Laghu Stavah — Sinhala Script

ඓන්ද්රස්යේව ශරාසනස්ය දධතී මධ්යේලලාටං ප්රභාං

ශෞක්ලීං කාන්තිමනුෂ්ණගෝරිව ශිරස්යාතන්වතී සර්වතඃ .

ඒෂාසෞ ත්රිපුරා හෘදි ද්යුතිරිවෝෂ්ණාංශෝඃ සදාහඃ ස්ථිතාත්

ඡින්ද්යාන්නඃ සහසා පදෛස්ත්රිභිරඝං ජ්යෝතිර්මයී වාඞ්මයී .. 1 ..

යා මාත්රා ත්රපුසීලතාතනුලසත්තන්තූත්ථිතිස්පර්ධිනී

වාග්බීජේ ප්රථමේ ස්ථිතා තව සදා තාං මන්මහේ තේ වයම් .

ශක්තිඃ කුණ්ඩලිනීති විශ්වජනනව්යාපාරබද්ධෝද්යමාඃ

ජ්ඤාත්වේත්ථං න පුනඃ ස්පෘශන්ති ජනනීගර්භේ(අ)ර්භකත්වං නරාඃ .. 2 ..

දෘෂ්ට්වා සම්භ්රමකාරි වස්තු සහසා ඓ ඓ ඉති ව්යාහෘතං

යේනාකූතවශාදපීහ වරදේ බින්දුං විනාප්යක්ෂරම් .

තස්යාපි ධ්රුවමේව දේවි තරසා ජාතේ තවානුග්රහේ

වාචඃසූක්තිසුධාරසද්රවමුචෝ නිර්යාන්ති වක්ත්රාම්බුජාත් .. 3 ..

යන්නිත්යේ තව කාමරාජමපරං මන්ත්රාක්ෂරං නිෂ්කලං

තත්සාරස්වතමිත්යවෛති විරලඃ කශ්චිද්බුධශ්චේද්භුවි .

ආඛ්යානං ප්රතිපර්ව සත්යතපසෝ යත්කීර්තයන්තෝ ද්විජාඃ

ප්රාරම්භේ ප්රණවාස්පදප්රණයිතාං නීත්වෝච්චරන්ති ස්ඵුටම් .. 4 ..

යත්සද්යෝ වචසාං ප්රවෘත්තිකරණේ දෘෂ්ටප්රභාවං බුධෛඃ

තාර්තීයං තදහං නමාමි මනසා ත්වද්බීජමින්දුප්රභම් .

අස්ත්යෞර්වෝ(අ)පි සරස්වතීමනුගතෝ ජාඩ්යාම්බුවිච්ඡිත්තයේ

ගෝශබ්දෝ ගිරි වර්තතේ සනියතං යෝගං විනා සිද්ධිදඃ .. 5 ..

ඒකෛකං තව දේවි බීජමනඝං සව්යඤ්ජනාව්යඤ්ජනං

කූටස්ථං යදි වා පෘථක් ක්රමගතං යද්වා ස්ථිතං ව්යුත්ක්රමාත් .

යං යං කාමමපේක්ෂ්ය යේන විධිනා කේනාපි වා චින්තිතං

ජප්තං වා සඵලීකරෝති සතතං තං තං සමස්තං නෘණාම් .. 6 ..

වාමේ පුස්තකධාරිණීමභයදාං සාක්ෂස්රජං දක්ෂිණේ

භක්තේභ්යෝ වරදානපේශලකරාං කර්පූරකුන්දෝජ්ජ්වලාම් .

උජ්ජෘම්භාම්බුජපත්රකාන්තිනයනස්නිග්ධප්රභාලෝකිනීං

යේ ත්වාමම්බ න ශීලයන්ති මනසා තේෂාං කවිත්වං කුතඃ .. 7 ..

යේ ත්වාං පාණ්ඩුරපුණ්ඩරීකපටලස්පෂ්ටාභිරාමප්රභාං

සිඤ්චන්තීමමෘතද්රවෛරිව ශිරෝ ධ්යායන්ති මූර්ධ්නි ස්ථිතාම් .

අශ්රාන්තා විකටස්ඵුටාක්ෂරපදා නිර්යාති වක්ත්රාම්බුජාත්

තේෂාං භාරති භාරතී සුරසරිත්කල්ලෝලලෝලෝර්මිවත් .. 8 ..

