Saundarya Lahari — Sinhala Script

ප්රථම භාගඃ - ආනන්ද ලහරි

භුමෞස්ඛලිත පාදානාං භූමිරේවා වලම්බනම් .

ත්වයී ජාතා පරාධානාං ත්වමේව ශරණං ශිවේ ..

ශිවඃ ශක්ත්යා යුක්තෝ යදි භවති ශක්තඃ ප්රභවිතුං

න චේදේවං දේවෝ න ඛලු කුශලඃ ස්පන්දිතුමපි .

අතස්ත්වාමාරාධ්යාං හරිහරවිරිඤ්චාදිභිරපි

ප්රණන්තුං ස්තෝතුං වා කථමකෘතපුණ්යඃ ප්රභවති .. 1 ..

තනීයාංසං පාංසුං තව චරණපඞ්කේරුහභවං

විරිඤ්චිස්සඤ්චින්වන් විරචයති ලෝකානවිකලම් .

වහත්යේනං ශෞරිඃ කථමපි සහස්රේණ ශිරසාං

හරස්සඞ්ක්ෂුද්යෛනං භජති භසිතෝද්ධූලනවිධිම් .. 2 ..

අවිද්යානාමන්ත-ස්තිමිර-මිහිරද්වීපනගරී

ජඩානාං චෛතන්ය-ස්තබක-මකරන්ද-ස්රුතිඣරී .

දරිද්රාණාං චින්තාමණිගුණනිකා ජන්මජලධෞ

නිමග්නානාං දංෂ්ට්රා මුරරිපු-වරාහස්ය භවති .. 3 ..

ත්වදන්යඃ පාණිභ්යාමභයවරදෝ දෛවතගණඃ

ත්වමේකා නෛවාසි ප්රකටිතවරාභීත්යභිනයා .

භයාත් ත්රාතුං දාතුං ඵලමපි ච වාඤ්ඡාසමධිකං

ශරණ්යේ ලෝකානාං තව හි චරණාවේව නිපුණෞ .. 4 ..

හරිස්ත්වාමාරාධ්ය ප්රණතජනසෞභාග්යජනනීං

පුරා නාරී භූත්වා පුරරිපුමපි ක්ෂෝභමනයත් .

ස්මරෝ(අ)පි ත්වාං නත්වා රතිනයනලේහ්යේන වපුෂා

මුනීනාමප්යන්තඃ ප්රභවති හි මෝහාය මහතාම් .. 5 ..

ධනුඃ පෞෂ්පං මෞර්වී මධුකරමයී පඤ්ච විශිඛාඃ

වසන්තඃ සාමන්තෝ මලයමරුදායෝධනරථඃ .

තථාප්යේකඃ සර්වං හිමගිරිසුතේ කාමපි කෘපාම්

අපාඞ්ගාත්තේ ලබ්ධ්වා ජගදිද-මනඞ්ගෝ විජයතේ .. 6 ..

ක්වණත්කාඤ්චීදාමා කරිකලභකුම්භස්තනනතා

පරික්ෂීණා මධ්යේ පරිණතශරච්චන්ද්රවදනා .

ධනුර්බාණාන් පාශං සෘණිමපි දධානා කරතලෛඃ

පුරස්තාදාස්තාං නඃ පුරමථිතුරාහෝපුරුෂිකා .. 7 ..

සුධාසින්ධෝර්මධ්යේ සුරවිටපිවාටීපරිවෘතේ

මණිද්වීපේ නීපෝපවනවති චින්තාමණිගෘහේ .

ශිවාකාරේ මඤ්චේ පරමශිවපර්යඞ්කනිලයාං

භජන්ති ත්වාං ධන්යාඃ කතිචන චිදානන්දලහරීම් .. 8 ..

මහීං මූලාධාරේ කමපි මණිපූරේ හුතවහං

ස්ථිතං ස්වාධිෂ්ඨානේ හෘදි මරුතමාකාශමුපරි .

මනෝ(අ)පි භ්රූමධ්යේ සකලමපි භිත්වා කුලපථං

සහස්රාරේ පද්මේ සහ රහසි පත්යා විහරසේ .. 9 ..

සුධාධාරාසාරෛශ්චරණයුගලාන්තර්විගලිතෛඃ

ප්රපඤ්චං සිඤ්චන්තී පුනරපි රසාම්නායමහසඃ .

අවාප්ය ස්වාං භූමිං භුජගනිභමධ්යුෂ්ටවලයං

ස්වමාත්මානං කෘත්වා ස්වපිෂි කුලකුණ්ඩේ කුහරිණි .. 10 ..

චතුර්භිඃ ශ්රීකණ්ඨෛඃ ශිවයුවතිභිඃ පඤ්චභිරපි

ප්රභින්නාභිඃ ශම්භෝර්නවභිරපි මූලප්රකෘතිභිඃ .

චතුශ්චත්වාරිංශද්වසුදලකලාශ්රත්රිවලය- [ත්රයශ්චත්වාරි]

ත්රිරේඛාභිඃ සාර්ධං තව ශරණකෝණාඃ පරිණතාඃ .. 11 .. [චරණකෝණාඃ, භවනකිණාඃ]

ත්වදීයං සෞන්දර්යං තුහිනගිරිකන්යේ තුලයිතුං

කවීන්ද්රාඃ කල්පන්තේ කථමපි විරිඤ්චිප්රභෘතයඃ .

යදාලෝකෞත්සුක්යාදමරලලනා යාන්ති මනසා

තපෝභිර්දුෂ්ප්රාපාමපි ගිරිශසායුජ්යපදවීම් .. 12 ..

නරං වර්ෂීයාංසං නයනවිරසං නර්මසු ජඩං

තවාපාඞ්ගාලෝකේ පතිතමනුධාවන්ති ශතශඃ .

ගලද්වේණීබන්ධාඃ කුචකලශවිස්රස්තසිචයා

හඨාත් ත්රුට්යත්කාඤ්ච්යෝ විගලිතදුකූලා යුවතයඃ .. 13 ..

ක්ෂිතෞ ෂට්පඤ්චාශද් ද්විසමධිකපඤ්චාශදුදකේ

හුතාශේ ද්වාෂෂ්ටිශ්චතුරධිකපඤ්චාශදනිලේ .

දිවි ද්විෂ්ෂට්ත්රිංශන්මනසි ච චතුෂ්ෂෂ්ටිරිති යේ

මයූඛාස්තේෂාමප්යුපරි තව පාදාම්බුජයුගම් .. 14 ..

ශරජ්ජ්යෝත්ස්නාශුද්ධාං ශශියුතජටාජූටමකුටාං

වරත්රාසත්රාණස්ඵටිකඝටිකාපුස්තකකරාම් .

සකෘන්න ත්වා නත්වා කථමිව සතාං සන්න්නිදධතේ

මධුක්ෂීරද්රාක්ෂාමධුරිමධුරීණාඃ භණිතයඃ .. 15.. [ඵණිතයඃ]

කවීන්ද්රාණාං චේතඃකමලවනබාලාතපරුචිං

භජන්තේ යේ සන්තඃ කතිචිදරුණාමේව භවතීම් .

විරිඤ්චිප්රේයස්යාස්තරුණතරශෘඞ්ගාරලහරී-

ගභීරාභිර්වාග්භිර්විදධති සතාං රඤ්ජනමමී .. 16 ..

සවිත්රීභිර්වාචාං ශශිමණිශිලාභඞ්ගරුචිභිඃ

වශින්යාද්යාභිස්ත්වාං සහ ජනනි සඤ්චින්තයති යඃ .

ස කර්තා කාව්යානාං භවති මහතාං භඞ්ගිරුචිභිඃ

වචෝභිර්වාග්දේවීවදනකමලාමෝදමධුරෛඃ .. 17 ..

තනුච්ඡායාභිස්තේ තරුණතරණිශ්රීසරණිභිඃ

දිවං සර්වාමුර්වීමරුණිමනි මග්නාං ස්මරති යඃ .

භවන්ත්යස්ය ත්රස්යද්වනහරිණශාලීනනයනාඃ

සහෝර්වශ්යා වශ්යාඃ කති කති න ගීර්වාණගණිකාඃ .. 18 ..

මුඛං බින්දුං කෘත්වා කුචයුගමධස්තස්ය තදධෝ

හරාර්ධං ධ්යායේද්යෝ හරමහිෂි තේ මන්මථකලාම් .

ස සද්යඃ සඞ්ක්ෂෝභං නයති වනිතා ඉත්යතිලඝු

ත්රිලෝකීමප්යාශු භ්රමයති රවීන්දුස්තනයුගාම් .. 19 ..

කිරන්තීමඞ්ගේභ්යඃ කිරණනිකුරම්බාමෘතරසං

හෘදි ත්වාමාධත්තේ හිමකරශිලාමූර්තිමිව යඃ .

ස සර්පාණාං දර්පං ශමයති ශකුන්තාධිප ඉව

ජ්වරප්ලුෂ්ටාන් දෘෂ්ට්යා සුඛයති සුධාධාරසිරයා .. 20 ..

තටිල්ලේඛාතන්වීං තපනශශිවෛශ්වානරමයීං

නිෂණ්ණාං ෂණ්ණාමප්යුපරි කමලානාං තව කලාම් .

මහාපද්මාටව්යාං මෘදිතමලමායේන මනසා

මහාන්තඃ පශ්යන්තෝ දධති පරමාහ්ලාදලහරීම් .. 21 ..

භවානි ත්වං දාසේ මයි විතර දෘෂ්ටිං සකරුණා-

මිති ස්තෝතුං වාඤ්ඡන් කථයති භවානි ත්වමිති යඃ .

තදෛව ත්වං තස්මෛ දිශසි නිජසායුජ්යපදවීං

මුකුන්දබ්රහ්මේන්ද්රස්ඵුටමකුටනීරාජිතපදාම් .. 22 ..

ත්වයා හෘත්වා වාමං වපුරපරි-තෘප්තේන මනසා

ශරීරාර්ධං ශම්භෝරපරමපි ශඞ්කේ හෘතමභූත් .

යදේතත්ත්වද්රූපං සකලමරුණාභං ත්රිනයනං

කුචාභ්යාමානම්රං කුටිලශශිචූඩාලමකුටම් .. 23 ..

ජගත්සූතේ ධාතා හරිරවති රුද්රඃ ක්ෂපයතේ

තිරස්කුර්වන්නේතත්ස්වමපි වපුරීශස්තිරයති .

සදාපූර්වඃ සර්වං තදිදමනුගෘහ්ණාති ච ශිව-

ස්තවාජ්ඤාමාලම්බ්ය ක්ෂණචලිතයෝර්භ්රූලතිකයෝඃ .. 24 ..

ත්රයාණාං දේවානාං ත්රිගුණජනිතානාං තව ශිවේ

භවේත් පූජා පූජා තව චරණයෝර්යා විරචිතා .

තථා හි ත්වත්පාදෝද්වහනමණිපීඨස්ය නිකටේ

ස්ථිතා හ්යේතේ ශශ්වන්මුකුලිතකරෝත්තංසමකුටාඃ .. 25 ..

විරිඤ්චිඃ පඤ්චත්වං ව්රජති හරිරාප්නෝති විරතිං

විනාශං කීනාශෝ භජති ධනදෝ යාති නිධනම් .

විතන්ද්රී මාහේන්ද්රී විතතිරපි සම්මීලිතදෘශා

මහාසංහාරේ(අ)ස්මින් විහරති සති ත්වත්පතිරසෞ .. 26 ..

ජපෝ ජල්පඃ ශිල්පං සකලමපි මුද්රාවිරචනා

ගතිඃ ප්රාදක්ෂිණ්යක්රමණමශනාද්යාහුතිවිධිඃ .

ප්රණාමස්සංවේශස්සුඛමඛිලමාත්මාර්පණදෘශා

සපර්යාපර්යායස්තව භවතු යන්මේ විලසිතම් .. 27 ..

සුධාමප්යාස්වාද්ය ප්රතිභයජරාමෘත්යුහරිණීං

විපද්යන්තේ විශ්වේ විධිශතමඛාද්යා දිවිෂදඃ .

කරාලං යත්ක්ෂ්වේලං කබලිතවතඃ කාලකලනා

න ශම්භෝස්තන්මූලං තව ජනනි තාටඞ්කමහිමා .. 28 ..

කිරීටං වෛරිඤ්චං පරිහර පුරඃ කෛටභභිදඃ

කඨෝරේ කෝටීරේ ස්ඛලසි ජහි ජම්භාරිමුකුටම් .

ප්රණම්රේෂ්වේතේෂු ප්රසභමුපයාතස්ය භවනං

භවස්යාභ්යුත්ථානේ තව පරිජනෝක්තිර්විජයතේ .. 29 ..

ස්වදේහෝද්භූතාභිර්ඝෘණිභිරණිමාද්යාභිරභිතෝ

නිෂේව්යේ නිත්යේ ත්වාමහමිති සදා භාවයති යඃ .

කිමාශ්චර්යං තස්ය ත්රිනයනසමෘද්ධිං තෘණයතෝ

මහාසංවර්තාග්නිර්විරචයති නිරාජනවිධිම් .. 30 ..

චතුෂ්ෂෂ්ට්යා තන්ත්රෛඃ සකලමතිසන්ධාය භුවනං

ස්ථිතස්තත්තත්සිද්ධිප්රසවපරතන්ත්රෛඃ පශුපතිඃ .

පුනස්ත්වන්නිර්බන්ධාදඛිලපුරුෂාර්ථෛකඝටනා-

ස්වතන්ත්රං තේ තන්ත්රං ක්ෂිතිතලමවාතීතරදිදම් .. 31 ..

ශිවඃ ශක්තිඃ කාමඃ ක්ෂිතිරථ රවිඃ ශීතකිරණඃ

ස්මරෝ හංසඃ ශක්රස්තදනු ච පරාමාරහරයඃ .

අමී හෘල්ලේඛාභිස්තිසෘභිරවසානේෂු ඝටිතා

භජන්තේ වර්ණාස්තේ තව ජනනි නාමාවයවතාම් .. 32 ..

ස්මරං යෝනිං ලක්ෂ්මීං ත්රිතයමිදමාදෞ තව මනෝ-

ර්නිධායෛකේ නිත්යේ නිරවධිමහාභෝගරසිකාඃ .

භජන්ති ත්වාං චින්තාමණිගුනනිබද්ධාක්ෂවලයාඃ

ශිවාග්නෞ ජුහ්වන්තඃ සුරභිඝෘතධාරාහුතිශතෛඃ .. 33 ..

