𑌸𑌜𑌨𑌕𑌃
𑌸𑍍𑌵𑌕𑍁𑌮𑍍𑌭𑍗 𑌹𑍇𑌰𑌮𑍍𑌬𑌃 𑌪𑌰𑌿𑌮𑍃𑌶𑌤𑌿 𑌹𑌸𑍍𑌤𑍇𑌨 𑌝𑌡𑌿𑌤𑌿 ॥ 72 ॥
𑌅𑌮𑍂 𑌤𑍇 𑌵𑌕𑍍𑌷𑍋𑌜𑌾𑌵𑌮𑍃𑌤𑌰𑌸𑌮𑌾𑌣𑌿𑌕𑍍𑌯𑌕𑍁𑌤𑍁𑌪𑍗
𑌨 𑌸𑌨𑍍𑌦𑍇𑌹𑌸𑍍𑌪𑌨𑍍𑌦𑍋 𑌨𑌗𑌪𑌤𑌿𑌪𑌤𑌾𑌕𑍇 𑌮𑌨𑌸𑌿 𑌨𑌃 ।
𑌪𑌿𑌬𑌨𑍍𑌤𑍗 𑌤𑍗 𑌯𑌸𑍍𑌮𑌾𑌦𑌵𑌿𑌦𑌿𑌤𑌵𑌧𑍂𑌸𑌙𑍍𑌗𑌰𑌸𑌿𑌕𑍗
𑌕𑍁𑌮𑌾𑌰𑌾𑌵𑌦𑍍𑌯𑌾𑌪𑌿 𑌦𑍍𑌵𑌿𑌰𑌦𑌵𑌦𑌨𑌕𑍍𑌰𑍗𑌞𑍍𑌚𑌦𑌲𑌨𑍗 ॥ 73 ॥
𑌵𑌹𑌤𑍍𑌯𑌮𑍍𑌬 𑌸𑍍𑌤𑌮𑍍𑌬𑍇𑌰𑌮𑌦𑌨𑍁𑌜𑌕𑍁𑌮𑍍𑌭𑌪𑍍𑌰𑌕𑍃𑌤𑌿𑌭𑌿𑌃
𑌸𑌮𑌾𑌰𑌬𑍍𑌧𑌾𑌂 𑌮𑍁𑌕𑍍𑌤𑌾𑌮𑌣𑌿𑌭𑌿𑌰𑌮𑌲𑌾𑌂 𑌹𑌾𑌰𑌲𑌤𑌿𑌕𑌾𑌮𑍍 ।
𑌕𑍁𑌚𑌾𑌭𑍋𑌗𑍋 𑌬𑌿𑌮𑍍𑌬𑌾𑌧𑌰𑌰𑍁𑌚𑌿𑌭𑌿𑌰𑌨𑍍𑌤𑌃 𑌶𑌬𑌲𑌿𑌤𑌾𑌂
𑌪𑍍𑌰𑌤𑌾𑌪𑌵𑍍𑌯𑌾𑌮𑌿𑌶𑍍𑌰𑌾𑌂 𑌪𑍁𑌰𑌦𑌮𑌯𑌿𑌤𑍁𑌃 𑌕𑍀𑌰𑍍𑌤𑌿𑌮𑌿𑌵 𑌤𑍇 ॥ 74 ॥
𑌤𑌵 𑌸𑍍𑌤𑌨𑍍𑌯𑌂 𑌮𑌨𑍍𑌯𑍇 𑌧𑌰𑌣𑌿𑌧𑌰𑌕𑌨𑍍𑌯𑍇 𑌹𑍃𑌦𑌯𑌤𑌃
𑌪𑌯𑌃𑌪𑌾𑌰𑌾𑌵𑌾𑌰𑌃 𑌪𑌰𑌿𑌵𑌹𑌤𑌿 𑌸𑌾𑌰𑌸𑍍𑌵𑌤𑌮𑌿𑌵 ।
𑌦𑌯𑌾𑌵𑌤𑍍𑌯𑌾 𑌦𑌤𑍍𑌤𑌂 𑌦𑍍𑌰𑌵𑌿𑌡𑌶𑌿𑌶𑍁𑌰𑌾𑌸𑍍𑌵𑌾𑌦𑍍𑌯 𑌤𑌵 𑌯𑌤𑍍
𑌕𑌵𑍀𑌨𑌾𑌂 𑌪𑍍𑌰𑍗𑌢𑌾𑌨𑌾𑌮𑌜𑌨𑌿 𑌕𑌮𑌨𑍀𑌯𑌃 𑌕𑌵𑌯𑌿𑌤𑌾 ॥ 75 ॥
𑌹𑌰𑌕𑍍𑌰𑍋𑌧𑌜𑍍𑌵𑌾𑌲𑌾𑌵𑌲𑌿𑌭𑌿𑌰𑌵𑌲𑍀𑌢𑍇𑌨 𑌵𑌪𑍁𑌷𑌾
𑌗𑌭𑍀𑌰𑍇 𑌤𑍇 𑌨𑌾𑌭𑍀𑌸𑌰𑌸𑌿 𑌕𑍃𑌤𑌸𑌙𑍍𑌗𑍋 𑌮𑌨𑌸𑌿𑌜𑌃 ।
𑌸𑌮𑍁𑌤𑍍𑌤𑌸𑍍𑌥𑍗 𑌤𑌸𑍍𑌮𑌾𑌦𑌚𑌲𑌤𑌨𑌯𑍇 𑌧𑍂𑌮𑌲𑌤𑌿𑌕𑌾
𑌜𑌨𑌸𑍍𑌤𑌾𑌂 𑌜𑌾𑌨𑍀𑌤𑍇 𑌤𑌵 𑌜𑌨𑌨𑌿 𑌰𑍋𑌮𑌾𑌵𑌲𑌿𑌰𑌿𑌤𑌿 ॥ 76 ॥
𑌯𑌦𑍇𑌤𑌤𑍍 𑌕𑌾𑌲𑌿𑌨𑍍𑌦𑍀𑌤𑌨𑍁𑌤𑌰𑌤𑌰𑌙𑍍𑌗𑌾𑌕𑍃𑌤𑌿 𑌶𑌿𑌵𑍇
𑌕𑍃𑌶𑍇 𑌮𑌧𑍍𑌯𑍇 𑌕𑌿𑌞𑍍𑌚𑌿𑌜𑍍𑌜𑌨𑌨𑌿 𑌤𑌵 𑌯𑌦𑍍𑌭𑌾𑌤𑌿 𑌸𑍁𑌧𑌿𑌯𑌾𑌮𑍍 ।
𑌵𑌿𑌮𑌰𑍍𑌦𑌾𑌦𑌨𑍍𑌯𑍋𑌽𑌨𑍍𑌯𑌂 𑌕𑍁𑌚𑌕𑌲𑌶𑌯𑍋𑌰𑌨𑍍𑌤𑌰𑌗𑌤𑌂
𑌤𑌨𑍂𑌭𑍂𑌤𑌂 𑌵𑍍𑌯𑍋𑌮 𑌪𑍍𑌰𑌵𑌿𑌶𑌦𑌿𑌵 𑌨𑌾𑌭𑌿𑌂 𑌕𑍁𑌹𑌰𑌿𑌣𑍀𑌮𑍍 ॥ 77 ॥
𑌸𑍍𑌥𑌿𑌰𑍋 𑌗𑌙𑍍𑌗𑌾𑌵𑌰𑍍𑌤𑌃 𑌸𑍍𑌤𑌨𑌮𑍁𑌕𑍁𑌲𑌰𑍋𑌮𑌾𑌵𑌲𑌿𑌲𑌤𑌾-
𑌕𑌲𑌾𑌵𑌾𑌲𑌂 𑌕𑍁𑌣𑍍𑌡𑌂 𑌕𑍁𑌸𑍁𑌮𑌶𑌰𑌤𑍇𑌜𑍋𑌹𑍁𑌤𑌭𑍁𑌜𑌃 ।
𑌰𑌤𑍇𑌰𑍍𑌲𑍀𑌲𑌾𑌗𑌾𑌰𑌂 𑌕𑌿𑌮𑌪𑌿 𑌤𑌵 𑌨𑌾𑌭𑌿𑌰𑍍𑌗𑌿𑌰𑌿𑌸𑍁𑌤𑍇
𑌬𑌿𑌲𑌦𑍍𑌵𑌾𑌰𑌂 𑌸𑌿𑌦𑍍𑌧𑍇𑌰𑍍𑌗𑌿𑌰𑌿𑌶𑌨𑌯𑌨𑌾𑌨𑌾𑌂 𑌵𑌿𑌜𑌯𑌤𑍇 ॥ 78 ॥
𑌨𑌿𑌸𑌰𑍍𑌗𑌕𑍍𑌷𑍀𑌣𑌸𑍍𑌯 𑌸𑍍𑌤𑌨𑌤𑌟𑌭𑌰𑍇𑌣 𑌕𑍍𑌲𑌮𑌜𑍁𑌷𑍋
𑌨𑌮𑌨𑍍𑌮𑍂𑌰𑍍𑌤𑍇𑌰𑍍𑌨𑌾𑌰𑍀𑌤𑌿𑌲𑌕 𑌶𑌨𑌕𑍈𑌸𑍍𑌤𑍍𑌰𑍁𑌟𑍍𑌯𑌤 𑌇𑌵 ।
𑌚𑌿𑌰𑌂 𑌤𑍇 𑌮𑌧𑍍𑌯𑌸𑍍𑌯 𑌤𑍍𑌰𑍁𑌟𑌿𑌤𑌤𑌟𑌿𑌨𑍀𑌤𑍀𑌰𑌤𑌰𑍁𑌣𑌾
𑌸𑌮𑌾𑌵𑌸𑍍𑌥𑌾𑌸𑍍𑌥𑍇𑌮𑍍𑌨𑍋 𑌭𑌵𑌤𑍁 𑌕𑍁𑌶𑌲𑌂 𑌶𑍈𑌲𑌤𑌨𑌯𑍇 ॥ 79 ॥
𑌕𑍁𑌚𑍗 𑌸𑌦𑍍𑌯𑌃𑌸𑍍𑌵𑌿𑌦𑍍𑌯𑌤𑍍𑌤𑌟𑌘𑌟𑌿𑌤𑌕𑍂𑌰𑍍𑌪𑌾𑌸𑌭𑌿𑌦𑍁𑌰𑍗
𑌕𑌷𑌨𑍍𑌤𑍗 𑌦𑍋𑌰𑍍𑌮𑍂𑌲𑍇 𑌕𑌨𑌕𑌕𑌲𑌶𑌾𑌭𑍗 𑌕𑌲𑌯𑌤𑌾 ।
𑌤𑌵 𑌤𑍍𑌰𑌾𑌤𑍁𑌂 𑌭𑌙𑍍𑌗𑌾𑌦𑌲𑌮𑌿𑌤𑌿 𑌵𑌲𑌗𑍍𑌨𑌂 𑌤𑌨𑍁𑌭𑍁𑌵𑌾
𑌤𑍍𑌰𑌿𑌧𑌾 𑌨𑌦𑍍𑌧𑌂 𑌦𑍇𑌵𑌿 𑌤𑍍𑌰𑌿𑌵𑌲𑌿 𑌲𑌵𑌲𑍀𑌵𑌲𑍍𑌲𑌿𑌭𑌿𑌰𑌿𑌵 ॥ 80 ॥
𑌗𑍁𑌰𑍁𑌤𑍍𑌵𑌂 𑌵𑌿𑌸𑍍𑌤𑌾𑌰𑌂 𑌕𑍍𑌷𑌿𑌤𑌿𑌧𑌰𑌪𑌤𑌿𑌃 𑌪𑌾𑌰𑍍𑌵𑌤𑌿 𑌨𑌿𑌜𑌾-
𑌨𑍍𑌨𑌿𑌤𑌮𑍍𑌬𑌾𑌦𑌾𑌚𑍍𑌛𑌿𑌦𑍍𑌯 𑌤𑍍𑌵𑌯𑌿 𑌹𑌰𑌣𑌰𑍂𑌪𑍇𑌣 𑌨𑌿𑌦𑌧𑍇 ।
𑌅𑌤𑌸𑍍𑌤𑍇 𑌵𑌿𑌸𑍍𑌤𑍀𑌰𑍍𑌣𑍋 𑌗𑍁𑌰𑍁𑌰𑌯𑌮𑌶𑍇𑌷𑌾𑌂 𑌵𑌸𑍁𑌮𑌤𑍀𑌂
𑌨𑌿𑌤𑌮𑍍𑌬𑌪𑍍𑌰𑌾𑌗𑍍𑌭𑌾𑌰𑌃 𑌸𑍍𑌥𑌗𑌯𑌤𑌿 𑌲𑌘𑍁𑌤𑍍𑌵𑌂 𑌨𑌯𑌤𑌿 𑌚 ॥ 81 ॥
𑌕𑌰𑍀𑌨𑍍𑌦𑍍𑌰𑌾𑌣𑌾𑌂 𑌶𑍁𑌣𑍍𑌡𑌾𑌨𑍍 𑌕𑌨𑌕𑌕𑌦𑌲𑍀𑌕𑌾𑌣𑍍𑌡𑌪𑌟𑌲𑍀-
𑌮𑍁𑌭𑌾𑌭𑍍𑌯𑌾𑌮𑍂𑌰𑍁𑌭𑍍𑌯𑌾𑌮𑍁𑌭𑌯𑌮𑌪𑌿 𑌨𑌿𑌰𑍍𑌜𑌿𑌤𑍍𑌯 𑌭𑌵𑌤𑍀 ।
𑌸𑍁𑌵𑍃𑌤𑍍𑌤𑌾𑌭𑍍𑌯𑌾𑌂 𑌪𑌤𑍍𑌯𑍁𑌃 𑌪𑍍𑌰𑌣𑌤𑌿𑌕𑌠𑌿𑌨𑌾𑌭𑍍𑌯𑌾𑌂 𑌗𑌿𑌰𑌿𑌸𑍁𑌤𑍇
𑌵𑌿𑌧𑌿𑌜𑍍𑌞𑍇 𑌜𑌾𑌨𑍁𑌭𑍍𑌯𑌾𑌂 𑌵𑌿𑌬𑍁𑌧𑌕𑌰𑌿𑌕𑍁𑌮𑍍𑌭𑌦𑍍𑌵𑌯𑌮𑌸𑌿 ॥ 82 ॥
𑌪𑌰𑌾𑌜𑍇𑌤𑍁𑌂 𑌰𑍁𑌦𑍍𑌰𑌂 𑌦𑍍𑌵𑌿𑌗𑍁𑌣𑌶𑌰𑌗𑌰𑍍𑌭𑍗 𑌗𑌿𑌰𑌿𑌸𑍁𑌤𑍇
𑌨𑌿𑌷𑌙𑍍𑌗𑍗 𑌜𑌙𑍍𑌘𑍇 𑌤𑍇 𑌵𑌿𑌷𑌮𑌵𑌿𑌶𑌿𑌖𑍋 𑌬𑌾𑌢𑌮𑌕𑍃𑌤 ।
𑌯𑌦𑌗𑍍𑌰𑍇 𑌦𑍃𑌶𑍍𑌯𑌨𑍍𑌤𑍇 𑌦𑌶𑌶𑌰𑌫𑌲𑌾𑌃 𑌪𑌾𑌦𑌯𑍁𑌗𑌲𑍀-
𑌨𑌖𑌾𑌗𑍍𑌰𑌚𑍍𑌛𑌦𑍍𑌮𑌾𑌨𑌃 𑌸𑍁𑌰𑌮𑌕𑍁𑌟𑌶𑌾𑌣𑍈𑌕𑌨𑌿𑌶𑌿𑌤𑌾𑌃 ॥ 83 ॥
𑌶𑍍𑌰𑍁𑌤𑍀𑌨𑌾𑌂 𑌮𑍂𑌰𑍍𑌧𑌾𑌨𑍋 𑌦𑌧𑌤𑌿 𑌤𑌵 𑌯𑍗 𑌶𑍇𑌖𑌰𑌤𑌯𑌾
𑌮𑌮𑌾𑌪𑍍𑌯𑍇𑌤𑍗 𑌮𑌾𑌤𑌃 𑌶𑌿𑌰𑌸𑌿 𑌦𑌯𑌯𑌾 𑌧𑍇𑌹𑌿 𑌚𑌰𑌣𑍗 ।
𑌯𑌯𑍋𑌃 𑌪𑌾𑌦𑍍𑌯𑌂 𑌪𑌾𑌥𑌃 𑌪𑌶𑍁𑌪𑌤𑌿𑌜𑌟𑌾𑌜𑍂𑌟𑌤𑌟𑌿𑌨𑍀
𑌯𑌯𑍋𑌰𑍍𑌲𑌾𑌕𑍍𑌷𑌾𑌲𑌕𑍍𑌷𑍍𑌮𑍀𑌰𑌰𑍁𑌣𑌹𑌰𑌿𑌚𑍂𑌡𑌾𑌮𑌣𑌿𑌰𑍁𑌚𑌿𑌃 ॥ 84 ॥
𑌨𑌮𑍋𑌵𑌾𑌕𑌂 𑌬𑍍𑌰𑍂𑌮𑍋 𑌨𑌯𑌨𑌰𑌮𑌣𑍀𑌯𑌾𑌯 𑌪𑌦𑌯𑍋-
𑌸𑍍𑌤𑌵𑌾𑌸𑍍𑌮𑍈 𑌦𑍍𑌵𑌨𑍍𑌦𑍍𑌵𑌾𑌯 𑌸𑍍𑌫𑍁𑌟𑌰𑍁𑌚𑌿𑌰𑌸𑌾𑌲𑌕𑍍𑌤𑌕𑌵𑌤𑍇 ।
𑌅𑌸𑍂𑌯𑌤𑍍𑌯𑌤𑍍𑌯𑌨𑍍𑌤𑌂 𑌯𑌦𑌭𑌿𑌹𑌨𑌨𑌾𑌯 𑌸𑍍𑌪𑍃𑌹𑌯𑌤𑍇
𑌪𑌶𑍂𑌨𑌾𑌮𑍀𑌶𑌾𑌨𑌃 𑌪𑍍𑌰𑌮𑌦𑌵𑌨𑌕𑌙𑍍𑌕𑍇𑌲𑌿𑌤𑌰𑌵𑍇 ॥ 85 ॥
𑌮𑍃𑌷𑌾 𑌕𑍃𑌤𑍍𑌵𑌾 𑌗𑍋𑌤𑍍𑌰𑌸𑍍𑌖𑌲𑌨𑌮𑌥 𑌵𑍈𑌲𑌕𑍍𑌷𑍍𑌯𑌨𑌮𑌿𑌤𑌂
𑌲𑌲𑌾𑌟𑍇 𑌭𑌰𑍍𑌤𑌾𑌰𑌂 𑌚𑌰𑌣𑌕𑌮𑌲𑍇 𑌤𑌾𑌡𑌯𑌤𑌿 𑌤𑍇 ।
𑌚𑌿𑌰𑌾𑌦𑌨𑍍𑌤𑌃𑌶𑌲𑍍𑌯𑌂 𑌦𑌹𑌨𑌕𑍃𑌤𑌮𑍁𑌨𑍍𑌮𑍂𑌲𑌿𑌤𑌵𑌤𑌾
𑌤𑍁𑌲𑌾𑌕𑍋𑌟𑌿𑌕𑍍𑌵𑌾𑌣𑍈𑌃 𑌕𑌿𑌲𑌿𑌕𑌿𑌲𑌿𑌤𑌮𑍀𑌶𑌾𑌨𑌰𑌿𑌪𑍁𑌣𑌾 ॥ 86 ॥
𑌹𑌿𑌮𑌾𑌨𑍀𑌹𑌨𑍍𑌤𑌵𑍍𑌯𑌂 𑌹𑌿𑌮𑌗𑌿𑌰𑌿𑌨𑌿𑌵𑌾𑌸𑍈𑌕𑌚𑌤𑍁𑌰𑍗
𑌨𑌿𑌶𑌾𑌯𑌾𑌂 𑌨𑌿𑌦𑍍𑌰𑌾𑌣𑌂 𑌨𑌿𑌶𑌿 𑌚𑌰𑌮𑌭𑌾𑌗𑍇 𑌚 𑌵𑌿𑌶𑌦𑍗 ।
𑌵𑌰𑌂 𑌲𑌕𑍍𑌷𑍍𑌮𑍀𑌪𑌾𑌤𑍍𑌰𑌂 𑌶𑍍𑌰𑌿𑌯𑌮𑌤𑌿𑌸𑍃𑌜𑌨𑍍𑌤𑍗 𑌸𑌮𑌯𑌿𑌨𑌾𑌂
𑌸𑌰𑍋𑌜𑌂 𑌤𑍍𑌵𑌤𑍍𑌪𑌾𑌦𑍗 𑌜𑌨𑌨𑌿 𑌜𑌯𑌤𑌶𑍍𑌚𑌿𑌤𑍍𑌰𑌮𑌿𑌹 𑌕𑌿𑌮𑍍 ॥ 87 ॥
𑌪𑌦𑌂 𑌤𑍇 𑌕𑍀𑌰𑍍𑌤𑍀𑌨𑌾𑌂 𑌪𑍍𑌰𑌪𑌦𑌮𑌪𑌦𑌂 𑌦𑍇𑌵𑌿 𑌵𑌿𑌪𑌦𑌾𑌂
𑌕𑌥𑌂 𑌨𑍀𑌤𑌂 𑌸𑌦𑍍𑌭𑌿𑌃 𑌕𑌠𑌿𑌨𑌕𑌮𑌠𑍀𑌕𑌰𑍍𑌪𑌰𑌤𑍁𑌲𑌾𑌮𑍍 ।
𑌕𑌥𑌂 𑌵𑌾 𑌬𑌾𑌹𑍁𑌭𑍍𑌯𑌾𑌮𑍁𑌪𑌯𑌮𑌨𑌕𑌾𑌲𑍇 𑌪𑍁𑌰𑌭𑌿𑌦𑌾
𑌯𑌦𑌾𑌦𑌾𑌯 𑌨𑍍𑌯𑌸𑍍𑌤𑌂 𑌦𑍃𑌷𑌦𑌿 𑌦𑌯𑌮𑌾𑌨𑍇𑌨 𑌮𑌨𑌸𑌾 ॥ 88 ॥
𑌨𑌖𑍈𑌰𑍍𑌨𑌾𑌕𑌸𑍍𑌤𑍍𑌰𑍀𑌣𑌾𑌂 𑌕𑌰𑌕𑌮𑌲𑌸𑌙𑍍𑌕𑍋𑌚𑌶𑌶𑌿𑌭𑌿-
𑌸𑍍𑌤𑌰𑍂𑌣𑌾𑌂 𑌦𑌿𑌵𑍍𑌯𑌾𑌨𑌾𑌂 𑌹𑌸𑌤 𑌇𑌵 𑌤𑍇 𑌚𑌣𑍍𑌡𑌿 𑌚𑌰𑌣𑍗 ।
𑌫𑌲𑌾𑌨𑌿 𑌸𑍍𑌵𑌃𑌸𑍍𑌥𑍇𑌭𑍍𑌯𑌃 𑌕𑌿𑌸𑌲𑌯𑌕𑌰𑌾𑌗𑍍𑌰𑍇𑌣 𑌦𑌦𑌤𑌾𑌂
𑌦𑌰𑌿𑌦𑍍𑌰𑍇𑌭𑍍𑌯𑍋 𑌭𑌦𑍍𑌰𑌾𑌂 𑌶𑍍𑌰𑌿𑌯𑌮𑌨𑌿𑌶𑌮𑌹𑍍𑌨𑌾𑌯 𑌦𑌦𑌤𑍗 ॥ 89 ॥
𑌦𑌦𑌾𑌨𑍇 𑌦𑍀𑌨𑍇𑌭𑍍𑌯𑌃 𑌶𑍍𑌰𑌿𑌯𑌮𑌨𑌿𑌶𑌮𑌾𑌶𑌾𑌨𑍁𑌸𑌦𑍃𑌶𑍀-
𑌮𑌮𑌨𑍍𑌦𑌂 𑌸𑍗𑌨𑍍𑌦𑌰𑍍𑌯𑌪𑍍𑌰𑌕𑌰𑌮𑌕𑌰𑌨𑍍𑌦𑌂 𑌵𑌿𑌕𑌿𑌰𑌤𑌿 ।
𑌤𑌵𑌾𑌸𑍍𑌮𑌿𑌨𑍍 𑌮𑌨𑍍𑌦𑌾𑌰𑌸𑍍𑌤𑌬𑌕𑌸𑍁𑌭𑌗𑍇 𑌯𑌾𑌤𑍁 𑌚𑌰𑌣𑍇
𑌨𑌿𑌮𑌜𑍍𑌜𑌨𑍍𑌮𑌜𑍍𑌜𑍀𑌵𑌃 𑌕𑌰𑌣𑌚𑌰𑌣𑌃 𑌷𑌟𑍍𑌚𑌰𑌣𑌤𑌾𑌮𑍍 ॥ 90 ॥
𑌪𑌦𑌨𑍍𑌯𑌾𑌸𑌕𑍍𑌰𑍀𑌡𑌾𑌪𑌰𑌿𑌚𑌯𑌮𑌿𑌵𑌾𑌰𑌬𑍍𑌧𑍁𑌮𑌨𑌸𑌃
𑌸𑍍𑌖𑌲𑌨𑍍𑌤𑌸𑍍𑌤𑍇 𑌖𑍇𑌲𑌂 𑌭𑌵𑌨𑌕𑌲𑌹𑌂𑌸𑌾 𑌨 𑌜𑌹𑌤𑌿 ।
𑌅𑌤𑌸𑍍𑌤𑍇𑌷𑌾𑌂 𑌶𑌿𑌕𑍍𑌷𑌾𑌂 𑌸𑍁𑌭𑌗𑌮𑌣𑌿𑌮𑌞𑍍𑌜𑍀𑌰𑌰𑌣𑌿𑌤-
𑌚𑍍𑌛𑌲𑌾𑌦𑌾𑌚𑌕𑍍𑌷𑌾𑌣𑌂 𑌚𑌰𑌣𑌕𑌮𑌲𑌂 𑌚𑌾𑌰𑍁𑌚𑌰𑌿𑌤𑍇 ॥ 91 ॥
𑌗𑌤𑌾𑌸𑍍𑌤𑍇 𑌮𑌞𑍍𑌚𑌤𑍍𑌵𑌂 𑌦𑍍𑌰𑍁𑌹𑌿𑌣𑌹𑌰𑌿𑌰𑍁𑌦𑍍𑌰𑍇𑌶𑍍𑌵𑌰𑌭𑍃𑌤𑌃
𑌶𑌿𑌵𑌃 𑌸𑍍𑌵𑌚𑍍𑌛𑌚𑍍𑌛𑌾𑌯𑌾𑌘𑌟𑌿𑌤𑌕𑌪𑌟𑌪𑍍𑌰𑌚𑍍𑌛𑌦𑌪𑌟𑌃 ।
𑌤𑍍𑌵𑌦𑍀𑌯𑌾𑌨𑌾𑌂 𑌭𑌾𑌸𑌾𑌂 𑌪𑍍𑌰𑌤𑌿𑌫𑌲𑌨𑌰𑌾𑌗𑌾𑌰𑍁𑌣𑌤𑌯𑌾
𑌶𑌰𑍀𑌰𑍀 𑌶𑍃𑌙𑍍𑌗𑌾𑌰𑍋 𑌰𑌸 𑌇𑌵 𑌦𑍃𑌶𑌾𑌂 𑌦𑍋𑌗𑍍𑌧𑌿 𑌕𑍁𑌤𑍁𑌕𑌮𑍍 ॥ 92 ॥
𑌅𑌰𑌾𑌲𑌾 𑌕𑍇𑌶𑍇𑌷𑍁 𑌪𑍍𑌰𑌕𑍃𑌤𑌿𑌸𑌰𑌲𑌾 𑌮𑌨𑍍𑌦𑌹𑌸𑌿𑌤𑍇
𑌶𑌿𑌰𑍀𑌷𑌾𑌭𑌾 𑌚𑌿𑌤𑍍𑌤𑍇 𑌦𑍃𑌷𑌦𑍁𑌪𑌲𑌶𑍋𑌭𑌾 𑌕𑍁𑌚𑌤𑌟𑍇 ।
𑌭𑍃𑌶𑌂 𑌤𑌨𑍍𑌵𑍀 𑌮𑌧𑍍𑌯𑍇 𑌪𑍃𑌥𑍁𑌰𑍁𑌰𑌸𑌿𑌜𑌾𑌰𑍋𑌹𑌵𑌿𑌷𑌯𑍇
𑌜𑌗𑌤𑍍𑌤𑍍𑌰𑌾𑌤𑍁𑌂 𑌶𑌮𑍍𑌭𑍋𑌰𑍍𑌜𑌯𑌤𑌿 𑌕𑌰𑍁𑌣𑌾 𑌕𑌾𑌚𑌿𑌦𑌰𑍁𑌣𑌾 ॥ 93 ॥
𑌕𑌲𑌙𑍍𑌕𑌃 𑌕𑌸𑍍𑌤𑍂𑌰𑍀 𑌰𑌜𑌨𑌿𑌕𑌰𑌬𑌿𑌮𑍍𑌬𑌂 𑌜𑌲𑌮𑌯𑌂
𑌕𑌲𑌾𑌭𑌿𑌃 𑌕𑌰𑍍𑌪𑍂𑌰𑍈𑌰𑍍𑌮𑌰𑌕𑌤𑌕𑌰𑌣𑍍𑌡𑌂 𑌨𑌿𑌬𑌿𑌡𑌿𑌤𑌮𑍍 ।
𑌅𑌤𑌸𑍍𑌤𑍍𑌵𑌦𑍍𑌭𑍋𑌗𑍇𑌨 𑌪𑍍𑌰𑌤𑌿𑌦𑌿𑌨𑌮𑌿𑌦𑌂 𑌰𑌿𑌕𑍍𑌤𑌕𑍁𑌹𑌰𑌂
𑌵𑌿𑌧𑌿𑌰𑍍𑌭𑍂𑌯𑍋 𑌭𑍂𑌯𑍋 𑌨𑌿𑌬𑌿𑌡𑌯𑌤𑌿 𑌨𑍂𑌨𑌂 𑌤𑌵 𑌕𑍃𑌤𑍇 ॥ 94 ॥
𑌪𑍁𑌰𑌾𑌰𑌾𑌤𑍇𑌰𑌨𑍍𑌤𑌃𑌪𑍁𑌰𑌮𑌸𑌿 𑌤𑌤𑌸𑍍𑌤𑍍𑌵𑌚𑍍𑌚𑌰𑌣𑌯𑍋𑌃
𑌸𑌪𑌰𑍍𑌯𑌾𑌮𑌰𑍍𑌯𑌾𑌦𑌾 𑌤𑌰𑌲𑌕𑌰𑌣𑌾𑌨𑌾𑌮𑌸𑍁𑌲𑌭𑌾 ।
𑌤𑌥𑌾 𑌹𑍍𑌯𑍇𑌤𑍇 𑌨𑍀𑌤𑌾𑌃 𑌶𑌤𑌮𑌖𑌮𑍁𑌖𑌾𑌃 𑌸𑌿𑌦𑍍𑌧𑌿𑌮𑌤𑍁𑌲𑌾𑌂
𑌤𑌵 𑌦𑍍𑌵𑌾𑌰𑍋𑌪𑌾𑌨𑍍𑌤𑌸𑍍𑌥𑌿𑌤𑌿𑌭𑌿𑌰𑌣𑌿𑌮𑌾𑌦𑍍𑌯𑌾𑌭𑌿𑌰𑌮𑌰𑌾𑌃 ॥ 95 ॥
𑌕𑌲𑌤𑍍𑌰𑌂 𑌵𑍈𑌧𑌾𑌤𑍍𑌰𑌂 𑌕𑌤𑌿𑌕𑌤𑌿 𑌭𑌜𑌨𑍍𑌤𑍇 𑌨 𑌕𑌵𑌯𑌃
𑌶𑍍𑌰𑌿𑌯𑍋 𑌦𑍇𑌵𑍍𑌯𑌾𑌃 𑌕𑍋 𑌵𑌾 𑌨 𑌭𑌵𑌤𑌿 𑌪𑌤𑌿𑌃 𑌕𑍈𑌰𑌪𑌿 𑌧𑌨𑍈𑌃 ।
𑌮𑌹𑌾𑌦𑍇𑌵𑌂 𑌹𑌿𑌤𑍍𑌵𑌾 𑌤𑌵 𑌸𑌤𑌿 𑌸𑌤𑍀𑌨𑌾𑌮𑌚𑌰𑌮𑍇
𑌕𑍁𑌚𑌾𑌭𑍍𑌯𑌾𑌮𑌾𑌸𑌙𑍍𑌗𑌃 𑌕𑍁𑌰𑌵𑌕𑌤𑌰𑍋𑌰𑌪𑍍𑌯𑌸𑍁𑌲𑌭𑌃 ॥ 96 ॥
𑌗𑌿𑌰𑌾𑌮𑌾𑌹𑍁𑌰𑍍𑌦𑍇𑌵𑍀𑌂 𑌦𑍍𑌰𑍁𑌹𑌿𑌣𑌗𑍃𑌹𑌿𑌣𑍀𑌮𑌾𑌗𑌮𑌵𑌿𑌦𑍋
𑌹𑌰𑍇𑌃 𑌪𑌤𑍍𑌨𑍀𑌂 𑌪𑌦𑍍𑌮𑌾𑌂 𑌹𑌰𑌸𑌹𑌚𑌰𑍀𑌮𑌦𑍍𑌰𑌿𑌤𑌨𑌯𑌾𑌮𑍍 ।
𑌤𑍁𑌰𑍀𑌯𑌾 𑌕𑌾𑌪𑌿 𑌤𑍍𑌵𑌂 𑌦𑍁𑌰𑌧𑌿𑌗𑌮𑌨𑌿𑌃𑌸𑍀𑌮𑌮𑌹𑌿𑌮𑌾
𑌮𑌹𑌾𑌮𑌾𑌯𑌾 𑌵𑌿𑌶𑍍𑌵𑌂 𑌭𑍍𑌰𑌮𑌯𑌸𑌿 𑌪𑌰𑌬𑍍𑌰𑌹𑍍𑌮𑌮𑌹𑌿𑌷𑌿 ॥ 97 ॥
𑌕𑌦𑌾 𑌕𑌾𑌲𑍇 𑌮𑌾𑌤𑌃 𑌕𑌥𑌯 𑌕𑌲𑌿𑌤𑌾𑌲𑌕𑍍𑌤𑌕𑌰𑌸𑌂
𑌪𑌿𑌬𑍇𑌯𑌂 𑌵𑌿𑌦𑍍𑌯𑌾𑌰𑍍𑌥𑍀 𑌤𑌵 𑌚𑌰𑌣𑌨𑌿𑌰𑍍𑌣𑍇𑌜𑌨𑌜𑌲𑌮𑍍 ।
𑌪𑍍𑌰𑌕𑍃𑌤𑍍𑌯𑌾 𑌮𑍂𑌕𑌾𑌨𑌾𑌮𑌪𑌿 𑌚 𑌕𑌵𑌿𑌤𑌾𑌕𑌾𑌰𑌣𑌤𑌯𑌾
𑌕𑌦𑌾 𑌧𑌤𑍍𑌤𑍇 𑌵𑌾𑌣𑍀𑌮𑍁𑌖𑌕𑌮𑌲𑌤𑌾𑌮𑍍𑌬𑍂𑌲𑌰𑌸𑌤𑌾𑌮𑍍 ॥ 98 ॥
𑌸𑌰𑌸𑍍𑌵𑌤𑍍𑌯𑌾 𑌲𑌕𑍍𑌷𑍍𑌮𑍍𑌯𑌾 𑌵𑌿𑌧𑌿𑌹𑌰𑌿𑌸𑌪𑌤𑍍𑌨𑍋 𑌵𑌿𑌹𑌰𑌤𑍇
𑌰𑌤𑍇𑌃 𑌪𑌾𑌤𑌿𑌵𑍍𑌰𑌤𑍍𑌯𑌂 𑌶𑌿𑌥𑌿𑌲𑌯𑌤𑌿 𑌰𑌮𑍍𑌯𑍇𑌣 𑌵𑌪𑍁𑌷𑌾 ।
𑌚𑌿𑌰𑌂 𑌜𑍀𑌵𑌨𑍍𑌨𑍇𑌵 𑌕𑍍𑌷𑌪𑌿𑌤𑌪𑌶𑍁𑌪𑌾𑌶𑌵𑍍𑌯𑌤𑌿𑌕𑌰𑌃
𑌪𑌰𑌾𑌨𑌨𑍍𑌦𑌾𑌭𑌿𑌖𑍍𑌯𑌂 𑌰𑌸𑌯𑌤𑌿 𑌰𑌸𑌂 𑌤𑍍𑌵𑌦𑍍𑌭𑌜𑌨𑌵𑌾𑌨𑍍 ॥ 99 ॥
𑌪𑍍𑌰𑌦𑍀𑌪𑌜𑍍𑌵𑌾𑌲𑌾𑌭𑌿𑌰𑍍𑌦𑌿𑌵𑌸𑌕𑌰𑌨𑍀𑌰𑌾𑌜𑌨𑌵𑌿𑌧𑌿𑌃
𑌸𑍁𑌧𑌾𑌸𑍂𑌤𑍇𑌶𑍍𑌚𑌨𑍍𑌦𑍍𑌰𑍋𑌪𑌲𑌜𑌲𑌲𑌵𑍈𑌰𑌰𑍍𑌘𑍍𑌯𑌰𑌚𑌨𑌾 ।
𑌸𑍍𑌵𑌕𑍀𑌯𑍈𑌰𑌮𑍍𑌭𑍋𑌭𑌿𑌃 𑌸𑌲𑌿𑌲𑌨𑌿𑌧𑌿𑌸𑍗𑌹𑌿𑌤𑍍𑌯𑌕𑌰𑌣𑌂
𑌤𑍍𑌵𑌦𑍀𑌯𑌾𑌭𑌿𑌰𑍍𑌵𑌾𑌗𑍍𑌭𑌿𑌸𑍍𑌤𑌵 𑌜𑌨𑌨𑌿 𑌵𑌾𑌚𑌾𑌂 𑌸𑍍𑌤𑍁𑌤𑌿𑌰𑌿𑌯𑌮𑍍 ॥ 100 ॥
𑌸𑍗𑌨𑍍𑌦𑌰𑍍𑌯𑌲𑌹𑌰𑌿 𑌮𑍁𑌖𑍍𑌯𑌸𑍍𑌤𑍋𑌤𑍍𑌰𑌂 𑌸𑌂𑌵𑌾𑌰𑍍𑌤𑌦𑌾𑌯𑌕𑌮𑍍 ।
𑌭𑌗𑌵𑌦𑍍𑌪𑌾𑌦 𑌸𑌨𑍍𑌕𑍍𑌲𑍁𑌪𑍍𑌤𑌂 𑌪𑌠𑍇𑌨𑍍 𑌮𑍁𑌕𑍍𑌤𑍗 𑌭𑌵𑍇𑌨𑍍𑌨𑌰𑌃 ॥
॥ 𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯
𑌶𑍍𑌰𑍀𑌗𑍋𑌵𑌿𑌨𑍍𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯
𑌶𑍍𑌰𑍀𑌮𑌚𑍍𑌛𑌙𑍍𑌕𑌰𑌭𑌗𑌵𑌤𑌃 𑌕𑍃𑌤𑍗 𑌸𑍗𑌨𑍍𑌦𑌰𑍍𑌯𑌲𑌹𑌰𑍀 𑌸𑌮𑍍𑌪𑍂𑌰𑍍𑌣𑌾 ॥
॥ 𑍐 𑌤𑌤𑍍𑌸𑌤𑍍 ॥
(𑌅𑌨𑍁𑌬𑌨𑍍𑌧𑌃)
𑌸𑌮𑌾𑌨𑍀𑌤𑌃 𑌪𑌦𑍍𑌭𑍍𑌯𑌾𑌂 𑌮𑌣𑌿𑌮𑍁𑌕𑍁𑌰𑌤𑌾𑌮𑌮𑍍𑌬𑌰𑌮𑌣𑌿-
𑌰𑍍𑌭𑌯𑌾𑌦𑌾𑌸𑍍𑌯𑌾𑌦𑌨𑍍𑌤𑌃𑌸𑍍𑌤𑌿𑌮𑌿𑌤𑌕𑌿𑌰𑌣𑌶𑍍𑌰𑍇𑌣𑌿𑌮𑌸𑍃𑌣𑌃 ।
(𑌪𑌾𑌠𑌭𑍇𑌦𑌃 - 𑌭𑌯𑌾𑌦𑌾𑌸𑍍𑌯 𑌸𑍍𑌨𑌿𑌗𑍍𑌧𑌸𑍍𑌤𑍍𑌮𑌿𑌤, 𑌭𑌯𑌾𑌦𑌾𑌸𑍍𑌯𑌸𑍍𑌯𑌾𑌨𑍍𑌤𑌃𑌸𑍍𑌤𑍍𑌮𑌿𑌤)
𑌦𑌧𑌾𑌤𑌿 𑌤𑍍𑌵𑌦𑍍𑌵𑌕𑍍𑌤𑍍𑌰𑌮𑍍𑌪𑍍𑌰𑌤𑌿𑌫𑌲𑌨𑌮𑌶𑍍𑌰𑌾𑌨𑍍𑌤𑌵𑌿𑌕𑌚𑌂
𑌨𑌿𑌰𑌾𑌤𑌙𑍍𑌕𑌂 𑌚𑌨𑍍𑌦𑍍𑌰𑌾𑌨𑍍𑌨𑌿𑌜𑌹𑍃𑌦𑌯𑌪𑌙𑍍𑌕𑍇𑌰𑍁𑌹𑌮𑌿𑌵 ॥ 101 ॥
𑌸𑌮𑍁𑌦𑍍𑌭𑍂𑌤𑌸𑍍𑌥𑍂𑌲𑌸𑍍𑌤𑌨𑌭𑌰𑌮𑍁𑌰𑌶𑍍𑌚𑌾𑌰𑍁 𑌹𑌸𑌿𑌤𑌂
𑌕𑌟𑌾𑌕𑍍𑌷𑍇 𑌕𑌨𑍍𑌦𑌰𑍍𑌪𑌃 𑌕𑌤𑌿𑌚𑌨 𑌕𑌦𑌮𑍍𑌬𑌦𑍍𑌯𑍁𑌤𑌿 𑌵𑌪𑍁𑌃 ।
𑌹𑌰𑌸𑍍𑌯 𑌤𑍍𑌵𑌦𑍍𑌭𑍍𑌰𑌾𑌨𑍍𑌤𑌿𑌂 𑌮𑌨𑌸𑌿 𑌜𑌨𑌯𑌨𑍍𑌤𑌿 𑌸𑍍𑌮 𑌵𑌿𑌮𑌲𑌾𑌃
𑌪𑌾𑌠𑌭𑍇𑌦𑌃 - 𑌜𑌨𑌯𑌾𑌮𑌾𑌸 𑌮𑌦𑌨𑍋, 𑌜𑌨𑌯𑌨𑍍𑌤𑌃 𑌸𑌮𑌤𑍁𑌲𑌾𑌂, 𑌜𑌨𑌯𑌨𑍍𑌤𑌾 𑌸𑍁𑌵𑌦𑌨𑍇
𑌭𑌵𑌤𑍍𑌯𑌾 𑌯𑍇 𑌭𑌕𑍍𑌤𑌾𑌃 𑌪𑌰𑌿𑌣𑌤𑌿𑌰𑌮𑍀𑌷𑌾𑌮𑌿𑌯𑌮𑍁𑌮𑍇 ॥ 102 ॥
𑌨𑌿𑌧𑍇 𑌨𑌿𑌤𑍍𑌯𑌸𑍍𑌮𑍇𑌰𑍇 𑌨𑌿𑌰𑌵𑌧𑌿𑌗𑍁𑌣𑍇 𑌨𑍀𑌤𑌿𑌨𑌿𑌪𑍁𑌣𑍇
𑌨𑌿𑌰𑌾𑌘𑌾𑌤𑌜𑍍𑌞𑌾𑌨𑍇 𑌨𑌿𑌯𑌮𑌪𑌰𑌚𑌿𑌤𑍍𑌤𑍈𑌕𑌨𑌿𑌲𑌯𑍇 ।
𑌨𑌿𑌯𑌤𑍍𑌯𑌾 𑌨𑌿𑌰𑍍𑌮𑍁𑌕𑍍𑌤𑍇 𑌨𑌿𑌖𑌿𑌲𑌨𑌿𑌗𑌮𑌾𑌨𑍍𑌤𑌸𑍍𑌤𑍁𑌤𑌿𑌪𑌦𑍇
𑌨𑌿𑌰𑌾𑌤𑌙𑍍𑌕𑍇 𑌨𑌿𑌤𑍍𑌯𑍇 𑌨𑌿𑌗𑌮𑌯 𑌮𑌮𑌾𑌪𑌿 𑌸𑍍𑌤𑍁𑌤𑌿𑌮𑌿𑌮𑌾𑌮𑍍 ॥ 103 ॥
Roman (IAST) Transliteration
prathama bhāgaḥ - ānanda lahari
bhumauskhalita pādānāṃ bhūmirevā valambanam |
tvayī jātā parādhānāṃ tvameva śaraṇaṃ śive ||
śivaḥ śaktyā yukto yadi bhavati śaktaḥ prabhavituṃ
na cedevaṃ devo na khalu kuśalaḥ spanditumapi |
atastvāmārādhyāṃ hariharaviriñcādibhirapi
praṇantuṃ stotuṃ vā kathamakṛtapuṇyaḥ prabhavati || 1 ||
tanīyāṃsaṃ pāṃsuṃ tava caraṇapaṅkeruhabhavaṃ
viriñcissañcinvan viracayati lokānavikalam |
vahatyenaṃ śauriḥ kathamapi sahasreṇa śirasāṃ
harassaṅkṣudyainaṃ bhajati bhasitoddhūlanavidhim || 2 ||
avidyānāmanta-stimira-mihiradvīpanagarī
jaḍānāṃ caitanya-stabaka-makaranda-srutijharī |
daridrāṇāṃ cintāmaṇiguṇanikā janmajaladhau
nimagnānāṃ daṃṣṭrā muraripu-varāhasya bhavati || 3 ||
tvadanyaḥ pāṇibhyāmabhayavarado daivatagaṇaḥ
tvamekā naivāsi prakaṭitavarābhītyabhinayā |
bhayāt trātuṃ dātuṃ phalamapi ca vāñchāsamadhikaṃ
śaraṇye lokānāṃ tava hi caraṇāveva nipuṇau || 4 ||
haristvāmārādhya praṇatajanasaubhāgyajananīṃ
purā nārī bhūtvā puraripumapi kṣobhamanayat |
smaro'pi tvāṃ natvā ratinayanalehyena vapuṣā
munīnāmapyantaḥ prabhavati hi mohāya mahatām || 5 ||
dhanuḥ pauṣpaṃ maurvī madhukaramayī pañca viśikhāḥ
vasantaḥ sāmanto malayamarudāyodhanarathaḥ |
tathāpyekaḥ sarvaṃ himagirisute kāmapi kṛpām
apāṅgātte labdhvā jagadida-manaṅgo vijayate || 6 ||
kvaṇatkāñcīdāmā karikalabhakumbhastananatā
parikṣīṇā madhye pariṇataśaraccandravadanā |
dhanurbāṇān pāśaṃ sṛṇimapi dadhānā karatalaiḥ
purastādāstāṃ naḥ puramathiturāhopuruṣikā || 7 ||
sudhāsindhormadhye suraviṭapivāṭīparivṛte
maṇidvīpe nīpopavanavati cintāmaṇigṛhe |
śivākāre mañce paramaśivaparyaṅkanilayāṃ
bhajanti tvāṃ dhanyāḥ katicana cidānandalaharīm || 8 ||
mahīṃ mūlādhāre kamapi maṇipūre hutavahaṃ
sthitaṃ svādhiṣṭhāne hṛdi marutamākāśamupari |
mano'pi bhrūmadhye sakalamapi bhitvā kulapathaṃ
sahasrāre padme saha rahasi patyā viharase || 9 ||
sudhādhārāsāraiścaraṇayugalāntarvigalitaiḥ
prapañcaṃ siñcantī punarapi rasāmnāyamahasaḥ |
avāpya svāṃ bhūmiṃ bhujaganibhamadhyuṣṭavalayaṃ
svamātmānaṃ kṛtvā svapiṣi kulakuṇḍe kuhariṇi || 10 ||
caturbhiḥ śrīkaṇṭhaiḥ śivayuvatibhiḥ pañcabhirapi
prabhinnābhiḥ śambhornavabhirapi mūlaprakṛtibhiḥ |
catuścatvāriṃśadvasudalakalāśratrivalaya- [trayaścatvāri]
trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]
tvadīyaṃ saundaryaṃ tuhinagirikanye tulayituṃ
kavīndrāḥ kalpante kathamapi viriñciprabhṛtayaḥ |
yadālokautsukyādamaralalanā yānti manasā
tapobhirduṣprāpāmapi giriśasāyujyapadavīm || 12 ||