යේ සින්දූරපරාගපිඤ්ජපිහිතාං ත්වත්තේජසාද්යාමිමාං

උර්වීං චාපි විලීනයාවකරසප්රස්තාරමග්නාමිව .

පශ්යන්ති ක්ෂණමප්යනන්යමනසස්තේෂාමනඞ්ගජ්වර-

-ක්ලාන්තස්රස්තකුරඞ්ගශාබකදෘශෝ වශ්යා භවන්ති ස්ඵුටම් .. 9 ..

චඤ්චත්කාඤ්චනකුණ්ඩලාඞ්ගදධරාමාබද්ධකාඤ්චීස්රජං

යේ ත්වාං චේතසි තද්ගතේ ක්ෂණමපි ධ්යායන්ති කෘත්වා ස්ථිරාම් .

තේෂාං වේශ්මසු විභ්රමාදහරහඃ ස්ඵාරීභවන්ත්යශ්චිරං

මාද්යත්කුඤ්ජරකර්ණතාලතරලාඃ ස්ථෛර්යං භජන්තේ ශ්රියඃ .. 10 ..

ආර්භට්යා ශශිඛණ්ඩමණ්ඩිතජටාජූටාං නෘමුණ්ඩස්රජං

බන්ධූකප්රසවාරුණාම්බරධරාං ප්රේතාසනාධ්යාසිනීම් .

ත්වාං ධ්යායන්ති චතුර්භුජාං ත්රිනයනාමාපීනතුඞ්ගස්තනීං

මධ්යේ නිම්නවලිත්රයාඞ්කිතතනුං ත්වද්රූපසංවිත්තයේ .. 11 ..

ජාතෝ(අ)ප්යල්පපරිච්ඡදේ ක්ෂිතිභුජාං සාමාන්යමාත්රේ කුලේ

නිඃශේෂාවනිචක්රවර්තිපදවීං ලබ්ධ්වා ප්රතාපෝන්නතඃ .

යද්විද්යාධර බෘන්දවන්දිතපදඃ ශ්රීවත්සරාජෝ(අ)භවත්

දේවි ත්වච්චරණාම්බුජ ප්රණතිජඃ සෝ(අ)යං ප්රසාදෝදයඃ .. 12 ..

චණ්ඩි ත්වච්චරණාම්බුජාර්චනකෘතේ බිල්වාදිලෝල්ලුණ්ඨන-

-ත්රුට්යත්කණ්ටකකෝටිභිඃ පරිචයං යේෂාං න ජග්මුඃ කරාඃ .

තේ දණ්ඩාඞ්කුශචක්රචාපකුලිශශ්රීවත්සමත්ස්යාඞ්කිතෛඃ

ජායන්තේ පෘථිවීභුජඃ කථමිවාම්භෝජප්රභෛඃ පාණිභිඃ .. 13 ..

විප්රාඃ ක්ෂෝණිභුජෝ විශස්තදිතරේ ක්ෂීරාජ්යමධ්වාසවෛඃ .

ත්වාං දේවි ත්රිපුරේ පරාපරමයීං සන්තර්ප්ය පූජාවිධෞ .

යාං යාං ප්රාර්ථයතේ මනඃ ස්ථිරධියාං තේෂාං ත ඒව ධ්රුවං

තාං තාං සිද්ධිමවාප්නුවන්ති තරසා විඝ්නෛරවිඝ්නීකෘතාඃ .. 14 ..

ශබ්දානාං ජනනී ත්වමත්ර භුවනේ වාග්වාදිනීත්යුච්යසේ

ත්වත්තඃ කේශවවාසව ප්රභෘතයෝ(අ)ප්යාවිර්භවන්ති ස්ඵුටම් .

ලීයන්තේ ඛලු යත්ර කල්පවිරමේ බ්රහ්මාදයස්තේ(අ)ප්යමී

සා ත්වං කාචිදචින්ත්යරූපමහිමා ශක්තිඃ පරා ගීයසේ .. 15 ..

දේවානාං ත්රිතයං ත්රයී හුතභුජාං ශක්තිත්රයං ත්රිඃ ස්වරාඃ

ත්රෛලෝක්යං ත්රිපදී ත්රිපුෂ්කරමථෝ ත්රිබ්රහ්ම වර්ණාස්ත්රයඃ .

