ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ದ್ವಿತೀಯಃ ಪ್ರಶ್ನಃ - ಇಷ್ಟಿವಿಧಾನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,
ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥
ಪ್ರ॒ಜಾಪತಿಃ॑ ಪ್ರ॒ಜಾ ಅ॑ಸೃಜತ॒ ತಾ-ಸ್ಸೃ॒ಷ್ಟಾ॒ ಇನ್ದ್ರಾ॒ಗ್ನೀ ಅಪಾ॑ಗೂಹತಾ॒ಗ್ಂ॒ ಸೋ॑-ಽಚಾಯ-ತ್ಪ್ರ॒ಜಾಪ॑ತಿರಿನ್ದ್ರಾ॒ಗ್ನೀ ವೈ ಮೇ᳚ ಪ್ರ॒ಜಾ ಅಪಾ॑ಘುಕ್ಷತಾ॒ಮಿತಿ॒ ಸ ಏ॒ತಮೈ᳚ನ್ದ್ರಾ॒ಗ್ನ- ಮೇಕಾ॑ದಶಕಪಾಲ-ಮಪಶ್ಯ॒-ತ್ತ-ನ್ನಿರ॑ವಪ॒-ತ್ತಾವ॑ಸ್ಮೈ ಪ್ರ॒ಜಾಃ ಪ್ರಾಸಾ॑ಧಯತಾ- ಮಿನ್ದ್ರಾ॒ಗ್ನೀ ವಾ ಏ॒ತಸ್ಯ॑ ಪ್ರ॒ಜಾಮಪ॑ ಗೂಹತೋ॒ ಯೋ-ಽಲಂ॑ ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತ॑ ಐನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇತ್-ಪ್ರ॒ಜಾಕಾ॑ಮ ಇನ್ದ್ರಾ॒ಗ್ನೀ [ ] 1
ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ᳚ ಪ್ರ॒ಜಾ-ಮ್ಪ್ರ ಸಾ॑ಧಯತೋ ವಿ॒ನ್ದತೇ᳚ ಪ್ರ॒ಜಾ-ಮೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ಥ್ಸ್ಪರ್ಧ॑ಮಾನಃ॒, ಕ್ಷೇತ್ರೇ॑ ವಾ ಸಜಾ॒ತೇಷು॑ ವೇನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾಭ್ಯಾ॑ಮೇ॒ವೇನ್ದ್ರಿ॒ಯಂ ಁವೀ॒ರ್ಯ॑-ಮ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ವಿ ಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಜಯ॒ತೇ-ಽಪ॒ ವಾ ಏ॒ತಸ್ಮಾ॑ದಿನ್ದ್ರಿ॒ಯಂ-ವೀಁ॒ರ್ಯ॑-ಙ್ಕ್ರಾಮತಿ॒ ಯ-ಸ್ಸ॑ಗ್ರಾ॒ಮ್ಮ-ಮು॑ಪಪ್ರ॒ಯಾತ್ಯೈ᳚ನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿ- [-ಮೇಕಾ॑ದಶಕಪಾಲ॒-ನ್ನಿಃ, ವ॒ಪೇ॒-ಥ್ಸ॒ಙ್ಗ್ರಾ॒ಮ-] 2
-ರ್ವ॑ಪೇ-ಥ್ಸಙ್ಗ್ರಾ॒ಮ-ಮು॑ಪಪ್ರಯಾ॒ಸ್ಯ-ನ್ನಿ॑ನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ನ್ಧತ್ತ-ಸ್ಸ॒ಹೇನ್ದ್ರಿ॒ಯೇಣ॑ ವೀ॒ರ್ಯೇ॑ಣೋಪ॒ ಪ್ರ ಯಾ॑ತಿ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮಂ-ವಿಁ ವಾ ಏ॒ಷ ಇ॑ನ್ದ್ರಿ॒ಯೇಣ॑ ವೀ॒ರ್ಯೇ॑ಣರ್ಧ್ಯತೇ॒ ಯ-ಸ್ಸ॑ಗ್ರಾ॒ಮ್ಮ-ಞ್ಜಯ॑ತ್ಯೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮ-ಞ್ಜಿ॒ತ್ವೇನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿದ್ರಿ॒ಯಂ-ವೀಁ॒ರ್ಯ॑ನ್- [ವೀ॒ರ್ಯ᳚ಮ್, ಧ॒ತ್ತೋ॒ ನೇನ್ದ್ರಿ॒ಯೇಣ॑] 3
-ಧತ್ತೋ॒ ನೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ॒ ವ್ಯೃ॑ದ್ಧ್ಯ॒ತೇ-ಽಪ॒ ವಾ ಏ॒ತಸ್ಮಾ॑ದಿನ್ದ್ರಿ॒ಯಂ-ವೀಁ॒ರ್ಯ॑-ಙ್ಕ್ರಾಮತಿ॒ ಯ ಏತಿ॑ ಜ॒ನತಾ॑ಮೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಜ್ಜ॒ನತಾ॑ಮೇ॒ಷ್ಯ-ನ್ನಿ॑ನ್ದ್ರಾ॒ಗ್ನೀ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ನಿನ್ದ್ರಿ॒ಯಂ-ವೀಁ॒ರ್ಯ॑-ನ್ಧತ್ತ-ಸ್ಸ॒ಹೇನ್ದ್ರಿ॒ಯೇಣ॑ ವೀ॒ರ್ಯೇ॑ಣ ಜ॒ನತಾ॑ಮೇತಿ ಪೌ॒ಷ್ಣ-ಞ್ಚ॒ರುಮನು॒ ನಿರ್ವ॑ಪೇ-ತ್ಪೂ॒ಷಾ ವಾ ಇ॑ನ್ದ್ರಿ॒ಯಸ್ಯ॑ ವೀ॒ರ್ಯ॑ಸ್ಯಾ-ಽನುಪ್ರದಾ॒ತಾ ಪೂ॒ಷಣ॑ಮೇ॒ವ [ ] 4
ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॑ ಇನ್ದ್ರಿ॒ಯಂ-ವೀಁ॒ರ್ಯ॑ಮನು॒ ಪ್ರಯ॑ಚ್ಛತಿ ಕ್ಷೈತ್ರಪ॒ತ್ಯ-ಞ್ಚ॒ರು-ನ್ನಿರ್ವ॑ಪೇ-ಜ್ಜ॒ನತಾ॑-ಮಾ॒ಗತ್ಯೇ॒ಯಂ-ವೈಁ ಕ್ಷೇತ್ರ॑ಸ್ಯ॒ ಪತಿ॑ರ॒ಸ್ಯಾಮೇ॒ವ ಪ್ರತಿ॑ ತಿಷ್ಠತ್ಯೈನ್ದ್ರಾ॒ಗ್ನ-ಮೇಕಾ॑ದಶಕಪಾಲ-ಮು॒ಪರಿ॑ಷ್ಟಾ॒-ನ್ನಿರ್ವ॑ಪೇದ॒ಸ್ಯಾಮೇ॒ವ ಪ್ರ॑ತಿ॒ಷ್ಠಾಯೇ᳚ನ್ದ್ರಿ॒ಯಂ-ವೀಁ॒ರ್ಯ॑-ಮು॒ಪರಿ॑ಷ್ಟಾ-ದಾ॒ತ್ಮ-ನ್ಧ॑ತ್ತೇ ॥ 5 ॥
(ಪ್ರ॒ಜಾಕಾ॑ಮ ಇನ್ದ್ರಾ॒ಗ್ನೀ - ಉ॑ಪಪ್ರ॒ಯಾತ್ಯೈ᳚ನ್ದ್ರಾ॒ಗ್ನಮೇಕಾ॑ದಶಕಪಾಲ॒-ನ್ನಿ- ರ್ವೀ॒ರ್ಯಂ॑ - ಪೂ॒ಷಣ॑ಮೇ॒ ವೈ - ಕಾ॒ನ್ನಚ॑ತ್ವಾರಿ॒ಗ್ಂ॒ಶಚ್ಚ॑ ) (ಅ. 1)
ಅ॒ಗ್ನಯೇ॑ ಪಥಿ॒ಕೃತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑-ಽತಿಪಾ॒ದಯೇ᳚-ತ್ಪ॒ಥೋ ವಾ ಏ॒ಷೋದ್ಧ್ಯಪ॑ಥೇನೈತಿ॒ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑ತಿಪಾ॒ದಯ॑ತ್ಯ॒ಗ್ನಿಮೇ॒ವ ಪ॑ಥಿ॒ಕೃತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಮಪ॑ಥಾ॒-ತ್ಪನ್ಥಾ॒ಮಪಿ॑ ನಯತ್ಯನ॒ಡ್ವಾ-ನ್ದಕ್ಷಿ॑ಣಾ ವ॒ಹೀ ಹ್ಯೇ॑ಷ ಸಮೃ॑ದ್ಧ್ಯಾ ಅ॒ಗ್ನಯೇ᳚ ವ್ರ॒ತಪ॑ತಯೇ [ವ್ರ॒ತಪ॑ತಯೇ, ಪು॒ರೋ॒ಡಾಶ॑-] 6
ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯ ಆಹಿ॑ತಾಗ್ನಿ॒-ಸ್ಸನ್ನ॑ವ್ರ॒ತ್ಯಮಿ॑ವ॒ ಚರೇ॑ದ॒ಗ್ನಿಮೇ॒ವ ವ್ರ॒ತಪ॑ತಿ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॑-ವ್ರಁ॒ತಮಾ ಲ॑ಭಂಯಁತಿ॒ ವ್ರತ್ಯೋ॑ ಭವತ್ಯ॒ಗ್ನಯೇ॑ ರಕ್ಷೋ॒ಘ್ನೇ ಪು॑ರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಗ್ಂ ರಕ್ಷಾಗ್ಂ॑ಸಿ॒ ಸಚೇ॑ರನ್ನ॒ಗ್ನಿಮೇ॒ವ ರ॑ಕ್ಷೋ॒ಹಣ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒-ದ್ರಕ್ಷಾ॒ಗ್॒ಸ್ಯಪ॑ ಹನ್ತಿ॒ ನಿಶಿ॑ತಾಯಾ॒-ನ್ನಿರ್ವ॑ಪೇ॒- [ನಿರ್ವ॑ಪೇತ್, ನಿಶಿ॑ತಾಯಾ॒ಗ್ಂ॒ ಹಿ] 7
-ನ್ನಿಶಿ॑ತಾಯಾ॒ಗ್ಂ॒ ಹಿ ರಕ್ಷಾಗ್ಂ॑ಸಿ ಪ್ರೇ॒ರತೇ॑ ಸ॒ಪ್ರೇಂರ್ಣಾ᳚ನ್ಯೇ॒ವೈನಾ॑ನಿ ಹನ್ತಿ॒ ಪರಿ॑ಶ್ರಿತೇ ಯಾಜಯೇ॒-ದ್ರಕ್ಷ॑ಸಾ॒-ಮನ॑ನ್ವವಚಾರಾಯ ರಕ್ಷೋ॒ಘ್ನೀ ಯಾ᳚ಜ್ಯಾನುವಾ॒ಕ್ಯೇ॑ ಭವತೋ॒ ರಕ್ಷ॑ಸಾ॒ಗ್॒ ಸ್ತೃತ್ಯಾ॑ ಅ॒ಗ್ನಯೇ॑ ರು॒ದ್ರವ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದಭಿ॒ಚರ॑-ನ್ನೇ॒ಷಾ ವಾ ಅ॑ಸ್ಯ ಘೋ॒ರಾ ತ॒ನೂರ್ಯ-ದ್ರು॒ದ್ರಸ್ತಸ್ಮಾ॑ ಏ॒ವೈನ॒ಮಾವೃ॑ಶ್ಚತಿ ತಾ॒ಜಗಾರ್ತಿ॒-ಮಾರ್ಚ್ಛ॑ತ್ಯ॒ಗ್ನಯೇ॑ ಸುರಭಿ॒ಮತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಸ್ಯ॒ ಗಾವೋ॑ ವಾ॒ ಪುರು॑ಷಾ [ವಾ॒ ಪುರು॑ಷಾಃ, ವಾ॒ ಪ್ರ॒ಮೀಯೇ॑ರ॒ನ್॒] 8
ವಾ ಪ್ರ॒ಮೀಯೇ॑ರ॒ನ್॒ ಯೋ ವಾ॑ ಬಿಭೀ॒ಯಾದೇ॒ಷಾ ವಾ ಅ॑ಸ್ಯ ಭೇಷ॒ಜ್ಯಾ॑ ತ॒ನೂರ್ಯ-ಥ್ಸು॑ರಭಿ॒ಮತೀ॒-ತಯೈ॒ವಾ-ಽಸ್ಮೈ॑ ಭೇಷ॒ಜ-ಙ್ಕ॑ರೋತಿ ಸುರಭಿ॒ಮತೇ॑ ಭವತಿ ಪೂತೀಗ॒ನ್ಧಸ್ಯಾ-ಽಪ॑ಹತ್ಯಾ ಅ॒ಗ್ನಯೇ॒ ಕ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮೇ ಸಂಯಁ॑ತ್ತೇ ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯಿ॒ತ್ವಾ ಪರಾ॑ನ॒ಭಿ ನಿರ್ದಿ॑ಶತಿ॒ ಯಮವ॑ರೇಷಾಂ॒-ವಿಁದ್ಧ್ಯ॑ನ್ತಿ॒ ಜೀವ॑ತಿ॒ ಸ ಯ-ಮ್ಪರೇ॑ಷಾ॒-ಮ್ಪ್ರ ಸ ಮೀ॑ಯತೇ॒ ಜಯ॑ತಿ॒ ತಗ್ಂ ಸ॑ಙ್ಗ್ರಾ॒ಮ- [ತಗ್ಂ ಸ॑ಙ್ಗ್ರಾ॒ಮಮ್, ಅ॒ಭಿ ವಾ ಏ॒ಷ] 9
-ಮ॒ಭಿ ವಾ ಏ॒ಷ ಏ॒ತಾನು॑ಚ್ಯತಿ॒ ಯೇಷಾ᳚-ಮ್ಪೂರ್ವಾಪ॒ರಾ ಅ॒ನ್ವಞ್ಚಃ॑ ಪ್ರ॒ಮೀಯ॑ನ್ತೇ ಪುರುಷಾಹು॒ತಿರ್-ಹ್ಯ॑ಸ್ಯ ಪ್ರಿ॒ಯತ॑ಮಾ॒-ಽಗ್ನಯೇ॒ ಕ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನೈಷಾ᳚-ಮ್ಪು॒ರಾ-ಽಽಯು॒ಷೋ-ಽಪ॑ರಃ॒ ಪ್ರಮೀ॑ಯತೇ॒-ಽಭಿ ವಾ ಏ॒ಷ ಏ॒ತಸ್ಯ॑ ಗೃ॒ಹಾನು॑ಚ್ಯತಿ॒ ಯಸ್ಯ॑ ಗೃ॒ಹಾ-ನ್ದಹ॑ತ್ಯ॒ಗ್ನಯೇ॒ ಕ್ಷಾಮ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ಭಾಗ॒ಧೇಯೇ॑ನೈ॒ವೈನಗ್ಂ॑ ಶಮಯತಿ॒ ನಾ-ಽಸ್ಯಾಪ॑ರ-ಙ್ಗೃ॒ಹಾ-ನ್ದ॑ಹತಿ ॥ 10 ॥
(ವ್ರ॒ತಪ॑ತಯೇ॒ - ನಿಶಿ॑ತಾಯಾ॒-ನ್ನಿರ್ವ॑ಪೇ॒ತ್ - ಪುರು॑ಷಾಃ - ಸಙ್ಗ್ರಾ॒ಮಂ - ನ - ಚ॒ತ್ವಾರಿ॑ ಚ) (ಅ. 2)
ಅ॒ಗ್ನಯೇ॒ ಕಾಮಾ॑ಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯ-ಙ್ಕಾಮೋ॒ ನೋಪ॒ನಮೇ॑-ದ॒ಗ್ನಿಮೇ॒ವ ಕಾಮ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಙ್ಕಾಮೇ॑ನ॒ ಸಮ॑ರ್ಧಯ॒ತ್ಯುಪೈ॑ನ॒-ಙ್ಕಾಮೋ॑ ನಮತ್ಯ॒ಗ್ನಯೇ॒ ಯ ವಿ॑ಷ್ಠಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸ್ಪರ್ಧ॑ಮಾನಃ॒, ಕ್ಷೇತ್ರೇ॑ ವಾ ಸಜಾ॒ತೇಷು॑ ವಾ॒-ಽಗ್ನಿಮೇ॒ವ ಯವಿ॑ಷ್ಠ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತೇನೈ॒ವೇನ್ದ್ರಿ॒ಯಂ-ವೀಁ॒ರ್ಯ॑-ಮ್ಭ್ರಾತೃ॑ವ್ಯಸ್ಯ [ಭ್ರಾತೃ॑ವ್ಯಸ್ಯ, ಯು॒ವ॒ತೇ॒ ವಿಪಾ॒ಪ್ಮನಾ॒] 11
ಯುವತೇ॒ ವಿಪಾ॒ಪ್ಮನಾ॒ ಭ್ರಾತೃ॑ವ್ಯೇಣ ಜಯತೇ॒-ಽಗ್ನಯೇ॒ ಯವಿ॑ಷ್ಠಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದಭಿಚ॒ರ್ಯಮಾ॑ಣೋ॒ ಽಗ್ನಿಮೇ॒ವ ಯವಿ॑ಷ್ಠ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॒-ದ್ರಕ್ಷಾಗ್ಂ॑ಸಿ ಯವಯತಿ॒ ನೈನ॑-ಮಭಿ॒ಚರನ್᳚-ಥ್ಸ್ತೃಣುತೇ॒-ಽಗ್ನಯ॒ ಆಯು॑ಷ್ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಸರ್ವ॒-ಮಾಯು॑-ರಿಯಾ॒-ಮಿತ್ಯ॒ಗ್ನಿ- ಮೇ॒ವಾ-ಽಽಯು॑ಷ್ಮನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॒- [ಏ॒ವಾ-ಽಸ್ಮಿನ್ನ್॑, ಆಯು॑ರ್ದಧಾತಿ॒] 12
-ನ್ನಾಯು॑ರ್ದಧಾತಿ॒ ಸರ್ವ॒ಮಾಯು॑-ರೇತ್ಯ॒ಗ್ನಯೇ॑ ಜಾ॒ತವೇ॑ದಸೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಭೂತಿ॑ಕಾಮೋ॒-ಽಗ್ನಿಮೇ॒ವ ಜಾ॒ತವೇ॑ದಸ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮ್ಭೂತಿ॑-ಙ್ಗಮಯತಿ॒ ಭವ॑ತ್ಯೇ॒ವಾಗ್ನಯೇ॒ ರುಕ್ಮ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ರುಕ್ಕಾ॑ಮೋ॒-ಽಗ್ನಿಮೇ॒ವ ರುಕ್ಮ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॒-ನ್ರುಚ॑-ನ್ದಧಾತಿ॒-ರೋಚ॑ತ ಏ॒ವಾಗ್ನಯೇ॒ ತೇಜ॑ಸ್ವತೇ ಪುರೋ॒ಡಾಶ॑- [ಪುರೋ॒ಡಾಶ᳚ಮ್, ಅ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ತ್] 13
-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ತ್ತೇಜ॑ಸ್ಕಾಮೋ॒-ಽಗ್ನಿಮೇ॒ವ ತೇಜ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॒-ನ್ತೇಜೋ॑ ದಧಾತಿ ತೇಜ॒ಸ್ವ್ಯೇ॑ವ ಭ॑ವತ್ಯ॒ಗ್ನಯೇ॑ ಸಾಹ॒ನ್ತ್ಯಾಯ॑ ಪುರೋ॒ಡಾಶ॑ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸೀಕ್ಷ॑ಮಾಣೋ॒ ಽಗ್ನಿಮೇ॒ವ ಸಾ॑ಹ॒ನ್ತ್ಯಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತೇನೈ॒ವ ಸ॑ಹತೇ॒ ಯಗ್ಂ ಸೀಕ್ಷ॑ತೇ ॥ 14 ॥
(ಭ್ರಾತೃ॑ವ್ಯಸ್ಯಾ -ಸ್ಮಿ॒ನ್ - ತೇಜ॑ಸ್ವತೇ ಪುರೋ॒ಡಶ॑ - ಮ॒ಷ್ಟಾತ್ರಿಗ್ಂ॑ಶಚ್ಚ) (ಅ. 3)
ಅ॒ಗ್ನಯೇ-ಽನ್ನ॑ವತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॒ತಾ-ಽನ್ನ॑ವಾನ್-ಥ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವಾ-ನ್ನ॑ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಮನ್ನ॑ವನ್ತ-ಙ್ಕರೋ॒ತ್ಯನ್ನ॑ವಾನೇ॒ವ ಭ॑ವತ್ಯ॒ಗ್ನಯೇ᳚-ಽನ್ನಾ॒ದಾಯ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತಾ-ಽನ್ನಾ॒ದ-ಸ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವಾನ್ನಾ॒ದಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮನ್ನಾ॒ದ-ಙ್ಕ॑ರೋತ್ಯನ್ನಾ॒ದ - [-ಕ॑ರೋತ್ಯನ್ನಾ॒ದಃ, ಏ॒ವ ಭ॑ವತ್ಯ॒ಗ್ನಯೇ-ಽನ್ನ॑ಪತಯೇ] 15
ಏ॒ವ ಭ॑ವತ್ಯ॒ಗ್ನಯೇ-ಽನ್ನ॑ಪತಯೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ-ಕಾ॒ಮಯೇ॒ತಾ-ಽನ್ನ॑ಪತಿ-ಸ್ಸ್ಯಾ॒-ಮಿತ್ಯ॒ಗ್ನಿ-ಮೇ॒ವಾ-ಽನ್ನ॑ಪತಿ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒-ಮನ್ನ॑ಪತಿ-ಙ್ಕರೋ॒ತ್ಯನ್ನ॑ಪತಿ-ರೇ॒ವ ಭ॑ವತ್ಯ॒ಗ್ನಯೇ॒ ಪವ॑ಮಾನಾಯ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇದ॒ಗ್ನಯೇ॑ ಪಾವ॒ಕಾಯಾ॒ಗ್ನಯೇ॒ ಶುಚ॑ಯೇ॒ ಜ್ಯೋಗಾ॑ಮಯಾವೀ॒ ಯದ॒ಗ್ನಯೇ॒ ಪವ॑ಮಾನಾಯ ನಿ॒ರ್ವಪ॑ತಿ ಪ್ರಾ॒ಣ-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॑ - [ಯದ॒ಗ್ನಯೇ᳚, ಪಾ॒ವ॒ಕಾಯ॒ ವಾಚ॑-] 16
ಪಾವ॒ಕಾಯ॒ ವಾಚ॑-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॒ ಶುಚ॑ಯ॒ ಆಯು॑-ರೇ॒ವಾ-ಽಸ್ಮಿ॒-ನ್ತೇನ॑ ದಧಾತ್ಯು॒ತ ಯದೀ॒ತಾಸು॒-ರ್ಭವ॑ತಿ॒ ಜೀವ॑ತ್ಯೇ॒ವೈತಾ-ಮೇ॒ವ ನಿರ್ವ॑ಪೇ॒-ಚ್ಚಕ್ಷು॑ಷ್ಕಾಮೋ॒ ಯದ॒ಗ್ನಯೇ॒ ಪವ॑ಮಾನಾಯ ನಿ॒ರ್ವಪ॑ತಿ ಪ್ರಾ॒ಣ-ಮೇ॒ವಾ-ಽಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॑ ಪಾವ॒ಕಾಯ॒ ವಾಚ॑-ಮೇ॒ವಾಸ್ಮಿ॒-ನ್ತೇನ॑ ದಧಾತಿ॒ ಯದ॒ಗ್ನಯೇ॒ ಶುಚ॑ಯೇ॒ ಚಕ್ಷು॑-ರೇ॒ವಾಸ್ಮಿ॒-ನ್ತೇನ॑ ದಧಾ- [ಚಕ್ಷು॑ರೇ॒ವಾಸ್ಮಿ॒-ನ್ತೇನ॑ ದಧಾತಿ, ಉ॒ತ ಯದ್ಯ॒ನ್ಧೋ] 17
-ತ್ಯು॒ತ ಯದ್ಯ॒ನ್ಧೋ ಭವ॑ತಿ॒ ಪ್ರೈವ ಪ॑ಶ್ಯತ್ಯ॒ಗ್ನಯೇ॑ ಪು॒ತ್ರವ॑ತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದಿನ್ದ್ರಾ॑ಯ ಪು॒ತ್ರಿಣೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ-ಮ್ಪ್ರ॒ಜಾಕಾ॑ಮೋ॒-ಽಗ್ನಿ-ರೇ॒ವಾ-ಽಸ್ಮೈ᳚ ಪ್ರ॒ಜಾ-ಮ್ಪ್ರ॑ಜ॒ನಯ॑ತಿ ವೃ॒ದ್ಧಾ-ಮಿನ್ದ್ರಃ॒ ಪ್ರ ಯ॑ಚ್ಛತ್ಯ॒ಗ್ನಯೇ॒ ರಸ॑ವತೇ-ಽಜಕ್ಷೀ॒ರೇ ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ರಸ॑ವಾನ್-ಥ್ಸ್ಯಾ॒-ಮಿತ್ಯ॒ಗ್ನಿ-ಮೇ॒ವ ರಸ॑ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॒ಗ್ಂ॒ ರಸ॑ವನ್ತ-ಙ್ಕರೋತಿ॒ [ರಸ॑ವನ್ತ-ಙ್ಕರೋತಿ, ರಸ॑ವಾನೇ॒ವ] 18
ರಸ॑ವಾನೇ॒ವ ಭ॑ವತ್ಯಜಕ್ಷೀ॒ರೇ ಭ॑ವತ್ಯಾಗ್ನೇ॒ಯೀ ವಾ ಏ॒ಷಾ ಯದ॒ಜಾ ಸಾ॒ಕ್ಷಾದೇ॒ವ ರಸ॒ಮವ॑ ರುನ್ಧೇ॒-ಽಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ವಸು॑ಮಾನ್-ಥ್ಸ್ಯಾ॒ಮಿತ್ಯ॒ಗ್ನಿ-ಮೇ॒ವ ವಸು॑ಮನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನಂ॒-ವಁಸು॑ಮನ್ತ-ಙ್ಕರೋತಿ॒ ವಸು॑ಮಾನೇ॒ವ ಭ॑ವತ್ಯ॒ಗ್ನಯೇ॑ ವಾಜ॒ಸೃತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿವ॑ರ್ಪೇ-ಥ್ಸಙ್ಗ್ರಾ॒ಮೇ ಸಂ-ಯಁ॑ತ್ತೇ॒ ವಾಜಂ॒- [ಸಂ-ಯಁ॑ತ್ತೇ॒ ವಾಜ᳚ಮ್, ವಾ ಏ॒ಷ ಸಿ॑ಸೀರ್ಷತಿ॒] 19
-ಁವಾ ಏ॒ಷ ಸಿ॑ಸೀರ್ಷತಿ॒ ಯ-ಸ್ಸ॑ಗ್ರಾ॒ಮ್ಮ-ಞ್ಜಿಗೀ॑ಷತ್ಯ॒ಗ್ನಿಃ ಖಲು॒ ವೈ ದೇ॒ವಾನಾಂ᳚-ವಾಁಜ॒ಸೃ-ದ॒ಗ್ನಿ-ಮೇ॒ವ ವಾ॑ಜ॒ಸೃತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಧಾವ॑ತಿ॒ ವಾಜ॒ಗ್ಂ॒ ಹನ್ತಿ॑ ವೃ॒ತ್ರ-ಞ್ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮ-ಮಥೋ॑ ಅ॒ಗ್ನಿರಿ॑ವ॒ ನ ಪ್ರ॑ತಿ॒ಧೃಷೇ॑ ಭವತ್ಯ॒ಗ್ನಯೇ᳚-ಽಗ್ನಿ॒ವತೇ॑ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಯಸ್ಯಾ॒ಗ್ನಾ- ವ॒ಗ್ನಿ- ಮ॑ಭ್ಯು॒ದ್ಧರೇ॑ಯು॒-ರ್ನಿರ್ದಿ॑ಷ್ಟಭಾಗೋ॒ ವಾ ಏ॒ತಯೋ॑-ರ॒ನ್ಯೋ-ಽನಿ॑ರ್ದಿಷ್ಟಭಾಗೋ॒-ಽನ್ಯಸ್ತೌ ಸ॒ಭಂವಁ॑ನ್ತೌ॒ ಯಜ॑ಮಾನ- [ಯಜ॑ಮಾನಮ್, ಅ॒ಭಿ] 20
-ಮ॒ಭಿ ಸ-ಮ್ಭ॑ವತ॒-ಸ್ಸ ಈ᳚ಶ್ವ॒ರ ಆರ್ತಿ॒-ಮಾರ್ತೋ॒-ರ್ಯ-ದ॒ಗ್ನಯೇ᳚-ಽಗ್ನಿ॒ವತೇ॑ ನಿ॒ರ್ವಪ॑ತಿ ಭಾಗ॒ಧೇಯೇ॑ನೈ॒ವೈನೌ॑ ಶಮಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನೋ॒-ಽಗ್ನಯೇ॒ ಜ್ಯೋತಿ॑ಷ್ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ದ್ಯಸ್ಯಾ॒-ಗ್ನಿರುದ್ಧೃ॒ತೋ-ಽಹು॑ತೇ-ಽಗ್ನಿಹೋ॒ತ್ರ ಉ॒ದ್ವಾಯೇ॒ದಪ॑ರ ಆ॒ದೀಪ್ಯಾ॑-ಽನೂ॒ದ್ಧೃತ್ಯ॒ ಇತ್ಯಾ॑ಹು॒ಸ್ತ-ತ್ತಥಾ॒ ನ ಕಾ॒ರ್ಯಂ॑-ಯಁ-ದ್ಭಾ॑ಗ॒ಧೇಯ॑ಮ॒ಭಿ ಪೂರ್ವ॑ ಉದ್ಧ್ರಿ॒ಯತೇ॒ ಕಿಮಪ॑ರೋ॒-ಽಭ್ಯು- [ಕಿಮಪ॑ರೋ॒-ಽಭ್ಯುತ್, ಹ್ರಿ॒ಯೇ॒ತೇತಿ॒ ತಾನ್ಯೇ॒ವಾ] 21
-ದ್ಧ್ರಿ॑ಯೇ॒ತೇತಿ॒ ತಾನ್ಯೇ॒ವಾ ವ॒ಕ್ಷಾಣಾ॑ನಿ ಸನ್ನಿ॒ಧಾಯ॑ ಮನ್ಥೇದಿ॒ತಃ ಪ್ರ॑ಥ॒ಮ-ಞ್ಜ॑ಜ್ಞೇ ಅ॒ಗ್ನಿ-ಸ್ಸ್ವಾದ್ಯೋನೇ॒ರಧಿ॑ ಜಾ॒ತವೇ॑ದಾಃ । ಸ ಗಾ॑ಯತ್ರಿ॒ಯಾ ತ್ರಿ॒ಷ್ಟುಭಾ॒ ಜಗ॑ತ್ಯಾ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹತು ಪ್ರಜಾ॒ನನ್ನಿತಿ॒ ಛನ್ದೋ॑ಭಿ-ರೇ॒ವೈನ॒ಗ್ಗ್॒ ಸ್ವಾದ್ಯೋನೇಃ॒ ಪ್ರಜ॑ನಯತ್ಯೇ॒ಷ ವಾ ವ ಸೋ᳚-ಽಗ್ನಿರಿತ್ಯಾ॑ಹು॒ ರ್ಜ್ಯೋತಿ॒ಸ್ತ್ವಾ ಅ॑ಸ್ಯ॒ ಪರಾ॑ಪತಿತ॒-ಮಿತಿ॒ ಯದ॒ಗ್ನಯೇ॒ ಜ್ಯೋತಿ॑ಷ್ಮತೇ ನಿ॒ರ್ವಪ॑ತಿ॒ ಯದೇ॒ವಾಸ್ಯ॒ ಜ್ಯೋತಿಃ॒ ಪರಾ॑ಪತಿತ॒-ನ್ತದೇ॒ವಾವ॑ ರುನ್ಧೇ ॥ 22 ॥
(ಕ॒ರೋ॒ತ್ಯ॒ನ್ನಾ॒ದೋ - ದ॑ಧಾತಿ॒ ಯದ॒ಗ್ನಯೇ॒ - ಶುಚ॑ಯೇ॒ ಚಕ್ಷು॑ರೇ॒ವಾಸ್ಮಿ॒-ನ್ತೇನ॑ ದಧಾತಿ -ಕರೋತಿ॒ - ವಾಜಂ॒ -ಁಯಜ॑ಮಾನ॒ - ಮು - ದೇ॒ವಾಸ್ಯ॒ - ಷಟ್ಚ॑) (ಅ. 4)
ವೈ॒ಶ್ವಾ॒ನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದ್ವಾರು॒ಣ-ಞ್ಚ॒ರು-ನ್ದ॑ಧಿ॒ಕ್ರಾವ್ಣ್ಣೇ॑ ಚ॒ರುಮ॑ಭಿಶ॒ಸ್ಯಮಾ॑ನೋ॒ ಯ-ದ್ವೈ᳚ಶ್ವಾನ॒ರೋ ದ್ವಾದ॑ಶಕಪಾಲೋ॒ ಭವ॑ತಿ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರೇಣೈ॒ವೈನಗ್ಗ್॑ ಸ್ವದಯ॒ತ್ಯಪ॑ ಪಾ॒ಪಂ-ವಁರ್ಣಗ್ಂ॑ ಹತೇ ವಾರು॒ಣೇನೈ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ದಧಿ॒ಕ್ರಾವ್ಣ್ಣಾ॑ ಪುನಾತಿ॒ ಹಿರ॑ಣ್ಯ॒-ನ್ದಕ್ಷಿ॑ಣಾ ಪ॒ವಿತ್ರಂ॒-ವೈಁ ಹಿರ॑ಣ್ಯ-ಮ್ಪು॒ನಾತ್ಯೇ॒ವೈನ॑-ಮಾ॒ದ್ಯ॑-ಮ॒ಸ್ಯಾ-ಽನ್ನ॑-ಮ್ಭವತ್ಯೇ॒ತಾಮೇ॒ವ ನಿರ್ವ॑ಪೇ-ತ್ಪ್ರ॒ಜಾಕಾ॑ಮ-ಸ್ಸಂವಁಥ್ಸ॒ರೋ [ಸಂವಁಥ್ಸ॒ರಃ, ವಾ] 23
ವಾ ಏ॒ತಸ್ಯಾ-ಽಶಾ᳚ನ್ತೋ॒ ಯೋನಿ॑-ಮ್ಪ್ರ॒ಜಾಯೈ॑ ಪಶೂ॒ನಾ-ನ್ನಿರ್ದ॑ಹತಿ॒ ಯೋ-ಽಲ॑-ಮ್ಪ್ರ॒ಜಾಯೈ॒ ಸ-ನ್ಪ್ರ॒ಜಾ-ನ್ನ ವಿ॒ನ್ದತೇ॒ ಯ-ದ್ವೈ᳚ಶ್ವಾನ॒ರೋ ದ್ವಾದ॑ಶಕಪಾಲೋ॒ ಭವ॑ತಿ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಮೇ॒ವ ಭಾ॑ಗ॒ಧೇಯೇ॑ನ ಶಮಯತಿ॒ ಸೋ᳚-ಽಸ್ಮೈ ಶಾ॒ನ್ತ-ಸ್ಸ್ವಾದ್ಯೋನೇಃ᳚ ಪ್ರ॒ಜಾ-ಮ್ಪ್ರಜ॑ನಯತಿ ವಾರು॒ಣೇನೈ॒ವೈನಂ॑-ವಁರುಣಪಾ॒ಶಾ-ನ್ಮು॑ಞ್ಚತಿ ದಧಿ॒ಕ್ರಾವ್ಣ್ಣಾ॑ ಪುನಾತಿ॒ ಹಿರ॑ಣ್ಯ॒-ನ್ದಕ್ಷಿ॑ಣಾ ಪ॒ವಿತ್ರಂ॒-ವೈಁ ಹಿರ॑ಣ್ಯ-ಮ್ಪು॒ನಾತ್ಯೇ॒ವೈನಂ॑- [ಪು॒ನಾತ್ಯೇ॒ವೈನ᳚ಮ್, ವಿ॒ನ್ದತೇ᳚] 24
-ಁವಿ॒ನ್ದತೇ᳚ ಪ್ರ॒ಜಾಂ-ವೈಁ᳚ಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ತ್ಪು॒ತ್ರೇ ಜಾ॒ತೇಯದ॒ಷ್ಟಾಕ॑ಪಾಲೋ॒ ಭವ॑ತಿ ಗಾಯತ್ರಿ॒ಯೈವೈನ॑-ಮ್ಬ್ರಹ್ಮವರ್ಚ॒ಸೇನ॑ ಪುನಾತಿ॒ ಯನ್ನವ॑ಕಪಾಲ-ಸ್ತ್ರಿ॒ವೃತೈ॒ವಾಸ್ಮಿ॒-ನ್ತೇಜೋ॑ ದಧಾತಿ॒ ಯ-ದ್ದಶ॑ಕಪಾಲೋ ವಿ॒ರಾಜೈ॒ವಾ-ಽಸ್ಮಿ॑-ನ್ನ॒ನ್ನಾದ್ಯ॑-ನ್ದಧಾತಿ॒ ಯದೇಕಾ॑ದಶಕಪಾಲ- ಸ್ತ್ರಿ॒ಷ್ಟುಭೈ॒ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ನ್ದ॑ಧಾತಿ॒ ಯ-ದ್ದ್ವಾದ॑ಶಕಪಾಲೋ॒ ಜಗ॑ತ್ಯೈ॒ವಾ-ಽಸ್ಮಿ॑-ನ್ಪ॒ಶೂ-ನ್ದ॑ಧಾತಿ॒ ಯಸ್ಮಿ॑ನ್ ಜಾ॒ತ ಏ॒ತಾಮಿಷ್ಟಿ॑-ನ್ನಿ॒ರ್ವಪ॑ತಿ ಪೂ॒ತ [ಪೂ॒ತಃ, ಏ॒ವ ತೇ॑ಜ॒ಸ್ವ್ಯ॑ನ್ನಾ॒ದ] 25
ಏ॒ವ ತೇ॑ಜ॒ಸ್ವ್ಯ॑ನ್ನಾ॒ದ ಇ॑ನ್ದ್ರಿಯಾ॒ವೀ ಪ॑ಶು॒ಮಾ-ನ್ಭ॑ವ॒ತ್ಯವ॒ ವಾ ಏ॒ಷ ಸು॑ವ॒ರ್ಗಾ-ಲ್ಲೋ॒ಕಾ-ಚ್ಛಿ॑ದ್ಯತೇ॒ ಯೋ ದ॑ರ್ಶಪೂರ್ಣಮಾಸಯಾ॒ಜೀ ಸನ್ನ॑ಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑ತಿಪಾ॒ದಯ॑ತಿ ಸುವ॒ರ್ಗಾಯ॒ ಹಿ ಲೋ॒ಕಾಯ॑ ದರ್ಶಪೂರ್ಣಮಾ॒ಸಾ ವಿ॒ಜ್ಯೇತೇ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದಮಾವಾ॒ಸ್ಯಾಂ᳚-ವಾಁ ಪೌರ್ಣಮಾ॒ಸೀಂ-ವಾಁ॑-ಽತಿ॒ಪಾದ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಮೇ॒ವ ಪ್ರೀ॑ಣಾ॒ತ್ಯಥೋ॑ ಸಂವಁಥ್ಸ॒ರಮೇ॒ವಾಸ್ಮಾ॒ ಉಪ॑ ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯ॒ ಸಮ॑ಷ್ಟ್ಯಾ॒ [ಸಮ॑ಷ್ಟ್ಯೈ, ಅಥೋ॑] 26
ಅಥೋ॑ ದೇ॒ವತಾ॑ ಏ॒ವಾನ್ವಾ॒ರಭ್ಯ॑ ಸುವ॒ರ್ಗಂ-ಲೋಁ॒ಕಮೇ॑ತಿ ವೀರ॒ಹಾ ವಾ ಏ॒ಷ ದೇ॒ವಾನಾಂ॒-ಯೋಁ᳚-ಽಗ್ನಿ-ಮು॑ದ್ವಾ॒ಸಯ॑ತೇ॒ ನ ವಾ ಏ॒ತಸ್ಯ॑ ಬ್ರಾಹ್ಮ॒ಣಾ ಋ॑ತಾ॒ಯವಃ॑ ಪು॒ರಾ-ಽನ್ನ॑-ಮಕ್ಷ-ನ್ನಾಗ್ನೇ॒ಯ-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ದ್ವೈಶ್ವಾನ॒ರ-ನ್ದ್ವಾದ॑ಶಕಪಾಲ-ಮ॒ಗ್ನಿಮು॑ದ್ವಾಸಯಿ॒ಷ್ಯನ್. ಯದ॒ಷ್ಟಾಕ॑ಪಾಲೋ॒ ಭವ॑ತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ-ಗಾ॑ಯ॒ತ್ರೋ᳚ ಽಗ್ನಿ-ರ್ಯಾವಾ॑-ನೇ॒ವಾ-ಽಗ್ನಿಸ್ತಸ್ಮಾ॑ ಆತಿ॒ಥ್ಯ-ಙ್ಕ॑ರೋ॒ತ್ಯಥೋ॒ ಯಥಾ॒ ಜನಂ॑-ಯಁ॒ತೇ॑-ಽವ॒ಸ-ಙ್ಕ॒ರೋತಿ॑ ತಾ॒ದೃ- [ತಾ॒ದೃಕ್, ಏ॒ವ] 27
-ಗೇ॒ವ ತ-ದ್ದ್ವಾದ॑ಶಕಪಾಲೋ ವೈಶ್ವಾನ॒ರೋ ಭ॑ವತಿ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರಃ ಖಲು॒ ವಾ ಅ॒ಗ್ನೇರ್ಯೋನಿ॒-ಸ್ಸ್ವಾಮೇ॒ವೈನಂ॒-ಯೋಁನಿ॑-ಙ್ಗಮಯ-ತ್ಯಾ॒ದ್ಯ॑ಮ॒ಸ್ಯಾನ್ನ॑-ಮ್ಭವತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲ॒-ಙ್ಗ್ರಾಮ॑ಕಾಮ ಆಹವ॒ನೀಯೇ॑ ವೈಶ್ವಾನ॒ರಮಧಿ॑ ಶ್ರಯತಿ॒ ಗಾರ್ಹ॑ಪತ್ಯೇ ಮಾರು॒ತ-ಮ್ಪಾ॑ಪವಸ್ಯ॒ಸಸ್ಯ॒ ವಿಧೃ॑ತ್ಯೈ॒ ದ್ವಾದ॑ಶಕಪಾಲೋ ವೈಶ್ವಾನ॒ರೋ ಭ॑ವತಿ॒ ದ್ವಾದ॑ಶ॒ ಮಾಸಾ᳚-ಸ್ಸಂವಁಥ್ಸ॒ರ-ಸ್ಸಂ॑ವಁಥ್ಸ॒ರೇಣೈ॒ವಾಸ್ಮೈ॑ ಸಜಾ॒ತಾಗ್ಶ್ಚ್ಯಾ॑ವಯತಿ ಮಾರು॒ತೋ ಭ॑ವತಿ [ ] 28
ಮ॒ರುತೋ॒ ವೈ ದೇ॒ವಾನಾಂ॒-ವಿಁಶೋ॑ ದೇವವಿ॒ಶೇನೈ॒ವಾ-ಽಸ್ಮೈ॑ ಮನುಷ್ಯ ವಿ॒ಶಮವ॑ ರುನ್ಧೇ ಸ॒ಪ್ತಕ॑ಪಾಲೋ ಭವತಿ ಸ॒ಪ್ತ ಗ॑ಣಾ॒ ವೈ ಮ॒ರುತೋ॑ ಗಣ॒ಶ ಏ॒ವಾಸ್ಮೈ॑ ಸಜಾ॒ತಾನವ॑ ರುನ್ಧೇ ಽನೂ॒ಚ್ಯಮಾ॑ನ॒ ಆ ಸಾ॑ದಯತಿ॒ ವಿಶ॑ಮೇ॒ವಾಸ್ಮಾ॒ ಅನು॑ವರ್ತ್ಮಾನ-ಙ್ಕರೋತಿ ॥ 29 ॥
(ಪ್ರ॒ಜಾಕಾ॑ಮ-ಸ್ಸಂವಁಥ್ಸ॒ರಃ - ಪು॒ನಾತ್ಯೇ॒ವೈನಂ॑ - ಪೂ॒ತಃ - ಸಮ॑ಷ್ಟ್ಯೈ -ತಾ॒ದೃಂ - ಮಾ॑ರು॒ತೋ ಭ॑ವ॒ - ತ್ಯೇಕಾ॒ನ್ನ ತ್ರಿ॒ಗ್ಂ॒ಶಚ್ಚ॑ ) (ಅ. 5)
ಆ॒ದಿ॒ತ್ಯ-ಞ್ಚ॒ರು-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮ-ಮು॑ಪಪ್ರಯಾ॒ಸ್ಯ-ನ್ನಿ॒ಯಂ-ವಾಁ ಅದಿ॑ತಿ-ರ॒ಸ್ಯಾಮೇ॒ವ ಪೂರ್ವೇ॒ ಪ್ರತಿ॑ತಿಷ್ಠನ್ತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದಾ॒ಯತ॑ನ-ಙ್ಗ॒ತ್ವಾ-ಸಂ॑ವಁಥ್ಸ॒ರೋ ವಾ ಅ॒ಗ್ನಿ ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರಃ ಖಲು॒ ವೈ ದೇ॒ವಾನಾ॑-ಮಾ॒ಯತ॑ನ-ಮೇ॒ತಸ್ಮಾ॒ದ್ವಾ ಆ॒ಯತ॑ನಾ-ದ್ದೇ॒ವಾ ಅಸು॑ರಾ-ನಜಯ॒ನ್॒. ಯ-ದ್ವೈ᳚ಶ್ವಾನ॒ರ-ನ್ದ್ವಾದ॑ಶಕಪಾಲ-ನ್ನಿ॒ರ್ವಪ॑ತಿ ದೇ॒ವಾನಾ॑-ಮೇ॒ವಾ-ಽಽಯತ॑ನೇ ಯತತೇ॒ ಜಯ॑ತಿ॒ ತಗ್ಂ ಸ॑ಗ್ರಾ॒ಮ್ಮ-ಮೇ॒ತಸ್ಮಿ॒ನ್ ವಾ ಏ॒ತೌ ಮೃ॑ಜಾತೇ॒ [ಏ॒ತೌ ಮೃ॑ಜಾತೇ, ಯೋ ವಿ॑ದ್ವಿಷಾ॒ಣಯೋ॒-ರನ್ನ॒-ಮತ್ತಿ॑] ॥ 30 ॥
ಯೋ ವಿ॑ದ್ವಿಷಾ॒ಣಯೋ॒-ರನ್ನ॒-ಮತ್ತಿ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದ್ವಿದ್ವಿಷಾ॒ಣಯೋ॒ರನ್ನ॑-ಞ್ಜ॒ಗ್ಧ್ವಾ ಸಂ॑ವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ ಸ್ವ॑ದಿತ-ಮೇ॒ವಾ-ಽತ್ತಿ॒ ನಾಸ್ಮಿ॑-ನ್ಮೃಜಾತೇ ಸಂವಁಥ್ಸ॒ರಾಯ॒ ವಾ ಏ॒ತೌ ಸಮ॑ಮಾತೇ॒ ಯೌ ಸ॑ಮ॒ಮಾತೇ॒ ತಯೋ॒ರ್ಯಃ ಪೂರ್ವೋ॑-ಽಭಿ॒ದ್ರುಹ್ಯ॑ತಿ॒ ತಂ-ವಁರು॑ಣೋ ಗೃಹ್ಣಾತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ಥ್ಸಮಮಾ॒ನಯೋಃ॒ ಪೂರ್ವೋ॑-ಽಭಿ॒ದ್ರುಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಮೇ॒ವಾ-ಽಽಪ್ತ್ವಾ ನಿ॑ರ್ವರು॒ಣಂ- [ನಿ॑ರ್ವರು॒ಣಮ್, ಪ॒ರಸ್ತಾ॑-ದ॒ಭಿ] ॥ 31 ॥
-ಪ॒ರಸ್ತಾ॑-ದ॒ಭಿ ದ್ರು॑ಹ್ಯತಿ॒ ನೈನಂ॒-ವಁರು॑ಣೋ ಗೃಹ್ಣಾತ್ಯಾ॒ವ್ಯಂ॑-ವಾಁ ಏ॒ಷ ಪ್ರತಿ॑ ಗೃಹ್ಣಾತಿ॒ ಯೋ-ಽವಿ॑-ಮ್ಪ್ರತಿಗೃ॒ಹ್ಣಾತಿ॑ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ॒ದವಿ॑-ಮ್ಪ್ರತಿ॒ಗೃಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಸ್ವ॑ದಿತಾಮೇ॒ವ ಪ್ರತಿ॑ಗೃಹ್ಣಾತಿ॒ ನಾ-ಽಽವ್ಯ॑-ಮ್ಪ್ರತಿ॑ಗೃಹ್ಣಾತ್ಯಾ॒ತ್ಮನೋ॒ ವಾ ಏ॒ಷ ಮಾತ್ರಾ॑ಮಾಪ್ನೋತಿ॒ ಯ ಉ॑ಭ॒ಯಾದ॑-ತ್ಪ್ರತಿಗೃ॒ಹ್ಣಾತ್ಯಶ್ವಂ॑-ವಾಁ॒ ಪುರು॑ಷಂ-ವಾಁ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ದುಭ॒ಯಾದ॑- [ನಿರ್ವ॑ಪೇ-ದುಭ॒ಯಾದ॑ತ್, ಪ್ರ॒ತಿ॒ಗೃಹ್ಯ॑] ॥ 32 ॥
-ತ್ಪ್ರತಿ॒ಗೃಹ್ಯ॑ ಸಂವಁಥ್ಸ॒ರೋ ವಾ ಅ॒ಗ್ನಿರ್ವೈ᳚ಶ್ವಾನ॒ರ-ಸ್ಸಂ॑ವಁಥ್ಸ॒ರ-ಸ್ವ॑ದಿತಮೇ॒ವ ಪ್ರತಿ॑ ಗೃಹ್ಣಾತಿ॒ ನಾತ್ಮನೋ॒ ಮಾತ್ರಾ॑ಮಾಪ್ನೋತಿ ವೈಶ್ವಾನ॒ರ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ಥ್ಸ॒ನಿ-ಮೇ॒ಷ್ಯನ್-ಥ್ಸಂ॑ವಁಥ್ಸ॒ರೋ ವಾ ಅ॒ಗ್ನಿ-ರ್ವೈ᳚ಶ್ವಾನ॒ರೋ ಯ॒ದಾ ಖಲು॒ ವೈ ಸಂ॑ವಁಥ್ಸ॒ರ-ಞ್ಜ॒ನತಾ॑ಯಾ॒-ಞ್ಚರ॒ತ್ಯಥ॒ ಸ ಧ॑ನಾ॒ರ್ಘೋ ಭ॑ವತಿ॒ಯ-ದ್ವೈ᳚ಶ್ವಾನ॒ರ-ನ್ದ್ವಾದ॑ಶಕಪಾಲ-ನ್ನಿ॒ರ್ವಪ॑ತಿ ಸಂವಁಥ್ಸ॒ರ-ಸಾ॑ತಾಮೇ॒ವ ಸ॒ನಿಮ॒ಭಿ ಪ್ರಚ್ಯ॑ವತೇ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವನ್ತಿ॒ ಯೋ ವೈ ಸಂ॑ವಁಥ್ಸ॒ರಂ- [ವೈ ಸಂ॑ವಁಥ್ಸ॒ರಮ್, ಪ್ರ॒ಯುಜ್ಯ॒ ನ] ॥ 33 ॥
-ಪ್ರ॒ಯುಜ್ಯ॒ ನ ವಿ॑ಮು॒ಞ್ಚತ್ಯ॑ಪ್ರತಿಷ್ಠಾ॒ನೋ ವೈ ಸ ಭ॑ವತ್ಯೇ॒ತ-ಮೇ॒ವ ವೈ᳚ಶ್ವಾನ॒ರ-ಮ್ಪುನ॑ರಾ॒ಗತ್ಯ॒ ನಿರ್ವ॑ಪೇ॒ದ್ಯ-ಮೇ॒ವ ಪ್ರ॑ಯು॒ಙ್ಕ್ತೇ ತ-ಮ್ಭಾ॑ಗ॒ಧೇಯೇ॑ನ॒ ವಿ ಮು॑ಞ್ಚತಿ॒ ಪ್ರತಿ॑ಷ್ಠಿತ್ಯೈ॒ ಯಯಾ॒ ರಜ್ವೋ᳚ತ್ತ॒ಮಾ-ಙ್ಗಾಮಾ॒ಜೇ-ತ್ತಾ-ಮ್ಭ್ರಾತೃ॑ವ್ಯಾಯ॒ ಪ್ರ ಹಿ॑ಣುಯಾ॒-ನ್ನಿರ್-ಋ॑ತಿ-ಮೇ॒ವಾಸ್ಮೈ॒ ಪ್ರ ಹಿ॑ಣೋತಿ ॥ 34 ॥
(ಮೃ॒ಜಾ॒ತೇ॒ - ನಿ॒ರ್ವ॒ರು॒ಣಂ - ಁವ॑ಪೇದುಭ॒ಯಾದ॒--ದ್ಯೋ ವೈ ಸಂ॑ವಁಥ್ಸ॒ರಗ್ಂ - ಷಟ್ತ್ರಿಗ್ಂ॑ಶಚ್ಚ) (ಅ. 6)
ಐ॒ನ್ದ್ರ-ಞ್ಚ॒ರು-ನ್ನಿರ್ವ॑ಪೇ-ತ್ಪ॒ಶುಕಾ॑ಮ ಐ॒ನ್ದ್ರಾ ವೈ ಪ॒ಶವ॒ ಇನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಪ॒ಶೂ-ನ್ಪ್ರಯ॑ಚ್ಛತಿ ಪಶು॒ಮಾ-ನೇ॒ವ ಭ॑ವತಿ ಚ॒ರುರ್ಭ॑ವತಿ॒ ಸ್ವಾದೇ॒ವಾಸ್ಮೈ॒ ಯೋನೇಃ᳚ ಪ॒ಶೂ-ನ್ಪ್ರಜ॑ನಯ॒ತೀನ್ದ್ರಾ॑ಯೇನ್ದ್ರಿ॒ಯಾವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ತ್ಪ॒ಶುಕಾ॑ಮ ಇನ್ದ್ರಿ॒ಯಂ-ವೈಁ ಪ॒ಶವ॒ ಇನ್ದ್ರ॑-ಮೇ॒ವೇನ್ದ್ರಿ॒ಯಾವ॑ನ್ತ॒ಗ್ಗ್॒ ಸ್ವೇನ ॑ಭಾಗ॒ಧೇಯೇ॒ನೋಪ॑ ಧಾವತಿ॒ ಸ [ಧಾವತಿ॒ ಸಃ, ಏ॒ವಾ-ಽಸ್ಮಾ॑] ॥ 35 ॥