naraṃ varṣīyāṃsaṃ nayanavirasaṃ narmasu jaḍaṃ
tavāpāṅgāloke patitamanudhāvanti śataśaḥ |
galadveṇībandhāḥ kucakalaśavisrastasicayā
haṭhāt truṭyatkāñcyo vigalitadukūlā yuvatayaḥ || 13 ||
kṣitau ṣaṭpañcāśad dvisamadhikapañcāśadudake
hutāśe dvāṣaṣṭiścaturadhikapañcāśadanile |
divi dviṣṣaṭtriṃśanmanasi ca catuṣṣaṣṭiriti ye
mayūkhāsteṣāmapyupari tava pādāmbujayugam || 14 ||
śarajjyotsnāśuddhāṃ śaśiyutajaṭājūṭamakuṭāṃ
varatrāsatrāṇasphaṭikaghaṭikāpustakakarām |
sakṛnna tvā natvā kathamiva satāṃ sannnidadhate
madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]
kavīndrāṇāṃ cetaḥkamalavanabālātaparuciṃ
bhajante ye santaḥ katicidaruṇāmeva bhavatīm |
viriñcipreyasyāstaruṇataraśṛṅgāralaharī-
gabhīrābhirvāgbhirvidadhati satāṃ rañjanamamī || 16 ||
savitrībhirvācāṃ śaśimaṇiśilābhaṅgarucibhiḥ
vaśinyādyābhistvāṃ saha janani sañcintayati yaḥ |
sa kartā kāvyānāṃ bhavati mahatāṃ bhaṅgirucibhiḥ
vacobhirvāgdevīvadanakamalāmodamadhuraiḥ || 17 ||
tanucchāyābhiste taruṇataraṇiśrīsaraṇibhiḥ
divaṃ sarvāmurvīmaruṇimani magnāṃ smarati yaḥ |
bhavantyasya trasyadvanahariṇaśālīnanayanāḥ
sahorvaśyā vaśyāḥ kati kati na gīrvāṇagaṇikāḥ || 18 ||
mukhaṃ binduṃ kṛtvā kucayugamadhastasya tadadho
harārdhaṃ dhyāyedyo haramahiṣi te manmathakalām |
sa sadyaḥ saṅkṣobhaṃ nayati vanitā ityatilaghu
trilokīmapyāśu bhramayati ravīndustanayugām || 19 ||
kirantīmaṅgebhyaḥ kiraṇanikurambāmṛtarasaṃ
hṛdi tvāmādhatte himakaraśilāmūrtimiva yaḥ |
sa sarpāṇāṃ darpaṃ śamayati śakuntādhipa iva
jvarapluṣṭān dṛṣṭyā sukhayati sudhādhārasirayā || 20 ||
taṭillekhātanvīṃ tapanaśaśivaiśvānaramayīṃ
niṣaṇṇāṃ ṣaṇṇāmapyupari kamalānāṃ tava kalām |
mahāpadmāṭavyāṃ mṛditamalamāyena manasā
mahāntaḥ paśyanto dadhati paramāhlādalaharīm || 21 ||
bhavāni tvaṃ dāse mayi vitara dṛṣṭiṃ sakaruṇā-
miti stotuṃ vāñchan kathayati bhavāni tvamiti yaḥ |
tadaiva tvaṃ tasmai diśasi nijasāyujyapadavīṃ
mukundabrahmendrasphuṭamakuṭanīrājitapadām || 22 ||
tvayā hṛtvā vāmaṃ vapurapari-tṛptena manasā
śarīrārdhaṃ śambhoraparamapi śaṅke hṛtamabhūt |
yadetattvadrūpaṃ sakalamaruṇābhaṃ trinayanaṃ
kucābhyāmānamraṃ kuṭilaśaśicūḍālamakuṭam || 23 ||
jagatsūte dhātā hariravati rudraḥ kṣapayate
tiraskurvannetatsvamapi vapurīśastirayati |
sadāpūrvaḥ sarvaṃ tadidamanugṛhṇāti ca śiva-
stavājñāmālambya kṣaṇacalitayorbhrūlatikayoḥ || 24 ||
trayāṇāṃ devānāṃ triguṇajanitānāṃ tava śive
bhavet pūjā pūjā tava caraṇayoryā viracitā |
tathā hi tvatpādodvahanamaṇipīṭhasya nikaṭe
sthitā hyete śaśvanmukulitakarottaṃsamakuṭāḥ || 25 ||
viriñciḥ pañcatvaṃ vrajati harirāpnoti viratiṃ
vināśaṃ kīnāśo bhajati dhanado yāti nidhanam |
vitandrī māhendrī vitatirapi sammīlitadṛśā
mahāsaṃhāre'smin viharati sati tvatpatirasau || 26 ||
japo jalpaḥ śilpaṃ sakalamapi mudrāviracanā
gatiḥ prādakṣiṇyakramaṇamaśanādyāhutividhiḥ |
praṇāmassaṃveśassukhamakhilamātmārpaṇadṛśā
saparyāparyāyastava bhavatu yanme vilasitam || 27 ||
sudhāmapyāsvādya pratibhayajarāmṛtyuhariṇīṃ
vipadyante viśve vidhiśatamakhādyā diviṣadaḥ |
karālaṃ yatkṣvelaṃ kabalitavataḥ kālakalanā
na śambhostanmūlaṃ tava janani tāṭaṅkamahimā || 28 ||
kirīṭaṃ vairiñcaṃ parihara puraḥ kaiṭabhabhidaḥ
kaṭhore koṭīre skhalasi jahi jambhārimukuṭam |
praṇamreṣveteṣu prasabhamupayātasya bhavanaṃ
bhavasyābhyutthāne tava parijanoktirvijayate || 29 ||
svadehodbhūtābhirghṛṇibhiraṇimādyābhirabhito
niṣevye nitye tvāmahamiti sadā bhāvayati yaḥ |
kimāścaryaṃ tasya trinayanasamṛddhiṃ tṛṇayato
mahāsaṃvartāgnirviracayati nirājanavidhim || 30 ||
catuṣṣaṣṭyā tantraiḥ sakalamatisandhāya bhuvanaṃ
sthitastattatsiddhiprasavaparatantraiḥ paśupatiḥ |
punastvannirbandhādakhilapuruṣārthaikaghaṭanā-
svatantraṃ te tantraṃ kṣititalamavātītaradidam || 31 ||
śivaḥ śaktiḥ kāmaḥ kṣitiratha raviḥ śītakiraṇaḥ
smaro haṃsaḥ śakrastadanu ca parāmāraharayaḥ |
amī hṛllekhābhistisṛbhiravasāneṣu ghaṭitā
bhajante varṇāste tava janani nāmāvayavatām || 32 ||
smaraṃ yoniṃ lakṣmīṃ tritayamidamādau tava mano-
rnidhāyaike nitye niravadhimahābhogarasikāḥ |
bhajanti tvāṃ cintāmaṇigunanibaddhākṣavalayāḥ
śivāgnau juhvantaḥ surabhighṛtadhārāhutiśataiḥ || 33 ||
śarīraṃ tvaṃ śambhoḥ śaśimihiravakṣoruhayugaṃ
tavātmānaṃ manye bhagavati navātmānamanagham |
ataśśeṣaśśeṣītyayamubhayasādhāraṇatayā
sthitaḥ sambandho vāṃ samarasaparānandaparayoḥ || 34 ||
manastvaṃ vyoma tvaṃ marudasi marutsārathirasi
tvamāpastvaṃ bhūmistvayi pariṇatāyāṃ na hi param |
tvameva svātmānaṃ pariṇamayituṃ viśvavapuṣā
cidānandākāraṃ śivayuvati bhāvena bibhṛṣe || 35 ||
tavājñācakrasthaṃ tapanaśaśikoṭidyutidharaṃ
paraṃ śambhuṃ vande parimilitapārśvaṃ paracitā |
yamārādhyan bhaktyā raviśaśiśucīnāmaviṣaye
nirāloke'loke nivasati hi bhālokabhuvane || 36 ||
viśuddhau te śuddhasphaṭikaviśadaṃ vyomajanakaṃ
śivaṃ seve devīmapi śivasamānavyavasitām |
yayoḥ kāntyā yāntyāḥ śaśikiraṇasārūpyasaraṇe-
vidhūtāntardhvāntā vilasati cakorīva jagatī || 37 ||
samunmīlat saṃvit kamalamakarandaikarasikaṃ
bhaje haṃsadvandvaṃ kimapi mahatāṃ mānasacaram |
yadālāpādaṣṭādaśaguṇitavidyāpariṇati-
ryadādatte doṣād guṇamakhilamadbhyaḥ paya iva || 38 ||
tava svādhiṣṭhāne hutavahamadhiṣṭhāya nirataṃ
tamīḍe saṃvartaṃ janani mahatīṃ tāṃ ca samayām |
yadāloke lokān dahati mahati krodhakalite
dayārdrā yā dṛṣṭiḥ śiśiramupacāraṃ racayati || 39 ||
taṭittvantaṃ śaktyā timiraparipanthisphuraṇayā
sphurannānāratnābharaṇapariṇaddhendradhanuṣam |
tava śyāmaṃ meghaṃ kamapi maṇipūraikaśaraṇaṃ
niṣeve varṣantaṃ haramihirataptaṃ tribhuvanam || 40 ||
tavādhāre mūle saha samayayā lāsyaparayā
navātmānaṃ manye navarasamahātāṇḍavanaṭam |
ubhābhyāmetābhyāmudayavidhimuddiśya dayayā
sanāthābhyāṃ jajñe janakajananīmajjagadidam || 41 ||
dvitīya bhāgaḥ - saundarya laharī
gatairmāṇikyatvaṃ gaganamaṇibhiḥ sāndraghaṭitaṃ
kirīṭaṃ te haimaṃ himagirisute kīrtayati yaḥ |
sa nīḍeyacchāyācchuraṇaśabalaṃ candraśakalaṃ
dhanuḥ śaunāsīraṃ kimiti na nibadhnāti dhiṣaṇām || 42 ||
dhunotu dhvāntaṃ nastulitadalitendīvaravanaṃ
ghanasnigdhaślakṣṇaṃ cikuranikurumbaṃ tava śive |
yadīyaṃ saurabhyaṃ sahajamupalabdhuṃ sumanaso
vasantyasmin manye valamathanavāṭīviṭapinām || 43 ||
tanotu kṣemaṃ nastava vadanasaundaryalaharī-
parīvāhasrotaḥsaraṇiriva sīmantasaraṇiḥ |
vahantī sindūraṃ prabalakabarībhāratimira-
dviṣāṃ bṛndairbandīkṛtamiva navīnārkakiraṇam || 44 ||
arālaiḥ svābhāvyādalikalabhasaśrībhiralakaiḥ
parītaṃ te vaktraṃ parihasati paṅkeruharucim |
darasmere yasmin daśanarucikiñjalkarucire
sugandhau mādyanti smaradahanacakṣurmadhulihaḥ || 45 ||
lalāṭaṃ lāvaṇyadyutivimalamābhāti tava ya-
ddvitīyaṃ tanmanye makuṭaghaṭitaṃ candraśakalam |
viparyāsanyāsādubhayamapi sambhūya ca mithaḥ
sudhālepasyūtiḥ pariṇamati rākāhimakaraḥ || 46 ||
bhruvau bhugne kiñcidbhuvanabhayabhaṅgavyasanini
tvadīye netrābhyāṃ madhukararucibhyāṃ dhṛtaguṇam |
dhanurmanye savyetarakaragṛhītaṃ ratipateḥ
prakoṣṭhe muṣṭau ca sthagayati nigūḍhāntaramume || 47 ||
ahaḥ sūte savyaṃ tava nayanamarkātmakatayā
triyāmāṃ vāmaṃ te sṛjati rajanīnāyakatayā |
tṛtīyā te dṛṣṭirdaradalitahemāmbujaruciḥ
samādhatte sandhyāṃ divasaniśayorantaracarīm || 48 ||
viśālā kalyāṇī sphuṭarucirayodhyā kuvalayaiḥ
kṛpādhārādhārā kimapi madhurābhogavatikā |
avantī dṛṣṭiste bahunagaravistāravijayā
dhruvaṃ tattannāmavyavaharaṇayogyā vijayate || 49 ||
kavīnāṃ sandarbhastabakamakarandaikarasikaṃ
kaṭākṣavyākṣepabhramarakalabhau karṇayugalam |
amuñcantau dṛṣṭvā tava navarasāsvādataralā-
vasūyāsaṃsargādalikanayanaṃ kiñcidaruṇam || 50 ||
śive śṛṅgārārdrā taditarajane kutsanaparā
saroṣā gaṅgāyāṃ giriśacarite vismayavatī |
harāhibhyo bhītā sarasiruhasaubhāgyajananī (jayinī)
sakhīṣu smerā te mayi jananī dṛṣṭiḥ sakaruṇā || 51 ||
gate karṇābhyarṇaṃ garuta iva pakṣmāṇi dadhatī
purāṃ bhettuścittapraśamarasavidrāvaṇaphale |
ime netre gotrādharapatikulottaṃsakalike
tavākarṇākṛṣṭasmaraśaravilāsaṃ kalayataḥ || 52 ||
vibhaktatraivarṇyaṃ vyatikaritalīlāñjanatayā
vibhāti tvannetratritayamidamīśānadayite |
punaḥ sraṣṭuṃ devān druhiṇaharirudrānuparatān
rajaḥ sattvaṃ bibhrattama iti guṇānāṃ trayamiva || 53 ||