ශරීරං ත්වං ශම්භෝඃ ශශිමිහිරවක්ෂෝරුහයුගං

තවාත්මානං මන්යේ භගවති නවාත්මානමනඝම් .

අතශ්ශේෂශ්ශේෂීත්යයමුභයසාධාරණතයා

ස්ථිතඃ සම්බන්ධෝ වාං සමරසපරානන්දපරයෝඃ .. 34 ..

මනස්ත්වං ව්යෝම ත්වං මරුදසි මරුත්සාරථිරසි

ත්වමාපස්ත්වං භූමිස්ත්වයි පරිණතායාං න හි පරම් .

ත්වමේව ස්වාත්මානං පරිණමයිතුං විශ්වවපුෂා

චිදානන්දාකාරං ශිවයුවති භාවේන බිභෘෂේ .. 35 ..

තවාජ්ඤාචක්රස්ථං තපනශශිකෝටිද්යුතිධරං

පරං ශම්භුං වන්දේ පරිමිලිතපාර්ශ්වං පරචිතා .

යමාරාධ්යන් භක්ත්යා රවිශශිශුචීනාමවිෂයේ

නිරාලෝකේ(අ)ලෝකේ නිවසති හි භාලෝකභුවනේ .. 36 ..

විශුද්ධෞ තේ ශුද්ධස්ඵටිකවිශදං ව්යෝමජනකං

ශිවං සේවේ දේවීමපි ශිවසමානව්යවසිතාම් .

යයෝඃ කාන්ත්යා යාන්ත්යාඃ ශශිකිරණසාරූප්යසරණේ-

විධූතාන්තර්ධ්වාන්තා විලසති චකෝරීව ජගතී .. 37 ..

සමුන්මීලත් සංවිත් කමලමකරන්දෛකරසිකං

භජේ හංසද්වන්ද්වං කිමපි මහතාං මානසචරම් .

යදාලාපාදෂ්ටාදශගුණිතවිද්යාපරිණති-

ර්යදාදත්තේ දෝෂාද් ගුණමඛිලමද්භ්යඃ පය ඉව .. 38 ..

තව ස්වාධිෂ්ඨානේ හුතවහමධිෂ්ඨාය නිරතං

තමීඩේ සංවර්තං ජනනි මහතීං තාං ච සමයාම් .

යදාලෝකේ ලෝකාන් දහති මහති ක්රෝධකලිතේ

දයාර්ද්රා යා දෘෂ්ටිඃ ශිශිරමුපචාරං රචයති .. 39 ..

තටිත්ත්වන්තං ශක්ත්යා තිමිරපරිපන්ථිස්ඵුරණයා

ස්ඵුරන්නානාරත්නාභරණපරිණද්ධේන්ද්රධනුෂම් .

තව ශ්යාමං මේඝං කමපි මණිපූරෛකශරණං

නිෂේවේ වර්ෂන්තං හරමිහිරතප්තං ත්රිභුවනම් .. 40 ..

තවාධාරේ මූලේ සහ සමයයා ලාස්යපරයා

නවාත්මානං මන්යේ නවරසමහාතාණ්ඩවනටම් .

උභාභ්යාමේතාභ්යාමුදයවිධිමුද්දිශ්ය දයයා

සනාථාභ්යාං ජජ්ඤේ ජනකජනනීමජ්ජගදිදම් .. 41 ..

ද්විතීය භාගඃ - සෞන්දර්ය ලහරී

ගතෛර්මාණික්යත්වං ගගනමණිභිඃ සාන්ද්රඝටිතං

කිරීටං තේ හෛමං හිමගිරිසුතේ කීර්තයති යඃ .

ස නීඩේයච්ඡායාච්ඡුරණශබලං චන්ද්රශකලං

ධනුඃ ශෞනාසීරං කිමිති න නිබධ්නාති ධිෂණාම් .. 42 ..

ධුනෝතු ධ්වාන්තං නස්තුලිතදලිතේන්දීවරවනං

ඝනස්නිග්ධශ්ලක්ෂ්ණං චිකුරනිකුරුම්බං තව ශිවේ .

යදීයං සෞරභ්යං සහජමුපලබ්ධුං සුමනසෝ

වසන්ත්යස්මින් මන්යේ වලමථනවාටීවිටපිනාම් .. 43 ..

තනෝතු ක්ෂේමං නස්තව වදනසෞන්දර්යලහරී-

පරීවාහස්රෝතඃසරණිරිව සීමන්තසරණිඃ .

වහන්තී සින්දූරං ප්රබලකබරීභාරතිමිර-

ද්විෂාං බෘන්දෛර්බන්දීකෘතමිව නවීනාර්කකිරණම් .. 44 ..

අරාලෛඃ ස්වාභාව්යාදලිකලභසශ්රීභිරලකෛඃ

පරීතං තේ වක්ත්රං පරිහසති පඞ්කේරුහරුචිම් .

දරස්මේරේ යස්මින් දශනරුචිකිඤ්ජල්කරුචිරේ

සුගන්ධෞ මාද්යන්ති ස්මරදහනචක්ෂුර්මධුලිහඃ .. 45 ..

ලලාටං ලාවණ්යද්යුතිවිමලමාභාති තව ය-

ද්ද්විතීයං තන්මන්යේ මකුටඝටිතං චන්ද්රශකලම් .

විපර්යාසන්යාසාදුභයමපි සම්භූය ච මිථඃ

සුධාලේපස්යූතිඃ පරිණමති රාකාහිමකරඃ .. 46 ..

භ්රුවෞ භුග්නේ කිඤ්චිද්භුවනභයභඞ්ගව්යසනිනි

ත්වදීයේ නේත්රාභ්යාං මධුකරරුචිභ්යාං ධෘතගුණම් .

ධනුර්මන්යේ සව්යේතරකරගෘහීතං රතිපතේඃ

ප්රකෝෂ්ඨේ මුෂ්ටෞ ච ස්ථගයති නිගූඪාන්තරමුමේ .. 47 ..

අහඃ සූතේ සව්යං තව නයනමර්කාත්මකතයා

ත්රියාමාං වාමං තේ සෘජති රජනීනායකතයා .

තෘතීයා තේ දෘෂ්ටිර්දරදලිතහේමාම්බුජරුචිඃ

සමාධත්තේ සන්ධ්යාං දිවසනිශයෝරන්තරචරීම් .. 48 ..

විශාලා කල්යාණී ස්ඵුටරුචිරයෝධ්යා කුවලයෛඃ

කෘපාධාරාධාරා කිමපි මධුරාභෝගවතිකා .

අවන්තී දෘෂ්ටිස්තේ බහුනගරවිස්තාරවිජයා

ධ්රුවං තත්තන්නාමව්යවහරණයෝග්යා විජයතේ .. 49 ..

කවීනාං සන්දර්භස්තබකමකරන්දෛකරසිකං

කටාක්ෂව්යාක්ෂේපභ්රමරකලභෞ කර්ණයුගලම් .

අමුඤ්චන්තෞ දෘෂ්ට්වා තව නවරසාස්වාදතරලා-

වසූයාසංසර්ගාදලිකනයනං කිඤ්චිදරුණම් .. 50 ..

ශිවේ ශෘඞ්ගාරාර්ද්රා තදිතරජනේ කුත්සනපරා

සරෝෂා ගඞ්ගායාං ගිරිශචරිතේ විස්මයවතී .

හරාහිභ්යෝ භීතා සරසිරුහසෞභාග්යජනනී (ජයිනී)

සඛීෂු ස්මේරා තේ මයි ජනනී දෘෂ්ටිඃ සකරුණා .. 51 ..

ගතේ කර්ණාභ්යර්ණං ගරුත ඉව පක්ෂ්මාණි දධතී

පුරාං භේත්තුශ්චිත්තප්රශමරසවිද්රාවණඵලේ .

ඉමේ නේත්රේ ගෝත්රාධරපතිකුලෝත්තංසකලිකේ

තවාකර්ණාකෘෂ්ටස්මරශරවිලාසං කලයතඃ .. 52 ..

විභක්තත්රෛවර්ණ්යං ව්යතිකරිතලීලාඤ්ජනතයා

විභාති ත්වන්නේත්රත්රිතයමිදමීශානදයිතේ .

පුනඃ ස්රෂ්ටුං දේවාන් ද්රුහිණහරිරුද්රානුපරතාන්

රජඃ සත්ත්වං බිභ්රත්තම ඉති ගුණානාං ත්රයමිව .. 53 ..

පවිත්රීකර්තුං නඃ පශුපතිපරාධීනහෘදයේ

දයාමිත්රෛර්නේත්රෛරරුණධවලශ්යාමරුචිභිඃ .

නදඃ ශෝණෝ ගඞ්ගා තපනතනයේති ධ්රුවමමුං

ත්රයාණාං තීර්ථානාමුපනයසි සම්භේදමනඝම් .. 54 ..

නිමේෂෝන්මේෂාභ්යාං ප්රලයමුදයං යාති ජගතී

තවේත්යාහුඃ සන්තෝ ධරණිධරරාජන්යතනයේ .

ත්වදුන්මේෂාජ්ජාතං ජගදිදමශේෂං ප්රලයතඃ

පරිත්රාතුං ශඞ්කේ පරිහෘතනිමේෂාස්තව දෘශඃ .. 55 ..

තවාපර්ණේ කර්ණේජපනයනපෛශුන්යචකිතා

නිලීයන්තේ තෝයේ නියතමනිමේෂාඃ ශඵරිකාඃ .

ඉයං ච ශ්රීර්බද්ධච්ඡදපුටකවාටං කුවලයම්

ජහාති ප්රත්යූෂේ නිශි ච විඝටය්ය ප්රවිශති .. 56 ..

දෘශා ද්රාඝීයස්යා දරදලිතනීලෝත්පලරුචා

දවීයාංසං දීනං ස්නපය කෘපයා මාමපි ශිවේ .

අනේනායං ධන්යෝ භවති න ච තේ හානිරියතා

වනේ වා හර්ම්යේ වා සමකරනිපාතෝ හිමකරඃ .. 57 ..

අරාලං තේ පාලීයුගලමගරාජන්යතනයේ

න කේෂාමාධත්තේ කුසුමශරකෝදණ්ඩකුතුකම් .

තිරශ්චීනෝ යත්ර ශ්රවණපථමුල්ලඞ්ඝ්ය විලස-

න්නපාඞ්ගව්යාසඞ්ගෝ දිශති ශරසන්ධානධිෂණාම් .. 58 ..

ස්ඵුරද්ගණ්ඩාභෝගප්රතිඵලිතතාටඞ්කයුගලං

චතුශ්චක්රං මන්යේ තව මුඛමිදං මන්මථරථම් .

යමාරුහ්ය ද්රුහ්යත්යවනිරථමර්කේන්දුචරණං

මහාවීරෝ මාරඃ ප්රමථපතයේ සජ්ජිතවතේ .. 59 ..

සරස්වත්යාඃ සූක්තීරමෘතලහරීකෞශලහරීඃ

පිබන්ත්යාඃ ශර්වාණි ශ්රවණචුලුකාභ්යාමවිරලම් .

චමත්කාරශ්ලාඝාචලිතශිරසඃ කුණ්ඩලගණෝ

ඣණත්කාරෛස්තාරෛඃ ප්රතිවචනමාචෂ්ට ඉව තේ .. 60 ..

අසෞ නාසාවංශස්තුහිනගිරිවංශධ්වජපටි

ත්වදීයෝ නේදීයඃ ඵලතු ඵලමස්මාකමුචිතම් .

වහන්නන්තර්මුක්තාඃ ශිශිරතරනිශ්වාසගලිතං

සමෘද්ධ්යා යත්තාසාං බහිරපි ච මුක්තාමණිධරඃ .. 61 ..

ප්රකෘත්යා රක්තායාස්තව සුදති දන්තච්ඡදරුචේඃ

ප්රවක්ෂ්යේ සාදෘශ්යං ජනයතු ඵලං විද්රුමලතා .

න බිම්බං තද්බිම්බප්රතිඵලනරාගාදරුණිතං

තුලාමධ්යාරෝඪුං කථමිව විලජ්ජේත කලයා .. 62 ..

ස්මිතජ්යෝත්ස්නාජාලං තව වදනචන්ද්රස්ය පිබතාං

චකෝරාණාමාසීදතිරසතයා චඤ්චුජඩිමා .

අතස්තේ ශීතාංශෝරමෘතලහරීමම්ලරුචයඃ

පිබන්ති ස්වච්ඡන්දං නිශි නිශි භෘශං කාඤ්ජිකධියා .. 63 ..

අවිශ්රාන්තං පත්යුර්ගුණගණකථාම්රේඩනජපා

ජපාපුෂ්පච්ඡායා තව ජනනි ජිහ්වා ජයති සා .

යදග්රාසීනායාඃ ස්ඵටිකදෘෂදච්ඡච්ඡවිමයී

සරස්වත්යා මූර්තිඃ පරිණමති මාණික්යවපුෂා .. 64 ..

රණේ ජිත්වා දෛත්යානපහෘතශිරස්ත්රෛඃ කවචිභිර්-

නිවෘත්තෛශ්චණ්ඩාංශත්රිපුරහරනිර්මාල්යවිමුඛෛඃ .

විශාඛේන්ද්රෝපේන්ද්රෛඃ ශශිවිශදකර්පූරශකලා

විලීයන්තේ මාතස්තව වදනතාම්බූලකබලාඃ .. 65 ..

විපඤ්ච්යා ගායන්තී විවිධමපදානං පශුපතේඃ

ත්වයාරබ්ධේ වක්තුං චලිතශිරසා සාධුවචනේ .

තදීයෛර්මාධුර්යෛරපලපිතතන්ත්රීකලරවාං

නිජාං වීණාං වාණී නිචුලයති චෝලේන නිභෘතම් .. 66 ..

කරාග්රේණ ස්පෘෂ්ටං තුහිනගිරිණා වත්සලතයා

ගිරීශේනෝදස්තං මුහුරධරපානාකුලතයා .

කරග්රාහ්යං ශම්භෝර්මුඛමුකුරවෘන්තං ගිරිසුතේ

කථඞ්කාරං බ්රූමස්තව චිබුකමෞපම්යරහිතම් .. 67 ..

භුජාශ්ලේෂාන් නිත්යං පුරදමයිතුඃ කණ්ටකවතී

තව ග්රීවා ධත්තේ මුඛකමලනාලශ්රියමියම් .