යත්කිඤ්චිජ්ජගති ත්රිධා නියමිතං වස්තු ත්රිවර්ගාදිකං

තත්සර්වං ත්රිපුරේති නාම භගවත්යන්වේති තේ තත්ත්වතඃ .. 16 ..

ලක්ෂ්මීං රාජකුලේ ජයාං රණභුවි ක්ෂේමඞ්කරීමධ්වනි

ක්රව්යාදද්විපසර්පභාජි ශබරීං කාන්තාරදුර්ගේ ගිරෞ .

භූතප්රේතපිශාචජම්බුකභයේ ස්මෘත්වා මහාභෛරවීං

ව්යාමෝහේ ත්රිපුරාං තරන්ති විපදස්තාරාං ච තෝයප්ලවේ .. 17 ..

මායා කුණ්ඩලිනී ක්රියා මධුමතී කාලී කලාමාලිනී

මාතඞ්ගී විජයා ජයා භගවතී දේවී ශිවා ශාම්භවී .

ශක්තිඃ ශඞ්කරවල්ලභා ත්රිනයනා වාග්වාදිනී භෛරවී

හ්රීඞ්කාරී ත්රිපුරා පරාපරමයී මාතා කුමාරීත්යසි .. 18 ..

ආඊපල්ලවිතෛඃ පරස්පරයුතෛර්ද්විත්රික්රමාද්යක්ෂරෛ

කාද්යෛඃ ක්ෂාන්තගතෛඃ ස්වරාදිභිරථ ක්ෂාන්තෛශ්ච තෛඃ සස්වරෛඃ .

නාමානි ත්රිපුරේ භවන්ති ඛලු යාන්යත්යන්තගුහ්යානි තේ

තේභ්යෝ භෛරවපත්නි විංශතිසහස්රේභ්යඃ පරේභ්යෝ නමඃ .. 19 ..

බෝද්ධව්යා නිපුණං බුධෛඃ ස්තුතිරියං කෘත්වා මනස්තද්ගතං

භාරත්යාස්ත්රිපුරේත්යනන්යමනසා යත්රාද්යවෘත්තේ ස්ඵුටම් .

ඒකද්විත්රිපදක්රමේණ කථිතස්තත්පාදසඞ්ඛ්යාක්ෂරෛඃ

මන්ත්රෝද්ධාර විධිර්විශේෂසහිතඃ සත්සම්ප්රදායාන්විතඃ .. 20 ..

සාවද්යං නිරවද්යමස්තු යදි වා කිං වානයා චින්තයා

නූනං ස්තෝත්රමිදං පඨිෂ්යති ජනෝ යස්යාස්ති භක්තිස්ත්වයි .

සඤ්චින්ත්යාපි ලඝුත්වමාත්මනි දෘඪං සඤ්ජායමානං හඨාත්

ත්වද්භක්ත්යා මුඛරීකෘතේන රචිතං යස්මාන්මයාපි ධෘවම් .. 21 ..

ඉති ශ්රීකාලිදාස විරචිත පඤ්චස්තව්යාං ප්රථමඃ ලඝුස්තවඃ .