pavitrīkartuṃ naḥ paśupatiparādhīnahṛdaye
dayāmitrairnetrairaruṇadhavalaśyāmarucibhiḥ |
nadaḥ śoṇo gaṅgā tapanatanayeti dhruvamamuṃ
trayāṇāṃ tīrthānāmupanayasi sambhedamanagham || 54 ||
nimeṣonmeṣābhyāṃ pralayamudayaṃ yāti jagatī
tavetyāhuḥ santo dharaṇidhararājanyatanaye |
tvadunmeṣājjātaṃ jagadidamaśeṣaṃ pralayataḥ
paritrātuṃ śaṅke parihṛtanimeṣāstava dṛśaḥ || 55 ||
tavāparṇe karṇejapanayanapaiśunyacakitā
nilīyante toye niyatamanimeṣāḥ śapharikāḥ |
iyaṃ ca śrīrbaddhacchadapuṭakavāṭaṃ kuvalayam
jahāti pratyūṣe niśi ca vighaṭayya praviśati || 56 ||
dṛśā drāghīyasyā daradalitanīlotpalarucā
davīyāṃsaṃ dīnaṃ snapaya kṛpayā māmapi śive |
anenāyaṃ dhanyo bhavati na ca te hāniriyatā
vane vā harmye vā samakaranipāto himakaraḥ || 57 ||
arālaṃ te pālīyugalamagarājanyatanaye
na keṣāmādhatte kusumaśarakodaṇḍakutukam |
tiraścīno yatra śravaṇapathamullaṅghya vilasa-
nnapāṅgavyāsaṅgo diśati śarasandhānadhiṣaṇām || 58 ||
sphuradgaṇḍābhogapratiphalitatāṭaṅkayugalaṃ
catuścakraṃ manye tava mukhamidaṃ manmatharatham |
yamāruhya druhyatyavanirathamarkenducaraṇaṃ
mahāvīro māraḥ pramathapataye sajjitavate || 59 ||
sarasvatyāḥ sūktīramṛtalaharīkauśalaharīḥ
pibantyāḥ śarvāṇi śravaṇaculukābhyāmaviralam |
camatkāraślāghācalitaśirasaḥ kuṇḍalagaṇo
jhaṇatkāraistāraiḥ prativacanamācaṣṭa iva te || 60 ||
asau nāsāvaṃśastuhinagirivaṃśadhvajapaṭi
tvadīyo nedīyaḥ phalatu phalamasmākamucitam |
vahannantarmuktāḥ śiśirataraniśvāsagalitaṃ
samṛddhyā yattāsāṃ bahirapi ca muktāmaṇidharaḥ || 61 ||
prakṛtyā raktāyāstava sudati dantacchadaruceḥ
pravakṣye sādṛśyaṃ janayatu phalaṃ vidrumalatā |
na bimbaṃ tadbimbapratiphalanarāgādaruṇitaṃ
tulāmadhyāroḍhuṃ kathamiva vilajjeta kalayā || 62 ||
smitajyotsnājālaṃ tava vadanacandrasya pibatāṃ
cakorāṇāmāsīdatirasatayā cañcujaḍimā |
ataste śītāṃśoramṛtalaharīmamlarucayaḥ
pibanti svacchandaṃ niśi niśi bhṛśaṃ kāñjikadhiyā || 63 ||
aviśrāntaṃ patyurguṇagaṇakathāmreḍanajapā
japāpuṣpacchāyā tava janani jihvā jayati sā |
yadagrāsīnāyāḥ sphaṭikadṛṣadacchacchavimayī
sarasvatyā mūrtiḥ pariṇamati māṇikyavapuṣā || 64 ||
raṇe jitvā daityānapahṛtaśirastraiḥ kavacibhir-
nivṛttaiścaṇḍāṃśatripuraharanirmālyavimukhaiḥ |
viśākhendropendraiḥ śaśiviśadakarpūraśakalā
vilīyante mātastava vadanatāmbūlakabalāḥ || 65 ||
vipañcyā gāyantī vividhamapadānaṃ paśupateḥ
tvayārabdhe vaktuṃ calitaśirasā sādhuvacane |
tadīyairmādhuryairapalapitatantrīkalaravāṃ
nijāṃ vīṇāṃ vāṇī niculayati colena nibhṛtam || 66 ||
karāgreṇa spṛṣṭaṃ tuhinagiriṇā vatsalatayā
girīśenodastaṃ muhuradharapānākulatayā |
karagrāhyaṃ śambhormukhamukuravṛntaṃ girisute
kathaṅkāraṃ brūmastava cibukamaupamyarahitam || 67 ||
bhujāśleṣān nityaṃ puradamayituḥ kaṇṭakavatī
tava grīvā dhatte mukhakamalanālaśriyamiyam |
svataḥ śvetā kālāgurubahulajambālamalinā
mṛṇālīlālityaṃ vahati yadadho hāralatikā || 68 ||
gale rekhāstisro gatigamakagītaikanipuṇe
vivāhavyānaddhapraguṇaguṇasaṅkhyāpratibhuvaḥ |
virājante nānāvidhamadhurarāgākarabhuvāṃ
trayāṇāṃ grāmāṇāṃ sthitiniyamasīmāna iva te || 69 ||
mṛṇālīmṛdvīnāṃ tava bhujalatānāṃ catasṛṇāṃ
caturbhiḥ saundaryaṃ sarasijabhavaḥ stauti vadanaiḥ |
nakhebhyaḥ santrasyan prathamamathanādandhakaripo-
ścaturṇāṃ śīrṣāṇāṃ samamabhayahastārpaṇadhiyā || 70 ||
nakhānāmuddyotairnavanalinarāgaṃ vihasatāṃ
karāṇāṃ te kāntiṃ kathaya kathayāmaḥ kathamume |
kayācidvā sāmyaṃ bhajatu kalayā hanta kamalaṃ
yadi krīḍallakṣmīcaraṇatalalākṣārasachaṇam || 71 ||
samaṃ devi skandadvipavadanapītaṃ stanayugaṃ
tavedaṃ naḥ khedaṃ haratu satataṃ prasnutamukham |
yadālokyāśaṅkākulitahṛdayo hāsajanakaḥ
svakumbhau herambaḥ parimṛśati hastena jhaḍiti || 72 ||
amū te vakṣojāvamṛtarasamāṇikyakutupau
na sandehaspando nagapatipatāke manasi naḥ |
pibantau tau yasmādaviditavadhūsaṅgarasikau
kumārāvadyāpi dviradavadanakrauñcadalanau || 73 ||
vahatyamba stamberamadanujakumbhaprakṛtibhiḥ
samārabdhāṃ muktāmaṇibhiramalāṃ hāralatikām |
kucābhogo bimbādhararucibhirantaḥ śabalitāṃ
pratāpavyāmiśrāṃ puradamayituḥ kīrtimiva te || 74 ||
tava stanyaṃ manye dharaṇidharakanye hṛdayataḥ
payaḥpārāvāraḥ parivahati sārasvatamiva |
dayāvatyā dattaṃ draviḍaśiśurāsvādya tava yat
kavīnāṃ prauḍhānāmajani kamanīyaḥ kavayitā || 75 ||
harakrodhajvālāvalibhiravalīḍhena vapuṣā
gabhīre te nābhīsarasi kṛtasaṅgo manasijaḥ |
samuttasthau tasmādacalatanaye dhūmalatikā
janastāṃ jānīte tava janani romāvaliriti || 76 ||
yadetat kālindītanutarataraṅgākṛti śive
kṛśe madhye kiñcijjanani tava yadbhāti sudhiyām |
vimardādanyo'nyaṃ kucakalaśayorantaragataṃ
tanūbhūtaṃ vyoma praviśadiva nābhiṃ kuhariṇīm || 77 ||
sthiro gaṅgāvartaḥ stanamukularomāvalilatā-
kalāvālaṃ kuṇḍaṃ kusumaśaratejohutabhujaḥ |
raterlīlāgāraṃ kimapi tava nābhirgirisute
biladvāraṃ siddhergiriśanayanānāṃ vijayate || 78 ||
nisargakṣīṇasya stanataṭabhareṇa klamajuṣo
namanmūrternārītilaka śanakaistruṭyata iva |
ciraṃ te madhyasya truṭitataṭinītīrataruṇā
samāvasthāsthemno bhavatu kuśalaṃ śailatanaye || 79 ||
kucau sadyaḥsvidyattaṭaghaṭitakūrpāsabhidurau
kaṣantau dormūle kanakakalaśābhau kalayatā |
tava trātuṃ bhaṅgādalamiti valagnaṃ tanubhuvā
tridhā naddhaṃ devi trivali lavalīvallibhiriva || 80 ||
gurutvaṃ vistāraṃ kṣitidharapatiḥ pārvati nijā-
nnitambādācchidya tvayi haraṇarūpeṇa nidadhe |
ataste vistīrṇo gururayamaśeṣāṃ vasumatīṃ
nitambaprāgbhāraḥ sthagayati laghutvaṃ nayati ca || 81 ||
karīndrāṇāṃ śuṇḍān kanakakadalīkāṇḍapaṭalī-
mubhābhyāmūrubhyāmubhayamapi nirjitya bhavatī |
suvṛttābhyāṃ patyuḥ praṇatikaṭhinābhyāṃ girisute
vidhijñe jānubhyāṃ vibudhakarikumbhadvayamasi || 82 ||
parājetuṃ rudraṃ dviguṇaśaragarbhau girisute
niṣaṅgau jaṅghe te viṣamaviśikho bāḍhamakṛta |
yadagre dṛśyante daśaśaraphalāḥ pādayugalī-
nakhāgracchadmānaḥ suramakuṭaśāṇaikaniśitāḥ || 83 ||
śrutīnāṃ mūrdhāno dadhati tava yau śekharatayā
mamāpyetau mātaḥ śirasi dayayā dhehi caraṇau |
yayoḥ pādyaṃ pāthaḥ paśupatijaṭājūṭataṭinī
yayorlākṣālakṣmīraruṇaharicūḍāmaṇiruciḥ || 84 ||
namovākaṃ brūmo nayanaramaṇīyāya padayo-
stavāsmai dvandvāya sphuṭarucirasālaktakavate |
asūyatyatyantaṃ yadabhihananāya spṛhayate
paśūnāmīśānaḥ pramadavanakaṅkelitarave || 85 ||
mṛṣā kṛtvā gotraskhalanamatha vailakṣyanamitaṃ
lalāṭe bhartāraṃ caraṇakamale tāḍayati te |
cirādantaḥśalyaṃ dahanakṛtamunmūlitavatā
tulākoṭikvāṇaiḥ kilikilitamīśānaripuṇā || 86 ||
himānīhantavyaṃ himagirinivāsaikacaturau
niśāyāṃ nidrāṇaṃ niśi caramabhāge ca viśadau |
varaṃ lakṣmīpātraṃ śriyamatisṛjantau samayināṃ
sarojaṃ tvatpādau janani jayataścitramiha kim || 87 ||
padaṃ te kīrtīnāṃ prapadamapadaṃ devi vipadāṃ
kathaṃ nītaṃ sadbhiḥ kaṭhinakamaṭhīkarparatulām |
kathaṃ vā bāhubhyāmupayamanakāle purabhidā
yadādāya nyastaṃ dṛṣadi dayamānena manasā || 88 ||
nakhairnākastrīṇāṃ karakamalasaṅkocaśaśibhi-
starūṇāṃ divyānāṃ hasata iva te caṇḍi caraṇau |
phalāni svaḥsthebhyaḥ kisalayakarāgreṇa dadatāṃ
daridrebhyo bhadrāṃ śriyamaniśamahnāya dadatau || 89 ||
dadāne dīnebhyaḥ śriyamaniśamāśānusadṛśī-
mamandaṃ saundaryaprakaramakarandaṃ vikirati |
tavāsmin mandārastabakasubhage yātu caraṇe
nimajjanmajjīvaḥ karaṇacaraṇaḥ ṣaṭcaraṇatām || 90 ||
padanyāsakrīḍāparicayamivārabdhumanasaḥ
skhalantaste khelaṃ bhavanakalahaṃsā na jahati |
atasteṣāṃ śikṣāṃ subhagamaṇimañjīraraṇita-
cchalādācakṣāṇaṃ caraṇakamalaṃ cārucarite || 91 ||
gatāste mañcatvaṃ druhiṇaharirudreśvarabhṛtaḥ
śivaḥ svacchacchāyāghaṭitakapaṭapracchadapaṭaḥ |
tvadīyānāṃ bhāsāṃ pratiphalanarāgāruṇatayā
śarīrī śṛṅgāro rasa iva dṛśāṃ dogdhi kutukam || 92 ||
arālā keśeṣu prakṛtisaralā mandahasite
śirīṣābhā citte dṛṣadupalaśobhā kucataṭe |
bhṛśaṃ tanvī madhye pṛthururasijārohaviṣaye
jagattrātuṃ śambhorjayati karuṇā kācidaruṇā || 93 ||
kalaṅkaḥ kastūrī rajanikarabimbaṃ jalamayaṃ
kalābhiḥ karpūrairmarakatakaraṇḍaṃ nibiḍitam |
atastvadbhogena pratidinamidaṃ riktakuharaṃ
vidhirbhūyo bhūyo nibiḍayati nūnaṃ tava kṛte || 94 ||
purārāterantaḥpuramasi tatastvaccaraṇayoḥ
saparyāmaryādā taralakaraṇānāmasulabhā |
tathā hyete nītāḥ śatamakhamukhāḥ siddhimatulāṃ
