𑌅𑌥 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃 ॥
𑌧𑍍𑌯𑌾𑌨𑌂 𑌶𑍍𑌰𑍁𑌣𑍁 𑌮𑌹𑌾𑌦𑍇𑌵𑌿 𑌸𑌰𑍍𑌵𑌾𑌨𑌨𑍍𑌦𑌪𑍍𑌰𑌦𑌾𑌯𑌕𑌮𑍍 ।
𑌸𑌰𑍍𑌵𑌸𑍗𑌖𑍍𑌯𑌕𑌰𑌂 𑌚𑍈𑌵 𑌭𑍁𑌕𑍍𑌤𑌿𑌮𑍁𑌕𑍍𑌤𑌿𑌪𑍍𑌰𑌦𑌾𑌯𑌕𑌮𑍍 ॥ 109 ॥
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌸𑍍𑌮𑌰𑌾𑌮𑌿
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌭𑌜𑌾𑌮𑌿 ।
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌵𑌦𑌾𑌮𑌿
𑌶𑍍𑌰𑍀𑌮𑌤𑍍𑌪𑌰𑌂 𑌬𑍍𑌰𑌹𑍍𑌮 𑌗𑍁𑌰𑍁𑌂 𑌨𑌮𑌾𑌮𑌿 ॥ 110 ॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌂 𑌪𑌰𑌮𑌸𑍁𑌖𑌦𑌂 𑌕𑍇𑌵𑌲𑌂 𑌜𑍍𑌞𑌾𑌨𑌮𑍂𑌰𑍍𑌤𑌿𑌂
𑌦𑍍𑌵𑌨𑍍𑌦𑍍𑌵𑌾𑌤𑍀𑌤𑌂 𑌗𑌗𑌨𑌸𑌦𑍃𑌶𑌂 𑌤𑌤𑍍𑌤𑍍𑌵𑌮𑌸𑍍𑌯𑌾𑌦𑌿𑌲𑌕𑍍𑌷𑍍𑌯𑌮𑍍 ।
𑌏𑌕𑌂 𑌨𑌿𑌤𑍍𑌯𑌂 𑌵𑌿𑌮𑌲𑌮𑌚𑌲𑌂 𑌸𑌰𑍍𑌵𑌧𑍀𑌸𑌾𑌕𑍍𑌷𑌿𑌭𑍂𑌤𑌂
𑌭𑌾𑌵𑌾𑌤𑍀𑌤𑌂 𑌤𑍍𑌰𑌿𑌗𑍁𑌣𑌰𑌹𑌿𑌤𑌂 𑌸𑌦𑍍𑌗𑍁𑌰𑍁𑌂 𑌤𑌂 𑌨𑌮𑌾𑌮𑌿 ॥ 111 ॥
𑌹𑍃𑌦𑌮𑍍𑌬𑍁𑌜𑍇 𑌕𑌰𑍍𑌣𑌿𑌕𑌮𑌧𑍍𑌯𑌸𑌂𑌸𑍍𑌥𑍇
𑌸𑌿𑌂𑌹𑌾𑌸𑌨𑍇 𑌸𑌂𑌸𑍍𑌥𑌿𑌤𑌦𑌿𑌵𑍍𑌯𑌮𑍂𑌰𑍍𑌤𑌿𑌮𑍍 ।
𑌧𑍍𑌯𑌾𑌯𑍇𑌦𑍍𑌗𑍁𑌰𑍁𑌂 𑌚𑌨𑍍𑌦𑍍𑌰𑌕𑌲𑌾𑌪𑍍𑌰𑌕𑌾𑌶𑌂
𑌸𑌚𑍍𑌚𑌿𑌤𑍍𑌸𑍁𑌖𑌾𑌭𑍀𑌷𑍍𑌟𑌵𑌰𑌂 𑌦𑌧𑌾𑌨𑌮𑍍 ॥ 112 ॥
𑌶𑍍𑌵𑍇𑌤𑌾𑌮𑍍𑌬𑌰𑌂 𑌶𑍍𑌵𑍇𑌤𑌵𑌿𑌲𑍇𑌪𑌪𑍁𑌷𑍍𑌪𑌂
𑌮𑍁𑌕𑍍𑌤𑌾𑌵𑌿𑌭𑍂𑌷𑌂 𑌮𑍁𑌦𑌿𑌤𑌂 𑌦𑍍𑌵𑌿𑌨𑍇𑌤𑍍𑌰𑌮𑍍 ।
𑌵𑌾𑌮𑌾𑌙𑍍𑌕𑌪𑍀𑌠𑌸𑍍𑌥𑌿𑌤𑌦𑌿𑌵𑍍𑌯𑌶𑌕𑍍𑌤𑌿𑌂
𑌮𑌨𑍍𑌦𑌸𑍍𑌮𑌿𑌤𑌂 𑌪𑍂𑌰𑍍𑌣𑌕𑍃𑌪𑌾𑌨𑌿𑌧𑌾𑌨𑌮𑍍 ॥ 113 ॥
𑌆𑌨𑌨𑍍𑌦𑌮𑌾𑌨𑌨𑍍𑌦𑌕𑌰𑌂 𑌪𑍍𑌰𑌸𑌨𑍍𑌨𑌂
𑌜𑍍𑌞𑌾𑌨𑌸𑍍𑌵𑌰𑍂𑌪𑌂 𑌨𑌿𑌜𑌭𑌾𑌵𑌯𑍁𑌕𑍍𑌤𑌮𑍍 ।
𑌯𑍋𑌗𑍀𑌨𑍍𑌦𑍍𑌰𑌮𑍀𑌡𑍍𑌯𑌂 𑌭𑌵𑌰𑍋𑌗𑌵𑍈𑌦𑍍𑌯𑌂
𑌶𑍍𑌰𑍀𑌮𑌦𑍍𑌗𑍁𑌰𑍁𑌂 𑌨𑌿𑌤𑍍𑌯𑌮𑌹𑌂 𑌨𑌮𑌾𑌮𑌿 ॥ 114 ॥
𑌵𑌨𑍍𑌦𑍇 𑌗𑍁𑌰𑍂𑌣𑌾𑌂 𑌚𑌰𑌣𑌾𑌰𑌵𑌿𑌨𑍍𑌦𑌂
𑌸𑌨𑍍𑌦𑌰𑍍𑌶𑌿𑌤𑌸𑍍𑌵𑌾𑌤𑍍𑌮𑌸𑍁𑌖𑌾𑌵𑌬𑍋𑌧𑍇 ।
𑌜𑌨𑌸𑍍𑌯 𑌯𑍇 𑌜𑌾𑌙𑍍𑌗𑌲𑌿𑌕𑌾𑌯𑌮𑌾𑌨𑍇
𑌸𑌂𑌸𑌾𑌰𑌹𑌾𑌲𑌾𑌹𑌲𑌮𑍋𑌹𑌶𑌾𑌨𑍍𑌤𑍍𑌯𑍈 ॥ 115 ॥
𑌯𑌸𑍍𑌮𑌿𑌨𑍍 𑌸𑍃𑌷𑍍𑌟𑌿𑌸𑍍𑌥𑌿𑌤𑌿𑌧𑍍𑌵𑌂𑌸𑌨𑌿𑌗𑍍𑌰𑌹𑌾𑌨𑍁𑌗𑍍𑌰𑌹𑌾𑌤𑍍𑌮𑌕𑌮𑍍 ।
𑌕𑍃𑌤𑍍𑌯𑌂 𑌪𑌞𑍍𑌚𑌵𑌿𑌧𑌂 𑌶𑌶𑍍𑌵𑌤𑍍 𑌭𑌾𑌸𑌤𑍇 𑌤𑌂 𑌗𑍁𑌰𑍁𑌂 𑌭𑌜𑍇𑌤𑍍 ॥ 116 ॥
𑌪𑌾𑌦𑌾𑌬𑍍𑌜𑍇 𑌸𑌰𑍍𑌵𑌸𑌂𑌸𑌾𑌰𑌦𑌾𑌵𑌕𑌾𑌲𑌾𑌨𑌲𑌂 𑌸𑍍𑌵𑌕𑍇 ।
𑌬𑍍𑌰𑌹𑍍𑌮𑌰𑌨𑍍𑌧𑍍𑌰𑍇 𑌸𑍍𑌥𑌿𑌤𑌾𑌮𑍍𑌭𑍋𑌜𑌮𑌧𑍍𑌯𑌸𑍍𑌥𑌂 𑌚𑌨𑍍𑌦𑍍𑌰𑌮𑌣𑍍𑌡𑌲𑌮𑍍 ॥ 117 ॥
𑌅𑌕𑌥𑌾𑌦𑌿𑌤𑍍𑌰𑌿𑌰𑍇𑌖𑌾𑌬𑍍𑌜𑍇 𑌸𑌹𑌸𑍍𑌰𑌦𑌲𑌮𑌣𑍍𑌡𑌲𑍇 ।
𑌹𑌂𑌸𑌪𑌾𑌰𑍍𑌶𑍍𑌵𑌤𑍍𑌰𑌿𑌕𑍋𑌣𑍇 𑌚 𑌸𑍍𑌮𑌰𑍇𑌤𑍍𑌤𑌨𑍍𑌮𑌧𑍍𑌯𑌗𑌂 𑌗𑍁𑌰𑍁𑌮𑍍 ॥ 118 ॥
𑌨𑌿𑌤𑍍𑌯𑌂 𑌶𑍁𑌦𑍍𑌧𑌂 𑌨𑌿𑌰𑌾𑌭𑌾𑌸𑌂 𑌨𑌿𑌰𑌾𑌕𑌾𑌰𑌂 𑌨𑌿𑌰𑌞𑍍𑌜𑌨𑌮𑍍 ।
𑌨𑌿𑌤𑍍𑌯𑌬𑍋𑌧𑌂 𑌚𑌿𑌦𑌾𑌨𑌨𑍍𑌦𑌂 𑌗𑍁𑌰𑍁𑌂 𑌬𑍍𑌰𑌹𑍍𑌮 𑌨𑌮𑌾𑌮𑍍𑌯𑌹𑌮𑍍 ॥ 119 ॥
𑌸𑌕𑌲𑌭𑍁𑌵𑌨𑌸𑍃𑌷𑍍𑌟𑌿𑌃 𑌕𑌲𑍍𑌪𑌿𑌤𑌾𑌶𑍇𑌷𑌸𑍃𑌷𑍍𑌟𑌿𑌃
𑌨𑌿𑌖𑌿𑌲𑌨𑌿𑌗𑌮𑌦𑍃𑌷𑍍𑌟𑌿𑌃 𑌸𑌤𑍍𑌪𑌦𑌾𑌰𑍍𑌥𑍈𑌕𑌸𑍃𑌷𑍍𑌟𑌿𑌃 ।
𑌅𑌤𑌦𑍍𑌗𑌣𑌪𑌰𑌮𑍇𑌷𑍍𑌟𑌿𑌃 𑌸𑌤𑍍𑌪𑌦𑌾𑌰𑍍𑌥𑍈𑌕𑌦𑍃𑌷𑍍𑌟𑌿𑌃
𑌭𑌵𑌗𑍁𑌣𑌪𑌰𑌮𑍇𑌷𑍍𑌟𑌿𑌰𑍍𑌮𑍋𑌕𑍍𑌷𑌮𑌾𑌰𑍍𑌗𑍈𑌕𑌦𑍃𑌷𑍍𑌟𑌿𑌃 ॥ 120 ॥
𑌸𑌕𑌲𑌭𑍁𑌵𑌨𑌰𑌙𑍍𑌗𑌸𑍍𑌥𑌾𑌪𑌨𑌾𑌸𑍍𑌤𑌮𑍍𑌭𑌯𑌷𑍍𑌟𑌿𑌃
𑌸𑌕𑌰𑍁𑌣𑌰𑌸𑌵𑍃𑌷𑍍𑌟𑌿𑌸𑍍𑌤𑌤𑍍𑌤𑍍𑌵𑌮𑌾𑌲𑌾𑌸𑌮𑌷𑍍𑌟𑌿𑌃 ।
𑌸𑌕𑌲𑌸𑌮𑌯𑌸𑍃𑌷𑍍𑌟𑌿𑌸𑍍𑌸𑌚𑍍𑌚𑌿𑌦𑌾𑌨𑌨𑍍𑌦𑌦𑍃𑌷𑍍𑌟𑌿𑌃
𑌨𑌿𑌵𑌸𑌤𑍁 𑌮𑌯𑌿 𑌨𑌿𑌤𑍍𑌯𑌂 𑌶𑍍𑌰𑍀𑌗𑍁𑌰𑍋𑌰𑍍𑌦𑌿𑌵𑍍𑌯𑌦𑍃𑌷𑍍𑌟𑌿𑌃 ॥ 121 ॥
𑌨 𑌗𑍁𑌰𑍋𑌰𑌧𑌿𑌕𑌂 𑌨 𑌗𑍁𑌰𑍋𑌰𑌧𑌿𑌕𑌂
𑌨 𑌗𑍁𑌰𑍋𑌰𑌧𑌿𑌕𑌂 𑌨 𑌗𑍁𑌰𑍋𑌰𑌧𑌿𑌕𑌮𑍍 ।
𑌶𑌿𑌵𑌶𑌾𑌸𑌨𑌤𑌃 𑌶𑌿𑌵𑌶𑌾𑌸𑌨𑌤𑌃
𑌶𑌿𑌵𑌶𑌾𑌸𑌨𑌤𑌃 𑌶𑌿𑌵𑌶𑌾𑌸𑌨𑌤𑌃 ॥ 122 ॥
𑌇𑌦𑌮𑍇𑌵 𑌶𑌿𑌵𑌂 𑌇𑌦𑌮𑍇𑌵 𑌶𑌿𑌵𑌂
𑌇𑌦𑌮𑍇𑌵 𑌶𑌿𑌵𑌂 𑌇𑌦𑌮𑍇𑌵 𑌶𑌿𑌵𑌮𑍍 ।
𑌹𑌰𑌿𑌶𑌾𑌸𑌨𑌤𑍋 𑌹𑌰𑌿𑌶𑌾𑌸𑌨𑌤𑍋
𑌹𑌰𑌿𑌶𑌾𑌸𑌨𑌤𑍋 𑌹𑌰𑌿𑌶𑌾𑌸𑌨𑌤𑌃 ॥ 123 ॥
𑌵𑌿𑌦𑌿𑌤𑌂 𑌵𑌿𑌦𑌿𑌤𑌂 𑌵𑌿𑌦𑌿𑌤𑌂 𑌵𑌿𑌦𑌿𑌤𑌂
𑌵𑌿𑌜𑌨𑌂 𑌵𑌿𑌜𑌨𑌂 𑌵𑌿𑌜𑌨𑌂 𑌵𑌿𑌜𑌨𑌮𑍍 ।
𑌵𑌿𑌧𑌿𑌶𑌾𑌸𑌨𑌤𑍋 𑌵𑌿𑌧𑌿𑌶𑌾𑌸𑌨𑌤𑍋
𑌵𑌿𑌧𑌿𑌶𑌾𑌸𑌨𑌤𑍋 𑌵𑌿𑌧𑌿𑌶𑌾𑌸𑌨𑌤𑌃 ॥ 124 ॥
𑌏𑌵𑌂𑌵𑌿𑌧𑌂 𑌗𑍁𑌰𑍁𑌂 𑌧𑍍𑌯𑌾𑌤𑍍𑌵𑌾 𑌜𑍍𑌞𑌾𑌨𑌮𑍁𑌤𑍍𑌪𑌦𑍍𑌯𑌤𑍇 𑌸𑍍𑌵𑌯𑌮𑍍 ।
𑌤𑌦𑌾 𑌗𑍁𑌰𑍂𑌪𑌦𑍇𑌶𑍇𑌨 𑌮𑍁𑌕𑍍𑌤𑍋𑌽𑌹𑌮𑌿𑌤𑌿 𑌭𑌾𑌵𑌯𑍇𑌤𑍍 ॥ 125 ॥
𑌗𑍁𑌰𑍂𑌪𑌦𑌿𑌷𑍍𑌟𑌮𑌾𑌰𑍍𑌗𑍇𑌣 𑌮𑌨𑌶𑍍𑌶𑍁𑌦𑍍𑌧𑌿𑌂 𑌤𑍁 𑌕𑌾𑌰𑌯𑍇𑌤𑍍 ।
𑌅𑌨𑌿𑌤𑍍𑌯𑌂 𑌖𑌣𑍍𑌡𑌯𑍇𑌤𑍍𑌸𑌰𑍍𑌵𑌂 𑌯𑌤𑍍𑌕𑌿𑌞𑍍𑌚𑌿𑌦𑌾𑌤𑍍𑌮𑌗𑍋𑌚𑌰𑌮𑍍 ॥ 126 ॥
𑌜𑍍𑌞𑍇𑌯𑌂 𑌸𑌰𑍍𑌵𑌂 𑌪𑍍𑌰𑌤𑍀𑌤𑌂 𑌚 𑌜𑍍𑌞𑌾𑌨𑌂 𑌚 𑌮𑌨 𑌉𑌚𑍍𑌯𑌤𑍇 ।
𑌜𑍍𑌞𑌾𑌨𑌂 𑌜𑍍𑌞𑍇𑌯𑌂 𑌸𑌮𑌂 𑌕𑍁𑌰𑍍𑌯𑌾𑌨𑍍𑌨𑌾𑌨𑍍𑌯𑌃 𑌪𑌨𑍍𑌥𑌾 𑌦𑍍𑌵𑌿𑌤𑍀𑌯𑌕𑌃 ॥ 127 ॥
𑌕𑌿𑌮𑌤𑍍𑌰 𑌬𑌹𑍁𑌨𑍋𑌕𑍍𑌤𑍇𑌨 𑌶𑌾𑌸𑍍𑌤𑍍𑌰𑌕𑍋𑌟𑌿𑌶𑌤𑍈𑌰𑌪𑌿 ।
𑌦𑍁𑌰𑍍𑌲𑌭𑌾 𑌚𑌿𑌤𑍍𑌤𑌵𑌿𑌶𑍍𑌰𑌾𑌨𑍍𑌤𑌿𑌃 𑌵𑌿𑌨𑌾 𑌗𑍁𑌰𑍁𑌕𑍃𑌪𑌾𑌂 𑌪𑌰𑌾𑌮𑍍 ॥ 128 ॥
𑌕𑌰𑍁𑌣𑌾𑌖𑌡𑍍𑌗𑌪𑌾𑌤𑍇𑌨 𑌛𑌿𑌤𑍍𑌵𑌾 𑌪𑌾𑌶𑌾𑌷𑍍𑌟𑌕𑌂 𑌶𑌿𑌶𑍋𑌃 ।
𑌸𑌮𑍍𑌯𑌗𑌾𑌨𑌨𑍍𑌦𑌜𑌨𑌕𑌃 𑌸𑌦𑍍𑌗𑍁𑌰𑍁𑌃 𑌸𑍋𑌽𑌭𑌿𑌧𑍀𑌯𑌤𑍇 ॥ 129 ॥
𑌏𑌵𑌂 𑌶𑍍𑌰𑍁𑌤𑍍𑌵𑌾 𑌮𑌹𑌾𑌦𑍇𑌵𑌿 𑌗𑍁𑌰𑍁𑌨𑌿𑌨𑍍𑌦𑌾𑌂 𑌕𑌰𑍋𑌤𑌿 𑌯𑌃 ।
𑌸 𑌯𑌾𑌤𑌿 𑌨𑌰𑌕𑌾𑌨𑍍 𑌘𑍋𑌰𑌾𑌨𑍍 𑌯𑌾𑌵𑌚𑍍𑌚𑌨𑍍𑌦𑍍𑌰𑌦𑌿𑌵𑌾𑌕𑌰𑍗 ॥ 130 ॥
𑌯𑌾𑌵𑌤𑍍𑌕𑌲𑍍𑌪𑌾𑌨𑍍𑌤𑌕𑍋 𑌦𑍇𑌹𑌸𑍍𑌤𑌾𑌵𑌦𑍍𑌦𑍇𑌵𑌿 𑌗𑍁𑌰𑍁𑌂 𑌸𑍍𑌮𑌰𑍇𑌤𑍍 ।
𑌗𑍁𑌰𑍁𑌲𑍋𑌪𑍋 𑌨 𑌕𑌰𑍍𑌤𑌵𑍍𑌯𑌃 𑌸𑍍𑌵𑌚𑍍𑌛𑌨𑍍𑌦𑍋 𑌯𑌦𑌿 𑌵𑌾 𑌭𑌵𑍇𑌤𑍍 ॥ 131 ॥
𑌹𑍁𑌙𑍍𑌕𑌾𑌰𑍇𑌣 𑌨 𑌵𑌕𑍍𑌤𑌵𑍍𑌯𑌂 𑌪𑍍𑌰𑌾𑌜𑍍𑌞𑌶𑌿𑌷𑍍𑌯𑍈𑌃 𑌕𑌦𑌾𑌚𑌨 ।
𑌗𑍁𑌰𑍋𑌰𑌗𑍍𑌰 𑌨 𑌵𑌕𑍍𑌤𑌵𑍍𑌯𑌮𑌸𑌤𑍍𑌯𑌂 𑌤𑍁 𑌕𑌦𑌾𑌚𑌨 ॥ 132 ॥
𑌗𑍁𑌰𑍁𑌂 𑌤𑍍𑌵𑌙𑍍𑌕𑍃𑌤𑍍𑌯 𑌹𑍁𑌙𑍍𑌕𑍃𑌤𑍍𑌯 𑌗𑍁𑌰𑍁𑌸𑌾𑌨𑍍𑌨𑌿𑌧𑍍𑌯𑌭𑌾𑌷𑌣𑌃 ।
𑌅𑌰𑌣𑍍𑌯𑍇 𑌨𑌿𑌰𑍍𑌜𑌲𑍇 𑌦𑍇𑌶𑍇 𑌸𑌮𑍍𑌭𑌵𑍇𑌦𑍍 𑌬𑍍𑌰𑌹𑍍𑌮𑌰𑌾𑌕𑍍𑌷𑌸𑌃 ॥ 133 ॥
𑌅𑌦𑍍𑌵𑍈𑌤𑌂 𑌭𑌾𑌵𑌯𑍇𑌨𑍍𑌨𑌿𑌤𑍍𑌯𑌂 𑌸𑌰𑍍𑌵𑌾𑌵𑌸𑍍𑌥𑌾𑌸𑍁 𑌸𑌰𑍍𑌵𑌦𑌾 ।
𑌕𑌦𑌾𑌚𑌿𑌦𑌪𑌿 𑌨𑍋 𑌕𑍁𑌰𑍍𑌯𑌾𑌦𑌦𑍍𑌵𑍈𑌤𑌂 𑌗𑍁𑌰𑍁𑌸𑌨𑍍𑌨𑌿𑌧𑍗 ॥ 134 ॥
𑌦𑍃𑌶𑍍𑌯𑌵𑌿𑌸𑍍𑌮𑍃𑌤𑌿𑌪𑌰𑍍𑌯𑌨𑍍𑌤𑌂 𑌕𑍁𑌰𑍍𑌯𑌾𑌦𑍍 𑌗𑍁𑌰𑍁𑌪𑌦𑌾𑌰𑍍𑌚𑌨𑌮𑍍 ।
𑌤𑌾𑌦𑍃𑌶𑌸𑍍𑌯𑍈𑌵 𑌕𑍈𑌵𑌲𑍍𑌯𑌂 𑌨 𑌚 𑌤𑌦𑍍𑌵𑍍𑌯𑌤𑌿𑌰𑍇𑌕𑌿𑌣𑌃 ॥ 135 ॥
𑌅𑌪𑌿 𑌸𑌮𑍍𑌪𑍂𑌰𑍍𑌣𑌤𑌤𑍍𑌤𑍍𑌵𑌜𑍍𑌞𑍋 𑌗𑍁𑌰𑍁𑌤𑍍𑌯𑌾𑌗𑍀 𑌭𑌵𑍇𑌦𑍍𑌯𑌦𑌾 ।
𑌭𑌵𑌤𑍍𑌯𑍇𑌵 𑌹𑌿 𑌤𑌸𑍍𑌯𑌾𑌨𑍍𑌤𑌕𑌾𑌲𑍇 𑌵𑌿𑌕𑍍𑌷𑍇𑌪𑌮𑍁𑌤𑍍𑌕𑌟𑌮𑍍 ॥ 136 ॥
𑌗𑍁𑌰𑍁𑌕𑌾𑌰𑍍𑌯𑌂 𑌨 𑌲𑌙𑍍𑌘𑍇𑌤 𑌨𑌾𑌪𑍃𑌷𑍍𑌟𑍍𑌵𑌾 𑌕𑌾𑌰𑍍𑌯𑌮𑌾𑌚𑌰𑍇𑌤𑍍 ।
𑌨 𑌹𑍍𑌯𑍁𑌤𑍍𑌤𑌿𑌷𑍍𑌠𑍇𑌦𑍍𑌦𑌿𑌶𑍇𑌽𑌨𑌤𑍍𑌵𑌾 𑌗𑍁𑌰𑍁𑌸𑌦𑍍𑌭𑌾𑌵𑌶𑍋𑌭𑌿𑌤𑌃 ॥ 137 ॥
𑌗𑍁𑌰𑍗 𑌸𑌤𑌿 𑌸𑍍𑌵𑌯𑌂 𑌦𑍇𑌵𑌿 𑌪𑌰𑍇𑌷𑌾𑌂 𑌤𑍁 𑌕𑌦𑌾𑌚𑌨 ।
𑌉𑌪𑌦𑍇𑌶𑌂 𑌨 𑌵𑍈 𑌕𑍁𑌰𑍍𑌯𑌾𑌤𑍍 𑌤𑌥𑌾 𑌚𑍇𑌦𑍍𑌰𑌾𑌕𑍍𑌷𑌸𑍋 𑌭𑌵𑍇𑌤𑍍 ॥ 138 ॥
𑌨 𑌗𑍁𑌰𑍋𑌰𑌾𑌶𑍍𑌰𑌮𑍇 𑌕𑍁𑌰𑍍𑌯𑌾𑌤𑍍 𑌦𑍁𑌷𑍍𑌪𑌾𑌨𑌂 𑌪𑌰𑌿𑌸𑌰𑍍𑌪𑌣𑌮𑍍 ।
𑌦𑍀𑌕𑍍𑌷𑌾 𑌵𑍍𑌯𑌾𑌖𑍍𑌯𑌾 𑌪𑍍𑌰𑌭𑍁𑌤𑍍𑌵𑌾𑌦𑌿 𑌗𑍁𑌰𑍋𑌰𑌾𑌜𑍍𑌞𑌾𑌂 𑌨 𑌕𑌾𑌰𑌯𑍇𑌤𑍍 ॥ 139 ॥
𑌨𑍋𑌪𑌾𑌶𑍍𑌰𑌯𑌂 𑌚 𑌪𑌰𑍍𑌯𑌕𑌂 𑌨 𑌚 𑌪𑌾𑌦𑌪𑍍𑌰𑌸𑌾𑌰𑌣𑌮𑍍 ।
𑌨𑌾𑌙𑍍𑌗𑌭𑍋𑌗𑌾𑌦𑌿𑌕𑌂 𑌕𑍁𑌰𑍍𑌯𑌾𑌨𑍍𑌨 𑌲𑍀𑌲𑌾𑌮𑌪𑌰𑌾𑌮𑌪𑌿 ॥ 140 ॥
𑌗𑍁𑌰𑍂𑌣𑌾𑌂 𑌸𑌦𑌸𑌦𑍍𑌵𑌾𑌽𑌪𑌿 𑌯𑌦𑍁𑌕𑍍𑌤𑌂 𑌤𑌨𑍍𑌨 𑌲𑌙𑍍𑌘𑌯𑍇𑌤𑍍 ।
𑌕𑍁𑌰𑍍𑌵𑌨𑍍𑌨𑌾𑌜𑍍𑌞𑌾𑌂 𑌦𑌿𑌵𑌾 𑌰𑌾𑌤𑍍𑌰𑍗 𑌦𑌾𑌸𑌵𑌨𑍍𑌨𑌿𑌵𑌸𑍇𑌦𑍍𑌗𑍁𑌰𑍋 ॥ 141 ॥
𑌅𑌦𑌤𑍍𑌤𑌂 𑌨 𑌗𑍁𑌰𑍋𑌰𑍍𑌦𑍍𑌰𑌵𑍍𑌯𑌮𑍁𑌪𑌭𑍁𑌞𑍍𑌜𑍀𑌤 𑌕𑌰𑍍𑌹𑌿𑌚𑌿𑌤𑍍 ।
𑌦𑌤𑍍𑌤𑍇 𑌚 𑌰𑌙𑍍𑌕𑌵𑌦𑍍𑌗𑍍𑌰𑌾𑌹𑍍𑌯𑌂 𑌪𑍍𑌰𑌾𑌣𑍋𑌽𑌪𑍍𑌯𑍇𑌤𑍇𑌨 𑌲𑌭𑍍𑌯𑌤𑍇 ॥ 142 ॥
𑌪𑌾𑌦𑍁𑌕𑌾𑌸𑌨𑌶𑌯𑍍𑌯𑌾𑌦𑌿 𑌗𑍁𑌰𑍁𑌣𑌾 𑌯𑌦𑌭𑍀𑌷𑍍𑌟𑌿𑌤𑌮𑍍 ।
𑌨𑌮𑌸𑍍𑌕𑍁𑌰𑍍𑌵𑍀𑌤 𑌤𑌤𑍍𑌸𑌰𑍍𑌵𑌂 𑌪𑌾𑌦𑌾𑌭𑍍𑌯𑌾𑌂 𑌨 𑌸𑍍𑌪𑍃𑌶𑍇𑌤𑍍 𑌕𑍍𑌵𑌚𑌿𑌤𑍍 ॥ 143 ॥
𑌗𑌚𑍍𑌛𑌤𑌃 𑌪𑍃𑌷𑍍𑌠𑌤𑍋 𑌗𑌚𑍍𑌛𑍇𑌤𑍍 𑌗𑍁𑌰𑍁𑌚𑍍𑌛𑌾𑌯𑌾𑌂 𑌨 𑌲𑌙𑍍𑌘𑌯𑍇𑌤𑍍 ।
𑌨𑍋𑌲𑍍𑌬𑌣𑌂 𑌧𑌾𑌰𑌯𑍇𑌦𑍍𑌵𑍇𑌷𑌂 𑌨𑌾𑌲𑌙𑍍𑌕𑌾𑌰𑌾𑌂𑌸𑍍𑌤𑌤𑍋𑌲𑍍𑌬𑌣𑌾𑌨𑍍 ॥ 144 ॥
𑌗𑍁𑌰𑍁𑌨𑌿𑌨𑍍𑌦𑌾𑌕𑌰𑌂 𑌦𑍃𑌷𑍍𑌟𑍍𑌵𑌾 𑌧𑌾𑌵𑌯𑍇𑌦𑌥 𑌵𑌾𑌸𑌯𑍇𑌤𑍍 ।
𑌸𑍍𑌥𑌾𑌨𑌂 𑌵𑌾 𑌤𑌤𑍍𑌪𑌰𑌿𑌤𑍍𑌯𑌾𑌜𑍍𑌯𑌂 𑌜𑌿𑌹𑍍𑌵𑌾𑌚𑍍𑌛𑍇𑌦𑌾𑌕𑍍𑌷𑌮𑍋 𑌯𑌦𑌿 ॥ 145 ॥
𑌨𑍋𑌚𑍍𑌛𑌿𑌷𑍍𑌟𑌂 𑌕𑌸𑍍𑌯𑌚𑌿𑌦𑍍𑌦𑍇𑌯𑌂 𑌗𑍁𑌰𑍋𑌰𑌾𑌜𑍍𑌞𑌾𑌂 𑌨 𑌚 𑌤𑍍𑌯𑌜𑍇𑌤𑍍 ।
𑌕𑍃𑌤𑍍𑌸𑍍𑌨𑌮𑍁𑌚𑍍𑌛𑌿𑌷𑍍𑌟𑌮𑌾𑌦𑌾𑌯 𑌹𑌵𑌿𑌰𑌿𑌵 𑌭𑌕𑍍𑌷𑌯𑍇𑌤𑍍𑌸𑍍𑌵𑌯𑌮𑍍 ॥ 146 ॥
𑌨𑌾𑌽𑌨𑍃𑌤𑌂 𑌨𑌾𑌽𑌪𑍍𑌰𑌿𑌯𑌂 𑌚𑍈𑌵 𑌨 𑌗𑌰𑍍𑌵𑌂 𑌨𑌾𑌽𑌪𑌿 𑌵𑌾 𑌬𑌹𑍁 ।
𑌨 𑌨𑌿𑌯𑍋𑌗𑌪𑌰𑌂 𑌬𑍍𑌰𑍂𑌯𑌾𑌤𑍍 𑌗𑍁𑌰𑍋𑌰𑌾𑌜𑍍𑌞𑌾𑌂 𑌵𑌿𑌭𑌾𑌵𑌯𑍇𑌤𑍍 ॥ 147 ॥
𑌪𑍍𑌰𑌭𑍋 𑌦𑍇𑌵𑌕𑍁𑌲𑍇𑌶𑌾𑌨𑌾𑌂 𑌸𑍍𑌵𑌾𑌮𑌿𑌨𑍍 𑌰𑌾𑌜𑌨𑍍 𑌕𑍁𑌲𑍇𑌶𑍍𑌵𑌰 ।
𑌇𑌤𑌿 𑌸𑌮𑍍𑌬𑍋𑌧𑌨𑍈𑌰𑍍𑌭𑍀𑌤𑍋 𑌗𑍁𑌰𑍁𑌭𑌾𑌵𑍇𑌨 𑌸𑌰𑍍𑌵𑌦𑌾 ॥ 148 ॥
𑌮𑍁𑌨𑌿𑌭𑌿𑌃 𑌪𑌨𑍍𑌨𑌗𑍈𑌰𑍍𑌵𑌾𑌪𑌿 𑌸𑍁𑌰𑍈𑌰𑍍𑌵𑌾 𑌶𑌾𑌪𑌿𑌤𑍋 𑌯𑌦𑌿 ।
𑌕𑌾𑌲𑌮𑍃𑌤𑍍𑌯𑍁𑌭𑌯𑌾𑌦𑍍𑌵𑌾𑌪𑌿 𑌗𑍁𑌰𑍁𑌃 𑌸𑌨𑍍𑌤𑍍𑌰𑌾𑌤𑌿 𑌪𑌾𑌰𑍍𑌵𑌤𑌿 ॥ 149 ॥
𑌅𑌶𑌕𑍍𑌤𑌾 𑌹𑌿 𑌸𑍁𑌰𑌾𑌦𑍍𑌯𑌾𑌶𑍍𑌚 𑌹𑍍𑌯𑌶𑌕𑍍𑌤𑌾𑌃 𑌮𑍁𑌨𑌯𑌸𑍍𑌤𑌥𑌾 ।
𑌗𑍁𑌰𑍁𑌶𑌾𑌪𑍋𑌪𑌪𑌨𑍍𑌨𑌸𑍍𑌯 𑌰𑌕𑍍𑌷𑌣𑌾𑌯 𑌚 𑌕𑍁𑌤𑍍𑌰𑌚𑌿𑌤𑍍 ॥ 150 ॥
𑌮𑌨𑍍𑌤𑍍𑌰𑌰𑌾𑌜𑌮𑌿𑌦𑌂 𑌦𑍇𑌵𑌿 𑌗𑍁𑌰𑍁𑌰𑌿𑌤𑍍𑌯𑌕𑍍𑌷𑌰𑌦𑍍𑌵𑌯𑌮𑍍 ।
𑌸𑍍𑌮𑍃𑌤𑌿𑌵𑍇𑌦𑌪𑍁𑌰𑌾𑌣𑌾𑌨𑌾𑌂 𑌸𑌾𑌰𑌮𑍇𑌵 𑌨 𑌸𑌂𑌶𑌯𑌃 ॥ 151 ॥
𑌸𑌤𑍍𑌕𑌾𑌰𑌮𑌾𑌨𑌪𑍂𑌜𑌾𑌰𑍍𑌥𑌂 𑌦𑌣𑍍𑌡𑌕𑌾𑌷𑌯𑌧𑌾𑌰𑌣𑌃 ।
𑌸 𑌸𑌨𑍍𑌨𑍍𑌯𑌾𑌸𑍀 𑌨 𑌵𑌕𑍍𑌤𑌵𑍍𑌯𑌃 𑌸𑌨𑍍𑌨𑍍𑌯𑌾𑌸𑍀 𑌜𑍍𑌞𑌾𑌨𑌤𑌤𑍍𑌪𑌰𑌃 ॥ 152 ॥
𑌵𑌿𑌜𑌾𑌨𑌨𑍍𑌤𑌿 𑌮𑌹𑌾𑌵𑌾𑌕𑍍𑌯𑌂 𑌗𑍁𑌰𑍋𑌶𑍍𑌚𑌰𑌣 𑌸𑍇𑌵𑌯𑌾 ।
𑌤𑍇 𑌵𑍈 𑌸𑌨𑍍𑌨𑍍𑌯𑌾𑌸𑌿𑌨𑌃 𑌪𑍍𑌰𑍋𑌕𑍍𑌤𑌾 𑌇𑌤𑌰𑍇 𑌵𑍇𑌷𑌧𑌾𑌰𑌿𑌣𑌃 ॥ 153 ॥
[𑌪𑌾𑌠𑌭𑍇𑌦𑌃 –
𑌨𑌿𑌤𑍍𑌯𑌂 𑌬𑍍𑌰𑌹𑍍𑌮 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌬𑍋𑌧𑌯𑍇𑌤𑍍𑌪𑌰𑌮𑍍 ।
𑌭𑌾𑌸𑌯𑌨𑍍 𑌬𑍍𑌰𑌹𑍍𑌮𑌭𑌾𑌵𑌂 𑌚 𑌦𑍀𑌪𑍋 𑌦𑍀𑌪𑌾𑌨𑍍𑌤𑌰𑌂 𑌯𑌥𑌾 ॥
]
𑌨𑌿𑌤𑍍𑌯𑌂 𑌬𑍍𑌰𑌹𑍍𑌮 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌸𑌤𑍍𑌯𑌚𑌿𑌦𑍍𑌧𑌨𑌮𑍍 ।
𑌯𑌃 𑌸𑌾𑌕𑍍𑌷𑌾𑌤𑍍𑌕𑍁𑌰𑍁𑌤𑍇 𑌲𑍋𑌕𑍇 𑌗𑍁𑌰𑍁𑌤𑍍𑌵𑌂 𑌤𑌸𑍍𑌯 𑌶𑍋𑌭𑌤𑍇 ॥ 154 ॥
𑌗𑍁𑌰𑍁𑌪𑍍𑌰𑌸𑌾𑌦𑌤𑌃 𑌸𑍍𑌵𑌾𑌤𑍍𑌮𑌨𑍍𑌯𑌾𑌤𑍍𑌮𑌾𑌰𑌾𑌮𑌨𑌿𑌰𑍀𑌕𑍍𑌷𑌣𑌾𑌤𑍍 ।
𑌸𑌮𑌤𑌾 𑌮𑍁𑌕𑍍𑌤𑌿𑌮𑌾𑌰𑍍𑌗𑍇𑌣 𑌸𑍍𑌵𑌾𑌤𑍍𑌮𑌜𑍍𑌞𑌾𑌨𑌂 𑌪𑍍𑌰𑌵𑌰𑍍𑌤𑌤𑍇 ॥ 155 ॥
𑌆𑌬𑍍𑌰𑌹𑍍𑌮𑌸𑍍𑌤𑌮𑍍𑌬𑌪𑌰𑍍𑌯𑌨𑍍𑌤𑌂 𑌪𑌰𑌮𑌾𑌤𑍍𑌮𑌸𑍍𑌵𑌰𑍂𑌪𑌕𑌮𑍍 ।
𑌸𑍍𑌥𑌾𑌵𑌰𑌂 𑌜𑌙𑍍𑌗𑌮𑌂 𑌚𑍈𑌵 𑌪𑍍𑌰𑌣𑌮𑌾𑌮𑌿 𑌜𑌗𑌨𑍍𑌮𑌯𑌮𑍍 ॥ 156 ॥
𑌵𑌨𑍍𑌦𑍇𑌽𑌹𑌂 𑌸𑌚𑍍𑌚𑌿𑌦𑌾𑌨𑌨𑍍𑌦𑌂 𑌭𑌾𑌵𑌾𑌤𑍀𑌤𑌂 𑌜𑌗𑌦𑍍𑌗𑍁𑌰𑍁𑌮𑍍 ।
𑌨𑌿𑌤𑍍𑌯𑌂 𑌪𑍂𑌰𑍍𑌣𑌂 𑌨𑌿𑌰𑌾𑌕𑌾𑌰𑌂 𑌨𑌿𑌰𑍍𑌗𑍁𑌣𑌂 𑌸𑍍𑌵𑌾𑌤𑍍𑌮𑌸𑌂𑌸𑍍𑌥𑌿𑌤𑌮𑍍 ॥ 157 ॥
𑌪𑌰𑌾𑌤𑍍𑌪𑌰𑌤𑌰𑌂 𑌧𑍍𑌯𑌾𑌯𑍇𑌨𑍍𑌨𑌿𑌤𑍍𑌯𑌮𑌾𑌨𑌨𑍍𑌦𑌕𑌾𑌰𑌕𑌮𑍍 ।
𑌹𑍃𑌦𑌯𑌾𑌕𑌾𑌶𑌮𑌧𑍍𑌯𑌸𑍍𑌥𑌂 𑌶𑍁𑌦𑍍𑌧𑌸𑍍𑌫𑌟𑌿𑌕𑌸𑌨𑍍𑌨𑌿𑌭𑌮𑍍 ॥ 158 ॥
𑌸𑍍𑌫𑌾𑌟𑌿𑌕𑍇 𑌸𑍍𑌫𑌾𑌟𑌿𑌕𑌂 𑌰𑍂𑌪𑌂 𑌦𑌰𑍍𑌪𑌣𑍇 𑌦𑌰𑍍𑌪𑌣𑍋 𑌯𑌥𑌾 ।
𑌤𑌥𑌾𑌽𑌽𑌤𑍍𑌮𑌨𑌿 𑌚𑌿𑌦𑌾𑌕𑌾𑌰𑌮𑌾𑌨𑌨𑍍𑌦𑌂 𑌸𑍋𑌽𑌹𑌮𑌿𑌤𑍍𑌯𑍁𑌤 ॥ 159 ॥
𑌅𑌙𑍍𑌗𑍁𑌷𑍍𑌠𑌮𑌾𑌤𑍍𑌰𑌂 𑌪𑍁𑌰𑍁𑌷𑌂 𑌧𑍍𑌯𑌾𑌯𑍇𑌚𑍍𑌚 𑌚𑌿𑌨𑍍𑌮𑌯𑌂 𑌹𑍃𑌦𑌿 ।
𑌤𑌤𑍍𑌰 𑌸𑍍𑌫𑍁𑌰𑌤𑌿 𑌯𑍋 𑌭𑌾𑌵𑌃 𑌶𑍃𑌣𑍁 𑌤𑌤𑍍𑌕𑌥𑌯𑌾𑌮𑌿 𑌤𑍇 ॥ 160 ॥
𑌅𑌜𑍋𑌽𑌹𑌮𑌮𑌰𑍋𑌽𑌹𑌂 𑌚 𑌅𑌨𑌾𑌦𑌿𑌨𑌿𑌧𑌨𑍋 𑌹𑍍𑌯𑌹𑌮𑍍 ।
𑌅𑌵𑌿𑌕𑌾𑌰𑌶𑍍𑌚𑌿𑌦𑌾𑌨𑌨𑍍𑌦𑍋 𑌹𑍍𑌯𑌣𑍀𑌯𑌾𑌨𑍍𑌮𑌹𑌤𑍋 𑌮𑌹𑌾𑌨𑍍 ॥ 161 ॥
𑌅𑌪𑍂𑌰𑍍𑌵𑌮𑌪𑌰𑌂 𑌨𑌿𑌤𑍍𑌯𑌂 𑌸𑍍𑌵𑌯𑌞𑍍𑌜𑍍𑌯𑍋𑌤𑌿𑌰𑍍𑌨𑌿𑌰𑌾𑌮𑌯𑌮𑍍 ।
𑌵𑌿𑌰𑌜𑌂 𑌪𑌰𑌮𑌾𑌕𑌾𑌶𑌂 𑌧𑍍𑌰𑍁𑌵𑌮𑌾𑌨𑌨𑍍𑌦𑌮𑌵𑍍𑌯𑌯𑌮𑍍 ॥ 162 ॥
𑌅𑌗𑍋𑌚𑌰𑌂 𑌤𑌥𑌾𑌽𑌗𑌮𑍍𑌯𑌂 𑌨𑌾𑌮𑌰𑍂𑌪𑌵𑌿𑌵𑌰𑍍𑌜𑌿𑌤𑌮𑍍 ।
𑌨𑌿𑌶𑍍𑌶𑌬𑍍𑌦𑌂 𑌤𑍁 𑌵𑌿𑌜𑌾𑌨𑍀𑌯𑌾𑌤𑍍𑌸𑍍𑌵𑌭𑌾𑌵𑌾𑌦𑍍𑌬𑍍𑌰𑌹𑍍𑌮 𑌪𑌾𑌰𑍍𑌵𑌤𑌿 ॥ 163 ॥
𑌯𑌥𑌾 𑌗𑌨𑍍𑌧𑌸𑍍𑌵𑌭𑌾𑌵𑌤𑍍𑌵𑌂 𑌕𑌰𑍍𑌪𑍂𑌰𑌕𑍁𑌸𑍁𑌮𑌾𑌦𑌿𑌷𑍁 ।
𑌶𑍀𑌤𑍋𑌷𑍍𑌣𑌤𑍍𑌵𑌸𑍍𑌵𑌭𑌾𑌵𑌤𑍍𑌵𑌂 𑌤𑌥𑌾 𑌬𑍍𑌰𑌹𑍍𑌮𑌣𑌿 𑌶𑌾𑌶𑍍𑌵𑌤𑌮𑍍 ॥ 164 ॥
𑌯𑌥𑌾 𑌨𑌿𑌜𑌸𑍍𑌵𑌭𑌾𑌵𑍇𑌨 𑌕𑍁𑌣𑍍𑌡𑌲𑍇 𑌕𑌟𑌕𑌾𑌦𑌯𑌃 ।
𑌸𑍁𑌵𑌰𑍍𑌣𑌤𑍍𑌵𑍇𑌨 𑌤𑌿𑌷𑍍𑌠𑌨𑍍𑌤𑌿 𑌤𑌥𑌾𑌽𑌹𑌂 𑌬𑍍𑌰𑌹𑍍𑌮 𑌶𑌾𑌶𑍍𑌵𑌤𑌮𑍍 ॥ 165 ॥
𑌸𑍍𑌵𑌯𑌂 𑌤𑌥𑌾𑌵𑌿𑌧𑍋 𑌭𑍂𑌤𑍍𑌵𑌾 𑌸𑍍𑌥𑌾𑌤𑌵𑍍𑌯𑌂 𑌯𑌤𑍍𑌰 𑌕𑍁𑌤𑍍𑌰 𑌚𑌿𑌤𑍍 ।
𑌕𑍀𑌟𑍋 𑌭𑍃𑌙𑍍𑌗 𑌇𑌵 𑌧𑍍𑌯𑌾𑌨𑌾𑌦𑍍𑌯𑌥𑌾 𑌭𑌵𑌤𑌿 𑌤𑌾𑌦𑍃𑌶𑌃 ॥ 166 ॥
𑌗𑍁𑌰𑍁𑌧𑍍𑌯𑌾𑌨𑌂 𑌤𑌥𑌾 𑌕𑍃𑌤𑍍𑌵𑌾 𑌸𑍍𑌵𑌯𑌂 𑌬𑍍𑌰𑌹𑍍𑌮𑌮𑌯𑍋 𑌭𑌵𑍇𑌤𑍍 ।
𑌪𑌿𑌣𑍍𑌡𑍇 𑌪𑌦𑍇 𑌤𑌥𑌾 𑌰𑍂𑌪𑍇 𑌮𑍁𑌕𑍍𑌤𑌾𑌸𑍍𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ॥ 167 ॥
𑌶𑍍𑌰𑍀𑌪𑌾𑌰𑍍𑌵𑌤𑍀 𑌉𑌵𑌾𑌚 ।
𑌪𑌿𑌣𑍍𑌡𑌂 𑌕𑌿𑌂 𑌤𑍁 𑌮𑌹𑌾𑌦𑍇𑌵 𑌪𑌦𑌂 𑌕𑌿𑌂 𑌸𑌮𑍁𑌦𑌾𑌹𑍃𑌤𑌮𑍍 ।
𑌰𑍂𑌪𑌾𑌤𑍀𑌤𑌂 𑌚 𑌰𑍂𑌪𑌂 𑌕𑌿𑌂 𑌏𑌤𑌦𑌾𑌖𑍍𑌯𑌾𑌹𑌿 𑌶𑌙𑍍𑌕𑌰 ॥ 168 ॥
𑌶𑍍𑌰𑍀𑌮𑌹𑌾𑌦𑍇𑌵 𑌉𑌵𑌾𑌚 ।
𑌪𑌿𑌣𑍍𑌡𑌂 𑌕𑍁𑌣𑍍𑌡𑌲𑌿𑌨𑍀 𑌶𑌕𑍍𑌤𑌿𑌃 𑌪𑌦𑌂 𑌹𑌂𑌸𑌮𑍁𑌦𑌾𑌹𑍃𑌤𑌮𑍍 ।
𑌰𑍂𑌪𑌂 𑌬𑌿𑌨𑍍𑌦𑍁𑌰𑌿𑌤𑌿 𑌜𑍍𑌞𑍇𑌯𑌂 𑌰𑍂𑌪𑌾𑌤𑍀𑌤𑌂 𑌨𑌿𑌰𑌞𑍍𑌜𑌨𑌮𑍍 ॥ 169 ॥
𑌪𑌿𑌣𑍍𑌡𑍇 𑌮𑍁𑌕𑍍𑌤𑌾𑌃 𑌪𑌦𑍇 𑌮𑍁𑌕𑍍𑌤𑌾 𑌰𑍂𑌪𑍇 𑌮𑍁𑌕𑍍𑌤𑌾 𑌵𑌰𑌾𑌨𑌨𑍇 ।
𑌰𑍂𑌪𑌾𑌤𑍀𑌤𑍇 𑌤𑍁 𑌯𑍇 𑌮𑍁𑌕𑍍𑌤𑌾𑌸𑍍𑌤𑍇 𑌮𑍁𑌕𑍍𑌤𑌾 𑌨𑌾𑌽𑌤𑍍𑌰 𑌸𑌂𑌶𑌯𑌃 ॥ 170 ॥
