Sakala Janani Stavah — Sinhala Script

අජානන්තෝ යාන්ති ක්ෂයමවශමන්යෝන්යකලහෛ-

-රමී මායාග්රන්ථෞ තව පරිලුඨන්තඃ සමයිනඃ .

ජගන්මාතර්ජන්මජ්වරභයතමඃ කෞමුදි වයං

නමස්තේ කුර්වාණාඃ ශරණමුපයාමෝ භගවතීම් .. 1 ..

වචස්තර්කාගම්යස්වරසපරමානන්දවිභව-

-ප්රබෝධාකාරාය ද්යුතිතුලිතනීලෝත්පලරුචේ .

ශිවාද්යාරාධ්යාය ස්තනභරවිනම්රාය සතතං

නමස්තස්මෛ කස්මෛචන භවතු මුග්ධාය මහසේ .. 2 ..

අනාද්යන්තාභේදප්රණයරසිකාපි ප්රණයිනී

ශිවස්යාසීර්යත්ත්වං පරිණයවිධෞ දේවි ගෘහිණී .

සවිත්රී භූතානාමපි යදුදභූඃ ශෛලතනයා

තදේතත්සංසාරප්රණයනමහානාටකමුඛම් .. 3 ..

බ්රුවන්ත්යේකේ තත්ත්වං භගවති සදන්යේ විදුරස-

-ත්පරේ මාතඃ ප්රාහුස්තව සදසදන්යේ සුකවයඃ .

පරේ නෛතත්සර්වං සමභිදධතේ දේවි සුධිය-

-ස්තදේතත්ත්වන්මායාවිලසිතමශේෂං නනු ශිවේ .. 4 ..

ලුඨද්ගුඤ්ජාහාරස්තනභරනමන්මධ්යලතිකා-

-මුදඤ්චද්ධර්මාම්භඃ කණගුණිතවක්ත්රාම්බුජරුචම් .

ශිවං පාර්ථත්රාණප්රවණමෘගයාකාරගුණිතං

ශිවාමන්වග්යාන්තීං ශරණමහමන්වේමි ශබරීම් .. 5 ..

මිථඃ කේශාකේශිප්රථනනිධනාස්තර්කඝටනාඃ

බහුශ්රද්ධාභක්තිප්රණතිවිෂයාඃ ශාස්ත්රවිධයඃ .

ප්රසීද ප්රත්යක්ෂීභව ගිරිසුතේ දේහි ශරණං

නිරාලම්බං චේතඃ පරිලුඨති පාරිප්ලවමිදම් .. 6 ..

ශුනාං වා වහ්නේර්වා ඛගපරිෂදෝ වා යදශනං

කදා කේන ක්වේති ක්වචිදපි න කශ්චිත්කලයති .

අමුෂ්මින්විශ්වාසං විජහිහි මමාහ්නාය වපුෂි

ප්රපද්යේථාශ්චේතඃ සකලජනනීමේව ශරණම් .. 7 ..

තටිත්කෝටිජ්යෝතිර්ද්යුතිදලිතෂඩ්ග්රන්ථිගහනං

ප්රවිෂ්ටං ස්වාධාරං පුනරපි සුධාවෘෂ්ටිවපුෂා .

කිමප්යෂ්ටාවිංශත්කිරණසකලීභූතමනිශං

භජේ ධාම ශ්යාමං කුචභරනතං බර්බරකචම් .. 8 ..

චතුෂ්පත්රාන්තඃ ෂඩ්දලපුටභගාන්තස්ත්රිවලය-

-ස්ඵුරද්විද්යුද්වහ්නිද්යුමණිනියුතාභද්යුතිලතේ .

ෂඩශ්රං භිත්ත්වාදෞ දශදලමථ ද්වාදශදලං

කලාශ්රං ච ද්ව්යශ්රං ගතවති නමස්තේ ගිරිසුතේ .. 9 ..

කුලං කේචිත්ප්රාහුර්වපුරකුලමන්යේ තව බුධාඃ

පරේ තත්සම්භේදං සමභිදධතේ කෞලමපරේ .

චතුර්ණාමප්යේෂාමුපරි කිමපි ප්රාහුරපරේ

මහාමායේ තත්ත්වං තව කථමමී නිශ්චිනුමහේ .. 10 ..

ෂඩධ්වාරණ්යානීං ප්රලයරවිකෝටිප්රතිරුචා

රුචා භස්මීකෘත්ය ස්වපදකමලප්රහ්වශිරසාම් .

විතන්වානඃ ශෛවං කිමපි වපුරින්දීවරරුචිඃ

කුචාභ්යාමානම්රස්තව පුරුෂකාරෝ විජයතේ .. 11 ..

ප්රකාශානන්දාභ්යාමවිදිතචරීං මධ්යපදවීං

ප්රවිශ්යෛතද්ද්වන්ද්වං රවිශශිසමාඛ්යං කබලයන් .

ප්රපද්යෝර්ධ්වං නාදං ලයදහනභස්මීකෘතකුලඃ

ප්රසාදාත්තේ ජන්තුඃ ශිවමකුලමම්බ ප්රවිශති .. 12 ..

මනුෂ්යාස්තිර්යඤ්චෝ මරුත ඉති ලෝකත්රයමිදං

භවාම්භෝධෞ මග්නං ත්රිගුණලහරීකෝටිලුඨිතම් .