ಏ॒ವಾ-ಽಸ್ಮಾ॑ ಇನ್ದ್ರಿ॒ಯ-ಮ್ಪ॒ಶೂ-ನ್ಪ್ರಯ॑ಚ್ಛತಿ ಪಶು॒ಮಾನೇ॒ವ ಭ॑ವ॒ತೀನ್ದ್ರಾ॑ಯ-ಘ॒ರ್ಮವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ಬ್ರಹ್ಮವರ್ಚ॒ಸಕಾ॑ಮೋ ಬ್ರಹ್ಮವರ್ಚ॒ಸಂ-ವೈಁ ಘ॒ರ್ಮ ಇನ್ದ್ರ॑ಮೇ॒ವ ಘ॒ರ್ಮವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ದ॑ಧಾತಿ ಬ್ರಹ್ಮವರ್ಚ॒ಸ್ಯೇ॑ವ ಭ॑ವ॒ತೀನ್ದ್ರಾ॑ಯಾ॒-ಽರ್ಕವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದನ್ನ॑ಕಾಮೋ॒-ಽರ್ಕೋ ವೈ ದೇ॒ವಾನಾ॒-ಮನ್ನ॒-ಮಿನ್ದ್ರ॑-ಮೇ॒ವಾ-ಽರ್ಕವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋ- [ಸ್ವೇನ॑ ಭಾಗ॒ಧೇಯೇ॑ನ, ಉಪ॑ ಧಾವತಿ॒ ಸ] ॥ 36॥
-ಪ॑ ಧಾವತಿ॒ ಸ ಏ॒ವಾಸ್ಮಾ॒ ಅನ್ನ॒-ಮ್ಪ್ರಯ॑ಚ್ಛತ್ಯನ್ನಾ॒ದ ಏ॒ವ ಭ॑ವ॒ತೀನ್ದ್ರಾ॑ಯ ಘ॒ರ್ಮವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಿನ್ದ್ರಾ॑ಯೇ-ನ್ದ್ರಿ॒ಯಾವ॑ತ॒ ಇನ್ದ್ರಾ॑ಯಾ॒-ಽರ್ಕವ॑ತೇ॒ ಭೂತಿ॑ಕಾಮೋ॒ ಯದಿನ್ದ್ರಾ॑ಯ ಘ॒ರ್ಮವ॑ತೇ ನಿ॒ರ್ವಪ॑ತಿ॒ ಶಿರ॑ ಏ॒ವಾಸ್ಯ॒ ತೇನ॑ ಕರೋತಿ॒ ಯದಿನ್ದ್ರಾ॑ಯೇನ್ದ್ರಿ॒ಯಾವ॑ತ ಆ॒ತ್ಮಾನ॑-ಮೇ॒ವಾಸ್ಯ॒ ತೇನ॑ ಕರೋತಿ॒-ಯ-ದಿನ್ದ್ರಾ॑ಯಾ॒-ಽರ್ಕವ॑ತೇ ಭೂ॒ತ ಏ॒ವಾನ್ನಾದ್ಯೇ॒ ಪ್ರತಿ॑-ತಿಷ್ಠತಿ॒ ಭವ॑ತ್ಯೇ॒ವೇನ್ದ್ರಾ॑ಯಾ- [ಭವ॑ತ್ಯೇ॒ವೇನ್ದ್ರಾ॑ಯಾ, ಅ॒ಗ್ಂ॒ ಹೋ॒ಮುಚೇ॑] ॥ 37 ॥
-ಽಗ್ಂ ಹೋ॒ಮುಚೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಃ ಪಾ॒ಪ್ಮನಾ॑ ಗೃಹೀ॒ತ-ಸ್ಸ್ಯಾ-ತ್ಪಾ॒ಪ್ಮಾ ವಾ ಅಗ್ಂಹ॒ ಇನ್ದ್ರ॑ಮೇ॒ವಾ-ಽಗ್ಂ ಹೋ॒ಮುಚ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ಮ್ಪಾ॒ಪ್ಮನೋ-ಽಗ್ಂಹ॑ಸೋ ಮುಞ್ಚ॒ತೀನ್ದ್ರಾ॑ಯ ವೈಮೃ॒ಧಾಯ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯ-ಮ್ಮೃಧೋ॒-ಽಭಿ ಪ್ರ॒ವೇಪೇ॑ರನ್-ರಾ॒ಷ್ಟ್ರಾಣಿ॑ ವಾ॒-ಽಭಿ ಸ॑ಮಿ॒ಯು-ರಿನ್ದ್ರ॑-ಮೇ॒ವ ವೈ॑ಮೃ॒ಧಗ್ಗ್ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಾ॒ನ್ಮೃಧೋ- [ಏ॒ವಾ-ಽಸ್ಮಾ॒ನ್ಮೃಧಃ॑, ಅಪ॑ ಹ॒ನ್ತೀನ್ದ್ರಾ॑ಯ] ॥ 38 ॥
-ಽಪ॑ ಹ॒ನ್ತೀನ್ದ್ರಾ॑ಯ ತ್ರಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ಬ॒ದ್ಧೋ ವಾ॒ ಪರಿ॑ಯತ್ತೋ॒ ವೇನ್ದ್ರ॑ಮೇ॒ವ ತ್ರಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ನ್ತ್ರಾಯತ॒ ಇನ್ದ್ರಾ॑ಯಾ-ಽರ್ಕಾಶ್ವಮೇ॒ಧವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯ-ಮ್ಮ॑ಹಾಯ॒ಜ್ಞೋ ನೋಪ॒ನಮೇ॑ದೇ॒ತೇ ವೈ ಮ॑ಹಾಯ॒ಜ್ಞಸ್ಯಾ-ಽನ್ತ್ಯೇ॑ ತ॒ನೂ ಯ-ದ॑ರ್ಕಾಶ್ವಮೇ॒ಧಾ-ವಿನ್ದ್ರ॑-ಮೇ॒ವಾ-ಽರ್ಕಾ᳚ಶ್ವಮೇ॒ಧ- ವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಾ॑ ಅನ್ತ॒ತೋ ಮ॑ಹಾಯ॒ಜ್ಞ-ಞ್ಚ್ಯಾ॑ವಯ॒ತ್ಯುಪೈ॑ನ-ಮ್ಮಹಾಯ॒ಜ್ಞೋ ನ॑ಮತಿ ॥ 39 ॥
(ಇ॒ನ್ದ್ರಿ॒ಯಾವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೋ᳚ - ಽರ್ಕವ॑ನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॑ನೈ॒ - ವೇನ್ದ್ರಾ॑ಯಾ - ಸ್ಮಾ॒-ನ್ಮೃಧೋ᳚ - ಽಸ್ಮೈ - ಸ॒ಪ್ತ ಚ॑ ) (ಅ. 7)
ಇನ್ದ್ರಾ॒ಯಾ-ಽನ್ವೃ॑ಜವೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದ್ಗ್ರಾಮ॑ಕಾಮ॒ ಇನ್ದ್ರ॑-ಮೇ॒ವಾ-ಽನ್ವೃ॑ಜು॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॑ ಸಜಾ॒ತಾ-ನನು॑ಕಾನ್ ಕರೋತಿ ಗ್ರಾ॒ಮ್ಯೇ॑ವ ಭ॑ವತೀನ್ದ್ರಾ॒ಣ್ಯೈ ಚ॒ರು-ನ್ನಿರ್ವ॑ಪೇ॒ದ್ಯಸ್ಯ॒ ಸೇನಾ-ಽಸಗ್ಂ॑ಶಿತೇವ॒ ಸ್ಯಾ-ದಿ॑ನ್ದ್ರಾ॒ಣೀ ವೈ ಸೇನಾ॑ಯೈ ದೇ॒ವತೇ᳚ನ್ದ್ರಾ॒ಣೀ-ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸೈವಾಸ್ಯ॒ ಸೇನಾ॒ಗ್ಂ॒ ಸಗ್ಗ್ ಶ್ಯ॑ತಿ॒ ಬಲ್ಬ॑ಜಾ॒ನಪೀ॒- [ಬಲ್ಬ॑ಜಾ॒ನಪಿ॑, ಇ॒ದ್ಧ್ಮೇ ಸ-ನ್ನ॑ಹ್ಯೇ॒ದ್ಗೌ-] ॥ 40 ॥
-ದ್ಧ್ಮೇ ಸ-ನ್ನ॑ಹ್ಯೇ॒ದ್ಗೌ-ರ್ಯತ್ರಾ-ಽಧಿ॑ಷ್ಕನ್ನಾ॒-ನ್ಯಮೇ॑ಹ॒-ತ್ತತೋ॒ ಬಲ್ಬ॑ಜಾ॒ ಉದ॑ತಿಷ್ಠ॒-ನ್ಗವಾ॑-ಮೇ॒ವೈನ॑-ನ್ನ್ಯಾ॒ಯ-ಮ॑ಪಿ॒ನೀಯ॒ ಗಾ ವೇ॑ದಯ॒ತೀನ್ದ್ರಾ॑ಯ ಮನ್ಯು॒ಮತೇ॒ ಮನ॑ಸ್ವತೇ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ಥ್ಸಙ್ಗ್ರಾ॒ಮೇ ಸಂಯಁ॑ತ್ತ ಇನ್ದ್ರಿ॒ಯೇಣ॒ ವೈ ಮ॒ನ್ಯುನಾ॒ ಮನ॑ಸಾ ಸಙ್ಗ್ರಾ॒ಮ-ಞ್ಜ॑ಯ॒ತೀನ್ದ್ರ॑-ಮೇ॒ವ ಮ॑ನ್ಯು॒ಮನ್ತ॒-ಮ್ಮನ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑ನ್ನಿನ್ದ್ರಿ॒ಯ-ಮ್ಮ॒ನ್ಯು-ಮ್ಮನೋ॑ ದಧಾತಿ॒ ಜಯ॑ತಿ॒ ತಗ್ಂ [ಜಯ॑ತಿ॒ ತಮ್, ಸ॒ಗ್ರಾ॒ಮ-ಮೇ॒ತಾ-ಮೇ॒ವ] ॥ 41 ॥
ಸ॑ಗ್ರಾ॒ಮ-ಮೇ॒ತಾ-ಮೇ॒ವ ನಿರ್ವ॑ಪೇ॒ದ್ಯೋ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪ ಇವ॒ ಸ್ಯಾದೇ॒ತಾನಿ॒ ಹಿ ವಾ ಏ॒ತಸ್ಮಾ॒ ದಪ॑ಕ್ರಾನ್ತಾ॒ನ್ಯಥೈ॒ಷ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪ॒ ಇನ್ದ್ರ॑ಮೇ॒ವ ಮ॑ನ್ಯು॒ಮನ್ತ॒-ಮ್ಮನ॑ಸ್ವನ್ತ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮಿ॑-ನ್ನಿನ್ದ್ರಿ॒ಯ-ಮ್ಮ॒ನ್ಯು-ಮ್ಮನೋ॑ ದಧಾತಿ॒ ನ ಹ॒ತಮ॑ನಾ-ಸ್ಸ್ವ॒ಯ-ಮ್ಪಾ॑ಪೋ ಭವ॒ತೀನ್ದ್ರಾ॑ಯ ದಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ದಾನ॑ಕಾಮಾ ಮೇ ಪ್ರ॒ಜಾ-ಸ್ಸ್ಯು॒- [ದಾನ॑ಕಾಮಾ ಮೇ ಪ್ರ॒ಜಾ-ಸ್ಸ್ಯುಃ॑, ಇತೀನ್ದ್ರ॑-ಮೇ॒ವ] ॥ 42 ॥
-ರಿತೀನ್ದ್ರ॑-ಮೇ॒ವ ದಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾಸ್ಮೈ॒ ದಾನ॑ಕಾಮಾಃ ಪ್ರ॒ಜಾಃ ಕ॑ರೋತಿ॒ ದಾನ॑ಕಾಮಾ ಅಸ್ಮೈ ಪ್ರ॒ಜಾ ಭ॑ವ॒ನ್ತೀನ್ದ್ರಾ॑ಯ ಪ್ರದಾ॒ತ್ರೇ ಪು॑ರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದ್ಯಸ್ಮೈ॒ ಪ್ರತ್ತ॑ಮಿವ॒ ಸನ್ನ ಪ್ರ॑ದೀ॒ಯೇತೇನ್ದ್ರ॑-ಮೇ॒ವ ಪ್ರ॑ದಾ॒ತಾರ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑-ಧಾವತಿ॒ ಸ ಏ॒ವಾಸ್ಮೈ॒ ಪ್ರ-ದಾ॑ಪಯ॒ತೀನ್ದ್ರಾ॑ಯ ಸು॒ತ್ರಾಮ್ಣೇ॑ ಪುರೋ॒ಡಾಶ॒-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಪ॑ರುದ್ಧೋ ವಾ- [-ದಪ॑ರುದ್ಧೋ ವಾ, ಅ॒ಪ॒ರು॒ದ್ಧಯಮಾ॑ನೋ॒] ॥ 43 ॥
-ಽಪರು॒ದ್ಧಯಮಾ॑ನೋ॒ ವೇನ್ದ್ರ॑ಮೇ॒ವ ಸು॒ತ್ರಾಮಾ॑ಣ॒ಗ್ಗ್॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವೈನ॑-ನ್ತ್ರಾಯತೇ ಽನಪರು॒ದ್ಧ್ಯೋ ಭ॑ವ॒ತೀನ್ದ್ರೋ॒ ವೈ ಸ॒ದೃ-ನ್ದೇ॒ವತಾ॑ಭಿರಾಸೀ॒-ಥ್ಸ ನ ವ್ಯಾ॒ವೃತ॑ಮಗಚ್ಛ॒-ಥ್ಸ ಪ್ರ॒ಜಾಪ॑ತಿ॒-ಮುಪಾ॑ಧಾವ॒-ತ್ತಸ್ಮಾ॑ ಏ॒ತ-ಮೈ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ॑ವಪ॒-ತ್ತೇನೈ॒-ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ಮ॑ದಧಾ॒-ಚ್ಛಕ್ವ॑ರೀ ಯಾಜ್ಯಾನುವಾ॒ಕ್ಯೇ॑ ಅಕರೋ॒-ದ್ವಜ್ರೋ॒ ವೈ ಶಕ್ವ॑ರೀ॒ ಸ ಏ॑ನಂ॒-ವಁಜ್ರೋ॒ ಭೂತ್ಯಾ॑ ಐನ್ಧ॒- [ಭೂತ್ಯಾ॑ ಐನ್ಧ, ಸೋ॑-ಽಭವ॒-ಥ್ಸೋ॑-ಽಬಿಭೇ-] ॥ 44 ॥
-ಸೋ॑-ಽಭವ॒ಥ್ಸೋ॑-ಽಬಿಭೇ-ದ್ಭೂ॒ತಃ ಪ್ರ ಮಾ॑ ಧಕ್ಷ್ಯ॒ತೀತಿ॒ ಸ ಪ್ರ॒ಜಾಪ॑ತಿ॒-ಮ್ಪುನ॒ರುಪಾ॑-ಽಧಾವ॒-ಥ್ಸ ಪ್ರ॒ಜಾಪ॑ತಿ॒-ಶ್ಶಕ್ವ॑ರ್ಯಾ॒ ಅಧಿ॑ ರೇ॒ವತೀ॒-ನ್ನಿರ॑ಮಿಮೀತ॒ ಶಾನ್ತ್ಯಾ॒ ಅಪ್ರ॑ದಾಹಾಯ॒ ಯೋ-ಽಲಗ್ಗ್॑ ಶ್ರಿ॒ಯೈ ಸನ್-ಥ್ಸ॒ದೃಙ್ಖ್ಸ॑ಮಾ॒ನೈ-ಸ್ಸ್ಯಾ-ತ್ತಸ್ಮಾ॑ ಏ॒ತ-ಮೈ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ದಿನ್ದ್ರ॑ಮೇ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ಸ ಏ॒ವಾ-ಽಸ್ಮಿ॑-ನ್ನಿನ್ದ್ರಿ॒ಯ-ನ್ದ॑ಧಾತಿ ರೇ॒ವತೀ॑ ಪುರೋನುವಾ॒ಕ್ಯಾ॑ ಭವತಿ॒ ಶಾನ್ತ್ಯಾ॒ ಅಪ್ರ॑ದಾಹಾಯ॒ ಶಕ್ವ॑ರೀ ಯಾ॒ಜ್ಯಾ॑ ವಜ್ರೋ॒ ವೈ ಶಕ್ವ॑ರೀ॒ಸ ಏ॑ನಂ॒-ವಁಜ್ರೋ॒ ಭೂತ್ಯಾ॑ ಇನ್ಧೇ॒ ಭವ॑ತ್ಯೇ॒ವ ॥ 45 ॥
(ಅಪಿ॒ - ತಗ್ಗ್ - ಸ್ಯು॑ - ರ್ವೈ - ನ್ಧ - ಭವತಿ॒ - ಚತು॑ರ್ದಶ ಚ ) (ಅ. 8)
ಆ॒ಗ್ನಾ॒-ವೈ॒ಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದಭಿ॒ಚರ॒ನ್-ಥ್ಸರ॑ಸ್ವ॒ತ್ಯಾಜ್ಯ॑ ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ ಯಶ್ಚ॒ರುರ್ಯದಾ᳚ಗ್ನಾ-ವೈಷ್ಣ॒ವ ಏಕಾ॑ದಶಕಪಾಲೋ॒ ಭವ॑ತ್ಯ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑ರ್ಯ॒ಜ್ಞೋ ದೇ॒ವತಾ॑ಭಿ-ಶ್ಚೈ॒ವೈನಂ॑-ಯಁ॒ಜ್ಞೇನ॑ ಚಾ॒ಭಿ ಚ॑ರತಿ॒-ಸರ॑ಸ್ವ॒ತ್ಯಾಜ್ಯ॑ಭಾಗಾ ಭವತಿ॒ ವಾಗ್ವೈ ಸರ॑ಸ್ವತೀ ವಾ॒ಚೈವೈನ॑-ಮ॒ಭಿ ಚ॑ರತಿ ಬಾರ್ಹಸ್ಪ॒ತ್ಯ-ಶ್ಚ॒ರು ರ್ಭ॑ವತಿ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒ ರ್ಬ್ರಹ್ಮ॑ಣೈ॒ವೈನ॑-ಮ॒ಭಿ ಚ॑ರತಿ॒ [-ಮ॒ಭಿ ಚ॑ರತಿ, ಪ್ರತಿ॒ ವೈ] ॥ 46 ॥
ಪ್ರತಿ॒ ವೈ ಪ॒ರಸ್ತಾ॑-ದಭಿ॒ಚರ॑ನ್ತ-ಮ॒ಭಿ ಚ॑ರನ್ತಿ॒ ದ್ವೇದ್ವೇ॑ ಪುರೋ-ಽನುವಾ॒ಕ್ಯೇ॑ ಕುರ್ಯಾ॒ದತಿ॒ ಪ್ರಯು॑ಕ್ತ್ಯಾ ಏ॒ತಯೈ॒ವ ಯ॑ಜೇತಾಭಿ ಚ॒ರ್ಯಮಾ॑ಣೋ ದೇ॒ವತಾ॑ಭಿ-ರೇ॒ವ ದೇ॒ವತಾಃ᳚ ಪ್ರತಿ॒ಚರ॑ತಿ ಯ॒ಜ್ಞೇನ॑ ಯ॒ಜ್ಞಂ-ವಾಁ॒ಚಾ ವಾಚ॒-ಮ್ಬ್ರಹ್ಮ॑ಣಾ॒ ಬ್ರಹ್ಮ॒ ಸ ದೇ॒ವತಾ᳚ಶ್ಚೈ॒ವ ಯ॒ಜ್ಞ-ಞ್ಚ॑ ಮದ್ಧ್ಯ॒ತೋ ವ್ಯವ॑ಸರ್ಪತಿ॒ ತಸ್ಯ॒ ನ ಕುತ॑-ಶ್ಚ॒ನೋಪಾ᳚ವ್ಯಾ॒ಧೋ ಭ॑ವತಿ॒ ನೈನ॑-ಮಭಿ॒ಚರನ್᳚-ಥ್ಸ್ತೃಣುತ ಆಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒ದ್ಯಂ-ಯಁ॒ಜ್ಞೋ ನೋ- [-ಯ॒ಜ್ಞೋ ನ, ಉ॒ಪ॒ನಮೇ॑ದ॒ಗ್ನಿ-ಸ್ಸರ್ವಾ॑] ॥ 47 ॥
-ಪ॒ನಮೇ॑ದ॒ಗ್ನಿ-ಸ್ಸರ್ವಾ॑ ದೇ॒ವತಾ॒ ವಿಷ್ಣು॑-ರ್ಯ॒ಜ್ಞೋ᳚-ಽಗ್ನಿ-ಞ್ಚೈ॒ವ ವಿಷ್ಣು॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮೈ॑ ಯ॒ಜ್ಞ-ಮ್ಪ್ರಯ॑ಚ್ಛತ॒ ಉಪೈ॑ನಂ-ಯಁ॒ಜ್ಞೋ ನ॑ಮತ್ಯಾಗ್ನಾ- ವೈಷ್ಣ॒ವ-ಙ್ಘೃ॒ತೇ ಚ॒ರು-ನ್ನಿರ್ವ॑ಪೇ॒ಚ್ಚಕ್ಷು॑ಷ್ಕಾಮೋ॒-ಽಗ್ನೇರ್ವೈ ಚಕ್ಷು॑ಷಾ ಮನು॒ಷ್ಯಾ॑ ವಿ ಪ॑ಶ್ಯನ್ತಿ ಯ॒ಜ್ಞಸ್ಯ॑ ದೇ॒ವಾ ಅ॒ಗ್ನಿ-ಞ್ಚೈ॒ವ ವಿಷ್ಣು॑-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾ- [ತಾವೇ॒ವ, ಅ॒ಸ್ಮಿ॒ನ್ ಚಕ್ಷು॑ರ್ಧತ್ತ॒-] ॥ 48 ॥
-ಽಸ್ಮಿ॒ನ್ ಚಕ್ಷು॑-ರ್ಧತ್ತ॒-ಶ್ಚಕ್ಷು॑ಷ್ಮಾ-ನೇ॒ವ ಭ॑ವತಿ ಧೇ॒ನ್ವೈ ವಾ ಏ॒ತ-ದ್ರೇತೋ॒ ಯದಾಜ್ಯ॑-ಮನ॒ಡುಹ॑-ಸ್ತಣ್ಡು॒ಲಾ ಮಿ॑ಥು॒ನಾ-ದೇ॒ವಾಸ್ಮೈ॒ ಚಕ್ಷುಃ॒ ಪ್ರಜ॑ನಯತಿ ಘೃ॒ತೇ ಭ॑ವತಿ॒ ತೇಜೋ॒ ವೈ ಘೃ॒ತ-ನ್ತೇಜ॒ಶ್ಚಕ್ಷು॒-ಸ್ತೇಜ॑ಸೈ॒ವಾಸ್ಮೈ॒ ತೇಜ॒-ಶ್ಚಕ್ಷು॒ರವ॑ ರುನ್ಧ ಇನ್ದ್ರಿ॒ಯಂ-ವೈಁ ವೀ॒ರ್ಯಂ॑-ವೃಁಙ್ಕ್ತೇ॒ ಭ್ರಾತೃ॑ವ್ಯೋ॒ ಯಜ॑ಮಾ॒ನೋ-ಽಯ॑ಜಮಾನಸ್ಯಾ-ಧ್ವ॒ರಕ॑ಲ್ಪಾ॒-ಮ್ಪ್ರತಿ॒ ನಿರ್ವ॑ಪೇ॒-ದ್ಭ್ರಾತೃ॑ವ್ಯೇ॒ ಯಜ॑ಮಾನೇ॒ ನಾ-ಽಸ್ಯೇ᳚ನ್ದ್ರಿ॒ಯಂ- [ನಾ-ಽಸ್ಯೇ᳚ನ್ದ್ರಿ॒ಯಮ್, ವೀ॒ರ್ಯಂ॑ ಁವೃಙ್ಕ್ತೇ] ॥ 49 ॥
-ಁವೀ॒ರ್ಯಂ॑ ಁವೃಙ್ಕ್ತೇ ಪು॒ರಾವಾ॒ಚಃ ಪ್ರವ॑ದಿತೋ॒-ರ್ನಿರ್ವ॑ಪೇ॒-ದ್ಯಾವ॑ತ್ಯೇ॒ವ ವಾ-ಕ್ತಾಮಪ್ರೋ॑ದಿತಾ॒-ಮ್ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ತಾಮ॑ಸ್ಯ॒ ವಾಚ॑-ಮ್ಪ್ರ॒ವದ॑ನ್ತೀ-ಮ॒ನ್ಯಾ ವಾಚೋ-ಽನು॒ ಪ್ರವ॑ದನ್ತಿ॒ ತಾ ಇ॑ನ್ದ್ರಿ॒ಯಂ-ವೀಁ॒ರ್ಯಂ॑-ಯಁಜ॑ಮಾನೇ ದಧತ್ಯಾಗ್ನಾ ವೈಷ್ಣ॒ವ-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ-ತ್ಪ್ರಾತ-ಸ್ಸವನ॒ಸ್ಯಾ॑-ಽಽ ಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯಶ್ಚ॒ರು- ರ್ಯದ॒ಷ್ಟಾಕ॑ಪಾಲೋ॒ ಭವ॑ತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರ-ಮ್ಪ್ರಾ॑ತ-ಸ್ಸವ॒ನ-ಮ್ಪ್ರಾ॑ತ-ಸ್ಸವ॒ನಮೇ॒ವ ತೇನಾ᳚-ಽಽಪ್ನೋ- [ತೇನಾ᳚-ಽಽಪ್ನೋತಿ, ಆ॒ಗ್ನಾ॒ವೈ॒ಷ್ಣ॒ವ-] ॥ 50 ॥
-ತ್ಯಾಗ್ನಾವೈಷ್ಣ॒ವ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ॒-ನ್ಮಾದ್ಧ್ಯ॑ನ್ದಿನಸ್ಯ॒ ಸವ॑ನಸ್ಯಾ-ಽಽ ಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯ-ಶ್ಚ॒ರು ರ್ಯದೇಕಾ॑ದಶಕಪಾಲೋ॒ ಭವ॒ತ್ಯೇಕಾ॑ದಶಾಕ್ಷರಾ ತ್ರಿ॒ಷ್ಟು-ಪ್ತ್ರೈಷ್ಟು॑ಭ॒-ಮ್ಮಾದ್ಧ್ಯ॑ನ್ದಿನ॒ಗ್ಂ॒ ಸವ॑ನ॒-ಮ್ಮಾದ್ಧ್ಯ॑ದಿನ್ನಮೇ॒ವ ಸವ॑ನ॒-ನ್ತೇನಾ᳚-ಽಽಪ್ನೋತ್ಯಾಗ್ನಾವೈಷ್ಣ॒ವ-ನ್ದ್ವಾದ॑ಶಕಪಾಲ॒-ನ್ನಿರ್ವ॑ಪೇ-ತ್ತೃತೀಯಸವ॒ನಸ್ಯಾ॑-ಽಽಕಾ॒ಲೇ ಸರ॑ಸ್ವ॒ತ್ಯಾಜ್ಯ॑ಭಾಗಾ॒ ಸ್ಯಾ-ದ್ಬಾ॑ರ್ಹಸ್ಪ॒ತ್ಯ-ಶ್ಚ॒ರುರ್ಯ-ದ್ದ್ವಾದ॑ಶಕಪಾಲೋ॒ ಭವ॑ತಿ॒ ದ್ವಾದ॑ಶಾಕ್ಷರಾ॒ ಜಗ॑ತೀ॒ ಜಾಗ॑ತ-ನ್ತೃತೀಯಸವ॒ನ-ನ್ತೃ॑ತೀಯ ಸವ॒ನಮೇ॒ವ ತೇನಾ᳚-ಽಽಪ್ನೋತಿ ದೇ॒ವತಾ॑ಭಿರೇ॒ವ ದೇ॒ವತಾಃ᳚ [ದೇ॒ವತಾಃ᳚, ಪ್ರ॒ತಿ॒ಚರ॑ತಿ] ॥ 51 ॥
ಪ್ರತಿ॒ಚರ॑ತಿ ಯ॒ಜ್ಞೇನ॑ ಯ॒ಜ್ಞಂ-ವಾಁ॒ಚಾ ವಾಚ॒-ಮ್ಬ್ರಹ್ಮ॑ಣಾ॒ ಬ್ರಹ್ಮ॑ ಕ॒ಪಾಲೈ॑ರೇ॒ವ ಛನ್ದಾಗ್॑ಸ್ಯಾ॒ಪ್ನೋತಿ॑ ಪುರೋ॒ಡಾಶೈ॒-ಸ್ಸವ॑ನಾನಿ ಮೈತ್ರಾವರು॒ಣ-ಮೇಕ॑ಕಪಾಲ॒-ನ್ನಿರ್ವ॑ಪೇ-ದ್ವ॒ಶಾಯೈ॑ ಕಾ॒ಲೇ ಯೈವಾಸೌ ಭ್ರಾತೃ॑ವ್ಯಸ್ಯ ವ॒ಶಾ-ಽನೂ॑ಬ॒ನ್ಧ್ಯಾ॑ ಸೋ ಏ॒ವೈಷೈತಸ್ಯೈಕ॑ಕಪಾಲೋ ಭವತಿ॒ ನ ಹಿ ಕ॒ಪಾಲೈಃ᳚ ಪ॒ಶು-ಮರ್ಹ॒ತ್ಯಾಪ್ತು᳚ಮ್ ॥ 52 ॥
(ಬ್ರಹ್ಮ॑ಣೈ॒ವೈನ॑ಮ॒ಭಿ ಚ॑ರತಿ - ಯ॒ಜ್ಞೋ ನ - ತಾವೇ॒ವಾ - ಽಸ್ಯೇ᳚ನ್ದ್ರಿ॒ಯ - ಮಾ᳚ಪ್ನೋತಿ -ದೇ॒ವತಾಃ᳚ - ಸ॒ಪ್ತತ್ರಿಗ್ಂ॑ಶಚ್ಚ ) (ಅ. 9)
ಅ॒ಸಾವಾ॑ದಿ॒ತ್ಯೋ ನ ವ್ಯ॑ರೋಚತ॒ ತಸ್ಮೈ॑ ದೇ॒ವಾಃ ಪ್ರಾಯ॑ಶ್ಚಿತ್ತಿ-ಮೈಚ್ಛ॒-ನ್ತಸ್ಮಾ॑ ಏ॒ತಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ॑ವಪ॒-ನ್ತೇನೈ॒ವಾಸ್ಮಿ॒-ನ್ರುಚ॑ಮದಧು॒ರ್ಯೋ ಬ್ರ॑ಹ್ಮವರ್ಚ॒ಸಕಾ॑ಮ॒-ಸ್ಸ್ಯಾ-ತ್ತಸ್ಮಾ॑ ಏ॒ತಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒-ಥ್ಸೋಮ॑-ಞ್ಚೈ॒ವ ರು॒ದ್ರ-ಞ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತಾವೇ॒ವಾಸ್ಮಿ॑-ನ್ಬ್ರಹ್ಮವರ್ಚ॒ಸ-ನ್ಧ॑ತ್ತೋ ಬ್ರಹ್ಮವರ್ಚ॒ಸ್ಯೇ॑ವ ಭ॑ವತಿ ತಿಷ್ಯಾಪೂರ್ಣಮಾ॒ಸೇ ನಿರ್ವ॑ಪೇದ್ರು॒ದ್ರೋ [ನಿರ್ವ॑ಪೇದ್ರು॒ದ್ರಃ, ವೈ ತಿ॒ಷ್ಯಃ॑ ಸೋಮಃ॑] ॥ 53 ॥
ವೈ ತಿ॒ಷ್ಯಃ॑ ಸೋಮಃ॑ ಪೂ॒ರ್ಣಮಾ॑ಸ-ಸ್ಸಾ॒ಕ್ಷಾದೇ॒ವ ಬ್ರ॑ಹ್ಮವರ್ಚ॒ಸಮವ॑ ರುನ್ಧೇ॒ ಪರಿ॑ಶ್ರಿತೇ ಯಾಜಯತಿ ಬ್ರಹ್ಮವರ್ಚ॒ಸಸ್ಯ॒ ಪರಿ॑ಗೃಹೀತ್ಯೈ ಶ್ವೇ॒ತಾಯೈ᳚ ಶ್ವೇ॒ತವ॑ಥ್ಸಾಯೈ ದು॒ಗ್ಧ-ಮ್ಮ॑ಥಿ॒ತಮಾಜ್ಯ॑-ಮ್ಭವ॒ತ್ಯಾಜ್ಯ॒-ಮ್ಪ್ರೋಕ್ಷ॑ಣ॒ಮಾಜ್ಯೇ॑ನ ಮಾರ್ಜಯನ್ತೇ॒ ಯಾವ॑ದೇ॒ವ ಬ್ರ॑ಹ್ಮವರ್ಚ॒ಸ-ನ್ತ-ಥ್ಸರ್ವ॑-ಙ್ಕರೋ॒ತ್ಯತಿ॑ ಬ್ರಹ್ಮವರ್ಚ॒ಸ-ಙ್ಕ್ರಿ॑ಯತ॒ ಇತ್ಯಾ॑ಹುರೀಶ್ವ॒ರೋ ದು॒ಶ್ಚರ್ಮಾ॒ ಭವಿ॑ತೋ॒ರಿತಿ॑ ಮಾನ॒ವೀ ಋಚೌ॑ ಧಾ॒ಯ್ಯೇ॑ ಕುರ್ಯಾ॒-ದ್ಯದ್ವೈ ಕಿಞ್ಚ॒ ಮನು॒-ರವ॑ದ॒ತ್ತ-ದ್ಭೇ॑ಷ॒ಜಂ- [-ದ್ಭೇ॑ಷ॒ಜಮ್, ಭೇ॒ಷ॒ಜ-ಮೇ॒ವಾ-ಽಸ್ಮೈ॑] ॥ 54 ॥
-ಭೇ॑ಷ॒ಜ-ಮೇ॒ವಾ-ಽಸ್ಮೈ॑ ಕರೋತಿ॒ ಯದಿ॑ ಬಿಭೀ॒ಯಾ-ದ್ದು॒ಶ್ಚರ್ಮಾ॑ ಭವಿಷ್ಯಾ॒ಮೀತಿ॑ ಸೋಮಾಪೌ॒ಷ್ಣ-ಞ್ಚ॒ರು-ನ್ನಿರ್ವ॑ಪೇ-ಥ್ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷಃ ಪೌ॒ಷ್ಣಾಃ ಪ॒ಶವ॒-ಸ್ಸ್ವಯೈ॒ ವಾಸ್ಮೈ॑ ದೇ॒ವತ॑ಯಾ ಪ॒ಶುಭಿ॒-ಸ್ತ್ವಚ॑-ಙ್ಕರೋತಿ॒ ನ ದು॒ಶ್ಚರ್ಮಾ॑ ಭವತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ-ತ್ಪ್ರ॒ಜಾಕಾ॑ಮ॒-ಸ್ಸೋಮೋ॒ ವೈ ರೇ॑ತೋ॒ಧಾ ಅ॒ಗ್ನಿಃ ಪ್ರ॒ಜಾನಾ᳚-ಮ್ಪ್ರಜನಯಿ॒ತಾ ಸೋಮ॑ ಏ॒ವಾಸ್ಮೈ॒ ರೇತೋ॒ ದಧಾ᳚ತ್ಯ॒ಗ್ನಿಃ ಪ್ರ॒ಜಾ-ಮ್ಪ್ರಜ॑ನಯತಿ ವಿ॒ನ್ದತೇ᳚ - [ ] ॥ 55 ॥
ಪ್ರ॒ಜಾಗ್ಂ ಸೋ॑ಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ-ದಭಿ॒ಚರನ್᳚-ಥ್ಸೌ॒ಮ್ಯೋ ವೈ ದೇ॒ವತ॑ಯಾ॒ ಪುರು॑ಷ ಏ॒ಷ ರು॒ದ್ರೋ ಯದ॒ಗ್ನಿ-ಸ್ಸ್ವಾಯಾ॑ ಏ॒ವೈನ॑-ನ್ದೇ॒ವತಾ॑ಯೈ ನಿ॒ಷ್ಕ್ರೀಯ॑ ರು॒ದ್ರಾಯಾಪಿ॑ ದಧಾತಿ ತಾ॒ಜಗಾರ್ತಿ॒-ಮಾರ್ಚ್ಛ॑ತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒-ಜ್ಜ್ಯೋಗಾ॑ಮಯಾವೀ॒ ಸೋಮಂ॒-ವಾಁ ಏ॒ತಸ್ಯ॒ ರಸೋ॑ ಗಚ್ಛತ್ಯ॒ಗ್ನಿಗ್ಂ ಶರೀ॑ರಂ॒-ಯಁಸ್ಯ॒ ಜ್ಯೋಗಾ॒ಮಯ॑ತಿ॒ ಸೋಮಾ॑ದೇ॒ವಾಸ್ಯ॒ ರಸ॑-ನ್ನಿಷ್ಕ್ರೀ॒ಣಾತ್ಯ॒ಗ್ನೇ-ಶ್ಶರೀ॑ರಮು॒ತ ಯದೀ॒- [ಯದಿ॑, ಇ॒ತಾಸು॒ ರ್ಭವ॑ತಿ॒] ॥ 56 ॥
-ತಾಸು॒ ರ್ಭವ॑ತಿ॒ ಜೀವ॑ತ್ಯೇ॒ವ ಸೋ॑ಮಾರು॒ದ್ರಯೋ॒ರ್ವಾ ಏ॒ತ-ಙ್ಗ್ರ॑ಸಿ॒ತಗ್ಂ ಹೋತಾ॒ ನಿಷ್ಖಿ॑ದತಿ॒ ಸ ಈ᳚ಶ್ವ॒ರ ಆರ್ತಿ॒ಮಾರ್ತೋ॑-ರನ॒ಡ್ವಾನ್. ಹೋತ್ರಾ॒ ದೇಯೋ॒ ವಹ್ನಿ॒ರ್ವಾ ಅ॑ನ॒ಡ್ವಾನ್. ವಹ್ನಿ॒ರ್॒ಹೋತಾ॒ ವಹ್ನಿ॑ನೈ॒ವ ವಹ್ನಿ॑-ಮಾ॒ತ್ಮಾನಗ್ಗ್॑ ಸ್ಪೃಣೋತಿ ಸೋಮಾರೌ॒ದ್ರ-ಞ್ಚ॒ರು-ನ್ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಸ್ವೇ᳚-ಽಸ್ಮಾ ಆ॒ಯತ॑ನೇ॒ ಭ್ರಾತೃ॑ವ್ಯ-ಞ್ಜನಯೇಯ॒ಮಿತಿ॒ ವೇದಿ॑-ಮ್ಪರಿ॒ಗೃಹ್ಯಾ॒-ಽರ್ಧ-ಮು॑ದ್ಧ॒ನ್ಯಾ-ದ॒ರ್ಧ-ನ್ನಾರ್ಧ-ಮ್ಬ॒ರ್॒ಹಿಷಃ॑ ಸ್ತೃಣೀ॒ಯಾ-ದ॒ರ್ಧ-ನ್ನಾರ್ಧ-ಮಿ॒ದ್ಧ್ಮಸ್ಯಾ᳚-ಽಭ್ಯಾ-ದ॒ದ್ಧ್ಯಾ-ದದ್॒ರ್ಧ-ನ್ನ ಸ್ವ ಏ॒ವಾಸ್ಮಾ॑ ಆ॒ಯತ॑ನೇ॒ ಭ್ರಾತೃ॑ವ್ಯ-ಞ್ಜನಯತಿ ॥ 57 ॥
(ರು॒ದ್ರೋ - ಭೇ॑ಷ॒ಜಂ - ವಿ॒ನ್ದತೇ॒- ಯದಿ॑ - ಸ್ತೃಣೀ॒ಯಾದ॒ರ್ಧಂ - ದ್ವಾದ॑ಶ ಚ) (ಅ. 10)
ಐ॒ನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇನ್ಮಾರು॒ತಗ್ಂ ಸ॒ಪ್ತಕ॑ಪಾಲ॒-ಙ್ಗ್ರಾಮ॑ಕಾಮ॒ ಇನ್ದ್ರ॑-ಞ್ಚೈ॒ವ ಮ॒ರುತ॑ಶ್ಚ॒ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತ್ಯಾಹವ॒ನೀಯ॑ ಐ॒ನ್ದ್ರಮಧಿ॑ ಶ್ರಯತಿ॒ ಗಾರ್ಹ॑ಪತ್ಯೇ ಮಾರು॒ತ-ಮ್ಪಾ॑ಪವಸ್ಯ॒ಸಸ್ಯ॒ ವಿಧೃ॑ತ್ಯೈ ಸ॒ಪ್ತಕ॑ಪಾಲೋ ಮಾರು॒ತೋ ಭ॑ವತಿ ಸ॒ಪ್ತಗ॑ಣಾ॒ ವೈ ಮ॒ರುತೋ॑ಗಣ॒ಶ ಏ॒ವಾಸ್ಮೈ॑ ಸಜಾ॒ತಾನವ॑ ರುನ್ಧೇ-ಽನೂ॒ಚ್ಯಮಾ॑ನ॒ ಆ ಸಾ॑ದಯತಿ॒ ವಿಶ॑ಮೇ॒ವಾ- [ವಿಶ॑ಮೇ॒ವ, ಅ॒ಸ್ಮಾ॒ ಅನು॑ವರ್ತ್ಮಾನಂ-] ॥ 58 ॥
-ಽಸ್ಮಾ॒ ಅನು॑ವರ್ತ್ಮಾನ-ಙ್ಕರೋತ್ಯೇ॒ತಾಮೇ॒ವ ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ ಕ್ಷ॒ತ್ರಾಯ॑ ಚ ವಿ॒ಶೇ ಚ॑ ಸ॒ಮದ॑-ನ್ದದ್ಧ್ಯಾ॒-ಮಿತ್ಯೈ॒ನ್ದ್ರಸ್ಯಾ॑-ಽವ॒ದ್ಯ-ನ್ಬ್ರೂ॑ಯಾ॒-ದಿನ್ದ್ರಾ॒ಯಾ-ಽನು॑ ಬ್ರೂ॒ಹೀತ್ಯಾ॒ಶ್ರಾವ್ಯ॑ ಬ್ರೂಯಾ-ನ್ಮ॒ರುತೋ॑ ಯ॒ಜೇತಿ॑ ಮಾರು॒ತಸ್ಯಾ॑-ಽವ॒ದ್ಯ-ನ್ಬ್ರೂ॑ಯಾ-ನ್ಮ॒ರುದ್ಭ್ಯೋ-ಽನು॑ ಬ್ರೂ॒ಹೀತ್ಯಾ॒ಶ್ರಾವ್ಯ॑ ಬ್ರೂಯಾ॒ದಿನ್ದ್ರಂ॑-ಯಁ॒ಜೇತಿ॒ ಸ್ವ ಏ॒ವೈಭ್ಯೋ॑ ಭಾಗ॒ಧೇಯೇ॑ ಸ॒ಮದ॑-ನ್ದಧಾತಿ ವಿತೃಗ್ಂಹಾ॒ಣಾ-ಸ್ತಿ॑ಷ್ಠನ್ತ್ಯೇ॒ ತಾಮೇ॒ವ [ ] ॥ 59 ॥
ನಿರ್ವ॑ಪೇ॒ದ್ಯಃ ಕಾ॒ಮಯೇ॑ತ॒ ಕಲ್ಪೇ॑ರ॒ನ್ನಿತಿ॑ ಯಥಾದೇವ॒ತ-ಮ॑ವ॒ದಾಯ॑ ಯಥಾ ದೇವ॒ತಂ-ಯಁ॑ಜೇ-ದ್ಭಾಗ॒ಧೇಯೇ॑ನೈ॒ವೈನಾನ್॑ ಯಥಾಯ॒ಥ-ಙ್ಕ॑ಲ್ಪಯತಿ॒ ಕಲ್ಪ॑ನ್ತ ಏ॒ವೈನ್ದ್ರ-ಮೇಕಾ॑ದಶಕಪಾಲ॒-ನ್ನಿರ್ವ॑ಪೇ-ದ್ವೈಶ್ವದೇ॒ವ-ನ್ದ್ವಾದ॑ಶಕಪಾಲ॒-ಙ್ಗ್ರಾಮ॑ಕಾಮ॒ ಇನ್ದ್ರ॑-ಞ್ಚೈ॒ವ ವಿಶ್ವಾಗ್॑ಶ್ಚ ದೇ॒ವಾನ್-ಥ್ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತ್ಯೈ॒ನ್ದ್ರಸ್ಯಾ॑-ಽವ॒ದಾಯ॑ ವೈಶ್ವದೇ॒ವಸ್ಯಾವ॑ ದ್ಯೇ॒-ದಥೈ॒ನ್ದ್ರಸ್ಯೋ॒- [-ದಥೈ॒ನ್ದ್ರಸ್ಯ॑, ಉ॒ಪರಿ॑ಷ್ಟಾ-] ॥ 60 ॥
-ಪರಿ॑ಷ್ಟಾ-ದಿನ್ದ್ರಿ॒ಯೇಣೈ॒ವಾಸ್ಮಾ॑ ಉಭ॒ಯತಃ॑ ಸಜಾ॒ತಾ-ನ್ಪರಿ॑ ಗೃಹ್ಣಾತ್ಯುಪಾಧಾ॒ಯ್ಯ॑ ಪೂರ್ವಯಂ॒-ವಾಁಸೋ॒ ದಕ್ಷಿ॑ಣಾ ಸಜಾ॒ತಾನಾ॒ಮುಪ॑ಹಿತ್ಯೈ॒ ಪೃಶ್ಞಿ॑ಯೈ ದು॒ಗ್ಧೇ ಪ್ರೈಯ॑ಙ್ಗವ-ಞ್ಚ॒ರು-ನ್ನಿರ್ವ॑ಪೇನ್ಮ॒ರುದ್ಭ್ಯೋ॒ ಗ್ರಾಮ॑ಕಾಮಃ॒ ಪೃಶ್ಞಿ॑ಯೈ॒ ವೈ ಪಯ॑ಸೋ ಮ॒ರುತೋ॑ ಜಾ॒ತಾಃ ಪೃಶ್ಞಿ॑ಯೈ ಪ್ರಿ॒ಯಙ್ಗ॑ವೋ ಮಾರು॒ತಾಃ ಖಲು॒ ವೈ ದೇ॒ವತ॑ಯಾ ಸಜಾ॒ತಾ ಮ॒ರುತ॑ ಏ॒ವ ಸ್ವೇನ॑ ಭಾಗ॒ಧೇಯೇ॒ನೋಪ॑ ಧಾವತಿ॒ ತ ಏ॒ವಾಸ್ಮೈ॑ ಸಜಾ॒ತಾ-ನ್ಪ್ರಯ॑ಚ್ಛನ್ತಿ ಗ್ರಾ॒ಮ್ಯೇ॑ವ ಭ॑ವತಿ ಪ್ರಿ॒ಯವ॑ತೀ ಯಾಜ್ಯಾನುವಾ॒ಕ್ಯೇ॑ [ಯಾಜ್ಯಾನುವಾ॒ಕ್ಯೇ᳚, ಭ॒ವ॒ತಃ॒ ಪ್ರಿ॒ಯಮೇ॒ವೈನಗ್ಂ॑] ॥ 61 ॥
ಭವತಃ ಪ್ರಿ॒ಯಮೇ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋತಿ ದ್ವಿ॒ಪದಾ॑ ಪುರೋ-ಽನುವಾ॒ಕ್ಯಾ॑ ಭವತಿ ದ್ವಿ॒ಪದ॑ ಏ॒ವಾವ॑ ರುನ್ಧೇ॒ ಚತು॑ಷ್ಪದಾ ಯಾ॒ಜ್ಯಾ॑ ಚತು॑ಷ್ಪದ ಏ॒ವ ಪ॒ಶೂನವ॑ ರುನ್ಧೇ ದೇವಾಸು॒ರಾ-ಸ್ಸಂಯಁ॑ತ್ತಾ ಆಸ॒-ನ್ತೇ ದೇ॒ವಾ ಮಿ॒ಥೋ ವಿಪ್ರಿ॑ಯಾ ಆಸ॒-ನ್ತೇ᳚(1॒) ಽನ್ಯೋ᳚-ಽನ್ಯಸ್ಮೈ॒ ಜ್ಯೈಷ್ಠ್ಯಾ॒ಯಾ-ತಿ॑ಷ್ಠಮಾನಾ-ಶ್ಚತು॒ರ್ಧಾ ವ್ಯ॑ಕ್ರಾಮ-ನ್ನ॒ಗ್ನಿ-ರ್ವಸು॑ಭಿ॒-ಸ್ಸೋಮೋ॑ ರು॒ದ್ರೈರಿನ್ದ್ರೋ॑ ಮ॒ರುದ್ಭಿ॒-ರ್ವರು॑ಣ ಆದಿ॒ತ್ಯೈ-ಸ್ಸ ಇನ್ದ್ರಃ॑ ಪ್ರ॒ಜಾಪ॑ತಿ॒-ಮುಪಾ॑-ಽಧಾವ॒-ತ್ತ- [-ಽಧಾವ॒-ತ್ತಮ್, ಏ॒ತಯಾ॑] ॥ 62 ॥
-ಮೇ॒ತಯಾ॑ ಸಂ॒(2)ಜ್ಞಾನ್ಯಾ॑-ಽಯಾಜಯ-ದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ॑ವಪ॒-ಥ್ಸೋಮಾ॑ಯ ರು॒ದ್ರವ॑ತೇ ಚ॒ರುಮಿನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒ -ಮೇಕಾ॑ದಶಕಪಾಲಂ॒-ವಁರು॑ಣಾಯಾ-ಽಽದಿ॒ತ್ಯವ॑ತೇ ಚ॒ರು-ನ್ತತೋ॒ ವಾ ಇನ್ದ್ರ॑-ನ್ದೇ॒ವಾ ಜ್ಯೈಷ್ಠ್ಯಾ॑ಯಾ॒ಭಿ ಸಮ॑ಜಾನತ॒ ಯ-ಸ್ಸ॑ಮಾ॒ನೈ-ರ್ಮಿ॒ಥೋ ವಿಪ್ರಿ॑ಯ॒-ಸ್ಸ್ಯಾ-ತ್ತಮೇ॒ತಯಾ॑ ಸಂ॒(2)ಜ್ಞಾನ್ಯಾ॑ ಯಾಜಯೇ-ದ॒ಗ್ನಯೇ॒ ವಸು॑ಮತೇ ಪುರೋ॒ಡಾಶ॑-ಮ॒ಷ್ಟಾಕ॑ಪಾಲ॒-ನ್ನಿರ್ವ॑ಪೇ॒-ಥ್ಸೋಮಾ॑ಯ ರು॒ದ್ರವ॑ತೇ ಚ॒ರು-ಮಿನ್ದ್ರಾ॑ಯ ಮ॒ರುತ್ವ॑ತೇ ಪುರೋ॒ಡಾಶ॒-ಮೇಕಾ॑ದಶಕಪಾಲಂ॒-ವಁರು॑ಣಾಯಾ ಽಽದಿ॒ತ್ಯವ॑ತೇ ಚ॒ರು-ಮಿನ್ದ್ರ॑-ಮೇ॒ವೈನ॑-ಮ್ಭೂ॒ತ-ಞ್ಜ್ಯೈಷ್ಠ್ಯಾ॑ಯ ಸಮಾ॒ನಾ ಅ॒ಭಿ ಸ-ಞ್ಜಾ॑ನತೇ॒ ವಸಿ॑ಷ್ಠ-ಸ್ಸಮಾ॒ನಾನಾ᳚-ಮ್ಭವತಿ ॥ 63 ॥
(ವಿಶ॑ಮೇ॒ವ - ತಿ॑ಷ್ಠನ್ತ್ಯೇ॒ತಾಮೇ॒ - ವಾಥೈ॒ನ್ದ್ರಸ್ಯ॑ - ಯಾಜ್ಯಾನುವಾ॒ಕ್ಯೇ॑ - ತಂ - ಁವರು॑ಣಾಯ॒ -ಚತು॑ರ್ದಶ ಚ) (ಅ. 11)
ಹಿ॒ರ॒ಣ್ಯ॒ಗ॒ರ್ಭ ಆಪೋ॑ ಹ॒ ಯತ್ಪ್ರಜಾ॑ಪತೇ ॥ ಸ ವೇ॑ದ ಪು॒ತ್ರಃ ಪಿ॒ತರ॒ಗ್ಂ॒ ಸ ಮಾ॒ತರ॒ಗ್ಂ॒ ಸ ಸೂ॒ನುಭ॑ರ್ವ॒-ಥ್ಸ ಭು॑ವ॒-ತ್ಪುನ॑ರ್ಮಘಃ । ಸ ದ್ಯಾಮೌರ್ಣೋ॑ದ॒ನ್ತರಿ॑ಕ್ಷ॒ಗ್ಂ॒ ಸ ಸುವ॒-ಸ್ಸ ವಿಶ್ವಾ॒ ಭುವೋ॑ ಅಭವ॒-ಥ್ಸ ಆ-ಽಭ॑ವತ್ ॥ ಉದು॒ ತ್ಯ-ಞ್ಚಿ॒ತ್ರಮ್ ॥ ಸ ಪ್ರ॑ತ್ನ॒ವನ್ನವೀ॑ಯ॒ಸಾ-ಽಗ್ನೇ᳚ ದ್ಯು॒ಮ್ನೇನ॑ ಸಂ॒ಯಁತಾ᳚ । ಬೃ॒ಹ-ತ್ತ॑ತನ್ಥ ಭಾ॒ನುನಾ᳚ ॥ ನಿ ಕಾವ್ಯಾ॑ ವೇ॒ಧಸ॒-ಶ್ಶಶ್ವ॑ತಸ್ಕ॒ರ್॒ಹಸ್ತೇ॒ ದಧಾ॑ನೋ॒ [ದಧಾ॑ನಃ, ನರ್ಯಾ॑ ಪು॒ರೂಣಿ॑ ।] ॥ 64 ॥
ನರ್ಯಾ॑ ಪು॒ರೂಣಿ॑ । ಅ॒ಗ್ನಿರ್ಭು॑ವದ್ರಯಿ॒ಪತೀ॑ ರಯೀ॒ಣಾಗ್ಂ ಸ॒ತ್ರಾ ಚ॑ಕ್ರಾ॒ಣೋ ಅ॒ಮೃತಾ॑ನಿ॒ ವಿಶ್ವಾ᳚ ॥ ಹಿರ॑ಣ್ಯಪಾಣಿಮೂ॒ತಯೇ॑ ಸವಿ॒ತಾರ॒ಮುಪ॑ ಹ್ವಯೇ । ಸ ಚೇತ್ತಾ॑ ದೇ॒ವತಾ॑ ಪ॒ದಮ್ ॥ ವಾ॒ಮಮ॒ದ್ಯ ಸ॑ವಿತರ್ವಾ॒ಮಮು॒ ಶ್ವೋ ದಿ॒ವೇದಿ॑ವೇ ವಾ॒ಮಮ॒ಸ್ಮಭ್ಯಗ್ಂ॑ ಸಾವೀಃ । ವಾ॒ಮಸ್ಯ॒ ಹಿ ಕ್ಷಯ॑ಸ್ಯ ದೇವ॒ ಭೂರೇ॑ರ॒ಯಾ ಧಿ॒ಯಾ ವಾ॑ಮ॒ಭಾಜಃ॑ ಸ್ಯಾಮ ॥ ಬಡಿ॒ತ್ಥಾ ಪರ್ವ॑ತಾನಾ-ಙ್ಖಿ॒ದ್ರ-ಮ್ಬಿ॑ಭರ್ಷಿ ಪೃಥಿವಿ । ಪ್ರ ಯಾ ಭೂ॑ಮಿ ಪ್ರವತ್ವತಿ ಮ॒ಹ್ನಾ ಜಿ॒ನೋಷಿ॑ [ಜಿ॒ನೋಷಿ॑, ಮ॒ಹಿ॒ನಿ॒ ।] ॥ 65 ॥
ಮಹಿನಿ ॥ ಸ್ತೋಮಾ॑ಸಸ್ತ್ವಾ ವಿಚಾರಿಣಿ॒ ಪ್ರತಿ॑ಷ್ಟೋಭನ್ತ್ಯ॒ಕ್ತುಭಿಃ॑ । ಪ್ರಯಾ ವಾಜ॒-ನ್ನ ಹೇಷ॑ನ್ತ-ಮ್ಪೇ॒ರು-ಮಸ್ಯ॑ಸ್ಯರ್ಜುನಿ ॥ ಋ॒ದೂ॒ದರೇ॑ಣ॒ ಸಖ್ಯಾ॑ ಸಚೇಯ॒ ಯೋ ಮಾ॒ ನ ರಿಷ್ಯೇ᳚ದ್ಧರ್ಯಶ್ವ ಪೀ॒ತಃ । ಅ॒ಯಂ-ಯಁ-ಸ್ಸೋಮೋ॒ ನ್ಯಧಾ᳚ಯ್ಯ॒ಸ್ಮೇ ತಸ್ಮಾ॒ ಇನ್ದ್ರ॑-ಮ್ಪ್ರ॒ತಿರ॑-ಮೇ॒ಮ್ಯಚ್ಛ॑ ॥ ಆಪಾ᳚ನ್ತಮನ್ಯು-ಸ್ತೃ॒ಪಲ॑-ಪ್ರಭರ್ಮಾ॒ ಧುನಿ॒-ಶ್ಶಿಮೀ॑ ವಾ॒ಞ್ಛರು॑ಮಾಗ್ಂ ಋಜೀ॒ಷೀ । ಸೋಮೋ॒ ವಿಶ್ವಾ᳚ನ್ಯತ॒ಸಾ ವನಾ॑ನಿ॒ ನಾರ್ವಾಗಿನ್ದ್ರ॑-ಮ್ಪ್ರತಿ॒ಮಾನಾ॑ನಿ ದೇಭುಃ ॥ ಪ್ರ- [ಪ್ರ, ಸು॒ವಾ॒ನ-ಸ್ಸೋಮ॑] ॥ 66 ॥
-ಸು॑ವಾ॒ನ-ಸ್ಸೋಮ॑ ಋತ॒ಯು-ಶ್ಚಿ॑ಕೇ॒ತೇನ್ದ್ರಾ॑ಯ॒ ಬ್ರಹ್ಮ॑ ಜ॒ಮದ॑ಗ್ನಿ॒-ರರ್ಚನ್ನ್॑ । ವೃಷಾ॑ ಯ॒ನ್ತಾ-ಽಸಿ॒ ಶವ॑ಸ-ಸ್ತು॒ರಸ್ಯಾ॒-ಽನ್ತ-ರ್ಯ॑ಚ್ಛ ಗೃಣ॒ತೇ ಧ॒ರ್ತ್ರ-ನ್ದೃಗ್ಂ॑ಹ ॥ ಸ॒ಬಾಧ॑ಸ್ತೇ॒ ಮದ॑-ಞ್ಚ ಶುಷ್ಮ॒ಯ-ಞ್ಚ॒ ಬ್ರಹ್ಮ॒ ನರೋ᳚ ಬ್ರಹ್ಮ॒ಕೃತಃ॑ ಸಪರ್ಯನ್ನ್ । ಅ॒ರ್ಕೋ ವಾ॒ ಯ-ತ್ತು॒ರತೇ॒ ಸೋಮ॑ಚಕ್ಷಾ॒-ಸ್ತತ್ರೇ-ದಿನ್ದ್ರೋ॑ ದಧತೇ ಪೃ॒ಥ್ಸು ತು॒ರ್ಯಾಮ್ ॥ ವಷ॑-ಟ್ತೇ ವಿಷ್ಣವಾ॒ಸ ಆ ಕೃ॑ಣೋಮಿ॒ ತನ್ಮೇ॑ ಜುಷಸ್ವ ಶಿಪಿವಿಷ್ಟ ಹ॒ವ್ಯಮ್ । ॥ 67 ॥
ವರ್ಧ॑ನ್ತು ತ್ವಾ ಸುಷ್ಟು॒ತಯೋ॒ ಗಿರೋ॑ ಮೇ ಯೂ॒ಯ-ಮ್ಪಾ॑ತ ಸ್ವ॒ಸ್ತಿಭಿ॒-ಸ್ಸದಾ॑ ನಃ ॥ಪ್ರ ತ-ತ್ತೇ॑ ಅ॒ದ್ಯ ಶಿ॑ಪಿವಿಷ್ಟ॒ ನಾಮಾ॒-ಽರ್ಯ-ಶ್ಶಗ್ಂ॑ ಸಾಮಿ ವ॒ಯುನಾ॑ನಿ ವಿ॒ದ್ವಾನ್ । ತನ್ತ್ವಾ॑ ಗೃಣಾಮಿ ತ॒ವಸ॒-ಮತ॑ವೀಯಾ॒ನ್ ಕ್ಷಯ॑ನ್ತಮ॒ಸ್ಯ ರಜ॑ಸಃ ಪರಾ॒ಕೇ ॥ ಕಿಮಿ-ತ್ತೇ॑ ವಿಷ್ಣೋ ಪರಿ॒ಚಕ್ಷ್ಯ॑-ಮ್ಭೂ॒-ತ್ಪ್ರ ಯದ್ವ॑ವ॒ಕ್ಷೇ ಶಿ॑ಪಿವಿ॒ಷ್ಟೋ ಅ॑ಸ್ಮಿ । ಮಾ ವರ್ಪೋ॑ ಅ॒ಸ್ಮದಪ॑ ಗೂಹ ಏ॒ತದ್ಯ-ದ॒ನ್ಯರೂ॑ಪ-ಸ್ಸಮಿ॒ಥೇ ಬ॒ಭೂಥ॑ । ॥ 68 ॥
ಅಗ್ನೇ॒ ದಾ ದಾ॒ಶುಷೇ॑ ರ॒ಯಿಂ-ವೀಁ॒ರವ॑ನ್ತ॒-ಮ್ಪರೀ॑ಣಸಮ್ । ಶಿ॒ಶೀ॒ಹಿ ನಃ॑ ಸೂನು॒ಮತಃ॑ ॥ ದಾ ನೋ॑ ಅಗ್ನೇ ಶ॒ತಿನೋ॒ ದಾ-ಸ್ಸ॑ಹ॒ಸ್ರಿಣೋ॑ ದು॒ರೋ ನ ವಾಜ॒ಗ್ಗ್॒ ಶ್ರುತ್ಯಾ॒ ಅಪಾ॑ ವೃಧಿ । ಪ್ರಾಚೀ॒ ದ್ಯಾವಾ॑ಪೃಥಿ॒ವೀ ಬ್ರಹ್ಮ॑ಣಾ ಕೃಧಿ॒ ಸುವ॒ರ್ಣ ಶು॒ಕ್ರಮು॒ಷಸೋ॒ ವಿ ದಿ॑ದ್ಯುತುಃ ॥ ಅ॒ಗ್ನಿರ್ದಾ॒ ದ್ರವಿ॑ಣಂ-ವೀಁ॒ರಪೇ॑ಶಾ ಅ॒ಗ್ನಿರ್-ಋಷಿಂ॒-ಯಁ-ಸ್ಸ॒ಹಸ್ರಾ॑ ಸ॒ನೋತಿ॑ । ಅ॒ಗ್ನಿರ್ದಿ॒ವಿ ಹ॒ವ್ಯಮಾ ತ॑ತಾನಾ॒-ಽಗ್ನೇ-ರ್ಧಾಮಾ॑ನಿ॒ ವಿಭೃ॑ತಾ ಪುರು॒ತ್ರಾ ॥ ಮಾ [ಮಾ, ನೋ॒ ಮ॒ರ್ಧೀ॒ ರಾ ತೂ ಭ॑ರ ।] ॥ 69 ॥
ನೋ॑ ಮರ್ಧೀ॒ ರಾ ತೂ ಭ॑ರ ॥ ಘೃ॒ತ-ನ್ನ ಪೂ॒ತ-ನ್ತ॒ನೂರ॑ರೇ॒ಪಾ-ಶ್ಶುಚಿ॒ ಹಿರ॑ಣ್ಯಮ್ । ತ-ತ್ತೇ॑ ರು॒ಕ್ಮೋ ನ ರೋ॑ಚತ ಸ್ವಧಾವಃ ॥ ಉ॒ಭೇ ಸು॑ಶ್ಚನ್ದ್ರ ಸ॒ರ್ಪಿಷೋ॒ ದರ್ವೀ᳚ ಶ್ರೀಣೀಷ ಆ॒ಸನಿ॑ । ಉ॒ತೋ ನ॒ ಉ-ತ್ಪು॑ಪೂರ್ಯಾ ಉ॒ಕ್ಥೇಷು॑ ಶವಸಸ್ಪತ॒ ಇಷಗ್ಗ್॑ ಸ್ತೋ॒ತೃಭ್ಯ॒ ಆ ಭ॑ರ ॥ ವಾಯೋ॑ ಶ॒ತಗ್ಂ ಹರೀ॑ಣಾಂ-ಯುಁ॒ವಸ್ವ॒ ಪೋಷ್ಯಾ॑ಣಾಮ್ । ಉ॒ತ ವಾ॑ ತೇ ಸಹ॒ಸ್ರಿಣೋ॒ ರಥ॒ ಆ ಯಾ॑ತು॒ ಪಾಜ॑ಸಾ ॥ ಪ್ರ ಯಾಭಿ॒- [ಪ್ರ ಯಾಭಿಃ, ಯಾಸಿ॑ ದಾ॒ಶ್ವಾಗ್ಂ ಸ॒ಮಚ್ಛಾ॑] ॥ 70 ॥
