2.2 - Hotribrahmanam - Krishna Yajurveda Taittiriya Brahmana Pathah - Prajapatirakamayata Prajah — Grantha Script

𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌦𑍍𑌵𑌿𑌤𑍀𑌯𑌃 𑌪𑍍𑌰𑌪𑌾𑌠𑌕𑌃 - 𑌹𑍋𑌤𑍃𑌬𑍍𑌰𑌾𑌹𑍍𑌮𑌣𑌮𑍍

𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,

𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥

𑌅𑌨𑍁𑌵𑌾𑌕𑌂 1 - 𑌦𑌶𑌹𑍋𑌤𑍃𑌮𑌨𑍍𑌤𑍍𑌰𑌸𑍍𑌯 𑌕𑍍𑌰𑌤𑍍𑌵𑌰𑍍𑌥𑌪𑍁𑌰𑍁𑌷𑌾𑌰𑍍𑌥𑌪𑍍𑌰𑌯𑍋𑌗𑍗

𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌪𑍍𑌰॒𑌜𑌾-𑌸𑍍𑌸𑍃॑𑌜𑍇॒𑌯𑍇𑌤𑌿॑ । 𑌸 𑌏॒𑌤-𑌨𑍍𑌦𑌶॑𑌹𑍋𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌮𑌨॑𑌸𑌾 𑌽𑌨𑍁॒𑌦𑍍𑌰𑍁𑌤𑍍𑌯॑ 𑌦𑌰𑍍𑌭𑌸𑍍𑌤॒𑌮𑍍𑌬𑍇॑-𑌽𑌜𑍁𑌹𑍋𑌤𑍍 । 𑌤𑌤𑍋॒ 𑌵𑍈 𑌸 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌤𑌾 𑌅॑𑌸𑍍𑌮𑌾𑌥𑍍𑌸𑍃॒𑌷𑍍𑌟𑌾 𑌅𑌪𑌾᳚𑌕𑍍𑌰𑌾𑌮𑌨𑍍𑌨𑍍 । 𑌤𑌾 𑌗𑍍𑌰𑌹𑍇॑𑌣𑌾𑌗𑍃𑌹𑍍𑌣𑌾𑌤𑍍 । 𑌤𑌦𑍍𑌗𑍍𑌰𑌹॑𑌸𑍍𑌯 𑌗𑍍𑌰𑌹॒𑌤𑍍𑌵𑌮𑍍 । 𑌯𑌃 𑌕𑌾॒𑌮𑌯𑍇॑𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸 𑌦𑌶॑𑌹𑍋𑌤𑌾𑌰॒-𑌮𑍍𑌮𑌨॑𑌸𑌾 𑌽𑌨𑍁॒𑌦𑍍𑌰𑍁𑌤𑍍𑌯॑ 𑌦𑌰𑍍𑌭𑌸𑍍𑌤॒𑌮𑍍𑌬𑍇 𑌜𑍁॑𑌹𑍁𑌯𑌾𑌤𑍍 । 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑍈 𑌦𑌶॑𑌹𑍋𑌤𑌾 ॥ 1 ॥

𑌪𑍍𑌰॒𑌜𑌾𑌪॑𑌤𑌿𑌰𑍇॒𑌵 𑌭𑍂॒𑌤𑍍𑌵𑌾 𑌪𑍍𑌰 𑌜𑌾॑𑌯𑌤𑍇 ॥ 𑌮𑌨॑𑌸𑌾 𑌜𑍁𑌹𑍋𑌤𑌿 । 𑌮𑌨॑ 𑌇𑌵॒ 𑌹𑌿 𑌪𑍍𑌰॒𑌜𑌾𑌪॑𑌤𑌿𑌃 । 𑌪𑍍𑌰॒𑌜𑌾𑌪॑𑌤𑍇॒𑌰𑌾𑌪𑍍𑌤𑍍𑌯𑍈᳚ ॥ 𑌪𑍂॒𑌰𑍍𑌣𑌯𑌾॑ 𑌜𑍁𑌹𑍋𑌤𑌿 । 𑌪𑍂॒𑌰𑍍𑌣 𑌇॑𑌵॒ 𑌹𑌿 𑌪𑍍𑌰॒𑌜𑌾𑌪॑𑌤𑌿𑌃 । 𑌪𑍍𑌰॒𑌜𑌾𑌪॑𑌤𑍇॒𑌰𑌾𑌪𑍍𑌤𑍍𑌯𑍈᳚ ॥ 𑌨𑍍𑌯𑍂॑𑌨𑌯𑌾 𑌜𑍁𑌹𑍋𑌤𑌿 । 𑌨𑍍𑌯𑍂॑𑌨𑌾॒𑌦𑍍𑌧𑌿 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅𑌸𑍃॑𑌜𑌤 । 𑌪𑍍𑌰॒𑌜𑌾𑌨𑌾॒𑌗𑍍𑌂॒ 𑌸𑍃𑌷𑍍𑌟𑍍𑌯𑍈᳚ ॥ 2 ॥

𑌦॒𑌰𑍍𑌭॒𑌸𑍍𑌤॒𑌮𑍍𑌬𑍇 𑌜𑍁॑𑌹𑍋𑌤𑌿 । 𑌏॒𑌤𑌸𑍍𑌮𑌾॒𑌦𑍍𑌵𑍈 𑌯𑍋𑌨𑍇𑌃᳚ 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌯𑌸𑍍𑌮𑌾॑𑌦𑍇॒𑌵 𑌯𑍋𑌨𑍇𑌃᳚ 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅𑌸𑍃॑𑌜𑌤 । 𑌤𑌸𑍍𑌮𑌾॑𑌦𑍇॒𑌵 𑌯𑍋𑌨𑍇𑌃॒ 𑌪𑍍𑌰 𑌜𑌾॑𑌯𑌤𑍇 ॥ 𑌬𑍍𑌰𑌾॒𑌹𑍍𑌮॒𑌣𑍋 𑌦॑𑌕𑍍𑌷𑌿𑌣॒𑌤 𑌉𑌪𑌾᳚𑌸𑍍𑌤𑍇 । 𑌬𑍍𑌰𑌾॒𑌹𑍍𑌮॒𑌣𑍋 𑌵𑍈 𑌪𑍍𑌰॒𑌜𑌾𑌨𑌾॑-𑌮𑍁𑌪𑌦𑍍𑌰॒𑌷𑍍𑌟𑌾 । 𑌉॒𑌪॒𑌦𑍍𑌰॒𑌷𑍍𑌟𑍁॒𑌮𑌤𑍍𑌯𑍇॒𑌵 𑌪𑍍𑌰 𑌜𑌾॑𑌯𑌤𑍇 ॥ 𑌗𑍍𑌰𑌹𑍋॑ 𑌭𑌵𑌤𑌿 । 𑌪𑍍𑌰॒𑌜𑌾𑌨𑌾𑌗𑍍𑌂॑ 𑌸𑍃॒𑌷𑍍𑌟𑌾𑌨𑌾॒-𑌨𑍍𑌧𑍃𑌤𑍍𑌯𑍈᳚ ॥ 𑌯-𑌮𑍍𑌬𑍍𑌰𑌾᳚𑌹𑍍𑌮॒𑌣𑌂-𑌵𑌿𑌁॒𑌦𑍍𑌯𑌾𑌂-𑌵𑌿𑌁॒𑌦𑍍𑌵𑌾𑌗𑍍𑌂𑌸𑌂॒-𑌯𑌁𑌶𑍋॒ 𑌨𑌰𑍍𑌚𑍍𑌛𑍇𑌤𑍍 ॥ 3 ॥

𑌸𑍋-𑌽𑌰॑𑌣𑍍𑌯-𑌮𑍍𑌪॒𑌰𑍇𑌤𑍍𑌯॑ । 𑌦॒𑌰𑍍𑌭॒𑌸𑍍𑌤॒𑌮𑍍𑌬-𑌮𑍁॒𑌦𑍍𑌗𑍍𑌰𑌤𑍍𑌥𑍍𑌯॑ । 𑌬𑍍𑌰𑌾॒𑌹𑍍𑌮॒𑌣-𑌨𑍍𑌦॑𑌕𑍍𑌷𑌿𑌣॒𑌤𑍋 𑌨𑌿॒𑌷𑌾𑌦𑍍𑌯॑ । 𑌚𑌤𑍁॑𑌰𑍍𑌹𑍋𑌤𑍄॒𑌨𑍍 𑌵𑍍𑌯𑌾𑌚॑𑌕𑍍𑌷𑍀𑌤 । 𑌏॒𑌤𑌦𑍍𑌵𑍈 𑌦𑍇॒𑌵𑌾𑌨𑌾᳚-𑌮𑍍𑌪𑌰॒𑌮-𑌙𑍍𑌗𑍁𑌹𑍍𑌯॒-𑌮𑍍𑌬𑍍𑌰𑌹𑍍𑌮॑ । 𑌯𑌚𑍍𑌚𑌤𑍁॑𑌰𑍍𑌹𑍋𑌤𑌾𑌰𑌃 । 𑌤𑌦𑍇॒𑌵 𑌪𑍍𑌰॑𑌕𑌾॒𑌶-𑌙𑍍𑌗॑𑌮𑌯𑌤𑌿 । 𑌤𑌦𑍇॑𑌨-𑌮𑍍𑌪𑍍𑌰𑌕𑌾॒𑌶-𑌙𑍍𑌗॒𑌤𑌮𑍍 । 𑌪𑍍𑌰॒𑌕𑌾॒𑌶-𑌮𑍍𑌪𑍍𑌰॒𑌜𑌾𑌨𑌾᳚-𑌙𑍍𑌗𑌮𑌯𑌤𑌿 ॥ 𑌦॒𑌰𑍍𑌭॒𑌸𑍍𑌤॒𑌮𑍍𑌬-𑌮𑍁॒𑌦𑍍𑌗𑍍𑌰𑌤𑍍𑌥𑍍𑌯॒ 𑌵𑍍𑌯𑌾𑌚॑𑌷𑍍𑌟𑍇 ॥ 4 ॥

𑌅॒𑌗𑍍𑌨𑌿॒𑌵𑌾𑌨𑍍. 𑌵𑍈 𑌦॑𑌰𑍍𑌭𑌸𑍍𑌤॒𑌮𑍍𑌬𑌃 । 𑌅॒𑌗𑍍𑌨𑌿॒𑌵𑌤𑍍𑌯𑍇॒𑌵 𑌵𑍍𑌯𑌾𑌚॑𑌷𑍍𑌟𑍇 ॥ 𑌬𑍍𑌰𑌾॒𑌹𑍍𑌮॒𑌣𑍋 𑌦॑𑌕𑍍𑌷𑌿𑌣॒𑌤 𑌉𑌪𑌾᳚𑌸𑍍𑌤𑍇 । 𑌬𑍍𑌰𑌾॒𑌹𑍍𑌮॒𑌣𑍋 𑌵𑍈 𑌪𑍍𑌰॒𑌜𑌾𑌨𑌾॑-𑌮𑍁𑌪𑌦𑍍𑌰॒𑌷𑍍𑌟𑌾 । 𑌉॒𑌪॒𑌦𑍍𑌰॒𑌷𑍍𑌟𑍁॒-𑌮𑌤𑍍𑌯𑍇॒𑌵𑍈𑌨𑌂॒-𑌯𑌁𑌶॑ 𑌋𑌚𑍍𑌛𑌤𑌿 ॥ 𑌈॒𑌶𑍍𑌵॒𑌰-𑌨𑍍𑌤𑌂-𑌯𑌁𑌶𑍋-𑌽𑌰𑍍𑌤𑍋॒𑌰𑌿𑌤𑍍𑌯𑌾॑𑌹𑍁𑌃 । 𑌯𑌸𑍍𑌯𑌾𑌨𑍍𑌤𑍇᳚ 𑌵𑍍𑌯𑌾॒𑌚𑌷𑍍𑌟॒ 𑌇𑌤𑌿॑ । 𑌵𑌰॒𑌸𑍍𑌤𑌸𑍍𑌮𑍈॒ 𑌦𑍇𑌯𑌃॑ । 𑌯𑌦𑍇॒𑌵𑍈𑌨॒-𑌨𑍍𑌤𑌤𑍍𑌰𑍋॑𑌪॒ 𑌨𑌮॑𑌤𑌿 । 𑌤𑌦𑍇॒𑌵𑌾𑌵॑ 𑌰𑍁𑌨𑍍𑌧𑍇 ॥ 5 ॥

𑌅॒𑌗𑍍𑌨𑌿𑌮𑌾॒𑌦𑌧𑌾॑𑌨𑍋॒ 𑌦𑌶॑𑌹𑍋𑌤𑍍𑌰𑌾॒ 𑌽𑌰𑌣𑌿॒𑌮𑌵॑𑌦𑌦𑍍𑌧𑍍𑌯𑌾𑌤𑍍 । 𑌪𑍍𑌰𑌜𑌾॑𑌤𑌮𑍇॒𑌵𑍈𑌨॒-𑌮𑌾𑌧॑𑌤𑍍𑌤𑍇 । 𑌤𑍇𑌨𑍈॒𑌵𑍋𑌦𑍍𑌦𑍍𑌰𑍁𑌤𑍍𑌯𑌾᳚𑌗𑍍𑌨𑌿𑌹𑍋॒𑌤𑍍𑌰-𑌞𑍍𑌜𑍁॑𑌹𑍁𑌯𑌾𑌤𑍍 । 𑌪𑍍𑌰𑌜𑌾॑𑌤𑌮𑍇॒𑌵𑍈𑌨॑𑌜𑍍𑌜𑍁𑌹𑍋𑌤𑌿 । 𑌹॒𑌵𑌿𑌰𑍍𑌨𑌿॑𑌰𑍍𑌵॒𑌫𑍍𑌸𑍍𑌯𑌨𑍍-𑌦𑌶॑𑌹𑍋𑌤𑌾𑌰𑌂॒-𑌵𑍍𑌯𑌾𑌁𑌚॑𑌕𑍍𑌷𑍀𑌤 । 𑌪𑍍𑌰𑌜𑌾॑𑌤𑌮𑍇॒𑌵𑍈𑌨॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌸𑌾॒𑌮𑌿॒𑌧𑍇॒𑌨𑍀-𑌰॑𑌨𑍁𑌵॒𑌕𑍍𑌷𑍍𑌯𑌨𑍍-𑌦𑌶॑𑌹𑍋𑌤𑌾𑌰𑌂॒-𑌵𑍍𑌯𑌾𑌁𑌚॑𑌕𑍍𑌷𑍀𑌤 । 𑌸𑌾॒𑌮𑌿॒𑌧𑍇॒𑌨𑍀𑌰𑍇॒𑌵 𑌸𑍃॒𑌷𑍍𑌟𑍍𑌵𑌾-𑌽𑌽𑌰𑌭𑍍𑌯॒ 𑌪𑍍𑌰 𑌤॑𑌨𑍁𑌤𑍇 । 𑌅𑌥𑍋॑ 𑌯॒𑌜𑍍𑌞𑍋 𑌵𑍈 𑌦𑌶॑𑌹𑍋𑌤𑌾 । 𑌯॒𑌜𑍍𑌞𑌮𑍇॒𑌵 𑌤॑𑌨𑍁𑌤𑍇 ॥ 6 ॥

𑌅॒𑌭𑌿॒𑌚𑌰॒𑌨𑍍-𑌦𑌶॑𑌹𑍋𑌤𑌾𑌰-𑌞𑍍𑌜𑍁𑌹𑍁𑌯𑌾𑌤𑍍 । 𑌨𑌵॒ 𑌵𑍈 𑌪𑍁𑌰𑍁॑𑌷𑍇 𑌪𑍍𑌰𑌾॒𑌣𑌾𑌃 । 𑌨𑌾𑌭𑌿॑𑌰𑍍𑌦𑌶॒𑌮𑍀 । 𑌸𑌪𑍍𑌰𑌾॑𑌣𑌮𑍇॒𑌵𑍈𑌨॑-𑌮॒𑌭𑌿𑌚॑𑌰𑌤𑌿 । 𑌏॒𑌤𑌾𑌵॒𑌦𑍍𑌵𑍈 𑌪𑍁𑌰𑍁॑𑌷𑌸𑍍𑌯॒ 𑌸𑍍𑌵𑌮𑍍 । 𑌯𑌾𑌵॑-𑌤𑍍𑌪𑍍𑌰𑌾॒𑌣𑌾𑌃 । 𑌯𑌾𑌵॑𑌦𑍇॒𑌵𑌾𑌸𑍍𑌯𑌾𑌸𑍍𑌤𑌿॑ । 𑌤𑌦॒𑌭𑌿𑌚॑𑌰𑌤𑌿 ॥ 𑌸𑍍𑌵𑌕𑍃॑𑌤॒ 𑌇𑌰𑌿॑𑌣𑍇 𑌜𑍁𑌹𑍋𑌤𑌿 𑌪𑍍𑌰𑌦॒𑌰𑍇 𑌵𑌾᳚ । 𑌏॒𑌤𑌦𑍍𑌵𑌾 𑌅॒𑌸𑍍𑌯𑍈 𑌨𑌿𑌰𑍍-𑌋॑𑌤𑌿𑌗𑍃𑌹𑍀𑌤𑌮𑍍 । 𑌨𑌿𑌰𑍍-𑌋॑𑌤𑌿 𑌗𑍃𑌹𑍀𑌤 𑌏॒𑌵𑍈𑌨॒-𑌨𑍍𑌨𑌿𑌰𑍍-𑌋॑𑌤𑍍𑌯𑌾 𑌗𑍍𑌰𑌾𑌹𑌯𑌤𑌿 ॥ 𑌯-𑌦𑍍𑌵𑌾॒𑌚𑌃 𑌕𑍍𑌰𑍂॒𑌰𑌮𑍍 । 𑌤𑍇𑌨॒ 𑌵𑌷॑𑌟𑍍𑌕𑌰𑍋𑌤𑌿 । 𑌵𑌾॒𑌚 𑌏॒𑌵𑍈𑌨॑-𑌙𑍍𑌕𑍍𑌰𑍂॒𑌰𑍇𑌣॒ 𑌪𑍍𑌰 𑌵𑍃॑𑌶𑍍𑌚𑌤𑌿 । 𑌤𑌾॒𑌜𑌗𑌾𑌰𑍍𑌤𑌿॒𑌮𑌾𑌰𑍍𑌚𑍍𑌛॑𑌤𑌿 ॥ 7 ॥

(𑌦𑌶॑𑌹𑍋𑌤𑌾॒ - 𑌸𑍃𑌷𑍍𑌟𑍍𑌯𑌾॑ - 𑌋॒𑌚𑍍𑌛𑍇-𑌦𑍍- 𑌵𑍍𑌯𑌾𑌚॑𑌷𑍍𑌟𑍇 - 𑌰𑍁𑌨𑍍𑌧 - 𑌏॒𑌵 𑌤॑𑌨𑍁𑌤𑍇॒ - 𑌨𑌿𑌰𑍍-𑌋॑𑌤𑌿𑌗𑍃𑌹𑍀𑌤॒-𑌮𑍍𑌪𑌞𑍍𑌚॑ 𑌚) (𑌅. 1)

𑌅𑌨𑍁𑌵𑌾𑌕𑌂 2 - 𑌚𑌤𑍁𑌰𑍍𑌹𑍋𑌤𑍍𑌰𑌾𑌦𑌿𑌮𑌨𑍍𑌤𑍍𑌰𑌾𑌣𑌾-𑌙𑍍𑌕𑍍𑌰𑌤𑍍𑌵𑌰𑍍𑌥𑌪𑍍𑌰𑌯𑍋𑌗𑌃

𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌦𑌰𑍍𑌶𑌪𑍂𑌰𑍍𑌣𑌮𑌾॒𑌸𑍗 𑌸𑍃॑𑌜𑍇॒𑌯𑍇𑌤𑌿॑ । 𑌸 𑌏॒𑌤-𑌞𑍍𑌚𑌤𑍁॑𑌰𑍍𑌹𑍋𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑-𑌽𑌜𑍁𑌹𑍋𑌤𑍍 । 𑌤𑌤𑍋॒ 𑌵𑍈 𑌸 𑌦॑𑌰𑍍𑌶𑌪𑍂𑌰𑍍𑌣𑌮𑌾॒𑌸𑌾𑌵॑𑌸𑍃𑌜𑌤 । 𑌤𑌾𑌵॑𑌸𑍍𑌮𑌾-𑌥𑍍𑌸𑍃॒𑌷𑍍𑌟𑌾𑌵𑌪𑌾᳚𑌕𑍍𑌰𑌾𑌮𑌤𑌾𑌮𑍍 । 𑌤𑍗 𑌗𑍍𑌰𑌹𑍇॑𑌣𑌾 𑌗𑍃𑌹𑍍𑌣𑌾𑌤𑍍 । 𑌤𑌦𑍍𑌗𑍍𑌰𑌹॑𑌸𑍍𑌯 𑌗𑍍𑌰𑌹॒𑌤𑍍𑌵𑌮𑍍 । 𑌦॒𑌰𑍍॒𑌶॒𑌪𑍂॒𑌰𑍍𑌣॒𑌮𑌾॒𑌸𑌾-𑌵𑌾॒𑌲𑌭॑𑌮𑌾𑌨𑌃 । 𑌚𑌤𑍁॑𑌰𑍍𑌹𑍋𑌤𑌾𑌰॒-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑-𑌹𑌵॒𑌨𑍀𑌯𑍇॑ 𑌜𑍁𑌹𑍁𑌯𑌾𑌤𑍍 । 𑌦॒𑌰𑍍॒𑌶॒𑌪𑍂॒𑌰𑍍𑌣॒𑌮𑌾॒𑌸𑌾𑌵𑍇॒𑌵 𑌸𑍃॒𑌷𑍍𑌟𑍍𑌵𑌾-𑌽𑌽𑌰𑌭𑍍𑌯॒ 𑌪𑍍𑌰 𑌤॑𑌨𑍁𑌤𑍇 ॥ 8 ॥

𑌗𑍍𑌰𑌹𑍋॑ 𑌭𑌵𑌤𑌿 । 𑌦॒𑌰𑍍॒𑌶॒𑌪𑍂॒𑌰𑍍𑌣॒𑌮𑌾॒𑌸𑌯𑍋᳚-𑌸𑍍𑌸𑍃॒𑌷𑍍𑌟𑌯𑍋॒𑌰𑍍𑌧𑍃𑌤𑍍𑌯𑍈᳚ ॥ 𑌸𑍋॑-𑌽𑌕𑌾𑌮𑌯𑌤 𑌚𑌾𑌤𑍁𑌰𑍍𑌮𑌾॒𑌸𑍍𑌯𑌾𑌨𑌿॑ 𑌸𑍃𑌜𑍇॒𑌯𑍇𑌤𑌿॑ । 𑌸 𑌏॒𑌤-𑌮𑍍𑌪𑌞𑍍𑌚॑𑌹𑍋𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑-𑌽𑌜𑍁𑌹𑍋𑌤𑍍 । 𑌤𑌤𑍋॒ 𑌵𑍈 𑌸 𑌚𑌾॑𑌤𑍁𑌰𑍍𑌮𑌾॒𑌸𑍍𑌯𑌾𑌨𑍍𑌯॑𑌸𑍃𑌜𑌤 । 𑌤𑌾𑌨𑍍𑌯॑𑌸𑍍𑌮𑌾-𑌥𑍍𑌸𑍃॒𑌷𑍍𑌟𑌾𑌨𑍍𑌯𑌪𑌾᳚𑌕𑍍𑌰𑌾𑌮𑌨𑍍𑌨𑍍 । 𑌤𑌾𑌨𑌿॒ 𑌗𑍍𑌰𑌹𑍇॑𑌣𑌾𑌗𑍃𑌹𑍍𑌣𑌾𑌤𑍍 । 𑌤𑌦𑍍𑌗𑍍𑌰𑌹॑𑌸𑍍𑌯 𑌗𑍍𑌰𑌹॒𑌤𑍍𑌵𑌮𑍍 । 𑌚𑌾॒𑌤𑍁॒𑌰𑍍𑌮𑌾॒𑌸𑍍𑌯𑌾𑌨𑍍𑌯𑌾॒𑌲𑌭॑𑌮𑌾𑌨𑌃 ॥ 9 ॥

𑌪𑌞𑍍𑌚॑𑌹𑍋𑌤𑌾𑌰॒-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑ 𑌜𑍁𑌹𑍁𑌯𑌾𑌤𑍍 । 𑌚𑌾॒𑌤𑍁॒𑌰𑍍𑌮𑌾॒𑌸𑍍𑌯𑌾𑌨𑍍𑌯𑍇॒𑌵 𑌸𑍃॒𑌷𑍍𑌟𑍍𑌵𑌾-𑌽𑌽𑌰𑌭𑍍𑌯॒ 𑌪𑍍𑌰 𑌤॑𑌨𑍁𑌤𑍇 । 𑌗𑍍𑌰𑌹𑍋॑ 𑌭𑌵𑌤𑌿 । 𑌚𑌾॒𑌤𑍁॒𑌰𑍍𑌮𑌾॒𑌸𑍍𑌯𑌾𑌨𑌾𑌗𑍍𑌂॑ 𑌸𑍃॒𑌷𑍍𑌟𑌾𑌨𑌾॒-𑌨𑍍𑌧𑍃𑌤𑍍𑌯𑍈᳚ ॥ 𑌸𑍋॑-𑌽𑌕𑌾𑌮𑌯𑌤 𑌪𑌶𑍁𑌬॒𑌨𑍍𑌧𑌗𑍍𑌂 𑌸𑍃॑𑌜𑍇॒𑌯𑍇𑌤𑌿॑ । 𑌸 𑌏॒𑌤𑌗𑍍𑌂 𑌷𑌡𑍍𑌢𑍋॑𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑-𑌽𑌜𑍁𑌹𑍋𑌤𑍍 । 𑌤𑌤𑍋॒ 𑌵𑍈 𑌸 𑌪॑𑌶𑍁𑌬॒𑌨𑍍𑌧𑌮॑𑌸𑍃𑌜𑌤 । 𑌸𑍋᳚-𑌽𑌸𑍍𑌮𑌾-𑌥𑍍𑌸𑍃॒𑌷𑍍𑌟𑍋 𑌽𑌪𑌾᳚𑌕𑍍𑌰𑌾𑌮𑌤𑍍 । 𑌤-𑌙𑍍𑌗𑍍𑌰𑌹𑍇॑𑌣𑌾𑌗𑍃𑌹𑍍𑌣𑌾𑌤𑍍 ॥ 10 ॥

𑌤𑌦𑍍𑌗𑍍𑌰𑌹॑𑌸𑍍𑌯 𑌗𑍍𑌰𑌹॒𑌤𑍍𑌵𑌮𑍍 । 𑌪॒𑌶𑍁॒𑌬॒𑌨𑍍𑌧𑍇𑌨॑ 𑌯॒𑌕𑍍𑌷𑍍𑌯𑌮𑌾॑𑌣𑌃 । 𑌷𑌡𑍍𑌢𑍋॑𑌤𑌾𑌰॒-𑌮𑍍𑌮𑌨॑𑌸𑌾 𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑ 𑌜𑍁𑌹𑍁𑌯𑌾𑌤𑍍 । 𑌪॒𑌶𑍁॒𑌬॒𑌨𑍍𑌧𑌮𑍇॒𑌵 𑌸𑍃॒𑌷𑍍𑌟𑍍𑌵𑌾-𑌽𑌽𑌰𑌭𑍍𑌯॒ 𑌪𑍍𑌰 𑌤॑𑌨𑍁𑌤𑍇 । 𑌗𑍍𑌰𑌹𑍋॑ 𑌭𑌵𑌤𑌿 । 𑌪॒𑌶𑍁॒𑌬॒𑌨𑍍𑌧𑌸𑍍𑌯॑ 𑌸𑍃॒𑌷𑍍𑌟𑌸𑍍𑌯॒ 𑌧𑍃𑌤𑍍𑌯𑍈᳚ ॥ 𑌸𑍋॑-𑌽𑌕𑌾𑌮𑌯𑌤 𑌸𑍗॒𑌮𑍍𑌯-𑌮॑𑌦𑍍𑌧𑍍𑌵॒𑌰𑌗𑍍𑌂 𑌸𑍃॑𑌜𑍇॒𑌯𑍇𑌤𑌿॑ । 𑌸 𑌏॒𑌤𑌗𑍍𑌂 𑌸॒𑌪𑍍𑌤𑌹𑍋॑𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑ 𑌽𑌜𑍁𑌹𑍋𑌤𑍍 । 𑌤𑌤𑍋॒ 𑌵𑍈 𑌸 𑌸𑍗॒𑌮𑍍𑌯-𑌮॑𑌦𑍍𑌧𑍍𑌵॒𑌰-𑌮॑𑌸𑍃𑌜𑌤 ॥ 11 ॥

𑌸𑍋᳚-𑌽𑌸𑍍𑌮𑌾-𑌥𑍍𑌸𑍃॒𑌷𑍍𑌟𑍋-𑌽𑌪𑌾᳚𑌕𑍍𑌰𑌾𑌮𑌤𑍍 । 𑌤-𑌙𑍍𑌗𑍍𑌰𑌹𑍇॑𑌣𑌾𑌗𑍃𑌹𑍍𑌣𑌾𑌤𑍍 । 𑌤𑌦𑍍𑌗𑍍𑌰𑌹॑𑌸𑍍𑌯 𑌗𑍍𑌰𑌹॒𑌤𑍍𑌵𑌮𑍍 । 𑌦𑍀॒𑌕𑍍𑌷𑌿॒𑌷𑍍𑌯𑌮𑌾॑𑌣𑌃 । 𑌸॒𑌪𑍍𑌤𑌹𑍋॑𑌤𑌾𑌰॒-𑌮𑍍𑌮𑌨॑𑌸𑌾-𑌽𑌨𑍁॒𑌦𑍍𑌰𑍁𑌤𑍍𑌯𑌾॑ 𑌹𑌵॒𑌨𑍀𑌯𑍇॑ 𑌜𑍁𑌹𑍁𑌯𑌾𑌤𑍍 । 𑌸𑍗॒𑌮𑍍𑌯𑌮𑍇॒𑌵𑌾𑌦𑍍𑌧𑍍𑌵॒𑌰𑌗𑍍𑌂 𑌸𑍃॒𑌷𑍍𑌟𑍍𑌵𑌾-𑌽𑌽𑌰𑌭𑍍𑌯॒ 𑌪𑍍𑌰 𑌤॑𑌨𑍁𑌤𑍇 । 𑌗𑍍𑌰𑌹𑍋॑ 𑌭𑌵𑌤𑌿 । 𑌸𑍗॒𑌮𑍍𑌯𑌸𑍍𑌯𑌾᳚-𑌦𑍍𑌧𑍍𑌵॒𑌰𑌸𑍍𑌯॑ 𑌸𑍃॒𑌷𑍍𑌟𑌸𑍍𑌯॒ 𑌧𑍃𑌤𑍍𑌯𑍈᳚ ॥ 𑌦𑍇॒𑌵𑍇𑌭𑍍𑌯𑍋॒ 𑌵𑍈 𑌯॒𑌜𑍍𑌞𑍋 𑌨 𑌪𑍍𑌰𑌾𑌭॑𑌵𑌤𑍍 । 𑌤𑌮𑍇॑𑌤𑌾𑌵॒𑌚𑍍𑌛-𑌸𑍍𑌸𑌮॑𑌭𑌰𑌨𑍍𑌨𑍍 ॥ 12 ॥

𑌯-𑌥𑍍𑌸॑𑌭𑌾𑌂॒𑌰𑌾𑌃 । 𑌤𑌤𑍋॒ 𑌵𑍈 𑌤𑍇𑌭𑍍𑌯𑍋॑ 𑌯॒𑌜𑍍𑌞𑌃 𑌪𑍍𑌰𑌾𑌭॑𑌵𑌤𑍍 । 𑌯-𑌥𑍍𑌸॑𑌭𑌾𑌂॒𑌰𑌾 𑌭𑌵॑𑌨𑍍𑌤𑌿 । 𑌯॒𑌜𑍍𑌞𑌸𑍍𑌯॒ 𑌪𑍍𑌰𑌭𑍂᳚𑌤𑍍𑌯𑍈 ॥ 𑌆॒𑌤𑌿॒𑌤𑍍𑌥𑍍𑌯𑌮𑌾॒𑌸𑌾𑌦𑍍𑌯॒ 𑌵𑍍𑌯𑌾𑌚॑𑌷𑍍𑌟𑍇 । 𑌯॒𑌜𑍍𑌞॒𑌮𑍁॒𑌖𑌂-𑌵𑌾𑌁 𑌆॑𑌤𑌿॒𑌥𑍍𑌯𑌮𑍍 । 𑌮𑍁॒𑌖॒𑌤 𑌏॒𑌵 𑌯॒𑌜𑍍𑌞𑌗𑍍𑌂 𑌸॒𑌭𑍃𑌨𑍍𑌤𑍍𑌯॒ 𑌪𑍍𑌰 𑌤॑𑌨𑍁𑌤𑍇 ॥ 𑌅𑌯॑𑌜𑍍𑌞𑍋॒ 𑌵𑌾 𑌏॒𑌷𑌃 । 𑌯𑍋॑-𑌽𑌪॒𑌤𑍍𑌨𑍀𑌕𑌃॑ । 𑌨 𑌪𑍍𑌰॒𑌜𑌾𑌃 𑌪𑍍𑌰 𑌜𑌾॑𑌯𑍇𑌰𑌨𑍍𑌨𑍍 । 𑌪𑌤𑍍𑌨𑍀॒𑌰𑍍𑌵𑍍𑌯𑌾𑌚॑𑌷𑍍𑌟𑍇 । 𑌯॒𑌜𑍍𑌞𑌮𑍇॒𑌵𑌾𑌕𑌃॑ । 𑌪𑍍𑌰॒𑌜𑌾𑌨𑌾᳚-𑌮𑍍𑌪𑍍𑌰॒𑌜𑌨॑𑌨𑌾𑌯 ॥ 𑌉॒𑌪॒𑌸𑌥𑍍𑌸𑍁॒ 𑌵𑍍𑌯𑌾𑌚॑𑌷𑍍𑌟𑍇 । 𑌏॒𑌤𑌦𑍍𑌵𑍈 𑌪𑌤𑍍𑌨𑍀॑𑌨𑌾-𑌮𑌾॒𑌯𑌤॑𑌨𑌮𑍍 । 𑌸𑍍𑌵 𑌏॒𑌵𑍈𑌨𑌾॑ 𑌆॒𑌯𑌤॒𑌨𑍇-𑌽𑌵॑ 𑌕𑌲𑍍𑌪𑌯𑌤𑌿 ॥ 13 ॥

(𑌤॒𑌨𑍁॒𑌤॒ - 𑌆॒𑌲𑌭॑𑌮𑌾𑌨𑍋 - 𑌽𑌗𑍃𑌹𑍍𑌣𑌾 - 𑌦𑌸𑍃𑌜 - 𑌤𑌾𑌭𑌰 - 𑌞𑍍𑌜𑌾𑌯𑍇𑌰॒𑌨𑍍-𑌥𑍍𑌷𑌟𑍍𑌚॑) (𑌅. 2)

𑌅𑌨𑍁𑌵𑌾𑌕𑌂 3 - 𑌚𑌤𑍁𑌰𑍍𑌹𑍋𑌤𑍃𑌪𑌞𑍍𑌚𑌹𑍋𑌤𑍃𑌮𑌨𑍍𑌤𑍍𑌰𑌗𑍍𑌰𑌹𑌭𑌾𑌗𑌯𑍋𑌃 𑌪𑍁𑌰𑍁𑌷𑌾𑌰𑍍𑌥 𑌪𑍍𑌰𑌯𑍋𑌗𑌃

𑌪𑍍𑌰॒𑌜𑌾𑌪॑𑌤𑌿-𑌰𑌕𑌾𑌮𑌯𑌤॒ 𑌪𑍍𑌰 𑌜𑌾॑𑌯𑍇॒𑌯𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸 𑌤𑍍𑌰𑌿॒𑌵𑍃𑌤॒𑌗𑍍𑌗𑍍॒ 𑌸𑍍𑌤𑍋𑌮॑-𑌮𑌸𑍃𑌜𑌤 । 𑌤-𑌮𑍍𑌪॑𑌞𑍍𑌚𑌦॒𑌶𑌸𑍍𑌤𑍋𑌮𑍋॑ 𑌮𑌦𑍍𑌧𑍍𑌯॒𑌤 𑌉𑌦॑𑌤𑍃𑌣𑌤𑍍 । 𑌤𑍗 𑌪𑍂᳚𑌰𑍍𑌵𑌪॒𑌕𑍍𑌷𑌶𑍍𑌚𑌾॑𑌪𑌰𑌪॒𑌕𑍍𑌷𑌶𑍍𑌚𑌾॑𑌭𑌵𑌤𑌾𑌮𑍍 । 𑌪𑍂॒𑌰𑍍𑌵॒𑌪॒𑌕𑍍𑌷-𑌨𑍍𑌦𑍇॒𑌵𑌾 𑌅𑌨𑍍𑌵𑌸𑍃॑𑌜𑍍𑌯𑌨𑍍𑌤 । 𑌅॒𑌪॒𑌰॒𑌪॒𑌕𑍍𑌷-𑌮𑌨𑍍𑌵𑌸𑍁॑𑌰𑌾𑌃 । 𑌤𑌤𑍋॑ 𑌦𑍇॒𑌵𑌾 𑌅𑌭॑𑌵𑌨𑍍𑌨𑍍 । 𑌪𑌰𑌾-𑌽𑌸𑍁॑𑌰𑌾𑌃 । 𑌯-𑌙𑍍𑌕𑌾॒𑌮𑌯𑍇॑𑌤॒ 𑌵𑌸𑍀॑𑌯𑌾𑌨𑍍-𑌥𑍍𑌸𑍍𑌯𑌾॒𑌦𑌿𑌤𑌿॑ ॥ 14 ॥

𑌤-𑌮𑍍𑌪𑍂᳚𑌰𑍍𑌵𑌪॒𑌕𑍍𑌷𑍇 𑌯𑌾॑𑌜𑌯𑍇𑌤𑍍 । 𑌵𑌸𑍀॑𑌯𑌾𑌨𑍇॒𑌵 𑌭॑𑌵𑌤𑌿 । 𑌯-𑌙𑍍𑌕𑌾॒𑌮𑌯𑍇॑𑌤॒ 𑌪𑌾𑌪𑍀॑𑌯𑌾𑌨𑍍-𑌥𑍍𑌸𑍍𑌯𑌾॒𑌦𑌿𑌤𑌿॑ । 𑌤𑌮॑𑌪𑌰𑌪॒𑌕𑍍𑌷𑍇 𑌯𑌾॑𑌜𑌯𑍇𑌤𑍍 । 𑌪𑌾𑌪𑍀॑𑌯𑌾𑌨𑍇॒𑌵 𑌭॑𑌵𑌤𑌿 । 𑌤𑌸𑍍𑌮𑌾᳚-𑌤𑍍𑌪𑍂𑌰𑍍𑌵𑌪॒𑌕𑍍𑌷𑍋॑ ¶𑌪॒𑌕𑍍𑌷𑌾𑌤𑍍-𑌕॑𑌰𑍁॒𑌣𑍍𑌯॑𑌤𑌰𑌃 ॥ 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑍈 𑌦𑌶॑𑌹𑍋𑌤𑌾 । 𑌚𑌤𑍁॑𑌰𑍍𑌹𑍋𑌤𑌾॒ 𑌪𑌞𑍍𑌚॑𑌹𑍋𑌤𑌾 । 𑌷𑌡𑍍𑌢𑍋॑𑌤𑌾 𑌸॒𑌪𑍍𑌤𑌹𑍋॑𑌤𑌾 । 𑌋॒𑌤𑌵𑌃॑ 𑌸𑌂𑌵𑌁𑌥𑍍𑌸॒𑌰𑌃 ॥ 15 ॥