කටාක්ෂශ්චේද්යත්ර ක්වචන තව මාතඃ කරුණයා

ශරීරී සද්යෝ(අ)යං ව්රජති පරමානන්දතනුතාම් .. 13 ..

ප්රියඞ්ගුශ්යාමාඞ්ගීමරුණතරවාසං කිසලයාං

සමුන්මීලන්මුක්තාඵලවහලනේපථ්යසුභගාම් .

ස්තනද්වන්ද්වස්ඵාරස්තබකනමිතාං කල්පලතිකාං

සකෘද්ධ්යායන්තස්ත්වාං දධති ශිවචින්තාමණිපදම් .. 14 ..

ෂඩාධාරාවර්තෛරපරිමිතමන්ත්රෝර්මිපටලෛඃ

ලසන්මුද්රාඵේනෛර්බහුවිධලසද්දෛවතඣෂෛඃ .

ක්රමස්රෝතෝභිස්ත්වං වහසි පරනාදාමෘතනදී

භවානි ප්රත්යග්රා ශිවචිදමෘතාබ්ධිප්රණයිනී .. 15 ..

මහීපාථෝවහ්නිශ්වසනවියදාත්මේන්දුරවිභි-

-ර්වපුර්භිග්රස්තාශෛරපි තව කියානම්බ මහිමා .

අමූන්යාලෝක්යන්තේ භගවති න කුත්රාප්යණුතමා-

-මවස්ථාං ප්රාප්තානි ත්වයි තු පරමව්යෝමවපුෂි .. 16 ..

කලාමාජ්ඤාං ප්රජ්ඤාං සමයමනුභූතිං සමරසං

ගුරුං පාරම්පර්යං විනයමුපදේශං ශිවපදම් .

ප්රමාණං නිර්වාණං ප්රකෘතිමභිභූතිං පරගුහාං

විධිං විද්යාමාහුඃ සකලජනනීමේව මුනයඃ .. 17 ..

ප්රලීනේ ශබ්දෞඝේ තදනු විරතේ බින්දුවිභවේ

තතස්තත්ත්වේ චාෂ්ටධ්වනිභිරනපායින්යධිගතේ .

ශ්රිතේ ශාක්තේ පර්වණ්යනුකලිතචින්මාත්ර ගහනාං

ස්වසංවිත්තිං යෝගී රසයති ශිවාඛ්යාං භගවතීම් .. 18 ..

පරානන්දාකාරාං නිරවධිශිවෛශ්වර්යවපුෂං

නිරාකාරාං ජ්ඤානප්රකෘතිමපරිච්ඡින්නකරුණාම් .

සවිත්රීං ලෝකානාං නිරතිශයධාමාස්පදපදාං

භවෝ වා මෝක්ෂෝ වා භවතු භවතීමේව භජතාම් .. 19 ..

ජගත්කායේ කෘත්වා තදපි හෘදයේ තච්ච පුරුෂේ

පුමාංසං බින්දුස්ථං තදපි වියදාඛ්යේ ච ගහනේ .

තදේතද්ජ්ඤානාඛ්යේ තදපි පරමානන්දගහනේ

මහාව්යෝමාකාරේ ත්වදනුභවශීලෝ විජයතේ .. 20 ..

විධේ වේද්යේ විද්යේ විවිධසමයේ වේදගුලිකේ

විචිත්රේ විශ්වාද්යේ විනයසුලභේ වේදජනනි .

ශිවජ්ඤේ ශූලස්ථේ ශිවපදවදාන්යේ ශිවනිධේ

ශිවේ මාතර්මහ්යං ත්වයි විතර භක්තිං නිරුපමාම් .. 21 ..

විධේර්මුණ්ඩං හෘත්වා යදකුරුත පාත්රං කරතලේ

හරිං ශූලප්රෝතං යදගමයදංසාභරණතාම් .

අලඤ්චක්රේ කණ්ඨං යදපි ගරලේනාම්බ ගිරිශඃ

ශිවස්ථායාඃ ශක්තේස්තදිදමඛිලං තේ විලසිතම් .. 22 ..

විරිඤ්ච්යාඛ්යා මාතඃ සෘජසි හරිසඤ්ජ්ඤා ත්වමවසි

ත්රිලෝකීං රුද්රාඛ්යා හරසි විදධාසීශ්වරදශාම් .

භවන්තී නාදාඛ්යා විහරසි ච පාශෞඝදලනී

ත්වමේවෛකා(අ)නේකා භවසි කෘතිභේදෛර්ගිරිසුතේ .. 23 ..

මුනීනාං චේතෝභිඃ ප්රමෘදිතකෂායෛරපි මනා-

-ගශක්යං සංස්ප්රෂ්ටුං චකිතචකිතෛරම්බ සතතම් .

ශ්රුතීනාං මූර්ධානඃ ප්රකෘතිකඨිනාඃ කෝමලතරේ

කථං තේ වින්දන්තේ පදකිසලයේ පාර්වති පදම් .. 24 ..

තටිද්වල්ලීං නිත්යාමමෘතසරිතං පාරරහිතාං

මලෝත්තීර්ණාං ජ්යෝත්ස්නාං ප්රකෘතිමගුණග්රන්ථිගහනාම් .

ගිරාං දූරාං විද්යාමවිනතකුචාං විශ්වජනනී-

-මපර්යන්තාං ලක්ෂ්මීමභිදධති සන්තෝ භගවතීම් .. 25 ..

