4.1 - Yunjanah Prathamammanah - Krishna Yajurveda Taittiriya Samhita Pathah — Sinhala Script

කෘෂ්ණ යජුර්වේදීය තෛත්තිරීය සංහිතායා-ඤ්චතුර්ථකාණ්ඩේ ප්රථමඃ ප්රශ්නඃ- අග්නිචිත්යඞ්ග මන්ත්රපාඨාභිධානං

ඕ-න්නමඃ පරමාත්මනේ, ශ්රී මහාගණපතයේ නමඃ,

ශ්රී ගුරුභ්යෝ නමඃ . හ॒රිඃ॒ ඕම් ..

යු॒ඤ්ජා॒නඃ ප්ර॑ථ॒ම-ම්මන॑ස්ත॒ත්වාය॑ සවි॒තා ධියඃ॑ . අ॒ග්නි-ඤ්ජ්යෝති॑ර්නි॒චාය්ය॑ පෘථි॒ව්යා අද්ධ්යා (අ)භ॑රත් .. යු॒ක්ත්වාය॒ මන॑සා දේ॒වාන්-ථ්සුව॑ර්ය॒තෝ ධි॒යා දිව᳚ම් . බෘ॒හජ්ජ්යෝතිඃ॑ කරිෂ්ය॒ත-ස්ස॑වි॒තා ප්රසු॑වාති॒ තාන් .. යු॒ක්තේන॒ මන॑සා ව॒ය-න්දේ॒වස්ය॑ සවි॒තු-ස්ස॒වේ . සු॒ව॒ර්ගේයා॑ය॒ ශක්ත්යෛ᳚ .. යු॒ඤ්ජතේ॒ මන॑ උ॒ත යු॑ඤ්ජතේ॒ ධියෝ॒ විප්රා॒ විප්ර॑ස්ය බෘහ॒තෝ වි॑ප॒ශ්චිතඃ॑ . වි හෝත්රා॑ දධේ වයුනා॒ විදේක॒ ඉ- [වයුනා॒ විදේක॒ ඉත්, ම॒හී දේ॒වස්ය॑] 1

-න්ම॒හී දේ॒වස්ය॑ සවි॒තුඃ පරි॑ෂ්ටුතිඃ .. යු॒ජේ වා॒-ම්බ්රහ්ම॑ පූ॒ර්ව්ය-න්නමෝ॑භි॒ර්වි ශ්ලෝකා॑ යන්ති ප॒ථ්යේ॑ව॒ සූරාඃ᳚ . ශෘ॒ණ්වන්ති॒ විශ්වේ॑ අ॒මෘත॑ස්ය පු॒ත්රා ආ යේ ධාමා॑නි දි॒ව්යානි॑ ත॒ස්ථුඃ .. යස්ය॑ ප්ර॒යාණ॒මන්ව॒න්ය ඉද්ය॒යුර්දේ॒වා දේ॒වස්ය॑ මහි॒මාන॒මර්ච॑තඃ . යඃ පාර්ථි॑වානි විම॒මේ ස ඒත॑ශෝ॒ රජාග්ං॑සි දේ॒ව-ස්ස॑වි॒තා ම॑හිත්ව॒නා .. දේව॑ සවිතඃ॒ ප්රසු॑ව ය॒ජ්ඤ-ම්ප්රස॑ව [ ] 2

ය॒ජ්ඤප॑ති॒-ම්භගා॑ය දි॒ව්යෝ ග॑න්ධ॒ර්වඃ . කේ॒ත॒පූඃ කේත॑න්නඃ පුනාතු වා॒චස්පති॒ර්වාච॑ම॒ද්ය ස්ව॑දාති නඃ .. ඉ॒ම-න්නෝ॑ දේව සවිතර්ය॒ජ්ඤ-ම්ප්රසු॑ව දේවා॒යුවග්ං॑ සඛි॒විදග්ං॑ සත්රා॒ජිත॑-න්ධන॒ජිතග්ං॑ සුව॒ර්ජිත᳚ම් .. ඍ॒චා ස්තෝම॒ග්ං॒ සම॑ර්ධය ගාය॒ත්රේණ॑ රථන්ත॒රම් . බෘ॒හ-ද්ගා॑ය॒ත්රව॑ර්තනි .. දේ॒වස්ය॑ ත්වා සවි॒තුඃ ප්ර॑ස॒වේ᳚ (අ)ශ්විනෝ᳚ර්බා॒හුභ්යා᳚-ම්පූ॒ෂ්ණෝ හස්තා᳚භ්යා-ඞ්ගාය॒ත්රේණ॒ ඡන්ද॒සා (අ)(අ)ද॑දේ-(අ)ඞ්ගිර॒ස්වදභ්රි॑රසි॒ නාරි॑- [නාරිඃ॑, අ॒සි॒ පෘ॒ථි॒ව්යා-ස්ස॒ධස්ථා॑-] 3

-රසි පෘථි॒ව්යා-ස්ස॒ධස්ථා॑-ද॒ග්නි-ම්පු॑රී॒ෂ්ය॑මඞ්ගිර॒ස්වදා භ॑ර॒ ත්රෛෂ්ටු॑භේන ත්වා॒ ඡන්ද॒සා (අ)(අ)ද॑දේ-(අ)ඞ්ගිර॒ස්ව-ද්බභ්රි॑රසි॒ නාරි॑රසි॒ ත්වයා॑ ව॒යග්ං ස॒ධස්ථ॒ ආග්නිග්ං ශ॑කේම॒ ඛනි॑තු-ම්පුරී॒ෂ්ය॑-ඤ්ජාග॑තේන ත්වා॒ ඡන්ද॒සා (අ)(අ)ද॑දේ-(අ)ඞ්ගිර॒ස්වද්ධස්ත॑ ආ॒ධාය॑ සවි॒තා බිභ්ර॒දභ්රිග්ං॑ හිර॒ණ්යයී᳚ම් . තයා॒ ජ්යෝති॒රජ॑ස්ර॒-මිද॒ග්නි-ඞ්ඛා॒ත්වී න॒ ආ භ॒රානු॑ෂ්ටුභේන ත්වා॒ ඡන්ද॒සා (අ)(අ)ද॑දේ-(අ)ඞ්ගිර॒ස්වත් .. 4 ..

(ඉ--ද්ය॒ජ්ඤ-ම්ප්රසු॑ව॒ - නාරි॒ - රානු॑ෂ්ටුභේන ත්වා॒ ඡන්ද॑සා॒ - ත්රීණි॑ ච) (අ. 1)

ඉ॒මාම॑ගෘභ්ණ-න්රශ॒නාමෘ॒තස්ය॒ පූර්ව॒ ආයු॑ෂි වි॒දථේ॑ෂු ක॒ව්යා . තයා॑ දේ॒වා-ස්සු॒තමා බ॑භූවුර්-ඍ॒තස්ය॒ සාම᳚න්-ථ්ස॒රමා॒රප॑න්තී .. ප්රතූ᳚ර්තං-වාँජි॒න්නා ද්ර॑ව॒ වරි॑ෂ්ඨා॒මනු॑ සං॒වँත᳚ම් . දි॒වි තේ॒ ජන්ම॑ පර॒මම॒න්තරි॑ක්ෂේ॒ නාභිඃ॑ පෘථි॒ව්යාමධි॒ යෝනිඃ॑ .. යු॒ඤ්ජාථා॒ග්ං॒ රාස॑භං-යුँ॒වම॒ස්මින්. යාමේ॑ වෘෂණ්වසූ . අ॒ග්නි-ම්භර॑න්තමස්ම॒යුම් .. යෝගේ॑යෝගේ ත॒වස්ත॑රං॒-වාँජේ॑වාජේ හවාමහේ . සඛා॑ය॒ ඉන්ද්ර॑ම॒තයේ᳚ .. ප්ර॒තූර්ව॒- [ප්ර॒තූර්වන්න්॑, ඒහ්ය॑ව॒ක්රාම॒න්නශ॑ස්තී] 5

-න්නේහ්ය॑ව॒ක්රාම॒න්නශ॑ස්තී රු॒ද්රස්ය॒ ගාණ॑පත්යා-න්මයෝ॒භූරේහි॑ . උ॒ර්ව॑න්තරි॑ක්ෂ॒මන්වි॑හි ස්ව॒ස්ති ග॑ව්යූති॒රභ॑යානි කෘ॒ණ්වන්න් .. පූ॒ෂ්ණා ස॒යුජා॑ ස॒හ . පෘ॒ථි॒ව්යා-ස්ස॒ධස්ථා॑ද॒ග්නි-ම්පු॑රි॒ෂ්ය॑-මඞ්ගිර॒ස්ව-දච්ඡේ᳚හ්ය॒ග්නි-ම්පු॑රී॒ෂ්ය॑ -මඞ්ගිර॒ස්වද-ච්ඡේ॑මෝ॒-(අ)ග්නි-ම්පු॑රී॒ෂ්ය॑-මඞ්ගිර॒ස්ව-ද්භ॑රිෂ්යාමෝ॒-(අ)ග්නි-ම්පු॑රී॒ෂ්ය॑-මඞ්ගිර॒ස්ව-ද්භ॑රාමඃ .. අන්ව॒ග්නිරු॒ෂසා॒-මග්ර॑මඛ්ය॒-දන්වහා॑නි ප්රථ॒මෝ ජා॒තවේ॑දාඃ . අනු॒ සූර්ය॑ස්ය [සූර්ය॑ස්ය, පු॒රු॒ත්රා ච॑] 6

පුරු॒ත්රා ච॑ ර॒ශ්මීනනු॒ ද්යාවා॑පෘථි॒වී ආ ත॑තාන .. ආ॒ගත්ය॑ වා॒ජ්යද්ධ්ව॑න॒-ස්සර්වා॒ මෘධෝ॒ විධූ॑නුතේ . අ॒ග්නිග්ං ස॒ධස්ථේ॑ මහ॒ති චක්ෂු॑ෂා॒ නි චි॑කීෂතේ .. ආ॒ක්රම්ය॑ වාජි-න්පෘථි॒වීම॒ග්නිමි॑ච්ඡ රු॒චා ත්වම් . භූම්යා॑ වෘ॒ත්වාය॑ නෝ බ්රූහි॒ යතඃ॒ ඛනා॑ම॒ තං-වँ॒යම් .. ද්යෞස්තේ॑ පෘ॒ෂ්ඨ-ම්පෘ॑ථි॒වී ස॒ධස්ථ॑මා॒ත්මා (අ)න්තරි॑ක්ෂග්ං සමු॒ද්රස්තේ॒ යෝනිඃ॑ . වි॒ඛ්යාය॒ චක්ෂු॑ෂා॒ ත්වම॒භි ති॑ෂ්ඨ [ත්වම॒භි ති॑ෂ්ඨ, පෘ॒ත॒න්ය॒තඃ .] 7

පෘතන්ය॒තඃ .. උත්ක්රා॑ම මහ॒තේ සෞභ॑ගායා॒-ස්මාදා॒ස්ථානා᳚-ද්ද්රවිණෝ॒දා වා॑ජින්න් . ව॒යග්ග් ස්යා॑ම සුම॒තෞ පෘ॑ථි॒ව්යා අ॒ග්නි-ඞ්ඛ॑නි॒ෂ්යන්ත॑ උ॒පස්ථේ॑ අස්යාඃ .. උද॑ක්රමී-ද්ද්රවිණෝ॒දා වා॒ජ්යර්වා-(අ)ක॒-ස්ස ලෝ॒කග්ං සුකෘ॑ත-ම්පෘථි॒ව්යාඃ . තතඃ॑ ඛනේම සු॒ප්රතී॑කම॒ග්නිග්ං සුවෝ॒ රුහා॑ණා॒ අධි॒ නාක॑ උත්ත॒මේ .. අ॒පෝ දේ॒වීරුප॑ සෘජ॒ මධු॑මතීරය॒ක්ෂ්මාය॑ ප්ර॒ජාභ්යඃ॑ . තාසා॒ග්॒ ස්ථානා॒දුජ්ජි॑හතා॒-මෝෂ॑ධය-ස්සුපිප්ප॒ලාඃ .. ජිඝ॑- [ජිඝ॑ර්මි, අ॒ග්නි-ම්මන॑සා] 8

-ර්ම්ය॒ග්නි-ම්මන॑සා ඝෘ॒තේන॑ ප්රති॒ක්ෂ්යන්ත॒-ම්භුව॑නානි॒ විශ්වා᳚ . පෘ॒ථු-න්ති॑ර॒ශ්චා වය॑සා බෘ॒හන්තං॒-ව්යँචි॑ෂ්ඨ॒මන්නග්ං॑ රභ॒සං-විँදා॑නම් .. ආ ත්වා॑ ජිඝර්මි॒ වච॑සා ඝෘ॒තේනා॑-(අ)ර॒ක්ෂසා॒ මන॑සා॒ තජ්ජු॑ෂස්ව . මර්ය॑ශ්රී-ස්ස්පෘහ॒ය-ද්ව॑ර්ණෝ අ॒ග්නිර්නා-(අ)භි॒මෘශේ॑ ත॒නුවා॒ ජර්හෘ॑ෂාණඃ .. පරි॒ වාජ॑පතිඃ ක॒විර॒ග්නිර්-හ॒ව්යාන්ය॑ක්රමීත් . දධ॒-ද්රත්නා॑නි දා॒ශුෂේ᳚ .. පරි॑ ත්වා-(අ)ග්නේ॒ පුරං॑-වँ॒යං-විँප්රග්ං॑ සහස්ය ධීමහි . ධෘ॒ෂ-ද්ව॑ර්ණ-න්දි॒වේදි॑වේ භේ॒ත්තාර॑-ම්භඞ්ගු॒රාව॑තඃ .. ත්වම॑ග්නේ॒ ද්යුභි॒ස්ත්ව-මා॑ශුශු॒ක්ෂණි॒ස්ත්ව-ම॒ද්භ්යස්ත්ව-මශ්ම॑න॒ස්පරි॑ . ත්වං-වँනේ᳚භ්ය॒ ස්ත්වමෝෂ॑ධීභ්ය॒ ස්ත්ව-න්නෘ॒ණා-න්නෘ॑පතේ ජායසේ॒ ශුචිඃ॑ .. 9 ..

(ප්ර॒තූර්ව॒න්ථ් - සූර්ය॑ස්ය - තිෂ්ඨ॒ - ජිඝ॑ර්මි - භේ॒ත්තාරං॑ - ँවිග්ංශ॒තිශ්ච॑) (අ. 2)

දේ॒වස්ය॑ ත්වා සවි॒තුඃ ප්ර॑ස॒වේ᳚-(අ)ශ්විනෝ᳚ ර්බා॒හුභ්යා᳚-ම්පූ॒ෂ්ණෝ හස්තා᳚භ්යා-ම්පෘථි॒ව්යා-ස්ස॒ධස්ථේ॒-(අ)ග්නි-ම්පු॑රී॒ෂ්ය॑-මඞ්ගිර॒ස්ව-ත්ඛ॑නාමි .. ජ්යෝති॑ෂ්මන්ත-න්ත්වා-(අ)ග්නේ සු॒ප්රතී॑ක॒මජ॑ස්රේණ භා॒නුනා॒ දීද්යා॑නම් . ශි॒ව-ම්ප්ර॒ජාභ්යෝ-(අ)හිග්ං॑ සන්ත-ම්පෘථි॒ව්යා-ස්ස॒ධස්ථේ॒-(අ)ග්නි-ම්පු॑රී॒ෂ්ය॑ -මඞ්ගිර॒ස්ව-ත්ඛ॑නාමි .. අ॒පා-ම්පෘ॒ෂ්ඨම॑සි ස॒ප්රථා॑ උ॒ර්ව॑ග්නි-ම්භ॑රි॒ෂ්යදප॑රාවපිෂ්ඨම් . වර්ධ॑මාන-ම්ම॒හ ආ ච॒ පුෂ්ක॑ර-න්දි॒වෝ මාත්ර॑යා වරි॒ණා ප්ර॑ථස්ව .. ශර්ම॑ ච ස්ථෝ॒ [ශර්ම॑ ච ස්ථඃ, වර්ම॑ ච] 10

වර්ම॑ ච ස්ථෝ॒ අච්ඡි॑ද්රේ බහු॒ලේ උ॒භේ . ව්යච॑ස්වතී॒ සං-වँ॑සාථා-ම්භ॒ර්තම॒ග්නි-ම්පු॑රී॒ෂ්ය᳚ම් .. සංවँ॑සාථාග්ං සුව॒ර්විදා॑ ස॒මීචී॒ උර॑සා॒ ත්මනා᳚ . අ॒ග්නිම॒න්ත ර්භ॑රි॒ෂ්යන්තී॒ ජ්යෝති॑ෂ්මන්ත॒ මජ॑ස්ර॒මිත් .. පු॒රී॒ෂ්යෝ॑-(අ)සි වි॒ශ්වභ॑රාඃ . අථ॑ර්වා ත්වා ප්රථ॒මෝ නිර॑මන්ථදග්නේ .. ත්වාම॑ග්නේ॒ පුෂ්ක॑රා॒දද්ධ්යථ॑ර්වා॒ නිර॑මන්ථත . මූ॒ර්ධ්නෝ විශ්ව॑ස්ය වා॒ඝතඃ॑ .. තමු॑ ත්වා ද॒ද්ධ්යඞ්ඞෘෂිඃ॑ පු॒ත්ර ඊ॑ධේ॒ [පු॒ත්ර ඊ॑ධේ, අථ॑ර්වණඃ .] 11

අථ॑ර්වණඃ . වෘ॒ත්ර॒හණ॑-ම්පුරන්ද॒රම් .. තමු॑ ත්වා පා॒ථ්යෝ වෘෂා॒ සමී॑ධේ දස්යු॒හන්ත॑මම් . ධ॒න॒ඤ්ජ॒යග්ං රණේ॑රණේ .. සීද॑ හෝත॒-ස්ස්ව උ॑ ලෝ॒කේ චි॑කි॒ත්වාන්-ථ්සා॒දයා॑ ය॒ජ්ඤග්ං සු॑කෘ॒තස්ය॒ යෝනෞ᳚ . දේ॒වා॒වීර්දේ॒වාන්. හ॒විෂා॑ යජා॒ස්යග්නේ॑ බෘ॒හ-ද්යජ॑මානේ॒ වයෝ॑ ධාඃ .. නි හෝතා॑ හෝතෘ॒ෂද॑නේ॒ විදා॑නස්ත්වේ॒ෂෝ දී॑දි॒වාග්ං අ॑සද-ථ්සු॒දක්ෂඃ॑ . අද॑බ්ධව්රත ප්රමති॒ර්වසි॑ෂ්ඨ-ස්සහස්ර-ම්භ॒ර-ශ්ශුචි॑ජිහ්වෝ අ॒ග්නිඃ .. සග්ං සී॑දස්ව ම॒හාග්ං අ॑සි॒ ශෝච॑ස්ව [ශෝච॑ස්ව, දේ॒ව॒වීත॑මඃ .] 12

දේව॒වීත॑මඃ . වි ධූ॒මම॑ග්නේ අරු॒ෂ-ම්මි॑යේද්ධ්ය සෘ॒ජ ප්ර॑ශස්ත දර්ශ॒තම් .. ජනි॑ෂ්වා॒ හි ජේන්යෝ॒ අග්රේ॒ අහ්නාග්ං॑ හි॒තෝ හි॒තේෂ්ව॑රු॒ෂෝ වනේ॑ෂු . දමේ॑දමේ ස॒ප්ත රත්නා॒ දධා॑නෝ॒-(අ)ග්නිර්හෝතා॒ නි ෂ॑සාදා॒ යජී॑යාන් .. 13 ..

(ස්ථ॒ - ඊ॒ධේ॒ - ශෝච॑ස්ව - ස॒ප්තවිග්ං॑ශතිශ්ච) - (අ. 3)

ස-න්තේ॑ වා॒යුර්මා॑ත॒රිශ්වා॑ දධාතූත්තා॒නායෛ॒ හෘද॑යං॒-යँද්විලි॑ෂ්ටම් . දේ॒වානාං॒-යँශ්චර॑ති ප්රා॒ණථේ॑න॒ තස්මෛ॑ ච දේවි॒ වෂ॑ඩස්තු॒ තුභ්ය᳚ම් .. සුජා॑තෝ॒ ජ්යෝති॑ෂා ස॒හ ශර්ම॒ වරූ॑ථ॒මා-(අ)ස॑ද॒-ස්සුවඃ॑ . වාසෝ॑ අග්නේ වි॒ශ්වරූ॑ප॒ග්ං॒ සංව්යँ॑යස්ව විභාවසෝ .. උදු॑ තිෂ්ඨ ස්වද්ධ්ව॒රාවා॑ නෝ දේ॒ව්යා කෘ॒පා . දෘ॒ශේ ච॑ භා॒සා බෘ॑හ॒තා සු॑ශු॒ක්වනි॒රා-(අ)ග්නේ॑ යාහි සුශ॒ස්තිභිඃ॑ .. 14 ..

