Muchukunda Stutih — Tamil Script

விமோஹிதோऽயம் ஜந ஈஶ மாயயா

த்வதீயயா த்வாம் ச பஜத்யநர்தத்ரு'க் ।

ஸுகாய துஃகப்ரபவேஷு ஸஜ்ஜதே

க்ரு'ஹேஷு யோஷித்புருஷஶ்ச வஞ்சிதஃ ॥ 1 ॥

லப்த்வா ஜநோ துர்லபமத்ர மாநுஷம்

கதஞ்சிதவ்யங்கமயத்நதோऽநக ।

பாதாரவிந்தம் ந பஜத்யஸந்மதி-

ர்க்ரு'ஹாந்தகூபே பதிதோ யதா பஶுஃ ॥ 2 ॥

மமைஷ காலோऽஜித நிஷ்பலோ கதோ

ராஜ்யஶ்ரியோந்நத்தமதஸ்ய பூபதே ।

மர்த்யாத்மபுத்தேஃ ஸுததாரகோஶபூ-

ஷ்வாஸஜ்ஜமாநஸ்ய துரந்தசிந்தயா ॥ 3 ॥

கலேவரேऽஸ்மிந் கடகுட்யஸந்நிபே

நிரூடமாநோ நரதேவ இத்யஹம் ।

வ்ரு'தோ ரதேபாஶ்வபதாத்யநீகபைர்காம்

பர்யடம்ஸ்த்வாகணயந் ஸுதுர்மதஃ ॥ 4 ॥

ப்ரமத்தமுச்சைரிதி க்ரு'த்யசிந்தயா

ப்ரபுத்தலோபம் விஷயேஷு லாலஸம் ।

த்வமப்ரமத்தஃ ஸஹஸாऽபிபத்யஸே

க்ஷுல்லேலிஹாநோऽஹிரிவாகுமந்தகஃ ॥ 5 ॥

புரா ரதைர்ஹேமபரிஷ்க்ரு'தைஶ்சரந்

மதங்கஜைர்வா நரதேவஸஞ்ஜ்ஞிதஃ ।

ஸ ஏவ காலேந துரத்யயேந தே

கலேவரோ விட்க்ரு'மிபஸ்மஸஞ்ஜ்ஞிதஃ ॥ 6 ॥

நிர்ஜித்ய திக்சக்ரமபூதவிக்ரஹோ

வராஸநஸ்தஃ ஸமராஜவந்திதஃ ।

க்ரு'ஹேஷு மைதுந்யஸுகேஷு யோஷிதாம்

க்ரீடாம்ரு'க பூருஷ ஈஶ நீயதே ॥ 7 ॥

கரோதி கர்மாணி தபஃஸு நிஷ்டிதோ

நிவ்ரு'த்தபோகஸ்ததபேக்ஷயா ததத் ।

புநஶ்ச பூயேயமஹம் ஸ்வராடிதி

ப்ரபுத்ததர்ஷோ ந ஸுகாய கல்பதே ॥ 8 ॥

பவாபவர்கோ ப்ரமதோ யதா பவே-

ஜ்ஜநஸ்ய தர்ஹ்யச்யுத ஸத்ஸமாகமஃ ।

ஸத்ஸங்கமோ யர்ஹி ததைவ ஸத்கதௌ

பராவரேஶே த்வயி ஜாயதே மதிஃ ॥ 9 ॥

மந்யே மமாநுக்ரஹ ஈஶ தே க்ரு'தோ

ராஜ்யாநுபந்தாபகமோ யத்ரு'ச்சயா ।

யஃ ப்ரார்த்யதே ஸாதுபிரேகசர்யயா

வநம் விவிக்ஷத்பிரகண்டபூமிபைஃ ॥ 10 ॥

ந காமயேऽந்யம் தவ பாதஸேவநாத்-

அகிஞ்சநப்ரார்த்யதமாத்வரம் விபோ ।

ஆராத்ய கஸ்த்வாம் ஹ்யபவர்கதம் ஹரே

வ்ரு'ணீத ஆர்யோ வரமாத்மபந்தநம் ॥ 11 ॥

தஸ்மாத்விஸ்ரு'ஜ்யாஶிஷ ஈஶ ஸர்வதோ

ரஜஸ்தமஃஸத்த்வகுணாநுபந்தநாஃ ।

நிரஞ்ஜநம் நிர்குணமத்வயம் பரம்

த்வாம் ஜ்ஞப்திமாத்ரம் புருஷம் வ்ரஜாம்யஹம் ॥ 12 ॥

சிரமிஹ வ்ரு'ஜிநார்தஸ்தப்யமாநோऽநுதாபைஃ

அவித்ரு'ஷஷடமித்ரோ லப்தஶாந்திஃ கதஞ்சித் ।

ஶரணத ஸமுபேதஸ்த்வத்பதாப்ஜம் பராத்மந்

அபயமம்ரு'தமஶோகம் பாஹி மாऽபந்நமீஶ ॥ 13 ॥

இதி ஶ்ரீமத்பாகவதாந்தர்கதா முசுகுந்தக்ரு'தா ஶ்ரீவிஷ்ணுஸ்துதிஃ ஸமாப்தா ।

Roman (IAST) Transliteration

vimohito'yaṃ jana īśa māyayā

tvadīyayā tvāṃ ca bhajatyanarthadṛk |