𑌗𑍁𑌰𑍁𑌰𑍍𑌧𑍍𑌯𑌾𑌨𑍇𑌨𑍈𑌵 𑌨𑌿𑌤𑍍𑌯𑌂 𑌦𑍇𑌹𑍀 𑌬𑍍𑌰𑌹𑍍𑌮𑌮𑌯𑍋 𑌭𑌵𑍇𑌤𑍍 ।
𑌸𑍍𑌥𑌿𑌤𑌶𑍍𑌚 𑌯𑌤𑍍𑌰 𑌕𑍁𑌤𑍍𑌰𑌾𑌽𑌪𑌿 𑌮𑍁𑌕𑍍𑌤𑍋𑌽𑌸𑍗 𑌨𑌾𑌽𑌤𑍍𑌰 𑌸𑌂𑌶𑌯𑌃 ॥ 171 ॥
𑌜𑍍𑌞𑌾𑌨𑌂 𑌵𑍈𑌰𑌾𑌗𑍍𑌯𑌮𑍈𑌶𑍍𑌵𑌰𑍍𑌯𑌂 𑌯𑌶𑌶𑍍𑌰𑍀𑌃 𑌸𑍍𑌵𑌮𑍁𑌦𑌾𑌹𑍃𑌤𑌮𑍍 ।
𑌷𑌡𑍍𑌗𑍁𑌣𑍈𑌶𑍍𑌵𑌰𑍍𑌯𑌯𑍁𑌕𑍍𑌤𑍋 𑌹𑌿 𑌭𑌗𑌵𑌾𑌨𑍍 𑌶𑍍𑌰𑍀𑌗𑍁𑌰𑍁𑌃 𑌪𑍍𑌰𑌿𑌯𑍇 ॥ 172 ॥
𑌗𑍁𑌰𑍁𑌶𑍍𑌶𑌿𑌵𑍋 𑌗𑍁𑌰𑍁𑌰𑍍𑌦𑍇𑌵𑍋 𑌗𑍁𑌰𑍁𑌰𑍍𑌬𑌨𑍍𑌧𑍁𑌃 𑌶𑌰𑍀𑌰𑌿𑌣𑌾𑌮𑍍 ।
𑌗𑍁𑌰𑍁𑌰𑌾𑌤𑍍𑌮𑌾 𑌗𑍁𑌰𑍁𑌰𑍍𑌜𑍀𑌵𑍋 𑌗𑍁𑌰𑍋𑌰𑌨𑍍𑌯𑌨𑍍𑌨 𑌵𑌿𑌦𑍍𑌯𑌤𑍇 ॥ 173 ॥
𑌏𑌕𑌾𑌕𑍀 𑌨𑌿𑌸𑍍𑌸𑍍𑌪𑍃𑌹𑌃 𑌶𑌾𑌨𑍍𑌤𑌶𑍍𑌚𑌿𑌨𑍍𑌤𑌾𑌽𑌸𑍂𑌯𑌾𑌦𑌿𑌵𑌰𑍍𑌜𑌿𑌤𑌃 ।
𑌬𑌾𑌲𑍍𑌯𑌭𑌾𑌵𑍇𑌨 𑌯𑍋 𑌭𑌾𑌤𑌿 𑌬𑍍𑌰𑌹𑍍𑌮𑌜𑍍𑌞𑌾𑌨𑍀 𑌸 𑌉𑌚𑍍𑌯𑌤𑍇 ॥ 174 ॥
𑌨 𑌸𑍁𑌖𑌂 𑌵𑍇𑌦𑌶𑌾𑌸𑍍𑌤𑍍𑌰𑍇𑌷𑍁 𑌨 𑌸𑍁𑌖𑌂 𑌮𑌨𑍍𑌤𑍍𑌰𑌯𑌨𑍍𑌤𑍍𑌰𑌕𑍇 ।
𑌗𑍁𑌰𑍋𑌃 𑌪𑍍𑌰𑌸𑌾𑌦𑌾𑌦𑌨𑍍𑌯𑌤𑍍𑌰 𑌸𑍁𑌖𑌂 𑌨𑌾𑌸𑍍𑌤𑌿 𑌮𑌹𑍀𑌤𑌲𑍇 ॥ 175 ॥
𑌚𑌾𑌰𑍍𑌵𑌾𑌕𑌵𑍈𑌷𑍍𑌣𑌵𑌮𑌤𑍇 𑌸𑍁𑌖𑌂 𑌪𑍍𑌰𑌾𑌭𑌾𑌕𑌰𑍇 𑌨 𑌹𑌿 ।
𑌗𑍁𑌰𑍋𑌃 𑌪𑌾𑌦𑌾𑌨𑍍𑌤𑌿𑌕𑍇 𑌯𑌦𑍍𑌵𑌤𑍍𑌸𑍁𑌖𑌂 𑌵𑍇𑌦𑌾𑌨𑍍𑌤𑌸𑌮𑍍𑌮𑌤𑌮𑍍 ॥ 176 ॥
𑌨 𑌤𑌤𑍍𑌸𑍁𑌖𑌂 𑌸𑍁𑌰𑍇𑌨𑍍𑌦𑍍𑌰𑌸𑍍𑌯 𑌨 𑌸𑍁𑌖𑌂 𑌚𑌕𑍍𑌰𑌵𑌰𑍍𑌤𑌿𑌨𑌾𑌮𑍍 ।
𑌯𑌤𑍍𑌸𑍁𑌖𑌂 𑌵𑍀𑌤𑌰𑌾𑌗𑌸𑍍𑌯 𑌮𑍁𑌨𑍇𑌰𑍇𑌕𑌾𑌨𑍍𑌤𑌵𑌾𑌸𑌿𑌨𑌃 ॥ 177 ॥
𑌨𑌿𑌤𑍍𑌯𑌂 𑌬𑍍𑌰𑌹𑍍𑌮𑌰𑌸𑌂 𑌪𑍀𑌤𑍍𑌵𑌾 𑌤𑍃𑌪𑍍𑌤𑍋 𑌯𑌃 𑌪𑌰𑌮𑌾𑌤𑍍𑌮𑌨𑌿 ।
𑌇𑌨𑍍𑌦𑍍𑌰𑌂 𑌚 𑌮𑌨𑍍𑌯𑌤𑍇 𑌤𑍁𑌚𑍍𑌛𑌂 𑌨𑍃𑌪𑌾𑌣𑌾𑌂 𑌤𑌤𑍍𑌰 𑌕𑌾 𑌕𑌥𑌾 ॥ 178 ॥
𑌯𑌤𑌃 𑌪𑌰𑌮𑌕𑍈𑌵𑌲𑍍𑌯𑌂 𑌗𑍁𑌰𑍁𑌮𑌾𑌰𑍍𑌗𑍇𑌣 𑌵𑍈 𑌭𑌵𑍇𑌤𑍍 ।
𑌗𑍁𑌰𑍁𑌭𑌕𑍍𑌤𑌿𑌰𑌤𑌃 𑌕𑌾𑌰𑍍𑌯𑌾 𑌸𑌰𑍍𑌵𑌦𑌾 𑌮𑍋𑌕𑍍𑌷𑌕𑌾𑌙𑍍𑌕𑍍𑌷𑌿𑌭𑌿𑌃 ॥ 179 ॥
𑌏𑌕 𑌏𑌵𑌾𑌽𑌦𑍍𑌵𑌿𑌤𑍀𑌯𑍋𑌽𑌹𑌂 𑌗𑍁𑌰𑍁𑌵𑌾𑌕𑍍𑌯𑍇𑌨 𑌨𑌿𑌶𑍍𑌚𑌿𑌤𑌃 ।
𑌏𑌵𑌮𑌭𑍍𑌯𑌸𑍍𑌯𑌤𑌾 𑌨𑌿𑌤𑍍𑌯𑌂 𑌨 𑌸𑍇𑌵𑍍𑌯𑌂 𑌵𑍈 𑌵𑌨𑌾𑌨𑍍𑌤𑌰𑌮𑍍 ॥ 180 ॥
𑌅𑌭𑍍𑌯𑌾𑌸𑌾𑌨𑍍𑌨𑌿𑌮𑌿𑌷𑍇𑌣𑍈𑌵 𑌸𑌮𑌾𑌧𑌿𑌮𑌧𑌿𑌗𑌚𑍍𑌛𑌤𑌿 ।
𑌆𑌜𑌨𑍍𑌮𑌜𑌨𑌿𑌤𑌂 𑌪𑌾𑌪𑌂 𑌤𑌤𑍍𑌕𑍍𑌷𑌣𑌾𑌦𑍇𑌵 𑌨𑌶𑍍𑌯𑌤𑌿 ॥ 181 ॥
𑌕𑌿𑌮𑌾𑌵𑌾𑌹𑌨𑌮𑌵𑍍𑌯𑌕𑍍𑌤𑍇 𑌵𑍍𑌯𑌾𑌪𑌕𑍇 𑌕𑌿𑌂 𑌵𑌿𑌸𑌰𑍍𑌜𑌨𑌮𑍍 ।
𑌅𑌮𑍂𑌰𑍍𑌤𑍇 𑌚 𑌕𑌥𑌂 𑌪𑍂𑌜𑌾 𑌕𑌥𑌂 𑌧𑍍𑌯𑌾𑌨𑌂 𑌨𑌿𑌰𑌾𑌮𑌯𑍇 ॥ 182 ॥
𑌗𑍁𑌰𑍁𑌰𑍍𑌵𑌿𑌷𑍍𑌣𑍁𑌃 𑌸𑌤𑍍𑌤𑍍𑌵𑌮𑌯𑍋 𑌰𑌾𑌜𑌸𑌶𑍍𑌚𑌤𑍁𑌰𑌾𑌨𑌨𑌃 ।
𑌤𑌾𑌮𑌸𑍋 𑌰𑍁𑌦𑍍𑌰𑌰𑍂𑌪𑍇𑌣 𑌸𑍃𑌜𑌤𑍍𑌯𑌵𑌤𑌿 𑌹𑌨𑍍𑌤𑌿 𑌚 ॥ 183 ॥
𑌸𑍍𑌵𑌯𑌂 𑌬𑍍𑌰𑌹𑍍𑌮𑌮𑌯𑍋 𑌭𑍂𑌤𑍍𑌵𑌾 𑌤𑌤𑍍𑌪𑌰𑌂 𑌚𑌾𑌵𑌲𑍋𑌕𑌯𑍇𑌤𑍍 ।
𑌪𑌰𑌾𑌤𑍍𑌪𑌰𑌤𑌰𑌂 𑌨𑌾𑌨𑍍𑌯𑌤𑍍 𑌸𑌰𑍍𑌵𑌗𑌂 𑌤𑌨𑍍𑌨𑌿𑌰𑌾𑌮𑌯𑌮𑍍 ॥ 184 ॥
𑌤𑌸𑍍𑌯𑌾𑌵𑌲𑍋𑌕𑌨𑌂 𑌪𑍍𑌰𑌾𑌪𑍍𑌯 𑌸𑌰𑍍𑌵𑌸𑌙𑍍𑌗𑌵𑌿𑌵𑌰𑍍𑌜𑌿𑌤𑌃 ।
𑌏𑌕𑌾𑌕𑍀 𑌨𑌿𑌸𑍍𑌸𑍍𑌪𑍃𑌹𑌃 𑌶𑌾𑌨𑍍𑌤𑌃 𑌸𑍍𑌥𑌾𑌤𑌵𑍍𑌯𑌂 𑌤𑌤𑍍𑌪𑍍𑌰𑌸𑌾𑌦𑌤𑌃 ॥ 185 ॥
𑌲𑌬𑍍𑌧𑌂 𑌵𑌾𑌽𑌥 𑌨 𑌲𑌬𑍍𑌧𑌂 𑌵𑌾 𑌸𑍍𑌵𑌲𑍍𑌪𑌂 𑌵𑌾 𑌬𑌹𑍁𑌲𑌂 𑌤𑌥𑌾 ।
𑌨𑌿𑌷𑍍𑌕𑌾𑌮𑍇𑌨𑍈𑌵 𑌭𑍋𑌕𑍍𑌤𑌵𑍍𑌯𑌂 𑌸𑌦𑌾 𑌸𑌨𑍍𑌤𑍁𑌷𑍍𑌟𑌮𑌾𑌨𑌸𑌃 ॥ 186 ॥
𑌸𑌰𑍍𑌵𑌜𑍍𑌞𑌪𑌦𑌮𑌿𑌤𑍍𑌯𑌾𑌹𑍁𑌰𑍍𑌦𑍇𑌹𑍀 𑌸𑌰𑍍𑌵𑌮𑌯𑍋 𑌭𑍁𑌵𑌿 ।
𑌸𑌦𑌾𑌽𑌽𑌨𑌨𑍍𑌦𑌃 𑌸𑌦𑌾 𑌶𑌾𑌨𑍍𑌤𑍋 𑌰𑌮𑌤𑍇 𑌯𑌤𑍍𑌰 𑌕𑍁𑌤𑍍𑌰 𑌚𑌿𑌤𑍍 ॥ 187 ॥
𑌯𑌤𑍍𑌰𑍈𑌵 𑌤𑌿𑌷𑍍𑌠𑌤𑍇 𑌸𑍋𑌽𑌪𑌿 𑌸 𑌦𑍇𑌶𑌃 𑌪𑍁𑌣𑍍𑌯𑌭𑌾𑌜𑌨𑌃 ।
𑌮𑍁𑌕𑍍𑌤𑌸𑍍𑌯 𑌲𑌕𑍍𑌷𑌣𑌂 𑌦𑍇𑌵𑌿 𑌤𑌵𑌾𑌽𑌗𑍍𑌰𑍇 𑌕𑌥𑌿𑌤𑌂 𑌮𑌯𑌾 ॥ 188 ॥
𑌉𑌪𑌦𑍇𑌶𑌸𑍍𑌤𑍍𑌵𑌯𑌂 𑌦𑍇𑌵𑌿 𑌗𑍁𑌰𑍁𑌮𑌾𑌰𑍍𑌗𑍇𑌣 𑌮𑍁𑌕𑍍𑌤𑌿𑌦𑌃 ।
𑌗𑍁𑌰𑍁𑌭𑌕𑍍𑌤𑌿𑌃 𑌤𑌥𑌾𑌽𑌤𑍍𑌯𑌨𑍍𑌤𑌾 𑌕𑌰𑍍𑌤𑌵𑍍𑌯𑌾 𑌵𑍈 𑌮𑌨𑍀𑌷𑌿𑌭𑌿𑌃 ॥ 189 ॥
𑌨𑌿𑌤𑍍𑌯𑌯𑍁𑌕𑍍𑌤𑌾𑌶𑍍𑌰𑌯𑌃 𑌸𑌰𑍍𑌵𑌵𑍇𑌦𑌕𑍃𑌤𑍍𑌸𑌰𑍍𑌵𑌵𑍇𑌦𑌕𑍃𑌤𑍍 ।
𑌸𑍍𑌵𑌪𑌰𑌜𑍍𑌞𑌾𑌨𑌦𑌾𑌤𑌾 𑌚 𑌤𑌂 𑌵𑌨𑍍𑌦𑍇 𑌗𑍁𑌰𑍁𑌮𑍀𑌶𑍍𑌵𑌰𑌮𑍍 ॥ 190 ॥
𑌯𑌦𑍍𑌯𑌪𑍍𑌯𑌧𑍀𑌤𑌾 𑌨𑌿𑌗𑌮𑌾𑌃 𑌷𑌡𑌙𑍍𑌗𑌾 𑌆𑌗𑌮𑌾𑌃 𑌪𑍍𑌰𑌿𑌯𑍇 ।
𑌅𑌧𑍍𑌯𑌾𑌤𑍍𑌮𑌾𑌦𑍀𑌨𑌿 𑌶𑌾𑌸𑍍𑌤𑍍𑌰𑌾𑌣𑌿 𑌜𑍍𑌞𑌾𑌨𑌂 𑌨𑌾𑌸𑍍𑌤𑌿 𑌗𑍁𑌰𑍁𑌂 𑌵𑌿𑌨𑌾 ॥ 191 ॥
𑌶𑌿𑌵𑌪𑍂𑌜𑌾𑌰𑌤𑍋 𑌵𑌾𑌽𑌪𑌿 𑌵𑌿𑌷𑍍𑌣𑍁𑌪𑍂𑌜𑌾𑌰𑌤𑍋𑌽𑌥𑌵𑌾 ।
𑌗𑍁𑌰𑍁𑌤𑌤𑍍𑌤𑍍𑌵𑌵𑌿𑌹𑍀𑌨𑌶𑍍𑌚𑍇𑌤𑍍𑌤𑌤𑍍𑌸𑌰𑍍𑌵𑌂 𑌵𑍍𑌯𑌰𑍍𑌥𑌮𑍇𑌵 𑌹𑌿 ॥ 192 ॥
𑌶𑌿𑌵𑌸𑍍𑌵𑌰𑍂𑌪𑌮𑌜𑍍𑌞𑌾𑌤𑍍𑌵𑌾 𑌶𑌿𑌵𑌪𑍂𑌜𑌾 𑌕𑍃𑌤𑌾 𑌯𑌦𑌿 ।
𑌸𑌾 𑌪𑍂𑌜𑌾 𑌨𑌾𑌮𑌮𑌾𑌤𑍍𑌰𑌂 𑌸𑍍𑌯𑌾𑌚𑍍𑌚𑌿𑌤𑍍𑌰𑌦𑍀𑌪 𑌇𑌵 𑌪𑍍𑌰𑌿𑌯𑍇 ॥ 193 ॥
𑌸𑌰𑍍𑌵𑌂 𑌸𑍍𑌯𑌾𑌤𑍍𑌸𑌫𑌲𑌂 𑌕𑌰𑍍𑌮 𑌗𑍁𑌰𑍁𑌦𑍀𑌕𑍍𑌷𑌾𑌪𑍍𑌰𑌭𑌾𑌵𑌤𑌃 ।
𑌗𑍁𑌰𑍁𑌲𑌾𑌭𑌾𑌤𑍍𑌸𑌰𑍍𑌵𑌲𑌾𑌭𑍋 𑌗𑍁𑌰𑍁𑌹𑍀𑌨𑌸𑍍𑌤𑍁 𑌬𑌾𑌲𑌿𑌶𑌃 ॥ 194 ॥
𑌗𑍁𑌰𑍁𑌹𑍀𑌨𑌃 𑌪𑌶𑍁𑌃 𑌕𑍀𑌟𑌃 𑌪𑌤𑌙𑍍𑌗𑍋 𑌵𑌕𑍍𑌤𑍁𑌮𑌰𑍍𑌹𑌤𑌿 ।
𑌶𑌿𑌵𑌰𑍂𑌪𑌂 𑌸𑍍𑌵𑌰𑍂𑌪𑌂 𑌚 𑌨 𑌜𑌾𑌨𑌾𑌤𑌿 𑌯𑌤𑌸𑍍𑌸𑍍𑌵𑌯𑌮𑍍 ॥ 195 ॥
𑌤𑌸𑍍𑌮𑌾𑌤𑍍𑌸𑌰𑍍𑌵𑌪𑍍𑌰𑌯𑌤𑍍𑌨𑍇𑌨 𑌸𑌰𑍍𑌵𑌸𑌙𑍍𑌗𑌵𑌿𑌵𑌰𑍍𑌜𑌿𑌤𑌃 ।
𑌵𑌿𑌹𑌾𑌯 𑌶𑌾𑌸𑍍𑌤𑍍𑌰𑌜𑌾𑌲𑌾𑌨𑌿 𑌗𑍁𑌰𑍁𑌮𑍇𑌵 𑌸𑌮𑌾𑌶𑍍𑌰𑌯𑍇𑌤𑍍 ॥ 196 ॥
𑌨𑌿𑌰𑌸𑍍𑌤𑌸𑌰𑍍𑌵𑌸𑌨𑍍𑌦𑍇𑌹𑍋 𑌏𑌕𑍀𑌕𑍃𑌤𑍍𑌯 𑌸𑍁𑌦𑌰𑍍𑌶𑌨𑌮𑍍 ।
𑌰𑌹𑌸𑍍𑌯𑌂 𑌯𑍋 𑌦𑌰𑍍𑌶𑌯𑌤𑌿 𑌭𑌜𑌾𑌮𑌿 𑌗𑍁𑌰𑍁𑌮𑍀𑌶𑍍𑌵𑌰𑌮𑍍 ॥ 197 ॥
𑌜𑍍𑌞𑌾𑌨𑌹𑍀𑌨𑍋 𑌗𑍁𑌰𑍁𑌸𑍍𑌤𑍍𑌯𑌾𑌜𑍍𑌯𑍋 𑌮𑌿𑌥𑍍𑌯𑌾𑌵𑌾𑌦𑍀 𑌵𑌿𑌡𑌮𑍍𑌬𑌕𑌃 ।
𑌸𑍍𑌵𑌵𑌿𑌶𑍍𑌰𑌾𑌨𑍍𑌤𑌿𑌂 𑌨 𑌜𑌾𑌨𑌾𑌤𑌿 𑌪𑌰𑌶𑌾𑌨𑍍𑌤𑌿𑌂 𑌕𑌰𑍋𑌤𑌿 𑌕𑌿𑌮𑍍 ॥ 198 ॥
𑌶𑌿𑌲𑌾𑌯𑌾𑌃 𑌕𑌿𑌂 𑌪𑌰𑌂 𑌜𑍍𑌞𑌾𑌨𑌂 𑌶𑌿𑌲𑌾𑌸𑌙𑍍𑌘𑌪𑍍𑌰𑌤𑌾𑌰𑌣𑍇 ।
𑌸𑍍𑌵𑌯𑌂 𑌤𑌰𑍍𑌤𑍁𑌂 𑌨 𑌜𑌾𑌨𑌾𑌤𑌿 𑌪𑌰𑌂 𑌨𑌿𑌸𑍍𑌤𑌾𑌰𑌯𑍇𑌤𑍍 𑌕𑌥𑌮𑍍 ॥ 199 ॥
𑌨 𑌵𑌨𑍍𑌦𑌨𑍀𑌯𑌾𑌸𑍍𑌤𑍇 𑌕𑌷𑍍𑌟𑌂 𑌦𑌰𑍍𑌶𑌨𑌾𑌦𑍍𑌭𑍍𑌰𑌾𑌨𑍍𑌤𑌿𑌕𑌾𑌰𑌕𑌾𑌃 ।
𑌵𑌰𑍍𑌜𑌯𑍇𑌤𑍍𑌤𑌾𑌨𑍍 𑌗𑍁𑌰𑍂𑌨𑍍 𑌦𑍂𑌰𑍇 𑌧𑍀𑌰𑌸𑍍𑌯 𑌤𑍁 𑌸𑌮𑌾𑌶𑍍𑌰𑌯𑍇𑌤𑍍 ॥ 200 ॥
𑌪𑌾𑌷𑌣𑍍𑌡𑌿𑌨𑌃 𑌪𑌾𑌪𑌰𑌤𑌾𑌃 𑌨𑌾𑌸𑍍𑌤𑌿𑌕𑌾 𑌭𑍇𑌦𑌬𑍁𑌦𑍍𑌧𑌯𑌃 ।
𑌸𑍍𑌤𑍍𑌰𑍀𑌲𑌮𑍍𑌪𑌟𑌾 𑌦𑍁𑌰𑌾𑌚𑌾𑌰𑌾𑌃 𑌕𑍃𑌤𑌘𑍍𑌨𑌾 𑌬𑌕𑌵𑍃𑌤𑍍𑌤𑌯𑌃 ॥ 201 ॥
𑌕𑌰𑍍𑌮𑌭𑍍𑌰𑌷𑍍𑌟𑌾𑌃 𑌕𑍍𑌷𑌮𑌾𑌨𑌷𑍍𑌟𑌾 𑌨𑌿𑌨𑍍𑌦𑍍𑌯𑌤𑌰𑍍𑌕𑍈𑌶𑍍𑌚 𑌵𑌾𑌦𑌿𑌨𑌃 ।
𑌕𑌾𑌮𑌿𑌨𑌃 𑌕𑍍𑌰𑍋𑌧𑌿𑌨𑌶𑍍𑌚𑍈𑌵 𑌹𑌿𑌂𑌸𑍍𑌰𑌾𑌶𑍍𑌚𑌣𑍍𑌡𑌾𑌃 𑌶𑌠𑌾𑌸𑍍𑌤𑌥𑌾 ॥ 202 ॥
𑌜𑍍𑌞𑌾𑌨𑌲𑍁𑌪𑍍𑌤𑌾 𑌨 𑌕𑌰𑍍𑌤𑌵𑍍𑌯𑌾 𑌮𑌹𑌾𑌪𑌾𑌪𑌾𑌸𑍍𑌤𑌥𑌾 𑌪𑍍𑌰𑌿𑌯𑍇 ।
𑌏𑌭𑍍𑌯𑍋 𑌭𑌿𑌨𑍍𑌨𑍋 𑌗𑍁𑌰𑍁𑌃 𑌸𑍇𑌵𑍍𑌯𑌃 𑌏𑌕𑌭𑌕𑍍𑌤𑍍𑌯𑌾 𑌵𑌿𑌚𑌾𑌰𑍍𑌯 𑌚 ॥ 203 ॥
𑌶𑌿𑌷𑍍𑌯𑌾𑌦𑌨𑍍𑌯𑌤𑍍𑌰 𑌦𑍇𑌵𑍇𑌶𑌿 𑌨 𑌵𑌦𑍇𑌦𑍍𑌯𑌸𑍍𑌯 𑌕𑌸𑍍𑌯𑌚𑌿𑌤𑍍 ।
𑌨𑌰𑌾𑌣𑌾𑌂 𑌚 𑌫𑌲𑌪𑍍𑌰𑌾𑌪𑍍𑌤𑍗 𑌭𑌕𑍍𑌤𑌿𑌰𑍇𑌵 𑌹𑌿 𑌕𑌾𑌰𑌣𑌮𑍍 ॥ 204 ॥
𑌗𑍂𑌢𑍋 𑌦𑍃𑌢𑌶𑍍𑌚 𑌪𑍍𑌰𑍀𑌤𑌶𑍍𑌚 𑌮𑍗𑌨𑍇𑌨 𑌸𑍁𑌸𑌮𑌾𑌹𑌿𑌤𑌃 ।
𑌸𑌕𑍃𑌤𑍍𑌕𑌾𑌮𑌗𑌤𑍋 𑌵𑌾𑌽𑌪𑌿 𑌪𑌞𑍍𑌚𑌧𑌾 𑌗𑍁𑌰𑍁𑌰𑍀𑌰𑌿𑌤𑌃 ॥ 205 ॥
𑌸𑌰𑍍𑌵𑌂 𑌗𑍁𑌰𑍁𑌮𑍁𑌖𑌾𑌲𑍍𑌲𑌬𑍍𑌧𑌂 𑌸𑌫𑌲𑌂 𑌪𑌾𑌪𑌨𑌾𑌶𑌨𑌮𑍍 ।
𑌯𑌦𑍍𑌯𑌦𑌾𑌤𑍍𑌮𑌹𑌿𑌤𑌂 𑌵𑌸𑍍𑌤𑍁 𑌤𑌤𑍍𑌤𑌦𑍍𑌦𑍍𑌰𑌵𑍍𑌯𑌂 𑌨 𑌵𑌞𑍍𑌚𑌯𑍇𑌤𑍍 ॥ 206 ॥
𑌗𑍁𑌰𑍁𑌦𑍇𑌵𑌾𑌰𑍍𑌪𑌣𑌂 𑌵𑌸𑍍𑌤𑍁 𑌤𑍇𑌨 𑌤𑍁𑌷𑍍𑌟𑍋𑌽𑌸𑍍𑌮𑌿 𑌸𑍁𑌵𑍍𑌰𑌤𑍇 ।
𑌶𑍍𑌰𑍀𑌗𑍁𑌰𑍋𑌃 𑌪𑌾𑌦𑍁𑌕𑌾𑌂 𑌮𑍁𑌦𑍍𑌰𑌾𑌂 𑌮𑍂𑌲𑌮𑌨𑍍𑌤𑍍𑌰𑌂 𑌚 𑌗𑍋𑌪𑌯𑍇𑌤𑍍 ॥ 207 ॥
𑌨𑌤𑌾𑌽𑌸𑍍𑌮𑌿 𑌤𑍇 𑌨𑌾𑌥 𑌪𑌦𑌾𑌰𑌵𑌿𑌨𑍍𑌦𑌂
𑌬𑍁𑌦𑍍𑌧𑍀𑌨𑍍𑌦𑍍𑌰𑌿𑌯𑌪𑍍𑌰𑌾𑌣𑌮𑌨𑍋𑌵𑌚𑍋𑌭𑌿𑌃 ।
𑌯𑌚𑍍𑌚𑌿𑌨𑍍𑌤𑍍𑌯𑌤𑍇 𑌭𑌾𑌵𑌿𑌤 𑌆𑌤𑍍𑌮𑌯𑍁𑌕𑍍𑌤𑍗
𑌮𑍁𑌮𑍁𑌕𑍍𑌷𑌿𑌭𑌿𑌃 𑌕𑌰𑍍𑌮𑌮𑌯𑍋𑌪𑌶𑌾𑌨𑍍𑌤𑌯𑍇 ॥ 208 ॥
𑌅𑌨𑍇𑌨 𑌯𑌦𑍍𑌭𑌵𑍇𑌤𑍍𑌕𑌾𑌰𑍍𑌯𑌂 𑌤𑌦𑍍𑌵𑌦𑌾𑌮𑌿 𑌤𑌵 𑌪𑍍𑌰𑌿𑌯𑍇 ।
𑌲𑍋𑌕𑍋𑌪𑌕𑌾𑌰𑌕𑌂 𑌦𑍇𑌵𑌿 𑌲𑍗𑌕𑌿𑌕𑌂 𑌤𑍁 𑌵𑌿𑌵𑌰𑍍𑌜𑌯𑍇𑌤𑍍 ॥ 209 ॥
𑌲𑍗𑌕𑌿𑌕𑌾𑌦𑍍𑌧𑌰𑍍𑌮𑌤𑍋 𑌯𑌾𑌤𑌿 𑌜𑍍𑌞𑌾𑌨𑌹𑍀𑌨𑍋 𑌭𑌵𑌾𑌰𑍍𑌣𑌵𑍇 ।
𑌜𑍍𑌞𑌾𑌨𑌭𑌾𑌵𑍇 𑌚 𑌯𑌤𑍍𑌸𑌰𑍍𑌵𑌂 𑌕𑌰𑍍𑌮 𑌨𑌿𑌷𑍍𑌕𑌰𑍍𑌮 𑌶𑌾𑌮𑍍𑌯𑌤𑌿 ॥ 210 ॥
𑌇𑌮𑌾𑌂 𑌤𑍁 𑌭𑌕𑍍𑌤𑌿𑌭𑌾𑌵𑍇𑌨 𑌪𑌠𑍇𑌦𑍍𑌵𑍈 𑌶𑍃𑌣𑍁𑌯𑌾𑌦𑌪𑌿 ।
𑌲𑌿𑌖𑌿𑌤𑍍𑌵𑌾 𑌯𑌤𑍍𑌪𑍍𑌰𑌦𑌾𑌨𑍇𑌨 𑌤𑌤𑍍𑌸𑌰𑍍𑌵𑌂 𑌫𑌲𑌮𑌶𑍍𑌨𑍁𑌤𑍇 ॥ 211 ॥
𑌗𑍁𑌰𑍁𑌗𑍀𑌤𑌾𑌮𑌿𑌮𑌾𑌂 𑌦𑍇𑌵𑌿 𑌹𑍃𑌦𑌿 𑌨𑌿𑌤𑍍𑌯𑌂 𑌵𑌿𑌭𑌾𑌵𑌯 ।
𑌮𑌹𑌾𑌵𑍍𑌯𑌾𑌧𑌿𑌗𑌤𑍈𑌰𑍍𑌦𑍁𑌃𑌖𑍈𑌃 𑌸𑌰𑍍𑌵𑌦𑌾 𑌪𑍍𑌰𑌜𑌪𑍇𑌨𑍍𑌮𑍁𑌦𑌾 ॥ 212 ॥
𑌗𑍁𑌰𑍁𑌗𑍀𑌤𑌾𑌕𑍍𑌷𑌰𑍈𑌕𑍈𑌕𑌂 𑌮𑌨𑍍𑌤𑍍𑌰𑌰𑌾𑌜𑌮𑌿𑌦𑌂 𑌪𑍍𑌰𑌿𑌯𑍇 ।
𑌅𑌨𑍍𑌯𑍇 𑌚 𑌵𑌿𑌵𑌿𑌧𑌾𑌃 𑌮𑌨𑍍𑌤𑍍𑌰𑌾𑌃 𑌕𑌲𑌾𑌂 𑌨𑌾𑌰𑍍𑌹𑌨𑍍𑌤𑌿 𑌷𑍋𑌡𑌶𑍀𑌮𑍍 ॥ 213 ॥
𑌅𑌨𑌨𑍍𑌤 𑌫𑌲𑌮𑌾𑌪𑍍𑌨𑍋𑌤𑌿 𑌗𑍁𑌰𑍁𑌗𑍀𑌤𑌾 𑌜𑌪𑍇𑌨 𑌤𑍁 ।
𑌸𑌰𑍍𑌵𑌪𑌾𑌪𑌹𑌰𑌾 𑌦𑍇𑌵𑌿 𑌸𑌰𑍍𑌵𑌦𑌾𑌰𑌿𑌦𑍍𑌰𑍍𑌯𑌨𑌾𑌶𑌿𑌨𑍀 ॥ 214 ॥
𑌅𑌕𑌾𑌲𑌮𑍃𑌤𑍍𑌯𑍁𑌹𑌰𑌾 𑌚𑍈𑌵 𑌸𑌰𑍍𑌵𑌸𑌙𑍍𑌕𑌟𑌨𑌾𑌶𑌿𑌨𑍀 ।
𑌯𑌕𑍍𑌷𑌰𑌾𑌕𑍍𑌷𑌸𑌭𑍂𑌤𑌾𑌦𑌿𑌚𑍋𑌰𑌵𑍍𑌯𑌾𑌘𑍍𑌰𑌵𑌿𑌘𑌾𑌤𑌿𑌨𑍀 ॥ 215 ॥
𑌸𑌰𑍍𑌵𑍋𑌪𑌦𑍍𑌰𑌵𑌕𑍁𑌷𑍍𑌠𑌾𑌦𑌿𑌦𑍁𑌷𑍍𑌟𑌦𑍋𑌷𑌨𑌿𑌵𑌾𑌰𑌿𑌣𑍀 ।
𑌯𑌤𑍍𑌫𑌲𑌂 𑌗𑍁𑌰𑍁𑌸𑌾𑌨𑍍𑌨𑌿𑌧𑍍𑌯𑌾𑌤𑍍𑌤𑌤𑍍𑌫𑌲𑌂 𑌪𑌠𑌨𑌾𑌦𑍍𑌭𑌵𑍇𑌤𑍍 ॥ 216 ॥
𑌮𑌹𑌾𑌵𑍍𑌯𑌾𑌧𑌿𑌹𑌰𑌾 𑌸𑌰𑍍𑌵𑌵𑌿𑌭𑍂𑌤𑍇𑌃 𑌸𑌿𑌦𑍍𑌧𑌿𑌦𑌾 𑌭𑌵𑍇𑌤𑍍 ।
𑌅𑌥𑌵𑌾 𑌮𑍋𑌹𑌨𑍇 𑌵𑌶𑍍𑌯𑍇 𑌸𑍍𑌵𑌯𑌮𑍇𑌵 𑌜𑌪𑍇𑌤𑍍𑌸𑌦𑌾 ॥ 217 ॥
𑌕𑍁𑌶𑌦𑍂𑌰𑍍𑌵𑌾𑌸𑌨𑍇 𑌦𑍇𑌵𑌿 𑌹𑍍𑌯𑌾𑌸𑌨𑍇 𑌶𑍁𑌭𑍍𑌰𑌕𑌮𑍍𑌬𑌲𑍇 ।
𑌉𑌪𑌵𑌿𑌶𑍍𑌯 𑌤𑌤𑍋 𑌦𑍇𑌵𑌿 𑌜𑌪𑍇𑌦𑍇𑌕𑌾𑌗𑍍𑌰𑌮𑌾𑌨𑌸𑌃 ॥ 218 ॥
𑌶𑍁𑌕𑍍𑌲𑌂 𑌸𑌰𑍍𑌵𑌤𑍍𑌰 𑌵𑍈 𑌪𑍍𑌰𑍋𑌕𑍍𑌤𑌂 𑌵𑌶𑍍𑌯𑍇 𑌰𑌕𑍍𑌤𑌾𑌸𑌨𑌂 𑌪𑍍𑌰𑌿𑌯𑍇 ।
𑌪𑌦𑍍𑌮𑌾𑌸𑌨𑍇 𑌜𑌪𑍇𑌨𑍍𑌨𑌿𑌤𑍍𑌯𑌂 𑌶𑌾𑌨𑍍𑌤𑌿𑌵𑌶𑍍𑌯𑌕𑌰𑌂 𑌪𑌰𑌮𑍍 ॥ 219 ॥
𑌵𑌸𑍍𑌤𑍍𑌰𑌾𑌸𑌨𑍇 𑌚 𑌦𑌾𑌰𑌿𑌦𑍍𑌰𑍍𑌯𑌂 𑌪𑌾𑌷𑌾𑌣𑍇 𑌰𑍋𑌗𑌸𑌮𑍍𑌭𑌵𑌃 ।
𑌮𑍇𑌦𑌿𑌨𑍍𑌯𑌾𑌂 𑌦𑍁𑌃𑌖𑌮𑌾𑌪𑍍𑌨𑍋𑌤𑌿 𑌕𑌾𑌷𑍍𑌠𑍇 𑌭𑌵𑌤𑌿 𑌨𑌿𑌷𑍍𑌫𑌲𑌮𑍍 ॥ 220 ॥
𑌕𑍃𑌷𑍍𑌣𑌾𑌜𑌿𑌨𑍇 𑌜𑍍𑌞𑌾𑌨𑌸𑌿𑌦𑍍𑌧𑌿𑌃 𑌮𑍋𑌕𑍍𑌷𑌶𑍍𑌰𑍀𑌰𑍍𑌵𑍍𑌯𑌾𑌘𑍍𑌰𑌚𑌰𑍍𑌮𑌣𑌿 ।
𑌕𑍁𑌶𑌾𑌸𑌨𑍇 𑌜𑍍𑌞𑌾𑌨𑌸𑌿𑌦𑍍𑌧𑌿𑌃 𑌸𑌰𑍍𑌵𑌸𑌿𑌦𑍍𑌧𑌿𑌸𑍍𑌤𑍁 𑌕𑌮𑍍𑌬𑌲𑍇 ॥ 221 ॥
𑌆𑌗𑍍𑌨𑍇𑌯𑍍𑌯𑌾𑌂 𑌕𑌰𑍍𑌷𑌣𑌂 𑌚𑍈𑌵 𑌵𑌾𑌯𑌵𑍍𑌯𑌾𑌂 𑌶𑌤𑍍𑌰𑍁𑌨𑌾𑌶𑌨𑌮𑍍 ।
𑌨𑍈𑌰𑍃𑌤𑍍𑌯𑌾𑌂 𑌦𑌰𑍍𑌶𑌨𑌂 𑌚𑍈𑌵 𑌈𑌶𑌾𑌨𑍍𑌯𑌾𑌂 𑌜𑍍𑌞𑌾𑌨𑌮𑍇𑌵 𑌚 ॥ 222 ॥
𑌉𑌦𑌙𑍍𑌮𑍁𑌖𑌃 𑌶𑌾𑌨𑍍𑌤𑌿𑌜𑌾𑌪𑍍𑌯𑍇 𑌵𑌶𑍍𑌯𑍇 𑌪𑍂𑌰𑍍𑌵𑌮𑍁𑌖𑌸𑍍𑌤𑌥𑌾 ।
𑌯𑌾𑌮𑍍𑌯𑍇 𑌤𑍁 𑌮𑌾𑌰𑌣𑌂 𑌪𑍍𑌰𑍋𑌕𑍍𑌤𑌂 𑌪𑌶𑍍𑌚𑌿𑌮𑍇 𑌚 𑌧𑌨𑌾𑌗𑌮𑌃 ॥ 223 ॥
𑌮𑍋𑌹𑌨𑌂 𑌸𑌰𑍍𑌵𑌭𑍂𑌤𑌾𑌨𑌾𑌂 𑌬𑌨𑍍𑌧𑌮𑍋𑌕𑍍𑌷𑌕𑌰𑌂 𑌪𑌰𑌮𑍍 ।
𑌦𑍇𑌵𑌰𑌾𑌜𑌪𑍍𑌰𑌿𑌯𑌕𑌰𑌂 𑌰𑌾𑌜𑌾𑌨𑌂 𑌵𑌶𑌮𑌾𑌨𑌯𑍇𑌤𑍍 ॥ 224 ॥
𑌮𑍁𑌖𑌸𑍍𑌤𑌮𑍍𑌭𑌕𑌰𑌂 𑌚𑍈𑌵 𑌗𑍁𑌣𑌾𑌨𑌾𑌂 𑌚 𑌵𑌿𑌵𑌰𑍍𑌧𑌨𑌮𑍍 ।
𑌦𑍁𑌷𑍍𑌕𑌰𑍍𑌮𑌨𑌾𑌶𑌨𑌂 𑌚𑍈𑌵 𑌤𑌥𑌾 𑌸𑌤𑍍𑌕𑌰𑍍𑌮𑌸𑌿𑌦𑍍𑌧𑌿𑌦𑌮𑍍 ॥ 225 ॥
𑌅𑌸𑌿𑌦𑍍𑌧𑌂 𑌸𑌾𑌧𑌯𑍇𑌤𑍍𑌕𑌾𑌰𑍍𑌯𑌂 𑌨𑌵𑌗𑍍𑌰𑌹𑌭𑌯𑌾𑌪𑌹𑌮𑍍 ।
𑌦𑍁𑌃𑌸𑍍𑌵𑌪𑍍𑌨𑌨𑌾𑌶𑌨𑌂 𑌚𑍈𑌵 𑌸𑍁𑌸𑍍𑌵𑌪𑍍𑌨𑌫𑌲𑌦𑌾𑌯𑌕𑌮𑍍 ॥ 226 ॥
𑌮𑍋𑌹𑌶𑌾𑌨𑍍𑌤𑌿𑌕𑌰𑌂 𑌚𑍈𑌵 𑌬𑌨𑍍𑌧𑌮𑍋𑌕𑍍𑌷𑌕𑌰𑌂 𑌪𑌰𑌮𑍍 ।
𑌸𑍍𑌵𑌰𑍂𑌪𑌜𑍍𑌞𑌾𑌨𑌨𑌿𑌲𑌯𑌂 𑌗𑍀𑌤𑌾𑌶𑌾𑌸𑍍𑌤𑍍𑌰𑌮𑌿𑌦𑌂 𑌶𑌿𑌵𑍇 ॥ 227 ॥
𑌯𑌂 𑌯𑌂 𑌚𑌿𑌨𑍍𑌤𑌯𑌤𑍇 𑌕𑌾𑌮𑌂 𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌶𑍍𑌚𑌯𑌮𑍍 ।
𑌨𑌿𑌤𑍍𑌯𑌂 𑌸𑍗𑌭𑌾𑌗𑍍𑌯𑌦𑌂 𑌪𑍁𑌣𑍍𑌯𑌂 𑌤𑌾𑌪𑌤𑍍𑌰𑌯𑌕𑍁𑌲𑌾𑌪𑌹𑌮𑍍 ॥ 228 ॥
𑌸𑌰𑍍𑌵𑌶𑌾𑌨𑍍𑌤𑌿𑌕𑌰𑌂 𑌨𑌿𑌤𑍍𑌯𑌂 𑌤𑌥𑌾 𑌵𑌨𑍍𑌧𑍍𑌯𑌾 𑌸𑍁𑌪𑍁𑌤𑍍𑌰𑌦𑌮𑍍 ।
𑌅𑌵𑍈𑌧𑌵𑍍𑌯𑌕𑌰𑌂 𑌸𑍍𑌤𑍍𑌰𑍀𑌣𑌾𑌂 𑌸𑍗𑌭𑌾𑌗𑍍𑌯𑌸𑍍𑌯 𑌵𑌿𑌵𑌰𑍍𑌧𑌨𑌮𑍍 ॥ 229 ॥
𑌆𑌯𑍁𑌰𑌾𑌰𑍋𑌗𑍍𑌯𑌮𑍈𑌶𑍍𑌵𑌰𑍍𑌯𑌂 𑌪𑍁𑌤𑍍𑌰𑌪𑍗𑌤𑍍𑌰𑌵𑌿𑌵𑌰𑍍𑌧𑌨𑌮𑍍 ।
𑌨𑌿𑌷𑍍𑌕𑌾𑌮𑌜𑌾𑌪𑍀 𑌵𑌿𑌧𑌵𑌾 𑌪𑌠𑍇𑌨𑍍𑌮𑍋𑌕𑍍𑌷𑌮𑌵𑌾𑌪𑍍𑌨𑍁𑌯𑌾𑌤𑍍 ॥ 230 ॥
𑌅𑌵𑍈𑌧𑌵𑍍𑌯𑌂 𑌸𑌕𑌾𑌮𑌾 𑌤𑍁 𑌲𑌭𑌤𑍇 𑌚𑌾𑌨𑍍𑌯𑌜𑌨𑍍𑌮𑌨𑌿 ।
𑌸𑌰𑍍𑌵𑌦𑍁𑌃𑌖𑌮𑌯𑌂 𑌵𑌿𑌘𑍍𑌨𑌂 𑌨𑌾𑌶𑌯𑍇𑌤𑍍𑌤𑌾𑌪𑌹𑌾𑌰𑌕𑌮𑍍 ॥ 231 ॥
𑌸𑌰𑍍𑌵𑌪𑌾𑌪𑌪𑍍𑌰𑌶𑌮𑌨𑌂 𑌧𑌰𑍍𑌮𑌕𑌾𑌮𑌾𑌰𑍍𑌥𑌮𑍋𑌕𑍍𑌷𑌦𑌮𑍍 ।
𑌯𑌂 𑌯𑌂 𑌚𑌿𑌨𑍍𑌤𑌯𑌤𑍇 𑌕𑌾𑌮𑌂 𑌤𑌂 𑌤𑌂 𑌪𑍍𑌰𑌾𑌪𑍍𑌨𑍋𑌤𑌿 𑌨𑌿𑌶𑍍𑌚𑌿𑌤𑌮𑍍 ॥ 232 ॥
𑌕𑌾𑌮𑍍𑌯𑌾𑌨𑌾𑌂 𑌕𑌾𑌮𑌧𑍇𑌨𑍁𑌰𑍍𑌵𑍈 𑌕𑌲𑍍𑌪𑌤𑍇 𑌕𑌲𑍍𑌪𑌪𑌾𑌦𑌪𑌃 ।
𑌚𑌿𑌨𑍍𑌤𑌾𑌮𑌣𑌿𑌶𑍍𑌚𑌿𑌨𑍍𑌤𑌿𑌤𑌸𑍍𑌯 𑌸𑌰𑍍𑌵𑌮𑌙𑍍𑌗𑌲𑌕𑌾𑌰𑌕𑌮𑍍 ॥ 233 ॥
𑌲𑌿𑌖𑌿𑌤𑍍𑌵𑌾 𑌪𑍂𑌜𑌯𑍇𑌦𑍍𑌯𑌸𑍍𑌤𑍁 𑌮𑍋𑌕𑍍𑌷𑌶𑍍𑌰𑌿𑌯𑌮𑌵𑌾𑌪𑍍𑌨𑍁𑌯𑌾𑌤𑍍 ।
𑌗𑍁𑌰𑍂𑌭𑌕𑍍𑌤𑌿𑌰𑍍𑌵𑌿𑌶𑍇𑌷𑍇𑌣 𑌜𑌾𑌯𑌤𑍇 𑌹𑍃𑌦𑌿 𑌸𑌰𑍍𑌵𑌦𑌾 ॥ 234 ॥
𑌜𑌪𑌨𑍍𑌤𑌿 𑌶𑌾𑌕𑍍𑌤𑌾𑌃 𑌸𑍗𑌰𑌾𑌶𑍍𑌚 𑌗𑌾𑌣𑌪𑌤𑍍𑌯𑌾𑌶𑍍𑌚 𑌵𑍈𑌷𑍍𑌣𑌵𑌾𑌃 ।
𑌶𑍈𑌵𑌾𑌃 𑌪𑌾𑌶𑍁𑌪𑌤𑌾𑌃 𑌸𑌰𑍍𑌵𑍇 𑌸𑌤𑍍𑌯𑌂 𑌸𑌤𑍍𑌯𑌂 𑌨 𑌸𑌂𑌶𑌯𑌃 ॥ 235 ॥
𑌇𑌤𑌿 𑌶𑍍𑌰𑍀𑌸𑍍𑌕𑌨𑍍𑌦𑌪𑍁𑌰𑌾𑌣𑍇 𑌉𑌤𑍍𑌤𑌰𑌖𑌣𑍍𑌡𑍇 𑌉𑌮𑌾𑌮𑌹𑍇𑌶𑍍𑌵𑌰 𑌸𑌂𑌵𑌾𑌦𑍇
𑌶𑍍𑌰𑍀 𑌗𑍁𑌰𑍁𑌗𑍀𑌤𑌾𑌯𑌾𑌂 𑌦𑍍𑌵𑌿𑌤𑍀𑌯𑍋𑌽𑌧𑍍𑌯𑌾𑌯𑌃 ॥
Roman (IAST) Transliteration
atha dvitīyo'dhyāyaḥ ||
dhyānaṃ śruṇu mahādevi sarvānandapradāyakam |
sarvasaukhyakaraṃ caiva bhuktimuktipradāyakam || 109 ||
śrīmatparaṃ brahma guruṃ smarāmi
śrīmatparaṃ brahma guruṃ bhajāmi |
śrīmatparaṃ brahma guruṃ vadāmi
śrīmatparaṃ brahma guruṃ namāmi || 110 ||
brahmānandaṃ paramasukhadaṃ kevalaṃ jñānamūrtiṃ
dvandvātītaṃ gaganasadṛśaṃ tattvamasyādilakṣyam |
ekaṃ nityaṃ vimalamacalaṃ sarvadhīsākṣibhūtaṃ
bhāvātītaṃ triguṇarahitaṃ sadguruṃ taṃ namāmi || 111 ||
