6.3 - Chatvala Ddhishniya Nupavapati - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ತೃತೀಯಃ ಪ್ರಶ್ನಃ - ಸೋಮಮನ್ತ್ರಬ್ರಾಹ್ಮಣನಿರೂಪಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಚಾತ್ವಾ॑ಲಾ॒-ದ್ಧಿಷ್ಣಿ॑ಯಾ॒ನುಪ॑ ವಪತಿ॒ ಯೋನಿ॒ರ್ವೈ ಯ॒ಜ್ಞಸ್ಯ॒ ಚಾತ್ವಾ॑ಲಂ-ಯಁ॒ಜ್ಞಸ್ಯ॑ ಸಯೋನಿ॒ತ್ವಾಯ॑ ದೇ॒ವಾ ವೈ ಯ॒ಜ್ಞ-ಮ್ಪರಾ॑-ಽಜಯನ್ತ॒ ತಮಾಗ್ನೀ᳚ದ್ಧ್ರಾ॒-ತ್ಪುನ॒ರಪಾ॑ಜಯನ್ನೇ॒ತದ್ವೈ ಯ॒ಜ್ಞಸ್ಯಾ-ಪ॑ರಾಜಿತಂ॒-ಯಁದಾಗ್ನೀ᳚ದ್ಧ್ರಂ॒-ಯಁದಾಗ್ನೀ᳚ದ್ಧ್ರಾ॒ದ್ಧಿಷ್ಣಿ॑ಯಾನ್. ವಿ॒ಹರ॑ತಿ॒ ಯದೇ॒ವ ಯ॒ಜ್ಞಸ್ಯಾ-ಪ॑ರಾಜಿತ॒-ನ್ತತ॑ ಏ॒ವೈನ॒-ಮ್ಪುನ॑ಸ್ತನುತೇ ಪರಾ॒ಜಿತ್ಯೇ॑ವ॒ ಖಲು॒ ವಾ ಏ॒ತೇ ಯ॑ನ್ತಿ॒ ಯೇ ಬ॑ಹಿಷ್ಪವಮಾ॒ನಗ್ಂ ಸರ್ಪ॑ನ್ತಿ ಬಹಿಷ್ಪವಮಾ॒ನೇ ಸ್ತು॒ತ [ಸ್ತು॒ತೇ, ಆ॒ಹಾಗ್ನೀ॑ದ॒ಗ್ನೀನ್. ವಿ] 1

ಆ॒ಹಾಗ್ನೀ॑ದ॒ಗ್ನೀನ್. ವಿ ಹ॑ರ ಬ॒ರ್॒ಹಿ-ಸ್ಸ್ತೃ॑ಣಾಹಿ ಪುರೋ॒ಡಾಶಾ॒ಗ್ಂ॒ ಅಲ॑-ಙ್ಕು॒ರ್ವಿತಿ॑ ಯ॒ಜ್ಞಮೇ॒ವಾಪ॒ಜಿತ್ಯ॒ ಪುನ॑ಸ್ತನ್ವಾ॒ನಾ ಯ॒ನ್ತ್ಯಙ್ಗಾ॑ರೈ॒ರ್ದ್ವೇ ಸವ॑ನೇ॒ ವಿ ಹ॑ರತಿ ಶ॒ಲಾಕಾ॑ಭಿ-ಸ್ತೃ॒ತೀಯಗ್ಂ॑ ಸಶುಕ್ರ॒ತ್ವಾಯಾಥೋ॒ ಸ-ಮ್ಭ॑ರತ್ಯೇ॒ವೈನ॒ದ್ಧಿಷ್ಣಿ॑ಯಾ॒ ವಾ ಅ॒ಮುಷ್ಮಿ॑ನ್ ಁಲೋ॒ಕೇ ಸೋಮ॑ಮರಕ್ಷ॒-ನ್ತೇಭ್ಯೋ-ಽಧಿ॒ ಸೋಮ॒ಮಾ-ಽಹ॑ರ॒-ನ್ತ ಮ॑ನ್ವ॒ವಾಯ॒ನ್ತ-ಮ್ಪರ್ಯ॑ವಿಶ॒ನ್॒. ಯ ಏ॒ವಂ-ವೇಁದ॑ ವಿ॒ನ್ದತೇ॑ [ಯ ಏ॒ವಂ-ವೇಁದ॑ ವಿ॒ನ್ದತೇ᳚, ಪ॒ರಿ॒ವೇ॒ಷ್ಟಾರ॒-ನ್ತೇ] 2

ಪರಿವೇ॒ಷ್ಟಾರ॒-ನ್ತೇ ಸೋ॑ಮಪೀ॒ಥೇನ॒ ವ್ಯಾ᳚ರ್ಧ್ಯನ್ತ॒ ತೇ ದೇ॒ವೇಷು॑ ಸೋಮಪೀ॒ಥಮೈ᳚ಚ್ಛನ್ತ॒ ತಾ-ನ್ದೇ॒ವಾ ಅ॑ಬ್ರುವ॒-ನ್ದ್ವೇದ್ವೇ॒ ನಾಮ॑ನೀ ಕುರುದ್ಧ್ವ॒ಮಥ॒ ಪ್ರ ವಾ॒-ಽಽಫ್ಸ್ಯಥ॒ ನ ವೇತ್ಯ॒ಗ್ನಯೋ॒ ವಾ ಅಥ॒ ಧಿಷ್ಣಿ॑ಯಾ॒ಸ್ತಸ್ಮಾ᳚-ದ್ದ್ವಿ॒ನಾಮಾ᳚ ಬ್ರಾಹ್ಮ॒ಣೋ-ಽರ್ಧು॑ಕ॒ಸ್ತೇಷಾಂ॒-ಯೇಁ ನೇದಿ॑ಷ್ಠ-ಮ್ಪ॒ರ್ಯವಿ॑ಶ॒-ನ್ತೇ ಸೋ॑ಮಪೀ॒ಥ-ಮ್ಪ್ರಾ-ಽಪ್ನು॑ವನ್ನಾಹವ॒ನೀಯ॑ ಆಗ್ನೀ॒ದ್ಧ್ರೀಯೋ॑ ಹೋ॒ತ್ರೀಯೋ॑ ಮಾರ್ಜಾ॒ಲೀಯ॒ಸ್ತಸ್ಮಾ॒-ತ್ತೇಷು॑ ಜುಹ್ವತ್ಯತಿ॒ಹಾಯ॒ ವಷ॑-ಟ್ಕರೋತಿ॒ ವಿ ಹ್ಯೇ॑ [ವಿ ಹಿ, ಏ॒ತೇ ಸೋ॑ಮಪೀ॒ಥೇನಾ-ಽಽರ್ಧ್ಯ॑ನ್ತ] 3

-ತೇ ಸೋ॑ಮಪೀ॒ಥೇನಾ-ಽಽರ್ಧ್ಯ॑ನ್ತ ದೇ॒ವಾ ವೈ ಯಾಃ ಪ್ರಾಚೀ॒-ರಾಹು॑ತೀ॒-ರಜು॑ಹವು॒ರ್ಯೇ ಪು॒ರಸ್ತಾ॒ದಸು॑ರಾ॒ ಆಸ॒-ನ್ತಾಗ್ ಸ್ತಾಭಿಃ॒ ಪ್ರಾಣು॑ದನ್ತ॒ ಯಾಃ ಪ್ರ॒ತೀಚೀ॒ರ್ಯೇ ಪ॒ಶ್ಚಾದಸು॑ರಾ॒ ಆಸ॒-ನ್ತಾಗ್ಸ್ತಾಭಿ॒-ರಪಾ॑ನುದನ್ತ॒ ಪ್ರಾಚೀ॑ರ॒ನ್ಯಾ ಆಹು॑ತಯೋ ಹೂ॒ಯನ್ತೇ᳚ ಪ್ರ॒ತ್ಯಙ್ಙಾಸೀ॑ನೋ॒ ಧಿಷ್ಣಿ॑ಯಾ॒ನ್. ವ್ಯಾಘಾ॑ರಯತಿ ಪ॒ಶ್ಚಾಚ್ಚೈ॒ವ ಪುರಸ್ತಾ᳚ಚ್ಚ॒ ಯಜ॑ಮಾನೋ॒ ಭ್ರಾತೃ॑ವ್ಯಾ॒-ನ್ಪ್ರ ಣು॑ದತೇ॒ ತಸ್ಮಾ॒-ತ್ಪರಾ॑ಚೀಃ ಪ್ರ॒ಜಾಃ ಪ್ರ ವೀ॑ಯನ್ತೇ ಪ್ರ॒ತೀಚೀ᳚- [ಪ್ರ॒ತೀಚೀಃ᳚, ಜಾ॒ಯ॒ನ್ತೇ॒ ಪ್ರಾ॒ಣಾ ವಾ ಏ॒ತೇ] 4

-ರ್ಜಾಯನ್ತೇ ಪ್ರಾ॒ಣಾ ವಾ ಏ॒ತೇ ಯದ್ಧಿಷ್ಣಿ॑ಯಾ॒ ಯದ॑ದ್ಧ್ವ॒ರ್ಯುಃ ಪ್ರ॒ತ್ಯ-ನ್ಧಿಷ್ಣಿ॑ಯಾ-ನತಿ॒ಸರ್ಪೇ᳚-ತ್ಪ್ರಾ॒ಣಾನ್-ಥ್ಸಙ್ಕ॑ರ್ಷೇ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ನ್ನಾಭಿ॒ರ್ವಾ ಏ॒ಷಾ ಯ॒ಜ್ಞಸ್ಯ॒ ಯದ್ಧೋತೋ॒ರ್ಧ್ವಃ ಖಲು॒ ವೈ ನಾಭ್ಯೈ᳚ ಪ್ರಾ॒ಣೋ-ಽವಾಂ॑ಅಪಾ॒ನೋ ಯದ॑ಧ್ವ॒ರ್ಯುಃ ಪ್ರ॒ತ್ಯಂ ಹೋತಾ॑ರಮತಿ॒ಸರ್ಪೇ॑ದಪಾ॒ನೇ ಪ್ರಾ॒ಣ-ನ್ದ॑ಧ್ಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ನ್ನಾದ್ಧ್ವ॒ರ್ಯುರುಪ॑ ಗಾಯೇ॒-ದ್ವಾಗ್ವೀ᳚ರ್ಯೋ॒ ವಾ ಅ॑ದ್ಧ್ವ॒ರ್ಯು-ರ್ಯದ॑ದ್ಧ್ವ॒ರ್ಯುರು॑ಪ॒-ಗಾಯೇ॑ದು-ದ್ಗಾ॒ತ್ರೇ [ ] 5

ವಾಚ॒ಗ್ಂ॒ ಸ-ಮ್ಪ್ರ ಯ॑ಚ್ಛೇ-ದುಪ॒ದಾಸು॑ಕಾ-ಽಸ್ಯ॒ ವಾ-ಖ್ಸ್ಯಾ᳚ದ್ಬ್ರಹ್ಮವಾ॒ದಿನೋ॑ ವದನ್ತಿ॒ ನಾಸಗ್ಗ್॑ಸ್ಥಿತೇ॒ ಸೋಮೇ᳚-ಽದ್ಧ್ವ॒ರ್ಯುಃ ಪ್ರ॒ತ್ಯಙ್-ಖ್ಸದೋ-ಽತೀ॑ಯಾ॒ದಥ॑ ಕ॒ಥಾ ದಾ᳚ಕ್ಷಿ॒ಣಾನಿ॒ ಹೋತು॑ಮೇತಿ॒ ಯಾಮೋ॒ ಹಿ ಸ ತೇಷಾ॒-ಙ್ಕಸ್ಮಾ॒ ಅಹ॑ ದೇ॒ವಾ ಯಾಮಂ॒-ವಾಁ-ಽಯಾ॑ಮಂ॒-ವಾಁ-ಽನು॑ ಜ್ಞಾಸ್ಯ॒ನ್ತೀತ್ಯು-ತ್ತ॑ರೇ॒ಣಾ-ಽಽಗ್ನೀ᳚ದ್ಧ್ರ-ಮ್ಪ॒ರೀತ್ಯ॑ ಜುಹೋತಿ ದಾಕ್ಷಿ॒ಣಾನಿ॒ ನ ಪ್ರಾ॒ಣಾನ್ಥ್ಸ-ಙ್ಕ॑ರ್ಷತಿ॒ ನ್ಯ॑ನ್ಯೇ ಧಿಷ್ಣಿ॑ಯಾ ಉ॒ಪ್ಯನ್ತೇ॒ ನಾನ್ಯೇ ಯಾ-ನ್ನಿ॒ವಪ॑ತಿ॒ ತೇನ॒ ತಾ-ನ್ಪ್ರೀ॑ಣಾತಿ॒ ಯಾ-ನ್ನನಿ॒ವಪ॑ತಿ॒ ಯದ॑ನುದಿ॒ಶತಿ॒ ತೇನ॒ ತಾನ್ ॥ 6 ॥

(ಸ್ತು॒ತೇ - ವಿ॒ನ್ದತೇ॒ - ಹಿ - ವೀ॑ಯನ್ತೇ ಪ್ರ॒ತೀಚೀ॑ - ರುದ್ಗ್ರಾ॒ತ್ರ - ಉ॒ಪ್ಯನ್ತೇ॒ - ಚತು॑ರ್ದಶ ಚ) (ಅ. 1)

ಸು॒ವ॒ರ್ಗಾಯ॒ ವಾ ಏ॒ತಾನಿ॑ ಲೋ॒ಕಾಯ॑ ಹೂಯನ್ತೇ॒ ಯ-ದ್ವೈ॑ಸರ್ಜ॒ನಾನಿ॒ ದ್ವಾಭ್ಯಾ॒-ಙ್ಗಾರ್ಹ॑ಪತ್ಯೇ ಜುಹೋತಿ ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯಾ॒ ಆಗ್ನೀ᳚ದ್ಧ್ರೇ ಜುಹೋತ್ಯ॒ನ್ತರಿ॑ಕ್ಷ ಏ॒ವಾ-ಽಽಕ್ರ॑ಮತ ಆಹವ॒ನೀಯೇ॑ ಜುಹೋತಿ ಸುವ॒ರ್ಗಮೇ॒ವೈನಂ॑-ಲೋಁ॒ಕ-ಙ್ಗ॑ಮಯತಿ ದೇ॒ವಾನ್. ವೈ ಸು॑ವ॒ರ್ಗಂ-ಲೋಁ॒ಕಂ-ಯಁ॒ತೋ ರಕ್ಷಾಗ್॑ಸ್ಯ ಜಿಘಾಗ್ಂಸ॒ನ್ತೇ ಸೋಮೇ॑ನ॒ ರಾಜ್ಞಾ॒ ರಕ್ಷಾಗ್॑-ಸ್ಯಪ॒ಹತ್ಯಾ॒ಪ್ತು-ಮಾ॒ತ್ಮಾನ॑-ಙ್ಕೃ॒ತ್ವಾ ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ರಕ್ಷ॑ಸಾ॒-ಮನು॑ಪಲಾಭಾ॒ಯಾ ಽಽತ್ತ॒-ಸ್ಸೋಮೋ॑ ಭವ॒ತ್ಯಥ॑ [ಭವ॒ತ್ಯಥ॑, ವೈ॒ಸ॒ರ್ಜ॒ನಾನಿ॑ ಜುಹೋತಿ॒] 7

ವೈಸರ್ಜ॒ನಾನಿ॑ ಜುಹೋತಿ॒ ರಕ್ಷ॑ಸಾ॒ಮಪ॑ಹತ್ಯೈ॒ ತ್ವಗ್ಂ ಸೋ॑ಮ ತನೂ॒ಕೃದ್ಭ್ಯ॒ ಇತ್ಯಾ॑ಹ ತನೂ॒ಕೃದ್ಧ್ಯ॑ಷ ದ್ವೇಷೋ᳚ಭ್ಯೋ॒-ಽನ್ಯಕೃ॑ತೇಭ್ಯ॒ ಇತ್ಯಾ॑ಹಾ॒ನ್ಯಕೃ॑ತಾನಿ॒ ಹಿ ರಕ್ಷಾಗ್॑ಸ್ಯು॒ರು ಯ॒ನ್ತಾ-ಽಸಿ॒ ವರೂ॑ಥ॒ಮಿತ್ಯಾ॑ಹೋ॒ರು ಣ॑ಸ್ಕೃ॒ಧೀತಿ॒ ವಾವೈತದಾ॑ಹ ಜುಷಾ॒ಣೋ ಅ॒ಪ್ತುರಾಜ್ಯ॑ಸ್ಯ ವೇ॒ತ್ವಿತ್ಯಾ॑ಹಾ॒ಪ್ತುಮೇ॒ವ ಯಜ॑ಮಾನ-ಙ್ಕೃ॒ತ್ವಾ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತಿ॒ ರಕ್ಷ॑ಸಾ॒-ಮನು॑ಪಲಾಭಾ॒ಯಾ-ಽಽ ಸೋಮ॑-ನ್ದದತ॒ [ಸೋಮ॑-ನ್ದದತೇ, ಆ ಗ್ರಾವ್ಣ್ಣ॒ ಆ] 8

ಆ ಗ್ರಾವ್ಣ್ಣ॒ ಆ ವಾ॑ಯ॒ವ್ಯಾ᳚ನ್ಯಾ ದ್ರೋ॑ಣಕಲ॒ಶಮು-ತ್ಪತ್ನೀ॒ಮಾ ನ॑ಯ॒ನ್ತ್ಯನ್ವನಾಗ್ಂ॑ಸಿ॒ ಪ್ರ ವ॑ರ್ತಯನ್ತಿ॒ ಯಾವ॑ದೇ॒ವಾಸ್ಯಾಸ್ತಿ॒ ತೇನ॑ ಸ॒ಹ ಸು॑ವ॒ರ್ಗಂ-ಲೋಁ॒ಕಮೇ॑ತಿ॒ ನಯ॑ವತ್ಯ॒ರ್ಚಾ-ಽಽಗ್ನೀ᳚ದ್ಧ್ರೇ ಜುಹೋತಿ ಸುವ॒ರ್ಗಸ್ಯ॑ ಲೋ॒ಕಸ್ಯಾ॒ಭಿನೀ᳚ತ್ಯೈ॒ ಗ್ರಾವ್ಣ್ಣೋ॑ ವಾಯ॒ವ್ಯಾ॑ನಿ ದ್ರೋಣಕಲ॒ಶಮಾಗ್ನೀ᳚ದ್ಧ್ರ॒ ಉಪ॑ ವಾಸಯತಿ॒ ವಿ ಹ್ಯೇ॑ನ॒-ನ್ತೈರ್ಗೃ॒ಹ್ಣತೇ॒ ಯ-ಥ್ಸ॒ಹೋಪ॑ವಾ॒ಸಯೇ॑-ದಪುವಾ॒ಯೇತ॑ ಸೌ॒ಮ್ಯರ್ಚಾ ಪ್ರ ಪಾ॑ದಯತಿ॒ ಸ್ವಯೈ॒- [ಪ್ರ ಪಾ॑ದಯತಿ॒ ಸ್ವಯ᳚, ಏ॒ವೈನ॑-ನ್ದೇ॒ವತ॑ಯಾ॒] 9

-ವೈನ॑-ನ್ದೇ॒ವತ॑ಯಾ॒ ಪ್ರ ಪಾ॑ದಯ॒ತ್ಯದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ ಸೀ॒ದೇತ್ಯಾ॑ಹ ಯಥಾಯ॒ಜುರೇ॒ವೈತ-ದ್ಯಜ॑ಮಾನೋ॒ ವಾ ಏ॒ತಸ್ಯ॑ ಪು॒ರಾ ಗೋ॒ಪ್ತಾ ಭ॑ವತ್ಯೇ॒ಷ ವೋ॑ ದೇವ ಸವಿತ॒-ಸ್ಸೋಮ॒ ಇತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವೈನ॑-ನ್ದೇ॒ವತಾ᳚ಭ್ಯ॒-ಸ್ಸ-ಮ್ಪ್ರಯ॑ಚ್ಛತ್ಯೇ॒ತ-ತ್ತ್ವಗ್ಂ ಸೋ॑ಮ ದೇ॒ವೋ ದೇ॒ವಾನುಪಾ॑ಗಾ॒ ಇತ್ಯಾ॑ಹ ದೇ॒ವೋ ಹ್ಯೇ॑ಷ ಸ- [ದೇ॒ವೋ ಹ್ಯೇ॑ಷ ಸನ್ನ್, ದೇ॒ವಾನು॒ಪೈತೀ॒ದಮ॒ಹ-] 10

-ನ್ದೇ॒ವಾನು॒ಪೈತೀ॒ದಮ॒ಹ-ಮ್ಮ॑ನು॒ಷ್ಯೋ॑ ಮನು॒ಷ್ಯಾ॑ನಿತ್ಯಾ॑ಹ ಮನು॒ಷ್ಯೋ᳚(1॒) ಹ್ಯೇ॑ಷ ಸ-ನ್ಮ॑ನು॒ಷ್ಯಾ॑ನು॒ಪೈತಿ॒ ಯದೇ॒ತ-ದ್ಯಜು॒ರ್ನ ಬ್ರೂ॒ಯಾದಪ್ರ॑ಜಾ ಅಪ॒ಶುರ್ಯಜ॑ಮಾನ-ಸ್ಸ್ಯಾ-ಥ್ಸ॒ಹ ಪ್ರ॒ಜಯಾ॑ ಸಹ ರಾ॒ಯಸ್ಪೋಷೇ॒ಣೇತ್ಯಾ॑ಹ ಪ್ರ॒ಜಯೈ॒ವ ಪ॒ಶುಭಿಃ॑ ಸ॒ಹೇಮಂ-ಲೋಁ॒ಕಮು॒ಪಾವ॑ರ್ತತೇ॒ ನಮೋ॑ ದೇ॒ವೇಭ್ಯ॒ ಇತ್ಯಾ॑ಹ ನಮಸ್ಕಾ॒ರೋ ಹಿ ದೇ॒ವಾನಾಗ್॑ ಸ್ವ॒ಧಾ ಪಿ॒ತೃಭ್ಯ॒ ಇತ್ಯಾ॑ಹ ಸ್ವಧಾಕಾ॒ರೋ ಹಿ [ಸ್ವಧಾಕಾ॒ರೋ ಹಿ, ಪಿ॒ತೃ॒ಣಾಮಿ॒ದಮ॒ಹ-] 11

ಪಿ॑ತೃ॒ಣಾಮಿ॒ದಮ॒ಹ-ನ್ನಿರ್ವರು॑ಣಸ್ಯ॒ ಪಾಶಾ॒ದಿತ್ಯಾ॑ಹ ವರುಣಪಾ॒ಶಾದೇ॒ವ ನಿರ್ಮು॑ಚ್ಯ॒ತೇ ಽಗ್ನೇ᳚ ವ್ರತಪತ ಆ॒ತ್ಮನಃ॒ ಪೂರ್ವಾ॑ ತ॒ನೂರಾ॒ದೇಯೇತ್ಯಾ॑ಹುಃ॒ ಕೋ ಹಿ ತದ್ವೇದ॒ ಯ-ದ್ವಸೀ॑ಯಾ॒ನ್-ಥ್ಸ್ವೇ ವಶೇ॑ ಭೂ॒ತೇ ಪುನ॑ರ್ವಾ॒ ದದಾ॑ತಿ॒ ನ ವೇತಿ॒ ಗ್ರಾವಾ॑ಣೋ॒ ವೈ ಸೋಮ॑ಸ್ಯ॒ ರಾಜ್ಞೋ॑ ಮಲಿಮ್ಲುಸೇ॒ನಾ ಯ ಏ॒ವಂ-ವಿಁ॒ದ್ವಾ-ನ್ಗ್ರಾವ್ಣ್ಣ॒ ಆಗ್ನೀ᳚ದ್ಧ್ರ ಉಪವಾ॒ಸಯ॑ತಿ॒ ನೈನ॑-ಮ್ಮಲಿಮ್ಲುಸೇ॒ನಾ ವಿ॑ನ್ದತಿ ॥ 12 ॥

(ಅಥ॑-ದದತೇ॒ - ಸ್ವಯಾ॒ - ಸನ್ಥ್ - ಸ್ವ॑ಧಾಕಾ॒ರೋ ಹಿ - ವಿ॑ನ್ದತಿ) (ಅ. 2)

ವೈ॒ಷ್ಣ॒ವ್ಯರ್ಚಾ ಹು॒ತ್ವಾ ಯೂಪ॒ಮಚ್ಛೈ॑ತಿ ವೈಷ್ಣ॒ವೋ ವೈ ದೇ॒ವತ॑ಯಾ॒ ಯೂಪ॒-ಸ್ಸ್ವಯೈ॒ವೈನ॑-ನ್ದೇ॒ವತ॒ಯಾ ಽಚ್ಛೈ॒ತ್ಯತ್ಯ॒ನ್ಯಾನಗಾ॒-ನ್ನಾನ್ಯಾ-ನುಪಾ॑ಗಾ॒ಮಿತ್ಯಾ॒ಹಾತಿ॒ ಹ್ಯ॑ನ್ಯಾನೇತಿ॒ ನಾನ್ಯಾ-ನು॒ಪೈತ್ಯ॒ರ್ವಾಕ್ತ್ವಾ॒ ಪರೈ॑ರವಿದ-ಮ್ಪ॒ರೋ-ಽವ॑ರೈ॒ರಿತ್ಯಾ॑ಹಾ॒ರ್ವಾಘ್ಯೇ॑ನ॒-ಮ್ಪರೈ᳚ರ್ವಿ॒ನ್ದತಿ॑ ಪ॒ರೋ-ಽವ॑ರೈ॒ಸ್ತ-ನ್ತ್ವಾ॑ ಜುಷೇ [ಜುಷೇ, ವೈ॒ಷ್ಣ॒ವ-ನ್ದೇ॑ವಯ॒ಜ್ಯಾಯಾ॒] 13

ವೈಷ್ಣ॒ವ-ನ್ದೇ॑ವಯ॒ಜ್ಯಾಯಾ॒ ಇತ್ಯಾ॑ಹ ದೇವಯ॒ಜ್ಯಾಯೈ॒ ಹ್ಯೇ॑ನ-ಞ್ಜು॒ಷತೇ॑ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನ॒ಕ್ತ್ವಿತ್ಯಾ॑ಹ॒ ತೇಜ॑ಸೈ॒ವೈನ॑-ಮನ॒ಕ್ತ್ಯೋಷ॑ಧೇ॒ ತ್ರಾಯ॑ಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ರಿತ್ಯಾ॑ಹ॒ ವಜ್ರೋ॒ ವೈ ಸ್ವಧಿ॑ತಿ॒-ಶ್ಶಾನ್ತ್ಯೈ॒ ಸ್ವಧಿ॑ತೇರ್ವೃ॒ಕ್ಷಸ್ಯ॒ ಬಿಭ್ಯ॑ತಃ ಪ್ರಥ॒ಮೇನ॒ ಶಕ॑ಲೇನ ಸ॒ಹ ತೇಜಃ॒ ಪರಾ॑ ಪತತಿ॒ ಯಃ ಪ್ರ॑ಥ॒ಮ-ಶ್ಶಕ॑ಲಃ ಪರಾ॒ಪತೇ॒-ತ್ತಮಪ್ಯಾ ಹ॑ರೇ॒-ಥ್ಸತೇ॑ಜಸ- [ಹ॑ರೇ॒-ಥ್ಸತೇ॑ಜಸಮ್, ಏ॒ವೈನ॒ಮಾ] 14

-ಮೇ॒ವೈನ॒ಮಾ ಹ॑ರತೀ॒ಮೇ ವೈ ಲೋ॒ಕಾ ಯೂಪಾ᳚-ತ್ಪ್ರಯ॒ತೋ ಬಿ॑ಭ್ಯತಿ॒ ದಿವ॒ಮಗ್ರೇ॑ಣ॒ ಮಾ ಲೇ॑ಖೀರ॒ನ್ತರಿ॑ಕ್ಷ॒-ಮ್ಮದ್ಧ್ಯೇ॑ನ॒ ಮಾ ಹಿಗ್ಂ॑ಸೀ॒ರಿತ್ಯಾ॑ಹೈ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॑ ಶಮಯತಿ॒ ವನ॑ಸ್ಪತೇ ಶ॒ತವ॑ಲ್ಶೋ॒ ವಿ ರೋ॒ಹೇತ್ಯಾ॒ವ್ರಶ್ಚ॑ನೇ ಜುಹೋತಿ॒ ತಸ್ಮಾ॑-ದಾ॒ವ್ರಶ್ಚ॑ನಾ-ದ್ವೃ॒ಕ್ಷಾಣಾ॒-ಮ್ಭೂಯಾಗ್ಂ॑ಸ॒ ಉತ್ತಿ॑ಷ್ಠನ್ತಿ ಸ॒ಹಸ್ರ॑ವಲ್ಶಾ॒ ವಿ ವ॒ಯಗ್ಂ ರು॑ಹೇ॒ಮೇತ್ಯಾ॑ಹಾ॒- ಽಽಶಿಷ॑ಮೇ॒ವೈತಾಮಾ ಶಾ॒ಸ್ತೇ ಽನ॑ಕ್ಷಸಙ್ಗ- [ಶಾ॒ಸ್ತೇ ಽನ॑ಕ್ಷಸಙ್ಗಮ್, ವೃ॒ಶ್ಚೇ॒-ದ್ಯದ॑ಕ್ಷಸ॒ಙ್ಗಂ-] 15

-ಁವೃಶ್ಚೇ॒-ದ್ಯದ॑ಕ್ಷಸ॒ಙ್ಗಂ-ವೃಁ॒ಶ್ಚೇದ॑ಧಈ॒ಷಂ-ಯಁಜ॑ಮಾನಸ್ಯ ಪ್ರ॒ಮಾಯು॑ಕಗ್ಗ್ ಸ್ಯಾ॒ದ್ಯ-ಙ್ಕಾ॒ಮಯೇ॒ತಾಪ್ರ॑ತಿಷ್ಠಿತ-ಸ್ಸ್ಯಾ॒ದಿತ್ಯಾ॑ರೋ॒ಹ-ನ್ತಸ್ಮ॑ ವೃಶ್ಚೇದೇ॒ಷ ವೈ ವನ॒ಸ್ಪತೀ॑ನಾ॒-ಮಪ್ರ॑ತಿಷ್ಠಿ॒ತೋ-ಽಪ್ರ॑ತಿಷ್ಠಿತ ಏ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತಾಪ॒ಶು-ಸ್ಸ್ಯಾ॒ದಿತ್ಯ॑ಪ॒ರ್ಣ-ನ್ತಸ್ಮೈ॒ ಶುಷ್ಕಾ᳚ಗ್ರಂ-ವೃಁಶ್ಚೇದೇ॒ಷ ವೈ ವನ॒ಸ್ಪತೀ॑ನಾ-ಮಪಶ॒ವ್ಯೋ॑-ಽಪ॒ಶುರೇ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ದಿತಿ॑ ಬಹುಪ॒ರ್ಣ-ನ್ತಸ್ಮೈ॑ ಬಹುಶಾ॒ಖಂ-ವೃಁ॑ಶ್ಚೇದೇ॒ಷ ವೈ [ ] 16

