Muka Pancha Shati 2 - Padaravinda Shatakam — Grantha Script

𑌮𑌹𑌿𑌮𑍍𑌨𑌃 𑌪𑌨𑍍𑌥𑌾𑌨𑌂 𑌮𑌦𑌨𑌪𑌰𑌿𑌪𑌨𑍍𑌥𑌿𑌪𑍍𑌰𑌣𑌯𑌿𑌨𑌿

𑌪𑍍𑌰𑌭𑍁𑌰𑍍𑌨𑌿𑌰𑍍𑌣𑍇𑌤𑍁𑌂 𑌤𑍇 𑌭𑌵𑌤𑌿 𑌯𑌤𑌮𑌾𑌨𑍋𑌽𑌪𑌿 𑌕𑌤𑌮𑌃 ।

𑌤𑌥𑌾𑌪𑌿 𑌶𑍍𑌰𑍀𑌕𑌾𑌞𑍍𑌚𑍀𑌵𑌿𑌹𑍃𑌤𑌿𑌰𑌸𑌿𑌕𑍇 𑌕𑍋𑌽𑌪𑌿 𑌮𑌨𑌸𑍋

𑌵𑌿𑌪𑌾𑌕𑌸𑍍𑌤𑍍𑌵𑌤𑍍𑌪𑌾𑌦𑌸𑍍𑌤𑍁𑌤𑌿𑌵𑌿𑌧𑌿𑌷𑍁 𑌜𑌲𑍍𑌪𑌾𑌕𑌯𑌤𑌿 𑌮𑌾𑌮𑍍 ॥1॥

𑌗𑌲𑌗𑍍𑌰𑌾𑌹𑍀 𑌪𑍗𑌰𑌨𑍍𑌦𑌰𑌪𑍁𑌰𑌵𑌨𑍀𑌪𑌲𑍍𑌲𑌵𑌰𑍁𑌚𑌾𑌂

𑌧𑍃𑌤𑌪𑌾𑌥𑌮𑍍𑌯𑌾𑌨𑌾𑌮𑌰𑍁𑌣𑌮𑌹𑌸𑌾𑌮𑌾𑌦𑌿𑌮𑌗𑍁𑌰𑍁𑌃 ।

𑌸𑌮𑌿𑌨𑍍𑌧𑍇 𑌬𑌨𑍍𑌧𑍂𑌕𑌸𑍍𑌤𑌬𑌕𑌸𑌹𑌯𑍁𑌧𑍍𑌵𑌾 𑌦𑌿𑌶𑌿 𑌦𑌿𑌶𑌿

𑌪𑍍𑌰𑌸𑌰𑍍𑌪𑌨𑍍𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌕𑌿𑌰𑌣𑌾𑌨𑌾𑌮𑌰𑍁𑌣𑌿𑌮𑌾 ॥2॥

𑌮𑌰𑌾𑌲𑍀𑌨𑌾𑌂 𑌯𑌾𑌨𑌾𑌭𑍍𑌯𑌸𑌨𑌕𑌲𑌨𑌾𑌮𑍂𑌲𑌗𑍁𑌰𑌵𑍇

𑌦𑌰𑌿𑌦𑍍𑌰𑌾𑌣𑌾𑌂 𑌤𑍍𑌰𑌾𑌣𑌵𑍍𑌯𑌤𑌿𑌕𑌰𑌸𑍁𑌰𑍋𑌦𑍍𑌯𑌾𑌨𑌤𑌰𑌵𑍇 ।

𑌤𑌮𑌸𑍍𑌕𑌾𑌣𑍍𑌡𑌪𑍍𑌰𑍗𑌢𑌿𑌪𑍍𑌰𑌕𑌟𑌨𑌤𑌿𑌰𑌸𑍍𑌕𑌾𑌰𑌪𑌟𑌵𑍇

𑌜𑌨𑍋𑌽𑌯𑌂 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌨𑌲𑌿𑌨𑌾𑌯 𑌸𑍍𑌪𑍃𑌹𑌯𑌤𑍇 ॥3॥

𑌵𑌹𑌨𑍍𑌤𑍀 𑌸𑍈𑌨𑍍𑌦𑍂𑌰𑍀𑌂 𑌸𑌰𑌣𑌿𑌮𑌵𑌨𑌮𑍍𑌰𑌾𑌮𑌰𑌪𑍁𑌰𑌼𑍀-

𑌪𑍁𑌰𑌨𑍍𑌧𑍍𑌰𑍀𑌸𑍀𑌮𑌨𑍍𑌤𑍇 𑌕𑌵𑌿𑌕𑌮𑌲𑌬𑌾𑌲𑌾𑌰𑍍𑌕𑌸𑍁𑌷𑌮𑌾 ।

𑌤𑍍𑌰𑌯𑍀𑌸𑍀𑌮𑌨𑍍𑌤𑌿𑌨𑍍𑌯𑌾𑌃 𑌸𑍍𑌤𑌨𑌤𑌟𑌨𑌿𑌚𑍋𑌲𑌾𑌰𑍁𑌣𑌪𑌟𑍀

𑌵𑌿𑌭𑌾𑌨𑍍𑌤𑍀 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌕𑌾𑌨𑍍𑌤𑌿𑌰𑍍𑌵𑌿𑌜𑌯𑌤𑍇 ॥4॥

𑌪𑍍𑌰𑌣𑌮𑍍𑌰𑍀𑌭𑍂𑌤𑌸𑍍𑌯 𑌪𑍍𑌰𑌣𑌯𑌕𑌲𑌹𑌤𑍍𑌰𑌸𑍍𑌤𑌮𑌨𑌸𑌃

𑌸𑍍𑌮𑌰𑌾𑌰𑌾𑌤𑍇𑌶𑍍𑌚𑍂𑌡𑌾𑌵𑌿𑌯𑌤𑌿 𑌗𑍃𑌹𑌮𑍇𑌧𑍀 𑌹𑌿𑌮𑌕𑌰𑌃 ।

𑌯𑌯𑍋𑌃 𑌸𑌾𑌨𑍍𑌧𑍍𑌯𑌾𑌂 𑌕𑌾𑌨𑍍𑌤𑌿𑌂 𑌵𑌹𑌤𑌿 𑌸𑍁𑌷𑌮𑌾𑌭𑌿𑌶𑍍𑌚𑌰𑌣𑌯𑍋𑌃

𑌤𑌯𑍋𑌰𑍍𑌮𑍇 𑌕𑌾𑌮𑌾𑌕𑍍𑌷𑍍𑌯𑌾 𑌹𑍃𑌦𑌯𑌮𑌪𑌤𑌨𑍍𑌦𑍍𑌰𑌂 𑌵𑌿𑌹𑌰𑌤𑌾𑌮𑍍 ॥5॥

𑌯𑌯𑍋𑌃 𑌪𑍀𑌠𑌾𑌯𑌨𑍍𑌤𑍇 𑌵𑌿𑌬𑍁𑌧𑌮𑍁𑌕𑍁𑌟𑍀𑌨𑌾𑌂 𑌪𑌟𑌲𑌿𑌕𑌾

𑌯𑌯𑍋𑌃 𑌸𑍗𑌧𑌾𑌯𑌨𑍍𑌤𑍇 𑌸𑍍𑌵𑌯𑌮𑍁𑌦𑌯𑌭𑌾𑌜𑍋 𑌭𑌣𑌿𑌤𑌯𑌃 ।

𑌯𑌯𑍋𑌃 𑌦𑌾𑌸𑌾𑌯𑌨𑍍𑌤𑍇 𑌸𑌰𑌸𑌿𑌜𑌭𑌵𑌾𑌦𑍍𑌯𑌾𑌶𑍍𑌚𑌰𑌣𑌯𑍋𑌃

𑌤𑌯𑍋𑌰𑍍𑌮𑍇 𑌕𑌾𑌮𑌾𑌕𑍍𑌷𑍍𑌯𑌾 𑌦𑌿𑌨𑌮𑌨𑍁 𑌵𑌰𑍀𑌵𑌰𑍍𑌤𑍁 𑌹𑍃𑌦𑌯𑌮𑍍 ॥6॥

𑌨𑌯𑌨𑍍𑌤𑍀 𑌸𑌙𑍍𑌕𑍋𑌚𑌂 𑌸𑌰𑌸𑌿𑌜𑌰𑍁𑌚𑌂 𑌦𑌿𑌕𑍍𑌪𑌰𑌿𑌸𑌰𑍇

𑌸𑍃𑌜𑌨𑍍𑌤𑍀 𑌲𑍗𑌹𑌿𑌤𑍍𑌯𑌂 𑌨𑌖𑌕𑌿𑌰𑌣𑌚𑌨𑍍𑌦𑍍𑌰𑌾𑌰𑍍𑌧𑌖𑌚𑌿𑌤𑌾 ।

𑌕𑌵𑍀𑌨𑍍𑌦𑍍𑌰𑌾𑌣𑌾𑌂 𑌹𑍃𑌤𑍍𑌕𑍈𑌰𑌵𑌵𑌿𑌕𑌸𑌨𑍋𑌦𑍍𑌯𑍋𑌗𑌜𑌨𑌨𑍀

𑌸𑍍𑌫𑍁𑌰𑌨𑍍𑌤𑍀 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌰𑍁𑌚𑌿𑌸𑌨𑍍𑌧𑍍𑌯𑌾 𑌵𑌿𑌜𑌯𑌤𑍇 ॥7॥

𑌵𑌿𑌰𑌾𑌵𑍈𑌰𑍍𑌮𑌾𑌞𑍍𑌜𑍀𑌰𑍈𑌃 𑌕𑌿𑌮𑌪𑌿 𑌕𑌥𑌯𑌨𑍍𑌤𑍀𑌵 𑌮𑌧𑍁𑌰𑌂

𑌪𑍁𑌰𑌸𑍍𑌤𑌾𑌦𑌾𑌨𑌮𑍍𑌰𑍇 𑌪𑍁𑌰𑌵𑌿𑌜𑌯𑌿𑌨𑌿 𑌸𑍍𑌮𑍇𑌰𑌵𑌦𑌨𑍇 ।

𑌵𑌯𑌸𑍍𑌯𑍇𑌵 𑌪𑍍𑌰𑍗𑌢𑌾 𑌶𑌿𑌥𑌿𑌲𑌯𑌤𑌿 𑌯𑌾 𑌪𑍍𑌰𑍇𑌮𑌕𑌲𑌹-

𑌪𑍍𑌰𑌰𑍋𑌹𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌲𑍀 𑌸𑌾 𑌵𑌿𑌜𑌯𑌤𑍇 ॥8॥

𑌸𑍁𑌪𑌰𑍍𑌵𑌸𑍍𑌤𑍍𑌰𑍀𑌲𑍋𑌲𑌾𑌲𑌕𑌪𑌰𑌿𑌚𑌿𑌤𑌂 𑌷𑌟𑍍𑌪𑌦𑌕𑍁𑌲𑍈𑌃

𑌸𑍍𑌫𑍁𑌰𑌲𑍍𑌲𑌾𑌕𑍍𑌷𑌾𑌰𑌾𑌗𑌂 𑌤𑌰𑍁𑌣𑌤𑌰𑌣𑌿𑌜𑍍𑌯𑍋𑌤𑌿𑌰𑌰𑍁𑌣𑍈𑌃 ।

𑌭𑍃𑌤𑌂 𑌕𑌾𑌨𑍍𑌤𑍍𑌯𑌮𑍍𑌭𑍋𑌭𑌿𑌃 𑌵𑌿𑌸𑍃𑌮𑌰𑌮𑌰𑌨𑍍𑌦𑍈𑌃 𑌸𑌰𑌸𑌿𑌜𑍈𑌃

𑌵𑌿𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌲𑌂 𑌬𑌨𑍍𑌧𑍁𑌪𑌦𑌵𑍀𑌮𑍍 ॥9॥

𑌰𑌜𑌃𑌸𑌂𑌸𑌰𑍍𑌗𑍇𑌽𑌪𑌿 𑌸𑍍𑌥𑌿𑌤𑌮𑌰𑌜𑌸𑌾𑌮𑍇𑌵 𑌹𑍃𑌦𑌯𑍇

𑌪𑌰𑌂 𑌰𑌕𑍍𑌤𑌤𑍍𑌵𑍇𑌨 𑌸𑍍𑌥𑌿𑌤𑌮𑌪𑌿 𑌵𑌿𑌰𑌕𑍍𑌤𑍈𑌕𑌶𑌰𑌣𑌮𑍍 ।

𑌅𑌲𑌭𑍍𑌯𑌂 𑌮𑌨𑍍𑌦𑌾𑌨𑌾𑌂 𑌦𑌧𑌦𑌪𑌿 𑌸𑌦𑌾 𑌮𑌨𑍍𑌦𑌗𑌤𑌿𑌤𑌾𑌂

𑌵𑌿𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌚𑌰𑌣𑌯𑍁𑌗𑌮𑌾𑌶𑍍𑌚𑌰𑍍𑌯𑌲𑌹𑌰𑍀𑌮𑍍 ॥10॥

𑌜𑌟𑌾𑌲𑌾 𑌮𑌞𑍍𑌜𑍀𑌰𑌸𑍍𑌫𑍁𑌰𑌦𑌰𑍁𑌣𑌰𑌤𑍍𑌨𑌾𑌂𑌶𑍁𑌨𑌿𑌕𑌰𑍈𑌃

𑌨𑌿𑌷𑌿𑌦𑌨𑍍𑌤𑍀 𑌮𑌧𑍍𑌯𑍇 𑌨𑌖𑌰𑍁𑌚𑌿𑌝𑌰𑍀𑌗𑌾𑌙𑍍𑌗𑌪𑌯𑌸𑌾𑌮𑍍 ।

𑌜𑌗𑌤𑍍𑌤𑍍𑌰𑌾𑌣𑌂 𑌕𑌰𑍍𑌤𑍁𑌂 𑌜𑌨𑌨𑌿 𑌮𑌮 𑌕𑌾𑌮𑌾𑌕𑍍𑌷𑌿 𑌨𑌿𑌯𑌤𑌂

𑌤𑌪𑌶𑍍𑌚𑌰𑍍𑌯𑌾𑌂 𑌧𑌤𑍍𑌤𑍇 𑌤𑌵 𑌚𑌰𑌣𑌪𑌾𑌥𑍋𑌜𑌯𑍁𑌗𑌲𑍀 ॥11॥

𑌤𑍁𑌲𑌾𑌕𑍋𑌟𑌿𑌦𑍍𑌵𑌨𑍍𑌦𑍍𑌵𑌕𑍍𑌕𑌣𑌿𑌤𑌭𑌣𑌿𑌤𑌾𑌭𑍀𑌤𑌿𑌵𑌚𑌸𑍋𑌃

𑌵𑌿𑌨𑌮𑍍𑌰𑌂 𑌕𑌾𑌮𑌾𑌕𑍍𑌷𑍀 𑌵𑌿𑌸𑍃𑌮𑌰𑌮𑌹𑌃𑌪𑌾𑌟𑌲𑌿𑌤𑌯𑍋𑌃 ।

𑌕𑍍𑌷𑌣𑌂 𑌵𑌿𑌨𑍍𑌯𑌾𑌸𑍇𑌨 𑌕𑍍𑌷𑌪𑌿𑌤𑌤𑌮𑌸𑍋𑌰𑍍𑌮𑍇 𑌲𑌲𑌿𑌤𑌯𑍋𑌃

𑌪𑍁𑌨𑍀𑌯𑌾𑌨𑍍𑌮𑍂𑌰𑍍𑌧𑌾𑌨𑌂 𑌪𑍁𑌰𑌹𑌰𑌪𑍁𑌰𑌨𑍍𑌧𑍍𑌰𑍀 𑌚𑌰𑌣𑌯𑍋𑌃 ॥12॥

𑌭𑌵𑌾𑌨𑌿 𑌦𑍍𑌰𑍁𑌹𑍍𑌯𑍇𑌤𑌾𑌂 𑌭𑌵𑌨𑌿𑌬𑌿𑌡𑌿𑌤𑍇𑌭𑍍𑌯𑍋 𑌮𑌮 𑌮𑍁𑌹𑍁-

𑌸𑍍𑌤𑌮𑍋𑌵𑍍𑌯𑌾𑌮𑍋𑌹𑍇𑌭𑍍𑌯𑌸𑍍𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑍗 ।

𑌯𑌯𑍋𑌰𑍍𑌲𑌾𑌕𑍍𑌷𑌾𑌬𑌿𑌨𑍍𑌦𑍁𑌸𑍍𑌫𑍁𑌰𑌣𑌧𑌰𑌣𑌾𑌦𑍍𑌧𑍍𑌵𑌰𑍍𑌜𑌟𑌿𑌜𑌟𑌾-

𑌕𑍁𑌟𑍀𑌰𑌾 𑌶𑍋𑌣𑌾𑌙𑍍𑌕𑌂 𑌵𑌹𑌤𑌿 𑌵𑌪𑍁𑌰𑍇𑌣𑌾𑌙𑍍𑌕𑌕𑌲𑌿𑌕𑌾 ॥13॥

𑌪𑌵𑌿𑌤𑍍𑌰𑍀𑌕𑍁𑌰𑍍𑌯𑍁𑌰𑍍𑌨𑍁𑌃 𑌪𑌦𑌤𑌲𑌭𑍁𑌵𑌃 𑌪𑌾𑌟𑌲𑌰𑍁𑌚𑌃

𑌪𑌰𑌾𑌗𑌾𑌸𑍍𑌤𑍇 𑌪𑌾𑌪𑌪𑍍𑌰𑌶𑌮𑌨𑌧𑍁𑌰𑍀𑌣𑌾𑌃 𑌪𑌰𑌶𑌿𑌵𑍇 ।

𑌕𑌣𑌂 𑌲𑌬𑍍𑌧𑍁𑌂 𑌯𑍇𑌷𑌾𑌂 𑌨𑌿𑌜𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌵𑌿𑌵𑌶𑌾

𑌵𑌲𑌨𑍍𑌤𑍋 𑌵𑍍𑌯𑌾𑌤𑌨𑍍𑌵𑌨𑍍𑌤𑍍𑌯𑌹𑌮𑌹𑌮𑌿𑌕𑌾𑌂 𑌮𑌾𑌧𑌵𑌮𑍁𑌖𑌾𑌃 ॥14॥

𑌬𑌲𑌾𑌕𑌾𑌮𑌾𑌲𑌾𑌭𑌿𑌰𑍍𑌨𑌖𑌰𑍁𑌚𑌿𑌮𑌯𑍀𑌭𑌿𑌃 𑌪𑌰𑌿𑌵𑍃𑌤𑍇

𑌵𑌿𑌨𑌮𑍍𑌰𑌸𑍍𑌵𑌰𑍍𑌨𑌾𑌰𑍀𑌵𑌿𑌕𑌚𑌕𑌚𑌕𑌾𑌲𑌾𑌮𑍍𑌬𑍁𑌦𑌕𑍁𑌲𑍇 ।

𑌸𑍍𑌫𑍁𑌰𑌨𑍍𑌤𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌦𑌲𑌿𑌤𑌬𑌨𑍍𑌧𑍂𑌕𑌸𑍁𑌹𑍃𑌦-

𑌸𑍍𑌤𑌟𑌿𑌲𑍍𑌲𑍇𑌖𑌾𑌯𑌨𑍍𑌤𑍇 𑌤𑌵 𑌚𑌰𑌣𑌪𑌾𑌥𑍋𑌜𑌕𑌿𑌰𑌣𑌾𑌃 ॥15॥

𑌸𑌰𑌾𑌗𑌃 𑌸𑌦𑍍𑌵𑍇𑌷𑌃 𑌪𑍍𑌰𑌸𑍃𑌮𑌰𑌸𑌰𑍋𑌜𑍇 𑌪𑍍𑌰𑌤𑌿𑌦𑌿𑌨𑌂

𑌨𑌿𑌸𑌰𑍍𑌗𑌾𑌦𑌾𑌕𑍍𑌰𑌾𑌮𑌨𑍍𑌵𑌿𑌬𑍁𑌧𑌜𑌨𑌮𑍂𑌰𑍍𑌧𑌾𑌨𑌮𑌧𑌿𑌕𑌮𑍍 ।

𑌕𑌥𑌙𑍍𑌕𑌾𑌰𑌂 𑌮𑌾𑌤𑌃 𑌕𑌥𑌯 𑌪𑌦𑌪𑌦𑍍𑌮𑌸𑍍𑌤𑌵 𑌸𑌤𑌾𑌂

𑌨𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌕𑍈𑌵𑌲𑍍𑌯𑌸𑌰𑌣𑌿𑌮𑍍 ॥16॥

𑌜𑌪𑌾𑌲𑌕𑍍𑌷𑍍𑌮𑍀𑌶𑍋𑌣𑍋 𑌜𑌨𑌿𑌤𑌪𑌰𑌮𑌜𑍍𑌞𑌾𑌨𑌨𑌲𑌿𑌨𑍀-

𑌵𑌿𑌕𑌾𑌸𑌵𑍍𑌯𑌾𑌸𑌙𑍍𑌗𑍋 𑌵𑌿𑌫𑌲𑌿𑌤𑌜𑌗𑌜𑍍𑌜𑌾𑌡𑍍𑌯𑌗𑌰𑌿𑌮𑌾 ।

𑌮𑌨𑌃𑌪𑍂𑌰𑍍𑌵𑌾𑌦𑍍𑌰𑌿𑌂 𑌮𑍇 𑌤𑌿𑌲𑌕𑌯𑌤𑍁 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾

𑌤𑌮𑌸𑍍𑌕𑌾𑌣𑍍𑌡𑌦𑍍𑌰𑍋𑌹𑍀 𑌤𑌵 𑌚𑌰𑌣𑌪𑌾𑌥𑍋𑌜𑌰𑌮𑌣𑌃 ॥17॥

𑌨𑌮𑌸𑍍𑌕𑍁𑌰𑍍𑌮𑌃 𑌪𑍍𑌰𑍇𑌙𑍍𑌖𑌨𑍍𑌮𑌣𑌿𑌕𑌟𑌕𑌨𑍀𑌲𑍋𑌤𑍍𑌪𑌲𑌮𑌹𑌃-

𑌪𑌯𑍋𑌧𑍗 𑌰𑌿𑌙𑍍𑌖𑌦𑍍𑌭𑌿𑌰𑍍𑌨𑌖𑌕𑌿𑌰𑌣𑌫𑍇𑌨𑍈𑌰𑍍𑌧𑌵𑌲𑌿𑌤𑍇 ।

𑌸𑍍𑌫𑍁𑌟𑌂 𑌕𑍁𑌰𑍍𑌵𑌾𑌣𑌾𑌯 𑌪𑍍𑌰𑌬𑌲𑌚𑌲𑌦𑍗𑌰𑍍𑌵𑌾𑌨𑌲𑌶𑌿𑌖𑌾-

𑌵𑌿𑌤𑌰𑍍𑌕𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑌤𑌤𑌮𑌰𑍁𑌣𑌿𑌮𑍍𑌨𑍇 𑌚𑌰𑌣𑌯𑍋𑌃 ॥18॥

𑌶𑌿𑌵𑍇 𑌪𑌾𑌶𑌾𑌯𑍇𑌤𑌾𑌮𑌲𑌘𑍁𑌨𑌿 𑌤𑌮𑌃𑌕𑍂𑌪𑌕𑍁𑌹𑌰𑍇

𑌦𑌿𑌨𑌾𑌧𑍀𑌶𑌾𑌯𑍇𑌤𑌾𑌂 𑌮𑌮 𑌹𑍃𑌦𑌯𑌪𑌾𑌥𑍋𑌜𑌵𑌿𑌪𑌿𑌨𑍇 ।

𑌨𑌭𑍋𑌮𑌾𑌸𑌾𑌯𑍇𑌤𑌾𑌂 𑌸𑌰𑌸𑌕𑌵𑌿𑌤𑌾𑌰𑍀𑌤𑌿𑌸𑌰𑌿𑌤𑌿

𑌤𑍍𑌵𑌦𑍀𑌯𑍗 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑍃𑌤𑌕𑌿𑌰𑌣𑍗 𑌦𑍇𑌵𑌿 𑌚𑌰𑌣𑍗 ॥19॥

𑌨𑌿𑌷𑌕𑍍𑌤𑌂 𑌶𑍍𑌰𑍁𑌤𑍍𑌯𑌨𑍍𑌤𑍇 𑌨𑌯𑌨𑌮𑌿𑌵 𑌸𑌦𑍍𑌵𑍃𑌤𑍍𑌤𑌰𑍁𑌚𑌿𑌰𑍈𑌃

𑌸𑌮𑍈𑌰𑍍𑌜𑍁𑌷𑍍𑌟𑌂 𑌶𑍁𑌦𑍍𑌧𑍈𑌰𑌧𑌰𑌮𑌿𑌵 𑌰𑌮𑍍𑌯𑍈𑌰𑍍𑌦𑍍𑌵𑌿𑌜𑌗𑌣𑍈𑌃 ।

𑌶𑌿𑌵𑍇 𑌵𑌕𑍍𑌷𑍋𑌜𑌨𑍍𑌮𑌦𑍍𑌵𑌿𑌤𑌯𑌮𑌿𑌵 𑌮𑍁𑌕𑍍𑌤𑌾𑌶𑍍𑌰𑌿𑌤𑌮𑍁𑌮𑍇

𑌤𑍍𑌵𑌦𑍀𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌣𑌤𑌶𑌰𑌣𑌂 𑌨𑍗𑌮𑌿 𑌚𑌰𑌣𑌮𑍍 ॥20॥