ස්වතඃ ශ්වේතා කාලාගුරුබහුලජම්බාලමලිනා

මෘණාලීලාලිත්යං වහති යදධෝ හාරලතිකා .. 68 ..

ගලේ රේඛාස්තිස්රෝ ගතිගමකගීතෛකනිපුණේ

විවාහව්යානද්ධප්රගුණගුණසඞ්ඛ්යාප්රතිභුවඃ .

විරාජන්තේ නානාවිධමධුරරාගාකරභුවාං

ත්රයාණාං ග්රාමාණාං ස්ථිතිනියමසීමාන ඉව තේ .. 69 ..

මෘණාලීමෘද්වීනාං තව භුජලතානාං චතසෘණාං

චතුර්භිඃ සෞන්දර්යං සරසිජභවඃ ස්තෞති වදනෛඃ .

නඛේභ්යඃ සන්ත්රස්යන් ප්රථමමථනාදන්ධකරිපෝ-

ශ්චතුර්ණාං ශීර්ෂාණාං සමමභයහස්තාර්පණධියා .. 70 ..

නඛානාමුද්ද්යෝතෛර්නවනලිනරාගං විහසතාං

කරාණාං තේ කාන්තිං කථය කථයාමඃ කථමුමේ .

කයාචිද්වා සාම්යං භජතු කලයා හන්ත කමලං

යදි ක්රීඩල්ලක්ෂ්මීචරණතලලාක්ෂාරසඡණම් .. 71 ..

සමං දේවි ස්කන්දද්විපවදනපීතං ස්තනයුගං

තවේදං නඃ ඛේදං හරතු සතතං ප්රස්නුතමුඛම් .

යදාලෝක්යාශඞ්කාකුලිතහෘදයෝ හාසජනකඃ

ස්වකුම්භෞ හේරම්බඃ පරිමෘශති හස්තේන ඣඩිති .. 72 ..

අමූ තේ වක්ෂෝජාවමෘතරසමාණික්යකුතුපෞ

න සන්දේහස්පන්දෝ නගපතිපතාකේ මනසි නඃ .

පිබන්තෞ තෞ යස්මාදවිදිතවධූසඞ්ගරසිකෞ

කුමාරාවද්යාපි ද්විරදවදනක්රෞඤ්චදලනෞ .. 73 ..

වහත්යම්බ ස්තම්බේරමදනුජකුම්භප්රකෘතිභිඃ

සමාරබ්ධාං මුක්තාමණිභිරමලාං හාරලතිකාම් .

කුචාභෝගෝ බිම්බාධරරුචිභිරන්තඃ ශබලිතාං

ප්රතාපව්යාමිශ්රාං පුරදමයිතුඃ කීර්තිමිව තේ .. 74 ..

තව ස්තන්යං මන්යේ ධරණිධරකන්යේ හෘදයතඃ

පයඃපාරාවාරඃ පරිවහති සාරස්වතමිව .

දයාවත්යා දත්තං ද්රවිඩශිශුරාස්වාද්ය තව යත්

කවීනාං ප්රෞඪානාමජනි කමනීයඃ කවයිතා .. 75 ..

හරක්රෝධජ්වාලාවලිභිරවලීඪේන වපුෂා

ගභීරේ තේ නාභීසරසි කෘතසඞ්ගෝ මනසිජඃ .

සමුත්තස්ථෞ තස්මාදචලතනයේ ධූමලතිකා

ජනස්තාං ජානීතේ තව ජනනි රෝමාවලිරිති .. 76 ..

යදේතත් කාලින්දීතනුතරතරඞ්ගාකෘති ශිවේ

කෘශේ මධ්යේ කිඤ්චිජ්ජනනි තව යද්භාති සුධියාම් .

විමර්දාදන්යෝ(අ)න්යං කුචකලශයෝරන්තරගතං

තනූභූතං ව්යෝම ප්රවිශදිව නාභිං කුහරිණීම් .. 77 ..

ස්ථිරෝ ගඞ්ගාවර්තඃ ස්තනමුකුලරෝමාවලිලතා-

කලාවාලං කුණ්ඩං කුසුමශරතේජෝහුතභුජඃ .

රතේර්ලීලාගාරං කිමපි තව නාභිර්ගිරිසුතේ

බිලද්වාරං සිද්ධේර්ගිරිශනයනානාං විජයතේ .. 78 ..

නිසර්ගක්ෂීණස්ය ස්තනතටභරේණ ක්ලමජුෂෝ

නමන්මූර්තේර්නාරීතිලක ශනකෛස්ත්රුට්යත ඉව .

චිරං තේ මධ්යස්ය ත්රුටිතතටිනීතීරතරුණා

සමාවස්ථාස්ථේම්නෝ භවතු කුශලං ශෛලතනයේ .. 79 ..

කුචෞ සද්යඃස්විද්යත්තටඝටිතකූර්පාසභිදුරෞ

කෂන්තෞ දෝර්මූලේ කනකකලශාභෞ කලයතා .

තව ත්රාතුං භඞ්ගාදලමිති වලග්නං තනුභුවා

ත්රිධා නද්ධං දේවි ත්රිවලි ලවලීවල්ලිභිරිව .. 80 ..

ගුරුත්වං විස්තාරං ක්ෂිතිධරපතිඃ පාර්වති නිජා-

න්නිතම්බාදාච්ඡිද්ය ත්වයි හරණරූපේණ නිදධේ .

අතස්තේ විස්තීර්ණෝ ගුරුරයමශේෂාං වසුමතීං

නිතම්බප්රාග්භාරඃ ස්ථගයති ලඝුත්වං නයති ච .. 81 ..

කරීන්ද්රාණාං ශුණ්ඩාන් කනකකදලීකාණ්ඩපටලී-

මුභාභ්යාමූරුභ්යාමුභයමපි නිර්ජිත්ය භවතී .

සුවෘත්තාභ්යාං පත්යුඃ ප්රණතිකඨිනාභ්යාං ගිරිසුතේ

විධිජ්ඤේ ජානුභ්යාං විබුධකරිකුම්භද්වයමසි .. 82 ..

පරාජේතුං රුද්රං ද්විගුණශරගර්භෞ ගිරිසුතේ

නිෂඞ්ගෞ ජඞ්ඝේ තේ විෂමවිශිඛෝ බාඪමකෘත .

යදග්රේ දෘශ්යන්තේ දශශරඵලාඃ පාදයුගලී-

නඛාග්රච්ඡද්මානඃ සුරමකුටශාණෛකනිශිතාඃ .. 83 ..

ශ්රුතීනාං මූර්ධානෝ දධති තව යෞ ශේඛරතයා

මමාප්යේතෞ මාතඃ ශිරසි දයයා ධේහි චරණෞ .

යයෝඃ පාද්යං පාථඃ පශුපතිජටාජූටතටිනී

යයෝර්ලාක්ෂාලක්ෂ්මීරරුණහරිචූඩාමණිරුචිඃ .. 84 ..

නමෝවාකං බ්රූමෝ නයනරමණීයාය පදයෝ-

ස්තවාස්මෛ ද්වන්ද්වාය ස්ඵුටරුචිරසාලක්තකවතේ .

අසූයත්යත්යන්තං යදභිහනනාය ස්පෘහයතේ

පශූනාමීශානඃ ප්රමදවනකඞ්කේලිතරවේ .. 85 ..

මෘෂා කෘත්වා ගෝත්රස්ඛලනමථ වෛලක්ෂ්යනමිතං

ලලාටේ භර්තාරං චරණකමලේ තාඩයති තේ .

චිරාදන්තඃශල්යං දහනකෘතමුන්මූලිතවතා

තුලාකෝටික්වාණෛඃ කිලිකිලිතමීශානරිපුණා .. 86 ..

හිමානීහන්තව්යං හිමගිරිනිවාසෛකචතුරෞ

නිශායාං නිද්රාණං නිශි චරමභාගේ ච විශදෞ .

වරං ලක්ෂ්මීපාත්රං ශ්රියමතිසෘජන්තෞ සමයිනාං

සරෝජං ත්වත්පාදෞ ජනනි ජයතශ්චිත්රමිහ කිම් .. 87 ..

පදං තේ කීර්තීනාං ප්රපදමපදං දේවි විපදාං

කථං නීතං සද්භිඃ කඨිනකමඨීකර්පරතුලාම් .

කථං වා බාහුභ්යාමුපයමනකාලේ පුරභිදා

යදාදාය න්යස්තං දෘෂදි දයමානේන මනසා .. 88 ..

නඛෛර්නාකස්ත්රීණාං කරකමලසඞ්කෝචශශිභි-

ස්තරූණාං දිව්යානාං හසත ඉව තේ චණ්ඩි චරණෞ .

ඵලානි ස්වඃස්ථේභ්යඃ කිසලයකරාග්රේණ දදතාං

දරිද්රේභ්යෝ භද්රාං ශ්රියමනිශමහ්නාය දදතෞ .. 89 ..

දදානේ දීනේභ්යඃ ශ්රියමනිශමාශානුසදෘශී-

මමන්දං සෞන්දර්යප්රකරමකරන්දං විකිරති .

තවාස්මින් මන්දාරස්තබකසුභගේ යාතු චරණේ

නිමජ්ජන්මජ්ජීවඃ කරණචරණඃ ෂට්චරණතාම් .. 90 ..

පදන්යාසක්රීඩාපරිචයමිවාරබ්ධුමනසඃ

ස්ඛලන්තස්තේ ඛේලං භවනකලහංසා න ජහති .

අතස්තේෂාං ශික්ෂාං සුභගමණිමඤ්ජීරරණිත-

ච්ඡලාදාචක්ෂාණං චරණකමලං චාරුචරිතේ .. 91 ..

ගතාස්තේ මඤ්චත්වං ද්රුහිණහරිරුද්රේශ්වරභෘතඃ

ශිවඃ ස්වච්ඡච්ඡායාඝටිතකපටප්රච්ඡදපටඃ .

ත්වදීයානාං භාසාං ප්රතිඵලනරාගාරුණතයා

ශරීරී ශෘඞ්ගාරෝ රස ඉව දෘශාං දෝග්ධි කුතුකම් .. 92 ..

අරාලා කේශේෂු ප්රකෘතිසරලා මන්දහසිතේ

ශිරීෂාභා චිත්තේ දෘෂදුපලශෝභා කුචතටේ .

භෘශං තන්වී මධ්යේ පෘථුරුරසිජාරෝහවිෂයේ

ජගත්ත්රාතුං ශම්භෝර්ජයති කරුණා කාචිදරුණා .. 93 ..

කලඞ්කඃ කස්තූරී රජනිකරබිම්බං ජලමයං

කලාභිඃ කර්පූරෛර්මරකතකරණ්ඩං නිබිඩිතම් .

අතස්ත්වද්භෝගේන ප්රතිදිනමිදං රික්තකුහරං

විධිර්භූයෝ භූයෝ නිබිඩයති නූනං තව කෘතේ .. 94 ..

පුරාරාතේරන්තඃපුරමසි තතස්ත්වච්චරණයෝඃ

සපර්යාමර්යාදා තරලකරණානාමසුලභා .

තථා හ්යේතේ නීතාඃ ශතමඛමුඛාඃ සිද්ධිමතුලාං

තව ද්වාරෝපාන්තස්ථිතිභිරණිමාද්යාභිරමරාඃ .. 95 ..

කලත්රං වෛධාත්රං කතිකති භජන්තේ න කවයඃ

ශ්රියෝ දේව්යාඃ කෝ වා න භවති පතිඃ කෛරපි ධනෛඃ .

මහාදේවං හිත්වා තව සති සතීනාමචරමේ

කුචාභ්යාමාසඞ්ගඃ කුරවකතරෝරප්යසුලභඃ .. 96 ..

ගිරාමාහුර්දේවීං ද්රුහිණගෘහිණීමාගමවිදෝ

හරේඃ පත්නීං පද්මාං හරසහචරීමද්රිතනයාම් .

තුරීයා කාපි ත්වං දුරධිගමනිඃසීමමහිමා

මහාමායා විශ්වං භ්රමයසි පරබ්රහ්මමහිෂි .. 97 ..

කදා කාලේ මාතඃ කථය කලිතාලක්තකරසං

පිබේයං විද්යාර්ථී තව චරණනිර්ණේජනජලම් .

ප්රකෘත්යා මූකානාමපි ච කවිතාකාරණතයා

කදා ධත්තේ වාණීමුඛකමලතාම්බූලරසතාම් .. 98 ..

සරස්වත්යා ලක්ෂ්ම්යා විධිහරිසපත්නෝ විහරතේ

රතේඃ පාතිව්රත්යං ශිථිලයති රම්යේණ වපුෂා .

චිරං ජීවන්නේව ක්ෂපිතපශුපාශව්යතිකරඃ

පරානන්දාභිඛ්යං රසයති රසං ත්වද්භජනවාන් .. 99 ..

ප්රදීපජ්වාලාභිර්දිවසකරනීරාජනවිධිඃ

සුධාසූතේශ්චන්ද්රෝපලජලලවෛරර්ඝ්යරචනා .

ස්වකීයෛරම්භෝභිඃ සලිලනිධිසෞහිත්යකරණං

ත්වදීයාභිර්වාග්භිස්තව ජනනි වාචාං ස්තුතිරියම් .. 100 ..

සෞන්දර්යලහරි මුඛ්යස්තෝත්රං සංවාර්තදායකම් .

භගවද්පාද සන්ක්ලුප්තං පඨේන් මුක්තෞ භවේන්නරඃ ..

.. ඉති ශ්රීමත්පරමහංසපරිව්රාජකාචාර්යස්ය

ශ්රීගෝවින්දභගවත්පූජ්යපාදශිෂ්යස්ය

ශ්රීමච්ඡඞ්කරභගවතඃ කෘතෞ සෞන්දර්යලහරී සම්පූර්ණා ..

.. ඕං තත්සත් ..

(අනුබන්ධඃ)

සමානීතඃ පද්භ්යාං මණිමුකුරතාමම්බරමණි-

ර්භයාදාස්යාදන්තඃස්තිමිතකිරණශ්රේණිමසෘණඃ .

(පාඨභේදඃ - භයාදාස්ය ස්නිග්ධස්ත්මිත, භයාදාස්යස්යාන්තඃස්ත්මිත)

දධාති ත්වද්වක්ත්රම්ප්රතිඵලනමශ්රාන්තවිකචං

නිරාතඞ්කං චන්ද්රාන්නිජහෘදයපඞ්කේරුහමිව .. 101 ..