ශරීරං ක්ෂිත්යම්භඃ ප්රභෘතිරචිතං කේවලමචිත්

සුඛං දුඃඛං චායං කලයති පුමාංශ්චේතන ඉති .

ස්ඵුටං ජානානෝ(අ)පි ප්රභවති න දේහී රහයිතුං

ශරීරාහඞ්කාරං තව සමයබාහ්යෝ ගිරිසුතේ .. 26 ..

පිතා මාතා භ්රාතා සුහෘදනුචරඃ සද්ම ගෘහිණී

වපුඃ ක්ෂේත්රං මිත්රං ධනමපි යදා මාං විජහති .

තදා මේ භින්දානා සපදි භයමෝහාන්ධතමසං

මහාජ්යෝත්ස්නේ මාතර්භව කරුණයා සන්නිධිකරී .. 27 ..

සුතා දක්ෂස්යාදෞ කිල සකලමාතස්ත්වමුදභූඃ

සදෝෂං තං හිත්වා තදනු ගිරිරාජස්ය දුහිතා .

අනාද්යන්තා ශම්භෝරපෘථගපි ශක්තිර්භගවතී

විවාහාජ්ජායාසීත්යහහ චරිතං වේත්ති තව කඃ .. 28 ..

කණාස්ත්වද්දීප්තීනාං රවිශශිකෘශානුප්රභෘතයඃ

පරං බ්රහ්ම ක්ෂුද්රං තව නියතමානන්දකණිකා .

ශිවාදි ක්ෂිත්යන්තං ත්රිවලයතනෝඃ සර්වමුදරේ

තවාස්තේ භක්තස්ය ස්ඵුරසි හෘදි චිත්රං භගවති .. 29 ..

පුරඃ පශ්චාදන්තර්බහිරපරිමේයං පරිමිතං

පරං ස්ථූලං සූක්ෂ්මං සකලමකුලං ගුහ්යමගුහම් .

දවීයෝ නේදීයඃ සදසදිති විශ්වං භගවතී

සදා පශ්යන්ත්යාඛ්යාං වහසි භුවනක්ෂෝභජනනීම් .. 30 ..

ප්රවිශ්ය ත්වන්මාර්ගං සහජදයයා දේශිකදෘශා

ෂඩධ්වධ්වාන්තෞඝච්ඡිදුරගණනාතීතකරුණාම් .

පරාමාජ්ඤාකාරාං සපදි ශිවයන්තීං ශිවතනුං

ස්වමාත්මානං ධන්යාශ්චිරමුපලභන්තේ භගවතීම් .. 31 ..

මයූඛාඃ පූෂ්ණීව ජ්වලන ඉව තද්දීප්තිකණිකාඃ

පයෝධෞ කල්ලෝලාඃ ප්රතිහතමහිම්නීව පෘෂතඃ .

උදේත්යෝදේත්යාම්බ ත්වයි සහ නිජෛඃ සාත්ත්විකගුණෛ-

-ර්භජන්තේ තත්ත්වෞඝාඃ ප්රශමමනුකල්පං පරවශාඃ .. 32 ..

විධුර්විෂ්ණුර්බ්රහ්මා ප්රකෘතිරණුරාත්මා දිනකරඃ

ස්වභාවෝ ජෛනේන්ද්රඃ සුගතමුනිරාකාශමලිනඃ .

ශිවඃ ශක්තිශ්චේති ශ්රුතිවිෂයතාං තාමුපගතාං

විකල්පෛරේභිස්ත්වාමභිදධති සන්තෝ භගවතීම් .. 33 ..

ශිවස්ත්වං ශක්තිස්ත්වං ත්වමසි සමයා ත්වං සමයිනී

ත්වමාත්මා ත්වං දීක්ෂා ත්වමයමණිමාදිර්ගුණගණඃ .

අවිද්යා ත්වං විද්යා ත්වමසි නිඛිලං ත්වං කිමපරං

පෘථක්තත්ත්වං ත්වත්තෝ භගවති න වීක්ෂාමහ ඉමේ .. 34 ..

ත්වයාසෞ ජානීතේ රචයති භවත්යෛව සතතං

ත්වයෛවේච්ඡත්යම්බ ත්වමසි නිඛිලා යස්ය තනවඃ .

ජගත්සාම්යං ශම්භෝර්වහසි පරමව්යෝමවපුෂඃ

තථාප්යර්ධං භූත්වා විහරසි ශිවස්යේති කිමිදම් .. 35 ..

අසඞ්ඛ්යෛඃ ප්රාචීනෛර්ජනනි ජනනෛඃ කර්මවිලයා-

-ත්සකෘජ්ජන්මන්යන්තේ ගුරුවපුෂමාසාද්ය ගිරිශම් .

අවාප්යාජ්ඤාං ශෛවීං ශිවතනුමපි ත්වාං විදිතවා-

-න්නයේයං ත්වත්පූජාස්තුතිවිරචනේනෛව දිවසාන් .. 36 ..

යත්ෂට්පත්රං කමලමුදිතං තස්ය යා කර්ණිකාඛ්යා

යෝනිස්තස්යාඃ ප්රථිතමුදරේ යත්තදෝඞ්කාරපීඨම් .

තස්යාප්යන්තඃ කුචභරනතාං කුණ්ඩලීති ප්රසිද්ධාං

ශ්යාමාකාරාං සකලජනනීං සන්තතං භාවයාමි .. 37 ..

භුවි පයසි කෘශානෞ මාරුතේ ඛේ ශශාඞ්කේ

සවිතරි යජමානේ(අ)ප්යෂ්ටධා ශක්තිරේකා .

