Muka Pancha Shati 4 - Kataksha Shatakam — Tamil Script

மோஹாந்தகாரநிவஹம் விநிஹந்துமீடே

மூகாத்மநாமபி மஹாகவிதாவதாந்யாந் ।

ஶ்ரீகாஞ்சிதேஶஶிஶிரீக்ரு'திஜாகரூகாந்

ஏகாம்ரநாததருணீகருணாவலோகாந் ॥1॥

மாதர்ஜயந்தி மமதாக்ரஹமோக்ஷணாநி

மாஹேந்த்ரநீலருசிஶிக்ஷணதக்ஷிணாநி ।

காமாக்ஷி கல்பிதஜகத்த்ரயரக்ஷணாநி

த்வத்வீக்ஷணாநி வரதாநவிசக்ஷணாநி ॥2॥

ஆநங்கதந்த்ரவிதிதர்ஶிதகௌஶலாநாம்

ஆநந்தமந்தபரிகூர்ணிதமந்தராணாம் ।

தாரல்யமம்ப தவ தாடிதகர்ணஸீம்நாம்

காமாக்ஷி கேலதி கடாக்ஷநிரீக்ஷணாநாம் ॥3॥

கல்லோலிதேந கருணாரஸவேல்லிதேந

கல்மாஷிதேந கமநீயம்ரு'துஸ்மிதேந ।

மாமஞ்சிதேந தவ கிஞ்சந குஞ்சிதேந

காமாக்ஷி தேந ஶிஶிரீகுரு வீக்ஷிதேந ॥4॥

ஸாஹாய்யகம் கதவதீ முஹுரர்ஜநஸ்ய

மந்தஸ்மிதஸ்ய பரிதோஷிதபீமசேதாஃ ।

காமாக்ஷி பாண்டவசமூரிவ தாவகீநா

கர்ணாந்திகம் சலதி ஹந்த கடாக்ஷலக்ஷ்மீஃ ॥5॥

அஸ்தம் க்ஷணாந்நயது மே பரிதாபஸூர்யம்

ஆநந்தசந்த்ரமஸமாநயதாம் ப்ரகாஶம் ।

காலாந்தகாரஸுஷுமாம் கலயந்திகந்தே

காமாக்ஷி கோமலகடாக்ஷநிஶாகமஸ்தே ॥6॥

தாடாங்கமௌக்திகருசாங்குரதந்தகாந்திஃ

காருண்யஹஸ்திபஶிகாமணிநாதிரூடஃ ।

உந்மூலயத்வஶுபபாதபமஸ்மதீயம்

காமாக்ஷி தாவககடாக்ஷமதங்கஜேதந்த்ரஃ ॥7॥

சாயாபரணே ஜகதாம் பரிதாபஹாரீ

தாடங்கரத்நமணிதல்லஜபல்லவஶ்ரீஃ ।

காருண்யநாம விகிரந்மகரந்தஜாலம்

காமாக்ஷி ராஜதி கடாக்ஷஸுரத்ருமஸ்தே ॥8॥

ஸூர்யாஶ்ரயப்ரணயிநீ மணிகுண்டலாம்ஶு-

லௌஹித்யகோகநதகாநநமாநநீயா ।

யாந்தீ தவ ஸ்மரஹராநநகாந்திஸிந்தும்

காமாக்ஷி ராஜதி கடாக்ஷகலிந்தகந்யா ॥9॥

ப்ராப்நோதி யம் ஸுக்ரு'திநம் தவ பக்ஷபாதாத்

காமாக்ஷி வீக்ஷணவிலாஸகலாபுரந்த்ரீ ।

ஸத்யஸ்தமேவ கில முக்திவதூர்வ்ரு'ணீதே

தஸ்மாந்நிதாந்தமநயோரிதமைகமத்யம் ॥10॥

யாந்தீ ஸதைவ மருதாமநுகூலபாவம்

ப்ரூவல்லிஶக்ரதநுருல்லஸிதா ரஸார்த்ரா ।

காமாக்ஷி கௌதுகதரங்கிதநீலகண்டா

காதம்பிநீவ தவ பாதி கடாக்ஷமாலா ॥11॥

கங்காம்பஸி ஸ்மிதமயே தபநாத்மஜேவ

கங்காதரோரஸி நவோத்பலமாலிகேவ ।

வக்த்ரப்ரபாஸரஸி ஶைவலமண்டலீவ

காமாக்ஷி ராஜதி கடாக்ஷருசிச்சடா தே ॥12॥

ஸம்ஸ்காரதஃ கிமபி கந்தலிதாந் ரஸஜ்ஞ-

கேதாரஸீம்நி ஸுதியாமுபபோகயோக்யாந் ।

கல்யாணஸூக்திலஹரீகலமாங்குராந்நஃ

காமாக்ஷி பக்ஷ்மலயது த்வதபாங்கமேகஃ ॥13॥

சாஞ்சல்யமேவ நியதம் கலயந்ப்ரக்ரு'த்யா

மாலிந்யபூஃ ஶ்ரதிபதாக்ரமஜாகரூகஃ ।

கைவல்யமேவ கிமு கல்பயதே நதாநாம்

காமாக்ஷி சித்ரமபி தே கருணாகடாக்ஷஃ ॥14॥

ஸஞ்ஜீவநே ஜநநி சூதஶிலீமுகஸ்ய

ஸம்மோஹநே ஶஶிகிஶோரகஶேகரஸ்ய ।

ஸம்ஸ்தம்பநே ச மமதாக்ரஹசேஷ்டிதஸ்ய

காமாக்ஷி வீக்ஷணகலா பரமௌஷதம் தே ॥15॥

நீலோऽபி ராகமதிகம் ஜநயந்புராரேஃ

லோலோऽபி பக்திமதிகாம் த்ரு'டயந்நராணாம் ।

வக்ரோऽபி தேவி நமதாம் ஸமதாம் விதந்வந்

காமாக்ஷி ந்ரு'த்யது மயி த்வதபாங்கபாதஃ ॥16॥

காமத்ருஹோ ஹ்ரு'தயயந்த்ரணஜாகரூகா

காமாக்ஷி சஞ்சலத்ரு'கஞ்சலமேகலா தே ।

ஆஶ்சர்யமம்ப பஜதாம் சடிதி ஸ்வகீய-

ஸம்பர்க ஏவ விதுநோதி ஸமஸ்தபந்தாந் ॥17॥

குண்டீகரோது விபதம் மம குஞ்சிதப்ரூ-

சாபாஞ்சிதஃ ஶ்ரிதவிதேஹபவாநுராகஃ ।

ரக்ஷோபகாரமநிஶம் ஜநயஞ்ஜகத்யாம்

காமாக்ஷி ராம இவ தே கருணாகடாக்ஷஃ ॥18॥

ஶ்ரீகாமகோடி ஶிவலோசநஶோஷிதஸ்ய

ஶ்ரு'ங்காரபீஜவிபவஸ்ய புநஃப்ரரோஹே ।

ப்ரேமாம்பஸார்த்ரமசிராத்ப்ரசுரேண ஶங்கே

கேதாரமம்ப தவ கேவலத்ரு'ஷ்டிபாதம் ॥19॥

மாஹாத்ம்யஶேவதிரஸௌ தவ துர்விலங்க்ய-

ஸம்ஸாரவிந்த்யகிரிகுண்டநகேலிசுஞ்சுஃ ।

தைர்யாம்புதிம் பஶுபதேஶ்சுலகீகரோதி

காமாக்ஷி வீக்ஷணவிஜ்ரு'ம்பணகும்பஜந்மா ॥20॥

பீயூஷவர்ஷவஶிஶிரா ஸ்புடதுத்பலஶ்ரீ-

மைத்ரீ நிஸர்கமதுரா க்ரு'ததாரகாப்திஃ ।

காமாக்ஷி ஸம்ஶ்ரிதவதீ வபுரஷ்டமூர்தேஃ

ஜ்யோத்ஸ்நாயதே பகவதி த்வதபாங்கமாலா ॥21॥

அம்ப ஸ்மரப்ரதிபடஸ்ய வபுர்மநோஜ்ஞம்

அம்போஜகாநநமிவாஞ்சிதகண்டகாபம் ।

ப்ரு'ங்கீவ சும்பதி ஸதைவ ஸபக்ஷபாதா

காமாக்ஷி கோமலருசிஸ்த்வதபாங்கமாலா ॥22॥

கேஶப்ரபாபடலநீலவிதாநஜாலே

காமாக்ஷி குண்டலமணிச்சவிதீபஶோபே ।

ஶங்கே கடாக்ஷருசிரங்கதலே க்ரு'பாக்யா

ஶைலூஷிகா நடதி ஶங்கரவல்லபே தே ॥23॥

அத்யந்தஶீதலமதந்த்ரயது க்ஷணார்தம்

அஸ்தோகவிப்ரமமநங்கவிலாஸகந்தம் ।

அல்பஸ்மிதாத்ரு'தமபாரக்ரு'பாப்ரவாஹம்

அக்ஷிப்ரரோஹமசிராந்மயி காமகோடி ॥24॥

மந்தாக்ஷராகதரலீக்ரு'திபாரதந்த்ர்யாத்

காமாக்ஷி மந்தரதராம் த்வதபாங்கடோலாம் ।

ஆருஹ்ய மந்தமதிகௌதுகஶாலி சக்ஷுஃ

ஆநந்தமேதி முஹுரர்தஶஶாங்கமௌலேஃ ॥25॥

த்ரையம்பகம் த்ரிபுரஸுந்தரி ஹர்ம்யபூமி-

ரங்கம் விஹாரஸரஸீ கருணாப்ரவாஹஃ ।

தாஸாஶ்ச வாஸவமுகாஃ பரிபாலநீயம்

காமாக்ஷி விஶ்வமபி வீக்ஷணபூப்ரு'தஸ்தே ॥26॥

வாகீஶ்வரீ ஸஹசரீ நியமேந லக்ஷ்மீஃ

ப்ரூவல்லரீவஶகரீ புவநாநி கேஹம் ।

ரூபம் த்ரிலோகநயநாம்ரு'தமம்ப தேஷாம்

காமாக்ஷி யேஷு தவ வீக்ஷணபாரதந்த்ரீ ॥27॥

மாஹேஶ்வரம் சடிதி மாநஸமீநமம்ப

காமாக்ஷி தைர்யஜலதௌ நிதராம் நிமக்நம் ।

ஜாலேந ஶ்ரு'ங்கலயதி த்வதபாங்கநாம்நா

விஸ்தாரிதேந விஷமாயுததாஶகோऽஸௌ ॥28॥

உந்மத்ய போதகமலாகாரமம்ப ஜாட்ய-

ஸ்தம்பேரமம் மம மநோவிபிநே ப்ரமந்தம் ।

குண்டீகுருஷ்வ தரஸா குடிலாக்ரஸீம்நா

காமாக்ஷி தாவககடாக்ஷமஹாங்குஶேந ॥29॥

உத்வேல்லிதஸ்தபகிதைர்லலிதைர்விலாஸைஃ

உத்தாய தேவி தவ காடகடாக்ஷகுஞ்ஜாத் ।

தூரம் பலாயயது மோஹம்ரு'கீகுலம் மே

காமாக்ஷி ஸ்தவரமநுக்ரஹகேஸரீந்த்ரஃ ॥30॥

ஸ்நேஹாத்ரு'தாம் விதலிதோத்பலகந்திசோராம்

ஜேதாரமேவ ஜகதீஶ்வரி ஜேதுகாமஃ ।

மாநோத்ததோ மகரகேதுரஸௌ துநீதே

காமாக்ஷி தாவககடாக்ஷக்ரு'பாணவல்லீம் ॥31॥

ஶ்ரௌதீம் வ்ரஜந்நபி ஸதா ஸரணிம் முநீநாம்

காமாக்ஷி ஸந்ததமபி ஸ்ம்ரு'திமார்ககாமீ ।

கௌடில்யமம்ப கதமஸ்திரதாம் ச தத்தே

சௌர்யம் ச பங்கஜருசாம் த்வதபாங்கபாதஃ ॥32॥

நித்யம் ஶ்ரேதுஃ பரிசிதௌ யதமாநமேவ

நீலோத்பலம் நிஜஸமீபநிவாஸலோலம் ।

ப்ரீத்யைவ பாடயதி வீக்ஷணதேஶிகேந்த்ரஃ

காமாக்ஷீ கிந்து தவ காலிமஸம்ப்ரதாயம் ॥33॥