sukhāya duḥkhaprabhaveṣu sajjate

gṛheṣu yoṣitpuruṣaśca vañcitaḥ || 1 ||

labdhvā jano durlabhamatra mānuṣaṃ

kathañcidavyaṅgamayatnato'nagha |

pādāravindaṃ na bhajatyasanmati-

rgṛhāndhakūpe patito yathā paśuḥ || 2 ||

mamaiṣa kālo'jita niṣphalo gato

rājyaśriyonnaddhamadasya bhūpate |

martyātmabuddheḥ sutadārakośabhū-

ṣvāsajjamānasya durantacintayā || 3 ||

kalevare'smin ghaṭakuḍyasannibhe

nirūḍhamāno naradeva ityaham |

vṛto rathebhāśvapadātyanīkapairgāṃ

paryaṭaṃstvāgaṇayan sudurmadaḥ || 4 ||

pramattamuccairiti kṛtyacintayā

prabhuddhalobhaṃ viṣayeṣu lālasam |

tvamapramattaḥ sahasā'bhipadyase

kṣullelihāno'hirivākhumantakaḥ || 5 ||

purā rathairhemapariṣkṛtaiścaran

mataṅgajairvā naradevasañjñitaḥ |

sa eva kālena duratyayena te

kalevaro viṭkṛmibhasmasañjñitaḥ || 6 ||

nirjitya dikcakramabhūtavigraho

varāsanasthaḥ samarājavanditaḥ |

gṛheṣu maithunyasukheṣu yoṣitāṃ

krīḍāmṛga pūruṣa īśa nīyate || 7 ||

karoti karmāṇi tapaḥsu niṣṭhito

nivṛttabhogastadapekṣayā dadat |

punaśca bhūyeyamahaṃ svarāḍiti

prabuddhatarṣo na sukhāya kalpate || 8 ||

bhavāpavargo bhramato yadā bhave-

jjanasya tarhyacyuta satsamāgamaḥ |

satsaṅgamo yarhi tadaiva sadgatau

parāvareśe tvayi jāyate matiḥ || 9 ||

manye mamānugraha īśa te kṛto

rājyānubandhāpagamo yadṛcchayā |

yaḥ prārthyate sādhubhirekacaryayā

vanaṃ vivikṣadbhirakhaṇḍabhūmipaiḥ || 10 ||

na kāmaye'nyaṃ tava pādasevanād-

akiñcanaprārthyatamādvaraṃ vibho |

ārādhya kastvāṃ hyapavargadaṃ hare

vṛṇīta āryo varamātmabandhanam || 11 ||

tasmādvisṛjyāśiṣa īśa sarvato

rajastamaḥsattvaguṇānubandhanāḥ |

nirañjanaṃ nirguṇamadvayaṃ paraṃ

tvāṃ jñaptimātraṃ puruṣaṃ vrajāmyaham || 12 ||

ciramiha vṛjinārtastapyamāno'nutāpaiḥ

avitṛṣaṣaḍamitro labdhaśāntiḥ kathañcit |

śaraṇada samupetastvatpadābjaṃ parātman

abhayamamṛtamaśokaṃ pāhi mā'pannamīśa || 13 ||

iti śrīmadbhāgavatāntargatā mucukundakṛtā śrīviṣṇustutiḥ samāptā |

Sanskrit — Devanagari (original)