සමුද්භූතස්ථූලස්තනභරමුරශ්චාරු හසිතං

කටාක්ෂේ කන්දර්පඃ කතිචන කදම්බද්යුති වපුඃ .

හරස්ය ත්වද්භ්රාන්තිං මනසි ජනයන්ති ස්ම විමලාඃ

පාඨභේදඃ - ජනයාමාස මදනෝ, ජනයන්තඃ සමතුලාං, ජනයන්තා සුවදනේ

භවත්යා යේ භක්තාඃ පරිණතිරමීෂාමියමුමේ .. 102 ..

නිධේ නිත්යස්මේරේ නිරවධිගුණේ නීතිනිපුණේ

නිරාඝාතජ්ඤානේ නියමපරචිත්තෛකනිලයේ .

නියත්යා නිර්මුක්තේ නිඛිලනිගමාන්තස්තුතිපදේ

නිරාතඞ්කේ නිත්යේ නිගමය මමාපි ස්තුතිමිමාම් .. 103 ..

Roman (IAST) Transliteration

prathama bhāgaḥ - ānanda lahari

bhumauskhalita pādānāṃ bhūmirevā valambanam |

tvayī jātā parādhānāṃ tvameva śaraṇaṃ śive ||

śivaḥ śaktyā yukto yadi bhavati śaktaḥ prabhavituṃ

na cedevaṃ devo na khalu kuśalaḥ spanditumapi |

atastvāmārādhyāṃ hariharaviriñcādibhirapi

praṇantuṃ stotuṃ vā kathamakṛtapuṇyaḥ prabhavati || 1 ||

tanīyāṃsaṃ pāṃsuṃ tava caraṇapaṅkeruhabhavaṃ

viriñcissañcinvan viracayati lokānavikalam |

vahatyenaṃ śauriḥ kathamapi sahasreṇa śirasāṃ

harassaṅkṣudyainaṃ bhajati bhasitoddhūlanavidhim || 2 ||

avidyānāmanta-stimira-mihiradvīpanagarī

jaḍānāṃ caitanya-stabaka-makaranda-srutijharī |

daridrāṇāṃ cintāmaṇiguṇanikā janmajaladhau

nimagnānāṃ daṃṣṭrā muraripu-varāhasya bhavati || 3 ||

tvadanyaḥ pāṇibhyāmabhayavarado daivatagaṇaḥ

tvamekā naivāsi prakaṭitavarābhītyabhinayā |

bhayāt trātuṃ dātuṃ phalamapi ca vāñchāsamadhikaṃ

śaraṇye lokānāṃ tava hi caraṇāveva nipuṇau || 4 ||

haristvāmārādhya praṇatajanasaubhāgyajananīṃ

purā nārī bhūtvā puraripumapi kṣobhamanayat |

smaro'pi tvāṃ natvā ratinayanalehyena vapuṣā

munīnāmapyantaḥ prabhavati hi mohāya mahatām || 5 ||

dhanuḥ pauṣpaṃ maurvī madhukaramayī pañca viśikhāḥ

vasantaḥ sāmanto malayamarudāyodhanarathaḥ |

tathāpyekaḥ sarvaṃ himagirisute kāmapi kṛpām

apāṅgātte labdhvā jagadida-manaṅgo vijayate || 6 ||

kvaṇatkāñcīdāmā karikalabhakumbhastananatā

parikṣīṇā madhye pariṇataśaraccandravadanā |

dhanurbāṇān pāśaṃ sṛṇimapi dadhānā karatalaiḥ

purastādāstāṃ naḥ puramathiturāhopuruṣikā || 7 ||

sudhāsindhormadhye suraviṭapivāṭīparivṛte

maṇidvīpe nīpopavanavati cintāmaṇigṛhe |

śivākāre mañce paramaśivaparyaṅkanilayāṃ

bhajanti tvāṃ dhanyāḥ katicana cidānandalaharīm || 8 ||

mahīṃ mūlādhāre kamapi maṇipūre hutavahaṃ

sthitaṃ svādhiṣṭhāne hṛdi marutamākāśamupari |

mano'pi bhrūmadhye sakalamapi bhitvā kulapathaṃ

sahasrāre padme saha rahasi patyā viharase || 9 ||

sudhādhārāsāraiścaraṇayugalāntarvigalitaiḥ

prapañcaṃ siñcantī punarapi rasāmnāyamahasaḥ |

avāpya svāṃ bhūmiṃ bhujaganibhamadhyuṣṭavalayaṃ

svamātmānaṃ kṛtvā svapiṣi kulakuṇḍe kuhariṇi || 10 ||

caturbhiḥ śrīkaṇṭhaiḥ śivayuvatibhiḥ pañcabhirapi

prabhinnābhiḥ śambhornavabhirapi mūlaprakṛtibhiḥ |

catuścatvāriṃśadvasudalakalāśratrivalaya- [trayaścatvāri]

trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]

tvadīyaṃ saundaryaṃ tuhinagirikanye tulayituṃ

kavīndrāḥ kalpante kathamapi viriñciprabhṛtayaḥ |

yadālokautsukyādamaralalanā yānti manasā

tapobhirduṣprāpāmapi giriśasāyujyapadavīm || 12 ||

naraṃ varṣīyāṃsaṃ nayanavirasaṃ narmasu jaḍaṃ

tavāpāṅgāloke patitamanudhāvanti śataśaḥ |

galadveṇībandhāḥ kucakalaśavisrastasicayā

haṭhāt truṭyatkāñcyo vigalitadukūlā yuvatayaḥ || 13 ||

kṣitau ṣaṭpañcāśad dvisamadhikapañcāśadudake

hutāśe dvāṣaṣṭiścaturadhikapañcāśadanile |

divi dviṣṣaṭtriṃśanmanasi ca catuṣṣaṣṭiriti ye

mayūkhāsteṣāmapyupari tava pādāmbujayugam || 14 ||

śarajjyotsnāśuddhāṃ śaśiyutajaṭājūṭamakuṭāṃ

varatrāsatrāṇasphaṭikaghaṭikāpustakakarām |

sakṛnna tvā natvā kathamiva satāṃ sannnidadhate

madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]

