6.1 - Prachinavagam Shankaroti - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ಪ್ರಥಮಃ ಪ್ರಶ್ನಃ - ಸೋಮಮನ್ತ್ರಬ್ರಾಹ್ಮಣನಿರೂಪಣಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಪ್ರಾ॒ಚೀನ॑ವಗ್ಂಶ-ಙ್ಕರೋತಿ ದೇವಮನು॒ಷ್ಯಾ ದಿಶೋ॒ ವ್ಯ॑ಭಜನ್ತ॒ ಪ್ರಾಚೀ᳚-ನ್ದೇ॒ವಾ ದ॑ಕ್ಷಿ॒ಣಾ ಪಿ॒ತರಃ॑ ಪ್ರ॒ತೀಚೀ᳚-ಮ್ಮನು॒ಷ್ಯಾ॑ ಉದೀ॑ಚೀಗ್ಂ ರು॒ದ್ರಾ ಯ-ತ್ಪ್ರಾ॒ಚೀನ॑ವಗ್ಂಶ-ಙ್ಕ॒ರೋತಿ॑ ದೇವಲೋ॒ಕಮೇ॒ವ ತ-ದ್ಯಜ॑ಮಾನ ಉ॒ಪಾವ॑ರ್ತತೇ॒ ಪರಿ॑ ಶ್ರಯತ್ಯ॒ನ್ತರ್ಹಿ॑ತೋ॒ಹಿ ದೇ॑ವಲೋ॒ಕೋ ಮ॑ನುಷ್ಯಲೋ॒ಕಾ-ನ್ನಾಸ್ಮಾಲ್ಲೋ॒ಕಾ-ಥ್ಸ್ವೇ॑ತವ್ಯಮಿ॒ವೇತ್ಯಾ॑ಹುಃ॒ ಕೋ ಹಿ ತ-ದ್ವೇದ॒ ಯ-ದ್ಯ॒ಮುಷ್ಮಿ॑ಁಲ್ಲೋ॒ಕೇ-ಽಸ್ತಿ॑ ವಾ॒ ನ ವೇತಿ॑ ದಿ॒ಕ್ಷ್ವ॑ತೀ ಕಾ॒ಶಾನ್ ಕ॑ರೋ- [ದಿ॒ಕ್ಷ್ವ॑ತೀ ಕಾ॒ಶಾನ್ ಕ॑ರೋತಿ, ಉ॒ಭಯೋ᳚] 1

-ತ್ಯು॒ಭಯೋ᳚-ರ್ಲೋ॒ಕಯೋ॑-ರ॒ಭಿಜಿ॑ತ್ಯೈ ಕೇಶಶ್ಮ॒ಶ್ರು ವ॑ಪತೇ ನ॒ಖಾನಿ॒ ನಿ ಕೃ॑ನ್ತತೇ ಮೃ॒ತಾ ವಾ ಏ॒ಷಾ ತ್ವಗ॑ಮೇ॒ದ್ಧ್ಯಾ ಯ-ತ್ಕೇ॑ಶಶ್ಮ॒ಶ್ರು ಮೃ॒ತಾಮೇ॒ವ ತ್ವಚ॑ಮ-ಮೇ॒ದ್ಧ್ಯಾಮ॑ಪ॒ಹತ್ಯ॑ ಯ॒ಜ್ಞಿಯೋ॑ ಭೂ॒ತ್ವಾ ಮೇಧ॒ಮುಪೈ॒ತ್ಯಙ್ಗಿ॑ರಸ-ಸ್ಸುವ॒ರ್ಗಂ-ಲೋಁ॒ಕಂ-ಯಁನ್ತೋ॒-ಽಫ್ಸು ದೀ᳚ಕ್ಷಾತ॒ಪಸೀ॒ ಪ್ರಾವೇ॑ಶಯನ್ನ॒ಫ್ಸು ಸ್ನಾ॑ತಿ ಸಾ॒ಕ್ಷಾದೇ॒ವ ದೀ᳚ಕ್ಷಾತ॒ಪಸೀ॒ ಅವ॑ ರುನ್ಧೇ ತೀ॒ರ್ಥೇ ಸ್ನಾ॑ತಿ ತೀ॒ರ್ಥೇ ಹಿ ತೇ ತಾ-ಮ್ಪ್ರಾವೇ॑ಶಯ-ನ್ತೀ॒ರ್ಥೇ ಸ್ನಾ॑ತಿ [ ] 2

ತೀ॒ರ್ಥಮೇ॒ವ ಸ॑ಮಾ॒ನಾನಾ᳚-ಮ್ಭವತ್ಯ॒ಪೋ᳚-ಽಶ್ಞಾತ್ಯನ್ತರ॒ತ ಏ॒ವ ಮೇದ್ಧ್ಯೋ॑ ಭವತಿ॒ ವಾಸ॑ಸಾ ದೀಕ್ಷಯತಿ ಸೌ॒ಮ್ಯಂ-ವೈಁ ಕ್ಷೌಮ॑-ನ್ದೇ॒ವತ॑ಯಾ॒ ಸೋಮ॑ಮೇ॒ಷ ದೇ॒ವತಾ॒ಮುಪೈ॑ತಿ॒ ಯೋ ದೀಕ್ಷ॑ತೇ॒ ಸೋಮ॑ಸ್ಯ ತ॒ನೂರ॑ಸಿ ತ॒ನುವ॑-ಮ್ಮೇ ಪಾ॒ಹೀತ್ಯಾ॑ಹ॒ ಸ್ವಾಮೇ॒ವ ದೇ॒ವತಾ॒ಮುಪೈ॒ತ್ಯಥೋ॑ ಆ॒ಶಿಷ॑ಮೇ॒ವೈತಾಮಾ ಶಾ᳚ಸ್ತೇ॒ ಽಗ್ನೇಸ್ತೂ॑ಷಾ॒ಧಾನಂ॑-ವಾಁ॒ಯೋರ್ವಾ॑ತ॒ಪಾನ॑-ಮ್ಪಿತೃ॒ಣಾ-ನ್ನೀ॒ವಿ-ರೋಷ॑ಧೀನಾ-ಮ್ಪ್ರಘಾ॒ತ [-ರೋಷ॑ಧೀನಾ-ಮ್ಪ್ರಘಾ॒ತಃ, ಆ॒ದಿ॒ತ್ಯಾನಾ᳚-ಮ್ಪ್ರಾಚೀನತಾ॒ನೋ] 3

ಆ॑ದಿ॒ತ್ಯಾನಾ᳚-ಮ್ಪ್ರಾಚೀನತಾ॒ನೋ ವಿಶ್ವೇ॑ಷಾ-ನ್ದೇ॒ವಾನಾ॒ಮೋತು॒ ರ್ನಕ್ಷ॑ತ್ರಾಣಾ-ಮತೀಕಾ॒ಶಾಸ್ತದ್ವಾ ಏ॒ತ-ಥ್ಸ॑ರ್ವ ದೇವ॒ತ್ಯಂ॑-ಯಁ-ದ್ವಾಸೋ॒ ಯ-ದ್ವಾಸ॑ಸಾ ದೀ॒ಕ್ಷಯ॑ತಿ॒ ಸರ್ವಾ॑ಭಿರೇ॒ವೈನ॑-ನ್ದೇ॒ವತಾ॑ಭಿ-ರ್ದೀಕ್ಷಯತಿ ಬ॒ಹಿಃಪ್ರಾ॑ಣೋ॒ ವೈ ಮ॑ನು॒ಷ್ಯ॑ಸ್ತ-ಸ್ಯಾಶ॑ನ-ಮ್ಪ್ರಾ॒ಣೋ᳚-ಽಶ್ಞಾತಿ॒ ಸಪ್ರಾ॑ಣ ಏ॒ವ ದೀ᳚ಕ್ಷತ॒ ಆಶಿ॑ತೋ ಭವತಿ॒ ಯಾವಾ॑ನೇ॒ವಾಸ್ಯ॑ ಪ್ರಾ॒ಣಸ್ತೇನ॑ ಸ॒ಹ ಮೇಧ॒ಮುಪೈ॑ತಿ ಘೃ॒ತ-ನ್ದೇ॒ವಾನಾ॒-ಮ್ಮಸ್ತು॑ ಪಿತೃ॒ಣಾ-ನ್ನಿಷ್ಪ॑ಕ್ವ-ಮ್ಮನು॒ಷ್ಯಾ॑ಣಾ॒-ನ್ತದ್ವಾ [-ಮ್ಮನು॒ಷ್ಯಾ॑ಣಾ॒-ನ್ತದ್ವೈ, ಏ॒ತ-ಥ್ಸ॑ರ್ವದೇವ॒ತ್ಯಂ॑] 4

ಏ॒ತ-ಥ್ಸ॑ರ್ವದೇವ॒ತ್ಯಂ॑-ಯಁನ್ನವ॑ನೀತಂ॒-ಯಁನ್ನವ॑ನೀತೇನಾಭ್ಯ॒ಙ್ಕ್ತೇ ಸರ್ವಾ॑ ಏ॒ವ ದೇ॒ವತಾಃ᳚ ಪ್ರೀಣಾತಿ॒ ಪ್ರಚ್ಯು॑ತೋ॒ ವಾ ಏ॒ಷೋ᳚-ಽಸ್ಮಾಲ್ಲೋ॒ಕಾದಗ॑ತೋ ದೇವಲೋ॒ಕಂ-ಯೋಁ ದೀ᳚ಕ್ಷಿ॒ತೋ᳚ ಽನ್ತ॒ರೇವ॒ ನವ॑ನೀತ॒-ನ್ತಸ್ಮಾ॒-ನ್ನವ॑ನೀತೇನಾ॒ಭ್ಯ॑ಙ್ಕ್ತೇ ಽನುಲೋ॒ಮಂ-ಯಁಜು॑ಷಾ॒ ವ್ಯಾವೃ॑ತ್ತ್ಯಾ॒ ಇನ್ದ್ರೋ॑ ವೃ॒ತ್ರಮ॑ಹ॒-ನ್ತಸ್ಯ॑ ಕ॒ನೀನಿ॑ಕಾ॒ ಪರಾ॑-ಽಪತ॒-ತ್ತದಾಞ್ಜ॑ನಮ-ಭವ॒ದ್ಯದಾ॒ಙ್ಕ್ತೇ ಚಕ್ಷು॑ರೇ॒ವ ಭ್ರಾತೃ॑ವ್ಯಸ್ಯ ವೃಙ್ಕ್ತೇ॒ ದಕ್ಷಿ॑ಣ॒-ಮ್ಪೂರ್ವ॒ಮಾ-ಽಙ್ಕ್ತೇ॑ [ದಕ್ಷಿ॑ಣ॒-ಮ್ಪೂರ್ವ॒ಮಾ-ಽಙ್ಕ್ತೇ᳚, ಸ॒ವ್ಯಗ್ಂ ಹಿ] 5

ಸ॒ವ್ಯಗ್ಂ ಹಿ ಪೂರ್ವ॑-ಮ್ಮನು॒ಷ್ಯಾ॑ ಆ॒ಞ್ಜತೇ॒ ನ ನಿ ಧಾ॑ವತೇ॒ ನೀವ॒ ಹಿ ಮ॑ನು॒ಷ್ಯಾ॑ ಧಾವ॑ನ್ತೇ॒ ಪಞ್ಚ॒ ಕೃತ್ವ॒ ಆ-ಽಙ್ಕ್ತೇ॒ ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧೇ॒ ಪರಿ॑ಮಿತ॒ಮಾಙ್ಕ್ತೇ ಽಪ॑ರಿಮಿತ॒ಗ್ಂ॒ ಹಿ ಮ॑ನು॒ಷ್ಯಾ॑ ಆ॒ಞ್ಜತೇ॒ ಸತೂ॑ಲ॒ಯಾ-ಽಽಙ್ಕ್ತೇ- ಽಪ॑ತೂಲಯಾ॒ ಹಿ ಮ॑ನು॒ಷ್ಯಾ॑ ಆ॒ಞ್ಜತೇ॒ ವ್ಯಾವೃ॑ತ್ತ್ಯೈ॒ ಯದಪ॑ತೂಲಯಾಞ್ಜೀ॒ತ ವಜ್ರ॑ ಇವ ಸ್ಯಾ॒-ಥ್ಸತೂ॑ಲ॒ಯಾ-ಽಽಙ್ಕ್ತೇ॑ ಮಿತ್ರ॒ತ್ವಾಯೇ- [ಮಿತ್ರ॒ತ್ವಾಯ॑, ಇನ್ದ್ರೋ॑] 6

