Shiva Padadi Keshanta Varnana Stotram — Sinhala Script

කල්යාණං නෝ විධත්තාං කටකතටලසත්කල්පවාටීනිකුඤ්ජ-

-ක්රීඩාසංසක්තවිද්යාධරනිකරවධූගීතරුද්රාපදානඃ .

තාරෛර්හේරම්බනාදෛස්තරලිතනිනදත්තාරකාරාතිකේකී

කෛලාසඃ ශර්වනිර්වෘත්යභිජනකපදඃ සර්වදා පර්වතේන්ද්රඃ .. 1 ..

යස්ය ප්රාහුඃ ස්වරූපං සකලදිවිෂදාං සාරසර්වස්වයෝගං

යස්යේෂුඃ ශාර්‍ඞ්ගධන්වා සමජනි ජගතාං රක්ෂණේ ජාගරූකඃ .

මෞර්වී දර්වීකරාණාමපි ච පරිබෘඪඃ පූස්ත්රයී සා ච ලක්ෂ්යං

සෝ(අ)ව්යාදව්යාජමස්මානශිවභිදනිශං නාකිනාං ශ්රීපිනාකඃ .. 2 ..

ආතඞ්කාවේගහාරී සකලදිවිෂදාමඞ්ඝ්රිපද්මාශ්රයාණාං

මාතඞ්ගාද්යුග්රදෛත්යප්රකරතනුගලද්රක්තධාරාක්තධාරඃ .

ක්රූරඃ සූරායුතානාමපි ච පරිභවං ස්වීයභාසා විතන්ව-

-න්ඝෝරාකාරඃ කුඨාරෝ දෘඪතරදුරිතාඛ්යාටවීං පාටයේන්නඃ .. 3 ..

කාලාරාතේඃ කරාග්රේ කෘතවසතිරුරඃශාණශාතෝ රිපූණාං

කාලේ කාලේ කුලාද්රිප්රවරතනයයා කල්පිතස්නේහලේපඃ .

පායාන්නඃ පාවකාර්චිඃප්රසරසඛමුඛඃ පාපහන්තා නිතාන්තං

ශූලඃ ශ්රීපාදසේවාභජනරසජුෂාං පාලනෛකාන්තශීලඃ .. 4 ..

දේවස්යාඞ්කාශ්රයායාඃ කුලගිරිදුහිතුර්නේත්රකෝණප්රචාර-

-ප්රස්තාරානත්යුදාරාන්පිපඨිෂුරිව යෝ නිත්යමත්යාදරේණ .

ආධත්තේ භඞ්ගිතුඞ්ගෛරනිශමවයවෛරන්තරඞ්ගං සමෝදං

සෝමාපීඩස්ය සෝ(අ)යං ප්රදිශතු කුශලං පාණිරඞ්ගඃ කුරඞ්ගඃ .. 5 ..

කණ්ඨප්රාන්තාවසජ්ජත්කනකමයමහාඝණ්ටිකාඝෝරඝෝෂෛඃ

කණ්ඨාරාවෛරකුණ්ඨෛරපි භරිතජගච්චක්රවාලාන්තරාලඃ .

චණ්ඩඃ ප්රෝද්දණ්ඩශෘඞ්ගඃ කකුදකබලිතෝත්තුඞ්ගකෛලාසශෘඞ්ගඃ

කණ්ඨේකාලස්ය වාහඃ ශමයතු ශමලං ශාශ්වතඃ ශාක්වරේන්ද්රඃ .. 6 ..

නිර්යද්දානාම්බුධාරාපරිමලතරලීභූතරෝලම්බපාලී-

-ඣඞ්කාරෛඃ ශඞ්කරාද්රේඃ ශිඛරශතදරීඃ පූරයන්භූරිඝෝෂෛඃ .

ශාර්වඃ සෞවර්ණශෛලප්රතිමපෘථුවපුඃ සර්වවිඝ්නාපහර්තා

ශර්වාණ්යාඃ පූර්වසූනුඃ ස භවතු භවතාං ස්වස්තිදෝ හස්තිවක්ත්රඃ .. 7 ..

යඃ පුණ්යෛර්දේවතානාං සමජනි ශිවයෝඃ ශ්ලාඝ්යවීර්යෛකමත්යා-

-ද්යන්නාම්නි ශ්රූයමාණේ දිතිජභටඝටා භීතිභාරං භජන්තේ .

භූයාත්සෝ(අ)යං විභූත්යෛ නිශිතශරශිඛාපාටිතක්රෞඤ්චශෛලඃ

සංසාරාගාධකූපෝදරපතිතසමුත්තාරකස්තාරකාරිඃ .. 8 ..

ආරූඪඃ ප්රෞඪවේගප්රවිජිතපවනං තුඞ්ගතුඞ්ගං තුරඞ්ගං

චේලං නීලං වසානඃ කරතලවිලසත්කාණ්ඩකෝදණ්ඩදණ්ඩඃ .

රාගද්වේෂාදිනානාවිධමෘගපටලීභීතිකෘද්භූතභර්තා

කුර්වන්නාඛේටලීලාං පරිලසතු මනඃකානනේ මාමකීනේ .. 9 ..

අම්භෝජාභ්යාං ච රම්භාරථචරණලතාද්වන්ද්වකුම්භීන්ද්රකුම්භෛ-

-ර්බිම්බේනේන්දෝශ්ච කම්බෝරුපරි විලසතා විද්රුමේණෝත්පලාභ්යාම් .

අම්භෝදේනාපි සම්භාවිතමුපජනිතාඩම්බරං ශම්බරාරේඃ

ශම්භෝඃ සම්භෝගයෝග්යං කිමපි ධනමිදං සම්භවේත්සම්පදේ නඃ .. 10 ..

වේණීසෞභාග්යවිස්මාපිතතපනසුතාචාරුවේණීවිලාසා-

-න්වාණීනිර්ධූතවාණීකරතලවිධෘතෝදාරවීණාවිරාවාන් .

ඒණීනේත්රාන්තභඞ්ගීනිරසනනිපුණාපාඞ්ගකෝණානුපාසේ

ශෝණාන්ප්රාණානුදූඪප්රතිනවසුෂමාකන්දලානින්දුමෞලේඃ .. 11 ..

නෘත්තාරම්භේෂු හස්තාහතමුරජධිමිද්ධිඞ්කෘතෛරත්යුදාරෛ-

-ශ්චිත්තානන්දං විධත්තේ සදසි භගවතඃ සන්තතං යඃ ස නන්දී .

චණ්ඩීශාද්යාස්තථාන්යේ චතුරගුණගණප්රීණිතස්වාමිසත්කා-

-රෝත්කර්ෂෝද්යත්ප්රසාදාඃ ප්රමථපරිබෘඪාඃ පාන්තු සන්තෝෂිණෝ නඃ .. 12 ..

මුක්තාමාණික්යජාලෛඃ පරිකලිතමහාසාලමාලෝකනීයං

ප්රත්යුප්තානර්ඝරත්නෛර්දිශි දිශි භවනෛඃ කල්පිතෛර්දික්පතීනාම් .

උද්යානෛරද්රිකන්යාපරිජනවනිතාමානනීයෛඃ පරීතං

හෘද්යං හෘද්යස්තු නිත්යං මම භුවනපතේර්ධාම සෝමාර්ධමෞලේඃ .. 13 ..