tava dvāropāntasthitibhiraṇimādyābhiramarāḥ || 95 ||
kalatraṃ vaidhātraṃ katikati bhajante na kavayaḥ
śriyo devyāḥ ko vā na bhavati patiḥ kairapi dhanaiḥ |
mahādevaṃ hitvā tava sati satīnāmacarame
kucābhyāmāsaṅgaḥ kuravakatarorapyasulabhaḥ || 96 ||
girāmāhurdevīṃ druhiṇagṛhiṇīmāgamavido
hareḥ patnīṃ padmāṃ harasahacarīmadritanayām |
turīyā kāpi tvaṃ duradhigamaniḥsīmamahimā
mahāmāyā viśvaṃ bhramayasi parabrahmamahiṣi || 97 ||
kadā kāle mātaḥ kathaya kalitālaktakarasaṃ
pibeyaṃ vidyārthī tava caraṇanirṇejanajalam |
prakṛtyā mūkānāmapi ca kavitākāraṇatayā
kadā dhatte vāṇīmukhakamalatāmbūlarasatām || 98 ||
sarasvatyā lakṣmyā vidhiharisapatno viharate
rateḥ pātivratyaṃ śithilayati ramyeṇa vapuṣā |
ciraṃ jīvanneva kṣapitapaśupāśavyatikaraḥ
parānandābhikhyaṃ rasayati rasaṃ tvadbhajanavān || 99 ||
pradīpajvālābhirdivasakaranīrājanavidhiḥ
sudhāsūteścandropalajalalavairarghyaracanā |
svakīyairambhobhiḥ salilanidhisauhityakaraṇaṃ
tvadīyābhirvāgbhistava janani vācāṃ stutiriyam || 100 ||
saundaryalahari mukhyastotraṃ saṃvārtadāyakam |
bhagavadpāda sankluptaṃ paṭhen muktau bhavennaraḥ ||
|| iti śrīmatparamahaṃsaparivrājakācāryasya
śrīgovindabhagavatpūjyapādaśiṣyasya
śrīmacchaṅkarabhagavataḥ kṛtau saundaryalaharī sampūrṇā ||
|| oṃ tatsat ||
(anubandhaḥ)
samānītaḥ padbhyāṃ maṇimukuratāmambaramaṇi-
rbhayādāsyādantaḥstimitakiraṇaśreṇimasṛṇaḥ |
(pāṭhabhedaḥ - bhayādāsya snigdhastmita, bhayādāsyasyāntaḥstmita)
dadhāti tvadvaktrampratiphalanamaśrāntavikacaṃ
nirātaṅkaṃ candrānnijahṛdayapaṅkeruhamiva || 101 ||
samudbhūtasthūlastanabharamuraścāru hasitaṃ
kaṭākṣe kandarpaḥ katicana kadambadyuti vapuḥ |
harasya tvadbhrāntiṃ manasi janayanti sma vimalāḥ
pāṭhabhedaḥ - janayāmāsa madano, janayantaḥ samatulāṃ, janayantā suvadane
bhavatyā ye bhaktāḥ pariṇatiramīṣāmiyamume || 102 ||
nidhe nityasmere niravadhiguṇe nītinipuṇe
nirāghātajñāne niyamaparacittaikanilaye |
niyatyā nirmukte nikhilanigamāntastutipade
nirātaṅke nitye nigamaya mamāpi stutimimām || 103 ||
Sanskrit — Devanagari (original)
प्रथम भागः - आनन्द लहरि
भुमौस्खलित पादानां भूमिरेवा वलम्बनम् ।
त्वयी जाता पराधानां त्वमेव शरणं शिवे ॥
शिवः शक्त्या युक्तो यदि भवति शक्तः प्रभवितुं
न चेदेवं देवो न खलु कुशलः स्पन्दितुमपि ।
अतस्त्वामाराध्यां हरिहरविरिञ्चादिभिरपि
प्रणन्तुं स्तोतुं वा कथमकृतपुण्यः प्रभवति ॥ 1 ॥
तनीयांसं पांसुं तव चरणपङ्केरुहभवं
विरिञ्चिस्सञ्चिन्वन् विरचयति लोकानविकलम् ।
वहत्येनं शौरिः कथमपि सहस्रेण शिरसां
हरस्सङ्क्षुद्यैनं भजति भसितोद्धूलनविधिम् ॥ 2 ॥
अविद्यानामन्त-स्तिमिर-मिहिरद्वीपनगरी
जडानां चैतन्य-स्तबक-मकरन्द-स्रुतिझरी ।
दरिद्राणां चिन्तामणिगुणनिका जन्मजलधौ
निमग्नानां दंष्ट्रा मुररिपु-वराहस्य भवति ॥ 3 ॥
त्वदन्यः पाणिभ्यामभयवरदो दैवतगणः
त्वमेका नैवासि प्रकटितवराभीत्यभिनया ।
भयात् त्रातुं दातुं फलमपि च वाञ्छासमधिकं
शरण्ये लोकानां तव हि चरणावेव निपुणौ ॥ 4 ॥
हरिस्त्वामाराध्य प्रणतजनसौभाग्यजननीं
पुरा नारी भूत्वा पुररिपुमपि क्षोभमनयत् ।
स्मरोऽपि त्वां नत्वा रतिनयनलेह्येन वपुषा
मुनीनामप्यन्तः प्रभवति हि मोहाय महताम् ॥ 5 ॥
धनुः पौष्पं मौर्वी मधुकरमयी पञ्च विशिखाः
वसन्तः सामन्तो मलयमरुदायोधनरथः ।
तथाप्येकः सर्वं हिमगिरिसुते कामपि कृपाम्
अपाङ्गात्ते लब्ध्वा जगदिद-मनङ्गो विजयते ॥ 6 ॥
क्वणत्काञ्चीदामा करिकलभकुम्भस्तननता
परिक्षीणा मध्ये परिणतशरच्चन्द्रवदना ।
धनुर्बाणान् पाशं सृणिमपि दधाना करतलैः
पुरस्तादास्तां नः पुरमथितुराहोपुरुषिका ॥ 7 ॥
सुधासिन्धोर्मध्ये सुरविटपिवाटीपरिवृते
मणिद्वीपे नीपोपवनवति चिन्तामणिगृहे ।
शिवाकारे मञ्चे परमशिवपर्यङ्कनिलयां
भजन्ति त्वां धन्याः कतिचन चिदानन्दलहरीम् ॥ 8 ॥
महीं मूलाधारे कमपि मणिपूरे हुतवहं
स्थितं स्वाधिष्ठाने हृदि मरुतमाकाशमुपरि ।
मनोऽपि भ्रूमध्ये सकलमपि भित्वा कुलपथं
सहस्रारे पद्मे सह रहसि पत्या विहरसे ॥ 9 ॥
सुधाधारासारैश्चरणयुगलान्तर्विगलितैः
प्रपञ्चं सिञ्चन्ती पुनरपि रसाम्नायमहसः ।
अवाप्य स्वां भूमिं भुजगनिभमध्युष्टवलयं
स्वमात्मानं कृत्वा स्वपिषि कुलकुण्डे कुहरिणि ॥ 10 ॥
चतुर्भिः श्रीकण्ठैः शिवयुवतिभिः पञ्चभिरपि
प्रभिन्नाभिः शम्भोर्नवभिरपि मूलप्रकृतिभिः ।
चतुश्चत्वारिंशद्वसुदलकलाश्रत्रिवलय- [त्रयश्चत्वारि]
त्रिरेखाभिः सार्धं तव शरणकोणाः परिणताः ॥ 11 ॥ [चरणकोणाः, भवनकिणाः]
त्वदीयं सौन्दर्यं तुहिनगिरिकन्ये तुलयितुं
कवीन्द्राः कल्पन्ते कथमपि विरिञ्चिप्रभृतयः ।
यदालोकौत्सुक्यादमरललना यान्ति मनसा
तपोभिर्दुष्प्रापामपि गिरिशसायुज्यपदवीम् ॥ 12 ॥
नरं वर्षीयांसं नयनविरसं नर्मसु जडं
तवापाङ्गालोके पतितमनुधावन्ति शतशः ।
गलद्वेणीबन्धाः कुचकलशविस्रस्तसिचया
हठात् त्रुट्यत्काञ्च्यो विगलितदुकूला युवतयः ॥ 13 ॥
क्षितौ षट्पञ्चाशद् द्विसमधिकपञ्चाशदुदके
हुताशे द्वाषष्टिश्चतुरधिकपञ्चाशदनिले ।
दिवि द्विष्षट्त्रिंशन्मनसि च चतुष्षष्टिरिति ये
मयूखास्तेषामप्युपरि तव पादाम्बुजयुगम् ॥ 14 ॥
शरज्ज्योत्स्नाशुद्धां शशियुतजटाजूटमकुटां
वरत्रासत्राणस्फटिकघटिकापुस्तककराम् ।
सकृन्न त्वा नत्वा कथमिव सतां सन्न्निदधते
मधुक्षीरद्राक्षामधुरिमधुरीणाः भणितयः ॥ 15॥ [फणितयः]
कवीन्द्राणां चेतःकमलवनबालातपरुचिं
भजन्ते ये सन्तः कतिचिदरुणामेव भवतीम् ।
विरिञ्चिप्रेयस्यास्तरुणतरशृङ्गारलहरी-
गभीराभिर्वाग्भिर्विदधति सतां रञ्जनममी ॥ 16 ॥
सवित्रीभिर्वाचां शशिमणिशिलाभङ्गरुचिभिः
वशिन्याद्याभिस्त्वां सह जननि सञ्चिन्तयति यः ।
स कर्ता काव्यानां भवति महतां भङ्गिरुचिभिः
वचोभिर्वाग्देवीवदनकमलामोदमधुरैः ॥ 17 ॥
तनुच्छायाभिस्ते तरुणतरणिश्रीसरणिभिः
दिवं सर्वामुर्वीमरुणिमनि मग्नां स्मरति यः ।
भवन्त्यस्य त्रस्यद्वनहरिणशालीननयनाः
सहोर्वश्या वश्याः कति कति न गीर्वाणगणिकाः ॥ 18 ॥
मुखं बिन्दुं कृत्वा कुचयुगमधस्तस्य तदधो
हरार्धं ध्यायेद्यो हरमहिषि ते मन्मथकलाम् ।
स सद्यः सङ्क्षोभं नयति वनिता इत्यतिलघु
त्रिलोकीमप्याशु भ्रमयति रवीन्दुस्तनयुगाम् ॥ 19 ॥
किरन्तीमङ्गेभ्यः किरणनिकुरम्बामृतरसं
हृदि त्वामाधत्ते हिमकरशिलामूर्तिमिव यः ।
स सर्पाणां दर्पं शमयति शकुन्ताधिप इव
ज्वरप्लुष्टान् दृष्ट्या सुखयति सुधाधारसिरया ॥ 20 ॥
तटिल्लेखातन्वीं तपनशशिवैश्वानरमयीं
निषण्णां षण्णामप्युपरि कमलानां तव कलाम् ।
महापद्माटव्यां मृदितमलमायेन मनसा
महान्तः पश्यन्तो दधति परमाह्लादलहरीम् ॥ 21 ॥
भवानि त्वं दासे मयि वितर दृष्टिं सकरुणा-
मिति स्तोतुं वाञ्छन् कथयति भवानि त्वमिति यः ।
तदैव त्वं तस्मै दिशसि निजसायुज्यपदवीं
मुकुन्दब्रह्मेन्द्रस्फुटमकुटनीराजितपदाम् ॥ 22 ॥
त्वया हृत्वा वामं वपुरपरि-तृप्तेन मनसा
शरीरार्धं शम्भोरपरमपि शङ्के हृतमभूत् ।
यदेतत्त्वद्रूपं सकलमरुणाभं त्रिनयनं
कुचाभ्यामानम्रं कुटिलशशिचूडालमकुटम् ॥ 23 ॥
जगत्सूते धाता हरिरवति रुद्रः क्षपयते
तिरस्कुर्वन्नेतत्स्वमपि वपुरीशस्तिरयति ।
सदापूर्वः सर्वं तदिदमनुगृह्णाति च शिव-
स्तवाज्ञामालम्ब्य क्षणचलितयोर्भ्रूलतिकयोः ॥ 24 ॥
त्रयाणां देवानां त्रिगुणजनितानां तव शिवे
भवेत् पूजा पूजा तव चरणयोर्या विरचिता ।
तथा हि त्वत्पादोद्वहनमणिपीठस्य निकटे
स्थिता ह्येते शश्वन्मुकुलितकरोत्तंसमकुटाः ॥ 25 ॥
विरिञ्चिः पञ्चत्वं व्रजति हरिराप्नोति विरतिं
विनाशं कीनाशो भजति धनदो याति निधनम् ।
वितन्द्री माहेन्द्री विततिरपि सम्मीलितदृशा
महासंहारेऽस्मिन् विहरति सति त्वत्पतिरसौ ॥ 26 ॥
जपो जल्पः शिल्पं सकलमपि मुद्राविरचना
गतिः प्रादक्षिण्यक्रमणमशनाद्याहुतिविधिः ।
प्रणामस्संवेशस्सुखमखिलमात्मार्पणदृशा
सपर्यापर्यायस्तव भवतु यन्मे विलसितम् ॥ 27 ॥
सुधामप्यास्वाद्य प्रतिभयजरामृत्युहरिणीं
विपद्यन्ते विश्वे विधिशतमखाद्या दिविषदः ।
करालं यत्क्ष्वेलं कबलितवतः कालकलना
न शम्भोस्तन्मूलं तव जननि ताटङ्कमहिमा ॥ 28 ॥
किरीटं वैरिञ्चं परिहर पुरः कैटभभिदः
कठोरे कोटीरे स्खलसि जहि जम्भारिमुकुटम् ।
प्रणम्रेष्वेतेषु प्रसभमुपयातस्य भवनं
भवस्याभ्युत्थाने तव परिजनोक्तिर्विजयते ॥ 29 ॥
स्वदेहोद्भूताभिर्घृणिभिरणिमाद्याभिरभितो
निषेव्ये नित्ये त्वामहमिति सदा भावयति यः ।
किमाश्चर्यं तस्य त्रिनयनसमृद्धिं तृणयतो
महासंवर्ताग्निर्विरचयति निराजनविधिम् ॥ 30 ॥
चतुष्षष्ट्या तन्त्रैः सकलमतिसन्धाय भुवनं
स्थितस्तत्तत्सिद्धिप्रसवपरतन्त्रैः पशुपतिः ।
पुनस्त्वन्निर्बन्धादखिलपुरुषार्थैकघटना-
स्वतन्त्रं ते तन्त्रं क्षितितलमवातीतरदिदम् ॥ 31 ॥
शिवः शक्तिः कामः क्षितिरथ रविः शीतकिरणः
स्मरो हंसः शक्रस्तदनु च परामारहरयः ।
अमी हृल्लेखाभिस्तिसृभिरवसानेषु घटिता
भजन्ते वर्णास्ते तव जननि नामावयवताम् ॥ 32 ॥
स्मरं योनिं लक्ष्मीं त्रितयमिदमादौ तव मनो-
र्निधायैके नित्ये निरवधिमहाभोगरसिकाः ।
भजन्ति त्वां चिन्तामणिगुननिबद्धाक्षवलयाः
शिवाग्नौ जुह्वन्तः सुरभिघृतधाराहुतिशतैः ॥ 33 ॥
शरीरं त्वं शम्भोः शशिमिहिरवक्षोरुहयुगं
तवात्मानं मन्ये भगवति नवात्मानमनघम् ।
अतश्शेषश्शेषीत्ययमुभयसाधारणतया
स्थितः सम्बन्धो वां समरसपरानन्दपरयोः ॥ 34 ॥
मनस्त्वं व्योम त्वं मरुदसि मरुत्सारथिरसि
त्वमापस्त्वं भूमिस्त्वयि परिणतायां न हि परम् ।
त्वमेव स्वात्मानं परिणमयितुं विश्ववपुषा