-ರ್ಯಾಸಿ॑ ದಾ॒ಶ್ವಾಗ್ಂ ಸ॒ಮಚ್ಛಾ॑ ನಿ॒ಯುದ್ಭಿ॑-ರ್ವಾಯವಿ॒ಷ್ಟಯೇ॑ ದುರೋ॒ಣೇ । ನಿ ನೋ॑ ರ॒ಯಿಗ್ಂ ಸು॒ಭೋಜ॑ಸಂ-ಯುಁವೇ॒ಹ ನಿ ವೀ॒ರವ॒-ದ್ಗವ್ಯ॒ಮಶ್ವಿ॑ಯ-ಞ್ಚ॒ ರಾಧಃ॑ ॥ರೇ॒ವತೀ᳚ರ್ನ-ಸ್ಸಧ॒ಮಾದ॒ ಇನ್ದ್ರೇ॑ ಸನ್ತು ತು॒ವಿವಾ॑ಜಾಃ । ಕ್ಷು॒ಮನ್ತೋ॒ ಯಾಭಿ॒ರ್ಮದೇ॑ಮ ॥ ರೇ॒ವಾಗ್ಂ ಇದ್ರೇ॒ವತಃ॑ ಸ್ತೋ॒ತಾ ಸ್ಯಾ-ತ್ತ್ವಾವ॑ತೋ ಮ॒ಘೋನಃ॑ । ಪ್ರೇದು॑ ಹರಿವ-ಶ್ಶ್ರು॒ತಸ್ಯ॑ ॥ 71 ॥
(ದಧಾ॑ನೋ - ಜಿ॒ನೋಷಿ॑ - ದೇಭುಃ॒ ಪ್ರ - ಹ॒ವ್ಯಂ - ಬ॒ಭೂಥ॒ - ಮಾ - ಯಾಭಿ॑ - ಶ್ಚತ್ವಾರಿ॒ಗ್ಂ॒ಶಚ್ಚ॑ ) (ಅ. 12)
(ಪ್ರ॒ಜಾಪ॑ತಿ॒ಸ್ತಾ-ಸ್ಸೃ॒ಷ್ಟಾ - ಅ॒ಗ್ನಯೇ॑ ಪಥಿ॒ಕೃತೇ॒ - ಗ್ನಯೇ॒ ಕಾಮಾ॑ಯಾ॒ - ಗ್ನಯೇನ್ನ॑ವತೇ -ವೈಶ್ವಾನ॒ರ -ಮಾ॑ದಿ॒ತ್ಯ-ಞ್ಚ॒ರು - ಮೈ॒ನ್ದ್ರ-ಞ್ಚ॒ರು - ಮಿನ್ದ್ರಾ॒ಯಾನ್ವೃ॑ಜವ - ಆಗ್ನಾವೈಷ್ಣ॒ವ -ಮ॒ಸೌ ಸೋ॑ಮಾರೌ॒ದ್ರ - ಮೈ॒ನ್ದ್ರಮ॒ಕಾ॑ದಶಕಪಾಲಗ್ಂ- ಹಿರಣ್ಯಗ॒ರ್ಭೋ - ದ್ವಾದ॑ಶ )
(ಪ್ರ॒ಜಾಪ॑ತಿ - ರ॒ಗ್ನಯೇ॒ ಕಾಮಾ॑ಯಾ॒ - ಽಭಿ ಸ-ಮ್ಭ॑ವತೋ॒ - ಯೋ ವಿ॑ದ್ವಿಷಾ॒ಣಯೋ॑ -ರಿ॒ಧ್ಮೇ ಸನ್ನ॑ ಹ್ಯೇ - ದಾಗ್ನಾವೈಷ್ಣ॒ವಮು॒ - ಪರಿ॑ಷ್ಟಾ॒ - ದ್ಯಾಸಿ॑ ದಾ॒ಶ್ವಾಗ್ಂಸ॒ - ಮೇಕ॑ಸಪ್ತತಿಃ )
(ಪ್ರ॒ಜಾಪ॑ತಿಃ॒, ಪ್ರೇದು॑ ಹರಿವ-ಶ್ಶ್ರು॒ತಸ್ಯ॑)
॥ ಹರಿಃ॑ ಓಮ್ ॥
॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ನ್ದ್ವಿತೀಯಕಾಣ್ಡೇ ದ್ವಿತೀಯಃ ಪ್ರಶ್ನ-ಸ್ಸಮಾಪ್ತಃ ॥
Roman (IAST) Transliteration
kṛṣṇa yajurvedīya taittirīya saṃhitāyā-ndvitīyakāṇḍe dvitīyaḥ praśnaḥ - iṣṭividhānaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
pra॒jāpatiḥ̭ pra॒jā a̭sṛjata॒ tā-ssṛ॒ṣṭā॒ indrā॒gnī apā̭gūhatā॒gṃ॒ so̭-'cāya-tpra॒jāpa̭tirindrā॒gnī vai me᳚ pra॒jā apā̭ghukṣatā॒miti॒ sa e॒tamai᳚ndrā॒gna- mekā̭daśakapāla-mapaśya॒-tta-nnira̭vapa॒-ttāva̭smai pra॒jāḥ prāsā̭dhayatā- mindrā॒gnī vā e॒tasya̭ pra॒jāmapa̭ gūhato॒ yo-'laṃ̭ pra॒jāyai॒ sa-npra॒jā-nna vi॒ndata̭ aindrā॒gna-mekā̭daśakapāla॒-nnirva̭pet-pra॒jākā̭ma indrā॒gnī [ ] 1
e॒va svena̭ bhāga॒dheye॒nopa̭ dhāvati॒ tāve॒vāsmai᳚ pra॒jā-mpra sā̭dhayato vi॒ndate᳚ pra॒jā-mai᳚ndrā॒gna-mekā̭daśakapāla॒-nnirva̭pe॒-thspardha̭mānaḥ॒, kṣetrḙ vā sajā॒teṣṷ vendrā॒gnī e॒va svena̭ bhāga॒dheye॒nopa̭ dhāvati॒ tābhyā̭me॒vendri॒yaṃ ~vī॒rya̭-mbhrātṛ̭vyasya vṛṅkte॒ vi pā॒pmanā॒ bhrātṛ̭vyeṇa jaya॒te-'pa॒ vā e॒tasmā̭dindri॒yaṃ-vī~॒rya̭-ṅkrāmati॒ ya-ssa̭grā॒mma-mṷpapra॒yātyai᳚ndrā॒gna-mekā̭daśakapāla॒-nni- [-mekā̭daśakapāla॒-nniḥ, va॒pe॒-thsa॒ṅgrā॒ma-] 2
-rva̭pe-thsaṅgrā॒ma-mṷpaprayā॒sya-nni̭ndrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnindri॒yaṃ-vī~॒rya̭-ndhatta-ssa॒hendri॒yeṇa̭ vī॒ryḙṇopa॒ pra yā̭ti॒ jaya̭ti॒ tagṃ sa̭grā॒mmaṃ-vi~ vā e॒ṣa i̭ndri॒yeṇa̭ vī॒ryḙṇardhyate॒ ya-ssa̭grā॒mma-ñjaya̭tyaindrā॒gna-mekā̭daśakapāla॒-nnirva̭pe-thsaṅgrā॒ma-ñji॒tvendrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnidri॒yaṃ-vī~॒rya̭n- [vī॒rya᳚m, dha॒tto॒ nendri॒yeṇa̭] 3
-dhatto॒ nendri॒yeṇa̭ vī॒ryḙṇa॒ vyṛ̭ddhya॒te-'pa॒ vā e॒tasmā̭dindri॒yaṃ-vī~॒rya̭-ṅkrāmati॒ ya eti̭ ja॒natā̭maindrā॒gna-mekā̭daśakapāla॒-nnirva̭pe-jja॒natā̭me॒ṣya-nni̭ndrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnindri॒yaṃ-vī~॒rya̭-ndhatta-ssa॒hendri॒yeṇa̭ vī॒ryḙṇa ja॒natā̭meti pau॒ṣṇa-ñca॒rumanu॒ nirva̭pe-tpū॒ṣā vā i̭ndri॒yasya̭ vī॒rya̭syā-'nupradā॒tā pū॒ṣaṇa̭me॒va [ ] 4
svena̭ bhāga॒dheye॒nopa̭ dhāvati॒ sa e॒vāsmā̭ indri॒yaṃ-vī~॒rya̭manu॒ praya̭cchati kṣaitrapa॒tya-ñca॒ru-nnirva̭pe-jja॒natā̭-mā॒gatye॒yaṃ-vai~ kṣetra̭sya॒ pati̭ra॒syāme॒va prati̭ tiṣṭhatyaindrā॒gna-mekā̭daśakapāla-mu॒pari̭ṣṭā॒-nnirva̭peda॒syāme॒va pra̭ti॒ṣṭhāye᳚ndri॒yaṃ-vī~॒rya̭-mu॒pari̭ṣṭā-dā॒tma-ndha̭tte || 5 ||
(pra॒jākā̭ma indrā॒gnī - ṷpapra॒yātyai᳚ndrā॒gnamekā̭daśakapāla॒-nni- rvī॒ryaṃ̭ - pū॒ṣaṇa̭me॒ vai - kā॒nnaca̭tvāri॒gṃ॒śacca̭ ) (a. 1)
a॒gnayḙ pathi॒kṛtḙ puro॒ḍāśa̭-ma॒ṣṭāka̭pāla॒-nnirva̭pe॒dyo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭-'tipā॒daye᳚-tpa॒tho vā e॒ṣoddhyapa̭thenaiti॒ yo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭tipā॒daya̭tya॒gnime॒va pa̭thi॒kṛta॒gg॒ svena̭ bhāga॒dheye॒nopa̭ dhāvati॒ sa e॒vaina॒mapa̭thā॒-tpanthā॒mapi̭ nayatyana॒ḍvā-ndakṣi̭ṇā va॒hī hyḙṣa samṛ̭ddhyā a॒gnaye᳚ vra॒tapa̭taye [vra॒tapa̭taye, pu॒ro॒ḍāśa̭-] 6
puro॒ḍāśa̭-ma॒ṣṭāka̭pāla॒-nnirva̭pe॒dya āhi̭tāgni॒-ssanna̭vra॒tyami̭va॒ carḙda॒gnime॒va vra॒tapa̭ti॒gg॒ svena̭ bhāga॒dheye॒nopa̭ dhāvati॒ sa e॒vainaṃ̭-vra~॒tamā la̭bhaṃya~ti॒ vratyo̭ bhavatya॒gnayḙ rakṣo॒ghne pṷro॒ḍāśa̭-ma॒ṣṭāka̭pāla॒-nnirva̭pe॒dyagṃ rakṣāgṃ̭si॒ sacḙranna॒gnime॒va ra̭kṣo॒haṇa॒gg॒ svena̭ bhāga॒dheye॒nopa̭ dhāvati॒ sa e॒vāsmā॒-drakṣā॒g॒syapa̭ hanti॒ niśi̭tāyā॒-nnirva̭pe॒- [nirva̭pet, niśi̭tāyā॒gṃ॒ hi] 7
-nniśi̭tāyā॒gṃ॒ hi rakṣāgṃ̭si pre॒ratḙ sa॒preṃrṇā᳚nye॒vainā̭ni hanti॒ pari̭śrite yājaye॒-drakṣa̭sā॒-mana̭nvavacārāya rakṣo॒ghnī yā᳚jyānuvā॒kyḙ bhavato॒ rakṣa̭sā॒g॒ stṛtyā̭ a॒gnayḙ ru॒drava̭te puro॒ḍāśa̭-ma॒ṣṭāka̭pāla॒-nnirva̭pe-dabhi॒cara̭-nne॒ṣā vā a̭sya gho॒rā ta॒nūrya-dru॒drastasmā̭ e॒vaina॒māvṛ̭ścati tā॒jagārti॒-mārccha̭tya॒gnayḙ surabhi॒matḙ puro॒ḍāśa̭-ma॒ṣṭāka̭pāla॒-nnirva̭pe॒dyasya॒ gāvo̭ vā॒ purṷṣā [vā॒ purṷṣāḥ, vā॒ pra॒mīyḙra॒n॒] 8
vā pra॒mīyḙra॒n॒ yo vā̭ bibhī॒yāde॒ṣā vā a̭sya bheṣa॒jyā̭ ta॒nūrya-thsṷrabhi॒matī॒-tayai॒vā-'smai̭ bheṣa॒ja-ṅka̭roti surabhi॒matḙ bhavati pūtīga॒ndhasyā-'pa̭hatyā a॒gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-thsaṅgrā॒me saṃya~̭tte bhāga॒dheyḙnai॒vainagṃ̭ śamayi॒tvā parā̭na॒bhi nirdi̭śati॒ yamava̭reṣāṃ॒-vi~ddhya̭nti॒ jīva̭ti॒ sa ya-mparḙṣā॒-mpra sa mī̭yate॒ jaya̭ti॒ tagṃ sa̭ṅgrā॒ma- [tagṃ sa̭ṅgrā॒mam, a॒bhi vā e॒ṣa] 9
-ma॒bhi vā e॒ṣa e॒tānṷcyati॒ yeṣā᳚-mpūrvāpa॒rā a॒nvañcaḥ̭ pra॒mīya̭nte puruṣāhu॒tir-hya̭sya pri॒yata̭mā॒-'gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-dbhāga॒dheyḙnai॒vainagṃ̭ śamayati॒ naiṣā᳚-mpu॒rā-''yu॒ṣo-'pa̭raḥ॒ pramī̭yate॒-'bhi vā e॒ṣa e॒tasya̭ gṛ॒hānṷcyati॒ yasya̭ gṛ॒hā-ndaha̭tya॒gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-dbhāga॒dheyḙnai॒vainagṃ̭ śamayati॒ nā-'syāpa̭ra-ṅgṛ॒hā-nda̭hati || 10 ||
(vra॒tapa̭taye॒ - niśi̭tāyā॒-nnirva̭pe॒t - purṷṣāḥ - saṅgrā॒maṃ - na - ca॒tvāri̭ ca) (a. 2)
a॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnirva̭pe॒dya-ṅkāmo॒ nopa॒namḙ-da॒gnime॒va kāma॒gg॒ svena̭ bhāga॒dheye॒nopa̭ dhāvati॒ sa e॒vaina॒-ṅkāmḙna॒ sama̭rdhaya॒tyupai̭na॒-ṅkāmo̭ namatya॒gnaye॒ ya vi̭ṣṭhāya puro॒ḍāśa̭-ma॒ṣṭāka̭pāla॒-nnirva̭pe॒-thspardha̭mānaḥ॒, kṣetrḙ vā sajā॒teṣṷ vā॒-'gnime॒va yavi̭ṣṭha॒gg॒ svena̭ bhāga॒dheye॒nopa̭ dhāvati॒ tenai॒vendri॒yaṃ-vī~॒rya̭-mbhrātṛ̭vyasya [bhrātṛ̭vyasya, yu॒va॒te॒ vipā॒pmanā॒] 11
yuvate॒ vipā॒pmanā॒ bhrātṛ̭vyeṇa jayate॒-'gnaye॒ yavi̭ṣṭhāya puro॒ḍāśa̭-ma॒ṣṭāka̭pāla॒-nnirva̭pe-dabhica॒ryamā̭ṇo॒ 'gnime॒va yavi̭ṣṭha॒gg॒ svena̭ bhāga॒dheye॒nopa̭ dhāvati॒ sa e॒vāsmā॒-drakṣāgṃ̭si yavayati॒ naina̭-mabhi॒caran᳚-thstṛṇute॒-'gnaya॒ āyṷṣmate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙta॒ sarva॒-māyṷ-riyā॒-mitya॒gni- me॒vā-''yṷṣmanta॒gg॒ svena̭ bhāga॒dheye॒nopa̭ dhāvati॒ sa e॒vā-'smi॒- [e॒vā-'sminṋ, āyṷrdadhāti॒] 12
-nnāyṷrdadhāti॒ sarva॒māyṷ-retya॒gnayḙ jā॒tavḙdase puro॒ḍāśa̭-ma॒ṣṭāka̭pāla॒-nnirva̭pe॒-dbhūti̭kāmo॒-'gnime॒va jā॒tavḙdasa॒gg॒ svena̭ bhāga॒dheye॒nopa̭ dhāvati॒ sa e॒vaina॒-mbhūti̭-ṅgamayati॒ bhava̭tye॒vāgnaye॒ rukma̭te puro॒ḍāśa̭-ma॒ṣṭāka̭pāla॒-nnirva̭pe॒-drukkā̭mo॒-'gnime॒va rukma̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmi॒-nruca̭-ndadhāti॒-roca̭ta e॒vāgnaye॒ teja̭svate puro॒ḍāśa̭- [puro॒ḍāśa᳚m, a॒ṣṭāka̭pāla॒-nnirva̭pe॒t] 13
-ma॒ṣṭāka̭pāla॒-nnirva̭pe॒-tteja̭skāmo॒-'gnime॒va teja̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi॒-ntejo̭ dadhāti teja॒svyḙva bha̭vatya॒gnayḙ sāha॒ntyāya̭ puro॒ḍāśa̭ma॒ṣṭāka̭pāla॒-nnirva̭pe॒-thsīkṣa̭māṇo॒ 'gnime॒va sā̭ha॒ntyagg svena̭ bhāga॒dheye॒nopa̭ dhāvati॒ tenai॒va sa̭hate॒ yagṃ sīkṣa̭te || 14 ||
(bhrātṛ̭vyasyā -smi॒n - teja̭svate puro॒ḍaśa̭ - ma॒ṣṭātrigṃ̭śacca) (a. 3)
a॒gnaye-'nna̭vate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒maye॒tā-'nna̭vān-thsyā॒mitya॒gni-me॒vā-nna̭vanta॒gg॒ svena̭ bhāga॒dheye॒nopa̭ dhāvati॒ sa e॒vaina॒manna̭vanta-ṅkaro॒tyanna̭vāne॒va bha̭vatya॒gnaye᳚-'nnā॒dāya̭ puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙtā-'nnā॒da-ssyā॒mitya॒gni-me॒vānnā॒dagg svena̭ bhāga॒dheye॒nopa̭ dhāvati॒ sa e॒vaina̭-mannā॒da-ṅka̭rotyannā॒da - [-ka̭rotyannā॒daḥ, e॒va bha̭vatya॒gnaye-'nna̭pataye] 15
e॒va bha̭vatya॒gnaye-'nna̭pataye puro॒ḍāśa̭-ma॒ṣṭāka̭pāla॒-nnirva̭pe॒dyaḥ-kā॒maye॒tā-'nna̭pati-ssyā॒-mitya॒gni-me॒vā-'nna̭pati॒gg॒ svena̭ bhāga॒dheye॒nopa̭ dhāvati॒ sa e॒vaina॒-manna̭pati-ṅkaro॒tyanna̭pati-re॒va bha̭vatya॒gnaye॒ pava̭mānāya puro॒ḍāśa̭-ma॒ṣṭāka̭pāla॒-nnirva̭peda॒gnayḙ pāva॒kāyā॒gnaye॒ śuca̭ye॒ jyogā̭mayāvī॒ yada॒gnaye॒ pava̭mānāya ni॒rvapa̭ti prā॒ṇa-me॒vā-'smi॒-ntena̭ dadhāti॒ yada॒gnayḙ - [yada॒gnaye᳚, pā॒va॒kāya॒ vāca̭-] 16
pāva॒kāya॒ vāca̭-me॒vā-'smi॒-ntena̭ dadhāti॒ yada॒gnaye॒ śuca̭ya॒ āyṷ-re॒vā-'smi॒-ntena̭ dadhātyu॒ta yadī॒tāsu॒-rbhava̭ti॒ jīva̭tye॒vaitā-me॒va nirva̭pe॒-ccakṣṷṣkāmo॒ yada॒gnaye॒ pava̭mānāya ni॒rvapa̭ti prā॒ṇa-me॒vā-'smi॒-ntena̭ dadhāti॒ yada॒gnayḙ pāva॒kāya॒ vāca̭-me॒vāsmi॒-ntena̭ dadhāti॒ yada॒gnaye॒ śuca̭ye॒ cakṣṷ-re॒vāsmi॒-ntena̭ dadhā- [cakṣṷre॒vāsmi॒-ntena̭ dadhāti, u॒ta yadya॒ndho] 17
-tyu॒ta yadya॒ndho bhava̭ti॒ praiva pa̭śyatya॒gnayḙ pu॒trava̭te puro॒ḍāśa̭-ma॒ṣṭāka̭pāla॒-nnirva̭pe॒-dindrā̭ya pu॒triṇḙ puro॒ḍāśa॒-mekā̭daśakapāla-mpra॒jākā̭mo॒-'gni-re॒vā-'smai᳚ pra॒jā-mpra̭ja॒naya̭ti vṛ॒ddhā-mindraḥ॒ pra ya̭cchatya॒gnaye॒ rasa̭vate-'jakṣī॒re ca॒ru-nnirva̭pe॒dyaḥ kā॒mayḙta॒ rasa̭vān-thsyā॒-mitya॒gni-me॒va rasa̭vanta॒gg॒ svena̭ bhāga॒dheye॒nopa̭ dhāvati॒ sa e॒vaina॒gṃ॒ rasa̭vanta-ṅkaroti॒ [rasa̭vanta-ṅkaroti, rasa̭vāne॒va] 18
rasa̭vāne॒va bha̭vatyajakṣī॒re bha̭vatyāgne॒yī vā e॒ṣā yada॒jā sā॒kṣāde॒va rasa॒mava̭ rundhe॒-'gnaye॒ vasṷmate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙta॒ vasṷmān-thsyā॒mitya॒gni-me॒va vasṷmanta॒gg॒ svena̭ bhāga॒dheye॒nopa̭ dhāvati॒ sa e॒vainaṃ॒-va~sṷmanta-ṅkaroti॒ vasṷmāne॒va bha̭vatya॒gnayḙ vāja॒sṛtḙ puro॒ḍāśa̭-ma॒ṣṭāka̭pāla॒-nniva̭rpe-thsaṅgrā॒me saṃ-ya~̭tte॒ vājaṃ॒- [saṃ-ya~̭tte॒ vāja᳚m, vā e॒ṣa si̭sīrṣati॒] 19
-~vā e॒ṣa si̭sīrṣati॒ ya-ssa̭grā॒mma-ñjigī̭ṣatya॒gniḥ khalu॒ vai de॒vānāṃ᳚-vā~ja॒sṛ-da॒gni-me॒va vā̭ja॒sṛta॒gg॒ svena̭ bhāga॒dheye॒nopa̭ dhāvati॒ dhāva̭ti॒ vāja॒gṃ॒ hanti̭ vṛ॒tra-ñjaya̭ti॒ tagṃ sa̭grā॒mma-matho̭ a॒gniri̭va॒ na pra̭ti॒dhṛṣḙ bhavatya॒gnaye᳚-'gni॒vatḙ puro॒ḍāśa̭-ma॒ṣṭāka̭pāla॒-nnirva̭pe॒-dyasyā॒gnā- va॒gni- ma̭bhyu॒ddharḙyu॒-rnirdi̭ṣṭabhāgo॒ vā e॒tayo̭-ra॒nyo-'ni̭rdiṣṭabhāgo॒-'nyastau sa॒bhaṃva~̭ntau॒ yaja̭māna- [yaja̭mānam, a॒bhi] 20
-ma॒bhi sa-mbha̭vata॒-ssa ī᳚śva॒ra ārti॒-mārto॒-rya-da॒gnaye᳚-'gni॒vatḙ ni॒rvapa̭ti bhāga॒dheyḙnai॒vainaṷ śamayati॒ nā-''rti॒mārccha̭ti॒ yaja̭māno॒-'gnaye॒ jyoti̭ṣmate puro॒ḍāśa̭-ma॒ṣṭāka̭pāla॒-nnirva̭pe॒-dyasyā॒-gniruddhṛ॒to-'hṷte-'gniho॒tra u॒dvāye॒dapa̭ra ā॒dīpyā̭-'nū॒ddhṛtya॒ ityā̭hu॒sta-ttathā॒ na kā॒ryaṃ̭-ya~-dbhā̭ga॒dheya̭ma॒bhi pūrva̭ uddhri॒yate॒ kimapa̭ro॒-'bhyu- [kimapa̭ro॒-'bhyut, hri॒ye॒teti॒ tānye॒vā] 21
-ddhri̭ye॒teti॒ tānye॒vā va॒kṣāṇā̭ni sanni॒dhāya̭ manthedi॒taḥ pra̭tha॒ma-ñja̭jñe a॒gni-ssvādyone॒radhi̭ jā॒tavḙdāḥ | sa gā̭yatri॒yā tri॒ṣṭubhā॒ jaga̭tyā de॒vebhyo̭ ha॒vyaṃ-va~̭hatu prajā॒nanniti॒ chando̭bhi-re॒vaina॒gg॒ svādyoneḥ॒ praja̭nayatye॒ṣa vā va so᳚-'gnirityā̭hu॒ rjyoti॒stvā a̭sya॒ parā̭patita॒-miti॒ yada॒gnaye॒ jyoti̭ṣmate ni॒rvapa̭ti॒ yade॒vāsya॒ jyotiḥ॒ parā̭patita॒-ntade॒vāva̭ rundhe || 22 ||
(ka॒ro॒tya॒nnā॒do - da̭dhāti॒ yada॒gnaye॒ - śuca̭ye॒ cakṣṷre॒vāsmi॒-ntena̭ dadhāti -karoti॒ - vājaṃ॒ -~yaja̭māna॒ - mu - de॒vāsya॒ - ṣaṭca̭) (a. 4)
vai॒śvā॒na॒ra-ndvāda̭śakapāla॒-nnirva̭pe-dvāru॒ṇa-ñca॒ru-nda̭dhi॒krāvṇṇḙ ca॒ruma̭bhiśa॒syamā̭no॒ ya-dvai᳚śvāna॒ro dvāda̭śakapālo॒ bhava̭ti saṃva~thsa॒ro vā a॒gni rvai᳚śvāna॒ra-ssaṃ̭va~thsa॒reṇai॒vainagg̭ svadaya॒tyapa̭ pā॒paṃ-va~rṇagṃ̭ hate vāru॒ṇenai॒vainaṃ̭-va~ruṇapā॒śā-nmṷñcati dadhi॒krāvṇṇā̭ punāti॒ hira̭ṇya॒-ndakṣi̭ṇā pa॒vitraṃ॒-vai~ hira̭ṇya-mpu॒nātye॒vaina̭-mā॒dya̭-ma॒syā-'nna̭-mbhavatye॒tāme॒va nirva̭pe-tpra॒jākā̭ma-ssaṃva~thsa॒ro [saṃva~thsa॒raḥ, vā] 23
vā e॒tasyā-'śā᳚nto॒ yoni̭-mpra॒jāyai̭ paśū॒nā-nnirda̭hati॒ yo-'la̭-mpra॒jāyai॒ sa-npra॒jā-nna vi॒ndate॒ ya-dvai᳚śvāna॒ro dvāda̭śakapālo॒ bhava̭ti saṃva~thsa॒ro vā a॒gni rvai᳚śvāna॒ra-ssaṃ̭va~thsa॒rame॒va bhā̭ga॒dheyḙna śamayati॒ so᳚-'smai śā॒nta-ssvādyoneḥ᳚ pra॒jā-mpraja̭nayati vāru॒ṇenai॒vainaṃ̭-va~ruṇapā॒śā-nmṷñcati dadhi॒krāvṇṇā̭ punāti॒ hira̭ṇya॒-ndakṣi̭ṇā pa॒vitraṃ॒-vai~ hira̭ṇya-mpu॒nātye॒vainaṃ̭- [pu॒nātye॒vaina᳚m, vi॒ndate᳚] 24
-~vi॒ndate᳚ pra॒jāṃ-vai~᳚śvāna॒ra-ndvāda̭śakapāla॒-nnirva̭pe-tpu॒tre jā॒teyada॒ṣṭāka̭pālo॒ bhava̭ti gāyatri॒yaivaina̭-mbrahmavarca॒sena̭ punāti॒ yannava̭kapāla-stri॒vṛtai॒vāsmi॒-ntejo̭ dadhāti॒ ya-ddaśa̭kapālo vi॒rājai॒vā-'smi̭-nna॒nnādya̭-ndadhāti॒ yadekā̭daśakapāla- stri॒ṣṭubhai॒vā-'smi̭-nnindri॒ya-nda̭dhāti॒ ya-ddvāda̭śakapālo॒ jaga̭tyai॒vā-'smi̭-npa॒śū-nda̭dhāti॒ yasmi̭n jā॒ta e॒tāmiṣṭi̭-nni॒rvapa̭ti pū॒ta [pū॒taḥ, e॒va tḙja॒svya̭nnā॒da] 25
e॒va tḙja॒svya̭nnā॒da i̭ndriyā॒vī pa̭śu॒mā-nbha̭va॒tyava॒ vā e॒ṣa sṷva॒rgā-llo॒kā-cchi̭dyate॒ yo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭tipā॒daya̭ti suva॒rgāya॒ hi lo॒kāya̭ darśapūrṇamā॒sā vi॒jyetḙ vaiśvāna॒ra-ndvāda̭śakapāla॒-nnirva̭pe-damāvā॒syāṃ᳚-vā~ paurṇamā॒sīṃ-vā~̭-'ti॒pādya̭ saṃva~thsa॒ro vā a॒gni rvai᳚śvāna॒ra-ssaṃ̭va~thsa॒rame॒va prī̭ṇā॒tyatho̭ saṃva~thsa॒rame॒vāsmā॒ upa̭ dadhāti suva॒rgasya̭ lo॒kasya॒ sama̭ṣṭyā॒ [sama̭ṣṭyai, atho̭] 26
atho̭ de॒vatā̭ e॒vānvā॒rabhya̭ suva॒rgaṃ-lo~॒kamḙti vīra॒hā vā e॒ṣa de॒vānāṃ॒-yo~᳚-'gni-mṷdvā॒saya̭te॒ na vā e॒tasya̭ brāhma॒ṇā ṛ̭tā॒yavaḥ̭ pu॒rā-'nna̭-makṣa-nnāgne॒ya-ma॒ṣṭāka̭pāla॒-nnirva̭pe-dvaiśvāna॒ra-ndvāda̭śakapāla-ma॒gnimṷdvāsayi॒ṣyan. yada॒ṣṭāka̭pālo॒ bhava̭tya॒ṣṭākṣa̭rā gāya॒trī-gā̭ya॒tro᳚ 'gni-ryāvā̭-ne॒vā-'gnistasmā̭ āti॒thya-ṅka̭ro॒tyatho॒ yathā॒ janaṃ̭-ya~॒tḙ-'va॒sa-ṅka॒roti̭ tā॒dṛ- [tā॒dṛk, e॒va] 27
-ge॒va ta-ddvāda̭śakapālo vaiśvāna॒ro bha̭vati॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒raḥ khalu॒ vā a॒gneryoni॒-ssvāme॒vainaṃ॒-yo~ni̭-ṅgamaya-tyā॒dya̭ma॒syānna̭-mbhavati vaiśvāna॒ra-ndvāda̭śakapāla॒-nnirva̭penmāru॒tagṃ sa॒ptaka̭pāla॒-ṅgrāma̭kāma āhava॒nīyḙ vaiśvāna॒ramadhi̭ śrayati॒ gārha̭patye māru॒ta-mpā̭pavasya॒sasya॒ vidhṛ̭tyai॒ dvāda̭śakapālo vaiśvāna॒ro bha̭vati॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒reṇai॒vāsmai̭ sajā॒tāgścyā̭vayati māru॒to bha̭vati [ ] 28
ma॒ruto॒ vai de॒vānāṃ॒-vi~śo̭ devavi॒śenai॒vā-'smai̭ manuṣya vi॒śamava̭ rundhe sa॒ptaka̭pālo bhavati sa॒pta ga̭ṇā॒ vai ma॒ruto̭ gaṇa॒śa e॒vāsmai̭ sajā॒tānava̭ rundhe 'nū॒cyamā̭na॒ ā sā̭dayati॒ viśa̭me॒vāsmā॒ anṷvartmāna-ṅkaroti || 29 ||
(pra॒jākā̭ma-ssaṃva~thsa॒raḥ - pu॒nātye॒vainaṃ̭ - pū॒taḥ - sama̭ṣṭyai -tā॒dṛṃ - mā̭ru॒to bha̭va॒ - tyekā॒nna tri॒gṃ॒śacca̭ ) (a. 5)
ā॒di॒tya-ñca॒ru-nnirva̭pe-thsaṅgrā॒ma-mṷpaprayā॒sya-nni॒yaṃ-vā~ adi̭ti-ra॒syāme॒va pūrve॒ prati̭tiṣṭhanti vaiśvāna॒ra-ndvāda̭śakapāla॒-nnirva̭pe-dā॒yata̭na-ṅga॒tvā-saṃ̭va~thsa॒ro vā a॒gni rvai᳚śvāna॒ra-ssaṃ̭va~thsa॒raḥ khalu॒ vai de॒vānā̭-mā॒yata̭na-me॒tasmā॒dvā ā॒yata̭nā-dde॒vā asṷrā-najaya॒n॒. ya-dvai᳚śvāna॒ra-ndvāda̭śakapāla-nni॒rvapa̭ti de॒vānā̭-me॒vā-''yata̭ne yatate॒ jaya̭ti॒ tagṃ sa̭grā॒mma-me॒tasmi॒n vā e॒tau mṛ̭jāte॒ [e॒tau mṛ̭jāte, yo vi̭dviṣā॒ṇayo॒-ranna॒-matti̭] || 30 ||
yo vi̭dviṣā॒ṇayo॒-ranna॒-matti̭ vaiśvāna॒ra-ndvāda̭śakapāla॒-nnirva̭pe-dvidviṣā॒ṇayo॒ranna̭-ñja॒gdhvā saṃ̭va~thsa॒ro vā a॒gni-rvai᳚śvāna॒ra-ssaṃ̭va~thsa॒ra sva̭dita-me॒vā-'tti॒ nāsmi̭-nmṛjāte saṃva~thsa॒rāya॒ vā e॒tau sama̭māte॒ yau sa̭ma॒māte॒ tayo॒ryaḥ pūrvo̭-'bhi॒druhya̭ti॒ taṃ-va~rṷṇo gṛhṇāti vaiśvāna॒ra-ndvāda̭śakapāla॒-nnirva̭pe-thsamamā॒nayoḥ॒ pūrvo̭-'bhi॒druhya̭ saṃva~thsa॒ro vā a॒gni-rvai᳚śvāna॒ra-ssaṃ̭va~thsa॒ra-me॒vā-''ptvā ni̭rvaru॒ṇaṃ- [ni̭rvaru॒ṇam, pa॒rastā̭-da॒bhi] || 31 ||
-pa॒rastā̭-da॒bhi drṷhyati॒ nainaṃ॒-va~rṷṇo gṛhṇātyā॒vyaṃ̭-vā~ e॒ṣa prati̭ gṛhṇāti॒ yo-'vi̭-mpratigṛ॒hṇāti̭ vaiśvāna॒ra-ndvāda̭śakapāla॒-nnirva̭pe॒davi̭-mprati॒gṛhya̭ saṃva~thsa॒ro vā a॒gni-rvai᳚śvāna॒ra-ssaṃ̭va~thsa॒ra-sva̭ditāme॒va prati̭gṛhṇāti॒ nā-''vya̭-mprati̭gṛhṇātyā॒tmano॒ vā e॒ṣa mātrā̭māpnoti॒ ya ṷbha॒yāda̭-tpratigṛ॒hṇātyaśvaṃ̭-vā~॒ purṷṣaṃ-vā~ vaiśvāna॒ra-ndvāda̭śakapāla॒-nnirva̭pe-dubha॒yāda̭- [nirva̭pe-dubha॒yāda̭t, pra॒ti॒gṛhya̭] || 32 ||
-tprati॒gṛhya̭ saṃva~thsa॒ro vā a॒gnirvai᳚śvāna॒ra-ssaṃ̭va~thsa॒ra-sva̭ditame॒va prati̭ gṛhṇāti॒ nātmano॒ mātrā̭māpnoti vaiśvāna॒ra-ndvāda̭śakapāla॒-nnirva̭pe-thsa॒ni-me॒ṣyan-thsaṃ̭va~thsa॒ro vā a॒gni-rvai᳚śvāna॒ro ya॒dā khalu॒ vai saṃ̭va~thsa॒ra-ñja॒natā̭yā॒-ñcara॒tyatha॒ sa dha̭nā॒rgho bha̭vati॒ya-dvai᳚śvāna॒ra-ndvāda̭śakapāla-nni॒rvapa̭ti saṃva~thsa॒ra-sā̭tāme॒va sa॒nima॒bhi pracya̭vate॒ dāna̭kāmā asmai pra॒jā bha̭vanti॒ yo vai saṃ̭va~thsa॒raṃ- [vai saṃ̭va~thsa॒ram, pra॒yujya॒ na] || 33 ||
-pra॒yujya॒ na vi̭mu॒ñcatya̭pratiṣṭhā॒no vai sa bha̭vatye॒ta-me॒va vai᳚śvāna॒ra-mpuna̭rā॒gatya॒ nirva̭pe॒dya-me॒va pra̭yu॒ṅkte ta-mbhā̭ga॒dheyḙna॒ vi mṷñcati॒ prati̭ṣṭhityai॒ yayā॒ rajvo᳚tta॒mā-ṅgāmā॒je-ttā-mbhrātṛ̭vyāya॒ pra hi̭ṇuyā॒-nnir-ṛ̭ti-me॒vāsmai॒ pra hi̭ṇoti || 34 ||
(mṛ॒jā॒te॒ - ni॒rva॒ru॒ṇaṃ - ~va̭pedubha॒yāda॒--dyo vai saṃ̭va~thsa॒ragṃ - ṣaṭtrigṃ̭śacca) (a. 6)