වහසි කුචභරාභ්යාං යාවනම්රාපි විශ්වං

සකලජනනි සා ත්වං පාහි මාමිත්යවාච්යම් .. 38 ..

ඉති ශ්රීකාලිදාස විරචිත පඤ්චස්තව්යාං පඤ්චමඃ සකලජනනීස්තවඃ .

Roman (IAST) Transliteration

ajānanto yānti kṣayamavaśamanyonyakalahai-

-ramī māyāgranthau tava pariluṭhantaḥ samayinaḥ |

jaganmātarjanmajvarabhayatamaḥ kaumudi vayaṃ

namaste kurvāṇāḥ śaraṇamupayāmo bhagavatīm || 1 ||

vacastarkāgamyasvarasaparamānandavibhava-

-prabodhākārāya dyutitulitanīlotpalaruce |

śivādyārādhyāya stanabharavinamrāya satataṃ

namastasmai kasmaicana bhavatu mugdhāya mahase || 2 ||

anādyantābhedapraṇayarasikāpi praṇayinī

śivasyāsīryattvaṃ pariṇayavidhau devi gṛhiṇī |

savitrī bhūtānāmapi yadudabhūḥ śailatanayā

tadetatsaṃsārapraṇayanamahānāṭakamukham || 3 ||

bruvantyeke tattvaṃ bhagavati sadanye vidurasa-

-tpare mātaḥ prāhustava sadasadanye sukavayaḥ |

pare naitatsarvaṃ samabhidadhate devi sudhiya-

-stadetattvanmāyāvilasitamaśeṣaṃ nanu śive || 4 ||

luṭhadguñjāhārastanabharanamanmadhyalatikā-

-mudañcaddharmāmbhaḥ kaṇaguṇitavaktrāmbujarucam |

śivaṃ pārthatrāṇapravaṇamṛgayākāraguṇitaṃ

śivāmanvagyāntīṃ śaraṇamahamanvemi śabarīm || 5 ||

mithaḥ keśākeśiprathananidhanāstarkaghaṭanāḥ

bahuśraddhābhaktipraṇativiṣayāḥ śāstravidhayaḥ |

prasīda pratyakṣībhava girisute dehi śaraṇaṃ

nirālambaṃ cetaḥ pariluṭhati pāriplavamidam || 6 ||

śunāṃ vā vahnervā khagapariṣado vā yadaśanaṃ

kadā kena kveti kvacidapi na kaścitkalayati |

amuṣminviśvāsaṃ vijahihi mamāhnāya vapuṣi

prapadyethāścetaḥ sakalajananīmeva śaraṇam || 7 ||

taṭitkoṭijyotirdyutidalitaṣaḍgranthigahanaṃ

praviṣṭaṃ svādhāraṃ punarapi sudhāvṛṣṭivapuṣā |

kimapyaṣṭāviṃśatkiraṇasakalībhūtamaniśaṃ

bhaje dhāma śyāmaṃ kucabharanataṃ barbarakacam || 8 ||

catuṣpatrāntaḥ ṣaḍdalapuṭabhagāntastrivalaya-

-sphuradvidyudvahnidyumaṇiniyutābhadyutilate |

ṣaḍaśraṃ bhittvādau daśadalamatha dvādaśadalaṃ

kalāśraṃ ca dvyaśraṃ gatavati namaste girisute || 9 ||

kulaṃ kecitprāhurvapurakulamanye tava budhāḥ

pare tatsambhedaṃ samabhidadhate kaulamapare |

caturṇāmapyeṣāmupari kimapi prāhurapare

mahāmāye tattvaṃ tava kathamamī niścinumahe || 10 ||

ṣaḍadhvāraṇyānīṃ pralayaravikoṭipratirucā

rucā bhasmīkṛtya svapadakamalaprahvaśirasām |

vitanvānaḥ śaivaṃ kimapi vapurindīvararuciḥ

kucābhyāmānamrastava puruṣakāro vijayate || 11 ||

prakāśānandābhyāmaviditacarīṃ madhyapadavīṃ

praviśyaitaddvandvaṃ raviśaśisamākhyaṃ kabalayan |

prapadyordhvaṃ nādaṃ layadahanabhasmīkṛtakulaḥ

prasādātte jantuḥ śivamakulamamba praviśati || 12 ||

manuṣyāstiryañco maruta iti lokatrayamidaṃ

bhavāmbhodhau magnaṃ triguṇalaharīkoṭiluṭhitam |

kaṭākṣaścedyatra kvacana tava mātaḥ karuṇayā

śarīrī sadyo'yaṃ vrajati paramānandatanutām || 13 ||

priyaṅguśyāmāṅgīmaruṇataravāsaṃ kisalayāṃ

samunmīlanmuktāphalavahalanepathyasubhagām |

stanadvandvasphārastabakanamitāṃ kalpalatikāṃ

sakṛddhyāyantastvāṃ dadhati śivacintāmaṇipadam || 14 ||

ṣaḍādhārāvartairaparimitamantrormipaṭalaiḥ

lasanmudrāphenairbahuvidhalasaddaivatajhaṣaiḥ |

kramasrotobhistvaṃ vahasi paranādāmṛtanadī

bhavāni pratyagrā śivacidamṛtābdhipraṇayinī || 15 ||

mahīpāthovahniśvasanaviyadātmenduravibhi-

-rvapurbhigrastāśairapi tava kiyānamba mahimā |

amūnyālokyante bhagavati na kutrāpyaṇutamā-

-mavasthāṃ prāptāni tvayi tu paramavyomavapuṣi || 16 ||

kalāmājñāṃ prajñāṃ samayamanubhūtiṃ samarasaṃ

guruṃ pāramparyaṃ vinayamupadeśaṃ śivapadam |

pramāṇaṃ nirvāṇaṃ prakṛtimabhibhūtiṃ paraguhāṃ

vidhiṃ vidyāmāhuḥ sakalajananīmeva munayaḥ || 17 ||

pralīne śabdaughe tadanu virate binduvibhave

tatastattve cāṣṭadhvanibhiranapāyinyadhigate |

śrite śākte parvaṇyanukalitacinmātra gahanāṃ

svasaṃvittiṃ yogī rasayati śivākhyāṃ bhagavatīm || 18 ||

parānandākārāṃ niravadhiśivaiśvaryavapuṣaṃ

nirākārāṃ jñānaprakṛtimaparicchinnakaruṇām |

savitrīṃ lokānāṃ niratiśayadhāmāspadapadāṃ

bhavo vā mokṣo vā bhavatu bhavatīmeva bhajatām || 19 ||