ப்ராந்த்வா முஹுஃ ஸ்தபகிதஸ்மிதபேநராஶௌ

காமாக்ஷி வக்த்ரருசிஸஞ்சயவாரிராஶௌ ।

ஆநந்ததி த்ரிபுரமர்தநநேத்ரலக்ஷ்மீஃ

ஆலம்ப்ய தேவி தவ மந்தமபாங்கஸேதும் ॥34॥

ஶ்யாமா தவ த்ரிபுரஸுந்தரி லோசநஶ்ரீஃ

காமாக்ஷி கந்தலிதமேதுரதாரகாந்திஃ ।

ஜ்யோத்ஸ்நாவதீ ஸ்மிதருசாபி கதம் தநோதி

ஸ்பர்தாமஹோ குவலயைஶ்ச ததா சகோரைஃ ॥35॥

காலாஞ்ஜநம் ச தவ தேவி நிரீக்ஷணம் ச

காமாக்ஷி ஸாம்யஸரணிம் ஸமுபைதி காந்த்யா ।

நிஶ்ஶேஷநேத்ரஸுலபம் ஜகதீஷு பூர்வ-

மந்யத்த்ரிநேத்ரஸுலபம் துஹிநாத்ரிகந்யே ॥36॥

தூமாங்குரோ மகரகேதநபாவகஸ்ய

காமாக்ஷி நேத்ரருசிநீலிமசாதுரீ தே ।

அத்யந்தமத்புதமிதம் நயநத்ரயஸ்ய

ஹர்ஷோதயம் ஜநயதே ஹருணாங்கமௌலேஃ ॥37॥

ஆரப்பலேஶஸமயே தவ வீக்ஷணஸ்ஸ

காமாக்ஷி மூகமபி வீக்ஷணமாத்ரநம்ரம் ।

ஸர்வஜ்ஞதா ஸகலலோகஸமக்ஷமேவ

கீர்திஸ்வயம்வரணமால்யவதீ வ்ரு'ணீதே ॥38॥

காலாம்புவாஹ உவ தே பரிதாபஹாரீ

காமாக்ஷி புஷ்கரமதஃகுருதே கடாக்க்ஷ்ஷஃ ।

பூர்வஃ பரம் க்ஷணருசா ஸமுபைதி மைத்ரீ-

மந்யஸ்து ஸ.ததருசிம் ப்ரகடீகரோதி ॥39॥

ஸூக்ஷ்மேऽபி துர்கமதரேऽபி குருப்ரஸாத-

ஸாஹாய்யகேந விசரந்நபவர்கமார்கே ।

ஸம்ஸாரபங்கநிசயே ந பதத்யமூம் தே

காமாக்ஷி காடமவலம்ப்ய கடாக்ஷயஷ்டிம் ॥40॥

காமாக்ஷி ஸந்ததமஸௌ ஹரிநீலரத்ந-

ஸ்தம்பே கடாக்ஷருசிபுஞ்ஜமயே பவத்யாஃ ।

பத்தோऽபி பக்திநிகலைர்மம சித்தஹஸ்தீ

ஸ்தம்பம் ச பந்தமபி முஞ்சதி ஹந்த சித்ரம் ॥41॥

காமாக்ஷி காஷ்ணர்யமபி ஸந்ததமஞ்ஜநம் ச

பிப்ரந்நிஸர்கதரலோऽபி பவத்கடாக்ஷஃ ।

வைமல்யமந்வஹமநஞ்ஜநதா ச பூயஃ

ஸ்தைர்யம் ச பக்தஹ்ரு'தயாய கதம் ததாதி ॥42॥

மந்தஸ்மிதஸ்தபகிதம் மணிகுண்டலாம்ஶு-

ஸ்தோமப்ரவாலருசிரம் ஶிஶிரீக்ரு'தாஶம் ।

காமாக்ஷி ராஜதி கடாக்ஷருசேஃ கதம்பம்

உத்யாநமம்ப கருணாஹரிணேக்ஷணாயாஃ ॥43॥

காமாக்ஷி தாவககடாக்ஷமஹேந்த்ரநீல-

ஸிம்ஹாஸநம் ஶ்ரிதவதோ மகரத்வஜஸ்ய ।

ஸாம்ராஜ்யமங்கலவிதௌ முணிகுண்டலஶ்ரீஃ

நீராஜநோத்ஸவதரங்கிததீபமாலா ॥44॥

மாதஃ க்ஷணம் ஸ்நபய மாம் தவ வீக்ஷிதேந

மந்தாக்ஷிதேந ஸுஜநைரபரோக்ஷிதேந ।

காமாக்ஷி கர்மதிமிரோத்கரபாஸ்கரேண

ஶ்ரேயஸ்கரேண மதுபத்யுதிதஸ்கரேண ॥45॥

ப்ரேமாபகாபயஸி மஜ்ஜநமாரசய்ய

யுக்தஃ ஸ்மிதாம்ஶுக்ரு'தபஸ்மவிலேபநேந ।

காமாக்ஷி குண்டலமணித்யுதிபிர்ஜடாலஃ

ஶ்ரீகண்டமேவ பஜதே தவ த்ரு'ஷ்டிபாதஃ ॥46॥

கைவல்யதாய கருணாரஸகிங்கராய

காமாக்ஷி கந்தலிதவிப்ரமஶங்கராய ।

ஆலோகநாய தவ பக்தஶிவங்கராய

மாதர்நமோऽஸ்து பரதந்த்ரிதஶங்கராய ॥47॥

ஸாம்ராஜ்யமங்கலவிதௌ மகரத்வஜஸ்ய

லோலாலகாலிக்ரு'ததோரணமால்யஶோபே ।

காமேஶ்வரி ப்ரசலதுத்பலவைஜயந்தீ-

சாதுர்யமேதி தவ சஞ்சலத்ரு'ஷ்டிபாதஃ ॥48॥

மார்கேண மஞ்ஜுகசகாந்திதமோவ்ரு'தேந

மந்தாயமாநகமநா மதநாதுராஸௌ ।

காமாக்ஷி த்ரு'ஷ்டிரயதே தவ ஶங்கராய

ஸங்கேதபூமிமசிராதபிஸாரிகேவ ॥49॥

வ்ரீடநுவ்ரு'த்திரமணீக்ரு'தஸாஹசர்யா

ஶைவாலிதாம் கலருசா ஶஶிஶேகரஸ்ய ।

காமாக்ஷி காந்திஸரஸீம் த்வதபாங்கலக்ஷ்மீஃ

மந்தம் ஸமாஶ்ரயதி மஜ்ஜநகேலநாய ॥50॥

காஷாயமம்ஶுகமிவ ப்ரகடம் ததாநோ

மாணிக்யகுண்டலருசிம் மமதாவிரோதீ ।

ஶ்ருத்யந்தஸீமநி ரதஃ ஸுதராம் சகாஸ்தி

காமாக்ஷி தாவககடாக்ஷயதீஶ்வரோऽஸௌ ॥51॥

பாஷாண ஏவ ஹரிநீலமணிர்திநேஷு

ப்ரம்லநதாம் குவலயம் ப்ரகடீகரோதி ।

நௌமித்திகோ ஜலதமேசகிமா ததஸ்தே

காமாக்ஷி ஶூந்யமுபமநமபாங்கலக்ஷ்ம்யாஃ ॥52॥

ஶ்ரு'ங்காரவிப்ரமவதீ ஸுதராம் ஸலஜ்ஜா

நாஸாக்ரமௌக்திகருசா க்ரு'தமந்தஹாஸா ।

ஶ்யாமா கடாக்ஷஸுஷமா தவ யுக்தமேதத்

காமாக்ஷி சும்பதி திகம்பரவக்த்ரபிம்பம் ॥53॥

நீலோத்பலேந மதுபேந ச த்ரு'ஷ்டிபாதஃ

காமாக்ஷி துல்ய இதி தே கதமாமநந்தி ।

ஶைத்யேந நிந்தயதி யதந்வஹமிந்துபாதாந்

பாதோருஹேண யதஸௌ கலஹாயதே ச ॥54॥

ஓஷ்டப்ரபாபடலவித்ருமமுத்ரிதே தே

ப்ரூவல்லிவீசிஸுபகே முககாந்திஸிந்தௌ ।

காமாக்ஷி வாரிபரபூரணலம்பமாந-

காலாம்புவாஹஸரணிம் லபதே கடாக்ஷஃ ॥55॥

மந்தஸ்மிதைர்தவலிதா மணிகுண்டலாம்ஶு-

ஸம்பர்கலோஹிதருசிஸ்த்வதபாங்கதாரா ।

காமாக்ஷி மல்லிகுஸுமைர்நவபல்லவைஶ்ச

நீலோத்பலைஶ்ச ரசிதேவ விபாதி மாலா ॥56॥

காமாக்ஷி ஶீதலக்ரு'பாரஸநிர்சராம்பஃ-

ஸம்பர்கபக்ஷ்மலருசிஸ்த்வதபாங்கமாலா ।

கோபிஃ ஸதா புரரிபோரபிலஷ்யமாணா

தூர்வாகதம்பகவிடம்பநமாதநோதி ॥57॥

ஹ்ரு'த்பங்கஜம் மம விகாஸயது ப்ரமுஷ்ண-

ந்நுல்லாஸமுத்பலருசேஸ்தமஸாம் நிரோத்தா ।

தோஷாநுஷங்கஜடதாம் ஜகதாம் துநாநஃ

காமாக்ஷி வீக்ஷணவிலாஸதிநோதயஸ்தே ॥58॥

சக்ஷுர்விமோஹயதி சந்த்ரவிபூஷணஸ்ய

காமாக்ஷி தாவககடாக்ஷதமஃப்ரரோஹஃ ।

ப்ரத்யங்முகம் து நயநம் ஸ்திமிதம் முநீநாம்

ப்ராகாஶ்யமேவ நயதீதி பரம் விசித்ரம் ॥59॥

காமாக்ஷி வீக்ஷணருசா யுதி நிர்ஜிதம் தே

நீலோத்பலம் நிரவஶேஷகதாபிமாநம் ।

ஆகத்ய தத்பரிஸரம் ஶ்ரவணவதம்ஸ-

வ்யோஜேந நூநமபயார்தநமாதநோதி ॥60॥

ஆஶ்சர்யமம்ப மதாநாப்யுதயாவலம்பஃ

காமாக்ஷி சஞ்சலநிரீக்ஷணவிப்ரமஸ்தே ।

தைர்யம் விதூய தநுதே ஹ்ரு'தி ராகபந்தம்

ஶம்போஸ்ததேவ விபரீததயா முநீநாம் ॥61॥

ஜந்தோஃ ஸக்ரு'த்ப்ரணமதோ ஜகதீட்யதாம் ச

தேஜாஸ்விதாம் ச நிஶிதாம் ச மதிம் ஸபாயாம் ।

காமாக்ஷி மாக்ஷிகசரீமிவ வைகரீம் ச

லக்ஷ்மீம் ச பக்ஷ்மலயதி க்ஷணவீக்ஷணம் தே ॥62॥

காதம்பிநீ கிமயதே ந ஜலாநுஷங்கம்

ப்ரு'ங்காவலீ கிமுரரீகுருதே ந பத்மம் ।

கிம் வா கலிந்ததநயா ஸஹதே ந பங்கம்

காமாக்ஷி நிஶ்சயபதம் ந தவாக்ஷிலக்ஷ்மீஃ ॥63॥

காகோலபாவகத்ரு'ணீகரணேऽபி தக்ஷஃ

காமாக்ஷி பாலகஸுதாகரஶேகரஸ்ய ।

அத்யந்தஶீதலதமோऽப்யநுபாரதம் தே

சித்தம் விமோஹயதி சித்ரமயம் கடாக்ஷஃ ॥64॥

கார்பண்யபூரபரிவர்திதமம்ப மோஹ-

கந்தோத்கதம் பவமயம் விஷபாதபம் மே ।

துங்கம் சிநத்து துஹிநாத்ரிஸுதே பவத்யாஃ

காஞ்சீபுரேஶ்வரி கடாக்ஷகுடாரதாரா ॥65॥

காமாக்ஷி கோரபவரோகசிகித்ஸநார்த-

மப்யர்த்ய தேஶிககடாக்ஷபிஷக்ப்ரஸாதாத் ।

தத்ராபி தேவி லபதே ஸுக்ரு'தீ கதாசி-

தந்யஸ்ய துர்லபமபாங்கமஹௌஷதம் தே ॥66॥

காமாக்ஷி தேஶிகக்ரு'பாங்குரமாஶ்ரயந்தோ