ai॒ndra-ñca॒ru-nnirva̭pe-tpa॒śukā̭ma ai॒ndrā vai pa॒śava॒ indra̭me॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒śū-npraya̭cchati paśu॒mā-ne॒va bha̭vati ca॒rurbha̭vati॒ svāde॒vāsmai॒ yoneḥ᳚ pa॒śū-npraja̭naya॒tīndrā̭yendri॒yāva̭te puro॒ḍāśa॒-mekā̭daśakapāla॒-nnirva̭pe-tpa॒śukā̭ma indri॒yaṃ-vai~ pa॒śava॒ indra̭-me॒vendri॒yāva̭nta॒gg॒ svena ̭bhāga॒dheye॒nopa̭ dhāvati॒ sa [dhāvati॒ saḥ, e॒vā-'smā̭] || 35 ||
e॒vā-'smā̭ indri॒ya-mpa॒śū-npraya̭cchati paśu॒māne॒va bha̭va॒tīndrā̭ya-gha॒rmava̭te puro॒ḍāśa॒-mekā̭daśakapāla॒-nnirva̭pe-dbrahmavarca॒sakā̭mo brahmavarca॒saṃ-vai~ gha॒rma indra̭me॒va gha॒rmava̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭-nbrahmavarca॒sa-nda̭dhāti brahmavarca॒syḙva bha̭va॒tīndrā̭yā॒-'rkava̭te puro॒ḍāśa॒-mekā̭daśakapāla॒-nnirva̭pe॒-danna̭kāmo॒-'rko vai de॒vānā॒-manna॒-mindra̭-me॒vā-'rkava̭nta॒gg॒ svena̭ bhāga॒dheye॒no- [svena̭ bhāga॒dheyḙna, upa̭ dhāvati॒ sa] || 36||
-pa̭ dhāvati॒ sa e॒vāsmā॒ anna॒-mpraya̭cchatyannā॒da e॒va bha̭va॒tīndrā̭ya gha॒rmava̭te puro॒ḍāśa॒-mekā̭daśakapāla॒-nnirva̭pe॒-dindrā̭ye-ndri॒yāva̭ta॒ indrā̭yā॒-'rkava̭te॒ bhūti̭kāmo॒ yadindrā̭ya gha॒rmava̭te ni॒rvapa̭ti॒ śira̭ e॒vāsya॒ tena̭ karoti॒ yadindrā̭yendri॒yāva̭ta ā॒tmāna̭-me॒vāsya॒ tena̭ karoti॒-ya-dindrā̭yā॒-'rkava̭te bhū॒ta e॒vānnādye॒ prati̭-tiṣṭhati॒ bhava̭tye॒vendrā̭yā- [bhava̭tye॒vendrā̭yā, a॒gṃ॒ ho॒mucḙ] || 37 ||
-'gṃ ho॒mucḙ puro॒ḍāśa॒-mekā̭daśakapāla॒-nnirva̭pe॒dyaḥ pā॒pmanā̭ gṛhī॒ta-ssyā-tpā॒pmā vā agṃha॒ indra̭me॒vā-'gṃ ho॒muca॒gg॒ svena̭ bhāga॒dheye॒nopa̭ dhāvati॒ sa e॒vaina̭-mpā॒pmano-'gṃha̭so muñca॒tīndrā̭ya vaimṛ॒dhāya̭ puro॒ḍāśa॒-mekā̭daśakapāla॒-nnirva̭pe॒dya-mmṛdho॒-'bhi pra॒vepḙran-rā॒ṣṭrāṇi̭ vā॒-'bhi sa̭mi॒yu-rindra̭-me॒va vai̭mṛ॒dhagg svena̭ bhāga॒dheye॒nopa̭ dhāvati॒ sa e॒vā-'smā॒nmṛdho- [e॒vā-'smā॒nmṛdhaḥ̭, apa̭ ha॒ntīndrā̭ya] || 38 ||
-'pa̭ ha॒ntīndrā̭ya trā॒tre pṷro॒ḍāśa॒-mekā̭daśakapāla॒-nnirva̭pe-dba॒ddho vā॒ pari̭yatto॒ vendra̭me॒va trā॒tāra॒gg॒ svena̭ bhāga॒dheye॒nopa̭ dhāvati॒ sa e॒vaina̭-ntrāyata॒ indrā̭yā-'rkāśvame॒dhava̭te puro॒ḍāśa॒-mekā̭daśakapāla॒-nnirva̭pe॒dya-mma̭hāya॒jño nopa॒namḙde॒te vai ma̭hāya॒jñasyā-'ntyḙ ta॒nū ya-da̭rkāśvame॒dhā-vindra̭-me॒vā-'rkā᳚śvame॒dha- va̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmā̭ anta॒to ma̭hāya॒jña-ñcyā̭vaya॒tyupai̭na-mmahāya॒jño na̭mati || 39 ||
(i॒ndri॒yāva̭nta॒gg॒ svena̭ bhāga॒dheye॒nopa̭ dhāvati॒ so᳚ - 'rkava̭nta॒gg॒ svena̭ bhāga॒dheyḙnai॒ - vendrā̭yā - smā॒-nmṛdho᳚ - 'smai - sa॒pta ca̭ ) (a. 7)
indrā॒yā-'nvṛ̭jave puro॒ḍāśa॒-mekā̭daśakapāla॒-nnirva̭pe॒-dgrāma̭kāma॒ indra̭-me॒vā-'nvṛ̭ju॒gg॒ svena̭ bhāga॒dheye॒nopa̭ dhāvati॒ sa e॒vāsmai̭ sajā॒tā-nanṷkān karoti grā॒myḙva bha̭vatīndrā॒ṇyai ca॒ru-nnirva̭pe॒dyasya॒ senā-'sagṃ̭śiteva॒ syā-di̭ndrā॒ṇī vai senā̭yai de॒vate᳚ndrā॒ṇī-me॒va svena̭ bhāga॒dheye॒nopa̭ dhāvati॒ saivāsya॒ senā॒gṃ॒ sagg śya̭ti॒ balba̭jā॒napī॒- [balba̭jā॒napi̭, i॒ddhme sa-nna̭hye॒dgau-] || 40 ||
-ddhme sa-nna̭hye॒dgau-ryatrā-'dhi̭ṣkannā॒-nyamḙha॒-ttato॒ balba̭jā॒ uda̭tiṣṭha॒-ngavā̭-me॒vaina̭-nnyā॒ya-ma̭pi॒nīya॒ gā vḙdaya॒tīndrā̭ya manyu॒mate॒ mana̭svate puro॒ḍāśa॒-mekā̭daśakapāla॒-nnirva̭pe-thsaṅgrā॒me saṃya~̭tta indri॒yeṇa॒ vai ma॒nyunā॒ mana̭sā saṅgrā॒ma-ñja̭ya॒tīndra̭-me॒va ma̭nyu॒manta॒-mmana̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭nnindri॒ya-mma॒nyu-mmano̭ dadhāti॒ jaya̭ti॒ tagṃ [jaya̭ti॒ tam, sa॒grā॒ma-me॒tā-me॒va] || 41 ||
sa̭grā॒ma-me॒tā-me॒va nirva̭pe॒dyo ha॒tama̭nā-ssva॒ya-mpā̭pa iva॒ syāde॒tāni॒ hi vā e॒tasmā॒ dapa̭krāntā॒nyathai॒ṣa ha॒tama̭nā-ssva॒ya-mpā̭pa॒ indra̭me॒va ma̭nyu॒manta॒-mmana̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭-nnindri॒ya-mma॒nyu-mmano̭ dadhāti॒ na ha॒tama̭nā-ssva॒ya-mpā̭po bhava॒tīndrā̭ya dā॒tre pṷro॒ḍāśa॒-mekā̭daśakapāla॒-nnirva̭pe॒dyaḥ kā॒mayḙta॒ dāna̭kāmā me pra॒jā-ssyu॒- [dāna̭kāmā me pra॒jā-ssyuḥ̭, itīndra̭-me॒va] || 42 ||
-ritīndra̭-me॒va dā॒tāra॒gg॒ svena̭ bhāga॒dheye॒nopa̭ dhāvati॒ sa e॒vāsmai॒ dāna̭kāmāḥ pra॒jāḥ ka̭roti॒ dāna̭kāmā asmai pra॒jā bha̭va॒ntīndrā̭ya pradā॒tre pṷro॒ḍāśa॒-mekā̭daśakapāla॒-nnirva̭pe॒-dyasmai॒ pratta̭miva॒ sanna pra̭dī॒yetendra̭-me॒va pra̭dā॒tāra॒gg॒ svena̭ bhāga॒dheye॒nopa̭-dhāvati॒ sa e॒vāsmai॒ pra-dā̭paya॒tīndrā̭ya su॒trāmṇḙ puro॒ḍāśa॒-mekā̭daśakapāla॒-nnirva̭pe॒-dapa̭ruddho vā- [-dapa̭ruddho vā, a॒pa॒ru॒ddhayamā̭no॒] || 43 ||
-'paru॒ddhayamā̭no॒ vendra̭me॒va su॒trāmā̭ṇa॒gg॒ svena̭ bhāga॒dheye॒nopa̭ dhāvati॒ sa e॒vaina̭-ntrāyate 'naparu॒ddhyo bha̭va॒tīndro॒ vai sa॒dṛ-nde॒vatā̭bhirāsī॒-thsa na vyā॒vṛta̭magaccha॒-thsa pra॒jāpa̭ti॒-mupā̭dhāva॒-ttasmā̭ e॒ta-mai॒ndra-mekā̭daśakapāla॒-nnira̭vapa॒-ttenai॒-vā-'smi̭-nnindri॒ya-ma̭dadhā॒-cchakva̭rī yājyānuvā॒kyḙ akaro॒-dvajro॒ vai śakva̭rī॒ sa ḙnaṃ॒-va~jro॒ bhūtyā̭ aindha॒- [bhūtyā̭ aindha, so̭-'bhava॒-thso̭-'bibhe-] || 44 ||
-so̭-'bhava॒thso̭-'bibhe-dbhū॒taḥ pra mā̭ dhakṣya॒tīti॒ sa pra॒jāpa̭ti॒-mpuna॒rupā̭-'dhāva॒-thsa pra॒jāpa̭ti॒-śśakva̭ryā॒ adhi̭ re॒vatī॒-nnira̭mimīta॒ śāntyā॒ apra̭dāhāya॒ yo-'lagg̭ śri॒yai san-thsa॒dṛṅkhsa̭mā॒nai-ssyā-ttasmā̭ e॒ta-mai॒ndra-mekā̭daśakapāla॒-nnirva̭pe॒-dindra̭me॒va svena̭ bhāga॒dheye॒nopa̭ dhāvati॒ sa e॒vā-'smi̭-nnindri॒ya-nda̭dhāti re॒vatī̭ puronuvā॒kyā̭ bhavati॒ śāntyā॒ apra̭dāhāya॒ śakva̭rī yā॒jyā̭ vajro॒ vai śakva̭rī॒sa ḙnaṃ॒-va~jro॒ bhūtyā̭ indhe॒ bhava̭tye॒va || 45 ||
(api॒ - tagg - syṷ - rvai - ndha - bhavati॒ - catṷrdaśa ca ) (a. 8)
ā॒gnā॒-vai॒ṣṇa॒va-mekā̭daśakapāla॒-nnirva̭pe-dabhi॒cara॒n-thsara̭sva॒tyājya̭ bhāgā॒ syā-dbā̭rhaspa॒t yaśca॒ruryadā᳚gnā-vaiṣṇa॒va ekā̭daśakapālo॒ bhava̭tya॒gni-ssarvā̭ de॒vatā॒ viṣṇṷrya॒jño de॒vatā̭bhi-ścai॒vainaṃ̭-ya~॒jñena̭ cā॒bhi ca̭rati॒-sara̭sva॒tyājya̭bhāgā bhavati॒ vāgvai sara̭svatī vā॒caivaina̭-ma॒bhi ca̭rati bārhaspa॒tya-śca॒ru rbha̭vati॒ brahma॒ vai de॒vānā॒-mbṛha॒spati॒ rbrahma̭ṇai॒vaina̭-ma॒bhi ca̭rati॒ [-ma॒bhi ca̭rati, prati॒ vai] || 46 ||
prati॒ vai pa॒rastā̭-dabhi॒cara̭nta-ma॒bhi ca̭ranti॒ dvedvḙ puro-'nuvā॒kyḙ kuryā॒dati॒ prayṷktyā e॒tayai॒va ya̭jetābhi ca॒ryamā̭ṇo de॒vatā̭bhi-re॒va de॒vatāḥ᳚ prati॒cara̭ti ya॒jñena̭ ya॒jñaṃ-vā~॒cā vāca॒-mbrahma̭ṇā॒ brahma॒ sa de॒vatā᳚ścai॒va ya॒jña-ñca̭ maddhya॒to vyava̭sarpati॒ tasya॒ na kuta̭-śca॒nopā᳚vyā॒dho bha̭vati॒ naina̭-mabhi॒caran᳚-thstṛṇuta āgnāvaiṣṇa॒va-mekā̭daśakapāla॒-nnirva̭pe॒dyaṃ-ya~॒jño no- [-ya॒jño na, u॒pa॒namḙda॒gni-ssarvā̭] || 47 ||
-pa॒namḙda॒gni-ssarvā̭ de॒vatā॒ viṣṇṷ-rya॒jño᳚-'gni-ñcai॒va viṣṇṷ-ñca॒ svena̭ bhāga॒dheye॒nopa̭ dhāvati॒ tāve॒vāsmai̭ ya॒jña-mpraya̭cchata॒ upai̭naṃ-ya~॒jño na̭matyāgnā- vaiṣṇa॒va-ṅghṛ॒te ca॒ru-nnirva̭pe॒ccakṣṷṣkāmo॒-'gnervai cakṣṷṣā manu॒ṣyā̭ vi pa̭śyanti ya॒jñasya̭ de॒vā a॒gni-ñcai॒va viṣṇṷ-ñca॒ svena̭ bhāga॒dheye॒nopa̭ dhāvati॒ tāve॒vā- [tāve॒va, a॒smi॒n cakṣṷrdhatta॒-] || 48 ||
-'smi॒n cakṣṷ-rdhatta॒-ścakṣṷṣmā-ne॒va bha̭vati dhe॒nvai vā e॒ta-dreto॒ yadājya̭-mana॒ḍuha̭-staṇḍu॒lā mi̭thu॒nā-de॒vāsmai॒ cakṣuḥ॒ praja̭nayati ghṛ॒te bha̭vati॒ tejo॒ vai ghṛ॒ta-nteja॒ścakṣu॒-steja̭sai॒vāsmai॒ teja॒-ścakṣu॒rava̭ rundha indri॒yaṃ-vai~ vī॒ryaṃ̭-vṛ~ṅkte॒ bhrātṛ̭vyo॒ yaja̭mā॒no-'ya̭jamānasyā-dhva॒raka̭lpā॒-mprati॒ nirva̭pe॒-dbhrātṛ̭vye॒ yaja̭māne॒ nā-'sye᳚ndri॒yaṃ- [nā-'sye᳚ndri॒yam, vī॒ryaṃ̭ ~vṛṅkte] || 49 ||
-~vī॒ryaṃ̭ ~vṛṅkte pu॒rāvā॒caḥ prava̭dito॒-rnirva̭pe॒-dyāva̭tye॒va vā-ktāmapro̭ditā॒-mbhrātṛ̭vyasya vṛṅkte॒ tāma̭sya॒ vāca̭-mpra॒vada̭ntī-ma॒nyā vāco-'nu॒ prava̭danti॒ tā i̭ndri॒yaṃ-vī~॒ryaṃ̭-ya~ja̭māne dadhatyāgnā vaiṣṇa॒va-ma॒ṣṭāka̭pāla॒-nnirva̭pe-tprāta-ssavana॒syā̭-'' kā॒le sara̭sva॒tyājya̭bhāgā॒ syā-dbā̭rhaspa॒tyaśca॒ru- ryada॒ṣṭāka̭pālo॒ bhava̭tya॒ṣṭākṣa̭rā gāya॒trī gā̭ya॒tra-mprā̭ta-ssava॒na-mprā̭ta-ssava॒name॒va tenā᳚-''pno- [tenā᳚-''pnoti, ā॒gnā॒vai॒ṣṇa॒va-] || 50 ||
-tyāgnāvaiṣṇa॒va-mekā̭daśakapāla॒-nnirva̭pe॒-nmāddhya̭ndinasya॒ sava̭nasyā-'' kā॒le sara̭sva॒tyājya̭bhāgā॒ syā-dbā̭rhaspa॒tya-śca॒ru ryadekā̭daśakapālo॒ bhava॒tyekā̭daśākṣarā tri॒ṣṭu-ptraiṣṭṷbha॒-mmāddhya̭ndina॒gṃ॒ sava̭na॒-mmāddhya̭dinname॒va sava̭na॒-ntenā᳚-''pnotyāgnāvaiṣṇa॒va-ndvāda̭śakapāla॒-nnirva̭pe-ttṛtīyasava॒nasyā̭-''kā॒le sara̭sva॒tyājya̭bhāgā॒ syā-dbā̭rhaspa॒tya-śca॒rurya-ddvāda̭śakapālo॒ bhava̭ti॒ dvāda̭śākṣarā॒ jaga̭tī॒ jāga̭ta-ntṛtīyasava॒na-ntṛ̭tīya sava॒name॒va tenā᳚-''pnoti de॒vatā̭bhire॒va de॒vatāḥ᳚ [de॒vatāḥ᳚, pra॒ti॒cara̭ti] || 51 ||
prati॒cara̭ti ya॒jñena̭ ya॒jñaṃ-vā~॒cā vāca॒-mbrahma̭ṇā॒ brahma̭ ka॒pālai̭re॒va chandāg̭syā॒pnoti̭ puro॒ḍāśai॒-ssava̭nāni maitrāvaru॒ṇa-meka̭kapāla॒-nnirva̭pe-dva॒śāyai̭ kā॒le yaivāsau bhrātṛ̭vyasya va॒śā-'nṷ̄ba॒ndhyā̭ so e॒vaiṣaitasyaika̭kapālo bhavati॒ na hi ka॒pālaiḥ᳚ pa॒śu-marha॒tyāptu᳚m || 52 ||
(brahma̭ṇai॒vaina̭ma॒bhi ca̭rati - ya॒jño na - tāve॒vā - 'sye᳚ndri॒ya - mā᳚pnoti -de॒vatāḥ᳚ - sa॒ptatrigṃ̭śacca ) (a. 9)
a॒sāvā̭di॒tyo na vya̭rocata॒ tasmai̭ de॒vāḥ prāya̭ścitti-maiccha॒-ntasmā̭ e॒tagṃ so̭mārau॒dra-ñca॒ru-nnira̭vapa॒-ntenai॒vāsmi॒-nruca̭madadhu॒ryo bra̭hmavarca॒sakā̭ma॒-ssyā-ttasmā̭ e॒tagṃ so̭mārau॒dra-ñca॒ru-nnirva̭pe॒-thsoma̭-ñcai॒va ru॒dra-ñca॒ svena̭ bhāga॒dheye॒nopa̭ dhāvati॒ tāve॒vāsmi̭-nbrahmavarca॒sa-ndha̭tto brahmavarca॒syḙva bha̭vati tiṣyāpūrṇamā॒se nirva̭pedru॒dro [nirva̭pedru॒draḥ, vai ti॒ṣyaḥ̭ somaḥ̭] || 53 ||
vai ti॒ṣyaḥ̭ somaḥ̭ pū॒rṇamā̭sa-ssā॒kṣāde॒va bra̭hmavarca॒samava̭ rundhe॒ pari̭śrite yājayati brahmavarca॒sasya॒ pari̭gṛhītyai śve॒tāyai᳚ śve॒tava̭thsāyai du॒gdha-mma̭thi॒tamājya̭-mbhava॒tyājya॒-mprokṣa̭ṇa॒mājyḙna mārjayante॒ yāva̭de॒va bra̭hmavarca॒sa-nta-thsarva̭-ṅkaro॒tyati̭ brahmavarca॒sa-ṅkri̭yata॒ ityā̭hurīśva॒ro du॒ścarmā॒ bhavi̭to॒riti̭ māna॒vī ṛcaṷ dhā॒yyḙ kuryā॒-dyadvai kiñca॒ manu॒-rava̭da॒tta-dbhḙṣa॒jaṃ- [-dbhḙṣa॒jam, bhe॒ṣa॒ja-me॒vā-'smai̭] || 54 ||
-bhḙṣa॒ja-me॒vā-'smai̭ karoti॒ yadi̭ bibhī॒yā-ddu॒ścarmā̭ bhaviṣyā॒mīti̭ somāpau॒ṣṇa-ñca॒ru-nnirva̭pe-thsau॒myo vai de॒vata̭yā॒ purṷṣaḥ pau॒ṣṇāḥ pa॒śava॒-ssvayai॒ vāsmai̭ de॒vata̭yā pa॒śubhi॒-stvaca̭-ṅkaroti॒ na du॒ścarmā̭ bhavati somārau॒dra-ñca॒ru-nnirva̭pe-tpra॒jākā̭ma॒-ssomo॒ vai rḙto॒dhā a॒gniḥ pra॒jānā᳚-mprajanayi॒tā soma̭ e॒vāsmai॒ reto॒ dadhā᳚tya॒gniḥ pra॒jā-mpraja̭nayati vi॒ndate᳚ - [ ] || 55 ||
pra॒jāgṃ so̭mārau॒dra-ñca॒ru-nnirva̭pe-dabhi॒caran᳚-thsau॒myo vai de॒vata̭yā॒ purṷṣa e॒ṣa ru॒dro yada॒gni-ssvāyā̭ e॒vaina̭-nde॒vatā̭yai ni॒ṣkrīya̭ ru॒drāyāpi̭ dadhāti tā॒jagārti॒-mārccha̭ti somārau॒dra-ñca॒ru-nnirva̭pe॒-jjyogā̭mayāvī॒ somaṃ॒-vā~ e॒tasya॒ raso̭ gacchatya॒gnigṃ śarī̭raṃ॒-ya~sya॒ jyogā॒maya̭ti॒ somā̭de॒vāsya॒ rasa̭-nniṣkrī॒ṇātya॒gne-śśarī̭ramu॒ta yadī॒- [yadi̭, i॒tāsu॒ rbhava̭ti॒] || 56 ||
-tāsu॒ rbhava̭ti॒ jīva̭tye॒va so̭māru॒drayo॒rvā e॒ta-ṅgra̭si॒tagṃ hotā॒ niṣkhi̭dati॒ sa ī᳚śva॒ra ārti॒mārto̭-rana॒ḍvān. hotrā॒ deyo॒ vahni॒rvā a̭na॒ḍvān. vahni॒r॒hotā॒ vahni̭nai॒va vahni̭-mā॒tmānagg̭ spṛṇoti somārau॒dra-ñca॒ru-nnirva̭pe॒dyaḥ kā॒mayḙta॒ sve᳚-'smā ā॒yata̭ne॒ bhrātṛ̭vya-ñjanayeya॒miti॒ vedi̭-mpari॒gṛhyā॒-'rdha-mṷddha॒nyā-da॒rdha-nnārdha-mba॒r॒hiṣaḥ̭ stṛṇī॒yā-da॒rdha-nnārdha-mi॒ddhmasyā᳚-'bhyā-da॒ddhyā-dad॒rdha-nna sva e॒vāsmā̭ ā॒yata̭ne॒ bhrātṛ̭vya-ñjanayati || 57 ||
(ru॒dro - bhḙṣa॒jaṃ - vi॒ndate॒- yadi̭ - stṛṇī॒yāda॒rdhaṃ - dvāda̭śa ca) (a. 10)
ai॒ndra-mekā̭daśakapāla॒-nnirva̭penmāru॒tagṃ sa॒ptaka̭pāla॒-ṅgrāma̭kāma॒ indra̭-ñcai॒va ma॒ruta̭śca॒ svena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vatyāhava॒nīya̭ ai॒ndramadhi̭ śrayati॒ gārha̭patye māru॒ta-mpā̭pavasya॒sasya॒ vidhṛ̭tyai sa॒ptaka̭pālo māru॒to bha̭vati sa॒ptaga̭ṇā॒ vai ma॒ruto̭gaṇa॒śa e॒vāsmai̭ sajā॒tānava̭ rundhe-'nū॒cyamā̭na॒ ā sā̭dayati॒ viśa̭me॒vā- [viśa̭me॒va, a॒smā॒ anṷvartmānaṃ-] || 58 ||
-'smā॒ anṷvartmāna-ṅkarotye॒tāme॒va nirva̭pe॒dyaḥ kā॒mayḙta kṣa॒trāya̭ ca vi॒śe ca̭ sa॒mada̭-ndaddhyā॒-mityai॒ndrasyā̭-'va॒dya-nbrṷ̄yā॒-dindrā॒yā-'nṷ brū॒hītyā॒śrāvya̭ brūyā-nma॒ruto̭ ya॒jeti̭ māru॒tasyā̭-'va॒dya-nbrṷ̄yā-nma॒rudbhyo-'nṷ brū॒hītyā॒śrāvya̭ brūyā॒dindraṃ̭-ya~॒jeti॒ sva e॒vaibhyo̭ bhāga॒dheyḙ sa॒mada̭-ndadhāti vitṛgṃhā॒ṇā-sti̭ṣṭhantye॒ tāme॒va [ ] || 59 ||
nirva̭pe॒dyaḥ kā॒mayḙta॒ kalpḙra॒nniti̭ yathādeva॒ta-ma̭va॒dāya̭ yathā deva॒taṃ-ya~̭je-dbhāga॒dheyḙnai॒vaināṋ yathāya॒tha-ṅka̭lpayati॒ kalpa̭nta e॒vaindra-mekā̭daśakapāla॒-nnirva̭pe-dvaiśvade॒va-ndvāda̭śakapāla॒-ṅgrāma̭kāma॒ indra̭-ñcai॒va viśvāg̭śca de॒vān-thsvena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vatyai॒ndrasyā̭-'va॒dāya̭ vaiśvade॒vasyāva̭ dye॒-dathai॒ndrasyo॒- [-dathai॒ndrasya̭, u॒pari̭ṣṭā-] || 60 ||
-pari̭ṣṭā-dindri॒yeṇai॒vāsmā̭ ubha॒yataḥ̭ sajā॒tā-npari̭ gṛhṇātyupādhā॒yya̭ pūrvayaṃ॒-vā~so॒ dakṣi̭ṇā sajā॒tānā॒mupa̭hityai॒ pṛśñi̭yai du॒gdhe praiya̭ṅgava-ñca॒ru-nnirva̭penma॒rudbhyo॒ grāma̭kāmaḥ॒ pṛśñi̭yai॒ vai paya̭so ma॒ruto̭ jā॒tāḥ pṛśñi̭yai pri॒yaṅga̭vo māru॒tāḥ khalu॒ vai de॒vata̭yā sajā॒tā ma॒ruta̭ e॒va svena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vati pri॒yava̭tī yājyānuvā॒kyḙ [yājyānuvā॒kye᳚, bha॒va॒taḥ॒ pri॒yame॒vainagṃ̭] || 61 ||
bhavataḥ pri॒yame॒vainagṃ̭ samā॒nānā᳚-ṅkaroti dvi॒padā̭ puro-'nuvā॒kyā̭ bhavati dvi॒pada̭ e॒vāva̭ rundhe॒ catṷṣpadā yā॒jyā̭ catṷṣpada e॒va pa॒śūnava̭ rundhe devāsu॒rā-ssaṃya~̭ttā āsa॒-nte de॒vā mi॒tho vipri̭yā āsa॒-nte᳚(1॒) 'nyo᳚-'nyasmai॒ jyaiṣṭhyā॒yā-ti̭ṣṭhamānā-ścatu॒rdhā vya̭krāma-nna॒gni-rvasṷbhi॒-ssomo̭ ru॒drairindro̭ ma॒rudbhi॒-rvarṷṇa ādi॒tyai-ssa indraḥ̭ pra॒jāpa̭ti॒-mupā̭-'dhāva॒-tta- [-'dhāva॒-ttam, e॒tayā̭] || 62 ||
-me॒tayā̭ saṃ॒(2)jñānyā̭-'yājaya-da॒gnaye॒ vasṷmate puro॒ḍāśa̭-ma॒ṣṭāka̭pāla॒-nnira̭vapa॒-thsomā̭ya ru॒drava̭te ca॒rumindrā̭ya ma॒rutva̭te puro॒ḍāśa॒ -mekā̭daśakapālaṃ॒-va~rṷṇāyā-''di॒tyava̭te ca॒ru-ntato॒ vā indra̭-nde॒vā jyaiṣṭhyā̭yā॒bhi sama̭jānata॒ ya-ssa̭mā॒nai-rmi॒tho vipri̭ya॒-ssyā-ttame॒tayā̭ saṃ॒(2)jñānyā̭ yājaye-da॒gnaye॒ vasṷmate puro॒ḍāśa̭-ma॒ṣṭāka̭pāla॒-nnirva̭pe॒-thsomā̭ya ru॒drava̭te ca॒ru-mindrā̭ya ma॒rutva̭te puro॒ḍāśa॒-mekā̭daśakapālaṃ॒-va~rṷṇāyā ''di॒tyava̭te ca॒ru-mindra̭-me॒vaina̭-mbhū॒ta-ñjyaiṣṭhyā̭ya samā॒nā a॒bhi sa-ñjā̭nate॒ vasi̭ṣṭha-ssamā॒nānā᳚-mbhavati || 63 ||
(viśa̭me॒va - ti̭ṣṭhantye॒tāme॒ - vāthai॒ndrasya̭ - yājyānuvā॒kyḙ - taṃ - ~varṷṇāya॒ -catṷrdaśa ca) (a. 11)
hi॒ra॒ṇya॒ga॒rbha āpo̭ ha॒ yatprajā̭pate || sa vḙda pu॒traḥ pi॒tara॒gṃ॒ sa mā॒tara॒gṃ॒ sa sū॒nubha̭rva॒-thsa bhṷva॒-tpuna̭rmaghaḥ | sa dyāmaurṇo̭da॒ntari̭kṣa॒gṃ॒ sa suva॒-ssa viśvā॒ bhuvo̭ abhava॒-thsa ā-'bha̭vat || udu॒ tya-ñci॒tram || sa pra̭tna॒vannavī̭ya॒sā-'gne᳚ dyu॒mnena̭ saṃ॒ya~tā᳚ | bṛ॒ha-tta̭tantha bhā॒nunā᳚ || ni kāvyā̭ ve॒dhasa॒-śśaśva̭taska॒r॒haste॒ dadhā̭no॒ [dadhā̭naḥ, naryā̭ pu॒rūṇi̭ |] || 64 ||
naryā̭ pu॒rūṇi̭ | a॒gnirbhṷvadrayi॒patī̭ rayī॒ṇāgṃ sa॒trā ca̭krā॒ṇo a॒mṛtā̭ni॒ viśvā᳚ || hira̭ṇyapāṇimū॒tayḙ savi॒tāra॒mupa̭ hvaye | sa cettā̭ de॒vatā̭ pa॒dam || vā॒mama॒dya sa̭vitarvā॒mamu॒ śvo di॒vedi̭ve vā॒mama॒smabhyagṃ̭ sāvīḥ | vā॒masya॒ hi kṣaya̭sya deva॒ bhūrḙra॒yā dhi॒yā vā̭ma॒bhājaḥ̭ syāma || baḍi॒tthā parva̭tānā-ṅkhi॒dra-mbi̭bharṣi pṛthivi | pra yā bhṷ̄mi pravatvati ma॒hnā ji॒noṣi̭ [ji॒noṣi̭, ma॒hi॒ni॒ |] || 65 ||
mahini || stomā̭sastvā vicāriṇi॒ prati̭ṣṭobhantya॒ktubhiḥ̭ | prayā vāja॒-nna heṣa̭nta-mpe॒ru-masya̭syarjuni || ṛ॒dū॒darḙṇa॒ sakhyā̭ saceya॒ yo mā॒ na riṣye᳚ddharyaśva pī॒taḥ | a॒yaṃ-ya~-ssomo॒ nyadhā᳚yya॒sme tasmā॒ indra̭-mpra॒tira̭-me॒myaccha̭ || āpā᳚ntamanyu-stṛ॒pala̭-prabharmā॒ dhuni॒-śśimī̭ vā॒ñcharṷmāgṃ ṛjī॒ṣī | somo॒ viśvā᳚nyata॒sā vanā̭ni॒ nārvāgindra̭-mprati॒mānā̭ni debhuḥ || pra- [pra, su॒vā॒na-ssoma̭] || 66 ||
-sṷvā॒na-ssoma̭ ṛta॒yu-ści̭ke॒tendrā̭ya॒ brahma̭ ja॒mada̭gni॒-rarcanṋ | vṛṣā̭ ya॒ntā-'si॒ śava̭sa-stu॒rasyā॒-'nta-rya̭ccha gṛṇa॒te dha॒rtra-ndṛgṃ̭ha || sa॒bādha̭ste॒ mada̭-ñca śuṣma॒ya-ñca॒ brahma॒ naro᳚ brahma॒kṛtaḥ̭ saparyann | a॒rko vā॒ ya-ttu॒rate॒ soma̭cakṣā॒-statre-dindro̭ dadhate pṛ॒thsu tu॒ryām || vaṣa̭-ṭte viṣṇavā॒sa ā kṛ̭ṇomi॒ tanmḙ juṣasva śipiviṣṭa ha॒vyam | || 67 ||
vardha̭ntu tvā suṣṭu॒tayo॒ giro̭ me yū॒ya-mpā̭ta sva॒stibhi॒-ssadā̭ naḥ ||pra ta-ttḙ a॒dya śi̭piviṣṭa॒ nāmā॒-'rya-śśagṃ̭ sāmi va॒yunā̭ni vi॒dvān | tantvā̭ gṛṇāmi ta॒vasa॒-mata̭vīyā॒n kṣaya̭ntama॒sya raja̭saḥ parā॒ke || kimi-ttḙ viṣṇo pari॒cakṣya̭-mbhū॒-tpra yadva̭va॒kṣe śi̭pivi॒ṣṭo a̭smi | mā varpo̭ a॒smadapa̭ gūha e॒tadya-da॒nyarṷ̄pa-ssami॒the ba॒bhūtha̭ | || 68 ||
agne॒ dā dā॒śuṣḙ ra॒yiṃ-vī~॒rava̭nta॒-mparī̭ṇasam | śi॒śī॒hi naḥ̭ sūnu॒mataḥ̭ || dā no̭ agne śa॒tino॒ dā-ssa̭ha॒sriṇo̭ du॒ro na vāja॒gg॒ śrutyā॒ apā̭ vṛdhi | prācī॒ dyāvā̭pṛthi॒vī brahma̭ṇā kṛdhi॒ suva॒rṇa śu॒kramu॒ṣaso॒ vi di̭dyutuḥ || a॒gnirdā॒ dravi̭ṇaṃ-vī~॒rapḙśā a॒gnir-ṛṣiṃ॒-ya~-ssa॒hasrā̭ sa॒noti̭ | a॒gnirdi॒vi ha॒vyamā ta̭tānā॒-'gne-rdhāmā̭ni॒ vibhṛ̭tā puru॒trā || mā [mā, no॒ ma॒rdhī॒ rā tū bha̭ra |] || 69 ||
no̭ mardhī॒ rā tū bha̭ra || ghṛ॒ta-nna pū॒ta-nta॒nūra̭re॒pā-śśuci॒ hira̭ṇyam | ta-ttḙ ru॒kmo na ro̭cata svadhāvaḥ || u॒bhe sṷścandra sa॒rpiṣo॒ darvī᳚ śrīṇīṣa ā॒sani̭ | u॒to na॒ u-tpṷpūryā u॒ktheṣṷ śavasaspata॒ iṣagg̭ sto॒tṛbhya॒ ā bha̭ra || vāyo̭ śa॒tagṃ harī̭ṇāṃ-yu~॒vasva॒ poṣyā̭ṇām | u॒ta vā̭ te saha॒sriṇo॒ ratha॒ ā yā̭tu॒ pāja̭sā || pra yābhi॒- [pra yābhiḥ, yāsi̭ dā॒śvāgṃ sa॒macchā̭] || 70 ||