-ನ್ದ್ರೋ॑ ವೃ॒ತ್ರಮ॑ಹ॒ನ್ಥ್ಸೋ᳚-ಽ(1॒)ಪೋ᳚-ಽ(1॒)ಭ್ಯ॑-ಮ್ರಿಯತ॒ ತಾಸಾಂ॒-ಯಁನ್ಮೇದ್ಧ್ಯಂ॑-ಯಁ॒ಜ್ಞಿಯ॒ಗ್ಂ॒ ಸದೇ॑ವ॒ಮಾಸೀ॒-ತ್ತದ॒ಪೋದ॑ಕ್ರಾಮ॒-ತ್ತೇ ದ॒ರ್ಭಾ ಅ॑ಭವ॒ನ್॒. ಯದ್ದ॑ರ್ಭಪುಞ್ಜೀ॒ಲೈಃ ಪ॒ವಯ॑ತಿ॒ ಯಾ ಏ॒ವ ಮೇದ್ಧ್ಯಾ॑ ಯ॒ಜ್ಞಿಯಾ॒-ಸ್ಸದೇ॑ವಾ॒ ಆಪ॒ಸ್ತಾಭಿ॑ರೇ॒ವೈನ॑-ಮ್ಪವಯತಿ॒ ದ್ವಾಭ್ಯಾ᳚-ಮ್ಪವಯತ್ಯ-ಹೋರಾ॒ತ್ರಾಭ್ಯಾ॑ಮೇ॒ವೈನ॑-ಮ್ಪವಯತಿ ತ್ರಿ॒ಭಿಃ ಪ॑ವಯತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಭಿರೇ॒ವೈನಂ॑-ಲೋಁ॒ಕೈಃ ಪ॑ವಯತಿ ಪ॒ಞ್ಚಭಿಃ॑ [ಪ॒ಞ್ಚಭಿಃ॑, ಪ॒ವ॒ಯ॒ತಿ॒ ಪಞ್ಚಾ᳚ಕ್ಷರಾ] 7

ಪವಯತಿ॒ ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಾಯೈ॒ವೈನ॑-ಮ್ಪವಯತಿ ಷ॒ಡ್ಭಿಃ ಪ॑ವಯತಿ॒ ಷಡ್ವಾ ಋ॒ತವ॑ ಋ॒ತುಭಿ॑ರೇ॒ವೈನ॑-ಮ್ಪವಯತಿ ಸ॒ಪ್ತಭಿಃ॑ ಪವಯತಿ ಸ॒ಪ್ತ ಛನ್ದಾಗ್ಂ॑ಸಿ॒ ಛನ್ದೋ॑ಭಿರೇ॒ವೈನ॑-ಮ್ಪವಯತಿ ನ॒ವಭಿಃ॑ ಪವಯತಿ॒ ನವ॒ ವೈ ಪುರು॑ಷೇ ಪ್ರಾ॒ಣಾ-ಸ್ಸಪ್ರಾ॑ಣಮೇ॒ವೈನ॑-ಮ್ಪವಯ॒ತ್ಯೇಕ॑ವಿಗ್ಂಶತ್ಯಾ ಪವಯತಿ॒ ದಶ॒ ಹಸ್ತ್ಯಾ॑ ಅ॒ಙ್ಗುಲ॑ಯೋ॒ ದಶ॒ ಪದ್ಯಾ॑ ಆ॒ತ್ಮೈಕ॑ವಿ॒ಗ್ಂ॒ಶೋ ಯಾವಾ॑ನೇ॒ವ ಪುರು॑ಷ॒ಸ್ತ-ಮಪ॑ರಿವರ್ಗ- [ಪುರು॑ಷ॒ಸ್ತ-ಮಪ॑ರಿವರ್ಗಮ್, ಪ॒ವ॒ಯ॒ತಿ॒ ಚಿ॒ತ್ಪತಿ॑ಸ್ತ್ವಾ] 8

-ಮ್ಪವಯತಿ ಚಿ॒ತ್ಪತಿ॑ಸ್ತ್ವಾ ಪುನಾ॒ತ್ವಿತ್ಯಾ॑ಹ॒ ಮನೋ॒ ವೈ ಚಿ॒ತ್ಪತಿ॒ರ್ಮನ॑ಸೈ॒ವೈನ॑-ಮ್ಪವಯತಿ ವಾ॒ಕ್ಪತಿ॑ಸ್ತ್ವಾ ಪುನಾ॒ತ್ವಿತ್ಯಾ॑ಹ ವಾ॒ಚೈವೈನ॑-ಮ್ಪವಯತಿ ದೇ॒ವಸ್ತ್ವಾ॑ ಸವಿ॒ತಾ ಪು॑ನಾ॒ತ್ವಿತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವೈನ॑-ಮ್ಪವಯತಿ॒ ತಸ್ಯ॑ ತೇ ಪವಿತ್ರಪತೇ ಪ॒ವಿತ್ರೇ॑ಣ॒ ಯಸ್ಮೈ॒ ಕ-ಮ್ಪು॒ನೇ ತಚ್ಛ॑ಕೇಯ॒ಮಿತ್ಯಾ॑-ಹಾ॒-ಽಽಶಿಷ॑ಮೇ॒ವೈತಾಮಾ ಶಾ᳚ಸ್ತೇ ॥ 9 ॥

(ಅ॒ತೀ॒ಕಾ॒ಶಾನ್ ಕ॑ರೋ॒ತ್ಯ - ವೇ॑ಶಯ-ನ್ತಿ॒ರ್ಥ ಸ್ನಾ॑ತಿ - ಪ್ರಘಾ॒ತೋ - ಮ॑ನು॒ಷ್ಯಾ॑ಣಾ॒-ನ್ತದ್ವಾ - ಆ-ಽಙ್ಕ್ತೇ॑ - ಮಿತ್ರ॒ತ್ವಾಯ॑ - ಪ॒ಞ್ಚಭಿ॒ - ರಪ॑ರಿವರ್ಗ - ಮ॒ಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 1)

ಯಾವ॑ನ್ತೋ॒ ವೈ ದೇ॒ವಾ ಯ॒ಜ್ಞಾಯಾಪು॑ನತ॒ ತ ಏ॒ವಾಭ॑ವ॒ನ್॒. ಯ ಏ॒ವಂ-ವಿಁ॒ದ್ವಾನ್. ಯ॒ಜ್ಞಾಯ॑ ಪುನೀ॒ತೇ ಭವ॑ತ್ಯೇ॒ವ ಬ॒ಹಿಃ ಪ॑ವಯಿ॒ತ್ವಾ-ಽನ್ತಃ ಪ್ರ ಪಾ॑ದಯತಿ ಮನುಷ್ಯಲೋ॒ಕ ಏ॒ವೈನ॑-ಮ್ಪವಯಿ॒ತ್ವಾ ಪೂ॒ತ-ನ್ದೇ॑ವಲೋ॒ಕ-ಮ್ಪ್ರ ಣ॑ಯ॒ತ್ಯದೀ᳚ಕ್ಷಿತ॒ ಏಕ॒ಯಾ-ಽಽಹು॒ತ್ಯೇತ್ಯಾ॑ಹು-ಸ್ಸ್ರು॒ವೇಣ॒ ಚತ॑ಸ್ರೋ ಜುಹೋತಿ ದೀಕ್ಷಿತ॒ತ್ವಾಯ॑ ಸ್ರು॒ಚಾ ಪ॑ಞ್ಚ॒ಮೀ-ಮ್ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧ॒ ಆಕೂ᳚ತ್ಯೈ ಪ್ರ॒ಯುಜೇ॒-ಽಗ್ನಯೇ॒ [ಪ್ರ॒ಯುಜೇ॒-ಽಗ್ನಯೇ᳚, ಸ್ವಾಹೇತ್ಯಾ॒ಹಾ] 10

ಸ್ವಾಹೇತ್ಯಾ॒ಹಾ-ಽಽಕೂ᳚ತ್ಯಾ॒ ಹಿ ಪುರು॑ಷೋ ಯ॒ಜ್ಞಮ॒ಭಿ ಪ್ರ॑ಯು॒ಙ್ಕ್ತೇ ಯಜೇ॒ಯೇತಿ॑ ಮೇ॒ಧಾಯೈ॒ ಮನ॑ಸೇ॒-ಽಗ್ನಯೇ॒ ಸ್ವಾಹೇತ್ಯಾ॑ಹ ಮೇ॒ಧಯಾ॒ ಹಿ ಮನ॑ಸಾ॒ ಪುರು॑ಷೋ ಯ॒ಜ್ಞಮ॑ಭಿ॒ಗಚ್ಛ॑ತಿ॒ ಸರ॑ಸ್ವತ್ಯೈ ಪೂ॒ಷ್ಣೇ᳚-ಽಗ್ನಯೇ॒ ಸ್ವಾಹೇತ್ಯಾ॑ಹ॒ ವಾಗ್ವೈ ಸರ॑ಸ್ವತೀ ಪೃಥಿ॒ವೀ ಪೂ॒ಷಾ ವಾ॒ಚೈವ ಪೃ॑ಥಿ॒ವ್ಯಾ ಯ॒ಜ್ಞ-ಮ್ಪ್ರಯು॑ಙ್ಕ್ತ॒ ಆಪೋ॑ ದೇವೀ-ರ್ಬೃಹತೀ-ರ್ವಿಶ್ವಶಮ್ಭುವ॒ ಇತ್ಯಾ॑ಹ॒ ಯಾ ವೈ ವರ್ಷ್ಯಾ॒ಸ್ತಾ [ಯಾ ವೈ ವರ್ಷ್ಯಾ॒ಸ್ತಾಃ, ಆಪೋ॑ ದೇ॒ವೀ-ರ್ಬೃ॑ಹ॒ತೀ-] 11

ಆಪೋ॑ ದೇ॒ವೀ-ರ್ಬೃ॑ಹ॒ತೀ-ರ್ವಿ॒ಶ್ವಶ॑ಭುಂವೋಁ॒ ಯದೇ॒ತ-ದ್ಯಜು॒ರ್ನ ಬ್ರೂ॒ಯಾ-ದ್ದಿ॒ವ್ಯಾ ಆಪೋ-ಽಶಾ᳚ನ್ತಾ ಇ॒ಮಂ-ಲೋಁ॒ಕಮಾ ಗ॑ಚ್ಛೇಯು॒ರಾಪೋ॑ ದೇವೀ-ರ್ಬೃಹತೀ-ರ್ವಿಶ್ವಶಮ್ಭುವ॒ ಇತ್ಯಾ॑ಹಾ॒ಸ್ಮಾ ಏ॒ವೈನಾ॑ ಲೋ॒ಕಾಯ॑ ಶಮಯತಿ॒ ತಸ್ಮಾ᳚ಚ್ಛಾ॒ನ್ತಾ ಇ॒ಮಂ-ಲೋಁ॒ಕಮಾ ಗ॑ಚ್ಛನ್ತಿ॒ ದ್ಯಾವಾ॑ಪೃಥಿ॒ವೀ ಇತ್ಯಾ॑ಹ॒ ದ್ಯಾವಾ॑ಪೃಥಿ॒ವ್ಯೋರ್ಹಿ ಯ॒ಜ್ಞ ಉ॒ರ್ವ॑ನ್ತರಿ॑ಕ್ಷ॒-ಮಿತ್ಯಾ॑ಹಾ॒ನ್ತರಿ॑ಕ್ಷೇ॒ ಹಿ ಯ॒ಜ್ಞೋ ಬೃಹ॒ಸ್ಪತಿ॑ರ್ನೋ ಹ॒ವಿಷಾ॑ ವೃಧಾ॒- [ಹ॒ವಿಷಾ॑ ವೃಧಾತು, ಇತ್ಯಾ॑ಹ॒ ಬ್ರಹ್ಮ॒ ವೈ] 12

-ತ್ವಿತ್ಯಾ॑ಹ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒-ರ್ಬ್ರಹ್ಮ॑ಣೈ॒ವಾಸ್ಮೈ॑ ಯ॒ಜ್ಞಮವ॑ ರುನ್ಧೇ॒ ಯದ್- ಬ್ರೂ॒ಯಾ-ದ್ವಿ॑ಧೇ॒ರಿತಿ॑ ಯಜ್ಞಸ್ಥಾ॒ಣುಮೃ॑ಚ್ಛೇ-ದ್ವೃಧಾ॒ತ್ವಿತ್ಯಾ॑ಹ ಯಜ್ಞಸ್ಥಾ॒ಣುಮೇ॒ವ ಪರಿ॑ ವೃಣಕ್ತಿ ಪ್ರ॒ಜಾಪ॑ತಿ-ರ್ಯ॒ಜ್ಞಮ॑ಸೃಜತ॒ ಸೋ᳚-ಽಸ್ಮಾ-ಥ್ಸೃ॒ಷ್ಟಃ ಪರಾಂ॑ಐ॒-ಥ್ಸ ಪ್ರ ಯಜು॒ರವ್ಲೀ॑ನಾ॒-ತ್ಪ್ರ ಸಾಮ॒ ತಮೃಗುದ॑ಯಚ್ಛ॒-ದ್ಯದೃಗು॒ದಯ॑ಚ್ಛ॒-ತ್ತದೌ᳚-ದ್ಗ್ರಹ॒ಣಸ್ಯೌ᳚-ದ್ಗ್ರಹಣ॒ತ್ವ ಮೃ॒ಚಾ [ಮೃ॒ಚಾ, ಜು॒ಹೋ॒ತಿ॒ ಯ॒ಜ್ಞಸ್ಯೋದ್ಯ॑ತ್ಯಾ] 13

