కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే పఞ్చమః ప్రపాఠకః - ఇష్టిహౌత్రమ్
ఓ-న్నమః పరమాత్మనే, శ్రీ మహాగణపతయే నమః,
శ్రీ గురుభ్యో నమః । హ॒రిః॒ ఓమ్ ॥
అనువాకం 1 - హోతుర్జపః పురస్తా-థ్సామిధేనీనామ్
స॒త్య-మ్ప్రప॑ద్యే । ఋ॒త-మ్ప్రప॑ద్యే ।
అ॒మృత॒-మ్ప్రప॑ద్యే ।
ప్ర॒జాప॑తేః ప్రి॒యా-న్త॒నువ॒మనా᳚ర్తా॒-మ్ప్రప॑ద్యే ।
ఇ॒దమ॒హ-మ్ప॑ఞ్చద॒శేన॒ వజ్రే॑ణ ।
ద్వి॒షన్త॒-మ్భ్రాతృ॑వ్య॒మవ॑క్రామామి ।
యో᳚-ఽస్మా-న్ద్వేష్టి॑ । య-ఞ్చ॑ వ॒య-న్ద్వి॒ష్మః ।
భూర్భువ॒-స్సువః॑ । హిమ్ ॥ 1 ॥
(స॒త్య-న్దశ॑) (అ. 1)
అనువాకం 2 - సామిధేనీమ్రన్వాహ
ప్ర వో॒ వాజా॑ అ॒భిద్య॑వః । హ॒విష్మ॑న్తో ఘృ॒తాచ్యా᳚ ।
దే॒వాఞ్జి॑గాతి సుమ్న॒యుః ॥ అగ్న॒ ఆయా॑హి వీ॒తయే᳚ । గృ॒ణా॒నో హ॒వ్యదా॑తయే । ని హోతా॑ సథ్సి బ॒ర॒ఃఇషి॑ ॥ త-న్త్వా॑ స॒మిద్భి॑రఙ్గిరః । ఘృ॒తేన॑ వర్ధయామసి । బృ॒హచ్ఛో॑చా యవిష్ఠ్య ॥ స నః॑ పృ॒థు శ్ర॒వాయ్య᳚మ్ ॥ 2 ॥
అచ్ఛా॑ దేవ వివాససి । బృ॒హద॑గ్నే సు॒వీర్య᳚మ్ ॥
ఈ॒డేన్యో॑ నమ॒స్య॑స్తి॒రః । తమాగ్ం॑సి దర్శ॒తః । సమ॒గ్నిరి॑ద్ధ్యతే॒ వృషా᳚ ॥ వృషో॑ అ॒గ్ని-స్సమి॑ద్ధ్యతే । అశ్వో॒ న దే॑వ॒వాహ॑నః ।
తగ్ం హ॒విష్మ॑న్త ఈడతే ॥ వృష॑ణ-న్త్వా వ॒యం-వృఁషన్న్॑ । వృషా॑ణ॒-స్సమి॑ధీమహి ॥ 3 ॥
అగ్నే॒ దీద్య॑త-మ్బృ॒హత్ ॥ అ॒గ్ని-న్దూ॒తం-వృఁ॑ణీమహే ।
హోతా॑రం-విఁ॒శ్వవే॑దసమ్ । అ॒స్య య॒జ్ఞస్య॑ సు॒క్రతు᳚మ్ ॥ స॒మి॒ద్ధ్యమా॑నో అద్ధ్వ॒రే । అ॒గ్నిః పా॑వ॒క ఈడ్యః॑ । శో॒చిష్కే॑శ॒స్తమీ॑మహే ॥ సమి॑ద్ధో అగ్న ఆహుత । దే॒వాన్. య॑క్షి స్వద్ధ్వర । త్వగ్ం హి హ॑వ్య॒వాడసి॑ ॥
ఆజు॑హోత దువ॒స్యత॑ । అ॒గ్ని-మ్ప్ర॑య॒త్య॑ద్ధ్వ॒రే ।
వృ॒ణీ॒ద్ధ్వగ్ం హ॑వ్య॒వాహ॑నమ్ ॥
త్వం-వఁరు॑ణ ఉ॒త మి॒త్రో అ॑గ్నే । త్వాం-వఁ॑ర్ధన్తి మ॒తిభి॒ర్వసి॑ష్ఠాః । త్వే వసు॑ సుషణ॒నాని॑ సన్తు । యూ॒య-మ్పా॑త స్వ॒స్తిభి॒-స్సదా॑ నః ॥ 4 ॥
(శ్ర॒వాయ్య॑ - మిధీమ॒ - హ్యసి॑ స॒ప్త చ॑) (అ. 2)
అనువాకం 3 - ప్రరముక్త్వా నివిదో-ఽనూచ్య దేవతా ఆవాహయతి
అగ్నే॑ మ॒హాగ్ం అ॑సి బ్రాహ్మణ భారత । అసా॒వసౌ᳚ ॥
దే॒వేద్ధో॒ మన్వి॑ద్ధః । ఋషి॑ష్టుతో॒ విప్రా॑నుమదితః । క॒వి॒శ॒స్తో బ్రహ్మ॑సగ్ంశితో ఘృ॒తాహ॑వనః ।
ప్ర॒ణీ-ర్య॒జ్ఞానా᳚మ్ । ర॒థీర॑ద్ధ్వ॒రాణా᳚మ్ ।
అ॒తూర్తో॒ హోతా᳚ । తూర్ణి॑ర్హవ్య॒వాట్ ।
ఆస్పాత్ర॑-ఞ్జు॒హూ-ర్దే॒వానా᳚మ్ ॥ 5 ॥
చ॒మ॒సో దే॑వ॒పానః॑ । అ॒రాగ్ం ఇ॑వాగ్నే నే॒మిర్దే॒వాగ్స్త్వ-మ్ప॑రి॒భూర॑సి । ఆవ॑హ దే॒వాన్. యజ॑మానాయ ॥ అ॒గ్నిమ॑గ్న॒ ఆవ॑హ । సోమ॒మావ॑హ ।
అ॒గ్నిమావ॑హ । ప్ర॒జాప॑తి॒మావ॑హ । అ॒గ్నీషోమా॒వావ॑హ । ఇ॒న్ద్రా॒గ్నీ ఆవ॑హ । ఇన్ద్ర॒మావ॑హ । మ॒హే॒న్ద్రమావ॑హ । దే॒వాగ్ం ఆ᳚జ్య॒పాగ్ం ఆవ॑హ ।
అ॒గ్నిగ్ం హో॒త్రాయావ॑హ । స్వ-మ్మ॑హి॒మాన॒మావ॑హ । ఆ చా᳚గ్నే దే॒వాన్. వహ॑ । సు॒యజా॑ చ యజ జాతవేదః ॥ 6 ॥
(దే॒వానా॒-మిన్ద్ర॒మావ॑హ॒ షట్చ॑) (అ. 3)
అనువాకం 4 - స్రుచావాదాపయతి
అ॒గ్నిర్-హోతా॒ వేత్వ॒గ్నిః । హో॒త్రం-వేఁ᳚త్తు ప్రావి॒త్రమ్ । స్మో వ॒యమ్ । సా॒ధు తే॑ యజమాన దే॒వతా᳚ । ఘృ॒తవ॑తీ-మద్ధ్వర్యో॒ స్రుచ॒మా-ఽస్య॑స్వ । దే॒వా॒యువం॑-విఁ॒శ్వవా॑రామ్ । ఈడా॑మహై దే॒వాగ్ం ఈ॒డేన్యాన్॑ ।
న॒మ॒స్యామ॑ నమ॒స్యాన్॑ । యజా॑మ య॒జ్ఞియాన్॑ ॥ 7 ॥
(అ॒గ్నిర్-హోతా॒ నవ॑) (అ. 4)
అనువాకం 5 - ప్రయాజాః
స॒మిధో॑ అగ్న॒ ఆజ్య॑స్య వియన్తు । తనూ॒నపా॑దగ్న॒ ఆజ్య॑స్య వేతు । ఇ॒డో అ॑గ్న॒ ఆజ్య॑స్య వియన్తు । బ॒ర్॒హిర॑గ్న॒ ఆజ్య॑స్య వేతు । స్వాహా॒-ఽగ్నిమ్ । స్వాహా॒ సోమ᳚మ్ । స్వాహా॒-ఽగ్నిమ్ । స్వాహా᳚ ప్ర॒జాప॑తిమ్ ।
స్వాహా॒-ఽగ్నీషోమౌ᳚ । స్వాహే᳚న్ద్రా॒గ్నీ । స్వాహేన్ద్ర᳚మ్ ।
స్వాహా॑ మహే॒న్ద్రమ్ । స్వాహా॑ దే॒వాగ్ం ఆ᳚జ్య॒పాన్ । స్వాహా॒-ఽగ్నిగ్ం హో॒త్రాజ్జు॑షా॒ణాః ।
అగ్న॒ ఆజ్య॑స్య వియన్తు ॥ 8 ॥
(ఇ॒న్ద్రా॒గ్నీ పఞ్చ॑ చ) (అ. 5)
అనువాకం 6 - అజ్యభాగయోః పురోనువాక్యే
అ॒గ్ని-ర్వృ॒త్రాణి॑ జఙ్ఘనత్ । ద్ర॒వి॒ణ॒స్యు-ర్వి॑ప॒న్యయా᳚ ।
సమి॑ద్ధ-శ్శు॒క్ర ఆహు॑తః । జు॒షా॒ణో అ॒గ్నిరాజ్య॑స్య వేతు । త్వగ్ం సో॑మాసి॒ సత్ప॑తిః । త్వగ్ం రాజో॒త వృ॑త్ర॒హా ।
త్వ-మ్భ॒ద్రో అ॑సి॒ క్రతుః॑ । జు॒షా॒ణ-స్సోమ॒ ఆజ్య॑స్య హ॒విషో॑ వేతు । అ॒గ్నిః ప్ర॒త్నేన॒ జన్మ॑నా । శుమ్భా॑నస్త॒నువ॒గ్గ్॒ స్వామ్ ।
క॒వి-ర్విప్రే॑ణ వావృధే । జు॒షా॒ణో అ॒గ్నిరాజ్య॑స్య వేతు ।
సోమ॑ గీ॒ర్భిష్ట్వా॑ వ॒యమ్ । వ॒ర్ధయా॑మో వచో॒విదః॑ । సు॒మృ॒డీ॒కో న॒ ఆవి॑శ ।
జు॒షా॒ణ-స్సోమ॒ ఆజ్య॑స్య హ॒విషో॑ వేతు ॥ 9 ॥
(స్వాగ్ం షట్చ॑) (అ. 6)
అనువాకం 7 - హవిషాం-యాఁజ్యానువాక్యాః
అ॒గ్ని-ర్మూ॒ర్ధా ది॒వః క॒కుత్ । పతిః॑ పృథి॒వ్యా అ॒యమ్ ।
అ॒పాగ్ం రేతాగ్ం॑సి జిన్వతి । భువో॑ య॒జ్ఞస్య॒ రజ॑సశ్చ నే॒తా । యత్రా॑ ని॒యుద్భి॒-స్సచ॑సే శి॒వాభిః॑ । ది॒వి మూ॒ర్ధాన॑-న్దధిషే సువ॒ర్॒షామ్ ।
జి॒హ్వామ॑గ్నే చకృషే హవ్య॒వాహ᳚మ్ । ప్రజా॑పతే॒ న త్వదే॒తాన్య॒న్యః । విశ్వా॑ జా॒తాని॒ పరి॒ తా బ॑భూవ ।
యత్-కా॑మాస్తే జుహు॒మస్తన్నో॑ అస్తు ॥ 10 ॥
వ॒యగ్గ్ స్యా॑మ॒ పత॑యో రయీ॒ణామ్ । స వే॑ద పు॒త్రః పి॒తర॒గ్ం॒ స మా॒తర᳚మ్ । స సూ॒నుర్భు॑వ॒థ్స భు॑వ॒త్పున॑ర్మఘః । స ద్యామౌర్ణో॑ద॒న్తరి॑క్ష॒గ్ం॒ స సువః॑ । స విశ్వా॒ భువో॑ అభవ॒థ్స ఆ-ఽభ॑వత్ । అగ్నీ॑షోమా॒ సవే॑దసా । సహూ॑తీ వనత॒-ఙ్గిరః॑ । స-న్దే॑వ॒త్రా బ॑భూవథుః । యు॒వమే॒తాని॑ ది॒వి రో॑చ॒నాని॑ ।
అ॒గ్నిశ్చ॑ సోమ॒ సక్ర॑తూ అధత్తమ్ ॥ 11 ॥
యు॒వగ్ం సిన్ధూగ్ం॑ ర॒భిశ॑స్తే-రవ॒ద్యాత్ । అగ్నీ॑షోమా॒-వము॑ఞ్చత-ఙ్గృభీ॒తాన్ ।
ఇన్ద్రా᳚గ్నీ రోచ॒నా ది॒వః । పరి॒ వాజే॑షు భూషథః ।
తద్వా᳚-ఞ్చేతి॒ ప్రవీ॒ర్య᳚మ్ । శ్నథ॑ద్వృ॒త్రము॒త స॑నోతి॒ వాజ᳚మ్ । ఇన్ద్రా॒ యో అ॒గ్నీ సహు॑రీ సప॒ర్యాత్ ।
ఇ॒ర॒జ్యన్తా॑ వస॒వ్య॑స్య॒ భూరేః᳚ । సహ॑స్తమా॒ సహ॑సా వాజ॒యన్తా᳚ । ఏన్ద్ర॑ సాన॒సిగ్ం ర॒యిమ్ ॥ 12 ॥
స॒జిత్వా॑నగ్ం సదా॒సహ᳚మ్ । వర్షి॑ష్ఠమూ॒తయే॑ భర । ప్రస॑సాహిషే పురుహూత॒ శత్రూన్॑ । జ్యేష్ఠ॑స్తే॒ శుష్మ॑ ఇ॒హ రా॒తిర॑స్తు । ఇన్ద్రాభ॑ర॒ దక్షి॑ణేనా॒ వసూ॑ని । పతి॒-స్సిన్ధూ॑నామసి రే॒వతీ॑నామ్ । మ॒హాగ్ం ఇన్ద్రో॒ య ఓజ॑సా । ప॒ర్జన్యో॑ వృష్టి॒మాగ్ం ఇ॑వ ।
స్తోమై᳚ర్వ॒థ్సస్య॑ వావృధే ।
మ॒హాం ఇన్ద్రో॑ నృ॒వదాచ॑ర్షణి॒ప్రాః ॥ 13 ॥
ఉ॒త ద్వి॒బర్హా॑ అమి॒న-స్సహో॑భిః । అ॒స్మ॒ద్రియ॑గ్వావృధే వీ॒ర్యా॑య ।
ఉ॒రుః పృ॒థు-స్సుకృ॑తః క॒ర్తృభి॑ర్భూత్ ।
పి॒ప్రీ॒హి దే॒వాగ్ం ఉ॑శ॒తో య॑విష్ఠ ।
వి॒ద్వాం ఋతూగ్ంర్-ఋ॑తుపతే యజే॒హ ।
యే దైవ్యా॑ ఋ॒త్విజ॒స్తేభి॑రగ్నే ।
త్వగ్ం హోతౄ॑ణామ॒స్యాయ॑జిష్ఠః ॥
అ॒గ్నిగ్గ్ స్వి॑ష్ట॒కృత᳚మ్ । అయా॑డ॒గ్నిర॒గ్నేః ప్రి॒యా ధామా॑ని । అయా॒ట్థ్సోమ॑స్య ప్రి॒యా ధామా॑ని ॥ 14 ॥
అయా॑డ॒గ్నేః ప్రి॒యా ధామా॑ని । అయా᳚ట్ప్ర॒జాప॑తేః ప్రి॒యా ధామా॑ని । అయా॑డ॒గ్నీషోమ॑యోః ప్రి॒యా ధామా॑ని । అయా॑డిన్ద్రాగ్ని॒యోః ప్రి॒యా ధామా॑ని ।
అయా॒డిన్ద్ర॑స్య ప్రి॒యా ధామా॑ని । అయా᳚ణ్మహే॒న్ద్రస్య॑ ప్రి॒యా ధామా॑ని । అయా᳚డ్దే॒వానా॑-మాజ్య॒పానా᳚-మ్ప్రి॒యా ధామా॑ని । యక్ష॑ద॒గ్నేర్-హోతుః॑ ప్రి॒యా ధామా॑ని । యక్ష॒థ్స్వ-మ్మ॑హి॒మాన᳚మ్ । ఆయ॑జతా॒మేజ్యా॒ ఇషః॑ । కృ॒ణోతు॒ సో అ॑ద్ధ్వ॒రా జా॒తవే॑దాః । జు॒షతాగ్ం॑ హ॒విః । అగ్నే॒ యద॒ద్య వి॒శో అ॑ద్ధ్వరస్య హోతః ।
పావ॑క శోచే॒ వేష్ట్వగ్ం హి యజ్వా᳚ । ఋ॒తా య॑జాసి మహి॒నా వి యద్భూః ।
హ॒వ్యా వ॑హ యవిష్ఠ॒ యా తే॑ అ॒ద్య ॥ 15 ॥
(అ॒స్త్వ॒ - ధ॒త్త॒గ్ం - ర॒యిం - చ॑ర్షణి॒ప్రాః - సోమ॑స్య ప్రి॒యా ధామా॒ - నీష॒-ష్షట్చ॑) (అ. 7)
అనువాకం 8 - ఇడోపాహ్వానామ్
ఉప॑హూతగ్ం రథన్త॒రగ్ం స॒హ పృ॑థి॒వ్యా ।
ఉప॑ మా రథన్త॒రగ్ం స॒హ పృ॑థి॒వ్యా హ్వ॑యతామ్ ।
ఉప॑హూతం-వాఁమదే॒వ్యగ్ం స॒హాన్తరి॑క్షేణ ।
ఉప॑ మా వామదే॒వ్యగ్ం స॒హాన్తరి॑క్షేణ హ్వయతామ్ ।
ఉప॑ హూత-మ్బృ॒హథ్స॒హ ది॒వా । ఉప॑ మా బృ॒హథ్స॒హ ది॒వా హ్వ॑యతామ్ । ఉప॑హూతా-స్స॒ప్త హోత్రాః᳚ ।