𑌪𑍍𑌰॒𑌜𑌾𑌃 𑌪॒𑌶𑌵॑ 𑌇॒𑌮𑍇 𑌲𑍋॒𑌕𑌾𑌃 । 𑌯 𑌏॒𑌵-𑌮𑍍𑌪𑍍𑌰॒𑌜𑌾𑌪॑𑌤𑌿-𑌮𑍍𑌬॒𑌹𑍋𑌰𑍍𑌭𑍂𑌯𑌾𑌗𑍍𑌂॑𑌸𑌂॒-𑌵𑍇𑌁𑌦॑ । 𑌬॒𑌹𑍋𑌰𑍇॒𑌵 𑌭𑍂𑌯𑌾᳚-𑌨𑍍𑌭𑌵𑌤𑌿 ॥ 𑌪𑍍𑌰॒𑌜𑌾𑌪॑𑌤𑌿-𑌰𑍍𑌦𑍇𑌵𑌾𑌸𑍁॒𑌰𑌾𑌨॑𑌸𑍃𑌜𑌤 । 𑌸 𑌇𑌨𑍍𑌦𑍍𑌰॒𑌮𑌪𑌿॒ 𑌨𑌾𑌸𑍃॑𑌜𑌤 । 𑌤-𑌨𑍍𑌦𑍇॒𑌵𑌾 𑌅॑𑌬𑍍𑌰𑍁𑌵𑌨𑍍𑌨𑍍 । 𑌇𑌨𑍍𑌦𑍍𑌰॑-𑌨𑍍𑌨𑍋 𑌜𑌨॒𑌯𑍇𑌤𑌿॑ । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌯𑌥𑌾॒ 𑌽𑌹𑌂-𑌯𑍁𑌁॒𑌷𑍍𑌮𑌾𑌗𑍍 𑌸𑍍𑌤𑌪॒𑌸𑌾 𑌽𑌸𑍃॑𑌕𑍍𑌷𑌿 । 𑌏॒𑌵𑌮𑌿𑌨𑍍𑌦𑍍𑌰॑-𑌞𑍍𑌜𑌨𑌯𑌦𑍍𑌧𑍍𑌵॒𑌮𑌿𑌤𑌿॑ ॥ 16 ॥

𑌤𑍇 𑌤𑌪𑍋॑-𑌽𑌤𑌪𑍍𑌯𑌨𑍍𑌤 । 𑌤 𑌆॒𑌤𑍍𑌮𑌨𑍍𑌨𑌿𑌨𑍍𑌦𑍍𑌰॑-𑌮𑌪𑌶𑍍𑌯𑌨𑍍𑌨𑍍 । 𑌤𑌮॑𑌬𑍍𑌰𑍁𑌵𑌨𑍍𑌨𑍍 । 𑌜𑌾𑌯॒𑌸𑍍𑌵𑍇𑌤𑌿॑ । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌕𑌿-𑌮𑍍𑌭𑌾॑𑌗॒𑌧𑍇𑌯॑-𑌮॒𑌭𑌿𑌜॑𑌨𑌿𑌷𑍍𑌯॒ 𑌇𑌤𑌿॑ । 𑌋॒𑌤𑍂𑌨𑍍-𑌥𑍍𑌸𑌂॑𑌵𑌁𑌥𑍍𑌸॒𑌰𑌮𑍍 । 𑌪𑍍𑌰॒𑌜𑌾𑌃 𑌪॒𑌶𑍂𑌨𑍍 । 𑌇॒𑌮𑌾𑌲𑍍 𑌁𑌲𑍋॒𑌕𑌾𑌨𑌿𑌤𑍍𑌯॑𑌬𑍍𑌰𑍁𑌵𑌨𑍍𑌨𑍍 । 𑌤𑌂-𑌵𑍈𑌁 𑌮𑌾-𑌽𑌽𑌹𑍁॑𑌤𑍍𑌯𑌾॒ 𑌪𑍍𑌰𑌜॑𑌨𑌯॒𑌤𑍇𑌤𑍍𑌯॑𑌬𑍍𑌰𑌵𑍀𑌤𑍍 ॥ 17 ॥

𑌤-𑌞𑍍𑌚𑌤𑍁॑𑌰𑍍𑌹𑍋𑌤𑍍𑌰𑌾॒ 𑌪𑍍𑌰𑌾𑌜॑𑌨𑌯𑌨𑍍𑌨𑍍 ॥ 𑌯𑌃 𑌕𑌾॒𑌮𑌯𑍇॑𑌤 𑌵𑍀॒𑌰𑍋 𑌮॒ 𑌆 𑌜𑌾॑𑌯𑍇॒𑌤𑍇𑌤𑌿॑ । 𑌸 𑌚𑌤𑍁॑𑌰𑍍𑌹𑍋𑌤𑌾𑌰-𑌞𑍍𑌜𑍁𑌹𑍁𑌯𑌾𑌤𑍍 । 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑍈 𑌚𑌤𑍁॑𑌰𑍍𑌹𑍋𑌤𑌾 । 𑌪𑍍𑌰॒𑌜𑌾𑌪॑𑌤𑌿𑌰𑍇॒𑌵 𑌭𑍂॒𑌤𑍍𑌵𑌾 𑌪𑍍𑌰𑌜𑌾॑𑌯𑌤𑍇 । 𑌜॒𑌜𑌨॒𑌦𑌿𑌨𑍍𑌦𑍍𑌰॑-𑌮𑌿𑌨𑍍𑌦𑍍𑌰𑌿॒𑌯𑌾𑌯॒ 𑌸𑍍𑌵𑌾𑌹𑍇𑌤𑌿॒ 𑌗𑍍𑌰𑌹𑍇॑𑌣 𑌜𑍁𑌹𑍋𑌤𑌿 । 𑌆-𑌽𑌸𑍍𑌯॑ 𑌵𑍀॒𑌰𑍋 𑌜𑌾॑𑌯𑌤𑍇 । 𑌵𑍀॒𑌰𑌗𑍍𑌂 𑌹𑌿 𑌦𑍇॒𑌵𑌾 𑌏॒𑌤𑌯𑌾 𑌽𑌽𑌹𑍁॑𑌤𑍍𑌯𑌾॒ 𑌪𑍍𑌰𑌾𑌜॑𑌨𑌯𑌨𑍍𑌨𑍍 ॥ 𑌆॒𑌦𑌿॒𑌤𑍍𑌯𑌾𑌶𑍍𑌚𑌾𑌙𑍍𑌗𑌿॑𑌰𑌸𑌶𑍍𑌚 𑌸𑍁𑌵॒𑌰𑍍𑌗𑍇 𑌲𑍋॒𑌕𑍇᳚ 𑌽𑌸𑍍𑌪𑌰𑍍𑌧𑌨𑍍𑌤 । 𑌵॒𑌯-𑌮𑍍𑌪𑍂𑌰𑍍𑌵𑍇॑ 𑌸𑍁𑌵॒𑌰𑍍𑌗𑌂-𑌲𑍋𑌁॒𑌕𑌮𑌿॑𑌯𑌾𑌮 𑌵॒𑌯-𑌮𑍍𑌪𑍂𑌰𑍍𑌵॒ 𑌇𑌤𑌿॑ ॥ 18 ॥

𑌤 𑌆॑𑌦𑌿॒𑌤𑍍𑌯𑌾 𑌏॒𑌤-𑌮𑍍𑌪𑌞𑍍𑌚॑𑌹𑍋𑌤𑌾𑌰-𑌮𑌪𑌶𑍍𑌯𑌨𑍍𑌨𑍍 । 𑌤-𑌮𑍍𑌪𑍁॒𑌰𑌾 𑌪𑍍𑌰𑌾॑𑌤𑌰𑌨𑍁𑌵𑌾॒𑌕𑌾𑌦𑌾𑌗𑍍𑌨𑍀᳚𑌦𑍍𑌧𑍍𑌰𑍇 𑌽𑌜𑍁𑌹𑌵𑍁𑌃 । 𑌤𑌤𑍋॒ 𑌵𑍈 𑌤𑍇 𑌪𑍂𑌰𑍍𑌵𑍇॑ 𑌸𑍁𑌵॒𑌰𑍍𑌗𑌂-𑌲𑍋𑌁॒𑌕𑌮𑌾॑𑌯𑌨𑍍𑌨𑍍 । 𑌯-𑌸𑍍𑌸𑍁॑𑌵॒𑌰𑍍𑌗𑌕𑌾॑𑌮॒-𑌸𑍍𑌸𑍍𑌯𑌾𑌤𑍍 । 𑌸 𑌪𑌞𑍍𑌚॑𑌹𑍋𑌤𑌾𑌰-𑌮𑍍𑌪𑍁॒𑌰𑌾 𑌪𑍍𑌰𑌾॑𑌤𑌰𑌨𑍁𑌵𑌾॒𑌕𑌾𑌦𑌾𑌗𑍍𑌨𑍀᳚𑌦𑍍𑌧𑍍𑌰𑍇 𑌜𑍁𑌹𑍁𑌯𑌾𑌤𑍍 । 𑌸𑌂॒𑌵𑌁॒𑌥𑍍𑌸॒𑌰𑍋 𑌵𑍈 𑌪𑌞𑍍𑌚॑𑌹𑍋𑌤𑌾 । 𑌸𑌂॒𑌵𑌁॒𑌥𑍍𑌸॒𑌰-𑌸𑍍𑌸𑍁॑𑌵॒𑌰𑍍𑌗𑍋 𑌲𑍋॒𑌕𑌃 । 𑌸𑌂॒𑌵𑌁॒𑌥𑍍𑌸॒𑌰 𑌏॒𑌵𑌰𑍍𑌤𑍁𑌷𑍁॑ 𑌪𑍍𑌰𑌤𑌿॒𑌷𑍍𑌠𑌾𑌯॑ । 𑌸𑍁॒𑌵॒𑌰𑍍𑌗𑌂-𑌲𑍋𑌁॒𑌕𑌮𑍇॑𑌤𑌿 ॥ 𑌤𑍇᳚𑌬𑍍𑌰𑍁𑌵॒-𑌨𑍍𑌨𑌙𑍍𑌗𑌿॑𑌰𑌸 𑌆𑌦𑌿॒𑌤𑍍𑌯𑌾𑌨𑍍 ॥ 19 ॥

𑌕𑍍𑌵॑ 𑌸𑍍𑌥 । 𑌕𑍍𑌵॑ 𑌵-𑌸𑍍𑌸॒𑌦𑍍𑌭𑍍𑌯𑍋 𑌹॒𑌵𑍍𑌯𑌂-𑌵𑌁॑𑌕𑍍𑌷𑍍𑌯𑌾𑌮॒ 𑌇𑌤𑌿॑ । 𑌛𑌨𑍍𑌦॒-𑌸𑍍𑌸𑍍𑌵𑌿𑌤𑍍𑌯॑𑌬𑍍𑌰𑍁𑌵𑌨𑍍𑌨𑍍 । 𑌗𑌾॒𑌯॒𑌤𑍍𑌰𑌿॒𑌯𑌾-𑌨𑍍𑌤𑍍𑌰𑌿॒𑌷𑍍𑌟𑍁𑌭𑌿॒-𑌜𑌗॑𑌤𑍍𑌯𑌾॒𑌮𑌿𑌤𑌿॑ । 𑌤𑌸𑍍𑌮𑌾॒𑌚𑍍𑌛𑌨𑍍𑌦𑌃॑ 𑌸𑍁 𑌸॒𑌦𑍍𑌭𑍍𑌯 𑌆॑𑌦𑌿॒𑌤𑍍𑌯𑍇𑌭𑍍𑌯𑌃॑ । 𑌆॒𑌙𑍍𑌗𑍀॒𑌰॒𑌸𑍀𑌃 𑌪𑍍𑌰॒𑌜𑌾 𑌹॒𑌵𑍍𑌯𑌂-𑌵𑌁॑𑌹𑌨𑍍𑌤𑌿 । 𑌵𑌹॑𑌨𑍍𑌤𑍍𑌯𑌸𑍍𑌮𑍈 𑌪𑍍𑌰॒𑌜𑌾 𑌬॒𑌲𑌿𑌮𑍍 । 𑌐𑌨॒𑌮𑌪𑍍𑌰॑𑌤𑌿𑌖𑍍𑌯𑌾𑌤-𑌙𑍍𑌗𑌚𑍍𑌛𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ ॥ 𑌦𑍍𑌵𑌾𑌦॑𑌶॒ 𑌮𑌾𑌸𑌾𑌃॒ 𑌪𑌞𑍍𑌚॒𑌰𑍍𑌤𑌵𑌃॑ । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 । 𑌅॒𑌸𑌾𑌵𑌾॑𑌦𑌿॒𑌤𑍍𑌯 𑌏॑𑌕𑌵𑌿॒𑌗𑍍𑌂॒𑌶𑌃 । 𑌏॒𑌤𑌸𑍍𑌮𑌿॒𑌨𑍍 𑌵𑌾 𑌏॒𑌷 𑌶𑍍𑌰𑌿॒𑌤𑌃 । 𑌏॒𑌤𑌸𑍍𑌮𑌿॒𑌨𑍍-𑌪𑍍𑌰𑌤𑌿॑𑌷𑍍𑌠𑌿𑌤𑌃 । 𑌯 𑌏॒𑌵𑌮𑍇॒𑌤𑌗𑍍𑌗𑍍 𑌶𑍍𑌰𑌿॒𑌤-𑌮𑍍𑌪𑍍𑌰𑌤𑌿॑𑌷𑍍𑌠𑌿𑌤𑌂॒-𑌵𑍇𑌁𑌦॑ । 𑌪𑍍𑌰𑌤𑍍𑌯𑍇॒𑌵 𑌤𑌿॑𑌷𑍍𑌠𑌤𑌿 ॥ 20 ॥

(𑌸𑍍𑌯𑌾॒𑌦𑌿𑌤𑌿॑ - 𑌸𑌂𑌵𑌁𑌥𑍍𑌸॒𑌰𑍋 - 𑌜॑𑌨𑌯𑌦𑍍𑌧𑍍𑌵॒𑌮𑌿𑌤𑍀 - 𑌤𑍍𑌯॑𑌬𑍍𑌰𑌵𑍀॒𑌤𑍍 - 𑌪𑍂𑌰𑍍𑌵॒ 𑌇𑌤𑍍𑌯𑌾॑ - 𑌦𑌿॒𑌤𑍍𑌯𑌾𑌨𑍍 - 𑌋॒𑌤𑌵॒-𑌷𑍍𑌷𑌟𑍍𑌚॑) (𑌅. 3)

𑌅𑌨𑍁𑌵𑌾𑌕𑌂 4 - 𑌜𑌗-𑌥𑍍𑌸𑍃𑌷𑍍𑌟𑌿𑌕𑌥𑌨𑌮𑍁𑌖𑍇𑌨 𑌹𑍋𑌤𑍃𑌮𑌨𑍍𑌤𑍍𑌰𑌪𑍍𑌰𑌶𑌂𑌸𑌾

𑌪𑍍𑌰॒𑌜𑌾𑌪॑𑌤𑌿-𑌰𑌕𑌾𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸 𑌏॒𑌤-𑌨𑍍𑌦𑌶॑𑌹𑍋𑌤𑌾𑌰-𑌮𑌪𑌶𑍍𑌯𑌤𑍍 । 𑌤𑍇𑌨॑ 𑌦𑌶॒𑌧𑌾 𑌽𑌽𑌤𑍍𑌮𑌾𑌨𑌂॑-𑌵𑌿𑌁॒𑌧𑌾𑌯॑ । 𑌦𑌶॑𑌹𑍋𑌤𑍍𑌰𑌾 𑌽𑌤𑌪𑍍𑌯𑌤 । 𑌤𑌸𑍍𑌯॒ 𑌚𑌿𑌤𑍍𑌤𑌿॒-𑌸𑍍𑌸𑍍𑌰𑍁𑌗𑌾𑌸𑍀᳚𑌤𑍍 । 𑌚𑌿॒𑌤𑍍𑌤𑌮𑌾𑌜𑍍𑌯᳚𑌮𑍍 । 𑌤𑌸𑍍𑌯𑍈॒𑌤𑌾॑𑌵𑌤𑍍𑌯𑍇॒𑌵 𑌵𑌾𑌗𑌾𑌸𑍀᳚𑌤𑍍 । 𑌏॒𑌤𑌾𑌵𑌾𑌨𑍍॑. 𑌯𑌜𑍍𑌞𑌕𑍍𑌰॒𑌤𑍁𑌃 ॥ 𑌸 𑌚𑌤𑍁॑𑌰𑍍𑌹𑍋𑌤𑌾𑌰-𑌮𑌸𑍃𑌜𑌤 । 𑌸𑍋॑-𑌽𑌨𑌨𑍍𑌦𑌤𑍍 ॥ 21 ॥

𑌅𑌸𑍃॑𑌕𑍍𑌷𑌿॒ 𑌵𑌾 𑌇॒𑌮𑌮𑌿𑌤𑌿॑ । 𑌤𑌸𑍍𑌯॒ 𑌸𑍋𑌮𑍋॑ 𑌹॒𑌵𑌿𑌰𑌾𑌸𑍀᳚𑌤𑍍 । 𑌸 𑌚𑌤𑍁॑𑌰𑍍𑌹𑍋𑌤𑍍𑌰𑌾 𑌽𑌤𑌪𑍍𑌯𑌤 । 𑌸𑍋॑-𑌽𑌤𑌾𑌮𑍍𑌯𑌤𑍍 । 𑌸 𑌭𑍂𑌰𑌿𑌤𑌿॒ 𑌵𑍍𑌯𑌾𑌹॑𑌰𑌤𑍍 । 𑌸 𑌭𑍂𑌮𑌿॑𑌮𑌸𑍃𑌜𑌤 । 𑌅॒𑌗𑍍𑌨𑌿॒𑌹𑍋॒𑌤𑍍𑌰-𑌨𑍍𑌦॑𑌰𑍍𑌶𑌪𑍂𑌰𑍍𑌣𑌮𑌾॒𑌸𑍗 𑌯𑌜𑍂𑌗𑍍𑌂॑𑌷𑌿 । 𑌸 𑌦𑍍𑌵𑌿॒𑌤𑍀𑌯॑𑌮𑌤𑌪𑍍𑌯𑌤 । 𑌸𑍋॑-𑌽𑌤𑌾𑌮𑍍𑌯𑌤𑍍 । 𑌸 𑌭𑍁𑌵॒ 𑌇𑌤𑌿॒ 𑌵𑍍𑌯𑌾𑌹॑𑌰𑌤𑍍 ॥ 22 ॥

𑌸𑍋᳚-𑌽𑌨𑍍𑌤𑌰𑌿॑𑌕𑍍𑌷-𑌮𑌸𑍃𑌜𑌤 । 𑌚𑌾॒𑌤𑍁॒𑌰𑍍𑌮𑌾॒𑌸𑍍𑌯𑌾𑌨𑌿॒ 𑌸𑌾𑌮𑌾॑𑌨𑌿 । 𑌸 𑌤𑍃॒𑌤𑍀𑌯॑𑌮𑌤𑌪𑍍𑌯𑌤 । 𑌸𑍋॑-𑌽𑌤𑌾𑌮𑍍𑌯𑌤𑍍 । 𑌸 𑌸𑍁𑌵॒𑌰𑌿𑌤𑌿॒ 𑌵𑍍𑌯𑌾𑌹॑𑌰𑌤𑍍 । 𑌸 𑌦𑌿𑌵॑𑌮𑌸𑍃𑌜𑌤 । 𑌅॒𑌗𑍍𑌨𑌿॒𑌷𑍍𑌟𑍋॒𑌮-𑌮𑍁॒𑌕𑍍𑌥𑍍𑌯॑-𑌮𑌤𑌿𑌰𑌾॒𑌤𑍍𑌰𑌮𑍃𑌚𑌃॑ । 𑌏॒𑌤𑌾 𑌵𑍈 𑌵𑍍𑌯𑌾𑌹𑍃॑𑌤𑌯 𑌇॒𑌮𑍇 𑌲𑍋॒𑌕𑌾𑌃 । 𑌇॒𑌮𑌾-𑌨𑍍𑌖𑌲𑍁॒ 𑌵𑍈 𑌲𑍋॒𑌕𑌾𑌨𑌨𑍁॑ 𑌪𑍍𑌰॒𑌜𑌾𑌃 𑌪॒𑌶𑌵॒𑌶𑍍𑌛𑌨𑍍𑌦𑌾𑌗𑍍𑌂॑𑌸𑌿॒ 𑌪𑍍𑌰𑌾𑌜𑌾॑𑌯𑌨𑍍𑌤 । 𑌯 𑌏॒𑌵𑌮𑍇॒𑌤𑌾𑌃 𑌪𑍍𑌰॒𑌜𑌾𑌪॑𑌤𑍇𑌃 𑌪𑍍𑌰𑌥॒𑌮𑌾 𑌵𑍍𑌯𑌾𑌹𑍃॑𑌤𑍀𑌃॒ 𑌪𑍍𑌰𑌜𑌾॑𑌤𑌾॒ 𑌵𑍇𑌦॑ ॥ 23 ॥

𑌪𑍍𑌰 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿॑-𑌰𑍍𑌮𑌿𑌥𑍁॒𑌨𑍈-𑌰𑍍𑌜𑌾॑𑌯𑌤𑍇 ॥ 𑌸 𑌪𑌞𑍍𑌚॑𑌹𑍋𑌤𑌾𑌰-𑌮𑌸𑍃𑌜𑌤 । 𑌸 𑌹॒𑌵𑌿𑌰𑍍𑌨𑌾-𑌵𑌿॑𑌨𑍍𑌦𑌤 । 𑌤𑌸𑍍𑌮𑍈॒ 𑌸𑍋𑌮॑-𑌸𑍍𑌤॒𑌨𑍁𑌵॒-𑌮𑍍𑌪𑍍𑌰𑌾𑌯॑𑌚𑍍𑌛𑌤𑍍 । 𑌏॒𑌤-𑌤𑍍𑌤𑍇॑ 𑌹॒𑌵𑌿𑌰𑌿𑌤𑌿॑ । 𑌸 𑌪𑌞𑍍𑌚॑𑌹𑍋𑌤𑍍𑌰𑌾 𑌽𑌤𑌪𑍍𑌯𑌤 । 𑌸𑍋॑-𑌽𑌤𑌾𑌮𑍍𑌯𑌤𑍍 । 𑌸 𑌪𑍍𑌰॒𑌤𑍍𑌯𑌙𑍍𑌙॑𑌬𑌾𑌧𑌤 । 𑌸𑍋-𑌽𑌸𑍁॑𑌰𑌾-𑌨𑌸𑍃𑌜𑌤 । 𑌤𑌦॒𑌸𑍍𑌯𑌾 𑌪𑍍𑌰𑌿॑𑌯𑌮𑌾𑌸𑍀𑌤𑍍 ॥ 24 ॥

𑌤-𑌦𑍍𑌦𑍁॒𑌰𑍍𑌵𑌰𑍍𑌣॒𑌗𑍍𑌂॒ 𑌹𑌿𑌰॑𑌣𑍍𑌯𑌮𑌭𑌵𑌤𑍍 । 𑌤-𑌦𑍍𑌦𑍁॒𑌰𑍍𑌵𑌰𑍍𑌣॑𑌸𑍍𑌯॒ 𑌹𑌿𑌰॑𑌣𑍍𑌯𑌸𑍍𑌯॒ 𑌜𑌨𑍍𑌮॑ । 𑌸 𑌦𑍍𑌵𑌿॒𑌤𑍀𑌯॑𑌮𑌤𑌪𑍍𑌯𑌤 । 𑌸𑍋॑-𑌽𑌤𑌾𑌮𑍍𑌯𑌤𑍍 । 𑌸 𑌪𑍍𑌰𑌾𑌂𑌅॑𑌬𑌾𑌧𑌤 । 𑌸 𑌦𑍇॒𑌵𑌾𑌨॑𑌸𑍃𑌜𑌤 । 𑌤𑌦॑𑌸𑍍𑌯 𑌪𑍍𑌰𑌿॒𑌯𑌮॑𑌸𑍀𑌤𑍍 । 𑌤-𑌥𑍍𑌸𑍁॒𑌵𑌰𑍍𑌣॒𑌗𑍍𑌂॒ 𑌹𑌿𑌰॑𑌣𑍍𑌯𑌮𑌭𑌵𑌤𑍍 । 𑌤-𑌥𑍍𑌸𑍁॒𑌵𑌰𑍍𑌣॑𑌸𑍍𑌯॒ 𑌹𑌿𑌰॑𑌣𑍍𑌯𑌸𑍍𑌯॒ 𑌜𑌨𑍍𑌮॑ । 𑌯 𑌏॒𑌵𑌗𑍍𑌂 𑌸𑍁॒𑌵𑌰𑍍𑌣॑𑌸𑍍𑌯॒ 𑌹𑌿𑌰॑𑌣𑍍𑌯𑌸𑍍𑌯॒ 𑌜𑌨𑍍𑌮॒ 𑌵𑍇𑌦॑ ॥ 25 ॥

𑌸𑍁॒𑌵𑌰𑍍𑌣॑ 𑌆॒𑌤𑍍𑌮𑌨𑌾॑ 𑌭𑌵𑌤𑌿 । 𑌦𑍁॒𑌰𑍍𑌵𑌰𑍍𑌣𑍋᳚-𑌽𑌸𑍍𑌯॒ 𑌭𑍍𑌰𑌾𑌤𑍃॑𑌵𑍍𑌯𑌃 । 𑌤𑌸𑍍𑌮𑌾᳚-𑌥𑍍𑌸𑍁॒𑌵𑌰𑍍𑌣॒𑌗𑍍𑌂॒ 𑌹𑌿𑌰॑𑌣𑍍𑌯-𑌮𑍍𑌭𑌾॒𑌰𑍍𑌯᳚𑌮𑍍 । 𑌸𑍁॒𑌵𑌰𑍍𑌣॑ 𑌏॒𑌵 𑌭॑𑌵𑌤𑌿 । 𑌐𑌨॑-𑌮𑍍𑌪𑍍𑌰𑌿॒𑌯-𑌙𑍍𑌗॑𑌚𑍍𑌛𑌤𑌿॒ 𑌨𑌾𑌪𑍍𑌰𑌿॑𑌯𑌮𑍍 ॥ 𑌸 𑌸॒𑌪𑍍𑌤𑌹𑍋॑𑌤𑌾𑌰-𑌮𑌸𑍃𑌜𑌤 । 𑌸 𑌸॒𑌪𑍍𑌤𑌹𑍋᳚𑌤𑍍𑌰𑍈॒𑌵 𑌸𑍁॑𑌵॒𑌰𑍍𑌗𑌂-𑌲𑍋𑌁॒𑌕𑌮𑍈᳚𑌤𑍍 ॥ 𑌤𑍍𑌰𑌿॒𑌣॒𑌵𑍇𑌨॒ 𑌸𑍍𑌤𑍋𑌮𑍇॑𑌨𑍈॒𑌭𑍍𑌯𑍋 𑌲𑍋॒𑌕𑍇𑌭𑍍𑌯𑍋-𑌽𑌸𑍁॑𑌰𑌾॒-𑌨𑍍𑌪𑍍𑌰𑌾𑌣𑍁॑𑌦𑌤 । 𑌤𑍍𑌰॒𑌯॒𑌸𑍍𑌤𑍍𑌰𑌿॒𑌗𑍍𑌂॒𑌶𑍇𑌨॒ 𑌪𑍍𑌰𑌤𑍍𑌯॑𑌤𑌿𑌷𑍍𑌠𑌤𑍍 । 𑌏॒𑌕॒𑌵𑌿॒𑌗𑍍𑌂॒𑌶𑍇𑌨॒ 𑌰𑍁𑌚॑𑌮𑌧𑌤𑍍𑌤 ॥ 26 ॥

𑌸॒𑌪𑍍𑌤॒𑌦॒𑌶𑍇𑌨॒ 𑌪𑍍𑌰𑌾𑌜𑌾॑𑌯𑌤 । 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾𑌨𑍍-𑌥𑍍𑌸𑍋𑌮𑍇॑𑌨॒ 𑌯𑌜॑𑌤𑍇 । 𑌸॒𑌪𑍍𑌤𑌹𑍋᳚𑌤𑍍𑌰𑍈॒𑌵 𑌸𑍁॑𑌵॒𑌰𑍍𑌗𑌂-𑌲𑍋𑌁॒𑌕𑌮𑍇॑𑌤𑌿 । 𑌤𑍍𑌰𑌿॒𑌣॒𑌵𑍇𑌨॒ 𑌸𑍍𑌤𑍋𑌮𑍇॑𑌨𑍈॒𑌭𑍍𑌯𑍋 𑌲𑍋॒𑌕𑍇𑌭𑍍𑌯𑍋॒ 𑌭𑍍𑌰𑌾𑌤𑍃॑𑌵𑍍𑌯𑌾॒𑌨𑍍-𑌪𑍍𑌰𑌣𑍁॑𑌦𑌤𑍇 । 𑌤𑍍𑌰॒𑌯॒𑌸𑍍𑌤𑍍𑌰𑌿॒𑌗𑍍𑌂॒𑌶𑍇𑌨॒ 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 । 𑌏॒𑌕॒𑌵𑌿॒𑌗𑍍𑌂॒𑌶𑍇𑌨॒ 𑌰𑍁𑌚॑-𑌨𑍍𑌧𑌤𑍍𑌤𑍇 । 𑌸॒𑌪𑍍𑌤॒𑌦॒𑌶𑍇𑌨॒ 𑌪𑍍𑌰𑌜𑌾॑𑌯𑌤𑍇 । 𑌤𑌸𑍍𑌮𑌾᳚-𑌥𑍍𑌸𑌪𑍍𑌤𑌦॒𑌶-𑌸𑍍𑌸𑍍𑌤𑍋𑌮𑍋॒ 𑌨 𑌨𑌿॒𑌰𑍍॒𑌹𑍃𑌤𑍍𑌯𑌃॑ । 𑌪𑍍𑌰॒𑌜𑌾𑌪॑𑌤𑌿॒ 𑌰𑍍𑌵𑍈 𑌸॑𑌪𑍍𑌤𑌦॒𑌶𑌃 । 𑌪𑍍𑌰॒𑌜𑌾𑌪॑𑌤𑌿𑌮𑍇॒𑌵 𑌮॑𑌦𑍍𑌧𑍍𑌯॒𑌤𑍋 𑌧॑𑌤𑍍𑌤𑍇॒ 𑌪𑍍𑌰𑌜𑌾᳚𑌤𑍍𑌯𑍈 ॥ 27 ॥

(𑌅॒𑌨॒𑌨𑍍𑌦॒-𑌦𑍍- 𑌭𑍁𑌵॒ 𑌇𑌤𑌿॒ 𑌵𑍍𑌯𑌾𑌹॑𑌰॒-𑌦𑍍- 𑌵𑍇𑌦𑌾॑ - 𑌸𑍀॒-𑌦𑍍- 𑌵𑍇𑌦𑌾॑ - 𑌧𑌤𑍍𑌤॒ - 𑌪𑍍𑌰𑌜𑌾᳚𑌤𑍍𑌯𑍈) (𑌅. 4)

𑌅𑌨𑍁𑌵𑌾𑌕𑌂 5 - 𑌦𑌕𑍍𑌷𑌿𑌣𑌾𑌪𑍍𑌰𑌤𑌿𑌗𑍍𑌰𑌹𑌮𑌨𑍍𑌤𑍍𑌰𑌵𑍍𑌯𑌾𑌖𑍍𑌯𑌾𑌨𑌮𑍍

𑌦𑍇॒𑌵𑌾 𑌵𑍈 𑌵𑌰𑍁॑𑌣𑌮𑌯𑌾𑌜𑌯𑌨𑍍𑌨𑍍 । 𑌸 𑌯𑌸𑍍𑌯𑍈॑ 𑌯𑌸𑍍𑌯𑍈 𑌦𑍇॒𑌵𑌤𑌾॑𑌯𑍈॒ 𑌦𑌕𑍍𑌷𑌿॑𑌣𑌾॒𑌮𑌨॑𑌯𑌤𑍍 । 𑌤𑌾𑌮॑𑌵𑍍𑌲𑍀𑌨𑌾𑌤𑍍 । 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 । 𑌵𑍍𑌯𑌾॒𑌵𑍃𑌤𑍍𑌯॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌮 । 𑌤𑌥𑌾॑ 𑌨𑍋॒ 𑌦𑌕𑍍𑌷𑌿॑𑌣𑌾॒ 𑌨 𑌵𑍍𑌲𑍇᳚𑌷𑍍𑌯॒𑌤𑍀𑌤𑌿॑ । 𑌤𑍇 𑌵𑍍𑌯𑌾॒𑌵𑍃𑌤𑍍𑌯॒ 𑌪𑍍𑌰𑌤𑍍𑌯॑𑌗𑍃𑌹𑍍𑌣𑌨𑍍𑌨𑍍 । 𑌤𑌤𑍋॒ 𑌵𑍈 𑌤𑌾-𑌨𑍍𑌦𑌕𑍍𑌷𑌿॑𑌣𑌾॒ 𑌨𑌾𑌵𑍍𑌲𑍀॑𑌨𑌾𑌤𑍍 । 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾𑌨𑍍 𑌵𑍍𑌯𑌾॒𑌵𑍃𑌤𑍍𑌯॒ 𑌦𑌕𑍍𑌷𑌿॑𑌣𑌾-𑌮𑍍𑌪𑍍𑌰𑌤𑌿𑌗𑍃॒𑌹𑍍𑌣𑌾𑌤𑌿॑ । 𑌨𑍈𑌨॒-𑌨𑍍𑌦𑌕𑍍𑌷𑌿॑𑌣𑌾 𑌵𑍍𑌲𑍀𑌨𑌾𑌤𑌿 ॥ 28 ॥

𑌰𑌾𑌜𑌾᳚ 𑌤𑍍𑌵𑌾॒ 𑌵𑌰𑍁॑𑌣𑍋 𑌨𑌯𑌤𑍁 𑌦𑍇𑌵𑌿 𑌦𑌕𑍍𑌷𑌿𑌣𑍇॒-𑌽𑌗𑍍𑌨𑌯𑍇॒ 𑌹𑌿𑌰॑𑌣𑍍𑌯॒𑌮𑌿𑌤𑍍𑌯𑌾॑𑌹 । 𑌆॒𑌗𑍍𑌨𑍇॒𑌯𑌂-𑌵𑍈𑌁 𑌹𑌿𑌰॑𑌣𑍍𑌯𑌮𑍍 । 𑌸𑍍𑌵𑌯𑍈॒𑌵𑍈𑌨॑-𑌦𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌸𑍋𑌮𑌾॑𑌯॒ 𑌵𑌾𑌸॒ 𑌇𑌤𑍍𑌯𑌾॑𑌹 । 𑌸𑍗॒𑌮𑍍𑌯𑌂-𑌵𑍈𑌁 𑌵𑌾𑌸𑌃॑ । 𑌸𑍍𑌵𑌯𑍈॒𑌵𑍈𑌨॑-𑌦𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌰𑍁॒𑌦𑍍𑌰𑌾𑌯॒ 𑌗𑌾𑌮𑌿𑌤𑍍𑌯𑌾॑𑌹 । 𑌰𑍗॒𑌦𑍍𑌰𑍀 𑌵𑍈 𑌗𑍗𑌃 । 𑌸𑍍𑌵𑌯𑍈॒𑌵𑍈𑌨𑌾᳚-𑌨𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌵𑌰𑍁॑𑌣𑌾॒𑌯𑌾𑌶𑍍𑌵॒𑌮𑌿𑌤𑍍𑌯𑌾॑𑌹 ॥ 29 ॥

𑌵𑌾॒𑌰𑍁॒𑌣𑍋 𑌵𑌾 𑌅𑌶𑍍𑌵𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌪𑍍𑌰𑌾॒𑌜𑌾𑌪॑𑌤𑌯𑍇॒ 𑌪𑍁𑌰𑍁॑𑌷॒𑌮𑌿𑌤𑍍𑌯𑌾॑𑌹 । 𑌪𑍍𑌰𑌾॒𑌜𑌾॒𑌪॒𑌤𑍍𑌯𑍋 𑌵𑍈 𑌪𑍁𑌰𑍁॑𑌷𑌃 । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌮𑌨॑𑌵𑍇॒ 𑌤𑌲𑍍𑌪॒𑌮𑌿𑌤𑍍𑌯𑌾॑𑌹 । 𑌮𑌾॒𑌨॒𑌵𑍋 𑌵𑍈 𑌤𑌲𑍍𑌪𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌉॒𑌤𑍍𑌤𑌾॒𑌨𑌾𑌯𑌾᳚𑌙𑍍𑌗𑍀𑌰॒𑌸𑌾𑌯𑌾𑌨॒ 𑌇𑌤𑍍𑌯𑌾॑𑌹 । 𑌇॒𑌯𑌂-𑌵𑌾𑌁 𑌉॑𑌤𑍍𑌤𑌾॒𑌨 𑌆᳚𑌙𑍍𑌗𑍀𑌰॒𑌸𑌃 ॥ 30 ॥