நாநாதபோநியமநாஶிதபாஶபந்தாஃ ।

வாஸாலயம் தவ கடாக்ஷமமும் மஹாந்தோ

லப்த்வா ஸுகம் ஸமாதியோ விசரந்தி லோகே ॥67॥

ஸாகூதஸம்லபிதஸம்ப்ரு'தமுக்தஹாஸம்

வ்ரீடாநுராகஸஹசாரி விலோகநம் தே ।

காமாக்ஷி காமபரிபந்திநி மாரவீர-

ஸாம்ராஜ்யவிப்ரமதஶாம் ஸபலீகரோதி ॥68॥

காமாக்ஷி விப்ரமபலைகநிதிர்விதாய

ப்ரூவல்லிசாபகுடிலீக்ரு'திமேவ சித்ரம் ।

ஸ்வாதீநதாம் தவ நிநாய ஶஶாங்கமௌலே-

ரங்கார்தராஜ்யஸுகலாபமபாங்கவீரஃ ॥69॥

காமாங்குரைகநிலயஸ்தவ த்ரு'ஷ்டிபாதஃ

காமாக்ஷி பக்தமநஸாம் ப்ரததாது காமாந் ।

ராகாந்விதஃ ஸ்வயமபி ப்ரகடீகரோதி

வைராக்யமேவ கதமேஷ மஹாமுநீநாம் ॥70॥

காலாம்புவாஹநிவஹைஃ கலஹாயதே தே

காமாக்ஷி காலிமமதேந ஸதா கடாக்ஷஃ ।

சித்ரம் ததாபி நிதராமமுமேவ த்ரு'ஷ்ட்வா

ஸோத்கண்ட ஏவ ரமதே கில நீலகண்டஃ ॥71॥

காமாக்ஷி மந்மதரிபும் ப்ரதி மாரதாப-

மோஹாந்தகாரஜலதாகமநேந ந்ரு'த்யந் ।

துஷ்கர்மகஞ்சுகிகுலம் கபலீகரோது

வ்யாமிஶ்ரமேசகருசிஸ்த்வதபாங்ககேகீ ॥72॥

காமாக்ஷி மந்மதரிபோரவலோகநேஷு

காந்தம் பயோஜமிவ தாவகமக்ஷிபாதம் ।

ப்ரேமாகமோ திவஸவத்விகசீகரோதி

லஜ்ஜாபரோ ரஜநிவந்முகுலீகரோதி ॥73॥

மூகோ விரிஞ்சதி பரம் புருஷஃ குரூபஃ

கந்தர்பதி த்ரிதஶராஜதி கிம்பசாநஃ ।

காமாக்ஷி கேவலமுபக்ரமகால ஏவ

லீலாதரங்கிதகடாக்ஷருசஃ க்ஷணம் தே ॥74॥

நீலாலகா மதுகரந்தி மநோஜ்ஞநாஸா-

முக்தாருசஃ ப்ரகடகந்தபிஸாங்குரந்தி ।

காருண்யமம்ப மகரந்ததி காமகோடி

மந்யே ததஃ கமலமேவ விலோசநம் தே ॥75॥

ஆகாங்க்ஷ்யமாணபலதாநவிசக்ஷணாயாஃ ।

காமாக்ஷி தாவககடாக்ஷககாமதேநோஃ ।

ஸம்பர்க ஏவ கதமம்ப விமுக்தபாஶ-

பந்தாஃ ஸ்புடம் தநுப்ரு'தஃ பஶுதாம் த்யஜந்தி ॥76॥

ஸம்ஸாரகர்மபரிதாபஜுஷாம் நராணாம்

காமாக்ஷி ஶீதலதராணி தவேக்ஷிதாநி ।

சந்த்ராதபந்தி கநசந்தநகர்தமந்தி

முக்தாகுணந்தி ஹிமவாரிநிஷேசநந்தி ॥77॥

ப்ரேமாம்புராஶிஸததஸ்நபிதாநி சித்ரம்

காமாக்ஷி தாவககடாக்ஷநிரீக்ஷணாநி ।

ஸந்துக்ஷயந்தி முஹுரிந்தநராஶிரீத்யா

மாரத்ருஹோ மநஸி மந்மதசித்ரபாநும் ॥78॥

காலாஞ்ஜநப்ரதிபடம் கமநீயகாந்த்யா

கந்தர்பதந்த்ரகலயா கலிதாநுபாவம் ।

காஞ்சீவிஹாரரஸிகே கலுஷார்திசோரம்

கல்லோலயஸ்வ மயி தே கருணாகடாக்ஷம் ॥79॥

க்ராந்தேந மந்மததேந விமோஹ்யமாந-

ஸ்வாந்தேந சூததருமூலகதஸ்ய பும்ஸஃ ।

காந்தேந கிஞ்சிதவலோகய லோசநஸ்ய

ப்ராந்தேந மாம் ஜநநி காஞ்சிபுரீவிபூஷே ॥80॥

காமாக்ஷி கோऽபி ஸுஜநாஸ்த்வதபாங்கஸங்கே

கண்டேந கந்தலிதகாலிமஸம்ப்ரதாயாஃ ।

உத்தம்ஸகல்பிதசகோரகுடும்பபோஷா

நக்தந்திவஸப்ரஸவபூநயநா பவந்தி ॥81॥

நீலோத்பலப்ரஸவகாந்திநிர்தஶநேந

காருண்யவிப்ரமஜுஷா தவ வீக்ஷணேந ।

காமாக்ஷி கர்மஜலதேஃ கலஶீஸுதேந

பாஶத்ரயாத்வயமமீ பரிமோசநீயாஃ ॥82॥

அத்யந்தசஞ்சலமக்ரு'த்ரிமமஞ்ஜநம் கிம்

சங்காரபங்கிரஹிதா கிமு ப்ரு'ங்கமாலா ।

தூமாங்குரஃ கிமு ஹுதாஶநஸங்கஹீநஃ

காமாக்ஷி நேத்ரருசிநீலிமகந்தலீ தே ॥83॥

காமாக்ஷி நித்யமயமஞ்ஜலிரஸ்து முக்தி-

பீஜாய விப்ரமமதோதயகூர்ணிதாய ।

கந்தர்பதர்பபுநருத்பவஸித்திதாய

கல்யாணதாய தவ தேவி த்ரு'கஞ்சலாய ॥84॥

தர்பாங்குரோ மகரகேதநவிப்ரமாணாம்

நிந்தாங்குரோ விதலிதோத்பலசாதுரீணாம் ।

தீபாங்குரோ பவதமிஸ்ரகதம்பகாநாம்

காமாக்ஷி பாலயது மாம் த்வதபாங்கபாதஃ ॥85॥

கைவல்யதிவ்யமணிரோஹணபர்வதேப்யஃ

காருண்யநிர்சரபயஃக்ரு'தமஞ்ஜநேப்யஃ ।

காமாக்ஷி கிங்கரிதஶங்கரமாநஸேப்ய-

ஸ்தேப்யோ நமோऽஸ்து தவ வீக்ஷணவிப்ரமேப்யஃ ॥86॥

அல்பீய ஏவ நவமுத்பலமம்ப ஹீநா

மீநஸ்ய வா ஸரணிரம்புருஹாம் ச கிம் வா ।

தூரே ம்ரு'கீத்ரு'கஸமஞ்ஜஸமஞ்ஜநம் ச

காமாக்ஷி வீக்ஷணருசௌ தவ தர்கயாமஃ ॥87॥

மிஶ்ரீபவத்கரலபங்கிலஶங்கரோரஸ்-

ஸீமாங்கணே கிமபி ரிங்கணமாததாநஃ ।

ஹேலாவதூதலலிதஶ்ரவணோத்பலோऽஸௌ

காமாக்ஷி பால இவ ராஜதி தே கடாக்ஷஃ ॥88॥

ப்ரௌடிகரோதி விதுஷாம் நவஸூக்திதாடீ-

சூதாடவீஷு புதகோகிலலால்யமாநம் ।

மாத்வீரஸம் பரிமலம் ச நிரர்கலம் தே

காமாக்ஷி வீக்ஷணவிலாஸவஸந்தலக்ஷ்மீஃ ॥89॥

கூலங்கஷம் விதநுதே கருணாம்புவர்ஷீ

ஸாரஸ்வதம் ஸுக்ரு'திநஃ ஸுலபம் ப்ரவாஹம் ।

துச்சீகரோதி யமுநாம்புதரங்கபங்கீம்

காமாக்ஷி கிம் தவ கடாக்ஷமஹாம்புவாஹஃ ॥90॥

ஜகர்தி தேவி கருணாஶுகஸுந்தரீ தே

தாடங்கரத்நருசிதாடிமகண்டஶோணே ।

காமாக்ஷி நிர்பரகடாக்ஷமரீசிபுஞ்ஜ-

மாஹேந்த்ரநீலமணிபஞ்ஜரமத்யபாகே ॥91॥

காமாக்ஷி ஸத்குவலயஸ்ய ஸகோத்ரபாவா-

தாக்ராமதி ஶ்ருதிமஸௌ தவ த்ரு'ஷ்டிபாதஃ ।

கிஞ்ச ஸ்புடம் குடிலதாம் ப்ரகடீகரோதி

ப்ரூவல்லரீபரிசிதஸ்ய பலம் கிமேதத் ॥92॥

ஏஷா தவாக்ஷிஸுஷமா விஷமாயுதஸ்ய

நாராசவர்ஷலஹரீ நகராஜகந்யே ।

ஶங்கே கரோதி ஶததா ஹ்ரு'தி தைர்யமுத்ராம்

ஶ்ரீகாமகோடி யதஸௌ ஶிஶிராம்ஶுமௌலேஃ ॥93॥

பாணேந புஷ்பதநுஷஃ பரிகல்ப்யமாந-

த்ராணேந பக்தமநஸாம் கருணாகரேண ।

கோணேந கோமலத்ரு'ஶஸ்தவ காமகோடி

ஶோணேந ஶோஷய ஶிவே மம ஶோகஸிந்தும் ॥94॥

மாரத்ருஹா முகுடஸீமநி லால்யமாநே

மந்தாகிநீபயஸி தே குடிலம் சரிஷ்ணுஃ ।

காமாக்ஷி கோபரபஸாத்வலமாநமீந-

ஸந்தேஹமங்குரயதி க்ஷணமக்ஷிபாதஃ ॥95॥

காமாக்ஷி ஸம்வலிதமௌக்திககுண்டலாம்ஶு-

சஞ்சத்ஸிதஶ்ரவணசாமரசாதுரீகஃ ।

ஸ்தம்பே நிரந்தரமபாங்கமயே பவத்யா

பத்தஶ்சகாஸ்தி மகரத்வஜமத்தஹஸ்தீ ॥96॥

யாவத்கடாக்ஷரஜநீஸமயாகமஸ்தே

காமாக்ஷி தாவதசிராந்நமதாம் நராணாம் ।

ஆவிர்பவத்யம்ரு'ததீதிதிபிம்பமம்ப

ஸம்விந்மயம் ஹ்ரு'தயபூர்வகிரீந்த்ரஶ்ரு'ங்கே ॥97॥

காமாக்ஷி கல்பவிடபீவ பவத்கடாக்ஷோ

தித்ஸுஃ ஸமஸ்தவிபவம் நமதாம் நராணாம் ।

ப்ரு'ங்கஸ்ய நீலநலிநஸ்ய ச காந்திஸம்ப-

த்ஸர்வஸ்வமேவ ஹரதீதி பரம் விசித்ரம் ॥98॥

அத்யந்தஶீதலமநர்கலகர்மபாக-

காகோலஹாரி ஸுலபம் ஸுமநோபிரேதத் ।

பீயூஷமேவ தவ வீக்ஷணமம்ப கிந்து

காமாக்ஷி நீலமிதமித்யயமேவ பேதஃ ॥99॥

அஜ்ஞாதபக்திரஸமப்ரஸரத்விவேக-

மத்யந்தகர்வமநதீதஸமஸ்தஶாஸ்த்ரம் ।

அப்ராப்தஸத்யமஸமீபகதம் ச முக்தேஃ

காமாக்ஷி நைவ தவ ஸ்ப்ரு'ஹயதி த்ரு'ஷ்டிபாதஃ ॥100॥

(காமாக்ஷி மாமவது தே கருணாகடாக்ஷஃ)