ವನ॒ಸ್ಪತೀ॑ನಾ-ಮ್ಪಶ॒ವ್ಯಃ॑ ಪಶು॒ಮಾನೇ॒ವ ಭ॑ವತಿ॒ ಪ್ರತಿ॑ಷ್ಠಿತಂ-ವೃಁಶ್ಚೇ-ತ್ಪ್ರತಿ॒ಷ್ಠಾಕಾ॑ಮಸ್ಯೈ॒ಷ ವೈ ವನ॒ಸ್ಪತೀ॑ನಾ॒-ಮ್ಪ್ರತಿ॑ಷ್ಠಿತೋ॒ ಯ-ಸ್ಸ॒ಮೇ ಭೂಮ್ಯೈ॒ ಸ್ವಾದ್ಯೋನೇ॑ ರೂ॒ಢಃ ಪ್ರತ್ಯೇ॒ವ ತಿ॑ಷ್ಠತಿ॒ ಯಃ ಪ್ರ॒ತ್ಯಙ್ಙುಪ॑ನತ॒ಸ್ತಂ-ವೃಁ॑ಶ್ಚೇ॒-ಥ್ಸ ಹಿ ಮೇಧ॑ಮ॒ಭ್ಯುಪ॑ನತಃ॒ ಪಞ್ಚಾ॑ರತ್ನಿ॒-ನ್ತಸ್ಮೈ॑ ವೃಶ್ಚೇ॒ದ್ಯ-ಙ್ಕಾ॒ಮಯೇ॒ತೋಪೈ॑ನ॒ಮುತ್ತ॑ರೋ ಯ॒ಜ್ಞೋ ನ॑ಮೇ॒ದಿತಿ॒ ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞ ಉಪೈ॑ನ॒ಮುತ್ತ॑ರೋ ಯ॒ಜ್ಞೋ [ಯ॒ಜ್ಞಃ, ನ॒ಮ॒ತಿ॒ ಷಡ॑ರತ್ನಿ] 17

ನ॑ಮತಿ॒ ಷಡ॑ರತ್ನಿ-ಮ್ಪ್ರತಿ॒ಷ್ಠಾಕಾ॑ಮಸ್ಯ॒ ಷಡ್ವಾ ಋ॒ತವ॑ ಋ॒ತುಷ್ವೇ॒ವ ಪ್ರತಿ॑ ತಿಷ್ಠತಿ ಸ॒ಪ್ತಾರ॑ತ್ನಿ-ಮ್ಪ॒ಶುಕಾ॑ಮಸ್ಯ ಸ॒ಪ್ತಪ॑ದಾ॒ ಶಕ್ವ॑ರೀ ಪ॒ಶವ॒-ಶ್ಶಕ್ವ॑ರೀ ಪ॒ಶೂನೇ॒ವಾವ॑ ರುನ್ಧೇ॒ ನವಾ॑ರತ್ನಿ॒-ನ್ತೇಜ॑ಸ್ಕಾಮಸ್ಯ ತ್ರಿ॒ವೃತಾ॒ ಸ್ತೋಮೇ॑ನ॒ ಸಮ್ಮಿ॑ತ॒-ನ್ತೇಜ॑ಸ್ತ್ರಿ॒ವೃ-ತ್ತೇ॑ಜ॒ಸ್ವ್ಯೇ॑ವ ಭ॑ವ॒-ತ್ಯೇಕಾ॑ದಶಾರತ್ನಿ-ಮಿನ್ದ್ರಿ॒ಯಕಾ॑ಮ॒-ಸ್ಯೈಕಾ॑ದಶಾಕ್ಷರಾ ತ್ರಿ॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟುಗಿ॑ನ್ದ್ರಿಯಾ॒ವ್ಯೇ॑ವ ಭ॑ವತಿ॒ ಪಞ್ಚ॑ದಶಾರತ್ನಿ॒-ಮ್ಭ್ರಾತೃ॑ವ್ಯವತಃ ಪಞ್ಚದ॒ಶೋ ವಜ್ರೋ॒ ಭ್ರಾತೃ॑ವ್ಯಾಭಿಭೂತ್ಯೈ ಸ॒ಪ್ತದ॑ಶಾರತ್ನಿ-ಮ್ಪ್ರ॒ಜಾಕಾ॑ಮಸ್ಯ ಸಪ್ತದ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯಾ॒ ಏಕ॑ವಿಗ್ಂಶತ್ಯರತ್ನಿ-ಮ್ಪ್ರತಿ॒ಷ್ಠಾಕಾ॑ಮ-ಸ್ಯೈಕವಿ॒ಗ್ಂ॒ಶ-ಸ್ಸ್ತೋಮಾ॑ನಾ-ಮ್ಪ್ರತಿ॒ಷ್ಠಾ ಪ್ರತಿ॑ಷ್ಠಿತ್ಯಾ ಅ॒ಷ್ಟಾಶ್ರಿ॑ರ್ಭವ-ತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ ತೇಜೋ॑ ಗಾಯ॒ತ್ರೀ ಗಾ॑ಯ॒ತ್ರೀ ಯ॑ಜ್ಞಮು॒ಖ-ನ್ತೇಜ॑ಸೈ॒ವ ಗಾ॑ಯತ್ರಿ॒ಯಾ ಯ॑ಜ್ಞಮು॒ಖೇನ॒ ಸಮ್ಮಿ॑ತಃ ॥ 18 ॥

(ಜು॒ಷೇ॒ - ಸತೇ॑ಜಸ॒ - ಮನ॑ಕ್ಷಸಙ್ಗಂ - ಬಹುಶಾ॒ಖಂ-ವೃಁ॑ಶ್ಚೇದೇ॒ಷ ವೈ - ಯ॒ಜ್ಞ ಉಪೈ॑ನ॒ಮುತ್ತ॑ರೋ ಯ॒ಜ್ಞ - ಆಪ್ತ್ಯಾ॒ - ಏಕಾ॒ನ್ನವಿಗ್ಂ॑ಶ॒ತಿಶ್ಚ॑) (ಅ. 3)

ಪೃ॒ಥಿ॒ವ್ಯೈ ತ್ವಾ॒-ಽನ್ತರಿ॑ಕ್ಷಾಯ ತ್ವಾ ದಿ॒ವೇ ತ್ವೇತ್ಯಾ॑ಹೈ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॒ ಪ್ರೋಕ್ಷ॑ತಿ॒ ಪರಾ᳚ಞ್ಚ॒-ಮ್ಪ್ರೋಕ್ಷ॑ತಿ॒ ಪರಾ॑ಙಿವ॒ ಹಿ ಸು॑ವ॒ರ್ಗೋ ಲೋ॒ಕಃ ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ॒ ಯ-ತ್ಖನ॑ತ್ಯ॒ಪೋ-ಽವ॑ ನಯತಿ॒ ಶಾನ್ತ್ಯೈ॒ ಯವ॑ಮತೀ॒ರವ॑ ನಯ॒ತ್ಯೂರ್ಗ್ವೈ ಯವೋ॒ ಯಜ॑ಮಾನೇನ॒ ಯೂಪ॒-ಸ್ಸಮ್ಮಿ॑ತೋ॒ ಯಾವಾ॑ನೇ॒ವ ಯಜ॑ಮಾನ॒-ಸ್ತಾವ॑ತೀ-ಮೇ॒ವಾಸ್ಮಿ॒-ನ್ನೂರ್ಜ॑-ನ್ದಧಾತಿ [ಮೇ॒ವಾಸ್ಮಿ॒-ನ್ನೂರ್ಜ॑-ನ್ದಧಾತಿ, ಪಿ॒ತೃ॒ಣಾಗ್ಂ ಸದ॑ನಮ॒ಸೀತಿ॑] 19

ಪಿತೃ॒ಣಾಗ್ಂ ಸದ॑ನಮ॒ಸೀತಿ॑ ಬ॒ರ್॒ಹಿರವ॑ ಸ್ತೃಣಾತಿ ಪಿತೃದೇವ॒ತ್ಯಾ᳚(1॒)ಗ್ಗ್॒ ಹ್ಯೇ॑ತ-ದ್ಯನ್ನಿಖಾ॑ತಂ॒-ಯಁ-ದ್ಬ॒ರ್॒ಹಿರನ॑ವಸ್ತೀರ್ಯ ಮಿನು॒ಯಾ-ತ್ಪಿ॑ತೃದೇವ॒ತ್ಯೋ॑ ನಿಖಾ॑ತ-ಸ್ಸ್ಯಾ-ದ್ಬ॒ರ್॒ಹಿರ॑ವ॒ಸ್ತೀರ್ಯ॑ ಮಿನೋತ್ಯ॒ಸ್ಯಾಮೇ॒ವೈನ॑-ಮ್ಮಿನೋತಿ ಯೂಪಶಕ॒ಲಮವಾ᳚ಸ್ಯತಿ॒ ಸತೇ॑ಜಸಮೇ॒ವೈನ॑-ಮ್ಮಿನೋತಿ ದೇ॒ವಸ್ತ್ವಾ॑ ಸವಿ॒ತಾ ಮದ್ಧ್ವಾ॑-ಽನ॒ಕ್ತ್ವಿತ್ಯಾ॑ಹ॒ ತೇಜ॑ಸೈ॒ವೈನ॑ಮನಕ್ತಿ ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ॒ ಇತಿ॑ ಚ॒ಷಾಲ॒-ಮ್ಪ್ರತಿ॑- [ಚ॒ಷಾಲ॒-ಮ್ಪ್ರತಿ॑, ಮು॒ಞ್ಚ॒ತಿ॒ ತಸ್ಮಾ᳚ಚ್ಛೀರ್ಷ॒ತ] 20

-ಮುಞ್ಚತಿ॒ ತಸ್ಮಾ᳚ಚ್ಛೀರ್ಷ॒ತ ಓಷ॑ಧಯಃ॒ ಫಲ॑-ಙ್ಗೃಹ್ಣನ್ತ್ಯ॒ನಕ್ತಿ॒ ತೇಜೋ॒ ವಾ ಆಜ್ಯಂ॒-ಯಁಜ॑ಮಾನೇನಾಗ್ನಿ॒ಷ್ಠಾ-ಽಶ್ರಿ॒-ಸ್ಸಮ್ಮಿ॑ತಾ॒ ಯದ॑ಗ್ನಿ॒ಷ್ಠಾ-ಮಶ್ರಿ॑ಮ॒ನಕ್ತಿ॒ ಯಜ॑ಮಾನಮೇ॒ವ ತೇಜ॑ಸಾ ಽನಕ್ತ್ಯಾ॒ನ್ತ-ಮ॑ನಕ್ತ್ಯಾ॒ನ್ತಮೇ॒ವ ಯಜ॑ಮಾನ॒-ನ್ತೇಜ॑ಸಾನಕ್ತಿ ಸ॒ರ್ವತಃ॒ ಪರಿ॑ ಮೃಶ॒ತ್ಯಪ॑ರಿವರ್ಗ-ಮೇ॒ವಾಸ್ಮಿ॒-ನ್ತೇಜೋ॑ ದಧಾ॒ತ್ಯು-ದ್ದಿವಗ್ಗ್॑ ಸ್ತಭಾ॒ನಾ-ಽನ್ತರಿ॑ಕ್ಷ-ಮ್ಪೃ॒ಣೇತ್ಯಾ॑ಹೈ॒ಷಾಂ-ಲೋಁ॒ಕಾನಾಂ॒-ವಿಁಧೃ॑ತ್ಯೈ ವೈಷ್ಣ॒ವ್ಯರ್ಚಾ [ವೈಷ್ಣ॒ವ್ಯರ್ಚಾ, ಕ॒ಲ್ಪ॒ಯ॒ತಿ॒ ವೈ॒ಷ್ಣ॒ವೋ ವೈ] 21

ಕ॑ಲ್ಪಯತಿ ವೈಷ್ಣ॒ವೋ ವೈ ದೇ॒ವತ॑ಯಾ॒ ಯೂಪ॒-ಸ್ಸ್ವಯೈ॒ವೈನ॑-ನ್ದೇ॒ವತ॑ಯಾ ಕಲ್ಪಯತಿ॒ ದ್ವಾಭ್ಯಾ᳚-ಙ್ಕಲ್ಪಯತಿ ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ॒ ಯ-ಙ್ಕಾ॒ಮಯೇ॑ತ॒ ತೇಜ॑ಸೈನ-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ವ್ಯ॑ರ್ಧಯೇಯ॒-ಮಿತ್ಯ॑ಗ್ನಿ॒ಷ್ಠಾ-ನ್ತಸ್ಯಾಶ್ರಿ॑-ಮಾಹವ॒ನೀಯಾ॑ದಿ॒ತ್ಥಂ-ವೇಁ॒ತ್ಥಂ-ವಾಁ-ಽತಿ॑ ನಾವಯೇ॒-ತ್ತೇಜ॑ಸೈ॒ವೈನ॑-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ವ್ಯ॑ರ್ಧಯತಿ॒ ಯ-ಙ್ಕಾ॒ಮಯೇ॑ತ॒ ತೇಜ॑ಸೈನ-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ಸಮ॑ರ್ಧಯೇಯ॒ಮಿ- [ಸಮ॑ರ್ಧಯೇಯ॒ಮಿತಿ॑, ಅ॒ಗ್ನಿ॒ಷ್ಠಾ-] 22

-ತ್ಯ॑ಗ್ನಿ॒ಷ್ಠಾ-ನ್ತಸ್ಯಾಶ್ರಿ॑ಮಾಹವ॒ನೀಯೇ॑ನ॒ ಸ-ಮ್ಮಿ॑ನುಯಾ॒-ತ್ತೇಜ॑ಸೈ॒ವೈನ॑-ನ್ದೇ॒ವತಾ॑ಭಿರಿನ್ದ್ರಿ॒ಯೇಣ॒ ಸಮ॑ರ್ಧಯತಿ ಬ್ರಹ್ಮ॒ವನಿ॑-ನ್ತ್ವಾ ಕ್ಷತ್ರ॒ವನಿ॒ಮಿತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಪರಿ॑ ವ್ಯಯ॒ತ್ಯೂರ್ಗ್ವೈ ರ॑ಶ॒ನಾ ಯಜ॑ಮಾನೇನ॒ ಯೂಪ॒-ಸ್ಸಮ್ಮಿ॑ತೋ॒ ಯಜ॑ಮಾನಮೇ॒ವೋರ್ಜಾ ಸಮ॑ರ್ಧಯತಿ ನಾಭಿದ॒ಘ್ನೇ ಪರಿ॑ ವ್ಯಯತಿ ನಾಭಿದ॒ಘ್ನ ಏ॒ವಾಸ್ಮಾ॒ ಊರ್ಜ॑-ನ್ದಧಾತಿ॒ ತಸ್ಮಾ᳚ನ್ನಾಭಿದ॒ಘ್ನ ಊ॒ರ್ಜಾ ಭು॑ಞ್ಜತೇ॒ ಯ-ಙ್ಕಾ॒ಮಯೇ॑ತೋ॒ರ್ಜೈನಂ॒- [ಯ-ಙ್ಕಾ॒ಮಯೇ॑ತೋ॒ರ್ಜೈನ᳚ಮ್, ವ್ಯ॑ರ್ಧಯೇಯ॒-] 23

ಁವ್ಯ॑ರ್ಧಯೇಯ॒-ಮಿತ್ಯೂ॒ರ್ಧ್ವಾಂ-ವಾಁ॒ ತಸ್ಯಾವಾ॑ಚೀಂ॒-ವಾಁ-ಽವೋ॑ಹೇದೂ॒ರ್ಜೈವೈನಂ॒-ವ್ಯಁ॑ರ್ಧಯತಿ॒ ಯದಿ॑ ಕಾ॒ಮಯೇ॑ತ॒ ವರ್ಷು॑ಕಃ ಪ॒ರ್ಜನ್ಯಃ॑ ಸ್ಯಾ॒ದಿತ್ಯ-ವಾ॑ಚೀ॒ಮವೋ॑ಹೇ॒-ದ್ವೃಷ್ಟಿ॑ಮೇ॒ವ ನಿ ಯ॑ಚ್ಛತಿ॒ ಯದಿ॑ ಕಾ॒ಮಯೇ॒ತಾವ॑ರ್ಷುಕ-ಸ್ಸ್ಯಾ॒ದಿತ್ಯೂ॒ರ್ಧ್ವಾಮುದೂ॑ಹೇ॒-ದ್ವೃಷ್ಟಿ॑ಮೇ॒ವೋ-ದ್ಯ॑ಚ್ಛತಿ ಪಿತೃ॒ಣಾ-ನ್ನಿಖಾ॑ತ-ಮ್ಮನು॒ಷ್ಯಾ॑ಣಾಮೂ॒ರ್ಧ್ವ-ನ್ನಿಖಾ॑ತಾ॒ದಾ ರ॑ಶ॒ನಾಯಾ॒ ಓಷ॑ಧೀನಾಗ್ಂ ರಶ॒ನಾ ವಿಶ್ವೇ॑ಷಾ- [ವಿಶ್ವೇ॑ಷಾಮ್, ದೇ॒ವಾನಾ॑-] 24

-ನ್ದೇ॒ವಾನಾ॑-ಮೂ॒ರ್ಧ್ವಗ್ಂ ರ॑ಶ॒ನಾಯಾ॒ ಆ ಚ॒ಷಾಲಾ॒ದಿನ್ದ್ರ॑ಸ್ಯ ಚ॒ಷಾಲಗ್ಂ॑ ಸಾ॒ದ್ಧ್ಯಾನಾ॒ಮತಿ॑ರಿಕ್ತ॒ಗ್ಂ॒ ಸ ವಾ ಏ॒ಷ ಸ॑ರ್ವದೇವ॒ತ್ಯೋ॑ ಯದ್ಯೂಪೋ॒ ಯದ್ಯೂಪ॑-ಮ್ಮಿ॒ನೋತಿ॒ ಸರ್ವಾ॑ ಏ॒ವ ದೇ॒ವತಾಃ᳚ ಪ್ರೀಣಾತಿ ಯ॒ಜ್ಞೇನ॒ ವೈ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ತೇ॑-ಽಮನ್ಯನ್ತ ಮನು॒ಷ್ಯಾ॑ ನೋ॒-ಽನ್ವಾಭ॑ವಿಷ್ಯ॒ನ್ತೀತಿ॒ ತೇ ಯೂಪೇ॑ನ ಯೋಪಯಿ॒ತ್ವಾ ಸು॑ವ॒ರ್ಗಂ ಁಲೋ॒ಕಮಾ॑ಯ॒-ನ್ತಮೃಷ॑ಯೋ॒ ಯೂಪೇ॑ನೈ॒ವಾನು॒ ಪ್ರಾಜಾ॑ನ॒-ನ್ತ-ದ್ಯೂಪ॑ಸ್ಯ ಯೂಪ॒ತ್ವಂ- [ಯೂಪ॒ತ್ವಮ್, ಯ-ದ್ಯೂಪ॑-] 25

ಁಯ-ದ್ಯೂಪ॑-ಮ್ಮಿ॒ನೋತಿ॑ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಪ್ರಜ್ಞಾ᳚ತ್ಯೈ ಪು॒ರಸ್ತಾ᳚-ನ್ಮಿನೋತಿ ಪು॒ರಸ್ತಾ॒ದ್ಧಿ ಯ॒ಜ್ಞಸ್ಯ॑ ಪ್ರಜ್ಞಾ॒ಯತೇ ಪ್ರ॑ಜ್ಞಾತ॒ಗ್ಂ॒ ಹಿ ತ-ದ್ಯದತಿ॑ಪನ್ನ ಆ॒ಹುರಿ॒ದ-ಙ್ಕಾ॒ರ್ಯ॑ಮಾಸೀ॒ದಿತಿ॑ ಸಾ॒ದ್ಧ್ಯಾ ವೈ ದೇ॒ವಾ ಯ॒ಜ್ಞಮತ್ಯ॑ಮನ್ಯನ್ತ॒ ತಾನ್. ಯ॒ಜ್ಞೋ ನಾಸ್ಪೃ॑ಶ॒-ತ್ತಾನ್. ಯ-ದ್ಯ॒ಜ್ಞಸ್ಯಾತಿ॑ರಿಕ್ತ॒ಮಾಸೀ॒-ತ್ತದ॑ಸ್ಪೃಶ॒ದತಿ॑ರಿಕ್ತಂ॒-ವಾಁ ಏ॒ತ-ದ್ಯ॒ಜ್ಞಸ್ಯ॒ ಯದ॒ಗ್ನಾವ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ॒ಹರ॒ತ್ಯತಿ॑ರಿಕ್ತಮೇ॒ತ- [ಪ್ರ॒ಹರ॒ತ್ಯತಿ॑ರಿಕ್ತಮೇ॒ತತ್, ಯೂಪ॑ಸ್ಯ॒] 26

-ದ್ಯೂಪ॑ಸ್ಯ॒ ಯದೂ॒ರ್ಧ್ವ-ಞ್ಚ॒ಷಾಲಾ॒-ತ್ತೇಷಾ॒-ನ್ತ-ದ್ಭಾ॑ಗ॒ಧೇಯ॒-ನ್ತಾನೇ॒ವ ತೇನ॑ ಪ್ರೀಣಾತಿ ದೇ॒ವಾ ವೈ ಸಗ್ಗ್ಸ್ಥಿ॑ತೇ॒ ಸೋಮೇ॒ ಪ್ರ ಸ್ರುಚೋ-ಽಹ॑ರ॒-ನ್ಪ್ರ ಯೂಪ॒-ನ್ತೇ॑-ಽಮನ್ಯನ್ತ ಯಜ್ಞವೇಶ॒ಸಂ-ವಾಁ ಇ॒ದ-ಙ್ಕು॑ರ್ಮ॒ ಇತಿ॒ ತೇ ಪ್ರ॑ಸ್ತ॒ರಗ್ಗ್ ಸ್ರು॒ಚಾ-ನ್ನಿ॒ಷ್ಕ್ರಯ॑ಣ-ಮಪಶ್ಯ॒ನ್-ಥ್ಸ್ವರುಂ॒-ಯೂಁಪ॑ಸ್ಯ॒ ಸಗ್ಗ್ಸ್ಥಿ॑ತೇ॒ ಸೋಮೇ॒ ಪ್ರ ಪ್ರ॑ಸ್ತ॒ರಗ್ಂ ಹರ॑ತಿ ಜು॒ಹೋತಿ॒ ಸ್ವರು॒ಮಯ॑ಜ್ಞವೇಶಸಾಯ ॥ 27 ॥

(ದ॒ಧಾ॒ತಿ॒ - ಪ್ರತ್ಯೃ॒ - ಚಾ - ಸಮ॑ರ್ಧಯೇಯ॒ಮಿತ್ಯೂ॒ - ರ್ಜೈನಂ॒ - ಁವಿಶ್ವೇ॑ಷಾಂ - ಁಯೂಪ॒ತ್ವ - ಮತಿ॑ರಿಕ್ತಮೇ॒ತ-ದ್- ದ್ವಿಚ॑ತ್ವಾರಿಗ್ಂಶಚ್ಚ) (ಅ. 4)

ಸಾ॒ದ್ಧ್ಯಾ ವೈ ದೇ॒ವಾ ಅ॒ಸ್ಮಿಁಲ್ಲೋ॒ಕ ಆ॑ಸ॒-ನ್ನಾನ್ಯ-ತ್ಕಿ॑-ಞ್ಚ॒ನ ಮಿ॒ಷ-ತ್ತೇ᳚-ಽಗ್ನಿಮೇ॒ವಾಗ್ನಯೇ॒ ಮೇಧಾ॒ಯಾ ಽಲ॑ಭನ್ತ॒ ನ ಹ್ಯ॑ನ್ಯದಾ॑ಲ॒ಭ್ಯಂ॑-ಮವಿ॑ನ್ದ॒-ನ್ತತೋ॒ ವಾ ಇ॒ಮಾಃ ಪ್ರ॒ಜಾಃ ಪ್ರಾಜಾ॑ಯನ್ತ॒ ಯದ॒ಗ್ನಾವ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ॒ಹರ॑ತಿ ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ರು॒ದ್ರೋ ವಾ ಏ॒ಷ ಯದ॒ಗ್ನಿರ್ಯಜ॑ಮಾನಃ ಪ॒ಶುರ್ಯ-ತ್ಪ॒ಶುಮಾ॒ಲಭ್ಯಾ॒ಗ್ನಿ-ಮ್ಮನ್ಥೇ᳚-ದ್ರು॒ದ್ರಾಯ॒ ಯಜ॑ಮಾನ॒- [ಯಜ॑ಮಾನಮ್, ಅಪಿ॑ ದದ್ಧ್ಯಾ-] 28

-ಮಪಿ॑ ದದ್ಧ್ಯಾ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ದಥೋ॒ ಖಲ್ವಾ॑ಹುರ॒ಗ್ನಿ-ಸ್ಸರ್ವಾ॑ ದೇ॒ವತಾ॑ ಹ॒ವಿರೇ॒ತದ್ಯ-ತ್ಪ॒ಶುರಿತಿ॒ ಯ-ತ್ಪ॒ಶುಮಾ॒ಲಭ್ಯಾ॒ಗ್ನಿ-ಮ್ಮನ್ಥ॑ತಿ ಹ॒ವ್ಯಾಯೈ॒ವಾ-ಽಽಸ॑ನ್ನಾಯ॒ ಸರ್ವಾ॑ ದೇ॒ವತಾ॑ ಜನಯ-ತ್ಯುಪಾ॒ಕೃತ್ಯೈ॒ವ ಮನ್ಥ್ಯ॒-ಸ್ತನ್ನೇವಾ-ಽಽಲ॑ಬ್ಧ॒-ನ್ನೇವಾನಾ॑ಲಬ್ಧ-ಮ॒ಗ್ನೇ-ರ್ಜ॒ನಿತ್ರ॑-ಮ॒ಸೀತ್ಯಾ॑ಹಾ॒ಗ್ನೇರ್ಹ್ಯೇ॑ತ-ಜ್ಜ॒ನಿತ್ರಂ॒-ವೃಁಷ॑ಣೌ ಸ್ಥ॒ ಇತ್ಯಾ॑ಹ॒ ವೃಷ॑ಣೌ॒ [ವೃಷ॑ಣೌ, ಹ್ಯೇ॑ತಾ-] 29

ಹ್ಯೇ॑ತಾ-ವು॒ರ್ವಶ್ಯ॑ಸ್ಯಾ॒ಯು-ರ॒ಸೀತ್ಯಾ॑ಹ ಮಿಥುನ॒ತ್ವಾಯ॑ ಘೃ॒ತೇನಾ॒ಕ್ತೇ ವೃಷ॑ಣ-ನ್ದಧಾಥಾ॒ಮಿತ್ಯಾ॑ಹ॒ ವೃಷ॑ಣ॒ಗ್ಗ್॒ ಹ್ಯೇ॑ತೇ ದಧಾ॑ತೇ॒ ಯೇ ಅ॒ಗ್ನಿ-ಙ್ಗಾ॑ಯ॒ತ್ರ-ಞ್ಛನ್ದೋ-ಽನು॒ ಪ್ರ ಜಾ॑ಯ॒ಸ್ವೇತ್ಯಾ॑ಹ॒ ಛನ್ದೋ॑ಭಿರೇ॒ವೈನ॒-ಮ್ಪ್ರ ಜ॑ನಯತ್ಯ॒ಗ್ನಯೇ॑ ಮ॒ಥ್ಯಮಾ॑ನಾ॒ಯಾನು॑ ಬ್ರೂ॒ಹೀತ್ಯಾ॑ಹ ಸಾವಿ॒ತ್ರೀಮೃಚ॒ಮನ್ವಾ॑ಹ ಸವಿ॒ತೃಪ್ರ॑ಸೂತ ಏ॒ವೈನ॑-ಮ್ಮನ್ಥತಿ ಜಾ॒ತಾಯಾನು॑ ಬ್ರೂಹಿ [ಬ್ರೂಹಿ, ಪ್ರ॒ಹ್ರಿ॒ಯಮಾ॑ಣಾ॒ಯಾ-ಽನು॑] 30

ಪ್ರಹ್ರಿ॒ಯಮಾ॑ಣಾ॒ಯಾ-ಽನು॑ ಬ್ರೂ॒ಹೀತ್ಯಾ॑ಹ॒ ಕಾಣ್ಡೇ॑ಕಾಣ್ಡ ಏ॒ವೈನ॑-ಙ್ಕ್ರಿ॒ಯಮಾ॑ಣೇ॒ ಸಮ॑ರ್ಧಯತಿ ಗಾಯ॒ತ್ರೀ-ಸ್ಸರ್ವಾ॒ ಅನ್ವಾ॑ಹ ಗಾಯ॒ತ್ರಛ॑ನ್ದಾ॒ ವಾ ಅ॒ಗ್ನಿ-ಸ್ಸ್ವೇನೈ॒ವೈನ॒-ಞ್ಛನ್ದ॑ಸಾ॒ ಸಮ॑ರ್ಧಯತ್ಯ॒ಗ್ನಿಃ ಪು॒ರಾ ಭವ॑ತ್ಯ॒ಗ್ನಿ-ಮ್ಮ॑ಥಿ॒ತ್ವಾ ಪ್ರ ಹ॑ರತಿ॒ ತೌ ಸ॒ಭಂವಁ॑ನ್ತೌ॒ ಯಜ॑ಮಾನಮ॒ಭಿ ಸ-ಮ್ಭ॑ವತೋ॒ ಭವ॑ತ-ನ್ನ॒-ಸ್ಸಮ॑ನಸಾ॒ವಿತ್ಯಾ॑ಹ॒ ಶಾನ್ತ್ಯೈ᳚ ಪ್ರ॒ಹೃತ್ಯ॑ ಜುಹೋತಿ ಜಾ॒ತಾಯೈ॒ವಾಸ್ಮಾ॒ ಅನ್ನ॒ಮಪಿ॑ ದಧಾ॒ತ್ಯಾಜ್ಯೇ॑ನ ಜುಹೋತ್ಯೇ॒ತದ್ವಾ ಅ॒ಗ್ನೇಃ ಪ್ರಿ॒ಯ-ನ್ಧಾಮ॒ ಯದಾಜ್ಯ॑-ಮ್ಪ್ರಿ॒ಯೇಣೈ॒ವೈನ॒-ನ್ಧಾಮ್ನಾ॒ ಸಮ॑ರ್ಧಯ॒ತ್ಯಥೋ॒ ತೇಜ॑ಸಾ ॥ 31 ॥

(ಯಜ॑ಮಾನ-ಮಾಹ॒ ವೃಷ॑ಣೌ-ಜಾ॒ತಾಯಾನು॑ ಬ್ರೂ॒ಹ್ಯಾ-ಪ್ಯ॒ -ಷ್ಟಾದ॑ಶ ಚ) (ಅ. 5)

ಇ॒ಷೇ ತ್ವೇತಿ॑ ಬ॒ರ್॒ಹಿರಾ ದ॑ತ್ತ ಇ॒ಚ್ಛತ॑ ಇವ॒ ಹ್ಯೇ॑ಷ ಯೋ ಯಜ॑ತ ಉಪ॒ವೀರ॒ಸೀತ್ಯಾ॒ಹೋಪ॒ ಹ್ಯೇ॑ನಾನಾಕ॒ರೋತ್ಯುಪೋ॑ ದೇ॒ವಾ-ನ್ದೈವೀ॒ರ್ವಿಶಃ॒ ಪ್ರಾಗು॒ರಿತ್ಯಾ॑ಹ॒ ದೈವೀ॒ರ್ಹ್ಯೇ॑ತಾ ವಿಶಃ॑ ಸ॒ತೀರ್ದೇ॒ವಾನು॑ಪ॒ಯನ್ತಿ॒ ವಹ್ನೀ॑ರು॒ಶಿಜ॒ ಇತ್ಯಾ॑ಹ॒ರ್ತ್ವಿಜೋ॒ ವೈ ವಹ್ನ॑ಯ ಉ॒ಶಿಜ॒-ಸ್ತಸ್ಮಾ॑ದೇ॒ವಮಾ॑ಹ॒ ಬೃಹ॑ಸ್ಪತೇ ಧಾ॒ರಯಾ॒ ವಸೂ॒ನೀ- [ವಸೂ॒ನೀತಿ॑, ಆ॒ಹ॒ ಬ್ರಹ್ಮ॒ ವೈ] 32

