𑌶𑌮𑍍𑌭𑍁𑌸𑍍𑌵𑌯𑌮𑍍𑌭𑍁𑌹𑌰𑌯𑍋 𑌹𑌰𑌿𑌣𑍇𑌕𑍍𑌷𑌣𑌾𑌨𑌾𑌂
𑌯𑍇𑌨𑌾𑌕𑍍𑌰𑌿𑌯𑌨𑍍𑌤 𑌸𑌤𑌤𑌂 𑌗𑍃𑌹𑌕𑍁𑌮𑍍𑌭𑌦𑌾𑌸𑌾𑌃 ।
𑌵𑌾𑌚𑌾𑌂 𑌅𑌗𑍋𑌚𑌰𑌚𑌰𑌿𑌤𑍍𑌰𑌵𑌿𑌚𑌿𑌤𑍍𑌰𑌿𑌤𑌾𑌯
𑌤𑌸𑍍𑌮𑍈 𑌨𑌮𑍋 𑌭𑌗𑌵𑌤𑍇 𑌮𑌕𑌰𑌧𑍍𑌵𑌜𑌾𑌯 ॥ 2.1 ॥
𑌸𑍍𑌮𑌿𑌤𑍇𑌨 𑌭𑌾𑌵𑍇𑌨 𑌚 𑌲𑌜𑍍𑌜𑌯𑌾 𑌭𑌿𑌯𑌾
𑌪𑌰𑌾𑌣𑍍𑌮𑍁𑌖𑍈𑌰𑌰𑍍𑌧𑌕𑌟𑌾𑌕𑍍𑌷𑌵𑍀𑌕𑍍𑌷𑌣𑍈𑌃 ।
𑌵𑌚𑍋𑌭𑌿𑌰𑍀𑌰𑍍𑌷𑍍𑌯𑌾𑌕𑌲𑌹𑍇𑌨 𑌲𑍀𑌲𑌯𑌾
𑌸𑌮𑌸𑍍𑌤𑌭𑌾𑌵𑍈𑌃 𑌖𑌲𑍁 𑌬𑌨𑍍𑌧𑌨𑌂 𑌸𑍍𑌤𑍍𑌰𑌿𑌯𑌃 ॥ 2.2 ॥
𑌭𑍍𑌰𑍂𑌚𑌾𑌤𑍁𑌰𑍍𑌯𑌾𑌤𑍍𑌕𑍁𑌷𑍍𑌚𑌿𑌤𑌾𑌕𑍍𑌷𑌾𑌃 𑌕𑌟𑌾𑌕𑍍𑌷𑌾𑌃
𑌸𑍍𑌨𑌿𑌗𑍍𑌧𑌾 𑌵𑌾𑌚𑍋 𑌲𑌜𑍍𑌜𑌿𑌤𑌾𑌨𑍍𑌤𑌾𑌶𑍍𑌚 𑌹𑌾𑌸𑌾𑌃 ।
𑌲𑍀𑌲𑌾𑌮𑌨𑍍𑌦𑌂 𑌪𑍍𑌰𑌸𑍍𑌥𑌿𑌤𑌂 𑌚 𑌸𑍍𑌥𑌿𑌤𑌂 𑌚
𑌸𑍍𑌤𑍍𑌰𑍀𑌣𑌾𑌂 𑌏𑌤𑌦𑍍𑌭𑍂𑌷𑌣𑌂 𑌚𑌾𑌯𑍁𑌧𑌂 𑌚 ॥ 2.3 ॥
𑌕𑍍𑌵𑌚𑌿𑌤𑍍𑌸𑌭𑍍𑌰𑍂𑌭𑌙𑍍𑌗𑍈𑌃 𑌕𑍍𑌵𑌚𑌿𑌦𑌪𑌿 𑌚 𑌲𑌜𑍍𑌜𑌾𑌪𑌰𑌿𑌗𑌤𑍈𑌃
𑌕𑍍𑌵𑌚𑌿𑌦𑍍𑌭𑍂𑌰𑌿𑌤𑍍𑌰𑌸𑍍𑌤𑍈𑌃 𑌕𑍍𑌵𑌚𑌿𑌦𑌪𑌿 𑌚 𑌲𑍀𑌲𑌾𑌵𑌿𑌲𑌲𑌿𑌤𑍈𑌃 ।
𑌕𑍁𑌮𑌾𑌰𑍀𑌣𑌾𑌂 𑌏𑌤𑍈𑌰𑍍𑌮𑌦𑌨𑌸𑍁𑌭𑌗𑍈𑌰𑍍𑌨𑍇𑌤𑍍𑌰𑌵𑌲𑌿𑌤𑍈𑌃
𑌸𑍍𑌫𑍁𑌰𑌨𑍍𑌨𑍀𑌲𑌾𑌬𑍍𑌜𑌾𑌨𑌾𑌂 𑌪𑍍𑌰𑌕𑌰𑌪𑌰𑌿𑌕𑍀𑌰𑍍𑌣𑌾 𑌇𑌵 𑌦𑌿𑌶𑌃 ॥ 2.4 ॥
𑌵𑌕𑍍𑌤𑍍𑌰𑌂 𑌚𑌨𑍍𑌦𑍍𑌰𑌵𑌿𑌕𑌾𑌸𑌿 𑌪𑌙𑍍𑌕𑌜𑌪𑌰𑍀𑌹𑌾𑌸𑌕𑍍𑌷𑌮𑍇 𑌲𑍋𑌚𑌨𑍇
𑌵𑌰𑍍𑌣𑌃 𑌸𑍍𑌵𑌰𑍍𑌣𑌂 𑌅𑌪𑌾𑌕𑌰𑌿𑌷𑍍𑌣𑍁𑌰𑌲𑌿𑌨𑍀𑌜𑌿𑌷𑍍𑌣𑍁𑌃 𑌕𑌚𑌾𑌨𑌾𑌂 𑌚𑌯𑌃 ।
𑌬𑌕𑍍𑌷𑍋𑌜𑌾𑌵𑌿𑌭𑌕𑍁𑌮𑍍𑌭𑌵𑌿𑌭𑍍𑌰𑌮𑌹𑌰𑍗 𑌗𑍁𑌰𑍍𑌵𑍀 𑌨𑌿𑌤𑌮𑍍𑌬𑌸𑍍𑌥𑌲𑍀
𑌵𑌾𑌚𑌾𑌂 𑌹𑌾𑌰𑌿 𑌚 𑌮𑌾𑌰𑍍𑌦𑌵𑌂 𑌯𑍁𑌵𑌤𑍀𑌷𑍁 𑌸𑍍𑌵𑌾𑌭𑌾𑌵𑌿𑌕𑌂 𑌮𑌣𑍍𑌡𑌨𑌮𑍍 ॥ 2.5 ॥
𑌸𑍍𑌮𑌿𑌤𑌕𑌿𑌞𑍍𑌚𑌿𑌨𑍍𑌮𑍁𑌗𑍍𑌧𑌂 𑌸𑌰𑌲𑌤𑌰𑌲𑍋 𑌦𑍃𑌷𑍍𑌟𑌿𑌵𑌿𑌭𑌵𑌃
𑌪𑌰𑌿𑌸𑍍𑌪𑌨𑍍𑌦𑍋 𑌵𑌾𑌚𑌾𑌂 𑌅𑌭𑌿𑌨𑌵𑌵𑌿𑌲𑌾𑌸𑍋𑌕𑍍𑌤𑌿𑌸𑌰𑌸𑌃 ।
𑌗𑌤𑌾𑌨𑌾𑌂 𑌆𑌰𑌮𑍍𑌭𑌃 𑌕𑌿𑌸𑌲𑌯𑌿𑌤𑌲𑍀𑌲𑌾𑌪𑌰𑌿𑌕𑌰𑌃
𑌸𑍍𑌪𑍃𑌶𑌨𑍍𑌤𑍍𑌯𑌾𑌸𑍍𑌤𑌾𑌰𑍁𑌣𑍍𑌯𑌂 𑌕𑌿𑌂 𑌇𑌵 𑌨 𑌹𑌿 𑌰𑌮𑍍𑌯𑌂 𑌮𑍃𑌗𑌦𑍃𑌶𑌃 ॥ 2.6 ॥
𑌦𑍍𑌰𑌷𑍍𑌟𑌵𑍍𑌯𑍇𑌷𑍁 𑌕𑌿𑌂 𑌉𑌤𑍍𑌤𑌮𑌂 𑌮𑍃𑌗𑌦𑍃𑌶𑌃 𑌪𑍍𑌰𑍇𑌮𑌪𑍍𑌰𑌸𑌨𑍍𑌨𑌂 𑌮𑍁𑌖𑌂
𑌘𑍍𑌰𑌾𑌤𑌵𑍇𑌷𑍍𑌵𑌪𑌿 𑌕𑌿𑌂 𑌤𑌦𑍍𑌆𑌸𑍍𑌯𑌪𑌵𑌨𑌃 𑌶𑍍𑌰𑌵𑍍𑌯𑍇𑌷𑍁 𑌕𑌿𑌂 𑌤𑌦𑍍𑌵𑌚𑌃 ।
𑌕𑌿𑌂 𑌸𑍍𑌵𑌾𑌦𑍍𑌯𑍇𑌷𑍁 𑌤𑌦𑍍𑌓𑌷𑍍𑌠𑌪𑌲𑍍𑌲𑌵𑌰𑌸𑌃 𑌸𑍍𑌪𑍃𑌶𑍍𑌯𑍇𑌷𑍁 𑌕𑌿𑌂 𑌤𑌦𑍍𑌵𑌪𑍁𑌰𑍍𑌧𑍍𑌯𑍇𑌯𑌂
𑌕𑌿𑌂 𑌨𑌵𑌯𑍗𑌵𑌨𑍇 𑌸𑌹𑍃𑌦𑌯𑍈𑌃 𑌸𑌰𑍍𑌵𑌤𑍍𑌰 𑌤𑌦𑍍𑌵𑌿𑌭𑍍𑌰𑌮𑌾𑌃 ॥ 2.7 ॥
𑌏𑌤𑌾𑌶𑍍𑌚𑌲𑌦𑍍𑌵𑌲𑌯𑌸𑌂𑌹𑌤𑌿𑌮𑍇𑌖𑌲𑍋𑌤𑍍𑌥𑌝𑌙𑍍𑌕𑌾𑌰
𑌨𑍂𑌪𑍁𑌰𑌪𑌰𑌾𑌜𑌿𑌤𑌰𑌾𑌜𑌹𑌂𑌸𑍍𑌯𑌃 ।
𑌕𑍁𑌰𑍍𑌵𑌨𑍍𑌤𑌿 𑌕𑌸𑍍𑌯 𑌨 𑌮𑌨𑍋 𑌵𑌿𑌵𑌶𑌂 𑌤𑌰𑍁𑌣𑍍𑌯𑍋
𑌵𑌿𑌤𑍍𑌰𑌸𑍍𑌤𑌮𑍁𑌗𑍍𑌧𑌹𑌰𑌿𑌣𑍀𑌸𑌦𑍃𑌶𑍈𑌃 𑌕𑌟𑌾𑌕𑍍𑌷𑍈𑌃 ॥ 2.8 ॥
𑌕𑍁𑌙𑍍𑌕𑍁𑌮𑌪𑌙𑍍𑌕𑌕𑌲𑌙𑍍𑌕𑌿𑌤𑌦𑍇𑌹𑌾
𑌗𑍗𑌰𑌪𑌯𑍋𑌧𑌰𑌕𑌮𑍍𑌪𑌿𑌤𑌹𑌾𑌰𑌾 ।
𑌨𑍂𑌪𑍁𑌰𑌹𑌂𑌸𑌰𑌣𑌤𑍍𑌪𑌦𑍍𑌮𑌾
𑌕𑌂 𑌨 𑌵𑌶𑍀𑌕𑍁𑌰𑍁𑌤𑍇 𑌭𑍁𑌵𑌿 𑌰𑌾𑌮𑌾 ॥ 2.9 ॥
𑌨𑍂𑌨𑌂 𑌹𑌿 𑌤𑍇 𑌕𑌵𑌿𑌵𑌰𑌾 𑌵𑌿𑌪𑌰𑍀𑌤𑌵𑌾𑌚𑍋
𑌯𑍇 𑌨𑌿𑌤𑍍𑌯𑌂 𑌆𑌹𑍁𑌰𑌬𑌲𑌾 𑌇𑌤𑌿 𑌕𑌾𑌮𑌿𑌨𑍀𑌸𑍍𑌤𑌾𑌃 ।
𑌯𑌾𑌭𑌿𑌰𑍍𑌵𑌿𑌲𑍋𑌲𑌿𑌤𑌰𑌤𑌾𑌰𑌕𑌦𑍃𑌷𑍍𑌟𑌿𑌪𑌾𑌤𑍈𑌃
𑌶𑌕𑍍𑌰𑌾𑌦𑌯𑍋𑌽𑌪𑌿 𑌵𑌿𑌜𑌿𑌤𑌾𑌸𑍍𑌤𑍍𑌵𑌬𑌲𑌾𑌃 𑌕𑌥𑌂 𑌤𑌾𑌃 ॥ 2.10 ॥
𑌨𑍂𑌨𑌂 𑌆𑌜𑍍𑌞𑌾𑌕𑌰𑌸𑍍𑌤𑌸𑍍𑌯𑌾𑌃 𑌸𑍁𑌭𑍍𑌰𑍁𑌵𑍋 𑌮𑌕𑌰𑌧𑍍𑌵𑌜𑌃 ।
𑌯𑌤𑌸𑍍𑌤𑌨𑍍𑌨𑍇𑌤𑍍𑌰𑌸𑌞𑍍𑌚𑌾𑌰𑌸𑍂𑌚𑌿𑌤𑍇𑌷𑍁 𑌪𑍍𑌰𑌵𑌰𑍍𑌤𑌤𑍇 ॥ 2.11 ॥
𑌕𑍇𑌶𑌾𑌃 𑌸𑌂𑌯𑌮𑌿𑌨𑌃 𑌶𑍍𑌰𑍁𑌤𑍇𑌰𑌪𑌿 𑌪𑌰𑌂 𑌪𑌾𑌰𑌂 𑌗𑌤𑍇 𑌲𑍋𑌚𑌨𑍇
𑌅𑌨𑍍𑌤𑌰𑍍𑌵𑌕𑍍𑌤𑍍𑌰𑌂 𑌅𑌪𑌿 𑌸𑍍𑌵𑌭𑌾𑌵𑌶𑍁𑌚𑌿𑌭𑍀𑌃 𑌕𑍀𑌰𑍍𑌣𑌂 𑌦𑍍𑌵𑌿𑌜𑌾𑌨𑌾𑌂 𑌗𑌣𑍈𑌃 ।
𑌮𑍁𑌕𑍍𑌤𑌾𑌨𑌾𑌂 𑌸𑌤𑌤𑌾𑌧𑌿𑌵𑌾𑌸𑌰𑍁𑌚𑌿𑌰𑍗 𑌵𑌕𑍍𑌷𑍋𑌜𑌕𑍁𑌮𑍍𑌭𑌾𑌵𑌿𑌮𑌾𑌵𑌿𑌤𑍍𑌥𑌂
𑌤𑌨𑍍𑌵𑌿 𑌵𑌪𑍁𑌃 𑌪𑍍𑌰𑌶𑌾𑌨𑍍𑌤𑌂 𑌅𑌪𑌿 𑌤𑍇𑌰𑌾𑌗𑌂 𑌕𑌰𑍋𑌤𑍍𑌯𑍇𑌵 𑌨𑌃 ॥ 2.12 ॥
𑌮𑍁𑌗𑍍𑌧𑍇 𑌧𑌾𑌨𑍁𑌷𑍍𑌕𑌤𑌾 𑌕𑍇𑌯𑌂 𑌅𑌪𑍂𑌰𑍍𑌵𑌾 𑌤𑍍𑌵𑌯𑌿 𑌦𑍃𑌶𑍍𑌯𑌤𑍇 ।
𑌯𑌯𑌾 𑌵𑌿𑌧𑍍𑌯𑌸𑌿 𑌚𑍇𑌤𑌾𑌂𑌸𑌿 𑌗𑍁𑌣𑍈𑌰𑍇𑌵 𑌨 𑌸𑌾𑌯𑌕𑍈𑌃 ॥ 2.13 ॥
𑌸𑌤𑌿 𑌪𑍍𑌰𑌦𑍀𑌪𑍇 𑌸𑌤𑍍𑌯𑌗𑍍𑌨𑍗 𑌸𑌤𑍍𑌸𑍁 𑌤𑌾𑌰𑌾𑌰𑌵𑍀𑌨𑍍𑌦𑍁𑌷𑍁 ।
𑌵𑌿𑌨𑌾 𑌮𑍇 𑌮𑍃𑌗𑌶𑌾𑌵𑌾𑌕𑍍𑌷𑍍𑌯𑌾 𑌤𑌮𑍋𑌭𑍂𑌤𑌂 𑌇𑌦𑌂 𑌜𑌗𑌤𑍍 ॥ 2.14 ॥
𑌉𑌦𑍍𑌵𑍃𑌤𑍍𑌤𑌃 𑌸𑍍𑌤𑌨𑌭𑌾𑌰 𑌏𑌷 𑌤𑌰𑌲𑍇 𑌨𑍇𑌤𑍍𑌰𑍇 𑌚𑌲𑍇 𑌭𑍍𑌰𑍂𑌲𑌤𑍇
𑌰𑌾𑌗𑌾𑌧𑌿𑌷𑍍𑌠𑌿𑌤𑌂 𑌓𑌷𑍍𑌠𑌪𑌲𑍍𑌲𑌵𑌂 𑌇𑌦𑌂 𑌕𑍁𑌰𑍍𑌵𑌨𑍍𑌤𑍁 𑌨𑌾𑌮 𑌵𑍍𑌯𑌥𑌾𑌮𑍍 ।
𑌸𑍗𑌭𑌾𑌗𑍍𑌯𑌾𑌕𑍍𑌷𑌰𑌮𑌾𑌲𑌿𑌕𑍇𑌵 𑌲𑌿𑌖𑌿𑌤𑌾 𑌪𑍁𑌷𑍍𑌪𑌾𑌯𑍁𑌧𑍇𑌨 𑌸𑍍𑌵𑌯𑌂
𑌮𑌧𑍍𑌯𑌸𑍍𑌥𑌾𑌪𑌿 𑌕𑌰𑍋𑌤𑌿 𑌤𑌾𑌪𑌂 𑌅𑌧𑌿𑌕𑌂 𑌰𑍋𑌮𑌾𑌵𑌲𑌿𑌃 𑌕𑍇𑌨 𑌸𑌾 ॥ 2.15 ॥
𑌮𑍁𑌖𑍇𑌨 𑌚𑌨𑍍𑌦𑍍𑌰𑌕𑌾𑌨𑍍𑌤𑍇𑌨 𑌮𑌹𑌾𑌨𑍀𑌲𑍈𑌃 𑌶𑌿𑌰𑍋𑌰𑍁𑌹𑍈𑌃 ।
𑌕𑌰𑌾𑌭𑍍𑌯𑌾𑌂 𑌪𑌦𑍍𑌮𑌰𑌾𑌗𑌾𑌭𑍍𑌯𑌾𑌂 𑌰𑍇𑌜𑍇 𑌰𑌤𑍍𑌨𑌮𑌯𑍀𑌵 𑌸𑌾 ॥ 2.16 ॥
𑌗𑍁𑌰𑍁𑌣𑌾 𑌸𑍍𑌤𑌨𑌭𑌾𑌰𑍇𑌣 𑌮𑍁𑌖𑌚𑌨𑍍𑌦𑍍𑌰𑍇𑌣 𑌭𑌾𑌸𑍍𑌵𑌤𑌾 ।
𑌶𑌨𑍈𑌶𑍍𑌚𑌰𑌾𑌭𑍍𑌯𑌾𑌂 𑌪𑌾𑌦𑌾𑌭𑍍𑌯𑌾𑌂 𑌰𑍇𑌜𑍇 𑌗𑍍𑌰𑌹𑌮𑌯𑍀𑌵 𑌸𑌾 ॥ 2.17 ॥
𑌤𑌸𑍍𑌯𑌾𑌃 𑌸𑍍𑌤𑌨𑍗 𑌯𑌦𑌿 𑌘𑌨𑍗 𑌜𑌘𑌨𑌂 𑌚 𑌹𑌾𑌰𑌿
𑌵𑌕𑍍𑌤𑍍𑌰𑌂 𑌚 𑌚𑌾𑌰𑍁 𑌤𑌵 𑌚𑌿𑌤𑍍𑌤 𑌕𑌿𑌂 𑌆𑌕𑍁𑌲𑌤𑍍𑌵𑌮𑍍 ।
𑌪𑍁𑌣𑍍𑌯𑌂 𑌕𑍁𑌰𑍁𑌷𑍍𑌵 𑌯𑌦𑌿 𑌤𑍇𑌷𑍁 𑌤𑌵𑌾𑌸𑍍𑌤𑌿 𑌵𑌾𑌞𑍍𑌛𑌾
𑌪𑍁𑌣𑍍𑌯𑍈𑌰𑍍𑌵𑌿𑌨𑌾 𑌨 𑌹𑌿 𑌭𑌵𑌨𑍍𑌤𑌿 𑌸𑌮𑍀𑌹𑌿𑌤𑌾𑌰𑍍𑌥𑌾𑌃 ॥ 2.18 ॥
𑌇𑌮𑍇 𑌤𑌾𑌰𑍁𑌣𑍍𑌯𑌶𑍍𑌰𑍀𑌨𑌵𑌪𑌰𑌿𑌮𑌲𑌾𑌃 𑌪𑍍𑌰𑍗𑌢𑌸𑍁𑌰𑌤𑌪𑍍𑌰𑌤𑌾𑌪
𑌪𑍍𑌰𑌾𑌰𑌮𑍍𑌭𑌾𑌃 𑌸𑍍𑌮𑌰𑌵𑌿𑌜𑌯𑌦𑌾𑌨𑌪𑍍𑌰𑌤𑌿𑌭𑍁𑌵𑌃 ।
𑌚𑌿𑌰𑌂 𑌚𑍇𑌤𑌶𑍍𑌚𑍋𑌰𑌾 𑌅𑌭𑌿𑌨𑌵𑌵𑌿𑌕𑌾𑌰𑍈𑌕𑌗𑍁𑌰𑌵𑍋
𑌵𑌿𑌲𑌾𑌸𑌵𑍍𑌯𑌾𑌪𑌾𑌰𑌾𑌃 𑌕𑌿𑌂 𑌅𑌪𑌿 𑌵𑌿𑌜𑌯𑌨𑍍𑌤𑍇 𑌮𑍃𑌗𑌦𑍃𑌶𑌾𑌮𑍍 ॥ 2.19 ॥
𑌪𑍍𑌰𑌣𑌯𑌮𑌧𑍁𑌰𑌾𑌃 𑌪𑍍𑌰𑍇𑌮𑍋𑌦𑍍𑌗𑌾𑌰𑌾 𑌰𑌸𑌾𑌶𑍍𑌰𑌯𑌤𑌾𑌂 𑌗𑌤𑌾𑌃
𑌫𑌣𑌿𑌤𑌿𑌮𑌧𑍁𑌰𑌾 𑌮𑍁𑌗𑍍𑌧𑌪𑍍𑌰𑌾𑌯𑌾𑌃 𑌪𑍍𑌰𑌕𑌾𑌶𑌿𑌤𑌸𑌮𑍍𑌮𑌦𑌾𑌃 ।
𑌪𑍍𑌰𑌕𑍃𑌤𑌿𑌸𑍁𑌭𑌗𑌾 𑌵𑌿𑌸𑍍𑌰𑌮𑍍𑌭𑌾𑌰𑍍𑌦𑍍𑌰𑌾𑌃 𑌸𑍍𑌮𑌰𑍋𑌦𑌯𑌦𑌾𑌯𑌿𑌨𑍀
𑌰𑌹𑌸𑌿 𑌕𑌿𑌂 𑌅𑌪𑌿 𑌸𑍍𑌵𑍈𑌰𑌾𑌲𑌾𑌪𑌾 𑌹𑌰𑌨𑍍𑌤𑌿 𑌮𑍃𑌗𑍀𑌦𑍃𑌶𑌾𑌮𑍍 ॥ 2.20 ॥
𑌵𑌿𑌶𑍍𑌰𑌮𑍍𑌯 𑌵𑌿𑌶𑍍𑌰𑌮𑍍𑌯 𑌵𑌨𑌦𑍍𑌰𑍁𑌮𑌾𑌣𑌾𑌂
𑌛𑌾𑌯𑌾𑌸𑍁 𑌤𑌨𑍍𑌵𑍀 𑌵𑌿𑌚𑌚𑌾𑌰 𑌕𑌾𑌚𑌿𑌤𑍍 ।
𑌸𑍍𑌤𑌨𑍋𑌤𑍍𑌤𑌰𑍀𑌯𑍇𑌣 𑌕𑌰𑍋𑌦𑍍𑌧𑍃𑌤𑍇𑌨
𑌨𑌿𑌵𑌾𑌰𑌯𑌨𑍍𑌤𑍀 𑌶𑌶𑌿𑌨𑍋 𑌮𑌯𑍂𑌖𑌾𑌨𑍍 ॥ 2.21 ॥
𑌅𑌦𑌰𑍍𑌶𑌨𑍇 𑌦𑌰𑍍𑌶𑌨𑌮𑌾𑌤𑍍𑌰𑌕𑌾𑌮𑌾
𑌦𑍃𑌷𑍍𑌟𑍍𑌵𑌾 𑌪𑌰𑌿𑌷𑍍𑌵𑌙𑍍𑌗𑌸𑍁𑌖𑍈𑌕𑌲𑍋𑌲𑌾 ।
𑌆𑌲𑌿𑌙𑍍𑌗𑌿𑌤𑌾𑌯𑌾𑌂 𑌪𑍁𑌨𑌰𑌾𑌯𑌤𑌾𑌕𑍍𑌷𑍍𑌯𑌾𑌮𑌾𑌶𑌾𑌸𑍍𑌮𑌹𑍇
𑌵𑌿𑌗𑍍𑌰𑌹𑌯𑍋𑌰𑌭𑍇𑌦𑌮𑍍 ॥ 2.22 ॥
𑌮𑌾𑌲𑌤𑍀 𑌶𑌿𑌰𑌸𑌿 𑌜𑍃𑌮𑍍𑌭𑌣𑌂 𑌮𑍁𑌖𑍇
𑌚𑌨𑍍𑌦𑌨𑌂 𑌵𑌪𑍁𑌷𑌿 𑌕𑍁𑌙𑍍𑌕𑍁𑌮𑌾𑌵𑌿𑌲𑌮𑍍 ।
𑌵𑌕𑍍𑌷𑌸𑌿 𑌪𑍍𑌰𑌿𑌯𑌤𑌮𑌾 𑌮𑌦𑌾𑌲𑌸𑌾
𑌸𑍍𑌵𑌰𑍍𑌗 𑌏𑌷 𑌪𑌰𑌿𑌶𑌿𑌷𑍍𑌟 𑌆𑌗𑌮𑌃 ॥ 2.23 ॥
𑌪𑍍𑌰𑌾𑌙𑍍𑌮𑌾𑌂 𑌏𑌤𑌿 𑌮𑌨𑌾𑌗𑌨𑌾𑌗𑌤𑌰𑌸𑌂 𑌜𑌾𑌤𑌾𑌭𑌿𑌲𑌾𑌷𑌾𑌂 𑌤𑌤𑌃
𑌸𑌵𑍍𑌰𑍀𑌡𑌂 𑌤𑌦𑌨𑍁 𑌶𑍍𑌲𑌥𑍋𑌦𑍍𑌯𑌮𑌂 𑌅𑌥 𑌪𑍍𑌰𑌧𑍍𑌵𑌸𑍍𑌤𑌧𑍈𑌰𑍍𑌯𑌂 𑌪𑍁𑌨𑌃 ।
𑌪𑍍𑌰𑍇𑌮𑌾𑌰𑍍𑌦𑍍𑌰𑌂 𑌸𑍍𑌪𑍃𑌹𑌣𑍀𑌯𑌨𑌿𑌰𑍍𑌭𑌰𑌰𑌹𑌃 𑌕𑍍𑌰𑍀𑌡𑌾𑌪𑍍𑌰𑌗𑌲𑍍𑌭𑌂 𑌤𑌤𑍋
𑌨𑌿𑌃𑌸𑌙𑍍𑌗𑌾𑌙𑍍𑌗𑌵𑌿𑌕𑌰𑍍𑌷𑌣𑌾𑌧𑌿𑌕𑌸𑍁𑌖𑌰𑌮𑍍𑌯𑌂 𑌕𑍁𑌲𑌸𑍍𑌤𑍍𑌰𑍀𑌰𑌤𑌮𑍍 ॥ 2.24 ॥
𑌉𑌰𑌸𑌿 𑌨𑌿𑌪𑌤𑌿𑌤𑌾𑌨𑌾𑌂 𑌸𑍍𑌰𑌸𑍍𑌤𑌧𑌮𑍍𑌮𑌿𑌲𑍍𑌲𑌕𑌾𑌨𑌾𑌂
𑌮𑍁𑌕𑍁𑌲𑌿𑌤𑌨𑌯𑌨𑌾𑌨𑌾𑌂 𑌕𑌿𑌞𑍍𑌚𑌿𑌦𑍍𑌉𑌨𑍍𑌮𑍀𑌲𑌿𑌤𑌾𑌨𑌾𑌮𑍍 ।
𑌉𑌪𑌰𑌿 𑌸𑍁𑌰𑌤𑌖𑍇𑌦𑌸𑍍𑌵𑌿𑌨𑍍𑌨𑌗𑌣𑍍𑌡𑌸𑍍𑌥𑌲𑌾𑌨𑌾𑌮𑌧𑌰
𑌮𑌧𑍁 𑌵𑌧𑍂𑌨𑌾𑌂 𑌭𑌾𑌗𑍍𑌯𑌵𑌨𑍍𑌤𑌃 𑌪𑌿𑌬𑌨𑍍𑌤𑌿 ॥ 2.25 ॥
𑌆𑌮𑍀𑌲𑌿𑌤𑌨𑌯𑌨𑌾𑌨𑌾𑌂 𑌯𑌃
𑌸𑍁𑌰𑌤𑌰𑌸𑍋𑌽𑌨𑍁 𑌸𑌂𑌵𑌿𑌦𑌂 𑌭𑌾𑌤𑌿 ।
𑌮𑌿𑌥𑍁𑌰𑍈𑌰𑍍𑌮𑌿𑌥𑍋𑌽𑌵𑌧𑌾𑌰𑌿𑌤𑌮𑌵𑌿𑌤𑌥𑌮𑍍
𑌇𑌦𑌂 𑌏𑌵 𑌕𑌾𑌮𑌨𑌿𑌰𑍍𑌬𑌰𑍍𑌹𑌣𑌮𑍍 ॥ 2.26 ॥
𑌇𑌦𑌂 𑌅𑌨𑍁𑌚𑌿𑌤𑌂 𑌅𑌕𑍍𑌰𑌮𑌶𑍍𑌚 𑌪𑍁𑌂𑌸𑌾𑌂
𑌯𑌦𑌿𑌹 𑌜𑌰𑌾𑌸𑍍𑌵𑌪𑌿 𑌮𑌨𑍍𑌮𑌥𑌾 𑌵𑌿𑌕𑌾𑌰𑌾𑌃 ।
𑌤𑌦𑌪𑌿 𑌚 𑌨 𑌕𑍃𑌤𑌂 𑌨𑌿𑌤𑌮𑍍𑌬𑌿𑌨𑍀𑌨𑌾𑌂
𑌸𑍍𑌤𑌨𑌪𑌤𑌨𑌾𑌵𑌧𑌿 𑌜𑍀𑌵𑌿𑌤𑌂 𑌰𑌤𑌂 𑌵𑌾 ॥ 2.27 ॥
𑌰𑌾𑌜𑌸𑍍𑌤𑍃𑌷𑍍𑌣𑌾𑌮𑍍𑌬𑍁𑌰𑌾𑌶𑍇𑌰𑍍𑌨 𑌹𑌿 𑌜𑌗𑌤𑌿 𑌗𑌤𑌃 𑌕𑌶𑍍𑌚𑌿𑌦𑍇𑌵𑌾𑌵𑌸𑌾𑌨𑌂
𑌕𑍋 𑌵𑌾𑌰𑍍𑌥𑍋𑌽𑌰𑍍𑌥𑍈𑌃 𑌪𑍍𑌰𑌭𑍂𑌤𑍈𑌃 𑌸𑍍𑌵𑌵𑌪𑍁𑌷𑌿 𑌗𑌲𑌿𑌤𑍇 𑌯𑍗𑌵𑌨𑍇 𑌸𑌾𑌨𑍁𑌰𑌾𑌗𑍇 ।
𑌗𑌚𑍍𑌛𑌾𑌮𑌃 𑌸𑌦𑍍𑌮 𑌯𑌾𑌵𑌦𑍍𑌵𑌿𑌕𑌸𑌿𑌤𑌨𑌯𑌨𑍇𑌨𑍍𑌦𑍀𑌵𑌰𑌾𑌲𑍋𑌕𑌿𑌨𑍀𑌨𑌾𑌮𑌾𑌕𑍍𑌰𑌮𑍍𑌯𑌾𑌕𑍍𑌰𑌮𑍍𑌯
𑌰𑍂𑌪𑌂 𑌝𑌟𑌿𑌤𑌿 𑌨 𑌜𑌰𑌯𑌾 𑌲𑍁𑌪𑍍𑌯𑌤𑍇 𑌪𑍍𑌰𑍇𑌯𑌸𑍀𑌨𑌾𑌮𑍍 ॥ 2.28 ॥
𑌰𑌾𑌗𑌸𑍍𑌯𑌾𑌗𑌾𑌰𑌂 𑌏𑌕𑌂 𑌨𑌰𑌕𑌶𑌤𑌮𑌹𑌾𑌦𑍁𑌃𑌖𑌸𑌮𑍍𑌪𑍍𑌰𑌾𑌪𑍍𑌤𑌿𑌹𑍇𑌤𑍁𑌰𑍍𑌮𑍋𑌹𑌸𑍍𑌯𑍋𑌤𑍍𑌪𑌤𑍍𑌤𑌿
𑌬𑍀𑌜𑌂 𑌜𑌲𑌧𑌰𑌪𑌟𑌲𑌂 𑌜𑍍𑌞𑌾𑌨𑌤𑌾𑌰𑌾𑌧𑌿𑌪𑌸𑍍𑌯 ।
𑌕𑌨𑍍𑌦𑌰𑍍𑌪𑌸𑍍𑌯𑍈𑌕𑌮𑌿𑌤𑍍𑌰𑌂 𑌪𑍍𑌰𑌕𑌟𑌿𑌤𑌵𑌿𑌵𑌿𑌧𑌸𑍍𑌪𑌷𑍍𑌟𑌦𑍋𑌷𑌪𑍍𑌰𑌬𑌨𑍍𑌧𑌂
𑌲𑍋𑌕𑍇𑌽𑌸𑍍𑌮𑌿𑌨𑍍𑌨 𑌹𑍍𑌯𑌰𑍍𑌥𑌵𑍍𑌰𑌜𑌕𑍁𑌲𑌭𑌵𑌨𑌯𑍗𑌵𑌨𑌾𑌦𑌨𑍍𑌯𑌦𑌸𑍍𑌤𑌿 ॥ 2.29 ॥
𑌶𑍃𑌙𑍍𑌗𑌾𑌰𑌦𑍍𑌰𑍁𑌮𑌨𑍀𑌰𑌦𑍇 𑌪𑍍𑌰𑌸𑍃𑌮𑌰𑌕𑍍𑌰𑍀𑌡𑌾𑌰𑌸𑌸𑍍𑌰𑍋𑌤𑌸𑌿
𑌪𑍍𑌰𑌦𑍍𑌯𑍁𑌮𑍍𑌨𑌪𑍍𑌰𑌿𑌯𑌬𑌾𑌨𑍍𑌧𑌵𑍇 𑌚𑌤𑍁𑌰𑌵𑌾𑌙𑍍𑌮𑍁𑌕𑍍𑌤𑌾𑌫𑌲𑍋𑌦𑌨𑍍𑌵𑌤𑌿 ।
𑌤𑌨𑍍𑌵𑍀𑌨𑍇𑌤𑍍𑌰𑌚𑌕𑍋𑌰𑌪𑌾𑌵𑌨𑌵𑌿𑌧𑍗 𑌸𑍗𑌭𑌾𑌗𑍍𑌯𑌲𑌕𑍍𑌷𑍍𑌮𑍀𑌨𑌿𑌧𑍗
𑌧𑌨𑍍𑌯𑌃 𑌕𑍋𑌽𑌪𑌿 𑌨 𑌵𑌿𑌕𑍍𑌰𑌿𑌯𑌾𑌂 𑌕𑌲𑌯𑌤𑌿 𑌪𑍍𑌰𑌾𑌪𑍍𑌤𑍇 𑌨𑌵𑍇 𑌯𑍗𑌵𑌨𑍇 ॥ 2.30 ॥
𑌸𑌂𑌸𑌾𑌰𑍇𑌽𑌸𑍍𑌮𑌿𑌨𑍍𑌨𑌸𑌾𑌰𑍇 𑌕𑍁𑌨𑍃𑌪𑌤𑌿𑌭𑌵𑌨𑌦𑍍𑌵𑌾𑌰𑌸𑍇𑌵𑌾𑌕𑌲𑌙𑍍𑌕𑌵𑍍𑌯𑌾𑌸𑌙𑍍𑌗
𑌵𑍍𑌯𑌸𑍍𑌤𑌧𑍈𑌰𑍍𑌯𑌂 𑌕𑌥𑌂 𑌅𑌮𑌲𑌧𑌿𑌯𑍋 𑌮𑌾𑌨𑌸𑌂 𑌸𑌂𑌵𑌿𑌦𑌧𑍍𑌯𑍁𑌃 ।
𑌯𑌦𑍍𑌯𑍇𑌤𑌾𑌃 𑌪𑍍𑌰𑍋𑌦𑍍𑌯𑌦𑍍𑌇𑌨𑍍𑌦𑍁𑌦𑍍𑌯𑍁𑌤𑌿𑌨𑌿𑌚𑌯𑌭𑍃𑌤𑍋 𑌨 𑌸𑍍𑌯𑍁𑌰𑌮𑍍𑌭𑍋𑌜𑌨𑍇𑌤𑍍𑌰𑌾𑌃
𑌪𑍍𑌰𑍇𑌙𑍍𑌖𑌤𑍍𑌕𑌾𑌞𑍍𑌚𑍀𑌕𑌲𑌾𑌪𑌾𑌃 𑌸𑍍𑌤𑌨𑌭𑌰𑌵𑌿𑌨𑌮𑌨𑍍𑌮𑌧𑍍𑌯𑌭𑌾𑌜𑌸𑍍𑌤𑌰𑍁𑌣𑍍𑌯𑌃 ॥ 2.31 ॥
𑌸𑌿𑌦𑍍𑌧𑌾𑌧𑍍𑌯𑌾𑌸𑌿𑌤𑌕𑌨𑍍𑌦𑌰𑍇 𑌹𑌰𑌵𑍃𑌷𑌸𑍍𑌕𑌨𑍍𑌧𑌾𑌵𑌰𑍁𑌗𑍍𑌣𑌦𑍍𑌰𑍁𑌮𑍇
𑌗𑌙𑍍𑌗𑌾𑌧𑍗𑌤𑌶𑌿𑌲𑌾𑌤𑌲𑍇 𑌹𑌿𑌮𑌵𑌤𑌃 𑌸𑍍𑌥𑌾𑌨𑍇 𑌸𑍍𑌥𑌿𑌤𑍇 𑌶𑍍𑌰𑍇𑌯𑌸𑌿 ।
𑌕𑌃 𑌕𑍁𑌰𑍍𑌵𑍀𑌤 𑌶𑌿𑌰𑌃 𑌪𑍍𑌰𑌣𑌾𑌮𑌮𑌲𑌿𑌨𑌂 𑌮𑍍𑌲𑌾𑌨𑌂 𑌮𑌨𑌸𑍍𑌵𑍀 𑌜𑌨𑍋
𑌯𑌦𑍍𑌵𑌿𑌤𑍍𑌰𑌸𑍍𑌤𑌕𑍁𑌰𑌙𑍍𑌗𑌶𑌾𑌵𑌨𑌯𑌨𑌾 𑌨 𑌸𑍍𑌯𑍁𑌃 𑌸𑍍𑌮𑌰𑌾𑌸𑍍𑌤𑍍𑌰𑌂 𑌸𑍍𑌤𑍍𑌰𑌿𑌯𑌃 ॥ 2.32 ॥
𑌸𑌂𑌸𑌾𑌰 𑌤𑌵 𑌪𑌰𑍍𑌯𑌨𑍍𑌤𑌪𑌦𑌵𑍀 𑌨 𑌦𑌵𑍀𑌯𑌸𑍀 ।
𑌅𑌨𑍍𑌤𑌰𑌾 𑌦𑍁𑌸𑍍𑌤𑌰𑌾 𑌨 𑌸𑍍𑌯𑍁𑌰𑍍𑌯𑌦𑌿 𑌤𑍇 𑌮𑌦𑌿𑌰𑍇𑌕𑍍𑌷𑌣𑌾𑌮𑍍 ॥ 2.33 ॥
𑌦𑌿𑌶 𑌵𑌨𑌹𑌰𑌿𑌣𑍀𑌭𑍍𑌯𑍋 𑌵𑌂𑌶𑌕𑌾𑌣𑍍𑌡𑌚𑍍𑌛𑌵𑍀𑌨𑌾𑌂
𑌕𑌵𑌲𑌂 𑌉𑌪𑌲𑌕𑍋𑌟𑌿𑌚𑍍𑌛𑌿𑌨𑍍𑌨𑌮𑍂𑌲𑌂 𑌕𑍁𑌶𑌾𑌨𑌾𑌮𑍍 ।
𑌶𑌕𑌯𑍁𑌵𑌤𑌿𑌕𑌪𑍋𑌲𑌾𑌪𑌾𑌣𑍍𑌡𑍁𑌤𑌾𑌮𑍍𑌬𑍂𑌲𑌵𑌲𑍍𑌲𑍀𑌦𑌲𑌮𑍍
𑌅𑌰𑍁𑌣𑌨𑌖𑌾𑌗𑍍𑌰𑍈𑌃 𑌪𑌾𑌟𑌿𑌤𑌂 𑌵𑌾 𑌵𑌧𑍂𑌭𑍍𑌯𑌃 ॥ 2.34 ॥
𑌅𑌸𑌾𑌰𑌾𑌃 𑌸𑌰𑍍𑌵𑍇 𑌤𑍇 𑌵𑌿𑌰𑌤𑌿𑌵𑌿𑌰𑌸𑌾𑌃 𑌪𑌾𑌪𑌵𑌿𑌷𑌯𑌾
𑌜𑍁𑌗𑍁𑌪𑍍𑌸𑍍𑌯𑌨𑍍𑌤𑌾𑌂 𑌯𑌦𑍍𑌵𑌾 𑌨𑌨𑍁 𑌸𑌕𑌲𑌦𑍋𑌷𑌾𑌸𑍍𑌪𑌦𑌂 𑌇𑌤𑌿 ।
𑌤𑌥𑌾𑌪𑍍𑌯𑍇𑌤𑌦𑍍𑌭𑍂𑌮𑍗 𑌨𑌹𑌿 𑌪𑌰𑌹𑌿𑌤𑌾𑌤𑍍𑌪𑍁𑌣𑍍𑌯𑌂 𑌅𑌧𑌿𑌕𑌂
𑌨 𑌚𑌾𑌸𑍍𑌮𑌿𑌨𑍍𑌸𑌂𑌸𑌾𑌰𑍇 𑌕𑍁𑌵𑌲𑌯𑌦𑍃𑌶𑍋 𑌰𑌮𑍍𑌯𑌂 𑌅𑌪𑌰𑌮𑍍 ॥ 2.35 ॥
𑌏𑌤𑌤𑍍𑌕𑌾𑌮𑌫𑌲𑍋 𑌲𑍋𑌕𑍇 𑌯𑌦𑍍𑌦𑍍𑌵𑌯𑍋𑌰𑍇𑌕𑌚𑌿𑌤𑍍𑌤𑌤𑌾 ।
𑌅𑌨𑍍𑌯𑌚𑌿𑌤𑍍𑌤𑌕𑍃𑌤𑍇 𑌕𑌾𑌮𑍇 𑌶𑌵𑌯𑍋𑌰𑌿𑌵 𑌸𑌙𑍍𑌗𑌮𑌃 ॥ 2.35.1 ॥
𑌮𑌾𑌤𑍍𑌸𑌰𑍍𑌯𑌂 𑌉𑌤𑍍𑌸𑌾𑌰𑍍𑌯 𑌵𑌿𑌚𑌾𑌰𑍍𑌯 𑌕𑌾𑌰𑍍𑌯𑌮𑌾𑌰𑍍𑌯𑌾𑌃
𑌸𑌮𑌰𑍍𑌯𑌾𑌦𑌂 𑌇𑌦𑌂 𑌵𑌦𑌨𑍍𑌤𑍁 ।
𑌸𑍇𑌵𑍍𑌯𑌾 𑌨𑌿𑌤𑌮𑍍𑌬𑌾𑌃 𑌕𑌿𑌂 𑌉 𑌭𑍂𑌧𑌰𑌾𑌣𑌾𑌮𑌤
𑌸𑍍𑌮𑌰𑌸𑍍𑌮𑍇𑌰𑌵𑌿𑌲𑌾𑌸𑌿𑌨𑍀𑌨𑌾𑌮𑍍 ॥ 2.36 ॥
𑌸𑌂𑌸𑌾𑌰𑍇 𑌸𑍍𑌵𑌪𑍍𑌨𑌸𑌾𑌰𑍇 𑌪𑌰𑌿𑌣𑌤𑌿𑌤𑌰𑌲𑍇 𑌦𑍍𑌵𑍇 𑌗𑌤𑍀 𑌪𑌣𑍍𑌡𑌿𑌤𑌾𑌨𑌾𑌂
𑌤𑌤𑍍𑌤𑍍𑌵𑌜𑍍𑌞𑌾𑌨𑌾𑌮𑍃𑌤𑌾𑌮𑍍𑌭𑌃𑌪𑍍𑌲𑌵𑌲𑌲𑌿𑌤𑌧𑌿𑌯𑌾𑌂 𑌯𑌾𑌤𑍁 𑌕𑌾𑌲𑌃 𑌕𑌥𑌞𑍍𑌚𑌿𑌤𑍍 ।
𑌨𑍋 𑌚𑍇𑌨𑍍𑌮𑍁𑌗𑍍𑌧𑌾𑌙𑍍𑌗𑌨𑌾𑌨𑌾𑌂 𑌸𑍍𑌤𑌨𑌜𑌘𑌨𑌘𑌨𑌾𑌭𑍋𑌗𑌸𑌮𑍍𑌭𑍋𑌗𑌿𑌨𑍀𑌨𑌾𑌂
𑌸𑍍𑌥𑍂𑌲𑍋𑌪𑌸𑍍𑌥𑌸𑍍𑌥𑌲𑍀𑌷𑍁 𑌸𑍍𑌥𑌗𑌿𑌤𑌕𑌰𑌤𑌲𑌸𑍍𑌪𑌰𑍍𑌶𑌲𑍀𑌲𑍋𑌦𑍍𑌯𑌮𑌾𑌨𑌾𑌮𑍍 ॥ 2.37 ॥
𑌆𑌵𑌾𑌸𑌃 𑌕𑍍𑌰𑌿𑌯𑌤𑌾𑌂 𑌗𑌙𑍍𑌗𑍇 𑌪𑌾𑌪𑌹𑌾𑌰𑌿𑌣𑌿 𑌵𑌾𑌰𑌿𑌣𑌿 ।
𑌸𑍍𑌤𑌨𑌦𑍍𑌵𑌯𑍇 𑌤𑌰𑍁𑌣𑍍𑌯𑌾 𑌵𑌾 𑌮𑌨𑍋𑌹𑌾𑌰𑌿𑌣𑌿 𑌹𑌾𑌰𑌿𑌣𑌿 ॥ 2.38 ॥
𑌕𑌿𑌂 𑌇𑌹 𑌬𑌹𑍁𑌭𑌿𑌰𑍁𑌕𑍍𑌤𑍈𑌰𑍍𑌯𑍁𑌕𑍍𑌤𑌿𑌶𑍂𑌨𑍍𑌯𑍈𑌃 𑌪𑍍𑌰𑌲𑌾𑌪𑍈𑌰𑍍𑌦𑍍𑌵𑌯𑌮𑍍
𑌇𑌹 𑌪𑍁𑌰𑍁𑌷𑌾𑌣𑌾𑌂 𑌸𑌰𑍍𑌵𑌦𑌾 𑌸𑍇𑌵𑌨𑍀𑌯𑌮𑍍 ।
𑌅𑌭𑌿𑌨𑌵𑌮𑌦𑌲𑍀𑌲𑌾𑌲𑌾𑌲𑌸𑌂 𑌸𑍁𑌨𑍍𑌦𑌰𑍀𑌣𑌾𑌂
𑌸𑍍𑌤𑌨𑌭𑌰𑌪𑌰𑌿𑌖𑌿𑌨𑍍𑌨𑌂 𑌯𑍗𑌵𑌨𑌂 𑌵𑌾 𑌵𑌨𑌂 𑌵𑌾 ॥ 2.39 ॥
𑌸𑌤𑍍𑌯𑌂 𑌜𑌨𑌾 𑌵𑌚𑍍𑌮𑌿 𑌨 𑌪𑌕𑍍𑌷𑌪𑌾𑌤𑌾𑌲𑍍
𑌲𑍋𑌕𑍇𑌷𑍁 𑌸𑌪𑍍𑌤𑌸𑍍𑌵𑌪𑌿 𑌤𑌥𑍍𑌯𑌂 𑌏𑌤𑌤𑍍 ।
𑌨𑌾𑌨𑍍𑌯𑌨𑍍𑌮𑌨𑍋𑌹𑌾𑌰𑌿 𑌨𑌿𑌤𑌮𑍍𑌬𑌿𑌨𑍀𑌭𑍍𑌯𑍋
𑌦𑍁𑌃𑌖𑍈𑌕𑌹𑍇𑌤𑍁𑌰𑍍𑌨 𑌚 𑌕𑌶𑍍𑌚𑌿𑌦𑌨𑍍𑌯𑌃 ॥ 2.40 ॥
𑌕𑌾𑌨𑍍𑌤𑍇𑌤𑍍𑌯𑍁𑌤𑍍𑌪𑌲𑌲𑍋𑌚𑌨𑍇𑌤𑌿 𑌵𑌿𑌪𑍁𑌲𑌶𑍍𑌰𑍋𑌣𑍀𑌭𑌰𑍇𑌤𑍍𑌯𑍁𑌨𑍍𑌨𑌮𑌤𑍍𑌪𑍀𑌨𑍋𑌤𑍍𑌤𑍁𑌙𑍍𑌗
𑌪𑌯𑍋𑌧𑌰𑍇𑌤𑌿 𑌸𑌮𑍁𑌖𑌾𑌮𑍍𑌭𑍋𑌜𑍇𑌤𑌿 𑌸𑍁𑌭𑍍𑌰𑍂𑌰𑌿𑌤𑌿 ।
𑌦𑍃𑌷𑍍𑌟𑍍𑌵𑌾 𑌮𑌾𑌦𑍍𑌯𑌤𑌿 𑌮𑍋𑌦𑌤𑍇𑌽𑌭𑌿𑌰𑌮𑌤𑍇 𑌪𑍍𑌰𑌸𑍍𑌤𑍗𑌤𑌿 𑌵𑌿𑌦𑍍𑌵𑌾𑌨𑌪𑌿
𑌪𑍍𑌰𑌤𑍍𑌯𑌕𑍍𑌷𑌾𑌶𑍁𑌚𑌿𑌭𑌸𑍍𑌤𑍍𑌰𑌿𑌕𑌾𑌂 𑌸𑍍𑌤𑍍𑌰𑌿𑌯𑌂 𑌅𑌹𑍋 𑌮𑍋𑌹𑌸𑍍𑌯 𑌦𑍁𑌶𑍍𑌚𑍇𑌷𑍍𑌟𑌿𑌤𑌮𑍍 ॥ 2.41 ॥
𑌸𑍍𑌮𑍃𑌤𑌾 𑌭𑌵𑌤𑌿 𑌤𑌾𑌪𑌾𑌯 𑌦𑍃𑌷𑍍𑌟𑌾 𑌚𑍋𑌨𑍍𑌮𑌾𑌦𑌕𑌾𑌰𑌿𑌣𑍀 ।
𑌸𑍍𑌪𑍃𑌷𑍍𑌟𑌾 𑌭𑌵𑌤𑌿 𑌮𑍋𑌹𑌾𑌯 𑌸𑌾 𑌨𑌾𑌮 𑌦𑌯𑌿𑌤𑌾 𑌕𑌥𑌮𑍍 ॥ 2.42 ॥
𑌤𑌾𑌵𑌦𑍇𑌵𑌾𑌮𑍃𑌤𑌮𑌯𑍀 𑌯𑌾𑌵𑌲𑍍𑌲𑍋𑌚𑌨𑌗𑍋𑌚𑌰𑌾 ।
𑌚𑌕𑍍𑌷𑍁𑌷𑍍𑌪𑌥𑌾𑌦𑌤𑍀𑌤𑌾 𑌤𑍁 𑌵𑌿𑌷𑌾𑌦𑌪𑍍𑌯𑌤𑌿𑌰𑌿𑌚𑍍𑌯𑌤𑍇 ॥ 2.43 ॥
𑌨𑌾𑌮𑍃𑌤𑌂 𑌨 𑌵𑌿𑌷𑌂 𑌕𑌿𑌞𑍍𑌚𑌿𑌦𑍇𑌤𑌾𑌂 𑌮𑍁𑌕𑍍𑌤𑍍𑌵𑌾 𑌨𑌿𑌤𑌮𑍍𑌬𑌿𑌨𑍀𑌮𑍍 ।
𑌸𑍈𑌵𑌾𑌮𑍃𑌤𑌲𑌤𑌾 𑌰𑌕𑍍𑌤𑌾 𑌵𑌿𑌰𑌕𑍍𑌤𑌾 𑌵𑌿𑌷𑌵𑌲𑍍𑌲𑌰𑍀 ॥ 2.44 ॥
𑌆𑌵𑌰𑍍𑌤𑌃 𑌸𑌂𑌶𑌯𑌾𑌨𑌾𑌂 𑌅𑌵𑌿𑌨𑌯𑌭𑍁𑌵𑌨𑌂 𑌪𑌟𑍍𑌟𑌣𑌂 𑌸𑌾𑌹𑌸𑌾𑌨𑌾𑌂
𑌦𑍋𑌷𑌾𑌣𑌾𑌂 𑌸𑌨𑍍𑌨𑌿𑌧𑌾𑌨𑌂 𑌕𑌪𑌟𑌶𑌤𑌮𑌯𑌂 𑌕𑍍𑌷𑍇𑌤𑍍𑌰𑌂 𑌅𑌪𑍍𑌰𑌤𑍍𑌯𑌯𑌾𑌨𑌾𑌮𑍍 ।
𑌸𑍍𑌵𑌰𑍍𑌗𑌦𑍍𑌵𑌾𑌰𑌸𑍍𑌯 𑌵𑌿𑌘𑍍𑌨𑍋 𑌨𑌰𑌕𑌪𑍁𑌰𑌮𑍁𑌖 𑌸𑌰𑍍𑌵𑌮𑌾𑌯𑌾𑌕𑌰𑌣𑍍𑌡𑌂
𑌸𑍍𑌤𑍍𑌰𑍀𑌯𑌨𑍍𑌤𑍍𑌰𑌂 𑌕𑍇𑌨 𑌸𑍃𑌷𑍍𑌟𑌂 𑌵𑌿𑌷𑌂 𑌅𑌮𑍃𑌤𑌮𑌯𑌂 𑌪𑍍𑌰𑌾𑌣𑌿𑌲𑍋𑌕𑌸𑍍𑌯 𑌪𑌾𑌶𑌃 ॥ 2.45 ॥
𑌨𑍋 𑌸𑌤𑍍𑌯𑍇𑌨 𑌮𑍃𑌗𑌾𑌙𑍍𑌕 𑌏𑌷 𑌵𑌦𑌨𑍀𑌭𑍂𑌤𑍋 𑌨 𑌚𑍇𑌨𑍍𑌦𑍀𑌵𑌰𑌦𑍍𑌵𑌨𑍍𑌦𑍍𑌵𑌂
𑌲𑍋𑌚𑌨𑌤𑌾𑌂 𑌗𑌤 𑌨 𑌕𑌨𑌕𑍈𑌰𑌪𑍍𑌯𑌙𑍍𑌗𑌯𑌷𑍍𑌟𑌿𑌃 𑌕𑍃𑌤𑌾 ।
𑌕𑌿𑌨𑍍𑌤𑍍𑌵𑍇𑌵𑌂 𑌕𑌵𑌿𑌭𑌿𑌃 𑌪𑍍𑌰𑌤𑌾𑌰𑌿𑌤𑌮𑌨𑌾𑌸𑍍𑌤𑌤𑍍𑌤𑍍𑌵𑌂 𑌵𑌿𑌜𑌾𑌨𑌨𑍍𑌨𑌪𑌿
𑌤𑍍𑌵𑌙𑍍𑌮𑌾𑌂𑌸𑌾𑌸𑍍𑌥𑌿𑌮𑌯𑌂 𑌵𑌪𑍁𑌰𑍍𑌮𑍃𑌗𑌦𑍃𑌶𑌾𑌂 𑌮𑌨𑍍𑌦𑍋 𑌜𑌨𑌃 𑌸𑍇𑌵𑌤𑍇 ॥ 2.46 ॥
𑌲𑍀𑌲𑌾𑌵𑌤𑍀𑌨𑌾𑌂 𑌸𑌹𑌜𑌾 𑌵𑌿𑌲𑌾𑌸𑌾𑌸𑍍𑌤
𑌏𑌵 𑌮𑍂𑌢𑌸𑍍𑌯 𑌹𑍃𑌦𑌿 𑌸𑍍𑌫𑍁𑌰𑌨𑍍𑌤𑌿 ।
𑌰𑌾𑌗𑍋 𑌨𑌲𑌿𑌨𑍍𑌯𑌾 𑌹𑌿 𑌨𑌿𑌸𑌰𑍍𑌗𑌸𑌿𑌦𑍍𑌧𑌸𑍍𑌤𑌤𑍍𑌰
𑌭𑍍𑌰𑌮𑍍𑌤𑍍𑌯𑍇𑌵 𑌵𑍃𑌥𑌾 𑌷𑌡𑍍𑌅𑌙𑍍𑌘𑍍𑌰𑌿𑌃 ॥ 2.47 ॥
𑌸𑌮𑍍𑌮𑍋𑌹𑌯𑌨𑍍𑌤𑌿 𑌮𑌦𑌯𑌨𑍍𑌤𑌿 𑌵𑌿𑌡𑌮𑍍𑌬𑌯𑌨𑍍𑌤𑌿
𑌨𑌿𑌰𑍍𑌭𑌰𑍍𑌤𑍍𑌸𑍍𑌯𑌨𑍍𑌤𑌿 𑌰𑌮𑌯𑌨𑍍𑌤𑌿 𑌵𑌿𑌷𑌾𑌦𑌯𑌨𑍍𑌤𑌿 ।
𑌏𑌤𑌾𑌃 𑌪𑍍𑌰𑌵𑌿𑌶𑍍𑌯 𑌸𑌦𑌯𑌂 𑌹𑍃𑌦𑌯𑌂 𑌨𑌰𑌾𑌣𑌾𑌂
𑌕𑌿𑌂 𑌨𑌾𑌮 𑌵𑌾𑌮𑌨𑌯𑌨𑌾 𑌨 𑌸𑌮𑌾𑌚𑌰𑌨𑍍𑌤𑌿 ॥ 2.47.1 ॥
𑌯𑌦𑍇𑌤𑌤𑍍𑌪𑍂𑌰𑍍𑌣𑍇𑌨𑍍𑌦𑍁𑌦𑍍𑌯𑍁𑌤𑌿𑌹𑌰𑌂 𑌉𑌦𑌾𑌰𑌾𑌕𑍃𑌤𑌿 𑌪𑌰𑌂
𑌮𑍁𑌖𑌾𑌬𑍍𑌜𑌂 𑌤𑌨𑍍𑌵𑌙𑍍𑌗𑍍𑌯𑌾𑌃 𑌕𑌿𑌲 𑌵𑌸𑌤𑌿 𑌯𑌤𑍍𑌰𑌾𑌧𑌰𑌮𑌧𑍁 ।
𑌇𑌦𑌂 𑌤𑌤𑍍𑌕𑌿𑌂 𑌪𑌾𑌕𑌦𑍍𑌰𑍁𑌮𑌫𑌲𑌂 𑌇𑌦𑌾𑌨𑍀𑌂 𑌅𑌤𑌿𑌰𑌸𑌵𑍍𑌯𑌤𑍀𑌤𑍇𑌽𑌸𑍍𑌮𑌿𑌨𑍍
𑌕𑌾𑌲𑍇 𑌵𑌿𑌷𑌂 𑌇𑌵 𑌭𑌵𑌿𑌷𑍍𑌯𑍍𑌤𑍍𑌯𑌸𑍁𑌖𑌦𑌮𑍍 ॥ 2.48 ॥
𑌉𑌨𑍍𑌮𑍀𑌲𑌤𑍍𑌤𑍍𑌰𑌿𑌵𑌲𑍀𑌤𑌰𑌙𑍍𑌗𑌨𑌿𑌲𑌯𑌾 𑌪𑍍𑌰𑍋𑌤𑍍𑌤𑍁𑌙𑍍𑌗𑌪𑍀𑌨𑌸𑍍𑌤𑌨𑌦𑍍𑌵𑌨𑍍𑌦𑍍𑌵𑍇𑌨𑍋𑌦𑍍𑌗𑌤
𑌚𑌕𑍍𑌰𑌵𑌾𑌕𑌯𑍁𑌗𑌲𑌾 𑌵𑌕𑍍𑌤𑍍𑌰𑌾𑌮𑍍𑌬𑍁𑌜𑍋𑌦𑍍𑌭𑌾𑌸𑌿𑌨𑍀 ।
𑌕𑌾𑌨𑍍𑌤𑌾𑌕𑌾𑌰𑌧𑌰𑌾 𑌨𑌦𑍀𑌯𑌂 𑌅𑌭𑌿𑌤𑌃 𑌕𑍍𑌰𑍂𑌰𑌾𑌤𑍍𑌰 𑌨𑌾𑌪𑍇𑌕𑍍𑌷𑌤𑍇
𑌸𑌂𑌸𑌾𑌰𑌾𑌰𑍍𑌣𑌵𑌮𑌜𑍍𑌜𑌨𑌂 𑌯𑌦𑌿 𑌤𑌦𑌾 𑌦𑍂𑌰𑍇𑌣 𑌸𑌨𑍍𑌤𑍍𑌯𑌜𑍍𑌯𑌤𑌾𑌮𑍍 ॥ 2.49 ॥
𑌜𑌲𑍍𑌪𑌨𑍍𑌤𑌿 𑌸𑌾𑌰𑍍𑌧𑌂 𑌅𑌨𑍍𑌯𑍇𑌨 𑌪𑌶𑍍𑌯𑌨𑍍𑌤𑍍𑌯𑌨𑍍𑌯𑌂 𑌸𑌵𑌿𑌭𑍍𑌰𑌮𑌾𑌃 ।
𑌹𑍃𑌦𑍍𑌗𑌤𑌂 𑌚𑌿𑌨𑍍𑌤𑌯𑌨𑍍𑌤𑍍𑌯𑌨𑍍𑌯𑌂 𑌪𑍍𑌰𑌿𑌯𑌃 𑌕𑍋 𑌨𑌾𑌮 𑌯𑍋𑌷𑌿𑌤𑌾𑌮𑍍 ॥ 2.50 ॥
𑌮𑌧𑍁 𑌤𑌿𑌷𑍍𑌠𑌤𑌿 𑌵𑌾𑌚𑌿 𑌯𑍋𑌷𑌿𑌤𑌾𑌂 𑌹𑍃𑌦𑌿 𑌹𑌾𑌲𑌾𑌹𑌲𑌂 𑌏𑌵 𑌕𑍇𑌵𑌲𑌮𑍍 ।
𑌅𑌤𑌏𑌵 𑌨𑌿𑌪𑍀𑌯𑌤𑍇𑌽𑌧𑌰𑍋 𑌹𑍃𑌦𑌯𑌂 𑌮𑍁𑌷𑍍𑌟𑌿𑌭𑌿𑌰𑍇𑌵 𑌤𑌾𑌡𑍍𑌯𑌤𑍇 ॥ 2.51 ॥
𑌅𑌪𑌸𑌰 𑌸𑌖𑍇 𑌦𑍂𑌰𑌾𑌦𑌸𑍍𑌮𑌾𑌤𑍍𑌕𑌟𑌾𑌕𑍍𑌷𑌵𑌿𑌷𑌾𑌨𑌲𑌾𑌤𑍍
𑌪𑍍𑌰𑌕𑍃𑌤𑌿𑌵𑌿𑌷𑌮𑌾𑌦𑍍𑌯𑍋𑌷𑌿𑌤𑍍𑌸𑌰𑍍𑌪𑌾𑌦𑍍𑌵𑌿𑌲𑌾𑌸𑌫𑌣𑌾𑌭𑍃𑌤𑌃 ।
𑌇𑌤𑌰𑌫𑌣𑌿𑌨𑌾 𑌦𑌷𑍍𑌟𑌃 𑌶𑌕𑍍𑌯𑌶𑍍𑌚𑌿𑌕𑌿𑌤𑍍𑌸𑌿𑌤𑍁𑌂 𑌔𑌷𑌧𑍈𑌶𑍍𑌚𑌤𑍁𑌰𑍍
𑌵𑌨𑌿𑌤𑌾𑌭𑍋𑌗𑌿𑌗𑍍𑌰𑌸𑍍𑌤𑌂 𑌹𑌿 𑌮𑌨𑍍𑌤𑍍𑌰𑌿𑌣𑌃 ॥ 2.52 ॥
𑌵𑌿𑌸𑍍𑌤𑌾𑌰𑌿𑌤𑌂 𑌮𑌕𑌰𑌕𑍇𑌤𑌨𑌧𑍀𑌵𑌰𑍇𑌣
𑌸𑍍𑌤𑍍𑌰𑍀𑌸𑌞𑍍𑌜𑍍𑌞𑌿𑌤𑌂 𑌬𑌡𑌿𑌶𑌂 𑌅𑌤𑍍𑌰 𑌭𑌵𑌾𑌮𑍍𑌬𑍁𑌰𑌾𑌶𑍗 ।
𑌯𑍇𑌨𑌾𑌚𑌿𑌰𑌾𑌤𑍍𑌤𑌦𑍍𑌅𑌧𑌰𑌾𑌮𑌿𑌷𑌲𑍋𑌲𑌮𑌰𑍍𑌤𑍍𑌯
𑌮𑌤𑍍𑌸𑍍𑌯𑌾𑌨𑍍𑌵𑌿𑌕𑍃𑌷𑍍𑌯 𑌵𑌿𑌪𑌚𑌤𑍍𑌯𑌨𑍁𑌰𑌾𑌗𑌵𑌹𑍍𑌨𑍗 ॥ 2.53 ॥
𑌕𑌾𑌮𑌿𑌨𑍀𑌕𑌾𑌯𑌕𑌾𑌨𑍍𑌤𑌾𑌰𑍇 𑌕𑍁𑌚𑌪𑌰𑍍𑌵𑌤𑌦𑍁𑌰𑍍𑌗𑌮𑍇 ।
𑌮𑌾 𑌸𑌞𑍍𑌚𑌰 𑌮𑌨𑌃 𑌪𑌾𑌨𑍍𑌥 𑌤𑌤𑍍𑌰𑌾𑌸𑍍𑌤𑍇 𑌸𑍍𑌮𑌰𑌤𑌸𑍍𑌕𑌰𑌃 ॥ 2.54 ॥
𑌵𑍍𑌯𑌾𑌡𑍀𑌰𑍍𑌘𑍇𑌣 𑌚𑌲𑍇𑌨 𑌵𑌕𑍍𑌤𑍍𑌰𑌗𑌤𑌿𑌨𑌾 𑌤𑍇𑌜𑌸𑍍𑌵𑌿𑌨𑌾 𑌭𑍋𑌗𑌿𑌨𑌾
𑌨𑍀𑌲𑌾𑌬𑍍𑌜𑌦𑍍𑌯𑍁𑌤𑌿𑌨𑌾𑌹𑌿𑌨𑌾 𑌪𑌰𑌂 𑌅𑌹𑌂 𑌦𑍃𑌷𑍍𑌟𑍋 𑌨 𑌤𑌚𑍍𑌚𑌕𑍍𑌷𑍁𑌷𑌾 ।
𑌦𑍃𑌷𑍍𑌟𑍇 𑌸𑌨𑍍𑌤𑌿 𑌚𑌿𑌕𑌿𑌤𑍍𑌸𑌕𑌾 𑌦𑌿𑌶𑌿 𑌦𑌿𑌶𑌿 𑌪𑍍𑌰𑌾𑌯𑍇𑌣 𑌧𑌨𑌾𑌰𑍍𑌥𑌿𑌨𑍋
𑌮𑍁𑌗𑍍𑌧𑌾𑌕𑍍𑌷𑌕𑍍𑌷𑌣𑌵𑍀𑌕𑍍𑌷𑌿𑌤𑌸𑍍𑌯 𑌨 𑌹𑌿 𑌮𑍇 𑌵𑍈𑌦𑍍𑌯𑍋 𑌨 𑌚𑌾𑌪𑍍𑌯𑍗𑌷𑌧𑌮𑍍 ॥ 2.55 ॥