𑌅॒𑌨𑌯𑍈॒𑌵𑍈𑌨॒𑌤𑍍-𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 ॥ 𑌵𑍈॒𑌶𑍍𑌵𑌾॒𑌨॒𑌰𑍍𑌯𑌾𑌰𑍍𑌚𑌾 𑌰𑌥॒-𑌮𑍍𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 । 𑌵𑍈॒𑌶𑍍𑌵𑌾॒𑌨॒𑌰𑍋 𑌵𑍈 𑌦𑍇॒𑌵𑌤॑𑌯𑌾॒ 𑌰𑌥𑌃॑ । 𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 ॥ 𑌤𑍇𑌨𑌾॑𑌮𑍃𑌤॒𑌤𑍍𑌵𑌮॑𑌶𑍍𑌯𑌾॒-𑌮𑌿𑌤𑍍𑌯𑌾॑𑌹 । 𑌅॒𑌮𑍃𑌤॑𑌮𑍇॒𑌵𑌾𑌤𑍍𑌮𑌨𑍍-𑌧॑𑌤𑍍𑌤𑍇 ॥ 𑌵𑌯𑍋॑ 𑌦𑌾॒𑌤𑍍𑌰 𑌇𑌤𑍍𑌯𑌾॑𑌹 । 𑌵𑌯॑ 𑌏॒𑌵𑍈𑌨॑-𑌙𑍍𑌕𑍃॒𑌤𑍍𑌵𑌾 । 𑌸𑍁॒𑌵॒𑌰𑍍𑌗𑌂-𑌲𑍋𑌁॒𑌕-𑌙𑍍𑌗॑𑌮𑌯𑌤𑌿 ॥ 𑌮𑌯𑍋॒ 𑌮𑌹𑍍𑌯॑𑌮𑌸𑍍𑌤𑍁 𑌪𑍍𑌰𑌤𑌿𑌗𑍍𑌰𑌹𑍀॒𑌤𑍍𑌰 𑌇𑌤𑍍𑌯𑌾॑𑌹 ॥ 31 ॥

𑌯𑌦𑍍𑌵𑍈 𑌶𑌿॒𑌵𑌮𑍍 । 𑌤𑌨𑍍𑌮𑌯𑌃॑ । 𑌆॒𑌤𑍍𑌮𑌨॑ 𑌏॒𑌵𑍈𑌷𑌾 𑌪𑌰𑍀᳚𑌤𑍍𑌤𑌿𑌃 ॥ 𑌕 𑌇॒𑌦-𑌙𑍍𑌕𑌸𑍍𑌮𑌾॑ 𑌅𑌦𑌾॒𑌦𑌿𑌤𑍍𑌯𑌾॑𑌹 । 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑍈 𑌕𑌃 । 𑌸 𑌪𑍍𑌰॒𑌜𑌾𑌪॑𑌤𑌯𑍇 𑌦𑌦𑌾𑌤𑌿 ॥ 𑌕𑌾𑌮𑌃॒ 𑌕𑌾𑌮𑌾॒𑌯𑍇𑌤𑍍𑌯𑌾॑𑌹 । 𑌕𑌾𑌮𑍇॑𑌨॒ 𑌹𑌿 𑌦𑌦𑌾॑𑌤𑌿 । 𑌕𑌾𑌮𑍇॑𑌨 𑌪𑍍𑌰𑌤𑌿𑌗𑍃॒𑌹𑍍𑌣𑌾𑌤𑌿॑ ॥ 𑌕𑌾𑌮𑍋॑ 𑌦𑌾॒𑌤𑌾 𑌕𑌾𑌮𑌃॑ 𑌪𑍍𑌰𑌤𑌿 𑌗𑍍𑌰𑌹𑍀॒𑌤𑍇𑌤𑍍𑌯𑌾॑𑌹 ॥ 32 ॥

𑌕𑌾𑌮𑍋॒ 𑌹𑌿 𑌦𑌾॒𑌤𑌾 । 𑌕𑌾𑌮𑌃॑ 𑌪𑍍𑌰𑌤𑌿 𑌗𑍍𑌰𑌹𑍀॒𑌤𑌾 ॥ 𑌕𑌾𑌮𑌗𑍍𑌂॑ 𑌸𑌮𑍁॒𑌦𑍍𑌰-𑌮𑌾𑌵𑌿॒𑌶𑍇𑌤𑍍𑌯𑌾॑𑌹 । 𑌸॒𑌮𑍁॒𑌦𑍍𑌰 𑌇॑𑌵॒ 𑌹𑌿 𑌕𑌾𑌮𑌃॑ । 𑌨𑍇𑌵॒ 𑌹𑌿 𑌕𑌾𑌮॒𑌸𑍍𑌯𑌾𑌨𑍍𑌤𑍋-𑌽𑌸𑍍𑌤𑌿॑ । 𑌨 𑌸॑𑌮𑍁॒𑌦𑍍𑌰𑌸𑍍𑌯॑ ॥ 𑌕𑌾𑌮𑍇॑𑌨 𑌤𑍍𑌵𑌾॒ 𑌪𑍍𑌰𑌤𑌿॑ 𑌗𑍃𑌹𑍍𑌣𑌾॒𑌮𑍀𑌤𑍍𑌯𑌾॑𑌹 । 𑌯𑍇𑌨॒ 𑌕𑌾𑌮𑍇॑𑌨 𑌪𑍍𑌰𑌤𑌿 𑌗𑍃॒𑌹𑍍𑌣𑌾𑌤𑌿॑ । 𑌸 𑌏॒𑌵𑍈𑌨॑𑌮॒𑌮𑍁𑌷𑍍𑌮𑌿॑𑌲𑍍 𑌁𑌲𑍋॒𑌕𑍇 𑌕𑌾𑌮॒ 𑌆𑌗॑𑌚𑍍𑌛𑌤𑌿 ॥ 𑌕𑌾𑌮𑍈॒𑌤𑌤𑍍𑌤॑ 𑌏॒𑌷𑌾 𑌤𑍇॑ 𑌕𑌾𑌮॒ 𑌦𑌕𑍍𑌷𑌿॒𑌣𑍇𑌤𑍍𑌯𑌾॑𑌹 । 𑌕𑌾𑌮॑ 𑌏॒𑌵 𑌤-𑌦𑍍𑌯𑌜॑𑌮𑌾𑌨𑍋॒-𑌽𑌮𑍁𑌷𑍍𑌮𑌿॑𑌲𑍍 𑌁𑌲𑍋॒𑌕𑍇 𑌦𑌕𑍍𑌷𑌿॑𑌣𑌾𑌮𑌿𑌚𑍍𑌛𑌤𑌿 । 𑌨 𑌪𑍍𑌰॑𑌤𑌿𑌗𑍍𑌰𑌹𑍀॒𑌤𑌰𑌿॑ ॥ 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾𑌨𑍍-𑌦𑌕𑍍𑌷𑌿॑𑌣𑌾-𑌮𑍍𑌪𑍍𑌰𑌤𑌿𑌗𑍃॒𑌹𑍍𑌣𑌾𑌤𑌿॑ । 𑌅॒𑌨𑍃॒𑌣𑌾𑌮𑍇॒𑌵𑍈𑌨𑌾॒-𑌮𑍍𑌪𑍍𑌰𑌤𑌿॑ 𑌗𑍃𑌹𑍍𑌣𑌾𑌤𑌿 ॥ 33 ॥

(𑌵𑍍𑌲𑍀॒𑌨𑌾॒𑌤𑍍𑌯 - 𑌶𑍍𑌵॒𑌮𑌿𑌤𑍍𑌯𑌾॑𑌹𑌾 - 𑌙𑍍𑌗𑌿𑌰॒𑌸𑌃 - 𑌪𑍍𑌰॑𑌤𑌿𑌗𑍍𑌰𑌹𑍀॒𑌤𑍍𑌰 𑌇𑌤𑍍𑌯𑌾॑𑌹 - 𑌪𑍍𑌰𑌤𑌿𑌗𑍍𑌰𑌹𑍀॒𑌤𑍇𑌤𑍍𑌯𑌾॑𑌹॒ - 𑌦𑌕𑍍𑌷𑌿॒𑌣𑍇𑌤𑍍𑌯𑌾॑𑌹 𑌚॒𑌤𑍍𑌵𑌾𑌰𑌿॑ 𑌚) (𑌅. 5)

𑌅𑌨𑍁𑌵𑌾𑌕𑌂 6 - 𑌦𑍍𑌵𑌾𑌦𑌶𑌾𑌹𑌦𑌶𑌮𑍇-𑌽𑌹𑌨𑌿 𑌹𑍋𑌤𑍃𑌮𑌨𑍍𑌤𑍍𑌰𑌾𑌃

𑌅𑌨𑍍𑌤𑍋॒ 𑌵𑌾 𑌏॒𑌷 𑌯॒𑌜𑍍𑌞𑌸𑍍𑌯॑ । 𑌯-𑌦𑍍𑌦॑𑌶॒𑌮𑌮𑌹𑌃॑ । 𑌦॒𑌶॒𑌮𑍇-𑌽𑌹᳚𑌨𑍍-𑌥𑍍𑌸𑌰𑍍𑌪𑌰𑌾॒𑌜𑍍𑌞𑌿𑌯𑌾॑ 𑌋॒𑌗𑍍𑌭𑌿-𑌸𑍍𑌸𑍍𑌤𑍁॑𑌵𑌨𑍍𑌤𑌿 । 𑌯॒𑌜𑍍𑌞𑌸𑍍𑌯𑍈॒𑌵𑌾𑌨𑍍𑌤॑-𑌙𑍍𑌗॒𑌤𑍍𑌵𑌾 । 𑌅॒𑌨𑍍𑌨𑌾𑌦𑍍𑌯॒𑌮𑌵॑𑌰𑍁𑌨𑍍𑌧𑌤𑍇 ॥ 𑌤𑌿॒𑌸𑍃𑌭𑌿𑌃॑ 𑌸𑍍𑌤𑍁𑌵𑌨𑍍𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 । 𑌏॒𑌭𑍍𑌯 𑌏॒𑌵 𑌲𑍋॒𑌕𑍇𑌭𑍍𑌯𑍋॒-𑌽𑌨𑍍𑌨𑌾𑌦𑍍𑌯॒𑌮𑌵॑𑌰𑍁𑌨𑍍𑌧𑌤𑍇 । 𑌪𑍃𑌶𑍍𑌨𑌿॑𑌵𑌤𑍀-𑌰𑍍𑌭𑌵𑌨𑍍𑌤𑌿 । 𑌅𑌨𑍍𑌨𑌂॒-𑌵𑍈𑌁 𑌪𑍃𑌶𑍍𑌨𑌿॑ ॥ 34 ॥

𑌅𑌨𑍍𑌨॑𑌮𑍇॒𑌵𑌾𑌵॑-𑌰𑍁𑌨𑍍𑌧𑌤𑍇 ॥ 𑌮𑌨॑𑌸𑌾॒ 𑌪𑍍𑌰𑌸𑍍𑌤𑍗॑𑌤𑌿 । 𑌮𑌨॒𑌸𑍋𑌦𑍍𑌗𑌾॑𑌯𑌤𑌿 । 𑌮𑌨॑𑌸𑌾॒ 𑌪𑍍𑌰𑌤𑌿॑ 𑌹𑌰𑌤𑌿 । 𑌮𑌨॑ 𑌇𑌵॒ 𑌹𑌿 𑌪𑍍𑌰॒𑌜𑌾𑌪॑𑌤𑌿𑌃 । 𑌪𑍍𑌰॒𑌜𑌾𑌪॑𑌤𑍇॒𑌰𑌾𑌪𑍍𑌤𑍍𑌯𑍈᳚ ॥ 𑌦𑍇॒𑌵𑌾 𑌵𑍈 𑌸॒𑌰𑍍𑌪𑌾𑌃 । 𑌤𑍇𑌷𑌾॑𑌮𑌿॒𑌯𑌗𑍍𑌂 𑌰𑌾𑌜𑍍𑌞𑍀᳚ । 𑌯-𑌥𑍍𑌸॑𑌰𑍍𑌪𑌰𑌾॒𑌜𑍍𑌞𑌿𑌯𑌾॑ 𑌋॒𑌗𑍍𑌭𑌿-𑌸𑍍𑌸𑍍𑌤𑍁॒𑌵𑌨𑍍𑌤𑌿॑ । 𑌅॒𑌸𑍍𑌯𑌾𑌮𑍇॒𑌵 𑌪𑍍𑌰𑌤𑌿॑ 𑌤𑌿𑌷𑍍𑌠𑌨𑍍𑌤𑌿 ॥ 35 ॥

𑌚𑌤𑍁॑𑌰𑍍𑌹𑍋𑌤𑍄॒𑌨𑍍॒. 𑌹𑍋𑌤𑌾॒ 𑌵𑍍𑌯𑌾𑌚॑𑌷𑍍𑌟𑍇 । 𑌸𑍍𑌤𑍁॒𑌤𑌮𑌨𑍁॑𑌶𑌗𑍍𑌂𑌸𑌤𑌿॒ 𑌶𑌾𑌨𑍍𑌤𑍍𑌯𑍈᳚ ॥ 𑌅𑌨𑍍𑌤𑍋॒ 𑌵𑌾 𑌏॒𑌷 𑌯॒𑌜𑍍𑌞𑌸𑍍𑌯॑ । 𑌯-𑌦𑍍𑌦॑𑌶॒𑌮𑌮𑌹𑌃॑ । 𑌏॒𑌤-𑌤𑍍𑌖𑌲𑍁॒ 𑌵𑍈 𑌦𑍇॒𑌵𑌾𑌨𑌾᳚-𑌮𑍍𑌪𑌰॒𑌮-𑌙𑍍𑌗𑍁𑌹𑍍𑌯॒-𑌮𑍍𑌬𑍍𑌰𑌹𑍍𑌮॑ । 𑌯𑌚𑍍𑌚𑌤𑍁॑𑌰𑍍𑌹𑍋𑌤𑌾𑌰𑌃 । 𑌦॒𑌶॒𑌮𑍇-𑌽𑌹॒𑌗𑍍𑌗𑍍॒-𑌶𑍍𑌚𑌤𑍁॑𑌰𑍍𑌹𑍋𑌤𑍄॒𑌨𑍍 𑌵𑍍𑌯𑌾𑌚॑𑌷𑍍𑌟𑍇 । 𑌯॒𑌜𑍍𑌞𑌸𑍍𑌯𑍈॒𑌵𑌾𑌨𑍍𑌤॑-𑌙𑍍𑌗॒𑌤𑍍𑌵𑌾 । 𑌪॒𑌰॒𑌮-𑌨𑍍𑌦𑍇॒𑌵𑌾𑌨𑌾॒-𑌙𑍍𑌗𑍁𑌹𑍍𑌯॒-𑌮𑍍𑌬𑍍𑌰𑌹𑍍𑌮𑌾𑌵॑𑌰𑍁𑌨𑍍𑌧𑍇 । 𑌤𑌦𑍇॒𑌵 𑌪𑍍𑌰॑𑌕𑌾॒𑌶-𑌙𑍍𑌗॑𑌮𑌯𑌤𑌿 ॥ 36 ॥

𑌤𑌦𑍇॑𑌨-𑌮𑍍𑌪𑍍𑌰𑌕𑌾॒𑌶-𑌙𑍍𑌗॒𑌤𑌮𑍍 । 𑌪𑍍𑌰॒𑌕𑌾॒𑌶-𑌮𑍍𑌪𑍍𑌰॒𑌜𑌾𑌨𑌾᳚-𑌙𑍍𑌗𑌮𑌯𑌤𑌿 ॥ 𑌵𑌾𑌚𑌂॑-𑌯𑌁𑌚𑍍𑌛𑌤𑌿 । 𑌯॒𑌜𑍍𑌞𑌸𑍍𑌯॒ 𑌧𑍃𑌤𑍍𑌯𑍈᳚ ॥ 𑌯॒𑌜॒𑌮𑌾॒𑌨॒𑌦𑍇॒𑌵॒𑌤𑍍𑌯𑌂॑-𑌵𑌾𑌁 𑌅𑌹𑌃॑ । 𑌭𑍍𑌰𑌾॒𑌤𑍃॒𑌵𑍍𑌯॒𑌦𑍇॒𑌵॒𑌤𑍍𑌯𑌾॑ 𑌰𑌾𑌤𑍍𑌰𑌿𑌃॑ । 𑌅𑌹𑍍𑌨𑌾॒ 𑌰𑌾𑌤𑍍𑌰𑌿॑-𑌨𑍍𑌧𑍍𑌯𑌾𑌯𑍇𑌤𑍍 । 𑌭𑍍𑌰𑌾𑌤𑍃॑𑌵𑍍𑌯𑌸𑍍𑌯𑍈॒𑌵 𑌤𑌲𑍍𑌲𑍋॒𑌕𑌂-𑌵𑍃𑌁॑𑌙𑍍𑌕𑍍𑌤𑍇 । 𑌯𑌦𑍍𑌦𑌿𑌵𑌾॒ 𑌵𑌾𑌚𑌂॑-𑌵𑌿𑌁𑌸𑍃॒𑌜𑍇𑌤𑍍 । 𑌅𑌹॒𑌰𑍍𑌭𑍍𑌰𑌾𑌤𑍃॑𑌵𑍍𑌯𑌾॒𑌯𑍋𑌚𑍍𑌛𑌿𑌗𑍍𑌂॑𑌷𑍇𑌤𑍍 । 𑌯𑌨𑍍𑌨𑌕𑍍𑌤𑌂॑-𑌵𑌿𑌁𑌸𑍃॒𑌜𑍇𑌤𑍍 । 𑌰𑌾𑌤𑍍𑌰𑌿॒-𑌮𑍍𑌭𑍍𑌰𑌾𑌤𑍃॑𑌵𑍍𑌯𑌾॒𑌯𑍋𑌚𑍍𑌛𑌿𑌗𑍍𑌂॑𑌷𑍇𑌤𑍍 । 𑌅॒𑌧𑌿॒𑌵𑍃॒𑌕𑍍𑌷॒𑌸𑍂॒𑌰𑍍𑌯𑍇 𑌵𑌾𑌚𑌂॒-𑌵𑌿𑌁𑌸𑍃॑𑌜𑌤𑌿 । 𑌏॒𑌤𑌾𑌵॑𑌨𑍍𑌤𑌮𑍇॒𑌵𑌾𑌸𑍍𑌮𑍈॑ 𑌲𑍋॒𑌕𑌮𑍁𑌚𑍍𑌛𑌿𑌗𑍍𑌂॑𑌷𑌤𑌿 । 𑌯𑌾𑌵॑𑌦𑌾𑌦𑌿॒𑌤𑍍𑌯𑍋᳚-𑌽𑌸𑍍𑌤॒𑌮𑍇𑌤𑌿॑ ॥ 37 ॥

(𑌪𑍃𑌶𑍍𑌨𑌿॑ - 𑌤𑌿𑌷𑍍𑌠𑌨𑍍𑌤𑌿 - 𑌗𑌮𑌯𑌤𑌿 - 𑌶𑌿𑌗𑍍𑌂𑌷𑍇॒-𑌤𑍍𑌪𑌞𑍍𑌚॑ 𑌚) (𑌅. 6)

𑌅𑌨𑍁𑌵𑌾𑌕𑌂 7 - 𑌸𑌪𑍍𑌤𑌹𑍋𑌤𑍃𑌮𑌨𑍍𑌤𑍍𑌰𑌸𑌾𑌧𑍍𑌯𑌯𑌜𑍍𑌞𑌪𑍍𑌰𑌶𑌂𑌸𑌾

𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌤𑌾-𑌸𑍍𑌸𑍃॒𑌷𑍍𑌟𑌾-𑌸𑍍𑌸𑌮॑𑌶𑍍𑌲𑌿𑌷𑍍𑌯𑌨𑍍𑌨𑍍 । 𑌤𑌾 𑌰𑍂॒𑌪𑍇𑌣𑌾𑌨𑍁॒ 𑌪𑍍𑌰𑌾𑌵𑌿॑𑌶𑌤𑍍 । 𑌤𑌸𑍍𑌮𑌾॑𑌦𑌾𑌹𑍁𑌃 । 𑌰𑍂॒𑌪𑌂-𑌵𑍈𑌁 𑌪𑍍𑌰॒𑌜𑌾𑌪॑𑌤𑌿॒𑌰𑌿𑌤𑌿॑ । 𑌤𑌾 𑌨𑌾𑌮𑍍𑌨𑌾-𑌽𑌨𑍁॒ 𑌪𑍍𑌰𑌾𑌵𑌿॑𑌶𑌤𑍍 । 𑌤𑌸𑍍𑌮𑌾॑𑌦𑌾𑌹𑍁𑌃 । 𑌨𑌾𑌮॒ 𑌵𑍈 𑌪𑍍𑌰॒𑌜𑌾𑌪॑𑌤𑌿॒𑌰𑌿𑌤𑌿॑ । 𑌤𑌸𑍍𑌮𑌾॒𑌦𑌪𑍍𑌯𑌾॑ 𑌽𑌮𑌿॒𑌤𑍍𑌰𑍗 𑌸॒𑌗𑌨𑍍𑌤𑍍𑌯॑ । 𑌨𑌾𑌮𑍍𑌨𑌾॒ 𑌚𑍇𑌦𑍍𑌧𑍍𑌵𑌯𑍇॑𑌤𑍇 ॥ 38 ॥

𑌮𑌿॒𑌤𑍍𑌰𑌮𑍇॒𑌵 𑌭॑𑌵𑌤𑌃 ॥ 𑌪𑍍𑌰॒𑌜𑌾𑌪॑𑌤𑌿-𑌰𑍍𑌦𑍇𑌵𑌾𑌸𑍁॒𑌰𑌾𑌨॑𑌸𑍃𑌜𑌤 । 𑌸 𑌇𑌨𑍍𑌦𑍍𑌰॒𑌮𑌪𑌿॒ 𑌨𑌾𑌸𑍃॑𑌜𑌤 । 𑌤-𑌨𑍍𑌦𑍇॒𑌵𑌾 𑌅॑𑌬𑍍𑌰𑍁𑌵𑌨𑍍𑌨𑍍 । 𑌇𑌨𑍍𑌦𑍍𑌰॑-𑌨𑍍𑌨𑍋 𑌜𑌨॒𑌯𑍇𑌤𑌿॑ । 𑌸 𑌆॒𑌤𑍍𑌮-𑌨𑍍𑌨𑌿𑌨𑍍𑌦𑍍𑌰॑-𑌮𑌪𑌶𑍍𑌯𑌤𑍍 । 𑌤𑌮॑𑌸𑍃𑌜𑌤 । 𑌤-𑌨𑍍𑌤𑍍𑌰𑌿॒𑌷𑍍𑌟𑍁𑌗𑍍-𑌵𑍀॒𑌰𑍍𑌯॑-𑌮𑍍𑌭𑍂॒𑌤𑍍𑌵𑌾-𑌽𑌨𑍁॒ 𑌪𑍍𑌰𑌾𑌵𑌿॑𑌶𑌤𑍍 । 𑌤𑌸𑍍𑌯॒ 𑌵𑌜𑍍𑌰𑌃॑ 𑌪𑌞𑍍𑌚𑌦॒𑌶𑍋 𑌹𑌸𑍍𑌤॒ 𑌆𑌪॑𑌦𑍍𑌯𑌤 । 𑌤𑍇𑌨𑍋॒𑌦𑌯𑍍𑌯𑌾𑌸𑍁॑𑌰𑌾𑌨॒𑌭𑍍𑌯॑ 𑌭𑌵𑌤𑍍 ॥ 39 ॥

𑌯 𑌏॒𑌵𑌂-𑌵𑍇𑌁𑌦॑ । 𑌅॒𑌭𑌿 𑌭𑍍𑌰𑌾𑌤𑍃॑𑌵𑍍𑌯𑌾-𑌨𑍍𑌭𑌵𑌤𑌿 ॥ 𑌤𑍇 𑌦𑍇॒𑌵𑌾 𑌅𑌸𑍁॑𑌰𑍈-𑌰𑍍𑌵𑌿॒𑌜𑌿𑌤𑍍𑌯॑ । 𑌸𑍁॒𑌵॒𑌰𑍍𑌗𑌂-𑌲𑍋𑌁॒𑌕𑌮𑌾॑𑌯𑌨𑍍𑌨𑍍 । 𑌤𑍇॑-𑌽𑌮𑍁𑌷𑍍𑌮𑌿॑𑌲𑍍 𑌁𑌲𑍋॒𑌕𑍇 𑌵𑍍𑌯॑𑌕𑍍𑌷𑍁𑌦𑍍𑌧𑍍𑌯𑌨𑍍𑌨𑍍 । 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 । 𑌅॒𑌮𑍁𑌤𑌃॑ 𑌪𑍍𑌰𑌦𑌾𑌨𑌂॒-𑌵𑌾𑌁 𑌉𑌪॑𑌜𑌿𑌜𑍀𑌵𑌿॒𑌮𑍇𑌤𑌿॑ । 𑌤𑍇 𑌸॒𑌪𑍍𑌤𑌹𑍋॑𑌤𑌾𑌰𑌂-𑌯𑌁॒𑌜𑍍𑌞𑌂-𑌵𑌿𑌁॒𑌧𑌾𑌯𑌾॒𑌯𑌾𑌸𑍍𑌯᳚𑌮𑍍 । 𑌆॒𑌙𑍍𑌗𑍀॒𑌰॒𑌸-𑌮𑍍𑌪𑍍𑌰𑌾𑌹𑌿॑𑌣𑍍𑌵𑌨𑍍𑌨𑍍 । 𑌏॒𑌤𑍇𑌨𑌾॒𑌮𑍁𑌤𑍍𑌰॑ 𑌕𑌲𑍍𑌪॒𑌯𑍇𑌤𑌿॑ ॥ 40 ॥

𑌤𑌸𑍍𑌯॒ 𑌵𑌾 𑌇॒𑌯-𑌙𑍍𑌕𑍍𑌲𑍃𑌪𑍍𑌤𑌿𑌃॑ । 𑌯𑌦𑌿॒𑌦-𑌙𑍍𑌕𑌿-𑌞𑍍𑌚॑ । 𑌯 𑌏॒𑌵𑌂-𑌵𑍇𑌁𑌦॑ । 𑌕𑌲𑍍𑌪॑𑌤𑍇-𑌽𑌸𑍍𑌮𑍈 । 𑌸 𑌵𑌾 𑌅॒𑌯-𑌮𑍍𑌮॑𑌨𑍁॒𑌷𑍍𑌯𑍇॑𑌷𑍁 𑌯॒𑌜𑍍𑌞-𑌸𑍍𑌸॒𑌪𑍍𑌤𑌹𑍋॑𑌤𑌾 । 𑌅॒𑌮𑍁𑌤𑍍𑌰॑ 𑌸॒𑌦𑍍𑌭𑍍𑌯𑍋 𑌦𑍇॒𑌵𑍇𑌭𑍍𑌯𑍋॑ 𑌹॒𑌵𑍍𑌯𑌂-𑌵𑌁॑𑌹𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ । 𑌉𑌪𑍈॑𑌨𑌂-𑌯𑌁॒𑌜𑍍𑌞𑍋 𑌨॑𑌮𑌤𑌿 ॥ 𑌸𑍋॑-𑌽𑌮𑌨𑍍𑌯𑌤 । 𑌅॒𑌭𑌿 𑌵𑌾 𑌇॒𑌮𑍇᳚-𑌽𑌸𑍍𑌮𑌾-𑌲𑍍𑌲𑍋॒𑌕𑌾𑌦॒𑌮𑍁𑌂𑌲𑍋𑌁॒𑌕-𑌙𑍍𑌕॑𑌮𑌿𑌷𑍍𑌯𑌨𑍍𑌤॒ 𑌇𑌤𑌿॑ । 𑌸 𑌵𑌾𑌚॑𑌸𑍍𑌪𑌤𑍇॒ 𑌹𑍃𑌦𑌿𑌤𑌿॒ 𑌵𑍍𑌯𑌾𑌹॑𑌰𑌤𑍍 । 𑌤𑌸𑍍𑌮𑌾᳚-𑌤𑍍𑌪𑍁॒𑌤𑍍𑌰𑍋 𑌹𑍃𑌦॑𑌯𑌮𑍍 । 𑌤𑌸𑍍𑌮𑌾॑𑌦॒𑌸𑍍𑌮𑌾-𑌲𑍍𑌲𑍋॒𑌕𑌾𑌦॒𑌮𑍁𑌂-𑌲𑍋𑌁॒𑌕-𑌨𑍍𑌨𑌾𑌭𑌿𑌕𑌾॑𑌮𑌯𑌨𑍍𑌤𑍇 । 𑌪𑍁॒𑌤𑍍𑌰𑍋 𑌹𑌿 𑌹𑍃𑌦॑𑌯𑌮𑍍 ॥ 41 ॥

(𑌹𑍍𑌵𑌯𑍇॑𑌤 - 𑌅𑌭𑌵𑌤𑍍 - 𑌕𑌲𑍍𑌪॒𑌯𑍇 - 𑌤𑍀𑌤𑌿॑ 𑌚॒𑌤𑍍𑌵𑌾𑌰𑌿॑ 𑌚) (𑌅. 7)

𑌅𑌨𑍁𑌵𑌾𑌕𑌂 8 - 𑌹𑍋𑌤𑍃𑌮𑌨𑍍𑌤𑍍𑌰𑌾𑌣𑌾𑌂 𑌸𑍋𑌮𑌯𑌾𑌗𑌾𑌙𑍍𑌗𑌤𑍍𑌵𑌮𑍍

𑌦𑍇॒𑌵𑌾 𑌵𑍈 𑌚𑌤𑍁॑𑌰𑍍𑌹𑍋𑌤𑍃𑌭𑌿-𑌰𑍍𑌯॒𑌜𑍍𑌞𑌮॑𑌤𑌨𑍍𑌵𑌤 । 𑌤𑍇 𑌵𑌿 𑌪𑌾॒𑌪𑍍𑌮𑌨𑌾॒ 𑌭𑍍𑌰𑌾𑌤𑍃॑𑌵𑍍𑌯𑍇॒𑌣𑌾𑌜॑𑌯𑌨𑍍𑌤 । 𑌅॒𑌭𑌿 𑌸𑍁॑𑌵॒𑌰𑍍𑌗𑌂-𑌲𑍋𑌁॒𑌕𑌮॑𑌜𑌯𑌨𑍍𑌨𑍍 । 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾𑌗𑍍-𑌶𑍍𑌚𑌤𑍁॑𑌰𑍍𑌹𑍋𑌤𑍃𑌭𑌿𑌰𑍍𑌯॒𑌜𑍍𑌞-𑌨𑍍𑌤॑𑌨𑍁॒𑌤𑍇 । 𑌵𑌿 𑌪𑌾॒𑌪𑍍𑌮𑌨𑌾॒ 𑌭𑍍𑌰𑌾𑌤𑍃॑𑌵𑍍𑌯𑍇𑌣 𑌜𑌯𑌤𑍇 । 𑌅॒𑌭𑌿 𑌸𑍁॑𑌵॒𑌰𑍍𑌗𑌂-𑌲𑍋𑌁॒𑌕-𑌞𑍍𑌜॑𑌯𑌤𑌿 ॥ 𑌷𑌡𑍍𑌢𑍋᳚𑌤𑍍𑌰𑌾 𑌪𑍍𑌰𑌾𑌯॒𑌣𑍀𑌯॒𑌮𑌾𑌸𑌾॑𑌦𑌯𑌤𑌿 । 𑌅॒𑌮𑍁𑌷𑍍𑌮𑍈॒ 𑌵𑍈 𑌲𑍋॒𑌕𑌾𑌯॒ 𑌷𑌡𑍍𑌢𑍋॑𑌤𑌾 । 𑌘𑍍𑌨𑌨𑍍𑌤𑌿॒ 𑌖𑌲𑍁॒ 𑌵𑌾 𑌏॒𑌤-𑌥𑍍𑌸𑍋𑌮᳚𑌮𑍍 । 𑌯𑌦॑𑌭𑌿𑌷𑍁॒𑌣𑍍𑌵𑌨𑍍𑌤𑌿॑ ॥ 42 ॥

𑌋॒𑌜𑍁॒𑌧𑍈𑌵𑍈𑌨॑𑌮॒𑌮𑍁𑌂-𑌲𑍋𑌁॒𑌕-𑌙𑍍𑌗॑𑌮𑌯𑌤𑌿 । 𑌚𑌤𑍁॑𑌰𑍍𑌹𑍋𑌤𑍍𑌰𑌾 𑌽𑌽𑌤𑌿॒𑌤𑍍𑌥𑍍𑌯𑌮𑍍 । 𑌯𑌶𑍋॒ 𑌵𑍈 𑌚𑌤𑍁॑𑌰𑍍𑌹𑍋𑌤𑌾 । 𑌯𑌶॑ 𑌏॒𑌵𑌾𑌤𑍍𑌮𑌨𑍍-𑌧॑𑌤𑍍𑌤𑍇 । 𑌪𑌞𑍍𑌚॑𑌹𑍋𑌤𑍍𑌰𑌾 𑌪॒𑌶𑍁𑌮𑍁𑌪॑ 𑌸𑌾𑌦𑌯𑌤𑌿 । 𑌸𑍁॒𑌵॒𑌰𑍍𑌗𑍍𑌯𑍋॑ 𑌵𑍈 𑌪𑌞𑍍𑌚॑𑌹𑍋𑌤𑌾 । 𑌯𑌜॑𑌮𑌾𑌨𑌃 𑌪॒𑌶𑍁𑌃 । 𑌯𑌜॑𑌮𑌾𑌨𑌮𑍇॒𑌵 𑌸𑍁॑𑌵॒𑌰𑍍𑌗𑌂-𑌲𑍋𑌁॒𑌕-𑌙𑍍𑌗॑𑌮𑌯𑌤𑌿 । 𑌗𑍍𑌰𑌹𑌾᳚𑌨𑍍-𑌗𑍃𑌹𑍀॒𑌤𑍍𑌵𑌾 𑌸॒𑌪𑍍𑌤𑌹𑍋॑𑌤𑌾𑌰-𑌞𑍍𑌜𑍁𑌹𑍋𑌤𑌿 । 𑌇॒𑌨𑍍𑌦𑍍𑌰𑌿॒𑌯𑌂-𑌵𑍈𑌁 𑌸॒𑌪𑍍𑌤𑌹𑍋॑𑌤𑌾 ॥ 43 ॥

𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵𑌾𑌤𑍍𑌮𑌨𑍍-𑌧॑𑌤𑍍𑌤𑍇 ॥ 𑌯𑍋 𑌵𑍈 𑌚𑌤𑍁॑𑌰𑍍𑌹𑍋𑌤𑍄-𑌨𑌨𑍁𑌸𑌵॒𑌨-𑌨𑍍𑌤॒𑌰𑍍𑌪𑌯॑𑌤𑌿 । 𑌤𑍃𑌪𑍍𑌯॑𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿𑌃॑ । 𑌉𑌪𑍈॑𑌨𑌗𑍍𑌂 𑌸𑍋𑌮𑌪𑍀॒𑌥𑍋 𑌨॑𑌮𑌤𑌿 । 𑌬॒𑌹𑌿॒𑌷𑍍𑌪𑌵॒𑌮𑌾॒𑌨𑍇 𑌦𑌶॑𑌹𑍋𑌤𑌾𑌰𑌂॒-𑌵𑍍𑌯𑌾𑌁𑌚॑𑌕𑍍𑌷𑍀𑌤 । 𑌮𑌾𑌦𑍍𑌧𑍍𑌯॑𑌨𑍍𑌦𑌿𑌨𑍇॒ 𑌪𑌵॑𑌮𑌾𑌨𑍇॒ 𑌚𑌤𑍁॑𑌰𑍍𑌹𑍋𑌤𑌾𑌰𑌮𑍍 । 𑌆𑌰𑍍𑌭॑𑌵𑍇॒ 𑌪𑌵॑𑌮𑌾𑌨𑍇॒ 𑌪𑌞𑍍𑌚॑𑌹𑍋𑌤𑌾𑌰𑌮𑍍 । 𑌪𑌿॒𑌤𑍃॒𑌯॒𑌜𑍍𑌞𑍇 𑌷𑌡𑍍𑌢𑍋॑𑌤𑌾𑌰𑌮𑍍 । 𑌯॒𑌜𑍍𑌞𑌾॒𑌯॒𑌜𑍍𑌞𑌿𑌯॑𑌸𑍍𑌯 𑌸𑍍𑌤𑍋॒𑌤𑍍𑌰𑍇 𑌸॒𑌪𑍍𑌤𑌹𑍋॑𑌤𑌾𑌰𑌮𑍍 । 𑌅॒𑌨𑍁॒𑌸॒𑌵॒𑌨𑌮𑍇॒𑌵𑍈𑌨𑌾𑌗𑍍॑ 𑌸𑍍𑌤𑌰𑍍𑌪𑌯𑌤𑌿 ॥ 44 ॥

𑌤𑍃𑌪𑍍𑌯॑𑌤𑌿 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿𑌃॑ । 𑌉𑌪𑍈॑𑌨𑌗𑍍𑌂 𑌸𑍋𑌮𑌪𑍀॒𑌥𑍋 𑌨॑𑌮𑌤𑌿 ॥ 𑌦𑍇॒𑌵𑌾 𑌵𑍈 𑌚𑌤𑍁॑𑌰𑍍𑌹𑍋𑌤𑍃𑌭𑌿-𑌸𑍍𑌸॒𑌤𑍍𑌰𑌮𑌾॑𑌸𑌤 । 𑌋𑌦𑍍𑌧𑌿॑𑌪𑌰𑌿𑌮𑌿𑌤𑌂॒-𑌯𑌁𑌶॑𑌸𑍍𑌕𑌾𑌮𑌾𑌃 । 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 । 𑌯𑌨𑍍𑌨𑌃॑ 𑌪𑍍𑌰𑌥॒𑌮𑌂-𑌯𑌁𑌶॑ 𑌋॒𑌚𑍍𑌛𑌾𑌤𑍍 । 𑌸𑌰𑍍𑌵𑍇॑𑌷𑌾-𑌨𑍍𑌨॒𑌸𑍍𑌤-𑌥𑍍𑌸॒𑌹𑌾𑌸॒𑌦𑌿𑌤𑌿॑ । 𑌸𑍋𑌮॒𑌶𑍍𑌚𑌤𑍁॑𑌰𑍍𑌹𑍋𑌤𑍍𑌰𑌾 । 𑌅॒𑌗𑍍𑌨𑌿𑌃 𑌪𑌞𑍍𑌚॑𑌹𑍋𑌤𑍍𑌰𑌾 । 𑌧𑌾॒𑌤𑌾 𑌷𑌡𑍍𑌢𑍋᳚𑌤𑍍𑌰𑌾 ॥ 45 ॥