ස්තම්භෛර්ජම්භාරිරත්නප්රවරවිරචිතෛඃ සම්භෘතෝපාන්තභාගං

ශුම්භත්සෝපානමාර්ගං ශුචිමණිනිචයෛර්ගුම්භිතානල්පශිල්පම් .

කුම්භෛඃ සම්පූර්ණශෝභං ශිරසි සුඝටිතෛඃ ශාතකුම්භෛරපඞ්කෛඃ

ශම්භෝඃ සම්භාවනීයං සකලමුනිජනෛඃ ස්වස්තිදං ස්යාත්සදෝ නඃ .. 14 ..

න්යස්තෝ මධ්යේ සභායාඃ පරිසරවිලසත්පාදපීඨාභිරාමෝ

හෘද්යඃ පාදෛශ්චතුර්භිඃ කනකමණිමයෛරුච්චකෛරුජ්ජ්වලාත්මා ..

වාසෝරත්නේන කේනාප්යධිකමෘදුතරේණාස්තෘතෝ විස්තෘතශ්රීඃ

පීඨඃ පීඩාභරං නඃ ශමයතු ශිවයෝඃ ස්වෛරසංවාසයෝග්යඃ .. 15 ..

ආසීනස්යාධිපීඨං ත්රිජගදධිපතේරඞ්ඝ්රිපීඨානුෂක්තෞ

පාථෝජාභෝගභාජෞ පරිමෘදුලතලෝල්ලාසිපද්මාදිරේඛෞ .

පාතාං පාදාවුභෞ තෞ නමදමරකිරීටෝල්ලසච්චාරුහීර-

-ශ්රේණීශෝණායමානෝන්නතනඛදශකෝද්භාසමානෞ සමානෞ .. 16 ..

යන්නාදෝ වේදවාචාං නිගදති නිඛිලං ලක්ෂණං පක්ෂිකේතු-

-ර්ලක්ෂ්මීසම්භෝගසෞඛ්යං විරචයති යයෝශ්චාපරේ රූපභේදේ .

ශම්භෝඃ සම්භාවනීයේ පදකමලසමාසඞ්ගතස්තුඞ්ගශෝභේ

මාඞ්ගල්යං නඃ සමග්රං සකලසුඛකරේ නූපුරේ පූරයේතාම් .. 17 ..

අඞ්ගේ ශෘඞ්ගාරයෝනේඃ සපදි ශලභතාං නේත්රවහ්නෞ ප්රයාතේ

ශත්රෝරුද්ධෘත්ය තස්මාදිෂුධියුගමධෝ න්යස්තමග්රේ කිමේතත් .

ශඞ්කාමිත්ථං නතානාමමරපරිෂදාමන්තරඞ්කූරයත්ත-

-ත්සඞ්ඝාතං චාරු ජඞ්ඝායුගමඛිලපතේරංහසාං සංහරේන්නඃ .. 18 ..

ජානුද්වන්ද්වේන මීනධ්වජනෘවරසමුද්රෝපමානේන සාකං

රාජන්තෞ රාජරම්භාකරිකරකනකස්තම්භසම්භාවනීයෞ .

ඌරූ ගෞරීකරාම්භෝරුහසරසසමාමර්දනානන්දභාජෞ

චාරූ දූරීක්රියාස්තාං දුරිතමුපචිතං ජන්මජන්මාන්තරේ නඃ .. 19 ..

ආමුක්තානර්ඝරත්නප්රකරකරපරිෂ්වක්තකල්යාණකාඤ්චී-

-දාම්නා බද්දේන දුග්ධද්යුතිනිචයමුෂා චීනපට්ටාම්බරේණ .

සංවීතේ ශෛලකන්යාසුචරිතපරිපාකායමාණේ නිතම්බේ

නිත්යං නර්නර්තු චිත්තං මම නිඛිලජගත්ස්වාමිනඃ සෝමමෞලේඃ .. 20 ..

සන්ධ්යාකාලානුරජ්යද්දිනකරසරුචා කාලධෞතේන ගාඪං

ව්යානද්ධඃ ස්නිග්ධමුග්ධඃ සරසමුදරබන්ධේන වීතෝපමේන .

උද්දීප්තෛඃ ස්වප්රකාශෛරුපචිතමහිමා මන්මථාරේරුදාරෝ

මධ්යෝ මිථ්යාර්ථසධ්ර්යඞ්මම දිශතු සදා සඞ්ගතිං මඞ්ගලානාම් .. 21 ..

නාභීචක්රාලවාලාන්නවනවසුෂමාදෝහදශ්රීපරීතා-

-දුද්ගච්ඡන්තී පුරස්තාදුදරපථමතික්රම්ය වක්ෂඃ ප්රයාන්ති .

ශ්යාමා කාමාගමාර්ථප්රකථනලිපිවද්භාසතේ යා නිකාමං

සා මා සෝමාර්ධමෞලේඃ සුඛයතු සතතං රෝමවල්ලීමතල්ලී .. 22 ..

ආශ්ලේෂේෂ්වද්රිජායාඃ කඨිනකුචතටීලිප්තකාශ්මීරපඞ්ක-

-ව්යාසඞ්ගාදුද්යදර්කද්යුතිභිරුපචිතස්පර්ධමුද්දාමහෘද්යම් .

දක්ෂාරාතේරුදූඪප්රතිනවමණිමාලාවලීභාසමානං

වක්ෂෝ වික්ෂෝභිතාඝං සතතනතිජුෂාං රක්ෂතාදක්ෂතං නඃ .. 23 ..

වාමාඞ්කේ විස්ඵුරන්ත්යාඃ කරතලවිලසච්චාරුරක්තෝත්පලායාඃ

කාන්තායා වාමවක්ෂෝරුහභරශිඛරෝන්මර්දනව්යග්රමේකම් .

අන්යාංස්ත්රීනප්යුදාරාන්වරපරශුමෘගාලඞ්කෘතානින්දුමෞලේ-

-ර්බාහූනාබද්ධහේමාඞ්ගදමණිකටකානන්තරාලෝකයාමඃ .. 24 ..

සම්භ්රාන්තායාඃ ශිවායාඃ පතිවිලයභියා සර්වලෝකෝපතාපා-

-ත්සංවිග්නස්යාපි විෂ්ණෝඃ සරභසමුභයෝර්වාරණප්රේරණාභ්යාම් .

මධ්යේ ත්රෛශඞ්කවීයාමනුභවති දශාං යත්ර හාලාහලෝෂ්මා

සෝ(අ)යං සර්වාපදාං නඃ ශමයතු නිචයං නීලකණ්ඨස්ය කණ්ඨඃ .. 25 ..

හෘද්යෛරද්රීන්ද්රකන්යාමෘදුදශනපදෛර්මුද්රිතෝ විද්රුමශ්රී-

-රුද්ද්යෝතන්ත්යා නිතාන්තං ධවලධවලයා මිශ්රිතෝ දන්තකාන්ත්යා .

මුක්තාමාණික්යජාලව්යතිකරසදෘශා තේජසා භාසමානඃ

සද්යෝජාතස්ය දද්යාදධරමණිරසෞ සම්පදාං සඤ්චයං නඃ .. 26 ..

කර්ණාලඞ්කාරනානාමණිනිකරරුචාං සඤ්චයෛරඤ්චිතායාං

වර්ණ්යායාං ස්වර්ණපද්මෝදරපරිවිලසත්කර්ණිකාසන්නිභායාම් .