𑌇𑌹 𑌹𑌿 𑌮𑌧𑍁𑌰𑌗𑍀𑌤𑌂 𑌨𑍃𑌤𑍍𑌯𑌂 𑌏𑌤𑌦𑍍𑌰𑌸𑍋𑌽𑌯𑌂
𑌸𑍍𑌫𑍁𑌰𑌤𑌿 𑌪𑌰𑌿𑌮𑌲𑍋𑌽𑌸𑍗 𑌸𑍍𑌪𑌰𑍍𑌶 𑌏𑌷 𑌸𑍍𑌤𑌨𑌾𑌨𑌾𑌮𑍍 ।
𑌇𑌤𑌿 𑌹𑌤𑌪𑌰𑌮𑌾𑌰𑍍𑌥𑍈𑌰𑌿𑌨𑍍𑌦𑍍𑌰𑌿𑌯𑍈𑌰𑍍𑌭𑍍𑌰𑌾𑌮𑍍𑌯𑌮𑌾𑌣𑌃
𑌸𑍍𑌵𑌹𑌿𑌤𑌕𑌰𑌣𑌧𑍂𑌰𑍍𑌤𑍈𑌃 𑌪𑌞𑍍𑌚𑌭𑌿𑌰𑍍𑌵𑌞𑍍𑌚𑌿𑌤𑍋𑌽𑌸𑍍𑌮𑌿 ॥ 2.56 ॥
𑌨 𑌗𑌮𑍍𑌯𑍋 𑌮𑌨𑍍𑌤𑍍𑌰𑌾𑌣𑌾𑌂 𑌨 𑌚 𑌭𑌵𑌤𑌿 𑌭𑍈𑌷𑌜𑍍𑌯𑌵𑌿𑌷𑌯𑍋
𑌨 𑌚𑌾𑌪𑌿 𑌪𑍍𑌰𑌧𑍍𑌵𑌂𑌸𑌂 𑌵𑍍𑌰𑌜𑌤𑌿 𑌵𑌿𑌵𑌿𑌧𑍈𑌃 𑌶𑌾𑌨𑍍𑌤𑌿𑌕𑌶𑌤𑍈𑌃 ।
𑌭𑍍𑌰𑌮𑌾𑌵𑍇𑌶𑌾𑌦𑌙𑍍𑌗𑍇 𑌕𑌂 𑌅𑌪𑌿 𑌵𑌿𑌦𑌧𑌦𑍍𑌭𑌙𑍍𑌗𑌂 𑌅𑌸𑌕𑍃𑌤𑍍
𑌸𑍍𑌮𑌰𑌾𑌪𑌸𑍍𑌮𑌾𑌰𑍋𑌽𑌯𑌂 𑌭𑍍𑌰𑌮𑌯𑌤𑌿 𑌦𑍃𑌶𑌂 𑌘𑍂𑌰𑍍𑌣𑌯𑌤𑌿 𑌚 ॥ 2.57 ॥
𑌜𑌾𑌤𑍍𑌯𑍍𑌅𑌨𑍍𑌧𑌾𑌯 𑌚 𑌦𑍁𑌰𑍍𑌮𑍁𑌖𑌾𑌯 𑌚 𑌜𑌰𑌾𑌜𑍀𑌰𑍍𑌣𑌾 𑌖𑌿𑌲𑌾𑌙𑍍𑌗𑌾𑌯 𑌚
𑌗𑍍𑌰𑌾𑌮𑍀𑌣𑌾𑌯 𑌚 𑌦𑍁𑌷𑍍𑌕𑍁𑌲𑌾𑌯 𑌚 𑌗𑌲𑌤𑍍𑌕𑍁𑌷𑍍𑌠𑌾𑌭𑌿𑌭𑍂𑌤𑌾𑌯 𑌚 ।
𑌯𑌚𑍍𑌛𑌨𑍍𑌤𑍀𑌷𑍁 𑌮𑌨𑍋𑌹𑌰𑌂 𑌨𑌿𑌜𑌵𑌪𑍁𑌲𑌕𑍍𑌷𑍍𑌮𑍀𑌲𑌵𑌶𑍍𑌰𑌦𑍍𑌧𑌯𑌾
𑌪𑌣𑍍𑌯𑌸𑍍𑌤𑍍𑌰𑍀𑌷𑍁 𑌵𑌿𑌵𑍇𑌕𑌕𑌲𑍍𑌪𑌲𑌤𑌿𑌕𑌾𑌶𑌸𑍍𑌤𑍍𑌰𑍀𑌷𑍁 𑌰𑌾𑌜𑍍𑌯𑍇𑌤 𑌕𑌃 ॥ 2.58 ॥
𑌵𑍇𑌶𑍍𑌯𑌾𑌸𑍗 𑌮𑌦𑌨𑌜𑍍𑌵𑌾𑌲𑌾
𑌰𑍂𑌪𑍇𑌽𑌨𑍍𑌧𑌨𑌵𑌿𑌵𑌰𑍍𑌧𑌿𑌤𑌾 ।
𑌕𑌾𑌮𑌿𑌭𑌿𑌰𑍍𑌯𑌤𑍍𑌰 𑌹𑍂𑌯𑌨𑍍𑌤𑍇
𑌯𑍗𑌵𑌨𑌾𑌨𑌿 𑌧𑌨𑌾𑌨𑌿 𑌚 ॥ 2.59 ॥
𑌕𑌶𑍍𑌚𑍁𑌮𑍍𑌬𑌤𑌿 𑌕𑍁𑌲𑌪𑍁𑌰𑍁𑌷𑍋 𑌵𑍇𑌶𑍍𑌯𑌾𑌧𑌰𑌪𑌲𑍍𑌲𑌵𑌂 𑌮𑌨𑍋𑌜𑍍𑌞𑌂 𑌅𑌪𑌿 ।
𑌚𑌾𑌰𑌭𑌟𑌚𑍋𑌰𑌚𑍇𑌟𑌕𑌨𑌟𑌵𑌿𑌟𑌨𑌿𑌷𑍍𑌠𑍀𑌵𑌨𑌶𑌰𑌾𑌵𑌮𑍍 ॥ 2.60 ॥
𑌧𑌨𑍍𑌯𑌾𑌸𑍍𑌤 𑌏𑌵 𑌧𑌵𑌲𑌾𑌯𑌤𑌲𑍋𑌚𑌨𑌾𑌨𑌾𑌂
𑌤𑌾𑌰𑍁𑌣𑍍𑌯𑌦𑌰𑍍𑌪𑌘𑌨𑌪𑍀𑌨𑌪𑌯𑍋𑌧𑌰𑌾𑌣𑌾𑌮𑍍 ।
𑌕𑍍𑌷𑌾𑌮𑍋𑌦𑌰𑍋𑌪𑌰𑌿 𑌲𑌸𑌤𑍍𑌤𑍍𑌰𑌿𑌵𑌲𑍀𑌲𑌤𑌾𑌨𑌾𑌂
𑌦𑍃𑌷𑍍𑌟𑍍𑌵𑌾𑌕𑍃𑌤𑌿𑌂 𑌵𑌿𑌕𑍃𑌤𑌿𑌂 𑌏𑌤𑌿 𑌮𑌨𑍋 𑌨 𑌯𑍇𑌷𑌾𑌮𑍍 ॥ 2.61 ॥
𑌬𑌾𑌲𑍇 𑌲𑍀𑌲𑌾𑌮𑍁𑌕𑍁𑌲𑌿𑌤𑌂 𑌅𑌮𑍀 𑌮𑌨𑍍𑌥𑌰𑌾 𑌦𑍃𑌷𑍍𑌟𑌿𑌪𑌾𑌤𑌾𑌃
𑌕𑌿𑌂 𑌕𑍍𑌷𑌿𑌪𑍍𑌯𑌨𑍍𑌤𑍇 𑌵𑌿𑌰𑌮𑌵𑌿𑌰𑌮 𑌵𑍍𑌯𑌰𑍍𑌥 𑌏𑌷 𑌶𑍍𑌰𑌮𑌸𑍍𑌤𑍇 ।
𑌸𑌮𑍍𑌪𑍍𑌰𑌤𑍍𑌯𑌨𑍍𑌯𑍇 𑌵𑌯𑌂 𑌉𑌪𑌰𑌤𑌂 𑌬𑌾𑌲𑍍𑌯𑌂 𑌆𑌸𑍍𑌥𑌾 𑌵𑌨𑌾𑌨𑍍𑌤𑍇
𑌕𑍍𑌷𑍀𑌣𑍋 𑌮𑍋𑌹𑌸𑍍𑌤𑍃𑌣𑌂 𑌇𑌵 𑌜𑌗𑌜𑍍𑌜𑌾𑌲𑌂 𑌆𑌲𑍋𑌕𑌯𑌾𑌮𑌃 ॥ 2.62 ॥
𑌇𑌯𑌂 𑌬𑌾𑌲𑌾 𑌮𑌾𑌂 𑌪𑍍𑌰𑌤𑍍𑌯𑌨𑌵𑌰𑌤𑌂 𑌇𑌨𑍍𑌦𑍀𑌵𑌰𑌦𑌲𑌪𑍍𑌰𑌭𑌾
𑌚𑍀𑌰𑌂 𑌚𑌕𑍍𑌷𑍁𑌃 𑌕𑍍𑌷𑌿𑌪𑌤𑌿 𑌕𑌿𑌂 𑌅𑌭𑌿𑌪𑍍𑌰𑍇𑌤𑌂 𑌅𑌨𑌯𑌾 ।
𑌗𑌤𑍋 𑌮𑍋𑌹𑍋𑌽𑌸𑍍𑌮𑌾𑌕𑌂 𑌸𑍍𑌮𑌰𑌶𑌬𑌰𑌬𑌾𑌣𑌵𑍍𑌯𑌤𑌿𑌕𑌰𑌜𑍍𑌵𑌰
𑌜𑍍𑌵𑌾𑌲𑌾 𑌶𑌾𑌨𑍍𑌤𑌾 𑌤𑌦𑌪𑌿 𑌨 𑌵𑌰𑌾𑌕𑍀 𑌵𑌿𑌰𑌮𑌤𑌿 ॥ 2.63 ॥
𑌕𑌿𑌂 𑌕𑌨𑍍𑌦𑌰𑍍𑌪 𑌕𑌰𑌂 𑌕𑌦𑌰𑍍𑌥𑌯𑌸𑌿 𑌰𑍇 𑌕𑍋𑌦𑌣𑍍𑌡𑌟𑌙𑍍𑌕𑌾𑌰𑌿𑌤𑌂
𑌰𑍇 𑌰𑍇 𑌕𑍋𑌕𑌿𑌲 𑌕𑍋𑌮𑌲𑌂 𑌕𑌲𑌰𑌵𑌂 𑌕𑌿𑌂 𑌵𑌾 𑌵𑍃𑌥𑌾 𑌜𑌲𑍍𑌪𑌸𑌿 ।
𑌮𑍁𑌗𑍍𑌧𑍇 𑌸𑍍𑌨𑌿𑌗𑍍𑌧𑌵𑌿𑌦𑌗𑍍𑌧𑌚𑌾𑌰𑍁𑌮𑌧𑍁𑌰𑍈𑌰𑍍𑌲𑍋𑌲𑍈𑌃 𑌕𑌟𑌾𑌕𑍍𑌷𑍈𑌰𑌲𑌂
𑌚𑍇𑌤𑌶𑍍𑌚𑍁𑌮𑍍𑌬𑌿𑌤𑌚𑌨𑍍𑌦𑍍𑌰𑌚𑍂𑌡𑌚𑌰𑌣𑌧𑍍𑌯𑌾𑌨𑌾𑌮𑍃𑌤𑌂 𑌵𑌰𑍍𑌤𑌤𑍇 ॥ 2.64 ॥
𑌵𑌿𑌰𑌹𑍇𑌽𑌪𑌿 𑌸𑌙𑍍𑌗𑌮𑌃 𑌖𑌲𑍁
𑌪𑌰𑌸𑍍𑌪𑌰𑌂 𑌸𑌙𑍍𑌗𑌤𑌂 𑌮𑌨𑍋 𑌯𑍇𑌷𑌾𑌮𑍍 ।
𑌹𑍃𑌦𑌯𑌂 𑌅𑌪𑌿 𑌵𑌿𑌘𑌟𑍍𑌟𑌿𑌤𑌂 𑌚𑍇𑌤𑍍
𑌸𑌙𑍍𑌗𑍀 𑌵𑌿𑌰𑌹𑌂 𑌵𑌿𑌶𑍇𑌷𑌯𑌤𑌿 ॥ 2.65 ॥
𑌕𑌿𑌂 𑌗𑌤𑍇𑌨 𑌯𑌦𑌿 𑌸𑌾 𑌨 𑌜𑍀𑌵𑌤𑌿
𑌪𑍍𑌰𑌾𑌣𑌿𑌤𑌿 𑌪𑍍𑌰𑌿𑌯𑌤𑌮𑌾 𑌤𑌥𑌾𑌪𑌿 𑌕𑌿𑌮𑍍 ।
𑌇𑌤𑍍𑌯𑍁𑌦𑍀𑌕𑍍𑌷𑍍𑌯 𑌨𑌵𑌮𑍇𑌘𑌮𑌾𑌲𑌿𑌕𑌾𑌂
𑌨 𑌪𑍍𑌰𑌯𑌾𑌤𑌿 𑌪𑌥𑌿𑌕𑌃 𑌸𑍍𑌵𑌮𑌨𑍍𑌦𑌿𑌰𑌮𑍍 ॥ 2.66 ॥
𑌵𑌿𑌰𑌮𑌤 𑌬𑍁𑌧𑌾 𑌯𑍋𑌷𑌿𑌤𑍍𑌸𑌙𑍍𑌗𑌾𑌤𑍍𑌸𑍁𑌖𑌾𑌤𑍍𑌕𑍍𑌷𑌣𑌭𑌙𑍍𑌗𑍁𑌰𑌾𑌤𑍍
𑌕𑍁𑌰𑍁𑌤 𑌕𑌰𑍁𑌣𑌾𑌮𑍈𑌤𑍍𑌰𑍀𑌪𑍍𑌰𑌜𑍍𑌞𑌾𑌵𑌧𑍂𑌜𑌨𑌸𑌙𑍍𑌗𑌮𑌮𑍍 ।
𑌨 𑌖𑌲𑍁 𑌨𑌰𑌕𑍇 𑌹𑌾𑌰𑌾𑌕𑍍𑌰𑌾𑌨𑍍𑌤𑌂 𑌘𑌨𑌸𑍍𑌤𑌨𑌮𑌣𑍍𑌡𑌲𑌂
𑌶𑌰𑌣𑌂 𑌅𑌥𑌵𑌾 𑌶𑍍𑌰𑍋𑌣𑍀𑌬𑌿𑌮𑍍𑌬𑌂 𑌰𑌣𑌨𑍍𑌮𑌣𑌿𑌮𑍇𑌖𑌲𑌮𑍍 ॥ 2.67 ॥
𑌯𑌦𑌾 𑌯𑍋𑌗𑌾𑌭𑍍𑌯𑌾𑌸𑌵𑍍𑌯𑌸𑌨𑌕𑍃𑌶𑌯𑍋𑌰𑌾𑌤𑍍𑌮𑌮𑌨𑌸𑍋𑌰𑌵𑌿𑌚𑍍𑌛𑌿𑌨𑍍𑌨𑌾
𑌮𑍈𑌤𑍍𑌰𑍀 𑌸𑍍𑌫𑍁𑌰𑌤𑌿 𑌕𑍃𑌤𑌿𑌨𑌸𑍍𑌤𑌸𑍍𑌯 𑌕𑌿𑌂 𑌉 𑌤𑍈𑌃 ।
𑌪𑍍𑌰𑌿𑌯𑌾𑌣𑌾𑌂 𑌆𑌲𑌾𑌪𑍈𑌰𑌧𑌰𑌮𑌧𑍁𑌭𑌿𑌰𑍍𑌵𑌕𑍍𑌤𑍍𑌰𑌵𑌿𑌧𑍁𑌭𑌿𑌃
𑌸𑌨𑌿𑌶𑍍𑌵𑌾𑌸𑌾𑌮𑍋𑌦𑍈𑌃 𑌸𑌕𑍁𑌚𑌕𑌲𑌶𑌾𑌶𑍍𑌲𑍇𑌷𑌸𑍁𑌰𑌤𑍈𑌃 ॥ 2.68 ॥
𑌯𑌦𑌾𑌸𑍀𑌦𑌜𑍍𑌞𑌾𑌨𑌂 𑌸𑍍𑌮𑌰𑌤𑌿𑌮𑌿𑌰𑌸𑌞𑍍𑌚𑌾𑌰𑌜𑌨𑌿𑌤𑌂
𑌤𑌦𑌾 𑌦𑍃𑌷𑍍𑌟𑌨𑌾𑌰𑍀𑌮𑌯𑌂 𑌇𑌦𑌂 𑌅𑌶𑍇𑌷𑌂 𑌜𑌗𑌦𑌿𑌤𑌿 ।
𑌇𑌦𑌾𑌨𑍀𑌂 𑌅𑌸𑍍𑌮𑌾𑌕𑌂 𑌪𑌟𑍁𑌤𑌰𑌵𑌿𑌵𑍇𑌕𑌾𑌞𑍍𑌜𑌨𑌜𑍁𑌷𑌾𑌂
𑌸𑌮𑍀𑌭𑍂𑌤𑌾 𑌦𑍃𑌷𑍍𑌟𑌿𑌸𑍍𑌤𑍍𑌰𑌿𑌭𑍁𑌵𑌨𑌂 𑌅𑌪𑌿 𑌬𑍍𑌰𑌹𑍍𑌮 𑌮𑌨𑍁𑌤𑍇 ॥ 2.69 ॥
𑌤𑌾𑌵𑌦𑍇𑌵 𑌕𑍃𑌤𑌿𑌨𑌾𑌂 𑌅𑌪𑌿 𑌸𑍍𑌫𑍁𑌰𑌤𑍍𑌯𑍇𑌷
𑌨𑌿𑌰𑍍𑌮𑌲𑌵𑌿𑌵𑍇𑌕𑌦𑍀𑌪𑌕𑌃 ।
𑌯𑌾𑌵𑌦𑍇𑌵 𑌨 𑌕𑍁𑌰𑌙𑍍𑌗𑌚𑌕𑍍𑌷𑍁𑌷𑌾𑌂
𑌤𑌾𑌡𑍍𑌯𑌤𑍇 𑌚𑌟𑍁𑌲𑌲𑍋𑌚𑌨𑌾𑌞𑍍𑌚𑌲𑍈𑌃 ॥ 2.70 ॥
𑌵𑌚𑌸𑌿 𑌭𑌵𑌤𑌿 𑌸𑌙𑍍𑌗𑌤𑍍𑌯𑌾𑌗𑌂 𑌉𑌦𑍍𑌦𑌿𑌶𑍍𑌯 𑌵𑌾𑌰𑍍𑌤𑌾
𑌶𑍍𑌰𑍁𑌤𑌿𑌮𑍁𑌖𑌰𑌮𑍁𑌖𑌾𑌨𑌾𑌂 𑌕𑍇𑌵𑌲𑌂 𑌪𑌣𑍍𑌡𑌿𑌤𑌾𑌨𑌾𑌮𑍍 ।
𑌜𑌘𑌨𑌂 𑌅𑌰𑍁𑌣𑌰𑌤𑍍𑌨𑌗𑍍𑌰𑌨𑍍𑌥𑌿𑌕𑌾𑌞𑍍𑌚𑍀𑌕𑌲𑌾𑌪𑌂
𑌕𑍁𑌵𑌲𑌯𑌨𑌯𑌨𑌾𑌨𑌾𑌂 𑌕𑍋 𑌵𑌿𑌹𑌾𑌤𑍁𑌂 𑌸𑌮𑌰𑍍𑌥𑌃 ॥ 2.71 ॥
𑌸𑍍𑌵𑌪𑌰𑌪𑍍𑌰𑌤𑌾𑌰𑌕𑍋𑌽𑌸𑍗
𑌨𑌿𑌨𑍍𑌦𑌤𑌿 𑌯𑍋𑌽𑌲𑍀𑌕𑌪𑌣𑍍𑌡𑌿𑌤𑍋 𑌯𑍁𑌵𑌤𑍀𑌃 ।
𑌯𑌸𑍍𑌮𑌾𑌤𑍍𑌤𑌪𑌸𑍋𑌽𑌪𑌿 𑌫𑌲𑌂
𑌸𑍍𑌵𑌰𑍍𑌗𑌃 𑌸𑍍𑌵𑌰𑍍𑌗𑍇𑌽𑌪𑌿 𑌚𑌾𑌪𑍍𑌸𑌰𑌸𑌃 ॥ 2.72 ॥
𑌮𑌤𑍍𑌤𑍇𑌭𑌕𑍁𑌮𑍍𑌭𑌦𑌲𑌨𑍇 𑌭𑍁𑌵𑌿 𑌸𑌨𑍍𑌤𑌿 𑌧𑍀𑌰𑌾𑌃
𑌕𑍇𑌚𑌿𑌤𑍍𑌪𑍍𑌰𑌚𑌣𑍍𑌡𑌮𑍃𑌗𑌰𑌾𑌜𑌵𑌧𑍇𑌽𑌪𑌿 𑌦𑌕𑍍𑌷𑌾𑌃 ।
𑌕𑌿𑌨𑍍𑌤𑍁 𑌬𑍍𑌰𑌵𑍀𑌮𑌿 𑌬𑌲𑌿𑌨𑌾𑌂 𑌪𑍁𑌰𑌤𑌃 𑌪𑍍𑌰𑌸𑌹𑍍𑌯
𑌕𑌨𑍍𑌦𑌰𑍍𑌪𑌦𑌰𑍍𑌪𑌦𑌲𑌨𑍇 𑌵𑌿𑌰𑌲𑌾 𑌮𑌨𑍁𑌷𑍍𑌯𑌾𑌃 ॥ 2.73 ॥
𑌸𑌨𑍍𑌮𑌾𑌰𑍍𑌗𑍇 𑌤𑌾𑌵𑌦𑌾𑌸𑍍𑌤𑍇 𑌪𑍍𑌰𑌭𑌵𑌤𑌿 𑌚 𑌨𑌰𑌸𑍍𑌤𑌾𑌵𑌦𑍇𑌵𑍇𑌨𑍍𑌦𑍍𑌰𑌿𑌯𑌾𑌣𑌾𑌂
𑌲𑌜𑍍𑌜𑌾𑌂 𑌤𑌾𑌵𑌦𑍍𑌵𑌿𑌧𑌤𑍍𑌤𑍇 𑌵𑌿𑌨𑌯𑌂 𑌅𑌪𑌿 𑌸𑌮𑌾𑌲𑌮𑍍𑌬𑌤𑍇 𑌤𑌾𑌵𑌦𑍇𑌵 ।
𑌭𑍍𑌰𑍂𑌚𑌾𑌪𑌾𑌕𑍃𑌷𑍍𑌟𑌮𑍁𑌕𑍍𑌤𑌾𑌃 𑌶𑍍𑌰𑌵𑌣𑌪𑌥𑌗𑌤𑌾 𑌨𑍀𑌲𑌪𑌕𑍍𑌷𑍍𑌮𑌾𑌣 𑌏𑌤𑍇
𑌯𑌾𑌵𑌲𑍍𑌲𑍀𑌲𑌾𑌵𑌤𑍀𑌨𑌾𑌂 𑌹𑍃𑌦𑌿 𑌨 𑌧𑍃𑌤𑌿𑌮𑍁𑌷𑍋 𑌦𑍃𑌷𑍍𑌟𑌿𑌬𑌾𑌣𑌾𑌃 𑌪𑌤𑌨𑍍𑌤𑌿 ॥ 2.74 ॥
𑌉𑌨𑍍𑌮𑌤𑍍𑌤𑌪𑍍𑌰𑍇𑌮𑌸𑌂𑌰𑌮𑍍𑌭𑌾𑌦𑍍
𑌆𑌰𑌭𑌨𑍍𑌤𑍇 𑌯𑌦𑍍𑌅𑌙𑍍𑌗𑌨𑌾𑌃 ।
𑌤𑌤𑍍𑌰 𑌪𑍍𑌰𑌤𑍍𑌯𑍂𑌹𑌂 𑌆𑌧𑌾𑌤𑍁𑌂
𑌬𑍍𑌰𑌹𑍍𑌮𑌾𑌪𑌿 𑌖𑌲𑍁 𑌕𑌾𑌤𑌰𑌃 ॥ 2.75 ॥
𑌤𑌾𑌵𑌨𑍍𑌮𑌹𑌤𑍍𑌤𑍍𑌵𑌂 𑌪𑌾𑌣𑍍𑌡𑌿𑌤𑍍𑌯𑌂
𑌕𑍁𑌲𑍀𑌨𑌤𑍍𑌵𑌂 𑌵𑌿𑌵𑍇𑌕𑌿𑌤𑌾 ।
𑌯𑌾𑌵𑌜𑍍𑌜𑍍𑌵𑌲𑌤𑌿 𑌨𑌾𑌙𑍍𑌗𑍇𑌷𑍁
𑌹𑌤𑌃 𑌪𑌞𑍍𑌚𑍇𑌷𑍁𑌪𑌾𑌵𑌕𑌃 ॥ 2.76 ॥
𑌶𑌾𑌸𑍍𑌤𑍍𑌰𑌜𑍍𑌞𑍋𑌽𑌪𑌿 𑌪𑍍𑌰𑌥𑌿𑌤𑌵𑌿𑌨𑌯𑍋𑌽𑌪𑍍𑌯𑌾𑌤𑍍𑌮𑌬𑍋𑌧𑍋𑌽𑌪𑌿 𑌬𑌾𑌢𑌂
𑌸𑌂𑌸𑌾𑌰𑍇𑌽𑌸𑍍𑌮𑌿𑌨𑍍𑌭𑌵𑌤𑌿 𑌵𑌿𑌰𑌲𑍋 𑌭𑌾𑌜𑌨𑌂 𑌸𑌦𑍍𑌗𑌤𑍀𑌨𑌾𑌮𑍍 ।
𑌯𑍇𑌨𑍈𑌤𑌸𑍍𑌮𑌿𑌨𑍍𑌨𑌿𑌰𑌯𑌨𑌗𑌰𑌦𑍍𑌵𑌾𑌰𑌂 𑌉𑌦𑍍𑌘𑌾𑌟𑌯𑌨𑍍𑌤𑍀
𑌵𑌾𑌮𑌾𑌕𑍍𑌷𑍀𑌣𑌾𑌂 𑌭𑌵𑌤𑌿 𑌕𑍁𑌟𑌿𑌲𑌾 𑌭𑍍𑌰𑍂𑌲𑌤𑌾 𑌕𑍁𑌞𑍍𑌚𑌿𑌕𑍇𑌵 ॥ 2.77 ॥
𑌕𑍃𑌶𑌃 𑌕𑌾𑌣𑌃 𑌖𑌞𑍍𑌜𑌃 𑌶𑍍𑌰𑌵𑌣𑌰𑌹𑌿𑌤𑌃 𑌪𑍁𑌚𑍍𑌛𑌵𑌿𑌕𑌲𑍋
𑌵𑍍𑌰𑌣𑍀 𑌪𑍂𑌯𑌕𑍍𑌲𑌿𑌨𑍍𑌨𑌃 𑌕𑍃𑌮𑌿𑌕𑍁𑌲𑌶𑌤𑍈𑌰𑌾𑌵𑍃𑌤𑌤𑌨𑍁𑌃 ।
𑌕𑍍𑌷𑍁𑌧𑌾 𑌕𑍍𑌷𑌾𑌮𑍋 𑌜𑍀𑌰𑍍𑌣𑌃 𑌪𑌿𑌠𑌰𑌕𑌕𑌪𑌾𑌲𑌾𑌰𑍍𑌪𑌿𑌤𑌗𑌲𑌃
𑌶𑍁𑌨𑍀𑌂 𑌅𑌨𑍍𑌵𑍇𑌤𑌿 𑌶𑍍𑌵𑌾 𑌹𑌤𑌂 𑌅𑌪𑌿 𑌚 𑌹𑌨𑍍𑌤𑍍𑌯𑍇𑌵 𑌮𑌦𑌨𑌃 ॥ 2.78 ॥
𑌸𑍍𑌤𑍍𑌰𑍀𑌮𑍁𑌦𑍍𑌰𑌾𑌂 𑌕𑍁𑌸𑍁𑌮𑌾𑌯𑍁𑌧𑌸𑍍𑌯 𑌜𑌯𑌿𑌨𑍀𑌂 𑌸𑌰𑍍𑌵𑌾𑌰𑍍𑌥𑌸𑌮𑍍𑌪𑌤𑍍𑌕𑌰𑍀𑌂
𑌯𑍇 𑌮𑍂𑌢𑌾𑌃 𑌪𑍍𑌰𑌵𑌿𑌹𑌾𑌯 𑌯𑌾𑌨𑍍𑌤𑌿 𑌕𑍁𑌧𑌿𑌯𑍋 𑌮𑌿𑌥𑍍𑌯𑌾𑌫𑌲𑌾𑌨𑍍𑌵𑍇𑌷𑌿𑌣𑌃 ।
𑌤𑍇 𑌤𑍇𑌨𑍈𑌵 𑌨𑌿𑌹𑌤𑍍𑌯 𑌨𑌿𑌰𑍍𑌦𑌯𑌤𑌰𑌂 𑌨𑌗𑍍𑌨𑍀𑌕𑍃𑌤𑌾 𑌮𑍁𑌣𑍍𑌡𑌿𑌤𑌾𑌃
𑌕𑍇𑌚𑌿𑌤𑍍𑌪𑌞𑍍𑌚𑌶𑌿𑌖𑍀𑌕𑍃𑌤𑌾𑌶𑍍𑌚 𑌜𑌟𑌿𑌲𑌾𑌃 𑌕𑌾𑌪𑌾𑌲𑌿𑌕𑌾𑌶𑍍𑌚𑌾𑌪𑌰𑍇 ॥ 2.79 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑌪𑌰𑌾𑌶𑌰𑌪𑍍𑌰𑌭𑍃𑌤𑌯𑍋 𑌵𑌾𑌤𑌾𑌮𑍍𑌬𑍁𑌪𑌰𑍍𑌣𑌾𑌶𑌨𑌾𑌸𑍍𑌤𑍇𑌽𑌪𑌿
𑌸𑍍𑌤𑍍𑌰𑍀𑌮𑍁𑌖𑌪𑌙𑍍𑌕𑌜𑌂 𑌸𑍁𑌲𑌲𑌿𑌤𑌂 𑌦𑍃𑌷𑍍𑌟𑍍𑌵𑍈𑌵 𑌮𑍋𑌹𑌂 𑌗𑌤𑌾𑌃 ।
𑌶𑌾𑌲𑍍𑌯𑌨𑍍𑌨𑌂 𑌸𑌘𑍃𑌤𑌂 𑌪𑌯𑍋𑌦𑌧𑌿𑌯𑍁𑌤𑌂 𑌯𑍇 𑌭𑍁𑌞𑍍𑌜𑌤𑍇 𑌮𑌾𑌨𑌵𑌾𑌸𑍍𑌤𑍇𑌷𑌾𑌮𑍍
𑌇𑌨𑍍𑌦𑍍𑌰𑌿𑌯𑌨𑌿𑌗𑍍𑌰𑌹𑍋 𑌯𑌦𑌿 𑌭𑌵𑍇𑌦𑍍𑌵𑌿𑌨𑍍𑌧𑍍𑌯𑌃 𑌪𑍍𑌲𑌵𑍇𑌤𑍍𑌸𑌾𑌗𑌰𑍇 ॥ 2.80 ॥
𑌪𑌰𑌿𑌮𑌲𑌭𑍃𑌤𑍋 𑌵𑌾𑌤𑌾𑌃 𑌶𑌾𑌖𑌾 𑌨𑌵𑌾𑌙𑍍𑌕𑍁𑌰𑌕𑍋𑌟𑌯𑍋
𑌮𑌧𑍁𑌰𑌵𑌿𑌰𑍁𑌤𑍋𑌤𑍍𑌕𑌣𑍍𑌠𑌾 𑌵𑌾𑌚𑌃 𑌪𑍍𑌰𑌿𑌯𑌾𑌃 𑌪𑌿𑌕𑌪𑌕𑍍𑌷𑌿𑌣𑌾𑌮𑍍 ।
𑌵𑌿𑌰𑌲𑌸𑍁𑌰𑌤𑌸𑍍𑌵𑍇𑌦𑍋𑌦𑍍𑌗𑌾𑌰𑌾 𑌵𑌧𑍂𑌵𑌦𑌨𑍇𑌨𑍍𑌦𑌵𑌃
𑌪𑍍𑌰𑌸𑌰𑌤𑌿 𑌮𑌧𑍗 𑌰𑌾𑌤𑍍𑌰𑍍𑌯𑌾𑌂 𑌜𑌾𑌤𑍋 𑌨 𑌕𑌸𑍍𑌯 𑌗𑍁𑌣𑍋𑌦𑌯𑌃 ॥ 2.81 ॥
𑌮𑌧𑍁𑌰𑌯𑌂 𑌮𑌧𑍁𑌰𑍈𑌰𑌪𑌿 𑌕𑍋𑌕𑌿𑌲𑌾
𑌕𑌲𑌰𑌵𑍈𑌰𑍍𑌮𑌲𑌯𑌸𑍍𑌯 𑌚 𑌵𑌾𑌯𑍁𑌭𑌿𑌃 ।
𑌵𑌿𑌰𑌹𑌿𑌣𑌃 𑌪𑍍𑌰𑌹𑌿𑌣𑌸𑍍𑌤𑌿 𑌶𑌰𑍀𑌰𑌿𑌣𑍋
𑌵𑌿𑌪𑌦𑌿 𑌹𑌨𑍍𑌤 𑌸𑍁𑌧𑌾𑌪𑌿 𑌵𑌿𑌷𑌾𑌯𑌤𑍇 ॥ 2.82 ॥
𑌆𑌵𑌾𑌸𑌃 𑌕𑌿𑌲𑌕𑌿𑌞𑍍𑌚𑌿𑌤𑌸𑍍𑌯 𑌦𑌯𑌿𑌤𑌾𑌪𑌾𑌰𑍍𑌶𑍍𑌵𑍇 𑌵𑌿𑌲𑌾𑌸𑌾𑌲𑌸𑌾𑌃
𑌕𑌰𑍍𑌣𑍇 𑌕𑍋𑌕𑌿𑌲𑌕𑌾𑌮𑌿𑌨𑍀𑌕𑌲𑌰𑌵𑌃 𑌸𑍍𑌮𑍇𑌰𑍋 𑌲𑌤𑌾𑌮𑌣𑍍𑌡𑌪𑌃 ।
𑌗𑍋𑌷𑍍𑌠𑍀 𑌸𑌤𑍍𑌕𑌵𑌿𑌭𑌿𑌃 𑌸𑌮𑌂 𑌕𑌤𑌿𑌪𑌯𑍈𑌰𑍍𑌮𑍁𑌗𑍍𑌧𑌾𑌃 𑌸𑍁𑌧𑌾𑌂𑌶𑍋𑌃 𑌕𑌰𑌾𑌃
𑌕𑍇𑌷𑌾𑌞𑍍𑌚𑌿𑌤𑍍𑌸𑍁𑌖𑌯𑌨𑍍𑌤𑌿 𑌚𑌾𑌤𑍍𑌰 𑌹𑍃𑌦𑌯𑌂 𑌚𑍈𑌤𑍍𑌰𑍇 𑌵𑌿𑌚𑌿𑌤𑍍𑌰𑌾𑌃 𑌕𑍍𑌷𑌪𑌾𑌃 ॥ 2.83 ॥
𑌪𑌾𑌨𑍍𑌥 𑌸𑍍𑌤𑍍𑌰𑍀𑌵𑌿𑌰𑌹𑌾𑌨𑌲𑌾𑌹𑍁𑌤𑌿𑌕𑌲𑌾𑌂 𑌆𑌤𑌨𑍍𑌵𑌤𑍀 𑌮𑌞𑍍𑌜𑌰𑍀𑌮𑌾𑌕𑌨𑍍𑌦𑍇𑌷𑍁
𑌪𑌿𑌕𑌾𑌙𑍍𑌗𑌨𑌾𑌭𑌿𑌰𑌧𑍁𑌨𑌾 𑌸𑍋𑌤𑍍𑌕𑌣𑍍𑌠𑌂 𑌆𑌲𑍋𑌕𑍍𑌯𑌤𑍇 ।
𑌅𑌪𑍍𑌯𑍇𑌤𑍇 𑌨𑌵𑌪𑌾𑌟𑌲𑌾𑌪𑌰𑌿𑌮𑌲𑌪𑍍𑌰𑌾𑌗𑍍𑌭𑌾𑌰𑌪𑌾𑌟𑌚𑍍𑌚𑌰𑌾
𑌵𑌾𑌨𑍍𑌤𑌿𑌕𑍍𑌲𑌾𑌨𑍍𑌤𑌿𑌵𑌿𑌤𑌾𑌨𑌤𑌾𑌨𑌵𑌕𑍃𑌤𑌃 𑌶𑍍𑌰𑍀𑌖𑌣𑍍𑌡𑌶𑍈𑌲𑌾𑌨𑌿𑌲𑌾𑌃 ॥ 2.84 ॥
𑌪𑍍𑌰𑌥𑌿𑌤𑌃 𑌪𑍍𑌰𑌣𑌯𑌵𑌤𑍀𑌨𑌾𑌂
𑌤𑌾𑌵𑌤𑍍𑌪𑌦𑌂 𑌆𑌤𑌨𑍋𑌤𑍁 𑌹𑍃𑌦𑌿 𑌮𑌾𑌨𑌃 ।
𑌭𑌵𑌤𑌿 𑌨 𑌯𑌾𑌵𑌚𑍍𑌚𑌨𑍍𑌦𑌨𑌤𑌰𑍁
𑌸𑍁𑌰𑌭𑌿𑌰𑍍𑌮𑌲𑌯𑌪𑌵𑌮𑌾𑌨𑌃 ॥ 2.85 ॥
𑌸𑌹𑌕𑌾𑌰𑌕𑍁𑌸𑍁𑌮𑌕𑍇𑌸𑌰𑌨𑌿𑌕𑌰
𑌭𑌰𑌾𑌮𑍋𑌦𑌮𑍂𑌰𑍍𑌚𑍍𑌛𑌿𑌤𑌦𑌿𑌗𑍍𑌅𑌨𑍍𑌤𑍇 ।
𑌮𑌧𑍁𑌰𑌮𑌧𑍁𑌰𑌵𑌿𑌧𑍁𑌰𑌮𑌧𑍁𑌪𑍇
𑌮𑌧𑍗 𑌭𑌵𑍇𑌤𑍍𑌕𑌸𑍍𑌯 𑌨𑍋𑌤𑍍𑌕𑌣𑍍𑌠𑌾 ॥ 2.86 ॥
𑌅𑌚𑍍𑌛𑌾𑌚𑍍𑌛𑌚𑌨𑍍𑌦𑌨𑌰𑌸𑌾𑌰𑍍𑌦𑍍𑌰𑌤𑌰𑌾 𑌮𑍃𑌗𑌾𑌕𑍍𑌷𑍍𑌯𑍋
𑌧𑌾𑌰𑌾𑌗𑍃𑌹𑌾𑌣𑌿 𑌕𑍁𑌸𑍁𑌮𑌾𑌨𑌿 𑌚 𑌕𑍗𑌮𑍁𑌦𑍀 𑌚 ।
𑌮𑌨𑍍𑌦𑍋 𑌮𑌰𑍁𑌤𑍍𑌸𑍁𑌮𑌨𑌸𑌃 𑌶𑍁𑌚𑌿 𑌹𑌰𑍍𑌮𑍍𑌯𑌪𑍃𑌷𑍍𑌠𑌂
𑌗𑍍𑌰𑍀𑌷𑍍𑌮𑍇 𑌮𑌦𑌂 𑌚 𑌮𑌦𑌨𑌂 𑌚 𑌵𑌿𑌵𑌰𑍍𑌧𑌯𑌨𑍍𑌤𑌿 ॥ 2.87 ॥
𑌸𑍍𑌰𑌜𑍋 𑌹𑍃𑌦𑍍𑌯𑌾𑌮𑍋𑌦𑌾 𑌵𑍍𑌯𑌜𑌨𑌪𑌵𑌨𑌶𑍍𑌚𑌨𑍍𑌦𑍍𑌰𑌕𑌿𑌰𑌣𑌾𑌃
𑌪𑌰𑌾𑌗𑌃 𑌕𑌾𑌸𑌾𑌰𑍋 𑌮𑌲𑌯𑌜𑌰𑌜𑌃 𑌶𑍀𑌧𑍁 𑌵𑌿𑌶𑌦𑌮𑍍 ।
𑌶𑍁𑌚𑌿𑌃 𑌸𑍗𑌧𑍋𑌤𑍍𑌸𑌙𑍍𑌗𑌃 𑌪𑍍𑌰𑌤𑌨𑍁 𑌵𑌸𑌨𑌂 𑌪𑌙𑍍𑌕𑌜𑌦𑍃𑌶𑍋
𑌨𑌿𑌦𑌾𑌘𑌋𑌤𑌾𑌵𑍇𑌤𑌦𑍍𑌵𑌿𑌲𑌸𑌤𑌿 𑌲𑌭𑌨𑍍𑌤𑍇 𑌸𑍁𑌕𑍃𑌤𑌿𑌨𑌃 ॥ 2.88 ॥
𑌸𑍁𑌧𑌾𑌶𑍁𑌭𑍍𑌰𑌂 𑌧𑌾𑌮 𑌸𑍍𑌫𑍁𑌰𑌦𑍍𑌅𑌮𑌲𑌰𑌶𑍍𑌮𑌿𑌃 𑌶𑌶𑌧𑌰𑌃
𑌪𑍍𑌰𑌿𑌯𑌾𑌵𑌕𑍍𑌤𑍍𑌰𑌾𑌮𑍍𑌭𑍋𑌜𑌂 𑌮𑌲𑌯𑌜𑌰𑌜𑌶𑍍𑌚𑌾𑌤𑌿𑌸𑍁𑌰𑌭𑌿𑌃 ।
𑌸𑍍𑌰𑌜𑍋 𑌹𑍃𑌦𑍍𑌯𑌾𑌮𑍋𑌦𑌾𑌸𑍍𑌤𑌦𑌿𑌦𑌂 𑌅𑌖𑌿𑌲𑌂 𑌰𑌾𑌗𑌿𑌣𑌿 𑌜𑌨𑍇
𑌕𑌰𑍋𑌤𑍍𑌯𑌨𑍍𑌤𑌃 𑌕𑍍𑌷𑍋𑌭𑌂 𑌨 𑌤𑍁 𑌵𑌿𑌷𑌯𑌸𑌂𑌸𑌰𑍍𑌗𑌵𑌿𑌮𑍁𑌖𑍇 ॥ 2.89 ॥
𑌤𑌰𑍁𑌣𑍀𑌵𑍇𑌷𑍋𑌦𑍍𑌦𑍀𑌪𑌿𑌤𑌕𑌾𑌮𑌾
𑌵𑌿𑌕𑌸𑌜𑍍𑌜𑌾𑌤𑍀𑌪𑍁𑌷𑍍𑌪𑌸𑍁𑌗𑌨𑍍𑌧𑌿𑌃 ।
𑌉𑌨𑍍𑌨𑌤𑌪𑍀𑌨𑌪𑌯𑍋𑌧𑌰𑌭𑌾𑌰𑌾
𑌪𑍍𑌰𑌾𑌵𑍃𑌟𑍍𑌤𑌨𑍁𑌤𑍇 𑌕𑌸𑍍𑌯 𑌨 𑌹𑌰𑍍𑌷𑌮𑍍 ॥ 2.90 ॥
𑌵𑌿𑌯𑌦𑍍𑌉𑌪𑌚𑌿𑌤𑌮𑍇𑌘𑌂 𑌭𑍂𑌮𑌯𑌃 𑌕𑌨𑍍𑌦𑌲𑌿𑌨𑍍𑌯𑍋
𑌨𑌵𑌕𑍁𑌟𑌜𑌕𑌦𑌮𑍍𑌬𑌾𑌮𑍋𑌦𑌿𑌨𑍋 𑌗𑌨𑍍𑌧𑌵𑌾𑌹𑌾𑌃 ।
𑌶𑌿𑌖𑌿𑌕𑍁𑌲𑌕𑌲𑌕𑍇𑌕𑌾𑌰𑌾𑌵𑌰𑌮𑍍𑌯𑌾 𑌵𑌨𑌾𑌨𑍍𑌤𑌾𑌃
𑌸𑍁𑌖𑌿𑌨𑌂 𑌅𑌸𑍁𑌖𑌿𑌨𑌂 𑌵𑌾 𑌸𑌰𑍍𑌵𑌂 𑌉𑌤𑍍𑌕𑌣𑍍𑌠𑌯𑌨𑍍𑌤𑌿 ॥ 2.91 ॥
𑌉𑌪𑌰𑌿 𑌘𑌨𑌂 𑌘𑌨𑌪𑌟𑌲𑌂
𑌤𑌿𑌰𑍍𑌯𑌗𑍍𑌗𑌿𑌰𑌯𑍋𑌽𑌪𑌿 𑌨𑌰𑍍𑌤𑌿𑌤𑌮𑌯𑍂𑌰𑌾𑌃 ।
𑌕𑍍𑌷𑌿𑌤𑌿𑌰𑌪𑌿 𑌕𑌨𑍍𑌦𑌲𑌧𑌵𑌲𑌾
𑌦𑍃𑌷𑍍𑌟𑌿𑌂 𑌪𑌥𑌿𑌕𑌃 𑌕𑍍𑌵 𑌪𑌾𑌤𑌯𑌤𑌿 ॥ 2.92 ॥
𑌇𑌤𑍋 𑌵𑌿𑌦𑍍𑌯𑍁𑌦𑍍𑌵𑌲𑍍𑌲𑍀𑌵𑌿𑌲𑌸𑌿𑌤𑌂 𑌇𑌤𑌃 𑌕𑍇𑌤𑌕𑌿𑌤𑌰𑍋𑌃
𑌸𑍍𑌫𑍁𑌰𑌨𑍍𑌗𑌨𑍍𑌧𑌃 𑌪𑍍𑌰𑍋𑌦𑍍𑌯𑌜𑍍𑌜𑌲𑌦𑌨𑌿𑌨𑌦𑌸𑍍𑌫𑍂𑌰𑍍𑌜𑌿𑌤𑌂 𑌇𑌤𑌃 ।
𑌇𑌤𑌃 𑌕𑍇𑌕𑌿𑌕𑍍𑌰𑍀𑌡𑌾𑌕𑌲𑌕𑌲𑌰𑌵𑌃 𑌪𑌕𑍍𑌷𑍍𑌮𑌲𑌦𑍃𑌶𑌾𑌂
𑌕𑌥𑌂 𑌯𑌾𑌸𑍍𑌯𑌨𑍍𑌤𑍍𑌯𑍇𑌤𑍇 𑌵𑌿𑌰𑌹𑌦𑌿𑌵𑌸𑌾𑌃 𑌸𑌮𑍍𑌭𑍃𑌤𑌰𑌸𑌾𑌃 ॥ 2.93 ॥
𑌅𑌸𑍂𑌚𑌿𑌸𑌞𑍍𑌚𑌾𑌰𑍇 𑌤𑌮𑌸𑌿 𑌨𑌭𑌸𑌿 𑌪𑍍𑌰𑍗𑌢𑌜𑌲𑌦𑌧𑍍𑌵𑌨𑌿𑌪𑍍𑌰𑌯𑍇
𑌤𑌸𑍍𑌮𑌿𑌨𑍍 𑌪𑌤𑌤𑌿 𑌦𑍃𑌶𑌦𑌾𑌂 𑌨𑍀𑌰𑌨𑌿𑌚𑌯𑍇 ।
𑌇𑌦𑌂 𑌸𑍗𑌦𑌾𑌮𑌿𑌨𑍍𑌯𑌾𑌃 𑌕𑌨𑌕𑌕𑌮𑌨𑍀𑌯𑌂 𑌵𑌿𑌲𑌸𑌿𑌤𑌂
𑌮𑍁𑌦𑌂 𑌚 𑌗𑍍𑌲𑌾𑌨𑌿𑌂 𑌚 𑌪𑍍𑌰𑌥𑌯𑌤𑌿 𑌪𑌥𑌿𑌷𑍍𑌵𑍇𑌵 𑌸𑍁𑌦𑍃𑌶𑌾𑌮𑍍 ॥ 2.94 ॥
𑌆𑌸𑌾𑌰𑍇𑌣 𑌨 𑌹𑌰𑍍𑌮𑍍𑌯𑌤𑌃 𑌪𑍍𑌰𑌿𑌯𑌤𑌮𑍈𑌰𑍍𑌯𑌾𑌤𑍁𑌂 𑌬𑌹𑌿𑌃 𑌶𑌕𑍍𑌯𑌤𑍇
𑌶𑍀𑌤𑍋𑌤𑍍𑌕𑌮𑍍𑌪𑌨𑌿𑌮𑌿𑌤𑍍𑌤𑌂 𑌆𑌯𑌤𑌦𑍃𑌶𑌾 𑌗𑌾𑌢𑌂 𑌸𑌮𑌾𑌲𑌿𑌙𑍍𑌗𑍍𑌯𑌤𑍇 ।
𑌜𑌾𑌤𑌾𑌃 𑌶𑍀𑌕𑌰𑌶𑍀𑌤𑌲𑌾𑌶𑍍𑌚 𑌮𑌰𑍁𑌤𑍋𑌰𑌤𑍍𑌯𑌨𑍍𑌤𑌖𑍇𑌦𑌚𑍍𑌛𑌿𑌦𑍋
𑌧𑌨𑍍𑌯𑌾𑌨𑌾𑌂 𑌬𑌤 𑌦𑍁𑌰𑍍𑌦𑌿𑌨𑌂 𑌸𑍁𑌦𑌿𑌨𑌤𑌾𑌂 𑌯𑌾𑌤𑌿 𑌪𑍍𑌰𑌿𑌯𑌾𑌸𑌙𑍍𑌗𑌮𑍇 ॥ 2.95 ॥
𑌅𑌰𑍍𑌧𑌂 𑌸𑍁𑌪𑍍𑌤𑍍𑌵𑌾 𑌨𑌿𑌶𑌾𑌯𑌾𑌃 𑌸𑌰𑌭𑌸𑌸𑍁𑌰𑌤𑌾𑌯𑌾𑌸𑌸𑌨𑍍𑌨𑌶𑍍𑌲𑌥𑌾𑌙𑍍𑌗𑌪𑍍𑌰𑍋𑌦𑍍𑌭𑍂𑌤𑌾𑌸𑌹𑍍𑌯
𑌤𑍃𑌷𑍍𑌣𑍋 𑌮𑌧𑍁𑌮𑌦𑌨𑌿𑌰𑌤𑍋 𑌹𑌰𑍍𑌮𑍍𑌯𑌪𑍃𑌷𑍍𑌠𑍇 𑌵𑌿𑌵𑌿𑌕𑍍𑌤𑍇 ।
𑌸𑌮𑍍𑌭𑍋𑌗𑌕𑍍𑌲𑌾𑌨𑍍𑌤𑌕𑌾𑌨𑍍𑌤𑌾𑌶𑌿𑌥𑌿𑌲𑌭𑍁𑌜𑌲𑌤𑌾𑌵𑌰𑍍𑌜𑌿𑌤𑌂 𑌕𑌰𑍍𑌕𑌰𑍀𑌤𑍋
𑌜𑍍𑌯𑍋𑌤𑍍𑌸𑍍𑌨𑌾𑌭𑌿𑌨𑍍𑌨𑌾𑌚𑍍𑌛𑌧𑌾𑌰𑌂 𑌪𑌿𑌬𑌤𑌿 𑌨 𑌸𑌲𑌿𑌲𑌂 𑌶𑌾𑌰𑌦𑌂 𑌮𑌨𑍍𑌦𑌪𑍁𑌣𑍍𑌯𑌃 ॥ 2.96 ॥
𑌹𑍇𑌮𑌨𑍍𑌤𑍇 𑌦𑌧𑌿𑌦𑍁𑌗𑍍𑌧𑌸𑌰𑍍𑌪𑌿𑌰𑌶𑌨𑌾 𑌮𑌾𑌞𑍍𑌜𑌿𑌷𑍍𑌠𑌵𑌾𑌸𑍋𑌭𑍃𑌤𑌃
𑌕𑌾𑌶𑍍𑌮𑍀𑌰𑌦𑍍𑌰𑌵𑌸𑌾𑌨𑍍𑌦𑍍𑌰𑌦𑌿𑌗𑍍𑌧𑌵𑌪𑍁𑌷𑌶𑍍𑌛𑌿𑌨𑍍𑌨𑌾 𑌵𑌿𑌚𑌿𑌤𑍍𑌰𑍈 𑌰𑌤𑍈𑌃 ।
𑌵𑍃𑌤𑍍𑌤𑍋𑌰𑍁𑌸𑍍𑌤𑌨𑌕𑌾𑌮𑌿𑌨𑍋𑌜𑌨𑌕𑍃𑌤𑌾𑌶𑍍𑌲𑍇𑌷𑌾 𑌗𑍃𑌹𑌾𑌭𑍍𑌯𑌨𑍍𑌤𑌰𑍇
𑌤𑌾𑌮𑍍𑌬𑍂𑌲𑍀𑌦𑌲𑌪𑍂𑌗𑌪𑍂𑌰𑌿𑌤𑌮𑍁𑌖𑌾 𑌧𑌨𑍍𑌯𑌾𑌃 𑌸𑍁𑌖𑌂 𑌶𑍇𑌰𑌤𑍇 ॥ 2.97 ॥
𑌪𑍍𑌰𑌦𑍁𑌯𑌤𑍍𑌪𑍍𑌰𑍗𑌢𑌪𑍍𑌰𑌿𑌯𑌙𑍍𑌗𑍁𑌦𑍍𑌯𑍁𑌤𑌿𑌭𑍃𑌤𑌿 𑌵𑌿𑌕𑌸𑌤𑍍𑌕𑍁𑌨𑍍𑌦𑌮𑌾𑌦𑍍𑌯𑌦𑍍𑌦𑍍𑌵𑌿𑌰𑍇𑌫𑍇
𑌕𑌾𑌲𑍇 𑌪𑍍𑌰𑌾𑌲𑍇𑌯𑌵𑌾𑌤𑌪𑍍𑌰𑌚𑌲𑌵𑌿𑌲𑌸𑌿𑌤𑍋𑌦𑌾𑌰𑌮𑌨𑍍𑌦𑌾𑌰𑌧𑌾𑌮𑍍𑌨𑌿 ।
𑌯𑍇𑌷𑌾𑌂 𑌨𑍋 𑌕𑌣𑍍𑌠𑌲𑌗𑍍𑌨𑌾 𑌕𑍍𑌷𑌣𑌂 𑌅𑌪𑌿 𑌤𑍁𑌹𑌿𑌨𑌕𑍍𑌷𑍋𑌦𑌦𑌕𑍍𑌷𑌾 𑌮𑍃𑌗𑌾𑌕𑍍𑌷𑍀
𑌤𑍇𑌸𑌾𑌂 𑌆𑌯𑌾𑌮𑌯𑌾𑌮𑌾 𑌯𑌮𑌸𑌦𑌨𑌸𑌮𑌾 𑌯𑌾𑌮𑌿𑌨𑍀 𑌯𑌾𑌤𑌿 𑌯𑍂𑌨𑌾𑌮𑍍 ॥ 2.98 ॥
𑌚𑍁𑌮𑍍𑌬𑌨𑍍𑌤𑍋 𑌗𑌣𑍍𑌡𑌭𑌿𑌤𑍍𑌤𑍀𑌰𑌲𑌕𑌵𑌤𑌿 𑌮𑍁𑌖𑍇 𑌸𑍀𑌤𑍍𑌕𑍃𑌤𑌾𑌨𑍍𑌯𑌾𑌦𑌧𑌾𑌨𑌾
𑌵𑌕𑍍𑌷𑌃𑌸𑍂𑌤𑍍𑌕𑌞𑍍𑌚𑍁𑌕𑍇𑌷𑍁 𑌸𑍍𑌤𑌨𑌭𑌰𑌪𑍁𑌲𑌕𑍋𑌦𑍍𑌭𑍇𑌦𑌂 𑌆𑌪𑌾𑌦𑌯𑌨𑍍𑌤𑌃 ।
𑌊𑌰𑍂𑌨𑌾𑌕𑌮𑍍𑌪𑌯𑌨𑍍𑌤𑌃 𑌪𑍃𑌥𑍁𑌜𑌘𑌨𑌤𑌟𑌾𑌤𑍍𑌸𑍍𑌰𑌂𑌸𑌯𑌨𑍍𑌤𑍋𑌽𑌂𑌶𑍁𑌕𑌾𑌨𑌿
𑌵𑍍𑌯𑌕𑍍𑌤𑌂 𑌕𑌾𑌨𑍍𑌤𑌾𑌜𑌨𑌾𑌨𑌾𑌂 𑌵𑌿𑌟𑌚𑌰𑌿𑌤𑌭𑍃𑌤𑌃 𑌶𑍈𑌶𑌿𑌰𑌾 𑌵𑌾𑌨𑍍𑌤𑌿 𑌵𑌾𑌤𑌾𑌃 ॥ 2.99 ॥
𑌕𑍇𑌶𑌾𑌨𑌾𑌕𑍁𑌲𑌯𑌨𑍍𑌦𑍃𑌶𑍋 𑌮𑍁𑌕𑍁𑌲𑌯𑌨𑍍𑌵𑌾𑌸𑍋 𑌬𑌲𑌾𑌦𑌾𑌕𑍍𑌷𑌿𑌪𑌨𑍍𑌨𑌾𑌤𑌨𑍍𑌵𑌨𑍍
𑌪𑍁𑌲𑌕𑍋𑌦𑍍𑌗𑌮𑌂 𑌪𑍍𑌰𑌕𑌟𑌯𑌨𑍍𑌨𑌾𑌵𑍇𑌗𑌕𑌮𑍍𑌪𑌂 𑌶𑌨𑍈𑌃 ।
𑌬𑌾𑌰𑌂 𑌬𑌾𑌰𑌂 𑌉𑌦𑌾𑌰𑌸𑍀𑌤𑍍𑌕𑍃𑌤𑌕𑍃𑌤𑍋 𑌦𑌨𑍍𑌤𑌚𑍍𑌛𑌦𑌾𑌨𑍍𑌪𑍀𑌡𑌯𑌨𑍍
𑌪𑍍𑌰𑌾𑌯𑌃 𑌶𑍈𑌶𑌿𑌰 𑌏𑌷 𑌸𑌮𑍍𑌪𑍍𑌰𑌤𑌿 𑌮𑌰𑍁𑌤𑍍𑌕𑌾𑌨𑍍𑌤𑌾𑌸𑍁 𑌕𑌾𑌨𑍍𑌤𑌾𑌯𑌤𑍇 ॥ 2.100 ॥
𑌯𑌦𑍍𑌯𑌸𑍍𑌯 𑌨𑌾𑌸𑍍𑌤𑌿 𑌰𑍁𑌚𑌿𑌰𑌂 𑌤𑌸𑍍𑌮𑌿𑌂𑌸𑍍𑌤𑌸𑍍𑌯 𑌸𑍍𑌪𑍃𑌹𑌾 𑌮𑌨𑍋𑌜𑍍𑌞𑍇𑌽𑌪𑌿 ।
𑌰𑌮𑌣𑍀𑌯𑍇𑌽𑌪𑌿 𑌸𑍁𑌧𑌾𑌂𑌶𑍗 𑌨 𑌮𑌨𑌃𑌕𑌾𑌮𑌃 𑌸𑌰𑍋𑌜𑌿𑌨𑍍𑌯𑌾𑌃 ॥ 2.101 ॥
𑌵𑍈𑌰𑌾𑌗𑍍𑌯𑍇 𑌸𑌞𑍍𑌚𑌰𑌤𑍍𑌯𑍇𑌕𑍋 𑌨𑍀𑌤𑍗 𑌭𑍍𑌰𑌮𑌤𑌿 𑌚𑌾𑌪𑌰𑌃 ।
𑌶𑍃𑌙𑍍𑌗𑌾𑌰𑍇 𑌰𑌮𑌤𑍇 𑌕𑌶𑍍𑌚𑌿𑌦𑍍𑌭𑍁𑌵𑌿 𑌭𑍇𑌦𑌾𑌃 𑌪𑌰𑌸𑍍𑌪𑌰𑌮𑍍 ॥ 2.102 ॥
Roman (IAST) Transliteration
śambhusvayambhuharayo hariṇekṣaṇānāṃ
yenākriyanta satataṃ gṛhakumbhadāsāḥ |
vācāṃ agocaracaritravicitritāya
tasmai namo bhagavate makaradhvajāya || 2.1 ||
smitena bhāvena ca lajjayā bhiyā
parāṇmukhairardhakaṭākṣavīkṣaṇaiḥ |
vacobhirīrṣyākalahena līlayā
samastabhāvaiḥ khalu bandhanaṃ striyaḥ || 2.2 ||
bhrūcāturyātkuṣcitākṣāḥ kaṭākṣāḥ
snigdhā vāco lajjitāntāśca hāsāḥ |
līlāmandaṃ prasthitaṃ ca sthitaṃ ca
strīṇāṃ etadbhūṣaṇaṃ cāyudhaṃ ca || 2.3 ||
kvacitsabhrūbhaṅgaiḥ kvacidapi ca lajjāparigataiḥ
kvacidbhūritrastaiḥ kvacidapi ca līlāvilalitaiḥ |
kumārīṇāṃ etairmadanasubhagairnetravalitaiḥ
sphurannīlābjānāṃ prakaraparikīrṇā iva diśaḥ || 2.4 ||
vaktraṃ candravikāsi paṅkajaparīhāsakṣame locane
varṇaḥ svarṇaṃ apākariṣṇuralinījiṣṇuḥ kacānāṃ cayaḥ |
bakṣojāvibhakumbhavibhramaharau gurvī nitambasthalī
vācāṃ hāri ca mārdavaṃ yuvatīṣu svābhāvikaṃ maṇḍanam || 2.5 ||
smitakiñcinmugdhaṃ saralataralo dṛṣṭivibhavaḥ
parispando vācāṃ abhinavavilāsoktisarasaḥ |
gatānāṃ ārambhaḥ kisalayitalīlāparikaraḥ