𑌇𑌨𑍍𑌦𑍍𑌰𑌃॑ 𑌸॒𑌪𑍍𑌤𑌹𑍋᳚𑌤𑍍𑌰𑌾 । 𑌪𑍍𑌰॒𑌜𑌾𑌪॑𑌤𑌿॒-𑌰𑍍𑌦𑌶॑𑌹𑍋𑌤𑍍𑌰𑌾 । 𑌤𑍇𑌷𑌾॒𑌗𑍍𑌂॒ 𑌸𑍋𑌮॒𑌗𑍍𑌂॒ 𑌰𑌾𑌜𑌾॑𑌨𑌂॒-𑌯𑌁𑌶॑ 𑌆𑌰𑍍𑌚𑍍𑌛𑌤𑍍 ॥ 𑌤𑌨𑍍𑌨𑍍𑌯॑𑌕𑌾𑌮𑌯𑌤 । 𑌤𑍇𑌨𑌾𑌪𑌾᳚𑌕𑍍𑌰𑌾𑌮𑌤𑍍 । 𑌤𑍇𑌨॑ 𑌪𑍍𑌰॒𑌲𑌾𑌯॑𑌮𑌚𑌰𑌤𑍍 । 𑌤-𑌨𑍍𑌦𑍇॒𑌵𑌾𑌃 𑌪𑍍𑌰𑍈॒𑌷𑍈𑌃 𑌪𑍍𑌰𑍈𑌷॑𑌮𑍈𑌚𑍍𑌛𑌨𑍍𑌨𑍍 । 𑌤𑌤𑍍-𑌪𑍍𑌰𑍈॒𑌷𑌾𑌣𑌾᳚-𑌮𑍍𑌪𑍍𑌰𑍈𑌷॒𑌤𑍍𑌵𑌮𑍍 । 𑌨𑌿॒𑌵𑌿𑌦𑍍𑌭𑌿॒𑌰𑍍𑌨𑍍𑌯॑𑌵𑍇𑌦𑌯𑌨𑍍𑌨𑍍 । 𑌤𑌨𑍍𑌨𑌿॒𑌵𑌿𑌦𑌾᳚-𑌨𑍍𑌨𑌿𑌵𑌿॒𑌤𑍍𑌤𑍍𑌵𑌮𑍍 ॥ 46 ॥

𑌆॒𑌪𑍍𑌰𑍀𑌭𑌿॑𑌰𑌾𑌪𑍍𑌨𑍁𑌵𑌨𑍍𑌨𑍍 । 𑌤𑌦𑌾॒𑌪𑍍𑌰𑍀𑌣𑌾॑𑌮𑌾𑌪𑍍𑌰𑌿॒𑌤𑍍𑌵𑌮𑍍 । 𑌤𑌮॑𑌘𑍍𑌨𑌨𑍍𑌨𑍍 । 𑌤𑌸𑍍𑌯॒ 𑌯𑌶𑍋॒ 𑌵𑍍𑌯॑𑌗𑍃𑌹𑍍𑌣𑌤 । 𑌤𑍇 𑌗𑍍𑌰𑌹𑌾॑ 𑌅𑌭𑌵𑌨𑍍𑌨𑍍 । 𑌤𑌦𑍍𑌗𑍍𑌰𑌹𑌾॑𑌣𑌾-𑌙𑍍𑌗𑍍𑌰𑌹॒𑌤𑍍𑌵𑌮𑍍 । 𑌯𑌸𑍍𑌯𑍈॒𑌵𑌂-𑌵𑌿𑌁॒𑌦𑍁𑌷𑍋॒ 𑌗𑍍𑌰𑌹𑌾॑ 𑌗𑍃॒𑌹𑍍𑌯𑌨𑍍𑌤𑍇᳚ । 𑌤𑌸𑍍𑌯॒ 𑌤𑍍𑌵𑍇॑𑌵 𑌗𑍃॑𑌹𑍀॒𑌤𑌾𑌃 ॥ 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 । 𑌯𑍋 𑌵𑍈 𑌨॒-𑌶𑍍𑌶𑍍𑌰𑍇𑌷𑍍𑌠𑍋-𑌽𑌭𑍂᳚𑌤𑍍 ॥ 47 ॥

𑌤𑌮॑𑌵𑌧𑌿𑌷𑍍𑌮 । 𑌪𑍁𑌨॑𑌰𑌿॒𑌮𑌗𑍍𑌂 𑌸𑍁॑𑌵𑌾𑌮𑌹𑌾॒ 𑌇𑌤𑌿॑ । 𑌤-𑌞𑍍𑌛𑌨𑍍𑌦𑍋॑𑌭𑌿-𑌰𑌸𑍁𑌵𑌨𑍍𑌤 । 𑌤𑌚𑍍𑌛𑌨𑍍𑌦॑𑌸𑌾-𑌞𑍍𑌛𑌨𑍍𑌦॒𑌸𑍍𑌤𑍍𑌵𑌮𑍍 । 𑌸𑌾𑌮𑍍𑌨𑌾॒ 𑌸𑌮𑌾𑌨॑𑌯𑌨𑍍𑌨𑍍 । 𑌤-𑌥𑍍𑌸𑌾𑌮𑍍𑌨𑌃॑ 𑌸𑌾𑌮॒𑌤𑍍𑌵𑌮𑍍 । 𑌉॒𑌕𑍍𑌥𑍈-𑌰𑍁𑌦॑𑌸𑍍𑌥𑌾𑌪𑌯𑌨𑍍𑌨𑍍 । 𑌤𑌦𑍁॒𑌕𑍍𑌥𑌾𑌨𑌾॑-𑌮𑍁𑌕𑍍𑌥॒𑌤𑍍𑌵𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌪𑍍𑌰𑌤𑍍𑌯𑍇॒𑌵 𑌤𑌿॑𑌷𑍍𑌠𑌤𑌿 ॥ 48 ॥

𑌸𑌰𑍍𑌵॒𑌮𑌾𑌯𑍁॑𑌰𑍇𑌤𑌿 ॥ 𑌸𑍋𑌮𑍋॒ 𑌵𑍈 𑌯𑌶𑌃॑ । 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾𑌨𑍍-𑌥𑍍𑌸𑍋𑌮॑𑌮𑌾॒𑌗𑌚𑍍𑌛॑𑌤𑌿 । 𑌯𑌶॑ 𑌏॒𑌵𑍈𑌨॑𑌮𑍃𑌚𑍍𑌛𑌤𑌿 । 𑌤𑌸𑍍𑌮𑌾॑𑌦𑌾𑌹𑍁𑌃 । 𑌯𑌶𑍍𑌚𑍈॒𑌵𑌂-𑌵𑍇𑌁𑌦॒ 𑌯𑌶𑍍𑌚॒ 𑌨 । 𑌤𑌾𑌵𑍁॒𑌭𑍗 𑌸𑍋𑌮॒-𑌮𑌾𑌗॑𑌚𑍍𑌛𑌤𑌃 । 𑌸𑍋𑌮𑍋॒ 𑌹𑌿 𑌯𑌶𑌃॑ । 𑌤-𑌨𑍍𑌤𑍍𑌵𑌾-𑌽𑌵 𑌯𑌶॑ 𑌋𑌚𑍍𑌛॒𑌤𑍀𑌤𑍍𑌯𑌾॑𑌹𑍁𑌃 । 𑌯-𑌸𑍍𑌸𑍋𑌮𑍇॒ 𑌸𑍋𑌮॒-𑌮𑍍𑌪𑍍𑌰𑌾𑌹𑍇𑌤𑌿॑ । 𑌤𑌸𑍍𑌮𑌾॒-𑌥𑍍𑌸𑍋𑌮𑍇॒ 𑌸𑍋𑌮𑌃॒ 𑌪𑍍𑌰𑍋𑌚𑍍𑌯𑌃॑ । 𑌯𑌶॑ 𑌏॒𑌵𑍈𑌨॑𑌮𑍃𑌚𑍍𑌛𑌤𑌿 ॥ 49 ॥

(𑌅॒𑌭𑌿॒𑌷𑍁॒𑌣𑍍𑌵𑌨𑍍𑌤𑌿॑ - 𑌸॒𑌪𑍍𑌤𑌹𑍋॑𑌤𑌾 - 𑌤𑌰𑍍𑌪𑌯𑌤𑌿॒ - 𑌷𑌡𑍍𑌢𑍋᳚𑌤𑍍𑌰𑌾 - 𑌨𑌿𑌵𑌿॒𑌤𑍍𑌤𑍍𑌵 - 𑌮𑌭𑍂᳚𑌤𑍍 - 𑌤𑌿𑌷𑍍𑌠𑌤𑌿॒ - 𑌪𑍍𑌰𑌾𑌹𑍇𑌤𑌿॒ 𑌦𑍍𑌵𑍇 𑌚॑) (𑌅. 8)

𑌅𑌨𑍁𑌵𑌾𑌕𑌂 9 - 𑌹𑍋𑌤𑍃𑌮𑌨𑍍𑌤𑍍𑌰𑍋𑌤𑍍𑌪𑌤𑍍𑌤𑌿𑌕𑌥𑌨𑌪𑍍𑌰𑌸𑌙𑍍𑌗𑍇𑌨 𑌜𑌗-𑌥𑍍𑌸𑍃𑌷𑍍𑌟𑌿𑌃

𑌇॒𑌦𑌂-𑌵𑌾𑌁 𑌅𑌗𑍍𑌰𑍇॒ 𑌨𑍈𑌵 𑌕𑌿𑌞𑍍𑌚॒𑌨𑌾𑌸𑍀᳚𑌤𑍍 । 𑌨 𑌦𑍍𑌯𑍗𑌰𑌾॑𑌸𑍀𑌤𑍍 । 𑌨 𑌪𑍃॑𑌥𑌿॒𑌵𑍀 । 𑌨𑌾𑌨𑍍𑌤𑌰𑌿॑𑌕𑍍𑌷𑌮𑍍 । 𑌤𑌦𑌸॑𑌦𑍇॒𑌵 𑌸𑌨𑍍𑌮𑌨𑍋॑ 𑌽𑌕𑍁𑌰𑍁𑌤॒ 𑌸𑍍𑌯𑌾𑌮𑌿𑌤𑌿॑ । 𑌤𑌦॑𑌤𑌪𑍍𑌯𑌤 । 𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌦𑍍𑌧𑍂॒𑌮𑍋॑-𑌽𑌜𑌾𑌯𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 । 𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌦॒𑌗𑍍𑌨𑌿-𑌰॑𑌜𑌾𑌯𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 ॥ 50 ॥

𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌜𑍍𑌜𑍍𑌯𑍋𑌤𑌿॑-𑌰𑌜𑌾𑌯𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 । 𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌦॒𑌰𑍍𑌚𑌿-𑌰॑𑌜𑌾𑌯𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 । 𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌨𑍍𑌮𑌰𑍀॑𑌚𑌯𑍋-𑌽𑌜𑌾𑌯𑌨𑍍𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 । 𑌤𑌸𑍍𑌮𑌾᳚𑌤𑍍-𑌤𑍇𑌪𑌾॒𑌨𑌾𑌦𑍁॑𑌦𑌾॒𑌰𑌾 𑌅॑𑌜𑌾𑌯𑌨𑍍𑌤 । 𑌤-𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤 । 𑌤𑌦॒𑌭𑍍𑌰𑌮𑌿॑𑌵॒ 𑌸𑌮॑𑌹𑌨𑍍𑌯𑌤 ॥ 𑌤-𑌦𑍍𑌵॒𑌸𑍍𑌤𑌿𑌮॑𑌭𑌿𑌨𑌤𑍍 ॥ 51 ॥

𑌸 𑌸॑𑌮𑍁॒𑌦𑍍𑌰𑍋॑-𑌽𑌭𑌵𑌤𑍍 । 𑌤𑌸𑍍𑌮𑌾᳚-𑌥𑍍𑌸𑌮𑍁॒𑌦𑍍𑌰𑌸𑍍𑌯॒ 𑌨 𑌪𑌿॑𑌬𑌨𑍍𑌤𑌿 । 𑌪𑍍𑌰॒𑌜𑌨॑𑌨𑌮𑌿𑌵॒ 𑌹𑌿 𑌮𑌨𑍍𑌯॑𑌨𑍍𑌤𑍇 । 𑌤𑌸𑍍𑌮𑌾᳚-𑌤𑍍𑌪॒𑌶𑍋-𑌰𑍍𑌜𑌾𑌯॑𑌮𑌾𑌨𑌾॒𑌦𑌾𑌪𑌃॑ 𑌪𑍁॒𑌰𑌸𑍍𑌤𑌾᳚-𑌦𑍍𑌯𑌨𑍍𑌤𑌿 ॥ 𑌤-𑌦𑍍𑌦𑌶॑𑌹𑍋॒𑌤𑌾-𑌽𑌨𑍍𑌵॑𑌸𑍃𑌜𑍍𑌯𑌤 । 𑌪𑍍𑌰॒𑌜𑌾𑌪॑𑌤𑌿॒𑌰𑍍𑌵𑍈 𑌦𑌶॑ 𑌹𑍋𑌤𑌾 ॥ 𑌯 𑌏॒𑌵-𑌨𑍍𑌤𑌪॑𑌸𑍋 𑌵𑍀॒𑌰𑍍𑌯𑌂॑-𑌵𑌿𑌁॒𑌦𑍍𑌵𑌾𑌗𑍍𑌸𑍍𑌤𑌪𑍍𑌯॑𑌤𑍇 । 𑌭𑌵॑𑌤𑍍𑌯𑍇॒𑌵 ॥ 𑌤𑌦𑍍𑌵𑌾 𑌇॒𑌦𑌮𑌾𑌪𑌃॑ 𑌸𑌲𑌿॒𑌲-𑌮𑌾॑𑌸𑍀𑌤𑍍 । 𑌸𑍋॑-𑌽𑌰𑍋𑌦𑍀𑌤𑍍-𑌪𑍍𑌰॒𑌜𑌾𑌪॑𑌤𑌿𑌃 ॥ 52 ॥

𑌸 𑌕𑌸𑍍𑌮𑌾॑ 𑌅𑌜𑍍𑌞𑌿 । 𑌯-𑌦𑍍𑌯॒𑌸𑍍𑌯𑌾 𑌅𑌪𑍍𑌰॑𑌤𑌿𑌷𑍍𑌠𑌾𑌯𑌾॒ 𑌇𑌤𑌿॑ । 𑌯𑌦॒𑌫𑍍𑌸𑍍𑌵॑-𑌵𑌾𑌪॑𑌦𑍍𑌯𑌤 । 𑌸𑌾 𑌪𑍃॑𑌥𑌿॒𑌵𑍍𑌯॑𑌭𑌵𑌤𑍍 । 𑌯𑌦𑍍𑌵𑍍𑌯𑌮𑍃॑𑌷𑍍𑌟 । 𑌤𑌦॒𑌨𑍍𑌤𑌰𑌿॑𑌕𑍍𑌷-𑌮𑌭𑌵𑌤𑍍 । 𑌯𑌦𑍂॒𑌰𑍍𑌧𑍍𑌵-𑌮𑍁॒𑌦𑌮𑍃॑𑌷𑍍𑌟 । 𑌸𑌾 𑌦𑍍𑌯𑍗𑌰॑𑌭𑌵𑌤𑍍 । 𑌯𑌦𑌰𑍋॑𑌦𑍀𑌤𑍍 । 𑌤𑌦॒𑌨𑌯𑍋॑ 𑌰𑍋𑌦॒𑌸𑍍𑌤𑍍𑌵𑌮𑍍 ॥ 53 ॥

𑌯 𑌏॒𑌵𑌂-𑌵𑍇𑌁𑌦॑ । 𑌨𑌾𑌸𑍍𑌯॑ 𑌗𑍃॒𑌹𑍇 𑌰𑍁॑𑌦𑌨𑍍𑌤𑌿 । 𑌏॒𑌤𑌦𑍍𑌵𑌾 𑌏॒𑌷𑌾𑌂-𑌲𑍋𑌁॒𑌕𑌾𑌨𑌾॒-𑌞𑍍𑌜𑌨𑍍𑌮॑ । 𑌯 𑌏॒𑌵𑌮𑍇॒𑌷𑌾𑌂-𑌲𑍋𑌁॒𑌕𑌾𑌨𑌾॒-𑌞𑍍𑌜𑌨𑍍𑌮॒ 𑌵𑍇𑌦॑ । 𑌨𑍈𑌷𑍁 𑌲𑍋॒𑌕𑍇-𑌷𑍍𑌵𑌾𑌰𑍍𑌤𑌿॒𑌮𑌾𑌰𑍍𑌚𑍍𑌛॑𑌤𑌿 । 𑌸 𑌇॒𑌮𑌾-𑌮𑍍𑌪𑍍𑌰॑𑌤𑌿॒𑌷𑍍𑌠𑌾-𑌮॑𑌵𑌿𑌨𑍍𑌦𑌤 ॥ 𑌸 𑌇॒𑌮𑌾-𑌮𑍍𑌪𑍍𑌰॑𑌤𑌿॒𑌷𑍍𑌠𑌾𑌂-𑌵𑌿𑌁॒𑌤𑍍𑌤𑍍𑌵𑌾 𑌽𑌕𑌾॑𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸𑍋᳚-𑌽𑌨𑍍𑌤𑌰𑍍𑌵𑌾॑𑌨𑌭𑌵𑌤𑍍 । 𑌸 𑌜॒𑌘𑌨𑌾॒𑌦𑌸𑍁॑𑌰𑌾-𑌨𑌸𑍃𑌜𑌤 ॥ 54 ॥

𑌤𑍇𑌭𑍍𑌯𑍋॑ 𑌮𑍃॒𑌨𑍍𑌮𑌯𑍇॒ 𑌪𑌾𑌤𑍍𑌰𑍇-𑌽𑌨𑍍𑌨॑𑌮𑌦𑍁𑌹𑌤𑍍 । 𑌯𑌾-𑌽𑌸𑍍𑌯॒ 𑌸𑌾 𑌤॒𑌨𑍂𑌰𑌾𑌸𑍀᳚𑌤𑍍 । 𑌤𑌾𑌮𑌪𑌾॑𑌹𑌤 । 𑌸𑌾 𑌤𑌮𑌿॑𑌸𑍍𑌰𑌾-𑌽𑌭𑌵𑌤𑍍 ॥ 𑌸𑍋॑-𑌽𑌕𑌾𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸𑍋᳚-𑌽𑌨𑍍𑌤𑌰𑍍𑌵𑌾॑-𑌨𑌭𑌵𑌤𑍍 । 𑌸 𑌪𑍍𑌰॒𑌜𑌨॑𑌨𑌾𑌦𑍇॒𑌵 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌤𑌸𑍍𑌮𑌾॑𑌦𑌿॒𑌮𑌾 𑌭𑍂𑌯𑌿॑𑌷𑍍𑌠𑌾𑌃 । 𑌪𑍍𑌰॒𑌜𑌨॑𑌨𑌾॒𑌦𑍍𑌧𑍍𑌯𑍇॑𑌨𑌾॒ 𑌅𑌸𑍃॑𑌜𑌤 ॥ 55 ॥

𑌤𑌾𑌭𑍍𑌯𑍋॑ 𑌦𑌾𑌰𑍁॒𑌮𑌯𑍇॒ 𑌪𑌾𑌤𑍍𑌰𑍇॒ 𑌪𑌯𑍋॑-𑌽𑌦𑍁𑌹𑌤 । 𑌯𑌾-𑌽𑌸𑍍𑌯॒ 𑌸𑌾 𑌤॒𑌨𑍂𑌰𑌾𑌸𑍀᳚𑌤𑍍 । 𑌤𑌾𑌮𑌪𑌾॑𑌹𑌤 । 𑌸𑌾 𑌜𑍋𑌥𑍍𑌸𑍍𑌨𑌾॑ 𑌽𑌭𑌵𑌤𑍍 ॥ 𑌸𑍋॑-𑌽𑌕𑌾𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸𑌤𑌪𑍋॑-𑌽𑌤𑌪𑍍𑌯𑌤 । 𑌸𑍋᳚-𑌽𑌨𑍍𑌤𑌰𑍍𑌵𑌾॑-𑌨𑌭𑌵𑌤𑍍 । 𑌸 𑌉॑𑌪𑌪॒𑌕𑍍𑌷𑌾𑌭𑍍𑌯𑌾॑-𑌮𑍇॒𑌵𑌰𑍍𑌤𑍂𑌨॑𑌸𑍃𑌜𑌤 । 𑌤𑍇𑌭𑍍𑌯𑍋॑ 𑌰𑌜॒𑌤𑍇 𑌪𑌾𑌤𑍍𑌰𑍇॑ 𑌘𑍃॒𑌤𑌮॑𑌦𑍁𑌹𑌤𑍍 । 𑌯𑌾-𑌽𑌸𑍍𑌯॒ 𑌸𑌾 𑌤॒𑌨𑍂𑌰𑌾𑌸𑍀᳚𑌤𑍍 ॥ 56 ॥

𑌤𑌾𑌮𑌪𑌾॑𑌹𑌤 । 𑌸𑍋॑-𑌽𑌹𑍋𑌰𑌾॒𑌤𑍍𑌰𑌯𑍋᳚-𑌸𑍍𑌸॒𑌨𑍍𑌧𑌿-𑌰॑𑌭𑌵𑌤𑍍 ॥ 𑌸𑍋॑-𑌽𑌕𑌾𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॑ । 𑌸 𑌤𑌪𑍋॑-𑌽𑌤𑌪𑍍𑌯𑌤 । 𑌸𑍋᳚-𑌽𑌨𑍍𑌤𑌰𑍍𑌵𑌾॑-𑌨𑌭𑌵𑌤𑍍 । 𑌸 𑌮𑍁𑌖𑌾᳚-𑌦𑍍𑌦𑍇॒𑌵𑌾-𑌨॑𑌸𑍃𑌜𑌤 । 𑌤𑍇𑌭𑍍𑌯𑍋॒ 𑌹𑌰𑌿॑𑌤𑍇॒ 𑌪𑌾𑌤𑍍𑌰𑍇॒ 𑌸𑍋𑌮॑𑌮𑌦𑍁𑌹𑌤𑍍 । 𑌯𑌾-𑌽𑌸𑍍𑌯॒ 𑌸𑌾 𑌤॒𑌨𑍂𑌰𑌾𑌸𑍀᳚𑌤𑍍 । 𑌤𑌾𑌮𑌪𑌾॑𑌹𑌤 । 𑌤𑌦𑌹॑𑌰𑌭𑌵𑌤𑍍 ॥ 57 ॥

𑌏॒𑌤𑍇 𑌵𑍈 𑌪𑍍𑌰॒𑌜𑌾𑌪॑𑌤𑍇॒𑌰𑍍𑌦𑍋𑌹𑌾𑌃᳚ । 𑌯 𑌏॒𑌵𑌂-𑌵𑍇𑌁𑌦॑ । 𑌦𑍁॒𑌹 𑌏॒𑌵 𑌪𑍍𑌰॒𑌜𑌾𑌃 ॥ 𑌦𑌿𑌵𑌾॒ 𑌵𑍈 𑌨𑍋॑-𑌽𑌭𑍂॒𑌦𑌿𑌤𑌿॑ । 𑌤-𑌦𑍍𑌦𑍇॒𑌵𑌾𑌨𑌾᳚-𑌨𑍍𑌦𑍇𑌵॒𑌤𑍍𑌵𑌮𑍍 । 𑌯 𑌏॒𑌵-𑌨𑍍𑌦𑍇॒𑌵𑌾𑌨𑌾᳚-𑌨𑍍𑌦𑍇𑌵॒𑌤𑍍𑌵𑌂-𑌵𑍇𑌁𑌦॑ । 𑌦𑍇॒𑌵𑌵𑌾॑𑌨𑍇॒𑌵 𑌭॑𑌵𑌤𑌿 ॥ 𑌏॒𑌤𑌦𑍍𑌵𑌾 𑌅॑𑌹𑍋𑌰𑌾॒𑌤𑍍𑌰𑌾𑌣𑌾॒-𑌞𑍍𑌜𑌨𑍍𑌮॑ । 𑌯 𑌏॒𑌵𑌮॑𑌹𑍋𑌰𑌾॒𑌤𑍍𑌰𑌾𑌣𑌾॒-𑌞𑍍𑌜𑌨𑍍𑌮॒ 𑌵𑍇𑌦॑ । 𑌨𑌾𑌹𑍋॑𑌰𑌾॒𑌤𑍍𑌰𑍇𑌷𑍍𑌵𑌾𑌰𑍍𑌤𑌿॒𑌮𑌾𑌰𑍍𑌚𑍍𑌛॑𑌤𑌿 ॥ 58 ॥

𑌅𑌸॒𑌤𑍋-𑌽𑌧𑌿॒ 𑌮𑌨𑍋॑-𑌽𑌸𑍃𑌜𑍍𑌯𑌤 । 𑌮𑌨𑌃॑ 𑌪𑍍𑌰॒𑌜𑌾𑌪॑𑌤𑌿-𑌮𑌸𑍃𑌜𑌤 । 𑌪𑍍𑌰॒𑌜𑌾𑌪॑𑌤𑌿𑌃 𑌪𑍍𑌰॒𑌜𑌾 𑌅॑𑌸𑍃𑌜𑌤 । 𑌤𑌦𑍍𑌵𑌾 𑌇॒𑌦-𑌮𑍍𑌮𑌨॑𑌸𑍍𑌯𑍇॒𑌵 𑌪॑𑌰॒𑌮-𑌮𑍍𑌪𑍍𑌰𑌤𑌿॑𑌷𑍍𑌠𑌿𑌤𑌮𑍍 । 𑌯𑌦𑌿॒𑌦-𑌙𑍍𑌕𑌿𑌞𑍍𑌚॑ । 𑌤𑌦𑍇॒𑌤𑌚𑍍𑌛𑍍𑌵𑍋॑𑌵𑌸𑍍𑌯॒ 𑌸𑌨𑍍𑌨𑌾𑌮॒ 𑌬𑍍𑌰𑌹𑍍𑌮॑ ॥ 𑌵𑍍𑌯𑍁॒𑌚𑍍𑌛𑌨𑍍𑌤𑍀᳚ 𑌵𑍍𑌯𑍁𑌚𑍍𑌛𑌨𑍍𑌤𑍍𑌯𑌸𑍍𑌮𑍈॒ 𑌵𑌸𑍍𑌯॑𑌸𑍀 𑌵𑌸𑍍𑌯𑌸𑍀॒ 𑌵𑍍𑌯𑍁॑𑌚𑍍𑌛𑌤𑌿 । 𑌪𑍍𑌰𑌜𑌾॑𑌯𑌤𑍇 𑌪𑍍𑌰॒𑌜𑌯𑌾॑ 𑌪॒𑌶𑍁𑌭𑌿𑌃॑ । 𑌪𑍍𑌰 𑌪॑𑌰𑌮𑍇॒𑌷𑍍𑌠𑌿𑌨𑍋॒ 𑌮𑌾𑌤𑍍𑌰𑌾॑-𑌮𑌾𑌪𑍍𑌨𑍋𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ ॥ 59 ॥

(𑌅॒𑌗𑍍𑌨𑌿𑌰॑𑌜𑌾𑌯𑌤॒ 𑌤𑌦𑍍𑌭𑍂𑌯𑍋॑-𑌽𑌤𑌪𑍍𑌯𑌤𑌾 - 𑌭𑌿𑌨𑌦 - 𑌰𑍋𑌦𑍀-𑌤𑍍𑌪𑍍𑌰॒𑌜𑌾𑌪॑𑌤𑍀 - 𑌰𑍋𑌦॒𑌸𑍍𑌤𑍍𑌵 - 𑌮॑𑌸𑍃𑌜॒ - 𑌤𑌾𑌸𑍃॑𑌜𑌤 - 𑌘𑍃॒𑌤𑌮॑𑌦𑍁𑌹॒𑌦𑍍𑌯𑌾-𑌽𑌸𑍍𑌯॒ 𑌸𑌾 𑌤॒𑌨𑍂𑌰𑌾𑌸𑍀॒ - 𑌦𑌹॑𑌰𑌭𑌵-𑌦𑍍- 𑌋𑌚𑍍𑌛𑌤𑌿॒ - 𑌵𑍇𑌦॑) (𑌅. 9)

(𑌇॒𑌦-𑌨𑍍𑌧𑍂॒𑌮𑍋᳚ 𑌽𑌗𑍍𑌨𑌿-𑌰𑍍𑌜𑍍𑌯𑍋𑌤𑌿॑ 𑌰॒𑌰𑍍𑌚𑌿-𑌰𑍍𑌮𑌰𑍀॑𑌚𑌯 𑌉𑌦𑌾॒𑌰𑌾 𑌸𑍍𑌤𑌦॒𑌭𑍍𑌰𑌗𑍍𑌂 /

𑌸 𑌜॒𑌘𑌨𑌾॒-𑌥𑍍𑌸𑌾 𑌤𑌮𑌿॑𑌸𑍍𑌰𑌾॒ 𑌸 𑌪𑍍𑌰॒𑌜𑌨॑𑌨𑌾॒-𑌥𑍍𑌸𑌾 𑌜𑍋𑌥𑍍𑌸𑍍𑌨𑌾॒ 𑌸 𑌉॑𑌪𑌪॒𑌕𑍍𑌷𑌾𑌭𑍍𑌯𑌾॒𑌗𑍍𑌂॒ 𑌸𑍋॑ 𑌽𑌹𑍋𑌰𑌾॒𑌤𑍍𑌰𑌯𑍋᳚-𑌸𑍍𑌸॒𑌨𑍍𑌧𑌿-𑌸𑍍𑌸𑌮𑍁𑌖𑌾॒-𑌤𑍍𑌤𑌦𑌹॑-𑌰𑍍𑌦𑍇॒𑌵𑌵𑌾᳚𑌨𑍍 / 𑌮𑍃॒𑌨𑍍𑌮𑌯𑍇॑ 𑌦𑌾𑌰𑍁॒𑌮𑌯𑍇॑ 𑌰𑌜॒𑌤𑍇 𑌹𑌰𑌿॑𑌤𑍇॒ 𑌤𑍇𑌭𑍍𑌯॒𑌸𑍍𑌤𑌾𑌭𑍍𑌯𑍋॒ 𑌦𑍍𑌵𑍇 𑌤𑍇𑌭𑍍𑌯𑍋-𑌽𑌨𑍍𑌨॒-𑌮𑍍𑌪𑌯𑍋॑

𑌘𑍃॒𑌤𑌗𑍍𑌂 𑌸𑍋𑌮᳚𑌮𑍍)

𑌅𑌨𑍁𑌵𑌾𑌕𑌂 10 - 𑌦𑍇𑌵𑌸𑍃𑌷𑍍𑌟𑌿𑌮𑌧𑍍𑌯𑍇-𑌽𑌵𑌸𑍍𑌥𑌿𑌤𑌸𑍍𑌯𑍇𑌨𑍍𑌦𑍍𑌰𑌸𑍍𑌯 𑌦𑍇𑌵𑌤𑌾𑌧𑌿𑌪𑌤𑌿𑌤𑍍𑌵𑌮𑍍

𑌪𑍍𑌰॒𑌜𑌾𑌪॑𑌤𑌿॒-𑌰𑌿𑌨𑍍𑌦𑍍𑌰॑𑌮𑌸𑍃𑌜-𑌤𑌾𑌨𑍁𑌜𑌾𑌵॒𑌰-𑌨𑍍𑌦𑍇॒𑌵𑌾𑌨𑌾᳚𑌮𑍍 । 𑌤-𑌮𑍍𑌪𑍍𑌰𑌾𑌹𑌿॑𑌣𑍋𑌤𑍍 । 𑌪𑌰𑍇॑𑌹𑌿 । 𑌏॒𑌤𑍇𑌷𑌾᳚-𑌨𑍍𑌦𑍇॒𑌵𑌾𑌨𑌾॒-𑌮𑌧𑌿॑𑌪𑌤𑌿𑌰𑍇॒𑌧𑍀𑌤𑌿॑ । 𑌤-𑌨𑍍𑌦𑍇॒𑌵𑌾 𑌅॑𑌬𑍍𑌰𑍁𑌵𑌨𑍍𑌨𑍍 । 𑌕𑌸𑍍𑌤𑍍𑌵𑌮𑌸𑌿॑ । 𑌵॒𑌯𑌂-𑌵𑍈𑌁 𑌤𑍍𑌵𑌚𑍍𑌛𑍍𑌰𑍇𑌯𑌾𑌗𑍍𑌂॑𑌸-𑌸𑍍𑌸𑍍𑌮॒ 𑌇𑌤𑌿॑ । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌕𑌸𑍍𑌤𑍍𑌵𑌮𑌸𑌿॑ 𑌵॒𑌯𑌂-𑌵𑍈𑌁 𑌤𑍍𑌵𑌚𑍍𑌛𑍍𑌰𑍇𑌯𑌾𑌗𑍍𑌂॑𑌸-𑌸𑍍𑌸𑍍𑌮॒ 𑌇𑌤𑌿॑ 𑌮𑌾 𑌦𑍇॒𑌵𑌾 𑌅॑𑌵𑍋𑌚॒𑌨𑍍𑌨𑌿𑌤𑌿॑ ॥ 𑌅𑌥॒ 𑌵𑌾 𑌇॒𑌦-𑌨𑍍𑌤𑌰𑍍𑌹𑌿॑ 𑌪𑍍𑌰॒𑌜𑌾𑌪॑𑌤𑍗॒ 𑌹𑌰॑ 𑌆𑌸𑍀𑌤𑍍 ॥ 60 ॥

𑌯𑌦॒𑌸𑍍𑌮𑌿𑌨𑍍𑌨𑌾॑𑌦𑌿॒𑌤𑍍𑌯𑍇 । 𑌤𑌦𑍇॑𑌨𑌮𑌬𑍍𑌰𑌵𑍀𑌤𑍍 । 𑌏॒𑌤𑌨𑍍𑌮𑍇॒ 𑌪𑍍𑌰𑌯॑𑌚𑍍𑌛 । 𑌅𑌥𑌾॒𑌹𑌮𑍇॒𑌤𑍇𑌷𑌾᳚-𑌨𑍍𑌦𑍇॒𑌵𑌾𑌨𑌾॒-𑌮𑌧𑌿॑𑌪𑌤𑌿-𑌰𑍍𑌭𑌵𑌿𑌷𑍍𑌯𑌾॒𑌮𑍀𑌤𑌿॑ । 𑌕𑍋॑𑌹𑌗𑍍𑌗𑍍-𑌸𑍍𑌯𑌾॒𑌮𑌿𑌤𑍍𑌯॑𑌬𑍍𑌰𑌵𑍀𑌤𑍍 । 𑌏॒𑌤-𑌤𑍍𑌪𑍍𑌰॒𑌦𑌾𑌯𑍇𑌤𑌿॑ । 𑌏॒𑌤-𑌥𑍍𑌸𑍍𑌯𑌾॒ 𑌇𑌤𑍍𑌯॑𑌬𑍍𑌰𑌵𑍀𑌤𑍍 । 𑌯𑌦𑍇॒𑌤𑌦𑍍𑌬𑍍𑌰𑌵𑍀॒𑌷𑍀𑌤𑌿॑ । 𑌕𑍋 𑌹॒ 𑌵𑍈 𑌨𑌾𑌮॑ 𑌪𑍍𑌰॒𑌜𑌾𑌪॑𑌤𑌿𑌃 । 𑌯 𑌏॒𑌵𑌂-𑌵𑍇𑌁𑌦॑ ॥ 61 ॥

𑌵𑌿॒𑌦𑍁𑌰𑍇॑𑌨॒-𑌨𑍍𑌨𑌾𑌮𑍍𑌨𑌾᳚ । 𑌤𑌦॑𑌸𑍍𑌮𑍈 𑌰𑍁॒𑌕𑍍𑌮-𑌙𑍍𑌕𑍃॒𑌤𑍍𑌵𑌾 𑌪𑍍𑌰𑌤𑍍𑌯॑𑌮𑍁𑌞𑍍𑌚𑌤𑍍 । 𑌤𑌤𑍋॒ 𑌵𑌾 𑌇𑌨𑍍𑌦𑍍𑌰𑍋॑ 𑌦𑍇॒𑌵𑌾𑌨𑌾॒-𑌮𑌧𑌿॑𑌪𑌤𑌿-𑌰𑌭𑌵𑌤𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌅𑌧𑌿॑𑌪𑌤𑌿𑌰𑍇॒𑌵 𑌸॑𑌮𑌾॒𑌨𑌾𑌨𑌾᳚-𑌮𑍍𑌭𑌵𑌤𑌿 ॥ 𑌸𑍋॑-𑌽𑌮𑌨𑍍𑌯𑌤 । 𑌕𑌿-𑌙𑍍𑌕𑌿𑌂॒-𑌵𑌾𑌁 𑌅॑𑌕𑌰॒𑌮𑌿𑌤𑌿॑ । 𑌸 𑌚॒𑌨𑍍𑌦𑍍𑌰-𑌮𑍍𑌮॒ 𑌆𑌹॒𑌰𑍇𑌤𑌿॒ 𑌪𑍍𑌰𑌾𑌲॑𑌪𑌤𑍍 । 𑌤𑌚𑍍𑌚॒𑌨𑍍𑌦𑍍𑌰𑌮॑𑌸-𑌶𑍍𑌚𑌨𑍍𑌦𑍍𑌰𑌮॒𑌸𑍍𑌤𑍍𑌵𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ ॥ 62 ॥

𑌚॒𑌨𑍍𑌦𑍍𑌰𑌵𑌾॑𑌨𑍇॒𑌵 𑌭॑𑌵𑌤𑌿 ॥ 𑌤-𑌨𑍍𑌦𑍇॒𑌵𑌾 𑌅॑𑌬𑍍𑌰𑍁𑌵𑌨𑍍𑌨𑍍 । 𑌸𑍁॒𑌵𑍀𑌰𑍍𑌯𑍋॑ 𑌽𑌮𑌰𑍍𑌯𑌾॒ 𑌯𑌥𑌾॑ 𑌗𑍋𑌪𑌾॒𑌯𑌤॒ 𑌇𑌤𑌿॑ । 𑌤-𑌥𑍍𑌸𑍂𑌰𑍍𑌯॑𑌸𑍍𑌯 𑌸𑍂𑌰𑍍𑌯॒𑌤𑍍𑌵𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌨𑍈𑌨॑-𑌨𑍍𑌦𑌭𑍍𑌨𑍋𑌤𑌿 ॥ 𑌕𑌶𑍍𑌚॒ 𑌨𑌾𑌸𑍍𑌮𑌿॒𑌨𑍍𑌵𑌾 𑌇॒𑌦𑌮𑌿॑𑌨𑍍𑌦𑍍𑌰𑌿॒𑌯-𑌮𑍍𑌪𑍍𑌰𑌤𑍍𑌯॑𑌸𑍍𑌥𑌾॒𑌦𑌿𑌤𑌿॑ । 𑌤𑌦𑌿𑌨𑍍𑌦𑍍𑌰॑-𑌸𑍍𑌯𑍇𑌨𑍍𑌦𑍍𑌰॒𑌤𑍍𑌵𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌇॒𑌨𑍍𑌦𑍍𑌰𑌿॒𑌯𑌾॒𑌵𑍍𑌯𑍇॑𑌵 𑌭॑𑌵𑌤𑌿 ॥ 63 ॥