-ತ್ಯಾ॑ಹ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ಹ॒ವ್ಯಾ ತೇ᳚ ಸ್ವದನ್ತಾ॒ಮಿತ್ಯಾ॑ಹ ಸ್ವ॒ದಯ॑ತ್ಯೇ॒ವೈನಾ॒-ನ್ದೇವ॑ ತ್ವಷ್ಟ॒ರ್ವಸು॑ ರ॒ಣ್ವೇತ್ಯಾ॑ಹ॒ ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಗ್ಂ॑ ರೂಪ॒ಕೃ-ದ್ರೂ॒ಪಮೇ॒ವ ಪ॒ಶುಷು॑ ದಧಾತಿ॒ ರೇವ॑ತೀ॒ ರಮ॑ದ್ಧ್ವ॒ಮಿತ್ಯಾ॑ಹ ಪ॒ಶವೋ॒ ವೈ ರೇ॒ವತೀಃ᳚ ಪ॒ಶೂನೇ॒ವಾಸ್ಮೈ॑ ರಮಯತಿ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॑ [ಇತಿ॑, ರ॒ಶ॒ನಾಮಾ ದ॑ತ್ತೇ॒] 33

ರಶ॒ನಾಮಾ ದ॑ತ್ತೇ॒ ಪ್ರಸೂ᳚ತ್ಯಾ ಅ॒ಶ್ವಿನೋ᳚ರ್ಬಾ॒ಹುಭ್ಯಾ॒-ಮಿತ್ಯಾ॑ಹಾ॒ಶ್ವಿನೌ॒ ಹಿ ದೇ॒ವಾನಾ॑ಮದ್ಧ್ವ॒ರ್ಯೂ ಆಸ್ತಾ᳚-ಮ್ಪೂ॒ಷ್ಣೋ ಹಸ್ತಾ᳚ಭ್ಯಾ॒ಮಿತ್ಯಾ॑ಹ॒ ಯತ್ಯಾ॑ ಋ॒ತಸ್ಯ॑ ತ್ವಾ ದೇವಹವಿಃ॒ ಪಾಶೇ॒ನಾ-ಽಽ ರ॑ಭ॒ ಇತ್ಯಾ॑ಹ ಸ॒ತ್ಯಂ-ವಾಁ ಋ॒ತಗ್ಂ ಸ॒ತ್ಯೇನೈ॒ವೈನ॑ಮೃ॒ತೇನಾ ಽಽರ॑ಭತೇ ಽಕ್ಷ್ಣ॒ಯಾ ಪರಿ॑ ಹರತಿ॒ ವದ್ಧ್ಯ॒ಗ್ಂ॒ ಹಿ ಪ್ರ॒ತ್ಯಞ್ಚ॑-ಮ್ಪ್ರತಿ ಮು॒ಞ್ಚನ್ತಿ॒ ವ್ಯಾವೃ॑ತ್ತ್ಯೈ॒ ಧರ್ಷಾ॒ ಮಾನು॑ಷಾ॒ನಿತಿ॒ ನಿ ಯು॑ನಕ್ತಿ॒ ಧೃತ್ಯಾ॑ ಅ॒ದ್ಭ್ಯ- [ಅ॒ದ್ಭ್ಯಃ, ತ್ವೌಷ॑ಧೀಭ್ಯಃ॒] 34

-ಸ್ತ್ವೌಷ॑ಧೀಭ್ಯಃ॒ ಪ್ರೋಕ್ಷಾ॒ಮೀತ್ಯಾ॑ಹಾ॒ದ್ಭ್ಯೋ ಹ್ಯೇ॑ಷ ಓಷ॑ಧೀಭ್ಯ-ಸ್ಸ॒ಭಂವಁ॑ತಿ॒ ಯ-ತ್ಪ॒ಶುರ॒ಪಾ-ಮ್ಪೇ॒ರುರ॒ಸೀತ್ಯಾ॑ಹೈ॒ಷ ಹ್ಯ॑ಪಾ-ಮ್ಪಾ॒ತಾ ಯೋ ಮೇಧಾ॑ಯಾ-ಽಽ ರ॒ಭ್ಯತೇ᳚ ಸ್ವಾ॒ತ್ತ-ಞ್ಚಿ॒-ಥ್ಸದೇ॑ವಗ್ಂ ಹ॒ವ್ಯಮಾಪೋ॑ ದೇವೀ॒-ಸ್ಸ್ವದ॑ತೈನ॒ಮಿತ್ಯಾ॑ಹ ಸ್ವ॒ದಯ॑ತ್ಯೇ॒ವೈನ॑-ಮು॒ಪರಿ॑ಷ್ಟಾ॒-ತ್ಪ್ರೋಕ್ಷ॑ತ್ಯು॒ಪರಿ॑ಷ್ಟಾದೇ॒ವೈನ॒-ಮ್ಮೇದ್ಧ್ಯ॑-ಙ್ಕರೋತಿ ಪಾ॒ಯಯ॑ತ್ಯನ್ತರ॒ತ ಏ॒ವೈನ॒-ಮ್ಮೇದ್ಧ್ಯ॑-ಙ್ಕರೋತ್ಯ॒ಧಸ್ತಾ॒ದುಪೋ᳚ಕ್ಷತಿ ಸ॒ರ್ವತ॑ ಏ॒ವೈನ॒-ಮ್ಮೇದ್ಧ್ಯ॑-ಙ್ಕರೋತಿ ॥ 35 ॥

(ವಸೂ॒ನೀತಿ॑-ಪ್ರಸ॒ವ ಇತ್ಯ॒-ದ್ಭ್ಯೋ᳚-ಽನ್ತರ॒ತ ಏ॒ವೈನಂ॒ - ದಶ॑ ಚ) (ಅ. 6)

ಅ॒ಗ್ನಿನಾ॒ ವೈ ಹೋತ್ರಾ॑ ದೇ॒ವಾ ಅಸು॑ರಾ-ನ॒ಭ್ಯ॑ಭವ-ನ್ನ॒ಗ್ನಯೇ॑ ಸಮಿ॒ದ್ಧ್ಯಮಾ॑ನಾ॒ಯಾನು॑ ಬ್ರೂ॒ಹೀತ್ಯಾ॑ಹ॒ ಭ್ರಾತೃ॑ವ್ಯಾಭಿಭೂತ್ಯೈ ಸ॒ಪ್ತದ॑ಶ ಸಾಮಿಧೇ॒ನೀರನ್ವಾ॑ಹ ಸಪ್ತದ॒ಶಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯೈ॑ ಸ॒ಪ್ತದ॒ಶಾನ್ವಾ॑ಹ॒ ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವ॒-ಸ್ಸ ಸಂ॑ವಁಥ್ಸ॒ರ-ಸ್ಸಂ॑ವಁಥ್ಸ॒ರ-ಮ್ಪ್ರ॒ಜಾ ಅನು॒ ಪ್ರಜಾ॑ಯನ್ತೇ ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ ದೇ॒ವಾ ವೈ ಸಾ॑ಮಿಧೇ॒ನೀರ॒ನೂಚ್ಯ॑ ಯ॒ಜ್ಞ-ನ್ನಾನ್ವ॑ಪಶ್ಯ॒ನ್-ಥ್ಸ ಪ್ರ॒ಜಾಪ॑ತಿ-ಸ್ತೂ॒ಷ್ಣೀ-ಮಾ॑ಘಾ॒ರ- [-ಮಾ॑ಘಾ॒ರಮ್, ಆ ಽಘಾ॑ರಯ॒-ತ್ತತೋ॒ ವೈ] 36

-ಮಾ ಽಘಾ॑ರಯ॒-ತ್ತತೋ॒ ವೈ ದೇ॒ವಾ ಯ॒ಜ್ಞಮನ್ವ॑ಪಶ್ಯ॒ನ್॒. ಯ-ತ್ತೂ॒ಷ್ಣೀ-ಮಾ॑ಘಾ॒ರ-ಮಾ॑ಘಾ॒ರಯ॑ತಿ ಯ॒ಜ್ಞಸ್ಯಾನು॑ಖ್ಯಾತ್ಯಾ॒ ಅಸು॑ರೇಷು॒ ವೈ ಯ॒ಜ್ಞ ಆ॑ಸೀ॒-ತ್ತ-ನ್ದೇ॒ವಾಸ್ತೂ᳚ಷ್ಣೀಗ್ಂ ಹೋ॒ಮೇನಾ॑ವೃಞ್ಜತ॒ ಯ-ತ್ತೂ॒ಷ್ಣೀ-ಮಾ॑ಘಾ॒ರ-ಮಾ॑ಘಾ॒ರಯ॑ತಿ॒ ಭ್ರಾತೃ॑ವ್ಯಸ್ಯೈ॒ ವ ತ-ದ್ಯ॒ಜ್ಞಂ-ವೃಁ॑ಙ್ಕ್ತೇ ಪರಿ॒ಧೀ॑ನ್-ಥ್ಸ-ಮ್ಮಾ᳚ರ್ಷ್ಟಿ ಪು॒ನಾತ್ಯೇ॒ವೈನಾ॒-ನ್ತ್ರಿಸ್ತ್ರಿ॒-ಸ್ಸ-ಮ್ಮಾ᳚ರ್ಷ್ಟಿ॒ ತ್ರ್ಯಾ॑ವೃ॒ದ್ಧಿ ಯ॒ಜ್ಞೋ-ಽಥೋ॒ ರಕ್ಷ॑ಸಾ॒ಮಪ॑ಹತ್ಯೈ॒ ದ್ವಾದ॑ಶ॒ ಸ-ಮ್ಪ॑ದ್ಯನ್ತೇ॒ ದ್ವಾದ॑ಶ॒ [ದ್ವಾದ॑ಶ, ಮಾಸಾ᳚-ಸ್ಸಂವಁಥ್ಸ॒ರ-] 37

ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯೈ॒ ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರೋ᳚-ಽಗ್ನಿ-ಸ್ಸರ್ವಾ॑ ದೇ॒ವತಾ॒ ಯದಾ॑ಘಾ॒ರ-ಮಾ॑ಘಾ॒ರಯ॑ತಿ ಶೀರ್ಷ॒ತ ಏ॒ವ ಯ॒ಜ್ಞಸ್ಯ॒ ಯಜ॑ಮಾನ॒-ಸ್ಸರ್ವಾ॑ ದೇ॒ವತಾ॒ ಅವ॑ ರುನ್ಧೇ॒ ಶಿರೋ॒ ವಾ ಏ॒ತ-ದ್ಯ॒ಜ್ಞಸ್ಯ॒ ಯದಾ॑ಘಾ॒ರ ಆ॒ತ್ಮಾ ಪ॒ಶುರಾ॑ಘಾ॒ರಮಾ॒ಘಾರ್ಯ॑ ಪ॒ಶುಗ್ಂ ಸಮ॑ನಕ್ತ್ಯಾ॒ತ್ಮನ್ನೇ॒ವ ಯ॒ಜ್ಞಸ್ಯ॒ [ಯ॒ಜ್ಞಸ್ಯ॑, ಶಿರಃ॒ ಪ್ರತಿ॑ ದಧಾತಿ॒] 38

ಶಿರಃ॒ ಪ್ರತಿ॑ ದಧಾತಿ॒ ಸ-ನ್ತೇ᳚ ಪ್ರಾ॒ಣೋ ವಾ॒ಯುನಾ॑ ಗಚ್ಛತಾ॒ಮಿತ್ಯಾ॑ಹ ವಾಯುದೇವ॒ತ್ಯೋ॑ ವೈ ಪ್ರಾ॒ಣೋ ವಾ॒ಯಾವೇ॒ವಾಸ್ಯ॑ ಪ್ರಾ॒ಣ-ಞ್ಜು॑ಹೋತಿ॒ ಸಂ-ಯಁಜ॑ತ್ರೈ॒ರಙ್ಗಾ॑ನಿ॒ ಸಂ-ಯಁ॒ಜ್ಞಪ॑ತಿರಾ॒ಶಿಷೇತ್ಯಾ॑ಹ ಯ॒ಜ್ಞಪ॑ತಿಮೇ॒ವಾಸ್ಯಾ॒-ಽಽಶಿಷ॑-ಙ್ಗಮಯತಿ ವಿ॒ಶ್ವರೂ॑ಪೋ॒ ವೈ ತ್ವಾ॒ಷ್ಟ್ರ ಉ॒ಪರಿ॑ಷ್ಟಾ-ತ್ಪ॒ಶುಮ॒ಭ್ಯ॑ವಮೀ॒-ತ್ತಸ್ಮಾ॑-ದು॒ಪರಿ॑ಷ್ಟಾ-ತ್ಪ॒ಶೋರ್ನಾವ॑ ದ್ಯನ್ತಿ॒ ಯದು॒ಪರಿ॑ಷ್ಟಾ-ತ್ಪ॒ಶುಗ್ಂ ಸ॑ಮ॒ನಕ್ತಿ॒ ಮೇದ್ಧ್ಯ॑ಮೇ॒ವೈ- [ಮೇದ್ಧ್ಯ॑ಮೇ॒ವ, ಏ॒ನ॒-ಙ್ಕ॒ರೋ॒ತ್ಯೃ॒ತ್ವಿಜೋ॑] 39

-ನ॑-ಙ್ಕರೋತ್ಯೃ॒ತ್ವಿಜೋ॑ ವೃಣೀತೇ॒ ಛನ್ದಾಗ್॑ಸ್ಯೇ॒ವ ವೃ॑ಣೀತೇ ಸ॒ಪ್ತ ವೃ॑ಣೀತೇ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವಃ॑ ಸ॒ಪ್ತಾ-ಽಽರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑ಸ್ಯು॒ಭಯ॒ಸ್ಯಾ ವ॑ರುದ್ಧ್ಯಾ॒ ಏಕಾ॑ದಶ ಪ್ರಯಾ॒ಜಾನ್. ಯ॑ಜತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತ-ಮ್ಪ್ರ ಯ॑ಜತಿ ವ॒ಪಾಮೇಕಃ॒ ಪರಿ॑ ಶಯ ಆ॒ತ್ಮೈವಾ-ಽಽತ್ಮಾನ॒-ಮ್ಪರಿ॑ ಶಯೇ॒ ವಜ್ರೋ॒ ವೈ ಸ್ವಧಿ॑ತಿ॒ರ್ವಜ್ರೋ॑ ಯೂಪಶಕ॒ಲೋ ಘೃ॒ತ-ಙ್ಖಲು॒ ವೈ ದೇ॒ವಾ ವಜ್ರ॑-ಙ್ಕೃ॒ತ್ವಾ ಸೋಮ॑ಮಘ್ನ-ನ್ಘೃ॒ತೇನಾ॒ಕ್ತೌ ಪ॒ಶು-ನ್ತ್ರಾ॑ಯೇಥಾ॒ಮಿತ್ಯಾ॑ಹ॒ ವಜ್ರೇ॑ಣೈ॒ವೈನಂ॒-ವಁಶೇ॑ ಕೃ॒ತ್ವಾ-ಽಽಲ॑ಭತೇ ॥ 40 ॥

(ಆ॒ಘಾ॒ರಂ - ಪ॑ದ್ಯನ್ತೇ॒ ದ್ವಾದ॑ಶಾ॒ - ಽಽತ್ಮನ್ನೇ॒ವ ಯ॒ಜ್ಞಸ್ಯ॒ - ಮೇಧ್ಯ॑ಮೇ॒ವ - ಖಲು॒ ವಾ - ಅ॒ಷ್ಟಾದ॑ಶ ಚ) (ಅ. 7)

ಪರ್ಯ॑ಗ್ನಿ ಕರೋತಿ ಸರ್ವ॒ಹುತ॑ಮೇ॒ವೈನ॑-ಙ್ಕರೋ॒ತ್ಯ-ಸ್ಕ॑ನ್ದಾ॒ಯಾ-ಸ್ಕ॑ನ್ನ॒ಗ್ಂ॒ ಹಿ ತ-ದ್ಯ-ದ್ಧು॒ತಸ್ಯ॒ ಸ್ಕನ್ದ॑ತಿ॒ ತ್ರಿಃ ಪರ್ಯ॑ಗ್ನಿ ಕರೋತಿ॒ ತ್ರ್ಯಾ॑ವೃ॒ದ್ಧಿ ಯ॒ಜ್ಞೋ-ಽಥೋ॒ ರಕ್ಷ॑ಸಾ॒ಮಪ॑ಹತ್ಯೈ ಬ್ರಹ್ಮವಾ॒ದಿನೋ॑ ವದನ್ತ್ಯನ್ವಾ॒ರಭ್ಯಃ॑ ಪ॒ಶೂ(3)-ರ್ನಾನ್ವಾ॒ರಭ್ಯಾ(3) ಇತಿ॑ ಮೃ॒ತ್ಯವೇ॒ ವಾ ಏ॒ಷ ನೀ॑ಯತೇ॒ ಯ-ತ್ಪ॒ಶುಸ್ತಂ-ಯಁದ॑ನ್ವಾ॒ರಭೇ॑ತ ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾ॒ದಥೋ॒ ಖಲ್ವಾ॑ಹು-ಸ್ಸುವ॒ರ್ಗಾಯ॒ ವಾ ಏ॒ಷ ಲೋ॒ಕಾಯ॑ ನೀಯತೇ॒ ಯ- [ಯತ್, ಪ॒ಶುರಿತಿ॒] 41

-ತ್ಪ॒ಶುರಿತಿ॒ ಯನ್ನಾನ್ವಾ॒ರಭೇ॑ತ ಸುವ॒ರ್ಗಾಲ್ಲೋ॒ಕಾ-ದ್ಯಜ॑ಮಾನೋ ಹೀಯೇತ ವಪಾ॒ಶ್ರಪ॑ಣೀಭ್ಯಾ-ಮ॒ನ್ವಾರ॑ಭತೇ॒ ತನ್ನೇವಾ॒ನ್ವಾರ॑ಬ್ಧ॒-ನ್ನೇವಾನ॑ನ್ವಾರಬ್ಧ॒ಮುಪ॒ ಪ್ರೇಷ್ಯ॑ ಹೋತರ್ಹ॒ವ್ಯಾ ದೇ॒ವೇಭ್ಯ॒ ಇತ್ಯಾ॑ಹೇಷಿ॒ತಗ್ಂ ಹಿ ಕರ್ಮ॑ ಕ್ರಿ॒ಯತೇ॒ ರೇವ॑ತೀರ್ಯ॒ಜ್ಞಪ॑ತಿ-ಮ್ಪ್ರಿಯ॒ಧಾ ಽಽವಿ॑ಶ॒ತೇತ್ಯಾ॑ಹ ಯಥಾಯ॒ಜುರೇ॒ವೈತದ॒ಗ್ನಿನಾ॑ ಪು॒ರಸ್ತಾ॑ದೇತಿ॒ ರಕ್ಷ॑ಸಾ॒ಮಪ॑ಹತ್ಯೈ ಪೃಥಿ॒ವ್ಯಾ-ಸ್ಸ॒ಪೃಞ್ಚಃ॑ ಪಾ॒ಹೀತಿ॑ ಬ॒ರ್॒ಹಿ- [ಬ॒ರ್॒ಹಿಃ, ಉಪಾ᳚-ಽಸ್ಯ॒ತ್ಯ-ಸ್ಕ॑ನ್ದಾ॒ಯಾ-] 42

-ರುಪಾ᳚-ಽಸ್ಯ॒ತ್ಯ-ಸ್ಕ॑ನ್ದಾ॒ಯಾ-ಸ್ಕ॑ನ್ನ॒ಗ್ಂ॒ ಹಿ ತ-ದ್ಯ-ದ್ಬ॒ರ್॒ಹಿಷಿ॒ ಸ್ಕನ್ದ॒ತ್ಯಥೋ॑ ಬರ್ಹಿ॒ಷದ॑ಮೇ॒ವೈನ॑-ಙ್ಕರೋತಿ॒ ಪರಾಂ॒ಆ ವ॑ರ್ತತೇ-ಽದ್ಧ್ವ॒ರ್ಯುಃ ಪ॒ಶೋ-ಸ್ಸ᳚ಜ್ಞ॒ಮ್ಪ್ಯಮಾ॑ನಾ-ತ್ಪ॒ಶುಭ್ಯ॑ ಏ॒ವ ತನ್ನಿ ಹ್ನು॑ತ ಆ॒ತ್ಮನೋ-ಽನಾ᳚ವ್ರಸ್ಕಾಯ॒ ಗಚ್ಛ॑ತಿ॒ ಶ್ರಿಯ॒-ಮ್ಪ್ರ ಪ॒ಶೂನಾ᳚ಪ್ನೋತಿ॒ ಯ ಏ॒ವಂ-ವೇಁದ॑ ಪ॒ಶ್ಚಾಲ್ಲೋ॑ಕಾ॒ ವಾ ಏ॒ಷಾ ಪ್ರಾಚ್ಯು॒ದಾನೀ॑ಯತೇ॒ ಯ-ತ್ಪತ್ನೀ॒ ನಮ॑ಸ್ತ ಆತಾ॒ನೇತ್ಯಾ॑ಹಾ-ಽಽದಿ॒ತ್ಯಸ್ಯ॒ ವೈ ರ॒ಶ್ಮಯ॑ [ರ॒ಶ್ಮಯಃ॑, ಆ॒ತಾ॒ನಾಸ್ತೇಭ್ಯ॑] 43

ಆತಾ॒ನಾಸ್ತೇಭ್ಯ॑ ಏ॒ವ ನಮ॑ಸ್ಕರೋತ್ಯನ॒ರ್ವಾ ಪ್ರೇಹೀತ್ಯಾ॑ಹ॒ ಭ್ರಾತೃ॑ವ್ಯೋ॒ ವಾ ಅರ್ವಾ॒ ಭ್ರಾತೃ॑ವ್ಯಾಪನುತ್ತ್ಯೈ ಘೃ॒ತಸ್ಯ॑ ಕು॒ಲ್ಯಾಮನು॑ ಸ॒ಹ ಪ್ರ॒ಜಯಾ॑ ಸ॒ಹ ರಾ॒ಯಸ್ಪೋಷೇ॒ಣೇ-ತ್ಯಾ॑ಹಾ॒ ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತ॒ ಆಪೋ॑ ದೇವೀ-ಶ್ಶುದ್ಧಾಯುವ॒ ಇತ್ಯಾ॑ಹ ಯಥಾಯ॒ಜುರೇ॒ವೈತತ್ ॥ 44 ॥

(ಲೋ॒ಕಾಯ॑ ನೀಯತೇ॒ ಯ-ದ್- ಬ॒ರ॒ಃಈ - ರ॒ಶ್ಮಯಃ॑ - ಸ॒ಪ್ತತ್ರಿಗ್ಂ॑ಶಚ್ಚ) (ಅ. 8)

ಪ॒ಶೋರ್ವಾ ಆಲ॑ಬ್ಧಸ್ಯ ಪ್ರಾ॒ಣಾಞ್ಛುಗೃ॑ಚ್ಛತಿ॒ ವಾಕ್ತ॒ ಆ ಪ್ಯಾ॑ಯತಾ-ಮ್ಪ್ರಾ॒ಣಸ್ತ॒ ಆ ಪ್ಯಾ॑ಯತಾ॒ಮಿತ್ಯಾ॑ಹ ಪ್ರಾ॒ಣೇಭ್ಯ॑ ಏ॒ವಾಸ್ಯ॒ ಶುಚಗ್ಂ॑ ಶಮಯತಿ॒ ಸಾ ಪ್ರಾ॒ಣೇಭ್ಯೋ-ಽಧಿ॑ ಪೃಥಿ॒ವೀಗ್ಂ ಶು-ಕ್ಪ್ರ ವಿ॑ಶತಿ॒ ಶಮಹೋ᳚ಭ್ಯಾ॒ಮಿತಿ॒ ನಿ ನ॑ಯತ್ಯಹೋರಾ॒ತ್ರಾಭ್ಯಾ॑ಮೇ॒ವ ಪೃ॑ಥಿ॒ವ್ಯೈ ಶುಚಗ್ಂ॑ ಶಮಯ॒ತ್ಯೋಷ॑ಧೇ॒ ತ್ರಾ॑ಯಸ್ವೈನ॒ಗ್ಗ್॒ ಸ್ವಧಿ॑ತೇ॒ ಮೈನಗ್ಂ॑ ಹಿಗ್ಂಸೀ॒ರಿತ್ಯಾ॑ಹ॒ ವಜ್ರೋ॒ ವೈ ಸ್ವಧಿ॑ತಿ॒- [ಸ್ವಧಿ॑ತಿಃ, ಶಾನ್ತ್ಯೈ॑ ಪಾರ್ಶ್ವ॒ತ] 45

-ಶ್ಶಾನ್ತ್ಯೈ॑ ಪಾರ್ಶ್ವ॒ತ ಆ ಚ್ಛ್ಯ॑ತಿ ಮದ್ಧ್ಯ॒ತೋ ಹಿ ಮ॑ನು॒ಷ್ಯಾ॑ ಆ॒ ಚ್ಛ್ಯನ್ತಿ॑ ತಿರ॒ಶ್ಚೀನ॒ಮಾ ಚ್ಛ್ಯ॑ತ್ಯನೂ॒ಚೀನ॒ಗ್ಂ॒ ಹಿ ಮ॑ನು॒ಷ್ಯಾ॑ ಆ॒ಚ್ಛ್ಯನ್ತಿ॒ ವ್ಯಾವೃ॑ತ್ತ್ಯೈ॒ ರಕ್ಷ॑ಸಾ-ಮ್ಭಾ॒ಗೋ॑-ಽಸೀತಿ॑ ಸ್ಥವಿಮ॒ತೋ ಬ॒ರ್॒ಹಿರ॒ಕ್ತ್ವಾ-ಽಪಾ᳚ಸ್ಯತ್ಯ॒ಸ್ನೈವ ರಕ್ಷಾಗ್ಂ॑ಸಿ ನಿ॒ರವ॑ದಯತ ಇ॒ದಮ॒ಹಗ್ಂ ರಕ್ಷೋ॑-ಽಧ॒ಮ-ನ್ತಮೋ॑ ನಯಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇತ್ಯಾ॑ಹ॒ ದ್ವೌ ವಾವ ಪುರು॑ಷೌ॒ ಯ-ಞ್ಚೈ॒ವ [ ] 46

ದ್ವೇಷ್ಟಿ॒ ಯಶ್ಚೈ॑ನ॒-ನ್ದ್ವೇಷ್ಟಿ॒ ತಾವು॒ಭಾವ॑ಧ॒ಮ-ನ್ತಮೋ॑ ನಯತೀ॒ಷೇ ತ್ವೇತಿ॑ ವ॒ಪಾಮುತ್ಖಿ॑ದತೀ॒ಚ್ಛತ॑ ಇವ॒ ಹ್ಯೇ॑ಷ ಯೋ ಯಜ॑ತೇ॒ ಯದು॑ಪತೃ॒ನ್ದ್ಯಾ-ದ್ರು॒ದ್ರೋ᳚-ಽಸ್ಯ ಪ॒ಶೂ-ನ್ಘಾತು॑ಕ-ಸ್ಸ್ಯಾ॒-ದ್ಯನ್ನೋಪ॑ತೃ॒ನ್ದ್ಯಾ-ದಯ॑ತಾ ಸ್ಯಾ-ದ॒ನ್ಯಯೋ॑ಪತೃ॒ಣತ್ತ್ಯ॒ನ್ಯಯಾ॒ ನ ಧೃತ್ಯೈ॑ ಘೃ॒ತೇನ॑ ದ್ಯಾವಾಪೃಥಿವೀ॒ ಪ್ರೋರ್ಣ್ವಾ॑ಥಾ॒ಮಿತ್ಯಾ॑ಹ॒ ದ್ಯಾವಾ॑ಪೃಥಿ॒ವೀ ಏ॒ವ ರಸೇ॑ನಾನ॒ಕ್ತ್ಯಚ್ಛಿ॑ನ್ನೋ॒ [ರಸೇ॑ನಾನ॒ಕ್ತ್ಯಚ್ಛಿ॑ನ್ನಃ, ರಾಯಃ॑ ಸು॒ವೀರ॒] 47

ರಾಯಃ॑ ಸು॒ವೀರ॒ ಇತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ॒ ಯ-ದ್ವ॒ಪಾ-ಮು॑ತ್ಖಿ॒ದ-ತ್ಯು॒ರ್ವ॑ನ್ತರಿ॑ಕ್ಷ॒-ಮನ್ವಿ॒ಹೀತ್ಯಾ॑ಹ॒ ಶಾನ್ತ್ಯೈ॒ ಪ್ರ ವಾ ಏ॒ಷೋ᳚-ಽಸ್ಮಾಲ್ಲೋ॒ಕಾಚ್ಚ್ಯ॑ವತೇ॒ ಯಃ ಪ॒ಶು-ಮ್ಮೃ॒ತ್ಯವೇ॑ ನೀ॒ಯಮಾ॑ನಮನ್ವಾ॒ರಭ॑ತೇ ವಪಾ॒ಶ್ರಪ॑ಣೀ॒ ಪುನ॑ರ॒ನ್ವಾರ॑ಭತೇ॒-ಽಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ ತಿಷ್ಠತ್ಯ॒ಗ್ನಿನಾ॑ ಪು॒ರಸ್ತಾ॑ದೇತಿ॒ ರಕ್ಷ॑ಸಾ॒ಮಪ॑ಹತ್ಯಾ॒ ಅಥೋ॑ ದೇ॒ವತಾ॑ ಏ॒ವ ಹ॒ವ್ಯೇನಾ- [ಏ॒ವ ಹ॒ವ್ಯೇನ॑, ಅನ್ವೇ॑ತಿ॒] 48

-ನ್ವೇ॑ತಿ॒ ನಾನ್ತ॒ಮಮಙ್ಗಾ॑ರ॒ಮತಿ॑ ಹರೇ॒-ದ್ಯದ॑ನ್ತ॒ಮಮಙ್ಗಾ॑ರಮತಿ॒ ಹರೇ᳚-ದ್ದೇ॒ವತಾ॒ ಅತಿ॑ ಮನ್ಯೇತ॒ ವಾಯೋ॒ ವೀಹಿ॑ ಸ್ತೋ॒ಕಾನಾ॒ಮಿತ್ಯಾ॑ಹ॒ ತಸ್ಮಾ॒-ದ್ವಿಭ॑ಕ್ತಾ-ಸ್ಸ್ತೋ॒ಕಾ ಅವ॑ ಪದ್ಯ॒ನ್ತೇ-ಽಗ್ರಂ॒-ವಾಁ ಏ॒ತ-ತ್ಪ॑ಶೂ॒ನಾಂ-ಯಁ-ದ್ವ॒ಪಾ-ಽಗ್ರ॒ಮೋಷ॑ಧೀನಾ-ಮ್ಬ॒ರ್॒ಹಿರಗ್ರೇ॑ಣೈ॒ವಾಗ್ರ॒ಗ್ಂ॒ ಸಮ॑ರ್ಧಯ॒ತ್ಯಥೋ॒ ಓಷ॑ಧೀಷ್ವೇ॒ವ ಪ॒ಶೂ-ನ್ಪ್ರತಿ॑ಷ್ಠಾಪಯತಿ॒ ಸ್ವಾಹಾ॑ಕೃತೀಭ್ಯಃ॒ ಪ್ರೇಷ್ಯೇತ್ಯಾ॑ಹ [ ] 49