ಜು॑ಹೋತಿ ಯ॒ಜ್ಞಸ್ಯೋದ್ಯ॑ತ್ಯಾ ಅನು॒ಷ್ಟುಪ್-ಛನ್ದ॑ಸಾ॒-ಮುದ॑ಯಚ್ಛ॒ದಿತ್ಯಾ॑-ಹು॒ಸ್ತಸ್ಮಾ॑ದನು॒ಷ್ಟುಭಾ॑ ಜುಹೋತಿ ಯ॒ಜ್ಞಸ್ಯೋದ್ಯ॑ತ್ಯೈ॒ ದ್ವಾದ॑ಶ ವಾಥ್ಸಬ॒ನ್ಧಾನ್ಯುದ॑ಯಚ್ಛ॒-ನ್ನಿತ್ಯಾ॑ಹು॒-ಸ್ತಸ್ಮಾ᳚ದ್- ದ್ವಾದ॒ಶಭಿ॑-ರ್ವಾಥ್ಸಬನ್ಧ॒ವಿದೋ॑ ದೀಕ್ಷಯನ್ತಿ॒ ಸಾ ವಾ ಏ॒ಷರ್ಗ॑ನು॒ಷ್ಟುಗ್-ವಾಗ॑ನು॒ಷ್ಟುಗ್-ಯದೇ॒ತಯ॒ರ್ಚಾ ದೀ॒ಕ್ಷಯ॑ತಿ ವಾ॒ಚೈವೈನ॒ಗ್ಂ॒ ಸರ್ವ॑ಯಾ ದೀಕ್ಷಯತಿ॒ ವಿಶ್ವೇ॑ ದೇ॒ವಸ್ಯ॑ ನೇ॒ತುರಿತ್ಯಾ॑ಹ ಸಾವಿ॒ತ್ರ್ಯೇ॑ತೇನ॒ ಮರ್ತೋ॑ ವೃಣೀತ ಸ॒ಖ್ಯ- [ಸ॒ಖ್ಯಮ್, ಇತ್ಯಾ॑ಹ] 14

-ಮಿತ್ಯಾ॑ಹ ಪಿತೃದೇವ॒ತ್ಯೈ॑ತೇನ॒ ವಿಶ್ವೇ॑ ರಾ॒ಯ ಇ॑ಷುದ್ಧ್ಯ॒ಸೀತ್ಯಾ॑ಹ ವೈಶ್ವದೇ॒ವ್ಯೇ॑ತೇನ॑ ದ್ಯು॒ಮ್ನಂ-ವೃಁ॑ಣೀತ ಪು॒ಷ್ಯಸ॒ ಇತ್ಯಾ॑ಹ ಪೌ॒ಷ್ಣ್ಯೇ॑ತೇನ॒ ಸಾ ವಾ ಏ॒ಷರ್ಖ್ಸ॑ರ್ವದೇವ॒ತ್ಯಾ॑ ಯದೇ॒ತಯ॒ರ್ಚಾ ದೀ॒ಕ್ಷಯ॑ತಿ॒ ಸರ್ವಾ॑ಭಿರೇ॒ವೈನ॑-ನ್ದೇ॒ವತಾ॑ಭಿರ್ದೀಕ್ಷಯತಿ ಸ॒ಪ್ತಾಕ್ಷ॑ರ-ಮ್ಪ್ರಥ॒ಮ-ಮ್ಪ॒ದಮ॒ಷ್ಟಾಕ್ಷ॑ರಾಣಿ॒ ತ್ರೀಣಿ॒ ಯಾನಿ॒ ತ್ರೀಣಿ॒ ತಾನ್ಯ॒ಷ್ಟಾವುಪ॑ ಯನ್ತಿ॒ ಯಾನಿ॑ ಚ॒ತ್ವಾರಿ॒ ತಾನ್ಯ॒ಷ್ಟೌ ಯದ॒ಷ್ಟಾಕ್ಷ॑ರಾ॒ ತೇನ॑ [ತೇನ॑, ಗಾ॒ಯ॒ತ್ರೀ ಯದೇಕಾ॑ದಶಾಕ್ಷರಾ॒] 15

ಗಾಯ॒ತ್ರೀ ಯದೇಕಾ॑ದಶಾಕ್ಷರಾ॒ ತೇನ॑ ತ್ರಿ॒ಷ್ಟುಗ್ಯ-ದ್ದ್ವಾದ॑ಶಾಕ್ಷರಾ॒ ತೇನ॒ ಜಗ॑ತೀ॒ ಸಾ ವಾ ಏ॒ಷರ್ಖ್ಸರ್ವಾ॑ಣಿ॒ ಛನ್ದಾಗ್ಂ॑ಸಿ॒ ಯದೇ॒ತಯ॒ರ್ಚಾ ದೀ॒ಕ್ಷಯ॑ತಿ॒ ಸರ್ವೇ॑ಭಿರೇ॒ವೈನ॒-ಞ್ಛನ್ದೋ॑ಭಿರ್ದೀಕ್ಷಯತಿ ಸ॒ಪ್ತಾಕ್ಷ॑ರ-ಮ್ಪ್ರಥ॒ಮ-ಮ್ಪ॒ದಗ್ಂ ಸ॒ಪ್ತಪ॑ದಾ॒ ಶಕ್ವ॑ರೀ ಪ॒ಶವ॒-ಶ್ಶಕ್ವ॑ರೀ ಪ॒ಶೂನೇ॒ವಾವ॑ ರುನ್ಧ॒ ಏಕ॑ಸ್ಮಾದ॒ಕ್ಷರಾ॒ದನಾ᳚ಪ್ತ-ಮ್ಪ್ರಥ॒ಮ-ಮ್ಪ॒ದ-ನ್ತಸ್ಮಾ॒-ದ್ಯ-ದ್ವಾ॒ಚೋ-ಽನಾ᳚ಪ್ತ॒-ನ್ತನ್ಮ॑ನು॒ಷ್ಯಾ॑ ಉಪ॑ ಜೀವನ್ತಿ ಪೂ॒ರ್ಣಯಾ॑ ಜುಹೋತಿ ಪೂ॒ರ್ಣ ಇ॑ವ॒ ಹಿ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯೈ॒ ನ್ಯೂ॑ನಯಾ ಜುಹೋತಿ॒ ನ್ಯೂ॑ನಾ॒ದ್ಧಿ ಪ್ರ॒ಜಾಪ॑ತಿಃ ಪ್ರ॒ಜಾ ಅಸೃ॑ಜತ ಪ್ರ॒ಜಾನಾ॒ಗ್ಂ॒ ಸೃಷ್ಟ್ಯೈ᳚ ॥ 16 ॥

(ಅ॒ಗ್ನಯೇ॒ - ತಾ - ವೃ॑ಧಾತ್ವೃ॒ - ಚಾ - ಸ॒ಖ್ಯಂ - ತೇನ॑ - ಜುಹೋತಿ॒ - ಪಞ್ಚ॑ದಶ ಚ) (ಅ. 2)

ಋ॒-ಖ್ಸಾ॒ಮೇ ವೈ ದೇ॒ವೇಭ್ಯೋ॑ ಯ॒ಜ್ಞಾಯಾ-ಽತಿ॑ಷ್ಠಮಾನೇ॒ ಕೃಷ್ಣೋ॑ ರೂ॒ಪ-ಙ್ಕೃ॒ತ್ವಾ- ಽಪ॒ಕ್ರಮ್ಯಾ॑ತಿಷ್ಠತಾ॒-ನ್ತೇ॑-ಽಮನ್ಯನ್ತ॒ ಯಂ-ವಾಁ ಇ॒ಮೇ ಉ॑ಪಾವ॒ರ್ಥ್ಸ್ಯತ॒-ಸ್ಸ ಇ॒ದ-ಮ್ಭ॑ವಿಷ್ಯ॒ತೀತಿ॒ ತೇ ಉಪಾ॑ಮನ್ತ್ರಯನ್ತ॒ ತೇ ಅ॑ಹೋರಾ॒ತ್ರಯೋ᳚-ರ್ಮಹಿ॒ಮಾನ॑-ಮಪನಿ॒ಧಾಯ॑ ದೇ॒ವಾನು॒ಪಾವ॑ರ್ತೇತಾಮೇ॒ಷ ವಾ ಋ॒ಚೋ ವರ್ಣೋ॒ ಯಚ್ಛು॒ಕ್ಲ-ಙ್ಕೃ॑ಷ್ಣಾಜಿ॒ನಸ್ಯೈ॒ಷ ಸಾಮ್ನೋ॒ ಯ-ತ್ಕೃ॒ಷ್ಣಮೃ॑ಖ್ಸಾ॒ಮಯೋ॒-ಶ್ಶಿಲ್ಪೇ᳚ ಸ್ಥ॒ ಇತ್ಯಾ॑ಹರ್ಖ್ಸಾ॒ಮೇ ಏ॒ವಾ-ಽವ॑ ರುನ್ಧ ಏ॒ಷ [ಏ॒ವಾ-ಽವ॑ ರುನ್ಧ ಏ॒ಷಃ, ವಾ ಅಹ್ನೋ॒] 17

ವಾ ಅಹ್ನೋ॒ ವರ್ಣೋ॒ ಯಚ್ಛು॒ಕ್ಲ-ಙ್ಕೃ॑ಷ್ಣಾಜಿ॒ನಸ್ಯೈ॒ಷ ರಾತ್ರಿ॑ಯಾ॒ ಯ-ತ್ಕೃ॒ಷ್ಣಂ-ಯಁದೇ॒ವೈನ॑ಯೋ॒ಸ್ತತ್ರ॒ ನ್ಯ॑ಕ್ತ॒-ನ್ತದೇ॒ವಾವ॑ ರುನ್ಧೇ ಕೃಷ್ಣಾಜಿ॒ನೇನ॑ ದೀಕ್ಷಯತಿ॒ ಬ್ರಹ್ಮ॑ಣೋ॒ ವಾ ಏ॒ತ-ದ್ರೂ॒ಪಂ-ಯಁ-ತ್ಕೃ॑ಷ್ಣಾಜಿ॒ನ-ಮ್ಬ್ರಹ್ಮ॑ಣೈ॒ವೈನ॑-ನ್ದೀಕ್ಷಯತೀ॒ಮಾ-ನ್ಧಿಯ॒ಗ್ಂ॒ ಶಿಕ್ಷ॑ಮಾಣಸ್ಯ ದೇ॒ವೇತ್ಯಾ॑ಹ ಯಥಾಯ॒ಜುರೇ॒ವೈತ-ದ್ಗರ್ಭೋ॒ ವಾ ಏ॒ಷ ಯ-ದ್ದೀ᳚ಕ್ಷಿ॒ತ ಉಲ್ಬಂ॒-ವಾಁಸಃ॒ ಪ್ರೋರ್ಣು॑ತೇ॒ ತಸ್ಮಾ॒- [ತಸ್ಮಾ᳚ತ್, ಗರ್ಭಾಃ॒ ಪ್ರಾವೃ॑ತಾ] 18

-ದ್ಗರ್ಭಾಃ॒ ಪ್ರಾವೃ॑ತಾ ಜಾಯನ್ತೇ॒ ನ ಪು॒ರಾ ಸೋಮ॑ಸ್ಯ ಕ್ರ॒ಯಾದಪೋ᳚ರ್ಣ್ವೀತ॒ ಯ-ತ್ಪು॒ರಾ ಸೋಮ॑ಸ್ಯ ಕ್ರ॒ಯಾದ॑ಪೋರ್ಣ್ವೀ॒ತ ಗರ್ಭಾಃ᳚ ಪ್ರ॒ಜಾನಾ᳚-ಮ್ಪರಾ॒ಪಾತು॑ಕಾ-ಸ್ಸ್ಯುಃ ಕ್ರೀ॒ತೇ ಸೋಮೇ-ಽಪೋ᳚ರ್ಣುತೇ॒ ಜಾಯ॑ತ ಏ॒ವ ತದಥೋ॒ ಯಥಾ॒ ವಸೀ॑ಯಾಗ್ಂ ಸ-ಮ್ಪ್ರತ್ಯಪೋರ್ಣು॒ತೇ ತಾ॒ದೃಗೇ॒ವ ತದಙ್ಗಿ॑ರಸ-ಸ್ಸುವ॒ರ್ಗಂ-ಲೋಁ॒ಕಂ-ಯಁನ್ತ॒ ಊರ್ಜಂ॒-ವ್ಯಁ॑ಭಜನ್ತ॒ ತತೋ॒ ಯದ॒ತ್ಯಶಿ॑ಷ್ಯತ॒ ತೇ ಶ॒ರಾ ಅ॑ಭವ॒ನ್ನೂರ್ಗ್ವೈ ಶ॒ರಾ ಯಚ್ಛ॑ರ॒ಮಯೀ॒ [ಯಚ್ಛ॑ರ॒ಮಯೀ᳚, ಮೇಖ॑ಲಾ॒] 19

ಮೇಖ॑ಲಾ॒ ಭವ॒ತ್ಯೂರ್ಜ॑ಮೇ॒ವಾವ॑ ರುನ್ಧೇ ಮದ್ಧ್ಯ॒ತ-ಸ್ಸನ್ನ॑ಹ್ಯತಿ ಮದ್ಧ್ಯ॒ತ ಏ॒ವಾಸ್ಮಾ॒ ಊರ್ಜ॑-ನ್ದಧಾತಿ॒ ತಸ್ಮಾ᳚ನ್ಮದ್ಧ್ಯ॒ತ ಊ॒ರ್ಜಾ ಭು॑ಞ್ಜತ ಊ॒ರ್ಧ್ವಂ-ವೈಁ ಪುರು॑ಷಸ್ಯ॒ ನಾಭ್ಯೈ॒ ಮೇದ್ಧ್ಯ॑-ಮವಾ॒ಚೀನ॑-ಮಮೇ॒ದ್ಧ್ಯಂ-ಯಁನ್ಮ॑ದ್ಧ್ಯ॒ತ-ಸ್ಸ॒ನಂಹ್ಯ॑ತಿ॒ ಮೇದ್ಧ್ಯ॑-ಞ್ಚೈ॒ವಾಸ್ಯಾ॑ಮೇ॒ದ್ಧ್ಯ-ಞ್ಚ॒ ವ್ಯಾವ॑ರ್ತಯ॒ತೀನ್ದ್ರೋ॑ ವೃ॒ತ್ರಾಯ॒ ವಜ್ರ॒-ಮ್ಪ್ರಾಹ॑ರ॒-ಥ್ಸ ತ್ರೇ॒ಧಾ ವ್ಯ॑ಭವ॒-ಥ್ಸ್ಫ್ಯಸ್ತೃತೀ॑ಯ॒ಗ್ಂ॒ ರಥ॒ಸ್ತೃತೀ॑ಯಂ॒-ಯೂಁಪ॒ಸ್ತೃತೀ॑ಯಂ॒- [-ಯೂಪ॒ಸ್ತೃತೀ॑ಯ॒ಮ್, ಯೇ᳚-ಽನ್ತ-ಶ್ಶ॒ರಾ] 20