ఉప॑ మా స॒ప్త హోత్రా᳚ హ్వయన్తామ్ । ఉప॑హూతా ధే॒ను-స్స॒హర్ష॑భా । ఉప॑ మా ధే॒ను-స్స॒హర్ష॑భా హ్వయతామ్ ॥ 16 ॥
ఉప॑హూతో భ॒క్ష-స్సఖా᳚ । ఉప॑ మా భ॒క్ష-స్సఖా᳚ హ్వయతామ్ । ఉప॑హూ॒తాఁ(4) హో । ఇడోప॑హూతా । ఉప॑హూ॒తేడా᳚ । ఉపో॑ అ॒స్మాగ్ం ఇడా᳚ హ్వయతామ్ । ఇడోప॑హూతా । ఉప॑హూ॒తేడా᳚ । మా॒న॒వీ ఘృ॒తప॑దీ మైత్రావరు॒ణీ ।
బ్రహ్మ॑ దే॒వకృ॑త॒ముప॑హూతమ్ ॥ 17 ॥
దైవ్యా॑ అద్ధ్వ॒ర్యవ॒ ఉప॑హూతాః । ఉప॑హూతా మను॒ష్యాః᳚ । య ఇ॒మం-యఁ॒జ్ఞమవాన్॑ । యే య॒జ్ఞప॑తిం॒-వఁర్ధాన్॑ । ఉప॑హూతే॒ ద్యావా॑పృథి॒వీ ।
పూ॒ర్వ॒జే ఋ॒తావ॑రీ । దే॒వీ దే॒వపు॑త్రే । ఉప॑హూతో॒-ఽయం-యఁజ॑మానః । ఉత్త॑రస్యా-న్దేవయ॒జ్యాయా॒-ముప॑హూతః । భూయ॑సి హవి॒ష్కర॑ణ॒ ఉప॑హూతః ।
ది॒వ్యే ధామ॒న్నుప॑హూతః ।
ఇ॒ద-మ్మే॑ దే॒వా హ॒విర్జు॑షన్తా॒మితి॒ తస్మి॒న్నుప॑హూతః ।
విశ్వ॑మస్య ప్రి॒యముప॑హూతమ్ ।
విశ్వ॑స్య ప్రి॒యస్యోప॑హూత॒స్యోప॑హూతః ॥ 18 ॥
(స॒హర్ష॑భా హ్వయతా॒ - ముప॑హూతగ్ం - హవి॒ష్కర॑ణ॒ ఉప॑హూతశ్చ॒త్వారి॑ చ) (అ. 8)
అనువాకం 9 - అనూయాజాః
దే॒వ-మ్బ॒ర్॒హిః । వ॒సు॒వనే॑ వసు॒ధేయ॑స్య వేతు । దే॒వో నరా॒శగ్ం సః॑ । వ॒సు॒వనే॑ వసు॒ధేయ॑స్య వేతు । దే॒వో అ॒గ్ని-స్స్వి॑ష్ట॒కృత్ । సు॒ద్రవి॑ణా మ॒న్ద్రః క॒విః । స॒త్యమ॑న్మా-ఽఽయ॒జీ హోతా᳚ । హోతు॑ర్-హోతు॒రాయ॑జీయాన్ । అగ్నే॒ యాన్-దే॒వానయా᳚ట్ । యాగ్ం అపి॑ప్రేః । యే తే॑ హో॒త్రే అమ॑థ్సత । తాగ్ం స॑స॒నుషీ॒గ్ం॒ హోత్రా᳚-న్దేవ-ఙ్గ॒మామ్ । ది॒వి దే॒వేషు॑ య॒జ్ఞమేర॑యే॒మమ్ । స్వి॒ష్ట॒కృచ్చాగ్నే॒ హోతా-ఽభూః᳚ ।
వ॒సు॒వనే॑ వసు॒ధేయ॑స్య నమోవా॒కే వీహి॑ ॥ 19 ॥
(అపి॑ప్రేః॒ పఞ్చ॑ చ) (అ. 9)
అనువాకం 10 - సూక్తావాకః
ఇ॒ద-న్ద్యా॑వాపృథివీ భ॒ద్రమ॑భూత్ ।
ఆర్ధ్మ॑ సూక్తవా॒కమ్ । ఉ॒త న॑మోవా॒కమ్ ।
ఋ॒ద్ధ్యాస్మ॑ సూ॒క్తోచ్య॑మగ్నే । త్వగ్ం సూ᳚క్త॒వాగ॑సి ।
ఉప॑శ్రితో ది॒వః పృ॑థి॒వ్యోః । ఓమ॑న్వతీ తే॒-ఽస్మిన్. య॒జ్ఞే య॑జమాన॒ ద్యావా॑పృథి॒వీ స్తా᳚మ్ ।
శ॒గం॒యే జీ॒రదా॑నూ । అత్ర॑స్నూ॒ అప్ర॑వేదే ।
ఉ॒రుగ॑వ్యూతీ అభయ॒-ఙ్కృతౌ᳚ ॥ 20 ॥
వృ॒ష్టిద్యా॑వా రీ॒త్యా॑పా । శ॒మ్భువౌ॑ మయో॒భువౌ᳚ ।
ఊర్జ॑స్వతీ చ॒ పయ॑స్వతీ చ । సూ॒ప॒చ॒ర॒ణా చ॑ స్వధిచర॒ణా చ॑ । తయో॑రా॒విది॑ ॥
అ॒గ్నిరి॒దగ్ం హ॒విర॑జుషత । అవీ॑వృధత॒ మహో॒ జ్యాయో॑-ఽకృత । సోమ॑ ఇ॒దగ్ం హ॒విర॑జుషత । అవీ॑వృధత॒ మహో॒ జ్యాయో॑-ఽకృత ।
అ॒గ్నిరి॒దగ్ం హ॒విర॑జుషత ॥ 21 ॥
అవీ॑వృధత॒ మహో॒ జ్యాయో॑-ఽకృత । ప్ర॒జాప॑తిరి॒దగ్ం హ॒విర॑జుషత । అవీ॑వృధత॒ మహో॒ జ్యాయో॑-ఽకృత । అ॒గ్నీషోమా॑వి॒దగ్ం హ॒విర॑జుషేతామ్ ।
అవీ॑వృధేతా॒-మ్మహో॒ జ్యాయో᳚-ఽక్రాతామ్ ।
ఇ॒న్ద్రా॒గ్నీ ఇ॒దగ్ం హ॒విర॑జుషేతామ్ ।
అవీ॑వృధేతా॒-మ్మహో॒ జ్యాయో᳚-ఽక్రాతామ్ । ఇన్ద్ర॑ ఇ॒దగ్ం హ॒విర॑జుషత । అవీ॑వృధత॒ మహో॒ జ్యాయో॑-ఽకృత । మ॒హే॒న్ద్ర ఇ॒దగ్ం హ॒విర॑జుషత ॥ 22 ॥
అవీ॑వృధత॒ మహో॒ జ్యాయో॑-ఽకృత । దే॒వా ఆ᳚జ్య॒పా ఆజ్య॑మజుషన్త । అవీ॑వృధన్త॒ మహో॒ జ్యాయో᳚-ఽక్రత । అ॒గ్నిర్హో॒త్రేణే॒దగ్ం హ॒విర॑జుషత ।
అవీ॑వృధత॒ మహో॒ జ్యాయో॑-ఽకృత ।
అ॒స్యామృధ॒-ద్ధోత్రా॑యా-న్దేవఙ్గ॒మాయా᳚మ్ ।
ఆశా᳚స్తే॒-ఽయం-యఁజ॑మానో॒-ఽసౌ ॥
ఆయు॒రాశా᳚స్తే । సు॒ప్ర॒జా॒స్త్వ-మాశా᳚స్తే ।
స॒జా॒త॒వ॒న॒స్యా-మాశా᳚స్తే ॥ 23 ॥
ఉత్త॑రా-న్దేవయ॒జ్యా-మాశా᳚స్తే । భూయో॑ హవి॒ష్కర॑ణ॒-మాశా᳚స్తే । ది॒వ్య-న్ధామాశా᳚స్తే । విశ్వ॑-మ్ప్రి॒యమాశా᳚స్తే । యద॒నేన॑ హ॒విషా ఽఽశా᳚స్తే । తద॑శ్యా॒త్-తదృ॑ద్ధ్యాత్ । తద॑స్మై దే॒వా రా॑సన్తామ్ । తద॒గ్ని-ర్దే॒వో దే॒వేభ్యో॒ వన॑తే । వ॒యమ॒గ్నే-ర్మాను॑షాః । ఇ॒ష్ట-ఞ్చ॑ వీ॒త-ఞ్చ॑ । ఉ॒భే చ॑ నో॒ ద్యావా॑పృథి॒వీ అగ్ంహ॑సస్పాతామ్ ।
ఇ॒హ గతి॑-ర్వా॒మస్యే॒ద-ఞ్చ॑ । నమో॑ దే॒వేభ్యః॑ ॥ 24 ॥
(అ॒భ॒య॒ఙ్కృతా॑వకృ - తా॒గ్నిరి॒దగ్ం హ॒విర॑జుషత - మహే॒న్ద్ర ఇ॒దగ్ం హ॒విర॑జుషత - సజాతవన॒స్యామాశా᳚స్తే - వీ॒త-ఞ్చ॒ త్రీణి॑ చ) (అ. 10)
అనువాకం 11 - శంయుఁవాకః
తచ్ఛం॒-యోఁరా వృ॑ణీమహే । గా॒తుం-యఁ॒జ్ఞాయ॑ । గా॒తుం-యఁ॒జ్ఞప॑తయే । దైవీ᳚ స్వ॒స్తిర॑స్తు నః । స్వ॒స్తి-ర్మాను॑షేభ్యః । ఊ॒ర్ధ్వ-ఞ్జి॑గాతు భేష॒జమ్ ।
శ-న్నో॑ అస్తు ద్వి॒పదే᳚ । శ-ఞ్చతు॑ష్పదే ॥ 25 ॥
(తచ్ఛం॒-యోఁర॒ష్టౌ) (అ. 11)
అనువాకం 12 - పత్నీసంయాఁజానాం-యాఁజ్యానువాక్యాః
ఆ ప్యా॑యస్వ॒ సమే॑తు తే వి॒శ్వతః॑ సోమ॒ వృష్ణి॑యమ్ । భవా॒ వాజ॑స్య సఙ్గ॒థే ॥ స-న్తే॒ పయాగ్ం ॑సి॒ సము॑ యన్తు॒ వాజా॒-స్సం-వృఁష్ణి॑యా-న్యభిమాతి॒షాహః॑ । ఆ॒ప్యాయ॑మానో అ॒మృతా॑య సోమ ది॒వి శ్రవాగ్॑స్యుత్త॒మాని॑ ధిష్వ ॥ ॥
ఇ॒హ త్వష్టా॑రమగ్రి॒యం-విఁ॒శ్వరూ॑ప॒ముప॑ హ్వయే । అ॒స్మాక॑మస్తు॒ కేవ॑లః ॥ తన్న॑స్తు॒రీప॒మధ॑ పోషయి॒త్ను దేవ॑ త్వష్ట॒ర్వి ర॑రా॒ణ-స్స్య॑స్వ । యతో॑ వీ॒రః క॑ర్మ॒ణ్యః॑ సు॒దక్షో॑ యు॒క్తగ్రా॑వా॒ జాయ॑తే దే॒వకా॑మః ॥ ॥
దే॒వానా॒-మ్పత్నీ॑రుశ॒తీర॑వన్తు నః । ప్రావ॑న్తు నస్తు॒జయే॒ వాజ॑సాతయే । యాః పార్థి॑వాసో॒ యా అ॒పామపి॑ వ్ర॒తే । తా నో॑ దేవీ-స్సుహవా॒-శ్శర్మ॑ యచ్ఛత ॥ ఉ॒త గ్నా వి॑యన్తు దే॒వప॑త్నీః । ఇ॒న్ద్రా॒ణ్య॑గ్నాయ్య॒శ్వినీ॒ రాట్ । ఆ రోద॑సీ వరుణా॒నీ శృ॑ణోతు ।
వి॒యన్తు॑ దే॒వీర్య ఋ॒తుర్జనీ॑నామ్ ॥ 26 ॥
అ॒గ్నిర్-హోతా॑ గృ॒హప॑తి॒-స్స రాజా᳚ । విశ్వా॑ వేద॒ జని॑మా జా॒తవే॑దాః । దే॒వానా॑ము॒త యో మర్త్యా॑నామ్ । యజి॑ష్ఠ॒-స్స ప్రయ॑జతామృ॒తావా᳚ ॥
వ॒యము॑ త్వా గృహపతే॒ జనా॑నామ్ । అగ్నే॒ అక॑ర్మ స॒మిధా॑ బృ॒హన్త᳚మ్ । అ॒స్థూ॒రిణో॒ గార్హ॑పత్యాని సన్తు । తి॒గ్మేన॑ న॒స్తేజ॑సా॒ సగ్ంశి॑శాధి ॥ 27 ॥
(జనీ॑నా - +మ॒ష్టౌ చ॑) (అ. 12)
అనువాకం 13 - పత్నీసంయాఁజే సోమాహ్వానమ్
ఉప॑హూతగ్ం రథన్త॒రగ్ం స॒హ పృ॑థి॒వ్యా ।
ఉప॑ మా రథన్త॒రగ్ం స॒హ పృ॑థి॒వ్యా హ్వ॑యతామ్ ।
ఉప॑హూతం-వాఁమదే॒వ్యగ్ం స॒హాన్తరి॑క్షేణ ।
ఉప॑ మా వామదే॒వ్యగ్ం స॒హాన్తరి॑క్షేణ హ్వయతామ్ । ఉప॑హూత-మ్బృ॒హథ్స॒హ ది॒వా । ఉప॑ మా బృ॒హథ్స॒హ ది॒వా హ్వ॑యతామ్ । ఉప॑హూతా-స్స॒ప్త హోత్రాః᳚ ।
ఉప॑ మా స॒ప్త హోత్రా᳚ హ్వయన్తామ్ । ఉప॑హూతా ధే॒ను-స్స॒హర్ష॑భా । ఉప॑ మా ధే॒ను-స్స॒హర్ష॑భా హ్వయతామ్ ॥ 28 ॥
ఉప॑హూతో భ॒క్ష-స్సఖా᳚ । ఉప॑ మా భ॒క్ష-స్సఖా᳚ హ్వయతామ్ । ఉప॑హూ॒తాఁ(4) హో । ఇడోప॑హూతా । ఉప॑హూ॒తేడా᳚ । ఉపో॑ అ॒స్మాగ్ం ఇడా᳚ హ్వయతామ్ । ఇడోప॑హూతా । ఉప॑హూ॒తేడా᳚ । మా॒న॒వీ ఘృ॒తప॑దీ మైత్రావరు॒ణీ ।
బ్రహ్మ॑ దే॒వకృ॑త॒ముప॑హూతమ్ ॥ 29 ॥
దైవ్యా॑ అద్ధ్వ॒ర్యవ॒ ఉప॑హూతాః । ఉప॑హూతా మను॒ష్యాః᳚ । య ఇ॒మం-యఁ॒జ్ఞమవాన్॑ । యే య॒జ్ఞప॑త్నీం॒-వఁర్ధాన్॑ । ఉప॑హూతే॒ ద్యావా॑పృథి॒వీ । పూ॒ర్వ॒జే ఋ॒తావ॑రీ । దే॒వీ దే॒వపు॑త్రే । ఉప॑హూతే॒యం-యఁజ॑మానా । ఇ॒న్ద్రా॒ణీవా॑విధ॒వా । అది॑తిరివ సుపు॒త్రా । ఉత్త॑రస్యా-న్దేవయ॒జ్యాయా॒-ముప॑హూతా ।
భూయ॑సి హవి॒ష్కర॑ణ॒ ఉప॑హూతా । ది॒వ్యే ధామ॒న్నుప॑హూతా । ఇ॒ద-మ్మే॑ దే॒వా హ॒వి-ర్జు॑షన్తా॒మితి॒ తస్మి॒-న్నుప॑హూతా । విశ్వ॑మస్యాః ప్రి॒యముప॑హూతమ్ ।
విశ్వ॑స్య ప్రి॒యస్యోప॑హూత॒స్యోప॑హూతా ॥ 30 ॥
(స॒హర్ష॑భా హ్వయతా॒ - ముప॑హూతగ్ం - సుపు॒త్రా షట్చ॑) (అ. 13)
(స॒త్యం - ప్రవో - ఽగ్నే॑ మ॒హా - న॒గ్నిర్-హోతా॑ - స॒మిధో॒ - ఽగ్ని-ర్వృ॒త్రాణ్య॒ - గ్ని-ర్మూ॒ర్ధో - ప॑హూతం - దే॒వ-మ్బ॒ర్॒హి - రి॒ద-న్ద్యా॑వాపృథివీ॒ -తచ్ఛం॒యోఁ- రా ప్యా॑య॒స్వో - ప॑హూత॒-న్త్రయో॑దశ)
(స॒త్యం - ఁవ॒యగ్గ్ స్యా॑మ - వృ॒ష్టిద్యా॑వా త్రి॒గ్ం॒శత్)
(స॒త్య-ముప॑హూతా)
॥ హరిః॑ ఓమ్ ॥
॥ కృష్ణ యజుర్వేదీయ తైత్తిరీయ బ్రాహ్మణే తృతీయాష్టకే పఞ్చమ ప్రపాఠక-స్సమాప్తః ॥
Roman (IAST) Transliteration
kṛṣṇa yajurvedīya taittirīya brāhmaṇe tṛtīyāṣṭake pañcamaḥ prapāṭhakaḥ - iṣṭihautram
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1 - hoturjapaḥ purastā-thsāmidhenīnām
sa॒tya-mprapa̭dye | ṛ॒ta-mprapa̭dye |
a॒mṛta॒-mprapa̭dye |
pra॒jāpa̭teḥ pri॒yā-nta॒nuva॒manā᳚rtā॒-mprapa̭dye |