hṛdambuje karṇikamadhyasaṃsthe
siṃhāsane saṃsthitadivyamūrtim |
dhyāyedguruṃ candrakalāprakāśaṃ
saccitsukhābhīṣṭavaraṃ dadhānam || 112 ||
śvetāmbaraṃ śvetavilepapuṣpaṃ
muktāvibhūṣaṃ muditaṃ dvinetram |
vāmāṅkapīṭhasthitadivyaśaktiṃ
mandasmitaṃ pūrṇakṛpānidhānam || 113 ||
ānandamānandakaraṃ prasannaṃ
jñānasvarūpaṃ nijabhāvayuktam |
yogīndramīḍyaṃ bhavarogavaidyaṃ
śrīmadguruṃ nityamahaṃ namāmi || 114 ||
vande gurūṇāṃ caraṇāravindaṃ
sandarśitasvātmasukhāvabodhe |
janasya ye jāṅgalikāyamāne
saṃsārahālāhalamohaśāntyai || 115 ||
yasmin sṛṣṭisthitidhvaṃsanigrahānugrahātmakam |
kṛtyaṃ pañcavidhaṃ śaśvat bhāsate taṃ guruṃ bhajet || 116 ||
pādābje sarvasaṃsāradāvakālānalaṃ svake |
brahmarandhre sthitāmbhojamadhyasthaṃ candramaṇḍalam || 117 ||
akathāditrirekhābje sahasradalamaṇḍale |
haṃsapārśvatrikoṇe ca smarettanmadhyagaṃ gurum || 118 ||
nityaṃ śuddhaṃ nirābhāsaṃ nirākāraṃ nirañjanam |
nityabodhaṃ cidānandaṃ guruṃ brahma namāmyaham || 119 ||
sakalabhuvanasṛṣṭiḥ kalpitāśeṣasṛṣṭiḥ
nikhilanigamadṛṣṭiḥ satpadārthaikasṛṣṭiḥ |
atadgaṇaparameṣṭiḥ satpadārthaikadṛṣṭiḥ
bhavaguṇaparameṣṭirmokṣamārgaikadṛṣṭiḥ || 120 ||
sakalabhuvanaraṅgasthāpanāstambhayaṣṭiḥ
sakaruṇarasavṛṣṭistattvamālāsamaṣṭiḥ |
sakalasamayasṛṣṭissaccidānandadṛṣṭiḥ
nivasatu mayi nityaṃ śrīgurordivyadṛṣṭiḥ || 121 ||
na guroradhikaṃ na guroradhikaṃ
na guroradhikaṃ na guroradhikam |
śivaśāsanataḥ śivaśāsanataḥ
śivaśāsanataḥ śivaśāsanataḥ || 122 ||
idameva śivaṃ idameva śivaṃ
idameva śivaṃ idameva śivam |
hariśāsanato hariśāsanato
hariśāsanato hariśāsanataḥ || 123 ||
viditaṃ viditaṃ viditaṃ viditaṃ
vijanaṃ vijanaṃ vijanaṃ vijanam |
vidhiśāsanato vidhiśāsanato
vidhiśāsanato vidhiśāsanataḥ || 124 ||
evaṃvidhaṃ guruṃ dhyātvā jñānamutpadyate svayam |
tadā gurūpadeśena mukto'hamiti bhāvayet || 125 ||
gurūpadiṣṭamārgeṇa manaśśuddhiṃ tu kārayet |
anityaṃ khaṇḍayetsarvaṃ yatkiñcidātmagocaram || 126 ||
jñeyaṃ sarvaṃ pratītaṃ ca jñānaṃ ca mana ucyate |
jñānaṃ jñeyaṃ samaṃ kuryānnānyaḥ panthā dvitīyakaḥ || 127 ||
kimatra bahunoktena śāstrakoṭiśatairapi |
durlabhā cittaviśrāntiḥ vinā gurukṛpāṃ parām || 128 ||
karuṇākhaḍgapātena chitvā pāśāṣṭakaṃ śiśoḥ |
samyagānandajanakaḥ sadguruḥ so'bhidhīyate || 129 ||
evaṃ śrutvā mahādevi gurunindāṃ karoti yaḥ |
sa yāti narakān ghorān yāvaccandradivākarau || 130 ||
yāvatkalpāntako dehastāvaddevi guruṃ smaret |
gurulopo na kartavyaḥ svacchando yadi vā bhavet || 131 ||
huṅkāreṇa na vaktavyaṃ prājñaśiṣyaiḥ kadācana |
guroragra na vaktavyamasatyaṃ tu kadācana || 132 ||
guruṃ tvaṅkṛtya huṅkṛtya gurusānnidhyabhāṣaṇaḥ |
araṇye nirjale deśe sambhaved brahmarākṣasaḥ || 133 ||
advaitaṃ bhāvayennityaṃ sarvāvasthāsu sarvadā |
kadācidapi no kuryādadvaitaṃ gurusannidhau || 134 ||
dṛśyavismṛtiparyantaṃ kuryād gurupadārcanam |
tādṛśasyaiva kaivalyaṃ na ca tadvyatirekiṇaḥ || 135 ||
api sampūrṇatattvajño gurutyāgī bhavedyadā |
bhavatyeva hi tasyāntakāle vikṣepamutkaṭam || 136 ||
gurukāryaṃ na laṅgheta nāpṛṣṭvā kāryamācaret |
na hyuttiṣṭheddiśe'natvā gurusadbhāvaśobhitaḥ || 137 ||
gurau sati svayaṃ devi pareṣāṃ tu kadācana |
upadeśaṃ na vai kuryāt tathā cedrākṣaso bhavet || 138 ||
na gurorāśrame kuryāt duṣpānaṃ parisarpaṇam |
dīkṣā vyākhyā prabhutvādi gurorājñāṃ na kārayet || 139 ||
nopāśrayaṃ ca paryakaṃ na ca pādaprasāraṇam |
nāṅgabhogādikaṃ kuryānna līlāmaparāmapi || 140 ||
gurūṇāṃ sadasadvā'pi yaduktaṃ tanna laṅghayet |
kurvannājñāṃ divā rātrau dāsavannivasedguro || 141 ||
adattaṃ na gurordravyamupabhuñjīta karhicit |
datte ca raṅkavadgrāhyaṃ prāṇo'pyetena labhyate || 142 ||
pādukāsanaśayyādi guruṇā yadabhīṣṭitam |
namaskurvīta tatsarvaṃ pādābhyāṃ na spṛśet kvacit || 143 ||
gacchataḥ pṛṣṭhato gacchet gurucchāyāṃ na laṅghayet |
nolbaṇaṃ dhārayedveṣaṃ nālaṅkārāṃstatolbaṇān || 144 ||
gurunindākaraṃ dṛṣṭvā dhāvayedatha vāsayet |
sthānaṃ vā tatparityājyaṃ jihvācchedākṣamo yadi || 145 ||
nocchiṣṭaṃ kasyaciddeyaṃ gurorājñāṃ na ca tyajet |
kṛtsnamucchiṣṭamādāya haviriva bhakṣayetsvayam || 146 ||
nā'nṛtaṃ nā'priyaṃ caiva na garvaṃ nā'pi vā bahu |
na niyogaparaṃ brūyāt gurorājñāṃ vibhāvayet || 147 ||
prabho devakuleśānāṃ svāmin rājan kuleśvara |
iti sambodhanairbhīto gurubhāvena sarvadā || 148 ||
munibhiḥ pannagairvāpi surairvā śāpito yadi |
kālamṛtyubhayādvāpi guruḥ santrāti pārvati || 149 ||
aśaktā hi surādyāśca hyaśaktāḥ munayastathā |
guruśāpopapannasya rakṣaṇāya ca kutracit || 150 ||
mantrarājamidaṃ devi gururityakṣaradvayam |
smṛtivedapurāṇānāṃ sārameva na saṃśayaḥ || 151 ||
satkāramānapūjārthaṃ daṇḍakāṣayadhāraṇaḥ |
sa sannyāsī na vaktavyaḥ sannyāsī jñānatatparaḥ || 152 ||
vijānanti mahāvākyaṃ guroścaraṇa sevayā |
te vai sannyāsinaḥ proktā itare veṣadhāriṇaḥ || 153 ||
[pāṭhabhedaḥ –
nityaṃ brahma nirākāraṃ nirguṇaṃ bodhayetparam |
bhāsayan brahmabhāvaṃ ca dīpo dīpāntaraṃ yathā ||
]
nityaṃ brahma nirākāraṃ nirguṇaṃ satyaciddhanam |
yaḥ sākṣātkurute loke gurutvaṃ tasya śobhate || 154 ||
guruprasādataḥ svātmanyātmārāmanirīkṣaṇāt |
samatā muktimārgeṇa svātmajñānaṃ pravartate || 155 ||
ābrahmastambaparyantaṃ paramātmasvarūpakam |
sthāvaraṃ jaṅgamaṃ caiva praṇamāmi jaganmayam || 156 ||
vande'haṃ saccidānandaṃ bhāvātītaṃ jagadgurum |
nityaṃ pūrṇaṃ nirākāraṃ nirguṇaṃ svātmasaṃsthitam || 157 ||
parātparataraṃ dhyāyennityamānandakārakam |
hṛdayākāśamadhyasthaṃ śuddhasphaṭikasannibham || 158 ||
sphāṭike sphāṭikaṃ rūpaṃ darpaṇe darpaṇo yathā |
tathā''tmani cidākāramānandaṃ so'hamityuta || 159 ||
aṅguṣṭhamātraṃ puruṣaṃ dhyāyecca cinmayaṃ hṛdi |
tatra sphurati yo bhāvaḥ śṛṇu tatkathayāmi te || 160 ||
ajo'hamamaro'haṃ ca anādinidhano hyaham |
avikāraścidānando hyaṇīyānmahato mahān || 161 ||
apūrvamaparaṃ nityaṃ svayañjyotirnirāmayam |
virajaṃ paramākāśaṃ dhruvamānandamavyayam || 162 ||
agocaraṃ tathā'gamyaṃ nāmarūpavivarjitam |
niśśabdaṃ tu vijānīyātsvabhāvādbrahma pārvati || 163 ||
yathā gandhasvabhāvatvaṃ karpūrakusumādiṣu |
śītoṣṇatvasvabhāvatvaṃ tathā brahmaṇi śāśvatam || 164 ||
yathā nijasvabhāvena kuṇḍale kaṭakādayaḥ |
suvarṇatvena tiṣṭhanti tathā'haṃ brahma śāśvatam || 165 ||
svayaṃ tathāvidho bhūtvā sthātavyaṃ yatra kutra cit |
kīṭo bhṛṅga iva dhyānādyathā bhavati tādṛśaḥ || 166 ||
gurudhyānaṃ tathā kṛtvā svayaṃ brahmamayo bhavet |
piṇḍe pade tathā rūpe muktāste nātra saṃśayaḥ || 167 ||
śrīpārvatī uvāca |
piṇḍaṃ kiṃ tu mahādeva padaṃ kiṃ samudāhṛtam |
rūpātītaṃ ca rūpaṃ kiṃ etadākhyāhi śaṅkara || 168 ||
śrīmahādeva uvāca |
piṇḍaṃ kuṇḍalinī śaktiḥ padaṃ haṃsamudāhṛtam |
rūpaṃ binduriti jñeyaṃ rūpātītaṃ nirañjanam || 169 ||
piṇḍe muktāḥ pade muktā rūpe muktā varānane |
rūpātīte tu ye muktāste muktā nā'tra saṃśayaḥ || 170 ||
gururdhyānenaiva nityaṃ dehī brahmamayo bhavet |