පද්ධත්යාං ප්රාණවායෝඃ ප්රණතජනහෘදම්භෝජවාසස්ය ශම්භෝ-

-ර්නිත්යං නශ්චිත්තමේතද්විරචයතු සුඛේනාසිකාං නාසිකායාම් .. 27 ..

අත්යන්තං භාසමානේ රුචිරතරරුචාං සඞ්ගමාත්සන්මණීනා-

-මුද්යච්චණ්ඩාංශුධාමප්රසරනිරසනස්පෂ්ටදෘෂ්ටාපදානේ .

භූයාස්තාං භූතයේ නඃ කරිවරජයිනඃ කර්ණපාශාවලම්බේ

භක්තාලීභාලසජ්ජජ්ජනිමරණලිපේඃ කුණ්ඩලේ කුණ්ඩලේ තේ .. 28 ..

යාභ්යාං කාලව්යවස්ථා භවති තනුමතාං යෝ මුඛං දේවතානාං

යේෂාමාහුඃ ස්වරූපං ජගති මුනිවරා දේවතානාං ත්රයීං තාම් .

රුද්රාණීවක්ත්රපඞ්කේරුහසතතවිහාරෝත්සුකේන්දින්දිරේභ්ය-

-ස්තේභ්යස්ත්රිභ්යඃ ප්රණාමාඤ්ජලිමුපරචයේ ත්රීක්ෂණස්යේක්ෂණේභ්යඃ .. 29 ..

වාමං වාමාඞ්කගායා වදනසරසිජේ ව්යාවලද්වල්ලභායා

ව්යානම්රේෂ්වන්යදන්යත්පුනරලිකභවං වීතනිඃශේෂරෞක්ෂ්යම් .

භූයෝ භූයෝපි මෝදාන්නිපතදතිදයාශීතලං චූතබාණේ

දක්ෂාරේරීක්ෂණානාං ත්රයමපහරතාදාශු තාපත්රයං නඃ .. 30 ..

යස්මින්නර්ධේන්දුමුග්ධද්යුතිනිචයතිරස්කාරනිස්තන්ද්රකාන්තෞ

කාශ්මීරක්ෂෝදසඞ්කල්පතමිව රුචිරං චිත්රකං භාති නේත්රම් .

තස්මින්නුල්ලීලචිල්ලීනටවරතරුණීලාස්යරඞ්ගායමාණේ

කාලාරේඃ ඵාලදේශේ විහරතු හෘදයං වීතචින්තාන්තරං නඃ .. 31 ..

ස්වාමින්ගඞ්ගාමිවාඞ්ගීකුරු තව ශිරසා මාමපීත්යර්ථයන්තීං

ධන්යාං කන්යාං ඛරාංශෝඃ ශිරසි වහති කිං න්වේෂ කාරුණ්යශාලී .

ඉත්ථං ශඞ්කාං ජනානාං ජනයදතිඝනං කෛශිකං කාලමේඝ-

-ච්ඡායං භූයාදුදාරං ත්රිපුරවිජයිනඃ ශ්රේයසේ භූයසේ නඃ .. 32 ..

ශෘඞ්ගාරාකල්පයෝග්යෛඃ ශිඛරිවරසුතාසත්සඛීහස්තලූනෛඃ

සූනෛරාබද්ධමාලාවලිපරිවිලසත්සෞරභාකෘෂ්ටභෘඞ්ගම් .

තුඞ්ගං මාණික්යකාන්ත්යා පරිහසිතසුරාවාසශෛලේන්ද්රශෘඞ්ගං

සඞ්ඝං නඃ සඞ්කටානාං විඝටයතු සදා කාඞ්කටීකං කිරීටම් .. 33 ..

වක්රාකාරඃ කලඞ්කී ජඩතනුරහමප්යඞ්ඝ්රිසේවානුභාවා-

-දුත්තංසත්වං ප්රයාතඃ සුලභතරඝෘණාස්යන්දිනශ්චන්ද්රමෞලේඃ .

තත්සේවන්තාං ජනෞඝාඃ ශිවමිති නිජයාවස්ථයෛව බ්රුවාණං

වන්දේ දේවස්ය ශම්භෝර්මුකුටසුඝටිතං මුග්ධපීයූෂභානුම් .. 34 ..

කාන්ත්යා සම්ඵුල්ලමල්ලීකුසුමධවලයා ව්යාප්ය විශ්වං විරාජ-

-න්වෘත්තාකාරෝ විතන්වන්මුහුරපි ච පරාං නිර්වෘතිං පාදභාජාම් .

සානන්දං නන්දිදෝෂ්ණා මණිකටකවතා වාහ්යමානඃ පුරාරේඃ

ශ්වේතච්ඡත්රාඛ්යශීතද්යුතිරපහරතාදාපදස්තාපදා නඃ .. 35 ..

දිව්යාකල්පෝජ්ජ්වලානාං ශිවගිරිසුතයෝඃ පාර්ශ්වයෝරාශ්රිතානාං

රුද්රාණීසත්සඛීනාං මදතරලකටාක්ෂාඤ්චලෛරඤ්චිතානාම් .

උද්වේල්ලද්බාහුවල්ලීවිලසනසමයේ චාමරාන්දෝලනීනා-

-මුද්භූතඃ කඞ්කණාලීවලයකලකලෝ වාරයේදාපදෝ නඃ .. 36 ..

ස්වර්ගෞකඃසුන්දරීණාං සුලලිතවපුෂාං ස්වාමිසේවාපරාණාං

වල්ගද්භූෂාණි වක්රාම්බුජපරිවිගලන්මුග්ධගීතාමෘතානි .

නිත්යං නෘත්තාන්යුපාසේ භුජවිධුතිපදන්යාසභාවාවලෝක-

-ප්රත්යුද්යත්ප්රීතිමාද්යත්ප්රමථනටනටීදත්තසම්භාවනානි .. 37 ..

ස්ථානප්රාප්ත්යා ස්වරාණාං කිමපි විශදතාං ව්යඤ්ජයන්මඤ්ජුවීණා-

-ස්වානාවච්ඡින්නතාලක්රමමමෘතමිවාස්වාද්යමානං ශිවාභ්යාම් .

නානාරාගාතිහෘද්යං නවරසමධුරස්තෝත්රජාතානුවිද්ධං

ගානං වීණාමහර්ෂේඃ කලමතිලලිතං කර්ණපූරයතාං නඃ .. 38 ..

චේතෝ ජාතප්රමෝදං සපදි විදධතී ප්රාණිනාං වාණිනීනාං

පාණිද්වන්ද්වාග්රජාග්රත්සුලලිතරණිතස්වර්ණතාලානුකූලා .

ස්වීයාරාවේණ පාථෝධරරවපටුනා නාදයන්තී මයූරීං

මායූරී මන්දභාවං මණිමුරජභවා මාර්ජනා මාර්ජයේන්නඃ .. 39 ..

දේවේභ්යෝ දානවේභ්යඃ පිතෘමුනිපරිෂත්සිද්ධවිද්යාධරේභ්යඃ

සාධ්යේභ්යශ්චාරණේභ්යෝ මනුජපශුපතජ්ජාතිකීටාදිකේභ්යඃ .

ශ්රීකෛලාසප්රරූඪාස්තෘණවිටපිමුඛාශ්චාපි යේ සන්ති තේභ්යඃ

සර්වේභ්යෝ නිර්විචාරං නතිමුපරචයේ ශර්වපාදාශ්රයේභ්යඃ .. 40 ..