-ಁಯೇ᳚-ಽನ್ತ-ಶ್ಶ॒ರಾ ಅಶೀ᳚ರ್ಯನ್ತ॒ ತೇ ಶ॒ರಾ ಅ॑ಭವ॒-ನ್ತಚ್ಛ॒ರಾಣಾಗ್ಂ॑ ಶರ॒ತ್ವಂ-ವಁಜ್ರೋ॒ ವೈ ಶ॒ರಾಃ, ಕ್ಷು-ತ್ಖಲು॒ ವೈ ಮ॑ನು॒ಷ್ಯ॑ಸ್ಯ॒ ಭ್ರಾತೃ॑ವ್ಯೋ॒ ಯಚ್ಛ॑ರ॒ಮಯೀ॒ ಮೇಖ॑ಲಾ॒ ಭವ॑ತಿ॒ ವಜ್ರೇ॑ಣೈ॒ವ ಸಾ॒ಕ್ಷಾ-ತ್ಕ್ಷುಧ॒-ಮ್ಭ್ರಾತೃ॑ವ್ಯ-ಮ್ಮದ್ಧ್ಯ॒ತೋ-ಽಪ॑ ಹತೇ ತ್ರಿ॒ವೃ-ದ್ಭ॑ವತಿ ತ್ರಿ॒ವೃದ್ವೈ ಪ್ರಾ॒ಣಸ್ತ್ರಿ॒ವೃತ॑ಮೇ॒ವ ಪ್ರಾ॒ಣ-ಮ್ಮ॑ದ್ಧ್ಯ॒ತೋ ಯಜ॑ಮಾನೇ ದಧಾತಿ ಪೃ॒ಥ್ವೀ ಭ॑ವತಿ॒ ರಜ್ಜೂ॑ನಾಂ॒-ವ್ಯಾಁವೃ॑ತ್ಯೈ॒ ಮೇಖ॑ಲಯಾ॒ ಯಜ॑ಮಾನ-ನ್ದೀಕ್ಷಯತಿ॒ ಯೋಕ್ತ್ರೇ॑ಣ॒ ಪತ್ನೀ᳚-ಮ್ಮಿಥುನ॒ತ್ವಾಯ॑ [ ] 21

ಯ॒ಜ್ಞೋ ದಕ್ಷಿ॑ಣಾಮ॒ಭ್ಯ॑ದ್ಧ್ಯಾಯ॒-ತ್ತಾಗ್ಂ ಸಮ॑ಭವ॒-ತ್ತದಿನ್ದ್ರೋ॑-ಽಚಾಯ॒-ಥ್ಸೋ॑-ಽಮನ್ಯತ॒ ಯೋ ವಾ ಇ॒ತೋ ಜ॑ನಿ॒ಷ್ಯತೇ॒ ಸ ಇ॒ದ-ಮ್ಭ॑ವಿಷ್ಯ॒ತೀತಿ॒ ತಾ-ಮ್ಪ್ರಾವಿ॑ಶ॒-ತ್ತಸ್ಯಾ॒ ಇನ್ದ್ರ॑ ಏ॒ವಾಜಾ॑ಯತ॒ ಸೋ॑-ಽಮನ್ಯತ॒ ಯೋ ವೈ ಮದಿ॒ತೋ ಽಪ॑ರೋ ಜನಿ॒ಷ್ಯತೇ॒ ಸ ಇ॒ದ-ಮ್ಭ॑ವಿಷ್ಯ॒ತೀತಿ॒ ತಸ್ಯಾ॑ ಅನು॒ಮೃಶ್ಯ॒ ಯೋನಿ॒ಮಾ-ಽಚ್ಛಿ॑ನ॒-ಥ್ಸಾ ಸೂ॒ತವ॑ಶಾ-ಽಭವ॒-ತ್ತ-ಥ್ಸೂ॒ತವ॑ಶಾಯೈ॒ ಜನ್ಮ॒ [ಜನ್ಮ॑, ತಾಗ್ಂ ಹಸ್ತೇ॒ ನ್ಯ॑ವೇಷ್ಟಯತ॒] 22

ತಾಗ್ಂ ಹಸ್ತೇ॒ ನ್ಯ॑ವೇಷ್ಟಯತ॒ ತಾ-ಮ್ಮೃ॒ಗೇಷು॒ ನ್ಯ॑ದಧಾ॒-ಥ್ಸಾ ಕೃ॑ಷ್ಣವಿಷಾ॒ಣಾ- ಽಭ॑ವ॒ದಿನ್ದ್ರ॑ಸ್ಯ॒ ಯೋನಿ॑ರಸಿ॒ ಮಾ ಮಾ॑ ಹಿಗ್ಂಸೀ॒ರಿತಿ॑ ಕೃಷ್ಣವಿಷಾ॒ಣಾ-ಮ್ಪ್ರ ಯ॑ಚ್ಛತಿ॒ ಸಯೋ॑ನಿಮೇ॒ವ ಯ॒ಜ್ಞ-ಙ್ಕ॑ರೋತಿ॒ ಸಯೋ॑ನಿ॒-ನ್ದಕ್ಷಿ॑ಣಾ॒ಗ್ಂ॒ ಸಯೋ॑ನಿ॒ಮಿನ್ದ್ರಗ್ಂ॑ ಸಯೋನಿ॒ತ್ವಾಯ॑ ಕೃ॒ಷ್ಯೈ ತ್ವಾ॑ ಸುಸ॒ಸ್ಯಾಯಾ॒ ಇತ್ಯಾ॑ಹ॒ ತಸ್ಮಾ॑ದಕೃಷ್ಟಪ॒ಚ್ಯಾ ಓಷ॑ಧಯಃ ಪಚ್ಯನ್ತೇ ಸುಪಿಪ್ಪ॒ಲಾಭ್ಯ॒-ಸ್ತ್ವೌಷ॑ಧೀಭ್ಯ॒ ಇತ್ಯಾ॑ಹ॒ ತಸ್ಮಾ॒ದೋಷ॑ಧಯಃ॒ ಫಲ॑-ಙ್ಗೃಹ್ಣನ್ತಿ॒ ಯದ್ಧಸ್ತೇ॑ನ [ಯದ್ಧಸ್ತೇ॑ನ, ಕ॒ಣ್ಡೂ॒ಯೇತ॑] 23

ಕಣ್ಡೂ॒ಯೇತ॑ ಪಾಮನ॒-ಮ್ಭಾವು॑ಕಾಃ ಪ್ರ॒ಜಾ-ಸ್ಸ್ಯು॒ರ್ಯ-ಥ್ಸ್ಮಯೇ॑ತ ನಗ್ನ॒-ಮ್ಭಾವು॑ಕಾಃ ಕೃಷ್ಣವಿಷಾ॒ಣಯಾ॑ ಕಣ್ಡೂಯತೇ-ಽಪಿ॒ಗೃಹ್ಯ॑ ಸ್ಮಯತೇ ಪ್ರ॒ಜಾನಾ᳚-ಙ್ಗೋಪೀ॒ಥಾಯ॒ ನ ಪು॒ರಾ ದಕ್ಷಿ॑ಣಾಭ್ಯೋ॒ ನೇತೋಃ᳚ ಕೃಷ್ಣವಿಷಾ॒ಣಾಮವ॑ ಚೃತೇ॒ದ್ಯ-ತ್ಪು॒ರಾ ದಕ್ಷಿ॑ಣಾಭ್ಯೋ॒ ನೇತೋಃ᳚ ಕೃಷ್ಣವಿಷಾ॒ಣಾ-ಮ॑ವಚೃ॒ತೇ-ದ್ಯೋನಿಃ॑ ಪ್ರ॒ಜಾನಾ᳚-ಮ್ಪರಾ॒ಪಾತು॑ಕಾ ಸ್ಯಾನ್ನೀ॒ತಾಸು॒ ದಕ್ಷಿ॑ಣಾಸು॒ ಚಾತ್ವಾ॑ಲೇ ಕೃಷ್ಣವಿಷಾ॒ಣಾ-ಮ್ಪ್ರಾಸ್ಯ॑ತಿ॒ ಯೋನಿ॒ರ್ವೈ ಯ॒ಜ್ಞಸ್ಯ॒ ಚಾತ್ವಾ॑ಲಂ॒-ಯೋಁನಿಃ॑ ಕೃಷ್ಣವಿಷಾ॒ಣಾ ಯೋನಾ॑ವೇ॒ವ ಯೋನಿ॑-ನ್ದಧಾತಿ ಯ॒ಜ್ಞಸ್ಯ॑ ಸಯೋನಿ॒ತ್ವಾಯ॑ ॥ 24 ॥

(ರು॒ನ್ಧ॒ ಏ॒ಷ - ತಸ್ಮಾ᳚ - ಚ್ಛರ॒ಮಯೀ॒ - ಯೂಪ॒ಸ್ತೃತೀ॑ಯಂ - ಮಿಥುನ॒ತ್ವಾಯ॒ - ಜನ್ಮ॒ - ಹಸ್ತೇ॑ನಾ॒ - ಽಷ್ಟಾಚ॑ತ್ವಾರಿಗ್ಂಶಚ್ಚ) (ಅ. 3)

ವಾಗ್ವೈ ದೇ॒ವೇಭ್ಯೋ ಽಪಾ᳚ಕ್ರಾಮ-ದ್ಯ॒ಜ್ಞಾಯಾತಿ॑ಷ್ಠಮಾನಾ॒ ಸಾ ವನ॒ಸ್ಪತೀ॒-ನ್ಪ್ರಾವಿ॑ಶ॒-ಥ್ಸೈಷಾ ವಾಗ್ವನ॒ಸ್ಪತಿ॑ಷು ವದತಿ॒ ಯಾ ದು॑ನ್ದು॒ಭೌ ಯಾ ತೂಣ॑ವೇ॒ ಯಾ ವೀಣಾ॑ಯಾಂ॒-ಯಁ-ದ್ದೀ᳚ಕ್ಷಿತದ॒ಣ್ಡ-ಮ್ಪ್ರ॒ಯಚ್ಛ॑ತಿ॒ ವಾಚ॑ಮೇ॒ವಾವ॑ ರುನ್ಧ॒ ಔದು॑ಬಂರೋ ಭವ॒ತ್ಯೂರ್ಗ್ವಾ ಉ॑ದು॒ಬಂರ॒ ಊರ್ಜ॑ಮೇ॒ವಾವ॑ ರುನ್ಧೇ॒ ಮುಖೇ॑ನ॒ ಸಮ್ಮಿ॑ತೋ ಭವತಿ ಮುಖ॒ತ ಏ॒ವಾಸ್ಮಾ॒ ಊರ್ಜ॑-ನ್ದಧಾತಿ॒ ತಸ್ಮಾ᳚-ನ್ಮುಖ॒ತ ಊ॒ರ್ಜಾ ಭು॑ಞ್ಜತೇ [ ] 25

ಕ್ರೀ॒ತೇ ಸೋಮೇ॑ ಮೈತ್ರಾವರು॒ಣಾಯ॑ ದ॒ಣ್ಡ-ಮ್ಪ್ರ ಯ॑ಚ್ಛತಿ ಮೈತ್ರಾವರು॒ಣೋ ಹಿ ಪು॒ರಸ್ತಾ॑-ದೃ॒ತ್ವಿಗ್ಭ್ಯೋ॒ ವಾಚಂ॑-ವಿಁ॒ಭಜ॑ತಿ॒ ತಾಮೃ॒ತ್ವಿಜೋ॒ ಯಜ॑ಮಾನೇ॒ ಪ್ರತಿ॑ ಷ್ಠಾಪಯನ್ತಿ॒ ಸ್ವಾಹಾ॑ ಯ॒ಜ್ಞ-ಮ್ಮನ॒ಸೇತ್ಯಾ॑ಹ॒ ಮನ॑ಸಾ॒ ಹಿ ಪುರು॑ಷೋ ಯ॒ಜ್ಞಮ॑ಭಿ॒ಗಚ್ಛ॑ತಿ॒ ಸ್ವಾಹಾ॒ ದ್ಯಾವಾ॑ಪೃಥಿ॒ವೀಭ್ಯಾ॒ -ಮಿತ್ಯಾ॑ಹ॒ ದ್ಯಾವಾ॑ಪೃಥಿ॒ವ್ಯೋರ್ಹಿ ಯ॒ಜ್ಞ-ಸ್ಸ್ವಾಹೋ॒ರೋರ॒-ನ್ತರಿ॑ಕ್ಷಾ॒ -ದಿತ್ಯಾ॑ಹಾ॒ನ್ತರಿ॑ಕ್ಷೇ॒ ಹಿ ಯ॒ಜ್ಞ-ಸ್ಸ್ವಾಹಾ॑ ಯ॒ಜ್ಞಂ-ವಾಁತಾ॒ದಾ ರ॑ಭ॒ ಇತ್ಯಾ॑ಹಾ॒-ಽಯಂ- [ಇತ್ಯಾ॑ಹಾ॒-ಽಯಮ್, ವಾವ ಯಃ ಪವ॑ತೇ॒] 26