i॒dama॒ha-mpa̭ñcada॒śena॒ vajrḙṇa |
dvi॒ṣanta॒-mbhrātṛ̭vya॒mava̭krāmāmi |
yo᳚-'smā-ndveṣṭi̭ | ya-ñca̭ va॒ya-ndvi॒ṣmaḥ |
bhūrbhuva॒-ssuvaḥ̭ | him || 1 ||
(sa॒tya-ndaśa̭) (a. 1)
anuvākaṃ 2 - sāmidhenīmranvāha
pra vo॒ vājā̭ a॒bhidya̭vaḥ | ha॒viṣma̭nto ghṛ॒tācyā᳚ |
de॒vāñji̭gāti sumna॒yuḥ || agna॒ āyā̭hi vī॒taye᳚ | gṛ॒ṇā॒no ha॒vyadā̭taye | ni hotā̭ sathsi ba॒ra॒ḥiṣi̭ || ta-ntvā̭ sa॒midbhi̭raṅgiraḥ | ghṛ॒tena̭ vardhayāmasi | bṛ॒haccho̭cā yaviṣṭhya || sa naḥ̭ pṛ॒thu śra॒vāyya᳚m || 2 ||
acchā̭ deva vivāsasi | bṛ॒hada̭gne su॒vīrya᳚m ||
ī॒ḍenyo̭ nama॒sya̭sti॒raḥ | tamāgṃ̭si darśa॒taḥ | sama॒gniri̭ddhyate॒ vṛṣā᳚ || vṛṣo̭ a॒gni-ssami̭ddhyate | aśvo॒ na dḙva॒vāha̭naḥ |
tagṃ ha॒viṣma̭nta īḍate || vṛṣa̭ṇa-ntvā va॒yaṃ-vṛ~ṣanṋ | vṛṣā̭ṇa॒-ssami̭dhīmahi || 3 ||
agne॒ dīdya̭ta-mbṛ॒hat || a॒gni-ndū॒taṃ-vṛ~̭ṇīmahe |
hotā̭raṃ-vi~॒śvavḙdasam | a॒sya ya॒jñasya̭ su॒kratu᳚m || sa॒mi॒ddhyamā̭no addhva॒re | a॒gniḥ pā̭va॒ka īḍyaḥ̭ | śo॒ciṣkḙśa॒stamī̭mahe || sami̭ddho agna āhuta | de॒vān. ya̭kṣi svaddhvara | tvagṃ hi ha̭vya॒vāḍasi̭ ||
ājṷhota duva॒syata̭ | a॒gni-mpra̭ya॒tya̭ddhva॒re |
vṛ॒ṇī॒ddhvagṃ ha̭vya॒vāha̭nam ||
tvaṃ-va~rṷṇa u॒ta mi॒tro a̭gne | tvāṃ-va~̭rdhanti ma॒tibhi॒rvasi̭ṣṭhāḥ | tve vasṷ suṣaṇa॒nāni̭ santu | yū॒ya-mpā̭ta sva॒stibhi॒-ssadā̭ naḥ || 4 ||
(śra॒vāyya̭ - midhīma॒ - hyasi̭ sa॒pta ca̭) (a. 2)
anuvākaṃ 3 - praramuktvā nivido-'nūcya devatā āvāhayati
agnḙ ma॒hāgṃ a̭si brāhmaṇa bhārata | asā॒vasau᳚ ||
de॒veddho॒ manvi̭ddhaḥ | ṛṣi̭ṣṭuto॒ viprā̭numaditaḥ | ka॒vi॒śa॒sto brahma̭sagṃśito ghṛ॒tāha̭vanaḥ |
pra॒ṇī-rya॒jñānā᳚m | ra॒thīra̭ddhva॒rāṇā᳚m |
a॒tūrto॒ hotā᳚ | tūrṇi̭rhavya॒vāṭ |
āspātra̭-ñju॒hū-rde॒vānā᳚m || 5 ||
ca॒ma॒so dḙva॒pānaḥ̭ | a॒rāgṃ i̭vāgne ne॒mirde॒vāgstva-mpa̭ri॒bhūra̭si | āva̭ha de॒vān. yaja̭mānāya || a॒gnima̭gna॒ āva̭ha | soma॒māva̭ha |
a॒gnimāva̭ha | pra॒jāpa̭ti॒māva̭ha | a॒gnīṣomā॒vāva̭ha | i॒ndrā॒gnī āva̭ha | indra॒māva̭ha | ma॒he॒ndramāva̭ha | de॒vāgṃ ā᳚jya॒pāgṃ āva̭ha |
a॒gnigṃ ho॒trāyāva̭ha | sva-mma̭hi॒māna॒māva̭ha | ā cā᳚gne de॒vān. vaha̭ | su॒yajā̭ ca yaja jātavedaḥ || 6 ||
(de॒vānā॒-mindra॒māva̭ha॒ ṣaṭca̭) (a. 3)
anuvākaṃ 4 - srucāvādāpayati
a॒gnir-hotā॒ vetva॒gniḥ | ho॒traṃ-ve~᳚ttu prāvi॒tram | smo va॒yam | sā॒dhu tḙ yajamāna de॒vatā᳚ | ghṛ॒tava̭tī-maddhvaryo॒ sruca॒mā-'sya̭sva | de॒vā॒yuvaṃ̭-vi~॒śvavā̭rām | īḍā̭mahai de॒vāgṃ ī॒ḍenyāṋ |
na॒ma॒syāma̭ nama॒syāṋ | yajā̭ma ya॒jñiyāṋ || 7 ||
(a॒gnir-hotā॒ nava̭) (a. 4)
anuvākaṃ 5 - prayājāḥ
sa॒midho̭ agna॒ ājya̭sya viyantu | tanū॒napā̭dagna॒ ājya̭sya vetu | i॒ḍo a̭gna॒ ājya̭sya viyantu | ba॒r॒hira̭gna॒ ājya̭sya vetu | svāhā॒-'gnim | svāhā॒ soma᳚m | svāhā॒-'gnim | svāhā᳚ pra॒jāpa̭tim |
svāhā॒-'gnīṣomau᳚ | svāhe᳚ndrā॒gnī | svāhendra᳚m |
svāhā̭ mahe॒ndram | svāhā̭ de॒vāgṃ ā᳚jya॒pān | svāhā॒-'gnigṃ ho॒trājjṷṣā॒ṇāḥ |
agna॒ ājya̭sya viyantu || 8 ||
(i॒ndrā॒gnī pañca̭ ca) (a. 5)
anuvākaṃ 6 - ajyabhāgayoḥ puronuvākye
a॒gni-rvṛ॒trāṇi̭ jaṅghanat | dra॒vi॒ṇa॒syu-rvi̭pa॒nyayā᳚ |
sami̭ddha-śśu॒kra āhṷtaḥ | ju॒ṣā॒ṇo a॒gnirājya̭sya vetu | tvagṃ so̭māsi॒ satpa̭tiḥ | tvagṃ rājo॒ta vṛ̭tra॒hā |
tva-mbha॒dro a̭si॒ kratuḥ̭ | ju॒ṣā॒ṇa-ssoma॒ ājya̭sya ha॒viṣo̭ vetu | a॒gniḥ pra॒tnena॒ janma̭nā | śumbhā̭nasta॒nuva॒gg॒ svām |
ka॒vi-rviprḙṇa vāvṛdhe | ju॒ṣā॒ṇo a॒gnirājya̭sya vetu |
soma̭ gī॒rbhiṣṭvā̭ va॒yam | va॒rdhayā̭mo vaco॒vidaḥ̭ | su॒mṛ॒ḍī॒ko na॒ āvi̭śa |
ju॒ṣā॒ṇa-ssoma॒ ājya̭sya ha॒viṣo̭ vetu || 9 ||
(svāgṃ ṣaṭca̭) (a. 6)
anuvākaṃ 7 - haviṣāṃ-yā~jyānuvākyāḥ
a॒gni-rmū॒rdhā di॒vaḥ ka॒kut | patiḥ̭ pṛthi॒vyā a॒yam |
a॒pāgṃ retāgṃ̭si jinvati | bhuvo̭ ya॒jñasya॒ raja̭saśca ne॒tā | yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣām |
ji॒hvāma̭gne cakṛṣe havya॒vāha᳚m | prajā̭pate॒ na tvade॒tānya॒nyaḥ | viśvā̭ jā॒tāni॒ pari॒ tā ba̭bhūva |
yat-kā̭māste juhu॒mastanno̭ astu || 10 ||
va॒yagg syā̭ma॒ pata̭yo rayī॒ṇām | sa vḙda pu॒traḥ pi॒tara॒gṃ॒ sa mā॒tara᳚m | sa sū॒nurbhṷva॒thsa bhṷva॒tpuna̭rmaghaḥ | sa dyāmaurṇo̭da॒ntari̭kṣa॒gṃ॒ sa suvaḥ̭ | sa viśvā॒ bhuvo̭ abhava॒thsa ā-'bha̭vat | agnī̭ṣomā॒ savḙdasā | sahṷ̄tī vanata॒-ṅgiraḥ̭ | sa-ndḙva॒trā ba̭bhūvathuḥ | yu॒vame॒tāni̭ di॒vi ro̭ca॒nāni̭ |
a॒gniśca̭ soma॒ sakra̭tū adhattam || 11 ||
yu॒vagṃ sindhūgṃ̭ ra॒bhiśa̭ste-rava॒dyāt | agnī̭ṣomā॒-vamṷñcata-ṅgṛbhī॒tān |
indrā᳚gnī roca॒nā di॒vaḥ | pari॒ vājḙṣu bhūṣathaḥ |
tadvā᳚-ñceti॒ pravī॒rya᳚m | śnatha̭dvṛ॒tramu॒ta sa̭noti॒ vāja᳚m | indrā॒ yo a॒gnī sahṷrī sapa॒ryāt |
i॒ra॒jyantā̭ vasa॒vya̭sya॒ bhūreḥ᳚ | saha̭stamā॒ saha̭sā vāja॒yantā᳚ | endra̭ sāna॒sigṃ ra॒yim || 12 ||
sa॒jitvā̭nagṃ sadā॒saha᳚m | varṣi̭ṣṭhamū॒tayḙ bhara | prasa̭sāhiṣe puruhūta॒ śatrūṋ | jyeṣṭha̭ste॒ śuṣma̭ i॒ha rā॒tira̭stu | indrābha̭ra॒ dakṣi̭ṇenā॒ vasṷ̄ni | pati॒-ssindhṷ̄nāmasi re॒vatī̭nām | ma॒hāgṃ indro॒ ya oja̭sā | pa॒rjanyo̭ vṛṣṭi॒māgṃ i̭va |
stomai᳚rva॒thsasya̭ vāvṛdhe |
ma॒hāṃ indro̭ nṛ॒vadāca̭rṣaṇi॒prāḥ || 13 ||
u॒ta dvi॒barhā̭ ami॒na-ssaho̭bhiḥ | a॒sma॒driya̭gvāvṛdhe vī॒ryā̭ya |
u॒ruḥ pṛ॒thu-ssukṛ̭taḥ ka॒rtṛbhi̭rbhūt |
pi॒prī॒hi de॒vāgṃ ṷśa॒to ya̭viṣṭha |
vi॒dvāṃ ṛtūgṃr-ṛ̭tupate yaje॒ha |
ye daivyā̭ ṛ॒tvija॒stebhi̭ragne |
tvagṃ hotṝ̭ṇāma॒syāya̭jiṣṭhaḥ ||
a॒gnigg svi̭ṣṭa॒kṛta᳚m | ayā̭ḍa॒gnira॒gneḥ pri॒yā dhāmā̭ni | ayā॒ṭthsoma̭sya pri॒yā dhāmā̭ni || 14 ||
ayā̭ḍa॒gneḥ pri॒yā dhāmā̭ni | ayā᳚ṭpra॒jāpa̭teḥ pri॒yā dhāmā̭ni | ayā̭ḍa॒gnīṣoma̭yoḥ pri॒yā dhāmā̭ni | ayā̭ḍindrāgni॒yoḥ pri॒yā dhāmā̭ni |
ayā॒ḍindra̭sya pri॒yā dhāmā̭ni | ayā᳚ṇmahe॒ndrasya̭ pri॒yā dhāmā̭ni | ayā᳚ḍde॒vānā̭-mājya॒pānā᳚-mpri॒yā dhāmā̭ni | yakṣa̭da॒gner-hotuḥ̭ pri॒yā dhāmā̭ni | yakṣa॒thsva-mma̭hi॒māna᳚m | āya̭jatā॒mejyā॒ iṣaḥ̭ | kṛ॒ṇotu॒ so a̭ddhva॒rā jā॒tavḙdāḥ | ju॒ṣatāgṃ̭ ha॒viḥ | agne॒ yada॒dya vi॒śo a̭ddhvarasya hotaḥ |
pāva̭ka śoce॒ veṣṭvagṃ hi yajvā᳚ | ṛ॒tā ya̭jāsi mahi॒nā vi yadbhūḥ |
ha॒vyā va̭ha yaviṣṭha॒ yā tḙ a॒dya || 15 ||
(a॒stva॒ - dha॒tta॒gṃ - ra॒yiṃ - ca̭rṣaṇi॒prāḥ - soma̭sya pri॒yā dhāmā॒ - nīṣa॒-ṣṣaṭca̭) (a. 7)
anuvākaṃ 8 - iḍopāhvānām
upa̭hūtagṃ rathanta॒ragṃ sa॒ha pṛ̭thi॒vyā |
upa̭ mā rathanta॒ragṃ sa॒ha pṛ̭thi॒vyā hva̭yatām |
upa̭hūtaṃ-vā~made॒vyagṃ sa॒hāntari̭kṣeṇa |
upa̭ mā vāmade॒vyagṃ sa॒hāntari̭kṣeṇa hvayatām |
upa̭ hūta-mbṛ॒hathsa॒ha di॒vā | upa̭ mā bṛ॒hathsa॒ha di॒vā hva̭yatām | upa̭hūtā-ssa॒pta hotrāḥ᳚ |
upa̭ mā sa॒pta hotrā᳚ hvayantām | upa̭hūtā dhe॒nu-ssa॒harṣa̭bhā | upa̭ mā dhe॒nu-ssa॒harṣa̭bhā hvayatām || 16 ||