kavīndrāṇāṃ cetaḥkamalavanabālātaparuciṃ

bhajante ye santaḥ katicidaruṇāmeva bhavatīm |

viriñcipreyasyāstaruṇataraśṛṅgāralaharī-

gabhīrābhirvāgbhirvidadhati satāṃ rañjanamamī || 16 ||

savitrībhirvācāṃ śaśimaṇiśilābhaṅgarucibhiḥ

vaśinyādyābhistvāṃ saha janani sañcintayati yaḥ |

sa kartā kāvyānāṃ bhavati mahatāṃ bhaṅgirucibhiḥ

vacobhirvāgdevīvadanakamalāmodamadhuraiḥ || 17 ||

tanucchāyābhiste taruṇataraṇiśrīsaraṇibhiḥ

divaṃ sarvāmurvīmaruṇimani magnāṃ smarati yaḥ |

bhavantyasya trasyadvanahariṇaśālīnanayanāḥ

sahorvaśyā vaśyāḥ kati kati na gīrvāṇagaṇikāḥ || 18 ||

mukhaṃ binduṃ kṛtvā kucayugamadhastasya tadadho

harārdhaṃ dhyāyedyo haramahiṣi te manmathakalām |

sa sadyaḥ saṅkṣobhaṃ nayati vanitā ityatilaghu

trilokīmapyāśu bhramayati ravīndustanayugām || 19 ||

kirantīmaṅgebhyaḥ kiraṇanikurambāmṛtarasaṃ

hṛdi tvāmādhatte himakaraśilāmūrtimiva yaḥ |

sa sarpāṇāṃ darpaṃ śamayati śakuntādhipa iva

jvarapluṣṭān dṛṣṭyā sukhayati sudhādhārasirayā || 20 ||

taṭillekhātanvīṃ tapanaśaśivaiśvānaramayīṃ

niṣaṇṇāṃ ṣaṇṇāmapyupari kamalānāṃ tava kalām |

mahāpadmāṭavyāṃ mṛditamalamāyena manasā

mahāntaḥ paśyanto dadhati paramāhlādalaharīm || 21 ||

bhavāni tvaṃ dāse mayi vitara dṛṣṭiṃ sakaruṇā-

miti stotuṃ vāñchan kathayati bhavāni tvamiti yaḥ |

tadaiva tvaṃ tasmai diśasi nijasāyujyapadavīṃ

mukundabrahmendrasphuṭamakuṭanīrājitapadām || 22 ||

tvayā hṛtvā vāmaṃ vapurapari-tṛptena manasā

śarīrārdhaṃ śambhoraparamapi śaṅke hṛtamabhūt |

yadetattvadrūpaṃ sakalamaruṇābhaṃ trinayanaṃ

kucābhyāmānamraṃ kuṭilaśaśicūḍālamakuṭam || 23 ||

jagatsūte dhātā hariravati rudraḥ kṣapayate

tiraskurvannetatsvamapi vapurīśastirayati |

sadāpūrvaḥ sarvaṃ tadidamanugṛhṇāti ca śiva-

stavājñāmālambya kṣaṇacalitayorbhrūlatikayoḥ || 24 ||

trayāṇāṃ devānāṃ triguṇajanitānāṃ tava śive

bhavet pūjā pūjā tava caraṇayoryā viracitā |

tathā hi tvatpādodvahanamaṇipīṭhasya nikaṭe

sthitā hyete śaśvanmukulitakarottaṃsamakuṭāḥ || 25 ||

viriñciḥ pañcatvaṃ vrajati harirāpnoti viratiṃ

vināśaṃ kīnāśo bhajati dhanado yāti nidhanam |

vitandrī māhendrī vitatirapi sammīlitadṛśā

mahāsaṃhāre'smin viharati sati tvatpatirasau || 26 ||

japo jalpaḥ śilpaṃ sakalamapi mudrāviracanā

gatiḥ prādakṣiṇyakramaṇamaśanādyāhutividhiḥ |

praṇāmassaṃveśassukhamakhilamātmārpaṇadṛśā

saparyāparyāyastava bhavatu yanme vilasitam || 27 ||

sudhāmapyāsvādya pratibhayajarāmṛtyuhariṇīṃ

vipadyante viśve vidhiśatamakhādyā diviṣadaḥ |

karālaṃ yatkṣvelaṃ kabalitavataḥ kālakalanā

na śambhostanmūlaṃ tava janani tāṭaṅkamahimā || 28 ||

kirīṭaṃ vairiñcaṃ parihara puraḥ kaiṭabhabhidaḥ

kaṭhore koṭīre skhalasi jahi jambhārimukuṭam |

praṇamreṣveteṣu prasabhamupayātasya bhavanaṃ

bhavasyābhyutthāne tava parijanoktirvijayate || 29 ||

svadehodbhūtābhirghṛṇibhiraṇimādyābhirabhito

niṣevye nitye tvāmahamiti sadā bhāvayati yaḥ |

kimāścaryaṃ tasya trinayanasamṛddhiṃ tṛṇayato

mahāsaṃvartāgnirviracayati nirājanavidhim || 30 ||

catuṣṣaṣṭyā tantraiḥ sakalamatisandhāya bhuvanaṃ

sthitastattatsiddhiprasavaparatantraiḥ paśupatiḥ |

punastvannirbandhādakhilapuruṣārthaikaghaṭanā-

svatantraṃ te tantraṃ kṣititalamavātītaradidam || 31 ||

śivaḥ śaktiḥ kāmaḥ kṣitiratha raviḥ śītakiraṇaḥ

smaro haṃsaḥ śakrastadanu ca parāmāraharayaḥ |

amī hṛllekhābhistisṛbhiravasāneṣu ghaṭitā

bhajante varṇāste tava janani nāmāvayavatām || 32 ||

smaraṃ yoniṃ lakṣmīṃ tritayamidamādau tava mano-

rnidhāyaike nitye niravadhimahābhogarasikāḥ |

bhajanti tvāṃ cintāmaṇigunanibaddhākṣavalayāḥ

śivāgnau juhvantaḥ surabhighṛtadhārāhutiśataiḥ || 33 ||

śarīraṃ tvaṃ śambhoḥ śaśimihiravakṣoruhayugaṃ

tavātmānaṃ manye bhagavati navātmānamanagham |

ataśśeṣaśśeṣītyayamubhayasādhāraṇatayā

sthitaḥ sambandho vāṃ samarasaparānandaparayoḥ || 34 ||

manastvaṃ vyoma tvaṃ marudasi marutsārathirasi

tvamāpastvaṃ bhūmistvayi pariṇatāyāṃ na hi param |

tvameva svātmānaṃ pariṇamayituṃ viśvavapuṣā

cidānandākāraṃ śivayuvati bhāvena bibhṛṣe || 35 ||

tavājñācakrasthaṃ tapanaśaśikoṭidyutidharaṃ

paraṃ śambhuṃ vande parimilitapārśvaṃ paracitā |

yamārādhyan bhaktyā raviśaśiśucīnāmaviṣaye

nirāloke'loke nivasati hi bhālokabhuvane || 36 ||

viśuddhau te śuddhasphaṭikaviśadaṃ vyomajanakaṃ

śivaṃ seve devīmapi śivasamānavyavasitām |

yayoḥ kāntyā yāntyāḥ śaśikiraṇasārūpyasaraṇe-

vidhūtāntardhvāntā vilasati cakorīva jagatī || 37 ||

samunmīlat saṃvit kamalamakarandaikarasikaṃ

bhaje haṃsadvandvaṃ kimapi mahatāṃ mānasacaram |

yadālāpādaṣṭādaśaguṇitavidyāpariṇati-

ryadādatte doṣād guṇamakhilamadbhyaḥ paya iva || 38 ||

tava svādhiṣṭhāne hutavahamadhiṣṭhāya nirataṃ

tamīḍe saṃvartaṃ janani mahatīṃ tāṃ ca samayām |

yadāloke lokān dahati mahati krodhakalite

dayārdrā yā dṛṣṭiḥ śiśiramupacāraṃ racayati || 39 ||

taṭittvantaṃ śaktyā timiraparipanthisphuraṇayā

sphurannānāratnābharaṇapariṇaddhendradhanuṣam |

tava śyāmaṃ meghaṃ kamapi maṇipūraikaśaraṇaṃ

niṣeve varṣantaṃ haramihirataptaṃ tribhuvanam || 40 ||

tavādhāre mūle saha samayayā lāsyaparayā

navātmānaṃ manye navarasamahātāṇḍavanaṭam |

ubhābhyāmetābhyāmudayavidhimuddiśya dayayā

sanāthābhyāṃ jajñe janakajananīmajjagadidam || 41 ||

dvitīya bhāgaḥ - saundarya laharī

gatairmāṇikyatvaṃ gaganamaṇibhiḥ sāndraghaṭitaṃ

kirīṭaṃ te haimaṃ himagirisute kīrtayati yaḥ |

sa nīḍeyacchāyācchuraṇaśabalaṃ candraśakalaṃ

dhanuḥ śaunāsīraṃ kimiti na nibadhnāti dhiṣaṇām || 42 ||

dhunotu dhvāntaṃ nastulitadalitendīvaravanaṃ

ghanasnigdhaślakṣṇaṃ cikuranikurumbaṃ tava śive |

yadīyaṃ saurabhyaṃ sahajamupalabdhuṃ sumanaso

vasantyasmin manye valamathanavāṭīviṭapinām || 43 ||

tanotu kṣemaṃ nastava vadanasaundaryalaharī-

parīvāhasrotaḥsaraṇiriva sīmantasaraṇiḥ |

vahantī sindūraṃ prabalakabarībhāratimira-

dviṣāṃ bṛndairbandīkṛtamiva navīnārkakiraṇam || 44 ||

arālaiḥ svābhāvyādalikalabhasaśrībhiralakaiḥ

parītaṃ te vaktraṃ parihasati paṅkeruharucim |

darasmere yasmin daśanarucikiñjalkarucire

sugandhau mādyanti smaradahanacakṣurmadhulihaḥ || 45 ||

lalāṭaṃ lāvaṇyadyutivimalamābhāti tava ya-

ddvitīyaṃ tanmanye makuṭaghaṭitaṃ candraśakalam |

viparyāsanyāsādubhayamapi sambhūya ca mithaḥ

sudhālepasyūtiḥ pariṇamati rākāhimakaraḥ || 46 ||

bhruvau bhugne kiñcidbhuvanabhayabhaṅgavyasanini

tvadīye netrābhyāṃ madhukararucibhyāṃ dhṛtaguṇam |

dhanurmanye savyetarakaragṛhītaṃ ratipateḥ

prakoṣṭhe muṣṭau ca sthagayati nigūḍhāntaramume || 47 ||

ahaḥ sūte savyaṃ tava nayanamarkātmakatayā

triyāmāṃ vāmaṃ te sṛjati rajanīnāyakatayā |

tṛtīyā te dṛṣṭirdaradalitahemāmbujaruciḥ

samādhatte sandhyāṃ divasaniśayorantaracarīm || 48 ||

viśālā kalyāṇī sphuṭarucirayodhyā kuvalayaiḥ

kṛpādhārādhārā kimapi madhurābhogavatikā |

avantī dṛṣṭiste bahunagaravistāravijayā

dhruvaṃ tattannāmavyavaharaṇayogyā vijayate || 49 ||

kavīnāṃ sandarbhastabakamakarandaikarasikaṃ

kaṭākṣavyākṣepabhramarakalabhau karṇayugalam |

amuñcantau dṛṣṭvā tava navarasāsvādataralā-

vasūyāsaṃsargādalikanayanaṃ kiñcidaruṇam || 50 ||

śive śṛṅgārārdrā taditarajane kutsanaparā

saroṣā gaṅgāyāṃ giriśacarite vismayavatī |

harāhibhyo bhītā sarasiruhasaubhāgyajananī (jayinī)

