2.1 - Vayavyagg Shveta Ma Labheta - Krishna Yajurveda Taittiriya Samhita Pathah — Sinhala Script

කෘෂ්ණ යජුර්වේදීය තෛත්තිරීය සංහිතායා-න්ද්විතීයකාණ්ඩේ ප්රථමඃ ප්රශ්නඃ - පශුවිධානං

ඕ-න්නමඃ පරමාත්මනේ, ශ්රී මහාගණපතයේ නමඃ,

ශ්රී ගුරුභ්යෝ නමඃ . හ॒රිඃ॒ ඕම් ..

වා॒ය॒ව්යග්ග්॑ ශ්වේ॒තමා ල॑භේත॒ භූති॑කාමෝ වා॒යුර්වෛ ක්ෂේපි॑ෂ්ඨා දේ॒වතා॑වා॒යුමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛන॒-ම්භූති॑-ඞ්ගමයති॒ භව॑ත්යේ॒වා-ති॑ක්ෂිප්රා දේ॒වතේත්යා॑හු॒-ස්සෛන॑මීශ්ව॒රා ප්ර॒දහ॒ ඉත්යේ॒තමේ॒ව සන්තං॑-වාँ॒යවේ॑ නි॒යුත්ව॑ත॒ ආ ල॑භේත නි॒යුද්වා අ॑ස්ය॒ ධෘති॑ර්ධෘ॒ත ඒ॒ව භූති॒මුපෛ॒ත්ය ප්ර॑දාහාය॒ භව॑ත්යේ॒ව [ ] 1

වා॒යවේ॑ නි॒යුත්ව॑ත॒ ආ ල॑භේත॒ ග්රාම॑කාමෝ වා॒යුර්වා ඉ॒මාඃ ප්ර॒ජා න॑ස්යෝ॒තා නේ॑නීයතේ වා॒යුමේ॒ව නි॒යුත්ව॑න්ත॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ᳚ ප්ර॒ජා න॑ස්යෝ॒තා නිය॑ච්ඡති ග්රා॒ම්යේ॑ව භ॑වති නි॒යුත්ව॑තේ භවති ධ්රු॒වා ඒ॒වාස්මා॒ අන॑පගාඃ කරෝති වා॒යවේ॑ නි॒යුත්ව॑ත॒ ආ ල॑භේත ප්ර॒ජාකා॑මඃ ප්රා॒ණෝ වෛ වා॒යුර॑පා॒නෝ නි॒යු-ත්ප්රා॑ණාපා॒නෞ ඛලු॒ වා ඒ॒තස්ය॑ ප්ර॒ජායා॒ [ප්ර॒ජායාඃ᳚, අප॑] 2

අප॑ ක්රාමතෝ॒ යෝ-(අ)ල॑-ම්ප්ර॒ජායෛ॒ ස-න්ප්ර॒ජා-න්න වි॒න්දතේ॑ වා॒යුමේ॒ව නි॒යුත්ව॑න්ත॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ᳚ ප්රාණාපා॒නාභ්යා᳚-ම්ප්ර॒ජා-ම්ප්ර ජ॑නයති වි॒න්දතේ᳚ ප්ර॒ජාං-වාँ॒යවේ॑ නි॒යුත්ව॑ත॒ ආ ල॑භේත॒ ජ්යෝගා॑මයාවී ප්රා॒ණෝ වෛ වා॒යුර॑පා॒නෝ නි॒යු-ත්ප්රා॑ණාපා॒නෞ ඛලු॒ වා ඒ॒තස්මා॒ දප॑ක්රාමතෝ॒ යස්ය॒ ජ්යෝගා॒මය॑ති වා॒යුමේ॒ව නි॒යුත්ව॑න්ත॒ග්ග්॒ ස්වේන॑ භාග॒ධේයේ॒නෝප॑ - [භාග॒ධේයේ॒නෝප॑, ධා॒ව॒ති॒ ස] 3

ධාවති॒ ස ඒ॒වා-(අ)ස්මි॑-න්ප්රාණාපා॒නෞ ද॑ධාත්යු॒ත යදී॒තාසු॒ර්භව॑ති॒ ජීව॑ත්යේ॒ව ප්ර॒ජාප॑ති॒ර්වා ඉ॒දමේක॑ ආසී॒-ථ්සෝ॑-(අ)කාමයත ප්ර॒ජාඃ ප॒ශූන්-ථ්සෘ॑ජේ॒යේති॒ ස ආ॒ත්මනෝ॑ ව॒පාමුද॑ක්ඛිද॒-ත්තාම॒ග්නෞ ප්රාගෘ॑හ්ණා॒-ත්තතෝ॒-(අ)ජස්තූ॑ප॒ර-ස්සම॑භව॒-ත්තග්ග් ස්වායෛ॑ දේ॒වතා॑යා॒ ආ (අ)ල॑භත॒ තතෝ॒ වෛ ස ප්ර॒ජාඃ ප॒ශූන॑සෘජත॒ යඃ ප්ර॒ජාකා॑මඃ [ ] 4

ප॒ශුකා॑ම॒-ස්ස්යා-ථ්ස ඒ॒ත-ම්ප්රා॑ජාප॒ත්යම॒ජ-න්තූ॑ප॒රමා ල॑භේත ප්ර॒ජාප॑තිමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ᳚ ප්ර॒ජා-ම්ප॒ශූ-න්ප්රජ॑නයති॒ යච්ඡ්ම॑ශ්රු॒ණස්ත-ත්පුරු॑ෂාණාග්ං රූ॒පං-යँ-ත්තූ॑ප॒රස්තදශ්වා॑නාං॒-යँද॒න්යතෝ॑ද॒-න්ත-ද්ගවාං॒-යँදව්යා॑ ඉව ශ॒ඵාස්තදවී॑නාං॒-යँද॒ජස්ත-ද॒ජානා॑-මේ॒තාව॑න්තෝ॒ වෛ ග්රා॒ම්යාඃ ප॒ශව॒ස්තා- [ප॒ශව॒ස්තාන්, රූ॒පේණෛ॒වාව॑ රුන්ධේ] 5

-න්රූ॒පේණෛ॒වාව॑ රුන්ධේ සෝමාපෞ॒ෂ්ණ-න්ත්රෛ॒තමා ල॑භේත ප॒ශුකා॑මෝ॒ද්වෞ වා අ॒ජායෛ॒ ස්තනෞ॒ නානෛ॒ව ද්වාව॒භි ජායේ॑තේ॒ ඌර්ජ॒-ම්පුෂ්ටි॑-න්තෘ॒තීයඃ॑සෝමාපූ॒ෂණා॑වේ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මෛ॑ ප॒ශූ-න්ප්රජ॑නයත॒-ස්සෝමෝ॒ වෛ රේ॑තෝ॒ධාඃ පූ॒ෂා ප॑ශූ॒නා-ම්ප්ර॑ජනයි॒තා සෝම॑ ඒ॒වාස්මෛ॒ රේතෝ॒ දධා॑ති පූ॒ෂා ප॒ශූ-න්ප්ර ජ॑නය॒ත්යෞදු॑ම්බරෝ॒ යූපෝ॑ භව॒ත්යූර්ග්වා උ॑දු॒ම්බර॒ ඌර්ක්ප॒ශව॑ ඌ॒ර්ජෛවාස්මා॒ ඌර්ජ॑-ම්ප॒ශූනව॑ රුන්ධේ .. 6 ..

(අප්ර॑දාහාය॒ භව॑ත්යේ॒ව - ප්ර॒ජායා॑ - ආ॒මය॑ති වා॒යුමේ॒ව නි॒යුත්ව॑ත॒ග්ග්॒ ස්වේන॑ භාග॒ධේයේ॒නෝප॑ - ප්ර॒ජාක॑ම॒ - ස්තාන් - යූප॒ - ස්ත්රයෝ॑දශ ච ) (අ. 1)

ප්ර॒ජාප॑තිඃ ප්ර॒ජා අ॑සෘජත॒ තා අ॑ස්මා-ථ්සෘ॒ෂ්ටාඃ පරා॑චීරාය॒-න්තා වරු॑ණමගච්ඡ॒-න්තා අන්වෛ॒-ත්තාඃ පුන॑රයාචත॒ තා අ॑ස්මෛ॒ න පුන॑රදදා॒-ථ්සෝ᳚-(අ)බ්රවී॒-ද්වරං॑-වෘँණී॒ෂ්වාථ॑ මේ॒ පුන॑ර්දේ॒හීති॒ තාසාං॒-වँර॒මා (අ)ල॑භත॒ ස කෘ॒ෂ්ණ ඒක॑ශිතිපාද-භව॒ද්යෝ වරු॑ණ ගෘහීත॒-ස්ස්යා-ථ්ස ඒ॒තං-වාँ॑රු॒ණ-ඞ්කෘ॒ෂ්ණ-මේක॑ශිතිපාද॒මා-ල॑භේත॒ වරු॑ණ- [වරු॑ණම්, ඒ॒ව ස්වේන॑] 7

-මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛනං॑-වँරුණපා॒ශා-න්මු॑ඤ්චති කෘ॒ෂ්ණ ඒක॑ශිතිපා-ද්භවති වාරු॒ණෝ හ්යේ॑ෂ දේ॒වත॑යා॒ සමෘ॑ද්ධ්යෛ॒ සුව॑ර්භානුරාසු॒ර-ස්සූර්ය॒-න්තම॑සා-(අ)විද්ධ්ය॒ත තස්මෛ॑දේ॒වාඃ ප්රාය॑ශ්චිත්ති-මෛච්ඡ॒-න්තස්ය॒ ය-ත්ප්ර॑ථ॒ම-න්තමෝ॒-(අ)පාඝ්න॒න්-ථ්සා කෘ॒ෂ්ණා-(අ)වි॑රභව॒-ද්ය-ද්ද්වි॒තීය॒ග්ං॒ සා ඵල්ගු॑නී॒ යත තෘ॒තීය॒ග්ං॒ සා බ॑ල॒ක්ෂී යද॑ද්ධ්ය॒ස්ථා-ද॒පාකෘ॑න්ත॒න්-ථ්සා (අ)වි॑ර්ව॒ශා [ ] 8

සම॑භව॒-ත්තේ දේ॒වා අ॑බ්රුව-න්දේවප॒ශුර්වා අ॒යග්ං සම॑භූ॒-ත්කස්මා॑ ඉ॒මමා ල॑ඵ්ස්යාමහ॒ ඉත්යථ॒ වෛ තර්හ්යල්පා॑ පෘථි॒ව්යාසී॒-දජා॑තා॒ ඕෂ॑ධය॒ස්තාමවිං॑-වँ॒ශාමා॑දි॒ත්යේභ්යඃ॒ කාමා॒යා-(අ)ල॑භන්ත॒ තතෝ॒ වා අප්ර॑ථත පෘථි॒ව්ය-ජා॑ය॒න්තෞෂ॑ධයෝ॒ යඃ කා॒මයේ॑ත॒ ප්රථේ॑ය ප॒ශුභිඃ॒ ප්ර ප්ර॒ජයා॑ ජායේ॒යේති॒ ස ඒ॒තාමවිං॑-වँ॒ශාමා॑දි॒ත්යේභ්යඃ॒ කාමා॒යා- [කාමා॑ය, ආල॑භේතා (අ)(අ)දි॒ත්යානේ॒ව] 9

-(අ)(අ)ල॑භේතා (අ)(අ)දි॒ත්යානේ॒ව කාම॒ග්ග්॒ ස්වේන॑ භාග॒ධේයේ॒නෝප॑ ධාවති॒ ත ඒ॒වෛන॑-ම්ප්ර॒ථය॑න්ති ප॒ශුභිඃ॒ ප්ර ප්ර॒ජයා॑ ජනයන්ත්ය॒-සාවා॑දි॒ත්යෝ න ව්ය॑රෝචත॒ තස්මෛ॑ දේ॒වාඃ ප්රාය॑ශ්චිත්තිමෛච්ඡ॒-න්තස්මා॑ ඒ॒තා ම॒ල්॒හා ආල॑භන්තා-(අ)(අ)ග්නේ॒යී-ඞ්කෘ॑ෂ්ණග්රී॒වීග්ං සග්ං॑හි॒තාමෛ॒න්ද්රීග් ශ්වේ॒තා-ම්බා॑ර්හස්ප॒ත්යා-න්තාභි॑රේ॒වාස්මි॒-න්රුච॑මදධු॒ර්යෝ බ්ර॑හ්මවර්ච॒ස-කා॑ම॒-ස්ස්යා-ත්තස්මා॑ ඒ॒තා ම॒ල්॒හා ආ ල॑භේතා- [ආ ල॑භේත, ආ॒ග්නේ॒යී-ඞ්කෘ॑ෂ්ණග්රී॒වීග්ං] 10

(ශිඛණ්ඩි පඤ්චති)

-(අ)(අ)ග්නේ॒යී-ඞ්කෘ॑ෂ්ණග්රී॒වීග්ං සග්ං॑හි॒තාමෛ॒න්ද්රීග් ශ්වේ॒තා-ම්බා॑ර්හස්ප॒ත්යාමේ॒තා ඒ॒ව දේ॒වතා॒-ස්ස්වේන॑ භාග॒ධේයේ॒නෝප॑ ධාවති॒ තා ඒ॒වාස්මි॑-න්බ්රහ්මවර්ච॒ස-න්ද॑ධති බ්රහ්මවර්ච॒ස්යේ॑ව භ॑වති ව॒සන්තා᳚ ප්රා॒තරා᳚ග්නේ॒යී-ඞ්කෘ॑ෂ්ණ ග්රී॒වීමා ල॑භේත ග්රී॒ෂ්මේ ම॒ද්ධ්යන්දි॑නේ සග්ංහි॒තාමෛ॒න්ද්රීග්ං ශ॒රද්ය॑පරා॒හ්ණේ ශ්වේ॒තා-ම්බා॑ර්හස්ප॒ත්යා-න්ත්රීණි॒ වා ආ॑දි॒ත්යස්ය॒ තේජාග්ං॑සි ව॒සන්තා᳚ ප්රා॒තර්ග්රී॒ෂ්මේ ම॒ද්ධ්යන්දි॑නේ ශ॒රද්ය॑පරා॒හ්ණේ යාව॑න්ත්යේ॒ව තේජාග්ං॑සි॒ තාන්යේ॒වා- [තාන්යේ॒ව, අව॑ රුන්ධේ] 11

-(අ)ව॑ රුන්ධේ සංවँථ්ස॒ර-ම්ප॒ර්යාල॑භ්යන්තේ සංවँථ්ස॒රෝ වෛ බ්ර॑හ්මවර්ච॒සස්ය॑ ප්රදා॒තා සං॑වँථ්ස॒ර ඒ॒වාස්මෛ᳚ බ්රහ්මවර්ච॒ස-ම්ප්ර ය॑ච්ඡති බ්රහ්මවර්ච॒ස්යේ॑ව භ॑වති ග॒ර්භිණ॑යෝ භවන්තීන්ද්රි॒යං-වෛँ ගර්භ॑ ඉන්ද්රි॒යමේ॒වාස්මි॑-න්දධති සාරස්ව॒තී-ම්මේ॒ෂීමා ල॑භේත॒ ය ඊ᳚ශ්ව॒රෝ වා॒චෝ වදි॑තෝ॒-ස්සන් වාච॒-න්න වදේ॒-ද්වාග්වෛ සර॑ස්වතී॒ සර॑ස්වතීමේ॒ව ස්වේන॑ භාග॒ධේයේ॒නෝප॑ ධාවති॒ සෛවාස්මි॒- [සෛවාස්මින්න්॑, වාච॑-න්දධාති] 12

-න්වාච॑-න්දධාති ප්රවදි॒තා වා॒චෝ භ॑ව॒ත්යප॑න්නදතී භවති॒ තස්මා᳚-න්මනු॒ෂ්යා᳚-ස්සර්වාං॒-වාँචං॑-වँදන්ත්යාග්නේ॒ය-ඞ්කෘ॒ෂ්ණග්රී॑ව॒මා ල॑භේත සෞ॒ම්ය-ම්බ॒භ්රු-ඤ්ජ්යෝගා॑මයාව්ය॒ග්නිං-වාँ ඒ॒තස්ය॒ ශරී॑ර-ඞ්ගච්ඡති॒ සෝම॒ග්ං॒ රසෝ॒ යස්ය॒ ජ්යෝගා॒මය॑ත්ය॒ග්නේරේ॒වාස්ය॒ ශරී॑ර-න්නිෂ්ක්රී॒ණාති॒ සෝමා॒-ද්රස॑මු॒ත යදී॒තාසු॒ර්භව॑ති॒ ජීව॑ත්යේ॒ව සෞ॒ම්ය-ම්බ॒භ්රුමා ල॑භේතා-(අ)(අ)ග්නේ॒ය-ඞ්කෘ॒ෂ්ණග්රී॑ව-ම්ප්ර॒ජාකා॑ම॒-ස්සෝමෝ॒ [සෝමඃ॑, වෛ රේ॑තෝ॒ධා] 13

වෛ රේ॑තෝ॒ධා අ॒ග්නිඃ ප්ර॒ජානා᳚-ම්ප්රජනයි॒තා සෝම॑ ඒ॒වාස්මෛ॒ රේතෝ॒ දධා᳚ත්ය॒ග්නිඃ ප්ර॒ජා-ම්ප්රජ॑නයති වි॒න්දතේ᳚ ප්ර॒ජාමා᳚ග්නේ॒ය-ඞ්කෘ॒ෂ්ණග්රී॑ව॒මා ල॑භේත සෞ॒ම්ය-ම්බ॒භ්රුං-යෝँ බ්රා᳚හ්ම॒ණෝ වි॒ද්යාම॒නූච්ය॒ න වි॒රෝචේ॑ත॒ යදා᳚ග්නේ॒යෝ භව॑ති॒ තේජ॑ ඒ॒වාස්මි॒-න්තේන॑ දධාති॒ ය-ථ්සෞ॒ම්යෝ බ්ර॑හ්මවර්ච॒ස-න්තේන॑ කෘ॒ෂ්ණග්රී॑ව ආග්නේ॒යෝ භ॑වති॒ තම॑ ඒ॒වාස්මා॒දප॑ හන්ති ශ්වේ॒තෝ භ॑වති॒ [භ॑වති, රුච॑මේ॒වාස්මි॑-න්දධාති] 14

රුච॑මේ॒වාස්මි॑-න්දධාති බ॒භ්රු-ස්සෞ॒ම්යෝ භ॑වති බ්රහ්මවර්ච॒සමේ॒වාස්මි॒-න්ත්විෂි॑-න්දධාත්යා-ග්නේ॒ය-ඞ්කෘ॒ෂ්ණග්රී॑ව॒මා ල॑භේත සෞ॒ම්ය-ම්බ॒භ්රුමා᳚ග්නේ॒ය-ඞ්කෘ॒ෂ්ණග්රී॑ව-ම්පුරෝ॒ධායා॒ග්॒ ස්පර්ධ॑මාන ආග්නේ॒යෝ වෛ බ්රා᳚හ්ම॒ණ-ස්සෞ॒ම්යෝ රා॑ජ॒න්යෝ॑-(අ)භිතඃ॑ සෞ॒ම්යමා᳚ග්නේ॒යෞ භ॑වත॒-ස්තේජ॑සෛ॒ව බ්රහ්ම॑ණෝභ॒යතෝ॑ රා॒ෂ්ට්ර-ම්පරි॑ ගෘහ්ණාත්යේක॒ධා ස॒මා වෘ॑ඞ්ක්තේ පු॒ර ඒ॑න-න්දධතේ .. 15 ..

(ල॒භේ॒ත॒ වරු॑ණං - ँව॒ශෛ - තාමවිං॑-වँ॒ශාමා॑දි॒ත්යේභ්යඃ॒ කාමා॑ය - ම॒ල්හා ආ ල॑භේත॒ - තාන්යේ॒ව - සෛවාස්මි॒න්ථ් - සෝමඃ॑ - ස්වේ॒තෝ භ॑වති॒ - ත්රිච॑ත්වාරිග්ංශච්ච ) (අ. 2)

දේ॒වා॒සු॒රා ඒ॒ෂු ලෝ॒කේෂ්ව॑ස්පර්ධන්ත॒ ස ඒ॒තං-විँෂ්ණු॑-ර්වාම॒නම॑පශ්ය॒-ත්තග්ග් ස්වායෛ॑ දේ॒වතා॑යා॒ ආ-(අ)ල॑භත॒ තතෝ॒ වෛ ස ඉ॒මාං-ලෝँ॒කාන॒භ්ය॑ජයද්- වෛෂ්ණ॒වං-වාँ॑ම॒නමා ල॑භේත॒ ස්පර්ධ॑මානෝ॒ විෂ්ණු॑රේ॒ව භූ॒ත්වේමාන් ँලෝ॒කාන॒භි ජ॑යති॒ විෂ॑ම॒ ආ ල॑භේත॒ විෂ॑මා ඉව॒ හීමේ ලෝ॒කා-ස්සමෘ॑ද්ධ්යා॒ ඉන්ද්රා॑ය මන්යු॒මතේ॒ මන॑ස්වතේ ල॒ලාම॑-ම්ප්රාශෘ॒ඞ්ගමා ල॑භේත සඞ්ග්රා॒මේ [ ] 16

සංයँ॑ත්ත ඉන්ද්රි॒යේණ॒ වෛ ම॒න්යුනා॒ මන॑සා සඞ්ග්රා॒ම-ඤ්ජ॑ය॒තීන්ද්ර॑මේ॒ව ම॑න්යු॒මන්ත॒-ම්මන॑ස්වන්ත॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මි॑න්නින්ද්රි॒ය-ම්ම॒න්යු-ම්මනෝ॑ දධාති॒ ජය॑ති॒ තග්ං ස॑ග්රා॒ම්මමින්ද්රා॑ය ම॒රුත්ව॑තේ පෘශ්ඤිස॒ක්ථමා ල॑භේත॒ ග්රාම॑කාම॒ ඉන්ද්ර॑මේ॒ව ම॒රුත්ව॑න්ත॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ස ජා॒තා-න්ප්රය॑ච්ඡති ග්රා॒ම්යේ॑ව භ॑වති॒ යදෘ॑ෂ॒භස්තේනෛ॒- [යදෘ॑ෂ॒භස්තේන॑, ඓ॒න්ද්රෝ ය-ත්පෘශ්ඤි॒ස්තේන॑] 17

-න්ද්රෝ ය-ත්පෘශ්ඤි॒ස්තේන॑ මාරු॒ත-ස්සමෘ॑ද්ධ්යෛ ප॒ශ්චා-ත්පෘ॑ශ්ඤිස॒ක්ථෝ භ॑වති පශ්චාදන්ව-වසා॒යිනී॑මේ॒වාස්මෛ॒ විශ॑-ඞ්කරෝති සෞ॒ම්ය-ම්බ॒භ්රුමා ල॑භේ॒තාන්න॑කාම-ස්සෞ॒ම්යං-වාँ අන්න॒ග්ං॒ සෝම॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා॒ අන්න॒-ම්ප්රය॑॑ච්ඡත්යන්නා॒ද ඒ॒ව භ॑වති බ॒භ්රුර්භ॑වත්යේ॒තද්වා අන්න॑ස්ය රූ॒පග්ං සමෘ॑ද්ධ්යෛ සෞ॒ම්ය-ම්බ॒භ්රුමා ල॑භේත॒ යමලග්ං॑ [යමල᳚ම්, රා॒ජ්යාය॒] 18

රා॒ජ්යාය॒ සන්තග්ං॑ රා॒ජ්ය-න්නෝප॒නමේ᳚-ථ්සෞ॒ම්යං-වෛँ රා॒ජ්යග්ං සෝම॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ රා॒ජ්ය-ම්ප්රය॑ච්ඡ॒ත්යුපෛ॑නග්ං රා॒ජ්ය-න්න॑මති බ॒භ්රුර්භ॑වත්යේ॒ත-ද්වෛ සෝම॑ස්ය රූ॒පග්ං සමෘ॑ද්ධ්යා॒ ඉන්ද්රා॑ය වෘත්ර॒තුරේ॑ ල॒ලාම॑-ම්ප්රාශෘ॒ඞ්ගමා ල॑භේත ග॒තශ්රීඃ᳚ ප්රති॒ෂ්ඨාකා॑මඃ පා॒ප්මාන॑මේ॒ව වෘ॒ත්ර-න්තී॒ර්ත්වා ප්ර॑ති॒ෂ්ඨා-ඞ්ග॑ච්ඡ॒තීන්ද්රා॑යාභිමාති॒ඝ්නේ ල॒ලාම॑-ම්ප්රාශෘ॒ඞ්ගමා [ල॒ලාම॑-ම්ප්රාශෘ॒ඞ්ගමා, ල॒භේ॒ත॒ යඃ පා॒ප්මනා॑] 19

ල॑භේත॒ යඃ පා॒ප්මනා॑ ගෘහී॒ත-ස්ස්යා-ත්පා॒ප්මා වා අ॒භිමා॑ති॒රින්ද්ර॑මේ॒වා- භි॑මාති॒හන॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා᳚-ත්පා॒ප්මාන॑ම॒භිමා॑ති॒-ම්ප්රණු॑දත॒ ඉන්ද්රා॑ය ව॒ජ්රිණේ॑ ල॒ලාම॑-ම්ප්රාශෘ॒ඞ්ගමා ල॑භේත॒ යමලග්ං॑ රා॒ජ්යාය॒ සන්තග්ං॑ රා॒ජ්ය-න්නෝප॒නමේ॒දින්ද්ර॑මේ॒ව ව॒ජ්රිණ॒ග්ග්॒ ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॒ වජ්ර॒-ම්ප්ර ය॑ච්ඡති॒ ස ඒ॑නං॒ ँවජ්රෝ॒ භූත්යා॑ ඉන්ධ॒ උපෛ॑නග්ං රා॒ජ්ය-න්න॑මති ල॒ලාමඃ॑ ප්රාශෘ॒ඞ්ගෝ භ॑වත්යේ॒තද්වෛ වජ්ර॑ස්ය රූ॒පග්ං සමෘ॑ද්ධ්යෛ .. 20

(ස॒ග්රා॒ම්මේ - තේනා - ල॑ - මභිමාති॒ඝ්නේ ල॒ලාම॑-ම්ප්රාශෘ॒ඞ්ගමෛ - නං॒ - පඤ්ච॑දශ ච ) (අ. 3)

අ॒සාවා॑දි॒ත්යෝ න ව්ය॑රෝචත॒ තස්මෛ॑ දේ॒වාඃ ප්රාය॑ශ්චිත්තිමෛච්ඡ॒-න්තස්මා॑ ඒ॒තා-න්දශ॑ර්ෂභා॒මා-(අ)ල॑භන්ත॒ තයෛ॒වාස්මි॒-න්රුච॑මදධු॒ර්යෝ බ්ර॑හ්මවර්ච॒සකා॑ම॒-ස්ස්යා-ත්තස්මා॑ ඒ॒තා-න්දශ॑ර්ෂභා॒මා ල॑භේතා॒-මුමේ॒වා-(අ)(අ)දි॒ත්යග්ග් ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මි॑-න්බ්රහ්මවර්ච॒ස-න්ද॑ධාති බ්රහ්මවර්ච॒ස්යේ॑ව භ॑වති ව॒සන්තා᳚ ප්රා॒තස්ත්රීන් ँල॒ලාමා॒නා ල॑භේත ග්රී॒ෂ්මේ ම॒ද්ධ්යන්දි॑නේ॒ - [ම॒ද්ධ්යන්දි॑නේ, ත්රීඤ්ඡි॑ති පෘ॒ෂ්ඨාඤ්ඡ॒රද්ය॑පරා॒හ්ණේ] 21