ඌ॒ර්ධ්ව ඌ॒ ෂු ණ॑ ඌ॒තයේ॒ තිෂ්ඨා॑ දේ॒වෝ න ස॑වි॒තා . ඌ॒ර්ධ්වෝ වාජ॑ස්ය॒ සනි॑තා॒ යද॒ඤ්ජිභි॑-ර්වා॒ඝද්භි॑-ර්වි॒හ්වයා॑මහේ .. ස ජා॒තෝ ගර්භෝ॑ අසි॒ රෝද॑ස්යෝ॒රග්නේ॒ චාරු॒ර්විභෘ॑ත॒ ඕෂ॑ධීෂු . චි॒ත්ර-ශ්ශිශුඃ॒ පරි॒ තමාග්॑ස්ය॒ක්තඃ ප්ර මා॒තෘභ්යෝ॒ අධි॒ කනි॑ක්රදද්ගාඃ .. ස්ථි॒රෝ භ॑ව වී॒ඩ්ව॑ඞ්ග ආ॒ශුර්භ॑ව වා॒ජ්ය॑ර්වන්න් . පෘ॒ථුර්භ॑ව සු॒ෂද॒ස්ත්වම॒ග්නේඃ පු॑රීෂ॒වාහ॑නඃ .. ශි॒වෝ භ॑ව [ ] 15

ප්ර॒ජාභ්යෝ॒ මානු॑ෂීභ්ය॒ස්ත්වම॑ඞ්ගිරඃ . මා ද්යාවා॑පෘථි॒වී අ॒භි ශූ॑ශුචෝ॒ මා-(අ)න්තරි॑ක්ෂ॒-ම්මා වන॒ස්පතීන්॑ .. ප්රෛතු॑ වා॒ජී කනි॑ක්රද॒-න්නාන॑ද॒-ද්රාස॑භඃ॒ පත්වා᳚ . භර॑න්න॒ග්නි-ම්පු॑රී॒ෂ්ය॑-ම්මා පා॒ද්යායු॑ෂඃ පු॒රා .. රාස॑භෝ වා॒-ඞ්කනි॑ක්රද॒-ථ්සුයු॑ක්තෝ වෘෂණා॒ රථේ᳚ . ස වා॑ම॒ග්නි-ම්පු॑රී॒ෂ්ය॑මා॒ශුර්දූ॒තෝ ව॑හාදි॒තඃ .. වෘෂා॒-(අ)ග්නිං-වෘँෂ॑ණ॒-ම්භර॑න්න॒පා-ඞ්ගර්භග්ං॑ සමු॒ද්රිය᳚ම් . අග්න॒ ආ යා॑හි [ ] 16

වී॒තය॑ ඍ॒තග්ං ස॒ත්යම් .. ඕෂ॑ධයඃ॒ ප්රති॑ ගෘහ්ණීතා॒-(අ)ග්නිමේ॒තග්ං ශි॒වමා॒යන්ත॑ම॒භ්යත්ර॑ යු॒ෂ්මාන් . ව්යස්ය॒න් විශ්වා॒ අම॑තී॒රරා॑තී-ර්නි॒ෂීද॑න්නෝ॒ අප॑ දුර්ම॒තිග්ං හ॑නත් .. ඕෂ॑ධයඃ॒ ප්රති॑ මෝදද්ධ්වමේන॒-ම්පුෂ්පා॑වතී-ස්සුපිප්ප॒ලාඃ . අ॒යං-වෝँ॒ ගර්භ॑ ඍ॒ත්වියඃ॑ ප්ර॒ත්නග්ං ස॒ධස්ථ॒මා (අ)ස॑දත් .. 17 ..

(සු॒ශ॒ස්තිභිඃ॑ - ශි॒වෝ භ॑ව - යාහි॒ - ෂට්ත්රිග්ං॑ශච්ච) (අ. 4)

වි පාජ॑සා පෘ॒ථුනා॒ ශෝශු॑චානෝ॒ බාධ॑ස්ව ද්වි॒ෂෝ ර॒ක්ෂසෝ॒ අමී॑වාඃ . සු॒ශර්ම॑ණෝ බෘහ॒ත-ශ්ශර්ම॑ණි ස්යාම॒ග්නේර॒හග්ං සු॒හව॑ස්ය॒ ප්රණී॑තෞ .. ආපෝ॒ හි ෂ්ඨා ම॑යෝ॒භුව॒ස්තා න॑ ඌ॒ර්ජේ ද॑ධාතන . ම॒හේ රණා॑ය॒ චක්ෂ॑සේ .. යෝ වඃ॑ ශි॒වත॑මෝ॒ රස॒ස්තස්ය॑ භාජයතේ॒හ නඃ॑ . උ॒ශ॒තීරි॑ව මා॒තරඃ॑ .. තස්මා॒ අර॑-ඞ්ගමාම වෝ॒ යස්ය॒ ක්ෂයා॑ය॒ ජින්ව॑ථ . ආපෝ॑ ජ॒නය॑ථා ච නඃ .. මි॒ත්ර- [මි॒ත්රඃ, ස॒ග්ං॒සෘජ්ය॑] 18

-ස්ස॒ග්ං॒සෘජ්ය॑ පෘථි॒වී-ම්භූමි॑-ඤ්ච॒ ජ්යෝති॑ෂා ස॒හ . සුජා॑ත-ඤ්ජා॒තවේ॑දසම॒ග්නිං-වෛँ᳚ශ්වාන॒රං-විँ॒භුම් .. අ॒ය॒ක්ෂ්මාය॑ ත්වා॒ සග්ං සෘ॑ජාමි ප්ර॒ජාභ්යඃ॑ . විශ්වේ᳚ ත්වා දේ॒වා වෛ᳚ශ්වාන॒රා-ස්සග්ං සෘ॑ජ॒න්ත්වා-නු॑ෂ්ටුභේන॒ ඡන්ද॑සා-(අ)ඞ්ගිර॒ස්වත් .. රු॒ද්රා-ස්ස॒භෘන්ත්ය॑ පෘථි॒වී-ම්බෘ॒හජ්ජ්යෝති॒-ස්සමී॑ධිරේ . තේෂා᳚-ම්භා॒නුරජ॑ස්ර॒ ඉච්ඡු॒ක්රෝ දේ॒වේෂු॑ රෝචතේ .. සග්ං සෘ॑ෂ්ටාං॒-වँසු॑භී රු॒ද්රෛර්ධීරෛඃ᳚ කර්ම॒ණ්යා᳚-ම්මෘද᳚ම් . හස්තා᳚භ්යා-ම්මෘ॒ද්වී-ඞ්කෘ॒ත්වා සි॑නීවා॒ලී ක॑රෝතු॒ [සි॑නීවා॒ලී ක॑රෝතු, තාම් .] 19

තාම් .. සි॒නී॒වා॒ලී සු॑කප॒ර්දා සු॑කුරී॒රා ස්වෞ॑ප॒ශා . සා තුභ්ය॑මදිතේ මහ॒ ඕඛා-න්ද॑ධාතු॒ හස්ත॑යෝඃ .. උ॒ඛා-ඞ්ක॑රෝතු॒ ශක්ත්යා॑ බා॒හුභ්යා॒-මදි॑තිර්ධි॒යා . මා॒තා පු॒ත්රං-යँථෝ॒පස්ථේ॒ සා-(අ)ග්නි-ම්බි॑භර්තු॒ ගර්භ॒ ආ .. ම॒ඛස්ය॒ ශිරෝ॑-(අ)සි ය॒ජ්ඤස්ය॑ ප॒දේ ස්ථඃ॑ . වස॑වස්ත්වා කෘණ්වන්තු ගාය॒ත්රේණ॒ ඡන්ද॑සා (අ)ඞ්ගිර॒ස්ව-ත්පෘ॑ථි॒ව්ය॑සි රු॒ද්රාස්ත්වා॑ කෘණ්වන්තු॒ ත්රෛෂ්ටු॑භේන॒ ඡන්ද॑සා (අ)ඞ්ගිර॒ස්වද॒න්තරි॑ක්ෂම- [-(අ)ඞ්ගිර॒ස්වද॒න්තරි॑ක්ෂමසි, ආ॒දි॒ත්යාස්ත්වා॑] 20

-ස්යාදි॒ත්යාස්ත්වා॑ කෘණ්වන්තු॒ ජාග॑තේන॒ ඡන්ද॑සා-(අ)ඞ්ගිර॒ස්ව-ද්ද්යෞර॑සි॒ විශ්වේ᳚ ත්වා දේ॒වා වෛ᳚ශ්වාන॒රාඃ කෘ॑ණ්ව॒න්ත්වානු॑ෂ්ටුභේන॒ ඡන්ද॑සා-(අ)ඞ්ගිර॒ස්ව-ද්දිශෝ॑-(අ)සි ධ්රු॒වා-(අ)සි॑ ධා॒රයා॒ මයි॑ ප්ර॒ජාග්ං රා॒යස්පෝෂ॑-ඞ්ගෞප॒ත්යග්ං සු॒වීර්යග්ං॑ සජා॒තාන්. යජ॑මානා॒යා-(අ)දි॑ත්යෛ॒ රාස්නා॒-(අ)ස්ය දි॑තිස්තේ॒ බිල॑-ඞ්ගෘහ්ණාතු॒ පාඞ්ක්තේ॑න॒ ඡන්ද॑සා (අ)ඞ්ගිර॒ස්වත් .. කෘ॒ත්වාය॒ සා ම॒හීමු॒ඛා-ම්මෘ॒න්මයීං॒-යෝँනි॑ම॒ග්නයේ᳚ . තා-ම්පු॒ත්රේභ්ය॒-ස්ස-ම්ප්රා ය॑ච්ඡ॒දදි॑ති-ශ්ශ්ර॒පයා॒නිති॑ .. 21 ..

(මි॒ත්රඃ - ක॑රෝ - ත්ව॒න්තරි॑ක්ෂමසි॒ - ප්ර - ච॒ත්වාරි॑ ච) (අ. 5)

වස॑වස්ත්වා ධූපයන්තු ගාය॒ත්රේණ॒ ඡන්ද॑සා-(අ)ඞ්ගිර॒ස්ව-ද්රු॒ද්රාස්ත්වා॑ ධූපයන්තු॒ ත්රෛෂ්ටු॑භේන॒ ඡන්ද॑සා-(අ)ඞ්ගිර॒ස්ව-දා॑දි॒ත්යාස්ත්වා॑ ධූපයන්තු॒ ජාග॑තේන॒ ඡන්ද॑සා-(අ)ඞ්ගිර॒ස්වද්- විශ්වේ᳚ ත්වා දේ॒වා වෛ᳚ශ්වාන॒රා ධූ॑පය॒න්ත්වානු॑ෂ්ටුභේන॒ ඡන්ද॑සා-(අ)ඞ්ගිර॒ස්ව-දින්ද්ර॑ස්ත්වා ධූපයත්වඞ්ගිර॒ස්ව--ද්විෂ්ණු॑ස්ත්වා ධූපයත්වඞ්ගිර॒ස්ව-ද්වරු॑ණස්ත්වා ධූපයත්වඞ්ගිර॒ස්ව-දදි॑තිස්ත්වා දේ॒වී වි॒ශ්වදේ᳚ව්යාවතී පෘථි॒ව්යා-ස්ස॒ධස්ථේ᳚-(අ)ඞ්ගිර॒ස්ව-ත්ඛ॑නත්වවට දේ॒වානා᳚-න්ත්වා॒ පත්නී᳚- [පත්නීඃ᳚, දේ॒වී-ර්වි॒ශ්වදේ᳚ව්යාවතීඃ] 22

-ර්දේ॒වී-ර්වි॒ශ්වදේ᳚ව්යාවතීඃ පෘථි॒ව්යා-ස්ස॒ධස්ථේ᳚-(අ)ඞ්ගිර॒ස්ව-ද්ද॑ධතූඛේ ධි॒ෂණා᳚ස්ත්වා දේ॒වීර්වි॒ශ්වදේ᳚ව්යාවතීඃ පෘථි॒ව්යා-ස්ස॒ධස්ථේ᳚-(අ)ඞ්ගිර॒ස්ව-ද॒භීන්ධ॑තාමුඛේ॒ ග්නාස්ත්වා॑ දේ॒වීර්වි॒ශ්වදේ᳚ව්යාවතීඃ පෘථි॒ව්යා-ස්ස॒ධස්ථේ᳚-(අ)ඞ්ගිර॒ස්ව-ච්ඡ්ර॑පයන්තූඛේ॒ වරූ᳚ත්රයෝ॒ ජන॑යස්ත්වා දේ॒වීර්වි॒ශ්වදේ᳚ව්යාවතීඃ පෘථි॒ව්යා-ස්ස॒ධස්ථේ᳚-(අ)ඞ්ගිර॒ස්ව-ත්ප॑චන්තූඛේ . මිත්රෛ॒තාමු॒ඛා-ම්ප॑චෛ॒ෂා මා භේ॑දි . ඒ॒තා-න්තේ॒ පරි॑ දදා॒ම්යභි॑ත්ත්යෛ .. අ॒භීමා- [අ॒භීමාම්, ම॒හි॒නා දිව॑-ම්මි॒ත්රෝ] 23

-ම්ම॑හි॒නා දිව॑-ම්මි॒ත්රෝ බ॑භූව ස॒ප්රථාඃ᳚ . උ॒ත ශ්රව॑සා පෘථි॒වීම් .. මි॒ත්රස්ය॑ චර්ෂණී॒ධෘත॒-ශ්ශ්රවෝ॑ දේ॒වස්ය॑ සාන॒සිම් . ද්යු॒ම්න-ඤ්චි॒ත්රශ්ර॑වස්තමම් .. දේ॒වස්ත්වා॑ සවි॒තෝද්ව॑පතු සුපා॒ණි-ස්ස්ව॑ඞ්ගු॒රිඃ . සු॒බා॒හුරු॒ත ශක්ත්යා᳚ .. අප॑ද්යමානා පෘථි॒ව්යාශා॒ දිශ॒ ආ පෘ॑ණ . උත්ති॑ෂ්ඨ බෘහ॒තී භ॑වෝ॒ර්ධ්වා ති॑ෂ්ඨ ධ්රු॒වා ත්වම් .. වස॑ව॒ස්ත්වා (අ)(අ)ච්ඡෘ॑න්දන්තු ගාය॒ත්රේණ॒ ඡන්ද॑සා-(අ)ඞ්ගිර॒ස්ව-ද්රු॒ද්රාස්ත්වා-(අ)(අ) ච්ඡෘ॑න්දන්තු॒ ත්රෛෂ්ටු॑භේන॒ ඡන්ද॑සා-(අ)ඞ්ගිර॒ස්ව-දා॑දි॒ත්යාස්ත්වා (අ)(අ)ච්ඡෘ॑න්දන්තු॒ ජාග॑තේන॒ ඡන්ද॑සා-(අ)ඞ්ගිර॒ස්ව-ද්විශ්වේ᳚ ත්වා දේ॒වා වෛ᳚ශ්වාන॒රා ආ ච්ඡෘ॑න්ද॒න්ත්වානු॑ෂ්ටුභේන॒ ඡන්ද॑සා-(අ)ඞ්ගිර॒ස්වත් .. 24 ..

(පත්නී॑ - රි॒මාග්ං - රු॒ද්රාස්ත්වා-(අ)(අ) ච්ඡෘ॑න්ද॒න්ත්වේ - කා॒න්න විග්ං॑ශ॒තිශ්ච॑) (අ. 6)

සමා᳚ස්ත්වා-(අ)ග්න ඍ॒තවෝ॑ වර්ධයන්තු සංවँථ්ස॒රා ඍෂ॑යෝ॒ යානි॑ ස॒ත්යා . ස-න්දි॒ව්යේන॑ දීදිහි රෝච॒නේන॒ විශ්වා॒ ආ භා॑හි ප්ර॒දිශඃ॑ පෘථි॒ව්යාඃ .. ස-ඤ්චේ॒ද්ධ්යස්වා᳚-(අ)ග්නේ॒ ප්ර ච॑ බෝධයෛන॒මුච්ච॑ තිෂ්ඨ මහ॒තේ සෞභ॑ගාය . මා ච॑ රිෂදුපස॒ත්තා තේ॑ අග්නේ බ්ර॒හ්මාණ॑ස්තේ ය॒ශසඃ॑ සන්තු॒ මා-(අ)න්යේ .. ත්වාම॑ග්නේ වෘණතේ බ්රාහ්ම॒ණා ඉ॒මේ ශි॒වෝ අ॑ග්නේ [ ] 25

සං॒-වँර॑ණේ භවා නඃ . ස॒ප॒ත්න॒හා නෝ॑ අභිමාති॒ජිච්ච॒ ස්වේ ගයේ॑ ජාගෘ॒හ්ය ප්ර॑යුච්ඡන්න් .. ඉ॒හෛවාග්නේ॒ අධි॑ ධාරයා ර॒යි-ම්මා ත්වා॒ නික්ර॑-න්පූර්ව॒චිතෝ॑ නිකා॒රිණඃ॑ . ක්ෂ॒ත්රම॑ග්නේ සු॒යම॑මස්තු॒ තුභ්ය॑මුපස॒ත්තා ව॑ර්ධතා-න්තේ॒ අනි॑ෂ්ටෘතඃ .. ක්ෂ॒ත්රේණා᳚-(අ)ග්නේ॒ ස්වායු॒-ස්සග්ං ර॑භස්ව මි॒ත්රේණා᳚-(අ)ග්නේ මිත්ර॒ධේයේ॑ යතස්ව . ස॒ජා॒තානා᳚-ම්මද්ධ්යම॒ස්ථා ඒ॑ධි॒ රාජ්ඤා॑මග්නේ විහ॒ව්යෝ॑ දීදිහී॒හ .. අති॒ [අති॑, නිහෝ॒ අති॒ ස්රිධෝ] 26

නිහෝ॒ අති॒ ස්රිධෝ (අ)ත්යචි॑ත්ති॒-මත්යරා॑තිමග්නේ . විශ්වා॒ හ්ය॑ග්නේ දුරි॒තා සහ॒ස්වාථා॒ස්මභ්යග්ං॑ ස॒හවී॑රාග්ං ර॒යින්දාඃ᳚ .. අ॒නා॒ධෘ॒ෂ්යෝ ජා॒තව॑දා॒ අනි॑ෂ්ටෘතෝ වි॒රාඩ॑ග්නේ ක්ෂත්ර॒භෘ-ද්දී॑දිහී॒හ . විශ්වා॒ ආශාඃ᳚ ප්රමු॒ඤ්ච-න්මානු॑ෂීර්භි॒ය-ශ්ශි॒වාභි॑ර॒ද්ය පරි॑ පාහි නෝ වෘ॒ධේ .. බෘහ॑ස්පතේ සවිතර්බෝ॒ධයෛ॑න॒ග්ං॒ සග්ංශි॑ත-ඤ්චිථ්ස-න්ත॒රාග්ං සග්ං ශි॑ශාධි . ව॒ර්ධයෛ॑න-ම්මහ॒තේ සෞභ॑ගාය॒ [සෞභ॑ගාය, විශ්ව॑ ඒන॒මනු॑ මදන්තු දේ॒වාඃ .] 27

විශ්ව॑ ඒන॒මනු॑ මදන්තු දේ॒වාඃ .. අ॒මු॒ත්ර॒භූයා॒දධ॒ යද්ය॒මස්ය॒ බෘහ॑ස්පතේ අ॒භිශ॑ස්තේ॒ර මු॑ඤ්චඃ . ප්රත්යෞ॑හතා-ම॒ශ්විනා॑ මෘ॒ත්යුම॑ස්මා-ද්දේ॒වානා॑-මග්නේ භි॒ෂජා॒ ශචී॑භිඃ .. උද්ව॒ය-න්තම॑ස॒ස්පරි॒ පශ්ය॑න්තෝ॒ ජ්යෝති॒රුත්ත॑රම් . දේ॒ව-න්දේ॑ව॒ත්රා සූර්ය॒මග॑න්ම॒ ජ්යෝති॑රුත්ත॒මම් .. 28 ..