𑌨𑌮𑌸𑍍𑌯𑌾𑌸𑌂𑌸𑌜𑍍𑌜𑌨𑍍𑌨𑌮𑍁𑌚𑌿𑌪𑌰𑌿𑌪𑌨𑍍𑌥𑌿𑌪𑍍𑌰𑌣𑌯𑌿𑌨𑍀-

𑌨𑌿𑌸𑌰𑍍𑌗𑌪𑍍𑌰𑍇𑌙𑍍𑌖𑍋𑌲𑌤𑍍𑌕𑍁𑌰𑌲𑌕𑍁𑌲𑌕𑌾𑌲𑌾𑌹𑌿𑌶𑌬𑌲𑍇 ।

𑌨𑌖𑌚𑍍𑌛𑌾𑌯𑌾𑌦𑍁𑌗𑍍𑌧𑍋𑌦𑌧𑌿𑌪𑌯𑌸𑌿 𑌤𑍇 𑌵𑍈𑌦𑍍𑌰𑍁𑌮𑌰𑍁𑌚𑌾𑌂

𑌪𑍍𑌰𑌚𑌾𑌰𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌯𑌤𑌿 𑌪𑌾𑌦𑌾𑌬𑍍𑌜𑌸𑍁𑌷𑌮𑌾 ॥21॥

𑌕𑌦𑌾 𑌦𑍂𑌰𑍀𑌕𑌰𑍍𑌤𑍁𑌂 𑌕𑌟𑍁𑌦𑍁𑌰𑌿𑌤𑌕𑌾𑌕𑍋𑌲𑌜𑌨𑌿𑌤𑌂

𑌮𑌹𑌾𑌨𑍍𑌤𑌂 𑌸𑌨𑍍𑌤𑌾𑌪𑌂 𑌮𑌦𑌨𑌪𑌰𑌿𑌪𑌨𑍍𑌥𑌿𑌪𑍍𑌰𑌿𑌯𑌤𑌮𑍇 ।

𑌕𑍍𑌷𑌣𑌾𑌤𑍍𑌤𑍇 𑌕𑌾𑌮𑌾𑌕𑍍𑌷𑌿 𑌤𑍍𑌰𑌿𑌭𑍁𑌵𑌨𑌪𑌰𑍀𑌤𑌾𑌪𑌹𑌰𑌣𑍇

𑌪𑌟𑍀𑌯𑌾𑌂𑌸𑌂 𑌲𑌪𑍍𑌸𑍍𑌯𑍇 𑌪𑌦𑌕𑌮𑌲𑌸𑍇𑌵𑌾𑌮𑍃𑌤𑌰𑌸𑌮𑍍 ॥22॥

𑌯𑌯𑍋𑌃 𑌸𑌾𑌨𑍍𑌧𑍍𑌯𑌂 𑌰𑍋𑌚𑌿𑌃 𑌸𑌤𑌤𑌮𑌰𑍁𑌣𑌿𑌮𑍍𑌨𑍇 𑌸𑍍𑌪𑍃𑌹𑌯𑌤𑍇

𑌯𑌯𑍋𑌶𑍍𑌚𑌾𑌨𑍍𑌦𑍍𑌰𑍀 𑌕𑌾𑌨𑍍𑌤𑌿𑌃 𑌪𑌰𑌿𑌪𑌤𑌤𑌿 𑌦𑍃𑌷𑍍𑌟𑍍𑌵𑌾 𑌨𑌖𑌰𑍁𑌚𑌿𑌮𑍍 ।

𑌯𑌯𑍋𑌃 𑌪𑌾𑌕𑍋𑌦𑍍𑌰𑍇𑌕𑌂 𑌪𑌿𑌪𑌠𑌿𑌷𑌤𑌿 𑌭𑌕𑍍𑌤𑍍𑌯𑌾 𑌕𑌿𑌸𑌲𑌯𑌂

𑌮𑍍𑌰𑌦𑌿𑌮𑍍𑌨𑌃 𑌕𑌾𑌮𑌾𑌕𑍍𑌷𑍍𑌯𑌾 𑌮𑌨𑌸𑌿 𑌚𑌰𑌣𑍗 𑌤𑍗 𑌤𑌨𑍁𑌮𑌹𑍇 ॥23॥

𑌜𑌗𑌨𑍍𑌨𑍇𑌦𑌂 𑌨𑍇𑌦𑌂 𑌪𑌰𑌮𑌿𑌤𑌿 𑌪𑌰𑌿𑌤𑍍𑌯𑌜𑍍𑌯 𑌯𑌤𑌿𑌭𑌿𑌃

𑌕𑍁𑌶𑌾𑌗𑍍𑌰𑍀𑌯𑌸𑍍𑌵𑌾𑌨𑍍𑌤𑍈𑌃 𑌕𑍁𑌶𑌲𑌧𑌿𑌷𑌣𑍈𑌃 𑌶𑌾𑌸𑍍𑌤𑍍𑌰𑌸𑌰𑌣𑍗 ।

𑌗𑌵𑍇𑌷𑍍𑌯𑌂 𑌕𑌾𑌮𑌾𑌕𑍍𑌷𑌿 𑌧𑍍𑌰𑍁𑌵𑌮𑌕𑍃𑌤𑌕𑌾𑌨𑌾𑌂 𑌗𑌿𑌰𑌿𑌸𑍁𑌤𑍇

𑌗𑌿𑌰𑌾𑌮𑍈𑌦𑌮𑍍𑌪𑌰𑍍𑌯𑌂 𑌤𑌵 𑌚𑌰𑌣𑌪𑌦𑍍𑌮𑌂 𑌵𑌿𑌜𑌯𑌤𑍇 ॥24॥

𑌕𑍃𑌤𑌸𑍍𑌨𑌾𑌨𑌂 𑌶𑌾𑌸𑍍𑌤𑍍𑌰𑌾𑌮𑍃𑌤𑌸𑌰𑌸𑌿 𑌕𑌾𑌮𑌾𑌕𑍍𑌷𑌿 𑌨𑌿𑌤𑌰𑌾𑌂

𑌦𑌧𑌾𑌨𑌂 𑌵𑍈𑌶𑌦𑍍𑌯𑌂 𑌕𑌲𑌿𑌤𑌰𑌸𑌮𑌾𑌨𑌨𑍍𑌦𑌸𑍁𑌧𑌯𑌾 ।

𑌅𑌲𑌙𑍍𑌕𑌾𑌰𑌂 𑌭𑍂𑌮𑍇𑌰𑍍𑌮𑍁𑌨𑌿𑌜𑌨𑌮𑌨𑌶𑍍𑌚𑌿𑌨𑍍𑌮𑌯𑌮𑌹𑌾-

𑌪𑌯𑍋𑌧𑍇𑌰𑌨𑍍𑌤𑌸𑍍𑌸𑍍𑌥𑌂 𑌤𑌵 𑌚𑌰𑌣𑌰𑌤𑍍𑌨𑌂 𑌮𑍃𑌗𑌯𑌤𑍇 ॥25॥

𑌮𑌨𑍋𑌗𑍇𑌹𑍇 𑌮𑍋𑌹𑍋𑌦𑍍𑌭𑌵𑌤𑌿𑌮𑌿𑌰𑌪𑍂𑌰𑍍𑌣𑍇 𑌮𑌮 𑌮𑍁𑌹𑍁𑌃

𑌦𑌰𑌿𑌦𑍍𑌰𑌾𑌣𑍀𑌕𑍁𑌰𑍍𑌵𑌨𑍍𑌦𑌿𑌨𑌕𑌰𑌸𑌹𑌸𑍍𑌰𑌾𑌣𑌿 𑌕𑌿𑌰𑌣𑍈𑌃 ।

𑌵𑌿𑌧𑌤𑍍𑌤𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑍃𑌮𑌰𑌤𑌮𑍋𑌵𑌞𑍍𑌚𑌨𑌚𑌣𑌃

𑌕𑍍𑌷𑌣𑌾𑌰𑍍𑌧𑌂 𑌸𑌾𑌨𑍍𑌨𑌿𑌧𑍍𑌯𑌂 𑌚𑌰𑌣𑌮𑌣𑌿𑌦𑍀𑌪𑍋 𑌜𑌨𑌨𑌿 𑌤𑍇 ॥26॥

𑌕𑌵𑍀𑌨𑌾𑌂 𑌚𑍇𑌤𑍋𑌵𑌨𑍍𑌨𑌖𑌰𑌰𑍁𑌚𑌿𑌸𑌮𑍍𑌪𑌰𑍍𑌕𑌿 𑌵𑌿𑌬𑍁𑌧-

𑌸𑍍𑌰𑌵𑌨𑍍𑌤𑍀𑌸𑍍𑌰𑍋𑌤𑍋𑌵𑌤𑍍𑌪𑌟𑍁𑌮𑍁𑌖𑌰𑌿𑌤𑌂 𑌹𑌂𑌸𑌕𑌰𑌵𑍈𑌃 ।

𑌦𑌿𑌨𑌾𑌰𑌮𑍍𑌭𑌶𑍍𑌰𑍀𑌵𑌨𑍍𑌨𑌿𑌯𑌤𑌮𑌰𑍁𑌣𑌚𑍍𑌛𑌾𑌯𑌸𑍁𑌭𑌗𑌂

𑌮𑌦𑌨𑍍𑌤𑌃 𑌕𑌾𑌮𑌾𑌕𑍍𑌷𑍍𑌯𑌾𑌃 𑌸𑍍𑌫𑍁𑌰𑌤𑍁 𑌪𑌦𑌪𑌙𑍍𑌕𑍇𑌰𑍁𑌹𑌯𑍁𑌗𑌮𑍍 ॥27॥

𑌸𑌦𑌾 𑌕𑌿𑌂 𑌸𑌮𑍍𑌪𑌰𑍍𑌕𑌾𑌤𑍍𑌪𑍍𑌰𑌕𑍃𑌤𑌿𑌕𑌠𑌿𑌨𑍈𑌰𑍍𑌨𑌾𑌕𑌿𑌮𑍁𑌕𑍁𑌟𑍈𑌃

𑌤𑌟𑍈𑌰𑍍𑌨𑍀𑌹𑌾𑌰𑌾𑌦𑍍𑌰𑍇𑌰𑌧𑌿𑌕𑌮𑌣𑍁𑌨𑌾 𑌯𑍋𑌗𑌿𑌮𑌨𑌸𑌾 ।

𑌵𑌿𑌭𑌿𑌨𑍍𑌤𑍇 𑌸𑌮𑍍𑌮𑍋𑌹𑌂 𑌶𑌿𑌶𑌿𑌰𑌯𑌤𑌿 𑌭𑌕𑍍𑌤𑌾𑌨𑌪𑌿 𑌦𑍃𑌶𑌾𑌮𑍍

𑌅𑌦𑍃𑌶𑍍𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌤𑍇 𑌪𑌾𑌦𑌯𑍁𑌗𑌲𑌮𑍍 ॥28॥

𑌪𑌵𑌿𑌤𑍍𑌰𑌾𑌭𑍍𑌯𑌾𑌮𑌮𑍍𑌬 𑌪𑍍𑌰𑌕𑍃𑌤𑌿𑌮𑍃𑌦𑍁𑌲𑌾𑌭𑍍𑌯𑌾𑌂 𑌤𑌵 𑌶𑌿𑌵𑍇

𑌪𑌦𑌾𑌭𑍍𑌯𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑌭𑌮𑌭𑌿𑌭𑍂𑌤𑍈𑌃 𑌸𑌚𑌕𑌿𑌤𑍈𑌃 ।

𑌪𑍍𑌰𑌵𑌾𑌲𑍈𑌰𑌮𑍍𑌭𑍋𑌜𑍈𑌰𑌪𑌿 𑌚 𑌵𑌨𑌵𑌾𑌸𑌵𑍍𑌰𑌤𑌦𑌶𑌾𑌃

𑌸𑌦𑍈𑌵𑌾𑌰𑌭𑍍𑌯𑌨𑍍𑌤𑍇 𑌪𑌰𑌿𑌚𑌰𑌿𑌤𑌨𑌾𑌨𑌾𑌦𑍍𑌵𑌿𑌜𑌗𑌣𑍈𑌃 ॥29॥

𑌚𑌿𑌰𑌾𑌦𑍍𑌦𑍃𑌶𑍍𑌯𑌾 𑌹𑌂𑌸𑍈𑌃 𑌕𑌥𑌮𑌪𑌿 𑌸𑌦𑌾 𑌹𑌂𑌸𑌸𑍁𑌲𑌭𑌂

𑌨𑌿𑌰𑌸𑍍𑌯𑌨𑍍𑌤𑍀 𑌜𑌾𑌡𑍍𑌯𑌂 𑌨𑌿𑌯𑌤𑌜𑌡𑌮𑌧𑍍𑌯𑍈𑌕𑌶𑌰𑌣𑌮𑍍 ।

𑌅𑌦𑍋𑌷𑌵𑍍𑌯𑌾𑌸𑌙𑍍𑌗𑌾 𑌸𑌤𑌤𑌮𑌪𑌿 𑌦𑍋𑌷𑌾𑌪𑍍𑌤𑌿𑌮𑌲𑌿𑌨𑌂

𑌪𑌯𑍋𑌜𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌰𑌿𑌹𑌸𑌤𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑍀 ॥30॥

𑌸𑍁𑌰𑌾𑌣𑌾𑌮𑌾𑌨𑌨𑍍𑌦𑌪𑍍𑌰𑌬𑌲𑌨𑌤𑌯𑌾 𑌮𑌣𑍍𑌡𑌨𑌤𑌯𑌾

𑌨𑌖𑍇𑌨𑍍𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌰𑍍𑌵𑌿𑌸𑍃𑌮𑌰𑌤𑌮𑌃𑌖𑌣𑍍𑌡𑌨𑌤𑌯𑌾 ।

𑌪𑌯𑍋𑌜𑌶𑍍𑌰𑍀𑌦𑍍𑌵𑍇𑌷𑌵𑍍𑌰𑌤𑌰𑌤𑌤𑌯𑌾 𑌤𑍍𑌵𑌚𑍍𑌚𑌰𑌣𑌯𑍋𑌃

𑌵𑌿𑌲𑌾𑌸𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑌿 𑌨𑍈𑌶𑌾𑌕𑌰𑌦𑌶𑌾𑌮𑍍 ॥31॥

𑌸𑌿𑌤𑌿𑌮𑍍𑌨𑌾 𑌕𑌾𑌨𑍍𑌤𑍀𑌨𑌾𑌂 𑌨𑌖𑌰𑌜𑌨𑍁𑌷𑌾𑌂 𑌪𑌾𑌦𑌨𑌲𑌿𑌨-

𑌚𑍍𑌛𑌵𑍀𑌨𑌾𑌂 𑌶𑍋𑌣𑌿𑌮𑍍𑌨𑌾 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌨𑌮𑌨𑍇 ।

𑌲𑌭𑌨𑍍𑌤𑍇 𑌮𑌨𑍍𑌦𑌾𑌰𑌗𑍍𑌰𑌥𑌿𑌤𑌨𑌵𑌬𑌨𑍍𑌧𑍂𑌕𑌕𑍁𑌸𑍁𑌮-

𑌸𑍍𑌰𑌜𑌾𑌂 𑌸𑌾𑌮𑍀𑌚𑍀𑌨𑍍𑌯𑌂 𑌸𑍁𑌰𑌪𑍁𑌰𑌪𑍁𑌰𑌨𑍍𑌧𑍍𑌰𑍀𑌕𑌚𑌭𑌰𑌾𑌃 ॥32॥

𑌸𑍍𑌫𑍁𑌰𑌨𑍍𑌮𑌧𑍍𑌯𑍇 𑌶𑍁𑌦𑍍𑌧𑍇 𑌨𑌖𑌕𑌿𑌰𑌣𑌦𑍁𑌗𑍍𑌧𑌾𑌬𑍍𑌧𑌿𑌪𑌯𑌸𑌾𑌂

𑌵𑌹𑌨𑍍𑌨𑌬𑍍𑌜𑌂 𑌚𑌕𑍍𑌰𑌂 𑌦𑌰𑌮𑌪𑌿 𑌚 𑌲𑍇𑌖𑌾𑌤𑍍𑌮𑌕𑌤𑌯𑌾 ।

𑌶𑍍𑌰𑌿𑌤𑍋 𑌮𑌾𑌤𑍍𑌸𑍍𑌯𑌂 𑌰𑍂𑌪𑌂 𑌶𑍍𑌰𑌿𑌯𑌮𑌪𑌿 𑌦𑌧𑌾𑌨𑍋 𑌨𑌿𑌰𑍁𑌪𑌮𑌾𑌂

𑌤𑍍𑌰𑌿𑌧𑌾𑌮𑌾 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌨𑌾𑌮𑌾 𑌵𑌿𑌜𑌯𑌤𑍇 ॥33॥

𑌨𑌖𑌶𑍍𑌰𑍀𑌸𑌨𑍍𑌨𑌦𑍍𑌧𑌸𑍍𑌤𑌬𑌕𑌨𑌿𑌚𑌿𑌤𑌃 𑌸𑍍𑌵𑍈𑌶𑍍𑌚 𑌕𑌿𑌰𑌣𑍈𑌃

𑌪𑌿𑌶𑌙𑍍𑌗𑍈𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌿𑌤𑌲𑌸𑌤𑍍𑌪𑌲𑍍𑌲𑌵𑌰𑍁𑌚𑌿𑌃 ।

𑌸𑌤𑌾𑌂 𑌗𑌮𑍍𑌯𑌃 𑌶𑌙𑍍𑌕𑍇 𑌸𑌕𑌲𑌫𑌲𑌦𑌾𑌤𑌾 𑌸𑍁𑌰𑌤𑌰𑍁𑌃

𑌤𑍍𑌵𑌦𑍀𑌯𑌃 𑌪𑌾𑌦𑍋𑌽𑌯𑌂 𑌤𑍁𑌹𑌿𑌨𑌗𑌿𑌰𑌿𑌰𑌾𑌜𑌨𑍍𑌯𑌤𑌨𑌯𑍇 ॥34॥

𑌵𑌷𑌟𑍍𑌕𑍁𑌰𑍍𑌵𑌨𑍍𑌮𑌾𑌞𑍍𑌜𑍀𑌰𑌕𑌲𑌕𑌲𑍈𑌃 𑌕𑌰𑍍𑌮𑌲𑌹𑌰𑍀-

𑌹𑌵𑍀𑌂𑌷𑌿 𑌪𑍍𑌰𑍗𑌦𑍍𑌦𑌣𑍍𑌡𑌂 𑌜𑍍𑌵𑌲𑌤𑌿 𑌪𑌰𑌮𑌜𑍍𑌞𑌾𑌨𑌦𑌹𑌨𑍇 ।

𑌮𑌹𑍀𑌯𑌾𑌨𑍍𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌮𑌹𑌸𑌿 𑌜𑍋𑌹𑍋𑌤𑌿 𑌸𑍁𑌧𑌿𑌯𑌾𑌂

𑌮𑌨𑍋𑌵𑍇𑌦𑍍𑌯𑌾𑌂 𑌮𑌾𑌤𑌸𑍍𑌤𑌵 𑌚𑌰𑌣𑌯𑌜𑍍𑌵𑌾 𑌗𑌿𑌰𑌿𑌸𑍁𑌤𑍇 ॥35॥

𑌮𑌹𑌾𑌮𑌨𑍍𑌤𑍍𑌰𑌂 𑌕𑌿𑌞𑍍𑌚𑌿𑌨𑍍𑌮𑌣𑌿𑌕𑌟𑌕𑌨𑌾𑌦𑍈𑌰𑍍𑌮𑍃𑌦𑍁 𑌜𑌪𑌨𑍍

𑌕𑍍𑌷𑌿𑌪𑌨𑍍𑌦𑌿𑌕𑍍𑌷𑍁 𑌸𑍍𑌵𑌚𑍍𑌛𑌂 𑌨𑌖𑌰𑍁𑌚𑌿𑌮𑌯𑌂 𑌭𑌾𑌸𑍍𑌮𑌨𑌰𑌜𑌃 ।

𑌨𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌪𑌟𑍁𑌰𑌚𑍍𑌚𑌾𑌟𑍍𑌯 𑌮𑌮𑌤𑌾-

𑌪𑌿𑌶𑌾𑌚𑍀𑌂 𑌪𑌾𑌦𑍋𑌽𑌯𑌂 𑌪𑍍𑌰𑌕𑌟𑌯𑌤𑌿 𑌤𑍇 𑌮𑌾𑌨𑍍𑌤𑍍𑌰𑌿𑌕𑌦𑌶𑌾𑌮𑍍 ॥36॥

𑌉𑌦𑍀𑌤𑍇 𑌬𑍋𑌧𑍇𑌨𑍍𑌦𑍗 𑌤𑌮𑌸𑌿 𑌨𑌿𑌤𑌰𑌾𑌂 𑌜𑌗𑍍𑌮𑍁𑌷𑌿 𑌦𑌶𑌾𑌂

𑌦𑌰𑌿𑌦𑍍𑌰𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌮𑌨𑍁𑌰𑌾𑌗𑌂 𑌵𑌿𑌦𑌧𑌤𑍀 ।

𑌸𑌿𑌤𑍇𑌨𑌾𑌚𑍍𑌛𑌾𑌦𑍍𑌯𑌾𑌙𑍍𑌗𑌂 𑌨𑌖𑌰𑍁𑌚𑌿𑌪𑌟𑍇𑌨𑌾𑌙𑍍𑌘𑍍𑌰𑌿𑌯𑍁𑌗𑌲𑍀-

𑌪𑍁𑌰𑌨𑍍𑌧𑍍𑌰𑍀 𑌤𑍇 𑌮𑌾𑌤𑌃 𑌸𑍍𑌵𑌯𑌮𑌭𑌿𑌸𑌰𑌤𑍍𑌯𑍇𑌵 𑌹𑍃𑌦𑌯𑌮𑍍 ॥37॥

𑌦𑌿𑌨𑌾𑌰𑌮𑍍𑌭𑌃 𑌸𑌮𑍍𑌪𑌨𑍍𑌨𑌲𑌿𑌨𑌵𑌿𑌪𑌿𑌨𑌾𑌨𑌾𑌮𑌭𑌿𑌨𑌵𑍋

𑌵𑌿𑌕𑌾𑌸𑍋 𑌵𑌾𑌸𑌨𑍍𑌤𑌃 𑌸𑍁𑌕𑌵𑌿𑌪𑌿𑌕𑌲𑍋𑌕𑌸𑍍𑌯 𑌨𑌿𑌯𑌤𑌃 ।

𑌪𑍍𑌰𑌦𑍋𑌷𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌪𑌰𑌮𑌜𑍍𑌞𑌾𑌨𑌶𑌶𑌿𑌨-

𑌶𑍍𑌚𑌕𑌾𑌸𑍍𑌤𑌿 𑌤𑍍𑌵𑌤𑍍𑌪𑌾𑌦𑌸𑍍𑌮𑌰𑌣𑌮𑌹𑌿𑌮𑌾 𑌶𑍈𑌲𑌤𑌨𑌯𑍇 ॥38॥

𑌧𑍃𑌤𑌚𑍍𑌛𑌾𑌯𑌂 𑌨𑌿𑌤𑍍𑌯𑌂 𑌸𑌰𑌸𑌿𑌰𑍁𑌹𑌮𑍈𑌤𑍍𑌰𑍀𑌪𑌰𑌿𑌚𑌿𑌤𑌂

𑌨𑌿𑌧𑌾𑌨𑌂 𑌦𑍀𑌪𑍍𑌤𑍀𑌨𑌾𑌂 𑌨𑌿𑌖𑌿𑌲𑌜𑌗𑌤𑌾𑌂 𑌬𑍋𑌧𑌜𑌨𑌕𑌮𑍍 ।

𑌮𑍁𑌮𑍁𑌕𑍍𑌷𑍂𑌣𑌾𑌂 𑌮𑌾𑌰𑍍𑌗𑌪𑍍𑌰𑌥𑌨𑌪𑌟𑍁 𑌕𑌾𑌮𑌾𑌕𑍍𑌷𑌿 𑌪𑌦𑌵𑍀𑌂

𑌪𑌦𑌂 𑌤𑍇 𑌪𑌾𑌤𑌙𑍍𑌗𑍀𑌂 𑌪𑌰𑌿𑌕𑌲𑌯𑌤𑍇 𑌪𑌰𑍍𑌵𑌤𑌸𑍁𑌤𑍇 ॥39॥

𑌶𑌨𑍈𑌸𑍍𑌤𑍀𑌰𑍍𑌤𑍍𑌵𑌾 𑌮𑍋𑌹𑌾𑌮𑍍𑌬𑍁𑌧𑌿𑌮𑌥 𑌸𑌮𑌾𑌰𑍋𑌢𑍁𑌮𑌨𑌸𑌃

𑌕𑍍𑌰𑌮𑌾𑌤𑍍𑌕𑍈𑌵𑌲𑍍𑌯𑌾𑌖𑍍𑌯𑌾𑌂 𑌸𑍁𑌕𑍃𑌤𑌿𑌸𑍁𑌲𑌭𑌾𑌂 𑌸𑍗𑌧𑌵𑌲𑌭𑍀𑌮𑍍 ।

𑌲𑌭𑌨𑍍𑌤𑍇 𑌨𑌿𑌃𑌶𑍍𑌰𑍇𑌣𑍀𑌮𑌿𑌵 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑌂

𑌪𑍁𑌰𑌶𑍍𑌚𑌰𑍍𑌯𑌾𑌭𑌿𑌸𑍍𑌤𑍇 𑌪𑍁𑌰𑌮𑌥𑌨𑌸𑍀𑌮𑌨𑍍𑌤𑌿𑌨𑌿 𑌜𑌨𑌾𑌃 ॥40॥

𑌪𑍍𑌰𑌚𑌣𑍍𑌡𑌾𑌰𑍍𑌤𑌿𑌕𑍍𑌷𑍋𑌭𑌪𑍍𑌰𑌮𑌥𑌨𑌕𑍃𑌤𑍇 𑌪𑍍𑌰𑌾𑌤𑌿𑌭𑌸𑌰𑌿-

𑌤𑍍𑌪𑍍𑌰𑌵𑌾𑌹𑌪𑍍𑌰𑍋𑌦𑍍𑌦𑌣𑍍𑌡𑍀𑌕𑌰𑌣𑌜𑌲𑌦𑌾𑌯 𑌪𑍍𑌰𑌣𑌮𑌤𑌾𑌮𑍍 ।

𑌪𑍍𑌰𑌦𑍀𑌪𑌾𑌯 𑌪𑍍𑌰𑍗𑌢𑍇 𑌭𑌵𑌤𑌮𑌸𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣-

𑌪𑍍𑌰𑌸𑌾𑌦𑍗𑌨𑍍𑌮𑍁𑌖𑍍𑌯𑌾𑌯 𑌸𑍍𑌪𑍃𑌹𑌯𑌤𑌿 𑌜𑌨𑍋𑌽𑌯𑌂 𑌜𑌨𑌨𑌿 𑌤𑍇 ॥41॥

𑌮𑌰𑍁𑌦𑍍𑌭𑌿𑌃 𑌸𑌂𑌸𑍇𑌵𑍍𑌯𑌾 𑌸𑌤𑌤𑌮𑌪𑌿 𑌚𑌾𑌞𑍍𑌚𑌲𑍍𑌯𑌰𑌹𑌿𑌤𑌾

𑌸𑌦𑌾𑌰𑍁𑌣𑍍𑌯𑌂 𑌯𑌾𑌨𑍍𑌤𑍀 𑌪𑌰𑌿𑌣𑌤𑌿𑌦𑌰𑌿𑌦𑍍𑌰𑌾𑌣𑌸𑍁𑌷𑌮𑌾 ।

𑌗𑍁𑌣𑍋𑌤𑍍𑌕𑌰𑍍𑌷𑌾𑌨𑍍𑌮𑌾𑌞𑍍𑌜𑍀𑌰𑌕𑌕𑌲𑌕𑌲𑍈𑌸𑍍𑌤𑌰𑍍𑌜𑌨𑌪𑌟𑍁𑌃

𑌪𑍍𑌰𑌵𑌾𑌲𑌂 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌰𑌿𑌹𑌸𑌤𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑍀 ॥42॥

𑌜𑌗𑌦𑍍𑌰𑌕𑍍𑌷𑌾𑌦𑌕𑍍𑌷𑌾 𑌜𑌲𑌜𑌰𑍁𑌚𑌿𑌶𑌿𑌕𑍍𑌷𑌾𑌪𑌟𑍁𑌤𑌰𑌾

𑌸𑌮𑍈𑌰𑍍𑌨𑌮𑍍𑌯𑌾 𑌰𑌮𑍍𑌯𑌾 𑌸𑌤𑌤𑌮𑌭𑌿𑌗𑌮𑍍𑌯𑌾 𑌬𑍁𑌧𑌜𑌨𑍈𑌃 ।

𑌦𑍍𑌵𑌯𑍀 𑌲𑍀𑌲𑌾𑌲𑍋𑌲𑌾 𑌶𑍍𑌰𑍁𑌤𑌿𑌷𑍁 𑌸𑍁𑌰𑌪𑌾𑌲𑌾𑌦𑌿𑌮𑍁𑌕𑍁𑌟𑍀-

𑌤𑌟𑍀𑌸𑍀𑌮𑌾𑌧𑌾𑌮𑌾 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋𑌃 ॥43॥

𑌗𑌿𑌰𑌾𑌂 𑌦𑍂𑌰𑍗 𑌚𑍋𑌰𑍗 𑌜𑌡𑌿𑌮𑌤𑌿𑌮𑌿𑌰𑌾𑌣𑌾𑌂 𑌕𑍃𑌤𑌜𑌗-

𑌤𑍍𑌪𑌰𑌿𑌤𑍍𑌰𑌾𑌣𑍗 𑌶𑍋𑌣𑍗 𑌮𑍁𑌨𑌿𑌹𑍃𑌦𑌯𑌲𑍀𑌲𑍈𑌕𑌨𑌿𑌪𑍁𑌣𑍗 ।

𑌨𑌖𑍈𑌃 𑌸𑍍𑌮𑍇𑌰𑍗 𑌸𑌾𑌰𑍗 𑌨𑌿𑌗𑌮𑌵𑌚𑌸𑌾𑌂 𑌖𑌣𑍍𑌡𑌿𑌤𑌭𑌵-

𑌗𑍍𑌰𑌹𑍋𑌨𑍍𑌮𑌾𑌦𑍗 𑌪𑌾𑌦𑍗 𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌕𑌲𑌯𑍇 ॥44॥

𑌅𑌵𑌿𑌶𑍍𑌰𑌾𑌨𑍍𑌤𑌂 𑌪𑌙𑍍𑌕𑌂 𑌯𑌦𑌪𑌿 𑌕𑌲𑌯𑌨𑍍𑌯𑌾𑌵𑌕𑌮𑌯𑌂

𑌨𑌿𑌰𑌸𑍍𑌯𑌨𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌣𑌮𑌨𑌜𑍁𑌷𑌾𑌂 𑌪𑌙𑍍𑌕𑌮𑌖𑌿𑌲𑌮𑍍 ।

𑌤𑍁𑌲𑌾𑌕𑍋𑌟𑌿𑌦𑍍𑌵𑌨𑍍𑌦𑌂 𑌦𑌧𑌦𑌪𑌿 𑌚 𑌗𑌚𑍍𑌛𑌨𑍍𑌨𑌤𑍁𑌲𑌤𑌾𑌂

𑌗𑌿𑌰𑌾𑌂 𑌮𑌾𑌰𑍍𑌗𑌂 𑌪𑌾𑌦𑍋 𑌗𑌿𑌰𑌿𑌵𑌰𑌸𑍁𑌤𑍇 𑌲𑌙𑍍𑌘𑌯𑌤𑌿 𑌤𑍇 ॥45॥

𑌪𑍍𑌰𑌵𑌾𑌲𑌂 𑌸𑌵𑍍𑌰𑍀𑌲𑌂 𑌵𑌿𑌪𑌿𑌨𑌵𑌿𑌵𑌰𑍇 𑌵𑍇𑌪𑌯𑌤𑌿 𑌯𑌾

𑌸𑍍𑌫𑍁𑌰𑌲𑍍𑌲𑍀𑌲𑌂 𑌬𑌾𑌲𑌾𑌤𑌪𑌮𑌧𑌿𑌕𑌬𑌾𑌲𑌂 𑌵𑌦𑌤𑌿 𑌯𑌾 ।

𑌰𑍁𑌚𑌿𑌂 𑌸𑌾𑌨𑍍𑌧𑍍𑌯𑌾𑌂 𑌵𑌨𑍍𑌧𑍍𑌯𑌾𑌂 𑌵𑌿𑌰𑌚𑌯𑌤𑌿 𑌯𑌾 𑌵𑌰𑍍𑌧𑌯𑌤𑍁 𑌸𑌾

𑌶𑌿𑌵𑌂 𑌮𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌪𑌾𑌟𑌲𑍍𑌯𑌲𑌹𑌰𑍀 ॥46॥

𑌕𑌿𑌰𑌞𑍍𑌜𑍍𑌯𑍋𑌤𑍍𑌸𑍍𑌨𑌾𑌰𑍀𑌤𑌿𑌂 𑌨𑌖𑌮𑍁𑌖𑌰𑍁𑌚𑌾 𑌹𑌂𑌸𑌮𑌨𑌸𑌾𑌂

𑌵𑌿𑌤𑌨𑍍𑌵𑌾𑌨𑌃 𑌪𑍍𑌰𑍀𑌤𑌿𑌂 𑌵𑌿𑌕𑌚𑌤𑌰𑍁𑌣𑌾𑌮𑍍𑌭𑍋𑌰𑍁𑌹𑌰𑍁𑌚𑌿𑌃 ।

𑌪𑍍𑌰𑌕𑌾𑌶𑌃 𑌶𑍍𑌰𑍀𑌪𑌾𑌦𑌸𑍍𑌤𑌵 𑌜𑌨𑌨𑌿 𑌕𑌾𑌮𑌾𑌕𑍍𑌷𑌿 𑌤𑌨𑍁𑌤𑍇

𑌶𑌰𑌤𑍍𑌕𑌾𑌲𑌪𑍍𑌰𑍗𑌢𑌿𑌂 𑌶𑌶𑌿𑌶𑌕𑌲𑌚𑍂𑌡𑌪𑍍𑌰𑌿𑌯𑌤𑌮𑍇 ॥47॥

𑌨𑌖𑌾𑌙𑍍𑌕𑍂𑌰𑌸𑍍𑌮𑍇𑌰𑌦𑍍𑌯𑍁𑌤𑌿𑌵𑌿𑌮𑌲𑌗𑌙𑍍𑌗𑌾𑌮𑍍𑌭𑌸𑌿 𑌸𑍁𑌖𑌂

𑌕𑍃𑌤𑌸𑍍𑌨𑌾𑌨𑌂 𑌜𑍍𑌞𑌾𑌨𑌾𑌮𑍃𑌤𑌮𑌮𑌲𑌮𑌾𑌸𑍍𑌵𑌾𑌦𑍍𑌯 𑌨𑌿𑌯𑌤𑌮𑍍 ।

𑌉𑌦𑌞𑍍𑌚𑌨𑍍𑌮𑌞𑍍𑌜𑍀𑌰𑌸𑍍𑌫𑍁𑌰𑌣𑌮𑌣𑌿𑌦𑍀𑌪𑍇 𑌮𑌮 𑌮𑌨𑍋

𑌮𑌨𑍋𑌜𑍍𑌞𑍇 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌮𑌣𑌿𑌹𑌰𑍍𑌮𑍍𑌯𑍇 𑌵𑌿𑌹𑌰𑌤𑌾𑌮𑍍 ॥48॥