विमोहितोऽयं जन ईश मायया

त्वदीयया त्वां च भजत्यनर्थदृक् ।

सुखाय दुःखप्रभवेषु सज्जते

गृहेषु योषित्पुरुषश्च वञ्चितः ॥ 1 ॥

लब्ध्वा जनो दुर्लभमत्र मानुषं

कथञ्चिदव्यङ्गमयत्नतोऽनघ ।

पादारविन्दं न भजत्यसन्मति-

र्गृहान्धकूपे पतितो यथा पशुः ॥ 2 ॥

ममैष कालोऽजित निष्फलो गतो

राज्यश्रियोन्नद्धमदस्य भूपते ।

मर्त्यात्मबुद्धेः सुतदारकोशभू-

ष्वासज्जमानस्य दुरन्तचिन्तया ॥ 3 ॥

कलेवरेऽस्मिन् घटकुड्यसन्निभे

निरूढमानो नरदेव इत्यहम् ।

वृतो रथेभाश्वपदात्यनीकपैर्गां

पर्यटंस्त्वागणयन् सुदुर्मदः ॥ 4 ॥

प्रमत्तमुच्चैरिति कृत्यचिन्तया

प्रभुद्धलोभं विषयेषु लालसम् ।

त्वमप्रमत्तः सहसाऽभिपद्यसे

क्षुल्लेलिहानोऽहिरिवाखुमन्तकः ॥ 5 ॥

पुरा रथैर्हेमपरिष्कृतैश्चरन्

मतङ्गजैर्वा नरदेवसञ्ज्ञितः ।

स एव कालेन दुरत्ययेन ते

कलेवरो विट्कृमिभस्मसञ्ज्ञितः ॥ 6 ॥

निर्जित्य दिक्चक्रमभूतविग्रहो

वरासनस्थः समराजवन्दितः ।

गृहेषु मैथुन्यसुखेषु योषितां

क्रीडामृग पूरुष ईश नीयते ॥ 7 ॥

करोति कर्माणि तपःसु निष्ठितो

निवृत्तभोगस्तदपेक्षया ददत् ।

पुनश्च भूयेयमहं स्वराडिति

प्रबुद्धतर्षो न सुखाय कल्पते ॥ 8 ॥

भवापवर्गो भ्रमतो यदा भवे-

ज्जनस्य तर्ह्यच्युत सत्समागमः ।

सत्सङ्गमो यर्हि तदैव सद्गतौ

परावरेशे त्वयि जायते मतिः ॥ 9 ॥

मन्ये ममानुग्रह ईश ते कृतो

राज्यानुबन्धापगमो यदृच्छया ।

यः प्रार्थ्यते साधुभिरेकचर्यया

वनं विविक्षद्भिरखण्डभूमिपैः ॥ 10 ॥

न कामयेऽन्यं तव पादसेवनाद्-

अकिञ्चनप्रार्थ्यतमाद्वरं विभो ।

आराध्य कस्त्वां ह्यपवर्गदं हरे

वृणीत आर्यो वरमात्मबन्धनम् ॥ 11 ॥

तस्माद्विसृज्याशिष ईश सर्वतो

रजस्तमःसत्त्वगुणानुबन्धनाः ।

निरञ्जनं निर्गुणमद्वयं परं

त्वां ज्ञप्तिमात्रं पुरुषं व्रजाम्यहम् ॥ 12 ॥

चिरमिह वृजिनार्तस्तप्यमानोऽनुतापैः

अवितृषषडमित्रो लब्धशान्तिः कथञ्चित् ।

शरणद समुपेतस्त्वत्पदाब्जं परात्मन्

अभयममृतमशोकं पाहि माऽपन्नमीश ॥ 13 ॥

इति श्रीमद्भागवतान्तर्गता मुचुकुन्दकृता श्रीविष्णुस्तुतिः समाप्ता ।