(ඉ॒මේ ශි॒වෝ අ॒ග්නේ - (අ)ති॒ - සෞභ॑ගාය॒ - චතු॑ස්ත්රිග්ංශච්ච) (අ. 7)

ඌ॒ර්ධ්වා අ॑ස්ය ස॒මිධෝ॑ භවන්ත්යූ॒ර්ධ්වා ශු॒ක්රා ශෝ॒චීග්ෂ්ය॒ග්නේඃ . ද්යු॒මත්ත॑මා සු॒ප්රතී॑කස්ය සූ॒නෝඃ .. තනූ॒නපා॒දසු॑රෝ වි॒ශ්වවේ॑දා දේ॒වෝ දේ॒වේෂු॑ දේ॒වඃ . ප॒ථ ආ-(අ)න॑ක්ති॒ මද්ධ්වා॑ ඝෘ॒තේන॑ .. මද්ධ්වා॑ ය॒ජ්ඤ-න්න॑ක්ෂසේ ප්රීණා॒නෝ නරා॒ශග්ංසෝ॑ අග්නේ . සු॒කෘද්දේ॒ව-ස්ස॑වි॒තා වි॒ශ්වවා॑රඃ .. අච්ඡා॒යමේ॑ති॒ ශව॑සා ඝෘ॒තේනේ॑ඩා॒නෝ වහ්නි॒ර්නම॑සා . අ॒ග්නිග්ග් ස්රුචෝ॑ අද්ධ්ව॒රේෂු॑ ප්ර॒යථ්සු॑ .. ස ය॑ක්ෂදස්ය මහි॒මාන॑ම॒ග්නේ-ස්ස [මහි॒මාන॑ම॒ග්නේ-ස්සඃ, ඊ॒ ම॒න්ද්රාසු॑ ප්ර॒යසඃ॑ .] 29

ඊ॑ ම॒න්ද්රාසු॑ ප්ර॒යසඃ॑ . වසු॒ශ්චේති॑ෂ්ඨෝ වසු॒ධාත॑මශ්ච .. ද්වාරෝ॑ දේ॒වීරන්ව॑ස්ය॒ විශ්වේ᳚ ව්ර॒තා ද॑දන්තේ අ॒ග්නේඃ . උ॒රු॒ව්යච॑සෝ॒ ධාම්නා॒ පත්ය॑මානාඃ .. තේ අ॑ස්ය॒ යෝෂ॑ණේ දි॒ව්යේ න යෝනා॑වු॒ෂාසා॒නක්තා᳚ . ඉ॒මං-යँ॒ජ්ඤම॑වතා මද්ධ්ව॒ර-න්නඃ॑ .. දෛව්යා॑ හෝතාරාවූ॒ර්ධ්ව-ම॑ද්ධ්ව॒ර-න්නෝ॒-(අ)ග්නේර්ජි॒හ්වාම॒භි ගෘ॑ණීතම් . කෘ॒ණු॒ත-න්න॒-ස්ස්වි॑ෂ්ටිම් .. ති॒ස්රෝ දේ॒වීර්බ॒ර්॒හිරේදග්ං ස॑ද॒න්ත්විඩා॒ සර॑ස්වතී॒ [සර॑ස්වතී, භාර॑තී .] 30

භාර॑තී . ම॒හී ගෘ॑ණා॒නා .. තන්න॑ස්තු॒රීප॒මද්භු॑ත-ම්පුරු॒ක්ෂු ත්වෂ්ටා॑ සු॒වීර᳚ම් . රා॒යස්පෝෂං॒-විँ ෂ්ය॑තු॒ නාභි॑ම॒ස්මේ .. වන॑ස්ප॒තේ-(අ)ව॑ සෘජා॒ රරා॑ණ॒ස්ත්මනා॑ දේ॒වේෂු॑ . අ॒ග්නිර්හ॒ව්යග්ං ශ॑මි॒තා සූ॑දයාති .. අග්නේ॒ ස්වාහා॑ කෘණුහි ජාතවේද॒ ඉන්ද්රා॑ය හ॒ව්යම් . විශ්වේ॑ දේ॒වා හ॒විරි॒ද-ඤ්ජු॑ෂන්තාම් .. හි॒ර॒ණ්ය॒ග॒ර්භ-ස්සම॑වර්ත॒තාග්රේ॑ භූ॒තස්ය॑ ජා॒තඃ පති॒රේක॑ ආසීත් . ස දා॑ධාර පෘථි॒වී-න්ද්යා- [පෘථි॒වී-න්ද්යාම්, උ॒තේමා-ඞ්කස්මෛ॑] 31

-මු॒තේමා-ඞ්කස්මෛ॑ දේ॒වාය॑ හ॒විෂා॑ විධේම .. යඃ ප්රා॑ණ॒තෝ නි॑මිෂ॒තෝ ම॑හි॒ත්වෛක॒ ඉද්රාජා॒ ජග॑තෝ බ॒භූව॑ . ය ඊශේ॑ අ॒ස්ය ද්වි॒පද॒ශ්චතු॑ෂ්පදඃ॒ කස්මෛ॑ දේ॒වාය॑ හ॒විෂා॑ විධේම .. ය ආ᳚ත්ම॒දා බ॑ල॒දා යස්ය॒ විශ්ව॑ උ॒පාස॑තේ ප්ර॒ශිෂං॒-යँස්ය॑ දේ॒වාඃ . යස්ය॑ ඡා॒යා-(අ)මෘතං॒-යँස්ය॑ මෘ॒ත්යුඃ කස්මෛ॑ දේ॒වාය॑ හ॒විෂා॑ විධේම .. යස්යේ॒මේ හි॒මව॑න්තෝ මහි॒ත්වා යස්ය॑ සමු॒ද්රග්ං ර॒සයා॑ ස॒හා- [ස॒හ, ආ॒හුඃ .] 32

-(අ)(අ)හුඃ . යස්යේ॒මාඃ ප්ර॒දිශෝ॒ යස්ය॑ බා॒හූ කස්මෛ॑ දේ॒වාය॑ හ॒විෂා॑ විධේම .. ය-ඞ්ක්රන්ද॑සී॒ අව॑සා තස්තභා॒නේ අ॒භ්යෛක්ෂේ॑තා॒-ම්මන॑සා॒ රේජ॑මානේ . යත්රාධි॒ සූර॒ උදි॑තෞ॒ ව්යේති॒ කස්මෛ॑ දේ॒වාය॑ හ॒විෂා॑ විධේම .. යේන॒ ද්යෞරු॒ග්රා පෘ॑ථි॒වී ච॑ දෘ॒ඪේ යේන॒ සු॒වඃ॑ ස්තභි॒තං-යේँන॒ නාකඃ॑ . යෝ අ॒න්තරි॑ක්ෂේ॒ රජ॑සෝ වි॒මානQඃකස්මෛ॑ දේ॒වාය॑ හ॒විෂා॑ විධේම .. ආපෝ॑ හ॒ යන්ම॑හ॒තී ර්විශ්ව॒- [යන්ම॑හ॒තී ර්විශ්ව᳚ම්, අය॒-න්දක්ෂ॒-න්දධා॑නා] 33

-මාය॒-න්දක්ෂ॒-න්දධා॑නා ජ॒නය॑න්තීර॒ග්නිම් . තතෝ॑ දේ॒වානා॒-න්නිර॑වර්ත॒තාසු॒රේකඃ॒ කස්මෛ॑ දේ॒වාය॑ හ॒විෂා॑ විධේම .. යශ්චි॒දාපෝ॑ මහි॒නා ප॒ර්යප॑ශ්ය॒-ද්දක්ෂ॒-න්දධා॑නා ජ॒නය॑න්තීර॒ග්නිම් . යෝ දේ॒වේෂ්වධි॑ දේ॒ව ඒක॒ ආසී॒-ත්කස්මෛ॑ දේ॒වාය॑ හ॒විෂා॑ විධේම .. 34 ..

(අ॒ග්නේ-ස්ස - සර॑ස්වතී॒ - ද්යාග්ං - ස॒හ - විශ්වං॒ - චතු॑ස්ත්රිග්ංශච්ච) (අ. 8)

(ඌ॒ර්ධ්වා - යඃ ප්රා॑ණ॒තෝ - ය ආ᳚ත්ම॒දා - යස්යේ॒මේ - යඞ්ක්රන්ද॑සී॒ - යේන॒ ද්යෞ- රාපෝ॑ හ॒ යත් - තතෝ॑ දේ॒වානාං॒ - ँයශ්චි॒දාපෝ॒ - යෝ දේ॒වේෂු॒ - නව॑ )

ආකූ॑තිම॒ග්නි-ම්ප්ර॒යුජ॒ග්ග්॒ ස්වාහා॒ මනෝ॑ මේ॒ධාම॒ග්නි-ම්ප්ර॒යුජ॒ග්ග්॒ ස්වාහා॑ චි॒ත්තං-විँජ්ඤා॑තම॒ග්නි-ම්ප්ර॒යුජ॒ග්ග්॒ ස්වාහා॑ වා॒චෝ විධෘ॑තිම॒ග්නි-ම්ප්ර॒යුජ॒ග්ග්॒ ස්වාහා᳚ ප්ර॒ජාප॑තයේ॒ මන॑වේ॒ ස්වාහා॒-(අ)ග්නයේ॑ වෛශ්වාන॒රාය॒ ස්වාහා॒ විශ්වේ॑ දේ॒වස්ය॑ නේ॒තුර්මර්තෝ॑ වෘණීත ස॒ඛ්යං-විँශ්වේ॑ රා॒ය ඉ॑ෂුද්ධ්යසි ද්යු॒ම්නං-වෘँ॑ණීත පු॒ෂ්යසේ॒ ස්වාහා॒ මා සු භි॑ත්ථා॒ මා සු රි॑ෂෝ॒ දෘග්ංහ॑ස්ව වී॒ඩය॑ස්ව॒ සු . අම්බ॑ ධෘෂ්ණු වී॒රය॑ස්වා॒- [වී॒රය॑ස්ව, අ॒ග්නිශ්චේ॒ද-ඞ්ක॑රිෂ්යථඃ .] 35

-(අ)ග්නිශ්චේ॒ද-ඞ්ක॑රිෂ්යථඃ .. දෘග්ංහ॑ස්ව දේවි පෘථිවි ස්ව॒ස්තය॑ ආසු॒රී මා॒යා ස්ව॒ධයා॑ කෘ॒තා-(අ)සි॑ . ජුෂ්ට॑-න්දේ॒වානා॑මි॒දම॑ස්තු හ॒ව්යමරි॑ෂ්ටා॒ ත්වමුදි॑හි ය॒ජ්ඤේ අ॒ස්මින්න් .. මිත්රෛ॒තාමු॒ඛා-න්ත॑පෛ॒ෂා මා භේ॑දි . ඒ॒තා-න්තේ॒ පරි॑ දදා॒ම්යභි॑ත්ත්යෛ .. ද්ර්ව॑න්න-ස්ස॒ර්පිරා॑සුතිඃ ප්ර॒ත්නෝ හෝතා॒ වරේ᳚ණ්යඃ . සහ॑සස්පු॒ත්රෝ අද්භු॑තඃ .. පර॑ස්යා॒ අධි॑ සං॒වँතෝ-(අ)ව॑රාග්ං අ॒භ්යා [අ॒භ්යා, ත॒ර॒ .] 36

ත॑ර . යත්රා॒හමස්මි॒ තාග්ං අ॑ව .. ප॒ර॒මස්යාඃ᳚ පරා॒වතෝ॑ රෝ॒හිද॑ශ්ව ඉ॒හා-(අ)ග॑හි . පු॒රී॒ෂ්යඃ॑ පුරුප්රි॒යෝ-(අ)ග්නේ॒ ත්ව-න්ත॑රා॒ මෘධඃ॑ .. සීද॒ ත්ව-ම්මා॒තුර॒ස්යා උ॒පස්ථේ॒ විශ්වා᳚න්යග්නේ ව॒යුනා॑නි වි॒ද්වාන් . මෛනා॑ම॒ර්චිෂා॒ මා තප॑සා॒-(අ)භි ශූ॑ශුචෝ॒-(අ)න්තර॑ස්යාග්ං ශු॒ක්ර ජ්යෝ॑ති॒ර්වි භා॑හි .. අ॒න්තර॑ග්නේ රු॒චා ත්වමු॒ඛායෛ॒ සද॑නේ॒ ස්වේ . තස්යා॒ස්ත්වග්ං හර॑සා॒ තප॒න් ජාත॑වේද-ශ්ශි॒වෝ භ॑ව .. ශි॒වෝ භූ॒ත්වා මහ්ය॑ම॒ග්නේ-(අ)ථෝ॑ සීද ශි॒වස්ත්වම් . ශි॒වාඃ කෘ॒ත්වා දිශ॒-ස්සර්වා॒-ස්ස්වාං-යෝँනි॑මි॒හා-(අ)(අ)ස॑දඃ .. 37 ..

(වී॒රය॒ස්වා - (අ)(අ) - තප॑න් - විග්ංශ॒තිශ්ච॑) (අ. 9)

යද॑ග්නේ॒ යානි॒ කානි॒ චා-(අ)(අ)තේ॒ දාරූ॑ණි ද॒ද්ධ්මසි॑ . තද॑ස්තු॒ තුභ්ය॒මි-ද්ඝෘ॒ත-න්තජ්ජු॑ෂස්ව යවිෂ්ඨ්ය .. යදත්ත්යු॑ප॒ජිහ්වි॑කා॒ යද්ව॒ම්රෝ අ॑ති॒සර්ප॑ති . සර්ව॒-න්තද॑ස්තු තේ ඝෘ॒ත-න්තජ්ජු॑ෂස්ව යවිෂ්ඨ්ය .. රාත්රිග්ං॑ රාත්රි॒මප්ර॑යාව॒-ම්භර॒න්තෝ-(අ)ශ්වා॑යේව॒ තිෂ්ඨ॑තේ ඝා॒සම॑ස්මෛ . රා॒යස්පෝෂේ॑ණ॒ සමි॒ෂා මද॒න්තෝ-(අ)ග්නේ॒ මා තේ॒ ප්රති॑වේශා රිෂාම .. නාභා॑ [නාභා᳚, පෘ॒ථි॒ව්යා-ස්ස॑මිධා॒න-] 38

පෘථි॒ව්යා-ස්ස॑මිධා॒න-ම॒ග්නිග්ං රා॒යස්පෝෂා॑ය බෘහ॒තේ හ॑වාමහේ . ඉ॒ර॒ම්ම॒ද-ම්බෘ॒හදු॑ක්ථං॒-යँජ॑ත්ර॒-ඤ්ජේතා॑රම॒ග්නි-ම්පෘත॑නාසු සාස॒හිම් .. යා-ස්සේනා॑ අ॒භීත්ව॑රීරා-ව්යා॒ධිනී॒-රුග॑ණා උ॒ත . යේ ස්තේ॒නා යේ ච॒ තස්ක॑රා॒ස්තාග්ස්තේ॑ අ॒ග්නේ-(අ)පි॑ දධාම්යා॒ස්යේ᳚ .. දග්ග්ෂ්ට්රා᳚භ්යා-ම්ම॒ලිම්ලූ॒න් ජම්භ්යෛ॒-ස්තස්ක॑රාග්ං උ॒ත . හනූ᳚භ්යාග් ස්තේ॒නාන්-භ॑ගව॒ස්තාග්-ස්ත්ව-ඞ්ඛා॑ද॒ සුඛා॑දිතාන් .. යේ ජනේ॑ෂු ම॒ලිම්ල॑ව-ස්ස්තේ॒නාස॒-ස්තස්ක॑රා॒ වනේ᳚ . යේ [ ] 39

කක්ෂේ᳚ෂ්වඝා॒ යව॒ස්තාග්ස්තේ॑ දධාමි॒ ජම්භ॑යෝඃ .. යෝ අ॒ස්මභ්ය॑මරාතී॒යා-ද්යශ්ච॑ නෝ॒ ද්වේෂ॑තේ॒ ජනඃ॑ . නින්දා॒ද්යෝ අ॒ස්මා-න්දිඵ්සා᳚ච්ච॒ සර්ව॒-න්ත-ම්ම॑ස්ම॒සා කු॑රු .. සග්ංශි॑ත-ම්මේ॒ බ්රහ්ම॒ සග්ංශි॑තං-වීँ॒ර්ය॑-ම්බල᳚ම් . සග්ංශි॑ත-ඞ්ක්ෂ॒ත්ර-ඤ්ජි॒ෂ්ණු යස්යා॒-(අ)හමස්මි॑ පු॒රෝහි॑තඃ .. උදේ॑ෂා-ම්බා॒හූ අ॑තිර॒මුද්වර්ච॒ උදූ॒ බල᳚ම් . ක්ෂි॒ණෝමි॒ බ්රහ්ම॑ණා॒-(අ)මිත්රා॒නුන්න॑යාමි॒ [-(අ)මිත්රා॒-නුන්න॑යාමි, ස්වාග්ං අ॒හම් .] 40

ස්වාග්ං අ॒හම් .. දෘ॒ශා॒නෝ රු॒ක්ම උ॒ර්ව්යා ව්ය॑ද්යෞද්දු॒ර්මර්ෂ॒මායුඃ॑ ශ්රි॒යේ රු॑චා॒නඃ . අ॒ග්නිර॒මෘතෝ॑ අභව॒ද්වයෝ॑-භි॒ර්යදේ॑න॒-න්ද්යෞරජ॑නය-ථ්සු॒රේතාඃ᳚ .. විශ්වා॑ රූ॒පාණි॒ ප්රති॑ මුඤ්චතේ ක॒විඃ ප්රා-(අ)සා॑වීද්භ॒ද්ර-න්ද්වි॒පදේ॒ චතු॑ෂ්පදේ . වි නාක॑මඛ්ය-ථ්සවි॒තා වරේ॒ණ්යෝ-(අ)නු॑ ප්ර॒යාණ॑මු॒ෂසෝ॒ වි॑රාජති .. නක්තෝ॒ෂාසා॒ සම॑නසා॒ විරූ॑පේ ධා॒පයේ॑තේ॒ ශිශු॒මේකග්ං॑ සමී॒චී . ද්යාවා॒ ක්ෂාමා॑ රු॒ක්මෝ [රු॒ක්මඃ, අ॒න්තර්වි භා॑ති] 41

අ॒න්තර්වි භා॑ති දේ॒වා අ॒ග්නි-න්ධා॑රය-න්ද්රවිණෝ॒දාඃ .. සු॒ප॒ර්ණෝ॑-(අ)සි ග॒රුත්මා᳚-න්ත්රි॒වෘත්තේ॒ ශිරෝ॑ ගාය॒ත්ර-ඤ්චක්ෂු॒-ස්ස්තෝම॑ ආ॒ත්මා සාම॑ තේ ත॒නූර්වා॑මදේ॒ව්ය-ම්බෘ॑හ-ද්රථන්ත॒රේ ප॒ක්ෂෞ ය॑ජ්ඤාය॒ජ්ඤිය॒-ම්පුච්ඡ॒-ඤ්ඡන්දා॒ග්॒ස්යඞ්ගා॑නි॒ ධිෂ්ණි॑යා-ශ්ශ॒ඵා යජූග්ං॑ෂි॒ නාම॑ .. සු॒ප॒ර්ණෝ॑-(අ)සි ග॒රුත්මා॒-න්දිව॑-ඞ්ගච්ඡ॒ සුවඃ॑ පත .. 42 ..

(නාභා॒ - වනේ॒ යේ - න॑යාමි॒ - ක්ෂාමා॑ රු॒ක්මෝ᳚ - (අ)ෂ්ටාත්රිග්ං॑ශච්ච) (අ. 10)

අග්නේ॒ යං-යँ॒ජ්ඤම॑ද්ධ්ව॒රං-විँ॒ශ්වතඃ॑ පරි॒භූරසි॑ . ස ඉද්දේ॒වේෂු॑ ගච්ඡති .. සෝම॒ යාස්තේ॑ මයෝ॒භුව॑ ඌ॒තය॒-ස්සන්ති॑ දා॒ශුෂේ᳚ . තාභි॑ර්නෝ-(අ)වි॒තා භ॑ව .. අ॒ග්නිර්මූ॒ර්ධා භුවඃ॑ .. ත්වන්නඃ॑ සෝම॒ , යා තේ॒ ධාමා॑නි .. ත-ථ්ස॑වි॒තුර්වරේ᳚ණ්ය॒-ම්භර්ගෝ॑ දේ॒වස්ය॑ ධීමහි . ධියෝ॒ යෝ නඃ॑ ප්රචෝ॒දයා᳚ත් .. අචි॑ත්තී॒ යච්ච॑කෘ॒මා දෛව්යේ॒ ජනේ॑ දී॒නෛර්දක්ෂෛඃ॒ ප්රභූ॑තී පූරුෂ॒ත්වතා᳚ . 43

දේ॒වේෂු॑ ච සවිත॒ර්මානු॑ෂේෂු ච॒ ත්වන්නෝ॒ අත්ර॑ සුවතා॒දනා॑ගසඃ .. චෝ॒ද॒යි॒ත්රී සූ॒නෘතා॑නා॒-ඤ්චේත॑න්තී සුමතී॒නාම් . ය॒ජ්ඤ-න්ද॑ධේ॒ සර॑ස්වතී .. පාවී॑රවී ක॒න්යා॑ චි॒ත්රායු॒-ස්සර॑ස්වතී වී॒රප॑ත්නී॒ ධිය॑-න්ධාත් . ග්නාභි॒රච්ඡි॑ද්රග්ං ශර॒ණග්ං ස॒ජෝෂා॑ දුරා॒ධර්ෂ॑-ඞ්ගෘණ॒තේ ශර්ම॑ යග්ංසත් .. පූ॒ෂා ගා අන්වේ॑තු නඃ පූ॒ෂා ර॑ක්ෂ॒ත්වර්ව॑තඃ . පූ॒ෂා වාජග්ං॑ සනෝතු නඃ .. ශු॒ක්ර-න්තේ॑ අ॒න්යද්ය॑ජ॒ත-න්තේ॑ අ॒න්ය- [අ॒න්යත්, විෂු॑රූපේ॒ අහ॑නී॒ ද්යෞරි॑වාසි .] 44

-ද්විෂු॑රූපේ॒ අහ॑නී॒ ද්යෞරි॑වාසි . විශ්වා॒ හි මා॒යා අව॑සි ස්වධාවෝ භ॒ද්රා තේ॑ පූෂන්නි॒හ රා॒තිර॑ස්තු .. තේ॑-(අ)වර්ධන්ත॒ ස්වත॑වසෝ මහිත්ව॒නා (අ)(අ)නාක॑-න්ත॒ස්ථුරු॒රු ච॑ක්රිරේ॒ සදඃ॑ . විෂ්ණු॒ ර්යද්ධා-(අ)(අ)ව॒-ද්වෘෂ॑ණ-ම්මද॒ච්යුතං॒-වँයෝ॒ න සී॑ද॒න්නධි॑ බ॒ර්॒හිෂි॑ ප්රි॒යේ .. ප්රචි॒ත්රම॒ර්ක-ඞ්ගෘ॑ණ॒තේ තු॒රාය॒ මාරු॑තාය॒ ස්වත॑වසේ භරද්ධ්වම් . යේ සහාග්ං॑සි॒ සහ॑සා॒ සහ॑න්තේ॒ [සහ॑න්තේ, රේජ॑තේ අග්නේ පෘථි॒වී ම॒ඛේභ්යඃ॑ .] 45

රේජ॑තේ අග්නේ පෘථි॒වී ම॒ඛේභ්යඃ॑ .. විශ්වේ॑ දේ॒වා විශ්වේ॑ දේවාඃ .. ද්යාවා॑ නඃ පෘථි॒වී ඉ॒මග්ං සි॒ද්ධ්රම॒ද්ය දි॑වි॒ස්පෘශ᳚ම් . ය॒ජ්ඤ-න්දේ॒වේෂු॒ යච්ඡතාම් .. ප්ර පූ᳚ර්ව॒ජේ පි॒තරා॒ නව්ය॑සීභිර්ගී॒ර්භිඃ කෘ॑ණුද්ධ්ව॒ග්ං॒ සද॑නේ ඍ॒තස්ය॑ . ආ නෝ᳚ ද්යාවාපෘථිවී॒ දෛව්යේ॑න॒ ජනේ॑න යාත॒-ම්මහි॑ වාං॒-වँරූ॑ථම් .. අ॒ග්නිග්ග් ස්තෝමේ॑න බෝධය සමිධා॒නෝ අම॑ර්ත්යම් . හ॒ව්යා දේ॒වේෂු॑ නෝ දධත් .. ස හ॑ව්ය॒වාඩම॑ර්ත්ය උ॒ශිග්දූ॒තශ්චනෝ॑හිතඃ . අ॒ග්නිර්ධි॒යා සමෘ॑ණ්වති .. ශන්නෝ॑ භවන්තු॒, වාජේ॑වාජේ .. 46 ..