sthitaśca yatra kutrā'pi mukto'sau nā'tra saṃśayaḥ || 171 ||
jñānaṃ vairāgyamaiśvaryaṃ yaśaśrīḥ svamudāhṛtam |
ṣaḍguṇaiśvaryayukto hi bhagavān śrīguruḥ priye || 172 ||
guruśśivo gururdevo gururbandhuḥ śarīriṇām |
gururātmā gururjīvo guroranyanna vidyate || 173 ||
ekākī nisspṛhaḥ śāntaścintā'sūyādivarjitaḥ |
bālyabhāvena yo bhāti brahmajñānī sa ucyate || 174 ||
na sukhaṃ vedaśāstreṣu na sukhaṃ mantrayantrake |
guroḥ prasādādanyatra sukhaṃ nāsti mahītale || 175 ||
cārvākavaiṣṇavamate sukhaṃ prābhākare na hi |
guroḥ pādāntike yadvatsukhaṃ vedāntasammatam || 176 ||
na tatsukhaṃ surendrasya na sukhaṃ cakravartinām |
yatsukhaṃ vītarāgasya munerekāntavāsinaḥ || 177 ||
nityaṃ brahmarasaṃ pītvā tṛpto yaḥ paramātmani |
indraṃ ca manyate tucchaṃ nṛpāṇāṃ tatra kā kathā || 178 ||
yataḥ paramakaivalyaṃ gurumārgeṇa vai bhavet |
gurubhaktirataḥ kāryā sarvadā mokṣakāṅkṣibhiḥ || 179 ||
eka evā'dvitīyo'haṃ guruvākyena niścitaḥ |
evamabhyasyatā nityaṃ na sevyaṃ vai vanāntaram || 180 ||
abhyāsānnimiṣeṇaiva samādhimadhigacchati |
ājanmajanitaṃ pāpaṃ tatkṣaṇādeva naśyati || 181 ||
kimāvāhanamavyakte vyāpake kiṃ visarjanam |
amūrte ca kathaṃ pūjā kathaṃ dhyānaṃ nirāmaye || 182 ||
gururviṣṇuḥ sattvamayo rājasaścaturānanaḥ |
tāmaso rudrarūpeṇa sṛjatyavati hanti ca || 183 ||
svayaṃ brahmamayo bhūtvā tatparaṃ cāvalokayet |
parātparataraṃ nānyat sarvagaṃ tannirāmayam || 184 ||
tasyāvalokanaṃ prāpya sarvasaṅgavivarjitaḥ |
ekākī nisspṛhaḥ śāntaḥ sthātavyaṃ tatprasādataḥ || 185 ||
labdhaṃ vā'tha na labdhaṃ vā svalpaṃ vā bahulaṃ tathā |
niṣkāmenaiva bhoktavyaṃ sadā santuṣṭamānasaḥ || 186 ||
sarvajñapadamityāhurdehī sarvamayo bhuvi |
sadā''nandaḥ sadā śānto ramate yatra kutra cit || 187 ||
yatraiva tiṣṭhate so'pi sa deśaḥ puṇyabhājanaḥ |
muktasya lakṣaṇaṃ devi tavā'gre kathitaṃ mayā || 188 ||
upadeśastvayaṃ devi gurumārgeṇa muktidaḥ |
gurubhaktiḥ tathā'tyantā kartavyā vai manīṣibhiḥ || 189 ||
nityayuktāśrayaḥ sarvavedakṛtsarvavedakṛt |
svaparajñānadātā ca taṃ vande gurumīśvaram || 190 ||
yadyapyadhītā nigamāḥ ṣaḍaṅgā āgamāḥ priye |
adhyātmādīni śāstrāṇi jñānaṃ nāsti guruṃ vinā || 191 ||
śivapūjārato vā'pi viṣṇupūjārato'thavā |
gurutattvavihīnaścettatsarvaṃ vyarthameva hi || 192 ||
śivasvarūpamajñātvā śivapūjā kṛtā yadi |
sā pūjā nāmamātraṃ syāccitradīpa iva priye || 193 ||
sarvaṃ syātsaphalaṃ karma gurudīkṣāprabhāvataḥ |
gurulābhātsarvalābho guruhīnastu bāliśaḥ || 194 ||
guruhīnaḥ paśuḥ kīṭaḥ pataṅgo vaktumarhati |
śivarūpaṃ svarūpaṃ ca na jānāti yatassvayam || 195 ||
tasmātsarvaprayatnena sarvasaṅgavivarjitaḥ |
vihāya śāstrajālāni gurumeva samāśrayet || 196 ||
nirastasarvasandeho ekīkṛtya sudarśanam |
rahasyaṃ yo darśayati bhajāmi gurumīśvaram || 197 ||
jñānahīno gurustyājyo mithyāvādī viḍambakaḥ |
svaviśrāntiṃ na jānāti paraśāntiṃ karoti kim || 198 ||
śilāyāḥ kiṃ paraṃ jñānaṃ śilāsaṅghapratāraṇe |
svayaṃ tartuṃ na jānāti paraṃ nistārayet katham || 199 ||
na vandanīyāste kaṣṭaṃ darśanādbhrāntikārakāḥ |
varjayettān gurūn dūre dhīrasya tu samāśrayet || 200 ||
pāṣaṇḍinaḥ pāparatāḥ nāstikā bhedabuddhayaḥ |
strīlampaṭā durācārāḥ kṛtaghnā bakavṛttayaḥ || 201 ||
karmabhraṣṭāḥ kṣamānaṣṭā nindyatarkaiśca vādinaḥ |
kāminaḥ krodhinaścaiva hiṃsrāścaṇḍāḥ śaṭhāstathā || 202 ||
jñānaluptā na kartavyā mahāpāpāstathā priye |
ebhyo bhinno guruḥ sevyaḥ ekabhaktyā vicārya ca || 203 ||
śiṣyādanyatra deveśi na vadedyasya kasyacit |
narāṇāṃ ca phalaprāptau bhaktireva hi kāraṇam || 204 ||
gūḍho dṛḍhaśca prītaśca maunena susamāhitaḥ |
sakṛtkāmagato vā'pi pañcadhā gururīritaḥ || 205 ||
sarvaṃ gurumukhāllabdhaṃ saphalaṃ pāpanāśanam |
yadyadātmahitaṃ vastu tattaddravyaṃ na vañcayet || 206 ||
gurudevārpaṇaṃ vastu tena tuṣṭo'smi suvrate |
śrīguroḥ pādukāṃ mudrāṃ mūlamantraṃ ca gopayet || 207 ||
natā'smi te nātha padāravindaṃ
buddhīndriyaprāṇamanovacobhiḥ |
yaccintyate bhāvita ātmayuktau
mumukṣibhiḥ karmamayopaśāntaye || 208 ||
anena yadbhavetkāryaṃ tadvadāmi tava priye |
lokopakārakaṃ devi laukikaṃ tu vivarjayet || 209 ||
laukikāddharmato yāti jñānahīno bhavārṇave |
jñānabhāve ca yatsarvaṃ karma niṣkarma śāmyati || 210 ||
imāṃ tu bhaktibhāvena paṭhedvai śṛṇuyādapi |
likhitvā yatpradānena tatsarvaṃ phalamaśnute || 211 ||
gurugītāmimāṃ devi hṛdi nityaṃ vibhāvaya |
mahāvyādhigatairduḥkhaiḥ sarvadā prajapenmudā || 212 ||
gurugītākṣaraikaikaṃ mantrarājamidaṃ priye |
anye ca vividhāḥ mantrāḥ kalāṃ nārhanti ṣoḍaśīm || 213 ||
ananta phalamāpnoti gurugītā japena tu |
sarvapāpaharā devi sarvadāridryanāśinī || 214 ||
akālamṛtyuharā caiva sarvasaṅkaṭanāśinī |
yakṣarākṣasabhūtādicoravyāghravighātinī || 215 ||
sarvopadravakuṣṭhādiduṣṭadoṣanivāriṇī |
yatphalaṃ gurusānnidhyāttatphalaṃ paṭhanādbhavet || 216 ||
mahāvyādhiharā sarvavibhūteḥ siddhidā bhavet |
athavā mohane vaśye svayameva japetsadā || 217 ||
kuśadūrvāsane devi hyāsane śubhrakambale |
upaviśya tato devi japedekāgramānasaḥ || 218 ||
śuklaṃ sarvatra vai proktaṃ vaśye raktāsanaṃ priye |
padmāsane japennityaṃ śāntivaśyakaraṃ param || 219 ||
vastrāsane ca dāridryaṃ pāṣāṇe rogasambhavaḥ |
medinyāṃ duḥkhamāpnoti kāṣṭhe bhavati niṣphalam || 220 ||
kṛṣṇājine jñānasiddhiḥ mokṣaśrīrvyāghracarmaṇi |
kuśāsane jñānasiddhiḥ sarvasiddhistu kambale || 221 ||
āgneyyāṃ karṣaṇaṃ caiva vāyavyāṃ śatrunāśanam |
nairṛtyāṃ darśanaṃ caiva īśānyāṃ jñānameva ca || 222 ||
udaṅmukhaḥ śāntijāpye vaśye pūrvamukhastathā |
yāmye tu māraṇaṃ proktaṃ paścime ca dhanāgamaḥ || 223 ||
mohanaṃ sarvabhūtānāṃ bandhamokṣakaraṃ param |
devarājapriyakaraṃ rājānaṃ vaśamānayet || 224 ||
mukhastambhakaraṃ caiva guṇānāṃ ca vivardhanam |
duṣkarmanāśanaṃ caiva tathā satkarmasiddhidam || 225 ||
asiddhaṃ sādhayetkāryaṃ navagrahabhayāpaham |
duḥsvapnanāśanaṃ caiva susvapnaphaladāyakam || 226 ||
mohaśāntikaraṃ caiva bandhamokṣakaraṃ param |
svarūpajñānanilayaṃ gītāśāstramidaṃ śive || 227 ||
yaṃ yaṃ cintayate kāmaṃ taṃ taṃ prāpnoti niścayam |
nityaṃ saubhāgyadaṃ puṇyaṃ tāpatrayakulāpaham || 228 ||
sarvaśāntikaraṃ nityaṃ tathā vandhyā suputradam |
avaidhavyakaraṃ strīṇāṃ saubhāgyasya vivardhanam || 229 ||
āyurārogyamaiśvaryaṃ putrapautravivardhanam |
niṣkāmajāpī vidhavā paṭhenmokṣamavāpnuyāt || 230 ||
avaidhavyaṃ sakāmā tu labhate cānyajanmani |
sarvaduḥkhamayaṃ vighnaṃ nāśayettāpahārakam || 231 ||
sarvapāpapraśamanaṃ dharmakāmārthamokṣadam |
yaṃ yaṃ cintayate kāmaṃ taṃ taṃ prāpnoti niścitam || 232 ||
kāmyānāṃ kāmadhenurvai kalpate kalpapādapaḥ |
cintāmaṇiścintitasya sarvamaṅgalakārakam || 233 ||
likhitvā pūjayedyastu mokṣaśriyamavāpnuyāt |
gurūbhaktirviśeṣeṇa jāyate hṛdi sarvadā || 234 ||
japanti śāktāḥ saurāśca gāṇapatyāśca vaiṣṇavāḥ |
śaivāḥ pāśupatāḥ sarve satyaṃ satyaṃ na saṃśayaḥ || 235 ||