𑌅॒𑌯𑌂-𑌵𑌾𑌁 𑌇॒𑌦-𑌮𑍍𑌪॑𑌰॒𑌮𑍋॑-𑌽𑌭𑍂॒𑌦𑌿𑌤𑌿॑ । 𑌤𑌤𑍍-𑌪॑𑌰𑌮𑍇॒𑌷𑍍𑌠𑌿𑌨𑌃॑ 𑌪𑌰𑌮𑍇𑌷𑍍𑌠𑌿॒𑌤𑍍𑌵𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌪॒𑌰॒𑌮𑌾𑌮𑍇॒𑌵 𑌕𑌾𑌷𑍍𑌠𑌾᳚-𑌙𑍍𑌗𑌚𑍍𑌛𑌤𑌿 ॥ 𑌤-𑌨𑍍𑌦𑍇॒𑌵𑌾-𑌸𑍍𑌸॑𑌮॒𑌨𑍍𑌤-𑌮𑍍𑌪𑌰𑍍𑌯॑𑌵𑌿𑌶𑌨𑍍𑌨𑍍 । 𑌵𑌸॑𑌵𑌃 𑌪𑍁॒𑌰𑌸𑍍𑌤𑌾᳚𑌤𑍍 । 𑌰𑍁॒𑌦𑍍𑌰𑌾 𑌦॑𑌕𑍍𑌷𑌿𑌣॒𑌤𑌃 । 𑌆॒𑌦𑌿॒𑌤𑍍𑌯𑌾𑌃 𑌪॒𑌶𑍍𑌚𑌾𑌤𑍍 । 𑌵𑌿𑌶𑍍𑌵𑍇॑ 𑌦𑍇॒𑌵𑌾 𑌉॑𑌤𑍍𑌤𑌰॒𑌤𑌃 । 𑌅𑌙𑍍𑌗𑌿॑𑌰𑌸𑌃 𑌪𑍍𑌰॒𑌤𑍍𑌯𑌞𑍍𑌚᳚𑌮𑍍 ॥ 64 ॥

𑌸𑌾॒𑌦𑍍𑌧𑍍𑌯𑌾𑌃 𑌪𑌰𑌾᳚𑌞𑍍𑌚𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌉𑌪𑍈॑𑌨𑌗𑍍𑌂 𑌸𑌮𑌾॒𑌨𑌾-𑌸𑍍𑌸𑌂-𑌵𑌿𑌁॑𑌶𑌨𑍍𑌤𑌿 ॥ 𑌸 𑌪𑍍𑌰॒𑌜𑌾𑌪॑𑌤𑌿𑌰𑍇॒𑌵 𑌭𑍂॒𑌤𑍍𑌵𑌾 𑌪𑍍𑌰॒𑌜𑌾 𑌆𑌵॑𑌯𑌤𑍍 । 𑌤𑌾 𑌅॑𑌸𑍍𑌮𑍈॒ 𑌨𑌾𑌤𑌿॑𑌷𑍍𑌠𑌨𑍍𑌤𑌾॒𑌨𑍍𑌨𑌾𑌦𑍍𑌯𑌾॑𑌯 । 𑌤𑌾 𑌮𑍁𑌖॑-𑌮𑍍𑌪𑍁॒𑌰𑌸𑍍𑌤𑌾॒𑌤𑍍-𑌪𑌶𑍍𑌯॑𑌨𑍍𑌤𑍀𑌃 । 𑌦॒𑌕𑍍𑌷𑌿॒𑌣॒𑌤𑌃 𑌪𑌰𑍍𑌯𑌾॑𑌯𑌨𑍍𑌨𑍍 । 𑌸 𑌦॑𑌕𑍍𑌷𑌿𑌣॒𑌤𑌃 𑌪𑌰𑍍𑌯॑𑌵𑌰𑍍𑌤𑌯𑌤 । 𑌤𑌾 𑌮𑍁𑌖॑-𑌮𑍍𑌪𑍁॒𑌰𑌸𑍍𑌤𑌾॒𑌤𑍍-𑌪𑌶𑍍𑌯॑𑌨𑍍𑌤𑍀𑌃 । 𑌮𑍁𑌖॑-𑌨𑍍𑌦𑌕𑍍𑌷𑌿𑌣॒𑌤𑌃 ॥ 65 ॥

𑌪॒𑌶𑍍𑌚𑌾𑌤𑍍-𑌪𑌰𑍍𑌯𑌾॑𑌯𑌨𑍍𑌨𑍍 । 𑌸 𑌪॒𑌶𑍍𑌚𑌾𑌤𑍍-𑌪𑌰𑍍𑌯॑𑌵𑌰𑍍𑌤𑌯𑌤 । 𑌤𑌾 𑌮𑍁𑌖॑-𑌮𑍍𑌪𑍁॒𑌰𑌸𑍍𑌤𑌾॒𑌤𑍍-𑌪𑌶𑍍𑌯॑𑌨𑍍𑌤𑍀𑌃 । 𑌮𑍁𑌖॑-𑌨𑍍𑌦𑌕𑍍𑌷𑌿𑌣॒𑌤𑌃 । 𑌮𑍁𑌖॑-𑌮𑍍𑌪॒𑌶𑍍𑌚𑌾𑌤𑍍 । 𑌉॒𑌤𑍍𑌤॒𑌰॒𑌤𑌃 𑌪𑌰𑍍𑌯𑌾॑𑌯𑌨𑍍𑌨𑍍 । 𑌸 𑌉॑𑌤𑍍𑌤𑌰॒𑌤𑌃 𑌪𑌰𑍍𑌯॑𑌵𑌰𑍍𑌤𑌯𑌤 । 𑌤𑌾 𑌮𑍁𑌖॑-𑌮𑍍𑌪𑍁॒𑌰𑌸𑍍𑌤𑌾॒𑌤𑍍-𑌪𑌶𑍍𑌯॑𑌨𑍍𑌤𑍀𑌃 । 𑌮𑍁𑌖॑-𑌨𑍍𑌦𑌕𑍍𑌷𑌿𑌣॒𑌤𑌃 । 𑌮𑍁𑌖॑-𑌮𑍍𑌪॒𑌶𑍍𑌚𑌾𑌤𑍍 ॥ 66 ॥

𑌮𑍁𑌖॑𑌮𑍁𑌤𑍍𑌤𑌰॒𑌤𑌃 । 𑌊॒𑌰𑍍𑌧𑍍𑌵𑌾 𑌉𑌦𑌾॑𑌯𑌨𑍍𑌨𑍍 । 𑌸 𑌉॒𑌪𑌰𑌿॑𑌷𑍍𑌟𑌾॒𑌨𑍍𑌨𑍍𑌯॑-𑌵𑌰𑍍𑌤𑌯𑌤 । 𑌤𑌾-𑌸𑍍𑌸॒𑌰𑍍𑌵𑌤𑍋॑𑌮𑍁𑌖𑍋 𑌭𑍂॒𑌤𑍍𑌵𑌾 𑌽𑌽𑌵॑𑌯𑌤𑍍 । 𑌤𑌤𑍋॒ 𑌵𑍈 𑌤𑌸𑍍𑌮𑍈᳚ 𑌪𑍍𑌰॒𑌜𑌾 𑌅𑌤𑌿॑𑌷𑍍𑌠𑌨𑍍𑌤𑌾॒𑌨𑍍𑌨𑌾𑌦𑍍𑌯𑌾॑𑌯 ॥ 𑌯 𑌏॒𑌵𑌂-𑌵𑌿𑌁॒𑌦𑍍𑌵𑌾-𑌨𑍍𑌪𑌰𑌿॑ 𑌚 𑌵॒𑌰𑍍𑌤𑌯॑𑌤𑍇॒ 𑌨𑌿 𑌚॑ । 𑌪𑍍𑌰॒𑌜𑌾𑌪॑𑌤𑌿𑌰𑍇॒𑌵 𑌭𑍁॒𑌤𑍍𑌵𑌾 𑌪𑍍𑌰॒𑌜𑌾 𑌅॑𑌤𑍍𑌤𑌿 । 𑌤𑌿𑌷𑍍𑌠॑𑌨𑍍𑌤𑍇-𑌽𑌸𑍍𑌮𑍈 𑌪𑍍𑌰॒𑌜𑌾 𑌅॒𑌨𑍍𑌨𑌾𑌦𑍍𑌯𑌾॑𑌯 । 𑌅॒𑌨𑍍𑌨𑌾॒𑌦 𑌏॒𑌵 𑌭॑𑌵𑌤𑌿 ॥ 67 ॥

(𑌆॒𑌸𑍀॒-𑌦𑍍- 𑌵𑍇𑌦॑ - 𑌚𑌨𑍍𑌦𑍍𑌰𑌮॒𑌸𑍍𑌤𑍍𑌵𑌂-𑌯𑌁 𑌏॒𑌵𑌂-𑌵𑍇𑌁𑌦𑍇᳚ - 𑌨𑍍𑌦𑍍𑌰𑌿𑌯𑌾॒𑌵𑍍𑌯𑍇॑𑌵 𑌭॑𑌵𑌤𑌿 - 𑌪𑍍𑌰॒𑌤𑍍𑌯𑌞𑍍𑌚॒ - 𑌮𑍁𑌖॑-𑌨𑍍𑌦𑌕𑍍𑌷𑌿𑌣॒𑌤𑍋 - 𑌮𑍁𑌖॑-𑌮𑍍𑌪॒𑌶𑍍𑌚𑌾𑌨𑍍 - +𑌨𑌵॑ 𑌚) (𑌆10 )

𑌅𑌨𑍁𑌵𑌾𑌕𑌂 11 - 𑌹𑍋𑌤𑍃𑌮𑌨𑍍𑌤𑍍𑌰𑌾𑌣𑌾-𑌮𑍍𑌪𑍁𑌰𑍁𑌷𑌾𑌰𑍍𑌥𑌪𑍍𑌰𑌯𑍋𑌗𑌃

𑌪𑍍𑌰॒𑌜𑌾𑌪॑𑌤𑌿-𑌰𑌕𑌾𑌮𑌯𑌤 𑌬॒𑌹𑍋𑌰𑍍𑌭𑍂𑌯𑌾᳚𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌏॒𑌤-𑌨𑍍𑌦𑌶॑𑌹𑍋𑌤𑌾𑌰-𑌮𑌪𑌶𑍍𑌯𑌤𑍍 । 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌸𑍍𑌯॒ 𑌪𑍍𑌰𑌯𑍁॑𑌕𑍍𑌤𑌿 𑌬॒𑌹𑍋𑌰𑍍𑌭𑍂𑌯𑌾॑𑌨𑌭𑌵𑌤𑍍 । 𑌯𑌃 𑌕𑌾॒𑌮𑌯𑍇॑𑌤 𑌬॒𑌹𑍋𑌰𑍍𑌭𑍂𑌯𑌾᳚𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌦𑌶॑𑌹𑍋𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑍀𑌤 । 𑌬॒𑌹𑍋𑌰𑍇॒𑌵 𑌭𑍂𑌯𑌾᳚𑌨𑍍-𑌭𑌵𑌤𑌿 ॥ 𑌸𑍋॑-𑌽𑌕𑌾𑌮𑌯𑌤 𑌵𑍀॒𑌰𑍋 𑌮॒ 𑌆𑌜𑌾॑𑌯𑍇॒𑌤𑍇𑌤𑌿॑ । 𑌸 𑌦𑌶॑𑌹𑍋𑌤𑍁॒𑌶𑍍𑌚𑌤𑍁॑𑌰𑍍𑌹𑍋𑌤𑌾𑌰॒-𑌨𑍍𑌨𑌿𑌰॑𑌮𑌿𑌮𑍀𑌤 । 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤 ॥ 68 ॥

𑌤𑌸𑍍𑌯॒ 𑌪𑍍𑌰𑌯𑍁॒𑌕𑍍𑌤𑍀𑌨𑍍𑌦𑍍𑌰𑍋॑ 𑌽𑌜𑌾𑌯𑌤 । 𑌯𑌃 𑌕𑌾॒𑌮𑌯𑍇॑𑌤 𑌵𑍀॒𑌰𑍋 𑌮॒ 𑌆𑌜𑌾॑𑌯𑍇॒𑌤𑍇𑌤𑌿॑ । 𑌸 𑌚𑌤𑍁॑𑌰𑍍𑌹𑍋𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑍀𑌤 । 𑌆-𑌽𑌸𑍍𑌯॑ 𑌵𑍀॒𑌰𑍋 𑌜𑌾॑𑌯𑌤𑍇 ॥ 𑌸𑍋॑-𑌽𑌕𑌾𑌮𑌯𑌤 𑌪𑌶𑍁॒𑌮𑌾𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌚𑌤𑍁॑𑌰𑍍𑌹𑍋𑌤𑍁𑌃॒ 𑌪𑌞𑍍𑌚॑𑌹𑍋𑌤𑌾𑌰॒-𑌨𑍍𑌨𑌿𑌰॑𑌮𑌿𑌮𑍀𑌤 । 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌸𑍍𑌯॒ 𑌪𑍍𑌰𑌯𑍁॑𑌕𑍍𑌤𑌿 𑌪𑌶𑍁॒𑌮𑌾𑌨॑𑌭𑌵𑌤𑍍 । 𑌯𑌃 𑌕𑌾॒𑌮𑌯𑍇॑𑌤 𑌪𑌶𑍁॒𑌮𑌾𑌨𑍍-𑌥𑍍𑌸𑍍𑌯𑌾॒𑌮𑌿𑌤𑌿॑ । 𑌸 𑌪𑌞𑍍𑌚॑𑌹𑍋𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑍀𑌤 ॥ 69 ॥

𑌪॒𑌶𑍁॒𑌮𑌾𑌨𑍇॒𑌵 𑌭॑𑌵𑌤𑌿 ॥ 𑌸𑍋॑-𑌽𑌕𑌾𑌮𑌯𑌤॒𑌰𑍍𑌤𑌵𑍋॑ 𑌮𑍇 𑌕𑌲𑍍𑌪𑍇𑌰॒𑌨𑍍𑌨𑌿𑌤𑌿॑ । 𑌸 𑌪𑌞𑍍𑌚॑𑌹𑍋𑌤𑍁॒-𑌷𑍍𑌷𑌡𑍍𑌢𑍋॑𑌤𑌾𑌰॒-𑌨𑍍𑌨𑌿𑌰॑𑌮𑌿𑌮𑍀𑌤 । 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌸𑍍𑌯॒ 𑌪𑍍𑌰𑌯𑍁॑𑌕𑍍𑌤𑍍𑌯𑍃॒𑌤𑌵𑍋᳚-𑌽𑌸𑍍𑌮𑌾 𑌅𑌕𑌲𑍍𑌪𑌨𑍍𑌤 । 𑌯𑌃 𑌕𑌾॒𑌮𑌯𑍇॑𑌤॒𑌰𑍍𑌤𑌵𑍋॑ 𑌮𑍇 𑌕𑌲𑍍𑌪𑍇𑌰॒𑌨𑍍𑌨𑌿𑌤𑌿॑ । 𑌸 𑌷𑌡𑍍𑌢𑍋॑𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑍀𑌤 । 𑌕𑌲𑍍𑌪॑𑌨𑍍𑌤𑍇-𑌽𑌸𑍍𑌮𑌾 𑌋॒𑌤𑌵𑌃॑ ॥ 𑌸𑍋॑-𑌽𑌕𑌾𑌮𑌯𑌤 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍀 𑌸𑍍𑌯𑌾᳚𑌮𑍍 । 𑌆 𑌮𑍇॑ 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍀 𑌜𑌾॑𑌯𑍇॒𑌤𑍇𑌤𑌿॑ ॥ 70 ॥

𑌸 𑌷𑌡𑍍𑌢𑍋॑𑌤𑍁-𑌸𑍍𑌸॒𑌪𑍍𑌤𑌹𑍋॑𑌤𑌾𑌰॒-𑌨𑍍𑌨𑌿𑌰॑𑌮𑌿𑌮𑍀𑌤 । 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤 । 𑌤𑌸𑍍𑌯॒ 𑌪𑍍𑌰𑌯𑍁॑𑌕𑍍𑌤𑌿 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍍𑌯॑𑌭𑌵𑌤𑍍 । 𑌆-𑌽𑌸𑍍𑌯॑ 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍍𑌯॑𑌜𑌾𑌯𑌤 । 𑌯𑌃 𑌕𑌾॒𑌮𑌯𑍇॑𑌤 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍀 𑌸𑍍𑌯𑌾᳚𑌮𑍍 । 𑌆 𑌮𑍇॑ 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍀 𑌜𑌾॑𑌯𑍇॒𑌤𑍇𑌤𑌿॑ । 𑌸 𑌸॒𑌪𑍍𑌤𑌹𑍋॑𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑍀𑌤 । 𑌸𑍋॒𑌮॒𑌪 𑌏॒𑌵 𑌸𑍋॑𑌮𑌯𑌾॒𑌜𑍀 𑌭॑𑌵𑌤𑌿 । 𑌆-𑌽𑌸𑍍𑌯॑ 𑌸𑍋𑌮॒𑌪-𑌸𑍍𑌸𑍋॑𑌮𑌯𑌾॒𑌜𑍀 𑌜𑌾॑𑌯𑌤𑍇 ॥ 𑌸 𑌵𑌾 𑌏॒𑌷 𑌪॒𑌶𑍁𑌃 𑌪॑𑌞𑍍𑌚॒𑌧𑌾 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 ॥ 71 ॥

𑌪॒𑌦𑍍𑌭𑌿𑌰𑍍𑌮𑍁𑌖𑍇॑𑌨 ॥ 𑌤𑍇 𑌦𑍇॒𑌵𑌾𑌃 𑌪॒𑌶𑍂𑌨𑍍. 𑌵𑌿॒𑌤𑍍𑌤𑍍𑌵𑌾 । 𑌸𑍁॒𑌵॒𑌰𑍍𑌗𑌂-𑌲𑍋𑌁॒𑌕𑌮𑌾॑𑌯𑌨𑍍𑌨𑍍 ॥ 𑌤𑍇॑-𑌽𑌮𑍁𑌷𑍍𑌮𑌿॑𑌲𑍍 𑌁𑌲𑍋॒𑌕𑍇 𑌵𑍍𑌯॑𑌕𑍍𑌷𑍁𑌦𑍍𑌧𑍍𑌯𑌨𑍍𑌨𑍍 । 𑌤𑍇᳚-𑌽𑌬𑍍𑌰𑍁𑌵𑌨𑍍𑌨𑍍 । 𑌅॒𑌮𑍁𑌤𑌃॑ 𑌪𑍍𑌰𑌦𑌾𑌨𑌂॒-𑌵𑌾𑌁 𑌉𑌪॑𑌜𑌿𑌜𑍀𑌵𑌿॒𑌮𑍇𑌤𑌿॑ । 𑌤𑍇 𑌸॒𑌪𑍍𑌤𑌹𑍋॑𑌤𑌾𑌰𑌂-𑌯𑌁॒𑌜𑍍𑌞𑌂-𑌵𑌿𑌁॒𑌧𑌾𑌯𑌾॒𑌯𑌾𑌸𑍍𑌯᳚𑌮𑍍 । 𑌆॒𑌙𑍍𑌗𑍀॒𑌰॒𑌸-𑌮𑍍𑌪𑍍𑌰𑌾𑌹𑌿॑𑌣𑍍𑌵𑌨𑍍𑌨𑍍 । 𑌏॒𑌤𑍇𑌨𑌾॒𑌮𑍁𑌤𑍍𑌰॑ 𑌕𑌲𑍍𑌪॒𑌯𑍇𑌤𑌿॑ । 𑌤𑌸𑍍𑌯॒ 𑌵𑌾 𑌇॒𑌯-𑌙𑍍𑌕𑍍𑌲𑍃𑌪𑍍𑌤𑌿𑌃॑ ॥ 72 ॥

𑌯𑌦𑌿॒𑌦-𑌙𑍍𑌕𑌿𑌞𑍍𑌚॑ । 𑌯 𑌏॒𑌵𑌂-𑌵𑍇𑌁𑌦॑ । 𑌕𑌲𑍍𑌪॑𑌤𑍇-𑌽𑌸𑍍𑌮𑍈 । 𑌸 𑌵𑌾 𑌅॒𑌯-𑌮𑍍𑌮॑𑌨𑍁॒𑌷𑍍𑌯𑍇॑𑌷𑍁 𑌯॒𑌜𑍍𑌞-𑌸𑍍𑌸॒𑌪𑍍𑌤𑌹𑍋॑𑌤𑌾 । 𑌅॒𑌮𑍁𑌤𑍍𑌰॑ 𑌸॒𑌦𑍍𑌭𑍍𑌯𑍋 𑌦𑍇॒𑌵𑍇𑌭𑍍𑌯𑍋॑ 𑌹॒𑌵𑍍𑌯𑌂-𑌵𑌁॑𑌹𑌤𑌿 । 𑌯 𑌏॒𑌵𑌂-𑌵𑍇𑌁𑌦॑ । 𑌉𑌪𑍈॑𑌨𑌂-𑌯𑌁॒𑌜𑍍𑌞𑍋 𑌨॑𑌮𑌤𑌿 ॥ 𑌯𑍋 𑌵𑍈 𑌚𑌤𑍁॑𑌰𑍍𑌹𑍋𑌤𑍃𑌣𑌾-𑌨𑍍𑌨𑌿॒𑌦𑌾𑌨𑌂॒-𑌵𑍇𑌁𑌦॑ । 𑌨𑌿॒𑌦𑌾𑌨॑𑌵𑌾-𑌨𑍍𑌭𑌵𑌤𑌿 । 𑌅॒𑌗𑍍𑌨𑌿॒𑌹𑍋॒𑌤𑍍𑌰𑌂-𑌵𑍈𑌁 𑌦𑌶॑𑌹𑍋𑌤𑍁𑌰𑍍𑌨𑌿॒𑌦𑌾𑌨᳚𑌮𑍍 । 𑌦॒𑌰𑍍॒𑌶॒𑌪𑍂॒𑌰𑍍𑌣॒𑌮𑌾॒𑌸𑍗 𑌚𑌤𑍁॑𑌰𑍍𑌹𑍋𑌤𑍁𑌃 । 𑌚𑌾॒𑌤𑍁॒𑌰𑍍𑌮𑌾॒𑌸𑍍𑌯𑌾𑌨𑌿॒ 𑌪𑌞𑍍𑌚॑ 𑌹𑍋𑌤𑍁𑌃 । 𑌪॒𑌶𑍁॒𑌬॒𑌨𑍍𑌧-𑌷𑍍𑌷𑌡𑍍𑌢𑍋॑𑌤𑍁𑌃 । 𑌸𑍗॒𑌮𑍍𑌯𑍋᳚-𑌽𑌦𑍍𑌧𑍍𑌵॒𑌰-𑌸𑍍𑌸॒𑌪𑍍𑌤𑌹𑍋॑𑌤𑍁𑌃 । 𑌏॒𑌤𑌦𑍍𑌵𑍈 𑌚𑌤𑍁॑𑌰𑍍𑌹𑍋𑌤𑍃𑌣𑌾-𑌨𑍍𑌨𑌿॒𑌦𑌾𑌨᳚𑌮𑍍 । 𑌯 𑌏॒𑌵𑌂-𑌵𑍇𑌁𑌦॑ । 𑌨𑌿॒𑌦𑌾𑌨॑𑌵𑌾-𑌨𑍍𑌭𑌵𑌤𑌿 ॥ 73 ॥

(𑌅॒𑌮𑌿॒𑌮𑍀॒𑌤॒ 𑌤-𑌮𑍍𑌪𑍍𑌰𑌾𑌯𑍁॑𑌙𑍍𑌕𑍍𑌤॒ - 𑌪𑌞𑍍𑌚॑𑌹𑍋𑌤𑌾𑌰॒-𑌮𑍍𑌪𑍍𑌰𑌯𑍁॑𑌞𑍍𑌜𑌿𑌤 - 𑌜𑌾𑌯𑍇॒𑌤𑍇𑌤𑌿॑ - 𑌤𑌿𑌷𑍍𑌠𑌤𑌿॒ - 𑌕𑍍𑌲𑍃𑌪𑍍𑌤𑌿॒--𑌰𑍍 𑌦𑌶॑𑌹𑍋𑌤𑍁-𑌰𑍍𑌨𑌿॒𑌦𑌾𑌨𑌗𑍍𑌂॑ 𑌸॒𑌪𑍍𑌤 𑌚॑ ) (𑌅. 11)

(𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌪𑍍𑌰॒𑌜𑌾-𑌸𑍍𑌸𑍃॑𑌜𑍇॒𑌯𑍇𑌤𑌿॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌦𑌰𑍍𑌶𑌪𑍂𑌰𑍍𑌣𑌮𑌾॒𑌸𑍗 𑌸𑍃॑𑌜𑍇॒𑌯𑍇𑌤𑌿॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤॒ 𑌪𑍍𑌰𑌜𑌾॑𑌯𑍇॒𑌯𑍇𑌤𑌿॒ 𑌸 𑌤𑌪॒-𑌸𑍍𑌸 𑌤𑍍𑌰𑌿॒𑌵𑍃𑌤𑌂॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤॒ 𑌦𑌶॑𑌹𑍋𑌤𑌾𑌰॒-𑌨𑍍𑌤𑍇𑌨॑ 𑌦𑌶॒𑌧𑌾-𑌽𑌽𑌤𑍍𑌮𑌾𑌨𑌂॑ - 𑌦𑍇॒𑌵𑌾 𑌵𑍈 𑌵𑌰𑍁॑𑌣॒ - 𑌮𑌨𑍍𑌤𑍋॒ 𑌵𑍈 - 𑌪𑍍𑌰॒𑌜𑌾𑌪॑𑌤𑌿॒𑌸𑍍𑌤𑌾-𑌸𑍍𑌸𑍃॒𑌷𑍍𑌟𑌾-𑌸𑍍𑌸𑌮॑𑌶𑍍𑌲𑌿𑌷𑍍𑌯𑌨𑍍 - 𑌦𑍇॒𑌵𑌾 𑌵𑍈 𑌚𑌤𑍁॑𑌰𑍍𑌹𑍋𑌤𑍃𑌭𑌿 - 𑌰𑌿॒𑌦𑌂-𑌵𑌾𑌁 𑌅𑌗𑍍𑌰𑍇᳚ - 𑌪𑍍𑌰॒𑌜𑌾𑌪॑𑌤𑌿॒𑌰𑌿𑌨𑍍𑌦𑍍𑌰𑌂॑ - 𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 𑌬॒𑌹𑍋𑌰𑍍𑌭𑍂𑌯𑌾॒𑌨𑍇𑌕𑌾॑𑌦𑌶)

(𑌪𑍍𑌰॒𑌜𑌾𑌪॑𑌤𑌿॒ - 𑌸𑍍𑌤𑌦𑍍𑌗𑍍𑌰𑌹॑𑌸𑍍𑌯 - 𑌪𑍍𑌰॒𑌜𑌾॑𑌪𑌤𑌿𑌰𑌕𑌾𑌮𑌯𑌤𑌾॒ - 𑌨𑌯𑍈॒𑌵𑍈𑌨॒𑌤𑍍 - 𑌤𑌸𑍍𑌯॒ 𑌵𑌾 𑌇॒𑌯-𑌙𑍍𑌕𑍍𑌲𑍃𑌪𑍍𑌤𑌿॒ - 𑌸𑍍𑌤𑌸𑍍𑌮𑌾᳚-𑌤𑍍𑌤𑍇𑌪𑌾॒𑌨𑌾𑌜𑍍𑌜𑍍𑌯𑍋𑌤𑌿॒--𑌰𑍍 𑌯𑌦॒𑌸𑍍𑌮𑌿𑌨𑍍𑌨𑌾॑𑌦𑌿॒𑌤𑍍𑌯𑍇 -𑌸𑌷𑌡𑍍𑌢𑍋॑𑌤𑍁-𑌸𑍍𑌸॒𑌪𑍍𑌤𑌹𑍋॑𑌤𑌾𑌰॒-𑌨𑍍𑌤𑍍𑌰𑌿𑌸॑𑌪𑍍𑌤𑌤𑌿𑌃)

(𑌪𑍍𑌰॒𑌜𑌾𑌪॑𑌤𑌿𑌰𑌕𑌾𑌮𑌯𑌤 - 𑌨𑌿॒𑌦𑌾𑌨॑𑌵𑌾𑌨𑍍𑌭𑌵𑌤𑌿)

॥ 𑌹𑌰𑌿𑌃॑ 𑌓𑌮𑍍 ॥

॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌦𑍍𑌵𑌿𑌤𑍀𑌯𑌾𑌷𑍍𑌟𑌕𑍇 𑌦𑍍𑌵𑌿𑌤𑍀𑌯𑌃 𑌪𑍍𑌰𑌪𑌾𑌠𑌕-𑌸𑍍𑌸𑌮𑌾𑌪𑍍𑌤𑌃 ॥

Roman (IAST) Transliteration

kṛṣṇa yajurvedīya taittirīya brāhmaṇe dvitīyāṣṭake dvitīyaḥ prapāṭhakaḥ - hotṛbrāhmaṇam

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - daśahotṛmantrasya kratvarthapuruṣārthaprayogau

pra॒jāpa̭tirakāmayata pra॒jā-ssṛ̭je॒yeti̭ | sa e॒ta-ndaśa̭hotāra-mapaśyat | ta-mmana̭sā 'nu॒drutya̭ darbhasta॒mbḙ-'juhot | tato॒ vai sa pra॒jā a̭sṛjata | tā a̭smāthsṛ॒ṣṭā apā᳚krāmann | tā grahḙṇāgṛhṇāt | tadgraha̭sya graha॒tvam | yaḥ kā॒mayḙta॒ prajā̭ye॒yeti̭ | sa daśa̭hotāra॒-mmana̭sā 'nu॒drutya̭ darbhasta॒mbe jṷhuyāt | pra॒jāpa̭ti॒rvai daśa̭hotā || 1 ||

pra॒jāpa̭tire॒va bhū॒tvā pra jā̭yate || mana̭sā juhoti | mana̭ iva॒ hi pra॒jāpa̭tiḥ | pra॒jāpa̭te॒rāptyai᳚ || pū॒rṇayā̭ juhoti | pū॒rṇa i̭va॒ hi pra॒jāpa̭tiḥ | pra॒jāpa̭te॒rāptyai᳚ || nyṷ̄nayā juhoti | nyṷ̄nā॒ddhi pra॒jāpa̭tiḥ pra॒jā asṛ̭jata | pra॒jānā॒gṃ॒ sṛṣṭyai᳚ || 2 ||

da॒rbha॒sta॒mbe jṷhoti | e॒tasmā॒dvai yoneḥ᳚ pra॒jāpa̭tiḥ pra॒jā a̭sṛjata | yasmā̭de॒va yoneḥ᳚ pra॒jāpa̭tiḥ pra॒jā asṛ̭jata | tasmā̭de॒va yoneḥ॒ pra jā̭yate || brā॒hma॒ṇo da̭kṣiṇa॒ta upā᳚ste | brā॒hma॒ṇo vai pra॒jānā̭-mupadra॒ṣṭā | u॒pa॒dra॒ṣṭu॒matye॒va pra jā̭yate || graho̭ bhavati | pra॒jānāgṃ̭ sṛ॒ṣṭānā॒-ndhṛtyai᳚ || ya-mbrā᳚hma॒ṇaṃ-vi~॒dyāṃ-vi~॒dvāgṃsaṃ॒-ya~śo॒ narcchet || 3 ||

so-'ra̭ṇya-mpa॒retya̭ | da॒rbha॒sta॒mba-mu॒dgratthya̭ | brā॒hma॒ṇa-nda̭kṣiṇa॒to ni॒ṣādya̭ | catṷrhotṝ॒n vyāca̭kṣīta | e॒tadvai de॒vānā᳚-mpara॒ma-ṅguhya॒-mbrahma̭ | yaccatṷrhotāraḥ | tade॒va pra̭kā॒śa-ṅga̭mayati | tadḙna-mprakā॒śa-ṅga॒tam | pra॒kā॒śa-mpra॒jānā᳚-ṅgamayati || da॒rbha॒sta॒mba-mu॒dgratthya॒ vyāca̭ṣṭe || 4 ||

a॒gni॒vān. vai da̭rbhasta॒mbaḥ | a॒gni॒vatye॒va vyāca̭ṣṭe || brā॒hma॒ṇo da̭kṣiṇa॒ta upā᳚ste | brā॒hma॒ṇo vai pra॒jānā̭-mupadra॒ṣṭā | u॒pa॒dra॒ṣṭu॒-matye॒vainaṃ॒-ya~śa̭ ṛcchati || ī॒śva॒ra-ntaṃ-ya~śo-'rto॒rityā̭huḥ | yasyānte᳚ vyā॒caṣṭa॒ iti̭ | vara॒stasmai॒ deyaḥ̭ | yade॒vaina॒-ntatro̭pa॒ nama̭ti | tade॒vāva̭ rundhe || 5 ||

a॒gnimā॒dadhā̭no॒ daśa̭hotrā॒ 'raṇi॒mava̭daddhyāt | prajā̭tame॒vaina॒-mādha̭tte | tenai॒voddrutyā᳚gniho॒tra-ñjṷhuyāt | prajā̭tame॒vaina̭jjuhoti | ha॒virni̭rva॒phsyan-daśa̭hotāraṃ॒-vyā~ca̭kṣīta | prajā̭tame॒vaina॒-nnirva̭pati | sā॒mi॒dhe॒nī-ra̭nuva॒kṣyan-daśa̭hotāraṃ॒-vyā~ca̭kṣīta | sā॒mi॒dhe॒nīre॒va sṛ॒ṣṭvā-''rabhya॒ pra ta̭nute | atho̭ ya॒jño vai daśa̭hotā | ya॒jñame॒va ta̭nute || 6 ||

a॒bhi॒cara॒n-daśa̭hotāra-ñjuhuyāt | nava॒ vai purṷṣe prā॒ṇāḥ | nābhi̭rdaśa॒mī | saprā̭ṇame॒vaina̭-ma॒bhica̭rati | e॒tāva॒dvai purṷṣasya॒ svam | yāva̭-tprā॒ṇāḥ | yāva̭de॒vāsyāsti̭ | tada॒bhica̭rati || svakṛ̭ta॒ iri̭ṇe juhoti prada॒re vā᳚ | e॒tadvā a॒syai nir-ṛ̭tigṛhītam | nir-ṛ̭ti gṛhīta e॒vaina॒-nnir-ṛ̭tyā grāhayati || ya-dvā॒caḥ krū॒ram | tena॒ vaṣa̭ṭkaroti | vā॒ca e॒vaina̭-ṅkrū॒reṇa॒ pra vṛ̭ścati | tā॒jagārti॒mārccha̭ti || 7 ||

(daśa̭hotā॒ - sṛṣṭyā̭ - ṛ॒cche-d- vyāca̭ṣṭe - rundha - e॒va ta̭nute॒ - nir-ṛ̭tigṛhīta॒-mpañca̭ ca) (a. 1)

anuvākaṃ 2 - caturhotrādimantrāṇā-ṅkratvarthaprayogaḥ

pra॒jāpa̭tirakāmayata darśapūrṇamā॒sau sṛ̭je॒yeti̭ | sa e॒ta-ñcatṷrhotāra-mapaśyat | ta-mmana̭sā-'nu॒drutyā̭ hava॒nīyḙ-'juhot | tato॒ vai sa da̭rśapūrṇamā॒sāva̭sṛjata | tāva̭smā-thsṛ॒ṣṭāvapā᳚krāmatām | tau grahḙṇā gṛhṇāt | tadgraha̭sya graha॒tvam | da॒r॒śa॒pū॒rṇa॒mā॒sā-vā॒labha̭mānaḥ | catṷrhotāra॒-mmana̭sā-'nu॒drutyā̭-hava॒nīyḙ juhuyāt | da॒r॒śa॒pū॒rṇa॒mā॒sāve॒va sṛ॒ṣṭvā-''rabhya॒ pra ta̭nute || 8 ||

graho̭ bhavati | da॒r॒śa॒pū॒rṇa॒mā॒sayo᳚-ssṛ॒ṣṭayo॒rdhṛtyai᳚ || so̭-'kāmayata cāturmā॒syāni̭ sṛje॒yeti̭ | sa e॒ta-mpañca̭hotāra-mapaśyat | ta-mmana̭sā-'nu॒drutyā̭ hava॒nīyḙ-'juhot | tato॒ vai sa cā̭turmā॒syānya̭sṛjata | tānya̭smā-thsṛ॒ṣṭānyapā᳚krāmann | tāni॒ grahḙṇāgṛhṇāt | tadgraha̭sya graha॒tvam | cā॒tu॒rmā॒syānyā॒labha̭mānaḥ || 9 ||

pañca̭hotāra॒-mmana̭sā-'nu॒drutyā̭ hava॒nīyḙ juhuyāt | cā॒tu॒rmā॒syānye॒va sṛ॒ṣṭvā-''rabhya॒ pra ta̭nute | graho̭ bhavati | cā॒tu॒rmā॒syānāgṃ̭ sṛ॒ṣṭānā॒-ndhṛtyai᳚ || so̭-'kāmayata paśuba॒ndhagṃ sṛ̭je॒yeti̭ | sa e॒tagṃ ṣaḍḍho̭tāra-mapaśyat | ta-mmana̭sā-'nu॒drutyā̭ hava॒nīyḙ-'juhot | tato॒ vai sa pa̭śuba॒ndhama̭sṛjata | so᳚-'smā-thsṛ॒ṣṭo 'pā᳚krāmat | ta-ṅgrahḙṇāgṛhṇāt || 10 ||

tadgraha̭sya graha॒tvam | pa॒śu॒ba॒ndhena̭ ya॒kṣyamā̭ṇaḥ | ṣaḍḍho̭tāra॒-mmana̭sā 'nu॒drutyā̭ hava॒nīyḙ juhuyāt | pa॒śu॒ba॒ndhame॒va sṛ॒ṣṭvā-''rabhya॒ pra ta̭nute | graho̭ bhavati | pa॒śu॒ba॒ndhasya̭ sṛ॒ṣṭasya॒ dhṛtyai᳚ || so̭-'kāmayata sau॒mya-ma̭ddhva॒ragṃ sṛ̭je॒yeti̭ | sa e॒tagṃ sa॒ptaho̭tāra-mapaśyat | ta-mmana̭sā-'nu॒drutyā̭ hava॒nīyḙ 'juhot | tato॒ vai sa sau॒mya-ma̭ddhva॒ra-ma̭sṛjata || 11 ||

so᳚-'smā-thsṛ॒ṣṭo-'pā᳚krāmat | ta-ṅgrahḙṇāgṛhṇāt | tadgraha̭sya graha॒tvam | dī॒kṣi॒ṣyamā̭ṇaḥ | sa॒ptaho̭tāra॒-mmana̭sā-'nu॒drutyā̭ hava॒nīyḙ juhuyāt | sau॒myame॒vāddhva॒ragṃ sṛ॒ṣṭvā-''rabhya॒ pra ta̭nute | graho̭ bhavati | sau॒myasyā᳚-ddhva॒rasya̭ sṛ॒ṣṭasya॒ dhṛtyai᳚ || de॒vebhyo॒ vai ya॒jño na prābha̭vat | tamḙtāva॒ccha-ssama̭bharann || 12 ||

ya-thsa̭bhāṃ॒rāḥ | tato॒ vai tebhyo̭ ya॒jñaḥ prābha̭vat | ya-thsa̭bhāṃ॒rā bhava̭nti | ya॒jñasya॒ prabhū᳚tyai || ā॒ti॒tthyamā॒sādya॒ vyāca̭ṣṭe | ya॒jña॒mu॒khaṃ-vā~ ā̭ti॒thyam | mu॒kha॒ta e॒va ya॒jñagṃ sa॒bhṛntya॒ pra ta̭nute || aya̭jño॒ vā e॒ṣaḥ | yo̭-'pa॒tnīkaḥ̭ | na pra॒jāḥ pra jā̭yerann | patnī॒rvyāca̭ṣṭe | ya॒jñame॒vākaḥ̭ | pra॒jānā᳚-mpra॒jana̭nāya || u॒pa॒sathsu॒ vyāca̭ṣṭe | e॒tadvai patnī̭nā-mā॒yata̭nam | sva e॒vainā̭ ā॒yata॒ne-'va̭ kalpayati || 13 ||