ත්රීඤ්ඡි॑ති පෘ॒ෂ්ඨාඤ්ඡ॒රද්ය॑පරා॒හ්ණේ ත්රීඤ්ඡි॑ති॒වාරා॒-න්ත්රීණි॒ වා ආ॑දි॒ත්යස්ය॒ තේජාග්ං॑සි ව॒සන්තා᳚ ප්රා॒තර්ග්රී॒ෂ්මේ ම॒ද්ධ්යන්දි॑නේ ශ॒රද්ය॑පරා॒හ්ණේ යාව॑න්ත්යේ॒ව තේජාග්ං॑සි॒ තාන්යේ॒වාව॑ රුන්ධේ॒ ත්රය॑ස්ත්රය॒ ආ ල॑භ්යන්තේ-(අ)භි පූ॒ර්වමේ॒වාස්මි॒-න්තේජෝ॑ දධාති සංවँථ්ස॒ර-ම්ප॒ර්යාල॑භ්යන්තේ සංවँථ්ස॒රෝ වෛ බ්ර॑හ්මවර්ච॒සස්ය॑ ප්රදා॒තා සං॑වँථ්ස॒ර ඒ॒වාස්මෛ᳚ බ්රහ්මවර්ච॒ස-ම්ප්ර ය॑ච්ඡති බ්රහ්මවර්ච॒ස්යේ॑ව භ॑වති සංවँථ්ස॒රස්ය॑ ප॒රස්තා᳚-ත්ප්රාජාප॒ත්ය-ඞ්කද්රු॒- [ ප්රාජාප॒ත්ය-ඞ්කද්රු᳚ම්, ආ ල॑භේත] 22

-මා ල॑භේත ප්ර॒ජාප॑ති॒-ස්සර්වා॑ දේ॒වතා॑ දේ॒වතා᳚ස්වේ॒ව ප්රති॑තිෂ්ඨති॒ යදි॑ බිභී॒යා-ද්දු॒ශ්චර්මා॑ භවිෂ්යා॒මීති॑ සෝමාපෞ॒ෂ්ණග්ග් ශ්යා॒මමා ල॑භේත සෞ॒ම්යෝ වෛ දේ॒වත॑යා॒ පුරු॑ෂඃ පෞ॒ෂ්ණාඃ ප॒ශව॒-ස්ස්වයෛ॒වාස්මෛ॑ දේ॒වත॑යා ප॒ශුභි॒ස්ත්වච॑-ඞ්කරෝති॒ න දු॒ශ්චර්මා॑ භවති දේ॒වාශ්ච॒ වෛ ය॒මශ්චා॒ස්මින් ँලෝ॒කේ᳚-(අ)ස්පර්ධන්ත॒ ස ය॒මෝ දේ॒වානා॑මින්ද්රි॒යං-වීँ॒ර්ය॑මයුවත॒ තද්ය॒මස්ය॑ [තද්ය॒මස්ය॑, ය॒ම॒ත්ව-න්තේ] 23

යම॒ත්ව-න්තේ දේ॒වා අ॑මන්යන්ත ය॒මෝ වා ඉ॒දම॑භූ॒-ද්ය-ද්ව॒යග්ග් ස්ම ඉති॒ තේ ප්ර॒ජාප॑ති॒මුපා॑ධාව॒න්-ථ්ස ඒ॒තෞ ප්ර॒ජාප॑තිරා॒ත්මන॑ උක්ෂව॒ශෞ නිර॑මිමීත॒ තේ දේ॒වා වෛ᳚ෂ්ණාවරු॒ණීං-වँ॒ශාමා-(අ)ල॑භන්තෛ॒න්ද්රමු॒ක්ෂාණ॒න්තං-වँරු॑ණේනෛ॒ව ග්රා॑හයි॒ත්වා විෂ්ණු॑නා ය॒ජ්ඤේන॒ ප්රාණු॑දන්තෛ॒න්ද්රේණෛ॒-වාස්යේ᳚න්ද්රි॒යම॑-වෘඤ්ජත॒ යෝ භ්රාතෘ॑ව්යවා॒න්-ථ්ස්යා-ථ්ස ස්පර්ධ॑මානෝ වෛෂ්ණාවරු॒ණීං- [වෛෂ්ණාවරු॒ණීම්, ව॒ශාමා] 24

-ँව॒ශාමා ල॑භේතෛ॒න්ද්රමු॒ක්ෂාණං॒-වँරු॑ණේනෛ॒ව භ්රාතෘ॑ව්ය-ඞ්ග්රාහයි॒ත්වා විෂ්ණු॑නා ය॒ජ්ඤේන॒ ප්රණු॑දත ඓ॒න්ද්රේණෛ॒වාස්යේ᳚න්ද්රි॒යං-වෘँ॑ඞ්ක්තේ॒ භව॑ත්යා॒ත්මනා॒ පරා᳚ස්ය॒ භ්රාතෘ॑ව්යෝ භව॒තීන්ද්රෝ॑ වෘ॒ත්රම॑හ॒-න්තං-වෘँ॒ත්රෝ හ॒ත-ෂ්ෂෝ॑ඩ॒ශභි॑-ර්භෝ॒ගෛර॑සිනා॒-ත්තස්ය॑ වෘ॒ත්රස්ය॑ ශීර්ෂ॒තෝ ගාව॒ උදා॑ය॒-න්තා වෛ॑දේ॒හ්යෝ॑-(අ)භව॒-න්තාසා॑මෘෂ॒භෝ ජ॒ඝනේ-(අ)නූදෛ॒-ත්තමින්ද්රෝ॑- [ජ॒ඝනේ-(අ)නූදෛ॒-ත්තමින්ද්රඃ॑, අ॒චා॒ය॒ථ්සෝ॑-(අ)මන්යත॒] 25

-(අ)චාය॒ථ්සෝ॑-(අ)මන්යත॒ යෝ වා ඉ॒මමා॒ලභේ॑ත॒ මුච්යේ॑තා॒ස්මා-ත්පා॒ප්මන॒ ඉති॒ ස ආ᳚ග්නේ॒ය-ඞ්කෘ॒ෂ්ණග්රී॑ව॒මා ල॑භතෛ॒න්ද්රමෘ॑ෂ॒භ-න්තස්යා॒ග්නිරේ॒ව ස්වේන॑ භාග॒ධේයේ॒නෝප॑ සෘත-ෂ්ෂෝඩශ॒ධා වෘ॒ත්රස්ය॑ භෝ॒ගානප්ය॑දහදෛ॒න්ද්රේණේ᳚න්ද්රි॒ය- මා॒ත්මන්න॑ධත්ත॒ යඃ පා॒ප්මනා॑ ගෘහී॒ත-ස්ස්යා-ථ්ස ආ᳚ග්නේ॒ය-ඞ්කෘ॒ෂ්ණග්රී॑ව॒මා ල॑භේතෛ॒න්ද්රමෘ॑ෂ॒භ-ම॒ග්නිරේ॒වාස්ය॒ ස්වේන॑ භාග॒ධේයේ॒නෝප॑සෘතඃ [ ] 26

පා॒ප්මාන॒මපි॑ දහත්යෛ॒න්ද්රේණේ᳚න්ද්රි॒යමා॒ත්ම-න්ධ॑ත්තේ॒ මුච්ය॑තේ පා॒ප්මනෝ॒ භව॑ත්යේ॒ව ද්යා॑වාපෘථි॒ව්යා᳚-න්ධේ॒නුමා ල॑භේත॒ ජ්යෝග॑පරුද්ධෝ॒ (අ)නයෝ॒ර්॒හි වා ඒ॒ෂෝ-(අ)ප්ර॑තිෂ්ඨි॒තෝ-(අ)ථෛ॒ෂ ජ්යෝගප॑රුද්ධෝ॒ ද්යාවා॑පෘථි॒වී ඒ॒ව ස්වේන॑ භාග॒ධේයේ॒නෝප॑ ධාවති॒ තේ ඒ॒වෛන॑-ම්ප්රති॒ෂ්ඨා-ඞ්ග॑මයතඃ॒ ප්රත්යේ॒ව ති॑ෂ්ඨති පර්යා॒රිණී॑ භවති පර්යා॒රීව॒ හ්යේ॑තස්ය॑ රා॒ෂ්ට්රං-යෝँ ජ්යෝග॑පරුද්ධ॒-ස්සමෘ॑ද්ධ්යෛ වාය॒ව්යං॑- [වාය॒ව්ය᳚ම්, ව॒ථ්සමා] 27

-ँව॒ථ්සමා ල॑භේත වා॒යුර්වා අ॒නයෝ᳚ර්ව॒ථ්ස ඉ॒මේ වා ඒ॒තස්මෛ॑ ලෝ॒කා අප॑ශුෂ්කා॒ විඩප॑ශු॒ෂ්කා-(අ)ථෛ॒ෂ ජ්යෝගප॑රුද්ධෝ වා॒යුමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා॑ ඉ॒මාං-ලෝँ॒කාන්. විශ॒-ම්ප්රදා॑පයති॒ ප්රාස්මා॑ ඉ॒මේ ලෝ॒කා-ස්ස්නු॑වන්තිභුඤ්ජ॒ත්යේ॑නං॒-විँඩුප॑තිෂ්ඨතේ .. 28 ..

(ම॒ධ්යන්දි॑නේ॒ - කද්රුං॑ - ँය॒මස්ය॒ - ස්පර්ධ॑මානෝ වෛෂ්ණාවරු॒ණීං -තමින්ද්රෝ᳚ - (අ)ස්ය॒ ස්වේන॑ භාග॒ධේයේ॒නෝප॑සෘතෝ - වාය॒ව්යං॑ - ද්විච॑ත්වාරිග්ංශච්ච) (අ. 4)

ඉන්ද්රෝ॑ ව॒ලස්ය॒ බිල॒මපෞ᳚ර්ණෝ॒-ථ්ස ය උ॑ත්ත॒මඃ ප॒ශුරාසී॒-ත්ත-ම්පෘ॒ෂ්ඨ-ම්ප්රති॑ ස॒ගෘංහ්යෝද॑ක්ඛිද॒-ත්තග්ං ස॒හස්ර॑-ම්ප॒ශවෝ-(අ)නූදා॑ය॒න්-ථ්ස උ॑න්න॒තෝ॑-(අ)භව॒ද්යඃ ප॒ශුකා॑ම॒-ස්ස්යා-ථ්ස ඒ॒තමෛ॒න්ද්රමු॑න්න॒තමා ල॑භේ॒තේන්ද්ර॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ප॒ශූ-න්ප්රය॑ච්ඡති පශු॒මානේ॒ව භ॑වත්යුන්න॒තෝ [භ॑වත්යුන්න॒තඃ, භ॒ව॒ති॒ සා॒හ॒ස්රී] 29

භ॑වති සාහ॒ස්රී වා ඒ॒ෂා ල॒ක්ෂ්මී යදු॑න්න॒තෝ ල॒ක්ෂ්මියෛ॒ ව ප॒ශූනව॑ රුන්ධේ ය॒දා ස॒හස්ර॑-ම්ප॒ශූ-න්ප්රා᳚ප්නු॒යාදථ॑ වෛෂ්ණ॒වං-වාँ॑ ම॒නමා ල॑භේතෛ॒තස්මි॒න්. වෛ ත-ථ්ස॒හස්ර॒මද්ධ්ය॑තිෂ්ඨ॒-ත්තස්මා॑දේ॒ෂ වා॑ම॒න-ස්සමී॑ෂිතඃ ප॒ශුභ්ය॑ ඒ॒ව ප්රජා॑තේභ්යඃ ප්රති॒ෂ්ඨා-න්ද॑ධාති॒ කෝ॑-(අ)ර්හති ස॒හස්ර॑-ම්ප॒ශූ-න්ප්රාප්තු॒මිත්යා॑හු-රහෝරා॒ත්රාණ්යේ॒ව ස॒හස්රග්ං॑ ස॒ම්පාද්යා-(අ)(අ)ල॑භේත ප॒ශවෝ॒ [ප॒ශවඃ॑, වා අ॑හෝරා॒ත්රාණි॑] 30

වා අ॑හෝරා॒ත්රාණි॑ ප॒ශූනේ॒ව ප්රජා॑තා-න්ප්රති॒ෂ්ඨා-ඞ්ග॑මය॒-ත්යෝෂ॑ධීභ්යෝ වේ॒හත॒මා ල॑භේත ප්ර॒ජාකා॑ම॒ ඕෂ॑ධයෝ॒ වා ඒ॒ත-ම්ප්ර॒ජායෛ॒ පරි॑බාධන්තේ॒ යෝ-(අ)ල॑-ම්ප්ර॒ජායෛ॒ ස-න්ප්ර॒ජා-න්න වි॒න්දත॒ ඕෂ॑ධයඃ॒ ඛලු॒ වා ඒ॒තස්යෛ॒ සූතු॒මපි॑ ඝ්නන්ති॒ යා වේ॒හ-ද්භව॒ත්යෝෂ॑ධීරේ॒ව ස්වේන॑ භාග॒ධේයේ॒නෝප॑ ධාවති॒ තා ඒ॒වාස්මෛ॒ ස්වාද්යෝනේඃ᳚ ප්ර॒ජා-ම්ප්ර ජ॑නයන්ති වි॒න්දතේ᳚ [ ] 31

ප්ර॒ජාමාපෝ॒ වා ඕෂ॑ධ॒යෝ-(අ)ස॒-ත්පුරු॑ෂ॒ ආප॑ ඒ॒වාස්මා॒ අස॑ත॒-ස්සද්ද॑දති॒ තස්මා॑දාහු॒ර්යශ්චෛ॒වං-වේँද॒ යශ්ච॒ නාප॒ස්ත්වාවාස॑ත॒-ස්සද්ද॑ද॒තී-ත්යෛ॒න්ද්රීග්ං සූ॒තව॑ශා॒මා ල॑භේත॒ භූති॑කා॒මෝ-(අ)ජා॑තෝ॒ වා ඒ॒ෂ යෝ-(අ)ල॒-ම්භූත්යෛ॒ ස-න්භූති॒-න්න ප්රා॒ප්නෝතීන්ද්ර॒-ඞ්ඛලු॒ වා ඒ॒ෂා සූ॒ත්වා ව॒ශා-(අ)භ॑ව॒- [ව॒ශා-(අ)භ॑වත්, ඉන්ද්ර॑මේ॒ව] 32

-දින්ද්ර॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛන॒-ම්භූති॑-ඞ්ගමයති॒ භව॑ත්යේ॒ව යග්ං සූ॒ත්වා ව॒ශා ස්යා-ත්තමෛ॒න්ද්රමේ॒වා-(අ)(අ) ල॑භේතෛ॒තද්වාව තදි॑න්ද්රි॒යග්ං සා॒ක්ෂාදේ॒වේන්ද්රි॒යමව॑ රුන්ධ ඓන්ද්රා॒ග්න-ම්පු॑නරු-ථ්සෘ॒ෂ්ටමා ල॑භේත॒ ය ආ තෘ॒තීයා॒-ත්පුරු॑ෂා॒-ථ්සෝම॒-න්න පිබේ॒-ද්විච්ඡි॑න්නෝ॒ වා ඒ॒තස්ය॑ සෝමපී॒ථෝ යෝ බ්රා᳚හ්ම॒ණ-ස්සන්නා [ ] 33

තෘ॒තීයා॒-ත්පුරු॑ෂා॒-ථ්සෝම॒-න්න පිබ॑තීන්ද්රා॒ග්නී ඒ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මෛ॑ සෝමපී॒ථ-ම්ප්රය॑ච්ඡත॒ උපෛ॑නග්ං සෝමපී॒ථෝ න॑මති॒ යදෛ॒න්ද්රෝ භව॑තීන්ද්රි॒යං-වෛँ සෝ॑මපී॒ථ ඉ॑න්ද්රි॒යමේ॒ව සෝ॑මපී॒ථමව॑ රුන්ධේ॒ යදා᳚ග්නේ॒යෝ භව॑ත්යාග්නේ॒යෝ වෛ බ්රා᳚හ්ම॒ණ-ස්ස්වාමේ॒ව දේ॒වතා॒මනු॒ සන්ත॑නෝති පුනරුථ්සෘ॒ෂ්ටෝ භ॑වති පුනරුථ්සෘ॒ෂ්ට ඉ॑ව॒ හ්යේ॑තස්ය॑ [හ්යේ॑තස්ය॑, සෝ॒ම॒පී॒ථ-ස්සමෘ॑ද්ධ්යෛ] 34

සෝමපී॒ථ-ස්සමෘ॑ද්ධ්යෛ බ්රාහ්මණස්ප॒ත්ය-න්තූ॑ප॒රමා ල॑භේතා-භි॒චර॒-න්බ්රහ්ම॑ණ॒ස්පති॑මේ॒ව ස්වේන॑ භාග॒ධේයේ॒නෝප॑ ධාවති॒ තස්මා॑ ඒ॒වෛන॒මා වෘ॑ශ්චති තා॒ජගාර්ති॒-මාර්ච්ඡ॑ති තූප॒රෝ භ॑වති ක්ෂු॒රප॑වි॒ර්වා ඒ॒ෂා ල॒ක්ෂ්මී ය-ත්තූ॑ප॒ර-ස්සමෘ॑ද්ධ්යෛ॒ ස්ඵ්යෝ යූපෝ॑ භවති॒ වජ්රෝ॒ වෛ ස්ඵ්යෝ වජ්ර॑මේ॒වාස්මෛ॒ ප්රහ॑රති ශර॒මය॑-ම්බ॒ර්॒හි-ශ්ශෘ॒ණාත්යේ॒වෛනං॒-වෛँභී॑දක ඉ॒ද්ධ්මෝ භි॒නත්ත්යේ॒වෛන᳚ම් .. 35 ..

(භ॒ව॒ත්යු॒න්න॒තඃ - ප॒ශවෝ॑ - ජනයන්ති වි॒න්දතේ॑ - (අ)භව॒ථ් - සන්නෛ - තස්යේ॒ - ධ්ම - ස්ත්රීණි॑ ච) (අ. 5)

බා॒ර්॒හ॒ස්ප॒ත්යග්ං ශි॑තිපෘ॒ෂ්ඨමා ල॑භේත॒ ග්රාම॑කාමෝ॒ යඃ කා॒මයේ॑ත පෘ॒ෂ්ඨග්ං ස॑මා॒නානාග්॑ ස්යා॒මිති॒ බෘහ॒ස්පති॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛන॑-ම්පෘ॒ෂ්ඨග්ං ස॑මා॒නානා᳚-ඞ්කරෝති ග්රා॒ම්යේ॑ව භ॑වති ශිතිපෘ॒ෂ්ඨෝ භ॑වති බාර්හස්ප॒ත්යෝ හ්යේ॑ෂ දේ॒වත॑යා॒ සමෘ॑ද්ධ්යෛ පෞ॒ෂ්ණග්ග් ශ්යා॒මමා ල॑භේ॒තාන්න॑කා॒මෝ-(අ)න්නං॒-වෛँ පූ॒ෂා පූ॒ෂණ॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා॒ [ඒ॒වාස්මෛ᳚, අන්න॒-ම්ප්ර] 36

අන්න॒-ම්ප්ර ය॑ච්ඡත්යන්නා॒ද ඒ॒ව භ॑වති ශ්යා॒මෝ භ॑වත්යේ॒තද්වා අන්න॑ස්ය රූ॒පග්ං සමෘ॑ද්ධ්යෛ මාරු॒ත-ම්පෘශ්ඤි॒මා ල॑භේ॒තා-(අ)න්න॑-කා॒මෝ-(අ)න්නං॒-වෛँ ම॒රුතෝ॑ම॒රුත॑ ඒ॒ව ස්වේන॑ භාග॒ධේයේ॒නෝප॑ ධාවති॒ ත ඒ॒වාස්මා॒ අන්න॒-ම්ප්රය॑ච්ඡන්ත්යන්නා॒දඒ॒ව භ॑වති॒ පෘශ්ඤි॑ ර්භවත්යේ॒තද්වා අන්න॑ස්ය රූ॒පග්ං සමෘ॑ද්ධ්යා ඓ॒න්ද්රම॑රු॒ණමා ල॑භේතේන්ද්රි॒යකා॑ම॒ ඉන්ද්ර॑මේ॒ව [ ] 37

ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මි॑න්නින්ද්රි॒ය-න්ද॑ධාතීන්ද්රියා॒ව්යේ॑ව භ॑වත්යරු॒ණෝ භ්රූමා᳚-න්භවත්යේ॒තද්වා ඉන්ද්ර॑ස්ය රූ॒පග්ං සමෘ॑ද්ධ්යෛ සාවි॒ත්රමු॑පද්ධ්ව॒ස්තමා ල॑භේත ස॒නිකා॑ම-ස්සවි॒තා වෛ ප්ර॑ස॒වානා॑මීශේ සවි॒තාර॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ස॒නි-ම්ප්රසු॑වති॒ දාන॑කාමා අස්මෛ ප්ර॒ජා භ॑වන්ත්යුපද්ධ්ව॒ස්තෝ භ॑වති සාවි॒ත්රෝ හ්යේ॑ෂ [සාවි॒ත්රෝ හ්යේ॑ෂඃ, දේ॒වත॑යා॒ සමෘ॑ද්ධ්යෛ] 38

දේ॒වත॑යා॒ සමෘ॑ද්ධ්යෛ වෛශ්වදේ॒ව-ම්බ॑හුරූ॒පමා ල॑භේ॒තා-(අ)න්න॑කාමෝවෛශ්වදේ॒වං-වාँ අන්නං॒-විँශ්වා॑නේ॒ව දේ॒වාන්-ථ්ස්වේන॑ භාග॒ධේයේ॒නෝප॑ ධාවති॒ත ඒ॒වාස්මා॒ අන්න॒-ම්ප්රය॑ච්ඡන්ත්යන්නා॒ද ඒ॒ව භ॑වති බහුරූ॒පෝ භ॑වතිබහුරූ॒පග්ග් හ්යන්න॒ග්ං॒ සමෘ॑ද්ධ්යෛ වෛශ්වදේ॒ව-ම්බ॑හුරූ॒පමා ල॑භේත॒ ග්රාම॑කාමෝ වෛශ්වදේ॒වා වෛ ස॑ජා॒තා විශ්වා॑නේ॒ව දේ॒වාන්-ථ්ස්වේන॑ භාග॒ධේයේ॒නෝප॑ ධාවති॒ ත ඒ॒වා-(අ)ස්මෛ॑ [ඒ॒වා-(අ)ස්මෛ᳚, ස॒ජා॒තා-න්ප්ර ය॑ච්ඡන්ති] 39

සජා॒තා-න්ප්ර ය॑ච්ඡන්ති ග්රා॒ම්යේ॑ව භ॑වති බහුරූ॒පෝ භ॑වති බහුදේව॒ත්යෝ᳚(1॒) හ්යේ॑ෂ සමෘ॑ද්ධ්යෛ ප්රාජාප॒ත්ය-න්තූ॑ප॒රමා ල॑භේත॒ යස්යානා᳚ජ්ඤාතමිව॒ ජ්යෝගා॒මයේ᳚-ත්ප්රාජාප॒ත්යෝ වෛ පුරු॑ෂඃ ප්ර॒ජාප॑තිඃ॒ ඛලු॒ වෛ තස්ය॑ වේද॒ යස්යානා᳚ජ්ඤාතමිව॒ ජ්යෝගා॒මය॑ති ප්ර॒ජාප॑තිමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛන॒-න්තස්මා॒-ථ්ස්රාමා᳚-න්මුඤ්චති තූප॒රෝ භ॑වති ප්රාජාප॒ත්යෝ හ්යේ॑ -ෂ දේ॒වත॑යා॒ සමෘ॑ද්ධ්යෛ .. 40 ..