ಯ॒ಜ್ಞಸ್ಯ॒ ಸಮಿ॑ಷ್ಟ್ಯೈ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಮಾ॒ತ್ಮಾ ವ॒ಪಾ ಪೃ॑ಷದಾ॒ಜ್ಯಮ॑ಭಿ॒ಘಾರ್ಯ॑ ವ॒ಪಾಮ॒ಭಿ ಘಾ॑ರಯತ್ಯಾ॒ತ್ಮನ್ನೇ॒ವ ಪ॑ಶೂ॒ನಾ-ಮ್ಪ್ರಾ॑ಣಾಪಾ॒ನೌ ದ॑ಧಾತಿ॒ ಸ್ವಾಹೋ॒ರ್ಧ್ವನ॑ಭಸ-ಮ್ಮಾರು॒ತ-ಙ್ಗ॑ಚ್ಛತ॒ಮಿತ್ಯಾ॑ಹೋ॒ರ್ಧ್ವನ॑ಭಾ ಹ ಸ್ಮ॒ ವೈ ಮಾ॑ರು॒ತೋ ದೇ॒ವಾನಾಂ᳚-ವಁಪಾ॒ಶ್ರಪ॑ಣೀ॒ ಪ್ರ ಹ॑ರತಿ॒ ತೇನೈ॒ವೈನೇ॒ ಪ್ರ ಹ॑ರತಿ॒ ವಿಷೂ॑ಚೀ॒ ಪ್ರ ಹ॑ರತಿ॒ ತಸ್ಮಾ॒-ದ್ವಿಷ್ವ॑ಞ್ಚೌ ಪ್ರಾಣಾಪಾ॒ನೌ ॥ 50 ॥

(ಸ್ವಧಿ॑ತಿ - ಶ್ಚೈ॒ವಾ - ಚ್ಛಿ॑ನ್ನೋ - ಹ॒ವ್ಯೇನೇ॒ - ಷ್ಯೇತ್ಯಾ॑ಹ॒ - ಷಟ್ಚ॑ತ್ವಾರಿಗ್ಂಶಚ್ಚ) (ಅ. 9)

ಪ॒ಶುಮಾ॒ಲಭ್ಯ॑ ಪುರೋ॒ಡಾಶ॒-ನ್ನಿರ್ವ॑ಪತಿ॒ ಸಮೇ॑ಧಮೇ॒ವೈನ॒ಮಾ ಲ॑ಭತೇ ವ॒ಪಯಾ᳚ ಪ್ರ॒ಚರ್ಯ॑ ಪುರೋ॒ಡಾಶೇ॑ನ॒ ಪ್ರ ಚ॑ರ॒ತ್ಯೂರ್ಗ್ವೈ ಪು॑ರೋ॒ಡಾಶ॒ ಊರ್ಜ॑ಮೇ॒ವ ಪ॑ಶೂ॒ನಾ-ಮ್ಮ॑ದ್ಧ್ಯ॒ತೋ ದ॑ಧಾ॒ತ್ಯಥೋ॑ ಪ॒ಶೋರೇ॒ವ ಛಿ॒ದ್ರಮಪಿ॑ ದಧಾತಿ ಪೃಷದಾ॒ಜ್ಯಸ್ಯೋ॑ಪ॒ಹತ್ಯ॒ ತ್ರಿಃ ಪೃ॑ಚ್ಛತಿ ಶೃ॒ತಗ್ಂ ಹ॒ವೀ(3)-ಶ್ಶ॑ಮಿತ॒ರಿತಿ॒ ತ್ರಿಷ॑ತ್ಯಾ॒ ಹಿ ದೇ॒ವಾ ಯೋ-ಽಶೃ॑ತಗ್ಂ ಶೃ॒ತಮಾಹ॒ ಸ ಏನ॑ಸಾ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ- [ಏ॒ತೌ ಪ॑ಶೂ॒ನಾಮ್, ಯ-ತ್ಪೃ॑ಷದಾ॒ಜ್ಯ-ಮ್ಪ॒ಶೋಃ] 51

-ಁಯ-ತ್ಪೃ॑ಷದಾ॒ಜ್ಯ-ಮ್ಪ॒ಶೋಃ ಖಲು॒ ವಾ ಆಲ॑ಬ್ಧಸ್ಯ॒ ಹೃದ॑ಯಮಾ॒ತ್ಮಾ-ಽಭಿ ಸಮೇ॑ತಿ॒ ಯ-ತ್ಪೃ॑ಷದಾ॒ಜ್ಯೇನ॒ ಹೃದ॑ಯ-ಮಭಿಘಾ॒ರಯ॑ತ್ಯಾ॒ತ್ಮನ್ನೇ॒ವ ಪ॑ಶೂ॒ನಾ-ಮ್ಪ್ರಾ॑ಣಾಪಾ॒ನೌ ದ॑ಧಾತಿ ಪ॒ಶುನಾ॒ ವೈ ದೇ॒ವಾ-ಸ್ಸು॑ವ॒ರ್ಗಂ-ಲೋಁ॒ಕಮಾ॑ಯ॒-ನ್ತೇ॑-ಽಮನ್ಯನ್ತ ಮನು॒ಷ್ಯಾ॑ ನೋ॒-ಽನ್ವಾಭ॑ವಿಷ್ಯ॒ನ್ತೀತಿ॒ ತಸ್ಯ॒ ಶಿರಃ॑ ಛಿ॒ತ್ತ್ವಾ ಮೇಧ॒-ಮ್ಪ್ರಾಕ್ಷಾ॑ರಯ॒ನ್ಥ್ಸ ಪ್ರ॒ಕ್ಷೋ॑-ಽಭವ॒-ತ್ತ-ತ್ಪ್ರ॒ಕ್ಷಸ್ಯ॑ ಪ್ರಕ್ಷ॒ತ್ವಂ-ಯಁ-ತ್ಪ್ಲ॑ಕ್ಷಶಾ॒ಖೋ-ತ್ತ॑ರಬ॒ರ್॒ಹಿ-ರ್ಭವ॑ತಿ॒ ಸಮೇ॑ಧಸ್ಯೈ॒ವ [ ] 52

ಪ॒ಶೋರವ॑ ದ್ಯತಿ ಪ॒ಶುಂ-ವೈಁ ಹ್ರಿ॒ಯಮಾ॑ಣ॒ಗ್ಂ॒ ರಕ್ಷಾ॒ಗ್॒ಸ್ಯನು॑ ಸಚನ್ತೇ-ಽನ್ತ॒ರಾ ಯೂಪ॑-ಞ್ಚಾ-ಽಽಹವ॒ನೀಯ॑-ಞ್ಚ ಹರತಿ॒ ರಕ್ಷ॑ಸಾ॒ಮಪ॑ಹತ್ಯೈ ಪ॒ಶೋರ್ವಾ ಆಲ॑ಬ್ಧಸ್ಯ॒ ಮನೋ-ಽಪ॑ ಕ್ರಾಮತಿ ಮ॒ನೋತಾ॑ಯೈ ಹ॒ವಿಷೋ॑-ಽವದೀ॒ಯಮಾ॑ನ॒ಸ್ಯಾನು॑ ಬ್ರೂ॒ಹೀತ್ಯಾ॑ಹ॒ ಮನ॑ ಏ॒ವಾಸ್ಯಾವ॑ ರುನ್ಧ॒ ಏಕಾ॑ದಶಾವ॒ದಾನಾ॒ನ್ಯವ॑ ದ್ಯತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತಸ್ಯಾ-ಽವ॑- [ಪ॒ಶುಸ್ತಸ್ಯಾ-ಽವ॑, ದ್ಯ॒ತಿ॒ ಹೃದ॑ಯ॒ಸ್ಯಾ-] 53

-ದ್ಯತಿ॒ ಹೃದ॑ಯ॒ಸ್ಯಾ-ಗ್ರೇ-ಽವ॑ ದ್ಯ॒ತ್ಯಥ॑ ಜಿ॒ಹ್ವಾಯಾ॒ ಅಥ॒ ವಕ್ಷ॑ಸೋ॒ ಯದ್ವೈ ಹೃದ॑ಯೇನಾಭಿ॒ಗಚ್ಛ॑ತಿ॒ ತಜ್ಜಿ॒ಹ್ವಯಾ॑ ವದತಿ॒ ಯಜ್ಜಿ॒ಹ್ವಯಾ॒ ವದ॑ತಿ॒ ತದುರ॒ಸೋ-ಽಧಿ॒ ನಿರ್ವ॑ದತ್ಯೇ॒ತದ್ವೈ ಪ॒ಶೋರ್ಯ॑ಥಾಪೂ॒ರ್ವಂ-ಯಁಸ್ಯೈ॒ವಮ॑ವ॒ದಾಯ॑ ಯಥಾ॒ಕಾಮ॒-ಮುತ್ತ॑ರೇಷಾಮವ॒ದ್ಯತಿ॑ ಯಥಾ ಪೂ॒ರ್ವಮೇ॒ವಾಸ್ಯ॑ ಪ॒ಶೋರವ॑ತ್ತ-ಮ್ಭವತಿ ಮದ್ಧ್ಯ॒ತೋ ಗು॒ದಸ್ಯಾವ॑ ದ್ಯತಿ ಮದ್ಧ್ಯ॒ತೋ ಹಿ ಪ್ರಾ॒ಣ ಉ॑ತ್ತ॒ಮಸ್ಯಾವ॑ ದ್ಯ- [ಉ॑ತ್ತ॒ಮಸ್ಯಾವ॑ ದ್ಯತಿ, ಉ॒ತ್ತ॒ಮೋ ಹಿ ಪ್ರಾ॒ಣೋ] 54

-ತ್ಯುತ್ತ॒ಮೋ ಹಿ ಪ್ರಾ॒ಣೋ ಯದೀತ॑ರಂ॒-ಯಁದೀತ॑ರ-ಮು॒ಭಯ॑ಮೇ॒ವಾಜಾ॑ಮಿ॒ ಜಾಯ॑ಮಾನೋ॒ ವೈ ಬ್ರಾ᳚ಹ್ಮ॒ಣ-ಸ್ತ್ರಿ॒ಭಿರ್-ಋ॑ಣ॒ವಾ ಜಾ॑ಯತೇ ಬ್ರಹ್ಮ॒ಚರ್ಯೇ॒ಣರ್ಷಿ॑ಭ್ಯೋ ಯ॒ಜ್ಞೇನ॑ ದೇ॒ವೇಭ್ಯಃ॑ ಪ್ರ॒ಜಯಾ॑ ಪಿ॒ತೃಭ್ಯ॑ ಏ॒ಷ ವಾ ಅ॑ನೃ॒ಣೋ ಯಃ ಪು॒ತ್ರೀ ಯಜ್ವಾ᳚ ಬ್ರಹ್ಮಚಾರಿವಾ॒ಸೀ ತದ॑ವ॒ದಾನೈ॑-ರೇ॒ವಾ-ಽವ॑ ದಯತೇ॒ ತದ॑ವ॒ದಾನಾ॑ನಾ-ಮವದಾನ॒ತ್ವ-ನ್ದೇ॑ವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಅ॒ಗ್ನಿಮ॑ಬ್ರುವ॒-ನ್ತ್ವಯಾ॑ ವೀ॒ರೇಣಾಸು॑ರಾನ॒ಭಿ ಭ॑ವಾ॒ಮೇತಿ॒ [ಭ॑ವಾ॒ಮೇತಿ॑, ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ] 55

ಸೋ᳚-ಽಬ್ರವೀ॒-ದ್ವರಂ॑-ವೃಁಣೈ ಪ॒ಶೋರು॑ದ್ಧಾ॒ರಮುದ್ಧ॑ರಾ॒ ಇತಿ॒ ಸ ಏ॒ತಮು॑ದ್ಧಾ॒ರಮುದ॑ಹರತ॒ ದೋಃ ಪೂ᳚ರ್ವಾ॒ರ್ಧಸ್ಯ॑ ಗು॒ದ-ಮ್ಮ॑ದ್ಧ್ಯ॒ತ-ಶ್ಶ್ರೋಣಿ॑-ಞ್ಜಘನಾ॒ರ್ಧಸ್ಯ॒ ತತೋ॑ ದೇ॒ವಾ ಅಭ॑ವ॒-ನ್ಪರಾ-ಽಸು॑ರಾ॒ ಯ-ತ್ತ್ರ್ಯ॒ಙ್ಗಾಣಾಗ್ಂ॑ ಸಮವ॒ದ್ಯತಿ॒ ಭ್ರಾತೃ॑ವ್ಯಾಭಿಭೂತ್ಯೈ॒ ಭವ॑ತ್ಯಾ॒ತ್ಮನಾ॒ ಪರಾ᳚-ಽಸ್ಯ॒ ಭ್ರಾತೃ॑ವ್ಯೋ ಭವತ್ಯಕ್ಷ್ಣ॒ಯಾ-ಽವ॑ ದ್ಯತಿ॒ ತಸ್ಮಾ॑ದಕ್ಷ್ಣ॒ಯಾ ಪ॒ಶವೋ-ಽಙ್ಗಾ॑ನಿ॒ ಪ್ರ ಹ॑ರನ್ತಿ॒ ಪ್ರತಿ॑ಷ್ಠಿತ್ಯೈ ॥ 56 ॥

(ಏ॒ತೌ ಪ॑ಶೂ॒ನಾಗ್ಂ - ಸಮೇ॑ಧಸ್ಯೈ॒ವ - ತಸ್ಯಾ-ಽವೋ᳚ - ತ್ತ॒ಮಸ್ಯಾವ॑ ದ್ಯ॒ತೀ - ತಿ॒ - ಪಞ್ಚ॑ಚತ್ವಾರಿಗ್ಂಶಚ್ಚ) (ಅ. 10)

ಮೇದ॑ಸಾ॒ ಸ್ರುಚೌ॒ ಪ್ರೋರ್ಣೋ॑ತಿ॒ ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪಮೇ॒ವ ಪ॒ಶುಷು॑ ದಧಾತಿ ಯೂ॒ಷನ್ನ॑ವ॒ಧಾಯ॒ ಪ್ರೋರ್ಣೋ॑ತಿ॒ ರಸೋ॒ ವಾ ಏ॒ಷ ಪ॑ಶೂ॒ನಾಂ-ಯಁದ್ಯೂ ರಸ॑ಮೇ॒ವ ಪ॒ಶುಷು॑ ದಧಾತಿ ಪಾ॒ರ್ಶ್ವೇನ॑ ವಸಾಹೋ॒ಮ-ಮ್ಪ್ರಯೌ॑ತಿ॒ ಮದ್ಧ್ಯಂ॒-ವಾಁ ಏ॒ತ-ತ್ಪ॑ಶೂ॒ನಾಂ-ಯಁ-ತ್ಪಾ॒ರ್ಶ್ವಗ್ಂ ರಸ॑ ಏ॒ಷ ಪ॑ಶೂ॒ನಾಂ-ಯಁದ್ವಸಾ॒ ಯ-ತ್ಪಾ॒ರ್ಶ್ವೇನ॑ ವಸಾಹೋ॒ಮ-ಮ್ಪ್ರ॒ಯೌತಿ॑ ಮದ್ಧ್ಯ॒ತ ಏ॒ವ ಪ॑ಶೂ॒ನಾಗ್ಂ ರಸ॑-ನ್ದಧಾತಿ॒ ಘ್ನನ್ತಿ॒ [ಘ್ನನ್ತಿ॑, ವಾ ಏ॒ತ-ತ್ಪ॒ಶು-] 57

ವಾ ಏ॒ತ-ತ್ಪ॒ಶುಂ-ಯಁ-ಥ್ಸ᳚ಜ್ಞ॒ಮ್ಪಯ॑ನ್ತ್ಯೈ॒ನ್ದ್ರಃ ಖಲು॒ ವೈ ದೇ॒ವತ॑ಯಾ ಪ್ರಾ॒ಣ ಐ॒ನ್ದ್ರೋ॑-ಽಪಾ॒ನ ಐ॒ನ್ದ್ರಃ ಪ್ರಾ॒ಣೋ ಅಙ್ಗೇ॑ಅಙ್ಗೇ॒ ನಿ ದೇ᳚ದ್ಧ್ಯ॒ದಿತ್ಯಾ॑ಹ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತಿ॒ ದೇವ॑ ತ್ವಷ್ಟ॒ರ್ಭೂರಿ॑ ತೇ॒ ಸಗ್ಂ ಸ॑ಮೇ॒ತ್ವಿತ್ಯಾ॑ಹ ತ್ವಾ॒ಷ್ಟ್ರಾ ಹಿ ದೇ॒ವತ॑ಯಾ ಪ॒ಶವೋ॒ ವಿಷು॑ರೂಪಾ॒ ಯ-ಥ್ಸಲ॑ಕ್ಷ್ಮಾಣೋ॒ ಭವ॒ಥೇತ್ಯಾ॑ಹ॒ ವಿಷು॑ರೂಪಾ॒ ಹ್ಯೇ॑ತೇ ಸನ್ತ॒-ಸ್ಸಲ॑ಕ್ಷ್ಮಾಣ ಏ॒ತರ್ಹಿ॒ ಭವ॑ನ್ತಿ ದೇವ॒ತ್ರಾ ಯನ್ತ॒- [ದೇವ॒ತ್ರಾ ಯನ್ತ᳚ಮ್, ಅವ॑ಸೇ॒] 58

-ಮವ॑ಸೇ॒ ಸಖಾ॒ಯೋ-ಽನು॑ ತ್ವಾ ಮಾ॒ತಾ ಪಿ॒ತರೋ॑ ಮದ॒ನ್ತ್ವಿತ್ಯಾ॒ಹಾ-ನು॑ಮತಮೇ॒ವೈನ॑-ಮ್ಮಾ॒ತ್ರಾ ಪಿ॒ತ್ರಾ ಸು॑ವ॒ರ್ಗಂ-ಲೋಁ॒ಕ-ಙ್ಗ॑ಮಯತ್ಯರ್ಧ॒ರ್ಚೇ ವ॑ಸಾಹೋ॒ಮ-ಞ್ಜು॑ಹೋತ್ಯ॒ಸೌ ವಾ ಅ॑ರ್ಧ॒ರ್ಚ ಇ॒ಯಮ॑ರ್ಧ॒ರ್ಚ ಇ॒ಮೇ ಏ॒ವ ರಸೇ॑ನಾನಕ್ತಿ॒ ದಿಶೋ॑ ಜುಹೋತಿ॒ ದಿಶ॑ ಏ॒ವ ರಸೇ॑ನಾನ॒ಕ್ತ್ಯಥೋ॑ ದಿ॒ಗ್ಭ್ಯ ಏ॒ವೋರ್ಜ॒ಗ್ಂ॒ ರಸ॒ಮವ॑ ರುನ್ಧೇ ಪ್ರಾಣಾಪಾ॒ನೌ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಂ-ವಾಁ॑ನಸ್ಪ॒ತ್ಯಾಃ ಖಲು॒ [ಖಲು॑, ವೈ ದೇ॒ವತ॑ಯಾ ಪ॒ಶವೋ॒] 59

ವೈ ದೇ॒ವತ॑ಯಾ ಪ॒ಶವೋ॒ ಯ-ತ್ಪೃ॑ಷದಾ॒ಜ್ಯಸ್ಯೋ॑-ಪ॒ಹತ್ಯಾ-ಽಽಹ॒ ವನ॒ಸ್ಪತ॒ಯೇ-ಽನು॑ ಬ್ರೂಹಿ॒ ವನ॒ಸ್ಪತ॑ಯೇ॒ ಪ್ರೇಷ್ಯೇತಿ॑ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತ್ಯ॒ನ್ಯಸ್ಯಾ᳚ನ್ಯಸ್ಯ ಸಮವ॒ತ್ತಗ್ಂ ಸ॒ಮವ॑ದ್ಯತಿ॒ ತಸ್ಮಾ॒ನ್ನಾನಾ॑ರೂಪಾಃ ಪ॒ಶವೋ॑ ಯೂ॒ಷ್ಣೋಪ॑ ಸಿಞ್ಚತಿ॒ ರಸೋ॒ ವಾ ಏ॒ಷ ಪ॑ಶೂ॒ನಾಂ-ಯಁದ್ಯೂ ರಸ॑ಮೇ॒ವ ಪ॒ಶುಷು॑ ದಧಾ॒ತೀಡಾ॒ಮುಪ॑ ಹ್ವಯತೇ ಪ॒ಶವೋ॒ ವಾ ಇಡಾ॑ ಪ॒ಶೂನೇ॒ವೋಪ॑ ಹ್ವಯತೇ ಚ॒ತುರುಪ॑ ಹ್ವಯತೇ॒ [ಚ॒ತುರುಪ॑ ಹ್ವಯತೇ, ಚತು॑ಷ್ಪಾದೋ॒ ಹಿ] 60

ಚತು॑ಷ್ಪಾದೋ॒ ಹಿ ಪ॒ಶವೋ॒ ಯ-ಙ್ಕಾ॒ಮಯೇ॑ತಾ ಪ॒ಶು-ಸ್ಸ್ಯಾ॒ದಿತ್ಯ॑ಮೇ॒ದಸ್ಕ॒-ನ್ತಸ್ಮಾ॒ ಆ ದ॑ದ್ಧ್ಯಾ॒ನ್ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪೇಣೈ॒ವೈನ॑-ಮ್ಪ॒ಶುಭ್ಯೋ॒ ನಿರ್ಭ॑ಜತ್ಯಪ॒ಶುರೇ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ದಿತಿ॒ ಮೇದ॑ಸ್ವ॒-ತ್ತಸ್ಮಾ॒ ಆ ದ॑ದ್ಧ್ಯಾ॒ನ್ಮೇದೋ॑ರೂಪಾ॒ ವೈ ಪ॒ಶವೋ॑ ರೂ॒ಪೇಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ಪಶು॒ಮಾನೇ॒ವ ಭ॑ವತಿ ಪ್ರ॒ಜಾಪ॑ತಿರ್ಯ॒ಜ್ಞಮ॑ಸೃಜತ॒ ಸ ಆಜ್ಯ॑- [ಸ ಆಜ್ಯ᳚ಮ್, ಪು॒ರಸ್ತಾ॑ದಸೃಜತ] 61

-ಮ್ಪು॒ರಸ್ತಾ॑ದಸೃಜತ ಪ॒ಶು-ಮ್ಮ॑ದ್ಧ್ಯ॒ತಃ ಪೃ॑ಷದಾ॒ಜ್ಯ-ಮ್ಪ॒ಶ್ಚಾ-ತ್ತಸ್ಮಾ॒ದಾಜ್ಯೇ॑ನ ಪ್ರಯಾ॒ಜಾ ಇ॑ಜ್ಯನ್ತೇ ಪ॒ಶುನಾ॑ ಮದ್ಧ್ಯ॒ತಃ ಪೃ॑ಷದಾ॒ಜ್ಯೇನಾ॑-ನೂಯಾ॒ಜಾ-ಸ್ತಸ್ಮಾ॑ದೇ॒ತನ್ಮಿ॒ಶ್ರಮಿ॑ವ ಪಶ್ಚಾ-ಥ್ಸೃ॒ಷ್ಟಗ್ಗ್ ಹ್ಯೇಕಾ॑ದಶಾನೂಯಾ॒ಜಾನ್. ಯ॑ಜತಿ॒ ದಶ॒ ವೈ ಪ॒ಶೋಃ ಪ್ರಾ॒ಣಾ ಆ॒ತ್ಮೈಕಾ॑ದ॒ಶೋ ಯಾವಾ॑ನೇ॒ವ ಪ॒ಶುಸ್ತಮನು॑ ಯಜತಿ॒ ಘ್ನನ್ತಿ॒ ವಾ ಏ॒ತ-ತ್ಪ॒ಶುಂ-ಯಁ-ಥ್ಸಂ᳚(2)ಜ್ಞ॒ಪಯ॑ನ್ತಿ ಪ್ರಾಣಾಪಾ॒ನೌ ಖಲು॒ ವಾ ಏ॒ತೌ ಪ॑ಶೂ॒ನಾಂ-ಯಁ-ತ್ಪೃ॑ಷದಾ॒ಜ್ಯಂ-ಯಁ-ತ್ಪೃ॑ಷದಾ॒ಜ್ಯೇನಾ॑ ನೂಯಾ॒ಜಾನ್. ಯಜ॑ತಿ ಪ್ರಾಣಾಪಾ॒ನಾವೇ॒ವ ಪ॒ಶುಷು॑ ದಧಾತಿ ॥ 62 ॥

(ಘ್ನನ್ತಿ॒ - ಯನ್ತಂ॒ - ಖಲು॑ - ಚ॒ತುರುಪ॑ ಹ್ವಯತ॒ - ಆಜ್ಯಂ॒ - ಁಯ-ತ್ಪೃ॑ಷದಾ॒ಜ್ಯೇನ॒ - ಷಟ್ ಚ॑) (ಅ. 11)

(ಚಾತ್ವಾ॑ಲಾಥ್ - ಸುವ॒ರ್ಗಾಯ॒ ಯ-ದ್ವೈ॑ಸರ್ಜ॒ನಾನಿ॑ - ವೈಷ್ಣ॒ವ್ಯರ್ಚಾ - ಪೃ॑ಥಿ॒ವ್ಯೈ - ಸಾ॒ಧ್ಯಾ - ಇ॒ಷೇ ತ್ವೇ - ತ್ಯ॒ಗ್ನಿನಾ॒ - ಪರ್ಯ॑ಗ್ನಿ - ಪ॒ಶೋಃ - ಪ॒ಶುಮಾ॒ಲಭ್ಯ॒ - ಮೇದ॑ಸಾ॒ ಸ್ರುಚಾ॒ - ವೇಕಾ॑ದಶ)

(ಚಾತ್ವಾ॑ಲಾ-ದ್- ದೇ॒ವಾನು॒ಪೈತಿ॑ - ಮುಞ್ಚತಿ - ಪ್ರಹ್ರಿ॒ಯಮಾ॑ಣಾಯ॒ - ಪರ್ಯ॑ಗ್ನಿ - ಪ॒ಶುಮಾ॒ಲಭ್ಯ॒ - ಚತು॑ಷ್ಪಾದೋ॒ - ದ್ವಿಷ॑ಷ್ಟಿಃ)

(ಚಾತ್ವಾ॑ಲಾ, ತ್ಪ॒ಶುಷು॑ ದಧಾತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ತೃತೀಯಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyāṃ ṣaṣṭhakāṇḍe tṛtīyaḥ praśnaḥ - somamantrabrāhmaṇanirūpaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

cātvā̭lā॒-ddhiṣṇi̭yā॒nupa̭ vapati॒ yoni॒rvai ya॒jñasya॒ cātvā̭laṃ-ya~॒jñasya̭ sayoni॒tvāya̭ de॒vā vai ya॒jña-mparā̭-'jayanta॒ tamāgnī᳚ddhrā॒-tpuna॒rapā̭jayanne॒tadvai ya॒jñasyā-pa̭rājitaṃ॒-ya~dāgnī᳚ddhraṃ॒-ya~dāgnī᳚ddhrā॒ddhiṣṇi̭yān. vi॒hara̭ti॒ yade॒va ya॒jñasyā-pa̭rājita॒-ntata̭ e॒vaina॒-mpuna̭stanute parā॒jityḙva॒ khalu॒ vā e॒te ya̭nti॒ ye ba̭hiṣpavamā॒nagṃ sarpa̭nti bahiṣpavamā॒ne stu॒ta [stu॒te, ā॒hāgnī̭da॒gnīn. vi] 1

ā॒hāgnī̭da॒gnīn. vi ha̭ra ba॒r॒hi-sstṛ̭ṇāhi puro॒ḍāśā॒gṃ॒ ala̭-ṅku॒rviti̭ ya॒jñame॒vāpa॒jitya॒ puna̭stanvā॒nā ya॒ntyaṅgā̭rai॒rdve sava̭ne॒ vi ha̭rati śa॒lākā̭bhi-stṛ॒tīyagṃ̭ saśukra॒tvāyātho॒ sa-mbha̭ratye॒vaina॒ddhiṣṇi̭yā॒ vā a॒muṣmi̭n ~lo॒ke soma̭marakṣa॒-ntebhyo-'dhi॒ soma॒mā-'ha̭ra॒-nta ma̭nva॒vāya॒nta-mparya̭viśa॒n॒. ya e॒vaṃ-ve~da̭ vi॒ndatḙ [ya e॒vaṃ-ve~da̭ vi॒ndate᳚, pa॒ri॒ve॒ṣṭāra॒-nte] 2

parive॒ṣṭāra॒-nte so̭mapī॒thena॒ vyā᳚rdhyanta॒ te de॒veṣṷ somapī॒thamai᳚cchanta॒ tā-nde॒vā a̭bruva॒-ndvedve॒ nāma̭nī kuruddhva॒matha॒ pra vā॒-''phsyatha॒ na vetya॒gnayo॒ vā atha॒ dhiṣṇi̭yā॒stasmā᳚-ddvi॒nāmā᳚ brāhma॒ṇo-'rdhṷka॒steṣāṃ॒-ye~ nedi̭ṣṭha-mpa॒ryavi̭śa॒-nte so̭mapī॒tha-mprā-'pnṷvannāhava॒nīya̭ āgnī॒ddhrīyo̭ ho॒trīyo̭ mārjā॒līya॒stasmā॒-tteṣṷ juhvatyati॒hāya॒ vaṣa̭-ṭkaroti॒ vi hyḙ [vi hi, e॒te so̭mapī॒thenā-''rdhya̭nta] 3

-te so̭mapī॒thenā-''rdhya̭nta de॒vā vai yāḥ prācī॒-rāhṷtī॒-rajṷhavu॒rye pu॒rastā॒dasṷrā॒ āsa॒-ntāg stābhiḥ॒ prāṇṷdanta॒ yāḥ pra॒tīcī॒rye pa॒ścādasṷrā॒ āsa॒-ntāgstābhi॒-rapā̭nudanta॒ prācī̭ra॒nyā āhṷtayo hū॒yante᳚ pra॒tyaṅṅāsī̭no॒ dhiṣṇi̭yā॒n. vyāghā̭rayati pa॒ścāccai॒va purastā᳚cca॒ yaja̭māno॒ bhrātṛ̭vyā॒-npra ṇṷdate॒ tasmā॒-tparā̭cīḥ pra॒jāḥ pra vī̭yante pra॒tīcī᳚- [pra॒tīcīḥ᳚, jā॒ya॒nte॒ prā॒ṇā vā e॒te] 4