spṛśantyāstāruṇyaṃ kiṃ iva na hi ramyaṃ mṛgadṛśaḥ || 2.6 ||
draṣṭavyeṣu kiṃ uttamaṃ mṛgadṛśaḥ premaprasannaṃ mukhaṃ
ghrātaveṣvapi kiṃ tadāsyapavanaḥ śravyeṣu kiṃ tadvacaḥ |
kiṃ svādyeṣu tadoṣṭhapallavarasaḥ spṛśyeṣu kiṃ tadvapurdhyeyaṃ
kiṃ navayauvane sahṛdayaiḥ sarvatra tadvibhramāḥ || 2.7 ||
etāścaladvalayasaṃhatimekhalotthajhaṅkāra
nūpuraparājitarājahaṃsyaḥ |
kurvanti kasya na mano vivaśaṃ taruṇyo
vitrastamugdhahariṇīsadṛśaiḥ kaṭākṣaiḥ || 2.8 ||
kuṅkumapaṅkakalaṅkitadehā
gaurapayodharakampitahārā |
nūpurahaṃsaraṇatpadmā
kaṃ na vaśīkurute bhuvi rāmā || 2.9 ||
nūnaṃ hi te kavivarā viparītavāco
ye nityaṃ āhurabalā iti kāminīstāḥ |
yābhirvilolitaratārakadṛṣṭipātaiḥ
śakrādayo'pi vijitāstvabalāḥ kathaṃ tāḥ || 2.10 ||
nūnaṃ ājñākarastasyāḥ subhruvo makaradhvajaḥ |
yatastannetrasañcārasūciteṣu pravartate || 2.11 ||
keśāḥ saṃyaminaḥ śruterapi paraṃ pāraṃ gate locane
antarvaktraṃ api svabhāvaśucibhīḥ kīrṇaṃ dvijānāṃ gaṇaiḥ |
muktānāṃ satatādhivāsarucirau vakṣojakumbhāvimāvitthaṃ
tanvi vapuḥ praśāntaṃ api terāgaṃ karotyeva naḥ || 2.12 ||
mugdhe dhānuṣkatā keyaṃ apūrvā tvayi dṛśyate |
yayā vidhyasi cetāṃsi guṇaireva na sāyakaiḥ || 2.13 ||
sati pradīpe satyagnau satsu tārāravīnduṣu |
vinā me mṛgaśāvākṣyā tamobhūtaṃ idaṃ jagat || 2.14 ||
udvṛttaḥ stanabhāra eṣa tarale netre cale bhrūlate
rāgādhiṣṭhitaṃ oṣṭhapallavaṃ idaṃ kurvantu nāma vyathām |
saubhāgyākṣaramālikeva likhitā puṣpāyudhena svayaṃ
madhyasthāpi karoti tāpaṃ adhikaṃ romāvaliḥ kena sā || 2.15 ||
mukhena candrakāntena mahānīlaiḥ śiroruhaiḥ |
karābhyāṃ padmarāgābhyāṃ reje ratnamayīva sā || 2.16 ||
guruṇā stanabhāreṇa mukhacandreṇa bhāsvatā |
śanaiścarābhyāṃ pādābhyāṃ reje grahamayīva sā || 2.17 ||
tasyāḥ stanau yadi ghanau jaghanaṃ ca hāri
vaktraṃ ca cāru tava citta kiṃ ākulatvam |
puṇyaṃ kuruṣva yadi teṣu tavāsti vāñchā
puṇyairvinā na hi bhavanti samīhitārthāḥ || 2.18 ||
ime tāruṇyaśrīnavaparimalāḥ prauḍhasuratapratāpa
prārambhāḥ smaravijayadānapratibhuvaḥ |
ciraṃ cetaścorā abhinavavikāraikaguravo
vilāsavyāpārāḥ kiṃ api vijayante mṛgadṛśām || 2.19 ||
praṇayamadhurāḥ premodgārā rasāśrayatāṃ gatāḥ
phaṇitimadhurā mugdhaprāyāḥ prakāśitasammadāḥ |
prakṛtisubhagā visrambhārdrāḥ smarodayadāyinī
rahasi kiṃ api svairālāpā haranti mṛgīdṛśām || 2.20 ||
viśramya viśramya vanadrumāṇāṃ
chāyāsu tanvī vicacāra kācit |
stanottarīyeṇa karoddhṛtena
nivārayantī śaśino mayūkhān || 2.21 ||
adarśane darśanamātrakāmā
dṛṣṭvā pariṣvaṅgasukhaikalolā |
āliṅgitāyāṃ punarāyatākṣyāmāśāsmahe
vigrahayorabhedam || 2.22 ||
mālatī śirasi jṛmbhaṇaṃ mukhe
candanaṃ vapuṣi kuṅkumāvilam |
vakṣasi priyatamā madālasā
svarga eṣa pariśiṣṭa āgamaḥ || 2.23 ||
prāṅmāṃ eti manāganāgatarasaṃ jātābhilāṣāṃ tataḥ
savrīḍaṃ tadanu ślathodyamaṃ atha pradhvastadhairyaṃ punaḥ |
premārdraṃ spṛhaṇīyanirbhararahaḥ krīḍāpragalbhaṃ tato
niḥsaṅgāṅgavikarṣaṇādhikasukharamyaṃ kulastrīratam || 2.24 ||
urasi nipatitānāṃ srastadhammillakānāṃ
mukulitanayanānāṃ kiñcidunmīlitānām |
upari suratakhedasvinnagaṇḍasthalānāmadhara
madhu vadhūnāṃ bhāgyavantaḥ pibanti || 2.25 ||
āmīlitanayanānāṃ yaḥ
surataraso'nu saṃvidaṃ bhāti |
mithurairmitho'vadhāritamavitatham
idaṃ eva kāmanirbarhaṇam || 2.26 ||
idaṃ anucitaṃ akramaśca puṃsāṃ
yadiha jarāsvapi manmathā vikārāḥ |
tadapi ca na kṛtaṃ nitambinīnāṃ
stanapatanāvadhi jīvitaṃ rataṃ vā || 2.27 ||
rājastṛṣṇāmburāśerna hi jagati gataḥ kaścidevāvasānaṃ
ko vārtho'rthaiḥ prabhūtaiḥ svavapuṣi galite yauvane sānurāge |
gacchāmaḥ sadma yāvadvikasitanayanendīvarālokinīnāmākramyākramya
rūpaṃ jhaṭiti na jarayā lupyate preyasīnām || 2.28 ||
rāgasyāgāraṃ ekaṃ narakaśatamahāduḥkhasamprāptiheturmohasyotpatti
bījaṃ jaladharapaṭalaṃ jñānatārādhipasya |
kandarpasyaikamitraṃ prakaṭitavividhaspaṣṭadoṣaprabandhaṃ
loke'sminna hyarthavrajakulabhavanayauvanādanyadasti || 2.29 ||
śṛṅgāradrumanīrade prasṛmarakrīḍārasasrotasi
pradyumnapriyabāndhave caturavāṅmuktāphalodanvati |
tanvīnetracakorapāvanavidhau saubhāgyalakṣmīnidhau
dhanyaḥ ko'pi na vikriyāṃ kalayati prāpte nave yauvane || 2.30 ||
saṃsāre'sminnasāre kunṛpatibhavanadvārasevākalaṅkavyāsaṅga
vyastadhairyaṃ kathaṃ amaladhiyo mānasaṃ saṃvidadhyuḥ |
yadyetāḥ prodyadindudyutinicayabhṛto na syurambhojanetrāḥ
preṅkhatkāñcīkalāpāḥ stanabharavinamanmadhyabhājastaruṇyaḥ || 2.31 ||
siddhādhyāsitakandare haravṛṣaskandhāvarugṇadrume
gaṅgādhautaśilātale himavataḥ sthāne sthite śreyasi |
kaḥ kurvīta śiraḥ praṇāmamalinaṃ mlānaṃ manasvī jano
yadvitrastakuraṅgaśāvanayanā na syuḥ smarāstraṃ striyaḥ || 2.32 ||
saṃsāra tava paryantapadavī na davīyasī |
antarā dustarā na syuryadi te madirekṣaṇām || 2.33 ||
diśa vanahariṇībhyo vaṃśakāṇḍacchavīnāṃ
kavalaṃ upalakoṭicchinnamūlaṃ kuśānām |
śakayuvatikapolāpāṇḍutāmbūlavallīdalam
aruṇanakhāgraiḥ pāṭitaṃ vā vadhūbhyaḥ || 2.34 ||
asārāḥ sarve te virativirasāḥ pāpaviṣayā
jugupsyantāṃ yadvā nanu sakaladoṣāspadaṃ iti |
tathāpyetadbhūmau nahi parahitātpuṇyaṃ adhikaṃ
na cāsminsaṃsāre kuvalayadṛśo ramyaṃ aparam || 2.35 ||
etatkāmaphalo loke yaddvayorekacittatā |
anyacittakṛte kāme śavayoriva saṅgamaḥ || 2.35.1 ||
mātsaryaṃ utsārya vicārya kāryamāryāḥ
samaryādaṃ idaṃ vadantu |
sevyā nitambāḥ kiṃ u bhūdharāṇāmata
smarasmeravilāsinīnām || 2.36 ||
saṃsāre svapnasāre pariṇatitarale dve gatī paṇḍitānāṃ
tattvajñānāmṛtāmbhaḥplavalalitadhiyāṃ yātu kālaḥ kathañcit |
no cenmugdhāṅganānāṃ stanajaghanaghanābhogasambhoginīnāṃ
sthūlopasthasthalīṣu sthagitakaratalasparśalīlodyamānām || 2.37 ||
āvāsaḥ kriyatāṃ gaṅge pāpahāriṇi vāriṇi |
stanadvaye taruṇyā vā manohāriṇi hāriṇi || 2.38 ||
kiṃ iha bahubhiruktairyuktiśūnyaiḥ pralāpairdvayam
iha puruṣāṇāṃ sarvadā sevanīyam |
abhinavamadalīlālālasaṃ sundarīṇāṃ
stanabharaparikhinnaṃ yauvanaṃ vā vanaṃ vā || 2.39 ||
satyaṃ janā vacmi na pakṣapātāl
lokeṣu saptasvapi tathyaṃ etat |
nānyanmanohāri nitambinībhyo
duḥkhaikaheturna ca kaścidanyaḥ || 2.40 ||
kāntetyutpalalocaneti vipulaśroṇībharetyunnamatpīnottuṅga
payodhareti samukhāmbhojeti subhrūriti |
dṛṣṭvā mādyati modate'bhiramate prastauti vidvānapi
pratyakṣāśucibhastrikāṃ striyaṃ aho mohasya duśceṣṭitam || 2.41 ||
smṛtā bhavati tāpāya dṛṣṭā conmādakāriṇī |
spṛṣṭā bhavati mohāya sā nāma dayitā katham || 2.42 ||
tāvadevāmṛtamayī yāvallocanagocarā |
cakṣuṣpathādatītā tu viṣādapyatiricyate || 2.43 ||
nāmṛtaṃ na viṣaṃ kiñcidetāṃ muktvā nitambinīm |
saivāmṛtalatā raktā viraktā viṣavallarī || 2.44 ||
āvartaḥ saṃśayānāṃ avinayabhuvanaṃ paṭṭaṇaṃ sāhasānāṃ
doṣāṇāṃ sannidhānaṃ kapaṭaśatamayaṃ kṣetraṃ apratyayānām |
svargadvārasya vighno narakapuramukha sarvamāyākaraṇḍaṃ
strīyantraṃ kena sṛṣṭaṃ viṣaṃ amṛtamayaṃ prāṇilokasya pāśaḥ || 2.45 ||
no satyena mṛgāṅka eṣa vadanībhūto na cendīvaradvandvaṃ
locanatāṃ gata na kanakairapyaṅgayaṣṭiḥ kṛtā |
kintvevaṃ kavibhiḥ pratāritamanāstattvaṃ vijānannapi
tvaṅmāṃsāsthimayaṃ vapurmṛgadṛśāṃ mando janaḥ sevate || 2.46 ||
līlāvatīnāṃ sahajā vilāsāsta
eva mūḍhasya hṛdi sphuranti |
rāgo nalinyā hi nisargasiddhastatra
bhramtyeva vṛthā ṣaḍaṅghriḥ || 2.47 ||
sammohayanti madayanti viḍambayanti
nirbhartsyanti ramayanti viṣādayanti |
etāḥ praviśya sadayaṃ hṛdayaṃ narāṇāṃ
kiṃ nāma vāmanayanā na samācaranti || 2.47.1 ||
yadetatpūrṇendudyutiharaṃ udārākṛti paraṃ
mukhābjaṃ tanvaṅgyāḥ kila vasati yatrādharamadhu |
idaṃ tatkiṃ pākadrumaphalaṃ idānīṃ atirasavyatīte'smin
kāle viṣaṃ iva bhaviṣytyasukhadam || 2.48 ||
unmīlattrivalītaraṅganilayā prottuṅgapīnastanadvandvenodgata
cakravākayugalā vaktrāmbujodbhāsinī |
kāntākāradharā nadīyaṃ abhitaḥ krūrātra nāpekṣate
saṃsārārṇavamajjanaṃ yadi tadā dūreṇa santyajyatām || 2.49 ||
jalpanti sārdhaṃ anyena paśyantyanyaṃ savibhramāḥ |
hṛdgataṃ cintayantyanyaṃ priyaḥ ko nāma yoṣitām || 2.50 ||
madhu tiṣṭhati vāci yoṣitāṃ hṛdi hālāhalaṃ eva kevalam |
ataeva nipīyate'dharo hṛdayaṃ muṣṭibhireva tāḍyate || 2.51 ||
apasara sakhe dūrādasmātkaṭākṣaviṣānalāt
prakṛtiviṣamādyoṣitsarpādvilāsaphaṇābhṛtaḥ |
itaraphaṇinā daṣṭaḥ śakyaścikitsituṃ auṣadhaiścatur
vanitābhogigrastaṃ hi mantriṇaḥ || 2.52 ||
vistāritaṃ makaraketanadhīvareṇa
strīsañjñitaṃ baḍiśaṃ atra bhavāmburāśau |
yenācirāttadadharāmiṣalolamartya
matsyānvikṛṣya vipacatyanurāgavahnau || 2.53 ||
kāminīkāyakāntāre kucaparvatadurgame |
mā sañcara manaḥ pāntha tatrāste smarataskaraḥ || 2.54 ||
vyāḍīrgheṇa calena vaktragatinā tejasvinā bhoginā
nīlābjadyutināhinā paraṃ ahaṃ dṛṣṭo na taccakṣuṣā |
dṛṣṭe santi cikitsakā diśi diśi prāyeṇa dhanārthino