(අ॒ස්මා॒ - ඉන්ද්ර॑මේ॒වෛ - ෂ - ස॑ජා॒තා විශ්වා॑නේ॒ව දේ॒වාන්-ථ්ස්වේන॑ භාග॒ධේයේ॒නෝප॑ ධාවති॒ ත ඒ॒වාස්මෛ᳚ - ප්රාජාප॒ත්යෝ හි - ත්රීණි॑ ච) (අ. 11)

ව॒ෂ॒ට්කා॒රෝ වෛ ගා॑යත්රි॒යෛ ශිරෝ᳚-(අ)ච්ඡින॒-ත්තස්යෛ॒ රසඃ॒ පරා॑පත॒-ත්ත-ම්බෘහ॒ස්පති॒ රුපා॑-(අ)ගෘහ්ණා॒ථ්සා ශි॑තිපෘ॒ෂ්ඨා ව॒ශා-(අ)භ॑ව॒ද්යෝ ද්වි॒තීයඃ॑ ප॒රා-(අ)ප॑ත॒-ත්ත-ම්මි॒ත්රාවරු॑ණා॒-වුපා॑ගෘහ්ණීතා॒ග්ං॒ සා ද්වි॑රූ॒පා ව॒ශා-(අ)භ॑ව॒-ද්යස්තෘ॒තීයඃ॑ ප॒රාප॑ත॒-ත්තං-විँශ්වේ॑ දේ॒වා උපා॑ගෘහ්ණ॒න්-ථ්සා බ॑හුරූ॒පා ව॒ශා භ॑ව॒ද්ය-ශ්ච॑තු॒ර්ථඃ ප॒රාප॑ත॒-ථ්ස පෘ॑ථි॒වී-ම්ප්රා-(අ)වි॑ශ॒-ත්ත-ම්බෘහ॒ස්පති॑ර॒- [බෘහ॒ස්පති॑ර॒භි, අ॒ගෘ॒හ්ණා॒-දස්ත්වේ॒වා-(අ)යං-] 41

-භ්ය॑ගෘහ්ණා॒-දස්ත්වේ॒වා-(අ)ය-ම්භෝගා॒යේති॒ ස උ॑ක්ෂව॒ශ-ස්සම॑භව॒-ද්යල්ලෝහි॑ත-ම්ප॒රාප॑ත॒-ත්ත-ද්රු॒ද්ර උපා॑-(අ)ගෘහ්ණා॒-ථ්සා රෞ॒ද්රී රෝහි॑ණී ව॒ශා-(අ)භ॑ව-ද්බාර්හස්ප॒ත්යාග්ං ශි॑තිපෘ॒ෂ්ඨාමා ල॑භේත බ්රහ්මවර්ච॒සකා॑මෝ॒ බෘහ॒ස්පති॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මි॑-න්බ්රහ්මවර්ච॒ස-න්ද॑ධාති බ්රහ්මවර්ච॒ස්යේ॑ව භ॑වති॒ ඡන්ද॑සාං॒-වාँ ඒ॒ෂ රසෝ॒ යද්ව॒ශා රස॑ ඉව॒ ඛලු॒ [ඛලු॑, වෛ] 42

වෛ බ්ර॑හ්මවර්ච॒ස-ඤ්ඡන්ද॑සාමේ॒ව රසේ॑න॒ රස॑-ම්බ්රහ්මවර්ච॒සමව॑ රුන්ධේ මෛත්රාවරු॒ණී-න්ද්වි॑රූ॒පාමා ල॑භේත॒ වෘෂ්ටි॑කාමෝ මෛ॒ත්රං-වාँ අහ॑ර්වාරු॒ණී රාත්රි॑රහෝරා॒ත්රාභ්යා॒-ඞ්ඛලු॒ වෛ ප॒ර්ජන්යෝ॑ වර්ෂති මි॒ත්රාවරු॑ණාවේ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මා॑ අහෝරා॒ත්රාභ්යා᳚-ම්ප॒ර්ජන්යං॑-වँර්ෂයත॒-ශ්ඡන්ද॑සාං॒-වාँ ඒ॒ෂ රසෝ॒ යද්ව॒ශා රස॑ ඉව॒ ඛලු॒ වෛ වෘෂ්ටි॒-ශ්ඡන්ද॑සාමේ॒ව රසේ॑න॒ [රසේ॑න, රසං॒-වෘँෂ්ටි॒මව॑ රුන්ධේ] 43

රසං॒-වෘँෂ්ටි॒මව॑ රුන්ධේ මෛත්රාවරු॒ණී-න්ද්වි॑රූ॒පාමා ල॑භේත ප්ර॒ජාකා॑මෝ මෛ॒ත්රං-වාँ අහ॑ර්වාරු॒ණී රාත්රි॑රහෝරා॒ත්රාභ්යා॒-ඞ්ඛලු॒ වෛ ප්ර॒ජාඃ ප්රජා॑යන්තේ මි॒ත්රාවරු॑ණාවේ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මා॑ අහෝරා॒ත්රාභ්යා᳚-ම්ප්ර॒ජා-ම්ප්රජ॑නයත॒-ශ්ඡන්ද॑සාං॒-වාँ ඒ॒ෂ රසෝ॒ යද්ව॒ශා රස॑ ඉව॒ ඛලු॒ වෛ ප්ර॒ජා ඡන්ද॑සාමේ॒ව රසේ॑න॒ රස॑-ම්ප්ර॒ජාමව॑- [රස॑-ම්ප්ර॒ජාමව॑, රු॒න්ධේ॒ වෛ॒ශ්ව॒දේ॒වීම්-] 44

-රුන්ධේ වෛශ්වදේ॒වී-ම්බ॑හුරූ॒පාමා ල॑භේ॒තාන්න॑කාමෝ වෛශ්වදේ॒වං-වාँ අන්නං॒-විँශ්වා॑නේ॒ව දේ॒වාන්-ථ්ස්වේන॑ භාග॒ධේයේ॒නෝප॑ ධාවති॒ ත ඒ॒වාස්මා॒ අන්නං॒ ප්රය॑ච්ඡන්ත්යන්නා॒ද ඒ॒ව භ॑වති॒ ඡන්ද॑සාං॒-වාँ ඒ॒ෂ රසෝ॒ යද්ව॒ශා රස॑ ඉව॒ ඛලු॒ වා අන්න॒-ඤ්ඡන්ද॑සාමේ॒ව රසේ॑න॒ රස॒මන්න॒මව॑ රුන්ධේ වෛශ්වදේ॒වී-ම්බ॑හුරූ॒පාමා ල॑භේත॒ ග්රාම॑කාමෝ වෛශ්වදේ॒වා වෛ [වෛ, ස॒ජා॒තා විශ්වා॑නේ॒ව] 45

ස॑ජා॒තා විශ්වා॑නේ॒ව දේ॒වාන්-ථ්ස්වේන॑ භාග॒ධේයේ॒නෝප॑ ධාවති॒ ත ඒ॒වාස්මෛ॑ සජා॒තා-න්ප්ර ය॑ච්ඡන්ති ග්රා॒ම්යේ॑ව භ॑වති॒ ඡන්ද॑සාං॒-වාँ ඒ॒ෂ රසෝ॒ යද්ව॒ශා රස॑ ඉව॒ ඛලු॒ වෛ ස॑ජා॒තා-ශ්ඡන්ද॑සාමේ॒ව රසේ॑න॒ රසග්ං॑ සජා॒තානව॑ රුන්ධේ බාර්හස්ප॒ත්ය- මු॑ක්ෂව॒ශමා ල॑භේත බ්රහ්මවර්ච॒සකා॑මෝ॒ බෘහ॒ස්පති॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වා-(අ)ස්මි॑-න්බ්රහ්මවර්ච॒සං- [ඒ॒වා-(අ)ස්මි॑-න්බ්රහ්මවර්ච॒සම්, ද॒ධා॒ති॒ බ්ර॒හ්ම॒ව॒ර්ච॒ස්යේ॑ව] 46

-ද॑ධාති බ්රහ්මවර්ච॒ස්යේ॑ව භ॑වති॒ වශං॒-වාँ ඒ॒ෂ ච॑රති॒ යදු॒ක්ෂාවශ॑ ඉව॒ ඛලු॒ වෛ බ්ර॑හ්මවර්ච॒සං-වँශේ॑නෛ॒ව වශ॑-ම්බ්රහ්මවර්ච॒සමව॑ රුන්ධේරෞ॒ද්රීග්ංරෝහි॑ණී॒මා ල॑භේතාභි॒චර॑-න්රු॒ද්රමේ॒ව ස්වේන॑ භාග॒ධේයේ॒නෝප॑ ධාවති॒ තස්මා॑ ඒ॒වෛන॒මා වෘ॑ශ්චති තා॒ජගාර්ති॒මාර්ච්ඡ॑ති॒ රෝහි॑ණී භවති රෞ॒ද්රී හ්යේ॑ෂා දේ॒වත॑යා॒ සමෘ॑ද්ධ්යෛ॒ ස්ඵ්යෝ යූපෝ॑ භවති॒ වජ්රෝ॒ වෛ ස්ඵ්යෝ වජ්ර॑මේ॒වාස්මෛ॒ ප්ර හ॑රති ශර॒මය॑-ම්බ॒ර්॒හි-ශ්ශෘ॒ණාත්යේ॒වෛනං॒-වෛँභී॑දක ඉ॒ද්ධ්මෝ භි॒නත්ත්යේ॒වෛන᳚ම් .. 47 ..

(අ॒භි - ඛලු॒ - වෘෂ්ටි॒-ශ්ඡන්ද॑සාමේ॒ව රසේ॑න - ප්ර॒ජාමව॑ - වෛශ්වදේ॒වා වෛ - බ්ර॑හ්මවර්ච॒සං - ँයූප॒ - ඒකා॒න්නවිග්ං॑ශ॒තිශ්ච॑) (අ. 7)

අ॒සාවා॑දි॒ත්යෝ න ව්ය॑රෝචත॒ තස්මෛ॑ දේ॒වාඃ ප්රාය॑ශ්චිත්තිමෛච්ඡ॒-න්තස්මා॑ ඒ॒තාග්ං සෞ॒රීග් ශ්වේ॒තාං-වँ॒ශාමා-(අ)ල॑භන්ත॒ තයෛ॒වාස්මි॒-න්රුච॑මදධු॒ර්යෝ බ්ර॑හ්මවර්ච॒සකා॑ම॒-ස්ස්යා-ත්තස්මා॑ ඒ॒තාග්ං සෞ॒රීග් ශ්වේ॒තාං-වँ॒ශාමා ල॑භේතා॒මුමේ॒වා (අ)(අ)දි॒ත්යග්ග් ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මි॑-න්බ්රහ්මවර්ච॒ස-න්ද॑ධාති බ්රහ්මවර්ච॒ස්යේ॑ව භ॑වති බෛ॒ල්॒වෝ යූපෝ॑ භවත්ය॒සෞ [ ] 48

වා ආ॑දි॒ත්යෝ යතෝ-(අ)ජා॑යත॒ තතෝ॑ බි॒ල්ව॑ උද॑තිෂ්ඨ॒-ථ්සයෝ᳚න්යේ॒ව බ්ර॑හ්මවර්ච॒සමව॑ රුන්ධේ බ්රාහ්මණස්ප॒ත්යා-ම්බ॑භ්රුක॒ර්ණීමා ල॑භේතා-භි॒චර॑න්-වාරු॒ණ-න්දශ॑කපාල-ම්පු॒රස්තා॒-න්නිර්ව॑පේ॒-ද්වරු॑ණේනෛ॒ව භ්රාතෘ॑ව්ය-ඞ්ග්රාහයි॒ත්වා බ්රහ්ම॑ණා ස්තෘණුතේ බභ්රුක॒ර්ණී භ॑වත්යේ॒තද්වෛ බ්රහ්ම॑ණෝ රූ॒පග්ං සමෘ॑ද්ධ්යෛ॒ ස්ඵ්යෝ යූපෝ॑ භවති॒ වජ්රෝ॒ වෛ ස්ඵ්යෝ වජ්ර॑මේ॒වාස්මෛ॒ ප්ර හ॑රති ශර॒මය॑-ම්බ॒ර්॒හි-ශ්ශෘ॒ණා- [-බ॒ර්॒හි-ශ්ශෘ॒ණාති॑, ඒ॒වෛනං॒-වෛँභී॑දක] 49

-ත්යේ॒වෛනං॒-වෛँභී॑දක ඉ॒ද්ධ්මෝ භි॒නත්ත්යේ॒වෛනං॑-වෛँෂ්ණ॒වං-වාँ॑ම॒නමා ල॑භේත॒ යං-යँ॒ජ්ඤෝ නෝප॒නමේ॒-ද්විෂ්ණු॒ර්වෛ ය॒ජ්ඤෝ විෂ්ණු॑මේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ය॒ජ්ඤ-ම්ප්ර ය॑ච්ඡ॒ත්යුපෛ॑නං-යँ॒ජ්ඤෝ න॑මති වාම॒නෝ භ॑වති වෛෂ්ණ॒වෝ හ්යේ॑ෂ දේ॒වත॑යා॒ සමෘ॑ද්ධ්යෛ ත්වා॒ෂ්ට්රං-වँ॑ඩ॒බ මා ල॑භේත ප॒ශුකා॑ම॒ස්ත්වෂ්ටා॒ වෛ ප॑ශූ॒නා-ම්මි॑ථු॒නානාං᳚- [වෛ ප॑ශූ॒නා-ම්මි॑ථු॒නානා᳚ම්, ප්ර॒ජ॒න॒යි॒තා] 50

ප්රජනයි॒තා ත්වෂ්ටා॑රමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ප॒ශූ-න්මි॑ථු॒නා-න්ප්ර ජ॑නයති ප්ර॒ජා හි වා ඒ॒තස්මි॑-න්ප॒ශවඃ॒ ප්රවි॑ෂ්ටා॒ අථෛ॒ෂ පුමා॒න්ථ්සන් ව॑ඩ॒බ-ස්සා॒ක්ෂාදේ॒ව ප්ර॒ජා-ම්ප॒ශූනව॑ රුන්ධේ මෛ॒ත්රග්ග් ශ්වේ॒තමා ල॑භේත සඞ්ග්රා॒මේ සංයँ॑ත්තේ සම॒යකා॑මෝ මි॒ත්රමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛන॑-ම්මි॒ත්රේණ॒ ස-න්න॑යති - [අ-න්න॑යති, වි॒ශා॒ලෝ භ॑වති॒] 51

විශා॒ලෝ භ॑වති॒ ව්යව॑සායයත්යේ॒වෛන॑-ම්ප්රාජාප॒ත්ය-ඞ්කෘ॒ෂ්ණමා ල॑භේත॒ වෘෂ්ටි॑කාමඃ ප්ර॒ජාප॑ති॒ර්වෛ වෘෂ්ට්යා॑ ඊශේ ප්ර॒ජාප॑තිමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මෛ॑ ප॒ර්ජන්යං॑-වँර්ෂයති කෘ॒ෂ්ණෝ භ॑වත්යේ॒තද්වෛ වෘෂ්ට්යෛ॑ රූ॒පග්ං රූ॒පේණෛ॒ව වෘෂ්ටි॒මව॑ රුන්ධේ ශ॒බලෝ॑ භවති වි॒ද්යුත॑මේ॒වාස්මෛ॑ ජනයි॒ත්වා ව॑ර්ෂයත්යවාශෘ॒ඞ්ගෝ භ॑වති॒ වෘෂ්ටි॑මේ॒වාස්මෛ॒ නි ය॑ච්ඡති .. 52 ..

(අ॒සෞ - ශෘ॒ණාති॑ - මිථු॒නානාං᳚ - නයති - යච්ඡති) (අ. 8)

වරු॑ණග්ං සුෂුවා॒ණම॒න්නාද්ය॒-න්නෝපා॑නම॒-ථ්ස ඒ॒තාං-වාँ॑රු॒ණී-ඞ්කෘ॒ෂ්ණාං-වँ॒ශාම॑පශ්ය॒-ත්තාග් ස්වායෛ॑ දේ॒වතා॑යා॒ ආල॑භත॒ තතෝ॒ වෛ තම॒න්නා-ද්ය॒මුපා॑-(අ)නම॒-ද්යමල॑-ම॒න්නාද්යා॑ය॒ සන්ත॑ම॒න්නාද්ය॒-න්නෝප॒නමේ॒-ථ්ස ඒ॒තාං ँවා॑රු॒ණී-ඞ්කෘ॒ෂ්ණාං-වँ॒ශාමා ල॑භේත॒ වරු॑ණමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා॒ අන්න॒-ම්ප්ර ය॑ච්ඡත්යන්නා॒ද [අන්න॒-ම්ප්ර ය॑ච්ඡත්යන්නා॒දඃ, ඒ॒ව භ॑වති] 53

ඒ॒ව භ॑වති කෘ॒ෂ්ණා භ॑වති වාරු॒ණී හ්යේ॑ෂා දේ॒වත॑යා॒ සමෘ॑ද්ධ්යෛ මෛ॒ත්රග්ග් ශ්වේ॒තමා ල॑භේත වාරු॒ණ-ඞ්කෘ॒ෂ්ණම॒පා-ඤ්චෞෂ॑ධීනා-ඤ්ච ස॒ධාංවँන්න॑කාමෝ මෛ॒ත්රීර්වා ඕෂ॑ධයෝ වාරු॒ණීරාපෝ॒-(අ)පා-ඤ්ච॒ ඛලු॒ වා ඕෂ॑ධීනා-ඤ්ච॒ රස॒මුප॑ ජීවාමෝ මි॒ත්රාවරු॑ණාවේ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මා॒ අන්න॒-ම්ප්රය॑ච්ඡතෝ-(අ)න්නා॒ද ඒ॒ව භ॑ව- [ඒ॒ව භ॑වති, අ॒පා-ඤ්චෞෂ॑ධීනා-ඤ්ච] 54

(ශිඛණ්ඩි ප්රචතිඃ)

-ත්ය॒පා-ඤ්චෞෂ॑ධීනා-ඤ්ච ස॒ධාංවාँ ල॑භත උ॒භය॒ස්යා-ව॑රුද්ධ්යෛ॒විශා॑ඛෝ॒ යූපෝ॑ භවති॒ ද්වේ හ්යේ॑තේ දේ॒වතේ॒ සමෘ॑ද්ධ්යෛ මෛ॒ත්රග්ග් ශ්වේ॒තමා ල॑භේත වාරු॒ණ-ඞ්කෘ॒ෂ්ණ-ඤ්ජ්යෝගා॑මයාවී॒-ය-න්මෛ॒ත්රෝ භව॑ති මි॒ත්රේණෛ॒වා-(අ)ස්මෛ॒ වරු॑ණග්ං ශමයති॒ ය-ද්වා॑රු॒ණ-ස්සා॒ක්ෂාදේ॒වෛනං॑-වँරුණපා॒ශා-න්මු॑ඤ්චත්යු॒ත යදී॒තාසු॒ර්භව॑ති॒ ජීව॑ත්යේ॒ව දේ॒වා වෛ පුෂ්ටි॒-න්නා-(අ)වි॑න්ද॒න්- [නා-(අ)වි॑න්දන්න්, තා-ම්මි॑ථු॒නේ॑] 55

-තා-ම්මි॑ථු॒නේ॑ (අ)පශ්ය॒-න්තස්යා॒-න්න සම॑රාධය॒න්තා-ව॒ශ්විනා॑-වබ්රූතා-මා॒වයෝ॒ර්වා ඒ॒ෂා මෛතස්යාං᳚ ँවදද්ධ්ව॒මිති॒ සාශ්විනෝ॑රේ॒වාභ॑ව॒ද්යඃ පුෂ්ටි॑කාම॒-ස්ස්යා-ථ්ස ඒ॒තාමා᳚ශ්වි॒නීං-යँ॒මීං-වँ॒ශාමා ල॑භේතා॒-(අ)ශ්විනා॑වේ॒ව ස්වේන॑ භාග॒ධේයේ॒නෝප॑ ධාවති॒ තාවේ॒වාස්මි॒-න්පුෂ්ටි॑-න්ධත්තඃ॒ පුෂ්ය॑ති ප්ර॒ජයා॑ ප॒ශුභිඃ॑ .. 56 ..

(අ॒න්නා॒දෝ᳚ - (අ)න්නා॒ද ඒ॒ව භ॑වත්ය - වින්ද॒න් - පඤ්ච॑චත්වාරිග්ංශච්ච) (අ. 9)

ආ॒ශ්වි॒න-න්ධූ॒ම්රල॑ලාම॒ මා ල॑භේත॒ යෝ දුර්බ්රා᳚හ්මණ॒-ස්සෝම॒-ම්පිපා॑සේ-ද॒ශ්විනෞ॒ වෛ දේ॒වානා॒-මසෝ॑මපාවාස්තා॒-න්තෞ ප॒ශ්චා සෝ॑මපී॒ථ-ම්ප්රාප්නු॑තා-ම॒ශ්විනා॑-වේ॒තස්ය॑ දේ॒වතා॒ යෝ දුර්බ්රා᳚හ්මණ॒-ස්සෝම॒-ම්පිපා॑සත්ය॒ශ්විනා॑වේ॒ව ස්වේන॑ භාග॒ධේයේ॒නෝප॑ ධාවති॒-තා-වේ॒වා-(අ)ස්මෛ॑ සෝමපී॒ථ-ම්ප්ර ය॑ච්ඡත॒ උපෛ॑නග්ං සෝමපී॒ථෝ න॑මති॒ ය-ද්ධූ॒ම්රෝ භව॑ති ධූම්රි॒මාණ॑-මේ॒වා-(අ)ස්මා॒-දප॑ හන්ති ල॒ලාමෝ॑ [ල॒ලාමඃ॑, භ॒ව॒ති මු॒ඛ॒ත] 57

භවති මුඛ॒ත ඒ॒වාස්මි॒-න්තේජෝ॑ දධාති වාය॒ව්ය॑-ඞ්ගෝමෘ॒ගමා ල॑භේත॒ යමජ॑ඝ්නිවාග්ං සමභි॒ශග්ං සේ॑යු॒රපූ॑තා॒ වා ඒ॒තං-වාँගෘ॑ච්ඡති॒ යමජ॑ඝ්නිවාග්ං සමභි॒ශග්ං ස॑න්ති॒ නෛෂ ග්රා॒ම්යඃ ප॒ශුර්නාර॒ණ්යෝ ය-ද්ගෝ॑මෘ॒ගෝ නේවෛ॒ෂ ග්රාමේ॒ නාර॑ණ්යේ॒ යමජ॑ඝ්නිවාග්ං සමභි॒ශග්ං ස॑න්ති වා॒යුර්වෛ දේ॒වානා᳚-ම්ප॒විත්රං॑-වාँ॒යුමේ॒ව ස්වේන॑ භාග॒ධේයේ॒නෝප॑ ධාවති॒ ස ඒ॒වෛ- [ස ඒ॒ව, ඒ॒න॒-ම්ප॒ව॒ය॒ති॒ පරා॑චී॒] 58

-න॑-ම්පවයති॒ පරා॑චී॒ වා ඒ॒තස්මෛ᳚ ව්යු॒ච්ඡන්තී॒ ව්යු॑ච්ඡති॒ තමඃ॑ පා॒ප්මාන॒-ම්ප්රවි॑ශති॒ යස්යා᳚-(අ)(අ)ශ්වි॒නේ ශ॒ස්යමා॑නේ॒ සූර්යෝ॒ නා-(අ)(අ)විර්භව॑ති සෞ॒ර්ය-ම්බ॑හුරූ॒පමා ල॑භේතා॒-(අ)මු-මේ॒වා-(අ)(අ)දි॒ත්යග්ග් ස්වේන॑ භාග॒ධේයේ॒නෝප॑ ධාවති॒ ස ඒ॒වාස්මා॒-ත්තමඃ॑ පා॒ප්මාන॒මප॑ හන්ති ප්ර॒තීච්ය॑ස්මෛ ව්යු॒ච්ඡන්තී॒ ව්යු॑ච්ඡ॒ත්යප॒ තමඃ॑ පා॒ප්මානග්ං॑ හතේ .. 59 ..

(ල॒ලාමඃ॒ - ස ඒ॒ව - ෂට්ච॑ත්වාරිග්ංශච්ච) (අ. 10)

ඉන්ද්රං॑-වෝँ වි॒ශ්වත॒ස්පරී, න්ද්ර॒-න්නරෝ॒, මරු॑තෝ॒ යද්ධ॑ වෝ දි॒වෝ, යා ව॒-ශ්ශර්ම॑ .. භරේ॒ෂ්වින්ද්රග්ං॑ සු॒හවග්ං॑ හවාමහේ (අ)ග්ංහෝ॒මුචග්ං॑ සු॒කෘත॒-න්දෛව්ය॒-ඤ්ජන᳚ම් . අ॒ග්නි-ම්මි॒ත්රං-වँරු॑ණග්ං සා॒තයේ॒ භග॒-න්ද්යාවා॑පෘථි॒වී ම॒රුතඃ॑ ස්ව॒ස්තයේ᳚ .. ම॒මත්තු॑ නඃ॒ පරි॑ජ්මා වස॒ර්॒හා ම॒මත්තු॒ වාතෝ॑ අ॒පාං-වෘँෂ॑ණ්වාන්න් . ශි॒ශී॒තමි॑න්ද්රාපර්වතා යු॒ව-න්න॒ස්තන්නෝ॒ විශ්වේ॑ වරිවස්යන්තු දේ॒වාඃ .. ප්රි॒යා වෝ॒ නාම॑ - [ප්රි॒යා වෝ॒ නාම॑, හු॒වේ॒ තු॒රාණා᳚ම් .] 60

හුවේ තු॒රාණා᳚ම් . ආ ය-ත්තෘ॒පන්ම॑රුතෝ වාවශා॒නාඃ .. ශ්රි॒යසේ॒ ක-ම්භා॒නුභි॒-ස්ස-ම්මි॑මික්ෂිරේ॒ තේ ර॒ශ්මිභි॒ස්ත ඍක්ව॑භි-ස්සුඛා॒දයඃ॑ . තේ වාශී॑මන්ත ඉ॒ෂ්මිණෝ॒ අභී॑රවෝ වි॒ද්රේ ප්රි॒යස්ය॒ මාරු॑තස්ය॒ ධාම්නඃ॑ .. අ॒ග්නිඃ ප්ර॑ථ॒මෝ වසු॑භිර්නෝ අව්යා॒-ථ්සෝමෝ॑ රු॒ද්රේභි॑ර॒භි ර॑ක්ෂත॒ ත්මනා᳚ . ඉන්ද්රෝ॑ ම॒රුද්භි॑ර්-ඍතු॒ධා කෘ॑ණෝත්වාදි॒ත්යෛර්නෝ॒ වරු॑ණ॒-ස්සග්ං ශි॑ශාතු .. ස-න්නෝ॑ දේ॒වෝ වසු॑භිර॒ග්නි-ස්සග්ං [වසු॑භිර॒ග්නි-ස්සම්, සෝම॑ස්ත॒නූභී॑ රු॒ද්රියා॑භිඃ .] 61

සෝම॑ස්ත॒නූභී॑ රු॒ද්රියා॑භිඃ . සමින්ද්රෝ॑ ම॒රුද්භි॑ ර්ය॒ජ්ඤියෛ॒-ස්සමා॑දි॒ත්යෛර්නෝ॒ වරු॑ණෝ අජිජ්ඤිපත් .. යථා॑-(අ)(අ)දි॒ත්යා වසු॑භි-ස්සම්බභූ॒වු-ර්ම॒රුද්භී॑ රු॒ද්රා-ස්ස॒මජා॑නතා॒භි . ඒ॒වා ත්රි॑ණාම॒න්න-හෘ॑ණීයමානා॒ විශ්වේ॑ දේ॒වා-ස්සම॑නසෝ භවන්තු .. කුත්රා॑ චි॒ද්යස්ය॒ සමෘ॑තෞ ර॒ණ්වා නරෝ॑ නෘ॒ෂද॑නේ . අර්හ॑න්තශ්චි॒-ද්යමි॑න්ධ॒තේ ස॑ඤ්ජ॒නය॑න්ති ජ॒න්තවඃ॑ .. සං-යँදි॒ෂෝ වනා॑මහේ॒ සග්ං හ॒ව්යා මානු॑ෂාණාම් . උ॒ත ද්යු॒ම්නස්ය॒ ශව॑ස [ශව॑සඃ, ඍ॒තස්ය॑ ර॒ශ්මිමා ද॑දේ .] 62

ඍ॒තස්ය॑ ර॒ශ්මිමා ද॑දේ .. ය॒ජ්ඤෝ දේ॒වානා॒-ම්ප්රත්යේ॑ති සු॒ම්නමාදි॑ත්යාසෝ॒ භව॑තා මෘඩ॒යන්තඃ॑ . ආ වෝ॒-(අ)ර්වාචී॑ සුම॒තිර්ව॑වෘත්යාද॒ග්ං॒ හෝශ්චි॒ද්යා ව॑රිවෝ॒විත්ත॒රා-(අ)ස॑ත් .. ශුචි॑ර॒ප-ස්සූ॒යව॑සා අද॑බ්ධ॒ උප॑ ක්ෂේති වෘ॒ද්ධව॑යා-ස්සු॒වීරඃ॑ . නකි॒ෂ්ටං(2) ඝ්න॒න්ත්යන්ති॑තෝ॒ න දූ॒රාද්ය ආ॑දි॒ත්යානා॒-ම්භව॑ති॒ ප්රණී॑තෞ .. ධා॒රය॑න්ත ආදි॒ත්යාසෝ॒ ජග॒ථ්ස්ථා දේ॒වා විශ්ව॑ස්ය॒ භුව॑නස්ය ගෝ॒පාඃ . දී॒ර්ඝාධි॑යෝ॒ රක්ෂ॑මාණා [රක්ෂ॑මාණාඃ, අ॒සු॒ර්ය॑මෘ॒තාවා॑න॒-] 63

අසු॒ර්ය॑මෘ॒තාවා॑න॒-ශ්චය॑මානා ඍ॒ණානි॑ .. ති॒ස්රෝ භූමී᳚ර්ධාරය॒-න්ත්රීග්ං රු॒ත ද්යූ-න්ත්රීණි॑ ව්ර॒තා වි॒දථේ॑ අ॒න්තරේ॑ෂාම් . ඍ॒තේනා॑-(අ)(අ)දිත්යා॒ මහි॑ වෝ මහි॒ත්ව-න්තද॑ර්යමන් වරුණ මිත්ර॒ චාරු॑ .. ත්යාන්නු ක්ෂ॒ත්රියා॒ග්ං॒ අව॑ ආදි॒ත්යාන්. යා॑චිෂාමහේ . සු॒මෘ॒ඩී॒කාග්ං අ॒භිෂ්ට॑යේ .. න ද॑ක්ෂි॒ණා විචි॑කිතේ॒ න ස॒ව්යා න ප්රා॒චීන॑මාදිත්යා॒ නෝත ප॒ශ්චා . පා॒ක්යා॑ චිද්වසවෝ ධී॒ර්යා॑ චි- [ධී॒ර්යා॑ චිත්, යු॒ෂ්මානී॑තෝ॒] 64

-ද්යු॒ෂ්මානී॑තෝ॒ අභ॑ය॒-ඤ්ජ්යෝති॑රශ්යාම් .. ආ॒දි॒ත්යානා॒මව॑සා॒ නූත॑නේන සක්ෂී॒මහි॒ ශර්ම॑ණා॒ ශන්ත॑මේන . අ॒නා॒ගා॒ස්ත්වේ අ॑දිති॒ත්වේ තු॒රාස॑ ඉ॒මං-යँ॒ජ්ඤ-න්ද॑ධතු॒ ශ්රෝෂ॑මාණාඃ .. ඉ॒ම-ම්මේ॑ වරුණ ශ්රුධී॒ හව॑ම॒ද්යා ච॑ මෘඩය . ත්වාම॑ව॒ස්යුරා ච॑කේ .. තත්ත්වා॑ යාමි॒ බ්රහ්ම॑ණා॒ වන්ද॑මාන॒-ස්තදා ශා᳚ස්තේ॒ යජ॑මානෝ හ॒විර්භිඃ॑ . අහේ॑ඩමානෝ වරුණේ॒හ බෝ॒ද්ධ්යුරු॑ශග්ංස॒ මා න॒ ආයුඃ॒ ප්රමෝ॑ෂීඃ .. 65 ..