चिदानन्दाकारं शिवयुवति भावेन बिभृषे ॥ 35 ॥
तवाज्ञाचक्रस्थं तपनशशिकोटिद्युतिधरं
परं शम्भुं वन्दे परिमिलितपार्श्वं परचिता ।
यमाराध्यन् भक्त्या रविशशिशुचीनामविषये
निरालोकेऽलोके निवसति हि भालोकभुवने ॥ 36 ॥
विशुद्धौ ते शुद्धस्फटिकविशदं व्योमजनकं
शिवं सेवे देवीमपि शिवसमानव्यवसिताम् ।
ययोः कान्त्या यान्त्याः शशिकिरणसारूप्यसरणे-
विधूतान्तर्ध्वान्ता विलसति चकोरीव जगती ॥ 37 ॥
समुन्मीलत् संवित् कमलमकरन्दैकरसिकं
भजे हंसद्वन्द्वं किमपि महतां मानसचरम् ।
यदालापादष्टादशगुणितविद्यापरिणति-
र्यदादत्ते दोषाद् गुणमखिलमद्भ्यः पय इव ॥ 38 ॥
तव स्वाधिष्ठाने हुतवहमधिष्ठाय निरतं
तमीडे संवर्तं जननि महतीं तां च समयाम् ।
यदालोके लोकान् दहति महति क्रोधकलिते
दयार्द्रा या दृष्टिः शिशिरमुपचारं रचयति ॥ 39 ॥
तटित्त्वन्तं शक्त्या तिमिरपरिपन्थिस्फुरणया
स्फुरन्नानारत्नाभरणपरिणद्धेन्द्रधनुषम् ।
तव श्यामं मेघं कमपि मणिपूरैकशरणं
निषेवे वर्षन्तं हरमिहिरतप्तं त्रिभुवनम् ॥ 40 ॥
तवाधारे मूले सह समयया लास्यपरया
नवात्मानं मन्ये नवरसमहाताण्डवनटम् ।
उभाभ्यामेताभ्यामुदयविधिमुद्दिश्य दयया
सनाथाभ्यां जज्ञे जनकजननीमज्जगदिदम् ॥ 41 ॥
द्वितीय भागः - सौन्दर्य लहरी
गतैर्माणिक्यत्वं गगनमणिभिः सान्द्रघटितं
किरीटं ते हैमं हिमगिरिसुते कीर्तयति यः ।
स नीडेयच्छायाच्छुरणशबलं चन्द्रशकलं
धनुः शौनासीरं किमिति न निबध्नाति धिषणाम् ॥ 42 ॥
धुनोतु ध्वान्तं नस्तुलितदलितेन्दीवरवनं
घनस्निग्धश्लक्ष्णं चिकुरनिकुरुम्बं तव शिवे ।
यदीयं सौरभ्यं सहजमुपलब्धुं सुमनसो
वसन्त्यस्मिन् मन्ये वलमथनवाटीविटपिनाम् ॥ 43 ॥
तनोतु क्षेमं नस्तव वदनसौन्दर्यलहरी-
परीवाहस्रोतःसरणिरिव सीमन्तसरणिः ।
वहन्ती सिन्दूरं प्रबलकबरीभारतिमिर-
द्विषां बृन्दैर्बन्दीकृतमिव नवीनार्ककिरणम् ॥ 44 ॥
अरालैः स्वाभाव्यादलिकलभसश्रीभिरलकैः
परीतं ते वक्त्रं परिहसति पङ्केरुहरुचिम् ।
दरस्मेरे यस्मिन् दशनरुचिकिञ्जल्करुचिरे
सुगन्धौ माद्यन्ति स्मरदहनचक्षुर्मधुलिहः ॥ 45 ॥
ललाटं लावण्यद्युतिविमलमाभाति तव य-
द्द्वितीयं तन्मन्ये मकुटघटितं चन्द्रशकलम् ।
विपर्यासन्यासादुभयमपि सम्भूय च मिथः
सुधालेपस्यूतिः परिणमति राकाहिमकरः ॥ 46 ॥
भ्रुवौ भुग्ने किञ्चिद्भुवनभयभङ्गव्यसनिनि
त्वदीये नेत्राभ्यां मधुकररुचिभ्यां धृतगुणम् ।
धनुर्मन्ये सव्येतरकरगृहीतं रतिपतेः
प्रकोष्ठे मुष्टौ च स्थगयति निगूढान्तरमुमे ॥ 47 ॥
अहः सूते सव्यं तव नयनमर्कात्मकतया
त्रियामां वामं ते सृजति रजनीनायकतया ।
तृतीया ते दृष्टिर्दरदलितहेमाम्बुजरुचिः
समाधत्ते सन्ध्यां दिवसनिशयोरन्तरचरीम् ॥ 48 ॥
विशाला कल्याणी स्फुटरुचिरयोध्या कुवलयैः
कृपाधाराधारा किमपि मधुराभोगवतिका ।
अवन्ती दृष्टिस्ते बहुनगरविस्तारविजया
ध्रुवं तत्तन्नामव्यवहरणयोग्या विजयते ॥ 49 ॥
कवीनां सन्दर्भस्तबकमकरन्दैकरसिकं
कटाक्षव्याक्षेपभ्रमरकलभौ कर्णयुगलम् ।
अमुञ्चन्तौ दृष्ट्वा तव नवरसास्वादतरला-
वसूयासंसर्गादलिकनयनं किञ्चिदरुणम् ॥ 50 ॥
शिवे शृङ्गारार्द्रा तदितरजने कुत्सनपरा
सरोषा गङ्गायां गिरिशचरिते विस्मयवती ।
हराहिभ्यो भीता सरसिरुहसौभाग्यजननी (जयिनी)
सखीषु स्मेरा ते मयि जननी दृष्टिः सकरुणा ॥ 51 ॥
गते कर्णाभ्यर्णं गरुत इव पक्ष्माणि दधती
पुरां भेत्तुश्चित्तप्रशमरसविद्रावणफले ।
इमे नेत्रे गोत्राधरपतिकुलोत्तंसकलिके
तवाकर्णाकृष्टस्मरशरविलासं कलयतः ॥ 52 ॥
विभक्तत्रैवर्ण्यं व्यतिकरितलीलाञ्जनतया
विभाति त्वन्नेत्रत्रितयमिदमीशानदयिते ।
पुनः स्रष्टुं देवान् द्रुहिणहरिरुद्रानुपरतान्
रजः सत्त्वं बिभ्रत्तम इति गुणानां त्रयमिव ॥ 53 ॥
पवित्रीकर्तुं नः पशुपतिपराधीनहृदये
दयामित्रैर्नेत्रैररुणधवलश्यामरुचिभिः ।
नदः शोणो गङ्गा तपनतनयेति ध्रुवममुं
त्रयाणां तीर्थानामुपनयसि सम्भेदमनघम् ॥ 54 ॥
निमेषोन्मेषाभ्यां प्रलयमुदयं याति जगती
तवेत्याहुः सन्तो धरणिधरराजन्यतनये ।
त्वदुन्मेषाज्जातं जगदिदमशेषं प्रलयतः
परित्रातुं शङ्के परिहृतनिमेषास्तव दृशः ॥ 55 ॥
तवापर्णे कर्णेजपनयनपैशुन्यचकिता
निलीयन्ते तोये नियतमनिमेषाः शफरिकाः ।
इयं च श्रीर्बद्धच्छदपुटकवाटं कुवलयम्
जहाति प्रत्यूषे निशि च विघटय्य प्रविशति ॥ 56 ॥
दृशा द्राघीयस्या दरदलितनीलोत्पलरुचा
दवीयांसं दीनं स्नपय कृपया मामपि शिवे ।
अनेनायं धन्यो भवति न च ते हानिरियता
वने वा हर्म्ये वा समकरनिपातो हिमकरः ॥ 57 ॥
अरालं ते पालीयुगलमगराजन्यतनये
न केषामाधत्ते कुसुमशरकोदण्डकुतुकम् ।
तिरश्चीनो यत्र श्रवणपथमुल्लङ्घ्य विलस-
न्नपाङ्गव्यासङ्गो दिशति शरसन्धानधिषणाम् ॥ 58 ॥
स्फुरद्गण्डाभोगप्रतिफलितताटङ्कयुगलं
चतुश्चक्रं मन्ये तव मुखमिदं मन्मथरथम् ।
यमारुह्य द्रुह्यत्यवनिरथमर्केन्दुचरणं
महावीरो मारः प्रमथपतये सज्जितवते ॥ 59 ॥
सरस्वत्याः सूक्तीरमृतलहरीकौशलहरीः
पिबन्त्याः शर्वाणि श्रवणचुलुकाभ्यामविरलम् ।
चमत्कारश्लाघाचलितशिरसः कुण्डलगणो
झणत्कारैस्तारैः प्रतिवचनमाचष्ट इव ते ॥ 60 ॥
असौ नासावंशस्तुहिनगिरिवंशध्वजपटि
त्वदीयो नेदीयः फलतु फलमस्माकमुचितम् ।
वहन्नन्तर्मुक्ताः शिशिरतरनिश्वासगलितं
समृद्ध्या यत्तासां बहिरपि च मुक्तामणिधरः ॥ 61 ॥
प्रकृत्या रक्तायास्तव सुदति दन्तच्छदरुचेः
प्रवक्ष्ये सादृश्यं जनयतु फलं विद्रुमलता ।
न बिम्बं तद्बिम्बप्रतिफलनरागादरुणितं
तुलामध्यारोढुं कथमिव विलज्जेत कलया ॥ 62 ॥
स्मितज्योत्स्नाजालं तव वदनचन्द्रस्य पिबतां
चकोराणामासीदतिरसतया चञ्चुजडिमा ।
अतस्ते शीतांशोरमृतलहरीमम्लरुचयः
पिबन्ति स्वच्छन्दं निशि निशि भृशं काञ्जिकधिया ॥ 63 ॥
अविश्रान्तं पत्युर्गुणगणकथाम्रेडनजपा
जपापुष्पच्छाया तव जननि जिह्वा जयति सा ।
यदग्रासीनायाः स्फटिकदृषदच्छच्छविमयी
सरस्वत्या मूर्तिः परिणमति माणिक्यवपुषा ॥ 64 ॥
रणे जित्वा दैत्यानपहृतशिरस्त्रैः कवचिभिर्-
निवृत्तैश्चण्डांशत्रिपुरहरनिर्माल्यविमुखैः ।
विशाखेन्द्रोपेन्द्रैः शशिविशदकर्पूरशकला
विलीयन्ते मातस्तव वदनताम्बूलकबलाः ॥ 65 ॥
विपञ्च्या गायन्ती विविधमपदानं पशुपतेः
त्वयारब्धे वक्तुं चलितशिरसा साधुवचने ।
तदीयैर्माधुर्यैरपलपिततन्त्रीकलरवां
निजां वीणां वाणी निचुलयति चोलेन निभृतम् ॥ 66 ॥
कराग्रेण स्पृष्टं तुहिनगिरिणा वत्सलतया
गिरीशेनोदस्तं मुहुरधरपानाकुलतया ।
करग्राह्यं शम्भोर्मुखमुकुरवृन्तं गिरिसुते
कथङ्कारं ब्रूमस्तव चिबुकमौपम्यरहितम् ॥ 67 ॥
भुजाश्लेषान् नित्यं पुरदमयितुः कण्टकवती
तव ग्रीवा धत्ते मुखकमलनालश्रियमियम् ।
स्वतः श्वेता कालागुरुबहुलजम्बालमलिना
मृणालीलालित्यं वहति यदधो हारलतिका ॥ 68 ॥
गले रेखास्तिस्रो गतिगमकगीतैकनिपुणे
विवाहव्यानद्धप्रगुणगुणसङ्ख्याप्रतिभुवः ।
विराजन्ते नानाविधमधुररागाकरभुवां
त्रयाणां ग्रामाणां स्थितिनियमसीमान इव ते ॥ 69 ॥
मृणालीमृद्वीनां तव भुजलतानां चतसृणां
चतुर्भिः सौन्दर्यं सरसिजभवः स्तौति वदनैः ।
नखेभ्यः सन्त्रस्यन् प्रथममथनादन्धकरिपो-
श्चतुर्णां शीर्षाणां सममभयहस्तार्पणधिया ॥ 70 ॥
नखानामुद्द्योतैर्नवनलिनरागं विहसतां
कराणां ते कान्तिं कथय कथयामः कथमुमे ।
कयाचिद्वा साम्यं भजतु कलया हन्त कमलं
यदि क्रीडल्लक्ष्मीचरणतललाक्षारसछणम् ॥ 71 ॥
समं देवि स्कन्दद्विपवदनपीतं स्तनयुगं
तवेदं नः खेदं हरतु सततं प्रस्नुतमुखम् ।
यदालोक्याशङ्काकुलितहृदयो हासजनकः
स्वकुम्भौ हेरम्बः परिमृशति हस्तेन झडिति ॥ 72 ॥
अमू ते वक्षोजावमृतरसमाणिक्यकुतुपौ
न सन्देहस्पन्दो नगपतिपताके मनसि नः ।
पिबन्तौ तौ यस्मादविदितवधूसङ्गरसिकौ
कुमारावद्यापि द्विरदवदनक्रौञ्चदलनौ ॥ 73 ॥
वहत्यम्ब स्तम्बेरमदनुजकुम्भप्रकृतिभिः
समारब्धां मुक्तामणिभिरमलां हारलतिकाम् ।
कुचाभोगो बिम्बाधररुचिभिरन्तः शबलितां
प्रतापव्यामिश्रां पुरदमयितुः कीर्तिमिव ते ॥ 74 ॥
तव स्तन्यं मन्ये धरणिधरकन्ये हृदयतः
पयःपारावारः परिवहति सारस्वतमिव ।
दयावत्या दत्तं द्रविडशिशुरास्वाद्य तव यत्
कवीनां प्रौढानामजनि कमनीयः कवयिता ॥ 75 ॥
हरक्रोधज्वालावलिभिरवलीढेन वपुषा
गभीरे ते नाभीसरसि कृतसङ्गो मनसिजः ।
समुत्तस्थौ तस्मादचलतनये धूमलतिका
जनस्तां जानीते तव जननि रोमावलिरिति ॥ 76 ॥
यदेतत् कालिन्दीतनुतरतरङ्गाकृति शिवे
कृशे मध्ये किञ्चिज्जननि तव यद्भाति सुधियाम् ।
विमर्दादन्योऽन्यं कुचकलशयोरन्तरगतं
तनूभूतं व्योम प्रविशदिव नाभिं कुहरिणीम् ॥ 77 ॥
स्थिरो गङ्गावर्तः स्तनमुकुलरोमावलिलता-
कलावालं कुण्डं कुसुमशरतेजोहुतभुजः ।
रतेर्लीलागारं किमपि तव नाभिर्गिरिसुते
बिलद्वारं सिद्धेर्गिरिशनयनानां विजयते ॥ 78 ॥
निसर्गक्षीणस्य स्तनतटभरेण क्लमजुषो
नमन्मूर्तेर्नारीतिलक शनकैस्त्रुट्यत इव ।
चिरं ते मध्यस्य त्रुटिततटिनीतीरतरुणा
समावस्थास्थेम्नो भवतु कुशलं शैलतनये ॥ 79 ॥
कुचौ सद्यःस्विद्यत्तटघटितकूर्पासभिदुरौ
कषन्तौ दोर्मूले कनककलशाभौ कलयता ।
तव त्रातुं भङ्गादलमिति वलग्नं तनुभुवा
त्रिधा नद्धं देवि त्रिवलि लवलीवल्लिभिरिव ॥ 80 ॥
गुरुत्वं विस्तारं क्षितिधरपतिः पार्वति निजा-
न्नितम्बादाच्छिद्य त्वयि हरणरूपेण निदधे ।
अतस्ते विस्तीर्णो गुरुरयमशेषां वसुमतीं
नितम्बप्राग्भारः स्थगयति लघुत्वं नयति च ॥ 81 ॥
करीन्द्राणां शुण्डान् कनककदलीकाण्डपटली-
मुभाभ्यामूरुभ्यामुभयमपि निर्जित्य भवती ।
सुवृत्ताभ्यां पत्युः प्रणतिकठिनाभ्यां गिरिसुते
विधिज्ञे जानुभ्यां विबुधकरिकुम्भद्वयमसि ॥ 82 ॥
पराजेतुं रुद्रं द्विगुणशरगर्भौ गिरिसुते
निषङ्गौ जङ्घे ते विषमविशिखो बाढमकृत ।
यदग्रे दृश्यन्ते दशशरफलाः पादयुगली-
नखाग्रच्छद्मानः सुरमकुटशाणैकनिशिताः ॥ 83 ॥
श्रुतीनां मूर्धानो दधति तव यौ शेखरतया
ममाप्येतौ मातः शिरसि दयया धेहि चरणौ ।
ययोः पाद्यं पाथः पशुपतिजटाजूटतटिनी