ධ්යායන්නිත්ථං ප්රභාතේ ප්රතිදිවසමිදං ස්තෝත්රරත්නං පඨේද්යඃ

කිං වා බ්රූමස්තදීයං සුචරිතමථවා කීර්තයාමඃ සමාසාත් .

සම්පජ්ජාතං සමග්රං සදසි බහුමතිං සර්වලෝකප්රියත්වං

සම්ප්රාප්යායුඃශතාන්තේ පදමයති පරබ්රහ්මණෝ මන්මථාරේඃ .. 41 ..

ඉති ශ්රීමත්පරමහංසපරිව්රාජකාචාර්යස්ය ශ්රීගෝවින්දභගවත්පූජ්යපාදශිෂ්යස්ය ශ්රීමච්ඡඞ්කරභගවතඃ කෘතෞ ශ්රී ශිව පාදාදිකේශාන්තවර්ණන ස්තෝත්රම් ..

Roman (IAST) Transliteration

kalyāṇaṃ no vidhattāṃ kaṭakataṭalasatkalpavāṭīnikuñja-

-krīḍāsaṃsaktavidyādharanikaravadhūgītarudrāpadānaḥ |

tārairherambanādaistaralitaninadattārakārātikekī

kailāsaḥ śarvanirvṛtyabhijanakapadaḥ sarvadā parvatendraḥ || 1 ||

yasya prāhuḥ svarūpaṃ sakaladiviṣadāṃ sārasarvasvayogaṃ

yasyeṣuḥ śār‍ṅgadhanvā samajani jagatāṃ rakṣaṇe jāgarūkaḥ |

maurvī darvīkarāṇāmapi ca paribṛḍhaḥ pūstrayī sā ca lakṣyaṃ

so'vyādavyājamasmānaśivabhidaniśaṃ nākināṃ śrīpinākaḥ || 2 ||

ātaṅkāvegahārī sakaladiviṣadāmaṅghripadmāśrayāṇāṃ

mātaṅgādyugradaityaprakaratanugaladraktadhārāktadhāraḥ |

krūraḥ sūrāyutānāmapi ca paribhavaṃ svīyabhāsā vitanva-

-nghorākāraḥ kuṭhāro dṛḍhataraduritākhyāṭavīṃ pāṭayennaḥ || 3 ||

kālārāteḥ karāgre kṛtavasatiruraḥśāṇaśāto ripūṇāṃ

kāle kāle kulādripravaratanayayā kalpitasnehalepaḥ |

pāyānnaḥ pāvakārciḥprasarasakhamukhaḥ pāpahantā nitāntaṃ

śūlaḥ śrīpādasevābhajanarasajuṣāṃ pālanaikāntaśīlaḥ || 4 ||

devasyāṅkāśrayāyāḥ kulagiriduhiturnetrakoṇapracāra-

-prastārānatyudārānpipaṭhiṣuriva yo nityamatyādareṇa |

ādhatte bhaṅgituṅgairaniśamavayavairantaraṅgaṃ samodaṃ

somāpīḍasya so'yaṃ pradiśatu kuśalaṃ pāṇiraṅgaḥ kuraṅgaḥ || 5 ||

kaṇṭhaprāntāvasajjatkanakamayamahāghaṇṭikāghoraghoṣaiḥ

kaṇṭhārāvairakuṇṭhairapi bharitajagaccakravālāntarālaḥ |

caṇḍaḥ proddaṇḍaśṛṅgaḥ kakudakabalitottuṅgakailāsaśṛṅgaḥ

kaṇṭhekālasya vāhaḥ śamayatu śamalaṃ śāśvataḥ śākvarendraḥ || 6 ||

niryaddānāmbudhārāparimalataralībhūtarolambapālī-

-jhaṅkāraiḥ śaṅkarādreḥ śikharaśatadarīḥ pūrayanbhūrighoṣaiḥ |

śārvaḥ sauvarṇaśailapratimapṛthuvapuḥ sarvavighnāpahartā

śarvāṇyāḥ pūrvasūnuḥ sa bhavatu bhavatāṃ svastido hastivaktraḥ || 7 ||

yaḥ puṇyairdevatānāṃ samajani śivayoḥ ślāghyavīryaikamatyā-

-dyannāmni śrūyamāṇe ditijabhaṭaghaṭā bhītibhāraṃ bhajante |

bhūyātso'yaṃ vibhūtyai niśitaśaraśikhāpāṭitakrauñcaśailaḥ

saṃsārāgādhakūpodarapatitasamuttārakastārakāriḥ || 8 ||

ārūḍhaḥ prauḍhavegapravijitapavanaṃ tuṅgatuṅgaṃ turaṅgaṃ

celaṃ nīlaṃ vasānaḥ karatalavilasatkāṇḍakodaṇḍadaṇḍaḥ |

rāgadveṣādinānāvidhamṛgapaṭalībhītikṛdbhūtabhartā

kurvannākheṭalīlāṃ parilasatu manaḥkānane māmakīne || 9 ||

ambhojābhyāṃ ca rambhārathacaraṇalatādvandvakumbhīndrakumbhai-

-rbimbenendośca kamborupari vilasatā vidrumeṇotpalābhyām |

ambhodenāpi sambhāvitamupajanitāḍambaraṃ śambarāreḥ

śambhoḥ sambhogayogyaṃ kimapi dhanamidaṃ sambhavetsampade naḥ || 10 ||

veṇīsaubhāgyavismāpitatapanasutācāruveṇīvilāsā-

-nvāṇīnirdhūtavāṇīkaratalavidhṛtodāravīṇāvirāvān |

eṇīnetrāntabhaṅgīnirasananipuṇāpāṅgakoṇānupāse

śoṇānprāṇānudūḍhapratinavasuṣamākandalānindumauleḥ || 11 ||

nṛttārambheṣu hastāhatamurajadhimiddhiṅkṛtairatyudārai-

-ścittānandaṃ vidhatte sadasi bhagavataḥ santataṃ yaḥ sa nandī |

caṇḍīśādyāstathānye caturaguṇagaṇaprīṇitasvāmisatkā-

-rotkarṣodyatprasādāḥ pramathaparibṛḍhāḥ pāntu santoṣiṇo naḥ || 12 ||

muktāmāṇikyajālaiḥ parikalitamahāsālamālokanīyaṃ

pratyuptānargharatnairdiśi diśi bhavanaiḥ kalpitairdikpatīnām |

udyānairadrikanyāparijanavanitāmānanīyaiḥ parītaṃ

hṛdyaṃ hṛdyastu nityaṃ mama bhuvanapaterdhāma somārdhamauleḥ || 13 ||

stambhairjambhāriratnapravaraviracitaiḥ sambhṛtopāntabhāgaṃ

śumbhatsopānamārgaṃ śucimaṇinicayairgumbhitānalpaśilpam |

kumbhaiḥ sampūrṇaśobhaṃ śirasi sughaṭitaiḥ śātakumbhairapaṅkaiḥ

śambhoḥ sambhāvanīyaṃ sakalamunijanaiḥ svastidaṃ syātsado naḥ || 14 ||

nyasto madhye sabhāyāḥ parisaravilasatpādapīṭhābhirāmo

hṛdyaḥ pādaiścaturbhiḥ kanakamaṇimayairuccakairujjvalātmā ||

vāsoratnena kenāpyadhikamṛdutareṇāstṛto vistṛtaśrīḥ

pīṭhaḥ pīḍābharaṃ naḥ śamayatu śivayoḥ svairasaṃvāsayogyaḥ || 15 ||

āsīnasyādhipīṭhaṃ trijagadadhipateraṅghripīṭhānuṣaktau

pāthojābhogabhājau parimṛdulatalollāsipadmādirekhau |

pātāṃ pādāvubhau tau namadamarakirīṭollasaccāruhīra-

-śreṇīśoṇāyamānonnatanakhadaśakodbhāsamānau samānau || 16 ||

yannādo vedavācāṃ nigadati nikhilaṃ lakṣaṇaṃ pakṣiketu-

-rlakṣmīsambhogasaukhyaṃ viracayati yayoścāpare rūpabhede |

śambhoḥ sambhāvanīye padakamalasamāsaṅgatastuṅgaśobhe

māṅgalyaṃ naḥ samagraṃ sakalasukhakare nūpure pūrayetām || 17 ||

aṅge śṛṅgārayoneḥ sapadi śalabhatāṃ netravahnau prayāte

śatroruddhṛtya tasmādiṣudhiyugamadho nyastamagre kimetat |

śaṅkāmitthaṃ natānāmamarapariṣadāmantaraṅkūrayatta-

-tsaṅghātaṃ cāru jaṅghāyugamakhilapateraṃhasāṃ saṃharennaḥ || 18 ||

jānudvandvena mīnadhvajanṛvarasamudropamānena sākaṃ

rājantau rājarambhākarikarakanakastambhasambhāvanīyau |

ūrū gaurīkarāmbhoruhasarasasamāmardanānandabhājau

cārū dūrīkriyāstāṃ duritamupacitaṃ janmajanmāntare naḥ || 19 ||

āmuktānargharatnaprakarakarapariṣvaktakalyāṇakāñcī-

-dāmnā baddena dugdhadyutinicayamuṣā cīnapaṭṭāmbareṇa |

saṃvīte śailakanyāsucaritaparipākāyamāṇe nitambe

nityaṃ narnartu cittaṃ mama nikhilajagatsvāminaḥ somamauleḥ || 20 ||