பாதேந லோசநருசேஸ்தவ காமகோடி

போதேந பதகபயோதிபயாதுராணாம் ।

பூதேந தேந நவகாஞ்சநகுண்டலாம்ஶு-

வீதேந ஶீதலய பூதரகந்யகே மாம் ॥101॥

॥ இதி கடாக்ஷஶதகம் ஸம்பூர்ணம் ॥

Roman (IAST) Transliteration

mohāndhakāranivahaṃ vinihantumīḍe

mūkātmanāmapi mahākavitāvadānyān |

śrīkāñcideśaśiśirīkṛtijāgarūkān

ekāmranāthataruṇīkaruṇāvalokān ||1||

mātarjayanti mamatāgrahamokṣaṇāni

māhendranīlaruciśikṣaṇadakṣiṇāni |

kāmākṣi kalpitajagattrayarakṣaṇāni

tvadvīkṣaṇāni varadānavicakṣaṇāni ||2||

ānaṅgatantravidhidarśitakauśalānām

ānandamandaparighūrṇitamantharāṇām |

tāralyamamba tava tāḍitakarṇasīmnāṃ

kāmākṣi khelati kaṭākṣanirīkṣaṇānām ||3||

kallolitena karuṇārasavellitena

kalmāṣitena kamanīyamṛdusmitena |

māmañcitena tava kiñcana kuñcitena

kāmākṣi tena śiśirīkuru vīkṣitena ||4||

sāhāyyakaṃ gatavatī muhurarjanasya

mandasmitasya paritoṣitabhīmacetāḥ |

kāmākṣi pāṇḍavacamūriva tāvakīnā

karṇāntikaṃ calati hanta kaṭākṣalakṣmīḥ ||5||

astaṃ kṣaṇānnayatu me paritāpasūryam

ānandacandramasamānayatāṃ prakāśam |

kālāndhakārasuṣumāṃ kalayandigante

kāmākṣi komalakaṭākṣaniśāgamaste ||6||

tāṭāṅkamauktikarucāṅkuradantakāntiḥ

kāruṇyahastipaśikhāmaṇinādhirūḍhaḥ |

unmūlayatvaśubhapādapamasmadīyaṃ

kāmākṣi tāvakakaṭākṣamataṅgajetandraḥ ||7||

chāyābharaṇe jagatāṃ paritāpahārī

tāṭaṅkaratnamaṇitallajapallavaśrīḥ |

kāruṇyanāma vikiranmakarandajālaṃ

kāmākṣi rājati kaṭākṣasuradrumaste ||8||

sūryāśrayapraṇayinī maṇikuṇḍalāṃśu-

lauhityakokanadakānanamānanīyā |

yāntī tava smaraharānanakāntisindhuṃ

kāmākṣi rājati kaṭākṣakalindakanyā ||9||

prāpnoti yaṃ sukṛtinaṃ tava pakṣapātāt

kāmākṣi vīkṣaṇavilāsakalāpurandhrī |

sadyastameva kila muktivadhūrvṛṇīte

tasmānnitāntamanayoridamaikamatyam ||10||

yāntī sadaiva marutāmanukūlabhāvaṃ

bhrūvalliśakradhanurullasitā rasārdrā |

kāmākṣi kautukataraṅgitanīlakaṇṭhā

kādambinīva tava bhāti kaṭākṣamālā ||11||

gaṅgāmbhasi smitamaye tapanātmajeva

gaṅgādharorasi navotpalamālikeva |

vaktraprabhāsarasi śaivalamaṇḍalīva

kāmākṣi rājati kaṭākṣarucicchaṭā te ||12||

saṃskārataḥ kimapi kandalitān rasajña-

kedārasīmni sudhiyāmupabhogayogyān |

kalyāṇasūktilaharīkalamāṅkurānnaḥ

kāmākṣi pakṣmalayatu tvadapāṅgameghaḥ ||13||

cāñcalyameva niyataṃ kalayanprakṛtyā

mālinyabhūḥ śratipathākramajāgarūkaḥ |

kaivalyameva kimu kalpayate natānāṃ

kāmākṣi citramapi te karuṇākaṭākṣaḥ ||14||

sañjīvane janani cūtaśilīmukhasya

sammohane śaśikiśorakaśekharasya |

saṃstambhane ca mamatāgrahaceṣṭitasya

kāmākṣi vīkṣaṇakalā paramauṣadhaṃ te ||15||

nīlo'pi rāgamadhikaṃ janayanpurāreḥ

lolo'pi bhaktimadhikāṃ dṛḍhayannarāṇām |

vakro'pi devi namatāṃ samatāṃ vitanvan

kāmākṣi nṛtyatu mayi tvadapāṅgapātaḥ ||16||

kāmadruho hṛdayayantraṇajāgarūkā

kāmākṣi cañcaladṛgañcalamekhalā te |

āścaryamamba bhajatāṃ jhaṭiti svakīya-

samparka eva vidhunoti samastabandhān ||17||

kuṇṭhīkarotu vipadaṃ mama kuñcitabhrū-

cāpāñcitaḥ śritavidehabhavānurāgaḥ |

rakṣopakāramaniśaṃ janayañjagatyāṃ

kāmākṣi rāma iva te karuṇākaṭākṣaḥ ||18||

śrīkāmakoṭi śivalocanaśoṣitasya

śṛṅgārabījavibhavasya punaḥprarohe |

premāmbhasārdramacirātpracureṇa śaṅke

kedāramamba tava kevaladṛṣṭipātam ||19||

māhātmyaśevadhirasau tava durvilaṅghya-

saṃsāravindhyagirikuṇṭhanakelicuñcuḥ |

dhairyāmbudhiṃ paśupateśculakīkaroti

kāmākṣi vīkṣaṇavijṛmbhaṇakumbhajanmā ||20||

pīyūṣavarṣavaśiśirā sphuṭadutpalaśrī-

maitrī nisargamadhurā kṛtatārakāptiḥ |

kāmākṣi saṃśritavatī vapuraṣṭamūrteḥ

jyotsnāyate bhagavati tvadapāṅgamālā ||21||

amba smarapratibhaṭasya vapurmanojñam

ambhojakānanamivāñcitakaṇṭakābham |

bhṛṅgīva cumbati sadaiva sapakṣapātā

kāmākṣi komalarucistvadapāṅgamālā ||22||

keśaprabhāpaṭalanīlavitānajāle

kāmākṣi kuṇḍalamaṇicchavidīpaśobhe |

śaṅke kaṭākṣaruciraṅgatale kṛpākhyā

śailūṣikā naṭati śaṅkaravallabhe te ||23||

atyantaśītalamatandrayatu kṣaṇārdham

astokavibhramamanaṅgavilāsakandam |

alpasmitādṛtamapārakṛpāpravāham

akṣiprarohamacirānmayi kāmakoṭi ||24||

mandākṣarāgataralīkṛtipāratantryāt

kāmākṣi mantharatarāṃ tvadapāṅgaḍolām |

āruhya mandamatikautukaśāli cakṣuḥ

ānandameti muhurardhaśaśāṅkamauleḥ ||25||

traiyambakaṃ tripurasundari harmyabhūmi-

raṅgaṃ vihārasarasī karuṇāpravāhaḥ |

dāsāśca vāsavamukhāḥ paripālanīyaṃ

kāmākṣi viśvamapi vīkṣaṇabhūbhṛtaste ||26||

vāgīśvarī sahacarī niyamena lakṣmīḥ

bhrūvallarīvaśakarī bhuvanāni geham |

rūpaṃ trilokanayanāmṛtamamba teṣāṃ

kāmākṣi yeṣu tava vīkṣaṇapāratantrī ||27||

māheśvaraṃ jhaṭiti mānasamīnamamba

kāmākṣi dhairyajaladhau nitarāṃ nimagnam |

jālena śṛṅkhalayati tvadapāṅganāmnā

vistāritena viṣamāyudhadāśako'sau ||28||

unmathya bodhakamalākāramamba jāḍya-

stamberamaṃ mama manovipine bhramantam |

kuṇṭhīkuruṣva tarasā kuṭilāgrasīmnā

kāmākṣi tāvakakaṭākṣamahāṅkuśena ||29||

udvellitastabakitairlalitairvilāsaiḥ

utthāya devi tava gāḍhakaṭākṣakuñjāt |

dūraṃ palāyayatu mohamṛgīkulaṃ me

kāmākṣi stavaramanugrahakesarīndraḥ ||30||

snehādṛtāṃ vidalitotpalakanticorāṃ

jetārameva jagadīśvari jetukāmaḥ |

mānoddhato makaraketurasau dhunīte

kāmākṣi tāvakakaṭākṣakṛpāṇavallīm ||31||

śrautīṃ vrajannapi sadā saraṇiṃ munīnāṃ

kāmākṣi santatamapi smṛtimārgagāmī |

kauṭilyamamba kathamasthiratāṃ ca dhatte

cauryaṃ ca paṅkajarucāṃ tvadapāṅgapātaḥ ||32||

nityaṃ śretuḥ paricitau yatamānameva

nīlotpalaṃ nijasamīpanivāsalolam |

prītyaiva pāṭhayati vīkṣaṇadeśikendraḥ

kāmākṣī kintu tava kālimasampradāyam ||33||

bhrāntvā muhuḥ stabakitasmitaphenarāśau

kāmākṣi vaktrarucisañcayavārirāśau |

ānandati tripuramardananetralakṣmīḥ

ālambya devi tava mandamapāṅgasetum ||34||

śyāmā tava tripurasundari locanaśrīḥ

kāmākṣi kandalitameduratārakāntiḥ |

jyotsnāvatī smitarucāpi kathaṃ tanoti

spardhāmaho kuvalayaiśca tathā cakoraiḥ ||35||

kālāñjanaṃ ca tava devi nirīkṣaṇaṃ ca

kāmākṣi sāmyasaraṇiṃ samupaiti kāntyā |

niśśeṣanetrasulabhaṃ jagatīṣu pūrva-

manyattrinetrasulabhaṃ tuhinādrikanye ||36||

dhūmāṅkuro makaraketanapāvakasya

kāmākṣi netrarucinīlimacāturī te |

atyantamadbhutamidaṃ nayanatrayasya

harṣodayaṃ janayate haruṇāṅkamauleḥ ||37||

ārabhbhaleśasamaye tava vīkṣaṇassa

kāmākṣi mūkamapi vīkṣaṇamātranamram |

sarvajñatā sakalalokasamakṣameva

kīrtisvayaṃvaraṇamālyavatī vṛṇīte ||38||

kālāmbuvāha uva te paritāpahārī

kāmākṣi puṣkaramadhaḥkurute kaṭākhkṣṣaḥ |

pūrvaḥ paraṃ kṣaṇarucā samupaiti maitrī-

manyastu sa.tataruciṃ prakaṭīkaroti ||39||

sūkṣme'pi durgamatare'pi guruprasāda-

sāhāyyakena vicarannapavargamārge |

saṃsārapaṅkanicaye na patatyamūṃ te

kāmākṣi gāḍhamavalambya kaṭākṣayaṣṭim ||40||

kāmākṣi santatamasau harinīlaratna-

stambhe kaṭākṣarucipuñjamaye bhavatyāḥ |

baddho'pi bhaktinigalairmama cittahastī

stambhaṃ ca bandhamapi muñcati hanta citram ||41||

kāmākṣi kāṣṇaryamapi santatamañjanaṃ ca

bibhrannisargataralo'pi bhavatkaṭākṣaḥ |

vaimalyamanvahamanañjanatā ca bhūyaḥ

sthairyaṃ ca bhaktahṛdayāya kathaṃ dadāti ||42||

mandasmitastabakitaṃ maṇikuṇḍalāṃśu-

stomapravālaruciraṃ śiśirīkṛtāśam |

kāmākṣi rājati kaṭākṣaruceḥ kadambam

udyānamamba karuṇāhariṇekṣaṇāyāḥ ||43||

kāmākṣi tāvakakaṭākṣamahendranīla-

siṃhāsanaṃ śritavato makaradhvajasya |

sāmrājyamaṅgalavidhau muṇikuṇḍalaśrīḥ

nīrājanotsavataraṅgitadīpamālā ||44||

mātaḥ kṣaṇaṃ snapaya māṃ tava vīkṣitena

mandākṣitena sujanairaparokṣitena |

kāmākṣi karmatimirotkarabhāskareṇa

śreyaskareṇa madhupadyutitaskareṇa ||45||

premāpagāpayasi majjanamāracayya

yuktaḥ smitāṃśukṛtabhasmavilepanena |

kāmākṣi kuṇḍalamaṇidyutibhirjaṭālaḥ

śrīkaṇṭhameva bhajate tava dṛṣṭipātaḥ ||46||

kaivalyadāya karuṇārasakiṅkarāya

kāmākṣi kandalitavibhramaśaṅkarāya |

ālokanāya tava bhaktaśivaṅkarāya

mātarnamo'stu paratantritaśaṅkarāya ||47||

sāmrājyamaṅgalavidhau makaradhvajasya

lolālakālikṛtatoraṇamālyaśobhe |

kāmeśvari pracaladutpalavaijayantī-

cāturyameti tava cañcaladṛṣṭipātaḥ ||48||

mārgeṇa mañjukacakāntitamovṛtena

mandāyamānagamanā madanāturāsau |

kāmākṣi dṛṣṭirayate tava śaṅkarāya

saṅketabhūmimacirādabhisārikeva ||49||

vrīḍanuvṛttiramaṇīkṛtasāhacaryā

śaivālitāṃ galarucā śaśiśekharasya |

kāmākṣi kāntisarasīṃ tvadapāṅgalakṣmīḥ

mandaṃ samāśrayati majjanakhelanāya ||50||

kāṣāyamaṃśukamiva prakaṭaṃ dadhāno