ययोर्लाक्षालक्ष्मीररुणहरिचूडामणिरुचिः ॥ 84 ॥
नमोवाकं ब्रूमो नयनरमणीयाय पदयो-
स्तवास्मै द्वन्द्वाय स्फुटरुचिरसालक्तकवते ।
असूयत्यत्यन्तं यदभिहननाय स्पृहयते
पशूनामीशानः प्रमदवनकङ्केलितरवे ॥ 85 ॥
मृषा कृत्वा गोत्रस्खलनमथ वैलक्ष्यनमितं
ललाटे भर्तारं चरणकमले ताडयति ते ।
चिरादन्तःशल्यं दहनकृतमुन्मूलितवता
तुलाकोटिक्वाणैः किलिकिलितमीशानरिपुणा ॥ 86 ॥
हिमानीहन्तव्यं हिमगिरिनिवासैकचतुरौ
निशायां निद्राणं निशि चरमभागे च विशदौ ।
वरं लक्ष्मीपात्रं श्रियमतिसृजन्तौ समयिनां
सरोजं त्वत्पादौ जननि जयतश्चित्रमिह किम् ॥ 87 ॥
पदं ते कीर्तीनां प्रपदमपदं देवि विपदां
कथं नीतं सद्भिः कठिनकमठीकर्परतुलाम् ।
कथं वा बाहुभ्यामुपयमनकाले पुरभिदा
यदादाय न्यस्तं दृषदि दयमानेन मनसा ॥ 88 ॥
नखैर्नाकस्त्रीणां करकमलसङ्कोचशशिभि-
स्तरूणां दिव्यानां हसत इव ते चण्डि चरणौ ।
फलानि स्वःस्थेभ्यः किसलयकराग्रेण ददतां
दरिद्रेभ्यो भद्रां श्रियमनिशमह्नाय ददतौ ॥ 89 ॥
ददाने दीनेभ्यः श्रियमनिशमाशानुसदृशी-
ममन्दं सौन्दर्यप्रकरमकरन्दं विकिरति ।
तवास्मिन् मन्दारस्तबकसुभगे यातु चरणे
निमज्जन्मज्जीवः करणचरणः षट्चरणताम् ॥ 90 ॥
पदन्यासक्रीडापरिचयमिवारब्धुमनसः
स्खलन्तस्ते खेलं भवनकलहंसा न जहति ।
अतस्तेषां शिक्षां सुभगमणिमञ्जीररणित-
च्छलादाचक्षाणं चरणकमलं चारुचरिते ॥ 91 ॥
गतास्ते मञ्चत्वं द्रुहिणहरिरुद्रेश्वरभृतः
शिवः स्वच्छच्छायाघटितकपटप्रच्छदपटः ।
त्वदीयानां भासां प्रतिफलनरागारुणतया
शरीरी शृङ्गारो रस इव दृशां दोग्धि कुतुकम् ॥ 92 ॥
अराला केशेषु प्रकृतिसरला मन्दहसिते
शिरीषाभा चित्ते दृषदुपलशोभा कुचतटे ।
भृशं तन्वी मध्ये पृथुरुरसिजारोहविषये
जगत्त्रातुं शम्भोर्जयति करुणा काचिदरुणा ॥ 93 ॥
कलङ्कः कस्तूरी रजनिकरबिम्बं जलमयं
कलाभिः कर्पूरैर्मरकतकरण्डं निबिडितम् ।
अतस्त्वद्भोगेन प्रतिदिनमिदं रिक्तकुहरं
विधिर्भूयो भूयो निबिडयति नूनं तव कृते ॥ 94 ॥
पुरारातेरन्तःपुरमसि ततस्त्वच्चरणयोः
सपर्यामर्यादा तरलकरणानामसुलभा ।
तथा ह्येते नीताः शतमखमुखाः सिद्धिमतुलां
तव द्वारोपान्तस्थितिभिरणिमाद्याभिरमराः ॥ 95 ॥
कलत्रं वैधात्रं कतिकति भजन्ते न कवयः
श्रियो देव्याः को वा न भवति पतिः कैरपि धनैः ।
महादेवं हित्वा तव सति सतीनामचरमे
कुचाभ्यामासङ्गः कुरवकतरोरप्यसुलभः ॥ 96 ॥
गिरामाहुर्देवीं द्रुहिणगृहिणीमागमविदो
हरेः पत्नीं पद्मां हरसहचरीमद्रितनयाम् ।
तुरीया कापि त्वं दुरधिगमनिःसीममहिमा
महामाया विश्वं भ्रमयसि परब्रह्ममहिषि ॥ 97 ॥
कदा काले मातः कथय कलितालक्तकरसं
पिबेयं विद्यार्थी तव चरणनिर्णेजनजलम् ।
प्रकृत्या मूकानामपि च कविताकारणतया
कदा धत्ते वाणीमुखकमलताम्बूलरसताम् ॥ 98 ॥
सरस्वत्या लक्ष्म्या विधिहरिसपत्नो विहरते
रतेः पातिव्रत्यं शिथिलयति रम्येण वपुषा ।
चिरं जीवन्नेव क्षपितपशुपाशव्यतिकरः
परानन्दाभिख्यं रसयति रसं त्वद्भजनवान् ॥ 99 ॥
प्रदीपज्वालाभिर्दिवसकरनीराजनविधिः
सुधासूतेश्चन्द्रोपलजललवैरर्घ्यरचना ।
स्वकीयैरम्भोभिः सलिलनिधिसौहित्यकरणं
त्वदीयाभिर्वाग्भिस्तव जननि वाचां स्तुतिरियम् ॥ 100 ॥
सौन्दर्यलहरि मुख्यस्तोत्रं संवार्तदायकम् ।
भगवद्पाद सन्क्लुप्तं पठेन् मुक्तौ भवेन्नरः ॥
॥ इति श्रीमत्परमहंसपरिव्राजकाचार्यस्य
श्रीगोविन्दभगवत्पूज्यपादशिष्यस्य
श्रीमच्छङ्करभगवतः कृतौ सौन्दर्यलहरी सम्पूर्णा ॥
॥ ॐ तत्सत् ॥
(अनुबन्धः)
समानीतः पद्भ्यां मणिमुकुरतामम्बरमणि-
र्भयादास्यादन्तःस्तिमितकिरणश्रेणिमसृणः ।
(पाठभेदः - भयादास्य स्निग्धस्त्मित, भयादास्यस्यान्तःस्त्मित)
दधाति त्वद्वक्त्रम्प्रतिफलनमश्रान्तविकचं
निरातङ्कं चन्द्रान्निजहृदयपङ्केरुहमिव ॥ 101 ॥
समुद्भूतस्थूलस्तनभरमुरश्चारु हसितं
कटाक्षे कन्दर्पः कतिचन कदम्बद्युति वपुः ।
हरस्य त्वद्भ्रान्तिं मनसि जनयन्ति स्म विमलाः
पाठभेदः - जनयामास मदनो, जनयन्तः समतुलां, जनयन्ता सुवदने
भवत्या ये भक्ताः परिणतिरमीषामियमुमे ॥ 102 ॥
निधे नित्यस्मेरे निरवधिगुणे नीतिनिपुणे
निराघातज्ञाने नियमपरचित्तैकनिलये ।
नियत्या निर्मुक्ते निखिलनिगमान्तस्तुतिपदे
निरातङ्के नित्ये निगमय ममापि स्तुतिमिमाम् ॥ 103 ॥
prathama bhāgaḥ - ānanda lahari
bhumauskhalita pādānāṃ bhūmirevā valambanam |
tvayī jātā parādhānāṃ tvameva śaraṇaṃ śive ||
śivaḥ śaktyā yukto yadi bhavati śaktaḥ prabhavituṃ
na cedevaṃ devo na khalu kuśalaḥ spanditumapi |
atastvāmārādhyāṃ hariharaviriñcādibhirapi
praṇantuṃ stotuṃ vā kathamakṛtapuṇyaḥ prabhavati || 1 ||
tanīyāṃsaṃ pāṃsuṃ tava caraṇapaṅkeruhabhavaṃ
viriñcissañcinvan viracayati lokānavikalam |
vahatyenaṃ śauriḥ kathamapi sahasreṇa śirasāṃ
harassaṅkṣudyainaṃ bhajati bhasitoddhūlanavidhim || 2 ||
avidyānāmanta-stimira-mihiradvīpanagarī
jaḍānāṃ caitanya-stabaka-makaranda-srutijharī |
daridrāṇāṃ cintāmaṇiguṇanikā janmajaladhau
nimagnānāṃ daṃṣṭrā muraripu-varāhasya bhavati || 3 ||
tvadanyaḥ pāṇibhyāmabhayavarado daivatagaṇaḥ
tvamekā naivāsi prakaṭitavarābhītyabhinayā |
bhayāt trātuṃ dātuṃ phalamapi ca vāñchāsamadhikaṃ
śaraṇye lokānāṃ tava hi caraṇāveva nipuṇau || 4 ||
haristvāmārādhya praṇatajanasaubhāgyajananīṃ
purā nārī bhūtvā puraripumapi kṣobhamanayat |
smaro'pi tvāṃ natvā ratinayanalehyena vapuṣā
munīnāmapyantaḥ prabhavati hi mohāya mahatām || 5 ||
dhanuḥ pauṣpaṃ maurvī madhukaramayī pañca viśikhāḥ
vasantaḥ sāmanto malayamarudāyodhanarathaḥ |
tathāpyekaḥ sarvaṃ himagirisute kāmapi kṛpām
apāṅgātte labdhvā jagadida-manaṅgo vijayate || 6 ||
kvaṇatkāñcīdāmā karikalabhakumbhastananatā
parikṣīṇā madhye pariṇataśaraccandravadanā |
dhanurbāṇān pāśaṃ sṛṇimapi dadhānā karatalaiḥ
purastādāstāṃ naḥ puramathiturāhopuruṣikā || 7 ||
sudhāsindhormadhye suraviṭapivāṭīparivṛte
maṇidvīpe nīpopavanavati cintāmaṇigṛhe |
śivākāre mañce paramaśivaparyaṅkanilayāṃ
bhajanti tvāṃ dhanyāḥ katicana cidānandalaharīm || 8 ||
mahīṃ mūlādhāre kamapi maṇipūre hutavahaṃ
sthitaṃ svādhiṣṭhāne hṛdi marutamākāśamupari |
mano'pi bhrūmadhye sakalamapi bhitvā kulapathaṃ
sahasrāre padme saha rahasi patyā viharase || 9 ||
sudhādhārāsāraiścaraṇayugalāntarvigalitaiḥ
prapañcaṃ siñcantī punarapi rasāmnāyamahasaḥ |
avāpya svāṃ bhūmiṃ bhujaganibhamadhyuṣṭavalayaṃ
svamātmānaṃ kṛtvā svapiṣi kulakuṇḍe kuhariṇi || 10 ||
caturbhiḥ śrīkaṇṭhaiḥ śivayuvatibhiḥ pañcabhirapi
prabhinnābhiḥ śambhornavabhirapi mūlaprakṛtibhiḥ |
catuścatvāriṃśadvasudalakalāśratrivalaya- [trayaścatvāri]
trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]
tvadīyaṃ saundaryaṃ tuhinagirikanye tulayituṃ
kavīndrāḥ kalpante kathamapi viriñciprabhṛtayaḥ |
yadālokautsukyādamaralalanā yānti manasā
tapobhirduṣprāpāmapi giriśasāyujyapadavīm || 12 ||
naraṃ varṣīyāṃsaṃ nayanavirasaṃ narmasu jaḍaṃ
tavāpāṅgāloke patitamanudhāvanti śataśaḥ |
galadveṇībandhāḥ kucakalaśavisrastasicayā
haṭhāt truṭyatkāñcyo vigalitadukūlā yuvatayaḥ || 13 ||
kṣitau ṣaṭpañcāśad dvisamadhikapañcāśadudake
hutāśe dvāṣaṣṭiścaturadhikapañcāśadanile |
divi dviṣṣaṭtriṃśanmanasi ca catuṣṣaṣṭiriti ye
mayūkhāsteṣāmapyupari tava pādāmbujayugam || 14 ||
śarajjyotsnāśuddhāṃ śaśiyutajaṭājūṭamakuṭāṃ
varatrāsatrāṇasphaṭikaghaṭikāpustakakarām |
sakṛnna tvā natvā kathamiva satāṃ sannnidadhate
madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]
kavīndrāṇāṃ cetaḥkamalavanabālātaparuciṃ
bhajante ye santaḥ katicidaruṇāmeva bhavatīm |
viriñcipreyasyāstaruṇataraśṛṅgāralaharī-
gabhīrābhirvāgbhirvidadhati satāṃ rañjanamamī || 16 ||
savitrībhirvācāṃ śaśimaṇiśilābhaṅgarucibhiḥ
vaśinyādyābhistvāṃ saha janani sañcintayati yaḥ |
sa kartā kāvyānāṃ bhavati mahatāṃ bhaṅgirucibhiḥ
vacobhirvāgdevīvadanakamalāmodamadhuraiḥ || 17 ||
tanucchāyābhiste taruṇataraṇiśrīsaraṇibhiḥ
divaṃ sarvāmurvīmaruṇimani magnāṃ smarati yaḥ |
bhavantyasya trasyadvanahariṇaśālīnanayanāḥ
sahorvaśyā vaśyāḥ kati kati na gīrvāṇagaṇikāḥ || 18 ||
mukhaṃ binduṃ kṛtvā kucayugamadhastasya tadadho
harārdhaṃ dhyāyedyo haramahiṣi te manmathakalām |
sa sadyaḥ saṅkṣobhaṃ nayati vanitā ityatilaghu
trilokīmapyāśu bhramayati ravīndustanayugām || 19 ||
kirantīmaṅgebhyaḥ kiraṇanikurambāmṛtarasaṃ
hṛdi tvāmādhatte himakaraśilāmūrtimiva yaḥ |
sa sarpāṇāṃ darpaṃ śamayati śakuntādhipa iva
jvarapluṣṭān dṛṣṭyā sukhayati sudhādhārasirayā || 20 ||
taṭillekhātanvīṃ tapanaśaśivaiśvānaramayīṃ
niṣaṇṇāṃ ṣaṇṇāmapyupari kamalānāṃ tava kalām |
mahāpadmāṭavyāṃ mṛditamalamāyena manasā
mahāntaḥ paśyanto dadhati paramāhlādalaharīm || 21 ||
bhavāni tvaṃ dāse mayi vitara dṛṣṭiṃ sakaruṇā-
miti stotuṃ vāñchan kathayati bhavāni tvamiti yaḥ |
tadaiva tvaṃ tasmai diśasi nijasāyujyapadavīṃ
mukundabrahmendrasphuṭamakuṭanīrājitapadām || 22 ||
tvayā hṛtvā vāmaṃ vapurapari-tṛptena manasā
śarīrārdhaṃ śambhoraparamapi śaṅke hṛtamabhūt |