(නාමා॒ - (අ)ග්නි-ස්සග්ං - ශව॑සෝ॒ - රක්ෂ॑මාණා - ධී॒ර්යා॑-ඤ්චි॒දේ - කා॒න්න ප॑ඤ්චා॒ශච්ච॑) (අ. 11)

(වා॒ය॒ව්යං॑ - ප්රා॒ජප॑ති॒ස්තා වරු॑ණං - දේවාසු॒රා ඒ॒ෂ්ව॑ - සාවා॑දි॒ත්යෝ දශ॑ර්ෂභා॒-මින්ද්රෝ॑ ව॒ලස්ය॑ - බාර්හස්ප॒ත්යං - ँව॑ෂට්කා॒රෝ॑ - (අ)සෞසෞ॒රීං॒ - ँව॑රුණ -මාශ්වි॒න - මින්ද්රං॑-වෝँ॒ නර॒ - ඒකාද॑ශ)

(වා॒ය॒ව්ය॑ - මාග්නේ॒යී-ඞ්කෘ॑ෂ්ණග්රී॒වී - ම॒සාවා॑දි॒ත්යෝ - වා අ॑හෝරා॒ත්රාණි॑ - වෂට්කා॒රඃ - ප්ර॑ජනයි॒තා - හු॑වේ තු॒රාණාං॒ - පඤ්ච॑ෂෂ්ටිඃ )

(වා॒ය॒ව්ය॑ම්, ප්රමෝ॑ෂීඃ)

.. හරිඃ॑ ඕම් ..

.. කෘෂ්ණ යජුර්වේදීය තෛත්තිරීය සංහිතායා-න්ද්විතීයකාණ්ඩේ ප්රථමඃ ප්රශ්න-ස්සමාප්තඃ ..

Roman (IAST) Transliteration

kṛṣṇa yajurvedīya taittirīya saṃhitāyā-ndvitīyakāṇḍe prathamaḥ praśnaḥ - paśuvidhānaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

vā॒ya॒vyagg̭ śve॒tamā la̭bheta॒ bhūti̭kāmo vā॒yurvai kṣepi̭ṣṭhā de॒vatā̭vā॒yume॒va svena̭ bhāga॒dheye॒nopa̭ dhāvati॒ sa e॒vaina॒-mbhūti̭-ṅgamayati॒ bhava̭tye॒vā-ti̭kṣiprā de॒vatetyā̭hu॒-ssaina̭mīśva॒rā pra॒daha॒ itye॒tame॒va santaṃ̭-vā~॒yavḙ ni॒yutva̭ta॒ ā la̭bheta ni॒yudvā a̭sya॒ dhṛti̭rdhṛ॒ta e॒va bhūti॒mupai॒tya pra̭dāhāya॒ bhava̭tye॒va [ ] 1

vā॒yavḙ ni॒yutva̭ta॒ ā la̭bheta॒ grāma̭kāmo vā॒yurvā i॒māḥ pra॒jā na̭syo॒tā nḙnīyate vā॒yume॒va ni॒yutva̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmai᳚ pra॒jā na̭syo॒tā niya̭cchati grā॒myḙva bha̭vati ni॒yutva̭te bhavati dhru॒vā e॒vāsmā॒ ana̭pagāḥ karoti vā॒yavḙ ni॒yutva̭ta॒ ā la̭bheta pra॒jākā̭maḥ prā॒ṇo vai vā॒yura̭pā॒no ni॒yu-tprā̭ṇāpā॒nau khalu॒ vā e॒tasya̭ pra॒jāyā॒ [pra॒jāyāḥ᳚, apa̭] 2

apa̭ krāmato॒ yo-'la̭-mpra॒jāyai॒ sa-npra॒jā-nna vi॒ndatḙ vā॒yume॒va ni॒yutva̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmai᳚ prāṇāpā॒nābhyā᳚-mpra॒jā-mpra ja̭nayati vi॒ndate᳚ pra॒jāṃ-vā~॒yavḙ ni॒yutva̭ta॒ ā la̭bheta॒ jyogā̭mayāvī prā॒ṇo vai vā॒yura̭pā॒no ni॒yu-tprā̭ṇāpā॒nau khalu॒ vā e॒tasmā॒ dapa̭krāmato॒ yasya॒ jyogā॒maya̭ti vā॒yume॒va ni॒yutva̭nta॒gg॒ svena̭ bhāga॒dheye॒nopa̭ - [bhāga॒dheye॒nopa̭, dhā॒va॒ti॒ sa] 3

dhāvati॒ sa e॒vā-'smi̭-nprāṇāpā॒nau da̭dhātyu॒ta yadī॒tāsu॒rbhava̭ti॒ jīva̭tye॒va pra॒jāpa̭ti॒rvā i॒dameka̭ āsī॒-thso̭-'kāmayata pra॒jāḥ pa॒śūn-thsṛ̭je॒yeti॒ sa ā॒tmano̭ va॒pāmuda̭kkhida॒-ttāma॒gnau prāgṛ̭hṇā॒-ttato॒-'jastṷ̄pa॒ra-ssama̭bhava॒-ttagg svāyai̭ de॒vatā̭yā॒ ā 'la̭bhata॒ tato॒ vai sa pra॒jāḥ pa॒śūna̭sṛjata॒ yaḥ pra॒jākā̭maḥ [ ] 4

pa॒śukā̭ma॒-ssyā-thsa e॒ta-mprā̭jāpa॒tyama॒ja-ntṷ̄pa॒ramā la̭bheta pra॒jāpa̭time॒va svena̭ bhāga॒dheye॒nopa̭ dhāvati॒ sa e॒vāsmai᳚ pra॒jā-mpa॒śū-npraja̭nayati॒ yacchma̭śru॒ṇasta-tpurṷṣāṇāgṃ rū॒paṃ-ya~-ttṷ̄pa॒rastadaśvā̭nāṃ॒-ya~da॒nyato̭da॒-nta-dgavāṃ॒-ya~davyā̭ iva śa॒phāstadavī̭nāṃ॒-ya~da॒jasta-da॒jānā̭-me॒tāva̭nto॒ vai grā॒myāḥ pa॒śava॒stā- [pa॒śava॒stān, rū॒peṇai॒vāva̭ rundhe] 5

-nrū॒peṇai॒vāva̭ rundhe somāpau॒ṣṇa-ntrai॒tamā la̭bheta pa॒śukā̭mo॒dvau vā a॒jāyai॒ stanau॒ nānai॒va dvāva॒bhi jāyḙte॒ ūrja॒-mpuṣṭi̭-ntṛ॒tīyaḥ̭somāpū॒ṣaṇā̭ve॒va svena̭ bhāga॒dheye॒nopa̭ dhāvati॒ tāve॒vāsmai̭ pa॒śū-npraja̭nayata॒-ssomo॒ vai rḙto॒dhāḥ pū॒ṣā pa̭śū॒nā-mpra̭janayi॒tā soma̭ e॒vāsmai॒ reto॒ dadhā̭ti pū॒ṣā pa॒śū-npra ja̭naya॒tyaudṷmbaro॒ yūpo̭ bhava॒tyūrgvā ṷdu॒mbara॒ ūrkpa॒śava̭ ū॒rjaivāsmā॒ ūrja̭-mpa॒śūnava̭ rundhe || 6 ||

(apra̭dāhāya॒ bhava̭tye॒va - pra॒jāyā̭ - ā॒maya̭ti vā॒yume॒va ni॒yutva̭ta॒gg॒ svena̭ bhāga॒dheye॒nopa̭ - pra॒jāka̭ma॒ - stān - yūpa॒ - strayo̭daśa ca ) (a. 1)

pra॒jāpa̭tiḥ pra॒jā a̭sṛjata॒ tā a̭smā-thsṛ॒ṣṭāḥ parā̭cīrāya॒-ntā varṷṇamagaccha॒-ntā anvai॒-ttāḥ puna̭rayācata॒ tā a̭smai॒ na puna̭radadā॒-thso᳚-'bravī॒-dvaraṃ̭-vṛ~ṇī॒ṣvātha̭ me॒ puna̭rde॒hīti॒ tāsāṃ॒-va~ra॒mā 'la̭bhata॒ sa kṛ॒ṣṇa eka̭śitipāda-bhava॒dyo varṷṇa gṛhīta॒-ssyā-thsa e॒taṃ-vā~̭ru॒ṇa-ṅkṛ॒ṣṇa-meka̭śitipāda॒mā-la̭bheta॒ varṷṇa- [varṷṇam, e॒va svena̭] 7

-me॒va svena̭ bhāga॒dheye॒nopa̭ dhāvati॒ sa e॒vainaṃ̭-va~ruṇapā॒śā-nmṷñcati kṛ॒ṣṇa eka̭śitipā-dbhavati vāru॒ṇo hyḙṣa de॒vata̭yā॒ samṛ̭ddhyai॒ suva̭rbhānurāsu॒ra-ssūrya॒-ntama̭sā-'viddhya॒ta tasmai̭de॒vāḥ prāya̭ścitti-maiccha॒-ntasya॒ ya-tpra̭tha॒ma-ntamo॒-'pāghna॒n-thsā kṛ॒ṣṇā-'vi̭rabhava॒-dya-ddvi॒tīya॒gṃ॒ sā phalgṷnī॒ yata tṛ॒tīya॒gṃ॒ sā ba̭la॒kṣī yada̭ddhya॒sthā-da॒pākṛ̭nta॒n-thsā 'vi̭rva॒śā [ ] 8

sama̭bhava॒-tte de॒vā a̭bruva-ndevapa॒śurvā a॒yagṃ sama̭bhū॒-tkasmā̭ i॒mamā la̭phsyāmaha॒ ityatha॒ vai tarhyalpā̭ pṛthi॒vyāsī॒-dajā̭tā॒ oṣa̭dhaya॒stāmaviṃ̭-va~॒śāmā̭di॒tyebhyaḥ॒ kāmā॒yā-'la̭bhanta॒ tato॒ vā apra̭thata pṛthi॒vya-jā̭ya॒ntauṣa̭dhayo॒ yaḥ kā॒mayḙta॒ prathḙya pa॒śubhiḥ॒ pra pra॒jayā̭ jāye॒yeti॒ sa e॒tāmaviṃ̭-va~॒śāmā̭di॒tyebhyaḥ॒ kāmā॒yā- [kāmā̭ya, āla̭bhetā ''di॒tyāne॒va] 9

-''la̭bhetā ''di॒tyāne॒va kāma॒gg॒ svena̭ bhāga॒dheye॒nopa̭ dhāvati॒ ta e॒vaina̭-mpra॒thaya̭nti pa॒śubhiḥ॒ pra pra॒jayā̭ janayantya॒-sāvā̭di॒tyo na vya̭rocata॒ tasmai̭ de॒vāḥ prāya̭ścittimaiccha॒-ntasmā̭ e॒tā ma॒l॒hā āla̭bhantā-''gne॒yī-ṅkṛ̭ṣṇagrī॒vīgṃ sagṃ̭hi॒tāmai॒ndrīg śve॒tā-mbā̭rhaspa॒tyā-ntābhi̭re॒vāsmi॒-nruca̭madadhu॒ryo bra̭hmavarca॒sa-kā̭ma॒-ssyā-ttasmā̭ e॒tā ma॒l॒hā ā la̭bhetā- [ā la̭bheta, ā॒gne॒yī-ṅkṛ̭ṣṇagrī॒vīgṃ] 10

(śikhaṇḍi pañcati)

-''gne॒yī-ṅkṛ̭ṣṇagrī॒vīgṃ sagṃ̭hi॒tāmai॒ndrīg śve॒tā-mbā̭rhaspa॒tyāme॒tā e॒va de॒vatā॒-ssvena̭ bhāga॒dheye॒nopa̭ dhāvati॒ tā e॒vāsmi̭-nbrahmavarca॒sa-nda̭dhati brahmavarca॒syḙva bha̭vati va॒santā᳚ prā॒tarā᳚gne॒yī-ṅkṛ̭ṣṇa grī॒vīmā la̭bheta grī॒ṣme ma॒ddhyandi̭ne sagṃhi॒tāmai॒ndrīgṃ śa॒radya̭parā॒hṇe śve॒tā-mbā̭rhaspa॒tyā-ntrīṇi॒ vā ā̭di॒tyasya॒ tejāgṃ̭si va॒santā᳚ prā॒targrī॒ṣme ma॒ddhyandi̭ne śa॒radya̭parā॒hṇe yāva̭ntye॒va tejāgṃ̭si॒ tānye॒vā- [tānye॒va, ava̭ rundhe] 11

-'va̭ rundhe saṃva~thsa॒ra-mpa॒ryāla̭bhyante saṃva~thsa॒ro vai bra̭hmavarca॒sasya̭ pradā॒tā saṃ̭va~thsa॒ra e॒vāsmai᳚ brahmavarca॒sa-mpra ya̭cchati brahmavarca॒syḙva bha̭vati ga॒rbhiṇa̭yo bhavantīndri॒yaṃ-vai~ garbha̭ indri॒yame॒vāsmi̭-ndadhati sārasva॒tī-mme॒ṣīmā la̭bheta॒ ya ī᳚śva॒ro vā॒co vadi̭to॒-ssan vāca॒-nna vade॒-dvāgvai sara̭svatī॒ sara̭svatīme॒va svena̭ bhāga॒dheye॒nopa̭ dhāvati॒ saivāsmi॒- [saivāsminṋ, vāca̭-ndadhāti] 12

-nvāca̭-ndadhāti pravadi॒tā vā॒co bha̭va॒tyapa̭nnadatī bhavati॒ tasmā᳚-nmanu॒ṣyā᳚-ssarvāṃ॒-vā~caṃ̭-va~dantyāgne॒ya-ṅkṛ॒ṣṇagrī̭va॒mā la̭bheta sau॒mya-mba॒bhru-ñjyogā̭mayāvya॒gniṃ-vā~ e॒tasya॒ śarī̭ra-ṅgacchati॒ soma॒gṃ॒ raso॒ yasya॒ jyogā॒maya̭tya॒gnere॒vāsya॒ śarī̭ra-nniṣkrī॒ṇāti॒ somā॒-drasa̭mu॒ta yadī॒tāsu॒rbhava̭ti॒ jīva̭tye॒va sau॒mya-mba॒bhrumā la̭bhetā-''gne॒ya-ṅkṛ॒ṣṇagrī̭va-mpra॒jākā̭ma॒-ssomo॒ [somaḥ̭, vai rḙto॒dhā] 13

vai rḙto॒dhā a॒gniḥ pra॒jānā᳚-mprajanayi॒tā soma̭ e॒vāsmai॒ reto॒ dadhā᳚tya॒gniḥ pra॒jā-mpraja̭nayati vi॒ndate᳚ pra॒jāmā᳚gne॒ya-ṅkṛ॒ṣṇagrī̭va॒mā la̭bheta sau॒mya-mba॒bhruṃ-yo~ brā᳚hma॒ṇo vi॒dyāma॒nūcya॒ na vi॒rocḙta॒ yadā᳚gne॒yo bhava̭ti॒ teja̭ e॒vāsmi॒-ntena̭ dadhāti॒ ya-thsau॒myo bra̭hmavarca॒sa-ntena̭ kṛ॒ṣṇagrī̭va āgne॒yo bha̭vati॒ tama̭ e॒vāsmā॒dapa̭ hanti śve॒to bha̭vati॒ [bha̭vati, ruca̭me॒vāsmi̭-ndadhāti] 14

ruca̭me॒vāsmi̭-ndadhāti ba॒bhru-ssau॒myo bha̭vati brahmavarca॒same॒vāsmi॒-ntviṣi̭-ndadhātyā-gne॒ya-ṅkṛ॒ṣṇagrī̭va॒mā la̭bheta sau॒mya-mba॒bhrumā᳚gne॒ya-ṅkṛ॒ṣṇagrī̭va-mpuro॒dhāyā॒g॒ spardha̭māna āgne॒yo vai brā᳚hma॒ṇa-ssau॒myo rā̭ja॒nyo̭-'bhitaḥ̭ sau॒myamā᳚gne॒yau bha̭vata॒-steja̭sai॒va brahma̭ṇobha॒yato̭ rā॒ṣṭra-mpari̭ gṛhṇātyeka॒dhā sa॒mā vṛ̭ṅkte pu॒ra ḙna-ndadhate || 15 ||

(la॒bhe॒ta॒ varṷṇaṃ - ~va॒śai - tāmaviṃ̭-va~॒śāmā̭di॒tyebhyaḥ॒ kāmā̭ya - ma॒lhā ā la̭bheta॒ - tānye॒va - saivāsmi॒nth - somaḥ̭ - sve॒to bha̭vati॒ - trica̭tvārigṃśacca ) (a. 2)

de॒vā॒su॒rā e॒ṣu lo॒keṣva̭spardhanta॒ sa e॒taṃ-vi~ṣṇṷ-rvāma॒nama̭paśya॒-ttagg svāyai̭ de॒vatā̭yā॒ ā-'la̭bhata॒ tato॒ vai sa i॒māṃ-lo~॒kāna॒bhya̭jayad- vaiṣṇa॒vaṃ-vā~̭ma॒namā la̭bheta॒ spardha̭māno॒ viṣṇṷre॒va bhū॒tvemān ~lo॒kāna॒bhi ja̭yati॒ viṣa̭ma॒ ā la̭bheta॒ viṣa̭mā iva॒ hīme lo॒kā-ssamṛ̭ddhyā॒ indrā̭ya manyu॒mate॒ mana̭svate la॒lāma̭-mprāśṛ॒ṅgamā la̭bheta saṅgrā॒me [ ] 16

saṃya~̭tta indri॒yeṇa॒ vai ma॒nyunā॒ mana̭sā saṅgrā॒ma-ñja̭ya॒tīndra̭me॒va ma̭nyu॒manta॒-mmana̭svanta॒gg॒ svena̭ bhāga॒dheye॒nopa̭ dhāvati॒ sa e॒vāsmi̭nnindri॒ya-mma॒nyu-mmano̭ dadhāti॒ jaya̭ti॒ tagṃ sa̭grā॒mmamindrā̭ya ma॒rutva̭te pṛśñisa॒kthamā la̭bheta॒ grāma̭kāma॒ indra̭me॒va ma॒rutva̭nta॒gg॒ svena̭ bhāga॒dheye॒nopa̭ dhāvati॒ sa e॒vāsmai̭ sa jā॒tā-npraya̭cchati grā॒myḙva bha̭vati॒ yadṛ̭ṣa॒bhastenai॒- [yadṛ̭ṣa॒bhastena̭, ai॒ndro ya-tpṛśñi॒stena̭] 17

-ndro ya-tpṛśñi॒stena̭ māru॒ta-ssamṛ̭ddhyai pa॒ścā-tpṛ̭śñisa॒ktho bha̭vati paścādanva-vasā॒yinī̭me॒vāsmai॒ viśa̭-ṅkaroti sau॒mya-mba॒bhrumā la̭bhe॒tānna̭kāma-ssau॒myaṃ-vā~ anna॒gṃ॒ soma̭me॒va svena̭ bhāga॒dheye॒nopa̭ dhāvati॒ sa e॒vāsmā॒ anna॒-mpraya̭̭cchatyannā॒da e॒va bha̭vati ba॒bhrurbha̭vatye॒tadvā anna̭sya rū॒pagṃ samṛ̭ddhyai sau॒mya-mba॒bhrumā la̭bheta॒ yamalagṃ̭ [yamala᳚m, rā॒jyāya॒] 18

rā॒jyāya॒ santagṃ̭ rā॒jya-nnopa॒name᳚-thsau॒myaṃ-vai~ rā॒jyagṃ soma̭me॒va svena̭ bhāga॒dheye॒nopa̭ dhāvati॒ sa e॒vāsmai̭ rā॒jya-mpraya̭ccha॒tyupai̭nagṃ rā॒jya-nna̭mati ba॒bhrurbha̭vatye॒ta-dvai soma̭sya rū॒pagṃ samṛ̭ddhyā॒ indrā̭ya vṛtra॒turḙ la॒lāma̭-mprāśṛ॒ṅgamā la̭bheta ga॒taśrīḥ᳚ prati॒ṣṭhākā̭maḥ pā॒pmāna̭me॒va vṛ॒tra-ntī॒rtvā pra̭ti॒ṣṭhā-ṅga̭ccha॒tīndrā̭yābhimāti॒ghne la॒lāma̭-mprāśṛ॒ṅgamā [la॒lāma̭-mprāśṛ॒ṅgamā, la॒bhe॒ta॒ yaḥ pā॒pmanā̭] 19

la̭bheta॒ yaḥ pā॒pmanā̭ gṛhī॒ta-ssyā-tpā॒pmā vā a॒bhimā̭ti॒rindra̭me॒vā- bhi̭māti॒hana॒gg॒ svena̭ bhāga॒dheye॒nopa̭ dhāvati॒ sa e॒vāsmā᳚-tpā॒pmāna̭ma॒bhimā̭ti॒-mpraṇṷdata॒ indrā̭ya va॒jriṇḙ la॒lāma̭-mprāśṛ॒ṅgamā la̭bheta॒ yamalagṃ̭ rā॒jyāya॒ santagṃ̭ rā॒jya-nnopa॒name॒dindra̭me॒va va॒jriṇa॒gg॒ svena̭ bhāga॒dheye॒nopa̭ dhāvati॒ sa e॒vāsmai॒ vajra॒-mpra ya̭cchati॒ sa ḙnaṃ॒ ~vajro॒ bhūtyā̭ indha॒ upai̭nagṃ rā॒jya-nna̭mati la॒lāmaḥ̭ prāśṛ॒ṅgo bha̭vatye॒tadvai vajra̭sya rū॒pagṃ samṛ̭ddhyai || 20

(sa॒grā॒mme - tenā - la̭ - mabhimāti॒ghne la॒lāma̭-mprāśṛ॒ṅgamai - naṃ॒ - pañca̭daśa ca ) (a. 3)

a॒sāvā̭di॒tyo na vya̭rocata॒ tasmai̭ de॒vāḥ prāya̭ścittimaiccha॒-ntasmā̭ e॒tā-ndaśa̭rṣabhā॒mā-'la̭bhanta॒ tayai॒vāsmi॒-nruca̭madadhu॒ryo bra̭hmavarca॒sakā̭ma॒-ssyā-ttasmā̭ e॒tā-ndaśa̭rṣabhā॒mā la̭bhetā॒-mume॒vā-''di॒tyagg svena̭ bhāga॒dheye॒nopa̭ dhāvati॒ sa e॒vāsmi̭-nbrahmavarca॒sa-nda̭dhāti brahmavarca॒syḙva bha̭vati va॒santā᳚ prā॒tastrīn ~la॒lāmā॒nā la̭bheta grī॒ṣme ma॒ddhyandi̭ne॒ - [ma॒ddhyandi̭ne, trīñchi̭ti pṛ॒ṣṭhāñcha॒radya̭parā॒hṇe] 21

trīñchi̭ti pṛ॒ṣṭhāñcha॒radya̭parā॒hṇe trīñchi̭ti॒vārā॒-ntrīṇi॒ vā ā̭di॒tyasya॒ tejāgṃ̭si va॒santā᳚ prā॒targrī॒ṣme ma॒ddhyandi̭ne śa॒radya̭parā॒hṇe yāva̭ntye॒va tejāgṃ̭si॒ tānye॒vāva̭ rundhe॒ traya̭straya॒ ā la̭bhyante-'bhi pū॒rvame॒vāsmi॒-ntejo̭ dadhāti saṃva~thsa॒ra-mpa॒ryāla̭bhyante saṃva~thsa॒ro vai bra̭hmavarca॒sasya̭ pradā॒tā saṃ̭va~thsa॒ra e॒vāsmai᳚ brahmavarca॒sa-mpra ya̭cchati brahmavarca॒syḙva bha̭vati saṃva~thsa॒rasya̭ pa॒rastā᳚-tprājāpa॒tya-ṅkadru॒- [ prājāpa॒tya-ṅkadru᳚m, ā la̭bheta] 22

-mā la̭bheta pra॒jāpa̭ti॒-ssarvā̭ de॒vatā̭ de॒vatā᳚sve॒va prati̭tiṣṭhati॒ yadi̭ bibhī॒yā-ddu॒ścarmā̭ bhaviṣyā॒mīti̭ somāpau॒ṣṇagg śyā॒mamā la̭bheta sau॒myo vai de॒vata̭yā॒ purṷṣaḥ pau॒ṣṇāḥ pa॒śava॒-ssvayai॒vāsmai̭ de॒vata̭yā pa॒śubhi॒stvaca̭-ṅkaroti॒ na du॒ścarmā̭ bhavati de॒vāśca॒ vai ya॒maścā॒smin ~lo॒ke᳚-'spardhanta॒ sa ya॒mo de॒vānā̭mindri॒yaṃ-vī~॒rya̭mayuvata॒ tadya॒masya̭ [tadya॒masya̭, ya॒ma॒tva-nte] 23

yama॒tva-nte de॒vā a̭manyanta ya॒mo vā i॒dama̭bhū॒-dya-dva॒yagg sma iti॒ te pra॒jāpa̭ti॒mupā̭dhāva॒n-thsa e॒tau pra॒jāpa̭tirā॒tmana̭ ukṣava॒śau nira̭mimīta॒ te de॒vā vai᳚ṣṇāvaru॒ṇīṃ-va~॒śāmā-'la̭bhantai॒ndramu॒kṣāṇa॒ntaṃ-va~rṷṇenai॒va grā̭hayi॒tvā viṣṇṷnā ya॒jñena॒ prāṇṷdantai॒ndreṇai॒-vāsye᳚ndri॒yama̭-vṛñjata॒ yo bhrātṛ̭vyavā॒n-thsyā-thsa spardha̭māno vaiṣṇāvaru॒ṇīṃ- [vaiṣṇāvaru॒ṇīm, va॒śāmā] 24

-~va॒śāmā la̭bhetai॒ndramu॒kṣāṇaṃ॒-va~rṷṇenai॒va bhrātṛ̭vya-ṅgrāhayi॒tvā viṣṇṷnā ya॒jñena॒ praṇṷdata ai॒ndreṇai॒vāsye᳚ndri॒yaṃ-vṛ~̭ṅkte॒ bhava̭tyā॒tmanā॒ parā᳚sya॒ bhrātṛ̭vyo bhava॒tīndro̭ vṛ॒trama̭ha॒-ntaṃ-vṛ~॒tro ha॒ta-ṣṣo̭ḍa॒śabhi̭-rbho॒gaira̭sinā॒-ttasya̭ vṛ॒trasya̭ śīrṣa॒to gāva॒ udā̭ya॒-ntā vai̭de॒hyo̭-'bhava॒-ntāsā̭mṛṣa॒bho ja॒ghane-'nūdai॒-ttamindro̭- [ja॒ghane-'nūdai॒-ttamindraḥ̭, a॒cā॒ya॒thso̭-'manyata॒] 25