Roman (IAST) Transliteration

aindrasyeva śarāsanasya dadhatī madhyelalāṭaṃ prabhāṃ

śauklīṃ kāntimanuṣṇagoriva śirasyātanvatī sarvataḥ |

eṣāsau tripurā hṛdi dyutirivoṣṇāṃśoḥ sadāhaḥ sthitāt

chindyānnaḥ sahasā padaistribhiraghaṃ jyotirmayī vāṅmayī || 1 ||

yā mātrā trapusīlatātanulasattantūtthitispardhinī

vāgbīje prathame sthitā tava sadā tāṃ manmahe te vayam |

śaktiḥ kuṇḍalinīti viśvajananavyāpārabaddhodyamāḥ

jñātvetthaṃ na punaḥ spṛśanti jananīgarbhe'rbhakatvaṃ narāḥ || 2 ||

dṛṣṭvā sambhramakāri vastu sahasā ai ai iti vyāhṛtaṃ

yenākūtavaśādapīha varade binduṃ vināpyakṣaram |

tasyāpi dhruvameva devi tarasā jāte tavānugrahe

vācaḥsūktisudhārasadravamuco niryānti vaktrāmbujāt || 3 ||

yannitye tava kāmarājamaparaṃ mantrākṣaraṃ niṣkalaṃ

tatsārasvatamityavaiti viralaḥ kaścidbudhaścedbhuvi |

ākhyānaṃ pratiparva satyatapaso yatkīrtayanto dvijāḥ

prārambhe praṇavāspadapraṇayitāṃ nītvoccaranti sphuṭam || 4 ||

yatsadyo vacasāṃ pravṛttikaraṇe dṛṣṭaprabhāvaṃ budhaiḥ

tārtīyaṃ tadahaṃ namāmi manasā tvadbījaminduprabham |

astyaurvo'pi sarasvatīmanugato jāḍyāmbuvicchittaye

gośabdo giri vartate saniyataṃ yogaṃ vinā siddhidaḥ || 5 ||

ekaikaṃ tava devi bījamanaghaṃ savyañjanāvyañjanaṃ

kūṭasthaṃ yadi vā pṛthak kramagataṃ yadvā sthitaṃ vyutkramāt |

yaṃ yaṃ kāmamapekṣya yena vidhinā kenāpi vā cintitaṃ

japtaṃ vā saphalīkaroti satataṃ taṃ taṃ samastaṃ nṛṇām || 6 ||

vāme pustakadhāriṇīmabhayadāṃ sākṣasrajaṃ dakṣiṇe

bhaktebhyo varadānapeśalakarāṃ karpūrakundojjvalām |

ujjṛmbhāmbujapatrakāntinayanasnigdhaprabhālokinīṃ

ye tvāmamba na śīlayanti manasā teṣāṃ kavitvaṃ kutaḥ || 7 ||

ye tvāṃ pāṇḍurapuṇḍarīkapaṭalaspaṣṭābhirāmaprabhāṃ

siñcantīmamṛtadravairiva śiro dhyāyanti mūrdhni sthitām |

aśrāntā vikaṭasphuṭākṣarapadā niryāti vaktrāmbujāt

teṣāṃ bhārati bhāratī surasaritkallolalolormivat || 8 ||

ye sindūraparāgapiñjapihitāṃ tvattejasādyāmimāṃ

urvīṃ cāpi vilīnayāvakarasaprastāramagnāmiva |

paśyanti kṣaṇamapyananyamanasasteṣāmanaṅgajvara-

-klāntasrastakuraṅgaśābakadṛśo vaśyā bhavanti sphuṭam || 9 ||

cañcatkāñcanakuṇḍalāṅgadadharāmābaddhakāñcīsrajaṃ

ye tvāṃ cetasi tadgate kṣaṇamapi dhyāyanti kṛtvā sthirām |

teṣāṃ veśmasu vibhramādaharahaḥ sphārībhavantyaściraṃ

mādyatkuñjarakarṇatālataralāḥ sthairyaṃ bhajante śriyaḥ || 10 ||

ārbhaṭyā śaśikhaṇḍamaṇḍitajaṭājūṭāṃ nṛmuṇḍasrajaṃ

bandhūkaprasavāruṇāmbaradharāṃ pretāsanādhyāsinīm |

tvāṃ dhyāyanti caturbhujāṃ trinayanāmāpīnatuṅgastanīṃ