sandhyākālānurajyaddinakarasarucā kāladhautena gāḍhaṃ

vyānaddhaḥ snigdhamugdhaḥ sarasamudarabandhena vītopamena |

uddīptaiḥ svaprakāśairupacitamahimā manmathārerudāro

madhyo mithyārthasadhryaṅmama diśatu sadā saṅgatiṃ maṅgalānām || 21 ||

nābhīcakrālavālānnavanavasuṣamādohadaśrīparītā-

-dudgacchantī purastādudarapathamatikramya vakṣaḥ prayānti |

śyāmā kāmāgamārthaprakathanalipivadbhāsate yā nikāmaṃ

sā mā somārdhamauleḥ sukhayatu satataṃ romavallīmatallī || 22 ||

āśleṣeṣvadrijāyāḥ kaṭhinakucataṭīliptakāśmīrapaṅka-

-vyāsaṅgādudyadarkadyutibhirupacitaspardhamuddāmahṛdyam |

dakṣārāterudūḍhapratinavamaṇimālāvalībhāsamānaṃ

vakṣo vikṣobhitāghaṃ satatanatijuṣāṃ rakṣatādakṣataṃ naḥ || 23 ||

vāmāṅke visphurantyāḥ karatalavilasaccāruraktotpalāyāḥ

kāntāyā vāmavakṣoruhabharaśikharonmardanavyagramekam |

anyāṃstrīnapyudārānvaraparaśumṛgālaṅkṛtānindumaule-

-rbāhūnābaddhahemāṅgadamaṇikaṭakānantarālokayāmaḥ || 24 ||

sambhrāntāyāḥ śivāyāḥ pativilayabhiyā sarvalokopatāpā-

-tsaṃvignasyāpi viṣṇoḥ sarabhasamubhayorvāraṇapreraṇābhyām |

madhye traiśaṅkavīyāmanubhavati daśāṃ yatra hālāhaloṣmā

so'yaṃ sarvāpadāṃ naḥ śamayatu nicayaṃ nīlakaṇṭhasya kaṇṭhaḥ || 25 ||

hṛdyairadrīndrakanyāmṛdudaśanapadairmudrito vidrumaśrī-

-ruddyotantyā nitāntaṃ dhavaladhavalayā miśrito dantakāntyā |

muktāmāṇikyajālavyatikarasadṛśā tejasā bhāsamānaḥ

sadyojātasya dadyādadharamaṇirasau sampadāṃ sañcayaṃ naḥ || 26 ||

karṇālaṅkāranānāmaṇinikararucāṃ sañcayairañcitāyāṃ

varṇyāyāṃ svarṇapadmodaraparivilasatkarṇikāsannibhāyām |

paddhatyāṃ prāṇavāyoḥ praṇatajanahṛdambhojavāsasya śambho-

-rnityaṃ naścittametadviracayatu sukhenāsikāṃ nāsikāyām || 27 ||

atyantaṃ bhāsamāne ruciratararucāṃ saṅgamātsanmaṇīnā-

-mudyaccaṇḍāṃśudhāmaprasaranirasanaspaṣṭadṛṣṭāpadāne |

bhūyāstāṃ bhūtaye naḥ karivarajayinaḥ karṇapāśāvalambe

bhaktālībhālasajjajjanimaraṇalipeḥ kuṇḍale kuṇḍale te || 28 ||

yābhyāṃ kālavyavasthā bhavati tanumatāṃ yo mukhaṃ devatānāṃ

yeṣāmāhuḥ svarūpaṃ jagati munivarā devatānāṃ trayīṃ tām |

rudrāṇīvaktrapaṅkeruhasatatavihārotsukendindirebhya-

-stebhyastribhyaḥ praṇāmāñjalimuparacaye trīkṣaṇasyekṣaṇebhyaḥ || 29 ||

vāmaṃ vāmāṅkagāyā vadanasarasije vyāvaladvallabhāyā

vyānamreṣvanyadanyatpunaralikabhavaṃ vītaniḥśeṣaraukṣyam |

bhūyo bhūyopi modānnipatadatidayāśītalaṃ cūtabāṇe

dakṣārerīkṣaṇānāṃ trayamapaharatādāśu tāpatrayaṃ naḥ || 30 ||

yasminnardhendumugdhadyutinicayatiraskāranistandrakāntau

kāśmīrakṣodasaṅkalpatamiva ruciraṃ citrakaṃ bhāti netram |

tasminnullīlacillīnaṭavarataruṇīlāsyaraṅgāyamāṇe

kālāreḥ phāladeśe viharatu hṛdayaṃ vītacintāntaraṃ naḥ || 31 ||

svāmingaṅgāmivāṅgīkuru tava śirasā māmapītyarthayantīṃ

dhanyāṃ kanyāṃ kharāṃśoḥ śirasi vahati kiṃ nveṣa kāruṇyaśālī |

itthaṃ śaṅkāṃ janānāṃ janayadatighanaṃ kaiśikaṃ kālamegha-

-cchāyaṃ bhūyādudāraṃ tripuravijayinaḥ śreyase bhūyase naḥ || 32 ||

śṛṅgārākalpayogyaiḥ śikharivarasutāsatsakhīhastalūnaiḥ

sūnairābaddhamālāvaliparivilasatsaurabhākṛṣṭabhṛṅgam |

tuṅgaṃ māṇikyakāntyā parihasitasurāvāsaśailendraśṛṅgaṃ

saṅghaṃ naḥ saṅkaṭānāṃ vighaṭayatu sadā kāṅkaṭīkaṃ kirīṭam || 33 ||

vakrākāraḥ kalaṅkī jaḍatanurahamapyaṅghrisevānubhāvā-

-duttaṃsatvaṃ prayātaḥ sulabhataraghṛṇāsyandinaścandramauleḥ |

tatsevantāṃ janaughāḥ śivamiti nijayāvasthayaiva bruvāṇaṃ

vande devasya śambhormukuṭasughaṭitaṃ mugdhapīyūṣabhānum || 34 ||

kāntyā samphullamallīkusumadhavalayā vyāpya viśvaṃ virāja-

-nvṛttākāro vitanvanmuhurapi ca parāṃ nirvṛtiṃ pādabhājām |

sānandaṃ nandidoṣṇā maṇikaṭakavatā vāhyamānaḥ purāreḥ

śvetacchatrākhyaśītadyutirapaharatādāpadastāpadā naḥ || 35 ||

divyākalpojjvalānāṃ śivagirisutayoḥ pārśvayorāśritānāṃ

rudrāṇīsatsakhīnāṃ madataralakaṭākṣāñcalairañcitānām |

udvelladbāhuvallīvilasanasamaye cāmarāndolanīnā-

-mudbhūtaḥ kaṅkaṇālīvalayakalakalo vārayedāpado naḥ || 36 ||

svargaukaḥsundarīṇāṃ sulalitavapuṣāṃ svāmisevāparāṇāṃ

valgadbhūṣāṇi vakrāmbujaparivigalanmugdhagītāmṛtāni |

nityaṃ nṛttānyupāse bhujavidhutipadanyāsabhāvāvaloka-

-pratyudyatprītimādyatpramathanaṭanaṭīdattasambhāvanāni || 37 ||

sthānaprāptyā svarāṇāṃ kimapi viśadatāṃ vyañjayanmañjuvīṇā-

-svānāvacchinnatālakramamamṛtamivāsvādyamānaṃ śivābhyām |

nānārāgātihṛdyaṃ navarasamadhurastotrajātānuviddhaṃ

gānaṃ vīṇāmaharṣeḥ kalamatilalitaṃ karṇapūrayatāṃ naḥ || 38 ||

ceto jātapramodaṃ sapadi vidadhatī prāṇināṃ vāṇinīnāṃ

pāṇidvandvāgrajāgratsulalitaraṇitasvarṇatālānukūlā |

svīyārāveṇa pāthodhararavapaṭunā nādayantī mayūrīṃ

māyūrī mandabhāvaṃ maṇimurajabhavā mārjanā mārjayennaḥ || 39 ||

devebhyo dānavebhyaḥ pitṛmunipariṣatsiddhavidyādharebhyaḥ

sādhyebhyaścāraṇebhyo manujapaśupatajjātikīṭādikebhyaḥ |

śrīkailāsaprarūḍhāstṛṇaviṭapimukhāścāpi ye santi tebhyaḥ

sarvebhyo nirvicāraṃ natimuparacaye śarvapādāśrayebhyaḥ || 40 ||

dhyāyannitthaṃ prabhāte pratidivasamidaṃ stotraratnaṃ paṭhedyaḥ

kiṃ vā brūmastadīyaṃ sucaritamathavā kīrtayāmaḥ samāsāt |

sampajjātaṃ samagraṃ sadasi bahumatiṃ sarvalokapriyatvaṃ

samprāpyāyuḥśatānte padamayati parabrahmaṇo manmathāreḥ || 41 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī śiva pādādikeśāntavarṇana stotram ||

Sanskrit — Devanagari (original)