-rjāyante prā॒ṇā vā e॒te yaddhiṣṇi̭yā॒ yada̭ddhva॒ryuḥ pra॒tya-ndhiṣṇi̭yā-nati॒sarpe᳚-tprā॒ṇān-thsaṅka̭rṣe-tpra॒māyṷka-ssyā॒nnābhi॒rvā e॒ṣā ya॒jñasya॒ yaddhoto॒rdhvaḥ khalu॒ vai nābhyai᳚ prā॒ṇo-'vāṃ̭apā॒no yada̭dhva॒ryuḥ pra॒tyaṃ hotā̭ramati॒sarpḙdapā॒ne prā॒ṇa-nda̭dhyā-tpra॒māyṷka-ssyā॒nnāddhva॒ryurupa̭ gāye॒-dvāgvī᳚ryo॒ vā a̭ddhva॒ryu-ryada̭ddhva॒ryurṷpa॒-gāyḙdu-dgā॒tre [ ] 5

vāca॒gṃ॒ sa-mpra ya̭cche-dupa॒dāsṷkā-'sya॒ vā-khsyā᳚dbrahmavā॒dino̭ vadanti॒ nāsagg̭sthite॒ some᳚-'ddhva॒ryuḥ pra॒tyaṅ-khsado-'tī̭yā॒datha̭ ka॒thā dā᳚kṣi॒ṇāni॒ hotṷmeti॒ yāmo॒ hi sa teṣā॒-ṅkasmā॒ aha̭ de॒vā yāmaṃ॒-vā~-'yā̭maṃ॒-vā~-'nṷ jñāsya॒ntītyu-tta̭re॒ṇā-''gnī᳚ddhra-mpa॒rītya̭ juhoti dākṣi॒ṇāni॒ na prā॒ṇānthsa-ṅka̭rṣati॒ nya̭nye dhiṣṇi̭yā u॒pyante॒ nānye yā-nni॒vapa̭ti॒ tena॒ tā-nprī̭ṇāti॒ yā-nnani॒vapa̭ti॒ yada̭nudi॒śati॒ tena॒ tān || 6 ||

(stu॒te - vi॒ndate॒ - hi - vī̭yante pra॒tīcī̭ - rudgrā॒tra - u॒pyante॒ - catṷrdaśa ca) (a. 1)

su॒va॒rgāya॒ vā e॒tāni̭ lo॒kāya̭ hūyante॒ ya-dvai̭sarja॒nāni॒ dvābhyā॒-ṅgārha̭patye juhoti dvi॒pā-dyaja̭mānaḥ॒ prati̭ṣṭhityā॒ āgnī᳚ddhre juhotya॒ntari̭kṣa e॒vā-''kra̭mata āhava॒nīyḙ juhoti suva॒rgame॒vainaṃ̭-lo~॒ka-ṅga̭mayati de॒vān. vai sṷva॒rgaṃ-lo~॒kaṃ-ya~॒to rakṣāg̭sya jighāgṃsa॒nte somḙna॒ rājñā॒ rakṣāg̭-syapa॒hatyā॒ptu-mā॒tmāna̭-ṅkṛ॒tvā sṷva॒rgaṃ-lo~॒kamā̭ya॒-nrakṣa̭sā॒-manṷpalābhā॒yā ''tta॒-ssomo̭ bhava॒tyatha̭ [bhava॒tyatha̭, vai॒sa॒rja॒nāni̭ juhoti॒] 7

vaisarja॒nāni̭ juhoti॒ rakṣa̭sā॒mapa̭hatyai॒ tvagṃ so̭ma tanū॒kṛdbhya॒ ityā̭ha tanū॒kṛddhya̭ṣa dveṣo᳚bhyo॒-'nyakṛ̭tebhya॒ ityā̭hā॒nyakṛ̭tāni॒ hi rakṣāg̭syu॒ru ya॒ntā-'si॒ varṷ̄tha॒mityā̭ho॒ru ṇa̭skṛ॒dhīti॒ vāvaitadā̭ha juṣā॒ṇo a॒pturājya̭sya ve॒tvityā̭hā॒ptume॒va yaja̭māna-ṅkṛ॒tvā sṷva॒rgaṃ-lo~॒ka-ṅga̭mayati॒ rakṣa̭sā॒-manṷpalābhā॒yā-'' soma̭-ndadata॒ [soma̭-ndadate, ā grāvṇṇa॒ ā] 8

ā grāvṇṇa॒ ā vā̭ya॒vyā᳚nyā dro̭ṇakala॒śamu-tpatnī॒mā na̭ya॒ntyanvanāgṃ̭si॒ pra va̭rtayanti॒ yāva̭de॒vāsyāsti॒ tena̭ sa॒ha sṷva॒rgaṃ-lo~॒kamḙti॒ naya̭vatya॒rcā-''gnī᳚ddhre juhoti suva॒rgasya̭ lo॒kasyā॒bhinī᳚tyai॒ grāvṇṇo̭ vāya॒vyā̭ni droṇakala॒śamāgnī᳚ddhra॒ upa̭ vāsayati॒ vi hyḙna॒-ntairgṛ॒hṇate॒ ya-thsa॒hopa̭vā॒sayḙ-dapuvā॒yeta̭ sau॒myarcā pra pā̭dayati॒ svayai॒- [pra pā̭dayati॒ svaya᳚, e॒vaina̭-nde॒vata̭yā॒] 9

-vaina̭-nde॒vata̭yā॒ pra pā̭daya॒tyadi̭tyā॒-ssado॒-'syadi̭tyā॒-ssada॒ ā sī॒detyā̭ha yathāya॒jure॒vaita-dyaja̭māno॒ vā e॒tasya̭ pu॒rā go॒ptā bha̭vatye॒ṣa vo̭ deva savita॒-ssoma॒ ityā̭ha savi॒tṛpra̭sūta e॒vaina̭-nde॒vatā᳚bhya॒-ssa-mpraya̭cchatye॒ta-ttvagṃ so̭ma de॒vo de॒vānupā̭gā॒ ityā̭ha de॒vo hyḙṣa sa- [de॒vo hyḙṣa sann, de॒vānu॒paitī॒dama॒ha-] 10

-nde॒vānu॒paitī॒dama॒ha-mma̭nu॒ṣyo̭ manu॒ṣyā̭nityā̭ha manu॒ṣyo᳚(1॒) hyḙṣa sa-nma̭nu॒ṣyā̭nu॒paiti॒ yade॒ta-dyaju॒rna brū॒yādapra̭jā apa॒śuryaja̭māna-ssyā-thsa॒ha pra॒jayā̭ saha rā॒yaspoṣe॒ṇetyā̭ha pra॒jayai॒va pa॒śubhiḥ̭ sa॒hemaṃ-lo~॒kamu॒pāva̭rtate॒ namo̭ de॒vebhya॒ ityā̭ha namaskā॒ro hi de॒vānāg̭ sva॒dhā pi॒tṛbhya॒ ityā̭ha svadhākā॒ro hi [svadhākā॒ro hi, pi॒tṛ॒ṇāmi॒dama॒ha-] 11

pi̭tṛ॒ṇāmi॒dama॒ha-nnirvarṷṇasya॒ pāśā॒dityā̭ha varuṇapā॒śāde॒va nirmṷcya॒te 'gne᳚ vratapata ā॒tmanaḥ॒ pūrvā̭ ta॒nūrā॒deyetyā̭huḥ॒ ko hi tadveda॒ ya-dvasī̭yā॒n-thsve vaśḙ bhū॒te puna̭rvā॒ dadā̭ti॒ na veti॒ grāvā̭ṇo॒ vai soma̭sya॒ rājño̭ malimluse॒nā ya e॒vaṃ-vi~॒dvā-ngrāvṇṇa॒ āgnī᳚ddhra upavā॒saya̭ti॒ naina̭-mmalimluse॒nā vi̭ndati || 12 ||

(atha̭-dadate॒ - svayā॒ - santh - sva̭dhākā॒ro hi - vi̭ndati) (a. 2)

vai॒ṣṇa॒vyarcā hu॒tvā yūpa॒macchai̭ti vaiṣṇa॒vo vai de॒vata̭yā॒ yūpa॒-ssvayai॒vaina̭-nde॒vata॒yā 'cchai॒tyatya॒nyānagā॒-nnānyā-nupā̭gā॒mityā॒hāti॒ hya̭nyāneti॒ nānyā-nu॒paitya॒rvāktvā॒ parai̭ravida-mpa॒ro-'va̭rai॒rityā̭hā॒rvāghyḙna॒-mparai᳚rvi॒ndati̭ pa॒ro-'va̭rai॒sta-ntvā̭ juṣe [juṣe, vai॒ṣṇa॒va-ndḙvaya॒jyāyā॒] 13

vaiṣṇa॒va-ndḙvaya॒jyāyā॒ ityā̭ha devaya॒jyāyai॒ hyḙna-ñju॒ṣatḙ de॒vastvā̭ savi॒tā maddhvā̭-'na॒ktvityā̭ha॒ teja̭sai॒vaina̭-mana॒ktyoṣa̭dhe॒ trāya̭svaina॒gg॒ svadhi̭te॒ mainagṃ̭ higṃsī॒rityā̭ha॒ vajro॒ vai svadhi̭ti॒-śśāntyai॒ svadhi̭tervṛ॒kṣasya॒ bibhya̭taḥ pratha॒mena॒ śaka̭lena sa॒ha tejaḥ॒ parā̭ patati॒ yaḥ pra̭tha॒ma-śśaka̭laḥ parā॒pate॒-ttamapyā ha̭re॒-thsatḙjasa- [ha̭re॒-thsatḙjasam, e॒vaina॒mā] 14

-me॒vaina॒mā ha̭ratī॒me vai lo॒kā yūpā᳚-tpraya॒to bi̭bhyati॒ diva॒magrḙṇa॒ mā lḙkhīra॒ntari̭kṣa॒-mmaddhyḙna॒ mā higṃ̭sī॒rityā̭hai॒bhya e॒vainaṃ̭-lo~॒kebhyaḥ̭ śamayati॒ vana̭spate śa॒tava̭lśo॒ vi ro॒hetyā॒vraśca̭ne juhoti॒ tasmā̭-dā॒vraśca̭nā-dvṛ॒kṣāṇā॒-mbhūyāgṃ̭sa॒ utti̭ṣṭhanti sa॒hasra̭valśā॒ vi va॒yagṃ rṷhe॒metyā̭hā॒- ''śiṣa̭me॒vaitāmā śā॒ste 'na̭kṣasaṅga- [śā॒ste 'na̭kṣasaṅgam, vṛ॒śce॒-dyada̭kṣasa॒ṅgaṃ-] 15

-~vṛśce॒-dyada̭kṣasa॒ṅgaṃ-vṛ~॒śceda̭dhaī॒ṣaṃ-ya~ja̭mānasya pra॒māyṷkagg syā॒dya-ṅkā॒maye॒tāpra̭tiṣṭhita-ssyā॒dityā̭ro॒ha-ntasma̭ vṛścede॒ṣa vai vana॒spatī̭nā॒-mapra̭tiṣṭhi॒to-'pra̭tiṣṭhita e॒va bha̭vati॒ ya-ṅkā॒mayḙtāpa॒śu-ssyā॒ditya̭pa॒rṇa-ntasmai॒ śuṣkā᳚graṃ-vṛ~ścede॒ṣa vai vana॒spatī̭nā-mapaśa॒vyo̭-'pa॒śure॒va bha̭vati॒ ya-ṅkā॒mayḙta paśu॒mān-thsyā॒diti̭ bahupa॒rṇa-ntasmai̭ bahuśā॒khaṃ-vṛ~̭ścede॒ṣa vai [ ] 16

vana॒spatī̭nā-mpaśa॒vyaḥ̭ paśu॒māne॒va bha̭vati॒ prati̭ṣṭhitaṃ-vṛ~śce-tprati॒ṣṭhākā̭masyai॒ṣa vai vana॒spatī̭nā॒-mprati̭ṣṭhito॒ ya-ssa॒me bhūmyai॒ svādyonḙ rū॒ḍhaḥ pratye॒va ti̭ṣṭhati॒ yaḥ pra॒tyaṅṅupa̭nata॒staṃ-vṛ~̭śce॒-thsa hi medha̭ma॒bhyupa̭nataḥ॒ pañcā̭ratni॒-ntasmai̭ vṛśce॒dya-ṅkā॒maye॒topai̭na॒mutta̭ro ya॒jño na̭me॒diti॒ pañcā᳚kṣarā pa॒ṅktiḥ pāṅkto̭ ya॒jña upai̭na॒mutta̭ro ya॒jño [ya॒jñaḥ, na॒ma॒ti॒ ṣaḍa̭ratni] 17

na̭mati॒ ṣaḍa̭ratni-mprati॒ṣṭhākā̭masya॒ ṣaḍvā ṛ॒tava̭ ṛ॒tuṣve॒va prati̭ tiṣṭhati sa॒ptāra̭tni-mpa॒śukā̭masya sa॒ptapa̭dā॒ śakva̭rī pa॒śava॒-śśakva̭rī pa॒śūne॒vāva̭ rundhe॒ navā̭ratni॒-nteja̭skāmasya tri॒vṛtā॒ stomḙna॒ sammi̭ta॒-nteja̭stri॒vṛ-ttḙja॒svyḙva bha̭va॒-tyekā̭daśāratni-mindri॒yakā̭ma॒-syaikā̭daśākṣarā tri॒ṣṭugi̭ndri॒ya-ntri॒ṣṭugi̭ndriyā॒vyḙva bha̭vati॒ pañca̭daśāratni॒-mbhrātṛ̭vyavataḥ pañcada॒śo vajro॒ bhrātṛ̭vyābhibhūtyai sa॒ptada̭śāratni-mpra॒jākā̭masya saptada॒śaḥ pra॒jāpa̭tiḥ pra॒jāpa̭te॒rāptyā॒ eka̭vigṃśatyaratni-mprati॒ṣṭhākā̭ma-syaikavi॒gṃ॒śa-sstomā̭nā-mprati॒ṣṭhā prati̭ṣṭhityā a॒ṣṭāśri̭rbhava-tya॒ṣṭākṣa̭rā gāya॒trī tejo̭ gāya॒trī gā̭ya॒trī ya̭jñamu॒kha-nteja̭sai॒va gā̭yatri॒yā ya̭jñamu॒khena॒ sammi̭taḥ || 18 ||

(ju॒ṣe॒ - satḙjasa॒ - mana̭kṣasaṅgaṃ - bahuśā॒khaṃ-vṛ~̭ścede॒ṣa vai - ya॒jña upai̭na॒mutta̭ro ya॒jña - āptyā॒ - ekā॒nnavigṃ̭śa॒tiśca̭) (a. 3)

pṛ॒thi॒vyai tvā॒-'ntari̭kṣāya tvā di॒ve tvetyā̭hai॒bhya e॒vainaṃ̭-lo~॒kebhyaḥ॒ prokṣa̭ti॒ parā᳚ñca॒-mprokṣa̭ti॒ parā̭ṅiva॒ hi sṷva॒rgo lo॒kaḥ krū॒rami̭va॒ vā e॒ta-tka̭roti॒ ya-tkhana̭tya॒po-'va̭ nayati॒ śāntyai॒ yava̭matī॒rava̭ naya॒tyūrgvai yavo॒ yaja̭mānena॒ yūpa॒-ssammi̭to॒ yāvā̭ne॒va yaja̭māna॒-stāva̭tī-me॒vāsmi॒-nnūrja̭-ndadhāti [me॒vāsmi॒-nnūrja̭-ndadhāti, pi॒tṛ॒ṇāgṃ sada̭nama॒sīti̭] 19

pitṛ॒ṇāgṃ sada̭nama॒sīti̭ ba॒r॒hirava̭ stṛṇāti pitṛdeva॒tyā᳚(1॒)gg॒ hyḙta-dyannikhā̭taṃ॒-ya~-dba॒r॒hirana̭vastīrya minu॒yā-tpi̭tṛdeva॒tyo̭ nikhā̭ta-ssyā-dba॒r॒hira̭va॒stīrya̭ minotya॒syāme॒vaina̭-mminoti yūpaśaka॒lamavā᳚syati॒ satḙjasame॒vaina̭-mminoti de॒vastvā̭ savi॒tā maddhvā̭-'na॒ktvityā̭ha॒ teja̭sai॒vaina̭manakti supippa॒lābhya॒-stvauṣa̭dhībhya॒ iti̭ ca॒ṣāla॒-mprati̭- [ca॒ṣāla॒-mprati̭, mu॒ñca॒ti॒ tasmā᳚cchīrṣa॒ta] 20

-muñcati॒ tasmā᳚cchīrṣa॒ta oṣa̭dhayaḥ॒ phala̭-ṅgṛhṇantya॒nakti॒ tejo॒ vā ājyaṃ॒-ya~ja̭mānenāgni॒ṣṭhā-'śri॒-ssammi̭tā॒ yada̭gni॒ṣṭhā-maśri̭ma॒nakti॒ yaja̭māname॒va teja̭sā 'naktyā॒nta-ma̭naktyā॒ntame॒va yaja̭māna॒-nteja̭sānakti sa॒rvataḥ॒ pari̭ mṛśa॒tyapa̭rivarga-me॒vāsmi॒-ntejo̭ dadhā॒tyu-ddivagg̭ stabhā॒nā-'ntari̭kṣa-mpṛ॒ṇetyā̭hai॒ṣāṃ-lo~॒kānāṃ॒-vi~dhṛ̭tyai vaiṣṇa॒vyarcā [vaiṣṇa॒vyarcā, ka॒lpa॒ya॒ti॒ vai॒ṣṇa॒vo vai] 21

ka̭lpayati vaiṣṇa॒vo vai de॒vata̭yā॒ yūpa॒-ssvayai॒vaina̭-nde॒vata̭yā kalpayati॒ dvābhyā᳚-ṅkalpayati dvi॒pā-dyaja̭mānaḥ॒ prati̭ṣṭhityai॒ ya-ṅkā॒mayḙta॒ teja̭saina-nde॒vatā̭bhirindri॒yeṇa॒ vya̭rdhayeya॒-mitya̭gni॒ṣṭhā-ntasyāśri̭-māhava॒nīyā̭di॒tthaṃ-ve~॒tthaṃ-vā~-'ti̭ nāvaye॒-tteja̭sai॒vaina̭-nde॒vatā̭bhirindri॒yeṇa॒ vya̭rdhayati॒ ya-ṅkā॒mayḙta॒ teja̭saina-nde॒vatā̭bhirindri॒yeṇa॒ sama̭rdhayeya॒mi- [sama̭rdhayeya॒miti̭, a॒gni॒ṣṭhā-] 22

-tya̭gni॒ṣṭhā-ntasyāśri̭māhava॒nīyḙna॒ sa-mmi̭nuyā॒-tteja̭sai॒vaina̭-nde॒vatā̭bhirindri॒yeṇa॒ sama̭rdhayati brahma॒vani̭-ntvā kṣatra॒vani॒mityā̭ha yathāya॒jure॒vaita-tpari̭ vyaya॒tyūrgvai ra̭śa॒nā yaja̭mānena॒ yūpa॒-ssammi̭to॒ yaja̭māname॒vorjā sama̭rdhayati nābhida॒ghne pari̭ vyayati nābhida॒ghna e॒vāsmā॒ ūrja̭-ndadhāti॒ tasmā᳚nnābhida॒ghna ū॒rjā bhṷñjate॒ ya-ṅkā॒mayḙto॒rjainaṃ॒- [ya-ṅkā॒mayḙto॒rjaina᳚m, vya̭rdhayeya॒-] 23

~vya̭rdhayeya॒-mityū॒rdhvāṃ-vā~॒ tasyāvā̭cīṃ॒-vā~-'vo̭hedū॒rjaivainaṃ॒-vya~̭rdhayati॒ yadi̭ kā॒mayḙta॒ varṣṷkaḥ pa॒rjanyaḥ̭ syā॒ditya-vā̭cī॒mavo̭he॒-dvṛṣṭi̭me॒va ni ya̭cchati॒ yadi̭ kā॒maye॒tāva̭rṣuka-ssyā॒dityū॒rdhvāmudṷ̄he॒-dvṛṣṭi̭me॒vo-dya̭cchati pitṛ॒ṇā-nnikhā̭ta-mmanu॒ṣyā̭ṇāmū॒rdhva-nnikhā̭tā॒dā ra̭śa॒nāyā॒ oṣa̭dhīnāgṃ raśa॒nā viśvḙṣā- [viśvḙṣām, de॒vānā̭-] 24

-nde॒vānā̭-mū॒rdhvagṃ ra̭śa॒nāyā॒ ā ca॒ṣālā॒dindra̭sya ca॒ṣālagṃ̭ sā॒ddhyānā॒mati̭rikta॒gṃ॒ sa vā e॒ṣa sa̭rvadeva॒tyo̭ yadyūpo॒ yadyūpa̭-mmi॒noti॒ sarvā̭ e॒va de॒vatāḥ᳚ prīṇāti ya॒jñena॒ vai de॒vā-ssṷva॒rgaṃ-lo~॒kamā̭ya॒-ntḙ-'manyanta manu॒ṣyā̭ no॒-'nvābha̭viṣya॒ntīti॒ te yūpḙna yopayi॒tvā sṷva॒rgaṃ ~lo॒kamā̭ya॒-ntamṛṣa̭yo॒ yūpḙnai॒vānu॒ prājā̭na॒-nta-dyūpa̭sya yūpa॒tvaṃ- [yūpa॒tvam, ya-dyūpa̭-] 25

~ya-dyūpa̭-mmi॒noti̭ suva॒rgasya̭ lo॒kasya॒ prajñā᳚tyai pu॒rastā᳚-nminoti pu॒rastā॒ddhi ya॒jñasya̭ prajñā॒yate pra̭jñāta॒gṃ॒ hi ta-dyadati̭panna ā॒huri॒da-ṅkā॒rya̭māsī॒diti̭ sā॒ddhyā vai de॒vā ya॒jñamatya̭manyanta॒ tān. ya॒jño nāspṛ̭śa॒-ttān. ya-dya॒jñasyāti̭rikta॒māsī॒-ttada̭spṛśa॒dati̭riktaṃ॒-vā~ e॒ta-dya॒jñasya॒ yada॒gnāva॒gni-mma̭thi॒tvā pra॒hara॒tyati̭riktame॒ta- [pra॒hara॒tyati̭riktame॒tat, yūpa̭sya॒] 26

-dyūpa̭sya॒ yadū॒rdhva-ñca॒ṣālā॒-tteṣā॒-nta-dbhā̭ga॒dheya॒-ntāne॒va tena̭ prīṇāti de॒vā vai saggsthi̭te॒ some॒ pra sruco-'ha̭ra॒-npra yūpa॒-ntḙ-'manyanta yajñaveśa॒saṃ-vā~ i॒da-ṅkṷrma॒ iti॒ te pra̭sta॒ragg sru॒cā-nni॒ṣkraya̭ṇa-mapaśya॒n-thsvaruṃ॒-yū~pa̭sya॒ saggsthi̭te॒ some॒ pra pra̭sta॒ragṃ hara̭ti ju॒hoti॒ svaru॒maya̭jñaveśasāya || 27 ||

(da॒dhā॒ti॒ - pratyṛ॒ - cā - sama̭rdhayeya॒mityū॒ - rjainaṃ॒ - ~viśvḙṣāṃ - ~yūpa॒tva - mati̭riktame॒ta-d- dvica̭tvārigṃśacca) (a. 4)

sā॒ddhyā vai de॒vā a॒smi~llo॒ka ā̭sa॒-nnānya-tki̭-ñca॒na mi॒ṣa-tte᳚-'gnime॒vāgnaye॒ medhā॒yā 'la̭bhanta॒ na hya̭nyadā̭la॒bhyaṃ̭-mavi̭nda॒-ntato॒ vā i॒māḥ pra॒jāḥ prājā̭yanta॒ yada॒gnāva॒gni-mma̭thi॒tvā pra॒hara̭ti pra॒jānā᳚-mpra॒jana̭nāya ru॒dro vā e॒ṣa yada॒gniryaja̭mānaḥ pa॒śurya-tpa॒śumā॒labhyā॒gni-mmanthe᳚-dru॒drāya॒ yaja̭māna॒- [yaja̭mānam, api̭ daddhyā-] 28

-mapi̭ daddhyā-tpra॒māyṷka-ssyā॒datho॒ khalvā̭hura॒gni-ssarvā̭ de॒vatā̭ ha॒vire॒tadya-tpa॒śuriti॒ ya-tpa॒śumā॒labhyā॒gni-mmantha̭ti ha॒vyāyai॒vā-''sa̭nnāya॒ sarvā̭ de॒vatā̭ janaya-tyupā॒kṛtyai॒va manthya॒-stannevā-''la̭bdha॒-nnevānā̭labdha-ma॒gne-rja॒nitra̭-ma॒sītyā̭hā॒gnerhyḙta-jja॒nitraṃ॒-vṛ~ṣa̭ṇau stha॒ ityā̭ha॒ vṛṣa̭ṇau॒ [vṛṣa̭ṇau, hyḙtā-] 29

hyḙtā-vu॒rvaśya̭syā॒yu-ra॒sītyā̭ha mithuna॒tvāya̭ ghṛ॒tenā॒kte vṛṣa̭ṇa-ndadhāthā॒mityā̭ha॒ vṛṣa̭ṇa॒gg॒ hyḙte dadhā̭te॒ ye a॒gni-ṅgā̭ya॒tra-ñchando-'nu॒ pra jā̭ya॒svetyā̭ha॒ chando̭bhire॒vaina॒-mpra ja̭nayatya॒gnayḙ ma॒thyamā̭nā॒yānṷ brū॒hītyā̭ha sāvi॒trīmṛca॒manvā̭ha savi॒tṛpra̭sūta e॒vaina̭-mmanthati jā॒tāyānṷ brūhi [brūhi, pra॒hri॒yamā̭ṇā॒yā-'nṷ] 30

prahri॒yamā̭ṇā॒yā-'nṷ brū॒hītyā̭ha॒ kāṇḍḙkāṇḍa e॒vaina̭-ṅkri॒yamā̭ṇe॒ sama̭rdhayati gāya॒trī-ssarvā॒ anvā̭ha gāya॒tracha̭ndā॒ vā a॒gni-ssvenai॒vaina॒-ñchanda̭sā॒ sama̭rdhayatya॒gniḥ pu॒rā bhava̭tya॒gni-mma̭thi॒tvā pra ha̭rati॒ tau sa॒bhaṃva~̭ntau॒ yaja̭mānama॒bhi sa-mbha̭vato॒ bhava̭ta-nna॒-ssama̭nasā॒vityā̭ha॒ śāntyai᳚ pra॒hṛtya̭ juhoti jā॒tāyai॒vāsmā॒ anna॒mapi̭ dadhā॒tyājyḙna juhotye॒tadvā a॒gneḥ pri॒ya-ndhāma॒ yadājya̭-mpri॒yeṇai॒vaina॒-ndhāmnā॒ sama̭rdhaya॒tyatho॒ teja̭sā || 31 ||

(yaja̭māna-māha॒ vṛṣa̭ṇau-jā॒tāyānṷ brū॒hyā-pya॒ -ṣṭāda̭śa ca) (a. 5)

i॒ṣe tveti̭ ba॒r॒hirā da̭tta i॒cchata̭ iva॒ hyḙṣa yo yaja̭ta upa॒vīra॒sītyā॒hopa॒ hyḙnānāka॒rotyupo̭ de॒vā-ndaivī॒rviśaḥ॒ prāgu॒rityā̭ha॒ daivī॒rhyḙtā viśaḥ̭ sa॒tīrde॒vānṷpa॒yanti॒ vahnī̭ru॒śija॒ ityā̭ha॒rtvijo॒ vai vahna̭ya u॒śija॒-stasmā̭de॒vamā̭ha॒ bṛha̭spate dhā॒rayā॒ vasū॒nī- [vasū॒nīti̭, ā॒ha॒ brahma॒ vai] 32

-tyā̭ha॒ brahma॒ vai de॒vānā॒-mbṛha॒spati॒ rbrahma̭ṇai॒vāsmai̭ pa॒śūnava̭ rundhe ha॒vyā te᳚ svadantā॒mityā̭ha sva॒daya̭tye॒vainā॒-ndeva̭ tvaṣṭa॒rvasṷ ra॒ṇvetyā̭ha॒ tvaṣṭā॒ vai pa̭śū॒nā-mmi̭thu॒nānāgṃ̭ rūpa॒kṛ-drū॒pame॒va pa॒śuṣṷ dadhāti॒ reva̭tī॒ rama̭ddhva॒mityā̭ha pa॒śavo॒ vai re॒vatīḥ᳚ pa॒śūne॒vāsmai̭ ramayati de॒vasya̭ tvā savi॒tuḥ pra̭sa॒va iti̭ [iti̭, ra॒śa॒nāmā da̭tte॒] 33

raśa॒nāmā da̭tte॒ prasū᳚tyā a॒śvino᳚rbā॒hubhyā॒-mityā̭hā॒śvinau॒ hi de॒vānā̭maddhva॒ryū āstā᳚-mpū॒ṣṇo hastā᳚bhyā॒mityā̭ha॒ yatyā̭ ṛ॒tasya̭ tvā devahaviḥ॒ pāśe॒nā-'' ra̭bha॒ ityā̭ha sa॒tyaṃ-vā~ ṛ॒tagṃ sa॒tyenai॒vaina̭mṛ॒tenā ''ra̭bhate 'kṣṇa॒yā pari̭ harati॒ vaddhya॒gṃ॒ hi pra॒tyañca̭-mprati mu॒ñcanti॒ vyāvṛ̭ttyai॒ dharṣā॒ mānṷṣā॒niti॒ ni yṷnakti॒ dhṛtyā̭ a॒dbhya- [a॒dbhyaḥ, tvauṣa̭dhībhyaḥ॒] 34

-stvauṣa̭dhībhyaḥ॒ prokṣā॒mītyā̭hā॒dbhyo hyḙṣa oṣa̭dhībhya-ssa॒bhaṃva~̭ti॒ ya-tpa॒śura॒pā-mpe॒rura॒sītyā̭hai॒ṣa hya̭pā-mpā॒tā yo medhā̭yā-'' ra॒bhyate᳚ svā॒tta-ñci॒-thsadḙvagṃ ha॒vyamāpo̭ devī॒-ssvada̭taina॒mityā̭ha sva॒daya̭tye॒vaina̭-mu॒pari̭ṣṭā॒-tprokṣa̭tyu॒pari̭ṣṭāde॒vaina॒-mmeddhya̭-ṅkaroti pā॒yaya̭tyantara॒ta e॒vaina॒-mmeddhya̭-ṅkarotya॒dhastā॒dupo᳚kṣati sa॒rvata̭ e॒vaina॒-mmeddhya̭-ṅkaroti || 35 ||

(vasū॒nīti̭-prasa॒va itya॒-dbhyo᳚-'ntara॒ta e॒vainaṃ॒ - daśa̭ ca) (a. 6)

a॒gninā॒ vai hotrā̭ de॒vā asṷrā-na॒bhya̭bhava-nna॒gnayḙ sami॒ddhyamā̭nā॒yānṷ brū॒hītyā̭ha॒ bhrātṛ̭vyābhibhūtyai sa॒ptada̭śa sāmidhe॒nīranvā̭ha saptada॒śaḥ pra॒jāpa̭tiḥ pra॒jāpa̭te॒rāptyai̭ sa॒ptada॒śānvā̭ha॒ dvāda̭śa॒ māsāḥ॒ pañca॒rtava॒-ssa saṃ̭va~thsa॒ra-ssaṃ̭va~thsa॒ra-mpra॒jā anu॒ prajā̭yante pra॒jānā᳚-mpra॒jana̭nāya de॒vā vai sā̭midhe॒nīra॒nūcya̭ ya॒jña-nnānva̭paśya॒n-thsa pra॒jāpa̭ti-stū॒ṣṇī-mā̭ghā॒ra- [-mā̭ghā॒ram, ā 'ghā̭raya॒-ttato॒ vai] 36