(ta॒nu॒ta॒ - ā॒labha̭māno - 'gṛhṇā - dasṛja - tābhara - ñjāyera॒n-thṣaṭca̭) (a. 2)

anuvākaṃ 3 - caturhotṛpañcahotṛmantragrahabhāgayoḥ puruṣārtha prayogaḥ

pra॒jāpa̭ti-rakāmayata॒ pra jā̭ye॒yeti̭ | sa tapo̭-'tapyata | sa tri॒vṛta॒gg॒ stoma̭-masṛjata | ta-mpa̭ñcada॒śastomo̭ maddhya॒ta uda̭tṛṇat | tau pū᳚rvapa॒kṣaścā̭parapa॒kṣaścā̭bhavatām | pū॒rva॒pa॒kṣa-nde॒vā anvasṛ̭jyanta | a॒pa॒ra॒pa॒kṣa-manvasṷrāḥ | tato̭ de॒vā abha̭vann | parā-'sṷrāḥ | ya-ṅkā॒mayḙta॒ vasī̭yān-thsyā॒diti̭ || 14 ||

ta-mpū᳚rvapa॒kṣe yā̭jayet | vasī̭yāne॒va bha̭vati | ya-ṅkā॒mayḙta॒ pāpī̭yān-thsyā॒diti̭ | tama̭parapa॒kṣe yā̭jayet | pāpī̭yāne॒va bha̭vati | tasmā᳚-tpūrvapa॒kṣo̭ ¶pa॒kṣāt-ka̭ru॒ṇya̭taraḥ || pra॒jāpa̭ti॒rvai daśa̭hotā | catṷrhotā॒ pañca̭hotā | ṣaḍḍho̭tā sa॒ptaho̭tā | ṛ॒tavaḥ̭ saṃva~thsa॒raḥ || 15 ||

pra॒jāḥ pa॒śava̭ i॒me lo॒kāḥ | ya e॒va-mpra॒jāpa̭ti-mba॒horbhūyāgṃ̭saṃ॒-ve~da̭ | ba॒hore॒va bhūyā᳚-nbhavati || pra॒jāpa̭ti-rdevāsu॒rāna̭sṛjata | sa indra॒mapi॒ nāsṛ̭jata | ta-nde॒vā a̭bruvann | indra̭-nno jana॒yeti̭ | so᳚-'bravīt | yathā॒ 'haṃ-yu~॒ṣmāg stapa॒sā 'sṛ̭kṣi | e॒vamindra̭-ñjanayaddhva॒miti̭ || 16 ||

te tapo̭-'tapyanta | ta ā॒tmannindra̭-mapaśyann | tama̭bruvann | jāya॒sveti̭ | so᳚-'bravīt | ki-mbhā̭ga॒dheya̭-ma॒bhija̭niṣya॒ iti̭ | ṛ॒tūn-thsaṃ̭va~thsa॒ram | pra॒jāḥ pa॒śūn | i॒māl ~lo॒kānitya̭bruvann | taṃ-vai~ mā-''hṷtyā॒ praja̭naya॒tetya̭bravīt || 17 ||

ta-ñcatṷrhotrā॒ prāja̭nayann || yaḥ kā॒mayḙta vī॒ro ma॒ ā jā̭ye॒teti̭ | sa catṷrhotāra-ñjuhuyāt | pra॒jāpa̭ti॒rvai catṷrhotā | pra॒jāpa̭tire॒va bhū॒tvā prajā̭yate | ja॒jana॒dindra̭-mindri॒yāya॒ svāheti॒ grahḙṇa juhoti | ā-'sya̭ vī॒ro jā̭yate | vī॒ragṃ hi de॒vā e॒tayā ''hṷtyā॒ prāja̭nayann || ā॒di॒tyāścāṅgi̭rasaśca suva॒rge lo॒ke᳚ 'spardhanta | va॒ya-mpūrvḙ suva॒rgaṃ-lo~॒kami̭yāma va॒ya-mpūrva॒ iti̭ || 18 ||

ta ā̭di॒tyā e॒ta-mpañca̭hotāra-mapaśyann | ta-mpu॒rā prā̭taranuvā॒kādāgnī᳚ddhre 'juhavuḥ | tato॒ vai te pūrvḙ suva॒rgaṃ-lo~॒kamā̭yann | ya-ssṷva॒rgakā̭ma॒-ssyāt | sa pañca̭hotāra-mpu॒rā prā̭taranuvā॒kādāgnī᳚ddhre juhuyāt | saṃ॒va~॒thsa॒ro vai pañca̭hotā | saṃ॒va~॒thsa॒ra-ssṷva॒rgo lo॒kaḥ | saṃ॒va~॒thsa॒ra e॒vartuṣṷ prati॒ṣṭhāya̭ | su॒va॒rgaṃ-lo~॒kamḙti || te᳚bruva॒-nnaṅgi̭rasa ādi॒tyān || 19 ||

kva̭ stha | kva̭ va-ssa॒dbhyo ha॒vyaṃ-va~̭kṣyāma॒ iti̭ | chanda॒-ssvitya̭bruvann | gā॒ya॒tri॒yā-ntri॒ṣṭubhi॒-jaga̭tyā॒miti̭ | tasmā॒cchandaḥ̭ su sa॒dbhya ā̭di॒tyebhyaḥ̭ | ā॒ṅgī॒ra॒sīḥ pra॒jā ha॒vyaṃ-va~̭hanti | vaha̭ntyasmai pra॒jā ba॒lim | aina॒mapra̭tikhyāta-ṅgacchati | ya e॒vaṃ-ve~da̭ || dvāda̭śa॒ māsāḥ॒ pañca॒rtavaḥ̭ | traya̭ i॒me lo॒kāḥ | a॒sāvā̭di॒tya ḙkavi॒gṃ॒śaḥ | e॒tasmi॒n vā e॒ṣa śri॒taḥ | e॒tasmi॒n-prati̭ṣṭhitaḥ | ya e॒vame॒tagg śri॒ta-mprati̭ṣṭhitaṃ॒-ve~da̭ | pratye॒va ti̭ṣṭhati || 20 ||

(syā॒diti̭ - saṃva~thsa॒ro - ja̭nayaddhva॒mitī - tya̭bravī॒t - pūrva॒ ityā̭ - di॒tyān - ṛ॒tava॒-ṣṣaṭca̭) (a. 3)

anuvākaṃ 4 - jaga-thsṛṣṭikathanamukhena hotṛmantrapraśaṃsā

pra॒jāpa̭ti-rakāmayata॒ prajā̭ye॒yeti̭ | sa e॒ta-ndaśa̭hotāra-mapaśyat | tena̭ daśa॒dhā ''tmānaṃ̭-vi~॒dhāya̭ | daśa̭hotrā 'tapyata | tasya॒ citti॒-ssrugāsī᳚t | ci॒ttamājya᳚m | tasyai॒tā̭vatye॒va vāgāsī᳚t | e॒tāvāṋ. yajñakra॒tuḥ || sa catṷrhotāra-masṛjata | so̭-'nandat || 21 ||

asṛ̭kṣi॒ vā i॒mamiti̭ | tasya॒ somo̭ ha॒virāsī᳚t | sa catṷrhotrā 'tapyata | so̭-'tāmyat | sa bhūriti॒ vyāha̭rat | sa bhūmi̭masṛjata | a॒gni॒ho॒tra-nda̭rśapūrṇamā॒sau yajūgṃ̭ṣi | sa dvi॒tīya̭matapyata | so̭-'tāmyat | sa bhuva॒ iti॒ vyāha̭rat || 22 ||

so᳚-'ntari̭kṣa-masṛjata | cā॒tu॒rmā॒syāni॒ sāmā̭ni | sa tṛ॒tīya̭matapyata | so̭-'tāmyat | sa suva॒riti॒ vyāha̭rat | sa diva̭masṛjata | a॒gni॒ṣṭo॒ma-mu॒kthya̭-matirā॒tramṛcaḥ̭ | e॒tā vai vyāhṛ̭taya i॒me lo॒kāḥ | i॒mā-nkhalu॒ vai lo॒kānanṷ pra॒jāḥ pa॒śava॒śchandāgṃ̭si॒ prājā̭yanta | ya e॒vame॒tāḥ pra॒jāpa̭teḥ pratha॒mā vyāhṛ̭tīḥ॒ prajā̭tā॒ veda̭ || 23 ||

pra pra॒jayā̭ pa॒śubhi̭-rmithu॒nai-rjā̭yate || sa pañca̭hotāra-masṛjata | sa ha॒virnā-vi̭ndata | tasmai॒ soma̭-sta॒nuva॒-mprāya̭cchat | e॒ta-ttḙ ha॒viriti̭ | sa pañca̭hotrā 'tapyata | so̭-'tāmyat | sa pra॒tyaṅṅa̭bādhata | so-'sṷrā-nasṛjata | tada॒syā pri̭yamāsīt || 24 ||

ta-ddu॒rvarṇa॒gṃ॒ hira̭ṇyamabhavat | ta-ddu॒rvarṇa̭sya॒ hira̭ṇyasya॒ janma̭ | sa dvi॒tīya̭matapyata | so̭-'tāmyat | sa prāṃa̭bādhata | sa de॒vāna̭sṛjata | tada̭sya pri॒yama̭sīt | ta-thsu॒varṇa॒gṃ॒ hira̭ṇyamabhavat | ta-thsu॒varṇa̭sya॒ hira̭ṇyasya॒ janma̭ | ya e॒vagṃ su॒varṇa̭sya॒ hira̭ṇyasya॒ janma॒ veda̭ || 25 ||

su॒varṇa̭ ā॒tmanā̭ bhavati | du॒rvarṇo᳚-'sya॒ bhrātṛ̭vyaḥ | tasmā᳚-thsu॒varṇa॒gṃ॒ hira̭ṇya-mbhā॒rya᳚m | su॒varṇa̭ e॒va bha̭vati | aina̭-mpri॒ya-ṅga̭cchati॒ nāpri̭yam || sa sa॒ptaho̭tāra-masṛjata | sa sa॒ptaho᳚trai॒va sṷva॒rgaṃ-lo~॒kamai᳚t || tri॒ṇa॒vena॒ stomḙnai॒bhyo lo॒kebhyo-'sṷrā॒-nprāṇṷdata | tra॒ya॒stri॒gṃ॒śena॒ pratya̭tiṣṭhat | e॒ka॒vi॒gṃ॒śena॒ ruca̭madhatta || 26 ||

sa॒pta॒da॒śena॒ prājā̭yata | ya e॒vaṃ-vi~॒dvān-thsomḙna॒ yaja̭te | sa॒ptaho᳚trai॒va sṷva॒rgaṃ-lo~॒kamḙti | tri॒ṇa॒vena॒ stomḙnai॒bhyo lo॒kebhyo॒ bhrātṛ̭vyā॒n-praṇṷdate | tra॒ya॒stri॒gṃ॒śena॒ prati̭ tiṣṭhati | e॒ka॒vi॒gṃ॒śena॒ ruca̭-ndhatte | sa॒pta॒da॒śena॒ prajā̭yate | tasmā᳚-thsaptada॒śa-sstomo॒ na ni॒r॒hṛtyaḥ̭ | pra॒jāpa̭ti॒ rvai sa̭ptada॒śaḥ | pra॒jāpa̭time॒va ma̭ddhya॒to dha̭tte॒ prajā᳚tyai || 27 ||

(a॒na॒nda॒-d- bhuva॒ iti॒ vyāha̭ra॒-d- vedā̭ - sī॒-d- vedā̭ - dhatta॒ - prajā᳚tyai) (a. 4)

anuvākaṃ 5 - dakṣiṇāpratigrahamantravyākhyānam

de॒vā vai varṷṇamayājayann | sa yasyai̭ yasyai de॒vatā̭yai॒ dakṣi̭ṇā॒mana̭yat | tāma̭vlīnāt | te᳚-'bruvann | vyā॒vṛtya॒ prati̭ gṛhṇāma | tathā̭ no॒ dakṣi̭ṇā॒ na vle᳚ṣya॒tīti̭ | te vyā॒vṛtya॒ pratya̭gṛhṇann | tato॒ vai tā-ndakṣi̭ṇā॒ nāvlī̭nāt | ya e॒vaṃ-vi~॒dvān vyā॒vṛtya॒ dakṣi̭ṇā-mpratigṛ॒hṇāti̭ | naina॒-ndakṣi̭ṇā vlīnāti || 28 ||

rājā᳚ tvā॒ varṷṇo nayatu devi dakṣiṇe॒-'gnaye॒ hira̭ṇya॒mityā̭ha | ā॒gne॒yaṃ-vai~ hira̭ṇyam | svayai॒vaina̭-dde॒vata̭yā॒ prati̭ gṛhṇāti | somā̭ya॒ vāsa॒ ityā̭ha | sau॒myaṃ-vai~ vāsaḥ̭ | svayai॒vaina̭-dde॒vata̭yā॒ prati̭ gṛhṇāti | ru॒drāya॒ gāmityā̭ha | rau॒drī vai gauḥ | svayai॒vainā᳚-nde॒vata̭yā॒ prati̭ gṛhṇāti | varṷṇā॒yāśva॒mityā̭ha || 29 ||

vā॒ru॒ṇo vā aśvaḥ̭ | svayai॒vaina̭-nde॒vata̭yā॒ prati̭ gṛhṇāti | prā॒jāpa̭taye॒ purṷṣa॒mityā̭ha | prā॒jā॒pa॒tyo vai purṷṣaḥ | svayai॒vaina̭-nde॒vata̭yā॒ prati̭ gṛhṇāti | mana̭ve॒ talpa॒mityā̭ha | mā॒na॒vo vai talpaḥ̭ | svayai॒vaina̭-nde॒vata̭yā॒ prati̭ gṛhṇāti | u॒ttā॒nāyā᳚ṅgīra॒sāyāna॒ ityā̭ha | i॒yaṃ-vā~ ṷttā॒na ā᳚ṅgīra॒saḥ || 30 ||

a॒nayai॒vaina॒t-prati̭ gṛhṇāti || vai॒śvā॒na॒ryārcā ratha॒-mprati̭ gṛhṇāti | vai॒śvā॒na॒ro vai de॒vata̭yā॒ rathaḥ̭ | svayai॒vaina̭-nde॒vata̭yā॒ prati̭ gṛhṇāti || tenā̭mṛta॒tvama̭śyā॒-mityā̭ha | a॒mṛta̭me॒vātman-dha̭tte || vayo̭ dā॒tra ityā̭ha | vaya̭ e॒vaina̭-ṅkṛ॒tvā | su॒va॒rgaṃ-lo~॒ka-ṅga̭mayati || mayo॒ mahya̭mastu pratigrahī॒tra ityā̭ha || 31 ||

yadvai śi॒vam | tanmayaḥ̭ | ā॒tmana̭ e॒vaiṣā parī᳚ttiḥ || ka i॒da-ṅkasmā̭ adā॒dityā̭ha | pra॒jāpa̭ti॒rvai kaḥ | sa pra॒jāpa̭taye dadāti || kāmaḥ॒ kāmā॒yetyā̭ha | kāmḙna॒ hi dadā̭ti | kāmḙna pratigṛ॒hṇāti̭ || kāmo̭ dā॒tā kāmaḥ̭ prati grahī॒tetyā̭ha || 32 ||

kāmo॒ hi dā॒tā | kāmaḥ̭ prati grahī॒tā || kāmagṃ̭ samu॒dra-māvi॒śetyā̭ha | sa॒mu॒dra i̭va॒ hi kāmaḥ̭ | neva॒ hi kāma॒syānto-'sti̭ | na sa̭mu॒drasya̭ || kāmḙna tvā॒ prati̭ gṛhṇā॒mītyā̭ha | yena॒ kāmḙna prati gṛ॒hṇāti̭ | sa e॒vaina̭ma॒muṣmi̭l ~lo॒ke kāma॒ āga̭cchati || kāmai॒tatta̭ e॒ṣā tḙ kāma॒ dakṣi॒ṇetyā̭ha | kāma̭ e॒va ta-dyaja̭māno॒-'muṣmi̭l ~lo॒ke dakṣi̭ṇāmicchati | na pra̭tigrahī॒tari̭ || ya e॒vaṃ-vi~॒dvān-dakṣi̭ṇā-mpratigṛ॒hṇāti̭ | a॒nṛ॒ṇāme॒vainā॒-mprati̭ gṛhṇāti || 33 ||

(vlī॒nā॒tya - śva॒mityā̭hā - ṅgira॒saḥ - pra̭tigrahī॒tra ityā̭ha - pratigrahī॒tetyā̭ha॒ - dakṣi॒ṇetyā̭ha ca॒tvāri̭ ca) (a. 5)

anuvākaṃ 6 - dvādaśāhadaśame-'hani hotṛmantrāḥ

anto॒ vā e॒ṣa ya॒jñasya̭ | ya-dda̭śa॒mamahaḥ̭ | da॒śa॒me-'ha᳚n-thsarparā॒jñiyā̭ ṛ॒gbhi-sstṷvanti | ya॒jñasyai॒vānta̭-ṅga॒tvā | a॒nnādya॒mava̭rundhate || ti॒sṛbhiḥ̭ stuvanti | traya̭ i॒me lo॒kāḥ | e॒bhya e॒va lo॒kebhyo॒-'nnādya॒mava̭rundhate | pṛśni̭vatī-rbhavanti | annaṃ॒-vai~ pṛśni̭ || 34 ||

anna̭me॒vāva̭-rundhate || mana̭sā॒ prastaṷti | mana॒sodgā̭yati | mana̭sā॒ prati̭ harati | mana̭ iva॒ hi pra॒jāpa̭tiḥ | pra॒jāpa̭te॒rāptyai᳚ || de॒vā vai sa॒rpāḥ | teṣā̭mi॒yagṃ rājñī᳚ | ya-thsa̭rparā॒jñiyā̭ ṛ॒gbhi-sstu॒vanti̭ | a॒syāme॒va prati̭ tiṣṭhanti || 35 ||

catṷrhotṝ॒n॒. hotā॒ vyāca̭ṣṭe | stu॒tamanṷśagṃsati॒ śāntyai᳚ || anto॒ vā e॒ṣa ya॒jñasya̭ | ya-dda̭śa॒mamahaḥ̭ | e॒ta-tkhalu॒ vai de॒vānā᳚-mpara॒ma-ṅguhya॒-mbrahma̭ | yaccatṷrhotāraḥ | da॒śa॒me-'ha॒gg॒-ścatṷrhotṝ॒n vyāca̭ṣṭe | ya॒jñasyai॒vānta̭-ṅga॒tvā | pa॒ra॒ma-nde॒vānā॒-ṅguhya॒-mbrahmāva̭rundhe | tade॒va pra̭kā॒śa-ṅga̭mayati || 36 ||

tadḙna-mprakā॒śa-ṅga॒tam | pra॒kā॒śa-mpra॒jānā᳚-ṅgamayati || vācaṃ̭-ya~cchati | ya॒jñasya॒ dhṛtyai᳚ || ya॒ja॒mā॒na॒de॒va॒tyaṃ̭-vā~ ahaḥ̭ | bhrā॒tṛ॒vya॒de॒va॒tyā̭ rātriḥ̭ | ahnā॒ rātri̭-ndhyāyet | bhrātṛ̭vyasyai॒va tallo॒kaṃ-vṛ~̭ṅkte | yaddivā॒ vācaṃ̭-vi~sṛ॒jet | aha॒rbhrātṛ̭vyā॒yocchigṃ̭ṣet | yannaktaṃ̭-vi~sṛ॒jet | rātri॒-mbhrātṛ̭vyā॒yocchigṃ̭ṣet | a॒dhi॒vṛ॒kṣa॒sū॒rye vācaṃ॒-vi~sṛ̭jati | e॒tāva̭ntame॒vāsmai̭ lo॒kamucchigṃ̭ṣati | yāva̭dādi॒tyo᳚-'sta॒meti̭ || 37 ||

(pṛśni̭ - tiṣṭhanti - gamayati - śigṃṣe॒-tpañca̭ ca) (a. 6)

anuvākaṃ 7 - saptahotṛmantrasādhyayajñapraśaṃsā

pra॒jāpa̭tiḥ pra॒jā a̭sṛjata | tā-ssṛ॒ṣṭā-ssama̭śliṣyann | tā rū॒peṇānu॒ prāvi̭śat | tasmā̭dāhuḥ | rū॒paṃ-vai~ pra॒jāpa̭ti॒riti̭ | tā nāmnā-'nu॒ prāvi̭śat | tasmā̭dāhuḥ | nāma॒ vai pra॒jāpa̭ti॒riti̭ | tasmā॒dapyā̭ 'mi॒trau sa॒gantya̭ | nāmnā॒ ceddhvayḙte || 38 ||

mi॒trame॒va bha̭vataḥ || pra॒jāpa̭ti-rdevāsu॒rāna̭sṛjata | sa indra॒mapi॒ nāsṛ̭jata | ta-nde॒vā a̭bruvann | indra̭-nno jana॒yeti̭ | sa ā॒tma-nnindra̭-mapaśyat | tama̭sṛjata | ta-ntri॒ṣṭug-vī॒rya̭-mbhū॒tvā-'nu॒ prāvi̭śat | tasya॒ vajraḥ̭ pañcada॒śo hasta॒ āpa̭dyata | teno॒dayyāsṷrāna॒bhya̭ bhavat || 39 ||

ya e॒vaṃ-ve~da̭ | a॒bhi bhrātṛ̭vyā-nbhavati || te de॒vā asṷrai-rvi॒jitya̭ | su॒va॒rgaṃ-lo~॒kamā̭yann | tḙ-'muṣmi̭l ~lo॒ke vya̭kṣuddhyann | te᳚-'bruvann | a॒mutaḥ̭ pradānaṃ॒-vā~ upa̭jijīvi॒meti̭ | te sa॒ptaho̭tāraṃ-ya~॒jñaṃ-vi~॒dhāyā॒yāsya᳚m | ā॒ṅgī॒ra॒sa-mprāhi̭ṇvann | e॒tenā॒mutra̭ kalpa॒yeti̭ || 40 ||

tasya॒ vā i॒ya-ṅklṛptiḥ̭ | yadi॒da-ṅki-ñca̭ | ya e॒vaṃ-ve~da̭ | kalpa̭te-'smai | sa vā a॒ya-mma̭nu॒ṣyḙṣu ya॒jña-ssa॒ptaho̭tā | a॒mutra̭ sa॒dbhyo de॒vebhyo̭ ha॒vyaṃ-va~̭hati | ya e॒vaṃ-ve~da̭ | upai̭naṃ-ya~॒jño na̭mati || so̭-'manyata | a॒bhi vā i॒me᳚-'smā-llo॒kāda॒muṃlo~॒ka-ṅka̭miṣyanta॒ iti̭ | sa vāca̭spate॒ hṛditi॒ vyāha̭rat | tasmā᳚-tpu॒tro hṛda̭yam | tasmā̭da॒smā-llo॒kāda॒muṃ-lo~॒ka-nnābhikā̭mayante | pu॒tro hi hṛda̭yam || 41 ||

(hvayḙta - abhavat - kalpa॒ye - tīti̭ ca॒tvāri̭ ca) (a. 7)

anuvākaṃ 8 - hotṛmantrāṇāṃ somayāgāṅgatvam

de॒vā vai catṷrhotṛbhi-rya॒jñama̭tanvata | te vi pā॒pmanā॒ bhrātṛ̭vye॒ṇāja̭yanta | a॒bhi sṷva॒rgaṃ-lo~॒kama̭jayann | ya e॒vaṃ-vi~॒dvāg-ścatṷrhotṛbhirya॒jña-nta̭nu॒te | vi pā॒pmanā॒ bhrātṛ̭vyeṇa jayate | a॒bhi sṷva॒rgaṃ-lo~॒ka-ñja̭yati || ṣaḍḍho᳚trā prāya॒ṇīya॒māsā̭dayati | a॒muṣmai॒ vai lo॒kāya॒ ṣaḍḍho̭tā | ghnanti॒ khalu॒ vā e॒ta-thsoma᳚m | yada̭bhiṣu॒ṇvanti̭ || 42 ||

ṛ॒ju॒dhaivaina̭ma॒muṃ-lo~॒ka-ṅga̭mayati | catṷrhotrā ''ti॒tthyam | yaśo॒ vai catṷrhotā | yaśa̭ e॒vātman-dha̭tte | pañca̭hotrā pa॒śumupa̭ sādayati | su॒va॒rgyo̭ vai pañca̭hotā | yaja̭mānaḥ pa॒śuḥ | yaja̭māname॒va sṷva॒rgaṃ-lo~॒ka-ṅga̭mayati | grahā᳚n-gṛhī॒tvā sa॒ptaho̭tāra-ñjuhoti | i॒ndri॒yaṃ-vai~ sa॒ptaho̭tā || 43 ||

i॒ndri॒yame॒vātman-dha̭tte || yo vai catṷrhotṝ-nanusava॒na-nta॒rpaya̭ti | tṛpya̭ti pra॒jayā̭ pa॒śubhiḥ̭ | upai̭nagṃ somapī॒tho na̭mati | ba॒hi॒ṣpava॒mā॒ne daśa̭hotāraṃ॒-vyā~ca̭kṣīta | māddhya̭ndine॒ pava̭māne॒ catṷrhotāram | ārbha̭ve॒ pava̭māne॒ pañca̭hotāram | pi॒tṛ॒ya॒jñe ṣaḍḍho̭tāram | ya॒jñā॒ya॒jñiya̭sya sto॒tre sa॒ptaho̭tāram | a॒nu॒sa॒va॒name॒vaināg̭ starpayati || 44 ||

tṛpya̭ti pra॒jayā̭ pa॒śubhiḥ̭ | upai̭nagṃ somapī॒tho na̭mati || de॒vā vai catṷrhotṛbhi-ssa॒tramā̭sata | ṛddhi̭parimitaṃ॒-ya~śa̭skāmāḥ | te᳚-'bruvann | yannaḥ̭ pratha॒maṃ-ya~śa̭ ṛ॒cchāt | sarvḙṣā-nna॒sta-thsa॒hāsa॒diti̭ | soma॒ścatṷrhotrā | a॒gniḥ pañca̭hotrā | dhā॒tā ṣaḍḍho᳚trā || 45 ||

indraḥ̭ sa॒ptaho᳚trā | pra॒jāpa̭ti॒-rdaśa̭hotrā | teṣā॒gṃ॒ soma॒gṃ॒ rājā̭naṃ॒-ya~śa̭ ārcchat || tannya̭kāmayata | tenāpā᳚krāmat | tena̭ pra॒lāya̭macarat | ta-nde॒vāḥ prai॒ṣaiḥ praiṣa̭maicchann | tat-prai॒ṣāṇā᳚-mpraiṣa॒tvam | ni॒vidbhi॒rnya̭vedayann | tanni॒vidā᳚-nnivi॒ttvam || 46 ||

ā॒prībhi̭rāpnuvann | tadā॒prīṇā̭māpri॒tvam | tama̭ghnann | tasya॒ yaśo॒ vya̭gṛhṇata | te grahā̭ abhavann | tadgrahā̭ṇā-ṅgraha॒tvam | yasyai॒vaṃ-vi~॒duṣo॒ grahā̭ gṛ॒hyante᳚ | tasya॒ tvḙva gṛ̭hī॒tāḥ || te᳚-'bruvann | yo vai na॒-śśreṣṭho-'bhū᳚t || 47 ||

tama̭vadhiṣma | puna̭ri॒magṃ sṷvāmahā॒ iti̭ | ta-ñchando̭bhi-rasuvanta | tacchanda̭sā-ñchanda॒stvam | sāmnā॒ samāna̭yann | ta-thsāmnaḥ̭ sāma॒tvam | u॒kthai-ruda̭sthāpayann | tadu॒kthānā̭-muktha॒tvam | ya e॒vaṃ-ve~da̭ | pratye॒va ti̭ṣṭhati || 48 ||

sarva॒māyṷreti || somo॒ vai yaśaḥ̭ | ya e॒vaṃ-vi~॒dvān-thsoma̭mā॒gaccha̭ti | yaśa̭ e॒vaina̭mṛcchati | tasmā̭dāhuḥ | yaścai॒vaṃ-ve~da॒ yaśca॒ na | tāvu॒bhau soma॒-māga̭cchataḥ | somo॒ hi yaśaḥ̭ | ta-ntvā-'va yaśa̭ ṛccha॒tītyā̭huḥ | ya-ssome॒ soma॒-mprāheti̭ | tasmā॒-thsome॒ somaḥ॒ procyaḥ̭ | yaśa̭ e॒vaina̭mṛcchati || 49 ||

(a॒bhi॒ṣu॒ṇvanti̭ - sa॒ptaho̭tā - tarpayati॒ - ṣaḍḍho᳚trā - nivi॒ttva - mabhū᳚t - tiṣṭhati॒ - prāheti॒ dve ca̭) (a. 8)

anuvākaṃ 9 - hotṛmantrotpattikathanaprasaṅgena jaga-thsṛṣṭiḥ

i॒daṃ-vā~ agre॒ naiva kiñca॒nāsī᳚t | na dyaurā̭sīt | na pṛ̭thi॒vī | nāntari̭kṣam | tadasa̭de॒va sanmano̭ 'kuruta॒ syāmiti̭ | tada̭tapyata | tasmā᳚t-tepā॒nāddhū॒mo̭-'jāyata | ta-dbhūyo̭-'tapyata | tasmā᳚t-tepā॒nāda॒gni-ra̭jāyata | ta-dbhūyo̭-'tapyata || 50 ||

tasmā᳚t-tepā॒nājjyoti̭-rajāyata | ta-dbhūyo̭-'tapyata | tasmā᳚t-tepā॒nāda॒rci-ra̭jāyata | ta-dbhūyo̭-'tapyata | tasmā᳚t-tepā॒nānmarī̭cayo-'jāyanta | ta-dbhūyo̭-'tapyata | tasmā᳚t-tepā॒nādṷdā॒rā a̭jāyanta | ta-dbhūyo̭-'tapyata | tada॒bhrami̭va॒ sama̭hanyata || ta-dva॒stima̭bhinat || 51 ||

sa sa̭mu॒dro̭-'bhavat | tasmā᳚-thsamu॒drasya॒ na pi̭banti | pra॒jana̭namiva॒ hi manya̭nte | tasmā᳚-tpa॒śo-rjāya̭mānā॒dāpaḥ̭ pu॒rastā᳚-dyanti || ta-ddaśa̭ho॒tā-'nva̭sṛjyata | pra॒jāpa̭ti॒rvai daśa̭ hotā || ya e॒va-ntapa̭so vī॒ryaṃ̭-vi~॒dvāgstapya̭te | bhava̭tye॒va || tadvā i॒damāpaḥ̭ sali॒la-mā̭sīt | so̭-'rodīt-pra॒jāpa̭tiḥ || 52 ||

sa kasmā̭ ajñi | ya-dya॒syā apra̭tiṣṭhāyā॒ iti̭ | yada॒phsva̭-vāpa̭dyata | sā pṛ̭thi॒vya̭bhavat | yadvyamṛ̭ṣṭa | tada॒ntari̭kṣa-mabhavat | yadū॒rdhva-mu॒damṛ̭ṣṭa | sā dyaura̭bhavat | yadaro̭dīt | tada॒nayo̭ roda॒stvam || 53 ||

ya e॒vaṃ-ve~da̭ | nāsya̭ gṛ॒he rṷdanti | e॒tadvā e॒ṣāṃ-lo~॒kānā॒-ñjanma̭ | ya e॒vame॒ṣāṃ-lo~॒kānā॒-ñjanma॒ veda̭ | naiṣu lo॒ke-ṣvārti॒mārccha̭ti | sa i॒mā-mpra̭ti॒ṣṭhā-ma̭vindata || sa i॒mā-mpra̭ti॒ṣṭhāṃ-vi~॒ttvā 'kā̭mayata॒ prajā̭ye॒yeti̭ | sa tapo̭-'tapyata | so᳚-'ntarvā̭nabhavat | sa ja॒ghanā॒dasṷrā-nasṛjata || 54 ||

tebhyo̭ mṛ॒nmaye॒ pātre-'nna̭maduhat | yā-'sya॒ sā ta॒nūrāsī᳚t | tāmapā̭hata | sā tami̭srā-'bhavat || so̭-'kāmayata॒ prajā̭ye॒yeti̭ | sa tapo̭-'tapyata | so᳚-'ntarvā̭-nabhavat | sa pra॒jana̭nāde॒va pra॒jā a̭sṛjata | tasmā̭di॒mā bhūyi̭ṣṭhāḥ | pra॒jana̭nā॒ddhyḙnā॒ asṛ̭jata || 55 ||

tābhyo̭ dāru॒maye॒ pātre॒ payo̭-'duhata | yā-'sya॒ sā ta॒nūrāsī᳚t | tāmapā̭hata | sā jothsnā̭ 'bhavat || so̭-'kāmayata॒ prajā̭ye॒yeti̭ | satapo̭-'tapyata | so᳚-'ntarvā̭-nabhavat | sa ṷpapa॒kṣābhyā̭-me॒vartūna̭sṛjata | tebhyo̭ raja॒te pātrḙ ghṛ॒tama̭duhat | yā-'sya॒ sā ta॒nūrāsī᳚t || 56 ||

tāmapā̭hata | so̭-'horā॒trayo᳚-ssa॒ndhi-ra̭bhavat || so̭-'kāmayata॒ prajā̭ye॒yeti̭ | sa tapo̭-'tapyata | so᳚-'ntarvā̭-nabhavat | sa mukhā᳚-dde॒vā-na̭sṛjata | tebhyo॒ hari̭te॒ pātre॒ soma̭maduhat | yā-'sya॒ sā ta॒nūrāsī᳚t | tāmapā̭hata | tadaha̭rabhavat || 57 ||

e॒te vai pra॒jāpa̭te॒rdohāḥ᳚ | ya e॒vaṃ-ve~da̭ | du॒ha e॒va pra॒jāḥ || divā॒ vai no̭-'bhū॒diti̭ | ta-dde॒vānā᳚-ndeva॒tvam | ya e॒va-nde॒vānā᳚-ndeva॒tvaṃ-ve~da̭ | de॒vavā̭ne॒va bha̭vati || e॒tadvā a̭horā॒trāṇā॒-ñjanma̭ | ya e॒vama̭horā॒trāṇā॒-ñjanma॒ veda̭ | nāho̭rā॒treṣvārti॒mārccha̭ti || 58 ||

asa॒to-'dhi॒ mano̭-'sṛjyata | manaḥ̭ pra॒jāpa̭ti-masṛjata | pra॒jāpa̭tiḥ pra॒jā a̭sṛjata | tadvā i॒da-mmana̭sye॒va pa̭ra॒ma-mprati̭ṣṭhitam | yadi॒da-ṅkiñca̭ | tade॒tacchvo̭vasya॒ sannāma॒ brahma̭ || vyu॒cchantī᳚ vyucchantyasmai॒ vasya̭sī vasyasī॒ vyṷcchati | prajā̭yate pra॒jayā̭ pa॒śubhiḥ̭ | pra pa̭rame॒ṣṭhino॒ mātrā̭-māpnoti | ya e॒vaṃ-ve~da̭ || 59 ||

(a॒gnira̭jāyata॒ tadbhūyo̭-'tapyatā - bhinada - rodī-tpra॒jāpa̭tī - roda॒stva - ma̭sṛja॒ - tāsṛ̭jata - ghṛ॒tama̭duha॒dyā-'sya॒ sā ta॒nūrāsī॒ - daha̭rabhava-d- ṛcchati॒ - veda̭) (a. 9)