-'cāya॒thso̭-'manyata॒ yo vā i॒mamā॒labhḙta॒ mucyḙtā॒smā-tpā॒pmana॒ iti॒ sa ā᳚gne॒ya-ṅkṛ॒ṣṇagrī̭va॒mā la̭bhatai॒ndramṛ̭ṣa॒bha-ntasyā॒gnire॒va svena̭ bhāga॒dheye॒nopa̭ sṛta-ṣṣoḍaśa॒dhā vṛ॒trasya̭ bho॒gānapya̭dahadai॒ndreṇe᳚ndri॒ya- mā॒tmanna̭dhatta॒ yaḥ pā॒pmanā̭ gṛhī॒ta-ssyā-thsa ā᳚gne॒ya-ṅkṛ॒ṣṇagrī̭va॒mā la̭bhetai॒ndramṛ̭ṣa॒bha-ma॒gnire॒vāsya॒ svena̭ bhāga॒dheye॒nopa̭sṛtaḥ [ ] 26

pā॒pmāna॒mapi̭ dahatyai॒ndreṇe᳚ndri॒yamā॒tma-ndha̭tte॒ mucya̭te pā॒pmano॒ bhava̭tye॒va dyā̭vāpṛthi॒vyā᳚-ndhe॒numā la̭bheta॒ jyoga̭paruddho॒ 'nayo॒r॒hi vā e॒ṣo-'pra̭tiṣṭhi॒to-'thai॒ṣa jyogapa̭ruddho॒ dyāvā̭pṛthi॒vī e॒va svena̭ bhāga॒dheye॒nopa̭ dhāvati॒ te e॒vaina̭-mprati॒ṣṭhā-ṅga̭mayataḥ॒ pratye॒va ti̭ṣṭhati paryā॒riṇī̭ bhavati paryā॒rīva॒ hyḙtasya̭ rā॒ṣṭraṃ-yo~ jyoga̭paruddha॒-ssamṛ̭ddhyai vāya॒vyaṃ̭- [vāya॒vya᳚m, va॒thsamā] 27

-~va॒thsamā la̭bheta vā॒yurvā a॒nayo᳚rva॒thsa i॒me vā e॒tasmai̭ lo॒kā apa̭śuṣkā॒ viḍapa̭śu॒ṣkā-'thai॒ṣa jyogapa̭ruddho vā॒yume॒va svena̭ bhāga॒dheye॒nopa̭ dhāvati॒ sa e॒vāsmā̭ i॒māṃ-lo~॒kān. viśa॒-mpradā̭payati॒ prāsmā̭ i॒me lo॒kā-ssnṷvantibhuñja॒tyḙnaṃ॒-vi~ḍupa̭tiṣṭhate || 28 ||

(ma॒dhyandi̭ne॒ - kadruṃ̭ - ~ya॒masya॒ - spardha̭māno vaiṣṇāvaru॒ṇīṃ -tamindro᳚ - 'sya॒ svena̭ bhāga॒dheye॒nopa̭sṛto - vāya॒vyaṃ̭ - dvica̭tvārigṃśacca) (a. 4)

indro̭ va॒lasya॒ bila॒mapau᳚rṇo॒-thsa ya ṷtta॒maḥ pa॒śurāsī॒-tta-mpṛ॒ṣṭha-mprati̭ sa॒gṛṃhyoda̭kkhida॒-ttagṃ sa॒hasra̭-mpa॒śavo-'nūdā̭ya॒n-thsa ṷnna॒to̭-'bhava॒dyaḥ pa॒śukā̭ma॒-ssyā-thsa e॒tamai॒ndramṷnna॒tamā la̭bhe॒tendra̭me॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒śū-npraya̭cchati paśu॒māne॒va bha̭vatyunna॒to [bha̭vatyunna॒taḥ, bha॒va॒ti॒ sā॒ha॒srī] 29

bha̭vati sāha॒srī vā e॒ṣā la॒kṣmī yadṷnna॒to la॒kṣmiyai॒ va pa॒śūnava̭ rundhe ya॒dā sa॒hasra̭-mpa॒śū-nprā᳚pnu॒yādatha̭ vaiṣṇa॒vaṃ-vā~̭ ma॒namā la̭bhetai॒tasmi॒n. vai ta-thsa॒hasra॒maddhya̭tiṣṭha॒-ttasmā̭de॒ṣa vā̭ma॒na-ssamī̭ṣitaḥ pa॒śubhya̭ e॒va prajā̭tebhyaḥ prati॒ṣṭhā-nda̭dhāti॒ ko̭-'rhati sa॒hasra̭-mpa॒śū-nprāptu॒mityā̭hu-rahorā॒trāṇye॒va sa॒hasragṃ̭ sa॒mpādyā-''la̭bheta pa॒śavo॒ [pa॒śavaḥ̭, vā a̭horā॒trāṇi̭] 30

vā a̭horā॒trāṇi̭ pa॒śūne॒va prajā̭tā-nprati॒ṣṭhā-ṅga̭maya॒-tyoṣa̭dhībhyo ve॒hata॒mā la̭bheta pra॒jākā̭ma॒ oṣa̭dhayo॒ vā e॒ta-mpra॒jāyai॒ pari̭bādhante॒ yo-'la̭-mpra॒jāyai॒ sa-npra॒jā-nna vi॒ndata॒ oṣa̭dhayaḥ॒ khalu॒ vā e॒tasyai॒ sūtu॒mapi̭ ghnanti॒ yā ve॒ha-dbhava॒tyoṣa̭dhīre॒va svena̭ bhāga॒dheye॒nopa̭ dhāvati॒ tā e॒vāsmai॒ svādyoneḥ᳚ pra॒jā-mpra ja̭nayanti vi॒ndate᳚ [ ] 31

pra॒jāmāpo॒ vā oṣa̭dha॒yo-'sa॒-tpurṷṣa॒ āpa̭ e॒vāsmā॒ asa̭ta॒-ssadda̭dati॒ tasmā̭dāhu॒ryaścai॒vaṃ-ve~da॒ yaśca॒ nāpa॒stvāvāsa̭ta॒-ssadda̭da॒tī-tyai॒ndrīgṃ sū॒tava̭śā॒mā la̭bheta॒ bhūti̭kā॒mo-'jā̭to॒ vā e॒ṣa yo-'la॒-mbhūtyai॒ sa-nbhūti॒-nna prā॒pnotīndra॒-ṅkhalu॒ vā e॒ṣā sū॒tvā va॒śā-'bha̭va॒- [va॒śā-'bha̭vat, indra̭me॒va] 32

-dindra̭me॒va svena̭ bhāga॒dheye॒nopa̭ dhāvati॒ sa e॒vaina॒-mbhūti̭-ṅgamayati॒ bhava̭tye॒va yagṃ sū॒tvā va॒śā syā-ttamai॒ndrame॒vā-'' la̭bhetai॒tadvāva tadi̭ndri॒yagṃ sā॒kṣāde॒vendri॒yamava̭ rundha aindrā॒gna-mpṷnaru-thsṛ॒ṣṭamā la̭bheta॒ ya ā tṛ॒tīyā॒-tpurṷṣā॒-thsoma॒-nna pibe॒-dvicchi̭nno॒ vā e॒tasya̭ somapī॒tho yo brā᳚hma॒ṇa-ssannā [ ] 33

tṛ॒tīyā॒-tpurṷṣā॒-thsoma॒-nna piba̭tīndrā॒gnī e॒va svena̭ bhāga॒dheye॒nopa̭ dhāvati॒ tāve॒vāsmai̭ somapī॒tha-mpraya̭cchata॒ upai̭nagṃ somapī॒tho na̭mati॒ yadai॒ndro bhava̭tīndri॒yaṃ-vai~ so̭mapī॒tha i̭ndri॒yame॒va so̭mapī॒thamava̭ rundhe॒ yadā᳚gne॒yo bhava̭tyāgne॒yo vai brā᳚hma॒ṇa-ssvāme॒va de॒vatā॒manu॒ santa̭noti punaruthsṛ॒ṣṭo bha̭vati punaruthsṛ॒ṣṭa i̭va॒ hyḙtasya̭ [hyḙtasya̭, so॒ma॒pī॒tha-ssamṛ̭ddhyai] 34

somapī॒tha-ssamṛ̭ddhyai brāhmaṇaspa॒tya-ntṷ̄pa॒ramā la̭bhetā-bhi॒cara॒-nbrahma̭ṇa॒spati̭me॒va svena̭ bhāga॒dheye॒nopa̭ dhāvati॒ tasmā̭ e॒vaina॒mā vṛ̭ścati tā॒jagārti॒-mārccha̭ti tūpa॒ro bha̭vati kṣu॒rapa̭vi॒rvā e॒ṣā la॒kṣmī ya-ttṷ̄pa॒ra-ssamṛ̭ddhyai॒ sphyo yūpo̭ bhavati॒ vajro॒ vai sphyo vajra̭me॒vāsmai॒ praha̭rati śara॒maya̭-mba॒r॒hi-śśṛ॒ṇātye॒vainaṃ॒-vai~bhī̭daka i॒ddhmo bhi॒nattye॒vaina᳚m || 35 ||

(bha॒va॒tyu॒nna॒taḥ - pa॒śavo̭ - janayanti vi॒ndatḙ - 'bhava॒th - sannai - tasye॒ - dhma - strīṇi̭ ca) (a. 5)

bā॒r॒ha॒spa॒tyagṃ śi̭tipṛ॒ṣṭhamā la̭bheta॒ grāma̭kāmo॒ yaḥ kā॒mayḙta pṛ॒ṣṭhagṃ sa̭mā॒nānāg̭ syā॒miti॒ bṛha॒spati̭me॒va svena̭ bhāga॒dheye॒nopa̭ dhāvati॒ sa e॒vaina̭-mpṛ॒ṣṭhagṃ sa̭mā॒nānā᳚-ṅkaroti grā॒myḙva bha̭vati śitipṛ॒ṣṭho bha̭vati bārhaspa॒tyo hyḙṣa de॒vata̭yā॒ samṛ̭ddhyai pau॒ṣṇagg śyā॒mamā la̭bhe॒tānna̭kā॒mo-'nnaṃ॒-vai~ pū॒ṣā pū॒ṣaṇa̭me॒va svena̭ bhāga॒dheye॒nopa̭ dhāvati॒ sa e॒vāsmā॒ [e॒vāsmai᳚, anna॒-mpra] 36

anna॒-mpra ya̭cchatyannā॒da e॒va bha̭vati śyā॒mo bha̭vatye॒tadvā anna̭sya rū॒pagṃ samṛ̭ddhyai māru॒ta-mpṛśñi॒mā la̭bhe॒tā-'nna̭-kā॒mo-'nnaṃ॒-vai~ ma॒ruto̭ma॒ruta̭ e॒va svena̭ bhāga॒dheye॒nopa̭ dhāvati॒ ta e॒vāsmā॒ anna॒-mpraya̭cchantyannā॒dae॒va bha̭vati॒ pṛśñi̭ rbhavatye॒tadvā anna̭sya rū॒pagṃ samṛ̭ddhyā ai॒ndrama̭ru॒ṇamā la̭bhetendri॒yakā̭ma॒ indra̭me॒va [ ] 37

svena̭ bhāga॒dheye॒nopa̭ dhāvati॒ sa e॒vāsmi̭nnindri॒ya-nda̭dhātīndriyā॒vyḙva bha̭vatyaru॒ṇo bhrūmā᳚-nbhavatye॒tadvā indra̭sya rū॒pagṃ samṛ̭ddhyai sāvi॒tramṷpaddhva॒stamā la̭bheta sa॒nikā̭ma-ssavi॒tā vai pra̭sa॒vānā̭mīśe savi॒tāra̭me॒va svena̭ bhāga॒dheye॒nopa̭ dhāvati॒ sa e॒vāsmai̭ sa॒ni-mprasṷvati॒ dāna̭kāmā asmai pra॒jā bha̭vantyupaddhva॒sto bha̭vati sāvi॒tro hyḙṣa [sāvi॒tro hyḙṣaḥ, de॒vata̭yā॒ samṛ̭ddhyai] 38

de॒vata̭yā॒ samṛ̭ddhyai vaiśvade॒va-mba̭hurū॒pamā la̭bhe॒tā-'nna̭kāmovaiśvade॒vaṃ-vā~ annaṃ॒-vi~śvā̭ne॒va de॒vān-thsvena̭ bhāga॒dheye॒nopa̭ dhāvati॒ta e॒vāsmā॒ anna॒-mpraya̭cchantyannā॒da e॒va bha̭vati bahurū॒po bha̭vatibahurū॒pagg hyanna॒gṃ॒ samṛ̭ddhyai vaiśvade॒va-mba̭hurū॒pamā la̭bheta॒ grāma̭kāmo vaiśvade॒vā vai sa̭jā॒tā viśvā̭ne॒va de॒vān-thsvena̭ bhāga॒dheye॒nopa̭ dhāvati॒ ta e॒vā-'smai̭ [e॒vā-'smai᳚, sa॒jā॒tā-npra ya̭cchanti] 39

sajā॒tā-npra ya̭cchanti grā॒myḙva bha̭vati bahurū॒po bha̭vati bahudeva॒tyo᳚(1॒) hyḙṣa samṛ̭ddhyai prājāpa॒tya-ntṷ̄pa॒ramā la̭bheta॒ yasyānā᳚jñātamiva॒ jyogā॒maye᳚-tprājāpa॒tyo vai purṷṣaḥ pra॒jāpa̭tiḥ॒ khalu॒ vai tasya̭ veda॒ yasyānā᳚jñātamiva॒ jyogā॒maya̭ti pra॒jāpa̭time॒va svena̭ bhāga॒dheye॒nopa̭ dhāvati॒ sa e॒vaina॒-ntasmā॒-thsrāmā᳚-nmuñcati tūpa॒ro bha̭vati prājāpa॒tyo hyḙ -ṣa de॒vata̭yā॒ samṛ̭ddhyai || 40 ||

(a॒smā॒ - indra̭me॒vai - ṣa - sa̭jā॒tā viśvā̭ne॒va de॒vān-thsvena̭ bhāga॒dheye॒nopa̭ dhāvati॒ ta e॒vāsmai᳚ - prājāpa॒tyo hi - trīṇi̭ ca) (a. 11)

va॒ṣa॒ṭkā॒ro vai gā̭yatri॒yai śiro᳚-'cchina॒-ttasyai॒ rasaḥ॒ parā̭pata॒-tta-mbṛha॒spati॒ rupā̭-'gṛhṇā॒thsā śi̭tipṛ॒ṣṭhā va॒śā-'bha̭va॒dyo dvi॒tīyaḥ̭ pa॒rā-'pa̭ta॒-tta-mmi॒trāvarṷṇā॒-vupā̭gṛhṇītā॒gṃ॒ sā dvi̭rū॒pā va॒śā-'bha̭va॒-dyastṛ॒tīyaḥ̭ pa॒rāpa̭ta॒-ttaṃ-vi~śvḙ de॒vā upā̭gṛhṇa॒n-thsā ba̭hurū॒pā va॒śā bha̭va॒dya-śca̭tu॒rthaḥ pa॒rāpa̭ta॒-thsa pṛ̭thi॒vī-mprā-'vi̭śa॒-tta-mbṛha॒spati̭ra॒- [bṛha॒spati̭ra॒bhi, a॒gṛ॒hṇā॒-dastve॒vā-'yaṃ-] 41

-bhya̭gṛhṇā॒-dastve॒vā-'ya-mbhogā॒yeti॒ sa ṷkṣava॒śa-ssama̭bhava॒-dyallohi̭ta-mpa॒rāpa̭ta॒-tta-dru॒dra upā̭-'gṛhṇā॒-thsā rau॒drī rohi̭ṇī va॒śā-'bha̭va-dbārhaspa॒tyāgṃ śi̭tipṛ॒ṣṭhāmā la̭bheta brahmavarca॒sakā̭mo॒ bṛha॒spati̭me॒va svena̭ bhāga॒dheye॒nopa̭ dhāvati॒ sa e॒vāsmi̭-nbrahmavarca॒sa-nda̭dhāti brahmavarca॒syḙva bha̭vati॒ chanda̭sāṃ॒-vā~ e॒ṣa raso॒ yadva॒śā rasa̭ iva॒ khalu॒ [khalṷ, vai] 42

vai bra̭hmavarca॒sa-ñchanda̭sāme॒va rasḙna॒ rasa̭-mbrahmavarca॒samava̭ rundhe maitrāvaru॒ṇī-ndvi̭rū॒pāmā la̭bheta॒ vṛṣṭi̭kāmo mai॒traṃ-vā~ aha̭rvāru॒ṇī rātri̭rahorā॒trābhyā॒-ṅkhalu॒ vai pa॒rjanyo̭ varṣati mi॒trāvarṷṇāve॒va svena̭ bhāga॒dheye॒nopa̭ dhāvati॒ tāve॒vāsmā̭ ahorā॒trābhyā᳚-mpa॒rjanyaṃ̭-va~rṣayata॒-śchanda̭sāṃ॒-vā~ e॒ṣa raso॒ yadva॒śā rasa̭ iva॒ khalu॒ vai vṛṣṭi॒-śchanda̭sāme॒va rasḙna॒ [rasḙna, rasaṃ॒-vṛ~ṣṭi॒mava̭ rundhe] 43

rasaṃ॒-vṛ~ṣṭi॒mava̭ rundhe maitrāvaru॒ṇī-ndvi̭rū॒pāmā la̭bheta pra॒jākā̭mo mai॒traṃ-vā~ aha̭rvāru॒ṇī rātri̭rahorā॒trābhyā॒-ṅkhalu॒ vai pra॒jāḥ prajā̭yante mi॒trāvarṷṇāve॒va svena̭ bhāga॒dheye॒nopa̭ dhāvati॒ tāve॒vāsmā̭ ahorā॒trābhyā᳚-mpra॒jā-mpraja̭nayata॒-śchanda̭sāṃ॒-vā~ e॒ṣa raso॒ yadva॒śā rasa̭ iva॒ khalu॒ vai pra॒jā chanda̭sāme॒va rasḙna॒ rasa̭-mpra॒jāmava̭- [rasa̭-mpra॒jāmava̭, ru॒ndhe॒ vai॒śva॒de॒vīm-] 44

-rundhe vaiśvade॒vī-mba̭hurū॒pāmā la̭bhe॒tānna̭kāmo vaiśvade॒vaṃ-vā~ annaṃ॒-vi~śvā̭ne॒va de॒vān-thsvena̭ bhāga॒dheye॒nopa̭ dhāvati॒ ta e॒vāsmā॒ annaṃ॒ praya̭cchantyannā॒da e॒va bha̭vati॒ chanda̭sāṃ॒-vā~ e॒ṣa raso॒ yadva॒śā rasa̭ iva॒ khalu॒ vā anna॒-ñchanda̭sāme॒va rasḙna॒ rasa॒manna॒mava̭ rundhe vaiśvade॒vī-mba̭hurū॒pāmā la̭bheta॒ grāma̭kāmo vaiśvade॒vā vai [vai, sa॒jā॒tā viśvā̭ne॒va] 45

sa̭jā॒tā viśvā̭ne॒va de॒vān-thsvena̭ bhāga॒dheye॒nopa̭ dhāvati॒ ta e॒vāsmai̭ sajā॒tā-npra ya̭cchanti grā॒myḙva bha̭vati॒ chanda̭sāṃ॒-vā~ e॒ṣa raso॒ yadva॒śā rasa̭ iva॒ khalu॒ vai sa̭jā॒tā-śchanda̭sāme॒va rasḙna॒ rasagṃ̭ sajā॒tānava̭ rundhe bārhaspa॒tya- mṷkṣava॒śamā la̭bheta brahmavarca॒sakā̭mo॒ bṛha॒spati̭me॒va svena̭ bhāga॒dheye॒nopa̭ dhāvati॒ sa e॒vā-'smi̭-nbrahmavarca॒saṃ- [e॒vā-'smi̭-nbrahmavarca॒sam, da॒dhā॒ti॒ bra॒hma॒va॒rca॒syḙva] 46

-da̭dhāti brahmavarca॒syḙva bha̭vati॒ vaśaṃ॒-vā~ e॒ṣa ca̭rati॒ yadu॒kṣāvaśa̭ iva॒ khalu॒ vai bra̭hmavarca॒saṃ-va~śḙnai॒va vaśa̭-mbrahmavarca॒samava̭ rundherau॒drīgṃrohi̭ṇī॒mā la̭bhetābhi॒cara̭-nru॒drame॒va svena̭ bhāga॒dheye॒nopa̭ dhāvati॒ tasmā̭ e॒vaina॒mā vṛ̭ścati tā॒jagārti॒mārccha̭ti॒ rohi̭ṇī bhavati rau॒drī hyḙṣā de॒vata̭yā॒ samṛ̭ddhyai॒ sphyo yūpo̭ bhavati॒ vajro॒ vai sphyo vajra̭me॒vāsmai॒ pra ha̭rati śara॒maya̭-mba॒r॒hi-śśṛ॒ṇātye॒vainaṃ॒-vai~bhī̭daka i॒ddhmo bhi॒nattye॒vaina᳚m || 47 ||

(a॒bhi - khalu॒ - vṛṣṭi॒-śchanda̭sāme॒va rasḙna - pra॒jāmava̭ - vaiśvade॒vā vai - bra̭hmavarca॒saṃ - ~yūpa॒ - ekā॒nnavigṃ̭śa॒tiśca̭) (a. 7)

a॒sāvā̭di॒tyo na vya̭rocata॒ tasmai̭ de॒vāḥ prāya̭ścittimaiccha॒-ntasmā̭ e॒tāgṃ sau॒rīg śve॒tāṃ-va~॒śāmā-'la̭bhanta॒ tayai॒vāsmi॒-nruca̭madadhu॒ryo bra̭hmavarca॒sakā̭ma॒-ssyā-ttasmā̭ e॒tāgṃ sau॒rīg śve॒tāṃ-va~॒śāmā la̭bhetā॒mume॒vā ''di॒tyagg svena̭ bhāga॒dheye॒nopa̭ dhāvati॒ sa e॒vāsmi̭-nbrahmavarca॒sa-nda̭dhāti brahmavarca॒syḙva bha̭vati bai॒l॒vo yūpo̭ bhavatya॒sau [ ] 48

vā ā̭di॒tyo yato-'jā̭yata॒ tato̭ bi॒lva̭ uda̭tiṣṭha॒-thsayo᳚nye॒va bra̭hmavarca॒samava̭ rundhe brāhmaṇaspa॒tyā-mba̭bhruka॒rṇīmā la̭bhetā-bhi॒cara̭n-vāru॒ṇa-ndaśa̭kapāla-mpu॒rastā॒-nnirva̭pe॒-dvarṷṇenai॒va bhrātṛ̭vya-ṅgrāhayi॒tvā brahma̭ṇā stṛṇute babhruka॒rṇī bha̭vatye॒tadvai brahma̭ṇo rū॒pagṃ samṛ̭ddhyai॒ sphyo yūpo̭ bhavati॒ vajro॒ vai sphyo vajra̭me॒vāsmai॒ pra ha̭rati śara॒maya̭-mba॒r॒hi-śśṛ॒ṇā- [-ba॒r॒hi-śśṛ॒ṇāti̭, e॒vainaṃ॒-vai~bhī̭daka] 49

-tye॒vainaṃ॒-vai~bhī̭daka i॒ddhmo bhi॒nattye॒vainaṃ̭-vai~ṣṇa॒vaṃ-vā~̭ma॒namā la̭bheta॒ yaṃ-ya~॒jño nopa॒name॒-dviṣṇu॒rvai ya॒jño viṣṇṷme॒va svena̭ bhāga॒dheye॒nopa̭ dhāvati॒ sa e॒vāsmai̭ ya॒jña-mpra ya̭ccha॒tyupai̭naṃ-ya~॒jño na̭mati vāma॒no bha̭vati vaiṣṇa॒vo hyḙṣa de॒vata̭yā॒ samṛ̭ddhyai tvā॒ṣṭraṃ-va~̭ḍa॒ba mā la̭bheta pa॒śukā̭ma॒stvaṣṭā॒ vai pa̭śū॒nā-mmi̭thu॒nānāṃ᳚- [vai pa̭śū॒nā-mmi̭thu॒nānā᳚m, pra॒ja॒na॒yi॒tā] 50

prajanayi॒tā tvaṣṭā̭rame॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒śū-nmi̭thu॒nā-npra ja̭nayati pra॒jā hi vā e॒tasmi̭-npa॒śavaḥ॒ pravi̭ṣṭā॒ athai॒ṣa pumā॒nthsan va̭ḍa॒ba-ssā॒kṣāde॒va pra॒jā-mpa॒śūnava̭ rundhe mai॒tragg śve॒tamā la̭bheta saṅgrā॒me saṃya~̭tte sama॒yakā̭mo mi॒trame॒va svena̭ bhāga॒dheye॒nopa̭ dhāvati॒ sa e॒vaina̭-mmi॒treṇa॒ sa-nna̭yati - [a-nna̭yati, vi॒śā॒lo bha̭vati॒] 51

viśā॒lo bha̭vati॒ vyava̭sāyayatye॒vaina̭-mprājāpa॒tya-ṅkṛ॒ṣṇamā la̭bheta॒ vṛṣṭi̭kāmaḥ pra॒jāpa̭ti॒rvai vṛṣṭyā̭ īśe pra॒jāpa̭time॒va svena̭ bhāga॒dheye॒nopa̭ dhāvati॒ sa e॒vāsmai̭ pa॒rjanyaṃ̭-va~rṣayati kṛ॒ṣṇo bha̭vatye॒tadvai vṛṣṭyai̭ rū॒pagṃ rū॒peṇai॒va vṛṣṭi॒mava̭ rundhe śa॒balo̭ bhavati vi॒dyuta̭me॒vāsmai̭ janayi॒tvā va̭rṣayatyavāśṛ॒ṅgo bha̭vati॒ vṛṣṭi̭me॒vāsmai॒ ni ya̭cchati || 52 ||

(a॒sau - śṛ॒ṇāti̭ - mithu॒nānāṃ᳚ - nayati - yacchati) (a. 8)

varṷṇagṃ suṣuvā॒ṇama॒nnādya॒-nnopā̭nama॒-thsa e॒tāṃ-vā~̭ru॒ṇī-ṅkṛ॒ṣṇāṃ-va~॒śāma̭paśya॒-ttāg svāyai̭ de॒vatā̭yā॒ āla̭bhata॒ tato॒ vai tama॒nnā-dya॒mupā̭-'nama॒-dyamala̭-ma॒nnādyā̭ya॒ santa̭ma॒nnādya॒-nnopa॒name॒-thsa e॒tāṃ ~vā̭ru॒ṇī-ṅkṛ॒ṣṇāṃ-va~॒śāmā la̭bheta॒ varṷṇame॒va svena̭ bhāga॒dheye॒nopa̭ dhāvati॒ sa e॒vāsmā॒ anna॒-mpra ya̭cchatyannā॒da [anna॒-mpra ya̭cchatyannā॒daḥ, e॒va bha̭vati] 53

e॒va bha̭vati kṛ॒ṣṇā bha̭vati vāru॒ṇī hyḙṣā de॒vata̭yā॒ samṛ̭ddhyai mai॒tragg śve॒tamā la̭bheta vāru॒ṇa-ṅkṛ॒ṣṇama॒pā-ñcauṣa̭dhīnā-ñca sa॒dhāṃva~nna̭kāmo mai॒trīrvā oṣa̭dhayo vāru॒ṇīrāpo॒-'pā-ñca॒ khalu॒ vā oṣa̭dhīnā-ñca॒ rasa॒mupa̭ jīvāmo mi॒trāvarṷṇāve॒va svena̭ bhāga॒dheye॒nopa̭ dhāvati॒ tāve॒vāsmā॒ anna॒-mpraya̭cchato-'nnā॒da e॒va bha̭va- [e॒va bha̭vati, a॒pā-ñcauṣa̭dhīnā-ñca] 54

(śikhaṇḍi pracatiḥ)