𑌭𑌵𑌾𑌮𑍍𑌭𑍋𑌧𑍗 𑌨𑍗𑌕𑌾𑌂 𑌜𑌡𑌿𑌮𑌵𑌿𑌪𑌿𑌨𑍇 𑌪𑌾𑌵𑌕𑌶𑌿𑌖𑌾-

𑌮𑌮𑌰𑍍𑌤𑍍𑌯𑍇𑌨𑍍𑌦𑍍𑌰𑌾𑌦𑍀𑌨𑌾𑌮𑌧𑌿𑌮𑍁𑌕𑍁𑌟𑌮𑍁𑌤𑍍𑌤𑌂𑌸𑌕𑌲𑌿𑌕𑌾𑌮𑍍 ।

𑌜𑌗𑌤𑍍𑌤𑌾𑌪𑍇 𑌜𑍍𑌯𑍋𑌤𑍍𑌸𑍍𑌨𑌾𑌮𑌕𑍃𑌤𑌕𑌵𑌚𑌃𑌪𑌞𑍍𑌜𑌰𑌪𑍁𑌟𑍇

𑌶𑍁𑌕𑌸𑍍𑌤𑍍𑌰𑍀𑌂 𑌕𑌾𑌮𑌾𑌕𑍍𑌷𑍍𑌯𑌾 𑌮𑌨𑌸𑌿 𑌕𑌲𑌯𑍇 𑌪𑌾𑌦𑌯𑍁𑌗𑌲𑍀𑌮𑍍 ॥49॥

𑌪𑌰𑌤𑍍𑌮𑌪𑍍𑌰𑌾𑌕𑌾𑌶𑍍𑌯𑌪𑍍𑌰𑌤𑌿𑌫𑌲𑌨𑌚𑍁𑌞𑍍𑌚𑍁𑌃 𑌪𑍍𑌰𑌣𑌮𑌤𑌾𑌂

𑌮𑌨𑍋𑌜𑍍𑌞𑌸𑍍𑌤𑍍𑌵𑌤𑍍𑌪𑌾𑌦𑍋 𑌮𑌣𑌿𑌮𑍁𑌕𑍁𑌰𑌮𑍁𑌦𑍍𑌰𑌾𑌂 𑌕𑌲𑌯𑌤𑍇 ।

𑌯𑌦𑍀𑌯𑌾𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌮𑌸𑍃𑌣𑌾𑌃 𑌶𑍋𑌧𑌕𑌦𑌶𑌾𑌂

𑌵𑌿𑌧𑌾𑌤𑍁𑌂 𑌚𑍇𑌷𑍍𑌠𑌨𑍍𑌤𑍇 𑌬𑌲𑌰𑌿𑌪𑍁𑌵𑌧𑍂𑌟𑍀𑌕𑌚𑌭𑌰𑌾𑌃 ॥50॥

𑌅𑌵𑌿𑌶𑍍𑌰𑌾𑌨𑍍𑌤𑌂 𑌤𑌿𑌷𑍍𑌠𑌨𑍍𑌨𑌕𑍃𑌤𑌕𑌵𑌚𑌃𑌕𑌨𑍍𑌦𑌰𑌪𑍁𑌟𑍀-

𑌕𑍁𑌟𑍀𑌰𑌾𑌨𑍍𑌤𑌃 𑌪𑍍𑌰𑍗𑌢𑌂 𑌨𑌖𑌰𑍁𑌚𑌿𑌸𑌟𑌾𑌲𑍀𑌂 𑌪𑍍𑌰𑌕𑌟𑌯𑌨𑍍 ।

𑌪𑍍𑌰𑌚𑌣𑍍𑌡𑌂 𑌖𑌣𑍍𑌡𑌤𑍍𑌵𑌂 𑌨𑌯𑌤𑍁 𑌮𑌮 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾

𑌤𑌮𑍋𑌵𑍇𑌤𑌣𑍍𑌡𑍇𑌨𑍍𑌦𑍍𑌰𑌂 𑌤𑌵 𑌚𑌰𑌣𑌕𑌣𑍍𑌠𑍀𑌰𑌵𑌪𑌤𑌿𑌃 ॥51॥

𑌪𑍁𑌰𑌸𑍍𑌤𑌾𑌤𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌰𑌸𑌮𑌾𑌖𑌣𑍍𑌡𑌲𑌪𑍁𑌰𑍀-

𑌪𑍁𑌰𑌨𑍍𑌧𑍍𑌰𑍀𑌣𑌾𑌂 𑌲𑌾𑌸𑍍𑌯𑌂 𑌤𑌵 𑌲𑌲𑌿𑌤𑌮𑌾𑌲𑍋𑌕𑍍𑌯 𑌶𑌨𑌕𑍈𑌃 ।

𑌨𑌖𑌶𑍍𑌰𑍀𑌭𑌿𑌃 𑌸𑍍𑌮𑍇𑌰𑌾 𑌬𑌹𑍁 𑌵𑌿𑌤𑌨𑍁𑌤𑍇 𑌨𑍂𑌪𑍁𑌰𑌰𑌵𑍈-

𑌶𑍍𑌚𑌮𑌤𑍍𑌕𑍃𑌤𑍍𑌯𑌾 𑌶𑌙𑍍𑌕𑍇 𑌚𑌰𑌣𑌯𑍁𑌗𑌲𑍀 𑌚𑌾𑌟𑍁𑌰𑌚𑌨𑌾𑌃 ॥52॥

𑌸𑌰𑍋𑌜𑌂 𑌨𑌿𑌨𑍍𑌦𑌨𑍍𑌤𑍀 𑌨𑌖𑌕𑌿𑌰𑌣𑌕𑌰𑍍𑌪𑍂𑌰𑌶𑌿𑌶𑌿𑌰𑌾

𑌨𑌿𑌷𑌿𑌕𑍍𑌤𑌾 𑌮𑌾𑌰𑌾𑌰𑍇𑌰𑍍𑌮𑍁𑌕𑍁𑌟𑌶𑌶𑌿𑌰𑍇𑌖𑌾𑌹𑌿𑌮𑌜𑌲𑍈𑌃 ।

𑌸𑍍𑌫𑍁𑌰𑌨𑍍𑌤𑍀 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌰𑍁𑌚𑌿𑌮𑌯𑍇 𑌪𑌲𑍍𑌲𑌵𑌚𑌯𑍇

𑌤𑌵𑌾𑌧𑌤𑍍𑌤𑍇 𑌮𑍈𑌤𑍍𑌰𑍀𑌂 𑌪𑌥𑌿𑌕𑌸𑍁𑌦𑍃𑌶𑌾 𑌪𑌾𑌦𑌯𑍁𑌗𑌲𑍀 ॥53॥

𑌨𑌤𑌾𑌨𑌾𑌂 𑌸𑌮𑍍𑌪𑌤𑍍𑌤𑍇𑌰𑌨𑌵𑌰𑌤𑌮𑌾𑌕𑌰𑍍𑌷𑌣𑌜𑌪𑌃

𑌪𑍍𑌰𑌰𑍋𑌹𑌤𑍍𑌸𑌂𑌸𑌾𑌰𑌪𑍍𑌰𑌸𑌰𑌗𑌰𑌿𑌮𑌸𑍍𑌤𑌮𑍍𑌭𑌨𑌜𑌪𑌃 ।

𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌹𑌰𑌮𑌨𑍋𑌮𑍋𑌹𑌨𑌜𑌪𑌃

𑌪𑌟𑍀𑌯𑌾𑌨𑍍𑌨𑌃 𑌪𑌾𑌯𑌾𑌤𑍍𑌪𑌦𑌨𑌲𑌿𑌨𑌮𑌞𑍍𑌜𑍀𑌰𑌨𑌿𑌨𑌦𑌃 ॥54॥

𑌵𑌿𑌤𑌨𑍍𑌵𑍀𑌥𑌾 𑌨𑌾𑌥𑍇 𑌮𑌮 𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌕𑍃𑌪𑌯𑌾

𑌪𑌦𑌾𑌮𑍍𑌭𑍋𑌜𑌨𑍍𑌯𑌾𑌸𑌂 𑌪𑌶𑍁𑌪𑌰𑌿𑌬𑍃𑌢𑌪𑍍𑌰𑌾𑌣𑌦𑌯𑌿𑌤𑍇 ।

𑌪𑌿𑌬𑌨𑍍𑌤𑍋 𑌯𑌨𑍍𑌮𑍁𑌦𑍍𑌰𑌾𑌂 𑌪𑍍𑌰𑌕𑌟𑌮𑍁𑌪𑌕𑌮𑍍𑌪𑌾𑌪𑌰𑌿𑌸𑌰𑌂

𑌦𑍃𑌶𑌾 𑌨𑌾𑌨𑌨𑍍𑌦𑍍𑌯𑌨𑍍𑌤𑍇 𑌨𑌲𑌿𑌨𑌭𑌵𑌨𑌾𑌰𑌾𑌯𑌣𑌮𑍁𑌖𑌾𑌃 ॥55॥

𑌪𑍍𑌰𑌣𑌾𑌮𑍋𑌦𑍍𑌯𑌦𑍍𑌬𑍃𑌨𑍍𑌦𑌾𑌰𑌮𑍁𑌕𑍁𑌟𑌮𑌨𑍍𑌦𑌾𑌰𑌕𑌲𑌿𑌕𑌾-

𑌵𑌿𑌲𑍋𑌲𑌲𑍍𑌲𑍋𑌲𑌮𑍍𑌬𑌪𑍍𑌰𑌕𑌰𑌮𑌯𑌧𑍂𑌮𑌪𑍍𑌰𑌚𑍁𑌰𑌿𑌮𑌾 ।

𑌪𑍍𑌰𑌦𑍀𑌪𑍍𑌤𑌃 𑌪𑌾𑌦𑌾𑌬𑍍𑌜𑌦𑍍𑌯𑍁𑌤𑌿𑌵𑌿𑌤𑌤𑌿𑌪𑌾𑌟𑌲𑍍𑌯𑌲𑌹𑌰𑍀-

𑌕𑍃𑌶𑌾𑌨𑍁𑌃 𑌕𑌾𑌮𑌾𑌕𑍍𑌷𑍍𑌯𑌾 𑌮𑌮 𑌦𑌹𑌤𑍁 𑌸𑌂𑌸𑌾𑌰𑌵𑌿𑌪𑌿𑌨𑌮𑍍 ॥56॥

𑌵𑌲𑌕𑍍𑌷𑌶𑍍𑌰𑍀𑌰𑍃𑌕𑍍𑌷𑌾𑌧𑌿𑌪𑌶𑌿𑌶𑍁𑌸𑌦𑍃𑌕𑍍𑌷𑍈𑌸𑍍𑌤𑌵 𑌨𑌖𑍈𑌃

𑌜𑌿𑌘𑍃𑌕𑍍𑌷𑍁𑌰𑍍𑌦𑌕𑍍𑌷𑌤𑍍𑌵𑌂 𑌸𑌰𑌸𑌿𑌰𑍁𑌹𑌭𑌿𑌕𑍍𑌷𑍁𑌤𑍍𑌵𑌕𑌰𑌣𑍇 ।

𑌕𑍍𑌷𑌣𑌾𑌨𑍍𑌮𑍇 𑌕𑌾𑌮𑌾𑌕𑍍𑌷𑌿 𑌕𑍍𑌷𑌪𑌿𑌤𑌭𑌵𑌸𑌙𑍍𑌕𑍍𑌷𑍋𑌭𑌗𑌰𑌿𑌮𑌾

𑌵𑌚𑍋𑌵𑍈𑌚𑌕𑍍𑌷𑌨𑍍𑌯𑌂 𑌚𑌰𑌣𑌯𑍁𑌗𑌲𑍀 𑌪𑌕𑍍𑌷𑍍𑌮𑌲𑌯𑌤𑌾𑌤𑍍 ॥57॥

𑌸𑌮𑌨𑍍𑌤𑌾𑌤𑍍𑌕𑌾𑌮𑌾𑌕𑍍𑌷𑌿 𑌕𑍍𑌷𑌤𑌤𑌿𑌮𑌿𑌰𑌸𑌨𑍍𑌤𑌾𑌨𑌸𑍁𑌭𑌗𑌾𑌨𑍍

𑌅𑌨𑌨𑍍𑌤𑌾𑌭𑌿𑌰𑍍𑌭𑌾𑌭𑌿𑌰𑍍𑌦𑌿𑌨𑌮𑌨𑍁 𑌦𑌿𑌗𑌨𑍍𑌤𑌾𑌨𑍍𑌵𑌿𑌰𑌚𑌯𑌨𑍍 ।

𑌅𑌹𑌨𑍍𑌤𑌾𑌯𑌾 𑌹𑌨𑍍𑌤𑌾 𑌮𑌮 𑌜𑌡𑌿𑌮𑌦𑌨𑍍𑌤𑌾𑌵𑌲𑌹𑌰𑌿𑌃

𑌵𑌿𑌭𑌿𑌨𑍍𑌤𑌾𑌂 𑌸𑌨𑍍𑌤𑌾𑌪𑌂 𑌤𑌵 𑌚𑌰𑌣𑌚𑌿𑌨𑍍𑌤𑌾𑌮𑌣𑌿𑌰𑌸𑍗 ॥58॥

𑌦𑌧𑌾𑌨𑍋 𑌭𑌾𑌸𑍍𑌵𑌤𑍍𑌤𑌾𑌮𑌮𑍃𑌤𑌨𑌿𑌲𑌯𑍋 𑌲𑍋𑌹𑌿𑌤𑌵𑌪𑍁𑌃

𑌵𑌿𑌨𑌮𑍍𑌰𑌾𑌣𑌾𑌂 𑌸𑍗𑌮𑍍𑌯𑍋 𑌗𑍁𑌰𑍁𑌰𑌪𑌿 𑌕𑌵𑌿𑌤𑍍𑌵𑌂 𑌚 𑌕𑌲𑌯𑌨𑍍 ।

𑌗𑌤𑍗 𑌮𑌨𑍍𑌦𑍋 𑌗𑌙𑍍𑌗𑌾𑌧𑌰𑌮𑌹𑌿𑌷𑌿 𑌕𑌾𑌮𑌾𑌕𑍍𑌷𑌿 𑌭𑌜𑌤𑌾𑌂

𑌤𑌮𑌃𑌕𑍇𑌤𑍁𑌰𑍍𑌮𑌾𑌤𑌸𑍍𑌤𑌵 𑌚𑌰𑌣𑌪𑌦𑍍𑌮𑍋 𑌵𑌿𑌜𑌯𑌤𑍇 ॥59॥

𑌨𑌯𑌨𑍍𑌤𑍀𑌂 𑌦𑌾𑌸𑌤𑍍𑌵𑌂 𑌨𑌲𑌿𑌨𑌭𑌵𑌮𑍁𑌖𑍍𑌯𑌾𑌨𑌸𑍁𑌲𑌭-

𑌪𑍍𑌰𑌦𑌾𑌨𑌾𑌦𑍍𑌦𑍀𑌨𑌾𑌨𑌾𑌮𑌮𑌰𑌤𑌰𑍁𑌦𑍗𑌰𑍍𑌭𑌾𑌗𑍍𑌯𑌜𑌨𑌨𑍀𑌮𑍍 ।

𑌜𑌗𑌜𑍍𑌜𑌨𑍍𑌮𑌕𑍍𑌷𑍇𑌮𑌕𑍍𑌷𑌯𑌵𑌿𑌧𑌿𑌷𑍁 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋-

𑌰𑍍𑌧𑍁𑌰𑍀𑌣𑌾𑌮𑍀𑌷𑍍𑌟𑍇 𑌕𑌰𑌸𑍍𑌤𑌵 𑌭𑌣𑌿𑌤𑍁𑌮𑌾𑌹𑍋𑌪𑍁𑌰𑍁𑌷𑌿𑌕𑌾𑌮𑍍 ॥60॥

𑌜𑌨𑍋𑌽𑌯𑌂 𑌸𑌨𑍍𑌤𑌪𑍍𑌤𑍋 𑌜𑌨𑌨𑌿 𑌭𑌵𑌚𑌣𑍍𑌡𑌾𑌂𑌶𑍁𑌕𑌿𑌰𑌣𑍈𑌃

𑌅𑌲𑌬𑍍𑌧𑌵𑍈𑌕𑌂 𑌶𑍀𑌤𑌂 𑌕𑌣𑌮𑌪𑌿 𑌪𑌰𑌜𑍍𑌞𑌾𑌨𑌪𑌯𑌸𑌃 ।

𑌤𑌮𑍋𑌮𑌾𑌰𑍍𑌗𑍇 𑌪𑌾𑌨𑍍𑌥𑌸𑍍𑌤𑌵 𑌝𑌟𑌿𑌤𑌿 𑌕𑌾𑌮𑌾𑌕𑍍𑌷𑌿 𑌶𑌿𑌶𑌿𑌰𑌾𑌂

𑌪𑌦𑌾𑌮𑍍𑌭𑍋𑌜𑌚𑍍𑌛𑌾𑌯𑌾𑌂 𑌪𑌰𑌮𑌶𑌿𑌵𑌜𑌾𑌯𑍇 𑌮𑍃𑌗𑌯𑌤𑍇 ॥61॥

𑌜𑌯𑌤𑍍𑌯𑌮𑍍𑌬 𑌶𑍍𑌰𑍀𑌮𑌨𑍍𑌨𑌖𑌕𑌿𑌰𑌣𑌚𑍀𑌨𑌾𑌂𑌶𑍁𑌕𑌮𑌯𑌂

𑌵𑌿𑌤𑌾𑌨𑌂 𑌬𑌿𑌭𑍍𑌰𑌾𑌣𑍇 𑌸𑍁𑌰𑌮𑍁𑌕𑍁𑌟𑌸𑌙𑍍𑌘𑌟𑍍𑌟𑌮𑌸𑍃𑌣𑍇 ।

𑌨𑌿𑌜𑌾𑌰𑍁𑌣𑍍𑌯𑌕𑍍𑌷𑍗𑌮𑌾𑌸𑍍𑌤𑌰𑌣𑌵𑌤𑌿 𑌕𑌾𑌮𑌾𑌕𑍍𑌷𑌿 𑌸𑍁𑌲𑌭𑌾

𑌬𑍁𑌧𑍈𑌃 𑌸𑌂𑌵𑌿𑌨𑍍𑌨𑌾𑌰𑍀 𑌤𑌵 𑌚𑌰𑌣𑌮𑌾𑌣𑌿𑌕𑍍𑌯𑌭𑌵𑌨𑍇 ॥62॥

𑌪𑍍𑌰𑌤𑍀𑌮𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌤𑌰𑍁𑌣𑌾𑌦𑌿𑌤𑍍𑌯𑌕𑌿𑌰𑌣-

𑌶𑍍𑌰𑌿𑌯𑍋 𑌮𑍂𑌲𑌦𑍍𑌰𑌵𑍍𑌯𑌂 𑌤𑌵 𑌚𑌰𑌣𑌮𑌦𑍍𑌰𑍀𑌨𑍍𑌦𑍍𑌰𑌤𑌨𑌯𑍇 ।

𑌸𑍁𑌰𑍇𑌨𑍍𑌦𑍍𑌰𑌾𑌶𑌾𑌮𑌾𑌪𑍂𑌰𑌯𑌤𑌿 𑌯𑌦𑌸𑍗 𑌧𑍍𑌵𑌾𑌨𑍍𑌤𑌮𑌖𑌿𑌲𑌂

𑌧𑍁𑌨𑍀𑌤𑍇 𑌦𑌿𑌗𑍍𑌭𑌾𑌗𑌾𑌨𑌪𑌿 𑌚 𑌮𑌹𑌸𑌾 𑌪𑌾𑌟𑌲𑌯𑌤𑍇 ॥63॥

𑌮𑌹𑌾𑌭𑌾𑌷𑍍𑌯𑌵𑍍𑌯𑌾𑌖𑍍𑌯𑌾𑌪𑌟𑍁𑌶𑌯𑌨𑌮𑌾𑌰𑍋𑌪𑌯𑌤𑌿 𑌵𑌾

𑌸𑍍𑌮𑌰𑌵𑍍𑌯𑌾𑌪𑌾𑌰𑍇𑌰𑍍𑌷𑍍𑌯𑌾𑌪𑌿𑌶𑍁𑌨𑌨𑌿𑌟𑌿𑌲𑌂 𑌕𑌾𑌰𑌯𑌤𑌿 𑌵𑌾 ।

𑌦𑍍𑌵𑌿𑌰𑍇𑌫𑌾𑌣𑌾𑌮𑌧𑍍𑌯𑌾𑌸𑌯𑌤𑌿 𑌸𑌤𑌤𑌂 𑌵𑌾𑌧𑌿𑌵𑌸𑌤𑌿𑌂

𑌪𑍍𑌰𑌣𑌮𑍍𑌰𑌾𑌨𑍍𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑌦𑌨𑌲𑌿𑌨𑌮𑌾𑌹𑌾𑌤𑍍𑌮𑍍𑌯𑌗𑌰𑌿𑌮𑌾 ॥64॥

𑌵𑌿𑌵𑍇𑌕𑌾𑌮𑍍𑌭𑌸𑍍𑌸𑍍𑌰𑍋𑌤𑌸𑍍𑌸𑍍𑌨𑌪𑌨𑌪𑌰𑌿𑌪𑌾𑌟𑍀𑌶𑌿𑌶𑌿𑌰𑌿𑌤𑍇

𑌸𑌮𑍀𑌭𑍂𑌤𑍇 𑌶𑌾𑌸𑍍𑌤𑍍𑌰𑌸𑍍𑌮𑌰𑌣𑌹𑌲𑌸𑌙𑍍𑌕𑌰𑍍𑌷𑌣𑌵𑌶𑌾𑌤𑍍 ।

𑌸𑌤𑌾𑌂 𑌚𑍇𑌤𑌃𑌕𑍍𑌷𑍇𑌤𑍍𑌰𑍇 𑌵𑌪𑌤𑌿 𑌤𑌵 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋

𑌮𑌹𑌾𑌸𑌂𑌵𑌿𑌤𑍍𑌸𑌸𑍍𑌯𑌪𑍍𑌰𑌕𑌰𑌵𑌰𑌬𑍀𑌜𑌂 𑌗𑌿𑌰𑌿𑌸𑍁𑌤𑍇 ॥65॥

𑌦𑌧𑌾𑌨𑍋 𑌮𑌨𑍍𑌦𑌾𑌰𑌸𑍍𑌤𑌬𑌕𑌪𑌰𑌿𑌪𑌾𑌟𑍀𑌂 𑌨𑌖𑌰𑍁𑌚𑌾

𑌵𑌹𑌨𑍍𑌦𑍀𑌪𑍍𑌤𑌾𑌂 𑌶𑍋𑌣𑌾𑌙𑍍𑌗𑍁𑌲𑌿𑌪𑌟𑌲𑌚𑌾𑌮𑍍𑌪𑍇𑌯𑌕𑌲𑌿𑌕𑌾𑌮𑍍 ।

𑌅𑌶𑍋𑌕𑍋𑌲𑍍𑌲𑌾𑌸𑌂 𑌨𑌃 𑌪𑍍𑌰𑌚𑍁𑌰𑌯𑌤𑍁 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋

𑌵𑌿𑌕𑌾𑌸𑍀 𑌵𑌾𑌸𑌨𑍍𑌤𑌃 𑌸𑌮𑌯 𑌇𑌵 𑌤𑍇 𑌶𑌰𑍍𑌵𑌦𑌯𑌿𑌤𑍇 ॥66॥

𑌨𑌖𑌾𑌂𑌶𑍁𑌪𑍍𑌰𑌾𑌚𑍁𑌰𑍍𑌯𑌪𑍍𑌰𑌸𑍃𑌮𑌰𑌮𑌰𑌾𑌲𑌾𑌲𑌿𑌧𑌵𑌲𑌃

𑌸𑍍𑌫𑍁𑌰𑌨𑍍𑌮𑌞𑍍𑌜𑍀𑌰𑍋𑌦𑍍𑌯𑌨𑍍𑌮𑌰𑌕𑌤𑌮𑌹𑌶𑍍𑌶𑍈𑌵𑌲𑌯𑍁𑌤𑌃 ।

𑌭𑌵𑌤𑍍𑌯𑌾𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌟𑌚𑌰𑌣𑌪𑌾𑌟𑌲𑍍𑌯𑌕𑌪𑌟𑍋

𑌨𑌦𑌃 𑌶𑍋𑌣𑌾𑌭𑌿𑌖𑍍𑌯𑍋 𑌨𑌗𑌪𑌤𑌿𑌤𑌨𑍂𑌜𑍇 𑌵𑌿𑌜𑌯𑌤𑍇 ॥67॥

𑌧𑍁𑌨𑌾𑌨𑌂 𑌪𑌙𑍍𑌕𑍗𑌘𑌂 𑌪𑌰𑌮𑌸𑍁𑌲𑌭𑌂 𑌕𑌣𑍍𑌟𑌕𑌕𑍁𑌲𑍈𑌃

𑌵𑌿𑌕𑌾𑌸𑌵𑍍𑌯𑌾𑌸𑌙𑍍𑌗𑌂 𑌵𑌿𑌦𑌧𑌦𑌪𑌰𑌾𑌧𑍀𑌨𑌮𑌨𑌿𑌶𑌮𑍍 ।

𑌨𑌖𑍇𑌨𑍍𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌰𑍍𑌵𑌿𑌶𑌦𑌰𑍁𑌚𑌿 𑌕𑌾𑌮𑌾𑌕𑍍𑌷𑌿 𑌨𑌿𑌤𑌰𑌾𑌮𑍍

𑌅𑌸𑌾𑌮𑌾𑌨𑍍𑌯𑌂 𑌮𑌨𑍍𑌯𑍇 𑌸𑌰𑌸𑌿𑌜𑌮𑌿𑌦𑌂 𑌤𑍇 𑌪𑌦𑌯𑍁𑌗𑌮𑍍 ॥68॥

𑌕𑌰𑍀𑌨𑍍𑌦𑍍𑌰𑌾𑌯 𑌦𑍍𑌰𑍁𑌹𑍍𑌯𑌤𑍍𑌯𑌲𑌸𑌗𑌤𑌿𑌲𑍀𑌲𑌾𑌸𑍁 𑌵𑌿𑌮𑌲𑍈𑌃

𑌪𑌯𑍋𑌜𑍈𑌰𑍍𑌮𑌾𑌤𑍍𑌸𑌰𑍍𑌯𑌂 𑌪𑍍𑌰𑌕𑌟𑌯𑌤𑌿 𑌕𑌾𑌮𑌂 𑌕𑌲𑌯𑌤𑍇 ।

𑌪𑌦𑌾𑌮𑍍𑌭𑍋𑌜𑌦𑍍𑌵𑌨𑍍𑌦𑍍𑌵𑌂 𑌤𑌵 𑌤𑌦𑌪𑌿 𑌕𑌾𑌮𑌾𑌕𑍍𑌷𑌿 𑌹𑍃𑌦𑌯𑌂

𑌮𑍁𑌨𑍀𑌨𑌾𑌂 𑌶𑌾𑌨𑍍𑌤𑌾𑌨𑌾𑌂 𑌕𑌥𑌮𑌨𑌿𑌶𑌮𑌸𑍍𑌮𑍈 𑌸𑍍𑌪𑍃𑌹𑌯𑌤𑍇 ॥69॥

𑌨𑌿𑌰𑌸𑍍𑌤𑌾 𑌶𑍋𑌣𑌿𑌮𑍍𑌨𑌾 𑌚𑌰𑌣𑌕𑌿𑌰𑌣𑌾𑌨𑌾𑌂 𑌤𑌵 𑌶𑌿𑌵𑍇

𑌸𑌮𑌿𑌨𑍍𑌧𑌾𑌨𑌾 𑌸𑌨𑍍𑌧𑍍𑌯𑌾𑌰𑍁𑌚𑌿𑌰𑌚𑌲𑌰𑌾𑌜𑌨𑍍𑌯𑌤𑌨𑌯𑍇 ।

𑌅𑌸𑌾𑌮𑌰𑍍𑌥𑍍𑌯𑌾𑌦𑍇𑌨𑌂 𑌪𑌰𑌿𑌭𑌵𑌿𑌤𑍁𑌮𑍇𑌤𑌤𑍍𑌸𑌮𑌰𑍁𑌚𑌾𑌂

𑌸𑌰𑍋𑌜𑌾𑌨𑌾𑌂 𑌜𑌾𑌨𑍇 𑌮𑍁𑌕𑍁𑌲𑌯𑌤𑌿 𑌶𑍋𑌭𑌾𑌂 𑌪𑍍𑌰𑌤𑌿𑌦𑌿𑌨𑌮𑍍 ॥70॥

𑌉𑌪𑌾𑌦𑌿𑌕𑍍𑌷𑌦𑍍𑌦𑌾𑌕𑍍𑌷𑍍𑌯𑌂 𑌤𑌵 𑌚𑌰𑌣𑌨𑌾𑌮𑌾 𑌗𑍁𑌰𑍁𑌰𑌸𑍗

𑌮𑌰𑌾𑌲𑌾𑌨𑌾𑌂 𑌶𑌙𑍍𑌕𑍇 𑌮𑌸𑍃𑌣𑌗𑌤𑌿𑌲𑌾𑌲𑌿𑌤𑍍𑌯𑌸𑌰𑌣𑍗 ।

𑌅𑌤𑌸𑍍𑌤𑍇 𑌨𑌿𑌸𑍍𑌤𑌨𑍍𑌦𑍍𑌰𑌂 𑌨𑌿𑌯𑌤𑌮𑌮𑍁𑌨𑌾 𑌸𑌖𑍍𑌯𑌪𑌦𑌵𑍀𑌂

𑌪𑍍𑌰𑌪𑌨𑍍𑌨𑌂 𑌪𑌾𑌥𑍋𑌜𑌂 𑌪𑍍𑌰𑌤𑌿 𑌦𑌧𑌤𑌿 𑌕𑌾𑌮𑌾𑌕𑍍𑌷𑌿 𑌕𑍁𑌤𑍁𑌕𑌮𑍍 ॥71॥

𑌦𑌧𑌾𑌨𑍈𑌃 𑌸𑌂𑌸𑌰𑍍𑌗𑌂 𑌪𑍍𑌰𑌕𑍃𑌤𑌿𑌮𑌲𑌿𑌨𑍈𑌃 𑌷𑌟𑍍𑌪𑌦𑌕𑍁𑌲𑍈𑌃

𑌦𑍍𑌵𑌿𑌜𑌾𑌧𑍀𑌶𑌶𑍍𑌲𑌾𑌘𑌾𑌵𑌿𑌧𑌿𑌷𑍁 𑌵𑌿𑌦𑌧𑌦𑍍𑌭𑌿𑌰𑍍𑌮𑍁𑌕𑍁𑌲𑌤𑌾𑌮𑍍 ।

𑌰𑌜𑍋𑌮𑌿𑌶𑍍𑌰𑍈𑌃 𑌪𑌦𑍍𑌮𑍈𑌰𑍍𑌨𑌿𑌯𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌪𑌦𑌯𑍋𑌃

𑌵𑌿𑌰𑍋𑌧𑌸𑍍𑌤𑍇 𑌯𑍁𑌕𑍍𑌤𑍋 𑌵𑌿𑌷𑌮𑌶𑌰𑌵𑍈𑌰𑌿𑌪𑍍𑌰𑌿𑌯𑌤𑌮𑍇 ॥72॥

𑌕𑌵𑌿𑌤𑍍𑌵𑌶𑍍𑌰𑍀𑌮𑌿𑌶𑍍𑌰𑍀𑌕𑌰𑌣𑌨𑌿𑌪𑍁𑌣𑍗 𑌰𑌕𑍍𑌷𑌣𑌚𑌣𑍗

𑌵𑌿𑌪𑌨𑍍𑌨𑌾𑌨𑌾𑌂 𑌶𑍍𑌰𑍀𑌮𑌨𑍍𑌨𑌲𑌿𑌨𑌮𑌸𑍃𑌣𑍗 𑌶𑍋𑌣𑌕𑌿𑌰𑌣𑍗 ।

𑌮𑍁𑌨𑍀𑌨𑍍𑌦𑍍𑌰𑌾𑌣𑌾𑌮𑌨𑍍𑌤𑌃𑌕𑌰𑌣𑌶𑌰𑌣𑍗 𑌮𑌨𑍍𑌦𑌸𑌰𑌣𑍗

𑌮𑌨𑍋𑌜𑍍𑌞𑍗 𑌕𑌾𑌮𑌾𑌕𑍍𑌷𑍍𑌯𑌾 𑌦𑍁𑌰𑌿𑌤𑌹𑌰𑌣𑍗 𑌨𑍗𑌮𑌿 𑌚𑌰𑌣𑍗 ॥73॥

𑌪𑌰𑌸𑍍𑌮𑌾𑌤𑍍𑌸𑌰𑍍𑌵𑌸𑍍𑌮𑌾𑌦𑌪𑌿 𑌚 𑌪𑌰𑌯𑍋𑌰𑍍𑌮𑍁𑌕𑍍𑌤𑌿𑌕𑌰𑌯𑍋𑌃

𑌨𑌖𑌶𑍍𑌰𑍀𑌭𑌿𑌰𑍍𑌜𑍍𑌯𑍋𑌤𑍍𑌸𑍍𑌨𑌾𑌕𑌲𑌿𑌤𑌤𑍁𑌲𑌯𑍋𑌸𑍍𑌤𑌾𑌮𑍍𑌰𑌤𑌲𑌯𑍋𑌃 ।

𑌨𑌿𑌲𑍀𑌯𑍇 𑌕𑌾𑌮𑌾𑌕𑍍𑌷𑍍𑌯𑌾 𑌨𑌿𑌗𑌮𑌨𑍁𑌤𑌯𑍋𑌰𑍍𑌨𑌾𑌕𑌿𑌨𑌤𑌯𑍋𑌃

𑌨𑌿𑌰𑌸𑍍𑌤𑌪𑍍𑌰𑍋𑌨𑍍𑌮𑍀𑌲𑌨𑍍𑌨𑌲𑌿𑌨𑌮𑌦𑌯𑍋𑌰𑍇𑌵 𑌪𑌦𑌯𑍋𑌃 ॥74॥

𑌸𑍍𑌵𑌭𑌾𑌵𑌾𑌦𑌨𑍍𑌯𑍋𑌨𑍍𑌯𑌂 𑌕𑌿𑌸𑌲𑌯𑌮𑌪𑍀𑌦𑌂 𑌤𑌵 𑌪𑌦𑌂

𑌮𑍍𑌰𑌦𑌿𑌮𑍍𑌨𑌾 𑌶𑍋𑌣𑌿𑌮𑍍𑌨𑌾 𑌭𑌗𑌵𑌤𑌿 𑌦𑌧𑌾𑌤𑍇 𑌸𑌦𑍃𑌶𑌤𑌾𑌮𑍍 ।

𑌵𑌨𑍇 𑌪𑍂𑌰𑍍𑌵𑌸𑍍𑌯𑍇𑌚𑍍𑌛𑌾 𑌸𑌤𑌤𑌮𑌵𑌨𑍇 𑌕𑌿𑌂 𑌤𑍁 𑌜𑌗𑌤𑌾𑌂

𑌪𑌰𑌸𑍍𑌯𑍇𑌤𑍍𑌥𑌂 𑌭𑍇𑌦𑌃 𑌸𑍍𑌫𑍁𑌰𑌤𑌿 𑌹𑍃𑌦𑌿 𑌕𑌾𑌮𑌾𑌕𑍍𑌷𑌿 𑌸𑍁𑌧𑌿𑌯𑌾𑌮𑍍 ॥75॥

𑌕𑌥𑌂 𑌵𑌾𑌚𑌾𑌲𑍋𑌽𑌪𑌿 𑌪𑍍𑌰𑌕𑌟𑌮𑌣𑌿𑌮𑌞𑍍𑌜𑍀𑌰𑌨𑌿𑌨𑌦𑍈𑌃

𑌸𑌦𑍈𑌵𑌾𑌨𑌨𑍍𑌦𑌾𑌰𑍍𑌦𑍍𑌰𑌾𑌨𑍍𑌵𑌿𑌰𑌚𑌯𑌤𑌿 𑌵𑌾𑌚𑌂𑌯𑌮𑌜𑌨𑌾𑌨𑍍 ।

𑌪𑍍𑌰𑌕𑍃𑌤𑍍𑌯𑌾 𑌤𑍇 𑌶𑍋𑌣𑌚𑍍𑌛𑌵𑌿𑌰𑌪𑌿 𑌚 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋

𑌮𑌨𑍀𑌷𑌾𑌨𑍈𑌰𑍍𑌮𑌲𑍍𑌯𑌂 𑌕𑌥𑌮𑌿𑌵 𑌨𑍃𑌣𑌾𑌂 𑌮𑌾𑌂𑌸𑌲𑌯𑌤𑍇 ॥76॥

𑌚𑌲𑌤𑍍𑌤𑍃𑌷𑍍𑌣𑌾𑌵𑍀𑌚𑍀𑌪𑌰𑌿𑌚𑌲𑌨𑌪𑌰𑍍𑌯𑌾𑌕𑍁𑌲𑌤𑌯𑌾

𑌮𑍁𑌹𑍁𑌰𑍍𑌭𑍍𑌰𑌾𑌨𑍍𑌤𑌸𑍍𑌤𑌾𑌨𑍍𑌤𑌃 𑌪𑌰𑌮𑌶𑌿𑌵𑌵𑌾𑌮𑌾𑌕𑍍𑌷𑌿 𑌪𑌰𑌵𑌾𑌨𑍍 ।

𑌤𑌿𑌤𑍀𑌰𑍍𑌷𑍁𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌚𑍁𑌰𑌤𑌰𑌕𑌰𑍍𑌮𑌾𑌮𑍍𑌬𑍁𑌧𑌿𑌮𑌮𑍁𑌂

𑌕𑌦𑌾𑌹𑌂 𑌲𑌪𑍍𑌸𑍍𑌯𑍇 𑌤𑍇 𑌚𑌰𑌣𑌮𑌣𑌿𑌸𑍇𑌤𑍁𑌂 𑌗𑌿𑌰𑌿𑌸𑍁𑌤𑍇 ॥77॥

𑌵𑌿𑌶𑍁𑌷𑍍𑌯𑌨𑍍𑌤𑍍𑌯𑌾𑌂 𑌪𑍍𑌰𑌜𑍍𑌞𑌾𑌸𑌰𑌿𑌤𑌿 𑌦𑍁𑌰𑌿𑌤𑌗𑍍𑌰𑍀𑌷𑍍𑌮𑌸𑌮𑌯-

𑌪𑍍𑌰𑌭𑌾𑌵𑍇𑌣 𑌕𑍍𑌷𑍀𑌣𑍇 𑌸𑌤𑌿 𑌮𑌮 𑌮𑌨𑌃𑌕𑍇𑌕𑌿𑌨𑌿 𑌶𑍁𑌚𑌾 ।

𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌚𑌰𑌣𑌾𑌮𑍍𑌭𑍋𑌦𑌮𑌹𑌿𑌮𑌾

𑌨𑌭𑍋𑌮𑌾𑌸𑌾𑌟𑍋𑌪𑌂 𑌨𑌗𑌪𑌤𑌿𑌸𑍁𑌤𑍇 𑌕𑌿𑌂 𑌨 𑌕𑍁𑌰𑍁𑌤𑍇 ॥78॥

𑌵𑌿𑌨𑌮𑍍𑌰𑌾𑌣𑌾𑌂 𑌚𑍇𑌤𑍋𑌭𑌵𑌨𑌵𑌲𑌭𑍀𑌸𑍀𑌮𑍍𑌨𑌿 𑌚𑌰𑌣-

𑌪𑍍𑌰𑌦𑍀𑌪𑍇 𑌪𑍍𑌰𑌾𑌕𑌾𑌶𑍍𑌯𑌂 𑌦𑌧𑌤𑌿 𑌤𑌵 𑌨𑌿𑌰𑍍𑌧𑍂𑌤𑌤𑌮𑌸𑌿 ।

𑌅𑌸𑍀𑌮𑌾 𑌕𑌾𑌮𑌾𑌕𑍍𑌷𑌿 𑌸𑍍𑌵𑌯𑌮𑌲𑌘𑍁𑌦𑍁𑌷𑍍𑌕𑌰𑍍𑌮𑌲𑌹𑌰𑍀

𑌵𑌿𑌘𑍂𑌰𑍍𑌣𑌨𑍍𑌤𑍀 𑌶𑌾𑌨𑍍𑌤𑌿𑌂 𑌶𑌲𑌭𑌪𑌰𑌿𑌪𑌾𑌟𑍀𑌵 𑌭𑌜𑌤𑍇 ॥79॥

𑌵𑌿𑌰𑌾𑌜𑌨𑍍𑌤𑍀 𑌶𑍁𑌕𑍍𑌤𑌿𑌰𑍍𑌨𑌖𑌕𑌿𑌰𑌣𑌮𑍁𑌕𑍍𑌤𑌾𑌮𑌣𑌿𑌤𑌤𑍇𑌃

𑌵𑌿𑌪𑌤𑍍𑌪𑌾𑌥𑍋𑌰𑌾𑌶𑍗 𑌤𑌰𑌿𑌰𑌪𑌿 𑌨𑌰𑌾𑌣𑌾𑌂 𑌪𑍍𑌰𑌣𑌮𑌤𑌾𑌮𑍍 ।

𑌤𑍍𑌵𑌦𑍀𑌯𑌃 𑌕𑌾𑌮𑌾𑌕𑍍𑌷𑌿 𑌧𑍍𑌰𑍁𑌵𑌮𑌲𑌘𑍁𑌵𑌹𑍍𑌨𑌿𑌰𑍍𑌭𑌵𑌵𑌨𑍇

𑌮𑍁𑌨𑍀𑌨𑌾𑌂 𑌜𑍍𑌞𑌾𑌨𑌾𑌗𑍍𑌨𑍇𑌰𑌰𑌣𑌿𑌰𑌯𑌮𑌙𑍍𑌘𑌿𑌰𑍍𑌵𑌿𑌜𑌯𑌤𑍇 ॥80॥

𑌸𑌮𑌸𑍍𑌤𑍈𑌃 𑌸𑌂𑌸𑍇𑌵𑍍𑌯𑌃 𑌸𑌤𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌵𑌿𑌬𑍁𑌧𑍈𑌃