-mā 'ghā̭raya॒-ttato॒ vai de॒vā ya॒jñamanva̭paśya॒n॒. ya-ttū॒ṣṇī-mā̭ghā॒ra-mā̭ghā॒raya̭ti ya॒jñasyānṷkhyātyā॒ asṷreṣu॒ vai ya॒jña ā̭sī॒-tta-nde॒vāstū᳚ṣṇīgṃ ho॒menā̭vṛñjata॒ ya-ttū॒ṣṇī-mā̭ghā॒ra-mā̭ghā॒raya̭ti॒ bhrātṛ̭vyasyai॒ va ta-dya॒jñaṃ-vṛ~̭ṅkte pari॒dhī̭n-thsa-mmā᳚rṣṭi pu॒nātye॒vainā॒-ntristri॒-ssa-mmā᳚rṣṭi॒ tryā̭vṛ॒ddhi ya॒jño-'tho॒ rakṣa̭sā॒mapa̭hatyai॒ dvāda̭śa॒ sa-mpa̭dyante॒ dvāda̭śa॒ [dvāda̭śa, māsā᳚-ssaṃva~thsa॒ra-] 37

māsā᳚-ssaṃva~thsa॒ra-ssaṃ̭va~thsa॒rame॒va prī̭ṇā॒tyatho̭ saṃva~thsa॒rame॒vāsmā॒ upa̭ dadhāti suva॒rgasya̭ lo॒kasya॒ sama̭ṣṭyai॒ śiro॒ vā e॒ta-dya॒jñasya॒ yadā̭ghā॒ro᳚-'gni-ssarvā̭ de॒vatā॒ yadā̭ghā॒ra-mā̭ghā॒raya̭ti śīrṣa॒ta e॒va ya॒jñasya॒ yaja̭māna॒-ssarvā̭ de॒vatā॒ ava̭ rundhe॒ śiro॒ vā e॒ta-dya॒jñasya॒ yadā̭ghā॒ra ā॒tmā pa॒śurā̭ghā॒ramā॒ghārya̭ pa॒śugṃ sama̭naktyā॒tmanne॒va ya॒jñasya॒ [ya॒jñasya̭, śiraḥ॒ prati̭ dadhāti॒] 38

śiraḥ॒ prati̭ dadhāti॒ sa-nte᳚ prā॒ṇo vā॒yunā̭ gacchatā॒mityā̭ha vāyudeva॒tyo̭ vai prā॒ṇo vā॒yāve॒vāsya̭ prā॒ṇa-ñjṷhoti॒ saṃ-ya~ja̭trai॒raṅgā̭ni॒ saṃ-ya~॒jñapa̭tirā॒śiṣetyā̭ha ya॒jñapa̭time॒vāsyā॒-''śiṣa̭-ṅgamayati vi॒śvarṷ̄po॒ vai tvā॒ṣṭra u॒pari̭ṣṭā-tpa॒śuma॒bhya̭vamī॒-ttasmā̭-du॒pari̭ṣṭā-tpa॒śornāva̭ dyanti॒ yadu॒pari̭ṣṭā-tpa॒śugṃ sa̭ma॒nakti॒ meddhya̭me॒vai- [meddhya̭me॒va, e॒na॒-ṅka॒ro॒tyṛ॒tvijo̭] 39

-na̭-ṅkarotyṛ॒tvijo̭ vṛṇīte॒ chandāg̭sye॒va vṛ̭ṇīte sa॒pta vṛ̭ṇīte sa॒pta grā॒myāḥ pa॒śavaḥ̭ sa॒ptā-''ra॒ṇyā-ssa॒pta chandāg̭syu॒bhaya॒syā va̭ruddhyā॒ ekā̭daśa prayā॒jān. ya̭jati॒ daśa॒ vai pa॒śoḥ prā॒ṇā ā॒tmaikā̭da॒śo yāvā̭ne॒va pa॒śusta-mpra ya̭jati va॒pāmekaḥ॒ pari̭ śaya ā॒tmaivā-''tmāna॒-mpari̭ śaye॒ vajro॒ vai svadhi̭ti॒rvajro̭ yūpaśaka॒lo ghṛ॒ta-ṅkhalu॒ vai de॒vā vajra̭-ṅkṛ॒tvā soma̭maghna-nghṛ॒tenā॒ktau pa॒śu-ntrā̭yethā॒mityā̭ha॒ vajrḙṇai॒vainaṃ॒-va~śḙ kṛ॒tvā-''la̭bhate || 40 ||

(ā॒ghā॒raṃ - pa̭dyante॒ dvāda̭śā॒ - ''tmanne॒va ya॒jñasya॒ - medhya̭me॒va - khalu॒ vā - a॒ṣṭāda̭śa ca) (a. 7)

parya̭gni karoti sarva॒huta̭me॒vaina̭-ṅkaro॒tya-ska̭ndā॒yā-ska̭nna॒gṃ॒ hi ta-dya-ddhu॒tasya॒ skanda̭ti॒ triḥ parya̭gni karoti॒ tryā̭vṛ॒ddhi ya॒jño-'tho॒ rakṣa̭sā॒mapa̭hatyai brahmavā॒dino̭ vadantyanvā॒rabhyaḥ̭ pa॒śū(3)-rnānvā॒rabhyā(3) iti̭ mṛ॒tyave॒ vā e॒ṣa nī̭yate॒ ya-tpa॒śustaṃ-ya~da̭nvā॒rabhḙta pra॒māyṷko॒ yaja̭māna-ssyā॒datho॒ khalvā̭hu-ssuva॒rgāya॒ vā e॒ṣa lo॒kāya̭ nīyate॒ ya- [yat, pa॒śuriti॒] 41

-tpa॒śuriti॒ yannānvā॒rabhḙta suva॒rgāllo॒kā-dyaja̭māno hīyeta vapā॒śrapa̭ṇībhyā-ma॒nvāra̭bhate॒ tannevā॒nvāra̭bdha॒-nnevāna̭nvārabdha॒mupa॒ preṣya̭ hotarha॒vyā de॒vebhya॒ ityā̭heṣi॒tagṃ hi karma̭ kri॒yate॒ reva̭tīrya॒jñapa̭ti-mpriya॒dhā ''vi̭śa॒tetyā̭ha yathāya॒jure॒vaitada॒gninā̭ pu॒rastā̭deti॒ rakṣa̭sā॒mapa̭hatyai pṛthi॒vyā-ssa॒pṛñcaḥ̭ pā॒hīti̭ ba॒r॒hi- [ba॒r॒hiḥ, upā᳚-'sya॒tya-ska̭ndā॒yā-] 42

-rupā᳚-'sya॒tya-ska̭ndā॒yā-ska̭nna॒gṃ॒ hi ta-dya-dba॒r॒hiṣi॒ skanda॒tyatho̭ barhi॒ṣada̭me॒vaina̭-ṅkaroti॒ parāṃ॒ā va̭rtate-'ddhva॒ryuḥ pa॒śo-ssa᳚jña॒mpyamā̭nā-tpa॒śubhya̭ e॒va tanni hnṷta ā॒tmano-'nā᳚vraskāya॒ gaccha̭ti॒ śriya॒-mpra pa॒śūnā᳚pnoti॒ ya e॒vaṃ-ve~da̭ pa॒ścāllo̭kā॒ vā e॒ṣā prācyu॒dānī̭yate॒ ya-tpatnī॒ nama̭sta ātā॒netyā̭hā-''di॒tyasya॒ vai ra॒śmaya̭ [ra॒śmayaḥ̭, ā॒tā॒nāstebhya̭] 43

ātā॒nāstebhya̭ e॒va nama̭skarotyana॒rvā prehītyā̭ha॒ bhrātṛ̭vyo॒ vā arvā॒ bhrātṛ̭vyāpanuttyai ghṛ॒tasya̭ ku॒lyāmanṷ sa॒ha pra॒jayā̭ sa॒ha rā॒yaspoṣe॒ṇe-tyā̭hā॒ ''śiṣa̭me॒vaitāmā śā᳚sta॒ āpo̭ devī-śśuddhāyuva॒ ityā̭ha yathāya॒jure॒vaitat || 44 ||

(lo॒kāya̭ nīyate॒ ya-d- ba॒ra॒ḥī - ra॒śmayaḥ̭ - sa॒ptatrigṃ̭śacca) (a. 8)

pa॒śorvā āla̭bdhasya prā॒ṇāñchugṛ̭cchati॒ vākta॒ ā pyā̭yatā-mprā॒ṇasta॒ ā pyā̭yatā॒mityā̭ha prā॒ṇebhya̭ e॒vāsya॒ śucagṃ̭ śamayati॒ sā prā॒ṇebhyo-'dhi̭ pṛthi॒vīgṃ śu-kpra vi̭śati॒ śamaho᳚bhyā॒miti॒ ni na̭yatyahorā॒trābhyā̭me॒va pṛ̭thi॒vyai śucagṃ̭ śamaya॒tyoṣa̭dhe॒ trā̭yasvaina॒gg॒ svadhi̭te॒ mainagṃ̭ higṃsī॒rityā̭ha॒ vajro॒ vai svadhi̭ti॒- [svadhi̭tiḥ, śāntyai̭ pārśva॒ta] 45

-śśāntyai̭ pārśva॒ta ā cchya̭ti maddhya॒to hi ma̭nu॒ṣyā̭ ā॒ cchyanti̭ tira॒ścīna॒mā cchya̭tyanū॒cīna॒gṃ॒ hi ma̭nu॒ṣyā̭ ā॒cchyanti॒ vyāvṛ̭ttyai॒ rakṣa̭sā-mbhā॒go̭-'sīti̭ sthavima॒to ba॒r॒hira॒ktvā-'pā᳚syatya॒snaiva rakṣāgṃ̭si ni॒rava̭dayata i॒dama॒hagṃ rakṣo̭-'dha॒ma-ntamo̭ nayāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma ityā̭ha॒ dvau vāva purṷṣau॒ ya-ñcai॒va [ ] 46

dveṣṭi॒ yaścai̭na॒-ndveṣṭi॒ tāvu॒bhāva̭dha॒ma-ntamo̭ nayatī॒ṣe tveti̭ va॒pāmutkhi̭datī॒cchata̭ iva॒ hyḙṣa yo yaja̭te॒ yadṷpatṛ॒ndyā-dru॒dro᳚-'sya pa॒śū-nghātṷka-ssyā॒-dyannopa̭tṛ॒ndyā-daya̭tā syā-da॒nyayo̭patṛ॒ṇattya॒nyayā॒ na dhṛtyai̭ ghṛ॒tena̭ dyāvāpṛthivī॒ prorṇvā̭thā॒mityā̭ha॒ dyāvā̭pṛthi॒vī e॒va rasḙnāna॒ktyacchi̭nno॒ [rasḙnāna॒ktyacchi̭nnaḥ, rāyaḥ̭ su॒vīra॒] 47

rāyaḥ̭ su॒vīra॒ ityā̭ha yathāya॒jure॒vaita-tkrū॒rami̭va॒ vā e॒ta-tka̭roti॒ ya-dva॒pā-mṷtkhi॒da-tyu॒rva̭ntari̭kṣa॒-manvi॒hītyā̭ha॒ śāntyai॒ pra vā e॒ṣo᳚-'smāllo॒kāccya̭vate॒ yaḥ pa॒śu-mmṛ॒tyavḙ nī॒yamā̭namanvā॒rabha̭te vapā॒śrapa̭ṇī॒ puna̭ra॒nvāra̭bhate॒-'sminne॒va lo॒ke prati̭ tiṣṭhatya॒gninā̭ pu॒rastā̭deti॒ rakṣa̭sā॒mapa̭hatyā॒ atho̭ de॒vatā̭ e॒va ha॒vyenā- [e॒va ha॒vyena̭, anvḙti॒] 48

-nvḙti॒ nānta॒mamaṅgā̭ra॒mati̭ hare॒-dyada̭nta॒mamaṅgā̭ramati॒ hare᳚-dde॒vatā॒ ati̭ manyeta॒ vāyo॒ vīhi̭ sto॒kānā॒mityā̭ha॒ tasmā॒-dvibha̭ktā-ssto॒kā ava̭ padya॒nte-'graṃ॒-vā~ e॒ta-tpa̭śū॒nāṃ-ya~-dva॒pā-'gra॒moṣa̭dhīnā-mba॒r॒hiragrḙṇai॒vāgra॒gṃ॒ sama̭rdhaya॒tyatho॒ oṣa̭dhīṣve॒va pa॒śū-nprati̭ṣṭhāpayati॒ svāhā̭kṛtībhyaḥ॒ preṣyetyā̭ha [ ] 49

ya॒jñasya॒ sami̭ṣṭyai prāṇāpā॒nau vā e॒tau pa̭śū॒nāṃ-ya~-tpṛ̭ṣadā॒jyamā॒tmā va॒pā pṛ̭ṣadā॒jyama̭bhi॒ghārya̭ va॒pāma॒bhi ghā̭rayatyā॒tmanne॒va pa̭śū॒nā-mprā̭ṇāpā॒nau da̭dhāti॒ svāho॒rdhvana̭bhasa-mmāru॒ta-ṅga̭cchata॒mityā̭ho॒rdhvana̭bhā ha sma॒ vai mā̭ru॒to de॒vānāṃ᳚-va~pā॒śrapa̭ṇī॒ pra ha̭rati॒ tenai॒vaine॒ pra ha̭rati॒ viṣṷ̄cī॒ pra ha̭rati॒ tasmā॒-dviṣva̭ñcau prāṇāpā॒nau || 50 ||

(svadhi̭ti - ścai॒vā - cchi̭nno - ha॒vyene॒ - ṣyetyā̭ha॒ - ṣaṭca̭tvārigṃśacca) (a. 9)

pa॒śumā॒labhya̭ puro॒ḍāśa॒-nnirva̭pati॒ samḙdhame॒vaina॒mā la̭bhate va॒payā᳚ pra॒carya̭ puro॒ḍāśḙna॒ pra ca̭ra॒tyūrgvai pṷro॒ḍāśa॒ ūrja̭me॒va pa̭śū॒nā-mma̭ddhya॒to da̭dhā॒tyatho̭ pa॒śore॒va chi॒dramapi̭ dadhāti pṛṣadā॒jyasyo̭pa॒hatya॒ triḥ pṛ̭cchati śṛ॒tagṃ ha॒vī(3)-śśa̭mita॒riti॒ triṣa̭tyā॒ hi de॒vā yo-'śṛ̭tagṃ śṛ॒tamāha॒ sa ena̭sā prāṇāpā॒nau vā e॒tau pa̭śū॒nāṃ- [e॒tau pa̭śū॒nām, ya-tpṛ̭ṣadā॒jya-mpa॒śoḥ] 51

-~ya-tpṛ̭ṣadā॒jya-mpa॒śoḥ khalu॒ vā āla̭bdhasya॒ hṛda̭yamā॒tmā-'bhi samḙti॒ ya-tpṛ̭ṣadā॒jyena॒ hṛda̭ya-mabhighā॒raya̭tyā॒tmanne॒va pa̭śū॒nā-mprā̭ṇāpā॒nau da̭dhāti pa॒śunā॒ vai de॒vā-ssṷva॒rgaṃ-lo~॒kamā̭ya॒-ntḙ-'manyanta manu॒ṣyā̭ no॒-'nvābha̭viṣya॒ntīti॒ tasya॒ śiraḥ̭ chi॒ttvā medha॒-mprākṣā̭raya॒nthsa pra॒kṣo̭-'bhava॒-tta-tpra॒kṣasya̭ prakṣa॒tvaṃ-ya~-tpla̭kṣaśā॒kho-tta̭raba॒r॒hi-rbhava̭ti॒ samḙdhasyai॒va [ ] 52

pa॒śorava̭ dyati pa॒śuṃ-vai~ hri॒yamā̭ṇa॒gṃ॒ rakṣā॒g॒syanṷ sacante-'nta॒rā yūpa̭-ñcā-''hava॒nīya̭-ñca harati॒ rakṣa̭sā॒mapa̭hatyai pa॒śorvā āla̭bdhasya॒ mano-'pa̭ krāmati ma॒notā̭yai ha॒viṣo̭-'vadī॒yamā̭na॒syānṷ brū॒hītyā̭ha॒ mana̭ e॒vāsyāva̭ rundha॒ ekā̭daśāva॒dānā॒nyava̭ dyati॒ daśa॒ vai pa॒śoḥ prā॒ṇā ā॒tmaikā̭da॒śo yāvā̭ne॒va pa॒śustasyā-'va̭- [pa॒śustasyā-'va̭, dya॒ti॒ hṛda̭ya॒syā-] 53

-dyati॒ hṛda̭ya॒syā-gre-'va̭ dya॒tyatha̭ ji॒hvāyā॒ atha॒ vakṣa̭so॒ yadvai hṛda̭yenābhi॒gaccha̭ti॒ tajji॒hvayā̭ vadati॒ yajji॒hvayā॒ vada̭ti॒ tadura॒so-'dhi॒ nirva̭datye॒tadvai pa॒śorya̭thāpū॒rvaṃ-ya~syai॒vama̭va॒dāya̭ yathā॒kāma॒-mutta̭reṣāmava॒dyati̭ yathā pū॒rvame॒vāsya̭ pa॒śorava̭tta-mbhavati maddhya॒to gu॒dasyāva̭ dyati maddhya॒to hi prā॒ṇa ṷtta॒masyāva̭ dya- [ṷtta॒masyāva̭ dyati, u॒tta॒mo hi prā॒ṇo] 54

-tyutta॒mo hi prā॒ṇo yadīta̭raṃ॒-ya~dīta̭ra-mu॒bhaya̭me॒vājā̭mi॒ jāya̭māno॒ vai brā᳚hma॒ṇa-stri॒bhir-ṛ̭ṇa॒vā jā̭yate brahma॒carye॒ṇarṣi̭bhyo ya॒jñena̭ de॒vebhyaḥ̭ pra॒jayā̭ pi॒tṛbhya̭ e॒ṣa vā a̭nṛ॒ṇo yaḥ pu॒trī yajvā᳚ brahmacārivā॒sī tada̭va॒dānai̭-re॒vā-'va̭ dayate॒ tada̭va॒dānā̭nā-mavadāna॒tva-ndḙvāsu॒rā-ssaṃya~̭ttā āsa॒-nte de॒vā a॒gnima̭bruva॒-ntvayā̭ vī॒reṇāsṷrāna॒bhi bha̭vā॒meti॒ [bha̭vā॒meti̭, so᳚-'bravī॒-dvaraṃ̭-vṛ~ṇai] 55

so᳚-'bravī॒-dvaraṃ̭-vṛ~ṇai pa॒śorṷddhā॒ramuddha̭rā॒ iti॒ sa e॒tamṷddhā॒ramuda̭harata॒ doḥ pū᳚rvā॒rdhasya̭ gu॒da-mma̭ddhya॒ta-śśroṇi̭-ñjaghanā॒rdhasya॒ tato̭ de॒vā abha̭va॒-nparā-'sṷrā॒ ya-ttrya॒ṅgāṇāgṃ̭ samava॒dyati॒ bhrātṛ̭vyābhibhūtyai॒ bhava̭tyā॒tmanā॒ parā᳚-'sya॒ bhrātṛ̭vyo bhavatyakṣṇa॒yā-'va̭ dyati॒ tasmā̭dakṣṇa॒yā pa॒śavo-'ṅgā̭ni॒ pra ha̭ranti॒ prati̭ṣṭhityai || 56 ||

(e॒tau pa̭śū॒nāgṃ - samḙdhasyai॒va - tasyā-'vo᳚ - tta॒masyāva̭ dya॒tī - ti॒ - pañca̭catvārigṃśacca) (a. 10)

meda̭sā॒ srucau॒ prorṇo̭ti॒ medo̭rūpā॒ vai pa॒śavo̭ rū॒pame॒va pa॒śuṣṷ dadhāti yū॒ṣanna̭va॒dhāya॒ prorṇo̭ti॒ raso॒ vā e॒ṣa pa̭śū॒nāṃ-ya~dyū rasa̭me॒va pa॒śuṣṷ dadhāti pā॒rśvena̭ vasāho॒ma-mprayaṷti॒ maddhyaṃ॒-vā~ e॒ta-tpa̭śū॒nāṃ-ya~-tpā॒rśvagṃ rasa̭ e॒ṣa pa̭śū॒nāṃ-ya~dvasā॒ ya-tpā॒rśvena̭ vasāho॒ma-mpra॒yauti̭ maddhya॒ta e॒va pa̭śū॒nāgṃ rasa̭-ndadhāti॒ ghnanti॒ [ghnanti̭, vā e॒ta-tpa॒śu-] 57

vā e॒ta-tpa॒śuṃ-ya~-thsa᳚jña॒mpaya̭ntyai॒ndraḥ khalu॒ vai de॒vata̭yā prā॒ṇa ai॒ndro̭-'pā॒na ai॒ndraḥ prā॒ṇo aṅgḙaṅge॒ ni de᳚ddhya॒dityā̭ha prāṇāpā॒nāve॒va pa॒śuṣṷ dadhāti॒ deva̭ tvaṣṭa॒rbhūri̭ te॒ sagṃ sa̭me॒tvityā̭ha tvā॒ṣṭrā hi de॒vata̭yā pa॒śavo॒ viṣṷrūpā॒ ya-thsala̭kṣmāṇo॒ bhava॒thetyā̭ha॒ viṣṷrūpā॒ hyḙte santa॒-ssala̭kṣmāṇa e॒tarhi॒ bhava̭nti deva॒trā yanta॒- [deva॒trā yanta᳚m, ava̭se॒] 58

-mava̭se॒ sakhā॒yo-'nṷ tvā mā॒tā pi॒taro̭ mada॒ntvityā॒hā-nṷmatame॒vaina̭-mmā॒trā pi॒trā sṷva॒rgaṃ-lo~॒ka-ṅga̭mayatyardha॒rce va̭sāho॒ma-ñjṷhotya॒sau vā a̭rdha॒rca i॒yama̭rdha॒rca i॒me e॒va rasḙnānakti॒ diśo̭ juhoti॒ diśa̭ e॒va rasḙnāna॒ktyatho̭ di॒gbhya e॒vorja॒gṃ॒ rasa॒mava̭ rundhe prāṇāpā॒nau vā e॒tau pa̭śū॒nāṃ-ya~-tpṛ̭ṣadā॒jyaṃ-vā~̭naspa॒tyāḥ khalu॒ [khalṷ, vai de॒vata̭yā pa॒śavo॒] 59

vai de॒vata̭yā pa॒śavo॒ ya-tpṛ̭ṣadā॒jyasyo̭-pa॒hatyā-''ha॒ vana॒spata॒ye-'nṷ brūhi॒ vana॒spata̭ye॒ preṣyeti̭ prāṇāpā॒nāve॒va pa॒śuṣṷ dadhātya॒nyasyā᳚nyasya samava॒ttagṃ sa॒mava̭dyati॒ tasmā॒nnānā̭rūpāḥ pa॒śavo̭ yū॒ṣṇopa̭ siñcati॒ raso॒ vā e॒ṣa pa̭śū॒nāṃ-ya~dyū rasa̭me॒va pa॒śuṣṷ dadhā॒tīḍā॒mupa̭ hvayate pa॒śavo॒ vā iḍā̭ pa॒śūne॒vopa̭ hvayate ca॒turupa̭ hvayate॒ [ca॒turupa̭ hvayate, catṷṣpādo॒ hi] 60

catṷṣpādo॒ hi pa॒śavo॒ ya-ṅkā॒mayḙtā pa॒śu-ssyā॒ditya̭me॒daska॒-ntasmā॒ ā da̭ddhyā॒nmedo̭rūpā॒ vai pa॒śavo̭ rū॒peṇai॒vaina̭-mpa॒śubhyo॒ nirbha̭jatyapa॒śure॒va bha̭vati॒ ya-ṅkā॒mayḙta paśu॒mān-thsyā॒diti॒ meda̭sva॒-ttasmā॒ ā da̭ddhyā॒nmedo̭rūpā॒ vai pa॒śavo̭ rū॒peṇai॒vāsmai̭ pa॒śūnava̭ rundhe paśu॒māne॒va bha̭vati pra॒jāpa̭tirya॒jñama̭sṛjata॒ sa ājya̭- [sa ājya᳚m, pu॒rastā̭dasṛjata] 61

-mpu॒rastā̭dasṛjata pa॒śu-mma̭ddhya॒taḥ pṛ̭ṣadā॒jya-mpa॒ścā-ttasmā॒dājyḙna prayā॒jā i̭jyante pa॒śunā̭ maddhya॒taḥ pṛ̭ṣadā॒jyenā̭-nūyā॒jā-stasmā̭de॒tanmi॒śrami̭va paścā-thsṛ॒ṣṭagg hyekā̭daśānūyā॒jān. ya̭jati॒ daśa॒ vai pa॒śoḥ prā॒ṇā ā॒tmaikā̭da॒śo yāvā̭ne॒va pa॒śustamanṷ yajati॒ ghnanti॒ vā e॒ta-tpa॒śuṃ-ya~-thsaṃ᳚(2)jña॒paya̭nti prāṇāpā॒nau khalu॒ vā e॒tau pa̭śū॒nāṃ-ya~-tpṛ̭ṣadā॒jyaṃ-ya~-tpṛ̭ṣadā॒jyenā̭ nūyā॒jān. yaja̭ti prāṇāpā॒nāve॒va pa॒śuṣṷ dadhāti || 62 ||

(ghnanti॒ - yantaṃ॒ - khalṷ - ca॒turupa̭ hvayata॒ - ājyaṃ॒ - ~ya-tpṛ̭ṣadā॒jyena॒ - ṣaṭ ca̭) (a. 11)

(cātvā̭lāth - suva॒rgāya॒ ya-dvai̭sarja॒nāni̭ - vaiṣṇa॒vyarcā - pṛ̭thi॒vyai - sā॒dhyā - i॒ṣe tve - tya॒gninā॒ - parya̭gni - pa॒śoḥ - pa॒śumā॒labhya॒ - meda̭sā॒ srucā॒ - vekā̭daśa)

(cātvā̭lā-d- de॒vānu॒paiti̭ - muñcati - prahri॒yamā̭ṇāya॒ - parya̭gni - pa॒śumā॒labhya॒ - catṷṣpādo॒ - dviṣa̭ṣṭiḥ)

(cātvā̭lā, tpa॒śuṣṷ dadhāti)

|| hariḥ̭ om ||

|| kṛṣṇa yajurvedīya taittirīya saṃhitāyāṃ ṣaṣṭhakāṇḍe tṛtīyaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहितायां षष्ठकाण्डे तृतीयः प्रश्नः - सोममन्त्रब्राह्मणनिरूपणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

चात्वा॑ला॒-द्धिष्णि॑या॒नुप॑ वपति॒ योनि॒र्वै य॒ज्ञस्य॒ चात्वा॑लं-यँ॒ज्ञस्य॑ सयोनि॒त्वाय॑ दे॒वा वै य॒ज्ञ-म्परा॑-ऽजयन्त॒ तमाग्नी᳚द्ध्रा॒-त्पुन॒रपा॑जयन्ने॒तद्वै य॒ज्ञस्या-प॑राजितं॒-यँदाग्नी᳚द्ध्रं॒-यँदाग्नी᳚द्ध्रा॒द्धिष्णि॑यान्. वि॒हर॑ति॒ यदे॒व य॒ज्ञस्या-प॑राजित॒-न्तत॑ ए॒वैन॒-म्पुन॑स्तनुते परा॒जित्ये॑व॒ खलु॒ वा ए॒ते य॑न्ति॒ ये ब॑हिष्पवमा॒नग्ं सर्प॑न्ति बहिष्पवमा॒ने स्तु॒त [स्तु॒ते, आ॒हाग्नी॑द॒ग्नीन्. वि] 1

आ॒हाग्नी॑द॒ग्नीन्. वि ह॑र ब॒र्॒हि-स्स्तृ॑णाहि पुरो॒डाशा॒ग्ं॒ अल॑-ङ्कु॒र्विति॑ य॒ज्ञमे॒वाप॒जित्य॒ पुन॑स्तन्वा॒ना य॒न्त्यङ्गा॑रै॒र्द्वे सव॑ने॒ वि ह॑रति श॒लाका॑भि-स्तृ॒तीयग्ं॑ सशुक्र॒त्वायाथो॒ स-म्भ॑रत्ये॒वैन॒द्धिष्णि॑या॒ वा अ॒मुष्मि॑न् ँलो॒के सोम॑मरक्ष॒-न्तेभ्यो-ऽधि॒ सोम॒मा-ऽह॑र॒-न्त म॑न्व॒वाय॒न्त-म्पर्य॑विश॒न्॒. य ए॒वं-वेँद॑ वि॒न्दते॑ [य ए॒वं-वेँद॑ वि॒न्दते᳚, प॒रि॒वे॒ष्टार॒-न्ते] 2

परिवे॒ष्टार॒-न्ते सो॑मपी॒थेन॒ व्या᳚र्ध्यन्त॒ ते दे॒वेषु॑ सोमपी॒थमै᳚च्छन्त॒ ता-न्दे॒वा अ॑ब्रुव॒-न्द्वेद्वे॒ नाम॑नी कुरुद्ध्व॒मथ॒ प्र वा॒-ऽऽफ्स्यथ॒ न वेत्य॒ग्नयो॒ वा अथ॒ धिष्णि॑या॒स्तस्मा᳚-द्द्वि॒नामा᳚ ब्राह्म॒णो-ऽर्धु॑क॒स्तेषां॒-येँ नेदि॑ष्ठ-म्प॒र्यवि॑श॒-न्ते सो॑मपी॒थ-म्प्रा-ऽप्नु॑वन्नाहव॒नीय॑ आग्नी॒द्ध्रीयो॑ हो॒त्रीयो॑ मार्जा॒लीय॒स्तस्मा॒-त्तेषु॑ जुह्वत्यति॒हाय॒ वष॑-ट्करोति॒ वि ह्ये॑ [वि हि, ए॒ते सो॑मपी॒थेना-ऽऽर्ध्य॑न्त] 3

-ते सो॑मपी॒थेना-ऽऽर्ध्य॑न्त दे॒वा वै याः प्राची॒-राहु॑ती॒-रजु॑हवु॒र्ये पु॒रस्ता॒दसु॑रा॒ आस॒-न्ताग् स्ताभिः॒ प्राणु॑दन्त॒ याः प्र॒तीची॒र्ये प॒श्चादसु॑रा॒ आस॒-न्ताग्स्ताभि॒-रपा॑नुदन्त॒ प्राची॑र॒न्या आहु॑तयो हू॒यन्ते᳚ प्र॒त्यङ्ङासी॑नो॒ धिष्णि॑या॒न्. व्याघा॑रयति प॒श्चाच्चै॒व पुरस्ता᳚च्च॒ यज॑मानो॒ भ्रातृ॑व्या॒-न्प्र णु॑दते॒ तस्मा॒-त्परा॑चीः प्र॒जाः प्र वी॑यन्ते प्र॒तीची᳚- [प्र॒तीचीः᳚, जा॒य॒न्ते॒ प्रा॒णा वा ए॒ते] 4

-र्जायन्ते प्रा॒णा वा ए॒ते यद्धिष्णि॑या॒ यद॑द्ध्व॒र्युः प्र॒त्य-न्धिष्णि॑या-नति॒सर्पे᳚-त्प्रा॒णान्-थ्सङ्क॑र्षे-त्प्र॒मायु॑क-स्स्या॒न्नाभि॒र्वा ए॒षा य॒ज्ञस्य॒ यद्धोतो॒र्ध्वः खलु॒ वै नाभ्यै᳚ प्रा॒णो-ऽवां॑अपा॒नो यद॑ध्व॒र्युः प्र॒त्यं होता॑रमति॒सर्पे॑दपा॒ने प्रा॒ण-न्द॑ध्या-त्प्र॒मायु॑क-स्स्या॒न्नाद्ध्व॒र्युरुप॑ गाये॒-द्वाग्वी᳚र्यो॒ वा अ॑द्ध्व॒र्यु-र्यद॑द्ध्व॒र्युरु॑प॒-गाये॑दु-द्गा॒त्रे [ ] 5