mugdhākṣakṣaṇavīkṣitasya na hi me vaidyo na cāpyauṣadham || 2.55 ||
iha hi madhuragītaṃ nṛtyaṃ etadraso'yaṃ
sphurati parimalo'sau sparśa eṣa stanānām |
iti hataparamārthairindriyairbhrāmyamāṇaḥ
svahitakaraṇadhūrtaiḥ pañcabhirvañcito'smi || 2.56 ||
na gamyo mantrāṇāṃ na ca bhavati bhaiṣajyaviṣayo
na cāpi pradhvaṃsaṃ vrajati vividhaiḥ śāntikaśataiḥ |
bhramāveśādaṅge kaṃ api vidadhadbhaṅgaṃ asakṛt
smarāpasmāro'yaṃ bhramayati dṛśaṃ ghūrṇayati ca || 2.57 ||
jātyandhāya ca durmukhāya ca jarājīrṇā khilāṅgāya ca
grāmīṇāya ca duṣkulāya ca galatkuṣṭhābhibhūtāya ca |
yacchantīṣu manoharaṃ nijavapulakṣmīlavaśraddhayā
paṇyastrīṣu vivekakalpalatikāśastrīṣu rājyeta kaḥ || 2.58 ||
veśyāsau madanajvālā
rūpe'ndhanavivardhitā |
kāmibhiryatra hūyante
yauvanāni dhanāni ca || 2.59 ||
kaścumbati kulapuruṣo veśyādharapallavaṃ manojñaṃ api |
cārabhaṭacoraceṭakanaṭaviṭaniṣṭhīvanaśarāvam || 2.60 ||
dhanyāsta eva dhavalāyatalocanānāṃ
tāruṇyadarpaghanapīnapayodharāṇām |
kṣāmodaropari lasattrivalīlatānāṃ
dṛṣṭvākṛtiṃ vikṛtiṃ eti mano na yeṣām || 2.61 ||
bāle līlāmukulitaṃ amī mantharā dṛṣṭipātāḥ
kiṃ kṣipyante viramavirama vyartha eṣa śramaste |
sampratyanye vayaṃ uparataṃ bālyaṃ āsthā vanānte
kṣīṇo mohastṛṇaṃ iva jagajjālaṃ ālokayāmaḥ || 2.62 ||
iyaṃ bālā māṃ pratyanavarataṃ indīvaradalaprabhā
cīraṃ cakṣuḥ kṣipati kiṃ abhipretaṃ anayā |
gato moho'smākaṃ smaraśabarabāṇavyatikarajvara
jvālā śāntā tadapi na varākī viramati || 2.63 ||
kiṃ kandarpa karaṃ kadarthayasi re kodaṇḍaṭaṅkāritaṃ
re re kokila komalaṃ kalaravaṃ kiṃ vā vṛthā jalpasi |
mugdhe snigdhavidagdhacārumadhurairlolaiḥ kaṭākṣairalaṃ
cetaścumbitacandracūḍacaraṇadhyānāmṛtaṃ vartate || 2.64 ||
virahe'pi saṅgamaḥ khalu
parasparaṃ saṅgataṃ mano yeṣām |
hṛdayaṃ api vighaṭṭitaṃ cet
saṅgī virahaṃ viśeṣayati || 2.65 ||
kiṃ gatena yadi sā na jīvati
prāṇiti priyatamā tathāpi kim |
ityudīkṣya navameghamālikāṃ
na prayāti pathikaḥ svamandiram || 2.66 ||
viramata budhā yoṣitsaṅgātsukhātkṣaṇabhaṅgurāt
kuruta karuṇāmaitrīprajñāvadhūjanasaṅgamam |
na khalu narake hārākrāntaṃ ghanastanamaṇḍalaṃ
śaraṇaṃ athavā śroṇībimbaṃ raṇanmaṇimekhalam || 2.67 ||
yadā yogābhyāsavyasanakṛśayorātmamanasoravicchinnā
maitrī sphurati kṛtinastasya kiṃ u taiḥ |
priyāṇāṃ ālāpairadharamadhubhirvaktravidhubhiḥ
saniśvāsāmodaiḥ sakucakalaśāśleṣasurataiḥ || 2.68 ||
yadāsīdajñānaṃ smaratimirasañcārajanitaṃ
tadā dṛṣṭanārīmayaṃ idaṃ aśeṣaṃ jagaditi |
idānīṃ asmākaṃ paṭutaravivekāñjanajuṣāṃ
samībhūtā dṛṣṭistribhuvanaṃ api brahma manute || 2.69 ||
tāvadeva kṛtināṃ api sphuratyeṣa
nirmalavivekadīpakaḥ |
yāvadeva na kuraṅgacakṣuṣāṃ
tāḍyate caṭulalocanāñcalaiḥ || 2.70 ||
vacasi bhavati saṅgatyāgaṃ uddiśya vārtā
śrutimukharamukhānāṃ kevalaṃ paṇḍitānām |
jaghanaṃ aruṇaratnagranthikāñcīkalāpaṃ
kuvalayanayanānāṃ ko vihātuṃ samarthaḥ || 2.71 ||
svaparapratārako'sau
nindati yo'līkapaṇḍito yuvatīḥ |
yasmāttapaso'pi phalaṃ
svargaḥ svarge'pi cāpsarasaḥ || 2.72 ||
mattebhakumbhadalane bhuvi santi dhīrāḥ
kecitpracaṇḍamṛgarājavadhe'pi dakṣāḥ |
kintu bravīmi balināṃ purataḥ prasahya
kandarpadarpadalane viralā manuṣyāḥ || 2.73 ||
sanmārge tāvadāste prabhavati ca narastāvadevendriyāṇāṃ
lajjāṃ tāvadvidhatte vinayaṃ api samālambate tāvadeva |
bhrūcāpākṛṣṭamuktāḥ śravaṇapathagatā nīlapakṣmāṇa ete
yāvallīlāvatīnāṃ hṛdi na dhṛtimuṣo dṛṣṭibāṇāḥ patanti || 2.74 ||
unmattapremasaṃrambhād
ārabhante yadaṅganāḥ |
tatra pratyūhaṃ ādhātuṃ
brahmāpi khalu kātaraḥ || 2.75 ||
tāvanmahattvaṃ pāṇḍityaṃ
kulīnatvaṃ vivekitā |
yāvajjvalati nāṅgeṣu
hataḥ pañceṣupāvakaḥ || 2.76 ||
śāstrajño'pi prathitavinayo'pyātmabodho'pi bāḍhaṃ
saṃsāre'sminbhavati viralo bhājanaṃ sadgatīnām |
yenaitasminnirayanagaradvāraṃ udghāṭayantī
vāmākṣīṇāṃ bhavati kuṭilā bhrūlatā kuñcikeva || 2.77 ||
kṛśaḥ kāṇaḥ khañjaḥ śravaṇarahitaḥ pucchavikalo
vraṇī pūyaklinnaḥ kṛmikulaśatairāvṛtatanuḥ |
kṣudhā kṣāmo jīrṇaḥ piṭharakakapālārpitagalaḥ
śunīṃ anveti śvā hataṃ api ca hantyeva madanaḥ || 2.78 ||
strīmudrāṃ kusumāyudhasya jayinīṃ sarvārthasampatkarīṃ
ye mūḍhāḥ pravihāya yānti kudhiyo mithyāphalānveṣiṇaḥ |
te tenaiva nihatya nirdayataraṃ nagnīkṛtā muṇḍitāḥ
kecitpañcaśikhīkṛtāśca jaṭilāḥ kāpālikāścāpare || 2.79 ||
viśvāmitraparāśaraprabhṛtayo vātāmbuparṇāśanāste'pi
strīmukhapaṅkajaṃ sulalitaṃ dṛṣṭvaiva mohaṃ gatāḥ |
śālyannaṃ saghṛtaṃ payodadhiyutaṃ ye bhuñjate mānavāsteṣām
indriyanigraho yadi bhavedvindhyaḥ plavetsāgare || 2.80 ||
parimalabhṛto vātāḥ śākhā navāṅkurakoṭayo
madhuravirutotkaṇṭhā vācaḥ priyāḥ pikapakṣiṇām |
viralasuratasvedodgārā vadhūvadanendavaḥ
prasarati madhau rātryāṃ jāto na kasya guṇodayaḥ || 2.81 ||
madhurayaṃ madhurairapi kokilā
kalaravairmalayasya ca vāyubhiḥ |
virahiṇaḥ prahiṇasti śarīriṇo
vipadi hanta sudhāpi viṣāyate || 2.82 ||
āvāsaḥ kilakiñcitasya dayitāpārśve vilāsālasāḥ
karṇe kokilakāminīkalaravaḥ smero latāmaṇḍapaḥ |
goṣṭhī satkavibhiḥ samaṃ katipayairmugdhāḥ sudhāṃśoḥ karāḥ
keṣāñcitsukhayanti cātra hṛdayaṃ caitre vicitrāḥ kṣapāḥ || 2.83 ||
pāntha strīvirahānalāhutikalāṃ ātanvatī mañjarīmākandeṣu
pikāṅganābhiradhunā sotkaṇṭhaṃ ālokyate |
apyete navapāṭalāparimalaprāgbhārapāṭaccarā
vāntiklāntivitānatānavakṛtaḥ śrīkhaṇḍaśailānilāḥ || 2.84 ||
prathitaḥ praṇayavatīnāṃ
tāvatpadaṃ ātanotu hṛdi mānaḥ |
bhavati na yāvaccandanataru
surabhirmalayapavamānaḥ || 2.85 ||
sahakārakusumakesaranikara
bharāmodamūrcchitadigante |
madhuramadhuravidhuramadhupe
madhau bhavetkasya notkaṇṭhā || 2.86 ||
acchācchacandanarasārdratarā mṛgākṣyo
dhārāgṛhāṇi kusumāni ca kaumudī ca |
mando marutsumanasaḥ śuci harmyapṛṣṭhaṃ
grīṣme madaṃ ca madanaṃ ca vivardhayanti || 2.87 ||
srajo hṛdyāmodā vyajanapavanaścandrakiraṇāḥ
parāgaḥ kāsāro malayajarajaḥ śīdhu viśadam |
śuciḥ saudhotsaṅgaḥ pratanu vasanaṃ paṅkajadṛśo
nidāghaṛtāvetadvilasati labhante sukṛtinaḥ || 2.88 ||
sudhāśubhraṃ dhāma sphuradamalaraśmiḥ śaśadharaḥ
priyāvaktrāmbhojaṃ malayajarajaścātisurabhiḥ |
srajo hṛdyāmodāstadidaṃ akhilaṃ rāgiṇi jane
karotyantaḥ kṣobhaṃ na tu viṣayasaṃsargavimukhe || 2.89 ||
taruṇīveṣoddīpitakāmā
vikasajjātīpuṣpasugandhiḥ |
unnatapīnapayodharabhārā
prāvṛṭtanute kasya na harṣam || 2.90 ||
viyadupacitameghaṃ bhūmayaḥ kandalinyo
navakuṭajakadambāmodino gandhavāhāḥ |
śikhikulakalakekārāvaramyā vanāntāḥ
sukhinaṃ asukhinaṃ vā sarvaṃ utkaṇṭhayanti || 2.91 ||
upari ghanaṃ ghanapaṭalaṃ
tiryaggirayo'pi nartitamayūrāḥ |
kṣitirapi kandaladhavalā
dṛṣṭiṃ pathikaḥ kva pātayati || 2.92 ||
ito vidyudvallīvilasitaṃ itaḥ ketakitaroḥ
sphurangandhaḥ prodyajjaladaninadasphūrjitaṃ itaḥ |
itaḥ kekikrīḍākalakalaravaḥ pakṣmaladṛśāṃ
kathaṃ yāsyantyete virahadivasāḥ sambhṛtarasāḥ || 2.93 ||
asūcisañcāre tamasi nabhasi prauḍhajaladadhvanipraye
tasmin patati dṛśadāṃ nīranicaye |
idaṃ saudāminyāḥ kanakakamanīyaṃ vilasitaṃ
mudaṃ ca glāniṃ ca prathayati pathiṣveva sudṛśām || 2.94 ||
āsāreṇa na harmyataḥ priyatamairyātuṃ bahiḥ śakyate
śītotkampanimittaṃ āyatadṛśā gāḍhaṃ samāliṅgyate |
jātāḥ śīkaraśītalāśca marutoratyantakhedacchido
dhanyānāṃ bata durdinaṃ sudinatāṃ yāti priyāsaṅgame || 2.95 ||
ardhaṃ suptvā niśāyāḥ sarabhasasuratāyāsasannaślathāṅgaprodbhūtāsahya
tṛṣṇo madhumadanirato harmyapṛṣṭhe vivikte |
sambhogaklāntakāntāśithilabhujalatāvarjitaṃ karkarīto
jyotsnābhinnācchadhāraṃ pibati na salilaṃ śāradaṃ mandapuṇyaḥ || 2.96 ||
hemante dadhidugdhasarpiraśanā māñjiṣṭhavāsobhṛtaḥ
kāśmīradravasāndradigdhavapuṣaśchinnā vicitrai rataiḥ |
vṛttorustanakāminojanakṛtāśleṣā gṛhābhyantare
tāmbūlīdalapūgapūritamukhā dhanyāḥ sukhaṃ śerate || 2.97 ||
praduyatprauḍhapriyaṅgudyutibhṛti vikasatkundamādyaddvirephe
kāle prāleyavātapracalavilasitodāramandāradhāmni |
yeṣāṃ no kaṇṭhalagnā kṣaṇaṃ api tuhinakṣodadakṣā mṛgākṣī
tesāṃ āyāmayāmā yamasadanasamā yāminī yāti yūnām || 2.98 ||
cumbanto gaṇḍabhittīralakavati mukhe sītkṛtānyādadhānā
vakṣaḥsūtkañcukeṣu stanabharapulakodbhedaṃ āpādayantaḥ |
ūrūnākampayantaḥ pṛthujaghanataṭātsraṃsayanto'ṃśukāni
vyaktaṃ kāntājanānāṃ viṭacaritabhṛtaḥ śaiśirā vānti vātāḥ || 2.99 ||
keśānākulayandṛśo mukulayanvāso balādākṣipannātanvan
pulakodgamaṃ prakaṭayannāvegakampaṃ śanaiḥ |
bāraṃ bāraṃ udārasītkṛtakṛto dantacchadānpīḍayan
prāyaḥ śaiśira eṣa samprati marutkāntāsu kāntāyate || 2.100 ||
yadyasya nāsti ruciraṃ tasmiṃstasya spṛhā manojñe'pi |
ramaṇīye'pi sudhāṃśau na manaḥkāmaḥ sarojinyāḥ || 2.101 ||
vairāgye sañcaratyeko nītau bhramati cāparaḥ |
śṛṅgāre ramate kaścidbhuvi bhedāḥ parasparam || 2.102 ||