-ಁವಾವ ಯಃ ಪವ॑ತೇ॒ ಸ ಯ॒ಜ್ಞಸ್ತಮೇ॒ವ ಸಾ॒ಕ್ಷಾದಾ ರ॑ಭತೇ ಮು॒ಷ್ಟೀ ಕ॑ರೋತಿ॒ ವಾಚಂ॑-ಯಁಚ್ಛತಿ ಯ॒ಜ್ಞಸ್ಯ॒ ಧೃತ್ಯಾ॒ ಅದೀ᳚ಕ್ಷಿಷ್ಟಾ॒ಯ-ಮ್ಬ್ರಾ᳚ಹ್ಮ॒ಣ ಇತಿ॒ ತ್ರಿರು॑ಪಾ॒ಗ್॒ಶ್ವಾ॑ಹ ದೇ॒ವೇಭ್ಯ॑ ಏ॒ವೈನ॒-ಮ್ಪ್ರಾ-ಽಽಹ॒ ತ್ರಿರು॒ಚ್ಚೈರು॒ಭಯೇ᳚ಭ್ಯ ಏ॒ವೈನ॑-ನ್ದೇವಮನು॒ಷ್ಯೇಭ್ಯಃ॒ ಪ್ರಾ-ಽಽಹ॒ ನ ಪು॒ರಾ ನಕ್ಷ॑ತ್ರೇಭ್ಯೋ॒ ವಾಚಂ॒-ವಿಁ ಸೃ॑ಜೇ॒-ದ್ಯತ್ಪು॒ರಾ ನಕ್ಷ॑ತ್ರೇಭ್ಯೋ॒ ವಾಚಂ॑-ವಿಁಸೃ॒ಜೇ-ದ್ಯ॒ಜ್ಞಂ-ವಿಁಚ್ಛಿ॑ನ್ದ್ಯಾ॒- [-ಁವಿಚ್ಛಿ॑ನ್ದ್ಯಾತ್, ಉದಿ॑ತೇಷು॒] 27

-ದುದಿ॑ತೇಷು॒ ನಕ್ಷ॑ತ್ರೇಷು ವ್ರ॒ತ-ಙ್ಕೃ॑ಣು॒ತೇತಿ॒ ವಾಚಂ॒-ವಿಁ ಸೃ॑ಜತಿ ಯ॒ಜ್ಞವ್ರ॑ತೋ॒ ವೈ ದೀ᳚ಕ್ಷಿ॒ತೋ ಯ॒ಜ್ಞಮೇ॒ವಾಭಿ ವಾಚಂ॒-ವಿಁ ಸೃ॑ಜತಿ॒ ಯದಿ॑ ವಿಸೃ॒ಜೇ-ದ್ವೈ᳚ಷ್ಣ॒ವೀಮೃಚ॒ಮನು॑ ಬ್ರೂಯಾ-ದ್ಯ॒ಜ್ಞೋ ವೈ ವಿಷ್ಣು॑ರ್ಯ॒ಜ್ಞೇನೈ॒ವ ಯ॒ಜ್ಞಗ್ಂ ಸ-ನ್ತ॑ನೋತಿ॒ ದೈವೀ॒-ನ್ಧಿಯ॑-ಮ್ಮನಾಮಹ॒ ಇತ್ಯಾ॑ಹ ಯ॒ಜ್ಞಮೇ॒ವ ತನ್ಮ್ರ॑ದಯತಿ ಸುಪಾ॒ರಾ ನೋ॑ ಅಸ॒ದ್ವಶ॒ ಇತ್ಯಾ॑ಹ॒ ವ್ಯು॑ಷ್ಟಿಮೇ॒ವಾವ॑ ರುನ್ಧೇ [ರುನ್ಧೇ, ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ] 28

ಬ್ರಹ್ಮವಾ॒ದಿನೋ॑ ವದನ್ತಿ ಹೋತ॒ವ್ಯ॑-ನ್ದೀಕ್ಷಿ॒ತಸ್ಯ॑ ಗೃ॒ಹಾ(3) ಇ ನ ಹೋ॑ತ॒ವ್ಯಾ(3)ಮಿತಿ॑ ಹ॒ವಿರ್ವೈ ದೀ᳚ಕ್ಷಿ॒ತೋ ಯಜ್ಜು॑ಹು॒ಯಾ-ದ್ಯಜ॑ಮಾನಸ್ಯಾವ॒ದಾಯ॑ ಜುಹುಯಾ॒-ದ್ಯನ್ನ ಜು॑ಹು॒ಯಾ-ದ್ಯ॑ಜ್ಞಪ॒ರುರ॒ನ್ತರಿ॑ಯಾ॒ದ್ಯೇ ದೇ॒ವಾ ಮನೋ॑ಜಾತಾ ಮನೋ॒ಯುಜ॒ ಇತ್ಯಾ॑ಹ ಪ್ರಾ॒ಣಾ ವೈ ದೇ॒ವಾ ಮನೋ॑ಜಾತಾ ಮನೋ॒ಯುಜ॒ಸ್ತೇಷ್ವೇ॒ವ ಪ॒ರೋಕ್ಷ॑-ಞ್ಜುಹೋತಿ॒ ತನ್ನೇವ॑ ಹು॒ತ-ನ್ನೇವಾಹು॑ತಗ್ಗ್ ಸ್ವ॒ಪನ್ತಂ॒-ವೈಁ ದೀ᳚ಕ್ಷಿ॒ತಗ್ಂ ರಕ್ಷಾಗ್ಂ॑ಸಿ ಜಿಘಾಗ್ಂಸನ್ತ್ಯ॒ಗ್ನಿಃ - [ಜಿಘಾಗ್ಂಸನ್ತ್ಯ॒ಗ್ನಿಃ, ಖಲು॒ ವೈ] 29

ಖಲು॒ ವೈ ರ॑ಕ್ಷೋ॒ಹಾ-ಽಗ್ನೇ॒ ತ್ವಗ್ಂ ಸು ಜಾ॑ಗೃಹಿ ವ॒ಯಗ್ಂ ಸು ಮ॑ನ್ದಿಷೀಮ॒ಹೀತ್ಯಾ॑ಹಾ॒ಗ್ನಿ-ಮೇ॒ವಾಧಿ॒ಪಾ-ಙ್ಕೃ॒ತ್ವಾ ಸ್ವ॑ಪಿತಿ॒ ರಕ್ಷ॑ಸಾ॒ಮಪ॑ಹತ್ಯಾ ಅವ್ರ॒ತ್ಯಮಿ॑ವ॒ ವಾ ಏ॒ಷ ಕ॑ರೋತಿ॒ ಯೋ ದೀ᳚ಕ್ಷಿ॒ತ-ಸ್ಸ್ವಪಿ॑ತಿ॒ ತ್ವಮ॑ಗ್ನೇ ವ್ರತ॒ಪಾ ಅ॒ಸೀತ್ಯಾ॑ಹಾ॒ಗ್ನಿರ್ವೈ ದೇ॒ವಾನಾಂ᳚-ವ್ರಁ॒ತಪ॑ತಿ॒-ಸ್ಸ ಏ॒ವೈನಂ॑-ವ್ರಁ॒ತಮಾ ಲ॑ಭಂಯಁತಿ ದೇ॒ವ ಆ ಮರ್ತ್ಯೇ॒ಷ್ವೇತ್ಯಾ॑ಹ ದೇ॒ವೋ [ದೇ॒ವಃ, ಹ್ಯೇ॑ಷ ಸ-ನ್ಮರ್ತ್ಯೇ॑ಷು॒] 30

ಹ್ಯೇ॑ಷ ಸ-ನ್ಮರ್ತ್ಯೇ॑ಷು॒ ತ್ವಂ-ಯಁ॒ಜ್ಞೇಷ್ವೀಡ್ಯ॒ ಇತ್ಯಾ॑ಹೈ॒ತಗ್ಂ ಹಿ ಯ॒ಜ್ಞೇಷ್ವೀಡ॒ತೇ-ಽಪ॒ ವೈ ದೀ᳚ಕ್ಷಿ॒ತಾ-ಥ್ಸು॑ಷು॒ಪುಷ॑ ಇನ್ದ್ರಿ॒ಯ-ನ್ದೇ॒ವತಾಃ᳚ ಕ್ರಾಮನ್ತಿ॒ ವಿಶ್ವೇ॑ ದೇ॒ವಾ ಅ॒ಭಿ ಮಾಮಾ-ಽವ॑ವೃತ್ರ॒-ನ್ನಿತ್ಯಾ॑-ಹೇನ್ದ್ರಿ॒ಯೇಣೈ॒ವೈನ॑-ನ್ದೇ॒ವತಾ॑ಭಿ॒-ಸ್ಸ-ನ್ನ॑ಯತಿ॒ ಯದೇ॒ತ-ದ್ಯಜು॒ರ್ನ ಬ್ರೂ॒ಯಾ-ದ್ಯಾವ॑ತ ಏ॒ವ ಪ॒ಶೂನ॒ಭಿ ದೀಕ್ಷೇ॑ತ॒ ತಾವ॑ನ್ತೋ-ಽಸ್ಯ ಪ॒ಶವಃ॑ ಸ್ಯೂ॒ ರಾಸ್ವೇಯ॑- [ಪ॒ಶವಃ॑ ಸ್ಯೂ॒ ರಾಸ್ವೇಯ॑ತ್, ಸೋ॒ಮಾ-ಽಽ ಭೂಯೋ॑] 31

-ಥ್ಸೋ॒ಮಾ-ಽಽ ಭೂಯೋ॑ ಭ॒ರೇತ್ಯಾ॒ಹಾ-ಪ॑ರಿಮಿತಾನೇ॒ವ ಪ॒ಶೂನವ॑ ರುನ್ಧೇ ಚ॒ನ್ದ್ರಮ॑ಸಿ॒ ಮಮ॒ ಭೋಗಾ॑ಯ ಭ॒ವೇತ್ಯಾ॑ಹ ಯಥಾದೇವ॒ತಮೇ॒ವೈನಾಃ॒ ಪ್ರತಿ॑ ಗೃಹ್ಣಾತಿ ವಾ॒ಯವೇ᳚ ತ್ವಾ॒ ವರು॑ಣಾಯ॒ ತ್ವೇತಿ॒ ಯದೇ॒ವಮೇ॒ತಾ ನಾನು॑ದಿ॒ಶೇದಯ॑ಥಾದೇವತ॒-ನ್ದಕ್ಷಿ॑ಣಾ ಗಮಯೇ॒ದಾ ದೇ॒ವತಾ᳚ಭ್ಯೋ ವೃಶ್ಚ್ಯೇತ॒ ಯದೇ॒ವಮೇ॒ತಾ ಅ॑ನುದಿ॒ಶತಿ॑ ಯಥಾದೇವ॒ತಮೇ॒ವ ದಕ್ಷಿ॑ಣಾ ಗಮಯತಿ॒ ನ ದೇ॒ವತಾ᳚ಭ್ಯ॒ ಆ [ನ ದೇ॒ವತಾ᳚ಭ್ಯ॒ ಆ, ವೃ॒ಶ್ಚ್ಯ॒ತೇ॒ ದೇವೀ॑ರಾಪೋ] 32

ವೃ॑ಶ್ಚ್ಯತೇ॒ ದೇವೀ॑ರಾಪೋ ಅಪಾ-ನ್ನಪಾ॒ದಿತ್ಯಾ॑ಹ॒ ಯದ್ವೋ॒ ಮೇದ್ಧ್ಯಂ॑-ಯಁ॒ಜ್ಞಿಯ॒ಗ್ಂ॒ ಸದೇ॑ವ॒-ನ್ತದ್ವೋ॒ ಮಾ-ಽವ॑ ಕ್ರಮಿಷ॒ಮಿತಿ॒ ವಾವೈತದಾ॒ಹಾಚ್ಛಿ॑ನ್ನ॒-ನ್ತನ್ತು॑-ಮ್ಪೃಥಿ॒ವ್ಯಾ ಅನು॑ ಗೇಷ॒ಮಿತ್ಯಾ॑ಹ॒ ಸೇತು॑ಮೇ॒ವ ಕೃ॒ತ್ವಾ-ಽತ್ಯೇ॑ತಿ ॥ 33 ॥

(ಭು॒ಞ್ಜ॒ತೇ॒ - ಽಯಂ - ಛಿ॑ನ್ದ್ಯಾ-ದ್- ರುನ್ಧೇ॒ - ಽಗ್ನಿ - ರಾ॑ಹ ದೇ॒ವ - ಇಯ॑-ದ್- ದೇ॒ವತಾ᳚ಭ್ಯ॒ ಆ - ತ್ರಯ॑ಸ್ತ್ರಿಗ್ಂಶಚ್ಚ) (ಅ. 4)