madhye nimnavalitrayāṅkitatanuṃ tvadrūpasaṃvittaye || 11 ||

jāto'pyalpaparicchade kṣitibhujāṃ sāmānyamātre kule

niḥśeṣāvanicakravartipadavīṃ labdhvā pratāponnataḥ |

yadvidyādhara bṛndavanditapadaḥ śrīvatsarājo'bhavat

devi tvaccaraṇāmbuja praṇatijaḥ so'yaṃ prasādodayaḥ || 12 ||

caṇḍi tvaccaraṇāmbujārcanakṛte bilvādilolluṇṭhana-

-truṭyatkaṇṭakakoṭibhiḥ paricayaṃ yeṣāṃ na jagmuḥ karāḥ |

te daṇḍāṅkuśacakracāpakuliśaśrīvatsamatsyāṅkitaiḥ

jāyante pṛthivībhujaḥ kathamivāmbhojaprabhaiḥ pāṇibhiḥ || 13 ||

viprāḥ kṣoṇibhujo viśastaditare kṣīrājyamadhvāsavaiḥ |

tvāṃ devi tripure parāparamayīṃ santarpya pūjāvidhau |

yāṃ yāṃ prārthayate manaḥ sthiradhiyāṃ teṣāṃ ta eva dhruvaṃ

tāṃ tāṃ siddhimavāpnuvanti tarasā vighnairavighnīkṛtāḥ || 14 ||

śabdānāṃ jananī tvamatra bhuvane vāgvādinītyucyase

tvattaḥ keśavavāsava prabhṛtayo'pyāvirbhavanti sphuṭam |

līyante khalu yatra kalpavirame brahmādayaste'pyamī

sā tvaṃ kācidacintyarūpamahimā śaktiḥ parā gīyase || 15 ||

devānāṃ tritayaṃ trayī hutabhujāṃ śaktitrayaṃ triḥ svarāḥ

trailokyaṃ tripadī tripuṣkaramatho tribrahma varṇāstrayaḥ |

yatkiñcijjagati tridhā niyamitaṃ vastu trivargādikaṃ

tatsarvaṃ tripureti nāma bhagavatyanveti te tattvataḥ || 16 ||

lakṣmīṃ rājakule jayāṃ raṇabhuvi kṣemaṅkarīmadhvani

kravyādadvipasarpabhāji śabarīṃ kāntāradurge girau |

bhūtapretapiśācajambukabhaye smṛtvā mahābhairavīṃ

vyāmohe tripurāṃ taranti vipadastārāṃ ca toyaplave || 17 ||

māyā kuṇḍalinī kriyā madhumatī kālī kalāmālinī

mātaṅgī vijayā jayā bhagavatī devī śivā śāmbhavī |

śaktiḥ śaṅkaravallabhā trinayanā vāgvādinī bhairavī

hrīṅkārī tripurā parāparamayī mātā kumārītyasi || 18 ||

āīpallavitaiḥ parasparayutairdvitrikramādyakṣarai

kādyaiḥ kṣāntagataiḥ svarādibhiratha kṣāntaiśca taiḥ sasvaraiḥ |

nāmāni tripure bhavanti khalu yānyatyantaguhyāni te

tebhyo bhairavapatni viṃśatisahasrebhyaḥ parebhyo namaḥ || 19 ||

boddhavyā nipuṇaṃ budhaiḥ stutiriyaṃ kṛtvā manastadgataṃ

bhāratyāstripuretyananyamanasā yatrādyavṛtte sphuṭam |

ekadvitripadakrameṇa kathitastatpādasaṅkhyākṣaraiḥ

mantroddhāra vidhirviśeṣasahitaḥ satsampradāyānvitaḥ || 20 ||

sāvadyaṃ niravadyamastu yadi vā kiṃ vānayā cintayā

nūnaṃ stotramidaṃ paṭhiṣyati jano yasyāsti bhaktistvayi |

sañcintyāpi laghutvamātmani dṛḍhaṃ sañjāyamānaṃ haṭhāt

tvadbhaktyā mukharīkṛtena racitaṃ yasmānmayāpi dhṛvam || 21 ||

iti śrīkālidāsa viracita pañcastavyāṃ prathamaḥ laghustavaḥ |

Sanskrit — Devanagari (original)