(පු॒රු॒ෂ॒ත්වතා॑ - යජ॒තන්තේ॑ අ॒න්යථ් - සහ॑න්තේ॒ - චනෝ॑හිතෝ॒ - (අ)ෂ්ටෞ ච॑ ) (අ. 11)

(යු॒ඤ්ජා॒න - ඉ॒මාම॑ගෘභ්ණන් - දේ॒වස්ය॒ - සන්තේ॒ - වි පාජ॑සා॒ - වස॑වස්ත්වා॒ - සමා᳚ස්ත්වෝ॒ - ර්ධ්වා - අ॒ස්යාකූ॑තිං॒ - ँයද॑ග්නේ॒ යාන් - යග්නේ॒ යං-යँ॒ජ්ඤ - මේකා॑දශ)

(යු॒ඤ්ජා॒නෝ - වර්ම॑ ච ස්ථ - ආදි॒ත්යස්ත්වා॒ - භාර॑තී॒ - ස්වාග්ං අ॒හග්ං - ෂට්ච॑ත්වාරිග්ංශත් )

(යු॒ඤ්ජා॒නෝ, වාජේ॑වාජේ)

.. හරිඃ॑ ඕම් ..

.. කෘෂ්ණ යජුර්වේදීය තෛත්තිරීය සංහිතායා-ඤ්චතුර්ථ කාණ්ඩේ ප්රථමඃ ප්රශ්න-ස්සමාප්තඃ ..

Roman (IAST) Transliteration

kṛṣṇa yajurvedīya taittirīya saṃhitāyā-ñcaturthakāṇḍe prathamaḥ praśnaḥ- agnicityaṅga mantrapāṭhābhidhānaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

yu॒ñjā॒naḥ pra̭tha॒ma-mmana̭sta॒tvāya̭ savi॒tā dhiyaḥ̭ | a॒gni-ñjyoti̭rni॒cāyya̭ pṛthi॒vyā addhyā 'bha̭rat || yu॒ktvāya॒ mana̭sā de॒vān-thsuva̭rya॒to dhi॒yā diva᳚m | bṛ॒hajjyotiḥ̭ kariṣya॒ta-ssa̭vi॒tā prasṷvāti॒ tān || yu॒ktena॒ mana̭sā va॒ya-nde॒vasya̭ savi॒tu-ssa॒ve | su॒va॒rgeyā̭ya॒ śaktyai᳚ || yu॒ñjate॒ mana̭ u॒ta yṷñjate॒ dhiyo॒ viprā॒ vipra̭sya bṛha॒to vi̭pa॒ścitaḥ̭ | vi hotrā̭ dadhe vayunā॒ videka॒ i- [vayunā॒ videka॒ it, ma॒hī de॒vasya̭] 1

-nma॒hī de॒vasya̭ savi॒tuḥ pari̭ṣṭutiḥ || yu॒je vā॒-mbrahma̭ pū॒rvya-nnamo̭bhi॒rvi ślokā̭ yanti pa॒thyḙva॒ sūrāḥ᳚ | śṛ॒ṇvanti॒ viśvḙ a॒mṛta̭sya pu॒trā ā ye dhāmā̭ni di॒vyāni̭ ta॒sthuḥ || yasya̭ pra॒yāṇa॒manva॒nya idya॒yurde॒vā de॒vasya̭ mahi॒māna॒marca̭taḥ | yaḥ pārthi̭vāni vima॒me sa eta̭śo॒ rajāgṃ̭si de॒va-ssa̭vi॒tā ma̭hitva॒nā || deva̭ savitaḥ॒ prasṷva ya॒jña-mprasa̭va [ ] 2

ya॒jñapa̭ti॒-mbhagā̭ya di॒vyo ga̭ndha॒rvaḥ | ke॒ta॒pūḥ keta̭nnaḥ punātu vā॒caspati॒rvāca̭ma॒dya sva̭dāti naḥ || i॒ma-nno̭ deva savitarya॒jña-mprasṷva devā॒yuvagṃ̭ sakhi॒vidagṃ̭ satrā॒jita̭-ndhana॒jitagṃ̭ suva॒rjita᳚m || ṛ॒cā stoma॒gṃ॒ sama̭rdhaya gāya॒treṇa̭ rathanta॒ram | bṛ॒ha-dgā̭ya॒trava̭rtani || de॒vasya̭ tvā savi॒tuḥ pra̭sa॒ve᳚ 'śvino᳚rbā॒hubhyā᳚-mpū॒ṣṇo hastā᳚bhyā-ṅgāya॒treṇa॒ chanda॒sā ''da̭de-'ṅgira॒svadabhri̭rasi॒ nāri̭- [nāriḥ̭, a॒si॒ pṛ॒thi॒vyā-ssa॒dhasthā̭-] 3

-rasi pṛthi॒vyā-ssa॒dhasthā̭-da॒gni-mpṷrī॒ṣya̭maṅgira॒svadā bha̭ra॒ traiṣṭṷbhena tvā॒ chanda॒sā ''da̭de-'ṅgira॒sva-dbabhri̭rasi॒ nāri̭rasi॒ tvayā̭ va॒yagṃ sa॒dhastha॒ āgnigṃ śa̭kema॒ khani̭tu-mpurī॒ṣya̭-ñjāga̭tena tvā॒ chanda॒sā ''da̭de-'ṅgira॒svaddhasta̭ ā॒dhāya̭ savi॒tā bibhra॒dabhrigṃ̭ hira॒ṇyayī᳚m | tayā॒ jyoti॒raja̭sra॒-mida॒gni-ṅkhā॒tvī na॒ ā bha॒rānṷṣṭubhena tvā॒ chanda॒sā ''da̭de-'ṅgira॒svat || 4 ||

(i--dya॒jña-mprasṷva॒ - nāri॒ - rānṷṣṭubhena tvā॒ chanda̭sā॒ - trīṇi̭ ca) (a. 1)

i॒māma̭gṛbhṇa-nraśa॒nāmṛ॒tasya॒ pūrva॒ āyṷṣi vi॒dathḙṣu ka॒vyā | tayā̭ de॒vā-ssu॒tamā ba̭bhūvur-ṛ॒tasya॒ sāma᳚n-thsa॒ramā॒rapa̭ntī || pratū᳚rtaṃ-vā~ji॒nnā dra̭va॒ vari̭ṣṭhā॒manṷ saṃ॒va~ta᳚m | di॒vi te॒ janma̭ para॒mama॒ntari̭kṣe॒ nābhiḥ̭ pṛthi॒vyāmadhi॒ yoniḥ̭ || yu॒ñjāthā॒gṃ॒ rāsa̭bhaṃ-yu~॒vama॒smin. yāmḙ vṛṣaṇvasū | a॒gni-mbhara̭ntamasma॒yum || yogḙyoge ta॒vasta̭raṃ॒-vā~jḙvāje havāmahe | sakhā̭ya॒ indra̭ma॒taye᳚ || pra॒tūrva॒- [pra॒tūrvanṋ, ehya̭va॒krāma॒nnaśa̭stī] 5

-nnehya̭va॒krāma॒nnaśa̭stī ru॒drasya॒ gāṇa̭patyā-nmayo॒bhūrehi̭ | u॒rva̭ntari̭kṣa॒manvi̭hi sva॒sti ga̭vyūti॒rabha̭yāni kṛ॒ṇvann || pū॒ṣṇā sa॒yujā̭ sa॒ha | pṛ॒thi॒vyā-ssa॒dhasthā̭da॒gni-mpṷri॒ṣya̭-maṅgira॒sva-dacche᳚hya॒gni-mpṷrī॒ṣya̭ -maṅgira॒svada-cchḙmo॒-'gni-mpṷrī॒ṣya̭-maṅgira॒sva-dbha̭riṣyāmo॒-'gni-mpṷrī॒ṣya̭-maṅgira॒sva-dbha̭rāmaḥ || anva॒gniru॒ṣasā॒-magra̭makhya॒-danvahā̭ni pratha॒mo jā॒tavḙdāḥ | anu॒ sūrya̭sya [sūrya̭sya, pu॒ru॒trā ca̭] 6

puru॒trā ca̭ ra॒śmīnanu॒ dyāvā̭pṛthi॒vī ā ta̭tāna || ā॒gatya̭ vā॒jyaddhva̭na॒-ssarvā॒ mṛdho॒ vidhṷ̄nute | a॒gnigṃ sa॒dhasthḙ maha॒ti cakṣṷṣā॒ ni ci̭kīṣate || ā॒kramya̭ vāji-npṛthi॒vīma॒gnimi̭ccha ru॒cā tvam | bhūmyā̭ vṛ॒tvāya̭ no brūhi॒ yataḥ॒ khanā̭ma॒ taṃ-va~॒yam || dyaustḙ pṛ॒ṣṭha-mpṛ̭thi॒vī sa॒dhastha̭mā॒tmā 'ntari̭kṣagṃ samu॒draste॒ yoniḥ̭ | vi॒khyāya॒ cakṣṷṣā॒ tvama॒bhi ti̭ṣṭha [tvama॒bhi ti̭ṣṭha, pṛ॒ta॒nya॒taḥ |] 7

pṛtanya॒taḥ || utkrā̭ma maha॒te saubha̭gāyā॒-smādā॒sthānā᳚-ddraviṇo॒dā vā̭jinn | va॒yagg syā̭ma suma॒tau pṛ̭thi॒vyā a॒gni-ṅkha̭ni॒ṣyanta̭ u॒pasthḙ asyāḥ || uda̭kramī-ddraviṇo॒dā vā॒jyarvā-'ka॒-ssa lo॒kagṃ sukṛ̭ta-mpṛthi॒vyāḥ | tataḥ̭ khanema su॒pratī̭kama॒gnigṃ suvo॒ ruhā̭ṇā॒ adhi॒ nāka̭ utta॒me || a॒po de॒vīrupa̭ sṛja॒ madhṷmatīraya॒kṣmāya̭ pra॒jābhyaḥ̭ | tāsā॒g॒ sthānā॒dujji̭hatā॒-moṣa̭dhaya-ssupippa॒lāḥ || jigha̭- [jigha̭rmi, a॒gni-mmana̭sā] 8

-rmya॒gni-mmana̭sā ghṛ॒tena̭ prati॒kṣyanta॒-mbhuva̭nāni॒ viśvā᳚ | pṛ॒thu-nti̭ra॒ścā vaya̭sā bṛ॒hantaṃ॒-vya~ci̭ṣṭha॒mannagṃ̭ rabha॒saṃ-vi~dā̭nam || ā tvā̭ jigharmi॒ vaca̭sā ghṛ॒tenā̭-'ra॒kṣasā॒ mana̭sā॒ tajjṷṣasva | marya̭śrī-sspṛha॒ya-dva̭rṇo a॒gnirnā-'bhi॒mṛśḙ ta॒nuvā॒ jarhṛ̭ṣāṇaḥ || pari॒ vāja̭patiḥ ka॒vira॒gnir-ha॒vyānya̭kramīt | dadha॒-dratnā̭ni dā॒śuṣe᳚ || pari̭ tvā-'gne॒ puraṃ̭-va~॒yaṃ-vi~pragṃ̭ sahasya dhīmahi | dhṛ॒ṣa-dva̭rṇa-ndi॒vedi̭ve bhe॒ttāra̭-mbhaṅgu॒rāva̭taḥ || tvama̭gne॒ dyubhi॒stva-mā̭śuśu॒kṣaṇi॒stva-ma॒dbhyastva-maśma̭na॒spari̭ | tvaṃ-va~ne᳚bhya॒ stvamoṣa̭dhībhya॒ stva-nnṛ॒ṇā-nnṛ̭pate jāyase॒ śuciḥ̭ || 9 ||

(pra॒tūrva॒nth - sūrya̭sya - tiṣṭha॒ - jigha̭rmi - bhe॒ttāraṃ̭ - ~vigṃśa॒tiśca̭) (a. 2)

de॒vasya̭ tvā savi॒tuḥ pra̭sa॒ve᳚-'śvino᳚ rbā॒hubhyā᳚-mpū॒ṣṇo hastā᳚bhyā-mpṛthi॒vyā-ssa॒dhasthe॒-'gni-mpṷrī॒ṣya̭-maṅgira॒sva-tkha̭nāmi || jyoti̭ṣmanta-ntvā-'gne su॒pratī̭ka॒maja̭sreṇa bhā॒nunā॒ dīdyā̭nam | śi॒va-mpra॒jābhyo-'higṃ̭ santa-mpṛthi॒vyā-ssa॒dhasthe॒-'gni-mpṷrī॒ṣya̭ -maṅgira॒sva-tkha̭nāmi || a॒pā-mpṛ॒ṣṭhama̭si sa॒prathā̭ u॒rva̭gni-mbha̭ri॒ṣyadapa̭rāvapiṣṭham | vardha̭māna-mma॒ha ā ca॒ puṣka̭ra-ndi॒vo mātra̭yā vari॒ṇā pra̭thasva || śarma̭ ca stho॒ [śarma̭ ca sthaḥ, varma̭ ca] 10

varma̭ ca stho॒ acchi̭dre bahu॒le u॒bhe | vyaca̭svatī॒ saṃ-va~̭sāthā-mbha॒rtama॒gni-mpṷrī॒ṣya᳚m || saṃva~̭sāthāgṃ suva॒rvidā̭ sa॒mīcī॒ ura̭sā॒ tmanā᳚ | a॒gnima॒nta rbha̭ri॒ṣyantī॒ jyoti̭ṣmanta॒ maja̭sra॒mit || pu॒rī॒ṣyo̭-'si vi॒śvabha̭rāḥ | atha̭rvā tvā pratha॒mo nira̭manthadagne || tvāma̭gne॒ puṣka̭rā॒daddhyatha̭rvā॒ nira̭manthata | mū॒rdhno viśva̭sya vā॒ghataḥ̭ || tamṷ tvā da॒ddhyaṅṅṛṣiḥ̭ pu॒tra ī̭dhe॒ [pu॒tra ī̭dhe, atha̭rvaṇaḥ |] 11

atha̭rvaṇaḥ | vṛ॒tra॒haṇa̭-mpuranda॒ram || tamṷ tvā pā॒thyo vṛṣā॒ samī̭dhe dasyu॒hanta̭mam | dha॒na॒ñja॒yagṃ raṇḙraṇe || sīda̭ hota॒-ssva ṷ lo॒ke ci̭ki॒tvān-thsā॒dayā̭ ya॒jñagṃ sṷkṛ॒tasya॒ yonau᳚ | de॒vā॒vīrde॒vān. ha॒viṣā̭ yajā॒syagnḙ bṛ॒ha-dyaja̭māne॒ vayo̭ dhāḥ || ni hotā̭ hotṛ॒ṣada̭ne॒ vidā̭nastve॒ṣo dī̭di॒vāgṃ a̭sada-thsu॒dakṣaḥ̭ | ada̭bdhavrata pramati॒rvasi̭ṣṭha-ssahasra-mbha॒ra-śśuci̭jihvo a॒gniḥ || sagṃ sī̭dasva ma॒hāgṃ a̭si॒ śoca̭sva [śoca̭sva, de॒va॒vīta̭maḥ |] 12

deva॒vīta̭maḥ | vi dhū॒mama̭gne aru॒ṣa-mmi̭yeddhya sṛ॒ja pra̭śasta darśa॒tam || jani̭ṣvā॒ hi jenyo॒ agre॒ ahnāgṃ̭ hi॒to hi॒teṣva̭ru॒ṣo vanḙṣu | damḙdame sa॒pta ratnā॒ dadhā̭no॒-'gnirhotā॒ ni ṣa̭sādā॒ yajī̭yān || 13 ||

(stha॒ - ī॒dhe॒ - śoca̭sva - sa॒ptavigṃ̭śatiśca) - (a. 3)

sa-ntḙ vā॒yurmā̭ta॒riśvā̭ dadhātūttā॒nāyai॒ hṛda̭yaṃ॒-ya~dvili̭ṣṭam | de॒vānāṃ॒-ya~ścara̭ti prā॒ṇathḙna॒ tasmai̭ ca devi॒ vaṣa̭ḍastu॒ tubhya᳚m || sujā̭to॒ jyoti̭ṣā sa॒ha śarma॒ varṷ̄tha॒mā-'sa̭da॒-ssuvaḥ̭ | vāso̭ agne vi॒śvarṷ̄pa॒gṃ॒ saṃvya~̭yasva vibhāvaso || udṷ tiṣṭha svaddhva॒rāvā̭ no de॒vyā kṛ॒pā | dṛ॒śe ca̭ bhā॒sā bṛ̭ha॒tā sṷśu॒kvani॒rā-'gnḙ yāhi suśa॒stibhiḥ̭ || 14 ||

ū॒rdhva ū॒ ṣu ṇa̭ ū॒taye॒ tiṣṭhā̭ de॒vo na sa̭vi॒tā | ū॒rdhvo vāja̭sya॒ sani̭tā॒ yada॒ñjibhi̭-rvā॒ghadbhi̭-rvi॒hvayā̭mahe || sa jā॒to garbho̭ asi॒ roda̭syo॒ragne॒ cāru॒rvibhṛ̭ta॒ oṣa̭dhīṣu | ci॒tra-śśiśuḥ॒ pari॒ tamāg̭sya॒ktaḥ pra mā॒tṛbhyo॒ adhi॒ kani̭kradadgāḥ || sthi॒ro bha̭va vī॒ḍva̭ṅga ā॒śurbha̭va vā॒jya̭rvann | pṛ॒thurbha̭va su॒ṣada॒stvama॒gneḥ pṷrīṣa॒vāha̭naḥ || śi॒vo bha̭va [ ] 15

pra॒jābhyo॒ mānṷṣībhya॒stvama̭ṅgiraḥ | mā dyāvā̭pṛthi॒vī a॒bhi śṷ̄śuco॒ mā-'ntari̭kṣa॒-mmā vana॒spatīṋ || praitṷ vā॒jī kani̭krada॒-nnāna̭da॒-drāsa̭bhaḥ॒ patvā᳚ | bhara̭nna॒gni-mpṷrī॒ṣya̭-mmā pā॒dyāyṷṣaḥ pu॒rā || rāsa̭bho vā॒-ṅkani̭krada॒-thsuyṷkto vṛṣaṇā॒ rathe᳚ | sa vā̭ma॒gni-mpṷrī॒ṣya̭mā॒śurdū॒to va̭hādi॒taḥ || vṛṣā॒-'gniṃ-vṛ~ṣa̭ṇa॒-mbhara̭nna॒pā-ṅgarbhagṃ̭ samu॒driya᳚m | agna॒ ā yā̭hi [ ] 16

vī॒taya̭ ṛ॒tagṃ sa॒tyam || oṣa̭dhayaḥ॒ prati̭ gṛhṇītā॒-'gnime॒tagṃ śi॒vamā॒yanta̭ma॒bhyatra̭ yu॒ṣmān | vyasya॒n viśvā॒ ama̭tī॒rarā̭tī-rni॒ṣīda̭nno॒ apa̭ durma॒tigṃ ha̭nat || oṣa̭dhayaḥ॒ prati̭ modaddhvamena॒-mpuṣpā̭vatī-ssupippa॒lāḥ | a॒yaṃ-vo~॒ garbha̭ ṛ॒tviyaḥ̭ pra॒tnagṃ sa॒dhastha॒mā 'sa̭dat || 17 ||

