𑌸𑌰𑍍𑌵𑌵𑍇𑌦𑌾𑌨𑍍𑌤𑌸𑌿𑌦𑍍𑌧𑌾𑌨𑍍𑌤𑌗𑍋𑌚𑌰𑌂 𑌤𑌮𑌗𑍋𑌚𑌰𑌮𑍍 ।
𑌗𑍋𑌵𑌿𑌨𑍍𑌦𑌂 𑌪𑌰𑌮𑌾𑌨𑌨𑍍𑌦𑌂 𑌸𑌦𑍍𑌗𑍁𑌰𑍁𑌂 𑌪𑍍𑌰𑌣𑌤𑍋𑌽𑌸𑍍𑌮𑍍𑌯𑌹𑌮𑍍 ॥ 1॥
𑌜𑌨𑍍𑌤𑍂𑌨𑌾𑌂 𑌨𑌰𑌜𑌨𑍍𑌮 𑌦𑍁𑌰𑍍𑌲𑌭𑌮𑌤𑌃 𑌪𑍁𑌂𑌸𑍍𑌤𑍍𑌵𑌂 𑌤𑌤𑍋 𑌵𑌿𑌪𑍍𑌰𑌤𑌾
𑌤𑌸𑍍𑌮𑌾𑌦𑍍𑌵𑍈𑌦𑌿𑌕𑌧𑌰𑍍𑌮𑌮𑌾𑌰𑍍𑌗𑌪𑌰𑌤𑌾 𑌵𑌿𑌦𑍍𑌵𑌤𑍍𑌤𑍍𑌵𑌮𑌸𑍍𑌮𑌾𑌤𑍍𑌪𑌰𑌮𑍍 ।
𑌆𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌚𑌨𑌂 𑌸𑍍𑌵𑌨𑍁𑌭𑌵𑍋 𑌬𑍍𑌰𑌹𑍍𑌮𑌾𑌤𑍍𑌮𑌨𑌾 𑌸𑌂𑌸𑍍𑌥𑌿𑌤𑌿𑌃
𑌮𑍁𑌕𑍍𑌤𑌿𑌰𑍍𑌨𑍋 𑌶𑌤𑌜𑌨𑍍𑌮𑌕𑍋𑌟𑌿𑌸𑍁𑌕𑍃𑌤𑍈𑌃 𑌪𑍁𑌣𑍍𑌯𑍈𑌰𑍍𑌵𑌿𑌨𑌾 𑌲𑌭𑍍𑌯𑌤𑍇 ॥ 2॥ (𑌪𑌾𑌠𑌭𑍇𑌦𑌃 - 𑌶𑌤𑌕𑍋𑌟𑌿𑌜𑌨𑍍𑌮𑌸𑍁 𑌕𑍃𑌤𑍈𑌃)
𑌦𑍁𑌰𑍍𑌲𑌭𑌂 𑌤𑍍𑌰𑌯𑌮𑍇𑌵𑍈𑌤𑌦𑍍𑌦𑍇𑌵𑌾𑌨𑍁𑌗𑍍𑌰𑌹𑌹𑍇𑌤𑍁𑌕𑌮𑍍 ।
𑌮𑌨𑍁𑌷𑍍𑌯𑌤𑍍𑌵𑌂 𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌮𑌹𑌾𑌪𑍁𑌰𑍁𑌷𑌸𑌂𑌶𑍍𑌰𑌯𑌃 ॥ 3॥
𑌲𑌬𑍍𑌧𑍍𑌵𑌾 𑌕𑌥𑌞𑍍𑌚𑌿𑌨𑍍𑌨𑌰𑌜𑌨𑍍𑌮 𑌦𑍁𑌰𑍍𑌲𑌭𑌂 (𑌪𑌾𑌠𑌭𑍇𑌦𑌃 - 𑌕𑌥𑌞𑍍𑌚𑌿𑌨𑍍)
𑌤𑌤𑍍𑌰𑌾𑌪𑌿 𑌪𑍁𑌂𑌸𑍍𑌤𑍍𑌵𑌂 𑌶𑍍𑌰𑍁𑌤𑌿𑌪𑌾𑌰𑌦𑌰𑍍𑌶𑌨𑌮𑍍 ।
𑌯𑌸𑍍𑌤𑍍𑌵𑌾𑌤𑍍𑌮𑌮𑍁𑌕𑍍𑌤𑍗 𑌨 𑌯𑌤𑍇𑌤 𑌮𑍂𑌢𑌧𑍀𑌃
𑌸 𑌹𑍍𑌯𑌾𑌤𑍍𑌮𑌹𑌾 𑌸𑍍𑌵𑌂 𑌵𑌿𑌨𑌿𑌹𑌨𑍍𑌤𑍍𑌯𑌸𑌦𑍍𑌗𑍍𑌰𑌹𑌾𑌤𑍍 ॥ 4॥ (𑌪𑌾𑌠𑌭𑍇𑌦𑌃 - 𑌆𑌤𑍍𑌮𑌹𑌾 𑌸𑍍𑌵𑌂)
𑌇𑌤𑌃 𑌕𑍋 𑌨𑍍𑌵𑌸𑍍𑌤𑌿 𑌮𑍂𑌢𑌾𑌤𑍍𑌮𑌾 𑌯𑌸𑍍𑌤𑍁 𑌸𑍍𑌵𑌾𑌰𑍍𑌥𑍇 𑌪𑍍𑌰𑌮𑌾𑌦𑍍𑌯𑌤𑌿 ।
𑌦𑍁𑌰𑍍𑌲𑌭𑌂 𑌮𑌾𑌨𑍁𑌷𑌂 𑌦𑍇𑌹𑌂 𑌪𑍍𑌰𑌾𑌪𑍍𑌯 𑌤𑌤𑍍𑌰𑌾𑌪𑌿 𑌪𑍗𑌰𑍁𑌷𑌮𑍍 ॥ 5॥
𑌵𑌦𑌨𑍍𑌤𑍁 𑌶𑌾𑌸𑍍𑌤𑍍𑌰𑌾𑌣𑌿 𑌯𑌜𑌨𑍍𑌤𑍁 𑌦𑍇𑌵𑌾𑌨𑍍 (𑌪𑌾𑌠𑌭𑍇𑌦𑌃 - 𑌪𑌠𑌨𑍍𑌤𑍁)
𑌕𑍁𑌰𑍍𑌵𑌨𑍍𑌤𑍁 𑌕𑌰𑍍𑌮𑌾𑌣𑌿 𑌭𑌜𑌨𑍍𑌤𑍁 𑌦𑍇𑌵𑌤𑌾𑌃 ।
𑌆𑌤𑍍𑌮𑍈𑌕𑍍𑌯𑌬𑍋𑌧𑍇𑌨 𑌵𑌿𑌨𑌾𑌪𑌿 𑌮𑍁𑌕𑍍𑌤𑌿- (𑌪𑌾𑌠𑌭𑍇𑌦𑌃 - 𑌵𑌿𑌨𑌾 𑌵𑌿𑌮𑍁𑌕𑍍𑌤𑌿𑌃 𑌨)
𑌰𑍍𑌨 𑌸𑌿𑌧𑍍𑌯𑌤𑌿 𑌬𑍍𑌰𑌹𑍍𑌮𑌶𑌤𑌾𑌨𑍍𑌤𑌰𑍇𑌽𑌪𑌿 ॥ 6॥
𑌅𑌮𑍃𑌤𑌤𑍍𑌤𑍍𑌵𑌸𑍍𑌯 𑌨𑌾𑌶𑌾𑌸𑍍𑌤𑌿 𑌵𑌿𑌤𑍍𑌤𑍇𑌨𑍇𑌤𑍍𑌯𑍇𑌵 𑌹𑌿 𑌶𑍍𑌰𑍁𑌤𑌿𑌃 ।
𑌬𑍍𑌰𑌵𑍀𑌤𑌿 𑌕𑌰𑍍𑌮𑌣𑍋 𑌮𑍁𑌕𑍍𑌤𑍇𑌰𑌹𑍇𑌤𑍁𑌤𑍍𑌵𑌂 𑌸𑍍𑌫𑍁𑌟𑌂 𑌯𑌤𑌃 ॥ 7॥
𑌅𑌤𑍋 𑌵𑌿𑌮𑍁𑌕𑍍𑌤𑍍𑌯𑍈 𑌪𑍍𑌰𑌯𑌤𑍇𑌤 𑌵𑌿𑌦𑍍𑌵𑌾𑌨𑍍
𑌸𑌨𑍍𑌨𑍍𑌯𑌸𑍍𑌤𑌬𑌾𑌹𑍍𑌯𑌾𑌰𑍍𑌥𑌸𑍁𑌖𑌸𑍍𑌪𑍃𑌹𑌃 𑌸𑌨𑍍 ।
𑌸𑌨𑍍𑌤𑌂 𑌮𑌹𑌾𑌨𑍍𑌤𑌂 𑌸𑌮𑍁𑌪𑍇𑌤𑍍𑌯 𑌦𑍇𑌶𑌿𑌕𑌂
𑌤𑍇𑌨𑍋𑌪𑌦𑌿𑌷𑍍𑌟𑌾𑌰𑍍𑌥𑌸𑌮𑌾𑌹𑌿𑌤𑌾𑌤𑍍𑌮𑌾 ॥ 8॥
𑌉𑌦𑍍𑌧𑌰𑍇𑌦𑌾𑌤𑍍𑌮𑌨𑌾𑌽𑌽𑌤𑍍𑌮𑌾𑌨𑌂 𑌮𑌗𑍍𑌨𑌂 𑌸𑌂𑌸𑌾𑌰𑌵𑌾𑌰𑌿𑌧𑍗 ।
𑌯𑍋𑌗𑌾𑌰𑍂𑌢𑌤𑍍𑌵𑌮𑌾𑌸𑌾𑌦𑍍𑌯 𑌸𑌮𑍍𑌯𑌗𑍍𑌦𑌰𑍍𑌶𑌨𑌨𑌿𑌷𑍍𑌠𑌯𑌾 ॥ 9॥
𑌸𑌨𑍍𑌨𑍍𑌯𑌸𑍍𑌯 𑌸𑌰𑍍𑌵𑌕𑌰𑍍𑌮𑌾𑌣𑌿 𑌭𑌵𑌬𑌨𑍍𑌧𑌵𑌿𑌮𑍁𑌕𑍍𑌤𑌯𑍇 ।
𑌯𑌤𑍍𑌯𑌤𑌾𑌂 𑌪𑌣𑍍𑌡𑌿𑌤𑍈𑌰𑍍𑌧𑍀𑌰𑍈𑌰𑌾𑌤𑍍𑌮𑌾𑌭𑍍𑌯𑌾𑌸 𑌉𑌪𑌸𑍍𑌥𑌿𑌤𑍈𑌃 ॥ 10॥
𑌚𑌿𑌤𑍍𑌤𑌸𑍍𑌯 𑌶𑍁𑌦𑍍𑌧𑌯𑍇 𑌕𑌰𑍍𑌮 𑌨 𑌤𑍁 𑌵𑌸𑍍𑌤𑍂𑌪𑌲𑌬𑍍𑌧𑌯𑍇 ।
𑌵𑌸𑍍𑌤𑍁𑌸𑌿𑌦𑍍𑌧𑌿𑌰𑍍𑌵𑌿𑌚𑌾𑌰𑍇𑌣 𑌨 𑌕𑌿𑌞𑍍𑌚𑌿𑌤𑍍𑌕𑌰𑍍𑌮𑌕𑍋𑌟𑌿𑌭𑌿𑌃 ॥ 11॥
𑌸𑌮𑍍𑌯𑌗𑍍𑌵𑌿𑌚𑌾𑌰𑌤𑌃 𑌸𑌿𑌦𑍍𑌧𑌾 𑌰𑌜𑍍𑌜𑍁𑌤𑌤𑍍𑌤𑍍𑌵𑌾𑌵𑌧𑌾𑌰𑌣𑌾 ।
𑌭𑍍𑌰𑌾𑌨𑍍𑌤𑍋𑌦𑌿𑌤𑌮𑌹𑌾𑌸𑌰𑍍𑌪𑌭𑌯𑌦𑍁𑌃𑌖𑌵𑌿𑌨𑌾𑌶𑌿𑌨𑍀 ॥ 12॥ (𑌪𑌾𑌠𑌭𑍇𑌦𑌃 - 𑌭𑍍𑌰𑌾𑌨𑍍𑌤𑍍𑌯𑍋)
𑌅𑌰𑍍𑌥𑌸𑍍𑌯 𑌨𑌿𑌶𑍍𑌚𑌯𑍋 𑌦𑍃𑌷𑍍𑌟𑍋 𑌵𑌿𑌚𑌾𑌰𑍇𑌣 𑌹𑌿𑌤𑍋𑌕𑍍𑌤𑌿𑌤𑌃 ।
𑌨 𑌸𑍍𑌨𑌾𑌨𑍇𑌨 𑌨 𑌦𑌾𑌨𑍇𑌨 𑌪𑍍𑌰𑌾𑌣𑌾𑌯𑌾𑌮𑌶𑌤𑍇𑌨 𑌵𑌾 ॥ 13॥
𑌅𑌧𑌿𑌕𑌾𑌰𑌿𑌣𑌮𑌾𑌶𑌾𑌸𑍍𑌤𑍇 𑌫𑌲𑌸𑌿𑌦𑍍𑌧𑌿𑌰𑍍𑌵𑌿𑌶𑍇𑌷𑌤𑌃 ।
𑌉𑌪𑌾𑌯𑌾 𑌦𑍇𑌶𑌕𑌾𑌲𑌾𑌦𑍍𑌯𑌾𑌃 𑌸𑌨𑍍𑌤𑍍𑌯𑌸𑍍𑌮𑌿𑌨𑍍𑌸𑌹𑌕𑌾𑌰𑌿𑌣𑌃 ॥ 14॥ (𑌪𑌾𑌠𑌭𑍇𑌦𑌃 - 𑌸𑌨𑍍𑌤𑍍𑌯𑌸𑍍𑌯𑌾𑌂)
𑌅𑌤𑍋 𑌵𑌿𑌚𑌾𑌰𑌃 𑌕𑌰𑍍𑌤𑌵𑍍𑌯𑍋 𑌜𑌿𑌜𑍍𑌞𑌾𑌸𑍋𑌰𑌾𑌤𑍍𑌮𑌵𑌸𑍍𑌤𑍁𑌨𑌃 ॥
𑌸𑌮𑌾𑌸𑌾𑌦𑍍𑌯 𑌦𑌯𑌾𑌸𑌿𑌨𑍍𑌧𑍁𑌂 𑌗𑍁𑌰𑍁𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑌮𑍍 ॥ 15॥
𑌮𑍇𑌧𑌾𑌵𑍀 𑌪𑍁𑌰𑍁𑌷𑍋 𑌵𑌿𑌦𑍍𑌵𑌾𑌨𑍂𑌹𑌾𑌪𑍋𑌹𑌵𑌿𑌚𑌕𑍍𑌷𑌣𑌃 ।
𑌅𑌧𑌿𑌕𑌾𑌰𑍍𑌯𑌾𑌤𑍍𑌮𑌵𑌿𑌦𑍍𑌯𑌾𑌯𑌾𑌮𑍁𑌕𑍍𑌤𑌲𑌕𑍍𑌷𑌣𑌲𑌕𑍍𑌷𑌿𑌤𑌃 ॥ 16॥
𑌵𑌿𑌵𑍇𑌕𑌿𑌨𑍋 𑌵𑌿𑌰𑌕𑍍𑌤𑌸𑍍𑌯 𑌶𑌮𑌾𑌦𑌿𑌗𑍁𑌣𑌶𑌾𑌲𑌿𑌨𑌃 ।
𑌮𑍁𑌮𑍁𑌕𑍍𑌷𑍋𑌰𑍇𑌵 𑌹𑌿 𑌬𑍍𑌰𑌹𑍍𑌮𑌜𑌿𑌜𑍍𑌞𑌾𑌸𑌾𑌯𑍋𑌗𑍍𑌯𑌤𑌾 𑌮𑌤𑌾 ॥ 17॥
𑌸𑌾𑌧𑌨𑌾𑌨𑍍𑌯𑌤𑍍𑌰 𑌚𑌤𑍍𑌵𑌾𑌰𑌿 𑌕𑌥𑌿𑌤𑌾𑌨𑌿 𑌮𑌨𑍀𑌷𑌿𑌭𑌿𑌃 ।
𑌯𑍇𑌷𑍁 𑌸𑌤𑍍𑌸𑍍𑌵𑍇𑌵 𑌸𑌨𑍍𑌨𑌿𑌷𑍍𑌠𑌾 𑌯𑌦𑌭𑌾𑌵𑍇 𑌨 𑌸𑌿𑌧𑍍𑌯𑌤𑌿 ॥ 18॥
𑌆𑌦𑍗 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 𑌪𑌰𑌿𑌗𑌣𑍍𑌯𑌤𑍇 ।
𑌇𑌹𑌾𑌮𑍁𑌤𑍍𑌰𑌫𑌲𑌭𑍋𑌗𑌵𑌿𑌰𑌾𑌗𑌸𑍍𑌤𑌦𑌨𑌨𑍍𑌤𑌰𑌮𑍍 ।
𑌶𑌮𑌾𑌦𑌿𑌷𑌟𑍍𑌕𑌸𑌮𑍍𑌪𑌤𑍍𑌤𑌿𑌰𑍍𑌮𑍁𑌮𑍁𑌕𑍍𑌷𑍁𑌤𑍍𑌵𑌮𑌿𑌤𑌿 𑌸𑍍𑌫𑍁𑌟𑌮𑍍 ॥ 19॥
𑌬𑍍𑌰𑌹𑍍𑌮 𑌸𑌤𑍍𑌯𑌂 𑌜𑌗𑌨𑍍𑌮𑌿𑌥𑍍𑌯𑍇𑌤𑍍𑌯𑍇𑌵𑌂𑌰𑍂𑌪𑍋 𑌵𑌿𑌨𑌿𑌶𑍍𑌚𑌯𑌃 ।
𑌸𑍋𑌽𑌯𑌂 𑌨𑌿𑌤𑍍𑌯𑌾𑌨𑌿𑌤𑍍𑌯𑌵𑌸𑍍𑌤𑍁𑌵𑌿𑌵𑍇𑌕𑌃 𑌸𑌮𑍁𑌦𑌾𑌹𑍃𑌤𑌃 ॥ 20॥
𑌤𑌦𑍍𑌵𑍈𑌰𑌾𑌗𑍍𑌯𑌂 𑌜𑌿𑌹𑌾𑌸𑌾 𑌯𑌾 𑌦𑌰𑍍𑌶𑌨𑌶𑍍𑌰𑌵𑌣𑌾𑌦𑌿𑌭𑌿𑌃 । (𑌪𑌾𑌠𑌭𑍇𑌦𑌃 - 𑌜𑍁𑌗𑍁𑌪𑍍𑌸𑌾 𑌯𑌾)
𑌦𑍇𑌹𑌾𑌦𑌿𑌬𑍍𑌰𑌹𑍍𑌮𑌪𑌰𑍍𑌯𑌨𑍍𑌤𑍇 𑌹𑍍𑌯𑌨𑌿𑌤𑍍𑌯𑍇 𑌭𑍋𑌗𑌵𑌸𑍍𑌤𑍁𑌨𑌿 ॥ 21॥ (𑌪𑌾𑌠𑌭𑍇𑌦𑌃 - 𑌭𑍋𑌗𑍍𑌯𑌵𑌸𑍍𑌤𑍁𑌨𑌿)
𑌵𑌿𑌰𑌜𑍍𑌯 𑌵𑌿𑌷𑌯𑌵𑍍𑌰𑌾𑌤𑌾𑌦𑍍𑌦𑍋𑌷𑌦𑍃𑌷𑍍𑌟𑍍𑌯𑌾 𑌮𑍁𑌹𑍁𑌰𑍍𑌮𑍁𑌹𑍁𑌃 ।
𑌸𑍍𑌵𑌲𑌕𑍍𑌷𑍍𑌯𑍇 𑌨𑌿𑌯𑌤𑌾𑌵𑌸𑍍𑌥𑌾 𑌮𑌨𑌸𑌃 𑌶𑌮 𑌉𑌚𑍍𑌯𑌤𑍇 ॥ 22॥
𑌵𑌿𑌷𑌯𑍇𑌭𑍍𑌯𑌃 𑌪𑌰𑌾𑌵𑌰𑍍𑌤𑍍𑌯 𑌸𑍍𑌥𑌾𑌪𑌨𑌂 𑌸𑍍𑌵𑌸𑍍𑌵𑌗𑍋𑌲𑌕𑍇 ।
𑌉𑌭𑌯𑍇𑌷𑌾𑌮𑌿𑌨𑍍𑌦𑍍𑌰𑌿𑌯𑌾𑌣𑌾𑌂 𑌸 𑌦𑌮𑌃 𑌪𑌰𑌿𑌕𑍀𑌰𑍍𑌤𑌿𑌤𑌃 ।
𑌬𑌾𑌹𑍍𑌯𑌾𑌨𑌾𑌲𑌮𑍍𑌬𑌨𑌂 𑌵𑍃𑌤𑍍𑌤𑍇𑌰𑍇𑌷𑍋𑌪𑌰𑌤𑌿𑌰𑍁𑌤𑍍𑌤𑌮𑌾 ॥ 23॥
𑌸𑌹𑌨𑌂 𑌸𑌰𑍍𑌵𑌦𑍁𑌃𑌖𑌾𑌨𑌾𑌮𑌪𑍍𑌰𑌤𑍀𑌕𑌾𑌰𑌪𑍂𑌰𑍍𑌵𑌕𑌮𑍍 ।
𑌚𑌿𑌨𑍍𑌤𑌾𑌵𑌿𑌲𑌾𑌪𑌰𑌹𑌿𑌤𑌂 𑌸𑌾 𑌤𑌿𑌤𑌿𑌕𑍍𑌷𑌾 𑌨𑌿𑌗𑌦𑍍𑌯𑌤𑍇 ॥ 24॥
𑌶𑌾𑌸𑍍𑌤𑍍𑌰𑌸𑍍𑌯 𑌗𑍁𑌰𑍁𑌵𑌾𑌕𑍍𑌯𑌸𑍍𑌯 𑌸𑌤𑍍𑌯𑌬𑍁𑌦𑍍𑌧𑍍𑌯𑌵𑌧𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 - 𑌸𑌤𑍍𑌯𑌬𑍁𑌦𑍍𑌧𑍍𑌯𑌾𑌵𑌧𑌾𑌰𑌣𑌾)
𑌸𑌾 𑌶𑍍𑌰𑌦𑍍𑌧𑌾 𑌕𑌥𑌿𑌤𑌾 𑌸𑌦𑍍𑌭𑌿𑌰𑍍𑌯𑌯𑌾 𑌵𑌸𑍍𑌤𑍂𑌪𑌲𑌭𑍍𑌯𑌤𑍇 ॥ 25॥
𑌸𑌰𑍍𑌵𑌦𑌾 𑌸𑍍𑌥𑌾𑌪𑌨𑌂 𑌬𑍁𑌦𑍍𑌧𑍇𑌃 𑌶𑍁𑌦𑍍𑌧𑍇 𑌬𑍍𑌰𑌹𑍍𑌮𑌣𑌿 𑌸𑌰𑍍𑌵𑌦𑌾 । (𑌪𑌾𑌠𑌭𑍇𑌦𑌃 - 𑌸𑌮𑍍𑌯𑌗𑌾𑌸𑍍𑌥𑌾𑌪𑌨𑌂)
𑌤𑌤𑍍𑌸𑌮𑌾𑌧𑌾𑌨𑌮𑌿𑌤𑍍𑌯𑍁𑌕𑍍𑌤𑌂 𑌨 𑌤𑍁 𑌚𑌿𑌤𑍍𑌤𑌸𑍍𑌯 𑌲𑌾𑌲𑌨𑌮𑍍 ॥ 26॥
𑌅𑌹𑌙𑍍𑌕𑌾𑌰𑌾𑌦𑌿𑌦𑍇𑌹𑌾𑌨𑍍𑌤𑌾𑌨𑍍 𑌬𑌨𑍍𑌧𑌾𑌨𑌜𑍍𑌞𑌾𑌨𑌕𑌲𑍍𑌪𑌿𑌤𑌾𑌨𑍍 ।
𑌸𑍍𑌵𑌸𑍍𑌵𑌰𑍂𑌪𑌾𑌵𑌬𑍋𑌧𑍇𑌨 𑌮𑍋𑌕𑍍𑌤𑍁𑌮𑌿𑌚𑍍𑌛𑌾 𑌮𑍁𑌮𑍁𑌕𑍍𑌷𑍁𑌤𑌾 ॥ 27॥
𑌮𑌨𑍍𑌦𑌮𑌧𑍍𑌯𑌮𑌰𑍂𑌪𑌾𑌪𑌿 𑌵𑍈𑌰𑌾𑌗𑍍𑌯𑍇𑌣 𑌶𑌮𑌾𑌦𑌿𑌨𑌾 ।
𑌪𑍍𑌰𑌸𑌾𑌦𑍇𑌨 𑌗𑍁𑌰𑍋𑌃 𑌸𑍇𑌯𑌂 𑌪𑍍𑌰𑌵𑍃𑌦𑍍𑌧𑌾 𑌸𑍂𑌯𑌤𑍇 𑌫𑌲𑌮𑍍 ॥ 28॥
𑌵𑍈𑌰𑌾𑌗𑍍𑌯𑌂 𑌚 𑌮𑍁𑌮𑍁𑌕𑍍𑌷𑍁𑌤𑍍𑌵𑌂 𑌤𑍀𑌵𑍍𑌰𑌂 𑌯𑌸𑍍𑌯 𑌤𑍁 𑌵𑌿𑌦𑍍𑌯𑌤𑍇 ।
𑌤𑌸𑍍𑌮𑌿𑌨𑍍𑌨𑍇𑌵𑌾𑌰𑍍𑌥𑌵𑌨𑍍𑌤𑌃 𑌸𑍍𑌯𑍁𑌃 𑌫𑌲𑌵𑌨𑍍𑌤𑌃 𑌶𑌮𑌾𑌦𑌯𑌃 ॥ 29॥
𑌏𑌤𑌯𑍋𑌰𑍍𑌮𑌨𑍍𑌦𑌤𑌾 𑌯𑌤𑍍𑌰 𑌵𑌿𑌰𑌕𑍍𑌤𑌤𑍍𑌵𑌮𑍁𑌮𑍁𑌕𑍍𑌷𑌯𑍋𑌃 ।
𑌮𑌰𑍗 𑌸𑌲𑌿𑌲𑌵𑌤𑍍𑌤𑌤𑍍𑌰 𑌶𑌮𑌾𑌦𑍇𑌰𑍍𑌭𑌾𑌨𑌮𑌾𑌤𑍍𑌰𑌤𑌾 ॥ 30॥
𑌮𑍋𑌕𑍍𑌷𑌕𑌾𑌰𑌣𑌸𑌾𑌮𑌗𑍍𑌰𑍍𑌯𑌾𑌂 𑌭𑌕𑍍𑌤𑌿𑌰𑍇𑌵 𑌗𑌰𑍀𑌯𑌸𑍀 ।
𑌸𑍍𑌵𑌸𑍍𑌵𑌰𑍂𑌪𑌾𑌨𑍁𑌸𑌨𑍍𑌧𑌾𑌨𑌂 𑌭𑌕𑍍𑌤𑌿𑌰𑌿𑌤𑍍𑌯𑌭𑌿𑌧𑍀𑌯𑌤𑍇 ॥ 31॥
𑌸𑍍𑌵𑌾𑌤𑍍𑌮𑌤𑌤𑍍𑌤𑍍𑌵𑌾𑌨𑍁𑌸𑌨𑍍𑌧𑌾𑌨𑌂 𑌭𑌕𑍍𑌤𑌿𑌰𑌿𑌤𑍍𑌯𑌪𑌰𑍇 𑌜𑌗𑍁𑌃 ।
𑌉𑌕𑍍𑌤𑌸𑌾𑌧𑌨𑌸𑌮𑍍𑌪𑌨𑍍𑌨𑌸𑍍𑌤𑌤𑍍𑌤𑍍𑌵𑌜𑌿𑌜𑍍𑌞𑌾𑌸𑍁𑌰𑌾𑌤𑍍𑌮𑌨𑌃 ।
𑌉𑌪𑌸𑍀𑌦𑍇𑌦𑍍𑌗𑍁𑌰𑍁𑌂 𑌪𑍍𑌰𑌾𑌜𑍍𑌞𑌂 𑌯𑌸𑍍𑌮𑌾𑌦𑍍𑌬𑌨𑍍𑌧𑌵𑌿𑌮𑍋𑌕𑍍𑌷𑌣𑌮𑍍 ॥ 32॥
𑌶𑍍𑌰𑍋𑌤𑍍𑌰𑌿𑌯𑍋𑌽𑌵𑍃𑌜𑌿𑌨𑍋𑌽𑌕𑌾𑌮𑌹𑌤𑍋 𑌯𑍋 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌃 ।
𑌬𑍍𑌰𑌹𑍍𑌮𑌣𑍍𑌯𑍁𑌪𑌰𑌤𑌃 𑌶𑌾𑌨𑍍𑌤𑍋 𑌨𑌿𑌰𑌿𑌨𑍍𑌧𑌨 𑌇𑌵𑌾𑌨𑌲𑌃 ।
𑌅𑌹𑍇𑌤𑍁𑌕𑌦𑌯𑌾𑌸𑌿𑌨𑍍𑌧𑍁𑌰𑍍𑌬𑌨𑍍𑌧𑍁𑌰𑌾𑌨𑌮𑌤𑌾𑌂 𑌸𑌤𑌾𑌮𑍍 ॥ 33॥
𑌤𑌮𑌾𑌰𑌾𑌧𑍍𑌯 𑌗𑍁𑌰𑍁𑌂 𑌭𑌕𑍍𑌤𑍍𑌯𑌾 𑌪𑍍𑌰𑌹𑍍𑌵𑌪𑍍𑌰𑌶𑍍𑌰𑌯𑌸𑍇𑌵𑌨𑍈𑌃 । (𑌪𑌾𑌠𑌭𑍇𑌦𑌃 - 𑌪𑍍𑌰𑌹𑍍𑌵𑌃)
𑌪𑍍𑌰𑌸𑌨𑍍𑌨𑌂 𑌤𑌮𑌨𑍁𑌪𑍍𑌰𑌾𑌪𑍍𑌯 𑌪𑍃𑌚𑍍𑌛𑍇𑌜𑍍𑌜𑍍𑌞𑌾𑌤𑌵𑍍𑌯𑌮𑌾𑌤𑍍𑌮𑌨𑌃 ॥ 34॥
𑌸𑍍𑌵𑌾𑌮𑌿𑌨𑍍𑌨𑌮𑌸𑍍𑌤𑍇 𑌨𑌤𑌲𑍋𑌕𑌬𑌨𑍍𑌧𑍋
𑌕𑌾𑌰𑍁𑌣𑍍𑌯𑌸𑌿𑌨𑍍𑌧𑍋 𑌪𑌤𑌿𑌤𑌂 𑌭𑌵𑌾𑌬𑍍𑌧𑍗 ।
𑌮𑌾𑌮𑍁𑌦𑍍𑌧𑌰𑌾𑌤𑍍𑌮𑍀𑌯𑌕𑌟𑌾𑌕𑍍𑌷𑌦𑍃𑌷𑍍𑌟𑍍𑌯𑌾
𑌋𑌜𑍍𑌵𑍍𑌯𑌾𑌤𑌿𑌕𑌾𑌰𑍁𑌣𑍍𑌯𑌸𑍁𑌧𑌾𑌭𑌿𑌵𑍃𑌷𑍍𑌟𑍍𑌯𑌾 ॥ 35॥
𑌦𑍁𑌰𑍍𑌵𑌾𑌰𑌸𑌂𑌸𑌾𑌰𑌦𑌵𑌾𑌗𑍍𑌨𑌿𑌤𑌪𑍍𑌤𑌂
𑌦𑍋𑌧𑍂𑌯𑌮𑌾𑌨𑌂 𑌦𑍁𑌰𑌦𑍃𑌷𑍍𑌟𑌵𑌾𑌤𑍈𑌃 ।
𑌭𑍀𑌤𑌂 𑌪𑍍𑌰𑌪𑌨𑍍𑌨𑌂 𑌪𑌰𑌿𑌪𑌾𑌹𑌿 𑌮𑍃𑌤𑍍𑌯𑍋𑌃
𑌶𑌰𑌣𑍍𑌯𑌮𑌨𑍍𑌯𑌦𑍍𑌯𑌦𑌹𑌂 𑌨 𑌜𑌾𑌨𑍇 ॥ 36॥ (𑌪𑌾𑌠𑌭𑍇𑌦𑌃 - 𑌅𑌨𑍍𑌯𑌂)
𑌶𑌾𑌨𑍍𑌤𑌾 𑌮𑌹𑌾𑌨𑍍𑌤𑍋 𑌨𑌿𑌵𑌸𑌨𑍍𑌤𑌿 𑌸𑌨𑍍𑌤𑍋
𑌵𑌸𑌨𑍍𑌤𑌵𑌲𑍍𑌲𑍋𑌕𑌹𑌿𑌤𑌂 𑌚𑌰𑌨𑍍𑌤𑌃 ।
𑌤𑍀𑌰𑍍𑌣𑌾𑌃 𑌸𑍍𑌵𑌯𑌂 𑌭𑍀𑌮𑌭𑌵𑌾𑌰𑍍𑌣𑌵𑌂 𑌜𑌨𑌾-
𑌨𑌹𑍇𑌤𑍁𑌨𑌾𑌨𑍍𑌯𑌾𑌨𑌪𑌿 𑌤𑌾𑌰𑌯𑌨𑍍𑌤𑌃 ॥ 37॥
𑌅𑌯𑌂 𑌸𑍍𑌵𑌭𑌾𑌵𑌃 𑌸𑍍𑌵𑌤 𑌏𑌵 𑌯𑌤𑍍𑌪𑌰-
𑌶𑍍𑌰𑌮𑌾𑌪𑌨𑍋𑌦𑌪𑍍𑌰𑌵𑌣𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌸𑍁𑌧𑌾𑌂𑌶𑍁𑌰𑍇𑌷 𑌸𑍍𑌵𑌯𑌮𑌰𑍍𑌕𑌕𑌰𑍍𑌕𑌶-
𑌪𑍍𑌰𑌭𑌾𑌭𑌿𑌤𑌪𑍍𑌤𑌾𑌮𑌵𑌤𑌿 𑌕𑍍𑌷𑌿𑌤𑌿𑌂 𑌕𑌿𑌲 ॥ 38॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌰𑌸𑌾𑌨𑍁𑌭𑍂𑌤𑌿𑌕𑌲𑌿𑌤𑍈𑌃 𑌪𑍂𑌤𑍈𑌃 𑌸𑍁𑌶𑍀𑌤𑍈𑌰𑍍𑌯𑍁𑌤𑍈- (𑌪𑌾𑌠𑌭𑍇𑌦𑌃 - 𑌸𑍁𑌶𑍀𑌤𑍈𑌃 𑌸𑌿𑌤𑍈𑌃)
𑌰𑍍𑌯𑍁𑌷𑍍𑌮𑌦𑍍𑌵𑌾𑌕𑍍𑌕𑌲𑌶𑍋𑌜𑍍𑌝𑌿𑌤𑍈𑌃 𑌶𑍍𑌰𑍁𑌤𑌿𑌸𑍁𑌖𑍈𑌰𑍍𑌵𑌾𑌕𑍍𑌯𑌾𑌮𑍃𑌤𑍈𑌃 𑌸𑍇𑌚𑌯 ।
𑌸𑌨𑍍𑌤𑌪𑍍𑌤𑌂 𑌭𑌵𑌤𑌾𑌪𑌦𑌾𑌵𑌦𑌹𑌨𑌜𑍍𑌵𑌾𑌲𑌾𑌭𑌿𑌰𑍇𑌨𑌂 𑌪𑍍𑌰𑌭𑍋
𑌧𑌨𑍍𑌯𑌾𑌸𑍍𑌤𑍇 𑌭𑌵𑌦𑍀𑌕𑍍𑌷𑌣𑌕𑍍𑌷𑌣𑌗𑌤𑍇𑌃 𑌪𑌾𑌤𑍍𑌰𑍀𑌕𑍃𑌤𑌾𑌃 𑌸𑍍𑌵𑍀𑌕𑍃𑌤𑌾𑌃 ॥ 39॥
𑌕𑌥𑌂 𑌤𑌰𑍇𑌯𑌂 𑌭𑌵𑌸𑌿𑌨𑍍𑌧𑍁𑌮𑍇𑌤𑌂
𑌕𑌾 𑌵𑌾 𑌗𑌤𑌿𑌰𑍍𑌮𑍇 𑌕𑌤𑌮𑍋𑌽𑌸𑍍𑌤𑍍𑌯𑍁𑌪𑌾𑌯𑌃 ।
𑌜𑌾𑌨𑍇 𑌨 𑌕𑌿𑌞𑍍𑌚𑌿𑌤𑍍𑌕𑍃𑌪𑌯𑌾𑌽𑌵 𑌮𑌾𑌂 𑌪𑍍𑌰𑌭𑍋
𑌸𑌂𑌸𑌾𑌰𑌦𑍁𑌃𑌖𑌕𑍍𑌷𑌤𑌿𑌮𑌾𑌤𑌨𑍁𑌷𑍍𑌵 ॥ 40॥
𑌤𑌥𑌾 𑌵𑌦𑌨𑍍𑌤𑌂 𑌶𑌰𑌣𑌾𑌗𑌤𑌂 𑌸𑍍𑌵𑌂
𑌸𑌂𑌸𑌾𑌰𑌦𑌾𑌵𑌾𑌨𑌲𑌤𑌾𑌪𑌤𑌪𑍍𑌤𑌮𑍍 ।
𑌨𑌿𑌰𑍀𑌕𑍍𑌷𑍍𑌯 𑌕𑌾𑌰𑍁𑌣𑍍𑌯𑌰𑌸𑌾𑌰𑍍𑌦𑍍𑌰𑌦𑍃𑌷𑍍𑌟𑍍𑌯𑌾
𑌦𑌦𑍍𑌯𑌾𑌦𑌭𑍀𑌤𑌿𑌂 𑌸𑌹𑌸𑌾 𑌮𑌹𑌾𑌤𑍍𑌮𑌾 ॥ 41॥
𑌵𑌿𑌦𑍍𑌵𑌾𑌨𑍍 𑌸 𑌤𑌸𑍍𑌮𑌾 𑌉𑌪𑌸𑌤𑍍𑌤𑌿𑌮𑍀𑌯𑍁𑌷𑍇
𑌮𑍁𑌮𑍁𑌕𑍍𑌷𑌵𑍇 𑌸𑌾𑌧𑍁 𑌯𑌥𑍋𑌕𑍍𑌤𑌕𑌾𑌰𑌿𑌣𑍇 ।
𑌪𑍍𑌰𑌶𑌾𑌨𑍍𑌤𑌚𑌿𑌤𑍍𑌤𑌾𑌯 𑌶𑌮𑌾𑌨𑍍𑌵𑌿𑌤𑌾𑌯
𑌤𑌤𑍍𑌤𑍍𑌵𑍋𑌪𑌦𑍇𑌶𑌂 𑌕𑍃𑌪𑌯𑍈𑌵 𑌕𑍁𑌰𑍍𑌯𑌾𑌤𑍍 ॥ 42॥
𑌮𑌾 𑌭𑍈𑌷𑍍𑌟 𑌵𑌿𑌦𑍍𑌵𑌂𑌸𑍍𑌤𑌵 𑌨𑌾𑌸𑍍𑌤𑍍𑌯𑌪𑌾𑌯𑌃
𑌸𑌂𑌸𑌾𑌰𑌸𑌿𑌨𑍍𑌧𑍋𑌸𑍍𑌤𑌰𑌣𑍇𑌽𑌸𑍍𑌤𑍍𑌯𑍁𑌪𑌾𑌯𑌃 ।
𑌯𑍇𑌨𑍈𑌵 𑌯𑌾𑌤𑌾 𑌯𑌤𑌯𑍋𑌽𑌸𑍍𑌯 𑌪𑌾𑌰𑌂
𑌤𑌮𑍇𑌵 𑌮𑌾𑌰𑍍𑌗𑌂 𑌤𑌵 𑌨𑌿𑌰𑍍𑌦𑌿𑌶𑌾𑌮𑌿 ॥ 43॥
𑌅𑌸𑍍𑌤𑍍𑌯𑍁𑌪𑌾𑌯𑍋 𑌮𑌹𑌾𑌨𑍍𑌕𑌶𑍍𑌚𑌿𑌤𑍍𑌸𑌂𑌸𑌾𑌰𑌭𑌯𑌨𑌾𑌶𑌨𑌃 ।
𑌤𑍇𑌨 𑌤𑍀𑌰𑍍𑌤𑍍𑌵𑌾 𑌭𑌵𑌾𑌮𑍍𑌭𑍋𑌧𑌿𑌂 𑌪𑌰𑌮𑌾𑌨𑌨𑍍𑌦𑌮𑌾𑌪𑍍𑌸𑍍𑌯𑌸𑌿 ॥ 44॥
𑌵𑍇𑌦𑌾𑌨𑍍𑌤𑌾𑌰𑍍𑌥𑌵𑌿𑌚𑌾𑌰𑍇𑌣 𑌜𑌾𑌯𑌤𑍇 𑌜𑍍𑌞𑌾𑌨𑌮𑍁𑌤𑍍𑌤𑌮𑌮𑍍 ।
𑌤𑍇𑌨𑌾𑌤𑍍𑌯𑌨𑍍𑌤𑌿𑌕𑌸𑌂𑌸𑌾𑌰𑌦𑍁𑌃𑌖𑌨𑌾𑌶𑍋 𑌭𑌵𑌤𑍍𑌯𑌨𑍁 ॥ 45॥
𑌶𑍍𑌰𑌦𑍍𑌧𑌾𑌭𑌕𑍍𑌤𑌿𑌧𑍍𑌯𑌾𑌨𑌯𑍋𑌗𑌾𑌨𑍍𑌮𑍁𑌮𑍁𑌕𑍍𑌷𑍋𑌃
𑌮𑍁𑌕𑍍𑌤𑍇𑌰𑍍𑌹𑍇𑌤𑍂𑌨𑍍𑌵𑌕𑍍𑌤𑌿 𑌸𑌾𑌕𑍍𑌷𑌾𑌚𑍍𑌛𑍍𑌰𑍁𑌤𑍇𑌰𑍍𑌗𑍀𑌃 ।
𑌯𑍋 𑌵𑌾 𑌏𑌤𑍇𑌷𑍍𑌵𑍇𑌵 𑌤𑌿𑌷𑍍𑌠𑌤𑍍𑌯𑌮𑍁𑌷𑍍𑌯
𑌮𑍋𑌕𑍍𑌷𑍋𑌽𑌵𑌿𑌦𑍍𑌯𑌾𑌕𑌲𑍍𑌪𑌿𑌤𑌾𑌦𑍍𑌦𑍇𑌹𑌬𑌨𑍍𑌧𑌾𑌤𑍍 ॥ 46॥
𑌅𑌜𑍍𑌞𑌾𑌨𑌯𑍋𑌗𑌾𑌤𑍍𑌪𑌰𑌮𑌾𑌤𑍍𑌮𑌨𑌸𑍍𑌤𑌵
𑌹𑍍𑌯𑌨𑌾𑌤𑍍𑌮𑌬𑌨𑍍𑌧𑌸𑍍𑌤𑌤 𑌏𑌵 𑌸𑌂𑌸𑍃𑌤𑌿𑌃 ।
𑌤𑌯𑍋𑌰𑍍𑌵𑌿𑌵𑍇𑌕𑍋𑌦𑌿𑌤𑌬𑍋𑌧𑌵𑌹𑍍𑌨𑌿𑌃
𑌅𑌜𑍍𑌞𑌾𑌨𑌕𑌾𑌰𑍍𑌯𑌂 𑌪𑍍𑌰𑌦𑌹𑍇𑌤𑍍𑌸𑌮𑍂𑌲𑌮𑍍 ॥ 47॥
𑌶𑌿𑌷𑍍𑌯 𑌉𑌵𑌾𑌚 ।
𑌕𑍃𑌪𑌯𑌾 𑌶𑍍𑌰𑍂𑌯𑌤𑌾𑌂 𑌸𑍍𑌵𑌾𑌮𑌿𑌨𑍍𑌪𑍍𑌰𑌶𑍍𑌨𑍋𑌽𑌯𑌂 𑌕𑍍𑌰𑌿𑌯𑌤𑍇 𑌮𑌯𑌾 ।
𑌯𑌦𑍁𑌤𑍍𑌤𑌰𑌮𑌹𑌂 𑌶𑍍𑌰𑍁𑌤𑍍𑌵𑌾 𑌕𑍃𑌤𑌾𑌰𑍍𑌥𑌃 𑌸𑍍𑌯𑌾𑌂 𑌭𑌵𑌨𑍍𑌮𑍁𑌖𑌾𑌤𑍍 ॥ 48॥
𑌕𑍋 𑌨𑌾𑌮 𑌬𑌨𑍍𑌧𑌃 𑌕𑌥𑌮𑍇𑌷 𑌆𑌗𑌤𑌃
𑌕𑌥𑌂 𑌪𑍍𑌰𑌤𑌿𑌷𑍍𑌠𑌾𑌸𑍍𑌯 𑌕𑌥𑌂 𑌵𑌿𑌮𑍋𑌕𑍍𑌷𑌃 ।
𑌕𑍋𑌽𑌸𑌾𑌵𑌨𑌾𑌤𑍍𑌮𑌾 𑌪𑌰𑌮𑌃 𑌕 𑌆𑌤𑍍𑌮𑌾
𑌤𑌯𑍋𑌰𑍍𑌵𑌿𑌵𑍇𑌕𑌃 𑌕𑌥𑌮𑍇𑌤𑌦𑍁𑌚𑍍𑌯𑌤𑌾𑌮𑍍 ॥ 49॥
𑌶𑍍𑌰𑍀𑌗𑍁𑌰𑍁𑌵𑌾𑌚 ।
𑌧𑌨𑍍𑌯𑍋𑌽𑌸𑌿 𑌕𑍃𑌤𑌕𑍃𑌤𑍍𑌯𑍋𑌽𑌸𑌿 𑌪𑌾𑌵𑌿𑌤𑌂 𑌤𑍇 𑌕𑍁𑌲𑌂 𑌤𑍍𑌵𑌯𑌾 । (𑌪𑌾𑌠𑌭𑍇𑌦𑌃 - 𑌪𑌾𑌵𑌿𑌤𑌂)
𑌯𑌦𑌵𑌿𑌦𑍍𑌯𑌾𑌬𑌨𑍍𑌧𑌮𑍁𑌕𑍍𑌤𑍍𑌯𑌾 𑌬𑍍𑌰𑌹𑍍𑌮𑍀𑌭𑌵𑌿𑌤𑍁𑌮𑌿𑌚𑍍𑌛𑌸𑌿 ॥ 50॥
𑌋𑌣𑌮𑍋𑌚𑌨𑌕𑌰𑍍𑌤𑌾𑌰𑌃 𑌪𑌿𑌤𑍁𑌃 𑌸𑌨𑍍𑌤𑌿 𑌸𑍁𑌤𑌾𑌦𑌯𑌃 ।
𑌬𑌨𑍍𑌧𑌮𑍋𑌚𑌨𑌕𑌰𑍍𑌤𑌾 𑌤𑍁 𑌸𑍍𑌵𑌸𑍍𑌮𑌾𑌦𑌨𑍍𑌯𑍋 𑌨 𑌕𑌶𑍍𑌚𑌨 ॥ 51॥
𑌮𑌸𑍍𑌤𑌕𑌨𑍍𑌯𑌸𑍍𑌤𑌭𑌾𑌰𑌾𑌦𑍇𑌰𑍍𑌦𑍁𑌃𑌖𑌮𑌨𑍍𑌯𑍈𑌰𑍍𑌨𑌿𑌵𑌾𑌰𑍍𑌯𑌤𑍇 ।
𑌕𑍍𑌷𑍁𑌧𑌾𑌦𑌿𑌕𑍃𑌤𑌦𑍁𑌃𑌖𑌂 𑌤𑍁 𑌵𑌿𑌨𑌾 𑌸𑍍𑌵𑍇𑌨 𑌨 𑌕𑍇𑌨𑌚𑌿𑌤𑍍 ॥ 52॥
𑌪𑌥𑍍𑌯𑌮𑍗𑌷𑌧𑌸𑍇𑌵𑌾 𑌚 𑌕𑍍𑌰𑌿𑌯𑌤𑍇 𑌯𑍇𑌨 𑌰𑍋𑌗𑌿𑌣𑌾 ।
𑌆𑌰𑍋𑌗𑍍𑌯𑌸𑌿𑌦𑍍𑌧𑌿𑌰𑍍𑌦𑍃𑌷𑍍𑌟𑌾𑌽𑌸𑍍𑌯 𑌨𑌾𑌨𑍍𑌯𑌾𑌨𑍁𑌷𑍍𑌠𑌿𑌤𑌕𑌰𑍍𑌮𑌣𑌾 ॥ 53॥
𑌵𑌸𑍍𑌤𑍁𑌸𑍍𑌵𑌰𑍂𑌪𑌂 𑌸𑍍𑌫𑍁𑌟𑌬𑍋𑌧𑌚𑌕𑍍𑌷𑍁𑌷𑌾
𑌸𑍍𑌵𑍇𑌨𑍈𑌵 𑌵𑍇𑌦𑍍𑌯𑌂 𑌨 𑌤𑍁 𑌪𑌣𑍍𑌡𑌿𑌤𑍇𑌨 ।
𑌚𑌨𑍍𑌦𑍍𑌰𑌸𑍍𑌵𑌰𑍂𑌪𑌂 𑌨𑌿𑌜𑌚𑌕𑍍𑌷𑍁𑌷𑍈𑌵
𑌜𑍍𑌞𑌾𑌤𑌵𑍍𑌯𑌮𑌨𑍍𑌯𑍈𑌰𑌵𑌗𑌮𑍍𑌯𑌤𑍇 𑌕𑌿𑌮𑍍 ॥ 54॥
𑌅𑌵𑌿𑌦𑍍𑌯𑌾𑌕𑌾𑌮𑌕𑌰𑍍𑌮𑌾𑌦𑌿𑌪𑌾𑌶𑌬𑌨𑍍𑌧𑌂 𑌵𑌿𑌮𑍋𑌚𑌿𑌤𑍁𑌮𑍍 ।
𑌕𑌃 𑌶𑌕𑍍𑌨𑍁𑌯𑌾𑌦𑍍𑌵𑌿𑌨𑌾𑌽𑌽𑌤𑍍𑌮𑌾𑌨𑌂 𑌕𑌲𑍍𑌪𑌕𑍋𑌟𑌿𑌶𑌤𑍈𑌰𑌪𑌿 ॥ 55॥
𑌨 𑌯𑍋𑌗𑍇𑌨 𑌨 𑌸𑌾𑌙𑍍𑌖𑍍𑌯𑍇𑌨 𑌕𑌰𑍍𑌮𑌣𑌾 𑌨𑍋 𑌨 𑌵𑌿𑌦𑍍𑌯𑌯𑌾 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌬𑍋𑌧𑍇𑌨 𑌮𑍋𑌕𑍍𑌷𑌃 𑌸𑌿𑌧𑍍𑌯𑌤𑌿 𑌨𑌾𑌨𑍍𑌯𑌥𑌾 ॥ 56॥
𑌵𑍀𑌣𑌾𑌯𑌾 𑌰𑍂𑌪𑌸𑍗𑌨𑍍𑌦𑌰𑍍𑌯𑌂 𑌤𑌨𑍍𑌤𑍍𑌰𑍀𑌵𑌾𑌦𑌨𑌸𑍗𑌷𑍍𑌠𑌵𑌮𑍍 ।
𑌪𑍍𑌰𑌜𑌾𑌰𑌞𑍍𑌜𑌨𑌮𑌾𑌤𑍍𑌰𑌂 𑌤𑌨𑍍𑌨 𑌸𑌾𑌮𑍍𑌰𑌾𑌜𑍍𑌯𑌾𑌯 𑌕𑌲𑍍𑌪𑌤𑍇 ॥ 57॥
𑌵𑌾𑌗𑍍𑌵𑍈𑌖𑌰𑍀 𑌶𑌬𑍍𑌦𑌝𑌰𑍀 𑌶𑌾𑌸𑍍𑌤𑍍𑌰𑌵𑍍𑌯𑌾𑌖𑍍𑌯𑌾𑌨𑌕𑍗𑌶𑌲𑌮𑍍 ।
𑌵𑍈𑌦𑍁𑌷𑍍𑌯𑌂 𑌵𑌿𑌦𑍁𑌷𑌾𑌂 𑌤𑌦𑍍𑌵𑌦𑍍𑌭𑍁𑌕𑍍𑌤𑌯𑍇 𑌨 𑌤𑍁 𑌮𑍁𑌕𑍍𑌤𑌯𑍇 ॥ 58॥
𑌅𑌵𑌿𑌜𑍍𑌞𑌾𑌤𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌶𑌾𑌸𑍍𑌤𑍍𑌰𑌾𑌧𑍀𑌤𑌿𑌸𑍍𑌤𑍁 𑌨𑌿𑌷𑍍𑌫𑌲𑌾 ।
𑌵𑌿𑌜𑍍𑌞𑌾𑌤𑍇𑌽𑌪𑌿 𑌪𑌰𑍇 𑌤𑌤𑍍𑌤𑍍𑌵𑍇 𑌶𑌾𑌸𑍍𑌤𑍍𑌰𑌾𑌧𑍀𑌤𑌿𑌸𑍍𑌤𑍁 𑌨𑌿𑌷𑍍𑌫𑌲𑌾 ॥ 59॥
𑌶𑌬𑍍𑌦𑌜𑌾𑌲𑌂 𑌮𑌹𑌾𑌰𑌣𑍍𑌯𑌂 𑌚𑌿𑌤𑍍𑌤𑌭𑍍𑌰𑌮𑌣𑌕𑌾𑌰𑌣𑌮𑍍 ।
𑌅𑌤𑌃 𑌪𑍍𑌰𑌯𑌤𑍍𑌨𑌾𑌜𑍍𑌜𑍍𑌞𑌾𑌤𑌵𑍍𑌯𑌂 𑌤𑌤𑍍𑌤𑍍𑌵𑌜𑍍𑌞𑍈𑌸𑍍𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃 ॥ 60॥ 𑌤𑌤𑍍𑌤𑍍𑌵𑌜𑍍𑌞𑌾𑌤𑍍𑌤𑌤𑍍𑌤𑍍𑌵
𑌅𑌜𑍍𑌞𑌾𑌨𑌸𑌰𑍍𑌪𑌦𑌷𑍍𑌟𑌸𑍍𑌯 𑌬𑍍𑌰𑌹𑍍𑌮𑌜𑍍𑌞𑌾𑌨𑍗𑌷𑌧𑌂 𑌵𑌿𑌨𑌾 ।
𑌕𑌿𑌮𑍁 𑌵𑍇𑌦𑍈𑌶𑍍𑌚 𑌶𑌾𑌸𑍍𑌤𑍍𑌰𑍈𑌶𑍍𑌚 𑌕𑌿𑌮𑍁 𑌮𑌨𑍍𑌤𑍍𑌰𑍈𑌃 𑌕𑌿𑌮𑍗𑌷𑌧𑍈𑌃 ॥ 61॥
𑌨 𑌗𑌚𑍍𑌛𑌤𑌿 𑌵𑌿𑌨𑌾 𑌪𑌾𑌨𑌂 𑌵𑍍𑌯𑌾𑌧𑌿𑌰𑍗𑌷𑌧𑌶𑌬𑍍𑌦𑌤𑌃 ।
𑌵𑌿𑌨𑌾𑌽𑌪𑌰𑍋𑌕𑍍𑌷𑌾𑌨𑍁𑌭𑌵𑌂 𑌬𑍍𑌰𑌹𑍍𑌮𑌶𑌬𑍍𑌦𑍈𑌰𑍍𑌨 𑌮𑍁𑌚𑍍𑌯𑌤𑍇 ॥ 62॥
𑌅𑌕𑍃𑌤𑍍𑌵𑌾 𑌦𑍃𑌶𑍍𑌯𑌵𑌿𑌲𑌯𑌮𑌜𑍍𑌞𑌾𑌤𑍍𑌵𑌾 𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃 ।
𑌬𑍍𑌰𑌹𑍍𑌮𑌶𑌬𑍍𑌦𑍈𑌃 𑌕𑍁𑌤𑍋 𑌮𑍁𑌕𑍍𑌤𑌿𑌰𑍁𑌕𑍍𑌤𑌿𑌮𑌾𑌤𑍍𑌰𑌫𑌲𑍈𑌰𑍍𑌨𑍃𑌣𑌾𑌮𑍍 ॥ 63॥ (𑌪𑌾𑌠𑌭𑍇𑌦𑌃 - 𑌬𑌾𑌹𑍍𑌯𑌶𑌬𑍍𑌦𑍈𑌃)
𑌅𑌕𑍃𑌤𑍍𑌵𑌾 𑌶𑌤𑍍𑌰𑍁𑌸𑌂𑌹𑌾𑌰𑌮𑌗𑌤𑍍𑌵𑌾𑌖𑌿𑌲𑌭𑍂𑌶𑍍𑌰𑌿𑌯𑌮𑍍 ।
𑌰𑌾𑌜𑌾𑌹𑌮𑌿𑌤𑌿 𑌶𑌬𑍍𑌦𑌾𑌨𑍍𑌨𑍋 𑌰𑌾𑌜𑌾 𑌭𑌵𑌿𑌤𑍁𑌮𑌰𑍍𑌹𑌤𑌿 ॥ 64॥
𑌆𑌪𑍍𑌤𑍋𑌕𑍍𑌤𑌿𑌂 𑌖𑌨𑌨𑌂 𑌤𑌥𑍋𑌪𑌰𑌿𑌶𑌿𑌲𑌾𑌦𑍍𑌯𑍁𑌤𑍍𑌕𑌰𑍍𑌷𑌣𑌂 𑌸𑍍𑌵𑍀𑌕𑍃𑌤𑌿𑌂 (𑌪𑌾𑌠𑌭𑍇𑌦𑌃 - 𑌪𑌰𑌿𑌶𑌿𑌲𑌾𑌪𑌾𑌕𑌰𑍍𑌷𑌣𑌂)
𑌨𑌿𑌕𑍍𑌷𑍇𑌪𑌃 𑌸𑌮𑌪𑍇𑌕𑍍𑌷𑌤𑍇 𑌨 𑌹𑌿 𑌬𑌹𑌿𑌃𑌶𑌬𑍍𑌦𑍈𑌸𑍍𑌤𑍁 𑌨𑌿𑌰𑍍𑌗𑌚𑍍𑌛𑌤𑌿 ।
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑍋𑌪𑌦𑍇𑌶𑌮𑌨𑌨𑌧𑍍𑌯𑌾𑌨𑌾𑌦𑌿𑌭𑌿𑌰𑍍𑌲𑌭𑍍𑌯𑌤𑍇
𑌮𑌾𑌯𑌾𑌕𑌾𑌰𑍍𑌯𑌤𑌿𑌰𑍋𑌹𑌿𑌤𑌂 𑌸𑍍𑌵𑌮𑌮𑌲𑌂 𑌤𑌤𑍍𑌤𑍍𑌵𑌂 𑌨 𑌦𑍁𑌰𑍍𑌯𑍁𑌕𑍍𑌤𑌿𑌭𑌿𑌃 ॥ 65॥
𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌭𑌵𑌬𑌨𑍍𑌧𑌵𑌿𑌮𑍁𑌕𑍍𑌤𑌯𑍇 ।
𑌸𑍍𑌵𑍈𑌰𑍇𑌵 𑌯𑌤𑍍𑌨𑌃 𑌕𑌰𑍍𑌤𑌵𑍍𑌯𑍋 𑌰𑍋𑌗𑌾𑌦𑌾𑌵𑌿𑌵 𑌪𑌣𑍍𑌡𑌿𑌤𑍈𑌃 ॥ 66॥ (𑌪𑌾𑌠𑌭𑍇𑌦𑌃 - 𑌰𑍋𑌗𑌾𑌦𑍇𑌰𑌿𑌵)
𑌯𑌸𑍍𑌤𑍍𑌵𑌯𑌾𑌦𑍍𑌯 𑌕𑍃𑌤𑌃 𑌪𑍍𑌰𑌶𑍍𑌨𑍋 𑌵𑌰𑍀𑌯𑌾𑌞𑍍𑌛𑌾𑌸𑍍𑌤𑍍𑌰𑌵𑌿𑌨𑍍𑌮𑌤𑌃 । (𑌪𑌾𑌠𑌭𑍇𑌦𑌃 - 𑌸𑌮𑍍𑌮𑌤𑌃)
𑌸𑍂𑌤𑍍𑌰𑌪𑍍𑌰𑌾𑌯𑍋 𑌨𑌿𑌗𑍂𑌢𑌾𑌰𑍍𑌥𑍋 𑌜𑍍𑌞𑌾𑌤𑌵𑍍𑌯𑌶𑍍𑌚 𑌮𑍁𑌮𑍁𑌕𑍍𑌷𑍁𑌭𑌿𑌃 ॥ 67॥
𑌶𑌋𑌣𑍁𑌷𑍍𑌵𑌾𑌵𑌹𑌿𑌤𑍋 𑌵𑌿𑌦𑍍𑌵𑌨𑍍𑌯𑌨𑍍𑌮𑌯𑌾 𑌸𑌮𑍁𑌦𑍀𑌰𑍍𑌯𑌤𑍇 ।
𑌤𑌦𑍇𑌤𑌚𑍍𑌛𑍍𑌰𑌵𑌣𑌾𑌤𑍍𑌸𑌦𑍍𑌯𑍋 𑌭𑌵𑌬𑌨𑍍𑌧𑌾𑌦𑍍𑌵𑌿𑌮𑍋𑌕𑍍𑌷𑍍𑌯𑌸𑍇 ॥ 68॥
𑌮𑍋𑌕𑍍𑌷𑌸𑍍𑌯 𑌹𑍇𑌤𑍁𑌃 𑌪𑍍𑌰𑌥𑌮𑍋 𑌨𑌿𑌗𑌦𑍍𑌯𑌤𑍇
𑌵𑍈𑌰𑌾𑌗𑍍𑌯𑌮𑌤𑍍𑌯𑌨𑍍𑌤𑌮𑌨𑌿𑌤𑍍𑌯𑌵𑌸𑍍𑌤𑍁𑌷𑍁 ।
𑌤𑌤𑌃 𑌶𑌮𑌶𑍍𑌚𑌾𑌪𑌿 𑌦𑌮𑌸𑍍𑌤𑌿𑌤𑌿𑌕𑍍𑌷𑌾
𑌨𑍍𑌯𑌾𑌸𑌃 𑌪𑍍𑌰𑌸𑌕𑍍𑌤𑌾𑌖𑌿𑌲𑌕𑌰𑍍𑌮𑌣𑌾𑌂 𑌭𑍃𑌶𑌮𑍍 ॥ 69॥
𑌤𑌤𑌃 𑌶𑍍𑌰𑍁𑌤𑌿𑌸𑍍𑌤𑌨𑍍𑌮𑌨𑌨𑌂 𑌸𑌤𑌤𑍍𑌤𑍍𑌵-
𑌧𑍍𑌯𑌾𑌨𑌂 𑌚𑌿𑌰𑌂 𑌨𑌿𑌤𑍍𑌯𑌨𑌿𑌰𑌨𑍍𑌤𑌰𑌂 𑌮𑍁𑌨𑍇𑌃 ।
𑌤𑌤𑍋𑌽𑌵𑌿𑌕𑌲𑍍𑌪𑌂 𑌪𑌰𑌮𑍇𑌤𑍍𑌯 𑌵𑌿𑌦𑍍𑌵𑌾𑌨𑍍
𑌇𑌹𑍈𑌵 𑌨𑌿𑌰𑍍𑌵𑌾𑌣𑌸𑍁𑌖𑌂 𑌸𑌮𑍃𑌚𑍍𑌛𑌤𑌿 ॥ 70॥
𑌯𑌦𑍍𑌬𑍋𑌦𑍍𑌧𑌵𑍍𑌯𑌂 𑌤𑌵𑍇𑌦𑌾𑌨𑍀𑌮𑌾𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌚𑌨𑌮𑍍 ।
𑌤𑌦𑍁𑌚𑍍𑌯𑌤𑍇 𑌮𑌯𑌾 𑌸𑌮𑍍𑌯𑌕𑍍 𑌶𑍍𑌰𑍁𑌤𑍍𑌵𑌾𑌤𑍍𑌮𑌨𑍍𑌯𑌵𑌧𑌾𑌰𑌯 ॥ 71॥
𑌮𑌜𑍍𑌜𑌾𑌸𑍍𑌥𑌿𑌮𑍇𑌦𑌃𑌪𑌲𑌰𑌕𑍍𑌤𑌚𑌰𑍍𑌮-
𑌤𑍍𑌵𑌗𑌾𑌹𑍍𑌵𑌯𑍈𑌰𑍍𑌧𑌾𑌤𑍁𑌭𑌿𑌰𑍇𑌭𑌿𑌰𑌨𑍍𑌵𑌿𑌤𑌮𑍍 ।
𑌪𑌾𑌦𑍋𑌰𑍁𑌵𑌕𑍍𑌷𑍋𑌭𑍁𑌜𑌪𑍃𑌷𑍍𑌠𑌮𑌸𑍍𑌤𑌕𑍈𑌃
𑌅𑌙𑍍𑌗𑍈𑌰𑍁𑌪𑌾𑌙𑍍𑌗𑍈𑌰𑍁𑌪𑌯𑍁𑌕𑍍𑌤𑌮𑍇𑌤𑌤𑍍 ॥ 72॥
𑌅𑌹𑌮𑍍𑌮𑌮𑍇𑌤𑌿 𑌪𑍍𑌰𑌥𑌿𑌤𑌂 𑌶𑌰𑍀𑌰𑌂
𑌮𑍋𑌹𑌾𑌸𑍍𑌪𑌦𑌂 𑌸𑍍𑌥𑍂𑌲𑌮𑌿𑌤𑍀𑌰𑍍𑌯𑌤𑍇 𑌬𑍁𑌧𑍈𑌃 ।
𑌨𑌭𑍋𑌨𑌭𑌸𑍍𑌵𑌦𑍍𑌦𑌹𑌨𑌾𑌮𑍍𑌬𑍁𑌭𑍂𑌮𑌯𑌃
𑌸𑍂𑌕𑍍𑌷𑍍𑌮𑌾𑌣𑌿 𑌭𑍂𑌤𑌾𑌨𑌿 𑌭𑌵𑌨𑍍𑌤𑌿 𑌤𑌾𑌨𑌿 ॥ 73॥
𑌪𑌰𑌸𑍍𑌪𑌰𑌾𑌂𑌶𑍈𑌰𑍍𑌮𑌿𑌲𑌿𑌤𑌾𑌨𑌿 𑌭𑍂𑌤𑍍𑌵𑌾
𑌸𑍍𑌥𑍂𑌲𑌾𑌨𑌿 𑌚 𑌸𑍍𑌥𑍂𑌲𑌶𑌰𑍀𑌰𑌹𑍇𑌤𑌵𑌃 ।
𑌮𑌾𑌤𑍍𑌰𑌾𑌸𑍍𑌤𑌦𑍀𑌯𑌾 𑌵𑌿𑌷𑌯𑌾 𑌭𑌵𑌨𑍍𑌤𑌿
𑌶𑌬𑍍𑌦𑌾𑌦𑌯𑌃 𑌪𑌞𑍍𑌚 𑌸𑍁𑌖𑌾𑌯 𑌭𑍋𑌕𑍍𑌤𑍁𑌃 ॥ 74॥
𑌯 𑌏𑌷𑍁 𑌮𑍂𑌢𑌾 𑌵𑌿𑌷𑌯𑍇𑌷𑍁 𑌬𑌦𑍍𑌧𑌾
𑌰𑌾𑌗𑍋𑌰𑍁𑌪𑌾𑌶𑍇𑌨 𑌸𑍁𑌦𑍁𑌰𑍍𑌦𑌮𑍇𑌨 ।
𑌆𑌯𑌾𑌨𑍍𑌤𑌿 𑌨𑌿𑌰𑍍𑌯𑌾𑌨𑍍𑌤𑍍𑌯𑌧 𑌊𑌰𑍍𑌧𑍍𑌵𑌮𑍁𑌚𑍍𑌚𑍈𑌃
𑌸𑍍𑌵𑌕𑌰𑍍𑌮𑌦𑍂𑌤𑍇𑌨 𑌜𑌵𑍇𑌨 𑌨𑍀𑌤𑌾𑌃 ॥ 75॥
𑌶𑌬𑍍𑌦𑌾𑌦𑌿𑌭𑌿𑌃 𑌪𑌞𑍍𑌚𑌭𑌿𑌰𑍇𑌵 𑌪𑌞𑍍𑌚
𑌪𑌞𑍍𑌚𑌤𑍍𑌵𑌮𑌾𑌪𑍁𑌃 𑌸𑍍𑌵𑌗𑍁𑌣𑍇𑌨 𑌬𑌦𑍍𑌧𑌾𑌃 ।
𑌕𑍁𑌰𑌙𑍍𑌗𑌮𑌾𑌤𑌙𑍍𑌗𑌪𑌤𑌙𑍍𑌗𑌮𑍀𑌨-
𑌭𑍃𑌙𑍍𑌗𑌾 𑌨𑌰𑌃 𑌪𑌞𑍍𑌚𑌭𑌿𑌰𑌞𑍍𑌚𑌿𑌤𑌃 𑌕𑌿𑌮𑍍 ॥ 76॥
𑌦𑍋𑌷𑍇𑌣 𑌤𑍀𑌵𑍍𑌰𑍋 𑌵𑌿𑌷𑌯𑌃 𑌕𑍃𑌷𑍍𑌣𑌸𑌰𑍍𑌪𑌵𑌿𑌷𑌾𑌦𑌪𑌿 ।
𑌵𑌿𑌷𑌂 𑌨𑌿𑌹𑌨𑍍𑌤𑌿 𑌭𑍋𑌕𑍍𑌤𑌾𑌰𑌂 𑌦𑍍𑌰𑌷𑍍𑌟𑌾𑌰𑌂 𑌚𑌕𑍍𑌷𑍁𑌷𑌾𑌪𑍍𑌯𑌯𑌮𑍍 ॥ 77॥
𑌵𑌿𑌷𑌯𑌾𑌶𑌾𑌮𑌹𑌾𑌪𑌾𑌶𑌾𑌦𑍍𑌯𑍋 𑌵𑌿𑌮𑍁𑌕𑍍𑌤𑌃 𑌸𑍁𑌦𑍁𑌸𑍍𑌤𑍍𑌯𑌜𑌾𑌤𑍍 ।
𑌸 𑌏𑌵 𑌕𑌲𑍍𑌪𑌤𑍇 𑌮𑍁𑌕𑍍𑌤𑍍𑌯𑍈 𑌨𑌾𑌨𑍍𑌯𑌃 𑌷𑌟𑍍𑌶𑌾𑌸𑍍𑌤𑍍𑌰𑌵𑍇𑌦𑍍𑌯𑌪𑌿 ॥ 78॥
𑌆𑌪𑌾𑌤𑌵𑍈𑌰𑌾𑌗𑍍𑌯𑌵𑌤𑍋 𑌮𑍁𑌮𑍁𑌕𑍍𑌷𑍂𑌨𑍍
𑌭𑌵𑌾𑌬𑍍𑌧𑌿𑌪𑌾𑌰𑌂 𑌪𑍍𑌰𑌤𑌿𑌯𑌾𑌤𑍁𑌮𑍁𑌦𑍍𑌯𑌤𑌾𑌨𑍍 ।
𑌆𑌶𑌾𑌗𑍍𑌰𑌹𑍋 𑌮𑌜𑍍𑌜𑌯𑌤𑍇𑌽𑌨𑍍𑌤𑌰𑌾𑌲𑍇
𑌨𑌿𑌗𑍃𑌹𑍍𑌯 𑌕𑌣𑍍𑌠𑍇 𑌵𑌿𑌨𑌿𑌵𑌰𑍍𑌤𑍍𑌯 𑌵𑍇𑌗𑌾𑌤𑍍 ॥ 79॥
𑌵𑌿𑌷𑌯𑌾𑌖𑍍𑌯𑌗𑍍𑌰𑌹𑍋 𑌯𑍇𑌨 𑌸𑍁𑌵𑌿𑌰𑌕𑍍𑌤𑍍𑌯𑌸𑌿𑌨𑌾 𑌹𑌤𑌃 ।
𑌸 𑌗𑌚𑍍𑌛𑌤𑌿 𑌭𑌵𑌾𑌮𑍍𑌭𑍋𑌧𑍇𑌃 𑌪𑌾𑌰𑌂 𑌪𑍍𑌰𑌤𑍍𑌯𑍂𑌹𑌵𑌰𑍍𑌜𑌿𑌤𑌃 ॥ 80॥
𑌵𑌿𑌷𑌮𑌵𑌿𑌷𑌯𑌮𑌾𑌰𑍍𑌗𑍈𑌰𑍍𑌗𑌚𑍍𑌛𑌤𑍋𑌽𑌨𑌚𑍍𑌛𑌬𑍁𑌦𑍍𑌧𑍇𑌃 (𑌪𑌾𑌠𑌭𑍇𑌦𑌃 - 𑌵𑌿𑌷𑌯𑌮𑌾𑌰𑍍𑌗𑍇 𑌗𑌚𑍍𑌛𑌤𑍋)
𑌪𑍍𑌰𑌤𑌿𑌪𑌦𑌮𑌭𑌿𑌯𑌾𑌤𑍋 𑌮𑍃𑌤𑍍𑌯𑍁𑌰𑌪𑍍𑌯𑍇𑌷 𑌵𑌿𑌦𑍍𑌧𑌿 । (𑌪𑌾𑌠𑌭𑍇𑌦𑌃 - 𑌪𑍍𑌰𑌤𑌿𑌪𑌦𑌮𑌭𑌿𑌘𑌾𑌤𑍋 𑌮𑍃𑌤𑍍𑌯𑍁𑌰𑌪𑍍𑌯𑍇𑌷 𑌸𑌿𑌦𑍍𑌧𑌃)
𑌹𑌿𑌤𑌸𑍁𑌜𑌨𑌗𑍁𑌰𑍂𑌕𑍍𑌤𑍍𑌯𑌾 𑌗𑌚𑍍𑌛𑌤𑌃 𑌸𑍍𑌵𑌸𑍍𑌯 𑌯𑍁𑌕𑍍𑌤𑍍𑌯𑌾
𑌪𑍍𑌰𑌭𑌵𑌤𑌿 𑌫𑌲𑌸𑌿𑌦𑍍𑌧𑌿𑌃 𑌸𑌤𑍍𑌯𑌮𑌿𑌤𑍍𑌯𑍇𑌵 𑌵𑌿𑌦𑍍𑌧𑌿 ॥ 81॥
𑌮𑍋𑌕𑍍𑌷𑌸𑍍𑌯 𑌕𑌾𑌙𑍍𑌕𑍍𑌷𑌾 𑌯𑌦𑌿 𑌵𑍈 𑌤𑌵𑌾𑌸𑍍𑌤𑌿
𑌤𑍍𑌯𑌜𑌾𑌤𑌿𑌦𑍂𑌰𑌾𑌦𑍍𑌵𑌿𑌷𑌯𑌾𑌨𑍍𑌵𑌿𑌷𑌂 𑌯𑌥𑌾 ।
𑌪𑍀𑌯𑍂𑌷𑌵𑌤𑍍𑌤𑍋𑌷𑌦𑌯𑌾𑌕𑍍𑌷𑌮𑌾𑌰𑍍𑌜𑌵-
𑌪𑍍𑌰𑌶𑌾𑌨𑍍𑌤𑌿𑌦𑌾𑌨𑍍𑌤𑍀𑌰𑍍𑌭𑌜 𑌨𑌿𑌤𑍍𑌯𑌮𑌾𑌦𑌰𑌾𑌤𑍍 ॥ 82॥
𑌅𑌨𑍁𑌕𑍍𑌷𑌣𑌂 𑌯𑌤𑍍𑌪𑌰𑌿𑌹𑍃𑌤𑍍𑌯 𑌕𑍃𑌤𑍍𑌯𑌂
𑌅𑌨𑌾𑌦𑍍𑌯𑌵𑌿𑌦𑍍𑌯𑌾𑌕𑍃𑌤𑌬𑌨𑍍𑌧𑌮𑍋𑌕𑍍𑌷𑌣𑌮𑍍 ।
𑌦𑍇𑌹𑌃 𑌪𑌰𑌾𑌰𑍍𑌥𑍋𑌽𑌯𑌮𑌮𑍁𑌷𑍍𑌯 𑌪𑍋𑌷𑌣𑍇
𑌯𑌃 𑌸𑌜𑍍𑌜𑌤𑍇 𑌸 𑌸𑍍𑌵𑌮𑌨𑍇𑌨 𑌹𑌨𑍍𑌤𑌿 ॥ 83॥
𑌶𑌰𑍀𑌰𑌪𑍋𑌷𑌣𑌾𑌰𑍍𑌥𑍀 𑌸𑌨𑍍 𑌯 𑌆𑌤𑍍𑌮𑌾𑌨𑌂 𑌦𑌿𑌦𑍃𑌕𑍍𑌷𑌤𑌿 । (𑌪𑌾𑌠𑌭𑍇𑌦𑌃 - 𑌦𑌿𑌦𑍃𑌕𑍍𑌷𑌤𑍇)
𑌗𑍍𑌰𑌾𑌹𑌂 𑌦𑌾𑌰𑍁𑌧𑌿𑌯𑌾 𑌧𑍃𑌤𑍍𑌵𑌾 𑌨𑌦𑍀𑌂 𑌤𑌰𑍍𑌤𑍁𑌂 𑌸 𑌗𑌚𑍍𑌛𑌤𑌿 ॥ 84॥ (𑌪𑌾𑌠𑌭𑍇𑌦𑌃 - 𑌸 𑌇𑌚𑍍𑌛𑌤𑌿)
𑌮𑍋𑌹 𑌏𑌵 𑌮𑌹𑌾𑌮𑍃𑌤𑍍𑌯𑍁𑌰𑍍𑌮𑍁𑌮𑍁𑌕𑍍𑌷𑍋𑌰𑍍𑌵𑌪𑍁𑌰𑌾𑌦𑌿𑌷𑍁 ।
𑌮𑍋𑌹𑍋 𑌵𑌿𑌨𑌿𑌰𑍍𑌜𑌿𑌤𑍋 𑌯𑍇𑌨 𑌸 𑌮𑍁𑌕𑍍𑌤𑌿𑌪𑌦𑌮𑌰𑍍𑌹𑌤𑌿 ॥ 85॥
𑌮𑍋𑌹𑌂 𑌜𑌹𑌿 𑌮𑌹𑌾𑌮𑍃𑌤𑍍𑌯𑍁𑌂 𑌦𑍇𑌹𑌦𑌾𑌰𑌸𑍁𑌤𑌾𑌦𑌿𑌷𑍁 ।
𑌯𑌂 𑌜𑌿𑌤𑍍𑌵𑌾 𑌮𑍁𑌨𑌯𑍋 𑌯𑌾𑌨𑍍𑌤𑌿 𑌤𑌦𑍍𑌵𑌿𑌷𑍍𑌣𑍋𑌃 𑌪𑌰𑌮𑌂 𑌪𑌦𑌮𑍍 ॥ 86॥
𑌤𑍍𑌵𑌙𑍍𑌮𑌾𑌂𑌸𑌰𑍁𑌧𑌿𑌰𑌸𑍍𑌨𑌾𑌯𑍁𑌮𑍇𑌦𑍋𑌮𑌜𑍍𑌜𑌾𑌸𑍍𑌥𑌿𑌸𑌙𑍍𑌕𑍁𑌲𑌮𑍍 ।
𑌪𑍂𑌰𑍍𑌣𑌂 𑌮𑍂𑌤𑍍𑌰𑌪𑍁𑌰𑍀𑌷𑌾𑌭𑍍𑌯𑌾𑌂 𑌸𑍍𑌥𑍂𑌲𑌂 𑌨𑌿𑌨𑍍𑌦𑍍𑌯𑌮𑌿𑌦𑌂 𑌵𑌪𑍁𑌃 ॥ 87॥
𑌪𑌞𑍍𑌚𑍀𑌕𑍃𑌤𑍇𑌭𑍍𑌯𑍋 𑌭𑍂𑌤𑍇𑌭𑍍𑌯𑌃 𑌸𑍍𑌥𑍂𑌲𑍇𑌭𑍍𑌯𑌃 𑌪𑍂𑌰𑍍𑌵𑌕𑌰𑍍𑌮𑌣𑌾 ।
𑌸𑌮𑍁𑌤𑍍𑌪𑌨𑍍𑌨𑌮𑌿𑌦𑌂 𑌸𑍍𑌥𑍂𑌲𑌂 𑌭𑍋𑌗𑌾𑌯𑌤𑌨𑌮𑌾𑌤𑍍𑌮𑌨𑌃 ।
𑌅𑌵𑌸𑍍𑌥𑌾 𑌜𑌾𑌗𑌰𑌸𑍍𑌤𑌸𑍍𑌯 𑌸𑍍𑌥𑍂𑌲𑌾𑌰𑍍𑌥𑌾𑌨𑍁𑌭𑌵𑍋 𑌯𑌤𑌃 ॥ 88॥
𑌬𑌾𑌹𑍍𑌯𑍇𑌨𑍍𑌦𑍍𑌰𑌿𑌯𑍈𑌃 𑌸𑍍𑌥𑍂𑌲𑌪𑌦𑌾𑌰𑍍𑌥𑌸𑍇𑌵𑌾𑌂
𑌸𑍍𑌰𑌕𑍍𑌚𑌨𑍍𑌦𑌨𑌸𑍍𑌤𑍍𑌰𑍍𑌯𑌾𑌦𑌿𑌵𑌿𑌚𑌿𑌤𑍍𑌰𑌰𑍂𑌪𑌾𑌮𑍍 ।
𑌕𑌰𑍋𑌤𑌿 𑌜𑍀𑌵𑌃 𑌸𑍍𑌵𑌯𑌮𑍇𑌤𑌦𑌾𑌤𑍍𑌮𑌨𑌾
𑌤𑌸𑍍𑌮𑌾𑌤𑍍𑌪𑍍𑌰𑌶𑌸𑍍𑌤𑌿𑌰𑍍𑌵𑌪𑍁𑌷𑍋𑌽𑌸𑍍𑌯 𑌜𑌾𑌗𑌰𑍇 ॥ 89॥
𑌸𑌰𑍍𑌵𑍋𑌽𑌪𑌿 𑌬𑌾𑌹𑍍𑌯𑌸𑌂𑌸𑌾𑌰𑌃 𑌪𑍁𑌰𑍁𑌷𑌸𑍍𑌯 𑌯𑌦𑌾𑌶𑍍𑌰𑌯𑌃 ।
𑌵𑌿𑌦𑍍𑌧𑌿 𑌦𑍇𑌹𑌮𑌿𑌦𑌂 𑌸𑍍𑌥𑍂𑌲𑌂 𑌗𑍃𑌹𑌵𑌦𑍍𑌗𑍃𑌹𑌮𑍇𑌧𑌿𑌨𑌃 ॥ 90॥
𑌸𑍍𑌥𑍂𑌲𑌸𑍍𑌯 𑌸𑌮𑍍𑌭𑌵𑌜𑌰𑌾𑌮𑌰𑌣𑌾𑌨𑌿 𑌧𑌰𑍍𑌮𑌾𑌃
𑌸𑍍𑌥𑍗𑌲𑍍𑌯𑌾𑌦𑌯𑍋 𑌬𑌹𑍁𑌵𑌿𑌧𑌾𑌃 𑌶𑌿𑌶𑍁𑌤𑌾𑌦𑍍𑌯𑌵𑌸𑍍𑌥𑌾𑌃 ।
𑌵𑌰𑍍𑌣𑌾𑌶𑍍𑌰𑌮𑌾𑌦𑌿𑌨𑌿𑌯𑌮𑌾 𑌬𑌹𑍁𑌧𑌾𑌽𑌽𑌮𑌯𑌾𑌃 𑌸𑍍𑌯𑍁𑌃
𑌪𑍂𑌜𑌾𑌵𑌮𑌾𑌨𑌬𑌹𑍁𑌮𑌾𑌨𑌮𑍁𑌖𑌾 𑌵𑌿𑌶𑍇𑌷𑌾𑌃 ॥ 91॥
𑌬𑍁𑌦𑍍𑌧𑍀𑌨𑍍𑌦𑍍𑌰𑌿𑌯𑌾𑌣𑌿 𑌶𑍍𑌰𑌵𑌣𑌂 𑌤𑍍𑌵𑌗𑌕𑍍𑌷𑌿
𑌘𑍍𑌰𑌾𑌣𑌂 𑌚 𑌜𑌿𑌹𑍍𑌵𑌾 𑌵𑌿𑌷𑌯𑌾𑌵𑌬𑍋𑌧𑌨𑌾𑌤𑍍 ।
𑌵𑌾𑌕𑍍𑌪𑌾𑌣𑌿𑌪𑌾𑌦𑌾 𑌗𑍁𑌦𑌮𑌪𑍍𑌯𑍁𑌪𑌸𑍍𑌥𑌃 (𑌪𑌾𑌠𑌭𑍇𑌦𑌃 - 𑌉𑌪𑌸𑍍𑌥𑌂)
𑌕𑌰𑍍𑌮𑍇𑌨𑍍𑌦𑍍𑌰𑌿𑌯𑌾𑌣𑌿 𑌪𑍍𑌰𑌵𑌣𑍇𑌨 𑌕𑌰𑍍𑌮𑌸𑍁 ॥ 92॥ (𑌪𑌾𑌠𑌭𑍇𑌦𑌃 - 𑌪𑍍𑌰𑌵𑌣𑌾𑌨𑌿)
𑌨𑌿𑌗𑌦𑍍𑌯𑌤𑍇𑌽𑌨𑍍𑌤𑌃𑌕𑌰𑌣𑌂 𑌮𑌨𑍋𑌧𑍀𑌃
𑌅𑌹𑌙𑍍𑌕𑍃𑌤𑌿𑌶𑍍𑌚𑌿𑌤𑍍𑌤𑌮𑌿𑌤𑌿 𑌸𑍍𑌵𑌵𑍃𑌤𑍍𑌤𑌿𑌭𑌿𑌃 ।
𑌮𑌨𑌸𑍍𑌤𑍁 𑌸𑌙𑍍𑌕𑌲𑍍𑌪𑌵𑌿𑌕𑌲𑍍𑌪𑌨𑌾𑌦𑌿𑌭𑌿𑌃
𑌬𑍁𑌦𑍍𑌧𑌿𑌃 𑌪𑌦𑌾𑌰𑍍𑌥𑌾𑌧𑍍𑌯𑌵𑌸𑌾𑌯𑌧𑌰𑍍𑌮𑌤𑌃 ॥ 93॥
𑌅𑌤𑍍𑌰𑌾𑌭𑌿𑌮𑌾𑌨𑌾𑌦𑌹𑌮𑌿𑌤𑍍𑌯𑌹𑌙𑍍𑌕𑍃𑌤𑌿𑌃 ।
𑌸𑍍𑌵𑌾𑌰𑍍𑌥𑌾𑌨𑍁𑌸𑌨𑍍𑌧𑌾𑌨𑌗𑍁𑌣𑍇𑌨 𑌚𑌿𑌤𑍍𑌤𑌮𑍍 ॥ 94॥
𑌪𑍍𑌰𑌾𑌣𑌾𑌪𑌾𑌨𑌵𑍍𑌯𑌾𑌨𑍋𑌦𑌾𑌨𑌸𑌮𑌾𑌨𑌾 𑌭𑌵𑌤𑍍𑌯𑌸𑍗 𑌪𑍍𑌰𑌾𑌣𑌃 ।
𑌸𑍍𑌵𑌯𑌮𑍇𑌵 𑌵𑍃𑌤𑍍𑌤𑌿𑌭𑍇𑌦𑌾𑌦𑍍𑌵𑌿𑌕𑍃𑌤𑌿𑌭𑍇𑌦𑌾𑌤𑍍𑌸𑍁𑌵𑌰𑍍𑌣𑌸𑌲𑌿𑌲𑌾𑌦𑌿𑌵𑌤𑍍 ॥ 95॥ (𑌪𑌾𑌠𑌭𑍇𑌦𑌃 - 𑌵𑌿𑌕𑍃𑌤𑍇𑌰𑍍𑌭𑍇𑌦𑌾𑌤𑍍𑌸𑍁𑌵𑌰𑍍𑌣𑌸𑌲𑌿𑌲𑌮𑌿𑌵)
𑌵𑌾𑌗𑌾𑌦𑌿 𑌪𑌞𑍍𑌚 𑌶𑍍𑌰𑌵𑌣𑌾𑌦𑌿 𑌪𑌞𑍍𑌚
𑌪𑍍𑌰𑌾𑌣𑌾𑌦𑌿 𑌪𑌞𑍍𑌚𑌾𑌭𑍍𑌰𑌮𑍁𑌖𑌾𑌨𑌿 𑌪𑌞𑍍𑌚 ।
𑌬𑍁𑌦𑍍𑌧𑍍𑌯𑌾𑌦𑍍𑌯𑌵𑌿𑌦𑍍𑌯𑌾𑌪𑌿 𑌚 𑌕𑌾𑌮𑌕𑌰𑍍𑌮𑌣𑍀
𑌪𑍁𑌰𑍍𑌯𑌷𑍍𑌟𑌕𑌂 𑌸𑍂𑌕𑍍𑌷𑍍𑌮𑌶𑌰𑍀𑌰𑌮𑌾𑌹𑍁𑌃 ॥ 96॥
𑌇𑌦𑌂 𑌶𑌰𑍀𑌰𑌂 𑌶𑌋𑌣𑍁 𑌸𑍂𑌕𑍍𑌷𑍍𑌮𑌸𑌞𑍍𑌜𑍍𑌞𑌿𑌤𑌂
𑌲𑌿𑌙𑍍𑌗𑌂 𑌤𑍍𑌵𑌪𑌞𑍍𑌚𑍀𑌕𑍃𑌤𑌭𑍂𑌤𑌸𑌮𑍍𑌭𑌵𑌮𑍍 ।
𑌸𑌵𑌾𑌸𑌨𑌂 𑌕𑌰𑍍𑌮𑌫𑌲𑌾𑌨𑍁𑌭𑌾𑌵𑌕𑌂
𑌸𑍍𑌵𑌾𑌜𑍍𑌞𑌾𑌨𑌤𑍋𑌽𑌨𑌾𑌦𑌿𑌰𑍁𑌪𑌾𑌧𑌿𑌰𑌾𑌤𑍍𑌮𑌨𑌃 ॥ 97॥
𑌸𑍍𑌵𑌪𑍍𑌨𑍋 𑌭𑌵𑌤𑍍𑌯𑌸𑍍𑌯 𑌵𑌿𑌭𑌕𑍍𑌤𑍍𑌯𑌵𑌸𑍍𑌥𑌾
𑌸𑍍𑌵𑌮𑌾𑌤𑍍𑌰𑌶𑍇𑌷𑍇𑌣 𑌵𑌿𑌭𑌾𑌤𑌿 𑌯𑌤𑍍𑌰 ।
𑌸𑍍𑌵𑌪𑍍𑌨𑍇 𑌤𑍁 𑌬𑍁𑌦𑍍𑌧𑌿𑌃 𑌸𑍍𑌵𑌯𑌮𑍇𑌵 𑌜𑌾𑌗𑍍𑌰𑌤𑍍
𑌕𑌾𑌲𑍀𑌨𑌨𑌾𑌨𑌾𑌵𑌿𑌧𑌵𑌾𑌸𑌨𑌾𑌭𑌿𑌃 ॥ 98॥
𑌕𑌰𑍍𑌤𑍍𑌰𑌾𑌦𑌿𑌭𑌾𑌵𑌂 𑌪𑍍𑌰𑌤𑌿𑌪𑌦𑍍𑌯 𑌰𑌾𑌜𑌤𑍇
𑌯𑌤𑍍𑌰 𑌸𑍍𑌵𑌯𑌂 𑌭𑌾𑌤𑌿 𑌹𑍍𑌯𑌯𑌂 𑌪𑌰𑌾𑌤𑍍𑌮𑌾 । (𑌪𑌾𑌠𑌭𑍇𑌦𑌃 - 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌰𑌯𑌂)
𑌧𑍀𑌮𑌾𑌤𑍍𑌰𑌕𑍋𑌪𑌾𑌧𑌿𑌰𑌶𑍇𑌷𑌸𑌾𑌕𑍍𑌷𑍀
𑌨 𑌲𑌿𑌪𑍍𑌯𑌤𑍇 𑌤𑌤𑍍𑌕𑍃𑌤𑌕𑌰𑍍𑌮𑌲𑍇𑌶𑍈𑌃 । 𑌕𑌰𑍍𑌮𑌲𑍇𑌪𑍈𑌃
𑌯𑌸𑍍𑌮𑌾𑌦𑌸𑌙𑍍𑌗𑌸𑍍𑌤𑌤 𑌏𑌵 𑌕𑌰𑍍𑌮𑌭𑌿𑌃
𑌨 𑌲𑌿𑌪𑍍𑌯𑌤𑍇 𑌕𑌿𑌞𑍍𑌚𑌿𑌦𑍁𑌪𑌾𑌧𑌿𑌨𑌾 𑌕𑍃𑌤𑍈𑌃 ॥ 99॥
𑌸𑌰𑍍𑌵𑌵𑍍𑌯𑌾𑌪𑍃𑌤𑌿𑌕𑌰𑌣𑌂 𑌲𑌿𑌙𑍍𑌗𑌮𑌿𑌦𑌂 𑌸𑍍𑌯𑌾𑌚𑍍𑌚𑌿𑌦𑌾𑌤𑍍𑌮𑌨𑌃 𑌪𑍁𑌂𑌸𑌃 ।
𑌵𑌾𑌸𑍍𑌯𑌾𑌦𑌿𑌕𑌮𑌿𑌵 𑌤𑌕𑍍𑌷𑍍𑌣𑌸𑍍𑌤𑍇𑌨𑍈𑌵𑌾𑌤𑍍𑌮𑌾 𑌭𑌵𑌤𑍍𑌯𑌸𑌙𑍍𑌗𑍋𑌽𑌯𑌮𑍍 ॥ 100॥
𑌅𑌨𑍍𑌧𑌤𑍍𑌵𑌮𑌨𑍍𑌦𑌤𑍍𑌵𑌪𑌟𑍁𑌤𑍍𑌵𑌧𑌰𑍍𑌮𑌾𑌃
𑌸𑍗𑌗𑍁𑌣𑍍𑌯𑌵𑍈𑌗𑍁𑌣𑍍𑌯𑌵𑌶𑌾𑌦𑍍𑌧𑌿 𑌚𑌕𑍍𑌷𑍁𑌷𑌃 ।
𑌬𑌾𑌧𑌿𑌰𑍍𑌯𑌮𑍂𑌕𑌤𑍍𑌵𑌮𑍁𑌖𑌾𑌸𑍍𑌤𑌥𑍈𑌵
𑌶𑍍𑌰𑍋𑌤𑍍𑌰𑌾𑌦𑌿𑌧𑌰𑍍𑌮𑌾 𑌨 𑌤𑍁 𑌵𑍇𑌤𑍍𑌤𑍁𑌰𑌾𑌤𑍍𑌮𑌨𑌃 ॥ 101॥
𑌉𑌚𑍍𑌛𑍍𑌵𑌾𑌸𑌨𑌿𑌃𑌶𑍍𑌵𑌾𑌸𑌵𑌿𑌜𑍃𑌮𑍍𑌭𑌣𑌕𑍍𑌷𑍁-
𑌤𑍍𑌪𑍍𑌰𑌸𑍍𑌯𑌨𑍍𑌦𑌨𑌾𑌦𑍍𑌯𑍁𑌤𑍍𑌕𑍍𑌰𑌮𑌣𑌾𑌦𑌿𑌕𑌾𑌃 𑌕𑍍𑌰𑌿𑌯𑌾𑌃 । (𑌪𑌾𑌠𑌭𑍇𑌦𑌃 - 𑌪𑍍𑌰𑌸𑍍𑌪𑌨𑍍𑌦𑌨𑌾𑌦𑍍𑌯𑍍)
𑌪𑍍𑌰𑌾𑌣𑌾𑌦𑌿𑌕𑌰𑍍𑌮𑌾𑌣𑌿 𑌵𑌦𑌨𑍍𑌤𑌿 𑌤𑌜𑍍𑌞𑌾𑌃 (𑌪𑌾𑌠𑌭𑍇𑌦𑌃 - 𑌤𑌜𑍍𑌜𑍍𑌞𑌾𑌃)
𑌪𑍍𑌰𑌾𑌣𑌸𑍍𑌯 𑌧𑌰𑍍𑌮𑌾𑌵𑌶𑌨𑌾𑌪𑌿𑌪𑌾𑌸𑍇 ॥ 102॥
𑌅𑌨𑍍𑌤𑌃𑌕𑌰𑌣𑌮𑍇𑌤𑍇𑌷𑍁 𑌚𑌕𑍍𑌷𑍁𑌰𑌾𑌦𑌿𑌷𑍁 𑌵𑌰𑍍𑌷𑍍𑌮𑌣𑌿 ।
𑌅𑌹𑌮𑌿𑌤𑍍𑌯𑌭𑌿𑌮𑌾𑌨𑍇𑌨 𑌤𑌿𑌷𑍍𑌠𑌤𑍍𑌯𑌾𑌭𑌾𑌸𑌤𑍇𑌜𑌸𑌾 ॥ 103॥
𑌅𑌹𑌙𑍍𑌕𑌾𑌰𑌃 𑌸 𑌵𑌿𑌜𑍍𑌞𑍇𑌯𑌃 𑌕𑌰𑍍𑌤𑌾 𑌭𑍋𑌕𑍍𑌤𑌾𑌭𑌿𑌮𑌾𑌨𑍍𑌯𑌯𑌮𑍍 ।
𑌸𑌤𑍍𑌤𑍍𑌵𑌾𑌦𑌿𑌗𑍁𑌣𑌯𑍋𑌗𑍇𑌨 𑌚𑌾𑌵𑌸𑍍𑌥𑌾𑌤𑍍𑌰𑌯𑌮𑌶𑍍𑌨𑍁𑌤𑍇 ॥ 104॥ (𑌪𑌾𑌠𑌭𑍇𑌦𑌃 - 𑌯𑍋𑌗𑍇𑌨𑌾𑌵𑌸𑍍𑌥𑌾𑌤𑍍𑌰𑌿𑌤𑌯𑌮𑍍𑌶𑍍𑌨𑍁𑌤𑍇)
𑌵𑌿𑌷𑌯𑌾𑌣𑌾𑌮𑌾𑌨𑍁𑌕𑍂𑌲𑍍𑌯𑍇 𑌸𑍁𑌖𑍀 𑌦𑍁𑌃𑌖𑍀 𑌵𑌿𑌪𑌰𑍍𑌯𑌯𑍇 ।
𑌸𑍁𑌖𑌂 𑌦𑍁𑌃𑌖𑌂 𑌚 𑌤𑌦𑍍𑌧𑌰𑍍𑌮𑌃 𑌸𑌦𑌾𑌨𑌨𑍍𑌦𑌸𑍍𑌯 𑌨𑌾𑌤𑍍𑌮𑌨𑌃 ॥ 105॥
𑌆𑌤𑍍𑌮𑌾𑌰𑍍𑌥𑌤𑍍𑌵𑍇𑌨 𑌹𑌿 𑌪𑍍𑌰𑍇𑌯𑌾𑌨𑍍𑌵𑌿𑌷𑌯𑍋 𑌨 𑌸𑍍𑌵𑌤𑌃 𑌪𑍍𑌰𑌿𑌯𑌃 ।
𑌸𑍍𑌵𑌤 𑌏𑌵 𑌹𑌿 𑌸𑌰𑍍𑌵𑍇𑌷𑌾𑌮𑌾𑌤𑍍𑌮𑌾 𑌪𑍍𑌰𑌿𑌯𑌤𑌮𑍋 𑌯𑌤𑌃 ।
𑌤𑌤 𑌆𑌤𑍍𑌮𑌾 𑌸𑌦𑌾𑌨𑌨𑍍𑌦𑍋 𑌨𑌾𑌸𑍍𑌯 𑌦𑍁𑌃𑌖𑌂 𑌕𑌦𑌾𑌚𑌨 ॥ 106॥
𑌯𑌤𑍍𑌸𑍁𑌷𑍁𑌪𑍍𑌤𑍗 𑌨𑌿𑌰𑍍𑌵𑌿𑌷𑌯 𑌆𑌤𑍍𑌮𑌾𑌨𑌨𑍍𑌦𑍋𑌽𑌨𑍁𑌭𑍂𑌯𑌤𑍇 ।
𑌶𑍍𑌰𑍁𑌤𑌿𑌃 𑌪𑍍𑌰𑌤𑍍𑌯𑌕𑍍𑌷𑌮𑍈𑌤𑌿𑌹𑍍𑌯𑌮𑌨𑍁𑌮𑌾𑌨𑌂 𑌚 𑌜𑌾𑌗𑍍𑌰𑌤𑌿 ॥ 107॥
𑌅𑌵𑍍𑌯𑌕𑍍𑌤𑌨𑌾𑌮𑍍𑌨𑍀 𑌪𑌰𑌮𑍇𑌶𑌶𑌕𑍍𑌤𑌿𑌃
𑌅𑌨𑌾𑌦𑍍𑌯𑌵𑌿𑌦𑍍𑌯𑌾 𑌤𑍍𑌰𑌿𑌗𑍁𑌣𑌾𑌤𑍍𑌮𑌿𑌕𑌾 𑌪𑌰𑌾 ।
𑌕𑌾𑌰𑍍𑌯𑌾𑌨𑍁𑌮𑍇𑌯𑌾 𑌸𑍁𑌧𑌿𑌯𑍈𑌵 𑌮𑌾𑌯𑌾
𑌯𑌯𑌾 𑌜𑌗𑌤𑍍𑌸𑌰𑍍𑌵𑌮𑌿𑌦𑌂 𑌪𑍍𑌰𑌸𑍂𑌯𑌤𑍇 ॥ 108॥
𑌸𑌨𑍍𑌨𑌾𑌪𑍍𑌯𑌸𑌨𑍍𑌨𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋
𑌭𑌿𑌨𑍍𑌨𑌾𑌪𑍍𑌯𑌭𑌿𑌨𑍍𑌨𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋 ।
𑌸𑌾𑌙𑍍𑌗𑌾𑌪𑍍𑌯𑌨𑌙𑍍𑌗𑌾 𑌹𑍍𑌯𑍁𑌭𑌯𑌾𑌤𑍍𑌮𑌿𑌕𑌾 𑌨𑍋 (𑌪𑌾𑌠𑌭𑍇𑌦𑌃 - 𑌅𑌨𑌙𑍍𑌗𑌾𑌪𑍍𑌯𑍁𑌭𑌯𑌾𑌤𑍍𑌮𑌿𑌕𑌾)
𑌮𑌹𑌾𑌦𑍍𑌭𑍁𑌤𑌾𑌽𑌨𑌿𑌰𑍍𑌵𑌚𑌨𑍀𑌯𑌰𑍂𑌪𑌾 ॥ 109॥
𑌶𑍁𑌦𑍍𑌧𑌾𑌦𑍍𑌵𑌯𑌬𑍍𑌰𑌹𑍍𑌮𑌵𑌿𑌬𑍋𑌧𑌨𑌾𑌶𑍍𑌯𑌾
𑌸𑌰𑍍𑌪𑌭𑍍𑌰𑌮𑍋 𑌰𑌜𑍍𑌜𑍁𑌵𑌿𑌵𑍇𑌕𑌤𑍋 𑌯𑌥𑌾 ।
𑌰𑌜𑌸𑍍𑌤𑌮𑌃𑌸𑌤𑍍𑌤𑍍𑌵𑌮𑌿𑌤𑌿 𑌪𑍍𑌰𑌸𑌿𑌦𑍍𑌧𑌾
𑌗𑍁𑌣𑌾𑌸𑍍𑌤𑌦𑍀𑌯𑌾𑌃 𑌪𑍍𑌰𑌥𑌿𑌤𑍈𑌃 𑌸𑍍𑌵𑌕𑌾𑌰𑍍𑌯𑍈𑌃 ॥ 110॥
𑌵𑌿𑌕𑍍𑌷𑍇𑌪𑌶𑌕𑍍𑌤𑍀 𑌰𑌜𑌸𑌃 𑌕𑍍𑌰𑌿𑌯𑌾𑌤𑍍𑌮𑌿𑌕𑌾
𑌯𑌤𑌃 𑌪𑍍𑌰𑌵𑍃𑌤𑍍𑌤𑌿𑌃 𑌪𑍍𑌰𑌸𑍃𑌤𑌾 𑌪𑍁𑌰𑌾𑌣𑍀 ।
𑌰𑌾𑌗𑌾𑌦𑌯𑍋𑌽𑌸𑍍𑌯𑌾𑌃 𑌪𑍍𑌰𑌭𑌵𑌨𑍍𑌤𑌿 𑌨𑌿𑌤𑍍𑌯𑌂
𑌦𑍁𑌃𑌖𑌾𑌦𑌯𑍋 𑌯𑍇 𑌮𑌨𑌸𑍋 𑌵𑌿𑌕𑌾𑌰𑌾𑌃 ॥ 111॥
𑌕𑌾𑌮𑌃 𑌕𑍍𑌰𑍋𑌧𑍋 𑌲𑍋𑌭𑌦𑌮𑍍𑌭𑌾𑌦𑍍𑌯𑌸𑍂𑌯𑌾 (𑌪𑌾𑌠𑌭𑍇𑌦𑌃 - 𑌲𑍋𑌭𑌦𑌮𑍍𑌭𑌾𑌭𑍍𑌯𑌸𑍂𑌯𑌾)
𑌅𑌹𑌙𑍍𑌕𑌾𑌰𑍇𑌰𑍍𑌷𑍍𑌯𑌾𑌮𑌤𑍍𑌸𑌰𑌾𑌦𑍍𑌯𑌾𑌸𑍍𑌤𑍁 𑌘𑍋𑌰𑌾𑌃 ।
𑌧𑌰𑍍𑌮𑌾 𑌏𑌤𑍇 𑌰𑌾𑌜𑌸𑌾𑌃 𑌪𑍁𑌮𑍍𑌪𑍍𑌰𑌵𑍃𑌤𑍍𑌤𑌿-
𑌰𑍍𑌯𑌸𑍍𑌮𑌾𑌦𑍇𑌷𑌾 𑌤𑌦𑍍𑌰𑌜𑍋 𑌬𑌨𑍍𑌧𑌹𑍇𑌤𑍁𑌃 ॥ 112॥ (𑌪𑌾𑌠𑌭𑍇𑌦𑌃 - 𑌯𑌸𑍍𑌮𑌾𑌦𑍇𑌤𑌤𑍍𑌤𑌦𑍍𑌰𑌜𑍋)
𑌏𑌷𑌾𑌽𑌽𑌵𑍃𑌤𑌿𑌰𑍍𑌨𑌾𑌮 𑌤𑌮𑍋𑌗𑍁𑌣𑌸𑍍𑌯
𑌶𑌕𑍍𑌤𑌿𑌰𑍍𑌮𑌯𑌾 𑌵𑌸𑍍𑌤𑍍𑌵𑌵𑌭𑌾𑌸𑌤𑍇𑌽𑌨𑍍𑌯𑌥𑌾 । 𑌶𑌕𑍍𑌤𑌿𑌰𑍍𑌯𑌯𑌾
𑌸𑍈𑌷𑌾 𑌨𑌿𑌦𑌾𑌨𑌂 𑌪𑍁𑌰𑍁𑌷𑌸𑍍𑌯 𑌸𑌂𑌸𑍃𑌤𑍇𑌃
𑌵𑌿𑌕𑍍𑌷𑍇𑌪𑌶𑌕𑍍𑌤𑍇𑌃 𑌪𑍍𑌰𑌵𑌣𑌸𑍍𑌯 𑌹𑍇𑌤𑍁𑌃 ॥ 113॥ (𑌪𑌾𑌠𑌭𑍇𑌦𑌃 - 𑌪𑍍𑌰𑌸𑌰𑌸𑍍𑌯)
𑌪𑍍𑌰𑌜𑍍𑌞𑌾𑌵𑌾𑌨𑌪𑌿 𑌪𑌣𑍍𑌡𑌿𑌤𑍋𑌽𑌪𑌿 𑌚𑌤𑍁𑌰𑍋𑌽𑌪𑍍𑌯𑌤𑍍𑌯𑌨𑍍𑌤𑌸𑍂𑌕𑍍𑌷𑍍𑌮𑌾𑌤𑍍𑌮𑌦𑍃𑌗𑍍- (𑌪𑌾𑌠𑌭𑍇𑌦𑌃 - 𑌸𑍂𑌕𑍍𑌷𑍍𑌮𑌾𑌰𑍍𑌥𑌦𑍃𑌗𑍍)
𑌵𑍍𑌯𑌾𑌲𑍀𑌢𑌸𑍍𑌤𑌮𑌸𑌾 𑌨 𑌵𑍇𑌤𑍍𑌤𑌿 𑌬𑌹𑍁𑌧𑌾 𑌸𑌮𑍍𑌬𑍋𑌧𑌿𑌤𑍋𑌽𑌪𑌿 𑌸𑍍𑌫𑍁𑌟𑌮𑍍 ।
𑌭𑍍𑌰𑌾𑌨𑍍𑌤𑍍𑌯𑌾𑌰𑍋𑌪𑌿𑌤𑌮𑍇𑌵 𑌸𑌾𑌧𑍁 𑌕𑌲𑌯𑌤𑍍𑌯𑌾𑌲𑌮𑍍𑌬𑌤𑍇 𑌤𑌦𑍍𑌗𑍁𑌣𑌾𑌨𑍍
𑌹𑌨𑍍𑌤𑌾𑌸𑍗 𑌪𑍍𑌰𑌬𑌲𑌾 𑌦𑍁𑌰𑌨𑍍𑌤𑌤𑌮𑌸𑌃 𑌶𑌕𑍍𑌤𑌿𑌰𑍍𑌮𑌹𑌤𑍍𑌯𑌾𑌵𑍃𑌤𑌿𑌃 ॥ 114॥
𑌅𑌭𑌾𑌵𑌨𑌾 𑌵𑌾 𑌵𑌿𑌪𑌰𑍀𑌤𑌭𑌾𑌵𑌨𑌾𑌽- (𑌪𑌾𑌠𑌭𑍇𑌦𑌃 - 𑌵𑌿𑌪𑌰𑍀𑌤𑌭𑌾𑌵𑌨𑌾)
𑌸𑌮𑍍𑌭𑌾𑌵𑌨𑌾 𑌵𑌿𑌪𑍍𑌰𑌤𑌿𑌪𑌤𑍍𑌤𑌿𑌰𑌸𑍍𑌯𑌾𑌃 ।
𑌸𑌂𑌸𑌰𑍍𑌗𑌯𑍁𑌕𑍍𑌤𑌂 𑌨 𑌵𑌿𑌮𑍁𑌞𑍍𑌚𑌤𑌿 𑌧𑍍𑌰𑍁𑌵𑌂
𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 𑌕𑍍𑌷𑌪𑌯𑌤𑍍𑌯𑌜𑌸𑍍𑌰𑌮𑍍 ॥ 115॥
𑌅𑌜𑍍𑌞𑌾𑌨𑌮𑌾𑌲𑌸𑍍𑌯𑌜𑌡𑌤𑍍𑌵𑌨𑌿𑌦𑍍𑌰𑌾-
𑌪𑍍𑌰𑌮𑌾𑌦𑌮𑍂𑌢𑌤𑍍𑌵𑌮𑍁𑌖𑌾𑌸𑍍𑌤𑌮𑍋𑌗𑍁𑌣𑌾𑌃 ।
𑌏𑌤𑍈𑌃 𑌪𑍍𑌰𑌯𑍁𑌕𑍍𑌤𑍋 𑌨 𑌹𑌿 𑌵𑍇𑌤𑍍𑌤𑌿 𑌕𑌿𑌞𑍍𑌚𑌿𑌤𑍍
𑌨𑌿𑌦𑍍𑌰𑌾𑌲𑍁𑌵𑌤𑍍𑌸𑍍𑌤𑌮𑍍𑌭𑌵𑌦𑍇𑌵 𑌤𑌿𑌷𑍍𑌠𑌤𑌿 ॥ 116॥
𑌸𑌤𑍍𑌤𑍍𑌵𑌂 𑌵𑌿𑌶𑍁𑌦𑍍𑌧𑌂 𑌜𑌲𑌵𑌤𑍍𑌤𑌥𑌾𑌪𑌿
𑌤𑌾𑌭𑍍𑌯𑌾𑌂 𑌮𑌿𑌲𑌿𑌤𑍍𑌵𑌾 𑌸𑌰𑌣𑌾𑌯 𑌕𑌲𑍍𑌪𑌤𑍇 ।
𑌯𑌤𑍍𑌰𑌾𑌤𑍍𑌮𑌬𑌿𑌮𑍍𑌬𑌃 𑌪𑍍𑌰𑌤𑌿𑌬𑌿𑌮𑍍𑌬𑌿𑌤𑌃 𑌸𑌨𑍍
𑌪𑍍𑌰𑌕𑌾𑌶𑌯𑌤𑍍𑌯𑌰𑍍𑌕 𑌇𑌵𑌾𑌖𑌿𑌲𑌂 𑌜𑌡𑌮𑍍 ॥ 117॥
𑌮𑌿𑌶𑍍𑌰𑌸𑍍𑌯 𑌸𑌤𑍍𑌤𑍍𑌵𑌸𑍍𑌯 𑌭𑌵𑌨𑍍𑌤𑌿 𑌧𑌰𑍍𑌮𑌾𑌃
𑌤𑍍𑌵𑌮𑌾𑌨𑌿𑌤𑌾𑌦𑍍𑌯𑌾 𑌨𑌿𑌯𑌮𑌾 𑌯𑌮𑌾𑌦𑍍𑌯𑌾𑌃 ।
𑌶𑍍𑌰𑌦𑍍𑌧𑌾 𑌚 𑌭𑌕𑍍𑌤𑌿𑌶𑍍𑌚 𑌮𑍁𑌮𑍁𑌕𑍍𑌷𑍁𑌤𑌾 𑌚
𑌦𑍈𑌵𑍀 𑌚 𑌸𑌮𑍍𑌪𑌤𑍍𑌤𑌿𑌰𑌸𑌨𑍍𑌨𑌿𑌵𑍃𑌤𑍍𑌤𑌿𑌃 ॥ 118॥
𑌵𑌿𑌶𑍁𑌦𑍍𑌧𑌸𑌤𑍍𑌤𑍍𑌵𑌸𑍍𑌯 𑌗𑍁𑌣𑌾𑌃 𑌪𑍍𑌰𑌸𑌾𑌦𑌃
𑌸𑍍𑌵𑌾𑌤𑍍𑌮𑌾𑌨𑍁𑌭𑍂𑌤𑌿𑌃 𑌪𑌰𑌮𑌾 𑌪𑍍𑌰𑌶𑌾𑌨𑍍𑌤𑌿𑌃 ।
𑌤𑍃𑌪𑍍𑌤𑌿𑌃 𑌪𑍍𑌰𑌹𑌰𑍍𑌷𑌃 𑌪𑌰𑌮𑌾𑌤𑍍𑌮𑌨𑌿𑌷𑍍𑌠𑌾
𑌯𑌯𑌾 𑌸𑌦𑌾𑌨𑌨𑍍𑌦𑌰𑌸𑌂 𑌸𑌮𑍃𑌚𑍍𑌛𑌤𑌿 ॥ 119॥
𑌅𑌵𑍍𑌯𑌕𑍍𑌤𑌮𑍇𑌤𑌤𑍍𑌤𑍍𑌰𑌿𑌗𑍁𑌣𑍈𑌰𑍍𑌨𑌿𑌰𑍁𑌕𑍍𑌤𑌂
𑌤𑌤𑍍𑌕𑌾𑌰𑌣𑌂 𑌨𑌾𑌮 𑌶𑌰𑍀𑌰𑌮𑌾𑌤𑍍𑌮𑌨𑌃 ।
𑌸𑍁𑌷𑍁𑌪𑍍𑌤𑌿𑌰𑍇𑌤𑌸𑍍𑌯 𑌵𑌿𑌭𑌕𑍍𑌤𑍍𑌯𑌵𑌸𑍍𑌥𑌾
𑌪𑍍𑌰𑌲𑍀𑌨𑌸𑌰𑍍𑌵𑍇𑌨𑍍𑌦𑍍𑌰𑌿𑌯𑌬𑍁𑌦𑍍𑌧𑌿𑌵𑍃𑌤𑍍𑌤𑌿𑌃 ॥ 120॥
𑌸𑌰𑍍𑌵𑌪𑍍𑌰𑌕𑌾𑌰𑌪𑍍𑌰𑌮𑌿𑌤𑌿𑌪𑍍𑌰𑌶𑌾𑌨𑍍𑌤𑌿𑌃
𑌬𑍀𑌜𑌾𑌤𑍍𑌮𑌨𑌾𑌵𑌸𑍍𑌥𑌿𑌤𑌿𑌰𑍇𑌵 𑌬𑍁𑌦𑍍𑌧𑍇𑌃 ।
𑌸𑍁𑌷𑍁𑌪𑍍𑌤𑌿𑌰𑍇𑌤𑌸𑍍𑌯 𑌕𑌿𑌲 𑌪𑍍𑌰𑌤𑍀𑌤𑌿𑌃 (𑌪𑌾𑌠𑌭𑍇𑌦𑌃 - 𑌸𑍁𑌷𑍁𑌪𑍍𑌤𑌿𑌰𑌤𑍍𑌰𑌾𑌸𑍍𑌯)
𑌕𑌿𑌞𑍍𑌚𑌿𑌨𑍍𑌨 𑌵𑍇𑌦𑍍𑌮𑍀𑌤𑌿 𑌜𑌗𑌤𑍍𑌪𑍍𑌰𑌸𑌿𑌦𑍍𑌧𑍇𑌃 ॥ 121॥
𑌦𑍇𑌹𑍇𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌽𑌹𑌮𑌾𑌦𑌯𑌃
𑌸𑌰𑍍𑌵𑍇 𑌵𑌿𑌕𑌾𑌰𑌾 𑌵𑌿𑌷𑌯𑌾𑌃 𑌸𑍁𑌖𑌾𑌦𑌯𑌃 ।
𑌵𑍍𑌯𑍋𑌮𑌾𑌦𑌿𑌭𑍂𑌤𑌾𑌨𑍍𑌯𑌖𑌿𑌲𑌂 𑌚 𑌵𑌿𑌶𑍍𑌵𑌂
𑌅𑌵𑍍𑌯𑌕𑍍𑌤𑌪𑌰𑍍𑌯𑌨𑍍𑌤𑌮𑌿𑌦𑌂 𑌹𑍍𑌯𑌨𑌾𑌤𑍍𑌮𑌾 ॥ 122॥
𑌮𑌾𑌯𑌾 𑌮𑌾𑌯𑌾𑌕𑌾𑌰𑍍𑌯𑌂 𑌸𑌰𑍍𑌵𑌂 𑌮𑌹𑌦𑌾𑌦𑌿𑌦𑍇𑌹𑌪𑌰𑍍𑌯𑌨𑍍𑌤𑌮𑍍 ।
𑌅𑌸𑌦𑌿𑌦𑌮𑌨𑌾𑌤𑍍𑌮𑌤𑌤𑍍𑌤𑍍𑌵𑌂 𑌵𑌿𑌦𑍍𑌧𑌿 𑌤𑍍𑌵𑌂 𑌮𑌰𑍁𑌮𑌰𑍀𑌚𑌿𑌕𑌾𑌕𑌲𑍍𑌪𑌮𑍍 ॥ 123॥
𑌅𑌥 𑌤𑍇 𑌸𑌮𑍍𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌸𑍍𑌵𑌰𑍂𑌪𑌂 𑌪𑌰𑌮𑌾𑌤𑍍𑌮𑌨𑌃 ।
𑌯𑌦𑍍𑌵𑌿𑌜𑍍𑌞𑌾𑌯 𑌨𑌰𑍋 𑌬𑌨𑍍𑌧𑌾𑌨𑍍𑌮𑍁𑌕𑍍𑌤𑌃 𑌕𑍈𑌵𑌲𑍍𑌯𑌮𑌶𑍍𑌨𑍁𑌤𑍇 ॥ 124॥
𑌅𑌸𑍍𑌤𑌿 𑌕𑌶𑍍𑌚𑌿𑌤𑍍𑌸𑍍𑌵𑌯𑌂 𑌨𑌿𑌤𑍍𑌯𑌮𑌹𑌮𑍍𑌪𑍍𑌰𑌤𑍍𑌯𑌯𑌲𑌮𑍍𑌬𑌨𑌃 ।
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍀 𑌸𑌨𑍍𑌪𑌞𑍍𑌚𑌕𑍋𑌶𑌵𑌿𑌲𑌕𑍍𑌷𑌣𑌃 ॥ 125॥
𑌯𑍋 𑌵𑌿𑌜𑌾𑌨𑌾𑌤𑌿 𑌸𑌕𑌲𑌂 𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 ।
𑌬𑍁𑌦𑍍𑌧𑌿𑌤𑌦𑍍𑌵𑍃𑌤𑍍𑌤𑌿𑌸𑌦𑍍𑌭𑌾𑌵𑌮𑌭𑌾𑌵𑌮𑌹𑌮𑌿𑌤𑍍𑌯𑌯𑌮𑍍 ॥ 126॥
𑌯𑌃 𑌪𑌶𑍍𑌯𑌤𑌿 𑌸𑍍𑌵𑌯𑌂 𑌸𑌰𑍍𑌵𑌂 𑌯𑌂 𑌨 𑌪𑌶𑍍𑌯𑌤𑌿 𑌕𑌶𑍍𑌚𑌨 । (𑌪𑌾𑌠𑌭𑍇𑌦𑌃 - 𑌕𑌿𑌞𑍍𑌚𑌨)
𑌯𑌶𑍍𑌚𑍇𑌤𑌯𑌤𑌿 𑌬𑍁𑌦𑍍𑌧𑍍𑌯𑌾𑌦𑌿 𑌨 𑌤𑌦𑍍𑌯𑌂 𑌚𑍇𑌤𑌯𑌤𑍍𑌯𑌯𑌮𑍍 ॥ 127॥
𑌯𑍇𑌨 𑌵𑌿𑌶𑍍𑌵𑌮𑌿𑌦𑌂 𑌵𑍍𑌯𑌾𑌪𑍍𑌤𑌂 𑌯𑌂 𑌨 𑌵𑍍𑌯𑌾𑌪𑍍𑌨𑍋𑌤𑌿 𑌕𑌿𑌞𑍍𑌚𑌨 ।
𑌆𑌭𑌾𑌰𑍂𑌪𑌮𑌿𑌦𑌂 𑌸𑌰𑍍𑌵𑌂 𑌯𑌂 𑌭𑌾𑌨𑍍𑌤𑌮𑌨𑍁𑌭𑌾𑌤𑍍𑌯𑌯𑌮𑍍 ॥ 128॥
𑌯𑌸𑍍𑌯 𑌸𑌨𑍍𑌨𑌿𑌧𑌿𑌮𑌾𑌤𑍍𑌰𑍇𑌣 𑌦𑍇𑌹𑍇𑌨𑍍𑌦𑍍𑌰𑌿𑌯𑌮𑌨𑍋𑌧𑌿𑌯𑌃 ।
𑌵𑌿𑌷𑌯𑍇𑌷𑍁 𑌸𑍍𑌵𑌕𑍀𑌯𑍇𑌷𑍁 𑌵𑌰𑍍𑌤𑌨𑍍𑌤𑍇 𑌪𑍍𑌰𑍇𑌰𑌿𑌤𑌾 𑌇𑌵 ॥ 129॥
𑌅𑌹𑌙𑍍𑌕𑌾𑌰𑌾𑌦𑌿𑌦𑍇𑌹𑌾𑌨𑍍𑌤𑌾 𑌵𑌿𑌷𑌯𑌾𑌶𑍍𑌚 𑌸𑍁𑌖𑌾𑌦𑌯𑌃 ।
𑌵𑍇𑌦𑍍𑌯𑌨𑍍𑌤𑍇 𑌘𑌟𑌵𑌦𑍍𑌯𑍇𑌨 𑌨𑌿𑌤𑍍𑌯𑌬𑍋𑌧𑌸𑍍𑌵𑌰𑍂𑌪𑌿𑌣𑌾 ॥ 130॥
𑌏𑌷𑍋𑌽𑌨𑍍𑌤𑌰𑌾𑌤𑍍𑌮𑌾 𑌪𑍁𑌰𑍁𑌷𑌃 𑌪𑍁𑌰𑌾𑌣𑍋
𑌨𑌿𑌰𑌨𑍍𑌤𑌰𑌾𑌖𑌣𑍍𑌡𑌸𑍁𑌖𑌾𑌨𑍁𑌭𑍂𑌤𑌿𑌃 ।
𑌸𑌦𑍈𑌕𑌰𑍂𑌪𑌃 𑌪𑍍𑌰𑌤𑌿𑌬𑍋𑌧𑌮𑌾𑌤𑍍𑌰𑍋
𑌯𑍇𑌨𑍇𑌷𑌿𑌤𑌾 𑌵𑌾𑌗𑌸𑌵𑌶𑍍𑌚𑌰𑌨𑍍𑌤𑌿 ॥ 131॥
𑌅𑌤𑍍𑌰𑍈𑌵 𑌸𑌤𑍍𑌤𑍍𑌵𑌾𑌤𑍍𑌮𑌨𑌿 𑌧𑍀𑌗𑍁𑌹𑌾𑌯𑌾𑌂
𑌅𑌵𑍍𑌯𑌾𑌕𑍃𑌤𑌾𑌕𑌾𑌶 𑌉𑌶𑌤𑍍𑌪𑍍𑌰𑌕𑌾𑌶𑌃 । (𑌪𑌾𑌠𑌭𑍇𑌦𑌃 - 𑌉𑌰𑍁𑌪𑍍𑌰𑌕𑌾𑌶𑌃)
𑌆𑌕𑌾𑌶 𑌉𑌚𑍍𑌚𑍈 𑌰𑌵𑌿𑌵𑌤𑍍𑌪𑍍𑌰𑌕𑌾𑌶𑌤𑍇
𑌸𑍍𑌵𑌤𑍇𑌜𑌸𑌾 𑌵𑌿𑌶𑍍𑌵𑌮𑌿𑌦𑌂 𑌪𑍍𑌰𑌕𑌾𑌶𑌯𑌨𑍍 ॥ 132॥
𑌜𑍍𑌞𑌾𑌤𑌾 𑌮𑌨𑍋𑌽𑌹𑌙𑍍𑌕𑍃𑌤𑌿𑌵𑌿𑌕𑍍𑌰𑌿𑌯𑌾𑌣𑌾𑌂
𑌦𑍇𑌹𑍇𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌕𑍃𑌤𑌕𑍍𑌰𑌿𑌯𑌾𑌣𑌾𑌮𑍍 ।
𑌅𑌯𑍋𑌽𑌗𑍍𑌨𑌿𑌵𑌤𑍍𑌤𑌾𑌨𑌨𑍁𑌵𑌰𑍍𑌤𑌮𑌾𑌨𑍋
𑌨 𑌚𑍇𑌷𑍍𑌟𑌤𑍇 𑌨𑍋 𑌵𑌿𑌕𑌰𑍋𑌤𑌿 𑌕𑌿𑌞𑍍𑌚𑌨 ॥ 133॥
𑌨 𑌜𑌾𑌯𑌤𑍇 𑌨𑍋 𑌮𑍍𑌰𑌿𑌯𑌤𑍇 𑌨 𑌵𑌰𑍍𑌧𑌤𑍇
𑌨 𑌕𑍍𑌷𑍀𑌯𑌤𑍇 𑌨𑍋 𑌵𑌿𑌕𑌰𑍋𑌤𑌿 𑌨𑌿𑌤𑍍𑌯𑌃 ।
𑌵𑌿𑌲𑍀𑌯𑌮𑌾𑌨𑍇𑌽𑌪𑌿 𑌵𑌪𑍁𑌷𑍍𑌯𑌮𑍁𑌷𑍍𑌮𑌿-
𑌨𑍍𑌨 𑌲𑍀𑌯𑌤𑍇 𑌕𑍁𑌮𑍍𑌭 𑌇𑌵𑌾𑌮𑍍𑌬𑌰𑌂 𑌸𑍍𑌵𑌯𑌮𑍍 ॥ 134॥
𑌪𑍍𑌰𑌕𑍃𑌤𑌿𑌵𑌿𑌕𑍃𑌤𑌿𑌭𑌿𑌨𑍍𑌨𑌃 𑌶𑍁𑌦𑍍𑌧𑌬𑍋𑌧𑌸𑍍𑌵𑌭𑌾𑌵𑌃
𑌸𑌦𑌸𑌦𑌿𑌦𑌮𑌶𑍇𑌷𑌂 𑌭𑌾𑌸𑌯𑌨𑍍𑌨𑌿𑌰𑍍𑌵𑌿𑌶𑍇𑌷𑌃 ।
𑌵𑌿𑌲𑌸𑌤𑌿 𑌪𑌰𑌮𑌾𑌤𑍍𑌮𑌾 𑌜𑌾𑌗𑍍𑌰𑌦𑌾𑌦𑌿𑌷𑍍𑌵𑌵𑌸𑍍𑌥𑌾-
𑌸𑍍𑌵𑌹𑌮𑌹𑌮𑌿𑌤𑌿 𑌸𑌾𑌕𑍍𑌷𑌾𑌤𑍍𑌸𑌾𑌕𑍍𑌷𑌿𑌰𑍂𑌪𑍇𑌣 𑌬𑍁𑌦𑍍𑌧𑍇𑌃 ॥ 135॥
𑌨𑌿𑌯𑌮𑌿𑌤𑌮𑌨𑌸𑌾𑌮𑍁𑌂 𑌤𑍍𑌵𑌂 𑌸𑍍𑌵𑌮𑌾𑌤𑍍𑌮𑌾𑌨𑌮𑌾𑌤𑍍𑌮-
𑌨𑍍𑌯𑌯𑌮𑌹𑌮𑌿𑌤𑌿 𑌸𑌾𑌕𑍍𑌷𑌾𑌦𑍍𑌵𑌿𑌦𑍍𑌧𑌿 𑌬𑍁𑌦𑍍𑌧𑌿𑌪𑍍𑌰𑌸𑌾𑌦𑌾𑌤𑍍 ।
𑌜𑌨𑌿𑌮𑌰𑌣𑌤𑌰𑌙𑍍𑌗𑌾𑌪𑌾𑌰𑌸𑌂𑌸𑌾𑌰𑌸𑌿𑌨𑍍𑌧𑍁𑌂
𑌪𑍍𑌰𑌤𑌰 𑌭𑌵 𑌕𑍃𑌤𑌾𑌰𑍍𑌥𑍋 𑌬𑍍𑌰𑌹𑍍𑌮𑌰𑍂𑌪𑍇𑌣 𑌸𑌂𑌸𑍍𑌥𑌃 ॥ 136॥
𑌅𑌤𑍍𑌰𑌾𑌨𑌾𑌤𑍍𑌮𑌨𑍍𑌯𑌹𑌮𑌿𑌤𑌿 𑌮𑌤𑌿𑌰𑍍𑌬𑌨𑍍𑌧 𑌏𑌷𑍋𑌽𑌸𑍍𑌯 𑌪𑍁𑌂𑌸𑌃
𑌪𑍍𑌰𑌾𑌪𑍍𑌤𑍋𑌽𑌜𑍍𑌞𑌾𑌨𑌾𑌜𑍍𑌜𑌨𑌨𑌮𑌰𑌣𑌕𑍍𑌲𑍇𑌶𑌸𑌮𑍍𑌪𑌾𑌤𑌹𑍇𑌤𑍁𑌃 ।
𑌯𑍇𑌨𑍈𑌵𑌾𑌯𑌂 𑌵𑌪𑍁𑌰𑌿𑌦𑌮𑌸𑌤𑍍𑌸𑌤𑍍𑌯𑌮𑌿𑌤𑍍𑌯𑌾𑌤𑍍𑌮𑌬𑍁𑌦𑍍𑌧𑍍𑌯𑌾
𑌪𑍁𑌷𑍍𑌯𑌤𑍍𑌯𑍁𑌕𑍍𑌷𑌤𑍍𑌯𑌵𑌤𑌿 𑌵𑌿𑌷𑌯𑍈𑌸𑍍𑌤𑌨𑍍𑌤𑍁𑌭𑌿𑌃 𑌕𑍋𑌶𑌕𑍃𑌦𑍍𑌵𑌤𑍍 ॥ 137॥
𑌅𑌤𑌸𑍍𑌮𑌿𑌂𑌸𑍍𑌤𑌦𑍍𑌬𑍁𑌦𑍍𑌧𑌿𑌃 𑌪𑍍𑌰𑌭𑌵𑌤𑌿 𑌵𑌿𑌮𑍂𑌢𑌸𑍍𑌯 𑌤𑌮𑌸𑌾
𑌵𑌿𑌵𑍇𑌕𑌾𑌭𑌾𑌵𑌾𑌦𑍍𑌵𑍈 𑌸𑍍𑌫𑍁𑌰𑌤𑌿 𑌭𑍁𑌜𑌗𑍇 𑌰𑌜𑍍𑌜𑍁𑌧𑌿𑌷𑌣𑌾 ।
𑌤𑌤𑍋𑌽𑌨𑌰𑍍𑌥𑌵𑍍𑌰𑌾𑌤𑍋 𑌨𑌿𑌪𑌤𑌤𑌿 𑌸𑌮𑌾𑌦𑌾𑌤𑍁𑌰𑌧𑌿𑌕𑌃
𑌤𑌤𑍋 𑌯𑍋𑌽𑌸𑌦𑍍𑌗𑍍𑌰𑌾𑌹𑌃 𑌸 𑌹𑌿 𑌭𑌵𑌤𑌿 𑌬𑌨𑍍𑌧𑌃 𑌶𑌋𑌣𑍁 𑌸𑌖𑍇 ॥ 138॥
𑌅𑌖𑌣𑍍𑌡𑌨𑌿𑌤𑍍𑌯𑌾𑌦𑍍𑌵𑌯𑌬𑍋𑌧𑌶𑌕𑍍𑌤𑍍𑌯𑌾
𑌸𑍍𑌫𑍁𑌰𑌨𑍍𑌤𑌮𑌾𑌤𑍍𑌮𑌾𑌨𑌮𑌨𑌨𑍍𑌤𑌵𑍈𑌭𑌵𑌮𑍍 ।
𑌸𑌮𑌾𑌵𑍃𑌣𑍋𑌤𑍍𑌯𑌾𑌵𑍃𑌤𑌿𑌶𑌕𑍍𑌤𑌿𑌰𑍇𑌷𑌾
𑌤𑌮𑍋𑌮𑌯𑍀 𑌰𑌾𑌹𑍁𑌰𑌿𑌵𑌾𑌰𑍍𑌕𑌬𑌿𑌮𑍍𑌬𑌮𑍍 ॥ 139॥
𑌤𑌿𑌰𑍋𑌭𑍂𑌤𑍇 𑌸𑍍𑌵𑌾𑌤𑍍𑌮𑌨𑍍𑌯𑌮𑌲𑌤𑌰𑌤𑍇𑌜𑍋𑌵𑌤𑌿 𑌪𑍁𑌮𑌾𑌨𑍍
𑌅𑌨𑌾𑌤𑍍𑌮𑌾𑌨𑌂 𑌮𑍋𑌹𑌾𑌦𑌹𑌮𑌿𑌤𑌿 𑌶𑌰𑍀𑌰𑌂 𑌕𑌲𑌯𑌤𑌿 ।
𑌤𑌤𑌃 𑌕𑌾𑌮𑌕𑍍𑌰𑍋𑌧𑌪𑍍𑌰𑌭𑍃𑌤𑌿𑌭𑌿𑌰𑌮𑍁𑌂 𑌬𑌨𑍍𑌧𑌨𑌗𑍁𑌣𑍈𑌃 (𑌪𑌾𑌠𑌭𑍇𑌦𑌃 - 𑌬𑌨𑍍𑌧𑌕𑌗𑍁𑌣𑍈𑌃)
𑌪𑌰𑌂 𑌵𑌿𑌕𑍍𑌷𑍇𑌪𑌾𑌖𑍍𑌯𑌾 𑌰𑌜𑌸 𑌉𑌰𑍁𑌶𑌕𑍍𑌤𑌿𑌰𑍍𑌵𑍍𑌯𑌥𑌯𑌤𑌿 ॥ 140॥
𑌮𑌹𑌾𑌮𑍋𑌹𑌗𑍍𑌰𑌾𑌹𑌗𑍍𑌰𑌸𑌨𑌗𑌲𑌿𑌤𑌾𑌤𑍍𑌮𑌾𑌵𑌗𑌮𑌨𑍋
𑌧𑌿𑌯𑍋 𑌨𑌾𑌨𑌾𑌵𑌸𑍍𑌥𑌾𑌂 𑌸𑍍𑌵𑌯𑌮𑌭𑌿𑌨𑌯𑌂𑌸𑍍𑌤𑌦𑍍𑌗𑍁𑌣𑌤𑌯𑌾 । (𑌪𑌾𑌠𑌭𑍇𑌦𑌃 - 𑌨𑌾𑌨𑌾𑌵𑌸𑍍𑌥𑌾𑌃)
𑌅𑌪𑌾𑌰𑍇 𑌸𑌂𑌸𑌾𑌰𑍇 𑌵𑌿𑌷𑌯𑌵𑌿𑌷𑌪𑍂𑌰𑍇 𑌜𑌲𑌨𑌿𑌧𑍗
𑌨𑌿𑌮𑌜𑍍𑌯𑍋𑌨𑍍𑌮𑌜𑍍𑌯𑌾𑌯𑌂 𑌭𑍍𑌰𑌮𑌤𑌿 𑌕𑍁𑌮𑌤𑌿𑌃 𑌕𑍁𑌤𑍍𑌸𑌿𑌤𑌗𑌤𑌿𑌃 ॥ 141॥
𑌭𑌾𑌨𑍁𑌪𑍍𑌰𑌭𑌾𑌸𑌞𑍍𑌜𑌨𑌿𑌤𑌾𑌭𑍍𑌰𑌪𑌙𑍍𑌕𑍍𑌤𑌿𑌃
𑌭𑌾𑌨𑍁𑌂 𑌤𑌿𑌰𑍋𑌧𑌾𑌯 𑌵𑌿𑌜𑍃𑌮𑍍𑌭𑌤𑍇 𑌯𑌥𑌾 ।
𑌆𑌤𑍍𑌮𑍋𑌦𑌿𑌤𑌾𑌹𑌙𑍍𑌕𑍃𑌤𑌿𑌰𑌾𑌤𑍍𑌮𑌤𑌤𑍍𑌤𑍍𑌵𑌂
𑌤𑌥𑌾 𑌤𑌿𑌰𑍋𑌧𑌾𑌯 𑌵𑌿𑌜𑍃𑌮𑍍𑌭𑌤𑍇 𑌸𑍍𑌵𑌯𑌮𑍍 ॥ 142॥
𑌕𑌵𑌲𑌿𑌤𑌦𑌿𑌨𑌨𑌾𑌥𑍇 𑌦𑍁𑌰𑍍𑌦𑌿𑌨𑍇 𑌸𑌾𑌨𑍍𑌦𑍍𑌰𑌮𑍇𑌘𑍈𑌃
𑌵𑍍𑌯𑌥𑌯𑌤𑌿 𑌹𑌿𑌮𑌝𑌞𑍍𑌝𑌾𑌵𑌾𑌯𑍁𑌰𑍁𑌗𑍍𑌰𑍋 𑌯𑌥𑍈𑌤𑌾𑌨𑍍 ।
𑌅𑌵𑌿𑌰𑌤𑌤𑌮𑌸𑌾𑌽𑌽𑌤𑍍𑌮𑌨𑍍𑌯𑌾𑌵𑍃𑌤𑍇 𑌮𑍂𑌢𑌬𑍁𑌦𑍍𑌧𑌿𑌂
𑌕𑍍𑌷𑌪𑌯𑌤𑌿 𑌬𑌹𑍁𑌦𑍁𑌃𑌖𑍈𑌸𑍍𑌤𑍀𑌵𑍍𑌰𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 ॥ 143॥
𑌏𑌤𑌾𑌭𑍍𑌯𑌾𑌮𑍇𑌵 𑌶𑌕𑍍𑌤𑌿𑌭𑍍𑌯𑌾𑌂 𑌬𑌨𑍍𑌧𑌃 𑌪𑍁𑌂𑌸𑌃 𑌸𑌮𑌾𑌗𑌤𑌃 ।
𑌯𑌾𑌭𑍍𑌯𑌾𑌂 𑌵𑌿𑌮𑍋𑌹𑌿𑌤𑍋 𑌦𑍇𑌹𑌂 𑌮𑌤𑍍𑌵𑌾𑌽𑌽𑌤𑍍𑌮𑌾𑌨𑌂 𑌭𑍍𑌰𑌮𑌤𑍍𑌯𑌯𑌮𑍍 ॥ 144॥
𑌬𑍀𑌜𑌂 𑌸𑌂𑌸𑍃𑌤𑌿𑌭𑍂𑌮𑌿𑌜𑌸𑍍𑌯 𑌤𑍁 𑌤𑌮𑍋 𑌦𑍇𑌹𑌾𑌤𑍍𑌮𑌧𑍀𑌰𑌙𑍍𑌕𑍁𑌰𑍋
𑌰𑌾𑌗𑌃 𑌪𑌲𑍍𑌲𑌵𑌮𑌮𑍍𑌬𑍁 𑌕𑌰𑍍𑌮 𑌤𑍁 𑌵𑌪𑍁𑌃 𑌸𑍍𑌕𑌨𑍍𑌧𑍋𑌽𑌸𑌵𑌃 𑌶𑌾𑌖𑌿𑌕𑌾𑌃 ।
𑌅𑌗𑍍𑌰𑌾𑌣𑍀𑌨𑍍𑌦𑍍𑌰𑌿𑌯𑌸𑌂𑌹𑌤𑌿𑌶𑍍𑌚 𑌵𑌿𑌷𑌯𑌾𑌃 𑌪𑍁𑌷𑍍𑌪𑌾𑌣𑌿 𑌦𑍁𑌃𑌖𑌂 𑌫𑌲𑌂
𑌨𑌾𑌨𑌾𑌕𑌰𑍍𑌮𑌸𑌮𑍁𑌦𑍍𑌭𑌵𑌂 𑌬𑌹𑍁𑌵𑌿𑌧𑌂 𑌭𑍋𑌕𑍍𑌤𑌾𑌤𑍍𑌰 𑌜𑍀𑌵𑌃 𑌖𑌗𑌃 ॥ 145॥
𑌅𑌜𑍍𑌞𑌾𑌨𑌮𑍂𑌲𑍋𑌽𑌯𑌮𑌨𑌾𑌤𑍍𑌮𑌬𑌨𑍍𑌧𑍋
𑌨𑍈𑌸𑌰𑍍𑌗𑌿𑌕𑍋𑌽𑌨𑌾𑌦𑌿𑌰𑌨𑌨𑍍𑌤 𑌈𑌰𑌿𑌤𑌃 ।
𑌜𑌨𑍍𑌮𑌾𑌪𑍍𑌯𑌯𑌵𑍍𑌯𑌾𑌧𑌿𑌜𑌰𑌾𑌦𑌿𑌦𑍁𑌃𑌖-
𑌪𑍍𑌰𑌵𑌾𑌹𑌪𑌾𑌤𑌂 𑌜𑌨𑌯𑌤𑍍𑌯𑌮𑍁𑌷𑍍𑌯 ॥ 146॥
𑌨𑌾𑌸𑍍𑌤𑍍𑌰𑍈𑌰𑍍𑌨 𑌶𑌸𑍍𑌤𑍍𑌰𑍈𑌰𑌨𑌿𑌲𑍇𑌨 𑌵𑌹𑍍𑌨𑌿𑌨𑌾
𑌛𑍇𑌤𑍍𑌤𑍁𑌂 𑌨 𑌶𑌕𑍍𑌯𑍋 𑌨 𑌚 𑌕𑌰𑍍𑌮𑌕𑍋𑌟𑌿𑌭𑌿𑌃 ।
𑌵𑌿𑌵𑍇𑌕𑌵𑌿𑌜𑍍𑌞𑌾𑌨𑌮𑌹𑌾𑌸𑌿𑌨𑌾 𑌵𑌿𑌨𑌾
𑌧𑌾𑌤𑍁𑌃 𑌪𑍍𑌰𑌸𑌾𑌦𑍇𑌨 𑌶𑌿𑌤𑍇𑌨 𑌮𑌞𑍍𑌜𑍁𑌨𑌾 ॥ 147॥
𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑍈𑌕𑌮𑌤𑍇𑌃 𑌸𑍍𑌵𑌧𑌰𑍍𑌮
𑌨𑌿𑌷𑍍𑌠𑌾 𑌤𑌯𑍈𑌵𑌾𑌤𑍍𑌮𑌵𑌿𑌶𑍁𑌦𑍍𑌧𑌿𑌰𑌸𑍍𑌯 ।
𑌵𑌿𑌶𑍁𑌦𑍍𑌧𑌬𑍁𑌦𑍍𑌧𑍇𑌃 𑌪𑌰𑌮𑌾𑌤𑍍𑌮𑌵𑍇𑌦𑌨𑌂
𑌤𑍇𑌨𑍈𑌵 𑌸𑌂𑌸𑌾𑌰𑌸𑌮𑍂𑌲𑌨𑌾𑌶𑌃 ॥ 148॥
𑌕𑍋𑌶𑍈𑌰𑌨𑍍𑌨𑌮𑌯𑌾𑌦𑍍𑌯𑍈𑌃 𑌪𑌞𑍍𑌚𑌭𑌿𑌰𑌾𑌤𑍍𑌮𑌾 𑌨 𑌸𑌂𑌵𑍃𑌤𑍋 𑌭𑌾𑌤𑌿 ।
𑌨𑌿𑌜𑌶𑌕𑍍𑌤𑌿𑌸𑌮𑍁𑌤𑍍𑌪𑌨𑍍𑌨𑍈𑌃 𑌶𑍈𑌵𑌾𑌲𑌪𑌟𑌲𑍈𑌰𑌿𑌵𑌾𑌮𑍍𑌬𑍁 𑌵𑌾𑌪𑍀𑌸𑍍𑌥𑌮𑍍 ॥ 149॥
𑌤𑌚𑍍𑌛𑍈𑌵𑌾𑌲𑌾𑌪𑌨𑌯𑍇 𑌸𑌮𑍍𑌯𑌕𑍍 𑌸𑌲𑌿𑌲𑌂 𑌪𑍍𑌰𑌤𑍀𑌯𑌤𑍇 𑌶𑍁𑌦𑍍𑌧𑌮𑍍 ।
𑌤𑍃𑌷𑍍𑌣𑌾𑌸𑌨𑍍𑌤𑌾𑌪𑌹𑌰𑌂 𑌸𑌦𑍍𑌯𑌃 𑌸𑍗𑌖𑍍𑌯𑌪𑍍𑌰𑌦𑌂 𑌪𑌰𑌂 𑌪𑍁𑌂𑌸𑌃 ॥ 150॥
𑌪𑌞𑍍𑌚𑌾𑌨𑌾𑌮𑌪𑌿 𑌕𑍋𑌶𑌾𑌨𑌾𑌮𑌪𑌵𑌾𑌦𑍇 𑌵𑌿𑌭𑌾𑌤𑍍𑌯𑌯𑌂 𑌶𑍁𑌦𑍍𑌧𑌃 ।
𑌨𑌿𑌤𑍍𑌯𑌾𑌨𑌨𑍍𑌦𑍈𑌕𑌰𑌸𑌃 𑌪𑍍𑌰𑌤𑍍𑌯𑌗𑍍𑌰𑍂𑌪𑌃 𑌪𑌰𑌃 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌃 ॥ 151॥
𑌆𑌤𑍍𑌮𑌾𑌨𑌾𑌤𑍍𑌮𑌵𑌿𑌵𑍇𑌕𑌃 𑌕𑌰𑍍𑌤𑌵𑍍𑌯𑍋 𑌬𑌨𑍍𑌧𑌮𑍁𑌕𑍍𑌤𑌯𑍇 𑌵𑌿𑌦𑍁𑌷𑌾 ।
𑌤𑍇𑌨𑍈𑌵𑌾𑌨𑌨𑍍𑌦𑍀 𑌭𑌵𑌤𑌿 𑌸𑍍𑌵𑌂 𑌵𑌿𑌜𑍍𑌞𑌾𑌯 𑌸𑌚𑍍𑌚𑌿𑌦𑌾𑌨𑌨𑍍𑌦𑌮𑍍 ॥ 152॥
𑌮𑍁𑌞𑍍𑌜𑌾𑌦𑌿𑌷𑍀𑌕𑌾𑌮𑌿𑌵 𑌦𑍃𑌶𑍍𑌯𑌵𑌰𑍍𑌗𑌾𑌤𑍍
𑌪𑍍𑌰𑌤𑍍𑌯𑌞𑍍𑌚𑌮𑌾𑌤𑍍𑌮𑌾𑌨𑌮𑌸𑌙𑍍𑌗𑌮𑌕𑍍𑌰𑌿𑌯𑌮𑍍 ।
𑌵𑌿𑌵𑌿𑌚𑍍𑌯 𑌤𑌤𑍍𑌰 𑌪𑍍𑌰𑌵𑌿𑌲𑌾𑌪𑍍𑌯 𑌸𑌰𑍍𑌵𑌂
𑌤𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌯𑌃 𑌸 𑌮𑍁𑌕𑍍𑌤𑌃 ॥ 153॥
𑌦𑍇𑌹𑍋𑌽𑌯𑌮𑌨𑍍𑌨𑌭𑌵𑌨𑍋𑌽𑌨𑍍𑌨𑌮𑌯𑌸𑍍𑌤𑍁 𑌕𑍋𑌶- (𑌪𑌾𑌠𑌭𑍇𑌦𑌃 - 𑌕𑍋𑌶𑍋)
𑌶𑍍𑌚𑌾𑌨𑍍𑌨𑍇𑌨 𑌜𑍀𑌵𑌤𑌿 𑌵𑌿𑌨𑌶𑍍𑌯𑌤𑌿 𑌤𑌦𑍍𑌵𑌿𑌹𑍀𑌨𑌃 । (𑌪𑌾𑌠𑌭𑍇𑌦𑌃 - 𑌹𑍍𑌯𑌨𑍍𑌨𑍇𑌨)
𑌤𑍍𑌵𑌕𑍍𑌚𑌰𑍍𑌮𑌮𑌾𑌂𑌸𑌰𑍁𑌧𑌿𑌰𑌾𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑌿-
𑌰𑍍𑌨𑌾𑌯𑌂 𑌸𑍍𑌵𑌯𑌂 𑌭𑌵𑌿𑌤𑍁𑌮𑌰𑍍𑌹𑌤𑌿 𑌨𑌿𑌤𑍍𑌯𑌶𑍁𑌦𑍍𑌧𑌃 ॥ 154॥
𑌪𑍂𑌰𑍍𑌵𑌂 𑌜𑌨𑍇𑌰𑌧𑌿𑌮𑍃𑌤𑍇𑌰𑌪𑌿 𑌨𑌾𑌯𑌮𑌸𑍍𑌤𑌿 (𑌪𑌾𑌠𑌭𑍇𑌦𑌃 - 𑌜𑌨𑍇𑌰𑌪𑌿𑌮𑍃𑌤𑍇𑌰𑌥)
𑌜𑌾𑌤𑌕𑍍𑌷𑌣𑌃 𑌕𑍍𑌷𑌣𑌗𑍁𑌣𑍋𑌽𑌨𑌿𑌯𑌤𑌸𑍍𑌵𑌭𑌾𑌵𑌃 ।
𑌨𑍈𑌕𑍋 𑌜𑌡𑌶𑍍𑌚 𑌘𑌟𑌵𑌤𑍍𑌪𑌰𑌿𑌦𑍃𑌶𑍍𑌯𑌮𑌾𑌨𑌃
𑌸𑍍𑌵𑌾𑌤𑍍𑌮𑌾 𑌕𑌥𑌂 𑌭𑌵𑌤𑌿 𑌭𑌾𑌵𑌵𑌿𑌕𑌾𑌰𑌵𑍇𑌤𑍍𑌤𑌾 ॥ 155॥
𑌪𑌾𑌣𑌿𑌪𑌾𑌦𑌾𑌦𑌿𑌮𑌾𑌨𑍍𑌦𑍇𑌹𑍋 𑌨𑌾𑌤𑍍𑌮𑌾 𑌵𑍍𑌯𑌙𑍍𑌗𑍇𑌽𑌪𑌿 𑌜𑍀𑌵𑌨𑌾𑌤𑍍 ।
𑌤𑌤𑍍𑌤𑌚𑍍𑌛𑌕𑍍𑌤𑍇𑌰𑌨𑌾𑌶𑌾𑌚𑍍𑌚 𑌨 𑌨𑌿𑌯𑌮𑍍𑌯𑍋 𑌨𑌿𑌯𑌾𑌮𑌕𑌃 ॥ 156॥
𑌦𑍇𑌹𑌤𑌦𑍍𑌧𑌰𑍍𑌮𑌤𑌤𑍍𑌕𑌰𑍍𑌮𑌤𑌦𑌵𑌸𑍍𑌥𑌾𑌦𑌿𑌸𑌾𑌕𑍍𑌷𑌿𑌣𑌃 ।
𑌸𑌤 𑌏𑌵 𑌸𑍍𑌵𑌤𑌃𑌸𑌿𑌦𑍍𑌧𑌂 𑌤𑌦𑍍𑌵𑍈𑌲𑌕𑍍𑌷𑌣𑍍𑌯𑌮𑌾𑌤𑍍𑌮𑌨𑌃 ॥ 157॥
𑌶𑌲𑍍𑌯𑌰𑌾𑌶𑌿𑌰𑍍𑌮𑌾𑌂𑌸𑌲𑌿𑌪𑍍𑌤𑍋 𑌮𑌲𑌪𑍂𑌰𑍍𑌣𑍋𑌽𑌤𑌿𑌕𑌶𑍍𑌮𑌲𑌃 ।
𑌕𑌥𑌂 𑌭𑌵𑍇𑌦𑌯𑌂 𑌵𑍇𑌤𑍍𑌤𑌾 𑌸𑍍𑌵𑌯𑌮𑍇𑌤𑌦𑍍𑌵𑌿𑌲𑌕𑍍𑌷𑌣𑌃 ॥ 158॥
𑌤𑍍𑌵𑌙𑍍𑌮𑌾𑌂𑌸𑌮𑍇𑌦𑍋𑌽𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑌾-
𑌵𑌹𑌮𑍍𑌮𑌤𑌿𑌂 𑌮𑍂𑌢𑌜𑌨𑌃 𑌕𑌰𑍋𑌤𑌿 ।
𑌵𑌿𑌲𑌕𑍍𑌷𑌣𑌂 𑌵𑍇𑌤𑍍𑌤𑌿 𑌵𑌿𑌚𑌾𑌰𑌶𑍀𑌲𑍋
𑌨𑌿𑌜𑌸𑍍𑌵𑌰𑍂𑌪𑌂 𑌪𑌰𑌮𑌾𑌰𑍍𑌥𑌭𑍂𑌤𑌮𑍍 ॥ 159॥
𑌦𑍇𑌹𑍋𑌽𑌹𑌮𑌿𑌤𑍍𑌯𑍇𑌵 𑌜𑌡𑌸𑍍𑌯 𑌬𑍁𑌦𑍍𑌧𑌿𑌃
𑌦𑍇𑌹𑍇 𑌚 𑌜𑍀𑌵𑍇 𑌵𑌿𑌦𑍁𑌷𑌸𑍍𑌤𑍍𑌵𑌹𑌨𑍍𑌧𑍀𑌃 ।
𑌵𑌿𑌵𑍇𑌕𑌵𑌿𑌜𑍍𑌞𑌾𑌨𑌵𑌤𑍋 𑌮𑌹𑌾𑌤𑍍𑌮𑌨𑍋
𑌬𑍍𑌰𑌹𑍍𑌮𑌾𑌹𑌮𑌿𑌤𑍍𑌯𑍇𑌵 𑌮𑌤𑌿𑌃 𑌸𑌦𑌾𑌤𑍍𑌮𑌨𑌿 ॥ 160॥
𑌅𑌤𑍍𑌰𑌾𑌤𑍍𑌮𑌬𑍁𑌦𑍍𑌧𑌿𑌂 𑌤𑍍𑌯𑌜 𑌮𑍂𑌢𑌬𑍁𑌦𑍍𑌧𑍇
𑌤𑍍𑌵𑌙𑍍𑌮𑌾𑌂𑌸𑌮𑍇𑌦𑍋𑌽𑌸𑍍𑌥𑌿𑌪𑍁𑌰𑍀𑌷𑌰𑌾𑌶𑍗 ।
𑌸𑌰𑍍𑌵𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌕𑍁𑌰𑍁𑌷𑍍𑌵 𑌶𑌾𑌨𑍍𑌤𑌿𑌂 𑌪𑌰𑌮𑌾𑌂 𑌭𑌜𑌸𑍍𑌵 ॥ 161॥
𑌦𑍇𑌹𑍇𑌨𑍍𑌦𑍍𑌰𑌿𑌯𑌾𑌦𑌾𑌵𑌸𑌤𑌿 𑌭𑍍𑌰𑌮𑍋𑌦𑌿𑌤𑌾𑌂
𑌵𑌿𑌦𑍍𑌵𑌾𑌨𑌹𑌨𑍍𑌤𑌾𑌂 𑌨 𑌜𑌹𑌾𑌤𑌿 𑌯𑌾𑌵𑌤𑍍 ।
𑌤𑌾𑌵𑌨𑍍𑌨 𑌤𑌸𑍍𑌯𑌾𑌸𑍍𑌤𑌿 𑌵𑌿𑌮𑍁𑌕𑍍𑌤𑌿𑌵𑌾𑌰𑍍𑌤𑌾-
𑌪𑍍𑌯𑌸𑍍𑌤𑍍𑌵𑍇𑌷 𑌵𑍇𑌦𑌾𑌨𑍍𑌤𑌨𑌯𑌾𑌨𑍍𑌤𑌦𑌰𑍍𑌶𑍀 ॥ 162॥
𑌛𑌾𑌯𑌾𑌶𑌰𑍀𑌰𑍇 𑌪𑍍𑌰𑌤𑌿𑌬𑌿𑌮𑍍𑌬𑌗𑌾𑌤𑍍𑌰𑍇
𑌯𑌤𑍍𑌸𑍍𑌵𑌪𑍍𑌨𑌦𑍇𑌹𑍇 𑌹𑍃𑌦𑌿 𑌕𑌲𑍍𑌪𑌿𑌤𑌾𑌙𑍍𑌗𑍇 ।
𑌯𑌥𑌾𑌤𑍍𑌮𑌬𑍁𑌦𑍍𑌧𑌿𑌸𑍍𑌤𑌵 𑌨𑌾𑌸𑍍𑌤𑌿 𑌕𑌾𑌚𑌿-
𑌜𑍍𑌜𑍀𑌵𑌚𑍍𑌛𑌰𑍀𑌰𑍇 𑌚 𑌤𑌥𑍈𑌵 𑌮𑌾𑌽𑌸𑍍𑌤𑍁 ॥ 163॥
𑌦𑍇𑌹𑌾𑌤𑍍𑌮𑌧𑍀𑌰𑍇𑌵 𑌨𑍃𑌣𑌾𑌮𑌸𑌦𑍍𑌧𑌿𑌯𑌾𑌂
𑌜𑌨𑍍𑌮𑌾𑌦𑌿𑌦𑍁𑌃𑌖𑌪𑍍𑌰𑌭𑌵𑌸𑍍𑌯 𑌬𑍀𑌜𑌮𑍍 ।
𑌯𑌤𑌸𑍍𑌤𑌤𑌸𑍍𑌤𑍍𑌵𑌂 𑌜𑌹𑌿 𑌤𑌾𑌂 𑌪𑍍𑌰𑌯𑌤𑍍𑌨𑌾𑌤𑍍
𑌤𑍍𑌯𑌕𑍍𑌤𑍇 𑌤𑍁 𑌚𑌿𑌤𑍍𑌤𑍇 𑌨 𑌪𑍁𑌨𑌰𑍍𑌭𑌵𑌾𑌶𑌾 ॥ 164॥
𑌕𑌰𑍍𑌮𑍇𑌨𑍍𑌦𑍍𑌰𑌿𑌯𑍈𑌃 𑌪𑌞𑍍𑌚𑌭𑌿𑌰𑌞𑍍𑌚𑌿𑌤𑍋𑌽𑌯𑌂
𑌪𑍍𑌰𑌾𑌣𑍋 𑌭𑌵𑍇𑌤𑍍𑌪𑍍𑌰𑌾𑌣𑌮𑌯𑌸𑍍𑌤𑍁 𑌕𑍋𑌶𑌃 ॥
𑌯𑍇𑌨𑌾𑌤𑍍𑌮𑌵𑌾𑌨𑌨𑍍𑌨𑌮𑌯𑍋𑌽𑌨𑍁𑌪𑍂𑌰𑍍𑌣𑌃
𑌪𑍍𑌰𑌵𑌰𑍍𑌤𑌤𑍇𑌽𑌸𑍗 𑌸𑌕𑌲𑌕𑍍𑌰𑌿𑌯𑌾𑌸𑍁 ॥ 165॥
𑌨𑍈𑌵𑌾𑌤𑍍𑌮𑌾𑌪𑌿 𑌪𑍍𑌰𑌾𑌣𑌮𑌯𑍋 𑌵𑌾𑌯𑍁𑌵𑌿𑌕𑌾𑌰𑍋 (𑌪𑌾𑌠𑌭𑍇𑌦𑌃 - 𑌨𑍈𑌵𑌾𑌤𑍍𑌮𑌾𑌯𑌂)
𑌗𑌨𑍍𑌤𑌾𑌽𑌽𑌗𑌨𑍍𑌤𑌾 𑌵𑌾𑌯𑍁𑌵𑌦𑌨𑍍𑌤𑌰𑍍𑌬𑌹𑌿𑌰𑍇𑌷𑌃 ।
𑌯𑌸𑍍𑌮𑌾𑌤𑍍𑌕𑌿𑌞𑍍𑌚𑌿𑌤𑍍𑌕𑍍𑌵𑌾𑌪𑌿 𑌨 𑌵𑍇𑌤𑍍𑌤𑍀𑌷𑍍𑌟𑌮𑌨𑌿𑌷𑍍𑌟𑌂
𑌸𑍍𑌵𑌂 𑌵𑌾𑌨𑍍𑌯𑌂 𑌵𑌾 𑌕𑌿𑌞𑍍𑌚𑌨 𑌨𑌿𑌤𑍍𑌯𑌂 𑌪𑌰𑌤𑌨𑍍𑌤𑍍𑌰𑌃 ॥ 166॥
𑌜𑍍𑌞𑌾𑌨𑍇𑌨𑍍𑌦𑍍𑌰𑌿𑌯𑌾𑌣𑌿 𑌚 𑌮𑌨𑌶𑍍𑌚 𑌮𑌨𑍋𑌮𑌯𑌃 𑌸𑍍𑌯𑌾𑌤𑍍
𑌕𑍋𑌶𑍋 𑌮𑌮𑌾𑌹𑌮𑌿𑌤𑌿 𑌵𑌸𑍍𑌤𑍁𑌵𑌿𑌕𑌲𑍍𑌪𑌹𑍇𑌤𑍁𑌃 ।
𑌸𑌞𑍍𑌜𑍍𑌞𑌾𑌦𑌿𑌭𑍇𑌦𑌕𑌲𑌨𑌾𑌕𑌲𑌿𑌤𑍋 𑌬𑌲𑍀𑌯𑌾𑌂-
𑌸𑍍𑌤𑌤𑍍𑌪𑍂𑌰𑍍𑌵𑌕𑍋𑌶𑌮𑌭𑌿𑌪𑍂𑌰𑍍𑌯 𑌵𑌿𑌜𑍃𑌮𑍍𑌭𑌤𑍇 𑌯𑌃 ॥ 167॥ (𑌪𑌾𑌠𑌭𑍇𑌦𑌃 - 𑌅𑌨𑍁𑌪𑍂𑌰𑍍𑌯)
𑌪𑌞𑍍𑌚𑍇𑌨𑍍𑌦𑍍𑌰𑌿𑌯𑍈𑌃 𑌪𑌞𑍍𑌚𑌭𑌿𑌰𑍇𑌵 𑌹𑍋𑌤𑍃𑌭𑌿𑌃
𑌪𑍍𑌰𑌚𑍀𑌯𑌮𑌾𑌨𑍋 𑌵𑌿𑌷𑌯𑌾𑌜𑍍𑌯𑌧𑌾𑌰𑌯𑌾 ।
𑌜𑌾𑌜𑍍𑌵𑌲𑍍𑌯𑌮𑌾𑌨𑍋 𑌬𑌹𑍁𑌵𑌾𑌸𑌨𑍇𑌨𑍍𑌧𑌨𑍈𑌃
𑌮𑌨𑍋𑌮𑌯𑌾𑌗𑍍𑌨𑌿𑌰𑍍𑌦𑌹𑌤𑌿 𑌪𑍍𑌰𑌪𑌞𑍍𑌚𑌮𑍍 ॥ 168॥ (𑌪𑌾𑌠𑌭𑍇𑌦𑌃 - 𑌮𑌨𑍋𑌮𑌯𑍋𑌽𑌗𑍍𑌨𑌿𑌰𑍍𑌦𑌹𑌤𑌿)
𑌨 𑌹𑍍𑌯𑌸𑍍𑌤𑍍𑌯𑌵𑌿𑌦𑍍𑌯𑌾 𑌮𑌨𑌸𑍋𑌽𑌤𑌿𑌰𑌿𑌕𑍍𑌤𑌾
𑌮𑌨𑍋 𑌹𑍍𑌯𑌵𑌿𑌦𑍍𑌯𑌾 𑌭𑌵𑌬𑌨𑍍𑌧𑌹𑍇𑌤𑍁𑌃 ।
𑌤𑌸𑍍𑌮𑌿𑌨𑍍𑌵𑌿𑌨𑌷𑍍𑌟𑍇 𑌸𑌕𑌲𑌂 𑌵𑌿𑌨𑌷𑍍𑌟𑌂
𑌵𑌿𑌜𑍃𑌮𑍍𑌭𑌿𑌤𑍇𑌽𑌸𑍍𑌮𑌿𑌨𑍍𑌸𑌕𑌲𑌂 𑌵𑌿𑌜𑍃𑌮𑍍𑌭𑌤𑍇 ॥ 169॥
𑌸𑍍𑌵𑌪𑍍𑌨𑍇𑌽𑌰𑍍𑌥𑌶𑍂𑌨𑍍𑌯𑍇 𑌸𑍃𑌜𑌤𑌿 𑌸𑍍𑌵𑌶𑌕𑍍𑌤𑍍𑌯𑌾
𑌭𑍋𑌕𑍍𑌤𑍍𑌰𑌾𑌦𑌿𑌵𑌿𑌶𑍍𑌵𑌂 𑌮𑌨 𑌏𑌵 𑌸𑌰𑍍𑌵𑌮𑍍 ।
𑌤𑌥𑍈𑌵 𑌜𑌾𑌗𑍍𑌰𑌤𑍍𑌯𑌪𑌿 𑌨𑍋 𑌵𑌿𑌶𑍇𑌷𑌃
𑌤𑌤𑍍𑌸𑌰𑍍𑌵𑌮𑍇𑌤𑌨𑍍𑌮𑌨𑌸𑍋 𑌵𑌿𑌜𑍃𑌮𑍍𑌭𑌣𑌮𑍍 ॥ 170॥
𑌸𑍁𑌷𑍁𑌪𑍍𑌤𑌿𑌕𑌾𑌲𑍇 𑌮𑌨𑌸𑌿 𑌪𑍍𑌰𑌲𑍀𑌨𑍇
𑌨𑍈𑌵𑌾𑌸𑍍𑌤𑌿 𑌕𑌿𑌞𑍍𑌚𑌿𑌤𑍍𑌸𑌕𑌲𑌪𑍍𑌰𑌸𑌿𑌦𑍍𑌧𑍇𑌃 ।
𑌅𑌤𑍋 𑌮𑌨𑌃𑌕𑌲𑍍𑌪𑌿𑌤 𑌏𑌵 𑌪𑍁𑌂𑌸𑌃
𑌸𑌂𑌸𑌾𑌰 𑌏𑌤𑌸𑍍𑌯 𑌨 𑌵𑌸𑍍𑌤𑍁𑌤𑍋𑌽𑌸𑍍𑌤𑌿 ॥ 171॥
𑌵𑌾𑌯𑍁𑌨𑌾𑌽𑌽𑌨𑍀𑌯𑌤𑍇 𑌮𑍇𑌘𑌃 𑌪𑍁𑌨𑌸𑍍𑌤𑍇𑌨𑍈𑌵 𑌨𑍀𑌯𑌤𑍇 । (𑌪𑌾𑌠𑌭𑍇𑌦𑌃 - 𑌵𑌾𑌯𑍁𑌨𑌾 𑌨𑍀𑌯𑌤𑍇 𑌮𑍇𑌘𑌃 𑌪𑍁𑌨𑌸𑍍𑌤𑍇𑌨𑍈𑌵 𑌲𑍀𑌯𑌤𑍇)
𑌮𑌨𑌸𑌾 𑌕𑌲𑍍𑌪𑍍𑌯𑌤𑍇 𑌬𑌨𑍍𑌧𑍋 𑌮𑍋𑌕𑍍𑌷𑌸𑍍𑌤𑍇𑌨𑍈𑌵 𑌕𑌲𑍍𑌪𑍍𑌯𑌤𑍇 ॥ 172॥
𑌦𑍇𑌹𑌾𑌦𑌿𑌸𑌰𑍍𑌵𑌵𑌿𑌷𑌯𑍇 𑌪𑌰𑌿𑌕𑌲𑍍𑌪𑍍𑌯 𑌰𑌾𑌗𑌂
𑌬𑌧𑍍𑌨𑌾𑌤𑌿 𑌤𑍇𑌨 𑌪𑍁𑌰𑍁𑌷𑌂 𑌪𑌶𑍁𑌵𑌦𑍍𑌗𑍁𑌣𑍇𑌨 ।
𑌵𑍈𑌰𑌸𑍍𑌯𑌮𑌤𑍍𑌰 𑌵𑌿𑌷𑌵𑌤𑍍 𑌸𑍁𑌵𑌿𑌧𑌾𑌯 𑌪𑌶𑍍𑌚𑌾𑌦𑍍
𑌏𑌨𑌂 𑌵𑌿𑌮𑍋𑌚𑌯𑌤𑌿 𑌤𑌨𑍍𑌮𑌨 𑌏𑌵 𑌬𑌨𑍍𑌧𑌾𑌤𑍍 ॥ 173॥
𑌤𑌸𑍍𑌮𑌾𑌨𑍍𑌮𑌨𑌃 𑌕𑌾𑌰𑌣𑌮𑌸𑍍𑌯 𑌜𑌨𑍍𑌤𑍋𑌃
𑌬𑌨𑍍𑌧𑌸𑍍𑌯 𑌮𑍋𑌕𑍍𑌷𑌸𑍍𑌯 𑌚 𑌵𑌾 𑌵𑌿𑌧𑌾𑌨𑍇 ।
𑌬𑌨𑍍𑌧𑌸𑍍𑌯 𑌹𑍇𑌤𑍁𑌰𑍍𑌮𑌲𑌿𑌨𑌂 𑌰𑌜𑍋𑌗𑍁𑌣𑍈𑌃
𑌮𑍋𑌕𑍍𑌷𑌸𑍍𑌯 𑌶𑍁𑌦𑍍𑌧𑌂 𑌵𑌿𑌰𑌜𑌸𑍍𑌤𑌮𑌸𑍍𑌕𑌮𑍍 ॥ 174॥
𑌵𑌿𑌵𑍇𑌕𑌵𑍈𑌰𑌾𑌗𑍍𑌯𑌗𑍁𑌣𑌾𑌤𑌿𑌰𑍇𑌕𑌾-
𑌚𑍍𑌛𑍁𑌦𑍍𑌧𑌤𑍍𑌵𑌮𑌾𑌸𑌾𑌦𑍍𑌯 𑌮𑌨𑍋 𑌵𑌿𑌮𑍁𑌕𑍍𑌤𑍍𑌯𑍈 ।
𑌭𑌵𑌤𑍍𑌯𑌤𑍋 𑌬𑍁𑌦𑍍𑌧𑌿𑌮𑌤𑍋 𑌮𑍁𑌮𑍁𑌕𑍍𑌷𑍋-
𑌸𑍍𑌤𑌾𑌭𑍍𑌯𑌾𑌂 𑌦𑍃𑌢𑌾𑌭𑍍𑌯𑌾𑌂 𑌭𑌵𑌿𑌤𑌵𑍍𑌯𑌮𑌗𑍍𑌰𑍇 ॥ 175॥
𑌮𑌨𑍋 𑌨𑌾𑌮 𑌮𑌹𑌾𑌵𑍍𑌯𑌾𑌘𑍍𑌰𑍋 𑌵𑌿𑌷𑌯𑌾𑌰𑌣𑍍𑌯𑌭𑍂𑌮𑌿𑌷𑍁 ।
𑌚𑌰𑌤𑍍𑌯𑌤𑍍𑌰 𑌨 𑌗𑌚𑍍𑌛𑌨𑍍𑌤𑍁 𑌸𑌾𑌧𑌵𑍋 𑌯𑍇 𑌮𑍁𑌮𑍁𑌕𑍍𑌷𑌵𑌃 ॥ 176॥
𑌮𑌨𑌃 𑌪𑍍𑌰𑌸𑍂𑌤𑍇 𑌵𑌿𑌷𑌯𑌾𑌨𑌶𑍇𑌷𑌾𑌨𑍍
𑌸𑍍𑌥𑍂𑌲𑌾𑌤𑍍𑌮𑌨𑌾 𑌸𑍂𑌕𑍍𑌷𑍍𑌮𑌤𑌯𑌾 𑌚 𑌭𑍋𑌕𑍍𑌤𑍁𑌃 ।
𑌶𑌰𑍀𑌰𑌵𑌰𑍍𑌣𑌾𑌶𑍍𑌰𑌮𑌜𑌾𑌤𑌿𑌭𑍇𑌦𑌾𑌨𑍍
𑌗𑍁𑌣𑌕𑍍𑌰𑌿𑌯𑌾𑌹𑍇𑌤𑍁𑌫𑌲𑌾𑌨𑌿 𑌨𑌿𑌤𑍍𑌯𑌮𑍍 ॥ 177॥
𑌅𑌸𑌙𑍍𑌗𑌚𑌿𑌦𑍍𑌰𑍂𑌪𑌮𑌮𑍁𑌂 𑌵𑌿𑌮𑍋𑌹𑍍𑌯
𑌦𑍇𑌹𑍇𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌗𑍁𑌣𑍈𑌰𑍍𑌨𑌿𑌬𑌦𑍍𑌧𑍍𑌯 ।
𑌅𑌹𑌮𑍍𑌮𑌮𑍇𑌤𑌿 𑌭𑍍𑌰𑌮𑌯𑌤𑍍𑌯𑌜𑌸𑍍𑌰𑌂
𑌮𑌨𑌃 𑌸𑍍𑌵𑌕𑍃𑌤𑍍𑌯𑍇𑌷𑍁 𑌫𑌲𑍋𑌪𑌭𑍁𑌕𑍍𑌤𑌿𑌷𑍁 ॥ 178॥
𑌅𑌧𑍍𑌯𑌾𑌸𑌦𑍋𑌷𑌾𑌤𑍍𑌪𑍁𑌰𑍁𑌷𑌸𑍍𑌯 𑌸𑌂𑌸𑍃𑌤𑌿𑌃 (𑌪𑌾𑌠𑌭𑍇𑌦𑌃 - 𑌅𑌧𑍍𑌯𑌾𑌸𑌯𑍋𑌗𑌾𑌤𑍍)
𑌅𑌧𑍍𑌯𑌾𑌸𑌬𑌨𑍍𑌧𑌸𑍍𑌤𑍍𑌵𑌮𑍁𑌨𑍈𑌵 𑌕𑌲𑍍𑌪𑌿𑌤𑌃 ।
𑌰𑌜𑌸𑍍𑌤𑌮𑍋𑌦𑍋𑌷𑌵𑌤𑍋𑌽𑌵𑌿𑌵𑍇𑌕𑌿𑌨𑍋
𑌜𑌨𑍍𑌮𑌾𑌦𑌿𑌦𑍁𑌃𑌖𑌸𑍍𑌯 𑌨𑌿𑌦𑌾𑌨𑌮𑍇𑌤𑌤𑍍 ॥ 179॥
𑌅𑌤𑌃 𑌪𑍍𑌰𑌾𑌹𑍁𑌰𑍍𑌮𑌨𑍋𑌽𑌵𑌿𑌦𑍍𑌯𑌾𑌂 𑌪𑌣𑍍𑌡𑌿𑌤𑌾𑌸𑍍𑌤𑌤𑍍𑌤𑍍𑌵𑌦𑌰𑍍𑌶𑌿𑌨𑌃 ।
𑌯𑍇𑌨𑍈𑌵 𑌭𑍍𑌰𑌾𑌮𑍍𑌯𑌤𑍇 𑌵𑌿𑌶𑍍𑌵𑌂 𑌵𑌾𑌯𑍁𑌨𑍇𑌵𑌾𑌭𑍍𑌰𑌮𑌣𑍍𑌡𑌲𑌮𑍍 ॥ 180॥
𑌤𑌨𑍍𑌮𑌨𑌃𑌶𑍋𑌧𑌨𑌂 𑌕𑌾𑌰𑍍𑌯𑌂 𑌪𑍍𑌰𑌯𑌤𑍍𑌨𑍇𑌨 𑌮𑍁𑌮𑍁𑌕𑍍𑌷𑍁𑌣𑌾 ।
𑌵𑌿𑌶𑍁𑌦𑍍𑌧𑍇 𑌸𑌤𑌿 𑌚𑍈𑌤𑌸𑍍𑌮𑌿𑌨𑍍𑌮𑍁𑌕𑍍𑌤𑌿𑌃 𑌕𑌰𑌫𑌲𑌾𑌯𑌤𑍇 ॥ 181॥
𑌮𑍋𑌕𑍍𑌷𑍈𑌕𑌸𑌕𑍍𑌤𑍍𑌯𑌾 𑌵𑌿𑌷𑌯𑍇𑌷𑍁 𑌰𑌾𑌗𑌂
𑌨𑌿𑌰𑍍𑌮𑍂𑌲𑍍𑌯 𑌸𑌨𑍍𑌨𑍍𑌯𑌸𑍍𑌯 𑌚 𑌸𑌰𑍍𑌵𑌕𑌰𑍍𑌮 ।
𑌸𑌚𑍍𑌛𑍍𑌰𑌦𑍍𑌧𑌯𑌾 𑌯𑌃 𑌶𑍍𑌰𑌵𑌣𑌾𑌦𑌿𑌨𑌿𑌷𑍍𑌠𑍋
𑌰𑌜𑌃𑌸𑍍𑌵𑌭𑌾𑌵𑌂 𑌸 𑌧𑍁𑌨𑍋𑌤𑌿 𑌬𑍁𑌦𑍍𑌧𑍇𑌃 ॥ 182॥
𑌮𑌨𑍋𑌮𑌯𑍋 𑌨𑌾𑌪𑌿 𑌭𑌵𑍇𑌤𑍍𑌪𑌰𑌾𑌤𑍍𑌮𑌾
𑌹𑍍𑌯𑌾𑌦𑍍𑌯𑌨𑍍𑌤𑌵𑌤𑍍𑌤𑍍𑌵𑌾𑌤𑍍𑌪𑌰𑌿𑌣𑌾𑌮𑌿𑌭𑌾𑌵𑌾𑌤𑍍 ।
𑌦𑍁𑌃𑌖𑌾𑌤𑍍𑌮𑌕𑌤𑍍𑌵𑌾𑌦𑍍𑌵𑌿𑌷𑌯𑌤𑍍𑌵𑌹𑍇𑌤𑍋𑌃
𑌦𑍍𑌰𑌷𑍍𑌟𑌾 𑌹𑌿 𑌦𑍃𑌶𑍍𑌯𑌾𑌤𑍍𑌮𑌤𑌯𑌾 𑌨 𑌦𑍃𑌷𑍍𑌟𑌃 ॥ 183॥
𑌬𑍁𑌦𑍍𑌧𑌿𑌰𑍍𑌬𑍁𑌦𑍍𑌧𑍀𑌨𑍍𑌦𑍍𑌰𑌿𑌯𑍈𑌃 𑌸𑌾𑌰𑍍𑌧𑌂 𑌸𑌵𑍃𑌤𑍍𑌤𑌿𑌃 𑌕𑌰𑍍𑌤𑍃𑌲𑌕𑍍𑌷𑌣𑌃 ।
𑌵𑌿𑌜𑍍𑌞𑌾𑌨𑌮𑌯𑌕𑍋𑌶𑌃 𑌸𑍍𑌯𑌾𑌤𑍍𑌪𑍁𑌂𑌸𑌃 𑌸𑌂𑌸𑌾𑌰𑌕𑌾𑌰𑌣𑌮𑍍 ॥ 184॥
𑌅𑌨𑍁𑌵𑍍𑌰𑌜𑌚𑍍𑌚𑌿𑌤𑍍𑌪𑍍𑌰𑌤𑌿𑌬𑌿𑌮𑍍𑌬𑌶𑌕𑍍𑌤𑌿𑌃
𑌵𑌿𑌜𑍍𑌞𑌾𑌨𑌸𑌞𑍍𑌜𑍍𑌞𑌃 𑌪𑍍𑌰𑌕𑍃𑌤𑍇𑌰𑍍𑌵𑌿𑌕𑌾𑌰𑌃 ।
𑌜𑍍𑌞𑌾𑌨𑌕𑍍𑌰𑌿𑌯𑌾𑌵𑌾𑌨𑌹𑌮𑌿𑌤𑍍𑌯𑌜𑌸𑍍𑌰𑌂
𑌦𑍇𑌹𑍇𑌨𑍍𑌦𑍍𑌰𑌿𑌯𑌾𑌦𑌿𑌷𑍍𑌵𑌭𑌿𑌮𑌨𑍍𑌯𑌤𑍇 𑌭𑍃𑌶𑌮𑍍 ॥ 185॥
𑌅𑌨𑌾𑌦𑌿𑌕𑌾𑌲𑍋𑌽𑌯𑌮𑌹𑌂𑌸𑍍𑌵𑌭𑌾𑌵𑍋
𑌜𑍀𑌵𑌃 𑌸𑌮𑌸𑍍𑌤𑌵𑍍𑌯𑌵𑌹𑌾𑌰𑌵𑍋𑌢𑌾 ।
𑌕𑌰𑍋𑌤𑌿 𑌕𑌰𑍍𑌮𑌾𑌣𑍍𑌯𑌪𑌿 𑌪𑍂𑌰𑍍𑌵𑌵𑌾𑌸𑌨𑌃 (𑌪𑌾𑌠𑌭𑍇𑌦𑌃 - 𑌕𑌰𑍍𑌮𑌾𑌣𑍍𑌯𑌨𑍁)
𑌪𑍁𑌣𑍍𑌯𑌾𑌨𑍍𑌯𑌪𑍁𑌣𑍍𑌯𑌾𑌨𑌿 𑌚 𑌤𑌤𑍍𑌫𑌲𑌾𑌨𑌿 ॥ 186॥
𑌭𑍁𑌙𑍍𑌕𑍍𑌤𑍇 𑌵𑌿𑌚𑌿𑌤𑍍𑌰𑌾𑌸𑍍𑌵𑌪𑌿 𑌯𑍋𑌨𑌿𑌷𑍁 𑌵𑍍𑌰𑌜-
𑌨𑍍𑌨𑌾𑌯𑌾𑌤𑌿 𑌨𑌿𑌰𑍍𑌯𑌾𑌤𑍍𑌯𑌧 𑌊𑌰𑍍𑌧𑍍𑌵𑌮𑍇𑌷𑌃 ।
𑌅𑌸𑍍𑌯𑍈𑌵 𑌵𑌿𑌜𑍍𑌞𑌾𑌨𑌮𑌯𑌸𑍍𑌯 𑌜𑌾𑌗𑍍𑌰𑌤𑍍-
𑌸𑍍𑌵𑌪𑍍𑌨𑌾𑌦𑍍𑌯𑌵𑌸𑍍𑌥𑌾𑌃 𑌸𑍁𑌖𑌦𑍁𑌃𑌖𑌭𑍋𑌗𑌃 ॥ 187॥
𑌦𑍇𑌹𑌾𑌦𑌿𑌨𑌿𑌷𑍍𑌠𑌾𑌶𑍍𑌰𑌮𑌧𑌰𑍍𑌮𑌕𑌰𑍍𑌮-
𑌗𑍁𑌣𑌾𑌭𑌿𑌮𑌾𑌨𑌃 𑌸𑌤𑌤𑌂 𑌮𑌮𑍇𑌤𑌿 ।
𑌵𑌿𑌜𑍍𑌞𑌾𑌨𑌕𑍋𑌶𑍋𑌽𑌯𑌮𑌤𑌿𑌪𑍍𑌰𑌕𑌾𑌶𑌃
𑌪𑍍𑌰𑌕𑍃𑌷𑍍𑌟𑌸𑌾𑌨𑍍𑌨𑌿𑌧𑍍𑌯𑌵𑌶𑌾𑌤𑍍𑌪𑌰𑌾𑌤𑍍𑌮𑌨𑌃 ।
𑌅𑌤𑍋 𑌭𑌵𑌤𑍍𑌯𑍇𑌷 𑌉𑌪𑌾𑌧𑌿𑌰𑌸𑍍𑌯
𑌯𑌦𑌾𑌤𑍍𑌮𑌧𑍀𑌃 𑌸𑌂𑌸𑌰𑌤𑌿 𑌭𑍍𑌰𑌮𑍇𑌣 ॥ 188॥
𑌯𑍋𑌽𑌯𑌂 𑌵𑌿𑌜𑍍𑌞𑌾𑌨𑌮𑌯𑌃 𑌪𑍍𑌰𑌾𑌣𑍇𑌷𑍁 𑌹𑍃𑌦𑌿 𑌸𑍍𑌫𑍁𑌰𑌤𑍍𑌯𑌯𑌂 𑌜𑍍𑌯𑍋𑌤𑌿𑌃 । (𑌪𑌾𑌠𑌭𑍇𑌦𑌃 - 𑌸𑍍𑌫𑍁𑌰𑌤𑍍𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌃)
𑌕𑍂𑌟𑌸𑍍𑌥𑌃 𑌸𑌨𑍍𑌨𑌾𑌤𑍍𑌮𑌾 𑌕𑌰𑍍𑌤𑌾 𑌭𑍋𑌕𑍍𑌤𑌾 𑌭𑌵𑌤𑍍𑌯𑍁𑌪𑌾𑌧𑌿𑌸𑍍𑌥𑌃 ॥ 189॥
𑌸𑍍𑌵𑌯𑌂 𑌪𑌰𑌿𑌚𑍍𑌛𑍇𑌦𑌮𑍁𑌪𑍇𑌤𑍍𑌯 𑌬𑍁𑌦𑍍𑌧𑍇𑌃
𑌤𑌾𑌦𑌾𑌤𑍍𑌮𑍍𑌯𑌦𑍋𑌷𑍇𑌣 𑌪𑌰𑌂 𑌮𑍃𑌷𑌾𑌤𑍍𑌮𑌨𑌃 ।
𑌸𑌰𑍍𑌵𑌾𑌤𑍍𑌮𑌕𑌃 𑌸𑌨𑍍𑌨𑌪𑌿 𑌵𑍀𑌕𑍍𑌷𑌤𑍇 𑌸𑍍𑌵𑌯𑌂
𑌸𑍍𑌵𑌤𑌃 𑌪𑍃𑌥𑌕𑍍𑌤𑍍𑌵𑍇𑌨 𑌮𑍃𑌦𑍋 𑌘𑌟𑌾𑌨𑌿𑌵 ॥ 190॥
𑌉𑌪𑌾𑌧𑌿𑌸𑌮𑍍𑌬𑌨𑍍𑌧𑌵𑌶𑌾𑌤𑍍𑌪𑌰𑌾𑌤𑍍𑌮𑌾
𑌹𑍍𑌯𑍁𑌪𑌾𑌧𑌿𑌧𑌰𑍍𑌮𑌾𑌨𑌨𑍁𑌭𑌾𑌤𑌿 𑌤𑌦𑍍𑌗𑍁𑌣𑌃 । (𑌪𑌾𑌠𑌭𑍇𑌦𑌃 - 𑌽𑌪𑍍𑌯𑍁𑌪𑌾𑌧𑌿)
𑌅𑌯𑍋𑌵𑌿𑌕𑌾𑌰𑌾𑌨𑌵𑌿𑌕𑌾𑌰𑌿𑌵𑌹𑍍𑌨𑌿𑌵𑌤𑍍
𑌸𑌦𑍈𑌕𑌰𑍂𑌪𑍋𑌽𑌪𑌿 𑌪𑌰𑌃 𑌸𑍍𑌵𑌭𑌾𑌵𑌾𑌤𑍍 ॥ 191॥
𑌶𑌿𑌷𑍍𑌯 𑌉𑌵𑌾𑌚 ।
𑌭𑍍𑌰𑌮𑍇𑌣𑌾𑌪𑍍𑌯𑌨𑍍𑌯𑌥𑌾 𑌵𑌾𑌽𑌸𑍍𑌤𑍁 𑌜𑍀𑌵𑌭𑌾𑌵𑌃 𑌪𑌰𑌾𑌤𑍍𑌮𑌨𑌃 ।
𑌤𑌦𑍁𑌪𑌾𑌧𑍇𑌰𑌨𑌾𑌦𑌿𑌤𑍍𑌵𑌾𑌨𑍍𑌨𑌾𑌨𑌾𑌦𑍇𑌰𑍍𑌨𑌾𑌶 𑌇𑌷𑍍𑌯𑌤𑍇 ॥ 192॥
𑌅𑌤𑍋𑌽𑌸𑍍𑌯 𑌜𑍀𑌵𑌭𑌾𑌵𑍋𑌽𑌪𑌿 𑌨𑌿𑌤𑍍𑌯𑌾 𑌭𑌵𑌤𑌿 𑌸𑌂𑌸𑍃𑌤𑌿𑌃 ।
𑌨 𑌨𑌿𑌵𑌰𑍍𑌤𑍇𑌤 𑌤𑌨𑍍𑌮𑍋𑌕𑍍𑌷𑌃 𑌕𑌥𑌂 𑌮𑍇 𑌶𑍍𑌰𑍀𑌗𑍁𑌰𑍋 𑌵𑌦 ॥ 193॥
𑌶𑍍𑌰𑍀𑌗𑍁𑌰𑍁𑌰𑍁𑌵𑌾𑌚 ।
𑌸𑌮𑍍𑌯𑌕𑍍𑌪𑍃𑌷𑍍𑌟𑌂 𑌤𑍍𑌵𑌯𑌾 𑌵𑌿𑌦𑍍𑌵𑌨𑍍𑌸𑌾𑌵𑌧𑌾𑌨𑍇𑌨 𑌤𑌚𑍍𑌛𑍃𑌣𑍁 ।
𑌪𑍍𑌰𑌾𑌮𑌾𑌣𑌿𑌕𑍀 𑌨 𑌭𑌵𑌤𑌿 𑌭𑍍𑌰𑌾𑌨𑍍𑌤𑍍𑌯𑌾 𑌮𑍋𑌹𑌿𑌤𑌕𑌲𑍍𑌪𑌨𑌾 ॥ 194॥
𑌭𑍍𑌰𑌾𑌨𑍍𑌤𑌿𑌂 𑌵𑌿𑌨𑌾 𑌤𑍍𑌵𑌸𑌙𑍍𑌗𑌸𑍍𑌯 𑌨𑌿𑌷𑍍𑌕𑍍𑌰𑌿𑌯𑌸𑍍𑌯 𑌨𑌿𑌰𑌾𑌕𑍃𑌤𑍇𑌃 ।
𑌨 𑌘𑌟𑍇𑌤𑌾𑌰𑍍𑌥𑌸𑌮𑍍𑌬𑌨𑍍𑌧𑍋 𑌨𑌭𑌸𑍋 𑌨𑍀𑌲𑌤𑌾𑌦𑌿𑌵𑌤𑍍 ॥ 195॥
𑌸𑍍𑌵𑌸𑍍𑌯 𑌦𑍍𑌰𑌷𑍍𑌟𑍁𑌰𑍍𑌨𑌿𑌰𑍍𑌗𑍁𑌣𑌸𑍍𑌯𑌾𑌕𑍍𑌰𑌿𑌯𑌸𑍍𑌯
𑌪𑍍𑌰𑌤𑍍𑌯𑌗𑍍𑌬𑍋𑌧𑌾𑌨𑌨𑍍𑌦𑌰𑍂𑌪𑌸𑍍𑌯 𑌬𑍁𑌦𑍍𑌧𑍇𑌃 ।
𑌭𑍍𑌰𑌾𑌨𑍍𑌤𑍍𑌯𑌾 𑌪𑍍𑌰𑌾𑌪𑍍𑌤𑍋 𑌜𑍀𑌵𑌭𑌾𑌵𑍋 𑌨 𑌸𑌤𑍍𑌯𑍋
𑌮𑍋𑌹𑌾𑌪𑌾𑌯𑍇 𑌨𑌾𑌸𑍍𑌤𑍍𑌯𑌵𑌸𑍍𑌤𑍁𑌸𑍍𑌵𑌭𑌾𑌵𑌾𑌤𑍍 ॥ 196॥
𑌯𑌾𑌵𑌦𑍍𑌭𑍍𑌰𑌾𑌨𑍍𑌤𑌿𑌸𑍍𑌤𑌾𑌵𑌦𑍇𑌵𑌾𑌸𑍍𑌯 𑌸𑌤𑍍𑌤𑌾
𑌮𑌿𑌥𑍍𑌯𑌾𑌜𑍍𑌞𑌾𑌨𑍋𑌜𑍍𑌜𑍃𑌮𑍍𑌭𑌿𑌤𑌸𑍍𑌯 𑌪𑍍𑌰𑌮𑌾𑌦𑌾𑌤𑍍 ।
𑌰𑌜𑍍𑌜𑍍𑌵𑌾𑌂 𑌸𑌰𑍍𑌪𑍋 𑌭𑍍𑌰𑌾𑌨𑍍𑌤𑌿𑌕𑌾𑌲𑍀𑌨 𑌏𑌵
𑌭𑍍𑌰𑌾𑌨𑍍𑌤𑍇𑌰𑍍𑌨𑌾𑌶𑍇 𑌨𑍈𑌵 𑌸𑌰𑍍𑌪𑍋𑌽𑌪𑌿 𑌤𑌦𑍍𑌵𑌤𑍍 ॥ 197॥ (𑌪𑌾𑌠𑌭𑍇𑌦𑌃 - 𑌸𑌰𑍍𑌪𑍋𑌽𑌸𑍍𑌤𑌿)
𑌅𑌨𑌾𑌦𑌿𑌤𑍍𑌵𑌮𑌵𑌿𑌦𑍍𑌯𑌾𑌯𑌾𑌃 𑌕𑌾𑌰𑍍𑌯𑌸𑍍𑌯𑌾𑌪𑌿 𑌤𑌥𑍇𑌷𑍍𑌯𑌤𑍇 ।
𑌉𑌤𑍍𑌪𑌨𑍍𑌨𑌾𑌯𑌾𑌂 𑌤𑍁 𑌵𑌿𑌦𑍍𑌯𑌾𑌯𑌾𑌮𑌾𑌵𑌿𑌦𑍍𑌯𑌕𑌮𑌨𑌾𑌦𑍍𑌯𑌪𑌿 ॥ 198॥
𑌪𑍍𑌰𑌬𑍋𑌧𑍇 𑌸𑍍𑌵𑌪𑍍𑌨𑌵𑌤𑍍𑌸𑌰𑍍𑌵𑌂 𑌸𑌹𑌮𑍂𑌲𑌂 𑌵𑌿𑌨𑌶𑍍𑌯𑌤𑌿 ।
𑌅𑌨𑌾𑌦𑍍𑌯𑌪𑍀𑌦𑌂 𑌨𑍋 𑌨𑌿𑌤𑍍𑌯𑌂 𑌪𑍍𑌰𑌾𑌗𑌭𑌾𑌵 𑌇𑌵 𑌸𑍍𑌫𑍁𑌟𑌮𑍍 ॥ 199॥
𑌅𑌨𑌾𑌦𑍇𑌰𑌪𑌿 𑌵𑌿𑌧𑍍𑌵𑌂𑌸𑌃 𑌪𑍍𑌰𑌾𑌗𑌭𑌾𑌵𑌸𑍍𑌯 𑌵𑍀𑌕𑍍𑌷𑌿𑌤𑌃 ।
𑌯𑌦𑍍𑌬𑍁𑌦𑍍𑌧𑍍𑌯𑍁𑌪𑌾𑌧𑌿𑌸𑌮𑍍𑌬𑌨𑍍𑌧𑌾𑌤𑍍𑌪𑌰𑌿𑌕𑌲𑍍𑌪𑌿𑌤𑌮𑌾𑌤𑍍𑌮𑌨𑌿 ॥ 200॥
𑌜𑍀𑌵𑌤𑍍𑌵𑌂 𑌨 𑌤𑌤𑍋𑌽𑌨𑍍𑌯𑌸𑍍𑌤𑍁 𑌸𑍍𑌵𑌰𑍂𑌪𑍇𑌣 𑌵𑌿𑌲𑌕𑍍𑌷𑌣𑌃 । (𑌪𑌾𑌠𑌭𑍇𑌦𑌃 - 𑌤𑌤𑍋𑌽𑌨𑍍𑌯𑌤𑍍𑌤𑍁)
𑌸𑌮𑍍𑌬𑌨𑍍𑌧𑌸𑍍𑌤𑍍𑌵𑌾𑌤𑍍𑌮𑌨𑍋 𑌬𑍁𑌦𑍍𑌧𑍍𑌯𑌾 𑌮𑌿𑌥𑍍𑌯𑌾𑌜𑍍𑌞𑌾𑌨𑌪𑍁𑌰𑌃𑌸𑌰𑌃 ॥ 201॥ (𑌪𑌾𑌠𑌭𑍇𑌦𑌃 - 𑌸𑌮𑍍𑌬𑌨𑍍𑌧𑌃 𑌸𑍍𑌵𑌾𑌤𑍍𑌮𑌨𑍋)
𑌵𑌿𑌨𑌿𑌵𑍃𑌤𑍍𑌤𑌿𑌰𑍍𑌭𑌵𑍇𑌤𑍍𑌤𑌸𑍍𑌯 𑌸𑌮𑍍𑌯𑌗𑍍𑌜𑍍𑌞𑌾𑌨𑍇𑌨 𑌨𑌾𑌨𑍍𑌯𑌥𑌾 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌵𑌿𑌜𑍍𑌞𑌾𑌨𑌂 𑌸𑌮𑍍𑌯𑌗𑍍𑌜𑍍𑌞𑌾𑌨𑌂 𑌶𑍍𑌰𑍁𑌤𑍇𑌰𑍍𑌮𑌤𑌮𑍍 ॥ 202॥
𑌤𑌦𑌾𑌤𑍍𑌮𑌾𑌨𑌾𑌤𑍍𑌮𑌨𑍋𑌃 𑌸𑌮𑍍𑌯𑌗𑍍𑌵𑌿𑌵𑍇𑌕𑍇𑌨𑍈𑌵 𑌸𑌿𑌧𑍍𑌯𑌤𑌿 ।
𑌤𑌤𑍋 𑌵𑌿𑌵𑍇𑌕𑌃 𑌕𑌰𑍍𑌤𑌵𑍍𑌯𑌃 𑌪𑍍𑌰𑌤𑍍𑌯𑌗𑌾𑌤𑍍𑌮𑌸𑌦𑌾𑌤𑍍𑌮𑌨𑍋𑌃 ॥ 203॥ (𑌪𑌾𑌠𑌭𑍇𑌦𑌃 - 𑌪𑍍𑌰𑌤𑍍𑌯𑌗𑌾𑌤𑍍𑌮𑌾𑌸𑌦𑌾𑌤𑍍𑌮𑌨𑍋𑌃)
𑌜𑌲𑌂 𑌪𑌙𑍍𑌕𑌵𑌦𑌤𑍍𑌯𑌨𑍍𑌤𑌂 𑌪𑌙𑍍𑌕𑌾𑌪𑌾𑌯𑍇 𑌜𑌲𑌂 𑌸𑍍𑌫𑍁𑌟𑌮𑍍 । (𑌪𑌾𑌠𑌭𑍇𑌦𑌃 - 𑌪𑌙𑍍𑌕𑌵𑌦𑌸𑍍𑌪𑌷𑍍𑌟𑌂)
𑌯𑌥𑌾 𑌭𑌾𑌤𑌿 𑌤𑌥𑌾𑌤𑍍𑌮𑌾𑌪𑌿 𑌦𑍋𑌷𑌾𑌭𑌾𑌵𑍇 𑌸𑍍𑌫𑍁𑌟𑌪𑍍𑌰𑌭𑌃 ॥ 204॥
𑌅𑌸𑌨𑍍𑌨𑌿𑌵𑍃𑌤𑍍𑌤𑍗 𑌤𑍁 𑌸𑌦𑌾𑌤𑍍𑌮𑌨𑌾 𑌸𑍍𑌫𑍁𑌟𑌂
𑌪𑍍𑌰𑌤𑍀𑌤𑌿𑌰𑍇𑌤𑌸𑍍𑌯 𑌭𑌵𑍇𑌤𑍍𑌪𑍍𑌰𑌤𑍀𑌚𑌃 ।
𑌤𑌤𑍋 𑌨𑌿𑌰𑌾𑌸𑌃 𑌕𑌰𑌣𑍀𑌯 𑌏𑌵
𑌸𑌦𑌾𑌤𑍍𑌮𑌨𑌃 𑌸𑌾𑌧𑍍𑌵𑌹𑌮𑌾𑌦𑌿𑌵𑌸𑍍𑌤𑍁𑌨𑌃 ॥ 205॥ (𑌪𑌾𑌠𑌭𑍇𑌦𑌃 - 𑌅𑌸𑌦𑌾𑌤𑍍𑌮𑌨𑌃)
𑌅𑌤𑍋 𑌨𑌾𑌯𑌂 𑌪𑌰𑌾𑌤𑍍𑌮𑌾 𑌸𑍍𑌯𑌾𑌦𑍍𑌵𑌿𑌜𑍍𑌞𑌾𑌨𑌮𑌯𑌶𑌬𑍍𑌦𑌭𑌾𑌕𑍍 ।
𑌵𑌿𑌕𑌾𑌰𑌿𑌤𑍍𑌵𑌾𑌜𑍍𑌜𑌡𑌤𑍍𑌵𑌾𑌚𑍍𑌚 𑌪𑌰𑌿𑌚𑍍𑌛𑌿𑌨𑍍𑌨𑌤𑍍𑌵𑌹𑍇𑌤𑍁𑌤𑌃 ।
𑌦𑍃𑌶𑍍𑌯𑌤𑍍𑌵𑌾𑌦𑍍𑌵𑍍𑌯𑌭𑌿𑌚𑌾𑌰𑌿𑌤𑍍𑌵𑌾𑌨𑍍𑌨𑌾𑌨𑌿𑌤𑍍𑌯𑍋 𑌨𑌿𑌤𑍍𑌯 𑌇𑌷𑍍𑌯𑌤𑍇 ॥ 206॥
𑌆𑌨𑌨𑍍𑌦𑌪𑍍𑌰𑌤𑌿𑌬𑌿𑌮𑍍𑌬𑌚𑍁𑌮𑍍𑌬𑌿𑌤𑌤𑌨𑍁𑌰𑍍𑌵𑍃𑌤𑍍𑌤𑌿𑌸𑍍𑌤𑌮𑍋𑌜𑍃𑌮𑍍𑌭𑌿𑌤𑌾
𑌸𑍍𑌯𑌾𑌦𑌾𑌨𑌨𑍍𑌦𑌮𑌯𑌃 𑌪𑍍𑌰𑌿𑌯𑌾𑌦𑌿𑌗𑍁𑌣𑌕𑌃 𑌸𑍍𑌵𑍇𑌷𑍍𑌟𑌾𑌰𑍍𑌥𑌲𑌾𑌭𑍋𑌦𑌯𑌃 ।
𑌪𑍁𑌣𑍍𑌯𑌸𑍍𑌯𑌾𑌨𑍁𑌭𑌵𑍇 𑌵𑌿𑌭𑌾𑌤𑌿 𑌕𑍃𑌤𑌿𑌨𑌾𑌮𑌾𑌨𑌨𑍍𑌦𑌰𑍂𑌪𑌃 𑌸𑍍𑌵𑌯𑌂
𑌸𑌰𑍍𑌵𑍋 𑌨𑌨𑍍𑌦𑌤𑌿 𑌯𑌤𑍍𑌰 𑌸𑌾𑌧𑍁 𑌤𑌨𑍁𑌭𑍃𑌨𑍍𑌮𑌾𑌤𑍍𑌰𑌃 𑌪𑍍𑌰𑌯𑌤𑍍𑌨𑌂 𑌵𑌿𑌨𑌾 ॥ 207॥ (𑌪𑌾𑌠𑌭𑍇𑌦𑌃 - 𑌭𑍂𑌤𑍍𑌵𑌾 𑌨𑌨𑍍𑌦𑌤𑌿)
𑌆𑌨𑌨𑍍𑌦𑌮𑌯𑌕𑍋𑌶𑌸𑍍𑌯 𑌸𑍁𑌷𑍁𑌪𑍍𑌤𑍗 𑌸𑍍𑌫𑍂𑌰𑍍𑌤𑌿𑌰𑍁𑌤𑍍𑌕𑌟𑌾 ।
𑌸𑍍𑌵𑌪𑍍𑌨𑌜𑌾𑌗𑌰𑌯𑍋𑌰𑍀𑌷𑌦𑌿𑌷𑍍𑌟𑌸𑌨𑍍𑌦𑌰𑍍𑌶𑌨𑌾𑌦𑌿𑌨𑌾 ॥ 208॥
𑌨𑍈𑌵𑌾𑌯𑌮𑌾𑌨𑌨𑍍𑌦𑌮𑌯𑌃 𑌪𑌰𑌾𑌤𑍍𑌮𑌾
𑌸𑍋𑌪𑌾𑌧𑌿𑌕𑌤𑍍𑌵𑌾𑌤𑍍𑌪𑍍𑌰𑌕𑍃𑌤𑍇𑌰𑍍𑌵𑌿𑌕𑌾𑌰𑌾𑌤𑍍 ।
𑌕𑌾𑌰𑍍𑌯𑌤𑍍𑌵𑌹𑍇𑌤𑍋𑌃 𑌸𑍁𑌕𑍃𑌤𑌕𑍍𑌰𑌿𑌯𑌾𑌯𑌾
𑌵𑌿𑌕𑌾𑌰𑌸𑌙𑍍𑌘𑌾𑌤𑌸𑌮𑌾𑌹𑌿𑌤𑌤𑍍𑌵𑌾𑌤𑍍 ॥ 209॥
𑌪𑌞𑍍𑌚𑌾𑌨𑌾𑌮𑌪𑌿 𑌕𑍋𑌶𑌾𑌨𑌾𑌂 𑌨𑌿𑌷𑍇𑌧𑍇 𑌯𑍁𑌕𑍍𑌤𑌿𑌤𑌃 𑌶𑍍𑌰𑍁𑌤𑍇𑌃 । (𑌪𑌾𑌠𑌭𑍇𑌦𑌃 - 𑌯𑍁𑌕𑍍𑌤𑌿𑌤𑌃 𑌕𑍃𑌤𑍇)
𑌤𑌨𑍍𑌨𑌿𑌷𑍇𑌧𑌾𑌵𑌧𑌿 𑌸𑌾𑌕𑍍𑌷𑍀 𑌬𑍋𑌧𑌰𑍂𑌪𑍋𑌽𑌵𑌶𑌿𑌷𑍍𑌯𑌤𑍇 ॥ 210॥ (𑌪𑌾𑌠𑌭𑍇𑌦𑌃 - 𑌤𑌨𑍍𑌨𑌿𑌷𑍇𑌧𑌾𑌵𑌧𑌿𑌃)
𑌯𑍋𑌽𑌯𑌮𑌾𑌤𑍍𑌮𑌾 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌃 𑌪𑌞𑍍𑌚𑌕𑍋𑌶𑌵𑌿𑌲𑌕𑍍𑌷𑌣𑌃 ।
𑌅𑌵𑌸𑍍𑌥𑌾𑌤𑍍𑌰𑌯𑌸𑌾𑌕𑍍𑌷𑍀 𑌸𑌨𑍍𑌨𑌿𑌰𑍍𑌵𑌿𑌕𑌾𑌰𑍋 𑌨𑌿𑌰𑌞𑍍𑌜𑌨𑌃 ।
𑌸𑌦𑌾𑌨𑌨𑍍𑌦𑌃 𑌸 𑌵𑌿𑌜𑍍𑌞𑍇𑌯𑌃 𑌸𑍍𑌵𑌾𑌤𑍍𑌮𑌤𑍍𑌵𑍇𑌨 𑌵𑌿𑌪𑌶𑍍𑌚𑌿𑌤𑌾 ॥ 211॥
𑌶𑌿𑌷𑍍𑌯 𑌉𑌵𑌾𑌚 ।
𑌮𑌿𑌥𑍍𑌯𑌾𑌤𑍍𑌵𑍇𑌨 𑌨𑌿𑌷𑌿𑌦𑍍𑌧𑍇𑌷𑍁 𑌕𑍋𑌶𑍇𑌷𑍍𑌵𑍇𑌤𑍇𑌷𑍁 𑌪𑌞𑍍𑌚𑌸𑍁 ।
𑌸𑌰𑍍𑌵𑌾𑌭𑌾𑌵𑌂 𑌵𑌿𑌨𑌾 𑌕𑌿𑌞𑍍𑌚𑌿𑌨𑍍𑌨 𑌪𑌶𑍍𑌯𑌾𑌮𑍍𑌯𑌤𑍍𑌰 𑌹𑍇 𑌗𑍁𑌰𑍋 ।
𑌵𑌿𑌜𑍍𑌞𑍇𑌯𑌂 𑌕𑌿𑌮𑍁 𑌵𑌸𑍍𑌤𑍍𑌵𑌸𑍍𑌤𑌿 𑌸𑍍𑌵𑌾𑌤𑍍𑌮𑌨𑌾𑌽𑌽𑌤𑍍𑌮𑌵𑌿𑌪𑌶𑍍𑌚𑌿𑌤𑌾 ॥ 212॥ (𑌪𑌾𑌠𑌭𑍇𑌦𑌃 - 𑌸𑍍𑌵𑌾𑌤𑍍𑌮𑌨𑌾𑌤𑍍𑌰 𑌵𑌿𑌪𑌶𑍍𑌚𑌿𑌤𑌾)
𑌶𑍍𑌰𑍀𑌗𑍁𑌰𑍁𑌰𑍁𑌵𑌾𑌚 ।
𑌸𑌤𑍍𑌯𑌮𑍁𑌕𑍍𑌤𑌂 𑌤𑍍𑌵𑌯𑌾 𑌵𑌿𑌦𑍍𑌵𑌨𑍍𑌨𑌿𑌪𑍁𑌣𑍋𑌽𑌸𑌿 𑌵𑌿𑌚𑌾𑌰𑌣𑍇 ।
𑌅𑌹𑌮𑌾𑌦𑌿𑌵𑌿𑌕𑌾𑌰𑌾𑌸𑍍𑌤𑍇 𑌤𑌦𑌭𑌾𑌵𑍋𑌽𑌯𑌮𑌪𑍍𑌯𑌨𑍁 ॥ 213॥ (𑌪𑌾𑌠𑌭𑍇𑌦𑌃 - 𑌽𑌯𑌮𑌪𑍍𑌯𑌥)
𑌸𑌰𑍍𑌵𑍇 𑌯𑍇𑌨𑌾𑌨𑍁𑌭𑍂𑌯𑌨𑍍𑌤𑍇 𑌯𑌃 𑌸𑍍𑌵𑌯𑌂 𑌨𑌾𑌨𑍁𑌭𑍂𑌯𑌤𑍇 ।
𑌤𑌮𑌾𑌤𑍍𑌮𑌾𑌨𑌂 𑌵𑍇𑌦𑌿𑌤𑌾𑌰𑌂 𑌵𑌿𑌦𑍍𑌧𑌿 𑌬𑍁𑌦𑍍𑌧𑍍𑌯𑌾 𑌸𑍁𑌸𑍂𑌕𑍍𑌷𑍍𑌮𑌯𑌾 ॥ 214॥
𑌤𑌤𑍍𑌸𑌾𑌕𑍍𑌷𑌿𑌕𑌂 𑌭𑌵𑍇𑌤𑍍𑌤𑌤𑍍𑌤𑌦𑍍𑌯𑌦𑍍𑌯𑌦𑍍𑌯𑍇𑌨𑌾𑌨𑍁𑌭𑍂𑌯𑌤𑍇 ।
𑌕𑌸𑍍𑌯𑌾𑌪𑍍𑌯𑌨𑌨𑍁𑌭𑍂𑌤𑌾𑌰𑍍𑌥𑍇 𑌸𑌾𑌕𑍍𑌷𑌿𑌤𑍍𑌵𑌂 𑌨𑍋𑌪𑌯𑍁𑌜𑍍𑌯𑌤𑍇 ॥ 215॥ (𑌪𑌾𑌠𑌭𑍇𑌦𑌃 - 𑌨𑍋𑌪𑌪𑌦𑍍𑌯𑌤𑍇)
𑌅𑌸𑍗 𑌸𑍍𑌵𑌸𑌾𑌕𑍍𑌷𑌿𑌕𑍋 𑌭𑌾𑌵𑍋 𑌯𑌤𑌃 𑌸𑍍𑌵𑍇𑌨𑌾𑌨𑍁𑌭𑍂𑌯𑌤𑍇 ।
𑌅𑌤𑌃 𑌪𑌰𑌂 𑌸𑍍𑌵𑌯𑌂 𑌸𑌾𑌕𑍍𑌷𑌾𑌤𑍍𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌨 𑌚𑍇𑌤𑌰𑌃 ॥ 216॥
𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 𑌸𑍍𑌫𑍁𑌟𑌤𑌰𑌂 𑌯𑍋𑌽𑌸𑍗 𑌸𑌮𑍁𑌜𑍍𑌜𑍃𑌮𑍍𑌭𑌤𑍇
𑌪𑍍𑌰𑌤𑍍𑌯𑌗𑍍𑌰𑍂𑌪𑌤𑌯𑌾 𑌸𑌦𑌾𑌹𑌮𑌹𑌮𑌿𑌤𑍍𑌯𑌨𑍍𑌤𑌃 𑌸𑍍𑌫𑍁𑌰𑌨𑍍𑌨𑍈𑌕𑌧𑌾 । (𑌪𑌾𑌠𑌭𑍇𑌦𑌃 - 𑌸𑍍𑌫𑍁𑌰𑌨𑍍𑌨𑍇𑌕𑌧𑌾)
𑌨𑌾𑌨𑌾𑌕𑌾𑌰𑌵𑌿𑌕𑌾𑌰𑌭𑌾𑌗𑌿𑌨 𑌇𑌮𑌾𑌨𑍍 𑌪𑌶𑍍𑌯𑌨𑍍𑌨𑌹𑌨𑍍𑌧𑍀𑌮𑍁𑌖𑌾𑌨𑍍 (𑌪𑌾𑌠𑌭𑍇𑌦𑌃 - 𑌭𑌾𑌜𑌿𑌨)
𑌨𑌿𑌤𑍍𑌯𑌾𑌨𑌨𑍍𑌦𑌚𑌿𑌦𑌾𑌤𑍍𑌮𑌨𑌾 𑌸𑍍𑌫𑍁𑌰𑌤𑌿 𑌤𑌂 𑌵𑌿𑌦𑍍𑌧𑌿 𑌸𑍍𑌵𑌮𑍇𑌤𑌂 𑌹𑍃𑌦𑌿 ॥ 217॥
𑌘𑌟𑍋𑌦𑌕𑍇 𑌬𑌿𑌮𑍍𑌬𑌿𑌤𑌮𑌰𑍍𑌕𑌬𑌿𑌮𑍍𑌬-
𑌮𑌾𑌲𑍋𑌕𑍍𑌯 𑌮𑍂𑌢𑍋 𑌰𑌵𑌿𑌮𑍇𑌵 𑌮𑌨𑍍𑌯𑌤𑍇 ।
𑌤𑌥𑌾 𑌚𑌿𑌦𑌾𑌭𑌾𑌸𑌮𑍁𑌪𑌾𑌧𑌿𑌸𑌂𑌸𑍍𑌥𑌂
𑌭𑍍𑌰𑌾𑌨𑍍𑌤𑍍𑌯𑌾𑌹𑌮𑌿𑌤𑍍𑌯𑍇𑌵 𑌜𑌡𑍋𑌽𑌭𑌿𑌮𑌨𑍍𑌯𑌤𑍇 ॥ 218॥
𑌘𑌟𑌂 𑌜𑌲𑌂 𑌤𑌦𑍍𑌗𑌤𑌮𑌰𑍍𑌕𑌬𑌿𑌮𑍍𑌬𑌂
𑌵𑌿𑌹𑌾𑌯 𑌸𑌰𑍍𑌵𑌂 𑌵𑌿𑌨𑌿𑌰𑍀𑌕𑍍𑌷𑍍𑌯𑌤𑍇𑌽𑌰𑍍𑌕𑌃 । (𑌪𑌾𑌠𑌭𑍇𑌦𑌃 - 𑌦𑌿𑌵𑌿 𑌵𑍀𑌕𑍍𑌷𑍍𑌯𑌤𑍇𑌽𑌰𑍍𑌕𑌃)
𑌤𑌟𑌸𑍍𑌥 𑌏𑌤𑌤𑍍𑌤𑍍𑌰𑌿𑌤𑌯𑌾𑌵𑌭𑌾𑌸𑌕𑌃 (𑌪𑌾𑌠𑌭𑍇𑌦𑌃 - 𑌤𑌟𑌸𑍍𑌥𑌿𑌤𑌃 𑌤𑌤𑍍𑌤𑍍𑌰𑌿)
𑌸𑍍𑌵𑌯𑌮𑍍𑌪𑍍𑌰𑌕𑌾𑌶𑍋 𑌵𑌿𑌦𑍁𑌷𑌾 𑌯𑌥𑌾 𑌤𑌥𑌾 ॥ 219॥
𑌦𑍇𑌹𑌂 𑌧𑌿𑌯𑌂 𑌚𑌿𑌤𑍍𑌪𑍍𑌰𑌤𑌿𑌬𑌿𑌮𑍍𑌬𑌮𑍇𑌵𑌂 (𑌪𑌾𑌠𑌭𑍇𑌦𑌃 - 𑌚𑌿𑌤𑍍𑌪𑍍𑌰𑌤𑌿𑌬𑌿𑌮𑍍𑌬𑌮𑍇𑌤𑌂)
𑌵𑌿𑌸𑍃𑌜𑍍𑌯 𑌬𑍁𑌦𑍍𑌧𑍗 𑌨𑌿𑌹𑌿𑌤𑌂 𑌗𑍁𑌹𑌾𑌯𑌾𑌮𑍍 ।
𑌦𑍍𑌰𑌷𑍍𑌟𑌾𑌰𑌮𑌾𑌤𑍍𑌮𑌾𑌨𑌮𑌖𑌣𑍍𑌡𑌬𑍋𑌧𑌂
𑌸𑌰𑍍𑌵𑌪𑍍𑌰𑌕𑌾𑌶𑌂 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌮𑍍 ॥ 220॥
𑌨𑌿𑌤𑍍𑌯𑌂 𑌵𑌿𑌭𑍁𑌂 𑌸𑌰𑍍𑌵𑌗𑌤𑌂 𑌸𑍁𑌸𑍂𑌕𑍍𑌷𑍍𑌮𑌂
𑌅𑌨𑍍𑌤𑌰𑍍𑌬𑌹𑌿𑌃𑌶𑍂𑌨𑍍𑌯𑌮𑌨𑌨𑍍𑌯𑌮𑌾𑌤𑍍𑌮𑌨𑌃 ।
𑌵𑌿𑌜𑍍𑌞𑌾𑌯 𑌸𑌮𑍍𑌯𑌙𑍍𑌨𑌿𑌜𑌰𑍂𑌪𑌮𑍇𑌤𑌤𑍍
𑌪𑍁𑌮𑌾𑌨𑍍 𑌵𑌿𑌪𑌾𑌪𑍍𑌮𑌾 𑌵𑌿𑌰𑌜𑍋 𑌵𑌿𑌮𑍃𑌤𑍍𑌯𑍁𑌃 ॥ 221॥
𑌵𑌿𑌶𑍋𑌕 𑌆𑌨𑌨𑍍𑌦𑌘𑌨𑍋 𑌵𑌿𑌪𑌶𑍍𑌚𑌿𑌤𑍍
𑌸𑍍𑌵𑌯𑌂 𑌕𑍁𑌤𑌶𑍍𑌚𑌿𑌨𑍍𑌨 𑌬𑌿𑌭𑍇𑌤𑌿 𑌕𑌶𑍍𑌚𑌿𑌤𑍍 ।
𑌨𑌾𑌨𑍍𑌯𑍋𑌽𑌸𑍍𑌤𑌿 𑌪𑌨𑍍𑌥𑌾 𑌭𑌵𑌬𑌨𑍍𑌧𑌮𑍁𑌕𑍍𑌤𑍇𑌃
𑌵𑌿𑌨𑌾 𑌸𑍍𑌵𑌤𑌤𑍍𑌤𑍍𑌵𑌾𑌵𑌗𑌮𑌂 𑌮𑍁𑌮𑍁𑌕𑍍𑌷𑍋𑌃 ॥ 222॥
𑌬𑍍𑌰𑌹𑍍𑌮𑌾𑌭𑌿𑌨𑍍𑌨𑌤𑍍𑌵𑌵𑌿𑌜𑍍𑌞𑌾𑌨𑌂 𑌭𑌵𑌮𑍋𑌕𑍍𑌷𑌸𑍍𑌯 𑌕𑌾𑌰𑌣𑌮𑍍 ।
𑌯𑍇𑌨𑌾𑌦𑍍𑌵𑌿𑌤𑍀𑌯𑌮𑌾𑌨𑌨𑍍𑌦𑌂 𑌬𑍍𑌰𑌹𑍍𑌮 𑌸𑌮𑍍𑌪𑌦𑍍𑌯𑌤𑍇 𑌬𑍁𑌧𑍈𑌃 ॥ 223॥ (𑌪𑌾𑌠𑌭𑍇𑌦𑌃 - 𑌸𑌮𑍍𑌪𑌦𑍍𑌯𑌤𑍇 𑌬𑍁𑌧𑌃)
𑌬𑍍𑌰𑌹𑍍𑌮𑌭𑍂𑌤𑌸𑍍𑌤𑍁 𑌸𑌂𑌸𑍃𑌤𑍍𑌯𑍈 𑌵𑌿𑌦𑍍𑌵𑌾𑌨𑍍𑌨𑌾𑌵𑌰𑍍𑌤𑌤𑍇 𑌪𑍁𑌨𑌃 ।
𑌵𑌿𑌜𑍍𑌞𑌾𑌤𑌵𑍍𑌯𑌮𑌤𑌃 𑌸𑌮𑍍𑌯𑌗𑍍𑌬𑍍𑌰𑌹𑍍𑌮𑌾𑌭𑌿𑌨𑍍𑌨𑌤𑍍𑌵𑌮𑌾𑌤𑍍𑌮𑌨𑌃 ॥ 224॥
𑌸𑌤𑍍𑌯𑌂 𑌜𑍍𑌞𑌾𑌨𑌮𑌨𑌨𑍍𑌤𑌂 𑌬𑍍𑌰𑌹𑍍𑌮 𑌵𑌿𑌶𑍁𑌦𑍍𑌧𑌂 𑌪𑌰𑌂 𑌸𑍍𑌵𑌤𑌃𑌸𑌿𑌦𑍍𑌧𑌮𑍍 ।
𑌨𑌿𑌤𑍍𑌯𑌾𑌨𑌨𑍍𑌦𑍈𑌕𑌰𑌸𑌂 𑌪𑍍𑌰𑌤𑍍𑌯𑌗𑌭𑌿𑌨𑍍𑌨𑌂 𑌨𑌿𑌰𑌨𑍍𑌤𑌰𑌂 𑌜𑌯𑌤𑌿 ॥ 225॥
𑌸𑌦𑌿𑌦𑌂 𑌪𑌰𑌮𑌾𑌦𑍍𑌵𑍈𑌤𑌂 𑌸𑍍𑌵𑌸𑍍𑌮𑌾𑌦𑌨𑍍𑌯𑌸𑍍𑌯 𑌵𑌸𑍍𑌤𑍁𑌨𑍋𑌽𑌭𑌾𑌵𑌾𑌤𑍍 ।
𑌨 𑌹𑍍𑌯𑌨𑍍𑌯𑌦𑌸𑍍𑌤𑌿 𑌕𑌿𑌞𑍍𑌚𑌿𑌤𑍍 𑌸𑌮𑍍𑌯𑌕𑍍 𑌪𑌰𑌮𑌾𑌰𑍍𑌥𑌤𑌤𑍍𑌤𑍍𑌵𑌬𑍋𑌧𑌦𑌶𑌾𑌯𑌾𑌮𑍍 ॥ 226॥ (𑌪𑌾𑌠𑌭𑍇𑌦𑌃 - 𑌪𑌰𑌤𑌤𑍍𑌤𑍍𑌵𑌬𑍋𑌧𑌸𑍁𑌦𑌶𑌾𑌯𑌾𑌮𑍍)
𑌯𑌦𑌿𑌦𑌂 𑌸𑌕𑌲𑌂 𑌵𑌿𑌶𑍍𑌵𑌂 𑌨𑌾𑌨𑌾𑌰𑍂𑌪𑌂 𑌪𑍍𑌰𑌤𑍀𑌤𑌮𑌜𑍍𑌞𑌾𑌨𑌾𑌤𑍍 ।
𑌤𑌤𑍍𑌸𑌰𑍍𑌵𑌂 𑌬𑍍𑌰𑌹𑍍𑌮𑍈𑌵 𑌪𑍍𑌰𑌤𑍍𑌯𑌸𑍍𑌤𑌾𑌶𑍇𑌷𑌭𑌾𑌵𑌨𑌾𑌦𑍋𑌷𑌮𑍍 ॥ 227॥
𑌮𑍃𑌤𑍍𑌕𑌾𑌰𑍍𑌯𑌭𑍂𑌤𑍋𑌽𑌪𑌿 𑌮𑍃𑌦𑍋 𑌨 𑌭𑌿𑌨𑍍𑌨𑌃
𑌕𑍁𑌮𑍍𑌭𑍋𑌽𑌸𑍍𑌤𑌿 𑌸𑌰𑍍𑌵𑌤𑍍𑌰 𑌤𑍁 𑌮𑍃𑌤𑍍𑌸𑍍𑌵𑌰𑍂𑌪𑌾𑌤𑍍 ।
𑌨 𑌕𑍁𑌮𑍍𑌭𑌰𑍂𑌪𑌂 𑌪𑍃𑌥𑌗𑌸𑍍𑌤𑌿 𑌕𑍁𑌮𑍍𑌭𑌃
𑌕𑍁𑌤𑍋 𑌮𑍃𑌷𑌾 𑌕𑌲𑍍𑌪𑌿𑌤𑌨𑌾𑌮𑌮𑌾𑌤𑍍𑌰𑌃 ॥ 228॥
𑌕𑍇𑌨𑌾𑌪𑌿 𑌮𑍃𑌦𑍍𑌭𑌿𑌨𑍍𑌨𑌤𑌯𑌾 𑌸𑍍𑌵𑌰𑍂𑌪𑌂
𑌘𑌟𑌸𑍍𑌯 𑌸𑌨𑍍𑌦𑌰𑍍𑌶𑌯𑌿𑌤𑍁𑌂 𑌨 𑌶𑌕𑍍𑌯𑌤𑍇 ।
𑌅𑌤𑍋 𑌘𑌟𑌃 𑌕𑌲𑍍𑌪𑌿𑌤 𑌏𑌵 𑌮𑍋𑌹𑌾-
𑌨𑍍𑌮𑍃𑌦𑍇𑌵 𑌸𑌤𑍍𑌯𑌂 𑌪𑌰𑌮𑌾𑌰𑍍𑌥𑌭𑍂𑌤𑌮𑍍 ॥ 229॥
𑌸𑌦𑍍𑌬𑍍𑌰𑌹𑍍𑌮𑌕𑌾𑌰𑍍𑌯𑌂 𑌸𑌕𑌲𑌂 𑌸𑌦𑍇𑌵𑌂 (𑌪𑌾𑌠𑌭𑍇𑌦𑌃 - 𑌸𑌦𑍈𑌵)
𑌤𑌨𑍍𑌮𑌾𑌤𑍍𑌰𑌮𑍇𑌤𑌨𑍍𑌨 𑌤𑌤𑍋𑌽𑌨𑍍𑌯𑌦𑌸𑍍𑌤𑌿 । (𑌪𑌾𑌠𑌭𑍇𑌦𑌃 - 𑌸𑌨𑍍𑌮𑌾𑌤𑍍𑌰𑌮𑍇𑌤𑌨𑍍𑌨)
𑌅𑌸𑍍𑌤𑍀𑌤𑌿 𑌯𑍋 𑌵𑌕𑍍𑌤𑌿 𑌨 𑌤𑌸𑍍𑌯 𑌮𑍋𑌹𑍋
𑌵𑌿𑌨𑌿𑌰𑍍𑌗𑌤𑍋 𑌨𑌿𑌦𑍍𑌰𑌿𑌤𑌵𑌤𑍍𑌪𑍍𑌰𑌜𑌲𑍍𑌪𑌃 ॥ 230॥
𑌬𑍍𑌰𑌹𑍍𑌮𑍈𑌵𑍇𑌦𑌂 𑌵𑌿𑌶𑍍𑌵𑌮𑌿𑌤𑍍𑌯𑍇𑌵 𑌵𑌾𑌣𑍀
𑌶𑍍𑌰𑍗𑌤𑍀 𑌬𑍍𑌰𑍂𑌤𑍇𑌽𑌥𑌰𑍍𑌵𑌨𑌿𑌷𑍍𑌠𑌾 𑌵𑌰𑌿𑌷𑍍𑌠𑌾 ।
𑌤𑌸𑍍𑌮𑌾𑌦𑍇𑌤𑌦𑍍𑌬𑍍𑌰𑌹𑍍𑌮𑌮𑌾𑌤𑍍𑌰𑌂 𑌹𑌿 𑌵𑌿𑌶𑍍𑌵𑌂
𑌨𑌾𑌧𑌿𑌷𑍍𑌠𑌾𑌨𑌾𑌦𑍍𑌭𑌿𑌨𑍍𑌨𑌤𑌾𑌽𑌽𑌰𑍋𑌪𑌿𑌤𑌸𑍍𑌯 ॥ 231॥
𑌸𑌤𑍍𑌯𑌂 𑌯𑌦𑌿 𑌸𑍍𑌯𑌾𑌜𑍍𑌜𑌗𑌦𑍇𑌤𑌦𑌾𑌤𑍍𑌮𑌨𑍋𑌽
𑌨𑌨𑍍𑌤𑌤𑍍𑌤𑍍𑌵𑌹𑌾𑌨𑌿𑌰𑍍𑌨𑌿𑌗𑌮𑌾𑌪𑍍𑌰𑌮𑌾𑌣𑌤𑌾 ।
𑌅𑌸𑌤𑍍𑌯𑌵𑌾𑌦𑌿𑌤𑍍𑌵𑌮𑌪𑍀𑌶𑌿𑌤𑍁𑌃 𑌸𑍍𑌯𑌾-
𑌨𑍍𑌨𑍈𑌤𑌤𑍍𑌤𑍍𑌰𑌯𑌂 𑌸𑌾𑌧𑍁 𑌹𑌿𑌤𑌂 𑌮𑌹𑌾𑌤𑍍𑌮𑌨𑌾𑌮𑍍 ॥ 232॥
𑌈𑌶𑍍𑌵𑌰𑍋 𑌵𑌸𑍍𑌤𑍁𑌤𑌤𑍍𑌤𑍍𑌵𑌜𑍍𑌞𑍋 𑌨 𑌚𑌾𑌹𑌂 𑌤𑍇𑌷𑍍𑌵𑌵𑌸𑍍𑌥𑌿𑌤𑌃 ।
𑌨 𑌚 𑌮𑌤𑍍𑌸𑍍𑌥𑌾𑌨𑌿 𑌭𑍂𑌤𑌾𑌨𑍀𑌤𑍍𑌯𑍇𑌵𑌮𑍇𑌵 𑌵𑍍𑌯𑌚𑍀𑌕𑍍𑌲𑍃𑌪𑌤𑍍 ॥ 233॥ (𑌪𑌾𑌠𑌭𑍇𑌦𑌃 - 𑌵𑍍𑌯𑌚𑍀𑌕𑌥𑌤𑍍)
𑌯𑌦𑌿 𑌸𑌤𑍍𑌯𑌂 𑌭𑌵𑍇𑌦𑍍𑌵𑌿𑌶𑍍𑌵𑌂 𑌸𑍁𑌷𑍁𑌪𑍍𑌤𑌾𑌵𑍁𑌪𑌲𑌭𑍍𑌯𑌤𑌾𑌮𑍍 ।
𑌯𑌨𑍍𑌨𑍋𑌪𑌲𑌭𑍍𑌯𑌤𑍇 𑌕𑌿𑌞𑍍𑌚𑌿𑌦𑌤𑍋𑌽𑌸𑌤𑍍𑌸𑍍𑌵𑌪𑍍𑌨𑌵𑌨𑍍𑌮𑍃𑌷𑌾 ॥ 234॥
𑌅𑌤𑌃 𑌪𑍃𑌥𑌙𑍍𑌨𑌾𑌸𑍍𑌤𑌿 𑌜𑌗𑌤𑍍𑌪𑌰𑌾𑌤𑍍𑌮𑌨𑌃
𑌪𑍃𑌥𑌕𑍍𑌪𑍍𑌰𑌤𑍀𑌤𑌿𑌸𑍍𑌤𑍁 𑌮𑍃𑌷𑌾 𑌗𑍁𑌣𑌾𑌦𑌿𑌵𑌤𑍍 । 𑌗𑍁𑌣𑌾𑌹𑌿𑌵𑌤𑍍
𑌆𑌰𑍋𑌪𑌿𑌤𑌸𑍍𑌯𑌾𑌸𑍍𑌤𑌿 𑌕𑌿𑌮𑌰𑍍𑌥𑌵𑌤𑍍𑌤𑌾𑌽-
𑌧𑌿𑌷𑍍𑌠𑌾𑌨𑌮𑌾𑌭𑌾𑌤𑌿 𑌤𑌥𑌾 𑌭𑍍𑌰𑌮𑍇𑌣 ॥ 235॥
𑌭𑍍𑌰𑌾𑌨𑍍𑌤𑌸𑍍𑌯 𑌯𑌦𑍍𑌯𑌦𑍍𑌭𑍍𑌰𑌮𑌤𑌃 𑌪𑍍𑌰𑌤𑍀𑌤𑌂
𑌬𑍍𑌰𑌹𑍍𑌮𑍈𑌵 𑌤𑌤𑍍𑌤𑌦𑍍𑌰𑌜𑌤𑌂 𑌹𑌿 𑌶𑍁𑌕𑍍𑌤𑌿𑌃 ।
𑌇𑌦𑌨𑍍𑌤𑌯𑌾 𑌬𑍍𑌰𑌹𑍍𑌮 𑌸𑌦𑍈𑌵 𑌰𑍂𑌪𑍍𑌯𑌤𑍇 (𑌪𑌾𑌠𑌭𑍇𑌦𑌃 - 𑌸𑌦𑍇𑌵)
𑌤𑍍𑌵𑌾𑌰𑍋𑌪𑌿𑌤𑌂 𑌬𑍍𑌰𑌹𑍍𑌮𑌣𑌿 𑌨𑌾𑌮𑌮𑌾𑌤𑍍𑌰𑌮𑍍 ॥ 236॥
𑌅𑌤𑌃 𑌪𑌰𑌂 𑌬𑍍𑌰𑌹𑍍𑌮 𑌸𑌦𑌦𑍍𑌵𑌿𑌤𑍀𑌯𑌂
𑌵𑌿𑌶𑍁𑌦𑍍𑌧𑌵𑌿𑌜𑍍𑌞𑌾𑌨𑌘𑌨𑌂 𑌨𑌿𑌰𑌞𑍍𑌜𑌨𑌮𑍍 ।
𑌪𑍍𑌰𑌶𑌾𑌨𑍍𑌤𑌮𑌾𑌦𑍍𑌯𑌨𑍍𑌤𑌵𑌿𑌹𑍀𑌨𑌮𑌕𑍍𑌰𑌿𑌯𑌂
𑌨𑌿𑌰𑌨𑍍𑌤𑌰𑌾𑌨𑌨𑍍𑌦𑌰𑌸𑌸𑍍𑌵𑌰𑍂𑌪𑌮𑍍 ॥ 237॥
𑌨𑌿𑌰𑌸𑍍𑌤𑌮𑌾𑌯𑌾𑌕𑍃𑌤𑌸𑌰𑍍𑌵𑌭𑍇𑌦𑌂
𑌨𑌿𑌤𑍍𑌯𑌂 𑌸𑍁𑌖𑌂 𑌨𑌿𑌷𑍍𑌕𑌲𑌮𑌪𑍍𑌰𑌮𑍇𑌯𑌮𑍍 । (𑌪𑌾𑌠𑌭𑍇𑌦𑌃 - 𑌨𑌿𑌤𑍍𑌯𑌂 𑌧𑍍𑌰𑍁𑌵𑌂)
𑌅𑌰𑍂𑌪𑌮𑌵𑍍𑌯𑌕𑍍𑌤𑌮𑌨𑌾𑌖𑍍𑌯𑌮𑌵𑍍𑌯𑌯𑌂
𑌜𑍍𑌯𑍋𑌤𑌿𑌃 𑌸𑍍𑌵𑌯𑌂 𑌕𑌿𑌞𑍍𑌚𑌿𑌦𑌿𑌦𑌂 𑌚𑌕𑌾𑌸𑍍𑌤𑌿 ॥ 238॥
𑌜𑍍𑌞𑌾𑌤𑍃𑌜𑍍𑌞𑍇𑌯𑌜𑍍𑌞𑌾𑌨𑌶𑍂𑌨𑍍𑌯𑌮𑌨𑌨𑍍𑌤𑌂 𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑍍 ।
𑌕𑍇𑌵𑌲𑌾𑌖𑌣𑍍𑌡𑌚𑌿𑌨𑍍𑌮𑌾𑌤𑍍𑌰𑌂 𑌪𑌰𑌂 𑌤𑌤𑍍𑌤𑍍𑌵𑌂 𑌵𑌿𑌦𑍁𑌰𑍍𑌬𑍁𑌧𑌾𑌃 ॥ 239॥
𑌅𑌹𑍇𑌯𑌮𑌨𑍁𑌪𑌾𑌦𑍇𑌯𑌂 𑌮𑌨𑍋𑌵𑌾𑌚𑌾𑌮𑌗𑍋𑌚𑌰𑌮𑍍 ।
𑌅𑌪𑍍𑌰𑌮𑍇𑌯𑌮𑌨𑌾𑌦𑍍𑌯𑌨𑍍𑌤𑌂 𑌬𑍍𑌰𑌹𑍍𑌮 𑌪𑍂𑌰𑍍𑌣𑌮𑌹𑌂 𑌮𑌹𑌃 ॥ 240॥ (𑌪𑌾𑌠𑌭𑍇𑌦𑌃 - 𑌪𑍂𑌰𑍍𑌣𑌂 𑌮𑌹𑌨𑍍𑌮𑌹𑌃)
𑌤𑌤𑍍𑌤𑍍𑌵𑌮𑍍𑌪𑌦𑌾𑌭𑍍𑌯𑌾𑌮𑌭𑌿𑌧𑍀𑌯𑌮𑌾𑌨𑌯𑍋𑌃
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌃 𑌶𑍋𑌧𑌿𑌤𑌯𑍋𑌰𑍍𑌯𑌦𑍀𑌤𑍍𑌥𑌮𑍍 । (𑌪𑌾𑌠𑌭𑍇𑌦𑌃 - 𑌶𑍋𑌧𑌿𑌤𑌯𑍋𑌰𑍍𑌯𑌦𑌿𑌤𑍍𑌥𑌮𑍍)
𑌶𑍍𑌰𑍁𑌤𑍍𑌯𑌾 𑌤𑌯𑍋𑌸𑍍𑌤𑌤𑍍𑌤𑍍𑌵𑌮𑌸𑍀𑌤𑌿 𑌸𑌮𑍍𑌯𑌗𑍍
𑌏𑌕𑌤𑍍𑌵𑌮𑍇𑌵 𑌪𑍍𑌰𑌤𑌿𑌪𑌾𑌦𑍍𑌯𑌤𑍇 𑌮𑍁𑌹𑍁𑌃 ॥ 241-
𑌏𑌕𑍍𑌯𑌂 𑌤𑌯𑍋𑌰𑍍𑌲𑌕𑍍𑌷𑌿𑌤𑌯𑍋𑌰𑍍𑌨 𑌵𑌾𑌚𑍍𑌯𑌯𑍋𑌃
𑌨𑌿𑌗𑌦𑍍𑌯𑌤𑍇𑌽𑌨𑍍𑌯𑍋𑌨𑍍𑌯𑌵𑌿𑌰𑍁𑌦𑍍𑌧𑌧𑌰𑍍𑌮𑌿𑌣𑍋𑌃 ।
𑌖𑌦𑍍𑌯𑍋𑌤𑌭𑌾𑌨𑍍𑌵𑍋𑌰𑌿𑌵 𑌰𑌾𑌜𑌭𑍃𑌤𑍍𑌯𑌯𑍋𑌃
𑌕𑍂𑌪𑌾𑌮𑍍𑌬𑍁𑌰𑌾𑌶𑍍𑌯𑍋𑌃 𑌪𑌰𑌮𑌾𑌣𑍁𑌮𑍇𑌰𑍍𑌵𑍋𑌃 ॥ 242॥
𑌤𑌯𑍋𑌰𑍍𑌵𑌿𑌰𑍋𑌧𑍋𑌽𑌯𑌮𑍁𑌪𑌾𑌧𑌿𑌕𑌲𑍍𑌪𑌿𑌤𑍋
𑌨 𑌵𑌾𑌸𑍍𑌤𑌵𑌃 𑌕𑌶𑍍𑌚𑌿𑌦𑍁𑌪𑌾𑌧𑌿𑌰𑍇𑌷𑌃 ।
𑌈𑌶𑌸𑍍𑌯 𑌮𑌾𑌯𑌾 𑌮𑌹𑌦𑌾𑌦𑌿𑌕𑌾𑌰𑌣𑌂
𑌜𑍀𑌵𑌸𑍍𑌯 𑌕𑌾𑌰𑍍𑌯𑌂 𑌶𑌋𑌣𑍁 𑌪𑌞𑍍𑌚𑌕𑍋𑌶𑌮𑍍 ॥ 243॥ (𑌪𑌾𑌠𑌭𑍇𑌦𑌃 - 𑌪𑌞𑍍𑌚𑌕𑍋𑌶𑌾𑌃)
𑌏𑌤𑌾𑌵𑍁𑌪𑌾𑌧𑍀 𑌪𑌰𑌜𑍀𑌵𑌯𑍋𑌸𑍍𑌤𑌯𑍋𑌃
𑌸𑌮𑍍𑌯𑌙𑍍𑌨𑌿𑌰𑌾𑌸𑍇 𑌨 𑌪𑌰𑍋 𑌨 𑌜𑍀𑌵𑌃 ।
𑌰𑌾𑌜𑍍𑌯𑌂 𑌨𑌰𑍇𑌨𑍍𑌦𑍍𑌰𑌸𑍍𑌯 𑌭𑌟𑌸𑍍𑌯 𑌖𑍇𑌟𑌕𑍍-
𑌸𑍍𑌤𑌯𑍋𑌰𑌪𑍋𑌹𑍇 𑌨 𑌭𑌟𑍋 𑌨 𑌰𑌾𑌜𑌾 ॥ 244॥
𑌅𑌥𑌾𑌤 𑌆𑌦𑍇𑌶 𑌇𑌤𑌿 𑌶𑍍𑌰𑍁𑌤𑌿𑌃 𑌸𑍍𑌵𑌯𑌂
𑌨𑌿𑌷𑍇𑌧𑌤𑌿 𑌬𑍍𑌰𑌹𑍍𑌮𑌣𑌿 𑌕𑌲𑍍𑌪𑌿𑌤𑌂 𑌦𑍍𑌵𑌯𑌮𑍍 ।
𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑌾𑌨𑍁𑌗𑍃𑌹𑍀𑌤𑌬𑍋𑌧𑌾- (𑌪𑌾𑌠𑌭𑍇𑌦𑌃 - 𑌪𑍍𑌰𑌮𑌾𑌣𑌾𑌨𑍁𑌗𑍃𑌹𑍀𑌤𑌯𑍁𑌕𑍍𑌤𑍍𑌯𑌾)
𑌤𑍍𑌤𑌯𑍋𑌰𑍍𑌨𑌿𑌰𑌾𑌸𑌃 𑌕𑌰𑌣𑍀𑌯 𑌏𑌵 ॥ 245॥
𑌨𑍇𑌦𑌂 𑌨𑍇𑌦𑌂 𑌕𑌲𑍍𑌪𑌿𑌤𑌤𑍍𑌵𑌾𑌨𑍍𑌨 𑌸𑌤𑍍𑌯𑌂
𑌰𑌜𑍍𑌜𑍁𑌦𑍃𑌷𑍍𑌟𑌵𑍍𑌯𑌾𑌲𑌵𑌤𑍍𑌸𑍍𑌵𑌪𑍍𑌨𑌵𑌚𑍍𑌚 । (𑌪𑌾𑌠𑌭𑍇𑌦𑌃 - 𑌰𑌜𑍍𑌜𑍗)
𑌇𑌤𑍍𑌥𑌂 𑌦𑍃𑌶𑍍𑌯𑌂 𑌸𑌾𑌧𑍁𑌯𑍁𑌕𑍍𑌤𑍍𑌯𑌾 𑌵𑍍𑌯𑌪𑍋𑌹𑍍𑌯
𑌜𑍍𑌞𑍇𑌯𑌃 𑌪𑌶𑍍𑌚𑌾𑌦𑍇𑌕𑌭𑌾𑌵𑌸𑍍𑌤𑌯𑍋𑌰𑍍𑌯𑌃 ॥ 246॥
𑌤𑌤𑌸𑍍𑌤𑍁 𑌤𑍗 𑌲𑌕𑍍𑌷𑌣𑌯𑌾 𑌸𑍁𑌲𑌕𑍍𑌷𑍍𑌯𑍗
𑌤𑌯𑍋𑌰𑌖𑌣𑍍𑌡𑍈𑌕𑌰𑌸𑌤𑍍𑌵𑌸𑌿𑌦𑍍𑌧𑌯𑍇 ।
𑌨𑌾𑌲𑌂 𑌜𑌹𑌤𑍍𑌯𑌾 𑌨 𑌤𑌥𑌾𑌽𑌜𑌹𑌤𑍍𑌯𑌾
𑌕𑌿𑌨𑍍𑌤𑍂𑌭𑌯𑌾𑌰𑍍𑌥𑌾𑌤𑍍𑌮𑌿𑌕𑌯𑍈𑌵 𑌭𑌾𑌵𑍍𑌯𑌮𑍍 ॥ 247॥ (𑌪𑌾𑌠𑌭𑍇𑌦𑌃 - 𑌭𑌯𑌾𑌰𑍍𑌥𑍈𑌕𑌤𑌯𑍈𑌵)
𑌸 𑌦𑍇𑌵𑌦𑌤𑍍𑌤𑍋𑌽𑌯𑌮𑌿𑌤𑍀𑌹 𑌚𑍈𑌕𑌤𑌾
𑌵𑌿𑌰𑍁𑌦𑍍𑌧𑌧𑌰𑍍𑌮𑌾𑌂𑌶𑌮𑌪𑌾𑌸𑍍𑌯 𑌕𑌥𑍍𑌯𑌤𑍇 ।
𑌯𑌥𑌾 𑌤𑌥𑌾 𑌤𑌤𑍍𑌤𑍍𑌵𑌮𑌸𑍀𑌤𑌿𑌵𑌾𑌕𑍍𑌯𑍇
𑌵𑌿𑌰𑍁𑌦𑍍𑌧𑌧𑌰𑍍𑌮𑌾𑌨𑍁𑌭𑌯𑌤𑍍𑌰 𑌹𑌿𑌤𑍍𑌵𑌾 ॥ 248॥
𑌸𑌂𑌲𑌕𑍍𑌷𑍍𑌯 𑌚𑌿𑌨𑍍𑌮𑌾𑌤𑍍𑌰𑌤𑌯𑌾 𑌸𑌦𑌾𑌤𑍍𑌮𑌨𑍋𑌃
𑌅𑌖𑌣𑍍𑌡𑌭𑌾𑌵𑌃 𑌪𑌰𑌿𑌚𑍀𑌯𑌤𑍇 𑌬𑍁𑌧𑍈𑌃 ।
𑌏𑌵𑌂 𑌮𑌹𑌾𑌵𑌾𑌕𑍍𑌯𑌶𑌤𑍇𑌨 𑌕𑌥𑍍𑌯𑌤𑍇
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌰𑍈𑌕𑍍𑌯𑌮𑌖𑌣𑍍𑌡𑌭𑌾𑌵𑌃 ॥ 249॥
𑌅𑌸𑍍𑌥𑍂𑌲𑌮𑌿𑌤𑍍𑌯𑍇𑌤𑌦𑌸𑌨𑍍𑌨𑌿𑌰𑌸𑍍𑌯
𑌸𑌿𑌦𑍍𑌧𑌂 𑌸𑍍𑌵𑌤𑍋 𑌵𑍍𑌯𑍋𑌮𑌵𑌦𑌪𑍍𑌰𑌤𑌰𑍍𑌕𑍍𑌯𑌮𑍍 ।
𑌅𑌤𑍋 𑌮𑍃𑌷𑌾𑌮𑌾𑌤𑍍𑌰𑌮𑌿𑌦𑌂 𑌪𑍍𑌰𑌤𑍀𑌤𑌂
𑌜𑌹𑍀𑌹𑌿 𑌯𑌤𑍍𑌸𑍍𑌵𑌾𑌤𑍍𑌮𑌤𑌯𑌾 𑌗𑍃𑌹𑍀𑌤𑌮𑍍 ।
𑌬𑍍𑌰𑌹𑍍𑌮𑌾𑌹𑌮𑌿𑌤𑍍𑌯𑍇𑌵 𑌵𑌿𑌶𑍁𑌦𑍍𑌧𑌬𑍁𑌦𑍍𑌧𑍍𑌯𑌾
𑌵𑌿𑌦𑍍𑌧𑌿 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌣𑍍𑌡𑌬𑍋𑌧𑌮𑍍 ॥ 250॥
𑌮𑍃𑌤𑍍𑌕𑌾𑌰𑍍𑌯𑌂 𑌸𑌕𑌲𑌂 𑌘𑌟𑌾𑌦𑌿 𑌸𑌤𑌤𑌂 𑌮𑍃𑌨𑍍𑌮𑌾𑌤𑍍𑌰𑌮𑍇𑌵𑌾𑌹𑌿𑌤𑌂 (𑌪𑌾𑌠𑌭𑍇𑌦𑌃 - 𑌮𑍃𑌨𑍍𑌮𑌾𑌤𑍍𑌰𑌮𑍇𑌵𑌾𑌭𑌿𑌤𑌃)
𑌤𑌦𑍍𑌵𑌤𑍍𑌸𑌜𑍍𑌜𑌨𑌿𑌤𑌂 𑌸𑌦𑌾𑌤𑍍𑌮𑌕𑌮𑌿𑌦𑌂 𑌸𑌨𑍍𑌮𑌾𑌤𑍍𑌰𑌮𑍇𑌵𑌾𑌖𑌿𑌲𑌮𑍍 ।
𑌯𑌸𑍍𑌮𑌾𑌨𑍍𑌨𑌾𑌸𑍍𑌤𑌿 𑌸𑌤𑌃 𑌪𑌰𑌂 𑌕𑌿𑌮𑌪𑌿 𑌤𑌤𑍍𑌸𑌤𑍍𑌯𑌂 𑌸 𑌆𑌤𑍍𑌮𑌾 𑌸𑍍𑌵𑌯𑌂
𑌤𑌸𑍍𑌮𑌾𑌤𑍍𑌤𑌤𑍍𑌤𑍍𑌵𑌮𑌸𑌿 𑌪𑍍𑌰𑌶𑌾𑌨𑍍𑌤𑌮𑌮𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌯𑌤𑍍𑌪𑌰𑌮𑍍 ॥ 251॥
𑌨𑌿𑌦𑍍𑌰𑌾𑌕𑌲𑍍𑌪𑌿𑌤𑌦𑍇𑌶𑌕𑌾𑌲𑌵𑌿𑌷𑌯𑌜𑍍𑌞𑌾𑌤𑍍𑌰𑌾𑌦𑌿 𑌸𑌰𑍍𑌵𑌂 𑌯𑌥𑌾
𑌮𑌿𑌥𑍍𑌯𑌾 𑌤𑌦𑍍𑌵𑌦𑌿𑌹𑌾𑌪𑌿 𑌜𑌾𑌗𑍍𑌰𑌤𑌿 𑌜𑌗𑌤𑍍𑌸𑍍𑌵𑌾𑌜𑍍𑌞𑌾𑌨𑌕𑌾𑌰𑍍𑌯𑌤𑍍𑌵𑌤𑌃 ।
𑌯𑌸𑍍𑌮𑌾𑌦𑍇𑌵𑌮𑌿𑌦𑌂 𑌶𑌰𑍀𑌰𑌕𑌰𑌣𑌪𑍍𑌰𑌾𑌣𑌾𑌹𑌮𑌾𑌦𑍍𑌯𑌪𑍍𑌯𑌸𑌤𑍍
𑌤𑌸𑍍𑌮𑌾𑌤𑍍𑌤𑌤𑍍𑌤𑍍𑌵𑌮𑌸𑌿 𑌪𑍍𑌰𑌶𑌾𑌨𑍍𑌤𑌮𑌮𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌯𑌤𑍍𑌪𑌰𑌮𑍍 ॥ 252॥
𑌯𑌤𑍍𑌰 𑌭𑍍𑌰𑌾𑌨𑍍𑌤𑍍𑌯𑌾 𑌕𑌲𑍍𑌪𑌿𑌤𑌂 𑌤𑌦𑍍𑌵𑌿𑌵𑍇𑌕𑍇 (𑌪𑌾𑌠𑌭𑍇𑌦𑌃 - 𑌯𑌦𑍍𑌵𑌿𑌵𑍇𑌕𑍇)
𑌤𑌤𑍍𑌤𑌨𑍍𑌮𑌾𑌤𑍍𑌰𑌂 𑌨𑍈𑌵 𑌤𑌸𑍍𑌮𑌾𑌦𑍍𑌵𑌿𑌭𑌿𑌨𑍍𑌨𑌮𑍍 ।
𑌸𑍍𑌵𑌪𑍍𑌨𑍇 𑌨𑌷𑍍𑌟𑌂 𑌸𑍍𑌵𑌪𑍍𑌨𑌵𑌿𑌶𑍍𑌵𑌂 𑌵𑌿𑌚𑌿𑌤𑍍𑌰𑌂
𑌸𑍍𑌵𑌸𑍍𑌮𑌾𑌦𑍍𑌭𑌿𑌨𑍍𑌨𑌂 𑌕𑌿𑌨𑍍𑌨𑍁 𑌦𑍃𑌷𑍍𑌟𑌂 𑌪𑍍𑌰𑌬𑍋𑌧𑍇 ॥ 253॥
𑌜𑌾𑌤𑌿𑌨𑍀𑌤𑌿𑌕𑍁𑌲𑌗𑍋𑌤𑍍𑌰𑌦𑍂𑌰𑌗𑌂
𑌨𑌾𑌮𑌰𑍂𑌪𑌗𑍁𑌣𑌦𑍋𑌷𑌵𑌰𑍍𑌜𑌿𑌤𑌮𑍍 ।
𑌦𑍇𑌶𑌕𑌾𑌲𑌵𑌿𑌷𑌯𑌾𑌤𑌿𑌵𑌰𑍍𑌤𑌿 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 254॥
𑌯𑌤𑍍𑌪𑌰𑌂 𑌸𑌕𑌲𑌵𑌾𑌗𑌗𑍋𑌚𑌰𑌂
𑌗𑍋𑌚𑌰𑌂 𑌵𑌿𑌮𑌲𑌬𑍋𑌧𑌚𑌕𑍍𑌷𑍁𑌷𑌃 ।
𑌶𑍁𑌦𑍍𑌧𑌚𑌿𑌦𑍍𑌘𑌨𑌮𑌨𑌾𑌦𑌿 𑌵𑌸𑍍𑌤𑍁 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 255॥
𑌷𑌡𑍍𑌭𑌿𑌰𑍂𑌰𑍍𑌮𑌿𑌭𑌿𑌰𑌯𑍋𑌗𑌿 𑌯𑍋𑌗𑌿𑌹𑍃𑌦𑍍-
𑌭𑌾𑌵𑌿𑌤𑌂 𑌨 𑌕𑌰𑌣𑍈𑌰𑍍𑌵𑌿𑌭𑌾𑌵𑌿𑌤𑌮𑍍 ।
𑌬𑍁𑌦𑍍𑌧𑍍𑌯𑌵𑍇𑌦𑍍𑌯𑌮𑌨𑌵𑌦𑍍𑌯𑌮𑌸𑍍𑌤𑌿 𑌯𑌦𑍍 (𑌪𑌾𑌠𑌭𑍇𑌦𑌃 - 𑌭𑍂𑌤𑌿 𑌯𑌦𑍍)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 256॥
𑌭𑍍𑌰𑌾𑌨𑍍𑌤𑌿𑌕𑌲𑍍𑌪𑌿𑌤𑌜𑌗𑌤𑍍𑌕𑌲𑌾𑌶𑍍𑌰𑌯𑌂
𑌸𑍍𑌵𑌾𑌶𑍍𑌰𑌯𑌂 𑌚 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌮𑍍 ।
𑌨𑌿𑌷𑍍𑌕𑌲𑌂 𑌨𑌿𑌰𑍁𑌪𑌮𑌾𑌨𑌵𑌦𑍍𑌧𑌿 𑌯𑌦𑍍 (𑌪𑌾𑌠𑌭𑍇𑌦𑌃 - 𑌨𑌿𑌰𑍁𑌪𑌮𑌾𑌨𑌮𑍃𑌦𑍍𑌧𑌿𑌮𑌤𑍍)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 257॥
𑌜𑌨𑍍𑌮𑌵𑍃𑌦𑍍𑌧𑌿𑌪𑌰𑌿𑌣𑌤𑍍𑌯𑌪𑌕𑍍𑌷𑌯-
𑌵𑍍𑌯𑌾𑌧𑌿𑌨𑌾𑌶𑌨𑌵𑌿𑌹𑍀𑌨𑌮𑌵𑍍𑌯𑌯𑌮𑍍 ।
𑌵𑌿𑌶𑍍𑌵𑌸𑍃𑌷𑍍𑌟𑍍𑌯𑌵𑌵𑌿𑌘𑌾𑌤𑌕𑌾𑌰𑌣𑌂 (𑌪𑌾𑌠𑌭𑍇𑌦𑌃 - 𑌵𑌨𑌘𑌾𑌤𑌕𑌾𑌰𑌣𑌂)
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 258॥
𑌅𑌸𑍍𑌤𑌭𑍇𑌦𑌮𑌨𑌪𑌾𑌸𑍍𑌤𑌲𑌕𑍍𑌷𑌣𑌂
𑌨𑌿𑌸𑍍𑌤𑌰𑌙𑍍𑌗𑌜𑌲𑌰𑌾𑌶𑌿𑌨𑌿𑌶𑍍𑌚𑌲𑌮𑍍 ।
𑌨𑌿𑌤𑍍𑌯𑌮𑍁𑌕𑍍𑌤𑌮𑌵𑌿𑌭𑌕𑍍𑌤𑌮𑍂𑌰𑍍𑌤𑌿 𑌯𑌦𑍍
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 259॥
𑌏𑌕𑌮𑍇𑌵 𑌸𑌦𑌨𑍇𑌕𑌕𑌾𑌰𑌣𑌂
𑌕𑌾𑌰𑌣𑌾𑌨𑍍𑌤𑌰𑌨𑌿𑌰𑌾𑌸𑍍𑌯𑌕𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 - 𑌸𑌕𑌾𑌰𑌣𑌮𑍍)
𑌕𑌾𑌰𑍍𑌯𑌕𑌾𑌰𑌣𑌵𑌿𑌲𑌕𑍍𑌷𑌣𑌂 𑌸𑍍𑌵𑌯𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 260॥
𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑌨𑌲𑍍𑌪𑌮𑌕𑍍𑌷𑌰𑌂
𑌯𑌤𑍍𑌕𑍍𑌷𑌰𑌾𑌕𑍍𑌷𑌰𑌵𑌿𑌲𑌕𑍍𑌷𑌣𑌂 𑌪𑌰𑌮𑍍 ।
𑌨𑌿𑌤𑍍𑌯𑌮𑌵𑍍𑌯𑌯𑌸𑍁𑌖𑌂 𑌨𑌿𑌰𑌞𑍍𑌜𑌨𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 261॥
𑌯𑌦𑍍𑌵𑌿𑌭𑌾𑌤𑌿 𑌸𑌦𑌨𑍇𑌕𑌧𑌾 𑌭𑍍𑌰𑌮𑌾-
𑌨𑍍𑌨𑌾𑌮𑌰𑍂𑌪𑌗𑍁𑌣𑌵𑌿𑌕𑍍𑌰𑌿𑌯𑌾𑌤𑍍𑌮𑌨𑌾 ।
𑌹𑍇𑌮𑌵𑌤𑍍𑌸𑍍𑌵𑌯𑌮𑌵𑌿𑌕𑍍𑌰𑌿𑌯𑌂 𑌸𑌦𑌾
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 262॥
𑌯𑌚𑍍𑌚𑌕𑌾𑌸𑍍𑌤𑍍𑌯𑌨𑌪𑌰𑌂 𑌪𑌰𑌾𑌤𑍍𑌪𑌰𑌂
𑌪𑍍𑌰𑌤𑍍𑌯𑌗𑍇𑌕𑌰𑌸𑌮𑌾𑌤𑍍𑌮𑌲𑌕𑍍𑌷𑌣𑌮𑍍 ।
𑌸𑌤𑍍𑌯𑌚𑌿𑌤𑍍𑌸𑍁𑌖𑌮𑌨𑌨𑍍𑌤𑌮𑌵𑍍𑌯𑌯𑌂
𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌮𑌸𑌿 𑌭𑌾𑌵𑌯𑌾𑌤𑍍𑌮𑌨𑌿 ॥ 263॥
𑌉𑌕𑍍𑌤𑌮𑌰𑍍𑌥𑌮𑌿𑌮𑌮𑌾𑌤𑍍𑌮𑌨𑌿 𑌸𑍍𑌵𑌯𑌂
𑌭𑌾𑌵𑌯𑍇𑌤𑍍𑌪𑍍𑌰𑌥𑌿𑌤𑌯𑍁𑌕𑍍𑌤𑌿𑌭𑌿𑌰𑍍𑌧𑌿𑌯𑌾 । (𑌪𑌾𑌠𑌭𑍇𑌦𑌃 - 𑌭𑌾𑌵𑌯 𑌪𑍍𑌰𑌥𑌿𑌤)
𑌸𑌂𑌶𑌯𑌾𑌦𑌿𑌰𑌹𑌿𑌤𑌂 𑌕𑌰𑌾𑌮𑍍𑌬𑍁𑌵𑌤𑍍
𑌤𑍇𑌨 𑌤𑌤𑍍𑌤𑍍𑌵𑌨𑌿𑌗𑌮𑍋 𑌭𑌵𑌿𑌷𑍍𑌯𑌤𑌿 ॥ 264॥
𑌸𑌮𑍍𑌬𑍋𑌧𑌮𑌾𑌤𑍍𑌰𑌂 𑌪𑌰𑌿𑌶𑍁𑌦𑍍𑌧𑌤𑌤𑍍𑌤𑍍𑌵𑌂 (𑌪𑌾𑌠𑌭𑍇𑌦𑌃 - 𑌸𑍍𑌵𑌂 𑌬𑍋𑌧𑌮𑌾𑌤𑍍𑌰𑌂)
𑌵𑌿𑌜𑍍𑌞𑌾𑌯 𑌸𑌙𑍍𑌘𑍇 𑌨𑍃𑌪𑌵𑌚𑍍𑌚 𑌸𑍈𑌨𑍍𑌯𑍇 ।
𑌤𑌦𑌾𑌶𑍍𑌰𑌯𑌃 𑌸𑍍𑌵𑌾𑌤𑍍𑌮𑌨𑌿 𑌸𑌰𑍍𑌵𑌦𑌾 𑌸𑍍𑌥𑌿𑌤𑍋 (𑌪𑌾𑌠𑌭𑍇𑌦𑌃 - 𑌤𑌦𑌾𑌤𑍍𑌮𑌨𑍈𑌵𑌾𑌤𑍍𑌮𑌨𑌿)
𑌵𑌿𑌲𑌾𑌪𑌯 𑌬𑍍𑌰𑌹𑍍𑌮𑌣𑌿 𑌵𑌿𑌶𑍍𑌵𑌜𑌾𑌤𑌮𑍍 ॥ 265॥ (𑌪𑌾𑌠𑌭𑍇𑌦𑌃 - 𑌦𑍃𑌶𑍍𑌯𑌜𑌾𑌤𑌮𑍍)
𑌬𑍁𑌦𑍍𑌧𑍗 𑌗𑍁𑌹𑌾𑌯𑌾𑌂 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌂
𑌬𑍍𑌰𑌹𑍍𑌮𑌾𑌸𑍍𑌤𑌿 𑌸𑌤𑍍𑌯𑌂 𑌪𑌰𑌮𑌦𑍍𑌵𑌿𑌤𑍀𑌯𑌮𑍍 ।
𑌤𑌦𑌾𑌤𑍍𑌮𑌨𑌾 𑌯𑍋𑌽𑌤𑍍𑌰 𑌵𑌸𑍇𑌦𑍍𑌗𑍁𑌹𑌾𑌯𑌾𑌂
𑌪𑍁𑌨𑌰𑍍𑌨 𑌤𑌸𑍍𑌯𑌾𑌙𑍍𑌗𑌗𑍁𑌹𑌾𑌪𑍍𑌰𑌵𑍇𑌶𑌃 ॥ 266॥
𑌜𑍍𑌞𑌾𑌤𑍇 𑌵𑌸𑍍𑌤𑍁𑌨𑍍𑌯𑌪𑌿 𑌬𑌲𑌵𑌤𑍀 𑌵𑌾𑌸𑌨𑌾𑌽𑌨𑌾𑌦𑌿𑌰𑍇𑌷𑌾
𑌕𑌰𑍍𑌤𑌾 𑌭𑍋𑌕𑍍𑌤𑌾𑌪𑍍𑌯𑌹𑌮𑌿𑌤𑌿 𑌦𑍃𑌢𑌾 𑌯𑌾𑌽𑌸𑍍𑌯 𑌸𑌂𑌸𑌾𑌰𑌹𑍇𑌤𑍁𑌃 ।
𑌪𑍍𑌰𑌤𑍍𑌯𑌗𑍍𑌦𑍃𑌷𑍍𑌟𑍍𑌯𑌾𑌽𑌽𑌤𑍍𑌮𑌨𑌿 𑌨𑌿𑌵𑌸𑌤𑌾 𑌸𑌾𑌪𑌨𑍇𑌯𑌾 𑌪𑍍𑌰𑌯𑌤𑍍𑌨𑌾-
𑌨𑍍𑌮𑍁𑌕𑍍𑌤𑌿𑌂 𑌪𑍍𑌰𑌾𑌹𑍁𑌸𑍍𑌤𑌦𑌿𑌹 𑌮𑍁𑌨𑌯𑍋 𑌵𑌾𑌸𑌨𑌾𑌤𑌾𑌨𑌵𑌂 𑌯𑌤𑍍 ॥ 267॥
𑌅𑌹𑌂 𑌮𑌮𑍇𑌤𑌿 𑌯𑍋 𑌭𑌾𑌵𑍋 𑌦𑍇𑌹𑌾𑌕𑍍𑌷𑌾𑌦𑌾𑌵𑌨𑌾𑌤𑍍𑌮𑌨𑌿 ।
𑌅𑌧𑍍𑌯𑌾𑌸𑍋𑌽𑌯𑌂 𑌨𑌿𑌰𑌸𑍍𑌤𑌵𑍍𑌯𑍋 𑌵𑌿𑌦𑍁𑌷𑌾 𑌸𑍍𑌵𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 268॥
𑌜𑍍𑌞𑌾𑌤𑍍𑌵𑌾 𑌸𑍍𑌵𑌂 𑌪𑍍𑌰𑌤𑍍𑌯𑌗𑌾𑌤𑍍𑌮𑌾𑌨𑌂 𑌬𑍁𑌦𑍍𑌧𑌿𑌤𑌦𑍍𑌵𑍃𑌤𑍍𑌤𑌿𑌸𑌾𑌕𑍍𑌷𑌿𑌣𑌮𑍍 ।
𑌸𑍋𑌽𑌹𑌮𑌿𑌤𑍍𑌯𑍇𑌵 𑌸𑌦𑍍𑌵𑍃𑌤𑍍𑌤𑍍𑌯𑌾𑌽𑌨𑌾𑌤𑍍𑌮𑌨𑍍𑌯𑌾𑌤𑍍𑌮𑌮𑌤𑌿𑌂 𑌜𑌹𑌿 ॥ 269॥
𑌲𑍋𑌕𑌾𑌨𑍁𑌵𑌰𑍍𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌤𑍍𑌯𑌕𑍍𑌤𑍍𑌵𑌾 𑌦𑍇𑌹𑌾𑌨𑍁𑌵𑌰𑍍𑌤𑌨𑌮𑍍 ।
𑌶𑌾𑌸𑍍𑌤𑍍𑌰𑌾𑌨𑍁𑌵𑌰𑍍𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 270॥
𑌲𑍋𑌕𑌵𑌾𑌸𑌨𑌯𑌾 𑌜𑌨𑍍𑌤𑍋𑌃 𑌶𑌾𑌸𑍍𑌤𑍍𑌰𑌵𑌾𑌸𑌨𑌯𑌾𑌪𑌿 𑌚 ।
271
𑌦𑍇𑌹𑌵𑌾𑌸𑌨𑌯𑌾 𑌜𑍍𑌞𑌾𑌨𑌂 𑌯𑌥𑌾𑌵𑌨𑍍𑌨𑍈𑌵 𑌜𑌾𑌯𑌤𑍇 ॥ 271
𑌸𑌂𑌸𑌾𑌰𑌕𑌾𑌰𑌾𑌗𑍃𑌹𑌮𑍋𑌕𑍍𑌷𑌮𑌿𑌚𑍍𑌛𑍋-
𑌰𑌯𑍋𑌮𑌯𑌂 𑌪𑌾𑌦𑌨𑌿𑌬𑌨𑍍𑌧𑌶𑌋𑌙𑍍𑌖𑌲𑌮𑍍 । (𑌪𑌾𑌠𑌭𑍇𑌦𑌃 - 𑌨𑌿𑌬𑌦𑍍𑌧)
𑌵𑌦𑌨𑍍𑌤𑌿 𑌤𑌜𑍍𑌜𑍍𑌞𑌾𑌃 𑌪𑌟𑍁 𑌵𑌾𑌸𑌨𑌾𑌤𑍍𑌰𑌯𑌂
𑌯𑍋𑌽𑌸𑍍𑌮𑌾𑌦𑍍𑌵𑌿𑌮𑍁𑌕𑍍𑌤𑌃 𑌸𑌮𑍁𑌪𑍈𑌤𑌿 𑌮𑍁𑌕𑍍𑌤𑌿𑌮𑍍 ॥ 272॥
𑌜𑌲𑌾𑌦𑌿𑌸𑌂𑌸𑌰𑍍𑌗𑌵𑌶𑌾𑌤𑍍𑌪𑍍𑌰𑌭𑍂𑌤- (𑌪𑌾𑌠𑌭𑍇𑌦𑌃 - 𑌜𑌲𑌾𑌦𑌿𑌸𑌮𑍍𑌪𑌰𑍍𑌕𑌵𑌶𑌾𑌤𑍍)
𑌦𑍁𑌰𑍍𑌗𑌨𑍍𑌧𑌧𑍂𑌤𑌾𑌽𑌗𑌰𑍁𑌦𑌿𑌵𑍍𑌯𑌵𑌾𑌸𑌨𑌾 ।
𑌸𑌙𑍍𑌘𑌰𑍍𑌷𑌣𑍇𑌨𑍈𑌵 𑌵𑌿𑌭𑌾𑌤𑌿 𑌸𑌮𑍍𑌯-
𑌗𑍍𑌵𑌿𑌧𑍂𑌯𑌮𑌾𑌨𑍇 𑌸𑌤𑌿 𑌬𑌾𑌹𑍍𑌯𑌗𑌨𑍍𑌧𑍇 ॥ 273॥
𑌅𑌨𑍍𑌤𑌃𑌶𑍍𑌰𑌿𑌤𑌾𑌨𑌨𑍍𑌤𑌦𑍁𑌰𑌨𑍍𑌤𑌵𑌾𑌸𑌨𑌾-
𑌧𑍂𑌲𑍀𑌵𑌿𑌲𑌿𑌪𑍍𑌤𑌾 𑌪𑌰𑌮𑌾𑌤𑍍𑌮𑌵𑌾𑌸𑌨𑌾 ।
𑌪𑍍𑌰𑌜𑍍𑌞𑌾𑌤𑌿𑌸𑌙𑍍𑌘𑌰𑍍𑌷𑌣𑌤𑍋 𑌵𑌿𑌶𑍁𑌦𑍍𑌧𑌾
𑌪𑍍𑌰𑌤𑍀𑌯𑌤𑍇 𑌚𑌨𑍍𑌦𑌨𑌗𑌨𑍍𑌧𑌵𑌤𑍍 𑌸𑍍𑌫𑍁𑌟𑌮𑍍 ॥ 274॥ (𑌪𑌾𑌠𑌭𑍇𑌦𑌃 - 𑌸𑍍𑌫𑍁𑌟𑌾)
𑌅𑌨𑌾𑌤𑍍𑌮𑌵𑌾𑌸𑌨𑌾𑌜𑌾𑌲𑍈𑌸𑍍𑌤𑌿𑌰𑍋𑌭𑍂𑌤𑌾𑌤𑍍𑌮𑌵𑌾𑌸𑌨𑌾 ।
𑌨𑌿𑌤𑍍𑌯𑌾𑌤𑍍𑌮𑌨𑌿𑌷𑍍𑌠𑌯𑌾 𑌤𑍇𑌷𑌾𑌂 𑌨𑌾𑌶𑍇 𑌭𑌾𑌤𑌿 𑌸𑍍𑌵𑌯𑌂 𑌸𑍍𑌫𑍁𑌟𑌮𑍍 ॥ 275॥ (𑌪𑌾𑌠𑌭𑍇𑌦𑌃 - 𑌸𑍍𑌫𑍁𑌟𑌾)
𑌯𑌥𑌾 𑌯𑌥𑌾 𑌪𑍍𑌰𑌤𑍍𑌯𑌗𑌵𑌸𑍍𑌥𑌿𑌤𑌂 𑌮𑌨𑌃
𑌤𑌥𑌾 𑌤𑌥𑌾 𑌮𑍁𑌞𑍍𑌚𑌤𑌿 𑌬𑌾𑌹𑍍𑌯𑌵𑌾𑌸𑌨𑌾𑌮𑍍 । (𑌪𑌾𑌠𑌭𑍇𑌦𑌃 - 𑌬𑌾𑌹𑍍𑌯𑌵𑌾𑌸𑌨𑌾𑌃)
𑌨𑌿𑌃𑌶𑍇𑌷𑌮𑍋𑌕𑍍𑌷𑍇 𑌸𑌤𑌿 𑌵𑌾𑌸𑌨𑌾𑌨𑌾𑌂
𑌆𑌤𑍍𑌮𑌾𑌨𑍁𑌭𑍂𑌤𑌿𑌃 𑌪𑍍𑌰𑌤𑌿𑌬𑌨𑍍𑌧𑌶𑍂𑌨𑍍𑌯𑌾 ॥ 276॥
𑌸𑍍𑌵𑌾𑌤𑍍𑌮𑌨𑍍𑌯𑍇𑌵 𑌸𑌦𑌾 𑌸𑍍𑌥𑌿𑌤𑍍𑌵𑌾 𑌮𑌨𑍋 𑌨𑌶𑍍𑌯𑌤𑌿 𑌯𑍋𑌗𑌿𑌨𑌃 । (𑌪𑌾𑌠𑌭𑍇𑌦𑌃 - 𑌸𑍍𑌥𑌿𑌤𑍍𑌯𑌾)
𑌵𑌾𑌸𑌨𑌾𑌨𑌾𑌂 𑌕𑍍𑌷𑌯𑌶𑍍𑌚𑌾𑌤𑌃 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 277॥
𑌤𑌮𑍋 𑌦𑍍𑌵𑌾𑌭𑍍𑌯𑌾𑌂 𑌰𑌜𑌃 𑌸𑌤𑍍𑌤𑍍𑌵𑌾𑌤𑍍𑌸𑌤𑍍𑌤𑍍𑌵𑌂 𑌶𑍁𑌦𑍍𑌧𑍇𑌨 𑌨𑌶𑍍𑌯𑌤𑌿 ।
𑌤𑌸𑍍𑌮𑌾𑌤𑍍𑌸𑌤𑍍𑌤𑍍𑌵𑌮𑌵𑌷𑍍𑌟𑌭𑍍𑌯 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 278॥
𑌪𑍍𑌰𑌾𑌰𑌬𑍍𑌧𑌂 𑌪𑍁𑌷𑍍𑌯𑌤𑌿 𑌵𑌪𑍁𑌰𑌿𑌤𑌿 𑌨𑌿𑌶𑍍𑌚𑌿𑌤𑍍𑌯 𑌨𑌿𑌶𑍍𑌚𑌲𑌃 ।
𑌧𑍈𑌰𑍍𑌯𑌮𑌾𑌲𑌮𑍍𑌬𑍍𑌯 𑌯𑌤𑍍𑌨𑍇𑌨 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 279॥
𑌨𑌾𑌹𑌂 𑌜𑍀𑌵𑌃 𑌪𑌰𑌂 𑌬𑍍𑌰𑌹𑍍𑌮𑍇𑌤𑍍𑌯𑌤𑌦𑍍𑌵𑍍𑌯𑌾𑌵𑍃𑌤𑍍𑌤𑌿𑌪𑍂𑌰𑍍𑌵𑌕𑌮𑍍 ।
𑌵𑌾𑌸𑌨𑌾𑌵𑍇𑌗𑌤𑌃 𑌪𑍍𑌰𑌾𑌪𑍍𑌤𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 280॥
𑌶𑍍𑌰𑍁𑌤𑍍𑌯𑌾 𑌯𑍁𑌕𑍍𑌤𑍍𑌯𑌾 𑌸𑍍𑌵𑌾𑌨𑍁𑌭𑍂𑌤𑍍𑌯𑌾 𑌜𑍍𑌞𑌾𑌤𑍍𑌵𑌾 𑌸𑌾𑌰𑍍𑌵𑌾𑌤𑍍𑌮𑍍𑌯𑌮𑌾𑌤𑍍𑌮𑌨𑌃 ।
𑌕𑍍𑌵𑌚𑌿𑌦𑌾𑌭𑌾𑌸𑌤𑌃 𑌪𑍍𑌰𑌾𑌪𑍍𑌤𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 281॥
𑌅𑌨𑌾𑌦𑌾𑌨𑌵𑌿𑌸𑌰𑍍𑌗𑌾𑌭𑍍𑌯𑌾𑌮𑍀𑌷𑌨𑍍𑌨𑌾𑌸𑍍𑌤𑌿 𑌕𑍍𑌰𑌿𑌯𑌾 𑌮𑍁𑌨𑍇𑌃 । (𑌪𑌾𑌠𑌭𑍇𑌦𑌃 - 𑌅𑌨𑍍𑌨𑌾𑌦𑌾𑌨𑌵𑌿𑌸𑌰𑍍𑌗𑌾)
𑌤𑌦𑍇𑌕𑌨𑌿𑌷𑍍𑌠𑌯𑌾 𑌨𑌿𑌤𑍍𑌯𑌂 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 282॥
𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌵𑌾𑌕𑍍𑌯𑍋𑌤𑍍𑌥𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑌤𑍍𑌵𑌬𑍋𑌧𑌤𑌃 ।
𑌬𑍍𑌰𑌹𑍍𑌮𑌣𑍍𑌯𑌾𑌤𑍍𑌮𑌤𑍍𑌵𑌦𑌾𑌰𑍍𑌢𑍍𑌯𑌾𑌯 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 283॥
𑌅𑌹𑌮𑍍𑌭𑌾𑌵𑌸𑍍𑌯 𑌦𑍇𑌹𑍇𑌽𑌸𑍍𑌮𑌿𑌨𑍍𑌨𑌿𑌃𑌶𑍇𑌷𑌵𑌿𑌲𑌯𑌾𑌵𑌧𑌿 ।
𑌸𑌾𑌵𑌧𑌾𑌨𑍇𑌨 𑌯𑍁𑌕𑍍𑌤𑌾𑌤𑍍𑌮𑌾 𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 284॥
𑌪𑍍𑌰𑌤𑍀𑌤𑌿𑌰𑍍𑌜𑍀𑌵𑌜𑌗𑌤𑍋𑌃 𑌸𑍍𑌵𑌪𑍍𑌨𑌵𑌦𑍍𑌭𑌾𑌤𑌿 𑌯𑌾𑌵𑌤𑌾 ।
𑌤𑌾𑌵𑌨𑍍𑌨𑌿𑌰𑌨𑍍𑌤𑌰𑌂 𑌵𑌿𑌦𑍍𑌵𑌨𑍍𑌸𑍍𑌵𑌾𑌧𑍍𑌯𑌾𑌸𑌾𑌪𑌨𑌯𑌂 𑌕𑍁𑌰𑍁 ॥ 285॥
𑌨𑌿𑌦𑍍𑌰𑌾𑌯𑌾 𑌲𑍋𑌕𑌵𑌾𑌰𑍍𑌤𑌾𑌯𑌾𑌃 𑌶𑌬𑍍𑌦𑌾𑌦𑍇𑌰𑌪𑌿 𑌵𑌿𑌸𑍍𑌮𑍃𑌤𑍇𑌃 ।
𑌕𑍍𑌵𑌚𑌿𑌨𑍍𑌨𑌾𑌵𑌸𑌰𑌂 𑌦𑌤𑍍𑌤𑍍𑌵𑌾 𑌚𑌿𑌨𑍍𑌤𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌨𑌿 ॥ 286॥
𑌮𑌾𑌤𑌾𑌪𑌿𑌤𑍍𑌰𑍋𑌰𑍍𑌮𑌲𑍋𑌦𑍍𑌭𑍂𑌤𑌂 𑌮𑌲𑌮𑌾𑌂𑌸𑌮𑌯𑌂 𑌵𑌪𑍁𑌃 ।
𑌤𑍍𑌯𑌕𑍍𑌤𑍍𑌵𑌾 𑌚𑌾𑌣𑍍𑌡𑌾𑌲𑌵𑌦𑍍𑌦𑍂𑌰𑌂 𑌬𑍍𑌰𑌹𑍍𑌮𑍀𑌭𑍂𑌯 𑌕𑍃𑌤𑍀 𑌭𑌵 ॥ 287॥
𑌘𑌟𑌾𑌕𑌾𑌶𑌂 𑌮𑌹𑌾𑌕𑌾𑌶 𑌇𑌵𑌾𑌤𑍍𑌮𑌾𑌨𑌂 𑌪𑌰𑌾𑌤𑍍𑌮𑌨𑌿 ।
𑌵𑌿𑌲𑌾𑌪𑍍𑌯𑌾𑌖𑌣𑍍𑌡𑌭𑌾𑌵𑍇𑌨 𑌤𑍂𑌷𑍍𑌣𑍀 𑌭𑌵 𑌸𑌦𑌾 𑌮𑍁𑌨𑍇 ॥ 288॥ (𑌪𑌾𑌠𑌭𑍇𑌦𑌃 - 𑌤𑍂𑌷𑍍𑌣𑍀𑌂)
𑌸𑍍𑌵𑌪𑍍𑌰𑌕𑌾𑌶𑌮𑌧𑌿𑌷𑍍𑌠𑌾𑌨𑌂 𑌸𑍍𑌵𑌯𑌮𑍍𑌭𑍂𑌯 𑌸𑌦𑌾𑌤𑍍𑌮𑌨𑌾 ।
𑌬𑍍𑌰𑌹𑍍𑌮𑌾𑌣𑍍𑌡𑌮𑌪𑌿 𑌪𑌿𑌣𑍍𑌡𑌾𑌣𑍍𑌡𑌂 𑌤𑍍𑌯𑌜𑍍𑌯𑌤𑌾𑌂 𑌮𑌲𑌭𑌾𑌣𑍍𑌡𑌵𑌤𑍍 ॥ 289॥
𑌚𑌿𑌦𑌾𑌤𑍍𑌮𑌨𑌿 𑌸𑌦𑌾𑌨𑌨𑍍𑌦𑍇 𑌦𑍇𑌹𑌾𑌰𑍂𑌢𑌾𑌮𑌹𑌨𑍍𑌧𑌿𑌯𑌮𑍍 ।
𑌨𑌿𑌵𑍇𑌶𑍍𑌯 𑌲𑌿𑌙𑍍𑌗𑌮𑍁𑌤𑍍𑌸𑍃𑌜𑍍𑌯 𑌕𑍇𑌵𑌲𑍋 𑌭𑌵 𑌸𑌰𑍍𑌵𑌦𑌾 ॥ 290॥
𑌯𑌤𑍍𑌰𑍈𑌷 𑌜𑌗𑌦𑌾𑌭𑌾𑌸𑍋 𑌦𑌰𑍍𑌪𑌣𑌾𑌨𑍍𑌤𑌃 𑌪𑍁𑌰𑌂 𑌯𑌥𑌾 ।