𑌸𑍍𑌤𑍁𑌤𑍋 𑌗𑌨𑍍𑌧𑌰𑍍𑌵𑌸𑍍𑌤𑍍𑌰𑍀𑌸𑍁𑌲𑌲𑌿𑌤𑌵𑌿𑌪𑌞𑍍𑌚𑍀𑌕𑌲𑌰𑌵𑍈𑌃 ।

𑌭𑌵𑌤𑍍𑌯𑌾 𑌭𑌿𑌨𑍍𑌦𑌾𑌨𑍋 𑌭𑌵𑌗𑌿𑌰𑌿𑌕𑍁𑌲𑌂 𑌜𑍃𑌮𑍍𑌭𑌿𑌤𑌤𑌮𑍋-

𑌬𑌲𑌦𑍍𑌰𑍋𑌹𑍀 𑌮𑌾𑌤𑌶𑍍𑌚𑌰𑌣𑌪𑍁𑌰𑍁𑌹𑍂𑌤𑍋 𑌵𑌿𑌜𑌯𑌤𑍇 ॥81॥

𑌵𑌸𑌨𑍍𑌤𑌂 𑌭𑌕𑍍𑌤𑌾𑌨𑌾𑌮𑌪𑌿 𑌮𑌨𑌸𑌿 𑌨𑌿𑌤𑍍𑌯𑌂 𑌪𑌰𑌿𑌲𑌸𑌦𑍍-

𑌘𑌨𑌚𑍍𑌛𑌾𑌯𑌾𑌪𑍂𑌰𑍍𑌣𑌂 𑌶𑍁𑌚𑌿𑌮𑌪𑌿 𑌨𑍃𑌣𑌾𑌂 𑌤𑌾𑌪𑌶𑌮𑌨𑌮𑍍 ।

𑌨𑌖𑍇𑌨𑍍𑌦𑍁𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌃 𑌶𑌿𑌶𑌿𑌰𑌮𑌪𑌿 𑌪𑌦𑍍𑌮𑍋𑌦𑌯𑌕𑌰𑌂

𑌨𑌮𑌾𑌮𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌮𑌧𑌿𑌕𑌾𑌶𑍍𑌚𑌰𑍍𑌯𑌕𑌰𑌣𑌮𑍍 ॥82॥

𑌕𑌵𑍀𑌨𑍍𑌦𑍍𑌰𑌾𑌣𑌾𑌂 𑌨𑌾𑌨𑌾𑌭𑌣𑌿𑌤𑌿𑌗𑍁𑌣𑌚𑌿𑌤𑍍𑌰𑍀𑌕𑍃𑌤𑌵𑌚𑌃-

𑌪𑍍𑌰𑌪𑌞𑍍𑌚𑌵𑍍𑌯𑌾𑌪𑌾𑌰𑌪𑍍𑌰𑌕𑌟𑌨𑌕𑌲𑌾𑌕𑍗𑌶𑌲𑌨𑌿𑌧𑌿𑌃 ।

𑌅𑌧𑌃𑌕𑍁𑌰𑍍𑌵𑌨𑍍𑌨𑌬𑍍𑌜𑌂 𑌸𑌨𑌕𑌭𑍃𑌗𑍁𑌮𑍁𑌖𑍍𑌯𑍈𑌰𑍍𑌮𑍁𑌨𑌿𑌜𑌨𑍈𑌃

𑌨𑌮𑌸𑍍𑌯𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌪𑌰𑌮𑍇𑌷𑍍𑌠𑍀 𑌵𑌿𑌜𑌯𑌤𑍇 ॥83॥

𑌭𑌵𑌤𑍍𑌯𑌾𑌃 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌿𑌤𑌪𑌦𑌪𑌙𑍍𑌕𑍇𑌰𑍁𑌹𑌭𑍁𑌵𑌾𑌂

𑌪𑌰𑌾𑌗𑌾𑌣𑌾𑌂 𑌪𑍂𑌰𑍈𑌃 𑌪𑌰𑌿𑌹𑍃𑌤𑌕𑌲𑌙𑍍𑌕𑌵𑍍𑌯𑌤𑌿𑌕𑌰𑍈𑌃 ।

𑌨𑌤𑌾𑌨𑌾𑌮𑌾𑌮𑍃𑌷𑍍𑌟𑍇 𑌹𑍃𑌦𑌯𑌮𑍁𑌕𑍁𑌰𑍇 𑌨𑌿𑌰𑍍𑌮𑌲𑌰𑍁𑌚𑌿

𑌪𑍍𑌰𑌸𑌨𑍍𑌨𑍇 𑌨𑌿𑌶𑍍𑌶𑍇𑌷𑌂 𑌪𑍍𑌰𑌤𑌿𑌫𑌲𑌤𑌿 𑌵𑌿𑌶𑍍𑌵𑌂 𑌗𑌿𑌰𑌿𑌸𑍁𑌤𑍇 ॥84॥

𑌤𑌵 𑌤𑍍𑌰𑌸𑍍𑌤𑌂 𑌪𑌾𑌦𑌾𑌤𑍍𑌕𑌿𑌸𑌲𑌯𑌮𑌰𑌣𑍍𑌯𑌾𑌨𑍍𑌤𑌰𑌮𑌗𑌾𑌤𑍍

𑌪𑌰𑌂 𑌰𑍇𑌖𑌾𑌰𑍂𑌪𑌂 𑌕𑌮𑌲𑌮𑌮𑍁𑌮𑍇𑌵𑌾𑌶𑍍𑌰𑌿𑌤𑌮𑌭𑍂𑌤𑍍 ।

𑌜𑌿𑌤𑌾𑌨𑌾𑌂 𑌕𑌾𑌮𑌾𑌕𑍍𑌷𑌿 𑌦𑍍𑌵𑌿𑌤𑌯𑌮𑌪𑌿 𑌯𑍁𑌕𑍍𑌤𑌂 𑌪𑌰𑌿𑌭𑌵𑍇

𑌵𑌿𑌦𑍇𑌶𑍇 𑌵𑌾𑌸𑍋 𑌵𑌾 𑌶𑌰𑌣𑌗𑌮𑌨𑌂 𑌵𑌾 𑌨𑌿𑌜𑌰𑌿𑌪𑍋𑌃 ॥85॥

𑌗𑍃𑌹𑍀𑌤𑍍𑌵𑌾 𑌯𑌾𑌥𑌾𑌰𑍍𑌥𑍍𑌯𑌂 𑌨𑌿𑌗𑌮𑌵𑌚𑌸𑌾𑌂 𑌦𑍇𑌶𑌿𑌕𑌕𑍃𑌪𑌾-

𑌕𑌟𑌾𑌕𑍍𑌷𑌰𑍍𑌕𑌜𑍍𑌯𑍋𑌤𑌿𑌶𑍍𑌶𑌮𑌿𑌤𑌮𑌮𑌤𑌾𑌬𑌨𑍍𑌧𑌤𑌮𑌸𑌃 ।

𑌯𑌤𑌨𑍍𑌤𑍇 𑌕𑌾𑌮𑌾𑌕𑍍𑌷𑌿 𑌪𑍍𑌰𑌤𑌿𑌦𑌿𑌵𑌸𑌮𑌨𑍍𑌤𑌰𑍍𑌦𑍍𑌰𑌢𑌯𑌿𑌤𑍁𑌂

𑌤𑍍𑌵𑌦𑍀𑌯𑌂 𑌪𑌾𑌦𑌾𑌬𑍍𑌜𑌂 𑌸𑍁𑌕𑍃𑌤𑌪𑌰𑌿𑌪𑌾𑌕𑍇𑌨 𑌸𑍁𑌜𑌨𑌾𑌃 ॥86॥

𑌜𑌡𑌾𑌨𑌾𑌮𑌪𑍍𑌯𑌮𑍍𑌬 𑌸𑍍𑌮𑌰𑌣𑌸𑌮𑌯𑍇 𑌤𑌵𑌚𑍍𑌚𑌰𑌣𑌯𑍋𑌃

𑌭𑍍𑌰𑌮𑌨𑍍𑌮𑌨𑍍𑌥𑌕𑍍𑌷𑍍𑌮𑌾𑌭𑍃𑌦𑍍𑌧𑍁𑌮𑍁𑌘𑍁𑌮𑌿𑌤𑌸𑌿𑌨𑍍𑌧𑍁𑌪𑍍𑌰𑌤𑌿𑌭𑌟𑌾𑌃 ।

𑌪𑍍𑌰𑌸𑌨𑍍𑌨𑌾𑌃 𑌕𑌾𑌮𑌾𑌕𑍍𑌷𑌿 𑌪𑍍𑌰𑌸𑌭𑌮𑌧𑌰𑌸𑍍𑌪𑌨𑍍𑌦𑌨𑌕𑌰𑌾

𑌭𑌵𑌨𑍍𑌤𑌿 𑌸𑍍𑌵𑌚𑍍𑌛𑌨𑍍𑌦𑌂 𑌪𑍍𑌰𑌕𑍃𑌤𑌿𑌪𑌰𑌿𑌪𑌕𑍍𑌕𑌾 𑌭𑌣𑌿𑌤𑌯𑌃 ॥87॥

𑌵𑌹𑌨𑍍𑌨𑌪𑍍𑌯𑌶𑍍𑌰𑌾𑌨𑍍𑌤𑌂 𑌮𑌧𑍁𑌰𑌨𑌿𑌨𑌦𑌂 𑌹𑌂𑌸𑌕𑌮𑌸𑍗

𑌤𑌮𑍇𑌵𑌾𑌧𑌃 𑌕𑌰𑍍𑌤𑍁𑌂 𑌕𑌿𑌮𑌿𑌵 𑌯𑌤𑌤𑍇 𑌕𑍇𑌲𑌿𑌗𑌮𑌨𑍇 ।

𑌭𑌵𑌸𑍍𑌯𑍈𑌵𑌾𑌨𑌨𑍍𑌦𑌂 𑌵𑌿𑌦𑌧𑌦𑌪𑌿 𑌕𑌾𑌮𑌾𑌕𑍍𑌷𑌿 𑌚𑌰𑌣𑍋

𑌭𑌵𑌤𑍍𑌯𑌾𑌸𑍍𑌤𑌦𑍍𑌦𑍍𑌰𑍋𑌹𑌂 𑌭𑌗𑌵𑌤𑌿 𑌕𑌿𑌮𑍇𑌵𑌂 𑌵𑌿𑌤𑌨𑍁𑌤𑍇 ॥88॥

𑌯𑌦𑌤𑍍𑌯𑌨𑍍𑌤𑌂 𑌤𑌾𑌮𑍍𑌯𑌤𑍍𑌯𑌲𑌸𑌗𑌤𑌿𑌵𑌾𑌰𑍍𑌤𑌾𑌸𑍍𑌵𑌪𑌿 𑌶𑌿𑌵𑍇

𑌤𑌦𑍇𑌤𑌤𑍍𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑍃𑌤𑌿𑌮𑍃𑌦𑍁𑌲𑌂 𑌤𑍇 𑌪𑌦𑌯𑍁𑌗𑌮𑍍 ।