jagatkāye kṛtvā tadapi hṛdaye tacca puruṣe

pumāṃsaṃ bindusthaṃ tadapi viyadākhye ca gahane |

tadetadjñānākhye tadapi paramānandagahane

mahāvyomākāre tvadanubhavaśīlo vijayate || 20 ||

vidhe vedye vidye vividhasamaye vedagulike

vicitre viśvādye vinayasulabhe vedajanani |

śivajñe śūlasthe śivapadavadānye śivanidhe

śive mātarmahyaṃ tvayi vitara bhaktiṃ nirupamām || 21 ||

vidhermuṇḍaṃ hṛtvā yadakuruta pātraṃ karatale

hariṃ śūlaprotaṃ yadagamayadaṃsābharaṇatām |

alañcakre kaṇṭhaṃ yadapi garalenāmba giriśaḥ

śivasthāyāḥ śaktestadidamakhilaṃ te vilasitam || 22 ||

viriñcyākhyā mātaḥ sṛjasi harisañjñā tvamavasi

trilokīṃ rudrākhyā harasi vidadhāsīśvaradaśām |

bhavantī nādākhyā viharasi ca pāśaughadalanī

tvamevaikā'nekā bhavasi kṛtibhedairgirisute || 23 ||

munīnāṃ cetobhiḥ pramṛditakaṣāyairapi manā-

-gaśakyaṃ saṃspraṣṭuṃ cakitacakitairamba satatam |

śrutīnāṃ mūrdhānaḥ prakṛtikaṭhināḥ komalatare

kathaṃ te vindante padakisalaye pārvati padam || 24 ||

taṭidvallīṃ nityāmamṛtasaritaṃ pārarahitāṃ

malottīrṇāṃ jyotsnāṃ prakṛtimaguṇagranthigahanām |

girāṃ dūrāṃ vidyāmavinatakucāṃ viśvajananī-

-maparyantāṃ lakṣmīmabhidadhati santo bhagavatīm || 25 ||

śarīraṃ kṣityambhaḥ prabhṛtiracitaṃ kevalamacit

sukhaṃ duḥkhaṃ cāyaṃ kalayati pumāṃścetana iti |

sphuṭaṃ jānāno'pi prabhavati na dehī rahayituṃ

śarīrāhaṅkāraṃ tava samayabāhyo girisute || 26 ||

pitā mātā bhrātā suhṛdanucaraḥ sadma gṛhiṇī

vapuḥ kṣetraṃ mitraṃ dhanamapi yadā māṃ vijahati |

tadā me bhindānā sapadi bhayamohāndhatamasaṃ

mahājyotsne mātarbhava karuṇayā sannidhikarī || 27 ||

sutā dakṣasyādau kila sakalamātastvamudabhūḥ

sadoṣaṃ taṃ hitvā tadanu girirājasya duhitā |

anādyantā śambhorapṛthagapi śaktirbhagavatī

vivāhājjāyāsītyahaha caritaṃ vetti tava kaḥ || 28 ||

kaṇāstvaddīptīnāṃ raviśaśikṛśānuprabhṛtayaḥ

paraṃ brahma kṣudraṃ tava niyatamānandakaṇikā |

śivādi kṣityantaṃ trivalayatanoḥ sarvamudare

tavāste bhaktasya sphurasi hṛdi citraṃ bhagavati || 29 ||

puraḥ paścādantarbahiraparimeyaṃ parimitaṃ

paraṃ sthūlaṃ sūkṣmaṃ sakalamakulaṃ guhyamaguham |

davīyo nedīyaḥ sadasaditi viśvaṃ bhagavatī

sadā paśyantyākhyāṃ vahasi bhuvanakṣobhajananīm || 30 ||

praviśya tvanmārgaṃ sahajadayayā deśikadṛśā

ṣaḍadhvadhvāntaughacchiduragaṇanātītakaruṇām |

parāmājñākārāṃ sapadi śivayantīṃ śivatanuṃ

svamātmānaṃ dhanyāściramupalabhante bhagavatīm || 31 ||

mayūkhāḥ pūṣṇīva jvalana iva taddīptikaṇikāḥ

payodhau kallolāḥ pratihatamahimnīva pṛṣataḥ |

udetyodetyāmba tvayi saha nijaiḥ sāttvikaguṇai-

-rbhajante tattvaughāḥ praśamamanukalpaṃ paravaśāḥ || 32 ||

vidhurviṣṇurbrahmā prakṛtiraṇurātmā dinakaraḥ

svabhāvo jainendraḥ sugatamunirākāśamalinaḥ |

śivaḥ śaktiśceti śrutiviṣayatāṃ tāmupagatāṃ

vikalpairebhistvāmabhidadhati santo bhagavatīm || 33 ||

śivastvaṃ śaktistvaṃ tvamasi samayā tvaṃ samayinī

tvamātmā tvaṃ dīkṣā tvamayamaṇimādirguṇagaṇaḥ |

avidyā tvaṃ vidyā tvamasi nikhilaṃ tvaṃ kimaparaṃ

pṛthaktattvaṃ tvatto bhagavati na vīkṣāmaha ime || 34 ||

tvayāsau jānīte racayati bhavatyaiva satataṃ

tvayaivecchatyamba tvamasi nikhilā yasya tanavaḥ |

jagatsāmyaṃ śambhorvahasi paramavyomavapuṣaḥ

tathāpyardhaṃ bhūtvā viharasi śivasyeti kimidam || 35 ||

asaṅkhyaiḥ prācīnairjanani jananaiḥ karmavilayā-

-tsakṛjjanmanyante guruvapuṣamāsādya giriśam |

avāpyājñāṃ śaivīṃ śivatanumapi tvāṃ viditavā-

-nnayeyaṃ tvatpūjāstutiviracanenaiva divasān || 36 ||

yatṣaṭpatraṃ kamalamuditaṃ tasya yā karṇikākhyā

yonistasyāḥ prathitamudare yattadoṅkārapīṭham |

tasyāpyantaḥ kucabharanatāṃ kuṇḍalīti prasiddhāṃ

śyāmākārāṃ sakalajananīṃ santataṃ bhāvayāmi || 37 ||

bhuvi payasi kṛśānau mārute khe śaśāṅke

savitari yajamāne'pyaṣṭadhā śaktirekā |

vahasi kucabharābhyāṃ yāvanamrāpi viśvaṃ

sakalajanani sā tvaṃ pāhi māmityavācyam || 38 ||

iti śrīkālidāsa viracita pañcastavyāṃ pañcamaḥ sakalajananīstavaḥ |

Sanskrit — Devanagari (original)