iti śrīskandapurāṇe uttarakhaṇḍe umāmaheśvara saṃvāde
śrī gurugītāyāṃ dvitīyo'dhyāyaḥ ||
Sanskrit — Devanagari (original)
अथ द्वितीयोऽध्यायः ॥
ध्यानं श्रुणु महादेवि सर्वानन्दप्रदायकम् ।
सर्वसौख्यकरं चैव भुक्तिमुक्तिप्रदायकम् ॥ 109 ॥
श्रीमत्परं ब्रह्म गुरुं स्मरामि
श्रीमत्परं ब्रह्म गुरुं भजामि ।
श्रीमत्परं ब्रह्म गुरुं वदामि
श्रीमत्परं ब्रह्म गुरुं नमामि ॥ 110 ॥
ब्रह्मानन्दं परमसुखदं केवलं ज्ञानमूर्तिं
द्वन्द्वातीतं गगनसदृशं तत्त्वमस्यादिलक्ष्यम् ।
एकं नित्यं विमलमचलं सर्वधीसाक्षिभूतं
भावातीतं त्रिगुणरहितं सद्गुरुं तं नमामि ॥ 111 ॥
हृदम्बुजे कर्णिकमध्यसंस्थे
सिंहासने संस्थितदिव्यमूर्तिम् ।
ध्यायेद्गुरुं चन्द्रकलाप्रकाशं
सच्चित्सुखाभीष्टवरं दधानम् ॥ 112 ॥
श्वेताम्बरं श्वेतविलेपपुष्पं
मुक्ताविभूषं मुदितं द्विनेत्रम् ।
वामाङ्कपीठस्थितदिव्यशक्तिं
मन्दस्मितं पूर्णकृपानिधानम् ॥ 113 ॥
आनन्दमानन्दकरं प्रसन्नं
ज्ञानस्वरूपं निजभावयुक्तम् ।
योगीन्द्रमीड्यं भवरोगवैद्यं
श्रीमद्गुरुं नित्यमहं नमामि ॥ 114 ॥
वन्दे गुरूणां चरणारविन्दं
सन्दर्शितस्वात्मसुखावबोधे ।
जनस्य ये जाङ्गलिकायमाने
संसारहालाहलमोहशान्त्यै ॥ 115 ॥
यस्मिन् सृष्टिस्थितिध्वंसनिग्रहानुग्रहात्मकम् ।
कृत्यं पञ्चविधं शश्वत् भासते तं गुरुं भजेत् ॥ 116 ॥
पादाब्जे सर्वसंसारदावकालानलं स्वके ।
ब्रह्मरन्ध्रे स्थिताम्भोजमध्यस्थं चन्द्रमण्डलम् ॥ 117 ॥
अकथादित्रिरेखाब्जे सहस्रदलमण्डले ।
हंसपार्श्वत्रिकोणे च स्मरेत्तन्मध्यगं गुरुम् ॥ 118 ॥
नित्यं शुद्धं निराभासं निराकारं निरञ्जनम् ।
नित्यबोधं चिदानन्दं गुरुं ब्रह्म नमाम्यहम् ॥ 119 ॥
सकलभुवनसृष्टिः कल्पिताशेषसृष्टिः
निखिलनिगमदृष्टिः सत्पदार्थैकसृष्टिः ।
अतद्गणपरमेष्टिः सत्पदार्थैकदृष्टिः
भवगुणपरमेष्टिर्मोक्षमार्गैकदृष्टिः ॥ 120 ॥
सकलभुवनरङ्गस्थापनास्तम्भयष्टिः
सकरुणरसवृष्टिस्तत्त्वमालासमष्टिः ।
सकलसमयसृष्टिस्सच्चिदानन्ददृष्टिः
निवसतु मयि नित्यं श्रीगुरोर्दिव्यदृष्टिः ॥ 121 ॥
न गुरोरधिकं न गुरोरधिकं
न गुरोरधिकं न गुरोरधिकम् ।
शिवशासनतः शिवशासनतः
शिवशासनतः शिवशासनतः ॥ 122 ॥
इदमेव शिवं इदमेव शिवं
इदमेव शिवं इदमेव शिवम् ।
हरिशासनतो हरिशासनतो
हरिशासनतो हरिशासनतः ॥ 123 ॥
विदितं विदितं विदितं विदितं
विजनं विजनं विजनं विजनम् ।
विधिशासनतो विधिशासनतो
विधिशासनतो विधिशासनतः ॥ 124 ॥
एवंविधं गुरुं ध्यात्वा ज्ञानमुत्पद्यते स्वयम् ।
तदा गुरूपदेशेन मुक्तोऽहमिति भावयेत् ॥ 125 ॥
गुरूपदिष्टमार्गेण मनश्शुद्धिं तु कारयेत् ।
अनित्यं खण्डयेत्सर्वं यत्किञ्चिदात्मगोचरम् ॥ 126 ॥
ज्ञेयं सर्वं प्रतीतं च ज्ञानं च मन उच्यते ।
ज्ञानं ज्ञेयं समं कुर्यान्नान्यः पन्था द्वितीयकः ॥ 127 ॥
किमत्र बहुनोक्तेन शास्त्रकोटिशतैरपि ।
दुर्लभा चित्तविश्रान्तिः विना गुरुकृपां पराम् ॥ 128 ॥
करुणाखड्गपातेन छित्वा पाशाष्टकं शिशोः ।
सम्यगानन्दजनकः सद्गुरुः सोऽभिधीयते ॥ 129 ॥
एवं श्रुत्वा महादेवि गुरुनिन्दां करोति यः ।
स याति नरकान् घोरान् यावच्चन्द्रदिवाकरौ ॥ 130 ॥
यावत्कल्पान्तको देहस्तावद्देवि गुरुं स्मरेत् ।
गुरुलोपो न कर्तव्यः स्वच्छन्दो यदि वा भवेत् ॥ 131 ॥
हुङ्कारेण न वक्तव्यं प्राज्ञशिष्यैः कदाचन ।
गुरोरग्र न वक्तव्यमसत्यं तु कदाचन ॥ 132 ॥
गुरुं त्वङ्कृत्य हुङ्कृत्य गुरुसान्निध्यभाषणः ।
अरण्ये निर्जले देशे सम्भवेद् ब्रह्मराक्षसः ॥ 133 ॥
अद्वैतं भावयेन्नित्यं सर्वावस्थासु सर्वदा ।
कदाचिदपि नो कुर्यादद्वैतं गुरुसन्निधौ ॥ 134 ॥
दृश्यविस्मृतिपर्यन्तं कुर्याद् गुरुपदार्चनम् ।
तादृशस्यैव कैवल्यं न च तद्व्यतिरेकिणः ॥ 135 ॥
अपि सम्पूर्णतत्त्वज्ञो गुरुत्यागी भवेद्यदा ।
भवत्येव हि तस्यान्तकाले विक्षेपमुत्कटम् ॥ 136 ॥
गुरुकार्यं न लङ्घेत नापृष्ट्वा कार्यमाचरेत् ।
न ह्युत्तिष्ठेद्दिशेऽनत्वा गुरुसद्भावशोभितः ॥ 137 ॥
गुरौ सति स्वयं देवि परेषां तु कदाचन ।
उपदेशं न वै कुर्यात् तथा चेद्राक्षसो भवेत् ॥ 138 ॥
न गुरोराश्रमे कुर्यात् दुष्पानं परिसर्पणम् ।
दीक्षा व्याख्या प्रभुत्वादि गुरोराज्ञां न कारयेत् ॥ 139 ॥
नोपाश्रयं च पर्यकं न च पादप्रसारणम् ।
नाङ्गभोगादिकं कुर्यान्न लीलामपरामपि ॥ 140 ॥
गुरूणां सदसद्वाऽपि यदुक्तं तन्न लङ्घयेत् ।
कुर्वन्नाज्ञां दिवा रात्रौ दासवन्निवसेद्गुरो ॥ 141 ॥
अदत्तं न गुरोर्द्रव्यमुपभुञ्जीत कर्हिचित् ।
दत्ते च रङ्कवद्ग्राह्यं प्राणोऽप्येतेन लभ्यते ॥ 142 ॥
पादुकासनशय्यादि गुरुणा यदभीष्टितम् ।
नमस्कुर्वीत तत्सर्वं पादाभ्यां न स्पृशेत् क्वचित् ॥ 143 ॥
गच्छतः पृष्ठतो गच्छेत् गुरुच्छायां न लङ्घयेत् ।
नोल्बणं धारयेद्वेषं नालङ्कारांस्ततोल्बणान् ॥ 144 ॥
गुरुनिन्दाकरं दृष्ट्वा धावयेदथ वासयेत् ।
स्थानं वा तत्परित्याज्यं जिह्वाच्छेदाक्षमो यदि ॥ 145 ॥
नोच्छिष्टं कस्यचिद्देयं गुरोराज्ञां न च त्यजेत् ।
कृत्स्नमुच्छिष्टमादाय हविरिव भक्षयेत्स्वयम् ॥ 146 ॥
नाऽनृतं नाऽप्रियं चैव न गर्वं नाऽपि वा बहु ।
न नियोगपरं ब्रूयात् गुरोराज्ञां विभावयेत् ॥ 147 ॥
प्रभो देवकुलेशानां स्वामिन् राजन् कुलेश्वर ।
इति सम्बोधनैर्भीतो गुरुभावेन सर्वदा ॥ 148 ॥
मुनिभिः पन्नगैर्वापि सुरैर्वा शापितो यदि ।
कालमृत्युभयाद्वापि गुरुः सन्त्राति पार्वति ॥ 149 ॥
अशक्ता हि सुराद्याश्च ह्यशक्ताः मुनयस्तथा ।
गुरुशापोपपन्नस्य रक्षणाय च कुत्रचित् ॥ 150 ॥
मन्त्रराजमिदं देवि गुरुरित्यक्षरद्वयम् ।
स्मृतिवेदपुराणानां सारमेव न संशयः ॥ 151 ॥
सत्कारमानपूजार्थं दण्डकाषयधारणः ।
स सन्न्यासी न वक्तव्यः सन्न्यासी ज्ञानतत्परः ॥ 152 ॥
विजानन्ति महावाक्यं गुरोश्चरण सेवया ।
ते वै सन्न्यासिनः प्रोक्ता इतरे वेषधारिणः ॥ 153 ॥
[पाठभेदः –
नित्यं ब्रह्म निराकारं निर्गुणं बोधयेत्परम् ।
भासयन् ब्रह्मभावं च दीपो दीपान्तरं यथा ॥
]
नित्यं ब्रह्म निराकारं निर्गुणं सत्यचिद्धनम् ।
यः साक्षात्कुरुते लोके गुरुत्वं तस्य शोभते ॥ 154 ॥
गुरुप्रसादतः स्वात्मन्यात्मारामनिरीक्षणात् ।
समता मुक्तिमार्गेण स्वात्मज्ञानं प्रवर्तते ॥ 155 ॥
आब्रह्मस्तम्बपर्यन्तं परमात्मस्वरूपकम् ।
स्थावरं जङ्गमं चैव प्रणमामि जगन्मयम् ॥ 156 ॥
वन्देऽहं सच्चिदानन्दं भावातीतं जगद्गुरुम् ।
नित्यं पूर्णं निराकारं निर्गुणं स्वात्मसंस्थितम् ॥ 157 ॥
परात्परतरं ध्यायेन्नित्यमानन्दकारकम् ।
हृदयाकाशमध्यस्थं शुद्धस्फटिकसन्निभम् ॥ 158 ॥
स्फाटिके स्फाटिकं रूपं दर्पणे दर्पणो यथा ।
तथाऽऽत्मनि चिदाकारमानन्दं सोऽहमित्युत ॥ 159 ॥
अङ्गुष्ठमात्रं पुरुषं ध्यायेच्च चिन्मयं हृदि ।
तत्र स्फुरति यो भावः शृणु तत्कथयामि ते ॥ 160 ॥
अजोऽहममरोऽहं च अनादिनिधनो ह्यहम् ।
अविकारश्चिदानन्दो ह्यणीयान्महतो महान् ॥ 161 ॥
अपूर्वमपरं नित्यं स्वयञ्ज्योतिर्निरामयम् ।
विरजं परमाकाशं ध्रुवमानन्दमव्ययम् ॥ 162 ॥
अगोचरं तथाऽगम्यं नामरूपविवर्जितम् ।
निश्शब्दं तु विजानीयात्स्वभावाद्ब्रह्म पार्वति ॥ 163 ॥
यथा गन्धस्वभावत्वं कर्पूरकुसुमादिषु ।
शीतोष्णत्वस्वभावत्वं तथा ब्रह्मणि शाश्वतम् ॥ 164 ॥
यथा निजस्वभावेन कुण्डले कटकादयः ।
सुवर्णत्वेन तिष्ठन्ति तथाऽहं ब्रह्म शाश्वतम् ॥ 165 ॥
स्वयं तथाविधो भूत्वा स्थातव्यं यत्र कुत्र चित् ।
कीटो भृङ्ग इव ध्यानाद्यथा भवति तादृशः ॥ 166 ॥
गुरुध्यानं तथा कृत्वा स्वयं ब्रह्ममयो भवेत् ।
पिण्डे पदे तथा रूपे मुक्तास्ते नात्र संशयः ॥ 167 ॥
श्रीपार्वती उवाच ।
पिण्डं किं तु महादेव पदं किं समुदाहृतम् ।
रूपातीतं च रूपं किं एतदाख्याहि शङ्कर ॥ 168 ॥
श्रीमहादेव उवाच ।
पिण्डं कुण्डलिनी शक्तिः पदं हंसमुदाहृतम् ।
रूपं बिन्दुरिति ज्ञेयं रूपातीतं निरञ्जनम् ॥ 169 ॥
पिण्डे मुक्ताः पदे मुक्ता रूपे मुक्ता वरानने ।
रूपातीते तु ये मुक्तास्ते मुक्ता नाऽत्र संशयः ॥ 170 ॥
गुरुर्ध्यानेनैव नित्यं देही ब्रह्ममयो भवेत् ।
स्थितश्च यत्र कुत्राऽपि मुक्तोऽसौ नाऽत्र संशयः ॥ 171 ॥
ज्ञानं वैराग्यमैश्वर्यं यशश्रीः स्वमुदाहृतम् ।