𑌤𑌦𑍍𑌬𑍍𑌰𑌹𑍍𑌮𑌾𑌹𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌕𑍃𑌤𑌕𑍃𑌤𑍍𑌯𑍋 𑌭𑌵𑌿𑌷𑍍𑌯𑌸𑌿 ॥ 291॥
𑌯𑌤𑍍𑌸𑌤𑍍𑌯𑌭𑍂𑌤𑌂 𑌨𑌿𑌜𑌰𑍂𑌪𑌮𑌾𑌦𑍍𑌯𑌂
𑌚𑌿𑌦𑌦𑍍𑌵𑌯𑌾𑌨𑌨𑍍𑌦𑌮𑌰𑍂𑌪𑌮𑌕𑍍𑌰𑌿𑌯𑌮𑍍 ।
𑌤𑌦𑍇𑌤𑍍𑌯 𑌮𑌿𑌥𑍍𑌯𑌾𑌵𑌪𑍁𑌰𑍁𑌤𑍍𑌸𑍃𑌜𑍇𑌤 (𑌪𑌾𑌠𑌭𑍇𑌦𑌃 - 𑌸𑍃𑌜𑍈𑌤)
𑌶𑍈𑌲𑍂𑌷𑌵𑌦𑍍𑌵𑍇𑌷𑌮𑍁𑌪𑌾𑌤𑍍𑌤𑌮𑌾𑌤𑍍𑌮𑌨𑌃 ॥ 292॥
𑌸𑌰𑍍𑌵𑌾𑌤𑍍𑌮𑌨𑌾 𑌦𑍃𑌶𑍍𑌯𑌮𑌿𑌦𑌂 𑌮𑍃𑌷𑍈𑌵
𑌨𑍈𑌵𑌾𑌹𑌮𑌰𑍍𑌥𑌃 𑌕𑍍𑌷𑌣𑌿𑌕𑌤𑍍𑌵𑌦𑌰𑍍𑌶𑌨𑌾𑌤𑍍 ।
𑌜𑌾𑌨𑌾𑌮𑍍𑌯𑌹𑌂 𑌸𑌰𑍍𑌵𑌮𑌿𑌤𑌿 𑌪𑍍𑌰𑌤𑍀𑌤𑌿𑌃
𑌕𑍁𑌤𑍋𑌽𑌹𑌮𑌾𑌦𑍇𑌃 𑌕𑍍𑌷𑌣𑌿𑌕𑌸𑍍𑌯 𑌸𑌿𑌧𑍍𑌯𑍇𑌤𑍍 ॥ 293॥
𑌅𑌹𑌮𑍍𑌪𑌦𑌾𑌰𑍍𑌥𑌸𑍍𑌤𑍍𑌵𑌹𑌮𑌾𑌦𑌿𑌸𑌾𑌕𑍍𑌷𑍀
𑌨𑌿𑌤𑍍𑌯𑌂 𑌸𑍁𑌷𑍁𑌪𑍍𑌤𑌾𑌵𑌪𑌿 𑌭𑌾𑌵𑌦𑌰𑍍𑌶𑌨𑌾𑌤𑍍 ।
𑌬𑍍𑌰𑍂𑌤𑍇 𑌹𑍍𑌯𑌜𑍋 𑌨𑌿𑌤𑍍𑌯 𑌇𑌤𑌿 𑌶𑍍𑌰𑍁𑌤𑌿𑌃 𑌸𑍍𑌵𑌯𑌂
𑌤𑌤𑍍𑌪𑍍𑌰𑌤𑍍𑌯𑌗𑌾𑌤𑍍𑌮𑌾 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌃 ॥ 294॥
𑌵𑌿𑌕𑌾𑌰𑌿𑌣𑌾𑌂 𑌸𑌰𑍍𑌵𑌵𑌿𑌕𑌾𑌰𑌵𑍇𑌤𑍍𑌤𑌾
𑌨𑌿𑌤𑍍𑌯𑌾𑌵𑌿𑌕𑌾𑌰𑍋 𑌭𑌵𑌿𑌤𑍁𑌂 𑌸𑌮𑌰𑍍𑌹𑌤𑌿 । (𑌪𑌾𑌠𑌭𑍇𑌦𑌃 - 𑌨𑌿𑌤𑍍𑌯𑍋𑌽𑌵𑌿𑌕𑌾𑌰𑍋)
𑌮𑌨𑍋𑌰𑌥𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌿𑌷𑍁 𑌸𑍍𑌫𑍁𑌟𑌂
𑌪𑍁𑌨𑌃 𑌪𑍁𑌨𑌰𑍍𑌦𑍃𑌷𑍍𑌟𑌮𑌸𑌤𑍍𑌤𑍍𑌵𑌮𑍇𑌤𑌯𑍋𑌃 ॥ 295॥
𑌅𑌤𑍋𑌽𑌭𑌿𑌮𑌾𑌨𑌂 𑌤𑍍𑌯𑌜 𑌮𑌾𑌂𑌸𑌪𑌿𑌣𑍍𑌡𑍇
𑌪𑌿𑌣𑍍𑌡𑌾𑌭𑌿𑌮𑌾𑌨𑌿𑌨𑍍𑌯𑌪𑌿 𑌬𑍁𑌦𑍍𑌧𑌿𑌕𑌲𑍍𑌪𑌿𑌤𑍇 ।
𑌕𑌾𑌲𑌤𑍍𑌰𑌯𑌾𑌬𑌾𑌧𑍍𑌯𑌮𑌖𑌣𑍍𑌡𑌬𑍋𑌧𑌂
𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑍁𑌪𑍈𑌹𑌿 𑌶𑌾𑌨𑍍𑌤𑌿𑌮𑍍 ॥ 296॥
𑌤𑍍𑌯𑌜𑌾𑌭𑌿𑌮𑌾𑌨𑌂 𑌕𑍁𑌲𑌗𑍋𑌤𑍍𑌰𑌨𑌾𑌮-
𑌰𑍂𑌪𑌾𑌶𑍍𑌰𑌮𑍇𑌷𑍍𑌵𑌾𑌰𑍍𑌦𑍍𑌰𑌶𑌵𑌾𑌶𑍍𑌰𑌿𑌤𑍇𑌷𑍁 ।
𑌲𑌿𑌙𑍍𑌗𑌸𑍍𑌯 𑌧𑌰𑍍𑌮𑌾𑌨𑌪𑌿 𑌕𑌰𑍍𑌤𑍃𑌤𑌾𑌦𑍀𑌂-
𑌸𑍍𑌤𑍍𑌯𑌕𑍍𑌤𑍍𑌵𑌾 𑌭𑌵𑌾𑌖𑌣𑍍𑌡𑌸𑍁𑌖𑌸𑍍𑌵𑌰𑍂𑌪𑌃 ॥ 297॥
𑌸𑌨𑍍𑌤𑍍𑌯𑌨𑍍𑌯𑍇 𑌪𑍍𑌰𑌤𑌿𑌬𑌨𑍍𑌧𑌾𑌃 𑌪𑍁𑌂𑌸𑌃 𑌸𑌂𑌸𑌾𑌰𑌹𑍇𑌤𑌵𑍋 𑌦𑍃𑌷𑍍𑌟𑌾𑌃 ।
𑌤𑍇𑌷𑌾𑌮𑍇𑌵𑌂 𑌮𑍂𑌲𑌂 𑌪𑍍𑌰𑌥𑌮𑌵𑌿𑌕𑌾𑌰𑍋 𑌭𑌵𑌤𑍍𑌯𑌹𑌙𑍍𑌕𑌾𑌰𑌃 ॥ 298॥ (𑌪𑌾𑌠𑌭𑍇𑌦𑌃 - 𑌤𑍇𑌷𑌾𑌮𑍇𑌷𑌾𑌂)
𑌯𑌾𑌵𑌤𑍍𑌸𑍍𑌯𑌾𑌤𑍍𑌸𑍍𑌵𑌸𑍍𑌯 𑌸𑌮𑍍𑌬𑌨𑍍𑌧𑍋𑌽𑌹𑌙𑍍𑌕𑌾𑌰𑍇𑌣 𑌦𑍁𑌰𑌾𑌤𑍍𑌮𑌨𑌾 ।
𑌤𑌾𑌵𑌨𑍍𑌨 𑌲𑍇𑌶𑌮𑌾𑌤𑍍𑌰𑌾𑌪𑌿 𑌮𑍁𑌕𑍍𑌤𑌿𑌵𑌾𑌰𑍍𑌤𑌾 𑌵𑌿𑌲𑌕𑍍𑌷𑌣𑌾 ॥ 299॥
𑌅𑌹𑌙𑍍𑌕𑌾𑌰𑌗𑍍𑌰𑌹𑌾𑌨𑍍𑌮𑍁𑌕𑍍𑌤𑌃 𑌸𑍍𑌵𑌰𑍂𑌪𑌮𑍁𑌪𑌪𑌦𑍍𑌯𑌤𑍇 ।
𑌚𑌨𑍍𑌦𑍍𑌰𑌵𑌦𑍍𑌵𑌿𑌮𑌲𑌃 𑌪𑍂𑌰𑍍𑌣𑌃 𑌸𑌦𑌾𑌨𑌨𑍍𑌦𑌃 𑌸𑍍𑌵𑌯𑌮𑍍𑌪𑍍𑌰𑌭𑌃 ॥ 300॥
𑌯𑍋 𑌵𑌾 𑌪𑍁𑌰𑍇 𑌸𑍋𑌽𑌹𑌮𑌿𑌤𑌿 𑌪𑍍𑌰𑌤𑍀𑌤𑍋 (𑌪𑌾𑌠𑌭𑍇𑌦𑌃 - 𑌪𑍁𑌰𑍈𑌷𑍋𑌽𑌹𑌮𑌿𑌤𑌿)
𑌬𑍁𑌦𑍍𑌧𑍍𑌯𑌾 𑌪𑍍𑌰𑌕𑍍𑌲𑍃𑌪𑍍𑌤𑌸𑍍𑌤𑌮𑌸𑌾𑌽𑌤𑌿𑌮𑍂𑌢𑌯𑌾 । (𑌪𑌾𑌠𑌭𑍇𑌦𑌃 - 𑌬𑍁𑌦𑍍𑌧𑍍𑌯𑌾𑌽𑌵𑌿𑌵𑌿𑌕𑍍𑌤𑌸𑍍𑌤𑌮𑌸𑌾)
𑌤𑌸𑍍𑌯𑍈𑌵 𑌨𑌿𑌃𑌶𑍇𑌷𑌤𑌯𑌾 𑌵𑌿𑌨𑌾𑌶𑍇
𑌬𑍍𑌰𑌹𑍍𑌮𑌾𑌤𑍍𑌮𑌭𑌾𑌵𑌃 𑌪𑍍𑌰𑌤𑌿𑌬𑌨𑍍𑌧𑌶𑍂𑌨𑍍𑌯𑌃 ॥ 301॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌨𑌿𑌧𑌿𑌰𑍍𑌮𑌹𑌾𑌬𑌲𑌵𑌤𑌾𑌽𑌹𑌙𑍍𑌕𑌾𑌰𑌘𑍋𑌰𑌾𑌹𑌿𑌨𑌾
𑌸𑌂𑌵𑍇𑌷𑍍𑌟𑍍𑌯𑌾𑌤𑍍𑌮𑌨𑌿 𑌰𑌕𑍍𑌷𑍍𑌯𑌤𑍇 𑌗𑍁𑌣𑌮𑌯𑍈𑌶𑍍𑌚𑌣𑍍𑌡𑍇𑌸𑍍𑌤𑍍𑌰𑌿𑌭𑌿𑌰𑍍𑌮𑌸𑍍𑌤𑌕𑍈𑌃 (𑌪𑌾𑌠𑌭𑍇𑌦𑌃 - 𑌚𑌣𑍍𑌡𑍈)
𑌵𑌿𑌜𑍍𑌞𑌾𑌨𑌾𑌖𑍍𑌯𑌮𑌹𑌾𑌸𑌿𑌨𑌾 𑌶𑍍𑌰𑍁𑌤𑌿𑌮𑌤𑌾 𑌵𑌿𑌚𑍍𑌛𑌿𑌦𑍍𑌯 𑌶𑍀𑌰𑍍𑌷𑌤𑍍𑌰𑌯𑌂 (𑌪𑌾𑌠𑌭𑍇𑌦𑌃 - 𑌦𑍍𑌯𑍁𑌤𑌿𑌮𑌤𑌾)
𑌨𑌿𑌰𑍍𑌮𑍂𑌲𑍍𑌯𑌾𑌹𑌿𑌮𑌿𑌮𑌂 𑌨𑌿𑌧𑌿𑌂 𑌸𑍁𑌖𑌕𑌰𑌂 𑌧𑍀𑌰𑍋𑌽𑌨𑍁𑌭𑍋𑌕𑍍𑌤𑍁𑌙𑍍𑌕𑍍𑌷𑌮𑌃 ॥ 302॥
𑌯𑌾𑌵𑌦𑍍𑌵𑌾 𑌯𑌤𑍍𑌕𑌿𑌞𑍍𑌚𑌿𑌦𑍍𑌵𑌿𑌷𑌦𑍋𑌷𑌸𑍍𑌫𑍂𑌰𑍍𑌤𑌿𑌰𑌸𑍍𑌤𑌿 𑌚𑍇𑌦𑍍𑌦𑍇𑌹𑍇 ।
𑌕𑌥𑌮𑌾𑌰𑍋𑌗𑍍𑌯𑌾𑌯 𑌭𑌵𑍇𑌤𑍍𑌤𑌦𑍍𑌵𑌦𑌹𑌨𑍍𑌤𑌾𑌪𑌿 𑌯𑍋𑌗𑌿𑌨𑍋 𑌮𑍁𑌕𑍍𑌤𑍍𑌯𑍈 ॥ 303॥
𑌅𑌹𑌮𑍋𑌽𑌤𑍍𑌯𑌨𑍍𑌤𑌨𑌿𑌵𑍃𑌤𑍍𑌤𑍍𑌯𑌾 𑌤𑌤𑍍𑌕𑍃𑌤𑌨𑌾𑌨𑌾𑌵𑌿𑌕𑌲𑍍𑌪𑌸𑌂𑌹𑍃𑌤𑍍𑌯𑌾 ।
𑌪𑍍𑌰𑌤𑍍𑌯𑌕𑍍𑌤𑌤𑍍𑌤𑍍𑌵𑌵𑌿𑌵𑍇𑌕𑌾𑌦𑌿𑌦𑌮𑌹𑌮𑌸𑍍𑌮𑍀𑌤𑌿 𑌵𑌿𑌨𑍍𑌦𑌤𑍇 𑌤𑌤𑍍𑌤𑍍𑌵𑌮𑍍 ॥ 304॥ (𑌪𑌾𑌠𑌭𑍇𑌦𑌃 - 𑌵𑌿𑌵𑍇𑌕𑌾𑌦𑌯𑌮𑍍)
𑌅𑌹𑌙𑍍𑌕𑌾𑌰𑍇 𑌕𑌰𑍍𑌤𑌰𑍍𑌯𑌹𑌮𑌿𑌤𑌿 𑌮𑌤𑌿𑌂 𑌮𑍁𑌞𑍍𑌚 𑌸𑌹𑌸𑌾 (𑌪𑌾𑌠𑌭𑍇𑌦𑌃 - 𑌅𑌹𑌙𑍍𑌕𑌰𑍍𑌤𑌰𑍍𑌯𑌸𑍍𑌮𑌿𑌨𑍍𑌨𑌹𑌮𑌿𑌤𑌿)
𑌵𑌿𑌕𑌾𑌰𑌾𑌤𑍍𑌮𑌨𑍍𑌯𑌾𑌤𑍍𑌮𑌪𑍍𑌰𑌤𑌿𑌫𑌲𑌜𑍁𑌷𑌿 𑌸𑍍𑌵𑌸𑍍𑌥𑌿𑌤𑌿𑌮𑍁𑌷𑌿 ।
𑌯𑌦𑌧𑍍𑌯𑌾𑌸𑌾𑌤𑍍𑌪𑍍𑌰𑌾𑌪𑍍𑌤𑌾 𑌜𑌨𑌿𑌮𑍃𑌤𑌿𑌜𑌰𑌾𑌦𑍁𑌃𑌖𑌬𑌹𑍁𑌲𑌾
𑌪𑍍𑌰𑌤𑍀𑌚𑌶𑍍𑌚𑌿𑌨𑍍𑌮𑍂𑌰𑍍𑌤𑍇𑌸𑍍𑌤𑌵 𑌸𑍁𑌖𑌤𑌨𑍋𑌃 𑌸𑌂𑌸𑍃𑌤𑌿𑌰𑌿𑌯𑌮𑍍 ॥ 305॥
𑌸𑌦𑍈𑌕𑌰𑍂𑌪𑌸𑍍𑌯 𑌚𑌿𑌦𑌾𑌤𑍍𑌮𑌨𑍋 𑌵𑌿𑌭𑍋-
𑌰𑌾𑌨𑌨𑍍𑌦𑌮𑍂𑌰𑍍𑌤𑍇𑌰𑌨𑌵𑌦𑍍𑌯𑌕𑍀𑌰𑍍𑌤𑍇𑌃 ।
𑌨𑍈𑌵𑌾𑌨𑍍𑌯𑌥𑌾 𑌕𑍍𑌵𑌾𑌪𑍍𑌯𑌵𑌿𑌕𑌾𑌰𑌿𑌣𑌸𑍍𑌤𑍇
𑌵𑌿𑌨𑌾𑌹𑌮𑌧𑍍𑌯𑌾𑌸𑌮𑌮𑍁𑌷𑍍𑌯 𑌸𑌂𑌸𑍃𑌤𑌿𑌃 ॥ 306॥
𑌤𑌸𑍍𑌮𑌾𑌦𑌹𑌙𑍍𑌕𑌾𑌰𑌮𑌿𑌮𑌂 𑌸𑍍𑌵𑌶𑌤𑍍𑌰𑍁𑌂
𑌭𑍋𑌕𑍍𑌤𑍁𑌰𑍍𑌗𑌲𑍇 𑌕𑌣𑍍𑌟𑌕𑌵𑌤𑍍𑌪𑍍𑌰𑌤𑍀𑌤𑌮𑍍 ।
𑌵𑌿𑌚𑍍𑌛𑌿𑌦𑍍𑌯 𑌵𑌿𑌜𑍍𑌞𑌾𑌨𑌮𑌹𑌾𑌸𑌿𑌨𑌾 𑌸𑍍𑌫𑍁𑌟𑌂
𑌭𑍁𑌙𑍍𑌕𑍍𑌷𑍍𑌵𑌾𑌤𑍍𑌮𑌸𑌾𑌮𑍍𑌰𑌾𑌜𑍍𑌯𑌸𑍁𑌖𑌂 𑌯𑌥𑍇𑌷𑍍𑌟𑌮𑍍 ॥ 307॥
𑌤𑌤𑍋𑌽𑌹𑌮𑌾𑌦𑍇𑌰𑍍𑌵𑌿𑌨𑌿𑌵𑌰𑍍𑌤𑍍𑌯 𑌵𑍃𑌤𑍍𑌤𑌿𑌂
𑌸𑌨𑍍𑌤𑍍𑌯𑌕𑍍𑌤𑌰𑌾𑌗𑌃 𑌪𑌰𑌮𑌾𑌰𑍍𑌥𑌲𑌾𑌭𑌾𑌤𑍍 ।
𑌤𑍂𑌷𑍍𑌣𑍀𑌂 𑌸𑌮𑌾𑌸𑍍𑌸𑍍𑌵𑌾𑌤𑍍𑌮𑌸𑍁𑌖𑌾𑌨𑍁𑌭𑍂𑌤𑍍𑌯𑌾
𑌪𑍂𑌰𑍍𑌣𑌾𑌤𑍍𑌮𑌨𑌾 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑌃 ॥ 308॥
𑌸𑌮𑍂𑌲𑌕𑍃𑌤𑍍𑌤𑍋𑌽𑌪𑌿 𑌮𑌹𑌾𑌨𑌹𑌂 𑌪𑍁𑌨𑌃
𑌵𑍍𑌯𑍁𑌲𑍍𑌲𑍇𑌖𑌿𑌤𑌃 𑌸𑍍𑌯𑌾𑌦𑍍𑌯𑌦𑌿 𑌚𑍇𑌤𑌸𑌾 𑌕𑍍𑌷𑌣𑌮𑍍 ।
𑌸𑌞𑍍𑌜𑍀𑌵𑍍𑌯 𑌵𑌿𑌕𑍍𑌷𑍇𑌪𑌶𑌤𑌂 𑌕𑌰𑍋𑌤𑌿
𑌨𑌭𑌸𑍍𑌵𑌤𑌾 𑌪𑍍𑌰𑌾𑌵𑍃𑌷𑌿 𑌵𑌾𑌰𑌿𑌦𑍋 𑌯𑌥𑌾 ॥ 309॥
𑌨𑌿𑌗𑍃𑌹𑍍𑌯 𑌶𑌤𑍍𑌰𑍋𑌰𑌹𑌮𑍋𑌽𑌵𑌕𑌾𑌶𑌃
𑌕𑍍𑌵𑌚𑌿𑌨𑍍𑌨 𑌦𑍇𑌯𑍋 𑌵𑌿𑌷𑌯𑌾𑌨𑍁𑌚𑌿𑌨𑍍𑌤𑌯𑌾 ।
𑌸 𑌏𑌵 𑌸𑌞𑍍𑌜𑍀𑌵𑌨𑌹𑍇𑌤𑍁𑌰𑌸𑍍𑌯
𑌪𑍍𑌰𑌕𑍍𑌷𑍀𑌣𑌜𑌮𑍍𑌬𑍀𑌰𑌤𑌰𑍋𑌰𑌿𑌵𑌾𑌮𑍍𑌬𑍁 ॥ 310॥
𑌦𑍇𑌹𑌾𑌤𑍍𑌮𑌨𑌾 𑌸𑌂𑌸𑍍𑌥𑌿𑌤 𑌏𑌵 𑌕𑌾𑌮𑍀
𑌵𑌿𑌲𑌕𑍍𑌷𑌣𑌃 𑌕𑌾𑌮𑌯𑌿𑌤𑌾 𑌕𑌥𑌂 𑌸𑍍𑌯𑌾𑌤𑍍 ।
𑌅𑌤𑍋𑌽𑌰𑍍𑌥𑌸𑌨𑍍𑌧𑌾𑌨𑌪𑌰𑌤𑍍𑌵𑌮𑍇𑌵
𑌭𑍇𑌦𑌪𑍍𑌰𑌸𑌕𑍍𑌤𑍍𑌯𑌾 𑌭𑌵𑌬𑌨𑍍𑌧𑌹𑍇𑌤𑍁𑌃 ॥ 311॥
𑌕𑌾𑌰𑍍𑌯𑌪𑍍𑌰𑌵𑌰𑍍𑌧𑌨𑌾𑌦𑍍𑌬𑍀𑌜𑌪𑍍𑌰𑌵𑍃𑌦𑍍𑌧𑌿𑌃 𑌪𑌰𑌿𑌦𑍃𑌶𑍍𑌯𑌤𑍇 ।
𑌕𑌾𑌰𑍍𑌯𑌨𑌾𑌶𑌾𑌦𑍍𑌬𑍀𑌜𑌨𑌾𑌶𑌸𑍍𑌤𑌸𑍍𑌮𑌾𑌤𑍍𑌕𑌾𑌰𑍍𑌯𑌂 𑌨𑌿𑌰𑍋𑌧𑌯𑍇𑌤𑍍 ॥ 312॥
𑌵𑌾𑌸𑌨𑌾𑌵𑍃𑌦𑍍𑌧𑌿𑌤𑌃 𑌕𑌾𑌰𑍍𑌯𑌂 𑌕𑌾𑌰𑍍𑌯𑌵𑍃𑌦𑍍𑌧𑍍𑌯𑌾 𑌚 𑌵𑌾𑌸𑌨𑌾 ।
𑌵𑌰𑍍𑌧𑌤𑍇 𑌸𑌰𑍍𑌵𑌥𑌾 𑌪𑍁𑌂𑌸𑌃 𑌸𑌂𑌸𑌾𑌰𑍋 𑌨 𑌨𑌿𑌵𑌰𑍍𑌤𑌤𑍇 ॥ 313॥
𑌸𑌂𑌸𑌾𑌰𑌬𑌨𑍍𑌧𑌵𑌿𑌚𑍍𑌛𑌿𑌤𑍍𑌤𑍍𑌯𑍈 𑌤𑌦𑍍 𑌦𑍍𑌵𑌯𑌂 𑌪𑍍𑌰𑌦𑌹𑍇𑌦𑍍𑌯𑌤𑌿𑌃 ।
𑌵𑌾𑌸𑌨𑌾𑌵𑍃𑌦𑍍𑌧𑌿𑌰𑍇𑌤𑌾𑌭𑍍𑌯𑌾𑌂 𑌚𑌿𑌨𑍍𑌤𑌯𑌾 𑌕𑍍𑌰𑌿𑌯𑌯𑌾 𑌬𑌹𑌿𑌃 ॥ 314॥ (𑌪𑌾𑌠𑌭𑍇𑌦𑌃 - 𑌵𑌾𑌸𑌨𑌾 𑌪𑍍𑌰𑍇𑌰𑍍𑌯𑌤𑍇 𑌹𑍍𑌯𑌨𑍍𑌤𑌃)
𑌤𑌾𑌭𑍍𑌯𑌾𑌂 𑌪𑍍𑌰𑌵𑌰𑍍𑌧𑌮𑌾𑌨𑌾 𑌸𑌾 𑌸𑍂𑌤𑍇 𑌸𑌂𑌸𑍃𑌤𑌿𑌮𑌾𑌤𑍍𑌮𑌨𑌃 ।
𑌤𑍍𑌰𑌯𑌾𑌣𑌾𑌂 𑌚 𑌕𑍍𑌷𑌯𑍋𑌪𑌾𑌯𑌃 𑌸𑌰𑍍𑌵𑌾𑌵𑌸𑍍𑌥𑌾𑌸𑍁 𑌸𑌰𑍍𑌵𑌦𑌾 ॥ 315॥
𑌸𑌰𑍍𑌵𑌤𑍍𑌰 𑌸𑌰𑍍𑌵𑌤𑌃 𑌸𑌰𑍍𑌵𑌬𑍍𑌰𑌹𑍍𑌮𑌮𑌾𑌤𑍍𑌰𑌾𑌵𑌲𑍋𑌕𑌨𑍈𑌃 । (𑌪𑌾𑌠𑌭𑍇𑌦𑌃 - 𑌮𑌾𑌤𑍍𑌰𑌾𑌵𑌲𑍋𑌕𑌨𑌮𑍍)
𑌸𑌦𑍍𑌭𑌾𑌵𑌵𑌾𑌸𑌨𑌾𑌦𑌾𑌰𑍍𑌢𑍍𑌯𑌾𑌤𑍍𑌤𑌤𑍍𑌤𑍍𑌰𑌯𑌂 𑌲𑌯𑌮𑌶𑍍𑌨𑍁𑌤𑍇 ॥ 316॥
𑌕𑍍𑌰𑌿𑌯𑌾𑌨𑌾𑌶𑍇 𑌭𑌵𑍇𑌚𑍍𑌚𑌿𑌨𑍍𑌤𑌾𑌨𑌾𑌶𑍋𑌽𑌸𑍍𑌮𑌾𑌦𑍍𑌵𑌾𑌸𑌨𑌾𑌕𑍍𑌷𑌯𑌃 ।
𑌵𑌾𑌸𑌨𑌾𑌪𑍍𑌰𑌕𑍍𑌷𑌯𑍋 𑌮𑍋𑌕𑍍𑌷𑌃 𑌸𑌾 𑌜𑍀𑌵𑌨𑍍𑌮𑍁𑌕𑍍𑌤𑌿𑌰𑌿𑌷𑍍𑌯𑌤𑍇 ॥ 317॥ (𑌪𑌾𑌠𑌭𑍇𑌦𑌃 - 𑌸)
𑌸𑌦𑍍𑌵𑌾𑌸𑌨𑌾𑌸𑍍𑌫𑍂𑌰𑍍𑌤𑌿𑌵𑌿𑌜𑍃𑌮𑍍𑌭𑌣𑍇 𑌸𑌤𑌿
𑌹𑍍𑌯𑌸𑍗 𑌵𑌿𑌲𑍀𑌨𑌾𑌪𑍍𑌯𑌹𑌮𑌾𑌦𑌿𑌵𑌾𑌸𑌨𑌾 । (𑌪𑌾𑌠𑌭𑍇𑌦𑌃 - 𑌵𑌿𑌲𑍀𑌨𑌾 𑌤𑍍𑌵𑌹𑌮𑌾𑌦𑌿𑌵𑌾𑌸𑌨𑌾)
𑌅𑌤𑌿𑌪𑍍𑌰𑌕𑍃𑌷𑍍𑌟𑌾𑌪𑍍𑌯𑌰𑍁𑌣𑌪𑍍𑌰𑌭𑌾𑌯𑌾𑌂
𑌵𑌿𑌲𑍀𑌯𑌤𑍇 𑌸𑌾𑌧𑍁 𑌯𑌥𑌾 𑌤𑌮𑌿𑌸𑍍𑌰𑌾 ॥ 318॥
𑌤𑌮𑌸𑍍𑌤𑌮𑌃𑌕𑌾𑌰𑍍𑌯𑌮𑌨𑌰𑍍𑌥𑌜𑌾𑌲𑌂
𑌨 𑌦𑍃𑌶𑍍𑌯𑌤𑍇 𑌸𑌤𑍍𑌯𑍁𑌦𑌿𑌤𑍇 𑌦𑌿𑌨𑍇𑌶𑍇 ।
𑌤𑌥𑌾𑌽𑌦𑍍𑌵𑌯𑌾𑌨𑌨𑍍𑌦𑌰𑌸𑌾𑌨𑍁𑌭𑍂𑌤𑍗
𑌨𑍈𑌵𑌾𑌸𑍍𑌤𑌿 𑌬𑌨𑍍𑌧𑍋 𑌨 𑌚 𑌦𑍁𑌃𑌖𑌗𑌨𑍍𑌧𑌃 ॥ 319॥
𑌦𑍃𑌶𑍍𑌯𑌂 𑌪𑍍𑌰𑌤𑍀𑌤𑌂 𑌪𑍍𑌰𑌵𑌿𑌲𑌾𑌪𑌯𑌨𑍍𑌸𑌨𑍍 (𑌪𑌾𑌠𑌭𑍇𑌦𑌃 - 𑌪𑍍𑌰𑌵𑌿𑌲𑌾𑌪𑌯𑌨𑍍𑌸𑍍𑌵𑌯𑌂)
𑌸𑌨𑍍𑌮𑌾𑌤𑍍𑌰𑌮𑌾𑌨𑌨𑍍𑌦𑌘𑌨𑌂 𑌵𑌿𑌭𑌾𑌵𑌯𑌨𑍍 ।
𑌸𑌮𑌾𑌹𑌿𑌤𑌃 𑌸𑌨𑍍𑌬𑌹𑌿𑌰𑌨𑍍𑌤𑌰𑌂 𑌵𑌾
𑌕𑌾𑌲𑌂 𑌨𑌯𑍇𑌥𑌾𑌃 𑌸𑌤𑌿 𑌕𑌰𑍍𑌮𑌬𑌨𑍍𑌧𑍇 ॥ 320॥
𑌪𑍍𑌰𑌮𑌾𑌦𑍋 𑌬𑍍𑌰𑌹𑍍𑌮𑌨𑌿𑌷𑍍𑌠𑌾𑌯𑌾𑌂 𑌨 𑌕𑌰𑍍𑌤𑌵𑍍𑌯𑌃 𑌕𑌦𑌾𑌚𑌨 ।
𑌪𑍍𑌰𑌮𑌾𑌦𑍋 𑌮𑍃𑌤𑍍𑌯𑍁𑌰𑌿𑌤𑍍𑌯𑌾𑌹 𑌭𑌗𑌵𑌾𑌨𑍍𑌬𑍍𑌰𑌹𑍍𑌮𑌣𑌃 𑌸𑍁𑌤𑌃 ॥ 321॥
𑌨 𑌪𑍍𑌰𑌮𑌾𑌦𑌾𑌦𑌨𑌰𑍍𑌥𑍋𑌽𑌨𑍍𑌯𑍋 𑌜𑍍𑌞𑌾𑌨𑌿𑌨𑌃 𑌸𑍍𑌵𑌸𑍍𑌵𑌰𑍂𑌪𑌤𑌃 ।
𑌤𑌤𑍋 𑌮𑍋𑌹𑌸𑍍𑌤𑌤𑍋𑌽𑌹𑌨𑍍𑌧𑍀𑌸𑍍𑌤𑌤𑍋 𑌬𑌨𑍍𑌧𑌸𑍍𑌤𑌤𑍋 𑌵𑍍𑌯𑌥𑌾 ॥ 322॥
𑌵𑌿𑌷𑌯𑌾𑌭𑌿𑌮𑍁𑌖𑌂 𑌦𑍃𑌷𑍍𑌟𑍍𑌵𑌾 𑌵𑌿𑌦𑍍𑌵𑌾𑌂𑌸𑌮𑌪𑌿 𑌵𑌿𑌸𑍍𑌮𑍃𑌤𑌿𑌃 ।
𑌵𑌿𑌕𑍍𑌷𑍇𑌪𑌯𑌤𑌿 𑌧𑍀𑌦𑍋𑌷𑍈𑌰𑍍𑌯𑍋𑌷𑌾 𑌜𑌾𑌰𑌮𑌿𑌵 𑌪𑍍𑌰𑌿𑌯𑌮𑍍 ॥ 323॥
𑌯𑌥𑌾𑌪𑌕𑍃𑌷𑍍𑌟𑌂 𑌶𑍈𑌵𑌾𑌲𑌂 𑌕𑍍𑌷𑌣𑌮𑌾𑌤𑍍𑌰𑌂 𑌨 𑌤𑌿𑌷𑍍𑌠𑌤𑌿 ।
𑌆𑌵𑍃𑌣𑍋𑌤𑌿 𑌤𑌥𑌾 𑌮𑌾𑌯𑌾 𑌪𑍍𑌰𑌾𑌜𑍍𑌞𑌂 𑌵𑌾𑌪𑌿 𑌪𑌰𑌾𑌙𑍍𑌮𑍁𑌖𑌮𑍍 ॥ 324॥
𑌲𑌕𑍍𑌷𑍍𑌯𑌚𑍍𑌯𑍁𑌤𑌂 𑌚𑍇𑌦𑍍𑌯𑌦𑌿 𑌚𑌿𑌤𑍍𑌤𑌮𑍀𑌷𑌦𑍍
𑌬𑌹𑌿𑌰𑍍𑌮𑍁𑌖𑌂 𑌸𑌨𑍍𑌨𑌿𑌪𑌤𑍇𑌤𑍍𑌤𑌤𑌸𑍍𑌤𑌤𑌃 ।
𑌪𑍍𑌰𑌮𑌾𑌦𑌤𑌃 𑌪𑍍𑌰𑌚𑍍𑌯𑍁𑌤𑌕𑍇𑌲𑌿𑌕𑌨𑍍𑌦𑍁𑌕𑌃
𑌸𑍋𑌪𑌾𑌨𑌪𑌙𑍍𑌕𑍍𑌤𑍗 𑌪𑌤𑌿𑌤𑍋 𑌯𑌥𑌾 𑌤𑌥𑌾 ॥ 325॥
𑌵𑌿𑌷𑌯𑍇𑌷𑍍𑌵𑌾𑌵𑌿𑌶𑌚𑍍𑌚𑍇𑌤𑌃 𑌸𑌙𑍍𑌕𑌲𑍍𑌪𑌯𑌤𑌿 𑌤𑌦𑍍𑌗𑍁𑌣𑌾𑌨𑍍 ।
𑌸𑌮𑍍𑌯𑌕𑍍𑌸𑌙𑍍𑌕𑌲𑍍𑌪𑌨𑌾𑌤𑍍𑌕𑌾𑌮𑌃 𑌕𑌾𑌮𑌾𑌤𑍍𑌪𑍁𑌂𑌸𑌃 𑌪𑍍𑌰𑌵𑌰𑍍𑌤𑌨𑌮𑍍 ॥ 326॥
𑌅𑌤𑌃 𑌪𑍍𑌰𑌮𑌾𑌦𑌾𑌨𑍍𑌨 𑌪𑌰𑍋𑌽𑌸𑍍𑌤𑌿 𑌮𑍃𑌤𑍍𑌯𑍁𑌃
𑌵𑌿𑌵𑍇𑌕𑌿𑌨𑍋 𑌬𑍍𑌰𑌹𑍍𑌮𑌵𑌿𑌦𑌃 𑌸𑌮𑌾𑌧𑍗 ।
𑌸𑌮𑌾𑌹𑌿𑌤𑌃 𑌸𑌿𑌦𑍍𑌧𑌿𑌮𑍁𑌪𑍈𑌤𑌿 𑌸𑌮𑍍𑌯𑌕𑍍
𑌸𑌮𑌾𑌹𑌿𑌤𑌾𑌤𑍍𑌮𑌾 𑌭𑌵 𑌸𑌾𑌵𑌧𑌾𑌨𑌃 ॥ 327॥
𑌤𑌤𑌃 𑌸𑍍𑌵𑌰𑍂𑌪𑌵𑌿𑌭𑍍𑌰𑌂𑌶𑍋 𑌵𑌿𑌭𑍍𑌰𑌷𑍍𑌟𑌸𑍍𑌤𑍁 𑌪𑌤𑌤𑍍𑌯𑌧𑌃 ।
𑌪𑌤𑌿𑌤𑌸𑍍𑌯 𑌵𑌿𑌨𑌾 𑌨𑌾𑌶𑌂 𑌪𑍁𑌨𑌰𑍍𑌨𑌾𑌰𑍋𑌹 𑌈𑌕𑍍𑌷𑍍𑌯𑌤𑍇 ॥ 328॥
𑌸𑌙𑍍𑌕𑌲𑍍𑌪𑌂 𑌵𑌰𑍍𑌜𑌯𑍇𑌤𑍍𑌤𑌸𑍍𑌮𑌾𑌤𑍍𑌸𑌰𑍍𑌵𑌾𑌨𑌰𑍍𑌥𑌸𑍍𑌯 𑌕𑌾𑌰𑌣𑌮𑍍 ।
𑌅𑌪𑌥𑍍𑌯𑌾𑌨𑌿 𑌹𑌿 𑌵𑌸𑍍𑌤𑍂𑌨𑌿 𑌵𑍍𑌯𑌾𑌧𑌿𑌗𑍍𑌰𑌸𑍍𑌤𑍋 𑌯𑌥𑍋𑌤𑍍𑌸𑍃𑌜𑍇 ।
𑌜𑍀𑌵𑌤𑍋 𑌯𑌸𑍍𑌯 𑌕𑍈𑌵𑌲𑍍𑌯𑌂 𑌵𑌿𑌦𑍇𑌹𑍇 𑌸 𑌚 𑌕𑍇𑌵𑌲𑌃 ।
𑌯𑌤𑍍𑌕𑌿𑌞𑍍𑌚𑌿𑌤𑍍 𑌪𑌶𑍍𑌯𑌤𑍋 𑌭𑍇𑌦𑌂 𑌭𑌯𑌂 𑌬𑍍𑌰𑍂𑌤𑍇 𑌯𑌜𑍁𑌃𑌶𑍍𑌰𑍁𑌤𑌿𑌃 ॥ 329॥
𑌯𑌦𑌾 𑌕𑌦𑌾 𑌵𑌾𑌪𑌿 𑌵𑌿𑌪𑌶𑍍𑌚𑌿𑌦𑍇𑌷
𑌬𑍍𑌰𑌹𑍍𑌮𑌣𑍍𑌯𑌨𑌨𑍍𑌤𑍇𑌽𑌪𑍍𑌯𑌣𑍁𑌮𑌾𑌤𑍍𑌰𑌭𑍇𑌦𑌮𑍍 ।
𑌪𑌶𑍍𑌯𑌤𑍍𑌯𑌥𑌾𑌮𑍁𑌷𑍍𑌯 𑌭𑌯𑌂 𑌤𑌦𑍈𑌵
𑌯𑌦𑍍𑌵𑍀𑌕𑍍𑌷𑌿𑌤𑌂 𑌭𑌿𑌨𑍍𑌨𑌤𑌯𑌾 𑌪𑍍𑌰𑌮𑌾𑌦𑌾𑌤𑍍 ॥ 330॥ (𑌪𑌾𑌠𑌭𑍇𑌦𑌃 - 𑌯𑌦𑍀𑌕𑍍𑌷𑌿𑌤𑌂)
𑌶𑍍𑌰𑍁𑌤𑌿𑌸𑍍𑌮𑍃𑌤𑌿𑌨𑍍𑌯𑌾𑌯𑌶𑌤𑍈𑌰𑍍𑌨𑌿𑌷𑌿𑌦𑍍𑌧𑍇
𑌦𑍃𑌶𑍍𑌯𑍇𑌽𑌤𑍍𑌰 𑌯𑌃 𑌸𑍍𑌵𑌾𑌤𑍍𑌮𑌮𑌤𑌿𑌂 𑌕𑌰𑍋𑌤𑌿 ।
𑌉𑌪𑍈𑌤𑌿 𑌦𑍁𑌃𑌖𑍋𑌪𑌰𑌿 𑌦𑍁𑌃𑌖𑌜𑌾𑌤𑌂
𑌨𑌿𑌷𑌿𑌦𑍍𑌧𑌕𑌰𑍍𑌤𑌾 𑌸 𑌮𑌲𑌿𑌮𑍍𑌲𑍁𑌚𑍋 𑌯𑌥𑌾 ॥ 331॥
𑌸𑌤𑍍𑌯𑌾𑌭𑌿𑌸𑌨𑍍𑌧𑌾𑌨𑌰𑌤𑍋 𑌵𑌿𑌮𑍁𑌕𑍍𑌤𑍋
𑌮𑌹𑌤𑍍𑌤𑍍𑌵𑌮𑌾𑌤𑍍𑌮𑍀𑌯𑌮𑍁𑌪𑍈𑌤𑌿 𑌨𑌿𑌤𑍍𑌯𑌮𑍍 ।
𑌮𑌿𑌥𑍍𑌯𑌾𑌭𑌿𑌸𑌨𑍍𑌧𑌾𑌨𑌰𑌤𑌸𑍍𑌤𑍁 𑌨𑌶𑍍𑌯𑍇𑌦𑍍
𑌦𑍃𑌷𑍍𑌟𑌂 𑌤𑌦𑍇𑌤𑌦𑍍𑌯𑌦𑌚𑍗𑌰𑌚𑍗𑌰𑌯𑍋𑌃 ॥ 332॥ (𑌪𑌾𑌠𑌭𑍇𑌦𑌃 - 𑌚𑍋𑌰𑌚𑍋𑌰𑌯𑍋𑌃)
𑌯𑌤𑌿𑌰𑌸𑌦𑌨𑍁𑌸𑌨𑍍𑌧𑌿𑌂 𑌬𑌨𑍍𑌧𑌹𑍇𑌤𑍁𑌂 𑌵𑌿𑌹𑌾𑌯
𑌸𑍍𑌵𑌯𑌮𑌯𑌮𑌹𑌮𑌸𑍍𑌮𑍀𑌤𑍍𑌯𑌾𑌤𑍍𑌮𑌦𑍃𑌷𑍍𑌟𑍍𑌯𑍈𑌵 𑌤𑌿𑌷𑍍𑌠𑍇𑌤𑍍
𑌸𑍁𑌖𑌯𑌤𑌿 𑌨𑌨𑍁 𑌨𑌿𑌷𑍍𑌠𑌾 𑌬𑍍𑌰𑌹𑍍𑌮𑌣𑌿 𑌸𑍍𑌵𑌾𑌨𑍁𑌭𑍂𑌤𑍍𑌯𑌾
𑌹𑌰𑌤𑌿 𑌪𑌰𑌮𑌵𑌿𑌦𑍍𑌯𑌾𑌕𑌾𑌰𑍍𑌯𑌦𑍁𑌃𑌖𑌂 𑌪𑍍𑌰𑌤𑍀𑌤𑌮𑍍 ॥ 333॥
𑌬𑌾𑌹𑍍𑌯𑌾𑌨𑍁𑌸𑌨𑍍𑌧𑌿𑌃 𑌪𑌰𑌿𑌵𑌰𑍍𑌧𑌯𑍇𑌤𑍍𑌫𑌲𑌂 (𑌪𑌾𑌠𑌭𑍇𑌦𑌃 - 𑌬𑌾𑌹𑍍𑌯𑌾𑌭𑌿𑌸𑌨𑍍𑌧𑌿𑌃)
𑌦𑍁𑌰𑍍𑌵𑌾𑌸𑌨𑌾𑌮𑍇𑌵 𑌤𑌤𑌸𑍍𑌤𑌤𑍋𑌽𑌧𑌿𑌕𑌾𑌮𑍍 ।
𑌜𑍍𑌞𑌾𑌤𑍍𑌵𑌾 𑌵𑌿𑌵𑍇𑌕𑍈𑌃 𑌪𑌰𑌿𑌹𑍃𑌤𑍍𑌯 𑌬𑌾𑌹𑍍𑌯𑌂
𑌸𑍍𑌵𑌾𑌤𑍍𑌮𑌾𑌨𑍁𑌸𑌨𑍍𑌧𑌿𑌂 𑌵𑌿𑌦𑌧𑍀𑌤 𑌨𑌿𑌤𑍍𑌯𑌮𑍍 ॥ 334॥
𑌬𑌾𑌹𑍍𑌯𑍇 𑌨𑌿𑌰𑍁𑌦𑍍𑌧𑍇 𑌮𑌨𑌸𑌃 𑌪𑍍𑌰𑌸𑌨𑍍𑌨𑌤𑌾
𑌮𑌨𑌃𑌪𑍍𑌰𑌸𑌾𑌦𑍇 𑌪𑌰𑌮𑌾𑌤𑍍𑌮𑌦𑌰𑍍𑌶𑌨𑌮𑍍 ।
𑌤𑌸𑍍𑌮𑌿𑌨𑍍𑌸𑍁𑌦𑍃𑌷𑍍𑌟𑍇 𑌭𑌵𑌬𑌨𑍍𑌧𑌨𑌾𑌶𑍋
𑌬𑌹𑌿𑌰𑍍𑌨𑌿𑌰𑍋𑌧𑌃 𑌪𑌦𑌵𑍀 𑌵𑌿𑌮𑍁𑌕𑍍𑌤𑍇𑌃 ॥ 335॥
𑌕𑌃 𑌪𑌣𑍍𑌡𑌿𑌤𑌃 𑌸𑌨𑍍𑌸𑌦𑌸𑌦𑍍𑌵𑌿𑌵𑍇𑌕𑍀
𑌶𑍍𑌰𑍁𑌤𑌿𑌪𑍍𑌰𑌮𑌾𑌣𑌃 𑌪𑌰𑌮𑌾𑌰𑍍𑌥𑌦𑌰𑍍𑌶𑍀 ।
𑌜𑌾𑌨𑌨𑍍𑌹𑌿 𑌕𑍁𑌰𑍍𑌯𑌾𑌦𑌸𑌤𑍋𑌽𑌵𑌲𑌮𑍍𑌬𑌂
𑌸𑍍𑌵𑌪𑌾𑌤𑌹𑍇𑌤𑍋𑌃 𑌶𑌿𑌶𑍁𑌵𑌨𑍍𑌮𑍁𑌮𑍁𑌕𑍍𑌷𑍁𑌃 ॥ 336॥
𑌦𑍇𑌹𑌾𑌦𑌿𑌸𑌂𑌸𑌕𑍍𑌤𑌿𑌮𑌤𑍋 𑌨 𑌮𑍁𑌕𑍍𑌤𑌿𑌃
𑌮𑍁𑌕𑍍𑌤𑌸𑍍𑌯 𑌦𑍇𑌹𑌾𑌦𑍍𑌯𑌭𑌿𑌮𑌤𑍍𑌯𑌭𑌾𑌵𑌃 ।
𑌸𑍁𑌪𑍍𑌤𑌸𑍍𑌯 𑌨𑍋 𑌜𑌾𑌗𑌰𑌣𑌂 𑌨 𑌜𑌾𑌗𑍍𑌰𑌤𑌃
𑌸𑍍𑌵𑌪𑍍𑌨𑌸𑍍𑌤𑌯𑍋𑌰𑍍𑌭𑌿𑌨𑍍𑌨𑌗𑍁𑌣𑌾𑌶𑍍𑌰𑌯𑌤𑍍𑌵𑌾𑌤𑍍 ॥ 337॥
𑌅𑌨𑍍𑌤𑌰𑍍𑌬𑌹𑌿𑌃 𑌸𑍍𑌵𑌂 𑌸𑍍𑌥𑌿𑌰𑌜𑌙𑍍𑌗𑌮𑍇𑌷𑍁
𑌜𑍍𑌞𑌾𑌤𑍍𑌵𑌾𑌽𑌽𑌤𑍍𑌮𑌨𑌾𑌧𑌾𑌰𑌤𑌯𑌾 𑌵𑌿𑌲𑍋𑌕𑍍𑌯 । (𑌪𑌾𑌠𑌭𑍇𑌦𑌃 - 𑌜𑍍𑌞𑌾𑌨𑌾𑌤𑍍𑌮𑌨𑍍)
𑌤𑍍𑌯𑌕𑍍𑌤𑌾𑌖𑌿𑌲𑍋𑌪𑌾𑌧𑌿𑌰𑌖𑌣𑍍𑌡𑌰𑍂𑌪𑌃
𑌪𑍂𑌰𑍍𑌣𑌾𑌤𑍍𑌮𑌨𑌾 𑌯𑌃 𑌸𑍍𑌥𑌿𑌤 𑌏𑌷 𑌮𑍁𑌕𑍍𑌤𑌃 ॥ 338॥
𑌸𑌰𑍍𑌵𑌾𑌤𑍍𑌮𑌨𑌾 𑌬𑌨𑍍𑌧𑌵𑌿𑌮𑍁𑌕𑍍𑌤𑌿𑌹𑍇𑌤𑍁𑌃
𑌸𑌰𑍍𑌵𑌾𑌤𑍍𑌮𑌭𑌾𑌵𑌾𑌨𑍍𑌨 𑌪𑌰𑍋𑌽𑌸𑍍𑌤𑌿 𑌕𑌶𑍍𑌚𑌿𑌤𑍍 ।
𑌦𑍃𑌶𑍍𑌯𑌾𑌗𑍍𑌰𑌹𑍇 𑌸𑌤𑍍𑌯𑍁𑌪𑌪𑌦𑍍𑌯𑌤𑍇𑌽𑌸𑍗
𑌸𑌰𑍍𑌵𑌾𑌤𑍍𑌮𑌭𑌾𑌵𑍋𑌽𑌸𑍍𑌯 𑌸𑌦𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 339॥
𑌦𑍃𑌶𑍍𑌯𑌸𑍍𑌯𑌾𑌗𑍍𑌰𑌹𑌣𑌂 𑌕𑌥𑌂 𑌨𑍁 𑌘𑌟𑌤𑍇 𑌦𑍇𑌹𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑍋
𑌬𑌾𑌹𑍍𑌯𑌾𑌰𑍍𑌥𑌾𑌨𑍁𑌭𑌵𑌪𑍍𑌰𑌸𑌕𑍍𑌤𑌮𑌨𑌸𑌸𑍍𑌤𑌤𑍍𑌤𑌤𑍍𑌕𑍍𑌰𑌿𑌯𑌾𑌂 𑌕𑍁𑌰𑍍𑌵𑌤𑌃 ।
𑌸𑌨𑍍𑌨𑍍𑌯𑌸𑍍𑌤𑌾𑌖𑌿𑌲𑌧𑌰𑍍𑌮𑌕𑌰𑍍𑌮𑌵𑌿𑌷𑌯𑍈𑌰𑍍𑌨𑌿𑌤𑍍𑌯𑌾𑌤𑍍𑌮𑌨𑌿𑌷𑍍𑌠𑌾𑌪𑌰𑍈𑌃
𑌤𑌤𑍍𑌤𑍍𑌵𑌜𑍍𑌞𑍈𑌃 𑌕𑌰𑌣𑍀𑌯𑌮𑌾𑌤𑍍𑌮𑌨𑌿 𑌸𑌦𑌾𑌨𑌨𑍍𑌦𑍇𑌚𑍍𑌛𑍁𑌭𑌿𑌰𑍍𑌯𑌤𑍍𑌨𑌤𑌃 ॥ 340॥
𑌸𑌰𑍍𑌵𑌾𑌤𑍍𑌮𑌸𑌿𑌦𑍍𑌧𑌯𑍇 𑌭𑌿𑌕𑍍𑌷𑍋𑌃 𑌕𑍃𑌤𑌶𑍍𑌰𑌵𑌣𑌕𑌰𑍍𑌮𑌣𑌃 । (𑌪𑌾𑌠𑌭𑍇𑌦𑌃 - 𑌸𑌾𑌰𑍍𑌵𑌾𑌤𑍍𑌮𑍍𑌯)
𑌸𑌮𑌾𑌧𑌿𑌂 𑌵𑌿𑌦𑌧𑌾𑌤𑍍𑌯𑍇𑌷𑌾 𑌶𑌾𑌨𑍍𑌤𑍋 𑌦𑌾𑌨𑍍𑌤 𑌇𑌤𑌿 𑌶𑍍𑌰𑍁𑌤𑌿𑌃 ॥ 341॥
𑌆𑌰𑍂𑌢𑌶𑌕𑍍𑌤𑍇𑌰𑌹𑌮𑍋 𑌵𑌿𑌨𑌾𑌶𑌃
𑌕𑌰𑍍𑌤𑍁𑌨𑍍𑌨 𑌶𑌕𑍍𑌯 𑌸𑌹𑌸𑌾𑌪𑌿 𑌪𑌣𑍍𑌡𑌿𑌤𑍈𑌃 । (𑌪𑌾𑌠𑌭𑍇𑌦𑌃 - 𑌕𑌰𑍍𑌤𑍁𑌂 𑌨)
𑌯𑍇 𑌨𑌿𑌰𑍍𑌵𑌿𑌕𑌲𑍍𑌪𑌾𑌖𑍍𑌯𑌸𑌮𑌾𑌧𑌿𑌨𑌿𑌶𑍍𑌚𑌲𑌾𑌃
𑌤𑌾𑌨𑌨𑍍𑌤𑌰𑌾𑌽𑌨𑌨𑍍𑌤𑌭𑌵𑌾 𑌹𑌿 𑌵𑌾𑌸𑌨𑌾𑌃 ॥ 342॥
𑌅𑌹𑌮𑍍𑌬𑍁𑌦𑍍𑌧𑍍𑌯𑍈𑌵 𑌮𑍋𑌹𑌿𑌨𑍍𑌯𑌾 𑌯𑍋𑌜𑌯𑌿𑌤𑍍𑌵𑌾𑌽𑌽𑌵𑍃𑌤𑍇𑌰𑍍𑌬𑌲𑌾𑌤𑍍 ।
𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌃 𑌪𑍁𑌰𑍁𑌷𑌂 𑌵𑌿𑌕𑍍𑌷𑍇𑌪𑌯𑌤𑌿 𑌤𑌦𑍍𑌗𑍁𑌣𑍈𑌃 ॥ 343॥
𑌵𑌿𑌕𑍍𑌷𑍇𑌪𑌶𑌕𑍍𑌤𑌿𑌵𑌿𑌜𑌯𑍋 𑌵𑌿𑌷𑌮𑍋 𑌵𑌿𑌧𑌾𑌤𑍁𑌂
𑌨𑌿𑌃𑌶𑍇𑌷𑌮𑌾𑌵𑌰𑌣𑌶𑌕𑍍𑌤𑌿𑌨𑌿𑌵𑍃𑌤𑍍𑌤𑍍𑌯𑌭𑌾𑌵𑍇 ।
𑌦𑍃𑌗𑍍𑌦𑍃𑌶𑍍𑌯𑌯𑍋𑌃 𑌸𑍍𑌫𑍁𑌟𑌪𑌯𑍋𑌜𑌲𑌵𑌦𑍍𑌵𑌿𑌭𑌾𑌗𑍇
𑌨𑌶𑍍𑌯𑍇𑌤𑍍𑌤𑌦𑌾𑌵𑌰𑌣𑌮𑌾𑌤𑍍𑌮𑌨𑌿 𑌚 𑌸𑍍𑌵𑌭𑌾𑌵𑌾𑌤𑍍 ।
𑌨𑌿𑌃𑌸𑌂𑌶𑌯𑍇𑌨 𑌭𑌵𑌤𑌿 𑌪𑍍𑌰𑌤𑌿𑌬𑌨𑍍𑌧𑌶𑍂𑌨𑍍𑌯𑍋
𑌵𑌿𑌕𑍍𑌷𑍇𑌪𑌣𑌂 𑌨 𑌹𑌿 𑌤𑌦𑌾 𑌯𑌦𑌿 𑌚𑍇𑌨𑍍𑌮𑍃𑌷𑌾𑌰𑍍𑌥𑍇 ॥ 344॥ (𑌪𑌾𑌠𑌭𑍇𑌦𑌃 - 𑌨𑌿𑌕𑍍𑌷𑍇𑌪𑌣𑌂)
𑌸𑌮𑍍𑌯𑌗𑍍𑌵𑌿𑌵𑍇𑌕𑌃 𑌸𑍍𑌫𑍁𑌟𑌬𑍋𑌧𑌜𑌨𑍍𑌯𑍋
𑌵𑌿𑌭𑌜𑍍𑌯 𑌦𑍃𑌗𑍍𑌦𑍃𑌶𑍍𑌯𑌪𑌦𑌾𑌰𑍍𑌥𑌤𑌤𑍍𑌤𑍍𑌵𑌮𑍍 ।
𑌛𑌿𑌨𑌤𑍍𑌤𑌿 𑌮𑌾𑌯𑌾𑌕𑍃𑌤𑌮𑍋𑌹𑌬𑌨𑍍𑌧𑌂
𑌯𑌸𑍍𑌮𑌾𑌦𑍍𑌵𑌿𑌮𑍁𑌕𑍍𑌤𑌸𑍍𑌤𑍁 𑌪𑍁𑌨𑌰𑍍𑌨 𑌸𑌂𑌸𑍃𑌤𑌿𑌃 ॥ 345॥ (𑌪𑌾𑌠𑌭𑍇𑌦𑌃 - 𑌵𑌿𑌮𑍁𑌕𑍍𑌤𑌸𑍍𑌯)
𑌪𑌰𑌾𑌵𑌰𑍈𑌕𑌤𑍍𑌵𑌵𑌿𑌵𑍇𑌕𑌵𑌹𑍍𑌨𑌿𑌃
𑌦𑌹𑌤𑍍𑌯𑌵𑌿𑌦𑍍𑌯𑌾𑌗𑌹𑌨𑌂 𑌹𑍍𑌯𑌶𑍇𑌷𑌮𑍍 ।
𑌕𑌿𑌂 𑌸𑍍𑌯𑌾𑌤𑍍𑌪𑍁𑌨𑌃 𑌸𑌂𑌸𑌰𑌣𑌸𑍍𑌯 𑌬𑍀𑌜𑌂
𑌅𑌦𑍍𑌵𑍈𑌤𑌭𑌾𑌵𑌂 𑌸𑌮𑍁𑌪𑍇𑌯𑍁𑌷𑍋𑌽𑌸𑍍𑌯 ॥ 346॥
𑌆𑌵𑌰𑌣𑌸𑍍𑌯 𑌨𑌿𑌵𑍃𑌤𑍍𑌤𑌿𑌰𑍍𑌭𑌵𑌤𑌿 𑌹𑌿 𑌸𑌮𑍍𑌯𑌕𑍍𑌪𑌦𑌾𑌰𑍍𑌥𑌦𑌰𑍍𑌶𑌨𑌤𑌃 ।
𑌮𑌿𑌥𑍍𑌯𑌾𑌜𑍍𑌞𑌾𑌨𑌵𑌿𑌨𑌾𑌶𑌸𑍍𑌤𑌦𑍍𑌵𑌿𑌕𑍍𑌷𑍇𑌪𑌜𑌨𑌿𑌤𑌦𑍁𑌃𑌖𑌨𑌿𑌵𑍃𑌤𑍍𑌤𑌿𑌃 ॥ 347॥
𑌏𑌤𑌤𑍍𑌤𑍍𑌰𑌿𑌤𑌯𑌂 𑌦𑍃𑌷𑍍𑌟𑌂 𑌸𑌮𑍍𑌯𑌗𑍍𑌰𑌜𑍍𑌜𑍁𑌸𑍍𑌵𑌰𑍂𑌪𑌵𑌿𑌜𑍍𑌞𑌾𑌨𑌾𑌤𑍍 ।
𑌤𑌸𑍍𑌮𑌾𑌦𑍍𑌵𑌸𑍍𑌤𑍁𑌸𑌤𑌤𑍍𑌤𑍍𑌵𑌂 𑌜𑍍𑌞𑌾𑌤𑌵𑍍𑌯𑌂 𑌬𑌨𑍍𑌧𑌮𑍁𑌕𑍍𑌤𑌯𑍇 𑌵𑌿𑌦𑍁𑌷𑌾 ॥ 348॥
𑌅𑌯𑍋𑌽𑌗𑍍𑌨𑌿𑌯𑍋𑌗𑌾𑌦𑌿𑌵 𑌸𑌤𑍍𑌸𑌮𑌨𑍍𑌵𑌯𑌾𑌨𑍍
𑌮𑌾𑌤𑍍𑌰𑌾𑌦𑌿𑌰𑍂𑌪𑍇𑌣 𑌵𑌿𑌜𑍃𑌮𑍍𑌭𑌤𑍇 𑌧𑍀𑌃 ।
𑌤𑌤𑍍𑌕𑌾𑌰𑍍𑌯𑌮𑍇𑌤𑌦𑍍𑌦𑍍𑌵𑌿𑌤𑌯𑌂 𑌯𑌤𑍋 𑌮𑍃𑌷𑌾 (𑌪𑌾𑌠𑌭𑍇𑌦𑌃 - 𑌤𑌤𑍍𑌕𑌾𑌰𑍍𑌯𑌮𑍇𑌵 𑌤𑍍𑌰𑌿𑌤𑌯𑌂)
𑌦𑍃𑌷𑍍𑌟𑌂 𑌭𑍍𑌰𑌮𑌸𑍍𑌵𑌪𑍍𑌨𑌮𑌨𑍋𑌰𑌥𑍇𑌷𑍁 ॥ 349॥
𑌤𑌤𑍋 𑌵𑌿𑌕𑌾𑌰𑌾𑌃 𑌪𑍍𑌰𑌕𑍃𑌤𑍇𑌰𑌹𑌮𑍍𑌮𑍁𑌖𑌾
𑌦𑍇𑌹𑌾𑌵𑌸𑌾𑌨𑌾 𑌵𑌿𑌷𑌯𑌾𑌶𑍍𑌚 𑌸𑌰𑍍𑌵𑍇 ।
𑌕𑍍𑌷𑌣𑍇𑌽𑌨𑍍𑌯𑌥𑌾𑌭𑌾𑌵𑌿𑌤𑌯𑌾 𑌹𑍍𑌯𑌮𑍀𑌷𑌾- (𑌪𑌾𑌠𑌭𑍇𑌦𑌃 - 𑌭𑌾𑌵𑌿𑌨 𑌏𑌷 𑌆𑌤𑍍𑌮𑌾)
𑌮𑌸𑌤𑍍𑌤𑍍𑌵𑌮𑌾𑌤𑍍𑌮𑌾 𑌤𑍁 𑌕𑌦𑌾𑌪𑌿 𑌨𑌾𑌨𑍍𑌯𑌥𑌾 ॥ 350॥ (𑌪𑌾𑌠𑌭𑍇𑌦𑌃 - 𑌮𑌸𑌤𑍍𑌤𑍍𑌵𑌮𑌾𑌤𑍍𑌮𑌾 𑌤𑍁 𑌕𑌦𑌾𑌪𑌿)
𑌨𑌿𑌤𑍍𑌯𑌾𑌦𑍍𑌵𑌯𑌾𑌖𑌣𑍍𑌡𑌚𑌿𑌦𑍇𑌕𑌰𑍂𑌪𑍋
𑌬𑍁𑌦𑍍𑌧𑍍𑌯𑌾𑌦𑌿𑌸𑌾𑌕𑍍𑌷𑍀 𑌸𑌦𑌸𑌦𑍍𑌵𑌿𑌲𑌕𑍍𑌷𑌣𑌃 ।
𑌅𑌹𑌮𑍍𑌪𑌦𑌪𑍍𑌰𑌤𑍍𑌯𑌯𑌲𑌕𑍍𑌷𑌿𑌤𑌾𑌰𑍍𑌥𑌃
𑌪𑍍𑌰𑌤𑍍𑌯𑌕𑍍 𑌸𑌦𑌾𑌨𑌨𑍍𑌦𑌘𑌨𑌃 𑌪𑌰𑌾𑌤𑍍𑌮𑌾 ॥ 351॥
𑌇𑌤𑍍𑌥𑌂 𑌵𑌿𑌪𑌶𑍍𑌚𑌿𑌤𑍍𑌸𑌦𑌸𑌦𑍍𑌵𑌿𑌭𑌜𑍍𑌯
𑌨𑌿𑌶𑍍𑌚𑌿𑌤𑍍𑌯 𑌤𑌤𑍍𑌤𑍍𑌵𑌂 𑌨𑌿𑌜𑌬𑍋𑌧𑌦𑍃𑌷𑍍𑌟𑍍𑌯𑌾 ।
𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌣𑍍𑌡𑌬𑍋𑌧𑌂
𑌤𑍇𑌭𑍍𑌯𑍋 𑌵𑌿𑌮𑍁𑌕𑍍𑌤𑌃 𑌸𑍍𑌵𑌯𑌮𑍇𑌵 𑌶𑌾𑌮𑍍𑌯𑌤𑌿 ॥ 352॥
𑌅𑌜𑍍𑌞𑌾𑌨𑌹𑍃𑌦𑌯𑌗𑍍𑌰𑌨𑍍𑌥𑍇𑌰𑍍𑌨𑌿𑌃𑌶𑍇𑌷𑌵𑌿𑌲𑌯𑌸𑍍𑌤𑌦𑌾 ।
𑌸𑌮𑌾𑌧𑌿𑌨𑌾𑌽𑌵𑌿𑌕𑌲𑍍𑌪𑍇𑌨 𑌯𑌦𑌾𑌽𑌦𑍍𑌵𑍈𑌤𑌾𑌤𑍍𑌮𑌦𑌰𑍍𑌶𑌨𑌮𑍍 ॥ 353॥
𑌤𑍍𑌵𑌮𑌹𑌮𑌿𑌦𑌮𑌿𑌤𑍀𑌯𑌂 𑌕𑌲𑍍𑌪𑌨𑌾 𑌬𑍁𑌦𑍍𑌧𑌿𑌦𑍋𑌷𑌾𑌤𑍍
𑌪𑍍𑌰𑌭𑌵𑌤𑌿 𑌪𑌰𑌮𑌾𑌤𑍍𑌮𑌨𑍍𑌯𑌦𑍍𑌵𑌯𑍇 𑌨𑌿𑌰𑍍𑌵𑌿𑌶𑍇𑌷𑍇 ।
𑌪𑍍𑌰𑌵𑌿𑌲𑌸𑌤𑌿 𑌸𑌮𑌾𑌧𑌾𑌵𑌸𑍍𑌯 𑌸𑌰𑍍𑌵𑍋 𑌵𑌿𑌕𑌲𑍍𑌪𑍋
𑌵𑌿𑌲𑌯𑌨𑌮𑍁𑌪𑌗𑌚𑍍𑌛𑍇𑌦𑍍𑌵𑌸𑍍𑌤𑍁𑌤𑌤𑍍𑌤𑍍𑌵𑌾𑌵𑌧𑍃𑌤𑍍𑌯𑌾 ॥ 354॥
𑌶𑌾𑌨𑍍𑌤𑍋 𑌦𑌾𑌨𑍍𑌤𑌃 𑌪𑌰𑌮𑍁𑌪𑌰𑌤𑌃 𑌕𑍍𑌷𑌾𑌨𑍍𑌤𑌿𑌯𑍁𑌕𑍍𑌤𑌃 𑌸𑌮𑌾𑌧𑌿𑌂
𑌕𑍁𑌰𑍍𑌵𑌨𑍍𑌨𑌿𑌤𑍍𑌯𑌂 𑌕𑌲𑌯𑌤𑌿 𑌯𑌤𑌿𑌃 𑌸𑍍𑌵𑌸𑍍𑌯 𑌸𑌰𑍍𑌵𑌾𑌤𑍍𑌮𑌭𑌾𑌵𑌮𑍍 ।
𑌤𑍇𑌨𑌾𑌵𑌿𑌦𑍍𑌯𑌾𑌤𑌿𑌮𑌿𑌰𑌜𑌨𑌿𑌤𑌾𑌨𑍍𑌸𑌾𑌧𑍁 𑌦𑌗𑍍𑌧𑍍𑌵𑌾 𑌵𑌿𑌕𑌲𑍍𑌪𑌾𑌨𑍍
𑌬𑍍𑌰𑌹𑍍𑌮𑌾𑌕𑍃𑌤𑍍𑌯𑌾 𑌨𑌿𑌵𑌸𑌤𑌿 𑌸𑍁𑌖𑌂 𑌨𑌿𑌷𑍍𑌕𑍍𑌰𑌿𑌯𑍋 𑌨𑌿𑌰𑍍𑌵𑌿𑌕𑌲𑍍𑌪𑌃 ॥ 355॥
𑌸𑌮𑌾𑌹𑌿𑌤𑌾 𑌯𑍇 𑌪𑍍𑌰𑌵𑌿𑌲𑌾𑌪𑍍𑌯 𑌬𑌾𑌹𑍍𑌯𑌂
𑌶𑍍𑌰𑍋𑌤𑍍𑌰𑌾𑌦𑌿 𑌚𑍇𑌤𑌃 𑌸𑍍𑌵𑌮𑌹𑌂 𑌚𑌿𑌦𑌾𑌤𑍍𑌮𑌨𑌿 ।
𑌤 𑌏𑌵 𑌮𑍁𑌕𑍍𑌤𑌾 𑌭𑌵𑌪𑌾𑌶𑌬𑌨𑍍𑌧𑍈𑌃
𑌨𑌾𑌨𑍍𑌯𑍇 𑌤𑍁 𑌪𑌾𑌰𑍋𑌕𑍍𑌷𑍍𑌯𑌕𑌥𑌾𑌭𑌿𑌧𑌾𑌯𑌿𑌨𑌃 ॥ 356॥
𑌉𑌪𑌾𑌧𑌿𑌭𑍇𑌦𑌾𑌤𑍍𑌸𑍍𑌵𑌯𑌮𑍇𑌵 𑌭𑌿𑌦𑍍𑌯𑌤𑍇 (𑌪𑌾𑌠𑌭𑍇𑌦𑌃 - 𑌯𑍋𑌗𑌾𑌤𑍍𑌸𑍍𑌵𑌯𑌮𑍇𑌵)
𑌚𑍋𑌪𑌾𑌧𑍍𑌯𑌪𑍋𑌹𑍇 𑌸𑍍𑌵𑌯𑌮𑍇𑌵 𑌕𑍇𑌵𑌲𑌃 ।
𑌤𑌸𑍍𑌮𑌾𑌦𑍁𑌪𑌾𑌧𑍇𑌰𑍍𑌵𑌿𑌲𑌯𑌾𑌯 𑌵𑌿𑌦𑍍𑌵𑌾𑌨𑍍
𑌵𑌸𑍇𑌤𑍍𑌸𑌦𑌾𑌽𑌕𑌲𑍍𑌪𑌸𑌮𑌾𑌧𑌿𑌨𑌿𑌷𑍍𑌠𑌯𑌾 ॥ 357॥
𑌸𑌤𑌿 𑌸𑌕𑍍𑌤𑍋 𑌨𑌰𑍋 𑌯𑌾𑌤𑌿 𑌸𑌦𑍍𑌭𑌾𑌵𑌂 𑌹𑍍𑌯𑍇𑌕𑌨𑌿𑌷𑍍𑌠𑌯𑌾 ।
𑌕𑍀𑌟𑌕𑍋 𑌭𑍍𑌰𑌮𑌰𑌂 𑌧𑍍𑌯𑌾𑌯𑌨𑍍 𑌭𑍍𑌰𑌮𑌰𑌤𑍍𑌵𑌾𑌯 𑌕𑌲𑍍𑌪𑌤𑍇 ॥ 358॥
𑌕𑍍𑌰𑌿𑌯𑌾𑌨𑍍𑌤𑌰𑌾𑌸𑌕𑍍𑌤𑌿𑌮𑌪𑌾𑌸𑍍𑌯 𑌕𑍀𑌟𑌕𑍋
𑌧𑍍𑌯𑌾𑌯𑌨𑍍𑌨𑌲𑌿𑌤𑍍𑌵𑌂 𑌹𑍍𑌯𑌲𑌿𑌭𑌾𑌵𑌮𑍃𑌚𑍍𑌛𑌤𑌿 । (𑌪𑌾𑌠𑌭𑍇𑌦𑌃 - 𑌧𑍍𑌯𑌾𑌯𑌨𑍍𑌯𑌥𑌾𑌲𑌿𑌂)
𑌤𑌥𑍈𑌵 𑌯𑍋𑌗𑍀 𑌪𑌰𑌮𑌾𑌤𑍍𑌮𑌤𑌤𑍍𑌤𑍍𑌵𑌂
𑌧𑍍𑌯𑌾𑌤𑍍𑌵𑌾 𑌸𑌮𑌾𑌯𑌾𑌤𑌿 𑌤𑌦𑍇𑌕𑌨𑌿𑌷𑍍𑌠𑌯𑌾 ॥ 359॥
𑌅𑌤𑍀𑌵 𑌸𑍂𑌕𑍍𑌷𑍍𑌮𑌂 𑌪𑌰𑌮𑌾𑌤𑍍𑌮𑌤𑌤𑍍𑌤𑍍𑌵𑌂
𑌨 𑌸𑍍𑌥𑍂𑌲𑌦𑍃𑌷𑍍𑌟𑍍𑌯𑌾 𑌪𑍍𑌰𑌤𑌿𑌪𑌤𑍍𑌤𑍁𑌮𑌰𑍍𑌹𑌤𑌿 ।
𑌸𑌮𑌾𑌧𑌿𑌨𑌾𑌤𑍍𑌯𑌨𑍍𑌤𑌸𑍁𑌸𑍂𑌕𑍍𑌷𑍍𑌮𑌵𑍃𑌤𑍍𑌤𑍍𑌯𑌾
𑌜𑍍𑌞𑌾𑌤𑌵𑍍𑌯𑌮𑌾𑌰𑍍𑌯𑍈𑌰𑌤𑌿𑌶𑍁𑌦𑍍𑌧𑌬𑍁𑌦𑍍𑌧𑌿𑌭𑌿𑌃 ॥ 360॥
𑌯𑌥𑌾 𑌸𑍁𑌵𑌰𑍍𑌣𑌂 𑌪𑍁𑌟𑌪𑌾𑌕𑌶𑍋𑌧𑌿𑌤𑌂
𑌤𑍍𑌯𑌕𑍍𑌤𑍍𑌵𑌾 𑌮𑌲𑌂 𑌸𑍍𑌵𑌾𑌤𑍍𑌮𑌗𑍁𑌣𑌂 𑌸𑌮𑍃𑌚𑍍𑌛𑌤𑌿 ।
𑌤𑌥𑌾 𑌮𑌨𑌃 𑌸𑌤𑍍𑌤𑍍𑌵𑌰𑌜𑌸𑍍𑌤𑌮𑍋𑌮𑌲𑌂
𑌧𑍍𑌯𑌾𑌨𑍇𑌨 𑌸𑌨𑍍𑌤𑍍𑌯𑌜𑍍𑌯 𑌸𑌮𑍇𑌤𑌿 𑌤𑌤𑍍𑌤𑍍𑌵𑌮𑍍 ॥ 361॥
𑌨𑌿𑌰𑌨𑍍𑌤𑌰𑌾𑌭𑍍𑌯𑌾𑌸𑌵𑌶𑌾𑌤𑍍𑌤𑌦𑌿𑌤𑍍𑌥𑌂
𑌪𑌕𑍍𑌵𑌂 𑌮𑌨𑍋 𑌬𑍍𑌰𑌹𑍍𑌮𑌣𑌿 𑌲𑍀𑌯𑌤𑍇 𑌯𑌦𑌾 ।
𑌤𑌦𑌾 𑌸𑌮𑌾𑌧𑌿𑌃 𑌸𑌵𑌿𑌕𑌲𑍍𑌪𑌵𑌰𑍍𑌜𑌿𑌤𑌃 (𑌪𑌾𑌠𑌭𑍇𑌦𑌃 - 𑌸 𑌵𑌿𑌕𑌲𑍍𑌪𑌵𑌰𑍍𑌜𑌿𑌤𑌃)
𑌸𑍍𑌵𑌤𑍋𑌽𑌦𑍍𑌵𑌯𑌾𑌨𑌨𑍍𑌦𑌰𑌸𑌾𑌨𑍁𑌭𑌾𑌵𑌕𑌃 ॥ 362॥
𑌸𑌮𑌾𑌧𑌿𑌨𑌾𑌽𑌨𑍇𑌨 𑌸𑌮𑌸𑍍𑌤𑌵𑌾𑌸𑌨𑌾-
𑌗𑍍𑌰𑌨𑍍𑌥𑍇𑌰𑍍𑌵𑌿𑌨𑌾𑌶𑍋𑌽𑌖𑌿𑌲𑌕𑌰𑍍𑌮𑌨𑌾𑌶𑌃 ।
𑌅𑌨𑍍𑌤𑌰𑍍𑌬𑌹𑌿𑌃 𑌸𑌰𑍍𑌵𑌤 𑌏𑌵 𑌸𑌰𑍍𑌵𑌦𑌾
𑌸𑍍𑌵𑌰𑍂𑌪𑌵𑌿𑌸𑍍𑌫𑍂𑌰𑍍𑌤𑌿𑌰𑌯𑌤𑍍𑌨𑌤𑌃 𑌸𑍍𑌯𑌾𑌤𑍍 ॥ 363॥
𑌶𑍍𑌰𑍁𑌤𑍇𑌃 𑌶𑌤𑌗𑍁𑌣𑌂 𑌵𑌿𑌦𑍍𑌯𑌾𑌨𑍍𑌮𑌨𑌨𑌂 𑌮𑌨𑌨𑌾𑌦𑌪𑌿 ।
𑌨𑌿𑌦𑌿𑌧𑍍𑌯𑌾𑌸𑌂 𑌲𑌕𑍍𑌷𑌗𑍁𑌣𑌮𑌨𑌨𑍍𑌤𑌂 𑌨𑌿𑌰𑍍𑌵𑌿𑌕𑌲𑍍𑌪𑌕𑌮𑍍 ॥ 364॥
𑌨𑌿𑌰𑍍𑌵𑌿𑌕𑌲𑍍𑌪𑌕𑌸𑌮𑌾𑌧𑌿𑌨𑌾 𑌸𑍍𑌫𑍁𑌟𑌂
𑌬𑍍𑌰𑌹𑍍𑌮𑌤𑌤𑍍𑌤𑍍𑌵𑌮𑌵𑌗𑌮𑍍𑌯𑌤𑍇 𑌧𑍍𑌰𑍁𑌵𑌮𑍍 ।
𑌨𑌾𑌨𑍍𑌯𑌥𑌾 𑌚𑌲𑌤𑌯𑌾 𑌮𑌨𑍋𑌗𑌤𑍇𑌃
𑌪𑍍𑌰𑌤𑍍𑌯𑌯𑌾𑌨𑍍𑌤𑌰𑌵𑌿𑌮𑌿𑌶𑍍𑌰𑌿𑌤𑌂 𑌭𑌵𑍇𑌤𑍍 ॥ 365॥
𑌅𑌤𑌃 𑌸𑌮𑌾𑌧𑌤𑍍𑌸𑍍𑌵 𑌯𑌤𑍇𑌨𑍍𑌦𑍍𑌰𑌿𑌯𑌃 𑌸𑌨𑍍
𑌨𑌿𑌰𑌨𑍍𑌤𑌰𑌂 𑌶𑌾𑌨𑍍𑌤𑌮𑌨𑌾𑌃 𑌪𑍍𑌰𑌤𑍀𑌚𑌿 ।
𑌵𑌿𑌧𑍍𑌵𑌂𑌸𑌯 𑌧𑍍𑌵𑌾𑌨𑍍𑌤𑌮𑌨𑌾𑌦𑍍𑌯𑌵𑌿𑌦𑍍𑌯𑌯𑌾
𑌕𑍃𑌤𑌂 𑌸𑌦𑍇𑌕𑌤𑍍𑌵𑌵𑌿𑌲𑍋𑌕𑌨𑍇𑌨 ॥ 366॥
𑌯𑍋𑌗𑌸𑍍𑌯 𑌪𑍍𑌰𑌥𑌮𑌦𑍍𑌵𑌾𑌰𑌂 𑌵𑌾𑌙𑍍𑌨𑌿𑌰𑍋𑌧𑍋𑌽𑌪𑌰𑌿𑌗𑍍𑌰𑌹𑌃 । (𑌪𑌾𑌠𑌭𑍇𑌦𑌃 - 𑌪𑍍𑌰𑌥𑌮𑌂 𑌦𑍍𑌵𑌾𑌰𑌂)
𑌨𑌿𑌰𑌾𑌶𑌾 𑌚 𑌨𑌿𑌰𑍀𑌹𑌾 𑌚 𑌨𑌿𑌤𑍍𑌯𑌮𑍇𑌕𑌾𑌨𑍍𑌤𑌶𑍀𑌲𑌤𑌾 ॥ 367॥
𑌏𑌕𑌾𑌨𑍍𑌤𑌸𑍍𑌥𑌿𑌤𑌿𑌰𑌿𑌨𑍍𑌦𑍍𑌰𑌿𑌯𑍋𑌪𑌰𑌮𑌣𑍇 𑌹𑍇𑌤𑍁𑌰𑍍𑌦𑌮𑌶𑍍𑌚𑍇𑌤𑌸𑌃
𑌸𑌂𑌰𑍋𑌧𑍇 𑌕𑌰𑌣𑌂 𑌶𑌮𑍇𑌨 𑌵𑌿𑌲𑌯𑌂 𑌯𑌾𑌯𑌾𑌦𑌹𑌂𑌵𑌾𑌸𑌨𑌾 ।
𑌤𑍇𑌨𑌾𑌨𑌨𑍍𑌦𑌰𑌸𑌾𑌨𑍁𑌭𑍂𑌤𑌿𑌰𑌚𑌲𑌾 𑌬𑍍𑌰𑌾𑌹𑍍𑌮𑍀 𑌸𑌦𑌾 𑌯𑍋𑌗𑌿𑌨𑌃
𑌤𑌸𑍍𑌮𑌾𑌚𑍍𑌚𑌿𑌤𑍍𑌤𑌨𑌿𑌰𑍋𑌧 𑌏𑌵 𑌸𑌤𑌤𑌂 𑌕𑌾𑌰𑍍𑌯𑌃 𑌪𑍍𑌰𑌯𑌤𑍍𑌨𑍋 𑌮𑍁𑌨𑍇𑌃 ॥ 368॥ 𑌪𑍍𑌰𑌯𑌤𑍍𑌨𑌾𑌨𑍍𑌮𑍁𑌨𑍇𑌃
𑌵𑌾𑌚𑌂 𑌨𑌿𑌯𑌚𑍍𑌛𑌾𑌤𑍍𑌮𑌨𑌿 𑌤𑌂 𑌨𑌿𑌯𑌚𑍍𑌛
𑌬𑍁𑌦𑍍𑌧𑍗 𑌧𑌿𑌯𑌂 𑌯𑌚𑍍𑌛 𑌚 𑌬𑍁𑌦𑍍𑌧𑌿𑌸𑌾𑌕𑍍𑌷𑌿𑌣𑌿 ।
𑌤𑌂 𑌚𑌾𑌪𑌿 𑌪𑍂𑌰𑍍𑌣𑌾𑌤𑍍𑌮𑌨𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌵𑌿𑌲𑌾𑌪𑍍𑌯 𑌶𑌾𑌨𑍍𑌤𑌿𑌂 𑌪𑌰𑌮𑌾𑌂 𑌭𑌜𑌸𑍍𑌵 ॥ 369॥
𑌦𑍇𑌹𑌪𑍍𑌰𑌾𑌣𑍇𑌨𑍍𑌦𑍍𑌰𑌿𑌯𑌮𑌨𑍋𑌬𑍁𑌦𑍍𑌧𑍍𑌯𑌾𑌦𑌿𑌭𑌿𑌰𑍁𑌪𑌾𑌧𑌿𑌭𑌿𑌃 ।
𑌯𑍈𑌰𑍍𑌯𑍈𑌰𑍍𑌵𑍃𑌤𑍍𑌤𑍇𑌃𑌸𑌮𑌾𑌯𑍋𑌗𑌸𑍍𑌤𑌤𑍍𑌤𑌦𑍍𑌭𑌾𑌵𑍋𑌽𑌸𑍍𑌯 𑌯𑍋𑌗𑌿𑌨𑌃 ॥ 370॥
𑌤𑌨𑍍𑌨𑌿𑌵𑍃𑌤𑍍𑌤𑍍𑌯𑌾 𑌮𑍁𑌨𑍇𑌃 𑌸𑌮𑍍𑌯𑌕𑍍 𑌸𑌰𑍍𑌵𑍋𑌪𑌰𑌮𑌣𑌂 𑌸𑍁𑌖𑌮𑍍 ।
𑌸𑌨𑍍𑌦𑍃𑌶𑍍𑌯𑌤𑍇 𑌸𑌦𑌾𑌨𑌨𑍍𑌦𑌰𑌸𑌾𑌨𑍁𑌭𑌵𑌵𑌿𑌪𑍍𑌲𑌵𑌃 ॥ 371॥
𑌅𑌨𑍍𑌤𑌸𑍍𑌤𑍍𑌯𑌾𑌗𑍋 𑌬𑌹𑌿𑌸𑍍𑌤𑍍𑌯𑌾𑌗𑍋 𑌵𑌿𑌰𑌕𑍍𑌤𑌸𑍍𑌯𑍈𑌵 𑌯𑍁𑌜𑍍𑌯𑌤𑍇 ।
𑌤𑍍𑌯𑌜𑌤𑍍𑌯𑌨𑍍𑌤𑌰𑍍𑌬𑌹𑌿𑌃𑌸𑌙𑍍𑌗𑌂 𑌵𑌿𑌰𑌕𑍍𑌤𑌸𑍍𑌤𑍁 𑌮𑍁𑌮𑍁𑌕𑍍𑌷𑌯𑌾 ॥ 372॥
𑌬𑌹𑌿𑌸𑍍𑌤𑍁 𑌵𑌿𑌷𑌯𑍈𑌃 𑌸𑌙𑍍𑌗𑌂 𑌤𑌥𑌾𑌨𑍍𑌤𑌰𑌹𑌮𑌾𑌦𑌿𑌭𑌿𑌃 । (𑌪𑌾𑌠𑌭𑍇𑌦𑌃 - 𑌸𑌙𑍍𑌗𑌃)
𑌵𑌿𑌰𑌕𑍍𑌤 𑌏𑌵 𑌶𑌕𑍍𑌨𑍋𑌤𑌿 𑌤𑍍𑌯𑌕𑍍𑌤𑍁𑌂 𑌬𑍍𑌰𑌹𑍍𑌮𑌣𑌿 𑌨𑌿𑌷𑍍𑌠𑌿𑌤𑌃 ॥ 373॥
𑌵𑍈𑌰𑌾𑌗𑍍𑌯𑌬𑍋𑌧𑍗 𑌪𑍁𑌰𑍁𑌷𑌸𑍍𑌯 𑌪𑌕𑍍𑌷𑌿𑌵𑌤𑍍
𑌪𑌕𑍍𑌷𑍗 𑌵𑌿𑌜𑌾𑌨𑍀𑌹𑌿 𑌵𑌿𑌚𑌕𑍍𑌷𑌣 𑌤𑍍𑌵𑌮𑍍 ।
𑌵𑌿𑌮𑍁𑌕𑍍𑌤𑌿𑌸𑍗𑌧𑌾𑌗𑍍𑌰𑌲𑌤𑌾𑌧𑌿𑌰𑍋𑌹𑌣𑌂
𑌤𑌾𑌭𑍍𑌯𑌾𑌂 𑌵𑌿𑌨𑌾 𑌨𑌾𑌨𑍍𑌯𑌤𑌰𑍇𑌣 𑌸𑌿𑌧𑍍𑌯𑌤𑌿 ॥ 374॥
𑌅𑌤𑍍𑌯𑌨𑍍𑌤𑌵𑍈𑌰𑌾𑌗𑍍𑌯𑌵𑌤𑌃 𑌸𑌮𑌾𑌧𑌿𑌃
𑌸𑌮𑌾𑌹𑌿𑌤𑌸𑍍𑌯𑍈𑌵 𑌦𑍃𑌢𑌪𑍍𑌰𑌬𑍋𑌧𑌃 ।
𑌪𑍍𑌰𑌬𑍁𑌦𑍍𑌧𑌤𑌤𑍍𑌤𑍍𑌵𑌸𑍍𑌯 𑌹𑌿 𑌬𑌨𑍍𑌧𑌮𑍁𑌕𑍍𑌤𑌿𑌃
𑌮𑍁𑌕𑍍𑌤𑌾𑌤𑍍𑌮𑌨𑍋 𑌨𑌿𑌤𑍍𑌯𑌸𑍁𑌖𑌾𑌨𑍁𑌭𑍂𑌤𑌿𑌃 ॥ 375॥
𑌵𑍈𑌰𑌾𑌗𑍍𑌯𑌾𑌨𑍍𑌨 𑌪𑌰𑌂 𑌸𑍁𑌖𑌸𑍍𑌯 𑌜𑌨𑌕𑌂 𑌪𑌶𑍍𑌯𑌾𑌮𑌿 𑌵𑌶𑍍𑌯𑌾𑌤𑍍𑌮𑌨𑌃
𑌤𑌚𑍍𑌚𑍇𑌚𑍍𑌛𑍁𑌦𑍍𑌧𑌤𑌰𑌾𑌤𑍍𑌮𑌬𑍋𑌧𑌸𑌹𑌿𑌤𑌂 𑌸𑍍𑌵𑌾𑌰𑌾𑌜𑍍𑌯𑌸𑌾𑌮𑍍𑌰𑌾𑌜𑍍𑌯𑌧𑍁𑌕𑍍 ।
𑌏𑌤𑌦𑍍𑌦𑍍𑌵𑌾𑌰𑌮𑌜𑌸𑍍𑌰𑌮𑍁𑌕𑍍𑌤𑌿𑌯𑍁𑌵𑌤𑍇𑌰𑍍𑌯𑌸𑍍𑌮𑌾𑌤𑍍𑌤𑍍𑌵𑌮𑌸𑍍𑌮𑌾𑌤𑍍𑌪𑌰𑌂
𑌸𑌰𑍍𑌵𑌤𑍍𑌰𑌾𑌸𑍍𑌪𑍃𑌹𑌯𑌾 𑌸𑌦𑌾𑌤𑍍𑌮𑌨𑌿 𑌸𑌦𑌾 𑌪𑍍𑌰𑌜𑍍𑌞𑌾𑌂 𑌕𑍁𑌰𑍁 𑌶𑍍𑌰𑍇𑌯𑌸𑍇 ॥ 376॥
𑌆𑌶𑌾𑌂 𑌛𑌿𑌨𑍍𑌦𑍍𑌧𑌿 𑌵𑌿𑌷𑍋𑌪𑌮𑍇𑌷𑍁 𑌵𑌿𑌷𑌯𑍇𑌷𑍍𑌵𑍇𑌷𑍈𑌵 𑌮𑍃𑌤𑍍𑌯𑍋𑌃 𑌕𑍃𑌤𑌿- (𑌪𑌾𑌠𑌭𑍇𑌦𑌃 - 𑌮𑍃𑌤𑍍𑌯𑍋𑌃 𑌸𑍃𑌤𑌿)
𑌸𑍍𑌤𑍍𑌯𑌕𑍍𑌤𑍍𑌵𑌾 𑌜𑌾𑌤𑌿𑌕𑍁𑌲𑌾𑌶𑍍𑌰𑌮𑍇𑌷𑍍𑌵𑌭𑌿𑌮𑌤𑌿𑌂 𑌮𑍁𑌞𑍍𑌚𑌾𑌤𑌿𑌦𑍂𑌰𑌾𑌤𑍍𑌕𑍍𑌰𑌿𑌯𑌾𑌃 ।
𑌦𑍇𑌹𑌾𑌦𑌾𑌵𑌸𑌤𑌿 𑌤𑍍𑌯𑌜𑌾𑌤𑍍𑌮𑌧𑌿𑌷𑌣𑌾𑌂 𑌪𑍍𑌰𑌜𑍍𑌞𑌾𑌂 𑌕𑍁𑌰𑍁𑌷𑍍𑌵𑌾𑌤𑍍𑌮𑌨𑌿
𑌤𑍍𑌵𑌂 𑌦𑍍𑌰𑌷𑍍𑌟𑌾𑌸𑍍𑌯𑌮𑌨𑍋𑌽𑌸𑌿 𑌨𑌿𑌰𑍍𑌦𑍍𑌵𑌯𑌪𑌰𑌂 𑌬𑍍𑌰𑌹𑍍𑌮𑌾𑌸𑌿 𑌯𑌦𑍍𑌵𑌸𑍍𑌤𑍁𑌤𑌃 ॥ 377॥ (𑌪𑌾𑌠𑌭𑍇𑌦𑌃 - 𑌦𑍍𑌰𑌷𑍍𑌟𑌾𑌸𑍍𑌯𑌮𑌲𑍋)
𑌲𑌕𑍍𑌷𑍍𑌯𑍇 𑌬𑍍𑌰𑌹𑍍𑌮𑌣𑌿 𑌮𑌾𑌨𑌸𑌂 𑌦𑍃𑌢𑌤𑌰𑌂 𑌸𑌂𑌸𑍍𑌥𑌾𑌪𑍍𑌯 𑌬𑌾𑌹𑍍𑌯𑍇𑌨𑍍𑌦𑍍𑌰𑌿𑌯𑌂
𑌸𑍍𑌵𑌸𑍍𑌥𑌾𑌨𑍇 𑌵𑌿𑌨𑌿𑌵𑍇𑌶𑍍𑌯 𑌨𑌿𑌶𑍍𑌚𑌲𑌤𑌨𑍁𑌶𑍍𑌚𑍋𑌪𑍇𑌕𑍍𑌷𑍍𑌯 𑌦𑍇𑌹𑌸𑍍𑌥𑌿𑌤𑌿𑌮𑍍 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑍍𑌯𑌮𑍁𑌪𑍇𑌤𑍍𑌯 𑌤𑌨𑍍𑌮𑌯𑌤𑌯𑌾 𑌚𑌾𑌖𑌣𑍍𑌡𑌵𑍃𑌤𑍍𑌤𑍍𑌯𑌾𑌽𑌨𑌿𑌶𑌂
𑌬𑍍𑌰𑌹𑍍𑌮𑌾𑌨𑌨𑍍𑌦𑌰𑌸𑌂 𑌪𑌿𑌬𑌾𑌤𑍍𑌮𑌨𑌿 𑌮𑍁𑌦𑌾 𑌶𑍂𑌨𑍍𑌯𑍈𑌃 𑌕𑌿𑌮𑌨𑍍𑌯𑍈𑌰𑍍𑌭𑍃𑌶𑌮𑍍 ॥ 378॥ (𑌪𑌾𑌠𑌭𑍇𑌦𑌃 - 𑌕𑌿𑌮𑌨𑍍𑌯𑍈𑌰𑍍𑌭𑍍𑌰𑌮𑍈𑌃)
𑌅𑌨𑌾𑌤𑍍𑌮𑌚𑌿𑌨𑍍𑌤𑌨𑌂 𑌤𑍍𑌯𑌕𑍍𑌤𑍍𑌵𑌾 𑌕𑌶𑍍𑌮𑌲𑌂 𑌦𑍁𑌃𑌖𑌕𑌾𑌰𑌣𑌮𑍍 ।
𑌚𑌿𑌨𑍍𑌤𑌯𑌾𑌤𑍍𑌮𑌾𑌨𑌮𑌾𑌨𑌨𑍍𑌦𑌰𑍂𑌪𑌂 𑌯𑌨𑍍𑌮𑍁𑌕𑍍𑌤𑌿𑌕𑌾𑌰𑌣𑌮𑍍 ॥ 379॥
𑌏𑌷 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌰𑌶𑍇𑌷𑌸𑌾𑌕𑍍𑌷𑍀
𑌵𑌿𑌜𑍍𑌞𑌾𑌨𑌕𑍋𑌶𑍋 𑌵𑌿𑌲𑌸𑌤𑍍𑌯𑌜𑌸𑍍𑌰𑌮𑍍 । 𑌵𑌿𑌜𑍍𑌞𑌾𑌨𑌕𑍋𑌶𑍇
𑌲𑌕𑍍𑌷𑍍𑌯𑌂 𑌵𑌿𑌧𑌾𑌯𑍈𑌨𑌮𑌸𑌦𑍍𑌵𑌿𑌲𑌕𑍍𑌷𑌣-
𑌮𑌖𑌣𑍍𑌡𑌵𑍃𑌤𑍍𑌤𑍍𑌯𑌾𑌽𑌽𑌤𑍍𑌮𑌤𑌯𑌾𑌽𑌨𑍁𑌭𑌾𑌵𑌯 ॥ 380॥
𑌏𑌤𑌮𑌚𑍍𑌛𑌿𑌨𑍍𑌨𑌯𑌾 𑌵𑍃𑌤𑍍𑌤𑍍𑌯𑌾 𑌪𑍍𑌰𑌤𑍍𑌯𑌯𑌾𑌨𑍍𑌤𑌰𑌶𑍂𑌨𑍍𑌯𑌯𑌾 ।
𑌉𑌲𑍍𑌲𑍇𑌖𑌯𑌨𑍍𑌵𑌿𑌜𑌾𑌨𑍀𑌯𑌾𑌤𑍍𑌸𑍍𑌵𑌸𑍍𑌵𑌰𑍂𑌪𑌤𑌯𑌾 𑌸𑍍𑌫𑍁𑌟𑌮𑍍 ॥ 381॥
𑌅𑌤𑍍𑌰𑌾𑌤𑍍𑌮𑌤𑍍𑌵𑌂 𑌦𑍃𑌢𑍀𑌕𑍁𑌰𑍍𑌵𑌨𑍍𑌨𑌹𑌮𑌾𑌦𑌿𑌷𑍁 𑌸𑌨𑍍𑌤𑍍𑌯𑌜𑌨𑍍 ।
𑌉𑌦𑌾𑌸𑍀𑌨𑌤𑌯𑌾 𑌤𑍇𑌷𑍁 𑌤𑌿𑌷𑍍𑌠𑍇𑌤𑍍𑌸𑍍𑌫𑍁𑌟𑌘𑌟𑌾𑌦𑌿𑌵𑌤𑍍 ॥ 382॥ (𑌪𑌾𑌠𑌭𑍇𑌦𑌃 - 𑌤𑌿𑌷𑍍𑌠𑍇𑌦𑍍𑌘𑌟𑌪𑌟𑌾𑌦𑌿𑌵𑌤𑍍)
𑌵𑌿𑌶𑍁𑌦𑍍𑌧𑌮𑌨𑍍𑌤𑌃𑌕𑌰𑌣𑌂 𑌸𑍍𑌵𑌰𑍂𑌪𑍇
𑌨𑌿𑌵𑍇𑌶𑍍𑌯 𑌸𑌾𑌕𑍍𑌷𑌿𑌣𑍍𑌯𑌵𑌬𑍋𑌧𑌮𑌾𑌤𑍍𑌰𑍇 ।
𑌶𑌨𑍈𑌃 𑌶𑌨𑍈𑌰𑍍𑌨𑌿𑌶𑍍𑌚𑌲𑌤𑌾𑌮𑍁𑌪𑌾𑌨𑌯𑌨𑍍
𑌪𑍂𑌰𑍍𑌣𑌂 𑌸𑍍𑌵𑌮𑍇𑌵𑌾𑌨𑍁𑌵𑌿𑌲𑍋𑌕𑌯𑍇𑌤𑍍𑌤𑌤𑌃 ॥ 383॥ (𑌪𑌾𑌠𑌭𑍇𑌦𑌃 - 𑌪𑍂𑌰𑍍𑌣𑌤𑍍𑌵𑌮𑍇𑌵𑌾𑌨𑍁)
𑌦𑍇𑌹𑍇𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌽𑌹𑌮𑌾𑌦𑌿𑌭𑌿𑌃
𑌸𑍍𑌵𑌾𑌜𑍍𑌞𑌾𑌨𑌕𑍍𑌲𑍃𑌪𑍍𑌤𑍈𑌰𑌖𑌿𑌲𑍈𑌰𑍁𑌪𑌾𑌧𑌿𑌭𑌿𑌃 ।
𑌵𑌿𑌮𑍁𑌕𑍍𑌤𑌮𑌾𑌤𑍍𑌮𑌾𑌨𑌮𑌖𑌣𑍍𑌡𑌰𑍂𑌪𑌂
𑌪𑍂𑌰𑍍𑌣𑌂 𑌮𑌹𑌾𑌕𑌾𑌶𑌮𑌿𑌵𑌾𑌵𑌲𑍋𑌕𑌯𑍇𑌤𑍍 ॥ 384॥
𑌘𑌟𑌕𑌲𑌶𑌕𑍁𑌸𑍂𑌲𑌸𑍂𑌚𑌿𑌮𑍁𑌖𑍍𑌯𑍈𑌃
𑌗𑌗𑌨𑌮𑍁𑌪𑌾𑌧𑌿𑌶𑌤𑍈𑌰𑍍𑌵𑌿𑌮𑍁𑌕𑍍𑌤𑌮𑍇𑌕𑌮𑍍 ।
𑌭𑌵𑌤𑌿 𑌨 𑌵𑌿𑌵𑌿𑌧𑌂 𑌤𑌥𑍈𑌵 𑌶𑍁𑌦𑍍𑌧𑌂
𑌪𑌰𑌮𑌹𑌮𑌾𑌦𑌿𑌵𑌿𑌮𑍁𑌕𑍍𑌤𑌮𑍇𑌕𑌮𑍇𑌵 ॥ 385॥
𑌬𑍍𑌰𑌹𑍍𑌮𑌾𑌦𑌿𑌸𑍍𑌤𑌮𑍍𑌬𑌪𑌰𑍍𑌯𑌨𑍍𑌤𑌾 𑌮𑍃𑌷𑌾𑌮𑌾𑌤𑍍𑌰𑌾 𑌉𑌪𑌾𑌧𑌯𑌃 । (𑌪𑌾𑌠𑌭𑍇𑌦𑌃 - 𑌬𑍍𑌰𑌹𑍍𑌮𑌾𑌦𑍍𑌯𑌾𑌃 𑌸𑍍𑌤𑌮𑍍𑌬)
𑌤𑌤𑌃 𑌪𑍂𑌰𑍍𑌣𑌂 𑌸𑍍𑌵𑌮𑌾𑌤𑍍𑌮𑌾𑌨𑌂 𑌪𑌶𑍍𑌯𑍇𑌦𑍇𑌕𑌾𑌤𑍍𑌮𑌨𑌾 𑌸𑍍𑌥𑌿𑌤𑌮𑍍 ॥ 386॥
𑌯𑌤𑍍𑌰 𑌭𑍍𑌰𑌾𑌨𑍍𑌤𑍍𑌯𑌾 𑌕𑌲𑍍𑌪𑌿𑌤𑌂 𑌤𑌦𑍍𑌵𑌿𑌵𑍇𑌕𑍇 (𑌪𑌾𑌠𑌭𑍇𑌦𑌃 - 𑌯𑌦𑍍𑌵𑌿𑌵𑍇𑌕𑍇)
𑌤𑌤𑍍𑌤𑌨𑍍𑌮𑌾𑌤𑍍𑌰𑌂 𑌨𑍈𑌵 𑌤𑌸𑍍𑌮𑌾𑌦𑍍𑌵𑌿𑌭𑌿𑌨𑍍𑌨𑌮𑍍 ।
𑌭𑍍𑌰𑌾𑌨𑍍𑌤𑍇𑌰𑍍𑌨𑌾𑌶𑍇 𑌭𑌾𑌤𑌿 𑌦𑍃𑌷𑍍𑌟𑌾𑌹𑌿𑌤𑌤𑍍𑌤𑍍𑌵𑌂 (𑌪𑌾𑌠𑌭𑍇𑌦𑌃 - 𑌭𑍍𑌰𑌾𑌨𑍍𑌤𑌿𑌦𑍃𑌷𑍍𑌟𑌾)
𑌰𑌜𑍍𑌜𑍁𑌸𑍍𑌤𑌦𑍍𑌵𑌦𑍍𑌵𑌿𑌶𑍍𑌵𑌮𑌾𑌤𑍍𑌮𑌸𑍍𑌵𑌰𑍂𑌪𑌮𑍍 ॥ 387॥
𑌸𑍍𑌵𑌯𑌂 𑌬𑍍𑌰𑌹𑍍𑌮𑌾 𑌸𑍍𑌵𑌯𑌂 𑌵𑌿𑌷𑍍𑌣𑍁𑌃 𑌸𑍍𑌵𑌯𑌮𑌿𑌨𑍍𑌦𑍍𑌰𑌃 𑌸𑍍𑌵𑌯𑌂 𑌶𑌿𑌵𑌃 ।
𑌸𑍍𑌵𑌯𑌂 𑌵𑌿𑌶𑍍𑌵𑌮𑌿𑌦𑌂 𑌸𑌰𑍍𑌵𑌂 𑌸𑍍𑌵𑌸𑍍𑌮𑌾𑌦𑌨𑍍𑌯𑌨𑍍𑌨 𑌕𑌿𑌞𑍍𑌚𑌨 ॥ 388॥
𑌅𑌨𑍍𑌤𑌃 𑌸𑍍𑌵𑌯𑌂 𑌚𑌾𑌪𑌿 𑌬𑌹𑌿𑌃 𑌸𑍍𑌵𑌯𑌂 𑌚
𑌸𑍍𑌵𑌯𑌂 𑌪𑍁𑌰𑌸𑍍𑌤𑌾𑌤𑍍 𑌸𑍍𑌵𑌯𑌮𑍇𑌵 𑌪𑌶𑍍𑌚𑌾𑌤𑍍 ।
𑌸𑍍𑌵𑌯𑌂 𑌹𑍍𑌯𑌾𑌵𑌾𑌚𑍍𑌯𑌾𑌂 𑌸𑍍𑌵𑌯𑌮𑌪𑍍𑌯𑍁𑌦𑍀𑌚𑍍𑌯𑌾𑌂 (𑌪𑌾𑌠𑌭𑍇𑌦𑌃 - 𑌹𑍍𑌯𑌵𑌾𑌚𑍍𑌯𑌾𑌂)
𑌤𑌥𑍋𑌪𑌰𑌿𑌷𑍍𑌟𑌾𑌤𑍍𑌸𑍍𑌵𑌯𑌮𑌪𑍍𑌯𑌧𑌸𑍍𑌤𑌾𑌤𑍍 ॥ 389॥
𑌤𑌰𑌙𑍍𑌗𑌫𑍇𑌨𑌭𑍍𑌰𑌮𑌬𑍁𑌦𑍍𑌬𑍁𑌦𑌾𑌦𑌿
𑌸𑌰𑍍𑌵𑌂 𑌸𑍍𑌵𑌰𑍂𑌪𑍇𑌣 𑌜𑌲𑌂 𑌯𑌥𑌾 𑌤𑌥𑌾 ।
𑌚𑌿𑌦𑍇𑌵 𑌦𑍇𑌹𑌾𑌦𑍍𑌯𑌹𑌮𑌨𑍍𑌤𑌮𑍇𑌤𑌤𑍍
𑌸𑌰𑍍𑌵𑌂 𑌚𑌿𑌦𑍇𑌵𑍈𑌕𑌰𑌸𑌂 𑌵𑌿𑌶𑍁𑌦𑍍𑌧𑌮𑍍 ॥ 390॥
𑌸𑌦𑍇𑌵𑍇𑌦𑌂 𑌸𑌰𑍍𑌵𑌂 𑌜𑌗𑌦𑌵𑌗𑌤𑌂 𑌵𑌾𑌙𑍍𑌮𑌨𑌸𑌯𑍋𑌃
𑌸𑌤𑍋𑌽𑌨𑍍𑌯𑌨𑍍𑌨𑌾𑌸𑍍𑌤𑍍𑌯𑍇𑌵 𑌪𑍍𑌰𑌕𑍃𑌤𑌿𑌪𑌰𑌸𑍀𑌮𑍍𑌨𑌿 𑌸𑍍𑌥𑌿𑌤𑌵𑌤𑌃 ।
𑌪𑍃𑌥𑌕𑍍 𑌕𑌿𑌂 𑌮𑍃𑌤𑍍𑌸𑍍𑌨𑌾𑌯𑌾𑌃 𑌕𑌲𑌶𑌘𑌟𑌕𑍁𑌮𑍍𑌭𑌾𑌦𑍍𑌯𑌵𑌗𑌤𑌂
𑌵𑌦𑌤𑍍𑌯𑍇𑌷 𑌭𑍍𑌰𑌾𑌨𑍍𑌤𑌸𑍍𑌤𑍍𑌵𑌮𑌹𑌮𑌿𑌤𑌿 𑌮𑌾𑌯𑌾𑌮𑌦𑌿𑌰𑌯𑌾 ॥ 391॥
𑌕𑍍𑌰𑌿𑌯𑌾𑌸𑌮𑌭𑌿𑌹𑌾𑌰𑍇𑌣 𑌯𑌤𑍍𑌰 𑌨𑌾𑌨𑍍𑌯𑌦𑌿𑌤𑌿 𑌶𑍍𑌰𑍁𑌤𑌿𑌃 ।
𑌬𑍍𑌰𑌵𑍀𑌤𑌿 𑌦𑍍𑌵𑍈𑌤𑌰𑌾𑌹𑌿𑌤𑍍𑌯𑌂 𑌮𑌿𑌥𑍍𑌯𑌾𑌧𑍍𑌯𑌾𑌸𑌨𑌿𑌵𑍃𑌤𑍍𑌤𑌯𑍇 ॥ 392॥
𑌆𑌕𑌾𑌶𑌵𑌨𑍍𑌨𑌿𑌰𑍍𑌮𑌲𑌨𑌿𑌰𑍍𑌵𑌿𑌕𑌲𑍍𑌪𑌂 (𑌪𑌾𑌠𑌭𑍇𑌦𑌃 - 𑌨𑌿𑌰𑍍𑌵𑌿𑌕𑌲𑍍𑌪)
𑌨𑌿𑌃𑌸𑍀𑌮𑌨𑌿𑌃𑌸𑍍𑌪𑌨𑍍𑌦𑌨𑌨𑌿𑌰𑍍𑌵𑌿𑌕𑌾𑌰𑌮𑍍 ।
𑌅𑌨𑍍𑌤𑌰𑍍𑌬𑌹𑌿𑌃𑌶𑍂𑌨𑍍𑌯𑌮𑌨𑌨𑍍𑌯𑌮𑌦𑍍𑌵𑌯𑌂
𑌸𑍍𑌵𑌯𑌂 𑌪𑌰𑌂 𑌬𑍍𑌰𑌹𑍍𑌮 𑌕𑌿𑌮𑌸𑍍𑌤𑌿 𑌬𑍋𑌧𑍍𑌯𑌮𑍍 ॥ 393॥
𑌵𑌕𑍍𑌤𑌵𑍍𑌯𑌂 𑌕𑌿𑌮𑍁 𑌵𑌿𑌦𑍍𑌯𑌤𑍇𑌽𑌤𑍍𑌰 𑌬𑌹𑍁𑌧𑌾 𑌬𑍍𑌰𑌹𑍍𑌮𑍈𑌵 𑌜𑍀𑌵𑌃 𑌸𑍍𑌵𑌯𑌂
𑌬𑍍𑌰𑌹𑍍𑌮𑍈𑌤𑌜𑍍𑌜𑌗𑌦𑌾𑌤𑌤𑌂 𑌨𑍁 𑌸𑌕𑌲𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌂 𑌶𑍍𑌰𑍁𑌤𑌿𑌃 । (𑌪𑌾𑌠𑌭𑍇𑌦𑌃 - 𑌜𑌗𑌦𑌾𑌪𑌰𑌾𑌣𑍁 𑌸𑌕𑌲𑌂)
𑌬𑍍𑌰𑌹𑍍𑌮𑍈𑌵𑌾𑌹𑌮𑌿𑌤𑌿 𑌪𑍍𑌰𑌬𑍁𑌦𑍍𑌧𑌮𑌤𑌯𑌃 𑌸𑌨𑍍𑌤𑍍𑌯𑌕𑍍𑌤𑌬𑌾𑌹𑍍𑌯𑌾𑌃 𑌸𑍍𑌫𑍁𑌟𑌂
𑌬𑍍𑌰𑌹𑍍𑌮𑍀𑌭𑍂𑌯 𑌵𑌸𑌨𑍍𑌤𑌿 𑌸𑌨𑍍𑌤𑌤𑌚𑌿𑌦𑌾𑌨𑌨𑍍𑌦𑌾𑌤𑍍𑌮𑌨𑍈𑌤𑌦𑍍𑌧𑍍𑌰𑍁𑌵𑌮𑍍 ॥ 394॥ (𑌪𑌾𑌠𑌭𑍇𑌦𑌃 - 𑌆𑌨𑌨𑍍𑌦𑌾𑌤𑍍𑌮𑌨𑍈𑌵 𑌧𑍍𑌰𑍁𑌵𑌮𑍍)
𑌜𑌹𑌿 𑌮𑌲𑌮𑌯𑌕𑍋𑌶𑍇𑌽𑌹𑌨𑍍𑌧𑌿𑌯𑍋𑌤𑍍𑌥𑌾𑌪𑌿𑌤𑌾𑌶𑌾𑌂
𑌪𑍍𑌰𑌸𑌭𑌮𑌨𑌿𑌲𑌕𑌲𑍍𑌪𑍇 𑌲𑌿𑌙𑍍𑌗𑌦𑍇𑌹𑍇𑌽𑌪𑌿 𑌪𑌶𑍍𑌚𑌾𑌤𑍍 ।
𑌨𑌿𑌗𑌮𑌗𑌦𑌿𑌤𑌕𑍀𑌰𑍍𑌤𑌿𑌂 𑌨𑌿𑌤𑍍𑌯𑌮𑌾𑌨𑌨𑍍𑌦𑌮𑍂𑌰𑍍𑌤𑌿𑌂
𑌸𑍍𑌵𑌯𑌮𑌿𑌤𑌿 𑌪𑌰𑌿𑌚𑍀𑌯 𑌬𑍍𑌰𑌹𑍍𑌮𑌰𑍂𑌪𑍇𑌣 𑌤𑌿𑌷𑍍𑌠 ॥ 395॥
𑌶𑌵𑌾𑌕𑌾𑌰𑌂 𑌯𑌾𑌵𑌦𑍍𑌭𑌜𑌤𑌿 𑌮𑌨𑍁𑌜𑌸𑍍𑌤𑌾𑌵𑌦𑌶𑍁𑌚𑌿𑌃
𑌪𑌰𑍇𑌭𑍍𑌯𑌃 𑌸𑍍𑌯𑌾𑌤𑍍𑌕𑍍𑌲𑍇𑌶𑍋 𑌜𑌨𑌨𑌮𑌰𑌣𑌵𑍍𑌯𑌾𑌧𑌿𑌨𑌿𑌲𑌯𑌃 । (𑌪𑌾𑌠𑌭𑍇𑌦𑌃 - 𑌵𑍍𑌯𑌾𑌧𑌿𑌨𑌿𑌰𑌯𑌾𑌃)
𑌯𑌦𑌾𑌤𑍍𑌮𑌾𑌨𑌂 𑌶𑍁𑌦𑍍𑌧𑌂 𑌕𑌲𑌯𑌤𑌿 𑌶𑌿𑌵𑌾𑌕𑌾𑌰𑌮𑌚𑌲𑌮𑍍
𑌤𑌦𑌾 𑌤𑍇𑌭𑍍𑌯𑍋 𑌮𑍁𑌕𑍍𑌤𑍋 𑌭𑌵𑌤𑌿 𑌹𑌿 𑌤𑌦𑌾𑌹 𑌶𑍍𑌰𑍁𑌤𑌿𑌰𑌪𑌿 ॥ 396॥
𑌸𑍍𑌵𑌾𑌤𑍍𑌮𑌨𑍍𑌯𑌾𑌰𑍋𑌪𑌿𑌤𑌾𑌶𑍇𑌷𑌾𑌭𑌾𑌸𑌵𑌸𑍍𑌤𑍁𑌨𑌿𑌰𑌾𑌸𑌤𑌃 ।
𑌸𑍍𑌵𑌯𑌮𑍇𑌵 𑌪𑌰𑌂 𑌬𑍍𑌰𑌹𑍍𑌮 𑌪𑍂𑌰𑍍𑌣𑌮𑌦𑍍𑌵𑌯𑌮𑌕𑍍𑌰𑌿𑌯𑌮𑍍 ॥ 397॥
𑌸𑌮𑌾𑌹𑌿𑌤𑌾𑌯𑌾𑌂 𑌸𑌤𑌿 𑌚𑌿𑌤𑍍𑌤𑌵𑍃𑌤𑍍𑌤𑍗
𑌪𑌰𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌨 𑌦𑍃𑌶𑍍𑌯𑌤𑍇 𑌕𑌶𑍍𑌚𑌿𑌦𑌯𑌂 𑌵𑌿𑌕𑌲𑍍𑌪𑌃
𑌪𑍍𑌰𑌜𑌲𑍍𑌪𑌮𑌾𑌤𑍍𑌰𑌃 𑌪𑌰𑌿𑌶𑌿𑌷𑍍𑌯𑌤𑍇 𑌯𑌤𑌃 ॥ 398॥ (𑌪𑌾𑌠𑌭𑍇𑌦𑌃 - 𑌤𑌤𑌃)
𑌅𑌸𑌤𑍍𑌕𑌲𑍍𑌪𑍋 𑌵𑌿𑌕𑌲𑍍𑌪𑍋𑌽𑌯𑌂 𑌵𑌿𑌶𑍍𑌵𑌮𑌿𑌤𑍍𑌯𑍇𑌕𑌵𑌸𑍍𑌤𑍁𑌨𑌿 ।
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 399॥
𑌦𑍍𑌰𑌷𑍍𑌟𑍁𑌦𑌰𑍍𑌶𑌨𑌦𑍃𑌶𑍍𑌯𑌾𑌦𑌿𑌭𑌾𑌵𑌶𑍂𑌨𑍍𑌯𑍈𑌕𑌵𑌸𑍍𑌤𑍁𑌨𑌿 । (𑌪𑌾𑌠𑌭𑍇𑌦𑌃 - 𑌦𑍍𑌰𑌷𑍍𑌟𑍃𑌦𑌰𑍍𑌶𑌨)
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 400॥
𑌕𑌲𑍍𑌪𑌾𑌰𑍍𑌣𑌵 𑌇𑌵𑌾𑌤𑍍𑌯𑌨𑍍𑌤𑌪𑌰𑌿𑌪𑍂𑌰𑍍𑌣𑍈𑌕𑌵𑌸𑍍𑌤𑍁𑌨𑌿 ।
𑌨𑌿𑌰𑍍𑌵𑌿𑌕𑌾𑌰𑍇 𑌨𑌿𑌰𑌾𑌕𑌾𑌰𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 401॥
𑌤𑍇𑌜𑌸𑍀𑌵 𑌤𑌮𑍋 𑌯𑌤𑍍𑌰 𑌪𑍍𑌰𑌲𑍀𑌨𑌂 𑌭𑍍𑌰𑌾𑌨𑍍𑌤𑌿𑌕𑌾𑌰𑌣𑌮𑍍 । (𑌪𑌾𑌠𑌭𑍇𑌦𑌃 - 𑌯𑌤𑍍𑌰 𑌵𑌿𑌲𑍀𑌨𑌂)
𑌅𑌦𑍍𑌵𑌿𑌤𑍀𑌯𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌨𑌿𑌰𑍍𑌵𑌿𑌶𑍇𑌷𑍇 𑌭𑌿𑌦𑌾 𑌕𑍁𑌤𑌃 ॥ 402॥
𑌏𑌕𑌾𑌤𑍍𑌮𑌕𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌭𑍇𑌦𑌵𑌾𑌰𑍍𑌤𑌾 𑌕𑌥𑌂 𑌵𑌸𑍇𑌤𑍍 । (𑌪𑌾𑌠𑌭𑍇𑌦𑌃 - 𑌕𑌥𑌂 𑌭𑌵𑍇𑌤𑍍)
𑌸𑍁𑌷𑍁𑌪𑍍𑌤𑍗 𑌸𑍁𑌖𑌮𑌾𑌤𑍍𑌰𑌾𑌯𑌾𑌂 𑌭𑍇𑌦𑌃 𑌕𑍇𑌨𑌾𑌵𑌲𑍋𑌕𑌿𑌤𑌃 ॥ 403॥
𑌨 𑌹𑍍𑌯𑌸𑍍𑌤𑌿 𑌵𑌿𑌶𑍍𑌵𑌂 𑌪𑌰𑌤𑌤𑍍𑌤𑍍𑌵𑌬𑍋𑌧𑌾𑌤𑍍
𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌕𑌾𑌲𑌤𑍍𑌰𑌯𑍇 𑌨𑌾𑌪𑍍𑌯𑌹𑌿𑌰𑍀𑌕𑍍𑌷𑌿𑌤𑍋 𑌗𑍁𑌣𑍇
𑌨 𑌹𑍍𑌯𑌮𑍍𑌬𑍁𑌬𑌿𑌨𑍍𑌦𑍁𑌰𑍍𑌮𑍃𑌗𑌤𑍃𑌷𑍍𑌣𑌿𑌕𑌾𑌯𑌾𑌮𑍍 ॥ 404॥
𑌮𑌾𑌯𑌾𑌮𑌾𑌤𑍍𑌰𑌮𑌿𑌦𑌂 𑌦𑍍𑌵𑍈𑌤𑌮𑌦𑍍𑌵𑍈𑌤𑌂 𑌪𑌰𑌮𑌾𑌰𑍍𑌥𑌤𑌃 ।
𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌃 𑌸𑌾𑌕𑍍𑌷𑌾𑌤𑍍𑌸𑍁𑌷𑍁𑌪𑍍𑌤𑌾𑌵𑌨𑍁𑌭𑍂𑌯𑌤𑍇 ॥ 405॥
𑌅𑌨𑌨𑍍𑌯𑌤𑍍𑌵𑌮𑌧𑌿𑌷𑍍𑌠𑌾𑌨𑌾𑌦𑌾𑌰𑍋𑌪𑍍𑌯𑌸𑍍𑌯 𑌨𑌿𑌰𑍀𑌕𑍍𑌷𑌿𑌤𑌮𑍍 ।
𑌪𑌣𑍍𑌡𑌿𑌤𑍈 𑌰𑌜𑍍𑌜𑍁𑌸𑌰𑍍𑌪𑌾𑌦𑍗 𑌵𑌿𑌕𑌲𑍍𑌪𑍋 𑌭𑍍𑌰𑌾𑌨𑍍𑌤𑌿𑌜𑍀𑌵𑌨𑌃 ॥ 406॥
𑌚𑌿𑌤𑍍𑌤𑌮𑍂𑌲𑍋 𑌵𑌿𑌕𑌲𑍍𑌪𑍋𑌽𑌯𑌂 𑌚𑌿𑌤𑍍𑌤𑌾𑌭𑌾𑌵𑍇 𑌨 𑌕𑌶𑍍𑌚𑌨 ।
𑌅𑌤𑌶𑍍𑌚𑌿𑌤𑍍𑌤𑌂 𑌸𑌮𑌾𑌧𑍇𑌹𑌿 𑌪𑍍𑌰𑌤𑍍𑌯𑌗𑍍𑌰𑍂𑌪𑍇 𑌪𑌰𑌾𑌤𑍍𑌮𑌨𑌿 ॥ 407॥
𑌕𑌿𑌮𑌪𑌿 𑌸𑌤𑌤𑌬𑍋𑌧𑌂 𑌕𑍇𑌵𑌲𑌾𑌨𑌨𑍍𑌦𑌰𑍂𑌪𑌂
𑌨𑌿𑌰𑍁𑌪𑌮𑌮𑌤𑌿𑌵𑍇𑌲𑌂 𑌨𑌿𑌤𑍍𑌯𑌮𑍁𑌕𑍍𑌤𑌂 𑌨𑌿𑌰𑍀𑌹𑌮𑍍 ।
𑌨𑌿𑌰𑌵𑌧𑌿𑌗𑌗𑌨𑌾𑌭𑌂 𑌨𑌿𑌷𑍍𑌕𑌲𑌂 𑌨𑌿𑌰𑍍𑌵𑌿𑌕𑌲𑍍𑌪𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍗 ॥ 408॥
𑌪𑍍𑌰𑌕𑍃𑌤𑌿𑌵𑌿𑌕𑍃𑌤𑌿𑌶𑍂𑌨𑍍𑌯𑌂 𑌭𑌾𑌵𑌨𑌾𑌤𑍀𑌤𑌭𑌾𑌵𑌂
𑌸𑌮𑌰𑌸𑌮𑌸𑌮𑌾𑌨𑌂 𑌮𑌾𑌨𑌸𑌮𑍍𑌬𑌨𑍍𑌧𑌦𑍂𑌰𑌮𑍍 ।
𑌨𑌿𑌗𑌮𑌵𑌚𑌨𑌸𑌿𑌦𑍍𑌧𑌂 𑌨𑌿𑌤𑍍𑌯𑌮𑌸𑍍𑌮𑌤𑍍𑌪𑍍𑌰𑌸𑌿𑌦𑍍𑌧𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍗 ॥ 409॥
𑌅𑌜𑌰𑌮𑌮𑌰𑌮𑌸𑍍𑌤𑌾𑌭𑌾𑌵𑌵𑌸𑍍𑌤𑍁𑌸𑍍𑌵𑌰𑍂𑌪𑌂 (𑌪𑌾𑌠𑌭𑍇𑌦𑌃 - 𑌭𑌾𑌸𑌵𑌸𑍍𑌤𑍁)
𑌸𑍍𑌤𑌿𑌮𑌿𑌤𑌸𑌲𑌿𑌲𑌰𑌾𑌶𑌿𑌪𑍍𑌰𑌖𑍍𑌯𑌮𑌾𑌖𑍍𑌯𑌾𑌵𑌿𑌹𑍀𑌨𑌮𑍍 ।
𑌶𑌮𑌿𑌤𑌗𑍁𑌣𑌵𑌿𑌕𑌾𑌰𑌂 𑌶𑌾𑌶𑍍𑌵𑌤𑌂 𑌶𑌾𑌨𑍍𑌤𑌮𑍇𑌕𑌂
𑌹𑍃𑌦𑌿 𑌕𑌲𑌯𑌤𑌿 𑌵𑌿𑌦𑍍𑌵𑌾𑌨𑍍 𑌬𑍍𑌰𑌹𑍍𑌮 𑌪𑍂𑌰𑍍𑌣𑌂 𑌸𑌮𑌾𑌧𑍗 ॥ 410॥
𑌸𑌮𑌾𑌹𑌿𑌤𑌾𑌨𑍍𑌤𑌃𑌕𑌰𑌣𑌃 𑌸𑍍𑌵𑌰𑍂𑌪𑍇
𑌵𑌿𑌲𑍋𑌕𑌯𑌾𑌤𑍍𑌮𑌾𑌨𑌮𑌖𑌣𑍍𑌡𑌵𑍈𑌭𑌵𑌮𑍍 ।
𑌵𑌿𑌚𑍍𑌛𑌿𑌨𑍍𑌦𑍍𑌧𑌿 𑌬𑌨𑍍𑌧𑌂 𑌭𑌵𑌗𑌨𑍍𑌧𑌗𑌨𑍍𑌧𑌿𑌤𑌂 (𑌪𑌾𑌠𑌭𑍇𑌦𑌃 - 𑌗𑌨𑍍𑌧𑌗𑌨𑍍𑌧𑌿𑌲𑌂)
𑌯𑌤𑍍𑌨𑍇𑌨 𑌪𑍁𑌂𑌸𑍍𑌤𑍍𑌵𑌂 𑌸𑌫𑌲𑍀𑌕𑍁𑌰𑍁𑌷𑍍𑌵 ॥ 411-
𑌸𑌰𑍍𑌵𑍋𑌪𑌾𑌧𑌿𑌵𑌿𑌨𑌿𑌰𑍍𑌮𑍁𑌕𑍍𑌤𑌂 𑌸𑌚𑍍𑌚𑌿𑌦𑌾𑌨𑌨𑍍𑌦𑌮𑌦𑍍𑌵𑌯𑌮𑍍 ।
𑌭𑌾𑌵𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌸𑍍𑌥𑌂 𑌨 𑌭𑍂𑌯𑌃 𑌕𑌲𑍍𑌪𑌸𑍇𑌽𑌧𑍍𑌵𑌨𑍇 ॥ 412॥
𑌛𑌾𑌯𑍇𑌵 𑌪𑍁𑌂𑌸𑌃 𑌪𑌰𑌿𑌦𑍃𑌶𑍍𑌯𑌮𑌾𑌨-
𑌮𑌾𑌭𑌾𑌸𑌰𑍂𑌪𑍇𑌣 𑌫𑌲𑌾𑌨𑍁𑌭𑍂𑌤𑍍𑌯𑌾 ।
𑌶𑌰𑍀𑌰𑌮𑌾𑌰𑌾𑌚𑍍𑌛𑌵𑌵𑌨𑍍𑌨𑌿𑌰𑌸𑍍𑌤𑌂
𑌪𑍁𑌨𑌰𑍍𑌨 𑌸𑌨𑍍𑌧𑌤𑍍𑌤 𑌇𑌦𑌂 𑌮𑌹𑌾𑌤𑍍𑌮𑌾 ॥ 413॥
𑌸𑌤𑌤𑌵𑌿𑌮𑌲𑌬𑍋𑌧𑌾𑌨𑌨𑍍𑌦𑌰𑍂𑌪𑌂 𑌸𑌮𑍇𑌤𑍍𑌯 (𑌪𑌾𑌠𑌭𑍇𑌦𑌃 - 𑌸𑍍𑌵𑌮𑍇𑌤𑍍𑌯)
𑌤𑍍𑌯𑌜 𑌜𑌡𑌮𑌲𑌰𑍂𑌪𑍋𑌪𑌾𑌧𑌿𑌮𑍇𑌤𑌂 𑌸𑍁𑌦𑍂𑌰𑍇 ।
𑌅𑌥 𑌪𑍁𑌨𑌰𑌪𑌿 𑌨𑍈𑌷 𑌸𑍍𑌮𑌰𑍍𑌯𑌤𑌾𑌂 𑌵𑌾𑌨𑍍𑌤𑌵𑌸𑍍𑌤𑍁 (𑌪𑌾𑌠𑌭𑍇𑌦𑌃 - 𑌪𑍁𑌨𑌰𑌪𑌿 𑌨𑍈𑌵)
𑌸𑍍𑌮𑌰𑌣𑌵𑌿𑌷𑌯𑌭𑍂𑌤𑌂 𑌕𑌲𑍍𑌪𑌤𑍇 𑌕𑍁𑌤𑍍𑌸𑌨𑌾𑌯 ॥ 414॥
𑌸𑌮𑍂𑌲𑌮𑍇𑌤𑌤𑍍𑌪𑌰𑌿𑌦𑌾𑌹𑍍𑌯 𑌵𑌹𑍍𑌨𑍗 (𑌪𑌾𑌠𑌭𑍇𑌦𑌃 - 𑌪𑌰𑌿𑌦𑌹𑍍𑌯)
𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌨𑌿𑌰𑍍𑌵𑌿𑌕𑌲𑍍𑌪𑍇 ।
𑌤𑌤𑌃 𑌸𑍍𑌵𑌯𑌂 𑌨𑌿𑌤𑍍𑌯𑌵𑌿𑌶𑍁𑌦𑍍𑌧𑌬𑍋𑌧𑌾-
𑌨𑌨𑍍𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌵𑌿𑌦𑍍𑌵𑌰𑌿𑌷𑍍𑌠𑌃 ॥ 415॥
𑌪𑍍𑌰𑌾𑌰𑌬𑍍𑌧𑌸𑍂𑌤𑍍𑌰𑌗𑍍𑌰𑌥𑌿𑌤𑌂 𑌶𑌰𑍀𑌰𑌂
𑌪𑍍𑌰𑌯𑌾𑌤𑍁 𑌵𑌾 𑌤𑌿𑌷𑍍𑌠𑌤𑍁 𑌗𑍋𑌰𑌿𑌵 𑌸𑍍𑌰𑌕𑍍 ।
𑌨 𑌤𑌤𑍍𑌪𑍁𑌨𑌃 𑌪𑌶𑍍𑌯𑌤𑌿 𑌤𑌤𑍍𑌤𑍍𑌵𑌵𑍇𑌤𑍍𑌤𑌾-
𑌽𑌽𑌨𑌨𑍍𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌲𑍀𑌨𑌵𑍃𑌤𑍍𑌤𑌿𑌃 ॥ 416॥
𑌅𑌖𑌣𑍍𑌡𑌾𑌨𑌨𑍍𑌦𑌮𑌾𑌤𑍍𑌮𑌾𑌨𑌂 𑌵𑌿𑌜𑍍𑌞𑌾𑌯 𑌸𑍍𑌵𑌸𑍍𑌵𑌰𑍂𑌪𑌤𑌃 ।
𑌕𑌿𑌮𑌿𑌚𑍍𑌛𑌨𑍍 𑌕𑌸𑍍𑌯 𑌵𑌾 𑌹𑍇𑌤𑍋𑌰𑍍𑌦𑍇𑌹𑌂 𑌪𑍁𑌷𑍍𑌣𑌾𑌤𑌿 𑌤𑌤𑍍𑌤𑍍𑌵𑌵𑌿𑌤𑍍 ॥ 417॥
𑌸𑌂𑌸𑌿𑌦𑍍𑌧𑌸𑍍𑌯 𑌫𑌲𑌂 𑌤𑍍𑌵𑍇𑌤𑌜𑍍𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌯𑍋𑌗𑌿𑌨𑌃 ।
𑌬𑌹𑌿𑌰𑌨𑍍𑌤𑌃 𑌸𑌦𑌾𑌨𑌨𑍍𑌦𑌰𑌸𑌾𑌸𑍍𑌵𑌾𑌦𑌨𑌮𑌾𑌤𑍍𑌮𑌨𑌿 ॥ 418॥
𑌵𑍈𑌰𑌾𑌗𑍍𑌯𑌸𑍍𑌯 𑌫𑌲𑌂 𑌬𑍋𑌧𑍋 𑌬𑍋𑌧𑌸𑍍𑌯𑍋𑌪𑌰𑌤𑌿𑌃 𑌫𑌲𑌮𑍍 ।
𑌸𑍍𑌵𑌾𑌨𑌨𑍍𑌦𑌾𑌨𑍁𑌭𑌵𑌾𑌚𑍍𑌛𑌾𑌨𑍍𑌤𑌿𑌰𑍇𑌷𑍈𑌵𑍋𑌪𑌰𑌤𑍇𑌃 𑌫𑌲𑌮𑍍 ॥ 419॥
𑌯𑌦𑍍𑌯𑍁𑌤𑍍𑌤𑌰𑍋𑌤𑍍𑌤𑌰𑌾𑌭𑌾𑌵𑌃 𑌪𑍂𑌰𑍍𑌵𑌪𑍂𑌰𑍍𑌵𑌨𑍍𑌤𑍁 𑌨𑌿𑌷𑍍𑌫𑌲𑌮𑍍 ।
𑌨𑌿𑌵𑍃𑌤𑍍𑌤𑌿𑌃 𑌪𑌰𑌮𑌾 𑌤𑍃𑌪𑍍𑌤𑌿𑌰𑌾𑌨𑌨𑍍𑌦𑍋𑌽𑌨𑍁𑌪𑌮𑌃 𑌸𑍍𑌵𑌤𑌃 ॥ 420॥
𑌦𑍃𑌷𑍍𑌟𑌦𑍁𑌃𑌖𑍇𑌷𑍍𑌵𑌨𑍁𑌦𑍍𑌵𑍇𑌗𑍋 𑌵𑌿𑌦𑍍𑌯𑌾𑌯𑌾𑌃 𑌪𑍍𑌰𑌸𑍍𑌤𑍁𑌤𑌂 𑌫𑌲𑌮𑍍 ।
𑌯𑌤𑍍𑌕𑍃𑌤𑌂 𑌭𑍍𑌰𑌾𑌨𑍍𑌤𑌿𑌵𑍇𑌲𑌾𑌯𑌾𑌂 𑌨𑌾𑌨𑌾 𑌕𑌰𑍍𑌮 𑌜𑍁𑌗𑍁𑌪𑍍𑌸𑌿𑌤𑌮𑍍 ।
𑌪𑌶𑍍𑌚𑌾𑌨𑍍𑌨𑌰𑍋 𑌵𑌿𑌵𑍇𑌕𑍇𑌨 𑌤𑌤𑍍𑌕𑌥𑌂 𑌕𑌰𑍍𑌤𑍁𑌮𑌰𑍍𑌹𑌤𑌿 ॥ 421॥
𑌵𑌿𑌦𑍍𑌯𑌾𑌫𑌲𑌂 𑌸𑍍𑌯𑌾𑌦𑌸𑌤𑍋 𑌨𑌿𑌵𑍃𑌤𑍍𑌤𑌿𑌃
𑌪𑍍𑌰𑌵𑍃𑌤𑍍𑌤𑌿𑌰𑌜𑍍𑌞𑌾𑌨𑌫𑌲𑌂 𑌤𑌦𑍀𑌕𑍍𑌷𑌿𑌤𑌮𑍍 ।
𑌤𑌜𑍍𑌜𑍍𑌞𑌾𑌜𑍍𑌞𑌯𑍋𑌰𑍍𑌯𑌨𑍍𑌮𑍃𑌗𑌤𑍃𑌷𑍍𑌣𑌿𑌕𑌾𑌦𑍗
𑌨𑍋𑌚𑍇𑌦𑍍𑌵𑌿𑌦𑌾𑌂 𑌦𑍃𑌷𑍍𑌟𑌫𑌲𑌂 𑌕𑌿𑌮𑌸𑍍𑌮𑌾𑌤𑍍 ॥ 422॥ (𑌪𑌾𑌠𑌭𑍇𑌦𑌃 - 𑌨𑍋𑌚𑍇𑌦𑍍𑌵𑌿𑌦𑍋)
𑌅𑌜𑍍𑌞𑌾𑌨𑌹𑍃𑌦𑌯𑌗𑍍𑌰𑌨𑍍𑌥𑍇𑌰𑍍𑌵𑌿𑌨𑌾𑌶𑍋 𑌯𑌦𑍍𑌯𑌶𑍇𑌷𑌤𑌃 ।
𑌅𑌨𑌿𑌚𑍍𑌛𑍋𑌰𑍍𑌵𑌿𑌷𑌯𑌃 𑌕𑌿𑌂 𑌨𑍁 𑌪𑍍𑌰𑌵𑍃𑌤𑍍𑌤𑍇𑌃 𑌕𑌾𑌰𑌣𑌂 𑌸𑍍𑌵𑌤𑌃 ॥ 423॥ (𑌪𑌾𑌠𑌭𑍇𑌦𑌃 - 𑌵𑌿𑌦𑍁𑌷𑌃 𑌕𑌿𑌂)
𑌵𑌾𑌸𑌨𑌾𑌨𑍁𑌦𑌯𑍋 𑌭𑍋𑌗𑍍𑌯𑍇 𑌵𑍈𑌰𑌾𑌗𑍍𑌯𑌸𑍍𑌯 𑌤𑌦𑌾𑌵𑌧𑌿𑌃 ।
𑌅𑌹𑌮𑍍𑌭𑌾𑌵𑍋𑌦𑌯𑌾𑌭𑌾𑌵𑍋 𑌬𑍋𑌧𑌸𑍍𑌯 𑌪𑌰𑌮𑌾𑌵𑌧𑌿𑌃 ।
𑌲𑍀𑌨𑌵𑍃𑌤𑍍𑌤𑍈𑌰𑌨𑍁𑌤𑍍𑌪𑌤𑍍𑌤𑌿𑌰𑍍𑌮𑌰𑍍𑌯𑌾𑌦𑍋𑌪𑌰𑌤𑍇𑌸𑍍𑌤𑍁 𑌸𑌾 ॥ 424॥ (𑌪𑌾𑌠𑌭𑍇𑌦𑌃 - 𑌵𑍃𑌤𑍍𑌤𑍇𑌰)
𑌬𑍍𑌰𑌹𑍍𑌮𑌾𑌕𑌾𑌰𑌤𑌯𑌾 𑌸𑌦𑌾 𑌸𑍍𑌥𑌿𑌤𑌤𑌯𑌾 𑌨𑌿𑌰𑍍𑌮𑍁𑌕𑍍𑌤𑌬𑌾𑌹𑍍𑌯𑌾𑌰𑍍𑌥𑌧𑍀-
𑌰𑌨𑍍𑌯𑌾𑌵𑍇𑌦𑌿𑌤𑌭𑍋𑌗𑍍𑌯𑌭𑍋𑌗𑌕𑌲𑌨𑍋 𑌨𑌿𑌦𑍍𑌰𑌾𑌲𑍁𑌵𑌦𑍍𑌬𑌾𑌲𑌵𑌤𑍍 ।
𑌸𑍍𑌵𑌪𑍍𑌨𑌾𑌲𑍋𑌕𑌿𑌤𑌲𑍋𑌕𑌵𑌜𑍍𑌜𑌗𑌦𑌿𑌦𑌂 𑌪𑌶𑍍𑌯𑌨𑍍𑌕𑍍𑌵𑌚𑌿𑌲𑍍𑌲𑌬𑍍𑌧𑌧𑍀-
𑌰𑌾𑌸𑍍𑌤𑍇 𑌕𑌶𑍍𑌚𑌿𑌦𑌨𑌨𑍍𑌤𑌪𑍁𑌣𑍍𑌯𑌫𑌲𑌭𑍁𑌗𑍍𑌧𑌨𑍍𑌯𑌃 𑌸 𑌮𑌾𑌨𑍍𑌯𑍋 𑌭𑍁𑌵𑌿 ॥ 425॥
𑌸𑍍𑌥𑌿𑌤𑌪𑍍𑌰𑌜𑍍𑌞𑍋 𑌯𑌤𑌿𑌰𑌯𑌂 𑌯𑌃 𑌸𑌦𑌾𑌨𑌨𑍍𑌦𑌮𑌶𑍍𑌨𑍁𑌤𑍇 ।
𑌬𑍍𑌰𑌹𑍍𑌮𑌣𑍍𑌯𑍇𑌵 𑌵𑌿𑌲𑍀𑌨𑌾𑌤𑍍𑌮𑌾 𑌨𑌿𑌰𑍍𑌵𑌿𑌕𑌾𑌰𑍋 𑌵𑌿𑌨𑌿𑌷𑍍𑌕𑍍𑌰𑌿𑌯𑌃 ॥ 426॥
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌃 𑌶𑍋𑌧𑌿𑌤𑌯𑍋𑌰𑍇𑌕𑌭𑌾𑌵𑌾𑌵𑌗𑌾𑌹𑌿𑌨𑍀 ।
𑌨𑌿𑌰𑍍𑌵𑌿𑌕𑌲𑍍𑌪𑌾 𑌚 𑌚𑌿𑌨𑍍𑌮𑌾𑌤𑍍𑌰𑌾 𑌵𑍃𑌤𑍍𑌤𑌿𑌃 𑌪𑍍𑌰𑌜𑍍𑌞𑍇𑌤𑌿 𑌕𑌥𑍍𑌯𑌤𑍇 ।
𑌸𑍁𑌸𑍍𑌥𑌿𑌤𑌾𑌽𑌸𑍗 𑌭𑌵𑍇𑌦𑍍𑌯𑌸𑍍𑌯 𑌸𑍍𑌥𑌿𑌤𑌪𑍍𑌰𑌜𑍍𑌞𑌃 𑌸 𑌉𑌚𑍍𑌯𑌤𑍇 ॥ 427॥
𑌯𑌸𑍍𑌯 𑌸𑍍𑌥𑌿𑌤𑌾 𑌭𑌵𑍇𑌤𑍍𑌪𑍍𑌰𑌜𑍍𑌞𑌾 𑌯𑌸𑍍𑌯𑌾𑌨𑌨𑍍𑌦𑍋 𑌨𑌿𑌰𑌨𑍍𑌤𑌰𑌃 ।
𑌪𑍍𑌰𑌪𑌞𑍍𑌚𑍋 𑌵𑌿𑌸𑍍𑌮𑍃𑌤𑌪𑍍𑌰𑌾𑌯𑌃 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 428॥
𑌲𑍀𑌨𑌧𑍀𑌰𑌪𑌿 𑌜𑌾𑌗𑌰𑍍𑌤𑌿 𑌜𑌾𑌗𑍍𑌰𑌦𑍍𑌧𑌰𑍍𑌮𑌵𑌿𑌵𑌰𑍍𑌜𑌿𑌤𑌃 ।
𑌬𑍋𑌧𑍋 𑌨𑌿𑌰𑍍𑌵𑌾𑌸𑌨𑍋 𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 429॥
𑌶𑌾𑌨𑍍𑌤𑌸𑌂𑌸𑌾𑌰𑌕𑌲𑌨𑌃 𑌕𑌲𑌾𑌵𑌾𑌨𑌪𑌿 𑌨𑌿𑌷𑍍𑌕𑌲𑌃 ।
𑌯𑌸𑍍𑌯 𑌚𑌿𑌤𑍍𑌤𑌂 𑌵𑌿𑌨𑌿𑌶𑍍𑌚𑌿𑌨𑍍𑌤𑌂 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 430॥ (𑌪𑌾𑌠𑌭𑍇𑌦𑌃 - 𑌯𑌃 𑌸𑌚𑌿𑌤𑍍𑌤𑍋𑌽𑌪𑌿 𑌨𑌿𑌶𑍍𑌚𑌿𑌤𑍍𑌤𑌃)
𑌵𑌰𑍍𑌤𑌮𑌾𑌨𑍇𑌽𑌪𑌿 𑌦𑍇𑌹𑍇𑌽𑌸𑍍𑌮𑌿𑌞𑍍𑌛𑌾𑌯𑌾𑌵𑌦𑌨𑍁𑌵𑌰𑍍𑌤𑌿𑌨𑌿 ।
𑌅𑌹𑌨𑍍𑌤𑌾𑌮𑌮𑌤𑌾𑌽𑌭𑌾𑌵𑍋 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 431॥
𑌅𑌤𑍀𑌤𑌾𑌨𑌨𑍁𑌸𑌨𑍍𑌧𑌾𑌨𑌂 𑌭𑌵𑌿𑌷𑍍𑌯𑌦𑌵𑌿𑌚𑌾𑌰𑌣𑌮𑍍 ।
𑌔𑌦𑌾𑌸𑍀𑌨𑍍𑌯𑌮𑌪𑌿 𑌪𑍍𑌰𑌾𑌪𑍍𑌤𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 432॥ (𑌪𑌾𑌠𑌭𑍇𑌦𑌃 - 𑌪𑍍𑌰𑌾𑌪𑍍𑌤𑍇)
𑌗𑍁𑌣𑌦𑍋𑌷𑌵𑌿𑌶𑌿𑌷𑍍𑌟𑍇𑌽𑌸𑍍𑌮𑌿𑌨𑍍𑌸𑍍𑌵𑌭𑌾𑌵𑍇𑌨 𑌵𑌿𑌲𑌕𑍍𑌷𑌣𑍇 ।
𑌸𑌰𑍍𑌵𑌤𑍍𑌰 𑌸𑌮𑌦𑌰𑍍𑌶𑌿𑌤𑍍𑌵𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 433॥
𑌇𑌷𑍍𑌟𑌾𑌨𑌿𑌷𑍍𑌟𑌾𑌰𑍍𑌥𑌸𑌮𑍍𑌪𑍍𑌰𑌾𑌪𑍍𑌤𑍗 𑌸𑌮𑌦𑌰𑍍𑌶𑌿𑌤𑌯𑌾𑌽𑌽𑌤𑍍𑌮𑌨𑌿 ।
𑌉𑌭𑌯𑌤𑍍𑌰𑌾𑌵𑌿𑌕𑌾𑌰𑌿𑌤𑍍𑌵𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 434॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌰𑌸𑌾𑌸𑍍𑌵𑌾𑌦𑌾𑌸𑌕𑍍𑌤𑌚𑌿𑌤𑍍𑌤𑌤𑌯𑌾 𑌯𑌤𑍇𑌃 ।
𑌅𑌨𑍍𑌤𑌰𑍍𑌬𑌹𑌿𑌰𑌵𑌿𑌜𑍍𑌞𑌾𑌨𑌂 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌮𑍍 ॥ 435॥
𑌦𑍇𑌹𑍇𑌨𑍍𑌦𑍍𑌰𑌿𑌯𑌾𑌦𑍗 𑌕𑌰𑍍𑌤𑌵𑍍𑌯𑍇 𑌮𑌮𑌾𑌹𑌮𑍍𑌭𑌾𑌵𑌵𑌰𑍍𑌜𑌿𑌤𑌃 ।
𑌔𑌦𑌾𑌸𑍀𑌨𑍍𑌯𑍇𑌨 𑌯𑌸𑍍𑌤𑌿𑌷𑍍𑌠𑍇𑌤𑍍𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 436॥ (𑌪𑌾𑌠𑌭𑍇𑌦𑌃 - 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)
𑌵𑌿𑌜𑍍𑌞𑌾𑌤 𑌆𑌤𑍍𑌮𑌨𑍋 𑌯𑌸𑍍𑌯 𑌬𑍍𑌰𑌹𑍍𑌮𑌭𑌾𑌵𑌃 𑌶𑍍𑌰𑍁𑌤𑍇𑌰𑍍𑌬𑌲𑌾𑌤𑍍 ।
𑌭𑌵𑌬𑌨𑍍𑌧𑌵𑌿𑌨𑌿𑌰𑍍𑌮𑍁𑌕𑍍𑌤𑌃 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 437॥ (𑌪𑌾𑌠𑌭𑍇𑌦𑌃 - 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)
𑌦𑍇𑌹𑍇𑌨𑍍𑌦𑍍𑌰𑌿𑌯𑍇𑌷𑍍𑌵𑌹𑌮𑍍𑌭𑌾𑌵 𑌇𑌦𑌮𑍍𑌭𑌾𑌵𑌸𑍍𑌤𑌦𑌨𑍍𑌯𑌕𑍇 ।
𑌯𑌸𑍍𑌯 𑌨𑍋 𑌭𑌵𑌤𑌃 𑌕𑍍𑌵𑌾𑌪𑌿 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥ 438॥
𑌜𑍀𑌵𑍇𑌶𑍋𑌭𑌯𑌸𑌂𑌸𑌾𑌰𑌰𑍂𑌪𑌦𑍁𑌰𑍍𑌵𑌾𑌸𑌨𑍋𑌜𑍍𑌝𑌿𑌤𑌾 ।
𑌸𑌾 𑌸𑌰𑍍𑌵𑌦𑌾 𑌭𑌵𑍇𑌦𑍍𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇 ॥
𑌨 𑌪𑍍𑌰𑌤𑍍𑌯𑌗𑍍𑌬𑍍𑌰𑌹𑍍𑌮𑌣𑍋𑌰𑍍𑌭𑍇𑌦𑌂 𑌕𑌦𑌾𑌪𑌿 𑌬𑍍𑌰𑌹𑍍𑌮𑌸𑌰𑍍𑌗𑌯𑍋𑌃 ।
𑌪𑍍𑌰𑌜𑍍𑌞𑌯𑌾 𑌯𑍋 𑌵𑌿𑌜𑌾𑌨𑌿𑌤𑌿 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 439॥ (𑌪𑌾𑌠𑌭𑍇𑌦𑌃 - 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)
𑌸𑌾𑌧𑍁𑌭𑌿𑌃 𑌪𑍂𑌜𑍍𑌯𑌮𑌾𑌨𑍇𑌽𑌸𑍍𑌮𑌿𑌨𑍍𑌪𑍀𑌡𑍍𑌯𑌮𑌾𑌨𑍇𑌽𑌪𑌿 𑌦𑍁𑌰𑍍𑌜𑌨𑍈𑌃 ।
𑌸𑌮𑌭𑌾𑌵𑍋 𑌭𑌵𑍇𑌦𑍍𑌯𑌸𑍍𑌯 𑌸 𑌜𑍀𑌵𑌨𑍍𑌮𑍁𑌕𑍍𑌤𑌲𑌕𑍍𑌷𑌣𑌃 ॥ 440॥ (𑌪𑌾𑌠𑌭𑍇𑌦𑌃 - 𑌸 𑌜𑍀𑌵𑌨𑍍𑌮𑍁𑌕𑍍𑌤 𑌇𑌷𑍍𑌯𑌤𑍇)
𑌯𑌤𑍍𑌰 𑌪𑍍𑌰𑌵𑌿𑌷𑍍𑌟𑌾 𑌵𑌿𑌷𑌯𑌾𑌃 𑌪𑌰𑍇𑌰𑌿𑌤𑌾
𑌨𑌦𑍀𑌪𑍍𑌰𑌵𑌾𑌹𑌾 𑌇𑌵 𑌵𑌾𑌰𑌿𑌰𑌾𑌶𑍗 ।
𑌲𑌿𑌨𑌨𑍍𑌤𑌿 𑌸𑌨𑍍𑌮𑌾𑌤𑍍𑌰𑌤𑌯𑌾 𑌨 𑌵𑌿𑌕𑍍𑌰𑌿𑌯𑌾𑌂
𑌉𑌤𑍍𑌪𑌾𑌦𑌯𑌨𑍍𑌤𑍍𑌯𑍇𑌷 𑌯𑌤𑌿𑌰𑍍𑌵𑌿𑌮𑍁𑌕𑍍𑌤𑌃 ॥ 441॥
𑌵𑌿𑌜𑍍𑌞𑌾𑌤𑌬𑍍𑌰𑌹𑍍𑌮𑌤𑌤𑍍𑌤𑍍𑌵𑌸𑍍𑌯 𑌯𑌥𑌾𑌪𑍂𑌰𑍍𑌵𑌂 𑌨 𑌸𑌂𑌸𑍃𑌤𑌿𑌃 ।
𑌅𑌸𑍍𑌤𑌿 𑌚𑍇𑌨𑍍𑌨 𑌸 𑌵𑌿𑌜𑍍𑌞𑌾𑌤𑌬𑍍𑌰𑌹𑍍𑌮𑌭𑌾𑌵𑍋 𑌬𑌹𑌿𑌰𑍍𑌮𑍁𑌖𑌃 ॥ 442॥
𑌪𑍍𑌰𑌾𑌚𑍀𑌨𑌵𑌾𑌸𑌨𑌾𑌵𑍇𑌗𑌾𑌦𑌸𑍗 𑌸𑌂𑌸𑌰𑌤𑍀𑌤𑌿 𑌚𑍇𑌤𑍍 ।
𑌨 𑌸𑌦𑍇𑌕𑌤𑍍𑌵𑌵𑌿𑌜𑍍𑌞𑌾𑌨𑌾𑌨𑍍𑌮𑌨𑍍𑌦𑍀 𑌭𑌵𑌤𑌿 𑌵𑌾𑌸𑌨𑌾 ॥ 443॥
𑌅𑌤𑍍𑌯𑌨𑍍𑌤𑌕𑌾𑌮𑍁𑌕𑌸𑍍𑌯𑌾𑌪𑌿 𑌵𑍃𑌤𑍍𑌤𑌿𑌃 𑌕𑍁𑌣𑍍𑌠𑌤𑌿 𑌮𑌾𑌤𑌰𑌿 ।
𑌤𑌥𑍈𑌵 𑌬𑍍𑌰𑌹𑍍𑌮𑌣𑌿 𑌜𑍍𑌞𑌾𑌤𑍇 𑌪𑍂𑌰𑍍𑌣𑌾𑌨𑌨𑍍𑌦𑍇 𑌮𑌨𑍀𑌷𑌿𑌣𑌃 ॥ 444॥
𑌨𑌿𑌦𑌿𑌧𑍍𑌯𑌾𑌸𑌨𑌶𑍀𑌲𑌸𑍍𑌯 𑌬𑌾𑌹𑍍𑌯𑌪𑍍𑌰𑌤𑍍𑌯𑌯 𑌈𑌕𑍍𑌷𑍍𑌯𑌤𑍇 ।
𑌬𑍍𑌰𑌵𑍀𑌤𑌿 𑌶𑍍𑌰𑍁𑌤𑌿𑌰𑍇𑌤𑌸𑍍𑌯 𑌪𑍍𑌰𑌾𑌰𑌬𑍍𑌧𑌂 𑌫𑌲𑌦𑌰𑍍𑌶𑌨𑌾𑌤𑍍 ॥ 445॥
𑌸𑍁𑌖𑌾𑌦𑍍𑌯𑌨𑍁𑌭𑌵𑍋 𑌯𑌾𑌵𑌤𑍍𑌤𑌾𑌵𑌤𑍍𑌪𑍍𑌰𑌾𑌰𑌬𑍍𑌧𑌮𑌿𑌷𑍍𑌯𑌤𑍇 ।
𑌫𑌲𑍋𑌦𑌯𑌃 𑌕𑍍𑌰𑌿𑌯𑌾𑌪𑍂𑌰𑍍𑌵𑍋 𑌨𑌿𑌷𑍍𑌕𑍍𑌰𑌿𑌯𑍋 𑌨 𑌹𑌿 𑌕𑍁𑌤𑍍𑌰𑌚𑌿𑌤𑍍 ॥ 446॥
𑌅𑌹𑌂 𑌬𑍍𑌰𑌹𑍍𑌮𑍇𑌤𑌿 𑌵𑌿𑌜𑍍𑌞𑌾𑌨𑌾𑌤𑍍𑌕𑌲𑍍𑌪𑌕𑍋𑌟𑌿𑌶𑌤𑌾𑌰𑍍𑌜𑌿𑌤𑌮𑍍 ।
𑌸𑌞𑍍𑌚𑌿𑌤𑌂 𑌵𑌿𑌲𑌯𑌂 𑌯𑌾𑌤𑌿 𑌪𑍍𑌰𑌬𑍋𑌧𑌾𑌤𑍍𑌸𑍍𑌵𑌪𑍍𑌨𑌕𑌰𑍍𑌮𑌵𑌤𑍍 ॥ 447॥
𑌯𑌤𑍍𑌕𑍃𑌤𑌂 𑌸𑍍𑌵𑌪𑍍𑌨𑌵𑍇𑌲𑌾𑌯𑌾𑌂 𑌪𑍁𑌣𑍍𑌯𑌂 𑌵𑌾 𑌪𑌾𑌪𑌮𑍁𑌲𑍍𑌬𑌣𑌮𑍍 ।
𑌸𑍁𑌪𑍍𑌤𑍋𑌤𑍍𑌥𑌿𑌤𑌸𑍍𑌯 𑌕𑌿𑌨𑍍𑌤𑌤𑍍𑌸𑍍𑌯𑌾𑌤𑍍𑌸𑍍𑌵𑌰𑍍𑌗𑌾𑌯 𑌨𑌰𑌕𑌾𑌯 𑌵𑌾 ॥ 448॥
𑌸𑍍𑌵𑌮𑌸𑌙𑍍𑌗𑌮𑍁𑌦𑌾𑌸𑍀𑌨𑌂 𑌪𑌰𑌿𑌜𑍍𑌞𑌾𑌯 𑌨𑌭𑍋 𑌯𑌥𑌾 ।
𑌨 𑌶𑍍𑌲𑌿𑌷𑍍𑌯𑌤𑌿 𑌚 𑌯𑌤𑍍𑌕𑌿𑌞𑍍𑌚𑌿𑌤𑍍𑌕𑌦𑌾𑌚𑌿𑌦𑍍𑌭𑌾𑌵𑌿𑌕𑌰𑍍𑌮𑌭𑌿𑌃 ॥ 449॥ (𑌪𑌾𑌠𑌭𑍇𑌦𑌃 - 𑌶𑍍𑌲𑌿𑌷𑍍𑌯𑌤𑍇 𑌯𑌤𑌿𑌃 𑌕𑌿𑌞𑍍𑌚𑌿𑌤𑍍)
𑌨 𑌨𑌭𑍋 𑌘𑌟𑌯𑍋𑌗𑍇𑌨 𑌸𑍁𑌰𑌾𑌗𑌨𑍍𑌧𑍇𑌨 𑌲𑌿𑌪𑍍𑌯𑌤𑍇 ।
𑌤𑌥𑌾𑌤𑍍𑌮𑍋𑌪𑌾𑌧𑌿𑌯𑍋𑌗𑍇𑌨 𑌤𑌦𑍍𑌧𑌰𑍍𑌮𑍈𑌰𑍍𑌨𑍈𑌵 𑌲𑌿𑌪𑍍𑌯𑌤𑍇 ॥ 450॥
𑌜𑍍𑌞𑌾𑌨𑍋𑌦𑌯𑌾𑌤𑍍𑌪𑍁𑌰𑌾𑌰𑌬𑍍𑌧𑌂 𑌕𑌰𑍍𑌮𑌜𑍍𑌞𑌾𑌨𑌾𑌨𑍍𑌨 𑌨𑌶𑍍𑌯𑌤𑌿 ।
𑌅𑌦𑌤𑍍𑌵𑌾 𑌸𑍍𑌵𑌫𑌲𑌂 𑌲𑌕𑍍𑌷𑍍𑌯𑌮𑍁𑌦𑍍𑌦𑌿𑌶𑍍𑌯𑍋𑌤𑍍𑌸𑍃𑌷𑍍𑌟𑌬𑌾𑌣𑌵𑌤𑍍 ॥ 451॥
𑌵𑍍𑌯𑌾𑌘𑍍𑌰𑌬𑍁𑌦𑍍𑌧𑍍𑌯𑌾 𑌵𑌿𑌨𑌿𑌰𑍍𑌮𑍁𑌕𑍍𑌤𑍋 𑌬𑌾𑌣𑌃 𑌪𑌶𑍍𑌚𑌾𑌤𑍍𑌤𑍁 𑌗𑍋𑌮𑌤𑍗 ।
𑌨 𑌤𑌿𑌷𑍍𑌠𑌤𑌿 𑌛𑌿𑌨𑌤𑍍𑌯𑍇𑌵 𑌲𑌕𑍍𑌷𑍍𑌯𑌂 𑌵𑍇𑌗𑍇𑌨 𑌨𑌿𑌰𑍍𑌭𑌰𑌮𑍍 ॥ 452॥
𑌪𑍍𑌰𑌾𑌰𑌬𑍍𑌧𑌂 𑌬𑌲𑌵𑌤𑍍𑌤𑌰𑌂 𑌖𑌲𑍁 𑌵𑌿𑌦𑌾𑌂 𑌭𑍋𑌗𑍇𑌨 𑌤𑌸𑍍𑌯 𑌕𑍍𑌷𑌯𑌃
𑌸𑌮𑍍𑌯𑌗𑍍𑌜𑍍𑌞𑌾𑌨𑌹𑍁𑌤𑌾𑌶𑌨𑍇𑌨 𑌵𑌿𑌲𑌯𑌃 𑌪𑍍𑌰𑌾𑌕𑍍𑌸𑌞𑍍𑌚𑌿𑌤𑌾𑌗𑌾𑌮𑌿𑌨𑌾𑌮𑍍 ।
𑌬𑍍𑌰𑌹𑍍𑌮𑌾𑌤𑍍𑌮𑍈𑌕𑍍𑌯𑌮𑌵𑍇𑌕𑍍𑌷𑍍𑌯 𑌤𑌨𑍍𑌮𑌯𑌤𑌯𑌾 𑌯𑍇 𑌸𑌰𑍍𑌵𑌦𑌾 𑌸𑌂𑌸𑍍𑌥𑌿𑌤𑌾𑌃
𑌤𑍇𑌷𑌾𑌂 𑌤𑌤𑍍𑌤𑍍𑌰𑌿𑌤𑌯𑌂 𑌨𑌹𑌿 𑌕𑍍𑌵𑌚𑌿𑌦𑌪𑌿 𑌬𑍍𑌰𑌹𑍍𑌮𑍈𑌵 𑌤𑍇 𑌨𑌿𑌰𑍍𑌗𑍁𑌣𑌮𑍍 ॥ 453॥
𑌉𑌪𑌾𑌧𑌿𑌤𑌾𑌦𑌾𑌤𑍍𑌮𑍍𑌯𑌵𑌿𑌹𑍀𑌨𑌕𑍇𑌵𑌲-
𑌬𑍍𑌰𑌹𑍍𑌮𑌾𑌤𑍍𑌮𑌨𑍈𑌵𑌾𑌤𑍍𑌮𑌨𑌿 𑌤𑌿𑌷𑍍𑌠𑌤𑍋 𑌮𑍁𑌨𑍇𑌃 ।
𑌪𑍍𑌰𑌾𑌰𑌬𑍍𑌧𑌸𑌦𑍍𑌭𑌾𑌵𑌕𑌥𑌾 𑌨 𑌯𑍁𑌕𑍍𑌤𑌾
𑌸𑍍𑌵𑌪𑍍𑌨𑌾𑌰𑍍𑌥𑌸𑌮𑍍𑌬𑌨𑍍𑌧𑌕𑌥𑍇𑌵 𑌜𑌾𑌗𑍍𑌰𑌤𑌃 ॥ 454॥
𑌨 𑌹𑌿 𑌪𑍍𑌰𑌬𑍁𑌦𑍍𑌧𑌃 𑌪𑍍𑌰𑌤𑌿𑌭𑌾𑌸𑌦𑍇𑌹𑍇
𑌦𑍇𑌹𑍋𑌪𑌯𑍋𑌗𑌿𑌨𑍍𑌯𑌪𑌿 𑌚 𑌪𑍍𑌰𑌪𑌞𑍍𑌚𑍇 ।
𑌕𑌰𑍋𑌤𑍍𑌯𑌹𑌨𑍍𑌤𑌾𑌂 𑌮𑌮𑌤𑌾𑌮𑌿𑌦𑌨𑍍𑌤𑌾𑌂
𑌕𑌿𑌨𑍍𑌤𑍁 𑌸𑍍𑌵𑌯𑌂 𑌤𑌿𑌷𑍍𑌠𑌤𑌿 𑌜𑌾𑌗𑌰𑍇𑌣 ॥ 455॥
𑌨 𑌤𑌸𑍍𑌯 𑌮𑌿𑌥𑍍𑌯𑌾𑌰𑍍𑌥𑌸𑌮𑌰𑍍𑌥𑌨𑍇𑌚𑍍𑌛𑌾
𑌨 𑌸𑌙𑍍𑌗𑍍𑌰𑌹𑌸𑍍𑌤𑌜𑍍𑌜𑌗𑌤𑍋𑌽𑌪𑌿 𑌦𑍃𑌷𑍍𑌟𑌃 ।
𑌤𑌤𑍍𑌰𑌾𑌨𑍁𑌵𑍃𑌤𑍍𑌤𑌿𑌰𑍍𑌯𑌦𑌿 𑌚𑍇𑌨𑍍𑌮𑍃𑌷𑌾𑌰𑍍𑌥𑍇
𑌨 𑌨𑌿𑌦𑍍𑌰𑌯𑌾 𑌮𑍁𑌕𑍍𑌤 𑌇𑌤𑍀𑌷𑍍𑌯𑌤𑍇 𑌧𑍍𑌰𑍁𑌵𑌮𑍍 ॥ 456॥
𑌤𑌦𑍍𑌵𑌤𑍍𑌪𑌰𑍇 𑌬𑍍𑌰𑌹𑍍𑌮𑌣𑌿 𑌵𑌰𑍍𑌤𑌮𑌾𑌨𑌃
𑌸𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑌿 𑌨𑌾𑌨𑍍𑌯𑌦𑍀𑌕𑍍𑌷𑌤𑍇 ।
𑌸𑍍𑌮𑍃𑌤𑌿𑌰𑍍𑌯𑌥𑌾 𑌸𑍍𑌵𑌪𑍍𑌨𑌵𑌿𑌲𑍋𑌕𑌿𑌤𑌾𑌰𑍍𑌥𑍇
𑌤𑌥𑌾 𑌵𑌿𑌦𑌃 𑌪𑍍𑌰𑌾𑌶𑌨𑌮𑍋𑌚𑌨𑌾𑌦𑍗 ॥ 457॥
𑌕𑌰𑍍𑌮𑌣𑌾 𑌨𑌿𑌰𑍍𑌮𑌿𑌤𑍋 𑌦𑍇𑌹𑌃 𑌪𑍍𑌰𑌾𑌰𑌬𑍍𑌧𑌂 𑌤𑌸𑍍𑌯 𑌕𑌲𑍍𑌪𑍍𑌯𑌤𑌾𑌮𑍍 ।
𑌨𑌾𑌨𑌾𑌦𑍇𑌰𑌾𑌤𑍍𑌮𑌨𑍋 𑌯𑍁𑌕𑍍𑌤𑌂 𑌨𑍈𑌵𑌾𑌤𑍍𑌮𑌾 𑌕𑌰𑍍𑌮𑌨𑌿𑌰𑍍𑌮𑌿𑌤𑌃 ॥ 458॥
𑌅𑌜𑍋 𑌨𑌿𑌤𑍍𑌯𑌃 𑌶𑌾𑌶𑍍𑌵𑌤 𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌰𑌮𑍋𑌘𑌵𑌾𑌕𑍍 । (𑌪𑌾𑌠𑌭𑍇𑌦𑌃 - 𑌅𑌜𑍋 𑌨𑌿𑌤𑍍𑌯 𑌇𑌤𑌿 𑌬𑍍𑌰𑍂𑌤𑍇 𑌶𑍍𑌰𑍁𑌤𑌿𑌰𑍇𑌷𑌾 𑌤𑍍𑌵𑌮𑍋𑌘𑌵𑌾𑌕𑍍)
𑌤𑌦𑌾𑌤𑍍𑌮𑌨𑌾 𑌤𑌿𑌷𑍍𑌠𑌤𑍋𑌽𑌸𑍍𑌯 𑌕𑍁𑌤𑌃 𑌪𑍍𑌰𑌾𑌰𑌬𑍍𑌧𑌕𑌲𑍍𑌪𑌨𑌾 ॥ 459॥
𑌪𑍍𑌰𑌾𑌰𑌬𑍍𑌧𑌂 𑌸𑌿𑌧𑍍𑌯𑌤𑌿 𑌤𑌦𑌾 𑌯𑌦𑌾 𑌦𑍇𑌹𑌾𑌤𑍍𑌮𑌨𑌾 𑌸𑍍𑌥𑌿𑌤𑌿𑌃 ।
𑌦𑍇𑌹𑌾𑌤𑍍𑌮𑌭𑌾𑌵𑍋 𑌨𑍈𑌵𑍇𑌷𑍍𑌟𑌃 𑌪𑍍𑌰𑌾𑌰𑌬𑍍𑌧𑌂 𑌤𑍍𑌯𑌜𑍍𑌯𑌤𑌾𑌮𑌤𑌃 ॥ 460॥
𑌶𑌰𑍀𑌰𑌸𑍍𑌯𑌾𑌪𑌿 𑌪𑍍𑌰𑌾𑌰𑌬𑍍𑌧𑌕𑌲𑍍𑌪𑌨𑌾 𑌭𑍍𑌰𑌾𑌨𑍍𑌤𑌿𑌰𑍇𑌵 𑌹𑌿 ।
𑌅𑌧𑍍𑌯𑌸𑍍𑌤𑌸𑍍𑌯 𑌕𑍁𑌤𑌃 𑌸𑌤𑍍𑌤𑍍𑌵𑌮𑌸𑌤𑍍𑌯𑌸𑍍𑌯 𑌕𑍁𑌤𑍋 𑌜𑌨𑌿𑌃 । (𑌪𑌾𑌠𑌭𑍇𑌦𑌃 - 𑌸𑌤𑍍𑌤𑍍𑌵𑌮𑌸𑌤𑍍𑌤𑍍𑌵𑌸𑍍𑌯)
𑌅𑌜𑌾𑌤𑌸𑍍𑌯 𑌕𑍁𑌤𑍋 𑌨𑌾𑌶𑌃 𑌪𑍍𑌰𑌾𑌰𑌬𑍍𑌧𑌮𑌸𑌤𑌃 𑌕𑍁𑌤𑌃 ॥ 461॥
𑌜𑍍𑌞𑌾𑌨𑍇𑌨𑌾𑌜𑍍𑌞𑌾𑌨𑌕𑌾𑌰𑍍𑌯𑌸𑍍𑌯 𑌸𑌮𑍂𑌲𑌸𑍍𑌯 𑌲𑌯𑍋 𑌯𑌦𑌿 ।
𑌤𑌿𑌷𑍍𑌠𑌤𑍍𑌯𑌯𑌂 𑌕𑌥𑌂 𑌦𑍇𑌹 𑌇𑌤𑌿 𑌶𑌙𑍍𑌕𑌾𑌵𑌤𑍋 𑌜𑌡𑌾𑌨𑍍 ॥ 462॥
𑌸𑌮𑌾𑌧𑌾𑌤𑍁𑌂 𑌬𑌾𑌹𑍍𑌯𑌦𑍃𑌷𑍍𑌟𑍍𑌯𑌾 𑌪𑍍𑌰𑌾𑌰𑌬𑍍𑌧𑌂 𑌵𑌦𑌤𑌿 𑌶𑍍𑌰𑍁𑌤𑌿𑌃 ।
𑌨 𑌤𑍁 𑌦𑍇𑌹𑌾𑌦𑌿𑌸𑌤𑍍𑌯𑌤𑍍𑌵𑌬𑍋𑌧𑌨𑌾𑌯 𑌵𑌿𑌪𑌶𑍍𑌚𑌿𑌤𑌾𑌮𑍍 ।
𑌯𑌤𑌃 𑌶𑍍𑌰𑍁𑌤𑍇𑌰𑌭𑌿𑌪𑍍𑌰𑌾𑌯𑌃 𑌪𑌰𑌮𑌾𑌰𑍍𑌥𑍈𑌕𑌗𑍋𑌚𑌰𑌃 ॥ 463॥
𑌪𑌰𑌿𑌪𑍂𑌰𑍍𑌣𑌮𑌨𑌾𑌦𑍍𑌯𑌨𑍍𑌤𑌮𑌪𑍍𑌰𑌮𑍇𑌯𑌮𑌵𑌿𑌕𑍍𑌰𑌿𑌯𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 464॥
𑌸𑌦𑍍𑌘𑌨𑌂 𑌚𑌿𑌦𑍍𑌘𑌨𑌂 𑌨𑌿𑌤𑍍𑌯𑌮𑌾𑌨𑌨𑍍𑌦𑌘𑌨𑌮𑌕𑍍𑌰𑌿𑌯𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 465॥
𑌪𑍍𑌰𑌤𑍍𑌯𑌗𑍇𑌕𑌰𑌸𑌂 𑌪𑍂𑌰𑍍𑌣𑌮𑌨𑌨𑍍𑌤𑌂 𑌸𑌰𑍍𑌵𑌤𑍋𑌮𑍁𑌖𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 466॥
𑌅𑌹𑍇𑌯𑌮𑌨𑍁𑌪𑌾𑌦𑍇𑌯𑌮𑌨𑌾𑌦𑍇𑌯𑌮𑌨𑌾𑌶𑍍𑌰𑌯𑌮𑍍 । 𑌮𑌨𑌾𑌧𑍇𑌯𑌮𑌨𑌾
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 467॥
𑌨𑌿𑌰𑍍𑌗𑍁𑌣𑌂 𑌨𑌿𑌷𑍍𑌕𑌲𑌂 𑌸𑍂𑌕𑍍𑌷𑍍𑌮𑌂 𑌨𑌿𑌰𑍍𑌵𑌿𑌕𑌲𑍍𑌪𑌂 𑌨𑌿𑌰𑌞𑍍𑌜𑌨𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 468॥
𑌅𑌨𑌿𑌰𑍂𑌪𑍍𑌯 𑌸𑍍𑌵𑌰𑍂𑌪𑌂 𑌯𑌨𑍍𑌮𑌨𑍋𑌵𑌾𑌚𑌾𑌮𑌗𑍋𑌚𑌰𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 469॥
𑌸𑌤𑍍𑌸𑌮𑍃𑌦𑍍𑌧𑌂 𑌸𑍍𑌵𑌤𑌃𑌸𑌿𑌦𑍍𑌧𑌂 𑌶𑍁𑌦𑍍𑌧𑌂 𑌬𑍁𑌦𑍍𑌧𑌮𑌨𑍀𑌦𑍃𑌶𑌮𑍍 ।
𑌏𑌕𑌮𑍇𑌵𑌾𑌦𑍍𑌵𑌯𑌂 𑌬𑍍𑌰𑌹𑍍𑌮 𑌨𑍇𑌹 𑌨𑌾𑌨𑌾𑌸𑍍𑌤𑌿 𑌕𑌿𑌞𑍍𑌚𑌨 ॥ 470॥
𑌨𑌿𑌰𑌸𑍍𑌤𑌰𑌾𑌗𑌾 𑌵𑌿𑌨𑌿𑌰𑌸𑍍𑌤𑌭𑍋𑌗𑌾𑌃 (𑌪𑌾𑌠𑌭𑍇𑌦𑌃 - 𑌨𑌿𑌰𑌪𑌾𑌸𑍍𑌤𑌭𑍋𑌗𑌾𑌃)
𑌶𑌾𑌨𑍍𑌤𑌾𑌃 𑌸𑍁𑌦𑌾𑌨𑍍𑌤𑌾 𑌯𑌤𑌯𑍋 𑌮𑌹𑌾𑌨𑍍𑌤𑌃 ।
𑌵𑌿𑌜𑍍𑌞𑌾𑌯 𑌤𑌤𑍍𑌤𑍍𑌵𑌂 𑌪𑌰𑌮𑍇𑌤𑌦𑌨𑍍𑌤𑍇
𑌪𑍍𑌰𑌾𑌪𑍍𑌤𑌾𑌃 𑌪𑌰𑌾𑌂 𑌨𑌿𑌰𑍍𑌵𑍃𑌤𑌿𑌮𑌾𑌤𑍍𑌮𑌯𑍋𑌗𑌾𑌤𑍍 ॥ 471॥
𑌭𑌵𑌾𑌨𑌪𑍀𑌦𑌂 𑌪𑌰𑌤𑌤𑍍𑌤𑍍𑌵𑌮𑌾𑌤𑍍𑌮𑌨𑌃
𑌸𑍍𑌵𑌰𑍂𑌪𑌮𑌾𑌨𑌨𑍍𑌦𑌘𑌨𑌂 𑌵𑌿𑌚𑌾𑌰𑍍𑌯 । (𑌪𑌾𑌠𑌭𑍇𑌦𑌃 - 𑌨𑌿𑌚𑌾𑌯𑍍𑌯)
𑌵𑌿𑌧𑍂𑌯 𑌮𑍋𑌹𑌂 𑌸𑍍𑌵𑌮𑌨𑌃𑌪𑍍𑌰𑌕𑌲𑍍𑌪𑌿𑌤𑌂
𑌮𑍁𑌕𑍍𑌤𑌃 𑌕𑍃𑌤𑌾𑌰𑍍𑌥𑍋 𑌭𑌵𑌤𑍁 𑌪𑍍𑌰𑌬𑍁𑌦𑍍𑌧𑌃 ॥ 472॥
𑌸𑌮𑌾𑌧𑌿𑌨𑌾 𑌸𑌾𑌧𑍁𑌵𑌿𑌨𑌿𑌶𑍍𑌚𑌲𑌾𑌤𑍍𑌮𑌨𑌾 (𑌪𑌾𑌠𑌭𑍇𑌦𑌃 - 𑌸𑍁𑌨𑌿𑌶𑍍𑌚𑌲𑌾𑌤𑍍𑌮𑌨𑌾)
𑌪𑌶𑍍𑌯𑌾𑌤𑍍𑌮𑌤𑌤𑍍𑌤𑍍𑌵𑌂 𑌸𑍍𑌫𑍁𑌟𑌬𑍋𑌧𑌚𑌕𑍍𑌷𑍁𑌷𑌾 ।
𑌨𑌿𑌃𑌸𑌂𑌶𑌯𑌂 𑌸𑌮𑍍𑌯𑌗𑌵𑍇𑌕𑍍𑌷𑌿𑌤𑌶𑍍𑌚𑍇-
𑌚𑍍𑌛𑍍𑌰𑍁𑌤𑌃 𑌪𑌦𑌾𑌰𑍍𑌥𑍋 𑌨 𑌪𑍁𑌨𑌰𑍍𑌵𑌿𑌕𑌲𑍍𑌪𑍍𑌯𑌤𑍇 ॥ 473॥ (𑌪𑌾𑌠𑌭𑍇𑌦𑌃 - 𑌪𑍁𑌨𑌰𑍍𑌵𑌿𑌕𑌲𑍍𑌪𑌤𑍇)
𑌸𑍍𑌵𑌸𑍍𑌯𑌾𑌵𑌿𑌦𑍍𑌯𑌾𑌬𑌨𑍍𑌧𑌸𑌮𑍍𑌬𑌨𑍍𑌧𑌮𑍋𑌕𑍍𑌷𑌾-
𑌤𑍍𑌸𑌤𑍍𑌯𑌜𑍍𑌞𑌾𑌨𑌾𑌨𑌨𑍍𑌦𑌰𑍂𑌪𑌾𑌤𑍍𑌮𑌲𑌬𑍍𑌧𑍗 ।
𑌶𑌾𑌸𑍍𑌤𑍍𑌰𑌂 𑌯𑍁𑌕𑍍𑌤𑌿𑌰𑍍𑌦𑍇𑌶𑌿𑌕𑍋𑌕𑍍𑌤𑌿𑌃 𑌪𑍍𑌰𑌮𑌾𑌣𑌂
𑌚𑌾𑌨𑍍𑌤𑌃𑌸𑌿𑌦𑍍𑌧𑌾 𑌸𑍍𑌵𑌾𑌨𑍁𑌭𑍂𑌤𑌿𑌃 𑌪𑍍𑌰𑌮𑌾𑌣𑌮𑍍 ॥ 474॥
𑌬𑌨𑍍𑌧𑍋 𑌮𑍋𑌕𑍍𑌷𑌶𑍍𑌚 𑌤𑍃𑌪𑍍𑌤𑌿𑌶𑍍𑌚 𑌚𑌿𑌨𑍍𑌤𑌾𑌽𑌽𑌰𑍋𑌗𑍍𑌯𑌕𑍍𑌷𑍁𑌧𑌾𑌦𑌯𑌃 ।
𑌸𑍍𑌵𑍇𑌨𑍈𑌵 𑌵𑍇𑌦𑍍𑌯𑌾 𑌯𑌜𑍍𑌜𑍍𑌞𑌾𑌨𑌂 𑌪𑌰𑍇𑌷𑌾𑌮𑌾𑌨𑍁𑌮𑌾𑌨𑌿𑌕𑌮𑍍 ॥ 475॥
𑌤𑌟𑌸𑍍𑌥𑌿𑌤𑌾 𑌬𑍋𑌧𑌯𑌨𑍍𑌤𑌿 𑌗𑍁𑌰𑌵𑌃 𑌶𑍍𑌰𑍁𑌤𑌯𑍋 𑌯𑌥𑌾 ।
𑌪𑍍𑌰𑌜𑍍𑌞𑌯𑍈𑌵 𑌤𑌰𑍇𑌦𑍍𑌵𑌿𑌦𑍍𑌵𑌾𑌨𑍀𑌶𑍍𑌵𑌰𑌾𑌨𑍁𑌗𑍃𑌹𑍀𑌤𑌯𑌾 ॥ 476॥
𑌸𑍍𑌵𑌾𑌨𑍁𑌭𑍂𑌤𑍍𑌯𑌾 𑌸𑍍𑌵𑌯𑌂 𑌜𑍍𑌞𑌾𑌤𑍍𑌵𑌾 𑌸𑍍𑌵𑌮𑌾𑌤𑍍𑌮𑌾𑌨𑌮𑌖𑌣𑍍𑌡𑌿𑌤𑌮𑍍 ।
𑌸𑌂𑌸𑌿𑌦𑍍𑌧𑌃 𑌸𑌮𑍍𑌮𑍁𑌖𑌂 𑌤𑌿𑌷𑍍𑌠𑍇𑌨𑍍𑌨𑌿𑌰𑍍𑌵𑌿𑌕𑌲𑍍𑌪𑌾𑌤𑍍𑌮𑌨𑌾𑌽𑌽𑌤𑍍𑌮𑌨𑌿 ॥ 477॥ (𑌪𑌾𑌠𑌭𑍇𑌦𑌃 - 𑌸𑍁𑌸𑍁𑌖𑌂 𑌤𑌿𑌷𑍍𑌠𑍇𑌨𑍍)
𑌵𑍇𑌦𑌾𑌨𑍍𑌤𑌸𑌿𑌦𑍍𑌧𑌾𑌨𑍍𑌤𑌨𑌿𑌰𑍁𑌕𑍍𑌤𑌿𑌰𑍇𑌷𑌾
𑌬𑍍𑌰𑌹𑍍𑌮𑍈𑌵 𑌜𑍀𑌵𑌃 𑌸𑌕𑌲𑌂 𑌜𑌗𑌚𑍍𑌚 ।
𑌅𑌖𑌣𑍍𑌡𑌰𑍂𑌪𑌸𑍍𑌥𑌿𑌤𑌿𑌰𑍇𑌵 𑌮𑍋𑌕𑍍𑌷𑍋
𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑍇 𑌶𑍍𑌰𑍁𑌤𑌯𑌃 𑌪𑍍𑌰𑌮𑌾𑌣𑌮𑍍 ॥ 478॥ (𑌪𑌾𑌠𑌭𑍇𑌦𑌃 - 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌂)
𑌇𑌤𑌿 𑌗𑍁𑌰𑍁𑌵𑌚𑌨𑌾𑌚𑍍𑌛𑍍𑌰𑍁𑌤𑌿𑌪𑍍𑌰𑌮𑌾𑌣𑌾𑌤𑍍
𑌪𑌰𑌮𑌵𑌗𑌮𑍍𑌯 𑌸𑌤𑌤𑍍𑌤𑍍𑌵𑌮𑌾𑌤𑍍𑌮𑌯𑍁𑌕𑍍𑌤𑍍𑌯𑌾 ।
𑌪𑍍𑌰𑌶𑌮𑌿𑌤𑌕𑌰𑌣𑌃 𑌸𑌮𑌾𑌹𑌿𑌤𑌾𑌤𑍍𑌮𑌾
𑌕𑍍𑌵𑌚𑌿𑌦𑌚𑌲𑌾𑌕𑍃𑌤𑌿𑌰𑌾𑌤𑍍𑌮𑌨𑌿𑌷𑍍𑌠𑌤𑍋𑌽𑌭𑍂𑌤𑍍 ॥ 479॥ (𑌪𑌾𑌠𑌭𑍇𑌦𑌃 - 𑌆𑌤𑍍𑌮𑌨𑌿𑌷𑍍𑌠𑌿𑌤𑍋)
𑌕𑌿𑌞𑍍𑌚𑌿𑌤𑍍𑌕𑌾𑌲𑌂 𑌸𑌮𑌾𑌧𑌾𑌯 𑌪𑌰𑍇 𑌬𑍍𑌰𑌹𑍍𑌮𑌣𑌿 𑌮𑌾𑌨𑌸𑌮𑍍 । (𑌪𑌾𑌠𑌭𑍇𑌦𑌃 - 𑌕𑌞𑍍𑌚𑌿𑌤𑍍𑌕𑌾𑌲𑌂)
𑌉𑌤𑍍𑌥𑌾𑌯 𑌪𑌰𑌮𑌾𑌨𑌨𑍍𑌦𑌾𑌦𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 480॥ (𑌪𑌾𑌠𑌭𑍇𑌦𑌃 - 𑌵𑍍𑌯𑍁𑌤𑍍𑌥𑌾𑌯)
𑌬𑍁𑌦𑍍𑌧𑌿𑌰𑍍𑌵𑌿𑌨𑌷𑍍𑌟𑌾 𑌗𑌲𑌿𑌤𑌾 𑌪𑍍𑌰𑌵𑍃𑌤𑍍𑌤𑌿𑌃
𑌬𑍍𑌰𑌹𑍍𑌮𑌾𑌤𑍍𑌮𑌨𑍋𑌰𑍇𑌕𑌤𑌯𑌾𑌽𑌧𑌿𑌗𑌤𑍍𑌯𑌾 ।
𑌇𑌦𑌂 𑌨 𑌜𑌾𑌨𑍇𑌽𑌪𑍍𑌯𑌨𑌿𑌦𑌂 𑌨 𑌜𑌾𑌨𑍇
𑌕𑌿𑌂 𑌵𑌾 𑌕𑌿𑌯𑌦𑍍𑌵𑌾 𑌸𑍁𑌖𑌮𑌸𑍍𑌤𑍍𑌯𑌪𑌾𑌰𑌮𑍍 ॥ 481॥ (𑌪𑌾𑌠𑌭𑍇𑌦𑌃 - 𑌸𑍁𑌖𑌮𑌸𑍍𑌯 𑌪𑌾𑌰𑌮𑍍)
𑌵𑌾𑌚𑌾 𑌵𑌕𑍍𑌤𑍁𑌮𑌶𑌕𑍍𑌯𑌮𑍇𑌵 𑌮𑌨𑌸𑌾 𑌮𑌨𑍍𑌤𑍁𑌂 𑌨 𑌵𑌾 𑌶𑌕𑍍𑌯𑌤𑍇
𑌸𑍍𑌵𑌾𑌨𑌨𑍍𑌦𑌾𑌮𑍃𑌤𑌪𑍂𑌰𑌪𑍂𑌰𑌿𑌤𑌪𑌰𑌬𑍍𑌰𑌹𑍍𑌮𑌾𑌮𑍍𑌬𑍁𑌧𑍇𑌰𑍍𑌵𑍈𑌭𑌵𑌮𑍍 ।
𑌅𑌮𑍍𑌭𑍋𑌰𑌾𑌶𑌿𑌵𑌿𑌶𑍀𑌰𑍍𑌣𑌵𑌾𑌰𑍍𑌷𑌿𑌕𑌶𑌿𑌲𑌾𑌭𑌾𑌵𑌂 𑌭𑌜𑌨𑍍𑌮𑍇 𑌮𑌨𑍋
𑌯𑌸𑍍𑌯𑌾𑌂𑌶𑌾𑌂𑌶𑌲𑌵𑍇 𑌵𑌿𑌲𑍀𑌨𑌮𑌧𑍁𑌨𑌾𑌽𑌽𑌨𑌨𑍍𑌦𑌾𑌤𑍍𑌮𑌨𑌾 𑌨𑌿𑌰𑍍𑌵𑍃𑌤𑌮𑍍 ॥ 482॥
𑌕𑍍𑌵 𑌗𑌤𑌂 𑌕𑍇𑌨 𑌵𑌾 𑌨𑍀𑌤𑌂 𑌕𑍁𑌤𑍍𑌰 𑌲𑍀𑌨𑌮𑌿𑌦𑌂 𑌜𑌗𑌤𑍍 ।
𑌅𑌧𑍁𑌨𑍈𑌵 𑌮𑌯𑌾 𑌦𑍃𑌷𑍍𑌟𑌂 𑌨𑌾𑌸𑍍𑌤𑌿 𑌕𑌿𑌂 𑌮𑌹𑌦𑌦𑍍𑌭𑍁𑌤𑌮𑍍 ॥ 483॥
𑌕𑌿𑌂 𑌹𑍇𑌯𑌂 𑌕𑌿𑌮𑍁𑌪𑌾𑌦𑍇𑌯𑌂 𑌕𑌿𑌮𑌨𑍍𑌯𑌤𑍍𑌕𑌿𑌂 𑌵𑌿𑌲𑌕𑍍𑌷𑌣𑌮𑍍 ।
𑌅𑌖𑌣𑍍𑌡𑌾𑌨𑌨𑍍𑌦𑌪𑍀𑌯𑍂𑌷𑌪𑍂𑌰𑍍𑌣𑍇 𑌬𑍍𑌰𑌹𑍍𑌮𑌮𑌹𑌾𑌰𑍍𑌣𑌵𑍇 ॥ 484॥
𑌨 𑌕𑌿𑌞𑍍𑌚𑌿𑌦𑌤𑍍𑌰 𑌪𑌶𑍍𑌯𑌾𑌮𑌿 𑌨 𑌶𑌋𑌣𑍋𑌮𑌿 𑌨 𑌵𑍇𑌦𑍍𑌮𑍍𑌯𑌹𑌮𑍍 ।
𑌸𑍍𑌵𑌾𑌤𑍍𑌮𑌨𑍈𑌵 𑌸𑌦𑌾𑌨𑌨𑍍𑌦𑌰𑍂𑌪𑍇𑌣𑌾𑌸𑍍𑌮𑌿 𑌵𑌿𑌲𑌕𑍍𑌷𑌣𑌃 ॥ 485॥
𑌨𑌮𑍋 𑌨𑌮𑌸𑍍𑌤𑍇 𑌗𑍁𑌰𑌵𑍇 𑌮𑌹𑌾𑌤𑍍𑌮𑌨𑍇
𑌵𑌿𑌮𑍁𑌕𑍍𑌤𑌸𑌙𑍍𑌗𑌾𑌯 𑌸𑌦𑍁𑌤𑍍𑌤𑌮𑌾𑌯 ।
𑌨𑌿𑌤𑍍𑌯𑌾𑌦𑍍𑌵𑌯𑌾𑌨𑌨𑍍𑌦𑌰𑌸𑌸𑍍𑌵𑌰𑍂𑌪𑌿𑌣𑍇
𑌭𑍂𑌮𑍍𑌨𑍇 𑌸𑌦𑌾𑌽𑌪𑌾𑌰𑌦𑌯𑌾𑌮𑍍𑌬𑍁𑌧𑌾𑌮𑍍𑌨𑍇 ॥ 486॥
𑌯𑌤𑍍𑌕𑌟𑌾𑌕𑍍𑌷𑌶𑌶𑌿𑌸𑌾𑌨𑍍𑌦𑍍𑌰𑌚𑌨𑍍𑌦𑍍𑌰𑌿𑌕𑌾-
𑌪𑌾𑌤𑌧𑍂𑌤𑌭𑌵𑌤𑌾𑌪𑌜𑌶𑍍𑌰𑌮𑌃 ।
𑌪𑍍𑌰𑌾𑌪𑍍𑌤𑌵𑌾𑌨𑌹𑌮𑌖𑌣𑍍𑌡𑌵𑍈𑌭𑌵𑌾-
𑌨𑌨𑍍𑌦𑌮𑌾𑌤𑍍𑌮𑌪𑌦𑌮𑌕𑍍𑌷𑌯𑌂 𑌕𑍍𑌷𑌣𑌾𑌤𑍍 ॥ 487॥
𑌧𑌨𑍍𑌯𑍋𑌽𑌹𑌂 𑌕𑍃𑌤𑌕𑍃𑌤𑍍𑌯𑍋𑌽𑌹𑌂 𑌵𑌿𑌮𑍁𑌕𑍍𑌤𑍋𑌽𑌹𑌂 𑌭𑌵𑌗𑍍𑌰𑌹𑌾𑌤𑍍 ।
𑌨𑌿𑌤𑍍𑌯𑌾𑌨𑌨𑍍𑌦𑌸𑍍𑌵𑌰𑍂𑌪𑍋𑌽𑌹𑌂 𑌪𑍂𑌰𑍍𑌣𑍋𑌽𑌹𑌂 𑌤𑍍𑌵𑌦𑌨𑍁𑌗𑍍𑌰𑌹𑌾𑌤𑍍 ॥ 488॥
𑌅𑌸𑌙𑍍𑌗𑍋𑌽𑌹𑌮𑌨𑌙𑍍𑌗𑍋𑌽𑌹𑌮𑌲𑌿𑌙𑍍𑌗𑍋𑌽𑌹𑌮𑌭𑌙𑍍𑌗𑍁𑌰𑌃 ।
𑌪𑍍𑌰𑌶𑌾𑌨𑍍𑌤𑍋𑌽𑌹𑌮𑌨𑌨𑍍𑌤𑍋𑌽𑌹𑌮𑌮𑌲𑍋𑌽𑌹𑌂 𑌚𑌿𑌰𑌨𑍍𑌤𑌨𑌃 ॥ 489॥ (𑌪𑌾𑌠𑌭𑍇𑌦𑌃 - 𑌽𑌹𑌮𑌤𑌾𑌨𑍍𑌤𑍋𑌽𑌹𑌂)
𑌅𑌕𑌰𑍍𑌤𑌾𑌹𑌮𑌭𑍋𑌕𑍍𑌤𑌾𑌹𑌮𑌵𑌿𑌕𑌾𑌰𑍋𑌽𑌹𑌮𑌕𑍍𑌰𑌿𑌯𑌃 ।
𑌶𑍁𑌦𑍍𑌧𑌬𑍋𑌧𑌸𑍍𑌵𑌰𑍂𑌪𑍋𑌽𑌹𑌂 𑌕𑍇𑌵𑌲𑍋𑌽𑌹𑌂 𑌸𑌦𑌾𑌶𑌿𑌵𑌃 ॥ 490॥
𑌦𑍍𑌰𑌷𑍍𑌟𑍁𑌃 𑌶𑍍𑌰𑍋𑌤𑍁𑌰𑍍𑌵𑌕𑍍𑌤𑍁𑌃 𑌕𑌰𑍍𑌤𑍁𑌰𑍍𑌭𑍋𑌕𑍍𑌤𑍁𑌰𑍍𑌵𑌿𑌭𑌿𑌨𑍍𑌨 𑌏𑌵𑌾𑌹𑌮𑍍 ।
𑌨𑌿𑌤𑍍𑌯𑌨𑌿𑌰𑌨𑍍𑌤𑌰𑌨𑌿𑌷𑍍𑌕𑍍𑌰𑌿𑌯𑌨𑌿𑌃𑌸𑍀𑌮𑌾𑌸𑌙𑍍𑌗𑌪𑍂𑌰𑍍𑌣𑌬𑍋𑌧𑌾𑌤𑍍𑌮𑌾 ॥ 491॥
𑌨𑌾𑌹𑌮𑌿𑌦𑌂 𑌨𑌾𑌹𑌮𑌦𑍋𑌽𑌪𑍍𑌯𑍁𑌭𑌯𑍋𑌰𑌵𑌭𑌾𑌸𑌕𑌂 𑌪𑌰𑌂 𑌶𑍁𑌦𑍍𑌧𑌮𑍍 ।
𑌬𑌾𑌹𑍍𑌯𑌾𑌭𑍍𑌯𑌨𑍍𑌤𑌰𑌶𑍂𑌨𑍍𑌯𑌂 𑌪𑍂𑌰𑍍𑌣𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌮𑍇𑌵𑌾𑌹𑌮𑍍 ॥ 492॥
𑌨𑌿𑌰𑍁𑌪𑌮𑌮𑌨𑌾𑌦𑌿𑌤𑌤𑍍𑌤𑍍𑌵𑌂 𑌤𑍍𑌵𑌮𑌹𑌮𑌿𑌦𑌮𑌦 𑌇𑌤𑌿 𑌕𑌲𑍍𑌪𑌨𑌾𑌦𑍂𑌰𑌮𑍍 ।
𑌨𑌿𑌤𑍍𑌯𑌾𑌨𑌨𑍍𑌦𑍈𑌕𑌰𑌸𑌂 𑌸𑌤𑍍𑌯𑌂 𑌬𑍍𑌰𑌹𑍍𑌮𑌾𑌦𑍍𑌵𑌿𑌤𑍀𑌯𑌮𑍇𑌵𑌾𑌹𑌮𑍍 ॥ 493॥
𑌨𑌾𑌰𑌾𑌯𑌣𑍋𑌽𑌹𑌂 𑌨𑌰𑌕𑌾𑌨𑍍𑌤𑌕𑍋𑌽𑌹𑌂
𑌪𑍁𑌰𑌾𑌨𑍍𑌤𑌕𑍋𑌽𑌹𑌂 𑌪𑍁𑌰𑍁𑌷𑍋𑌽𑌹𑌮𑍀𑌶𑌃 ।
𑌅𑌖𑌣𑍍𑌡𑌬𑍋𑌧𑍋𑌽𑌹𑌮𑌶𑍇𑌷𑌸𑌾𑌕𑍍𑌷𑍀
𑌨𑌿𑌰𑍀𑌶𑍍𑌵𑌰𑍋𑌽𑌹𑌂 𑌨𑌿𑌰𑌹𑌂 𑌚 𑌨𑌿𑌰𑍍𑌮𑌮𑌃 ॥ 494॥
𑌸𑌰𑍍𑌵𑍇𑌷𑍁 𑌭𑍂𑌤𑍇𑌷𑍍𑌵𑌹𑌮𑍇𑌵 𑌸𑌂𑌸𑍍𑌥𑌿𑌤𑍋
𑌜𑍍𑌞𑌾𑌨𑌾𑌤𑍍𑌮𑌨𑌾𑌽𑌨𑍍𑌤𑌰𑍍𑌬𑌹𑌿𑌰𑌾𑌶𑍍𑌰𑌯𑌃 𑌸𑌨𑍍 ।
𑌭𑍋𑌕𑍍𑌤𑌾 𑌚 𑌭𑍋𑌗𑍍𑌯𑌂 𑌸𑍍𑌵𑌯𑌮𑍇𑌵 𑌸𑌰𑍍𑌵𑌂
𑌯𑌦𑍍𑌯𑌤𑍍𑌪𑍃𑌥𑌗𑍍𑌦𑍃𑌷𑍍𑌟𑌮𑌿𑌦𑌨𑍍𑌤𑌯𑌾 𑌪𑍁𑌰𑌾 ॥ 495॥
𑌮𑌯𑍍𑌯𑌖𑌣𑍍𑌡𑌸𑍁𑌖𑌾𑌮𑍍𑌭𑍋𑌧𑍗 𑌬𑌹𑍁𑌧𑌾 𑌵𑌿𑌶𑍍𑌵𑌵𑍀𑌚𑌯𑌃 ।
𑌉𑌤𑍍𑌪𑌦𑍍𑌯𑌨𑍍𑌤𑍇 𑌵𑌿𑌲𑍀𑌯𑌨𑍍𑌤𑍇 𑌮𑌾𑌯𑌾𑌮𑌾𑌰𑍁𑌤𑌵𑌿𑌭𑍍𑌰𑌮𑌾𑌤𑍍 ॥ 496॥
𑌸𑍍𑌥𑍁𑌲𑌾𑌦𑌿𑌭𑌾𑌵𑌾 𑌮𑌯𑌿 𑌕𑌲𑍍𑌪𑌿𑌤𑌾 𑌭𑍍𑌰𑌮𑌾-
𑌦𑌾𑌰𑍋𑌪𑌿𑌤𑌾𑌨𑍁𑌸𑍍𑌫𑍁𑌰𑌣𑍇𑌨 𑌲𑍋𑌕𑍈𑌃 ।
𑌕𑌾𑌲𑍇 𑌯𑌥𑌾 𑌕𑌲𑍍𑌪𑌕𑌵𑌤𑍍𑌸𑌰𑌾𑌯-
𑌣𑌰𑍍𑌤𑍍𑌵𑌾𑌦𑌯𑍋 𑌨𑌿𑌷𑍍𑌕𑌲𑌨𑌿𑌰𑍍𑌵𑌿𑌕𑌲𑍍𑌪𑍇 ॥ 497॥
𑌆𑌰𑍋𑌪𑌿𑌤𑌂 𑌨𑌾𑌶𑍍𑌰𑌯𑌦𑍂𑌷𑌕𑌂 𑌭𑌵𑍇𑌤𑍍
𑌕𑌦𑌾𑌪𑌿 𑌮𑍂𑌢𑍈𑌰𑌤𑌿𑌦𑍋𑌷𑌦𑍂𑌷𑌿𑌤𑍈𑌃 । 𑌮𑍂𑌢𑍈𑌰𑍍𑌮𑌤𑌿
𑌨𑌾𑌰𑍍𑌦𑍍𑌰𑍀𑌕𑌰𑍋𑌤𑍍𑌯𑍂𑌷𑌰𑌭𑍂𑌮𑌿𑌭𑌾𑌗𑌂
𑌮𑌰𑍀𑌚𑌿𑌕𑌾𑌵𑌾𑌰𑌿 𑌮𑌹𑌾𑌪𑍍𑌰𑌵𑌾𑌹𑌃 ॥ 498॥
𑌆𑌕𑌾𑌶𑌵𑌲𑍍𑌲𑍇𑌪𑌵𑌿𑌦𑍂𑌰𑌗𑍋𑌽𑌹𑌂 (𑌪𑌾𑌠𑌭𑍇𑌦𑌃 - 𑌆𑌕𑌾𑌶𑌵𑌤𑍍 𑌕𑌲𑍍𑌪𑌵𑌿)
𑌆𑌦𑌿𑌤𑍍𑌯𑌵𑌦𑍍𑌭𑌾𑌸𑍍𑌯𑌵𑌿𑌲𑌕𑍍𑌷𑌣𑍋𑌽𑌹𑌮𑍍 ।
𑌅𑌹𑌾𑌰𑍍𑌯𑌵𑌨𑍍𑌨𑌿𑌤𑍍𑌯𑌵𑌿𑌨𑌿𑌶𑍍𑌚𑌲𑍋𑌽𑌹𑌂
𑌅𑌮𑍍𑌭𑍋𑌧𑌿𑌵𑌤𑍍𑌪𑌾𑌰𑌵𑌿𑌵𑌰𑍍𑌜𑌿𑌤𑍋𑌽𑌹𑌮𑍍 ॥ 499॥
𑌨 𑌮𑍇 𑌦𑍇𑌹𑍇𑌨 𑌸𑌮𑍍𑌬𑌨𑍍𑌧𑍋 𑌮𑍇𑌘𑍇𑌨𑍇𑌵 𑌵𑌿𑌹𑌾𑌯𑌸𑌃 ।
𑌅𑌤𑌃 𑌕𑍁𑌤𑍋 𑌮𑍇 𑌤𑌦𑍍𑌧𑌰𑍍𑌮𑌾 𑌜𑌾𑌗𑍍𑌰𑌤𑍍𑌸𑍍𑌵𑌪𑍍𑌨𑌸𑍁𑌷𑍁𑌪𑍍𑌤𑌯𑌃 ॥ 500॥
𑌉𑌪𑌾𑌧𑌿𑌰𑌾𑌯𑌾𑌤𑌿 𑌸 𑌏𑌵 𑌗𑌚𑍍𑌛𑌤𑌿
𑌸 𑌏𑌵 𑌕𑌰𑍍𑌮𑌾𑌣𑌿 𑌕𑌰𑍋𑌤𑌿 𑌭𑍁𑌙𑍍𑌕𑍍𑌤𑍇 ।
𑌸 𑌏𑌵 𑌜𑍀𑌰𑍍𑌯𑌨𑍍 𑌮𑍍𑌰𑌿𑌯𑌤𑍇 𑌸𑌦𑌾𑌹𑌂 (𑌪𑌾𑌠𑌭𑍇𑌦𑌃 - 𑌏𑌵 𑌜𑍀𑌵𑌨𑍍)
𑌕𑍁𑌲𑌾𑌦𑍍𑌰𑌿𑌵𑌨𑍍𑌨𑌿𑌶𑍍𑌚𑌲 𑌏𑌵 𑌸𑌂𑌸𑍍𑌥𑌿𑌤𑌃 ॥ 501॥
𑌨 𑌮𑍇 𑌪𑍍𑌰𑌵𑍃𑌤𑍍𑌤𑌿𑌰𑍍𑌨 𑌚 𑌮𑍇 𑌨𑌿𑌵𑍃𑌤𑍍𑌤𑌿𑌃
𑌸𑌦𑍈𑌕𑌰𑍂𑌪𑌸𑍍𑌯 𑌨𑌿𑌰𑌂𑌶𑌕𑌸𑍍𑌯 ।
𑌏𑌕𑌾𑌤𑍍𑌮𑌕𑍋 𑌯𑍋 𑌨𑌿𑌵𑌿𑌡𑍋 𑌨𑌿𑌰𑌨𑍍𑌤𑌰𑍋 (𑌪𑌾𑌠𑌭𑍇𑌦𑌃 - 𑌨𑌿𑌬𑌿𑌡𑍋)
𑌵𑍍𑌯𑍋𑌮𑍇𑌵 𑌪𑍂𑌰𑍍𑌣𑌃 𑌸 𑌕𑌥𑌂 𑌨𑍁 𑌚𑍇𑌷𑍍𑌟𑌤𑍇 ॥ 502॥
𑌪𑍁𑌣𑍍𑌯𑌾𑌨𑌿 𑌪𑌾𑌪𑌾𑌨𑌿 𑌨𑌿𑌰𑌿𑌨𑍍𑌦𑍍𑌰𑌿𑌯𑌸𑍍𑌯
𑌨𑌿𑌶𑍍𑌚𑍇𑌤𑌸𑍋 𑌨𑌿𑌰𑍍𑌵𑌿𑌕𑍃𑌤𑍇𑌰𑍍𑌨𑌿𑌰𑌾𑌕𑍃𑌤𑍇𑌃 ।
𑌕𑍁𑌤𑍋 𑌮𑌮𑌾𑌖𑌣𑍍𑌡𑌸𑍁𑌖𑌾𑌨𑍁𑌭𑍂𑌤𑍇𑌃
𑌬𑍍𑌰𑍂𑌤𑍇 𑌹𑍍𑌯𑌨𑌨𑍍𑌵𑌾𑌗𑌤𑌮𑌿𑌤𑍍𑌯𑌪𑌿 𑌶𑍍𑌰𑍁𑌤𑌿𑌃 ॥ 503॥
𑌛𑌾𑌯𑌯𑌾 𑌸𑍍𑌪𑍃𑌷𑍍𑌟𑌮𑍁𑌷𑍍𑌣𑌂 𑌵𑌾 𑌶𑍀𑌤𑌂 𑌵𑌾 𑌸𑍁𑌷𑍍𑌠𑍁 𑌦𑍁𑌃𑌷𑍍𑌠𑍁 𑌵𑌾 ।
𑌨 𑌸𑍍𑌪𑍃𑌶𑌤𑍍𑌯𑍇𑌵 𑌯𑌤𑍍𑌕𑌿𑌞𑍍𑌚𑌿𑌤𑍍𑌪𑍁𑌰𑍁𑌷𑌂 𑌤𑌦𑍍𑌵𑌿𑌲𑌕𑍍𑌷𑌣𑌮𑍍 ॥ 504॥
𑌨 𑌸𑌾𑌕𑍍𑌷𑌿𑌣𑌂 𑌸𑌾𑌕𑍍𑌷𑍍𑌯𑌧𑌰𑍍𑌮𑌾𑌃 𑌸𑌂𑌸𑍍𑌪𑍃𑌶𑌨𑍍𑌤𑌿 𑌵𑌿𑌲𑌕𑍍𑌷𑌣𑌮𑍍 ।
𑌅𑌵𑌿𑌕𑌾𑌰𑌮𑍁𑌦𑌾𑌸𑍀𑌨𑌂 𑌗𑍃𑌹𑌧𑌰𑍍𑌮𑌾𑌃 𑌪𑍍𑌰𑌦𑍀𑌪𑌵𑌤𑍍 ।
𑌦𑍇𑌹𑍇𑌨𑍍𑌦𑍍𑌰𑌿𑌯𑌮𑌨𑍋𑌧𑌰𑍍𑌮𑌾 𑌨𑍈𑌵𑌾𑌤𑍍𑌮𑌾𑌨𑌂 𑌸𑍍𑌪𑍃𑌶𑌨𑍍𑌤𑍍𑌯𑌹𑍋 ॥ 505॥ 𑌏𑌕𑍍𑌷𑍍𑌤𑍍𑌰
𑌰𑌵𑍇𑌰𑍍𑌯𑌥𑌾 𑌕𑌰𑍍𑌮𑌣𑌿 𑌸𑌾𑌕𑍍𑌷𑌿𑌭𑌾𑌵𑍋
𑌵𑌹𑍍𑌨𑍇𑌰𑍍𑌯𑌥𑌾 𑌦𑌾𑌹𑌨𑌿𑌯𑌾𑌮𑌕𑌤𑍍𑌵𑌮𑍍 । (𑌪𑌾𑌠𑌭𑍇𑌦𑌃 - 𑌵𑌾𑌽𑌯𑌸𑌿 𑌦𑌾𑌹𑌕𑌤𑍍𑌵𑌮𑍍)
𑌰𑌜𑍍𑌜𑍋𑌰𑍍𑌯𑌥𑌾𑌽𑌽𑌰𑍋𑌪𑌿𑌤𑌵𑌸𑍍𑌤𑍁𑌸𑌙𑍍𑌗𑌃
𑌤𑌥𑍈𑌵 𑌕𑍂𑌟𑌸𑍍𑌥𑌚𑌿𑌦𑌾𑌤𑍍𑌮𑌨𑍋 𑌮𑍇 ॥ 506॥
𑌕𑌰𑍍𑌤𑌾𑌪𑌿 𑌵𑌾 𑌕𑌾𑌰𑌯𑌿𑌤𑌾𑌪𑌿 𑌨𑌾𑌹𑌂
𑌭𑍋𑌕𑍍𑌤𑌾𑌪𑌿 𑌵𑌾 𑌭𑍋𑌜𑌯𑌿𑌤𑌾𑌪𑌿 𑌨𑌾𑌹𑌮𑍍 ।
𑌦𑍍𑌰𑌷𑍍𑌟𑌾𑌪𑌿 𑌵𑌾 𑌦𑌰𑍍𑌶𑌯𑌿𑌤𑌾𑌪𑌿 𑌨𑌾𑌹𑌂
𑌸𑍋𑌽𑌹𑌂 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌰𑌨𑍀𑌦𑍃𑌗𑌾𑌤𑍍𑌮𑌾 ॥ 507॥
𑌚𑌲𑌤𑍍𑌯𑍁𑌪𑌾𑌧𑍗 𑌪𑍍𑌰𑌤𑌿𑌬𑌿𑌮𑍍𑌬𑌲𑍗𑌲𑍍𑌯-
𑌮𑍗𑌪𑌾𑌧𑌿𑌕𑌂 𑌮𑍂𑌢𑌧𑌿𑌯𑍋 𑌨𑌯𑌨𑍍𑌤𑌿 ।
𑌸𑍍𑌵𑌬𑌿𑌮𑍍𑌬𑌭𑍂𑌤𑌂 𑌰𑌵𑌿𑌵𑌦𑍍𑌵𑌿𑌨𑌿𑌷𑍍𑌕𑍍𑌰𑌿𑌯𑌂
𑌕𑌰𑍍𑌤𑌾𑌸𑍍𑌮𑌿 𑌭𑍋𑌕𑍍𑌤𑌾𑌸𑍍𑌮𑌿 𑌹𑌤𑍋𑌽𑌸𑍍𑌮𑌿 𑌹𑍇𑌤𑌿 ॥ 508॥
𑌜𑌲𑍇 𑌵𑌾𑌪𑌿 𑌸𑍍𑌥𑌲𑍇 𑌵𑌾𑌪𑌿 𑌲𑍁𑌠𑌤𑍍𑌵𑍇𑌷 𑌜𑌡𑌾𑌤𑍍𑌮𑌕𑌃 ।
𑌨𑌾𑌹𑌂 𑌵𑌿𑌲𑌿𑌪𑍍𑌯𑍇 𑌤𑌦𑍍𑌧𑌰𑍍𑌮𑍈𑌰𑍍𑌘𑌟𑌧𑌰𑍍𑌮𑍈𑌰𑍍𑌨𑌭𑍋 𑌯𑌥𑌾 ॥ 509॥
𑌕𑌰𑍍𑌤𑍃𑌤𑍍𑌵𑌭𑍋𑌕𑍍𑌤𑍃𑌤𑍍𑌵𑌖𑌲𑌤𑍍𑌵𑌮𑌤𑍍𑌤𑌤𑌾-
𑌜𑌡𑌤𑍍𑌵𑌬𑌦𑍍𑌧𑌤𑍍𑌵𑌵𑌿𑌮𑍁𑌕𑍍𑌤𑌤𑌾𑌦𑌯𑌃 ।
𑌬𑍁𑌦𑍍𑌧𑍇𑌰𑍍𑌵𑌿𑌕𑌲𑍍𑌪𑌾 𑌨 𑌤𑍁 𑌸𑌨𑍍𑌤𑌿 𑌵𑌸𑍍𑌤𑍁𑌤𑌃
𑌸𑍍𑌵𑌸𑍍𑌮𑌿𑌨𑍍𑌪𑌰𑍇 𑌬𑍍𑌰𑌹𑍍𑌮𑌣𑌿 𑌕𑍇𑌵𑌲𑍇𑌽𑌦𑍍𑌵𑌯𑍇 ॥ 510॥
𑌸𑌨𑍍𑌤𑍁 𑌵𑌿𑌕𑌾𑌰𑌾𑌃 𑌪𑍍𑌰𑌕𑍃𑌤𑍇𑌰𑍍𑌦𑌶𑌧𑌾 𑌶𑌤𑌧𑌾 𑌸𑌹𑌸𑍍𑌰𑌧𑌾 𑌵𑌾𑌪𑌿 ।
𑌕𑌿𑌂 𑌮𑍇𑌽𑌸𑌙𑍍𑌗𑌚𑌿𑌤𑌸𑍍𑌤𑍈𑌰𑍍𑌨 𑌘𑌨𑌃 𑌕𑍍𑌵𑌚𑌿𑌦𑌮𑍍𑌬𑌰𑌂 𑌸𑍍𑌪𑍃𑌶𑌤𑌿 ॥ 511॥ (𑌪𑌾𑌠𑌭𑍇𑌦𑌃 - 𑌤𑍈𑌃 𑌕𑌿𑌂 𑌮𑍇𑌽𑌸𑌙𑍍𑌗𑌚𑌿𑌤𑍇𑌰𑍍𑌨 𑌹𑍍𑌯𑌮𑍍𑌬𑍁𑌦𑌡𑌮𑍍𑌬𑌰𑍋𑌽𑌮𑍍𑌬𑌰𑌂)
𑌅𑌵𑍍𑌯𑌕𑍍𑌤𑌾𑌦𑌿𑌸𑍍𑌥𑍂𑌲𑌪𑌰𑍍𑌯𑌨𑍍𑌤𑌮𑍇𑌤𑌤𑍍
𑌵𑌿𑌶𑍍𑌵𑌂 𑌯𑌤𑍍𑌰𑌾𑌭𑌾𑌸𑌮𑌾𑌤𑍍𑌰𑌂 𑌪𑍍𑌰𑌤𑍀𑌤𑌮𑍍 ।
𑌵𑍍𑌯𑍋𑌮𑌪𑍍𑌰𑌖𑍍𑌯𑌂 𑌸𑍂𑌕𑍍𑌷𑍍𑌮𑌮𑌾𑌦𑍍𑌯𑌨𑍍𑌤𑌹𑍀𑌨𑌂
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 512॥
𑌸𑌰𑍍𑌵𑌾𑌧𑌾𑌰𑌂 𑌸𑌰𑍍𑌵𑌵𑌸𑍍𑌤𑍁𑌪𑍍𑌰𑌕𑌾𑌶𑌂
𑌸𑌰𑍍𑌵𑌾𑌕𑌾𑌰𑌂 𑌸𑌰𑍍𑌵𑌗𑌂 𑌸𑌰𑍍𑌵𑌶𑍂𑌨𑍍𑌯𑌮𑍍 ।
𑌨𑌿𑌤𑍍𑌯𑌂 𑌶𑍁𑌦𑍍𑌧𑌂 𑌨𑌿𑌶𑍍𑌚𑌲𑌂 𑌨𑌿𑌰𑍍𑌵𑌿𑌕𑌲𑍍𑌪𑌂 (𑌪𑌾𑌠𑌭𑍇𑌦𑌃 - 𑌨𑌿𑌷𑍍𑌕𑌲𑌂)
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 513॥
𑌯𑌤𑍍𑌪𑍍𑌰𑌤𑍍𑌯𑌸𑍍𑌤𑌾𑌶𑍇𑌷𑌮𑌾𑌯𑌾𑌵𑌿𑌶𑍇𑌷𑌂
𑌪𑍍𑌰𑌤𑍍𑌯𑌗𑍍𑌰𑍂𑌪𑌂 𑌪𑍍𑌰𑌤𑍍𑌯𑌯𑌾𑌗𑌮𑍍𑌯𑌮𑌾𑌨𑌮𑍍 ।
𑌸𑌤𑍍𑌯𑌜𑍍𑌞𑌾𑌨𑌾𑌨𑌨𑍍𑌤𑌮𑌾𑌨𑌨𑍍𑌦𑌰𑍂𑌪𑌂
𑌬𑍍𑌰𑌹𑍍𑌮𑌾𑌦𑍍𑌵𑍈𑌤𑌂 𑌯𑌤𑍍𑌤𑌦𑍇𑌵𑌾𑌹𑌮𑌸𑍍𑌮𑌿 ॥ 514॥
𑌨𑌿𑌷𑍍𑌕𑍍𑌰𑌿𑌯𑍋𑌽𑌸𑍍𑌮𑍍𑌯𑌵𑌿𑌕𑌾𑌰𑍋𑌽𑌸𑍍𑌮𑌿
𑌨𑌿𑌷𑍍𑌕𑌲𑍋𑌽𑌸𑍍𑌮𑌿 𑌨𑌿𑌰𑌾𑌕𑍃𑌤𑌿𑌃 ।
𑌨𑌿𑌰𑍍𑌵𑌿𑌕𑌲𑍍𑌪𑍋𑌽𑌸𑍍𑌮𑌿 𑌨𑌿𑌤𑍍𑌯𑍋𑌽𑌸𑍍𑌮𑌿
𑌨𑌿𑌰𑌾𑌲𑌮𑍍𑌬𑍋𑌽𑌸𑍍𑌮𑌿 𑌨𑌿𑌰𑍍𑌦𑍍𑌵𑌯𑌃 ॥ 515॥
𑌸𑌰𑍍𑌵𑌾𑌤𑍍𑌮𑌕𑍋𑌽𑌹𑌂 𑌸𑌰𑍍𑌵𑍋𑌽𑌹𑌂 𑌸𑌰𑍍𑌵𑌾𑌤𑍀𑌤𑍋𑌽𑌹𑌮𑌦𑍍𑌵𑌯𑌃 ।
𑌕𑍇𑌵𑌲𑌾𑌖𑌣𑍍𑌡𑌬𑍋𑌧𑍋𑌽𑌹𑌮𑌾𑌨𑌨𑍍𑌦𑍋𑌽𑌹𑌂 𑌨𑌿𑌰𑌨𑍍𑌤𑌰𑌃 ॥ 516॥
𑌸𑍍𑌵𑌾𑌰𑌾𑌜𑍍𑌯𑌸𑌾𑌮𑍍𑌰𑌾𑌜𑍍𑌯𑌵𑌿𑌭𑍂𑌤𑌿𑌰𑍇𑌷𑌾
𑌭𑌵𑌤𑍍𑌕𑍃𑌪𑌾𑌶𑍍𑌰𑍀𑌮𑌹𑌿𑌮𑌪𑍍𑌰𑌸𑌾𑌦𑌾𑌤𑍍 ।
𑌪𑍍𑌰𑌾𑌪𑍍𑌤𑌾 𑌮𑌯𑌾 𑌶𑍍𑌰𑍀𑌗𑍁𑌰𑌵𑍇 𑌮𑌹𑌾𑌤𑍍𑌮𑌨𑍇
𑌨𑌮𑍋 𑌨𑌮𑌸𑍍𑌤𑍇𑌽𑌸𑍍𑌤𑍁 𑌪𑍁𑌨𑌰𑍍𑌨𑌮𑍋𑌽𑌸𑍍𑌤𑍁 ॥ 517॥
𑌮𑌹𑌾𑌸𑍍𑌵𑌪𑍍𑌨𑍇 𑌮𑌾𑌯𑌾𑌕𑍃𑌤𑌜𑌨𑌿𑌜𑌰𑌾𑌮𑍃𑌤𑍍𑌯𑍁𑌗𑌹𑌨𑍇
𑌭𑍍𑌰𑌮𑌨𑍍𑌤𑌂 𑌕𑍍𑌲𑌿𑌶𑍍𑌯𑌨𑍍𑌤𑌂 𑌬𑌹𑍁𑌲𑌤𑌰𑌤𑌾𑌪𑍈𑌰𑌨𑍁𑌦𑌿𑌨𑌮𑍍 । (𑌪𑌾𑌠𑌭𑍇𑌦𑌃 - 𑌰𑌨𑍁𑌕𑌲𑌮𑍍)
𑌅𑌹𑌙𑍍𑌕𑌾𑌰𑌵𑍍𑌯𑌾𑌘𑍍𑌰𑌵𑍍𑌯𑌥𑌿𑌤𑌮𑌿𑌮𑌮𑌤𑍍𑌯𑌨𑍍𑌤𑌕𑍃𑌪𑌯𑌾
𑌪𑍍𑌰𑌬𑍋𑌧𑍍𑌯 𑌪𑍍𑌰𑌸𑍍𑌵𑌾𑌪𑌾𑌤𑍍𑌪𑌰𑌮𑌵𑌿𑌤𑌵𑌾𑌨𑍍𑌮𑌾𑌮𑌸𑌿 𑌗𑍁𑌰𑍋 ॥ 518॥
𑌨𑌮𑌸𑍍𑌤𑌸𑍍𑌮𑍈 𑌸𑌦𑍈𑌕𑌸𑍍𑌮𑍈 𑌕𑌸𑍍𑌮𑍈𑌚𑌿𑌨𑍍𑌮𑌹𑌸𑍇 𑌨𑌮𑌃 । (𑌪𑌾𑌠𑌭𑍇𑌦𑌃 - 𑌸𑌦𑍇𑌕𑌸𑍍𑌮𑍈 𑌨𑌮𑌶𑍍𑌚𑌿𑌨𑍍𑌮𑌹𑌸𑍇 𑌮𑍁𑌹𑍁𑌃)
𑌯𑌦𑍇𑌤𑌦𑍍𑌵𑌿𑌶𑍍𑌵𑌰𑍂𑌪𑍇𑌣 𑌰𑌾𑌜𑌤𑍇 𑌗𑍁𑌰𑍁𑌰𑌾𑌜 𑌤𑍇 ॥ 519॥
𑌇𑌤𑌿 𑌨𑌤𑌮𑌵𑌲𑍋𑌕𑍍𑌯 𑌶𑌿𑌷𑍍𑌯𑌵𑌰𑍍𑌯𑌂
𑌸𑌮𑌧𑌿𑌗𑌤𑌾𑌤𑍍𑌮𑌸𑍁𑌖𑌂 𑌪𑍍𑌰𑌬𑍁𑌦𑍍𑌧𑌤𑌤𑍍𑌤𑍍𑌵𑌮𑍍 ।
𑌪𑍍𑌰𑌮𑍁𑌦𑌿𑌤𑌹𑍃𑌦𑌯𑌂 𑌸 𑌦𑍇𑌶𑌿𑌕𑍇𑌨𑍍𑌦𑍍𑌰𑌃 (𑌪𑌾𑌠𑌭𑍇𑌦𑌃 - 𑌹𑍃𑌦𑌯𑌃)
𑌪𑍁𑌨𑌰𑌿𑌦𑌮𑌾𑌹 𑌵𑌚𑌃 𑌪𑌰𑌂 𑌮𑌹𑌾𑌤𑍍𑌮𑌾 ॥ 520॥
𑌬𑍍𑌰𑌹𑍍𑌮𑌪𑍍𑌰𑌤𑍍𑌯𑌯𑌸𑌨𑍍𑌤𑌤𑌿𑌰𑍍𑌜𑌗𑌦𑌤𑍋 𑌬𑍍𑌰𑌹𑍍𑌮𑍈𑌵 𑌤𑌤𑍍𑌸𑌰𑍍𑌵𑌤𑌃 (𑌪𑌾𑌠𑌭𑍇𑌦𑌃 - 𑌸𑌤𑍍𑌸𑌰𑍍𑌵𑌤𑌃)
𑌪𑌶𑍍𑌯𑌾𑌧𑍍𑌯𑌾𑌤𑍍𑌮𑌦𑍃𑌶𑌾 𑌪𑍍𑌰𑌶𑌾𑌨𑍍𑌤𑌮𑌨𑌸𑌾 𑌸𑌰𑍍𑌵𑌾𑌸𑍍𑌵𑌵𑌸𑍍𑌥𑌾𑌸𑍍𑌵𑌪𑌿 ।
𑌰𑍂𑌪𑌾𑌦𑌨𑍍𑌯𑌦𑌵𑍇𑌕𑍍𑌷𑌿𑌤𑌂 𑌕𑌿𑌮𑌭𑌿𑌤𑌶𑍍𑌚𑌕𑍍𑌷𑍁𑌷𑍍𑌮𑌤𑌾𑌂 𑌦𑍃𑌶𑍍𑌯𑌤𑍇 (𑌪𑌾𑌠𑌭𑍇𑌦𑌃 - 𑌵𑌿𑌦𑍍𑌯𑌤𑍇)
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑌃 𑌸𑌤𑌃 𑌕𑌿𑌮𑌪𑌰𑌂 𑌬𑍁𑌦𑍍𑌧𑍇𑌰𑍍𑌵𑌿𑌹𑌾𑌰𑌾𑌸𑍍𑌪𑌦𑌮𑍍 ॥ 521॥
𑌕𑌸𑍍𑌤𑌾𑌂 𑌪𑌰𑌾𑌨𑌨𑍍𑌦𑌰𑌸𑌾𑌨𑍁𑌭𑍂𑌤𑌿-
𑌮𑍃𑌤𑍍𑌸𑍃𑌜𑍍𑌯 𑌶𑍂𑌨𑍍𑌯𑍇𑌷𑍁 𑌰𑌮𑍇𑌤 𑌵𑌿𑌦𑍍𑌵𑌾𑌨𑍍 । (𑌪𑌾𑌠𑌭𑍇𑌦𑌃 - 𑌮𑍁𑌤𑍍𑌸𑍃𑌜𑍍𑌯
𑌚𑌨𑍍𑌦𑍍𑌰𑍇 𑌮𑌹𑌾𑌹𑍍𑌲𑌾𑌦𑌿𑌨𑌿 𑌦𑍀𑌪𑍍𑌯𑌮𑌾𑌨𑍇)
𑌚𑌿𑌤𑍍𑌰𑍇𑌨𑍍𑌦𑍁𑌮𑌾𑌲𑍋𑌕𑌯𑌿𑌤𑍁𑌂 𑌕 𑌇𑌚𑍍𑌛𑍇𑌤𑍍 ॥ 522॥
𑌅𑌸𑌤𑍍𑌪𑌦𑌾𑌰𑍍𑌥𑌾𑌨𑍁𑌭𑌵𑍇𑌨 𑌕𑌿𑌞𑍍𑌚𑌿𑌨𑍍
𑌨 𑌹𑍍𑌯𑌸𑍍𑌤𑌿 𑌤𑍃𑌪𑍍𑌤𑌿𑌰𑍍𑌨 𑌚 𑌦𑍁𑌃𑌖𑌹𑌾𑌨𑌿𑌃 ।
𑌤𑌦𑌦𑍍𑌵𑌯𑌾𑌨𑌨𑍍𑌦𑌰𑌸𑌾𑌨𑍁𑌭𑍂𑌤𑍍𑌯𑌾
𑌤𑍃𑌪𑍍𑌤𑌃 𑌸𑍁𑌖𑌂 𑌤𑌿𑌷𑍍𑌠 𑌸𑌦𑌾𑌤𑍍𑌮𑌨𑌿𑌷𑍍𑌠𑌯𑌾 ॥ 523॥
𑌸𑍍𑌵𑌮𑍇𑌵 𑌸𑌰𑍍𑌵𑌥𑌾 𑌪𑌶𑍍𑌯𑌨𑍍𑌮𑌨𑍍𑌯𑌮𑌾𑌨𑌃 𑌸𑍍𑌵𑌮𑌦𑍍𑌵𑌯𑌮𑍍 । (𑌪𑌾𑌠𑌭𑍇𑌦𑌃 - 𑌸𑌰𑍍𑌵𑌤𑌃)
𑌸𑍍𑌵𑌾𑌨𑌨𑍍𑌦𑌮𑌨𑍁𑌭𑍁𑌞𑍍𑌜𑌾𑌨𑌃 𑌕𑌾𑌲𑌂 𑌨𑌯 𑌮𑌹𑌾𑌮𑌤𑍇 ॥ 524॥
𑌅𑌖𑌣𑍍𑌡𑌬𑍋𑌧𑌾𑌤𑍍𑌮𑌨𑌿 𑌨𑌿𑌰𑍍𑌵𑌿𑌕𑌲𑍍𑌪𑍇
𑌵𑌿𑌕𑌲𑍍𑌪𑌨𑌂 𑌵𑍍𑌯𑍋𑌮𑍍𑌨𑌿 𑌪𑍁𑌰𑌪𑍍𑌰𑌕𑌲𑍍𑌪𑌨𑌮𑍍 ।
𑌤𑌦𑌦𑍍𑌵𑌯𑌾𑌨𑌨𑍍𑌦𑌮𑌯𑌾𑌤𑍍𑌮𑌨𑌾 𑌸𑌦𑌾
𑌶𑌾𑌨𑍍𑌤𑌿𑌂 𑌪𑌰𑌾𑌮𑍇𑌤𑍍𑌯 𑌭𑌜𑌸𑍍𑌵 𑌮𑍗𑌨𑌮𑍍 ॥ 525॥
𑌤𑍂𑌷𑍍𑌣𑍀𑌮𑌵𑌸𑍍𑌥𑌾 𑌪𑌰𑌮𑍋𑌪𑌶𑌾𑌨𑍍𑌤𑌿𑌃
𑌬𑍁𑌦𑍍𑌧𑍇𑌰𑌸𑌤𑍍𑌕𑌲𑍍𑌪𑌵𑌿𑌕𑌲𑍍𑌪𑌹𑍇𑌤𑍋𑌃 ।
𑌬𑍍𑌰𑌹𑍍𑌮𑌾𑌤𑍍𑌮𑌨𑍋 𑌬𑍍𑌰𑌹𑍍𑌮𑌵𑌿𑌦𑍋 𑌮𑌹𑌾𑌤𑍍𑌮𑌨𑍋
𑌯𑌤𑍍𑌰𑌾𑌦𑍍𑌵𑌯𑌾𑌨𑌨𑍍𑌦𑌸𑍁𑌖𑌂 𑌨𑌿𑌰𑌨𑍍𑌤𑌰𑌮𑍍 ॥ 526॥
𑌨𑌾𑌸𑍍𑌤𑌿 𑌨𑌿𑌰𑍍𑌵𑌾𑌸𑌨𑌾𑌨𑍍𑌮𑍗𑌨𑌾𑌤𑍍𑌪𑌰𑌂 𑌸𑍁𑌖𑌕𑍃𑌦𑍁𑌤𑍍𑌤𑌮𑌮𑍍 ।
𑌵𑌿𑌜𑍍𑌞𑌾𑌤𑌾𑌤𑍍𑌮𑌸𑍍𑌵𑌰𑍂𑌪𑌸𑍍𑌯 𑌸𑍍𑌵𑌾𑌨𑌨𑍍𑌦𑌰𑌸𑌪𑌾𑌯𑌿𑌨𑌃 ॥ 527॥
𑌗𑌚𑍍𑌛𑌂𑌸𑍍𑌤𑌿𑌷𑍍𑌠𑌨𑍍𑌨𑍁𑌪𑌵𑌿𑌶𑌞𑍍𑌛𑌯𑌾𑌨𑍋 𑌵𑌾𑌽𑌨𑍍𑌯𑌥𑌾𑌪𑌿 𑌵𑌾 ।
𑌯𑌥𑍇𑌚𑍍𑌛𑌯𑌾 𑌵𑌸𑍇𑌦𑍍𑌵𑌿𑌦𑍍𑌵𑌾𑌨𑌾𑌤𑍍𑌮𑌾𑌰𑌾𑌮𑌃 𑌸𑌦𑌾 𑌮𑍁𑌨𑌿𑌃 ॥ 528॥
𑌨 𑌦𑍇𑌶𑌕𑌾𑌲𑌾𑌸𑌨𑌦𑌿𑌗𑍍𑌯𑌮𑌾𑌦𑌿-
𑌲𑌕𑍍𑌷𑍍𑌯𑌾𑌦𑍍𑌯𑌪𑍇𑌕𑍍𑌷𑌾𑌽𑌪𑍍𑌰𑌤𑌿𑌬𑌦𑍍𑌧𑌵𑍃𑌤𑍍𑌤𑍇𑌃 । (𑌪𑌾𑌠𑌭𑍇𑌦𑌃 - 𑌪𑍍𑌰𑌤𑌿𑌬𑌦𑍍𑌧
𑌸𑌂𑌸𑌿𑌦𑍍𑌧𑌤𑌤𑍍𑌤𑍍𑌵𑌸𑍍𑌯 𑌮𑌹𑌾𑌤𑍍𑌮𑌨𑍋𑌽𑌸𑍍𑌤𑌿)
𑌸𑍍𑌵𑌵𑍇𑌦𑌨𑍇 𑌕𑌾 𑌨𑌿𑌯𑌮𑌾𑌦𑍍𑌯𑌵𑌸𑍍𑌥𑌾 ॥ 529॥
𑌘𑌟𑍋𑌽𑌯𑌮𑌿𑌤𑌿 𑌵𑌿𑌜𑍍𑌞𑌾𑌤𑍁𑌂 𑌨𑌿𑌯𑌮𑌃 𑌕𑍋𑌽𑌨𑍍𑌵𑌵𑍇𑌕𑍍𑌷𑌤𑍇 । (𑌪𑌾𑌠𑌭𑍇𑌦𑌃 - 𑌅𑌪𑍇𑌕𑍍𑌷𑍍𑌯𑌤𑍇)
𑌵𑌿𑌨𑌾 𑌪𑍍𑌰𑌮𑌾𑌣𑌸𑍁𑌷𑍍𑌠𑍁𑌤𑍍𑌵𑌂 𑌯𑌸𑍍𑌮𑌿𑌨𑍍𑌸𑌤𑌿 𑌪𑌦𑌾𑌰𑍍𑌥𑌧𑍀𑌃 ॥ 530॥
𑌅𑌯𑌮𑌾𑌤𑍍𑌮𑌾 𑌨𑌿𑌤𑍍𑌯𑌸𑌿𑌦𑍍𑌧𑌃 𑌪𑍍𑌰𑌮𑌾𑌣𑍇 𑌸𑌤𑌿 𑌭𑌾𑌸𑌤𑍇 ।
𑌨 𑌦𑍇𑌶𑌂 𑌨𑌾𑌪𑌿 𑌵𑌾 𑌕𑌾𑌲𑌂 𑌨 𑌶𑍁𑌦𑍍𑌧𑌿𑌂 𑌵𑌾𑌪𑍍𑌯𑌪𑍇𑌕𑍍𑌷𑌤𑍇 ॥ 531॥
𑌦𑍇𑌵𑌦𑌤𑍍𑌤𑍋𑌽𑌹𑌮𑌿𑌤𑍍𑌯𑍇𑌤𑌦𑍍𑌵𑌿𑌜𑍍𑌞𑌾𑌨𑌂 𑌨𑌿𑌰𑌪𑍇𑌕𑍍𑌷𑌕𑌮𑍍 ।
𑌤𑌦𑍍𑌵𑌦𑍍𑌬𑍍𑌰𑌹𑍍𑌮𑌵𑌿𑌦𑍋𑌽𑌪𑍍𑌯𑌸𑍍𑌯 𑌬𑍍𑌰𑌹𑍍𑌮𑌾𑌹𑌮𑌿𑌤𑌿 𑌵𑍇𑌦𑌨𑌮𑍍 ॥ 532॥
𑌭𑌾𑌨𑍁𑌨𑍇𑌵 𑌜𑌗𑌤𑍍𑌸𑌰𑍍𑌵𑌂 𑌭𑌾𑌸𑌤𑍇 𑌯𑌸𑍍𑌯 𑌤𑍇𑌜𑌸𑌾 ।
𑌅𑌨𑌾𑌤𑍍𑌮𑌕𑌮𑌸𑌤𑍍𑌤𑍁𑌚𑍍𑌛𑌂 𑌕𑌿𑌂 𑌨𑍁 𑌤𑌸𑍍𑌯𑌾𑌵𑌭𑌾𑌸𑌕𑌮𑍍 ॥ 533॥
𑌵𑍇𑌦𑌶𑌾𑌸𑍍𑌤𑍍𑌰𑌪𑍁𑌰𑌾𑌣𑌾𑌨𑌿 𑌭𑍂𑌤𑌾𑌨𑌿 𑌸𑌕𑌲𑌾𑌨𑍍𑌯𑌪𑌿 ।
𑌯𑍇𑌨𑌾𑌰𑍍𑌥𑌵𑌨𑍍𑌤𑌿 𑌤𑌂 𑌕𑌿𑌨𑍍𑌨𑍁 𑌵𑌿𑌜𑍍𑌞𑌾𑌤𑌾𑌰𑌂 𑌪𑍍𑌰𑌕𑌾𑌶𑌯𑍇𑌤𑍍 ॥ 534॥
𑌏𑌷 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌰𑌨𑌨𑍍𑌤𑌶𑌕𑍍𑌤𑌿𑌃
𑌆𑌤𑍍𑌮𑌾𑌽𑌪𑍍𑌰𑌮𑍇𑌯𑌃 𑌸𑌕𑌲𑌾𑌨𑍁𑌭𑍂𑌤𑌿𑌃 ।
𑌯𑌮𑍇𑌵 𑌵𑌿𑌜𑍍𑌞𑌾𑌯 𑌵𑌿𑌮𑍁𑌕𑍍𑌤𑌬𑌨𑍍𑌧𑍋
𑌜𑌯𑌤𑍍𑌯𑌯𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑍋𑌤𑍍𑌤𑌮𑌃 ॥ 535॥
𑌨 𑌖𑌿𑌦𑍍𑌯𑌤𑍇 𑌨𑍋 𑌵𑌿𑌷𑌯𑍈𑌃 𑌪𑍍𑌰𑌮𑍋𑌦𑌤𑍇
𑌨 𑌸𑌜𑍍𑌜𑌤𑍇 𑌨𑌾𑌪𑌿 𑌵𑌿𑌰𑌜𑍍𑌯𑌤𑍇 𑌚 ।
𑌸𑍍𑌵𑌸𑍍𑌮𑌿𑌨𑍍𑌸𑌦𑌾 𑌕𑍍𑌰𑍀𑌡𑌤𑌿 𑌨𑌨𑍍𑌦𑌤𑌿 𑌸𑍍𑌵𑌯𑌂
𑌨𑌿𑌰𑌨𑍍𑌤𑌰𑌾𑌨𑌨𑍍𑌦𑌰𑌸𑍇𑌨 𑌤𑍃𑌪𑍍𑌤𑌃 ॥ 536॥
𑌕𑍍𑌷𑍁𑌧𑌾𑌂 𑌦𑍇𑌹𑌵𑍍𑌯𑌥𑌾𑌂 𑌤𑍍𑌯𑌕𑍍𑌤𑍍𑌵𑌾 𑌬𑌾𑌲𑌃 𑌕𑍍𑌰𑍀𑌡𑌤𑌿 𑌵𑌸𑍍𑌤𑍁𑌨𑌿𑌃 । (𑌪𑌾𑌠𑌭𑍇𑌦𑌃 - 𑌵𑌸𑍍𑌤𑍁𑌨𑌿)
𑌤𑌥𑍈𑌵 𑌵𑌿𑌦𑍍𑌵𑌾𑌨𑍍 𑌰𑌮𑌤𑍇 𑌨𑌿𑌰𑍍𑌮𑌮𑍋 𑌨𑌿𑌰𑌹𑌂 𑌸𑍁𑌖𑍀 ॥ 537॥
𑌚𑌿𑌨𑍍𑌤𑌾𑌶𑍂𑌨𑍍𑌯𑌮𑌦𑍈𑌨𑍍𑌯𑌭𑍈𑌕𑍍𑌷𑌮𑌶𑌨𑌂 𑌪𑌾𑌨𑌂 𑌸𑌰𑌿𑌦𑍍𑌵𑌾𑌰𑌿𑌷𑍁
𑌸𑍍𑌵𑌾𑌤𑌨𑍍𑌤𑍍𑌰𑍍𑌯𑍇𑌣 𑌨𑌿𑌰𑌙𑍍𑌕𑍁𑌶𑌾 𑌸𑍍𑌥𑌿𑌤𑌿𑌰𑌭𑍀𑌰𑍍𑌨𑌿𑌦𑍍𑌰𑌾 𑌶𑍍𑌮𑌶𑌾𑌨𑍇 𑌵𑌨𑍇 ।
𑌵𑌸𑍍𑌤𑍍𑌰𑌂 𑌕𑍍𑌷𑌾𑌲𑌨𑌶𑍋𑌷𑌣𑌾𑌦𑌿𑌰𑌹𑌿𑌤𑌂 𑌦𑌿𑌗𑍍𑌵𑌾𑌸𑍍𑌤𑍁 𑌶𑌯𑍍𑌯𑌾 𑌮𑌹𑍀
𑌸𑌞𑍍𑌚𑌾𑌰𑍋 𑌨𑌿𑌗𑌮𑌾𑌨𑍍𑌤𑌵𑍀𑌥𑌿𑌷𑍁 𑌵𑌿𑌦𑌾𑌂 𑌕𑍍𑌰𑍀𑌡𑌾 𑌪𑌰𑍇 𑌬𑍍𑌰𑌹𑍍𑌮𑌣𑌿 ॥ 538॥
𑌵𑌿𑌮𑌾𑌨𑌮𑌾𑌲𑌮𑍍𑌬𑍍𑌯 𑌶𑌰𑍀𑌰𑌮𑍇𑌤𑌦𑍍
𑌭𑍁𑌨𑌕𑍍𑌤𑍍𑌯𑌶𑍇𑌷𑌾𑌨𑍍𑌵𑌿𑌷𑌯𑌾𑌨𑍁𑌪𑌸𑍍𑌥𑌿𑌤𑌾𑌨𑍍 ।
𑌪𑌰𑍇𑌚𑍍𑌛𑌯𑌾 𑌬𑌾𑌲𑌵𑌦𑌾𑌤𑍍𑌮𑌵𑍇𑌤𑍍𑌤𑌾
𑌯𑍋𑌽𑌵𑍍𑌯𑌕𑍍𑌤𑌲𑌿𑌙𑍍𑌗𑍋𑌽𑌨𑌨𑍁𑌷𑌕𑍍𑌤𑌬𑌾𑌹𑍍𑌯𑌃 ॥ 539॥
𑌦𑌿𑌗𑌮𑍍𑌬𑌰𑍋 𑌵𑌾𑌪𑌿 𑌚 𑌸𑌾𑌮𑍍𑌬𑌰𑍋 𑌵𑌾
𑌤𑍍𑌵𑌗𑌮𑍍𑌬𑌰𑍋 𑌵𑌾𑌪𑌿 𑌚𑌿𑌦𑌮𑍍𑌬𑌰𑌸𑍍𑌥𑌃 ।
𑌉𑌨𑍍𑌮𑌤𑍍𑌤𑌵𑌦𑍍𑌵𑌾𑌪𑌿 𑌚 𑌬𑌾𑌲𑌵𑌦𑍍𑌵𑌾
𑌪𑌿𑌶𑌾𑌚𑌵𑌦𑍍𑌵𑌾𑌪𑌿 𑌚𑌰𑌤𑍍𑌯𑌵𑌨𑍍𑌯𑌾𑌮𑍍 ॥ 540॥
𑌕𑌾𑌮𑌾𑌨𑍍𑌨𑌿𑌷𑍍𑌕𑌾𑌮𑌰𑍂𑌪𑍀 𑌸𑌂𑌶𑍍𑌚𑌰𑌤𑍍𑌯𑍇𑌕𑌚𑌰𑍋 𑌮𑍁𑌨𑌿𑌃 । (𑌪𑌾𑌠𑌭𑍇𑌦𑌃 - 𑌕𑌾𑌮𑌾𑌨𑍍𑌨𑍀 𑌕𑌾𑌮𑌰𑍂𑌪𑍀)
𑌸𑍍𑌵𑌾𑌤𑍍𑌮𑌨𑍈𑌵 𑌸𑌦𑌾 𑌤𑍁𑌷𑍍𑌟𑌃 𑌸𑍍𑌵𑌯𑌂 𑌸𑌰𑍍𑌵𑌾𑌤𑍍𑌮𑌨𑌾 𑌸𑍍𑌥𑌿𑌤𑌃 ॥ 541॥
𑌕𑍍𑌵𑌚𑌿𑌨𑍍𑌮𑍂𑌢𑍋 𑌵𑌿𑌦𑍍𑌵𑌾𑌨𑍍 𑌕𑍍𑌵𑌚𑌿𑌦𑌪𑌿 𑌮𑌹𑌾𑌰𑌾𑌜𑌵𑌿𑌭𑌵𑌃
𑌕𑍍𑌵𑌚𑌿𑌦𑍍𑌭𑍍𑌰𑌾𑌨𑍍𑌤𑌃 𑌸𑍗𑌮𑍍𑌯𑌃 𑌕𑍍𑌵𑌚𑌿𑌦𑌜𑌗𑌰𑌾𑌚𑌾𑌰𑌕𑌲𑌿𑌤𑌃 ।
𑌕𑍍𑌵𑌚𑌿𑌤𑍍𑌪𑌾𑌤𑍍𑌰𑍀𑌭𑍂𑌤𑌃 𑌕𑍍𑌵𑌚𑌿𑌦𑌵𑌮𑌤𑌃 𑌕𑍍𑌵𑌾𑌪𑍍𑌯𑌵𑌿𑌦𑌿𑌤𑌃
𑌚𑌰𑌤𑍍𑌯𑍇𑌵𑌂 𑌪𑍍𑌰𑌾𑌜𑍍𑌞𑌃 𑌸𑌤𑌤𑌪𑌰𑌮𑌾𑌨𑌨𑍍𑌦𑌸𑍁𑌖𑌿𑌤𑌃 ॥ 542॥
𑌨𑌿𑌰𑍍𑌧𑌨𑍋𑌽𑌪𑌿 𑌸𑌦𑌾 𑌤𑍁𑌷𑍍𑌟𑍋𑌽𑌪𑍍𑌯𑌸𑌹𑌾𑌯𑍋 𑌮𑌹𑌾𑌬𑌲𑌃 ।
𑌨𑌿𑌤𑍍𑌯𑌤𑍃𑌪𑍍𑌤𑍋𑌽𑌪𑍍𑌯𑌭𑍁𑌞𑍍𑌜𑌾𑌨𑍋𑌽𑌪𑍍𑌯𑌸𑌮𑌃 𑌸𑌮𑌦𑌰𑍍𑌶𑌨𑌃 ॥ 543॥
𑌅𑌪𑌿 𑌕𑍁𑌰𑍍𑌵𑌨𑍍𑌨𑌕𑍁𑌰𑍍𑌵𑌾𑌣𑌶𑍍𑌚𑌾𑌭𑍋𑌕𑍍𑌤𑌾 𑌫𑌲𑌭𑍋𑌗𑍍𑌯𑌪𑌿 ।
𑌶𑌰𑍀𑌰𑍍𑌯𑌪𑍍𑌯𑌶𑌰𑍀𑌰𑍍𑌯𑍇𑌷 𑌪𑌰𑌿𑌚𑍍𑌛𑌿𑌨𑍍𑌨𑍋𑌽𑌪𑌿 𑌸𑌰𑍍𑌵𑌗𑌃 ॥ 544॥
𑌅𑌶𑌰𑍀𑌰𑌂 𑌸𑌦𑌾 𑌸𑌨𑍍𑌤𑌮𑌿𑌮𑌂 𑌬𑍍𑌰𑌹𑍍𑌮𑌵𑌿𑌦𑌂 𑌕𑍍𑌵𑌚𑌿𑌤𑍍 ।
𑌪𑍍𑌰𑌿𑌯𑌾𑌪𑍍𑌰𑌿𑌯𑍇 𑌨 𑌸𑍍𑌪𑍃𑌶𑌤𑌸𑍍𑌤𑌥𑍈𑌵 𑌚 𑌶𑍁𑌭𑌾𑌶𑍁𑌭𑍇 ॥ 545॥
𑌸𑍍𑌥𑍂𑌲𑌾𑌦𑌿𑌸𑌮𑍍𑌬𑌨𑍍𑌧𑌵𑌤𑍋𑌽𑌭𑌿𑌮𑌾𑌨𑌿𑌨𑌃
𑌸𑍁𑌖𑌂 𑌚 𑌦𑍁𑌃𑌖𑌂 𑌚 𑌶𑍁𑌭𑌾𑌶𑍁𑌭𑍇 𑌚 ।
𑌵𑌿𑌧𑍍𑌵𑌸𑍍𑌤𑌬𑌨𑍍𑌧𑌸𑍍𑌯 𑌸𑌦𑌾𑌤𑍍𑌮𑌨𑍋 𑌮𑍁𑌨𑍇𑌃
𑌕𑍁𑌤𑌃 𑌶𑍁𑌭𑌂 𑌵𑌾𑌽𑌪𑍍𑌯𑌶𑍁𑌭𑌂 𑌫𑌲𑌂 𑌵𑌾 ॥ 546॥
𑌤𑌮𑌸𑌾 𑌗𑍍𑌰𑌸𑍍𑌤𑌵𑌦𑍍𑌭𑌾𑌨𑌾𑌦𑌗𑍍𑌰𑌸𑍍𑌤𑍋𑌽𑌪𑌿 𑌰𑌵𑌿𑌰𑍍𑌜𑌨𑍈𑌃 ।
𑌗𑍍𑌰𑌸𑍍𑌤 𑌇𑌤𑍍𑌯𑍁𑌚𑍍𑌯𑌤𑍇 𑌭𑍍𑌰𑌾𑌨𑍍𑌤𑍍𑌯𑌾𑌂 𑌹𑍍𑌯𑌜𑍍𑌞𑌾𑌤𑍍𑌵𑌾 𑌵𑌸𑍍𑌤𑍁𑌲𑌕𑍍𑌷𑌣𑌮𑍍 ॥ 547॥ (𑌪𑌾𑌠𑌭𑍇𑌦𑌃 - 𑌭𑍍𑌰𑌾𑌨𑍍𑌤𑍍𑌯𑌾)
𑌤𑌦𑍍𑌵𑌦𑍍𑌦𑍇𑌹𑌾𑌦𑌿𑌬𑌨𑍍𑌧𑍇𑌭𑍍𑌯𑍋 𑌵𑌿𑌮𑍁𑌕𑍍𑌤𑌂 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌮𑍍 ।
𑌪𑌶𑍍𑌯𑌨𑍍𑌤𑌿 𑌦𑍇𑌹𑌿𑌵𑌨𑍍𑌮𑍂𑌢𑌾𑌃 𑌶𑌰𑍀𑌰𑌾𑌭𑌾𑌸𑌦𑌰𑍍𑌶𑌨𑌾𑌤𑍍 ॥ 548॥
𑌅𑌹𑌿𑌰𑍍𑌨𑌿𑌰𑍍𑌲𑍍𑌵𑌯𑌨𑍀𑌂 𑌵𑌾𑌯𑌂 𑌮𑍁𑌕𑍍𑌤𑍍𑌵𑌾 𑌦𑍇𑌹𑌂 𑌤𑍁 𑌤𑌿𑌷𑍍𑌠𑌤𑌿 । (𑌪𑌾𑌠𑌭𑍇𑌦𑌃 - 𑌅𑌹𑌿𑌨𑌿)
𑌇𑌤𑌸𑍍𑌤𑌤𑌶𑍍𑌚𑌾𑌲𑍍𑌯𑌮𑌾𑌨𑍋 𑌯𑌤𑍍𑌕𑌿𑌞𑍍𑌚𑌿𑌤𑍍𑌪𑍍𑌰𑌾𑌣𑌵𑌾𑌯𑍁𑌨𑌾 ॥ 549॥
𑌸𑍍𑌤𑍍𑌰𑍋𑌤𑌸𑌾 𑌨𑍀𑌯𑌤𑍇 𑌦𑌾𑌰𑍁 𑌯𑌥𑌾 𑌨𑌿𑌮𑍍𑌨𑍋𑌨𑍍𑌨𑌤𑌸𑍍𑌥𑌲𑌮𑍍 ।
𑌦𑍈𑌵𑍇𑌨 𑌨𑍀𑌯𑌤𑍇 𑌦𑍇𑌹𑍋 𑌯𑌥𑌾𑌕𑌾𑌲𑍋𑌪𑌭𑍁𑌕𑍍𑌤𑌿𑌷𑍁 ॥ 550॥
𑌪𑍍𑌰𑌾𑌰𑌬𑍍𑌧𑌕𑌰𑍍𑌮𑌪𑌰𑌿𑌕𑌲𑍍𑌪𑌿𑌤𑌵𑌾𑌸𑌨𑌾𑌭𑌿𑌃
𑌸𑌂𑌸𑌾𑌰𑌿𑌵𑌚𑍍𑌚𑌰𑌤𑌿 𑌭𑍁𑌕𑍍𑌤𑌿𑌷𑍁 𑌮𑍁𑌕𑍍𑌤𑌦𑍇𑌹𑌃 ।
𑌸𑌿𑌦𑍍𑌧𑌃 𑌸𑍍𑌵𑌯𑌂 𑌵𑌸𑌤𑌿 𑌸𑌾𑌕𑍍𑌷𑌿𑌵𑌦𑌤𑍍𑌰 𑌤𑍂𑌷𑍍𑌣𑍀𑌂
𑌚𑌕𑍍𑌰𑌸𑍍𑌯 𑌮𑍂𑌲𑌮𑌿𑌵 𑌕𑌲𑍍𑌪𑌵𑌿𑌕𑌲𑍍𑌪𑌶𑍂𑌨𑍍𑌯𑌃 ॥ 551॥
𑌨𑍈𑌵𑍇𑌨𑍍𑌦𑍍𑌰𑌿𑌯𑌾𑌣𑌿 𑌵𑌿𑌷𑌯𑍇𑌷𑍁 𑌨𑌿𑌯𑍁𑌙𑍍𑌕𑍍𑌤 𑌏𑌷
𑌨𑍈𑌵𑌾𑌪𑌯𑍁𑌙𑍍𑌕𑍍𑌤 𑌉𑌪𑌦𑌰𑍍𑌶𑌨𑌲𑌕𑍍𑌷𑌣𑌸𑍍𑌥𑌃 ।
𑌨𑍈𑌵 𑌕𑍍𑌰𑌿𑌯𑌾𑌫𑌲𑌮𑌪𑍀𑌷𑌦𑌵𑍇𑌕𑍍𑌷𑌤𑍇 𑌸 (𑌪𑌾𑌠𑌭𑍇𑌦𑌃 - 𑌅𑌪𑍀𑌷𑌦𑌪𑍇𑌕𑍍𑌷𑌤𑍇 𑌸𑌃)
𑌸𑍍𑌵𑌾𑌨𑌨𑍍𑌦𑌸𑌾𑌨𑍍𑌦𑍍𑌰𑌰𑌸𑌪𑌾𑌨𑌸𑍁𑌮𑌤𑍍𑌤𑌚𑌿𑌤𑍍𑌤𑌃 ॥ 552॥
𑌲𑌕𑍍𑌷𑍍𑌯𑌾𑌲𑌕𑍍𑌷𑍍𑌯𑌗𑌤𑌿𑌂 𑌤𑍍𑌯𑌕𑍍𑌤𑍍𑌵𑌾 𑌯𑌸𑍍𑌤𑌿𑌷𑍍𑌠𑍇𑌤𑍍𑌕𑍇𑌵𑌲𑌾𑌤𑍍𑌮𑌨𑌾 ।
𑌶𑌿𑌵 𑌏𑌵 𑌸𑍍𑌵𑌯𑌂 𑌸𑌾𑌕𑍍𑌷𑌾𑌦𑌯𑌂 𑌬𑍍𑌰𑌹𑍍𑌮𑌵𑌿𑌦𑍁𑌤𑍍𑌤𑌮𑌃 ॥ 553॥
𑌜𑍀𑌵𑌨𑍍𑌨𑍇𑌵 𑌸𑌦𑌾 𑌮𑍁𑌕𑍍𑌤𑌃 𑌕𑍃𑌤𑌾𑌰𑍍𑌥𑍋 𑌬𑍍𑌰𑌹𑍍𑌮𑌵𑌿𑌤𑍍𑌤𑌮𑌃 ।
𑌉𑌪𑌾𑌧𑌿𑌨𑌾𑌶𑌾𑌦𑍍𑌬𑍍𑌰𑌹𑍍𑌮𑍈𑌵 𑌸𑌨𑍍 𑌬𑍍𑌰𑌹𑍍𑌮𑌾𑌪𑍍𑌯𑍇𑌤𑌿 𑌨𑌿𑌰𑍍𑌦𑍍𑌵𑌯𑌮𑍍 ॥ 554॥
𑌶𑍈𑌲𑍂𑌷𑍋 𑌵𑍇𑌷𑌸𑌦𑍍𑌭𑌾𑌵𑌾𑌭𑌾𑌵𑌯𑍋𑌶𑍍𑌚 𑌯𑌥𑌾 𑌪𑍁𑌮𑌾𑌨𑍍 ।
𑌤𑌥𑍈𑌵 𑌬𑍍𑌰𑌹𑍍𑌮𑌵𑌿𑌚𑍍𑌛𑍍𑌰𑍇𑌷𑍍𑌠𑌃 𑌸𑌦𑌾 𑌬𑍍𑌰𑌹𑍍𑌮𑍈𑌵 𑌨𑌾𑌪𑌰𑌃 ॥ 555॥
𑌯𑌤𑍍𑌰 𑌕𑍍𑌵𑌾𑌪𑌿 𑌵𑌿𑌶𑍀𑌰𑍍𑌣𑌂 𑌸𑌤𑍍𑌪𑌰𑍍𑌣𑌮𑌿𑌵 𑌤𑌰𑍋𑌰𑍍𑌵𑌪𑍁𑌃 𑌪𑌤𑌤𑌾𑌤𑍍 । (𑌪𑌾𑌠𑌭𑍇𑌦𑌃 - 𑌵𑌿𑌶𑍀𑌰𑍍𑌣𑌂 𑌪𑌰𑍍𑌣𑌮𑌿𑌵)
𑌬𑍍𑌰𑌹𑍍𑌮𑍀𑌭𑍂𑌤𑌸𑍍𑌯 𑌯𑌤𑍇𑌃 𑌪𑍍𑌰𑌾𑌗𑍇𑌵 𑌤𑌚𑍍𑌚𑌿𑌦𑌗𑍍𑌨𑌿𑌨𑌾 𑌦𑌗𑍍𑌧𑌮𑍍 ॥ 556॥
𑌸𑌦𑌾𑌤𑍍𑌮𑌨𑌿 𑌬𑍍𑌰𑌹𑍍𑌮𑌣𑌿 𑌤𑌿𑌷𑍍𑌠𑌤𑍋 𑌮𑍁𑌨𑍇𑌃
𑌪𑍂𑌰𑍍𑌣𑌾𑌽𑌦𑍍𑌵𑌯𑌾𑌨𑌨𑍍𑌦𑌮𑌯𑌾𑌤𑍍𑌮𑌨𑌾 𑌸𑌦𑌾 ।
𑌨 𑌦𑍇𑌶𑌕𑌾𑌲𑌾𑌦𑍍𑌯𑍁𑌚𑌿𑌤𑌪𑍍𑌰𑌤𑍀𑌕𑍍𑌷𑌾
𑌤𑍍𑌵𑌙𑍍𑌮𑌾𑌂𑌸𑌵𑌿𑌟𑍍𑌪𑌿𑌣𑍍𑌡𑌵𑌿𑌸𑌰𑍍𑌜𑌨𑌾𑌯 ॥ 557॥
𑌦𑍇𑌹𑌸𑍍𑌯 𑌮𑍋𑌕𑍍𑌷𑍋 𑌨𑍋 𑌮𑍋𑌕𑍍𑌷𑍋 𑌨 𑌦𑌣𑍍𑌡𑌸𑍍𑌯 𑌕𑌮𑌣𑍍𑌡𑌲𑍋𑌃 ।
𑌅𑌵𑌿𑌦𑍍𑌯𑌾𑌹𑍃𑌦𑌯𑌗𑍍𑌰𑌨𑍍𑌥𑌿𑌮𑍋𑌕𑍍𑌷𑍋 𑌮𑍋𑌕𑍍𑌷𑍋 𑌯𑌤𑌸𑍍𑌤𑌤𑌃 ॥ 558॥
𑌕𑍁𑌲𑍍𑌯𑌾𑌯𑌾𑌮𑌥 𑌨𑌦𑍍𑌯𑌾𑌂 𑌵𑌾 𑌶𑌿𑌵𑌕𑍍𑌷𑍇𑌤𑍍𑌰𑍇𑌽𑌪𑌿 𑌚𑌤𑍍𑌵𑌰𑍇 ।
𑌪𑌰𑍍𑌣𑌂 𑌪𑌤𑌤𑌿 𑌚𑍇𑌤𑍍𑌤𑍇𑌨 𑌤𑌰𑍋𑌃 𑌕𑌿𑌂 𑌨𑍁 𑌶𑍁𑌭𑌾𑌶𑍁𑌭𑌮𑍍 ॥ 559॥
𑌪𑌤𑍍𑌰𑌸𑍍𑌯 𑌪𑍁𑌷𑍍𑌪𑌸𑍍𑌯 𑌫𑌲𑌸𑍍𑌯 𑌨𑌾𑌶𑌵𑌦𑍍-
𑌦𑍇𑌹𑍇𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌧𑌿𑌯𑌾𑌂 𑌵𑌿𑌨𑌾𑌶𑌃 ।
𑌨𑍈𑌵𑌾𑌤𑍍𑌮𑌨𑌃 𑌸𑍍𑌵𑌸𑍍𑌯 𑌸𑌦𑌾𑌤𑍍𑌮𑌕𑌸𑍍𑌯𑌾-
𑌨𑌨𑍍𑌦𑌾𑌕𑍃𑌤𑍇𑌰𑍍𑌵𑍃𑌕𑍍𑌷𑌵𑌦𑌸𑍍𑌤𑌿 𑌚𑍈𑌷𑌃 ॥ 560॥ (𑌪𑌾𑌠𑌭𑍇𑌦𑌃 - 𑌵𑌦𑌾𑌸𑍍𑌤 𑌏𑌷𑌃)
𑌪𑍍𑌰𑌜𑍍𑌞𑌾𑌨𑌘𑌨 𑌇𑌤𑍍𑌯𑌾𑌤𑍍𑌮𑌲𑌕𑍍𑌷𑌣𑌂 𑌸𑌤𑍍𑌯𑌸𑍂𑌚𑌕𑌮𑍍 ।
𑌅𑌨𑍂𑌦𑍍𑌯𑍗𑌪𑌾𑌧𑌿𑌕𑌸𑍍𑌯𑍈𑌵 𑌕𑌥𑌯𑌨𑍍𑌤𑌿 𑌵𑌿𑌨𑌾𑌶𑌨𑌮𑍍 ॥ 561॥
𑌅𑌵𑌿𑌨𑌾𑌶𑍀 𑌵𑌾 𑌅𑌰𑍇𑌽𑌯𑌮𑌾𑌤𑍍𑌮𑍇𑌤𑌿 𑌶𑍍𑌰𑍁𑌤𑌿𑌰𑌾𑌤𑍍𑌮𑌨𑌃 ।
𑌪𑍍𑌰𑌬𑍍𑌰𑌵𑍀𑌤𑍍𑌯𑌵𑌿𑌨𑌾𑌶𑌿𑌤𑍍𑌵𑌂 𑌵𑌿𑌨𑌶𑍍𑌯𑌤𑍍𑌸𑍁 𑌵𑌿𑌕𑌾𑌰𑌿𑌷𑍁 ॥ 562॥
𑌪𑌾𑌷𑌾𑌣𑌵𑍃𑌕𑍍𑌷𑌤𑍃𑌣𑌧𑌾𑌨𑍍𑌯𑌕𑌡𑌙𑍍𑌕𑌰𑌾𑌦𑍍𑌯𑌾 (𑌪𑌾𑌠𑌭𑍇𑌦𑌃 - 𑌕𑌟𑌾𑌮𑍍𑌬𑌰𑌾𑌦𑍍𑌯𑌾)
𑌦𑌗𑍍𑌧𑌾 𑌭𑌵𑌨𑍍𑌤𑌿 𑌹𑌿 𑌮𑍃𑌦𑍇𑌵 𑌯𑌥𑌾 𑌤𑌥𑍈𑌵 ।
𑌦𑍇𑌹𑍇𑌨𑍍𑌦𑍍𑌰𑌿𑌯𑌾𑌸𑍁𑌮𑌨 𑌆𑌦𑌿 𑌸𑌮𑌸𑍍𑌤𑌦𑍃𑌶𑍍𑌯𑌂
𑌜𑍍𑌞𑌾𑌨𑌾𑌗𑍍𑌨𑌿𑌦𑌗𑍍𑌧𑌮𑍁𑌪𑌯𑌾𑌤𑌿 𑌪𑌰𑌾𑌤𑍍𑌮𑌭𑌾𑌵𑌮𑍍 ॥ 563॥
𑌵𑌿𑌲𑌕𑍍𑌷𑌣𑌂 𑌯𑌥𑌾 𑌧𑍍𑌵𑌾𑌨𑍍𑌤𑌂 𑌲𑍀𑌯𑌤𑍇 𑌭𑌾𑌨𑍁𑌤𑍇𑌜𑌸𑌿 ।
𑌤𑌥𑍈𑌵 𑌸𑌕𑌲𑌂 𑌦𑍃𑌶𑍍𑌯𑌂 𑌬𑍍𑌰𑌹𑍍𑌮𑌣𑌿 𑌪𑍍𑌰𑌵𑌿𑌲𑍀𑌯𑌤𑍇 ॥ 564॥
𑌘𑌟𑍇 𑌨𑌷𑍍𑌟𑍇 𑌯𑌥𑌾 𑌵𑍍𑌯𑍋𑌮 𑌵𑍍𑌯𑍋𑌮𑍈𑌵 𑌭𑌵𑌤𑌿 𑌸𑍍𑌫𑍁𑌟𑌮𑍍 ।
𑌤𑌥𑍈𑌵𑍋𑌪𑌾𑌧𑌿𑌵𑌿𑌲𑌯𑍇 𑌬𑍍𑌰𑌹𑍍𑌮𑍈𑌵 𑌬𑍍𑌰𑌹𑍍𑌮𑌵𑌿𑌤𑍍𑌸𑍍𑌵𑌯𑌮𑍍 ॥ 565॥
𑌕𑍍𑌷𑍀𑌰𑌂 𑌕𑍍𑌷𑍀𑌰𑍇 𑌯𑌥𑌾 𑌕𑍍𑌷𑌿𑌪𑍍𑌤𑌂 𑌤𑍈𑌲𑌂 𑌤𑍈𑌲𑍇 𑌜𑌲𑌂 𑌜𑌲𑍇 ।
𑌸𑌂𑌯𑍁𑌕𑍍𑌤𑌮𑍇𑌕𑌤𑌾𑌂 𑌯𑌾𑌤𑌿 𑌤𑌥𑌾𑌽𑌽𑌤𑍍𑌮𑌨𑍍𑌯𑌾𑌤𑍍𑌮𑌵𑌿𑌨𑍍𑌮𑍁𑌨𑌿𑌃 ॥ 566॥
𑌏𑌵𑌂 𑌵𑌿𑌦𑍇𑌹𑌕𑍈𑌵𑌲𑍍𑌯𑌂 𑌸𑌨𑍍𑌮𑌾𑌤𑍍𑌰𑌤𑍍𑌵𑌮𑌖𑌣𑍍𑌡𑌿𑌤𑌮𑍍 ।
𑌬𑍍𑌰𑌹𑍍𑌮𑌭𑌾𑌵𑌂 𑌪𑍍𑌰𑌪𑌦𑍍𑌯𑍈𑌷 𑌯𑌤𑌿𑌰𑍍𑌨𑌾𑌵𑌰𑍍𑌤𑌤𑍇 𑌪𑍁𑌨𑌃 ॥ 567॥
𑌸𑌦𑌾𑌤𑍍𑌮𑍈𑌕𑌤𑍍𑌵𑌵𑌿𑌜𑍍𑌞𑌾𑌨𑌦𑌗𑍍𑌧𑌾𑌵𑌿𑌦𑍍𑌯𑌾𑌦𑌿𑌵𑌰𑍍𑌷𑍍𑌮𑌣𑌃 ।
𑌅𑌮𑍁𑌷𑍍𑌯 𑌬𑍍𑌰𑌹𑍍𑌮𑌭𑍂𑌤𑌤𑍍𑌵𑌾𑌦𑍍 𑌬𑍍𑌰𑌹𑍍𑌮𑌣𑌃 𑌕𑍁𑌤 𑌉𑌦𑍍𑌭𑌵𑌃 ॥ 568॥
𑌮𑌾𑌯𑌾𑌕𑍍𑌲𑍃𑌪𑍍𑌤𑍗 𑌬𑌨𑍍𑌧𑌮𑍋𑌕𑍍𑌷𑍗 𑌨 𑌸𑍍𑌤𑌃 𑌸𑍍𑌵𑌾𑌤𑍍𑌮𑌨𑌿 𑌵𑌸𑍍𑌤𑍁𑌤𑌃 ।
𑌯𑌥𑌾 𑌰𑌜𑍍𑌜𑍗 𑌨𑌿𑌷𑍍𑌕𑍍𑌰𑌿𑌯𑌾𑌯𑌾𑌂 𑌸𑌰𑍍𑌪𑌾𑌭𑌾𑌸𑌵𑌿𑌨𑌿𑌰𑍍𑌗𑌮𑍗 ॥ 569॥
𑌆𑌵𑍃𑌤𑍇𑌃 𑌸𑌦𑌸𑌤𑍍𑌤𑍍𑌵𑌾𑌭𑍍𑌯𑌾𑌂 𑌵𑌕𑍍𑌤𑌵𑍍𑌯𑍇 𑌬𑌨𑍍𑌧𑌮𑍋𑌕𑍍𑌷𑌣𑍇 ।
𑌨𑌾𑌵𑍃𑌤𑌿𑌰𑍍𑌬𑍍𑌰𑌹𑍍𑌮𑌣𑌃 𑌕𑌾𑌚𑌿𑌦𑌨𑍍𑌯𑌾𑌭𑌾𑌵𑌾𑌦𑌨𑌾𑌵𑍃𑌤𑌮𑍍 ।
𑌯𑌦𑍍𑌯𑌸𑍍𑌤𑍍𑌯𑌦𑍍𑌵𑍈𑌤𑌹𑌾𑌨𑌿𑌃 𑌸𑍍𑌯𑌾𑌦𑍍 𑌦𑍍𑌵𑍈𑌤𑌂 𑌨𑍋 𑌸𑌹𑌤𑍇 𑌶𑍍𑌰𑍁𑌤𑌿𑌃 ॥ 570॥
𑌬𑌨𑍍𑌧𑌞𑍍𑌚 𑌮𑍋𑌕𑍍𑌷𑌞𑍍𑌚 𑌮𑍃𑌷𑍈𑌵 𑌮𑍂𑌢𑌾
𑌬𑍁𑌦𑍍𑌧𑍇𑌰𑍍𑌗𑍁𑌣𑌂 𑌵𑌸𑍍𑌤𑍁𑌨𑌿 𑌕𑌲𑍍𑌪𑌯𑌨𑍍𑌤𑌿 ।
𑌦𑍃𑌗𑌾𑌵𑍃𑌤𑌿𑌂 𑌮𑍇𑌘𑌕𑍃𑌤𑌾𑌂 𑌯𑌥𑌾 𑌰𑌵𑍗
𑌯𑌤𑍋𑌽𑌦𑍍𑌵𑌯𑌾𑌽𑌸𑌙𑍍𑌗𑌚𑌿𑌦𑍇𑌤𑌦𑌕𑍍𑌷𑌰𑌮𑍍 ॥ 571॥ (𑌪𑌾𑌠𑌭𑍇𑌦𑌃 - 𑌚𑌿𑌦𑍇𑌕𑌮𑌕𑍍𑌷𑌰𑌮𑍍)
𑌅𑌸𑍍𑌤𑍀𑌤𑌿 𑌪𑍍𑌰𑌤𑍍𑌯𑌯𑍋 𑌯𑌶𑍍𑌚 𑌯𑌶𑍍𑌚 𑌨𑌾𑌸𑍍𑌤𑍀𑌤𑌿 𑌵𑌸𑍍𑌤𑍁𑌨𑌿 ।
𑌬𑍁𑌦𑍍𑌧𑍇𑌰𑍇𑌵 𑌗𑍁𑌣𑌾𑌵𑍇𑌤𑍗 𑌨 𑌤𑍁 𑌨𑌿𑌤𑍍𑌯𑌸𑍍𑌯 𑌵𑌸𑍍𑌤𑍁𑌨𑌃 ॥ 572॥
𑌅𑌤𑌸𑍍𑌤𑍗 𑌮𑌾𑌯𑌯𑌾 𑌕𑍍𑌲𑍃𑌪𑍍𑌤𑍗 𑌬𑌨𑍍𑌧𑌮𑍋𑌕𑍍𑌷𑍗 𑌨 𑌚𑌾𑌤𑍍𑌮𑌨𑌿 ।
𑌨𑌿𑌷𑍍𑌕𑌲𑍇 𑌨𑌿𑌷𑍍𑌕𑍍𑌰𑌿𑌯𑍇 𑌶𑌾𑌨𑍍𑌤𑍇 𑌨𑌿𑌰𑌵𑌦𑍍𑌯𑍇 𑌨𑌿𑌰𑌞𑍍𑌜𑌨𑍇 ।
𑌅𑌦𑍍𑌵𑌿𑌤𑍀𑌯𑍇 𑌪𑌰𑍇 𑌤𑌤𑍍𑌤𑍍𑌵𑍇 𑌵𑍍𑌯𑍋𑌮𑌵𑌤𑍍𑌕𑌲𑍍𑌪𑌨𑌾 𑌕𑍁𑌤𑌃 ॥ 573॥
𑌨 𑌨𑌿𑌰𑍋𑌧𑍋 𑌨 𑌚𑍋𑌤𑍍𑌪𑌤𑍍𑌤𑌿𑌰𑍍𑌨 𑌬𑌦𑍍𑌧𑍋 𑌨 𑌚 𑌸𑌾𑌧𑌕𑌃 ।
𑌨 𑌮𑍁𑌮𑍁𑌕𑍍𑌷𑍁𑌰𑍍𑌨 𑌵𑍈 𑌮𑍁𑌕𑍍𑌤 𑌇𑌤𑍍𑌯𑍇𑌷𑌾 𑌪𑌰𑌮𑌾𑌰𑍍𑌥𑌤𑌾 ॥ 574॥
𑌸𑌕𑌲𑌨𑌿𑌗𑌮𑌚𑍂𑌡𑌾𑌸𑍍𑌵𑌾𑌨𑍍𑌤𑌸𑌿𑌦𑍍𑌧𑌾𑌨𑍍𑌤𑌰𑍂𑌪𑌂
𑌪𑌰𑌮𑌿𑌦𑌮𑌤𑌿𑌗𑍁𑌹𑍍𑌯𑌂 𑌦𑌰𑍍𑌶𑌿𑌤𑌂 𑌤𑍇 𑌮𑌯𑌾𑌦𑍍𑌯 ।
𑌅𑌪𑌗𑌤𑌕𑌲𑌿𑌦𑍋𑌷𑌂 𑌕𑌾𑌮𑌨𑌿𑌰𑍍𑌮𑍁𑌕𑍍𑌤𑌬𑍁𑌦𑍍𑌧𑌿𑌂 (𑌪𑌾𑌠𑌭𑍇𑌦𑌃 - 𑌬𑍁𑌦𑍍𑌧𑌿𑌃)
𑌸𑍍𑌵𑌸𑍁𑌤𑌵𑌦𑌸𑌕𑍃𑌤𑍍𑌤𑍍𑌵𑌾𑌂 𑌭𑌾𑌵𑌯𑌿𑌤𑍍𑌵𑌾 𑌮𑍁𑌮𑍁𑌕𑍍𑌷𑍁𑌮𑍍 ॥ 575॥
𑌇𑌤𑌿 𑌶𑍍𑌰𑍁𑌤𑍍𑌵𑌾 𑌗𑍁𑌰𑍋𑌰𑍍𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌯𑍇𑌣 𑌕𑍃𑌤𑌾𑌨𑌤𑌿𑌃 ।
𑌸 𑌤𑍇𑌨 𑌸𑌮𑌨𑍁𑌜𑍍𑌞𑌾𑌤𑍋 𑌯𑌯𑍗 𑌨𑌿𑌰𑍍𑌮𑍁𑌕𑍍𑌤𑌬𑌨𑍍𑌧𑌨𑌃 ॥ 576॥
𑌗𑍁𑌰𑍁𑌰𑍇𑌵 𑌸𑌦𑌾𑌨𑌨𑍍𑌦𑌸𑌿𑌨𑍍𑌧𑍗 𑌨𑌿𑌰𑍍𑌮𑌗𑍍𑌨𑌮𑌾𑌨𑌸𑌃 । (𑌪𑌾𑌠𑌭𑍇𑌦𑌃 - 𑌗𑍁𑌰𑍁𑌰𑍇𑌷)
𑌪𑌾𑌵𑌯𑌨𑍍𑌵𑌸𑍁𑌧𑌾𑌂 𑌸𑌰𑍍𑌵𑌾𑌂 𑌵𑌿𑌚𑌚𑌾𑌰 𑌨𑌿𑌰𑌨𑍍𑌤𑌰𑌃 ॥ 577॥
𑌇𑌤𑍍𑌯𑌾𑌚𑌾𑌰𑍍𑌯𑌸𑍍𑌯 𑌶𑌿𑌷𑍍𑌯𑌸𑍍𑌯 𑌸𑌂𑌵𑌾𑌦𑍇𑌨𑌾𑌤𑍍𑌮𑌲𑌕𑍍𑌷𑌣𑌮𑍍 ।
𑌨𑌿𑌰𑍂𑌪𑌿𑌤𑌂 𑌮𑍁𑌮𑍁𑌕𑍍𑌷𑍂𑌣𑌾𑌂 𑌸𑍁𑌖𑌬𑍋𑌧𑍋𑌪𑌪𑌤𑍍𑌤𑌯𑍇 ॥ 578॥
𑌹𑌿𑌤𑌮𑌿𑌦𑌮𑍁𑌪𑌦𑍇𑌶𑌮𑌾𑌦𑍍𑌰𑌿𑌯𑌨𑍍𑌤𑌾𑌂
𑌵𑌿𑌹𑌿𑌤𑌨𑌿𑌰𑌸𑍍𑌤𑌸𑌮𑌸𑍍𑌤𑌚𑌿𑌤𑍍𑌤𑌦𑍋𑌷𑌾𑌃 ।
𑌭𑌵𑌸𑍁𑌖𑌵𑌿𑌰𑌤𑌾𑌃 𑌪𑍍𑌰𑌶𑌾𑌨𑍍𑌤𑌚𑌿𑌤𑍍𑌤𑌾𑌃 (𑌪𑌾𑌠𑌭𑍇𑌦𑌃 - 𑌸𑍁𑌖𑌵𑌿𑌮𑍁𑌖𑌾𑌃)
𑌶𑍍𑌰𑍁𑌤𑌿𑌰𑌸𑌿𑌕𑌾 𑌯𑌤𑌯𑍋 𑌮𑍁𑌮𑍁𑌕𑍍𑌷𑌵𑍋 𑌯𑍇 ॥ 579॥
𑌸𑌂𑌸𑌾𑌰𑌾𑌧𑍍𑌵𑌨𑌿 𑌤𑌾𑌪𑌭𑌾𑌨𑍁𑌕𑌿𑌰𑌣𑌪𑍍𑌰𑍋𑌦𑍍𑌭𑍂𑌤𑌦𑌾𑌹𑌵𑍍𑌯𑌥𑌾-
𑌖𑌿𑌨𑍍𑌨𑌾𑌨𑌾𑌂 𑌜𑌲𑌕𑌾𑌙𑍍𑌕𑍍𑌷𑌯𑌾 𑌮𑌰𑍁𑌭𑍁𑌵𑌿 𑌭𑍍𑌰𑌾𑌨𑍍𑌤𑍍𑌯𑌾 𑌪𑌰𑌿𑌭𑍍𑌰𑌾𑌮𑍍𑌯𑌤𑌾𑌮𑍍 ।
𑌅𑌤𑍍𑌯𑌾𑌸𑌨𑍍𑌨𑌸𑍁𑌧𑌾𑌮𑍍𑌬𑍁𑌧𑌿𑌂 𑌸𑍁𑌖𑌕𑌰𑌂 𑌬𑍍𑌰𑌹𑍍𑌮𑌾𑌦𑍍𑌵𑌯𑌂 𑌦𑌰𑍍𑌶𑌯-
𑌤𑍍𑌯𑍇𑌷𑌾 𑌶𑌙𑍍𑌕𑌰𑌭𑌾𑌰𑌤𑍀 𑌵𑌿𑌜𑌯𑌤𑍇 𑌨𑌿𑌰𑍍𑌵𑌾𑌣𑌸𑌨𑍍𑌦𑌾𑌯𑌿𑌨𑍀 ॥ 580॥
॥ 𑌇𑌤𑌿 𑌶𑌙𑍍𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌂 𑌵𑌿𑌵𑍇𑌕𑌚𑍂𑌡𑌾𑌮𑌣𑌿𑌃 ॥
॥ 𑍐 𑌤𑌤𑍍𑌸𑌤𑍍 ॥
Roman (IAST) Transliteration
sarvavedāntasiddhāntagocaraṃ tamagocaram |
govindaṃ paramānandaṃ sadguruṃ praṇato'smyaham || 1||
jantūnāṃ narajanma durlabhamataḥ puṃstvaṃ tato vipratā
tasmādvaidikadharmamārgaparatā vidvattvamasmātparam |
ātmānātmavivecanaṃ svanubhavo brahmātmanā saṃsthitiḥ