māṇikyakuṇḍalaruciṃ mamatāvirodhī |

śrutyantasīmani rataḥ sutarāṃ cakāsti

kāmākṣi tāvakakaṭākṣayatīśvaro'sau ||51||

pāṣāṇa eva harinīlamaṇirdineṣu

pramlanatāṃ kuvalayaṃ prakaṭīkaroti |

naumittiko jaladamecakimā tataste

kāmākṣi śūnyamupamanamapāṅgalakṣmyāḥ ||52||

śṛṅgāravibhramavatī sutarāṃ salajjā

nāsāgramauktikarucā kṛtamandahāsā |

śyāmā kaṭākṣasuṣamā tava yuktametat

kāmākṣi cumbati digambaravaktrabimbam ||53||

nīlotpalena madhupena ca dṛṣṭipātaḥ

kāmākṣi tulya iti te kathamāmananti |

śaityena nindayati yadanvahamindupādān

pāthoruheṇa yadasau kalahāyate ca ||54||

oṣṭhaprabhāpaṭalavidrumamudrite te

bhrūvallivīcisubhage mukhakāntisindhau |

kāmākṣi vāribharapūraṇalambamāna-

kālāmbuvāhasaraṇiṃ labhate kaṭākṣaḥ ||55||

mandasmitairdhavalitā maṇikuṇḍalāṃśu-

samparkalohitarucistvadapāṅgadhārā |

kāmākṣi mallikusumairnavapallavaiśca

nīlotpalaiśca raciteva vibhāti mālā ||56||

kāmākṣi śītalakṛpārasanirjharāmbhaḥ-

samparkapakṣmalarucistvadapāṅgamālā |

gobhiḥ sadā purariporabhilaṣyamāṇā

dūrvākadambakaviḍambanamātanoti ||57||

hṛtpaṅkajaṃ mama vikāsayatu pramuṣṇa-

nnullāsamutpalarucestamasāṃ niroddhā |

doṣānuṣaṅgajaḍatāṃ jagatāṃ dhunānaḥ

kāmākṣi vīkṣaṇavilāsadinodayaste ||58||

cakṣurvimohayati candravibhūṣaṇasya

kāmākṣi tāvakakaṭākṣatamaḥprarohaḥ |

pratyaṅmukhaṃ tu nayanaṃ stimitaṃ munīnāṃ

prākāśyameva nayatīti paraṃ vicitram ||59||

kāmākṣi vīkṣaṇarucā yudhi nirjitaṃ te

nīlotpalaṃ niravaśeṣagatābhimānam |

āgatya tatparisaraṃ śravaṇavataṃsa-

vyojena nūnamabhayārthanamātanoti ||60||

āścaryamamba madānābhyudayāvalambaḥ

kāmākṣi cañcalanirīkṣaṇavibhramaste |

dhairyaṃ vidhūya tanute hṛdi rāgabandhaṃ

śambhostadeva viparītatayā munīnām ||61||

jantoḥ sakṛtpraṇamato jagadīḍyatāṃ ca

tejāsvitāṃ ca niśitāṃ ca matiṃ sabhāyām |

kāmākṣi mākṣikajharīmiva vaikharīṃ ca

lakṣmīṃ ca pakṣmalayati kṣaṇavīkṣaṇaṃ te ||62||

kādambinī kimayate na jalānuṣaṅgaṃ

bhṛṅgāvalī kimurarīkurute na padmam |

kiṃ vā kalindatanayā sahate na bhaṅgaṃ

kāmākṣi niścayapadaṃ na tavākṣilakṣmīḥ ||63||

kākolapāvakatṛṇīkaraṇe'pi dakṣaḥ

kāmākṣi bālakasudhākaraśekharasya |

atyantaśītalatamo'pyanupārataṃ te

cittaṃ vimohayati citramayaṃ kaṭākṣaḥ ||64||

kārpaṇyapūraparivardhitamamba moha-

kandodgataṃ bhavamayaṃ viṣapādapaṃ me |

tuṅgaṃ chinattu tuhinādrisute bhavatyāḥ

kāñcīpureśvari kaṭākṣakuṭhāradhārā ||65||

kāmākṣi ghorabhavarogacikitsanārtha-

mabhyarthya deśikakaṭākṣabhiṣakprasādāt |

tatrāpi devi labhate sukṛtī kadāci-

danyasya durlabhamapāṅgamahauṣadhaṃ te ||66||

kāmākṣi deśikakṛpāṅkuramāśrayanto

nānātaponiyamanāśitapāśabandhāḥ |

vāsālayaṃ tava kaṭākṣamamuṃ mahānto

labdhvā sukhaṃ samādhiyo vicaranti loke ||67||

sākūtasaṃlapitasambhṛtamugdhahāsaṃ

vrīḍānurāgasahacāri vilokanaṃ te |

kāmākṣi kāmaparipanthini māravīra-

sāmrājyavibhramadaśāṃ saphalīkaroti ||68||

kāmākṣi vibhramabalaikanidhirvidhāya

bhrūvallicāpakuṭilīkṛtimeva citram |

svādhīnatāṃ tava nināya śaśāṅkamaule-

raṅgārdharājyasukhalābhamapāṅgavīraḥ ||69||

kāmāṅkuraikanilayastava dṛṣṭipātaḥ

kāmākṣi bhaktamanasāṃ pradadātu kāmān |

rāgānvitaḥ svayamapi prakaṭīkaroti

vairāgyameva kathameṣa mahāmunīnām ||70||

kālāmbuvāhanivahaiḥ kalahāyate te

kāmākṣi kālimamadena sadā kaṭākṣaḥ |

citraṃ tathāpi nitarāmamumeva dṛṣṭvā

sotkaṇṭha eva ramate kila nīlakaṇṭhaḥ ||71||

kāmākṣi manmatharipuṃ prati māratāpa-

mohāndhakārajaladāgamanena nṛtyan |

duṣkarmakañcukikulaṃ kabalīkarotu

vyāmiśramecakarucistvadapāṅgakekī ||72||

kāmākṣi manmathariporavalokaneṣu

kāntaṃ payojamiva tāvakamakṣipātam |

premāgamo divasavadvikacīkaroti

lajjābharo rajanivanmukulīkaroti ||73||

mūko viriñcati paraṃ puruṣaḥ kurūpaḥ

kandarpati tridaśarājati kimpacānaḥ |

kāmākṣi kevalamupakramakāla eva

līlātaraṅgitakaṭākṣarucaḥ kṣaṇaṃ te ||74||

nīlālakā madhukaranti manojñanāsā-

muktārucaḥ prakaṭakandabisāṅkuranti |

kāruṇyamamba makarandati kāmakoṭi

manye tataḥ kamalameva vilocanaṃ te ||75||

ākāṅkṣyamāṇaphaladānavicakṣaṇāyāḥ |

kāmākṣi tāvakakaṭākṣakakāmadhenoḥ |

samparka eva kathamamba vimuktapāśa-

bandhāḥ sphuṭaṃ tanubhṛtaḥ paśutāṃ tyajanti ||76||

saṃsāragharmaparitāpajuṣāṃ narāṇāṃ

kāmākṣi śītalatarāṇi tavekṣitāni |

candrātapanti ghanacandanakardamanti

muktāguṇanti himavāriniṣecananti ||77||

premāmburāśisatatasnapitāni citraṃ

kāmākṣi tāvakakaṭākṣanirīkṣaṇāni |

sandhukṣayanti muhurindhanarāśirītyā

māradruho manasi manmathacitrabhānum ||78||

kālāñjanapratibhaṭaṃ kamanīyakāntyā

kandarpatantrakalayā kalitānubhāvam |

kāñcīvihārarasike kaluṣārticoraṃ

kallolayasva mayi te karuṇākaṭākṣam ||79||

krāntena manmathadena vimohyamāna-

svāntena cūtatarumūlagatasya puṃsaḥ |

kāntena kiñcidavalokaya locanasya

prāntena māṃ janani kāñcipurīvibhūṣe ||80||

kāmākṣi ko'pi sujanāstvadapāṅgasaṅge

kaṇṭhena kandalitakālimasampradāyāḥ |

uttaṃsakalpitacakorakuṭumbapoṣā

naktandivasaprasavabhūnayanā bhavanti ||81||

nīlotpalaprasavakāntinirdaśanena

kāruṇyavibhramajuṣā tava vīkṣaṇena |

kāmākṣi karmajaladheḥ kalaśīsutena

pāśatrayādvayamamī parimocanīyāḥ ||82||

atyantacañcalamakṛtrimamañjanaṃ kiṃ

jhaṅkārabhaṅgirahitā kimu bhṛṅgamālā |

dhūmāṅkuraḥ kimu hutāśanasaṅgahīnaḥ

kāmākṣi netrarucinīlimakandalī te ||83||

kāmākṣi nityamayamañjalirastu mukti-

bījāya vibhramamadodayaghūrṇitāya |

kandarpadarpapunarudbhavasiddhidāya

kalyāṇadāya tava devi dṛgañcalāya ||84||

darpāṅkuro makaraketanavibhramāṇāṃ

nindāṅkuro vidalitotpalacāturīṇām |

dīpāṅkuro bhavatamisrakadambakānāṃ

kāmākṣi pālayatu māṃ tvadapāṅgapātaḥ ||85||

kaivalyadivyamaṇirohaṇaparvatebhyaḥ

kāruṇyanirjharapayaḥkṛtamañjanebhyaḥ |

kāmākṣi kiṅkaritaśaṅkaramānasebhya-

stebhyo namo'stu tava vīkṣaṇavibhramebhyaḥ ||86||

alpīya eva navamutpalamamba hīnā

mīnasya vā saraṇiramburuhāṃ ca kiṃ vā |

dūre mṛgīdṛgasamañjasamañjanaṃ ca

kāmākṣi vīkṣaṇarucau tava tarkayāmaḥ ||87||

miśrībhavadgaralapaṅkilaśaṅkaroras-

sīmāṅgaṇe kimapi riṅkhaṇamādadhānaḥ |

helāvadhūtalalitaśravaṇotpalo'sau

kāmākṣi bāla iva rājati te kaṭākṣaḥ ||88||

prauḍhikaroti viduṣāṃ navasūktidhāṭī-

cūtāṭavīṣu budhakokilalālyamānam |

mādhvīrasaṃ parimalaṃ ca nirargalaṃ te

kāmākṣi vīkṣaṇavilāsavasantalakṣmīḥ ||89||

kūlaṅkaṣaṃ vitanute karuṇāmbuvarṣī

sārasvataṃ sukṛtinaḥ sulabhaṃ pravāham |

tucchīkaroti yamunāmbutaraṅgabhaṅgīṃ

kāmākṣi kiṃ tava kaṭākṣamahāmbuvāhaḥ ||90||

jagarti devi karuṇāśukasundarī te

tāṭaṅkaratnarucidāḍimakhaṇḍaśoṇe |

kāmākṣi nirbharakaṭākṣamarīcipuñja-

māhendranīlamaṇipañjaramadhyabhāge ||91||

kāmākṣi satkuvalayasya sagotrabhāvā-

dākrāmati śrutimasau tava dṛṣṭipātaḥ |

kiñca sphuṭaṃ kuṭilatāṃ prakaṭīkaroti

bhrūvallarīparicitasya phalaṃ kimetat ||92||

eṣā tavākṣisuṣamā viṣamāyudhasya

nārācavarṣalaharī nagarājakanye |

śaṅke karoti śatadhā hṛdi dhairyamudrāṃ

śrīkāmakoṭi yadasau śiśirāṃśumauleḥ ||93||

bāṇena puṣpadhanuṣaḥ parikalpyamāna-

trāṇena bhaktamanasāṃ karuṇākareṇa |

koṇena komaladṛśastava kāmakoṭi

śoṇena śoṣaya śive mama śokasindhum ||94||

māradruhā mukuṭasīmani lālyamāne

mandākinīpayasi te kuṭilaṃ cariṣṇuḥ |

kāmākṣi koparabhasādvalamānamīna-

sandehamaṅkurayati kṣaṇamakṣipātaḥ ||95||

kāmākṣi saṃvalitamauktikakuṇḍalāṃśu-

cañcatsitaśravaṇacāmaracāturīkaḥ |

stambhe nirantaramapāṅgamaye bhavatyā

baddhaścakāsti makaradhvajamattahastī ||96||

yāvatkaṭākṣarajanīsamayāgamaste

kāmākṣi tāvadacirānnamatāṃ narāṇām |

āvirbhavatyamṛtadīdhitibimbamamba

saṃvinmayaṃ hṛdayapūrvagirīndraśṛṅge ||97||

kāmākṣi kalpaviṭapīva bhavatkaṭākṣo

ditsuḥ samastavibhavaṃ namatāṃ narāṇām |

bhṛṅgasya nīlanalinasya ca kāntisampa-

tsarvasvameva haratīti paraṃ vicitram ||98||

atyantaśītalamanargalakarmapāka-

kākolahāri sulabhaṃ sumanobhiretat |

pīyūṣameva tava vīkṣaṇamamba kintu

kāmākṣi nīlamidamityayameva bhedaḥ ||99||

ajñātabhaktirasamaprasaradviveka-

matyantagarvamanadhītasamastaśāstram |

aprāptasatyamasamīpagataṃ ca mukteḥ

kāmākṣi naiva tava spṛhayati dṛṣṭipātaḥ ||100||

(kāmākṣi māmavatu te karuṇākaṭākṣaḥ)

pātena locanarucestava kāmakoṭi

potena patakapayodhibhayāturāṇām |

pūtena tena navakāñcanakuṇḍalāṃśu-

vītena śītalaya bhūdharakanyake mām ||101||

|| iti kaṭākṣaśatakaṃ sampūrṇam ||

Sanskrit — Devanagari (original)