upa̭hūto bha॒kṣa-ssakhā᳚ | upa̭ mā bha॒kṣa-ssakhā᳚ hvayatām | upa̭hū॒tā~(4) ho | iḍopa̭hūtā | upa̭hū॒teḍā᳚ | upo̭ a॒smāgṃ iḍā᳚ hvayatām | iḍopa̭hūtā | upa̭hū॒teḍā᳚ | mā॒na॒vī ghṛ॒tapa̭dī maitrāvaru॒ṇī |
brahma̭ de॒vakṛ̭ta॒mupa̭hūtam || 17 ||
daivyā̭ addhva॒ryava॒ upa̭hūtāḥ | upa̭hūtā manu॒ṣyāḥ᳚ | ya i॒maṃ-ya~॒jñamavāṋ | ye ya॒jñapa̭tiṃ॒-va~rdhāṋ | upa̭hūte॒ dyāvā̭pṛthi॒vī |
pū॒rva॒je ṛ॒tāva̭rī | de॒vī de॒vapṷtre | upa̭hūto॒-'yaṃ-ya~ja̭mānaḥ | utta̭rasyā-ndevaya॒jyāyā॒-mupa̭hūtaḥ | bhūya̭si havi॒ṣkara̭ṇa॒ upa̭hūtaḥ |
di॒vye dhāma॒nnupa̭hūtaḥ |
i॒da-mmḙ de॒vā ha॒virjṷṣantā॒miti॒ tasmi॒nnupa̭hūtaḥ |
viśva̭masya pri॒yamupa̭hūtam |
viśva̭sya pri॒yasyopa̭hūta॒syopa̭hūtaḥ || 18 ||
(sa॒harṣa̭bhā hvayatā॒ - mupa̭hūtagṃ - havi॒ṣkara̭ṇa॒ upa̭hūtaśca॒tvāri̭ ca) (a. 8)
anuvākaṃ 9 - anūyājāḥ
de॒va-mba॒r॒hiḥ | va॒su॒vanḙ vasu॒dheya̭sya vetu | de॒vo narā॒śagṃ saḥ̭ | va॒su॒vanḙ vasu॒dheya̭sya vetu | de॒vo a॒gni-ssvi̭ṣṭa॒kṛt | su॒dravi̭ṇā ma॒ndraḥ ka॒viḥ | sa॒tyama̭nmā-''ya॒jī hotā᳚ | hotṷr-hotu॒rāya̭jīyān | agne॒ yān-de॒vānayā᳚ṭ | yāgṃ api̭preḥ | ye tḙ ho॒tre ama̭thsata | tāgṃ sa̭sa॒nuṣī॒gṃ॒ hotrā᳚-ndeva-ṅga॒mām | di॒vi de॒veṣṷ ya॒jñamera̭ye॒mam | svi॒ṣṭa॒kṛccāgne॒ hotā-'bhūḥ᳚ |
va॒su॒vanḙ vasu॒dheya̭sya namovā॒ke vīhi̭ || 19 ||
(api̭preḥ॒ pañca̭ ca) (a. 9)
anuvākaṃ 10 - sūktāvākaḥ
i॒da-ndyā̭vāpṛthivī bha॒drama̭bhūt |
ārdhma̭ sūktavā॒kam | u॒ta na̭movā॒kam |
ṛ॒ddhyāsma̭ sū॒ktocya̭magne | tvagṃ sū᳚kta॒vāga̭si |
upa̭śrito di॒vaḥ pṛ̭thi॒vyoḥ | oma̭nvatī te॒-'smin. ya॒jñe ya̭jamāna॒ dyāvā̭pṛthi॒vī stā᳚m |
śa॒gaṃ॒ye jī॒radā̭nū | atra̭snū॒ apra̭vede |
u॒ruga̭vyūtī abhaya॒-ṅkṛtau᳚ || 20 ||
vṛ॒ṣṭidyā̭vā rī॒tyā̭pā | śa॒mbhuvaṷ mayo॒bhuvau᳚ |
ūrja̭svatī ca॒ paya̭svatī ca | sū॒pa॒ca॒ra॒ṇā ca̭ svadhicara॒ṇā ca̭ | tayo̭rā॒vidi̭ ||
a॒gniri॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | soma̭ i॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta |
a॒gniri॒dagṃ ha॒vira̭juṣata || 21 ||
avī̭vṛdhata॒ maho॒ jyāyo̭-'kṛta | pra॒jāpa̭tiri॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | a॒gnīṣomā̭vi॒dagṃ ha॒vira̭juṣetām |
avī̭vṛdhetā॒-mmaho॒ jyāyo᳚-'krātām |
i॒ndrā॒gnī i॒dagṃ ha॒vira̭juṣetām |
avī̭vṛdhetā॒-mmaho॒ jyāyo᳚-'krātām | indra̭ i॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | ma॒he॒ndra i॒dagṃ ha॒vira̭juṣata || 22 ||
avī̭vṛdhata॒ maho॒ jyāyo̭-'kṛta | de॒vā ā᳚jya॒pā ājya̭majuṣanta | avī̭vṛdhanta॒ maho॒ jyāyo᳚-'krata | a॒gnirho॒treṇe॒dagṃ ha॒vira̭juṣata |
avī̭vṛdhata॒ maho॒ jyāyo̭-'kṛta |
a॒syāmṛdha॒-ddhotrā̭yā-ndevaṅga॒māyā᳚m |
āśā᳚ste॒-'yaṃ-ya~ja̭māno॒-'sau ||
āyu॒rāśā᳚ste | su॒pra॒jā॒stva-māśā᳚ste |
sa॒jā॒ta॒va॒na॒syā-māśā᳚ste || 23 ||
utta̭rā-ndevaya॒jyā-māśā᳚ste | bhūyo̭ havi॒ṣkara̭ṇa॒-māśā᳚ste | di॒vya-ndhāmāśā᳚ste | viśva̭-mpri॒yamāśā᳚ste | yada॒nena̭ ha॒viṣā ''śā᳚ste | tada̭śyā॒t-tadṛ̭ddhyāt | tada̭smai de॒vā rā̭santām | tada॒gni-rde॒vo de॒vebhyo॒ vana̭te | va॒yama॒gne-rmānṷṣāḥ | i॒ṣṭa-ñca̭ vī॒ta-ñca̭ | u॒bhe ca̭ no॒ dyāvā̭pṛthi॒vī agṃha̭saspātām |
i॒ha gati̭-rvā॒masye॒da-ñca̭ | namo̭ de॒vebhyaḥ̭ || 24 ||
(a॒bha॒ya॒ṅkṛtā̭vakṛ - tā॒gniri॒dagṃ ha॒vira̭juṣata - mahe॒ndra i॒dagṃ ha॒vira̭juṣata - sajātavana॒syāmāśā᳚ste - vī॒ta-ñca॒ trīṇi̭ ca) (a. 10)
anuvākaṃ 11 - śaṃyu~vākaḥ
tacchaṃ॒-yo~rā vṛ̭ṇīmahe | gā॒tuṃ-ya~॒jñāya̭ | gā॒tuṃ-ya~॒jñapa̭taye | daivī᳚ sva॒stira̭stu naḥ | sva॒sti-rmānṷṣebhyaḥ | ū॒rdhva-ñji̭gātu bheṣa॒jam |
śa-nno̭ astu dvi॒pade᳚ | śa-ñcatṷṣpade || 25 ||
(tacchaṃ॒-yo~ra॒ṣṭau) (a. 11)
anuvākaṃ 12 - patnīsaṃyā~jānāṃ-yā~jyānuvākyāḥ
ā pyā̭yasva॒ samḙtu te vi॒śvataḥ̭ soma॒ vṛṣṇi̭yam | bhavā॒ vāja̭sya saṅga॒the || sa-nte॒ payāgṃ ̭si॒ samṷ yantu॒ vājā॒-ssaṃ-vṛ~ṣṇi̭yā-nyabhimāti॒ṣāhaḥ̭ | ā॒pyāya̭māno a॒mṛtā̭ya soma di॒vi śravāg̭syutta॒māni̭ dhiṣva || ||
i॒ha tvaṣṭā̭ramagri॒yaṃ-vi~॒śvarṷ̄pa॒mupa̭ hvaye | a॒smāka̭mastu॒ keva̭laḥ || tanna̭stu॒rīpa॒madha̭ poṣayi॒tnu deva̭ tvaṣṭa॒rvi ra̭rā॒ṇa-ssya̭sva | yato̭ vī॒raḥ ka̭rma॒ṇyaḥ̭ su॒dakṣo̭ yu॒ktagrā̭vā॒ jāya̭te de॒vakā̭maḥ || ||
de॒vānā॒-mpatnī̭ruśa॒tīra̭vantu naḥ | prāva̭ntu nastu॒jaye॒ vāja̭sātaye | yāḥ pārthi̭vāso॒ yā a॒pāmapi̭ vra॒te | tā no̭ devī-ssuhavā॒-śśarma̭ yacchata || u॒ta gnā vi̭yantu de॒vapa̭tnīḥ | i॒ndrā॒ṇya̭gnāyya॒śvinī॒ rāṭ | ā roda̭sī varuṇā॒nī śṛ̭ṇotu |
vi॒yantṷ de॒vīrya ṛ॒turjanī̭nām || 26 ||
a॒gnir-hotā̭ gṛ॒hapa̭ti॒-ssa rājā᳚ | viśvā̭ veda॒ jani̭mā jā॒tavḙdāḥ | de॒vānā̭mu॒ta yo martyā̭nām | yaji̭ṣṭha॒-ssa praya̭jatāmṛ॒tāvā᳚ ||
va॒yamṷ tvā gṛhapate॒ janā̭nām | agne॒ aka̭rma sa॒midhā̭ bṛ॒hanta᳚m | a॒sthū॒riṇo॒ gārha̭patyāni santu | ti॒gmena̭ na॒steja̭sā॒ sagṃśi̭śādhi || 27 ||
(janī̭nā - +ma॒ṣṭau ca̭) (a. 12)
anuvākaṃ 13 - patnīsaṃyā~je somāhvānam
upa̭hūtagṃ rathanta॒ragṃ sa॒ha pṛ̭thi॒vyā |
upa̭ mā rathanta॒ragṃ sa॒ha pṛ̭thi॒vyā hva̭yatām |
upa̭hūtaṃ-vā~made॒vyagṃ sa॒hāntari̭kṣeṇa |
upa̭ mā vāmade॒vyagṃ sa॒hāntari̭kṣeṇa hvayatām | upa̭hūta-mbṛ॒hathsa॒ha di॒vā | upa̭ mā bṛ॒hathsa॒ha di॒vā hva̭yatām | upa̭hūtā-ssa॒pta hotrāḥ᳚ |
upa̭ mā sa॒pta hotrā᳚ hvayantām | upa̭hūtā dhe॒nu-ssa॒harṣa̭bhā | upa̭ mā dhe॒nu-ssa॒harṣa̭bhā hvayatām || 28 ||
upa̭hūto bha॒kṣa-ssakhā᳚ | upa̭ mā bha॒kṣa-ssakhā᳚ hvayatām | upa̭hū॒tā~(4) ho | iḍopa̭hūtā | upa̭hū॒teḍā᳚ | upo̭ a॒smāgṃ iḍā᳚ hvayatām | iḍopa̭hūtā | upa̭hū॒teḍā᳚ | mā॒na॒vī ghṛ॒tapa̭dī maitrāvaru॒ṇī |
brahma̭ de॒vakṛ̭ta॒mupa̭hūtam || 29 ||
daivyā̭ addhva॒ryava॒ upa̭hūtāḥ | upa̭hūtā manu॒ṣyāḥ᳚ | ya i॒maṃ-ya~॒jñamavāṋ | ye ya॒jñapa̭tnīṃ॒-va~rdhāṋ | upa̭hūte॒ dyāvā̭pṛthi॒vī | pū॒rva॒je ṛ॒tāva̭rī | de॒vī de॒vapṷtre | upa̭hūte॒yaṃ-ya~ja̭mānā | i॒ndrā॒ṇīvā̭vidha॒vā | adi̭tiriva supu॒trā | utta̭rasyā-ndevaya॒jyāyā॒-mupa̭hūtā |
bhūya̭si havi॒ṣkara̭ṇa॒ upa̭hūtā | di॒vye dhāma॒nnupa̭hūtā | i॒da-mmḙ de॒vā ha॒vi-rjṷṣantā॒miti॒ tasmi॒-nnupa̭hūtā | viśva̭masyāḥ pri॒yamupa̭hūtam |
viśva̭sya pri॒yasyopa̭hūta॒syopa̭hūtā || 30 ||
(sa॒harṣa̭bhā hvayatā॒ - mupa̭hūtagṃ - supu॒trā ṣaṭca̭) (a. 13)
(sa॒tyaṃ - pravo - 'gnḙ ma॒hā - na॒gnir-hotā̭ - sa॒midho॒ - 'gni-rvṛ॒trāṇya॒ - gni-rmū॒rdho - pa̭hūtaṃ - de॒va-mba॒r॒hi - ri॒da-ndyā̭vāpṛthivī॒ -tacchaṃ॒yo~- rā pyā̭ya॒svo - pa̭hūta॒-ntrayo̭daśa)
(sa॒tyaṃ - ~va॒yagg syā̭ma - vṛ॒ṣṭidyā̭vā tri॒gṃ॒śat)
(sa॒tya-mupa̭hūtā)
|| hariḥ̭ om ||
|| kṛṣṇa yajurvedīya taittirīya brāhmaṇe tṛtīyāṣṭake pañcama prapāṭhaka-ssamāptaḥ ||
Sanskrit — Devanagari (original)
कृष्ण यजुर्वेदीय तैत्तिरीय ब्राह्मणे तृतीयाष्टके पञ्चमः प्रपाठकः - इष्टिहौत्रम्