muktirno śatajanmakoṭisukṛtaiḥ puṇyairvinā labhyate || 2|| (pāṭhabhedaḥ - śatakoṭijanmasu kṛtaiḥ)
durlabhaṃ trayamevaitaddevānugrahahetukam |
manuṣyatvaṃ mumukṣutvaṃ mahāpuruṣasaṃśrayaḥ || 3||
labdhvā kathañcinnarajanma durlabhaṃ (pāṭhabhedaḥ - kathañcin)
tatrāpi puṃstvaṃ śrutipāradarśanam |
yastvātmamuktau na yateta mūḍhadhīḥ
sa hyātmahā svaṃ vinihantyasadgrahāt || 4|| (pāṭhabhedaḥ - ātmahā svaṃ)
itaḥ ko nvasti mūḍhātmā yastu svārthe pramādyati |
durlabhaṃ mānuṣaṃ dehaṃ prāpya tatrāpi pauruṣam || 5||
vadantu śāstrāṇi yajantu devān (pāṭhabhedaḥ - paṭhantu)
kurvantu karmāṇi bhajantu devatāḥ |
ātmaikyabodhena vināpi mukti- (pāṭhabhedaḥ - vinā vimuktiḥ na)
rna sidhyati brahmaśatāntare'pi || 6||
amṛtattvasya nāśāsti vittenetyeva hi śrutiḥ |
bravīti karmaṇo mukterahetutvaṃ sphuṭaṃ yataḥ || 7||
ato vimuktyai prayateta vidvān
sannyastabāhyārthasukhaspṛhaḥ san |
santaṃ mahāntaṃ samupetya deśikaṃ
tenopadiṣṭārthasamāhitātmā || 8||
uddharedātmanā''tmānaṃ magnaṃ saṃsāravāridhau |
yogārūḍhatvamāsādya samyagdarśananiṣṭhayā || 9||
sannyasya sarvakarmāṇi bhavabandhavimuktaye |
yatyatāṃ paṇḍitairdhīrairātmābhyāsa upasthitaiḥ || 10||
cittasya śuddhaye karma na tu vastūpalabdhaye |
vastusiddhirvicāreṇa na kiñcitkarmakoṭibhiḥ || 11||
samyagvicārataḥ siddhā rajjutattvāvadhāraṇā |
bhrāntoditamahāsarpabhayaduḥkhavināśinī || 12|| (pāṭhabhedaḥ - bhrāntyo)
arthasya niścayo dṛṣṭo vicāreṇa hitoktitaḥ |
na snānena na dānena prāṇāyāmaśatena vā || 13||
adhikāriṇamāśāste phalasiddhirviśeṣataḥ |
upāyā deśakālādyāḥ santyasminsahakāriṇaḥ || 14|| (pāṭhabhedaḥ - santyasyāṃ)
ato vicāraḥ kartavyo jijñāsorātmavastunaḥ ||
samāsādya dayāsindhuṃ guruṃ brahmaviduttamam || 15||
medhāvī puruṣo vidvānūhāpohavicakṣaṇaḥ |
adhikāryātmavidyāyāmuktalakṣaṇalakṣitaḥ || 16||
vivekino viraktasya śamādiguṇaśālinaḥ |
mumukṣoreva hi brahmajijñāsāyogyatā matā || 17||
sādhanānyatra catvāri kathitāni manīṣibhiḥ |
yeṣu satsveva sanniṣṭhā yadabhāve na sidhyati || 18||
ādau nityānityavastuvivekaḥ parigaṇyate |
ihāmutraphalabhogavirāgastadanantaram |
śamādiṣaṭkasampattirmumukṣutvamiti sphuṭam || 19||
brahma satyaṃ jaganmithyetyevaṃrūpo viniścayaḥ |
so'yaṃ nityānityavastuvivekaḥ samudāhṛtaḥ || 20||
tadvairāgyaṃ jihāsā yā darśanaśravaṇādibhiḥ | (pāṭhabhedaḥ - jugupsā yā)
dehādibrahmaparyante hyanitye bhogavastuni || 21|| (pāṭhabhedaḥ - bhogyavastuni)
virajya viṣayavrātāddoṣadṛṣṭyā muhurmuhuḥ |
svalakṣye niyatāvasthā manasaḥ śama ucyate || 22||
viṣayebhyaḥ parāvartya sthāpanaṃ svasvagolake |
ubhayeṣāmindriyāṇāṃ sa damaḥ parikīrtitaḥ |
bāhyānālambanaṃ vṛttereṣoparatiruttamā || 23||
sahanaṃ sarvaduḥkhānāmapratīkārapūrvakam |
cintāvilāparahitaṃ sā titikṣā nigadyate || 24||
śāstrasya guruvākyasya satyabuddhyavadhāraṇam | (pāṭhabhedaḥ - satyabuddhyāvadhāraṇā)
sā śraddhā kathitā sadbhiryayā vastūpalabhyate || 25||
sarvadā sthāpanaṃ buddheḥ śuddhe brahmaṇi sarvadā | (pāṭhabhedaḥ - samyagāsthāpanaṃ)
tatsamādhānamityuktaṃ na tu cittasya lālanam || 26||
ahaṅkārādidehāntān bandhānajñānakalpitān |
svasvarūpāvabodhena moktumicchā mumukṣutā || 27||
mandamadhyamarūpāpi vairāgyeṇa śamādinā |
prasādena guroḥ seyaṃ pravṛddhā sūyate phalam || 28||
vairāgyaṃ ca mumukṣutvaṃ tīvraṃ yasya tu vidyate |
tasminnevārthavantaḥ syuḥ phalavantaḥ śamādayaḥ || 29||
etayormandatā yatra viraktatvamumukṣayoḥ |
marau salilavattatra śamāderbhānamātratā || 30||
mokṣakāraṇasāmagryāṃ bhaktireva garīyasī |
svasvarūpānusandhānaṃ bhaktirityabhidhīyate || 31||
svātmatattvānusandhānaṃ bhaktirityapare jaguḥ |
uktasādhanasampannastattvajijñāsurātmanaḥ |
upasīdedguruṃ prājñaṃ yasmādbandhavimokṣaṇam || 32||
śrotriyo'vṛjino'kāmahato yo brahmavittamaḥ |
brahmaṇyuparataḥ śānto nirindhana ivānalaḥ |
ahetukadayāsindhurbandhurānamatāṃ satām || 33||
tamārādhya guruṃ bhaktyā prahvapraśrayasevanaiḥ | (pāṭhabhedaḥ - prahvaḥ)
prasannaṃ tamanuprāpya pṛcchejjñātavyamātmanaḥ || 34||
svāminnamaste natalokabandho
kāruṇyasindho patitaṃ bhavābdhau |
māmuddharātmīyakaṭākṣadṛṣṭyā
ṛjvyātikāruṇyasudhābhivṛṣṭyā || 35||
durvārasaṃsāradavāgnitaptaṃ
dodhūyamānaṃ duradṛṣṭavātaiḥ |
bhītaṃ prapannaṃ paripāhi mṛtyoḥ
śaraṇyamanyadyadahaṃ na jāne || 36|| (pāṭhabhedaḥ - anyaṃ)
śāntā mahānto nivasanti santo
vasantavallokahitaṃ carantaḥ |
tīrṇāḥ svayaṃ bhīmabhavārṇavaṃ janā-
nahetunānyānapi tārayantaḥ || 37||
ayaṃ svabhāvaḥ svata eva yatpara-
śramāpanodapravaṇaṃ mahātmanām |
sudhāṃśureṣa svayamarkakarkaśa-
prabhābhitaptāmavati kṣitiṃ kila || 38||
brahmānandarasānubhūtikalitaiḥ pūtaiḥ suśītairyutai- (pāṭhabhedaḥ - suśītaiḥ sitaiḥ)
ryuṣmadvākkalaśojjhitaiḥ śrutisukhairvākyāmṛtaiḥ secaya |
santaptaṃ bhavatāpadāvadahanajvālābhirenaṃ prabho
dhanyāste bhavadīkṣaṇakṣaṇagateḥ pātrīkṛtāḥ svīkṛtāḥ || 39||
kathaṃ tareyaṃ bhavasindhumetaṃ
kā vā gatirme katamo'styupāyaḥ |
jāne na kiñcitkṛpayā'va māṃ prabho
saṃsāraduḥkhakṣatimātanuṣva || 40||
tathā vadantaṃ śaraṇāgataṃ svaṃ
saṃsāradāvānalatāpataptam |
nirīkṣya kāruṇyarasārdradṛṣṭyā
dadyādabhītiṃ sahasā mahātmā || 41||
vidvān sa tasmā upasattimīyuṣe
mumukṣave sādhu yathoktakāriṇe |
praśāntacittāya śamānvitāya
tattvopadeśaṃ kṛpayaiva kuryāt || 42||
mā bhaiṣṭa vidvaṃstava nāstyapāyaḥ
saṃsārasindhostaraṇe'styupāyaḥ |
yenaiva yātā yatayo'sya pāraṃ
tameva mārgaṃ tava nirdiśāmi || 43||
astyupāyo mahānkaścitsaṃsārabhayanāśanaḥ |
tena tīrtvā bhavāmbhodhiṃ paramānandamāpsyasi || 44||
vedāntārthavicāreṇa jāyate jñānamuttamam |
tenātyantikasaṃsāraduḥkhanāśo bhavatyanu || 45||
śraddhābhaktidhyānayogānmumukṣoḥ
mukterhetūnvakti sākṣācchrutergīḥ |
yo vā eteṣveva tiṣṭhatyamuṣya
mokṣo'vidyākalpitāddehabandhāt || 46||
ajñānayogātparamātmanastava
hyanātmabandhastata eva saṃsṛtiḥ |
tayorvivekoditabodhavahniḥ
ajñānakāryaṃ pradahetsamūlam || 47||
śiṣya uvāca |
kṛpayā śrūyatāṃ svāminpraśno'yaṃ kriyate mayā |
yaduttaramahaṃ śrutvā kṛtārthaḥ syāṃ bhavanmukhāt || 48||
ko nāma bandhaḥ kathameṣa āgataḥ
kathaṃ pratiṣṭhāsya kathaṃ vimokṣaḥ |
ko'sāvanātmā paramaḥ ka ātmā
tayorvivekaḥ kathametaducyatām || 49||
śrīguruvāca |
dhanyo'si kṛtakṛtyo'si pāvitaṃ te kulaṃ tvayā | (pāṭhabhedaḥ - pāvitaṃ)
yadavidyābandhamuktyā brahmībhavitumicchasi || 50||
ṛṇamocanakartāraḥ pituḥ santi sutādayaḥ |
bandhamocanakartā tu svasmādanyo na kaścana || 51||
mastakanyastabhārāderduḥkhamanyairnivāryate |
kṣudhādikṛtaduḥkhaṃ tu vinā svena na kenacit || 52||
pathyamauṣadhasevā ca kriyate yena rogiṇā |
ārogyasiddhirdṛṣṭā'sya nānyānuṣṭhitakarmaṇā || 53||
vastusvarūpaṃ sphuṭabodhacakṣuṣā
svenaiva vedyaṃ na tu paṇḍitena |
candrasvarūpaṃ nijacakṣuṣaiva
jñātavyamanyairavagamyate kim || 54||
avidyākāmakarmādipāśabandhaṃ vimocitum |
kaḥ śaknuyādvinā''tmānaṃ kalpakoṭiśatairapi || 55||
na yogena na sāṅkhyena karmaṇā no na vidyayā |
brahmātmaikatvabodhena mokṣaḥ sidhyati nānyathā || 56||
vīṇāyā rūpasaundaryaṃ tantrīvādanasauṣṭhavam |
prajārañjanamātraṃ tanna sāmrājyāya kalpate || 57||
vāgvaikharī śabdajharī śāstravyākhyānakauśalam |
vaiduṣyaṃ viduṣāṃ tadvadbhuktaye na tu muktaye || 58||
avijñāte pare tattve śāstrādhītistu niṣphalā |
vijñāte'pi pare tattve śāstrādhītistu niṣphalā || 59||
śabdajālaṃ mahāraṇyaṃ cittabhramaṇakāraṇam |
ataḥ prayatnājjñātavyaṃ tattvajñaistattvamātmanaḥ || 60|| tattvajñāttattva
ajñānasarpadaṣṭasya brahmajñānauṣadhaṃ vinā |
kimu vedaiśca śāstraiśca kimu mantraiḥ kimauṣadhaiḥ || 61||
na gacchati vinā pānaṃ vyādhirauṣadhaśabdataḥ |
vinā'parokṣānubhavaṃ brahmaśabdairna mucyate || 62||
akṛtvā dṛśyavilayamajñātvā tattvamātmanaḥ |
brahmaśabdaiḥ kuto muktiruktimātraphalairnṛṇām || 63|| (pāṭhabhedaḥ - bāhyaśabdaiḥ)
akṛtvā śatrusaṃhāramagatvākhilabhūśriyam |
rājāhamiti śabdānno rājā bhavitumarhati || 64||
āptoktiṃ khananaṃ tathopariśilādyutkarṣaṇaṃ svīkṛtiṃ (pāṭhabhedaḥ - pariśilāpākarṣaṇaṃ)
nikṣepaḥ samapekṣate na hi bahiḥśabdaistu nirgacchati |
tadvadbrahmavidopadeśamananadhyānādibhirlabhyate
māyākāryatirohitaṃ svamamalaṃ tattvaṃ na duryuktibhiḥ || 65||
tasmātsarvaprayatnena bhavabandhavimuktaye |
svaireva yatnaḥ kartavyo rogādāviva paṇḍitaiḥ || 66|| (pāṭhabhedaḥ - rogāderiva)
yastvayādya kṛtaḥ praśno varīyāñchāstravinmataḥ | (pāṭhabhedaḥ - sammataḥ)
sūtraprāyo nigūḍhārtho jñātavyaśca mumukṣubhiḥ || 67||
śaṛṇuṣvāvahito vidvanyanmayā samudīryate |
tadetacchravaṇātsadyo bhavabandhādvimokṣyase || 68||
mokṣasya hetuḥ prathamo nigadyate
vairāgyamatyantamanityavastuṣu |
tataḥ śamaścāpi damastitikṣā
nyāsaḥ prasaktākhilakarmaṇāṃ bhṛśam || 69||
tataḥ śrutistanmananaṃ satattva-
dhyānaṃ ciraṃ nityanirantaraṃ muneḥ |
tato'vikalpaṃ parametya vidvān
ihaiva nirvāṇasukhaṃ samṛcchati || 70||
yadboddhavyaṃ tavedānīmātmānātmavivecanam |
taducyate mayā samyak śrutvātmanyavadhāraya || 71||
majjāsthimedaḥpalaraktacarma-
tvagāhvayairdhātubhirebhiranvitam |
pādoruvakṣobhujapṛṣṭhamastakaiḥ
aṅgairupāṅgairupayuktametat || 72||
ahammameti prathitaṃ śarīraṃ
mohāspadaṃ sthūlamitīryate budhaiḥ |
nabhonabhasvaddahanāmbubhūmayaḥ
sūkṣmāṇi bhūtāni bhavanti tāni || 73||
parasparāṃśairmilitāni bhūtvā
sthūlāni ca sthūlaśarīrahetavaḥ |
mātrāstadīyā viṣayā bhavanti
śabdādayaḥ pañca sukhāya bhoktuḥ || 74||
ya eṣu mūḍhā viṣayeṣu baddhā
rāgorupāśena sudurdamena |
āyānti niryāntyadha ūrdhvamuccaiḥ
svakarmadūtena javena nītāḥ || 75||
śabdādibhiḥ pañcabhireva pañca
pañcatvamāpuḥ svaguṇena baddhāḥ |
kuraṅgamātaṅgapataṅgamīna-
bhṛṅgā naraḥ pañcabhirañcitaḥ kim || 76||
doṣeṇa tīvro viṣayaḥ kṛṣṇasarpaviṣādapi |
viṣaṃ nihanti bhoktāraṃ draṣṭāraṃ cakṣuṣāpyayam || 77||
viṣayāśāmahāpāśādyo vimuktaḥ sudustyajāt |
sa eva kalpate muktyai nānyaḥ ṣaṭśāstravedyapi || 78||
āpātavairāgyavato mumukṣūn
bhavābdhipāraṃ pratiyātumudyatān |
āśāgraho majjayate'ntarāle
nigṛhya kaṇṭhe vinivartya vegāt || 79||
viṣayākhyagraho yena suviraktyasinā hataḥ |
sa gacchati bhavāmbhodheḥ pāraṃ pratyūhavarjitaḥ || 80||
viṣamaviṣayamārgairgacchato'nacchabuddheḥ (pāṭhabhedaḥ - viṣayamārge gacchato)
pratipadamabhiyāto mṛtyurapyeṣa viddhi | (pāṭhabhedaḥ - pratipadamabhighāto mṛtyurapyeṣa siddhaḥ)
hitasujanagurūktyā gacchataḥ svasya yuktyā
prabhavati phalasiddhiḥ satyamityeva viddhi || 81||
mokṣasya kāṅkṣā yadi vai tavāsti
tyajātidūrādviṣayānviṣaṃ yathā |
pīyūṣavattoṣadayākṣamārjava-
praśāntidāntīrbhaja nityamādarāt || 82||
anukṣaṇaṃ yatparihṛtya kṛtyaṃ
anādyavidyākṛtabandhamokṣaṇam |
dehaḥ parārtho'yamamuṣya poṣaṇe
yaḥ sajjate sa svamanena hanti || 83||
śarīrapoṣaṇārthī san ya ātmānaṃ didṛkṣati | (pāṭhabhedaḥ - didṛkṣate)
grāhaṃ dārudhiyā dhṛtvā nadīṃ tartuṃ sa gacchati || 84|| (pāṭhabhedaḥ - sa icchati)
moha eva mahāmṛtyurmumukṣorvapurādiṣu |
moho vinirjito yena sa muktipadamarhati || 85||
mohaṃ jahi mahāmṛtyuṃ dehadārasutādiṣu |
yaṃ jitvā munayo yānti tadviṣṇoḥ paramaṃ padam || 86||
tvaṅmāṃsarudhirasnāyumedomajjāsthisaṅkulam |
pūrṇaṃ mūtrapurīṣābhyāṃ sthūlaṃ nindyamidaṃ vapuḥ || 87||
pañcīkṛtebhyo bhūtebhyaḥ sthūlebhyaḥ pūrvakarmaṇā |
samutpannamidaṃ sthūlaṃ bhogāyatanamātmanaḥ |
avasthā jāgarastasya sthūlārthānubhavo yataḥ || 88||
bāhyendriyaiḥ sthūlapadārthasevāṃ
srakcandanastryādivicitrarūpām |
karoti jīvaḥ svayametadātmanā
tasmātpraśastirvapuṣo'sya jāgare || 89||
sarvo'pi bāhyasaṃsāraḥ puruṣasya yadāśrayaḥ |
viddhi dehamidaṃ sthūlaṃ gṛhavadgṛhamedhinaḥ || 90||
sthūlasya sambhavajarāmaraṇāni dharmāḥ
sthaulyādayo bahuvidhāḥ śiśutādyavasthāḥ |
varṇāśramādiniyamā bahudhā''mayāḥ syuḥ
pūjāvamānabahumānamukhā viśeṣāḥ || 91||
buddhīndriyāṇi śravaṇaṃ tvagakṣi
ghrāṇaṃ ca jihvā viṣayāvabodhanāt |
vākpāṇipādā gudamapyupasthaḥ (pāṭhabhedaḥ - upasthaṃ)
karmendriyāṇi pravaṇena karmasu || 92|| (pāṭhabhedaḥ - pravaṇāni)
nigadyate'ntaḥkaraṇaṃ manodhīḥ
ahaṅkṛtiścittamiti svavṛttibhiḥ |
manastu saṅkalpavikalpanādibhiḥ
buddhiḥ padārthādhyavasāyadharmataḥ || 93||
atrābhimānādahamityahaṅkṛtiḥ |
svārthānusandhānaguṇena cittam || 94||
prāṇāpānavyānodānasamānā bhavatyasau prāṇaḥ |
svayameva vṛttibhedādvikṛtibhedātsuvarṇasalilādivat || 95|| (pāṭhabhedaḥ - vikṛterbhedātsuvarṇasalilamiva)
vāgādi pañca śravaṇādi pañca
prāṇādi pañcābhramukhāni pañca |
buddhyādyavidyāpi ca kāmakarmaṇī
puryaṣṭakaṃ sūkṣmaśarīramāhuḥ || 96||
idaṃ śarīraṃ śaṛṇu sūkṣmasañjñitaṃ
liṅgaṃ tvapañcīkṛtabhūtasambhavam |
savāsanaṃ karmaphalānubhāvakaṃ
svājñānato'nādirupādhirātmanaḥ || 97||
svapno bhavatyasya vibhaktyavasthā
svamātraśeṣeṇa vibhāti yatra |
svapne tu buddhiḥ svayameva jāgrat
kālīnanānāvidhavāsanābhiḥ || 98||
kartrādibhāvaṃ pratipadya rājate
yatra svayaṃ bhāti hyayaṃ parātmā | (pāṭhabhedaḥ - svayañjyotirayaṃ)
dhīmātrakopādhiraśeṣasākṣī
na lipyate tatkṛtakarmaleśaiḥ | karmalepaiḥ
yasmādasaṅgastata eva karmabhiḥ
na lipyate kiñcidupādhinā kṛtaiḥ || 99||
sarvavyāpṛtikaraṇaṃ liṅgamidaṃ syāccidātmanaḥ puṃsaḥ |
vāsyādikamiva takṣṇastenaivātmā bhavatyasaṅgo'yam || 100||
andhatvamandatvapaṭutvadharmāḥ
sauguṇyavaiguṇyavaśāddhi cakṣuṣaḥ |
bādhiryamūkatvamukhāstathaiva
śrotrādidharmā na tu vetturātmanaḥ || 101||
ucchvāsaniḥśvāsavijṛmbhaṇakṣu-
tprasyandanādyutkramaṇādikāḥ kriyāḥ | (pāṭhabhedaḥ - praspandanādy)
prāṇādikarmāṇi vadanti tajñāḥ (pāṭhabhedaḥ - tajjñāḥ)
prāṇasya dharmāvaśanāpipāse || 102||
antaḥkaraṇameteṣu cakṣurādiṣu varṣmaṇi |
ahamityabhimānena tiṣṭhatyābhāsatejasā || 103||
ahaṅkāraḥ sa vijñeyaḥ kartā bhoktābhimānyayam |
sattvādiguṇayogena cāvasthātrayamaśnute || 104|| (pāṭhabhedaḥ - yogenāvasthātritayamśnute)
viṣayāṇāmānukūlye sukhī duḥkhī viparyaye |
sukhaṃ duḥkhaṃ ca taddharmaḥ sadānandasya nātmanaḥ || 105||
ātmārthatvena hi preyānviṣayo na svataḥ priyaḥ |
svata eva hi sarveṣāmātmā priyatamo yataḥ |
tata ātmā sadānando nāsya duḥkhaṃ kadācana || 106||
yatsuṣuptau nirviṣaya ātmānando'nubhūyate |
śrutiḥ pratyakṣamaitihyamanumānaṃ ca jāgrati || 107||
avyaktanāmnī parameśaśaktiḥ
anādyavidyā triguṇātmikā parā |
kāryānumeyā sudhiyaiva māyā
yayā jagatsarvamidaṃ prasūyate || 108||
sannāpyasannāpyubhayātmikā no
bhinnāpyabhinnāpyubhayātmikā no |
sāṅgāpyanaṅgā hyubhayātmikā no (pāṭhabhedaḥ - anaṅgāpyubhayātmikā)
mahādbhutā'nirvacanīyarūpā || 109||
śuddhādvayabrahmavibodhanāśyā
sarpabhramo rajjuvivekato yathā |
rajastamaḥsattvamiti prasiddhā
guṇāstadīyāḥ prathitaiḥ svakāryaiḥ || 110||
vikṣepaśaktī rajasaḥ kriyātmikā
yataḥ pravṛttiḥ prasṛtā purāṇī |
rāgādayo'syāḥ prabhavanti nityaṃ
duḥkhādayo ye manaso vikārāḥ || 111||
kāmaḥ krodho lobhadambhādyasūyā (pāṭhabhedaḥ - lobhadambhābhyasūyā)
ahaṅkārerṣyāmatsarādyāstu ghorāḥ |
dharmā ete rājasāḥ pumpravṛtti-
ryasmādeṣā tadrajo bandhahetuḥ || 112|| (pāṭhabhedaḥ - yasmādetattadrajo)
eṣā''vṛtirnāma tamoguṇasya
śaktirmayā vastvavabhāsate'nyathā | śaktiryayā
saiṣā nidānaṃ puruṣasya saṃsṛteḥ
vikṣepaśakteḥ pravaṇasya hetuḥ || 113|| (pāṭhabhedaḥ - prasarasya)
prajñāvānapi paṇḍito'pi caturo'pyatyantasūkṣmātmadṛg- (pāṭhabhedaḥ - sūkṣmārthadṛg)
vyālīḍhastamasā na vetti bahudhā sambodhito'pi sphuṭam |
bhrāntyāropitameva sādhu kalayatyālambate tadguṇān
hantāsau prabalā durantatamasaḥ śaktirmahatyāvṛtiḥ || 114||
abhāvanā vā viparītabhāvanā'- (pāṭhabhedaḥ - viparītabhāvanā)
sambhāvanā vipratipattirasyāḥ |
saṃsargayuktaṃ na vimuñcati dhruvaṃ
vikṣepaśaktiḥ kṣapayatyajasram || 115||
ajñānamālasyajaḍatvanidrā-
pramādamūḍhatvamukhāstamoguṇāḥ |
etaiḥ prayukto na hi vetti kiñcit
nidrāluvatstambhavadeva tiṣṭhati || 116||
sattvaṃ viśuddhaṃ jalavattathāpi
tābhyāṃ militvā saraṇāya kalpate |
yatrātmabimbaḥ pratibimbitaḥ san
prakāśayatyarka ivākhilaṃ jaḍam || 117||
miśrasya sattvasya bhavanti dharmāḥ
tvamānitādyā niyamā yamādyāḥ |
śraddhā ca bhaktiśca mumukṣutā ca
daivī ca sampattirasannivṛttiḥ || 118||
viśuddhasattvasya guṇāḥ prasādaḥ
svātmānubhūtiḥ paramā praśāntiḥ |
tṛptiḥ praharṣaḥ paramātmaniṣṭhā
yayā sadānandarasaṃ samṛcchati || 119||
avyaktametattriguṇairniruktaṃ
tatkāraṇaṃ nāma śarīramātmanaḥ |
suṣuptiretasya vibhaktyavasthā
pralīnasarvendriyabuddhivṛttiḥ || 120||
sarvaprakārapramitipraśāntiḥ
bījātmanāvasthitireva buddheḥ |
suṣuptiretasya kila pratītiḥ (pāṭhabhedaḥ - suṣuptiratrāsya)
kiñcinna vedmīti jagatprasiddheḥ || 121||
dehendriyaprāṇamano'hamādayaḥ
sarve vikārā viṣayāḥ sukhādayaḥ |
vyomādibhūtānyakhilaṃ ca viśvaṃ
avyaktaparyantamidaṃ hyanātmā || 122||
māyā māyākāryaṃ sarvaṃ mahadādidehaparyantam |
asadidamanātmatattvaṃ viddhi tvaṃ marumarīcikākalpam || 123||
atha te sampravakṣyāmi svarūpaṃ paramātmanaḥ |
yadvijñāya naro bandhānmuktaḥ kaivalyamaśnute || 124||
asti kaścitsvayaṃ nityamahampratyayalambanaḥ |
avasthātrayasākṣī sanpañcakośavilakṣaṇaḥ || 125||
yo vijānāti sakalaṃ jāgratsvapnasuṣuptiṣu |
buddhitadvṛttisadbhāvamabhāvamahamityayam || 126||
yaḥ paśyati svayaṃ sarvaṃ yaṃ na paśyati kaścana | (pāṭhabhedaḥ - kiñcana)
yaścetayati buddhyādi na tadyaṃ cetayatyayam || 127||
yena viśvamidaṃ vyāptaṃ yaṃ na vyāpnoti kiñcana |
ābhārūpamidaṃ sarvaṃ yaṃ bhāntamanubhātyayam || 128||
yasya sannidhimātreṇa dehendriyamanodhiyaḥ |
viṣayeṣu svakīyeṣu vartante preritā iva || 129||
ahaṅkārādidehāntā viṣayāśca sukhādayaḥ |
vedyante ghaṭavadyena nityabodhasvarūpiṇā || 130||
eṣo'ntarātmā puruṣaḥ purāṇo
nirantarākhaṇḍasukhānubhūtiḥ |
sadaikarūpaḥ pratibodhamātro
yeneṣitā vāgasavaścaranti || 131||
atraiva sattvātmani dhīguhāyāṃ
avyākṛtākāśa uśatprakāśaḥ | (pāṭhabhedaḥ - uruprakāśaḥ)
ākāśa uccai ravivatprakāśate
svatejasā viśvamidaṃ prakāśayan || 132||
jñātā mano'haṅkṛtivikriyāṇāṃ
dehendriyaprāṇakṛtakriyāṇām |
ayo'gnivattānanuvartamāno
na ceṣṭate no vikaroti kiñcana || 133||
na jāyate no mriyate na vardhate
na kṣīyate no vikaroti nityaḥ |
vilīyamāne'pi vapuṣyamuṣmi-
nna līyate kumbha ivāmbaraṃ svayam || 134||
prakṛtivikṛtibhinnaḥ śuddhabodhasvabhāvaḥ
sadasadidamaśeṣaṃ bhāsayannirviśeṣaḥ |
vilasati paramātmā jāgradādiṣvavasthā-
svahamahamiti sākṣātsākṣirūpeṇa buddheḥ || 135||
niyamitamanasāmuṃ tvaṃ svamātmānamātma-
nyayamahamiti sākṣādviddhi buddhiprasādāt |
janimaraṇataraṅgāpārasaṃsārasindhuṃ
pratara bhava kṛtārtho brahmarūpeṇa saṃsthaḥ || 136||
atrānātmanyahamiti matirbandha eṣo'sya puṃsaḥ
prāpto'jñānājjananamaraṇakleśasampātahetuḥ |
yenaivāyaṃ vapuridamasatsatyamityātmabuddhyā
puṣyatyukṣatyavati viṣayaistantubhiḥ kośakṛdvat || 137||
atasmiṃstadbuddhiḥ prabhavati vimūḍhasya tamasā
vivekābhāvādvai sphurati bhujage rajjudhiṣaṇā |
tato'narthavrāto nipatati samādāturadhikaḥ
tato yo'sadgrāhaḥ sa hi bhavati bandhaḥ śaṛṇu sakhe || 138||
akhaṇḍanityādvayabodhaśaktyā
sphurantamātmānamanantavaibhavam |
samāvṛṇotyāvṛtiśaktireṣā
tamomayī rāhurivārkabimbam || 139||
tirobhūte svātmanyamalataratejovati pumān
anātmānaṃ mohādahamiti śarīraṃ kalayati |
tataḥ kāmakrodhaprabhṛtibhiramuṃ bandhanaguṇaiḥ (pāṭhabhedaḥ - bandhakaguṇaiḥ)
paraṃ vikṣepākhyā rajasa uruśaktirvyathayati || 140||
mahāmohagrāhagrasanagalitātmāvagamano
dhiyo nānāvasthāṃ svayamabhinayaṃstadguṇatayā | (pāṭhabhedaḥ - nānāvasthāḥ)
apāre saṃsāre viṣayaviṣapūre jalanidhau
nimajyonmajyāyaṃ bhramati kumatiḥ kutsitagatiḥ || 141||
bhānuprabhāsañjanitābhrapaṅktiḥ
bhānuṃ tirodhāya vijṛmbhate yathā |
ātmoditāhaṅkṛtirātmatattvaṃ
tathā tirodhāya vijṛmbhate svayam || 142||
kavalitadinanāthe durdine sāndrameghaiḥ
vyathayati himajhañjhāvāyurugro yathaitān |
aviratatamasā''tmanyāvṛte mūḍhabuddhiṃ
kṣapayati bahuduḥkhaistīvravikṣepaśaktiḥ || 143||
etābhyāmeva śaktibhyāṃ bandhaḥ puṃsaḥ samāgataḥ |
yābhyāṃ vimohito dehaṃ matvā''tmānaṃ bhramatyayam || 144||
bījaṃ saṃsṛtibhūmijasya tu tamo dehātmadhīraṅkuro
rāgaḥ pallavamambu karma tu vapuḥ skandho'savaḥ śākhikāḥ |
agrāṇīndriyasaṃhatiśca viṣayāḥ puṣpāṇi duḥkhaṃ phalaṃ
nānākarmasamudbhavaṃ bahuvidhaṃ bhoktātra jīvaḥ khagaḥ || 145||
ajñānamūlo'yamanātmabandho
naisargiko'nādirananta īritaḥ |
janmāpyayavyādhijarādiduḥkha-
pravāhapātaṃ janayatyamuṣya || 146||
nāstrairna śastrairanilena vahninā
chettuṃ na śakyo na ca karmakoṭibhiḥ |
vivekavijñānamahāsinā vinā
dhātuḥ prasādena śitena mañjunā || 147||
śrutipramāṇaikamateḥ svadharma
niṣṭhā tayaivātmaviśuddhirasya |
viśuddhabuddheḥ paramātmavedanaṃ
tenaiva saṃsārasamūlanāśaḥ || 148||
kośairannamayādyaiḥ pañcabhirātmā na saṃvṛto bhāti |
nijaśaktisamutpannaiḥ śaivālapaṭalairivāmbu vāpīstham || 149||
tacchaivālāpanaye samyak salilaṃ pratīyate śuddham |
tṛṣṇāsantāpaharaṃ sadyaḥ saukhyapradaṃ paraṃ puṃsaḥ || 150||
pañcānāmapi kośānāmapavāde vibhātyayaṃ śuddhaḥ |
nityānandaikarasaḥ pratyagrūpaḥ paraḥ svayañjyotiḥ || 151||
ātmānātmavivekaḥ kartavyo bandhamuktaye viduṣā |
tenaivānandī bhavati svaṃ vijñāya saccidānandam || 152||
muñjādiṣīkāmiva dṛśyavargāt
pratyañcamātmānamasaṅgamakriyam |
vivicya tatra pravilāpya sarvaṃ
tadātmanā tiṣṭhati yaḥ sa muktaḥ || 153||
deho'yamannabhavano'nnamayastu kośa- (pāṭhabhedaḥ - kośo)
ścānnena jīvati vinaśyati tadvihīnaḥ | (pāṭhabhedaḥ - hyannena)
tvakcarmamāṃsarudhirāsthipurīṣarāśi-
rnāyaṃ svayaṃ bhavitumarhati nityaśuddhaḥ || 154||
pūrvaṃ janeradhimṛterapi nāyamasti (pāṭhabhedaḥ - janerapimṛteratha)
jātakṣaṇaḥ kṣaṇaguṇo'niyatasvabhāvaḥ |
naiko jaḍaśca ghaṭavatparidṛśyamānaḥ
svātmā kathaṃ bhavati bhāvavikāravettā || 155||
pāṇipādādimāndeho nātmā vyaṅge'pi jīvanāt |
tattacchakteranāśācca na niyamyo niyāmakaḥ || 156||
dehataddharmatatkarmatadavasthādisākṣiṇaḥ |
sata eva svataḥsiddhaṃ tadvailakṣaṇyamātmanaḥ || 157||
śalyarāśirmāṃsalipto malapūrṇo'tikaśmalaḥ |
kathaṃ bhavedayaṃ vettā svayametadvilakṣaṇaḥ || 158||
tvaṅmāṃsamedo'sthipurīṣarāśā-
vahammatiṃ mūḍhajanaḥ karoti |
vilakṣaṇaṃ vetti vicāraśīlo
nijasvarūpaṃ paramārthabhūtam || 159||
deho'hamityeva jaḍasya buddhiḥ
dehe ca jīve viduṣastvahandhīḥ |
vivekavijñānavato mahātmano
brahmāhamityeva matiḥ sadātmani || 160||
atrātmabuddhiṃ tyaja mūḍhabuddhe
tvaṅmāṃsamedo'sthipurīṣarāśau |
sarvātmani brahmaṇi nirvikalpe
kuruṣva śāntiṃ paramāṃ bhajasva || 161||
dehendriyādāvasati bhramoditāṃ
vidvānahantāṃ na jahāti yāvat |
tāvanna tasyāsti vimuktivārtā-
pyastveṣa vedāntanayāntadarśī || 162||
chāyāśarīre pratibimbagātre
yatsvapnadehe hṛdi kalpitāṅge |
yathātmabuddhistava nāsti kāci-
jjīvaccharīre ca tathaiva mā'stu || 163||
dehātmadhīreva nṛṇāmasaddhiyāṃ
janmādiduḥkhaprabhavasya bījam |
yatastatastvaṃ jahi tāṃ prayatnāt
tyakte tu citte na punarbhavāśā || 164||
karmendriyaiḥ pañcabhirañcito'yaṃ
prāṇo bhavetprāṇamayastu kośaḥ ||
yenātmavānannamayo'nupūrṇaḥ
pravartate'sau sakalakriyāsu || 165||
naivātmāpi prāṇamayo vāyuvikāro (pāṭhabhedaḥ - naivātmāyaṃ)
gantā''gantā vāyuvadantarbahireṣaḥ |
yasmātkiñcitkvāpi na vettīṣṭamaniṣṭaṃ
svaṃ vānyaṃ vā kiñcana nityaṃ paratantraḥ || 166||
jñānendriyāṇi ca manaśca manomayaḥ syāt
kośo mamāhamiti vastuvikalpahetuḥ |
sañjñādibhedakalanākalito balīyāṃ-
statpūrvakośamabhipūrya vijṛmbhate yaḥ || 167|| (pāṭhabhedaḥ - anupūrya)
pañcendriyaiḥ pañcabhireva hotṛbhiḥ
pracīyamāno viṣayājyadhārayā |
jājvalyamāno bahuvāsanendhanaiḥ
manomayāgnirdahati prapañcam || 168|| (pāṭhabhedaḥ - manomayo'gnirdahati)
na hyastyavidyā manaso'tiriktā
mano hyavidyā bhavabandhahetuḥ |
tasminvinaṣṭe sakalaṃ vinaṣṭaṃ
vijṛmbhite'sminsakalaṃ vijṛmbhate || 169||
svapne'rthaśūnye sṛjati svaśaktyā
bhoktrādiviśvaṃ mana eva sarvam |
tathaiva jāgratyapi no viśeṣaḥ
tatsarvametanmanaso vijṛmbhaṇam || 170||
suṣuptikāle manasi pralīne
naivāsti kiñcitsakalaprasiddheḥ |
ato manaḥkalpita eva puṃsaḥ
saṃsāra etasya na vastuto'sti || 171||
vāyunā''nīyate meghaḥ punastenaiva nīyate | (pāṭhabhedaḥ - vāyunā nīyate meghaḥ punastenaiva līyate)
manasā kalpyate bandho mokṣastenaiva kalpyate || 172||
dehādisarvaviṣaye parikalpya rāgaṃ
badhnāti tena puruṣaṃ paśuvadguṇena |
vairasyamatra viṣavat suvidhāya paścād
enaṃ vimocayati tanmana eva bandhāt || 173||
tasmānmanaḥ kāraṇamasya jantoḥ
bandhasya mokṣasya ca vā vidhāne |
bandhasya heturmalinaṃ rajoguṇaiḥ
mokṣasya śuddhaṃ virajastamaskam || 174||
vivekavairāgyaguṇātirekā-
cchuddhatvamāsādya mano vimuktyai |
bhavatyato buddhimato mumukṣo-
stābhyāṃ dṛḍhābhyāṃ bhavitavyamagre || 175||
mano nāma mahāvyāghro viṣayāraṇyabhūmiṣu |
caratyatra na gacchantu sādhavo ye mumukṣavaḥ || 176||
manaḥ prasūte viṣayānaśeṣān
sthūlātmanā sūkṣmatayā ca bhoktuḥ |
śarīravarṇāśramajātibhedān
guṇakriyāhetuphalāni nityam || 177||
asaṅgacidrūpamamuṃ vimohya
dehendriyaprāṇaguṇairnibaddhya |
ahammameti bhramayatyajasraṃ
manaḥ svakṛtyeṣu phalopabhuktiṣu || 178||
adhyāsadoṣātpuruṣasya saṃsṛtiḥ (pāṭhabhedaḥ - adhyāsayogāt)
adhyāsabandhastvamunaiva kalpitaḥ |
rajastamodoṣavato'vivekino
janmādiduḥkhasya nidānametat || 179||
ataḥ prāhurmano'vidyāṃ paṇḍitāstattvadarśinaḥ |
yenaiva bhrāmyate viśvaṃ vāyunevābhramaṇḍalam || 180||
tanmanaḥśodhanaṃ kāryaṃ prayatnena mumukṣuṇā |
viśuddhe sati caitasminmuktiḥ karaphalāyate || 181||
mokṣaikasaktyā viṣayeṣu rāgaṃ
nirmūlya sannyasya ca sarvakarma |
sacchraddhayā yaḥ śravaṇādiniṣṭho
rajaḥsvabhāvaṃ sa dhunoti buddheḥ || 182||
manomayo nāpi bhavetparātmā
hyādyantavattvātpariṇāmibhāvāt |
duḥkhātmakatvādviṣayatvahetoḥ
draṣṭā hi dṛśyātmatayā na dṛṣṭaḥ || 183||
buddhirbuddhīndriyaiḥ sārdhaṃ savṛttiḥ kartṛlakṣaṇaḥ |
vijñānamayakośaḥ syātpuṃsaḥ saṃsārakāraṇam || 184||
anuvrajaccitpratibimbaśaktiḥ
vijñānasañjñaḥ prakṛtervikāraḥ |
jñānakriyāvānahamityajasraṃ
dehendriyādiṣvabhimanyate bhṛśam || 185||
anādikālo'yamahaṃsvabhāvo
jīvaḥ samastavyavahāravoḍhā |
karoti karmāṇyapi pūrvavāsanaḥ (pāṭhabhedaḥ - karmāṇyanu)
puṇyānyapuṇyāni ca tatphalāni || 186||
bhuṅkte vicitrāsvapi yoniṣu vraja-
nnāyāti niryātyadha ūrdhvameṣaḥ |
asyaiva vijñānamayasya jāgrat-
svapnādyavasthāḥ sukhaduḥkhabhogaḥ || 187||
dehādiniṣṭhāśramadharmakarma-
guṇābhimānaḥ satataṃ mameti |
vijñānakośo'yamatiprakāśaḥ
prakṛṣṭasānnidhyavaśātparātmanaḥ |
ato bhavatyeṣa upādhirasya
yadātmadhīḥ saṃsarati bhrameṇa || 188||
yo'yaṃ vijñānamayaḥ prāṇeṣu hṛdi sphuratyayaṃ jyotiḥ | (pāṭhabhedaḥ - sphuratsvayañjyotiḥ)
kūṭasthaḥ sannātmā kartā bhoktā bhavatyupādhisthaḥ || 189||
svayaṃ paricchedamupetya buddheḥ
tādātmyadoṣeṇa paraṃ mṛṣātmanaḥ |
sarvātmakaḥ sannapi vīkṣate svayaṃ
svataḥ pṛthaktvena mṛdo ghaṭāniva || 190||
upādhisambandhavaśātparātmā
hyupādhidharmānanubhāti tadguṇaḥ | (pāṭhabhedaḥ - 'pyupādhi)
ayovikārānavikārivahnivat
sadaikarūpo'pi paraḥ svabhāvāt || 191||
śiṣya uvāca |
bhrameṇāpyanyathā vā'stu jīvabhāvaḥ parātmanaḥ |
tadupādheranāditvānnānādernāśa iṣyate || 192||
ato'sya jīvabhāvo'pi nityā bhavati saṃsṛtiḥ |
na nivarteta tanmokṣaḥ kathaṃ me śrīguro vada || 193||
śrīgururuvāca |
samyakpṛṣṭaṃ tvayā vidvansāvadhānena tacchṛṇu |
prāmāṇikī na bhavati bhrāntyā mohitakalpanā || 194||
bhrāntiṃ vinā tvasaṅgasya niṣkriyasya nirākṛteḥ |
na ghaṭetārthasambandho nabhaso nīlatādivat || 195||
svasya draṣṭurnirguṇasyākriyasya
pratyagbodhānandarūpasya buddheḥ |
bhrāntyā prāpto jīvabhāvo na satyo
mohāpāye nāstyavastusvabhāvāt || 196||
yāvadbhrāntistāvadevāsya sattā
mithyājñānojjṛmbhitasya pramādāt |
rajjvāṃ sarpo bhrāntikālīna eva
bhrānternāśe naiva sarpo'pi tadvat || 197|| (pāṭhabhedaḥ - sarpo'sti)
anāditvamavidyāyāḥ kāryasyāpi tatheṣyate |
utpannāyāṃ tu vidyāyāmāvidyakamanādyapi || 198||
prabodhe svapnavatsarvaṃ sahamūlaṃ vinaśyati |
anādyapīdaṃ no nityaṃ prāgabhāva iva sphuṭam || 199||
anāderapi vidhvaṃsaḥ prāgabhāvasya vīkṣitaḥ |
yadbuddhyupādhisambandhātparikalpitamātmani || 200||
jīvatvaṃ na tato'nyastu svarūpeṇa vilakṣaṇaḥ | (pāṭhabhedaḥ - tato'nyattu)
sambandhastvātmano buddhyā mithyājñānapuraḥsaraḥ || 201|| (pāṭhabhedaḥ - sambandhaḥ svātmano)
vinivṛttirbhavettasya samyagjñānena nānyathā |
brahmātmaikatvavijñānaṃ samyagjñānaṃ śrutermatam || 202||
tadātmānātmanoḥ samyagvivekenaiva sidhyati |
tato vivekaḥ kartavyaḥ pratyagātmasadātmanoḥ || 203|| (pāṭhabhedaḥ - pratyagātmāsadātmanoḥ)
jalaṃ paṅkavadatyantaṃ paṅkāpāye jalaṃ sphuṭam | (pāṭhabhedaḥ - paṅkavadaspaṣṭaṃ)
yathā bhāti tathātmāpi doṣābhāve sphuṭaprabhaḥ || 204||
asannivṛttau tu sadātmanā sphuṭaṃ
pratītiretasya bhavetpratīcaḥ |
tato nirāsaḥ karaṇīya eva
sadātmanaḥ sādhvahamādivastunaḥ || 205|| (pāṭhabhedaḥ - asadātmanaḥ)
ato nāyaṃ parātmā syādvijñānamayaśabdabhāk |
vikāritvājjaḍatvācca paricchinnatvahetutaḥ |
dṛśyatvādvyabhicāritvānnānityo nitya iṣyate || 206||
ānandapratibimbacumbitatanurvṛttistamojṛmbhitā
syādānandamayaḥ priyādiguṇakaḥ sveṣṭārthalābhodayaḥ |
puṇyasyānubhave vibhāti kṛtināmānandarūpaḥ svayaṃ
sarvo nandati yatra sādhu tanubhṛnmātraḥ prayatnaṃ vinā || 207|| (pāṭhabhedaḥ - bhūtvā nandati)
ānandamayakośasya suṣuptau sphūrtirutkaṭā |
svapnajāgarayorīṣadiṣṭasandarśanādinā || 208||
naivāyamānandamayaḥ parātmā
sopādhikatvātprakṛtervikārāt |
kāryatvahetoḥ sukṛtakriyāyā
vikārasaṅghātasamāhitatvāt || 209||
pañcānāmapi kośānāṃ niṣedhe yuktitaḥ śruteḥ | (pāṭhabhedaḥ - yuktitaḥ kṛte)
tanniṣedhāvadhi sākṣī bodharūpo'vaśiṣyate || 210|| (pāṭhabhedaḥ - tanniṣedhāvadhiḥ)
yo'yamātmā svayañjyotiḥ pañcakośavilakṣaṇaḥ |
avasthātrayasākṣī sannirvikāro nirañjanaḥ |
sadānandaḥ sa vijñeyaḥ svātmatvena vipaścitā || 211||
śiṣya uvāca |
mithyātvena niṣiddheṣu kośeṣveteṣu pañcasu |
sarvābhāvaṃ vinā kiñcinna paśyāmyatra he guro |
vijñeyaṃ kimu vastvasti svātmanā''tmavipaścitā || 212|| (pāṭhabhedaḥ - svātmanātra vipaścitā)
śrīgururuvāca |
satyamuktaṃ tvayā vidvannipuṇo'si vicāraṇe |
ahamādivikārāste tadabhāvo'yamapyanu || 213|| (pāṭhabhedaḥ - 'yamapyatha)
sarve yenānubhūyante yaḥ svayaṃ nānubhūyate |
tamātmānaṃ veditāraṃ viddhi buddhyā susūkṣmayā || 214||
tatsākṣikaṃ bhavettattadyadyadyenānubhūyate |
kasyāpyananubhūtārthe sākṣitvaṃ nopayujyate || 215|| (pāṭhabhedaḥ - nopapadyate)
asau svasākṣiko bhāvo yataḥ svenānubhūyate |
ataḥ paraṃ svayaṃ sākṣātpratyagātmā na cetaraḥ || 216||
jāgratsvapnasuṣuptiṣu sphuṭataraṃ yo'sau samujjṛmbhate
pratyagrūpatayā sadāhamahamityantaḥ sphurannaikadhā | (pāṭhabhedaḥ - sphurannekadhā)
nānākāravikārabhāgina imān paśyannahandhīmukhān (pāṭhabhedaḥ - bhājina)
nityānandacidātmanā sphurati taṃ viddhi svametaṃ hṛdi || 217||
ghaṭodake bimbitamarkabimba-
mālokya mūḍho ravimeva manyate |
tathā cidābhāsamupādhisaṃsthaṃ
bhrāntyāhamityeva jaḍo'bhimanyate || 218||
ghaṭaṃ jalaṃ tadgatamarkabimbaṃ
vihāya sarvaṃ vinirīkṣyate'rkaḥ | (pāṭhabhedaḥ - divi vīkṣyate'rkaḥ)
taṭastha etattritayāvabhāsakaḥ (pāṭhabhedaḥ - taṭasthitaḥ tattri)
svayamprakāśo viduṣā yathā tathā || 219||
dehaṃ dhiyaṃ citpratibimbamevaṃ (pāṭhabhedaḥ - citpratibimbametaṃ)
visṛjya buddhau nihitaṃ guhāyām |
draṣṭāramātmānamakhaṇḍabodhaṃ
sarvaprakāśaṃ sadasadvilakṣaṇam || 220||
nityaṃ vibhuṃ sarvagataṃ susūkṣmaṃ
antarbahiḥśūnyamananyamātmanaḥ |
vijñāya samyaṅnijarūpametat
pumān vipāpmā virajo vimṛtyuḥ || 221||
viśoka ānandaghano vipaścit
svayaṃ kutaścinna bibheti kaścit |
nānyo'sti panthā bhavabandhamukteḥ
vinā svatattvāvagamaṃ mumukṣoḥ || 222||
brahmābhinnatvavijñānaṃ bhavamokṣasya kāraṇam |
yenādvitīyamānandaṃ brahma sampadyate budhaiḥ || 223|| (pāṭhabhedaḥ - sampadyate budhaḥ)
brahmabhūtastu saṃsṛtyai vidvānnāvartate punaḥ |
vijñātavyamataḥ samyagbrahmābhinnatvamātmanaḥ || 224||
satyaṃ jñānamanantaṃ brahma viśuddhaṃ paraṃ svataḥsiddham |
nityānandaikarasaṃ pratyagabhinnaṃ nirantaraṃ jayati || 225||
sadidaṃ paramādvaitaṃ svasmādanyasya vastuno'bhāvāt |
na hyanyadasti kiñcit samyak paramārthatattvabodhadaśāyām || 226|| (pāṭhabhedaḥ - paratattvabodhasudaśāyām)
yadidaṃ sakalaṃ viśvaṃ nānārūpaṃ pratītamajñānāt |
tatsarvaṃ brahmaiva pratyastāśeṣabhāvanādoṣam || 227||
mṛtkāryabhūto'pi mṛdo na bhinnaḥ
kumbho'sti sarvatra tu mṛtsvarūpāt |
na kumbharūpaṃ pṛthagasti kumbhaḥ
kuto mṛṣā kalpitanāmamātraḥ || 228||
kenāpi mṛdbhinnatayā svarūpaṃ
ghaṭasya sandarśayituṃ na śakyate |
ato ghaṭaḥ kalpita eva mohā-
nmṛdeva satyaṃ paramārthabhūtam || 229||
sadbrahmakāryaṃ sakalaṃ sadevaṃ (pāṭhabhedaḥ - sadaiva)
tanmātrametanna tato'nyadasti | (pāṭhabhedaḥ - sanmātrametanna)
astīti yo vakti na tasya moho
vinirgato nidritavatprajalpaḥ || 230||
brahmaivedaṃ viśvamityeva vāṇī
śrautī brūte'tharvaniṣṭhā variṣṭhā |
tasmādetadbrahmamātraṃ hi viśvaṃ
nādhiṣṭhānādbhinnatā''ropitasya || 231||
satyaṃ yadi syājjagadetadātmano'
nantattvahānirnigamāpramāṇatā |
asatyavāditvamapīśituḥ syā-
nnaitattrayaṃ sādhu hitaṃ mahātmanām || 232||
īśvaro vastutattvajño na cāhaṃ teṣvavasthitaḥ |
na ca matsthāni bhūtānītyevameva vyacīklṛpat || 233|| (pāṭhabhedaḥ - vyacīkathat)
yadi satyaṃ bhavedviśvaṃ suṣuptāvupalabhyatām |
yannopalabhyate kiñcidato'satsvapnavanmṛṣā || 234||
ataḥ pṛthaṅnāsti jagatparātmanaḥ
pṛthakpratītistu mṛṣā guṇādivat | guṇāhivat
āropitasyāsti kimarthavattā'-
dhiṣṭhānamābhāti tathā bhrameṇa || 235||
bhrāntasya yadyadbhramataḥ pratītaṃ
brahmaiva tattadrajataṃ hi śuktiḥ |
idantayā brahma sadaiva rūpyate (pāṭhabhedaḥ - sadeva)
tvāropitaṃ brahmaṇi nāmamātram || 236||
ataḥ paraṃ brahma sadadvitīyaṃ
viśuddhavijñānaghanaṃ nirañjanam |
praśāntamādyantavihīnamakriyaṃ
nirantarānandarasasvarūpam || 237||
nirastamāyākṛtasarvabhedaṃ
nityaṃ sukhaṃ niṣkalamaprameyam | (pāṭhabhedaḥ - nityaṃ dhruvaṃ)
arūpamavyaktamanākhyamavyayaṃ
jyotiḥ svayaṃ kiñcididaṃ cakāsti || 238||
jñātṛjñeyajñānaśūnyamanantaṃ nirvikalpakam |
kevalākhaṇḍacinmātraṃ paraṃ tattvaṃ vidurbudhāḥ || 239||
aheyamanupādeyaṃ manovācāmagocaram |
aprameyamanādyantaṃ brahma pūrṇamahaṃ mahaḥ || 240|| (pāṭhabhedaḥ - pūrṇaṃ mahanmahaḥ)
tattvampadābhyāmabhidhīyamānayoḥ
brahmātmanoḥ śodhitayoryadīttham | (pāṭhabhedaḥ - śodhitayoryadittham)
śrutyā tayostattvamasīti samyag
ekatvameva pratipādyate muhuḥ || 241-
ekyaṃ tayorlakṣitayorna vācyayoḥ
nigadyate'nyonyaviruddhadharmiṇoḥ |
khadyotabhānvoriva rājabhṛtyayoḥ
kūpāmburāśyoḥ paramāṇumervoḥ || 242||
tayorvirodho'yamupādhikalpito
na vāstavaḥ kaścidupādhireṣaḥ |
īśasya māyā mahadādikāraṇaṃ
jīvasya kāryaṃ śaṛṇu pañcakośam || 243|| (pāṭhabhedaḥ - pañcakośāḥ)
etāvupādhī parajīvayostayoḥ
samyaṅnirāse na paro na jīvaḥ |
rājyaṃ narendrasya bhaṭasya kheṭak-
stayorapohe na bhaṭo na rājā || 244||
athāta ādeśa iti śrutiḥ svayaṃ
niṣedhati brahmaṇi kalpitaṃ dvayam |
śrutipramāṇānugṛhītabodhā- (pāṭhabhedaḥ - pramāṇānugṛhītayuktyā)
ttayornirāsaḥ karaṇīya eva || 245||
nedaṃ nedaṃ kalpitatvānna satyaṃ
rajjudṛṣṭavyālavatsvapnavacca | (pāṭhabhedaḥ - rajjau)
itthaṃ dṛśyaṃ sādhuyuktyā vyapohya
jñeyaḥ paścādekabhāvastayoryaḥ || 246||
tatastu tau lakṣaṇayā sulakṣyau
tayorakhaṇḍaikarasatvasiddhaye |
nālaṃ jahatyā na tathā'jahatyā
kintūbhayārthātmikayaiva bhāvyam || 247|| (pāṭhabhedaḥ - bhayārthaikatayaiva)
sa devadatto'yamitīha caikatā
viruddhadharmāṃśamapāsya kathyate |
yathā tathā tattvamasītivākye
viruddhadharmānubhayatra hitvā || 248||
saṃlakṣya cinmātratayā sadātmanoḥ
akhaṇḍabhāvaḥ paricīyate budhaiḥ |
evaṃ mahāvākyaśatena kathyate
brahmātmanoraikyamakhaṇḍabhāvaḥ || 249||
asthūlamityetadasannirasya
siddhaṃ svato vyomavadapratarkyam |
ato mṛṣāmātramidaṃ pratītaṃ
jahīhi yatsvātmatayā gṛhītam |
brahmāhamityeva viśuddhabuddhyā
viddhi svamātmānamakhaṇḍabodham || 250||
mṛtkāryaṃ sakalaṃ ghaṭādi satataṃ mṛnmātramevāhitaṃ (pāṭhabhedaḥ - mṛnmātramevābhitaḥ)
tadvatsajjanitaṃ sadātmakamidaṃ sanmātramevākhilam |
yasmānnāsti sataḥ paraṃ kimapi tatsatyaṃ sa ātmā svayaṃ
tasmāttattvamasi praśāntamamalaṃ brahmādvayaṃ yatparam || 251||
nidrākalpitadeśakālaviṣayajñātrādi sarvaṃ yathā
mithyā tadvadihāpi jāgrati jagatsvājñānakāryatvataḥ |
yasmādevamidaṃ śarīrakaraṇaprāṇāhamādyapyasat
tasmāttattvamasi praśāntamamalaṃ brahmādvayaṃ yatparam || 252||
yatra bhrāntyā kalpitaṃ tadviveke (pāṭhabhedaḥ - yadviveke)
tattanmātraṃ naiva tasmādvibhinnam |
svapne naṣṭaṃ svapnaviśvaṃ vicitraṃ
svasmādbhinnaṃ kinnu dṛṣṭaṃ prabodhe || 253||
jātinītikulagotradūragaṃ
nāmarūpaguṇadoṣavarjitam |
deśakālaviṣayātivarti yad
brahma tattvamasi bhāvayātmani || 254||
yatparaṃ sakalavāgagocaraṃ
gocaraṃ vimalabodhacakṣuṣaḥ |
śuddhacidghanamanādi vastu yad
brahma tattvamasi bhāvayātmani || 255||
ṣaḍbhirūrmibhirayogi yogihṛd-
bhāvitaṃ na karaṇairvibhāvitam |
buddhyavedyamanavadyamasti yad (pāṭhabhedaḥ - bhūti yad)
brahma tattvamasi bhāvayātmani || 256||
bhrāntikalpitajagatkalāśrayaṃ
svāśrayaṃ ca sadasadvilakṣaṇam |
niṣkalaṃ nirupamānavaddhi yad (pāṭhabhedaḥ - nirupamānamṛddhimat)
brahma tattvamasi bhāvayātmani || 257||
janmavṛddhipariṇatyapakṣaya-
vyādhināśanavihīnamavyayam |
viśvasṛṣṭyavavighātakāraṇaṃ (pāṭhabhedaḥ - vanaghātakāraṇaṃ)
brahma tattvamasi bhāvayātmani || 258||
astabhedamanapāstalakṣaṇaṃ
nistaraṅgajalarāśiniścalam |
nityamuktamavibhaktamūrti yad
brahma tattvamasi bhāvayātmani || 259||
ekameva sadanekakāraṇaṃ
kāraṇāntaranirāsyakāraṇam | (pāṭhabhedaḥ - sakāraṇam)
kāryakāraṇavilakṣaṇaṃ svayaṃ
brahma tattvamasi bhāvayātmani || 260||
nirvikalpakamanalpamakṣaraṃ
yatkṣarākṣaravilakṣaṇaṃ param |
nityamavyayasukhaṃ nirañjanaṃ
brahma tattvamasi bhāvayātmani || 261||
yadvibhāti sadanekadhā bhramā-
nnāmarūpaguṇavikriyātmanā |
hemavatsvayamavikriyaṃ sadā
brahma tattvamasi bhāvayātmani || 262||
yaccakāstyanaparaṃ parātparaṃ
pratyagekarasamātmalakṣaṇam |
satyacitsukhamanantamavyayaṃ
brahma tattvamasi bhāvayātmani || 263||
uktamarthamimamātmani svayaṃ
bhāvayetprathitayuktibhirdhiyā | (pāṭhabhedaḥ - bhāvaya prathita)
saṃśayādirahitaṃ karāmbuvat
tena tattvanigamo bhaviṣyati || 264||
sambodhamātraṃ pariśuddhatattvaṃ (pāṭhabhedaḥ - svaṃ bodhamātraṃ)
vijñāya saṅghe nṛpavacca sainye |
tadāśrayaḥ svātmani sarvadā sthito (pāṭhabhedaḥ - tadātmanaivātmani)
vilāpaya brahmaṇi viśvajātam || 265|| (pāṭhabhedaḥ - dṛśyajātam)
buddhau guhāyāṃ sadasadvilakṣaṇaṃ
brahmāsti satyaṃ paramadvitīyam |
tadātmanā yo'tra vasedguhāyāṃ
punarna tasyāṅgaguhāpraveśaḥ || 266||
jñāte vastunyapi balavatī vāsanā'nādireṣā
kartā bhoktāpyahamiti dṛḍhā yā'sya saṃsārahetuḥ |
pratyagdṛṣṭyā''tmani nivasatā sāpaneyā prayatnā-
nmuktiṃ prāhustadiha munayo vāsanātānavaṃ yat || 267||
ahaṃ mameti yo bhāvo dehākṣādāvanātmani |
adhyāso'yaṃ nirastavyo viduṣā svātmaniṣṭhayā || 268||
jñātvā svaṃ pratyagātmānaṃ buddhitadvṛttisākṣiṇam |
so'hamityeva sadvṛttyā'nātmanyātmamatiṃ jahi || 269||
lokānuvartanaṃ tyaktvā tyaktvā dehānuvartanam |
śāstrānuvartanaṃ tyaktvā svādhyāsāpanayaṃ kuru || 270||
lokavāsanayā jantoḥ śāstravāsanayāpi ca |
dehavāsanayā jñānaṃ yathāvannaiva jāyate || 271
saṃsārakārāgṛhamokṣamiccho-
rayomayaṃ pādanibandhaśaṛṅkhalam | (pāṭhabhedaḥ - nibaddha)
vadanti tajjñāḥ paṭu vāsanātrayaṃ
yo'smādvimuktaḥ samupaiti muktim || 272||
jalādisaṃsargavaśātprabhūta- (pāṭhabhedaḥ - jalādisamparkavaśāt)
durgandhadhūtā'garudivyavāsanā |
saṅgharṣaṇenaiva vibhāti samya-
gvidhūyamāne sati bāhyagandhe || 273||
antaḥśritānantadurantavāsanā-
dhūlīviliptā paramātmavāsanā |
prajñātisaṅgharṣaṇato viśuddhā
pratīyate candanagandhavat sphuṭam || 274|| (pāṭhabhedaḥ - sphuṭā)
anātmavāsanājālaistirobhūtātmavāsanā |
nityātmaniṣṭhayā teṣāṃ nāśe bhāti svayaṃ sphuṭam || 275|| (pāṭhabhedaḥ - sphuṭā)
yathā yathā pratyagavasthitaṃ manaḥ
tathā tathā muñcati bāhyavāsanām | (pāṭhabhedaḥ - bāhyavāsanāḥ)
niḥśeṣamokṣe sati vāsanānāṃ
ātmānubhūtiḥ pratibandhaśūnyā || 276||
svātmanyeva sadā sthitvā mano naśyati yoginaḥ | (pāṭhabhedaḥ - sthityā)
vāsanānāṃ kṣayaścātaḥ svādhyāsāpanayaṃ kuru || 277||
tamo dvābhyāṃ rajaḥ sattvātsattvaṃ śuddhena naśyati |
tasmātsattvamavaṣṭabhya svādhyāsāpanayaṃ kuru || 278||
prārabdhaṃ puṣyati vapuriti niścitya niścalaḥ |
dhairyamālambya yatnena svādhyāsāpanayaṃ kuru || 279||
nāhaṃ jīvaḥ paraṃ brahmetyatadvyāvṛttipūrvakam |
vāsanāvegataḥ prāptasvādhyāsāpanayaṃ kuru || 280||
śrutyā yuktyā svānubhūtyā jñātvā sārvātmyamātmanaḥ |