sakhīṣu smerā te mayi jananī dṛṣṭiḥ sakaruṇā || 51 ||

gate karṇābhyarṇaṃ garuta iva pakṣmāṇi dadhatī

purāṃ bhettuścittapraśamarasavidrāvaṇaphale |

ime netre gotrādharapatikulottaṃsakalike

tavākarṇākṛṣṭasmaraśaravilāsaṃ kalayataḥ || 52 ||

vibhaktatraivarṇyaṃ vyatikaritalīlāñjanatayā

vibhāti tvannetratritayamidamīśānadayite |

punaḥ sraṣṭuṃ devān druhiṇaharirudrānuparatān

rajaḥ sattvaṃ bibhrattama iti guṇānāṃ trayamiva || 53 ||

pavitrīkartuṃ naḥ paśupatiparādhīnahṛdaye

dayāmitrairnetrairaruṇadhavalaśyāmarucibhiḥ |

nadaḥ śoṇo gaṅgā tapanatanayeti dhruvamamuṃ

trayāṇāṃ tīrthānāmupanayasi sambhedamanagham || 54 ||

nimeṣonmeṣābhyāṃ pralayamudayaṃ yāti jagatī

tavetyāhuḥ santo dharaṇidhararājanyatanaye |

tvadunmeṣājjātaṃ jagadidamaśeṣaṃ pralayataḥ

paritrātuṃ śaṅke parihṛtanimeṣāstava dṛśaḥ || 55 ||

tavāparṇe karṇejapanayanapaiśunyacakitā

nilīyante toye niyatamanimeṣāḥ śapharikāḥ |

iyaṃ ca śrīrbaddhacchadapuṭakavāṭaṃ kuvalayam

jahāti pratyūṣe niśi ca vighaṭayya praviśati || 56 ||

dṛśā drāghīyasyā daradalitanīlotpalarucā

davīyāṃsaṃ dīnaṃ snapaya kṛpayā māmapi śive |

anenāyaṃ dhanyo bhavati na ca te hāniriyatā

vane vā harmye vā samakaranipāto himakaraḥ || 57 ||

arālaṃ te pālīyugalamagarājanyatanaye

na keṣāmādhatte kusumaśarakodaṇḍakutukam |

tiraścīno yatra śravaṇapathamullaṅghya vilasa-

nnapāṅgavyāsaṅgo diśati śarasandhānadhiṣaṇām || 58 ||

sphuradgaṇḍābhogapratiphalitatāṭaṅkayugalaṃ

catuścakraṃ manye tava mukhamidaṃ manmatharatham |

yamāruhya druhyatyavanirathamarkenducaraṇaṃ

mahāvīro māraḥ pramathapataye sajjitavate || 59 ||

sarasvatyāḥ sūktīramṛtalaharīkauśalaharīḥ

pibantyāḥ śarvāṇi śravaṇaculukābhyāmaviralam |

camatkāraślāghācalitaśirasaḥ kuṇḍalagaṇo

jhaṇatkāraistāraiḥ prativacanamācaṣṭa iva te || 60 ||

asau nāsāvaṃśastuhinagirivaṃśadhvajapaṭi

tvadīyo nedīyaḥ phalatu phalamasmākamucitam |

vahannantarmuktāḥ śiśirataraniśvāsagalitaṃ

samṛddhyā yattāsāṃ bahirapi ca muktāmaṇidharaḥ || 61 ||

prakṛtyā raktāyāstava sudati dantacchadaruceḥ

pravakṣye sādṛśyaṃ janayatu phalaṃ vidrumalatā |

na bimbaṃ tadbimbapratiphalanarāgādaruṇitaṃ

tulāmadhyāroḍhuṃ kathamiva vilajjeta kalayā || 62 ||

smitajyotsnājālaṃ tava vadanacandrasya pibatāṃ

cakorāṇāmāsīdatirasatayā cañcujaḍimā |

ataste śītāṃśoramṛtalaharīmamlarucayaḥ

pibanti svacchandaṃ niśi niśi bhṛśaṃ kāñjikadhiyā || 63 ||

aviśrāntaṃ patyurguṇagaṇakathāmreḍanajapā

japāpuṣpacchāyā tava janani jihvā jayati sā |

yadagrāsīnāyāḥ sphaṭikadṛṣadacchacchavimayī

sarasvatyā mūrtiḥ pariṇamati māṇikyavapuṣā || 64 ||

raṇe jitvā daityānapahṛtaśirastraiḥ kavacibhir-

nivṛttaiścaṇḍāṃśatripuraharanirmālyavimukhaiḥ |

viśākhendropendraiḥ śaśiviśadakarpūraśakalā

vilīyante mātastava vadanatāmbūlakabalāḥ || 65 ||

vipañcyā gāyantī vividhamapadānaṃ paśupateḥ

tvayārabdhe vaktuṃ calitaśirasā sādhuvacane |

tadīyairmādhuryairapalapitatantrīkalaravāṃ

nijāṃ vīṇāṃ vāṇī niculayati colena nibhṛtam || 66 ||

karāgreṇa spṛṣṭaṃ tuhinagiriṇā vatsalatayā

girīśenodastaṃ muhuradharapānākulatayā |

karagrāhyaṃ śambhormukhamukuravṛntaṃ girisute

kathaṅkāraṃ brūmastava cibukamaupamyarahitam || 67 ||

bhujāśleṣān nityaṃ puradamayituḥ kaṇṭakavatī

tava grīvā dhatte mukhakamalanālaśriyamiyam |

svataḥ śvetā kālāgurubahulajambālamalinā

mṛṇālīlālityaṃ vahati yadadho hāralatikā || 68 ||

gale rekhāstisro gatigamakagītaikanipuṇe

vivāhavyānaddhapraguṇaguṇasaṅkhyāpratibhuvaḥ |

virājante nānāvidhamadhurarāgākarabhuvāṃ

trayāṇāṃ grāmāṇāṃ sthitiniyamasīmāna iva te || 69 ||

mṛṇālīmṛdvīnāṃ tava bhujalatānāṃ catasṛṇāṃ

caturbhiḥ saundaryaṃ sarasijabhavaḥ stauti vadanaiḥ |

nakhebhyaḥ santrasyan prathamamathanādandhakaripo-

ścaturṇāṃ śīrṣāṇāṃ samamabhayahastārpaṇadhiyā || 70 ||

nakhānāmuddyotairnavanalinarāgaṃ vihasatāṃ

karāṇāṃ te kāntiṃ kathaya kathayāmaḥ kathamume |

kayācidvā sāmyaṃ bhajatu kalayā hanta kamalaṃ

yadi krīḍallakṣmīcaraṇatalalākṣārasachaṇam || 71 ||

samaṃ devi skandadvipavadanapītaṃ stanayugaṃ

tavedaṃ naḥ khedaṃ haratu satataṃ prasnutamukham |

yadālokyāśaṅkākulitahṛdayo hāsajanakaḥ

svakumbhau herambaḥ parimṛśati hastena jhaḍiti || 72 ||

amū te vakṣojāvamṛtarasamāṇikyakutupau

na sandehaspando nagapatipatāke manasi naḥ |

pibantau tau yasmādaviditavadhūsaṅgarasikau

kumārāvadyāpi dviradavadanakrauñcadalanau || 73 ||

vahatyamba stamberamadanujakumbhaprakṛtibhiḥ

samārabdhāṃ muktāmaṇibhiramalāṃ hāralatikām |

kucābhogo bimbādhararucibhirantaḥ śabalitāṃ

pratāpavyāmiśrāṃ puradamayituḥ kīrtimiva te || 74 ||

tava stanyaṃ manye dharaṇidharakanye hṛdayataḥ

payaḥpārāvāraḥ parivahati sārasvatamiva |

dayāvatyā dattaṃ draviḍaśiśurāsvādya tava yat

kavīnāṃ prauḍhānāmajani kamanīyaḥ kavayitā || 75 ||

harakrodhajvālāvalibhiravalīḍhena vapuṣā

gabhīre te nābhīsarasi kṛtasaṅgo manasijaḥ |

samuttasthau tasmādacalatanaye dhūmalatikā

janastāṃ jānīte tava janani romāvaliriti || 76 ||

yadetat kālindītanutarataraṅgākṛti śive

kṛśe madhye kiñcijjanani tava yadbhāti sudhiyām |

vimardādanyo'nyaṃ kucakalaśayorantaragataṃ

tanūbhūtaṃ vyoma praviśadiva nābhiṃ kuhariṇīm || 77 ||

sthiro gaṅgāvartaḥ stanamukularomāvalilatā-

kalāvālaṃ kuṇḍaṃ kusumaśaratejohutabhujaḥ |

raterlīlāgāraṃ kimapi tava nābhirgirisute

biladvāraṃ siddhergiriśanayanānāṃ vijayate || 78 ||

nisargakṣīṇasya stanataṭabhareṇa klamajuṣo

namanmūrternārītilaka śanakaistruṭyata iva |

ciraṃ te madhyasya truṭitataṭinītīrataruṇā

samāvasthāsthemno bhavatu kuśalaṃ śailatanaye || 79 ||

kucau sadyaḥsvidyattaṭaghaṭitakūrpāsabhidurau

kaṣantau dormūle kanakakalaśābhau kalayatā |

tava trātuṃ bhaṅgādalamiti valagnaṃ tanubhuvā

tridhā naddhaṃ devi trivali lavalīvallibhiriva || 80 ||

gurutvaṃ vistāraṃ kṣitidharapatiḥ pārvati nijā-

nnitambādācchidya tvayi haraṇarūpeṇa nidadhe |

ataste vistīrṇo gururayamaśeṣāṃ vasumatīṃ

nitambaprāgbhāraḥ sthagayati laghutvaṃ nayati ca || 81 ||

karīndrāṇāṃ śuṇḍān kanakakadalīkāṇḍapaṭalī-

mubhābhyāmūrubhyāmubhayamapi nirjitya bhavatī |

suvṛttābhyāṃ patyuḥ praṇatikaṭhinābhyāṃ girisute

vidhijñe jānubhyāṃ vibudhakarikumbhadvayamasi || 82 ||

parājetuṃ rudraṃ dviguṇaśaragarbhau girisute

niṣaṅgau jaṅghe te viṣamaviśikho bāḍhamakṛta |

yadagre dṛśyante daśaśaraphalāḥ pādayugalī-

nakhāgracchadmānaḥ suramakuṭaśāṇaikaniśitāḥ || 83 ||

śrutīnāṃ mūrdhāno dadhati tava yau śekharatayā

mamāpyetau mātaḥ śirasi dayayā dhehi caraṇau |

yayoḥ pādyaṃ pāthaḥ paśupatijaṭājūṭataṭinī

yayorlākṣālakṣmīraruṇaharicūḍāmaṇiruciḥ || 84 ||

namovākaṃ brūmo nayanaramaṇīyāya padayo-

stavāsmai dvandvāya sphuṭarucirasālaktakavate |

asūyatyatyantaṃ yadabhihananāya spṛhayate

paśūnāmīśānaḥ pramadavanakaṅkelitarave || 85 ||

mṛṣā kṛtvā gotraskhalanamatha vailakṣyanamitaṃ

lalāṭe bhartāraṃ caraṇakamale tāḍayati te |

cirādantaḥśalyaṃ dahanakṛtamunmūlitavatā

tulākoṭikvāṇaiḥ kilikilitamīśānaripuṇā || 86 ||

himānīhantavyaṃ himagirinivāsaikacaturau

niśāyāṃ nidrāṇaṃ niśi caramabhāge ca viśadau |

varaṃ lakṣmīpātraṃ śriyamatisṛjantau samayināṃ

sarojaṃ tvatpādau janani jayataścitramiha kim || 87 ||

padaṃ te kīrtīnāṃ prapadamapadaṃ devi vipadāṃ

kathaṃ nītaṃ sadbhiḥ kaṭhinakamaṭhīkarparatulām |

kathaṃ vā bāhubhyāmupayamanakāle purabhidā

yadādāya nyastaṃ dṛṣadi dayamānena manasā || 88 ||

nakhairnākastrīṇāṃ karakamalasaṅkocaśaśibhi-

starūṇāṃ divyānāṃ hasata iva te caṇḍi caraṇau |

phalāni svaḥsthebhyaḥ kisalayakarāgreṇa dadatāṃ

daridrebhyo bhadrāṃ śriyamaniśamahnāya dadatau || 89 ||

dadāne dīnebhyaḥ śriyamaniśamāśānusadṛśī-

mamandaṃ saundaryaprakaramakarandaṃ vikirati |

tavāsmin mandārastabakasubhage yātu caraṇe

nimajjanmajjīvaḥ karaṇacaraṇaḥ ṣaṭcaraṇatām || 90 ||

padanyāsakrīḍāparicayamivārabdhumanasaḥ

skhalantaste khelaṃ bhavanakalahaṃsā na jahati |

atasteṣāṃ śikṣāṃ subhagamaṇimañjīraraṇita-

cchalādācakṣāṇaṃ caraṇakamalaṃ cārucarite || 91 ||

gatāste mañcatvaṃ druhiṇaharirudreśvarabhṛtaḥ

śivaḥ svacchacchāyāghaṭitakapaṭapracchadapaṭaḥ |

tvadīyānāṃ bhāsāṃ pratiphalanarāgāruṇatayā

śarīrī śṛṅgāro rasa iva dṛśāṃ dogdhi kutukam || 92 ||

arālā keśeṣu prakṛtisaralā mandahasite

śirīṣābhā citte dṛṣadupalaśobhā kucataṭe |

bhṛśaṃ tanvī madhye pṛthururasijārohaviṣaye

jagattrātuṃ śambhorjayati karuṇā kācidaruṇā || 93 ||

kalaṅkaḥ kastūrī rajanikarabimbaṃ jalamayaṃ

kalābhiḥ karpūrairmarakatakaraṇḍaṃ nibiḍitam |

atastvadbhogena pratidinamidaṃ riktakuharaṃ

vidhirbhūyo bhūyo nibiḍayati nūnaṃ tava kṛte || 94 ||

purārāterantaḥpuramasi tatastvaccaraṇayoḥ

saparyāmaryādā taralakaraṇānāmasulabhā |

tathā hyete nītāḥ śatamakhamukhāḥ siddhimatulāṃ

tava dvāropāntasthitibhiraṇimādyābhiramarāḥ || 95 ||

kalatraṃ vaidhātraṃ katikati bhajante na kavayaḥ

śriyo devyāḥ ko vā na bhavati patiḥ kairapi dhanaiḥ |

mahādevaṃ hitvā tava sati satīnāmacarame

kucābhyāmāsaṅgaḥ kuravakatarorapyasulabhaḥ || 96 ||

girāmāhurdevīṃ druhiṇagṛhiṇīmāgamavido

hareḥ patnīṃ padmāṃ harasahacarīmadritanayām |

turīyā kāpi tvaṃ duradhigamaniḥsīmamahimā

mahāmāyā viśvaṃ bhramayasi parabrahmamahiṣi || 97 ||

kadā kāle mātaḥ kathaya kalitālaktakarasaṃ

pibeyaṃ vidyārthī tava caraṇanirṇejanajalam |

prakṛtyā mūkānāmapi ca kavitākāraṇatayā

kadā dhatte vāṇīmukhakamalatāmbūlarasatām || 98 ||

sarasvatyā lakṣmyā vidhiharisapatno viharate

rateḥ pātivratyaṃ śithilayati ramyeṇa vapuṣā |

ciraṃ jīvanneva kṣapitapaśupāśavyatikaraḥ

parānandābhikhyaṃ rasayati rasaṃ tvadbhajanavān || 99 ||

pradīpajvālābhirdivasakaranīrājanavidhiḥ

sudhāsūteścandropalajalalavairarghyaracanā |

svakīyairambhobhiḥ salilanidhisauhityakaraṇaṃ

tvadīyābhirvāgbhistava janani vācāṃ stutiriyam || 100 ||

saundaryalahari mukhyastotraṃ saṃvārtadāyakam |

bhagavadpāda sankluptaṃ paṭhen muktau bhavennaraḥ ||

|| iti śrīmatparamahaṃsaparivrājakācāryasya

śrīgovindabhagavatpūjyapādaśiṣyasya

śrīmacchaṅkarabhagavataḥ kṛtau saundaryalaharī sampūrṇā ||

|| oṃ tatsat ||

(anubandhaḥ)

samānītaḥ padbhyāṃ maṇimukuratāmambaramaṇi-

rbhayādāsyādantaḥstimitakiraṇaśreṇimasṛṇaḥ |

(pāṭhabhedaḥ - bhayādāsya snigdhastmita, bhayādāsyasyāntaḥstmita)

dadhāti tvadvaktrampratiphalanamaśrāntavikacaṃ

nirātaṅkaṃ candrānnijahṛdayapaṅkeruhamiva || 101 ||

samudbhūtasthūlastanabharamuraścāru hasitaṃ

kaṭākṣe kandarpaḥ katicana kadambadyuti vapuḥ |

harasya tvadbhrāntiṃ manasi janayanti sma vimalāḥ

pāṭhabhedaḥ - janayāmāsa madano, janayantaḥ samatulāṃ, janayantā suvadane

bhavatyā ye bhaktāḥ pariṇatiramīṣāmiyamume || 102 ||

nidhe nityasmere niravadhiguṇe nītinipuṇe

nirāghātajñāne niyamaparacittaikanilaye |

niyatyā nirmukte nikhilanigamāntastutipade

nirātaṅke nitye nigamaya mamāpi stutimimām || 103 ||

Sanskrit — Devanagari (original)

प्रथम भागः - आनन्द लहरि

भुमौस्खलित पादानां भूमिरेवा वलम्बनम् ।

त्वयी जाता पराधानां त्वमेव शरणं शिवे ॥

शिवः शक्त्या युक्तो यदि भवति शक्तः प्रभवितुं

न चेदेवं देवो न खलु कुशलः स्पन्दितुमपि ।

अतस्त्वामाराध्यां हरिहरविरिञ्चादिभिरपि

प्रणन्तुं स्तोतुं वा कथमकृतपुण्यः प्रभवति ॥ 1 ॥

तनीयांसं पांसुं तव चरणपङ्केरुहभवं

विरिञ्चिस्सञ्चिन्वन् विरचयति लोकानविकलम् ।

वहत्येनं शौरिः कथमपि सहस्रेण शिरसां

हरस्सङ्क्षुद्यैनं भजति भसितोद्धूलनविधिम् ॥ 2 ॥

अविद्यानामन्त-स्तिमिर-मिहिरद्वीपनगरी

जडानां चैतन्य-स्तबक-मकरन्द-स्रुतिझरी ।

दरिद्राणां चिन्तामणिगुणनिका जन्मजलधौ

निमग्नानां दंष्ट्रा मुररिपु-वराहस्य भवति ॥ 3 ॥

त्वदन्यः पाणिभ्यामभयवरदो दैवतगणः

त्वमेका नैवासि प्रकटितवराभीत्यभिनया ।

भयात् त्रातुं दातुं फलमपि च वाञ्छासमधिकं

शरण्ये लोकानां तव हि चरणावेव निपुणौ ॥ 4 ॥

हरिस्त्वामाराध्य प्रणतजनसौभाग्यजननीं

पुरा नारी भूत्वा पुररिपुमपि क्षोभमनयत् ।

स्मरोऽपि त्वां नत्वा रतिनयनलेह्येन वपुषा

मुनीनामप्यन्तः प्रभवति हि मोहाय महताम् ॥ 5 ॥

धनुः पौष्पं मौर्वी मधुकरमयी पञ्च विशिखाः

वसन्तः सामन्तो मलयमरुदायोधनरथः ।

तथाप्येकः सर्वं हिमगिरिसुते कामपि कृपाम्

अपाङ्गात्ते लब्ध्वा जगदिद-मनङ्गो विजयते ॥ 6 ॥

क्वणत्काञ्चीदामा करिकलभकुम्भस्तननता

परिक्षीणा मध्ये परिणतशरच्चन्द्रवदना ।

धनुर्बाणान् पाशं सृणिमपि दधाना करतलैः

पुरस्तादास्तां नः पुरमथितुराहोपुरुषिका ॥ 7 ॥

सुधासिन्धोर्मध्ये सुरविटपिवाटीपरिवृते

मणिद्वीपे नीपोपवनवति चिन्तामणिगृहे ।

शिवाकारे मञ्चे परमशिवपर्यङ्कनिलयां

भजन्ति त्वां धन्याः कतिचन चिदानन्दलहरीम् ॥ 8 ॥

महीं मूलाधारे कमपि मणिपूरे हुतवहं

स्थितं स्वाधिष्ठाने हृदि मरुतमाकाशमुपरि ।

मनोऽपि भ्रूमध्ये सकलमपि भित्वा कुलपथं

सहस्रारे पद्मे सह रहसि पत्या विहरसे ॥ 9 ॥

सुधाधारासारैश्चरणयुगलान्तर्विगलितैः

प्रपञ्चं सिञ्चन्ती पुनरपि रसाम्नायमहसः ।

अवाप्य स्वां भूमिं भुजगनिभमध्युष्टवलयं

स्वमात्मानं कृत्वा स्वपिषि कुलकुण्डे कुहरिणि ॥ 10 ॥

चतुर्भिः श्रीकण्ठैः शिवयुवतिभिः पञ्चभिरपि

प्रभिन्नाभिः शम्भोर्नवभिरपि मूलप्रकृतिभिः ।

चतुश्चत्वारिंशद्वसुदलकलाश्रत्रिवलय- [त्रयश्चत्वारि]

त्रिरेखाभिः सार्धं तव शरणकोणाः परिणताः ॥ 11 ॥ [चरणकोणाः, भवनकिणाः]

त्वदीयं सौन्दर्यं तुहिनगिरिकन्ये तुलयितुं

कवीन्द्राः कल्पन्ते कथमपि विरिञ्चिप्रभृतयः ।

यदालोकौत्सुक्यादमरललना यान्ति मनसा

तपोभिर्दुष्प्रापामपि गिरिशसायुज्यपदवीम् ॥ 12 ॥

नरं वर्षीयांसं नयनविरसं नर्मसु जडं

तवापाङ्गालोके पतितमनुधावन्ति शतशः ।

गलद्वेणीबन्धाः कुचकलशविस्रस्तसिचया

हठात् त्रुट्यत्काञ्च्यो विगलितदुकूला युवतयः ॥ 13 ॥

क्षितौ षट्पञ्चाशद् द्विसमधिकपञ्चाशदुदके

हुताशे द्वाषष्टिश्चतुरधिकपञ्चाशदनिले ।

दिवि द्विष्षट्त्रिंशन्मनसि च चतुष्षष्टिरिति ये

मयूखास्तेषामप्युपरि तव पादाम्बुजयुगम् ॥ 14 ॥

शरज्ज्योत्स्नाशुद्धां शशियुतजटाजूटमकुटां

वरत्रासत्राणस्फटिकघटिकापुस्तककराम् ।

सकृन्न त्वा नत्वा कथमिव सतां सन्न्निदधते

मधुक्षीरद्राक्षामधुरिमधुरीणाः भणितयः ॥ 15॥ [फणितयः]