मोहान्धकारनिवहं विनिहन्तुमीडे

मूकात्मनामपि महाकवितावदान्यान् ।

श्रीकाञ्चिदेशशिशिरीकृतिजागरूकान्

एकाम्रनाथतरुणीकरुणावलोकान् ॥1॥

मातर्जयन्ति ममताग्रहमोक्षणानि

माहेन्द्रनीलरुचिशिक्षणदक्षिणानि ।

कामाक्षि कल्पितजगत्त्रयरक्षणानि

त्वद्वीक्षणानि वरदानविचक्षणानि ॥2॥

आनङ्गतन्त्रविधिदर्शितकौशलानाम्

आनन्दमन्दपरिघूर्णितमन्थराणाम् ।

तारल्यमम्ब तव ताडितकर्णसीम्नां

कामाक्षि खेलति कटाक्षनिरीक्षणानाम् ॥3॥

कल्लोलितेन करुणारसवेल्लितेन

कल्माषितेन कमनीयमृदुस्मितेन ।

मामञ्चितेन तव किञ्चन कुञ्चितेन

कामाक्षि तेन शिशिरीकुरु वीक्षितेन ॥4॥

साहाय्यकं गतवती मुहुरर्जनस्य

मन्दस्मितस्य परितोषितभीमचेताः ।

कामाक्षि पाण्डवचमूरिव तावकीना

कर्णान्तिकं चलति हन्त कटाक्षलक्ष्मीः ॥5॥

अस्तं क्षणान्नयतु मे परितापसूर्यम्

आनन्दचन्द्रमसमानयतां प्रकाशम् ।

कालान्धकारसुषुमां कलयन्दिगन्ते

कामाक्षि कोमलकटाक्षनिशागमस्ते ॥6॥

ताटाङ्कमौक्तिकरुचाङ्कुरदन्तकान्तिः

कारुण्यहस्तिपशिखामणिनाधिरूढः ।

उन्मूलयत्वशुभपादपमस्मदीयं

कामाक्षि तावककटाक्षमतङ्गजेतन्द्रः ॥7॥

छायाभरणे जगतां परितापहारी

ताटङ्करत्नमणितल्लजपल्लवश्रीः ।

कारुण्यनाम विकिरन्मकरन्दजालं

कामाक्षि राजति कटाक्षसुरद्रुमस्ते ॥8॥

सूर्याश्रयप्रणयिनी मणिकुण्डलांशु-

लौहित्यकोकनदकाननमाननीया ।

यान्ती तव स्मरहराननकान्तिसिन्धुं

कामाक्षि राजति कटाक्षकलिन्दकन्या ॥9॥

प्राप्नोति यं सुकृतिनं तव पक्षपातात्

कामाक्षि वीक्षणविलासकलापुरन्ध्री ।

सद्यस्तमेव किल मुक्तिवधूर्वृणीते

तस्मान्नितान्तमनयोरिदमैकमत्यम् ॥10॥

यान्ती सदैव मरुतामनुकूलभावं

भ्रूवल्लिशक्रधनुरुल्लसिता रसार्द्रा ।

कामाक्षि कौतुकतरङ्गितनीलकण्ठा

कादम्बिनीव तव भाति कटाक्षमाला ॥11॥

गङ्गाम्भसि स्मितमये तपनात्मजेव

गङ्गाधरोरसि नवोत्पलमालिकेव ।

वक्त्रप्रभासरसि शैवलमण्डलीव

कामाक्षि राजति कटाक्षरुचिच्छटा ते ॥12॥

संस्कारतः किमपि कन्दलितान् रसज्ञ-

केदारसीम्नि सुधियामुपभोगयोग्यान् ।

कल्याणसूक्तिलहरीकलमाङ्कुरान्नः

कामाक्षि पक्ष्मलयतु त्वदपाङ्गमेघः ॥13॥

चाञ्चल्यमेव नियतं कलयन्प्रकृत्या

मालिन्यभूः श्रतिपथाक्रमजागरूकः ।

कैवल्यमेव किमु कल्पयते नतानां

कामाक्षि चित्रमपि ते करुणाकटाक्षः ॥14॥

सञ्जीवने जननि चूतशिलीमुखस्य

सम्मोहने शशिकिशोरकशेखरस्य ।

संस्तम्भने च ममताग्रहचेष्टितस्य

कामाक्षि वीक्षणकला परमौषधं ते ॥15॥

नीलोऽपि रागमधिकं जनयन्पुरारेः

लोलोऽपि भक्तिमधिकां दृढयन्नराणाम् ।

वक्रोऽपि देवि नमतां समतां वितन्वन्

कामाक्षि नृत्यतु मयि त्वदपाङ्गपातः ॥16॥

कामद्रुहो हृदययन्त्रणजागरूका

कामाक्षि चञ्चलदृगञ्चलमेखला ते ।

आश्चर्यमम्ब भजतां झटिति स्वकीय-

सम्पर्क एव विधुनोति समस्तबन्धान् ॥17॥

कुण्ठीकरोतु विपदं मम कुञ्चितभ्रू-

चापाञ्चितः श्रितविदेहभवानुरागः ।

रक्षोपकारमनिशं जनयञ्जगत्यां

कामाक्षि राम इव ते करुणाकटाक्षः ॥18॥

श्रीकामकोटि शिवलोचनशोषितस्य

शृङ्गारबीजविभवस्य पुनःप्ररोहे ।

प्रेमाम्भसार्द्रमचिरात्प्रचुरेण शङ्के

केदारमम्ब तव केवलदृष्टिपातम् ॥19॥

माहात्म्यशेवधिरसौ तव दुर्विलङ्घ्य-

संसारविन्ध्यगिरिकुण्ठनकेलिचुञ्चुः ।

धैर्याम्बुधिं पशुपतेश्चुलकीकरोति

कामाक्षि वीक्षणविजृम्भणकुम्भजन्मा ॥20॥

पीयूषवर्षवशिशिरा स्फुटदुत्पलश्री-

मैत्री निसर्गमधुरा कृततारकाप्तिः ।

कामाक्षि संश्रितवती वपुरष्टमूर्तेः

ज्योत्स्नायते भगवति त्वदपाङ्गमाला ॥21॥

अम्ब स्मरप्रतिभटस्य वपुर्मनोज्ञम्

अम्भोजकाननमिवाञ्चितकण्टकाभम् ।

भृङ्गीव चुम्बति सदैव सपक्षपाता

कामाक्षि कोमलरुचिस्त्वदपाङ्गमाला ॥22॥

केशप्रभापटलनीलवितानजाले

कामाक्षि कुण्डलमणिच्छविदीपशोभे ।

शङ्के कटाक्षरुचिरङ्गतले कृपाख्या

शैलूषिका नटति शङ्करवल्लभे ते ॥23॥

अत्यन्तशीतलमतन्द्रयतु क्षणार्धम्

अस्तोकविभ्रममनङ्गविलासकन्दम् ।

अल्पस्मितादृतमपारकृपाप्रवाहम्

अक्षिप्ररोहमचिरान्मयि कामकोटि ॥24॥

मन्दाक्षरागतरलीकृतिपारतन्त्र्यात्

कामाक्षि मन्थरतरां त्वदपाङ्गडोलाम् ।

आरुह्य मन्दमतिकौतुकशालि चक्षुः

आनन्दमेति मुहुरर्धशशाङ्कमौलेः ॥25॥

त्रैयम्बकं त्रिपुरसुन्दरि हर्म्यभूमि-

रङ्गं विहारसरसी करुणाप्रवाहः ।

दासाश्च वासवमुखाः परिपालनीयं

कामाक्षि विश्वमपि वीक्षणभूभृतस्ते ॥26॥

वागीश्वरी सहचरी नियमेन लक्ष्मीः

भ्रूवल्लरीवशकरी भुवनानि गेहम् ।

रूपं त्रिलोकनयनामृतमम्ब तेषां

कामाक्षि येषु तव वीक्षणपारतन्त्री ॥27॥

माहेश्वरं झटिति मानसमीनमम्ब

कामाक्षि धैर्यजलधौ नितरां निमग्नम् ।

जालेन शृङ्खलयति त्वदपाङ्गनाम्ना

विस्तारितेन विषमायुधदाशकोऽसौ ॥28॥

उन्मथ्य बोधकमलाकारमम्ब जाड्य-

स्तम्बेरमं मम मनोविपिने भ्रमन्तम् ।

कुण्ठीकुरुष्व तरसा कुटिलाग्रसीम्ना

कामाक्षि तावककटाक्षमहाङ्कुशेन ॥29॥

उद्वेल्लितस्तबकितैर्ललितैर्विलासैः

उत्थाय देवि तव गाढकटाक्षकुञ्जात् ।

दूरं पलाययतु मोहमृगीकुलं मे

कामाक्षि स्तवरमनुग्रहकेसरीन्द्रः ॥30॥

स्नेहादृतां विदलितोत्पलकन्तिचोरां

जेतारमेव जगदीश्वरि जेतुकामः ।

मानोद्धतो मकरकेतुरसौ धुनीते

कामाक्षि तावककटाक्षकृपाणवल्लीम् ॥31॥

श्रौतीं व्रजन्नपि सदा सरणिं मुनीनां

कामाक्षि सन्ततमपि स्मृतिमार्गगामी ।

कौटिल्यमम्ब कथमस्थिरतां च धत्ते

चौर्यं च पङ्कजरुचां त्वदपाङ्गपातः ॥32॥

नित्यं श्रेतुः परिचितौ यतमानमेव

नीलोत्पलं निजसमीपनिवासलोलम् ।

प्रीत्यैव पाठयति वीक्षणदेशिकेन्द्रः

कामाक्षी किन्तु तव कालिमसम्प्रदायम् ॥33॥

भ्रान्त्वा मुहुः स्तबकितस्मितफेनराशौ

कामाक्षि वक्त्ररुचिसञ्चयवारिराशौ ।