kvacidābhāsataḥ prāptasvādhyāsāpanayaṃ kuru || 281||
anādānavisargābhyāmīṣannāsti kriyā muneḥ | (pāṭhabhedaḥ - annādānavisargā)
tadekaniṣṭhayā nityaṃ svādhyāsāpanayaṃ kuru || 282||
tattvamasyādivākyotthabrahmātmaikatvabodhataḥ |
brahmaṇyātmatvadārḍhyāya svādhyāsāpanayaṃ kuru || 283||
ahambhāvasya dehe'sminniḥśeṣavilayāvadhi |
sāvadhānena yuktātmā svādhyāsāpanayaṃ kuru || 284||
pratītirjīvajagatoḥ svapnavadbhāti yāvatā |
tāvannirantaraṃ vidvansvādhyāsāpanayaṃ kuru || 285||
nidrāyā lokavārtāyāḥ śabdāderapi vismṛteḥ |
kvacinnāvasaraṃ dattvā cintayātmānamātmani || 286||
mātāpitrormalodbhūtaṃ malamāṃsamayaṃ vapuḥ |
tyaktvā cāṇḍālavaddūraṃ brahmībhūya kṛtī bhava || 287||
ghaṭākāśaṃ mahākāśa ivātmānaṃ parātmani |
vilāpyākhaṇḍabhāvena tūṣṇī bhava sadā mune || 288|| (pāṭhabhedaḥ - tūṣṇīṃ)
svaprakāśamadhiṣṭhānaṃ svayambhūya sadātmanā |
brahmāṇḍamapi piṇḍāṇḍaṃ tyajyatāṃ malabhāṇḍavat || 289||
cidātmani sadānande dehārūḍhāmahandhiyam |
niveśya liṅgamutsṛjya kevalo bhava sarvadā || 290||
yatraiṣa jagadābhāso darpaṇāntaḥ puraṃ yathā |
tadbrahmāhamiti jñātvā kṛtakṛtyo bhaviṣyasi || 291||
yatsatyabhūtaṃ nijarūpamādyaṃ
cidadvayānandamarūpamakriyam |
tadetya mithyāvapurutsṛjeta (pāṭhabhedaḥ - sṛjaita)
śailūṣavadveṣamupāttamātmanaḥ || 292||
sarvātmanā dṛśyamidaṃ mṛṣaiva
naivāhamarthaḥ kṣaṇikatvadarśanāt |
jānāmyahaṃ sarvamiti pratītiḥ
kuto'hamādeḥ kṣaṇikasya sidhyet || 293||
ahampadārthastvahamādisākṣī
nityaṃ suṣuptāvapi bhāvadarśanāt |
brūte hyajo nitya iti śrutiḥ svayaṃ
tatpratyagātmā sadasadvilakṣaṇaḥ || 294||
vikāriṇāṃ sarvavikāravettā
nityāvikāro bhavituṃ samarhati | (pāṭhabhedaḥ - nityo'vikāro)
manorathasvapnasuṣuptiṣu sphuṭaṃ
punaḥ punardṛṣṭamasattvametayoḥ || 295||
ato'bhimānaṃ tyaja māṃsapiṇḍe
piṇḍābhimāninyapi buddhikalpite |
kālatrayābādhyamakhaṇḍabodhaṃ
jñātvā svamātmānamupaihi śāntim || 296||
tyajābhimānaṃ kulagotranāma-
rūpāśrameṣvārdraśavāśriteṣu |
liṅgasya dharmānapi kartṛtādīṃ-
styaktvā bhavākhaṇḍasukhasvarūpaḥ || 297||
santyanye pratibandhāḥ puṃsaḥ saṃsārahetavo dṛṣṭāḥ |
teṣāmevaṃ mūlaṃ prathamavikāro bhavatyahaṅkāraḥ || 298|| (pāṭhabhedaḥ - teṣāmeṣāṃ)
yāvatsyātsvasya sambandho'haṅkāreṇa durātmanā |
tāvanna leśamātrāpi muktivārtā vilakṣaṇā || 299||
ahaṅkāragrahānmuktaḥ svarūpamupapadyate |
candravadvimalaḥ pūrṇaḥ sadānandaḥ svayamprabhaḥ || 300||
yo vā pure so'hamiti pratīto (pāṭhabhedaḥ - puraiṣo'hamiti)
buddhyā praklṛptastamasā'timūḍhayā | (pāṭhabhedaḥ - buddhyā'viviktastamasā)
tasyaiva niḥśeṣatayā vināśe
brahmātmabhāvaḥ pratibandhaśūnyaḥ || 301||
brahmānandanidhirmahābalavatā'haṅkāraghorāhinā
saṃveṣṭyātmani rakṣyate guṇamayaiścaṇḍestribhirmastakaiḥ (pāṭhabhedaḥ - caṇḍai)
vijñānākhyamahāsinā śrutimatā vicchidya śīrṣatrayaṃ (pāṭhabhedaḥ - dyutimatā)
nirmūlyāhimimaṃ nidhiṃ sukhakaraṃ dhīro'nubhoktuṅkṣamaḥ || 302||
yāvadvā yatkiñcidviṣadoṣasphūrtirasti ceddehe |
kathamārogyāya bhavettadvadahantāpi yogino muktyai || 303||
ahamo'tyantanivṛttyā tatkṛtanānāvikalpasaṃhṛtyā |
pratyaktattvavivekādidamahamasmīti vindate tattvam || 304|| (pāṭhabhedaḥ - vivekādayam)
ahaṅkāre kartaryahamiti matiṃ muñca sahasā (pāṭhabhedaḥ - ahaṅkartaryasminnahamiti)
vikārātmanyātmapratiphalajuṣi svasthitimuṣi |
yadadhyāsātprāptā janimṛtijarāduḥkhabahulā
pratīcaścinmūrtestava sukhatanoḥ saṃsṛtiriyam || 305||
sadaikarūpasya cidātmano vibho-
rānandamūrteranavadyakīrteḥ |
naivānyathā kvāpyavikāriṇaste
vināhamadhyāsamamuṣya saṃsṛtiḥ || 306||
tasmādahaṅkāramimaṃ svaśatruṃ
bhokturgale kaṇṭakavatpratītam |
vicchidya vijñānamahāsinā sphuṭaṃ
bhuṅkṣvātmasāmrājyasukhaṃ yatheṣṭam || 307||
tato'hamādervinivartya vṛttiṃ
santyaktarāgaḥ paramārthalābhāt |
tūṣṇīṃ samāssvātmasukhānubhūtyā
pūrṇātmanā brahmaṇi nirvikalpaḥ || 308||
samūlakṛtto'pi mahānahaṃ punaḥ
vyullekhitaḥ syādyadi cetasā kṣaṇam |
sañjīvya vikṣepaśataṃ karoti
nabhasvatā prāvṛṣi vārido yathā || 309||
nigṛhya śatrorahamo'vakāśaḥ
kvacinna deyo viṣayānucintayā |
sa eva sañjīvanaheturasya
prakṣīṇajambīratarorivāmbu || 310||
dehātmanā saṃsthita eva kāmī
vilakṣaṇaḥ kāmayitā kathaṃ syāt |
ato'rthasandhānaparatvameva
bhedaprasaktyā bhavabandhahetuḥ || 311||
kāryapravardhanādbījapravṛddhiḥ paridṛśyate |
kāryanāśādbījanāśastasmātkāryaṃ nirodhayet || 312||
vāsanāvṛddhitaḥ kāryaṃ kāryavṛddhyā ca vāsanā |
vardhate sarvathā puṃsaḥ saṃsāro na nivartate || 313||
saṃsārabandhavicchittyai tad dvayaṃ pradahedyatiḥ |
vāsanāvṛddhiretābhyāṃ cintayā kriyayā bahiḥ || 314|| (pāṭhabhedaḥ - vāsanā preryate hyantaḥ)
tābhyāṃ pravardhamānā sā sūte saṃsṛtimātmanaḥ |
trayāṇāṃ ca kṣayopāyaḥ sarvāvasthāsu sarvadā || 315||
sarvatra sarvataḥ sarvabrahmamātrāvalokanaiḥ | (pāṭhabhedaḥ - mātrāvalokanam)
sadbhāvavāsanādārḍhyāttattrayaṃ layamaśnute || 316||
kriyānāśe bhaveccintānāśo'smādvāsanākṣayaḥ |
vāsanāprakṣayo mokṣaḥ sā jīvanmuktiriṣyate || 317|| (pāṭhabhedaḥ - sa)
sadvāsanāsphūrtivijṛmbhaṇe sati
hyasau vilīnāpyahamādivāsanā | (pāṭhabhedaḥ - vilīnā tvahamādivāsanā)
atiprakṛṣṭāpyaruṇaprabhāyāṃ
vilīyate sādhu yathā tamisrā || 318||
tamastamaḥkāryamanarthajālaṃ
na dṛśyate satyudite dineśe |
tathā'dvayānandarasānubhūtau
naivāsti bandho na ca duḥkhagandhaḥ || 319||
dṛśyaṃ pratītaṃ pravilāpayansan (pāṭhabhedaḥ - pravilāpayansvayaṃ)
sanmātramānandaghanaṃ vibhāvayan |
samāhitaḥ sanbahirantaraṃ vā
kālaṃ nayethāḥ sati karmabandhe || 320||
pramādo brahmaniṣṭhāyāṃ na kartavyaḥ kadācana |
pramādo mṛtyurityāha bhagavānbrahmaṇaḥ sutaḥ || 321||
na pramādādanartho'nyo jñāninaḥ svasvarūpataḥ |
tato mohastato'handhīstato bandhastato vyathā || 322||
viṣayābhimukhaṃ dṛṣṭvā vidvāṃsamapi vismṛtiḥ |
vikṣepayati dhīdoṣairyoṣā jāramiva priyam || 323||
yathāpakṛṣṭaṃ śaivālaṃ kṣaṇamātraṃ na tiṣṭhati |
āvṛṇoti tathā māyā prājñaṃ vāpi parāṅmukham || 324||
lakṣyacyutaṃ cedyadi cittamīṣad
bahirmukhaṃ sannipatettatastataḥ |
pramādataḥ pracyutakelikandukaḥ
sopānapaṅktau patito yathā tathā || 325||
viṣayeṣvāviśaccetaḥ saṅkalpayati tadguṇān |
samyaksaṅkalpanātkāmaḥ kāmātpuṃsaḥ pravartanam || 326||
ataḥ pramādānna paro'sti mṛtyuḥ
vivekino brahmavidaḥ samādhau |
samāhitaḥ siddhimupaiti samyak
samāhitātmā bhava sāvadhānaḥ || 327||
tataḥ svarūpavibhraṃśo vibhraṣṭastu patatyadhaḥ |
patitasya vinā nāśaṃ punarnāroha īkṣyate || 328||
saṅkalpaṃ varjayettasmātsarvānarthasya kāraṇam |
apathyāni hi vastūni vyādhigrasto yathotsṛje |
jīvato yasya kaivalyaṃ videhe sa ca kevalaḥ |
yatkiñcit paśyato bhedaṃ bhayaṃ brūte yajuḥśrutiḥ || 329||
yadā kadā vāpi vipaścideṣa
brahmaṇyanante'pyaṇumātrabhedam |
paśyatyathāmuṣya bhayaṃ tadaiva
yadvīkṣitaṃ bhinnatayā pramādāt || 330|| (pāṭhabhedaḥ - yadīkṣitaṃ)
śrutismṛtinyāyaśatairniṣiddhe
dṛśye'tra yaḥ svātmamatiṃ karoti |
upaiti duḥkhopari duḥkhajātaṃ
niṣiddhakartā sa malimluco yathā || 331||
satyābhisandhānarato vimukto
mahattvamātmīyamupaiti nityam |
mithyābhisandhānaratastu naśyed
dṛṣṭaṃ tadetadyadacauracaurayoḥ || 332|| (pāṭhabhedaḥ - coracorayoḥ)
yatirasadanusandhiṃ bandhahetuṃ vihāya
svayamayamahamasmītyātmadṛṣṭyaiva tiṣṭhet
sukhayati nanu niṣṭhā brahmaṇi svānubhūtyā
harati paramavidyākāryaduḥkhaṃ pratītam || 333||
bāhyānusandhiḥ parivardhayetphalaṃ (pāṭhabhedaḥ - bāhyābhisandhiḥ)
durvāsanāmeva tatastato'dhikām |
jñātvā vivekaiḥ parihṛtya bāhyaṃ
svātmānusandhiṃ vidadhīta nityam || 334||
bāhye niruddhe manasaḥ prasannatā
manaḥprasāde paramātmadarśanam |
tasminsudṛṣṭe bhavabandhanāśo
bahirnirodhaḥ padavī vimukteḥ || 335||
kaḥ paṇḍitaḥ sansadasadvivekī
śrutipramāṇaḥ paramārthadarśī |
jānanhi kuryādasato'valambaṃ
svapātahetoḥ śiśuvanmumukṣuḥ || 336||
dehādisaṃsaktimato na muktiḥ
muktasya dehādyabhimatyabhāvaḥ |
suptasya no jāgaraṇaṃ na jāgrataḥ
svapnastayorbhinnaguṇāśrayatvāt || 337||
antarbahiḥ svaṃ sthirajaṅgameṣu
jñātvā''tmanādhāratayā vilokya | (pāṭhabhedaḥ - jñānātman)
tyaktākhilopādhirakhaṇḍarūpaḥ
pūrṇātmanā yaḥ sthita eṣa muktaḥ || 338||
sarvātmanā bandhavimuktihetuḥ
sarvātmabhāvānna paro'sti kaścit |
dṛśyāgrahe satyupapadyate'sau
sarvātmabhāvo'sya sadātmaniṣṭhayā || 339||
dṛśyasyāgrahaṇaṃ kathaṃ nu ghaṭate dehātmanā tiṣṭhato
bāhyārthānubhavaprasaktamanasastattatkriyāṃ kurvataḥ |
sannyastākhiladharmakarmaviṣayairnityātmaniṣṭhāparaiḥ
tattvajñaiḥ karaṇīyamātmani sadānandecchubhiryatnataḥ || 340||
sarvātmasiddhaye bhikṣoḥ kṛtaśravaṇakarmaṇaḥ | (pāṭhabhedaḥ - sārvātmya)
samādhiṃ vidadhātyeṣā śānto dānta iti śrutiḥ || 341||
ārūḍhaśakterahamo vināśaḥ
kartunna śakya sahasāpi paṇḍitaiḥ | (pāṭhabhedaḥ - kartuṃ na)
ye nirvikalpākhyasamādhiniścalāḥ
tānantarā'nantabhavā hi vāsanāḥ || 342||
ahambuddhyaiva mohinyā yojayitvā''vṛterbalāt |
vikṣepaśaktiḥ puruṣaṃ vikṣepayati tadguṇaiḥ || 343||
vikṣepaśaktivijayo viṣamo vidhātuṃ
niḥśeṣamāvaraṇaśaktinivṛttyabhāve |
dṛgdṛśyayoḥ sphuṭapayojalavadvibhāge
naśyettadāvaraṇamātmani ca svabhāvāt |
niḥsaṃśayena bhavati pratibandhaśūnyo
vikṣepaṇaṃ na hi tadā yadi cenmṛṣārthe || 344|| (pāṭhabhedaḥ - nikṣepaṇaṃ)
samyagvivekaḥ sphuṭabodhajanyo
vibhajya dṛgdṛśyapadārthatattvam |
chinatti māyākṛtamohabandhaṃ
yasmādvimuktastu punarna saṃsṛtiḥ || 345|| (pāṭhabhedaḥ - vimuktasya)
parāvaraikatvavivekavahniḥ
dahatyavidyāgahanaṃ hyaśeṣam |
kiṃ syātpunaḥ saṃsaraṇasya bījaṃ
advaitabhāvaṃ samupeyuṣo'sya || 346||
āvaraṇasya nivṛttirbhavati hi samyakpadārthadarśanataḥ |
mithyājñānavināśastadvikṣepajanitaduḥkhanivṛttiḥ || 347||
etattritayaṃ dṛṣṭaṃ samyagrajjusvarūpavijñānāt |
tasmādvastusatattvaṃ jñātavyaṃ bandhamuktaye viduṣā || 348||
ayo'gniyogādiva satsamanvayān
mātrādirūpeṇa vijṛmbhate dhīḥ |
tatkāryametaddvitayaṃ yato mṛṣā (pāṭhabhedaḥ - tatkāryameva tritayaṃ)
dṛṣṭaṃ bhramasvapnamanoratheṣu || 349||
tato vikārāḥ prakṛterahammukhā
dehāvasānā viṣayāśca sarve |
kṣaṇe'nyathābhāvitayā hyamīṣā- (pāṭhabhedaḥ - bhāvina eṣa ātmā)
masattvamātmā tu kadāpi nānyathā || 350|| (pāṭhabhedaḥ - masattvamātmā tu kadāpi)
nityādvayākhaṇḍacidekarūpo
buddhyādisākṣī sadasadvilakṣaṇaḥ |
ahampadapratyayalakṣitārthaḥ
pratyak sadānandaghanaḥ parātmā || 351||
itthaṃ vipaścitsadasadvibhajya
niścitya tattvaṃ nijabodhadṛṣṭyā |
jñātvā svamātmānamakhaṇḍabodhaṃ
tebhyo vimuktaḥ svayameva śāmyati || 352||
ajñānahṛdayagrantherniḥśeṣavilayastadā |
samādhinā'vikalpena yadā'dvaitātmadarśanam || 353||
tvamahamidamitīyaṃ kalpanā buddhidoṣāt
prabhavati paramātmanyadvaye nirviśeṣe |
pravilasati samādhāvasya sarvo vikalpo
vilayanamupagacchedvastutattvāvadhṛtyā || 354||
śānto dāntaḥ paramuparataḥ kṣāntiyuktaḥ samādhiṃ
kurvannityaṃ kalayati yatiḥ svasya sarvātmabhāvam |
tenāvidyātimirajanitānsādhu dagdhvā vikalpān
brahmākṛtyā nivasati sukhaṃ niṣkriyo nirvikalpaḥ || 355||
samāhitā ye pravilāpya bāhyaṃ
śrotrādi cetaḥ svamahaṃ cidātmani |
ta eva muktā bhavapāśabandhaiḥ
nānye tu pārokṣyakathābhidhāyinaḥ || 356||
upādhibhedātsvayameva bhidyate (pāṭhabhedaḥ - yogātsvayameva)
copādhyapohe svayameva kevalaḥ |
tasmādupādhervilayāya vidvān
vasetsadā'kalpasamādhiniṣṭhayā || 357||
sati sakto naro yāti sadbhāvaṃ hyekaniṣṭhayā |
kīṭako bhramaraṃ dhyāyan bhramaratvāya kalpate || 358||
kriyāntarāsaktimapāsya kīṭako
dhyāyannalitvaṃ hyalibhāvamṛcchati | (pāṭhabhedaḥ - dhyāyanyathāliṃ)
tathaiva yogī paramātmatattvaṃ
dhyātvā samāyāti tadekaniṣṭhayā || 359||
atīva sūkṣmaṃ paramātmatattvaṃ
na sthūladṛṣṭyā pratipattumarhati |
samādhinātyantasusūkṣmavṛttyā
jñātavyamāryairatiśuddhabuddhibhiḥ || 360||
yathā suvarṇaṃ puṭapākaśodhitaṃ
tyaktvā malaṃ svātmaguṇaṃ samṛcchati |
tathā manaḥ sattvarajastamomalaṃ
dhyānena santyajya sameti tattvam || 361||
nirantarābhyāsavaśāttaditthaṃ
pakvaṃ mano brahmaṇi līyate yadā |
tadā samādhiḥ savikalpavarjitaḥ (pāṭhabhedaḥ - sa vikalpavarjitaḥ)
svato'dvayānandarasānubhāvakaḥ || 362||
samādhinā'nena samastavāsanā-
granthervināśo'khilakarmanāśaḥ |
antarbahiḥ sarvata eva sarvadā
svarūpavisphūrtirayatnataḥ syāt || 363||
śruteḥ śataguṇaṃ vidyānmananaṃ mananādapi |
nididhyāsaṃ lakṣaguṇamanantaṃ nirvikalpakam || 364||
nirvikalpakasamādhinā sphuṭaṃ
brahmatattvamavagamyate dhruvam |
nānyathā calatayā manogateḥ
pratyayāntaravimiśritaṃ bhavet || 365||
ataḥ samādhatsva yatendriyaḥ san
nirantaraṃ śāntamanāḥ pratīci |
vidhvaṃsaya dhvāntamanādyavidyayā
kṛtaṃ sadekatvavilokanena || 366||
yogasya prathamadvāraṃ vāṅnirodho'parigrahaḥ | (pāṭhabhedaḥ - prathamaṃ dvāraṃ)
nirāśā ca nirīhā ca nityamekāntaśīlatā || 367||
ekāntasthitirindriyoparamaṇe heturdamaścetasaḥ
saṃrodhe karaṇaṃ śamena vilayaṃ yāyādahaṃvāsanā |
tenānandarasānubhūtiracalā brāhmī sadā yoginaḥ
tasmāccittanirodha eva satataṃ kāryaḥ prayatno muneḥ || 368|| prayatnānmuneḥ
vācaṃ niyacchātmani taṃ niyaccha
buddhau dhiyaṃ yaccha ca buddhisākṣiṇi |
taṃ cāpi pūrṇātmani nirvikalpe
vilāpya śāntiṃ paramāṃ bhajasva || 369||
dehaprāṇendriyamanobuddhyādibhirupādhibhiḥ |
yairyairvṛtteḥsamāyogastattadbhāvo'sya yoginaḥ || 370||
tannivṛttyā muneḥ samyak sarvoparamaṇaṃ sukham |
sandṛśyate sadānandarasānubhavaviplavaḥ || 371||
antastyāgo bahistyāgo viraktasyaiva yujyate |
tyajatyantarbahiḥsaṅgaṃ viraktastu mumukṣayā || 372||
bahistu viṣayaiḥ saṅgaṃ tathāntarahamādibhiḥ | (pāṭhabhedaḥ - saṅgaḥ)
virakta eva śaknoti tyaktuṃ brahmaṇi niṣṭhitaḥ || 373||
vairāgyabodhau puruṣasya pakṣivat
pakṣau vijānīhi vicakṣaṇa tvam |
vimuktisaudhāgralatādhirohaṇaṃ
tābhyāṃ vinā nānyatareṇa sidhyati || 374||
atyantavairāgyavataḥ samādhiḥ
samāhitasyaiva dṛḍhaprabodhaḥ |
prabuddhatattvasya hi bandhamuktiḥ
muktātmano nityasukhānubhūtiḥ || 375||
vairāgyānna paraṃ sukhasya janakaṃ paśyāmi vaśyātmanaḥ
taccecchuddhatarātmabodhasahitaṃ svārājyasāmrājyadhuk |
etaddvāramajasramuktiyuvateryasmāttvamasmātparaṃ
sarvatrāspṛhayā sadātmani sadā prajñāṃ kuru śreyase || 376||
āśāṃ chinddhi viṣopameṣu viṣayeṣveṣaiva mṛtyoḥ kṛti- (pāṭhabhedaḥ - mṛtyoḥ sṛti)
styaktvā jātikulāśrameṣvabhimatiṃ muñcātidūrātkriyāḥ |
dehādāvasati tyajātmadhiṣaṇāṃ prajñāṃ kuruṣvātmani
tvaṃ draṣṭāsyamano'si nirdvayaparaṃ brahmāsi yadvastutaḥ || 377|| (pāṭhabhedaḥ - draṣṭāsyamalo)
lakṣye brahmaṇi mānasaṃ dṛḍhataraṃ saṃsthāpya bāhyendriyaṃ
svasthāne viniveśya niścalatanuścopekṣya dehasthitim |
brahmātmaikyamupetya tanmayatayā cākhaṇḍavṛttyā'niśaṃ
brahmānandarasaṃ pibātmani mudā śūnyaiḥ kimanyairbhṛśam || 378|| (pāṭhabhedaḥ - kimanyairbhramaiḥ)
anātmacintanaṃ tyaktvā kaśmalaṃ duḥkhakāraṇam |
cintayātmānamānandarūpaṃ yanmuktikāraṇam || 379||
eṣa svayañjyotiraśeṣasākṣī
vijñānakośo vilasatyajasram | vijñānakośe
lakṣyaṃ vidhāyainamasadvilakṣaṇa-
makhaṇḍavṛttyā''tmatayā'nubhāvaya || 380||
etamacchinnayā vṛttyā pratyayāntaraśūnyayā |
ullekhayanvijānīyātsvasvarūpatayā sphuṭam || 381||
atrātmatvaṃ dṛḍhīkurvannahamādiṣu santyajan |
udāsīnatayā teṣu tiṣṭhetsphuṭaghaṭādivat || 382|| (pāṭhabhedaḥ - tiṣṭhedghaṭapaṭādivat)
viśuddhamantaḥkaraṇaṃ svarūpe
niveśya sākṣiṇyavabodhamātre |
śanaiḥ śanairniścalatāmupānayan
pūrṇaṃ svamevānuvilokayettataḥ || 383|| (pāṭhabhedaḥ - pūrṇatvamevānu)
dehendriyaprāṇamano'hamādibhiḥ
svājñānaklṛptairakhilairupādhibhiḥ |
vimuktamātmānamakhaṇḍarūpaṃ
pūrṇaṃ mahākāśamivāvalokayet || 384||
ghaṭakalaśakusūlasūcimukhyaiḥ
gaganamupādhiśatairvimuktamekam |
bhavati na vividhaṃ tathaiva śuddhaṃ
paramahamādivimuktamekameva || 385||
brahmādistambaparyantā mṛṣāmātrā upādhayaḥ | (pāṭhabhedaḥ - brahmādyāḥ stamba)
tataḥ pūrṇaṃ svamātmānaṃ paśyedekātmanā sthitam || 386||
yatra bhrāntyā kalpitaṃ tadviveke (pāṭhabhedaḥ - yadviveke)
tattanmātraṃ naiva tasmādvibhinnam |
bhrānternāśe bhāti dṛṣṭāhitattvaṃ (pāṭhabhedaḥ - bhrāntidṛṣṭā)
rajjustadvadviśvamātmasvarūpam || 387||
svayaṃ brahmā svayaṃ viṣṇuḥ svayamindraḥ svayaṃ śivaḥ |
svayaṃ viśvamidaṃ sarvaṃ svasmādanyanna kiñcana || 388||
antaḥ svayaṃ cāpi bahiḥ svayaṃ ca
svayaṃ purastāt svayameva paścāt |
svayaṃ hyāvācyāṃ svayamapyudīcyāṃ (pāṭhabhedaḥ - hyavācyāṃ)
tathopariṣṭātsvayamapyadhastāt || 389||
taraṅgaphenabhramabudbudādi
sarvaṃ svarūpeṇa jalaṃ yathā tathā |
cideva dehādyahamantametat
sarvaṃ cidevaikarasaṃ viśuddham || 390||
sadevedaṃ sarvaṃ jagadavagataṃ vāṅmanasayoḥ
sato'nyannāstyeva prakṛtiparasīmni sthitavataḥ |
pṛthak kiṃ mṛtsnāyāḥ kalaśaghaṭakumbhādyavagataṃ
vadatyeṣa bhrāntastvamahamiti māyāmadirayā || 391||
kriyāsamabhihāreṇa yatra nānyaditi śrutiḥ |
bravīti dvaitarāhityaṃ mithyādhyāsanivṛttaye || 392||
ākāśavannirmalanirvikalpaṃ (pāṭhabhedaḥ - nirvikalpa)
niḥsīmaniḥspandananirvikāram |
antarbahiḥśūnyamananyamadvayaṃ
svayaṃ paraṃ brahma kimasti bodhyam || 393||
vaktavyaṃ kimu vidyate'tra bahudhā brahmaiva jīvaḥ svayaṃ
brahmaitajjagadātataṃ nu sakalaṃ brahmādvitīyaṃ śrutiḥ | (pāṭhabhedaḥ - jagadāparāṇu sakalaṃ)
brahmaivāhamiti prabuddhamatayaḥ santyaktabāhyāḥ sphuṭaṃ
brahmībhūya vasanti santatacidānandātmanaitaddhruvam || 394|| (pāṭhabhedaḥ - ānandātmanaiva dhruvam)
jahi malamayakośe'handhiyotthāpitāśāṃ
prasabhamanilakalpe liṅgadehe'pi paścāt |
nigamagaditakīrtiṃ nityamānandamūrtiṃ
svayamiti paricīya brahmarūpeṇa tiṣṭha || 395||
śavākāraṃ yāvadbhajati manujastāvadaśuciḥ
parebhyaḥ syātkleśo jananamaraṇavyādhinilayaḥ | (pāṭhabhedaḥ - vyādhinirayāḥ)
yadātmānaṃ śuddhaṃ kalayati śivākāramacalam
tadā tebhyo mukto bhavati hi tadāha śrutirapi || 396||
svātmanyāropitāśeṣābhāsavastunirāsataḥ |
svayameva paraṃ brahma pūrṇamadvayamakriyam || 397||
samāhitāyāṃ sati cittavṛttau
parātmani brahmaṇi nirvikalpe |
na dṛśyate kaścidayaṃ vikalpaḥ
prajalpamātraḥ pariśiṣyate yataḥ || 398|| (pāṭhabhedaḥ - tataḥ)
asatkalpo vikalpo'yaṃ viśvamityekavastuni |
nirvikāre nirākāre nirviśeṣe bhidā kutaḥ || 399||
draṣṭudarśanadṛśyādibhāvaśūnyaikavastuni | (pāṭhabhedaḥ - draṣṭṛdarśana)
nirvikāre nirākāre nirviśeṣe bhidā kutaḥ || 400||
kalpārṇava ivātyantaparipūrṇaikavastuni |
nirvikāre nirākāre nirviśeṣe bhidā kutaḥ || 401||
tejasīva tamo yatra pralīnaṃ bhrāntikāraṇam | (pāṭhabhedaḥ - yatra vilīnaṃ)
advitīye pare tattve nirviśeṣe bhidā kutaḥ || 402||
ekātmake pare tattve bhedavārtā kathaṃ vaset | (pāṭhabhedaḥ - kathaṃ bhavet)
suṣuptau sukhamātrāyāṃ bhedaḥ kenāvalokitaḥ || 403||
na hyasti viśvaṃ paratattvabodhāt
sadātmani brahmaṇi nirvikalpe |
kālatraye nāpyahirīkṣito guṇe
na hyambubindurmṛgatṛṣṇikāyām || 404||
māyāmātramidaṃ dvaitamadvaitaṃ paramārthataḥ |
iti brūte śrutiḥ sākṣātsuṣuptāvanubhūyate || 405||
ananyatvamadhiṣṭhānādāropyasya nirīkṣitam |
paṇḍitai rajjusarpādau vikalpo bhrāntijīvanaḥ || 406||
cittamūlo vikalpo'yaṃ cittābhāve na kaścana |
ataścittaṃ samādhehi pratyagrūpe parātmani || 407||
kimapi satatabodhaṃ kevalānandarūpaṃ
nirupamamativelaṃ nityamuktaṃ nirīham |
niravadhigaganābhaṃ niṣkalaṃ nirvikalpaṃ
hṛdi kalayati vidvān brahma pūrṇaṃ samādhau || 408||
prakṛtivikṛtiśūnyaṃ bhāvanātītabhāvaṃ
samarasamasamānaṃ mānasambandhadūram |
nigamavacanasiddhaṃ nityamasmatprasiddhaṃ
hṛdi kalayati vidvān brahma pūrṇaṃ samādhau || 409||
ajaramamaramastābhāvavastusvarūpaṃ (pāṭhabhedaḥ - bhāsavastu)
stimitasalilarāśiprakhyamākhyāvihīnam |
śamitaguṇavikāraṃ śāśvataṃ śāntamekaṃ
hṛdi kalayati vidvān brahma pūrṇaṃ samādhau || 410||
samāhitāntaḥkaraṇaḥ svarūpe
vilokayātmānamakhaṇḍavaibhavam |
vicchinddhi bandhaṃ bhavagandhagandhitaṃ (pāṭhabhedaḥ - gandhagandhilaṃ)
yatnena puṃstvaṃ saphalīkuruṣva || 411-
sarvopādhivinirmuktaṃ saccidānandamadvayam |
bhāvayātmānamātmasthaṃ na bhūyaḥ kalpase'dhvane || 412||
chāyeva puṃsaḥ paridṛśyamāna-
mābhāsarūpeṇa phalānubhūtyā |
śarīramārācchavavannirastaṃ
punarna sandhatta idaṃ mahātmā || 413||
satatavimalabodhānandarūpaṃ sametya (pāṭhabhedaḥ - svametya)
tyaja jaḍamalarūpopādhimetaṃ sudūre |
atha punarapi naiṣa smaryatāṃ vāntavastu (pāṭhabhedaḥ - punarapi naiva)
smaraṇaviṣayabhūtaṃ kalpate kutsanāya || 414||
samūlametatparidāhya vahnau (pāṭhabhedaḥ - paridahya)
sadātmani brahmaṇi nirvikalpe |
tataḥ svayaṃ nityaviśuddhabodhā-
nandātmanā tiṣṭhati vidvariṣṭhaḥ || 415||
prārabdhasūtragrathitaṃ śarīraṃ
prayātu vā tiṣṭhatu goriva srak |
na tatpunaḥ paśyati tattvavettā-
''nandātmani brahmaṇi līnavṛttiḥ || 416||
akhaṇḍānandamātmānaṃ vijñāya svasvarūpataḥ |
kimicchan kasya vā hetordehaṃ puṣṇāti tattvavit || 417||
saṃsiddhasya phalaṃ tvetajjīvanmuktasya yoginaḥ |
bahirantaḥ sadānandarasāsvādanamātmani || 418||
vairāgyasya phalaṃ bodho bodhasyoparatiḥ phalam |
svānandānubhavācchāntireṣaivoparateḥ phalam || 419||
yadyuttarottarābhāvaḥ pūrvapūrvantu niṣphalam |
nivṛttiḥ paramā tṛptirānando'nupamaḥ svataḥ || 420||
dṛṣṭaduḥkheṣvanudvego vidyāyāḥ prastutaṃ phalam |
yatkṛtaṃ bhrāntivelāyāṃ nānā karma jugupsitam |
paścānnaro vivekena tatkathaṃ kartumarhati || 421||
vidyāphalaṃ syādasato nivṛttiḥ
pravṛttirajñānaphalaṃ tadīkṣitam |
tajjñājñayoryanmṛgatṛṣṇikādau
nocedvidāṃ dṛṣṭaphalaṃ kimasmāt || 422|| (pāṭhabhedaḥ - nocedvido)
ajñānahṛdayagranthervināśo yadyaśeṣataḥ |
anicchorviṣayaḥ kiṃ nu pravṛtteḥ kāraṇaṃ svataḥ || 423|| (pāṭhabhedaḥ - viduṣaḥ kiṃ)
vāsanānudayo bhogye vairāgyasya tadāvadhiḥ |
ahambhāvodayābhāvo bodhasya paramāvadhiḥ |
līnavṛttairanutpattirmaryādoparatestu sā || 424|| (pāṭhabhedaḥ - vṛttera)
brahmākāratayā sadā sthitatayā nirmuktabāhyārthadhī-
ranyāveditabhogyabhogakalano nidrāluvadbālavat |
svapnālokitalokavajjagadidaṃ paśyankvacillabdhadhī-
rāste kaścidanantapuṇyaphalabhugdhanyaḥ sa mānyo bhuvi || 425||
sthitaprajño yatirayaṃ yaḥ sadānandamaśnute |
brahmaṇyeva vilīnātmā nirvikāro viniṣkriyaḥ || 426||
brahmātmanoḥ śodhitayorekabhāvāvagāhinī |
nirvikalpā ca cinmātrā vṛttiḥ prajñeti kathyate |
susthitā'sau bhavedyasya sthitaprajñaḥ sa ucyate || 427||
yasya sthitā bhavetprajñā yasyānando nirantaraḥ |
prapañco vismṛtaprāyaḥ sa jīvanmukta iṣyate || 428||
līnadhīrapi jāgarti jāgraddharmavivarjitaḥ |
bodho nirvāsano yasya sa jīvanmukta iṣyate || 429||
śāntasaṃsārakalanaḥ kalāvānapi niṣkalaḥ |
yasya cittaṃ viniścintaṃ sa jīvanmukta iṣyate || 430|| (pāṭhabhedaḥ - yaḥ sacitto'pi niścittaḥ)
vartamāne'pi dehe'smiñchāyāvadanuvartini |
ahantāmamatā'bhāvo jīvanmuktasya lakṣaṇam || 431||
atītānanusandhānaṃ bhaviṣyadavicāraṇam |
audāsīnyamapi prāptaṃ jīvanmuktasya lakṣaṇam || 432|| (pāṭhabhedaḥ - prāpte)
guṇadoṣaviśiṣṭe'sminsvabhāvena vilakṣaṇe |
sarvatra samadarśitvaṃ jīvanmuktasya lakṣaṇam || 433||
iṣṭāniṣṭārthasamprāptau samadarśitayā''tmani |
ubhayatrāvikāritvaṃ jīvanmuktasya lakṣaṇam || 434||
brahmānandarasāsvādāsaktacittatayā yateḥ |
antarbahiravijñānaṃ jīvanmuktasya lakṣaṇam || 435||
dehendriyādau kartavye mamāhambhāvavarjitaḥ |
audāsīnyena yastiṣṭhetsa jīvanmuktalakṣaṇaḥ || 436|| (pāṭhabhedaḥ - sa jīvanmukta iṣyate)
vijñāta ātmano yasya brahmabhāvaḥ śruterbalāt |
bhavabandhavinirmuktaḥ sa jīvanmuktalakṣaṇaḥ || 437|| (pāṭhabhedaḥ - sa jīvanmukta iṣyate)
dehendriyeṣvahambhāva idambhāvastadanyake |
yasya no bhavataḥ kvāpi sa jīvanmukta iṣyate || 438||
jīveśobhayasaṃsārarūpadurvāsanojjhitā |
sā sarvadā bhavedyasya sa jīvanmukta iṣyate ||
na pratyagbrahmaṇorbhedaṃ kadāpi brahmasargayoḥ |
prajñayā yo vijāniti sa jīvanmuktalakṣaṇaḥ || 439|| (pāṭhabhedaḥ - sa jīvanmukta iṣyate)
sādhubhiḥ pūjyamāne'sminpīḍyamāne'pi durjanaiḥ |
samabhāvo bhavedyasya sa jīvanmuktalakṣaṇaḥ || 440|| (pāṭhabhedaḥ - sa jīvanmukta iṣyate)
yatra praviṣṭā viṣayāḥ pareritā
nadīpravāhā iva vārirāśau |
linanti sanmātratayā na vikriyāṃ
utpādayantyeṣa yatirvimuktaḥ || 441||
vijñātabrahmatattvasya yathāpūrvaṃ na saṃsṛtiḥ |
asti cenna sa vijñātabrahmabhāvo bahirmukhaḥ || 442||
prācīnavāsanāvegādasau saṃsaratīti cet |
na sadekatvavijñānānmandī bhavati vāsanā || 443||
atyantakāmukasyāpi vṛttiḥ kuṇṭhati mātari |
tathaiva brahmaṇi jñāte pūrṇānande manīṣiṇaḥ || 444||
nididhyāsanaśīlasya bāhyapratyaya īkṣyate |
bravīti śrutiretasya prārabdhaṃ phaladarśanāt || 445||
sukhādyanubhavo yāvattāvatprārabdhamiṣyate |
phalodayaḥ kriyāpūrvo niṣkriyo na hi kutracit || 446||
ahaṃ brahmeti vijñānātkalpakoṭiśatārjitam |
sañcitaṃ vilayaṃ yāti prabodhātsvapnakarmavat || 447||
yatkṛtaṃ svapnavelāyāṃ puṇyaṃ vā pāpamulbaṇam |
suptotthitasya kintatsyātsvargāya narakāya vā || 448||
svamasaṅgamudāsīnaṃ parijñāya nabho yathā |
na śliṣyati ca yatkiñcitkadācidbhāvikarmabhiḥ || 449|| (pāṭhabhedaḥ - śliṣyate yatiḥ kiñcit)
na nabho ghaṭayogena surāgandhena lipyate |
tathātmopādhiyogena taddharmairnaiva lipyate || 450||
jñānodayātpurārabdhaṃ karmajñānānna naśyati |
adatvā svaphalaṃ lakṣyamuddiśyotsṛṣṭabāṇavat || 451||
vyāghrabuddhyā vinirmukto bāṇaḥ paścāttu gomatau |
na tiṣṭhati chinatyeva lakṣyaṃ vegena nirbharam || 452||
prārabdhaṃ balavattaraṃ khalu vidāṃ bhogena tasya kṣayaḥ
samyagjñānahutāśanena vilayaḥ prāksañcitāgāminām |
brahmātmaikyamavekṣya tanmayatayā ye sarvadā saṃsthitāḥ
teṣāṃ tattritayaṃ nahi kvacidapi brahmaiva te nirguṇam || 453||
upādhitādātmyavihīnakevala-
brahmātmanaivātmani tiṣṭhato muneḥ |
prārabdhasadbhāvakathā na yuktā
svapnārthasambandhakatheva jāgrataḥ || 454||
na hi prabuddhaḥ pratibhāsadehe
dehopayoginyapi ca prapañce |
karotyahantāṃ mamatāmidantāṃ
kintu svayaṃ tiṣṭhati jāgareṇa || 455||
na tasya mithyārthasamarthanecchā
na saṅgrahastajjagato'pi dṛṣṭaḥ |
tatrānuvṛttiryadi cenmṛṣārthe
na nidrayā mukta itīṣyate dhruvam || 456||
tadvatpare brahmaṇi vartamānaḥ
sadātmanā tiṣṭhati nānyadīkṣate |
smṛtiryathā svapnavilokitārthe
tathā vidaḥ prāśanamocanādau || 457||
karmaṇā nirmito dehaḥ prārabdhaṃ tasya kalpyatām |
nānāderātmano yuktaṃ naivātmā karmanirmitaḥ || 458||
ajo nityaḥ śāśvata iti brūte śrutiramoghavāk | (pāṭhabhedaḥ - ajo nitya iti brūte śrutireṣā tvamoghavāk)
tadātmanā tiṣṭhato'sya kutaḥ prārabdhakalpanā || 459||
prārabdhaṃ sidhyati tadā yadā dehātmanā sthitiḥ |
dehātmabhāvo naiveṣṭaḥ prārabdhaṃ tyajyatāmataḥ || 460||
śarīrasyāpi prārabdhakalpanā bhrāntireva hi |
adhyastasya kutaḥ sattvamasatyasya kuto janiḥ | (pāṭhabhedaḥ - sattvamasattvasya)
ajātasya kuto nāśaḥ prārabdhamasataḥ kutaḥ || 461||
jñānenājñānakāryasya samūlasya layo yadi |
tiṣṭhatyayaṃ kathaṃ deha iti śaṅkāvato jaḍān || 462||
samādhātuṃ bāhyadṛṣṭyā prārabdhaṃ vadati śrutiḥ |
na tu dehādisatyatvabodhanāya vipaścitām |
yataḥ śruterabhiprāyaḥ paramārthaikagocaraḥ || 463||
paripūrṇamanādyantamaprameyamavikriyam |
ekamevādvayaṃ brahma neha nānāsti kiñcana || 464||
sadghanaṃ cidghanaṃ nityamānandaghanamakriyam |
ekamevādvayaṃ brahma neha nānāsti kiñcana || 465||
pratyagekarasaṃ pūrṇamanantaṃ sarvatomukham |
ekamevādvayaṃ brahma neha nānāsti kiñcana || 466||
aheyamanupādeyamanādeyamanāśrayam | manādheyamanā
ekamevādvayaṃ brahma neha nānāsti kiñcana || 467||
nirguṇaṃ niṣkalaṃ sūkṣmaṃ nirvikalpaṃ nirañjanam |
ekamevādvayaṃ brahma neha nānāsti kiñcana || 468||
anirūpya svarūpaṃ yanmanovācāmagocaram |
ekamevādvayaṃ brahma neha nānāsti kiñcana || 469||
satsamṛddhaṃ svataḥsiddhaṃ śuddhaṃ buddhamanīdṛśam |
ekamevādvayaṃ brahma neha nānāsti kiñcana || 470||
nirastarāgā vinirastabhogāḥ (pāṭhabhedaḥ - nirapāstabhogāḥ)
śāntāḥ sudāntā yatayo mahāntaḥ |
vijñāya tattvaṃ parametadante
prāptāḥ parāṃ nirvṛtimātmayogāt || 471||
bhavānapīdaṃ paratattvamātmanaḥ
svarūpamānandaghanaṃ vicārya | (pāṭhabhedaḥ - nicāyya)
vidhūya mohaṃ svamanaḥprakalpitaṃ
muktaḥ kṛtārtho bhavatu prabuddhaḥ || 472||
samādhinā sādhuviniścalātmanā (pāṭhabhedaḥ - suniścalātmanā)
paśyātmatattvaṃ sphuṭabodhacakṣuṣā |
niḥsaṃśayaṃ samyagavekṣitaśce-
cchrutaḥ padārtho na punarvikalpyate || 473|| (pāṭhabhedaḥ - punarvikalpate)
svasyāvidyābandhasambandhamokṣā-
tsatyajñānānandarūpātmalabdhau |
śāstraṃ yuktirdeśikoktiḥ pramāṇaṃ
cāntaḥsiddhā svānubhūtiḥ pramāṇam || 474||
bandho mokṣaśca tṛptiśca cintā''rogyakṣudhādayaḥ |
svenaiva vedyā yajjñānaṃ pareṣāmānumānikam || 475||
taṭasthitā bodhayanti guravaḥ śrutayo yathā |
prajñayaiva taredvidvānīśvarānugṛhītayā || 476||
svānubhūtyā svayaṃ jñātvā svamātmānamakhaṇḍitam |
saṃsiddhaḥ sammukhaṃ tiṣṭhennirvikalpātmanā''tmani || 477|| (pāṭhabhedaḥ - susukhaṃ tiṣṭhen)
vedāntasiddhāntaniruktireṣā
brahmaiva jīvaḥ sakalaṃ jagacca |
akhaṇḍarūpasthitireva mokṣo
brahmādvitīye śrutayaḥ pramāṇam || 478|| (pāṭhabhedaḥ - brahmādvitīyaṃ)
iti guruvacanācchrutipramāṇāt
paramavagamya satattvamātmayuktyā |
praśamitakaraṇaḥ samāhitātmā
kvacidacalākṛtirātmaniṣṭhato'bhūt || 479|| (pāṭhabhedaḥ - ātmaniṣṭhito)
kiñcitkālaṃ samādhāya pare brahmaṇi mānasam | (pāṭhabhedaḥ - kañcitkālaṃ)
utthāya paramānandādidaṃ vacanamabravīt || 480|| (pāṭhabhedaḥ - vyutthāya)
buddhirvinaṣṭā galitā pravṛttiḥ
brahmātmanorekatayā'dhigatyā |
idaṃ na jāne'pyanidaṃ na jāne
kiṃ vā kiyadvā sukhamastyapāram || 481|| (pāṭhabhedaḥ - sukhamasya pāram)
vācā vaktumaśakyameva manasā mantuṃ na vā śakyate
svānandāmṛtapūrapūritaparabrahmāmbudhervaibhavam |
ambhorāśiviśīrṇavārṣikaśilābhāvaṃ bhajanme mano
yasyāṃśāṃśalave vilīnamadhunā''nandātmanā nirvṛtam || 482||
kva gataṃ kena vā nītaṃ kutra līnamidaṃ jagat |
adhunaiva mayā dṛṣṭaṃ nāsti kiṃ mahadadbhutam || 483||
kiṃ heyaṃ kimupādeyaṃ kimanyatkiṃ vilakṣaṇam |
akhaṇḍānandapīyūṣapūrṇe brahmamahārṇave || 484||
na kiñcidatra paśyāmi na śaṛṇomi na vedmyaham |
svātmanaiva sadānandarūpeṇāsmi vilakṣaṇaḥ || 485||
namo namaste gurave mahātmane
vimuktasaṅgāya saduttamāya |
nityādvayānandarasasvarūpiṇe
bhūmne sadā'pāradayāmbudhāmne || 486||
yatkaṭākṣaśaśisāndracandrikā-
pātadhūtabhavatāpajaśramaḥ |
prāptavānahamakhaṇḍavaibhavā-
nandamātmapadamakṣayaṃ kṣaṇāt || 487||
dhanyo'haṃ kṛtakṛtyo'haṃ vimukto'haṃ bhavagrahāt |
nityānandasvarūpo'haṃ pūrṇo'haṃ tvadanugrahāt || 488||
asaṅgo'hamanaṅgo'hamaliṅgo'hamabhaṅguraḥ |
praśānto'hamananto'hamamalo'haṃ cirantanaḥ || 489|| (pāṭhabhedaḥ - 'hamatānto'haṃ)
akartāhamabhoktāhamavikāro'hamakriyaḥ |
śuddhabodhasvarūpo'haṃ kevalo'haṃ sadāśivaḥ || 490||
draṣṭuḥ śroturvaktuḥ karturbhokturvibhinna evāham |
nityanirantaraniṣkriyaniḥsīmāsaṅgapūrṇabodhātmā || 491||
nāhamidaṃ nāhamado'pyubhayoravabhāsakaṃ paraṃ śuddham |
bāhyābhyantaraśūnyaṃ pūrṇaṃ brahmādvitīyamevāham || 492||
nirupamamanāditattvaṃ tvamahamidamada iti kalpanādūram |
nityānandaikarasaṃ satyaṃ brahmādvitīyamevāham || 493||
nārāyaṇo'haṃ narakāntako'haṃ
purāntako'haṃ puruṣo'hamīśaḥ |
akhaṇḍabodho'hamaśeṣasākṣī
nirīśvaro'haṃ nirahaṃ ca nirmamaḥ || 494||
sarveṣu bhūteṣvahameva saṃsthito
jñānātmanā'ntarbahirāśrayaḥ san |
bhoktā ca bhogyaṃ svayameva sarvaṃ
yadyatpṛthagdṛṣṭamidantayā purā || 495||
mayyakhaṇḍasukhāmbhodhau bahudhā viśvavīcayaḥ |
utpadyante vilīyante māyāmārutavibhramāt || 496||
sthulādibhāvā mayi kalpitā bhramā-
dāropitānusphuraṇena lokaiḥ |
kāle yathā kalpakavatsarāya-
ṇartvādayo niṣkalanirvikalpe || 497||
āropitaṃ nāśrayadūṣakaṃ bhavet
kadāpi mūḍhairatidoṣadūṣitaiḥ | mūḍhairmati
nārdrīkarotyūṣarabhūmibhāgaṃ
marīcikāvāri mahāpravāhaḥ || 498||
ākāśavallepavidūrago'haṃ (pāṭhabhedaḥ - ākāśavat kalpavi)
ādityavadbhāsyavilakṣaṇo'ham |
ahāryavannityaviniścalo'haṃ
ambhodhivatpāravivarjito'ham || 499||
na me dehena sambandho megheneva vihāyasaḥ |
ataḥ kuto me taddharmā jāgratsvapnasuṣuptayaḥ || 500||
upādhirāyāti sa eva gacchati
sa eva karmāṇi karoti bhuṅkte |
sa eva jīryan mriyate sadāhaṃ (pāṭhabhedaḥ - eva jīvan)
kulādrivanniścala eva saṃsthitaḥ || 501||
na me pravṛttirna ca me nivṛttiḥ
sadaikarūpasya niraṃśakasya |
ekātmako yo niviḍo nirantaro (pāṭhabhedaḥ - nibiḍo)
vyomeva pūrṇaḥ sa kathaṃ nu ceṣṭate || 502||
puṇyāni pāpāni nirindriyasya
niścetaso nirvikṛternirākṛteḥ |
kuto mamākhaṇḍasukhānubhūteḥ
brūte hyananvāgatamityapi śrutiḥ || 503||
chāyayā spṛṣṭamuṣṇaṃ vā śītaṃ vā suṣṭhu duḥṣṭhu vā |
na spṛśatyeva yatkiñcitpuruṣaṃ tadvilakṣaṇam || 504||
na sākṣiṇaṃ sākṣyadharmāḥ saṃspṛśanti vilakṣaṇam |
avikāramudāsīnaṃ gṛhadharmāḥ pradīpavat |
dehendriyamanodharmā naivātmānaṃ spṛśantyaho || 505|| ekṣtra
raveryathā karmaṇi sākṣibhāvo
vahneryathā dāhaniyāmakatvam | (pāṭhabhedaḥ - vā'yasi dāhakatvam)
rajjoryathā''ropitavastusaṅgaḥ
tathaiva kūṭasthacidātmano me || 506||
kartāpi vā kārayitāpi nāhaṃ
bhoktāpi vā bhojayitāpi nāham |
draṣṭāpi vā darśayitāpi nāhaṃ
so'haṃ svayañjyotiranīdṛgātmā || 507||
calatyupādhau pratibimbalaulya-
maupādhikaṃ mūḍhadhiyo nayanti |
svabimbabhūtaṃ ravivadviniṣkriyaṃ
kartāsmi bhoktāsmi hato'smi heti || 508||
jale vāpi sthale vāpi luṭhatveṣa jaḍātmakaḥ |
nāhaṃ vilipye taddharmairghaṭadharmairnabho yathā || 509||
kartṛtvabhoktṛtvakhalatvamattatā-
jaḍatvabaddhatvavimuktatādayaḥ |
buddhervikalpā na tu santi vastutaḥ
svasminpare brahmaṇi kevale'dvaye || 510||
santu vikārāḥ prakṛterdaśadhā śatadhā sahasradhā vāpi |
kiṃ me'saṅgacitastairna ghanaḥ kvacidambaraṃ spṛśati || 511|| (pāṭhabhedaḥ - taiḥ kiṃ me'saṅgaciterna hyambudaḍambaro'mbaraṃ)
avyaktādisthūlaparyantametat
viśvaṃ yatrābhāsamātraṃ pratītam |
vyomaprakhyaṃ sūkṣmamādyantahīnaṃ
brahmādvaitaṃ yattadevāhamasmi || 512||
sarvādhāraṃ sarvavastuprakāśaṃ
sarvākāraṃ sarvagaṃ sarvaśūnyam |
nityaṃ śuddhaṃ niścalaṃ nirvikalpaṃ (pāṭhabhedaḥ - niṣkalaṃ)
brahmādvaitaṃ yattadevāhamasmi || 513||
yatpratyastāśeṣamāyāviśeṣaṃ
pratyagrūpaṃ pratyayāgamyamānam |
satyajñānānantamānandarūpaṃ
brahmādvaitaṃ yattadevāhamasmi || 514||
niṣkriyo'smyavikāro'smi
niṣkalo'smi nirākṛtiḥ |
nirvikalpo'smi nityo'smi
nirālambo'smi nirdvayaḥ || 515||
sarvātmako'haṃ sarvo'haṃ sarvātīto'hamadvayaḥ |
kevalākhaṇḍabodho'hamānando'haṃ nirantaraḥ || 516||
svārājyasāmrājyavibhūtireṣā
bhavatkṛpāśrīmahimaprasādāt |
prāptā mayā śrīgurave mahātmane
namo namaste'stu punarnamo'stu || 517||
mahāsvapne māyākṛtajanijarāmṛtyugahane
bhramantaṃ kliśyantaṃ bahulataratāpairanudinam | (pāṭhabhedaḥ - ranukalam)
ahaṅkāravyāghravyathitamimamatyantakṛpayā
prabodhya prasvāpātparamavitavānmāmasi guro || 518||
namastasmai sadaikasmai kasmaicinmahase namaḥ | (pāṭhabhedaḥ - sadekasmai namaścinmahase muhuḥ)
yadetadviśvarūpeṇa rājate gururāja te || 519||
iti natamavalokya śiṣyavaryaṃ
samadhigatātmasukhaṃ prabuddhatattvam |
pramuditahṛdayaṃ sa deśikendraḥ (pāṭhabhedaḥ - hṛdayaḥ)
punaridamāha vacaḥ paraṃ mahātmā || 520||
brahmapratyayasantatirjagadato brahmaiva tatsarvataḥ (pāṭhabhedaḥ - satsarvataḥ)
paśyādhyātmadṛśā praśāntamanasā sarvāsvavasthāsvapi |
rūpādanyadavekṣitaṃ kimabhitaścakṣuṣmatāṃ dṛśyate (pāṭhabhedaḥ - vidyate)
tadvadbrahmavidaḥ sataḥ kimaparaṃ buddhervihārāspadam || 521||
kastāṃ parānandarasānubhūti-
mṛtsṛjya śūnyeṣu rameta vidvān | (pāṭhabhedaḥ - mutsṛjya
candre mahāhlādini dīpyamāne)
citrendumālokayituṃ ka icchet || 522||
asatpadārthānubhavena kiñcin
na hyasti tṛptirna ca duḥkhahāniḥ |
tadadvayānandarasānubhūtyā
tṛptaḥ sukhaṃ tiṣṭha sadātmaniṣṭhayā || 523||
svameva sarvathā paśyanmanyamānaḥ svamadvayam | (pāṭhabhedaḥ - sarvataḥ)
svānandamanubhuñjānaḥ kālaṃ naya mahāmate || 524||
akhaṇḍabodhātmani nirvikalpe
vikalpanaṃ vyomni puraprakalpanam |
tadadvayānandamayātmanā sadā
śāntiṃ parāmetya bhajasva maunam || 525||
tūṣṇīmavasthā paramopaśāntiḥ
buddherasatkalpavikalpahetoḥ |
brahmātmano brahmavido mahātmano
yatrādvayānandasukhaṃ nirantaram || 526||
nāsti nirvāsanānmaunātparaṃ sukhakṛduttamam |
vijñātātmasvarūpasya svānandarasapāyinaḥ || 527||
gacchaṃstiṣṭhannupaviśañchayāno vā'nyathāpi vā |
yathecchayā vasedvidvānātmārāmaḥ sadā muniḥ || 528||
na deśakālāsanadigyamādi-
lakṣyādyapekṣā'pratibaddhavṛtteḥ | (pāṭhabhedaḥ - pratibaddha
saṃsiddhatattvasya mahātmano'sti)
svavedane kā niyamādyavasthā || 529||
ghaṭo'yamiti vijñātuṃ niyamaḥ ko'nvavekṣate | (pāṭhabhedaḥ - apekṣyate)
vinā pramāṇasuṣṭhutvaṃ yasminsati padārthadhīḥ || 530||
ayamātmā nityasiddhaḥ pramāṇe sati bhāsate |
na deśaṃ nāpi vā kālaṃ na śuddhiṃ vāpyapekṣate || 531||
devadatto'hamityetadvijñānaṃ nirapekṣakam |
tadvadbrahmavido'pyasya brahmāhamiti vedanam || 532||
bhānuneva jagatsarvaṃ bhāsate yasya tejasā |
anātmakamasattucchaṃ kiṃ nu tasyāvabhāsakam || 533||
vedaśāstrapurāṇāni bhūtāni sakalānyapi |
yenārthavanti taṃ kinnu vijñātāraṃ prakāśayet || 534||
eṣa svayañjyotiranantaśaktiḥ
ātmā'prameyaḥ sakalānubhūtiḥ |
yameva vijñāya vimuktabandho
jayatyayaṃ brahmaviduttamottamaḥ || 535||
na khidyate no viṣayaiḥ pramodate
na sajjate nāpi virajyate ca |
svasminsadā krīḍati nandati svayaṃ
nirantarānandarasena tṛptaḥ || 536||
kṣudhāṃ dehavyathāṃ tyaktvā bālaḥ krīḍati vastuniḥ | (pāṭhabhedaḥ - vastuni)
tathaiva vidvān ramate nirmamo nirahaṃ sukhī || 537||
cintāśūnyamadainyabhaikṣamaśanaṃ pānaṃ saridvāriṣu
svātantryeṇa niraṅkuśā sthitirabhīrnidrā śmaśāne vane |
vastraṃ kṣālanaśoṣaṇādirahitaṃ digvāstu śayyā mahī
sañcāro nigamāntavīthiṣu vidāṃ krīḍā pare brahmaṇi || 538||
vimānamālambya śarīrametad
bhunaktyaśeṣānviṣayānupasthitān |
parecchayā bālavadātmavettā
yo'vyaktaliṅgo'nanuṣaktabāhyaḥ || 539||
digambaro vāpi ca sāmbaro vā
tvagambaro vāpi cidambarasthaḥ |
unmattavadvāpi ca bālavadvā
piśācavadvāpi caratyavanyām || 540||
kāmānniṣkāmarūpī saṃścaratyekacaro muniḥ | (pāṭhabhedaḥ - kāmānnī kāmarūpī)
svātmanaiva sadā tuṣṭaḥ svayaṃ sarvātmanā sthitaḥ || 541||
kvacinmūḍho vidvān kvacidapi mahārājavibhavaḥ
kvacidbhrāntaḥ saumyaḥ kvacidajagarācārakalitaḥ |
kvacitpātrībhūtaḥ kvacidavamataḥ kvāpyaviditaḥ
caratyevaṃ prājñaḥ satataparamānandasukhitaḥ || 542||
nirdhano'pi sadā tuṣṭo'pyasahāyo mahābalaḥ |
nityatṛpto'pyabhuñjāno'pyasamaḥ samadarśanaḥ || 543||
api kurvannakurvāṇaścābhoktā phalabhogyapi |
śarīryapyaśarīryeṣa paricchinno'pi sarvagaḥ || 544||
aśarīraṃ sadā santamimaṃ brahmavidaṃ kvacit |
priyāpriye na spṛśatastathaiva ca śubhāśubhe || 545||
sthūlādisambandhavato'bhimāninaḥ
sukhaṃ ca duḥkhaṃ ca śubhāśubhe ca |
vidhvastabandhasya sadātmano muneḥ
kutaḥ śubhaṃ vā'pyaśubhaṃ phalaṃ vā || 546||
tamasā grastavadbhānādagrasto'pi ravirjanaiḥ |
grasta ityucyate bhrāntyāṃ hyajñātvā vastulakṣaṇam || 547|| (pāṭhabhedaḥ - bhrāntyā)
tadvaddehādibandhebhyo vimuktaṃ brahmavittamam |
paśyanti dehivanmūḍhāḥ śarīrābhāsadarśanāt || 548||
ahirnirlvayanīṃ vāyaṃ muktvā dehaṃ tu tiṣṭhati | (pāṭhabhedaḥ - ahini)
itastataścālyamāno yatkiñcitprāṇavāyunā || 549||
strotasā nīyate dāru yathā nimnonnatasthalam |
daivena nīyate deho yathākālopabhuktiṣu || 550||
prārabdhakarmaparikalpitavāsanābhiḥ
saṃsārivaccarati bhuktiṣu muktadehaḥ |
siddhaḥ svayaṃ vasati sākṣivadatra tūṣṇīṃ
cakrasya mūlamiva kalpavikalpaśūnyaḥ || 551||
naivendriyāṇi viṣayeṣu niyuṅkta eṣa
naivāpayuṅkta upadarśanalakṣaṇasthaḥ |
naiva kriyāphalamapīṣadavekṣate sa (pāṭhabhedaḥ - apīṣadapekṣate saḥ)
svānandasāndrarasapānasumattacittaḥ || 552||
lakṣyālakṣyagatiṃ tyaktvā yastiṣṭhetkevalātmanā |
śiva eva svayaṃ sākṣādayaṃ brahmaviduttamaḥ || 553||
jīvanneva sadā muktaḥ kṛtārtho brahmavittamaḥ |
upādhināśādbrahmaiva san brahmāpyeti nirdvayam || 554||
śailūṣo veṣasadbhāvābhāvayośca yathā pumān |
tathaiva brahmavicchreṣṭhaḥ sadā brahmaiva nāparaḥ || 555||
yatra kvāpi viśīrṇaṃ satparṇamiva tarorvapuḥ patatāt | (pāṭhabhedaḥ - viśīrṇaṃ parṇamiva)
brahmībhūtasya yateḥ prāgeva taccidagninā dagdham || 556||
sadātmani brahmaṇi tiṣṭhato muneḥ
pūrṇā'dvayānandamayātmanā sadā |
na deśakālādyucitapratīkṣā
tvaṅmāṃsaviṭpiṇḍavisarjanāya || 557||
dehasya mokṣo no mokṣo na daṇḍasya kamaṇḍaloḥ |
avidyāhṛdayagranthimokṣo mokṣo yatastataḥ || 558||
kulyāyāmatha nadyāṃ vā śivakṣetre'pi catvare |
parṇaṃ patati cettena taroḥ kiṃ nu śubhāśubham || 559||
patrasya puṣpasya phalasya nāśavad-
dehendriyaprāṇadhiyāṃ vināśaḥ |
naivātmanaḥ svasya sadātmakasyā-
nandākṛtervṛkṣavadasti caiṣaḥ || 560|| (pāṭhabhedaḥ - vadāsta eṣaḥ)
prajñānaghana ityātmalakṣaṇaṃ satyasūcakam |
anūdyaupādhikasyaiva kathayanti vināśanam || 561||
avināśī vā are'yamātmeti śrutirātmanaḥ |