ದೇ॒ವಾ ವೈ ದೇ॑ವ॒ಯಜ॑ನ-ಮದ್ಧ್ಯವ॒ಸಾಯ॒ ದಿಶೋ॒ ನ ಪ್ರಾಜಾ॑ನ॒-ನ್ತೇ᳚(1॒)-ಽನ್ಯೋ᳚-ಽನ್ಯಮುಪಾ॑ಧಾವ॒-ನ್ತ್ವಯಾ॒ ಪ್ರ ಜಾ॑ನಾಮ॒ ತ್ವಯೇತಿ॒ ತೇ-ಽದಿ॑ತ್ಯಾ॒ಗ್ಂ॒ ಸಮ॑ದ್ಧ್ರಯನ್ತ॒ ತ್ವಯಾ॒ ಪ್ರ ಜಾ॑ನಾ॒ಮೇತಿ॒ ಸಾ-ಽಬ್ರ॑ವೀ॒-ದ್ವರಂ॑-ವೃಁಣೈ॒ ಮತ್ಪ್ರಾ॑ಯಣಾ ಏ॒ವ ವೋ॑ ಯ॒ಜ್ಞಾ ಮದು॑ದಯನಾ ಅಸ॒ನ್ನಿತಿ॒ ತಸ್ಮಾ॑ದಾದಿ॒ತ್ಯಃ ಪ್ರಾ॑ಯ॒ಣೀಯೋ॑ ಯ॒ಜ್ಞಾನಾ॑ಮಾದಿ॒ತ್ಯ ಉ॑ದಯ॒ನೀಯಃ॒ ಪಞ್ಚ॑ ದೇ॒ವತಾ॑ ಯಜತಿ॒ ಪಞ್ಚ॒ ದಿಶೋ॑ ದಿ॒ಶಾ-ಮ್ಪ್ರಜ್ಞಾ᳚ತ್ಯಾ॒ [ದಿ॒ಶಾ-ಮ್ಪ್ರಜ್ಞಾ᳚ತ್ಯೈ, ಅಥೋ॒ ಪಞ್ಚಾ᳚ಕ್ಷರಾ] 34

ಅಥೋ॒ ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧೇ॒ ಪಥ್ಯಾಗ್॑ ಸ್ವ॒ಸ್ತಿಮ॑ಯಜ॒-ನ್ಪ್ರಾಚೀ॑ಮೇ॒ವ ತಯಾ॒ ದಿಶ॒-ಮ್ಪ್ರಾಜಾ॑ನನ್ನ॒ಗ್ನಿನಾ॑ ದಕ್ಷಿ॒ಣಾ ಸೋಮೇ॑ನ ಪ್ರ॒ತೀಚೀಗ್ಂ॑ ಸವಿ॒ತ್ರೋದೀ॑ಚೀ॒-ಮದಿ॑ತ್ಯೋ॒ರ್ಧ್ವಾ-ಮ್ಪಥ್ಯಾಗ್॑ ಸ್ವ॒ಸ್ತಿಂ ಁಯ॑ಜತಿ॒ ಪ್ರಾಚೀ॑ಮೇ॒ವ ತಯಾ॒ ದಿಶ॒-ಮ್ಪ್ರ ಜಾ॑ನಾತಿ॒ ಪಥ್ಯಾಗ್॑ ಸ್ವ॒ಸ್ತಿಮಿ॒ಷ್ಟ್ವಾ-ಽಗ್ನೀಷೋಮೌ॑ ಯಜತಿ॒ ಚಕ್ಷು॑ಷೀ॒ ವಾ ಏ॒ತೇ ಯ॒ಜ್ಞಸ್ಯ॒ ಯದ॒ಗ್ನೀಷೋಮೌ॒ ತಾಭ್ಯಾ॑ಮೇ॒ವಾನು॑ ಪಶ್ಯ- [ಪಶ್ಯತಿ, ಅ॒ಗ್ನೀಷೋಮಾ॑-ವಿ॒ಷ್ಟ್ವಾ] 35

-ತ್ಯ॒ಗ್ನೀಷೋಮಾ॑-ವಿ॒ಷ್ಟ್ವಾ ಸ॑ವಿ॒ತಾರಂ॑-ಯಁಜತಿ ಸವಿ॒ತೃಪ್ರ॑ಸೂತ ಏ॒ವಾನು॑ ಪಶ್ಯತಿ ಸವಿ॒ತಾರ॑ಮಿ॒ಷ್ಟ್ವಾ-ಽದಿ॑ತಿಂ-ಯಁಜತೀ॒ಯಂ-ವಾಁ ಅದಿ॑ತಿರ॒ಸ್ಯಾಮೇ॒ವ ಪ್ರ॑ತಿ॒ಷ್ಠಾಯಾನು॑ ಪಶ್ಯ॒ತ್ಯದಿ॑ತಿಮಿ॒ಷ್ಟ್ವಾ ಮಾ॑ರು॒ತೀಮೃಚ॒ಮನ್ವಾ॑ಹ ಮ॒ರುತೋ॒ ವೈ ದೇ॒ವಾನಾಂ॒-ವಿಁಶೋ॑ ದೇವವಿ॒ಶ-ಙ್ಖಲು॒ ವೈ ಕಲ್ಪ॑ಮಾನ-ಮ್ಮನುಷ್ಯವಿ॒ಶಮನು॑ ಕಲ್ಪತೇ॒ ಯ-ನ್ಮಾ॑ರು॒ತೀಮೃಚ॑ಮ॒ನ್ವಾಹ॑ ವಿ॒ಶಾ-ಙ್ಕೢಪ್ತ್ಯೈ᳚ ಬ್ರಹ್ಮವಾ॒ದಿನೋ॑ ವದನ್ತಿ ಪ್ರಯಾ॒ಜವ॑ದನನೂಯಾ॒ಜ-ಮ್ಪ್ರಾ॑ಯ॒ಣೀಯ॑-ಙ್ಕಾ॒ರ್ಯ॑-ಮನೂಯಾ॒ಜವ॑- [-ಮನೂಯಾ॒ಜವ॑ತ್, ಅ॒ಪ್ರ॒ಯಾ॒ಜ-ಮು॑ದಯ॒ನೀಯ॒] 36

-ದಪ್ರಯಾ॒ಜ-ಮು॑ದಯ॒ನೀಯ॒-ಮಿತೀ॒ಮೇ ವೈ ಪ್ರ॑ಯಾ॒ಜಾ ಅ॒ಮೀ ಅ॑ನೂಯಾ॒ಜಾ-ಸ್ಸೈವ ಸಾ ಯ॒ಜ್ಞಸ್ಯ॒ ಸನ್ತ॑ತಿ॒ಸ್ತ-ತ್ತಥಾ॒ ನ ಕಾ॒ರ್ಯ॑ಮಾ॒ತ್ಮಾ ವೈ ಪ್ರ॑ಯಾ॒ಜಾಃ ಪ್ರ॒ಜಾ-ಽನೂ॑ಯಾ॒ಜಾ ಯ-ತ್ಪ್ರ॑ಯಾ॒ಜಾ-ನ॑ನ್ತರಿ॒ಯಾದಾ॒ತ್ಮಾನ॑ಮ॒-ನ್ತರಿ॑ಯಾ॒-ದ್ಯದ॑ನೂಯಾ॒ಜಾ-ನ॑ನ್ತರಿ॒ಯಾ-ತ್ಪ್ರ॒ಜಾಮ॒ನ್ತರಿ॑ಯಾ॒ದ್ಯತಃ॒ ಖಲು॒ ವೈ ಯ॒ಜ್ಞಸ್ಯ॒ ವಿತ॑ತಸ್ಯ॒ ನ ಕ್ರಿ॒ಯತೇ॒ ತದನು॑ ಯ॒ಜ್ಞಃ ಪರಾ॑ ಭವತಿ ಯ॒ಜ್ಞ-ಮ್ಪ॑ರಾ॒ಭವ॑ನ್ತಂ॒-ಯಁಜ॑ಮಾ॒ನೋ-ಽನು॒ [-ಁಯಜ॑ಮಾ॒ನೋ-ಽನು॑, ಪರಾ॑ ಭವತಿ] 37

ಪರಾ॑ ಭವತಿ ಪ್ರಯಾ॒ಜವ॑ದೇ॒ವಾ-ನೂ॑ಯಾ॒ಜವ॑-ತ್ಪ್ರಾಯ॒ಣೀಯ॑-ಙ್ಕಾ॒ರ್ಯ॑-ಮ್ಪ್ರಯಾ॒ಜವ॑ದನೂಯಾ॒ಜವ॑-ದುದಯ॒ನೀಯ॒-ನ್ನಾ-ಽಽತ್ಮಾನ॑ಮನ್ತ॒ರೇತಿ॒ ನ ಪ್ರ॒ಜಾ-ನ್ನ ಯ॒ಜ್ಞಃ ಪ॑ರಾ॒ಭವ॑ತಿ॒ ನ ಯಜ॑ಮಾನಃ ಪ್ರಾಯ॒ಣೀಯ॑ಸ್ಯ ನಿಷ್ಕಾ॒ಸ ಉ॑ದಯ॒ನೀಯ॑ಮ॒ಭಿ ನಿರ್ವ॑ಪತಿ॒ ಸೈವ ಸಾ ಯ॒ಜ್ಞಸ್ಯ॒ ಸನ್ತ॑ತಿ॒ರ್ಯಾಃ ಪ್ರಾ॑ಯ॒ಣೀಯ॑ಸ್ಯ ಯಾ॒ಜ್ಯಾ॑ ಯ-ತ್ತಾ ಉ॑ದಯ॒ನೀಯ॑ಸ್ಯ ಯಾ॒ಜ್ಯಾಃ᳚ ಕು॒ರ್ಯಾ-ತ್ಪರಾಂ॑ಅ॒ಮುಂ-ಲೋಁ॒ಕಮಾ ರೋ॑ಹೇ-ತ್ಪ್ರ॒ಮಾಯು॑ಕ-ಸ್ಸ್ಯಾ॒ದ್ಯಾಃ ಪ್ರಾ॑ಯ॒ಣೀಯ॑ಸ್ಯ ಪುರೋ-ಽನುವಾ॒ಕ್ಯಾ᳚ಸ್ತಾ ಉ॑ದಯ॒ನೀಯ॑ಸ್ಯ ಯಾ॒ಜ್ಯಾಃ᳚ ಕರೋತ್ಯ॒ಸ್ಮಿನ್ನೇ॒ವ ಲೋ॒ಕೇ ಪ್ರತಿ॑ ತಿಷ್ಠತಿ ॥ 38 ॥

(ಪ್ರಜ್ಞಾ᳚ತ್ಯೈ - ಪಶ್ಯತ್ಯ - ನೂಯಾ॒ಜವ॒ - ದ್ಯಜ॑ಮಾ॒ನೋ-ಽನು॑ - ಪುರೋನುವಾ॒ಕ್ಯಾ᳚ಸ್ತಾ - ಅ॒ಷ್ಟೌ ಚ॑) (ಅ. 5)

ಕ॒ದ್ರೂಶ್ಚ॒ ವೈ ಸು॑ಪ॒ರ್ಣೀ ಚಾ᳚-ಽಽತ್ಮರೂ॒ಪಯೋ॑ರಸ್ಪರ್ಧೇತಾ॒ಗ್ಂ॒ ಸಾ ಕ॒ದ್ರೂ-ಸ್ಸು॑ಪ॒ರ್ಣೀಮ॑ಜಯ॒-ಥ್ಸಾ-ಽಬ್ರ॑ವೀ-ತ್ತೃ॒ತೀಯ॑ಸ್ಯಾಮಿ॒ತೋ ದಿ॒ವಿ ಸೋಮ॒ಸ್ತಮಾ ಹ॑ರ॒ ತೇನಾ॒-ಽಽತ್ಮಾನ॒-ನ್ನಿಷ್ಕ್ರೀ॑ಣೀ॒ಷ್ವೇತೀ॒ಯಂ-ವೈಁ ಕ॒ದ್ರೂರ॒ಸೌ ಸು॑ಪ॒ರ್ಣೀ ಛನ್ದಾಗ್ಂ॑ಸಿ ಸೌಪರ್ಣೇ॒ಯಾ-ಸ್ಸಾಬ್ರ॑ವೀದ॒ಸ್ಮೈ ವೈ ಪಿ॒ತರೌ॑ ಪು॒ತ್ರಾ-ನ್ಬಿ॑ಭೃತ-ಸ್ತೃ॒ತೀಯ॑ಸ್ಯಾಮಿ॒ತೋ ದಿ॒ವಿ ಸೋಮ॒ಸ್ತಮಾ ಹ॑ರ॒ ತೇನಾ॒-ಽಽತ್ಮಾನ॒-ನ್ನಿಷ್ಕ್ರೀ॑ಣೀ॒ಷ್ವೇ- [ನಿಷ್ಕ್ರೀ॑ಣೀ॒ಷ್ವ, ಇತಿ॑ ಮಾ] 39