ऐन्द्रस्येव शरासनस्य दधती मध्येललाटं प्रभां

शौक्लीं कान्तिमनुष्णगोरिव शिरस्यातन्वती सर्वतः ।

एषासौ त्रिपुरा हृदि द्युतिरिवोष्णांशोः सदाहः स्थितात्

छिन्द्यान्नः सहसा पदैस्त्रिभिरघं ज्योतिर्मयी वाङ्मयी ॥ 1 ॥

या मात्रा त्रपुसीलतातनुलसत्तन्तूत्थितिस्पर्धिनी

वाग्बीजे प्रथमे स्थिता तव सदा तां मन्महे ते वयम् ।

शक्तिः कुण्डलिनीति विश्वजननव्यापारबद्धोद्यमाः

ज्ञात्वेत्थं न पुनः स्पृशन्ति जननीगर्भेऽर्भकत्वं नराः ॥ 2 ॥

दृष्ट्वा सम्भ्रमकारि वस्तु सहसा ऐ ऐ इति व्याहृतं

येनाकूतवशादपीह वरदे बिन्दुं विनाप्यक्षरम् ।

तस्यापि ध्रुवमेव देवि तरसा जाते तवानुग्रहे

वाचःसूक्तिसुधारसद्रवमुचो निर्यान्ति वक्त्राम्बुजात् ॥ 3 ॥

यन्नित्ये तव कामराजमपरं मन्त्राक्षरं निष्कलं

तत्सारस्वतमित्यवैति विरलः कश्चिद्बुधश्चेद्भुवि ।

आख्यानं प्रतिपर्व सत्यतपसो यत्कीर्तयन्तो द्विजाः

प्रारम्भे प्रणवास्पदप्रणयितां नीत्वोच्चरन्ति स्फुटम् ॥ 4 ॥

यत्सद्यो वचसां प्रवृत्तिकरणे दृष्टप्रभावं बुधैः

तार्तीयं तदहं नमामि मनसा त्वद्बीजमिन्दुप्रभम् ।

अस्त्यौर्वोऽपि सरस्वतीमनुगतो जाड्याम्बुविच्छित्तये

गोशब्दो गिरि वर्तते सनियतं योगं विना सिद्धिदः ॥ 5 ॥

एकैकं तव देवि बीजमनघं सव्यञ्जनाव्यञ्जनं

कूटस्थं यदि वा पृथक् क्रमगतं यद्वा स्थितं व्युत्क्रमात् ।

यं यं काममपेक्ष्य येन विधिना केनापि वा चिन्तितं

जप्तं वा सफलीकरोति सततं तं तं समस्तं नृणाम् ॥ 6 ॥

वामे पुस्तकधारिणीमभयदां साक्षस्रजं दक्षिणे

भक्तेभ्यो वरदानपेशलकरां कर्पूरकुन्दोज्ज्वलाम् ।

उज्जृम्भाम्बुजपत्रकान्तिनयनस्निग्धप्रभालोकिनीं

ये त्वामम्ब न शीलयन्ति मनसा तेषां कवित्वं कुतः ॥ 7 ॥

ये त्वां पाण्डुरपुण्डरीकपटलस्पष्टाभिरामप्रभां

सिञ्चन्तीममृतद्रवैरिव शिरो ध्यायन्ति मूर्ध्नि स्थिताम् ।

अश्रान्ता विकटस्फुटाक्षरपदा निर्याति वक्त्राम्बुजात्

तेषां भारति भारती सुरसरित्कल्लोललोलोर्मिवत् ॥ 8 ॥

ये सिन्दूरपरागपिञ्जपिहितां त्वत्तेजसाद्यामिमां

उर्वीं चापि विलीनयावकरसप्रस्तारमग्नामिव ।

पश्यन्ति क्षणमप्यनन्यमनसस्तेषामनङ्गज्वर-

-क्लान्तस्रस्तकुरङ्गशाबकदृशो वश्या भवन्ति स्फुटम् ॥ 9 ॥

चञ्चत्काञ्चनकुण्डलाङ्गदधरामाबद्धकाञ्चीस्रजं

ये त्वां चेतसि तद्गते क्षणमपि ध्यायन्ति कृत्वा स्थिराम् ।

तेषां वेश्मसु विभ्रमादहरहः स्फारीभवन्त्यश्चिरं

माद्यत्कुञ्जरकर्णतालतरलाः स्थैर्यं भजन्ते श्रियः ॥ 10 ॥

आर्भट्या शशिखण्डमण्डितजटाजूटां नृमुण्डस्रजं

बन्धूकप्रसवारुणाम्बरधरां प्रेतासनाध्यासिनीम् ।

त्वां ध्यायन्ति चतुर्भुजां त्रिनयनामापीनतुङ्गस्तनीं