prabravītyavināśitvaṃ vinaśyatsu vikāriṣu || 562||
pāṣāṇavṛkṣatṛṇadhānyakaḍaṅkarādyā (pāṭhabhedaḥ - kaṭāmbarādyā)
dagdhā bhavanti hi mṛdeva yathā tathaiva |
dehendriyāsumana ādi samastadṛśyaṃ
jñānāgnidagdhamupayāti parātmabhāvam || 563||
vilakṣaṇaṃ yathā dhvāntaṃ līyate bhānutejasi |
tathaiva sakalaṃ dṛśyaṃ brahmaṇi pravilīyate || 564||
ghaṭe naṣṭe yathā vyoma vyomaiva bhavati sphuṭam |
tathaivopādhivilaye brahmaiva brahmavitsvayam || 565||
kṣīraṃ kṣīre yathā kṣiptaṃ tailaṃ taile jalaṃ jale |
saṃyuktamekatāṃ yāti tathā''tmanyātmavinmuniḥ || 566||
evaṃ videhakaivalyaṃ sanmātratvamakhaṇḍitam |
brahmabhāvaṃ prapadyaiṣa yatirnāvartate punaḥ || 567||
sadātmaikatvavijñānadagdhāvidyādivarṣmaṇaḥ |
amuṣya brahmabhūtatvād brahmaṇaḥ kuta udbhavaḥ || 568||
māyāklṛptau bandhamokṣau na staḥ svātmani vastutaḥ |
yathā rajjau niṣkriyāyāṃ sarpābhāsavinirgamau || 569||
āvṛteḥ sadasattvābhyāṃ vaktavye bandhamokṣaṇe |
nāvṛtirbrahmaṇaḥ kācidanyābhāvādanāvṛtam |
yadyastyadvaitahāniḥ syād dvaitaṃ no sahate śrutiḥ || 570||
bandhañca mokṣañca mṛṣaiva mūḍhā
buddherguṇaṃ vastuni kalpayanti |
dṛgāvṛtiṃ meghakṛtāṃ yathā ravau
yato'dvayā'saṅgacidetadakṣaram || 571|| (pāṭhabhedaḥ - cidekamakṣaram)
astīti pratyayo yaśca yaśca nāstīti vastuni |
buddhereva guṇāvetau na tu nityasya vastunaḥ || 572||
atastau māyayā klṛptau bandhamokṣau na cātmani |
niṣkale niṣkriye śānte niravadye nirañjane |
advitīye pare tattve vyomavatkalpanā kutaḥ || 573||
na nirodho na cotpattirna baddho na ca sādhakaḥ |
na mumukṣurna vai mukta ityeṣā paramārthatā || 574||
sakalanigamacūḍāsvāntasiddhāntarūpaṃ
paramidamatiguhyaṃ darśitaṃ te mayādya |
apagatakalidoṣaṃ kāmanirmuktabuddhiṃ (pāṭhabhedaḥ - buddhiḥ)
svasutavadasakṛttvāṃ bhāvayitvā mumukṣum || 575||
iti śrutvā gurorvākyaṃ praśrayeṇa kṛtānatiḥ |
sa tena samanujñāto yayau nirmuktabandhanaḥ || 576||
gurureva sadānandasindhau nirmagnamānasaḥ | (pāṭhabhedaḥ - gurureṣa)
pāvayanvasudhāṃ sarvāṃ vicacāra nirantaraḥ || 577||
ityācāryasya śiṣyasya saṃvādenātmalakṣaṇam |
nirūpitaṃ mumukṣūṇāṃ sukhabodhopapattaye || 578||
hitamidamupadeśamādriyantāṃ
vihitanirastasamastacittadoṣāḥ |
bhavasukhaviratāḥ praśāntacittāḥ (pāṭhabhedaḥ - sukhavimukhāḥ)
śrutirasikā yatayo mumukṣavo ye || 579||
saṃsārādhvani tāpabhānukiraṇaprodbhūtadāhavyathā-
khinnānāṃ jalakāṅkṣayā marubhuvi bhrāntyā paribhrāmyatām |
atyāsannasudhāmbudhiṃ sukhakaraṃ brahmādvayaṃ darśaya-
tyeṣā śaṅkarabhāratī vijayate nirvāṇasandāyinī || 580||
|| iti śaṅkarācāryaviracitaṃ vivekacūḍāmaṇiḥ ||
|| oṃ tatsat ||
Sanskrit — Devanagari (original)
सर्ववेदान्तसिद्धान्तगोचरं तमगोचरम् ।
गोविन्दं परमानन्दं सद्गुरुं प्रणतोऽस्म्यहम् ॥ 1॥
जन्तूनां नरजन्म दुर्लभमतः पुंस्त्वं ततो विप्रता
तस्माद्वैदिकधर्ममार्गपरता विद्वत्त्वमस्मात्परम् ।
आत्मानात्मविवेचनं स्वनुभवो ब्रह्मात्मना संस्थितिः
मुक्तिर्नो शतजन्मकोटिसुकृतैः पुण्यैर्विना लभ्यते ॥ 2॥ (पाठभेदः - शतकोटिजन्मसु कृतैः)
दुर्लभं त्रयमेवैतद्देवानुग्रहहेतुकम् ।
मनुष्यत्वं मुमुक्षुत्वं महापुरुषसंश्रयः ॥ 3॥
लब्ध्वा कथञ्चिन्नरजन्म दुर्लभं (पाठभेदः - कथञ्चिन्)
तत्रापि पुंस्त्वं श्रुतिपारदर्शनम् ।
यस्त्वात्ममुक्तौ न यतेत मूढधीः
स ह्यात्महा स्वं विनिहन्त्यसद्ग्रहात् ॥ 4॥ (पाठभेदः - आत्महा स्वं)
इतः को न्वस्ति मूढात्मा यस्तु स्वार्थे प्रमाद्यति ।
दुर्लभं मानुषं देहं प्राप्य तत्रापि पौरुषम् ॥ 5॥
वदन्तु शास्त्राणि यजन्तु देवान् (पाठभेदः - पठन्तु)
कुर्वन्तु कर्माणि भजन्तु देवताः ।
आत्मैक्यबोधेन विनापि मुक्ति- (पाठभेदः - विना विमुक्तिः न)
र्न सिध्यति ब्रह्मशतान्तरेऽपि ॥ 6॥
अमृतत्त्वस्य नाशास्ति वित्तेनेत्येव हि श्रुतिः ।
ब्रवीति कर्मणो मुक्तेरहेतुत्वं स्फुटं यतः ॥ 7॥
अतो विमुक्त्यै प्रयतेत विद्वान्
सन्न्यस्तबाह्यार्थसुखस्पृहः सन् ।
सन्तं महान्तं समुपेत्य देशिकं
तेनोपदिष्टार्थसमाहितात्मा ॥ 8॥
उद्धरेदात्मनाऽऽत्मानं मग्नं संसारवारिधौ ।
योगारूढत्वमासाद्य सम्यग्दर्शननिष्ठया ॥ 9॥
सन्न्यस्य सर्वकर्माणि भवबन्धविमुक्तये ।
यत्यतां पण्डितैर्धीरैरात्माभ्यास उपस्थितैः ॥ 10॥
चित्तस्य शुद्धये कर्म न तु वस्तूपलब्धये ।
वस्तुसिद्धिर्विचारेण न किञ्चित्कर्मकोटिभिः ॥ 11॥
सम्यग्विचारतः सिद्धा रज्जुतत्त्वावधारणा ।
भ्रान्तोदितमहासर्पभयदुःखविनाशिनी ॥ 12॥ (पाठभेदः - भ्रान्त्यो)
अर्थस्य निश्चयो दृष्टो विचारेण हितोक्तितः ।
न स्नानेन न दानेन प्राणायामशतेन वा ॥ 13॥
अधिकारिणमाशास्ते फलसिद्धिर्विशेषतः ।
उपाया देशकालाद्याः सन्त्यस्मिन्सहकारिणः ॥ 14॥ (पाठभेदः - सन्त्यस्यां)
अतो विचारः कर्तव्यो जिज्ञासोरात्मवस्तुनः ॥
समासाद्य दयासिन्धुं गुरुं ब्रह्मविदुत्तमम् ॥ 15॥
मेधावी पुरुषो विद्वानूहापोहविचक्षणः ।
अधिकार्यात्मविद्यायामुक्तलक्षणलक्षितः ॥ 16॥
विवेकिनो विरक्तस्य शमादिगुणशालिनः ।
मुमुक्षोरेव हि ब्रह्मजिज्ञासायोग्यता मता ॥ 17॥
साधनान्यत्र चत्वारि कथितानि मनीषिभिः ।
येषु सत्स्वेव सन्निष्ठा यदभावे न सिध्यति ॥ 18॥
आदौ नित्यानित्यवस्तुविवेकः परिगण्यते ।
इहामुत्रफलभोगविरागस्तदनन्तरम् ।
शमादिषट्कसम्पत्तिर्मुमुक्षुत्वमिति स्फुटम् ॥ 19॥
ब्रह्म सत्यं जगन्मिथ्येत्येवंरूपो विनिश्चयः ।
सोऽयं नित्यानित्यवस्तुविवेकः समुदाहृतः ॥ 20॥
तद्वैराग्यं जिहासा या दर्शनश्रवणादिभिः । (पाठभेदः - जुगुप्सा या)
देहादिब्रह्मपर्यन्ते ह्यनित्ये भोगवस्तुनि ॥ 21॥ (पाठभेदः - भोग्यवस्तुनि)
विरज्य विषयव्राताद्दोषदृष्ट्या मुहुर्मुहुः ।
स्वलक्ष्ये नियतावस्था मनसः शम उच्यते ॥ 22॥
विषयेभ्यः परावर्त्य स्थापनं स्वस्वगोलके ।
उभयेषामिन्द्रियाणां स दमः परिकीर्तितः ।
बाह्यानालम्बनं वृत्तेरेषोपरतिरुत्तमा ॥ 23॥
सहनं सर्वदुःखानामप्रतीकारपूर्वकम् ।
चिन्ताविलापरहितं सा तितिक्षा निगद्यते ॥ 24॥
शास्त्रस्य गुरुवाक्यस्य सत्यबुद्ध्यवधारणम् । (पाठभेदः - सत्यबुद्ध्यावधारणा)
सा श्रद्धा कथिता सद्भिर्यया वस्तूपलभ्यते ॥ 25॥
सर्वदा स्थापनं बुद्धेः शुद्धे ब्रह्मणि सर्वदा । (पाठभेदः - सम्यगास्थापनं)
तत्समाधानमित्युक्तं न तु चित्तस्य लालनम् ॥ 26॥
अहङ्कारादिदेहान्तान् बन्धानज्ञानकल्पितान् ।
स्वस्वरूपावबोधेन मोक्तुमिच्छा मुमुक्षुता ॥ 27॥
मन्दमध्यमरूपापि वैराग्येण शमादिना ।
प्रसादेन गुरोः सेयं प्रवृद्धा सूयते फलम् ॥ 28॥
वैराग्यं च मुमुक्षुत्वं तीव्रं यस्य तु विद्यते ।
तस्मिन्नेवार्थवन्तः स्युः फलवन्तः शमादयः ॥ 29॥
एतयोर्मन्दता यत्र विरक्तत्वमुमुक्षयोः ।
मरौ सलिलवत्तत्र शमादेर्भानमात्रता ॥ 30॥
मोक्षकारणसामग्र्यां भक्तिरेव गरीयसी ।
स्वस्वरूपानुसन्धानं भक्तिरित्यभिधीयते ॥ 31॥
स्वात्मतत्त्वानुसन्धानं भक्तिरित्यपरे जगुः ।
उक्तसाधनसम्पन्नस्तत्त्वजिज्ञासुरात्मनः ।
उपसीदेद्गुरुं प्राज्ञं यस्माद्बन्धविमोक्षणम् ॥ 32॥
श्रोत्रियोऽवृजिनोऽकामहतो यो ब्रह्मवित्तमः ।
ब्रह्मण्युपरतः शान्तो निरिन्धन इवानलः ।
अहेतुकदयासिन्धुर्बन्धुरानमतां सताम् ॥ 33॥
तमाराध्य गुरुं भक्त्या प्रह्वप्रश्रयसेवनैः । (पाठभेदः - प्रह्वः)
प्रसन्नं तमनुप्राप्य पृच्छेज्ज्ञातव्यमात्मनः ॥ 34॥
स्वामिन्नमस्ते नतलोकबन्धो
कारुण्यसिन्धो पतितं भवाब्धौ ।
मामुद्धरात्मीयकटाक्षदृष्ट्या
ऋज्व्यातिकारुण्यसुधाभिवृष्ट्या ॥ 35॥
दुर्वारसंसारदवाग्नितप्तं
दोधूयमानं दुरदृष्टवातैः ।
भीतं प्रपन्नं परिपाहि मृत्योः
शरण्यमन्यद्यदहं न जाने ॥ 36॥ (पाठभेदः - अन्यं)
शान्ता महान्तो निवसन्ति सन्तो
वसन्तवल्लोकहितं चरन्तः ।
तीर्णाः स्वयं भीमभवार्णवं जना-
नहेतुनान्यानपि तारयन्तः ॥ 37॥
अयं स्वभावः स्वत एव यत्पर-
श्रमापनोदप्रवणं महात्मनाम् ।
सुधांशुरेष स्वयमर्ककर्कश-
प्रभाभितप्तामवति क्षितिं किल ॥ 38॥
ब्रह्मानन्दरसानुभूतिकलितैः पूतैः सुशीतैर्युतै- (पाठभेदः - सुशीतैः सितैः)
र्युष्मद्वाक्कलशोज्झितैः श्रुतिसुखैर्वाक्यामृतैः सेचय ।
सन्तप्तं भवतापदावदहनज्वालाभिरेनं प्रभो
धन्यास्ते भवदीक्षणक्षणगतेः पात्रीकृताः स्वीकृताः ॥ 39॥
कथं तरेयं भवसिन्धुमेतं
का वा गतिर्मे कतमोऽस्त्युपायः ।
जाने न किञ्चित्कृपयाऽव मां प्रभो
संसारदुःखक्षतिमातनुष्व ॥ 40॥
तथा वदन्तं शरणागतं स्वं
संसारदावानलतापतप्तम् ।
निरीक्ष्य कारुण्यरसार्द्रदृष्ट्या
दद्यादभीतिं सहसा महात्मा ॥ 41॥
विद्वान् स तस्मा उपसत्तिमीयुषे
मुमुक्षवे साधु यथोक्तकारिणे ।
प्रशान्तचित्ताय शमान्विताय
तत्त्वोपदेशं कृपयैव कुर्यात् ॥ 42॥
मा भैष्ट विद्वंस्तव नास्त्यपायः
संसारसिन्धोस्तरणेऽस्त्युपायः ।
येनैव याता यतयोऽस्य पारं
तमेव मार्गं तव निर्दिशामि ॥ 43॥
अस्त्युपायो महान्कश्चित्संसारभयनाशनः ।
तेन तीर्त्वा भवाम्भोधिं परमानन्दमाप्स्यसि ॥ 44॥
वेदान्तार्थविचारेण जायते ज्ञानमुत्तमम् ।
तेनात्यन्तिकसंसारदुःखनाशो भवत्यनु ॥ 45॥
श्रद्धाभक्तिध्यानयोगान्मुमुक्षोः
मुक्तेर्हेतून्वक्ति साक्षाच्छ्रुतेर्गीः ।
यो वा एतेष्वेव तिष्ठत्यमुष्य
मोक्षोऽविद्याकल्पिताद्देहबन्धात् ॥ 46॥
अज्ञानयोगात्परमात्मनस्तव
ह्यनात्मबन्धस्तत एव संसृतिः ।
तयोर्विवेकोदितबोधवह्निः
अज्ञानकार्यं प्रदहेत्समूलम् ॥ 47॥
शिष्य उवाच ।
कृपया श्रूयतां स्वामिन्प्रश्नोऽयं क्रियते मया ।
यदुत्तरमहं श्रुत्वा कृतार्थः स्यां भवन्मुखात् ॥ 48॥
को नाम बन्धः कथमेष आगतः
कथं प्रतिष्ठास्य कथं विमोक्षः ।
कोऽसावनात्मा परमः क आत्मा
तयोर्विवेकः कथमेतदुच्यताम् ॥ 49॥
श्रीगुरुवाच ।
धन्योऽसि कृतकृत्योऽसि पावितं ते कुलं त्वया । (पाठभेदः - पावितं)
यदविद्याबन्धमुक्त्या ब्रह्मीभवितुमिच्छसि ॥ 50॥
ऋणमोचनकर्तारः पितुः सन्ति सुतादयः ।
बन्धमोचनकर्ता तु स्वस्मादन्यो न कश्चन ॥ 51॥
मस्तकन्यस्तभारादेर्दुःखमन्यैर्निवार्यते ।
क्षुधादिकृतदुःखं तु विना स्वेन न केनचित् ॥ 52॥
पथ्यमौषधसेवा च क्रियते येन रोगिणा ।
आरोग्यसिद्धिर्दृष्टाऽस्य नान्यानुष्ठितकर्मणा ॥ 53॥
वस्तुस्वरूपं स्फुटबोधचक्षुषा
स्वेनैव वेद्यं न तु पण्डितेन ।
चन्द्रस्वरूपं निजचक्षुषैव
ज्ञातव्यमन्यैरवगम्यते किम् ॥ 54॥
अविद्याकामकर्मादिपाशबन्धं विमोचितुम् ।
कः शक्नुयाद्विनाऽऽत्मानं कल्पकोटिशतैरपि ॥ 55॥
न योगेन न साङ्ख्येन कर्मणा नो न विद्यया ।
ब्रह्मात्मैकत्वबोधेन मोक्षः सिध्यति नान्यथा ॥ 56॥
वीणाया रूपसौन्दर्यं तन्त्रीवादनसौष्ठवम् ।
प्रजारञ्जनमात्रं तन्न साम्राज्याय कल्पते ॥ 57॥
वाग्वैखरी शब्दझरी शास्त्रव्याख्यानकौशलम् ।
वैदुष्यं विदुषां तद्वद्भुक्तये न तु मुक्तये ॥ 58॥
अविज्ञाते परे तत्त्वे शास्त्राधीतिस्तु निष्फला ।
विज्ञातेऽपि परे तत्त्वे शास्त्राधीतिस्तु निष्फला ॥ 59॥
शब्दजालं महारण्यं चित्तभ्रमणकारणम् ।
अतः प्रयत्नाज्ज्ञातव्यं तत्त्वज्ञैस्तत्त्वमात्मनः ॥ 60॥ तत्त्वज्ञात्तत्त्व
अज्ञानसर्पदष्टस्य ब्रह्मज्ञानौषधं विना ।
किमु वेदैश्च शास्त्रैश्च किमु मन्त्रैः किमौषधैः ॥ 61॥
न गच्छति विना पानं व्याधिरौषधशब्दतः ।
विनाऽपरोक्षानुभवं ब्रह्मशब्दैर्न मुच्यते ॥ 62॥
अकृत्वा दृश्यविलयमज्ञात्वा तत्त्वमात्मनः ।
ब्रह्मशब्दैः कुतो मुक्तिरुक्तिमात्रफलैर्नृणाम् ॥ 63॥ (पाठभेदः - बाह्यशब्दैः)
अकृत्वा शत्रुसंहारमगत्वाखिलभूश्रियम् ।
राजाहमिति शब्दान्नो राजा भवितुमर्हति ॥ 64॥
आप्तोक्तिं खननं तथोपरिशिलाद्युत्कर्षणं स्वीकृतिं (पाठभेदः - परिशिलापाकर्षणं)
निक्षेपः समपेक्षते न हि बहिःशब्दैस्तु निर्गच्छति ।
तद्वद्ब्रह्मविदोपदेशमननध्यानादिभिर्लभ्यते
मायाकार्यतिरोहितं स्वममलं तत्त्वं न दुर्युक्तिभिः ॥ 65॥
तस्मात्सर्वप्रयत्नेन भवबन्धविमुक्तये ।
स्वैरेव यत्नः कर्तव्यो रोगादाविव पण्डितैः ॥ 66॥ (पाठभेदः - रोगादेरिव)
यस्त्वयाद्य कृतः प्रश्नो वरीयाञ्छास्त्रविन्मतः । (पाठभेदः - सम्मतः)
सूत्रप्रायो निगूढार्थो ज्ञातव्यश्च मुमुक्षुभिः ॥ 67॥
शऋणुष्वावहितो विद्वन्यन्मया समुदीर्यते ।
तदेतच्छ्रवणात्सद्यो भवबन्धाद्विमोक्ष्यसे ॥ 68॥
मोक्षस्य हेतुः प्रथमो निगद्यते
वैराग्यमत्यन्तमनित्यवस्तुषु ।
ततः शमश्चापि दमस्तितिक्षा
न्यासः प्रसक्ताखिलकर्मणां भृशम् ॥ 69॥
ततः श्रुतिस्तन्मननं सतत्त्व-
ध्यानं चिरं नित्यनिरन्तरं मुनेः ।
ततोऽविकल्पं परमेत्य विद्वान्
इहैव निर्वाणसुखं समृच्छति ॥ 70॥
यद्बोद्धव्यं तवेदानीमात्मानात्मविवेचनम् ।
तदुच्यते मया सम्यक् श्रुत्वात्मन्यवधारय ॥ 71॥
मज्जास्थिमेदःपलरक्तचर्म-
त्वगाह्वयैर्धातुभिरेभिरन्वितम् ।
पादोरुवक्षोभुजपृष्ठमस्तकैः
अङ्गैरुपाङ्गैरुपयुक्तमेतत् ॥ 72॥
अहम्ममेति प्रथितं शरीरं
मोहास्पदं स्थूलमितीर्यते बुधैः ।
नभोनभस्वद्दहनाम्बुभूमयः
सूक्ष्माणि भूतानि भवन्ति तानि ॥ 73॥
परस्परांशैर्मिलितानि भूत्वा
स्थूलानि च स्थूलशरीरहेतवः ।
मात्रास्तदीया विषया भवन्ति
शब्दादयः पञ्च सुखाय भोक्तुः ॥ 74॥
य एषु मूढा विषयेषु बद्धा
रागोरुपाशेन सुदुर्दमेन ।
आयान्ति निर्यान्त्यध ऊर्ध्वमुच्चैः
स्वकर्मदूतेन जवेन नीताः ॥ 75॥
शब्दादिभिः पञ्चभिरेव पञ्च
पञ्चत्वमापुः स्वगुणेन बद्धाः ।
कुरङ्गमातङ्गपतङ्गमीन-
भृङ्गा नरः पञ्चभिरञ्चितः किम् ॥ 76॥
दोषेण तीव्रो विषयः कृष्णसर्पविषादपि ।
विषं निहन्ति भोक्तारं द्रष्टारं चक्षुषाप्ययम् ॥ 77॥
विषयाशामहापाशाद्यो विमुक्तः सुदुस्त्यजात् ।
स एव कल्पते मुक्त्यै नान्यः षट्शास्त्रवेद्यपि ॥ 78॥
आपातवैराग्यवतो मुमुक्षून्
भवाब्धिपारं प्रतियातुमुद्यतान् ।
आशाग्रहो मज्जयतेऽन्तराले
निगृह्य कण्ठे विनिवर्त्य वेगात् ॥ 79॥
विषयाख्यग्रहो येन सुविरक्त्यसिना हतः ।
स गच्छति भवाम्भोधेः पारं प्रत्यूहवर्जितः ॥ 80॥
विषमविषयमार्गैर्गच्छतोऽनच्छबुद्धेः (पाठभेदः - विषयमार्गे गच्छतो)
प्रतिपदमभियातो मृत्युरप्येष विद्धि । (पाठभेदः - प्रतिपदमभिघातो मृत्युरप्येष सिद्धः)
हितसुजनगुरूक्त्या गच्छतः स्वस्य युक्त्या
प्रभवति फलसिद्धिः सत्यमित्येव विद्धि ॥ 81॥
मोक्षस्य काङ्क्षा यदि वै तवास्ति
त्यजातिदूराद्विषयान्विषं यथा ।
पीयूषवत्तोषदयाक्षमार्जव-
प्रशान्तिदान्तीर्भज नित्यमादरात् ॥ 82॥
अनुक्षणं यत्परिहृत्य कृत्यं
अनाद्यविद्याकृतबन्धमोक्षणम् ।
देहः परार्थोऽयममुष्य पोषणे
यः सज्जते स स्वमनेन हन्ति ॥ 83॥
शरीरपोषणार्थी सन् य आत्मानं दिदृक्षति । (पाठभेदः - दिदृक्षते)
ग्राहं दारुधिया धृत्वा नदीं तर्तुं स गच्छति ॥ 84॥ (पाठभेदः - स इच्छति)
मोह एव महामृत्युर्मुमुक्षोर्वपुरादिषु ।
मोहो विनिर्जितो येन स मुक्तिपदमर्हति ॥ 85॥
मोहं जहि महामृत्युं देहदारसुतादिषु ।
यं जित्वा मुनयो यान्ति तद्विष्णोः परमं पदम् ॥ 86॥
त्वङ्मांसरुधिरस्नायुमेदोमज्जास्थिसङ्कुलम् ।
पूर्णं मूत्रपुरीषाभ्यां स्थूलं निन्द्यमिदं वपुः ॥ 87॥
पञ्चीकृतेभ्यो भूतेभ्यः स्थूलेभ्यः पूर्वकर्मणा ।
समुत्पन्नमिदं स्थूलं भोगायतनमात्मनः ।
अवस्था जागरस्तस्य स्थूलार्थानुभवो यतः ॥ 88॥
बाह्येन्द्रियैः स्थूलपदार्थसेवां
स्रक्चन्दनस्त्र्यादिविचित्ररूपाम् ।
करोति जीवः स्वयमेतदात्मना
तस्मात्प्रशस्तिर्वपुषोऽस्य जागरे ॥ 89॥
सर्वोऽपि बाह्यसंसारः पुरुषस्य यदाश्रयः ।
विद्धि देहमिदं स्थूलं गृहवद्गृहमेधिनः ॥ 90॥
स्थूलस्य सम्भवजरामरणानि धर्माः
स्थौल्यादयो बहुविधाः शिशुताद्यवस्थाः ।
वर्णाश्रमादिनियमा बहुधाऽऽमयाः स्युः
पूजावमानबहुमानमुखा विशेषाः ॥ 91॥
बुद्धीन्द्रियाणि श्रवणं त्वगक्षि
घ्राणं च जिह्वा विषयावबोधनात् ।
वाक्पाणिपादा गुदमप्युपस्थः (पाठभेदः - उपस्थं)
कर्मेन्द्रियाणि प्रवणेन कर्मसु ॥ 92॥ (पाठभेदः - प्रवणानि)
निगद्यतेऽन्तःकरणं मनोधीः
अहङ्कृतिश्चित्तमिति स्ववृत्तिभिः ।
मनस्तु सङ्कल्पविकल्पनादिभिः
बुद्धिः पदार्थाध्यवसायधर्मतः ॥ 93॥
अत्राभिमानादहमित्यहङ्कृतिः ।
स्वार्थानुसन्धानगुणेन चित्तम् ॥ 94॥
प्राणापानव्यानोदानसमाना भवत्यसौ प्राणः ।
स्वयमेव वृत्तिभेदाद्विकृतिभेदात्सुवर्णसलिलादिवत् ॥ 95॥ (पाठभेदः - विकृतेर्भेदात्सुवर्णसलिलमिव)
वागादि पञ्च श्रवणादि पञ्च
प्राणादि पञ्चाभ्रमुखानि पञ्च ।
बुद्ध्याद्यविद्यापि च कामकर्मणी
पुर्यष्टकं सूक्ष्मशरीरमाहुः ॥ 96॥
इदं शरीरं शऋणु सूक्ष्मसञ्ज्ञितं
लिङ्गं त्वपञ्चीकृतभूतसम्भवम् ।
सवासनं कर्मफलानुभावकं
स्वाज्ञानतोऽनादिरुपाधिरात्मनः ॥ 97॥
स्वप्नो भवत्यस्य विभक्त्यवस्था
स्वमात्रशेषेण विभाति यत्र ।
स्वप्ने तु बुद्धिः स्वयमेव जाग्रत्
कालीननानाविधवासनाभिः ॥ 98॥
कर्त्रादिभावं प्रतिपद्य राजते
यत्र स्वयं भाति ह्ययं परात्मा । (पाठभेदः - स्वयञ्ज्योतिरयं)
धीमात्रकोपाधिरशेषसाक्षी
न लिप्यते तत्कृतकर्मलेशैः । कर्मलेपैः
यस्मादसङ्गस्तत एव कर्मभिः
न लिप्यते किञ्चिदुपाधिना कृतैः ॥ 99॥
सर्वव्यापृतिकरणं लिङ्गमिदं स्याच्चिदात्मनः पुंसः ।
वास्यादिकमिव तक्ष्णस्तेनैवात्मा भवत्यसङ्गोऽयम् ॥ 100॥
अन्धत्वमन्दत्वपटुत्वधर्माः
सौगुण्यवैगुण्यवशाद्धि चक्षुषः ।
बाधिर्यमूकत्वमुखास्तथैव
श्रोत्रादिधर्मा न तु वेत्तुरात्मनः ॥ 101॥
उच्छ्वासनिःश्वासविजृम्भणक्षु-
त्प्रस्यन्दनाद्युत्क्रमणादिकाः क्रियाः । (पाठभेदः - प्रस्पन्दनाद्य्)
प्राणादिकर्माणि वदन्ति तज्ञाः (पाठभेदः - तज्ज्ञाः)
प्राणस्य धर्मावशनापिपासे ॥ 102॥
अन्तःकरणमेतेषु चक्षुरादिषु वर्ष्मणि ।
अहमित्यभिमानेन तिष्ठत्याभासतेजसा ॥ 103॥
अहङ्कारः स विज्ञेयः कर्ता भोक्ताभिमान्ययम् ।
सत्त्वादिगुणयोगेन चावस्थात्रयमश्नुते ॥ 104॥ (पाठभेदः - योगेनावस्थात्रितयम्श्नुते)
विषयाणामानुकूल्ये सुखी दुःखी विपर्यये ।
सुखं दुःखं च तद्धर्मः सदानन्दस्य नात्मनः ॥ 105॥
आत्मार्थत्वेन हि प्रेयान्विषयो न स्वतः प्रियः ।
स्वत एव हि सर्वेषामात्मा प्रियतमो यतः ।
तत आत्मा सदानन्दो नास्य दुःखं कदाचन ॥ 106॥
यत्सुषुप्तौ निर्विषय आत्मानन्दोऽनुभूयते ।
श्रुतिः प्रत्यक्षमैतिह्यमनुमानं च जाग्रति ॥ 107॥
अव्यक्तनाम्नी परमेशशक्तिः
अनाद्यविद्या त्रिगुणात्मिका परा ।
कार्यानुमेया सुधियैव माया
यया जगत्सर्वमिदं प्रसूयते ॥ 108॥
सन्नाप्यसन्नाप्युभयात्मिका नो
भिन्नाप्यभिन्नाप्युभयात्मिका नो ।
साङ्गाप्यनङ्गा ह्युभयात्मिका नो (पाठभेदः - अनङ्गाप्युभयात्मिका)
महाद्भुताऽनिर्वचनीयरूपा ॥ 109॥
शुद्धाद्वयब्रह्मविबोधनाश्या
सर्पभ्रमो रज्जुविवेकतो यथा ।
रजस्तमःसत्त्वमिति प्रसिद्धा
गुणास्तदीयाः प्रथितैः स्वकार्यैः ॥ 110॥
विक्षेपशक्ती रजसः क्रियात्मिका
यतः प्रवृत्तिः प्रसृता पुराणी ।
रागादयोऽस्याः प्रभवन्ति नित्यं
दुःखादयो ये मनसो विकाराः ॥ 111॥
कामः क्रोधो लोभदम्भाद्यसूया (पाठभेदः - लोभदम्भाभ्यसूया)
अहङ्कारेर्ष्यामत्सराद्यास्तु घोराः ।
धर्मा एते राजसाः पुम्प्रवृत्ति-
र्यस्मादेषा तद्रजो बन्धहेतुः ॥ 112॥ (पाठभेदः - यस्मादेतत्तद्रजो)
एषाऽऽवृतिर्नाम तमोगुणस्य
शक्तिर्मया वस्त्ववभासतेऽन्यथा । शक्तिर्यया
सैषा निदानं पुरुषस्य संसृतेः
विक्षेपशक्तेः प्रवणस्य हेतुः ॥ 113॥ (पाठभेदः - प्रसरस्य)
प्रज्ञावानपि पण्डितोऽपि चतुरोऽप्यत्यन्तसूक्ष्मात्मदृग्- (पाठभेदः - सूक्ष्मार्थदृग्)
व्यालीढस्तमसा न वेत्ति बहुधा सम्बोधितोऽपि स्फुटम् ।
भ्रान्त्यारोपितमेव साधु कलयत्यालम्बते तद्गुणान्
हन्तासौ प्रबला दुरन्ततमसः शक्तिर्महत्यावृतिः ॥ 114॥
अभावना वा विपरीतभावनाऽ- (पाठभेदः - विपरीतभावना)
सम्भावना विप्रतिपत्तिरस्याः ।
संसर्गयुक्तं न विमुञ्चति ध्रुवं
विक्षेपशक्तिः क्षपयत्यजस्रम् ॥ 115॥
अज्ञानमालस्यजडत्वनिद्रा-
प्रमादमूढत्वमुखास्तमोगुणाः ।
एतैः प्रयुक्तो न हि वेत्ति किञ्चित्
निद्रालुवत्स्तम्भवदेव तिष्ठति ॥ 116॥
सत्त्वं विशुद्धं जलवत्तथापि
ताभ्यां मिलित्वा सरणाय कल्पते ।
यत्रात्मबिम्बः प्रतिबिम्बितः सन्
प्रकाशयत्यर्क इवाखिलं जडम् ॥ 117॥
मिश्रस्य सत्त्वस्य भवन्ति धर्माः
त्वमानिताद्या नियमा यमाद्याः ।
श्रद्धा च भक्तिश्च मुमुक्षुता च
दैवी च सम्पत्तिरसन्निवृत्तिः ॥ 118॥
विशुद्धसत्त्वस्य गुणाः प्रसादः
स्वात्मानुभूतिः परमा प्रशान्तिः ।
तृप्तिः प्रहर्षः परमात्मनिष्ठा
यया सदानन्दरसं समृच्छति ॥ 119॥
अव्यक्तमेतत्त्रिगुणैर्निरुक्तं
तत्कारणं नाम शरीरमात्मनः ।
सुषुप्तिरेतस्य विभक्त्यवस्था
प्रलीनसर्वेन्द्रियबुद्धिवृत्तिः ॥ 120॥
सर्वप्रकारप्रमितिप्रशान्तिः
बीजात्मनावस्थितिरेव बुद्धेः ।
सुषुप्तिरेतस्य किल प्रतीतिः (पाठभेदः - सुषुप्तिरत्रास्य)
किञ्चिन्न वेद्मीति जगत्प्रसिद्धेः ॥ 121॥
देहेन्द्रियप्राणमनोऽहमादयः
सर्वे विकारा विषयाः सुखादयः ।
व्योमादिभूतान्यखिलं च विश्वं
अव्यक्तपर्यन्तमिदं ह्यनात्मा ॥ 122॥
माया मायाकार्यं सर्वं महदादिदेहपर्यन्तम् ।
असदिदमनात्मतत्त्वं विद्धि त्वं मरुमरीचिकाकल्पम् ॥ 123॥
अथ ते सम्प्रवक्ष्यामि स्वरूपं परमात्मनः ।
यद्विज्ञाय नरो बन्धान्मुक्तः कैवल्यमश्नुते ॥ 124॥
अस्ति कश्चित्स्वयं नित्यमहम्प्रत्ययलम्बनः ।
अवस्थात्रयसाक्षी सन्पञ्चकोशविलक्षणः ॥ 125॥
यो विजानाति सकलं जाग्रत्स्वप्नसुषुप्तिषु ।
बुद्धितद्वृत्तिसद्भावमभावमहमित्ययम् ॥ 126॥
यः पश्यति स्वयं सर्वं यं न पश्यति कश्चन । (पाठभेदः - किञ्चन)
यश्चेतयति बुद्ध्यादि न तद्यं चेतयत्ययम् ॥ 127॥
येन विश्वमिदं व्याप्तं यं न व्याप्नोति किञ्चन ।
आभारूपमिदं सर्वं यं भान्तमनुभात्ययम् ॥ 128॥
यस्य सन्निधिमात्रेण देहेन्द्रियमनोधियः ।
विषयेषु स्वकीयेषु वर्तन्ते प्रेरिता इव ॥ 129॥
अहङ्कारादिदेहान्ता विषयाश्च सुखादयः ।
वेद्यन्ते घटवद्येन नित्यबोधस्वरूपिणा ॥ 130॥
एषोऽन्तरात्मा पुरुषः पुराणो
निरन्तराखण्डसुखानुभूतिः ।
सदैकरूपः प्रतिबोधमात्रो
येनेषिता वागसवश्चरन्ति ॥ 131॥
अत्रैव सत्त्वात्मनि धीगुहायां
अव्याकृताकाश उशत्प्रकाशः । (पाठभेदः - उरुप्रकाशः)
आकाश उच्चै रविवत्प्रकाशते
स्वतेजसा विश्वमिदं प्रकाशयन् ॥ 132॥
ज्ञाता मनोऽहङ्कृतिविक्रियाणां
देहेन्द्रियप्राणकृतक्रियाणाम् ।
अयोऽग्निवत्ताननुवर्तमानो
न चेष्टते नो विकरोति किञ्चन ॥ 133॥
न जायते नो म्रियते न वर्धते
न क्षीयते नो विकरोति नित्यः ।
विलीयमानेऽपि वपुष्यमुष्मि-
न्न लीयते कुम्भ इवाम्बरं स्वयम् ॥ 134॥
प्रकृतिविकृतिभिन्नः शुद्धबोधस्वभावः
सदसदिदमशेषं भासयन्निर्विशेषः ।
विलसति परमात्मा जाग्रदादिष्ववस्था-
स्वहमहमिति साक्षात्साक्षिरूपेण बुद्धेः ॥ 135॥
नियमितमनसामुं त्वं स्वमात्मानमात्म-
न्ययमहमिति साक्षाद्विद्धि बुद्धिप्रसादात् ।
जनिमरणतरङ्गापारसंसारसिन्धुं
प्रतर भव कृतार्थो ब्रह्मरूपेण संस्थः ॥ 136॥
अत्रानात्मन्यहमिति मतिर्बन्ध एषोऽस्य पुंसः
प्राप्तोऽज्ञानाज्जननमरणक्लेशसम्पातहेतुः ।
येनैवायं वपुरिदमसत्सत्यमित्यात्मबुद्ध्या
पुष्यत्युक्षत्यवति विषयैस्तन्तुभिः कोशकृद्वत् ॥ 137॥
अतस्मिंस्तद्बुद्धिः प्रभवति विमूढस्य तमसा
विवेकाभावाद्वै स्फुरति भुजगे रज्जुधिषणा ।
ततोऽनर्थव्रातो निपतति समादातुरधिकः
ततो योऽसद्ग्राहः स हि भवति बन्धः शऋणु सखे ॥ 138॥
अखण्डनित्याद्वयबोधशक्त्या
स्फुरन्तमात्मानमनन्तवैभवम् ।
समावृणोत्यावृतिशक्तिरेषा
तमोमयी राहुरिवार्कबिम्बम् ॥ 139॥
तिरोभूते स्वात्मन्यमलतरतेजोवति पुमान्
अनात्मानं मोहादहमिति शरीरं कलयति ।
ततः कामक्रोधप्रभृतिभिरमुं बन्धनगुणैः (पाठभेदः - बन्धकगुणैः)
परं विक्षेपाख्या रजस उरुशक्तिर्व्यथयति ॥ 140॥
महामोहग्राहग्रसनगलितात्मावगमनो
धियो नानावस्थां स्वयमभिनयंस्तद्गुणतया । (पाठभेदः - नानावस्थाः)
अपारे संसारे विषयविषपूरे जलनिधौ
निमज्योन्मज्यायं भ्रमति कुमतिः कुत्सितगतिः ॥ 141॥
भानुप्रभासञ्जनिताभ्रपङ्क्तिः
भानुं तिरोधाय विजृम्भते यथा ।
आत्मोदिताहङ्कृतिरात्मतत्त्वं
तथा तिरोधाय विजृम्भते स्वयम् ॥ 142॥
कवलितदिननाथे दुर्दिने सान्द्रमेघैः
व्यथयति हिमझञ्झावायुरुग्रो यथैतान् ।
अविरततमसाऽऽत्मन्यावृते मूढबुद्धिं
क्षपयति बहुदुःखैस्तीव्रविक्षेपशक्तिः ॥ 143॥
एताभ्यामेव शक्तिभ्यां बन्धः पुंसः समागतः ।
याभ्यां विमोहितो देहं मत्वाऽऽत्मानं भ्रमत्ययम् ॥ 144॥
बीजं संसृतिभूमिजस्य तु तमो देहात्मधीरङ्कुरो
रागः पल्लवमम्बु कर्म तु वपुः स्कन्धोऽसवः शाखिकाः ।
अग्राणीन्द्रियसंहतिश्च विषयाः पुष्पाणि दुःखं फलं
नानाकर्मसमुद्भवं बहुविधं भोक्तात्र जीवः खगः ॥ 145॥
अज्ञानमूलोऽयमनात्मबन्धो
नैसर्गिकोऽनादिरनन्त ईरितः ।
जन्माप्ययव्याधिजरादिदुःख-
प्रवाहपातं जनयत्यमुष्य ॥ 146॥
नास्त्रैर्न शस्त्रैरनिलेन वह्निना
छेत्तुं न शक्यो न च कर्मकोटिभिः ।
विवेकविज्ञानमहासिना विना
धातुः प्रसादेन शितेन मञ्जुना ॥ 147॥
श्रुतिप्रमाणैकमतेः स्वधर्म
निष्ठा तयैवात्मविशुद्धिरस्य ।
विशुद्धबुद्धेः परमात्मवेदनं
तेनैव संसारसमूलनाशः ॥ 148॥
कोशैरन्नमयाद्यैः पञ्चभिरात्मा न संवृतो भाति ।
निजशक्तिसमुत्पन्नैः शैवालपटलैरिवाम्बु वापीस्थम् ॥ 149॥
तच्छैवालापनये सम्यक् सलिलं प्रतीयते शुद्धम् ।
तृष्णासन्तापहरं सद्यः सौख्यप्रदं परं पुंसः ॥ 150॥
पञ्चानामपि कोशानामपवादे विभात्ययं शुद्धः ।
नित्यानन्दैकरसः प्रत्यग्रूपः परः स्वयञ्ज्योतिः ॥ 151॥
आत्मानात्मविवेकः कर्तव्यो बन्धमुक्तये विदुषा ।
तेनैवानन्दी भवति स्वं विज्ञाय सच्चिदानन्दम् ॥ 152॥
मुञ्जादिषीकामिव दृश्यवर्गात्
प्रत्यञ्चमात्मानमसङ्गमक्रियम् ।
विविच्य तत्र प्रविलाप्य सर्वं
तदात्मना तिष्ठति यः स मुक्तः ॥ 153॥
देहोऽयमन्नभवनोऽन्नमयस्तु कोश- (पाठभेदः - कोशो)
श्चान्नेन जीवति विनश्यति तद्विहीनः । (पाठभेदः - ह्यन्नेन)
त्वक्चर्ममांसरुधिरास्थिपुरीषराशि-
र्नायं स्वयं भवितुमर्हति नित्यशुद्धः ॥ 154॥
पूर्वं जनेरधिमृतेरपि नायमस्ति (पाठभेदः - जनेरपिमृतेरथ)
जातक्षणः क्षणगुणोऽनियतस्वभावः ।
नैको जडश्च घटवत्परिदृश्यमानः
स्वात्मा कथं भवति भावविकारवेत्ता ॥ 155॥
पाणिपादादिमान्देहो नात्मा व्यङ्गेऽपि जीवनात् ।
तत्तच्छक्तेरनाशाच्च न नियम्यो नियामकः ॥ 156॥
देहतद्धर्मतत्कर्मतदवस्थादिसाक्षिणः ।
सत एव स्वतःसिद्धं तद्वैलक्षण्यमात्मनः ॥ 157॥
शल्यराशिर्मांसलिप्तो मलपूर्णोऽतिकश्मलः ।
कथं भवेदयं वेत्ता स्वयमेतद्विलक्षणः ॥ 158॥
त्वङ्मांसमेदोऽस्थिपुरीषराशा-
वहम्मतिं मूढजनः करोति ।
विलक्षणं वेत्ति विचारशीलो
निजस्वरूपं परमार्थभूतम् ॥ 159॥
देहोऽहमित्येव जडस्य बुद्धिः
देहे च जीवे विदुषस्त्वहन्धीः ।
विवेकविज्ञानवतो महात्मनो
ब्रह्माहमित्येव मतिः सदात्मनि ॥ 160॥
अत्रात्मबुद्धिं त्यज मूढबुद्धे
त्वङ्मांसमेदोऽस्थिपुरीषराशौ ।
सर्वात्मनि ब्रह्मणि निर्विकल्पे
कुरुष्व शान्तिं परमां भजस्व ॥ 161॥
देहेन्द्रियादावसति भ्रमोदितां
विद्वानहन्तां न जहाति यावत् ।
तावन्न तस्यास्ति विमुक्तिवार्ता-
प्यस्त्वेष वेदान्तनयान्तदर्शी ॥ 162॥
छायाशरीरे प्रतिबिम्बगात्रे
यत्स्वप्नदेहे हृदि कल्पिताङ्गे ।
यथात्मबुद्धिस्तव नास्ति काचि-
ज्जीवच्छरीरे च तथैव माऽस्तु ॥ 163॥
देहात्मधीरेव नृणामसद्धियां
जन्मादिदुःखप्रभवस्य बीजम् ।
यतस्ततस्त्वं जहि तां प्रयत्नात्
त्यक्ते तु चित्ते न पुनर्भवाशा ॥ 164॥
कर्मेन्द्रियैः पञ्चभिरञ्चितोऽयं
प्राणो भवेत्प्राणमयस्तु कोशः ॥
येनात्मवानन्नमयोऽनुपूर्णः
प्रवर्ततेऽसौ सकलक्रियासु ॥ 165॥
नैवात्मापि प्राणमयो वायुविकारो (पाठभेदः - नैवात्मायं)
गन्ताऽऽगन्ता वायुवदन्तर्बहिरेषः ।
यस्मात्किञ्चित्क्वापि न वेत्तीष्टमनिष्टं
स्वं वान्यं वा किञ्चन नित्यं परतन्त्रः ॥ 166॥
ज्ञानेन्द्रियाणि च मनश्च मनोमयः स्यात्
कोशो ममाहमिति वस्तुविकल्पहेतुः ।
सञ्ज्ञादिभेदकलनाकलितो बलीयां-
स्तत्पूर्वकोशमभिपूर्य विजृम्भते यः ॥ 167॥ (पाठभेदः - अनुपूर्य)
पञ्चेन्द्रियैः पञ्चभिरेव होतृभिः
प्रचीयमानो विषयाज्यधारया ।
जाज्वल्यमानो बहुवासनेन्धनैः
मनोमयाग्निर्दहति प्रपञ्चम् ॥ 168॥ (पाठभेदः - मनोमयोऽग्निर्दहति)
न ह्यस्त्यविद्या मनसोऽतिरिक्ता
मनो ह्यविद्या भवबन्धहेतुः ।
तस्मिन्विनष्टे सकलं विनष्टं
विजृम्भितेऽस्मिन्सकलं विजृम्भते ॥ 169॥
स्वप्नेऽर्थशून्ये सृजति स्वशक्त्या
भोक्त्रादिविश्वं मन एव सर्वम् ।
तथैव जाग्रत्यपि नो विशेषः
तत्सर्वमेतन्मनसो विजृम्भणम् ॥ 170॥
सुषुप्तिकाले मनसि प्रलीने
नैवास्ति किञ्चित्सकलप्रसिद्धेः ।
अतो मनःकल्पित एव पुंसः
संसार एतस्य न वस्तुतोऽस्ति ॥ 171॥
वायुनाऽऽनीयते मेघः पुनस्तेनैव नीयते । (पाठभेदः - वायुना नीयते मेघः पुनस्तेनैव लीयते)
मनसा कल्प्यते बन्धो मोक्षस्तेनैव कल्प्यते ॥ 172॥
देहादिसर्वविषये परिकल्प्य रागं
बध्नाति तेन पुरुषं पशुवद्गुणेन ।
वैरस्यमत्र विषवत् सुविधाय पश्चाद्
एनं विमोचयति तन्मन एव बन्धात् ॥ 173॥
तस्मान्मनः कारणमस्य जन्तोः
बन्धस्य मोक्षस्य च वा विधाने ।
बन्धस्य हेतुर्मलिनं रजोगुणैः
मोक्षस्य शुद्धं विरजस्तमस्कम् ॥ 174॥
विवेकवैराग्यगुणातिरेका-
च्छुद्धत्वमासाद्य मनो विमुक्त्यै ।
भवत्यतो बुद्धिमतो मुमुक्षो-
स्ताभ्यां दृढाभ्यां भवितव्यमग्रे ॥ 175॥
मनो नाम महाव्याघ्रो विषयारण्यभूमिषु ।
चरत्यत्र न गच्छन्तु साधवो ये मुमुक्षवः ॥ 176॥
मनः प्रसूते विषयानशेषान्
स्थूलात्मना सूक्ष्मतया च भोक्तुः ।
शरीरवर्णाश्रमजातिभेदान्
गुणक्रियाहेतुफलानि नित्यम् ॥ 177॥
असङ्गचिद्रूपममुं विमोह्य
देहेन्द्रियप्राणगुणैर्निबद्ध्य ।
अहम्ममेति भ्रमयत्यजस्रं
मनः स्वकृत्येषु फलोपभुक्तिषु ॥ 178॥
अध्यासदोषात्पुरुषस्य संसृतिः (पाठभेदः - अध्यासयोगात्)
अध्यासबन्धस्त्वमुनैव कल्पितः ।
रजस्तमोदोषवतोऽविवेकिनो
जन्मादिदुःखस्य निदानमेतत् ॥ 179॥
अतः प्राहुर्मनोऽविद्यां पण्डितास्तत्त्वदर्शिनः ।
येनैव भ्राम्यते विश्वं वायुनेवाभ्रमण्डलम् ॥ 180॥
तन्मनःशोधनं कार्यं प्रयत्नेन मुमुक्षुणा ।
विशुद्धे सति चैतस्मिन्मुक्तिः करफलायते ॥ 181॥
मोक्षैकसक्त्या विषयेषु रागं
निर्मूल्य सन्न्यस्य च सर्वकर्म ।
सच्छ्रद्धया यः श्रवणादिनिष्ठो
रजःस्वभावं स धुनोति बुद्धेः ॥ 182॥
मनोमयो नापि भवेत्परात्मा
ह्याद्यन्तवत्त्वात्परिणामिभावात् ।
दुःखात्मकत्वाद्विषयत्वहेतोः
द्रष्टा हि दृश्यात्मतया न दृष्टः ॥ 183॥
बुद्धिर्बुद्धीन्द्रियैः सार्धं सवृत्तिः कर्तृलक्षणः ।
विज्ञानमयकोशः स्यात्पुंसः संसारकारणम् ॥ 184॥
अनुव्रजच्चित्प्रतिबिम्बशक्तिः
विज्ञानसञ्ज्ञः प्रकृतेर्विकारः ।
ज्ञानक्रियावानहमित्यजस्रं
देहेन्द्रियादिष्वभिमन्यते भृशम् ॥ 185॥
अनादिकालोऽयमहंस्वभावो
जीवः समस्तव्यवहारवोढा ।
करोति कर्माण्यपि पूर्ववासनः (पाठभेदः - कर्माण्यनु)
पुण्यान्यपुण्यानि च तत्फलानि ॥ 186॥
भुङ्क्ते विचित्रास्वपि योनिषु व्रज-
न्नायाति निर्यात्यध ऊर्ध्वमेषः ।
अस्यैव विज्ञानमयस्य जाग्रत्-
स्वप्नाद्यवस्थाः सुखदुःखभोगः ॥ 187॥
देहादिनिष्ठाश्रमधर्मकर्म-
गुणाभिमानः सततं ममेति ।
विज्ञानकोशोऽयमतिप्रकाशः
प्रकृष्टसान्निध्यवशात्परात्मनः ।
अतो भवत्येष उपाधिरस्य
यदात्मधीः संसरति भ्रमेण ॥ 188॥
योऽयं विज्ञानमयः प्राणेषु हृदि स्फुरत्ययं ज्योतिः । (पाठभेदः - स्फुरत्स्वयञ्ज्योतिः)
कूटस्थः सन्नात्मा कर्ता भोक्ता भवत्युपाधिस्थः ॥ 189॥
स्वयं परिच्छेदमुपेत्य बुद्धेः
तादात्म्यदोषेण परं मृषात्मनः ।
सर्वात्मकः सन्नपि वीक्षते स्वयं
स्वतः पृथक्त्वेन मृदो घटानिव ॥ 190॥
उपाधिसम्बन्धवशात्परात्मा
ह्युपाधिधर्माननुभाति तद्गुणः । (पाठभेदः - ऽप्युपाधि)
अयोविकारानविकारिवह्निवत्
सदैकरूपोऽपि परः स्वभावात् ॥ 191॥
शिष्य उवाच ।
भ्रमेणाप्यन्यथा वाऽस्तु जीवभावः परात्मनः ।
तदुपाधेरनादित्वान्नानादेर्नाश इष्यते ॥ 192॥
अतोऽस्य जीवभावोऽपि नित्या भवति संसृतिः ।
न निवर्तेत तन्मोक्षः कथं मे श्रीगुरो वद ॥ 193॥
श्रीगुरुरुवाच ।
सम्यक्पृष्टं त्वया विद्वन्सावधानेन तच्छृणु ।
प्रामाणिकी न भवति भ्रान्त्या मोहितकल्पना ॥ 194॥
भ्रान्तिं विना त्वसङ्गस्य निष्क्रियस्य निराकृतेः ।
न घटेतार्थसम्बन्धो नभसो नीलतादिवत् ॥ 195॥
स्वस्य द्रष्टुर्निर्गुणस्याक्रियस्य
प्रत्यग्बोधानन्दरूपस्य बुद्धेः ।
भ्रान्त्या प्राप्तो जीवभावो न सत्यो
मोहापाये नास्त्यवस्तुस्वभावात् ॥ 196॥
यावद्भ्रान्तिस्तावदेवास्य सत्ता
मिथ्याज्ञानोज्जृम्भितस्य प्रमादात् ।
रज्ज्वां सर्पो भ्रान्तिकालीन एव
भ्रान्तेर्नाशे नैव सर्पोऽपि तद्वत् ॥ 197॥ (पाठभेदः - सर्पोऽस्ति)
अनादित्वमविद्यायाः कार्यस्यापि तथेष्यते ।
उत्पन्नायां तु विद्यायामाविद्यकमनाद्यपि ॥ 198॥
प्रबोधे स्वप्नवत्सर्वं सहमूलं विनश्यति ।
अनाद्यपीदं नो नित्यं प्रागभाव इव स्फुटम् ॥ 199॥
अनादेरपि विध्वंसः प्रागभावस्य वीक्षितः ।
यद्बुद्ध्युपाधिसम्बन्धात्परिकल्पितमात्मनि ॥ 200॥
जीवत्वं न ततोऽन्यस्तु स्वरूपेण विलक्षणः । (पाठभेदः - ततोऽन्यत्तु)
सम्बन्धस्त्वात्मनो बुद्ध्या मिथ्याज्ञानपुरःसरः ॥ 201॥ (पाठभेदः - सम्बन्धः स्वात्मनो)
विनिवृत्तिर्भवेत्तस्य सम्यग्ज्ञानेन नान्यथा ।
ब्रह्मात्मैकत्वविज्ञानं सम्यग्ज्ञानं श्रुतेर्मतम् ॥ 202॥
तदात्मानात्मनोः सम्यग्विवेकेनैव सिध्यति ।
ततो विवेकः कर्तव्यः प्रत्यगात्मसदात्मनोः ॥ 203॥ (पाठभेदः - प्रत्यगात्मासदात्मनोः)
जलं पङ्कवदत्यन्तं पङ्कापाये जलं स्फुटम् । (पाठभेदः - पङ्कवदस्पष्टं)
यथा भाति तथात्मापि दोषाभावे स्फुटप्रभः ॥ 204॥
असन्निवृत्तौ तु सदात्मना स्फुटं
प्रतीतिरेतस्य भवेत्प्रतीचः ।
ततो निरासः करणीय एव
सदात्मनः साध्वहमादिवस्तुनः ॥ 205॥ (पाठभेदः - असदात्मनः)
अतो नायं परात्मा स्याद्विज्ञानमयशब्दभाक् ।
विकारित्वाज्जडत्वाच्च परिच्छिन्नत्वहेतुतः ।
दृश्यत्वाद्व्यभिचारित्वान्नानित्यो नित्य इष्यते ॥ 206॥
आनन्दप्रतिबिम्बचुम्बिततनुर्वृत्तिस्तमोजृम्भिता
स्यादानन्दमयः प्रियादिगुणकः स्वेष्टार्थलाभोदयः ।
पुण्यस्यानुभवे विभाति कृतिनामानन्दरूपः स्वयं
सर्वो नन्दति यत्र साधु तनुभृन्मात्रः प्रयत्नं विना ॥ 207॥ (पाठभेदः - भूत्वा नन्दति)
आनन्दमयकोशस्य सुषुप्तौ स्फूर्तिरुत्कटा ।
स्वप्नजागरयोरीषदिष्टसन्दर्शनादिना ॥ 208॥
नैवायमानन्दमयः परात्मा
सोपाधिकत्वात्प्रकृतेर्विकारात् ।
कार्यत्वहेतोः सुकृतक्रियाया
विकारसङ्घातसमाहितत्वात् ॥ 209॥
पञ्चानामपि कोशानां निषेधे युक्तितः श्रुतेः । (पाठभेदः - युक्तितः कृते)
तन्निषेधावधि साक्षी बोधरूपोऽवशिष्यते ॥ 210॥ (पाठभेदः - तन्निषेधावधिः)
योऽयमात्मा स्वयञ्ज्योतिः पञ्चकोशविलक्षणः ।
अवस्थात्रयसाक्षी सन्निर्विकारो निरञ्जनः ।
सदानन्दः स विज्ञेयः स्वात्मत्वेन विपश्चिता ॥ 211॥
शिष्य उवाच ।
मिथ्यात्वेन निषिद्धेषु कोशेष्वेतेषु पञ्चसु ।
सर्वाभावं विना किञ्चिन्न पश्याम्यत्र हे गुरो ।
विज्ञेयं किमु वस्त्वस्ति स्वात्मनाऽऽत्मविपश्चिता ॥ 212॥ (पाठभेदः - स्वात्मनात्र विपश्चिता)
श्रीगुरुरुवाच ।
सत्यमुक्तं त्वया विद्वन्निपुणोऽसि विचारणे ।
अहमादिविकारास्ते तदभावोऽयमप्यनु ॥ 213॥ (पाठभेदः - ऽयमप्यथ)
सर्वे येनानुभूयन्ते यः स्वयं नानुभूयते ।
तमात्मानं वेदितारं विद्धि बुद्ध्या सुसूक्ष्मया ॥ 214॥
तत्साक्षिकं भवेत्तत्तद्यद्यद्येनानुभूयते ।
कस्याप्यननुभूतार्थे साक्षित्वं नोपयुज्यते ॥ 215॥ (पाठभेदः - नोपपद्यते)
असौ स्वसाक्षिको भावो यतः स्वेनानुभूयते ।
अतः परं स्वयं साक्षात्प्रत्यगात्मा न चेतरः ॥ 216॥
जाग्रत्स्वप्नसुषुप्तिषु स्फुटतरं योऽसौ समुज्जृम्भते
प्रत्यग्रूपतया सदाहमहमित्यन्तः स्फुरन्नैकधा । (पाठभेदः - स्फुरन्नेकधा)
नानाकारविकारभागिन इमान् पश्यन्नहन्धीमुखान् (पाठभेदः - भाजिन)
नित्यानन्दचिदात्मना स्फुरति तं विद्धि स्वमेतं हृदि ॥ 217॥
घटोदके बिम्बितमर्कबिम्ब-
मालोक्य मूढो रविमेव मन्यते ।
तथा चिदाभासमुपाधिसंस्थं
भ्रान्त्याहमित्येव जडोऽभिमन्यते ॥ 218॥
घटं जलं तद्गतमर्कबिम्बं
विहाय सर्वं विनिरीक्ष्यतेऽर्कः । (पाठभेदः - दिवि वीक्ष्यतेऽर्कः)
तटस्थ एतत्त्रितयावभासकः (पाठभेदः - तटस्थितः तत्त्रि)
स्वयम्प्रकाशो विदुषा यथा तथा ॥ 219॥
देहं धियं चित्प्रतिबिम्बमेवं (पाठभेदः - चित्प्रतिबिम्बमेतं)
विसृज्य बुद्धौ निहितं गुहायाम् ।
द्रष्टारमात्मानमखण्डबोधं
सर्वप्रकाशं सदसद्विलक्षणम् ॥ 220॥
नित्यं विभुं सर्वगतं सुसूक्ष्मं
अन्तर्बहिःशून्यमनन्यमात्मनः ।
विज्ञाय सम्यङ्निजरूपमेतत्
पुमान् विपाप्मा विरजो विमृत्युः ॥ 221॥
विशोक आनन्दघनो विपश्चित्
स्वयं कुतश्चिन्न बिभेति कश्चित् ।
नान्योऽस्ति पन्था भवबन्धमुक्तेः
विना स्वतत्त्वावगमं मुमुक्षोः ॥ 222॥
ब्रह्माभिन्नत्वविज्ञानं भवमोक्षस्य कारणम् ।
येनाद्वितीयमानन्दं ब्रह्म सम्पद्यते बुधैः ॥ 223॥ (पाठभेदः - सम्पद्यते बुधः)
ब्रह्मभूतस्तु संसृत्यै विद्वान्नावर्तते पुनः ।
विज्ञातव्यमतः सम्यग्ब्रह्माभिन्नत्वमात्मनः ॥ 224॥
सत्यं ज्ञानमनन्तं ब्रह्म विशुद्धं परं स्वतःसिद्धम् ।
नित्यानन्दैकरसं प्रत्यगभिन्नं निरन्तरं जयति ॥ 225॥
सदिदं परमाद्वैतं स्वस्मादन्यस्य वस्तुनोऽभावात् ।
न ह्यन्यदस्ति किञ्चित् सम्यक् परमार्थतत्त्वबोधदशायाम् ॥ 226॥ (पाठभेदः - परतत्त्वबोधसुदशायाम्)
यदिदं सकलं विश्वं नानारूपं प्रतीतमज्ञानात् ।
तत्सर्वं ब्रह्मैव प्रत्यस्ताशेषभावनादोषम् ॥ 227॥
मृत्कार्यभूतोऽपि मृदो न भिन्नः
कुम्भोऽस्ति सर्वत्र तु मृत्स्वरूपात् ।
न कुम्भरूपं पृथगस्ति कुम्भः
कुतो मृषा कल्पितनाममात्रः ॥ 228॥
केनापि मृद्भिन्नतया स्वरूपं
घटस्य सन्दर्शयितुं न शक्यते ।
अतो घटः कल्पित एव मोहा-
न्मृदेव सत्यं परमार्थभूतम् ॥ 229॥
सद्ब्रह्मकार्यं सकलं सदेवं (पाठभेदः - सदैव)
तन्मात्रमेतन्न ततोऽन्यदस्ति । (पाठभेदः - सन्मात्रमेतन्न)
अस्तीति यो वक्ति न तस्य मोहो
विनिर्गतो निद्रितवत्प्रजल्पः ॥ 230॥
ब्रह्मैवेदं विश्वमित्येव वाणी
श्रौती ब्रूतेऽथर्वनिष्ठा वरिष्ठा ।
तस्मादेतद्ब्रह्ममात्रं हि विश्वं
नाधिष्ठानाद्भिन्नताऽऽरोपितस्य ॥ 231॥
सत्यं यदि स्याज्जगदेतदात्मनोऽ
नन्तत्त्वहानिर्निगमाप्रमाणता ।
असत्यवादित्वमपीशितुः स्या-
न्नैतत्त्रयं साधु हितं महात्मनाम् ॥ 232॥
ईश्वरो वस्तुतत्त्वज्ञो न चाहं तेष्ववस्थितः ।
न च मत्स्थानि भूतानीत्येवमेव व्यचीक्लृपत् ॥ 233॥ (पाठभेदः - व्यचीकथत्)
यदि सत्यं भवेद्विश्वं सुषुप्तावुपलभ्यताम् ।
यन्नोपलभ्यते किञ्चिदतोऽसत्स्वप्नवन्मृषा ॥ 234॥
अतः पृथङ्नास्ति जगत्परात्मनः
पृथक्प्रतीतिस्तु मृषा गुणादिवत् । गुणाहिवत्
आरोपितस्यास्ति किमर्थवत्ताऽ-
धिष्ठानमाभाति तथा भ्रमेण ॥ 235॥
भ्रान्तस्य यद्यद्भ्रमतः प्रतीतं
ब्रह्मैव तत्तद्रजतं हि शुक्तिः ।
इदन्तया ब्रह्म सदैव रूप्यते (पाठभेदः - सदेव)
त्वारोपितं ब्रह्मणि नाममात्रम् ॥ 236॥
अतः परं ब्रह्म सदद्वितीयं
विशुद्धविज्ञानघनं निरञ्जनम् ।
प्रशान्तमाद्यन्तविहीनमक्रियं
निरन्तरानन्दरसस्वरूपम् ॥ 237॥
निरस्तमायाकृतसर्वभेदं
नित्यं सुखं निष्कलमप्रमेयम् । (पाठभेदः - नित्यं ध्रुवं)
अरूपमव्यक्तमनाख्यमव्ययं
ज्योतिः स्वयं किञ्चिदिदं चकास्ति ॥ 238॥
ज्ञातृज्ञेयज्ञानशून्यमनन्तं निर्विकल्पकम् ।
केवलाखण्डचिन्मात्रं परं तत्त्वं विदुर्बुधाः ॥ 239॥
अहेयमनुपादेयं मनोवाचामगोचरम् ।
अप्रमेयमनाद्यन्तं ब्रह्म पूर्णमहं महः ॥ 240॥ (पाठभेदः - पूर्णं महन्महः)
तत्त्वम्पदाभ्यामभिधीयमानयोः
ब्रह्मात्मनोः शोधितयोर्यदीत्थम् । (पाठभेदः - शोधितयोर्यदित्थम्)
श्रुत्या तयोस्तत्त्वमसीति सम्यग्
एकत्वमेव प्रतिपाद्यते मुहुः ॥ 241-
एक्यं तयोर्लक्षितयोर्न वाच्ययोः
निगद्यतेऽन्योन्यविरुद्धधर्मिणोः ।
खद्योतभान्वोरिव राजभृत्ययोः
कूपाम्बुराश्योः परमाणुमेर्वोः ॥ 242॥
तयोर्विरोधोऽयमुपाधिकल्पितो
न वास्तवः कश्चिदुपाधिरेषः ।
ईशस्य माया महदादिकारणं
जीवस्य कार्यं शऋणु पञ्चकोशम् ॥ 243॥ (पाठभेदः - पञ्चकोशाः)
एतावुपाधी परजीवयोस्तयोः
सम्यङ्निरासे न परो न जीवः ।
राज्यं नरेन्द्रस्य भटस्य खेटक्-
स्तयोरपोहे न भटो न राजा ॥ 244॥
अथात आदेश इति श्रुतिः स्वयं
निषेधति ब्रह्मणि कल्पितं द्वयम् ।
श्रुतिप्रमाणानुगृहीतबोधा- (पाठभेदः - प्रमाणानुगृहीतयुक्त्या)
त्तयोर्निरासः करणीय एव ॥ 245॥
नेदं नेदं कल्पितत्वान्न सत्यं
रज्जुदृष्टव्यालवत्स्वप्नवच्च । (पाठभेदः - रज्जौ)
इत्थं दृश्यं साधुयुक्त्या व्यपोह्य
ज्ञेयः पश्चादेकभावस्तयोर्यः ॥ 246॥
ततस्तु तौ लक्षणया सुलक्ष्यौ
तयोरखण्डैकरसत्वसिद्धये ।
नालं जहत्या न तथाऽजहत्या
किन्तूभयार्थात्मिकयैव भाव्यम् ॥ 247॥ (पाठभेदः - भयार्थैकतयैव)
स देवदत्तोऽयमितीह चैकता
विरुद्धधर्मांशमपास्य कथ्यते ।
यथा तथा तत्त्वमसीतिवाक्ये
विरुद्धधर्मानुभयत्र हित्वा ॥ 248॥
संलक्ष्य चिन्मात्रतया सदात्मनोः
अखण्डभावः परिचीयते बुधैः ।
एवं महावाक्यशतेन कथ्यते
ब्रह्मात्मनोरैक्यमखण्डभावः ॥ 249॥
अस्थूलमित्येतदसन्निरस्य
सिद्धं स्वतो व्योमवदप्रतर्क्यम् ।
अतो मृषामात्रमिदं प्रतीतं
जहीहि यत्स्वात्मतया गृहीतम् ।
ब्रह्माहमित्येव विशुद्धबुद्ध्या
विद्धि स्वमात्मानमखण्डबोधम् ॥ 250॥
मृत्कार्यं सकलं घटादि सततं मृन्मात्रमेवाहितं (पाठभेदः - मृन्मात्रमेवाभितः)
तद्वत्सज्जनितं सदात्मकमिदं सन्मात्रमेवाखिलम् ।
यस्मान्नास्ति सतः परं किमपि तत्सत्यं स आत्मा स्वयं
तस्मात्तत्त्वमसि प्रशान्तममलं ब्रह्माद्वयं यत्परम् ॥ 251॥
निद्राकल्पितदेशकालविषयज्ञात्रादि सर्वं यथा
मिथ्या तद्वदिहापि जाग्रति जगत्स्वाज्ञानकार्यत्वतः ।
यस्मादेवमिदं शरीरकरणप्राणाहमाद्यप्यसत्
तस्मात्तत्त्वमसि प्रशान्तममलं ब्रह्माद्वयं यत्परम् ॥ 252॥
यत्र भ्रान्त्या कल्पितं तद्विवेके (पाठभेदः - यद्विवेके)
तत्तन्मात्रं नैव तस्माद्विभिन्नम् ।
स्वप्ने नष्टं स्वप्नविश्वं विचित्रं
स्वस्माद्भिन्नं किन्नु दृष्टं प्रबोधे ॥ 253॥
जातिनीतिकुलगोत्रदूरगं
नामरूपगुणदोषवर्जितम् ।
देशकालविषयातिवर्ति यद्
ब्रह्म तत्त्वमसि भावयात्मनि ॥ 254॥
यत्परं सकलवागगोचरं
गोचरं विमलबोधचक्षुषः ।
शुद्धचिद्घनमनादि वस्तु यद्
ब्रह्म तत्त्वमसि भावयात्मनि ॥ 255॥
षड्भिरूर्मिभिरयोगि योगिहृद्-
भावितं न करणैर्विभावितम् ।
बुद्ध्यवेद्यमनवद्यमस्ति यद् (पाठभेदः - भूति यद्)
ब्रह्म तत्त्वमसि भावयात्मनि ॥ 256॥
भ्रान्तिकल्पितजगत्कलाश्रयं
स्वाश्रयं च सदसद्विलक्षणम् ।
निष्कलं निरुपमानवद्धि यद् (पाठभेदः - निरुपमानमृद्धिमत्)
ब्रह्म तत्त्वमसि भावयात्मनि ॥ 257॥
जन्मवृद्धिपरिणत्यपक्षय-
व्याधिनाशनविहीनमव्ययम् ।
विश्वसृष्ट्यवविघातकारणं (पाठभेदः - वनघातकारणं)
ब्रह्म तत्त्वमसि भावयात्मनि ॥ 258॥
अस्तभेदमनपास्तलक्षणं
निस्तरङ्गजलराशिनिश्चलम् ।
नित्यमुक्तमविभक्तमूर्ति यद्
ब्रह्म तत्त्वमसि भावयात्मनि ॥ 259॥
एकमेव सदनेककारणं
कारणान्तरनिरास्यकारणम् । (पाठभेदः - सकारणम्)
कार्यकारणविलक्षणं स्वयं
ब्रह्म तत्त्वमसि भावयात्मनि ॥ 260॥
निर्विकल्पकमनल्पमक्षरं
यत्क्षराक्षरविलक्षणं परम् ।
नित्यमव्ययसुखं निरञ्जनं
ब्रह्म तत्त्वमसि भावयात्मनि ॥ 261॥
यद्विभाति सदनेकधा भ्रमा-
न्नामरूपगुणविक्रियात्मना ।
हेमवत्स्वयमविक्रियं सदा
ब्रह्म तत्त्वमसि भावयात्मनि ॥ 262॥
यच्चकास्त्यनपरं परात्परं
प्रत्यगेकरसमात्मलक्षणम् ।
सत्यचित्सुखमनन्तमव्ययं
ब्रह्म तत्त्वमसि भावयात्मनि ॥ 263॥
उक्तमर्थमिममात्मनि स्वयं
भावयेत्प्रथितयुक्तिभिर्धिया । (पाठभेदः - भावय प्रथित)
संशयादिरहितं कराम्बुवत्
तेन तत्त्वनिगमो भविष्यति ॥ 264॥
सम्बोधमात्रं परिशुद्धतत्त्वं (पाठभेदः - स्वं बोधमात्रं)
विज्ञाय सङ्घे नृपवच्च सैन्ये ।
तदाश्रयः स्वात्मनि सर्वदा स्थितो (पाठभेदः - तदात्मनैवात्मनि)
विलापय ब्रह्मणि विश्वजातम् ॥ 265॥ (पाठभेदः - दृश्यजातम्)
बुद्धौ गुहायां सदसद्विलक्षणं
ब्रह्मास्ति सत्यं परमद्वितीयम् ।
तदात्मना योऽत्र वसेद्गुहायां
पुनर्न तस्याङ्गगुहाप्रवेशः ॥ 266॥
ज्ञाते वस्तुन्यपि बलवती वासनाऽनादिरेषा
कर्ता भोक्ताप्यहमिति दृढा याऽस्य संसारहेतुः ।
प्रत्यग्दृष्ट्याऽऽत्मनि निवसता सापनेया प्रयत्ना-
न्मुक्तिं प्राहुस्तदिह मुनयो वासनातानवं यत् ॥ 267॥
अहं ममेति यो भावो देहाक्षादावनात्मनि ।
अध्यासोऽयं निरस्तव्यो विदुषा स्वात्मनिष्ठया ॥ 268॥
ज्ञात्वा स्वं प्रत्यगात्मानं बुद्धितद्वृत्तिसाक्षिणम् ।
सोऽहमित्येव सद्वृत्त्याऽनात्मन्यात्ममतिं जहि ॥ 269॥
लोकानुवर्तनं त्यक्त्वा त्यक्त्वा देहानुवर्तनम् ।
शास्त्रानुवर्तनं त्यक्त्वा स्वाध्यासापनयं कुरु ॥ 270॥
लोकवासनया जन्तोः शास्त्रवासनयापि च ।
देहवासनया ज्ञानं यथावन्नैव जायते ॥ 271
संसारकारागृहमोक्षमिच्छो-
रयोमयं पादनिबन्धशऋङ्खलम् । (पाठभेदः - निबद्ध)
वदन्ति तज्ज्ञाः पटु वासनात्रयं
योऽस्माद्विमुक्तः समुपैति मुक्तिम् ॥ 272॥
जलादिसंसर्गवशात्प्रभूत- (पाठभेदः - जलादिसम्पर्कवशात्)
दुर्गन्धधूताऽगरुदिव्यवासना ।
सङ्घर्षणेनैव विभाति सम्य-
ग्विधूयमाने सति बाह्यगन्धे ॥ 273॥
अन्तःश्रितानन्तदुरन्तवासना-
धूलीविलिप्ता परमात्मवासना ।
प्रज्ञातिसङ्घर्षणतो विशुद्धा
प्रतीयते चन्दनगन्धवत् स्फुटम् ॥ 274॥ (पाठभेदः - स्फुटा)
अनात्मवासनाजालैस्तिरोभूतात्मवासना ।
नित्यात्मनिष्ठया तेषां नाशे भाति स्वयं स्फुटम् ॥ 275॥ (पाठभेदः - स्फुटा)
यथा यथा प्रत्यगवस्थितं मनः
तथा तथा मुञ्चति बाह्यवासनाम् । (पाठभेदः - बाह्यवासनाः)
निःशेषमोक्षे सति वासनानां
आत्मानुभूतिः प्रतिबन्धशून्या ॥ 276॥
स्वात्मन्येव सदा स्थित्वा मनो नश्यति योगिनः । (पाठभेदः - स्थित्या)
वासनानां क्षयश्चातः स्वाध्यासापनयं कुरु ॥ 277॥
तमो द्वाभ्यां रजः सत्त्वात्सत्त्वं शुद्धेन नश्यति ।
तस्मात्सत्त्वमवष्टभ्य स्वाध्यासापनयं कुरु ॥ 278॥
प्रारब्धं पुष्यति वपुरिति निश्चित्य निश्चलः ।
धैर्यमालम्ब्य यत्नेन स्वाध्यासापनयं कुरु ॥ 279॥
नाहं जीवः परं ब्रह्मेत्यतद्व्यावृत्तिपूर्वकम् ।
वासनावेगतः प्राप्तस्वाध्यासापनयं कुरु ॥ 280॥
श्रुत्या युक्त्या स्वानुभूत्या ज्ञात्वा सार्वात्म्यमात्मनः ।
क्वचिदाभासतः प्राप्तस्वाध्यासापनयं कुरु ॥ 281॥
अनादानविसर्गाभ्यामीषन्नास्ति क्रिया मुनेः । (पाठभेदः - अन्नादानविसर्गा)
तदेकनिष्ठया नित्यं स्वाध्यासापनयं कुरु ॥ 282॥
तत्त्वमस्यादिवाक्योत्थब्रह्मात्मैकत्वबोधतः ।
ब्रह्मण्यात्मत्वदार्ढ्याय स्वाध्यासापनयं कुरु ॥ 283॥
अहम्भावस्य देहेऽस्मिन्निःशेषविलयावधि ।
सावधानेन युक्तात्मा स्वाध्यासापनयं कुरु ॥ 284॥
प्रतीतिर्जीवजगतोः स्वप्नवद्भाति यावता ।
तावन्निरन्तरं विद्वन्स्वाध्यासापनयं कुरु ॥ 285॥
निद्राया लोकवार्तायाः शब्दादेरपि विस्मृतेः ।
क्वचिन्नावसरं दत्त्वा चिन्तयात्मानमात्मनि ॥ 286॥
मातापित्रोर्मलोद्भूतं मलमांसमयं वपुः ।
त्यक्त्वा चाण्डालवद्दूरं ब्रह्मीभूय कृती भव ॥ 287॥
घटाकाशं महाकाश इवात्मानं परात्मनि ।
विलाप्याखण्डभावेन तूष्णी भव सदा मुने ॥ 288॥ (पाठभेदः - तूष्णीं)
स्वप्रकाशमधिष्ठानं स्वयम्भूय सदात्मना ।
ब्रह्माण्डमपि पिण्डाण्डं त्यज्यतां मलभाण्डवत् ॥ 289॥
चिदात्मनि सदानन्दे देहारूढामहन्धियम् ।
निवेश्य लिङ्गमुत्सृज्य केवलो भव सर्वदा ॥ 290॥
यत्रैष जगदाभासो दर्पणान्तः पुरं यथा ।
तद्ब्रह्माहमिति ज्ञात्वा कृतकृत्यो भविष्यसि ॥ 291॥
यत्सत्यभूतं निजरूपमाद्यं
चिदद्वयानन्दमरूपमक्रियम् ।
तदेत्य मिथ्यावपुरुत्सृजेत (पाठभेदः - सृजैत)
शैलूषवद्वेषमुपात्तमात्मनः ॥ 292॥
सर्वात्मना दृश्यमिदं मृषैव