कवीन्द्राणां चेतःकमलवनबालातपरुचिं

भजन्ते ये सन्तः कतिचिदरुणामेव भवतीम् ।

विरिञ्चिप्रेयस्यास्तरुणतरशृङ्गारलहरी-

गभीराभिर्वाग्भिर्विदधति सतां रञ्जनममी ॥ 16 ॥

सवित्रीभिर्वाचां शशिमणिशिलाभङ्गरुचिभिः

वशिन्याद्याभिस्त्वां सह जननि सञ्चिन्तयति यः ।

स कर्ता काव्यानां भवति महतां भङ्गिरुचिभिः

वचोभिर्वाग्देवीवदनकमलामोदमधुरैः ॥ 17 ॥

तनुच्छायाभिस्ते तरुणतरणिश्रीसरणिभिः

दिवं सर्वामुर्वीमरुणिमनि मग्नां स्मरति यः ।

भवन्त्यस्य त्रस्यद्वनहरिणशालीननयनाः

सहोर्वश्या वश्याः कति कति न गीर्वाणगणिकाः ॥ 18 ॥

मुखं बिन्दुं कृत्वा कुचयुगमधस्तस्य तदधो

हरार्धं ध्यायेद्यो हरमहिषि ते मन्मथकलाम् ।

स सद्यः सङ्क्षोभं नयति वनिता इत्यतिलघु

त्रिलोकीमप्याशु भ्रमयति रवीन्दुस्तनयुगाम् ॥ 19 ॥

किरन्तीमङ्गेभ्यः किरणनिकुरम्बामृतरसं

हृदि त्वामाधत्ते हिमकरशिलामूर्तिमिव यः ।

स सर्पाणां दर्पं शमयति शकुन्ताधिप इव

ज्वरप्लुष्टान् दृष्ट्या सुखयति सुधाधारसिरया ॥ 20 ॥

तटिल्लेखातन्वीं तपनशशिवैश्वानरमयीं

निषण्णां षण्णामप्युपरि कमलानां तव कलाम् ।

महापद्माटव्यां मृदितमलमायेन मनसा

महान्तः पश्यन्तो दधति परमाह्लादलहरीम् ॥ 21 ॥

भवानि त्वं दासे मयि वितर दृष्टिं सकरुणा-

मिति स्तोतुं वाञ्छन् कथयति भवानि त्वमिति यः ।

तदैव त्वं तस्मै दिशसि निजसायुज्यपदवीं

मुकुन्दब्रह्मेन्द्रस्फुटमकुटनीराजितपदाम् ॥ 22 ॥

त्वया हृत्वा वामं वपुरपरि-तृप्तेन मनसा

शरीरार्धं शम्भोरपरमपि शङ्के हृतमभूत् ।

यदेतत्त्वद्रूपं सकलमरुणाभं त्रिनयनं

कुचाभ्यामानम्रं कुटिलशशिचूडालमकुटम् ॥ 23 ॥

जगत्सूते धाता हरिरवति रुद्रः क्षपयते

तिरस्कुर्वन्नेतत्स्वमपि वपुरीशस्तिरयति ।

सदापूर्वः सर्वं तदिदमनुगृह्णाति च शिव-

स्तवाज्ञामालम्ब्य क्षणचलितयोर्भ्रूलतिकयोः ॥ 24 ॥

त्रयाणां देवानां त्रिगुणजनितानां तव शिवे

भवेत् पूजा पूजा तव चरणयोर्या विरचिता ।

तथा हि त्वत्पादोद्वहनमणिपीठस्य निकटे

स्थिता ह्येते शश्वन्मुकुलितकरोत्तंसमकुटाः ॥ 25 ॥

विरिञ्चिः पञ्चत्वं व्रजति हरिराप्नोति विरतिं

विनाशं कीनाशो भजति धनदो याति निधनम् ।

वितन्द्री माहेन्द्री विततिरपि सम्मीलितदृशा

महासंहारेऽस्मिन् विहरति सति त्वत्पतिरसौ ॥ 26 ॥

जपो जल्पः शिल्पं सकलमपि मुद्राविरचना

गतिः प्रादक्षिण्यक्रमणमशनाद्याहुतिविधिः ।

प्रणामस्संवेशस्सुखमखिलमात्मार्पणदृशा

सपर्यापर्यायस्तव भवतु यन्मे विलसितम् ॥ 27 ॥

सुधामप्यास्वाद्य प्रतिभयजरामृत्युहरिणीं

विपद्यन्ते विश्वे विधिशतमखाद्या दिविषदः ।

करालं यत्क्ष्वेलं कबलितवतः कालकलना

न शम्भोस्तन्मूलं तव जननि ताटङ्कमहिमा ॥ 28 ॥

किरीटं वैरिञ्चं परिहर पुरः कैटभभिदः

कठोरे कोटीरे स्खलसि जहि जम्भारिमुकुटम् ।

प्रणम्रेष्वेतेषु प्रसभमुपयातस्य भवनं

भवस्याभ्युत्थाने तव परिजनोक्तिर्विजयते ॥ 29 ॥

स्वदेहोद्भूताभिर्घृणिभिरणिमाद्याभिरभितो

निषेव्ये नित्ये त्वामहमिति सदा भावयति यः ।

किमाश्चर्यं तस्य त्रिनयनसमृद्धिं तृणयतो

महासंवर्ताग्निर्विरचयति निराजनविधिम् ॥ 30 ॥

चतुष्षष्ट्या तन्त्रैः सकलमतिसन्धाय भुवनं

स्थितस्तत्तत्सिद्धिप्रसवपरतन्त्रैः पशुपतिः ।

पुनस्त्वन्निर्बन्धादखिलपुरुषार्थैकघटना-

स्वतन्त्रं ते तन्त्रं क्षितितलमवातीतरदिदम् ॥ 31 ॥

शिवः शक्तिः कामः क्षितिरथ रविः शीतकिरणः

स्मरो हंसः शक्रस्तदनु च परामारहरयः ।

अमी हृल्लेखाभिस्तिसृभिरवसानेषु घटिता

भजन्ते वर्णास्ते तव जननि नामावयवताम् ॥ 32 ॥

स्मरं योनिं लक्ष्मीं त्रितयमिदमादौ तव मनो-

र्निधायैके नित्ये निरवधिमहाभोगरसिकाः ।

भजन्ति त्वां चिन्तामणिगुननिबद्धाक्षवलयाः

शिवाग्नौ जुह्वन्तः सुरभिघृतधाराहुतिशतैः ॥ 33 ॥

शरीरं त्वं शम्भोः शशिमिहिरवक्षोरुहयुगं

तवात्मानं मन्ये भगवति नवात्मानमनघम् ।

अतश्शेषश्शेषीत्ययमुभयसाधारणतया

स्थितः सम्बन्धो वां समरसपरानन्दपरयोः ॥ 34 ॥

मनस्त्वं व्योम त्वं मरुदसि मरुत्सारथिरसि

त्वमापस्त्वं भूमिस्त्वयि परिणतायां न हि परम् ।

त्वमेव स्वात्मानं परिणमयितुं विश्ववपुषा

चिदानन्दाकारं शिवयुवति भावेन बिभृषे ॥ 35 ॥

तवाज्ञाचक्रस्थं तपनशशिकोटिद्युतिधरं

परं शम्भुं वन्दे परिमिलितपार्श्वं परचिता ।

यमाराध्यन् भक्त्या रविशशिशुचीनामविषये

निरालोकेऽलोके निवसति हि भालोकभुवने ॥ 36 ॥

विशुद्धौ ते शुद्धस्फटिकविशदं व्योमजनकं

शिवं सेवे देवीमपि शिवसमानव्यवसिताम् ।

ययोः कान्त्या यान्त्याः शशिकिरणसारूप्यसरणे-

विधूतान्तर्ध्वान्ता विलसति चकोरीव जगती ॥ 37 ॥

समुन्मीलत् संवित् कमलमकरन्दैकरसिकं

भजे हंसद्वन्द्वं किमपि महतां मानसचरम् ।

यदालापादष्टादशगुणितविद्यापरिणति-

र्यदादत्ते दोषाद् गुणमखिलमद्भ्यः पय इव ॥ 38 ॥

तव स्वाधिष्ठाने हुतवहमधिष्ठाय निरतं

तमीडे संवर्तं जननि महतीं तां च समयाम् ।

यदालोके लोकान् दहति महति क्रोधकलिते

दयार्द्रा या दृष्टिः शिशिरमुपचारं रचयति ॥ 39 ॥

तटित्त्वन्तं शक्त्या तिमिरपरिपन्थिस्फुरणया

स्फुरन्नानारत्नाभरणपरिणद्धेन्द्रधनुषम् ।

तव श्यामं मेघं कमपि मणिपूरैकशरणं

निषेवे वर्षन्तं हरमिहिरतप्तं त्रिभुवनम् ॥ 40 ॥

तवाधारे मूले सह समयया लास्यपरया

नवात्मानं मन्ये नवरसमहाताण्डवनटम् ।

उभाभ्यामेताभ्यामुदयविधिमुद्दिश्य दयया

सनाथाभ्यां जज्ञे जनकजननीमज्जगदिदम् ॥ 41 ॥

द्वितीय भागः - सौन्दर्य लहरी

गतैर्माणिक्यत्वं गगनमणिभिः सान्द्रघटितं

किरीटं ते हैमं हिमगिरिसुते कीर्तयति यः ।

स नीडेयच्छायाच्छुरणशबलं चन्द्रशकलं

धनुः शौनासीरं किमिति न निबध्नाति धिषणाम् ॥ 42 ॥

धुनोतु ध्वान्तं नस्तुलितदलितेन्दीवरवनं

घनस्निग्धश्लक्ष्णं चिकुरनिकुरुम्बं तव शिवे ।

यदीयं सौरभ्यं सहजमुपलब्धुं सुमनसो

वसन्त्यस्मिन् मन्ये वलमथनवाटीविटपिनाम् ॥ 43 ॥

तनोतु क्षेमं नस्तव वदनसौन्दर्यलहरी-

परीवाहस्रोतःसरणिरिव सीमन्तसरणिः ।

वहन्ती सिन्दूरं प्रबलकबरीभारतिमिर-

द्विषां बृन्दैर्बन्दीकृतमिव नवीनार्ककिरणम् ॥ 44 ॥

अरालैः स्वाभाव्यादलिकलभसश्रीभिरलकैः

परीतं ते वक्त्रं परिहसति पङ्केरुहरुचिम् ।

दरस्मेरे यस्मिन् दशनरुचिकिञ्जल्करुचिरे

सुगन्धौ माद्यन्ति स्मरदहनचक्षुर्मधुलिहः ॥ 45 ॥

ललाटं लावण्यद्युतिविमलमाभाति तव य-

द्द्वितीयं तन्मन्ये मकुटघटितं चन्द्रशकलम् ।

विपर्यासन्यासादुभयमपि सम्भूय च मिथः

सुधालेपस्यूतिः परिणमति राकाहिमकरः ॥ 46 ॥

भ्रुवौ भुग्ने किञ्चिद्भुवनभयभङ्गव्यसनिनि

त्वदीये नेत्राभ्यां मधुकररुचिभ्यां धृतगुणम् ।

धनुर्मन्ये सव्येतरकरगृहीतं रतिपतेः

प्रकोष्ठे मुष्टौ च स्थगयति निगूढान्तरमुमे ॥ 47 ॥

अहः सूते सव्यं तव नयनमर्कात्मकतया

त्रियामां वामं ते सृजति रजनीनायकतया ।

तृतीया ते दृष्टिर्दरदलितहेमाम्बुजरुचिः

समाधत्ते सन्ध्यां दिवसनिशयोरन्तरचरीम् ॥ 48 ॥

विशाला कल्याणी स्फुटरुचिरयोध्या कुवलयैः

कृपाधाराधारा किमपि मधुराभोगवतिका ।

अवन्ती दृष्टिस्ते बहुनगरविस्तारविजया

ध्रुवं तत्तन्नामव्यवहरणयोग्या विजयते ॥ 49 ॥

कवीनां सन्दर्भस्तबकमकरन्दैकरसिकं

कटाक्षव्याक्षेपभ्रमरकलभौ कर्णयुगलम् ।

अमुञ्चन्तौ दृष्ट्वा तव नवरसास्वादतरला-

वसूयासंसर्गादलिकनयनं किञ्चिदरुणम् ॥ 50 ॥

शिवे शृङ्गारार्द्रा तदितरजने कुत्सनपरा

सरोषा गङ्गायां गिरिशचरिते विस्मयवती ।

हराहिभ्यो भीता सरसिरुहसौभाग्यजननी (जयिनी)