(su॒śa॒stibhiḥ̭ - śi॒vo bha̭va - yāhi॒ - ṣaṭtrigṃ̭śacca) (a. 4)

vi pāja̭sā pṛ॒thunā॒ śośṷcāno॒ bādha̭sva dvi॒ṣo ra॒kṣaso॒ amī̭vāḥ | su॒śarma̭ṇo bṛha॒ta-śśarma̭ṇi syāma॒gnera॒hagṃ su॒hava̭sya॒ praṇī̭tau || āpo॒ hi ṣṭhā ma̭yo॒bhuva॒stā na̭ ū॒rje da̭dhātana | ma॒he raṇā̭ya॒ cakṣa̭se || yo vaḥ̭ śi॒vata̭mo॒ rasa॒stasya̭ bhājayate॒ha naḥ̭ | u॒śa॒tīri̭va mā॒taraḥ̭ || tasmā॒ ara̭-ṅgamāma vo॒ yasya॒ kṣayā̭ya॒ jinva̭tha | āpo̭ ja॒naya̭thā ca naḥ || mi॒tra- [mi॒traḥ, sa॒gṃ॒sṛjya̭] 18

-ssa॒gṃ॒sṛjya̭ pṛthi॒vī-mbhūmi̭-ñca॒ jyoti̭ṣā sa॒ha | sujā̭ta-ñjā॒tavḙdasama॒gniṃ-vai~᳚śvāna॒raṃ-vi~॒bhum || a॒ya॒kṣmāya̭ tvā॒ sagṃ sṛ̭jāmi pra॒jābhyaḥ̭ | viśve᳚ tvā de॒vā vai᳚śvāna॒rā-ssagṃ sṛ̭ja॒ntvā-nṷṣṭubhena॒ chanda̭sā-'ṅgira॒svat || ru॒drā-ssa॒bhṛntya̭ pṛthi॒vī-mbṛ॒hajjyoti॒-ssamī̭dhire | teṣā᳚-mbhā॒nuraja̭sra॒ icchu॒kro de॒veṣṷ rocate || sagṃ sṛ̭ṣṭāṃ॒-va~sṷbhī ru॒drairdhīraiḥ᳚ karma॒ṇyā᳚-mmṛda᳚m | hastā᳚bhyā-mmṛ॒dvī-ṅkṛ॒tvā si̭nīvā॒lī ka̭rotu॒ [si̭nīvā॒lī ka̭rotu, tām |] 19

tām || si॒nī॒vā॒lī sṷkapa॒rdā sṷkurī॒rā svaṷpa॒śā | sā tubhya̭madite maha॒ okhā-nda̭dhātu॒ hasta̭yoḥ || u॒khā-ṅka̭rotu॒ śaktyā̭ bā॒hubhyā॒-madi̭tirdhi॒yā | mā॒tā pu॒traṃ-ya~tho॒pasthe॒ sā-'gni-mbi̭bhartu॒ garbha॒ ā || ma॒khasya॒ śiro̭-'si ya॒jñasya̭ pa॒de sthaḥ̭ | vasa̭vastvā kṛṇvantu gāya॒treṇa॒ chanda̭sā 'ṅgira॒sva-tpṛ̭thi॒vya̭si ru॒drāstvā̭ kṛṇvantu॒ traiṣṭṷbhena॒ chanda̭sā 'ṅgira॒svada॒ntari̭kṣama- [-'ṅgira॒svada॒ntari̭kṣamasi, ā॒di॒tyāstvā̭] 20

-syādi॒tyāstvā̭ kṛṇvantu॒ jāga̭tena॒ chanda̭sā-'ṅgira॒sva-ddyaura̭si॒ viśve᳚ tvā de॒vā vai᳚śvāna॒rāḥ kṛ̭ṇva॒ntvānṷṣṭubhena॒ chanda̭sā-'ṅgira॒sva-ddiśo̭-'si dhru॒vā-'si̭ dhā॒rayā॒ mayi̭ pra॒jāgṃ rā॒yaspoṣa̭-ṅgaupa॒tyagṃ su॒vīryagṃ̭ sajā॒tān. yaja̭mānā॒yā-'di̭tyai॒ rāsnā॒-'sya di̭tiste॒ bila̭-ṅgṛhṇātu॒ pāṅktḙna॒ chanda̭sā 'ṅgira॒svat || kṛ॒tvāya॒ sā ma॒hīmu॒khā-mmṛ॒nmayīṃ॒-yo~ni̭ma॒gnaye᳚ | tā-mpu॒trebhya॒-ssa-mprā ya̭ccha॒dadi̭ti-śśra॒payā॒niti̭ || 21 ||

(mi॒traḥ - ka̭ro - tva॒ntari̭kṣamasi॒ - pra - ca॒tvāri̭ ca) (a. 5)

vasa̭vastvā dhūpayantu gāya॒treṇa॒ chanda̭sā-'ṅgira॒sva-dru॒drāstvā̭ dhūpayantu॒ traiṣṭṷbhena॒ chanda̭sā-'ṅgira॒sva-dā̭di॒tyāstvā̭ dhūpayantu॒ jāga̭tena॒ chanda̭sā-'ṅgira॒svad- viśve᳚ tvā de॒vā vai᳚śvāna॒rā dhṷ̄paya॒ntvānṷṣṭubhena॒ chanda̭sā-'ṅgira॒sva-dindra̭stvā dhūpayatvaṅgira॒sva--dviṣṇṷstvā dhūpayatvaṅgira॒sva-dvarṷṇastvā dhūpayatvaṅgira॒sva-dadi̭tistvā de॒vī vi॒śvade᳚vyāvatī pṛthi॒vyā-ssa॒dhasthe᳚-'ṅgira॒sva-tkha̭natvavaṭa de॒vānā᳚-ntvā॒ patnī᳚- [patnīḥ᳚, de॒vī-rvi॒śvade᳚vyāvatīḥ] 22

-rde॒vī-rvi॒śvade᳚vyāvatīḥ pṛthi॒vyā-ssa॒dhasthe᳚-'ṅgira॒sva-dda̭dhatūkhe dhi॒ṣaṇā᳚stvā de॒vīrvi॒śvade᳚vyāvatīḥ pṛthi॒vyā-ssa॒dhasthe᳚-'ṅgira॒sva-da॒bhīndha̭tāmukhe॒ gnāstvā̭ de॒vīrvi॒śvade᳚vyāvatīḥ pṛthi॒vyā-ssa॒dhasthe᳚-'ṅgira॒sva-cchra̭payantūkhe॒ varū᳚trayo॒ jana̭yastvā de॒vīrvi॒śvade᳚vyāvatīḥ pṛthi॒vyā-ssa॒dhasthe᳚-'ṅgira॒sva-tpa̭cantūkhe | mitrai॒tāmu॒khā-mpa̭cai॒ṣā mā bhḙdi | e॒tā-nte॒ pari̭ dadā॒myabhi̭ttyai || a॒bhīmā- [a॒bhīmām, ma॒hi॒nā diva̭-mmi॒tro] 23

-mma̭hi॒nā diva̭-mmi॒tro ba̭bhūva sa॒prathāḥ᳚ | u॒ta śrava̭sā pṛthi॒vīm || mi॒trasya̭ carṣaṇī॒dhṛta॒-śśravo̭ de॒vasya̭ sāna॒sim | dyu॒mna-ñci॒traśra̭vastamam || de॒vastvā̭ savi॒todva̭patu supā॒ṇi-ssva̭ṅgu॒riḥ | su॒bā॒huru॒ta śaktyā᳚ || apa̭dyamānā pṛthi॒vyāśā॒ diśa॒ ā pṛ̭ṇa | utti̭ṣṭha bṛha॒tī bha̭vo॒rdhvā ti̭ṣṭha dhru॒vā tvam || vasa̭va॒stvā ''cchṛ̭ndantu gāya॒treṇa॒ chanda̭sā-'ṅgira॒sva-dru॒drāstvā-'' cchṛ̭ndantu॒ traiṣṭṷbhena॒ chanda̭sā-'ṅgira॒sva-dā̭di॒tyāstvā ''cchṛ̭ndantu॒ jāga̭tena॒ chanda̭sā-'ṅgira॒sva-dviśve᳚ tvā de॒vā vai᳚śvāna॒rā ā cchṛ̭nda॒ntvānṷṣṭubhena॒ chanda̭sā-'ṅgira॒svat || 24 ||

(patnī̭ - ri॒māgṃ - ru॒drāstvā-'' cchṛ̭nda॒ntve - kā॒nna vigṃ̭śa॒tiśca̭) (a. 6)

samā᳚stvā-'gna ṛ॒tavo̭ vardhayantu saṃva~thsa॒rā ṛṣa̭yo॒ yāni̭ sa॒tyā | sa-ndi॒vyena̭ dīdihi roca॒nena॒ viśvā॒ ā bhā̭hi pra॒diśaḥ̭ pṛthi॒vyāḥ || sa-ñce॒ddhyasvā᳚-'gne॒ pra ca̭ bodhayaina॒mucca̭ tiṣṭha maha॒te saubha̭gāya | mā ca̭ riṣadupasa॒ttā tḙ agne bra॒hmāṇa̭ste ya॒śasaḥ̭ santu॒ mā-'nye || tvāma̭gne vṛṇate brāhma॒ṇā i॒me śi॒vo a̭gne [ ] 25

saṃ॒-va~ra̭ṇe bhavā naḥ | sa॒pa॒tna॒hā no̭ abhimāti॒jicca॒ sve gayḙ jāgṛ॒hya pra̭yucchann || i॒haivāgne॒ adhi̭ dhārayā ra॒yi-mmā tvā॒ nikra̭-npūrva॒cito̭ nikā॒riṇaḥ̭ | kṣa॒trama̭gne su॒yama̭mastu॒ tubhya̭mupasa॒ttā va̭rdhatā-nte॒ ani̭ṣṭṛtaḥ || kṣa॒treṇā᳚-'gne॒ svāyu॒-ssagṃ ra̭bhasva mi॒treṇā᳚-'gne mitra॒dheyḙ yatasva | sa॒jā॒tānā᳚-mmaddhyama॒sthā ḙdhi॒ rājñā̭magne viha॒vyo̭ dīdihī॒ha || ati॒ [ati̭, niho॒ ati॒ sridho] 26

niho॒ ati॒ sridho 'tyaci̭tti॒-matyarā̭timagne | viśvā॒ hya̭gne duri॒tā saha॒svāthā॒smabhyagṃ̭ sa॒havī̭rāgṃ ra॒yindāḥ᳚ || a॒nā॒dhṛ॒ṣyo jā॒tava̭dā॒ ani̭ṣṭṛto vi॒rāḍa̭gne kṣatra॒bhṛ-ddī̭dihī॒ha | viśvā॒ āśāḥ᳚ pramu॒ñca-nmānṷṣīrbhi॒ya-śśi॒vābhi̭ra॒dya pari̭ pāhi no vṛ॒dhe || bṛha̭spate savitarbo॒dhayai̭na॒gṃ॒ sagṃśi̭ta-ñcithsa-nta॒rāgṃ sagṃ śi̭śādhi | va॒rdhayai̭na-mmaha॒te saubha̭gāya॒ [saubha̭gāya, viśva̭ ena॒manṷ madantu de॒vāḥ |] 27

viśva̭ ena॒manṷ madantu de॒vāḥ || a॒mu॒tra॒bhūyā॒dadha॒ yadya॒masya॒ bṛha̭spate a॒bhiśa̭ste॒ra mṷñcaḥ | pratyaṷhatā-ma॒śvinā̭ mṛ॒tyuma̭smā-dde॒vānā̭-magne bhi॒ṣajā॒ śacī̭bhiḥ || udva॒ya-ntama̭sa॒spari॒ paśya̭nto॒ jyoti॒rutta̭ram | de॒va-ndḙva॒trā sūrya॒maga̭nma॒ jyoti̭rutta॒mam || 28 ||

(i॒me śi॒vo a॒gne - 'ti॒ - saubha̭gāya॒ - catṷstrigṃśacca) (a. 7)

ū॒rdhvā a̭sya sa॒midho̭ bhavantyū॒rdhvā śu॒krā śo॒cīgṣya॒gneḥ | dyu॒matta̭mā su॒pratī̭kasya sū॒noḥ || tanū॒napā॒dasṷro vi॒śvavḙdā de॒vo de॒veṣṷ de॒vaḥ | pa॒tha ā-'na̭kti॒ maddhvā̭ ghṛ॒tena̭ || maddhvā̭ ya॒jña-nna̭kṣase prīṇā॒no narā॒śagṃso̭ agne | su॒kṛdde॒va-ssa̭vi॒tā vi॒śvavā̭raḥ || acchā॒yamḙti॒ śava̭sā ghṛ॒tenḙḍā॒no vahni॒rnama̭sā | a॒gnigg sruco̭ addhva॒reṣṷ pra॒yathsṷ || sa ya̭kṣadasya mahi॒māna̭ma॒gne-ssa [mahi॒māna̭ma॒gne-ssaḥ, ī॒ ma॒ndrāsṷ pra॒yasaḥ̭ |] 29

ī̭ ma॒ndrāsṷ pra॒yasaḥ̭ | vasu॒śceti̭ṣṭho vasu॒dhāta̭maśca || dvāro̭ de॒vīranva̭sya॒ viśve᳚ vra॒tā da̭dante a॒gneḥ | u॒ru॒vyaca̭so॒ dhāmnā॒ patya̭mānāḥ || te a̭sya॒ yoṣa̭ṇe di॒vye na yonā̭vu॒ṣāsā॒naktā᳚ | i॒maṃ-ya~॒jñama̭vatā maddhva॒ra-nnaḥ̭ || daivyā̭ hotārāvū॒rdhva-ma̭ddhva॒ra-nno॒-'gnerji॒hvāma॒bhi gṛ̭ṇītam | kṛ॒ṇu॒ta-nna॒-ssvi̭ṣṭim || ti॒sro de॒vīrba॒r॒hiredagṃ sa̭da॒ntviḍā॒ sara̭svatī॒ [sara̭svatī, bhāra̭tī |] 30

bhāra̭tī | ma॒hī gṛ̭ṇā॒nā || tanna̭stu॒rīpa॒madbhṷta-mpuru॒kṣu tvaṣṭā̭ su॒vīra᳚m | rā॒yaspoṣaṃ॒-vi~ ṣya̭tu॒ nābhi̭ma॒sme || vana̭spa॒te-'va̭ sṛjā॒ rarā̭ṇa॒stmanā̭ de॒veṣṷ | a॒gnirha॒vyagṃ śa̭mi॒tā sṷ̄dayāti || agne॒ svāhā̭ kṛṇuhi jātaveda॒ indrā̭ya ha॒vyam | viśvḙ de॒vā ha॒viri॒da-ñjṷṣantām || hi॒ra॒ṇya॒ga॒rbha-ssama̭varta॒tāgrḙ bhū॒tasya̭ jā॒taḥ pati॒reka̭ āsīt | sa dā̭dhāra pṛthi॒vī-ndyā- [pṛthi॒vī-ndyām, u॒temā-ṅkasmai̭] 31

-mu॒temā-ṅkasmai̭ de॒vāya̭ ha॒viṣā̭ vidhema || yaḥ prā̭ṇa॒to ni̭miṣa॒to ma̭hi॒tvaika॒ idrājā॒ jaga̭to ba॒bhūva̭ | ya īśḙ a॒sya dvi॒pada॒ścatṷṣpadaḥ॒ kasmai̭ de॒vāya̭ ha॒viṣā̭ vidhema || ya ā᳚tma॒dā ba̭la॒dā yasya॒ viśva̭ u॒pāsa̭te pra॒śiṣaṃ॒-ya~sya̭ de॒vāḥ | yasya̭ chā॒yā-'mṛtaṃ॒-ya~sya̭ mṛ॒tyuḥ kasmai̭ de॒vāya̭ ha॒viṣā̭ vidhema || yasye॒me hi॒mava̭nto mahi॒tvā yasya̭ samu॒dragṃ ra॒sayā̭ sa॒hā- [sa॒ha, ā॒huḥ |] 32

-''huḥ | yasye॒māḥ pra॒diśo॒ yasya̭ bā॒hū kasmai̭ de॒vāya̭ ha॒viṣā̭ vidhema || ya-ṅkranda̭sī॒ ava̭sā tastabhā॒ne a॒bhyaikṣḙtā॒-mmana̭sā॒ reja̭māne | yatrādhi॒ sūra॒ udi̭tau॒ vyeti॒ kasmai̭ de॒vāya̭ ha॒viṣā̭ vidhema || yena॒ dyauru॒grā pṛ̭thi॒vī ca̭ dṛ॒ḍhe yena॒ su॒vaḥ̭ stabhi॒taṃ-ye~na॒ nākaḥ̭ | yo a॒ntari̭kṣe॒ raja̭so vi॒mānaQḥkasmai̭ de॒vāya̭ ha॒viṣā̭ vidhema || āpo̭ ha॒ yanma̭ha॒tī rviśva॒- [yanma̭ha॒tī rviśva᳚m, aya॒-ndakṣa॒-ndadhā̭nā] 33

-māya॒-ndakṣa॒-ndadhā̭nā ja॒naya̭ntīra॒gnim | tato̭ de॒vānā॒-nnira̭varta॒tāsu॒rekaḥ॒ kasmai̭ de॒vāya̭ ha॒viṣā̭ vidhema || yaści॒dāpo̭ mahi॒nā pa॒ryapa̭śya॒-ddakṣa॒-ndadhā̭nā ja॒naya̭ntīra॒gnim | yo de॒veṣvadhi̭ de॒va eka॒ āsī॒-tkasmai̭ de॒vāya̭ ha॒viṣā̭ vidhema || 34 ||

(a॒gne-ssa - sara̭svatī॒ - dyāgṃ - sa॒ha - viśvaṃ॒ - catṷstrigṃśacca) (a. 8)

(ū॒rdhvā - yaḥ prā̭ṇa॒to - ya ā᳚tma॒dā - yasye॒me - yaṅkranda̭sī॒ - yena॒ dyau- rāpo̭ ha॒ yat - tato̭ de॒vānāṃ॒ - ~yaści॒dāpo॒ - yo de॒veṣu॒ - nava̭ )

ākṷ̄tima॒gni-mpra॒yuja॒gg॒ svāhā॒ mano̭ me॒dhāma॒gni-mpra॒yuja॒gg॒ svāhā̭ ci॒ttaṃ-vi~jñā̭tama॒gni-mpra॒yuja॒gg॒ svāhā̭ vā॒co vidhṛ̭tima॒gni-mpra॒yuja॒gg॒ svāhā᳚ pra॒jāpa̭taye॒ mana̭ve॒ svāhā॒-'gnayḙ vaiśvāna॒rāya॒ svāhā॒ viśvḙ de॒vasya̭ ne॒turmarto̭ vṛṇīta sa॒khyaṃ-vi~śvḙ rā॒ya i̭ṣuddhyasi dyu॒mnaṃ-vṛ~̭ṇīta pu॒ṣyase॒ svāhā॒ mā su bhi̭tthā॒ mā su ri̭ṣo॒ dṛgṃha̭sva vī॒ḍaya̭sva॒ su | amba̭ dhṛṣṇu vī॒raya̭svā॒- [vī॒raya̭sva, a॒gniśce॒da-ṅka̭riṣyathaḥ |] 35

-'gniśce॒da-ṅka̭riṣyathaḥ || dṛgṃha̭sva devi pṛthivi sva॒staya̭ āsu॒rī mā॒yā sva॒dhayā̭ kṛ॒tā-'si̭ | juṣṭa̭-nde॒vānā̭mi॒dama̭stu ha॒vyamari̭ṣṭā॒ tvamudi̭hi ya॒jñe a॒sminn || mitrai॒tāmu॒khā-nta̭pai॒ṣā mā bhḙdi | e॒tā-nte॒ pari̭ dadā॒myabhi̭ttyai || drva̭nna-ssa॒rpirā̭sutiḥ pra॒tno hotā॒ vare᳚ṇyaḥ | saha̭saspu॒tro adbhṷtaḥ || para̭syā॒ adhi̭ saṃ॒va~to-'va̭rāgṃ a॒bhyā [a॒bhyā, ta॒ra॒ |] 36

ta̭ra | yatrā॒hamasmi॒ tāgṃ a̭va || pa॒ra॒masyāḥ᳚ parā॒vato̭ ro॒hida̭śva i॒hā-'ga̭hi | pu॒rī॒ṣyaḥ̭ purupri॒yo-'gne॒ tva-nta̭rā॒ mṛdhaḥ̭ || sīda॒ tva-mmā॒tura॒syā u॒pasthe॒ viśvā᳚nyagne va॒yunā̭ni vi॒dvān | mainā̭ma॒rciṣā॒ mā tapa̭sā॒-'bhi śṷ̄śuco॒-'ntara̭syāgṃ śu॒kra jyo̭ti॒rvi bhā̭hi || a॒ntara̭gne ru॒cā tvamu॒khāyai॒ sada̭ne॒ sve | tasyā॒stvagṃ hara̭sā॒ tapa॒n jāta̭veda-śśi॒vo bha̭va || śi॒vo bhū॒tvā mahya̭ma॒gne-'tho̭ sīda śi॒vastvam | śi॒vāḥ kṛ॒tvā diśa॒-ssarvā॒-ssvāṃ-yo~ni̭mi॒hā-''sa̭daḥ || 37 ||