आनन्दति त्रिपुरमर्दननेत्रलक्ष्मीः

आलम्ब्य देवि तव मन्दमपाङ्गसेतुम् ॥34॥

श्यामा तव त्रिपुरसुन्दरि लोचनश्रीः

कामाक्षि कन्दलितमेदुरतारकान्तिः ।

ज्योत्स्नावती स्मितरुचापि कथं तनोति

स्पर्धामहो कुवलयैश्च तथा चकोरैः ॥35॥

कालाञ्जनं च तव देवि निरीक्षणं च

कामाक्षि साम्यसरणिं समुपैति कान्त्या ।

निश्शेषनेत्रसुलभं जगतीषु पूर्व-

मन्यत्त्रिनेत्रसुलभं तुहिनाद्रिकन्ये ॥36॥

धूमाङ्कुरो मकरकेतनपावकस्य

कामाक्षि नेत्ररुचिनीलिमचातुरी ते ।

अत्यन्तमद्भुतमिदं नयनत्रयस्य

हर्षोदयं जनयते हरुणाङ्कमौलेः ॥37॥

आरभ्भलेशसमये तव वीक्षणस्स

कामाक्षि मूकमपि वीक्षणमात्रनम्रम् ।

सर्वज्ञता सकललोकसमक्षमेव

कीर्तिस्वयंवरणमाल्यवती वृणीते ॥38॥

कालाम्बुवाह उव ते परितापहारी

कामाक्षि पुष्करमधःकुरुते कटाख्क्ष्षः ।

पूर्वः परं क्षणरुचा समुपैति मैत्री-

मन्यस्तु स.ततरुचिं प्रकटीकरोति ॥39॥

सूक्ष्मेऽपि दुर्गमतरेऽपि गुरुप्रसाद-

साहाय्यकेन विचरन्नपवर्गमार्गे ।

संसारपङ्कनिचये न पतत्यमूं ते

कामाक्षि गाढमवलम्ब्य कटाक्षयष्टिम् ॥40॥

कामाक्षि सन्ततमसौ हरिनीलरत्न-

स्तम्भे कटाक्षरुचिपुञ्जमये भवत्याः ।

बद्धोऽपि भक्तिनिगलैर्मम चित्तहस्ती

स्तम्भं च बन्धमपि मुञ्चति हन्त चित्रम् ॥41॥

कामाक्षि काष्णर्यमपि सन्ततमञ्जनं च

बिभ्रन्निसर्गतरलोऽपि भवत्कटाक्षः ।

वैमल्यमन्वहमनञ्जनता च भूयः

स्थैर्यं च भक्तहृदयाय कथं ददाति ॥42॥

मन्दस्मितस्तबकितं मणिकुण्डलांशु-

स्तोमप्रवालरुचिरं शिशिरीकृताशम् ।

कामाक्षि राजति कटाक्षरुचेः कदम्बम्

उद्यानमम्ब करुणाहरिणेक्षणायाः ॥43॥

कामाक्षि तावककटाक्षमहेन्द्रनील-

सिंहासनं श्रितवतो मकरध्वजस्य ।

साम्राज्यमङ्गलविधौ मुणिकुण्डलश्रीः

नीराजनोत्सवतरङ्गितदीपमाला ॥44॥

मातः क्षणं स्नपय मां तव वीक्षितेन

मन्दाक्षितेन सुजनैरपरोक्षितेन ।

कामाक्षि कर्मतिमिरोत्करभास्करेण

श्रेयस्करेण मधुपद्युतितस्करेण ॥45॥

प्रेमापगापयसि मज्जनमारचय्य

युक्तः स्मितांशुकृतभस्मविलेपनेन ।

कामाक्षि कुण्डलमणिद्युतिभिर्जटालः

श्रीकण्ठमेव भजते तव दृष्टिपातः ॥46॥

कैवल्यदाय करुणारसकिङ्कराय

कामाक्षि कन्दलितविभ्रमशङ्कराय ।

आलोकनाय तव भक्तशिवङ्कराय

मातर्नमोऽस्तु परतन्त्रितशङ्कराय ॥47॥

साम्राज्यमङ्गलविधौ मकरध्वजस्य

लोलालकालिकृततोरणमाल्यशोभे ।

कामेश्वरि प्रचलदुत्पलवैजयन्ती-

चातुर्यमेति तव चञ्चलदृष्टिपातः ॥48॥

मार्गेण मञ्जुकचकान्तितमोवृतेन

मन्दायमानगमना मदनातुरासौ ।

कामाक्षि दृष्टिरयते तव शङ्कराय

सङ्केतभूमिमचिरादभिसारिकेव ॥49॥

व्रीडनुवृत्तिरमणीकृतसाहचर्या

शैवालितां गलरुचा शशिशेखरस्य ।

कामाक्षि कान्तिसरसीं त्वदपाङ्गलक्ष्मीः

मन्दं समाश्रयति मज्जनखेलनाय ॥50॥

काषायमंशुकमिव प्रकटं दधानो

माणिक्यकुण्डलरुचिं ममताविरोधी ।

श्रुत्यन्तसीमनि रतः सुतरां चकास्ति

कामाक्षि तावककटाक्षयतीश्वरोऽसौ ॥51॥

पाषाण एव हरिनीलमणिर्दिनेषु

प्रम्लनतां कुवलयं प्रकटीकरोति ।

नौमित्तिको जलदमेचकिमा ततस्ते

कामाक्षि शून्यमुपमनमपाङ्गलक्ष्म्याः ॥52॥

शृङ्गारविभ्रमवती सुतरां सलज्जा

नासाग्रमौक्तिकरुचा कृतमन्दहासा ।

श्यामा कटाक्षसुषमा तव युक्तमेतत्

कामाक्षि चुम्बति दिगम्बरवक्त्रबिम्बम् ॥53॥

नीलोत्पलेन मधुपेन च दृष्टिपातः

कामाक्षि तुल्य इति ते कथमामनन्ति ।

शैत्येन निन्दयति यदन्वहमिन्दुपादान्

पाथोरुहेण यदसौ कलहायते च ॥54॥

ओष्ठप्रभापटलविद्रुममुद्रिते ते

भ्रूवल्लिवीचिसुभगे मुखकान्तिसिन्धौ ।

कामाक्षि वारिभरपूरणलम्बमान-

कालाम्बुवाहसरणिं लभते कटाक्षः ॥55॥

मन्दस्मितैर्धवलिता मणिकुण्डलांशु-

सम्पर्कलोहितरुचिस्त्वदपाङ्गधारा ।

कामाक्षि मल्लिकुसुमैर्नवपल्लवैश्च

नीलोत्पलैश्च रचितेव विभाति माला ॥56॥

कामाक्षि शीतलकृपारसनिर्झराम्भः-

सम्पर्कपक्ष्मलरुचिस्त्वदपाङ्गमाला ।

गोभिः सदा पुररिपोरभिलष्यमाणा

दूर्वाकदम्बकविडम्बनमातनोति ॥57॥

हृत्पङ्कजं मम विकासयतु प्रमुष्ण-

न्नुल्लासमुत्पलरुचेस्तमसां निरोद्धा ।

दोषानुषङ्गजडतां जगतां धुनानः

कामाक्षि वीक्षणविलासदिनोदयस्ते ॥58॥

चक्षुर्विमोहयति चन्द्रविभूषणस्य

कामाक्षि तावककटाक्षतमःप्ररोहः ।

प्रत्यङ्मुखं तु नयनं स्तिमितं मुनीनां

प्राकाश्यमेव नयतीति परं विचित्रम् ॥59॥

कामाक्षि वीक्षणरुचा युधि निर्जितं ते

नीलोत्पलं निरवशेषगताभिमानम् ।

आगत्य तत्परिसरं श्रवणवतंस-

व्योजेन नूनमभयार्थनमातनोति ॥60॥

आश्चर्यमम्ब मदानाभ्युदयावलम्बः

कामाक्षि चञ्चलनिरीक्षणविभ्रमस्ते ।

धैर्यं विधूय तनुते हृदि रागबन्धं

शम्भोस्तदेव विपरीततया मुनीनाम् ॥61॥

जन्तोः सकृत्प्रणमतो जगदीड्यतां च

तेजास्वितां च निशितां च मतिं सभायाम् ।

कामाक्षि माक्षिकझरीमिव वैखरीं च

लक्ष्मीं च पक्ष्मलयति क्षणवीक्षणं ते ॥62॥

कादम्बिनी किमयते न जलानुषङ्गं

भृङ्गावली किमुररीकुरुते न पद्मम् ।

किं वा कलिन्दतनया सहते न भङ्गं

कामाक्षि निश्चयपदं न तवाक्षिलक्ष्मीः ॥63॥

काकोलपावकतृणीकरणेऽपि दक्षः

कामाक्षि बालकसुधाकरशेखरस्य ।

अत्यन्तशीतलतमोऽप्यनुपारतं ते

चित्तं विमोहयति चित्रमयं कटाक्षः ॥64॥

कार्पण्यपूरपरिवर्धितमम्ब मोह-

कन्दोद्गतं भवमयं विषपादपं मे ।

तुङ्गं छिनत्तु तुहिनाद्रिसुते भवत्याः

काञ्चीपुरेश्वरि कटाक्षकुठारधारा ॥65॥

कामाक्षि घोरभवरोगचिकित्सनार्थ-

मभ्यर्थ्य देशिककटाक्षभिषक्प्रसादात् ।

तत्रापि देवि लभते सुकृती कदाचि-

दन्यस्य दुर्लभमपाङ्गमहौषधं ते ॥66॥

कामाक्षि देशिककृपाङ्कुरमाश्रयन्तो

नानातपोनियमनाशितपाशबन्धाः ।

वासालयं तव कटाक्षममुं महान्तो

लब्ध्वा सुखं समाधियो विचरन्ति लोके ॥67॥

साकूतसंलपितसम्भृतमुग्धहासं