मध्ये निम्नवलित्रयाङ्किततनुं त्वद्रूपसंवित्तये ॥ 11 ॥

जातोऽप्यल्पपरिच्छदे क्षितिभुजां सामान्यमात्रे कुले

निःशेषावनिचक्रवर्तिपदवीं लब्ध्वा प्रतापोन्नतः ।

यद्विद्याधर बृन्दवन्दितपदः श्रीवत्सराजोऽभवत्

देवि त्वच्चरणाम्बुज प्रणतिजः सोऽयं प्रसादोदयः ॥ 12 ॥

चण्डि त्वच्चरणाम्बुजार्चनकृते बिल्वादिलोल्लुण्ठन-

-त्रुट्यत्कण्टककोटिभिः परिचयं येषां न जग्मुः कराः ।

ते दण्डाङ्कुशचक्रचापकुलिशश्रीवत्समत्स्याङ्कितैः

जायन्ते पृथिवीभुजः कथमिवाम्भोजप्रभैः पाणिभिः ॥ 13 ॥

विप्राः क्षोणिभुजो विशस्तदितरे क्षीराज्यमध्वासवैः ।

त्वां देवि त्रिपुरे परापरमयीं सन्तर्प्य पूजाविधौ ।

यां यां प्रार्थयते मनः स्थिरधियां तेषां त एव ध्रुवं

तां तां सिद्धिमवाप्नुवन्ति तरसा विघ्नैरविघ्नीकृताः ॥ 14 ॥

शब्दानां जननी त्वमत्र भुवने वाग्वादिनीत्युच्यसे

त्वत्तः केशववासव प्रभृतयोऽप्याविर्भवन्ति स्फुटम् ।

लीयन्ते खलु यत्र कल्पविरमे ब्रह्मादयस्तेऽप्यमी

सा त्वं काचिदचिन्त्यरूपमहिमा शक्तिः परा गीयसे ॥ 15 ॥

देवानां त्रितयं त्रयी हुतभुजां शक्तित्रयं त्रिः स्वराः

त्रैलोक्यं त्रिपदी त्रिपुष्करमथो त्रिब्रह्म वर्णास्त्रयः ।

यत्किञ्चिज्जगति त्रिधा नियमितं वस्तु त्रिवर्गादिकं

तत्सर्वं त्रिपुरेति नाम भगवत्यन्वेति ते तत्त्वतः ॥ 16 ॥

लक्ष्मीं राजकुले जयां रणभुवि क्षेमङ्करीमध्वनि

क्रव्यादद्विपसर्पभाजि शबरीं कान्तारदुर्गे गिरौ ।

भूतप्रेतपिशाचजम्बुकभये स्मृत्वा महाभैरवीं

व्यामोहे त्रिपुरां तरन्ति विपदस्तारां च तोयप्लवे ॥ 17 ॥

माया कुण्डलिनी क्रिया मधुमती काली कलामालिनी

मातङ्गी विजया जया भगवती देवी शिवा शाम्भवी ।

शक्तिः शङ्करवल्लभा त्रिनयना वाग्वादिनी भैरवी

ह्रीङ्कारी त्रिपुरा परापरमयी माता कुमारीत्यसि ॥ 18 ॥

आईपल्लवितैः परस्परयुतैर्द्वित्रिक्रमाद्यक्षरै

काद्यैः क्षान्तगतैः स्वरादिभिरथ क्षान्तैश्च तैः सस्वरैः ।

नामानि त्रिपुरे भवन्ति खलु यान्यत्यन्तगुह्यानि ते

तेभ्यो भैरवपत्नि विंशतिसहस्रेभ्यः परेभ्यो नमः ॥ 19 ॥

बोद्धव्या निपुणं बुधैः स्तुतिरियं कृत्वा मनस्तद्गतं

भारत्यास्त्रिपुरेत्यनन्यमनसा यत्राद्यवृत्ते स्फुटम् ।

एकद्वित्रिपदक्रमेण कथितस्तत्पादसङ्ख्याक्षरैः

मन्त्रोद्धार विधिर्विशेषसहितः सत्सम्प्रदायान्वितः ॥ 20 ॥

सावद्यं निरवद्यमस्तु यदि वा किं वानया चिन्तया

नूनं स्तोत्रमिदं पठिष्यति जनो यस्यास्ति भक्तिस्त्वयि ।

सञ्चिन्त्यापि लघुत्वमात्मनि दृढं सञ्जायमानं हठात्

त्वद्भक्त्या मुखरीकृतेन रचितं यस्मान्मयापि धृवम् ॥ 21 ॥

इति श्रीकालिदास विरचित पञ्चस्तव्यां प्रथमः लघुस्तवः ।