𑌕𑌿𑌰𑍀𑌟𑍈𑌃 𑌸𑌙𑍍𑌘𑌟𑍍𑌟𑌂 𑌕𑌥𑌮𑌿𑌵 𑌸𑍁𑌰𑍗𑌘𑌸𑍍𑌯 𑌸𑌹𑌤𑍇

𑌮𑍁𑌨𑍀𑌨𑍍𑌦𑍍𑌰𑌾𑌣𑌾𑌮𑌾𑌸𑍍𑌤𑍇 𑌮𑌨𑌸𑌿 𑌚 𑌕𑌥𑌂 𑌸𑍂𑌚𑌿𑌨𑌿𑌶𑌿𑌤𑍇 ॥89॥

𑌮𑌨𑍋𑌰𑌙𑍍𑌗𑍇 𑌮𑌤𑍍𑌕𑍇 𑌵𑌿𑌬𑍁𑌧𑌜𑌨𑌸𑌮𑍍𑌮𑍋𑌦𑌜𑌨𑌨𑍀

𑌸𑌰𑌾𑌗𑌵𑍍𑌯𑌾𑌸𑌙𑍍𑌗𑌂 𑌸𑌰𑌸𑌮𑍃𑌦𑍁𑌸𑌞𑍍𑌚𑌾𑌰𑌸𑍁𑌭𑌗𑌾 ।

𑌮𑌨𑍋𑌜𑍍𑌞𑌾 𑌕𑌾𑌮𑌾𑌕𑍍𑌷𑌿 𑌪𑍍𑌰𑌕𑌟𑌯𑌤𑍁 𑌲𑌾𑌸𑍍𑌯𑌪𑍍𑌰𑌕𑌰𑌣𑌂

𑌰𑌣𑌨𑍍𑌮𑌞𑍍𑌜𑍀𑌰𑌾 𑌤𑍇 𑌚𑌰𑌣𑌯𑍁𑌗𑌲𑍀𑌨𑌰𑍍𑌤𑌕𑌵𑌧𑍂𑌃 ॥90॥

𑌪𑌰𑌿𑌷𑍍𑌕𑍁𑌰𑍍𑌵𑌨𑍍𑌮𑌾𑌤𑌃 𑌪𑌶𑍁𑌪𑌤𑌿𑌕𑌪𑌰𑍍𑌦𑌂 𑌚𑌰𑌣𑌰𑌾𑌟𑍍

𑌪𑌰𑌾𑌚𑌾𑌂 𑌹𑍃𑌤𑍍𑌪𑌦𑍍𑌮𑌂 𑌪𑌰𑌮𑌭𑌣𑌿𑌤𑍀𑌨𑌾𑌂 𑌚 𑌮𑌕𑍁𑌟𑌮𑍍 ।

𑌭𑌵𑌾𑌖𑍍𑌯𑍇 𑌪𑌾𑌥𑍋𑌧𑍗 𑌪𑌰𑌿𑌹𑌰𑌤𑍁 𑌕𑌾𑌮𑌾𑌕𑍍𑌷𑌿 𑌮𑌮𑌤𑌾-

𑌪𑌰𑌾𑌧𑍀𑌨𑌤𑍍𑌵𑌂 𑌮𑍇 𑌪𑌰𑌿𑌮𑍁𑌷𑌿𑌤𑌪𑌾𑌥𑍋𑌜𑌮𑌹𑌿𑌮𑌾 ॥91॥

𑌪𑍍𑌰𑌸𑍂𑌨𑍈𑌃 𑌸𑌮𑍍𑌪𑌰𑍍𑌕𑌾𑌦𑌮𑌰𑌤𑌰𑍁𑌣𑍀𑌕𑍁𑌨𑍍𑌤𑌲𑌭𑌵𑍈𑌃

𑌅𑌭𑍀𑌷𑍍𑌟𑌾𑌨𑌾𑌂 𑌦𑌾𑌨𑌾𑌦𑌨𑌿𑌶𑌮𑌪𑌿 𑌕𑌾𑌮𑌾𑌕𑍍𑌷𑌿 𑌨𑌮𑌤𑌾𑌮𑍍 ।

𑌸𑍍𑌵𑌸𑌙𑍍𑌗𑌾𑌤𑍍𑌕𑌙𑍍𑌕𑍇𑌲𑌿𑌪𑍍𑌰𑌸𑌵𑌜𑌨𑌕𑌤𑍍𑌵𑍇𑌨 𑌚 𑌶𑌿𑌵𑍇

𑌤𑍍𑌰𑌿𑌧𑌾 𑌧𑌤𑍍𑌤𑍇 𑌵𑌾𑌰𑍍𑌤𑌾𑌂 𑌸𑍁𑌰𑌭𑌿𑌰𑌿𑌤𑌿 𑌪𑌾𑌦𑍋 𑌗𑌿𑌰𑌿𑌸𑍁𑌤𑍇 ॥92॥

𑌮𑌹𑌾𑌮𑍋𑌹𑌸𑍍𑌤𑍇𑌨𑌵𑍍𑌯𑌤𑌿𑌕𑌰𑌭𑌯𑌾𑌤𑍍𑌪𑌾𑌲𑌯𑌤𑌿 𑌯𑍋

𑌵𑌿𑌨𑌿𑌕𑍍𑌷𑌿𑌪𑍍𑌤𑌂 𑌸𑍍𑌵𑌸𑍍𑌮𑌿𑌨𑍍𑌨𑌿𑌜𑌜𑌨𑌮𑌨𑍋𑌰𑌤𑍍𑌨𑌮𑌨𑌿𑌶𑌮𑍍 ।

𑌸 𑌰𑌾𑌗𑌸𑍍𑌯𑍋𑌦𑍍𑌰𑍇𑌕𑌾𑌤𑍍𑌸𑌤𑌤𑌮𑌪𑌿 𑌕𑌾𑌮𑌾𑌕𑍍𑌷𑌿 𑌤𑌰𑌸𑌾

𑌕𑌿𑌮𑍇𑌵𑌂 𑌪𑌾𑌦𑍋𑌽𑌸𑍗 𑌕𑌿𑌸𑌲𑌯𑌰𑍁𑌚𑌿𑌂 𑌚𑍋𑌰𑌯𑌤𑌿 𑌤𑍇 ॥93॥

𑌸𑌦𑌾 𑌸𑍍𑌵𑌾𑌦𑍁𑌙𑍍𑌕𑌾𑌰𑌂 𑌵𑌿𑌷𑌯𑌲𑌹𑌰𑍀𑌶𑌾𑌲𑌿𑌕𑌣𑌿𑌕𑌾𑌂

𑌸𑌮𑌾𑌸𑍍𑌵𑌾𑌦𑍍𑌯 𑌶𑍍𑌰𑌾𑌨𑍍𑌤𑌂 𑌹𑍃𑌦𑌯𑌶𑍁𑌕𑌪𑍋𑌤𑌂 𑌜𑌨𑌨𑌿 𑌮𑍇 ।

𑌕𑍃𑌪𑌾𑌜𑌾𑌲𑍇 𑌫𑌾𑌲𑍇𑌕𑍍𑌷𑌣𑌮𑌹𑌿𑌷𑌿 𑌕𑌾𑌮𑌾𑌕𑍍𑌷𑌿 𑌰𑌭𑌸𑌾𑌤𑍍

𑌗𑍃𑌹𑍀𑌤𑍍𑌵𑌾 𑌰𑍁𑌨𑍍𑌧𑍀𑌥𑌾𑌰𑌸𑍍𑌤𑌵 𑌪𑌦𑌯𑍁𑌗𑍀𑌪𑌞𑍍𑌜𑌰𑌪𑍁𑌟𑍇 ॥94॥

𑌧𑍁𑌨𑌾𑌨𑌂 𑌕𑌾𑌮𑌾𑌕𑍍𑌷𑌿 𑌸𑍍𑌮𑌰𑌣𑌲𑌵𑌮𑌾𑌤𑍍𑌰𑍇𑌣 𑌜𑌡𑌿𑌮-

𑌜𑍍𑌵𑌰𑌪𑍍𑌰𑍗𑌢𑌿𑌂 𑌗𑍂𑌢𑌸𑍍𑌥𑌿𑌤𑌿 𑌨𑌿𑌗𑌮𑌨𑍈𑌕𑍁𑌞𑍍𑌜𑌕𑍁𑌹𑌰𑍇 ।

𑌅𑌲𑌭𑍍𑌯𑌂 𑌸𑌰𑍍𑌵𑍇𑌷𑌾𑌂 𑌕𑌤𑌿𑌚𑌨 𑌲𑌭𑌨𑍍𑌤𑍇 𑌸𑍁𑌕𑍃𑌤𑌿𑌨𑌃

𑌚𑌿𑌰𑌾𑌦𑌨𑍍𑌵𑌿𑌷𑍍𑌯𑌨𑍍𑌤𑌸𑍍𑌤𑌵 𑌚𑌰𑌣𑌸𑌿𑌦𑍍𑌧𑍗𑌷𑌧𑌮𑌿𑌦𑌮𑍍 ॥95॥

𑌰𑌣𑌨𑍍𑌮𑌞𑍍𑌜𑍀𑌰𑌾𑌭𑍍𑌯𑌾𑌂 𑌲𑌲𑌿𑌤𑌗𑌮𑌨𑌾𑌭𑍍𑌯𑌾𑌂 𑌸𑍁𑌕𑍃𑌤𑌿𑌨𑌾𑌂

𑌮𑌨𑍋𑌵𑌾𑌸𑍍𑌤𑌵𑍍𑌯𑌾𑌭𑍍𑌯𑌾𑌂 𑌮𑌥𑌿𑌤𑌤𑌿𑌮𑌿𑌰𑌾𑌭𑍍𑌯𑌾𑌂 𑌨𑌖𑌰𑍁𑌚𑌾 ।

𑌨𑌿𑌧𑍇𑌯𑌾𑌭𑍍𑌯𑌾𑌂 𑌪𑌤𑍍𑌯𑌾 𑌨𑌿𑌜𑌶𑌿𑌰𑌸𑌿 𑌕𑌾𑌮𑌾𑌕𑍍𑌷𑌿 𑌸𑌤𑌤𑌂

𑌨𑌮𑌸𑍍𑌤𑍇 𑌪𑌾𑌦𑌾𑌭𑍍𑌯𑌾𑌂 𑌨𑌲𑌿𑌨𑌮𑍃𑌦𑍁𑌲𑌾𑌭𑍍𑌯𑌾𑌂 𑌗𑌿𑌰𑌿𑌸𑍁𑌤𑍇 ॥96॥

𑌸𑍁𑌰𑌾𑌗𑍇 𑌰𑌾𑌕𑍇𑌨𑍍𑌦𑍁𑌪𑍍𑌰𑌤𑌿𑌨𑌿𑌧𑌿𑌮𑍁𑌖𑍇 𑌪𑌰𑍍𑌵𑌤𑌸𑍁𑌤𑍇

𑌚𑌿𑌰𑌾𑌲𑍍𑌲𑌭𑍍𑌯𑍇 𑌭𑌕𑍍𑌤𑍍𑌯𑌾 𑌶𑌮𑌧𑌨𑌜𑌨𑌾𑌨𑌾𑌂 𑌪𑌰𑌿𑌷𑌦𑌾 ।

𑌮𑌨𑍋𑌭𑍃𑌙𑍍𑌗𑍋 𑌮𑌤𑍍𑌕𑌃 𑌪𑌦𑌕𑌮𑌲𑌯𑍁𑌗𑍍𑌮𑍇 𑌜𑌨𑌨𑌿 𑌤𑍇

𑌪𑍍𑌰𑌕𑌾𑌮𑌂 𑌕𑌾𑌮𑌾𑌕𑍍𑌷𑌿 𑌤𑍍𑌰𑌿𑌪𑍁𑌰𑌹𑌰𑌵𑌾𑌮𑌾𑌕𑍍𑌷𑌿 𑌰𑌮𑌤𑌾𑌮𑍍 ॥97॥

𑌶𑌿𑌵𑍇 𑌸𑌂𑌵𑌿𑌦𑍍𑌰𑍂𑌪𑍇 𑌶𑌶𑌿𑌶𑌕𑌲𑌚𑍂𑌡𑌪𑍍𑌰𑌿𑌯𑌤𑌮𑍇

𑌶𑌨𑍈𑌰𑍍𑌗𑌤𑍍𑌯𑌾𑌗𑌤𑍍𑌯𑌾 𑌜𑌿𑌤𑌸𑍁𑌰𑌵𑌰𑍇𑌭𑍇 𑌗𑌿𑌰𑌿𑌸𑍁𑌤𑍇 ।

𑌯𑌤𑌨𑍍𑌤𑍇 𑌸𑌨𑍍𑌤𑌸𑍍𑌤𑍇 𑌚𑌰𑌣𑌨𑌲𑌿𑌨𑌾𑌲𑌾𑌨𑌯𑍁𑌗𑌲𑍇

𑌸𑌦𑌾 𑌬𑌦𑍍𑌧𑌂 𑌚𑌿𑌤𑍍𑌤𑌪𑍍𑌰𑌮𑌦𑌕𑌰𑌿𑌯𑍂𑌥𑌂 𑌦𑍃𑌢𑌤𑌰𑌮𑍍 ॥98॥

𑌯𑌶𑌃 𑌸𑍂𑌤𑍇 𑌮𑌾𑌤𑌰𑍍𑌮𑌧𑍁𑌰𑌕𑌵𑌿𑌤𑌾𑌂 𑌪𑌕𑍍𑌷𑍍𑌮𑌲𑌯𑌤𑍇

𑌶𑍍𑌰𑌿𑌯𑌂 𑌦𑌤𑍍𑌤𑍇 𑌚𑌿𑌤𑍍𑌤𑍇 𑌕𑌮𑌪𑌿 𑌪𑌰𑌿𑌪𑌾𑌕𑌂 𑌪𑍍𑌰𑌥𑌯𑌤𑍇 ।

𑌸𑌤𑌾𑌂 𑌪𑌾𑌶𑌗𑍍𑌰𑌨𑍍𑌥𑌿𑌂 𑌶𑌿𑌥𑌿𑌲𑌯𑌤𑌿 𑌕𑌿𑌂 𑌕𑌿𑌂 𑌨 𑌕𑍁𑌰𑍁𑌤𑍇

𑌪𑍍𑌰𑌪𑌨𑍍𑌨𑍇 𑌕𑌾𑌮𑌾𑌕𑍍𑌷𑍍𑌯𑌾𑌃 𑌪𑍍𑌰𑌣𑌤𑌿𑌪𑌰𑌿𑌪𑌾𑌟𑍀 𑌚𑌰𑌣𑌯𑍋𑌃 ॥99॥

𑌮𑌨𑍀𑌷𑌾𑌂 𑌮𑌾𑌹𑍇𑌨𑍍𑌦𑍍𑌰𑍀𑌂 𑌕𑌕𑍁𑌭𑌮𑌿𑌵 𑌤𑍇 𑌕𑌾𑌮𑌪𑌿 𑌦𑌶𑌾𑌂

𑌪𑍍𑌰𑌧𑌤𑍍𑌤𑍇 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌤𑌰𑍁𑌣𑌾𑌦𑌿𑌤𑍍𑌯𑌕𑌿𑌰𑌣𑌃 ।

𑌯𑌦𑍀𑌯𑍇 𑌸𑌮𑍍𑌪𑌰𑍍𑌕𑍇 𑌧𑍃𑌤𑌰𑌸𑌮𑌰𑌨𑍍𑌦𑌾 𑌕𑌵𑌯𑌤𑌾𑌂

𑌪𑌰𑍀𑌪𑌾𑌕𑌂 𑌧𑌤𑍍𑌤𑍇 𑌪𑌰𑌿𑌮𑌲𑌵𑌤𑍀 𑌸𑍂𑌕𑍍𑌤𑌿𑌨𑌲𑌿𑌨𑍀 ॥100॥

𑌪𑍁𑌰𑌾 𑌮𑌾𑌰𑌾𑌰𑌾𑌤𑌿𑌃 𑌪𑍁𑌰𑌮𑌜𑌯𑌦𑌮𑍍𑌬 𑌸𑍍𑌤𑌵𑌶𑌤𑍈𑌃

𑌪𑍍𑌰𑌸𑌨𑍍𑌨𑌾𑌯𑌾𑌂 𑌸𑌤𑍍𑌯𑌾𑌂 𑌤𑍍𑌵𑌯𑌿 𑌤𑍁𑌹𑌿𑌨𑌶𑍈𑌲𑍇𑌨𑍍𑌦𑍍𑌰𑌤𑌨𑌯𑍇 ।

𑌅𑌤𑌸𑍍𑌤𑍇 𑌕𑌾𑌮𑌾𑌕𑍍𑌷𑌿 𑌸𑍍𑌫𑍁𑌰𑌤𑍁 𑌤𑌰𑌸𑌾 𑌕𑌾𑌲𑌸𑌮𑌯𑍇

𑌸𑌮𑌾𑌯𑌾𑌤𑍇 𑌮𑌾𑌤𑌰𑍍𑌮𑌮 𑌮𑌨𑌸𑌿 𑌪𑌾𑌦𑌾𑌬𑍍𑌜𑌯𑍁𑌗𑌲𑌮𑍍 ॥101॥

𑌪𑌦𑌦𑍍𑌵𑌨𑍍𑌦𑍍𑌵𑌂 𑌮𑌨𑍍𑌦𑌂 𑌗𑌤𑌿𑌷𑍁 𑌨𑌿𑌵𑌸𑌨𑍍𑌤𑌂 𑌹𑍃𑌦𑌿 𑌸𑌤𑌾𑌂

𑌗𑌿𑌰𑌾𑌮𑌨𑍍𑌤𑍇 𑌭𑍍𑌰𑌾𑌨𑍍𑌤𑌂 𑌕𑍃𑌤𑌕𑌰𑌹𑌿𑌤𑌾𑌨𑌾𑌂 𑌪𑌰𑌿𑌬𑍃𑌢𑍇 ।

𑌜𑌨𑌾𑌨𑌾𑌮𑌾𑌨𑌨𑍍𑌦𑌂 𑌜𑌨𑌨𑌿 𑌜𑌨𑌯𑌨𑍍𑌤𑌂 𑌪𑍍𑌰𑌣𑌮𑌤𑌾𑌂

𑌤𑍍𑌵𑌦𑍀𑌯𑌂 𑌕𑌾𑌮𑌾𑌕𑍍𑌷𑌿 𑌪𑍍𑌰𑌤𑌿𑌦𑌿𑌨𑌮𑌹𑌂 𑌨𑍗𑌮𑌿 𑌵𑌿𑌮𑌲𑌮𑍍 ॥102॥

𑌇𑌦𑌂 𑌯𑌃 𑌕𑌾𑌮𑌾𑌕𑍍𑌷𑍍𑌯𑌾𑌶𑍍𑌚𑌰𑌣𑌨𑌲𑌿𑌨𑌸𑍍𑌤𑍋𑌤𑍍𑌰𑌶𑌤𑌕𑌂

𑌜𑌪𑍇𑌨𑍍𑌨𑌿𑌤𑍍𑌯𑌂 𑌭𑌕𑍍𑌤𑍍𑌯𑌾 𑌨𑌿𑌖𑌿𑌲𑌜𑌗𑌦𑌾𑌹𑍍𑌲𑌾𑌦𑌜𑌨𑌕𑌮𑍍 ।

𑌸 𑌵𑌿𑌶𑍍𑌵𑍇𑌷𑌾𑌂 𑌵𑌨𑍍𑌦𑍍𑌯𑌃 𑌸𑌕𑌲𑌕𑌵𑌿𑌲𑍋𑌕𑍈𑌕𑌤𑌿𑌲𑌕𑌃

𑌚𑌿𑌰𑌂 𑌭𑍁𑌕𑍍𑌤𑍍𑌵𑌾 𑌭𑍋𑌗𑌾𑌨𑍍𑌪𑌰𑌿𑌣𑌮𑌤𑌿 𑌚𑌿𑌦𑍍𑌰𑍂𑌪𑌕𑌲𑌯𑌾 ॥103॥

॥ 𑌇𑌤𑌿 𑌪𑌾𑌦𑌾𑌰𑌵𑌿𑌨𑍍𑌦𑌶𑌤𑌕𑌂 𑌸𑌮𑍍𑌪𑍂𑌰𑍍𑌣𑌮𑍍 ॥

Roman (IAST) Transliteration

mahimnaḥ panthānaṃ madanaparipanthipraṇayini

prabhurnirṇetuṃ te bhavati yatamāno'pi katamaḥ |

tathāpi śrīkāñcīvihṛtirasike ko'pi manaso

vipākastvatpādastutividhiṣu jalpākayati mām ||1||

galagrāhī paurandarapuravanīpallavarucāṃ

dhṛtapāthamyānāmaruṇamahasāmādimaguruḥ |

samindhe bandhūkastabakasahayudhvā diśi diśi

prasarpankāmākṣyāścaraṇakiraṇānāmaruṇimā ||2||

marālīnāṃ yānābhyasanakalanāmūlagurave

daridrāṇāṃ trāṇavyatikarasurodyānatarave |

tamaskāṇḍaprauḍhiprakaṭanatiraskārapaṭave

jano'yaṃ kāmākṣyāścaraṇanalināya spṛhayate ||3||

vahantī saindūrīṃ saraṇimavanamrāmarapuṟī-

purandhrīsīmante kavikamalabālārkasuṣamā |

trayīsīmantinyāḥ stanataṭanicolāruṇapaṭī

vibhāntī kāmākṣyāḥ padanalinakāntirvijayate ||4||

praṇamrībhūtasya praṇayakalahatrastamanasaḥ

smarārāteścūḍāviyati gṛhamedhī himakaraḥ |

yayoḥ sāndhyāṃ kāntiṃ vahati suṣamābhiścaraṇayoḥ

tayorme kāmākṣyā hṛdayamapatandraṃ viharatām ||5||

yayoḥ pīṭhāyante vibudhamukuṭīnāṃ paṭalikā

yayoḥ saudhāyante svayamudayabhājo bhaṇitayaḥ |

yayoḥ dāsāyante sarasijabhavādyāścaraṇayoḥ

tayorme kāmākṣyā dinamanu varīvartu hṛdayam ||6||

nayantī saṅkocaṃ sarasijarucaṃ dikparisare

sṛjantī lauhityaṃ nakhakiraṇacandrārdhakhacitā |

kavīndrāṇāṃ hṛtkairavavikasanodyogajananī

sphurantī kāmākṣyāḥ caraṇarucisandhyā vijayate ||7||

virāvairmāñjīraiḥ kimapi kathayantīva madhuraṃ

purastādānamre puravijayini smeravadane |

vayasyeva prauḍhā śithilayati yā premakalaha-

prarohaṃ kāmākṣyāḥ caraṇayugalī sā vijayate ||8||

suparvastrīlolālakaparicitaṃ ṣaṭpadakulaiḥ

sphurallākṣārāgaṃ taruṇataraṇijyotiraruṇaiḥ |

bhṛtaṃ kāntyambhobhiḥ visṛmaramarandaiḥ sarasijaiḥ

vidhatte kāmākṣyāḥ caraṇayugalaṃ bandhupadavīm ||9||

rajaḥsaṃsarge'pi sthitamarajasāmeva hṛdaye

paraṃ raktatvena sthitamapi viraktaikaśaraṇam |

alabhyaṃ mandānāṃ dadhadapi sadā mandagatitāṃ

vidhatte kāmākṣyāḥ caraṇayugamāścaryalaharīm ||10||

jaṭālā mañjīrasphuradaruṇaratnāṃśunikaraiḥ

niṣidantī madhye nakharucijharīgāṅgapayasām |

jagattrāṇaṃ kartuṃ janani mama kāmākṣi niyataṃ

tapaścaryāṃ dhatte tava caraṇapāthojayugalī ||11||

tulākoṭidvandvakkaṇitabhaṇitābhītivacasoḥ

vinamraṃ kāmākṣī visṛmaramahaḥpāṭalitayoḥ |

kṣaṇaṃ vinyāsena kṣapitatamasorme lalitayoḥ

punīyānmūrdhānaṃ puraharapurandhrī caraṇayoḥ ||12||

bhavāni druhyetāṃ bhavanibiḍitebhyo mama muhu-

stamovyāmohebhyastava janani kāmākṣi caraṇau |

yayorlākṣābindusphuraṇadharaṇāddhvarjaṭijaṭā-

kuṭīrā śoṇāṅkaṃ vahati vapureṇāṅkakalikā ||13||

pavitrīkuryurnuḥ padatalabhuvaḥ pāṭalarucaḥ

parāgāste pāpapraśamanadhurīṇāḥ paraśive |

kaṇaṃ labdhuṃ yeṣāṃ nijaśirasi kāmākṣi vivaśā

valanto vyātanvantyahamahamikāṃ mādhavamukhāḥ ||14||

balākāmālābhirnakharucimayībhiḥ parivṛte

vinamrasvarnārīvikacakacakālāmbudakule |

sphurantaḥ kāmākṣi sphuṭadalitabandhūkasuhṛda-

staṭillekhāyante tava caraṇapāthojakiraṇāḥ ||15||

sarāgaḥ sadveṣaḥ prasṛmarasaroje pratidinaṃ

nisargādākrāmanvibudhajanamūrdhānamadhikam |

kathaṅkāraṃ mātaḥ kathaya padapadmastava satāṃ

natānāṃ kāmākṣi prakaṭayati kaivalyasaraṇim ||16||

japālakṣmīśoṇo janitaparamajñānanalinī-

vikāsavyāsaṅgo viphalitajagajjāḍyagarimā |

manaḥpūrvādriṃ me tilakayatu kāmākṣi tarasā

tamaskāṇḍadrohī tava caraṇapāthojaramaṇaḥ ||17||

namaskurmaḥ preṅkhanmaṇikaṭakanīlotpalamahaḥ-

payodhau riṅkhadbhirnakhakiraṇaphenairdhavalite |

sphuṭaṃ kurvāṇāya prabalacaladaurvānalaśikhā-

vitarkaṃ kāmākṣyāḥ satatamaruṇimne caraṇayoḥ ||18||

śive pāśāyetāmalaghuni tamaḥkūpakuhare

dinādhīśāyetāṃ mama hṛdayapāthojavipine |

nabhomāsāyetāṃ sarasakavitārītisariti

tvadīyau kāmākṣi prasṛtakiraṇau devi caraṇau ||19||

niṣaktaṃ śrutyante nayanamiva sadvṛttaruciraiḥ

samairjuṣṭaṃ śuddhairadharamiva ramyairdvijagaṇaiḥ |

śive vakṣojanmadvitayamiva muktāśritamume

tvadīyaṃ kāmākṣi praṇataśaraṇaṃ naumi caraṇam ||20||

namasyāsaṃsajjannamuciparipanthipraṇayinī-

nisargapreṅkholatkuralakulakālāhiśabale |

nakhacchāyādugdhodadhipayasi te vaidrumarucāṃ

pracāraṃ kāmākṣi pracurayati pādābjasuṣamā ||21||

kadā dūrīkartuṃ kaṭuduritakākolajanitaṃ

mahāntaṃ santāpaṃ madanaparipanthipriyatame |

kṣaṇātte kāmākṣi tribhuvanaparītāpaharaṇe

paṭīyāṃsaṃ lapsye padakamalasevāmṛtarasam ||22||

yayoḥ sāndhyaṃ rociḥ satatamaruṇimne spṛhayate

yayoścāndrī kāntiḥ paripatati dṛṣṭvā nakharucim |

yayoḥ pākodrekaṃ pipaṭhiṣati bhaktyā kisalayaṃ

mradimnaḥ kāmākṣyā manasi caraṇau tau tanumahe ||23||

jagannedaṃ nedaṃ paramiti parityajya yatibhiḥ

kuśāgrīyasvāntaiḥ kuśaladhiṣaṇaiḥ śāstrasaraṇau |

gaveṣyaṃ kāmākṣi dhruvamakṛtakānāṃ girisute

girāmaidamparyaṃ tava caraṇapadmaṃ vijayate ||24||

kṛtasnānaṃ śāstrāmṛtasarasi kāmākṣi nitarāṃ

dadhānaṃ vaiśadyaṃ kalitarasamānandasudhayā |

alaṅkāraṃ bhūmermunijanamanaścinmayamahā-

payodherantassthaṃ tava caraṇaratnaṃ mṛgayate ||25||

manogehe mohodbhavatimirapūrṇe mama muhuḥ

daridrāṇīkurvandinakarasahasrāṇi kiraṇaiḥ |

vidhattāṃ kāmākṣi prasṛmaratamovañcanacaṇaḥ

kṣaṇārdhaṃ sānnidhyaṃ caraṇamaṇidīpo janani te ||26||

kavīnāṃ cetovannakhararucisamparki vibudha-

sravantīsrotovatpaṭumukharitaṃ haṃsakaravaiḥ |

dinārambhaśrīvanniyatamaruṇacchāyasubhagaṃ

madantaḥ kāmākṣyāḥ sphuratu padapaṅkeruhayugam ||27||

sadā kiṃ samparkātprakṛtikaṭhinairnākimukuṭaiḥ

taṭairnīhārādreradhikamaṇunā yogimanasā |

vibhinte sammohaṃ śiśirayati bhaktānapi dṛśām

adṛśyaṃ kāmākṣi prakaṭayati te pādayugalam ||28||

pavitrābhyāmamba prakṛtimṛdulābhyāṃ tava śive

padābhyāṃ kāmākṣi prasabhamabhibhūtaiḥ sacakitaiḥ |

pravālairambhojairapi ca vanavāsavratadaśāḥ

sadaivārabhyante paricaritanānādvijagaṇaiḥ ||29||

cirāddṛśyā haṃsaiḥ kathamapi sadā haṃsasulabhaṃ

nirasyantī jāḍyaṃ niyatajaḍamadhyaikaśaraṇam |

adoṣavyāsaṅgā satatamapi doṣāptimalinaṃ

payojaṃ kāmākṣyāḥ parihasati pādābjayugalī ||30||

surāṇāmānandaprabalanatayā maṇḍanatayā

nakhendujyotsnābhirvisṛmaratamaḥkhaṇḍanatayā |

payojaśrīdveṣavrataratatayā tvaccaraṇayoḥ

vilāsaḥ kāmākṣi prakaṭayati naiśākaradaśām ||31||

sitimnā kāntīnāṃ nakharajanuṣāṃ pādanalina-

cchavīnāṃ śoṇimnā tava janani kāmākṣi namane |

labhante mandāragrathitanavabandhūkakusuma-

srajāṃ sāmīcīnyaṃ surapurapurandhrīkacabharāḥ ||32||

sphuranmadhye śuddhe nakhakiraṇadugdhābdhipayasāṃ

vahannabjaṃ cakraṃ daramapi ca lekhātmakatayā |

śrito mātsyaṃ rūpaṃ śriyamapi dadhāno nirupamāṃ

tridhāmā kāmākṣyāḥ padanalinanāmā vijayate ||33||

nakhaśrīsannaddhastabakanicitaḥ svaiśca kiraṇaiḥ

piśaṅgaiḥ kāmākṣi prakaṭitalasatpallavaruciḥ |

satāṃ gamyaḥ śaṅke sakalaphaladātā surataruḥ

tvadīyaḥ pādo'yaṃ tuhinagirirājanyatanaye ||34||

vaṣaṭkurvanmāñjīrakalakalaiḥ karmalaharī-

havīṃṣi prauddaṇḍaṃ jvalati paramajñānadahane |

mahīyānkāmākṣi sphuṭamahasi johoti sudhiyāṃ

manovedyāṃ mātastava caraṇayajvā girisute ||35||

mahāmantraṃ kiñcinmaṇikaṭakanādairmṛdu japan

kṣipandikṣu svacchaṃ nakharucimayaṃ bhāsmanarajaḥ |

natānāṃ kāmākṣi prakṛtipaṭuraccāṭya mamatā-

piśācīṃ pādo'yaṃ prakaṭayati te māntrikadaśām ||36||

udīte bodhendau tamasi nitarāṃ jagmuṣi daśāṃ

daridrāṃ kāmākṣi prakaṭamanurāgaṃ vidadhatī |

sitenācchādyāṅgaṃ nakharucipaṭenāṅghriyugalī-

purandhrī te mātaḥ svayamabhisaratyeva hṛdayam ||37||

dinārambhaḥ sampannalinavipinānāmabhinavo

vikāso vāsantaḥ sukavipikalokasya niyataḥ |

pradoṣaḥ kāmākṣi prakaṭaparamajñānaśaśina-

ścakāsti tvatpādasmaraṇamahimā śailatanaye ||38||

dhṛtacchāyaṃ nityaṃ sarasiruhamaitrīparicitaṃ

nidhānaṃ dīptīnāṃ nikhilajagatāṃ bodhajanakam |

mumukṣūṇāṃ mārgaprathanapaṭu kāmākṣi padavīṃ

padaṃ te pātaṅgīṃ parikalayate parvatasute ||39||

śanaistīrtvā mohāmbudhimatha samāroḍhumanasaḥ

kramātkaivalyākhyāṃ sukṛtisulabhāṃ saudhavalabhīm |

labhante niḥśreṇīmiva jhaṭiti kāmākṣi caraṇaṃ

puraścaryābhiste puramathanasīmantini janāḥ ||40||

pracaṇḍārtikṣobhapramathanakṛte prātibhasari-

tpravāhaproddaṇḍīkaraṇajaladāya praṇamatām |

pradīpāya prauḍhe bhavatamasi kāmākṣi caraṇa-

prasādaunmukhyāya spṛhayati jano'yaṃ janani te ||41||

marudbhiḥ saṃsevyā satatamapi cāñcalyarahitā

sadāruṇyaṃ yāntī pariṇatidaridrāṇasuṣamā |

guṇotkarṣānmāñjīrakakalakalaistarjanapaṭuḥ

pravālaṃ kāmākṣyāḥ parihasati pādābjayugalī ||42||

jagadrakṣādakṣā jalajaruciśikṣāpaṭutarā

samairnamyā ramyā satatamabhigamyā budhajanaiḥ |

dvayī līlālolā śrutiṣu surapālādimukuṭī-

taṭīsīmādhāmā tava janani kāmākṣi padayoḥ ||43||

girāṃ dūrau corau jaḍimatimirāṇāṃ kṛtajaga-

tparitrāṇau śoṇau munihṛdayalīlaikanipuṇau |

nakhaiḥ smerau sārau nigamavacasāṃ khaṇḍitabhava-

grahonmādau pādau tava janani kāmākṣi kalaye ||44||

aviśrāntaṃ paṅkaṃ yadapi kalayanyāvakamayaṃ

nirasyankāmākṣi praṇamanajuṣāṃ paṅkamakhilam |

tulākoṭidvandaṃ dadhadapi ca gacchannatulatāṃ

girāṃ mārgaṃ pādo girivarasute laṅghayati te ||45||

pravālaṃ savrīlaṃ vipinavivare vepayati yā