अजानन्तो यान्ति क्षयमवशमन्योन्यकलहै-

-रमी मायाग्रन्थौ तव परिलुठन्तः समयिनः ।

जगन्मातर्जन्मज्वरभयतमः कौमुदि वयं

नमस्ते कुर्वाणाः शरणमुपयामो भगवतीम् ॥ 1 ॥

वचस्तर्कागम्यस्वरसपरमानन्दविभव-

-प्रबोधाकाराय द्युतितुलितनीलोत्पलरुचे ।

शिवाद्याराध्याय स्तनभरविनम्राय सततं

नमस्तस्मै कस्मैचन भवतु मुग्धाय महसे ॥ 2 ॥

अनाद्यन्ताभेदप्रणयरसिकापि प्रणयिनी

शिवस्यासीर्यत्त्वं परिणयविधौ देवि गृहिणी ।

सवित्री भूतानामपि यदुदभूः शैलतनया

तदेतत्संसारप्रणयनमहानाटकमुखम् ॥ 3 ॥

ब्रुवन्त्येके तत्त्वं भगवति सदन्ये विदुरस-

-त्परे मातः प्राहुस्तव सदसदन्ये सुकवयः ।

परे नैतत्सर्वं समभिदधते देवि सुधिय-

-स्तदेतत्त्वन्मायाविलसितमशेषं ननु शिवे ॥ 4 ॥

लुठद्गुञ्जाहारस्तनभरनमन्मध्यलतिका-

-मुदञ्चद्धर्माम्भः कणगुणितवक्त्राम्बुजरुचम् ।

शिवं पार्थत्राणप्रवणमृगयाकारगुणितं

शिवामन्वग्यान्तीं शरणमहमन्वेमि शबरीम् ॥ 5 ॥

मिथः केशाकेशिप्रथननिधनास्तर्कघटनाः

बहुश्रद्धाभक्तिप्रणतिविषयाः शास्त्रविधयः ।

प्रसीद प्रत्यक्षीभव गिरिसुते देहि शरणं

निरालम्बं चेतः परिलुठति पारिप्लवमिदम् ॥ 6 ॥

शुनां वा वह्नेर्वा खगपरिषदो वा यदशनं

कदा केन क्वेति क्वचिदपि न कश्चित्कलयति ।

अमुष्मिन्विश्वासं विजहिहि ममाह्नाय वपुषि

प्रपद्येथाश्चेतः सकलजननीमेव शरणम् ॥ 7 ॥

तटित्कोटिज्योतिर्द्युतिदलितषड्ग्रन्थिगहनं

प्रविष्टं स्वाधारं पुनरपि सुधावृष्टिवपुषा ।

किमप्यष्टाविंशत्किरणसकलीभूतमनिशं

भजे धाम श्यामं कुचभरनतं बर्बरकचम् ॥ 8 ॥

चतुष्पत्रान्तः षड्दलपुटभगान्तस्त्रिवलय-

-स्फुरद्विद्युद्वह्निद्युमणिनियुताभद्युतिलते ।

षडश्रं भित्त्वादौ दशदलमथ द्वादशदलं

कलाश्रं च द्व्यश्रं गतवति नमस्ते गिरिसुते ॥ 9 ॥

कुलं केचित्प्राहुर्वपुरकुलमन्ये तव बुधाः

परे तत्सम्भेदं समभिदधते कौलमपरे ।

चतुर्णामप्येषामुपरि किमपि प्राहुरपरे

महामाये तत्त्वं तव कथममी निश्चिनुमहे ॥ 10 ॥

षडध्वारण्यानीं प्रलयरविकोटिप्रतिरुचा

रुचा भस्मीकृत्य स्वपदकमलप्रह्वशिरसाम् ।

वितन्वानः शैवं किमपि वपुरिन्दीवररुचिः

कुचाभ्यामानम्रस्तव पुरुषकारो विजयते ॥ 11 ॥

प्रकाशानन्दाभ्यामविदितचरीं मध्यपदवीं

प्रविश्यैतद्द्वन्द्वं रविशशिसमाख्यं कबलयन् ।

प्रपद्योर्ध्वं नादं लयदहनभस्मीकृतकुलः

प्रसादात्ते जन्तुः शिवमकुलमम्ब प्रविशति ॥ 12 ॥

मनुष्यास्तिर्यञ्चो मरुत इति लोकत्रयमिदं

भवाम्भोधौ मग्नं त्रिगुणलहरीकोटिलुठितम् ।

कटाक्षश्चेद्यत्र क्वचन तव मातः करुणया

शरीरी सद्योऽयं व्रजति परमानन्दतनुताम् ॥ 13 ॥

प्रियङ्गुश्यामाङ्गीमरुणतरवासं किसलयां