yadetattvadrūpaṃ sakalamaruṇābhaṃ trinayanaṃ
kucābhyāmānamraṃ kuṭilaśaśicūḍālamakuṭam || 23 ||
jagatsūte dhātā hariravati rudraḥ kṣapayate
tiraskurvannetatsvamapi vapurīśastirayati |
sadāpūrvaḥ sarvaṃ tadidamanugṛhṇāti ca śiva-
stavājñāmālambya kṣaṇacalitayorbhrūlatikayoḥ || 24 ||
trayāṇāṃ devānāṃ triguṇajanitānāṃ tava śive
bhavet pūjā pūjā tava caraṇayoryā viracitā |
tathā hi tvatpādodvahanamaṇipīṭhasya nikaṭe
sthitā hyete śaśvanmukulitakarottaṃsamakuṭāḥ || 25 ||
viriñciḥ pañcatvaṃ vrajati harirāpnoti viratiṃ
vināśaṃ kīnāśo bhajati dhanado yāti nidhanam |
vitandrī māhendrī vitatirapi sammīlitadṛśā
mahāsaṃhāre'smin viharati sati tvatpatirasau || 26 ||
japo jalpaḥ śilpaṃ sakalamapi mudrāviracanā
gatiḥ prādakṣiṇyakramaṇamaśanādyāhutividhiḥ |
praṇāmassaṃveśassukhamakhilamātmārpaṇadṛśā
saparyāparyāyastava bhavatu yanme vilasitam || 27 ||
sudhāmapyāsvādya pratibhayajarāmṛtyuhariṇīṃ
vipadyante viśve vidhiśatamakhādyā diviṣadaḥ |
karālaṃ yatkṣvelaṃ kabalitavataḥ kālakalanā
na śambhostanmūlaṃ tava janani tāṭaṅkamahimā || 28 ||
kirīṭaṃ vairiñcaṃ parihara puraḥ kaiṭabhabhidaḥ
kaṭhore koṭīre skhalasi jahi jambhārimukuṭam |
praṇamreṣveteṣu prasabhamupayātasya bhavanaṃ
bhavasyābhyutthāne tava parijanoktirvijayate || 29 ||
svadehodbhūtābhirghṛṇibhiraṇimādyābhirabhito
niṣevye nitye tvāmahamiti sadā bhāvayati yaḥ |
kimāścaryaṃ tasya trinayanasamṛddhiṃ tṛṇayato
mahāsaṃvartāgnirviracayati nirājanavidhim || 30 ||
catuṣṣaṣṭyā tantraiḥ sakalamatisandhāya bhuvanaṃ
sthitastattatsiddhiprasavaparatantraiḥ paśupatiḥ |
punastvannirbandhādakhilapuruṣārthaikaghaṭanā-
svatantraṃ te tantraṃ kṣititalamavātītaradidam || 31 ||
śivaḥ śaktiḥ kāmaḥ kṣitiratha raviḥ śītakiraṇaḥ
smaro haṃsaḥ śakrastadanu ca parāmāraharayaḥ |
amī hṛllekhābhistisṛbhiravasāneṣu ghaṭitā
bhajante varṇāste tava janani nāmāvayavatām || 32 ||
smaraṃ yoniṃ lakṣmīṃ tritayamidamādau tava mano-
rnidhāyaike nitye niravadhimahābhogarasikāḥ |
bhajanti tvāṃ cintāmaṇigunanibaddhākṣavalayāḥ
śivāgnau juhvantaḥ surabhighṛtadhārāhutiśataiḥ || 33 ||
śarīraṃ tvaṃ śambhoḥ śaśimihiravakṣoruhayugaṃ
tavātmānaṃ manye bhagavati navātmānamanagham |
ataśśeṣaśśeṣītyayamubhayasādhāraṇatayā
sthitaḥ sambandho vāṃ samarasaparānandaparayoḥ || 34 ||
manastvaṃ vyoma tvaṃ marudasi marutsārathirasi
tvamāpastvaṃ bhūmistvayi pariṇatāyāṃ na hi param |
tvameva svātmānaṃ pariṇamayituṃ viśvavapuṣā
cidānandākāraṃ śivayuvati bhāvena bibhṛṣe || 35 ||
tavājñācakrasthaṃ tapanaśaśikoṭidyutidharaṃ
paraṃ śambhuṃ vande parimilitapārśvaṃ paracitā |
yamārādhyan bhaktyā raviśaśiśucīnāmaviṣaye
nirāloke'loke nivasati hi bhālokabhuvane || 36 ||
viśuddhau te śuddhasphaṭikaviśadaṃ vyomajanakaṃ
śivaṃ seve devīmapi śivasamānavyavasitām |
yayoḥ kāntyā yāntyāḥ śaśikiraṇasārūpyasaraṇe-
vidhūtāntardhvāntā vilasati cakorīva jagatī || 37 ||
samunmīlat saṃvit kamalamakarandaikarasikaṃ
bhaje haṃsadvandvaṃ kimapi mahatāṃ mānasacaram |
yadālāpādaṣṭādaśaguṇitavidyāpariṇati-
ryadādatte doṣād guṇamakhilamadbhyaḥ paya iva || 38 ||
tava svādhiṣṭhāne hutavahamadhiṣṭhāya nirataṃ
tamīḍe saṃvartaṃ janani mahatīṃ tāṃ ca samayām |
yadāloke lokān dahati mahati krodhakalite
dayārdrā yā dṛṣṭiḥ śiśiramupacāraṃ racayati || 39 ||
taṭittvantaṃ śaktyā timiraparipanthisphuraṇayā
sphurannānāratnābharaṇapariṇaddhendradhanuṣam |
tava śyāmaṃ meghaṃ kamapi maṇipūraikaśaraṇaṃ
niṣeve varṣantaṃ haramihirataptaṃ tribhuvanam || 40 ||
tavādhāre mūle saha samayayā lāsyaparayā
navātmānaṃ manye navarasamahātāṇḍavanaṭam |
ubhābhyāmetābhyāmudayavidhimuddiśya dayayā
sanāthābhyāṃ jajñe janakajananīmajjagadidam || 41 ||
dvitīya bhāgaḥ - saundarya laharī
gatairmāṇikyatvaṃ gaganamaṇibhiḥ sāndraghaṭitaṃ
kirīṭaṃ te haimaṃ himagirisute kīrtayati yaḥ |
sa nīḍeyacchāyācchuraṇaśabalaṃ candraśakalaṃ
dhanuḥ śaunāsīraṃ kimiti na nibadhnāti dhiṣaṇām || 42 ||
dhunotu dhvāntaṃ nastulitadalitendīvaravanaṃ
ghanasnigdhaślakṣṇaṃ cikuranikurumbaṃ tava śive |
yadīyaṃ saurabhyaṃ sahajamupalabdhuṃ sumanaso
vasantyasmin manye valamathanavāṭīviṭapinām || 43 ||
tanotu kṣemaṃ nastava vadanasaundaryalaharī-
parīvāhasrotaḥsaraṇiriva sīmantasaraṇiḥ |
vahantī sindūraṃ prabalakabarībhāratimira-
dviṣāṃ bṛndairbandīkṛtamiva navīnārkakiraṇam || 44 ||
arālaiḥ svābhāvyādalikalabhasaśrībhiralakaiḥ
parītaṃ te vaktraṃ parihasati paṅkeruharucim |
darasmere yasmin daśanarucikiñjalkarucire
sugandhau mādyanti smaradahanacakṣurmadhulihaḥ || 45 ||
lalāṭaṃ lāvaṇyadyutivimalamābhāti tava ya-
ddvitīyaṃ tanmanye makuṭaghaṭitaṃ candraśakalam |
viparyāsanyāsādubhayamapi sambhūya ca mithaḥ
sudhālepasyūtiḥ pariṇamati rākāhimakaraḥ || 46 ||
bhruvau bhugne kiñcidbhuvanabhayabhaṅgavyasanini
tvadīye netrābhyāṃ madhukararucibhyāṃ dhṛtaguṇam |
dhanurmanye savyetarakaragṛhītaṃ ratipateḥ
prakoṣṭhe muṣṭau ca sthagayati nigūḍhāntaramume || 47 ||
ahaḥ sūte savyaṃ tava nayanamarkātmakatayā
triyāmāṃ vāmaṃ te sṛjati rajanīnāyakatayā |
tṛtīyā te dṛṣṭirdaradalitahemāmbujaruciḥ
samādhatte sandhyāṃ divasaniśayorantaracarīm || 48 ||
viśālā kalyāṇī sphuṭarucirayodhyā kuvalayaiḥ
kṛpādhārādhārā kimapi madhurābhogavatikā |
avantī dṛṣṭiste bahunagaravistāravijayā
dhruvaṃ tattannāmavyavaharaṇayogyā vijayate || 49 ||
kavīnāṃ sandarbhastabakamakarandaikarasikaṃ
kaṭākṣavyākṣepabhramarakalabhau karṇayugalam |
amuñcantau dṛṣṭvā tava navarasāsvādataralā-
vasūyāsaṃsargādalikanayanaṃ kiñcidaruṇam || 50 ||
śive śṛṅgārārdrā taditarajane kutsanaparā
saroṣā gaṅgāyāṃ giriśacarite vismayavatī |
harāhibhyo bhītā sarasiruhasaubhāgyajananī (jayinī)
sakhīṣu smerā te mayi jananī dṛṣṭiḥ sakaruṇā || 51 ||
gate karṇābhyarṇaṃ garuta iva pakṣmāṇi dadhatī
purāṃ bhettuścittapraśamarasavidrāvaṇaphale |
ime netre gotrādharapatikulottaṃsakalike
tavākarṇākṛṣṭasmaraśaravilāsaṃ kalayataḥ || 52 ||
vibhaktatraivarṇyaṃ vyatikaritalīlāñjanatayā
vibhāti tvannetratritayamidamīśānadayite |
punaḥ sraṣṭuṃ devān druhiṇaharirudrānuparatān
rajaḥ sattvaṃ bibhrattama iti guṇānāṃ trayamiva || 53 ||
pavitrīkartuṃ naḥ paśupatiparādhīnahṛdaye
dayāmitrairnetrairaruṇadhavalaśyāmarucibhiḥ |
nadaḥ śoṇo gaṅgā tapanatanayeti dhruvamamuṃ
trayāṇāṃ tīrthānāmupanayasi sambhedamanagham || 54 ||
nimeṣonmeṣābhyāṃ pralayamudayaṃ yāti jagatī
tavetyāhuḥ santo dharaṇidhararājanyatanaye |
tvadunmeṣājjātaṃ jagadidamaśeṣaṃ pralayataḥ
paritrātuṃ śaṅke parihṛtanimeṣāstava dṛśaḥ || 55 ||
tavāparṇe karṇejapanayanapaiśunyacakitā
nilīyante toye niyatamanimeṣāḥ śapharikāḥ |
iyaṃ ca śrīrbaddhacchadapuṭakavāṭaṃ kuvalayam
jahāti pratyūṣe niśi ca vighaṭayya praviśati || 56 ||
dṛśā drāghīyasyā daradalitanīlotpalarucā
davīyāṃsaṃ dīnaṃ snapaya kṛpayā māmapi śive |
anenāyaṃ dhanyo bhavati na ca te hāniriyatā
vane vā harmye vā samakaranipāto himakaraḥ || 57 ||
arālaṃ te pālīyugalamagarājanyatanaye
na keṣāmādhatte kusumaśarakodaṇḍakutukam |
tiraścīno yatra śravaṇapathamullaṅghya vilasa-
nnapāṅgavyāsaṅgo diśati śarasandhānadhiṣaṇām || 58 ||
sphuradgaṇḍābhogapratiphalitatāṭaṅkayugalaṃ
catuścakraṃ manye tava mukhamidaṃ manmatharatham |
yamāruhya druhyatyavanirathamarkenducaraṇaṃ
mahāvīro māraḥ pramathapataye sajjitavate || 59 ||
sarasvatyāḥ sūktīramṛtalaharīkauśalaharīḥ
pibantyāḥ śarvāṇi śravaṇaculukābhyāmaviralam |
camatkāraślāghācalitaśirasaḥ kuṇḍalagaṇo
jhaṇatkāraistāraiḥ prativacanamācaṣṭa iva te || 60 ||
asau nāsāvaṃśastuhinagirivaṃśadhvajapaṭi
tvadīyo nedīyaḥ phalatu phalamasmākamucitam |
vahannantarmuktāḥ śiśirataraniśvāsagalitaṃ
samṛddhyā yattāsāṃ bahirapi ca muktāmaṇidharaḥ || 61 ||
prakṛtyā raktāyāstava sudati dantacchadaruceḥ
pravakṣye sādṛśyaṃ janayatu phalaṃ vidrumalatā |
na bimbaṃ tadbimbapratiphalanarāgādaruṇitaṃ
tulāmadhyāroḍhuṃ kathamiva vilajjeta kalayā || 62 ||
smitajyotsnājālaṃ tava vadanacandrasya pibatāṃ
cakorāṇāmāsīdatirasatayā cañcujaḍimā |
ataste śītāṃśoramṛtalaharīmamlarucayaḥ
pibanti svacchandaṃ niśi niśi bhṛśaṃ kāñjikadhiyā || 63 ||
aviśrāntaṃ patyurguṇagaṇakathāmreḍanajapā
japāpuṣpacchāyā tava janani jihvā jayati sā |
yadagrāsīnāyāḥ sphaṭikadṛṣadacchacchavimayī