वाच॒ग्ं॒ स-म्प्र य॑च्छे-दुप॒दासु॑का-ऽस्य॒ वा-ख्स्या᳚द्ब्रह्मवा॒दिनो॑ वदन्ति॒ नासग्ग्॑स्थिते॒ सोमे᳚-ऽद्ध्व॒र्युः प्र॒त्यङ्-ख्सदो-ऽती॑या॒दथ॑ क॒था दा᳚क्षि॒णानि॒ होतु॑मेति॒ यामो॒ हि स तेषा॒-ङ्कस्मा॒ अह॑ दे॒वा यामं॒-वाँ-ऽया॑मं॒-वाँ-ऽनु॑ ज्ञास्य॒न्तीत्यु-त्त॑रे॒णा-ऽऽग्नी᳚द्ध्र-म्प॒रीत्य॑ जुहोति दाक्षि॒णानि॒ न प्रा॒णान्थ्स-ङ्क॑र्षति॒ न्य॑न्ये धिष्णि॑या उ॒प्यन्ते॒ नान्ये या-न्नि॒वप॑ति॒ तेन॒ ता-न्प्री॑णाति॒ या-न्ननि॒वप॑ति॒ यद॑नुदि॒शति॒ तेन॒ तान् ॥ 6 ॥

(स्तु॒ते - वि॒न्दते॒ - हि - वी॑यन्ते प्र॒तीची॑ - रुद्ग्रा॒त्र - उ॒प्यन्ते॒ - चतु॑र्दश च) (अ. 1)

सु॒व॒र्गाय॒ वा ए॒तानि॑ लो॒काय॑ हूयन्ते॒ य-द्वै॑सर्ज॒नानि॒ द्वाभ्या॒-ङ्गार्ह॑पत्ये जुहोति द्वि॒पा-द्यज॑मानः॒ प्रति॑ष्ठित्या॒ आग्नी᳚द्ध्रे जुहोत्य॒न्तरि॑क्ष ए॒वा-ऽऽक्र॑मत आहव॒नीये॑ जुहोति सुव॒र्गमे॒वैनं॑-लोँ॒क-ङ्ग॑मयति दे॒वान्. वै सु॑व॒र्गं-लोँ॒कं-यँ॒तो रक्षाग्॑स्य जिघाग्ंस॒न्ते सोमे॑न॒ राज्ञा॒ रक्षाग्॑-स्यप॒हत्या॒प्तु-मा॒त्मान॑-ङ्कृ॒त्वा सु॑व॒र्गं-लोँ॒कमा॑य॒-न्रक्ष॑सा॒-मनु॑पलाभा॒या ऽऽत्त॒-स्सोमो॑ भव॒त्यथ॑ [भव॒त्यथ॑, वै॒स॒र्ज॒नानि॑ जुहोति॒] 7

वैसर्ज॒नानि॑ जुहोति॒ रक्ष॑सा॒मप॑हत्यै॒ त्वग्ं सो॑म तनू॒कृद्भ्य॒ इत्या॑ह तनू॒कृद्ध्य॑ष द्वेषो᳚भ्यो॒-ऽन्यकृ॑तेभ्य॒ इत्या॑हा॒न्यकृ॑तानि॒ हि रक्षाग्॑स्यु॒रु य॒न्ता-ऽसि॒ वरू॑थ॒मित्या॑हो॒रु ण॑स्कृ॒धीति॒ वावैतदा॑ह जुषा॒णो अ॒प्तुराज्य॑स्य वे॒त्वित्या॑हा॒प्तुमे॒व यज॑मान-ङ्कृ॒त्वा सु॑व॒र्गं-लोँ॒क-ङ्ग॑मयति॒ रक्ष॑सा॒-मनु॑पलाभा॒या-ऽऽ सोम॑-न्ददत॒ [सोम॑-न्ददते, आ ग्राव्ण्ण॒ आ] 8

आ ग्राव्ण्ण॒ आ वा॑य॒व्या᳚न्या द्रो॑णकल॒शमु-त्पत्नी॒मा न॑य॒न्त्यन्वनाग्ं॑सि॒ प्र व॑र्तयन्ति॒ याव॑दे॒वास्यास्ति॒ तेन॑ स॒ह सु॑व॒र्गं-लोँ॒कमे॑ति॒ नय॑वत्य॒र्चा-ऽऽग्नी᳚द्ध्रे जुहोति सुव॒र्गस्य॑ लो॒कस्या॒भिनी᳚त्यै॒ ग्राव्ण्णो॑ वाय॒व्या॑नि द्रोणकल॒शमाग्नी᳚द्ध्र॒ उप॑ वासयति॒ वि ह्ये॑न॒-न्तैर्गृ॒ह्णते॒ य-थ्स॒होप॑वा॒सये॑-दपुवा॒येत॑ सौ॒म्यर्चा प्र पा॑दयति॒ स्वयै॒- [प्र पा॑दयति॒ स्वय᳚, ए॒वैन॑-न्दे॒वत॑या॒] 9

-वैन॑-न्दे॒वत॑या॒ प्र पा॑दय॒त्यदि॑त्या॒-स्सदो॒-ऽस्यदि॑त्या॒-स्सद॒ आ सी॒देत्या॑ह यथाय॒जुरे॒वैत-द्यज॑मानो॒ वा ए॒तस्य॑ पु॒रा गो॒प्ता भ॑वत्ये॒ष वो॑ देव सवित॒-स्सोम॒ इत्या॑ह सवि॒तृप्र॑सूत ए॒वैन॑-न्दे॒वता᳚भ्य॒-स्स-म्प्रय॑च्छत्ये॒त-त्त्वग्ं सो॑म दे॒वो दे॒वानुपा॑गा॒ इत्या॑ह दे॒वो ह्ये॑ष स- [दे॒वो ह्ये॑ष सन्न्, दे॒वानु॒पैती॒दम॒ह-] 10

-न्दे॒वानु॒पैती॒दम॒ह-म्म॑नु॒ष्यो॑ मनु॒ष्या॑नित्या॑ह मनु॒ष्यो᳚(1॒) ह्ये॑ष स-न्म॑नु॒ष्या॑नु॒पैति॒ यदे॒त-द्यजु॒र्न ब्रू॒यादप्र॑जा अप॒शुर्यज॑मान-स्स्या-थ्स॒ह प्र॒जया॑ सह रा॒यस्पोषे॒णेत्या॑ह प्र॒जयै॒व प॒शुभिः॑ स॒हेमं-लोँ॒कमु॒पाव॑र्तते॒ नमो॑ दे॒वेभ्य॒ इत्या॑ह नमस्का॒रो हि दे॒वानाग्॑ स्व॒धा पि॒तृभ्य॒ इत्या॑ह स्वधाका॒रो हि [स्वधाका॒रो हि, पि॒तृ॒णामि॒दम॒ह-] 11

पि॑तृ॒णामि॒दम॒ह-न्निर्वरु॑णस्य॒ पाशा॒दित्या॑ह वरुणपा॒शादे॒व निर्मु॑च्य॒ते ऽग्ने᳚ व्रतपत आ॒त्मनः॒ पूर्वा॑ त॒नूरा॒देयेत्या॑हुः॒ को हि तद्वेद॒ य-द्वसी॑या॒न्-थ्स्वे वशे॑ भू॒ते पुन॑र्वा॒ ददा॑ति॒ न वेति॒ ग्रावा॑णो॒ वै सोम॑स्य॒ राज्ञो॑ मलिम्लुसे॒ना य ए॒वं-विँ॒द्वा-न्ग्राव्ण्ण॒ आग्नी᳚द्ध्र उपवा॒सय॑ति॒ नैन॑-म्मलिम्लुसे॒ना वि॑न्दति ॥ 12 ॥

(अथ॑-ददते॒ - स्वया॒ - सन्थ् - स्व॑धाका॒रो हि - वि॑न्दति) (अ. 2)

वै॒ष्ण॒व्यर्चा हु॒त्वा यूप॒मच्छै॑ति वैष्ण॒वो वै दे॒वत॑या॒ यूप॒-स्स्वयै॒वैन॑-न्दे॒वत॒या ऽच्छै॒त्यत्य॒न्यानगा॒-न्नान्या-नुपा॑गा॒मित्या॒हाति॒ ह्य॑न्यानेति॒ नान्या-नु॒पैत्य॒र्वाक्त्वा॒ परै॑रविद-म्प॒रो-ऽव॑रै॒रित्या॑हा॒र्वाघ्ये॑न॒-म्परै᳚र्वि॒न्दति॑ प॒रो-ऽव॑रै॒स्त-न्त्वा॑ जुषे [जुषे, वै॒ष्ण॒व-न्दे॑वय॒ज्याया॒] 13

वैष्ण॒व-न्दे॑वय॒ज्याया॒ इत्या॑ह देवय॒ज्यायै॒ ह्ये॑न-ञ्जु॒षते॑ दे॒वस्त्वा॑ सवि॒ता मद्ध्वा॑-ऽन॒क्त्वित्या॑ह॒ तेज॑सै॒वैन॑-मन॒क्त्योष॑धे॒ त्राय॑स्वैन॒ग्ग्॒ स्वधि॑ते॒ मैनग्ं॑ हिग्ंसी॒रित्या॑ह॒ वज्रो॒ वै स्वधि॑ति॒-श्शान्त्यै॒ स्वधि॑तेर्वृ॒क्षस्य॒ बिभ्य॑तः प्रथ॒मेन॒ शक॑लेन स॒ह तेजः॒ परा॑ पतति॒ यः प्र॑थ॒म-श्शक॑लः परा॒पते॒-त्तमप्या ह॑रे॒-थ्सते॑जस- [ह॑रे॒-थ्सते॑जसम्, ए॒वैन॒मा] 14

-मे॒वैन॒मा ह॑रती॒मे वै लो॒का यूपा᳚-त्प्रय॒तो बि॑भ्यति॒ दिव॒मग्रे॑ण॒ मा ले॑खीर॒न्तरि॑क्ष॒-म्मद्ध्ये॑न॒ मा हिग्ं॑सी॒रित्या॑है॒भ्य ए॒वैनं॑-लोँ॒केभ्यः॑ शमयति॒ वन॑स्पते श॒तव॑ल्शो॒ वि रो॒हेत्या॒व्रश्च॑ने जुहोति॒ तस्मा॑-दा॒व्रश्च॑ना-द्वृ॒क्षाणा॒-म्भूयाग्ं॑स॒ उत्ति॑ष्ठन्ति स॒हस्र॑वल्शा॒ वि व॒यग्ं रु॑हे॒मेत्या॑हा॒- ऽऽशिष॑मे॒वैतामा शा॒स्ते ऽन॑क्षसङ्ग- [शा॒स्ते ऽन॑क्षसङ्गम्, वृ॒श्चे॒-द्यद॑क्षस॒ङ्गं-] 15

-ँवृश्चे॒-द्यद॑क्षस॒ङ्गं-वृँ॒श्चेद॑धई॒षं-यँज॑मानस्य प्र॒मायु॑कग्ग् स्या॒द्य-ङ्का॒मये॒ताप्र॑तिष्ठित-स्स्या॒दित्या॑रो॒ह-न्तस्म॑ वृश्चेदे॒ष वै वन॒स्पती॑ना॒-मप्र॑तिष्ठि॒तो-ऽप्र॑तिष्ठित ए॒व भ॑वति॒ य-ङ्का॒मये॑ताप॒शु-स्स्या॒दित्य॑प॒र्ण-न्तस्मै॒ शुष्का᳚ग्रं-वृँश्चेदे॒ष वै वन॒स्पती॑ना-मपश॒व्यो॑-ऽप॒शुरे॒व भ॑वति॒ य-ङ्का॒मये॑त पशु॒मान्-थ्स्या॒दिति॑ बहुप॒र्ण-न्तस्मै॑ बहुशा॒खं-वृँ॑श्चेदे॒ष वै [ ] 16

वन॒स्पती॑ना-म्पश॒व्यः॑ पशु॒माने॒व भ॑वति॒ प्रति॑ष्ठितं-वृँश्चे-त्प्रति॒ष्ठाका॑मस्यै॒ष वै वन॒स्पती॑ना॒-म्प्रति॑ष्ठितो॒ य-स्स॒मे भूम्यै॒ स्वाद्योने॑ रू॒ढः प्रत्ये॒व ति॑ष्ठति॒ यः प्र॒त्यङ्ङुप॑नत॒स्तं-वृँ॑श्चे॒-थ्स हि मेध॑म॒भ्युप॑नतः॒ पञ्चा॑रत्नि॒-न्तस्मै॑ वृश्चे॒द्य-ङ्का॒मये॒तोपै॑न॒मुत्त॑रो य॒ज्ञो न॑मे॒दिति॒ पञ्चा᳚क्षरा प॒ङ्क्तिः पाङ्क्तो॑ य॒ज्ञ उपै॑न॒मुत्त॑रो य॒ज्ञो [य॒ज्ञः, न॒म॒ति॒ षड॑रत्नि] 17

न॑मति॒ षड॑रत्नि-म्प्रति॒ष्ठाका॑मस्य॒ षड्वा ऋ॒तव॑ ऋ॒तुष्वे॒व प्रति॑ तिष्ठति स॒प्तार॑त्नि-म्प॒शुका॑मस्य स॒प्तप॑दा॒ शक्व॑री प॒शव॒-श्शक्व॑री प॒शूने॒वाव॑ रुन्धे॒ नवा॑रत्नि॒-न्तेज॑स्कामस्य त्रि॒वृता॒ स्तोमे॑न॒ सम्मि॑त॒-न्तेज॑स्त्रि॒वृ-त्ते॑ज॒स्व्ये॑व भ॑व॒-त्येका॑दशारत्नि-मिन्द्रि॒यका॑म॒-स्यैका॑दशाक्षरा त्रि॒ष्टुगि॑न्द्रि॒य-न्त्रि॒ष्टुगि॑न्द्रिया॒व्ये॑व भ॑वति॒ पञ्च॑दशारत्नि॒-म्भ्रातृ॑व्यवतः पञ्चद॒शो वज्रो॒ भ्रातृ॑व्याभिभूत्यै स॒प्तद॑शारत्नि-म्प्र॒जाका॑मस्य सप्तद॒शः प्र॒जाप॑तिः प्र॒जाप॑ते॒राप्त्या॒ एक॑विग्ंशत्यरत्नि-म्प्रति॒ष्ठाका॑म-स्यैकवि॒ग्ं॒श-स्स्तोमा॑ना-म्प्रति॒ष्ठा प्रति॑ष्ठित्या अ॒ष्टाश्रि॑र्भव-त्य॒ष्टाक्ष॑रा गाय॒त्री तेजो॑ गाय॒त्री गा॑य॒त्री य॑ज्ञमु॒ख-न्तेज॑सै॒व गा॑यत्रि॒या य॑ज्ञमु॒खेन॒ सम्मि॑तः ॥ 18 ॥

(जु॒षे॒ - सते॑जस॒ - मन॑क्षसङ्गं - बहुशा॒खं-वृँ॑श्चेदे॒ष वै - य॒ज्ञ उपै॑न॒मुत्त॑रो य॒ज्ञ - आप्त्या॒ - एका॒न्नविग्ं॑श॒तिश्च॑) (अ. 3)

पृ॒थि॒व्यै त्वा॒-ऽन्तरि॑क्षाय त्वा दि॒वे त्वेत्या॑है॒भ्य ए॒वैनं॑-लोँ॒केभ्यः॒ प्रोक्ष॑ति॒ परा᳚ञ्च॒-म्प्रोक्ष॑ति॒ परा॑ङिव॒ हि सु॑व॒र्गो लो॒कः क्रू॒रमि॑व॒ वा ए॒त-त्क॑रोति॒ य-त्खन॑त्य॒पो-ऽव॑ नयति॒ शान्त्यै॒ यव॑मती॒रव॑ नय॒त्यूर्ग्वै यवो॒ यज॑मानेन॒ यूप॒-स्सम्मि॑तो॒ यावा॑ने॒व यज॑मान॒-स्ताव॑ती-मे॒वास्मि॒-न्नूर्ज॑-न्दधाति [मे॒वास्मि॒-न्नूर्ज॑-न्दधाति, पि॒तृ॒णाग्ं सद॑नम॒सीति॑] 19

पितृ॒णाग्ं सद॑नम॒सीति॑ ब॒र्॒हिरव॑ स्तृणाति पितृदेव॒त्या᳚(1॒)ग्ग्॒ ह्ये॑त-द्यन्निखा॑तं॒-यँ-द्ब॒र्॒हिरन॑वस्तीर्य मिनु॒या-त्पि॑तृदेव॒त्यो॑ निखा॑त-स्स्या-द्ब॒र्॒हिर॑व॒स्तीर्य॑ मिनोत्य॒स्यामे॒वैन॑-म्मिनोति यूपशक॒लमवा᳚स्यति॒ सते॑जसमे॒वैन॑-म्मिनोति दे॒वस्त्वा॑ सवि॒ता मद्ध्वा॑-ऽन॒क्त्वित्या॑ह॒ तेज॑सै॒वैन॑मनक्ति सुपिप्प॒लाभ्य॒-स्त्वौष॑धीभ्य॒ इति॑ च॒षाल॒-म्प्रति॑- [च॒षाल॒-म्प्रति॑, मु॒ञ्च॒ति॒ तस्मा᳚च्छीर्ष॒त] 20

-मुञ्चति॒ तस्मा᳚च्छीर्ष॒त ओष॑धयः॒ फल॑-ङ्गृह्णन्त्य॒नक्ति॒ तेजो॒ वा आज्यं॒-यँज॑मानेनाग्नि॒ष्ठा-ऽश्रि॒-स्सम्मि॑ता॒ यद॑ग्नि॒ष्ठा-मश्रि॑म॒नक्ति॒ यज॑मानमे॒व तेज॑सा ऽनक्त्या॒न्त-म॑नक्त्या॒न्तमे॒व यज॑मान॒-न्तेज॑सानक्ति स॒र्वतः॒ परि॑ मृश॒त्यप॑रिवर्ग-मे॒वास्मि॒-न्तेजो॑ दधा॒त्यु-द्दिवग्ग्॑ स्तभा॒ना-ऽन्तरि॑क्ष-म्पृ॒णेत्या॑है॒षां-लोँ॒कानां॒-विँधृ॑त्यै वैष्ण॒व्यर्चा [वैष्ण॒व्यर्चा, क॒ल्प॒य॒ति॒ वै॒ष्ण॒वो वै] 21

क॑ल्पयति वैष्ण॒वो वै दे॒वत॑या॒ यूप॒-स्स्वयै॒वैन॑-न्दे॒वत॑या कल्पयति॒ द्वाभ्या᳚-ङ्कल्पयति द्वि॒पा-द्यज॑मानः॒ प्रति॑ष्ठित्यै॒ य-ङ्का॒मये॑त॒ तेज॑सैन-न्दे॒वता॑भिरिन्द्रि॒येण॒ व्य॑र्धयेय॒-मित्य॑ग्नि॒ष्ठा-न्तस्याश्रि॑-माहव॒नीया॑दि॒त्थं-वेँ॒त्थं-वाँ-ऽति॑ नावये॒-त्तेज॑सै॒वैन॑-न्दे॒वता॑भिरिन्द्रि॒येण॒ व्य॑र्धयति॒ य-ङ्का॒मये॑त॒ तेज॑सैन-न्दे॒वता॑भिरिन्द्रि॒येण॒ सम॑र्धयेय॒मि- [सम॑र्धयेय॒मिति॑, अ॒ग्नि॒ष्ठा-] 22

-त्य॑ग्नि॒ष्ठा-न्तस्याश्रि॑माहव॒नीये॑न॒ स-म्मि॑नुया॒-त्तेज॑सै॒वैन॑-न्दे॒वता॑भिरिन्द्रि॒येण॒ सम॑र्धयति ब्रह्म॒वनि॑-न्त्वा क्षत्र॒वनि॒मित्या॑ह यथाय॒जुरे॒वैत-त्परि॑ व्यय॒त्यूर्ग्वै र॑श॒ना यज॑मानेन॒ यूप॒-स्सम्मि॑तो॒ यज॑मानमे॒वोर्जा सम॑र्धयति नाभिद॒घ्ने परि॑ व्ययति नाभिद॒घ्न ए॒वास्मा॒ ऊर्ज॑-न्दधाति॒ तस्मा᳚न्नाभिद॒घ्न ऊ॒र्जा भु॑ञ्जते॒ य-ङ्का॒मये॑तो॒र्जैनं॒- [य-ङ्का॒मये॑तो॒र्जैन᳚म्, व्य॑र्धयेय॒-] 23

ँव्य॑र्धयेय॒-मित्यू॒र्ध्वां-वाँ॒ तस्यावा॑चीं॒-वाँ-ऽवो॑हेदू॒र्जैवैनं॒-व्यँ॑र्धयति॒ यदि॑ का॒मये॑त॒ वर्षु॑कः प॒र्जन्यः॑ स्या॒दित्य-वा॑ची॒मवो॑हे॒-द्वृष्टि॑मे॒व नि य॑च्छति॒ यदि॑ का॒मये॒ताव॑र्षुक-स्स्या॒दित्यू॒र्ध्वामुदू॑हे॒-द्वृष्टि॑मे॒वो-द्य॑च्छति पितृ॒णा-न्निखा॑त-म्मनु॒ष्या॑णामू॒र्ध्व-न्निखा॑ता॒दा र॑श॒नाया॒ ओष॑धीनाग्ं रश॒ना विश्वे॑षा- [विश्वे॑षाम्, दे॒वाना॑-] 24

-न्दे॒वाना॑-मू॒र्ध्वग्ं र॑श॒नाया॒ आ च॒षाला॒दिन्द्र॑स्य च॒षालग्ं॑ सा॒द्ध्याना॒मति॑रिक्त॒ग्ं॒ स वा ए॒ष स॑र्वदेव॒त्यो॑ यद्यूपो॒ यद्यूप॑-म्मि॒नोति॒ सर्वा॑ ए॒व दे॒वताः᳚ प्रीणाति य॒ज्ञेन॒ वै दे॒वा-स्सु॑व॒र्गं-लोँ॒कमा॑य॒-न्ते॑-ऽमन्यन्त मनु॒ष्या॑ नो॒-ऽन्वाभ॑विष्य॒न्तीति॒ ते यूपे॑न योपयि॒त्वा सु॑व॒र्गं ँलो॒कमा॑य॒-न्तमृष॑यो॒ यूपे॑नै॒वानु॒ प्राजा॑न॒-न्त-द्यूप॑स्य यूप॒त्वं- [यूप॒त्वम्, य-द्यूप॑-] 25

ँय-द्यूप॑-म्मि॒नोति॑ सुव॒र्गस्य॑ लो॒कस्य॒ प्रज्ञा᳚त्यै पु॒रस्ता᳚-न्मिनोति पु॒रस्ता॒द्धि य॒ज्ञस्य॑ प्रज्ञा॒यते प्र॑ज्ञात॒ग्ं॒ हि त-द्यदति॑पन्न आ॒हुरि॒द-ङ्का॒र्य॑मासी॒दिति॑ सा॒द्ध्या वै दे॒वा य॒ज्ञमत्य॑मन्यन्त॒ तान्. य॒ज्ञो नास्पृ॑श॒-त्तान्. य-द्य॒ज्ञस्याति॑रिक्त॒मासी॒-त्तद॑स्पृश॒दति॑रिक्तं॒-वाँ ए॒त-द्य॒ज्ञस्य॒ यद॒ग्नाव॒ग्नि-म्म॑थि॒त्वा प्र॒हर॒त्यति॑रिक्तमे॒त- [प्र॒हर॒त्यति॑रिक्तमे॒तत्, यूप॑स्य॒] 26

-द्यूप॑स्य॒ यदू॒र्ध्व-ञ्च॒षाला॒-त्तेषा॒-न्त-द्भा॑ग॒धेय॒-न्ताने॒व तेन॑ प्रीणाति दे॒वा वै सग्ग्स्थि॑ते॒ सोमे॒ प्र स्रुचो-ऽह॑र॒-न्प्र यूप॒-न्ते॑-ऽमन्यन्त यज्ञवेश॒सं-वाँ इ॒द-ङ्कु॑र्म॒ इति॒ ते प्र॑स्त॒रग्ग् स्रु॒चा-न्नि॒ष्क्रय॑ण-मपश्य॒न्-थ्स्वरुं॒-यूँप॑स्य॒ सग्ग्स्थि॑ते॒ सोमे॒ प्र प्र॑स्त॒रग्ं हर॑ति जु॒होति॒ स्वरु॒मय॑ज्ञवेशसाय ॥ 27 ॥

(द॒धा॒ति॒ - प्रत्यृ॒ - चा - सम॑र्धयेय॒मित्यू॒ - र्जैनं॒ - ँविश्वे॑षां - ँयूप॒त्व - मति॑रिक्तमे॒त-द्- द्विच॑त्वारिग्ंशच्च) (अ. 4)

सा॒द्ध्या वै दे॒वा अ॒स्मिँल्लो॒क आ॑स॒-न्नान्य-त्कि॑-ञ्च॒न मि॒ष-त्ते᳚-ऽग्निमे॒वाग्नये॒ मेधा॒या ऽल॑भन्त॒ न ह्य॑न्यदा॑ल॒भ्यं॑-मवि॑न्द॒-न्ततो॒ वा इ॒माः प्र॒जाः प्राजा॑यन्त॒ यद॒ग्नाव॒ग्नि-म्म॑थि॒त्वा प्र॒हर॑ति प्र॒जाना᳚-म्प्र॒जन॑नाय रु॒द्रो वा ए॒ष यद॒ग्निर्यज॑मानः प॒शुर्य-त्प॒शुमा॒लभ्या॒ग्नि-म्मन्थे᳚-द्रु॒द्राय॒ यज॑मान॒- [यज॑मानम्, अपि॑ दद्ध्या-] 28

-मपि॑ दद्ध्या-त्प्र॒मायु॑क-स्स्या॒दथो॒ खल्वा॑हुर॒ग्नि-स्सर्वा॑ दे॒वता॑ ह॒विरे॒तद्य-त्प॒शुरिति॒ य-त्प॒शुमा॒लभ्या॒ग्नि-म्मन्थ॑ति ह॒व्यायै॒वा-ऽऽस॑न्नाय॒ सर्वा॑ दे॒वता॑ जनय-त्युपा॒कृत्यै॒व मन्थ्य॒-स्तन्नेवा-ऽऽल॑ब्ध॒-न्नेवाना॑लब्ध-म॒ग्ने-र्ज॒नित्र॑-म॒सीत्या॑हा॒ग्नेर्ह्ये॑त-ज्ज॒नित्रं॒-वृँष॑णौ स्थ॒ इत्या॑ह॒ वृष॑णौ॒ [वृष॑णौ, ह्ये॑ता-] 29

ह्ये॑ता-वु॒र्वश्य॑स्या॒यु-र॒सीत्या॑ह मिथुन॒त्वाय॑ घृ॒तेना॒क्ते वृष॑ण-न्दधाथा॒मित्या॑ह॒ वृष॑ण॒ग्ग्॒ ह्ये॑ते दधा॑ते॒ ये अ॒ग्नि-ङ्गा॑य॒त्र-ञ्छन्दो-ऽनु॒ प्र जा॑य॒स्वेत्या॑ह॒ छन्दो॑भिरे॒वैन॒-म्प्र ज॑नयत्य॒ग्नये॑ म॒थ्यमा॑ना॒यानु॑ ब्रू॒हीत्या॑ह सावि॒त्रीमृच॒मन्वा॑ह सवि॒तृप्र॑सूत ए॒वैन॑-म्मन्थति जा॒तायानु॑ ब्रूहि [ब्रूहि, प्र॒ह्रि॒यमा॑णा॒या-ऽनु॑] 30

प्रह्रि॒यमा॑णा॒या-ऽनु॑ ब्रू॒हीत्या॑ह॒ काण्डे॑काण्ड ए॒वैन॑-ङ्क्रि॒यमा॑णे॒ सम॑र्धयति गाय॒त्री-स्सर्वा॒ अन्वा॑ह गाय॒त्रछ॑न्दा॒ वा अ॒ग्नि-स्स्वेनै॒वैन॒-ञ्छन्द॑सा॒ सम॑र्धयत्य॒ग्निः पु॒रा भव॑त्य॒ग्नि-म्म॑थि॒त्वा प्र ह॑रति॒ तौ स॒भंवँ॑न्तौ॒ यज॑मानम॒भि स-म्भ॑वतो॒ भव॑त-न्न॒-स्सम॑नसा॒वित्या॑ह॒ शान्त्यै᳚ प्र॒हृत्य॑ जुहोति जा॒तायै॒वास्मा॒ अन्न॒मपि॑ दधा॒त्याज्ये॑न जुहोत्ये॒तद्वा अ॒ग्नेः प्रि॒य-न्धाम॒ यदाज्य॑-म्प्रि॒येणै॒वैन॒-न्धाम्ना॒ सम॑र्धय॒त्यथो॒ तेज॑सा ॥ 31 ॥

(यज॑मान-माह॒ वृष॑णौ-जा॒तायानु॑ ब्रू॒ह्या-प्य॒ -ष्टाद॑श च) (अ. 5)

इ॒षे त्वेति॑ ब॒र्॒हिरा द॑त्त इ॒च्छत॑ इव॒ ह्ये॑ष यो यज॑त उप॒वीर॒सीत्या॒होप॒ ह्ये॑नानाक॒रोत्युपो॑ दे॒वा-न्दैवी॒र्विशः॒ प्रागु॒रित्या॑ह॒ दैवी॒र्ह्ये॑ता विशः॑ स॒तीर्दे॒वानु॑प॒यन्ति॒ वह्नी॑रु॒शिज॒ इत्या॑ह॒र्त्विजो॒ वै वह्न॑य उ॒शिज॒-स्तस्मा॑दे॒वमा॑ह॒ बृह॑स्पते धा॒रया॒ वसू॒नी- [वसू॒नीति॑, आ॒ह॒ ब्रह्म॒ वै] 32

-त्या॑ह॒ ब्रह्म॒ वै दे॒वाना॒-म्बृह॒स्पति॒ र्ब्रह्म॑णै॒वास्मै॑ प॒शूनव॑ रुन्धे ह॒व्या ते᳚ स्वदन्ता॒मित्या॑ह स्व॒दय॑त्ये॒वैना॒-न्देव॑ त्वष्ट॒र्वसु॑ र॒ण्वेत्या॑ह॒ त्वष्टा॒ वै प॑शू॒ना-म्मि॑थु॒नानाग्ं॑ रूप॒कृ-द्रू॒पमे॒व प॒शुषु॑ दधाति॒ रेव॑ती॒ रम॑द्ध्व॒मित्या॑ह प॒शवो॒ वै रे॒वतीः᳚ प॒शूने॒वास्मै॑ रमयति दे॒वस्य॑ त्वा सवि॒तुः प्र॑स॒व इति॑ [इति॑, र॒श॒नामा द॑त्ते॒] 33