Sanskrit — Devanagari (original)
शम्भुस्वयम्भुहरयो हरिणेक्षणानां
येनाक्रियन्त सततं गृहकुम्भदासाः ।
वाचां अगोचरचरित्रविचित्रिताय
तस्मै नमो भगवते मकरध्वजाय ॥ 2.1 ॥
स्मितेन भावेन च लज्जया भिया
पराण्मुखैरर्धकटाक्षवीक्षणैः ।
वचोभिरीर्ष्याकलहेन लीलया
समस्तभावैः खलु बन्धनं स्त्रियः ॥ 2.2 ॥
भ्रूचातुर्यात्कुष्चिताक्षाः कटाक्षाः
स्निग्धा वाचो लज्जितान्ताश्च हासाः ।
लीलामन्दं प्रस्थितं च स्थितं च
स्त्रीणां एतद्भूषणं चायुधं च ॥ 2.3 ॥
क्वचित्सभ्रूभङ्गैः क्वचिदपि च लज्जापरिगतैः
क्वचिद्भूरित्रस्तैः क्वचिदपि च लीलाविललितैः ।
कुमारीणां एतैर्मदनसुभगैर्नेत्रवलितैः
स्फुरन्नीलाब्जानां प्रकरपरिकीर्णा इव दिशः ॥ 2.4 ॥
वक्त्रं चन्द्रविकासि पङ्कजपरीहासक्षमे लोचने
वर्णः स्वर्णं अपाकरिष्णुरलिनीजिष्णुः कचानां चयः ।
बक्षोजाविभकुम्भविभ्रमहरौ गुर्वी नितम्बस्थली
वाचां हारि च मार्दवं युवतीषु स्वाभाविकं मण्डनम् ॥ 2.5 ॥
स्मितकिञ्चिन्मुग्धं सरलतरलो दृष्टिविभवः
परिस्पन्दो वाचां अभिनवविलासोक्तिसरसः ।
गतानां आरम्भः किसलयितलीलापरिकरः
स्पृशन्त्यास्तारुण्यं किं इव न हि रम्यं मृगदृशः ॥ 2.6 ॥
द्रष्टव्येषु किं उत्तमं मृगदृशः प्रेमप्रसन्नं मुखं
घ्रातवेष्वपि किं तद्आस्यपवनः श्रव्येषु किं तद्वचः ।
किं स्वाद्येषु तद्ओष्ठपल्लवरसः स्पृश्येषु किं तद्वपुर्ध्येयं
किं नवयौवने सहृदयैः सर्वत्र तद्विभ्रमाः ॥ 2.7 ॥
एताश्चलद्वलयसंहतिमेखलोत्थझङ्कार
नूपुरपराजितराजहंस्यः ।
कुर्वन्ति कस्य न मनो विवशं तरुण्यो
वित्रस्तमुग्धहरिणीसदृशैः कटाक्षैः ॥ 2.8 ॥
कुङ्कुमपङ्ककलङ्कितदेहा
गौरपयोधरकम्पितहारा ।
नूपुरहंसरणत्पद्मा
कं न वशीकुरुते भुवि रामा ॥ 2.9 ॥
नूनं हि ते कविवरा विपरीतवाचो
ये नित्यं आहुरबला इति कामिनीस्ताः ।
याभिर्विलोलितरतारकदृष्टिपातैः
शक्रादयोऽपि विजितास्त्वबलाः कथं ताः ॥ 2.10 ॥
नूनं आज्ञाकरस्तस्याः सुभ्रुवो मकरध्वजः ।
यतस्तन्नेत्रसञ्चारसूचितेषु प्रवर्तते ॥ 2.11 ॥
केशाः संयमिनः श्रुतेरपि परं पारं गते लोचने
अन्तर्वक्त्रं अपि स्वभावशुचिभीः कीर्णं द्विजानां गणैः ।
मुक्तानां सतताधिवासरुचिरौ वक्षोजकुम्भाविमावित्थं
तन्वि वपुः प्रशान्तं अपि तेरागं करोत्येव नः ॥ 2.12 ॥
मुग्धे धानुष्कता केयं अपूर्वा त्वयि दृश्यते ।
यया विध्यसि चेतांसि गुणैरेव न सायकैः ॥ 2.13 ॥
सति प्रदीपे सत्यग्नौ सत्सु तारारवीन्दुषु ।
विना मे मृगशावाक्ष्या तमोभूतं इदं जगत् ॥ 2.14 ॥
उद्वृत्तः स्तनभार एष तरले नेत्रे चले भ्रूलते
रागाधिष्ठितं ओष्ठपल्लवं इदं कुर्वन्तु नाम व्यथाम् ।
सौभाग्याक्षरमालिकेव लिखिता पुष्पायुधेन स्वयं
मध्यस्थापि करोति तापं अधिकं रोमावलिः केन सा ॥ 2.15 ॥
मुखेन चन्द्रकान्तेन महानीलैः शिरोरुहैः ।
कराभ्यां पद्मरागाभ्यां रेजे रत्नमयीव सा ॥ 2.16 ॥
गुरुणा स्तनभारेण मुखचन्द्रेण भास्वता ।
शनैश्चराभ्यां पादाभ्यां रेजे ग्रहमयीव सा ॥ 2.17 ॥
तस्याः स्तनौ यदि घनौ जघनं च हारि
वक्त्रं च चारु तव चित्त किं आकुलत्वम् ।
पुण्यं कुरुष्व यदि तेषु तवास्ति वाञ्छा
पुण्यैर्विना न हि भवन्ति समीहितार्थाः ॥ 2.18 ॥
इमे तारुण्यश्रीनवपरिमलाः प्रौढसुरतप्रताप
प्रारम्भाः स्मरविजयदानप्रतिभुवः ।
चिरं चेतश्चोरा अभिनवविकारैकगुरवो
विलासव्यापाराः किं अपि विजयन्ते मृगदृशाम् ॥ 2.19 ॥
प्रणयमधुराः प्रेमोद्गारा रसाश्रयतां गताः
फणितिमधुरा मुग्धप्रायाः प्रकाशितसम्मदाः ।
प्रकृतिसुभगा विस्रम्भार्द्राः स्मरोदयदायिनी
रहसि किं अपि स्वैरालापा हरन्ति मृगीदृशाम् ॥ 2.20 ॥
विश्रम्य विश्रम्य वनद्रुमाणां
छायासु तन्वी विचचार काचित् ।
स्तनोत्तरीयेण करोद्धृतेन
निवारयन्ती शशिनो मयूखान् ॥ 2.21 ॥
अदर्शने दर्शनमात्रकामा
दृष्ट्वा परिष्वङ्गसुखैकलोला ।
आलिङ्गितायां पुनरायताक्ष्यामाशास्महे
विग्रहयोरभेदम् ॥ 2.22 ॥
मालती शिरसि जृम्भणं मुखे
चन्दनं वपुषि कुङ्कुमाविलम् ।
वक्षसि प्रियतमा मदालसा
स्वर्ग एष परिशिष्ट आगमः ॥ 2.23 ॥
प्राङ्मां एति मनागनागतरसं जाताभिलाषां ततः
सव्रीडं तदनु श्लथोद्यमं अथ प्रध्वस्तधैर्यं पुनः ।
प्रेमार्द्रं स्पृहणीयनिर्भररहः क्रीडाप्रगल्भं ततो
निःसङ्गाङ्गविकर्षणाधिकसुखरम्यं कुलस्त्रीरतम् ॥ 2.24 ॥
उरसि निपतितानां स्रस्तधम्मिल्लकानां
मुकुलितनयनानां किञ्चिद्उन्मीलितानाम् ।
उपरि सुरतखेदस्विन्नगण्डस्थलानामधर
मधु वधूनां भाग्यवन्तः पिबन्ति ॥ 2.25 ॥
आमीलितनयनानां यः
सुरतरसोऽनु संविदं भाति ।
मिथुरैर्मिथोऽवधारितमवितथम्
इदं एव कामनिर्बर्हणम् ॥ 2.26 ॥
इदं अनुचितं अक्रमश्च पुंसां
यदिह जरास्वपि मन्मथा विकाराः ।
तदपि च न कृतं नितम्बिनीनां
स्तनपतनावधि जीवितं रतं वा ॥ 2.27 ॥
राजस्तृष्णाम्बुराशेर्न हि जगति गतः कश्चिदेवावसानं
को वार्थोऽर्थैः प्रभूतैः स्ववपुषि गलिते यौवने सानुरागे ।
गच्छामः सद्म यावद्विकसितनयनेन्दीवरालोकिनीनामाक्रम्याक्रम्य
रूपं झटिति न जरया लुप्यते प्रेयसीनाम् ॥ 2.28 ॥
रागस्यागारं एकं नरकशतमहादुःखसम्प्राप्तिहेतुर्मोहस्योत्पत्ति
बीजं जलधरपटलं ज्ञानताराधिपस्य ।
कन्दर्पस्यैकमित्रं प्रकटितविविधस्पष्टदोषप्रबन्धं
लोकेऽस्मिन्न ह्यर्थव्रजकुलभवनयौवनादन्यदस्ति ॥ 2.29 ॥
शृङ्गारद्रुमनीरदे प्रसृमरक्रीडारसस्रोतसि
प्रद्युम्नप्रियबान्धवे चतुरवाङ्मुक्ताफलोदन्वति ।
तन्वीनेत्रचकोरपावनविधौ सौभाग्यलक्ष्मीनिधौ
धन्यः कोऽपि न विक्रियां कलयति प्राप्ते नवे यौवने ॥ 2.30 ॥
संसारेऽस्मिन्नसारे कुनृपतिभवनद्वारसेवाकलङ्कव्यासङ्ग
व्यस्तधैर्यं कथं अमलधियो मानसं संविदध्युः ।
यद्येताः प्रोद्यद्इन्दुद्युतिनिचयभृतो न स्युरम्भोजनेत्राः
प्रेङ्खत्काञ्चीकलापाः स्तनभरविनमन्मध्यभाजस्तरुण्यः ॥ 2.31 ॥
सिद्धाध्यासितकन्दरे हरवृषस्कन्धावरुग्णद्रुमे
गङ्गाधौतशिलातले हिमवतः स्थाने स्थिते श्रेयसि ।
कः कुर्वीत शिरः प्रणाममलिनं म्लानं मनस्वी जनो
यद्वित्रस्तकुरङ्गशावनयना न स्युः स्मरास्त्रं स्त्रियः ॥ 2.32 ॥
संसार तव पर्यन्तपदवी न दवीयसी ।
अन्तरा दुस्तरा न स्युर्यदि ते मदिरेक्षणाम् ॥ 2.33 ॥
दिश वनहरिणीभ्यो वंशकाण्डच्छवीनां
कवलं उपलकोटिच्छिन्नमूलं कुशानाम् ।
शकयुवतिकपोलापाण्डुताम्बूलवल्लीदलम्
अरुणनखाग्रैः पाटितं वा वधूभ्यः ॥ 2.34 ॥
असाराः सर्वे ते विरतिविरसाः पापविषया
जुगुप्स्यन्तां यद्वा ननु सकलदोषास्पदं इति ।
तथाप्येतद्भूमौ नहि परहितात्पुण्यं अधिकं
न चास्मिन्संसारे कुवलयदृशो रम्यं अपरम् ॥ 2.35 ॥
एतत्कामफलो लोके यद्द्वयोरेकचित्तता ।
अन्यचित्तकृते कामे शवयोरिव सङ्गमः ॥ 2.35.1 ॥
मात्सर्यं उत्सार्य विचार्य कार्यमार्याः
समर्यादं इदं वदन्तु ।
सेव्या नितम्बाः किं उ भूधराणामत
स्मरस्मेरविलासिनीनाम् ॥ 2.36 ॥
संसारे स्वप्नसारे परिणतितरले द्वे गती पण्डितानां
तत्त्वज्ञानामृताम्भःप्लवललितधियां यातु कालः कथञ्चित् ।
नो चेन्मुग्धाङ्गनानां स्तनजघनघनाभोगसम्भोगिनीनां
स्थूलोपस्थस्थलीषु स्थगितकरतलस्पर्शलीलोद्यमानाम् ॥ 2.37 ॥
आवासः क्रियतां गङ्गे पापहारिणि वारिणि ।
स्तनद्वये तरुण्या वा मनोहारिणि हारिणि ॥ 2.38 ॥
किं इह बहुभिरुक्तैर्युक्तिशून्यैः प्रलापैर्द्वयम्
इह पुरुषाणां सर्वदा सेवनीयम् ।
अभिनवमदलीलालालसं सुन्दरीणां
स्तनभरपरिखिन्नं यौवनं वा वनं वा ॥ 2.39 ॥
सत्यं जना वच्मि न पक्षपाताल्
लोकेषु सप्तस्वपि तथ्यं एतत् ।
नान्यन्मनोहारि नितम्बिनीभ्यो
दुःखैकहेतुर्न च कश्चिदन्यः ॥ 2.40 ॥
कान्तेत्युत्पललोचनेति विपुलश्रोणीभरेत्युन्नमत्पीनोत्तुङ्ग
पयोधरेति समुखाम्भोजेति सुभ्रूरिति ।
दृष्ट्वा माद्यति मोदतेऽभिरमते प्रस्तौति विद्वानपि
प्रत्यक्षाशुचिभस्त्रिकां स्त्रियं अहो मोहस्य दुश्चेष्टितम् ॥ 2.41 ॥
स्मृता भवति तापाय दृष्टा चोन्मादकारिणी ।
स्पृष्टा भवति मोहाय सा नाम दयिता कथम् ॥ 2.42 ॥
तावदेवामृतमयी यावल्लोचनगोचरा ।
चक्षुष्पथादतीता तु विषादप्यतिरिच्यते ॥ 2.43 ॥
नामृतं न विषं किञ्चिदेतां मुक्त्वा नितम्बिनीम् ।
सैवामृतलता रक्ता विरक्ता विषवल्लरी ॥ 2.44 ॥
आवर्तः संशयानां अविनयभुवनं पट्टणं साहसानां
दोषाणां सन्निधानं कपटशतमयं क्षेत्रं अप्रत्ययानाम् ।
स्वर्गद्वारस्य विघ्नो नरकपुरमुख सर्वमायाकरण्डं
स्त्रीयन्त्रं केन सृष्टं विषं अमृतमयं प्राणिलोकस्य पाशः ॥ 2.45 ॥
नो सत्येन मृगाङ्क एष वदनीभूतो न चेन्दीवरद्वन्द्वं
लोचनतां गत न कनकैरप्यङ्गयष्टिः कृता ।
किन्त्वेवं कविभिः प्रतारितमनास्तत्त्वं विजानन्नपि
त्वङ्मांसास्थिमयं वपुर्मृगदृशां मन्दो जनः सेवते ॥ 2.46 ॥
लीलावतीनां सहजा विलासास्त
एव मूढस्य हृदि स्फुरन्ति ।
रागो नलिन्या हि निसर्गसिद्धस्तत्र
भ्रम्त्येव वृथा षड्अङ्घ्रिः ॥ 2.47 ॥
सम्मोहयन्ति मदयन्ति विडम्बयन्ति
निर्भर्त्स्यन्ति रमयन्ति विषादयन्ति ।
एताः प्रविश्य सदयं हृदयं नराणां
किं नाम वामनयना न समाचरन्ति ॥ 2.47.1 ॥
यदेतत्पूर्णेन्दुद्युतिहरं उदाराकृति परं
मुखाब्जं तन्वङ्ग्याः किल वसति यत्राधरमधु ।
इदं तत्किं पाकद्रुमफलं इदानीं अतिरसव्यतीतेऽस्मिन्
काले विषं इव भविष्य्त्यसुखदम् ॥ 2.48 ॥
उन्मीलत्त्रिवलीतरङ्गनिलया प्रोत्तुङ्गपीनस्तनद्वन्द्वेनोद्गत
चक्रवाकयुगला वक्त्राम्बुजोद्भासिनी ।
कान्ताकारधरा नदीयं अभितः क्रूरात्र नापेक्षते
संसारार्णवमज्जनं यदि तदा दूरेण सन्त्यज्यताम् ॥ 2.49 ॥
जल्पन्ति सार्धं अन्येन पश्यन्त्यन्यं सविभ्रमाः ।
हृद्गतं चिन्तयन्त्यन्यं प्रियः को नाम योषिताम् ॥ 2.50 ॥
मधु तिष्ठति वाचि योषितां हृदि हालाहलं एव केवलम् ।
अतएव निपीयतेऽधरो हृदयं मुष्टिभिरेव ताड्यते ॥ 2.51 ॥
अपसर सखे दूरादस्मात्कटाक्षविषानलात्
प्रकृतिविषमाद्योषित्सर्पाद्विलासफणाभृतः ।
इतरफणिना दष्टः शक्यश्चिकित्सितुं औषधैश्चतुर्
वनिताभोगिग्रस्तं हि मन्त्रिणः ॥ 2.52 ॥
विस्तारितं मकरकेतनधीवरेण
स्त्रीसञ्ज्ञितं बडिशं अत्र भवाम्बुराशौ ।
येनाचिरात्तद्अधरामिषलोलमर्त्य
मत्स्यान्विकृष्य विपचत्यनुरागवह्नौ ॥ 2.53 ॥
कामिनीकायकान्तारे कुचपर्वतदुर्गमे ।
मा सञ्चर मनः पान्थ तत्रास्ते स्मरतस्करः ॥ 2.54 ॥
व्याडीर्घेण चलेन वक्त्रगतिना तेजस्विना भोगिना
नीलाब्जद्युतिनाहिना परं अहं दृष्टो न तच्चक्षुषा ।
दृष्टे सन्ति चिकित्सका दिशि दिशि प्रायेण धनार्थिनो