कल्याणं नो विधत्तां कटकतटलसत्कल्पवाटीनिकुञ्ज-

-क्रीडासंसक्तविद्याधरनिकरवधूगीतरुद्रापदानः ।

तारैर्हेरम्बनादैस्तरलितनिनदत्तारकारातिकेकी

कैलासः शर्वनिर्वृत्यभिजनकपदः सर्वदा पर्वतेन्द्रः ॥ 1 ॥

यस्य प्राहुः स्वरूपं सकलदिविषदां सारसर्वस्वयोगं

यस्येषुः शार्‍ङ्गधन्वा समजनि जगतां रक्षणे जागरूकः ।

मौर्वी दर्वीकराणामपि च परिबृढः पूस्त्रयी सा च लक्ष्यं

सोऽव्यादव्याजमस्मानशिवभिदनिशं नाकिनां श्रीपिनाकः ॥ 2 ॥

आतङ्कावेगहारी सकलदिविषदामङ्घ्रिपद्माश्रयाणां

मातङ्गाद्युग्रदैत्यप्रकरतनुगलद्रक्तधाराक्तधारः ।

क्रूरः सूरायुतानामपि च परिभवं स्वीयभासा वितन्व-

-न्घोराकारः कुठारो दृढतरदुरिताख्याटवीं पाटयेन्नः ॥ 3 ॥

कालारातेः कराग्रे कृतवसतिरुरःशाणशातो रिपूणां

काले काले कुलाद्रिप्रवरतनयया कल्पितस्नेहलेपः ।

पायान्नः पावकार्चिःप्रसरसखमुखः पापहन्ता नितान्तं

शूलः श्रीपादसेवाभजनरसजुषां पालनैकान्तशीलः ॥ 4 ॥

देवस्याङ्काश्रयायाः कुलगिरिदुहितुर्नेत्रकोणप्रचार-

-प्रस्तारानत्युदारान्पिपठिषुरिव यो नित्यमत्यादरेण ।

आधत्ते भङ्गितुङ्गैरनिशमवयवैरन्तरङ्गं समोदं

सोमापीडस्य सोऽयं प्रदिशतु कुशलं पाणिरङ्गः कुरङ्गः ॥ 5 ॥

कण्ठप्रान्तावसज्जत्कनकमयमहाघण्टिकाघोरघोषैः

कण्ठारावैरकुण्ठैरपि भरितजगच्चक्रवालान्तरालः ।

चण्डः प्रोद्दण्डशृङ्गः ककुदकबलितोत्तुङ्गकैलासशृङ्गः

कण्ठेकालस्य वाहः शमयतु शमलं शाश्वतः शाक्वरेन्द्रः ॥ 6 ॥

निर्यद्दानाम्बुधारापरिमलतरलीभूतरोलम्बपाली-

-झङ्कारैः शङ्कराद्रेः शिखरशतदरीः पूरयन्भूरिघोषैः ।

शार्वः सौवर्णशैलप्रतिमपृथुवपुः सर्वविघ्नापहर्ता

शर्वाण्याः पूर्वसूनुः स भवतु भवतां स्वस्तिदो हस्तिवक्त्रः ॥ 7 ॥

यः पुण्यैर्देवतानां समजनि शिवयोः श्लाघ्यवीर्यैकमत्या-

-द्यन्नाम्नि श्रूयमाणे दितिजभटघटा भीतिभारं भजन्ते ।

भूयात्सोऽयं विभूत्यै निशितशरशिखापाटितक्रौञ्चशैलः

संसारागाधकूपोदरपतितसमुत्तारकस्तारकारिः ॥ 8 ॥

आरूढः प्रौढवेगप्रविजितपवनं तुङ्गतुङ्गं तुरङ्गं

चेलं नीलं वसानः करतलविलसत्काण्डकोदण्डदण्डः ।

रागद्वेषादिनानाविधमृगपटलीभीतिकृद्भूतभर्ता

कुर्वन्नाखेटलीलां परिलसतु मनःकानने मामकीने ॥ 9 ॥

अम्भोजाभ्यां च रम्भारथचरणलताद्वन्द्वकुम्भीन्द्रकुम्भै-

-र्बिम्बेनेन्दोश्च कम्बोरुपरि विलसता विद्रुमेणोत्पलाभ्याम् ।

अम्भोदेनापि सम्भावितमुपजनिताडम्बरं शम्बरारेः

शम्भोः सम्भोगयोग्यं किमपि धनमिदं सम्भवेत्सम्पदे नः ॥ 10 ॥

वेणीसौभाग्यविस्मापिततपनसुताचारुवेणीविलासा-

-न्वाणीनिर्धूतवाणीकरतलविधृतोदारवीणाविरावान् ।

एणीनेत्रान्तभङ्गीनिरसननिपुणापाङ्गकोणानुपासे

शोणान्प्राणानुदूढप्रतिनवसुषमाकन्दलानिन्दुमौलेः ॥ 11 ॥

नृत्तारम्भेषु हस्ताहतमुरजधिमिद्धिङ्कृतैरत्युदारै-

-श्चित्तानन्दं विधत्ते सदसि भगवतः सन्ततं यः स नन्दी ।

चण्डीशाद्यास्तथान्ये चतुरगुणगणप्रीणितस्वामिसत्का-

-रोत्कर्षोद्यत्प्रसादाः प्रमथपरिबृढाः पान्तु सन्तोषिणो नः ॥ 12 ॥

मुक्तामाणिक्यजालैः परिकलितमहासालमालोकनीयं

प्रत्युप्तानर्घरत्नैर्दिशि दिशि भवनैः कल्पितैर्दिक्पतीनाम् ।

उद्यानैरद्रिकन्यापरिजनवनितामाननीयैः परीतं

हृद्यं हृद्यस्तु नित्यं मम भुवनपतेर्धाम सोमार्धमौलेः ॥ 13 ॥

स्तम्भैर्जम्भारिरत्नप्रवरविरचितैः सम्भृतोपान्तभागं

शुम्भत्सोपानमार्गं शुचिमणिनिचयैर्गुम्भितानल्पशिल्पम् ।

कुम्भैः सम्पूर्णशोभं शिरसि सुघटितैः शातकुम्भैरपङ्कैः

शम्भोः सम्भावनीयं सकलमुनिजनैः स्वस्तिदं स्यात्सदो नः ॥ 14 ॥