षड्गुणैश्वर्ययुक्तो हि भगवान् श्रीगुरुः प्रिये ॥ 172 ॥
गुरुश्शिवो गुरुर्देवो गुरुर्बन्धुः शरीरिणाम् ।
गुरुरात्मा गुरुर्जीवो गुरोरन्यन्न विद्यते ॥ 173 ॥
एकाकी निस्स्पृहः शान्तश्चिन्ताऽसूयादिवर्जितः ।
बाल्यभावेन यो भाति ब्रह्मज्ञानी स उच्यते ॥ 174 ॥
न सुखं वेदशास्त्रेषु न सुखं मन्त्रयन्त्रके ।
गुरोः प्रसादादन्यत्र सुखं नास्ति महीतले ॥ 175 ॥
चार्वाकवैष्णवमते सुखं प्राभाकरे न हि ।
गुरोः पादान्तिके यद्वत्सुखं वेदान्तसम्मतम् ॥ 176 ॥
न तत्सुखं सुरेन्द्रस्य न सुखं चक्रवर्तिनाम् ।
यत्सुखं वीतरागस्य मुनेरेकान्तवासिनः ॥ 177 ॥
नित्यं ब्रह्मरसं पीत्वा तृप्तो यः परमात्मनि ।
इन्द्रं च मन्यते तुच्छं नृपाणां तत्र का कथा ॥ 178 ॥
यतः परमकैवल्यं गुरुमार्गेण वै भवेत् ।
गुरुभक्तिरतः कार्या सर्वदा मोक्षकाङ्क्षिभिः ॥ 179 ॥
एक एवाऽद्वितीयोऽहं गुरुवाक्येन निश्चितः ।
एवमभ्यस्यता नित्यं न सेव्यं वै वनान्तरम् ॥ 180 ॥
अभ्यासान्निमिषेणैव समाधिमधिगच्छति ।
आजन्मजनितं पापं तत्क्षणादेव नश्यति ॥ 181 ॥
किमावाहनमव्यक्ते व्यापके किं विसर्जनम् ।
अमूर्ते च कथं पूजा कथं ध्यानं निरामये ॥ 182 ॥
गुरुर्विष्णुः सत्त्वमयो राजसश्चतुराननः ।
तामसो रुद्ररूपेण सृजत्यवति हन्ति च ॥ 183 ॥
स्वयं ब्रह्ममयो भूत्वा तत्परं चावलोकयेत् ।
परात्परतरं नान्यत् सर्वगं तन्निरामयम् ॥ 184 ॥
तस्यावलोकनं प्राप्य सर्वसङ्गविवर्जितः ।
एकाकी निस्स्पृहः शान्तः स्थातव्यं तत्प्रसादतः ॥ 185 ॥
लब्धं वाऽथ न लब्धं वा स्वल्पं वा बहुलं तथा ।
निष्कामेनैव भोक्तव्यं सदा सन्तुष्टमानसः ॥ 186 ॥
सर्वज्ञपदमित्याहुर्देही सर्वमयो भुवि ।
सदाऽऽनन्दः सदा शान्तो रमते यत्र कुत्र चित् ॥ 187 ॥
यत्रैव तिष्ठते सोऽपि स देशः पुण्यभाजनः ।
मुक्तस्य लक्षणं देवि तवाऽग्रे कथितं मया ॥ 188 ॥
उपदेशस्त्वयं देवि गुरुमार्गेण मुक्तिदः ।
गुरुभक्तिः तथाऽत्यन्ता कर्तव्या वै मनीषिभिः ॥ 189 ॥
नित्ययुक्ताश्रयः सर्ववेदकृत्सर्ववेदकृत् ।
स्वपरज्ञानदाता च तं वन्दे गुरुमीश्वरम् ॥ 190 ॥
यद्यप्यधीता निगमाः षडङ्गा आगमाः प्रिये ।
अध्यात्मादीनि शास्त्राणि ज्ञानं नास्ति गुरुं विना ॥ 191 ॥
शिवपूजारतो वाऽपि विष्णुपूजारतोऽथवा ।
गुरुतत्त्वविहीनश्चेत्तत्सर्वं व्यर्थमेव हि ॥ 192 ॥
शिवस्वरूपमज्ञात्वा शिवपूजा कृता यदि ।
सा पूजा नाममात्रं स्याच्चित्रदीप इव प्रिये ॥ 193 ॥
सर्वं स्यात्सफलं कर्म गुरुदीक्षाप्रभावतः ।
गुरुलाभात्सर्वलाभो गुरुहीनस्तु बालिशः ॥ 194 ॥
गुरुहीनः पशुः कीटः पतङ्गो वक्तुमर्हति ।
शिवरूपं स्वरूपं च न जानाति यतस्स्वयम् ॥ 195 ॥
तस्मात्सर्वप्रयत्नेन सर्वसङ्गविवर्जितः ।
विहाय शास्त्रजालानि गुरुमेव समाश्रयेत् ॥ 196 ॥
निरस्तसर्वसन्देहो एकीकृत्य सुदर्शनम् ।
रहस्यं यो दर्शयति भजामि गुरुमीश्वरम् ॥ 197 ॥
ज्ञानहीनो गुरुस्त्याज्यो मिथ्यावादी विडम्बकः ।
स्वविश्रान्तिं न जानाति परशान्तिं करोति किम् ॥ 198 ॥
शिलायाः किं परं ज्ञानं शिलासङ्घप्रतारणे ।
स्वयं तर्तुं न जानाति परं निस्तारयेत् कथम् ॥ 199 ॥
न वन्दनीयास्ते कष्टं दर्शनाद्भ्रान्तिकारकाः ।
वर्जयेत्तान् गुरून् दूरे धीरस्य तु समाश्रयेत् ॥ 200 ॥
पाषण्डिनः पापरताः नास्तिका भेदबुद्धयः ।
स्त्रीलम्पटा दुराचाराः कृतघ्ना बकवृत्तयः ॥ 201 ॥
कर्मभ्रष्टाः क्षमानष्टा निन्द्यतर्कैश्च वादिनः ।
कामिनः क्रोधिनश्चैव हिंस्राश्चण्डाः शठास्तथा ॥ 202 ॥
ज्ञानलुप्ता न कर्तव्या महापापास्तथा प्रिये ।
एभ्यो भिन्नो गुरुः सेव्यः एकभक्त्या विचार्य च ॥ 203 ॥
शिष्यादन्यत्र देवेशि न वदेद्यस्य कस्यचित् ।
नराणां च फलप्राप्तौ भक्तिरेव हि कारणम् ॥ 204 ॥
गूढो दृढश्च प्रीतश्च मौनेन सुसमाहितः ।
सकृत्कामगतो वाऽपि पञ्चधा गुरुरीरितः ॥ 205 ॥
सर्वं गुरुमुखाल्लब्धं सफलं पापनाशनम् ।
यद्यदात्महितं वस्तु तत्तद्द्रव्यं न वञ्चयेत् ॥ 206 ॥
गुरुदेवार्पणं वस्तु तेन तुष्टोऽस्मि सुव्रते ।
श्रीगुरोः पादुकां मुद्रां मूलमन्त्रं च गोपयेत् ॥ 207 ॥
नताऽस्मि ते नाथ पदारविन्दं
बुद्धीन्द्रियप्राणमनोवचोभिः ।
यच्चिन्त्यते भावित आत्मयुक्तौ
मुमुक्षिभिः कर्ममयोपशान्तये ॥ 208 ॥
अनेन यद्भवेत्कार्यं तद्वदामि तव प्रिये ।
लोकोपकारकं देवि लौकिकं तु विवर्जयेत् ॥ 209 ॥
लौकिकाद्धर्मतो याति ज्ञानहीनो भवार्णवे ।
ज्ञानभावे च यत्सर्वं कर्म निष्कर्म शाम्यति ॥ 210 ॥
इमां तु भक्तिभावेन पठेद्वै शृणुयादपि ।
लिखित्वा यत्प्रदानेन तत्सर्वं फलमश्नुते ॥ 211 ॥
गुरुगीतामिमां देवि हृदि नित्यं विभावय ।
महाव्याधिगतैर्दुःखैः सर्वदा प्रजपेन्मुदा ॥ 212 ॥
गुरुगीताक्षरैकैकं मन्त्रराजमिदं प्रिये ।
अन्ये च विविधाः मन्त्राः कलां नार्हन्ति षोडशीम् ॥ 213 ॥
अनन्त फलमाप्नोति गुरुगीता जपेन तु ।
सर्वपापहरा देवि सर्वदारिद्र्यनाशिनी ॥ 214 ॥
अकालमृत्युहरा चैव सर्वसङ्कटनाशिनी ।
यक्षराक्षसभूतादिचोरव्याघ्रविघातिनी ॥ 215 ॥
सर्वोपद्रवकुष्ठादिदुष्टदोषनिवारिणी ।
यत्फलं गुरुसान्निध्यात्तत्फलं पठनाद्भवेत् ॥ 216 ॥
महाव्याधिहरा सर्वविभूतेः सिद्धिदा भवेत् ।
अथवा मोहने वश्ये स्वयमेव जपेत्सदा ॥ 217 ॥
कुशदूर्वासने देवि ह्यासने शुभ्रकम्बले ।
उपविश्य ततो देवि जपेदेकाग्रमानसः ॥ 218 ॥
शुक्लं सर्वत्र वै प्रोक्तं वश्ये रक्तासनं प्रिये ।
पद्मासने जपेन्नित्यं शान्तिवश्यकरं परम् ॥ 219 ॥
वस्त्रासने च दारिद्र्यं पाषाणे रोगसम्भवः ।
मेदिन्यां दुःखमाप्नोति काष्ठे भवति निष्फलम् ॥ 220 ॥
कृष्णाजिने ज्ञानसिद्धिः मोक्षश्रीर्व्याघ्रचर्मणि ।
कुशासने ज्ञानसिद्धिः सर्वसिद्धिस्तु कम्बले ॥ 221 ॥
आग्नेय्यां कर्षणं चैव वायव्यां शत्रुनाशनम् ।
नैरृत्यां दर्शनं चैव ईशान्यां ज्ञानमेव च ॥ 222 ॥
उदङ्मुखः शान्तिजाप्ये वश्ये पूर्वमुखस्तथा ।
याम्ये तु मारणं प्रोक्तं पश्चिमे च धनागमः ॥ 223 ॥
मोहनं सर्वभूतानां बन्धमोक्षकरं परम् ।
देवराजप्रियकरं राजानं वशमानयेत् ॥ 224 ॥
मुखस्तम्भकरं चैव गुणानां च विवर्धनम् ।
दुष्कर्मनाशनं चैव तथा सत्कर्मसिद्धिदम् ॥ 225 ॥
असिद्धं साधयेत्कार्यं नवग्रहभयापहम् ।
दुःस्वप्ननाशनं चैव सुस्वप्नफलदायकम् ॥ 226 ॥
मोहशान्तिकरं चैव बन्धमोक्षकरं परम् ।
स्वरूपज्ञाननिलयं गीताशास्त्रमिदं शिवे ॥ 227 ॥
यं यं चिन्तयते कामं तं तं प्राप्नोति निश्चयम् ।
नित्यं सौभाग्यदं पुण्यं तापत्रयकुलापहम् ॥ 228 ॥
सर्वशान्तिकरं नित्यं तथा वन्ध्या सुपुत्रदम् ।
अवैधव्यकरं स्त्रीणां सौभाग्यस्य विवर्धनम् ॥ 229 ॥
आयुरारोग्यमैश्वर्यं पुत्रपौत्रविवर्धनम् ।
निष्कामजापी विधवा पठेन्मोक्षमवाप्नुयात् ॥ 230 ॥
अवैधव्यं सकामा तु लभते चान्यजन्मनि ।
सर्वदुःखमयं विघ्नं नाशयेत्तापहारकम् ॥ 231 ॥
सर्वपापप्रशमनं धर्मकामार्थमोक्षदम् ।
यं यं चिन्तयते कामं तं तं प्राप्नोति निश्चितम् ॥ 232 ॥
काम्यानां कामधेनुर्वै कल्पते कल्पपादपः ।
चिन्तामणिश्चिन्तितस्य सर्वमङ्गलकारकम् ॥ 233 ॥
लिखित्वा पूजयेद्यस्तु मोक्षश्रियमवाप्नुयात् ।
गुरूभक्तिर्विशेषेण जायते हृदि सर्वदा ॥ 234 ॥
जपन्ति शाक्ताः सौराश्च गाणपत्याश्च वैष्णवाः ।
शैवाः पाशुपताः सर्वे सत्यं सत्यं न संशयः ॥ 235 ॥
इति श्रीस्कन्दपुराणे उत्तरखण्डे उमामहेश्वर संवादे
श्री गुरुगीतायां द्वितीयोऽध्यायः ॥
atha dvitīyo'dhyāyaḥ ||
dhyānaṃ śruṇu mahādevi sarvānandapradāyakam |
sarvasaukhyakaraṃ caiva bhuktimuktipradāyakam || 109 ||
śrīmatparaṃ brahma guruṃ smarāmi
śrīmatparaṃ brahma guruṃ bhajāmi |
śrīmatparaṃ brahma guruṃ vadāmi
śrīmatparaṃ brahma guruṃ namāmi || 110 ||
brahmānandaṃ paramasukhadaṃ kevalaṃ jñānamūrtiṃ
dvandvātītaṃ gaganasadṛśaṃ tattvamasyādilakṣyam |
ekaṃ nityaṃ vimalamacalaṃ sarvadhīsākṣibhūtaṃ
bhāvātītaṃ triguṇarahitaṃ sadguruṃ taṃ namāmi || 111 ||
hṛdambuje karṇikamadhyasaṃsthe
siṃhāsane saṃsthitadivyamūrtim |
dhyāyedguruṃ candrakalāprakāśaṃ
saccitsukhābhīṣṭavaraṃ dadhānam || 112 ||
śvetāmbaraṃ śvetavilepapuṣpaṃ
muktāvibhūṣaṃ muditaṃ dvinetram |