sphurallīlaṃ bālātapamadhikabālaṃ vadati yā |

ruciṃ sāndhyāṃ vandhyāṃ viracayati yā vardhayatu sā

śivaṃ me kāmākṣyāḥ padanalinapāṭalyalaharī ||46||

kirañjyotsnārītiṃ nakhamukharucā haṃsamanasāṃ

vitanvānaḥ prītiṃ vikacataruṇāmbhoruharuciḥ |

prakāśaḥ śrīpādastava janani kāmākṣi tanute

śaratkālaprauḍhiṃ śaśiśakalacūḍapriyatame ||47||

nakhāṅkūrasmeradyutivimalagaṅgāmbhasi sukhaṃ

kṛtasnānaṃ jñānāmṛtamamalamāsvādya niyatam |

udañcanmañjīrasphuraṇamaṇidīpe mama mano

manojñe kāmākṣyāścaraṇamaṇiharmye viharatām ||48||

bhavāmbhodhau naukāṃ jaḍimavipine pāvakaśikhā-

mamartyendrādīnāmadhimukuṭamuttaṃsakalikām |

jagattāpe jyotsnāmakṛtakavacaḥpañjarapuṭe

śukastrīṃ kāmākṣyā manasi kalaye pādayugalīm ||49||

paratmaprākāśyapratiphalanacuñcuḥ praṇamatāṃ

manojñastvatpādo maṇimukuramudrāṃ kalayate |

yadīyāṃ kāmākṣi prakṛtimasṛṇāḥ śodhakadaśāṃ

vidhātuṃ ceṣṭhante balaripuvadhūṭīkacabharāḥ ||50||

aviśrāntaṃ tiṣṭhannakṛtakavacaḥkandarapuṭī-

kuṭīrāntaḥ prauḍhaṃ nakharucisaṭālīṃ prakaṭayan |

pracaṇḍaṃ khaṇḍatvaṃ nayatu mama kāmākṣi tarasā

tamovetaṇḍendraṃ tava caraṇakaṇṭhīravapatiḥ ||51||

purastātkāmākṣi pracurarasamākhaṇḍalapurī-

purandhrīṇāṃ lāsyaṃ tava lalitamālokya śanakaiḥ |

nakhaśrībhiḥ smerā bahu vitanute nūpuraravai-

ścamatkṛtyā śaṅke caraṇayugalī cāṭuracanāḥ ||52||

sarojaṃ nindantī nakhakiraṇakarpūraśiśirā

niṣiktā mārārermukuṭaśaśirekhāhimajalaiḥ |

sphurantī kāmākṣi sphuṭarucimaye pallavacaye

tavādhatte maitrīṃ pathikasudṛśā pādayugalī ||53||

natānāṃ sampatteranavaratamākarṣaṇajapaḥ

prarohatsaṃsāraprasaragarimastambhanajapaḥ |

tvadīyaḥ kāmākṣi smaraharamanomohanajapaḥ

paṭīyānnaḥ pāyātpadanalinamañjīraninadaḥ ||54||

vitanvīthā nāthe mama śirasi kāmākṣi kṛpayā

padāmbhojanyāsaṃ paśuparibṛḍhaprāṇadayite |

pibanto yanmudrāṃ prakaṭamupakampāparisaraṃ

dṛśā nānandyante nalinabhavanārāyaṇamukhāḥ ||55||

praṇāmodyadbṛndāramukuṭamandārakalikā-

vilolallolambaprakaramayadhūmapracurimā |

pradīptaḥ pādābjadyutivitatipāṭalyalaharī-

kṛśānuḥ kāmākṣyā mama dahatu saṃsāravipinam ||56||

valakṣaśrīrṛkṣādhipaśiśusadṛkṣaistava nakhaiḥ

jighṛkṣurdakṣatvaṃ sarasiruhabhikṣutvakaraṇe |

kṣaṇānme kāmākṣi kṣapitabhavasaṅkṣobhagarimā

vacovaicakṣanyaṃ caraṇayugalī pakṣmalayatāt ||57||

samantātkāmākṣi kṣatatimirasantānasubhagān

anantābhirbhābhirdinamanu digantānviracayan |

ahantāyā hantā mama jaḍimadantāvalahariḥ

vibhintāṃ santāpaṃ tava caraṇacintāmaṇirasau ||58||

dadhāno bhāsvattāmamṛtanilayo lohitavapuḥ

vinamrāṇāṃ saumyo gururapi kavitvaṃ ca kalayan |

gatau mando gaṅgādharamahiṣi kāmākṣi bhajatāṃ

tamaḥketurmātastava caraṇapadmo vijayate ||59||

nayantīṃ dāsatvaṃ nalinabhavamukhyānasulabha-

pradānāddīnānāmamaratarudaurbhāgyajananīm |

jagajjanmakṣemakṣayavidhiṣu kāmākṣi padayo-

rdhurīṇāmīṣṭe karastava bhaṇitumāhopuruṣikām ||60||

jano'yaṃ santapto janani bhavacaṇḍāṃśukiraṇaiḥ

alabdhavaikaṃ śītaṃ kaṇamapi parajñānapayasaḥ |

tamomārge pānthastava jhaṭiti kāmākṣi śiśirāṃ

padāmbhojacchāyāṃ paramaśivajāye mṛgayate ||61||

jayatyamba śrīmannakhakiraṇacīnāṃśukamayaṃ

vitānaṃ bibhrāṇe suramukuṭasaṅghaṭṭamasṛṇe |

nijāruṇyakṣaumāstaraṇavati kāmākṣi sulabhā

budhaiḥ saṃvinnārī tava caraṇamāṇikyabhavane ||62||

pratīmaḥ kāmākṣi sphuritataruṇādityakiraṇa-

śriyo mūladravyaṃ tava caraṇamadrīndratanaye |

surendrāśāmāpūrayati yadasau dhvāntamakhilaṃ

dhunīte digbhāgānapi ca mahasā pāṭalayate ||63||

mahābhāṣyavyākhyāpaṭuśayanamāropayati vā

smaravyāpārerṣyāpiśunaniṭilaṃ kārayati vā |

dvirephāṇāmadhyāsayati satataṃ vādhivasatiṃ

praṇamrānkāmākṣyāḥ padanalinamāhātmyagarimā ||64||

vivekāmbhassrotassnapanaparipāṭīśiśirite

samībhūte śāstrasmaraṇahalasaṅkarṣaṇavaśāt |

satāṃ cetaḥkṣetre vapati tava kāmākṣi caraṇo

mahāsaṃvitsasyaprakaravarabījaṃ girisute ||65||

dadhāno mandārastabakaparipāṭīṃ nakharucā

vahandīptāṃ śoṇāṅgulipaṭalacāmpeyakalikām |

aśokollāsaṃ naḥ pracurayatu kāmākṣi caraṇo

vikāsī vāsantaḥ samaya iva te śarvadayite ||66||

nakhāṃśuprācuryaprasṛmaramarālālidhavalaḥ

sphuranmañjīrodyanmarakatamahaśśaivalayutaḥ |

bhavatyāḥ kāmākṣi sphuṭacaraṇapāṭalyakapaṭo

nadaḥ śoṇābhikhyo nagapatitanūje vijayate ||67||

dhunānaṃ paṅkaughaṃ paramasulabhaṃ kaṇṭakakulaiḥ

vikāsavyāsaṅgaṃ vidadhadaparādhīnamaniśam |

nakhendujyotsnābhirviśadaruci kāmākṣi nitarām

asāmānyaṃ manye sarasijamidaṃ te padayugam ||68||

karīndrāya druhyatyalasagatilīlāsu vimalaiḥ

payojairmātsaryaṃ prakaṭayati kāmaṃ kalayate |

padāmbhojadvandvaṃ tava tadapi kāmākṣi hṛdayaṃ

munīnāṃ śāntānāṃ kathamaniśamasmai spṛhayate ||69||

nirastā śoṇimnā caraṇakiraṇānāṃ tava śive

samindhānā sandhyāruciracalarājanyatanaye |

asāmarthyādenaṃ paribhavitumetatsamarucāṃ

sarojānāṃ jāne mukulayati śobhāṃ pratidinam ||70||

upādikṣaddākṣyaṃ tava caraṇanāmā gururasau

marālānāṃ śaṅke masṛṇagatilālityasaraṇau |

ataste nistandraṃ niyatamamunā sakhyapadavīṃ

prapannaṃ pāthojaṃ prati dadhati kāmākṣi kutukam ||71||

dadhānaiḥ saṃsargaṃ prakṛtimalinaiḥ ṣaṭpadakulaiḥ

dvijādhīśaślāghāvidhiṣu vidadhadbhirmukulatām |

rajomiśraiḥ padmairniyatamapi kāmākṣi padayoḥ

virodhaste yukto viṣamaśaravairipriyatame ||72||

kavitvaśrīmiśrīkaraṇanipuṇau rakṣaṇacaṇau

vipannānāṃ śrīmannalinamasṛṇau śoṇakiraṇau |

munīndrāṇāmantaḥkaraṇaśaraṇau mandasaraṇau

manojñau kāmākṣyā duritaharaṇau naumi caraṇau ||73||

parasmātsarvasmādapi ca parayormuktikarayoḥ

nakhaśrībhirjyotsnākalitatulayostāmratalayoḥ |

nilīye kāmākṣyā nigamanutayornākinatayoḥ

nirastapronmīlannalinamadayoreva padayoḥ ||74||

svabhāvādanyonyaṃ kisalayamapīdaṃ tava padaṃ

mradimnā śoṇimnā bhagavati dadhāte sadṛśatām |

vane pūrvasyecchā satatamavane kiṃ tu jagatāṃ

parasyetthaṃ bhedaḥ sphurati hṛdi kāmākṣi sudhiyām ||75||

kathaṃ vācālo'pi prakaṭamaṇimañjīraninadaiḥ

sadaivānandārdrānviracayati vācaṃyamajanān |

prakṛtyā te śoṇacchavirapi ca kāmākṣi caraṇo

manīṣānairmalyaṃ kathamiva nṛṇāṃ māṃsalayate ||76||

calattṛṣṇāvīcīparicalanaparyākulatayā

muhurbhrāntastāntaḥ paramaśivavāmākṣi paravān |

titīrṣuḥ kāmākṣi pracuratarakarmāmbudhimamuṃ

kadāhaṃ lapsye te caraṇamaṇisetuṃ girisute ||77||

viśuṣyantyāṃ prajñāsariti duritagrīṣmasamaya-

prabhāveṇa kṣīṇe sati mama manaḥkekini śucā |

tvadīyaḥ kāmākṣi sphuritacaraṇāmbhodamahimā

nabhomāsāṭopaṃ nagapatisute kiṃ na kurute ||78||

vinamrāṇāṃ cetobhavanavalabhīsīmni caraṇa-

pradīpe prākāśyaṃ dadhati tava nirdhūtatamasi |

asīmā kāmākṣi svayamalaghuduṣkarmalaharī

vighūrṇantī śāntiṃ śalabhaparipāṭīva bhajate ||79||

virājantī śuktirnakhakiraṇamuktāmaṇitateḥ

vipatpāthorāśau tarirapi narāṇāṃ praṇamatām |

tvadīyaḥ kāmākṣi dhruvamalaghuvahnirbhavavane

munīnāṃ jñānāgneraraṇirayamaṅghirvijayate ||80||

samastaiḥ saṃsevyaḥ satatamapi kāmākṣi vibudhaiḥ

stuto gandharvastrīsulalitavipañcīkalaravaiḥ |

bhavatyā bhindāno bhavagirikulaṃ jṛmbhitatamo-

baladrohī mātaścaraṇapuruhūto vijayate ||81||

vasantaṃ bhaktānāmapi manasi nityaṃ parilasad-

ghanacchāyāpūrṇaṃ śucimapi nṛṇāṃ tāpaśamanam |

nakhendujyotsnābhiḥ śiśiramapi padmodayakaraṃ

namāmaḥ kāmākṣyāścaraṇamadhikāścaryakaraṇam ||82||

kavīndrāṇāṃ nānābhaṇitiguṇacitrīkṛtavacaḥ-

prapañcavyāpāraprakaṭanakalākauśalanidhiḥ |

adhaḥkurvannabjaṃ sanakabhṛgumukhyairmunijanaiḥ

namasyaḥ kāmākṣyāścaraṇaparameṣṭhī vijayate ||83||

bhavatyāḥ kāmākṣi sphuritapadapaṅkeruhabhuvāṃ

parāgāṇāṃ pūraiḥ parihṛtakalaṅkavyatikaraiḥ |

natānāmāmṛṣṭe hṛdayamukure nirmalaruci

prasanne niśśeṣaṃ pratiphalati viśvaṃ girisute ||84||

tava trastaṃ pādātkisalayamaraṇyāntaramagāt

paraṃ rekhārūpaṃ kamalamamumevāśritamabhūt |

jitānāṃ kāmākṣi dvitayamapi yuktaṃ paribhave

videśe vāso vā śaraṇagamanaṃ vā nijaripoḥ ||85||

gṛhītvā yāthārthyaṃ nigamavacasāṃ deśikakṛpā-

kaṭākṣarkajyotiśśamitamamatābandhatamasaḥ |

yatante kāmākṣi pratidivasamantardraḍhayituṃ

tvadīyaṃ pādābjaṃ sukṛtaparipākena sujanāḥ ||86||

jaḍānāmapyamba smaraṇasamaye tavaccaraṇayoḥ

bhramanmanthakṣmābhṛddhumughumitasindhupratibhaṭāḥ |

prasannāḥ kāmākṣi prasabhamadharaspandanakarā

bhavanti svacchandaṃ prakṛtiparipakkā bhaṇitayaḥ ||87||

vahannapyaśrāntaṃ madhuraninadaṃ haṃsakamasau

tamevādhaḥ kartuṃ kimiva yatate keligamane |

bhavasyaivānandaṃ vidadhadapi kāmākṣi caraṇo

bhavatyāstaddrohaṃ bhagavati kimevaṃ vitanute ||88||

yadatyantaṃ tāmyatyalasagativārtāsvapi śive

tadetatkāmākṣi prakṛtimṛdulaṃ te padayugam |

kirīṭaiḥ saṅghaṭṭaṃ kathamiva suraughasya sahate

munīndrāṇāmāste manasi ca kathaṃ sūciniśite ||89||

manoraṅge matke vibudhajanasammodajananī

sarāgavyāsaṅgaṃ sarasamṛdusañcārasubhagā |

manojñā kāmākṣi prakaṭayatu lāsyaprakaraṇaṃ

raṇanmañjīrā te caraṇayugalīnartakavadhūḥ ||90||

pariṣkurvanmātaḥ paśupatikapardaṃ caraṇarāṭ

parācāṃ hṛtpadmaṃ paramabhaṇitīnāṃ ca makuṭam |

bhavākhye pāthodhau pariharatu kāmākṣi mamatā-

parādhīnatvaṃ me parimuṣitapāthojamahimā ||91||

prasūnaiḥ samparkādamarataruṇīkuntalabhavaiḥ

abhīṣṭānāṃ dānādaniśamapi kāmākṣi namatām |

svasaṅgātkaṅkeliprasavajanakatvena ca śive

tridhā dhatte vārtāṃ surabhiriti pādo girisute ||92||

mahāmohastenavyatikarabhayātpālayati yo

vinikṣiptaṃ svasminnijajanamanoratnamaniśam |

sa rāgasyodrekātsatatamapi kāmākṣi tarasā

kimevaṃ pādo'sau kisalayaruciṃ corayati te ||93||

sadā svāduṅkāraṃ viṣayalaharīśālikaṇikāṃ

samāsvādya śrāntaṃ hṛdayaśukapotaṃ janani me |

kṛpājāle phālekṣaṇamahiṣi kāmākṣi rabhasāt

gṛhītvā rundhīthārastava padayugīpañjarapuṭe ||94||

dhunānaṃ kāmākṣi smaraṇalavamātreṇa jaḍima-

jvaraprauḍhiṃ gūḍhasthiti nigamanaikuñjakuhare |

alabhyaṃ sarveṣāṃ katicana labhante sukṛtinaḥ

cirādanviṣyantastava caraṇasiddhauṣadhamidam ||95||

raṇanmañjīrābhyāṃ lalitagamanābhyāṃ sukṛtināṃ

manovāstavyābhyāṃ mathitatimirābhyāṃ nakharucā |

nidheyābhyāṃ patyā nijaśirasi kāmākṣi satataṃ

namaste pādābhyāṃ nalinamṛdulābhyāṃ girisute ||96||

surāge rākendupratinidhimukhe parvatasute

cirāllabhye bhaktyā śamadhanajanānāṃ pariṣadā |

manobhṛṅgo matkaḥ padakamalayugme janani te

prakāmaṃ kāmākṣi tripuraharavāmākṣi ramatām ||97||

śive saṃvidrūpe śaśiśakalacūḍapriyatame

śanairgatyāgatyā jitasuravarebhe girisute |

yatante santaste caraṇanalinālānayugale

sadā baddhaṃ cittapramadakariyūthaṃ dṛḍhataram ||98||

yaśaḥ sūte mātarmadhurakavitāṃ pakṣmalayate

śriyaṃ datte citte kamapi paripākaṃ prathayate |

satāṃ pāśagranthiṃ śithilayati kiṃ kiṃ na kurute

prapanne kāmākṣyāḥ praṇatiparipāṭī caraṇayoḥ ||99||

manīṣāṃ māhendrīṃ kakubhamiva te kāmapi daśāṃ

pradhatte kāmākṣyāścaraṇataruṇādityakiraṇaḥ |

yadīye samparke dhṛtarasamarandā kavayatāṃ

parīpākaṃ dhatte parimalavatī sūktinalinī ||100||

purā mārārātiḥ puramajayadamba stavaśataiḥ

prasannāyāṃ satyāṃ tvayi tuhinaśailendratanaye |

ataste kāmākṣi sphuratu tarasā kālasamaye

samāyāte mātarmama manasi pādābjayugalam ||101||

padadvandvaṃ mandaṃ gatiṣu nivasantaṃ hṛdi satāṃ

girāmante bhrāntaṃ kṛtakarahitānāṃ paribṛḍhe |

janānāmānandaṃ janani janayantaṃ praṇamatāṃ

tvadīyaṃ kāmākṣi pratidinamahaṃ naumi vimalam ||102||

idaṃ yaḥ kāmākṣyāścaraṇanalinastotraśatakaṃ

japennityaṃ bhaktyā nikhilajagadāhlādajanakam |

sa viśveṣāṃ vandyaḥ sakalakavilokaikatilakaḥ

ciraṃ bhuktvā bhogānpariṇamati cidrūpakalayā ||103||

|| iti pādāravindaśatakaṃ sampūrṇam ||

Sanskrit — Devanagari (original)