रश॒नामा द॑त्ते॒ प्रसू᳚त्या अ॒श्विनो᳚र्बा॒हुभ्या॒-मित्या॑हा॒श्विनौ॒ हि दे॒वाना॑मद्ध्व॒र्यू आस्ता᳚-म्पू॒ष्णो हस्ता᳚भ्या॒मित्या॑ह॒ यत्या॑ ऋ॒तस्य॑ त्वा देवहविः॒ पाशे॒ना-ऽऽ र॑भ॒ इत्या॑ह स॒त्यं-वाँ ऋ॒तग्ं स॒त्येनै॒वैन॑मृ॒तेना ऽऽर॑भते ऽक्ष्ण॒या परि॑ हरति॒ वद्ध्य॒ग्ं॒ हि प्र॒त्यञ्च॑-म्प्रति मु॒ञ्चन्ति॒ व्यावृ॑त्त्यै॒ धर्षा॒ मानु॑षा॒निति॒ नि यु॑नक्ति॒ धृत्या॑ अ॒द्भ्य- [अ॒द्भ्यः, त्वौष॑धीभ्यः॒] 34

-स्त्वौष॑धीभ्यः॒ प्रोक्षा॒मीत्या॑हा॒द्भ्यो ह्ये॑ष ओष॑धीभ्य-स्स॒भंवँ॑ति॒ य-त्प॒शुर॒पा-म्पे॒रुर॒सीत्या॑है॒ष ह्य॑पा-म्पा॒ता यो मेधा॑या-ऽऽ र॒भ्यते᳚ स्वा॒त्त-ञ्चि॒-थ्सदे॑वग्ं ह॒व्यमापो॑ देवी॒-स्स्वद॑तैन॒मित्या॑ह स्व॒दय॑त्ये॒वैन॑-मु॒परि॑ष्टा॒-त्प्रोक्ष॑त्यु॒परि॑ष्टादे॒वैन॒-म्मेद्ध्य॑-ङ्करोति पा॒यय॑त्यन्तर॒त ए॒वैन॒-म्मेद्ध्य॑-ङ्करोत्य॒धस्ता॒दुपो᳚क्षति स॒र्वत॑ ए॒वैन॒-म्मेद्ध्य॑-ङ्करोति ॥ 35 ॥

(वसू॒नीति॑-प्रस॒व इत्य॒-द्भ्यो᳚-ऽन्तर॒त ए॒वैनं॒ - दश॑ च) (अ. 6)

अ॒ग्निना॒ वै होत्रा॑ दे॒वा असु॑रा-न॒भ्य॑भव-न्न॒ग्नये॑ समि॒द्ध्यमा॑ना॒यानु॑ ब्रू॒हीत्या॑ह॒ भ्रातृ॑व्याभिभूत्यै स॒प्तद॑श सामिधे॒नीरन्वा॑ह सप्तद॒शः प्र॒जाप॑तिः प्र॒जाप॑ते॒राप्त्यै॑ स॒प्तद॒शान्वा॑ह॒ द्वाद॑श॒ मासाः॒ पञ्च॒र्तव॒-स्स सं॑वँथ्स॒र-स्सं॑वँथ्स॒र-म्प्र॒जा अनु॒ प्रजा॑यन्ते प्र॒जाना᳚-म्प्र॒जन॑नाय दे॒वा वै सा॑मिधे॒नीर॒नूच्य॑ य॒ज्ञ-न्नान्व॑पश्य॒न्-थ्स प्र॒जाप॑ति-स्तू॒ष्णी-मा॑घा॒र- [-मा॑घा॒रम्, आ ऽघा॑रय॒-त्ततो॒ वै] 36

-मा ऽघा॑रय॒-त्ततो॒ वै दे॒वा य॒ज्ञमन्व॑पश्य॒न्॒. य-त्तू॒ष्णी-मा॑घा॒र-मा॑घा॒रय॑ति य॒ज्ञस्यानु॑ख्यात्या॒ असु॑रेषु॒ वै य॒ज्ञ आ॑सी॒-त्त-न्दे॒वास्तू᳚ष्णीग्ं हो॒मेना॑वृञ्जत॒ य-त्तू॒ष्णी-मा॑घा॒र-मा॑घा॒रय॑ति॒ भ्रातृ॑व्यस्यै॒ व त-द्य॒ज्ञं-वृँ॑ङ्क्ते परि॒धी॑न्-थ्स-म्मा᳚र्ष्टि पु॒नात्ये॒वैना॒-न्त्रिस्त्रि॒-स्स-म्मा᳚र्ष्टि॒ त्र्या॑वृ॒द्धि य॒ज्ञो-ऽथो॒ रक्ष॑सा॒मप॑हत्यै॒ द्वाद॑श॒ स-म्प॑द्यन्ते॒ द्वाद॑श॒ [द्वाद॑श, मासा᳚-स्संवँथ्स॒र-] 37

मासा᳚-स्संवँथ्स॒र-स्सं॑वँथ्स॒रमे॒व प्री॑णा॒त्यथो॑ संवँथ्स॒रमे॒वास्मा॒ उप॑ दधाति सुव॒र्गस्य॑ लो॒कस्य॒ सम॑ष्ट्यै॒ शिरो॒ वा ए॒त-द्य॒ज्ञस्य॒ यदा॑घा॒रो᳚-ऽग्नि-स्सर्वा॑ दे॒वता॒ यदा॑घा॒र-मा॑घा॒रय॑ति शीर्ष॒त ए॒व य॒ज्ञस्य॒ यज॑मान॒-स्सर्वा॑ दे॒वता॒ अव॑ रुन्धे॒ शिरो॒ वा ए॒त-द्य॒ज्ञस्य॒ यदा॑घा॒र आ॒त्मा प॒शुरा॑घा॒रमा॒घार्य॑ प॒शुग्ं सम॑नक्त्या॒त्मन्ने॒व य॒ज्ञस्य॒ [य॒ज्ञस्य॑, शिरः॒ प्रति॑ दधाति॒] 38

शिरः॒ प्रति॑ दधाति॒ स-न्ते᳚ प्रा॒णो वा॒युना॑ गच्छता॒मित्या॑ह वायुदेव॒त्यो॑ वै प्रा॒णो वा॒यावे॒वास्य॑ प्रा॒ण-ञ्जु॑होति॒ सं-यँज॑त्रै॒रङ्गा॑नि॒ सं-यँ॒ज्ञप॑तिरा॒शिषेत्या॑ह य॒ज्ञप॑तिमे॒वास्या॒-ऽऽशिष॑-ङ्गमयति वि॒श्वरू॑पो॒ वै त्वा॒ष्ट्र उ॒परि॑ष्टा-त्प॒शुम॒भ्य॑वमी॒-त्तस्मा॑-दु॒परि॑ष्टा-त्प॒शोर्नाव॑ द्यन्ति॒ यदु॒परि॑ष्टा-त्प॒शुग्ं स॑म॒नक्ति॒ मेद्ध्य॑मे॒वै- [मेद्ध्य॑मे॒व, ए॒न॒-ङ्क॒रो॒त्यृ॒त्विजो॑] 39

-न॑-ङ्करोत्यृ॒त्विजो॑ वृणीते॒ छन्दाग्॑स्ये॒व वृ॑णीते स॒प्त वृ॑णीते स॒प्त ग्रा॒म्याः प॒शवः॑ स॒प्ता-ऽऽर॒ण्या-स्स॒प्त छन्दाग्॑स्यु॒भय॒स्या व॑रुद्ध्या॒ एका॑दश प्रया॒जान्. य॑जति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्त-म्प्र य॑जति व॒पामेकः॒ परि॑ शय आ॒त्मैवा-ऽऽत्मान॒-म्परि॑ शये॒ वज्रो॒ वै स्वधि॑ति॒र्वज्रो॑ यूपशक॒लो घृ॒त-ङ्खलु॒ वै दे॒वा वज्र॑-ङ्कृ॒त्वा सोम॑मघ्न-न्घृ॒तेना॒क्तौ प॒शु-न्त्रा॑येथा॒मित्या॑ह॒ वज्रे॑णै॒वैनं॒-वँशे॑ कृ॒त्वा-ऽऽल॑भते ॥ 40 ॥

(आ॒घा॒रं - प॑द्यन्ते॒ द्वाद॑शा॒ - ऽऽत्मन्ने॒व य॒ज्ञस्य॒ - मेध्य॑मे॒व - खलु॒ वा - अ॒ष्टाद॑श च) (अ. 7)

पर्य॑ग्नि करोति सर्व॒हुत॑मे॒वैन॑-ङ्करो॒त्य-स्क॑न्दा॒या-स्क॑न्न॒ग्ं॒ हि त-द्य-द्धु॒तस्य॒ स्कन्द॑ति॒ त्रिः पर्य॑ग्नि करोति॒ त्र्या॑वृ॒द्धि य॒ज्ञो-ऽथो॒ रक्ष॑सा॒मप॑हत्यै ब्रह्मवा॒दिनो॑ वदन्त्यन्वा॒रभ्यः॑ प॒शू(3)-र्नान्वा॒रभ्या(3) इति॑ मृ॒त्यवे॒ वा ए॒ष नी॑यते॒ य-त्प॒शुस्तं-यँद॑न्वा॒रभे॑त प्र॒मायु॑को॒ यज॑मान-स्स्या॒दथो॒ खल्वा॑हु-स्सुव॒र्गाय॒ वा ए॒ष लो॒काय॑ नीयते॒ य- [यत्, प॒शुरिति॒] 41

-त्प॒शुरिति॒ यन्नान्वा॒रभे॑त सुव॒र्गाल्लो॒का-द्यज॑मानो हीयेत वपा॒श्रप॑णीभ्या-म॒न्वार॑भते॒ तन्नेवा॒न्वार॑ब्ध॒-न्नेवान॑न्वारब्ध॒मुप॒ प्रेष्य॑ होतर्ह॒व्या दे॒वेभ्य॒ इत्या॑हेषि॒तग्ं हि कर्म॑ क्रि॒यते॒ रेव॑तीर्य॒ज्ञप॑ति-म्प्रिय॒धा ऽऽवि॑श॒तेत्या॑ह यथाय॒जुरे॒वैतद॒ग्निना॑ पु॒रस्ता॑देति॒ रक्ष॑सा॒मप॑हत्यै पृथि॒व्या-स्स॒पृञ्चः॑ पा॒हीति॑ ब॒र्॒हि- [ब॒र्॒हिः, उपा᳚-ऽस्य॒त्य-स्क॑न्दा॒या-] 42

-रुपा᳚-ऽस्य॒त्य-स्क॑न्दा॒या-स्क॑न्न॒ग्ं॒ हि त-द्य-द्ब॒र्॒हिषि॒ स्कन्द॒त्यथो॑ बर्हि॒षद॑मे॒वैन॑-ङ्करोति॒ परां॒आ व॑र्तते-ऽद्ध्व॒र्युः प॒शो-स्स᳚ज्ञ॒म्प्यमा॑ना-त्प॒शुभ्य॑ ए॒व तन्नि ह्नु॑त आ॒त्मनो-ऽना᳚व्रस्काय॒ गच्छ॑ति॒ श्रिय॒-म्प्र प॒शूना᳚प्नोति॒ य ए॒वं-वेँद॑ प॒श्चाल्लो॑का॒ वा ए॒षा प्राच्यु॒दानी॑यते॒ य-त्पत्नी॒ नम॑स्त आता॒नेत्या॑हा-ऽऽदि॒त्यस्य॒ वै र॒श्मय॑ [र॒श्मयः॑, आ॒ता॒नास्तेभ्य॑] 43

आता॒नास्तेभ्य॑ ए॒व नम॑स्करोत्यन॒र्वा प्रेहीत्या॑ह॒ भ्रातृ॑व्यो॒ वा अर्वा॒ भ्रातृ॑व्यापनुत्त्यै घृ॒तस्य॑ कु॒ल्यामनु॑ स॒ह प्र॒जया॑ स॒ह रा॒यस्पोषे॒णे-त्या॑हा॒ ऽऽशिष॑मे॒वैतामा शा᳚स्त॒ आपो॑ देवी-श्शुद्धायुव॒ इत्या॑ह यथाय॒जुरे॒वैतत् ॥ 44 ॥

(लो॒काय॑ नीयते॒ य-द्- ब॒र॒ःई - र॒श्मयः॑ - स॒प्तत्रिग्ं॑शच्च) (अ. 8)

प॒शोर्वा आल॑ब्धस्य प्रा॒णाञ्छुगृ॑च्छति॒ वाक्त॒ आ प्या॑यता-म्प्रा॒णस्त॒ आ प्या॑यता॒मित्या॑ह प्रा॒णेभ्य॑ ए॒वास्य॒ शुचग्ं॑ शमयति॒ सा प्रा॒णेभ्यो-ऽधि॑ पृथि॒वीग्ं शु-क्प्र वि॑शति॒ शमहो᳚भ्या॒मिति॒ नि न॑यत्यहोरा॒त्राभ्या॑मे॒व पृ॑थि॒व्यै शुचग्ं॑ शमय॒त्योष॑धे॒ त्रा॑यस्वैन॒ग्ग्॒ स्वधि॑ते॒ मैनग्ं॑ हिग्ंसी॒रित्या॑ह॒ वज्रो॒ वै स्वधि॑ति॒- [स्वधि॑तिः, शान्त्यै॑ पार्श्व॒त] 45

-श्शान्त्यै॑ पार्श्व॒त आ च्छ्य॑ति मद्ध्य॒तो हि म॑नु॒ष्या॑ आ॒ च्छ्यन्ति॑ तिर॒श्चीन॒मा च्छ्य॑त्यनू॒चीन॒ग्ं॒ हि म॑नु॒ष्या॑ आ॒च्छ्यन्ति॒ व्यावृ॑त्त्यै॒ रक्ष॑सा-म्भा॒गो॑-ऽसीति॑ स्थविम॒तो ब॒र्॒हिर॒क्त्वा-ऽपा᳚स्यत्य॒स्नैव रक्षाग्ं॑सि नि॒रव॑दयत इ॒दम॒हग्ं रक्षो॑-ऽध॒म-न्तमो॑ नयामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इत्या॑ह॒ द्वौ वाव पुरु॑षौ॒ य-ञ्चै॒व [ ] 46

द्वेष्टि॒ यश्चै॑न॒-न्द्वेष्टि॒ तावु॒भाव॑ध॒म-न्तमो॑ नयती॒षे त्वेति॑ व॒पामुत्खि॑दती॒च्छत॑ इव॒ ह्ये॑ष यो यज॑ते॒ यदु॑पतृ॒न्द्या-द्रु॒द्रो᳚-ऽस्य प॒शू-न्घातु॑क-स्स्या॒-द्यन्नोप॑तृ॒न्द्या-दय॑ता स्या-द॒न्ययो॑पतृ॒णत्त्य॒न्यया॒ न धृत्यै॑ घृ॒तेन॑ द्यावापृथिवी॒ प्रोर्ण्वा॑था॒मित्या॑ह॒ द्यावा॑पृथि॒वी ए॒व रसे॑नान॒क्त्यच्छि॑न्नो॒ [रसे॑नान॒क्त्यच्छि॑न्नः, रायः॑ सु॒वीर॒] 47

रायः॑ सु॒वीर॒ इत्या॑ह यथाय॒जुरे॒वैत-त्क्रू॒रमि॑व॒ वा ए॒त-त्क॑रोति॒ य-द्व॒पा-मु॑त्खि॒द-त्यु॒र्व॑न्तरि॑क्ष॒-मन्वि॒हीत्या॑ह॒ शान्त्यै॒ प्र वा ए॒षो᳚-ऽस्माल्लो॒काच्च्य॑वते॒ यः प॒शु-म्मृ॒त्यवे॑ नी॒यमा॑नमन्वा॒रभ॑ते वपा॒श्रप॑णी॒ पुन॑र॒न्वार॑भते॒-ऽस्मिन्ने॒व लो॒के प्रति॑ तिष्ठत्य॒ग्निना॑ पु॒रस्ता॑देति॒ रक्ष॑सा॒मप॑हत्या॒ अथो॑ दे॒वता॑ ए॒व ह॒व्येना- [ए॒व ह॒व्येन॑, अन्वे॑ति॒] 48

-न्वे॑ति॒ नान्त॒ममङ्गा॑र॒मति॑ हरे॒-द्यद॑न्त॒ममङ्गा॑रमति॒ हरे᳚-द्दे॒वता॒ अति॑ मन्येत॒ वायो॒ वीहि॑ स्तो॒काना॒मित्या॑ह॒ तस्मा॒-द्विभ॑क्ता-स्स्तो॒का अव॑ पद्य॒न्ते-ऽग्रं॒-वाँ ए॒त-त्प॑शू॒नां-यँ-द्व॒पा-ऽग्र॒मोष॑धीना-म्ब॒र्॒हिरग्रे॑णै॒वाग्र॒ग्ं॒ सम॑र्धय॒त्यथो॒ ओष॑धीष्वे॒व प॒शू-न्प्रति॑ष्ठापयति॒ स्वाहा॑कृतीभ्यः॒ प्रेष्येत्या॑ह [ ] 49

य॒ज्ञस्य॒ समि॑ष्ट्यै प्राणापा॒नौ वा ए॒तौ प॑शू॒नां-यँ-त्पृ॑षदा॒ज्यमा॒त्मा व॒पा पृ॑षदा॒ज्यम॑भि॒घार्य॑ व॒पाम॒भि घा॑रयत्या॒त्मन्ने॒व प॑शू॒ना-म्प्रा॑णापा॒नौ द॑धाति॒ स्वाहो॒र्ध्वन॑भस-म्मारु॒त-ङ्ग॑च्छत॒मित्या॑हो॒र्ध्वन॑भा ह स्म॒ वै मा॑रु॒तो दे॒वानां᳚-वँपा॒श्रप॑णी॒ प्र ह॑रति॒ तेनै॒वैने॒ प्र ह॑रति॒ विषू॑ची॒ प्र ह॑रति॒ तस्मा॒-द्विष्व॑ञ्चौ प्राणापा॒नौ ॥ 50 ॥

(स्वधि॑ति - श्चै॒वा - च्छि॑न्नो - ह॒व्येने॒ - ष्येत्या॑ह॒ - षट्च॑त्वारिग्ंशच्च) (अ. 9)

प॒शुमा॒लभ्य॑ पुरो॒डाश॒-न्निर्व॑पति॒ समे॑धमे॒वैन॒मा ल॑भते व॒पया᳚ प्र॒चर्य॑ पुरो॒डाशे॑न॒ प्र च॑र॒त्यूर्ग्वै पु॑रो॒डाश॒ ऊर्ज॑मे॒व प॑शू॒ना-म्म॑द्ध्य॒तो द॑धा॒त्यथो॑ प॒शोरे॒व छि॒द्रमपि॑ दधाति पृषदा॒ज्यस्यो॑प॒हत्य॒ त्रिः पृ॑च्छति शृ॒तग्ं ह॒वी(3)-श्श॑मित॒रिति॒ त्रिष॑त्या॒ हि दे॒वा यो-ऽशृ॑तग्ं शृ॒तमाह॒ स एन॑सा प्राणापा॒नौ वा ए॒तौ प॑शू॒नां- [ए॒तौ प॑शू॒नाम्, य-त्पृ॑षदा॒ज्य-म्प॒शोः] 51

-ँय-त्पृ॑षदा॒ज्य-म्प॒शोः खलु॒ वा आल॑ब्धस्य॒ हृद॑यमा॒त्मा-ऽभि समे॑ति॒ य-त्पृ॑षदा॒ज्येन॒ हृद॑य-मभिघा॒रय॑त्या॒त्मन्ने॒व प॑शू॒ना-म्प्रा॑णापा॒नौ द॑धाति प॒शुना॒ वै दे॒वा-स्सु॑व॒र्गं-लोँ॒कमा॑य॒-न्ते॑-ऽमन्यन्त मनु॒ष्या॑ नो॒-ऽन्वाभ॑विष्य॒न्तीति॒ तस्य॒ शिरः॑ छि॒त्त्वा मेध॒-म्प्राक्षा॑रय॒न्थ्स प्र॒क्षो॑-ऽभव॒-त्त-त्प्र॒क्षस्य॑ प्रक्ष॒त्वं-यँ-त्प्ल॑क्षशा॒खो-त्त॑रब॒र्॒हि-र्भव॑ति॒ समे॑धस्यै॒व [ ] 52

प॒शोरव॑ द्यति प॒शुं-वैँ ह्रि॒यमा॑ण॒ग्ं॒ रक्षा॒ग्॒स्यनु॑ सचन्ते-ऽन्त॒रा यूप॑-ञ्चा-ऽऽहव॒नीय॑-ञ्च हरति॒ रक्ष॑सा॒मप॑हत्यै प॒शोर्वा आल॑ब्धस्य॒ मनो-ऽप॑ क्रामति म॒नोता॑यै ह॒विषो॑-ऽवदी॒यमा॑न॒स्यानु॑ ब्रू॒हीत्या॑ह॒ मन॑ ए॒वास्याव॑ रुन्ध॒ एका॑दशाव॒दाना॒न्यव॑ द्यति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्तस्या-ऽव॑- [प॒शुस्तस्या-ऽव॑, द्य॒ति॒ हृद॑य॒स्या-] 53

-द्यति॒ हृद॑य॒स्या-ग्रे-ऽव॑ द्य॒त्यथ॑ जि॒ह्वाया॒ अथ॒ वक्ष॑सो॒ यद्वै हृद॑येनाभि॒गच्छ॑ति॒ तज्जि॒ह्वया॑ वदति॒ यज्जि॒ह्वया॒ वद॑ति॒ तदुर॒सो-ऽधि॒ निर्व॑दत्ये॒तद्वै प॒शोर्य॑थापू॒र्वं-यँस्यै॒वम॑व॒दाय॑ यथा॒काम॒-मुत्त॑रेषामव॒द्यति॑ यथा पू॒र्वमे॒वास्य॑ प॒शोरव॑त्त-म्भवति मद्ध्य॒तो गु॒दस्याव॑ द्यति मद्ध्य॒तो हि प्रा॒ण उ॑त्त॒मस्याव॑ द्य- [उ॑त्त॒मस्याव॑ द्यति, उ॒त्त॒मो हि प्रा॒णो] 54

-त्युत्त॒मो हि प्रा॒णो यदीत॑रं॒-यँदीत॑र-मु॒भय॑मे॒वाजा॑मि॒ जाय॑मानो॒ वै ब्रा᳚ह्म॒ण-स्त्रि॒भिर्-ऋ॑ण॒वा जा॑यते ब्रह्म॒चर्ये॒णर्षि॑भ्यो य॒ज्ञेन॑ दे॒वेभ्यः॑ प्र॒जया॑ पि॒तृभ्य॑ ए॒ष वा अ॑नृ॒णो यः पु॒त्री यज्वा᳚ ब्रह्मचारिवा॒सी तद॑व॒दानै॑-रे॒वा-ऽव॑ दयते॒ तद॑व॒दाना॑ना-मवदान॒त्व-न्दे॑वासु॒रा-स्संयँ॑त्ता आस॒-न्ते दे॒वा अ॒ग्निम॑ब्रुव॒-न्त्वया॑ वी॒रेणासु॑रान॒भि भ॑वा॒मेति॒ [भ॑वा॒मेति॑, सो᳚-ऽब्रवी॒-द्वरं॑-वृँणै] 55

सो᳚-ऽब्रवी॒-द्वरं॑-वृँणै प॒शोरु॑द्धा॒रमुद्ध॑रा॒ इति॒ स ए॒तमु॑द्धा॒रमुद॑हरत॒ दोः पू᳚र्वा॒र्धस्य॑ गु॒द-म्म॑द्ध्य॒त-श्श्रोणि॑-ञ्जघना॒र्धस्य॒ ततो॑ दे॒वा अभ॑व॒-न्परा-ऽसु॑रा॒ य-त्त्र्य॒ङ्गाणाग्ं॑ समव॒द्यति॒ भ्रातृ॑व्याभिभूत्यै॒ भव॑त्या॒त्मना॒ परा᳚-ऽस्य॒ भ्रातृ॑व्यो भवत्यक्ष्ण॒या-ऽव॑ द्यति॒ तस्मा॑दक्ष्ण॒या प॒शवो-ऽङ्गा॑नि॒ प्र ह॑रन्ति॒ प्रति॑ष्ठित्यै ॥ 56 ॥

(ए॒तौ प॑शू॒नाग्ं - समे॑धस्यै॒व - तस्या-ऽवो᳚ - त्त॒मस्याव॑ द्य॒ती - ति॒ - पञ्च॑चत्वारिग्ंशच्च) (अ. 10)

मेद॑सा॒ स्रुचौ॒ प्रोर्णो॑ति॒ मेदो॑रूपा॒ वै प॒शवो॑ रू॒पमे॒व प॒शुषु॑ दधाति यू॒षन्न॑व॒धाय॒ प्रोर्णो॑ति॒ रसो॒ वा ए॒ष प॑शू॒नां-यँद्यू रस॑मे॒व प॒शुषु॑ दधाति पा॒र्श्वेन॑ वसाहो॒म-म्प्रयौ॑ति॒ मद्ध्यं॒-वाँ ए॒त-त्प॑शू॒नां-यँ-त्पा॒र्श्वग्ं रस॑ ए॒ष प॑शू॒नां-यँद्वसा॒ य-त्पा॒र्श्वेन॑ वसाहो॒म-म्प्र॒यौति॑ मद्ध्य॒त ए॒व प॑शू॒नाग्ं रस॑-न्दधाति॒ घ्नन्ति॒ [घ्नन्ति॑, वा ए॒त-त्प॒शु-] 57

वा ए॒त-त्प॒शुं-यँ-थ्स᳚ज्ञ॒म्पय॑न्त्यै॒न्द्रः खलु॒ वै दे॒वत॑या प्रा॒ण ऐ॒न्द्रो॑-ऽपा॒न ऐ॒न्द्रः प्रा॒णो अङ्गे॑अङ्गे॒ नि दे᳚द्ध्य॒दित्या॑ह प्राणापा॒नावे॒व प॒शुषु॑ दधाति॒ देव॑ त्वष्ट॒र्भूरि॑ ते॒ सग्ं स॑मे॒त्वित्या॑ह त्वा॒ष्ट्रा हि दे॒वत॑या प॒शवो॒ विषु॑रूपा॒ य-थ्सल॑क्ष्माणो॒ भव॒थेत्या॑ह॒ विषु॑रूपा॒ ह्ये॑ते सन्त॒-स्सल॑क्ष्माण ए॒तर्हि॒ भव॑न्ति देव॒त्रा यन्त॒- [देव॒त्रा यन्त᳚म्, अव॑से॒] 58

-मव॑से॒ सखा॒यो-ऽनु॑ त्वा मा॒ता पि॒तरो॑ मद॒न्त्वित्या॒हा-नु॑मतमे॒वैन॑-म्मा॒त्रा पि॒त्रा सु॑व॒र्गं-लोँ॒क-ङ्ग॑मयत्यर्ध॒र्चे व॑साहो॒म-ञ्जु॑होत्य॒सौ वा अ॑र्ध॒र्च इ॒यम॑र्ध॒र्च इ॒मे ए॒व रसे॑नानक्ति॒ दिशो॑ जुहोति॒ दिश॑ ए॒व रसे॑नान॒क्त्यथो॑ दि॒ग्भ्य ए॒वोर्ज॒ग्ं॒ रस॒मव॑ रुन्धे प्राणापा॒नौ वा ए॒तौ प॑शू॒नां-यँ-त्पृ॑षदा॒ज्यं-वाँ॑नस्प॒त्याः खलु॒ [खलु॑, वै दे॒वत॑या प॒शवो॒] 59

वै दे॒वत॑या प॒शवो॒ य-त्पृ॑षदा॒ज्यस्यो॑-प॒हत्या-ऽऽह॒ वन॒स्पत॒ये-ऽनु॑ ब्रूहि॒ वन॒स्पत॑ये॒ प्रेष्येति॑ प्राणापा॒नावे॒व प॒शुषु॑ दधात्य॒न्यस्या᳚न्यस्य समव॒त्तग्ं स॒मव॑द्यति॒ तस्मा॒न्नाना॑रूपाः प॒शवो॑ यू॒ष्णोप॑ सिञ्चति॒ रसो॒ वा ए॒ष प॑शू॒नां-यँद्यू रस॑मे॒व प॒शुषु॑ दधा॒तीडा॒मुप॑ ह्वयते प॒शवो॒ वा इडा॑ प॒शूने॒वोप॑ ह्वयते च॒तुरुप॑ ह्वयते॒ [च॒तुरुप॑ ह्वयते, चतु॑ष्पादो॒ हि] 60

चतु॑ष्पादो॒ हि प॒शवो॒ य-ङ्का॒मये॑ता प॒शु-स्स्या॒दित्य॑मे॒दस्क॒-न्तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वैन॑-म्प॒शुभ्यो॒ निर्भ॑जत्यप॒शुरे॒व भ॑वति॒ य-ङ्का॒मये॑त पशु॒मान्-थ्स्या॒दिति॒ मेद॑स्व॒-त्तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वास्मै॑ प॒शूनव॑ रुन्धे पशु॒माने॒व भ॑वति प्र॒जाप॑तिर्य॒ज्ञम॑सृजत॒ स आज्य॑- [स आज्य᳚म्, पु॒रस्ता॑दसृजत] 61

-म्पु॒रस्ता॑दसृजत प॒शु-म्म॑द्ध्य॒तः पृ॑षदा॒ज्य-म्प॒श्चा-त्तस्मा॒दाज्ये॑न प्रया॒जा इ॑ज्यन्ते प॒शुना॑ मद्ध्य॒तः पृ॑षदा॒ज्येना॑-नूया॒जा-स्तस्मा॑दे॒तन्मि॒श्रमि॑व पश्चा-थ्सृ॒ष्टग्ग् ह्येका॑दशानूया॒जान्. य॑जति॒ दश॒ वै प॒शोः प्रा॒णा आ॒त्मैका॑द॒शो यावा॑ने॒व प॒शुस्तमनु॑ यजति॒ घ्नन्ति॒ वा ए॒त-त्प॒शुं-यँ-थ्सं᳚(2)ज्ञ॒पय॑न्ति प्राणापा॒नौ खलु॒ वा ए॒तौ प॑शू॒नां-यँ-त्पृ॑षदा॒ज्यं-यँ-त्पृ॑षदा॒ज्येना॑ नूया॒जान्. यज॑ति प्राणापा॒नावे॒व प॒शुषु॑ दधाति ॥ 62 ॥

(घ्नन्ति॒ - यन्तं॒ - खलु॑ - च॒तुरुप॑ ह्वयत॒ - आज्यं॒ - ँय-त्पृ॑षदा॒ज्येन॒ - षट् च॑) (अ. 11)

(चात्वा॑लाथ् - सुव॒र्गाय॒ य-द्वै॑सर्ज॒नानि॑ - वैष्ण॒व्यर्चा - पृ॑थि॒व्यै - सा॒ध्या - इ॒षे त्वे - त्य॒ग्निना॒ - पर्य॑ग्नि - प॒शोः - प॒शुमा॒लभ्य॒ - मेद॑सा॒ स्रुचा॒ - वेका॑दश)

(चात्वा॑ला-द्- दे॒वानु॒पैति॑ - मुञ्चति - प्रह्रि॒यमा॑णाय॒ - पर्य॑ग्नि - प॒शुमा॒लभ्य॒ - चतु॑ष्पादो॒ - द्विष॑ष्टिः)

(चात्वा॑ला, त्प॒शुषु॑ दधाति)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहितायां षष्ठकाण्डे तृतीयः प्रश्न-स्समाप्तः ॥