(vī॒raya॒svā - '' - tapa̭n - vigṃśa॒tiśca̭) (a. 9)

yada̭gne॒ yāni॒ kāni॒ cā-''te॒ dārṷ̄ṇi da॒ddhmasi̭ | tada̭stu॒ tubhya॒mi-dghṛ॒ta-ntajjṷṣasva yaviṣṭhya || yadattyṷpa॒jihvi̭kā॒ yadva॒mro a̭ti॒sarpa̭ti | sarva॒-ntada̭stu te ghṛ॒ta-ntajjṷṣasva yaviṣṭhya || rātrigṃ̭ rātri॒mapra̭yāva॒-mbhara॒nto-'śvā̭yeva॒ tiṣṭha̭te ghā॒sama̭smai | rā॒yaspoṣḙṇa॒ sami॒ṣā mada॒nto-'gne॒ mā te॒ prati̭veśā riṣāma || nābhā̭ [nābhā᳚, pṛ॒thi॒vyā-ssa̭midhā॒na-] 38

pṛthi॒vyā-ssa̭midhā॒na-ma॒gnigṃ rā॒yaspoṣā̭ya bṛha॒te ha̭vāmahe | i॒ra॒mma॒da-mbṛ॒hadṷkthaṃ॒-ya~ja̭tra॒-ñjetā̭rama॒gni-mpṛta̭nāsu sāsa॒him || yā-ssenā̭ a॒bhītva̭rīrā-vyā॒dhinī॒-ruga̭ṇā u॒ta | ye ste॒nā ye ca॒ taska̭rā॒stāgstḙ a॒gne-'pi̭ dadhāmyā॒sye᳚ || daggṣṭrā᳚bhyā-mma॒limlū॒n jambhyai॒-staska̭rāgṃ u॒ta | hanū᳚bhyāg ste॒nān-bha̭gava॒stāg-stva-ṅkhā̭da॒ sukhā̭ditān || ye janḙṣu ma॒limla̭va-sste॒nāsa॒-staska̭rā॒ vane᳚ | ye [ ] 39

kakṣe᳚ṣvaghā॒ yava॒stāgstḙ dadhāmi॒ jambha̭yoḥ || yo a॒smabhya̭marātī॒yā-dyaśca̭ no॒ dveṣa̭te॒ janaḥ̭ | nindā॒dyo a॒smā-ndiphsā᳚cca॒ sarva॒-nta-mma̭sma॒sā kṷru || sagṃśi̭ta-mme॒ brahma॒ sagṃśi̭taṃ-vī~॒rya̭-mbala᳚m | sagṃśi̭ta-ṅkṣa॒tra-ñji॒ṣṇu yasyā॒-'hamasmi̭ pu॒rohi̭taḥ || udḙṣā-mbā॒hū a̭tira॒mudvarca॒ udū॒ bala᳚m | kṣi॒ṇomi॒ brahma̭ṇā॒-'mitrā॒nunna̭yāmi॒ [-'mitrā॒-nunna̭yāmi, svāgṃ a॒ham |] 40

svāgṃ a॒ham || dṛ॒śā॒no ru॒kma u॒rvyā vya̭dyauddu॒rmarṣa॒māyuḥ̭ śri॒ye rṷcā॒naḥ | a॒gnira॒mṛto̭ abhava॒dvayo̭-bhi॒ryadḙna॒-ndyauraja̭naya-thsu॒retāḥ᳚ || viśvā̭ rū॒pāṇi॒ prati̭ muñcate ka॒viḥ prā-'sā̭vīdbha॒dra-ndvi॒pade॒ catṷṣpade | vi nāka̭makhya-thsavi॒tā vare॒ṇyo-'nṷ pra॒yāṇa̭mu॒ṣaso॒ vi̭rājati || nakto॒ṣāsā॒ sama̭nasā॒ virṷ̄pe dhā॒payḙte॒ śiśu॒mekagṃ̭ samī॒cī | dyāvā॒ kṣāmā̭ ru॒kmo [ru॒kmaḥ, a॒ntarvi bhā̭ti] 41

a॒ntarvi bhā̭ti de॒vā a॒gni-ndhā̭raya-ndraviṇo॒dāḥ || su॒pa॒rṇo̭-'si ga॒rutmā᳚-ntri॒vṛtte॒ śiro̭ gāya॒tra-ñcakṣu॒-sstoma̭ ā॒tmā sāma̭ te ta॒nūrvā̭made॒vya-mbṛ̭ha-drathanta॒re pa॒kṣau ya̭jñāya॒jñiya॒-mpuccha॒-ñchandā॒g॒syaṅgā̭ni॒ dhiṣṇi̭yā-śśa॒phā yajūgṃ̭ṣi॒ nāma̭ || su॒pa॒rṇo̭-'si ga॒rutmā॒-ndiva̭-ṅgaccha॒ suvaḥ̭ pata || 42 ||

(nābhā॒ - vane॒ ye - na̭yāmi॒ - kṣāmā̭ ru॒kmo᳚ - 'ṣṭātrigṃ̭śacca) (a. 10)

agne॒ yaṃ-ya~॒jñama̭ddhva॒raṃ-vi~॒śvataḥ̭ pari॒bhūrasi̭ | sa idde॒veṣṷ gacchati || soma॒ yāstḙ mayo॒bhuva̭ ū॒taya॒-ssanti̭ dā॒śuṣe᳚ | tābhi̭rno-'vi॒tā bha̭va || a॒gnirmū॒rdhā bhuvaḥ̭ || tvannaḥ̭ soma॒ , yā te॒ dhāmā̭ni || ta-thsa̭vi॒turvare᳚ṇya॒-mbhargo̭ de॒vasya̭ dhīmahi | dhiyo॒ yo naḥ̭ praco॒dayā᳚t || aci̭ttī॒ yacca̭kṛ॒mā daivye॒ janḙ dī॒nairdakṣaiḥ॒ prabhṷ̄tī pūruṣa॒tvatā᳚ | 43

de॒veṣṷ ca savita॒rmānṷṣeṣu ca॒ tvanno॒ atra̭ suvatā॒danā̭gasaḥ || co॒da॒yi॒trī sū॒nṛtā̭nā॒-ñceta̭ntī sumatī॒nām | ya॒jña-nda̭dhe॒ sara̭svatī || pāvī̭ravī ka॒nyā̭ ci॒trāyu॒-ssara̭svatī vī॒rapa̭tnī॒ dhiya̭-ndhāt | gnābhi॒racchi̭dragṃ śara॒ṇagṃ sa॒joṣā̭ durā॒dharṣa̭-ṅgṛṇa॒te śarma̭ yagṃsat || pū॒ṣā gā anvḙtu naḥ pū॒ṣā ra̭kṣa॒tvarva̭taḥ | pū॒ṣā vājagṃ̭ sanotu naḥ || śu॒kra-ntḙ a॒nyadya̭ja॒ta-ntḙ a॒nya- [a॒nyat, viṣṷrūpe॒ aha̭nī॒ dyauri̭vāsi |] 44

-dviṣṷrūpe॒ aha̭nī॒ dyauri̭vāsi | viśvā॒ hi mā॒yā ava̭si svadhāvo bha॒drā tḙ pūṣanni॒ha rā॒tira̭stu || tḙ-'vardhanta॒ svata̭vaso mahitva॒nā ''nāka̭-nta॒sthuru॒ru ca̭krire॒ sadaḥ̭ | viṣṇu॒ ryaddhā-''va॒-dvṛṣa̭ṇa-mmada॒cyutaṃ॒-va~yo॒ na sī̭da॒nnadhi̭ ba॒r॒hiṣi̭ pri॒ye || praci॒trama॒rka-ṅgṛ̭ṇa॒te tu॒rāya॒ mārṷtāya॒ svata̭vase bharaddhvam | ye sahāgṃ̭si॒ saha̭sā॒ saha̭nte॒ [saha̭nte, reja̭te agne pṛthi॒vī ma॒khebhyaḥ̭ |] 45

reja̭te agne pṛthi॒vī ma॒khebhyaḥ̭ || viśvḙ de॒vā viśvḙ devāḥ || dyāvā̭ naḥ pṛthi॒vī i॒magṃ si॒ddhrama॒dya di̭vi॒spṛśa᳚m | ya॒jña-nde॒veṣu॒ yacchatām || pra pū᳚rva॒je pi॒tarā॒ navya̭sībhirgī॒rbhiḥ kṛ̭ṇuddhva॒gṃ॒ sada̭ne ṛ॒tasya̭ | ā no᳚ dyāvāpṛthivī॒ daivyḙna॒ janḙna yāta॒-mmahi̭ vāṃ॒-va~rṷ̄tham || a॒gnigg stomḙna bodhaya samidhā॒no ama̭rtyam | ha॒vyā de॒veṣṷ no dadhat || sa ha̭vya॒vāḍama̭rtya u॒śigdū॒taścano̭hitaḥ | a॒gnirdhi॒yā samṛ̭ṇvati || śanno̭ bhavantu॒, vājḙvāje || 46 ||

(pu॒ru॒ṣa॒tvatā̭ - yaja॒tantḙ a॒nyath - saha̭nte॒ - cano̭hito॒ - 'ṣṭau ca̭ ) (a. 11)

(yu॒ñjā॒na - i॒māma̭gṛbhṇan - de॒vasya॒ - sante॒ - vi pāja̭sā॒ - vasa̭vastvā॒ - samā᳚stvo॒ - rdhvā - a॒syākṷ̄tiṃ॒ - ~yada̭gne॒ yān - yagne॒ yaṃ-ya~॒jña - mekā̭daśa)

(yu॒ñjā॒no - varma̭ ca stha - ādi॒tyastvā॒ - bhāra̭tī॒ - svāgṃ a॒hagṃ - ṣaṭca̭tvārigṃśat )

(yu॒ñjā॒no, vājḙvāje)

|| hariḥ̭ om ||

|| kṛṣṇa yajurvedīya taittirīya saṃhitāyā-ñcaturtha kāṇḍe prathamaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-ञ्चतुर्थकाण्डे प्रथमः प्रश्नः- अग्निचित्यङ्ग मन्त्रपाठाभिधानं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

यु॒ञ्जा॒नः प्र॑थ॒म-म्मन॑स्त॒त्वाय॑ सवि॒ता धियः॑ । अ॒ग्नि-ञ्ज्योति॑र्नि॒चाय्य॑ पृथि॒व्या अद्ध्या ऽभ॑रत् ॥ यु॒क्त्वाय॒ मन॑सा दे॒वान्-थ्सुव॑र्य॒तो धि॒या दिव᳚म् । बृ॒हज्ज्योतिः॑ करिष्य॒त-स्स॑वि॒ता प्रसु॑वाति॒ तान् ॥ यु॒क्तेन॒ मन॑सा व॒य-न्दे॒वस्य॑ सवि॒तु-स्स॒वे । सु॒व॒र्गेया॑य॒ शक्त्यै᳚ ॥ यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुना॒ विदेक॒ इ- [वयुना॒ विदेक॒ इत्, म॒ही दे॒वस्य॑] 1

-न्म॒ही दे॒वस्य॑ सवि॒तुः परि॑ष्टुतिः ॥ यु॒जे वा॒-म्ब्रह्म॑ पू॒र्व्य-न्नमो॑भि॒र्वि श्लोका॑ यन्ति प॒थ्ये॑व॒ सूराः᳚ । शृ॒ण्वन्ति॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः ॥ यस्य॑ प्र॒याण॒मन्व॒न्य इद्य॒युर्दे॒वा दे॒वस्य॑ महि॒मान॒मर्च॑तः । यः पार्थि॑वानि विम॒मे स एत॑शो॒ रजाग्ं॑सि दे॒व-स्स॑वि॒ता म॑हित्व॒ना ॥ देव॑ सवितः॒ प्रसु॑व य॒ज्ञ-म्प्रस॑व [ ] 2

य॒ज्ञप॑ति॒-म्भगा॑य दि॒व्यो ग॑न्ध॒र्वः । के॒त॒पूः केत॑न्नः पुनातु वा॒चस्पति॒र्वाच॑म॒द्य स्व॑दाति नः ॥ इ॒म-न्नो॑ देव सवितर्य॒ज्ञ-म्प्रसु॑व देवा॒युवग्ं॑ सखि॒विदग्ं॑ सत्रा॒जित॑-न्धन॒जितग्ं॑ सुव॒र्जित᳚म् ॥ ऋ॒चा स्तोम॒ग्ं॒ सम॑र्धय गाय॒त्रेण॑ रथन्त॒रम् । बृ॒ह-द्गा॑य॒त्रव॑र्तनि ॥ दे॒वस्य॑ त्वा सवि॒तुः प्र॑स॒वे᳚ ऽश्विनो᳚र्बा॒हुभ्या᳚-म्पू॒ष्णो हस्ता᳚भ्या-ङ्गाय॒त्रेण॒ छन्द॒सा ऽऽद॑दे-ऽङ्गिर॒स्वदभ्रि॑रसि॒ नारि॑- [नारिः॑, अ॒सि॒ पृ॒थि॒व्या-स्स॒धस्था॑-] 3

-रसि पृथि॒व्या-स्स॒धस्था॑-द॒ग्नि-म्पु॑री॒ष्य॑मङ्गिर॒स्वदा भ॑र॒ त्रैष्टु॑भेन त्वा॒ छन्द॒सा ऽऽद॑दे-ऽङ्गिर॒स्व-द्बभ्रि॑रसि॒ नारि॑रसि॒ त्वया॑ व॒यग्ं स॒धस्थ॒ आग्निग्ं श॑केम॒ खनि॑तु-म्पुरी॒ष्य॑-ञ्जाग॑तेन त्वा॒ छन्द॒सा ऽऽद॑दे-ऽङ्गिर॒स्वद्धस्त॑ आ॒धाय॑ सवि॒ता बिभ्र॒दभ्रिग्ं॑ हिर॒ण्ययी᳚म् । तया॒ ज्योति॒रज॑स्र॒-मिद॒ग्नि-ङ्खा॒त्वी न॒ आ भ॒रानु॑ष्टुभेन त्वा॒ छन्द॒सा ऽऽद॑दे-ऽङ्गिर॒स्वत् ॥ 4 ॥

(इ--द्य॒ज्ञ-म्प्रसु॑व॒ - नारि॒ - रानु॑ष्टुभेन त्वा॒ छन्द॑सा॒ - त्रीणि॑ च) (अ. 1)

इ॒माम॑गृभ्ण-न्रश॒नामृ॒तस्य॒ पूर्व॒ आयु॑षि वि॒दथे॑षु क॒व्या । तया॑ दे॒वा-स्सु॒तमा ब॑भूवुर्-ऋ॒तस्य॒ साम᳚न्-थ्स॒रमा॒रप॑न्ती ॥ प्रतू᳚र्तं-वाँजि॒न्ना द्र॑व॒ वरि॑ष्ठा॒मनु॑ सं॒वँत᳚म् । दि॒वि ते॒ जन्म॑ पर॒मम॒न्तरि॑क्षे॒ नाभिः॑ पृथि॒व्यामधि॒ योनिः॑ ॥ यु॒ञ्जाथा॒ग्ं॒ रास॑भं-युँ॒वम॒स्मिन्. यामे॑ वृषण्वसू । अ॒ग्नि-म्भर॑न्तमस्म॒युम् ॥ योगे॑योगे त॒वस्त॑रं॒-वाँजे॑वाजे हवामहे । सखा॑य॒ इन्द्र॑म॒तये᳚ ॥ प्र॒तूर्व॒- [प्र॒तूर्वन्न्॑, एह्य॑व॒क्राम॒न्नश॑स्ती] 5

-न्नेह्य॑व॒क्राम॒न्नश॑स्ती रु॒द्रस्य॒ गाण॑पत्या-न्मयो॒भूरेहि॑ । उ॒र्व॑न्तरि॑क्ष॒मन्वि॑हि स्व॒स्ति ग॑व्यूति॒रभ॑यानि कृ॒ण्वन्न् ॥ पू॒ष्णा स॒युजा॑ स॒ह । पृ॒थि॒व्या-स्स॒धस्था॑द॒ग्नि-म्पु॑रि॒ष्य॑-मङ्गिर॒स्व-दच्छे᳚ह्य॒ग्नि-म्पु॑री॒ष्य॑ -मङ्गिर॒स्वद-च्छे॑मो॒-ऽग्नि-म्पु॑री॒ष्य॑-मङ्गिर॒स्व-द्भ॑रिष्यामो॒-ऽग्नि-म्पु॑री॒ष्य॑-मङ्गिर॒स्व-द्भ॑रामः ॥ अन्व॒ग्निरु॒षसा॒-मग्र॑मख्य॒-दन्वहा॑नि प्रथ॒मो जा॒तवे॑दाः । अनु॒ सूर्य॑स्य [सूर्य॑स्य, पु॒रु॒त्रा च॑] 6

पुरु॒त्रा च॑ र॒श्मीननु॒ द्यावा॑पृथि॒वी आ त॑तान ॥ आ॒गत्य॑ वा॒ज्यद्ध्व॑न॒-स्सर्वा॒ मृधो॒ विधू॑नुते । अ॒ग्निग्ं स॒धस्थे॑ मह॒ति चक्षु॑षा॒ नि चि॑कीषते ॥ आ॒क्रम्य॑ वाजि-न्पृथि॒वीम॒ग्निमि॑च्छ रु॒चा त्वम् । भूम्या॑ वृ॒त्वाय॑ नो ब्रूहि॒ यतः॒ खना॑म॒ तं-वँ॒यम् ॥ द्यौस्ते॑ पृ॒ष्ठ-म्पृ॑थि॒वी स॒धस्थ॑मा॒त्मा ऽन्तरि॑क्षग्ं समु॒द्रस्ते॒ योनिः॑ । वि॒ख्याय॒ चक्षु॑षा॒ त्वम॒भि ति॑ष्ठ [त्वम॒भि ति॑ष्ठ, पृ॒त॒न्य॒तः ।] 7

पृतन्य॒तः ॥ उत्क्रा॑म मह॒ते सौभ॑गाया॒-स्मादा॒स्थाना᳚-द्द्रविणो॒दा वा॑जिन्न् । व॒यग्ग् स्या॑म सुम॒तौ पृ॑थि॒व्या अ॒ग्नि-ङ्ख॑नि॒ष्यन्त॑ उ॒पस्थे॑ अस्याः ॥ उद॑क्रमी-द्द्रविणो॒दा वा॒ज्यर्वा-ऽक॒-स्स लो॒कग्ं सुकृ॑त-म्पृथि॒व्याः । ततः॑ खनेम सु॒प्रती॑कम॒ग्निग्ं सुवो॒ रुहा॑णा॒ अधि॒ नाक॑ उत्त॒मे ॥ अ॒पो दे॒वीरुप॑ सृज॒ मधु॑मतीरय॒क्ष्माय॑ प्र॒जाभ्यः॑ । तासा॒ग्॒ स्थाना॒दुज्जि॑हता॒-मोष॑धय-स्सुपिप्प॒लाः ॥ जिघ॑- [जिघ॑र्मि, अ॒ग्नि-म्मन॑सा] 8

-र्म्य॒ग्नि-म्मन॑सा घृ॒तेन॑ प्रति॒क्ष्यन्त॒-म्भुव॑नानि॒ विश्वा᳚ । पृ॒थु-न्ति॑र॒श्चा वय॑सा बृ॒हन्तं॒-व्यँचि॑ष्ठ॒मन्नग्ं॑ रभ॒सं-विँदा॑नम् ॥ आ त्वा॑ जिघर्मि॒ वच॑सा घृ॒तेना॑-ऽर॒क्षसा॒ मन॑सा॒ तज्जु॑षस्व । मर्य॑श्री-स्स्पृह॒य-द्व॑र्णो अ॒ग्निर्ना-ऽभि॒मृशे॑ त॒नुवा॒ जर्हृ॑षाणः ॥ परि॒ वाज॑पतिः क॒विर॒ग्निर्-ह॒व्यान्य॑क्रमीत् । दध॒-द्रत्ना॑नि दा॒शुषे᳚ ॥ परि॑ त्वा-ऽग्ने॒ पुरं॑-वँ॒यं-विँप्रग्ं॑ सहस्य धीमहि । धृ॒ष-द्व॑र्ण-न्दि॒वेदि॑वे भे॒त्तार॑-म्भङ्गु॒राव॑तः ॥ त्वम॑ग्ने॒ द्युभि॒स्त्व-मा॑शुशु॒क्षणि॒स्त्व-म॒द्भ्यस्त्व-मश्म॑न॒स्परि॑ । त्वं-वँने᳚भ्य॒ स्त्वमोष॑धीभ्य॒ स्त्व-न्नृ॒णा-न्नृ॑पते जायसे॒ शुचिः॑ ॥ 9 ॥