समुन्मीलन्मुक्ताफलवहलनेपथ्यसुभगाम् ।

स्तनद्वन्द्वस्फारस्तबकनमितां कल्पलतिकां

सकृद्ध्यायन्तस्त्वां दधति शिवचिन्तामणिपदम् ॥ 14 ॥

षडाधारावर्तैरपरिमितमन्त्रोर्मिपटलैः

लसन्मुद्राफेनैर्बहुविधलसद्दैवतझषैः ।

क्रमस्रोतोभिस्त्वं वहसि परनादामृतनदी

भवानि प्रत्यग्रा शिवचिदमृताब्धिप्रणयिनी ॥ 15 ॥

महीपाथोवह्निश्वसनवियदात्मेन्दुरविभि-

-र्वपुर्भिग्रस्ताशैरपि तव कियानम्ब महिमा ।

अमून्यालोक्यन्ते भगवति न कुत्राप्यणुतमा-

-मवस्थां प्राप्तानि त्वयि तु परमव्योमवपुषि ॥ 16 ॥

कलामाज्ञां प्रज्ञां समयमनुभूतिं समरसं

गुरुं पारम्पर्यं विनयमुपदेशं शिवपदम् ।

प्रमाणं निर्वाणं प्रकृतिमभिभूतिं परगुहां

विधिं विद्यामाहुः सकलजननीमेव मुनयः ॥ 17 ॥

प्रलीने शब्दौघे तदनु विरते बिन्दुविभवे

ततस्तत्त्वे चाष्टध्वनिभिरनपायिन्यधिगते ।

श्रिते शाक्ते पर्वण्यनुकलितचिन्मात्र गहनां

स्वसंवित्तिं योगी रसयति शिवाख्यां भगवतीम् ॥ 18 ॥

परानन्दाकारां निरवधिशिवैश्वर्यवपुषं

निराकारां ज्ञानप्रकृतिमपरिच्छिन्नकरुणाम् ।

सवित्रीं लोकानां निरतिशयधामास्पदपदां

भवो वा मोक्षो वा भवतु भवतीमेव भजताम् ॥ 19 ॥

जगत्काये कृत्वा तदपि हृदये तच्च पुरुषे

पुमांसं बिन्दुस्थं तदपि वियदाख्ये च गहने ।

तदेतद्ज्ञानाख्ये तदपि परमानन्दगहने

महाव्योमाकारे त्वदनुभवशीलो विजयते ॥ 20 ॥

विधे वेद्ये विद्ये विविधसमये वेदगुलिके

विचित्रे विश्वाद्ये विनयसुलभे वेदजननि ।

शिवज्ञे शूलस्थे शिवपदवदान्ये शिवनिधे

शिवे मातर्मह्यं त्वयि वितर भक्तिं निरुपमाम् ॥ 21 ॥

विधेर्मुण्डं हृत्वा यदकुरुत पात्रं करतले

हरिं शूलप्रोतं यदगमयदंसाभरणताम् ।

अलञ्चक्रे कण्ठं यदपि गरलेनाम्ब गिरिशः

शिवस्थायाः शक्तेस्तदिदमखिलं ते विलसितम् ॥ 22 ॥

विरिञ्च्याख्या मातः सृजसि हरिसञ्ज्ञा त्वमवसि

त्रिलोकीं रुद्राख्या हरसि विदधासीश्वरदशाम् ।

भवन्ती नादाख्या विहरसि च पाशौघदलनी

त्वमेवैकाऽनेका भवसि कृतिभेदैर्गिरिसुते ॥ 23 ॥

मुनीनां चेतोभिः प्रमृदितकषायैरपि मना-

-गशक्यं संस्प्रष्टुं चकितचकितैरम्ब सततम् ।

श्रुतीनां मूर्धानः प्रकृतिकठिनाः कोमलतरे

कथं ते विन्दन्ते पदकिसलये पार्वति पदम् ॥ 24 ॥

तटिद्वल्लीं नित्याममृतसरितं पाररहितां

मलोत्तीर्णां ज्योत्स्नां प्रकृतिमगुणग्रन्थिगहनाम् ।

गिरां दूरां विद्यामविनतकुचां विश्वजननी-

-मपर्यन्तां लक्ष्मीमभिदधति सन्तो भगवतीम् ॥ 25 ॥

शरीरं क्षित्यम्भः प्रभृतिरचितं केवलमचित्

सुखं दुःखं चायं कलयति पुमांश्चेतन इति ।

स्फुटं जानानोऽपि प्रभवति न देही रहयितुं