-ryāsi̭ dā॒śvāgṃ sa॒macchā̭ ni॒yudbhi̭-rvāyavi॒ṣṭayḙ duro॒ṇe | ni no̭ ra॒yigṃ su॒bhoja̭saṃ-yu~ve॒ha ni vī॒rava॒-dgavya॒maśvi̭ya-ñca॒ rādhaḥ̭ ||re॒vatī᳚rna-ssadha॒māda॒ indrḙ santu tu॒vivā̭jāḥ | kṣu॒manto॒ yābhi॒rmadḙma || re॒vāgṃ idre॒vataḥ̭ sto॒tā syā-ttvāva̭to ma॒ghonaḥ̭ | predṷ hariva-śśru॒tasya̭ || 71 ||
(dadhā̭no - ji॒noṣi̭ - debhuḥ॒ pra - ha॒vyaṃ - ba॒bhūtha॒ - mā - yābhi̭ - ścatvāri॒gṃ॒śacca̭ ) (a. 12)
(pra॒jāpa̭ti॒stā-ssṛ॒ṣṭā - a॒gnayḙ pathi॒kṛte॒ - gnaye॒ kāmā̭yā॒ - gnayenna̭vate -vaiśvāna॒ra -mā̭di॒tya-ñca॒ru - mai॒ndra-ñca॒ru - mindrā॒yānvṛ̭java - āgnāvaiṣṇa॒va -ma॒sau so̭mārau॒dra - mai॒ndrama॒kā̭daśakapālagṃ- hiraṇyaga॒rbho - dvāda̭śa )
(pra॒jāpa̭ti - ra॒gnaye॒ kāmā̭yā॒ - 'bhi sa-mbha̭vato॒ - yo vi̭dviṣā॒ṇayo̭ -ri॒dhme sanna̭ hye - dāgnāvaiṣṇa॒vamu॒ - pari̭ṣṭā॒ - dyāsi̭ dā॒śvāgṃsa॒ - meka̭saptatiḥ )
(pra॒jāpa̭tiḥ॒, predṷ hariva-śśru॒tasya̭)
|| hariḥ̭ om ||
|| kṛṣṇa yajurvedīya taittirīya saṃhitāyā-ndvitīyakāṇḍe dvitīyaḥ praśna-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय संहिताया-न्द्वितीयकाण्डे द्वितीयः प्रश्नः - इष्टिविधानं
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
प्र॒जापतिः॑ प्र॒जा अ॑सृजत॒ ता-स्सृ॒ष्टा॒ इन्द्रा॒ग्नी अपा॑गूहता॒ग्ं॒ सो॑-ऽचाय-त्प्र॒जाप॑तिरिन्द्रा॒ग्नी वै मे᳚ प्र॒जा अपा॑घुक्षता॒मिति॒ स ए॒तमै᳚न्द्रा॒ग्न- मेका॑दशकपाल-मपश्य॒-त्त-न्निर॑वप॒-त्ताव॑स्मै प्र॒जाः प्रासा॑धयता- मिन्द्रा॒ग्नी वा ए॒तस्य॑ प्र॒जामप॑ गूहतो॒ यो-ऽलं॑ प्र॒जायै॒ स-न्प्र॒जा-न्न वि॒न्दत॑ ऐन्द्रा॒ग्न-मेका॑दशकपाल॒-न्निर्व॑पेत्-प्र॒जाका॑म इन्द्रा॒ग्नी [ ] 1
ए॒व स्वेन॑ भाग॒धेये॒नोप॑ धावति॒ तावे॒वास्मै᳚ प्र॒जा-म्प्र सा॑धयतो वि॒न्दते᳚ प्र॒जा-मै᳚न्द्रा॒ग्न-मेका॑दशकपाल॒-न्निर्व॑पे॒-थ्स्पर्ध॑मानः॒, क्षेत्रे॑ वा सजा॒तेषु॑ वेन्द्रा॒ग्नी ए॒व स्वेन॑ भाग॒धेये॒नोप॑ धावति॒ ताभ्या॑मे॒वेन्द्रि॒यं ँवी॒र्य॑-म्भ्रातृ॑व्यस्य वृङ्क्ते॒ वि पा॒प्मना॒ भ्रातृ॑व्येण जय॒ते-ऽप॒ वा ए॒तस्मा॑दिन्द्रि॒यं-वीँ॒र्य॑-ङ्क्रामति॒ य-स्स॑ग्रा॒म्म-मु॑पप्र॒यात्यै᳚न्द्रा॒ग्न-मेका॑दशकपाल॒-न्नि- [-मेका॑दशकपाल॒-न्निः, व॒पे॒-थ्स॒ङ्ग्रा॒म-] 2
-र्व॑पे-थ्सङ्ग्रा॒म-मु॑पप्रया॒स्य-न्नि॑न्द्रा॒ग्नी ए॒व स्वेन॑ भाग॒धेये॒नोप॑ धावति॒ तावे॒वास्मि॑-न्निन्द्रि॒यं-वीँ॒र्य॑-न्धत्त-स्स॒हेन्द्रि॒येण॑ वी॒र्ये॑णोप॒ प्र या॑ति॒ जय॑ति॒ तग्ं स॑ग्रा॒म्मं-विँ वा ए॒ष इ॑न्द्रि॒येण॑ वी॒र्ये॑णर्ध्यते॒ य-स्स॑ग्रा॒म्म-ञ्जय॑त्यैन्द्रा॒ग्न-मेका॑दशकपाल॒-न्निर्व॑पे-थ्सङ्ग्रा॒म-ञ्जि॒त्वेन्द्रा॒ग्नी ए॒व स्वेन॑ भाग॒धेये॒नोप॑ धावति॒ तावे॒वास्मि॑-न्निद्रि॒यं-वीँ॒र्य॑न्- [वी॒र्य᳚म्, ध॒त्तो॒ नेन्द्रि॒येण॑] 3
-धत्तो॒ नेन्द्रि॒येण॑ वी॒र्ये॑ण॒ व्यृ॑द्ध्य॒ते-ऽप॒ वा ए॒तस्मा॑दिन्द्रि॒यं-वीँ॒र्य॑-ङ्क्रामति॒ य एति॑ ज॒नता॑मैन्द्रा॒ग्न-मेका॑दशकपाल॒-न्निर्व॑पे-ज्ज॒नता॑मे॒ष्य-न्नि॑न्द्रा॒ग्नी ए॒व स्वेन॑ भाग॒धेये॒नोप॑ धावति॒ तावे॒वास्मि॑-न्निन्द्रि॒यं-वीँ॒र्य॑-न्धत्त-स्स॒हेन्द्रि॒येण॑ वी॒र्ये॑ण ज॒नता॑मेति पौ॒ष्ण-ञ्च॒रुमनु॒ निर्व॑पे-त्पू॒षा वा इ॑न्द्रि॒यस्य॑ वी॒र्य॑स्या-ऽनुप्रदा॒ता पू॒षण॑मे॒व [ ] 4
स्वेन॑ भाग॒धेये॒नोप॑ धावति॒ स ए॒वास्मा॑ इन्द्रि॒यं-वीँ॒र्य॑मनु॒ प्रय॑च्छति क्षैत्रप॒त्य-ञ्च॒रु-न्निर्व॑पे-ज्ज॒नता॑-मा॒गत्ये॒यं-वैँ क्षेत्र॑स्य॒ पति॑र॒स्यामे॒व प्रति॑ तिष्ठत्यैन्द्रा॒ग्न-मेका॑दशकपाल-मु॒परि॑ष्टा॒-न्निर्व॑पेद॒स्यामे॒व प्र॑ति॒ष्ठाये᳚न्द्रि॒यं-वीँ॒र्य॑-मु॒परि॑ष्टा-दा॒त्म-न्ध॑त्ते ॥ 5 ॥
(प्र॒जाका॑म इन्द्रा॒ग्नी - उ॑पप्र॒यात्यै᳚न्द्रा॒ग्नमेका॑दशकपाल॒-न्नि- र्वी॒र्यं॑ - पू॒षण॑मे॒ वै - का॒न्नच॑त्वारि॒ग्ं॒शच्च॑ ) (अ. 1)
अ॒ग्नये॑ पथि॒कृते॑ पुरो॒डाश॑-म॒ष्टाक॑पाल॒-न्निर्व॑पे॒द्यो द॑र्शपूर्णमासया॒जी सन्न॑मावा॒स्यां᳚-वाँ पौर्णमा॒सीं-वाँ॑-ऽतिपा॒दये᳚-त्प॒थो वा ए॒षोद्ध्यप॑थेनैति॒ यो द॑र्शपूर्णमासया॒जी सन्न॑मावा॒स्यां᳚-वाँ पौर्णमा॒सीं-वाँ॑तिपा॒दय॑त्य॒ग्निमे॒व प॑थि॒कृत॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒मप॑था॒-त्पन्था॒मपि॑ नयत्यन॒ड्वा-न्दक्षि॑णा व॒ही ह्ये॑ष समृ॑द्ध्या अ॒ग्नये᳚ व्र॒तप॑तये [व्र॒तप॑तये, पु॒रो॒डाश॑-] 6
पुरो॒डाश॑-म॒ष्टाक॑पाल॒-न्निर्व॑पे॒द्य आहि॑ताग्नि॒-स्सन्न॑व्र॒त्यमि॑व॒ चरे॑द॒ग्निमे॒व व्र॒तप॑ति॒ग्ग्॒ स्वेन॑ भाग॒धेये॒नोप॑ धावति॒ स ए॒वैनं॑-व्रँ॒तमा ल॑भंयँति॒ व्रत्यो॑ भवत्य॒ग्नये॑ रक्षो॒घ्ने पु॑रो॒डाश॑-म॒ष्टाक॑पाल॒-न्निर्व॑पे॒द्यग्ं रक्षाग्ं॑सि॒ सचे॑रन्न॒ग्निमे॒व र॑क्षो॒हण॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मा॒-द्रक्षा॒ग्॒स्यप॑ हन्ति॒ निशि॑ताया॒-न्निर्व॑पे॒- [निर्व॑पेत्, निशि॑ताया॒ग्ं॒ हि] 7
-न्निशि॑ताया॒ग्ं॒ हि रक्षाग्ं॑सि प्रे॒रते॑ स॒प्रेंर्णा᳚न्ये॒वैना॑नि हन्ति॒ परि॑श्रिते याजये॒-द्रक्ष॑सा॒-मन॑न्ववचाराय रक्षो॒घ्नी या᳚ज्यानुवा॒क्ये॑ भवतो॒ रक्ष॑सा॒ग्॒ स्तृत्या॑ अ॒ग्नये॑ रु॒द्रव॑ते पुरो॒डाश॑-म॒ष्टाक॑पाल॒-न्निर्व॑पे-दभि॒चर॑-न्ने॒षा वा अ॑स्य घो॒रा त॒नूर्य-द्रु॒द्रस्तस्मा॑ ए॒वैन॒मावृ॑श्चति ता॒जगार्ति॒-मार्च्छ॑त्य॒ग्नये॑ सुरभि॒मते॑ पुरो॒डाश॑-म॒ष्टाक॑पाल॒-न्निर्व॑पे॒द्यस्य॒ गावो॑ वा॒ पुरु॑षा [वा॒ पुरु॑षाः, वा॒ प्र॒मीये॑र॒न्॒] 8
वा प्र॒मीये॑र॒न्॒ यो वा॑ बिभी॒यादे॒षा वा अ॑स्य भेष॒ज्या॑ त॒नूर्य-थ्सु॑रभि॒मती॒-तयै॒वा-ऽस्मै॑ भेष॒ज-ङ्क॑रोति सुरभि॒मते॑ भवति पूतीग॒न्धस्या-ऽप॑हत्या अ॒ग्नये॒ क्षाम॑वते पुरो॒डाश॑-म॒ष्टाक॑पाल॒-न्निर्व॑पे-थ्सङ्ग्रा॒मे संयँ॑त्ते भाग॒धेये॑नै॒वैनग्ं॑ शमयि॒त्वा परा॑न॒भि निर्दि॑शति॒ यमव॑रेषां॒-विँद्ध्य॑न्ति॒ जीव॑ति॒ स य-म्परे॑षा॒-म्प्र स मी॑यते॒ जय॑ति॒ तग्ं स॑ङ्ग्रा॒म- [तग्ं स॑ङ्ग्रा॒मम्, अ॒भि वा ए॒ष] 9
-म॒भि वा ए॒ष ए॒तानु॑च्यति॒ येषा᳚-म्पूर्वाप॒रा अ॒न्वञ्चः॑ प्र॒मीय॑न्ते पुरुषाहु॒तिर्-ह्य॑स्य प्रि॒यत॑मा॒-ऽग्नये॒ क्षाम॑वते पुरो॒डाश॑-म॒ष्टाक॑पाल॒-न्निर्व॑पे-द्भाग॒धेये॑नै॒वैनग्ं॑ शमयति॒ नैषा᳚-म्पु॒रा-ऽऽयु॒षो-ऽप॑रः॒ प्रमी॑यते॒-ऽभि वा ए॒ष ए॒तस्य॑ गृ॒हानु॑च्यति॒ यस्य॑ गृ॒हा-न्दह॑त्य॒ग्नये॒ क्षाम॑वते पुरो॒डाश॑-म॒ष्टाक॑पाल॒-न्निर्व॑पे-द्भाग॒धेये॑नै॒वैनग्ं॑ शमयति॒ ना-ऽस्याप॑र-ङ्गृ॒हा-न्द॑हति ॥ 10 ॥
(व्र॒तप॑तये॒ - निशि॑ताया॒-न्निर्व॑पे॒त् - पुरु॑षाः - सङ्ग्रा॒मं - न - च॒त्वारि॑ च) (अ. 2)
अ॒ग्नये॒ कामा॑य पुरो॒डाश॑-म॒ष्टाक॑पाल॒-न्निर्व॑पे॒द्य-ङ्कामो॒ नोप॒नमे॑-द॒ग्निमे॒व काम॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒-ङ्कामे॑न॒ सम॑र्धय॒त्युपै॑न॒-ङ्कामो॑ नमत्य॒ग्नये॒ य वि॑ष्ठाय पुरो॒डाश॑-म॒ष्टाक॑पाल॒-न्निर्व॑पे॒-थ्स्पर्ध॑मानः॒, क्षेत्रे॑ वा सजा॒तेषु॑ वा॒-ऽग्निमे॒व यवि॑ष्ठ॒ग्ग्॒ स्वेन॑ भाग॒धेये॒नोप॑ धावति॒ तेनै॒वेन्द्रि॒यं-वीँ॒र्य॑-म्भ्रातृ॑व्यस्य [भ्रातृ॑व्यस्य, यु॒व॒ते॒ विपा॒प्मना॒] 11
युवते॒ विपा॒प्मना॒ भ्रातृ॑व्येण जयते॒-ऽग्नये॒ यवि॑ष्ठाय पुरो॒डाश॑-म॒ष्टाक॑पाल॒-न्निर्व॑पे-दभिच॒र्यमा॑णो॒ ऽग्निमे॒व यवि॑ष्ठ॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मा॒-द्रक्षाग्ं॑सि यवयति॒ नैन॑-मभि॒चरन्᳚-थ्स्तृणुते॒-ऽग्नय॒ आयु॑ष्मते पुरो॒डाश॑-म॒ष्टाक॑पाल॒-न्निर्व॑पे॒द्यः का॒मये॑त॒ सर्व॒-मायु॑-रिया॒-मित्य॒ग्नि- मे॒वा-ऽऽयु॑ष्मन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वा-ऽस्मि॒- [ए॒वा-ऽस्मिन्न्॑, आयु॑र्दधाति॒] 12
-न्नायु॑र्दधाति॒ सर्व॒मायु॑-रेत्य॒ग्नये॑ जा॒तवे॑दसे पुरो॒डाश॑-म॒ष्टाक॑पाल॒-न्निर्व॑पे॒-द्भूति॑कामो॒-ऽग्निमे॒व जा॒तवे॑दस॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒-म्भूति॑-ङ्गमयति॒ भव॑त्ये॒वाग्नये॒ रुक्म॑ते पुरो॒डाश॑-म॒ष्टाक॑पाल॒-न्निर्व॑पे॒-द्रुक्का॑मो॒-ऽग्निमे॒व रुक्म॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॒-न्रुच॑-न्दधाति॒-रोच॑त ए॒वाग्नये॒ तेज॑स्वते पुरो॒डाश॑- [पुरो॒डाश᳚म्, अ॒ष्टाक॑पाल॒-न्निर्व॑पे॒त्] 13
-म॒ष्टाक॑पाल॒-न्निर्व॑पे॒-त्तेज॑स्कामो॒-ऽग्निमे॒व तेज॑स्वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॒-न्तेजो॑ दधाति तेज॒स्व्ये॑व भ॑वत्य॒ग्नये॑ साह॒न्त्याय॑ पुरो॒डाश॑म॒ष्टाक॑पाल॒-न्निर्व॑पे॒-थ्सीक्ष॑माणो॒ ऽग्निमे॒व सा॑ह॒न्त्यग्ग् स्वेन॑ भाग॒धेये॒नोप॑ धावति॒ तेनै॒व स॑हते॒ यग्ं सीक्ष॑ते ॥ 14 ॥
(भ्रातृ॑व्यस्या -स्मि॒न् - तेज॑स्वते पुरो॒डश॑ - म॒ष्टात्रिग्ं॑शच्च) (अ. 3)
अ॒ग्नये-ऽन्न॑वते पुरो॒डाश॑-म॒ष्टाक॑पाल॒-न्निर्व॑पे॒द्यः का॒मये॒ता-ऽन्न॑वान्-थ्स्या॒मित्य॒ग्नि-मे॒वा-न्न॑वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒मन्न॑वन्त-ङ्करो॒त्यन्न॑वाने॒व भ॑वत्य॒ग्नये᳚-ऽन्ना॒दाय॑ पुरो॒डाश॑-म॒ष्टाक॑पाल॒-न्निर्व॑पे॒द्यः का॒मये॑ता-ऽन्ना॒द-स्स्या॒मित्य॒ग्नि-मे॒वान्ना॒दग्ग् स्वेन॑ भाग॒धेये॒नोप॑ धावति॒ स ए॒वैन॑-मन्ना॒द-ङ्क॑रोत्यन्ना॒द - [-क॑रोत्यन्ना॒दः, ए॒व भ॑वत्य॒ग्नये-ऽन्न॑पतये] 15
ए॒व भ॑वत्य॒ग्नये-ऽन्न॑पतये पुरो॒डाश॑-म॒ष्टाक॑पाल॒-न्निर्व॑पे॒द्यः-का॒मये॒ता-ऽन्न॑पति-स्स्या॒-मित्य॒ग्नि-मे॒वा-ऽन्न॑पति॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒-मन्न॑पति-ङ्करो॒त्यन्न॑पति-रे॒व भ॑वत्य॒ग्नये॒ पव॑मानाय पुरो॒डाश॑-म॒ष्टाक॑पाल॒-न्निर्व॑पेद॒ग्नये॑ पाव॒काया॒ग्नये॒ शुच॑ये॒ ज्योगा॑मयावी॒ यद॒ग्नये॒ पव॑मानाय नि॒र्वप॑ति प्रा॒ण-मे॒वा-ऽस्मि॒-न्तेन॑ दधाति॒ यद॒ग्नये॑ - [यद॒ग्नये᳚, पा॒व॒काय॒ वाच॑-] 16
पाव॒काय॒ वाच॑-मे॒वा-ऽस्मि॒-न्तेन॑ दधाति॒ यद॒ग्नये॒ शुच॑य॒ आयु॑-रे॒वा-ऽस्मि॒-न्तेन॑ दधात्यु॒त यदी॒तासु॒-र्भव॑ति॒ जीव॑त्ये॒वैता-मे॒व निर्व॑पे॒-च्चक्षु॑ष्कामो॒ यद॒ग्नये॒ पव॑मानाय नि॒र्वप॑ति प्रा॒ण-मे॒वा-ऽस्मि॒-न्तेन॑ दधाति॒ यद॒ग्नये॑ पाव॒काय॒ वाच॑-मे॒वास्मि॒-न्तेन॑ दधाति॒ यद॒ग्नये॒ शुच॑ये॒ चक्षु॑-रे॒वास्मि॒-न्तेन॑ दधा- [चक्षु॑रे॒वास्मि॒-न्तेन॑ दधाति, उ॒त यद्य॒न्धो] 17
-त्यु॒त यद्य॒न्धो भव॑ति॒ प्रैव प॑श्यत्य॒ग्नये॑ पु॒त्रव॑ते पुरो॒डाश॑-म॒ष्टाक॑पाल॒-न्निर्व॑पे॒-दिन्द्रा॑य पु॒त्रिणे॑ पुरो॒डाश॒-मेका॑दशकपाल-म्प्र॒जाका॑मो॒-ऽग्नि-रे॒वा-ऽस्मै᳚ प्र॒जा-म्प्र॑ज॒नय॑ति वृ॒द्धा-मिन्द्रः॒ प्र य॑च्छत्य॒ग्नये॒ रस॑वते-ऽजक्षी॒रे च॒रु-न्निर्व॑पे॒द्यः का॒मये॑त॒ रस॑वान्-थ्स्या॒-मित्य॒ग्नि-मे॒व रस॑वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॒ग्ं॒ रस॑वन्त-ङ्करोति॒ [रस॑वन्त-ङ्करोति, रस॑वाने॒व] 18
रस॑वाने॒व भ॑वत्यजक्षी॒रे भ॑वत्याग्ने॒यी वा ए॒षा यद॒जा सा॒क्षादे॒व रस॒मव॑ रुन्धे॒-ऽग्नये॒ वसु॑मते पुरो॒डाश॑-म॒ष्टाक॑पाल॒-न्निर्व॑पे॒द्यः का॒मये॑त॒ वसु॑मान्-थ्स्या॒मित्य॒ग्नि-मे॒व वसु॑मन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वैनं॒-वँसु॑मन्त-ङ्करोति॒ वसु॑माने॒व भ॑वत्य॒ग्नये॑ वाज॒सृते॑ पुरो॒डाश॑-म॒ष्टाक॑पाल॒-न्निव॑र्पे-थ्सङ्ग्रा॒मे सं-यँ॑त्ते॒ वाजं॒- [सं-यँ॑त्ते॒ वाज᳚म्, वा ए॒ष सि॑सीर्षति॒] 19
-ँवा ए॒ष सि॑सीर्षति॒ य-स्स॑ग्रा॒म्म-ञ्जिगी॑षत्य॒ग्निः खलु॒ वै दे॒वानां᳚-वाँज॒सृ-द॒ग्नि-मे॒व वा॑ज॒सृत॒ग्ग्॒ स्वेन॑ भाग॒धेये॒नोप॑ धावति॒ धाव॑ति॒ वाज॒ग्ं॒ हन्ति॑ वृ॒त्र-ञ्जय॑ति॒ तग्ं स॑ग्रा॒म्म-मथो॑ अ॒ग्निरि॑व॒ न प्र॑ति॒धृषे॑ भवत्य॒ग्नये᳚-ऽग्नि॒वते॑ पुरो॒डाश॑-म॒ष्टाक॑पाल॒-न्निर्व॑पे॒-द्यस्या॒ग्ना- व॒ग्नि- म॑भ्यु॒द्धरे॑यु॒-र्निर्दि॑ष्टभागो॒ वा ए॒तयो॑-र॒न्यो-ऽनि॑र्दिष्टभागो॒-ऽन्यस्तौ स॒भंवँ॑न्तौ॒ यज॑मान- [यज॑मानम्, अ॒भि] 20
-म॒भि स-म्भ॑वत॒-स्स ई᳚श्व॒र आर्ति॒-मार्तो॒-र्य-द॒ग्नये᳚-ऽग्नि॒वते॑ नि॒र्वप॑ति भाग॒धेये॑नै॒वैनौ॑ शमयति॒ ना-ऽऽर्ति॒मार्च्छ॑ति॒ यज॑मानो॒-ऽग्नये॒ ज्योति॑ष्मते पुरो॒डाश॑-म॒ष्टाक॑पाल॒-न्निर्व॑पे॒-द्यस्या॒-ग्निरुद्धृ॒तो-ऽहु॑ते-ऽग्निहो॒त्र उ॒द्वाये॒दप॑र आ॒दीप्या॑-ऽनू॒द्धृत्य॒ इत्या॑हु॒स्त-त्तथा॒ न का॒र्यं॑-यँ-द्भा॑ग॒धेय॑म॒भि पूर्व॑ उद्ध्रि॒यते॒ किमप॑रो॒-ऽभ्यु- [किमप॑रो॒-ऽभ्युत्, ह्रि॒ये॒तेति॒ तान्ये॒वा] 21
-द्ध्रि॑ये॒तेति॒ तान्ये॒वा व॒क्षाणा॑नि सन्नि॒धाय॑ मन्थेदि॒तः प्र॑थ॒म-ञ्ज॑ज्ञे अ॒ग्नि-स्स्वाद्योने॒रधि॑ जा॒तवे॑दाः । स गा॑यत्रि॒या त्रि॒ष्टुभा॒ जग॑त्या दे॒वेभ्यो॑ ह॒व्यं-वँ॑हतु प्रजा॒नन्निति॒ छन्दो॑भि-रे॒वैन॒ग्ग्॒ स्वाद्योनेः॒ प्रज॑नयत्ये॒ष वा व सो᳚-ऽग्निरित्या॑हु॒ र्ज्योति॒स्त्वा अ॑स्य॒ परा॑पतित॒-मिति॒ यद॒ग्नये॒ ज्योति॑ष्मते नि॒र्वप॑ति॒ यदे॒वास्य॒ ज्योतिः॒ परा॑पतित॒-न्तदे॒वाव॑ रुन्धे ॥ 22 ॥
(क॒रो॒त्य॒न्ना॒दो - द॑धाति॒ यद॒ग्नये॒ - शुच॑ये॒ चक्षु॑रे॒वास्मि॒-न्तेन॑ दधाति -करोति॒ - वाजं॒ -ँयज॑मान॒ - मु - दे॒वास्य॒ - षट्च॑) (अ. 4)
वै॒श्वा॒न॒र-न्द्वाद॑शकपाल॒-न्निर्व॑पे-द्वारु॒ण-ञ्च॒रु-न्द॑धि॒क्राव्ण्णे॑ च॒रुम॑भिश॒स्यमा॑नो॒ य-द्वै᳚श्वान॒रो द्वाद॑शकपालो॒ भव॑ति संवँथ्स॒रो वा अ॒ग्नि र्वै᳚श्वान॒र-स्सं॑वँथ्स॒रेणै॒वैनग्ग्॑ स्वदय॒त्यप॑ पा॒पं-वँर्णग्ं॑ हते वारु॒णेनै॒वैनं॑-वँरुणपा॒शा-न्मु॑ञ्चति दधि॒क्राव्ण्णा॑ पुनाति॒ हिर॑ण्य॒-न्दक्षि॑णा प॒वित्रं॒-वैँ हिर॑ण्य-म्पु॒नात्ये॒वैन॑-मा॒द्य॑-म॒स्या-ऽन्न॑-म्भवत्ये॒तामे॒व निर्व॑पे-त्प्र॒जाका॑म-स्संवँथ्स॒रो [संवँथ्स॒रः, वा] 23
वा ए॒तस्या-ऽशा᳚न्तो॒ योनि॑-म्प्र॒जायै॑ पशू॒ना-न्निर्द॑हति॒ यो-ऽल॑-म्प्र॒जायै॒ स-न्प्र॒जा-न्न वि॒न्दते॒ य-द्वै᳚श्वान॒रो द्वाद॑शकपालो॒ भव॑ति संवँथ्स॒रो वा अ॒ग्नि र्वै᳚श्वान॒र-स्सं॑वँथ्स॒रमे॒व भा॑ग॒धेये॑न शमयति॒ सो᳚-ऽस्मै शा॒न्त-स्स्वाद्योनेः᳚ प्र॒जा-म्प्रज॑नयति वारु॒णेनै॒वैनं॑-वँरुणपा॒शा-न्मु॑ञ्चति दधि॒क्राव्ण्णा॑ पुनाति॒ हिर॑ण्य॒-न्दक्षि॑णा प॒वित्रं॒-वैँ हिर॑ण्य-म्पु॒नात्ये॒वैनं॑- [पु॒नात्ये॒वैन᳚म्, वि॒न्दते᳚] 24
-ँवि॒न्दते᳚ प्र॒जां-वैँ᳚श्वान॒र-न्द्वाद॑शकपाल॒-न्निर्व॑पे-त्पु॒त्रे जा॒तेयद॒ष्टाक॑पालो॒ भव॑ति गायत्रि॒यैवैन॑-म्ब्रह्मवर्च॒सेन॑ पुनाति॒ यन्नव॑कपाल-स्त्रि॒वृतै॒वास्मि॒-न्तेजो॑ दधाति॒ य-द्दश॑कपालो वि॒राजै॒वा-ऽस्मि॑-न्न॒न्नाद्य॑-न्दधाति॒ यदेका॑दशकपाल- स्त्रि॒ष्टुभै॒वा-ऽस्मि॑-न्निन्द्रि॒य-न्द॑धाति॒ य-द्द्वाद॑शकपालो॒ जग॑त्यै॒वा-ऽस्मि॑-न्प॒शू-न्द॑धाति॒ यस्मि॑न् जा॒त ए॒तामिष्टि॑-न्नि॒र्वप॑ति पू॒त [पू॒तः, ए॒व ते॑ज॒स्व्य॑न्ना॒द] 25
ए॒व ते॑ज॒स्व्य॑न्ना॒द इ॑न्द्रिया॒वी प॑शु॒मा-न्भ॑व॒त्यव॒ वा ए॒ष सु॑व॒र्गा-ल्लो॒का-च्छि॑द्यते॒ यो द॑र्शपूर्णमासया॒जी सन्न॑मावा॒स्यां᳚-वाँ पौर्णमा॒सीं-वाँ॑तिपा॒दय॑ति सुव॒र्गाय॒ हि लो॒काय॑ दर्शपूर्णमा॒सा वि॒ज्येते॑ वैश्वान॒र-न्द्वाद॑शकपाल॒-न्निर्व॑पे-दमावा॒स्यां᳚-वाँ पौर्णमा॒सीं-वाँ॑-ऽति॒पाद्य॑ संवँथ्स॒रो वा अ॒ग्नि र्वै᳚श्वान॒र-स्सं॑वँथ्स॒रमे॒व प्री॑णा॒त्यथो॑ संवँथ्स॒रमे॒वास्मा॒ उप॑ दधाति सुव॒र्गस्य॑ लो॒कस्य॒ सम॑ष्ट्या॒ [सम॑ष्ट्यै, अथो॑] 26
अथो॑ दे॒वता॑ ए॒वान्वा॒रभ्य॑ सुव॒र्गं-लोँ॒कमे॑ति वीर॒हा वा ए॒ष दे॒वानां॒-योँ᳚-ऽग्नि-मु॑द्वा॒सय॑ते॒ न वा ए॒तस्य॑ ब्राह्म॒णा ऋ॑ता॒यवः॑ पु॒रा-ऽन्न॑-मक्ष-न्नाग्ने॒य-म॒ष्टाक॑पाल॒-न्निर्व॑पे-द्वैश्वान॒र-न्द्वाद॑शकपाल-म॒ग्निमु॑द्वासयि॒ष्यन्. यद॒ष्टाक॑पालो॒ भव॑त्य॒ष्टाक्ष॑रा गाय॒त्री-गा॑य॒त्रो᳚ ऽग्नि-र्यावा॑-ने॒वा-ऽग्निस्तस्मा॑ आति॒थ्य-ङ्क॑रो॒त्यथो॒ यथा॒ जनं॑-यँ॒ते॑-ऽव॒स-ङ्क॒रोति॑ ता॒दृ- [ता॒दृक्, ए॒व] 27
-गे॒व त-द्द्वाद॑शकपालो वैश्वान॒रो भ॑वति॒ द्वाद॑श॒ मासा᳚-स्संवँथ्स॒र-स्सं॑वँथ्स॒रः खलु॒ वा अ॒ग्नेर्योनि॒-स्स्वामे॒वैनं॒-योँनि॑-ङ्गमय-त्या॒द्य॑म॒स्यान्न॑-म्भवति वैश्वान॒र-न्द्वाद॑शकपाल॒-न्निर्व॑पेन्मारु॒तग्ं स॒प्तक॑पाल॒-ङ्ग्राम॑काम आहव॒नीये॑ वैश्वान॒रमधि॑ श्रयति॒ गार्ह॑पत्ये मारु॒त-म्पा॑पवस्य॒सस्य॒ विधृ॑त्यै॒ द्वाद॑शकपालो वैश्वान॒रो भ॑वति॒ द्वाद॑श॒ मासा᳚-स्संवँथ्स॒र-स्सं॑वँथ्स॒रेणै॒वास्मै॑ सजा॒ताग्श्च्या॑वयति मारु॒तो भ॑वति [ ] 28
म॒रुतो॒ वै दे॒वानां॒-विँशो॑ देववि॒शेनै॒वा-ऽस्मै॑ मनुष्य वि॒शमव॑ रुन्धे स॒प्तक॑पालो भवति स॒प्त ग॑णा॒ वै म॒रुतो॑ गण॒श ए॒वास्मै॑ सजा॒तानव॑ रुन्धे ऽनू॒च्यमा॑न॒ आ सा॑दयति॒ विश॑मे॒वास्मा॒ अनु॑वर्त्मान-ङ्करोति ॥ 29 ॥
(प्र॒जाका॑म-स्संवँथ्स॒रः - पु॒नात्ये॒वैनं॑ - पू॒तः - सम॑ष्ट्यै -ता॒दृं - मा॑रु॒तो भ॑व॒ - त्येका॒न्न त्रि॒ग्ं॒शच्च॑ ) (अ. 5)
आ॒दि॒त्य-ञ्च॒रु-न्निर्व॑पे-थ्सङ्ग्रा॒म-मु॑पप्रया॒स्य-न्नि॒यं-वाँ अदि॑ति-र॒स्यामे॒व पूर्वे॒ प्रति॑तिष्ठन्ति वैश्वान॒र-न्द्वाद॑शकपाल॒-न्निर्व॑पे-दा॒यत॑न-ङ्ग॒त्वा-सं॑वँथ्स॒रो वा अ॒ग्नि र्वै᳚श्वान॒र-स्सं॑वँथ्स॒रः खलु॒ वै दे॒वाना॑-मा॒यत॑न-मे॒तस्मा॒द्वा आ॒यत॑ना-द्दे॒वा असु॑रा-नजय॒न्॒. य-द्वै᳚श्वान॒र-न्द्वाद॑शकपाल-न्नि॒र्वप॑ति दे॒वाना॑-मे॒वा-ऽऽयत॑ने यतते॒ जय॑ति॒ तग्ं स॑ग्रा॒म्म-मे॒तस्मि॒न् वा ए॒तौ मृ॑जाते॒ [ए॒तौ मृ॑जाते, यो वि॑द्विषा॒णयो॒-रन्न॒-मत्ति॑] ॥ 30 ॥
यो वि॑द्विषा॒णयो॒-रन्न॒-मत्ति॑ वैश्वान॒र-न्द्वाद॑शकपाल॒-न्निर्व॑पे-द्विद्विषा॒णयो॒रन्न॑-ञ्ज॒ग्ध्वा सं॑वँथ्स॒रो वा अ॒ग्नि-र्वै᳚श्वान॒र-स्सं॑वँथ्स॒र स्व॑दित-मे॒वा-ऽत्ति॒ नास्मि॑-न्मृजाते संवँथ्स॒राय॒ वा ए॒तौ सम॑माते॒ यौ स॑म॒माते॒ तयो॒र्यः पूर्वो॑-ऽभि॒द्रुह्य॑ति॒ तं-वँरु॑णो गृह्णाति वैश्वान॒र-न्द्वाद॑शकपाल॒-न्निर्व॑पे-थ्सममा॒नयोः॒ पूर्वो॑-ऽभि॒द्रुह्य॑ संवँथ्स॒रो वा अ॒ग्नि-र्वै᳚श्वान॒र-स्सं॑वँथ्स॒र-मे॒वा-ऽऽप्त्वा नि॑र्वरु॒णं- [नि॑र्वरु॒णम्, प॒रस्ता॑-द॒भि] ॥ 31 ॥
-प॒रस्ता॑-द॒भि द्रु॑ह्यति॒ नैनं॒-वँरु॑णो गृह्णात्या॒व्यं॑-वाँ ए॒ष प्रति॑ गृह्णाति॒ यो-ऽवि॑-म्प्रतिगृ॒ह्णाति॑ वैश्वान॒र-न्द्वाद॑शकपाल॒-न्निर्व॑पे॒दवि॑-म्प्रति॒गृह्य॑ संवँथ्स॒रो वा अ॒ग्नि-र्वै᳚श्वान॒र-स्सं॑वँथ्स॒र-स्व॑दितामे॒व प्रति॑गृह्णाति॒ ना-ऽऽव्य॑-म्प्रति॑गृह्णात्या॒त्मनो॒ वा ए॒ष मात्रा॑माप्नोति॒ य उ॑भ॒याद॑-त्प्रतिगृ॒ह्णात्यश्वं॑-वाँ॒ पुरु॑षं-वाँ वैश्वान॒र-न्द्वाद॑शकपाल॒-न्निर्व॑पे-दुभ॒याद॑- [निर्व॑पे-दुभ॒याद॑त्, प्र॒ति॒गृह्य॑] ॥ 32 ॥
-त्प्रति॒गृह्य॑ संवँथ्स॒रो वा अ॒ग्निर्वै᳚श्वान॒र-स्सं॑वँथ्स॒र-स्व॑दितमे॒व प्रति॑ गृह्णाति॒ नात्मनो॒ मात्रा॑माप्नोति वैश्वान॒र-न्द्वाद॑शकपाल॒-न्निर्व॑पे-थ्स॒नि-मे॒ष्यन्-थ्सं॑वँथ्स॒रो वा अ॒ग्नि-र्वै᳚श्वान॒रो य॒दा खलु॒ वै सं॑वँथ्स॒र-ञ्ज॒नता॑या॒-ञ्चर॒त्यथ॒ स ध॑ना॒र्घो भ॑वति॒य-द्वै᳚श्वान॒र-न्द्वाद॑शकपाल-न्नि॒र्वप॑ति संवँथ्स॒र-सा॑तामे॒व स॒निम॒भि प्रच्य॑वते॒ दान॑कामा अस्मै प्र॒जा भ॑वन्ति॒ यो वै सं॑वँथ्स॒रं- [वै सं॑वँथ्स॒रम्, प्र॒युज्य॒ न] ॥ 33 ॥
-प्र॒युज्य॒ न वि॑मु॒ञ्चत्य॑प्रतिष्ठा॒नो वै स भ॑वत्ये॒त-मे॒व वै᳚श्वान॒र-म्पुन॑रा॒गत्य॒ निर्व॑पे॒द्य-मे॒व प्र॑यु॒ङ्क्ते त-म्भा॑ग॒धेये॑न॒ वि मु॑ञ्चति॒ प्रति॑ष्ठित्यै॒ यया॒ रज्वो᳚त्त॒मा-ङ्गामा॒जे-त्ता-म्भ्रातृ॑व्याय॒ प्र हि॑णुया॒-न्निर्-ऋ॑ति-मे॒वास्मै॒ प्र हि॑णोति ॥ 34 ॥
(मृ॒जा॒ते॒ - नि॒र्व॒रु॒णं - ँव॑पेदुभ॒याद॒--द्यो वै सं॑वँथ्स॒रग्ं - षट्त्रिग्ं॑शच्च) (अ. 6)
ऐ॒न्द्र-ञ्च॒रु-न्निर्व॑पे-त्प॒शुका॑म ऐ॒न्द्रा वै प॒शव॒ इन्द्र॑मे॒व स्वेन॑ भाग॒धेये॒नोप॑ धावति॒ स ए॒वास्मै॑ प॒शू-न्प्रय॑च्छति पशु॒मा-ने॒व भ॑वति च॒रुर्भ॑वति॒ स्वादे॒वास्मै॒ योनेः᳚ प॒शू-न्प्रज॑नय॒तीन्द्रा॑येन्द्रि॒याव॑ते पुरो॒डाश॒-मेका॑दशकपाल॒-न्निर्व॑पे-त्प॒शुका॑म इन्द्रि॒यं-वैँ प॒शव॒ इन्द्र॑-मे॒वेन्द्रि॒याव॑न्त॒ग्ग्॒ स्वेन ॑भाग॒धेये॒नोप॑ धावति॒ स [धावति॒ सः, ए॒वा-ऽस्मा॑] ॥ 35 ॥