(प्र॒तूर्व॒न्थ् - सूर्य॑स्य - तिष्ठ॒ - जिघ॑र्मि - भे॒त्तारं॑ - ँविग्ंश॒तिश्च॑) (अ. 2)

दे॒वस्य॑ त्वा सवि॒तुः प्र॑स॒वे᳚-ऽश्विनो᳚ र्बा॒हुभ्या᳚-म्पू॒ष्णो हस्ता᳚भ्या-म्पृथि॒व्या-स्स॒धस्थे॒-ऽग्नि-म्पु॑री॒ष्य॑-मङ्गिर॒स्व-त्ख॑नामि ॥ ज्योति॑ष्मन्त-न्त्वा-ऽग्ने सु॒प्रती॑क॒मज॑स्रेण भा॒नुना॒ दीद्या॑नम् । शि॒व-म्प्र॒जाभ्यो-ऽहिग्ं॑ सन्त-म्पृथि॒व्या-स्स॒धस्थे॒-ऽग्नि-म्पु॑री॒ष्य॑ -मङ्गिर॒स्व-त्ख॑नामि ॥ अ॒पा-म्पृ॒ष्ठम॑सि स॒प्रथा॑ उ॒र्व॑ग्नि-म्भ॑रि॒ष्यदप॑रावपिष्ठम् । वर्ध॑मान-म्म॒ह आ च॒ पुष्क॑र-न्दि॒वो मात्र॑या वरि॒णा प्र॑थस्व ॥ शर्म॑ च स्थो॒ [शर्म॑ च स्थः, वर्म॑ च] 10

वर्म॑ च स्थो॒ अच्छि॑द्रे बहु॒ले उ॒भे । व्यच॑स्वती॒ सं-वँ॑साथा-म्भ॒र्तम॒ग्नि-म्पु॑री॒ष्य᳚म् ॥ संवँ॑साथाग्ं सुव॒र्विदा॑ स॒मीची॒ उर॑सा॒ त्मना᳚ । अ॒ग्निम॒न्त र्भ॑रि॒ष्यन्ती॒ ज्योति॑ष्मन्त॒ मज॑स्र॒मित् ॥ पु॒री॒ष्यो॑-ऽसि वि॒श्वभ॑राः । अथ॑र्वा त्वा प्रथ॒मो निर॑मन्थदग्ने ॥ त्वाम॑ग्ने॒ पुष्क॑रा॒दद्ध्यथ॑र्वा॒ निर॑मन्थत । मू॒र्ध्नो विश्व॑स्य वा॒घतः॑ ॥ तमु॑ त्वा द॒द्ध्यङ्ङृषिः॑ पु॒त्र ई॑धे॒ [पु॒त्र ई॑धे, अथ॑र्वणः ।] 11

अथ॑र्वणः । वृ॒त्र॒हण॑-म्पुरन्द॒रम् ॥ तमु॑ त्वा पा॒थ्यो वृषा॒ समी॑धे दस्यु॒हन्त॑मम् । ध॒न॒ञ्ज॒यग्ं रणे॑रणे ॥ सीद॑ होत॒-स्स्व उ॑ लो॒के चि॑कि॒त्वान्-थ्सा॒दया॑ य॒ज्ञग्ं सु॑कृ॒तस्य॒ योनौ᳚ । दे॒वा॒वीर्दे॒वान्. ह॒विषा॑ यजा॒स्यग्ने॑ बृ॒ह-द्यज॑माने॒ वयो॑ धाः ॥ नि होता॑ होतृ॒षद॑ने॒ विदा॑नस्त्वे॒षो दी॑दि॒वाग्ं अ॑सद-थ्सु॒दक्षः॑ । अद॑ब्धव्रत प्रमति॒र्वसि॑ष्ठ-स्सहस्र-म्भ॒र-श्शुचि॑जिह्वो अ॒ग्निः ॥ सग्ं सी॑दस्व म॒हाग्ं अ॑सि॒ शोच॑स्व [शोच॑स्व, दे॒व॒वीत॑मः ।] 12

देव॒वीत॑मः । वि धू॒मम॑ग्ने अरु॒ष-म्मि॑येद्ध्य सृ॒ज प्र॑शस्त दर्श॒तम् ॥ जनि॑ष्वा॒ हि जेन्यो॒ अग्रे॒ अह्नाग्ं॑ हि॒तो हि॒तेष्व॑रु॒षो वने॑षु । दमे॑दमे स॒प्त रत्ना॒ दधा॑नो॒-ऽग्निर्होता॒ नि ष॑सादा॒ यजी॑यान् ॥ 13 ॥

(स्थ॒ - ई॒धे॒ - शोच॑स्व - स॒प्तविग्ं॑शतिश्च) - (अ. 3)

स-न्ते॑ वा॒युर्मा॑त॒रिश्वा॑ दधातूत्ता॒नायै॒ हृद॑यं॒-यँद्विलि॑ष्टम् । दे॒वानां॒-यँश्चर॑ति प्रा॒णथे॑न॒ तस्मै॑ च देवि॒ वष॑डस्तु॒ तुभ्य᳚म् ॥ सुजा॑तो॒ ज्योति॑षा स॒ह शर्म॒ वरू॑थ॒मा-ऽस॑द॒-स्सुवः॑ । वासो॑ अग्ने वि॒श्वरू॑प॒ग्ं॒ संव्यँ॑यस्व विभावसो ॥ उदु॑ तिष्ठ स्वद्ध्व॒रावा॑ नो दे॒व्या कृ॒पा । दृ॒शे च॑ भा॒सा बृ॑ह॒ता सु॑शु॒क्वनि॒रा-ऽग्ने॑ याहि सुश॒स्तिभिः॑ ॥ 14 ॥

ऊ॒र्ध्व ऊ॒ षु ण॑ ऊ॒तये॒ तिष्ठा॑ दे॒वो न स॑वि॒ता । ऊ॒र्ध्वो वाज॑स्य॒ सनि॑ता॒ यद॒ञ्जिभि॑-र्वा॒घद्भि॑-र्वि॒ह्वया॑महे ॥ स जा॒तो गर्भो॑ असि॒ रोद॑स्यो॒रग्ने॒ चारु॒र्विभृ॑त॒ ओष॑धीषु । चि॒त्र-श्शिशुः॒ परि॒ तमाग्॑स्य॒क्तः प्र मा॒तृभ्यो॒ अधि॒ कनि॑क्रदद्गाः ॥ स्थि॒रो भ॑व वी॒ड्व॑ङ्ग आ॒शुर्भ॑व वा॒ज्य॑र्वन्न् । पृ॒थुर्भ॑व सु॒षद॒स्त्वम॒ग्नेः पु॑रीष॒वाह॑नः ॥ शि॒वो भ॑व [ ] 15

प्र॒जाभ्यो॒ मानु॑षीभ्य॒स्त्वम॑ङ्गिरः । मा द्यावा॑पृथि॒वी अ॒भि शू॑शुचो॒ मा-ऽन्तरि॑क्ष॒-म्मा वन॒स्पतीन्॑ ॥ प्रैतु॑ वा॒जी कनि॑क्रद॒-न्नान॑द॒-द्रास॑भः॒ पत्वा᳚ । भर॑न्न॒ग्नि-म्पु॑री॒ष्य॑-म्मा पा॒द्यायु॑षः पु॒रा ॥ रास॑भो वा॒-ङ्कनि॑क्रद॒-थ्सुयु॑क्तो वृषणा॒ रथे᳚ । स वा॑म॒ग्नि-म्पु॑री॒ष्य॑मा॒शुर्दू॒तो व॑हादि॒तः ॥ वृषा॒-ऽग्निं-वृँष॑ण॒-म्भर॑न्न॒पा-ङ्गर्भग्ं॑ समु॒द्रिय᳚म् । अग्न॒ आ या॑हि [ ] 16

वी॒तय॑ ऋ॒तग्ं स॒त्यम् ॥ ओष॑धयः॒ प्रति॑ गृह्णीता॒-ऽग्निमे॒तग्ं शि॒वमा॒यन्त॑म॒भ्यत्र॑ यु॒ष्मान् । व्यस्य॒न् विश्वा॒ अम॑ती॒ररा॑ती-र्नि॒षीद॑न्नो॒ अप॑ दुर्म॒तिग्ं ह॑नत् ॥ ओष॑धयः॒ प्रति॑ मोदद्ध्वमेन॒-म्पुष्पा॑वती-स्सुपिप्प॒लाः । अ॒यं-वोँ॒ गर्भ॑ ऋ॒त्वियः॑ प्र॒त्नग्ं स॒धस्थ॒मा ऽस॑दत् ॥ 17 ॥

(सु॒श॒स्तिभिः॑ - शि॒वो भ॑व - याहि॒ - षट्त्रिग्ं॑शच्च) (अ. 4)

वि पाज॑सा पृ॒थुना॒ शोशु॑चानो॒ बाध॑स्व द्वि॒षो र॒क्षसो॒ अमी॑वाः । सु॒शर्म॑णो बृह॒त-श्शर्म॑णि स्याम॒ग्नेर॒हग्ं सु॒हव॑स्य॒ प्रणी॑तौ ॥ आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ॥ यो वः॑ शि॒वत॑मो॒ रस॒स्तस्य॑ भाजयते॒ह नः॑ । उ॒श॒तीरि॑व मा॒तरः॑ ॥ तस्मा॒ अर॑-ङ्गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ॥ मि॒त्र- [मि॒त्रः, स॒ग्ं॒सृज्य॑] 18

-स्स॒ग्ं॒सृज्य॑ पृथि॒वी-म्भूमि॑-ञ्च॒ ज्योति॑षा स॒ह । सुजा॑त-ञ्जा॒तवे॑दसम॒ग्निं-वैँ᳚श्वान॒रं-विँ॒भुम् ॥ अ॒य॒क्ष्माय॑ त्वा॒ सग्ं सृ॑जामि प्र॒जाभ्यः॑ । विश्वे᳚ त्वा दे॒वा वै᳚श्वान॒रा-स्सग्ं सृ॑ज॒न्त्वा-नु॑ष्टुभेन॒ छन्द॑सा-ऽङ्गिर॒स्वत् ॥ रु॒द्रा-स्स॒भृन्त्य॑ पृथि॒वी-म्बृ॒हज्ज्योति॒-स्समी॑धिरे । तेषा᳚-म्भा॒नुरज॑स्र॒ इच्छु॒क्रो दे॒वेषु॑ रोचते ॥ सग्ं सृ॑ष्टां॒-वँसु॑भी रु॒द्रैर्धीरैः᳚ कर्म॒ण्या᳚-म्मृद᳚म् । हस्ता᳚भ्या-म्मृ॒द्वी-ङ्कृ॒त्वा सि॑नीवा॒ली क॑रोतु॒ [सि॑नीवा॒ली क॑रोतु, ताम् ।] 19

ताम् ॥ सि॒नी॒वा॒ली सु॑कप॒र्दा सु॑कुरी॒रा स्वौ॑प॒शा । सा तुभ्य॑मदिते मह॒ ओखा-न्द॑धातु॒ हस्त॑योः ॥ उ॒खा-ङ्क॑रोतु॒ शक्त्या॑ बा॒हुभ्या॒-मदि॑तिर्धि॒या । मा॒ता पु॒त्रं-यँथो॒पस्थे॒ सा-ऽग्नि-म्बि॑भर्तु॒ गर्भ॒ आ ॥ म॒खस्य॒ शिरो॑-ऽसि य॒ज्ञस्य॑ प॒दे स्थः॑ । वस॑वस्त्वा कृण्वन्तु गाय॒त्रेण॒ छन्द॑सा ऽङ्गिर॒स्व-त्पृ॑थि॒व्य॑सि रु॒द्रास्त्वा॑ कृण्वन्तु॒ त्रैष्टु॑भेन॒ छन्द॑सा ऽङ्गिर॒स्वद॒न्तरि॑क्षम- [-ऽङ्गिर॒स्वद॒न्तरि॑क्षमसि, आ॒दि॒त्यास्त्वा॑] 20

-स्यादि॒त्यास्त्वा॑ कृण्वन्तु॒ जाग॑तेन॒ छन्द॑सा-ऽङ्गिर॒स्व-द्द्यौर॑सि॒ विश्वे᳚ त्वा दे॒वा वै᳚श्वान॒राः कृ॑ण्व॒न्त्वानु॑ष्टुभेन॒ छन्द॑सा-ऽङ्गिर॒स्व-द्दिशो॑-ऽसि ध्रु॒वा-ऽसि॑ धा॒रया॒ मयि॑ प्र॒जाग्ं रा॒यस्पोष॑-ङ्गौप॒त्यग्ं सु॒वीर्यग्ं॑ सजा॒तान्. यज॑माना॒या-ऽदि॑त्यै॒ रास्ना॒-ऽस्य दि॑तिस्ते॒ बिल॑-ङ्गृह्णातु॒ पाङ्क्ते॑न॒ छन्द॑सा ऽङ्गिर॒स्वत् ॥ कृ॒त्वाय॒ सा म॒हीमु॒खा-म्मृ॒न्मयीं॒-योँनि॑म॒ग्नये᳚ । ता-म्पु॒त्रेभ्य॒-स्स-म्प्रा य॑च्छ॒ददि॑ति-श्श्र॒पया॒निति॑ ॥ 21 ॥

(मि॒त्रः - क॑रो - त्व॒न्तरि॑क्षमसि॒ - प्र - च॒त्वारि॑ च) (अ. 5)

वस॑वस्त्वा धूपयन्तु गाय॒त्रेण॒ छन्द॑सा-ऽङ्गिर॒स्व-द्रु॒द्रास्त्वा॑ धूपयन्तु॒ त्रैष्टु॑भेन॒ छन्द॑सा-ऽङ्गिर॒स्व-दा॑दि॒त्यास्त्वा॑ धूपयन्तु॒ जाग॑तेन॒ छन्द॑सा-ऽङ्गिर॒स्वद्- विश्वे᳚ त्वा दे॒वा वै᳚श्वान॒रा धू॑पय॒न्त्वानु॑ष्टुभेन॒ छन्द॑सा-ऽङ्गिर॒स्व-दिन्द्र॑स्त्वा धूपयत्वङ्गिर॒स्व--द्विष्णु॑स्त्वा धूपयत्वङ्गिर॒स्व-द्वरु॑णस्त्वा धूपयत्वङ्गिर॒स्व-ददि॑तिस्त्वा दे॒वी वि॒श्वदे᳚व्यावती पृथि॒व्या-स्स॒धस्थे᳚-ऽङ्गिर॒स्व-त्ख॑नत्ववट दे॒वाना᳚-न्त्वा॒ पत्नी᳚- [पत्नीः᳚, दे॒वी-र्वि॒श्वदे᳚व्यावतीः] 22

-र्दे॒वी-र्वि॒श्वदे᳚व्यावतीः पृथि॒व्या-स्स॒धस्थे᳚-ऽङ्गिर॒स्व-द्द॑धतूखे धि॒षणा᳚स्त्वा दे॒वीर्वि॒श्वदे᳚व्यावतीः पृथि॒व्या-स्स॒धस्थे᳚-ऽङ्गिर॒स्व-द॒भीन्ध॑तामुखे॒ ग्नास्त्वा॑ दे॒वीर्वि॒श्वदे᳚व्यावतीः पृथि॒व्या-स्स॒धस्थे᳚-ऽङ्गिर॒स्व-च्छ्र॑पयन्तूखे॒ वरू᳚त्रयो॒ जन॑यस्त्वा दे॒वीर्वि॒श्वदे᳚व्यावतीः पृथि॒व्या-स्स॒धस्थे᳚-ऽङ्गिर॒स्व-त्प॑चन्तूखे । मित्रै॒तामु॒खा-म्प॑चै॒षा मा भे॑दि । ए॒ता-न्ते॒ परि॑ ददा॒म्यभि॑त्त्यै ॥ अ॒भीमा- [अ॒भीमाम्, म॒हि॒ना दिव॑-म्मि॒त्रो] 23

-म्म॑हि॒ना दिव॑-म्मि॒त्रो ब॑भूव स॒प्रथाः᳚ । उ॒त श्रव॑सा पृथि॒वीम् ॥ मि॒त्रस्य॑ चर्षणी॒धृत॒-श्श्रवो॑ दे॒वस्य॑ सान॒सिम् । द्यु॒म्न-ञ्चि॒त्रश्र॑वस्तमम् ॥ दे॒वस्त्वा॑ सवि॒तोद्व॑पतु सुपा॒णि-स्स्व॑ङ्गु॒रिः । सु॒बा॒हुरु॒त शक्त्या᳚ ॥ अप॑द्यमाना पृथि॒व्याशा॒ दिश॒ आ पृ॑ण । उत्ति॑ष्ठ बृह॒ती भ॑वो॒र्ध्वा ति॑ष्ठ ध्रु॒वा त्वम् ॥ वस॑व॒स्त्वा ऽऽच्छृ॑न्दन्तु गाय॒त्रेण॒ छन्द॑सा-ऽङ्गिर॒स्व-द्रु॒द्रास्त्वा-ऽऽ च्छृ॑न्दन्तु॒ त्रैष्टु॑भेन॒ छन्द॑सा-ऽङ्गिर॒स्व-दा॑दि॒त्यास्त्वा ऽऽच्छृ॑न्दन्तु॒ जाग॑तेन॒ छन्द॑सा-ऽङ्गिर॒स्व-द्विश्वे᳚ त्वा दे॒वा वै᳚श्वान॒रा आ च्छृ॑न्द॒न्त्वानु॑ष्टुभेन॒ छन्द॑सा-ऽङ्गिर॒स्वत् ॥ 24 ॥

(पत्नी॑ - रि॒माग्ं - रु॒द्रास्त्वा-ऽऽ च्छृ॑न्द॒न्त्वे - का॒न्न विग्ं॑श॒तिश्च॑) (अ. 6)

समा᳚स्त्वा-ऽग्न ऋ॒तवो॑ वर्धयन्तु संवँथ्स॒रा ऋष॑यो॒ यानि॑ स॒त्या । स-न्दि॒व्येन॑ दीदिहि रोच॒नेन॒ विश्वा॒ आ भा॑हि प्र॒दिशः॑ पृथि॒व्याः ॥ स-ञ्चे॒द्ध्यस्वा᳚-ऽग्ने॒ प्र च॑ बोधयैन॒मुच्च॑ तिष्ठ मह॒ते सौभ॑गाय । मा च॑ रिषदुपस॒त्ता ते॑ अग्ने ब्र॒ह्माण॑स्ते य॒शसः॑ सन्तु॒ मा-ऽन्ये ॥ त्वाम॑ग्ने वृणते ब्राह्म॒णा इ॒मे शि॒वो अ॑ग्ने [ ] 25

सं॒-वँर॑णे भवा नः । स॒प॒त्न॒हा नो॑ अभिमाति॒जिच्च॒ स्वे गये॑ जागृ॒ह्य प्र॑युच्छन्न् ॥ इ॒हैवाग्ने॒ अधि॑ धारया र॒यि-म्मा त्वा॒ निक्र॑-न्पूर्व॒चितो॑ निका॒रिणः॑ । क्ष॒त्रम॑ग्ने सु॒यम॑मस्तु॒ तुभ्य॑मुपस॒त्ता व॑र्धता-न्ते॒ अनि॑ष्टृतः ॥ क्ष॒त्रेणा᳚-ऽग्ने॒ स्वायु॒-स्सग्ं र॑भस्व मि॒त्रेणा᳚-ऽग्ने मित्र॒धेये॑ यतस्व । स॒जा॒ताना᳚-म्मद्ध्यम॒स्था ए॑धि॒ राज्ञा॑मग्ने विह॒व्यो॑ दीदिही॒ह ॥ अति॒ [अति॑, निहो॒ अति॒ स्रिधो] 26

निहो॒ अति॒ स्रिधो ऽत्यचि॑त्ति॒-मत्यरा॑तिमग्ने । विश्वा॒ ह्य॑ग्ने दुरि॒ता सह॒स्वाथा॒स्मभ्यग्ं॑ स॒हवी॑राग्ं र॒यिन्दाः᳚ ॥ अ॒ना॒धृ॒ष्यो जा॒तव॑दा॒ अनि॑ष्टृतो वि॒राड॑ग्ने क्षत्र॒भृ-द्दी॑दिही॒ह । विश्वा॒ आशाः᳚ प्रमु॒ञ्च-न्मानु॑षीर्भि॒य-श्शि॒वाभि॑र॒द्य परि॑ पाहि नो वृ॒धे ॥ बृह॑स्पते सवितर्बो॒धयै॑न॒ग्ं॒ सग्ंशि॑त-ञ्चिथ्स-न्त॒राग्ं सग्ं शि॑शाधि । व॒र्धयै॑न-म्मह॒ते सौभ॑गाय॒ [सौभ॑गाय, विश्व॑ एन॒मनु॑ मदन्तु दे॒वाः ।] 27

विश्व॑ एन॒मनु॑ मदन्तु दे॒वाः ॥ अ॒मु॒त्र॒भूया॒दध॒ यद्य॒मस्य॒ बृह॑स्पते अ॒भिश॑स्ते॒र मु॑ञ्चः । प्रत्यौ॑हता-म॒श्विना॑ मृ॒त्युम॑स्मा-द्दे॒वाना॑-मग्ने भि॒षजा॒ शची॑भिः ॥ उद्व॒य-न्तम॑स॒स्परि॒ पश्य॑न्तो॒ ज्योति॒रुत्त॑रम् । दे॒व-न्दे॑व॒त्रा सूर्य॒मग॑न्म॒ ज्योति॑रुत्त॒मम् ॥ 28 ॥