(i॒da-ndhū॒mo᳚ 'gni-rjyoti̭ ra॒rci-rmarī̭caya udā॒rā stada॒bhragṃ /

sa ja॒ghanā॒-thsā tami̭srā॒ sa pra॒jana̭nā॒-thsā jothsnā॒ sa ṷpapa॒kṣābhyā॒gṃ॒ so̭ 'horā॒trayo᳚-ssa॒ndhi-ssamukhā॒-ttadaha̭-rde॒vavā᳚n / mṛ॒nmayḙ dāru॒mayḙ raja॒te hari̭te॒ tebhya॒stābhyo॒ dve tebhyo-'nna॒-mpayo̭

ghṛ॒tagṃ soma᳚m)

anuvākaṃ 10 - devasṛṣṭimadhye-'vasthitasyendrasya devatādhipatitvam

pra॒jāpa̭ti॒-rindra̭masṛja-tānujāva॒ra-nde॒vānā᳚m | ta-mprāhi̭ṇot | parḙhi | e॒teṣā᳚-nde॒vānā॒-madhi̭patire॒dhīti̭ | ta-nde॒vā a̭bruvann | kastvamasi̭ | va॒yaṃ-vai~ tvacchreyāgṃ̭sa-ssma॒ iti̭ | so᳚-'bravīt | kastvamasi̭ va॒yaṃ-vai~ tvacchreyāgṃ̭sa-ssma॒ iti̭ mā de॒vā a̭voca॒nniti̭ || atha॒ vā i॒da-ntarhi̭ pra॒jāpa̭tau॒ hara̭ āsīt || 60 ||

yada॒sminnā̭di॒tye | tadḙnamabravīt | e॒tanme॒ praya̭ccha | athā॒hame॒teṣā᳚-nde॒vānā॒-madhi̭pati-rbhaviṣyā॒mīti̭ | ko̭hagg-syā॒mitya̭bravīt | e॒ta-tpra॒dāyeti̭ | e॒ta-thsyā॒ itya̭bravīt | yade॒tadbravī॒ṣīti̭ | ko ha॒ vai nāma̭ pra॒jāpa̭tiḥ | ya e॒vaṃ-ve~da̭ || 61 ||

vi॒durḙna॒-nnāmnā᳚ | tada̭smai ru॒kma-ṅkṛ॒tvā pratya̭muñcat | tato॒ vā indro̭ de॒vānā॒-madhi̭pati-rabhavat | ya e॒vaṃ-ve~da̭ | adhi̭patire॒va sa̭mā॒nānā᳚-mbhavati || so̭-'manyata | ki-ṅkiṃ॒-vā~ a̭kara॒miti̭ | sa ca॒ndra-mma॒ āha॒reti॒ prāla̭pat | tacca॒ndrama̭sa-ścandrama॒stvam | ya e॒vaṃ-ve~da̭ || 62 ||

ca॒ndravā̭ne॒va bha̭vati || ta-nde॒vā a̭bruvann | su॒vīryo̭ 'maryā॒ yathā̭ gopā॒yata॒ iti̭ | ta-thsūrya̭sya sūrya॒tvam | ya e॒vaṃ-ve~da̭ | naina̭-ndabhnoti || kaśca॒ nāsmi॒nvā i॒dami̭ndri॒ya-mpratya̭sthā॒diti̭ | tadindra̭-syendra॒tvam | ya e॒vaṃ-ve~da̭ | i॒ndri॒yā॒vyḙva bha̭vati || 63 ||

a॒yaṃ-vā~ i॒da-mpa̭ra॒mo̭-'bhū॒diti̭ | tat-pa̭rame॒ṣṭhinaḥ̭ parameṣṭhi॒tvam | ya e॒vaṃ-ve~da̭ | pa॒ra॒māme॒va kāṣṭhā᳚-ṅgacchati || ta-nde॒vā-ssa̭ma॒nta-mparya̭viśann | vasa̭vaḥ pu॒rastā᳚t | ru॒drā da̭kṣiṇa॒taḥ | ā॒di॒tyāḥ pa॒ścāt | viśvḙ de॒vā ṷttara॒taḥ | aṅgi̭rasaḥ pra॒tyañca᳚m || 64 ||

sā॒ddhyāḥ parā᳚ñcam | ya e॒vaṃ-ve~da̭ | upai̭nagṃ samā॒nā-ssaṃ-vi~̭śanti || sa pra॒jāpa̭tire॒va bhū॒tvā pra॒jā āva̭yat | tā a̭smai॒ nāti̭ṣṭhantā॒nnādyā̭ya | tā mukha̭-mpu॒rastā॒t-paśya̭ntīḥ | da॒kṣi॒ṇa॒taḥ paryā̭yann | sa da̭kṣiṇa॒taḥ parya̭vartayata | tā mukha̭-mpu॒rastā॒t-paśya̭ntīḥ | mukha̭-ndakṣiṇa॒taḥ || 65 ||

pa॒ścāt-paryā̭yann | sa pa॒ścāt-parya̭vartayata | tā mukha̭-mpu॒rastā॒t-paśya̭ntīḥ | mukha̭-ndakṣiṇa॒taḥ | mukha̭-mpa॒ścāt | u॒tta॒ra॒taḥ paryā̭yann | sa ṷttara॒taḥ parya̭vartayata | tā mukha̭-mpu॒rastā॒t-paśya̭ntīḥ | mukha̭-ndakṣiṇa॒taḥ | mukha̭-mpa॒ścāt || 66 ||

mukha̭muttara॒taḥ | ū॒rdhvā udā̭yann | sa u॒pari̭ṣṭā॒nnya̭-vartayata | tā-ssa॒rvato̭mukho bhū॒tvā ''va̭yat | tato॒ vai tasmai᳚ pra॒jā ati̭ṣṭhantā॒nnādyā̭ya || ya e॒vaṃ-vi~॒dvā-npari̭ ca va॒rtaya̭te॒ ni ca̭ | pra॒jāpa̭tire॒va bhu॒tvā pra॒jā a̭tti | tiṣṭha̭nte-'smai pra॒jā a॒nnādyā̭ya | a॒nnā॒da e॒va bha̭vati || 67 ||

(ā॒sī॒-d- veda̭ - candrama॒stvaṃ-ya~ e॒vaṃ-ve~de᳚ - ndriyā॒vyḙva bha̭vati - pra॒tyañca॒ - mukha̭-ndakṣiṇa॒to - mukha̭-mpa॒ścān - +nava̭ ca) (ā10 )

anuvākaṃ 11 - hotṛmantrāṇā-mpuruṣārthaprayogaḥ

pra॒jāpa̭ti-rakāmayata ba॒horbhūyā᳚n-thsyā॒miti̭ | sa e॒ta-ndaśa̭hotāra-mapaśyat | ta-mprāyṷṅkta | tasya॒ prayṷkti ba॒horbhūyā̭nabhavat | yaḥ kā॒mayḙta ba॒horbhūyā᳚n-thsyā॒miti̭ | sa daśa̭hotāra॒-mprayṷñjīta | ba॒hore॒va bhūyā᳚n-bhavati || so̭-'kāmayata vī॒ro ma॒ ājā̭ye॒teti̭ | sa daśa̭hotu॒ścatṷrhotāra॒-nnira̭mimīta | ta-mprāyṷṅkta || 68 ||

tasya॒ prayu॒ktīndro̭ 'jāyata | yaḥ kā॒mayḙta vī॒ro ma॒ ājā̭ye॒teti̭ | sa catṷrhotāra॒-mprayṷñjīta | ā-'sya̭ vī॒ro jā̭yate || so̭-'kāmayata paśu॒mān-thsyā॒miti̭ | sa catṷrhotuḥ॒ pañca̭hotāra॒-nnira̭mimīta | ta-mprāyṷṅkta | tasya॒ prayṷkti paśu॒māna̭bhavat | yaḥ kā॒mayḙta paśu॒mān-thsyā॒miti̭ | sa pañca̭hotāra॒-mprayṷñjīta || 69 ||

pa॒śu॒māne॒va bha̭vati || so̭-'kāmayata॒rtavo̭ me kalpera॒nniti̭ | sa pañca̭hotu॒-ṣṣaḍḍho̭tāra॒-nnira̭mimīta | ta-mprāyṷṅkta | tasya॒ prayṷktyṛ॒tavo᳚-'smā akalpanta | yaḥ kā॒mayḙta॒rtavo̭ me kalpera॒nniti̭ | sa ṣaḍḍho̭tāra॒-mprayṷñjīta | kalpa̭nte-'smā ṛ॒tavaḥ̭ || so̭-'kāmayata soma॒pa-sso̭mayā॒jī syā᳚m | ā mḙ soma॒pa-sso̭mayā॒jī jā̭ye॒teti̭ || 70 ||

sa ṣaḍḍho̭tu-ssa॒ptaho̭tāra॒-nnira̭mimīta | ta-mprāyṷṅkta | tasya॒ prayṷkti soma॒pa-sso̭mayā॒jya̭bhavat | ā-'sya̭ soma॒pa-sso̭mayā॒jya̭jāyata | yaḥ kā॒mayḙta soma॒pa-sso̭mayā॒jī syā᳚m | ā mḙ soma॒pa-sso̭mayā॒jī jā̭ye॒teti̭ | sa sa॒ptaho̭tāra॒-mprayṷñjīta | so॒ma॒pa e॒va so̭mayā॒jī bha̭vati | ā-'sya̭ soma॒pa-sso̭mayā॒jī jā̭yate || sa vā e॒ṣa pa॒śuḥ pa̭ñca॒dhā prati̭ tiṣṭhati || 71 ||

pa॒dbhirmukhḙna || te de॒vāḥ pa॒śūn. vi॒ttvā | su॒va॒rgaṃ-lo~॒kamā̭yann || tḙ-'muṣmi̭l ~lo॒ke vya̭kṣuddhyann | te᳚-'bruvann | a॒mutaḥ̭ pradānaṃ॒-vā~ upa̭jijīvi॒meti̭ | te sa॒ptaho̭tāraṃ-ya~॒jñaṃ-vi~॒dhāyā॒yāsya᳚m | ā॒ṅgī॒ra॒sa-mprāhi̭ṇvann | e॒tenā॒mutra̭ kalpa॒yeti̭ | tasya॒ vā i॒ya-ṅklṛptiḥ̭ || 72 ||

yadi॒da-ṅkiñca̭ | ya e॒vaṃ-ve~da̭ | kalpa̭te-'smai | sa vā a॒ya-mma̭nu॒ṣyḙṣu ya॒jña-ssa॒ptaho̭tā | a॒mutra̭ sa॒dbhyo de॒vebhyo̭ ha॒vyaṃ-va~̭hati | ya e॒vaṃ-ve~da̭ | upai̭naṃ-ya~॒jño na̭mati || yo vai catṷrhotṛṇā-nni॒dānaṃ॒-ve~da̭ | ni॒dāna̭vā-nbhavati | a॒gni॒ho॒traṃ-vai~ daśa̭hoturni॒dāna᳚m | da॒r॒śa॒pū॒rṇa॒mā॒sau catṷrhotuḥ | cā॒tu॒rmā॒syāni॒ pañca̭ hotuḥ | pa॒śu॒ba॒ndha-ṣṣaḍḍho̭tuḥ | sau॒myo᳚-'ddhva॒ra-ssa॒ptaho̭tuḥ | e॒tadvai catṷrhotṛṇā-nni॒dāna᳚m | ya e॒vaṃ-ve~da̭ | ni॒dāna̭vā-nbhavati || 73 ||

(a॒mi॒mī॒ta॒ ta-mprāyṷṅkta॒ - pañca̭hotāra॒-mprayṷñjita - jāye॒teti̭ - tiṣṭhati॒ - klṛpti॒--r daśa̭hotu-rni॒dānagṃ̭ sa॒pta ca̭ ) (a. 11)

(pra॒jāpa̭tirakāmayata pra॒jā-ssṛ̭je॒yeti̭ - pra॒jāpa̭tirakāmayata darśapūrṇamā॒sau sṛ̭je॒yeti̭ - pra॒jāpa̭tirakāmayata॒ prajā̭ye॒yeti॒ sa tapa॒-ssa tri॒vṛtaṃ̭ - pra॒jāpa̭tirakāmayata॒ daśa̭hotāra॒-ntena̭ daśa॒dhā-''tmānaṃ̭ - de॒vā vai varṷṇa॒ - manto॒ vai - pra॒jāpa̭ti॒stā-ssṛ॒ṣṭā-ssama̭śliṣyan - de॒vā vai catṷrhotṛbhi - ri॒daṃ-vā~ agre᳚ - pra॒jāpa̭ti॒rindraṃ̭ - pra॒jāpa̭tirakāmayata ba॒horbhūyā॒nekā̭daśa)

(pra॒jāpa̭ti॒ - stadgraha̭sya - pra॒jā̭patirakāmayatā॒ - nayai॒vaina॒t - tasya॒ vā i॒ya-ṅklṛpti॒ - stasmā᳚-ttepā॒nājjyoti॒--r yada॒sminnā̭di॒tye -saṣaḍḍho̭tu-ssa॒ptaho̭tāra॒-ntrisa̭ptatiḥ)

(pra॒jāpa̭tirakāmayata - ni॒dāna̭vānbhavati)

|| hariḥ̭ om ||

|| kṛṣṇa yajurvedīya taittirīya brāhmaṇe dvitīyāṣṭake dvitīyaḥ prapāṭhaka-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय ब्राह्मणे द्वितीयाष्टके द्वितीयः प्रपाठकः - होतृब्राह्मणम्

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

अनुवाकं 1 - दशहोतृमन्त्रस्य क्रत्वर्थपुरुषार्थप्रयोगौ

प्र॒जाप॑तिरकामयत प्र॒जा-स्सृ॑जे॒येति॑ । स ए॒त-न्दश॑होतार-मपश्यत् । त-म्मन॑सा ऽनु॒द्रुत्य॑ दर्भस्त॒म्बे॑-ऽजुहोत् । ततो॒ वै स प्र॒जा अ॑सृजत । ता अ॑स्माथ्सृ॒ष्टा अपा᳚क्रामन्न् । ता ग्रहे॑णागृह्णात् । तद्ग्रह॑स्य ग्रह॒त्वम् । यः का॒मये॑त॒ प्रजा॑ये॒येति॑ । स दश॑होतार॒-म्मन॑सा ऽनु॒द्रुत्य॑ दर्भस्त॒म्बे जु॑हुयात् । प्र॒जाप॑ति॒र्वै दश॑होता ॥ 1 ॥

प्र॒जाप॑तिरे॒व भू॒त्वा प्र जा॑यते ॥ मन॑सा जुहोति । मन॑ इव॒ हि प्र॒जाप॑तिः । प्र॒जाप॑ते॒राप्त्यै᳚ ॥ पू॒र्णया॑ जुहोति । पू॒र्ण इ॑व॒ हि प्र॒जाप॑तिः । प्र॒जाप॑ते॒राप्त्यै᳚ ॥ न्यू॑नया जुहोति । न्यू॑ना॒द्धि प्र॒जाप॑तिः प्र॒जा असृ॑जत । प्र॒जाना॒ग्ं॒ सृष्ट्यै᳚ ॥ 2 ॥

द॒र्भ॒स्त॒म्बे जु॑होति । ए॒तस्मा॒द्वै योनेः᳚ प्र॒जाप॑तिः प्र॒जा अ॑सृजत । यस्मा॑दे॒व योनेः᳚ प्र॒जाप॑तिः प्र॒जा असृ॑जत । तस्मा॑दे॒व योनेः॒ प्र जा॑यते ॥ ब्रा॒ह्म॒णो द॑क्षिण॒त उपा᳚स्ते । ब्रा॒ह्म॒णो वै प्र॒जाना॑-मुपद्र॒ष्टा । उ॒प॒द्र॒ष्टु॒मत्ये॒व प्र जा॑यते ॥ ग्रहो॑ भवति । प्र॒जानाग्ं॑ सृ॒ष्टाना॒-न्धृत्यै᳚ ॥ य-म्ब्रा᳚ह्म॒णं-विँ॒द्यां-विँ॒द्वाग्ंसं॒-यँशो॒ नर्च्छेत् ॥ 3 ॥

सो-ऽर॑ण्य-म्प॒रेत्य॑ । द॒र्भ॒स्त॒म्ब-मु॒द्ग्रत्थ्य॑ । ब्रा॒ह्म॒ण-न्द॑क्षिण॒तो नि॒षाद्य॑ । चतु॑र्होतॄ॒न् व्याच॑क्षीत । ए॒तद्वै दे॒वाना᳚-म्पर॒म-ङ्गुह्य॒-म्ब्रह्म॑ । यच्चतु॑र्होतारः । तदे॒व प्र॑का॒श-ङ्ग॑मयति । तदे॑न-म्प्रका॒श-ङ्ग॒तम् । प्र॒का॒श-म्प्र॒जाना᳚-ङ्गमयति ॥ द॒र्भ॒स्त॒म्ब-मु॒द्ग्रत्थ्य॒ व्याच॑ष्टे ॥ 4 ॥

अ॒ग्नि॒वान्. वै द॑र्भस्त॒म्बः । अ॒ग्नि॒वत्ये॒व व्याच॑ष्टे ॥ ब्रा॒ह्म॒णो द॑क्षिण॒त उपा᳚स्ते । ब्रा॒ह्म॒णो वै प्र॒जाना॑-मुपद्र॒ष्टा । उ॒प॒द्र॒ष्टु॒-मत्ये॒वैनं॒-यँश॑ ऋच्छति ॥ ई॒श्व॒र-न्तं-यँशो-ऽर्तो॒रित्या॑हुः । यस्यान्ते᳚ व्या॒चष्ट॒ इति॑ । वर॒स्तस्मै॒ देयः॑ । यदे॒वैन॒-न्तत्रो॑प॒ नम॑ति । तदे॒वाव॑ रुन्धे ॥ 5 ॥

अ॒ग्निमा॒दधा॑नो॒ दश॑होत्रा॒ ऽरणि॒मव॑दद्ध्यात् । प्रजा॑तमे॒वैन॒-माध॑त्ते । तेनै॒वोद्द्रुत्या᳚ग्निहो॒त्र-ञ्जु॑हुयात् । प्रजा॑तमे॒वैन॑ज्जुहोति । ह॒विर्नि॑र्व॒फ्स्यन्-दश॑होतारं॒-व्याँच॑क्षीत । प्रजा॑तमे॒वैन॒-न्निर्व॑पति । सा॒मि॒धे॒नी-र॑नुव॒क्ष्यन्-दश॑होतारं॒-व्याँच॑क्षीत । सा॒मि॒धे॒नीरे॒व सृ॒ष्ट्वा-ऽऽरभ्य॒ प्र त॑नुते । अथो॑ य॒ज्ञो वै दश॑होता । य॒ज्ञमे॒व त॑नुते ॥ 6 ॥

अ॒भि॒चर॒न्-दश॑होतार-ञ्जुहुयात् । नव॒ वै पुरु॑षे प्रा॒णाः । नाभि॑र्दश॒मी । सप्रा॑णमे॒वैन॑-म॒भिच॑रति । ए॒ताव॒द्वै पुरु॑षस्य॒ स्वम् । याव॑-त्प्रा॒णाः । याव॑दे॒वास्यास्ति॑ । तद॒भिच॑रति ॥ स्वकृ॑त॒ इरि॑णे जुहोति प्रद॒रे वा᳚ । ए॒तद्वा अ॒स्यै निर्-ऋ॑तिगृहीतम् । निर्-ऋ॑ति गृहीत ए॒वैन॒-न्निर्-ऋ॑त्या ग्राहयति ॥ य-द्वा॒चः क्रू॒रम् । तेन॒ वष॑ट्करोति । वा॒च ए॒वैन॑-ङ्क्रू॒रेण॒ प्र वृ॑श्चति । ता॒जगार्ति॒मार्च्छ॑ति ॥ 7 ॥

(दश॑होता॒ - सृष्ट्या॑ - ऋ॒च्छे-द्- व्याच॑ष्टे - रुन्ध - ए॒व त॑नुते॒ - निर्-ऋ॑तिगृहीत॒-म्पञ्च॑ च) (अ. 1)

अनुवाकं 2 - चतुर्होत्रादिमन्त्राणा-ङ्क्रत्वर्थप्रयोगः

प्र॒जाप॑तिरकामयत दर्शपूर्णमा॒सौ सृ॑जे॒येति॑ । स ए॒त-ञ्चतु॑र्होतार-मपश्यत् । त-म्मन॑सा-ऽनु॒द्रुत्या॑ हव॒नीये॑-ऽजुहोत् । ततो॒ वै स द॑र्शपूर्णमा॒साव॑सृजत । ताव॑स्मा-थ्सृ॒ष्टावपा᳚क्रामताम् । तौ ग्रहे॑णा गृह्णात् । तद्ग्रह॑स्य ग्रह॒त्वम् । द॒र्॒श॒पू॒र्ण॒मा॒सा-वा॒लभ॑मानः । चतु॑र्होतार॒-म्मन॑सा-ऽनु॒द्रुत्या॑-हव॒नीये॑ जुहुयात् । द॒र्॒श॒पू॒र्ण॒मा॒सावे॒व सृ॒ष्ट्वा-ऽऽरभ्य॒ प्र त॑नुते ॥ 8 ॥

ग्रहो॑ भवति । द॒र्॒श॒पू॒र्ण॒मा॒सयो᳚-स्सृ॒ष्टयो॒र्धृत्यै᳚ ॥ सो॑-ऽकामयत चातुर्मा॒स्यानि॑ सृजे॒येति॑ । स ए॒त-म्पञ्च॑होतार-मपश्यत् । त-म्मन॑सा-ऽनु॒द्रुत्या॑ हव॒नीये॑-ऽजुहोत् । ततो॒ वै स चा॑तुर्मा॒स्यान्य॑सृजत । तान्य॑स्मा-थ्सृ॒ष्टान्यपा᳚क्रामन्न् । तानि॒ ग्रहे॑णागृह्णात् । तद्ग्रह॑स्य ग्रह॒त्वम् । चा॒तु॒र्मा॒स्यान्या॒लभ॑मानः ॥ 9 ॥

पञ्च॑होतार॒-म्मन॑सा-ऽनु॒द्रुत्या॑ हव॒नीये॑ जुहुयात् । चा॒तु॒र्मा॒स्यान्ये॒व सृ॒ष्ट्वा-ऽऽरभ्य॒ प्र त॑नुते । ग्रहो॑ भवति । चा॒तु॒र्मा॒स्यानाग्ं॑ सृ॒ष्टाना॒-न्धृत्यै᳚ ॥ सो॑-ऽकामयत पशुब॒न्धग्ं सृ॑जे॒येति॑ । स ए॒तग्ं षड्ढो॑तार-मपश्यत् । त-म्मन॑सा-ऽनु॒द्रुत्या॑ हव॒नीये॑-ऽजुहोत् । ततो॒ वै स प॑शुब॒न्धम॑सृजत । सो᳚-ऽस्मा-थ्सृ॒ष्टो ऽपा᳚क्रामत् । त-ङ्ग्रहे॑णागृह्णात् ॥ 10 ॥

तद्ग्रह॑स्य ग्रह॒त्वम् । प॒शु॒ब॒न्धेन॑ य॒क्ष्यमा॑णः । षड्ढो॑तार॒-म्मन॑सा ऽनु॒द्रुत्या॑ हव॒नीये॑ जुहुयात् । प॒शु॒ब॒न्धमे॒व सृ॒ष्ट्वा-ऽऽरभ्य॒ प्र त॑नुते । ग्रहो॑ भवति । प॒शु॒ब॒न्धस्य॑ सृ॒ष्टस्य॒ धृत्यै᳚ ॥ सो॑-ऽकामयत सौ॒म्य-म॑द्ध्व॒रग्ं सृ॑जे॒येति॑ । स ए॒तग्ं स॒प्तहो॑तार-मपश्यत् । त-म्मन॑सा-ऽनु॒द्रुत्या॑ हव॒नीये॑ ऽजुहोत् । ततो॒ वै स सौ॒म्य-म॑द्ध्व॒र-म॑सृजत ॥ 11 ॥

सो᳚-ऽस्मा-थ्सृ॒ष्टो-ऽपा᳚क्रामत् । त-ङ्ग्रहे॑णागृह्णात् । तद्ग्रह॑स्य ग्रह॒त्वम् । दी॒क्षि॒ष्यमा॑णः । स॒प्तहो॑तार॒-म्मन॑सा-ऽनु॒द्रुत्या॑ हव॒नीये॑ जुहुयात् । सौ॒म्यमे॒वाद्ध्व॒रग्ं सृ॒ष्ट्वा-ऽऽरभ्य॒ प्र त॑नुते । ग्रहो॑ भवति । सौ॒म्यस्या᳚-द्ध्व॒रस्य॑ सृ॒ष्टस्य॒ धृत्यै᳚ ॥ दे॒वेभ्यो॒ वै य॒ज्ञो न प्राभ॑वत् । तमे॑ताव॒च्छ-स्सम॑भरन्न् ॥ 12 ॥

य-थ्स॑भां॒राः । ततो॒ वै तेभ्यो॑ य॒ज्ञः प्राभ॑वत् । य-थ्स॑भां॒रा भव॑न्ति । य॒ज्ञस्य॒ प्रभू᳚त्यै ॥ आ॒ति॒त्थ्यमा॒साद्य॒ व्याच॑ष्टे । य॒ज्ञ॒मु॒खं-वाँ आ॑ति॒थ्यम् । मु॒ख॒त ए॒व य॒ज्ञग्ं स॒भृन्त्य॒ प्र त॑नुते ॥ अय॑ज्ञो॒ वा ए॒षः । यो॑-ऽप॒त्नीकः॑ । न प्र॒जाः प्र जा॑येरन्न् । पत्नी॒र्व्याच॑ष्टे । य॒ज्ञमे॒वाकः॑ । प्र॒जाना᳚-म्प्र॒जन॑नाय ॥ उ॒प॒सथ्सु॒ व्याच॑ष्टे । ए॒तद्वै पत्नी॑ना-मा॒यत॑नम् । स्व ए॒वैना॑ आ॒यत॒ने-ऽव॑ कल्पयति ॥ 13 ॥

(त॒नु॒त॒ - आ॒लभ॑मानो - ऽगृह्णा - दसृज - ताभर - ञ्जायेर॒न्-थ्षट्च॑) (अ. 2)

अनुवाकं 3 - चतुर्होतृपञ्चहोतृमन्त्रग्रहभागयोः पुरुषार्थ प्रयोगः

प्र॒जाप॑ति-रकामयत॒ प्र जा॑ये॒येति॑ । स तपो॑-ऽतप्यत । स त्रि॒वृत॒ग्ग्॒ स्तोम॑-मसृजत । त-म्प॑ञ्चद॒शस्तोमो॑ मद्ध्य॒त उद॑तृणत् । तौ पू᳚र्वप॒क्षश्चा॑परप॒क्षश्चा॑भवताम् । पू॒र्व॒प॒क्ष-न्दे॒वा अन्वसृ॑ज्यन्त । अ॒प॒र॒प॒क्ष-मन्वसु॑राः । ततो॑ दे॒वा अभ॑वन्न् । परा-ऽसु॑राः । य-ङ्का॒मये॑त॒ वसी॑यान्-थ्स्या॒दिति॑ ॥ 14 ॥

त-म्पू᳚र्वप॒क्षे या॑जयेत् । वसी॑याने॒व भ॑वति । य-ङ्का॒मये॑त॒ पापी॑यान्-थ्स्या॒दिति॑ । तम॑परप॒क्षे या॑जयेत् । पापी॑याने॒व भ॑वति । तस्मा᳚-त्पूर्वप॒क्षो॑ ¶प॒क्षात्-क॑रु॒ण्य॑तरः ॥ प्र॒जाप॑ति॒र्वै दश॑होता । चतु॑र्होता॒ पञ्च॑होता । षड्ढो॑ता स॒प्तहो॑ता । ऋ॒तवः॑ संवँथ्स॒रः ॥ 15 ॥

प्र॒जाः प॒शव॑ इ॒मे लो॒काः । य ए॒व-म्प्र॒जाप॑ति-म्ब॒होर्भूयाग्ं॑सं॒-वेँद॑ । ब॒होरे॒व भूया᳚-न्भवति ॥ प्र॒जाप॑ति-र्देवासु॒रान॑सृजत । स इन्द्र॒मपि॒ नासृ॑जत । त-न्दे॒वा अ॑ब्रुवन्न् । इन्द्र॑-न्नो जन॒येति॑ । सो᳚-ऽब्रवीत् । यथा॒ ऽहं-युँ॒ष्माग् स्तप॒सा ऽसृ॑क्षि । ए॒वमिन्द्र॑-ञ्जनयद्ध्व॒मिति॑ ॥ 16 ॥

ते तपो॑-ऽतप्यन्त । त आ॒त्मन्निन्द्र॑-मपश्यन्न् । तम॑ब्रुवन्न् । जाय॒स्वेति॑ । सो᳚-ऽब्रवीत् । कि-म्भा॑ग॒धेय॑-म॒भिज॑निष्य॒ इति॑ । ऋ॒तून्-थ्सं॑वँथ्स॒रम् । प्र॒जाः प॒शून् । इ॒माल् ँलो॒कानित्य॑ब्रुवन्न् । तं-वैँ मा-ऽऽहु॑त्या॒ प्रज॑नय॒तेत्य॑ब्रवीत् ॥ 17 ॥

त-ञ्चतु॑र्होत्रा॒ प्राज॑नयन्न् ॥ यः का॒मये॑त वी॒रो म॒ आ जा॑ये॒तेति॑ । स चतु॑र्होतार-ञ्जुहुयात् । प्र॒जाप॑ति॒र्वै चतु॑र्होता । प्र॒जाप॑तिरे॒व भू॒त्वा प्रजा॑यते । ज॒जन॒दिन्द्र॑-मिन्द्रि॒याय॒ स्वाहेति॒ ग्रहे॑ण जुहोति । आ-ऽस्य॑ वी॒रो जा॑यते । वी॒रग्ं हि दे॒वा ए॒तया ऽऽहु॑त्या॒ प्राज॑नयन्न् ॥ आ॒दि॒त्याश्चाङ्गि॑रसश्च सुव॒र्गे लो॒के᳚ ऽस्पर्धन्त । व॒य-म्पूर्वे॑ सुव॒र्गं-लोँ॒कमि॑याम व॒य-म्पूर्व॒ इति॑ ॥ 18 ॥

त आ॑दि॒त्या ए॒त-म्पञ्च॑होतार-मपश्यन्न् । त-म्पु॒रा प्रा॑तरनुवा॒कादाग्नी᳚द्ध्रे ऽजुहवुः । ततो॒ वै ते पूर्वे॑ सुव॒र्गं-लोँ॒कमा॑यन्न् । य-स्सु॑व॒र्गका॑म॒-स्स्यात् । स पञ्च॑होतार-म्पु॒रा प्रा॑तरनुवा॒कादाग्नी᳚द्ध्रे जुहुयात् । सं॒वँ॒थ्स॒रो वै पञ्च॑होता । सं॒वँ॒थ्स॒र-स्सु॑व॒र्गो लो॒कः । सं॒वँ॒थ्स॒र ए॒वर्तुषु॑ प्रति॒ष्ठाय॑ । सु॒व॒र्गं-लोँ॒कमे॑ति ॥ ते᳚ब्रुव॒-न्नङ्गि॑रस आदि॒त्यान् ॥ 19 ॥

क्व॑ स्थ । क्व॑ व-स्स॒द्भ्यो ह॒व्यं-वँ॑क्ष्याम॒ इति॑ । छन्द॒-स्स्वित्य॑ब्रुवन्न् । गा॒य॒त्रि॒या-न्त्रि॒ष्टुभि॒-जग॑त्या॒मिति॑ । तस्मा॒च्छन्दः॑ सु स॒द्भ्य आ॑दि॒त्येभ्यः॑ । आ॒ङ्गी॒र॒सीः प्र॒जा ह॒व्यं-वँ॑हन्ति । वह॑न्त्यस्मै प्र॒जा ब॒लिम् । ऐन॒मप्र॑तिख्यात-ङ्गच्छति । य ए॒वं-वेँद॑ ॥ द्वाद॑श॒ मासाः॒ पञ्च॒र्तवः॑ । त्रय॑ इ॒मे लो॒काः । अ॒सावा॑दि॒त्य ए॑कवि॒ग्ं॒शः । ए॒तस्मि॒न् वा ए॒ष श्रि॒तः । ए॒तस्मि॒न्-प्रति॑ष्ठितः । य ए॒वमे॒तग्ग् श्रि॒त-म्प्रति॑ष्ठितं॒-वेँद॑ । प्रत्ये॒व ति॑ष्ठति ॥ 20 ॥

(स्या॒दिति॑ - संवँथ्स॒रो - ज॑नयद्ध्व॒मिती - त्य॑ब्रवी॒त् - पूर्व॒ इत्या॑ - दि॒त्यान् - ऋ॒तव॒-ष्षट्च॑) (अ. 3)

अनुवाकं 4 - जग-थ्सृष्टिकथनमुखेन होतृमन्त्रप्रशंसा

प्र॒जाप॑ति-रकामयत॒ प्रजा॑ये॒येति॑ । स ए॒त-न्दश॑होतार-मपश्यत् । तेन॑ दश॒धा ऽऽत्मानं॑-विँ॒धाय॑ । दश॑होत्रा ऽतप्यत । तस्य॒ चित्ति॒-स्स्रुगासी᳚त् । चि॒त्तमाज्य᳚म् । तस्यै॒ता॑वत्ये॒व वागासी᳚त् । ए॒तावान्॑. यज्ञक्र॒तुः ॥ स चतु॑र्होतार-मसृजत । सो॑-ऽनन्दत् ॥ 21 ॥

असृ॑क्षि॒ वा इ॒ममिति॑ । तस्य॒ सोमो॑ ह॒विरासी᳚त् । स चतु॑र्होत्रा ऽतप्यत । सो॑-ऽताम्यत् । स भूरिति॒ व्याह॑रत् । स भूमि॑मसृजत । अ॒ग्नि॒हो॒त्र-न्द॑र्शपूर्णमा॒सौ यजूग्ं॑षि । स द्वि॒तीय॑मतप्यत । सो॑-ऽताम्यत् । स भुव॒ इति॒ व्याह॑रत् ॥ 22 ॥

सो᳚-ऽन्तरि॑क्ष-मसृजत । चा॒तु॒र्मा॒स्यानि॒ सामा॑नि । स तृ॒तीय॑मतप्यत । सो॑-ऽताम्यत् । स सुव॒रिति॒ व्याह॑रत् । स दिव॑मसृजत । अ॒ग्नि॒ष्टो॒म-मु॒क्थ्य॑-मतिरा॒त्रमृचः॑ । ए॒ता वै व्याहृ॑तय इ॒मे लो॒काः । इ॒मा-न्खलु॒ वै लो॒काननु॑ प्र॒जाः प॒शव॒श्छन्दाग्ं॑सि॒ प्राजा॑यन्त । य ए॒वमे॒ताः प्र॒जाप॑तेः प्रथ॒मा व्याहृ॑तीः॒ प्रजा॑ता॒ वेद॑ ॥ 23 ॥

प्र प्र॒जया॑ प॒शुभि॑-र्मिथु॒नै-र्जा॑यते ॥ स पञ्च॑होतार-मसृजत । स ह॒विर्ना-वि॑न्दत । तस्मै॒ सोम॑-स्त॒नुव॒-म्प्राय॑च्छत् । ए॒त-त्ते॑ ह॒विरिति॑ । स पञ्च॑होत्रा ऽतप्यत । सो॑-ऽताम्यत् । स प्र॒त्यङ्ङ॑बाधत । सो-ऽसु॑रा-नसृजत । तद॒स्या प्रि॑यमासीत् ॥ 24 ॥

त-द्दु॒र्वर्ण॒ग्ं॒ हिर॑ण्यमभवत् । त-द्दु॒र्वर्ण॑स्य॒ हिर॑ण्यस्य॒ जन्म॑ । स द्वि॒तीय॑मतप्यत । सो॑-ऽताम्यत् । स प्रांअ॑बाधत । स दे॒वान॑सृजत । तद॑स्य प्रि॒यम॑सीत् । त-थ्सु॒वर्ण॒ग्ं॒ हिर॑ण्यमभवत् । त-थ्सु॒वर्ण॑स्य॒ हिर॑ण्यस्य॒ जन्म॑ । य ए॒वग्ं सु॒वर्ण॑स्य॒ हिर॑ण्यस्य॒ जन्म॒ वेद॑ ॥ 25 ॥

सु॒वर्ण॑ आ॒त्मना॑ भवति । दु॒र्वर्णो᳚-ऽस्य॒ भ्रातृ॑व्यः । तस्मा᳚-थ्सु॒वर्ण॒ग्ं॒ हिर॑ण्य-म्भा॒र्य᳚म् । सु॒वर्ण॑ ए॒व भ॑वति । ऐन॑-म्प्रि॒य-ङ्ग॑च्छति॒ नाप्रि॑यम् ॥ स स॒प्तहो॑तार-मसृजत । स स॒प्तहो᳚त्रै॒व सु॑व॒र्गं-लोँ॒कमै᳚त् ॥ त्रि॒ण॒वेन॒ स्तोमे॑नै॒भ्यो लो॒केभ्यो-ऽसु॑रा॒-न्प्राणु॑दत । त्र॒य॒स्त्रि॒ग्ं॒शेन॒ प्रत्य॑तिष्ठत् । ए॒क॒वि॒ग्ं॒शेन॒ रुच॑मधत्त ॥ 26 ॥

स॒प्त॒द॒शेन॒ प्राजा॑यत । य ए॒वं-विँ॒द्वान्-थ्सोमे॑न॒ यज॑ते । स॒प्तहो᳚त्रै॒व सु॑व॒र्गं-लोँ॒कमे॑ति । त्रि॒ण॒वेन॒ स्तोमे॑नै॒भ्यो लो॒केभ्यो॒ भ्रातृ॑व्या॒न्-प्रणु॑दते । त्र॒य॒स्त्रि॒ग्ं॒शेन॒ प्रति॑ तिष्ठति । ए॒क॒वि॒ग्ं॒शेन॒ रुच॑-न्धत्ते । स॒प्त॒द॒शेन॒ प्रजा॑यते । तस्मा᳚-थ्सप्तद॒श-स्स्तोमो॒ न नि॒र्॒हृत्यः॑ । प्र॒जाप॑ति॒ र्वै स॑प्तद॒शः । प्र॒जाप॑तिमे॒व म॑द्ध्य॒तो ध॑त्ते॒ प्रजा᳚त्यै ॥ 27 ॥

(अ॒न॒न्द॒-द्- भुव॒ इति॒ व्याह॑र॒-द्- वेदा॑ - सी॒-द्- वेदा॑ - धत्त॒ - प्रजा᳚त्यै) (अ. 4)

अनुवाकं 5 - दक्षिणाप्रतिग्रहमन्त्रव्याख्यानम्

दे॒वा वै वरु॑णमयाजयन्न् । स यस्यै॑ यस्यै दे॒वता॑यै॒ दक्षि॑णा॒मन॑यत् । ताम॑व्लीनात् । ते᳚-ऽब्रुवन्न् । व्या॒वृत्य॒ प्रति॑ गृह्णाम । तथा॑ नो॒ दक्षि॑णा॒ न व्ले᳚ष्य॒तीति॑ । ते व्या॒वृत्य॒ प्रत्य॑गृह्णन्न् । ततो॒ वै ता-न्दक्षि॑णा॒ नाव्ली॑नात् । य ए॒वं-विँ॒द्वान् व्या॒वृत्य॒ दक्षि॑णा-म्प्रतिगृ॒ह्णाति॑ । नैन॒-न्दक्षि॑णा व्लीनाति ॥ 28 ॥

राजा᳚ त्वा॒ वरु॑णो नयतु देवि दक्षिणे॒-ऽग्नये॒ हिर॑ण्य॒मित्या॑ह । आ॒ग्ने॒यं-वैँ हिर॑ण्यम् । स्वयै॒वैन॑-द्दे॒वत॑या॒ प्रति॑ गृह्णाति । सोमा॑य॒ वास॒ इत्या॑ह । सौ॒म्यं-वैँ वासः॑ । स्वयै॒वैन॑-द्दे॒वत॑या॒ प्रति॑ गृह्णाति । रु॒द्राय॒ गामित्या॑ह । रौ॒द्री वै गौः । स्वयै॒वैना᳚-न्दे॒वत॑या॒ प्रति॑ गृह्णाति । वरु॑णा॒याश्व॒मित्या॑ह ॥ 29 ॥

वा॒रु॒णो वा अश्वः॑ । स्वयै॒वैन॑-न्दे॒वत॑या॒ प्रति॑ गृह्णाति । प्रा॒जाप॑तये॒ पुरु॑ष॒मित्या॑ह । प्रा॒जा॒प॒त्यो वै पुरु॑षः । स्वयै॒वैन॑-न्दे॒वत॑या॒ प्रति॑ गृह्णाति । मन॑वे॒ तल्प॒मित्या॑ह । मा॒न॒वो वै तल्पः॑ । स्वयै॒वैन॑-न्दे॒वत॑या॒ प्रति॑ गृह्णाति । उ॒त्ता॒नाया᳚ङ्गीर॒सायान॒ इत्या॑ह । इ॒यं-वाँ उ॑त्ता॒न आ᳚ङ्गीर॒सः ॥ 30 ॥