-tya॒pā-ñcauṣa̭dhīnā-ñca sa॒dhāṃvā~ la̭bhata u॒bhaya॒syā-va̭ruddhyai॒viśā̭kho॒ yūpo̭ bhavati॒ dve hyḙte de॒vate॒ samṛ̭ddhyai mai॒tragg śve॒tamā la̭bheta vāru॒ṇa-ṅkṛ॒ṣṇa-ñjyogā̭mayāvī॒-ya-nmai॒tro bhava̭ti mi॒treṇai॒vā-'smai॒ varṷṇagṃ śamayati॒ ya-dvā̭ru॒ṇa-ssā॒kṣāde॒vainaṃ̭-va~ruṇapā॒śā-nmṷñcatyu॒ta yadī॒tāsu॒rbhava̭ti॒ jīva̭tye॒va de॒vā vai puṣṭi॒-nnā-'vi̭nda॒n- [nā-'vi̭ndann, tā-mmi̭thu॒nḙ] 55

-tā-mmi̭thu॒nḙ 'paśya॒-ntasyā॒-nna sama̭rādhaya॒ntā-va॒śvinā̭-vabrūtā-mā॒vayo॒rvā e॒ṣā maitasyāṃ᳚ ~vadaddhva॒miti॒ sāśvino̭re॒vābha̭va॒dyaḥ puṣṭi̭kāma॒-ssyā-thsa e॒tāmā᳚śvi॒nīṃ-ya~॒mīṃ-va~॒śāmā la̭bhetā॒-'śvinā̭ve॒va svena̭ bhāga॒dheye॒nopa̭ dhāvati॒ tāve॒vāsmi॒-npuṣṭi̭-ndhattaḥ॒ puṣya̭ti pra॒jayā̭ pa॒śubhiḥ̭ || 56 ||

(a॒nnā॒do᳚ - 'nnā॒da e॒va bha̭vatya - vinda॒n - pañca̭catvārigṃśacca) (a. 9)

ā॒śvi॒na-ndhū॒mrala̭lāma॒ mā la̭bheta॒ yo durbrā᳚hmaṇa॒-ssoma॒-mpipā̭se-da॒śvinau॒ vai de॒vānā॒-maso̭mapāvāstā॒-ntau pa॒ścā so̭mapī॒tha-mprāpnṷtā-ma॒śvinā̭-ve॒tasya̭ de॒vatā॒ yo durbrā᳚hmaṇa॒-ssoma॒-mpipā̭satya॒śvinā̭ve॒va svena̭ bhāga॒dheye॒nopa̭ dhāvati॒-tā-ve॒vā-'smai̭ somapī॒tha-mpra ya̭cchata॒ upai̭nagṃ somapī॒tho na̭mati॒ ya-ddhū॒mro bhava̭ti dhūmri॒māṇa̭-me॒vā-'smā॒-dapa̭ hanti la॒lāmo̭ [la॒lāmaḥ̭, bha॒va॒ti mu॒kha॒ta] 57

bhavati mukha॒ta e॒vāsmi॒-ntejo̭ dadhāti vāya॒vya̭-ṅgomṛ॒gamā la̭bheta॒ yamaja̭ghnivāgṃ samabhi॒śagṃ sḙyu॒rapṷ̄tā॒ vā e॒taṃ-vā~gṛ̭cchati॒ yamaja̭ghnivāgṃ samabhi॒śagṃ sa̭nti॒ naiṣa grā॒myaḥ pa॒śurnāra॒ṇyo ya-dgo̭mṛ॒go nevai॒ṣa grāme॒ nāra̭ṇye॒ yamaja̭ghnivāgṃ samabhi॒śagṃ sa̭nti vā॒yurvai de॒vānā᳚-mpa॒vitraṃ̭-vā~॒yume॒va svena̭ bhāga॒dheye॒nopa̭ dhāvati॒ sa e॒vai- [sa e॒va, e॒na॒-mpa॒va॒ya॒ti॒ parā̭cī॒] 58

-na̭-mpavayati॒ parā̭cī॒ vā e॒tasmai᳚ vyu॒cchantī॒ vyṷcchati॒ tamaḥ̭ pā॒pmāna॒-mpravi̭śati॒ yasyā᳚-''śvi॒ne śa॒syamā̭ne॒ sūryo॒ nā-''virbhava̭ti sau॒rya-mba̭hurū॒pamā la̭bhetā॒-'mu-me॒vā-''di॒tyagg svena̭ bhāga॒dheye॒nopa̭ dhāvati॒ sa e॒vāsmā॒-ttamaḥ̭ pā॒pmāna॒mapa̭ hanti pra॒tīcya̭smai vyu॒cchantī॒ vyṷccha॒tyapa॒ tamaḥ̭ pā॒pmānagṃ̭ hate || 59 ||

(la॒lāmaḥ॒ - sa e॒va - ṣaṭca̭tvārigṃśacca) (a. 10)

indraṃ̭-vo~ vi॒śvata॒sparī, ndra॒-nnaro॒, marṷto॒ yaddha̭ vo di॒vo, yā va॒-śśarma̭ || bhare॒ṣvindragṃ̭ su॒havagṃ̭ havāmahe 'gṃho॒mucagṃ̭ su॒kṛta॒-ndaivya॒-ñjana᳚m | a॒gni-mmi॒traṃ-va~rṷṇagṃ sā॒taye॒ bhaga॒-ndyāvā̭pṛthi॒vī ma॒rutaḥ̭ sva॒staye᳚ || ma॒mattṷ naḥ॒ pari̭jmā vasa॒r॒hā ma॒mattu॒ vāto̭ a॒pāṃ-vṛ~ṣa̭ṇvānn | śi॒śī॒tami̭ndrāparvatā yu॒va-nna॒stanno॒ viśvḙ varivasyantu de॒vāḥ || pri॒yā vo॒ nāma̭ - [pri॒yā vo॒ nāma̭, hu॒ve॒ tu॒rāṇā᳚m |] 60

huve tu॒rāṇā᳚m | ā ya-ttṛ॒panma̭ruto vāvaśā॒nāḥ || śri॒yase॒ ka-mbhā॒nubhi॒-ssa-mmi̭mikṣire॒ te ra॒śmibhi॒sta ṛkva̭bhi-ssukhā॒dayaḥ̭ | te vāśī̭manta i॒ṣmiṇo॒ abhī̭ravo vi॒dre pri॒yasya॒ mārṷtasya॒ dhāmnaḥ̭ || a॒gniḥ pra̭tha॒mo vasṷbhirno avyā॒-thsomo̭ ru॒drebhi̭ra॒bhi ra̭kṣata॒ tmanā᳚ | indro̭ ma॒rudbhi̭r-ṛtu॒dhā kṛ̭ṇotvādi॒tyairno॒ varṷṇa॒-ssagṃ śi̭śātu || sa-nno̭ de॒vo vasṷbhira॒gni-ssagṃ [vasṷbhira॒gni-ssam, soma̭sta॒nūbhī̭ ru॒driyā̭bhiḥ |] 61

soma̭sta॒nūbhī̭ ru॒driyā̭bhiḥ | samindro̭ ma॒rudbhi̭ rya॒jñiyai॒-ssamā̭di॒tyairno॒ varṷṇo ajijñipat || yathā̭-''di॒tyā vasṷbhi-ssambabhū॒vu-rma॒rudbhī̭ ru॒drā-ssa॒majā̭natā॒bhi | e॒vā tri̭ṇāma॒nna-hṛ̭ṇīyamānā॒ viśvḙ de॒vā-ssama̭naso bhavantu || kutrā̭ ci॒dyasya॒ samṛ̭tau ra॒ṇvā naro̭ nṛ॒ṣada̭ne | arha̭ntaści॒-dyami̭ndha॒te sa̭ñja॒naya̭nti ja॒ntavaḥ̭ || saṃ-ya~di॒ṣo vanā̭mahe॒ sagṃ ha॒vyā mānṷṣāṇām | u॒ta dyu॒mnasya॒ śava̭sa [śava̭saḥ, ṛ॒tasya̭ ra॒śmimā da̭de |] 62

ṛ॒tasya̭ ra॒śmimā da̭de || ya॒jño de॒vānā॒-mpratyḙti su॒mnamādi̭tyāso॒ bhava̭tā mṛḍa॒yantaḥ̭ | ā vo॒-'rvācī̭ suma॒tirva̭vṛtyāda॒gṃ॒ hości॒dyā va̭rivo॒vitta॒rā-'sa̭t || śuci̭ra॒pa-ssū॒yava̭sā ada̭bdha॒ upa̭ kṣeti vṛ॒ddhava̭yā-ssu॒vīraḥ̭ | naki॒ṣṭaṃ(2) ghna॒ntyanti̭to॒ na dū॒rādya ā̭di॒tyānā॒-mbhava̭ti॒ praṇī̭tau || dhā॒raya̭nta ādi॒tyāso॒ jaga॒thsthā de॒vā viśva̭sya॒ bhuva̭nasya go॒pāḥ | dī॒rghādhi̭yo॒ rakṣa̭māṇā [rakṣa̭māṇāḥ, a॒su॒rya̭mṛ॒tāvā̭na॒-] 63

asu॒rya̭mṛ॒tāvā̭na॒-ścaya̭mānā ṛ॒ṇāni̭ || ti॒sro bhūmī᳚rdhāraya॒-ntrīgṃ ru॒ta dyū-ntrīṇi̭ vra॒tā vi॒dathḙ a॒ntarḙṣām | ṛ॒tenā̭-''dityā॒ mahi̭ vo mahi॒tva-ntada̭ryaman varuṇa mitra॒ cārṷ || tyānnu kṣa॒triyā॒gṃ॒ ava̭ ādi॒tyān. yā̭ciṣāmahe | su॒mṛ॒ḍī॒kāgṃ a॒bhiṣṭa̭ye || na da̭kṣi॒ṇā vici̭kite॒ na sa॒vyā na prā॒cīna̭mādityā॒ nota pa॒ścā | pā॒kyā̭ cidvasavo dhī॒ryā̭ ci- [dhī॒ryā̭ cit, yu॒ṣmānī̭to॒] 64

-dyu॒ṣmānī̭to॒ abha̭ya॒-ñjyoti̭raśyām || ā॒di॒tyānā॒mava̭sā॒ nūta̭nena sakṣī॒mahi॒ śarma̭ṇā॒ śanta̭mena | a॒nā॒gā॒stve a̭diti॒tve tu॒rāsa̭ i॒maṃ-ya~॒jña-nda̭dhatu॒ śroṣa̭māṇāḥ || i॒ma-mmḙ varuṇa śrudhī॒ hava̭ma॒dyā ca̭ mṛḍaya | tvāma̭va॒syurā ca̭ke || tattvā̭ yāmi॒ brahma̭ṇā॒ vanda̭māna॒-stadā śā᳚ste॒ yaja̭māno ha॒virbhiḥ̭ | ahḙḍamāno varuṇe॒ha bo॒ddhyurṷśagṃsa॒ mā na॒ āyuḥ॒ pramo̭ṣīḥ || 65 ||

(nāmā॒ - 'gni-ssagṃ - śava̭so॒ - rakṣa̭māṇā - dhī॒ryā̭-ñci॒de - kā॒nna pa̭ñcā॒śacca̭) (a. 11)

(vā॒ya॒vyaṃ̭ - prā॒japa̭ti॒stā varṷṇaṃ - devāsu॒rā e॒ṣva̭ - sāvā̭di॒tyo daśa̭rṣabhā॒-mindro̭ va॒lasya̭ - bārhaspa॒tyaṃ - ~va̭ṣaṭkā॒ro̭ - 'sausau॒rīṃ॒ - ~va̭ruṇa -māśvi॒na - mindraṃ̭-vo~॒ nara॒ - ekāda̭śa)

(vā॒ya॒vya̭ - māgne॒yī-ṅkṛ̭ṣṇagrī॒vī - ma॒sāvā̭di॒tyo - vā a̭horā॒trāṇi̭ - vaṣaṭkā॒raḥ - pra̭janayi॒tā - hṷve tu॒rāṇāṃ॒ - pañca̭ṣaṣṭiḥ )

(vā॒ya॒vya̭m, pramo̭ṣīḥ)

|| hariḥ̭ om ||

|| kṛṣṇa yajurvedīya taittirīya saṃhitāyā-ndvitīyakāṇḍe prathamaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-न्द्वितीयकाण्डे प्रथमः प्रश्नः - पशुविधानं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

वा॒य॒व्यग्ग्॑ श्वे॒तमा ल॑भेत॒ भूति॑कामो वा॒युर्वै क्षेपि॑ष्ठा दे॒वता॑वा॒युमे॒व स्वेन॑ भाग॒धेये॒नोप॑ धावति॒ स ए॒वैन॒-म्भूति॑-ङ्गमयति॒ भव॑त्ये॒वा-ति॑क्षिप्रा दे॒वतेत्या॑हु॒-स्सैन॑मीश्व॒रा प्र॒दह॒ इत्ये॒तमे॒व सन्तं॑-वाँ॒यवे॑ नि॒युत्व॑त॒ आ ल॑भेत नि॒युद्वा अ॑स्य॒ धृति॑र्धृ॒त ए॒व भूति॒मुपै॒त्य प्र॑दाहाय॒ भव॑त्ये॒व [ ] 1

वा॒यवे॑ नि॒युत्व॑त॒ आ ल॑भेत॒ ग्राम॑कामो वा॒युर्वा इ॒माः प्र॒जा न॑स्यो॒ता ने॑नीयते वा॒युमे॒व नि॒युत्व॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै᳚ प्र॒जा न॑स्यो॒ता निय॑च्छति ग्रा॒म्ये॑व भ॑वति नि॒युत्व॑ते भवति ध्रु॒वा ए॒वास्मा॒ अन॑पगाः करोति वा॒यवे॑ नि॒युत्व॑त॒ आ ल॑भेत प्र॒जाका॑मः प्रा॒णो वै वा॒युर॑पा॒नो नि॒यु-त्प्रा॑णापा॒नौ खलु॒ वा ए॒तस्य॑ प्र॒जाया॒ [प्र॒जायाः᳚, अप॑] 2

अप॑ क्रामतो॒ यो-ऽल॑-म्प्र॒जायै॒ स-न्प्र॒जा-न्न वि॒न्दते॑ वा॒युमे॒व नि॒युत्व॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै᳚ प्राणापा॒नाभ्या᳚-म्प्र॒जा-म्प्र ज॑नयति वि॒न्दते᳚ प्र॒जां-वाँ॒यवे॑ नि॒युत्व॑त॒ आ ल॑भेत॒ ज्योगा॑मयावी प्रा॒णो वै वा॒युर॑पा॒नो नि॒यु-त्प्रा॑णापा॒नौ खलु॒ वा ए॒तस्मा॒ दप॑क्रामतो॒ यस्य॒ ज्योगा॒मय॑ति वा॒युमे॒व नि॒युत्व॑न्त॒ग्ग्॒ स्वेन॑ भाग॒धेये॒नोप॑ - [भाग॒धेये॒नोप॑, धा॒व॒ति॒ स] 3

धावति॒ स ए॒वा-ऽस्मि॑-न्प्राणापा॒नौ द॑धात्यु॒त यदी॒तासु॒र्भव॑ति॒ जीव॑त्ये॒व प्र॒जाप॑ति॒र्वा इ॒दमेक॑ आसी॒-थ्सो॑-ऽकामयत प्र॒जाः प॒शून्-थ्सृ॑जे॒येति॒ स आ॒त्मनो॑ व॒पामुद॑क्खिद॒-त्ताम॒ग्नौ प्रागृ॑ह्णा॒-त्ततो॒-ऽजस्तू॑प॒र-स्सम॑भव॒-त्तग्ग् स्वायै॑ दे॒वता॑या॒ आ ऽल॑भत॒ ततो॒ वै स प्र॒जाः प॒शून॑सृजत॒ यः प्र॒जाका॑मः [ ] 4

प॒शुका॑म॒-स्स्या-थ्स ए॒त-म्प्रा॑जाप॒त्यम॒ज-न्तू॑प॒रमा ल॑भेत प्र॒जाप॑तिमे॒व स्वेन॑ भाग॒धेये॒नोप॑ धावति॒ स ए॒वास्मै᳚ प्र॒जा-म्प॒शू-न्प्रज॑नयति॒ यच्छ्म॑श्रु॒णस्त-त्पुरु॑षाणाग्ं रू॒पं-यँ-त्तू॑प॒रस्तदश्वा॑नां॒-यँद॒न्यतो॑द॒-न्त-द्गवां॒-यँदव्या॑ इव श॒फास्तदवी॑नां॒-यँद॒जस्त-द॒जाना॑-मे॒ताव॑न्तो॒ वै ग्रा॒म्याः प॒शव॒स्ता- [प॒शव॒स्तान्, रू॒पेणै॒वाव॑ रुन्धे] 5

-न्रू॒पेणै॒वाव॑ रुन्धे सोमापौ॒ष्ण-न्त्रै॒तमा ल॑भेत प॒शुका॑मो॒द्वौ वा अ॒जायै॒ स्तनौ॒ नानै॒व द्वाव॒भि जाये॑ते॒ ऊर्ज॒-म्पुष्टि॑-न्तृ॒तीयः॑सोमापू॒षणा॑वे॒व स्वेन॑ भाग॒धेये॒नोप॑ धावति॒ तावे॒वास्मै॑ प॒शू-न्प्रज॑नयत॒-स्सोमो॒ वै रे॑तो॒धाः पू॒षा प॑शू॒ना-म्प्र॑जनयि॒ता सोम॑ ए॒वास्मै॒ रेतो॒ दधा॑ति पू॒षा प॒शू-न्प्र ज॑नय॒त्यौदु॑म्बरो॒ यूपो॑ भव॒त्यूर्ग्वा उ॑दु॒म्बर॒ ऊर्क्प॒शव॑ ऊ॒र्जैवास्मा॒ ऊर्ज॑-म्प॒शूनव॑ रुन्धे ॥ 6 ॥

(अप्र॑दाहाय॒ भव॑त्ये॒व - प्र॒जाया॑ - आ॒मय॑ति वा॒युमे॒व नि॒युत्व॑त॒ग्ग्॒ स्वेन॑ भाग॒धेये॒नोप॑ - प्र॒जाक॑म॒ - स्तान् - यूप॒ - स्त्रयो॑दश च ) (अ. 1)

प्र॒जाप॑तिः प्र॒जा अ॑सृजत॒ ता अ॑स्मा-थ्सृ॒ष्टाः परा॑चीराय॒-न्ता वरु॑णमगच्छ॒-न्ता अन्वै॒-त्ताः पुन॑रयाचत॒ ता अ॑स्मै॒ न पुन॑रददा॒-थ्सो᳚-ऽब्रवी॒-द्वरं॑-वृँणी॒ष्वाथ॑ मे॒ पुन॑र्दे॒हीति॒ तासां॒-वँर॒मा ऽल॑भत॒ स कृ॒ष्ण एक॑शितिपाद-भव॒द्यो वरु॑ण गृहीत॒-स्स्या-थ्स ए॒तं-वाँ॑रु॒ण-ङ्कृ॒ष्ण-मेक॑शितिपाद॒मा-ल॑भेत॒ वरु॑ण- [वरु॑णम्, ए॒व स्वेन॑] 7

-मे॒व स्वेन॑ भाग॒धेये॒नोप॑ धावति॒ स ए॒वैनं॑-वँरुणपा॒शा-न्मु॑ञ्चति कृ॒ष्ण एक॑शितिपा-द्भवति वारु॒णो ह्ये॑ष दे॒वत॑या॒ समृ॑द्ध्यै॒ सुव॑र्भानुरासु॒र-स्सूर्य॒-न्तम॑सा-ऽविद्ध्य॒त तस्मै॑दे॒वाः प्राय॑श्चित्ति-मैच्छ॒-न्तस्य॒ य-त्प्र॑थ॒म-न्तमो॒-ऽपाघ्न॒न्-थ्सा कृ॒ष्णा-ऽवि॑रभव॒-द्य-द्द्वि॒तीय॒ग्ं॒ सा फल्गु॑नी॒ यत तृ॒तीय॒ग्ं॒ सा ब॑ल॒क्षी यद॑द्ध्य॒स्था-द॒पाकृ॑न्त॒न्-थ्सा ऽवि॑र्व॒शा [ ] 8

सम॑भव॒-त्ते दे॒वा अ॑ब्रुव-न्देवप॒शुर्वा अ॒यग्ं सम॑भू॒-त्कस्मा॑ इ॒ममा ल॑फ्स्यामह॒ इत्यथ॒ वै तर्ह्यल्पा॑ पृथि॒व्यासी॒-दजा॑ता॒ ओष॑धय॒स्तामविं॑-वँ॒शामा॑दि॒त्येभ्यः॒ कामा॒या-ऽल॑भन्त॒ ततो॒ वा अप्र॑थत पृथि॒व्य-जा॑य॒न्तौष॑धयो॒ यः का॒मये॑त॒ प्रथे॑य प॒शुभिः॒ प्र प्र॒जया॑ जाये॒येति॒ स ए॒तामविं॑-वँ॒शामा॑दि॒त्येभ्यः॒ कामा॒या- [कामा॑य, आल॑भेता ऽऽदि॒त्याने॒व] 9

-ऽऽल॑भेता ऽऽदि॒त्याने॒व काम॒ग्ग्॒ स्वेन॑ भाग॒धेये॒नोप॑ धावति॒ त ए॒वैन॑-म्प्र॒थय॑न्ति प॒शुभिः॒ प्र प्र॒जया॑ जनयन्त्य॒-सावा॑दि॒त्यो न व्य॑रोचत॒ तस्मै॑ दे॒वाः प्राय॑श्चित्तिमैच्छ॒-न्तस्मा॑ ए॒ता म॒ल्॒हा आल॑भन्ता-ऽऽग्ने॒यी-ङ्कृ॑ष्णग्री॒वीग्ं सग्ं॑हि॒तामै॒न्द्रीग् श्वे॒ता-म्बा॑र्हस्प॒त्या-न्ताभि॑रे॒वास्मि॒-न्रुच॑मदधु॒र्यो ब्र॑ह्मवर्च॒स-का॑म॒-स्स्या-त्तस्मा॑ ए॒ता म॒ल्॒हा आ ल॑भेता- [आ ल॑भेत, आ॒ग्ने॒यी-ङ्कृ॑ष्णग्री॒वीग्ं] 10

(शिखण्डि पञ्चति)

-ऽऽग्ने॒यी-ङ्कृ॑ष्णग्री॒वीग्ं सग्ं॑हि॒तामै॒न्द्रीग् श्वे॒ता-म्बा॑र्हस्प॒त्यामे॒ता ए॒व दे॒वता॒-स्स्वेन॑ भाग॒धेये॒नोप॑ धावति॒ ता ए॒वास्मि॑-न्ब्रह्मवर्च॒स-न्द॑धति ब्रह्मवर्च॒स्ये॑व भ॑वति व॒सन्ता᳚ प्रा॒तरा᳚ग्ने॒यी-ङ्कृ॑ष्ण ग्री॒वीमा ल॑भेत ग्री॒ष्मे म॒द्ध्यन्दि॑ने सग्ंहि॒तामै॒न्द्रीग्ं श॒रद्य॑परा॒ह्णे श्वे॒ता-म्बा॑र्हस्प॒त्या-न्त्रीणि॒ वा आ॑दि॒त्यस्य॒ तेजाग्ं॑सि व॒सन्ता᳚ प्रा॒तर्ग्री॒ष्मे म॒द्ध्यन्दि॑ने श॒रद्य॑परा॒ह्णे याव॑न्त्ये॒व तेजाग्ं॑सि॒ तान्ये॒वा- [तान्ये॒व, अव॑ रुन्धे] 11

-ऽव॑ रुन्धे संवँथ्स॒र-म्प॒र्याल॑भ्यन्ते संवँथ्स॒रो वै ब्र॑ह्मवर्च॒सस्य॑ प्रदा॒ता सं॑वँथ्स॒र ए॒वास्मै᳚ ब्रह्मवर्च॒स-म्प्र य॑च्छति ब्रह्मवर्च॒स्ये॑व भ॑वति ग॒र्भिण॑यो भवन्तीन्द्रि॒यं-वैँ गर्भ॑ इन्द्रि॒यमे॒वास्मि॑-न्दधति सारस्व॒ती-म्मे॒षीमा ल॑भेत॒ य ई᳚श्व॒रो वा॒चो वदि॑तो॒-स्सन् वाच॒-न्न वदे॒-द्वाग्वै सर॑स्वती॒ सर॑स्वतीमे॒व स्वेन॑ भाग॒धेये॒नोप॑ धावति॒ सैवास्मि॒- [सैवास्मिन्न्॑, वाच॑-न्दधाति] 12

-न्वाच॑-न्दधाति प्रवदि॒ता वा॒चो भ॑व॒त्यप॑न्नदती भवति॒ तस्मा᳚-न्मनु॒ष्या᳚-स्सर्वां॒-वाँचं॑-वँदन्त्याग्ने॒य-ङ्कृ॒ष्णग्री॑व॒मा ल॑भेत सौ॒म्य-म्ब॒भ्रु-ञ्ज्योगा॑मयाव्य॒ग्निं-वाँ ए॒तस्य॒ शरी॑र-ङ्गच्छति॒ सोम॒ग्ं॒ रसो॒ यस्य॒ ज्योगा॒मय॑त्य॒ग्नेरे॒वास्य॒ शरी॑र-न्निष्क्री॒णाति॒ सोमा॒-द्रस॑मु॒त यदी॒तासु॒र्भव॑ति॒ जीव॑त्ये॒व सौ॒म्य-म्ब॒भ्रुमा ल॑भेता-ऽऽग्ने॒य-ङ्कृ॒ष्णग्री॑व-म्प्र॒जाका॑म॒-स्सोमो॒ [सोमः॑, वै रे॑तो॒धा] 13

वै रे॑तो॒धा अ॒ग्निः प्र॒जाना᳚-म्प्रजनयि॒ता सोम॑ ए॒वास्मै॒ रेतो॒ दधा᳚त्य॒ग्निः प्र॒जा-म्प्रज॑नयति वि॒न्दते᳚ प्र॒जामा᳚ग्ने॒य-ङ्कृ॒ष्णग्री॑व॒मा ल॑भेत सौ॒म्य-म्ब॒भ्रुं-योँ ब्रा᳚ह्म॒णो वि॒द्याम॒नूच्य॒ न वि॒रोचे॑त॒ यदा᳚ग्ने॒यो भव॑ति॒ तेज॑ ए॒वास्मि॒-न्तेन॑ दधाति॒ य-थ्सौ॒म्यो ब्र॑ह्मवर्च॒स-न्तेन॑ कृ॒ष्णग्री॑व आग्ने॒यो भ॑वति॒ तम॑ ए॒वास्मा॒दप॑ हन्ति श्वे॒तो भ॑वति॒ [भ॑वति, रुच॑मे॒वास्मि॑-न्दधाति] 14

रुच॑मे॒वास्मि॑-न्दधाति ब॒भ्रु-स्सौ॒म्यो भ॑वति ब्रह्मवर्च॒समे॒वास्मि॒-न्त्विषि॑-न्दधात्या-ग्ने॒य-ङ्कृ॒ष्णग्री॑व॒मा ल॑भेत सौ॒म्य-म्ब॒भ्रुमा᳚ग्ने॒य-ङ्कृ॒ष्णग्री॑व-म्पुरो॒धाया॒ग्॒ स्पर्ध॑मान आग्ने॒यो वै ब्रा᳚ह्म॒ण-स्सौ॒म्यो रा॑ज॒न्यो॑-ऽभितः॑ सौ॒म्यमा᳚ग्ने॒यौ भ॑वत॒-स्तेज॑सै॒व ब्रह्म॑णोभ॒यतो॑ रा॒ष्ट्र-म्परि॑ गृह्णात्येक॒धा स॒मा वृ॑ङ्क्ते पु॒र ए॑न-न्दधते ॥ 15 ॥