(इ॒मे शि॒वो अ॒ग्ने - ऽति॒ - सौभ॑गाय॒ - चतु॑स्त्रिग्ंशच्च) (अ. 7)

ऊ॒र्ध्वा अ॑स्य स॒मिधो॑ भवन्त्यू॒र्ध्वा शु॒क्रा शो॒चीग्ष्य॒ग्नेः । द्यु॒मत्त॑मा सु॒प्रती॑कस्य सू॒नोः ॥ तनू॒नपा॒दसु॑रो वि॒श्ववे॑दा दे॒वो दे॒वेषु॑ दे॒वः । प॒थ आ-ऽन॑क्ति॒ मद्ध्वा॑ घृ॒तेन॑ ॥ मद्ध्वा॑ य॒ज्ञ-न्न॑क्षसे प्रीणा॒नो नरा॒शग्ंसो॑ अग्ने । सु॒कृद्दे॒व-स्स॑वि॒ता वि॒श्ववा॑रः ॥ अच्छा॒यमे॑ति॒ शव॑सा घृ॒तेने॑डा॒नो वह्नि॒र्नम॑सा । अ॒ग्निग्ग् स्रुचो॑ अद्ध्व॒रेषु॑ प्र॒यथ्सु॑ ॥ स य॑क्षदस्य महि॒मान॑म॒ग्ने-स्स [महि॒मान॑म॒ग्ने-स्सः, ई॒ म॒न्द्रासु॑ प्र॒यसः॑ ।] 29

ई॑ म॒न्द्रासु॑ प्र॒यसः॑ । वसु॒श्चेति॑ष्ठो वसु॒धात॑मश्च ॥ द्वारो॑ दे॒वीरन्व॑स्य॒ विश्वे᳚ व्र॒ता द॑दन्ते अ॒ग्नेः । उ॒रु॒व्यच॑सो॒ धाम्ना॒ पत्य॑मानाः ॥ ते अ॑स्य॒ योष॑णे दि॒व्ये न योना॑वु॒षासा॒नक्ता᳚ । इ॒मं-यँ॒ज्ञम॑वता मद्ध्व॒र-न्नः॑ ॥ दैव्या॑ होतारावू॒र्ध्व-म॑द्ध्व॒र-न्नो॒-ऽग्नेर्जि॒ह्वाम॒भि गृ॑णीतम् । कृ॒णु॒त-न्न॒-स्स्वि॑ष्टिम् ॥ ति॒स्रो दे॒वीर्ब॒र्॒हिरेदग्ं स॑द॒न्त्विडा॒ सर॑स्वती॒ [सर॑स्वती, भार॑ती ।] 30

भार॑ती । म॒ही गृ॑णा॒ना ॥ तन्न॑स्तु॒रीप॒मद्भु॑त-म्पुरु॒क्षु त्वष्टा॑ सु॒वीर᳚म् । रा॒यस्पोषं॒-विँ ष्य॑तु॒ नाभि॑म॒स्मे ॥ वन॑स्प॒ते-ऽव॑ सृजा॒ ररा॑ण॒स्त्मना॑ दे॒वेषु॑ । अ॒ग्निर्ह॒व्यग्ं श॑मि॒ता सू॑दयाति ॥ अग्ने॒ स्वाहा॑ कृणुहि जातवेद॒ इन्द्रा॑य ह॒व्यम् । विश्वे॑ दे॒वा ह॒विरि॒द-ञ्जु॑षन्ताम् ॥ हि॒र॒ण्य॒ग॒र्भ-स्सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् । स दा॑धार पृथि॒वी-न्द्या- [पृथि॒वी-न्द्याम्, उ॒तेमा-ङ्कस्मै॑] 31

-मु॒तेमा-ङ्कस्मै॑ दे॒वाय॑ ह॒विषा॑ विधेम ॥ यः प्रा॑ण॒तो नि॑मिष॒तो म॑हि॒त्वैक॒ इद्राजा॒ जग॑तो ब॒भूव॑ । य ईशे॑ अ॒स्य द्वि॒पद॒श्चतु॑ष्पदः॒ कस्मै॑ दे॒वाय॑ ह॒विषा॑ विधेम ॥ य आ᳚त्म॒दा ब॑ल॒दा यस्य॒ विश्व॑ उ॒पास॑ते प्र॒शिषं॒-यँस्य॑ दे॒वाः । यस्य॑ छा॒या-ऽमृतं॒-यँस्य॑ मृ॒त्युः कस्मै॑ दे॒वाय॑ ह॒विषा॑ विधेम ॥ यस्ये॒मे हि॒मव॑न्तो महि॒त्वा यस्य॑ समु॒द्रग्ं र॒सया॑ स॒हा- [स॒ह, आ॒हुः ।] 32

-ऽऽहुः । यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ह॒विषा॑ विधेम ॥ य-ङ्क्रन्द॑सी॒ अव॑सा तस्तभा॒ने अ॒भ्यैक्षे॑ता॒-म्मन॑सा॒ रेज॑माने । यत्राधि॒ सूर॒ उदि॑तौ॒ व्येति॒ कस्मै॑ दे॒वाय॑ ह॒विषा॑ विधेम ॥ येन॒ द्यौरु॒ग्रा पृ॑थि॒वी च॑ दृ॒ढे येन॒ सु॒वः॑ स्तभि॒तं-येँन॒ नाकः॑ । यो अ॒न्तरि॑क्षे॒ रज॑सो वि॒मानQःकस्मै॑ दे॒वाय॑ ह॒विषा॑ विधेम ॥ आपो॑ ह॒ यन्म॑ह॒ती र्विश्व॒- [यन्म॑ह॒ती र्विश्व᳚म्, अय॒-न्दक्ष॒-न्दधा॑ना] 33

-माय॒-न्दक्ष॒-न्दधा॑ना ज॒नय॑न्तीर॒ग्निम् । ततो॑ दे॒वाना॒-न्निर॑वर्त॒तासु॒रेकः॒ कस्मै॑ दे॒वाय॑ ह॒विषा॑ विधेम ॥ यश्चि॒दापो॑ महि॒ना प॒र्यप॑श्य॒-द्दक्ष॒-न्दधा॑ना ज॒नय॑न्तीर॒ग्निम् । यो दे॒वेष्वधि॑ दे॒व एक॒ आसी॒-त्कस्मै॑ दे॒वाय॑ ह॒विषा॑ विधेम ॥ 34 ॥

(अ॒ग्ने-स्स - सर॑स्वती॒ - द्याग्ं - स॒ह - विश्वं॒ - चतु॑स्त्रिग्ंशच्च) (अ. 8)

(ऊ॒र्ध्वा - यः प्रा॑ण॒तो - य आ᳚त्म॒दा - यस्ये॒मे - यङ्क्रन्द॑सी॒ - येन॒ द्यौ- रापो॑ ह॒ यत् - ततो॑ दे॒वानां॒ - ँयश्चि॒दापो॒ - यो दे॒वेषु॒ - नव॑ )

आकू॑तिम॒ग्नि-म्प्र॒युज॒ग्ग्॒ स्वाहा॒ मनो॑ मे॒धाम॒ग्नि-म्प्र॒युज॒ग्ग्॒ स्वाहा॑ चि॒त्तं-विँज्ञा॑तम॒ग्नि-म्प्र॒युज॒ग्ग्॒ स्वाहा॑ वा॒चो विधृ॑तिम॒ग्नि-म्प्र॒युज॒ग्ग्॒ स्वाहा᳚ प्र॒जाप॑तये॒ मन॑वे॒ स्वाहा॒-ऽग्नये॑ वैश्वान॒राय॒ स्वाहा॒ विश्वे॑ दे॒वस्य॑ ने॒तुर्मर्तो॑ वृणीत स॒ख्यं-विँश्वे॑ रा॒य इ॑षुद्ध्यसि द्यु॒म्नं-वृँ॑णीत पु॒ष्यसे॒ स्वाहा॒ मा सु भि॑त्था॒ मा सु रि॑षो॒ दृग्ंह॑स्व वी॒डय॑स्व॒ सु । अम्ब॑ धृष्णु वी॒रय॑स्वा॒- [वी॒रय॑स्व, अ॒ग्निश्चे॒द-ङ्क॑रिष्यथः ।] 35

-ऽग्निश्चे॒द-ङ्क॑रिष्यथः ॥ दृग्ंह॑स्व देवि पृथिवि स्व॒स्तय॑ आसु॒री मा॒या स्व॒धया॑ कृ॒ता-ऽसि॑ । जुष्ट॑-न्दे॒वाना॑मि॒दम॑स्तु ह॒व्यमरि॑ष्टा॒ त्वमुदि॑हि य॒ज्ञे अ॒स्मिन्न् ॥ मित्रै॒तामु॒खा-न्त॑पै॒षा मा भे॑दि । ए॒ता-न्ते॒ परि॑ ददा॒म्यभि॑त्त्यै ॥ द्र्व॑न्न-स्स॒र्पिरा॑सुतिः प्र॒त्नो होता॒ वरे᳚ण्यः । सह॑सस्पु॒त्रो अद्भु॑तः ॥ पर॑स्या॒ अधि॑ सं॒वँतो-ऽव॑राग्ं अ॒भ्या [अ॒भ्या, त॒र॒ ।] 36

त॑र । यत्रा॒हमस्मि॒ ताग्ं अ॑व ॥ प॒र॒मस्याः᳚ परा॒वतो॑ रो॒हिद॑श्व इ॒हा-ऽग॑हि । पु॒री॒ष्यः॑ पुरुप्रि॒यो-ऽग्ने॒ त्व-न्त॑रा॒ मृधः॑ ॥ सीद॒ त्व-म्मा॒तुर॒स्या उ॒पस्थे॒ विश्वा᳚न्यग्ने व॒युना॑नि वि॒द्वान् । मैना॑म॒र्चिषा॒ मा तप॑सा॒-ऽभि शू॑शुचो॒-ऽन्तर॑स्याग्ं शु॒क्र ज्यो॑ति॒र्वि भा॑हि ॥ अ॒न्तर॑ग्ने रु॒चा त्वमु॒खायै॒ सद॑ने॒ स्वे । तस्या॒स्त्वग्ं हर॑सा॒ तप॒न् जात॑वेद-श्शि॒वो भ॑व ॥ शि॒वो भू॒त्वा मह्य॑म॒ग्ने-ऽथो॑ सीद शि॒वस्त्वम् । शि॒वाः कृ॒त्वा दिश॒-स्सर्वा॒-स्स्वां-योँनि॑मि॒हा-ऽऽस॑दः ॥ 37 ॥

(वी॒रय॒स्वा - ऽऽ - तप॑न् - विग्ंश॒तिश्च॑) (अ. 9)

यद॑ग्ने॒ यानि॒ कानि॒ चा-ऽऽते॒ दारू॑णि द॒द्ध्मसि॑ । तद॑स्तु॒ तुभ्य॒मि-द्घृ॒त-न्तज्जु॑षस्व यविष्ठ्य ॥ यदत्त्यु॑प॒जिह्वि॑का॒ यद्व॒म्रो अ॑ति॒सर्प॑ति । सर्व॒-न्तद॑स्तु ते घृ॒त-न्तज्जु॑षस्व यविष्ठ्य ॥ रात्रिग्ं॑ रात्रि॒मप्र॑याव॒-म्भर॒न्तो-ऽश्वा॑येव॒ तिष्ठ॑ते घा॒सम॑स्मै । रा॒यस्पोषे॑ण॒ समि॒षा मद॒न्तो-ऽग्ने॒ मा ते॒ प्रति॑वेशा रिषाम ॥ नाभा॑ [नाभा᳚, पृ॒थि॒व्या-स्स॑मिधा॒न-] 38

पृथि॒व्या-स्स॑मिधा॒न-म॒ग्निग्ं रा॒यस्पोषा॑य बृह॒ते ह॑वामहे । इ॒र॒म्म॒द-म्बृ॒हदु॑क्थं॒-यँज॑त्र॒-ञ्जेता॑रम॒ग्नि-म्पृत॑नासु सास॒हिम् ॥ या-स्सेना॑ अ॒भीत्व॑रीरा-व्या॒धिनी॒-रुग॑णा उ॒त । ये स्ते॒ना ये च॒ तस्क॑रा॒स्ताग्स्ते॑ अ॒ग्ने-ऽपि॑ दधाम्या॒स्ये᳚ ॥ दग्ग्ष्ट्रा᳚भ्या-म्म॒लिम्लू॒न् जम्भ्यै॒-स्तस्क॑राग्ं उ॒त । हनू᳚भ्याग् स्ते॒नान्-भ॑गव॒स्ताग्-स्त्व-ङ्खा॑द॒ सुखा॑दितान् ॥ ये जने॑षु म॒लिम्ल॑व-स्स्ते॒नास॒-स्तस्क॑रा॒ वने᳚ । ये [ ] 39

कक्षे᳚ष्वघा॒ यव॒स्ताग्स्ते॑ दधामि॒ जम्भ॑योः ॥ यो अ॒स्मभ्य॑मराती॒या-द्यश्च॑ नो॒ द्वेष॑ते॒ जनः॑ । निन्दा॒द्यो अ॒स्मा-न्दिफ्सा᳚च्च॒ सर्व॒-न्त-म्म॑स्म॒सा कु॑रु ॥ सग्ंशि॑त-म्मे॒ ब्रह्म॒ सग्ंशि॑तं-वीँ॒र्य॑-म्बल᳚म् । सग्ंशि॑त-ङ्क्ष॒त्र-ञ्जि॒ष्णु यस्या॒-ऽहमस्मि॑ पु॒रोहि॑तः ॥ उदे॑षा-म्बा॒हू अ॑तिर॒मुद्वर्च॒ उदू॒ बल᳚म् । क्षि॒णोमि॒ ब्रह्म॑णा॒-ऽमित्रा॒नुन्न॑यामि॒ [-ऽमित्रा॒-नुन्न॑यामि, स्वाग्ं अ॒हम् ।] 40

स्वाग्ं अ॒हम् ॥ दृ॒शा॒नो रु॒क्म उ॒र्व्या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः । अ॒ग्निर॒मृतो॑ अभव॒द्वयो॑-भि॒र्यदे॑न॒-न्द्यौरज॑नय-थ्सु॒रेताः᳚ ॥ विश्वा॑ रू॒पाणि॒ प्रति॑ मुञ्चते क॒विः प्रा-ऽसा॑वीद्भ॒द्र-न्द्वि॒पदे॒ चतु॑ष्पदे । वि नाक॑मख्य-थ्सवि॒ता वरे॒ण्यो-ऽनु॑ प्र॒याण॑मु॒षसो॒ वि॑राजति ॥ नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेकग्ं॑ समी॒ची । द्यावा॒ क्षामा॑ रु॒क्मो [रु॒क्मः, अ॒न्तर्वि भा॑ति] 41

अ॒न्तर्वि भा॑ति दे॒वा अ॒ग्नि-न्धा॑रय-न्द्रविणो॒दाः ॥ सु॒प॒र्णो॑-ऽसि ग॒रुत्मा᳚-न्त्रि॒वृत्ते॒ शिरो॑ गाय॒त्र-ञ्चक्षु॒-स्स्तोम॑ आ॒त्मा साम॑ ते त॒नूर्वा॑मदे॒व्य-म्बृ॑ह-द्रथन्त॒रे प॒क्षौ य॑ज्ञाय॒ज्ञिय॒-म्पुच्छ॒-ञ्छन्दा॒ग्॒स्यङ्गा॑नि॒ धिष्णि॑या-श्श॒फा यजूग्ं॑षि॒ नाम॑ ॥ सु॒प॒र्णो॑-ऽसि ग॒रुत्मा॒-न्दिव॑-ङ्गच्छ॒ सुवः॑ पत ॥ 42 ॥

(नाभा॒ - वने॒ ये - न॑यामि॒ - क्षामा॑ रु॒क्मो᳚ - ऽष्टात्रिग्ं॑शच्च) (अ. 10)

अग्ने॒ यं-यँ॒ज्ञम॑द्ध्व॒रं-विँ॒श्वतः॑ परि॒भूरसि॑ । स इद्दे॒वेषु॑ गच्छति ॥ सोम॒ यास्ते॑ मयो॒भुव॑ ऊ॒तय॒-स्सन्ति॑ दा॒शुषे᳚ । ताभि॑र्नो-ऽवि॒ता भ॑व ॥ अ॒ग्निर्मू॒र्धा भुवः॑ ॥ त्वन्नः॑ सोम॒ , या ते॒ धामा॑नि ॥ त-थ्स॑वि॒तुर्वरे᳚ण्य॒-म्भर्गो॑ दे॒वस्य॑ धीमहि । धियो॒ यो नः॑ प्रचो॒दया᳚त् ॥ अचि॑त्ती॒ यच्च॑कृ॒मा दैव्ये॒ जने॑ दी॒नैर्दक्षैः॒ प्रभू॑ती पूरुष॒त्वता᳚ । 43

दे॒वेषु॑ च सवित॒र्मानु॑षेषु च॒ त्वन्नो॒ अत्र॑ सुवता॒दना॑गसः ॥ चो॒द॒यि॒त्री सू॒नृता॑ना॒-ञ्चेत॑न्ती सुमती॒नाम् । य॒ज्ञ-न्द॑धे॒ सर॑स्वती ॥ पावी॑रवी क॒न्या॑ चि॒त्रायु॒-स्सर॑स्वती वी॒रप॑त्नी॒ धिय॑-न्धात् । ग्नाभि॒रच्छि॑द्रग्ं शर॒णग्ं स॒जोषा॑ दुरा॒धर्ष॑-ङ्गृण॒ते शर्म॑ यग्ंसत् ॥ पू॒षा गा अन्वे॑तु नः पू॒षा र॑क्ष॒त्वर्व॑तः । पू॒षा वाजग्ं॑ सनोतु नः ॥ शु॒क्र-न्ते॑ अ॒न्यद्य॑ज॒त-न्ते॑ अ॒न्य- [अ॒न्यत्, विषु॑रूपे॒ अह॑नी॒ द्यौरि॑वासि ।] 44

-द्विषु॑रूपे॒ अह॑नी॒ द्यौरि॑वासि । विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु ॥ ते॑-ऽवर्धन्त॒ स्वत॑वसो महित्व॒ना ऽऽनाक॑-न्त॒स्थुरु॒रु च॑क्रिरे॒ सदः॑ । विष्णु॒ र्यद्धा-ऽऽव॒-द्वृष॑ण-म्मद॒च्युतं॒-वँयो॒ न सी॑द॒न्नधि॑ ब॒र्॒हिषि॑ प्रि॒ये ॥ प्रचि॒त्रम॒र्क-ङ्गृ॑ण॒ते तु॒राय॒ मारु॑ताय॒ स्वत॑वसे भरद्ध्वम् । ये सहाग्ं॑सि॒ सह॑सा॒ सह॑न्ते॒ [सह॑न्ते, रेज॑ते अग्ने पृथि॒वी म॒खेभ्यः॑ ।] 45

रेज॑ते अग्ने पृथि॒वी म॒खेभ्यः॑ ॥ विश्वे॑ दे॒वा विश्वे॑ देवाः ॥ द्यावा॑ नः पृथि॒वी इ॒मग्ं सि॒द्ध्रम॒द्य दि॑वि॒स्पृश᳚म् । य॒ज्ञ-न्दे॒वेषु॒ यच्छताम् ॥ प्र पू᳚र्व॒जे पि॒तरा॒ नव्य॑सीभिर्गी॒र्भिः कृ॑णुद्ध्व॒ग्ं॒ सद॑ने ऋ॒तस्य॑ । आ नो᳚ द्यावापृथिवी॒ दैव्ये॑न॒ जने॑न यात॒-म्महि॑ वां॒-वँरू॑थम् ॥ अ॒ग्निग्ग् स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत् ॥ स ह॑व्य॒वाडम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति ॥ शन्नो॑ भवन्तु॒, वाजे॑वाजे ॥ 46 ॥

(पु॒रु॒ष॒त्वता॑ - यज॒तन्ते॑ अ॒न्यथ् - सह॑न्ते॒ - चनो॑हितो॒ - ऽष्टौ च॑ ) (अ. 11)

(यु॒ञ्जा॒न - इ॒माम॑गृभ्णन् - दे॒वस्य॒ - सन्ते॒ - वि पाज॑सा॒ - वस॑वस्त्वा॒ - समा᳚स्त्वो॒ - र्ध्वा - अ॒स्याकू॑तिं॒ - ँयद॑ग्ने॒ यान् - यग्ने॒ यं-यँ॒ज्ञ - मेका॑दश)

(यु॒ञ्जा॒नो - वर्म॑ च स्थ - आदि॒त्यस्त्वा॒ - भार॑ती॒ - स्वाग्ं अ॒हग्ं - षट्च॑त्वारिग्ंशत् )

(यु॒ञ्जा॒नो, वाजे॑वाजे)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-ञ्चतुर्थ काण्डे प्रथमः प्रश्न-स्समाप्तः ॥