मुग्धाक्षक्षणवीक्षितस्य न हि मे वैद्यो न चाप्यौषधम् ॥ 2.55 ॥
इह हि मधुरगीतं नृत्यं एतद्रसोऽयं
स्फुरति परिमलोऽसौ स्पर्श एष स्तनानाम् ।
इति हतपरमार्थैरिन्द्रियैर्भ्राम्यमाणः
स्वहितकरणधूर्तैः पञ्चभिर्वञ्चितोऽस्मि ॥ 2.56 ॥
न गम्यो मन्त्राणां न च भवति भैषज्यविषयो
न चापि प्रध्वंसं व्रजति विविधैः शान्तिकशतैः ।
भ्रमावेशादङ्गे कं अपि विदधद्भङ्गं असकृत्
स्मरापस्मारोऽयं भ्रमयति दृशं घूर्णयति च ॥ 2.57 ॥
जात्य्अन्धाय च दुर्मुखाय च जराजीर्णा खिलाङ्गाय च
ग्रामीणाय च दुष्कुलाय च गलत्कुष्ठाभिभूताय च ।
यच्छन्तीषु मनोहरं निजवपुलक्ष्मीलवश्रद्धया
पण्यस्त्रीषु विवेककल्पलतिकाशस्त्रीषु राज्येत कः ॥ 2.58 ॥
वेश्यासौ मदनज्वाला
रूपेऽन्धनविवर्धिता ।
कामिभिर्यत्र हूयन्ते
यौवनानि धनानि च ॥ 2.59 ॥
कश्चुम्बति कुलपुरुषो वेश्याधरपल्लवं मनोज्ञं अपि ।
चारभटचोरचेटकनटविटनिष्ठीवनशरावम् ॥ 2.60 ॥
धन्यास्त एव धवलायतलोचनानां
तारुण्यदर्पघनपीनपयोधराणाम् ।
क्षामोदरोपरि लसत्त्रिवलीलतानां
दृष्ट्वाकृतिं विकृतिं एति मनो न येषाम् ॥ 2.61 ॥
बाले लीलामुकुलितं अमी मन्थरा दृष्टिपाताः
किं क्षिप्यन्ते विरमविरम व्यर्थ एष श्रमस्ते ।
सम्प्रत्यन्ये वयं उपरतं बाल्यं आस्था वनान्ते
क्षीणो मोहस्तृणं इव जगज्जालं आलोकयामः ॥ 2.62 ॥
इयं बाला मां प्रत्यनवरतं इन्दीवरदलप्रभा
चीरं चक्षुः क्षिपति किं अभिप्रेतं अनया ।
गतो मोहोऽस्माकं स्मरशबरबाणव्यतिकरज्वर
ज्वाला शान्ता तदपि न वराकी विरमति ॥ 2.63 ॥
किं कन्दर्प करं कदर्थयसि रे कोदण्डटङ्कारितं
रे रे कोकिल कोमलं कलरवं किं वा वृथा जल्पसि ।
मुग्धे स्निग्धविदग्धचारुमधुरैर्लोलैः कटाक्षैरलं
चेतश्चुम्बितचन्द्रचूडचरणध्यानामृतं वर्तते ॥ 2.64 ॥
विरहेऽपि सङ्गमः खलु
परस्परं सङ्गतं मनो येषाम् ।
हृदयं अपि विघट्टितं चेत्
सङ्गी विरहं विशेषयति ॥ 2.65 ॥
किं गतेन यदि सा न जीवति
प्राणिति प्रियतमा तथापि किम् ।
इत्युदीक्ष्य नवमेघमालिकां
न प्रयाति पथिकः स्वमन्दिरम् ॥ 2.66 ॥
विरमत बुधा योषित्सङ्गात्सुखात्क्षणभङ्गुरात्
कुरुत करुणामैत्रीप्रज्ञावधूजनसङ्गमम् ।
न खलु नरके हाराक्रान्तं घनस्तनमण्डलं
शरणं अथवा श्रोणीबिम्बं रणन्मणिमेखलम् ॥ 2.67 ॥
यदा योगाभ्यासव्यसनकृशयोरात्ममनसोरविच्छिन्ना
मैत्री स्फुरति कृतिनस्तस्य किं उ तैः ।
प्रियाणां आलापैरधरमधुभिर्वक्त्रविधुभिः
सनिश्वासामोदैः सकुचकलशाश्लेषसुरतैः ॥ 2.68 ॥
यदासीदज्ञानं स्मरतिमिरसञ्चारजनितं
तदा दृष्टनारीमयं इदं अशेषं जगदिति ।
इदानीं अस्माकं पटुतरविवेकाञ्जनजुषां
समीभूता दृष्टिस्त्रिभुवनं अपि ब्रह्म मनुते ॥ 2.69 ॥
तावदेव कृतिनां अपि स्फुरत्येष
निर्मलविवेकदीपकः ।
यावदेव न कुरङ्गचक्षुषां
ताड्यते चटुललोचनाञ्चलैः ॥ 2.70 ॥
वचसि भवति सङ्गत्यागं उद्दिश्य वार्ता
श्रुतिमुखरमुखानां केवलं पण्डितानाम् ।
जघनं अरुणरत्नग्रन्थिकाञ्चीकलापं
कुवलयनयनानां को विहातुं समर्थः ॥ 2.71 ॥
स्वपरप्रतारकोऽसौ
निन्दति योऽलीकपण्डितो युवतीः ।
यस्मात्तपसोऽपि फलं
स्वर्गः स्वर्गेऽपि चाप्सरसः ॥ 2.72 ॥
मत्तेभकुम्भदलने भुवि सन्ति धीराः
केचित्प्रचण्डमृगराजवधेऽपि दक्षाः ।
किन्तु ब्रवीमि बलिनां पुरतः प्रसह्य
कन्दर्पदर्पदलने विरला मनुष्याः ॥ 2.73 ॥
सन्मार्गे तावदास्ते प्रभवति च नरस्तावदेवेन्द्रियाणां
लज्जां तावद्विधत्ते विनयं अपि समालम्बते तावदेव ।
भ्रूचापाकृष्टमुक्ताः श्रवणपथगता नीलपक्ष्माण एते
यावल्लीलावतीनां हृदि न धृतिमुषो दृष्टिबाणाः पतन्ति ॥ 2.74 ॥
उन्मत्तप्रेमसंरम्भाद्
आरभन्ते यद्अङ्गनाः ।
तत्र प्रत्यूहं आधातुं
ब्रह्मापि खलु कातरः ॥ 2.75 ॥
तावन्महत्त्वं पाण्डित्यं
कुलीनत्वं विवेकिता ।
यावज्ज्वलति नाङ्गेषु
हतः पञ्चेषुपावकः ॥ 2.76 ॥
शास्त्रज्ञोऽपि प्रथितविनयोऽप्यात्मबोधोऽपि बाढं
संसारेऽस्मिन्भवति विरलो भाजनं सद्गतीनाम् ।
येनैतस्मिन्निरयनगरद्वारं उद्घाटयन्ती
वामाक्षीणां भवति कुटिला भ्रूलता कुञ्चिकेव ॥ 2.77 ॥
कृशः काणः खञ्जः श्रवणरहितः पुच्छविकलो
व्रणी पूयक्लिन्नः कृमिकुलशतैरावृततनुः ।
क्षुधा क्षामो जीर्णः पिठरककपालार्पितगलः
शुनीं अन्वेति श्वा हतं अपि च हन्त्येव मदनः ॥ 2.78 ॥
स्त्रीमुद्रां कुसुमायुधस्य जयिनीं सर्वार्थसम्पत्करीं
ये मूढाः प्रविहाय यान्ति कुधियो मिथ्याफलान्वेषिणः ।
ते तेनैव निहत्य निर्दयतरं नग्नीकृता मुण्डिताः
केचित्पञ्चशिखीकृताश्च जटिलाः कापालिकाश्चापरे ॥ 2.79 ॥
विश्वामित्रपराशरप्रभृतयो वाताम्बुपर्णाशनास्तेऽपि
स्त्रीमुखपङ्कजं सुललितं दृष्ट्वैव मोहं गताः ।
शाल्यन्नं सघृतं पयोदधियुतं ये भुञ्जते मानवास्तेषाम्
इन्द्रियनिग्रहो यदि भवेद्विन्ध्यः प्लवेत्सागरे ॥ 2.80 ॥
परिमलभृतो वाताः शाखा नवाङ्कुरकोटयो
मधुरविरुतोत्कण्ठा वाचः प्रियाः पिकपक्षिणाम् ।
विरलसुरतस्वेदोद्गारा वधूवदनेन्दवः
प्रसरति मधौ रात्र्यां जातो न कस्य गुणोदयः ॥ 2.81 ॥
मधुरयं मधुरैरपि कोकिला
कलरवैर्मलयस्य च वायुभिः ।
विरहिणः प्रहिणस्ति शरीरिणो
विपदि हन्त सुधापि विषायते ॥ 2.82 ॥
आवासः किलकिञ्चितस्य दयितापार्श्वे विलासालसाः
कर्णे कोकिलकामिनीकलरवः स्मेरो लतामण्डपः ।
गोष्ठी सत्कविभिः समं कतिपयैर्मुग्धाः सुधांशोः कराः
केषाञ्चित्सुखयन्ति चात्र हृदयं चैत्रे विचित्राः क्षपाः ॥ 2.83 ॥
पान्थ स्त्रीविरहानलाहुतिकलां आतन्वती मञ्जरीमाकन्देषु
पिकाङ्गनाभिरधुना सोत्कण्ठं आलोक्यते ।
अप्येते नवपाटलापरिमलप्राग्भारपाटच्चरा
वान्तिक्लान्तिवितानतानवकृतः श्रीखण्डशैलानिलाः ॥ 2.84 ॥
प्रथितः प्रणयवतीनां
तावत्पदं आतनोतु हृदि मानः ।
भवति न यावच्चन्दनतरु
सुरभिर्मलयपवमानः ॥ 2.85 ॥
सहकारकुसुमकेसरनिकर
भरामोदमूर्च्छितदिग्अन्ते ।
मधुरमधुरविधुरमधुपे
मधौ भवेत्कस्य नोत्कण्ठा ॥ 2.86 ॥
अच्छाच्छचन्दनरसार्द्रतरा मृगाक्ष्यो
धारागृहाणि कुसुमानि च कौमुदी च ।
मन्दो मरुत्सुमनसः शुचि हर्म्यपृष्ठं
ग्रीष्मे मदं च मदनं च विवर्धयन्ति ॥ 2.87 ॥
स्रजो हृद्यामोदा व्यजनपवनश्चन्द्रकिरणाः
परागः कासारो मलयजरजः शीधु विशदम् ।
शुचिः सौधोत्सङ्गः प्रतनु वसनं पङ्कजदृशो
निदाघऋतावेतद्विलसति लभन्ते सुकृतिनः ॥ 2.88 ॥
सुधाशुभ्रं धाम स्फुरद्अमलरश्मिः शशधरः
प्रियावक्त्राम्भोजं मलयजरजश्चातिसुरभिः ।
स्रजो हृद्यामोदास्तदिदं अखिलं रागिणि जने
करोत्यन्तः क्षोभं न तु विषयसंसर्गविमुखे ॥ 2.89 ॥
तरुणीवेषोद्दीपितकामा
विकसज्जातीपुष्पसुगन्धिः ।
उन्नतपीनपयोधरभारा
प्रावृट्तनुते कस्य न हर्षम् ॥ 2.90 ॥
वियद्उपचितमेघं भूमयः कन्दलिन्यो
नवकुटजकदम्बामोदिनो गन्धवाहाः ।
शिखिकुलकलकेकारावरम्या वनान्ताः
सुखिनं असुखिनं वा सर्वं उत्कण्ठयन्ति ॥ 2.91 ॥
उपरि घनं घनपटलं
तिर्यग्गिरयोऽपि नर्तितमयूराः ।
क्षितिरपि कन्दलधवला
दृष्टिं पथिकः क्व पातयति ॥ 2.92 ॥
इतो विद्युद्वल्लीविलसितं इतः केतकितरोः
स्फुरन्गन्धः प्रोद्यज्जलदनिनदस्फूर्जितं इतः ।
इतः केकिक्रीडाकलकलरवः पक्ष्मलदृशां
कथं यास्यन्त्येते विरहदिवसाः सम्भृतरसाः ॥ 2.93 ॥
असूचिसञ्चारे तमसि नभसि प्रौढजलदध्वनिप्रये
तस्मिन् पतति दृशदां नीरनिचये ।
इदं सौदामिन्याः कनककमनीयं विलसितं
मुदं च ग्लानिं च प्रथयति पथिष्वेव सुदृशाम् ॥ 2.94 ॥
आसारेण न हर्म्यतः प्रियतमैर्यातुं बहिः शक्यते
शीतोत्कम्पनिमित्तं आयतदृशा गाढं समालिङ्ग्यते ।
जाताः शीकरशीतलाश्च मरुतोरत्यन्तखेदच्छिदो
धन्यानां बत दुर्दिनं सुदिनतां याति प्रियासङ्गमे ॥ 2.95 ॥
अर्धं सुप्त्वा निशायाः सरभससुरतायाससन्नश्लथाङ्गप्रोद्भूतासह्य
तृष्णो मधुमदनिरतो हर्म्यपृष्ठे विविक्ते ।
सम्भोगक्लान्तकान्ताशिथिलभुजलतावर्जितं कर्करीतो
ज्योत्स्नाभिन्नाच्छधारं पिबति न सलिलं शारदं मन्दपुण्यः ॥ 2.96 ॥
हेमन्ते दधिदुग्धसर्पिरशना माञ्जिष्ठवासोभृतः
काश्मीरद्रवसान्द्रदिग्धवपुषश्छिन्ना विचित्रै रतैः ।
वृत्तोरुस्तनकामिनोजनकृताश्लेषा गृहाभ्यन्तरे
ताम्बूलीदलपूगपूरितमुखा धन्याः सुखं शेरते ॥ 2.97 ॥
प्रदुयत्प्रौढप्रियङ्गुद्युतिभृति विकसत्कुन्दमाद्यद्द्विरेफे
काले प्रालेयवातप्रचलविलसितोदारमन्दारधाम्नि ।
येषां नो कण्ठलग्ना क्षणं अपि तुहिनक्षोददक्षा मृगाक्षी
तेसां आयामयामा यमसदनसमा यामिनी याति यूनाम् ॥ 2.98 ॥
चुम्बन्तो गण्डभित्तीरलकवति मुखे सीत्कृतान्यादधाना
वक्षःसूत्कञ्चुकेषु स्तनभरपुलकोद्भेदं आपादयन्तः ।
ऊरूनाकम्पयन्तः पृथुजघनतटात्स्रंसयन्तोऽंशुकानि
व्यक्तं कान्ताजनानां विटचरितभृतः शैशिरा वान्ति वाताः ॥ 2.99 ॥
केशानाकुलयन्दृशो मुकुलयन्वासो बलादाक्षिपन्नातन्वन्
पुलकोद्गमं प्रकटयन्नावेगकम्पं शनैः ।
बारं बारं उदारसीत्कृतकृतो दन्तच्छदान्पीडयन्
प्रायः शैशिर एष सम्प्रति मरुत्कान्तासु कान्तायते ॥ 2.100 ॥
यद्यस्य नास्ति रुचिरं तस्मिंस्तस्य स्पृहा मनोज्ञेऽपि ।
रमणीयेऽपि सुधांशौ न मनःकामः सरोजिन्याः ॥ 2.101 ॥
वैराग्ये सञ्चरत्येको नीतौ भ्रमति चापरः ।
शृङ्गारे रमते कश्चिद्भुवि भेदाः परस्परम् ॥ 2.102 ॥
śambhusvayambhuharayo hariṇekṣaṇānāṃ
yenākriyanta satataṃ gṛhakumbhadāsāḥ |
vācāṃ agocaracaritravicitritāya
tasmai namo bhagavate makaradhvajāya || 2.1 ||
smitena bhāvena ca lajjayā bhiyā
parāṇmukhairardhakaṭākṣavīkṣaṇaiḥ |
vacobhirīrṣyākalahena līlayā
samastabhāvaiḥ khalu bandhanaṃ striyaḥ || 2.2 ||
bhrūcāturyātkuṣcitākṣāḥ kaṭākṣāḥ
snigdhā vāco lajjitāntāśca hāsāḥ |
līlāmandaṃ prasthitaṃ ca sthitaṃ ca
strīṇāṃ etadbhūṣaṇaṃ cāyudhaṃ ca || 2.3 ||
kvacitsabhrūbhaṅgaiḥ kvacidapi ca lajjāparigataiḥ
kvacidbhūritrastaiḥ kvacidapi ca līlāvilalitaiḥ |
kumārīṇāṃ etairmadanasubhagairnetravalitaiḥ
sphurannīlābjānāṃ prakaraparikīrṇā iva diśaḥ || 2.4 ||
vaktraṃ candravikāsi paṅkajaparīhāsakṣame locane
varṇaḥ svarṇaṃ apākariṣṇuralinījiṣṇuḥ kacānāṃ cayaḥ |
bakṣojāvibhakumbhavibhramaharau gurvī nitambasthalī
vācāṃ hāri ca mārdavaṃ yuvatīṣu svābhāvikaṃ maṇḍanam || 2.5 ||
smitakiñcinmugdhaṃ saralataralo dṛṣṭivibhavaḥ
parispando vācāṃ abhinavavilāsoktisarasaḥ |
gatānāṃ ārambhaḥ kisalayitalīlāparikaraḥ
spṛśantyāstāruṇyaṃ kiṃ iva na hi ramyaṃ mṛgadṛśaḥ || 2.6 ||