(ल॒भे॒त॒ वरु॑णं - ँव॒शै - तामविं॑-वँ॒शामा॑दि॒त्येभ्यः॒ कामा॑य - म॒ल्हा आ ल॑भेत॒ - तान्ये॒व - सैवास्मि॒न्थ् - सोमः॑ - स्वे॒तो भ॑वति॒ - त्रिच॑त्वारिग्ंशच्च ) (अ. 2)

दे॒वा॒सु॒रा ए॒षु लो॒केष्व॑स्पर्धन्त॒ स ए॒तं-विँष्णु॑-र्वाम॒नम॑पश्य॒-त्तग्ग् स्वायै॑ दे॒वता॑या॒ आ-ऽल॑भत॒ ततो॒ वै स इ॒मां-लोँ॒कान॒भ्य॑जयद्- वैष्ण॒वं-वाँ॑म॒नमा ल॑भेत॒ स्पर्ध॑मानो॒ विष्णु॑रे॒व भू॒त्वेमान् ँलो॒कान॒भि ज॑यति॒ विष॑म॒ आ ल॑भेत॒ विष॑मा इव॒ हीमे लो॒का-स्समृ॑द्ध्या॒ इन्द्रा॑य मन्यु॒मते॒ मन॑स्वते ल॒लाम॑-म्प्राशृ॒ङ्गमा ल॑भेत सङ्ग्रा॒मे [ ] 16

संयँ॑त्त इन्द्रि॒येण॒ वै म॒न्युना॒ मन॑सा सङ्ग्रा॒म-ञ्ज॑य॒तीन्द्र॑मे॒व म॑न्यु॒मन्त॒-म्मन॑स्वन्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मि॑न्निन्द्रि॒य-म्म॒न्यु-म्मनो॑ दधाति॒ जय॑ति॒ तग्ं स॑ग्रा॒म्ममिन्द्रा॑य म॒रुत्व॑ते पृश्ञिस॒क्थमा ल॑भेत॒ ग्राम॑काम॒ इन्द्र॑मे॒व म॒रुत्व॑न्त॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै॑ स जा॒ता-न्प्रय॑च्छति ग्रा॒म्ये॑व भ॑वति॒ यदृ॑ष॒भस्तेनै॒- [यदृ॑ष॒भस्तेन॑, ऐ॒न्द्रो य-त्पृश्ञि॒स्तेन॑] 17

-न्द्रो य-त्पृश्ञि॒स्तेन॑ मारु॒त-स्समृ॑द्ध्यै प॒श्चा-त्पृ॑श्ञिस॒क्थो भ॑वति पश्चादन्व-वसा॒यिनी॑मे॒वास्मै॒ विश॑-ङ्करोति सौ॒म्य-म्ब॒भ्रुमा ल॑भे॒तान्न॑काम-स्सौ॒म्यं-वाँ अन्न॒ग्ं॒ सोम॑मे॒व स्वेन॑ भाग॒धेये॒नोप॑ धावति॒ स ए॒वास्मा॒ अन्न॒-म्प्रय॑॑च्छत्यन्ना॒द ए॒व भ॑वति ब॒भ्रुर्भ॑वत्ये॒तद्वा अन्न॑स्य रू॒पग्ं समृ॑द्ध्यै सौ॒म्य-म्ब॒भ्रुमा ल॑भेत॒ यमलग्ं॑ [यमल᳚म्, रा॒ज्याय॒] 18

रा॒ज्याय॒ सन्तग्ं॑ रा॒ज्य-न्नोप॒नमे᳚-थ्सौ॒म्यं-वैँ रा॒ज्यग्ं सोम॑मे॒व स्वेन॑ भाग॒धेये॒नोप॑ धावति॒ स ए॒वास्मै॑ रा॒ज्य-म्प्रय॑च्छ॒त्युपै॑नग्ं रा॒ज्य-न्न॑मति ब॒भ्रुर्भ॑वत्ये॒त-द्वै सोम॑स्य रू॒पग्ं समृ॑द्ध्या॒ इन्द्रा॑य वृत्र॒तुरे॑ ल॒लाम॑-म्प्राशृ॒ङ्गमा ल॑भेत ग॒तश्रीः᳚ प्रति॒ष्ठाका॑मः पा॒प्मान॑मे॒व वृ॒त्र-न्ती॒र्त्वा प्र॑ति॒ष्ठा-ङ्ग॑च्छ॒तीन्द्रा॑याभिमाति॒घ्ने ल॒लाम॑-म्प्राशृ॒ङ्गमा [ल॒लाम॑-म्प्राशृ॒ङ्गमा, ल॒भे॒त॒ यः पा॒प्मना॑] 19

ल॑भेत॒ यः पा॒प्मना॑ गृही॒त-स्स्या-त्पा॒प्मा वा अ॒भिमा॑ति॒रिन्द्र॑मे॒वा- भि॑माति॒हन॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मा᳚-त्पा॒प्मान॑म॒भिमा॑ति॒-म्प्रणु॑दत॒ इन्द्रा॑य व॒ज्रिणे॑ ल॒लाम॑-म्प्राशृ॒ङ्गमा ल॑भेत॒ यमलग्ं॑ रा॒ज्याय॒ सन्तग्ं॑ रा॒ज्य-न्नोप॒नमे॒दिन्द्र॑मे॒व व॒ज्रिण॒ग्ग्॒ स्वेन॑ भाग॒धेये॒नोप॑ धावति॒ स ए॒वास्मै॒ वज्र॒-म्प्र य॑च्छति॒ स ए॑नं॒ ँवज्रो॒ भूत्या॑ इन्ध॒ उपै॑नग्ं रा॒ज्य-न्न॑मति ल॒लामः॑ प्राशृ॒ङ्गो भ॑वत्ये॒तद्वै वज्र॑स्य रू॒पग्ं समृ॑द्ध्यै ॥ 20

(स॒ग्रा॒म्मे - तेना - ल॑ - मभिमाति॒घ्ने ल॒लाम॑-म्प्राशृ॒ङ्गमै - नं॒ - पञ्च॑दश च ) (अ. 3)

अ॒सावा॑दि॒त्यो न व्य॑रोचत॒ तस्मै॑ दे॒वाः प्राय॑श्चित्तिमैच्छ॒-न्तस्मा॑ ए॒ता-न्दश॑र्षभा॒मा-ऽल॑भन्त॒ तयै॒वास्मि॒-न्रुच॑मदधु॒र्यो ब्र॑ह्मवर्च॒सका॑म॒-स्स्या-त्तस्मा॑ ए॒ता-न्दश॑र्षभा॒मा ल॑भेता॒-मुमे॒वा-ऽऽदि॒त्यग्ग् स्वेन॑ भाग॒धेये॒नोप॑ धावति॒ स ए॒वास्मि॑-न्ब्रह्मवर्च॒स-न्द॑धाति ब्रह्मवर्च॒स्ये॑व भ॑वति व॒सन्ता᳚ प्रा॒तस्त्रीन् ँल॒लामा॒ना ल॑भेत ग्री॒ष्मे म॒द्ध्यन्दि॑ने॒ - [म॒द्ध्यन्दि॑ने, त्रीञ्छि॑ति पृ॒ष्ठाञ्छ॒रद्य॑परा॒ह्णे] 21

त्रीञ्छि॑ति पृ॒ष्ठाञ्छ॒रद्य॑परा॒ह्णे त्रीञ्छि॑ति॒वारा॒-न्त्रीणि॒ वा आ॑दि॒त्यस्य॒ तेजाग्ं॑सि व॒सन्ता᳚ प्रा॒तर्ग्री॒ष्मे म॒द्ध्यन्दि॑ने श॒रद्य॑परा॒ह्णे याव॑न्त्ये॒व तेजाग्ं॑सि॒ तान्ये॒वाव॑ रुन्धे॒ त्रय॑स्त्रय॒ आ ल॑भ्यन्ते-ऽभि पू॒र्वमे॒वास्मि॒-न्तेजो॑ दधाति संवँथ्स॒र-म्प॒र्याल॑भ्यन्ते संवँथ्स॒रो वै ब्र॑ह्मवर्च॒सस्य॑ प्रदा॒ता सं॑वँथ्स॒र ए॒वास्मै᳚ ब्रह्मवर्च॒स-म्प्र य॑च्छति ब्रह्मवर्च॒स्ये॑व भ॑वति संवँथ्स॒रस्य॑ प॒रस्ता᳚-त्प्राजाप॒त्य-ङ्कद्रु॒- [ प्राजाप॒त्य-ङ्कद्रु᳚म्, आ ल॑भेत] 22

-मा ल॑भेत प्र॒जाप॑ति॒-स्सर्वा॑ दे॒वता॑ दे॒वता᳚स्वे॒व प्रति॑तिष्ठति॒ यदि॑ बिभी॒या-द्दु॒श्चर्मा॑ भविष्या॒मीति॑ सोमापौ॒ष्णग्ग् श्या॒ममा ल॑भेत सौ॒म्यो वै दे॒वत॑या॒ पुरु॑षः पौ॒ष्णाः प॒शव॒-स्स्वयै॒वास्मै॑ दे॒वत॑या प॒शुभि॒स्त्वच॑-ङ्करोति॒ न दु॒श्चर्मा॑ भवति दे॒वाश्च॒ वै य॒मश्चा॒स्मिन् ँलो॒के᳚-ऽस्पर्धन्त॒ स य॒मो दे॒वाना॑मिन्द्रि॒यं-वीँ॒र्य॑मयुवत॒ तद्य॒मस्य॑ [तद्य॒मस्य॑, य॒म॒त्व-न्ते] 23

यम॒त्व-न्ते दे॒वा अ॑मन्यन्त य॒मो वा इ॒दम॑भू॒-द्य-द्व॒यग्ग् स्म इति॒ ते प्र॒जाप॑ति॒मुपा॑धाव॒न्-थ्स ए॒तौ प्र॒जाप॑तिरा॒त्मन॑ उक्षव॒शौ निर॑मिमीत॒ ते दे॒वा वै᳚ष्णावरु॒णीं-वँ॒शामा-ऽल॑भन्तै॒न्द्रमु॒क्षाण॒न्तं-वँरु॑णेनै॒व ग्रा॑हयि॒त्वा विष्णु॑ना य॒ज्ञेन॒ प्राणु॑दन्तै॒न्द्रेणै॒-वास्ये᳚न्द्रि॒यम॑-वृञ्जत॒ यो भ्रातृ॑व्यवा॒न्-थ्स्या-थ्स स्पर्ध॑मानो वैष्णावरु॒णीं- [वैष्णावरु॒णीम्, व॒शामा] 24

-ँव॒शामा ल॑भेतै॒न्द्रमु॒क्षाणं॒-वँरु॑णेनै॒व भ्रातृ॑व्य-ङ्ग्राहयि॒त्वा विष्णु॑ना य॒ज्ञेन॒ प्रणु॑दत ऐ॒न्द्रेणै॒वास्ये᳚न्द्रि॒यं-वृँ॑ङ्क्ते॒ भव॑त्या॒त्मना॒ परा᳚स्य॒ भ्रातृ॑व्यो भव॒तीन्द्रो॑ वृ॒त्रम॑ह॒-न्तं-वृँ॒त्रो ह॒त-ष्षो॑ड॒शभि॑-र्भो॒गैर॑सिना॒-त्तस्य॑ वृ॒त्रस्य॑ शीर्ष॒तो गाव॒ उदा॑य॒-न्ता वै॑दे॒ह्यो॑-ऽभव॒-न्तासा॑मृष॒भो ज॒घने-ऽनूदै॒-त्तमिन्द्रो॑- [ज॒घने-ऽनूदै॒-त्तमिन्द्रः॑, अ॒चा॒य॒थ्सो॑-ऽमन्यत॒] 25

-ऽचाय॒थ्सो॑-ऽमन्यत॒ यो वा इ॒ममा॒लभे॑त॒ मुच्ये॑ता॒स्मा-त्पा॒प्मन॒ इति॒ स आ᳚ग्ने॒य-ङ्कृ॒ष्णग्री॑व॒मा ल॑भतै॒न्द्रमृ॑ष॒भ-न्तस्या॒ग्निरे॒व स्वेन॑ भाग॒धेये॒नोप॑ सृत-ष्षोडश॒धा वृ॒त्रस्य॑ भो॒गानप्य॑दहदै॒न्द्रेणे᳚न्द्रि॒य- मा॒त्मन्न॑धत्त॒ यः पा॒प्मना॑ गृही॒त-स्स्या-थ्स आ᳚ग्ने॒य-ङ्कृ॒ष्णग्री॑व॒मा ल॑भेतै॒न्द्रमृ॑ष॒भ-म॒ग्निरे॒वास्य॒ स्वेन॑ भाग॒धेये॒नोप॑सृतः [ ] 26

पा॒प्मान॒मपि॑ दहत्यै॒न्द्रेणे᳚न्द्रि॒यमा॒त्म-न्ध॑त्ते॒ मुच्य॑ते पा॒प्मनो॒ भव॑त्ये॒व द्या॑वापृथि॒व्या᳚-न्धे॒नुमा ल॑भेत॒ ज्योग॑परुद्धो॒ ऽनयो॒र्॒हि वा ए॒षो-ऽप्र॑तिष्ठि॒तो-ऽथै॒ष ज्योगप॑रुद्धो॒ द्यावा॑पृथि॒वी ए॒व स्वेन॑ भाग॒धेये॒नोप॑ धावति॒ ते ए॒वैन॑-म्प्रति॒ष्ठा-ङ्ग॑मयतः॒ प्रत्ये॒व ति॑ष्ठति पर्या॒रिणी॑ भवति पर्या॒रीव॒ ह्ये॑तस्य॑ रा॒ष्ट्रं-योँ ज्योग॑परुद्ध॒-स्समृ॑द्ध्यै वाय॒व्यं॑- [वाय॒व्य᳚म्, व॒थ्समा] 27

-ँव॒थ्समा ल॑भेत वा॒युर्वा अ॒नयो᳚र्व॒थ्स इ॒मे वा ए॒तस्मै॑ लो॒का अप॑शुष्का॒ विडप॑शु॒ष्का-ऽथै॒ष ज्योगप॑रुद्धो वा॒युमे॒व स्वेन॑ भाग॒धेये॒नोप॑ धावति॒ स ए॒वास्मा॑ इ॒मां-लोँ॒कान्. विश॒-म्प्रदा॑पयति॒ प्रास्मा॑ इ॒मे लो॒का-स्स्नु॑वन्तिभुञ्ज॒त्ये॑नं॒-विँडुप॑तिष्ठते ॥ 28 ॥

(म॒ध्यन्दि॑ने॒ - कद्रुं॑ - ँय॒मस्य॒ - स्पर्ध॑मानो वैष्णावरु॒णीं -तमिन्द्रो᳚ - ऽस्य॒ स्वेन॑ भाग॒धेये॒नोप॑सृतो - वाय॒व्यं॑ - द्विच॑त्वारिग्ंशच्च) (अ. 4)

इन्द्रो॑ व॒लस्य॒ बिल॒मपौ᳚र्णो॒-थ्स य उ॑त्त॒मः प॒शुरासी॒-त्त-म्पृ॒ष्ठ-म्प्रति॑ स॒गृंह्योद॑क्खिद॒-त्तग्ं स॒हस्र॑-म्प॒शवो-ऽनूदा॑य॒न्-थ्स उ॑न्न॒तो॑-ऽभव॒द्यः प॒शुका॑म॒-स्स्या-थ्स ए॒तमै॒न्द्रमु॑न्न॒तमा ल॑भे॒तेन्द्र॑मे॒व स्वेन॑ भाग॒धेये॒नोप॑ धावति॒ स ए॒वास्मै॑ प॒शू-न्प्रय॑च्छति पशु॒माने॒व भ॑वत्युन्न॒तो [भ॑वत्युन्न॒तः, भ॒व॒ति॒ सा॒ह॒स्री] 29

भ॑वति साह॒स्री वा ए॒षा ल॒क्ष्मी यदु॑न्न॒तो ल॒क्ष्मियै॒ व प॒शूनव॑ रुन्धे य॒दा स॒हस्र॑-म्प॒शू-न्प्रा᳚प्नु॒यादथ॑ वैष्ण॒वं-वाँ॑ म॒नमा ल॑भेतै॒तस्मि॒न्. वै त-थ्स॒हस्र॒मद्ध्य॑तिष्ठ॒-त्तस्मा॑दे॒ष वा॑म॒न-स्समी॑षितः प॒शुभ्य॑ ए॒व प्रजा॑तेभ्यः प्रति॒ष्ठा-न्द॑धाति॒ को॑-ऽर्हति स॒हस्र॑-म्प॒शू-न्प्राप्तु॒मित्या॑हु-रहोरा॒त्राण्ये॒व स॒हस्रग्ं॑ स॒म्पाद्या-ऽऽल॑भेत प॒शवो॒ [प॒शवः॑, वा अ॑होरा॒त्राणि॑] 30

वा अ॑होरा॒त्राणि॑ प॒शूने॒व प्रजा॑ता-न्प्रति॒ष्ठा-ङ्ग॑मय॒-त्योष॑धीभ्यो वे॒हत॒मा ल॑भेत प्र॒जाका॑म॒ ओष॑धयो॒ वा ए॒त-म्प्र॒जायै॒ परि॑बाधन्ते॒ यो-ऽल॑-म्प्र॒जायै॒ स-न्प्र॒जा-न्न वि॒न्दत॒ ओष॑धयः॒ खलु॒ वा ए॒तस्यै॒ सूतु॒मपि॑ घ्नन्ति॒ या वे॒ह-द्भव॒त्योष॑धीरे॒व स्वेन॑ भाग॒धेये॒नोप॑ धावति॒ ता ए॒वास्मै॒ स्वाद्योनेः᳚ प्र॒जा-म्प्र ज॑नयन्ति वि॒न्दते᳚ [ ] 31

प्र॒जामापो॒ वा ओष॑ध॒यो-ऽस॒-त्पुरु॑ष॒ आप॑ ए॒वास्मा॒ अस॑त॒-स्सद्द॑दति॒ तस्मा॑दाहु॒र्यश्चै॒वं-वेँद॒ यश्च॒ नाप॒स्त्वावास॑त॒-स्सद्द॑द॒ती-त्यै॒न्द्रीग्ं सू॒तव॑शा॒मा ल॑भेत॒ भूति॑का॒मो-ऽजा॑तो॒ वा ए॒ष यो-ऽल॒-म्भूत्यै॒ स-न्भूति॒-न्न प्रा॒प्नोतीन्द्र॒-ङ्खलु॒ वा ए॒षा सू॒त्वा व॒शा-ऽभ॑व॒- [व॒शा-ऽभ॑वत्, इन्द्र॑मे॒व] 32

-दिन्द्र॑मे॒व स्वेन॑ भाग॒धेये॒नोप॑ धावति॒ स ए॒वैन॒-म्भूति॑-ङ्गमयति॒ भव॑त्ये॒व यग्ं सू॒त्वा व॒शा स्या-त्तमै॒न्द्रमे॒वा-ऽऽ ल॑भेतै॒तद्वाव तदि॑न्द्रि॒यग्ं सा॒क्षादे॒वेन्द्रि॒यमव॑ रुन्ध ऐन्द्रा॒ग्न-म्पु॑नरु-थ्सृ॒ष्टमा ल॑भेत॒ य आ तृ॒तीया॒-त्पुरु॑षा॒-थ्सोम॒-न्न पिबे॒-द्विच्छि॑न्नो॒ वा ए॒तस्य॑ सोमपी॒थो यो ब्रा᳚ह्म॒ण-स्सन्ना [ ] 33

तृ॒तीया॒-त्पुरु॑षा॒-थ्सोम॒-न्न पिब॑तीन्द्रा॒ग्नी ए॒व स्वेन॑ भाग॒धेये॒नोप॑ धावति॒ तावे॒वास्मै॑ सोमपी॒थ-म्प्रय॑च्छत॒ उपै॑नग्ं सोमपी॒थो न॑मति॒ यदै॒न्द्रो भव॑तीन्द्रि॒यं-वैँ सो॑मपी॒थ इ॑न्द्रि॒यमे॒व सो॑मपी॒थमव॑ रुन्धे॒ यदा᳚ग्ने॒यो भव॑त्याग्ने॒यो वै ब्रा᳚ह्म॒ण-स्स्वामे॒व दे॒वता॒मनु॒ सन्त॑नोति पुनरुथ्सृ॒ष्टो भ॑वति पुनरुथ्सृ॒ष्ट इ॑व॒ ह्ये॑तस्य॑ [ह्ये॑तस्य॑, सो॒म॒पी॒थ-स्समृ॑द्ध्यै] 34

सोमपी॒थ-स्समृ॑द्ध्यै ब्राह्मणस्प॒त्य-न्तू॑प॒रमा ल॑भेता-भि॒चर॒-न्ब्रह्म॑ण॒स्पति॑मे॒व स्वेन॑ भाग॒धेये॒नोप॑ धावति॒ तस्मा॑ ए॒वैन॒मा वृ॑श्चति ता॒जगार्ति॒-मार्च्छ॑ति तूप॒रो भ॑वति क्षु॒रप॑वि॒र्वा ए॒षा ल॒क्ष्मी य-त्तू॑प॒र-स्समृ॑द्ध्यै॒ स्फ्यो यूपो॑ भवति॒ वज्रो॒ वै स्फ्यो वज्र॑मे॒वास्मै॒ प्रह॑रति शर॒मय॑-म्ब॒र्॒हि-श्शृ॒णात्ये॒वैनं॒-वैँभी॑दक इ॒द्ध्मो भि॒नत्त्ये॒वैन᳚म् ॥ 35 ॥

(भ॒व॒त्यु॒न्न॒तः - प॒शवो॑ - जनयन्ति वि॒न्दते॑ - ऽभव॒थ् - सन्नै - तस्ये॒ - ध्म - स्त्रीणि॑ च) (अ. 5)

बा॒र्॒ह॒स्प॒त्यग्ं शि॑तिपृ॒ष्ठमा ल॑भेत॒ ग्राम॑कामो॒ यः का॒मये॑त पृ॒ष्ठग्ं स॑मा॒नानाग्॑ स्या॒मिति॒ बृह॒स्पति॑मे॒व स्वेन॑ भाग॒धेये॒नोप॑ धावति॒ स ए॒वैन॑-म्पृ॒ष्ठग्ं स॑मा॒नाना᳚-ङ्करोति ग्रा॒म्ये॑व भ॑वति शितिपृ॒ष्ठो भ॑वति बार्हस्प॒त्यो ह्ये॑ष दे॒वत॑या॒ समृ॑द्ध्यै पौ॒ष्णग्ग् श्या॒ममा ल॑भे॒तान्न॑का॒मो-ऽन्नं॒-वैँ पू॒षा पू॒षण॑मे॒व स्वेन॑ भाग॒धेये॒नोप॑ धावति॒ स ए॒वास्मा॒ [ए॒वास्मै᳚, अन्न॒-म्प्र] 36

अन्न॒-म्प्र य॑च्छत्यन्ना॒द ए॒व भ॑वति श्या॒मो भ॑वत्ये॒तद्वा अन्न॑स्य रू॒पग्ं समृ॑द्ध्यै मारु॒त-म्पृश्ञि॒मा ल॑भे॒ता-ऽन्न॑-का॒मो-ऽन्नं॒-वैँ म॒रुतो॑म॒रुत॑ ए॒व स्वेन॑ भाग॒धेये॒नोप॑ धावति॒ त ए॒वास्मा॒ अन्न॒-म्प्रय॑च्छन्त्यन्ना॒दए॒व भ॑वति॒ पृश्ञि॑ र्भवत्ये॒तद्वा अन्न॑स्य रू॒पग्ं समृ॑द्ध्या ऐ॒न्द्रम॑रु॒णमा ल॑भेतेन्द्रि॒यका॑म॒ इन्द्र॑मे॒व [ ] 37

स्वेन॑ भाग॒धेये॒नोप॑ धावति॒ स ए॒वास्मि॑न्निन्द्रि॒य-न्द॑धातीन्द्रिया॒व्ये॑व भ॑वत्यरु॒णो भ्रूमा᳚-न्भवत्ये॒तद्वा इन्द्र॑स्य रू॒पग्ं समृ॑द्ध्यै सावि॒त्रमु॑पद्ध्व॒स्तमा ल॑भेत स॒निका॑म-स्सवि॒ता वै प्र॑स॒वाना॑मीशे सवि॒तार॑मे॒व स्वेन॑ भाग॒धेये॒नोप॑ धावति॒ स ए॒वास्मै॑ स॒नि-म्प्रसु॑वति॒ दान॑कामा अस्मै प्र॒जा भ॑वन्त्युपद्ध्व॒स्तो भ॑वति सावि॒त्रो ह्ये॑ष [सावि॒त्रो ह्ये॑षः, दे॒वत॑या॒ समृ॑द्ध्यै] 38

दे॒वत॑या॒ समृ॑द्ध्यै वैश्वदे॒व-म्ब॑हुरू॒पमा ल॑भे॒ता-ऽन्न॑कामोवैश्वदे॒वं-वाँ अन्नं॒-विँश्वा॑ने॒व दे॒वान्-थ्स्वेन॑ भाग॒धेये॒नोप॑ धावति॒त ए॒वास्मा॒ अन्न॒-म्प्रय॑च्छन्त्यन्ना॒द ए॒व भ॑वति बहुरू॒पो भ॑वतिबहुरू॒पग्ग् ह्यन्न॒ग्ं॒ समृ॑द्ध्यै वैश्वदे॒व-म्ब॑हुरू॒पमा ल॑भेत॒ ग्राम॑कामो वैश्वदे॒वा वै स॑जा॒ता विश्वा॑ने॒व दे॒वान्-थ्स्वेन॑ भाग॒धेये॒नोप॑ धावति॒ त ए॒वा-ऽस्मै॑ [ए॒वा-ऽस्मै᳚, स॒जा॒ता-न्प्र य॑च्छन्ति] 39

सजा॒ता-न्प्र य॑च्छन्ति ग्रा॒म्ये॑व भ॑वति बहुरू॒पो भ॑वति बहुदेव॒त्यो᳚(1॒) ह्ये॑ष समृ॑द्ध्यै प्राजाप॒त्य-न्तू॑प॒रमा ल॑भेत॒ यस्याना᳚ज्ञातमिव॒ ज्योगा॒मये᳚-त्प्राजाप॒त्यो वै पुरु॑षः प्र॒जाप॑तिः॒ खलु॒ वै तस्य॑ वेद॒ यस्याना᳚ज्ञातमिव॒ ज्योगा॒मय॑ति प्र॒जाप॑तिमे॒व स्वेन॑ भाग॒धेये॒नोप॑ धावति॒ स ए॒वैन॒-न्तस्मा॒-थ्स्रामा᳚-न्मुञ्चति तूप॒रो भ॑वति प्राजाप॒त्यो ह्ये॑ -ष दे॒वत॑या॒ समृ॑द्ध्यै ॥ 40 ॥

(अ॒स्मा॒ - इन्द्र॑मे॒वै - ष - स॑जा॒ता विश्वा॑ने॒व दे॒वान्-थ्स्वेन॑ भाग॒धेये॒नोप॑ धावति॒ त ए॒वास्मै᳚ - प्राजाप॒त्यो हि - त्रीणि॑ च) (अ. 11)