अ॒नयै॒वैन॒त्-प्रति॑ गृह्णाति ॥ वै॒श्वा॒न॒र्यार्चा रथ॒-म्प्रति॑ गृह्णाति । वै॒श्वा॒न॒रो वै दे॒वत॑या॒ रथः॑ । स्वयै॒वैन॑-न्दे॒वत॑या॒ प्रति॑ गृह्णाति ॥ तेना॑मृत॒त्वम॑श्या॒-मित्या॑ह । अ॒मृत॑मे॒वात्मन्-ध॑त्ते ॥ वयो॑ दा॒त्र इत्या॑ह । वय॑ ए॒वैन॑-ङ्कृ॒त्वा । सु॒व॒र्गं-लोँ॒क-ङ्ग॑मयति ॥ मयो॒ मह्य॑मस्तु प्रतिग्रही॒त्र इत्या॑ह ॥ 31 ॥

यद्वै शि॒वम् । तन्मयः॑ । आ॒त्मन॑ ए॒वैषा परी᳚त्तिः ॥ क इ॒द-ङ्कस्मा॑ अदा॒दित्या॑ह । प्र॒जाप॑ति॒र्वै कः । स प्र॒जाप॑तये ददाति ॥ कामः॒ कामा॒येत्या॑ह । कामे॑न॒ हि ददा॑ति । कामे॑न प्रतिगृ॒ह्णाति॑ ॥ कामो॑ दा॒ता कामः॑ प्रति ग्रही॒तेत्या॑ह ॥ 32 ॥

कामो॒ हि दा॒ता । कामः॑ प्रति ग्रही॒ता ॥ कामग्ं॑ समु॒द्र-मावि॒शेत्या॑ह । स॒मु॒द्र इ॑व॒ हि कामः॑ । नेव॒ हि काम॒स्यान्तो-ऽस्ति॑ । न स॑मु॒द्रस्य॑ ॥ कामे॑न त्वा॒ प्रति॑ गृह्णा॒मीत्या॑ह । येन॒ कामे॑न प्रति गृ॒ह्णाति॑ । स ए॒वैन॑म॒मुष्मि॑ल् ँलो॒के काम॒ आग॑च्छति ॥ कामै॒तत्त॑ ए॒षा ते॑ काम॒ दक्षि॒णेत्या॑ह । काम॑ ए॒व त-द्यज॑मानो॒-ऽमुष्मि॑ल् ँलो॒के दक्षि॑णामिच्छति । न प्र॑तिग्रही॒तरि॑ ॥ य ए॒वं-विँ॒द्वान्-दक्षि॑णा-म्प्रतिगृ॒ह्णाति॑ । अ॒नृ॒णामे॒वैना॒-म्प्रति॑ गृह्णाति ॥ 33 ॥

(व्ली॒ना॒त्य - श्व॒मित्या॑हा - ङ्गिर॒सः - प्र॑तिग्रही॒त्र इत्या॑ह - प्रतिग्रही॒तेत्या॑ह॒ - दक्षि॒णेत्या॑ह च॒त्वारि॑ च) (अ. 5)

अनुवाकं 6 - द्वादशाहदशमे-ऽहनि होतृमन्त्राः

अन्तो॒ वा ए॒ष य॒ज्ञस्य॑ । य-द्द॑श॒ममहः॑ । द॒श॒मे-ऽह᳚न्-थ्सर्परा॒ज्ञिया॑ ऋ॒ग्भि-स्स्तु॑वन्ति । य॒ज्ञस्यै॒वान्त॑-ङ्ग॒त्वा । अ॒न्नाद्य॒मव॑रुन्धते ॥ ति॒सृभिः॑ स्तुवन्ति । त्रय॑ इ॒मे लो॒काः । ए॒भ्य ए॒व लो॒केभ्यो॒-ऽन्नाद्य॒मव॑रुन्धते । पृश्नि॑वती-र्भवन्ति । अन्नं॒-वैँ पृश्नि॑ ॥ 34 ॥

अन्न॑मे॒वाव॑-रुन्धते ॥ मन॑सा॒ प्रस्तौ॑ति । मन॒सोद्गा॑यति । मन॑सा॒ प्रति॑ हरति । मन॑ इव॒ हि प्र॒जाप॑तिः । प्र॒जाप॑ते॒राप्त्यै᳚ ॥ दे॒वा वै स॒र्पाः । तेषा॑मि॒यग्ं राज्ञी᳚ । य-थ्स॑र्परा॒ज्ञिया॑ ऋ॒ग्भि-स्स्तु॒वन्ति॑ । अ॒स्यामे॒व प्रति॑ तिष्ठन्ति ॥ 35 ॥

चतु॑र्होतॄ॒न्॒. होता॒ व्याच॑ष्टे । स्तु॒तमनु॑शग्ंसति॒ शान्त्यै᳚ ॥ अन्तो॒ वा ए॒ष य॒ज्ञस्य॑ । य-द्द॑श॒ममहः॑ । ए॒त-त्खलु॒ वै दे॒वाना᳚-म्पर॒म-ङ्गुह्य॒-म्ब्रह्म॑ । यच्चतु॑र्होतारः । द॒श॒मे-ऽह॒ग्ग्॒-श्चतु॑र्होतॄ॒न् व्याच॑ष्टे । य॒ज्ञस्यै॒वान्त॑-ङ्ग॒त्वा । प॒र॒म-न्दे॒वाना॒-ङ्गुह्य॒-म्ब्रह्माव॑रुन्धे । तदे॒व प्र॑का॒श-ङ्ग॑मयति ॥ 36 ॥

तदे॑न-म्प्रका॒श-ङ्ग॒तम् । प्र॒का॒श-म्प्र॒जाना᳚-ङ्गमयति ॥ वाचं॑-यँच्छति । य॒ज्ञस्य॒ धृत्यै᳚ ॥ य॒ज॒मा॒न॒दे॒व॒त्यं॑-वाँ अहः॑ । भ्रा॒तृ॒व्य॒दे॒व॒त्या॑ रात्रिः॑ । अह्ना॒ रात्रि॑-न्ध्यायेत् । भ्रातृ॑व्यस्यै॒व तल्लो॒कं-वृँ॑ङ्क्ते । यद्दिवा॒ वाचं॑-विँसृ॒जेत् । अह॒र्भ्रातृ॑व्या॒योच्छिग्ं॑षेत् । यन्नक्तं॑-विँसृ॒जेत् । रात्रि॒-म्भ्रातृ॑व्या॒योच्छिग्ं॑षेत् । अ॒धि॒वृ॒क्ष॒सू॒र्ये वाचं॒-विँसृ॑जति । ए॒ताव॑न्तमे॒वास्मै॑ लो॒कमुच्छिग्ं॑षति । याव॑दादि॒त्यो᳚-ऽस्त॒मेति॑ ॥ 37 ॥

(पृश्नि॑ - तिष्ठन्ति - गमयति - शिग्ंषे॒-त्पञ्च॑ च) (अ. 6)

अनुवाकं 7 - सप्तहोतृमन्त्रसाध्ययज्ञप्रशंसा

प्र॒जाप॑तिः प्र॒जा अ॑सृजत । ता-स्सृ॒ष्टा-स्सम॑श्लिष्यन्न् । ता रू॒पेणानु॒ प्रावि॑शत् । तस्मा॑दाहुः । रू॒पं-वैँ प्र॒जाप॑ति॒रिति॑ । ता नाम्ना-ऽनु॒ प्रावि॑शत् । तस्मा॑दाहुः । नाम॒ वै प्र॒जाप॑ति॒रिति॑ । तस्मा॒दप्या॑ ऽमि॒त्रौ स॒गन्त्य॑ । नाम्ना॒ चेद्ध्वये॑ते ॥ 38 ॥

मि॒त्रमे॒व भ॑वतः ॥ प्र॒जाप॑ति-र्देवासु॒रान॑सृजत । स इन्द्र॒मपि॒ नासृ॑जत । त-न्दे॒वा अ॑ब्रुवन्न् । इन्द्र॑-न्नो जन॒येति॑ । स आ॒त्म-न्निन्द्र॑-मपश्यत् । तम॑सृजत । त-न्त्रि॒ष्टुग्-वी॒र्य॑-म्भू॒त्वा-ऽनु॒ प्रावि॑शत् । तस्य॒ वज्रः॑ पञ्चद॒शो हस्त॒ आप॑द्यत । तेनो॒दय्यासु॑रान॒भ्य॑ भवत् ॥ 39 ॥

य ए॒वं-वेँद॑ । अ॒भि भ्रातृ॑व्या-न्भवति ॥ ते दे॒वा असु॑रै-र्वि॒जित्य॑ । सु॒व॒र्गं-लोँ॒कमा॑यन्न् । ते॑-ऽमुष्मि॑ल् ँलो॒के व्य॑क्षुद्ध्यन्न् । ते᳚-ऽब्रुवन्न् । अ॒मुतः॑ प्रदानं॒-वाँ उप॑जिजीवि॒मेति॑ । ते स॒प्तहो॑तारं-यँ॒ज्ञं-विँ॒धाया॒यास्य᳚म् । आ॒ङ्गी॒र॒स-म्प्राहि॑ण्वन्न् । ए॒तेना॒मुत्र॑ कल्प॒येति॑ ॥ 40 ॥

तस्य॒ वा इ॒य-ङ्क्लृप्तिः॑ । यदि॒द-ङ्कि-ञ्च॑ । य ए॒वं-वेँद॑ । कल्प॑ते-ऽस्मै । स वा अ॒य-म्म॑नु॒ष्ये॑षु य॒ज्ञ-स्स॒प्तहो॑ता । अ॒मुत्र॑ स॒द्भ्यो दे॒वेभ्यो॑ ह॒व्यं-वँ॑हति । य ए॒वं-वेँद॑ । उपै॑नं-यँ॒ज्ञो न॑मति ॥ सो॑-ऽमन्यत । अ॒भि वा इ॒मे᳚-ऽस्मा-ल्लो॒काद॒मुंलोँ॒क-ङ्क॑मिष्यन्त॒ इति॑ । स वाच॑स्पते॒ हृदिति॒ व्याह॑रत् । तस्मा᳚-त्पु॒त्रो हृद॑यम् । तस्मा॑द॒स्मा-ल्लो॒काद॒मुं-लोँ॒क-न्नाभिका॑मयन्ते । पु॒त्रो हि हृद॑यम् ॥ 41 ॥

(ह्वये॑त - अभवत् - कल्प॒ये - तीति॑ च॒त्वारि॑ च) (अ. 7)

अनुवाकं 8 - होतृमन्त्राणां सोमयागाङ्गत्वम्

दे॒वा वै चतु॑र्होतृभि-र्य॒ज्ञम॑तन्वत । ते वि पा॒प्मना॒ भ्रातृ॑व्ये॒णाज॑यन्त । अ॒भि सु॑व॒र्गं-लोँ॒कम॑जयन्न् । य ए॒वं-विँ॒द्वाग्-श्चतु॑र्होतृभिर्य॒ज्ञ-न्त॑नु॒ते । वि पा॒प्मना॒ भ्रातृ॑व्येण जयते । अ॒भि सु॑व॒र्गं-लोँ॒क-ञ्ज॑यति ॥ षड्ढो᳚त्रा प्राय॒णीय॒मासा॑दयति । अ॒मुष्मै॒ वै लो॒काय॒ षड्ढो॑ता । घ्नन्ति॒ खलु॒ वा ए॒त-थ्सोम᳚म् । यद॑भिषु॒ण्वन्ति॑ ॥ 42 ॥

ऋ॒जु॒धैवैन॑म॒मुं-लोँ॒क-ङ्ग॑मयति । चतु॑र्होत्रा ऽऽति॒त्थ्यम् । यशो॒ वै चतु॑र्होता । यश॑ ए॒वात्मन्-ध॑त्ते । पञ्च॑होत्रा प॒शुमुप॑ सादयति । सु॒व॒र्ग्यो॑ वै पञ्च॑होता । यज॑मानः प॒शुः । यज॑मानमे॒व सु॑व॒र्गं-लोँ॒क-ङ्ग॑मयति । ग्रहा᳚न्-गृही॒त्वा स॒प्तहो॑तार-ञ्जुहोति । इ॒न्द्रि॒यं-वैँ स॒प्तहो॑ता ॥ 43 ॥

इ॒न्द्रि॒यमे॒वात्मन्-ध॑त्ते ॥ यो वै चतु॑र्होतॄ-ननुसव॒न-न्त॒र्पय॑ति । तृप्य॑ति प्र॒जया॑ प॒शुभिः॑ । उपै॑नग्ं सोमपी॒थो न॑मति । ब॒हि॒ष्पव॒मा॒ने दश॑होतारं॒-व्याँच॑क्षीत । माद्ध्य॑न्दिने॒ पव॑माने॒ चतु॑र्होतारम् । आर्भ॑वे॒ पव॑माने॒ पञ्च॑होतारम् । पि॒तृ॒य॒ज्ञे षड्ढो॑तारम् । य॒ज्ञा॒य॒ज्ञिय॑स्य स्तो॒त्रे स॒प्तहो॑तारम् । अ॒नु॒स॒व॒नमे॒वैनाग्॑ स्तर्पयति ॥ 44 ॥

तृप्य॑ति प्र॒जया॑ प॒शुभिः॑ । उपै॑नग्ं सोमपी॒थो न॑मति ॥ दे॒वा वै चतु॑र्होतृभि-स्स॒त्रमा॑सत । ऋद्धि॑परिमितं॒-यँश॑स्कामाः । ते᳚-ऽब्रुवन्न् । यन्नः॑ प्रथ॒मं-यँश॑ ऋ॒च्छात् । सर्वे॑षा-न्न॒स्त-थ्स॒हास॒दिति॑ । सोम॒श्चतु॑र्होत्रा । अ॒ग्निः पञ्च॑होत्रा । धा॒ता षड्ढो᳚त्रा ॥ 45 ॥

इन्द्रः॑ स॒प्तहो᳚त्रा । प्र॒जाप॑ति॒-र्दश॑होत्रा । तेषा॒ग्ं॒ सोम॒ग्ं॒ राजा॑नं॒-यँश॑ आर्च्छत् ॥ तन्न्य॑कामयत । तेनापा᳚क्रामत् । तेन॑ प्र॒लाय॑मचरत् । त-न्दे॒वाः प्रै॒षैः प्रैष॑मैच्छन्न् । तत्-प्रै॒षाणा᳚-म्प्रैष॒त्वम् । नि॒विद्भि॒र्न्य॑वेदयन्न् । तन्नि॒विदा᳚-न्निवि॒त्त्वम् ॥ 46 ॥

आ॒प्रीभि॑राप्नुवन्न् । तदा॒प्रीणा॑माप्रि॒त्वम् । तम॑घ्नन्न् । तस्य॒ यशो॒ व्य॑गृह्णत । ते ग्रहा॑ अभवन्न् । तद्ग्रहा॑णा-ङ्ग्रह॒त्वम् । यस्यै॒वं-विँ॒दुषो॒ ग्रहा॑ गृ॒ह्यन्ते᳚ । तस्य॒ त्वे॑व गृ॑ही॒ताः ॥ ते᳚-ऽब्रुवन्न् । यो वै न॒-श्श्रेष्ठो-ऽभू᳚त् ॥ 47 ॥

तम॑वधिष्म । पुन॑रि॒मग्ं सु॑वामहा॒ इति॑ । त-ञ्छन्दो॑भि-रसुवन्त । तच्छन्द॑सा-ञ्छन्द॒स्त्वम् । साम्ना॒ समान॑यन्न् । त-थ्साम्नः॑ साम॒त्वम् । उ॒क्थै-रुद॑स्थापयन्न् । तदु॒क्थाना॑-मुक्थ॒त्वम् । य ए॒वं-वेँद॑ । प्रत्ये॒व ति॑ष्ठति ॥ 48 ॥

सर्व॒मायु॑रेति ॥ सोमो॒ वै यशः॑ । य ए॒वं-विँ॒द्वान्-थ्सोम॑मा॒गच्छ॑ति । यश॑ ए॒वैन॑मृच्छति । तस्मा॑दाहुः । यश्चै॒वं-वेँद॒ यश्च॒ न । तावु॒भौ सोम॒-माग॑च्छतः । सोमो॒ हि यशः॑ । त-न्त्वा-ऽव यश॑ ऋच्छ॒तीत्या॑हुः । य-स्सोमे॒ सोम॒-म्प्राहेति॑ । तस्मा॒-थ्सोमे॒ सोमः॒ प्रोच्यः॑ । यश॑ ए॒वैन॑मृच्छति ॥ 49 ॥

(अ॒भि॒षु॒ण्वन्ति॑ - स॒प्तहो॑ता - तर्पयति॒ - षड्ढो᳚त्रा - निवि॒त्त्व - मभू᳚त् - तिष्ठति॒ - प्राहेति॒ द्वे च॑) (अ. 8)

अनुवाकं 9 - होतृमन्त्रोत्पत्तिकथनप्रसङ्गेन जग-थ्सृष्टिः

इ॒दं-वाँ अग्रे॒ नैव किञ्च॒नासी᳚त् । न द्यौरा॑सीत् । न पृ॑थि॒वी । नान्तरि॑क्षम् । तदस॑दे॒व सन्मनो॑ ऽकुरुत॒ स्यामिति॑ । तद॑तप्यत । तस्मा᳚त्-तेपा॒नाद्धू॒मो॑-ऽजायत । त-द्भूयो॑-ऽतप्यत । तस्मा᳚त्-तेपा॒नाद॒ग्नि-र॑जायत । त-द्भूयो॑-ऽतप्यत ॥ 50 ॥

तस्मा᳚त्-तेपा॒नाज्ज्योति॑-रजायत । त-द्भूयो॑-ऽतप्यत । तस्मा᳚त्-तेपा॒नाद॒र्चि-र॑जायत । त-द्भूयो॑-ऽतप्यत । तस्मा᳚त्-तेपा॒नान्मरी॑चयो-ऽजायन्त । त-द्भूयो॑-ऽतप्यत । तस्मा᳚त्-तेपा॒नादु॑दा॒रा अ॑जायन्त । त-द्भूयो॑-ऽतप्यत । तद॒भ्रमि॑व॒ सम॑हन्यत ॥ त-द्व॒स्तिम॑भिनत् ॥ 51 ॥

स स॑मु॒द्रो॑-ऽभवत् । तस्मा᳚-थ्समु॒द्रस्य॒ न पि॑बन्ति । प्र॒जन॑नमिव॒ हि मन्य॑न्ते । तस्मा᳚-त्प॒शो-र्जाय॑माना॒दापः॑ पु॒रस्ता᳚-द्यन्ति ॥ त-द्दश॑हो॒ता-ऽन्व॑सृज्यत । प्र॒जाप॑ति॒र्वै दश॑ होता ॥ य ए॒व-न्तप॑सो वी॒र्यं॑-विँ॒द्वाग्स्तप्य॑ते । भव॑त्ये॒व ॥ तद्वा इ॒दमापः॑ सलि॒ल-मा॑सीत् । सो॑-ऽरोदीत्-प्र॒जाप॑तिः ॥ 52 ॥

स कस्मा॑ अज्ञि । य-द्य॒स्या अप्र॑तिष्ठाया॒ इति॑ । यद॒फ्स्व॑-वाप॑द्यत । सा पृ॑थि॒व्य॑भवत् । यद्व्यमृ॑ष्ट । तद॒न्तरि॑क्ष-मभवत् । यदू॒र्ध्व-मु॒दमृ॑ष्ट । सा द्यौर॑भवत् । यदरो॑दीत् । तद॒नयो॑ रोद॒स्त्वम् ॥ 53 ॥

य ए॒वं-वेँद॑ । नास्य॑ गृ॒हे रु॑दन्ति । ए॒तद्वा ए॒षां-लोँ॒काना॒-ञ्जन्म॑ । य ए॒वमे॒षां-लोँ॒काना॒-ञ्जन्म॒ वेद॑ । नैषु लो॒के-ष्वार्ति॒मार्च्छ॑ति । स इ॒मा-म्प्र॑ति॒ष्ठा-म॑विन्दत ॥ स इ॒मा-म्प्र॑ति॒ष्ठां-विँ॒त्त्वा ऽका॑मयत॒ प्रजा॑ये॒येति॑ । स तपो॑-ऽतप्यत । सो᳚-ऽन्तर्वा॑नभवत् । स ज॒घना॒दसु॑रा-नसृजत ॥ 54 ॥

तेभ्यो॑ मृ॒न्मये॒ पात्रे-ऽन्न॑मदुहत् । या-ऽस्य॒ सा त॒नूरासी᳚त् । तामपा॑हत । सा तमि॑स्रा-ऽभवत् ॥ सो॑-ऽकामयत॒ प्रजा॑ये॒येति॑ । स तपो॑-ऽतप्यत । सो᳚-ऽन्तर्वा॑-नभवत् । स प्र॒जन॑नादे॒व प्र॒जा अ॑सृजत । तस्मा॑दि॒मा भूयि॑ष्ठाः । प्र॒जन॑ना॒द्ध्ये॑ना॒ असृ॑जत ॥ 55 ॥

ताभ्यो॑ दारु॒मये॒ पात्रे॒ पयो॑-ऽदुहत । या-ऽस्य॒ सा त॒नूरासी᳚त् । तामपा॑हत । सा जोथ्स्ना॑ ऽभवत् ॥ सो॑-ऽकामयत॒ प्रजा॑ये॒येति॑ । सतपो॑-ऽतप्यत । सो᳚-ऽन्तर्वा॑-नभवत् । स उ॑पप॒क्षाभ्या॑-मे॒वर्तून॑सृजत । तेभ्यो॑ रज॒ते पात्रे॑ घृ॒तम॑दुहत् । या-ऽस्य॒ सा त॒नूरासी᳚त् ॥ 56 ॥

तामपा॑हत । सो॑-ऽहोरा॒त्रयो᳚-स्स॒न्धि-र॑भवत् ॥ सो॑-ऽकामयत॒ प्रजा॑ये॒येति॑ । स तपो॑-ऽतप्यत । सो᳚-ऽन्तर्वा॑-नभवत् । स मुखा᳚-द्दे॒वा-न॑सृजत । तेभ्यो॒ हरि॑ते॒ पात्रे॒ सोम॑मदुहत् । या-ऽस्य॒ सा त॒नूरासी᳚त् । तामपा॑हत । तदह॑रभवत् ॥ 57 ॥

ए॒ते वै प्र॒जाप॑ते॒र्दोहाः᳚ । य ए॒वं-वेँद॑ । दु॒ह ए॒व प्र॒जाः ॥ दिवा॒ वै नो॑-ऽभू॒दिति॑ । त-द्दे॒वाना᳚-न्देव॒त्वम् । य ए॒व-न्दे॒वाना᳚-न्देव॒त्वं-वेँद॑ । दे॒ववा॑ने॒व भ॑वति ॥ ए॒तद्वा अ॑होरा॒त्राणा॒-ञ्जन्म॑ । य ए॒वम॑होरा॒त्राणा॒-ञ्जन्म॒ वेद॑ । नाहो॑रा॒त्रेष्वार्ति॒मार्च्छ॑ति ॥ 58 ॥

अस॒तो-ऽधि॒ मनो॑-ऽसृज्यत । मनः॑ प्र॒जाप॑ति-मसृजत । प्र॒जाप॑तिः प्र॒जा अ॑सृजत । तद्वा इ॒द-म्मन॑स्ये॒व प॑र॒म-म्प्रति॑ष्ठितम् । यदि॒द-ङ्किञ्च॑ । तदे॒तच्छ्वो॑वस्य॒ सन्नाम॒ ब्रह्म॑ ॥ व्यु॒च्छन्ती᳚ व्युच्छन्त्यस्मै॒ वस्य॑सी वस्यसी॒ व्यु॑च्छति । प्रजा॑यते प्र॒जया॑ प॒शुभिः॑ । प्र प॑रमे॒ष्ठिनो॒ मात्रा॑-माप्नोति । य ए॒वं-वेँद॑ ॥ 59 ॥

(अ॒ग्निर॑जायत॒ तद्भूयो॑-ऽतप्यता - भिनद - रोदी-त्प्र॒जाप॑ती - रोद॒स्त्व - म॑सृज॒ - तासृ॑जत - घृ॒तम॑दुह॒द्या-ऽस्य॒ सा त॒नूरासी॒ - दह॑रभव-द्- ऋच्छति॒ - वेद॑) (अ. 9)

(इ॒द-न्धू॒मो᳚ ऽग्नि-र्ज्योति॑ र॒र्चि-र्मरी॑चय उदा॒रा स्तद॒भ्रग्ं /

स ज॒घना॒-थ्सा तमि॑स्रा॒ स प्र॒जन॑ना॒-थ्सा जोथ्स्ना॒ स उ॑पप॒क्षाभ्या॒ग्ं॒ सो॑ ऽहोरा॒त्रयो᳚-स्स॒न्धि-स्समुखा॒-त्तदह॑-र्दे॒ववा᳚न् / मृ॒न्मये॑ दारु॒मये॑ रज॒ते हरि॑ते॒ तेभ्य॒स्ताभ्यो॒ द्वे तेभ्यो-ऽन्न॒-म्पयो॑

घृ॒तग्ं सोम᳚म्)

अनुवाकं 10 - देवसृष्टिमध्ये-ऽवस्थितस्येन्द्रस्य देवताधिपतित्वम्

प्र॒जाप॑ति॒-रिन्द्र॑मसृज-तानुजाव॒र-न्दे॒वाना᳚म् । त-म्प्राहि॑णोत् । परे॑हि । ए॒तेषा᳚-न्दे॒वाना॒-मधि॑पतिरे॒धीति॑ । त-न्दे॒वा अ॑ब्रुवन्न् । कस्त्वमसि॑ । व॒यं-वैँ त्वच्छ्रेयाग्ं॑स-स्स्म॒ इति॑ । सो᳚-ऽब्रवीत् । कस्त्वमसि॑ व॒यं-वैँ त्वच्छ्रेयाग्ं॑स-स्स्म॒ इति॑ मा दे॒वा अ॑वोच॒न्निति॑ ॥ अथ॒ वा इ॒द-न्तर्हि॑ प्र॒जाप॑तौ॒ हर॑ आसीत् ॥ 60 ॥

यद॒स्मिन्ना॑दि॒त्ये । तदे॑नमब्रवीत् । ए॒तन्मे॒ प्रय॑च्छ । अथा॒हमे॒तेषा᳚-न्दे॒वाना॒-मधि॑पति-र्भविष्या॒मीति॑ । को॑हग्ग्-स्या॒मित्य॑ब्रवीत् । ए॒त-त्प्र॒दायेति॑ । ए॒त-थ्स्या॒ इत्य॑ब्रवीत् । यदे॒तद्ब्रवी॒षीति॑ । को ह॒ वै नाम॑ प्र॒जाप॑तिः । य ए॒वं-वेँद॑ ॥ 61 ॥

वि॒दुरे॑न॒-न्नाम्ना᳚ । तद॑स्मै रु॒क्म-ङ्कृ॒त्वा प्रत्य॑मुञ्चत् । ततो॒ वा इन्द्रो॑ दे॒वाना॒-मधि॑पति-रभवत् । य ए॒वं-वेँद॑ । अधि॑पतिरे॒व स॑मा॒नाना᳚-म्भवति ॥ सो॑-ऽमन्यत । कि-ङ्किं॒-वाँ अ॑कर॒मिति॑ । स च॒न्द्र-म्म॒ आह॒रेति॒ प्राल॑पत् । तच्च॒न्द्रम॑स-श्चन्द्रम॒स्त्वम् । य ए॒वं-वेँद॑ ॥ 62 ॥

च॒न्द्रवा॑ने॒व भ॑वति ॥ त-न्दे॒वा अ॑ब्रुवन्न् । सु॒वीर्यो॑ ऽमर्या॒ यथा॑ गोपा॒यत॒ इति॑ । त-थ्सूर्य॑स्य सूर्य॒त्वम् । य ए॒वं-वेँद॑ । नैन॑-न्दभ्नोति ॥ कश्च॒ नास्मि॒न्वा इ॒दमि॑न्द्रि॒य-म्प्रत्य॑स्था॒दिति॑ । तदिन्द्र॑-स्येन्द्र॒त्वम् । य ए॒वं-वेँद॑ । इ॒न्द्रि॒या॒व्ये॑व भ॑वति ॥ 63 ॥

अ॒यं-वाँ इ॒द-म्प॑र॒मो॑-ऽभू॒दिति॑ । तत्-प॑रमे॒ष्ठिनः॑ परमेष्ठि॒त्वम् । य ए॒वं-वेँद॑ । प॒र॒मामे॒व काष्ठा᳚-ङ्गच्छति ॥ त-न्दे॒वा-स्स॑म॒न्त-म्पर्य॑विशन्न् । वस॑वः पु॒रस्ता᳚त् । रु॒द्रा द॑क्षिण॒तः । आ॒दि॒त्याः प॒श्चात् । विश्वे॑ दे॒वा उ॑त्तर॒तः । अङ्गि॑रसः प्र॒त्यञ्च᳚म् ॥ 64 ॥

सा॒द्ध्याः परा᳚ञ्चम् । य ए॒वं-वेँद॑ । उपै॑नग्ं समा॒ना-स्सं-विँ॑शन्ति ॥ स प्र॒जाप॑तिरे॒व भू॒त्वा प्र॒जा आव॑यत् । ता अ॑स्मै॒ नाति॑ष्ठन्ता॒न्नाद्या॑य । ता मुख॑-म्पु॒रस्ता॒त्-पश्य॑न्तीः । द॒क्षि॒ण॒तः पर्या॑यन्न् । स द॑क्षिण॒तः पर्य॑वर्तयत । ता मुख॑-म्पु॒रस्ता॒त्-पश्य॑न्तीः । मुख॑-न्दक्षिण॒तः ॥ 65 ॥

प॒श्चात्-पर्या॑यन्न् । स प॒श्चात्-पर्य॑वर्तयत । ता मुख॑-म्पु॒रस्ता॒त्-पश्य॑न्तीः । मुख॑-न्दक्षिण॒तः । मुख॑-म्प॒श्चात् । उ॒त्त॒र॒तः पर्या॑यन्न् । स उ॑त्तर॒तः पर्य॑वर्तयत । ता मुख॑-म्पु॒रस्ता॒त्-पश्य॑न्तीः । मुख॑-न्दक्षिण॒तः । मुख॑-म्प॒श्चात् ॥ 66 ॥

मुख॑मुत्तर॒तः । ऊ॒र्ध्वा उदा॑यन्न् । स उ॒परि॑ष्टा॒न्न्य॑-वर्तयत । ता-स्स॒र्वतो॑मुखो भू॒त्वा ऽऽव॑यत् । ततो॒ वै तस्मै᳚ प्र॒जा अति॑ष्ठन्ता॒न्नाद्या॑य ॥ य ए॒वं-विँ॒द्वा-न्परि॑ च व॒र्तय॑ते॒ नि च॑ । प्र॒जाप॑तिरे॒व भु॒त्वा प्र॒जा अ॑त्ति । तिष्ठ॑न्ते-ऽस्मै प्र॒जा अ॒न्नाद्या॑य । अ॒न्ना॒द ए॒व भ॑वति ॥ 67 ॥

(आ॒सी॒-द्- वेद॑ - चन्द्रम॒स्त्वं-यँ ए॒वं-वेँदे᳚ - न्द्रिया॒व्ये॑व भ॑वति - प्र॒त्यञ्च॒ - मुख॑-न्दक्षिण॒तो - मुख॑-म्प॒श्चान् - +नव॑ च) (आ10 )

अनुवाकं 11 - होतृमन्त्राणा-म्पुरुषार्थप्रयोगः

प्र॒जाप॑ति-रकामयत ब॒होर्भूया᳚न्-थ्स्या॒मिति॑ । स ए॒त-न्दश॑होतार-मपश्यत् । त-म्प्रायु॑ङ्क्त । तस्य॒ प्रयु॑क्ति ब॒होर्भूया॑नभवत् । यः का॒मये॑त ब॒होर्भूया᳚न्-थ्स्या॒मिति॑ । स दश॑होतार॒-म्प्रयु॑ञ्जीत । ब॒होरे॒व भूया᳚न्-भवति ॥ सो॑-ऽकामयत वी॒रो म॒ आजा॑ये॒तेति॑ । स दश॑होतु॒श्चतु॑र्होतार॒-न्निर॑मिमीत । त-म्प्रायु॑ङ्क्त ॥ 68 ॥

तस्य॒ प्रयु॒क्तीन्द्रो॑ ऽजायत । यः का॒मये॑त वी॒रो म॒ आजा॑ये॒तेति॑ । स चतु॑र्होतार॒-म्प्रयु॑ञ्जीत । आ-ऽस्य॑ वी॒रो जा॑यते ॥ सो॑-ऽकामयत पशु॒मान्-थ्स्या॒मिति॑ । स चतु॑र्होतुः॒ पञ्च॑होतार॒-न्निर॑मिमीत । त-म्प्रायु॑ङ्क्त । तस्य॒ प्रयु॑क्ति पशु॒मान॑भवत् । यः का॒मये॑त पशु॒मान्-थ्स्या॒मिति॑ । स पञ्च॑होतार॒-म्प्रयु॑ञ्जीत ॥ 69 ॥

प॒शु॒माने॒व भ॑वति ॥ सो॑-ऽकामयत॒र्तवो॑ मे कल्पेर॒न्निति॑ । स पञ्च॑होतु॒-ष्षड्ढो॑तार॒-न्निर॑मिमीत । त-म्प्रायु॑ङ्क्त । तस्य॒ प्रयु॑क्त्यृ॒तवो᳚-ऽस्मा अकल्पन्त । यः का॒मये॑त॒र्तवो॑ मे कल्पेर॒न्निति॑ । स षड्ढो॑तार॒-म्प्रयु॑ञ्जीत । कल्प॑न्ते-ऽस्मा ऋ॒तवः॑ ॥ सो॑-ऽकामयत सोम॒प-स्सो॑मया॒जी स्या᳚म् । आ मे॑ सोम॒प-स्सो॑मया॒जी जा॑ये॒तेति॑ ॥ 70 ॥

स षड्ढो॑तु-स्स॒प्तहो॑तार॒-न्निर॑मिमीत । त-म्प्रायु॑ङ्क्त । तस्य॒ प्रयु॑क्ति सोम॒प-स्सो॑मया॒ज्य॑भवत् । आ-ऽस्य॑ सोम॒प-स्सो॑मया॒ज्य॑जायत । यः का॒मये॑त सोम॒प-स्सो॑मया॒जी स्या᳚म् । आ मे॑ सोम॒प-स्सो॑मया॒जी जा॑ये॒तेति॑ । स स॒प्तहो॑तार॒-म्प्रयु॑ञ्जीत । सो॒म॒प ए॒व सो॑मया॒जी भ॑वति । आ-ऽस्य॑ सोम॒प-स्सो॑मया॒जी जा॑यते ॥ स वा ए॒ष प॒शुः प॑ञ्च॒धा प्रति॑ तिष्ठति ॥ 71 ॥

प॒द्भिर्मुखे॑न ॥ ते दे॒वाः प॒शून्. वि॒त्त्वा । सु॒व॒र्गं-लोँ॒कमा॑यन्न् ॥ ते॑-ऽमुष्मि॑ल् ँलो॒के व्य॑क्षुद्ध्यन्न् । ते᳚-ऽब्रुवन्न् । अ॒मुतः॑ प्रदानं॒-वाँ उप॑जिजीवि॒मेति॑ । ते स॒प्तहो॑तारं-यँ॒ज्ञं-विँ॒धाया॒यास्य᳚म् । आ॒ङ्गी॒र॒स-म्प्राहि॑ण्वन्न् । ए॒तेना॒मुत्र॑ कल्प॒येति॑ । तस्य॒ वा इ॒य-ङ्क्लृप्तिः॑ ॥ 72 ॥

यदि॒द-ङ्किञ्च॑ । य ए॒वं-वेँद॑ । कल्प॑ते-ऽस्मै । स वा अ॒य-म्म॑नु॒ष्ये॑षु य॒ज्ञ-स्स॒प्तहो॑ता । अ॒मुत्र॑ स॒द्भ्यो दे॒वेभ्यो॑ ह॒व्यं-वँ॑हति । य ए॒वं-वेँद॑ । उपै॑नं-यँ॒ज्ञो न॑मति ॥ यो वै चतु॑र्होतृणा-न्नि॒दानं॒-वेँद॑ । नि॒दान॑वा-न्भवति । अ॒ग्नि॒हो॒त्रं-वैँ दश॑होतुर्नि॒दान᳚म् । द॒र्॒श॒पू॒र्ण॒मा॒सौ चतु॑र्होतुः । चा॒तु॒र्मा॒स्यानि॒ पञ्च॑ होतुः । प॒शु॒ब॒न्ध-ष्षड्ढो॑तुः । सौ॒म्यो᳚-ऽद्ध्व॒र-स्स॒प्तहो॑तुः । ए॒तद्वै चतु॑र्होतृणा-न्नि॒दान᳚म् । य ए॒वं-वेँद॑ । नि॒दान॑वा-न्भवति ॥ 73 ॥

(अ॒मि॒मी॒त॒ त-म्प्रायु॑ङ्क्त॒ - पञ्च॑होतार॒-म्प्रयु॑ञ्जित - जाये॒तेति॑ - तिष्ठति॒ - क्लृप्ति॒--र् दश॑होतु-र्नि॒दानग्ं॑ स॒प्त च॑ ) (अ. 11)

(प्र॒जाप॑तिरकामयत प्र॒जा-स्सृ॑जे॒येति॑ - प्र॒जाप॑तिरकामयत दर्शपूर्णमा॒सौ सृ॑जे॒येति॑ - प्र॒जाप॑तिरकामयत॒ प्रजा॑ये॒येति॒ स तप॒-स्स त्रि॒वृतं॑ - प्र॒जाप॑तिरकामयत॒ दश॑होतार॒-न्तेन॑ दश॒धा-ऽऽत्मानं॑ - दे॒वा वै वरु॑ण॒ - मन्तो॒ वै - प्र॒जाप॑ति॒स्ता-स्सृ॒ष्टा-स्सम॑श्लिष्यन् - दे॒वा वै चतु॑र्होतृभि - रि॒दं-वाँ अग्रे᳚ - प्र॒जाप॑ति॒रिन्द्रं॑ - प्र॒जाप॑तिरकामयत ब॒होर्भूया॒नेका॑दश)

(प्र॒जाप॑ति॒ - स्तद्ग्रह॑स्य - प्र॒जा॑पतिरकामयता॒ - नयै॒वैन॒त् - तस्य॒ वा इ॒य-ङ्क्लृप्ति॒ - स्तस्मा᳚-त्तेपा॒नाज्ज्योति॒--र् यद॒स्मिन्ना॑दि॒त्ये -सषड्ढो॑तु-स्स॒प्तहो॑तार॒-न्त्रिस॑प्ततिः)

(प्र॒जाप॑तिरकामयत - नि॒दान॑वान्भवति)

॥ हरिः॑ ओम् ॥

॥ कृष्ण यजुर्वेदीय तैत्तिरीय ब्राह्मणे द्वितीयाष्टके द्वितीयः प्रपाठक-स्समाप्तः ॥