नैवाहमर्थः क्षणिकत्वदर्शनात् ।
जानाम्यहं सर्वमिति प्रतीतिः
कुतोऽहमादेः क्षणिकस्य सिध्येत् ॥ 293॥
अहम्पदार्थस्त्वहमादिसाक्षी
नित्यं सुषुप्तावपि भावदर्शनात् ।
ब्रूते ह्यजो नित्य इति श्रुतिः स्वयं
तत्प्रत्यगात्मा सदसद्विलक्षणः ॥ 294॥
विकारिणां सर्वविकारवेत्ता
नित्याविकारो भवितुं समर्हति । (पाठभेदः - नित्योऽविकारो)
मनोरथस्वप्नसुषुप्तिषु स्फुटं
पुनः पुनर्दृष्टमसत्त्वमेतयोः ॥ 295॥
अतोऽभिमानं त्यज मांसपिण्डे
पिण्डाभिमानिन्यपि बुद्धिकल्पिते ।
कालत्रयाबाध्यमखण्डबोधं
ज्ञात्वा स्वमात्मानमुपैहि शान्तिम् ॥ 296॥
त्यजाभिमानं कुलगोत्रनाम-
रूपाश्रमेष्वार्द्रशवाश्रितेषु ।
लिङ्गस्य धर्मानपि कर्तृतादीं-
स्त्यक्त्वा भवाखण्डसुखस्वरूपः ॥ 297॥
सन्त्यन्ये प्रतिबन्धाः पुंसः संसारहेतवो दृष्टाः ।
तेषामेवं मूलं प्रथमविकारो भवत्यहङ्कारः ॥ 298॥ (पाठभेदः - तेषामेषां)
यावत्स्यात्स्वस्य सम्बन्धोऽहङ्कारेण दुरात्मना ।
तावन्न लेशमात्रापि मुक्तिवार्ता विलक्षणा ॥ 299॥
अहङ्कारग्रहान्मुक्तः स्वरूपमुपपद्यते ।
चन्द्रवद्विमलः पूर्णः सदानन्दः स्वयम्प्रभः ॥ 300॥
यो वा पुरे सोऽहमिति प्रतीतो (पाठभेदः - पुरैषोऽहमिति)
बुद्ध्या प्रक्लृप्तस्तमसाऽतिमूढया । (पाठभेदः - बुद्ध्याऽविविक्तस्तमसा)
तस्यैव निःशेषतया विनाशे
ब्रह्मात्मभावः प्रतिबन्धशून्यः ॥ 301॥
ब्रह्मानन्दनिधिर्महाबलवताऽहङ्कारघोराहिना
संवेष्ट्यात्मनि रक्ष्यते गुणमयैश्चण्डेस्त्रिभिर्मस्तकैः (पाठभेदः - चण्डै)
विज्ञानाख्यमहासिना श्रुतिमता विच्छिद्य शीर्षत्रयं (पाठभेदः - द्युतिमता)
निर्मूल्याहिमिमं निधिं सुखकरं धीरोऽनुभोक्तुङ्क्षमः ॥ 302॥
यावद्वा यत्किञ्चिद्विषदोषस्फूर्तिरस्ति चेद्देहे ।
कथमारोग्याय भवेत्तद्वदहन्तापि योगिनो मुक्त्यै ॥ 303॥
अहमोऽत्यन्तनिवृत्त्या तत्कृतनानाविकल्पसंहृत्या ।
प्रत्यक्तत्त्वविवेकादिदमहमस्मीति विन्दते तत्त्वम् ॥ 304॥ (पाठभेदः - विवेकादयम्)
अहङ्कारे कर्तर्यहमिति मतिं मुञ्च सहसा (पाठभेदः - अहङ्कर्तर्यस्मिन्नहमिति)
विकारात्मन्यात्मप्रतिफलजुषि स्वस्थितिमुषि ।
यदध्यासात्प्राप्ता जनिमृतिजरादुःखबहुला
प्रतीचश्चिन्मूर्तेस्तव सुखतनोः संसृतिरियम् ॥ 305॥
सदैकरूपस्य चिदात्मनो विभो-
रानन्दमूर्तेरनवद्यकीर्तेः ।
नैवान्यथा क्वाप्यविकारिणस्ते
विनाहमध्यासममुष्य संसृतिः ॥ 306॥
तस्मादहङ्कारमिमं स्वशत्रुं
भोक्तुर्गले कण्टकवत्प्रतीतम् ।
विच्छिद्य विज्ञानमहासिना स्फुटं
भुङ्क्ष्वात्मसाम्राज्यसुखं यथेष्टम् ॥ 307॥
ततोऽहमादेर्विनिवर्त्य वृत्तिं
सन्त्यक्तरागः परमार्थलाभात् ।
तूष्णीं समास्स्वात्मसुखानुभूत्या
पूर्णात्मना ब्रह्मणि निर्विकल्पः ॥ 308॥
समूलकृत्तोऽपि महानहं पुनः
व्युल्लेखितः स्याद्यदि चेतसा क्षणम् ।
सञ्जीव्य विक्षेपशतं करोति
नभस्वता प्रावृषि वारिदो यथा ॥ 309॥
निगृह्य शत्रोरहमोऽवकाशः
क्वचिन्न देयो विषयानुचिन्तया ।
स एव सञ्जीवनहेतुरस्य
प्रक्षीणजम्बीरतरोरिवाम्बु ॥ 310॥
देहात्मना संस्थित एव कामी
विलक्षणः कामयिता कथं स्यात् ।
अतोऽर्थसन्धानपरत्वमेव
भेदप्रसक्त्या भवबन्धहेतुः ॥ 311॥
कार्यप्रवर्धनाद्बीजप्रवृद्धिः परिदृश्यते ।
कार्यनाशाद्बीजनाशस्तस्मात्कार्यं निरोधयेत् ॥ 312॥
वासनावृद्धितः कार्यं कार्यवृद्ध्या च वासना ।
वर्धते सर्वथा पुंसः संसारो न निवर्तते ॥ 313॥
संसारबन्धविच्छित्त्यै तद् द्वयं प्रदहेद्यतिः ।
वासनावृद्धिरेताभ्यां चिन्तया क्रियया बहिः ॥ 314॥ (पाठभेदः - वासना प्रेर्यते ह्यन्तः)
ताभ्यां प्रवर्धमाना सा सूते संसृतिमात्मनः ।
त्रयाणां च क्षयोपायः सर्वावस्थासु सर्वदा ॥ 315॥
सर्वत्र सर्वतः सर्वब्रह्ममात्रावलोकनैः । (पाठभेदः - मात्रावलोकनम्)
सद्भाववासनादार्ढ्यात्तत्त्रयं लयमश्नुते ॥ 316॥
क्रियानाशे भवेच्चिन्तानाशोऽस्माद्वासनाक्षयः ।
वासनाप्रक्षयो मोक्षः सा जीवन्मुक्तिरिष्यते ॥ 317॥ (पाठभेदः - स)
सद्वासनास्फूर्तिविजृम्भणे सति
ह्यसौ विलीनाप्यहमादिवासना । (पाठभेदः - विलीना त्वहमादिवासना)
अतिप्रकृष्टाप्यरुणप्रभायां
विलीयते साधु यथा तमिस्रा ॥ 318॥
तमस्तमःकार्यमनर्थजालं
न दृश्यते सत्युदिते दिनेशे ।
तथाऽद्वयानन्दरसानुभूतौ
नैवास्ति बन्धो न च दुःखगन्धः ॥ 319॥
दृश्यं प्रतीतं प्रविलापयन्सन् (पाठभेदः - प्रविलापयन्स्वयं)
सन्मात्रमानन्दघनं विभावयन् ।
समाहितः सन्बहिरन्तरं वा
कालं नयेथाः सति कर्मबन्धे ॥ 320॥
प्रमादो ब्रह्मनिष्ठायां न कर्तव्यः कदाचन ।
प्रमादो मृत्युरित्याह भगवान्ब्रह्मणः सुतः ॥ 321॥
न प्रमादादनर्थोऽन्यो ज्ञानिनः स्वस्वरूपतः ।
ततो मोहस्ततोऽहन्धीस्ततो बन्धस्ततो व्यथा ॥ 322॥
विषयाभिमुखं दृष्ट्वा विद्वांसमपि विस्मृतिः ।
विक्षेपयति धीदोषैर्योषा जारमिव प्रियम् ॥ 323॥
यथापकृष्टं शैवालं क्षणमात्रं न तिष्ठति ।
आवृणोति तथा माया प्राज्ञं वापि पराङ्मुखम् ॥ 324॥
लक्ष्यच्युतं चेद्यदि चित्तमीषद्
बहिर्मुखं सन्निपतेत्ततस्ततः ।
प्रमादतः प्रच्युतकेलिकन्दुकः
सोपानपङ्क्तौ पतितो यथा तथा ॥ 325॥
विषयेष्वाविशच्चेतः सङ्कल्पयति तद्गुणान् ।
सम्यक्सङ्कल्पनात्कामः कामात्पुंसः प्रवर्तनम् ॥ 326॥
अतः प्रमादान्न परोऽस्ति मृत्युः
विवेकिनो ब्रह्मविदः समाधौ ।
समाहितः सिद्धिमुपैति सम्यक्
समाहितात्मा भव सावधानः ॥ 327॥
ततः स्वरूपविभ्रंशो विभ्रष्टस्तु पतत्यधः ।
पतितस्य विना नाशं पुनर्नारोह ईक्ष्यते ॥ 328॥
सङ्कल्पं वर्जयेत्तस्मात्सर्वानर्थस्य कारणम् ।
अपथ्यानि हि वस्तूनि व्याधिग्रस्तो यथोत्सृजे ।
जीवतो यस्य कैवल्यं विदेहे स च केवलः ।
यत्किञ्चित् पश्यतो भेदं भयं ब्रूते यजुःश्रुतिः ॥ 329॥
यदा कदा वापि विपश्चिदेष
ब्रह्मण्यनन्तेऽप्यणुमात्रभेदम् ।
पश्यत्यथामुष्य भयं तदैव
यद्वीक्षितं भिन्नतया प्रमादात् ॥ 330॥ (पाठभेदः - यदीक्षितं)
श्रुतिस्मृतिन्यायशतैर्निषिद्धे
दृश्येऽत्र यः स्वात्ममतिं करोति ।
उपैति दुःखोपरि दुःखजातं
निषिद्धकर्ता स मलिम्लुचो यथा ॥ 331॥
सत्याभिसन्धानरतो विमुक्तो
महत्त्वमात्मीयमुपैति नित्यम् ।
मिथ्याभिसन्धानरतस्तु नश्येद्
दृष्टं तदेतद्यदचौरचौरयोः ॥ 332॥ (पाठभेदः - चोरचोरयोः)
यतिरसदनुसन्धिं बन्धहेतुं विहाय
स्वयमयमहमस्मीत्यात्मदृष्ट्यैव तिष्ठेत्
सुखयति ननु निष्ठा ब्रह्मणि स्वानुभूत्या
हरति परमविद्याकार्यदुःखं प्रतीतम् ॥ 333॥
बाह्यानुसन्धिः परिवर्धयेत्फलं (पाठभेदः - बाह्याभिसन्धिः)
दुर्वासनामेव ततस्ततोऽधिकाम् ।
ज्ञात्वा विवेकैः परिहृत्य बाह्यं
स्वात्मानुसन्धिं विदधीत नित्यम् ॥ 334॥
बाह्ये निरुद्धे मनसः प्रसन्नता
मनःप्रसादे परमात्मदर्शनम् ।
तस्मिन्सुदृष्टे भवबन्धनाशो
बहिर्निरोधः पदवी विमुक्तेः ॥ 335॥
कः पण्डितः सन्सदसद्विवेकी
श्रुतिप्रमाणः परमार्थदर्शी ।
जानन्हि कुर्यादसतोऽवलम्बं
स्वपातहेतोः शिशुवन्मुमुक्षुः ॥ 336॥
देहादिसंसक्तिमतो न मुक्तिः
मुक्तस्य देहाद्यभिमत्यभावः ।
सुप्तस्य नो जागरणं न जाग्रतः
स्वप्नस्तयोर्भिन्नगुणाश्रयत्वात् ॥ 337॥
अन्तर्बहिः स्वं स्थिरजङ्गमेषु
ज्ञात्वाऽऽत्मनाधारतया विलोक्य । (पाठभेदः - ज्ञानात्मन्)
त्यक्ताखिलोपाधिरखण्डरूपः
पूर्णात्मना यः स्थित एष मुक्तः ॥ 338॥
सर्वात्मना बन्धविमुक्तिहेतुः
सर्वात्मभावान्न परोऽस्ति कश्चित् ।
दृश्याग्रहे सत्युपपद्यतेऽसौ
सर्वात्मभावोऽस्य सदात्मनिष्ठया ॥ 339॥
दृश्यस्याग्रहणं कथं नु घटते देहात्मना तिष्ठतो
बाह्यार्थानुभवप्रसक्तमनसस्तत्तत्क्रियां कुर्वतः ।
सन्न्यस्ताखिलधर्मकर्मविषयैर्नित्यात्मनिष्ठापरैः
तत्त्वज्ञैः करणीयमात्मनि सदानन्देच्छुभिर्यत्नतः ॥ 340॥
सर्वात्मसिद्धये भिक्षोः कृतश्रवणकर्मणः । (पाठभेदः - सार्वात्म्य)
समाधिं विदधात्येषा शान्तो दान्त इति श्रुतिः ॥ 341॥
आरूढशक्तेरहमो विनाशः
कर्तुन्न शक्य सहसापि पण्डितैः । (पाठभेदः - कर्तुं न)
ये निर्विकल्पाख्यसमाधिनिश्चलाः
तानन्तराऽनन्तभवा हि वासनाः ॥ 342॥
अहम्बुद्ध्यैव मोहिन्या योजयित्वाऽऽवृतेर्बलात् ।
विक्षेपशक्तिः पुरुषं विक्षेपयति तद्गुणैः ॥ 343॥
विक्षेपशक्तिविजयो विषमो विधातुं
निःशेषमावरणशक्तिनिवृत्त्यभावे ।
दृग्दृश्ययोः स्फुटपयोजलवद्विभागे
नश्येत्तदावरणमात्मनि च स्वभावात् ।
निःसंशयेन भवति प्रतिबन्धशून्यो
विक्षेपणं न हि तदा यदि चेन्मृषार्थे ॥ 344॥ (पाठभेदः - निक्षेपणं)
सम्यग्विवेकः स्फुटबोधजन्यो
विभज्य दृग्दृश्यपदार्थतत्त्वम् ।
छिनत्ति मायाकृतमोहबन्धं
यस्माद्विमुक्तस्तु पुनर्न संसृतिः ॥ 345॥ (पाठभेदः - विमुक्तस्य)
परावरैकत्वविवेकवह्निः
दहत्यविद्यागहनं ह्यशेषम् ।
किं स्यात्पुनः संसरणस्य बीजं
अद्वैतभावं समुपेयुषोऽस्य ॥ 346॥
आवरणस्य निवृत्तिर्भवति हि सम्यक्पदार्थदर्शनतः ।
मिथ्याज्ञानविनाशस्तद्विक्षेपजनितदुःखनिवृत्तिः ॥ 347॥
एतत्त्रितयं दृष्टं सम्यग्रज्जुस्वरूपविज्ञानात् ।
तस्माद्वस्तुसतत्त्वं ज्ञातव्यं बन्धमुक्तये विदुषा ॥ 348॥
अयोऽग्नियोगादिव सत्समन्वयान्
मात्रादिरूपेण विजृम्भते धीः ।
तत्कार्यमेतद्द्वितयं यतो मृषा (पाठभेदः - तत्कार्यमेव त्रितयं)
दृष्टं भ्रमस्वप्नमनोरथेषु ॥ 349॥
ततो विकाराः प्रकृतेरहम्मुखा
देहावसाना विषयाश्च सर्वे ।
क्षणेऽन्यथाभावितया ह्यमीषा- (पाठभेदः - भाविन एष आत्मा)
मसत्त्वमात्मा तु कदापि नान्यथा ॥ 350॥ (पाठभेदः - मसत्त्वमात्मा तु कदापि)
नित्याद्वयाखण्डचिदेकरूपो
बुद्ध्यादिसाक्षी सदसद्विलक्षणः ।
अहम्पदप्रत्ययलक्षितार्थः
प्रत्यक् सदानन्दघनः परात्मा ॥ 351॥
इत्थं विपश्चित्सदसद्विभज्य
निश्चित्य तत्त्वं निजबोधदृष्ट्या ।
ज्ञात्वा स्वमात्मानमखण्डबोधं
तेभ्यो विमुक्तः स्वयमेव शाम्यति ॥ 352॥
अज्ञानहृदयग्रन्थेर्निःशेषविलयस्तदा ।
समाधिनाऽविकल्पेन यदाऽद्वैतात्मदर्शनम् ॥ 353॥
त्वमहमिदमितीयं कल्पना बुद्धिदोषात्
प्रभवति परमात्मन्यद्वये निर्विशेषे ।
प्रविलसति समाधावस्य सर्वो विकल्पो
विलयनमुपगच्छेद्वस्तुतत्त्वावधृत्या ॥ 354॥
शान्तो दान्तः परमुपरतः क्षान्तियुक्तः समाधिं
कुर्वन्नित्यं कलयति यतिः स्वस्य सर्वात्मभावम् ।
तेनाविद्यातिमिरजनितान्साधु दग्ध्वा विकल्पान्
ब्रह्माकृत्या निवसति सुखं निष्क्रियो निर्विकल्पः ॥ 355॥
समाहिता ये प्रविलाप्य बाह्यं
श्रोत्रादि चेतः स्वमहं चिदात्मनि ।
त एव मुक्ता भवपाशबन्धैः
नान्ये तु पारोक्ष्यकथाभिधायिनः ॥ 356॥
उपाधिभेदात्स्वयमेव भिद्यते (पाठभेदः - योगात्स्वयमेव)
चोपाध्यपोहे स्वयमेव केवलः ।
तस्मादुपाधेर्विलयाय विद्वान्
वसेत्सदाऽकल्पसमाधिनिष्ठया ॥ 357॥
सति सक्तो नरो याति सद्भावं ह्येकनिष्ठया ।
कीटको भ्रमरं ध्यायन् भ्रमरत्वाय कल्पते ॥ 358॥
क्रियान्तरासक्तिमपास्य कीटको
ध्यायन्नलित्वं ह्यलिभावमृच्छति । (पाठभेदः - ध्यायन्यथालिं)
तथैव योगी परमात्मतत्त्वं
ध्यात्वा समायाति तदेकनिष्ठया ॥ 359॥
अतीव सूक्ष्मं परमात्मतत्त्वं
न स्थूलदृष्ट्या प्रतिपत्तुमर्हति ।
समाधिनात्यन्तसुसूक्ष्मवृत्त्या
ज्ञातव्यमार्यैरतिशुद्धबुद्धिभिः ॥ 360॥
यथा सुवर्णं पुटपाकशोधितं
त्यक्त्वा मलं स्वात्मगुणं समृच्छति ।
तथा मनः सत्त्वरजस्तमोमलं
ध्यानेन सन्त्यज्य समेति तत्त्वम् ॥ 361॥
निरन्तराभ्यासवशात्तदित्थं
पक्वं मनो ब्रह्मणि लीयते यदा ।
तदा समाधिः सविकल्पवर्जितः (पाठभेदः - स विकल्पवर्जितः)
स्वतोऽद्वयानन्दरसानुभावकः ॥ 362॥
समाधिनाऽनेन समस्तवासना-
ग्रन्थेर्विनाशोऽखिलकर्मनाशः ।
अन्तर्बहिः सर्वत एव सर्वदा
स्वरूपविस्फूर्तिरयत्नतः स्यात् ॥ 363॥
श्रुतेः शतगुणं विद्यान्मननं मननादपि ।
निदिध्यासं लक्षगुणमनन्तं निर्विकल्पकम् ॥ 364॥
निर्विकल्पकसमाधिना स्फुटं
ब्रह्मतत्त्वमवगम्यते ध्रुवम् ।
नान्यथा चलतया मनोगतेः
प्रत्ययान्तरविमिश्रितं भवेत् ॥ 365॥
अतः समाधत्स्व यतेन्द्रियः सन्
निरन्तरं शान्तमनाः प्रतीचि ।
विध्वंसय ध्वान्तमनाद्यविद्यया
कृतं सदेकत्वविलोकनेन ॥ 366॥
योगस्य प्रथमद्वारं वाङ्निरोधोऽपरिग्रहः । (पाठभेदः - प्रथमं द्वारं)
निराशा च निरीहा च नित्यमेकान्तशीलता ॥ 367॥
एकान्तस्थितिरिन्द्रियोपरमणे हेतुर्दमश्चेतसः
संरोधे करणं शमेन विलयं यायादहंवासना ।
तेनानन्दरसानुभूतिरचला ब्राह्मी सदा योगिनः
तस्माच्चित्तनिरोध एव सततं कार्यः प्रयत्नो मुनेः ॥ 368॥ प्रयत्नान्मुनेः
वाचं नियच्छात्मनि तं नियच्छ
बुद्धौ धियं यच्छ च बुद्धिसाक्षिणि ।
तं चापि पूर्णात्मनि निर्विकल्पे
विलाप्य शान्तिं परमां भजस्व ॥ 369॥
देहप्राणेन्द्रियमनोबुद्ध्यादिभिरुपाधिभिः ।
यैर्यैर्वृत्तेःसमायोगस्तत्तद्भावोऽस्य योगिनः ॥ 370॥
तन्निवृत्त्या मुनेः सम्यक् सर्वोपरमणं सुखम् ।
सन्दृश्यते सदानन्दरसानुभवविप्लवः ॥ 371॥
अन्तस्त्यागो बहिस्त्यागो विरक्तस्यैव युज्यते ।
त्यजत्यन्तर्बहिःसङ्गं विरक्तस्तु मुमुक्षया ॥ 372॥
बहिस्तु विषयैः सङ्गं तथान्तरहमादिभिः । (पाठभेदः - सङ्गः)
विरक्त एव शक्नोति त्यक्तुं ब्रह्मणि निष्ठितः ॥ 373॥
वैराग्यबोधौ पुरुषस्य पक्षिवत्
पक्षौ विजानीहि विचक्षण त्वम् ।
विमुक्तिसौधाग्रलताधिरोहणं
ताभ्यां विना नान्यतरेण सिध्यति ॥ 374॥
अत्यन्तवैराग्यवतः समाधिः
समाहितस्यैव दृढप्रबोधः ।
प्रबुद्धतत्त्वस्य हि बन्धमुक्तिः
मुक्तात्मनो नित्यसुखानुभूतिः ॥ 375॥
वैराग्यान्न परं सुखस्य जनकं पश्यामि वश्यात्मनः
तच्चेच्छुद्धतरात्मबोधसहितं स्वाराज्यसाम्राज्यधुक् ।
एतद्द्वारमजस्रमुक्तियुवतेर्यस्मात्त्वमस्मात्परं
सर्वत्रास्पृहया सदात्मनि सदा प्रज्ञां कुरु श्रेयसे ॥ 376॥
आशां छिन्द्धि विषोपमेषु विषयेष्वेषैव मृत्योः कृति- (पाठभेदः - मृत्योः सृति)
स्त्यक्त्वा जातिकुलाश्रमेष्वभिमतिं मुञ्चातिदूरात्क्रियाः ।
देहादावसति त्यजात्मधिषणां प्रज्ञां कुरुष्वात्मनि
त्वं द्रष्टास्यमनोऽसि निर्द्वयपरं ब्रह्मासि यद्वस्तुतः ॥ 377॥ (पाठभेदः - द्रष्टास्यमलो)
लक्ष्ये ब्रह्मणि मानसं दृढतरं संस्थाप्य बाह्येन्द्रियं
स्वस्थाने विनिवेश्य निश्चलतनुश्चोपेक्ष्य देहस्थितिम् ।
ब्रह्मात्मैक्यमुपेत्य तन्मयतया चाखण्डवृत्त्याऽनिशं
ब्रह्मानन्दरसं पिबात्मनि मुदा शून्यैः किमन्यैर्भृशम् ॥ 378॥ (पाठभेदः - किमन्यैर्भ्रमैः)
अनात्मचिन्तनं त्यक्त्वा कश्मलं दुःखकारणम् ।
चिन्तयात्मानमानन्दरूपं यन्मुक्तिकारणम् ॥ 379॥
एष स्वयञ्ज्योतिरशेषसाक्षी
विज्ञानकोशो विलसत्यजस्रम् । विज्ञानकोशे
लक्ष्यं विधायैनमसद्विलक्षण-
मखण्डवृत्त्याऽऽत्मतयाऽनुभावय ॥ 380॥
एतमच्छिन्नया वृत्त्या प्रत्ययान्तरशून्यया ।
उल्लेखयन्विजानीयात्स्वस्वरूपतया स्फुटम् ॥ 381॥
अत्रात्मत्वं दृढीकुर्वन्नहमादिषु सन्त्यजन् ।
उदासीनतया तेषु तिष्ठेत्स्फुटघटादिवत् ॥ 382॥ (पाठभेदः - तिष्ठेद्घटपटादिवत्)
विशुद्धमन्तःकरणं स्वरूपे
निवेश्य साक्षिण्यवबोधमात्रे ।
शनैः शनैर्निश्चलतामुपानयन्
पूर्णं स्वमेवानुविलोकयेत्ततः ॥ 383॥ (पाठभेदः - पूर्णत्वमेवानु)
देहेन्द्रियप्राणमनोऽहमादिभिः
स्वाज्ञानक्लृप्तैरखिलैरुपाधिभिः ।
विमुक्तमात्मानमखण्डरूपं
पूर्णं महाकाशमिवावलोकयेत् ॥ 384॥
घटकलशकुसूलसूचिमुख्यैः
गगनमुपाधिशतैर्विमुक्तमेकम् ।
भवति न विविधं तथैव शुद्धं
परमहमादिविमुक्तमेकमेव ॥ 385॥
ब्रह्मादिस्तम्बपर्यन्ता मृषामात्रा उपाधयः । (पाठभेदः - ब्रह्माद्याः स्तम्ब)
ततः पूर्णं स्वमात्मानं पश्येदेकात्मना स्थितम् ॥ 386॥
यत्र भ्रान्त्या कल्पितं तद्विवेके (पाठभेदः - यद्विवेके)
तत्तन्मात्रं नैव तस्माद्विभिन्नम् ।
भ्रान्तेर्नाशे भाति दृष्टाहितत्त्वं (पाठभेदः - भ्रान्तिदृष्टा)
रज्जुस्तद्वद्विश्वमात्मस्वरूपम् ॥ 387॥
स्वयं ब्रह्मा स्वयं विष्णुः स्वयमिन्द्रः स्वयं शिवः ।
स्वयं विश्वमिदं सर्वं स्वस्मादन्यन्न किञ्चन ॥ 388॥
अन्तः स्वयं चापि बहिः स्वयं च
स्वयं पुरस्तात् स्वयमेव पश्चात् ।
स्वयं ह्यावाच्यां स्वयमप्युदीच्यां (पाठभेदः - ह्यवाच्यां)
तथोपरिष्टात्स्वयमप्यधस्तात् ॥ 389॥
तरङ्गफेनभ्रमबुद्बुदादि
सर्वं स्वरूपेण जलं यथा तथा ।
चिदेव देहाद्यहमन्तमेतत्
सर्वं चिदेवैकरसं विशुद्धम् ॥ 390॥
सदेवेदं सर्वं जगदवगतं वाङ्मनसयोः
सतोऽन्यन्नास्त्येव प्रकृतिपरसीम्नि स्थितवतः ।
पृथक् किं मृत्स्नायाः कलशघटकुम्भाद्यवगतं
वदत्येष भ्रान्तस्त्वमहमिति मायामदिरया ॥ 391॥
क्रियासमभिहारेण यत्र नान्यदिति श्रुतिः ।
ब्रवीति द्वैतराहित्यं मिथ्याध्यासनिवृत्तये ॥ 392॥
आकाशवन्निर्मलनिर्विकल्पं (पाठभेदः - निर्विकल्प)
निःसीमनिःस्पन्दननिर्विकारम् ।
अन्तर्बहिःशून्यमनन्यमद्वयं
स्वयं परं ब्रह्म किमस्ति बोध्यम् ॥ 393॥
वक्तव्यं किमु विद्यतेऽत्र बहुधा ब्रह्मैव जीवः स्वयं
ब्रह्मैतज्जगदाततं नु सकलं ब्रह्माद्वितीयं श्रुतिः । (पाठभेदः - जगदापराणु सकलं)
ब्रह्मैवाहमिति प्रबुद्धमतयः सन्त्यक्तबाह्याः स्फुटं
ब्रह्मीभूय वसन्ति सन्ततचिदानन्दात्मनैतद्ध्रुवम् ॥ 394॥ (पाठभेदः - आनन्दात्मनैव ध्रुवम्)
जहि मलमयकोशेऽहन्धियोत्थापिताशां
प्रसभमनिलकल्पे लिङ्गदेहेऽपि पश्चात् ।
निगमगदितकीर्तिं नित्यमानन्दमूर्तिं
स्वयमिति परिचीय ब्रह्मरूपेण तिष्ठ ॥ 395॥
शवाकारं यावद्भजति मनुजस्तावदशुचिः
परेभ्यः स्यात्क्लेशो जननमरणव्याधिनिलयः । (पाठभेदः - व्याधिनिरयाः)
यदात्मानं शुद्धं कलयति शिवाकारमचलम्
तदा तेभ्यो मुक्तो भवति हि तदाह श्रुतिरपि ॥ 396॥
स्वात्मन्यारोपिताशेषाभासवस्तुनिरासतः ।
स्वयमेव परं ब्रह्म पूर्णमद्वयमक्रियम् ॥ 397॥
समाहितायां सति चित्तवृत्तौ
परात्मनि ब्रह्मणि निर्विकल्पे ।
न दृश्यते कश्चिदयं विकल्पः
प्रजल्पमात्रः परिशिष्यते यतः ॥ 398॥ (पाठभेदः - ततः)
असत्कल्पो विकल्पोऽयं विश्वमित्येकवस्तुनि ।
निर्विकारे निराकारे निर्विशेषे भिदा कुतः ॥ 399॥
द्रष्टुदर्शनदृश्यादिभावशून्यैकवस्तुनि । (पाठभेदः - द्रष्टृदर्शन)
निर्विकारे निराकारे निर्विशेषे भिदा कुतः ॥ 400॥
कल्पार्णव इवात्यन्तपरिपूर्णैकवस्तुनि ।
निर्विकारे निराकारे निर्विशेषे भिदा कुतः ॥ 401॥
तेजसीव तमो यत्र प्रलीनं भ्रान्तिकारणम् । (पाठभेदः - यत्र विलीनं)
अद्वितीये परे तत्त्वे निर्विशेषे भिदा कुतः ॥ 402॥
एकात्मके परे तत्त्वे भेदवार्ता कथं वसेत् । (पाठभेदः - कथं भवेत्)
सुषुप्तौ सुखमात्रायां भेदः केनावलोकितः ॥ 403॥
न ह्यस्ति विश्वं परतत्त्वबोधात्
सदात्मनि ब्रह्मणि निर्विकल्पे ।
कालत्रये नाप्यहिरीक्षितो गुणे
न ह्यम्बुबिन्दुर्मृगतृष्णिकायाम् ॥ 404॥
मायामात्रमिदं द्वैतमद्वैतं परमार्थतः ।
इति ब्रूते श्रुतिः साक्षात्सुषुप्तावनुभूयते ॥ 405॥
अनन्यत्वमधिष्ठानादारोप्यस्य निरीक्षितम् ।
पण्डितै रज्जुसर्पादौ विकल्पो भ्रान्तिजीवनः ॥ 406॥
चित्तमूलो विकल्पोऽयं चित्ताभावे न कश्चन ।
अतश्चित्तं समाधेहि प्रत्यग्रूपे परात्मनि ॥ 407॥
किमपि सततबोधं केवलानन्दरूपं
निरुपममतिवेलं नित्यमुक्तं निरीहम् ।
निरवधिगगनाभं निष्कलं निर्विकल्पं
हृदि कलयति विद्वान् ब्रह्म पूर्णं समाधौ ॥ 408॥
प्रकृतिविकृतिशून्यं भावनातीतभावं
समरसमसमानं मानसम्बन्धदूरम् ।
निगमवचनसिद्धं नित्यमस्मत्प्रसिद्धं
हृदि कलयति विद्वान् ब्रह्म पूर्णं समाधौ ॥ 409॥
अजरममरमस्ताभाववस्तुस्वरूपं (पाठभेदः - भासवस्तु)
स्तिमितसलिलराशिप्रख्यमाख्याविहीनम् ।
शमितगुणविकारं शाश्वतं शान्तमेकं
हृदि कलयति विद्वान् ब्रह्म पूर्णं समाधौ ॥ 410॥
समाहितान्तःकरणः स्वरूपे
विलोकयात्मानमखण्डवैभवम् ।
विच्छिन्द्धि बन्धं भवगन्धगन्धितं (पाठभेदः - गन्धगन्धिलं)
यत्नेन पुंस्त्वं सफलीकुरुष्व ॥ 411-
सर्वोपाधिविनिर्मुक्तं सच्चिदानन्दमद्वयम् ।
भावयात्मानमात्मस्थं न भूयः कल्पसेऽध्वने ॥ 412॥
छायेव पुंसः परिदृश्यमान-
माभासरूपेण फलानुभूत्या ।
शरीरमाराच्छववन्निरस्तं
पुनर्न सन्धत्त इदं महात्मा ॥ 413॥
सततविमलबोधानन्दरूपं समेत्य (पाठभेदः - स्वमेत्य)
त्यज जडमलरूपोपाधिमेतं सुदूरे ।
अथ पुनरपि नैष स्मर्यतां वान्तवस्तु (पाठभेदः - पुनरपि नैव)
स्मरणविषयभूतं कल्पते कुत्सनाय ॥ 414॥
समूलमेतत्परिदाह्य वह्नौ (पाठभेदः - परिदह्य)
सदात्मनि ब्रह्मणि निर्विकल्पे ।
ततः स्वयं नित्यविशुद्धबोधा-
नन्दात्मना तिष्ठति विद्वरिष्ठः ॥ 415॥
प्रारब्धसूत्रग्रथितं शरीरं
प्रयातु वा तिष्ठतु गोरिव स्रक् ।
न तत्पुनः पश्यति तत्त्ववेत्ता-
ऽऽनन्दात्मनि ब्रह्मणि लीनवृत्तिः ॥ 416॥
अखण्डानन्दमात्मानं विज्ञाय स्वस्वरूपतः ।
किमिच्छन् कस्य वा हेतोर्देहं पुष्णाति तत्त्ववित् ॥ 417॥
संसिद्धस्य फलं त्वेतज्जीवन्मुक्तस्य योगिनः ।
बहिरन्तः सदानन्दरसास्वादनमात्मनि ॥ 418॥
वैराग्यस्य फलं बोधो बोधस्योपरतिः फलम् ।
स्वानन्दानुभवाच्छान्तिरेषैवोपरतेः फलम् ॥ 419॥
यद्युत्तरोत्तराभावः पूर्वपूर्वन्तु निष्फलम् ।
निवृत्तिः परमा तृप्तिरानन्दोऽनुपमः स्वतः ॥ 420॥
दृष्टदुःखेष्वनुद्वेगो विद्यायाः प्रस्तुतं फलम् ।
यत्कृतं भ्रान्तिवेलायां नाना कर्म जुगुप्सितम् ।
पश्चान्नरो विवेकेन तत्कथं कर्तुमर्हति ॥ 421॥
विद्याफलं स्यादसतो निवृत्तिः
प्रवृत्तिरज्ञानफलं तदीक्षितम् ।
तज्ज्ञाज्ञयोर्यन्मृगतृष्णिकादौ
नोचेद्विदां दृष्टफलं किमस्मात् ॥ 422॥ (पाठभेदः - नोचेद्विदो)
अज्ञानहृदयग्रन्थेर्विनाशो यद्यशेषतः ।
अनिच्छोर्विषयः किं नु प्रवृत्तेः कारणं स्वतः ॥ 423॥ (पाठभेदः - विदुषः किं)
वासनानुदयो भोग्ये वैराग्यस्य तदावधिः ।
अहम्भावोदयाभावो बोधस्य परमावधिः ।
लीनवृत्तैरनुत्पत्तिर्मर्यादोपरतेस्तु सा ॥ 424॥ (पाठभेदः - वृत्तेर)
ब्रह्माकारतया सदा स्थिततया निर्मुक्तबाह्यार्थधी-
रन्यावेदितभोग्यभोगकलनो निद्रालुवद्बालवत् ।
स्वप्नालोकितलोकवज्जगदिदं पश्यन्क्वचिल्लब्धधी-
रास्ते कश्चिदनन्तपुण्यफलभुग्धन्यः स मान्यो भुवि ॥ 425॥
स्थितप्रज्ञो यतिरयं यः सदानन्दमश्नुते ।
ब्रह्मण्येव विलीनात्मा निर्विकारो विनिष्क्रियः ॥ 426॥
ब्रह्मात्मनोः शोधितयोरेकभावावगाहिनी ।
निर्विकल्पा च चिन्मात्रा वृत्तिः प्रज्ञेति कथ्यते ।
सुस्थिताऽसौ भवेद्यस्य स्थितप्रज्ञः स उच्यते ॥ 427॥
यस्य स्थिता भवेत्प्रज्ञा यस्यानन्दो निरन्तरः ।
प्रपञ्चो विस्मृतप्रायः स जीवन्मुक्त इष्यते ॥ 428॥
लीनधीरपि जागर्ति जाग्रद्धर्मविवर्जितः ।
बोधो निर्वासनो यस्य स जीवन्मुक्त इष्यते ॥ 429॥
शान्तसंसारकलनः कलावानपि निष्कलः ।
यस्य चित्तं विनिश्चिन्तं स जीवन्मुक्त इष्यते ॥ 430॥ (पाठभेदः - यः सचित्तोऽपि निश्चित्तः)
वर्तमानेऽपि देहेऽस्मिञ्छायावदनुवर्तिनि ।
अहन्ताममताऽभावो जीवन्मुक्तस्य लक्षणम् ॥ 431॥
अतीताननुसन्धानं भविष्यदविचारणम् ।
औदासीन्यमपि प्राप्तं जीवन्मुक्तस्य लक्षणम् ॥ 432॥ (पाठभेदः - प्राप्ते)
गुणदोषविशिष्टेऽस्मिन्स्वभावेन विलक्षणे ।
सर्वत्र समदर्शित्वं जीवन्मुक्तस्य लक्षणम् ॥ 433॥
इष्टानिष्टार्थसम्प्राप्तौ समदर्शितयाऽऽत्मनि ।
उभयत्राविकारित्वं जीवन्मुक्तस्य लक्षणम् ॥ 434॥
ब्रह्मानन्दरसास्वादासक्तचित्ततया यतेः ।
अन्तर्बहिरविज्ञानं जीवन्मुक्तस्य लक्षणम् ॥ 435॥
देहेन्द्रियादौ कर्तव्ये ममाहम्भाववर्जितः ।
औदासीन्येन यस्तिष्ठेत्स जीवन्मुक्तलक्षणः ॥ 436॥ (पाठभेदः - स जीवन्मुक्त इष्यते)
विज्ञात आत्मनो यस्य ब्रह्मभावः श्रुतेर्बलात् ।
भवबन्धविनिर्मुक्तः स जीवन्मुक्तलक्षणः ॥ 437॥ (पाठभेदः - स जीवन्मुक्त इष्यते)
देहेन्द्रियेष्वहम्भाव इदम्भावस्तदन्यके ।
यस्य नो भवतः क्वापि स जीवन्मुक्त इष्यते ॥ 438॥
जीवेशोभयसंसाररूपदुर्वासनोज्झिता ।
सा सर्वदा भवेद्यस्य स जीवन्मुक्त इष्यते ॥
न प्रत्यग्ब्रह्मणोर्भेदं कदापि ब्रह्मसर्गयोः ।
प्रज्ञया यो विजानिति स जीवन्मुक्तलक्षणः ॥ 439॥ (पाठभेदः - स जीवन्मुक्त इष्यते)
साधुभिः पूज्यमानेऽस्मिन्पीड्यमानेऽपि दुर्जनैः ।
समभावो भवेद्यस्य स जीवन्मुक्तलक्षणः ॥ 440॥ (पाठभेदः - स जीवन्मुक्त इष्यते)
यत्र प्रविष्टा विषयाः परेरिता
नदीप्रवाहा इव वारिराशौ ।
लिनन्ति सन्मात्रतया न विक्रियां
उत्पादयन्त्येष यतिर्विमुक्तः ॥ 441॥
विज्ञातब्रह्मतत्त्वस्य यथापूर्वं न संसृतिः ।
अस्ति चेन्न स विज्ञातब्रह्मभावो बहिर्मुखः ॥ 442॥
प्राचीनवासनावेगादसौ संसरतीति चेत् ।
न सदेकत्वविज्ञानान्मन्दी भवति वासना ॥ 443॥
अत्यन्तकामुकस्यापि वृत्तिः कुण्ठति मातरि ।
तथैव ब्रह्मणि ज्ञाते पूर्णानन्दे मनीषिणः ॥ 444॥
निदिध्यासनशीलस्य बाह्यप्रत्यय ईक्ष्यते ।
ब्रवीति श्रुतिरेतस्य प्रारब्धं फलदर्शनात् ॥ 445॥
सुखाद्यनुभवो यावत्तावत्प्रारब्धमिष्यते ।
फलोदयः क्रियापूर्वो निष्क्रियो न हि कुत्रचित् ॥ 446॥
अहं ब्रह्मेति विज्ञानात्कल्पकोटिशतार्जितम् ।
सञ्चितं विलयं याति प्रबोधात्स्वप्नकर्मवत् ॥ 447॥
यत्कृतं स्वप्नवेलायां पुण्यं वा पापमुल्बणम् ।
सुप्तोत्थितस्य किन्तत्स्यात्स्वर्गाय नरकाय वा ॥ 448॥
स्वमसङ्गमुदासीनं परिज्ञाय नभो यथा ।
न श्लिष्यति च यत्किञ्चित्कदाचिद्भाविकर्मभिः ॥ 449॥ (पाठभेदः - श्लिष्यते यतिः किञ्चित्)
न नभो घटयोगेन सुरागन्धेन लिप्यते ।
तथात्मोपाधियोगेन तद्धर्मैर्नैव लिप्यते ॥ 450॥
ज्ञानोदयात्पुरारब्धं कर्मज्ञानान्न नश्यति ।
अदत्वा स्वफलं लक्ष्यमुद्दिश्योत्सृष्टबाणवत् ॥ 451॥
व्याघ्रबुद्ध्या विनिर्मुक्तो बाणः पश्चात्तु गोमतौ ।
न तिष्ठति छिनत्येव लक्ष्यं वेगेन निर्भरम् ॥ 452॥
प्रारब्धं बलवत्तरं खलु विदां भोगेन तस्य क्षयः
सम्यग्ज्ञानहुताशनेन विलयः प्राक्सञ्चितागामिनाम् ।
ब्रह्मात्मैक्यमवेक्ष्य तन्मयतया ये सर्वदा संस्थिताः
तेषां तत्त्रितयं नहि क्वचिदपि ब्रह्मैव ते निर्गुणम् ॥ 453॥
उपाधितादात्म्यविहीनकेवल-
ब्रह्मात्मनैवात्मनि तिष्ठतो मुनेः ।
प्रारब्धसद्भावकथा न युक्ता
स्वप्नार्थसम्बन्धकथेव जाग्रतः ॥ 454॥
न हि प्रबुद्धः प्रतिभासदेहे
देहोपयोगिन्यपि च प्रपञ्चे ।
करोत्यहन्तां ममतामिदन्तां
किन्तु स्वयं तिष्ठति जागरेण ॥ 455॥
न तस्य मिथ्यार्थसमर्थनेच्छा
न सङ्ग्रहस्तज्जगतोऽपि दृष्टः ।
तत्रानुवृत्तिर्यदि चेन्मृषार्थे
न निद्रया मुक्त इतीष्यते ध्रुवम् ॥ 456॥
तद्वत्परे ब्रह्मणि वर्तमानः
सदात्मना तिष्ठति नान्यदीक्षते ।
स्मृतिर्यथा स्वप्नविलोकितार्थे
तथा विदः प्राशनमोचनादौ ॥ 457॥
कर्मणा निर्मितो देहः प्रारब्धं तस्य कल्प्यताम् ।
नानादेरात्मनो युक्तं नैवात्मा कर्मनिर्मितः ॥ 458॥
अजो नित्यः शाश्वत इति ब्रूते श्रुतिरमोघवाक् । (पाठभेदः - अजो नित्य इति ब्रूते श्रुतिरेषा त्वमोघवाक्)
तदात्मना तिष्ठतोऽस्य कुतः प्रारब्धकल्पना ॥ 459॥
प्रारब्धं सिध्यति तदा यदा देहात्मना स्थितिः ।
देहात्मभावो नैवेष्टः प्रारब्धं त्यज्यतामतः ॥ 460॥
शरीरस्यापि प्रारब्धकल्पना भ्रान्तिरेव हि ।
अध्यस्तस्य कुतः सत्त्वमसत्यस्य कुतो जनिः । (पाठभेदः - सत्त्वमसत्त्वस्य)
अजातस्य कुतो नाशः प्रारब्धमसतः कुतः ॥ 461॥
ज्ञानेनाज्ञानकार्यस्य समूलस्य लयो यदि ।
तिष्ठत्ययं कथं देह इति शङ्कावतो जडान् ॥ 462॥
समाधातुं बाह्यदृष्ट्या प्रारब्धं वदति श्रुतिः ।
न तु देहादिसत्यत्वबोधनाय विपश्चिताम् ।
यतः श्रुतेरभिप्रायः परमार्थैकगोचरः ॥ 463॥
परिपूर्णमनाद्यन्तमप्रमेयमविक्रियम् ।
एकमेवाद्वयं ब्रह्म नेह नानास्ति किञ्चन ॥ 464॥
सद्घनं चिद्घनं नित्यमानन्दघनमक्रियम् ।
एकमेवाद्वयं ब्रह्म नेह नानास्ति किञ्चन ॥ 465॥
प्रत्यगेकरसं पूर्णमनन्तं सर्वतोमुखम् ।
एकमेवाद्वयं ब्रह्म नेह नानास्ति किञ्चन ॥ 466॥
अहेयमनुपादेयमनादेयमनाश्रयम् । मनाधेयमना
एकमेवाद्वयं ब्रह्म नेह नानास्ति किञ्चन ॥ 467॥
निर्गुणं निष्कलं सूक्ष्मं निर्विकल्पं निरञ्जनम् ।
एकमेवाद्वयं ब्रह्म नेह नानास्ति किञ्चन ॥ 468॥
अनिरूप्य स्वरूपं यन्मनोवाचामगोचरम् ।
एकमेवाद्वयं ब्रह्म नेह नानास्ति किञ्चन ॥ 469॥
सत्समृद्धं स्वतःसिद्धं शुद्धं बुद्धमनीदृशम् ।
एकमेवाद्वयं ब्रह्म नेह नानास्ति किञ्चन ॥ 470॥
निरस्तरागा विनिरस्तभोगाः (पाठभेदः - निरपास्तभोगाः)
शान्ताः सुदान्ता यतयो महान्तः ।
विज्ञाय तत्त्वं परमेतदन्ते
प्राप्ताः परां निर्वृतिमात्मयोगात् ॥ 471॥
भवानपीदं परतत्त्वमात्मनः
स्वरूपमानन्दघनं विचार्य । (पाठभेदः - निचाय्य)
विधूय मोहं स्वमनःप्रकल्पितं
मुक्तः कृतार्थो भवतु प्रबुद्धः ॥ 472॥
समाधिना साधुविनिश्चलात्मना (पाठभेदः - सुनिश्चलात्मना)
पश्यात्मतत्त्वं स्फुटबोधचक्षुषा ।
निःसंशयं सम्यगवेक्षितश्चे-
च्छ्रुतः पदार्थो न पुनर्विकल्प्यते ॥ 473॥ (पाठभेदः - पुनर्विकल्पते)
स्वस्याविद्याबन्धसम्बन्धमोक्षा-
त्सत्यज्ञानानन्दरूपात्मलब्धौ ।
शास्त्रं युक्तिर्देशिकोक्तिः प्रमाणं
चान्तःसिद्धा स्वानुभूतिः प्रमाणम् ॥ 474॥
बन्धो मोक्षश्च तृप्तिश्च चिन्ताऽऽरोग्यक्षुधादयः ।
स्वेनैव वेद्या यज्ज्ञानं परेषामानुमानिकम् ॥ 475॥
तटस्थिता बोधयन्ति गुरवः श्रुतयो यथा ।
प्रज्ञयैव तरेद्विद्वानीश्वरानुगृहीतया ॥ 476॥
स्वानुभूत्या स्वयं ज्ञात्वा स्वमात्मानमखण्डितम् ।
संसिद्धः सम्मुखं तिष्ठेन्निर्विकल्पात्मनाऽऽत्मनि ॥ 477॥ (पाठभेदः - सुसुखं तिष्ठेन्)
वेदान्तसिद्धान्तनिरुक्तिरेषा
ब्रह्मैव जीवः सकलं जगच्च ।
अखण्डरूपस्थितिरेव मोक्षो
ब्रह्माद्वितीये श्रुतयः प्रमाणम् ॥ 478॥ (पाठभेदः - ब्रह्माद्वितीयं)
इति गुरुवचनाच्छ्रुतिप्रमाणात्
परमवगम्य सतत्त्वमात्मयुक्त्या ।
प्रशमितकरणः समाहितात्मा
क्वचिदचलाकृतिरात्मनिष्ठतोऽभूत् ॥ 479॥ (पाठभेदः - आत्मनिष्ठितो)
किञ्चित्कालं समाधाय परे ब्रह्मणि मानसम् । (पाठभेदः - कञ्चित्कालं)
उत्थाय परमानन्दादिदं वचनमब्रवीत् ॥ 480॥ (पाठभेदः - व्युत्थाय)
बुद्धिर्विनष्टा गलिता प्रवृत्तिः
ब्रह्मात्मनोरेकतयाऽधिगत्या ।
इदं न जानेऽप्यनिदं न जाने
किं वा कियद्वा सुखमस्त्यपारम् ॥ 481॥ (पाठभेदः - सुखमस्य पारम्)
वाचा वक्तुमशक्यमेव मनसा मन्तुं न वा शक्यते
स्वानन्दामृतपूरपूरितपरब्रह्माम्बुधेर्वैभवम् ।
अम्भोराशिविशीर्णवार्षिकशिलाभावं भजन्मे मनो
यस्यांशांशलवे विलीनमधुनाऽऽनन्दात्मना निर्वृतम् ॥ 482॥
क्व गतं केन वा नीतं कुत्र लीनमिदं जगत् ।
अधुनैव मया दृष्टं नास्ति किं महदद्भुतम् ॥ 483॥
किं हेयं किमुपादेयं किमन्यत्किं विलक्षणम् ।
अखण्डानन्दपीयूषपूर्णे ब्रह्ममहार्णवे ॥ 484॥
न किञ्चिदत्र पश्यामि न शऋणोमि न वेद्म्यहम् ।
स्वात्मनैव सदानन्दरूपेणास्मि विलक्षणः ॥ 485॥
नमो नमस्ते गुरवे महात्मने
विमुक्तसङ्गाय सदुत्तमाय ।
नित्याद्वयानन्दरसस्वरूपिणे
भूम्ने सदाऽपारदयाम्बुधाम्ने ॥ 486॥
यत्कटाक्षशशिसान्द्रचन्द्रिका-
पातधूतभवतापजश्रमः ।
प्राप्तवानहमखण्डवैभवा-
नन्दमात्मपदमक्षयं क्षणात् ॥ 487॥
धन्योऽहं कृतकृत्योऽहं विमुक्तोऽहं भवग्रहात् ।
नित्यानन्दस्वरूपोऽहं पूर्णोऽहं त्वदनुग्रहात् ॥ 488॥
असङ्गोऽहमनङ्गोऽहमलिङ्गोऽहमभङ्गुरः ।
प्रशान्तोऽहमनन्तोऽहममलोऽहं चिरन्तनः ॥ 489॥ (पाठभेदः - ऽहमतान्तोऽहं)
अकर्ताहमभोक्ताहमविकारोऽहमक्रियः ।
शुद्धबोधस्वरूपोऽहं केवलोऽहं सदाशिवः ॥ 490॥
द्रष्टुः श्रोतुर्वक्तुः कर्तुर्भोक्तुर्विभिन्न एवाहम् ।
नित्यनिरन्तरनिष्क्रियनिःसीमासङ्गपूर्णबोधात्मा ॥ 491॥
नाहमिदं नाहमदोऽप्युभयोरवभासकं परं शुद्धम् ।
बाह्याभ्यन्तरशून्यं पूर्णं ब्रह्माद्वितीयमेवाहम् ॥ 492॥
निरुपममनादितत्त्वं त्वमहमिदमद इति कल्पनादूरम् ।
नित्यानन्दैकरसं सत्यं ब्रह्माद्वितीयमेवाहम् ॥ 493॥
नारायणोऽहं नरकान्तकोऽहं
पुरान्तकोऽहं पुरुषोऽहमीशः ।
अखण्डबोधोऽहमशेषसाक्षी
निरीश्वरोऽहं निरहं च निर्ममः ॥ 494॥
सर्वेषु भूतेष्वहमेव संस्थितो
ज्ञानात्मनाऽन्तर्बहिराश्रयः सन् ।
भोक्ता च भोग्यं स्वयमेव सर्वं
यद्यत्पृथग्दृष्टमिदन्तया पुरा ॥ 495॥
मय्यखण्डसुखाम्भोधौ बहुधा विश्ववीचयः ।
उत्पद्यन्ते विलीयन्ते मायामारुतविभ्रमात् ॥ 496॥
स्थुलादिभावा मयि कल्पिता भ्रमा-
दारोपितानुस्फुरणेन लोकैः ।
काले यथा कल्पकवत्सराय-
णर्त्वादयो निष्कलनिर्विकल्पे ॥ 497॥
आरोपितं नाश्रयदूषकं भवेत्
कदापि मूढैरतिदोषदूषितैः । मूढैर्मति
नार्द्रीकरोत्यूषरभूमिभागं
मरीचिकावारि महाप्रवाहः ॥ 498॥
आकाशवल्लेपविदूरगोऽहं (पाठभेदः - आकाशवत् कल्पवि)
आदित्यवद्भास्यविलक्षणोऽहम् ।
अहार्यवन्नित्यविनिश्चलोऽहं
अम्भोधिवत्पारविवर्जितोऽहम् ॥ 499॥
न मे देहेन सम्बन्धो मेघेनेव विहायसः ।
अतः कुतो मे तद्धर्मा जाग्रत्स्वप्नसुषुप्तयः ॥ 500॥
उपाधिरायाति स एव गच्छति
स एव कर्माणि करोति भुङ्क्ते ।
स एव जीर्यन् म्रियते सदाहं (पाठभेदः - एव जीवन्)
कुलाद्रिवन्निश्चल एव संस्थितः ॥ 501॥
न मे प्रवृत्तिर्न च मे निवृत्तिः
सदैकरूपस्य निरंशकस्य ।
एकात्मको यो निविडो निरन्तरो (पाठभेदः - निबिडो)
व्योमेव पूर्णः स कथं नु चेष्टते ॥ 502॥
पुण्यानि पापानि निरिन्द्रियस्य
निश्चेतसो निर्विकृतेर्निराकृतेः ।
कुतो ममाखण्डसुखानुभूतेः
ब्रूते ह्यनन्वागतमित्यपि श्रुतिः ॥ 503॥
छायया स्पृष्टमुष्णं वा शीतं वा सुष्ठु दुःष्ठु वा ।
न स्पृशत्येव यत्किञ्चित्पुरुषं तद्विलक्षणम् ॥ 504॥
न साक्षिणं साक्ष्यधर्माः संस्पृशन्ति विलक्षणम् ।
अविकारमुदासीनं गृहधर्माः प्रदीपवत् ।
देहेन्द्रियमनोधर्मा नैवात्मानं स्पृशन्त्यहो ॥ 505॥ एक्ष्त्र
रवेर्यथा कर्मणि साक्षिभावो
वह्नेर्यथा दाहनियामकत्वम् । (पाठभेदः - वाऽयसि दाहकत्वम्)
रज्जोर्यथाऽऽरोपितवस्तुसङ्गः
तथैव कूटस्थचिदात्मनो मे ॥ 506॥
कर्तापि वा कारयितापि नाहं
भोक्तापि वा भोजयितापि नाहम् ।
द्रष्टापि वा दर्शयितापि नाहं
सोऽहं स्वयञ्ज्योतिरनीदृगात्मा ॥ 507॥
चलत्युपाधौ प्रतिबिम्बलौल्य-
मौपाधिकं मूढधियो नयन्ति ।
स्वबिम्बभूतं रविवद्विनिष्क्रियं
कर्तास्मि भोक्तास्मि हतोऽस्मि हेति ॥ 508॥
जले वापि स्थले वापि लुठत्वेष जडात्मकः ।
नाहं विलिप्ये तद्धर्मैर्घटधर्मैर्नभो यथा ॥ 509॥
कर्तृत्वभोक्तृत्वखलत्वमत्तता-
जडत्वबद्धत्वविमुक्ततादयः ।
बुद्धेर्विकल्पा न तु सन्ति वस्तुतः
स्वस्मिन्परे ब्रह्मणि केवलेऽद्वये ॥ 510॥
सन्तु विकाराः प्रकृतेर्दशधा शतधा सहस्रधा वापि ।
किं मेऽसङ्गचितस्तैर्न घनः क्वचिदम्बरं स्पृशति ॥ 511॥ (पाठभेदः - तैः किं मेऽसङ्गचितेर्न ह्यम्बुदडम्बरोऽम्बरं)
अव्यक्तादिस्थूलपर्यन्तमेतत्
विश्वं यत्राभासमात्रं प्रतीतम् ।
व्योमप्रख्यं सूक्ष्ममाद्यन्तहीनं
ब्रह्माद्वैतं यत्तदेवाहमस्मि ॥ 512॥
सर्वाधारं सर्ववस्तुप्रकाशं
सर्वाकारं सर्वगं सर्वशून्यम् ।
नित्यं शुद्धं निश्चलं निर्विकल्पं (पाठभेदः - निष्कलं)
ब्रह्माद्वैतं यत्तदेवाहमस्मि ॥ 513॥
यत्प्रत्यस्ताशेषमायाविशेषं
प्रत्यग्रूपं प्रत्ययागम्यमानम् ।
सत्यज्ञानानन्तमानन्दरूपं
ब्रह्माद्वैतं यत्तदेवाहमस्मि ॥ 514॥
निष्क्रियोऽस्म्यविकारोऽस्मि
निष्कलोऽस्मि निराकृतिः ।
निर्विकल्पोऽस्मि नित्योऽस्मि
निरालम्बोऽस्मि निर्द्वयः ॥ 515॥
सर्वात्मकोऽहं सर्वोऽहं सर्वातीतोऽहमद्वयः ।
केवलाखण्डबोधोऽहमानन्दोऽहं निरन्तरः ॥ 516॥
स्वाराज्यसाम्राज्यविभूतिरेषा
भवत्कृपाश्रीमहिमप्रसादात् ।
प्राप्ता मया श्रीगुरवे महात्मने
नमो नमस्तेऽस्तु पुनर्नमोऽस्तु ॥ 517॥
महास्वप्ने मायाकृतजनिजरामृत्युगहने
भ्रमन्तं क्लिश्यन्तं बहुलतरतापैरनुदिनम् । (पाठभेदः - रनुकलम्)
अहङ्कारव्याघ्रव्यथितमिममत्यन्तकृपया
प्रबोध्य प्रस्वापात्परमवितवान्मामसि गुरो ॥ 518॥
नमस्तस्मै सदैकस्मै कस्मैचिन्महसे नमः । (पाठभेदः - सदेकस्मै नमश्चिन्महसे मुहुः)
यदेतद्विश्वरूपेण राजते गुरुराज ते ॥ 519॥
इति नतमवलोक्य शिष्यवर्यं
समधिगतात्मसुखं प्रबुद्धतत्त्वम् ।
प्रमुदितहृदयं स देशिकेन्द्रः (पाठभेदः - हृदयः)
पुनरिदमाह वचः परं महात्मा ॥ 520॥
ब्रह्मप्रत्ययसन्ततिर्जगदतो ब्रह्मैव तत्सर्वतः (पाठभेदः - सत्सर्वतः)
पश्याध्यात्मदृशा प्रशान्तमनसा सर्वास्ववस्थास्वपि ।
रूपादन्यदवेक्षितं किमभितश्चक्षुष्मतां दृश्यते (पाठभेदः - विद्यते)
तद्वद्ब्रह्मविदः सतः किमपरं बुद्धेर्विहारास्पदम् ॥ 521॥
कस्तां परानन्दरसानुभूति-
मृत्सृज्य शून्येषु रमेत विद्वान् । (पाठभेदः - मुत्सृज्य
चन्द्रे महाह्लादिनि दीप्यमाने)
चित्रेन्दुमालोकयितुं क इच्छेत् ॥ 522॥
असत्पदार्थानुभवेन किञ्चिन्
न ह्यस्ति तृप्तिर्न च दुःखहानिः ।
तदद्वयानन्दरसानुभूत्या
तृप्तः सुखं तिष्ठ सदात्मनिष्ठया ॥ 523॥
स्वमेव सर्वथा पश्यन्मन्यमानः स्वमद्वयम् । (पाठभेदः - सर्वतः)
स्वानन्दमनुभुञ्जानः कालं नय महामते ॥ 524॥
अखण्डबोधात्मनि निर्विकल्पे
विकल्पनं व्योम्नि पुरप्रकल्पनम् ।
तदद्वयानन्दमयात्मना सदा
शान्तिं परामेत्य भजस्व मौनम् ॥ 525॥
तूष्णीमवस्था परमोपशान्तिः
बुद्धेरसत्कल्पविकल्पहेतोः ।
ब्रह्मात्मनो ब्रह्मविदो महात्मनो
यत्राद्वयानन्दसुखं निरन्तरम् ॥ 526॥
नास्ति निर्वासनान्मौनात्परं सुखकृदुत्तमम् ।
विज्ञातात्मस्वरूपस्य स्वानन्दरसपायिनः ॥ 527॥
गच्छंस्तिष्ठन्नुपविशञ्छयानो वाऽन्यथापि वा ।
यथेच्छया वसेद्विद्वानात्मारामः सदा मुनिः ॥ 528॥
न देशकालासनदिग्यमादि-
लक्ष्याद्यपेक्षाऽप्रतिबद्धवृत्तेः । (पाठभेदः - प्रतिबद्ध
संसिद्धतत्त्वस्य महात्मनोऽस्ति)
स्ववेदने का नियमाद्यवस्था ॥ 529॥
घटोऽयमिति विज्ञातुं नियमः कोऽन्ववेक्षते । (पाठभेदः - अपेक्ष्यते)
विना प्रमाणसुष्ठुत्वं यस्मिन्सति पदार्थधीः ॥ 530॥
अयमात्मा नित्यसिद्धः प्रमाणे सति भासते ।
न देशं नापि वा कालं न शुद्धिं वाप्यपेक्षते ॥ 531॥
देवदत्तोऽहमित्येतद्विज्ञानं निरपेक्षकम् ।
तद्वद्ब्रह्मविदोऽप्यस्य ब्रह्माहमिति वेदनम् ॥ 532॥
भानुनेव जगत्सर्वं भासते यस्य तेजसा ।
अनात्मकमसत्तुच्छं किं नु तस्यावभासकम् ॥ 533॥
वेदशास्त्रपुराणानि भूतानि सकलान्यपि ।
येनार्थवन्ति तं किन्नु विज्ञातारं प्रकाशयेत् ॥ 534॥
एष स्वयञ्ज्योतिरनन्तशक्तिः
आत्माऽप्रमेयः सकलानुभूतिः ।
यमेव विज्ञाय विमुक्तबन्धो
जयत्ययं ब्रह्मविदुत्तमोत्तमः ॥ 535॥
न खिद्यते नो विषयैः प्रमोदते
न सज्जते नापि विरज्यते च ।
स्वस्मिन्सदा क्रीडति नन्दति स्वयं
निरन्तरानन्दरसेन तृप्तः ॥ 536॥
क्षुधां देहव्यथां त्यक्त्वा बालः क्रीडति वस्तुनिः । (पाठभेदः - वस्तुनि)
तथैव विद्वान् रमते निर्ममो निरहं सुखी ॥ 537॥
चिन्ताशून्यमदैन्यभैक्षमशनं पानं सरिद्वारिषु
स्वातन्त्र्येण निरङ्कुशा स्थितिरभीर्निद्रा श्मशाने वने ।
वस्त्रं क्षालनशोषणादिरहितं दिग्वास्तु शय्या मही
सञ्चारो निगमान्तवीथिषु विदां क्रीडा परे ब्रह्मणि ॥ 538॥
विमानमालम्ब्य शरीरमेतद्
भुनक्त्यशेषान्विषयानुपस्थितान् ।
परेच्छया बालवदात्मवेत्ता
योऽव्यक्तलिङ्गोऽननुषक्तबाह्यः ॥ 539॥
दिगम्बरो वापि च साम्बरो वा
त्वगम्बरो वापि चिदम्बरस्थः ।
उन्मत्तवद्वापि च बालवद्वा
पिशाचवद्वापि चरत्यवन्याम् ॥ 540॥
कामान्निष्कामरूपी संश्चरत्येकचरो मुनिः । (पाठभेदः - कामान्नी कामरूपी)
स्वात्मनैव सदा तुष्टः स्वयं सर्वात्मना स्थितः ॥ 541॥
क्वचिन्मूढो विद्वान् क्वचिदपि महाराजविभवः
क्वचिद्भ्रान्तः सौम्यः क्वचिदजगराचारकलितः ।
क्वचित्पात्रीभूतः क्वचिदवमतः क्वाप्यविदितः
चरत्येवं प्राज्ञः सततपरमानन्दसुखितः ॥ 542॥
निर्धनोऽपि सदा तुष्टोऽप्यसहायो महाबलः ।
नित्यतृप्तोऽप्यभुञ्जानोऽप्यसमः समदर्शनः ॥ 543॥
अपि कुर्वन्नकुर्वाणश्चाभोक्ता फलभोग्यपि ।
शरीर्यप्यशरीर्येष परिच्छिन्नोऽपि सर्वगः ॥ 544॥
अशरीरं सदा सन्तमिमं ब्रह्मविदं क्वचित् ।
प्रियाप्रिये न स्पृशतस्तथैव च शुभाशुभे ॥ 545॥
स्थूलादिसम्बन्धवतोऽभिमानिनः
सुखं च दुःखं च शुभाशुभे च ।
विध्वस्तबन्धस्य सदात्मनो मुनेः
कुतः शुभं वाऽप्यशुभं फलं वा ॥ 546॥
तमसा ग्रस्तवद्भानादग्रस्तोऽपि रविर्जनैः ।
ग्रस्त इत्युच्यते भ्रान्त्यां ह्यज्ञात्वा वस्तुलक्षणम् ॥ 547॥ (पाठभेदः - भ्रान्त्या)
तद्वद्देहादिबन्धेभ्यो विमुक्तं ब्रह्मवित्तमम् ।
पश्यन्ति देहिवन्मूढाः शरीराभासदर्शनात् ॥ 548॥
अहिर्निर्ल्वयनीं वायं मुक्त्वा देहं तु तिष्ठति । (पाठभेदः - अहिनि)
इतस्ततश्चाल्यमानो यत्किञ्चित्प्राणवायुना ॥ 549॥
स्त्रोतसा नीयते दारु यथा निम्नोन्नतस्थलम् ।
दैवेन नीयते देहो यथाकालोपभुक्तिषु ॥ 550॥
प्रारब्धकर्मपरिकल्पितवासनाभिः
संसारिवच्चरति भुक्तिषु मुक्तदेहः ।
सिद्धः स्वयं वसति साक्षिवदत्र तूष्णीं
चक्रस्य मूलमिव कल्पविकल्पशून्यः ॥ 551॥
नैवेन्द्रियाणि विषयेषु नियुङ्क्त एष
नैवापयुङ्क्त उपदर्शनलक्षणस्थः ।
नैव क्रियाफलमपीषदवेक्षते स (पाठभेदः - अपीषदपेक्षते सः)
स्वानन्दसान्द्ररसपानसुमत्तचित्तः ॥ 552॥
लक्ष्यालक्ष्यगतिं त्यक्त्वा यस्तिष्ठेत्केवलात्मना ।
शिव एव स्वयं साक्षादयं ब्रह्मविदुत्तमः ॥ 553॥
जीवन्नेव सदा मुक्तः कृतार्थो ब्रह्मवित्तमः ।
उपाधिनाशाद्ब्रह्मैव सन् ब्रह्माप्येति निर्द्वयम् ॥ 554॥
शैलूषो वेषसद्भावाभावयोश्च यथा पुमान् ।
तथैव ब्रह्मविच्छ्रेष्ठः सदा ब्रह्मैव नापरः ॥ 555॥
यत्र क्वापि विशीर्णं सत्पर्णमिव तरोर्वपुः पततात् । (पाठभेदः - विशीर्णं पर्णमिव)
ब्रह्मीभूतस्य यतेः प्रागेव तच्चिदग्निना दग्धम् ॥ 556॥
सदात्मनि ब्रह्मणि तिष्ठतो मुनेः
पूर्णाऽद्वयानन्दमयात्मना सदा ।
न देशकालाद्युचितप्रतीक्षा
त्वङ्मांसविट्पिण्डविसर्जनाय ॥ 557॥
देहस्य मोक्षो नो मोक्षो न दण्डस्य कमण्डलोः ।
अविद्याहृदयग्रन्थिमोक्षो मोक्षो यतस्ततः ॥ 558॥
कुल्यायामथ नद्यां वा शिवक्षेत्रेऽपि चत्वरे ।
पर्णं पतति चेत्तेन तरोः किं नु शुभाशुभम् ॥ 559॥
पत्रस्य पुष्पस्य फलस्य नाशवद्-
देहेन्द्रियप्राणधियां विनाशः ।
नैवात्मनः स्वस्य सदात्मकस्या-
नन्दाकृतेर्वृक्षवदस्ति चैषः ॥ 560॥ (पाठभेदः - वदास्त एषः)
प्रज्ञानघन इत्यात्मलक्षणं सत्यसूचकम् ।
अनूद्यौपाधिकस्यैव कथयन्ति विनाशनम् ॥ 561॥
अविनाशी वा अरेऽयमात्मेति श्रुतिरात्मनः ।
प्रब्रवीत्यविनाशित्वं विनश्यत्सु विकारिषु ॥ 562॥
पाषाणवृक्षतृणधान्यकडङ्कराद्या (पाठभेदः - कटाम्बराद्या)
दग्धा भवन्ति हि मृदेव यथा तथैव ।
देहेन्द्रियासुमन आदि समस्तदृश्यं
ज्ञानाग्निदग्धमुपयाति परात्मभावम् ॥ 563॥
विलक्षणं यथा ध्वान्तं लीयते भानुतेजसि ।
तथैव सकलं दृश्यं ब्रह्मणि प्रविलीयते ॥ 564॥
घटे नष्टे यथा व्योम व्योमैव भवति स्फुटम् ।
तथैवोपाधिविलये ब्रह्मैव ब्रह्मवित्स्वयम् ॥ 565॥
क्षीरं क्षीरे यथा क्षिप्तं तैलं तैले जलं जले ।
संयुक्तमेकतां याति तथाऽऽत्मन्यात्मविन्मुनिः ॥ 566॥
एवं विदेहकैवल्यं सन्मात्रत्वमखण्डितम् ।
ब्रह्मभावं प्रपद्यैष यतिर्नावर्तते पुनः ॥ 567॥
सदात्मैकत्वविज्ञानदग्धाविद्यादिवर्ष्मणः ।
अमुष्य ब्रह्मभूतत्वाद् ब्रह्मणः कुत उद्भवः ॥ 568॥
मायाक्लृप्तौ बन्धमोक्षौ न स्तः स्वात्मनि वस्तुतः ।
यथा रज्जौ निष्क्रियायां सर्पाभासविनिर्गमौ ॥ 569॥
आवृतेः सदसत्त्वाभ्यां वक्तव्ये बन्धमोक्षणे ।
नावृतिर्ब्रह्मणः काचिदन्याभावादनावृतम् ।
यद्यस्त्यद्वैतहानिः स्याद् द्वैतं नो सहते श्रुतिः ॥ 570॥
बन्धञ्च मोक्षञ्च मृषैव मूढा
बुद्धेर्गुणं वस्तुनि कल्पयन्ति ।
दृगावृतिं मेघकृतां यथा रवौ
यतोऽद्वयाऽसङ्गचिदेतदक्षरम् ॥ 571॥ (पाठभेदः - चिदेकमक्षरम्)
अस्तीति प्रत्ययो यश्च यश्च नास्तीति वस्तुनि ।
बुद्धेरेव गुणावेतौ न तु नित्यस्य वस्तुनः ॥ 572॥
अतस्तौ मायया क्लृप्तौ बन्धमोक्षौ न चात्मनि ।
निष्कले निष्क्रिये शान्ते निरवद्ये निरञ्जने ।
अद्वितीये परे तत्त्वे व्योमवत्कल्पना कुतः ॥ 573॥
न निरोधो न चोत्पत्तिर्न बद्धो न च साधकः ।
न मुमुक्षुर्न वै मुक्त इत्येषा परमार्थता ॥ 574॥
सकलनिगमचूडास्वान्तसिद्धान्तरूपं
परमिदमतिगुह्यं दर्शितं ते मयाद्य ।
अपगतकलिदोषं कामनिर्मुक्तबुद्धिं (पाठभेदः - बुद्धिः)
स्वसुतवदसकृत्त्वां भावयित्वा मुमुक्षुम् ॥ 575॥
इति श्रुत्वा गुरोर्वाक्यं प्रश्रयेण कृतानतिः ।
स तेन समनुज्ञातो ययौ निर्मुक्तबन्धनः ॥ 576॥
गुरुरेव सदानन्दसिन्धौ निर्मग्नमानसः । (पाठभेदः - गुरुरेष)
पावयन्वसुधां सर्वां विचचार निरन्तरः ॥ 577॥
इत्याचार्यस्य शिष्यस्य संवादेनात्मलक्षणम् ।
निरूपितं मुमुक्षूणां सुखबोधोपपत्तये ॥ 578॥
हितमिदमुपदेशमाद्रियन्तां
विहितनिरस्तसमस्तचित्तदोषाः ।
भवसुखविरताः प्रशान्तचित्ताः (पाठभेदः - सुखविमुखाः)
श्रुतिरसिका यतयो मुमुक्षवो ये ॥ 579॥
संसाराध्वनि तापभानुकिरणप्रोद्भूतदाहव्यथा-
खिन्नानां जलकाङ्क्षया मरुभुवि भ्रान्त्या परिभ्राम्यताम् ।
अत्यासन्नसुधाम्बुधिं सुखकरं ब्रह्माद्वयं दर्शय-
त्येषा शङ्करभारती विजयते निर्वाणसन्दायिनी ॥ 580॥
॥ इति शङ्कराचार्यविरचितं विवेकचूडामणिः ॥
॥ ॐ तत्सत् ॥
sarvavedāntasiddhāntagocaraṃ tamagocaram |
govindaṃ paramānandaṃ sadguruṃ praṇato'smyaham || 1||
jantūnāṃ narajanma durlabhamataḥ puṃstvaṃ tato vipratā
tasmādvaidikadharmamārgaparatā vidvattvamasmātparam |
ātmānātmavivecanaṃ svanubhavo brahmātmanā saṃsthitiḥ
muktirno śatajanmakoṭisukṛtaiḥ puṇyairvinā labhyate || 2|| (pāṭhabhedaḥ - śatakoṭijanmasu kṛtaiḥ)
durlabhaṃ trayamevaitaddevānugrahahetukam |
manuṣyatvaṃ mumukṣutvaṃ mahāpuruṣasaṃśrayaḥ || 3||
labdhvā kathañcinnarajanma durlabhaṃ (pāṭhabhedaḥ - kathañcin)
tatrāpi puṃstvaṃ śrutipāradarśanam |
yastvātmamuktau na yateta mūḍhadhīḥ
sa hyātmahā svaṃ vinihantyasadgrahāt || 4|| (pāṭhabhedaḥ - ātmahā svaṃ)
itaḥ ko nvasti mūḍhātmā yastu svārthe pramādyati |
durlabhaṃ mānuṣaṃ dehaṃ prāpya tatrāpi pauruṣam || 5||
vadantu śāstrāṇi yajantu devān (pāṭhabhedaḥ - paṭhantu)
kurvantu karmāṇi bhajantu devatāḥ |
ātmaikyabodhena vināpi mukti- (pāṭhabhedaḥ - vinā vimuktiḥ na)
rna sidhyati brahmaśatāntare'pi || 6||
amṛtattvasya nāśāsti vittenetyeva hi śrutiḥ |
bravīti karmaṇo mukterahetutvaṃ sphuṭaṃ yataḥ || 7||
ato vimuktyai prayateta vidvān
sannyastabāhyārthasukhaspṛhaḥ san |
santaṃ mahāntaṃ samupetya deśikaṃ
tenopadiṣṭārthasamāhitātmā || 8||
uddharedātmanā''tmānaṃ magnaṃ saṃsāravāridhau |
yogārūḍhatvamāsādya samyagdarśananiṣṭhayā || 9||
sannyasya sarvakarmāṇi bhavabandhavimuktaye |
yatyatāṃ paṇḍitairdhīrairātmābhyāsa upasthitaiḥ || 10||
cittasya śuddhaye karma na tu vastūpalabdhaye |
vastusiddhirvicāreṇa na kiñcitkarmakoṭibhiḥ || 11||
samyagvicārataḥ siddhā rajjutattvāvadhāraṇā |
bhrāntoditamahāsarpabhayaduḥkhavināśinī || 12|| (pāṭhabhedaḥ - bhrāntyo)
arthasya niścayo dṛṣṭo vicāreṇa hitoktitaḥ |
na snānena na dānena prāṇāyāmaśatena vā || 13||
adhikāriṇamāśāste phalasiddhirviśeṣataḥ |
upāyā deśakālādyāḥ santyasminsahakāriṇaḥ || 14|| (pāṭhabhedaḥ - santyasyāṃ)
ato vicāraḥ kartavyo jijñāsorātmavastunaḥ ||
samāsādya dayāsindhuṃ guruṃ brahmaviduttamam || 15||
medhāvī puruṣo vidvānūhāpohavicakṣaṇaḥ |
adhikāryātmavidyāyāmuktalakṣaṇalakṣitaḥ || 16||
vivekino viraktasya śamādiguṇaśālinaḥ |
mumukṣoreva hi brahmajijñāsāyogyatā matā || 17||
sādhanānyatra catvāri kathitāni manīṣibhiḥ |
yeṣu satsveva sanniṣṭhā yadabhāve na sidhyati || 18||
ādau nityānityavastuvivekaḥ parigaṇyate |
ihāmutraphalabhogavirāgastadanantaram |
śamādiṣaṭkasampattirmumukṣutvamiti sphuṭam || 19||
brahma satyaṃ jaganmithyetyevaṃrūpo viniścayaḥ |
so'yaṃ nityānityavastuvivekaḥ samudāhṛtaḥ || 20||
tadvairāgyaṃ jihāsā yā darśanaśravaṇādibhiḥ | (pāṭhabhedaḥ - jugupsā yā)
dehādibrahmaparyante hyanitye bhogavastuni || 21|| (pāṭhabhedaḥ - bhogyavastuni)
virajya viṣayavrātāddoṣadṛṣṭyā muhurmuhuḥ |
svalakṣye niyatāvasthā manasaḥ śama ucyate || 22||
viṣayebhyaḥ parāvartya sthāpanaṃ svasvagolake |
ubhayeṣāmindriyāṇāṃ sa damaḥ parikīrtitaḥ |
bāhyānālambanaṃ vṛttereṣoparatiruttamā || 23||