महिम्नः पन्थानं मदनपरिपन्थिप्रणयिनि

प्रभुर्निर्णेतुं ते भवति यतमानोऽपि कतमः ।

तथापि श्रीकाञ्चीविहृतिरसिके कोऽपि मनसो

विपाकस्त्वत्पादस्तुतिविधिषु जल्पाकयति माम् ॥1॥

गलग्राही पौरन्दरपुरवनीपल्लवरुचां

धृतपाथम्यानामरुणमहसामादिमगुरुः ।

समिन्धे बन्धूकस्तबकसहयुध्वा दिशि दिशि

प्रसर्पन्कामाक्ष्याश्चरणकिरणानामरुणिमा ॥2॥

मरालीनां यानाभ्यसनकलनामूलगुरवे

दरिद्राणां त्राणव्यतिकरसुरोद्यानतरवे ।

तमस्काण्डप्रौढिप्रकटनतिरस्कारपटवे

जनोऽयं कामाक्ष्याश्चरणनलिनाय स्पृहयते ॥3॥

वहन्ती सैन्दूरीं सरणिमवनम्रामरपुऱी-

पुरन्ध्रीसीमन्ते कविकमलबालार्कसुषमा ।

त्रयीसीमन्तिन्याः स्तनतटनिचोलारुणपटी

विभान्ती कामाक्ष्याः पदनलिनकान्तिर्विजयते ॥4॥

प्रणम्रीभूतस्य प्रणयकलहत्रस्तमनसः

स्मरारातेश्चूडावियति गृहमेधी हिमकरः ।

ययोः सान्ध्यां कान्तिं वहति सुषमाभिश्चरणयोः

तयोर्मे कामाक्ष्या हृदयमपतन्द्रं विहरताम् ॥5॥

ययोः पीठायन्ते विबुधमुकुटीनां पटलिका

ययोः सौधायन्ते स्वयमुदयभाजो भणितयः ।

ययोः दासायन्ते सरसिजभवाद्याश्चरणयोः

तयोर्मे कामाक्ष्या दिनमनु वरीवर्तु हृदयम् ॥6॥

नयन्ती सङ्कोचं सरसिजरुचं दिक्परिसरे

सृजन्ती लौहित्यं नखकिरणचन्द्रार्धखचिता ।

कवीन्द्राणां हृत्कैरवविकसनोद्योगजननी

स्फुरन्ती कामाक्ष्याः चरणरुचिसन्ध्या विजयते ॥7॥

विरावैर्माञ्जीरैः किमपि कथयन्तीव मधुरं

पुरस्तादानम्रे पुरविजयिनि स्मेरवदने ।

वयस्येव प्रौढा शिथिलयति या प्रेमकलह-

प्ररोहं कामाक्ष्याः चरणयुगली सा विजयते ॥8॥

सुपर्वस्त्रीलोलालकपरिचितं षट्पदकुलैः

स्फुरल्लाक्षारागं तरुणतरणिज्योतिररुणैः ।

भृतं कान्त्यम्भोभिः विसृमरमरन्दैः सरसिजैः

विधत्ते कामाक्ष्याः चरणयुगलं बन्धुपदवीम् ॥9॥

रजःसंसर्गेऽपि स्थितमरजसामेव हृदये

परं रक्तत्वेन स्थितमपि विरक्तैकशरणम् ।

अलभ्यं मन्दानां दधदपि सदा मन्दगतितां

विधत्ते कामाक्ष्याः चरणयुगमाश्चर्यलहरीम् ॥10॥

जटाला मञ्जीरस्फुरदरुणरत्नांशुनिकरैः

निषिदन्ती मध्ये नखरुचिझरीगाङ्गपयसाम् ।

जगत्त्राणं कर्तुं जननि मम कामाक्षि नियतं

तपश्चर्यां धत्ते तव चरणपाथोजयुगली ॥11॥

तुलाकोटिद्वन्द्वक्कणितभणिताभीतिवचसोः

विनम्रं कामाक्षी विसृमरमहःपाटलितयोः ।

क्षणं विन्यासेन क्षपिततमसोर्मे ललितयोः

पुनीयान्मूर्धानं पुरहरपुरन्ध्री चरणयोः ॥12॥

भवानि द्रुह्येतां भवनिबिडितेभ्यो मम मुहु-

स्तमोव्यामोहेभ्यस्तव जननि कामाक्षि चरणौ ।

ययोर्लाक्षाबिन्दुस्फुरणधरणाद्ध्वर्जटिजटा-

कुटीरा शोणाङ्कं वहति वपुरेणाङ्ककलिका ॥13॥

पवित्रीकुर्युर्नुः पदतलभुवः पाटलरुचः

परागास्ते पापप्रशमनधुरीणाः परशिवे ।

कणं लब्धुं येषां निजशिरसि कामाक्षि विवशा

वलन्तो व्यातन्वन्त्यहमहमिकां माधवमुखाः ॥14॥

बलाकामालाभिर्नखरुचिमयीभिः परिवृते

विनम्रस्वर्नारीविकचकचकालाम्बुदकुले ।

स्फुरन्तः कामाक्षि स्फुटदलितबन्धूकसुहृद-

स्तटिल्लेखायन्ते तव चरणपाथोजकिरणाः ॥15॥

सरागः सद्वेषः प्रसृमरसरोजे प्रतिदिनं

निसर्गादाक्रामन्विबुधजनमूर्धानमधिकम् ।

कथङ्कारं मातः कथय पदपद्मस्तव सतां

नतानां कामाक्षि प्रकटयति कैवल्यसरणिम् ॥16॥

जपालक्ष्मीशोणो जनितपरमज्ञाननलिनी-

विकासव्यासङ्गो विफलितजगज्जाड्यगरिमा ।

मनःपूर्वाद्रिं मे तिलकयतु कामाक्षि तरसा

तमस्काण्डद्रोही तव चरणपाथोजरमणः ॥17॥

नमस्कुर्मः प्रेङ्खन्मणिकटकनीलोत्पलमहः-

पयोधौ रिङ्खद्भिर्नखकिरणफेनैर्धवलिते ।

स्फुटं कुर्वाणाय प्रबलचलदौर्वानलशिखा-

वितर्कं कामाक्ष्याः सततमरुणिम्ने चरणयोः ॥18॥

शिवे पाशायेतामलघुनि तमःकूपकुहरे

दिनाधीशायेतां मम हृदयपाथोजविपिने ।

नभोमासायेतां सरसकवितारीतिसरिति

त्वदीयौ कामाक्षि प्रसृतकिरणौ देवि चरणौ ॥19॥

निषक्तं श्रुत्यन्ते नयनमिव सद्वृत्तरुचिरैः

समैर्जुष्टं शुद्धैरधरमिव रम्यैर्द्विजगणैः ।

शिवे वक्षोजन्मद्वितयमिव मुक्ताश्रितमुमे

त्वदीयं कामाक्षि प्रणतशरणं नौमि चरणम् ॥20॥

नमस्यासंसज्जन्नमुचिपरिपन्थिप्रणयिनी-

निसर्गप्रेङ्खोलत्कुरलकुलकालाहिशबले ।

नखच्छायादुग्धोदधिपयसि ते वैद्रुमरुचां

प्रचारं कामाक्षि प्रचुरयति पादाब्जसुषमा ॥21॥

कदा दूरीकर्तुं कटुदुरितकाकोलजनितं

महान्तं सन्तापं मदनपरिपन्थिप्रियतमे ।

क्षणात्ते कामाक्षि त्रिभुवनपरीतापहरणे

पटीयांसं लप्स्ये पदकमलसेवामृतरसम् ॥22॥

ययोः सान्ध्यं रोचिः सततमरुणिम्ने स्पृहयते

ययोश्चान्द्री कान्तिः परिपतति दृष्ट्वा नखरुचिम् ।

ययोः पाकोद्रेकं पिपठिषति भक्त्या किसलयं

म्रदिम्नः कामाक्ष्या मनसि चरणौ तौ तनुमहे ॥23॥

जगन्नेदं नेदं परमिति परित्यज्य यतिभिः

कुशाग्रीयस्वान्तैः कुशलधिषणैः शास्त्रसरणौ ।

गवेष्यं कामाक्षि ध्रुवमकृतकानां गिरिसुते

गिरामैदम्पर्यं तव चरणपद्मं विजयते ॥24॥

कृतस्नानं शास्त्रामृतसरसि कामाक्षि नितरां

दधानं वैशद्यं कलितरसमानन्दसुधया ।

अलङ्कारं भूमेर्मुनिजनमनश्चिन्मयमहा-

पयोधेरन्तस्स्थं तव चरणरत्नं मृगयते ॥25॥

मनोगेहे मोहोद्भवतिमिरपूर्णे मम मुहुः

दरिद्राणीकुर्वन्दिनकरसहस्राणि किरणैः ।

विधत्तां कामाक्षि प्रसृमरतमोवञ्चनचणः

क्षणार्धं सान्निध्यं चरणमणिदीपो जननि ते ॥26॥

कवीनां चेतोवन्नखररुचिसम्पर्कि विबुध-

स्रवन्तीस्रोतोवत्पटुमुखरितं हंसकरवैः ।

दिनारम्भश्रीवन्नियतमरुणच्छायसुभगं

मदन्तः कामाक्ष्याः स्फुरतु पदपङ्केरुहयुगम् ॥27॥

सदा किं सम्पर्कात्प्रकृतिकठिनैर्नाकिमुकुटैः

तटैर्नीहाराद्रेरधिकमणुना योगिमनसा ।

विभिन्ते सम्मोहं शिशिरयति भक्तानपि दृशाम्

अदृश्यं कामाक्षि प्रकटयति ते पादयुगलम् ॥28॥

पवित्राभ्यामम्ब प्रकृतिमृदुलाभ्यां तव शिवे

पदाभ्यां कामाक्षि प्रसभमभिभूतैः सचकितैः ।

प्रवालैरम्भोजैरपि च वनवासव्रतदशाः

सदैवारभ्यन्ते परिचरितनानाद्विजगणैः ॥29॥

चिराद्दृश्या हंसैः कथमपि सदा हंससुलभं

निरस्यन्ती जाड्यं नियतजडमध्यैकशरणम् ।

अदोषव्यासङ्गा सततमपि दोषाप्तिमलिनं

पयोजं कामाक्ष्याः परिहसति पादाब्जयुगली ॥30॥

सुराणामानन्दप्रबलनतया मण्डनतया

नखेन्दुज्योत्स्नाभिर्विसृमरतमःखण्डनतया ।

पयोजश्रीद्वेषव्रतरततया त्वच्चरणयोः

विलासः कामाक्षि प्रकटयति नैशाकरदशाम् ॥31॥

सितिम्ना कान्तीनां नखरजनुषां पादनलिन-

च्छवीनां शोणिम्ना तव जननि कामाक्षि नमने ।

लभन्ते मन्दारग्रथितनवबन्धूककुसुम-

स्रजां सामीचीन्यं सुरपुरपुरन्ध्रीकचभराः ॥32॥

स्फुरन्मध्ये शुद्धे नखकिरणदुग्धाब्धिपयसां

वहन्नब्जं चक्रं दरमपि च लेखात्मकतया ।

श्रितो मात्स्यं रूपं श्रियमपि दधानो निरुपमां

त्रिधामा कामाक्ष्याः पदनलिननामा विजयते ॥33॥

नखश्रीसन्नद्धस्तबकनिचितः स्वैश्च किरणैः

पिशङ्गैः कामाक्षि प्रकटितलसत्पल्लवरुचिः ।

सतां गम्यः शङ्के सकलफलदाता सुरतरुः

त्वदीयः पादोऽयं तुहिनगिरिराजन्यतनये ॥34॥

वषट्कुर्वन्माञ्जीरकलकलैः कर्मलहरी-

हवींषि प्रौद्दण्डं ज्वलति परमज्ञानदहने ।

महीयान्कामाक्षि स्फुटमहसि जोहोति सुधियां

मनोवेद्यां मातस्तव चरणयज्वा गिरिसुते ॥35॥

महामन्त्रं किञ्चिन्मणिकटकनादैर्मृदु जपन्

क्षिपन्दिक्षु स्वच्छं नखरुचिमयं भास्मनरजः ।

नतानां कामाक्षि प्रकृतिपटुरच्चाट्य ममता-

पिशाचीं पादोऽयं प्रकटयति ते मान्त्रिकदशाम् ॥36॥

उदीते बोधेन्दौ तमसि नितरां जग्मुषि दशां

दरिद्रां कामाक्षि प्रकटमनुरागं विदधती ।

सितेनाच्छाद्याङ्गं नखरुचिपटेनाङ्घ्रियुगली-

पुरन्ध्री ते मातः स्वयमभिसरत्येव हृदयम् ॥37॥

दिनारम्भः सम्पन्नलिनविपिनानामभिनवो

विकासो वासन्तः सुकविपिकलोकस्य नियतः ।

प्रदोषः कामाक्षि प्रकटपरमज्ञानशशिन-

श्चकास्ति त्वत्पादस्मरणमहिमा शैलतनये ॥38॥

धृतच्छायं नित्यं सरसिरुहमैत्रीपरिचितं

निधानं दीप्तीनां निखिलजगतां बोधजनकम् ।

मुमुक्षूणां मार्गप्रथनपटु कामाक्षि पदवीं

पदं ते पातङ्गीं परिकलयते पर्वतसुते ॥39॥

शनैस्तीर्त्वा मोहाम्बुधिमथ समारोढुमनसः

क्रमात्कैवल्याख्यां सुकृतिसुलभां सौधवलभीम् ।

लभन्ते निःश्रेणीमिव झटिति कामाक्षि चरणं

पुरश्चर्याभिस्ते पुरमथनसीमन्तिनि जनाः ॥40॥

प्रचण्डार्तिक्षोभप्रमथनकृते प्रातिभसरि-

त्प्रवाहप्रोद्दण्डीकरणजलदाय प्रणमताम् ।

प्रदीपाय प्रौढे भवतमसि कामाक्षि चरण-

प्रसादौन्मुख्याय स्पृहयति जनोऽयं जननि ते ॥41॥

मरुद्भिः संसेव्या सततमपि चाञ्चल्यरहिता

सदारुण्यं यान्ती परिणतिदरिद्राणसुषमा ।

गुणोत्कर्षान्माञ्जीरककलकलैस्तर्जनपटुः

प्रवालं कामाक्ष्याः परिहसति पादाब्जयुगली ॥42॥

जगद्रक्षादक्षा जलजरुचिशिक्षापटुतरा

समैर्नम्या रम्या सततमभिगम्या बुधजनैः ।

द्वयी लीलालोला श्रुतिषु सुरपालादिमुकुटी-

तटीसीमाधामा तव जननि कामाक्षि पदयोः ॥43॥

गिरां दूरौ चोरौ जडिमतिमिराणां कृतजग-

त्परित्राणौ शोणौ मुनिहृदयलीलैकनिपुणौ ।

नखैः स्मेरौ सारौ निगमवचसां खण्डितभव-

ग्रहोन्मादौ पादौ तव जननि कामाक्षि कलये ॥44॥

अविश्रान्तं पङ्कं यदपि कलयन्यावकमयं

निरस्यन्कामाक्षि प्रणमनजुषां पङ्कमखिलम् ।

तुलाकोटिद्वन्दं दधदपि च गच्छन्नतुलतां

गिरां मार्गं पादो गिरिवरसुते लङ्घयति ते ॥45॥

प्रवालं सव्रीलं विपिनविवरे वेपयति या

स्फुरल्लीलं बालातपमधिकबालं वदति या ।

रुचिं सान्ध्यां वन्ध्यां विरचयति या वर्धयतु सा

शिवं मे कामाक्ष्याः पदनलिनपाटल्यलहरी ॥46॥

किरञ्ज्योत्स्नारीतिं नखमुखरुचा हंसमनसां

वितन्वानः प्रीतिं विकचतरुणाम्भोरुहरुचिः ।

प्रकाशः श्रीपादस्तव जननि कामाक्षि तनुते

शरत्कालप्रौढिं शशिशकलचूडप्रियतमे ॥47॥

नखाङ्कूरस्मेरद्युतिविमलगङ्गाम्भसि सुखं

कृतस्नानं ज्ञानामृतममलमास्वाद्य नियतम् ।

उदञ्चन्मञ्जीरस्फुरणमणिदीपे मम मनो

मनोज्ञे कामाक्ष्याश्चरणमणिहर्म्ये विहरताम् ॥48॥

भवाम्भोधौ नौकां जडिमविपिने पावकशिखा-

ममर्त्येन्द्रादीनामधिमुकुटमुत्तंसकलिकाम् ।

जगत्तापे ज्योत्स्नामकृतकवचःपञ्जरपुटे

शुकस्त्रीं कामाक्ष्या मनसि कलये पादयुगलीम् ॥49॥

परत्मप्राकाश्यप्रतिफलनचुञ्चुः प्रणमतां

मनोज्ञस्त्वत्पादो मणिमुकुरमुद्रां कलयते ।

यदीयां कामाक्षि प्रकृतिमसृणाः शोधकदशां

विधातुं चेष्ठन्ते बलरिपुवधूटीकचभराः ॥50॥

अविश्रान्तं तिष्ठन्नकृतकवचःकन्दरपुटी-

कुटीरान्तः प्रौढं नखरुचिसटालीं प्रकटयन् ।

प्रचण्डं खण्डत्वं नयतु मम कामाक्षि तरसा

तमोवेतण्डेन्द्रं तव चरणकण्ठीरवपतिः ॥51॥

पुरस्तात्कामाक्षि प्रचुररसमाखण्डलपुरी-

पुरन्ध्रीणां लास्यं तव ललितमालोक्य शनकैः ।

नखश्रीभिः स्मेरा बहु वितनुते नूपुररवै-

श्चमत्कृत्या शङ्के चरणयुगली चाटुरचनाः ॥52॥

सरोजं निन्दन्ती नखकिरणकर्पूरशिशिरा

निषिक्ता मारारेर्मुकुटशशिरेखाहिमजलैः ।

स्फुरन्ती कामाक्षि स्फुटरुचिमये पल्लवचये

तवाधत्ते मैत्रीं पथिकसुदृशा पादयुगली ॥53॥

नतानां सम्पत्तेरनवरतमाकर्षणजपः

प्ररोहत्संसारप्रसरगरिमस्तम्भनजपः ।

त्वदीयः कामाक्षि स्मरहरमनोमोहनजपः

पटीयान्नः पायात्पदनलिनमञ्जीरनिनदः ॥54॥

वितन्वीथा नाथे मम शिरसि कामाक्षि कृपया

पदाम्भोजन्यासं पशुपरिबृढप्राणदयिते ।

पिबन्तो यन्मुद्रां प्रकटमुपकम्पापरिसरं

दृशा नानन्द्यन्ते नलिनभवनारायणमुखाः ॥55॥

प्रणामोद्यद्बृन्दारमुकुटमन्दारकलिका-

विलोलल्लोलम्बप्रकरमयधूमप्रचुरिमा ।

प्रदीप्तः पादाब्जद्युतिविततिपाटल्यलहरी-

कृशानुः कामाक्ष्या मम दहतु संसारविपिनम् ॥56॥

वलक्षश्रीरृक्षाधिपशिशुसदृक्षैस्तव नखैः

जिघृक्षुर्दक्षत्वं सरसिरुहभिक्षुत्वकरणे ।

क्षणान्मे कामाक्षि क्षपितभवसङ्क्षोभगरिमा

वचोवैचक्षन्यं चरणयुगली पक्ष्मलयतात् ॥57॥

समन्तात्कामाक्षि क्षततिमिरसन्तानसुभगान्

अनन्ताभिर्भाभिर्दिनमनु दिगन्तान्विरचयन् ।

अहन्ताया हन्ता मम जडिमदन्तावलहरिः

विभिन्तां सन्तापं तव चरणचिन्तामणिरसौ ॥58॥

दधानो भास्वत्ताममृतनिलयो लोहितवपुः

विनम्राणां सौम्यो गुरुरपि कवित्वं च कलयन् ।

गतौ मन्दो गङ्गाधरमहिषि कामाक्षि भजतां

तमःकेतुर्मातस्तव चरणपद्मो विजयते ॥59॥

नयन्तीं दासत्वं नलिनभवमुख्यानसुलभ-

प्रदानाद्दीनानाममरतरुदौर्भाग्यजननीम् ।

जगज्जन्मक्षेमक्षयविधिषु कामाक्षि पदयो-

र्धुरीणामीष्टे करस्तव भणितुमाहोपुरुषिकाम् ॥60॥

जनोऽयं सन्तप्तो जननि भवचण्डांशुकिरणैः

अलब्धवैकं शीतं कणमपि परज्ञानपयसः ।

तमोमार्गे पान्थस्तव झटिति कामाक्षि शिशिरां

पदाम्भोजच्छायां परमशिवजाये मृगयते ॥61॥

जयत्यम्ब श्रीमन्नखकिरणचीनांशुकमयं

वितानं बिभ्राणे सुरमुकुटसङ्घट्टमसृणे ।

निजारुण्यक्षौमास्तरणवति कामाक्षि सुलभा

बुधैः संविन्नारी तव चरणमाणिक्यभवने ॥62॥

प्रतीमः कामाक्षि स्फुरिततरुणादित्यकिरण-

श्रियो मूलद्रव्यं तव चरणमद्रीन्द्रतनये ।

सुरेन्द्राशामापूरयति यदसौ ध्वान्तमखिलं

धुनीते दिग्भागानपि च महसा पाटलयते ॥63॥

महाभाष्यव्याख्यापटुशयनमारोपयति वा

स्मरव्यापारेर्ष्यापिशुननिटिलं कारयति वा ।

द्विरेफाणामध्यासयति सततं वाधिवसतिं

प्रणम्रान्कामाक्ष्याः पदनलिनमाहात्म्यगरिमा ॥64॥

विवेकाम्भस्स्रोतस्स्नपनपरिपाटीशिशिरिते

समीभूते शास्त्रस्मरणहलसङ्कर्षणवशात् ।

सतां चेतःक्षेत्रे वपति तव कामाक्षि चरणो

महासंवित्सस्यप्रकरवरबीजं गिरिसुते ॥65॥

दधानो मन्दारस्तबकपरिपाटीं नखरुचा

वहन्दीप्तां शोणाङ्गुलिपटलचाम्पेयकलिकाम् ।

अशोकोल्लासं नः प्रचुरयतु कामाक्षि चरणो

विकासी वासन्तः समय इव ते शर्वदयिते ॥66॥

नखांशुप्राचुर्यप्रसृमरमरालालिधवलः

स्फुरन्मञ्जीरोद्यन्मरकतमहश्शैवलयुतः ।

भवत्याः कामाक्षि स्फुटचरणपाटल्यकपटो

नदः शोणाभिख्यो नगपतितनूजे विजयते ॥67॥

धुनानं पङ्कौघं परमसुलभं कण्टककुलैः

विकासव्यासङ्गं विदधदपराधीनमनिशम् ।

नखेन्दुज्योत्स्नाभिर्विशदरुचि कामाक्षि नितराम्

असामान्यं मन्ये सरसिजमिदं ते पदयुगम् ॥68॥

करीन्द्राय द्रुह्यत्यलसगतिलीलासु विमलैः

पयोजैर्मात्सर्यं प्रकटयति कामं कलयते ।

पदाम्भोजद्वन्द्वं तव तदपि कामाक्षि हृदयं

मुनीनां शान्तानां कथमनिशमस्मै स्पृहयते ॥69॥

निरस्ता शोणिम्ना चरणकिरणानां तव शिवे

समिन्धाना सन्ध्यारुचिरचलराजन्यतनये ।

असामर्थ्यादेनं परिभवितुमेतत्समरुचां

सरोजानां जाने मुकुलयति शोभां प्रतिदिनम् ॥70॥

उपादिक्षद्दाक्ष्यं तव चरणनामा गुरुरसौ

मरालानां शङ्के मसृणगतिलालित्यसरणौ ।

अतस्ते निस्तन्द्रं नियतममुना सख्यपदवीं

प्रपन्नं पाथोजं प्रति दधति कामाक्षि कुतुकम् ॥71॥

दधानैः संसर्गं प्रकृतिमलिनैः षट्पदकुलैः

द्विजाधीशश्लाघाविधिषु विदधद्भिर्मुकुलताम् ।

रजोमिश्रैः पद्मैर्नियतमपि कामाक्षि पदयोः

विरोधस्ते युक्तो विषमशरवैरिप्रियतमे ॥72॥

कवित्वश्रीमिश्रीकरणनिपुणौ रक्षणचणौ

विपन्नानां श्रीमन्नलिनमसृणौ शोणकिरणौ ।

मुनीन्द्राणामन्तःकरणशरणौ मन्दसरणौ

मनोज्ञौ कामाक्ष्या दुरितहरणौ नौमि चरणौ ॥73॥

परस्मात्सर्वस्मादपि च परयोर्मुक्तिकरयोः

नखश्रीभिर्ज्योत्स्नाकलिततुलयोस्ताम्रतलयोः ।

निलीये कामाक्ष्या निगमनुतयोर्नाकिनतयोः

निरस्तप्रोन्मीलन्नलिनमदयोरेव पदयोः ॥74॥

स्वभावादन्योन्यं किसलयमपीदं तव पदं

म्रदिम्ना शोणिम्ना भगवति दधाते सदृशताम् ।

वने पूर्वस्येच्छा सततमवने किं तु जगतां

परस्येत्थं भेदः स्फुरति हृदि कामाक्षि सुधियाम् ॥75॥

कथं वाचालोऽपि प्रकटमणिमञ्जीरनिनदैः

सदैवानन्दार्द्रान्विरचयति वाचंयमजनान् ।

प्रकृत्या ते शोणच्छविरपि च कामाक्षि चरणो

मनीषानैर्मल्यं कथमिव नृणां मांसलयते ॥76॥

चलत्तृष्णावीचीपरिचलनपर्याकुलतया

मुहुर्भ्रान्तस्तान्तः परमशिववामाक्षि परवान् ।

तितीर्षुः कामाक्षि प्रचुरतरकर्माम्बुधिममुं

कदाहं लप्स्ये ते चरणमणिसेतुं गिरिसुते ॥77॥

विशुष्यन्त्यां प्रज्ञासरिति दुरितग्रीष्मसमय-

प्रभावेण क्षीणे सति मम मनःकेकिनि शुचा ।

त्वदीयः कामाक्षि स्फुरितचरणाम्भोदमहिमा

नभोमासाटोपं नगपतिसुते किं न कुरुते ॥78॥

विनम्राणां चेतोभवनवलभीसीम्नि चरण-

प्रदीपे प्राकाश्यं दधति तव निर्धूततमसि ।

असीमा कामाक्षि स्वयमलघुदुष्कर्मलहरी

विघूर्णन्ती शान्तिं शलभपरिपाटीव भजते ॥79॥

विराजन्ती शुक्तिर्नखकिरणमुक्तामणिततेः

विपत्पाथोराशौ तरिरपि नराणां प्रणमताम् ।

त्वदीयः कामाक्षि ध्रुवमलघुवह्निर्भववने

मुनीनां ज्ञानाग्नेररणिरयमङ्घिर्विजयते ॥80॥

समस्तैः संसेव्यः सततमपि कामाक्षि विबुधैः

स्तुतो गन्धर्वस्त्रीसुललितविपञ्चीकलरवैः ।

भवत्या भिन्दानो भवगिरिकुलं जृम्भिततमो-

बलद्रोही मातश्चरणपुरुहूतो विजयते ॥81॥

वसन्तं भक्तानामपि मनसि नित्यं परिलसद्-

घनच्छायापूर्णं शुचिमपि नृणां तापशमनम् ।

नखेन्दुज्योत्स्नाभिः शिशिरमपि पद्मोदयकरं

नमामः कामाक्ष्याश्चरणमधिकाश्चर्यकरणम् ॥82॥

कवीन्द्राणां नानाभणितिगुणचित्रीकृतवचः-

प्रपञ्चव्यापारप्रकटनकलाकौशलनिधिः ।

अधःकुर्वन्नब्जं सनकभृगुमुख्यैर्मुनिजनैः

नमस्यः कामाक्ष्याश्चरणपरमेष्ठी विजयते ॥83॥

भवत्याः कामाक्षि स्फुरितपदपङ्केरुहभुवां

परागाणां पूरैः परिहृतकलङ्कव्यतिकरैः ।

नतानामामृष्टे हृदयमुकुरे निर्मलरुचि

प्रसन्ने निश्शेषं प्रतिफलति विश्वं गिरिसुते ॥84॥

तव त्रस्तं पादात्किसलयमरण्यान्तरमगात्

परं रेखारूपं कमलममुमेवाश्रितमभूत् ।

जितानां कामाक्षि द्वितयमपि युक्तं परिभवे

विदेशे वासो वा शरणगमनं वा निजरिपोः ॥85॥

गृहीत्वा याथार्थ्यं निगमवचसां देशिककृपा-

कटाक्षर्कज्योतिश्शमितममताबन्धतमसः ।

यतन्ते कामाक्षि प्रतिदिवसमन्तर्द्रढयितुं

त्वदीयं पादाब्जं सुकृतपरिपाकेन सुजनाः ॥86॥

जडानामप्यम्ब स्मरणसमये तवच्चरणयोः

भ्रमन्मन्थक्ष्माभृद्धुमुघुमितसिन्धुप्रतिभटाः ।

प्रसन्नाः कामाक्षि प्रसभमधरस्पन्दनकरा

भवन्ति स्वच्छन्दं प्रकृतिपरिपक्का भणितयः ॥87॥

वहन्नप्यश्रान्तं मधुरनिनदं हंसकमसौ

तमेवाधः कर्तुं किमिव यतते केलिगमने ।

भवस्यैवानन्दं विदधदपि कामाक्षि चरणो

भवत्यास्तद्द्रोहं भगवति किमेवं वितनुते ॥88॥

यदत्यन्तं ताम्यत्यलसगतिवार्तास्वपि शिवे

तदेतत्कामाक्षि प्रकृतिमृदुलं ते पदयुगम् ।

किरीटैः सङ्घट्टं कथमिव सुरौघस्य सहते

मुनीन्द्राणामास्ते मनसि च कथं सूचिनिशिते ॥89॥

मनोरङ्गे मत्के विबुधजनसम्मोदजननी

सरागव्यासङ्गं सरसमृदुसञ्चारसुभगा ।

मनोज्ञा कामाक्षि प्रकटयतु लास्यप्रकरणं

रणन्मञ्जीरा ते चरणयुगलीनर्तकवधूः ॥90॥

परिष्कुर्वन्मातः पशुपतिकपर्दं चरणराट्

पराचां हृत्पद्मं परमभणितीनां च मकुटम् ।

भवाख्ये पाथोधौ परिहरतु कामाक्षि ममता-

पराधीनत्वं मे परिमुषितपाथोजमहिमा ॥91॥

प्रसूनैः सम्पर्कादमरतरुणीकुन्तलभवैः

अभीष्टानां दानादनिशमपि कामाक्षि नमताम् ।

स्वसङ्गात्कङ्केलिप्रसवजनकत्वेन च शिवे

त्रिधा धत्ते वार्तां सुरभिरिति पादो गिरिसुते ॥92॥

महामोहस्तेनव्यतिकरभयात्पालयति यो

विनिक्षिप्तं स्वस्मिन्निजजनमनोरत्नमनिशम् ।

स रागस्योद्रेकात्सततमपि कामाक्षि तरसा

किमेवं पादोऽसौ किसलयरुचिं चोरयति ते ॥93॥

सदा स्वादुङ्कारं विषयलहरीशालिकणिकां

समास्वाद्य श्रान्तं हृदयशुकपोतं जननि मे ।

कृपाजाले फालेक्षणमहिषि कामाक्षि रभसात्

गृहीत्वा रुन्धीथारस्तव पदयुगीपञ्जरपुटे ॥94॥

धुनानं कामाक्षि स्मरणलवमात्रेण जडिम-

ज्वरप्रौढिं गूढस्थिति निगमनैकुञ्जकुहरे ।

अलभ्यं सर्वेषां कतिचन लभन्ते सुकृतिनः

चिरादन्विष्यन्तस्तव चरणसिद्धौषधमिदम् ॥95॥

रणन्मञ्जीराभ्यां ललितगमनाभ्यां सुकृतिनां

मनोवास्तव्याभ्यां मथिततिमिराभ्यां नखरुचा ।

निधेयाभ्यां पत्या निजशिरसि कामाक्षि सततं

नमस्ते पादाभ्यां नलिनमृदुलाभ्यां गिरिसुते ॥96॥

सुरागे राकेन्दुप्रतिनिधिमुखे पर्वतसुते

चिराल्लभ्ये भक्त्या शमधनजनानां परिषदा ।

मनोभृङ्गो मत्कः पदकमलयुग्मे जननि ते

प्रकामं कामाक्षि त्रिपुरहरवामाक्षि रमताम् ॥97॥

शिवे संविद्रूपे शशिशकलचूडप्रियतमे

शनैर्गत्यागत्या जितसुरवरेभे गिरिसुते ।

यतन्ते सन्तस्ते चरणनलिनालानयुगले

सदा बद्धं चित्तप्रमदकरियूथं दृढतरम् ॥98॥

यशः सूते मातर्मधुरकवितां पक्ष्मलयते

श्रियं दत्ते चित्ते कमपि परिपाकं प्रथयते ।

सतां पाशग्रन्थिं शिथिलयति किं किं न कुरुते

प्रपन्ने कामाक्ष्याः प्रणतिपरिपाटी चरणयोः ॥99॥

मनीषां माहेन्द्रीं ककुभमिव ते कामपि दशां

प्रधत्ते कामाक्ष्याश्चरणतरुणादित्यकिरणः ।

यदीये सम्पर्के धृतरसमरन्दा कवयतां

परीपाकं धत्ते परिमलवती सूक्तिनलिनी ॥100॥

पुरा मारारातिः पुरमजयदम्ब स्तवशतैः

प्रसन्नायां सत्यां त्वयि तुहिनशैलेन्द्रतनये ।

अतस्ते कामाक्षि स्फुरतु तरसा कालसमये

समायाते मातर्मम मनसि पादाब्जयुगलम् ॥101॥

पदद्वन्द्वं मन्दं गतिषु निवसन्तं हृदि सतां

गिरामन्ते भ्रान्तं कृतकरहितानां परिबृढे ।

जनानामानन्दं जननि जनयन्तं प्रणमतां

त्वदीयं कामाक्षि प्रतिदिनमहं नौमि विमलम् ॥102॥

इदं यः कामाक्ष्याश्चरणनलिनस्तोत्रशतकं

जपेन्नित्यं भक्त्या निखिलजगदाह्लादजनकम् ।

स विश्वेषां वन्द्यः सकलकविलोकैकतिलकः

चिरं भुक्त्वा भोगान्परिणमति चिद्रूपकलया ॥103॥

॥ इति पादारविन्दशतकं सम्पूर्णम् ॥