vāmāṅkapīṭhasthitadivyaśaktiṃ
mandasmitaṃ pūrṇakṛpānidhānam || 113 ||
ānandamānandakaraṃ prasannaṃ
jñānasvarūpaṃ nijabhāvayuktam |
yogīndramīḍyaṃ bhavarogavaidyaṃ
śrīmadguruṃ nityamahaṃ namāmi || 114 ||
vande gurūṇāṃ caraṇāravindaṃ
sandarśitasvātmasukhāvabodhe |
janasya ye jāṅgalikāyamāne
saṃsārahālāhalamohaśāntyai || 115 ||
yasmin sṛṣṭisthitidhvaṃsanigrahānugrahātmakam |
kṛtyaṃ pañcavidhaṃ śaśvat bhāsate taṃ guruṃ bhajet || 116 ||
pādābje sarvasaṃsāradāvakālānalaṃ svake |
brahmarandhre sthitāmbhojamadhyasthaṃ candramaṇḍalam || 117 ||
akathāditrirekhābje sahasradalamaṇḍale |
haṃsapārśvatrikoṇe ca smarettanmadhyagaṃ gurum || 118 ||
nityaṃ śuddhaṃ nirābhāsaṃ nirākāraṃ nirañjanam |
nityabodhaṃ cidānandaṃ guruṃ brahma namāmyaham || 119 ||
sakalabhuvanasṛṣṭiḥ kalpitāśeṣasṛṣṭiḥ
nikhilanigamadṛṣṭiḥ satpadārthaikasṛṣṭiḥ |
atadgaṇaparameṣṭiḥ satpadārthaikadṛṣṭiḥ
bhavaguṇaparameṣṭirmokṣamārgaikadṛṣṭiḥ || 120 ||
sakalabhuvanaraṅgasthāpanāstambhayaṣṭiḥ
sakaruṇarasavṛṣṭistattvamālāsamaṣṭiḥ |
sakalasamayasṛṣṭissaccidānandadṛṣṭiḥ
nivasatu mayi nityaṃ śrīgurordivyadṛṣṭiḥ || 121 ||
na guroradhikaṃ na guroradhikaṃ
na guroradhikaṃ na guroradhikam |
śivaśāsanataḥ śivaśāsanataḥ
śivaśāsanataḥ śivaśāsanataḥ || 122 ||
idameva śivaṃ idameva śivaṃ
idameva śivaṃ idameva śivam |
hariśāsanato hariśāsanato
hariśāsanato hariśāsanataḥ || 123 ||
viditaṃ viditaṃ viditaṃ viditaṃ
vijanaṃ vijanaṃ vijanaṃ vijanam |
vidhiśāsanato vidhiśāsanato
vidhiśāsanato vidhiśāsanataḥ || 124 ||
evaṃvidhaṃ guruṃ dhyātvā jñānamutpadyate svayam |
tadā gurūpadeśena mukto'hamiti bhāvayet || 125 ||
gurūpadiṣṭamārgeṇa manaśśuddhiṃ tu kārayet |
anityaṃ khaṇḍayetsarvaṃ yatkiñcidātmagocaram || 126 ||
jñeyaṃ sarvaṃ pratītaṃ ca jñānaṃ ca mana ucyate |
jñānaṃ jñeyaṃ samaṃ kuryānnānyaḥ panthā dvitīyakaḥ || 127 ||
kimatra bahunoktena śāstrakoṭiśatairapi |
durlabhā cittaviśrāntiḥ vinā gurukṛpāṃ parām || 128 ||
karuṇākhaḍgapātena chitvā pāśāṣṭakaṃ śiśoḥ |
samyagānandajanakaḥ sadguruḥ so'bhidhīyate || 129 ||
evaṃ śrutvā mahādevi gurunindāṃ karoti yaḥ |
sa yāti narakān ghorān yāvaccandradivākarau || 130 ||
yāvatkalpāntako dehastāvaddevi guruṃ smaret |
gurulopo na kartavyaḥ svacchando yadi vā bhavet || 131 ||
huṅkāreṇa na vaktavyaṃ prājñaśiṣyaiḥ kadācana |
guroragra na vaktavyamasatyaṃ tu kadācana || 132 ||
guruṃ tvaṅkṛtya huṅkṛtya gurusānnidhyabhāṣaṇaḥ |
araṇye nirjale deśe sambhaved brahmarākṣasaḥ || 133 ||
advaitaṃ bhāvayennityaṃ sarvāvasthāsu sarvadā |
kadācidapi no kuryādadvaitaṃ gurusannidhau || 134 ||
dṛśyavismṛtiparyantaṃ kuryād gurupadārcanam |
tādṛśasyaiva kaivalyaṃ na ca tadvyatirekiṇaḥ || 135 ||
api sampūrṇatattvajño gurutyāgī bhavedyadā |
bhavatyeva hi tasyāntakāle vikṣepamutkaṭam || 136 ||
gurukāryaṃ na laṅgheta nāpṛṣṭvā kāryamācaret |
na hyuttiṣṭheddiśe'natvā gurusadbhāvaśobhitaḥ || 137 ||
gurau sati svayaṃ devi pareṣāṃ tu kadācana |
upadeśaṃ na vai kuryāt tathā cedrākṣaso bhavet || 138 ||
na gurorāśrame kuryāt duṣpānaṃ parisarpaṇam |
dīkṣā vyākhyā prabhutvādi gurorājñāṃ na kārayet || 139 ||
nopāśrayaṃ ca paryakaṃ na ca pādaprasāraṇam |
nāṅgabhogādikaṃ kuryānna līlāmaparāmapi || 140 ||
gurūṇāṃ sadasadvā'pi yaduktaṃ tanna laṅghayet |
kurvannājñāṃ divā rātrau dāsavannivasedguro || 141 ||
adattaṃ na gurordravyamupabhuñjīta karhicit |
datte ca raṅkavadgrāhyaṃ prāṇo'pyetena labhyate || 142 ||
pādukāsanaśayyādi guruṇā yadabhīṣṭitam |
namaskurvīta tatsarvaṃ pādābhyāṃ na spṛśet kvacit || 143 ||
gacchataḥ pṛṣṭhato gacchet gurucchāyāṃ na laṅghayet |
nolbaṇaṃ dhārayedveṣaṃ nālaṅkārāṃstatolbaṇān || 144 ||
gurunindākaraṃ dṛṣṭvā dhāvayedatha vāsayet |
sthānaṃ vā tatparityājyaṃ jihvācchedākṣamo yadi || 145 ||
nocchiṣṭaṃ kasyaciddeyaṃ gurorājñāṃ na ca tyajet |
kṛtsnamucchiṣṭamādāya haviriva bhakṣayetsvayam || 146 ||
nā'nṛtaṃ nā'priyaṃ caiva na garvaṃ nā'pi vā bahu |
na niyogaparaṃ brūyāt gurorājñāṃ vibhāvayet || 147 ||
prabho devakuleśānāṃ svāmin rājan kuleśvara |
iti sambodhanairbhīto gurubhāvena sarvadā || 148 ||
munibhiḥ pannagairvāpi surairvā śāpito yadi |
kālamṛtyubhayādvāpi guruḥ santrāti pārvati || 149 ||
aśaktā hi surādyāśca hyaśaktāḥ munayastathā |
guruśāpopapannasya rakṣaṇāya ca kutracit || 150 ||
mantrarājamidaṃ devi gururityakṣaradvayam |
smṛtivedapurāṇānāṃ sārameva na saṃśayaḥ || 151 ||
satkāramānapūjārthaṃ daṇḍakāṣayadhāraṇaḥ |
sa sannyāsī na vaktavyaḥ sannyāsī jñānatatparaḥ || 152 ||
vijānanti mahāvākyaṃ guroścaraṇa sevayā |
te vai sannyāsinaḥ proktā itare veṣadhāriṇaḥ || 153 ||
[pāṭhabhedaḥ –
nityaṃ brahma nirākāraṃ nirguṇaṃ bodhayetparam |
bhāsayan brahmabhāvaṃ ca dīpo dīpāntaraṃ yathā ||
]
nityaṃ brahma nirākāraṃ nirguṇaṃ satyaciddhanam |
yaḥ sākṣātkurute loke gurutvaṃ tasya śobhate || 154 ||
guruprasādataḥ svātmanyātmārāmanirīkṣaṇāt |
samatā muktimārgeṇa svātmajñānaṃ pravartate || 155 ||
ābrahmastambaparyantaṃ paramātmasvarūpakam |
sthāvaraṃ jaṅgamaṃ caiva praṇamāmi jaganmayam || 156 ||
vande'haṃ saccidānandaṃ bhāvātītaṃ jagadgurum |
nityaṃ pūrṇaṃ nirākāraṃ nirguṇaṃ svātmasaṃsthitam || 157 ||
parātparataraṃ dhyāyennityamānandakārakam |
hṛdayākāśamadhyasthaṃ śuddhasphaṭikasannibham || 158 ||
sphāṭike sphāṭikaṃ rūpaṃ darpaṇe darpaṇo yathā |
tathā''tmani cidākāramānandaṃ so'hamityuta || 159 ||
aṅguṣṭhamātraṃ puruṣaṃ dhyāyecca cinmayaṃ hṛdi |
tatra sphurati yo bhāvaḥ śṛṇu tatkathayāmi te || 160 ||
ajo'hamamaro'haṃ ca anādinidhano hyaham |
avikāraścidānando hyaṇīyānmahato mahān || 161 ||
apūrvamaparaṃ nityaṃ svayañjyotirnirāmayam |
virajaṃ paramākāśaṃ dhruvamānandamavyayam || 162 ||
agocaraṃ tathā'gamyaṃ nāmarūpavivarjitam |
niśśabdaṃ tu vijānīyātsvabhāvādbrahma pārvati || 163 ||
yathā gandhasvabhāvatvaṃ karpūrakusumādiṣu |
śītoṣṇatvasvabhāvatvaṃ tathā brahmaṇi śāśvatam || 164 ||
yathā nijasvabhāvena kuṇḍale kaṭakādayaḥ |
suvarṇatvena tiṣṭhanti tathā'haṃ brahma śāśvatam || 165 ||
svayaṃ tathāvidho bhūtvā sthātavyaṃ yatra kutra cit |
kīṭo bhṛṅga iva dhyānādyathā bhavati tādṛśaḥ || 166 ||
gurudhyānaṃ tathā kṛtvā svayaṃ brahmamayo bhavet |
piṇḍe pade tathā rūpe muktāste nātra saṃśayaḥ || 167 ||
śrīpārvatī uvāca |
piṇḍaṃ kiṃ tu mahādeva padaṃ kiṃ samudāhṛtam |
rūpātītaṃ ca rūpaṃ kiṃ etadākhyāhi śaṅkara || 168 ||
śrīmahādeva uvāca |
piṇḍaṃ kuṇḍalinī śaktiḥ padaṃ haṃsamudāhṛtam |
rūpaṃ binduriti jñeyaṃ rūpātītaṃ nirañjanam || 169 ||
piṇḍe muktāḥ pade muktā rūpe muktā varānane |
rūpātīte tu ye muktāste muktā nā'tra saṃśayaḥ || 170 ||
gururdhyānenaiva nityaṃ dehī brahmamayo bhavet |
sthitaśca yatra kutrā'pi mukto'sau nā'tra saṃśayaḥ || 171 ||
jñānaṃ vairāgyamaiśvaryaṃ yaśaśrīḥ svamudāhṛtam |
ṣaḍguṇaiśvaryayukto hi bhagavān śrīguruḥ priye || 172 ||
guruśśivo gururdevo gururbandhuḥ śarīriṇām |