ए॒वा-ऽस्मा॑ इन्द्रि॒य-म्प॒शू-न्प्रय॑च्छति पशु॒माने॒व भ॑व॒तीन्द्रा॑य-घ॒र्मव॑ते पुरो॒डाश॒-मेका॑दशकपाल॒-न्निर्व॑पे-द्ब्रह्मवर्च॒सका॑मो ब्रह्मवर्च॒सं-वैँ घ॒र्म इन्द्र॑मे॒व घ॒र्मव॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॑-न्ब्रह्मवर्च॒स-न्द॑धाति ब्रह्मवर्च॒स्ये॑व भ॑व॒तीन्द्रा॑या॒-ऽर्कव॑ते पुरो॒डाश॒-मेका॑दशकपाल॒-न्निर्व॑पे॒-दन्न॑कामो॒-ऽर्को वै दे॒वाना॒-मन्न॒-मिन्द्र॑-मे॒वा-ऽर्कव॑न्त॒ग्ग्॒ स्वेन॑ भाग॒धेये॒नो- [स्वेन॑ भाग॒धेये॑न, उप॑ धावति॒ स] ॥ 36॥
-प॑ धावति॒ स ए॒वास्मा॒ अन्न॒-म्प्रय॑च्छत्यन्ना॒द ए॒व भ॑व॒तीन्द्रा॑य घ॒र्मव॑ते पुरो॒डाश॒-मेका॑दशकपाल॒-न्निर्व॑पे॒-दिन्द्रा॑ये-न्द्रि॒याव॑त॒ इन्द्रा॑या॒-ऽर्कव॑ते॒ भूति॑कामो॒ यदिन्द्रा॑य घ॒र्मव॑ते नि॒र्वप॑ति॒ शिर॑ ए॒वास्य॒ तेन॑ करोति॒ यदिन्द्रा॑येन्द्रि॒याव॑त आ॒त्मान॑-मे॒वास्य॒ तेन॑ करोति॒-य-दिन्द्रा॑या॒-ऽर्कव॑ते भू॒त ए॒वान्नाद्ये॒ प्रति॑-तिष्ठति॒ भव॑त्ये॒वेन्द्रा॑या- [भव॑त्ये॒वेन्द्रा॑या, अ॒ग्ं॒ हो॒मुचे॑] ॥ 37 ॥
-ऽग्ं हो॒मुचे॑ पुरो॒डाश॒-मेका॑दशकपाल॒-न्निर्व॑पे॒द्यः पा॒प्मना॑ गृही॒त-स्स्या-त्पा॒प्मा वा अग्ंह॒ इन्द्र॑मे॒वा-ऽग्ं हो॒मुच॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॑-म्पा॒प्मनो-ऽग्ंह॑सो मुञ्च॒तीन्द्रा॑य वैमृ॒धाय॑ पुरो॒डाश॒-मेका॑दशकपाल॒-न्निर्व॑पे॒द्य-म्मृधो॒-ऽभि प्र॒वेपे॑रन्-रा॒ष्ट्राणि॑ वा॒-ऽभि स॑मि॒यु-रिन्द्र॑-मे॒व वै॑मृ॒धग्ग् स्वेन॑ भाग॒धेये॒नोप॑ धावति॒ स ए॒वा-ऽस्मा॒न्मृधो- [ए॒वा-ऽस्मा॒न्मृधः॑, अप॑ ह॒न्तीन्द्रा॑य] ॥ 38 ॥
-ऽप॑ ह॒न्तीन्द्रा॑य त्रा॒त्रे पु॑रो॒डाश॒-मेका॑दशकपाल॒-न्निर्व॑पे-द्ब॒द्धो वा॒ परि॑यत्तो॒ वेन्द्र॑मे॒व त्रा॒तार॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॑-न्त्रायत॒ इन्द्रा॑या-ऽर्काश्वमे॒धव॑ते पुरो॒डाश॒-मेका॑दशकपाल॒-न्निर्व॑पे॒द्य-म्म॑हाय॒ज्ञो नोप॒नमे॑दे॒ते वै म॑हाय॒ज्ञस्या-ऽन्त्ये॑ त॒नू य-द॑र्काश्वमे॒धा-विन्द्र॑-मे॒वा-ऽर्का᳚श्वमे॒ध- व॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मा॑ अन्त॒तो म॑हाय॒ज्ञ-ञ्च्या॑वय॒त्युपै॑न-म्महाय॒ज्ञो न॑मति ॥ 39 ॥
(इ॒न्द्रि॒याव॑न्त॒ग्ग्॒ स्वेन॑ भाग॒धेये॒नोप॑ धावति॒ सो᳚ - ऽर्कव॑न्त॒ग्ग्॒ स्वेन॑ भाग॒धेये॑नै॒ - वेन्द्रा॑या - स्मा॒-न्मृधो᳚ - ऽस्मै - स॒प्त च॑ ) (अ. 7)
इन्द्रा॒या-ऽन्वृ॑जवे पुरो॒डाश॒-मेका॑दशकपाल॒-न्निर्व॑पे॒-द्ग्राम॑काम॒ इन्द्र॑-मे॒वा-ऽन्वृ॑जु॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै॑ सजा॒ता-ननु॑कान् करोति ग्रा॒म्ये॑व भ॑वतीन्द्रा॒ण्यै च॒रु-न्निर्व॑पे॒द्यस्य॒ सेना-ऽसग्ं॑शितेव॒ स्या-दि॑न्द्रा॒णी वै सेना॑यै दे॒वते᳚न्द्रा॒णी-मे॒व स्वेन॑ भाग॒धेये॒नोप॑ धावति॒ सैवास्य॒ सेना॒ग्ं॒ सग्ग् श्य॑ति॒ बल्ब॑जा॒नपी॒- [बल्ब॑जा॒नपि॑, इ॒द्ध्मे स-न्न॑ह्ये॒द्गौ-] ॥ 40 ॥
-द्ध्मे स-न्न॑ह्ये॒द्गौ-र्यत्रा-ऽधि॑ष्कन्ना॒-न्यमे॑ह॒-त्ततो॒ बल्ब॑जा॒ उद॑तिष्ठ॒-न्गवा॑-मे॒वैन॑-न्न्या॒य-म॑पि॒नीय॒ गा वे॑दय॒तीन्द्रा॑य मन्यु॒मते॒ मन॑स्वते पुरो॒डाश॒-मेका॑दशकपाल॒-न्निर्व॑पे-थ्सङ्ग्रा॒मे संयँ॑त्त इन्द्रि॒येण॒ वै म॒न्युना॒ मन॑सा सङ्ग्रा॒म-ञ्ज॑य॒तीन्द्र॑-मे॒व म॑न्यु॒मन्त॒-म्मन॑स्वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॑न्निन्द्रि॒य-म्म॒न्यु-म्मनो॑ दधाति॒ जय॑ति॒ तग्ं [जय॑ति॒ तम्, स॒ग्रा॒म-मे॒ता-मे॒व] ॥ 41 ॥
स॑ग्रा॒म-मे॒ता-मे॒व निर्व॑पे॒द्यो ह॒तम॑ना-स्स्व॒य-म्पा॑प इव॒ स्यादे॒तानि॒ हि वा ए॒तस्मा॒ दप॑क्रान्ता॒न्यथै॒ष ह॒तम॑ना-स्स्व॒य-म्पा॑प॒ इन्द्र॑मे॒व म॑न्यु॒मन्त॒-म्मन॑स्वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॑-न्निन्द्रि॒य-म्म॒न्यु-म्मनो॑ दधाति॒ न ह॒तम॑ना-स्स्व॒य-म्पा॑पो भव॒तीन्द्रा॑य दा॒त्रे पु॑रो॒डाश॒-मेका॑दशकपाल॒-न्निर्व॑पे॒द्यः का॒मये॑त॒ दान॑कामा मे प्र॒जा-स्स्यु॒- [दान॑कामा मे प्र॒जा-स्स्युः॑, इतीन्द्र॑-मे॒व] ॥ 42 ॥
-रितीन्द्र॑-मे॒व दा॒तार॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै॒ दान॑कामाः प्र॒जाः क॑रोति॒ दान॑कामा अस्मै प्र॒जा भ॑व॒न्तीन्द्रा॑य प्रदा॒त्रे पु॑रो॒डाश॒-मेका॑दशकपाल॒-न्निर्व॑पे॒-द्यस्मै॒ प्रत्त॑मिव॒ सन्न प्र॑दी॒येतेन्द्र॑-मे॒व प्र॑दा॒तार॒ग्ग्॒ स्वेन॑ भाग॒धेये॒नोप॑-धावति॒ स ए॒वास्मै॒ प्र-दा॑पय॒तीन्द्रा॑य सु॒त्राम्णे॑ पुरो॒डाश॒-मेका॑दशकपाल॒-न्निर्व॑पे॒-दप॑रुद्धो वा- [-दप॑रुद्धो वा, अ॒प॒रु॒द्धयमा॑नो॒] ॥ 43 ॥
-ऽपरु॒द्धयमा॑नो॒ वेन्द्र॑मे॒व सु॒त्रामा॑ण॒ग्ग्॒ स्वेन॑ भाग॒धेये॒नोप॑ धावति॒ स ए॒वैन॑-न्त्रायते ऽनपरु॒द्ध्यो भ॑व॒तीन्द्रो॒ वै स॒दृ-न्दे॒वता॑भिरासी॒-थ्स न व्या॒वृत॑मगच्छ॒-थ्स प्र॒जाप॑ति॒-मुपा॑धाव॒-त्तस्मा॑ ए॒त-मै॒न्द्र-मेका॑दशकपाल॒-न्निर॑वप॒-त्तेनै॒-वा-ऽस्मि॑-न्निन्द्रि॒य-म॑दधा॒-च्छक्व॑री याज्यानुवा॒क्ये॑ अकरो॒-द्वज्रो॒ वै शक्व॑री॒ स ए॑नं॒-वँज्रो॒ भूत्या॑ ऐन्ध॒- [भूत्या॑ ऐन्ध, सो॑-ऽभव॒-थ्सो॑-ऽबिभे-] ॥ 44 ॥
-सो॑-ऽभव॒थ्सो॑-ऽबिभे-द्भू॒तः प्र मा॑ धक्ष्य॒तीति॒ स प्र॒जाप॑ति॒-म्पुन॒रुपा॑-ऽधाव॒-थ्स प्र॒जाप॑ति॒-श्शक्व॑र्या॒ अधि॑ रे॒वती॒-न्निर॑मिमीत॒ शान्त्या॒ अप्र॑दाहाय॒ यो-ऽलग्ग्॑ श्रि॒यै सन्-थ्स॒दृङ्ख्स॑मा॒नै-स्स्या-त्तस्मा॑ ए॒त-मै॒न्द्र-मेका॑दशकपाल॒-न्निर्व॑पे॒-दिन्द्र॑मे॒व स्वेन॑ भाग॒धेये॒नोप॑ धावति॒ स ए॒वा-ऽस्मि॑-न्निन्द्रि॒य-न्द॑धाति रे॒वती॑ पुरोनुवा॒क्या॑ भवति॒ शान्त्या॒ अप्र॑दाहाय॒ शक्व॑री या॒ज्या॑ वज्रो॒ वै शक्व॑री॒स ए॑नं॒-वँज्रो॒ भूत्या॑ इन्धे॒ भव॑त्ये॒व ॥ 45 ॥
(अपि॒ - तग्ग् - स्यु॑ - र्वै - न्ध - भवति॒ - चतु॑र्दश च ) (अ. 8)
आ॒ग्ना॒-वै॒ष्ण॒व-मेका॑दशकपाल॒-न्निर्व॑पे-दभि॒चर॒न्-थ्सर॑स्व॒त्याज्य॑ भागा॒ स्या-द्बा॑र्हस्प॒त् यश्च॒रुर्यदा᳚ग्ना-वैष्ण॒व एका॑दशकपालो॒ भव॑त्य॒ग्नि-स्सर्वा॑ दे॒वता॒ विष्णु॑र्य॒ज्ञो दे॒वता॑भि-श्चै॒वैनं॑-यँ॒ज्ञेन॑ चा॒भि च॑रति॒-सर॑स्व॒त्याज्य॑भागा भवति॒ वाग्वै सर॑स्वती वा॒चैवैन॑-म॒भि च॑रति बार्हस्प॒त्य-श्च॒रु र्भ॑वति॒ ब्रह्म॒ वै दे॒वाना॒-म्बृह॒स्पति॒ र्ब्रह्म॑णै॒वैन॑-म॒भि च॑रति॒ [-म॒भि च॑रति, प्रति॒ वै] ॥ 46 ॥
प्रति॒ वै प॒रस्ता॑-दभि॒चर॑न्त-म॒भि च॑रन्ति॒ द्वेद्वे॑ पुरो-ऽनुवा॒क्ये॑ कुर्या॒दति॒ प्रयु॑क्त्या ए॒तयै॒व य॑जेताभि च॒र्यमा॑णो दे॒वता॑भि-रे॒व दे॒वताः᳚ प्रति॒चर॑ति य॒ज्ञेन॑ य॒ज्ञं-वाँ॒चा वाच॒-म्ब्रह्म॑णा॒ ब्रह्म॒ स दे॒वता᳚श्चै॒व य॒ज्ञ-ञ्च॑ मद्ध्य॒तो व्यव॑सर्पति॒ तस्य॒ न कुत॑-श्च॒नोपा᳚व्या॒धो भ॑वति॒ नैन॑-मभि॒चरन्᳚-थ्स्तृणुत आग्नावैष्ण॒व-मेका॑दशकपाल॒-न्निर्व॑पे॒द्यं-यँ॒ज्ञो नो- [-य॒ज्ञो न, उ॒प॒नमे॑द॒ग्नि-स्सर्वा॑] ॥ 47 ॥
-प॒नमे॑द॒ग्नि-स्सर्वा॑ दे॒वता॒ विष्णु॑-र्य॒ज्ञो᳚-ऽग्नि-ञ्चै॒व विष्णु॑-ञ्च॒ स्वेन॑ भाग॒धेये॒नोप॑ धावति॒ तावे॒वास्मै॑ य॒ज्ञ-म्प्रय॑च्छत॒ उपै॑नं-यँ॒ज्ञो न॑मत्याग्ना- वैष्ण॒व-ङ्घृ॒ते च॒रु-न्निर्व॑पे॒च्चक्षु॑ष्कामो॒-ऽग्नेर्वै चक्षु॑षा मनु॒ष्या॑ वि प॑श्यन्ति य॒ज्ञस्य॑ दे॒वा अ॒ग्नि-ञ्चै॒व विष्णु॑-ञ्च॒ स्वेन॑ भाग॒धेये॒नोप॑ धावति॒ तावे॒वा- [तावे॒व, अ॒स्मि॒न् चक्षु॑र्धत्त॒-] ॥ 48 ॥
-ऽस्मि॒न् चक्षु॑-र्धत्त॒-श्चक्षु॑ष्मा-ने॒व भ॑वति धे॒न्वै वा ए॒त-द्रेतो॒ यदाज्य॑-मन॒डुह॑-स्तण्डु॒ला मि॑थु॒ना-दे॒वास्मै॒ चक्षुः॒ प्रज॑नयति घृ॒ते भ॑वति॒ तेजो॒ वै घृ॒त-न्तेज॒श्चक्षु॒-स्तेज॑सै॒वास्मै॒ तेज॒-श्चक्षु॒रव॑ रुन्ध इन्द्रि॒यं-वैँ वी॒र्यं॑-वृँङ्क्ते॒ भ्रातृ॑व्यो॒ यज॑मा॒नो-ऽय॑जमानस्या-ध्व॒रक॑ल्पा॒-म्प्रति॒ निर्व॑पे॒-द्भ्रातृ॑व्ये॒ यज॑माने॒ ना-ऽस्ये᳚न्द्रि॒यं- [ना-ऽस्ये᳚न्द्रि॒यम्, वी॒र्यं॑ ँवृङ्क्ते] ॥ 49 ॥
-ँवी॒र्यं॑ ँवृङ्क्ते पु॒रावा॒चः प्रव॑दितो॒-र्निर्व॑पे॒-द्याव॑त्ये॒व वा-क्तामप्रो॑दिता॒-म्भ्रातृ॑व्यस्य वृङ्क्ते॒ ताम॑स्य॒ वाच॑-म्प्र॒वद॑न्ती-म॒न्या वाचो-ऽनु॒ प्रव॑दन्ति॒ ता इ॑न्द्रि॒यं-वीँ॒र्यं॑-यँज॑माने दधत्याग्ना वैष्ण॒व-म॒ष्टाक॑पाल॒-न्निर्व॑पे-त्प्रात-स्सवन॒स्या॑-ऽऽ का॒ले सर॑स्व॒त्याज्य॑भागा॒ स्या-द्बा॑र्हस्प॒त्यश्च॒रु- र्यद॒ष्टाक॑पालो॒ भव॑त्य॒ष्टाक्ष॑रा गाय॒त्री गा॑य॒त्र-म्प्रा॑त-स्सव॒न-म्प्रा॑त-स्सव॒नमे॒व तेना᳚-ऽऽप्नो- [तेना᳚-ऽऽप्नोति, आ॒ग्ना॒वै॒ष्ण॒व-] ॥ 50 ॥
-त्याग्नावैष्ण॒व-मेका॑दशकपाल॒-न्निर्व॑पे॒-न्माद्ध्य॑न्दिनस्य॒ सव॑नस्या-ऽऽ का॒ले सर॑स्व॒त्याज्य॑भागा॒ स्या-द्बा॑र्हस्प॒त्य-श्च॒रु र्यदेका॑दशकपालो॒ भव॒त्येका॑दशाक्षरा त्रि॒ष्टु-प्त्रैष्टु॑भ॒-म्माद्ध्य॑न्दिन॒ग्ं॒ सव॑न॒-म्माद्ध्य॑दिन्नमे॒व सव॑न॒-न्तेना᳚-ऽऽप्नोत्याग्नावैष्ण॒व-न्द्वाद॑शकपाल॒-न्निर्व॑पे-त्तृतीयसव॒नस्या॑-ऽऽका॒ले सर॑स्व॒त्याज्य॑भागा॒ स्या-द्बा॑र्हस्प॒त्य-श्च॒रुर्य-द्द्वाद॑शकपालो॒ भव॑ति॒ द्वाद॑शाक्षरा॒ जग॑ती॒ जाग॑त-न्तृतीयसव॒न-न्तृ॑तीय सव॒नमे॒व तेना᳚-ऽऽप्नोति दे॒वता॑भिरे॒व दे॒वताः᳚ [दे॒वताः᳚, प्र॒ति॒चर॑ति] ॥ 51 ॥
प्रति॒चर॑ति य॒ज्ञेन॑ य॒ज्ञं-वाँ॒चा वाच॒-म्ब्रह्म॑णा॒ ब्रह्म॑ क॒पालै॑रे॒व छन्दाग्॑स्या॒प्नोति॑ पुरो॒डाशै॒-स्सव॑नानि मैत्रावरु॒ण-मेक॑कपाल॒-न्निर्व॑पे-द्व॒शायै॑ का॒ले यैवासौ भ्रातृ॑व्यस्य व॒शा-ऽनू॑ब॒न्ध्या॑ सो ए॒वैषैतस्यैक॑कपालो भवति॒ न हि क॒पालैः᳚ प॒शु-मर्ह॒त्याप्तु᳚म् ॥ 52 ॥
(ब्रह्म॑णै॒वैन॑म॒भि च॑रति - य॒ज्ञो न - तावे॒वा - ऽस्ये᳚न्द्रि॒य - मा᳚प्नोति -दे॒वताः᳚ - स॒प्तत्रिग्ं॑शच्च ) (अ. 9)
अ॒सावा॑दि॒त्यो न व्य॑रोचत॒ तस्मै॑ दे॒वाः प्राय॑श्चित्ति-मैच्छ॒-न्तस्मा॑ ए॒तग्ं सो॑मारौ॒द्र-ञ्च॒रु-न्निर॑वप॒-न्तेनै॒वास्मि॒-न्रुच॑मदधु॒र्यो ब्र॑ह्मवर्च॒सका॑म॒-स्स्या-त्तस्मा॑ ए॒तग्ं सो॑मारौ॒द्र-ञ्च॒रु-न्निर्व॑पे॒-थ्सोम॑-ञ्चै॒व रु॒द्र-ञ्च॒ स्वेन॑ भाग॒धेये॒नोप॑ धावति॒ तावे॒वास्मि॑-न्ब्रह्मवर्च॒स-न्ध॑त्तो ब्रह्मवर्च॒स्ये॑व भ॑वति तिष्यापूर्णमा॒से निर्व॑पेद्रु॒द्रो [निर्व॑पेद्रु॒द्रः, वै ति॒ष्यः॑ सोमः॑] ॥ 53 ॥
वै ति॒ष्यः॑ सोमः॑ पू॒र्णमा॑स-स्सा॒क्षादे॒व ब्र॑ह्मवर्च॒समव॑ रुन्धे॒ परि॑श्रिते याजयति ब्रह्मवर्च॒सस्य॒ परि॑गृहीत्यै श्वे॒तायै᳚ श्वे॒तव॑थ्सायै दु॒ग्ध-म्म॑थि॒तमाज्य॑-म्भव॒त्याज्य॒-म्प्रोक्ष॑ण॒माज्ये॑न मार्जयन्ते॒ याव॑दे॒व ब्र॑ह्मवर्च॒स-न्त-थ्सर्व॑-ङ्करो॒त्यति॑ ब्रह्मवर्च॒स-ङ्क्रि॑यत॒ इत्या॑हुरीश्व॒रो दु॒श्चर्मा॒ भवि॑तो॒रिति॑ मान॒वी ऋचौ॑ धा॒य्ये॑ कुर्या॒-द्यद्वै किञ्च॒ मनु॒-रव॑द॒त्त-द्भे॑ष॒जं- [-द्भे॑ष॒जम्, भे॒ष॒ज-मे॒वा-ऽस्मै॑] ॥ 54 ॥
-भे॑ष॒ज-मे॒वा-ऽस्मै॑ करोति॒ यदि॑ बिभी॒या-द्दु॒श्चर्मा॑ भविष्या॒मीति॑ सोमापौ॒ष्ण-ञ्च॒रु-न्निर्व॑पे-थ्सौ॒म्यो वै दे॒वत॑या॒ पुरु॑षः पौ॒ष्णाः प॒शव॒-स्स्वयै॒ वास्मै॑ दे॒वत॑या प॒शुभि॒-स्त्वच॑-ङ्करोति॒ न दु॒श्चर्मा॑ भवति सोमारौ॒द्र-ञ्च॒रु-न्निर्व॑पे-त्प्र॒जाका॑म॒-स्सोमो॒ वै रे॑तो॒धा अ॒ग्निः प्र॒जाना᳚-म्प्रजनयि॒ता सोम॑ ए॒वास्मै॒ रेतो॒ दधा᳚त्य॒ग्निः प्र॒जा-म्प्रज॑नयति वि॒न्दते᳚ - [ ] ॥ 55 ॥
प्र॒जाग्ं सो॑मारौ॒द्र-ञ्च॒रु-न्निर्व॑पे-दभि॒चरन्᳚-थ्सौ॒म्यो वै दे॒वत॑या॒ पुरु॑ष ए॒ष रु॒द्रो यद॒ग्नि-स्स्वाया॑ ए॒वैन॑-न्दे॒वता॑यै नि॒ष्क्रीय॑ रु॒द्रायापि॑ दधाति ता॒जगार्ति॒-मार्च्छ॑ति सोमारौ॒द्र-ञ्च॒रु-न्निर्व॑पे॒-ज्ज्योगा॑मयावी॒ सोमं॒-वाँ ए॒तस्य॒ रसो॑ गच्छत्य॒ग्निग्ं शरी॑रं॒-यँस्य॒ ज्योगा॒मय॑ति॒ सोमा॑दे॒वास्य॒ रस॑-न्निष्क्री॒णात्य॒ग्ने-श्शरी॑रमु॒त यदी॒- [यदि॑, इ॒तासु॒ र्भव॑ति॒] ॥ 56 ॥
-तासु॒ र्भव॑ति॒ जीव॑त्ये॒व सो॑मारु॒द्रयो॒र्वा ए॒त-ङ्ग्र॑सि॒तग्ं होता॒ निष्खि॑दति॒ स ई᳚श्व॒र आर्ति॒मार्तो॑-रन॒ड्वान्. होत्रा॒ देयो॒ वह्नि॒र्वा अ॑न॒ड्वान्. वह्नि॒र्॒होता॒ वह्नि॑नै॒व वह्नि॑-मा॒त्मानग्ग्॑ स्पृणोति सोमारौ॒द्र-ञ्च॒रु-न्निर्व॑पे॒द्यः का॒मये॑त॒ स्वे᳚-ऽस्मा आ॒यत॑ने॒ भ्रातृ॑व्य-ञ्जनयेय॒मिति॒ वेदि॑-म्परि॒गृह्या॒-ऽर्ध-मु॑द्ध॒न्या-द॒र्ध-न्नार्ध-म्ब॒र्॒हिषः॑ स्तृणी॒या-द॒र्ध-न्नार्ध-मि॒द्ध्मस्या᳚-ऽभ्या-द॒द्ध्या-दद्॒र्ध-न्न स्व ए॒वास्मा॑ आ॒यत॑ने॒ भ्रातृ॑व्य-ञ्जनयति ॥ 57 ॥
(रु॒द्रो - भे॑ष॒जं - वि॒न्दते॒- यदि॑ - स्तृणी॒याद॒र्धं - द्वाद॑श च) (अ. 10)
ऐ॒न्द्र-मेका॑दशकपाल॒-न्निर्व॑पेन्मारु॒तग्ं स॒प्तक॑पाल॒-ङ्ग्राम॑काम॒ इन्द्र॑-ञ्चै॒व म॒रुत॑श्च॒ स्वेन॑ भाग॒धेये॒नोप॑ धावति॒ त ए॒वास्मै॑ सजा॒ता-न्प्रय॑च्छन्ति ग्रा॒म्ये॑व भ॑वत्याहव॒नीय॑ ऐ॒न्द्रमधि॑ श्रयति॒ गार्ह॑पत्ये मारु॒त-म्पा॑पवस्य॒सस्य॒ विधृ॑त्यै स॒प्तक॑पालो मारु॒तो भ॑वति स॒प्तग॑णा॒ वै म॒रुतो॑गण॒श ए॒वास्मै॑ सजा॒तानव॑ रुन्धे-ऽनू॒च्यमा॑न॒ आ सा॑दयति॒ विश॑मे॒वा- [विश॑मे॒व, अ॒स्मा॒ अनु॑वर्त्मानं-] ॥ 58 ॥
-ऽस्मा॒ अनु॑वर्त्मान-ङ्करोत्ये॒तामे॒व निर्व॑पे॒द्यः का॒मये॑त क्ष॒त्राय॑ च वि॒शे च॑ स॒मद॑-न्दद्ध्या॒-मित्यै॒न्द्रस्या॑-ऽव॒द्य-न्ब्रू॑या॒-दिन्द्रा॒या-ऽनु॑ ब्रू॒हीत्या॒श्राव्य॑ ब्रूया-न्म॒रुतो॑ य॒जेति॑ मारु॒तस्या॑-ऽव॒द्य-न्ब्रू॑या-न्म॒रुद्भ्यो-ऽनु॑ ब्रू॒हीत्या॒श्राव्य॑ ब्रूया॒दिन्द्रं॑-यँ॒जेति॒ स्व ए॒वैभ्यो॑ भाग॒धेये॑ स॒मद॑-न्दधाति वितृग्ंहा॒णा-स्ति॑ष्ठन्त्ये॒ तामे॒व [ ] ॥ 59 ॥
निर्व॑पे॒द्यः का॒मये॑त॒ कल्पे॑र॒न्निति॑ यथादेव॒त-म॑व॒दाय॑ यथा देव॒तं-यँ॑जे-द्भाग॒धेये॑नै॒वैनान्॑ यथाय॒थ-ङ्क॑ल्पयति॒ कल्प॑न्त ए॒वैन्द्र-मेका॑दशकपाल॒-न्निर्व॑पे-द्वैश्वदे॒व-न्द्वाद॑शकपाल॒-ङ्ग्राम॑काम॒ इन्द्र॑-ञ्चै॒व विश्वाग्॑श्च दे॒वान्-थ्स्वेन॑ भाग॒धेये॒नोप॑ धावति॒ त ए॒वास्मै॑ सजा॒ता-न्प्रय॑च्छन्ति ग्रा॒म्ये॑व भ॑वत्यै॒न्द्रस्या॑-ऽव॒दाय॑ वैश्वदे॒वस्याव॑ द्ये॒-दथै॒न्द्रस्यो॒- [-दथै॒न्द्रस्य॑, उ॒परि॑ष्टा-] ॥ 60 ॥
-परि॑ष्टा-दिन्द्रि॒येणै॒वास्मा॑ उभ॒यतः॑ सजा॒ता-न्परि॑ गृह्णात्युपाधा॒य्य॑ पूर्वयं॒-वाँसो॒ दक्षि॑णा सजा॒ताना॒मुप॑हित्यै॒ पृश्ञि॑यै दु॒ग्धे प्रैय॑ङ्गव-ञ्च॒रु-न्निर्व॑पेन्म॒रुद्भ्यो॒ ग्राम॑कामः॒ पृश्ञि॑यै॒ वै पय॑सो म॒रुतो॑ जा॒ताः पृश्ञि॑यै प्रि॒यङ्ग॑वो मारु॒ताः खलु॒ वै दे॒वत॑या सजा॒ता म॒रुत॑ ए॒व स्वेन॑ भाग॒धेये॒नोप॑ धावति॒ त ए॒वास्मै॑ सजा॒ता-न्प्रय॑च्छन्ति ग्रा॒म्ये॑व भ॑वति प्रि॒यव॑ती याज्यानुवा॒क्ये॑ [याज्यानुवा॒क्ये᳚, भ॒व॒तः॒ प्रि॒यमे॒वैनग्ं॑] ॥ 61 ॥
भवतः प्रि॒यमे॒वैनग्ं॑ समा॒नाना᳚-ङ्करोति द्वि॒पदा॑ पुरो-ऽनुवा॒क्या॑ भवति द्वि॒पद॑ ए॒वाव॑ रुन्धे॒ चतु॑ष्पदा या॒ज्या॑ चतु॑ष्पद ए॒व प॒शूनव॑ रुन्धे देवासु॒रा-स्संयँ॑त्ता आस॒-न्ते दे॒वा मि॒थो विप्रि॑या आस॒-न्ते᳚(1॒) ऽन्यो᳚-ऽन्यस्मै॒ ज्यैष्ठ्या॒या-ति॑ष्ठमाना-श्चतु॒र्धा व्य॑क्राम-न्न॒ग्नि-र्वसु॑भि॒-स्सोमो॑ रु॒द्रैरिन्द्रो॑ म॒रुद्भि॒-र्वरु॑ण आदि॒त्यै-स्स इन्द्रः॑ प्र॒जाप॑ति॒-मुपा॑-ऽधाव॒-त्त- [-ऽधाव॒-त्तम्, ए॒तया॑] ॥ 62 ॥
-मे॒तया॑ सं॒(2)ज्ञान्या॑-ऽयाजय-द॒ग्नये॒ वसु॑मते पुरो॒डाश॑-म॒ष्टाक॑पाल॒-न्निर॑वप॒-थ्सोमा॑य रु॒द्रव॑ते च॒रुमिन्द्रा॑य म॒रुत्व॑ते पुरो॒डाश॒ -मेका॑दशकपालं॒-वँरु॑णाया-ऽऽदि॒त्यव॑ते च॒रु-न्ततो॒ वा इन्द्र॑-न्दे॒वा ज्यैष्ठ्या॑या॒भि सम॑जानत॒ य-स्स॑मा॒नै-र्मि॒थो विप्रि॑य॒-स्स्या-त्तमे॒तया॑ सं॒(2)ज्ञान्या॑ याजये-द॒ग्नये॒ वसु॑मते पुरो॒डाश॑-म॒ष्टाक॑पाल॒-न्निर्व॑पे॒-थ्सोमा॑य रु॒द्रव॑ते च॒रु-मिन्द्रा॑य म॒रुत्व॑ते पुरो॒डाश॒-मेका॑दशकपालं॒-वँरु॑णाया ऽऽदि॒त्यव॑ते च॒रु-मिन्द्र॑-मे॒वैन॑-म्भू॒त-ञ्ज्यैष्ठ्या॑य समा॒ना अ॒भि स-ञ्जा॑नते॒ वसि॑ष्ठ-स्समा॒नाना᳚-म्भवति ॥ 63 ॥
(विश॑मे॒व - ति॑ष्ठन्त्ये॒तामे॒ - वाथै॒न्द्रस्य॑ - याज्यानुवा॒क्ये॑ - तं - ँवरु॑णाय॒ -चतु॑र्दश च) (अ. 11)
हि॒र॒ण्य॒ग॒र्भ आपो॑ ह॒ यत्प्रजा॑पते ॥ स वे॑द पु॒त्रः पि॒तर॒ग्ं॒ स मा॒तर॒ग्ं॒ स सू॒नुभ॑र्व॒-थ्स भु॑व॒-त्पुन॑र्मघः । स द्यामौर्णो॑द॒न्तरि॑क्ष॒ग्ं॒ स सुव॒-स्स विश्वा॒ भुवो॑ अभव॒-थ्स आ-ऽभ॑वत् ॥ उदु॒ त्य-ञ्चि॒त्रम् ॥ स प्र॑त्न॒वन्नवी॑य॒सा-ऽग्ने᳚ द्यु॒म्नेन॑ सं॒यँता᳚ । बृ॒ह-त्त॑तन्थ भा॒नुना᳚ ॥ नि काव्या॑ वे॒धस॒-श्शश्व॑तस्क॒र्॒हस्ते॒ दधा॑नो॒ [दधा॑नः, नर्या॑ पु॒रूणि॑ ।] ॥ 64 ॥
नर्या॑ पु॒रूणि॑ । अ॒ग्निर्भु॑वद्रयि॒पती॑ रयी॒णाग्ं स॒त्रा च॑क्रा॒णो अ॒मृता॑नि॒ विश्वा᳚ ॥ हिर॑ण्यपाणिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दम् ॥ वा॒मम॒द्य स॑वितर्वा॒ममु॒ श्वो दि॒वेदि॑वे वा॒मम॒स्मभ्यग्ं॑ सावीः । वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाजः॑ स्याम ॥ बडि॒त्था पर्व॑ताना-ङ्खि॒द्र-म्बि॑भर्षि पृथिवि । प्र या भू॑मि प्रवत्वति म॒ह्ना जि॒नोषि॑ [जि॒नोषि॑, म॒हि॒नि॒ ।] ॥ 65 ॥
महिनि ॥ स्तोमा॑सस्त्वा विचारिणि॒ प्रति॑ष्टोभन्त्य॒क्तुभिः॑ । प्रया वाज॒-न्न हेष॑न्त-म्पे॒रु-मस्य॑स्यर्जुनि ॥ ऋ॒दू॒दरे॑ण॒ सख्या॑ सचेय॒ यो मा॒ न रिष्ये᳚द्धर्यश्व पी॒तः । अ॒यं-यँ-स्सोमो॒ न्यधा᳚य्य॒स्मे तस्मा॒ इन्द्र॑-म्प्र॒तिर॑-मे॒म्यच्छ॑ ॥ आपा᳚न्तमन्यु-स्तृ॒पल॑-प्रभर्मा॒ धुनि॒-श्शिमी॑ वा॒ञ्छरु॑माग्ं ऋजी॒षी । सोमो॒ विश्वा᳚न्यत॒सा वना॑नि॒ नार्वागिन्द्र॑-म्प्रति॒माना॑नि देभुः ॥ प्र- [प्र, सु॒वा॒न-स्सोम॑] ॥ 66 ॥
-सु॑वा॒न-स्सोम॑ ऋत॒यु-श्चि॑के॒तेन्द्रा॑य॒ ब्रह्म॑ ज॒मद॑ग्नि॒-रर्चन्न्॑ । वृषा॑ य॒न्ता-ऽसि॒ शव॑स-स्तु॒रस्या॒-ऽन्त-र्य॑च्छ गृण॒ते ध॒र्त्र-न्दृग्ं॑ह ॥ स॒बाध॑स्ते॒ मद॑-ञ्च शुष्म॒य-ञ्च॒ ब्रह्म॒ नरो᳚ ब्रह्म॒कृतः॑ सपर्यन्न् । अ॒र्को वा॒ य-त्तु॒रते॒ सोम॑चक्षा॒-स्तत्रे-दिन्द्रो॑ दधते पृ॒थ्सु तु॒र्याम् ॥ वष॑-ट्ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् । ॥ 67 ॥
वर्ध॑न्तु त्वा सुष्टु॒तयो॒ गिरो॑ मे यू॒य-म्पा॑त स्व॒स्तिभि॒-स्सदा॑ नः ॥प्र त-त्ते॑ अ॒द्य शि॑पिविष्ट॒ नामा॒-ऽर्य-श्शग्ं॑ सामि व॒युना॑नि वि॒द्वान् । तन्त्वा॑ गृणामि त॒वस॒-मत॑वीया॒न् क्षय॑न्तम॒स्य रज॑सः परा॒के ॥ किमि-त्ते॑ विष्णो परि॒चक्ष्य॑-म्भू॒-त्प्र यद्व॑व॒क्षे शि॑पिवि॒ष्टो अ॑स्मि । मा वर्पो॑ अ॒स्मदप॑ गूह ए॒तद्य-द॒न्यरू॑प-स्समि॒थे ब॒भूथ॑ । ॥ 68 ॥
अग्ने॒ दा दा॒शुषे॑ र॒यिं-वीँ॒रव॑न्त॒-म्परी॑णसम् । शि॒शी॒हि नः॑ सूनु॒मतः॑ ॥ दा नो॑ अग्ने श॒तिनो॒ दा-स्स॑ह॒स्रिणो॑ दु॒रो न वाज॒ग्ग्॒ श्रुत्या॒ अपा॑ वृधि । प्राची॒ द्यावा॑पृथि॒वी ब्रह्म॑णा कृधि॒ सुव॒र्ण शु॒क्रमु॒षसो॒ वि दि॑द्युतुः ॥ अ॒ग्निर्दा॒ द्रवि॑णं-वीँ॒रपे॑शा अ॒ग्निर्-ऋषिं॒-यँ-स्स॒हस्रा॑ स॒नोति॑ । अ॒ग्निर्दि॒वि ह॒व्यमा त॑ताना॒-ऽग्ने-र्धामा॑नि॒ विभृ॑ता पुरु॒त्रा ॥ मा [मा, नो॒ म॒र्धी॒ रा तू भ॑र ।] ॥ 69 ॥
नो॑ मर्धी॒ रा तू भ॑र ॥ घृ॒त-न्न पू॒त-न्त॒नूर॑रे॒पा-श्शुचि॒ हिर॑ण्यम् । त-त्ते॑ रु॒क्मो न रो॑चत स्वधावः ॥ उ॒भे सु॑श्चन्द्र स॒र्पिषो॒ दर्वी᳚ श्रीणीष आ॒सनि॑ । उ॒तो न॒ उ-त्पु॑पूर्या उ॒क्थेषु॑ शवसस्पत॒ इषग्ग्॑ स्तो॒तृभ्य॒ आ भ॑र ॥ वायो॑ श॒तग्ं हरी॑णां-युँ॒वस्व॒ पोष्या॑णाम् । उ॒त वा॑ ते सह॒स्रिणो॒ रथ॒ आ या॑तु॒ पाज॑सा ॥ प्र याभि॒- [प्र याभिः, यासि॑ दा॒श्वाग्ं स॒मच्छा॑] ॥ 70 ॥
-र्यासि॑ दा॒श्वाग्ं स॒मच्छा॑ नि॒युद्भि॑-र्वायवि॒ष्टये॑ दुरो॒णे । नि नो॑ र॒यिग्ं सु॒भोज॑सं-युँवे॒ह नि वी॒रव॒-द्गव्य॒मश्वि॑य-ञ्च॒ राधः॑ ॥रे॒वती᳚र्न-स्सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म ॥ रे॒वाग्ं इद्रे॒वतः॑ स्तो॒ता स्या-त्त्वाव॑तो म॒घोनः॑ । प्रेदु॑ हरिव-श्श्रु॒तस्य॑ ॥ 71 ॥
(दधा॑नो - जि॒नोषि॑ - देभुः॒ प्र - ह॒व्यं - ब॒भूथ॒ - मा - याभि॑ - श्चत्वारि॒ग्ं॒शच्च॑ ) (अ. 12)
(प्र॒जाप॑ति॒स्ता-स्सृ॒ष्टा - अ॒ग्नये॑ पथि॒कृते॒ - ग्नये॒ कामा॑या॒ - ग्नयेन्न॑वते -वैश्वान॒र -मा॑दि॒त्य-ञ्च॒रु - मै॒न्द्र-ञ्च॒रु - मिन्द्रा॒यान्वृ॑जव - आग्नावैष्ण॒व -म॒सौ सो॑मारौ॒द्र - मै॒न्द्रम॒का॑दशकपालग्ं- हिरण्यग॒र्भो - द्वाद॑श )
(प्र॒जाप॑ति - र॒ग्नये॒ कामा॑या॒ - ऽभि स-म्भ॑वतो॒ - यो वि॑द्विषा॒णयो॑ -रि॒ध्मे सन्न॑ ह्ये - दाग्नावैष्ण॒वमु॒ - परि॑ष्टा॒ - द्यासि॑ दा॒श्वाग्ंस॒ - मेक॑सप्ततिः )
(प्र॒जाप॑तिः॒, प्रेदु॑ हरिव-श्श्रु॒तस्य॑)
॥ हरिः॑ ओम् ॥
॥ कृष्ण यजुर्वेदीय तैत्तिरीय संहिताया-न्द्वितीयकाण्डे द्वितीयः प्रश्न-स्समाप्तः ॥
kṛṣṇa yajurvedīya taittirīya saṃhitāyā-ndvitīyakāṇḍe dvitīyaḥ praśnaḥ - iṣṭividhānaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