ओ-न्नमः परमात्मने, श्री महागणपतये नमः,
श्री गुरुभ्यो नमः । ह॒रिः॒ ओम् ॥
अनुवाकं 1 - होतुर्जपः पुरस्ता-थ्सामिधेनीनाम्
स॒त्य-म्प्रप॑द्ये । ऋ॒त-म्प्रप॑द्ये ।
अ॒मृत॒-म्प्रप॑द्ये ।
प्र॒जाप॑तेः प्रि॒या-न्त॒नुव॒मना᳚र्ता॒-म्प्रप॑द्ये ।
इ॒दम॒ह-म्प॑ञ्चद॒शेन॒ वज्रे॑ण ।
द्वि॒षन्त॒-म्भ्रातृ॑व्य॒मव॑क्रामामि ।
यो᳚-ऽस्मा-न्द्वेष्टि॑ । य-ञ्च॑ व॒य-न्द्वि॒ष्मः ।
भूर्भुव॒-स्सुवः॑ । हिम् ॥ 1 ॥
(स॒त्य-न्दश॑) (अ. 1)
अनुवाकं 2 - सामिधेनीम्रन्वाह
प्र वो॒ वाजा॑ अ॒भिद्य॑वः । ह॒विष्म॑न्तो घृ॒ताच्या᳚ ।
दे॒वाञ्जि॑गाति सुम्न॒युः ॥ अग्न॒ आया॑हि वी॒तये᳚ । गृ॒णा॒नो ह॒व्यदा॑तये । नि होता॑ सथ्सि ब॒र॒ःइषि॑ ॥ त-न्त्वा॑ स॒मिद्भि॑रङ्गिरः । घृ॒तेन॑ वर्धयामसि । बृ॒हच्छो॑चा यविष्ठ्य ॥ स नः॑ पृ॒थु श्र॒वाय्य᳚म् ॥ 2 ॥
अच्छा॑ देव विवाससि । बृ॒हद॑ग्ने सु॒वीर्य᳚म् ॥
ई॒डेन्यो॑ नम॒स्य॑स्ति॒रः । तमाग्ं॑सि दर्श॒तः । सम॒ग्निरि॑द्ध्यते॒ वृषा᳚ ॥ वृषो॑ अ॒ग्नि-स्समि॑द्ध्यते । अश्वो॒ न दे॑व॒वाह॑नः ।
तग्ं ह॒विष्म॑न्त ईडते ॥ वृष॑ण-न्त्वा व॒यं-वृँषन्न्॑ । वृषा॑ण॒-स्समि॑धीमहि ॥ 3 ॥
अग्ने॒ दीद्य॑त-म्बृ॒हत् ॥ अ॒ग्नि-न्दू॒तं-वृँ॑णीमहे ।
होता॑रं-विँ॒श्ववे॑दसम् । अ॒स्य य॒ज्ञस्य॑ सु॒क्रतु᳚म् ॥ स॒मि॒द्ध्यमा॑नो अद्ध्व॒रे । अ॒ग्निः पा॑व॒क ईड्यः॑ । शो॒चिष्के॑श॒स्तमी॑महे ॥ समि॑द्धो अग्न आहुत । दे॒वान्. य॑क्षि स्वद्ध्वर । त्वग्ं हि ह॑व्य॒वाडसि॑ ॥
आजु॑होत दुव॒स्यत॑ । अ॒ग्नि-म्प्र॑य॒त्य॑द्ध्व॒रे ।
वृ॒णी॒द्ध्वग्ं ह॑व्य॒वाह॑नम् ॥
त्वं-वँरु॑ण उ॒त मि॒त्रो अ॑ग्ने । त्वां-वँ॑र्धन्ति म॒तिभि॒र्वसि॑ष्ठाः । त्वे वसु॑ सुषण॒नानि॑ सन्तु । यू॒य-म्पा॑त स्व॒स्तिभि॒-स्सदा॑ नः ॥ 4 ॥
(श्र॒वाय्य॑ - मिधीम॒ - ह्यसि॑ स॒प्त च॑) (अ. 2)
अनुवाकं 3 - प्ररमुक्त्वा निविदो-ऽनूच्य देवता आवाहयति
अग्ने॑ म॒हाग्ं अ॑सि ब्राह्मण भारत । असा॒वसौ᳚ ॥
दे॒वेद्धो॒ मन्वि॑द्धः । ऋषि॑ष्टुतो॒ विप्रा॑नुमदितः । क॒वि॒श॒स्तो ब्रह्म॑सग्ंशितो घृ॒ताह॑वनः ।
प्र॒णी-र्य॒ज्ञाना᳚म् । र॒थीर॑द्ध्व॒राणा᳚म् ।
अ॒तूर्तो॒ होता᳚ । तूर्णि॑र्हव्य॒वाट् ।
आस्पात्र॑-ञ्जु॒हू-र्दे॒वाना᳚म् ॥ 5 ॥
च॒म॒सो दे॑व॒पानः॑ । अ॒राग्ं इ॑वाग्ने ने॒मिर्दे॒वाग्स्त्व-म्प॑रि॒भूर॑सि । आव॑ह दे॒वान्. यज॑मानाय ॥ अ॒ग्निम॑ग्न॒ आव॑ह । सोम॒माव॑ह ।
अ॒ग्निमाव॑ह । प्र॒जाप॑ति॒माव॑ह । अ॒ग्नीषोमा॒वाव॑ह । इ॒न्द्रा॒ग्नी आव॑ह । इन्द्र॒माव॑ह । म॒हे॒न्द्रमाव॑ह । दे॒वाग्ं आ᳚ज्य॒पाग्ं आव॑ह ।
अ॒ग्निग्ं हो॒त्रायाव॑ह । स्व-म्म॑हि॒मान॒माव॑ह । आ चा᳚ग्ने दे॒वान्. वह॑ । सु॒यजा॑ च यज जातवेदः ॥ 6 ॥
(दे॒वाना॒-मिन्द्र॒माव॑ह॒ षट्च॑) (अ. 3)
अनुवाकं 4 - स्रुचावादापयति
अ॒ग्निर्-होता॒ वेत्व॒ग्निः । हो॒त्रं-वेँ᳚त्तु प्रावि॒त्रम् । स्मो व॒यम् । सा॒धु ते॑ यजमान दे॒वता᳚ । घृ॒तव॑ती-मद्ध्वर्यो॒ स्रुच॒मा-ऽस्य॑स्व । दे॒वा॒युवं॑-विँ॒श्ववा॑राम् । ईडा॑महै दे॒वाग्ं ई॒डेन्यान्॑ ।
न॒म॒स्याम॑ नम॒स्यान्॑ । यजा॑म य॒ज्ञियान्॑ ॥ 7 ॥
(अ॒ग्निर्-होता॒ नव॑) (अ. 4)
अनुवाकं 5 - प्रयाजाः
स॒मिधो॑ अग्न॒ आज्य॑स्य वियन्तु । तनू॒नपा॑दग्न॒ आज्य॑स्य वेतु । इ॒डो अ॑ग्न॒ आज्य॑स्य वियन्तु । ब॒र्॒हिर॑ग्न॒ आज्य॑स्य वेतु । स्वाहा॒-ऽग्निम् । स्वाहा॒ सोम᳚म् । स्वाहा॒-ऽग्निम् । स्वाहा᳚ प्र॒जाप॑तिम् ।
स्वाहा॒-ऽग्नीषोमौ᳚ । स्वाहे᳚न्द्रा॒ग्नी । स्वाहेन्द्र᳚म् ।
स्वाहा॑ महे॒न्द्रम् । स्वाहा॑ दे॒वाग्ं आ᳚ज्य॒पान् । स्वाहा॒-ऽग्निग्ं हो॒त्राज्जु॑षा॒णाः ।
अग्न॒ आज्य॑स्य वियन्तु ॥ 8 ॥
(इ॒न्द्रा॒ग्नी पञ्च॑ च) (अ. 5)
अनुवाकं 6 - अज्यभागयोः पुरोनुवाक्ये
अ॒ग्नि-र्वृ॒त्राणि॑ जङ्घनत् । द्र॒वि॒ण॒स्यु-र्वि॑प॒न्यया᳚ ।
समि॑द्ध-श्शु॒क्र आहु॑तः । जु॒षा॒णो अ॒ग्निराज्य॑स्य वेतु । त्वग्ं सो॑मासि॒ सत्प॑तिः । त्वग्ं राजो॒त वृ॑त्र॒हा ।
त्व-म्भ॒द्रो अ॑सि॒ क्रतुः॑ । जु॒षा॒ण-स्सोम॒ आज्य॑स्य ह॒विषो॑ वेतु । अ॒ग्निः प्र॒त्नेन॒ जन्म॑ना । शुम्भा॑नस्त॒नुव॒ग्ग्॒ स्वाम् ।
क॒वि-र्विप्रे॑ण वावृधे । जु॒षा॒णो अ॒ग्निराज्य॑स्य वेतु ।
सोम॑ गी॒र्भिष्ट्वा॑ व॒यम् । व॒र्धया॑मो वचो॒विदः॑ । सु॒मृ॒डी॒को न॒ आवि॑श ।
जु॒षा॒ण-स्सोम॒ आज्य॑स्य ह॒विषो॑ वेतु ॥ 9 ॥
(स्वाग्ं षट्च॑) (अ. 6)
अनुवाकं 7 - हविषां-याँज्यानुवाक्याः
अ॒ग्नि-र्मू॒र्धा दि॒वः क॒कुत् । पतिः॑ पृथि॒व्या अ॒यम् ।
अ॒पाग्ं रेताग्ं॑सि जिन्वति । भुवो॑ य॒ज्ञस्य॒ रज॑सश्च ने॒ता । यत्रा॑ नि॒युद्भि॒-स्सच॑से शि॒वाभिः॑ । दि॒वि मू॒र्धान॑-न्दधिषे सुव॒र्॒षाम् ।
जि॒ह्वाम॑ग्ने चकृषे हव्य॒वाह᳚म् । प्रजा॑पते॒ न त्वदे॒तान्य॒न्यः । विश्वा॑ जा॒तानि॒ परि॒ ता ब॑भूव ।
यत्-का॑मास्ते जुहु॒मस्तन्नो॑ अस्तु ॥ 10 ॥
व॒यग्ग् स्या॑म॒ पत॑यो रयी॒णाम् । स वे॑द पु॒त्रः पि॒तर॒ग्ं॒ स मा॒तर᳚म् । स सू॒नुर्भु॑व॒थ्स भु॑व॒त्पुन॑र्मघः । स द्यामौर्णो॑द॒न्तरि॑क्ष॒ग्ं॒ स सुवः॑ । स विश्वा॒ भुवो॑ अभव॒थ्स आ-ऽभ॑वत् । अग्नी॑षोमा॒ सवे॑दसा । सहू॑ती वनत॒-ङ्गिरः॑ । स-न्दे॑व॒त्रा ब॑भूवथुः । यु॒वमे॒तानि॑ दि॒वि रो॑च॒नानि॑ ।
अ॒ग्निश्च॑ सोम॒ सक्र॑तू अधत्तम् ॥ 11 ॥
यु॒वग्ं सिन्धूग्ं॑ र॒भिश॑स्ते-रव॒द्यात् । अग्नी॑षोमा॒-वमु॑ञ्चत-ङ्गृभी॒तान् ।
इन्द्रा᳚ग्नी रोच॒ना दि॒वः । परि॒ वाजे॑षु भूषथः ।
तद्वा᳚-ञ्चेति॒ प्रवी॒र्य᳚म् । श्नथ॑द्वृ॒त्रमु॒त स॑नोति॒ वाज᳚म् । इन्द्रा॒ यो अ॒ग्नी सहु॑री सप॒र्यात् ।
इ॒र॒ज्यन्ता॑ वस॒व्य॑स्य॒ भूरेः᳚ । सह॑स्तमा॒ सह॑सा वाज॒यन्ता᳚ । एन्द्र॑ सान॒सिग्ं र॒यिम् ॥ 12 ॥
स॒जित्वा॑नग्ं सदा॒सह᳚म् । वर्षि॑ष्ठमू॒तये॑ भर । प्रस॑साहिषे पुरुहूत॒ शत्रून्॑ । ज्येष्ठ॑स्ते॒ शुष्म॑ इ॒ह रा॒तिर॑स्तु । इन्द्राभ॑र॒ दक्षि॑णेना॒ वसू॑नि । पति॒-स्सिन्धू॑नामसि रे॒वती॑नाम् । म॒हाग्ं इन्द्रो॒ य ओज॑सा । प॒र्जन्यो॑ वृष्टि॒माग्ं इ॑व ।
स्तोमै᳚र्व॒थ्सस्य॑ वावृधे ।
म॒हां इन्द्रो॑ नृ॒वदाच॑र्षणि॒प्राः ॥ 13 ॥
उ॒त द्वि॒बर्हा॑ अमि॒न-स्सहो॑भिः । अ॒स्म॒द्रिय॑ग्वावृधे वी॒र्या॑य ।
उ॒रुः पृ॒थु-स्सुकृ॑तः क॒र्तृभि॑र्भूत् ।
पि॒प्री॒हि दे॒वाग्ं उ॑श॒तो य॑विष्ठ ।
वि॒द्वां ऋतूग्ंर्-ऋ॑तुपते यजे॒ह ।
ये दैव्या॑ ऋ॒त्विज॒स्तेभि॑रग्ने ।
त्वग्ं होतॄ॑णाम॒स्याय॑जिष्ठः ॥
अ॒ग्निग्ग् स्वि॑ष्ट॒कृत᳚म् । अया॑ड॒ग्निर॒ग्नेः प्रि॒या धामा॑नि । अया॒ट्थ्सोम॑स्य प्रि॒या धामा॑नि ॥ 14 ॥
अया॑ड॒ग्नेः प्रि॒या धामा॑नि । अया᳚ट्प्र॒जाप॑तेः प्रि॒या धामा॑नि । अया॑ड॒ग्नीषोम॑योः प्रि॒या धामा॑नि । अया॑डिन्द्राग्नि॒योः प्रि॒या धामा॑नि ।
अया॒डिन्द्र॑स्य प्रि॒या धामा॑नि । अया᳚ण्महे॒न्द्रस्य॑ प्रि॒या धामा॑नि । अया᳚ड्दे॒वाना॑-माज्य॒पाना᳚-म्प्रि॒या धामा॑नि । यक्ष॑द॒ग्नेर्-होतुः॑ प्रि॒या धामा॑नि । यक्ष॒थ्स्व-म्म॑हि॒मान᳚म् । आय॑जता॒मेज्या॒ इषः॑ । कृ॒णोतु॒ सो अ॑द्ध्व॒रा जा॒तवे॑दाः । जु॒षताग्ं॑ ह॒विः । अग्ने॒ यद॒द्य वि॒शो अ॑द्ध्वरस्य होतः ।
पाव॑क शोचे॒ वेष्ट्वग्ं हि यज्वा᳚ । ऋ॒ता य॑जासि महि॒ना वि यद्भूः ।
ह॒व्या व॑ह यविष्ठ॒ या ते॑ अ॒द्य ॥ 15 ॥
(अ॒स्त्व॒ - ध॒त्त॒ग्ं - र॒यिं - च॑र्षणि॒प्राः - सोम॑स्य प्रि॒या धामा॒ - नीष॒-ष्षट्च॑) (अ. 7)
अनुवाकं 8 - इडोपाह्वानाम्
उप॑हूतग्ं रथन्त॒रग्ं स॒ह पृ॑थि॒व्या ।
उप॑ मा रथन्त॒रग्ं स॒ह पृ॑थि॒व्या ह्व॑यताम् ।
उप॑हूतं-वाँमदे॒व्यग्ं स॒हान्तरि॑क्षेण ।
उप॑ मा वामदे॒व्यग्ं स॒हान्तरि॑क्षेण ह्वयताम् ।
उप॑ हूत-म्बृ॒हथ्स॒ह दि॒वा । उप॑ मा बृ॒हथ्स॒ह दि॒वा ह्व॑यताम् । उप॑हूता-स्स॒प्त होत्राः᳚ ।
उप॑ मा स॒प्त होत्रा᳚ ह्वयन्ताम् । उप॑हूता धे॒नु-स्स॒हर्ष॑भा । उप॑ मा धे॒नु-स्स॒हर्ष॑भा ह्वयताम् ॥ 16 ॥