draṣṭavyeṣu kiṃ uttamaṃ mṛgadṛśaḥ premaprasannaṃ mukhaṃ
ghrātaveṣvapi kiṃ tadāsyapavanaḥ śravyeṣu kiṃ tadvacaḥ |
kiṃ svādyeṣu tadoṣṭhapallavarasaḥ spṛśyeṣu kiṃ tadvapurdhyeyaṃ
kiṃ navayauvane sahṛdayaiḥ sarvatra tadvibhramāḥ || 2.7 ||
etāścaladvalayasaṃhatimekhalotthajhaṅkāra
nūpuraparājitarājahaṃsyaḥ |
kurvanti kasya na mano vivaśaṃ taruṇyo
vitrastamugdhahariṇīsadṛśaiḥ kaṭākṣaiḥ || 2.8 ||
kuṅkumapaṅkakalaṅkitadehā
gaurapayodharakampitahārā |
nūpurahaṃsaraṇatpadmā
kaṃ na vaśīkurute bhuvi rāmā || 2.9 ||
nūnaṃ hi te kavivarā viparītavāco
ye nityaṃ āhurabalā iti kāminīstāḥ |
yābhirvilolitaratārakadṛṣṭipātaiḥ
śakrādayo'pi vijitāstvabalāḥ kathaṃ tāḥ || 2.10 ||
nūnaṃ ājñākarastasyāḥ subhruvo makaradhvajaḥ |
yatastannetrasañcārasūciteṣu pravartate || 2.11 ||
keśāḥ saṃyaminaḥ śruterapi paraṃ pāraṃ gate locane
antarvaktraṃ api svabhāvaśucibhīḥ kīrṇaṃ dvijānāṃ gaṇaiḥ |
muktānāṃ satatādhivāsarucirau vakṣojakumbhāvimāvitthaṃ
tanvi vapuḥ praśāntaṃ api terāgaṃ karotyeva naḥ || 2.12 ||
mugdhe dhānuṣkatā keyaṃ apūrvā tvayi dṛśyate |
yayā vidhyasi cetāṃsi guṇaireva na sāyakaiḥ || 2.13 ||
sati pradīpe satyagnau satsu tārāravīnduṣu |
vinā me mṛgaśāvākṣyā tamobhūtaṃ idaṃ jagat || 2.14 ||
udvṛttaḥ stanabhāra eṣa tarale netre cale bhrūlate
rāgādhiṣṭhitaṃ oṣṭhapallavaṃ idaṃ kurvantu nāma vyathām |
saubhāgyākṣaramālikeva likhitā puṣpāyudhena svayaṃ
madhyasthāpi karoti tāpaṃ adhikaṃ romāvaliḥ kena sā || 2.15 ||
mukhena candrakāntena mahānīlaiḥ śiroruhaiḥ |
karābhyāṃ padmarāgābhyāṃ reje ratnamayīva sā || 2.16 ||
guruṇā stanabhāreṇa mukhacandreṇa bhāsvatā |
śanaiścarābhyāṃ pādābhyāṃ reje grahamayīva sā || 2.17 ||
tasyāḥ stanau yadi ghanau jaghanaṃ ca hāri
vaktraṃ ca cāru tava citta kiṃ ākulatvam |
puṇyaṃ kuruṣva yadi teṣu tavāsti vāñchā
puṇyairvinā na hi bhavanti samīhitārthāḥ || 2.18 ||
ime tāruṇyaśrīnavaparimalāḥ prauḍhasuratapratāpa
prārambhāḥ smaravijayadānapratibhuvaḥ |
ciraṃ cetaścorā abhinavavikāraikaguravo
vilāsavyāpārāḥ kiṃ api vijayante mṛgadṛśām || 2.19 ||
praṇayamadhurāḥ premodgārā rasāśrayatāṃ gatāḥ
phaṇitimadhurā mugdhaprāyāḥ prakāśitasammadāḥ |
prakṛtisubhagā visrambhārdrāḥ smarodayadāyinī
rahasi kiṃ api svairālāpā haranti mṛgīdṛśām || 2.20 ||
viśramya viśramya vanadrumāṇāṃ
chāyāsu tanvī vicacāra kācit |
stanottarīyeṇa karoddhṛtena
nivārayantī śaśino mayūkhān || 2.21 ||
adarśane darśanamātrakāmā
dṛṣṭvā pariṣvaṅgasukhaikalolā |
āliṅgitāyāṃ punarāyatākṣyāmāśāsmahe
vigrahayorabhedam || 2.22 ||
mālatī śirasi jṛmbhaṇaṃ mukhe
candanaṃ vapuṣi kuṅkumāvilam |
vakṣasi priyatamā madālasā
svarga eṣa pariśiṣṭa āgamaḥ || 2.23 ||
prāṅmāṃ eti manāganāgatarasaṃ jātābhilāṣāṃ tataḥ
savrīḍaṃ tadanu ślathodyamaṃ atha pradhvastadhairyaṃ punaḥ |
premārdraṃ spṛhaṇīyanirbhararahaḥ krīḍāpragalbhaṃ tato
niḥsaṅgāṅgavikarṣaṇādhikasukharamyaṃ kulastrīratam || 2.24 ||
urasi nipatitānāṃ srastadhammillakānāṃ
mukulitanayanānāṃ kiñcidunmīlitānām |
upari suratakhedasvinnagaṇḍasthalānāmadhara
madhu vadhūnāṃ bhāgyavantaḥ pibanti || 2.25 ||
āmīlitanayanānāṃ yaḥ
surataraso'nu saṃvidaṃ bhāti |
mithurairmitho'vadhāritamavitatham
idaṃ eva kāmanirbarhaṇam || 2.26 ||
idaṃ anucitaṃ akramaśca puṃsāṃ
yadiha jarāsvapi manmathā vikārāḥ |
tadapi ca na kṛtaṃ nitambinīnāṃ
stanapatanāvadhi jīvitaṃ rataṃ vā || 2.27 ||
rājastṛṣṇāmburāśerna hi jagati gataḥ kaścidevāvasānaṃ
ko vārtho'rthaiḥ prabhūtaiḥ svavapuṣi galite yauvane sānurāge |
gacchāmaḥ sadma yāvadvikasitanayanendīvarālokinīnāmākramyākramya
rūpaṃ jhaṭiti na jarayā lupyate preyasīnām || 2.28 ||
rāgasyāgāraṃ ekaṃ narakaśatamahāduḥkhasamprāptiheturmohasyotpatti
bījaṃ jaladharapaṭalaṃ jñānatārādhipasya |
kandarpasyaikamitraṃ prakaṭitavividhaspaṣṭadoṣaprabandhaṃ
loke'sminna hyarthavrajakulabhavanayauvanādanyadasti || 2.29 ||
śṛṅgāradrumanīrade prasṛmarakrīḍārasasrotasi
pradyumnapriyabāndhave caturavāṅmuktāphalodanvati |
tanvīnetracakorapāvanavidhau saubhāgyalakṣmīnidhau
dhanyaḥ ko'pi na vikriyāṃ kalayati prāpte nave yauvane || 2.30 ||
saṃsāre'sminnasāre kunṛpatibhavanadvārasevākalaṅkavyāsaṅga
vyastadhairyaṃ kathaṃ amaladhiyo mānasaṃ saṃvidadhyuḥ |
yadyetāḥ prodyadindudyutinicayabhṛto na syurambhojanetrāḥ
preṅkhatkāñcīkalāpāḥ stanabharavinamanmadhyabhājastaruṇyaḥ || 2.31 ||
siddhādhyāsitakandare haravṛṣaskandhāvarugṇadrume
gaṅgādhautaśilātale himavataḥ sthāne sthite śreyasi |
kaḥ kurvīta śiraḥ praṇāmamalinaṃ mlānaṃ manasvī jano
yadvitrastakuraṅgaśāvanayanā na syuḥ smarāstraṃ striyaḥ || 2.32 ||
saṃsāra tava paryantapadavī na davīyasī |
antarā dustarā na syuryadi te madirekṣaṇām || 2.33 ||
diśa vanahariṇībhyo vaṃśakāṇḍacchavīnāṃ
kavalaṃ upalakoṭicchinnamūlaṃ kuśānām |
śakayuvatikapolāpāṇḍutāmbūlavallīdalam
aruṇanakhāgraiḥ pāṭitaṃ vā vadhūbhyaḥ || 2.34 ||
asārāḥ sarve te virativirasāḥ pāpaviṣayā
jugupsyantāṃ yadvā nanu sakaladoṣāspadaṃ iti |
tathāpyetadbhūmau nahi parahitātpuṇyaṃ adhikaṃ
na cāsminsaṃsāre kuvalayadṛśo ramyaṃ aparam || 2.35 ||
etatkāmaphalo loke yaddvayorekacittatā |
anyacittakṛte kāme śavayoriva saṅgamaḥ || 2.35.1 ||
mātsaryaṃ utsārya vicārya kāryamāryāḥ
samaryādaṃ idaṃ vadantu |
sevyā nitambāḥ kiṃ u bhūdharāṇāmata
smarasmeravilāsinīnām || 2.36 ||
saṃsāre svapnasāre pariṇatitarale dve gatī paṇḍitānāṃ
tattvajñānāmṛtāmbhaḥplavalalitadhiyāṃ yātu kālaḥ kathañcit |
no cenmugdhāṅganānāṃ stanajaghanaghanābhogasambhoginīnāṃ
sthūlopasthasthalīṣu sthagitakaratalasparśalīlodyamānām || 2.37 ||
āvāsaḥ kriyatāṃ gaṅge pāpahāriṇi vāriṇi |
stanadvaye taruṇyā vā manohāriṇi hāriṇi || 2.38 ||
kiṃ iha bahubhiruktairyuktiśūnyaiḥ pralāpairdvayam
iha puruṣāṇāṃ sarvadā sevanīyam |
abhinavamadalīlālālasaṃ sundarīṇāṃ
stanabharaparikhinnaṃ yauvanaṃ vā vanaṃ vā || 2.39 ||
satyaṃ janā vacmi na pakṣapātāl
lokeṣu saptasvapi tathyaṃ etat |
nānyanmanohāri nitambinībhyo
duḥkhaikaheturna ca kaścidanyaḥ || 2.40 ||
kāntetyutpalalocaneti vipulaśroṇībharetyunnamatpīnottuṅga
payodhareti samukhāmbhojeti subhrūriti |
dṛṣṭvā mādyati modate'bhiramate prastauti vidvānapi
pratyakṣāśucibhastrikāṃ striyaṃ aho mohasya duśceṣṭitam || 2.41 ||
smṛtā bhavati tāpāya dṛṣṭā conmādakāriṇī |
spṛṣṭā bhavati mohāya sā nāma dayitā katham || 2.42 ||
tāvadevāmṛtamayī yāvallocanagocarā |
cakṣuṣpathādatītā tu viṣādapyatiricyate || 2.43 ||
nāmṛtaṃ na viṣaṃ kiñcidetāṃ muktvā nitambinīm |
saivāmṛtalatā raktā viraktā viṣavallarī || 2.44 ||
āvartaḥ saṃśayānāṃ avinayabhuvanaṃ paṭṭaṇaṃ sāhasānāṃ
doṣāṇāṃ sannidhānaṃ kapaṭaśatamayaṃ kṣetraṃ apratyayānām |
svargadvārasya vighno narakapuramukha sarvamāyākaraṇḍaṃ
strīyantraṃ kena sṛṣṭaṃ viṣaṃ amṛtamayaṃ prāṇilokasya pāśaḥ || 2.45 ||
no satyena mṛgāṅka eṣa vadanībhūto na cendīvaradvandvaṃ
locanatāṃ gata na kanakairapyaṅgayaṣṭiḥ kṛtā |
kintvevaṃ kavibhiḥ pratāritamanāstattvaṃ vijānannapi
tvaṅmāṃsāsthimayaṃ vapurmṛgadṛśāṃ mando janaḥ sevate || 2.46 ||
līlāvatīnāṃ sahajā vilāsāsta
eva mūḍhasya hṛdi sphuranti |
rāgo nalinyā hi nisargasiddhastatra
bhramtyeva vṛthā ṣaḍaṅghriḥ || 2.47 ||
sammohayanti madayanti viḍambayanti
nirbhartsyanti ramayanti viṣādayanti |
etāḥ praviśya sadayaṃ hṛdayaṃ narāṇāṃ
kiṃ nāma vāmanayanā na samācaranti || 2.47.1 ||
yadetatpūrṇendudyutiharaṃ udārākṛti paraṃ
mukhābjaṃ tanvaṅgyāḥ kila vasati yatrādharamadhu |
idaṃ tatkiṃ pākadrumaphalaṃ idānīṃ atirasavyatīte'smin
kāle viṣaṃ iva bhaviṣytyasukhadam || 2.48 ||
unmīlattrivalītaraṅganilayā prottuṅgapīnastanadvandvenodgata
cakravākayugalā vaktrāmbujodbhāsinī |
kāntākāradharā nadīyaṃ abhitaḥ krūrātra nāpekṣate
saṃsārārṇavamajjanaṃ yadi tadā dūreṇa santyajyatām || 2.49 ||
jalpanti sārdhaṃ anyena paśyantyanyaṃ savibhramāḥ |
hṛdgataṃ cintayantyanyaṃ priyaḥ ko nāma yoṣitām || 2.50 ||
madhu tiṣṭhati vāci yoṣitāṃ hṛdi hālāhalaṃ eva kevalam |
ataeva nipīyate'dharo hṛdayaṃ muṣṭibhireva tāḍyate || 2.51 ||
apasara sakhe dūrādasmātkaṭākṣaviṣānalāt
prakṛtiviṣamādyoṣitsarpādvilāsaphaṇābhṛtaḥ |
itaraphaṇinā daṣṭaḥ śakyaścikitsituṃ auṣadhaiścatur
vanitābhogigrastaṃ hi mantriṇaḥ || 2.52 ||
vistāritaṃ makaraketanadhīvareṇa
strīsañjñitaṃ baḍiśaṃ atra bhavāmburāśau |
yenācirāttadadharāmiṣalolamartya
matsyānvikṛṣya vipacatyanurāgavahnau || 2.53 ||
kāminīkāyakāntāre kucaparvatadurgame |
mā sañcara manaḥ pāntha tatrāste smarataskaraḥ || 2.54 ||
vyāḍīrgheṇa calena vaktragatinā tejasvinā bhoginā
nīlābjadyutināhinā paraṃ ahaṃ dṛṣṭo na taccakṣuṣā |
dṛṣṭe santi cikitsakā diśi diśi prāyeṇa dhanārthino
mugdhākṣakṣaṇavīkṣitasya na hi me vaidyo na cāpyauṣadham || 2.55 ||