न्यस्तो मध्ये सभायाः परिसरविलसत्पादपीठाभिरामो

हृद्यः पादैश्चतुर्भिः कनकमणिमयैरुच्चकैरुज्ज्वलात्मा ॥

वासोरत्नेन केनाप्यधिकमृदुतरेणास्तृतो विस्तृतश्रीः

पीठः पीडाभरं नः शमयतु शिवयोः स्वैरसंवासयोग्यः ॥ 15 ॥

आसीनस्याधिपीठं त्रिजगदधिपतेरङ्घ्रिपीठानुषक्तौ

पाथोजाभोगभाजौ परिमृदुलतलोल्लासिपद्मादिरेखौ ।

पातां पादावुभौ तौ नमदमरकिरीटोल्लसच्चारुहीर-

-श्रेणीशोणायमानोन्नतनखदशकोद्भासमानौ समानौ ॥ 16 ॥

यन्नादो वेदवाचां निगदति निखिलं लक्षणं पक्षिकेतु-

-र्लक्ष्मीसम्भोगसौख्यं विरचयति ययोश्चापरे रूपभेदे ।

शम्भोः सम्भावनीये पदकमलसमासङ्गतस्तुङ्गशोभे

माङ्गल्यं नः समग्रं सकलसुखकरे नूपुरे पूरयेताम् ॥ 17 ॥

अङ्गे शृङ्गारयोनेः सपदि शलभतां नेत्रवह्नौ प्रयाते

शत्रोरुद्धृत्य तस्मादिषुधियुगमधो न्यस्तमग्रे किमेतत् ।

शङ्कामित्थं नतानाममरपरिषदामन्तरङ्कूरयत्त-

-त्सङ्घातं चारु जङ्घायुगमखिलपतेरंहसां संहरेन्नः ॥ 18 ॥

जानुद्वन्द्वेन मीनध्वजनृवरसमुद्रोपमानेन साकं

राजन्तौ राजरम्भाकरिकरकनकस्तम्भसम्भावनीयौ ।

ऊरू गौरीकराम्भोरुहसरससमामर्दनानन्दभाजौ

चारू दूरीक्रियास्तां दुरितमुपचितं जन्मजन्मान्तरे नः ॥ 19 ॥

आमुक्तानर्घरत्नप्रकरकरपरिष्वक्तकल्याणकाञ्ची-

-दाम्ना बद्देन दुग्धद्युतिनिचयमुषा चीनपट्टाम्बरेण ।

संवीते शैलकन्यासुचरितपरिपाकायमाणे नितम्बे

नित्यं नर्नर्तु चित्तं मम निखिलजगत्स्वामिनः सोममौलेः ॥ 20 ॥

सन्ध्याकालानुरज्यद्दिनकरसरुचा कालधौतेन गाढं

व्यानद्धः स्निग्धमुग्धः सरसमुदरबन्धेन वीतोपमेन ।

उद्दीप्तैः स्वप्रकाशैरुपचितमहिमा मन्मथारेरुदारो

मध्यो मिथ्यार्थसध्र्यङ्मम दिशतु सदा सङ्गतिं मङ्गलानाम् ॥ 21 ॥

नाभीचक्रालवालान्नवनवसुषमादोहदश्रीपरीता-

-दुद्गच्छन्ती पुरस्तादुदरपथमतिक्रम्य वक्षः प्रयान्ति ।

श्यामा कामागमार्थप्रकथनलिपिवद्भासते या निकामं

सा मा सोमार्धमौलेः सुखयतु सततं रोमवल्लीमतल्ली ॥ 22 ॥

आश्लेषेष्वद्रिजायाः कठिनकुचतटीलिप्तकाश्मीरपङ्क-

-व्यासङ्गादुद्यदर्कद्युतिभिरुपचितस्पर्धमुद्दामहृद्यम् ।

दक्षारातेरुदूढप्रतिनवमणिमालावलीभासमानं

वक्षो विक्षोभिताघं सततनतिजुषां रक्षतादक्षतं नः ॥ 23 ॥

वामाङ्के विस्फुरन्त्याः करतलविलसच्चारुरक्तोत्पलायाः

कान्ताया वामवक्षोरुहभरशिखरोन्मर्दनव्यग्रमेकम् ।

अन्यांस्त्रीनप्युदारान्वरपरशुमृगालङ्कृतानिन्दुमौले-

-र्बाहूनाबद्धहेमाङ्गदमणिकटकानन्तरालोकयामः ॥ 24 ॥

सम्भ्रान्तायाः शिवायाः पतिविलयभिया सर्वलोकोपतापा-

-त्संविग्नस्यापि विष्णोः सरभसमुभयोर्वारणप्रेरणाभ्याम् ।

मध्ये त्रैशङ्कवीयामनुभवति दशां यत्र हालाहलोष्मा

सोऽयं सर्वापदां नः शमयतु निचयं नीलकण्ठस्य कण्ठः ॥ 25 ॥

हृद्यैरद्रीन्द्रकन्यामृदुदशनपदैर्मुद्रितो विद्रुमश्री-

-रुद्द्योतन्त्या नितान्तं धवलधवलया मिश्रितो दन्तकान्त्या ।

मुक्तामाणिक्यजालव्यतिकरसदृशा तेजसा भासमानः

सद्योजातस्य दद्यादधरमणिरसौ सम्पदां सञ्चयं नः ॥ 26 ॥

कर्णालङ्कारनानामणिनिकररुचां सञ्चयैरञ्चितायां

वर्ण्यायां स्वर्णपद्मोदरपरिविलसत्कर्णिकासन्निभायाम् ।

पद्धत्यां प्राणवायोः प्रणतजनहृदम्भोजवासस्य शम्भो-

-र्नित्यं नश्चित्तमेतद्विरचयतु सुखेनासिकां नासिकायाम् ॥ 27 ॥

अत्यन्तं भासमाने रुचिरतररुचां सङ्गमात्सन्मणीना-

-मुद्यच्चण्डांशुधामप्रसरनिरसनस्पष्टदृष्टापदाने ।

भूयास्तां भूतये नः करिवरजयिनः कर्णपाशावलम्बे

भक्तालीभालसज्जज्जनिमरणलिपेः कुण्डले कुण्डले ते ॥ 28 ॥