-ತಿ॑ ಮಾ ಕ॒ದ್ರೂರ॑ವೋಚ॒ದಿತಿ॒ ಜಗ॒ತ್ಯುದ॑ಪತ॒-ಚ್ಚತು॑ರ್ದಶಾಕ್ಷರಾ ಸ॒ತೀ ಸಾ ಽಪ್ರಾ᳚ಪ್ಯ॒ ನ್ಯ॑ವರ್ತತ॒ ತಸ್ಯೈ॒ ದ್ವೇ ಅ॒ಕ್ಷರೇ॑ ಅಮೀಯೇತಾ॒ಗ್ಂ॒ ಸಾ ಪ॒ಶುಭಿ॑ಶ್ಚ ದೀ॒ಕ್ಷಯಾ॒ ಚಾ-ಽಗ॑ಚ್ಛ॒-ತ್ತಸ್ಮಾ॒ಜ್ಜಗ॑ತೀ॒ ಛನ್ದ॑ಸಾ-ಮ್ಪಶ॒ವ್ಯ॑ತಮಾ॒ ತಸ್ಮಾ᳚-ತ್ಪಶು॒ಮನ್ತ॑-ನ್ದೀ॒ಕ್ಷೋಪ॑ ನಮತಿ ತ್ರಿ॒ಷ್ಟುಗುದ॑ಪತ॒-ತ್ತ್ರಯೋ॑ದಶಾಕ್ಷರಾ ಸ॒ತೀ ಸಾ ಽಪ್ರಾ᳚ಪ್ಯ॒ ನ್ಯ॑ವರ್ತತ॒ ತಸ್ಯೈ॒ ದ್ವೇ ಅ॒ಕ್ಷರೇ॑ ಅಮೀಯೇತಾ॒ಗ್ಂ॒ ಸಾ ದಕ್ಷಿ॑ಣಾಭಿಶ್ಚ॒ [ದಕ್ಷಿ॑ಣಾಭಿಶ್ಚ, ತಪ॑ಸಾ॒] 40

ತಪ॑ಸಾ॒ ಚಾ-ಽಗ॑ಚ್ಛ॒-ತ್ತಸ್ಮಾ᳚-ತ್ತ್ರಿ॒ಷ್ಟುಭೋ॑ ಲೋ॒ಕೇ ಮಾದ್ಧ್ಯ॑ನ್ದಿನೇ॒ ಸವ॑ನೇ॒ ದಕ್ಷಿ॑ಣಾ ನೀಯನ್ತ ಏ॒ತ-ತ್ಖಲು॒ ವಾವ ತಪ॒ ಇತ್ಯಾ॑ಹು॒ರ್ಯ-ಸ್ಸ್ವ-ನ್ದದಾ॒ತೀತಿ॑ ಗಾಯ॒ತ್ರ್ಯುದ॑ಪತ॒ಚ್ಚತು॑ರಕ್ಷರಾ ಸ॒ತ್ಯ॑ಜಯಾ॒ ಜ್ಯೋತಿ॑ಷಾ॒ ತಮ॑ಸ್ಯಾ ಅ॒ಜಾ-ಽಭ್ಯ॑ರುನ್ಧ॒ ತದ॒ಜಾಯಾ॑ ಅಜ॒ತ್ವಗ್ಂ ಸಾ ಸೋಮ॒-ಞ್ಚಾ-ಽಽಹ॑ರಚ್ಚ॒ತ್ವಾರಿ॑ ಚಾ॒ಕ್ಷರಾ॑ಣಿ॒ ಸಾ-ಽಷ್ಟಾಕ್ಷ॑ರಾ॒ ಸಮ॑ಪದ್ಯತ ಬ್ರಹ್ಮವಾ॒ದಿನೋ॑ ವದನ್ತಿ॒ [ಬ್ರಹ್ಮವಾ॒ದಿನೋ॑ ವದನ್ತಿ, ಕಸ್ಮಾ᳚-ಥ್ಸ॒ತ್ಯಾ-] 41

ಕಸ್ಮಾ᳚-ಥ್ಸ॒ತ್ಯಾ-ದ್ಗಾ॑ಯ॒ತ್ರೀ ಕನಿ॑ಷ್ಠಾ॒ ಛನ್ದ॑ಸಾಗ್ಂ ಸ॒ತೀ ಯ॑ಜ್ಞಮು॒ಖ-ಮ್ಪರೀ॑ಯಾ॒ಯೇತಿ॒ ಯದೇ॒ವಾದ-ಸ್ಸೋಮ॒ಮಾ-ಽಹ॑ರ॒-ತ್ತಸ್ಮಾ᳚-ದ್ಯಜ್ಞಮು॒ಖ-ಮ್ಪರ್ಯೈ॒-ತ್ತಸ್ಮಾ᳚-ತ್ತೇಜ॒ಸ್ವಿನೀ॑ತಮಾ ಪ॒ದ್ಭ್ಯಾ-ನ್ದ್ವೇ ಸವ॑ನೇ ಸ॒ಮಗೃ॑ಹ್ಣಾ॒-ನ್ಮುಖೇ॒ನೈಕಂ॒-ಯಁನ್ಮುಖೇ॑ನ ಸ॒ಮಗೃ॑ಹ್ಣಾ॒-ತ್ತದ॑ಧಯ॒-ತ್ತಸ್ಮಾ॒-ದ್ದ್ವೇ ಸವ॑ನೇ ಶು॒ಕ್ರ॑ವತೀ ಪ್ರಾತಸ್ಸವ॒ನ-ಞ್ಚ॒ ಮಾದ್ಧ್ಯ॑ನ್ದಿನ-ಞ್ಚ॒ ತಸ್ಮಾ᳚-ತ್ತೃತೀಯ ಸವ॒ನ ಋ॑ಜೀ॒ಷಮ॒ಭಿ ಷು॑ಣ್ವನ್ತಿ ಧೀ॒ತಮಿ॑ವ॒ ಹಿ ಮನ್ಯ॑ನ್ತ [ಹಿ ಮನ್ಯ॑ನ್ತೇ, ಆ॒ಶಿರ॒ಮವ॑ ನಯತಿ] 42

ಆ॒ಶಿರ॒ಮವ॑ ನಯತಿ ಸಶುಕ್ರ॒ತ್ವಾಯಾಥೋ॒ ಸ-ಮ್ಭ॑ರತ್ಯೇ॒ವೈನ॒-ತ್ತಗ್ಂ ಸೋಮ॑-ಮಾಹ್ರಿ॒ಯಮಾ॑ಣ-ಙ್ಗನ್ಧ॒ರ್ವೋ ವಿ॒ಶ್ವಾವ॑ಸಃ॒ ಪರ್ಯ॑ಮುಷ್ಣಾ॒-ಥ್ಸ ತಿ॒ಸ್ರೋ ರಾತ್ರೀಃ॒ ಪರಿ॑ಮುಷಿತೋ-ಽವಸ॒-ತ್ತಸ್ಮಾ᳚-ತ್ತಿ॒ಸ್ರೋ ರಾತ್ರೀಃ᳚ ಕ್ರೀ॒ತ-ಸ್ಸೋಮೋ॑ ವಸತಿ॒ ತೇ ದೇ॒ವಾ ಅ॑ಬ್ರುವ॒ನ್-ಥ್ಸ್ತ್ರೀಕಾ॑ಮಾ॒ ವೈ ಗ॑ನ್ಧ॒ರ್ವಾ ಸ್ಸ್ತ್ರಿ॒ಯಾ ನಿಷ್ಕ್ರೀ॑ಣಾ॒ಮೇತಿ॒ ತೇ ವಾಚ॒ಗ್ಗ್॒ ಸ್ತ್ರಿಯ॒ಮೇಕ॑ಹಾಯನೀ-ಙ್ಕೃ॒ತ್ವಾ ತಯಾ॒ ನಿರ॑ಕ್ರೀಣ॒ನ್-ಥ್ಸಾ ರೋ॒ಹಿ-ದ್ರೂ॒ಪ-ಙ್ಕೃ॒ತ್ವಾ ಗ॑ನ್ಧ॒ರ್ವೇಭ್ಯೋ॑- [ಗ॑ನ್ಧ॒ರ್ವೇಭ್ಯಃ॑, ಅ॒ಪ॒ಕ್ರಮ್ಯಾ॑ತಿಷ್ಠ॒-ತ್ತ-ದ್ರೋ॒ಹಿತೋ॒] 43

-ಽಪ॒ಕ್ರಮ್ಯಾ॑ತಿಷ್ಠ॒-ತ್ತ-ದ್ರೋ॒ಹಿತೋ॒ ಜನ್ಮ॒ ತೇ ದೇ॒ವಾ ಅ॑ಬ್ರುವ॒ನ್ನಪ॑ ಯು॒ಷ್ಮದಕ್ರ॑ಮೀ॒-ನ್ನಾಸ್ಮಾನು॒-ಪಾವ॑ರ್ತತೇ॒ ವಿ ಹ್ವ॑ಯಾಮಹಾ॒ ಇತಿ॒ ಬ್ರಹ್ಮ॑ ಗನ್ಧ॒ರ್ವಾ ಅವ॑ದ॒ನ್ನಗಾ॑ಯ-ನ್ದೇ॒ವಾ-ಸ್ಸಾ ದೇ॒ವಾ-ನ್ಗಾಯ॑ತ ಉ॒ಪಾವ॑ರ್ತತ॒ ತಸ್ಮಾ॒-ದ್ಗಾಯ॑ನ್ತ॒ಗ್ಗ್॒ ಸ್ತ್ರಿಯಃ॑ ಕಾಮಯನ್ತೇ॒ ಕಾಮು॑ಕಾ ಏನ॒ಗ್ಗ್॒ ಸ್ತ್ರಿಯೋ॑ ಭವನ್ತಿ॒ ಯ ಏ॒ವಂ-ವೇಁದಾಥೋ॒ ಯ ಏ॒ವಂ-ವಿಁ॒ದ್ವಾನಪಿ॒ ಜನ್ಯೇ॑ಷು॒ ಭವ॑ತಿ॒ ತೇಭ್ಯ॑ ಏ॒ವ ದ॑ದತ್ಯು॒ತ ಯ-ದ್ಬ॒ಹುತ॑ಯಾ॒ [ಯ-ದ್ಬ॒ಹುತ॑ಯಾಃ, ಭವ॒ನ್ತ್ಯೇಕ॑ಹಾಯನ್ಯಾ] 44

ಭವ॒ನ್ತ್ಯೇಕ॑ಹಾಯನ್ಯಾ ಕ್ರೀಣಾತಿ ವಾ॒ಚೈವೈನ॒ಗ್ಂ॒ ಸರ್ವ॑ಯಾ ಕ್ರೀಣಾತಿ॒ ತಸ್ಮಾ॒ದೇಕ॑ಹಾಯನಾ ಮನು॒ಷ್ಯಾ॑ ವಾಚಂ॑-ವಁದ॒ನ್ತ್ಯಕೂ॑ಟ॒ಯಾ ಽಕ॑ರ್ಣ॒ಯಾ-ಽ ಕಾ॑ಣ॒ಯಾಶ್ಲೋ॑ಣ॒ಯಾ ಽಸ॑ಪ್ತಶಫಯಾ ಕ್ರೀಣಾತಿ॒ ಸರ್ವ॑ಯೈ॒ವೈನ॑-ಙ್ಕ್ರೀಣಾತಿ॒ ಯಚ್ಛ್ವೇ॒ತಯಾ᳚ ಕ್ರೀಣೀ॒ಯಾ-ದ್ದು॒ಶ್ಚರ್ಮಾ॒ ಯಜ॑ಮಾನ-ಸ್ಸ್ಯಾ॒ದ್ಯ-ತ್ಕೃ॒ಷ್ಣಯಾ॑-ಽನು॒ಸ್ತರ॑ಣೀ ಸ್ಯಾ-ತ್ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾ॒ದ್ಯ-ದ್ದ್ವಿ॑ರೂ॒ಪಯಾ॒ ವಾರ್ತ್ರ॑ಘ್ನೀ ಸ್ಯಾ॒-ಥ್ಸ ವಾ॒-ಽನ್ಯ-ಞ್ಜಿ॑ನೀ॒ಯಾ-ತ್ತಂ-ವಾಁ॒-ಽನ್ಯೋ ಜಿ॑ನೀಯಾದರು॒ಣಯಾ॑ ಪಿಙ್ಗಾ॒ಕ್ಷ್ಯಾ ಕ್ರೀ॑ಣಾತ್ಯೇ॒ತದ್ವೈ ಸೋಮ॑ಸ್ಯ ರೂ॒ಪಗ್ಗ್ ಸ್ವಯೈ॒ವೈನ॑-ನ್ದೇ॒ವತ॑ಯಾ ಕ್ರೀಣಾತಿ ॥ 45 ॥

(ನಿಷ್ಕ್ರೀ॑ಣೀಷ್ವ॒ - ದಕ್ಷಿ॑ಣಾಭಿಶ್ಚ - ವದನ್ತಿ॒ - ಮನ್ಯ॑ನ್ತೇ-ಗನ್ಧ॒ರ್ವೇಭ್ಯೋ॑-ಬ॒ಹುತ॑ಯಾಃ-ಪಿಙ್ಗಾ॒ಕ್ಷ್ಯಾ-ದಶ॑ ಚ ) (ಅ. 6)