व्रीडानुरागसहचारि विलोकनं ते ।

कामाक्षि कामपरिपन्थिनि मारवीर-

साम्राज्यविभ्रमदशां सफलीकरोति ॥68॥

कामाक्षि विभ्रमबलैकनिधिर्विधाय

भ्रूवल्लिचापकुटिलीकृतिमेव चित्रम् ।

स्वाधीनतां तव निनाय शशाङ्कमौले-

रङ्गार्धराज्यसुखलाभमपाङ्गवीरः ॥69॥

कामाङ्कुरैकनिलयस्तव दृष्टिपातः

कामाक्षि भक्तमनसां प्रददातु कामान् ।

रागान्वितः स्वयमपि प्रकटीकरोति

वैराग्यमेव कथमेष महामुनीनाम् ॥70॥

कालाम्बुवाहनिवहैः कलहायते ते

कामाक्षि कालिममदेन सदा कटाक्षः ।

चित्रं तथापि नितराममुमेव दृष्ट्वा

सोत्कण्ठ एव रमते किल नीलकण्ठः ॥71॥

कामाक्षि मन्मथरिपुं प्रति मारताप-

मोहान्धकारजलदागमनेन नृत्यन् ।

दुष्कर्मकञ्चुकिकुलं कबलीकरोतु

व्यामिश्रमेचकरुचिस्त्वदपाङ्गकेकी ॥72॥

कामाक्षि मन्मथरिपोरवलोकनेषु

कान्तं पयोजमिव तावकमक्षिपातम् ।

प्रेमागमो दिवसवद्विकचीकरोति

लज्जाभरो रजनिवन्मुकुलीकरोति ॥73॥

मूको विरिञ्चति परं पुरुषः कुरूपः

कन्दर्पति त्रिदशराजति किम्पचानः ।

कामाक्षि केवलमुपक्रमकाल एव

लीलातरङ्गितकटाक्षरुचः क्षणं ते ॥74॥

नीलालका मधुकरन्ति मनोज्ञनासा-

मुक्तारुचः प्रकटकन्दबिसाङ्कुरन्ति ।

कारुण्यमम्ब मकरन्दति कामकोटि

मन्ये ततः कमलमेव विलोचनं ते ॥75॥

आकाङ्क्ष्यमाणफलदानविचक्षणायाः ।

कामाक्षि तावककटाक्षककामधेनोः ।

सम्पर्क एव कथमम्ब विमुक्तपाश-

बन्धाः स्फुटं तनुभृतः पशुतां त्यजन्ति ॥76॥

संसारघर्मपरितापजुषां नराणां

कामाक्षि शीतलतराणि तवेक्षितानि ।

चन्द्रातपन्ति घनचन्दनकर्दमन्ति

मुक्तागुणन्ति हिमवारिनिषेचनन्ति ॥77॥

प्रेमाम्बुराशिसततस्नपितानि चित्रं

कामाक्षि तावककटाक्षनिरीक्षणानि ।

सन्धुक्षयन्ति मुहुरिन्धनराशिरीत्या

मारद्रुहो मनसि मन्मथचित्रभानुम् ॥78॥

कालाञ्जनप्रतिभटं कमनीयकान्त्या

कन्दर्पतन्त्रकलया कलितानुभावम् ।

काञ्चीविहाररसिके कलुषार्तिचोरं

कल्लोलयस्व मयि ते करुणाकटाक्षम् ॥79॥

क्रान्तेन मन्मथदेन विमोह्यमान-

स्वान्तेन चूततरुमूलगतस्य पुंसः ।

कान्तेन किञ्चिदवलोकय लोचनस्य

प्रान्तेन मां जननि काञ्चिपुरीविभूषे ॥80॥

कामाक्षि कोऽपि सुजनास्त्वदपाङ्गसङ्गे

कण्ठेन कन्दलितकालिमसम्प्रदायाः ।

उत्तंसकल्पितचकोरकुटुम्बपोषा

नक्तन्दिवसप्रसवभूनयना भवन्ति ॥81॥

नीलोत्पलप्रसवकान्तिनिर्दशनेन

कारुण्यविभ्रमजुषा तव वीक्षणेन ।

कामाक्षि कर्मजलधेः कलशीसुतेन

पाशत्रयाद्वयममी परिमोचनीयाः ॥82॥

अत्यन्तचञ्चलमकृत्रिममञ्जनं किं

झङ्कारभङ्गिरहिता किमु भृङ्गमाला ।

धूमाङ्कुरः किमु हुताशनसङ्गहीनः

कामाक्षि नेत्ररुचिनीलिमकन्दली ते ॥83॥

कामाक्षि नित्यमयमञ्जलिरस्तु मुक्ति-

बीजाय विभ्रममदोदयघूर्णिताय ।

कन्दर्पदर्पपुनरुद्भवसिद्धिदाय

कल्याणदाय तव देवि दृगञ्चलाय ॥84॥

दर्पाङ्कुरो मकरकेतनविभ्रमाणां

निन्दाङ्कुरो विदलितोत्पलचातुरीणाम् ।

दीपाङ्कुरो भवतमिस्रकदम्बकानां

कामाक्षि पालयतु मां त्वदपाङ्गपातः ॥85॥

कैवल्यदिव्यमणिरोहणपर्वतेभ्यः

कारुण्यनिर्झरपयःकृतमञ्जनेभ्यः ।

कामाक्षि किङ्करितशङ्करमानसेभ्य-

स्तेभ्यो नमोऽस्तु तव वीक्षणविभ्रमेभ्यः ॥86॥

अल्पीय एव नवमुत्पलमम्ब हीना

मीनस्य वा सरणिरम्बुरुहां च किं वा ।

दूरे मृगीदृगसमञ्जसमञ्जनं च

कामाक्षि वीक्षणरुचौ तव तर्कयामः ॥87॥

मिश्रीभवद्गरलपङ्किलशङ्करोरस्-

सीमाङ्गणे किमपि रिङ्खणमादधानः ।

हेलावधूतललितश्रवणोत्पलोऽसौ

कामाक्षि बाल इव राजति ते कटाक्षः ॥88॥

प्रौढिकरोति विदुषां नवसूक्तिधाटी-

चूताटवीषु बुधकोकिललाल्यमानम् ।

माध्वीरसं परिमलं च निरर्गलं ते

कामाक्षि वीक्षणविलासवसन्तलक्ष्मीः ॥89॥

कूलङ्कषं वितनुते करुणाम्बुवर्षी

सारस्वतं सुकृतिनः सुलभं प्रवाहम् ।

तुच्छीकरोति यमुनाम्बुतरङ्गभङ्गीं

कामाक्षि किं तव कटाक्षमहाम्बुवाहः ॥90॥

जगर्ति देवि करुणाशुकसुन्दरी ते

ताटङ्करत्नरुचिदाडिमखण्डशोणे ।

कामाक्षि निर्भरकटाक्षमरीचिपुञ्ज-

माहेन्द्रनीलमणिपञ्जरमध्यभागे ॥91॥

कामाक्षि सत्कुवलयस्य सगोत्रभावा-

दाक्रामति श्रुतिमसौ तव दृष्टिपातः ।

किञ्च स्फुटं कुटिलतां प्रकटीकरोति

भ्रूवल्लरीपरिचितस्य फलं किमेतत् ॥92॥

एषा तवाक्षिसुषमा विषमायुधस्य

नाराचवर्षलहरी नगराजकन्ये ।

शङ्के करोति शतधा हृदि धैर्यमुद्रां

श्रीकामकोटि यदसौ शिशिरांशुमौलेः ॥93॥

बाणेन पुष्पधनुषः परिकल्प्यमान-

त्राणेन भक्तमनसां करुणाकरेण ।

कोणेन कोमलदृशस्तव कामकोटि

शोणेन शोषय शिवे मम शोकसिन्धुम् ॥94॥

मारद्रुहा मुकुटसीमनि लाल्यमाने

मन्दाकिनीपयसि ते कुटिलं चरिष्णुः ।

कामाक्षि कोपरभसाद्वलमानमीन-

सन्देहमङ्कुरयति क्षणमक्षिपातः ॥95॥

कामाक्षि संवलितमौक्तिककुण्डलांशु-

चञ्चत्सितश्रवणचामरचातुरीकः ।

स्तम्भे निरन्तरमपाङ्गमये भवत्या

बद्धश्चकास्ति मकरध्वजमत्तहस्ती ॥96॥

यावत्कटाक्षरजनीसमयागमस्ते

कामाक्षि तावदचिरान्नमतां नराणाम् ।

आविर्भवत्यमृतदीधितिबिम्बमम्ब

संविन्मयं हृदयपूर्वगिरीन्द्रशृङ्गे ॥97॥

कामाक्षि कल्पविटपीव भवत्कटाक्षो

दित्सुः समस्तविभवं नमतां नराणाम् ।

भृङ्गस्य नीलनलिनस्य च कान्तिसम्प-

त्सर्वस्वमेव हरतीति परं विचित्रम् ॥98॥

अत्यन्तशीतलमनर्गलकर्मपाक-

काकोलहारि सुलभं सुमनोभिरेतत् ।

पीयूषमेव तव वीक्षणमम्ब किन्तु

कामाक्षि नीलमिदमित्ययमेव भेदः ॥99॥

अज्ञातभक्तिरसमप्रसरद्विवेक-

मत्यन्तगर्वमनधीतसमस्तशास्त्रम् ।

अप्राप्तसत्यमसमीपगतं च मुक्तेः

कामाक्षि नैव तव स्पृहयति दृष्टिपातः ॥100॥

(कामाक्षि मामवतु ते करुणाकटाक्षः)

पातेन लोचनरुचेस्तव कामकोटि

पोतेन पतकपयोधिभयातुराणाम् ।

पूतेन तेन नवकाञ्चनकुण्डलांशु-

वीतेन शीतलय भूधरकन्यके माम् ॥101॥

॥ इति कटाक्षशतकं सम्पूर्णम् ॥