याभ्यां कालव्यवस्था भवति तनुमतां यो मुखं देवतानां

येषामाहुः स्वरूपं जगति मुनिवरा देवतानां त्रयीं ताम् ।

रुद्राणीवक्त्रपङ्केरुहसततविहारोत्सुकेन्दिन्दिरेभ्य-

-स्तेभ्यस्त्रिभ्यः प्रणामाञ्जलिमुपरचये त्रीक्षणस्येक्षणेभ्यः ॥ 29 ॥

वामं वामाङ्कगाया वदनसरसिजे व्यावलद्वल्लभाया

व्यानम्रेष्वन्यदन्यत्पुनरलिकभवं वीतनिःशेषरौक्ष्यम् ।

भूयो भूयोपि मोदान्निपतदतिदयाशीतलं चूतबाणे

दक्षारेरीक्षणानां त्रयमपहरतादाशु तापत्रयं नः ॥ 30 ॥

यस्मिन्नर्धेन्दुमुग्धद्युतिनिचयतिरस्कारनिस्तन्द्रकान्तौ

काश्मीरक्षोदसङ्कल्पतमिव रुचिरं चित्रकं भाति नेत्रम् ।

तस्मिन्नुल्लीलचिल्लीनटवरतरुणीलास्यरङ्गायमाणे

कालारेः फालदेशे विहरतु हृदयं वीतचिन्तान्तरं नः ॥ 31 ॥

स्वामिन्गङ्गामिवाङ्गीकुरु तव शिरसा मामपीत्यर्थयन्तीं

धन्यां कन्यां खरांशोः शिरसि वहति किं न्वेष कारुण्यशाली ।

इत्थं शङ्कां जनानां जनयदतिघनं कैशिकं कालमेघ-

-च्छायं भूयादुदारं त्रिपुरविजयिनः श्रेयसे भूयसे नः ॥ 32 ॥

शृङ्गाराकल्पयोग्यैः शिखरिवरसुतासत्सखीहस्तलूनैः

सूनैराबद्धमालावलिपरिविलसत्सौरभाकृष्टभृङ्गम् ।

तुङ्गं माणिक्यकान्त्या परिहसितसुरावासशैलेन्द्रशृङ्गं

सङ्घं नः सङ्कटानां विघटयतु सदा काङ्कटीकं किरीटम् ॥ 33 ॥

वक्राकारः कलङ्की जडतनुरहमप्यङ्घ्रिसेवानुभावा-

-दुत्तंसत्वं प्रयातः सुलभतरघृणास्यन्दिनश्चन्द्रमौलेः ।

तत्सेवन्तां जनौघाः शिवमिति निजयावस्थयैव ब्रुवाणं

वन्दे देवस्य शम्भोर्मुकुटसुघटितं मुग्धपीयूषभानुम् ॥ 34 ॥

कान्त्या सम्फुल्लमल्लीकुसुमधवलया व्याप्य विश्वं विराज-

-न्वृत्ताकारो वितन्वन्मुहुरपि च परां निर्वृतिं पादभाजाम् ।

सानन्दं नन्दिदोष्णा मणिकटकवता वाह्यमानः पुरारेः

श्वेतच्छत्राख्यशीतद्युतिरपहरतादापदस्तापदा नः ॥ 35 ॥

दिव्याकल्पोज्ज्वलानां शिवगिरिसुतयोः पार्श्वयोराश्रितानां

रुद्राणीसत्सखीनां मदतरलकटाक्षाञ्चलैरञ्चितानाम् ।

उद्वेल्लद्बाहुवल्लीविलसनसमये चामरान्दोलनीना-

-मुद्भूतः कङ्कणालीवलयकलकलो वारयेदापदो नः ॥ 36 ॥

स्वर्गौकःसुन्दरीणां सुललितवपुषां स्वामिसेवापराणां

वल्गद्भूषाणि वक्राम्बुजपरिविगलन्मुग्धगीतामृतानि ।

नित्यं नृत्तान्युपासे भुजविधुतिपदन्यासभावावलोक-

-प्रत्युद्यत्प्रीतिमाद्यत्प्रमथनटनटीदत्तसम्भावनानि ॥ 37 ॥

स्थानप्राप्त्या स्वराणां किमपि विशदतां व्यञ्जयन्मञ्जुवीणा-

-स्वानावच्छिन्नतालक्रमममृतमिवास्वाद्यमानं शिवाभ्याम् ।

नानारागातिहृद्यं नवरसमधुरस्तोत्रजातानुविद्धं

गानं वीणामहर्षेः कलमतिललितं कर्णपूरयतां नः ॥ 38 ॥

चेतो जातप्रमोदं सपदि विदधती प्राणिनां वाणिनीनां

पाणिद्वन्द्वाग्रजाग्रत्सुललितरणितस्वर्णतालानुकूला ।

स्वीयारावेण पाथोधररवपटुना नादयन्ती मयूरीं

मायूरी मन्दभावं मणिमुरजभवा मार्जना मार्जयेन्नः ॥ 39 ॥

देवेभ्यो दानवेभ्यः पितृमुनिपरिषत्सिद्धविद्याधरेभ्यः

साध्येभ्यश्चारणेभ्यो मनुजपशुपतज्जातिकीटादिकेभ्यः ।

श्रीकैलासप्ररूढास्तृणविटपिमुखाश्चापि ये सन्ति तेभ्यः

सर्वेभ्यो निर्विचारं नतिमुपरचये शर्वपादाश्रयेभ्यः ॥ 40 ॥

ध्यायन्नित्थं प्रभाते प्रतिदिवसमिदं स्तोत्ररत्नं पठेद्यः

किं वा ब्रूमस्तदीयं सुचरितमथवा कीर्तयामः समासात् ।

सम्पज्जातं समग्रं सदसि बहुमतिं सर्वलोकप्रियत्वं

सम्प्राप्यायुःशतान्ते पदमयति परब्रह्मणो मन्मथारेः ॥ 41 ॥

इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ श्री शिव पादादिकेशान्तवर्णन स्तोत्रम् ॥