उप॑हूतो भ॒क्ष-स्सखा᳚ । उप॑ मा भ॒क्ष-स्सखा᳚ ह्वयताम् । उप॑हू॒ताँ(4) हो । इडोप॑हूता । उप॑हू॒तेडा᳚ । उपो॑ अ॒स्माग्ं इडा᳚ ह्वयताम् । इडोप॑हूता । उप॑हू॒तेडा᳚ । मा॒न॒वी घृ॒तप॑दी मैत्रावरु॒णी ।
ब्रह्म॑ दे॒वकृ॑त॒मुप॑हूतम् ॥ 17 ॥
दैव्या॑ अद्ध्व॒र्यव॒ उप॑हूताः । उप॑हूता मनु॒ष्याः᳚ । य इ॒मं-यँ॒ज्ञमवान्॑ । ये य॒ज्ञप॑तिं॒-वँर्धान्॑ । उप॑हूते॒ द्यावा॑पृथि॒वी ।
पू॒र्व॒जे ऋ॒ताव॑री । दे॒वी दे॒वपु॑त्रे । उप॑हूतो॒-ऽयं-यँज॑मानः । उत्त॑रस्या-न्देवय॒ज्याया॒-मुप॑हूतः । भूय॑सि हवि॒ष्कर॑ण॒ उप॑हूतः ।
दि॒व्ये धाम॒न्नुप॑हूतः ।
इ॒द-म्मे॑ दे॒वा ह॒विर्जु॑षन्ता॒मिति॒ तस्मि॒न्नुप॑हूतः ।
विश्व॑मस्य प्रि॒यमुप॑हूतम् ।
विश्व॑स्य प्रि॒यस्योप॑हूत॒स्योप॑हूतः ॥ 18 ॥
(स॒हर्ष॑भा ह्वयता॒ - मुप॑हूतग्ं - हवि॒ष्कर॑ण॒ उप॑हूतश्च॒त्वारि॑ च) (अ. 8)
अनुवाकं 9 - अनूयाजाः
दे॒व-म्ब॒र्॒हिः । व॒सु॒वने॑ वसु॒धेय॑स्य वेतु । दे॒वो नरा॒शग्ं सः॑ । व॒सु॒वने॑ वसु॒धेय॑स्य वेतु । दे॒वो अ॒ग्नि-स्स्वि॑ष्ट॒कृत् । सु॒द्रवि॑णा म॒न्द्रः क॒विः । स॒त्यम॑न्मा-ऽऽय॒जी होता᳚ । होतु॑र्-होतु॒राय॑जीयान् । अग्ने॒ यान्-दे॒वानया᳚ट् । याग्ं अपि॑प्रेः । ये ते॑ हो॒त्रे अम॑थ्सत । ताग्ं स॑स॒नुषी॒ग्ं॒ होत्रा᳚-न्देव-ङ्ग॒माम् । दि॒वि दे॒वेषु॑ य॒ज्ञमेर॑ये॒मम् । स्वि॒ष्ट॒कृच्चाग्ने॒ होता-ऽभूः᳚ ।
व॒सु॒वने॑ वसु॒धेय॑स्य नमोवा॒के वीहि॑ ॥ 19 ॥
(अपि॑प्रेः॒ पञ्च॑ च) (अ. 9)
अनुवाकं 10 - सूक्तावाकः
इ॒द-न्द्या॑वापृथिवी भ॒द्रम॑भूत् ।
आर्ध्म॑ सूक्तवा॒कम् । उ॒त न॑मोवा॒कम् ।
ऋ॒द्ध्यास्म॑ सू॒क्तोच्य॑मग्ने । त्वग्ं सू᳚क्त॒वाग॑सि ।
उप॑श्रितो दि॒वः पृ॑थि॒व्योः । ओम॑न्वती ते॒-ऽस्मिन्. य॒ज्ञे य॑जमान॒ द्यावा॑पृथि॒वी स्ता᳚म् ।
श॒गं॒ये जी॒रदा॑नू । अत्र॑स्नू॒ अप्र॑वेदे ।
उ॒रुग॑व्यूती अभय॒-ङ्कृतौ᳚ ॥ 20 ॥
वृ॒ष्टिद्या॑वा री॒त्या॑पा । श॒म्भुवौ॑ मयो॒भुवौ᳚ ।
ऊर्ज॑स्वती च॒ पय॑स्वती च । सू॒प॒च॒र॒णा च॑ स्वधिचर॒णा च॑ । तयो॑रा॒विदि॑ ॥
अ॒ग्निरि॒दग्ं ह॒विर॑जुषत । अवी॑वृधत॒ महो॒ ज्यायो॑-ऽकृत । सोम॑ इ॒दग्ं ह॒विर॑जुषत । अवी॑वृधत॒ महो॒ ज्यायो॑-ऽकृत ।
अ॒ग्निरि॒दग्ं ह॒विर॑जुषत ॥ 21 ॥
अवी॑वृधत॒ महो॒ ज्यायो॑-ऽकृत । प्र॒जाप॑तिरि॒दग्ं ह॒विर॑जुषत । अवी॑वृधत॒ महो॒ ज्यायो॑-ऽकृत । अ॒ग्नीषोमा॑वि॒दग्ं ह॒विर॑जुषेताम् ।
अवी॑वृधेता॒-म्महो॒ ज्यायो᳚-ऽक्राताम् ।
इ॒न्द्रा॒ग्नी इ॒दग्ं ह॒विर॑जुषेताम् ।
अवी॑वृधेता॒-म्महो॒ ज्यायो᳚-ऽक्राताम् । इन्द्र॑ इ॒दग्ं ह॒विर॑जुषत । अवी॑वृधत॒ महो॒ ज्यायो॑-ऽकृत । म॒हे॒न्द्र इ॒दग्ं ह॒विर॑जुषत ॥ 22 ॥
अवी॑वृधत॒ महो॒ ज्यायो॑-ऽकृत । दे॒वा आ᳚ज्य॒पा आज्य॑मजुषन्त । अवी॑वृधन्त॒ महो॒ ज्यायो᳚-ऽक्रत । अ॒ग्निर्हो॒त्रेणे॒दग्ं ह॒विर॑जुषत ।
अवी॑वृधत॒ महो॒ ज्यायो॑-ऽकृत ।
अ॒स्यामृध॒-द्धोत्रा॑या-न्देवङ्ग॒माया᳚म् ।
आशा᳚स्ते॒-ऽयं-यँज॑मानो॒-ऽसौ ॥
आयु॒राशा᳚स्ते । सु॒प्र॒जा॒स्त्व-माशा᳚स्ते ।
स॒जा॒त॒व॒न॒स्या-माशा᳚स्ते ॥ 23 ॥
उत्त॑रा-न्देवय॒ज्या-माशा᳚स्ते । भूयो॑ हवि॒ष्कर॑ण॒-माशा᳚स्ते । दि॒व्य-न्धामाशा᳚स्ते । विश्व॑-म्प्रि॒यमाशा᳚स्ते । यद॒नेन॑ ह॒विषा ऽऽशा᳚स्ते । तद॑श्या॒त्-तदृ॑द्ध्यात् । तद॑स्मै दे॒वा रा॑सन्ताम् । तद॒ग्नि-र्दे॒वो दे॒वेभ्यो॒ वन॑ते । व॒यम॒ग्ने-र्मानु॑षाः । इ॒ष्ट-ञ्च॑ वी॒त-ञ्च॑ । उ॒भे च॑ नो॒ द्यावा॑पृथि॒वी अग्ंह॑सस्पाताम् ।
इ॒ह गति॑-र्वा॒मस्ये॒द-ञ्च॑ । नमो॑ दे॒वेभ्यः॑ ॥ 24 ॥
(अ॒भ॒य॒ङ्कृता॑वकृ - ता॒ग्निरि॒दग्ं ह॒विर॑जुषत - महे॒न्द्र इ॒दग्ं ह॒विर॑जुषत - सजातवन॒स्यामाशा᳚स्ते - वी॒त-ञ्च॒ त्रीणि॑ च) (अ. 10)
अनुवाकं 11 - शंयुँवाकः
तच्छं॒-योँरा वृ॑णीमहे । गा॒तुं-यँ॒ज्ञाय॑ । गा॒तुं-यँ॒ज्ञप॑तये । दैवी᳚ स्व॒स्तिर॑स्तु नः । स्व॒स्ति-र्मानु॑षेभ्यः । ऊ॒र्ध्व-ञ्जि॑गातु भेष॒जम् ।
श-न्नो॑ अस्तु द्वि॒पदे᳚ । श-ञ्चतु॑ष्पदे ॥ 25 ॥
(तच्छं॒-योँर॒ष्टौ) (अ. 11)
अनुवाकं 12 - पत्नीसंयाँजानां-याँज्यानुवाक्याः
आ प्या॑यस्व॒ समे॑तु ते वि॒श्वतः॑ सोम॒ वृष्णि॑यम् । भवा॒ वाज॑स्य सङ्ग॒थे ॥ स-न्ते॒ पयाग्ं ॑सि॒ समु॑ यन्तु॒ वाजा॒-स्सं-वृँष्णि॑या-न्यभिमाति॒षाहः॑ । आ॒प्याय॑मानो अ॒मृता॑य सोम दि॒वि श्रवाग्॑स्युत्त॒मानि॑ धिष्व ॥ ॥
इ॒ह त्वष्टा॑रमग्रि॒यं-विँ॒श्वरू॑प॒मुप॑ ह्वये । अ॒स्माक॑मस्तु॒ केव॑लः ॥ तन्न॑स्तु॒रीप॒मध॑ पोषयि॒त्नु देव॑ त्वष्ट॒र्वि र॑रा॒ण-स्स्य॑स्व । यतो॑ वी॒रः क॑र्म॒ण्यः॑ सु॒दक्षो॑ यु॒क्तग्रा॑वा॒ जाय॑ते दे॒वका॑मः ॥ ॥
दे॒वाना॒-म्पत्नी॑रुश॒तीर॑वन्तु नः । प्राव॑न्तु नस्तु॒जये॒ वाज॑सातये । याः पार्थि॑वासो॒ या अ॒पामपि॑ व्र॒ते । ता नो॑ देवी-स्सुहवा॒-श्शर्म॑ यच्छत ॥ उ॒त ग्ना वि॑यन्तु दे॒वप॑त्नीः । इ॒न्द्रा॒ण्य॑ग्नाय्य॒श्विनी॒ राट् । आ रोद॑सी वरुणा॒नी शृ॑णोतु ।
वि॒यन्तु॑ दे॒वीर्य ऋ॒तुर्जनी॑नाम् ॥ 26 ॥
अ॒ग्निर्-होता॑ गृ॒हप॑ति॒-स्स राजा᳚ । विश्वा॑ वेद॒ जनि॑मा जा॒तवे॑दाः । दे॒वाना॑मु॒त यो मर्त्या॑नाम् । यजि॑ष्ठ॒-स्स प्रय॑जतामृ॒तावा᳚ ॥
व॒यमु॑ त्वा गृहपते॒ जना॑नाम् । अग्ने॒ अक॑र्म स॒मिधा॑ बृ॒हन्त᳚म् । अ॒स्थू॒रिणो॒ गार्ह॑पत्यानि सन्तु । ति॒ग्मेन॑ न॒स्तेज॑सा॒ सग्ंशि॑शाधि ॥ 27 ॥
(जनी॑ना - +म॒ष्टौ च॑) (अ. 12)
अनुवाकं 13 - पत्नीसंयाँजे सोमाह्वानम्
उप॑हूतग्ं रथन्त॒रग्ं स॒ह पृ॑थि॒व्या ।
उप॑ मा रथन्त॒रग्ं स॒ह पृ॑थि॒व्या ह्व॑यताम् ।
उप॑हूतं-वाँमदे॒व्यग्ं स॒हान्तरि॑क्षेण ।
उप॑ मा वामदे॒व्यग्ं स॒हान्तरि॑क्षेण ह्वयताम् । उप॑हूत-म्बृ॒हथ्स॒ह दि॒वा । उप॑ मा बृ॒हथ्स॒ह दि॒वा ह्व॑यताम् । उप॑हूता-स्स॒प्त होत्राः᳚ ।
उप॑ मा स॒प्त होत्रा᳚ ह्वयन्ताम् । उप॑हूता धे॒नु-स्स॒हर्ष॑भा । उप॑ मा धे॒नु-स्स॒हर्ष॑भा ह्वयताम् ॥ 28 ॥
उप॑हूतो भ॒क्ष-स्सखा᳚ । उप॑ मा भ॒क्ष-स्सखा᳚ ह्वयताम् । उप॑हू॒ताँ(4) हो । इडोप॑हूता । उप॑हू॒तेडा᳚ । उपो॑ अ॒स्माग्ं इडा᳚ ह्वयताम् । इडोप॑हूता । उप॑हू॒तेडा᳚ । मा॒न॒वी घृ॒तप॑दी मैत्रावरु॒णी ।
ब्रह्म॑ दे॒वकृ॑त॒मुप॑हूतम् ॥ 29 ॥
दैव्या॑ अद्ध्व॒र्यव॒ उप॑हूताः । उप॑हूता मनु॒ष्याः᳚ । य इ॒मं-यँ॒ज्ञमवान्॑ । ये य॒ज्ञप॑त्नीं॒-वँर्धान्॑ । उप॑हूते॒ द्यावा॑पृथि॒वी । पू॒र्व॒जे ऋ॒ताव॑री । दे॒वी दे॒वपु॑त्रे । उप॑हूते॒यं-यँज॑माना । इ॒न्द्रा॒णीवा॑विध॒वा । अदि॑तिरिव सुपु॒त्रा । उत्त॑रस्या-न्देवय॒ज्याया॒-मुप॑हूता ।
भूय॑सि हवि॒ष्कर॑ण॒ उप॑हूता । दि॒व्ये धाम॒न्नुप॑हूता । इ॒द-म्मे॑ दे॒वा ह॒वि-र्जु॑षन्ता॒मिति॒ तस्मि॒-न्नुप॑हूता । विश्व॑मस्याः प्रि॒यमुप॑हूतम् ।
विश्व॑स्य प्रि॒यस्योप॑हूत॒स्योप॑हूता ॥ 30 ॥
(स॒हर्ष॑भा ह्वयता॒ - मुप॑हूतग्ं - सुपु॒त्रा षट्च॑) (अ. 13)
(स॒त्यं - प्रवो - ऽग्ने॑ म॒हा - न॒ग्निर्-होता॑ - स॒मिधो॒ - ऽग्नि-र्वृ॒त्राण्य॒ - ग्नि-र्मू॒र्धो - प॑हूतं - दे॒व-म्ब॒र्॒हि - रि॒द-न्द्या॑वापृथिवी॒ -तच्छं॒योँ- रा प्या॑य॒स्वो - प॑हूत॒-न्त्रयो॑दश)
(स॒त्यं - ँव॒यग्ग् स्या॑म - वृ॒ष्टिद्या॑वा त्रि॒ग्ं॒शत्)
(स॒त्य-मुप॑हूता)
॥ हरिः॑ ओम् ॥
॥ कृष्ण यजुर्वेदीय तैत्तिरीय ब्राह्मणे तृतीयाष्टके पञ्चम प्रपाठक-स्समाप्तः ॥
kṛṣṇa yajurvedīya taittirīya brāhmaṇe tṛtīyāṣṭake pañcamaḥ prapāṭhakaḥ - iṣṭihautram
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | ha॒riḥ॒ om ||
anuvākaṃ 1 - hoturjapaḥ purastā-thsāmidhenīnām
sa॒tya-mprapa̭dye | ṛ॒ta-mprapa̭dye |
a॒mṛta॒-mprapa̭dye |
pra॒jāpa̭teḥ pri॒yā-nta॒nuva॒manā᳚rtā॒-mprapa̭dye |
i॒dama॒ha-mpa̭ñcada॒śena॒ vajrḙṇa |