pra॒jāpatiḥ̭ pra॒jā a̭sṛjata॒ tā-ssṛ॒ṣṭā॒ indrā॒gnī apā̭gūhatā॒gṃ॒ so̭-'cāya-tpra॒jāpa̭tirindrā॒gnī vai me᳚ pra॒jā apā̭ghukṣatā॒miti॒ sa e॒tamai᳚ndrā॒gna- mekā̭daśakapāla-mapaśya॒-tta-nnira̭vapa॒-ttāva̭smai pra॒jāḥ prāsā̭dhayatā- mindrā॒gnī vā e॒tasya̭ pra॒jāmapa̭ gūhato॒ yo-'laṃ̭ pra॒jāyai॒ sa-npra॒jā-nna vi॒ndata̭ aindrā॒gna-mekā̭daśakapāla॒-nnirva̭pet-pra॒jākā̭ma indrā॒gnī [ ] 1
e॒va svena̭ bhāga॒dheye॒nopa̭ dhāvati॒ tāve॒vāsmai᳚ pra॒jā-mpra sā̭dhayato vi॒ndate᳚ pra॒jā-mai᳚ndrā॒gna-mekā̭daśakapāla॒-nnirva̭pe॒-thspardha̭mānaḥ॒, kṣetrḙ vā sajā॒teṣṷ vendrā॒gnī e॒va svena̭ bhāga॒dheye॒nopa̭ dhāvati॒ tābhyā̭me॒vendri॒yaṃ ~vī॒rya̭-mbhrātṛ̭vyasya vṛṅkte॒ vi pā॒pmanā॒ bhrātṛ̭vyeṇa jaya॒te-'pa॒ vā e॒tasmā̭dindri॒yaṃ-vī~॒rya̭-ṅkrāmati॒ ya-ssa̭grā॒mma-mṷpapra॒yātyai᳚ndrā॒gna-mekā̭daśakapāla॒-nni- [-mekā̭daśakapāla॒-nniḥ, va॒pe॒-thsa॒ṅgrā॒ma-] 2
-rva̭pe-thsaṅgrā॒ma-mṷpaprayā॒sya-nni̭ndrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnindri॒yaṃ-vī~॒rya̭-ndhatta-ssa॒hendri॒yeṇa̭ vī॒ryḙṇopa॒ pra yā̭ti॒ jaya̭ti॒ tagṃ sa̭grā॒mmaṃ-vi~ vā e॒ṣa i̭ndri॒yeṇa̭ vī॒ryḙṇardhyate॒ ya-ssa̭grā॒mma-ñjaya̭tyaindrā॒gna-mekā̭daśakapāla॒-nnirva̭pe-thsaṅgrā॒ma-ñji॒tvendrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnidri॒yaṃ-vī~॒rya̭n- [vī॒rya᳚m, dha॒tto॒ nendri॒yeṇa̭] 3
-dhatto॒ nendri॒yeṇa̭ vī॒ryḙṇa॒ vyṛ̭ddhya॒te-'pa॒ vā e॒tasmā̭dindri॒yaṃ-vī~॒rya̭-ṅkrāmati॒ ya eti̭ ja॒natā̭maindrā॒gna-mekā̭daśakapāla॒-nnirva̭pe-jja॒natā̭me॒ṣya-nni̭ndrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmi̭-nnindri॒yaṃ-vī~॒rya̭-ndhatta-ssa॒hendri॒yeṇa̭ vī॒ryḙṇa ja॒natā̭meti pau॒ṣṇa-ñca॒rumanu॒ nirva̭pe-tpū॒ṣā vā i̭ndri॒yasya̭ vī॒rya̭syā-'nupradā॒tā pū॒ṣaṇa̭me॒va [ ] 4
svena̭ bhāga॒dheye॒nopa̭ dhāvati॒ sa e॒vāsmā̭ indri॒yaṃ-vī~॒rya̭manu॒ praya̭cchati kṣaitrapa॒tya-ñca॒ru-nnirva̭pe-jja॒natā̭-mā॒gatye॒yaṃ-vai~ kṣetra̭sya॒ pati̭ra॒syāme॒va prati̭ tiṣṭhatyaindrā॒gna-mekā̭daśakapāla-mu॒pari̭ṣṭā॒-nnirva̭peda॒syāme॒va pra̭ti॒ṣṭhāye᳚ndri॒yaṃ-vī~॒rya̭-mu॒pari̭ṣṭā-dā॒tma-ndha̭tte || 5 ||
(pra॒jākā̭ma indrā॒gnī - ṷpapra॒yātyai᳚ndrā॒gnamekā̭daśakapāla॒-nni- rvī॒ryaṃ̭ - pū॒ṣaṇa̭me॒ vai - kā॒nnaca̭tvāri॒gṃ॒śacca̭ ) (a. 1)
a॒gnayḙ pathi॒kṛtḙ puro॒ḍāśa̭-ma॒ṣṭāka̭pāla॒-nnirva̭pe॒dyo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭-'tipā॒daye᳚-tpa॒tho vā e॒ṣoddhyapa̭thenaiti॒ yo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭tipā॒daya̭tya॒gnime॒va pa̭thi॒kṛta॒gg॒ svena̭ bhāga॒dheye॒nopa̭ dhāvati॒ sa e॒vaina॒mapa̭thā॒-tpanthā॒mapi̭ nayatyana॒ḍvā-ndakṣi̭ṇā va॒hī hyḙṣa samṛ̭ddhyā a॒gnaye᳚ vra॒tapa̭taye [vra॒tapa̭taye, pu॒ro॒ḍāśa̭-] 6
puro॒ḍāśa̭-ma॒ṣṭāka̭pāla॒-nnirva̭pe॒dya āhi̭tāgni॒-ssanna̭vra॒tyami̭va॒ carḙda॒gnime॒va vra॒tapa̭ti॒gg॒ svena̭ bhāga॒dheye॒nopa̭ dhāvati॒ sa e॒vainaṃ̭-vra~॒tamā la̭bhaṃya~ti॒ vratyo̭ bhavatya॒gnayḙ rakṣo॒ghne pṷro॒ḍāśa̭-ma॒ṣṭāka̭pāla॒-nnirva̭pe॒dyagṃ rakṣāgṃ̭si॒ sacḙranna॒gnime॒va ra̭kṣo॒haṇa॒gg॒ svena̭ bhāga॒dheye॒nopa̭ dhāvati॒ sa e॒vāsmā॒-drakṣā॒g॒syapa̭ hanti॒ niśi̭tāyā॒-nnirva̭pe॒- [nirva̭pet, niśi̭tāyā॒gṃ॒ hi] 7
-nniśi̭tāyā॒gṃ॒ hi rakṣāgṃ̭si pre॒ratḙ sa॒preṃrṇā᳚nye॒vainā̭ni hanti॒ pari̭śrite yājaye॒-drakṣa̭sā॒-mana̭nvavacārāya rakṣo॒ghnī yā᳚jyānuvā॒kyḙ bhavato॒ rakṣa̭sā॒g॒ stṛtyā̭ a॒gnayḙ ru॒drava̭te puro॒ḍāśa̭-ma॒ṣṭāka̭pāla॒-nnirva̭pe-dabhi॒cara̭-nne॒ṣā vā a̭sya gho॒rā ta॒nūrya-dru॒drastasmā̭ e॒vaina॒māvṛ̭ścati tā॒jagārti॒-mārccha̭tya॒gnayḙ surabhi॒matḙ puro॒ḍāśa̭-ma॒ṣṭāka̭pāla॒-nnirva̭pe॒dyasya॒ gāvo̭ vā॒ purṷṣā [vā॒ purṷṣāḥ, vā॒ pra॒mīyḙra॒n॒] 8
vā pra॒mīyḙra॒n॒ yo vā̭ bibhī॒yāde॒ṣā vā a̭sya bheṣa॒jyā̭ ta॒nūrya-thsṷrabhi॒matī॒-tayai॒vā-'smai̭ bheṣa॒ja-ṅka̭roti surabhi॒matḙ bhavati pūtīga॒ndhasyā-'pa̭hatyā a॒gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-thsaṅgrā॒me saṃya~̭tte bhāga॒dheyḙnai॒vainagṃ̭ śamayi॒tvā parā̭na॒bhi nirdi̭śati॒ yamava̭reṣāṃ॒-vi~ddhya̭nti॒ jīva̭ti॒ sa ya-mparḙṣā॒-mpra sa mī̭yate॒ jaya̭ti॒ tagṃ sa̭ṅgrā॒ma- [tagṃ sa̭ṅgrā॒mam, a॒bhi vā e॒ṣa] 9
-ma॒bhi vā e॒ṣa e॒tānṷcyati॒ yeṣā᳚-mpūrvāpa॒rā a॒nvañcaḥ̭ pra॒mīya̭nte puruṣāhu॒tir-hya̭sya pri॒yata̭mā॒-'gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-dbhāga॒dheyḙnai॒vainagṃ̭ śamayati॒ naiṣā᳚-mpu॒rā-''yu॒ṣo-'pa̭raḥ॒ pramī̭yate॒-'bhi vā e॒ṣa e॒tasya̭ gṛ॒hānṷcyati॒ yasya̭ gṛ॒hā-ndaha̭tya॒gnaye॒ kṣāma̭vate puro॒ḍāśa̭-ma॒ṣṭāka̭pāla॒-nnirva̭pe-dbhāga॒dheyḙnai॒vainagṃ̭ śamayati॒ nā-'syāpa̭ra-ṅgṛ॒hā-nda̭hati || 10 ||
(vra॒tapa̭taye॒ - niśi̭tāyā॒-nnirva̭pe॒t - purṷṣāḥ - saṅgrā॒maṃ - na - ca॒tvāri̭ ca) (a. 2)
a॒gnaye॒ kāmā̭ya puro॒ḍāśa̭-ma॒ṣṭāka̭pāla॒-nnirva̭pe॒dya-ṅkāmo॒ nopa॒namḙ-da॒gnime॒va kāma॒gg॒ svena̭ bhāga॒dheye॒nopa̭ dhāvati॒ sa e॒vaina॒-ṅkāmḙna॒ sama̭rdhaya॒tyupai̭na॒-ṅkāmo̭ namatya॒gnaye॒ ya vi̭ṣṭhāya puro॒ḍāśa̭-ma॒ṣṭāka̭pāla॒-nnirva̭pe॒-thspardha̭mānaḥ॒, kṣetrḙ vā sajā॒teṣṷ vā॒-'gnime॒va yavi̭ṣṭha॒gg॒ svena̭ bhāga॒dheye॒nopa̭ dhāvati॒ tenai॒vendri॒yaṃ-vī~॒rya̭-mbhrātṛ̭vyasya [bhrātṛ̭vyasya, yu॒va॒te॒ vipā॒pmanā॒] 11
yuvate॒ vipā॒pmanā॒ bhrātṛ̭vyeṇa jayate॒-'gnaye॒ yavi̭ṣṭhāya puro॒ḍāśa̭-ma॒ṣṭāka̭pāla॒-nnirva̭pe-dabhica॒ryamā̭ṇo॒ 'gnime॒va yavi̭ṣṭha॒gg॒ svena̭ bhāga॒dheye॒nopa̭ dhāvati॒ sa e॒vāsmā॒-drakṣāgṃ̭si yavayati॒ naina̭-mabhi॒caran᳚-thstṛṇute॒-'gnaya॒ āyṷṣmate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙta॒ sarva॒-māyṷ-riyā॒-mitya॒gni- me॒vā-''yṷṣmanta॒gg॒ svena̭ bhāga॒dheye॒nopa̭ dhāvati॒ sa e॒vā-'smi॒- [e॒vā-'sminṋ, āyṷrdadhāti॒] 12
-nnāyṷrdadhāti॒ sarva॒māyṷ-retya॒gnayḙ jā॒tavḙdase puro॒ḍāśa̭-ma॒ṣṭāka̭pāla॒-nnirva̭pe॒-dbhūti̭kāmo॒-'gnime॒va jā॒tavḙdasa॒gg॒ svena̭ bhāga॒dheye॒nopa̭ dhāvati॒ sa e॒vaina॒-mbhūti̭-ṅgamayati॒ bhava̭tye॒vāgnaye॒ rukma̭te puro॒ḍāśa̭-ma॒ṣṭāka̭pāla॒-nnirva̭pe॒-drukkā̭mo॒-'gnime॒va rukma̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmi॒-nruca̭-ndadhāti॒-roca̭ta e॒vāgnaye॒ teja̭svate puro॒ḍāśa̭- [puro॒ḍāśa᳚m, a॒ṣṭāka̭pāla॒-nnirva̭pe॒t] 13
-ma॒ṣṭāka̭pāla॒-nnirva̭pe॒-tteja̭skāmo॒-'gnime॒va teja̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi॒-ntejo̭ dadhāti teja॒svyḙva bha̭vatya॒gnayḙ sāha॒ntyāya̭ puro॒ḍāśa̭ma॒ṣṭāka̭pāla॒-nnirva̭pe॒-thsīkṣa̭māṇo॒ 'gnime॒va sā̭ha॒ntyagg svena̭ bhāga॒dheye॒nopa̭ dhāvati॒ tenai॒va sa̭hate॒ yagṃ sīkṣa̭te || 14 ||
(bhrātṛ̭vyasyā -smi॒n - teja̭svate puro॒ḍaśa̭ - ma॒ṣṭātrigṃ̭śacca) (a. 3)
a॒gnaye-'nna̭vate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒maye॒tā-'nna̭vān-thsyā॒mitya॒gni-me॒vā-nna̭vanta॒gg॒ svena̭ bhāga॒dheye॒nopa̭ dhāvati॒ sa e॒vaina॒manna̭vanta-ṅkaro॒tyanna̭vāne॒va bha̭vatya॒gnaye᳚-'nnā॒dāya̭ puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙtā-'nnā॒da-ssyā॒mitya॒gni-me॒vānnā॒dagg svena̭ bhāga॒dheye॒nopa̭ dhāvati॒ sa e॒vaina̭-mannā॒da-ṅka̭rotyannā॒da - [-ka̭rotyannā॒daḥ, e॒va bha̭vatya॒gnaye-'nna̭pataye] 15
e॒va bha̭vatya॒gnaye-'nna̭pataye puro॒ḍāśa̭-ma॒ṣṭāka̭pāla॒-nnirva̭pe॒dyaḥ-kā॒maye॒tā-'nna̭pati-ssyā॒-mitya॒gni-me॒vā-'nna̭pati॒gg॒ svena̭ bhāga॒dheye॒nopa̭ dhāvati॒ sa e॒vaina॒-manna̭pati-ṅkaro॒tyanna̭pati-re॒va bha̭vatya॒gnaye॒ pava̭mānāya puro॒ḍāśa̭-ma॒ṣṭāka̭pāla॒-nnirva̭peda॒gnayḙ pāva॒kāyā॒gnaye॒ śuca̭ye॒ jyogā̭mayāvī॒ yada॒gnaye॒ pava̭mānāya ni॒rvapa̭ti prā॒ṇa-me॒vā-'smi॒-ntena̭ dadhāti॒ yada॒gnayḙ - [yada॒gnaye᳚, pā॒va॒kāya॒ vāca̭-] 16
pāva॒kāya॒ vāca̭-me॒vā-'smi॒-ntena̭ dadhāti॒ yada॒gnaye॒ śuca̭ya॒ āyṷ-re॒vā-'smi॒-ntena̭ dadhātyu॒ta yadī॒tāsu॒-rbhava̭ti॒ jīva̭tye॒vaitā-me॒va nirva̭pe॒-ccakṣṷṣkāmo॒ yada॒gnaye॒ pava̭mānāya ni॒rvapa̭ti prā॒ṇa-me॒vā-'smi॒-ntena̭ dadhāti॒ yada॒gnayḙ pāva॒kāya॒ vāca̭-me॒vāsmi॒-ntena̭ dadhāti॒ yada॒gnaye॒ śuca̭ye॒ cakṣṷ-re॒vāsmi॒-ntena̭ dadhā- [cakṣṷre॒vāsmi॒-ntena̭ dadhāti, u॒ta yadya॒ndho] 17
-tyu॒ta yadya॒ndho bhava̭ti॒ praiva pa̭śyatya॒gnayḙ pu॒trava̭te puro॒ḍāśa̭-ma॒ṣṭāka̭pāla॒-nnirva̭pe॒-dindrā̭ya pu॒triṇḙ puro॒ḍāśa॒-mekā̭daśakapāla-mpra॒jākā̭mo॒-'gni-re॒vā-'smai᳚ pra॒jā-mpra̭ja॒naya̭ti vṛ॒ddhā-mindraḥ॒ pra ya̭cchatya॒gnaye॒ rasa̭vate-'jakṣī॒re ca॒ru-nnirva̭pe॒dyaḥ kā॒mayḙta॒ rasa̭vān-thsyā॒-mitya॒gni-me॒va rasa̭vanta॒gg॒ svena̭ bhāga॒dheye॒nopa̭ dhāvati॒ sa e॒vaina॒gṃ॒ rasa̭vanta-ṅkaroti॒ [rasa̭vanta-ṅkaroti, rasa̭vāne॒va] 18
rasa̭vāne॒va bha̭vatyajakṣī॒re bha̭vatyāgne॒yī vā e॒ṣā yada॒jā sā॒kṣāde॒va rasa॒mava̭ rundhe॒-'gnaye॒ vasṷmate puro॒ḍāśa̭-ma॒ṣṭāka̭pāla॒-nnirva̭pe॒dyaḥ kā॒mayḙta॒ vasṷmān-thsyā॒mitya॒gni-me॒va vasṷmanta॒gg॒ svena̭ bhāga॒dheye॒nopa̭ dhāvati॒ sa e॒vainaṃ॒-va~sṷmanta-ṅkaroti॒ vasṷmāne॒va bha̭vatya॒gnayḙ vāja॒sṛtḙ puro॒ḍāśa̭-ma॒ṣṭāka̭pāla॒-nniva̭rpe-thsaṅgrā॒me saṃ-ya~̭tte॒ vājaṃ॒- [saṃ-ya~̭tte॒ vāja᳚m, vā e॒ṣa si̭sīrṣati॒] 19
-~vā e॒ṣa si̭sīrṣati॒ ya-ssa̭grā॒mma-ñjigī̭ṣatya॒gniḥ khalu॒ vai de॒vānāṃ᳚-vā~ja॒sṛ-da॒gni-me॒va vā̭ja॒sṛta॒gg॒ svena̭ bhāga॒dheye॒nopa̭ dhāvati॒ dhāva̭ti॒ vāja॒gṃ॒ hanti̭ vṛ॒tra-ñjaya̭ti॒ tagṃ sa̭grā॒mma-matho̭ a॒gniri̭va॒ na pra̭ti॒dhṛṣḙ bhavatya॒gnaye᳚-'gni॒vatḙ puro॒ḍāśa̭-ma॒ṣṭāka̭pāla॒-nnirva̭pe॒-dyasyā॒gnā- va॒gni- ma̭bhyu॒ddharḙyu॒-rnirdi̭ṣṭabhāgo॒ vā e॒tayo̭-ra॒nyo-'ni̭rdiṣṭabhāgo॒-'nyastau sa॒bhaṃva~̭ntau॒ yaja̭māna- [yaja̭mānam, a॒bhi] 20
-ma॒bhi sa-mbha̭vata॒-ssa ī᳚śva॒ra ārti॒-mārto॒-rya-da॒gnaye᳚-'gni॒vatḙ ni॒rvapa̭ti bhāga॒dheyḙnai॒vainaṷ śamayati॒ nā-''rti॒mārccha̭ti॒ yaja̭māno॒-'gnaye॒ jyoti̭ṣmate puro॒ḍāśa̭-ma॒ṣṭāka̭pāla॒-nnirva̭pe॒-dyasyā॒-gniruddhṛ॒to-'hṷte-'gniho॒tra u॒dvāye॒dapa̭ra ā॒dīpyā̭-'nū॒ddhṛtya॒ ityā̭hu॒sta-ttathā॒ na kā॒ryaṃ̭-ya~-dbhā̭ga॒dheya̭ma॒bhi pūrva̭ uddhri॒yate॒ kimapa̭ro॒-'bhyu- [kimapa̭ro॒-'bhyut, hri॒ye॒teti॒ tānye॒vā] 21
-ddhri̭ye॒teti॒ tānye॒vā va॒kṣāṇā̭ni sanni॒dhāya̭ manthedi॒taḥ pra̭tha॒ma-ñja̭jñe a॒gni-ssvādyone॒radhi̭ jā॒tavḙdāḥ | sa gā̭yatri॒yā tri॒ṣṭubhā॒ jaga̭tyā de॒vebhyo̭ ha॒vyaṃ-va~̭hatu prajā॒nanniti॒ chando̭bhi-re॒vaina॒gg॒ svādyoneḥ॒ praja̭nayatye॒ṣa vā va so᳚-'gnirityā̭hu॒ rjyoti॒stvā a̭sya॒ parā̭patita॒-miti॒ yada॒gnaye॒ jyoti̭ṣmate ni॒rvapa̭ti॒ yade॒vāsya॒ jyotiḥ॒ parā̭patita॒-ntade॒vāva̭ rundhe || 22 ||
(ka॒ro॒tya॒nnā॒do - da̭dhāti॒ yada॒gnaye॒ - śuca̭ye॒ cakṣṷre॒vāsmi॒-ntena̭ dadhāti -karoti॒ - vājaṃ॒ -~yaja̭māna॒ - mu - de॒vāsya॒ - ṣaṭca̭) (a. 4)
vai॒śvā॒na॒ra-ndvāda̭śakapāla॒-nnirva̭pe-dvāru॒ṇa-ñca॒ru-nda̭dhi॒krāvṇṇḙ ca॒ruma̭bhiśa॒syamā̭no॒ ya-dvai᳚śvāna॒ro dvāda̭śakapālo॒ bhava̭ti saṃva~thsa॒ro vā a॒gni rvai᳚śvāna॒ra-ssaṃ̭va~thsa॒reṇai॒vainagg̭ svadaya॒tyapa̭ pā॒paṃ-va~rṇagṃ̭ hate vāru॒ṇenai॒vainaṃ̭-va~ruṇapā॒śā-nmṷñcati dadhi॒krāvṇṇā̭ punāti॒ hira̭ṇya॒-ndakṣi̭ṇā pa॒vitraṃ॒-vai~ hira̭ṇya-mpu॒nātye॒vaina̭-mā॒dya̭-ma॒syā-'nna̭-mbhavatye॒tāme॒va nirva̭pe-tpra॒jākā̭ma-ssaṃva~thsa॒ro [saṃva~thsa॒raḥ, vā] 23
vā e॒tasyā-'śā᳚nto॒ yoni̭-mpra॒jāyai̭ paśū॒nā-nnirda̭hati॒ yo-'la̭-mpra॒jāyai॒ sa-npra॒jā-nna vi॒ndate॒ ya-dvai᳚śvāna॒ro dvāda̭śakapālo॒ bhava̭ti saṃva~thsa॒ro vā a॒gni rvai᳚śvāna॒ra-ssaṃ̭va~thsa॒rame॒va bhā̭ga॒dheyḙna śamayati॒ so᳚-'smai śā॒nta-ssvādyoneḥ᳚ pra॒jā-mpraja̭nayati vāru॒ṇenai॒vainaṃ̭-va~ruṇapā॒śā-nmṷñcati dadhi॒krāvṇṇā̭ punāti॒ hira̭ṇya॒-ndakṣi̭ṇā pa॒vitraṃ॒-vai~ hira̭ṇya-mpu॒nātye॒vainaṃ̭- [pu॒nātye॒vaina᳚m, vi॒ndate᳚] 24
-~vi॒ndate᳚ pra॒jāṃ-vai~᳚śvāna॒ra-ndvāda̭śakapāla॒-nnirva̭pe-tpu॒tre jā॒teyada॒ṣṭāka̭pālo॒ bhava̭ti gāyatri॒yaivaina̭-mbrahmavarca॒sena̭ punāti॒ yannava̭kapāla-stri॒vṛtai॒vāsmi॒-ntejo̭ dadhāti॒ ya-ddaśa̭kapālo vi॒rājai॒vā-'smi̭-nna॒nnādya̭-ndadhāti॒ yadekā̭daśakapāla- stri॒ṣṭubhai॒vā-'smi̭-nnindri॒ya-nda̭dhāti॒ ya-ddvāda̭śakapālo॒ jaga̭tyai॒vā-'smi̭-npa॒śū-nda̭dhāti॒ yasmi̭n jā॒ta e॒tāmiṣṭi̭-nni॒rvapa̭ti pū॒ta [pū॒taḥ, e॒va tḙja॒svya̭nnā॒da] 25
e॒va tḙja॒svya̭nnā॒da i̭ndriyā॒vī pa̭śu॒mā-nbha̭va॒tyava॒ vā e॒ṣa sṷva॒rgā-llo॒kā-cchi̭dyate॒ yo da̭rśapūrṇamāsayā॒jī sanna̭māvā॒syāṃ᳚-vā~ paurṇamā॒sīṃ-vā~̭tipā॒daya̭ti suva॒rgāya॒ hi lo॒kāya̭ darśapūrṇamā॒sā vi॒jyetḙ vaiśvāna॒ra-ndvāda̭śakapāla॒-nnirva̭pe-damāvā॒syāṃ᳚-vā~ paurṇamā॒sīṃ-vā~̭-'ti॒pādya̭ saṃva~thsa॒ro vā a॒gni rvai᳚śvāna॒ra-ssaṃ̭va~thsa॒rame॒va prī̭ṇā॒tyatho̭ saṃva~thsa॒rame॒vāsmā॒ upa̭ dadhāti suva॒rgasya̭ lo॒kasya॒ sama̭ṣṭyā॒ [sama̭ṣṭyai, atho̭] 26
atho̭ de॒vatā̭ e॒vānvā॒rabhya̭ suva॒rgaṃ-lo~॒kamḙti vīra॒hā vā e॒ṣa de॒vānāṃ॒-yo~᳚-'gni-mṷdvā॒saya̭te॒ na vā e॒tasya̭ brāhma॒ṇā ṛ̭tā॒yavaḥ̭ pu॒rā-'nna̭-makṣa-nnāgne॒ya-ma॒ṣṭāka̭pāla॒-nnirva̭pe-dvaiśvāna॒ra-ndvāda̭śakapāla-ma॒gnimṷdvāsayi॒ṣyan. yada॒ṣṭāka̭pālo॒ bhava̭tya॒ṣṭākṣa̭rā gāya॒trī-gā̭ya॒tro᳚ 'gni-ryāvā̭-ne॒vā-'gnistasmā̭ āti॒thya-ṅka̭ro॒tyatho॒ yathā॒ janaṃ̭-ya~॒tḙ-'va॒sa-ṅka॒roti̭ tā॒dṛ- [tā॒dṛk, e॒va] 27
-ge॒va ta-ddvāda̭śakapālo vaiśvāna॒ro bha̭vati॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒raḥ khalu॒ vā a॒gneryoni॒-ssvāme॒vainaṃ॒-yo~ni̭-ṅgamaya-tyā॒dya̭ma॒syānna̭-mbhavati vaiśvāna॒ra-ndvāda̭śakapāla॒-nnirva̭penmāru॒tagṃ sa॒ptaka̭pāla॒-ṅgrāma̭kāma āhava॒nīyḙ vaiśvāna॒ramadhi̭ śrayati॒ gārha̭patye māru॒ta-mpā̭pavasya॒sasya॒ vidhṛ̭tyai॒ dvāda̭śakapālo vaiśvāna॒ro bha̭vati॒ dvāda̭śa॒ māsā᳚-ssaṃva~thsa॒ra-ssaṃ̭va~thsa॒reṇai॒vāsmai̭ sajā॒tāgścyā̭vayati māru॒to bha̭vati [ ] 28
ma॒ruto॒ vai de॒vānāṃ॒-vi~śo̭ devavi॒śenai॒vā-'smai̭ manuṣya vi॒śamava̭ rundhe sa॒ptaka̭pālo bhavati sa॒pta ga̭ṇā॒ vai ma॒ruto̭ gaṇa॒śa e॒vāsmai̭ sajā॒tānava̭ rundhe 'nū॒cyamā̭na॒ ā sā̭dayati॒ viśa̭me॒vāsmā॒ anṷvartmāna-ṅkaroti || 29 ||
(pra॒jākā̭ma-ssaṃva~thsa॒raḥ - pu॒nātye॒vainaṃ̭ - pū॒taḥ - sama̭ṣṭyai -tā॒dṛṃ - mā̭ru॒to bha̭va॒ - tyekā॒nna tri॒gṃ॒śacca̭ ) (a. 5)
ā॒di॒tya-ñca॒ru-nnirva̭pe-thsaṅgrā॒ma-mṷpaprayā॒sya-nni॒yaṃ-vā~ adi̭ti-ra॒syāme॒va pūrve॒ prati̭tiṣṭhanti vaiśvāna॒ra-ndvāda̭śakapāla॒-nnirva̭pe-dā॒yata̭na-ṅga॒tvā-saṃ̭va~thsa॒ro vā a॒gni rvai᳚śvāna॒ra-ssaṃ̭va~thsa॒raḥ khalu॒ vai de॒vānā̭-mā॒yata̭na-me॒tasmā॒dvā ā॒yata̭nā-dde॒vā asṷrā-najaya॒n॒. ya-dvai᳚śvāna॒ra-ndvāda̭śakapāla-nni॒rvapa̭ti de॒vānā̭-me॒vā-''yata̭ne yatate॒ jaya̭ti॒ tagṃ sa̭grā॒mma-me॒tasmi॒n vā e॒tau mṛ̭jāte॒ [e॒tau mṛ̭jāte, yo vi̭dviṣā॒ṇayo॒-ranna॒-matti̭] || 30 ||
yo vi̭dviṣā॒ṇayo॒-ranna॒-matti̭ vaiśvāna॒ra-ndvāda̭śakapāla॒-nnirva̭pe-dvidviṣā॒ṇayo॒ranna̭-ñja॒gdhvā saṃ̭va~thsa॒ro vā a॒gni-rvai᳚śvāna॒ra-ssaṃ̭va~thsa॒ra sva̭dita-me॒vā-'tti॒ nāsmi̭-nmṛjāte saṃva~thsa॒rāya॒ vā e॒tau sama̭māte॒ yau sa̭ma॒māte॒ tayo॒ryaḥ pūrvo̭-'bhi॒druhya̭ti॒ taṃ-va~rṷṇo gṛhṇāti vaiśvāna॒ra-ndvāda̭śakapāla॒-nnirva̭pe-thsamamā॒nayoḥ॒ pūrvo̭-'bhi॒druhya̭ saṃva~thsa॒ro vā a॒gni-rvai᳚śvāna॒ra-ssaṃ̭va~thsa॒ra-me॒vā-''ptvā ni̭rvaru॒ṇaṃ- [ni̭rvaru॒ṇam, pa॒rastā̭-da॒bhi] || 31 ||
-pa॒rastā̭-da॒bhi drṷhyati॒ nainaṃ॒-va~rṷṇo gṛhṇātyā॒vyaṃ̭-vā~ e॒ṣa prati̭ gṛhṇāti॒ yo-'vi̭-mpratigṛ॒hṇāti̭ vaiśvāna॒ra-ndvāda̭śakapāla॒-nnirva̭pe॒davi̭-mprati॒gṛhya̭ saṃva~thsa॒ro vā a॒gni-rvai᳚śvāna॒ra-ssaṃ̭va~thsa॒ra-sva̭ditāme॒va prati̭gṛhṇāti॒ nā-''vya̭-mprati̭gṛhṇātyā॒tmano॒ vā e॒ṣa mātrā̭māpnoti॒ ya ṷbha॒yāda̭-tpratigṛ॒hṇātyaśvaṃ̭-vā~॒ purṷṣaṃ-vā~ vaiśvāna॒ra-ndvāda̭śakapāla॒-nnirva̭pe-dubha॒yāda̭- [nirva̭pe-dubha॒yāda̭t, pra॒ti॒gṛhya̭] || 32 ||
-tprati॒gṛhya̭ saṃva~thsa॒ro vā a॒gnirvai᳚śvāna॒ra-ssaṃ̭va~thsa॒ra-sva̭ditame॒va prati̭ gṛhṇāti॒ nātmano॒ mātrā̭māpnoti vaiśvāna॒ra-ndvāda̭śakapāla॒-nnirva̭pe-thsa॒ni-me॒ṣyan-thsaṃ̭va~thsa॒ro vā a॒gni-rvai᳚śvāna॒ro ya॒dā khalu॒ vai saṃ̭va~thsa॒ra-ñja॒natā̭yā॒-ñcara॒tyatha॒ sa dha̭nā॒rgho bha̭vati॒ya-dvai᳚śvāna॒ra-ndvāda̭śakapāla-nni॒rvapa̭ti saṃva~thsa॒ra-sā̭tāme॒va sa॒nima॒bhi pracya̭vate॒ dāna̭kāmā asmai pra॒jā bha̭vanti॒ yo vai saṃ̭va~thsa॒raṃ- [vai saṃ̭va~thsa॒ram, pra॒yujya॒ na] || 33 ||
-pra॒yujya॒ na vi̭mu॒ñcatya̭pratiṣṭhā॒no vai sa bha̭vatye॒ta-me॒va vai᳚śvāna॒ra-mpuna̭rā॒gatya॒ nirva̭pe॒dya-me॒va pra̭yu॒ṅkte ta-mbhā̭ga॒dheyḙna॒ vi mṷñcati॒ prati̭ṣṭhityai॒ yayā॒ rajvo᳚tta॒mā-ṅgāmā॒je-ttā-mbhrātṛ̭vyāya॒ pra hi̭ṇuyā॒-nnir-ṛ̭ti-me॒vāsmai॒ pra hi̭ṇoti || 34 ||
(mṛ॒jā॒te॒ - ni॒rva॒ru॒ṇaṃ - ~va̭pedubha॒yāda॒--dyo vai saṃ̭va~thsa॒ragṃ - ṣaṭtrigṃ̭śacca) (a. 6)
ai॒ndra-ñca॒ru-nnirva̭pe-tpa॒śukā̭ma ai॒ndrā vai pa॒śava॒ indra̭me॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒śū-npraya̭cchati paśu॒mā-ne॒va bha̭vati ca॒rurbha̭vati॒ svāde॒vāsmai॒ yoneḥ᳚ pa॒śū-npraja̭naya॒tīndrā̭yendri॒yāva̭te puro॒ḍāśa॒-mekā̭daśakapāla॒-nnirva̭pe-tpa॒śukā̭ma indri॒yaṃ-vai~ pa॒śava॒ indra̭-me॒vendri॒yāva̭nta॒gg॒ svena ̭bhāga॒dheye॒nopa̭ dhāvati॒ sa [dhāvati॒ saḥ, e॒vā-'smā̭] || 35 ||
e॒vā-'smā̭ indri॒ya-mpa॒śū-npraya̭cchati paśu॒māne॒va bha̭va॒tīndrā̭ya-gha॒rmava̭te puro॒ḍāśa॒-mekā̭daśakapāla॒-nnirva̭pe-dbrahmavarca॒sakā̭mo brahmavarca॒saṃ-vai~ gha॒rma indra̭me॒va gha॒rmava̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭-nbrahmavarca॒sa-nda̭dhāti brahmavarca॒syḙva bha̭va॒tīndrā̭yā॒-'rkava̭te puro॒ḍāśa॒-mekā̭daśakapāla॒-nnirva̭pe॒-danna̭kāmo॒-'rko vai de॒vānā॒-manna॒-mindra̭-me॒vā-'rkava̭nta॒gg॒ svena̭ bhāga॒dheye॒no- [svena̭ bhāga॒dheyḙna, upa̭ dhāvati॒ sa] || 36||
-pa̭ dhāvati॒ sa e॒vāsmā॒ anna॒-mpraya̭cchatyannā॒da e॒va bha̭va॒tīndrā̭ya gha॒rmava̭te puro॒ḍāśa॒-mekā̭daśakapāla॒-nnirva̭pe॒-dindrā̭ye-ndri॒yāva̭ta॒ indrā̭yā॒-'rkava̭te॒ bhūti̭kāmo॒ yadindrā̭ya gha॒rmava̭te ni॒rvapa̭ti॒ śira̭ e॒vāsya॒ tena̭ karoti॒ yadindrā̭yendri॒yāva̭ta ā॒tmāna̭-me॒vāsya॒ tena̭ karoti॒-ya-dindrā̭yā॒-'rkava̭te bhū॒ta e॒vānnādye॒ prati̭-tiṣṭhati॒ bhava̭tye॒vendrā̭yā- [bhava̭tye॒vendrā̭yā, a॒gṃ॒ ho॒mucḙ] || 37 ||