सखीषु स्मेरा ते मयि जननी दृष्टिः सकरुणा ॥ 51 ॥

गते कर्णाभ्यर्णं गरुत इव पक्ष्माणि दधती

पुरां भेत्तुश्चित्तप्रशमरसविद्रावणफले ।

इमे नेत्रे गोत्राधरपतिकुलोत्तंसकलिके

तवाकर्णाकृष्टस्मरशरविलासं कलयतः ॥ 52 ॥

विभक्तत्रैवर्ण्यं व्यतिकरितलीलाञ्जनतया

विभाति त्वन्नेत्रत्रितयमिदमीशानदयिते ।

पुनः स्रष्टुं देवान् द्रुहिणहरिरुद्रानुपरतान्

रजः सत्त्वं बिभ्रत्तम इति गुणानां त्रयमिव ॥ 53 ॥

पवित्रीकर्तुं नः पशुपतिपराधीनहृदये

दयामित्रैर्नेत्रैररुणधवलश्यामरुचिभिः ।

नदः शोणो गङ्गा तपनतनयेति ध्रुवममुं

त्रयाणां तीर्थानामुपनयसि सम्भेदमनघम् ॥ 54 ॥

निमेषोन्मेषाभ्यां प्रलयमुदयं याति जगती

तवेत्याहुः सन्तो धरणिधरराजन्यतनये ।

त्वदुन्मेषाज्जातं जगदिदमशेषं प्रलयतः

परित्रातुं शङ्के परिहृतनिमेषास्तव दृशः ॥ 55 ॥

तवापर्णे कर्णेजपनयनपैशुन्यचकिता

निलीयन्ते तोये नियतमनिमेषाः शफरिकाः ।

इयं च श्रीर्बद्धच्छदपुटकवाटं कुवलयम्

जहाति प्रत्यूषे निशि च विघटय्य प्रविशति ॥ 56 ॥

दृशा द्राघीयस्या दरदलितनीलोत्पलरुचा

दवीयांसं दीनं स्नपय कृपया मामपि शिवे ।

अनेनायं धन्यो भवति न च ते हानिरियता

वने वा हर्म्ये वा समकरनिपातो हिमकरः ॥ 57 ॥

अरालं ते पालीयुगलमगराजन्यतनये

न केषामाधत्ते कुसुमशरकोदण्डकुतुकम् ।

तिरश्चीनो यत्र श्रवणपथमुल्लङ्घ्य विलस-

न्नपाङ्गव्यासङ्गो दिशति शरसन्धानधिषणाम् ॥ 58 ॥

स्फुरद्गण्डाभोगप्रतिफलितताटङ्कयुगलं

चतुश्चक्रं मन्ये तव मुखमिदं मन्मथरथम् ।

यमारुह्य द्रुह्यत्यवनिरथमर्केन्दुचरणं

महावीरो मारः प्रमथपतये सज्जितवते ॥ 59 ॥

सरस्वत्याः सूक्तीरमृतलहरीकौशलहरीः

पिबन्त्याः शर्वाणि श्रवणचुलुकाभ्यामविरलम् ।

चमत्कारश्लाघाचलितशिरसः कुण्डलगणो

झणत्कारैस्तारैः प्रतिवचनमाचष्ट इव ते ॥ 60 ॥

असौ नासावंशस्तुहिनगिरिवंशध्वजपटि

त्वदीयो नेदीयः फलतु फलमस्माकमुचितम् ।

वहन्नन्तर्मुक्ताः शिशिरतरनिश्वासगलितं

समृद्ध्या यत्तासां बहिरपि च मुक्तामणिधरः ॥ 61 ॥

प्रकृत्या रक्तायास्तव सुदति दन्तच्छदरुचेः

प्रवक्ष्ये सादृश्यं जनयतु फलं विद्रुमलता ।

न बिम्बं तद्बिम्बप्रतिफलनरागादरुणितं

तुलामध्यारोढुं कथमिव विलज्जेत कलया ॥ 62 ॥

स्मितज्योत्स्नाजालं तव वदनचन्द्रस्य पिबतां

चकोराणामासीदतिरसतया चञ्चुजडिमा ।

अतस्ते शीतांशोरमृतलहरीमम्लरुचयः

पिबन्ति स्वच्छन्दं निशि निशि भृशं काञ्जिकधिया ॥ 63 ॥

अविश्रान्तं पत्युर्गुणगणकथाम्रेडनजपा

जपापुष्पच्छाया तव जननि जिह्वा जयति सा ।

यदग्रासीनायाः स्फटिकदृषदच्छच्छविमयी

सरस्वत्या मूर्तिः परिणमति माणिक्यवपुषा ॥ 64 ॥

रणे जित्वा दैत्यानपहृतशिरस्त्रैः कवचिभिर्-

निवृत्तैश्चण्डांशत्रिपुरहरनिर्माल्यविमुखैः ।

विशाखेन्द्रोपेन्द्रैः शशिविशदकर्पूरशकला

विलीयन्ते मातस्तव वदनताम्बूलकबलाः ॥ 65 ॥

विपञ्च्या गायन्ती विविधमपदानं पशुपतेः

त्वयारब्धे वक्तुं चलितशिरसा साधुवचने ।

तदीयैर्माधुर्यैरपलपिततन्त्रीकलरवां

निजां वीणां वाणी निचुलयति चोलेन निभृतम् ॥ 66 ॥

कराग्रेण स्पृष्टं तुहिनगिरिणा वत्सलतया

गिरीशेनोदस्तं मुहुरधरपानाकुलतया ।

करग्राह्यं शम्भोर्मुखमुकुरवृन्तं गिरिसुते

कथङ्कारं ब्रूमस्तव चिबुकमौपम्यरहितम् ॥ 67 ॥

भुजाश्लेषान् नित्यं पुरदमयितुः कण्टकवती

तव ग्रीवा धत्ते मुखकमलनालश्रियमियम् ।

स्वतः श्वेता कालागुरुबहुलजम्बालमलिना

मृणालीलालित्यं वहति यदधो हारलतिका ॥ 68 ॥

गले रेखास्तिस्रो गतिगमकगीतैकनिपुणे

विवाहव्यानद्धप्रगुणगुणसङ्ख्याप्रतिभुवः ।

विराजन्ते नानाविधमधुररागाकरभुवां

त्रयाणां ग्रामाणां स्थितिनियमसीमान इव ते ॥ 69 ॥

मृणालीमृद्वीनां तव भुजलतानां चतसृणां

चतुर्भिः सौन्दर्यं सरसिजभवः स्तौति वदनैः ।

नखेभ्यः सन्त्रस्यन् प्रथममथनादन्धकरिपो-

श्चतुर्णां शीर्षाणां सममभयहस्तार्पणधिया ॥ 70 ॥

नखानामुद्द्योतैर्नवनलिनरागं विहसतां

कराणां ते कान्तिं कथय कथयामः कथमुमे ।

कयाचिद्वा साम्यं भजतु कलया हन्त कमलं

यदि क्रीडल्लक्ष्मीचरणतललाक्षारसछणम् ॥ 71 ॥

समं देवि स्कन्दद्विपवदनपीतं स्तनयुगं

तवेदं नः खेदं हरतु सततं प्रस्नुतमुखम् ।

यदालोक्याशङ्काकुलितहृदयो हासजनकः

स्वकुम्भौ हेरम्बः परिमृशति हस्तेन झडिति ॥ 72 ॥

अमू ते वक्षोजावमृतरसमाणिक्यकुतुपौ

न सन्देहस्पन्दो नगपतिपताके मनसि नः ।

पिबन्तौ तौ यस्मादविदितवधूसङ्गरसिकौ

कुमारावद्यापि द्विरदवदनक्रौञ्चदलनौ ॥ 73 ॥

वहत्यम्ब स्तम्बेरमदनुजकुम्भप्रकृतिभिः

समारब्धां मुक्तामणिभिरमलां हारलतिकाम् ।

कुचाभोगो बिम्बाधररुचिभिरन्तः शबलितां

प्रतापव्यामिश्रां पुरदमयितुः कीर्तिमिव ते ॥ 74 ॥

तव स्तन्यं मन्ये धरणिधरकन्ये हृदयतः

पयःपारावारः परिवहति सारस्वतमिव ।

दयावत्या दत्तं द्रविडशिशुरास्वाद्य तव यत्

कवीनां प्रौढानामजनि कमनीयः कवयिता ॥ 75 ॥

हरक्रोधज्वालावलिभिरवलीढेन वपुषा

गभीरे ते नाभीसरसि कृतसङ्गो मनसिजः ।

समुत्तस्थौ तस्मादचलतनये धूमलतिका

जनस्तां जानीते तव जननि रोमावलिरिति ॥ 76 ॥

यदेतत् कालिन्दीतनुतरतरङ्गाकृति शिवे

कृशे मध्ये किञ्चिज्जननि तव यद्भाति सुधियाम् ।

विमर्दादन्योऽन्यं कुचकलशयोरन्तरगतं

तनूभूतं व्योम प्रविशदिव नाभिं कुहरिणीम् ॥ 77 ॥

स्थिरो गङ्गावर्तः स्तनमुकुलरोमावलिलता-

कलावालं कुण्डं कुसुमशरतेजोहुतभुजः ।

रतेर्लीलागारं किमपि तव नाभिर्गिरिसुते

बिलद्वारं सिद्धेर्गिरिशनयनानां विजयते ॥ 78 ॥

निसर्गक्षीणस्य स्तनतटभरेण क्लमजुषो

नमन्मूर्तेर्नारीतिलक शनकैस्त्रुट्यत इव ।

चिरं ते मध्यस्य त्रुटिततटिनीतीरतरुणा

समावस्थास्थेम्नो भवतु कुशलं शैलतनये ॥ 79 ॥

कुचौ सद्यःस्विद्यत्तटघटितकूर्पासभिदुरौ

कषन्तौ दोर्मूले कनककलशाभौ कलयता ।

तव त्रातुं भङ्गादलमिति वलग्नं तनुभुवा

त्रिधा नद्धं देवि त्रिवलि लवलीवल्लिभिरिव ॥ 80 ॥

गुरुत्वं विस्तारं क्षितिधरपतिः पार्वति निजा-

न्नितम्बादाच्छिद्य त्वयि हरणरूपेण निदधे ।

अतस्ते विस्तीर्णो गुरुरयमशेषां वसुमतीं

नितम्बप्राग्भारः स्थगयति लघुत्वं नयति च ॥ 81 ॥

करीन्द्राणां शुण्डान् कनककदलीकाण्डपटली-

मुभाभ्यामूरुभ्यामुभयमपि निर्जित्य भवती ।

सुवृत्ताभ्यां पत्युः प्रणतिकठिनाभ्यां गिरिसुते

विधिज्ञे जानुभ्यां विबुधकरिकुम्भद्वयमसि ॥ 82 ॥

पराजेतुं रुद्रं द्विगुणशरगर्भौ गिरिसुते

निषङ्गौ जङ्घे ते विषमविशिखो बाढमकृत ।

यदग्रे दृश्यन्ते दशशरफलाः पादयुगली-

नखाग्रच्छद्मानः सुरमकुटशाणैकनिशिताः ॥ 83 ॥

श्रुतीनां मूर्धानो दधति तव यौ शेखरतया

ममाप्येतौ मातः शिरसि दयया धेहि चरणौ ।

ययोः पाद्यं पाथः पशुपतिजटाजूटतटिनी

ययोर्लाक्षालक्ष्मीररुणहरिचूडामणिरुचिः ॥ 84 ॥

नमोवाकं ब्रूमो नयनरमणीयाय पदयो-

स्तवास्मै द्वन्द्वाय स्फुटरुचिरसालक्तकवते ।

असूयत्यत्यन्तं यदभिहननाय स्पृहयते

पशूनामीशानः प्रमदवनकङ्केलितरवे ॥ 85 ॥

मृषा कृत्वा गोत्रस्खलनमथ वैलक्ष्यनमितं

ललाटे भर्तारं चरणकमले ताडयति ते ।

चिरादन्तःशल्यं दहनकृतमुन्मूलितवता

तुलाकोटिक्वाणैः किलिकिलितमीशानरिपुणा ॥ 86 ॥

हिमानीहन्तव्यं हिमगिरिनिवासैकचतुरौ

निशायां निद्राणं निशि चरमभागे च विशदौ ।

वरं लक्ष्मीपात्रं श्रियमतिसृजन्तौ समयिनां

सरोजं त्वत्पादौ जननि जयतश्चित्रमिह किम् ॥ 87 ॥

पदं ते कीर्तीनां प्रपदमपदं देवि विपदां

कथं नीतं सद्भिः कठिनकमठीकर्परतुलाम् ।

कथं वा बाहुभ्यामुपयमनकाले पुरभिदा

यदादाय न्यस्तं दृषदि दयमानेन मनसा ॥ 88 ॥

नखैर्नाकस्त्रीणां करकमलसङ्कोचशशिभि-

स्तरूणां दिव्यानां हसत इव ते चण्डि चरणौ ।

फलानि स्वःस्थेभ्यः किसलयकराग्रेण ददतां

दरिद्रेभ्यो भद्रां श्रियमनिशमह्नाय ददतौ ॥ 89 ॥

ददाने दीनेभ्यः श्रियमनिशमाशानुसदृशी-

ममन्दं सौन्दर्यप्रकरमकरन्दं विकिरति ।

तवास्मिन् मन्दारस्तबकसुभगे यातु चरणे

निमज्जन्मज्जीवः करणचरणः षट्चरणताम् ॥ 90 ॥

पदन्यासक्रीडापरिचयमिवारब्धुमनसः

स्खलन्तस्ते खेलं भवनकलहंसा न जहति ।

अतस्तेषां शिक्षां सुभगमणिमञ्जीररणित-

च्छलादाचक्षाणं चरणकमलं चारुचरिते ॥ 91 ॥

गतास्ते मञ्चत्वं द्रुहिणहरिरुद्रेश्वरभृतः

शिवः स्वच्छच्छायाघटितकपटप्रच्छदपटः ।

त्वदीयानां भासां प्रतिफलनरागारुणतया

शरीरी शृङ्गारो रस इव दृशां दोग्धि कुतुकम् ॥ 92 ॥

अराला केशेषु प्रकृतिसरला मन्दहसिते

शिरीषाभा चित्ते दृषदुपलशोभा कुचतटे ।

भृशं तन्वी मध्ये पृथुरुरसिजारोहविषये

जगत्त्रातुं शम्भोर्जयति करुणा काचिदरुणा ॥ 93 ॥

कलङ्कः कस्तूरी रजनिकरबिम्बं जलमयं

कलाभिः कर्पूरैर्मरकतकरण्डं निबिडितम् ।

अतस्त्वद्भोगेन प्रतिदिनमिदं रिक्तकुहरं

विधिर्भूयो भूयो निबिडयति नूनं तव कृते ॥ 94 ॥

पुरारातेरन्तःपुरमसि ततस्त्वच्चरणयोः

सपर्यामर्यादा तरलकरणानामसुलभा ।

तथा ह्येते नीताः शतमखमुखाः सिद्धिमतुलां

तव द्वारोपान्तस्थितिभिरणिमाद्याभिरमराः ॥ 95 ॥

कलत्रं वैधात्रं कतिकति भजन्ते न कवयः

श्रियो देव्याः को वा न भवति पतिः कैरपि धनैः ।

महादेवं हित्वा तव सति सतीनामचरमे

कुचाभ्यामासङ्गः कुरवकतरोरप्यसुलभः ॥ 96 ॥

गिरामाहुर्देवीं द्रुहिणगृहिणीमागमविदो

हरेः पत्नीं पद्मां हरसहचरीमद्रितनयाम् ।

तुरीया कापि त्वं दुरधिगमनिःसीममहिमा

महामाया विश्वं भ्रमयसि परब्रह्ममहिषि ॥ 97 ॥

कदा काले मातः कथय कलितालक्तकरसं

पिबेयं विद्यार्थी तव चरणनिर्णेजनजलम् ।

प्रकृत्या मूकानामपि च कविताकारणतया

कदा धत्ते वाणीमुखकमलताम्बूलरसताम् ॥ 98 ॥

सरस्वत्या लक्ष्म्या विधिहरिसपत्नो विहरते

रतेः पातिव्रत्यं शिथिलयति रम्येण वपुषा ।

चिरं जीवन्नेव क्षपितपशुपाशव्यतिकरः

परानन्दाभिख्यं रसयति रसं त्वद्भजनवान् ॥ 99 ॥

प्रदीपज्वालाभिर्दिवसकरनीराजनविधिः

सुधासूतेश्चन्द्रोपलजललवैरर्घ्यरचना ।

स्वकीयैरम्भोभिः सलिलनिधिसौहित्यकरणं

त्वदीयाभिर्वाग्भिस्तव जननि वाचां स्तुतिरियम् ॥ 100 ॥

सौन्दर्यलहरि मुख्यस्तोत्रं संवार्तदायकम् ।

भगवद्पाद सन्क्लुप्तं पठेन् मुक्तौ भवेन्नरः ॥

॥ इति श्रीमत्परमहंसपरिव्राजकाचार्यस्य

श्रीगोविन्दभगवत्पूज्यपादशिष्यस्य

श्रीमच्छङ्करभगवतः कृतौ सौन्दर्यलहरी सम्पूर्णा ॥

॥ ॐ तत्सत् ॥

(अनुबन्धः)

समानीतः पद्भ्यां मणिमुकुरतामम्बरमणि-

र्भयादास्यादन्तःस्तिमितकिरणश्रेणिमसृणः ।

(पाठभेदः - भयादास्य स्निग्धस्त्मित, भयादास्यस्यान्तःस्त्मित)

दधाति त्वद्वक्त्रम्प्रतिफलनमश्रान्तविकचं

निरातङ्कं चन्द्रान्निजहृदयपङ्केरुहमिव ॥ 101 ॥

समुद्भूतस्थूलस्तनभरमुरश्चारु हसितं

कटाक्षे कन्दर्पः कतिचन कदम्बद्युति वपुः ।

हरस्य त्वद्भ्रान्तिं मनसि जनयन्ति स्म विमलाः

पाठभेदः - जनयामास मदनो, जनयन्तः समतुलां, जनयन्ता सुवदने

भवत्या ये भक्ताः परिणतिरमीषामियमुमे ॥ 102 ॥

निधे नित्यस्मेरे निरवधिगुणे नीतिनिपुणे

निराघातज्ञाने नियमपरचित्तैकनिलये ।

नियत्या निर्मुक्ते निखिलनिगमान्तस्तुतिपदे

निरातङ्के नित्ये निगमय ममापि स्तुतिमिमाम् ॥ 103 ॥