gururātmā gururjīvo guroranyanna vidyate || 173 ||
ekākī nisspṛhaḥ śāntaścintā'sūyādivarjitaḥ |
bālyabhāvena yo bhāti brahmajñānī sa ucyate || 174 ||
na sukhaṃ vedaśāstreṣu na sukhaṃ mantrayantrake |
guroḥ prasādādanyatra sukhaṃ nāsti mahītale || 175 ||
cārvākavaiṣṇavamate sukhaṃ prābhākare na hi |
guroḥ pādāntike yadvatsukhaṃ vedāntasammatam || 176 ||
na tatsukhaṃ surendrasya na sukhaṃ cakravartinām |
yatsukhaṃ vītarāgasya munerekāntavāsinaḥ || 177 ||
nityaṃ brahmarasaṃ pītvā tṛpto yaḥ paramātmani |
indraṃ ca manyate tucchaṃ nṛpāṇāṃ tatra kā kathā || 178 ||
yataḥ paramakaivalyaṃ gurumārgeṇa vai bhavet |
gurubhaktirataḥ kāryā sarvadā mokṣakāṅkṣibhiḥ || 179 ||
eka evā'dvitīyo'haṃ guruvākyena niścitaḥ |
evamabhyasyatā nityaṃ na sevyaṃ vai vanāntaram || 180 ||
abhyāsānnimiṣeṇaiva samādhimadhigacchati |
ājanmajanitaṃ pāpaṃ tatkṣaṇādeva naśyati || 181 ||
kimāvāhanamavyakte vyāpake kiṃ visarjanam |
amūrte ca kathaṃ pūjā kathaṃ dhyānaṃ nirāmaye || 182 ||
gururviṣṇuḥ sattvamayo rājasaścaturānanaḥ |
tāmaso rudrarūpeṇa sṛjatyavati hanti ca || 183 ||
svayaṃ brahmamayo bhūtvā tatparaṃ cāvalokayet |
parātparataraṃ nānyat sarvagaṃ tannirāmayam || 184 ||
tasyāvalokanaṃ prāpya sarvasaṅgavivarjitaḥ |
ekākī nisspṛhaḥ śāntaḥ sthātavyaṃ tatprasādataḥ || 185 ||
labdhaṃ vā'tha na labdhaṃ vā svalpaṃ vā bahulaṃ tathā |
niṣkāmenaiva bhoktavyaṃ sadā santuṣṭamānasaḥ || 186 ||
sarvajñapadamityāhurdehī sarvamayo bhuvi |
sadā''nandaḥ sadā śānto ramate yatra kutra cit || 187 ||
yatraiva tiṣṭhate so'pi sa deśaḥ puṇyabhājanaḥ |
muktasya lakṣaṇaṃ devi tavā'gre kathitaṃ mayā || 188 ||
upadeśastvayaṃ devi gurumārgeṇa muktidaḥ |
gurubhaktiḥ tathā'tyantā kartavyā vai manīṣibhiḥ || 189 ||
nityayuktāśrayaḥ sarvavedakṛtsarvavedakṛt |
svaparajñānadātā ca taṃ vande gurumīśvaram || 190 ||
yadyapyadhītā nigamāḥ ṣaḍaṅgā āgamāḥ priye |
adhyātmādīni śāstrāṇi jñānaṃ nāsti guruṃ vinā || 191 ||
śivapūjārato vā'pi viṣṇupūjārato'thavā |
gurutattvavihīnaścettatsarvaṃ vyarthameva hi || 192 ||
śivasvarūpamajñātvā śivapūjā kṛtā yadi |
sā pūjā nāmamātraṃ syāccitradīpa iva priye || 193 ||
sarvaṃ syātsaphalaṃ karma gurudīkṣāprabhāvataḥ |
gurulābhātsarvalābho guruhīnastu bāliśaḥ || 194 ||
guruhīnaḥ paśuḥ kīṭaḥ pataṅgo vaktumarhati |
śivarūpaṃ svarūpaṃ ca na jānāti yatassvayam || 195 ||
tasmātsarvaprayatnena sarvasaṅgavivarjitaḥ |
vihāya śāstrajālāni gurumeva samāśrayet || 196 ||
nirastasarvasandeho ekīkṛtya sudarśanam |
rahasyaṃ yo darśayati bhajāmi gurumīśvaram || 197 ||
jñānahīno gurustyājyo mithyāvādī viḍambakaḥ |
svaviśrāntiṃ na jānāti paraśāntiṃ karoti kim || 198 ||
śilāyāḥ kiṃ paraṃ jñānaṃ śilāsaṅghapratāraṇe |
svayaṃ tartuṃ na jānāti paraṃ nistārayet katham || 199 ||
na vandanīyāste kaṣṭaṃ darśanādbhrāntikārakāḥ |
varjayettān gurūn dūre dhīrasya tu samāśrayet || 200 ||
pāṣaṇḍinaḥ pāparatāḥ nāstikā bhedabuddhayaḥ |
strīlampaṭā durācārāḥ kṛtaghnā bakavṛttayaḥ || 201 ||
karmabhraṣṭāḥ kṣamānaṣṭā nindyatarkaiśca vādinaḥ |
kāminaḥ krodhinaścaiva hiṃsrāścaṇḍāḥ śaṭhāstathā || 202 ||
jñānaluptā na kartavyā mahāpāpāstathā priye |
ebhyo bhinno guruḥ sevyaḥ ekabhaktyā vicārya ca || 203 ||
śiṣyādanyatra deveśi na vadedyasya kasyacit |
narāṇāṃ ca phalaprāptau bhaktireva hi kāraṇam || 204 ||
gūḍho dṛḍhaśca prītaśca maunena susamāhitaḥ |
sakṛtkāmagato vā'pi pañcadhā gururīritaḥ || 205 ||
sarvaṃ gurumukhāllabdhaṃ saphalaṃ pāpanāśanam |
yadyadātmahitaṃ vastu tattaddravyaṃ na vañcayet || 206 ||
gurudevārpaṇaṃ vastu tena tuṣṭo'smi suvrate |
śrīguroḥ pādukāṃ mudrāṃ mūlamantraṃ ca gopayet || 207 ||
natā'smi te nātha padāravindaṃ
buddhīndriyaprāṇamanovacobhiḥ |
yaccintyate bhāvita ātmayuktau
mumukṣibhiḥ karmamayopaśāntaye || 208 ||
anena yadbhavetkāryaṃ tadvadāmi tava priye |
lokopakārakaṃ devi laukikaṃ tu vivarjayet || 209 ||
laukikāddharmato yāti jñānahīno bhavārṇave |
jñānabhāve ca yatsarvaṃ karma niṣkarma śāmyati || 210 ||
imāṃ tu bhaktibhāvena paṭhedvai śṛṇuyādapi |
likhitvā yatpradānena tatsarvaṃ phalamaśnute || 211 ||
gurugītāmimāṃ devi hṛdi nityaṃ vibhāvaya |
mahāvyādhigatairduḥkhaiḥ sarvadā prajapenmudā || 212 ||
gurugītākṣaraikaikaṃ mantrarājamidaṃ priye |
anye ca vividhāḥ mantrāḥ kalāṃ nārhanti ṣoḍaśīm || 213 ||
ananta phalamāpnoti gurugītā japena tu |
sarvapāpaharā devi sarvadāridryanāśinī || 214 ||
akālamṛtyuharā caiva sarvasaṅkaṭanāśinī |
yakṣarākṣasabhūtādicoravyāghravighātinī || 215 ||
sarvopadravakuṣṭhādiduṣṭadoṣanivāriṇī |
yatphalaṃ gurusānnidhyāttatphalaṃ paṭhanādbhavet || 216 ||
mahāvyādhiharā sarvavibhūteḥ siddhidā bhavet |
athavā mohane vaśye svayameva japetsadā || 217 ||
kuśadūrvāsane devi hyāsane śubhrakambale |
upaviśya tato devi japedekāgramānasaḥ || 218 ||
śuklaṃ sarvatra vai proktaṃ vaśye raktāsanaṃ priye |
padmāsane japennityaṃ śāntivaśyakaraṃ param || 219 ||
vastrāsane ca dāridryaṃ pāṣāṇe rogasambhavaḥ |
medinyāṃ duḥkhamāpnoti kāṣṭhe bhavati niṣphalam || 220 ||
kṛṣṇājine jñānasiddhiḥ mokṣaśrīrvyāghracarmaṇi |
kuśāsane jñānasiddhiḥ sarvasiddhistu kambale || 221 ||
āgneyyāṃ karṣaṇaṃ caiva vāyavyāṃ śatrunāśanam |
nairṛtyāṃ darśanaṃ caiva īśānyāṃ jñānameva ca || 222 ||
udaṅmukhaḥ śāntijāpye vaśye pūrvamukhastathā |
yāmye tu māraṇaṃ proktaṃ paścime ca dhanāgamaḥ || 223 ||
mohanaṃ sarvabhūtānāṃ bandhamokṣakaraṃ param |
devarājapriyakaraṃ rājānaṃ vaśamānayet || 224 ||
mukhastambhakaraṃ caiva guṇānāṃ ca vivardhanam |
duṣkarmanāśanaṃ caiva tathā satkarmasiddhidam || 225 ||
asiddhaṃ sādhayetkāryaṃ navagrahabhayāpaham |
duḥsvapnanāśanaṃ caiva susvapnaphaladāyakam || 226 ||
mohaśāntikaraṃ caiva bandhamokṣakaraṃ param |
svarūpajñānanilayaṃ gītāśāstramidaṃ śive || 227 ||
yaṃ yaṃ cintayate kāmaṃ taṃ taṃ prāpnoti niścayam |
nityaṃ saubhāgyadaṃ puṇyaṃ tāpatrayakulāpaham || 228 ||
sarvaśāntikaraṃ nityaṃ tathā vandhyā suputradam |
avaidhavyakaraṃ strīṇāṃ saubhāgyasya vivardhanam || 229 ||
āyurārogyamaiśvaryaṃ putrapautravivardhanam |
niṣkāmajāpī vidhavā paṭhenmokṣamavāpnuyāt || 230 ||
avaidhavyaṃ sakāmā tu labhate cānyajanmani |
sarvaduḥkhamayaṃ vighnaṃ nāśayettāpahārakam || 231 ||
sarvapāpapraśamanaṃ dharmakāmārthamokṣadam |
yaṃ yaṃ cintayate kāmaṃ taṃ taṃ prāpnoti niścitam || 232 ||
kāmyānāṃ kāmadhenurvai kalpate kalpapādapaḥ |
cintāmaṇiścintitasya sarvamaṅgalakārakam || 233 ||
likhitvā pūjayedyastu mokṣaśriyamavāpnuyāt |
gurūbhaktirviśeṣeṇa jāyate hṛdi sarvadā || 234 ||
japanti śāktāḥ saurāśca gāṇapatyāśca vaiṣṇavāḥ |
śaivāḥ pāśupatāḥ sarve satyaṃ satyaṃ na saṃśayaḥ || 235 ||
iti śrīskandapurāṇe uttarakhaṇḍe umāmaheśvara saṃvāde
śrī gurugītāyāṃ dvitīyo'dhyāyaḥ ||
🕉️ This is the original Sanskrit rendered in Grantha script.
Pronunciation is identical to the Sanskrit Devanagari version.