शरीराहङ्कारं तव समयबाह्यो गिरिसुते ॥ 26 ॥

पिता माता भ्राता सुहृदनुचरः सद्म गृहिणी

वपुः क्षेत्रं मित्रं धनमपि यदा मां विजहति ।

तदा मे भिन्दाना सपदि भयमोहान्धतमसं

महाज्योत्स्ने मातर्भव करुणया सन्निधिकरी ॥ 27 ॥

सुता दक्षस्यादौ किल सकलमातस्त्वमुदभूः

सदोषं तं हित्वा तदनु गिरिराजस्य दुहिता ।

अनाद्यन्ता शम्भोरपृथगपि शक्तिर्भगवती

विवाहाज्जायासीत्यहह चरितं वेत्ति तव कः ॥ 28 ॥

कणास्त्वद्दीप्तीनां रविशशिकृशानुप्रभृतयः

परं ब्रह्म क्षुद्रं तव नियतमानन्दकणिका ।

शिवादि क्षित्यन्तं त्रिवलयतनोः सर्वमुदरे

तवास्ते भक्तस्य स्फुरसि हृदि चित्रं भगवति ॥ 29 ॥

पुरः पश्चादन्तर्बहिरपरिमेयं परिमितं

परं स्थूलं सूक्ष्मं सकलमकुलं गुह्यमगुहम् ।

दवीयो नेदीयः सदसदिति विश्वं भगवती

सदा पश्यन्त्याख्यां वहसि भुवनक्षोभजननीम् ॥ 30 ॥

प्रविश्य त्वन्मार्गं सहजदयया देशिकदृशा

षडध्वध्वान्तौघच्छिदुरगणनातीतकरुणाम् ।

परामाज्ञाकारां सपदि शिवयन्तीं शिवतनुं

स्वमात्मानं धन्याश्चिरमुपलभन्ते भगवतीम् ॥ 31 ॥

मयूखाः पूष्णीव ज्वलन इव तद्दीप्तिकणिकाः

पयोधौ कल्लोलाः प्रतिहतमहिम्नीव पृषतः ।

उदेत्योदेत्याम्ब त्वयि सह निजैः सात्त्विकगुणै-

-र्भजन्ते तत्त्वौघाः प्रशममनुकल्पं परवशाः ॥ 32 ॥

विधुर्विष्णुर्ब्रह्मा प्रकृतिरणुरात्मा दिनकरः

स्वभावो जैनेन्द्रः सुगतमुनिराकाशमलिनः ।

शिवः शक्तिश्चेति श्रुतिविषयतां तामुपगतां

विकल्पैरेभिस्त्वामभिदधति सन्तो भगवतीम् ॥ 33 ॥

शिवस्त्वं शक्तिस्त्वं त्वमसि समया त्वं समयिनी

त्वमात्मा त्वं दीक्षा त्वमयमणिमादिर्गुणगणः ।

अविद्या त्वं विद्या त्वमसि निखिलं त्वं किमपरं

पृथक्तत्त्वं त्वत्तो भगवति न वीक्षामह इमे ॥ 34 ॥

त्वयासौ जानीते रचयति भवत्यैव सततं

त्वयैवेच्छत्यम्ब त्वमसि निखिला यस्य तनवः ।

जगत्साम्यं शम्भोर्वहसि परमव्योमवपुषः

तथाप्यर्धं भूत्वा विहरसि शिवस्येति किमिदम् ॥ 35 ॥

असङ्ख्यैः प्राचीनैर्जननि जननैः कर्मविलया-

-त्सकृज्जन्मन्यन्ते गुरुवपुषमासाद्य गिरिशम् ।

अवाप्याज्ञां शैवीं शिवतनुमपि त्वां विदितवा-

-न्नयेयं त्वत्पूजास्तुतिविरचनेनैव दिवसान् ॥ 36 ॥

यत्षट्पत्रं कमलमुदितं तस्य या कर्णिकाख्या

योनिस्तस्याः प्रथितमुदरे यत्तदोङ्कारपीठम् ।

तस्याप्यन्तः कुचभरनतां कुण्डलीति प्रसिद्धां

श्यामाकारां सकलजननीं सन्ततं भावयामि ॥ 37 ॥

भुवि पयसि कृशानौ मारुते खे शशाङ्के

सवितरि यजमानेऽप्यष्टधा शक्तिरेका ।

वहसि कुचभराभ्यां यावनम्रापि विश्वं

सकलजननि सा त्वं पाहि मामित्यवाच्यम् ॥ 38 ॥

इति श्रीकालिदास विरचित पञ्चस्तव्यां पञ्चमः सकलजननीस्तवः ।