-'gṃ ho॒mucḙ puro॒ḍāśa॒-mekā̭daśakapāla॒-nnirva̭pe॒dyaḥ pā॒pmanā̭ gṛhī॒ta-ssyā-tpā॒pmā vā agṃha॒ indra̭me॒vā-'gṃ ho॒muca॒gg॒ svena̭ bhāga॒dheye॒nopa̭ dhāvati॒ sa e॒vaina̭-mpā॒pmano-'gṃha̭so muñca॒tīndrā̭ya vaimṛ॒dhāya̭ puro॒ḍāśa॒-mekā̭daśakapāla॒-nnirva̭pe॒dya-mmṛdho॒-'bhi pra॒vepḙran-rā॒ṣṭrāṇi̭ vā॒-'bhi sa̭mi॒yu-rindra̭-me॒va vai̭mṛ॒dhagg svena̭ bhāga॒dheye॒nopa̭ dhāvati॒ sa e॒vā-'smā॒nmṛdho- [e॒vā-'smā॒nmṛdhaḥ̭, apa̭ ha॒ntīndrā̭ya] || 38 ||
-'pa̭ ha॒ntīndrā̭ya trā॒tre pṷro॒ḍāśa॒-mekā̭daśakapāla॒-nnirva̭pe-dba॒ddho vā॒ pari̭yatto॒ vendra̭me॒va trā॒tāra॒gg॒ svena̭ bhāga॒dheye॒nopa̭ dhāvati॒ sa e॒vaina̭-ntrāyata॒ indrā̭yā-'rkāśvame॒dhava̭te puro॒ḍāśa॒-mekā̭daśakapāla॒-nnirva̭pe॒dya-mma̭hāya॒jño nopa॒namḙde॒te vai ma̭hāya॒jñasyā-'ntyḙ ta॒nū ya-da̭rkāśvame॒dhā-vindra̭-me॒vā-'rkā᳚śvame॒dha- va̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmā̭ anta॒to ma̭hāya॒jña-ñcyā̭vaya॒tyupai̭na-mmahāya॒jño na̭mati || 39 ||
(i॒ndri॒yāva̭nta॒gg॒ svena̭ bhāga॒dheye॒nopa̭ dhāvati॒ so᳚ - 'rkava̭nta॒gg॒ svena̭ bhāga॒dheyḙnai॒ - vendrā̭yā - smā॒-nmṛdho᳚ - 'smai - sa॒pta ca̭ ) (a. 7)
indrā॒yā-'nvṛ̭jave puro॒ḍāśa॒-mekā̭daśakapāla॒-nnirva̭pe॒-dgrāma̭kāma॒ indra̭-me॒vā-'nvṛ̭ju॒gg॒ svena̭ bhāga॒dheye॒nopa̭ dhāvati॒ sa e॒vāsmai̭ sajā॒tā-nanṷkān karoti grā॒myḙva bha̭vatīndrā॒ṇyai ca॒ru-nnirva̭pe॒dyasya॒ senā-'sagṃ̭śiteva॒ syā-di̭ndrā॒ṇī vai senā̭yai de॒vate᳚ndrā॒ṇī-me॒va svena̭ bhāga॒dheye॒nopa̭ dhāvati॒ saivāsya॒ senā॒gṃ॒ sagg śya̭ti॒ balba̭jā॒napī॒- [balba̭jā॒napi̭, i॒ddhme sa-nna̭hye॒dgau-] || 40 ||
-ddhme sa-nna̭hye॒dgau-ryatrā-'dhi̭ṣkannā॒-nyamḙha॒-ttato॒ balba̭jā॒ uda̭tiṣṭha॒-ngavā̭-me॒vaina̭-nnyā॒ya-ma̭pi॒nīya॒ gā vḙdaya॒tīndrā̭ya manyu॒mate॒ mana̭svate puro॒ḍāśa॒-mekā̭daśakapāla॒-nnirva̭pe-thsaṅgrā॒me saṃya~̭tta indri॒yeṇa॒ vai ma॒nyunā॒ mana̭sā saṅgrā॒ma-ñja̭ya॒tīndra̭-me॒va ma̭nyu॒manta॒-mmana̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭nnindri॒ya-mma॒nyu-mmano̭ dadhāti॒ jaya̭ti॒ tagṃ [jaya̭ti॒ tam, sa॒grā॒ma-me॒tā-me॒va] || 41 ||
sa̭grā॒ma-me॒tā-me॒va nirva̭pe॒dyo ha॒tama̭nā-ssva॒ya-mpā̭pa iva॒ syāde॒tāni॒ hi vā e॒tasmā॒ dapa̭krāntā॒nyathai॒ṣa ha॒tama̭nā-ssva॒ya-mpā̭pa॒ indra̭me॒va ma̭nyu॒manta॒-mmana̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭-nnindri॒ya-mma॒nyu-mmano̭ dadhāti॒ na ha॒tama̭nā-ssva॒ya-mpā̭po bhava॒tīndrā̭ya dā॒tre pṷro॒ḍāśa॒-mekā̭daśakapāla॒-nnirva̭pe॒dyaḥ kā॒mayḙta॒ dāna̭kāmā me pra॒jā-ssyu॒- [dāna̭kāmā me pra॒jā-ssyuḥ̭, itīndra̭-me॒va] || 42 ||
-ritīndra̭-me॒va dā॒tāra॒gg॒ svena̭ bhāga॒dheye॒nopa̭ dhāvati॒ sa e॒vāsmai॒ dāna̭kāmāḥ pra॒jāḥ ka̭roti॒ dāna̭kāmā asmai pra॒jā bha̭va॒ntīndrā̭ya pradā॒tre pṷro॒ḍāśa॒-mekā̭daśakapāla॒-nnirva̭pe॒-dyasmai॒ pratta̭miva॒ sanna pra̭dī॒yetendra̭-me॒va pra̭dā॒tāra॒gg॒ svena̭ bhāga॒dheye॒nopa̭-dhāvati॒ sa e॒vāsmai॒ pra-dā̭paya॒tīndrā̭ya su॒trāmṇḙ puro॒ḍāśa॒-mekā̭daśakapāla॒-nnirva̭pe॒-dapa̭ruddho vā- [-dapa̭ruddho vā, a॒pa॒ru॒ddhayamā̭no॒] || 43 ||
-'paru॒ddhayamā̭no॒ vendra̭me॒va su॒trāmā̭ṇa॒gg॒ svena̭ bhāga॒dheye॒nopa̭ dhāvati॒ sa e॒vaina̭-ntrāyate 'naparu॒ddhyo bha̭va॒tīndro॒ vai sa॒dṛ-nde॒vatā̭bhirāsī॒-thsa na vyā॒vṛta̭magaccha॒-thsa pra॒jāpa̭ti॒-mupā̭dhāva॒-ttasmā̭ e॒ta-mai॒ndra-mekā̭daśakapāla॒-nnira̭vapa॒-ttenai॒-vā-'smi̭-nnindri॒ya-ma̭dadhā॒-cchakva̭rī yājyānuvā॒kyḙ akaro॒-dvajro॒ vai śakva̭rī॒ sa ḙnaṃ॒-va~jro॒ bhūtyā̭ aindha॒- [bhūtyā̭ aindha, so̭-'bhava॒-thso̭-'bibhe-] || 44 ||
-so̭-'bhava॒thso̭-'bibhe-dbhū॒taḥ pra mā̭ dhakṣya॒tīti॒ sa pra॒jāpa̭ti॒-mpuna॒rupā̭-'dhāva॒-thsa pra॒jāpa̭ti॒-śśakva̭ryā॒ adhi̭ re॒vatī॒-nnira̭mimīta॒ śāntyā॒ apra̭dāhāya॒ yo-'lagg̭ śri॒yai san-thsa॒dṛṅkhsa̭mā॒nai-ssyā-ttasmā̭ e॒ta-mai॒ndra-mekā̭daśakapāla॒-nnirva̭pe॒-dindra̭me॒va svena̭ bhāga॒dheye॒nopa̭ dhāvati॒ sa e॒vā-'smi̭-nnindri॒ya-nda̭dhāti re॒vatī̭ puronuvā॒kyā̭ bhavati॒ śāntyā॒ apra̭dāhāya॒ śakva̭rī yā॒jyā̭ vajro॒ vai śakva̭rī॒sa ḙnaṃ॒-va~jro॒ bhūtyā̭ indhe॒ bhava̭tye॒va || 45 ||
(api॒ - tagg - syṷ - rvai - ndha - bhavati॒ - catṷrdaśa ca ) (a. 8)
ā॒gnā॒-vai॒ṣṇa॒va-mekā̭daśakapāla॒-nnirva̭pe-dabhi॒cara॒n-thsara̭sva॒tyājya̭ bhāgā॒ syā-dbā̭rhaspa॒t yaśca॒ruryadā᳚gnā-vaiṣṇa॒va ekā̭daśakapālo॒ bhava̭tya॒gni-ssarvā̭ de॒vatā॒ viṣṇṷrya॒jño de॒vatā̭bhi-ścai॒vainaṃ̭-ya~॒jñena̭ cā॒bhi ca̭rati॒-sara̭sva॒tyājya̭bhāgā bhavati॒ vāgvai sara̭svatī vā॒caivaina̭-ma॒bhi ca̭rati bārhaspa॒tya-śca॒ru rbha̭vati॒ brahma॒ vai de॒vānā॒-mbṛha॒spati॒ rbrahma̭ṇai॒vaina̭-ma॒bhi ca̭rati॒ [-ma॒bhi ca̭rati, prati॒ vai] || 46 ||
prati॒ vai pa॒rastā̭-dabhi॒cara̭nta-ma॒bhi ca̭ranti॒ dvedvḙ puro-'nuvā॒kyḙ kuryā॒dati॒ prayṷktyā e॒tayai॒va ya̭jetābhi ca॒ryamā̭ṇo de॒vatā̭bhi-re॒va de॒vatāḥ᳚ prati॒cara̭ti ya॒jñena̭ ya॒jñaṃ-vā~॒cā vāca॒-mbrahma̭ṇā॒ brahma॒ sa de॒vatā᳚ścai॒va ya॒jña-ñca̭ maddhya॒to vyava̭sarpati॒ tasya॒ na kuta̭-śca॒nopā᳚vyā॒dho bha̭vati॒ naina̭-mabhi॒caran᳚-thstṛṇuta āgnāvaiṣṇa॒va-mekā̭daśakapāla॒-nnirva̭pe॒dyaṃ-ya~॒jño no- [-ya॒jño na, u॒pa॒namḙda॒gni-ssarvā̭] || 47 ||
-pa॒namḙda॒gni-ssarvā̭ de॒vatā॒ viṣṇṷ-rya॒jño᳚-'gni-ñcai॒va viṣṇṷ-ñca॒ svena̭ bhāga॒dheye॒nopa̭ dhāvati॒ tāve॒vāsmai̭ ya॒jña-mpraya̭cchata॒ upai̭naṃ-ya~॒jño na̭matyāgnā- vaiṣṇa॒va-ṅghṛ॒te ca॒ru-nnirva̭pe॒ccakṣṷṣkāmo॒-'gnervai cakṣṷṣā manu॒ṣyā̭ vi pa̭śyanti ya॒jñasya̭ de॒vā a॒gni-ñcai॒va viṣṇṷ-ñca॒ svena̭ bhāga॒dheye॒nopa̭ dhāvati॒ tāve॒vā- [tāve॒va, a॒smi॒n cakṣṷrdhatta॒-] || 48 ||
-'smi॒n cakṣṷ-rdhatta॒-ścakṣṷṣmā-ne॒va bha̭vati dhe॒nvai vā e॒ta-dreto॒ yadājya̭-mana॒ḍuha̭-staṇḍu॒lā mi̭thu॒nā-de॒vāsmai॒ cakṣuḥ॒ praja̭nayati ghṛ॒te bha̭vati॒ tejo॒ vai ghṛ॒ta-nteja॒ścakṣu॒-steja̭sai॒vāsmai॒ teja॒-ścakṣu॒rava̭ rundha indri॒yaṃ-vai~ vī॒ryaṃ̭-vṛ~ṅkte॒ bhrātṛ̭vyo॒ yaja̭mā॒no-'ya̭jamānasyā-dhva॒raka̭lpā॒-mprati॒ nirva̭pe॒-dbhrātṛ̭vye॒ yaja̭māne॒ nā-'sye᳚ndri॒yaṃ- [nā-'sye᳚ndri॒yam, vī॒ryaṃ̭ ~vṛṅkte] || 49 ||
-~vī॒ryaṃ̭ ~vṛṅkte pu॒rāvā॒caḥ prava̭dito॒-rnirva̭pe॒-dyāva̭tye॒va vā-ktāmapro̭ditā॒-mbhrātṛ̭vyasya vṛṅkte॒ tāma̭sya॒ vāca̭-mpra॒vada̭ntī-ma॒nyā vāco-'nu॒ prava̭danti॒ tā i̭ndri॒yaṃ-vī~॒ryaṃ̭-ya~ja̭māne dadhatyāgnā vaiṣṇa॒va-ma॒ṣṭāka̭pāla॒-nnirva̭pe-tprāta-ssavana॒syā̭-'' kā॒le sara̭sva॒tyājya̭bhāgā॒ syā-dbā̭rhaspa॒tyaśca॒ru- ryada॒ṣṭāka̭pālo॒ bhava̭tya॒ṣṭākṣa̭rā gāya॒trī gā̭ya॒tra-mprā̭ta-ssava॒na-mprā̭ta-ssava॒name॒va tenā᳚-''pno- [tenā᳚-''pnoti, ā॒gnā॒vai॒ṣṇa॒va-] || 50 ||
-tyāgnāvaiṣṇa॒va-mekā̭daśakapāla॒-nnirva̭pe॒-nmāddhya̭ndinasya॒ sava̭nasyā-'' kā॒le sara̭sva॒tyājya̭bhāgā॒ syā-dbā̭rhaspa॒tya-śca॒ru ryadekā̭daśakapālo॒ bhava॒tyekā̭daśākṣarā tri॒ṣṭu-ptraiṣṭṷbha॒-mmāddhya̭ndina॒gṃ॒ sava̭na॒-mmāddhya̭dinname॒va sava̭na॒-ntenā᳚-''pnotyāgnāvaiṣṇa॒va-ndvāda̭śakapāla॒-nnirva̭pe-ttṛtīyasava॒nasyā̭-''kā॒le sara̭sva॒tyājya̭bhāgā॒ syā-dbā̭rhaspa॒tya-śca॒rurya-ddvāda̭śakapālo॒ bhava̭ti॒ dvāda̭śākṣarā॒ jaga̭tī॒ jāga̭ta-ntṛtīyasava॒na-ntṛ̭tīya sava॒name॒va tenā᳚-''pnoti de॒vatā̭bhire॒va de॒vatāḥ᳚ [de॒vatāḥ᳚, pra॒ti॒cara̭ti] || 51 ||
prati॒cara̭ti ya॒jñena̭ ya॒jñaṃ-vā~॒cā vāca॒-mbrahma̭ṇā॒ brahma̭ ka॒pālai̭re॒va chandāg̭syā॒pnoti̭ puro॒ḍāśai॒-ssava̭nāni maitrāvaru॒ṇa-meka̭kapāla॒-nnirva̭pe-dva॒śāyai̭ kā॒le yaivāsau bhrātṛ̭vyasya va॒śā-'nṷ̄ba॒ndhyā̭ so e॒vaiṣaitasyaika̭kapālo bhavati॒ na hi ka॒pālaiḥ᳚ pa॒śu-marha॒tyāptu᳚m || 52 ||
(brahma̭ṇai॒vaina̭ma॒bhi ca̭rati - ya॒jño na - tāve॒vā - 'sye᳚ndri॒ya - mā᳚pnoti -de॒vatāḥ᳚ - sa॒ptatrigṃ̭śacca ) (a. 9)
a॒sāvā̭di॒tyo na vya̭rocata॒ tasmai̭ de॒vāḥ prāya̭ścitti-maiccha॒-ntasmā̭ e॒tagṃ so̭mārau॒dra-ñca॒ru-nnira̭vapa॒-ntenai॒vāsmi॒-nruca̭madadhu॒ryo bra̭hmavarca॒sakā̭ma॒-ssyā-ttasmā̭ e॒tagṃ so̭mārau॒dra-ñca॒ru-nnirva̭pe॒-thsoma̭-ñcai॒va ru॒dra-ñca॒ svena̭ bhāga॒dheye॒nopa̭ dhāvati॒ tāve॒vāsmi̭-nbrahmavarca॒sa-ndha̭tto brahmavarca॒syḙva bha̭vati tiṣyāpūrṇamā॒se nirva̭pedru॒dro [nirva̭pedru॒draḥ, vai ti॒ṣyaḥ̭ somaḥ̭] || 53 ||
vai ti॒ṣyaḥ̭ somaḥ̭ pū॒rṇamā̭sa-ssā॒kṣāde॒va bra̭hmavarca॒samava̭ rundhe॒ pari̭śrite yājayati brahmavarca॒sasya॒ pari̭gṛhītyai śve॒tāyai᳚ śve॒tava̭thsāyai du॒gdha-mma̭thi॒tamājya̭-mbhava॒tyājya॒-mprokṣa̭ṇa॒mājyḙna mārjayante॒ yāva̭de॒va bra̭hmavarca॒sa-nta-thsarva̭-ṅkaro॒tyati̭ brahmavarca॒sa-ṅkri̭yata॒ ityā̭hurīśva॒ro du॒ścarmā॒ bhavi̭to॒riti̭ māna॒vī ṛcaṷ dhā॒yyḙ kuryā॒-dyadvai kiñca॒ manu॒-rava̭da॒tta-dbhḙṣa॒jaṃ- [-dbhḙṣa॒jam, bhe॒ṣa॒ja-me॒vā-'smai̭] || 54 ||
-bhḙṣa॒ja-me॒vā-'smai̭ karoti॒ yadi̭ bibhī॒yā-ddu॒ścarmā̭ bhaviṣyā॒mīti̭ somāpau॒ṣṇa-ñca॒ru-nnirva̭pe-thsau॒myo vai de॒vata̭yā॒ purṷṣaḥ pau॒ṣṇāḥ pa॒śava॒-ssvayai॒ vāsmai̭ de॒vata̭yā pa॒śubhi॒-stvaca̭-ṅkaroti॒ na du॒ścarmā̭ bhavati somārau॒dra-ñca॒ru-nnirva̭pe-tpra॒jākā̭ma॒-ssomo॒ vai rḙto॒dhā a॒gniḥ pra॒jānā᳚-mprajanayi॒tā soma̭ e॒vāsmai॒ reto॒ dadhā᳚tya॒gniḥ pra॒jā-mpraja̭nayati vi॒ndate᳚ - [ ] || 55 ||
pra॒jāgṃ so̭mārau॒dra-ñca॒ru-nnirva̭pe-dabhi॒caran᳚-thsau॒myo vai de॒vata̭yā॒ purṷṣa e॒ṣa ru॒dro yada॒gni-ssvāyā̭ e॒vaina̭-nde॒vatā̭yai ni॒ṣkrīya̭ ru॒drāyāpi̭ dadhāti tā॒jagārti॒-mārccha̭ti somārau॒dra-ñca॒ru-nnirva̭pe॒-jjyogā̭mayāvī॒ somaṃ॒-vā~ e॒tasya॒ raso̭ gacchatya॒gnigṃ śarī̭raṃ॒-ya~sya॒ jyogā॒maya̭ti॒ somā̭de॒vāsya॒ rasa̭-nniṣkrī॒ṇātya॒gne-śśarī̭ramu॒ta yadī॒- [yadi̭, i॒tāsu॒ rbhava̭ti॒] || 56 ||
-tāsu॒ rbhava̭ti॒ jīva̭tye॒va so̭māru॒drayo॒rvā e॒ta-ṅgra̭si॒tagṃ hotā॒ niṣkhi̭dati॒ sa ī᳚śva॒ra ārti॒mārto̭-rana॒ḍvān. hotrā॒ deyo॒ vahni॒rvā a̭na॒ḍvān. vahni॒r॒hotā॒ vahni̭nai॒va vahni̭-mā॒tmānagg̭ spṛṇoti somārau॒dra-ñca॒ru-nnirva̭pe॒dyaḥ kā॒mayḙta॒ sve᳚-'smā ā॒yata̭ne॒ bhrātṛ̭vya-ñjanayeya॒miti॒ vedi̭-mpari॒gṛhyā॒-'rdha-mṷddha॒nyā-da॒rdha-nnārdha-mba॒r॒hiṣaḥ̭ stṛṇī॒yā-da॒rdha-nnārdha-mi॒ddhmasyā᳚-'bhyā-da॒ddhyā-dad॒rdha-nna sva e॒vāsmā̭ ā॒yata̭ne॒ bhrātṛ̭vya-ñjanayati || 57 ||
(ru॒dro - bhḙṣa॒jaṃ - vi॒ndate॒- yadi̭ - stṛṇī॒yāda॒rdhaṃ - dvāda̭śa ca) (a. 10)
ai॒ndra-mekā̭daśakapāla॒-nnirva̭penmāru॒tagṃ sa॒ptaka̭pāla॒-ṅgrāma̭kāma॒ indra̭-ñcai॒va ma॒ruta̭śca॒ svena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vatyāhava॒nīya̭ ai॒ndramadhi̭ śrayati॒ gārha̭patye māru॒ta-mpā̭pavasya॒sasya॒ vidhṛ̭tyai sa॒ptaka̭pālo māru॒to bha̭vati sa॒ptaga̭ṇā॒ vai ma॒ruto̭gaṇa॒śa e॒vāsmai̭ sajā॒tānava̭ rundhe-'nū॒cyamā̭na॒ ā sā̭dayati॒ viśa̭me॒vā- [viśa̭me॒va, a॒smā॒ anṷvartmānaṃ-] || 58 ||
-'smā॒ anṷvartmāna-ṅkarotye॒tāme॒va nirva̭pe॒dyaḥ kā॒mayḙta kṣa॒trāya̭ ca vi॒śe ca̭ sa॒mada̭-ndaddhyā॒-mityai॒ndrasyā̭-'va॒dya-nbrṷ̄yā॒-dindrā॒yā-'nṷ brū॒hītyā॒śrāvya̭ brūyā-nma॒ruto̭ ya॒jeti̭ māru॒tasyā̭-'va॒dya-nbrṷ̄yā-nma॒rudbhyo-'nṷ brū॒hītyā॒śrāvya̭ brūyā॒dindraṃ̭-ya~॒jeti॒ sva e॒vaibhyo̭ bhāga॒dheyḙ sa॒mada̭-ndadhāti vitṛgṃhā॒ṇā-sti̭ṣṭhantye॒ tāme॒va [ ] || 59 ||
nirva̭pe॒dyaḥ kā॒mayḙta॒ kalpḙra॒nniti̭ yathādeva॒ta-ma̭va॒dāya̭ yathā deva॒taṃ-ya~̭je-dbhāga॒dheyḙnai॒vaināṋ yathāya॒tha-ṅka̭lpayati॒ kalpa̭nta e॒vaindra-mekā̭daśakapāla॒-nnirva̭pe-dvaiśvade॒va-ndvāda̭śakapāla॒-ṅgrāma̭kāma॒ indra̭-ñcai॒va viśvāg̭śca de॒vān-thsvena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vatyai॒ndrasyā̭-'va॒dāya̭ vaiśvade॒vasyāva̭ dye॒-dathai॒ndrasyo॒- [-dathai॒ndrasya̭, u॒pari̭ṣṭā-] || 60 ||
-pari̭ṣṭā-dindri॒yeṇai॒vāsmā̭ ubha॒yataḥ̭ sajā॒tā-npari̭ gṛhṇātyupādhā॒yya̭ pūrvayaṃ॒-vā~so॒ dakṣi̭ṇā sajā॒tānā॒mupa̭hityai॒ pṛśñi̭yai du॒gdhe praiya̭ṅgava-ñca॒ru-nnirva̭penma॒rudbhyo॒ grāma̭kāmaḥ॒ pṛśñi̭yai॒ vai paya̭so ma॒ruto̭ jā॒tāḥ pṛśñi̭yai pri॒yaṅga̭vo māru॒tāḥ khalu॒ vai de॒vata̭yā sajā॒tā ma॒ruta̭ e॒va svena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npraya̭cchanti grā॒myḙva bha̭vati pri॒yava̭tī yājyānuvā॒kyḙ [yājyānuvā॒kye᳚, bha॒va॒taḥ॒ pri॒yame॒vainagṃ̭] || 61 ||
bhavataḥ pri॒yame॒vainagṃ̭ samā॒nānā᳚-ṅkaroti dvi॒padā̭ puro-'nuvā॒kyā̭ bhavati dvi॒pada̭ e॒vāva̭ rundhe॒ catṷṣpadā yā॒jyā̭ catṷṣpada e॒va pa॒śūnava̭ rundhe devāsu॒rā-ssaṃya~̭ttā āsa॒-nte de॒vā mi॒tho vipri̭yā āsa॒-nte᳚(1॒) 'nyo᳚-'nyasmai॒ jyaiṣṭhyā॒yā-ti̭ṣṭhamānā-ścatu॒rdhā vya̭krāma-nna॒gni-rvasṷbhi॒-ssomo̭ ru॒drairindro̭ ma॒rudbhi॒-rvarṷṇa ādi॒tyai-ssa indraḥ̭ pra॒jāpa̭ti॒-mupā̭-'dhāva॒-tta- [-'dhāva॒-ttam, e॒tayā̭] || 62 ||
-me॒tayā̭ saṃ॒(2)jñānyā̭-'yājaya-da॒gnaye॒ vasṷmate puro॒ḍāśa̭-ma॒ṣṭāka̭pāla॒-nnira̭vapa॒-thsomā̭ya ru॒drava̭te ca॒rumindrā̭ya ma॒rutva̭te puro॒ḍāśa॒ -mekā̭daśakapālaṃ॒-va~rṷṇāyā-''di॒tyava̭te ca॒ru-ntato॒ vā indra̭-nde॒vā jyaiṣṭhyā̭yā॒bhi sama̭jānata॒ ya-ssa̭mā॒nai-rmi॒tho vipri̭ya॒-ssyā-ttame॒tayā̭ saṃ॒(2)jñānyā̭ yājaye-da॒gnaye॒ vasṷmate puro॒ḍāśa̭-ma॒ṣṭāka̭pāla॒-nnirva̭pe॒-thsomā̭ya ru॒drava̭te ca॒ru-mindrā̭ya ma॒rutva̭te puro॒ḍāśa॒-mekā̭daśakapālaṃ॒-va~rṷṇāyā ''di॒tyava̭te ca॒ru-mindra̭-me॒vaina̭-mbhū॒ta-ñjyaiṣṭhyā̭ya samā॒nā a॒bhi sa-ñjā̭nate॒ vasi̭ṣṭha-ssamā॒nānā᳚-mbhavati || 63 ||
(viśa̭me॒va - ti̭ṣṭhantye॒tāme॒ - vāthai॒ndrasya̭ - yājyānuvā॒kyḙ - taṃ - ~varṷṇāya॒ -catṷrdaśa ca) (a. 11)
hi॒ra॒ṇya॒ga॒rbha āpo̭ ha॒ yatprajā̭pate || sa vḙda pu॒traḥ pi॒tara॒gṃ॒ sa mā॒tara॒gṃ॒ sa sū॒nubha̭rva॒-thsa bhṷva॒-tpuna̭rmaghaḥ | sa dyāmaurṇo̭da॒ntari̭kṣa॒gṃ॒ sa suva॒-ssa viśvā॒ bhuvo̭ abhava॒-thsa ā-'bha̭vat || udu॒ tya-ñci॒tram || sa pra̭tna॒vannavī̭ya॒sā-'gne᳚ dyu॒mnena̭ saṃ॒ya~tā᳚ | bṛ॒ha-tta̭tantha bhā॒nunā᳚ || ni kāvyā̭ ve॒dhasa॒-śśaśva̭taska॒r॒haste॒ dadhā̭no॒ [dadhā̭naḥ, naryā̭ pu॒rūṇi̭ |] || 64 ||
naryā̭ pu॒rūṇi̭ | a॒gnirbhṷvadrayi॒patī̭ rayī॒ṇāgṃ sa॒trā ca̭krā॒ṇo a॒mṛtā̭ni॒ viśvā᳚ || hira̭ṇyapāṇimū॒tayḙ savi॒tāra॒mupa̭ hvaye | sa cettā̭ de॒vatā̭ pa॒dam || vā॒mama॒dya sa̭vitarvā॒mamu॒ śvo di॒vedi̭ve vā॒mama॒smabhyagṃ̭ sāvīḥ | vā॒masya॒ hi kṣaya̭sya deva॒ bhūrḙra॒yā dhi॒yā vā̭ma॒bhājaḥ̭ syāma || baḍi॒tthā parva̭tānā-ṅkhi॒dra-mbi̭bharṣi pṛthivi | pra yā bhṷ̄mi pravatvati ma॒hnā ji॒noṣi̭ [ji॒noṣi̭, ma॒hi॒ni॒ |] || 65 ||
mahini || stomā̭sastvā vicāriṇi॒ prati̭ṣṭobhantya॒ktubhiḥ̭ | prayā vāja॒-nna heṣa̭nta-mpe॒ru-masya̭syarjuni || ṛ॒dū॒darḙṇa॒ sakhyā̭ saceya॒ yo mā॒ na riṣye᳚ddharyaśva pī॒taḥ | a॒yaṃ-ya~-ssomo॒ nyadhā᳚yya॒sme tasmā॒ indra̭-mpra॒tira̭-me॒myaccha̭ || āpā᳚ntamanyu-stṛ॒pala̭-prabharmā॒ dhuni॒-śśimī̭ vā॒ñcharṷmāgṃ ṛjī॒ṣī | somo॒ viśvā᳚nyata॒sā vanā̭ni॒ nārvāgindra̭-mprati॒mānā̭ni debhuḥ || pra- [pra, su॒vā॒na-ssoma̭] || 66 ||
-sṷvā॒na-ssoma̭ ṛta॒yu-ści̭ke॒tendrā̭ya॒ brahma̭ ja॒mada̭gni॒-rarcanṋ | vṛṣā̭ ya॒ntā-'si॒ śava̭sa-stu॒rasyā॒-'nta-rya̭ccha gṛṇa॒te dha॒rtra-ndṛgṃ̭ha || sa॒bādha̭ste॒ mada̭-ñca śuṣma॒ya-ñca॒ brahma॒ naro᳚ brahma॒kṛtaḥ̭ saparyann | a॒rko vā॒ ya-ttu॒rate॒ soma̭cakṣā॒-statre-dindro̭ dadhate pṛ॒thsu tu॒ryām || vaṣa̭-ṭte viṣṇavā॒sa ā kṛ̭ṇomi॒ tanmḙ juṣasva śipiviṣṭa ha॒vyam | || 67 ||
vardha̭ntu tvā suṣṭu॒tayo॒ giro̭ me yū॒ya-mpā̭ta sva॒stibhi॒-ssadā̭ naḥ ||pra ta-ttḙ a॒dya śi̭piviṣṭa॒ nāmā॒-'rya-śśagṃ̭ sāmi va॒yunā̭ni vi॒dvān | tantvā̭ gṛṇāmi ta॒vasa॒-mata̭vīyā॒n kṣaya̭ntama॒sya raja̭saḥ parā॒ke || kimi-ttḙ viṣṇo pari॒cakṣya̭-mbhū॒-tpra yadva̭va॒kṣe śi̭pivi॒ṣṭo a̭smi | mā varpo̭ a॒smadapa̭ gūha e॒tadya-da॒nyarṷ̄pa-ssami॒the ba॒bhūtha̭ | || 68 ||
agne॒ dā dā॒śuṣḙ ra॒yiṃ-vī~॒rava̭nta॒-mparī̭ṇasam | śi॒śī॒hi naḥ̭ sūnu॒mataḥ̭ || dā no̭ agne śa॒tino॒ dā-ssa̭ha॒sriṇo̭ du॒ro na vāja॒gg॒ śrutyā॒ apā̭ vṛdhi | prācī॒ dyāvā̭pṛthi॒vī brahma̭ṇā kṛdhi॒ suva॒rṇa śu॒kramu॒ṣaso॒ vi di̭dyutuḥ || a॒gnirdā॒ dravi̭ṇaṃ-vī~॒rapḙśā a॒gnir-ṛṣiṃ॒-ya~-ssa॒hasrā̭ sa॒noti̭ | a॒gnirdi॒vi ha॒vyamā ta̭tānā॒-'gne-rdhāmā̭ni॒ vibhṛ̭tā puru॒trā || mā [mā, no॒ ma॒rdhī॒ rā tū bha̭ra |] || 69 ||
no̭ mardhī॒ rā tū bha̭ra || ghṛ॒ta-nna pū॒ta-nta॒nūra̭re॒pā-śśuci॒ hira̭ṇyam | ta-ttḙ ru॒kmo na ro̭cata svadhāvaḥ || u॒bhe sṷścandra sa॒rpiṣo॒ darvī᳚ śrīṇīṣa ā॒sani̭ | u॒to na॒ u-tpṷpūryā u॒ktheṣṷ śavasaspata॒ iṣagg̭ sto॒tṛbhya॒ ā bha̭ra || vāyo̭ śa॒tagṃ harī̭ṇāṃ-yu~॒vasva॒ poṣyā̭ṇām | u॒ta vā̭ te saha॒sriṇo॒ ratha॒ ā yā̭tu॒ pāja̭sā || pra yābhi॒- [pra yābhiḥ, yāsi̭ dā॒śvāgṃ sa॒macchā̭] || 70 ||
-ryāsi̭ dā॒śvāgṃ sa॒macchā̭ ni॒yudbhi̭-rvāyavi॒ṣṭayḙ duro॒ṇe | ni no̭ ra॒yigṃ su॒bhoja̭saṃ-yu~ve॒ha ni vī॒rava॒-dgavya॒maśvi̭ya-ñca॒ rādhaḥ̭ ||re॒vatī᳚rna-ssadha॒māda॒ indrḙ santu tu॒vivā̭jāḥ | kṣu॒manto॒ yābhi॒rmadḙma || re॒vāgṃ idre॒vataḥ̭ sto॒tā syā-ttvāva̭to ma॒ghonaḥ̭ | predṷ hariva-śśru॒tasya̭ || 71 ||
(dadhā̭no - ji॒noṣi̭ - debhuḥ॒ pra - ha॒vyaṃ - ba॒bhūtha॒ - mā - yābhi̭ - ścatvāri॒gṃ॒śacca̭ ) (a. 12)
(pra॒jāpa̭ti॒stā-ssṛ॒ṣṭā - a॒gnayḙ pathi॒kṛte॒ - gnaye॒ kāmā̭yā॒ - gnayenna̭vate -vaiśvāna॒ra -mā̭di॒tya-ñca॒ru - mai॒ndra-ñca॒ru - mindrā॒yānvṛ̭java - āgnāvaiṣṇa॒va -ma॒sau so̭mārau॒dra - mai॒ndrama॒kā̭daśakapālagṃ- hiraṇyaga॒rbho - dvāda̭śa )
(pra॒jāpa̭ti - ra॒gnaye॒ kāmā̭yā॒ - 'bhi sa-mbha̭vato॒ - yo vi̭dviṣā॒ṇayo̭ -ri॒dhme sanna̭ hye - dāgnāvaiṣṇa॒vamu॒ - pari̭ṣṭā॒ - dyāsi̭ dā॒śvāgṃsa॒ - meka̭saptatiḥ )
(pra॒jāpa̭tiḥ॒, predṷ hariva-śśru॒tasya̭)
|| hariḥ̭ om ||
|| kṛṣṇa yajurvedīya taittirīya saṃhitāyā-ndvitīyakāṇḍe dvitīyaḥ praśna-ssamāptaḥ ||
🕉️ This is the original Sanskrit rendered in Kannada script.
Pronunciation is identical to the Sanskrit Devanagari version.