sahanaṃ sarvaduḥkhānāmapratīkārapūrvakam |
cintāvilāparahitaṃ sā titikṣā nigadyate || 24||
śāstrasya guruvākyasya satyabuddhyavadhāraṇam | (pāṭhabhedaḥ - satyabuddhyāvadhāraṇā)
sā śraddhā kathitā sadbhiryayā vastūpalabhyate || 25||
sarvadā sthāpanaṃ buddheḥ śuddhe brahmaṇi sarvadā | (pāṭhabhedaḥ - samyagāsthāpanaṃ)
tatsamādhānamityuktaṃ na tu cittasya lālanam || 26||
ahaṅkārādidehāntān bandhānajñānakalpitān |
svasvarūpāvabodhena moktumicchā mumukṣutā || 27||
mandamadhyamarūpāpi vairāgyeṇa śamādinā |
prasādena guroḥ seyaṃ pravṛddhā sūyate phalam || 28||
vairāgyaṃ ca mumukṣutvaṃ tīvraṃ yasya tu vidyate |
tasminnevārthavantaḥ syuḥ phalavantaḥ śamādayaḥ || 29||
etayormandatā yatra viraktatvamumukṣayoḥ |
marau salilavattatra śamāderbhānamātratā || 30||
mokṣakāraṇasāmagryāṃ bhaktireva garīyasī |
svasvarūpānusandhānaṃ bhaktirityabhidhīyate || 31||
svātmatattvānusandhānaṃ bhaktirityapare jaguḥ |
uktasādhanasampannastattvajijñāsurātmanaḥ |
upasīdedguruṃ prājñaṃ yasmādbandhavimokṣaṇam || 32||
śrotriyo'vṛjino'kāmahato yo brahmavittamaḥ |
brahmaṇyuparataḥ śānto nirindhana ivānalaḥ |
ahetukadayāsindhurbandhurānamatāṃ satām || 33||
tamārādhya guruṃ bhaktyā prahvapraśrayasevanaiḥ | (pāṭhabhedaḥ - prahvaḥ)
prasannaṃ tamanuprāpya pṛcchejjñātavyamātmanaḥ || 34||
svāminnamaste natalokabandho
kāruṇyasindho patitaṃ bhavābdhau |
māmuddharātmīyakaṭākṣadṛṣṭyā
ṛjvyātikāruṇyasudhābhivṛṣṭyā || 35||
durvārasaṃsāradavāgnitaptaṃ
dodhūyamānaṃ duradṛṣṭavātaiḥ |
bhītaṃ prapannaṃ paripāhi mṛtyoḥ
śaraṇyamanyadyadahaṃ na jāne || 36|| (pāṭhabhedaḥ - anyaṃ)
śāntā mahānto nivasanti santo
vasantavallokahitaṃ carantaḥ |
tīrṇāḥ svayaṃ bhīmabhavārṇavaṃ janā-
nahetunānyānapi tārayantaḥ || 37||
ayaṃ svabhāvaḥ svata eva yatpara-
śramāpanodapravaṇaṃ mahātmanām |
sudhāṃśureṣa svayamarkakarkaśa-
prabhābhitaptāmavati kṣitiṃ kila || 38||
brahmānandarasānubhūtikalitaiḥ pūtaiḥ suśītairyutai- (pāṭhabhedaḥ - suśītaiḥ sitaiḥ)
ryuṣmadvākkalaśojjhitaiḥ śrutisukhairvākyāmṛtaiḥ secaya |
santaptaṃ bhavatāpadāvadahanajvālābhirenaṃ prabho
dhanyāste bhavadīkṣaṇakṣaṇagateḥ pātrīkṛtāḥ svīkṛtāḥ || 39||
kathaṃ tareyaṃ bhavasindhumetaṃ
kā vā gatirme katamo'styupāyaḥ |
jāne na kiñcitkṛpayā'va māṃ prabho
saṃsāraduḥkhakṣatimātanuṣva || 40||
tathā vadantaṃ śaraṇāgataṃ svaṃ
saṃsāradāvānalatāpataptam |
nirīkṣya kāruṇyarasārdradṛṣṭyā
dadyādabhītiṃ sahasā mahātmā || 41||
vidvān sa tasmā upasattimīyuṣe
mumukṣave sādhu yathoktakāriṇe |
praśāntacittāya śamānvitāya
tattvopadeśaṃ kṛpayaiva kuryāt || 42||
mā bhaiṣṭa vidvaṃstava nāstyapāyaḥ
saṃsārasindhostaraṇe'styupāyaḥ |
yenaiva yātā yatayo'sya pāraṃ
tameva mārgaṃ tava nirdiśāmi || 43||
astyupāyo mahānkaścitsaṃsārabhayanāśanaḥ |
tena tīrtvā bhavāmbhodhiṃ paramānandamāpsyasi || 44||
vedāntārthavicāreṇa jāyate jñānamuttamam |
tenātyantikasaṃsāraduḥkhanāśo bhavatyanu || 45||
śraddhābhaktidhyānayogānmumukṣoḥ
mukterhetūnvakti sākṣācchrutergīḥ |
yo vā eteṣveva tiṣṭhatyamuṣya
mokṣo'vidyākalpitāddehabandhāt || 46||
ajñānayogātparamātmanastava
hyanātmabandhastata eva saṃsṛtiḥ |
tayorvivekoditabodhavahniḥ
ajñānakāryaṃ pradahetsamūlam || 47||
śiṣya uvāca |
kṛpayā śrūyatāṃ svāminpraśno'yaṃ kriyate mayā |
yaduttaramahaṃ śrutvā kṛtārthaḥ syāṃ bhavanmukhāt || 48||
ko nāma bandhaḥ kathameṣa āgataḥ
kathaṃ pratiṣṭhāsya kathaṃ vimokṣaḥ |
ko'sāvanātmā paramaḥ ka ātmā
tayorvivekaḥ kathametaducyatām || 49||
śrīguruvāca |
dhanyo'si kṛtakṛtyo'si pāvitaṃ te kulaṃ tvayā | (pāṭhabhedaḥ - pāvitaṃ)
yadavidyābandhamuktyā brahmībhavitumicchasi || 50||
ṛṇamocanakartāraḥ pituḥ santi sutādayaḥ |
bandhamocanakartā tu svasmādanyo na kaścana || 51||
mastakanyastabhārāderduḥkhamanyairnivāryate |
kṣudhādikṛtaduḥkhaṃ tu vinā svena na kenacit || 52||
pathyamauṣadhasevā ca kriyate yena rogiṇā |
ārogyasiddhirdṛṣṭā'sya nānyānuṣṭhitakarmaṇā || 53||
vastusvarūpaṃ sphuṭabodhacakṣuṣā
svenaiva vedyaṃ na tu paṇḍitena |
candrasvarūpaṃ nijacakṣuṣaiva
jñātavyamanyairavagamyate kim || 54||
avidyākāmakarmādipāśabandhaṃ vimocitum |
kaḥ śaknuyādvinā''tmānaṃ kalpakoṭiśatairapi || 55||
na yogena na sāṅkhyena karmaṇā no na vidyayā |
brahmātmaikatvabodhena mokṣaḥ sidhyati nānyathā || 56||
vīṇāyā rūpasaundaryaṃ tantrīvādanasauṣṭhavam |
prajārañjanamātraṃ tanna sāmrājyāya kalpate || 57||
vāgvaikharī śabdajharī śāstravyākhyānakauśalam |
vaiduṣyaṃ viduṣāṃ tadvadbhuktaye na tu muktaye || 58||
avijñāte pare tattve śāstrādhītistu niṣphalā |
vijñāte'pi pare tattve śāstrādhītistu niṣphalā || 59||
śabdajālaṃ mahāraṇyaṃ cittabhramaṇakāraṇam |
ataḥ prayatnājjñātavyaṃ tattvajñaistattvamātmanaḥ || 60|| tattvajñāttattva
ajñānasarpadaṣṭasya brahmajñānauṣadhaṃ vinā |
kimu vedaiśca śāstraiśca kimu mantraiḥ kimauṣadhaiḥ || 61||
na gacchati vinā pānaṃ vyādhirauṣadhaśabdataḥ |
vinā'parokṣānubhavaṃ brahmaśabdairna mucyate || 62||
akṛtvā dṛśyavilayamajñātvā tattvamātmanaḥ |
brahmaśabdaiḥ kuto muktiruktimātraphalairnṛṇām || 63|| (pāṭhabhedaḥ - bāhyaśabdaiḥ)
akṛtvā śatrusaṃhāramagatvākhilabhūśriyam |
rājāhamiti śabdānno rājā bhavitumarhati || 64||
āptoktiṃ khananaṃ tathopariśilādyutkarṣaṇaṃ svīkṛtiṃ (pāṭhabhedaḥ - pariśilāpākarṣaṇaṃ)
nikṣepaḥ samapekṣate na hi bahiḥśabdaistu nirgacchati |
tadvadbrahmavidopadeśamananadhyānādibhirlabhyate
māyākāryatirohitaṃ svamamalaṃ tattvaṃ na duryuktibhiḥ || 65||
tasmātsarvaprayatnena bhavabandhavimuktaye |
svaireva yatnaḥ kartavyo rogādāviva paṇḍitaiḥ || 66|| (pāṭhabhedaḥ - rogāderiva)
yastvayādya kṛtaḥ praśno varīyāñchāstravinmataḥ | (pāṭhabhedaḥ - sammataḥ)
sūtraprāyo nigūḍhārtho jñātavyaśca mumukṣubhiḥ || 67||
śaṛṇuṣvāvahito vidvanyanmayā samudīryate |
tadetacchravaṇātsadyo bhavabandhādvimokṣyase || 68||
mokṣasya hetuḥ prathamo nigadyate
vairāgyamatyantamanityavastuṣu |
tataḥ śamaścāpi damastitikṣā
nyāsaḥ prasaktākhilakarmaṇāṃ bhṛśam || 69||
tataḥ śrutistanmananaṃ satattva-
dhyānaṃ ciraṃ nityanirantaraṃ muneḥ |
tato'vikalpaṃ parametya vidvān
ihaiva nirvāṇasukhaṃ samṛcchati || 70||
yadboddhavyaṃ tavedānīmātmānātmavivecanam |
taducyate mayā samyak śrutvātmanyavadhāraya || 71||
majjāsthimedaḥpalaraktacarma-
tvagāhvayairdhātubhirebhiranvitam |
pādoruvakṣobhujapṛṣṭhamastakaiḥ
aṅgairupāṅgairupayuktametat || 72||
ahammameti prathitaṃ śarīraṃ
mohāspadaṃ sthūlamitīryate budhaiḥ |
nabhonabhasvaddahanāmbubhūmayaḥ
sūkṣmāṇi bhūtāni bhavanti tāni || 73||
parasparāṃśairmilitāni bhūtvā
sthūlāni ca sthūlaśarīrahetavaḥ |
mātrāstadīyā viṣayā bhavanti
śabdādayaḥ pañca sukhāya bhoktuḥ || 74||
ya eṣu mūḍhā viṣayeṣu baddhā
rāgorupāśena sudurdamena |
āyānti niryāntyadha ūrdhvamuccaiḥ
svakarmadūtena javena nītāḥ || 75||
śabdādibhiḥ pañcabhireva pañca
pañcatvamāpuḥ svaguṇena baddhāḥ |
kuraṅgamātaṅgapataṅgamīna-
bhṛṅgā naraḥ pañcabhirañcitaḥ kim || 76||
doṣeṇa tīvro viṣayaḥ kṛṣṇasarpaviṣādapi |
viṣaṃ nihanti bhoktāraṃ draṣṭāraṃ cakṣuṣāpyayam || 77||
viṣayāśāmahāpāśādyo vimuktaḥ sudustyajāt |
sa eva kalpate muktyai nānyaḥ ṣaṭśāstravedyapi || 78||
āpātavairāgyavato mumukṣūn
bhavābdhipāraṃ pratiyātumudyatān |
āśāgraho majjayate'ntarāle
nigṛhya kaṇṭhe vinivartya vegāt || 79||
viṣayākhyagraho yena suviraktyasinā hataḥ |
sa gacchati bhavāmbhodheḥ pāraṃ pratyūhavarjitaḥ || 80||
viṣamaviṣayamārgairgacchato'nacchabuddheḥ (pāṭhabhedaḥ - viṣayamārge gacchato)
pratipadamabhiyāto mṛtyurapyeṣa viddhi | (pāṭhabhedaḥ - pratipadamabhighāto mṛtyurapyeṣa siddhaḥ)
hitasujanagurūktyā gacchataḥ svasya yuktyā
prabhavati phalasiddhiḥ satyamityeva viddhi || 81||
mokṣasya kāṅkṣā yadi vai tavāsti
tyajātidūrādviṣayānviṣaṃ yathā |
pīyūṣavattoṣadayākṣamārjava-
praśāntidāntīrbhaja nityamādarāt || 82||
anukṣaṇaṃ yatparihṛtya kṛtyaṃ
anādyavidyākṛtabandhamokṣaṇam |
dehaḥ parārtho'yamamuṣya poṣaṇe
yaḥ sajjate sa svamanena hanti || 83||
śarīrapoṣaṇārthī san ya ātmānaṃ didṛkṣati | (pāṭhabhedaḥ - didṛkṣate)
grāhaṃ dārudhiyā dhṛtvā nadīṃ tartuṃ sa gacchati || 84|| (pāṭhabhedaḥ - sa icchati)
moha eva mahāmṛtyurmumukṣorvapurādiṣu |
moho vinirjito yena sa muktipadamarhati || 85||
mohaṃ jahi mahāmṛtyuṃ dehadārasutādiṣu |
yaṃ jitvā munayo yānti tadviṣṇoḥ paramaṃ padam || 86||
tvaṅmāṃsarudhirasnāyumedomajjāsthisaṅkulam |
pūrṇaṃ mūtrapurīṣābhyāṃ sthūlaṃ nindyamidaṃ vapuḥ || 87||
pañcīkṛtebhyo bhūtebhyaḥ sthūlebhyaḥ pūrvakarmaṇā |
samutpannamidaṃ sthūlaṃ bhogāyatanamātmanaḥ |
avasthā jāgarastasya sthūlārthānubhavo yataḥ || 88||
bāhyendriyaiḥ sthūlapadārthasevāṃ
srakcandanastryādivicitrarūpām |
karoti jīvaḥ svayametadātmanā
tasmātpraśastirvapuṣo'sya jāgare || 89||
sarvo'pi bāhyasaṃsāraḥ puruṣasya yadāśrayaḥ |
viddhi dehamidaṃ sthūlaṃ gṛhavadgṛhamedhinaḥ || 90||
sthūlasya sambhavajarāmaraṇāni dharmāḥ
sthaulyādayo bahuvidhāḥ śiśutādyavasthāḥ |
varṇāśramādiniyamā bahudhā''mayāḥ syuḥ
pūjāvamānabahumānamukhā viśeṣāḥ || 91||
buddhīndriyāṇi śravaṇaṃ tvagakṣi
ghrāṇaṃ ca jihvā viṣayāvabodhanāt |
vākpāṇipādā gudamapyupasthaḥ (pāṭhabhedaḥ - upasthaṃ)
karmendriyāṇi pravaṇena karmasu || 92|| (pāṭhabhedaḥ - pravaṇāni)
nigadyate'ntaḥkaraṇaṃ manodhīḥ
ahaṅkṛtiścittamiti svavṛttibhiḥ |
manastu saṅkalpavikalpanādibhiḥ
buddhiḥ padārthādhyavasāyadharmataḥ || 93||
atrābhimānādahamityahaṅkṛtiḥ |
svārthānusandhānaguṇena cittam || 94||
prāṇāpānavyānodānasamānā bhavatyasau prāṇaḥ |
svayameva vṛttibhedādvikṛtibhedātsuvarṇasalilādivat || 95|| (pāṭhabhedaḥ - vikṛterbhedātsuvarṇasalilamiva)
vāgādi pañca śravaṇādi pañca
prāṇādi pañcābhramukhāni pañca |
buddhyādyavidyāpi ca kāmakarmaṇī
puryaṣṭakaṃ sūkṣmaśarīramāhuḥ || 96||
idaṃ śarīraṃ śaṛṇu sūkṣmasañjñitaṃ
liṅgaṃ tvapañcīkṛtabhūtasambhavam |
savāsanaṃ karmaphalānubhāvakaṃ
svājñānato'nādirupādhirātmanaḥ || 97||
svapno bhavatyasya vibhaktyavasthā
svamātraśeṣeṇa vibhāti yatra |
svapne tu buddhiḥ svayameva jāgrat
kālīnanānāvidhavāsanābhiḥ || 98||
kartrādibhāvaṃ pratipadya rājate
yatra svayaṃ bhāti hyayaṃ parātmā | (pāṭhabhedaḥ - svayañjyotirayaṃ)
dhīmātrakopādhiraśeṣasākṣī
na lipyate tatkṛtakarmaleśaiḥ | karmalepaiḥ
yasmādasaṅgastata eva karmabhiḥ
na lipyate kiñcidupādhinā kṛtaiḥ || 99||
sarvavyāpṛtikaraṇaṃ liṅgamidaṃ syāccidātmanaḥ puṃsaḥ |
vāsyādikamiva takṣṇastenaivātmā bhavatyasaṅgo'yam || 100||
andhatvamandatvapaṭutvadharmāḥ
sauguṇyavaiguṇyavaśāddhi cakṣuṣaḥ |
bādhiryamūkatvamukhāstathaiva
śrotrādidharmā na tu vetturātmanaḥ || 101||
ucchvāsaniḥśvāsavijṛmbhaṇakṣu-
tprasyandanādyutkramaṇādikāḥ kriyāḥ | (pāṭhabhedaḥ - praspandanādy)
prāṇādikarmāṇi vadanti tajñāḥ (pāṭhabhedaḥ - tajjñāḥ)
prāṇasya dharmāvaśanāpipāse || 102||
antaḥkaraṇameteṣu cakṣurādiṣu varṣmaṇi |
ahamityabhimānena tiṣṭhatyābhāsatejasā || 103||
ahaṅkāraḥ sa vijñeyaḥ kartā bhoktābhimānyayam |
sattvādiguṇayogena cāvasthātrayamaśnute || 104|| (pāṭhabhedaḥ - yogenāvasthātritayamśnute)
viṣayāṇāmānukūlye sukhī duḥkhī viparyaye |
sukhaṃ duḥkhaṃ ca taddharmaḥ sadānandasya nātmanaḥ || 105||
ātmārthatvena hi preyānviṣayo na svataḥ priyaḥ |
svata eva hi sarveṣāmātmā priyatamo yataḥ |
tata ātmā sadānando nāsya duḥkhaṃ kadācana || 106||
yatsuṣuptau nirviṣaya ātmānando'nubhūyate |
śrutiḥ pratyakṣamaitihyamanumānaṃ ca jāgrati || 107||
avyaktanāmnī parameśaśaktiḥ
anādyavidyā triguṇātmikā parā |
kāryānumeyā sudhiyaiva māyā
yayā jagatsarvamidaṃ prasūyate || 108||
sannāpyasannāpyubhayātmikā no
bhinnāpyabhinnāpyubhayātmikā no |
sāṅgāpyanaṅgā hyubhayātmikā no (pāṭhabhedaḥ - anaṅgāpyubhayātmikā)
mahādbhutā'nirvacanīyarūpā || 109||
śuddhādvayabrahmavibodhanāśyā
sarpabhramo rajjuvivekato yathā |
rajastamaḥsattvamiti prasiddhā
guṇāstadīyāḥ prathitaiḥ svakāryaiḥ || 110||
vikṣepaśaktī rajasaḥ kriyātmikā
yataḥ pravṛttiḥ prasṛtā purāṇī |
rāgādayo'syāḥ prabhavanti nityaṃ
duḥkhādayo ye manaso vikārāḥ || 111||
kāmaḥ krodho lobhadambhādyasūyā (pāṭhabhedaḥ - lobhadambhābhyasūyā)
ahaṅkārerṣyāmatsarādyāstu ghorāḥ |
dharmā ete rājasāḥ pumpravṛtti-
ryasmādeṣā tadrajo bandhahetuḥ || 112|| (pāṭhabhedaḥ - yasmādetattadrajo)
eṣā''vṛtirnāma tamoguṇasya
śaktirmayā vastvavabhāsate'nyathā | śaktiryayā
saiṣā nidānaṃ puruṣasya saṃsṛteḥ
vikṣepaśakteḥ pravaṇasya hetuḥ || 113|| (pāṭhabhedaḥ - prasarasya)
prajñāvānapi paṇḍito'pi caturo'pyatyantasūkṣmātmadṛg- (pāṭhabhedaḥ - sūkṣmārthadṛg)
vyālīḍhastamasā na vetti bahudhā sambodhito'pi sphuṭam |
bhrāntyāropitameva sādhu kalayatyālambate tadguṇān
hantāsau prabalā durantatamasaḥ śaktirmahatyāvṛtiḥ || 114||
abhāvanā vā viparītabhāvanā'- (pāṭhabhedaḥ - viparītabhāvanā)
sambhāvanā vipratipattirasyāḥ |
saṃsargayuktaṃ na vimuñcati dhruvaṃ
vikṣepaśaktiḥ kṣapayatyajasram || 115||
ajñānamālasyajaḍatvanidrā-
pramādamūḍhatvamukhāstamoguṇāḥ |
etaiḥ prayukto na hi vetti kiñcit
nidrāluvatstambhavadeva tiṣṭhati || 116||
sattvaṃ viśuddhaṃ jalavattathāpi
tābhyāṃ militvā saraṇāya kalpate |
yatrātmabimbaḥ pratibimbitaḥ san
prakāśayatyarka ivākhilaṃ jaḍam || 117||
miśrasya sattvasya bhavanti dharmāḥ
tvamānitādyā niyamā yamādyāḥ |
śraddhā ca bhaktiśca mumukṣutā ca
daivī ca sampattirasannivṛttiḥ || 118||
viśuddhasattvasya guṇāḥ prasādaḥ
svātmānubhūtiḥ paramā praśāntiḥ |
tṛptiḥ praharṣaḥ paramātmaniṣṭhā
yayā sadānandarasaṃ samṛcchati || 119||
avyaktametattriguṇairniruktaṃ
tatkāraṇaṃ nāma śarīramātmanaḥ |
suṣuptiretasya vibhaktyavasthā
pralīnasarvendriyabuddhivṛttiḥ || 120||
sarvaprakārapramitipraśāntiḥ
bījātmanāvasthitireva buddheḥ |
suṣuptiretasya kila pratītiḥ (pāṭhabhedaḥ - suṣuptiratrāsya)
kiñcinna vedmīti jagatprasiddheḥ || 121||
dehendriyaprāṇamano'hamādayaḥ
sarve vikārā viṣayāḥ sukhādayaḥ |
vyomādibhūtānyakhilaṃ ca viśvaṃ
avyaktaparyantamidaṃ hyanātmā || 122||
māyā māyākāryaṃ sarvaṃ mahadādidehaparyantam |
asadidamanātmatattvaṃ viddhi tvaṃ marumarīcikākalpam || 123||
atha te sampravakṣyāmi svarūpaṃ paramātmanaḥ |
yadvijñāya naro bandhānmuktaḥ kaivalyamaśnute || 124||
asti kaścitsvayaṃ nityamahampratyayalambanaḥ |
avasthātrayasākṣī sanpañcakośavilakṣaṇaḥ || 125||
yo vijānāti sakalaṃ jāgratsvapnasuṣuptiṣu |
buddhitadvṛttisadbhāvamabhāvamahamityayam || 126||
yaḥ paśyati svayaṃ sarvaṃ yaṃ na paśyati kaścana | (pāṭhabhedaḥ - kiñcana)
yaścetayati buddhyādi na tadyaṃ cetayatyayam || 127||
yena viśvamidaṃ vyāptaṃ yaṃ na vyāpnoti kiñcana |
ābhārūpamidaṃ sarvaṃ yaṃ bhāntamanubhātyayam || 128||
yasya sannidhimātreṇa dehendriyamanodhiyaḥ |
viṣayeṣu svakīyeṣu vartante preritā iva || 129||
ahaṅkārādidehāntā viṣayāśca sukhādayaḥ |
vedyante ghaṭavadyena nityabodhasvarūpiṇā || 130||
eṣo'ntarātmā puruṣaḥ purāṇo
nirantarākhaṇḍasukhānubhūtiḥ |
sadaikarūpaḥ pratibodhamātro
yeneṣitā vāgasavaścaranti || 131||
atraiva sattvātmani dhīguhāyāṃ
avyākṛtākāśa uśatprakāśaḥ | (pāṭhabhedaḥ - uruprakāśaḥ)
ākāśa uccai ravivatprakāśate
svatejasā viśvamidaṃ prakāśayan || 132||
jñātā mano'haṅkṛtivikriyāṇāṃ
dehendriyaprāṇakṛtakriyāṇām |
ayo'gnivattānanuvartamāno
na ceṣṭate no vikaroti kiñcana || 133||
na jāyate no mriyate na vardhate
na kṣīyate no vikaroti nityaḥ |
vilīyamāne'pi vapuṣyamuṣmi-
nna līyate kumbha ivāmbaraṃ svayam || 134||
prakṛtivikṛtibhinnaḥ śuddhabodhasvabhāvaḥ
sadasadidamaśeṣaṃ bhāsayannirviśeṣaḥ |
vilasati paramātmā jāgradādiṣvavasthā-
svahamahamiti sākṣātsākṣirūpeṇa buddheḥ || 135||
niyamitamanasāmuṃ tvaṃ svamātmānamātma-
nyayamahamiti sākṣādviddhi buddhiprasādāt |
janimaraṇataraṅgāpārasaṃsārasindhuṃ
pratara bhava kṛtārtho brahmarūpeṇa saṃsthaḥ || 136||
atrānātmanyahamiti matirbandha eṣo'sya puṃsaḥ
prāpto'jñānājjananamaraṇakleśasampātahetuḥ |
yenaivāyaṃ vapuridamasatsatyamityātmabuddhyā
puṣyatyukṣatyavati viṣayaistantubhiḥ kośakṛdvat || 137||
atasmiṃstadbuddhiḥ prabhavati vimūḍhasya tamasā
vivekābhāvādvai sphurati bhujage rajjudhiṣaṇā |
tato'narthavrāto nipatati samādāturadhikaḥ
tato yo'sadgrāhaḥ sa hi bhavati bandhaḥ śaṛṇu sakhe || 138||
akhaṇḍanityādvayabodhaśaktyā
sphurantamātmānamanantavaibhavam |
samāvṛṇotyāvṛtiśaktireṣā
tamomayī rāhurivārkabimbam || 139||
tirobhūte svātmanyamalataratejovati pumān
anātmānaṃ mohādahamiti śarīraṃ kalayati |
tataḥ kāmakrodhaprabhṛtibhiramuṃ bandhanaguṇaiḥ (pāṭhabhedaḥ - bandhakaguṇaiḥ)
paraṃ vikṣepākhyā rajasa uruśaktirvyathayati || 140||
mahāmohagrāhagrasanagalitātmāvagamano
dhiyo nānāvasthāṃ svayamabhinayaṃstadguṇatayā | (pāṭhabhedaḥ - nānāvasthāḥ)
apāre saṃsāre viṣayaviṣapūre jalanidhau
nimajyonmajyāyaṃ bhramati kumatiḥ kutsitagatiḥ || 141||
bhānuprabhāsañjanitābhrapaṅktiḥ
bhānuṃ tirodhāya vijṛmbhate yathā |
ātmoditāhaṅkṛtirātmatattvaṃ
tathā tirodhāya vijṛmbhate svayam || 142||
kavalitadinanāthe durdine sāndrameghaiḥ
vyathayati himajhañjhāvāyurugro yathaitān |
aviratatamasā''tmanyāvṛte mūḍhabuddhiṃ
kṣapayati bahuduḥkhaistīvravikṣepaśaktiḥ || 143||
etābhyāmeva śaktibhyāṃ bandhaḥ puṃsaḥ samāgataḥ |
yābhyāṃ vimohito dehaṃ matvā''tmānaṃ bhramatyayam || 144||
bījaṃ saṃsṛtibhūmijasya tu tamo dehātmadhīraṅkuro
rāgaḥ pallavamambu karma tu vapuḥ skandho'savaḥ śākhikāḥ |
agrāṇīndriyasaṃhatiśca viṣayāḥ puṣpāṇi duḥkhaṃ phalaṃ
nānākarmasamudbhavaṃ bahuvidhaṃ bhoktātra jīvaḥ khagaḥ || 145||
ajñānamūlo'yamanātmabandho
naisargiko'nādirananta īritaḥ |
janmāpyayavyādhijarādiduḥkha-
pravāhapātaṃ janayatyamuṣya || 146||
nāstrairna śastrairanilena vahninā
chettuṃ na śakyo na ca karmakoṭibhiḥ |
vivekavijñānamahāsinā vinā
dhātuḥ prasādena śitena mañjunā || 147||
śrutipramāṇaikamateḥ svadharma
niṣṭhā tayaivātmaviśuddhirasya |
viśuddhabuddheḥ paramātmavedanaṃ
tenaiva saṃsārasamūlanāśaḥ || 148||
kośairannamayādyaiḥ pañcabhirātmā na saṃvṛto bhāti |
nijaśaktisamutpannaiḥ śaivālapaṭalairivāmbu vāpīstham || 149||
tacchaivālāpanaye samyak salilaṃ pratīyate śuddham |
tṛṣṇāsantāpaharaṃ sadyaḥ saukhyapradaṃ paraṃ puṃsaḥ || 150||
pañcānāmapi kośānāmapavāde vibhātyayaṃ śuddhaḥ |
nityānandaikarasaḥ pratyagrūpaḥ paraḥ svayañjyotiḥ || 151||
ātmānātmavivekaḥ kartavyo bandhamuktaye viduṣā |
tenaivānandī bhavati svaṃ vijñāya saccidānandam || 152||
muñjādiṣīkāmiva dṛśyavargāt
pratyañcamātmānamasaṅgamakriyam |
vivicya tatra pravilāpya sarvaṃ
tadātmanā tiṣṭhati yaḥ sa muktaḥ || 153||
deho'yamannabhavano'nnamayastu kośa- (pāṭhabhedaḥ - kośo)
ścānnena jīvati vinaśyati tadvihīnaḥ | (pāṭhabhedaḥ - hyannena)
tvakcarmamāṃsarudhirāsthipurīṣarāśi-
rnāyaṃ svayaṃ bhavitumarhati nityaśuddhaḥ || 154||
pūrvaṃ janeradhimṛterapi nāyamasti (pāṭhabhedaḥ - janerapimṛteratha)
jātakṣaṇaḥ kṣaṇaguṇo'niyatasvabhāvaḥ |
naiko jaḍaśca ghaṭavatparidṛśyamānaḥ
svātmā kathaṃ bhavati bhāvavikāravettā || 155||
pāṇipādādimāndeho nātmā vyaṅge'pi jīvanāt |
tattacchakteranāśācca na niyamyo niyāmakaḥ || 156||
dehataddharmatatkarmatadavasthādisākṣiṇaḥ |
sata eva svataḥsiddhaṃ tadvailakṣaṇyamātmanaḥ || 157||
śalyarāśirmāṃsalipto malapūrṇo'tikaśmalaḥ |
kathaṃ bhavedayaṃ vettā svayametadvilakṣaṇaḥ || 158||
tvaṅmāṃsamedo'sthipurīṣarāśā-
vahammatiṃ mūḍhajanaḥ karoti |
vilakṣaṇaṃ vetti vicāraśīlo
nijasvarūpaṃ paramārthabhūtam || 159||
deho'hamityeva jaḍasya buddhiḥ
dehe ca jīve viduṣastvahandhīḥ |
vivekavijñānavato mahātmano
brahmāhamityeva matiḥ sadātmani || 160||
atrātmabuddhiṃ tyaja mūḍhabuddhe
tvaṅmāṃsamedo'sthipurīṣarāśau |
sarvātmani brahmaṇi nirvikalpe
kuruṣva śāntiṃ paramāṃ bhajasva || 161||
dehendriyādāvasati bhramoditāṃ
vidvānahantāṃ na jahāti yāvat |
tāvanna tasyāsti vimuktivārtā-
pyastveṣa vedāntanayāntadarśī || 162||
chāyāśarīre pratibimbagātre
yatsvapnadehe hṛdi kalpitāṅge |
yathātmabuddhistava nāsti kāci-
jjīvaccharīre ca tathaiva mā'stu || 163||
dehātmadhīreva nṛṇāmasaddhiyāṃ
janmādiduḥkhaprabhavasya bījam |
yatastatastvaṃ jahi tāṃ prayatnāt
tyakte tu citte na punarbhavāśā || 164||
karmendriyaiḥ pañcabhirañcito'yaṃ
prāṇo bhavetprāṇamayastu kośaḥ ||
yenātmavānannamayo'nupūrṇaḥ
pravartate'sau sakalakriyāsu || 165||
naivātmāpi prāṇamayo vāyuvikāro (pāṭhabhedaḥ - naivātmāyaṃ)
gantā''gantā vāyuvadantarbahireṣaḥ |
yasmātkiñcitkvāpi na vettīṣṭamaniṣṭaṃ
svaṃ vānyaṃ vā kiñcana nityaṃ paratantraḥ || 166||
jñānendriyāṇi ca manaśca manomayaḥ syāt
kośo mamāhamiti vastuvikalpahetuḥ |
sañjñādibhedakalanākalito balīyāṃ-
statpūrvakośamabhipūrya vijṛmbhate yaḥ || 167|| (pāṭhabhedaḥ - anupūrya)
pañcendriyaiḥ pañcabhireva hotṛbhiḥ
pracīyamāno viṣayājyadhārayā |
jājvalyamāno bahuvāsanendhanaiḥ
manomayāgnirdahati prapañcam || 168|| (pāṭhabhedaḥ - manomayo'gnirdahati)
na hyastyavidyā manaso'tiriktā
mano hyavidyā bhavabandhahetuḥ |
tasminvinaṣṭe sakalaṃ vinaṣṭaṃ
vijṛmbhite'sminsakalaṃ vijṛmbhate || 169||
svapne'rthaśūnye sṛjati svaśaktyā
bhoktrādiviśvaṃ mana eva sarvam |
tathaiva jāgratyapi no viśeṣaḥ
tatsarvametanmanaso vijṛmbhaṇam || 170||
suṣuptikāle manasi pralīne
naivāsti kiñcitsakalaprasiddheḥ |
ato manaḥkalpita eva puṃsaḥ
saṃsāra etasya na vastuto'sti || 171||
vāyunā''nīyate meghaḥ punastenaiva nīyate | (pāṭhabhedaḥ - vāyunā nīyate meghaḥ punastenaiva līyate)
manasā kalpyate bandho mokṣastenaiva kalpyate || 172||
dehādisarvaviṣaye parikalpya rāgaṃ
badhnāti tena puruṣaṃ paśuvadguṇena |
vairasyamatra viṣavat suvidhāya paścād
enaṃ vimocayati tanmana eva bandhāt || 173||
tasmānmanaḥ kāraṇamasya jantoḥ
bandhasya mokṣasya ca vā vidhāne |
bandhasya heturmalinaṃ rajoguṇaiḥ
mokṣasya śuddhaṃ virajastamaskam || 174||
vivekavairāgyaguṇātirekā-
cchuddhatvamāsādya mano vimuktyai |
bhavatyato buddhimato mumukṣo-
stābhyāṃ dṛḍhābhyāṃ bhavitavyamagre || 175||
mano nāma mahāvyāghro viṣayāraṇyabhūmiṣu |
caratyatra na gacchantu sādhavo ye mumukṣavaḥ || 176||
manaḥ prasūte viṣayānaśeṣān
sthūlātmanā sūkṣmatayā ca bhoktuḥ |
śarīravarṇāśramajātibhedān
guṇakriyāhetuphalāni nityam || 177||
asaṅgacidrūpamamuṃ vimohya
dehendriyaprāṇaguṇairnibaddhya |
ahammameti bhramayatyajasraṃ
manaḥ svakṛtyeṣu phalopabhuktiṣu || 178||
adhyāsadoṣātpuruṣasya saṃsṛtiḥ (pāṭhabhedaḥ - adhyāsayogāt)
adhyāsabandhastvamunaiva kalpitaḥ |
rajastamodoṣavato'vivekino
janmādiduḥkhasya nidānametat || 179||
ataḥ prāhurmano'vidyāṃ paṇḍitāstattvadarśinaḥ |
yenaiva bhrāmyate viśvaṃ vāyunevābhramaṇḍalam || 180||
tanmanaḥśodhanaṃ kāryaṃ prayatnena mumukṣuṇā |
viśuddhe sati caitasminmuktiḥ karaphalāyate || 181||
mokṣaikasaktyā viṣayeṣu rāgaṃ
nirmūlya sannyasya ca sarvakarma |
sacchraddhayā yaḥ śravaṇādiniṣṭho
rajaḥsvabhāvaṃ sa dhunoti buddheḥ || 182||
manomayo nāpi bhavetparātmā
hyādyantavattvātpariṇāmibhāvāt |
duḥkhātmakatvādviṣayatvahetoḥ
draṣṭā hi dṛśyātmatayā na dṛṣṭaḥ || 183||
buddhirbuddhīndriyaiḥ sārdhaṃ savṛttiḥ kartṛlakṣaṇaḥ |
vijñānamayakośaḥ syātpuṃsaḥ saṃsārakāraṇam || 184||
anuvrajaccitpratibimbaśaktiḥ
vijñānasañjñaḥ prakṛtervikāraḥ |
jñānakriyāvānahamityajasraṃ
dehendriyādiṣvabhimanyate bhṛśam || 185||
anādikālo'yamahaṃsvabhāvo
jīvaḥ samastavyavahāravoḍhā |
karoti karmāṇyapi pūrvavāsanaḥ (pāṭhabhedaḥ - karmāṇyanu)
puṇyānyapuṇyāni ca tatphalāni || 186||
bhuṅkte vicitrāsvapi yoniṣu vraja-
nnāyāti niryātyadha ūrdhvameṣaḥ |
asyaiva vijñānamayasya jāgrat-
svapnādyavasthāḥ sukhaduḥkhabhogaḥ || 187||
dehādiniṣṭhāśramadharmakarma-
guṇābhimānaḥ satataṃ mameti |
vijñānakośo'yamatiprakāśaḥ
prakṛṣṭasānnidhyavaśātparātmanaḥ |
ato bhavatyeṣa upādhirasya
yadātmadhīḥ saṃsarati bhrameṇa || 188||
yo'yaṃ vijñānamayaḥ prāṇeṣu hṛdi sphuratyayaṃ jyotiḥ | (pāṭhabhedaḥ - sphuratsvayañjyotiḥ)
kūṭasthaḥ sannātmā kartā bhoktā bhavatyupādhisthaḥ || 189||
svayaṃ paricchedamupetya buddheḥ
tādātmyadoṣeṇa paraṃ mṛṣātmanaḥ |
sarvātmakaḥ sannapi vīkṣate svayaṃ
svataḥ pṛthaktvena mṛdo ghaṭāniva || 190||
upādhisambandhavaśātparātmā
hyupādhidharmānanubhāti tadguṇaḥ | (pāṭhabhedaḥ - 'pyupādhi)
ayovikārānavikārivahnivat
sadaikarūpo'pi paraḥ svabhāvāt || 191||
śiṣya uvāca |
bhrameṇāpyanyathā vā'stu jīvabhāvaḥ parātmanaḥ |
tadupādheranāditvānnānādernāśa iṣyate || 192||
ato'sya jīvabhāvo'pi nityā bhavati saṃsṛtiḥ |
na nivarteta tanmokṣaḥ kathaṃ me śrīguro vada || 193||
śrīgururuvāca |
samyakpṛṣṭaṃ tvayā vidvansāvadhānena tacchṛṇu |
prāmāṇikī na bhavati bhrāntyā mohitakalpanā || 194||
bhrāntiṃ vinā tvasaṅgasya niṣkriyasya nirākṛteḥ |
na ghaṭetārthasambandho nabhaso nīlatādivat || 195||
svasya draṣṭurnirguṇasyākriyasya
pratyagbodhānandarūpasya buddheḥ |
bhrāntyā prāpto jīvabhāvo na satyo
mohāpāye nāstyavastusvabhāvāt || 196||
yāvadbhrāntistāvadevāsya sattā
mithyājñānojjṛmbhitasya pramādāt |
rajjvāṃ sarpo bhrāntikālīna eva
bhrānternāśe naiva sarpo'pi tadvat || 197|| (pāṭhabhedaḥ - sarpo'sti)
anāditvamavidyāyāḥ kāryasyāpi tatheṣyate |
utpannāyāṃ tu vidyāyāmāvidyakamanādyapi || 198||
prabodhe svapnavatsarvaṃ sahamūlaṃ vinaśyati |
anādyapīdaṃ no nityaṃ prāgabhāva iva sphuṭam || 199||
anāderapi vidhvaṃsaḥ prāgabhāvasya vīkṣitaḥ |
yadbuddhyupādhisambandhātparikalpitamātmani || 200||
jīvatvaṃ na tato'nyastu svarūpeṇa vilakṣaṇaḥ | (pāṭhabhedaḥ - tato'nyattu)
sambandhastvātmano buddhyā mithyājñānapuraḥsaraḥ || 201|| (pāṭhabhedaḥ - sambandhaḥ svātmano)
vinivṛttirbhavettasya samyagjñānena nānyathā |
brahmātmaikatvavijñānaṃ samyagjñānaṃ śrutermatam || 202||
tadātmānātmanoḥ samyagvivekenaiva sidhyati |
tato vivekaḥ kartavyaḥ pratyagātmasadātmanoḥ || 203|| (pāṭhabhedaḥ - pratyagātmāsadātmanoḥ)
jalaṃ paṅkavadatyantaṃ paṅkāpāye jalaṃ sphuṭam | (pāṭhabhedaḥ - paṅkavadaspaṣṭaṃ)
yathā bhāti tathātmāpi doṣābhāve sphuṭaprabhaḥ || 204||
asannivṛttau tu sadātmanā sphuṭaṃ
pratītiretasya bhavetpratīcaḥ |
tato nirāsaḥ karaṇīya eva
sadātmanaḥ sādhvahamādivastunaḥ || 205|| (pāṭhabhedaḥ - asadātmanaḥ)
ato nāyaṃ parātmā syādvijñānamayaśabdabhāk |
vikāritvājjaḍatvācca paricchinnatvahetutaḥ |
dṛśyatvādvyabhicāritvānnānityo nitya iṣyate || 206||
ānandapratibimbacumbitatanurvṛttistamojṛmbhitā
syādānandamayaḥ priyādiguṇakaḥ sveṣṭārthalābhodayaḥ |
puṇyasyānubhave vibhāti kṛtināmānandarūpaḥ svayaṃ
sarvo nandati yatra sādhu tanubhṛnmātraḥ prayatnaṃ vinā || 207|| (pāṭhabhedaḥ - bhūtvā nandati)
ānandamayakośasya suṣuptau sphūrtirutkaṭā |
svapnajāgarayorīṣadiṣṭasandarśanādinā || 208||
naivāyamānandamayaḥ parātmā
sopādhikatvātprakṛtervikārāt |
kāryatvahetoḥ sukṛtakriyāyā
vikārasaṅghātasamāhitatvāt || 209||
pañcānāmapi kośānāṃ niṣedhe yuktitaḥ śruteḥ | (pāṭhabhedaḥ - yuktitaḥ kṛte)
tanniṣedhāvadhi sākṣī bodharūpo'vaśiṣyate || 210|| (pāṭhabhedaḥ - tanniṣedhāvadhiḥ)
yo'yamātmā svayañjyotiḥ pañcakośavilakṣaṇaḥ |
avasthātrayasākṣī sannirvikāro nirañjanaḥ |
sadānandaḥ sa vijñeyaḥ svātmatvena vipaścitā || 211||
śiṣya uvāca |
mithyātvena niṣiddheṣu kośeṣveteṣu pañcasu |
sarvābhāvaṃ vinā kiñcinna paśyāmyatra he guro |
vijñeyaṃ kimu vastvasti svātmanā''tmavipaścitā || 212|| (pāṭhabhedaḥ - svātmanātra vipaścitā)
śrīgururuvāca |
satyamuktaṃ tvayā vidvannipuṇo'si vicāraṇe |
ahamādivikārāste tadabhāvo'yamapyanu || 213|| (pāṭhabhedaḥ - 'yamapyatha)
sarve yenānubhūyante yaḥ svayaṃ nānubhūyate |
tamātmānaṃ veditāraṃ viddhi buddhyā susūkṣmayā || 214||
tatsākṣikaṃ bhavettattadyadyadyenānubhūyate |
kasyāpyananubhūtārthe sākṣitvaṃ nopayujyate || 215|| (pāṭhabhedaḥ - nopapadyate)
asau svasākṣiko bhāvo yataḥ svenānubhūyate |
ataḥ paraṃ svayaṃ sākṣātpratyagātmā na cetaraḥ || 216||
jāgratsvapnasuṣuptiṣu sphuṭataraṃ yo'sau samujjṛmbhate
pratyagrūpatayā sadāhamahamityantaḥ sphurannaikadhā | (pāṭhabhedaḥ - sphurannekadhā)
nānākāravikārabhāgina imān paśyannahandhīmukhān (pāṭhabhedaḥ - bhājina)
nityānandacidātmanā sphurati taṃ viddhi svametaṃ hṛdi || 217||
ghaṭodake bimbitamarkabimba-
mālokya mūḍho ravimeva manyate |
tathā cidābhāsamupādhisaṃsthaṃ
bhrāntyāhamityeva jaḍo'bhimanyate || 218||
ghaṭaṃ jalaṃ tadgatamarkabimbaṃ
vihāya sarvaṃ vinirīkṣyate'rkaḥ | (pāṭhabhedaḥ - divi vīkṣyate'rkaḥ)
taṭastha etattritayāvabhāsakaḥ (pāṭhabhedaḥ - taṭasthitaḥ tattri)
svayamprakāśo viduṣā yathā tathā || 219||
dehaṃ dhiyaṃ citpratibimbamevaṃ (pāṭhabhedaḥ - citpratibimbametaṃ)
visṛjya buddhau nihitaṃ guhāyām |
draṣṭāramātmānamakhaṇḍabodhaṃ
sarvaprakāśaṃ sadasadvilakṣaṇam || 220||
nityaṃ vibhuṃ sarvagataṃ susūkṣmaṃ
antarbahiḥśūnyamananyamātmanaḥ |
vijñāya samyaṅnijarūpametat
pumān vipāpmā virajo vimṛtyuḥ || 221||
viśoka ānandaghano vipaścit
svayaṃ kutaścinna bibheti kaścit |
nānyo'sti panthā bhavabandhamukteḥ
vinā svatattvāvagamaṃ mumukṣoḥ || 222||
brahmābhinnatvavijñānaṃ bhavamokṣasya kāraṇam |
yenādvitīyamānandaṃ brahma sampadyate budhaiḥ || 223|| (pāṭhabhedaḥ - sampadyate budhaḥ)
brahmabhūtastu saṃsṛtyai vidvānnāvartate punaḥ |
vijñātavyamataḥ samyagbrahmābhinnatvamātmanaḥ || 224||
satyaṃ jñānamanantaṃ brahma viśuddhaṃ paraṃ svataḥsiddham |
nityānandaikarasaṃ pratyagabhinnaṃ nirantaraṃ jayati || 225||
sadidaṃ paramādvaitaṃ svasmādanyasya vastuno'bhāvāt |
na hyanyadasti kiñcit samyak paramārthatattvabodhadaśāyām || 226|| (pāṭhabhedaḥ - paratattvabodhasudaśāyām)
yadidaṃ sakalaṃ viśvaṃ nānārūpaṃ pratītamajñānāt |
tatsarvaṃ brahmaiva pratyastāśeṣabhāvanādoṣam || 227||
mṛtkāryabhūto'pi mṛdo na bhinnaḥ
kumbho'sti sarvatra tu mṛtsvarūpāt |
na kumbharūpaṃ pṛthagasti kumbhaḥ
kuto mṛṣā kalpitanāmamātraḥ || 228||
kenāpi mṛdbhinnatayā svarūpaṃ
ghaṭasya sandarśayituṃ na śakyate |
ato ghaṭaḥ kalpita eva mohā-
nmṛdeva satyaṃ paramārthabhūtam || 229||
sadbrahmakāryaṃ sakalaṃ sadevaṃ (pāṭhabhedaḥ - sadaiva)
tanmātrametanna tato'nyadasti | (pāṭhabhedaḥ - sanmātrametanna)
astīti yo vakti na tasya moho
vinirgato nidritavatprajalpaḥ || 230||
brahmaivedaṃ viśvamityeva vāṇī
śrautī brūte'tharvaniṣṭhā variṣṭhā |
tasmādetadbrahmamātraṃ hi viśvaṃ
nādhiṣṭhānādbhinnatā''ropitasya || 231||
satyaṃ yadi syājjagadetadātmano'
nantattvahānirnigamāpramāṇatā |
asatyavāditvamapīśituḥ syā-
nnaitattrayaṃ sādhu hitaṃ mahātmanām || 232||
īśvaro vastutattvajño na cāhaṃ teṣvavasthitaḥ |
na ca matsthāni bhūtānītyevameva vyacīklṛpat || 233|| (pāṭhabhedaḥ - vyacīkathat)
yadi satyaṃ bhavedviśvaṃ suṣuptāvupalabhyatām |
yannopalabhyate kiñcidato'satsvapnavanmṛṣā || 234||
ataḥ pṛthaṅnāsti jagatparātmanaḥ
pṛthakpratītistu mṛṣā guṇādivat | guṇāhivat
āropitasyāsti kimarthavattā'-
dhiṣṭhānamābhāti tathā bhrameṇa || 235||
bhrāntasya yadyadbhramataḥ pratītaṃ
brahmaiva tattadrajataṃ hi śuktiḥ |
idantayā brahma sadaiva rūpyate (pāṭhabhedaḥ - sadeva)
tvāropitaṃ brahmaṇi nāmamātram || 236||
ataḥ paraṃ brahma sadadvitīyaṃ
viśuddhavijñānaghanaṃ nirañjanam |
praśāntamādyantavihīnamakriyaṃ
nirantarānandarasasvarūpam || 237||
nirastamāyākṛtasarvabhedaṃ
nityaṃ sukhaṃ niṣkalamaprameyam | (pāṭhabhedaḥ - nityaṃ dhruvaṃ)
arūpamavyaktamanākhyamavyayaṃ
jyotiḥ svayaṃ kiñcididaṃ cakāsti || 238||
jñātṛjñeyajñānaśūnyamanantaṃ nirvikalpakam |
kevalākhaṇḍacinmātraṃ paraṃ tattvaṃ vidurbudhāḥ || 239||
aheyamanupādeyaṃ manovācāmagocaram |
aprameyamanādyantaṃ brahma pūrṇamahaṃ mahaḥ || 240|| (pāṭhabhedaḥ - pūrṇaṃ mahanmahaḥ)
tattvampadābhyāmabhidhīyamānayoḥ
brahmātmanoḥ śodhitayoryadīttham | (pāṭhabhedaḥ - śodhitayoryadittham)
śrutyā tayostattvamasīti samyag
ekatvameva pratipādyate muhuḥ || 241-
ekyaṃ tayorlakṣitayorna vācyayoḥ
nigadyate'nyonyaviruddhadharmiṇoḥ |
khadyotabhānvoriva rājabhṛtyayoḥ
kūpāmburāśyoḥ paramāṇumervoḥ || 242||
tayorvirodho'yamupādhikalpito
na vāstavaḥ kaścidupādhireṣaḥ |
īśasya māyā mahadādikāraṇaṃ
jīvasya kāryaṃ śaṛṇu pañcakośam || 243|| (pāṭhabhedaḥ - pañcakośāḥ)
etāvupādhī parajīvayostayoḥ
samyaṅnirāse na paro na jīvaḥ |
rājyaṃ narendrasya bhaṭasya kheṭak-
stayorapohe na bhaṭo na rājā || 244||
athāta ādeśa iti śrutiḥ svayaṃ
niṣedhati brahmaṇi kalpitaṃ dvayam |
śrutipramāṇānugṛhītabodhā- (pāṭhabhedaḥ - pramāṇānugṛhītayuktyā)
ttayornirāsaḥ karaṇīya eva || 245||
nedaṃ nedaṃ kalpitatvānna satyaṃ
rajjudṛṣṭavyālavatsvapnavacca | (pāṭhabhedaḥ - rajjau)
itthaṃ dṛśyaṃ sādhuyuktyā vyapohya
jñeyaḥ paścādekabhāvastayoryaḥ || 246||
tatastu tau lakṣaṇayā sulakṣyau
tayorakhaṇḍaikarasatvasiddhaye |
nālaṃ jahatyā na tathā'jahatyā
kintūbhayārthātmikayaiva bhāvyam || 247|| (pāṭhabhedaḥ - bhayārthaikatayaiva)
sa devadatto'yamitīha caikatā
viruddhadharmāṃśamapāsya kathyate |
yathā tathā tattvamasītivākye
viruddhadharmānubhayatra hitvā || 248||
saṃlakṣya cinmātratayā sadātmanoḥ
akhaṇḍabhāvaḥ paricīyate budhaiḥ |
evaṃ mahāvākyaśatena kathyate
brahmātmanoraikyamakhaṇḍabhāvaḥ || 249||
asthūlamityetadasannirasya
siddhaṃ svato vyomavadapratarkyam |
ato mṛṣāmātramidaṃ pratītaṃ
jahīhi yatsvātmatayā gṛhītam |
brahmāhamityeva viśuddhabuddhyā
viddhi svamātmānamakhaṇḍabodham || 250||
mṛtkāryaṃ sakalaṃ ghaṭādi satataṃ mṛnmātramevāhitaṃ (pāṭhabhedaḥ - mṛnmātramevābhitaḥ)
tadvatsajjanitaṃ sadātmakamidaṃ sanmātramevākhilam |
yasmānnāsti sataḥ paraṃ kimapi tatsatyaṃ sa ātmā svayaṃ
tasmāttattvamasi praśāntamamalaṃ brahmādvayaṃ yatparam || 251||
nidrākalpitadeśakālaviṣayajñātrādi sarvaṃ yathā
mithyā tadvadihāpi jāgrati jagatsvājñānakāryatvataḥ |
yasmādevamidaṃ śarīrakaraṇaprāṇāhamādyapyasat
tasmāttattvamasi praśāntamamalaṃ brahmādvayaṃ yatparam || 252||
yatra bhrāntyā kalpitaṃ tadviveke (pāṭhabhedaḥ - yadviveke)
tattanmātraṃ naiva tasmādvibhinnam |
svapne naṣṭaṃ svapnaviśvaṃ vicitraṃ
svasmādbhinnaṃ kinnu dṛṣṭaṃ prabodhe || 253||
jātinītikulagotradūragaṃ
nāmarūpaguṇadoṣavarjitam |
deśakālaviṣayātivarti yad
brahma tattvamasi bhāvayātmani || 254||
yatparaṃ sakalavāgagocaraṃ
gocaraṃ vimalabodhacakṣuṣaḥ |
śuddhacidghanamanādi vastu yad
brahma tattvamasi bhāvayātmani || 255||
ṣaḍbhirūrmibhirayogi yogihṛd-
bhāvitaṃ na karaṇairvibhāvitam |
buddhyavedyamanavadyamasti yad (pāṭhabhedaḥ - bhūti yad)
brahma tattvamasi bhāvayātmani || 256||
bhrāntikalpitajagatkalāśrayaṃ
svāśrayaṃ ca sadasadvilakṣaṇam |
niṣkalaṃ nirupamānavaddhi yad (pāṭhabhedaḥ - nirupamānamṛddhimat)
brahma tattvamasi bhāvayātmani || 257||
janmavṛddhipariṇatyapakṣaya-
vyādhināśanavihīnamavyayam |
viśvasṛṣṭyavavighātakāraṇaṃ (pāṭhabhedaḥ - vanaghātakāraṇaṃ)
brahma tattvamasi bhāvayātmani || 258||
astabhedamanapāstalakṣaṇaṃ
nistaraṅgajalarāśiniścalam |
nityamuktamavibhaktamūrti yad
brahma tattvamasi bhāvayātmani || 259||
ekameva sadanekakāraṇaṃ
kāraṇāntaranirāsyakāraṇam | (pāṭhabhedaḥ - sakāraṇam)
kāryakāraṇavilakṣaṇaṃ svayaṃ
brahma tattvamasi bhāvayātmani || 260||
nirvikalpakamanalpamakṣaraṃ
yatkṣarākṣaravilakṣaṇaṃ param |
nityamavyayasukhaṃ nirañjanaṃ
brahma tattvamasi bhāvayātmani || 261||
yadvibhāti sadanekadhā bhramā-
nnāmarūpaguṇavikriyātmanā |
hemavatsvayamavikriyaṃ sadā
brahma tattvamasi bhāvayātmani || 262||
yaccakāstyanaparaṃ parātparaṃ
pratyagekarasamātmalakṣaṇam |
satyacitsukhamanantamavyayaṃ
brahma tattvamasi bhāvayātmani || 263||
uktamarthamimamātmani svayaṃ
bhāvayetprathitayuktibhirdhiyā | (pāṭhabhedaḥ - bhāvaya prathita)
saṃśayādirahitaṃ karāmbuvat
tena tattvanigamo bhaviṣyati || 264||
sambodhamātraṃ pariśuddhatattvaṃ (pāṭhabhedaḥ - svaṃ bodhamātraṃ)
vijñāya saṅghe nṛpavacca sainye |
tadāśrayaḥ svātmani sarvadā sthito (pāṭhabhedaḥ - tadātmanaivātmani)
vilāpaya brahmaṇi viśvajātam || 265|| (pāṭhabhedaḥ - dṛśyajātam)
buddhau guhāyāṃ sadasadvilakṣaṇaṃ
brahmāsti satyaṃ paramadvitīyam |
tadātmanā yo'tra vasedguhāyāṃ
punarna tasyāṅgaguhāpraveśaḥ || 266||
jñāte vastunyapi balavatī vāsanā'nādireṣā
kartā bhoktāpyahamiti dṛḍhā yā'sya saṃsārahetuḥ |
pratyagdṛṣṭyā''tmani nivasatā sāpaneyā prayatnā-
nmuktiṃ prāhustadiha munayo vāsanātānavaṃ yat || 267||
ahaṃ mameti yo bhāvo dehākṣādāvanātmani |
adhyāso'yaṃ nirastavyo viduṣā svātmaniṣṭhayā || 268||
jñātvā svaṃ pratyagātmānaṃ buddhitadvṛttisākṣiṇam |
so'hamityeva sadvṛttyā'nātmanyātmamatiṃ jahi || 269||
lokānuvartanaṃ tyaktvā tyaktvā dehānuvartanam |
śāstrānuvartanaṃ tyaktvā svādhyāsāpanayaṃ kuru || 270||
lokavāsanayā jantoḥ śāstravāsanayāpi ca |
dehavāsanayā jñānaṃ yathāvannaiva jāyate || 271
saṃsārakārāgṛhamokṣamiccho-
rayomayaṃ pādanibandhaśaṛṅkhalam | (pāṭhabhedaḥ - nibaddha)
vadanti tajjñāḥ paṭu vāsanātrayaṃ
yo'smādvimuktaḥ samupaiti muktim || 272||
jalādisaṃsargavaśātprabhūta- (pāṭhabhedaḥ - jalādisamparkavaśāt)
durgandhadhūtā'garudivyavāsanā |
saṅgharṣaṇenaiva vibhāti samya-
gvidhūyamāne sati bāhyagandhe || 273||
antaḥśritānantadurantavāsanā-
dhūlīviliptā paramātmavāsanā |
prajñātisaṅgharṣaṇato viśuddhā
pratīyate candanagandhavat sphuṭam || 274|| (pāṭhabhedaḥ - sphuṭā)
anātmavāsanājālaistirobhūtātmavāsanā |
nityātmaniṣṭhayā teṣāṃ nāśe bhāti svayaṃ sphuṭam || 275|| (pāṭhabhedaḥ - sphuṭā)
yathā yathā pratyagavasthitaṃ manaḥ
tathā tathā muñcati bāhyavāsanām | (pāṭhabhedaḥ - bāhyavāsanāḥ)
niḥśeṣamokṣe sati vāsanānāṃ
ātmānubhūtiḥ pratibandhaśūnyā || 276||
svātmanyeva sadā sthitvā mano naśyati yoginaḥ | (pāṭhabhedaḥ - sthityā)
vāsanānāṃ kṣayaścātaḥ svādhyāsāpanayaṃ kuru || 277||
tamo dvābhyāṃ rajaḥ sattvātsattvaṃ śuddhena naśyati |
tasmātsattvamavaṣṭabhya svādhyāsāpanayaṃ kuru || 278||
prārabdhaṃ puṣyati vapuriti niścitya niścalaḥ |
dhairyamālambya yatnena svādhyāsāpanayaṃ kuru || 279||
nāhaṃ jīvaḥ paraṃ brahmetyatadvyāvṛttipūrvakam |
vāsanāvegataḥ prāptasvādhyāsāpanayaṃ kuru || 280||
śrutyā yuktyā svānubhūtyā jñātvā sārvātmyamātmanaḥ |
kvacidābhāsataḥ prāptasvādhyāsāpanayaṃ kuru || 281||
anādānavisargābhyāmīṣannāsti kriyā muneḥ | (pāṭhabhedaḥ - annādānavisargā)
tadekaniṣṭhayā nityaṃ svādhyāsāpanayaṃ kuru || 282||
tattvamasyādivākyotthabrahmātmaikatvabodhataḥ |
brahmaṇyātmatvadārḍhyāya svādhyāsāpanayaṃ kuru || 283||
ahambhāvasya dehe'sminniḥśeṣavilayāvadhi |
sāvadhānena yuktātmā svādhyāsāpanayaṃ kuru || 284||
pratītirjīvajagatoḥ svapnavadbhāti yāvatā |
tāvannirantaraṃ vidvansvādhyāsāpanayaṃ kuru || 285||
nidrāyā lokavārtāyāḥ śabdāderapi vismṛteḥ |
kvacinnāvasaraṃ dattvā cintayātmānamātmani || 286||
mātāpitrormalodbhūtaṃ malamāṃsamayaṃ vapuḥ |
tyaktvā cāṇḍālavaddūraṃ brahmībhūya kṛtī bhava || 287||
ghaṭākāśaṃ mahākāśa ivātmānaṃ parātmani |
vilāpyākhaṇḍabhāvena tūṣṇī bhava sadā mune || 288|| (pāṭhabhedaḥ - tūṣṇīṃ)
svaprakāśamadhiṣṭhānaṃ svayambhūya sadātmanā |
brahmāṇḍamapi piṇḍāṇḍaṃ tyajyatāṃ malabhāṇḍavat || 289||
cidātmani sadānande dehārūḍhāmahandhiyam |
niveśya liṅgamutsṛjya kevalo bhava sarvadā || 290||
yatraiṣa jagadābhāso darpaṇāntaḥ puraṃ yathā |
tadbrahmāhamiti jñātvā kṛtakṛtyo bhaviṣyasi || 291||
yatsatyabhūtaṃ nijarūpamādyaṃ
cidadvayānandamarūpamakriyam |
tadetya mithyāvapurutsṛjeta (pāṭhabhedaḥ - sṛjaita)
śailūṣavadveṣamupāttamātmanaḥ || 292||
sarvātmanā dṛśyamidaṃ mṛṣaiva
naivāhamarthaḥ kṣaṇikatvadarśanāt |
jānāmyahaṃ sarvamiti pratītiḥ
kuto'hamādeḥ kṣaṇikasya sidhyet || 293||
ahampadārthastvahamādisākṣī
nityaṃ suṣuptāvapi bhāvadarśanāt |
brūte hyajo nitya iti śrutiḥ svayaṃ
tatpratyagātmā sadasadvilakṣaṇaḥ || 294||
vikāriṇāṃ sarvavikāravettā
nityāvikāro bhavituṃ samarhati | (pāṭhabhedaḥ - nityo'vikāro)
manorathasvapnasuṣuptiṣu sphuṭaṃ
punaḥ punardṛṣṭamasattvametayoḥ || 295||
ato'bhimānaṃ tyaja māṃsapiṇḍe
piṇḍābhimāninyapi buddhikalpite |
kālatrayābādhyamakhaṇḍabodhaṃ
jñātvā svamātmānamupaihi śāntim || 296||
tyajābhimānaṃ kulagotranāma-
rūpāśrameṣvārdraśavāśriteṣu |
liṅgasya dharmānapi kartṛtādīṃ-
styaktvā bhavākhaṇḍasukhasvarūpaḥ || 297||
santyanye pratibandhāḥ puṃsaḥ saṃsārahetavo dṛṣṭāḥ |
teṣāmevaṃ mūlaṃ prathamavikāro bhavatyahaṅkāraḥ || 298|| (pāṭhabhedaḥ - teṣāmeṣāṃ)
yāvatsyātsvasya sambandho'haṅkāreṇa durātmanā |
tāvanna leśamātrāpi muktivārtā vilakṣaṇā || 299||
ahaṅkāragrahānmuktaḥ svarūpamupapadyate |
candravadvimalaḥ pūrṇaḥ sadānandaḥ svayamprabhaḥ || 300||
yo vā pure so'hamiti pratīto (pāṭhabhedaḥ - puraiṣo'hamiti)
buddhyā praklṛptastamasā'timūḍhayā | (pāṭhabhedaḥ - buddhyā'viviktastamasā)
tasyaiva niḥśeṣatayā vināśe
brahmātmabhāvaḥ pratibandhaśūnyaḥ || 301||
brahmānandanidhirmahābalavatā'haṅkāraghorāhinā