dvi॒ṣanta॒-mbhrātṛ̭vya॒mava̭krāmāmi |
yo᳚-'smā-ndveṣṭi̭ | ya-ñca̭ va॒ya-ndvi॒ṣmaḥ |
bhūrbhuva॒-ssuvaḥ̭ | him || 1 ||
(sa॒tya-ndaśa̭) (a. 1)
anuvākaṃ 2 - sāmidhenīmranvāha
pra vo॒ vājā̭ a॒bhidya̭vaḥ | ha॒viṣma̭nto ghṛ॒tācyā᳚ |
de॒vāñji̭gāti sumna॒yuḥ || agna॒ āyā̭hi vī॒taye᳚ | gṛ॒ṇā॒no ha॒vyadā̭taye | ni hotā̭ sathsi ba॒ra॒ḥiṣi̭ || ta-ntvā̭ sa॒midbhi̭raṅgiraḥ | ghṛ॒tena̭ vardhayāmasi | bṛ॒haccho̭cā yaviṣṭhya || sa naḥ̭ pṛ॒thu śra॒vāyya᳚m || 2 ||
acchā̭ deva vivāsasi | bṛ॒hada̭gne su॒vīrya᳚m ||
ī॒ḍenyo̭ nama॒sya̭sti॒raḥ | tamāgṃ̭si darśa॒taḥ | sama॒gniri̭ddhyate॒ vṛṣā᳚ || vṛṣo̭ a॒gni-ssami̭ddhyate | aśvo॒ na dḙva॒vāha̭naḥ |
tagṃ ha॒viṣma̭nta īḍate || vṛṣa̭ṇa-ntvā va॒yaṃ-vṛ~ṣanṋ | vṛṣā̭ṇa॒-ssami̭dhīmahi || 3 ||
agne॒ dīdya̭ta-mbṛ॒hat || a॒gni-ndū॒taṃ-vṛ~̭ṇīmahe |
hotā̭raṃ-vi~॒śvavḙdasam | a॒sya ya॒jñasya̭ su॒kratu᳚m || sa॒mi॒ddhyamā̭no addhva॒re | a॒gniḥ pā̭va॒ka īḍyaḥ̭ | śo॒ciṣkḙśa॒stamī̭mahe || sami̭ddho agna āhuta | de॒vān. ya̭kṣi svaddhvara | tvagṃ hi ha̭vya॒vāḍasi̭ ||
ājṷhota duva॒syata̭ | a॒gni-mpra̭ya॒tya̭ddhva॒re |
vṛ॒ṇī॒ddhvagṃ ha̭vya॒vāha̭nam ||
tvaṃ-va~rṷṇa u॒ta mi॒tro a̭gne | tvāṃ-va~̭rdhanti ma॒tibhi॒rvasi̭ṣṭhāḥ | tve vasṷ suṣaṇa॒nāni̭ santu | yū॒ya-mpā̭ta sva॒stibhi॒-ssadā̭ naḥ || 4 ||
(śra॒vāyya̭ - midhīma॒ - hyasi̭ sa॒pta ca̭) (a. 2)
anuvākaṃ 3 - praramuktvā nivido-'nūcya devatā āvāhayati
agnḙ ma॒hāgṃ a̭si brāhmaṇa bhārata | asā॒vasau᳚ ||
de॒veddho॒ manvi̭ddhaḥ | ṛṣi̭ṣṭuto॒ viprā̭numaditaḥ | ka॒vi॒śa॒sto brahma̭sagṃśito ghṛ॒tāha̭vanaḥ |
pra॒ṇī-rya॒jñānā᳚m | ra॒thīra̭ddhva॒rāṇā᳚m |
a॒tūrto॒ hotā᳚ | tūrṇi̭rhavya॒vāṭ |
āspātra̭-ñju॒hū-rde॒vānā᳚m || 5 ||
ca॒ma॒so dḙva॒pānaḥ̭ | a॒rāgṃ i̭vāgne ne॒mirde॒vāgstva-mpa̭ri॒bhūra̭si | āva̭ha de॒vān. yaja̭mānāya || a॒gnima̭gna॒ āva̭ha | soma॒māva̭ha |
a॒gnimāva̭ha | pra॒jāpa̭ti॒māva̭ha | a॒gnīṣomā॒vāva̭ha | i॒ndrā॒gnī āva̭ha | indra॒māva̭ha | ma॒he॒ndramāva̭ha | de॒vāgṃ ā᳚jya॒pāgṃ āva̭ha |
a॒gnigṃ ho॒trāyāva̭ha | sva-mma̭hi॒māna॒māva̭ha | ā cā᳚gne de॒vān. vaha̭ | su॒yajā̭ ca yaja jātavedaḥ || 6 ||
(de॒vānā॒-mindra॒māva̭ha॒ ṣaṭca̭) (a. 3)
anuvākaṃ 4 - srucāvādāpayati
a॒gnir-hotā॒ vetva॒gniḥ | ho॒traṃ-ve~᳚ttu prāvi॒tram | smo va॒yam | sā॒dhu tḙ yajamāna de॒vatā᳚ | ghṛ॒tava̭tī-maddhvaryo॒ sruca॒mā-'sya̭sva | de॒vā॒yuvaṃ̭-vi~॒śvavā̭rām | īḍā̭mahai de॒vāgṃ ī॒ḍenyāṋ |
na॒ma॒syāma̭ nama॒syāṋ | yajā̭ma ya॒jñiyāṋ || 7 ||
(a॒gnir-hotā॒ nava̭) (a. 4)
anuvākaṃ 5 - prayājāḥ
sa॒midho̭ agna॒ ājya̭sya viyantu | tanū॒napā̭dagna॒ ājya̭sya vetu | i॒ḍo a̭gna॒ ājya̭sya viyantu | ba॒r॒hira̭gna॒ ājya̭sya vetu | svāhā॒-'gnim | svāhā॒ soma᳚m | svāhā॒-'gnim | svāhā᳚ pra॒jāpa̭tim |
svāhā॒-'gnīṣomau᳚ | svāhe᳚ndrā॒gnī | svāhendra᳚m |
svāhā̭ mahe॒ndram | svāhā̭ de॒vāgṃ ā᳚jya॒pān | svāhā॒-'gnigṃ ho॒trājjṷṣā॒ṇāḥ |
agna॒ ājya̭sya viyantu || 8 ||
(i॒ndrā॒gnī pañca̭ ca) (a. 5)
anuvākaṃ 6 - ajyabhāgayoḥ puronuvākye
a॒gni-rvṛ॒trāṇi̭ jaṅghanat | dra॒vi॒ṇa॒syu-rvi̭pa॒nyayā᳚ |
sami̭ddha-śśu॒kra āhṷtaḥ | ju॒ṣā॒ṇo a॒gnirājya̭sya vetu | tvagṃ so̭māsi॒ satpa̭tiḥ | tvagṃ rājo॒ta vṛ̭tra॒hā |
tva-mbha॒dro a̭si॒ kratuḥ̭ | ju॒ṣā॒ṇa-ssoma॒ ājya̭sya ha॒viṣo̭ vetu | a॒gniḥ pra॒tnena॒ janma̭nā | śumbhā̭nasta॒nuva॒gg॒ svām |
ka॒vi-rviprḙṇa vāvṛdhe | ju॒ṣā॒ṇo a॒gnirājya̭sya vetu |
soma̭ gī॒rbhiṣṭvā̭ va॒yam | va॒rdhayā̭mo vaco॒vidaḥ̭ | su॒mṛ॒ḍī॒ko na॒ āvi̭śa |
ju॒ṣā॒ṇa-ssoma॒ ājya̭sya ha॒viṣo̭ vetu || 9 ||
(svāgṃ ṣaṭca̭) (a. 6)
anuvākaṃ 7 - haviṣāṃ-yā~jyānuvākyāḥ
a॒gni-rmū॒rdhā di॒vaḥ ka॒kut | patiḥ̭ pṛthi॒vyā a॒yam |
a॒pāgṃ retāgṃ̭si jinvati | bhuvo̭ ya॒jñasya॒ raja̭saśca ne॒tā | yatrā̭ ni॒yudbhi॒-ssaca̭se śi॒vābhiḥ̭ | di॒vi mū॒rdhāna̭-ndadhiṣe suva॒r॒ṣām |
ji॒hvāma̭gne cakṛṣe havya॒vāha᳚m | prajā̭pate॒ na tvade॒tānya॒nyaḥ | viśvā̭ jā॒tāni॒ pari॒ tā ba̭bhūva |
yat-kā̭māste juhu॒mastanno̭ astu || 10 ||
va॒yagg syā̭ma॒ pata̭yo rayī॒ṇām | sa vḙda pu॒traḥ pi॒tara॒gṃ॒ sa mā॒tara᳚m | sa sū॒nurbhṷva॒thsa bhṷva॒tpuna̭rmaghaḥ | sa dyāmaurṇo̭da॒ntari̭kṣa॒gṃ॒ sa suvaḥ̭ | sa viśvā॒ bhuvo̭ abhava॒thsa ā-'bha̭vat | agnī̭ṣomā॒ savḙdasā | sahṷ̄tī vanata॒-ṅgiraḥ̭ | sa-ndḙva॒trā ba̭bhūvathuḥ | yu॒vame॒tāni̭ di॒vi ro̭ca॒nāni̭ |
a॒gniśca̭ soma॒ sakra̭tū adhattam || 11 ||
yu॒vagṃ sindhūgṃ̭ ra॒bhiśa̭ste-rava॒dyāt | agnī̭ṣomā॒-vamṷñcata-ṅgṛbhī॒tān |
indrā᳚gnī roca॒nā di॒vaḥ | pari॒ vājḙṣu bhūṣathaḥ |
tadvā᳚-ñceti॒ pravī॒rya᳚m | śnatha̭dvṛ॒tramu॒ta sa̭noti॒ vāja᳚m | indrā॒ yo a॒gnī sahṷrī sapa॒ryāt |
i॒ra॒jyantā̭ vasa॒vya̭sya॒ bhūreḥ᳚ | saha̭stamā॒ saha̭sā vāja॒yantā᳚ | endra̭ sāna॒sigṃ ra॒yim || 12 ||
sa॒jitvā̭nagṃ sadā॒saha᳚m | varṣi̭ṣṭhamū॒tayḙ bhara | prasa̭sāhiṣe puruhūta॒ śatrūṋ | jyeṣṭha̭ste॒ śuṣma̭ i॒ha rā॒tira̭stu | indrābha̭ra॒ dakṣi̭ṇenā॒ vasṷ̄ni | pati॒-ssindhṷ̄nāmasi re॒vatī̭nām | ma॒hāgṃ indro॒ ya oja̭sā | pa॒rjanyo̭ vṛṣṭi॒māgṃ i̭va |
stomai᳚rva॒thsasya̭ vāvṛdhe |
ma॒hāṃ indro̭ nṛ॒vadāca̭rṣaṇi॒prāḥ || 13 ||
u॒ta dvi॒barhā̭ ami॒na-ssaho̭bhiḥ | a॒sma॒driya̭gvāvṛdhe vī॒ryā̭ya |
u॒ruḥ pṛ॒thu-ssukṛ̭taḥ ka॒rtṛbhi̭rbhūt |
pi॒prī॒hi de॒vāgṃ ṷśa॒to ya̭viṣṭha |
vi॒dvāṃ ṛtūgṃr-ṛ̭tupate yaje॒ha |
ye daivyā̭ ṛ॒tvija॒stebhi̭ragne |
tvagṃ hotṝ̭ṇāma॒syāya̭jiṣṭhaḥ ||
a॒gnigg svi̭ṣṭa॒kṛta᳚m | ayā̭ḍa॒gnira॒gneḥ pri॒yā dhāmā̭ni | ayā॒ṭthsoma̭sya pri॒yā dhāmā̭ni || 14 ||
ayā̭ḍa॒gneḥ pri॒yā dhāmā̭ni | ayā᳚ṭpra॒jāpa̭teḥ pri॒yā dhāmā̭ni | ayā̭ḍa॒gnīṣoma̭yoḥ pri॒yā dhāmā̭ni | ayā̭ḍindrāgni॒yoḥ pri॒yā dhāmā̭ni |
ayā॒ḍindra̭sya pri॒yā dhāmā̭ni | ayā᳚ṇmahe॒ndrasya̭ pri॒yā dhāmā̭ni | ayā᳚ḍde॒vānā̭-mājya॒pānā᳚-mpri॒yā dhāmā̭ni | yakṣa̭da॒gner-hotuḥ̭ pri॒yā dhāmā̭ni | yakṣa॒thsva-mma̭hi॒māna᳚m | āya̭jatā॒mejyā॒ iṣaḥ̭ | kṛ॒ṇotu॒ so a̭ddhva॒rā jā॒tavḙdāḥ | ju॒ṣatāgṃ̭ ha॒viḥ | agne॒ yada॒dya vi॒śo a̭ddhvarasya hotaḥ |
pāva̭ka śoce॒ veṣṭvagṃ hi yajvā᳚ | ṛ॒tā ya̭jāsi mahi॒nā vi yadbhūḥ |
ha॒vyā va̭ha yaviṣṭha॒ yā tḙ a॒dya || 15 ||
(a॒stva॒ - dha॒tta॒gṃ - ra॒yiṃ - ca̭rṣaṇi॒prāḥ - soma̭sya pri॒yā dhāmā॒ - nīṣa॒-ṣṣaṭca̭) (a. 7)
anuvākaṃ 8 - iḍopāhvānām
upa̭hūtagṃ rathanta॒ragṃ sa॒ha pṛ̭thi॒vyā |
upa̭ mā rathanta॒ragṃ sa॒ha pṛ̭thi॒vyā hva̭yatām |
upa̭hūtaṃ-vā~made॒vyagṃ sa॒hāntari̭kṣeṇa |
upa̭ mā vāmade॒vyagṃ sa॒hāntari̭kṣeṇa hvayatām |
upa̭ hūta-mbṛ॒hathsa॒ha di॒vā | upa̭ mā bṛ॒hathsa॒ha di॒vā hva̭yatām | upa̭hūtā-ssa॒pta hotrāḥ᳚ |
upa̭ mā sa॒pta hotrā᳚ hvayantām | upa̭hūtā dhe॒nu-ssa॒harṣa̭bhā | upa̭ mā dhe॒nu-ssa॒harṣa̭bhā hvayatām || 16 ||