iha hi madhuragītaṃ nṛtyaṃ etadraso'yaṃ
sphurati parimalo'sau sparśa eṣa stanānām |
iti hataparamārthairindriyairbhrāmyamāṇaḥ
svahitakaraṇadhūrtaiḥ pañcabhirvañcito'smi || 2.56 ||
na gamyo mantrāṇāṃ na ca bhavati bhaiṣajyaviṣayo
na cāpi pradhvaṃsaṃ vrajati vividhaiḥ śāntikaśataiḥ |
bhramāveśādaṅge kaṃ api vidadhadbhaṅgaṃ asakṛt
smarāpasmāro'yaṃ bhramayati dṛśaṃ ghūrṇayati ca || 2.57 ||
jātyandhāya ca durmukhāya ca jarājīrṇā khilāṅgāya ca
grāmīṇāya ca duṣkulāya ca galatkuṣṭhābhibhūtāya ca |
yacchantīṣu manoharaṃ nijavapulakṣmīlavaśraddhayā
paṇyastrīṣu vivekakalpalatikāśastrīṣu rājyeta kaḥ || 2.58 ||
veśyāsau madanajvālā
rūpe'ndhanavivardhitā |
kāmibhiryatra hūyante
yauvanāni dhanāni ca || 2.59 ||
kaścumbati kulapuruṣo veśyādharapallavaṃ manojñaṃ api |
cārabhaṭacoraceṭakanaṭaviṭaniṣṭhīvanaśarāvam || 2.60 ||
dhanyāsta eva dhavalāyatalocanānāṃ
tāruṇyadarpaghanapīnapayodharāṇām |
kṣāmodaropari lasattrivalīlatānāṃ
dṛṣṭvākṛtiṃ vikṛtiṃ eti mano na yeṣām || 2.61 ||
bāle līlāmukulitaṃ amī mantharā dṛṣṭipātāḥ
kiṃ kṣipyante viramavirama vyartha eṣa śramaste |
sampratyanye vayaṃ uparataṃ bālyaṃ āsthā vanānte
kṣīṇo mohastṛṇaṃ iva jagajjālaṃ ālokayāmaḥ || 2.62 ||
iyaṃ bālā māṃ pratyanavarataṃ indīvaradalaprabhā
cīraṃ cakṣuḥ kṣipati kiṃ abhipretaṃ anayā |
gato moho'smākaṃ smaraśabarabāṇavyatikarajvara
jvālā śāntā tadapi na varākī viramati || 2.63 ||
kiṃ kandarpa karaṃ kadarthayasi re kodaṇḍaṭaṅkāritaṃ
re re kokila komalaṃ kalaravaṃ kiṃ vā vṛthā jalpasi |
mugdhe snigdhavidagdhacārumadhurairlolaiḥ kaṭākṣairalaṃ
cetaścumbitacandracūḍacaraṇadhyānāmṛtaṃ vartate || 2.64 ||
virahe'pi saṅgamaḥ khalu
parasparaṃ saṅgataṃ mano yeṣām |
hṛdayaṃ api vighaṭṭitaṃ cet
saṅgī virahaṃ viśeṣayati || 2.65 ||
kiṃ gatena yadi sā na jīvati
prāṇiti priyatamā tathāpi kim |
ityudīkṣya navameghamālikāṃ
na prayāti pathikaḥ svamandiram || 2.66 ||
viramata budhā yoṣitsaṅgātsukhātkṣaṇabhaṅgurāt
kuruta karuṇāmaitrīprajñāvadhūjanasaṅgamam |
na khalu narake hārākrāntaṃ ghanastanamaṇḍalaṃ
śaraṇaṃ athavā śroṇībimbaṃ raṇanmaṇimekhalam || 2.67 ||
yadā yogābhyāsavyasanakṛśayorātmamanasoravicchinnā
maitrī sphurati kṛtinastasya kiṃ u taiḥ |
priyāṇāṃ ālāpairadharamadhubhirvaktravidhubhiḥ
saniśvāsāmodaiḥ sakucakalaśāśleṣasurataiḥ || 2.68 ||
yadāsīdajñānaṃ smaratimirasañcārajanitaṃ
tadā dṛṣṭanārīmayaṃ idaṃ aśeṣaṃ jagaditi |
idānīṃ asmākaṃ paṭutaravivekāñjanajuṣāṃ
samībhūtā dṛṣṭistribhuvanaṃ api brahma manute || 2.69 ||
tāvadeva kṛtināṃ api sphuratyeṣa
nirmalavivekadīpakaḥ |
yāvadeva na kuraṅgacakṣuṣāṃ
tāḍyate caṭulalocanāñcalaiḥ || 2.70 ||
vacasi bhavati saṅgatyāgaṃ uddiśya vārtā
śrutimukharamukhānāṃ kevalaṃ paṇḍitānām |
jaghanaṃ aruṇaratnagranthikāñcīkalāpaṃ
kuvalayanayanānāṃ ko vihātuṃ samarthaḥ || 2.71 ||
svaparapratārako'sau
nindati yo'līkapaṇḍito yuvatīḥ |
yasmāttapaso'pi phalaṃ
svargaḥ svarge'pi cāpsarasaḥ || 2.72 ||
mattebhakumbhadalane bhuvi santi dhīrāḥ
kecitpracaṇḍamṛgarājavadhe'pi dakṣāḥ |
kintu bravīmi balināṃ purataḥ prasahya
kandarpadarpadalane viralā manuṣyāḥ || 2.73 ||
sanmārge tāvadāste prabhavati ca narastāvadevendriyāṇāṃ
lajjāṃ tāvadvidhatte vinayaṃ api samālambate tāvadeva |
bhrūcāpākṛṣṭamuktāḥ śravaṇapathagatā nīlapakṣmāṇa ete
yāvallīlāvatīnāṃ hṛdi na dhṛtimuṣo dṛṣṭibāṇāḥ patanti || 2.74 ||
unmattapremasaṃrambhād
ārabhante yadaṅganāḥ |
tatra pratyūhaṃ ādhātuṃ
brahmāpi khalu kātaraḥ || 2.75 ||
tāvanmahattvaṃ pāṇḍityaṃ
kulīnatvaṃ vivekitā |
yāvajjvalati nāṅgeṣu
hataḥ pañceṣupāvakaḥ || 2.76 ||
śāstrajño'pi prathitavinayo'pyātmabodho'pi bāḍhaṃ
saṃsāre'sminbhavati viralo bhājanaṃ sadgatīnām |
yenaitasminnirayanagaradvāraṃ udghāṭayantī
vāmākṣīṇāṃ bhavati kuṭilā bhrūlatā kuñcikeva || 2.77 ||
kṛśaḥ kāṇaḥ khañjaḥ śravaṇarahitaḥ pucchavikalo
vraṇī pūyaklinnaḥ kṛmikulaśatairāvṛtatanuḥ |
kṣudhā kṣāmo jīrṇaḥ piṭharakakapālārpitagalaḥ
śunīṃ anveti śvā hataṃ api ca hantyeva madanaḥ || 2.78 ||
strīmudrāṃ kusumāyudhasya jayinīṃ sarvārthasampatkarīṃ
ye mūḍhāḥ pravihāya yānti kudhiyo mithyāphalānveṣiṇaḥ |
te tenaiva nihatya nirdayataraṃ nagnīkṛtā muṇḍitāḥ
kecitpañcaśikhīkṛtāśca jaṭilāḥ kāpālikāścāpare || 2.79 ||
viśvāmitraparāśaraprabhṛtayo vātāmbuparṇāśanāste'pi
strīmukhapaṅkajaṃ sulalitaṃ dṛṣṭvaiva mohaṃ gatāḥ |
śālyannaṃ saghṛtaṃ payodadhiyutaṃ ye bhuñjate mānavāsteṣām
indriyanigraho yadi bhavedvindhyaḥ plavetsāgare || 2.80 ||
parimalabhṛto vātāḥ śākhā navāṅkurakoṭayo
madhuravirutotkaṇṭhā vācaḥ priyāḥ pikapakṣiṇām |
viralasuratasvedodgārā vadhūvadanendavaḥ
prasarati madhau rātryāṃ jāto na kasya guṇodayaḥ || 2.81 ||
madhurayaṃ madhurairapi kokilā
kalaravairmalayasya ca vāyubhiḥ |
virahiṇaḥ prahiṇasti śarīriṇo
vipadi hanta sudhāpi viṣāyate || 2.82 ||
āvāsaḥ kilakiñcitasya dayitāpārśve vilāsālasāḥ
karṇe kokilakāminīkalaravaḥ smero latāmaṇḍapaḥ |
goṣṭhī satkavibhiḥ samaṃ katipayairmugdhāḥ sudhāṃśoḥ karāḥ
keṣāñcitsukhayanti cātra hṛdayaṃ caitre vicitrāḥ kṣapāḥ || 2.83 ||
pāntha strīvirahānalāhutikalāṃ ātanvatī mañjarīmākandeṣu
pikāṅganābhiradhunā sotkaṇṭhaṃ ālokyate |
apyete navapāṭalāparimalaprāgbhārapāṭaccarā
vāntiklāntivitānatānavakṛtaḥ śrīkhaṇḍaśailānilāḥ || 2.84 ||
prathitaḥ praṇayavatīnāṃ
tāvatpadaṃ ātanotu hṛdi mānaḥ |
bhavati na yāvaccandanataru
surabhirmalayapavamānaḥ || 2.85 ||
sahakārakusumakesaranikara
bharāmodamūrcchitadigante |
madhuramadhuravidhuramadhupe
madhau bhavetkasya notkaṇṭhā || 2.86 ||
acchācchacandanarasārdratarā mṛgākṣyo
dhārāgṛhāṇi kusumāni ca kaumudī ca |
mando marutsumanasaḥ śuci harmyapṛṣṭhaṃ
grīṣme madaṃ ca madanaṃ ca vivardhayanti || 2.87 ||
srajo hṛdyāmodā vyajanapavanaścandrakiraṇāḥ
parāgaḥ kāsāro malayajarajaḥ śīdhu viśadam |
śuciḥ saudhotsaṅgaḥ pratanu vasanaṃ paṅkajadṛśo
nidāghaṛtāvetadvilasati labhante sukṛtinaḥ || 2.88 ||
sudhāśubhraṃ dhāma sphuradamalaraśmiḥ śaśadharaḥ
priyāvaktrāmbhojaṃ malayajarajaścātisurabhiḥ |
srajo hṛdyāmodāstadidaṃ akhilaṃ rāgiṇi jane
karotyantaḥ kṣobhaṃ na tu viṣayasaṃsargavimukhe || 2.89 ||
taruṇīveṣoddīpitakāmā
vikasajjātīpuṣpasugandhiḥ |
unnatapīnapayodharabhārā
prāvṛṭtanute kasya na harṣam || 2.90 ||
viyadupacitameghaṃ bhūmayaḥ kandalinyo
navakuṭajakadambāmodino gandhavāhāḥ |
śikhikulakalakekārāvaramyā vanāntāḥ
sukhinaṃ asukhinaṃ vā sarvaṃ utkaṇṭhayanti || 2.91 ||
upari ghanaṃ ghanapaṭalaṃ
tiryaggirayo'pi nartitamayūrāḥ |
kṣitirapi kandaladhavalā
dṛṣṭiṃ pathikaḥ kva pātayati || 2.92 ||
ito vidyudvallīvilasitaṃ itaḥ ketakitaroḥ
sphurangandhaḥ prodyajjaladaninadasphūrjitaṃ itaḥ |
itaḥ kekikrīḍākalakalaravaḥ pakṣmaladṛśāṃ
kathaṃ yāsyantyete virahadivasāḥ sambhṛtarasāḥ || 2.93 ||
asūcisañcāre tamasi nabhasi prauḍhajaladadhvanipraye
tasmin patati dṛśadāṃ nīranicaye |
idaṃ saudāminyāḥ kanakakamanīyaṃ vilasitaṃ
mudaṃ ca glāniṃ ca prathayati pathiṣveva sudṛśām || 2.94 ||
āsāreṇa na harmyataḥ priyatamairyātuṃ bahiḥ śakyate
śītotkampanimittaṃ āyatadṛśā gāḍhaṃ samāliṅgyate |
jātāḥ śīkaraśītalāśca marutoratyantakhedacchido
dhanyānāṃ bata durdinaṃ sudinatāṃ yāti priyāsaṅgame || 2.95 ||
ardhaṃ suptvā niśāyāḥ sarabhasasuratāyāsasannaślathāṅgaprodbhūtāsahya
tṛṣṇo madhumadanirato harmyapṛṣṭhe vivikte |
sambhogaklāntakāntāśithilabhujalatāvarjitaṃ karkarīto
jyotsnābhinnācchadhāraṃ pibati na salilaṃ śāradaṃ mandapuṇyaḥ || 2.96 ||
hemante dadhidugdhasarpiraśanā māñjiṣṭhavāsobhṛtaḥ
kāśmīradravasāndradigdhavapuṣaśchinnā vicitrai rataiḥ |
vṛttorustanakāminojanakṛtāśleṣā gṛhābhyantare
tāmbūlīdalapūgapūritamukhā dhanyāḥ sukhaṃ śerate || 2.97 ||
praduyatprauḍhapriyaṅgudyutibhṛti vikasatkundamādyaddvirephe
kāle prāleyavātapracalavilasitodāramandāradhāmni |
yeṣāṃ no kaṇṭhalagnā kṣaṇaṃ api tuhinakṣodadakṣā mṛgākṣī
tesāṃ āyāmayāmā yamasadanasamā yāminī yāti yūnām || 2.98 ||
cumbanto gaṇḍabhittīralakavati mukhe sītkṛtānyādadhānā
vakṣaḥsūtkañcukeṣu stanabharapulakodbhedaṃ āpādayantaḥ |
ūrūnākampayantaḥ pṛthujaghanataṭātsraṃsayanto'ṃśukāni
vyaktaṃ kāntājanānāṃ viṭacaritabhṛtaḥ śaiśirā vānti vātāḥ || 2.99 ||
keśānākulayandṛśo mukulayanvāso balādākṣipannātanvan
pulakodgamaṃ prakaṭayannāvegakampaṃ śanaiḥ |
bāraṃ bāraṃ udārasītkṛtakṛto dantacchadānpīḍayan
prāyaḥ śaiśira eṣa samprati marutkāntāsu kāntāyate || 2.100 ||
yadyasya nāsti ruciraṃ tasmiṃstasya spṛhā manojñe'pi |
ramaṇīye'pi sudhāṃśau na manaḥkāmaḥ sarojinyāḥ || 2.101 ||
vairāgye sañcaratyeko nītau bhramati cāparaḥ |
śṛṅgāre ramate kaścidbhuvi bhedāḥ parasparam || 2.102 ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.