saṃveṣṭyātmani rakṣyate guṇamayaiścaṇḍestribhirmastakaiḥ (pāṭhabhedaḥ - caṇḍai)
vijñānākhyamahāsinā śrutimatā vicchidya śīrṣatrayaṃ (pāṭhabhedaḥ - dyutimatā)
nirmūlyāhimimaṃ nidhiṃ sukhakaraṃ dhīro'nubhoktuṅkṣamaḥ || 302||
yāvadvā yatkiñcidviṣadoṣasphūrtirasti ceddehe |
kathamārogyāya bhavettadvadahantāpi yogino muktyai || 303||
ahamo'tyantanivṛttyā tatkṛtanānāvikalpasaṃhṛtyā |
pratyaktattvavivekādidamahamasmīti vindate tattvam || 304|| (pāṭhabhedaḥ - vivekādayam)
ahaṅkāre kartaryahamiti matiṃ muñca sahasā (pāṭhabhedaḥ - ahaṅkartaryasminnahamiti)
vikārātmanyātmapratiphalajuṣi svasthitimuṣi |
yadadhyāsātprāptā janimṛtijarāduḥkhabahulā
pratīcaścinmūrtestava sukhatanoḥ saṃsṛtiriyam || 305||
sadaikarūpasya cidātmano vibho-
rānandamūrteranavadyakīrteḥ |
naivānyathā kvāpyavikāriṇaste
vināhamadhyāsamamuṣya saṃsṛtiḥ || 306||
tasmādahaṅkāramimaṃ svaśatruṃ
bhokturgale kaṇṭakavatpratītam |
vicchidya vijñānamahāsinā sphuṭaṃ
bhuṅkṣvātmasāmrājyasukhaṃ yatheṣṭam || 307||
tato'hamādervinivartya vṛttiṃ
santyaktarāgaḥ paramārthalābhāt |
tūṣṇīṃ samāssvātmasukhānubhūtyā
pūrṇātmanā brahmaṇi nirvikalpaḥ || 308||
samūlakṛtto'pi mahānahaṃ punaḥ
vyullekhitaḥ syādyadi cetasā kṣaṇam |
sañjīvya vikṣepaśataṃ karoti
nabhasvatā prāvṛṣi vārido yathā || 309||
nigṛhya śatrorahamo'vakāśaḥ
kvacinna deyo viṣayānucintayā |
sa eva sañjīvanaheturasya
prakṣīṇajambīratarorivāmbu || 310||
dehātmanā saṃsthita eva kāmī
vilakṣaṇaḥ kāmayitā kathaṃ syāt |
ato'rthasandhānaparatvameva
bhedaprasaktyā bhavabandhahetuḥ || 311||
kāryapravardhanādbījapravṛddhiḥ paridṛśyate |
kāryanāśādbījanāśastasmātkāryaṃ nirodhayet || 312||
vāsanāvṛddhitaḥ kāryaṃ kāryavṛddhyā ca vāsanā |
vardhate sarvathā puṃsaḥ saṃsāro na nivartate || 313||
saṃsārabandhavicchittyai tad dvayaṃ pradahedyatiḥ |
vāsanāvṛddhiretābhyāṃ cintayā kriyayā bahiḥ || 314|| (pāṭhabhedaḥ - vāsanā preryate hyantaḥ)
tābhyāṃ pravardhamānā sā sūte saṃsṛtimātmanaḥ |
trayāṇāṃ ca kṣayopāyaḥ sarvāvasthāsu sarvadā || 315||
sarvatra sarvataḥ sarvabrahmamātrāvalokanaiḥ | (pāṭhabhedaḥ - mātrāvalokanam)
sadbhāvavāsanādārḍhyāttattrayaṃ layamaśnute || 316||
kriyānāśe bhaveccintānāśo'smādvāsanākṣayaḥ |
vāsanāprakṣayo mokṣaḥ sā jīvanmuktiriṣyate || 317|| (pāṭhabhedaḥ - sa)
sadvāsanāsphūrtivijṛmbhaṇe sati
hyasau vilīnāpyahamādivāsanā | (pāṭhabhedaḥ - vilīnā tvahamādivāsanā)
atiprakṛṣṭāpyaruṇaprabhāyāṃ
vilīyate sādhu yathā tamisrā || 318||
tamastamaḥkāryamanarthajālaṃ
na dṛśyate satyudite dineśe |
tathā'dvayānandarasānubhūtau
naivāsti bandho na ca duḥkhagandhaḥ || 319||
dṛśyaṃ pratītaṃ pravilāpayansan (pāṭhabhedaḥ - pravilāpayansvayaṃ)
sanmātramānandaghanaṃ vibhāvayan |
samāhitaḥ sanbahirantaraṃ vā
kālaṃ nayethāḥ sati karmabandhe || 320||
pramādo brahmaniṣṭhāyāṃ na kartavyaḥ kadācana |
pramādo mṛtyurityāha bhagavānbrahmaṇaḥ sutaḥ || 321||
na pramādādanartho'nyo jñāninaḥ svasvarūpataḥ |
tato mohastato'handhīstato bandhastato vyathā || 322||
viṣayābhimukhaṃ dṛṣṭvā vidvāṃsamapi vismṛtiḥ |
vikṣepayati dhīdoṣairyoṣā jāramiva priyam || 323||
yathāpakṛṣṭaṃ śaivālaṃ kṣaṇamātraṃ na tiṣṭhati |
āvṛṇoti tathā māyā prājñaṃ vāpi parāṅmukham || 324||
lakṣyacyutaṃ cedyadi cittamīṣad
bahirmukhaṃ sannipatettatastataḥ |
pramādataḥ pracyutakelikandukaḥ
sopānapaṅktau patito yathā tathā || 325||
viṣayeṣvāviśaccetaḥ saṅkalpayati tadguṇān |
samyaksaṅkalpanātkāmaḥ kāmātpuṃsaḥ pravartanam || 326||
ataḥ pramādānna paro'sti mṛtyuḥ
vivekino brahmavidaḥ samādhau |
samāhitaḥ siddhimupaiti samyak
samāhitātmā bhava sāvadhānaḥ || 327||
tataḥ svarūpavibhraṃśo vibhraṣṭastu patatyadhaḥ |
patitasya vinā nāśaṃ punarnāroha īkṣyate || 328||
saṅkalpaṃ varjayettasmātsarvānarthasya kāraṇam |
apathyāni hi vastūni vyādhigrasto yathotsṛje |
jīvato yasya kaivalyaṃ videhe sa ca kevalaḥ |
yatkiñcit paśyato bhedaṃ bhayaṃ brūte yajuḥśrutiḥ || 329||
yadā kadā vāpi vipaścideṣa
brahmaṇyanante'pyaṇumātrabhedam |
paśyatyathāmuṣya bhayaṃ tadaiva
yadvīkṣitaṃ bhinnatayā pramādāt || 330|| (pāṭhabhedaḥ - yadīkṣitaṃ)
śrutismṛtinyāyaśatairniṣiddhe
dṛśye'tra yaḥ svātmamatiṃ karoti |
upaiti duḥkhopari duḥkhajātaṃ
niṣiddhakartā sa malimluco yathā || 331||
satyābhisandhānarato vimukto
mahattvamātmīyamupaiti nityam |
mithyābhisandhānaratastu naśyed
dṛṣṭaṃ tadetadyadacauracaurayoḥ || 332|| (pāṭhabhedaḥ - coracorayoḥ)
yatirasadanusandhiṃ bandhahetuṃ vihāya
svayamayamahamasmītyātmadṛṣṭyaiva tiṣṭhet
sukhayati nanu niṣṭhā brahmaṇi svānubhūtyā
harati paramavidyākāryaduḥkhaṃ pratītam || 333||
bāhyānusandhiḥ parivardhayetphalaṃ (pāṭhabhedaḥ - bāhyābhisandhiḥ)
durvāsanāmeva tatastato'dhikām |
jñātvā vivekaiḥ parihṛtya bāhyaṃ
svātmānusandhiṃ vidadhīta nityam || 334||
bāhye niruddhe manasaḥ prasannatā
manaḥprasāde paramātmadarśanam |
tasminsudṛṣṭe bhavabandhanāśo
bahirnirodhaḥ padavī vimukteḥ || 335||
kaḥ paṇḍitaḥ sansadasadvivekī
śrutipramāṇaḥ paramārthadarśī |
jānanhi kuryādasato'valambaṃ
svapātahetoḥ śiśuvanmumukṣuḥ || 336||
dehādisaṃsaktimato na muktiḥ
muktasya dehādyabhimatyabhāvaḥ |
suptasya no jāgaraṇaṃ na jāgrataḥ
svapnastayorbhinnaguṇāśrayatvāt || 337||
antarbahiḥ svaṃ sthirajaṅgameṣu
jñātvā''tmanādhāratayā vilokya | (pāṭhabhedaḥ - jñānātman)
tyaktākhilopādhirakhaṇḍarūpaḥ
pūrṇātmanā yaḥ sthita eṣa muktaḥ || 338||
sarvātmanā bandhavimuktihetuḥ
sarvātmabhāvānna paro'sti kaścit |
dṛśyāgrahe satyupapadyate'sau
sarvātmabhāvo'sya sadātmaniṣṭhayā || 339||
dṛśyasyāgrahaṇaṃ kathaṃ nu ghaṭate dehātmanā tiṣṭhato
bāhyārthānubhavaprasaktamanasastattatkriyāṃ kurvataḥ |
sannyastākhiladharmakarmaviṣayairnityātmaniṣṭhāparaiḥ
tattvajñaiḥ karaṇīyamātmani sadānandecchubhiryatnataḥ || 340||
sarvātmasiddhaye bhikṣoḥ kṛtaśravaṇakarmaṇaḥ | (pāṭhabhedaḥ - sārvātmya)
samādhiṃ vidadhātyeṣā śānto dānta iti śrutiḥ || 341||
ārūḍhaśakterahamo vināśaḥ
kartunna śakya sahasāpi paṇḍitaiḥ | (pāṭhabhedaḥ - kartuṃ na)
ye nirvikalpākhyasamādhiniścalāḥ
tānantarā'nantabhavā hi vāsanāḥ || 342||
ahambuddhyaiva mohinyā yojayitvā''vṛterbalāt |
vikṣepaśaktiḥ puruṣaṃ vikṣepayati tadguṇaiḥ || 343||
vikṣepaśaktivijayo viṣamo vidhātuṃ
niḥśeṣamāvaraṇaśaktinivṛttyabhāve |
dṛgdṛśyayoḥ sphuṭapayojalavadvibhāge
naśyettadāvaraṇamātmani ca svabhāvāt |
niḥsaṃśayena bhavati pratibandhaśūnyo
vikṣepaṇaṃ na hi tadā yadi cenmṛṣārthe || 344|| (pāṭhabhedaḥ - nikṣepaṇaṃ)
samyagvivekaḥ sphuṭabodhajanyo
vibhajya dṛgdṛśyapadārthatattvam |
chinatti māyākṛtamohabandhaṃ
yasmādvimuktastu punarna saṃsṛtiḥ || 345|| (pāṭhabhedaḥ - vimuktasya)
parāvaraikatvavivekavahniḥ
dahatyavidyāgahanaṃ hyaśeṣam |
kiṃ syātpunaḥ saṃsaraṇasya bījaṃ
advaitabhāvaṃ samupeyuṣo'sya || 346||
āvaraṇasya nivṛttirbhavati hi samyakpadārthadarśanataḥ |
mithyājñānavināśastadvikṣepajanitaduḥkhanivṛttiḥ || 347||
etattritayaṃ dṛṣṭaṃ samyagrajjusvarūpavijñānāt |
tasmādvastusatattvaṃ jñātavyaṃ bandhamuktaye viduṣā || 348||
ayo'gniyogādiva satsamanvayān
mātrādirūpeṇa vijṛmbhate dhīḥ |
tatkāryametaddvitayaṃ yato mṛṣā (pāṭhabhedaḥ - tatkāryameva tritayaṃ)
dṛṣṭaṃ bhramasvapnamanoratheṣu || 349||
tato vikārāḥ prakṛterahammukhā
dehāvasānā viṣayāśca sarve |
kṣaṇe'nyathābhāvitayā hyamīṣā- (pāṭhabhedaḥ - bhāvina eṣa ātmā)
masattvamātmā tu kadāpi nānyathā || 350|| (pāṭhabhedaḥ - masattvamātmā tu kadāpi)
nityādvayākhaṇḍacidekarūpo
buddhyādisākṣī sadasadvilakṣaṇaḥ |
ahampadapratyayalakṣitārthaḥ
pratyak sadānandaghanaḥ parātmā || 351||
itthaṃ vipaścitsadasadvibhajya
niścitya tattvaṃ nijabodhadṛṣṭyā |
jñātvā svamātmānamakhaṇḍabodhaṃ
tebhyo vimuktaḥ svayameva śāmyati || 352||
ajñānahṛdayagrantherniḥśeṣavilayastadā |
samādhinā'vikalpena yadā'dvaitātmadarśanam || 353||
tvamahamidamitīyaṃ kalpanā buddhidoṣāt
prabhavati paramātmanyadvaye nirviśeṣe |
pravilasati samādhāvasya sarvo vikalpo
vilayanamupagacchedvastutattvāvadhṛtyā || 354||
śānto dāntaḥ paramuparataḥ kṣāntiyuktaḥ samādhiṃ
kurvannityaṃ kalayati yatiḥ svasya sarvātmabhāvam |
tenāvidyātimirajanitānsādhu dagdhvā vikalpān
brahmākṛtyā nivasati sukhaṃ niṣkriyo nirvikalpaḥ || 355||
samāhitā ye pravilāpya bāhyaṃ
śrotrādi cetaḥ svamahaṃ cidātmani |
ta eva muktā bhavapāśabandhaiḥ
nānye tu pārokṣyakathābhidhāyinaḥ || 356||
upādhibhedātsvayameva bhidyate (pāṭhabhedaḥ - yogātsvayameva)
copādhyapohe svayameva kevalaḥ |
tasmādupādhervilayāya vidvān
vasetsadā'kalpasamādhiniṣṭhayā || 357||
sati sakto naro yāti sadbhāvaṃ hyekaniṣṭhayā |
kīṭako bhramaraṃ dhyāyan bhramaratvāya kalpate || 358||
kriyāntarāsaktimapāsya kīṭako
dhyāyannalitvaṃ hyalibhāvamṛcchati | (pāṭhabhedaḥ - dhyāyanyathāliṃ)
tathaiva yogī paramātmatattvaṃ
dhyātvā samāyāti tadekaniṣṭhayā || 359||
atīva sūkṣmaṃ paramātmatattvaṃ
na sthūladṛṣṭyā pratipattumarhati |
samādhinātyantasusūkṣmavṛttyā
jñātavyamāryairatiśuddhabuddhibhiḥ || 360||
yathā suvarṇaṃ puṭapākaśodhitaṃ
tyaktvā malaṃ svātmaguṇaṃ samṛcchati |
tathā manaḥ sattvarajastamomalaṃ
dhyānena santyajya sameti tattvam || 361||
nirantarābhyāsavaśāttaditthaṃ
pakvaṃ mano brahmaṇi līyate yadā |
tadā samādhiḥ savikalpavarjitaḥ (pāṭhabhedaḥ - sa vikalpavarjitaḥ)
svato'dvayānandarasānubhāvakaḥ || 362||
samādhinā'nena samastavāsanā-
granthervināśo'khilakarmanāśaḥ |
antarbahiḥ sarvata eva sarvadā
svarūpavisphūrtirayatnataḥ syāt || 363||
śruteḥ śataguṇaṃ vidyānmananaṃ mananādapi |
nididhyāsaṃ lakṣaguṇamanantaṃ nirvikalpakam || 364||
nirvikalpakasamādhinā sphuṭaṃ
brahmatattvamavagamyate dhruvam |
nānyathā calatayā manogateḥ
pratyayāntaravimiśritaṃ bhavet || 365||
ataḥ samādhatsva yatendriyaḥ san
nirantaraṃ śāntamanāḥ pratīci |
vidhvaṃsaya dhvāntamanādyavidyayā
kṛtaṃ sadekatvavilokanena || 366||
yogasya prathamadvāraṃ vāṅnirodho'parigrahaḥ | (pāṭhabhedaḥ - prathamaṃ dvāraṃ)
nirāśā ca nirīhā ca nityamekāntaśīlatā || 367||
ekāntasthitirindriyoparamaṇe heturdamaścetasaḥ
saṃrodhe karaṇaṃ śamena vilayaṃ yāyādahaṃvāsanā |
tenānandarasānubhūtiracalā brāhmī sadā yoginaḥ
tasmāccittanirodha eva satataṃ kāryaḥ prayatno muneḥ || 368|| prayatnānmuneḥ
vācaṃ niyacchātmani taṃ niyaccha
buddhau dhiyaṃ yaccha ca buddhisākṣiṇi |
taṃ cāpi pūrṇātmani nirvikalpe
vilāpya śāntiṃ paramāṃ bhajasva || 369||
dehaprāṇendriyamanobuddhyādibhirupādhibhiḥ |
yairyairvṛtteḥsamāyogastattadbhāvo'sya yoginaḥ || 370||
tannivṛttyā muneḥ samyak sarvoparamaṇaṃ sukham |
sandṛśyate sadānandarasānubhavaviplavaḥ || 371||
antastyāgo bahistyāgo viraktasyaiva yujyate |
tyajatyantarbahiḥsaṅgaṃ viraktastu mumukṣayā || 372||
bahistu viṣayaiḥ saṅgaṃ tathāntarahamādibhiḥ | (pāṭhabhedaḥ - saṅgaḥ)
virakta eva śaknoti tyaktuṃ brahmaṇi niṣṭhitaḥ || 373||
vairāgyabodhau puruṣasya pakṣivat
pakṣau vijānīhi vicakṣaṇa tvam |
vimuktisaudhāgralatādhirohaṇaṃ
tābhyāṃ vinā nānyatareṇa sidhyati || 374||
atyantavairāgyavataḥ samādhiḥ
samāhitasyaiva dṛḍhaprabodhaḥ |
prabuddhatattvasya hi bandhamuktiḥ
muktātmano nityasukhānubhūtiḥ || 375||
vairāgyānna paraṃ sukhasya janakaṃ paśyāmi vaśyātmanaḥ
taccecchuddhatarātmabodhasahitaṃ svārājyasāmrājyadhuk |
etaddvāramajasramuktiyuvateryasmāttvamasmātparaṃ
sarvatrāspṛhayā sadātmani sadā prajñāṃ kuru śreyase || 376||
āśāṃ chinddhi viṣopameṣu viṣayeṣveṣaiva mṛtyoḥ kṛti- (pāṭhabhedaḥ - mṛtyoḥ sṛti)
styaktvā jātikulāśrameṣvabhimatiṃ muñcātidūrātkriyāḥ |
dehādāvasati tyajātmadhiṣaṇāṃ prajñāṃ kuruṣvātmani
tvaṃ draṣṭāsyamano'si nirdvayaparaṃ brahmāsi yadvastutaḥ || 377|| (pāṭhabhedaḥ - draṣṭāsyamalo)
lakṣye brahmaṇi mānasaṃ dṛḍhataraṃ saṃsthāpya bāhyendriyaṃ
svasthāne viniveśya niścalatanuścopekṣya dehasthitim |
brahmātmaikyamupetya tanmayatayā cākhaṇḍavṛttyā'niśaṃ
brahmānandarasaṃ pibātmani mudā śūnyaiḥ kimanyairbhṛśam || 378|| (pāṭhabhedaḥ - kimanyairbhramaiḥ)
anātmacintanaṃ tyaktvā kaśmalaṃ duḥkhakāraṇam |
cintayātmānamānandarūpaṃ yanmuktikāraṇam || 379||
eṣa svayañjyotiraśeṣasākṣī
vijñānakośo vilasatyajasram | vijñānakośe
lakṣyaṃ vidhāyainamasadvilakṣaṇa-
makhaṇḍavṛttyā''tmatayā'nubhāvaya || 380||
etamacchinnayā vṛttyā pratyayāntaraśūnyayā |
ullekhayanvijānīyātsvasvarūpatayā sphuṭam || 381||
atrātmatvaṃ dṛḍhīkurvannahamādiṣu santyajan |
udāsīnatayā teṣu tiṣṭhetsphuṭaghaṭādivat || 382|| (pāṭhabhedaḥ - tiṣṭhedghaṭapaṭādivat)
viśuddhamantaḥkaraṇaṃ svarūpe
niveśya sākṣiṇyavabodhamātre |
śanaiḥ śanairniścalatāmupānayan
pūrṇaṃ svamevānuvilokayettataḥ || 383|| (pāṭhabhedaḥ - pūrṇatvamevānu)
dehendriyaprāṇamano'hamādibhiḥ
svājñānaklṛptairakhilairupādhibhiḥ |
vimuktamātmānamakhaṇḍarūpaṃ
pūrṇaṃ mahākāśamivāvalokayet || 384||
ghaṭakalaśakusūlasūcimukhyaiḥ
gaganamupādhiśatairvimuktamekam |
bhavati na vividhaṃ tathaiva śuddhaṃ
paramahamādivimuktamekameva || 385||
brahmādistambaparyantā mṛṣāmātrā upādhayaḥ | (pāṭhabhedaḥ - brahmādyāḥ stamba)
tataḥ pūrṇaṃ svamātmānaṃ paśyedekātmanā sthitam || 386||
yatra bhrāntyā kalpitaṃ tadviveke (pāṭhabhedaḥ - yadviveke)
tattanmātraṃ naiva tasmādvibhinnam |
bhrānternāśe bhāti dṛṣṭāhitattvaṃ (pāṭhabhedaḥ - bhrāntidṛṣṭā)
rajjustadvadviśvamātmasvarūpam || 387||
svayaṃ brahmā svayaṃ viṣṇuḥ svayamindraḥ svayaṃ śivaḥ |
svayaṃ viśvamidaṃ sarvaṃ svasmādanyanna kiñcana || 388||
antaḥ svayaṃ cāpi bahiḥ svayaṃ ca
svayaṃ purastāt svayameva paścāt |
svayaṃ hyāvācyāṃ svayamapyudīcyāṃ (pāṭhabhedaḥ - hyavācyāṃ)
tathopariṣṭātsvayamapyadhastāt || 389||
taraṅgaphenabhramabudbudādi
sarvaṃ svarūpeṇa jalaṃ yathā tathā |
cideva dehādyahamantametat
sarvaṃ cidevaikarasaṃ viśuddham || 390||
sadevedaṃ sarvaṃ jagadavagataṃ vāṅmanasayoḥ
sato'nyannāstyeva prakṛtiparasīmni sthitavataḥ |
pṛthak kiṃ mṛtsnāyāḥ kalaśaghaṭakumbhādyavagataṃ
vadatyeṣa bhrāntastvamahamiti māyāmadirayā || 391||
kriyāsamabhihāreṇa yatra nānyaditi śrutiḥ |
bravīti dvaitarāhityaṃ mithyādhyāsanivṛttaye || 392||
ākāśavannirmalanirvikalpaṃ (pāṭhabhedaḥ - nirvikalpa)
niḥsīmaniḥspandananirvikāram |
antarbahiḥśūnyamananyamadvayaṃ
svayaṃ paraṃ brahma kimasti bodhyam || 393||
vaktavyaṃ kimu vidyate'tra bahudhā brahmaiva jīvaḥ svayaṃ
brahmaitajjagadātataṃ nu sakalaṃ brahmādvitīyaṃ śrutiḥ | (pāṭhabhedaḥ - jagadāparāṇu sakalaṃ)
brahmaivāhamiti prabuddhamatayaḥ santyaktabāhyāḥ sphuṭaṃ
brahmībhūya vasanti santatacidānandātmanaitaddhruvam || 394|| (pāṭhabhedaḥ - ānandātmanaiva dhruvam)
jahi malamayakośe'handhiyotthāpitāśāṃ
prasabhamanilakalpe liṅgadehe'pi paścāt |
nigamagaditakīrtiṃ nityamānandamūrtiṃ
svayamiti paricīya brahmarūpeṇa tiṣṭha || 395||
śavākāraṃ yāvadbhajati manujastāvadaśuciḥ
parebhyaḥ syātkleśo jananamaraṇavyādhinilayaḥ | (pāṭhabhedaḥ - vyādhinirayāḥ)
yadātmānaṃ śuddhaṃ kalayati śivākāramacalam
tadā tebhyo mukto bhavati hi tadāha śrutirapi || 396||
svātmanyāropitāśeṣābhāsavastunirāsataḥ |
svayameva paraṃ brahma pūrṇamadvayamakriyam || 397||
samāhitāyāṃ sati cittavṛttau
parātmani brahmaṇi nirvikalpe |
na dṛśyate kaścidayaṃ vikalpaḥ
prajalpamātraḥ pariśiṣyate yataḥ || 398|| (pāṭhabhedaḥ - tataḥ)
asatkalpo vikalpo'yaṃ viśvamityekavastuni |
nirvikāre nirākāre nirviśeṣe bhidā kutaḥ || 399||
draṣṭudarśanadṛśyādibhāvaśūnyaikavastuni | (pāṭhabhedaḥ - draṣṭṛdarśana)
nirvikāre nirākāre nirviśeṣe bhidā kutaḥ || 400||
kalpārṇava ivātyantaparipūrṇaikavastuni |
nirvikāre nirākāre nirviśeṣe bhidā kutaḥ || 401||
tejasīva tamo yatra pralīnaṃ bhrāntikāraṇam | (pāṭhabhedaḥ - yatra vilīnaṃ)
advitīye pare tattve nirviśeṣe bhidā kutaḥ || 402||
ekātmake pare tattve bhedavārtā kathaṃ vaset | (pāṭhabhedaḥ - kathaṃ bhavet)
suṣuptau sukhamātrāyāṃ bhedaḥ kenāvalokitaḥ || 403||
na hyasti viśvaṃ paratattvabodhāt
sadātmani brahmaṇi nirvikalpe |
kālatraye nāpyahirīkṣito guṇe
na hyambubindurmṛgatṛṣṇikāyām || 404||
māyāmātramidaṃ dvaitamadvaitaṃ paramārthataḥ |
iti brūte śrutiḥ sākṣātsuṣuptāvanubhūyate || 405||
ananyatvamadhiṣṭhānādāropyasya nirīkṣitam |
paṇḍitai rajjusarpādau vikalpo bhrāntijīvanaḥ || 406||
cittamūlo vikalpo'yaṃ cittābhāve na kaścana |
ataścittaṃ samādhehi pratyagrūpe parātmani || 407||
kimapi satatabodhaṃ kevalānandarūpaṃ
nirupamamativelaṃ nityamuktaṃ nirīham |
niravadhigaganābhaṃ niṣkalaṃ nirvikalpaṃ
hṛdi kalayati vidvān brahma pūrṇaṃ samādhau || 408||
prakṛtivikṛtiśūnyaṃ bhāvanātītabhāvaṃ
samarasamasamānaṃ mānasambandhadūram |
nigamavacanasiddhaṃ nityamasmatprasiddhaṃ
hṛdi kalayati vidvān brahma pūrṇaṃ samādhau || 409||
ajaramamaramastābhāvavastusvarūpaṃ (pāṭhabhedaḥ - bhāsavastu)
stimitasalilarāśiprakhyamākhyāvihīnam |
śamitaguṇavikāraṃ śāśvataṃ śāntamekaṃ
hṛdi kalayati vidvān brahma pūrṇaṃ samādhau || 410||
samāhitāntaḥkaraṇaḥ svarūpe
vilokayātmānamakhaṇḍavaibhavam |
vicchinddhi bandhaṃ bhavagandhagandhitaṃ (pāṭhabhedaḥ - gandhagandhilaṃ)
yatnena puṃstvaṃ saphalīkuruṣva || 411-
sarvopādhivinirmuktaṃ saccidānandamadvayam |
bhāvayātmānamātmasthaṃ na bhūyaḥ kalpase'dhvane || 412||
chāyeva puṃsaḥ paridṛśyamāna-
mābhāsarūpeṇa phalānubhūtyā |
śarīramārācchavavannirastaṃ
punarna sandhatta idaṃ mahātmā || 413||
satatavimalabodhānandarūpaṃ sametya (pāṭhabhedaḥ - svametya)
tyaja jaḍamalarūpopādhimetaṃ sudūre |
atha punarapi naiṣa smaryatāṃ vāntavastu (pāṭhabhedaḥ - punarapi naiva)
smaraṇaviṣayabhūtaṃ kalpate kutsanāya || 414||
samūlametatparidāhya vahnau (pāṭhabhedaḥ - paridahya)
sadātmani brahmaṇi nirvikalpe |
tataḥ svayaṃ nityaviśuddhabodhā-
nandātmanā tiṣṭhati vidvariṣṭhaḥ || 415||
prārabdhasūtragrathitaṃ śarīraṃ
prayātu vā tiṣṭhatu goriva srak |
na tatpunaḥ paśyati tattvavettā-
''nandātmani brahmaṇi līnavṛttiḥ || 416||
akhaṇḍānandamātmānaṃ vijñāya svasvarūpataḥ |
kimicchan kasya vā hetordehaṃ puṣṇāti tattvavit || 417||
saṃsiddhasya phalaṃ tvetajjīvanmuktasya yoginaḥ |
bahirantaḥ sadānandarasāsvādanamātmani || 418||
vairāgyasya phalaṃ bodho bodhasyoparatiḥ phalam |
svānandānubhavācchāntireṣaivoparateḥ phalam || 419||
yadyuttarottarābhāvaḥ pūrvapūrvantu niṣphalam |
nivṛttiḥ paramā tṛptirānando'nupamaḥ svataḥ || 420||
dṛṣṭaduḥkheṣvanudvego vidyāyāḥ prastutaṃ phalam |
yatkṛtaṃ bhrāntivelāyāṃ nānā karma jugupsitam |
paścānnaro vivekena tatkathaṃ kartumarhati || 421||
vidyāphalaṃ syādasato nivṛttiḥ
pravṛttirajñānaphalaṃ tadīkṣitam |
tajjñājñayoryanmṛgatṛṣṇikādau
nocedvidāṃ dṛṣṭaphalaṃ kimasmāt || 422|| (pāṭhabhedaḥ - nocedvido)
ajñānahṛdayagranthervināśo yadyaśeṣataḥ |
anicchorviṣayaḥ kiṃ nu pravṛtteḥ kāraṇaṃ svataḥ || 423|| (pāṭhabhedaḥ - viduṣaḥ kiṃ)
vāsanānudayo bhogye vairāgyasya tadāvadhiḥ |
ahambhāvodayābhāvo bodhasya paramāvadhiḥ |
līnavṛttairanutpattirmaryādoparatestu sā || 424|| (pāṭhabhedaḥ - vṛttera)
brahmākāratayā sadā sthitatayā nirmuktabāhyārthadhī-
ranyāveditabhogyabhogakalano nidrāluvadbālavat |
svapnālokitalokavajjagadidaṃ paśyankvacillabdhadhī-
rāste kaścidanantapuṇyaphalabhugdhanyaḥ sa mānyo bhuvi || 425||
sthitaprajño yatirayaṃ yaḥ sadānandamaśnute |
brahmaṇyeva vilīnātmā nirvikāro viniṣkriyaḥ || 426||
brahmātmanoḥ śodhitayorekabhāvāvagāhinī |
nirvikalpā ca cinmātrā vṛttiḥ prajñeti kathyate |
susthitā'sau bhavedyasya sthitaprajñaḥ sa ucyate || 427||
yasya sthitā bhavetprajñā yasyānando nirantaraḥ |
prapañco vismṛtaprāyaḥ sa jīvanmukta iṣyate || 428||
līnadhīrapi jāgarti jāgraddharmavivarjitaḥ |
bodho nirvāsano yasya sa jīvanmukta iṣyate || 429||
śāntasaṃsārakalanaḥ kalāvānapi niṣkalaḥ |
yasya cittaṃ viniścintaṃ sa jīvanmukta iṣyate || 430|| (pāṭhabhedaḥ - yaḥ sacitto'pi niścittaḥ)
vartamāne'pi dehe'smiñchāyāvadanuvartini |
ahantāmamatā'bhāvo jīvanmuktasya lakṣaṇam || 431||
atītānanusandhānaṃ bhaviṣyadavicāraṇam |
audāsīnyamapi prāptaṃ jīvanmuktasya lakṣaṇam || 432|| (pāṭhabhedaḥ - prāpte)
guṇadoṣaviśiṣṭe'sminsvabhāvena vilakṣaṇe |
sarvatra samadarśitvaṃ jīvanmuktasya lakṣaṇam || 433||
iṣṭāniṣṭārthasamprāptau samadarśitayā''tmani |
ubhayatrāvikāritvaṃ jīvanmuktasya lakṣaṇam || 434||
brahmānandarasāsvādāsaktacittatayā yateḥ |
antarbahiravijñānaṃ jīvanmuktasya lakṣaṇam || 435||
dehendriyādau kartavye mamāhambhāvavarjitaḥ |
audāsīnyena yastiṣṭhetsa jīvanmuktalakṣaṇaḥ || 436|| (pāṭhabhedaḥ - sa jīvanmukta iṣyate)
vijñāta ātmano yasya brahmabhāvaḥ śruterbalāt |
bhavabandhavinirmuktaḥ sa jīvanmuktalakṣaṇaḥ || 437|| (pāṭhabhedaḥ - sa jīvanmukta iṣyate)
dehendriyeṣvahambhāva idambhāvastadanyake |
yasya no bhavataḥ kvāpi sa jīvanmukta iṣyate || 438||
jīveśobhayasaṃsārarūpadurvāsanojjhitā |
sā sarvadā bhavedyasya sa jīvanmukta iṣyate ||
na pratyagbrahmaṇorbhedaṃ kadāpi brahmasargayoḥ |
prajñayā yo vijāniti sa jīvanmuktalakṣaṇaḥ || 439|| (pāṭhabhedaḥ - sa jīvanmukta iṣyate)
sādhubhiḥ pūjyamāne'sminpīḍyamāne'pi durjanaiḥ |
samabhāvo bhavedyasya sa jīvanmuktalakṣaṇaḥ || 440|| (pāṭhabhedaḥ - sa jīvanmukta iṣyate)
yatra praviṣṭā viṣayāḥ pareritā
nadīpravāhā iva vārirāśau |
linanti sanmātratayā na vikriyāṃ
utpādayantyeṣa yatirvimuktaḥ || 441||
vijñātabrahmatattvasya yathāpūrvaṃ na saṃsṛtiḥ |
asti cenna sa vijñātabrahmabhāvo bahirmukhaḥ || 442||
prācīnavāsanāvegādasau saṃsaratīti cet |
na sadekatvavijñānānmandī bhavati vāsanā || 443||
atyantakāmukasyāpi vṛttiḥ kuṇṭhati mātari |
tathaiva brahmaṇi jñāte pūrṇānande manīṣiṇaḥ || 444||
nididhyāsanaśīlasya bāhyapratyaya īkṣyate |
bravīti śrutiretasya prārabdhaṃ phaladarśanāt || 445||
sukhādyanubhavo yāvattāvatprārabdhamiṣyate |
phalodayaḥ kriyāpūrvo niṣkriyo na hi kutracit || 446||
ahaṃ brahmeti vijñānātkalpakoṭiśatārjitam |
sañcitaṃ vilayaṃ yāti prabodhātsvapnakarmavat || 447||
yatkṛtaṃ svapnavelāyāṃ puṇyaṃ vā pāpamulbaṇam |
suptotthitasya kintatsyātsvargāya narakāya vā || 448||
svamasaṅgamudāsīnaṃ parijñāya nabho yathā |
na śliṣyati ca yatkiñcitkadācidbhāvikarmabhiḥ || 449|| (pāṭhabhedaḥ - śliṣyate yatiḥ kiñcit)
na nabho ghaṭayogena surāgandhena lipyate |
tathātmopādhiyogena taddharmairnaiva lipyate || 450||
jñānodayātpurārabdhaṃ karmajñānānna naśyati |
adatvā svaphalaṃ lakṣyamuddiśyotsṛṣṭabāṇavat || 451||
vyāghrabuddhyā vinirmukto bāṇaḥ paścāttu gomatau |
na tiṣṭhati chinatyeva lakṣyaṃ vegena nirbharam || 452||
prārabdhaṃ balavattaraṃ khalu vidāṃ bhogena tasya kṣayaḥ
samyagjñānahutāśanena vilayaḥ prāksañcitāgāminām |
brahmātmaikyamavekṣya tanmayatayā ye sarvadā saṃsthitāḥ
teṣāṃ tattritayaṃ nahi kvacidapi brahmaiva te nirguṇam || 453||
upādhitādātmyavihīnakevala-
brahmātmanaivātmani tiṣṭhato muneḥ |
prārabdhasadbhāvakathā na yuktā
svapnārthasambandhakatheva jāgrataḥ || 454||
na hi prabuddhaḥ pratibhāsadehe
dehopayoginyapi ca prapañce |
karotyahantāṃ mamatāmidantāṃ
kintu svayaṃ tiṣṭhati jāgareṇa || 455||
na tasya mithyārthasamarthanecchā
na saṅgrahastajjagato'pi dṛṣṭaḥ |
tatrānuvṛttiryadi cenmṛṣārthe
na nidrayā mukta itīṣyate dhruvam || 456||
tadvatpare brahmaṇi vartamānaḥ
sadātmanā tiṣṭhati nānyadīkṣate |
smṛtiryathā svapnavilokitārthe
tathā vidaḥ prāśanamocanādau || 457||
karmaṇā nirmito dehaḥ prārabdhaṃ tasya kalpyatām |
nānāderātmano yuktaṃ naivātmā karmanirmitaḥ || 458||
ajo nityaḥ śāśvata iti brūte śrutiramoghavāk | (pāṭhabhedaḥ - ajo nitya iti brūte śrutireṣā tvamoghavāk)
tadātmanā tiṣṭhato'sya kutaḥ prārabdhakalpanā || 459||
prārabdhaṃ sidhyati tadā yadā dehātmanā sthitiḥ |
dehātmabhāvo naiveṣṭaḥ prārabdhaṃ tyajyatāmataḥ || 460||
śarīrasyāpi prārabdhakalpanā bhrāntireva hi |
adhyastasya kutaḥ sattvamasatyasya kuto janiḥ | (pāṭhabhedaḥ - sattvamasattvasya)
ajātasya kuto nāśaḥ prārabdhamasataḥ kutaḥ || 461||
jñānenājñānakāryasya samūlasya layo yadi |
tiṣṭhatyayaṃ kathaṃ deha iti śaṅkāvato jaḍān || 462||
samādhātuṃ bāhyadṛṣṭyā prārabdhaṃ vadati śrutiḥ |
na tu dehādisatyatvabodhanāya vipaścitām |
yataḥ śruterabhiprāyaḥ paramārthaikagocaraḥ || 463||
paripūrṇamanādyantamaprameyamavikriyam |
ekamevādvayaṃ brahma neha nānāsti kiñcana || 464||
sadghanaṃ cidghanaṃ nityamānandaghanamakriyam |
ekamevādvayaṃ brahma neha nānāsti kiñcana || 465||
pratyagekarasaṃ pūrṇamanantaṃ sarvatomukham |
ekamevādvayaṃ brahma neha nānāsti kiñcana || 466||
aheyamanupādeyamanādeyamanāśrayam | manādheyamanā
ekamevādvayaṃ brahma neha nānāsti kiñcana || 467||
nirguṇaṃ niṣkalaṃ sūkṣmaṃ nirvikalpaṃ nirañjanam |
ekamevādvayaṃ brahma neha nānāsti kiñcana || 468||
anirūpya svarūpaṃ yanmanovācāmagocaram |
ekamevādvayaṃ brahma neha nānāsti kiñcana || 469||
satsamṛddhaṃ svataḥsiddhaṃ śuddhaṃ buddhamanīdṛśam |
ekamevādvayaṃ brahma neha nānāsti kiñcana || 470||
nirastarāgā vinirastabhogāḥ (pāṭhabhedaḥ - nirapāstabhogāḥ)
śāntāḥ sudāntā yatayo mahāntaḥ |
vijñāya tattvaṃ parametadante
prāptāḥ parāṃ nirvṛtimātmayogāt || 471||
bhavānapīdaṃ paratattvamātmanaḥ
svarūpamānandaghanaṃ vicārya | (pāṭhabhedaḥ - nicāyya)
vidhūya mohaṃ svamanaḥprakalpitaṃ
muktaḥ kṛtārtho bhavatu prabuddhaḥ || 472||
samādhinā sādhuviniścalātmanā (pāṭhabhedaḥ - suniścalātmanā)
paśyātmatattvaṃ sphuṭabodhacakṣuṣā |
niḥsaṃśayaṃ samyagavekṣitaśce-
cchrutaḥ padārtho na punarvikalpyate || 473|| (pāṭhabhedaḥ - punarvikalpate)
svasyāvidyābandhasambandhamokṣā-
tsatyajñānānandarūpātmalabdhau |
śāstraṃ yuktirdeśikoktiḥ pramāṇaṃ
cāntaḥsiddhā svānubhūtiḥ pramāṇam || 474||
bandho mokṣaśca tṛptiśca cintā''rogyakṣudhādayaḥ |
svenaiva vedyā yajjñānaṃ pareṣāmānumānikam || 475||
taṭasthitā bodhayanti guravaḥ śrutayo yathā |
prajñayaiva taredvidvānīśvarānugṛhītayā || 476||
svānubhūtyā svayaṃ jñātvā svamātmānamakhaṇḍitam |
saṃsiddhaḥ sammukhaṃ tiṣṭhennirvikalpātmanā''tmani || 477|| (pāṭhabhedaḥ - susukhaṃ tiṣṭhen)
vedāntasiddhāntaniruktireṣā
brahmaiva jīvaḥ sakalaṃ jagacca |
akhaṇḍarūpasthitireva mokṣo
brahmādvitīye śrutayaḥ pramāṇam || 478|| (pāṭhabhedaḥ - brahmādvitīyaṃ)
iti guruvacanācchrutipramāṇāt
paramavagamya satattvamātmayuktyā |
praśamitakaraṇaḥ samāhitātmā
kvacidacalākṛtirātmaniṣṭhato'bhūt || 479|| (pāṭhabhedaḥ - ātmaniṣṭhito)
kiñcitkālaṃ samādhāya pare brahmaṇi mānasam | (pāṭhabhedaḥ - kañcitkālaṃ)
utthāya paramānandādidaṃ vacanamabravīt || 480|| (pāṭhabhedaḥ - vyutthāya)
buddhirvinaṣṭā galitā pravṛttiḥ
brahmātmanorekatayā'dhigatyā |
idaṃ na jāne'pyanidaṃ na jāne
kiṃ vā kiyadvā sukhamastyapāram || 481|| (pāṭhabhedaḥ - sukhamasya pāram)
vācā vaktumaśakyameva manasā mantuṃ na vā śakyate
svānandāmṛtapūrapūritaparabrahmāmbudhervaibhavam |
ambhorāśiviśīrṇavārṣikaśilābhāvaṃ bhajanme mano
yasyāṃśāṃśalave vilīnamadhunā''nandātmanā nirvṛtam || 482||
kva gataṃ kena vā nītaṃ kutra līnamidaṃ jagat |
adhunaiva mayā dṛṣṭaṃ nāsti kiṃ mahadadbhutam || 483||
kiṃ heyaṃ kimupādeyaṃ kimanyatkiṃ vilakṣaṇam |
akhaṇḍānandapīyūṣapūrṇe brahmamahārṇave || 484||
na kiñcidatra paśyāmi na śaṛṇomi na vedmyaham |
svātmanaiva sadānandarūpeṇāsmi vilakṣaṇaḥ || 485||
namo namaste gurave mahātmane
vimuktasaṅgāya saduttamāya |
nityādvayānandarasasvarūpiṇe
bhūmne sadā'pāradayāmbudhāmne || 486||
yatkaṭākṣaśaśisāndracandrikā-
pātadhūtabhavatāpajaśramaḥ |
prāptavānahamakhaṇḍavaibhavā-
nandamātmapadamakṣayaṃ kṣaṇāt || 487||
dhanyo'haṃ kṛtakṛtyo'haṃ vimukto'haṃ bhavagrahāt |
nityānandasvarūpo'haṃ pūrṇo'haṃ tvadanugrahāt || 488||
asaṅgo'hamanaṅgo'hamaliṅgo'hamabhaṅguraḥ |
praśānto'hamananto'hamamalo'haṃ cirantanaḥ || 489|| (pāṭhabhedaḥ - 'hamatānto'haṃ)
akartāhamabhoktāhamavikāro'hamakriyaḥ |
śuddhabodhasvarūpo'haṃ kevalo'haṃ sadāśivaḥ || 490||
draṣṭuḥ śroturvaktuḥ karturbhokturvibhinna evāham |
nityanirantaraniṣkriyaniḥsīmāsaṅgapūrṇabodhātmā || 491||
nāhamidaṃ nāhamado'pyubhayoravabhāsakaṃ paraṃ śuddham |
bāhyābhyantaraśūnyaṃ pūrṇaṃ brahmādvitīyamevāham || 492||
nirupamamanāditattvaṃ tvamahamidamada iti kalpanādūram |
nityānandaikarasaṃ satyaṃ brahmādvitīyamevāham || 493||
nārāyaṇo'haṃ narakāntako'haṃ
purāntako'haṃ puruṣo'hamīśaḥ |
akhaṇḍabodho'hamaśeṣasākṣī
nirīśvaro'haṃ nirahaṃ ca nirmamaḥ || 494||
sarveṣu bhūteṣvahameva saṃsthito
jñānātmanā'ntarbahirāśrayaḥ san |
bhoktā ca bhogyaṃ svayameva sarvaṃ
yadyatpṛthagdṛṣṭamidantayā purā || 495||
mayyakhaṇḍasukhāmbhodhau bahudhā viśvavīcayaḥ |
utpadyante vilīyante māyāmārutavibhramāt || 496||
sthulādibhāvā mayi kalpitā bhramā-
dāropitānusphuraṇena lokaiḥ |
kāle yathā kalpakavatsarāya-
ṇartvādayo niṣkalanirvikalpe || 497||
āropitaṃ nāśrayadūṣakaṃ bhavet
kadāpi mūḍhairatidoṣadūṣitaiḥ | mūḍhairmati
nārdrīkarotyūṣarabhūmibhāgaṃ
marīcikāvāri mahāpravāhaḥ || 498||
ākāśavallepavidūrago'haṃ (pāṭhabhedaḥ - ākāśavat kalpavi)
ādityavadbhāsyavilakṣaṇo'ham |
ahāryavannityaviniścalo'haṃ
ambhodhivatpāravivarjito'ham || 499||
na me dehena sambandho megheneva vihāyasaḥ |
ataḥ kuto me taddharmā jāgratsvapnasuṣuptayaḥ || 500||
upādhirāyāti sa eva gacchati
sa eva karmāṇi karoti bhuṅkte |
sa eva jīryan mriyate sadāhaṃ (pāṭhabhedaḥ - eva jīvan)
kulādrivanniścala eva saṃsthitaḥ || 501||
na me pravṛttirna ca me nivṛttiḥ
sadaikarūpasya niraṃśakasya |
ekātmako yo niviḍo nirantaro (pāṭhabhedaḥ - nibiḍo)
vyomeva pūrṇaḥ sa kathaṃ nu ceṣṭate || 502||
puṇyāni pāpāni nirindriyasya
niścetaso nirvikṛternirākṛteḥ |
kuto mamākhaṇḍasukhānubhūteḥ
brūte hyananvāgatamityapi śrutiḥ || 503||
chāyayā spṛṣṭamuṣṇaṃ vā śītaṃ vā suṣṭhu duḥṣṭhu vā |
na spṛśatyeva yatkiñcitpuruṣaṃ tadvilakṣaṇam || 504||
na sākṣiṇaṃ sākṣyadharmāḥ saṃspṛśanti vilakṣaṇam |
avikāramudāsīnaṃ gṛhadharmāḥ pradīpavat |
dehendriyamanodharmā naivātmānaṃ spṛśantyaho || 505|| ekṣtra
raveryathā karmaṇi sākṣibhāvo
vahneryathā dāhaniyāmakatvam | (pāṭhabhedaḥ - vā'yasi dāhakatvam)
rajjoryathā''ropitavastusaṅgaḥ
tathaiva kūṭasthacidātmano me || 506||
kartāpi vā kārayitāpi nāhaṃ
bhoktāpi vā bhojayitāpi nāham |
draṣṭāpi vā darśayitāpi nāhaṃ
so'haṃ svayañjyotiranīdṛgātmā || 507||
calatyupādhau pratibimbalaulya-
maupādhikaṃ mūḍhadhiyo nayanti |
svabimbabhūtaṃ ravivadviniṣkriyaṃ
kartāsmi bhoktāsmi hato'smi heti || 508||
jale vāpi sthale vāpi luṭhatveṣa jaḍātmakaḥ |
nāhaṃ vilipye taddharmairghaṭadharmairnabho yathā || 509||
kartṛtvabhoktṛtvakhalatvamattatā-
jaḍatvabaddhatvavimuktatādayaḥ |
buddhervikalpā na tu santi vastutaḥ
svasminpare brahmaṇi kevale'dvaye || 510||
santu vikārāḥ prakṛterdaśadhā śatadhā sahasradhā vāpi |
kiṃ me'saṅgacitastairna ghanaḥ kvacidambaraṃ spṛśati || 511|| (pāṭhabhedaḥ - taiḥ kiṃ me'saṅgaciterna hyambudaḍambaro'mbaraṃ)
avyaktādisthūlaparyantametat
viśvaṃ yatrābhāsamātraṃ pratītam |
vyomaprakhyaṃ sūkṣmamādyantahīnaṃ
brahmādvaitaṃ yattadevāhamasmi || 512||
sarvādhāraṃ sarvavastuprakāśaṃ
sarvākāraṃ sarvagaṃ sarvaśūnyam |
nityaṃ śuddhaṃ niścalaṃ nirvikalpaṃ (pāṭhabhedaḥ - niṣkalaṃ)
brahmādvaitaṃ yattadevāhamasmi || 513||
yatpratyastāśeṣamāyāviśeṣaṃ
pratyagrūpaṃ pratyayāgamyamānam |
satyajñānānantamānandarūpaṃ
brahmādvaitaṃ yattadevāhamasmi || 514||
niṣkriyo'smyavikāro'smi
niṣkalo'smi nirākṛtiḥ |
nirvikalpo'smi nityo'smi
nirālambo'smi nirdvayaḥ || 515||
sarvātmako'haṃ sarvo'haṃ sarvātīto'hamadvayaḥ |
kevalākhaṇḍabodho'hamānando'haṃ nirantaraḥ || 516||
svārājyasāmrājyavibhūtireṣā
bhavatkṛpāśrīmahimaprasādāt |
prāptā mayā śrīgurave mahātmane
namo namaste'stu punarnamo'stu || 517||
mahāsvapne māyākṛtajanijarāmṛtyugahane
bhramantaṃ kliśyantaṃ bahulataratāpairanudinam | (pāṭhabhedaḥ - ranukalam)
ahaṅkāravyāghravyathitamimamatyantakṛpayā
prabodhya prasvāpātparamavitavānmāmasi guro || 518||
namastasmai sadaikasmai kasmaicinmahase namaḥ | (pāṭhabhedaḥ - sadekasmai namaścinmahase muhuḥ)
yadetadviśvarūpeṇa rājate gururāja te || 519||
iti natamavalokya śiṣyavaryaṃ
samadhigatātmasukhaṃ prabuddhatattvam |
pramuditahṛdayaṃ sa deśikendraḥ (pāṭhabhedaḥ - hṛdayaḥ)
punaridamāha vacaḥ paraṃ mahātmā || 520||
brahmapratyayasantatirjagadato brahmaiva tatsarvataḥ (pāṭhabhedaḥ - satsarvataḥ)
paśyādhyātmadṛśā praśāntamanasā sarvāsvavasthāsvapi |
rūpādanyadavekṣitaṃ kimabhitaścakṣuṣmatāṃ dṛśyate (pāṭhabhedaḥ - vidyate)
tadvadbrahmavidaḥ sataḥ kimaparaṃ buddhervihārāspadam || 521||
kastāṃ parānandarasānubhūti-
mṛtsṛjya śūnyeṣu rameta vidvān | (pāṭhabhedaḥ - mutsṛjya
candre mahāhlādini dīpyamāne)
citrendumālokayituṃ ka icchet || 522||
asatpadārthānubhavena kiñcin
na hyasti tṛptirna ca duḥkhahāniḥ |
tadadvayānandarasānubhūtyā
tṛptaḥ sukhaṃ tiṣṭha sadātmaniṣṭhayā || 523||
svameva sarvathā paśyanmanyamānaḥ svamadvayam | (pāṭhabhedaḥ - sarvataḥ)
svānandamanubhuñjānaḥ kālaṃ naya mahāmate || 524||
akhaṇḍabodhātmani nirvikalpe
vikalpanaṃ vyomni puraprakalpanam |
tadadvayānandamayātmanā sadā
śāntiṃ parāmetya bhajasva maunam || 525||
tūṣṇīmavasthā paramopaśāntiḥ
buddherasatkalpavikalpahetoḥ |
brahmātmano brahmavido mahātmano
yatrādvayānandasukhaṃ nirantaram || 526||
nāsti nirvāsanānmaunātparaṃ sukhakṛduttamam |
vijñātātmasvarūpasya svānandarasapāyinaḥ || 527||
gacchaṃstiṣṭhannupaviśañchayāno vā'nyathāpi vā |
yathecchayā vasedvidvānātmārāmaḥ sadā muniḥ || 528||
na deśakālāsanadigyamādi-
lakṣyādyapekṣā'pratibaddhavṛtteḥ | (pāṭhabhedaḥ - pratibaddha
saṃsiddhatattvasya mahātmano'sti)
svavedane kā niyamādyavasthā || 529||
ghaṭo'yamiti vijñātuṃ niyamaḥ ko'nvavekṣate | (pāṭhabhedaḥ - apekṣyate)
vinā pramāṇasuṣṭhutvaṃ yasminsati padārthadhīḥ || 530||
ayamātmā nityasiddhaḥ pramāṇe sati bhāsate |
na deśaṃ nāpi vā kālaṃ na śuddhiṃ vāpyapekṣate || 531||
devadatto'hamityetadvijñānaṃ nirapekṣakam |
tadvadbrahmavido'pyasya brahmāhamiti vedanam || 532||
bhānuneva jagatsarvaṃ bhāsate yasya tejasā |
anātmakamasattucchaṃ kiṃ nu tasyāvabhāsakam || 533||
vedaśāstrapurāṇāni bhūtāni sakalānyapi |
yenārthavanti taṃ kinnu vijñātāraṃ prakāśayet || 534||
eṣa svayañjyotiranantaśaktiḥ
ātmā'prameyaḥ sakalānubhūtiḥ |
yameva vijñāya vimuktabandho
jayatyayaṃ brahmaviduttamottamaḥ || 535||
na khidyate no viṣayaiḥ pramodate
na sajjate nāpi virajyate ca |
svasminsadā krīḍati nandati svayaṃ
nirantarānandarasena tṛptaḥ || 536||
kṣudhāṃ dehavyathāṃ tyaktvā bālaḥ krīḍati vastuniḥ | (pāṭhabhedaḥ - vastuni)
tathaiva vidvān ramate nirmamo nirahaṃ sukhī || 537||
cintāśūnyamadainyabhaikṣamaśanaṃ pānaṃ saridvāriṣu
svātantryeṇa niraṅkuśā sthitirabhīrnidrā śmaśāne vane |
vastraṃ kṣālanaśoṣaṇādirahitaṃ digvāstu śayyā mahī
sañcāro nigamāntavīthiṣu vidāṃ krīḍā pare brahmaṇi || 538||
vimānamālambya śarīrametad
bhunaktyaśeṣānviṣayānupasthitān |
parecchayā bālavadātmavettā
yo'vyaktaliṅgo'nanuṣaktabāhyaḥ || 539||
digambaro vāpi ca sāmbaro vā
tvagambaro vāpi cidambarasthaḥ |
unmattavadvāpi ca bālavadvā
piśācavadvāpi caratyavanyām || 540||
kāmānniṣkāmarūpī saṃścaratyekacaro muniḥ | (pāṭhabhedaḥ - kāmānnī kāmarūpī)
svātmanaiva sadā tuṣṭaḥ svayaṃ sarvātmanā sthitaḥ || 541||
kvacinmūḍho vidvān kvacidapi mahārājavibhavaḥ
kvacidbhrāntaḥ saumyaḥ kvacidajagarācārakalitaḥ |
kvacitpātrībhūtaḥ kvacidavamataḥ kvāpyaviditaḥ
caratyevaṃ prājñaḥ satataparamānandasukhitaḥ || 542||
nirdhano'pi sadā tuṣṭo'pyasahāyo mahābalaḥ |
nityatṛpto'pyabhuñjāno'pyasamaḥ samadarśanaḥ || 543||
api kurvannakurvāṇaścābhoktā phalabhogyapi |
śarīryapyaśarīryeṣa paricchinno'pi sarvagaḥ || 544||
aśarīraṃ sadā santamimaṃ brahmavidaṃ kvacit |
priyāpriye na spṛśatastathaiva ca śubhāśubhe || 545||
sthūlādisambandhavato'bhimāninaḥ
sukhaṃ ca duḥkhaṃ ca śubhāśubhe ca |
vidhvastabandhasya sadātmano muneḥ
kutaḥ śubhaṃ vā'pyaśubhaṃ phalaṃ vā || 546||
tamasā grastavadbhānādagrasto'pi ravirjanaiḥ |
grasta ityucyate bhrāntyāṃ hyajñātvā vastulakṣaṇam || 547|| (pāṭhabhedaḥ - bhrāntyā)
tadvaddehādibandhebhyo vimuktaṃ brahmavittamam |
paśyanti dehivanmūḍhāḥ śarīrābhāsadarśanāt || 548||
ahirnirlvayanīṃ vāyaṃ muktvā dehaṃ tu tiṣṭhati | (pāṭhabhedaḥ - ahini)
itastataścālyamāno yatkiñcitprāṇavāyunā || 549||
strotasā nīyate dāru yathā nimnonnatasthalam |
daivena nīyate deho yathākālopabhuktiṣu || 550||
prārabdhakarmaparikalpitavāsanābhiḥ
saṃsārivaccarati bhuktiṣu muktadehaḥ |
siddhaḥ svayaṃ vasati sākṣivadatra tūṣṇīṃ
cakrasya mūlamiva kalpavikalpaśūnyaḥ || 551||
naivendriyāṇi viṣayeṣu niyuṅkta eṣa
naivāpayuṅkta upadarśanalakṣaṇasthaḥ |
naiva kriyāphalamapīṣadavekṣate sa (pāṭhabhedaḥ - apīṣadapekṣate saḥ)
svānandasāndrarasapānasumattacittaḥ || 552||
lakṣyālakṣyagatiṃ tyaktvā yastiṣṭhetkevalātmanā |
śiva eva svayaṃ sākṣādayaṃ brahmaviduttamaḥ || 553||
jīvanneva sadā muktaḥ kṛtārtho brahmavittamaḥ |
upādhināśādbrahmaiva san brahmāpyeti nirdvayam || 554||
śailūṣo veṣasadbhāvābhāvayośca yathā pumān |
tathaiva brahmavicchreṣṭhaḥ sadā brahmaiva nāparaḥ || 555||
yatra kvāpi viśīrṇaṃ satparṇamiva tarorvapuḥ patatāt | (pāṭhabhedaḥ - viśīrṇaṃ parṇamiva)
brahmībhūtasya yateḥ prāgeva taccidagninā dagdham || 556||
sadātmani brahmaṇi tiṣṭhato muneḥ
pūrṇā'dvayānandamayātmanā sadā |
na deśakālādyucitapratīkṣā
tvaṅmāṃsaviṭpiṇḍavisarjanāya || 557||
dehasya mokṣo no mokṣo na daṇḍasya kamaṇḍaloḥ |
avidyāhṛdayagranthimokṣo mokṣo yatastataḥ || 558||
kulyāyāmatha nadyāṃ vā śivakṣetre'pi catvare |
parṇaṃ patati cettena taroḥ kiṃ nu śubhāśubham || 559||
patrasya puṣpasya phalasya nāśavad-
dehendriyaprāṇadhiyāṃ vināśaḥ |
naivātmanaḥ svasya sadātmakasyā-
nandākṛtervṛkṣavadasti caiṣaḥ || 560|| (pāṭhabhedaḥ - vadāsta eṣaḥ)
prajñānaghana ityātmalakṣaṇaṃ satyasūcakam |
anūdyaupādhikasyaiva kathayanti vināśanam || 561||
avināśī vā are'yamātmeti śrutirātmanaḥ |
prabravītyavināśitvaṃ vinaśyatsu vikāriṣu || 562||
pāṣāṇavṛkṣatṛṇadhānyakaḍaṅkarādyā (pāṭhabhedaḥ - kaṭāmbarādyā)
dagdhā bhavanti hi mṛdeva yathā tathaiva |
dehendriyāsumana ādi samastadṛśyaṃ
jñānāgnidagdhamupayāti parātmabhāvam || 563||
vilakṣaṇaṃ yathā dhvāntaṃ līyate bhānutejasi |
tathaiva sakalaṃ dṛśyaṃ brahmaṇi pravilīyate || 564||
ghaṭe naṣṭe yathā vyoma vyomaiva bhavati sphuṭam |
tathaivopādhivilaye brahmaiva brahmavitsvayam || 565||
kṣīraṃ kṣīre yathā kṣiptaṃ tailaṃ taile jalaṃ jale |
saṃyuktamekatāṃ yāti tathā''tmanyātmavinmuniḥ || 566||
evaṃ videhakaivalyaṃ sanmātratvamakhaṇḍitam |
brahmabhāvaṃ prapadyaiṣa yatirnāvartate punaḥ || 567||
sadātmaikatvavijñānadagdhāvidyādivarṣmaṇaḥ |
amuṣya brahmabhūtatvād brahmaṇaḥ kuta udbhavaḥ || 568||
māyāklṛptau bandhamokṣau na staḥ svātmani vastutaḥ |
yathā rajjau niṣkriyāyāṃ sarpābhāsavinirgamau || 569||
āvṛteḥ sadasattvābhyāṃ vaktavye bandhamokṣaṇe |
nāvṛtirbrahmaṇaḥ kācidanyābhāvādanāvṛtam |
yadyastyadvaitahāniḥ syād dvaitaṃ no sahate śrutiḥ || 570||
bandhañca mokṣañca mṛṣaiva mūḍhā
buddherguṇaṃ vastuni kalpayanti |
dṛgāvṛtiṃ meghakṛtāṃ yathā ravau
yato'dvayā'saṅgacidetadakṣaram || 571|| (pāṭhabhedaḥ - cidekamakṣaram)
astīti pratyayo yaśca yaśca nāstīti vastuni |
buddhereva guṇāvetau na tu nityasya vastunaḥ || 572||
atastau māyayā klṛptau bandhamokṣau na cātmani |
niṣkale niṣkriye śānte niravadye nirañjane |
advitīye pare tattve vyomavatkalpanā kutaḥ || 573||
na nirodho na cotpattirna baddho na ca sādhakaḥ |
na mumukṣurna vai mukta ityeṣā paramārthatā || 574||
sakalanigamacūḍāsvāntasiddhāntarūpaṃ
paramidamatiguhyaṃ darśitaṃ te mayādya |
apagatakalidoṣaṃ kāmanirmuktabuddhiṃ (pāṭhabhedaḥ - buddhiḥ)
svasutavadasakṛttvāṃ bhāvayitvā mumukṣum || 575||
iti śrutvā gurorvākyaṃ praśrayeṇa kṛtānatiḥ |
sa tena samanujñāto yayau nirmuktabandhanaḥ || 576||
gurureva sadānandasindhau nirmagnamānasaḥ | (pāṭhabhedaḥ - gurureṣa)
pāvayanvasudhāṃ sarvāṃ vicacāra nirantaraḥ || 577||
ityācāryasya śiṣyasya saṃvādenātmalakṣaṇam |
nirūpitaṃ mumukṣūṇāṃ sukhabodhopapattaye || 578||
hitamidamupadeśamādriyantāṃ
vihitanirastasamastacittadoṣāḥ |
bhavasukhaviratāḥ praśāntacittāḥ (pāṭhabhedaḥ - sukhavimukhāḥ)
śrutirasikā yatayo mumukṣavo ye || 579||
saṃsārādhvani tāpabhānukiraṇaprodbhūtadāhavyathā-
khinnānāṃ jalakāṅkṣayā marubhuvi bhrāntyā paribhrāmyatām |
atyāsannasudhāmbudhiṃ sukhakaraṃ brahmādvayaṃ darśaya-
tyeṣā śaṅkarabhāratī vijayate nirvāṇasandāyinī || 580||
|| iti śaṅkarācāryaviracitaṃ vivekacūḍāmaṇiḥ ||
|| oṃ tatsat ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.