sarasvatyā mūrtiḥ pariṇamati māṇikyavapuṣā || 64 ||
raṇe jitvā daityānapahṛtaśirastraiḥ kavacibhir-
nivṛttaiścaṇḍāṃśatripuraharanirmālyavimukhaiḥ |
viśākhendropendraiḥ śaśiviśadakarpūraśakalā
vilīyante mātastava vadanatāmbūlakabalāḥ || 65 ||
vipañcyā gāyantī vividhamapadānaṃ paśupateḥ
tvayārabdhe vaktuṃ calitaśirasā sādhuvacane |
tadīyairmādhuryairapalapitatantrīkalaravāṃ
nijāṃ vīṇāṃ vāṇī niculayati colena nibhṛtam || 66 ||
karāgreṇa spṛṣṭaṃ tuhinagiriṇā vatsalatayā
girīśenodastaṃ muhuradharapānākulatayā |
karagrāhyaṃ śambhormukhamukuravṛntaṃ girisute
kathaṅkāraṃ brūmastava cibukamaupamyarahitam || 67 ||
bhujāśleṣān nityaṃ puradamayituḥ kaṇṭakavatī
tava grīvā dhatte mukhakamalanālaśriyamiyam |
svataḥ śvetā kālāgurubahulajambālamalinā
mṛṇālīlālityaṃ vahati yadadho hāralatikā || 68 ||
gale rekhāstisro gatigamakagītaikanipuṇe
vivāhavyānaddhapraguṇaguṇasaṅkhyāpratibhuvaḥ |
virājante nānāvidhamadhurarāgākarabhuvāṃ
trayāṇāṃ grāmāṇāṃ sthitiniyamasīmāna iva te || 69 ||
mṛṇālīmṛdvīnāṃ tava bhujalatānāṃ catasṛṇāṃ
caturbhiḥ saundaryaṃ sarasijabhavaḥ stauti vadanaiḥ |
nakhebhyaḥ santrasyan prathamamathanādandhakaripo-
ścaturṇāṃ śīrṣāṇāṃ samamabhayahastārpaṇadhiyā || 70 ||
nakhānāmuddyotairnavanalinarāgaṃ vihasatāṃ
karāṇāṃ te kāntiṃ kathaya kathayāmaḥ kathamume |
kayācidvā sāmyaṃ bhajatu kalayā hanta kamalaṃ
yadi krīḍallakṣmīcaraṇatalalākṣārasachaṇam || 71 ||
samaṃ devi skandadvipavadanapītaṃ stanayugaṃ
tavedaṃ naḥ khedaṃ haratu satataṃ prasnutamukham |
yadālokyāśaṅkākulitahṛdayo hāsajanakaḥ
svakumbhau herambaḥ parimṛśati hastena jhaḍiti || 72 ||
amū te vakṣojāvamṛtarasamāṇikyakutupau
na sandehaspando nagapatipatāke manasi naḥ |
pibantau tau yasmādaviditavadhūsaṅgarasikau
kumārāvadyāpi dviradavadanakrauñcadalanau || 73 ||
vahatyamba stamberamadanujakumbhaprakṛtibhiḥ
samārabdhāṃ muktāmaṇibhiramalāṃ hāralatikām |
kucābhogo bimbādhararucibhirantaḥ śabalitāṃ
pratāpavyāmiśrāṃ puradamayituḥ kīrtimiva te || 74 ||
tava stanyaṃ manye dharaṇidharakanye hṛdayataḥ
payaḥpārāvāraḥ parivahati sārasvatamiva |
dayāvatyā dattaṃ draviḍaśiśurāsvādya tava yat
kavīnāṃ prauḍhānāmajani kamanīyaḥ kavayitā || 75 ||
harakrodhajvālāvalibhiravalīḍhena vapuṣā
gabhīre te nābhīsarasi kṛtasaṅgo manasijaḥ |
samuttasthau tasmādacalatanaye dhūmalatikā
janastāṃ jānīte tava janani romāvaliriti || 76 ||
yadetat kālindītanutarataraṅgākṛti śive
kṛśe madhye kiñcijjanani tava yadbhāti sudhiyām |
vimardādanyo'nyaṃ kucakalaśayorantaragataṃ
tanūbhūtaṃ vyoma praviśadiva nābhiṃ kuhariṇīm || 77 ||
sthiro gaṅgāvartaḥ stanamukularomāvalilatā-
kalāvālaṃ kuṇḍaṃ kusumaśaratejohutabhujaḥ |
raterlīlāgāraṃ kimapi tava nābhirgirisute
biladvāraṃ siddhergiriśanayanānāṃ vijayate || 78 ||
nisargakṣīṇasya stanataṭabhareṇa klamajuṣo
namanmūrternārītilaka śanakaistruṭyata iva |
ciraṃ te madhyasya truṭitataṭinītīrataruṇā
samāvasthāsthemno bhavatu kuśalaṃ śailatanaye || 79 ||
kucau sadyaḥsvidyattaṭaghaṭitakūrpāsabhidurau
kaṣantau dormūle kanakakalaśābhau kalayatā |
tava trātuṃ bhaṅgādalamiti valagnaṃ tanubhuvā
tridhā naddhaṃ devi trivali lavalīvallibhiriva || 80 ||
gurutvaṃ vistāraṃ kṣitidharapatiḥ pārvati nijā-
nnitambādācchidya tvayi haraṇarūpeṇa nidadhe |
ataste vistīrṇo gururayamaśeṣāṃ vasumatīṃ
nitambaprāgbhāraḥ sthagayati laghutvaṃ nayati ca || 81 ||
karīndrāṇāṃ śuṇḍān kanakakadalīkāṇḍapaṭalī-
mubhābhyāmūrubhyāmubhayamapi nirjitya bhavatī |
suvṛttābhyāṃ patyuḥ praṇatikaṭhinābhyāṃ girisute
vidhijñe jānubhyāṃ vibudhakarikumbhadvayamasi || 82 ||
parājetuṃ rudraṃ dviguṇaśaragarbhau girisute
niṣaṅgau jaṅghe te viṣamaviśikho bāḍhamakṛta |
yadagre dṛśyante daśaśaraphalāḥ pādayugalī-
nakhāgracchadmānaḥ suramakuṭaśāṇaikaniśitāḥ || 83 ||
śrutīnāṃ mūrdhāno dadhati tava yau śekharatayā
mamāpyetau mātaḥ śirasi dayayā dhehi caraṇau |
yayoḥ pādyaṃ pāthaḥ paśupatijaṭājūṭataṭinī
yayorlākṣālakṣmīraruṇaharicūḍāmaṇiruciḥ || 84 ||
namovākaṃ brūmo nayanaramaṇīyāya padayo-
stavāsmai dvandvāya sphuṭarucirasālaktakavate |
asūyatyatyantaṃ yadabhihananāya spṛhayate
paśūnāmīśānaḥ pramadavanakaṅkelitarave || 85 ||
mṛṣā kṛtvā gotraskhalanamatha vailakṣyanamitaṃ
lalāṭe bhartāraṃ caraṇakamale tāḍayati te |
cirādantaḥśalyaṃ dahanakṛtamunmūlitavatā
tulākoṭikvāṇaiḥ kilikilitamīśānaripuṇā || 86 ||
himānīhantavyaṃ himagirinivāsaikacaturau
niśāyāṃ nidrāṇaṃ niśi caramabhāge ca viśadau |
varaṃ lakṣmīpātraṃ śriyamatisṛjantau samayināṃ
sarojaṃ tvatpādau janani jayataścitramiha kim || 87 ||
padaṃ te kīrtīnāṃ prapadamapadaṃ devi vipadāṃ
kathaṃ nītaṃ sadbhiḥ kaṭhinakamaṭhīkarparatulām |
kathaṃ vā bāhubhyāmupayamanakāle purabhidā
yadādāya nyastaṃ dṛṣadi dayamānena manasā || 88 ||
nakhairnākastrīṇāṃ karakamalasaṅkocaśaśibhi-
starūṇāṃ divyānāṃ hasata iva te caṇḍi caraṇau |
phalāni svaḥsthebhyaḥ kisalayakarāgreṇa dadatāṃ
daridrebhyo bhadrāṃ śriyamaniśamahnāya dadatau || 89 ||
dadāne dīnebhyaḥ śriyamaniśamāśānusadṛśī-
mamandaṃ saundaryaprakaramakarandaṃ vikirati |
tavāsmin mandārastabakasubhage yātu caraṇe
nimajjanmajjīvaḥ karaṇacaraṇaḥ ṣaṭcaraṇatām || 90 ||
padanyāsakrīḍāparicayamivārabdhumanasaḥ
skhalantaste khelaṃ bhavanakalahaṃsā na jahati |
atasteṣāṃ śikṣāṃ subhagamaṇimañjīraraṇita-
cchalādācakṣāṇaṃ caraṇakamalaṃ cārucarite || 91 ||
gatāste mañcatvaṃ druhiṇaharirudreśvarabhṛtaḥ
śivaḥ svacchacchāyāghaṭitakapaṭapracchadapaṭaḥ |
tvadīyānāṃ bhāsāṃ pratiphalanarāgāruṇatayā
śarīrī śṛṅgāro rasa iva dṛśāṃ dogdhi kutukam || 92 ||
arālā keśeṣu prakṛtisaralā mandahasite
śirīṣābhā citte dṛṣadupalaśobhā kucataṭe |
bhṛśaṃ tanvī madhye pṛthururasijārohaviṣaye
jagattrātuṃ śambhorjayati karuṇā kācidaruṇā || 93 ||
kalaṅkaḥ kastūrī rajanikarabimbaṃ jalamayaṃ
kalābhiḥ karpūrairmarakatakaraṇḍaṃ nibiḍitam |
atastvadbhogena pratidinamidaṃ riktakuharaṃ
vidhirbhūyo bhūyo nibiḍayati nūnaṃ tava kṛte || 94 ||
purārāterantaḥpuramasi tatastvaccaraṇayoḥ
saparyāmaryādā taralakaraṇānāmasulabhā |
tathā hyete nītāḥ śatamakhamukhāḥ siddhimatulāṃ
tava dvāropāntasthitibhiraṇimādyābhiramarāḥ || 95 ||
kalatraṃ vaidhātraṃ katikati bhajante na kavayaḥ
śriyo devyāḥ ko vā na bhavati patiḥ kairapi dhanaiḥ |
mahādevaṃ hitvā tava sati satīnāmacarame
kucābhyāmāsaṅgaḥ kuravakatarorapyasulabhaḥ || 96 ||
girāmāhurdevīṃ druhiṇagṛhiṇīmāgamavido
hareḥ patnīṃ padmāṃ harasahacarīmadritanayām |
turīyā kāpi tvaṃ duradhigamaniḥsīmamahimā
mahāmāyā viśvaṃ bhramayasi parabrahmamahiṣi || 97 ||
kadā kāle mātaḥ kathaya kalitālaktakarasaṃ
pibeyaṃ vidyārthī tava caraṇanirṇejanajalam |
prakṛtyā mūkānāmapi ca kavitākāraṇatayā
kadā dhatte vāṇīmukhakamalatāmbūlarasatām || 98 ||
sarasvatyā lakṣmyā vidhiharisapatno viharate
rateḥ pātivratyaṃ śithilayati ramyeṇa vapuṣā |
ciraṃ jīvanneva kṣapitapaśupāśavyatikaraḥ
parānandābhikhyaṃ rasayati rasaṃ tvadbhajanavān || 99 ||
pradīpajvālābhirdivasakaranīrājanavidhiḥ
sudhāsūteścandropalajalalavairarghyaracanā |
svakīyairambhobhiḥ salilanidhisauhityakaraṇaṃ
tvadīyābhirvāgbhistava janani vācāṃ stutiriyam || 100 ||
saundaryalahari mukhyastotraṃ saṃvārtadāyakam |
bhagavadpāda sankluptaṃ paṭhen muktau bhavennaraḥ ||
|| iti śrīmatparamahaṃsaparivrājakācāryasya
śrīgovindabhagavatpūjyapādaśiṣyasya
śrīmacchaṅkarabhagavataḥ kṛtau saundaryalaharī sampūrṇā ||
|| oṃ tatsat ||
(anubandhaḥ)
samānītaḥ padbhyāṃ maṇimukuratāmambaramaṇi-
rbhayādāsyādantaḥstimitakiraṇaśreṇimasṛṇaḥ |
(pāṭhabhedaḥ - bhayādāsya snigdhastmita, bhayādāsyasyāntaḥstmita)
dadhāti tvadvaktrampratiphalanamaśrāntavikacaṃ
nirātaṅkaṃ candrānnijahṛdayapaṅkeruhamiva || 101 ||
samudbhūtasthūlastanabharamuraścāru hasitaṃ
kaṭākṣe kandarpaḥ katicana kadambadyuti vapuḥ |
harasya tvadbhrāntiṃ manasi janayanti sma vimalāḥ
pāṭhabhedaḥ - janayāmāsa madano, janayantaḥ samatulāṃ, janayantā suvadane
bhavatyā ye bhaktāḥ pariṇatiramīṣāmiyamume || 102 ||
nidhe nityasmere niravadhiguṇe nītinipuṇe
nirāghātajñāne niyamaparacittaikanilaye |
niyatyā nirmukte nikhilanigamāntastutipade
nirātaṅke nitye nigamaya mamāpi stutimimām || 103 ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.