व॒ष॒ट्का॒रो वै गा॑यत्रि॒यै शिरो᳚-ऽच्छिन॒-त्तस्यै॒ रसः॒ परा॑पत॒-त्त-म्बृह॒स्पति॒ रुपा॑-ऽगृह्णा॒थ्सा शि॑तिपृ॒ष्ठा व॒शा-ऽभ॑व॒द्यो द्वि॒तीयः॑ प॒रा-ऽप॑त॒-त्त-म्मि॒त्रावरु॑णा॒-वुपा॑गृह्णीता॒ग्ं॒ सा द्वि॑रू॒पा व॒शा-ऽभ॑व॒-द्यस्तृ॒तीयः॑ प॒राप॑त॒-त्तं-विँश्वे॑ दे॒वा उपा॑गृह्ण॒न्-थ्सा ब॑हुरू॒पा व॒शा भ॑व॒द्य-श्च॑तु॒र्थः प॒राप॑त॒-थ्स पृ॑थि॒वी-म्प्रा-ऽवि॑श॒-त्त-म्बृह॒स्पति॑र॒- [बृह॒स्पति॑र॒भि, अ॒गृ॒ह्णा॒-दस्त्वे॒वा-ऽयं-] 41

-भ्य॑गृह्णा॒-दस्त्वे॒वा-ऽय-म्भोगा॒येति॒ स उ॑क्षव॒श-स्सम॑भव॒-द्यल्लोहि॑त-म्प॒राप॑त॒-त्त-द्रु॒द्र उपा॑-ऽगृह्णा॒-थ्सा रौ॒द्री रोहि॑णी व॒शा-ऽभ॑व-द्बार्हस्प॒त्याग्ं शि॑तिपृ॒ष्ठामा ल॑भेत ब्रह्मवर्च॒सका॑मो॒ बृह॒स्पति॑मे॒व स्वेन॑ भाग॒धेये॒नोप॑ धावति॒ स ए॒वास्मि॑-न्ब्रह्मवर्च॒स-न्द॑धाति ब्रह्मवर्च॒स्ये॑व भ॑वति॒ छन्द॑सां॒-वाँ ए॒ष रसो॒ यद्व॒शा रस॑ इव॒ खलु॒ [खलु॑, वै] 42

वै ब्र॑ह्मवर्च॒स-ञ्छन्द॑सामे॒व रसे॑न॒ रस॑-म्ब्रह्मवर्च॒समव॑ रुन्धे मैत्रावरु॒णी-न्द्वि॑रू॒पामा ल॑भेत॒ वृष्टि॑कामो मै॒त्रं-वाँ अह॑र्वारु॒णी रात्रि॑रहोरा॒त्राभ्या॒-ङ्खलु॒ वै प॒र्जन्यो॑ वर्षति मि॒त्रावरु॑णावे॒व स्वेन॑ भाग॒धेये॒नोप॑ धावति॒ तावे॒वास्मा॑ अहोरा॒त्राभ्या᳚-म्प॒र्जन्यं॑-वँर्षयत॒-श्छन्द॑सां॒-वाँ ए॒ष रसो॒ यद्व॒शा रस॑ इव॒ खलु॒ वै वृष्टि॒-श्छन्द॑सामे॒व रसे॑न॒ [रसे॑न, रसं॒-वृँष्टि॒मव॑ रुन्धे] 43

रसं॒-वृँष्टि॒मव॑ रुन्धे मैत्रावरु॒णी-न्द्वि॑रू॒पामा ल॑भेत प्र॒जाका॑मो मै॒त्रं-वाँ अह॑र्वारु॒णी रात्रि॑रहोरा॒त्राभ्या॒-ङ्खलु॒ वै प्र॒जाः प्रजा॑यन्ते मि॒त्रावरु॑णावे॒व स्वेन॑ भाग॒धेये॒नोप॑ धावति॒ तावे॒वास्मा॑ अहोरा॒त्राभ्या᳚-म्प्र॒जा-म्प्रज॑नयत॒-श्छन्द॑सां॒-वाँ ए॒ष रसो॒ यद्व॒शा रस॑ इव॒ खलु॒ वै प्र॒जा छन्द॑सामे॒व रसे॑न॒ रस॑-म्प्र॒जामव॑- [रस॑-म्प्र॒जामव॑, रु॒न्धे॒ वै॒श्व॒दे॒वीम्-] 44

-रुन्धे वैश्वदे॒वी-म्ब॑हुरू॒पामा ल॑भे॒तान्न॑कामो वैश्वदे॒वं-वाँ अन्नं॒-विँश्वा॑ने॒व दे॒वान्-थ्स्वेन॑ भाग॒धेये॒नोप॑ धावति॒ त ए॒वास्मा॒ अन्नं॒ प्रय॑च्छन्त्यन्ना॒द ए॒व भ॑वति॒ छन्द॑सां॒-वाँ ए॒ष रसो॒ यद्व॒शा रस॑ इव॒ खलु॒ वा अन्न॒-ञ्छन्द॑सामे॒व रसे॑न॒ रस॒मन्न॒मव॑ रुन्धे वैश्वदे॒वी-म्ब॑हुरू॒पामा ल॑भेत॒ ग्राम॑कामो वैश्वदे॒वा वै [वै, स॒जा॒ता विश्वा॑ने॒व] 45

स॑जा॒ता विश्वा॑ने॒व दे॒वान्-थ्स्वेन॑ भाग॒धेये॒नोप॑ धावति॒ त ए॒वास्मै॑ सजा॒ता-न्प्र य॑च्छन्ति ग्रा॒म्ये॑व भ॑वति॒ छन्द॑सां॒-वाँ ए॒ष रसो॒ यद्व॒शा रस॑ इव॒ खलु॒ वै स॑जा॒ता-श्छन्द॑सामे॒व रसे॑न॒ रसग्ं॑ सजा॒तानव॑ रुन्धे बार्हस्प॒त्य- मु॑क्षव॒शमा ल॑भेत ब्रह्मवर्च॒सका॑मो॒ बृह॒स्पति॑मे॒व स्वेन॑ भाग॒धेये॒नोप॑ धावति॒ स ए॒वा-ऽस्मि॑-न्ब्रह्मवर्च॒सं- [ए॒वा-ऽस्मि॑-न्ब्रह्मवर्च॒सम्, द॒धा॒ति॒ ब्र॒ह्म॒व॒र्च॒स्ये॑व] 46

-द॑धाति ब्रह्मवर्च॒स्ये॑व भ॑वति॒ वशं॒-वाँ ए॒ष च॑रति॒ यदु॒क्षावश॑ इव॒ खलु॒ वै ब्र॑ह्मवर्च॒सं-वँशे॑नै॒व वश॑-म्ब्रह्मवर्च॒समव॑ रुन्धेरौ॒द्रीग्ंरोहि॑णी॒मा ल॑भेताभि॒चर॑-न्रु॒द्रमे॒व स्वेन॑ भाग॒धेये॒नोप॑ धावति॒ तस्मा॑ ए॒वैन॒मा वृ॑श्चति ता॒जगार्ति॒मार्च्छ॑ति॒ रोहि॑णी भवति रौ॒द्री ह्ये॑षा दे॒वत॑या॒ समृ॑द्ध्यै॒ स्फ्यो यूपो॑ भवति॒ वज्रो॒ वै स्फ्यो वज्र॑मे॒वास्मै॒ प्र ह॑रति शर॒मय॑-म्ब॒र्॒हि-श्शृ॒णात्ये॒वैनं॒-वैँभी॑दक इ॒द्ध्मो भि॒नत्त्ये॒वैन᳚म् ॥ 47 ॥

(अ॒भि - खलु॒ - वृष्टि॒-श्छन्द॑सामे॒व रसे॑न - प्र॒जामव॑ - वैश्वदे॒वा वै - ब्र॑ह्मवर्च॒सं - ँयूप॒ - एका॒न्नविग्ं॑श॒तिश्च॑) (अ. 7)

अ॒सावा॑दि॒त्यो न व्य॑रोचत॒ तस्मै॑ दे॒वाः प्राय॑श्चित्तिमैच्छ॒-न्तस्मा॑ ए॒ताग्ं सौ॒रीग् श्वे॒तां-वँ॒शामा-ऽल॑भन्त॒ तयै॒वास्मि॒-न्रुच॑मदधु॒र्यो ब्र॑ह्मवर्च॒सका॑म॒-स्स्या-त्तस्मा॑ ए॒ताग्ं सौ॒रीग् श्वे॒तां-वँ॒शामा ल॑भेता॒मुमे॒वा ऽऽदि॒त्यग्ग् स्वेन॑ भाग॒धेये॒नोप॑ धावति॒ स ए॒वास्मि॑-न्ब्रह्मवर्च॒स-न्द॑धाति ब्रह्मवर्च॒स्ये॑व भ॑वति बै॒ल्॒वो यूपो॑ भवत्य॒सौ [ ] 48

वा आ॑दि॒त्यो यतो-ऽजा॑यत॒ ततो॑ बि॒ल्व॑ उद॑तिष्ठ॒-थ्सयो᳚न्ये॒व ब्र॑ह्मवर्च॒समव॑ रुन्धे ब्राह्मणस्प॒त्या-म्ब॑भ्रुक॒र्णीमा ल॑भेता-भि॒चर॑न्-वारु॒ण-न्दश॑कपाल-म्पु॒रस्ता॒-न्निर्व॑पे॒-द्वरु॑णेनै॒व भ्रातृ॑व्य-ङ्ग्राहयि॒त्वा ब्रह्म॑णा स्तृणुते बभ्रुक॒र्णी भ॑वत्ये॒तद्वै ब्रह्म॑णो रू॒पग्ं समृ॑द्ध्यै॒ स्फ्यो यूपो॑ भवति॒ वज्रो॒ वै स्फ्यो वज्र॑मे॒वास्मै॒ प्र ह॑रति शर॒मय॑-म्ब॒र्॒हि-श्शृ॒णा- [-ब॒र्॒हि-श्शृ॒णाति॑, ए॒वैनं॒-वैँभी॑दक] 49

-त्ये॒वैनं॒-वैँभी॑दक इ॒द्ध्मो भि॒नत्त्ये॒वैनं॑-वैँष्ण॒वं-वाँ॑म॒नमा ल॑भेत॒ यं-यँ॒ज्ञो नोप॒नमे॒-द्विष्णु॒र्वै य॒ज्ञो विष्णु॑मे॒व स्वेन॑ भाग॒धेये॒नोप॑ धावति॒ स ए॒वास्मै॑ य॒ज्ञ-म्प्र य॑च्छ॒त्युपै॑नं-यँ॒ज्ञो न॑मति वाम॒नो भ॑वति वैष्ण॒वो ह्ये॑ष दे॒वत॑या॒ समृ॑द्ध्यै त्वा॒ष्ट्रं-वँ॑ड॒ब मा ल॑भेत प॒शुका॑म॒स्त्वष्टा॒ वै प॑शू॒ना-म्मि॑थु॒नानां᳚- [वै प॑शू॒ना-म्मि॑थु॒नाना᳚म्, प्र॒ज॒न॒यि॒ता] 50

प्रजनयि॒ता त्वष्टा॑रमे॒व स्वेन॑ भाग॒धेये॒नोप॑ धावति॒ स ए॒वास्मै॑ प॒शू-न्मि॑थु॒ना-न्प्र ज॑नयति प्र॒जा हि वा ए॒तस्मि॑-न्प॒शवः॒ प्रवि॑ष्टा॒ अथै॒ष पुमा॒न्थ्सन् व॑ड॒ब-स्सा॒क्षादे॒व प्र॒जा-म्प॒शूनव॑ रुन्धे मै॒त्रग्ग् श्वे॒तमा ल॑भेत सङ्ग्रा॒मे संयँ॑त्ते सम॒यका॑मो मि॒त्रमे॒व स्वेन॑ भाग॒धेये॒नोप॑ धावति॒ स ए॒वैन॑-म्मि॒त्रेण॒ स-न्न॑यति - [अ-न्न॑यति, वि॒शा॒लो भ॑वति॒] 51

विशा॒लो भ॑वति॒ व्यव॑साययत्ये॒वैन॑-म्प्राजाप॒त्य-ङ्कृ॒ष्णमा ल॑भेत॒ वृष्टि॑कामः प्र॒जाप॑ति॒र्वै वृष्ट्या॑ ईशे प्र॒जाप॑तिमे॒व स्वेन॑ भाग॒धेये॒नोप॑ धावति॒ स ए॒वास्मै॑ प॒र्जन्यं॑-वँर्षयति कृ॒ष्णो भ॑वत्ये॒तद्वै वृष्ट्यै॑ रू॒पग्ं रू॒पेणै॒व वृष्टि॒मव॑ रुन्धे श॒बलो॑ भवति वि॒द्युत॑मे॒वास्मै॑ जनयि॒त्वा व॑र्षयत्यवाशृ॒ङ्गो भ॑वति॒ वृष्टि॑मे॒वास्मै॒ नि य॑च्छति ॥ 52 ॥

(अ॒सौ - शृ॒णाति॑ - मिथु॒नानां᳚ - नयति - यच्छति) (अ. 8)

वरु॑णग्ं सुषुवा॒णम॒न्नाद्य॒-न्नोपा॑नम॒-थ्स ए॒तां-वाँ॑रु॒णी-ङ्कृ॒ष्णां-वँ॒शाम॑पश्य॒-त्ताग् स्वायै॑ दे॒वता॑या॒ आल॑भत॒ ततो॒ वै तम॒न्ना-द्य॒मुपा॑-ऽनम॒-द्यमल॑-म॒न्नाद्या॑य॒ सन्त॑म॒न्नाद्य॒-न्नोप॒नमे॒-थ्स ए॒तां ँवा॑रु॒णी-ङ्कृ॒ष्णां-वँ॒शामा ल॑भेत॒ वरु॑णमे॒व स्वेन॑ भाग॒धेये॒नोप॑ धावति॒ स ए॒वास्मा॒ अन्न॒-म्प्र य॑च्छत्यन्ना॒द [अन्न॒-म्प्र य॑च्छत्यन्ना॒दः, ए॒व भ॑वति] 53

ए॒व भ॑वति कृ॒ष्णा भ॑वति वारु॒णी ह्ये॑षा दे॒वत॑या॒ समृ॑द्ध्यै मै॒त्रग्ग् श्वे॒तमा ल॑भेत वारु॒ण-ङ्कृ॒ष्णम॒पा-ञ्चौष॑धीना-ञ्च स॒धांवँन्न॑कामो मै॒त्रीर्वा ओष॑धयो वारु॒णीरापो॒-ऽपा-ञ्च॒ खलु॒ वा ओष॑धीना-ञ्च॒ रस॒मुप॑ जीवामो मि॒त्रावरु॑णावे॒व स्वेन॑ भाग॒धेये॒नोप॑ धावति॒ तावे॒वास्मा॒ अन्न॒-म्प्रय॑च्छतो-ऽन्ना॒द ए॒व भ॑व- [ए॒व भ॑वति, अ॒पा-ञ्चौष॑धीना-ञ्च] 54

(शिखण्डि प्रचतिः)

-त्य॒पा-ञ्चौष॑धीना-ञ्च स॒धांवाँ ल॑भत उ॒भय॒स्या-व॑रुद्ध्यै॒विशा॑खो॒ यूपो॑ भवति॒ द्वे ह्ये॑ते दे॒वते॒ समृ॑द्ध्यै मै॒त्रग्ग् श्वे॒तमा ल॑भेत वारु॒ण-ङ्कृ॒ष्ण-ञ्ज्योगा॑मयावी॒-य-न्मै॒त्रो भव॑ति मि॒त्रेणै॒वा-ऽस्मै॒ वरु॑णग्ं शमयति॒ य-द्वा॑रु॒ण-स्सा॒क्षादे॒वैनं॑-वँरुणपा॒शा-न्मु॑ञ्चत्यु॒त यदी॒तासु॒र्भव॑ति॒ जीव॑त्ये॒व दे॒वा वै पुष्टि॒-न्ना-ऽवि॑न्द॒न्- [ना-ऽवि॑न्दन्न्, ता-म्मि॑थु॒ने॑] 55

-ता-म्मि॑थु॒ने॑ ऽपश्य॒-न्तस्या॒-न्न सम॑राधय॒न्ता-व॒श्विना॑-वब्रूता-मा॒वयो॒र्वा ए॒षा मैतस्यां᳚ ँवदद्ध्व॒मिति॒ साश्विनो॑रे॒वाभ॑व॒द्यः पुष्टि॑काम॒-स्स्या-थ्स ए॒तामा᳚श्वि॒नीं-यँ॒मीं-वँ॒शामा ल॑भेता॒-ऽश्विना॑वे॒व स्वेन॑ भाग॒धेये॒नोप॑ धावति॒ तावे॒वास्मि॒-न्पुष्टि॑-न्धत्तः॒ पुष्य॑ति प्र॒जया॑ प॒शुभिः॑ ॥ 56 ॥

(अ॒न्ना॒दो᳚ - ऽन्ना॒द ए॒व भ॑वत्य - विन्द॒न् - पञ्च॑चत्वारिग्ंशच्च) (अ. 9)

आ॒श्वि॒न-न्धू॒म्रल॑लाम॒ मा ल॑भेत॒ यो दुर्ब्रा᳚ह्मण॒-स्सोम॒-म्पिपा॑से-द॒श्विनौ॒ वै दे॒वाना॒-मसो॑मपावास्ता॒-न्तौ प॒श्चा सो॑मपी॒थ-म्प्राप्नु॑ता-म॒श्विना॑-वे॒तस्य॑ दे॒वता॒ यो दुर्ब्रा᳚ह्मण॒-स्सोम॒-म्पिपा॑सत्य॒श्विना॑वे॒व स्वेन॑ भाग॒धेये॒नोप॑ धावति॒-ता-वे॒वा-ऽस्मै॑ सोमपी॒थ-म्प्र य॑च्छत॒ उपै॑नग्ं सोमपी॒थो न॑मति॒ य-द्धू॒म्रो भव॑ति धूम्रि॒माण॑-मे॒वा-ऽस्मा॒-दप॑ हन्ति ल॒लामो॑ [ल॒लामः॑, भ॒व॒ति मु॒ख॒त] 57

भवति मुख॒त ए॒वास्मि॒-न्तेजो॑ दधाति वाय॒व्य॑-ङ्गोमृ॒गमा ल॑भेत॒ यमज॑घ्निवाग्ं समभि॒शग्ं से॑यु॒रपू॑ता॒ वा ए॒तं-वाँगृ॑च्छति॒ यमज॑घ्निवाग्ं समभि॒शग्ं स॑न्ति॒ नैष ग्रा॒म्यः प॒शुर्नार॒ण्यो य-द्गो॑मृ॒गो नेवै॒ष ग्रामे॒ नार॑ण्ये॒ यमज॑घ्निवाग्ं समभि॒शग्ं स॑न्ति वा॒युर्वै दे॒वाना᳚-म्प॒वित्रं॑-वाँ॒युमे॒व स्वेन॑ भाग॒धेये॒नोप॑ धावति॒ स ए॒वै- [स ए॒व, ए॒न॒-म्प॒व॒य॒ति॒ परा॑ची॒] 58

-न॑-म्पवयति॒ परा॑ची॒ वा ए॒तस्मै᳚ व्यु॒च्छन्ती॒ व्यु॑च्छति॒ तमः॑ पा॒प्मान॒-म्प्रवि॑शति॒ यस्या᳚-ऽऽश्वि॒ने श॒स्यमा॑ने॒ सूर्यो॒ ना-ऽऽविर्भव॑ति सौ॒र्य-म्ब॑हुरू॒पमा ल॑भेता॒-ऽमु-मे॒वा-ऽऽदि॒त्यग्ग् स्वेन॑ भाग॒धेये॒नोप॑ धावति॒ स ए॒वास्मा॒-त्तमः॑ पा॒प्मान॒मप॑ हन्ति प्र॒तीच्य॑स्मै व्यु॒च्छन्ती॒ व्यु॑च्छ॒त्यप॒ तमः॑ पा॒प्मानग्ं॑ हते ॥ 59 ॥

(ल॒लामः॒ - स ए॒व - षट्च॑त्वारिग्ंशच्च) (अ. 10)

इन्द्रं॑-वोँ वि॒श्वत॒स्परी, न्द्र॒-न्नरो॒, मरु॑तो॒ यद्ध॑ वो दि॒वो, या व॒-श्शर्म॑ ॥ भरे॒ष्विन्द्रग्ं॑ सु॒हवग्ं॑ हवामहे ऽग्ंहो॒मुचग्ं॑ सु॒कृत॒-न्दैव्य॒-ञ्जन᳚म् । अ॒ग्नि-म्मि॒त्रं-वँरु॑णग्ं सा॒तये॒ भग॒-न्द्यावा॑पृथि॒वी म॒रुतः॑ स्व॒स्तये᳚ ॥ म॒मत्तु॑ नः॒ परि॑ज्मा वस॒र्॒हा म॒मत्तु॒ वातो॑ अ॒पां-वृँष॑ण्वान्न् । शि॒शी॒तमि॑न्द्रापर्वता यु॒व-न्न॒स्तन्नो॒ विश्वे॑ वरिवस्यन्तु दे॒वाः ॥ प्रि॒या वो॒ नाम॑ - [प्रि॒या वो॒ नाम॑, हु॒वे॒ तु॒राणा᳚म् ।] 60

हुवे तु॒राणा᳚म् । आ य-त्तृ॒पन्म॑रुतो वावशा॒नाः ॥ श्रि॒यसे॒ क-म्भा॒नुभि॒-स्स-म्मि॑मिक्षिरे॒ ते र॒श्मिभि॒स्त ऋक्व॑भि-स्सुखा॒दयः॑ । ते वाशी॑मन्त इ॒ष्मिणो॒ अभी॑रवो वि॒द्रे प्रि॒यस्य॒ मारु॑तस्य॒ धाम्नः॑ ॥ अ॒ग्निः प्र॑थ॒मो वसु॑भिर्नो अव्या॒-थ्सोमो॑ रु॒द्रेभि॑र॒भि र॑क्षत॒ त्मना᳚ । इन्द्रो॑ म॒रुद्भि॑र्-ऋतु॒धा कृ॑णोत्वादि॒त्यैर्नो॒ वरु॑ण॒-स्सग्ं शि॑शातु ॥ स-न्नो॑ दे॒वो वसु॑भिर॒ग्नि-स्सग्ं [वसु॑भिर॒ग्नि-स्सम्, सोम॑स्त॒नूभी॑ रु॒द्रिया॑भिः ।] 61

सोम॑स्त॒नूभी॑ रु॒द्रिया॑भिः । समिन्द्रो॑ म॒रुद्भि॑ र्य॒ज्ञियै॒-स्समा॑दि॒त्यैर्नो॒ वरु॑णो अजिज्ञिपत् ॥ यथा॑-ऽऽदि॒त्या वसु॑भि-स्सम्बभू॒वु-र्म॒रुद्भी॑ रु॒द्रा-स्स॒मजा॑नता॒भि । ए॒वा त्रि॑णाम॒न्न-हृ॑णीयमाना॒ विश्वे॑ दे॒वा-स्सम॑नसो भवन्तु ॥ कुत्रा॑ चि॒द्यस्य॒ समृ॑तौ र॒ण्वा नरो॑ नृ॒षद॑ने । अर्ह॑न्तश्चि॒-द्यमि॑न्ध॒ते स॑ञ्ज॒नय॑न्ति ज॒न्तवः॑ ॥ सं-यँदि॒षो वना॑महे॒ सग्ं ह॒व्या मानु॑षाणाम् । उ॒त द्यु॒म्नस्य॒ शव॑स [शव॑सः, ऋ॒तस्य॑ र॒श्मिमा द॑दे ।] 62

ऋ॒तस्य॑ र॒श्मिमा द॑दे ॥ य॒ज्ञो दे॒वाना॒-म्प्रत्ये॑ति सु॒म्नमादि॑त्यासो॒ भव॑ता मृड॒यन्तः॑ । आ वो॒-ऽर्वाची॑ सुम॒तिर्व॑वृत्याद॒ग्ं॒ होश्चि॒द्या व॑रिवो॒वित्त॒रा-ऽस॑त् ॥ शुचि॑र॒प-स्सू॒यव॑सा अद॑ब्ध॒ उप॑ क्षेति वृ॒द्धव॑या-स्सु॒वीरः॑ । नकि॒ष्टं(2) घ्न॒न्त्यन्ति॑तो॒ न दू॒राद्य आ॑दि॒त्याना॒-म्भव॑ति॒ प्रणी॑तौ ॥ धा॒रय॑न्त आदि॒त्यासो॒ जग॒थ्स्था दे॒वा विश्व॑स्य॒ भुव॑नस्य गो॒पाः । दी॒र्घाधि॑यो॒ रक्ष॑माणा [रक्ष॑माणाः, अ॒सु॒र्य॑मृ॒तावा॑न॒-] 63

असु॒र्य॑मृ॒तावा॑न॒-श्चय॑माना ऋ॒णानि॑ ॥ ति॒स्रो भूमी᳚र्धारय॒-न्त्रीग्ं रु॒त द्यू-न्त्रीणि॑ व्र॒ता वि॒दथे॑ अ॒न्तरे॑षाम् । ऋ॒तेना॑-ऽऽदित्या॒ महि॑ वो महि॒त्व-न्तद॑र्यमन् वरुण मित्र॒ चारु॑ ॥ त्यान्नु क्ष॒त्रिया॒ग्ं॒ अव॑ आदि॒त्यान्. या॑चिषामहे । सु॒मृ॒डी॒काग्ं अ॒भिष्ट॑ये ॥ न द॑क्षि॒णा विचि॑किते॒ न स॒व्या न प्रा॒चीन॑मादित्या॒ नोत प॒श्चा । पा॒क्या॑ चिद्वसवो धी॒र्या॑ चि- [धी॒र्या॑ चित्, यु॒ष्मानी॑तो॒] 64

-द्यु॒ष्मानी॑तो॒ अभ॑य॒-ञ्ज्योति॑रश्याम् ॥ आ॒दि॒त्याना॒मव॑सा॒ नूत॑नेन सक्षी॒महि॒ शर्म॑णा॒ शन्त॑मेन । अ॒ना॒गा॒स्त्वे अ॑दिति॒त्वे तु॒रास॑ इ॒मं-यँ॒ज्ञ-न्द॑धतु॒ श्रोष॑माणाः ॥ इ॒म-म्मे॑ वरुण श्रुधी॒ हव॑म॒द्या च॑ मृडय । त्वाम॑व॒स्युरा च॑के ॥ तत्त्वा॑ यामि॒ ब्रह्म॑णा॒ वन्द॑मान॒-स्तदा शा᳚स्ते॒ यज॑मानो ह॒विर्भिः॑ । अहे॑डमानो वरुणे॒ह बो॒द्ध्युरु॑शग्ंस॒ मा न॒ आयुः॒ प्रमो॑षीः ॥ 65 ॥

(नामा॒ - ऽग्नि-स्सग्ं - शव॑सो॒ - रक्ष॑माणा - धी॒र्या॑-ञ्चि॒दे - का॒न्न प॑ञ्चा॒शच्च॑) (अ. 11)

(वा॒य॒व्यं॑ - प्रा॒जप॑ति॒स्ता वरु॑णं - देवासु॒रा ए॒ष्व॑ - सावा॑दि॒त्यो दश॑र्षभा॒-मिन्द्रो॑ व॒लस्य॑ - बार्हस्प॒त्यं - ँव॑षट्का॒रो॑ - ऽसौसौ॒रीं॒ - ँव॑रुण -माश्वि॒न - मिन्द्रं॑-वोँ॒ नर॒ - एकाद॑श)

(वा॒य॒व्य॑ - माग्ने॒यी-ङ्कृ॑ष्णग्री॒वी - म॒सावा॑दि॒त्यो - वा अ॑होरा॒त्राणि॑ - वषट्का॒रः - प्र॑जनयि॒ता - हु॑वे तु॒राणां॒ - पञ्च॑षष्टिः )

(वा॒य॒व्य॑म्, प्रमो॑षीः)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-न्द्वितीयकाण्डे प्रथमः प्रश्न-स्समाप्तः ॥