upa̭hūto bha॒kṣa-ssakhā᳚ | upa̭ mā bha॒kṣa-ssakhā᳚ hvayatām | upa̭hū॒tā~(4) ho | iḍopa̭hūtā | upa̭hū॒teḍā᳚ | upo̭ a॒smāgṃ iḍā᳚ hvayatām | iḍopa̭hūtā | upa̭hū॒teḍā᳚ | mā॒na॒vī ghṛ॒tapa̭dī maitrāvaru॒ṇī |
brahma̭ de॒vakṛ̭ta॒mupa̭hūtam || 17 ||
daivyā̭ addhva॒ryava॒ upa̭hūtāḥ | upa̭hūtā manu॒ṣyāḥ᳚ | ya i॒maṃ-ya~॒jñamavāṋ | ye ya॒jñapa̭tiṃ॒-va~rdhāṋ | upa̭hūte॒ dyāvā̭pṛthi॒vī |
pū॒rva॒je ṛ॒tāva̭rī | de॒vī de॒vapṷtre | upa̭hūto॒-'yaṃ-ya~ja̭mānaḥ | utta̭rasyā-ndevaya॒jyāyā॒-mupa̭hūtaḥ | bhūya̭si havi॒ṣkara̭ṇa॒ upa̭hūtaḥ |
di॒vye dhāma॒nnupa̭hūtaḥ |
i॒da-mmḙ de॒vā ha॒virjṷṣantā॒miti॒ tasmi॒nnupa̭hūtaḥ |
viśva̭masya pri॒yamupa̭hūtam |
viśva̭sya pri॒yasyopa̭hūta॒syopa̭hūtaḥ || 18 ||
(sa॒harṣa̭bhā hvayatā॒ - mupa̭hūtagṃ - havi॒ṣkara̭ṇa॒ upa̭hūtaśca॒tvāri̭ ca) (a. 8)
anuvākaṃ 9 - anūyājāḥ
de॒va-mba॒r॒hiḥ | va॒su॒vanḙ vasu॒dheya̭sya vetu | de॒vo narā॒śagṃ saḥ̭ | va॒su॒vanḙ vasu॒dheya̭sya vetu | de॒vo a॒gni-ssvi̭ṣṭa॒kṛt | su॒dravi̭ṇā ma॒ndraḥ ka॒viḥ | sa॒tyama̭nmā-''ya॒jī hotā᳚ | hotṷr-hotu॒rāya̭jīyān | agne॒ yān-de॒vānayā᳚ṭ | yāgṃ api̭preḥ | ye tḙ ho॒tre ama̭thsata | tāgṃ sa̭sa॒nuṣī॒gṃ॒ hotrā᳚-ndeva-ṅga॒mām | di॒vi de॒veṣṷ ya॒jñamera̭ye॒mam | svi॒ṣṭa॒kṛccāgne॒ hotā-'bhūḥ᳚ |
va॒su॒vanḙ vasu॒dheya̭sya namovā॒ke vīhi̭ || 19 ||
(api̭preḥ॒ pañca̭ ca) (a. 9)
anuvākaṃ 10 - sūktāvākaḥ
i॒da-ndyā̭vāpṛthivī bha॒drama̭bhūt |
ārdhma̭ sūktavā॒kam | u॒ta na̭movā॒kam |
ṛ॒ddhyāsma̭ sū॒ktocya̭magne | tvagṃ sū᳚kta॒vāga̭si |
upa̭śrito di॒vaḥ pṛ̭thi॒vyoḥ | oma̭nvatī te॒-'smin. ya॒jñe ya̭jamāna॒ dyāvā̭pṛthi॒vī stā᳚m |
śa॒gaṃ॒ye jī॒radā̭nū | atra̭snū॒ apra̭vede |
u॒ruga̭vyūtī abhaya॒-ṅkṛtau᳚ || 20 ||
vṛ॒ṣṭidyā̭vā rī॒tyā̭pā | śa॒mbhuvaṷ mayo॒bhuvau᳚ |
ūrja̭svatī ca॒ paya̭svatī ca | sū॒pa॒ca॒ra॒ṇā ca̭ svadhicara॒ṇā ca̭ | tayo̭rā॒vidi̭ ||
a॒gniri॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | soma̭ i॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta |
a॒gniri॒dagṃ ha॒vira̭juṣata || 21 ||
avī̭vṛdhata॒ maho॒ jyāyo̭-'kṛta | pra॒jāpa̭tiri॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | a॒gnīṣomā̭vi॒dagṃ ha॒vira̭juṣetām |
avī̭vṛdhetā॒-mmaho॒ jyāyo᳚-'krātām |
i॒ndrā॒gnī i॒dagṃ ha॒vira̭juṣetām |
avī̭vṛdhetā॒-mmaho॒ jyāyo᳚-'krātām | indra̭ i॒dagṃ ha॒vira̭juṣata | avī̭vṛdhata॒ maho॒ jyāyo̭-'kṛta | ma॒he॒ndra i॒dagṃ ha॒vira̭juṣata || 22 ||
avī̭vṛdhata॒ maho॒ jyāyo̭-'kṛta | de॒vā ā᳚jya॒pā ājya̭majuṣanta | avī̭vṛdhanta॒ maho॒ jyāyo᳚-'krata | a॒gnirho॒treṇe॒dagṃ ha॒vira̭juṣata |
avī̭vṛdhata॒ maho॒ jyāyo̭-'kṛta |
a॒syāmṛdha॒-ddhotrā̭yā-ndevaṅga॒māyā᳚m |
āśā᳚ste॒-'yaṃ-ya~ja̭māno॒-'sau ||
āyu॒rāśā᳚ste | su॒pra॒jā॒stva-māśā᳚ste |
sa॒jā॒ta॒va॒na॒syā-māśā᳚ste || 23 ||
utta̭rā-ndevaya॒jyā-māśā᳚ste | bhūyo̭ havi॒ṣkara̭ṇa॒-māśā᳚ste | di॒vya-ndhāmāśā᳚ste | viśva̭-mpri॒yamāśā᳚ste | yada॒nena̭ ha॒viṣā ''śā᳚ste | tada̭śyā॒t-tadṛ̭ddhyāt | tada̭smai de॒vā rā̭santām | tada॒gni-rde॒vo de॒vebhyo॒ vana̭te | va॒yama॒gne-rmānṷṣāḥ | i॒ṣṭa-ñca̭ vī॒ta-ñca̭ | u॒bhe ca̭ no॒ dyāvā̭pṛthi॒vī agṃha̭saspātām |
i॒ha gati̭-rvā॒masye॒da-ñca̭ | namo̭ de॒vebhyaḥ̭ || 24 ||
(a॒bha॒ya॒ṅkṛtā̭vakṛ - tā॒gniri॒dagṃ ha॒vira̭juṣata - mahe॒ndra i॒dagṃ ha॒vira̭juṣata - sajātavana॒syāmāśā᳚ste - vī॒ta-ñca॒ trīṇi̭ ca) (a. 10)
anuvākaṃ 11 - śaṃyu~vākaḥ
tacchaṃ॒-yo~rā vṛ̭ṇīmahe | gā॒tuṃ-ya~॒jñāya̭ | gā॒tuṃ-ya~॒jñapa̭taye | daivī᳚ sva॒stira̭stu naḥ | sva॒sti-rmānṷṣebhyaḥ | ū॒rdhva-ñji̭gātu bheṣa॒jam |
śa-nno̭ astu dvi॒pade᳚ | śa-ñcatṷṣpade || 25 ||
(tacchaṃ॒-yo~ra॒ṣṭau) (a. 11)
anuvākaṃ 12 - patnīsaṃyā~jānāṃ-yā~jyānuvākyāḥ
ā pyā̭yasva॒ samḙtu te vi॒śvataḥ̭ soma॒ vṛṣṇi̭yam | bhavā॒ vāja̭sya saṅga॒the || sa-nte॒ payāgṃ ̭si॒ samṷ yantu॒ vājā॒-ssaṃ-vṛ~ṣṇi̭yā-nyabhimāti॒ṣāhaḥ̭ | ā॒pyāya̭māno a॒mṛtā̭ya soma di॒vi śravāg̭syutta॒māni̭ dhiṣva || ||
i॒ha tvaṣṭā̭ramagri॒yaṃ-vi~॒śvarṷ̄pa॒mupa̭ hvaye | a॒smāka̭mastu॒ keva̭laḥ || tanna̭stu॒rīpa॒madha̭ poṣayi॒tnu deva̭ tvaṣṭa॒rvi ra̭rā॒ṇa-ssya̭sva | yato̭ vī॒raḥ ka̭rma॒ṇyaḥ̭ su॒dakṣo̭ yu॒ktagrā̭vā॒ jāya̭te de॒vakā̭maḥ || ||
de॒vānā॒-mpatnī̭ruśa॒tīra̭vantu naḥ | prāva̭ntu nastu॒jaye॒ vāja̭sātaye | yāḥ pārthi̭vāso॒ yā a॒pāmapi̭ vra॒te | tā no̭ devī-ssuhavā॒-śśarma̭ yacchata || u॒ta gnā vi̭yantu de॒vapa̭tnīḥ | i॒ndrā॒ṇya̭gnāyya॒śvinī॒ rāṭ | ā roda̭sī varuṇā॒nī śṛ̭ṇotu |
vi॒yantṷ de॒vīrya ṛ॒turjanī̭nām || 26 ||
a॒gnir-hotā̭ gṛ॒hapa̭ti॒-ssa rājā᳚ | viśvā̭ veda॒ jani̭mā jā॒tavḙdāḥ | de॒vānā̭mu॒ta yo martyā̭nām | yaji̭ṣṭha॒-ssa praya̭jatāmṛ॒tāvā᳚ ||
va॒yamṷ tvā gṛhapate॒ janā̭nām | agne॒ aka̭rma sa॒midhā̭ bṛ॒hanta᳚m | a॒sthū॒riṇo॒ gārha̭patyāni santu | ti॒gmena̭ na॒steja̭sā॒ sagṃśi̭śādhi || 27 ||
(janī̭nā - +ma॒ṣṭau ca̭) (a. 12)
anuvākaṃ 13 - patnīsaṃyā~je somāhvānam
upa̭hūtagṃ rathanta॒ragṃ sa॒ha pṛ̭thi॒vyā |
upa̭ mā rathanta॒ragṃ sa॒ha pṛ̭thi॒vyā hva̭yatām |
upa̭hūtaṃ-vā~made॒vyagṃ sa॒hāntari̭kṣeṇa |
upa̭ mā vāmade॒vyagṃ sa॒hāntari̭kṣeṇa hvayatām | upa̭hūta-mbṛ॒hathsa॒ha di॒vā | upa̭ mā bṛ॒hathsa॒ha di॒vā hva̭yatām | upa̭hūtā-ssa॒pta hotrāḥ᳚ |
upa̭ mā sa॒pta hotrā᳚ hvayantām | upa̭hūtā dhe॒nu-ssa॒harṣa̭bhā | upa̭ mā dhe॒nu-ssa॒harṣa̭bhā hvayatām || 28 ||
upa̭hūto bha॒kṣa-ssakhā᳚ | upa̭ mā bha॒kṣa-ssakhā᳚ hvayatām | upa̭hū॒tā~(4) ho | iḍopa̭hūtā | upa̭hū॒teḍā᳚ | upo̭ a॒smāgṃ iḍā᳚ hvayatām | iḍopa̭hūtā | upa̭hū॒teḍā᳚ | mā॒na॒vī ghṛ॒tapa̭dī maitrāvaru॒ṇī |
brahma̭ de॒vakṛ̭ta॒mupa̭hūtam || 29 ||
daivyā̭ addhva॒ryava॒ upa̭hūtāḥ | upa̭hūtā manu॒ṣyāḥ᳚ | ya i॒maṃ-ya~॒jñamavāṋ | ye ya॒jñapa̭tnīṃ॒-va~rdhāṋ | upa̭hūte॒ dyāvā̭pṛthi॒vī | pū॒rva॒je ṛ॒tāva̭rī | de॒vī de॒vapṷtre | upa̭hūte॒yaṃ-ya~ja̭mānā | i॒ndrā॒ṇīvā̭vidha॒vā | adi̭tiriva supu॒trā | utta̭rasyā-ndevaya॒jyāyā॒-mupa̭hūtā |
bhūya̭si havi॒ṣkara̭ṇa॒ upa̭hūtā | di॒vye dhāma॒nnupa̭hūtā | i॒da-mmḙ de॒vā ha॒vi-rjṷṣantā॒miti॒ tasmi॒-nnupa̭hūtā | viśva̭masyāḥ pri॒yamupa̭hūtam |
viśva̭sya pri॒yasyopa̭hūta॒syopa̭hūtā || 30 ||
(sa॒harṣa̭bhā hvayatā॒ - mupa̭hūtagṃ - supu॒trā ṣaṭca̭) (a. 13)
(sa॒tyaṃ - pravo - 'gnḙ ma॒hā - na॒gnir-hotā̭ - sa॒midho॒ - 'gni-rvṛ॒trāṇya॒ - gni-rmū॒rdho - pa̭hūtaṃ - de॒va-mba॒r॒hi - ri॒da-ndyā̭vāpṛthivī॒ -tacchaṃ॒yo~- rā pyā̭ya॒svo - pa̭hūta॒-ntrayo̭daśa)
(sa॒tyaṃ - ~va॒yagg syā̭ma - vṛ॒ṣṭidyā̭vā tri॒gṃ॒śat)
(sa॒tya-mupa̭hūtā)
|| hariḥ̭ om ||
|| kṛṣṇa yajurvedīya taittirīya brāhmaṇe tṛtīyāṣṭake pañcama prapāṭhaka-ssamāptaḥ ||
🕉️ This is the original Sanskrit rendered in Telugu script.
Pronunciation is identical to the Sanskrit Devanagari version.