ತದ್ಧಿರ॑ಣ್ಯಮಭವ॒-ತ್ತಸ್ಮಾ॑ದ॒ದ್ಭ್ಯೋ ಹಿರ॑ಣ್ಯ-ಮ್ಪುನನ್ತಿ ಬ್ರಹ್ಮವಾ॒ದಿನೋ॑ ವದನ್ತಿ॒ ಕಸ್ಮಾ᳚-ಥ್ಸ॒ತ್ಯಾದ॑ನ॒ಸ್ಥಿಕೇ॑ನ ಪ್ರ॒ಜಾಃ ಪ್ರ॒ವೀಯ॑ನ್ತೇ ಽಸ್ಥ॒ನ್ವತೀ᳚ರ್ಜಾಯನ್ತ॒ ಇತಿ॒ ಯದ್ಧಿರ॑ಣ್ಯ-ಙ್ಘೃ॒ತೇ॑-ಽವ॒ಧಾಯ॑ ಜು॒ಹೋತಿ॒ ತಸ್ಮಾ॑ದನ॒ಸ್ಥಿಕೇ॑ನ ಪ್ರ॒ಜಾಃ ಪ್ರ ವೀ॑ಯನ್ತೇ ಽಸ್ಥ॒ನ್ವತೀ᳚ರ್ಜಾಯನ್ತ ಏ॒ತದ್ವಾ ಅ॒ಗ್ನೇಃ ಪ್ರಿ॒ಯ-ನ್ಧಾಮ॒ ಯ-ದ್ಘೃ॒ತ-ನ್ತೇಜೋ॒ ಹಿರ॑ಣ್ಯಮಿ॒ಯನ್ತೇ॑ ಶುಕ್ರ ತ॒ನೂರಿ॒ದಂ-ವಁರ್ಚ॒ ಇತ್ಯಾ॑ಹ॒ ಸತೇ॑ಜಸಮೇ॒ವೈನ॒ಗ್ಂ॒ ಸತ॑ನು- [ಸತ॑ನುಮ್, ಕ॒ರೋ॒ತ್ಯಥೋ॒] 46

-ಙ್ಕರೋ॒ತ್ಯಥೋ॒ ಸ-ಮ್ಭ॑ರತ್ಯೇ॒ವೈನಂ॒-ಯಁದಬ॑ದ್ಧಮ-ವದ॒ದ್ಧ್ಯಾ-ದ್ಗರ್ಭಾಃ᳚ ಪ್ರ॒ಜಾನಾ᳚-ಮ್ಪರಾ॒ಪಾತು॑ಕಾ-ಸ್ಸ್ಯುರ್ಬ॒ದ್ಧಮವ॑ ದಧಾತಿ॒ ಗರ್ಭಾ॑ಣಾ॒-ನ್ಧೃತ್ಯೈ॑ ನಿಷ್ಟ॒ರ್ಕ್ಯ॑-ಮ್ಬದ್ಧ್ನಾತಿ ಪ್ರ॒ಜಾನಾ᳚-ಮ್ಪ್ರ॒ಜನ॑ನಾಯ॒ ವಾಗ್ವಾ ಏ॒ಷಾ ಯ-ಥ್ಸೋ॑ಮ॒ಕ್ರಯ॑ಣೀ॒ ಜೂರ॒ಸೀತ್ಯಾ॑ಹ॒ ಯದ್ಧಿ ಮನ॑ಸಾ॒ ಜವ॑ತೇ॒ ತ-ದ್ವಾ॒ಚಾ ವದ॑ತಿ ಧೃ॒ತಾ ಮನ॒ಸೇತ್ಯಾ॑ಹ॒ ಮನ॑ಸಾ॒ ಹಿ ವಾಗ್ಧೃ॒ತಾ ಜುಷ್ಟಾ॒ ವಿಷ್ಣ॑ವ॒ ಇತ್ಯಾ॑ಹ [ ] 47

ಯ॒ಜ್ಞೋ ವೈ ವಿಷ್ಣು॑ ರ್ಯ॒ಜ್ಞಾಯೈ॒ವೈನಾ॒-ಞ್ಜುಷ್ಟಾ᳚-ಙ್ಕರೋತಿ॒ ತಸ್ಯಾ᳚ಸ್ತೇ ಸ॒ತ್ಯಸ॑ವಸಃ ಪ್ರಸ॒ವ ಇತ್ಯಾ॑ಹ ಸವಿ॒ತೃ-ಪ್ರ॑ಸೂತಾಮೇ॒ವ ವಾಚ॒ಮವ॑ ರುನ್ಧೇ॒ ಕಾಣ್ಡೇ॑ಕಾಣ್ಡೇ॒ ವೈ ಕ್ರಿ॒ಯಮಾ॑ಣೇ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಜಿಘಾಗ್ಂಸನ್ತ್ಯೇ॒ಷ ಖಲು॒ ವಾ ಅರ॑ಕ್ಷೋಹತಃ॒ ಪನ್ಥಾ॒ ಯೋ᳚-ಽಗ್ನೇಶ್ಚ॒ ಸೂರ್ಯ॑ಸ್ಯ ಚ॒ ಸೂರ್ಯ॑ಸ್ಯ॒ ಚಕ್ಷು॒ರಾ-ಽರು॑ಹಮ॒ಗ್ನೇರ॒ಕ್ಷ್ಣಃ ಕ॒ನೀನಿ॑ಕಾ॒ಮಿತ್ಯಾ॑ಹ॒ ಯ ಏ॒ವಾರ॑ಕ್ಷೋಹತಃ॒ ಪನ್ಥಾ॒ಸ್ತಗ್ಂ ಸ॒ಮಾರೋ॑ಹತಿ॒ [ಸ॒ಮಾರೋ॑ಹತಿ, ವಾಗ್ವಾ ಏ॒ಷಾ] 48

ವಾಗ್ವಾ ಏ॒ಷಾ ಯ-ಥ್ಸೋ॑ಮ॒ಕ್ರಯ॑ಣೀ॒ ಚಿದ॑ಸಿ ಮ॒ನಾ-ಽಸೀತ್ಯಾ॑ಹ॒ ಶಾಸ್ತ್ಯೇ॒ವೈನಾ॑ಮೇ॒ತ-ತ್ತಸ್ಮಾ᳚ಚ್ಛಿ॒ಷ್ಟಾಃ ಪ್ರ॒ಜಾ ಜಾ॑ಯನ್ತೇ॒ ಚಿದ॒ಸೀತ್ಯಾ॑ಹ॒ ಯದ್ಧಿ ಮನ॑ಸಾ ಚೇ॒ತಯ॑ತೇ॒ ತ-ದ್ವಾ॒ಚಾ ವದ॑ತಿ ಮ॒ನಾ-ಽಸೀತ್ಯಾ॑ಹ॒ ಯದ್ಧಿ ಮನ॑ಸಾ-ಽಭಿ॒ಗಚ್ಛ॑ತಿ॒ ತ-ತ್ಕ॒ರೋತಿ॒ ಧೀರ॒ಸೀತ್ಯಾ॑ಹ॒ ಯದ್ಧಿ ಮನ॑ಸಾ॒ ಧ್ಯಾಯ॑ತಿ॒ ತ-ದ್ವಾ॒ಚಾ [ ] 49

ವದ॑ತಿ॒ ದಕ್ಷಿ॑ಣಾ॒-ಽಸೀತ್ಯಾ॑ಹ॒ ದಕ್ಷಿ॑ಣಾ॒ ಹ್ಯೇ॑ಷಾ ಯ॒ಜ್ಞಿಯಾ॒-ಽಸೀತ್ಯಾ॑ಹ ಯ॒ಜ್ಞಿಯಾ॑ಮೇ॒ವೈನಾ᳚-ಙ್ಕರೋತಿ ಕ್ಷ॒ತ್ರಿಯಾ॒ಸೀತ್ಯಾ॑ಹ ಕ್ಷ॒ತ್ರಿಯಾ॒ ಹ್ಯೇ॑ಷಾ ಽದಿ॑ತಿರಸ್ಯುಭ॒ಯತ॑ಶ್ಶೀ॒ರ್ಷ್ಣೀತ್ಯಾ॑ಹ॒ ಯದೇ॒ವಾ-ಽಽದಿ॒ತ್ಯಃ ಪ್ರಾ॑ಯ॒ಣೀಯೋ॑ ಯ॒ಜ್ಞಾನಾ॑ಮಾದಿ॒ತ್ಯ ಉ॑ದಯ॒ನೀಯ॒-ಸ್ತಸ್ಮಾ॑ದೇ॒ವಮಾ॑ಹ॒ ಯದಬ॑ದ್ಧಾ॒ ಸ್ಯಾದಯ॑ತಾ ಸ್ಯಾ॒ದ್ಯ-ತ್ಪ॑ದಿಬ॒ದ್ಧಾ-ಽನು॒ಸ್ತರ॑ಣೀ ಸ್ಯಾ-ತ್ಪ್ರ॒ಮಾಯು॑ಕೋ॒ ಯಜ॑ಮಾನ-ಸ್ಸ್ಯಾ॒- [ಯಜ॑ಮಾನ-ಸ್ಸ್ಯಾತ್, ಯ-ತ್ಕ॑ರ್ಣಗೃಹೀ॒ತಾ] 50

-ದ್ಯ-ತ್ಕ॑ರ್ಣಗೃಹೀ॒ತಾ ವಾರ್ತ್ರ॑ಘ್ನೀ ಸ್ಯಾ॒-ಥ್ಸ ವಾ॒-ಽನ್ಯ-ಞ್ಜಿ॑ನೀ॒ಯಾ-ತ್ತಂ-ವಾಁ॒-ಽನ್ಯೋ ಜಿ॑ನೀಯಾನ್ಮಿ॒ತ್ರಸ್ತ್ವಾ॑ ಪ॒ದಿ ಬ॑ದ್ಧ್ನಾ॒ತ್ವಿತ್ಯಾ॑ಹ ಮಿ॒ತ್ರೋ ವೈ ಶಿ॒ವೋ ದೇ॒ವಾನಾ॒-ನ್ತೇನೈ॒ವೈನಾ᳚-ಮ್ಪ॒ದಿ ಬ॑ದ್ಧ್ನಾತಿ ಪೂ॒ಷಾ-ಽದ್ಧ್ವ॑ನಃ ಪಾ॒ತ್ವಿತ್ಯಾ॑ಹೇ॒ಯಂ-ವೈಁ ಪೂ॒ಷೇಮಾಮೇ॒ವಾಸ್ಯಾ॑ ಅಧಿ॒ಪಾಮ॑ಕ॒-ಸ್ಸಮ॑ಷ್ಟ್ಯಾ॒ ಇನ್ದ್ರಾ॒ಯಾ-ದ್ಧ್ಯ॑ಕ್ಷಾ॒ಯೇತ್ಯಾ॒ಹೇನ್ದ್ರ॑ಮೇ॒ವಾಸ್ಯಾ॒ ಅದ್ಧ್ಯ॑ಕ್ಷ-ಙ್ಕರೋ॒- [ಅದ್ಧ್ಯ॑ಕ್ಷ-ಙ್ಕರೋತಿ, ಅನು॑ ತ್ವಾ ಮಾ॒ತಾ] 51

-ತ್ಯನು॑ ತ್ವಾ ಮಾ॒ತಾ ಮ॑ನ್ಯತಾ॒ಮನು॑ ಪಿ॒ತೇತ್ಯಾ॒ಹಾ-ನು॑ಮತಯೈ॒ವೈನ॑ಯಾ ಕ್ರೀಣಾತಿ॒ ಸಾ ದೇ॑ವಿ ದೇ॒ವಮಚ್ಛೇ॒ಹೀತ್ಯಾ॑ಹ ದೇ॒ವೀ ಹ್ಯೇ॑ಷಾ ದೇ॒ವ-ಸ್ಸೋಮ॒ ಇನ್ದ್ರಾ॑ಯ॒ ಸೋಮ॒ಮಿತ್ಯಾ॒ಹೇನ್ದ್ರಾ॑ಯ॒ ಹಿ ಸೋಮ॑ ಆಹ್ರಿ॒ಯತೇ॒ ಯದೇ॒ತ-ದ್ಯಜು॒ರ್ನ ಬ್ರೂ॒ಯಾ-ತ್ಪರಾ᳚ಚ್ಯೇ॒ವ ಸೋ॑ಮ॒ಕ್ರಯ॑ಣೀಯಾ-ದ್ರು॒ದ್ರಸ್ತ್ವಾ-ಽಽ ವ॑ರ್ತಯ॒ತ್ವಿತ್ಯಾ॑ಹ ರು॒ದ್ರೋ ವೈ ಕ್ರೂ॒ರೋ [ರು॒ದ್ರೋ ವೈ ಕ್ರೂ॒ರಃ, ದೇ॒ವಾನಾ॒-ನ್ತಮೇ॒ವಾಸ್ಯೈ॑] 52

ದೇ॒ವಾನಾ॒-ನ್ತಮೇ॒ವಾಸ್ಯೈ॑ ಪ॒ರಸ್ತಾ᳚-ದ್ದಧಾ॒ತ್ಯಾವೃ॑ತ್ತ್ಯೈ ಕ್ರೂ॒ರಮಿ॑ವ॒ ವಾ ಏ॒ತ-ತ್ಕ॑ರೋತಿ॒ ಯ-ದ್ರು॒ದ್ರಸ್ಯ॑ ಕೀ॒ರ್ತಯ॑ತಿ ಮಿ॒ತ್ರಸ್ಯ॑ ಪ॒ಥೇತ್ಯಾ॑ಹ॒ ಶಾನ್ತ್ಯೈ॑ ವಾ॒ಚಾ ವಾ ಏ॒ಷ ವಿ ಕ್ರೀ॑ಣೀತೇ॒ ಯ-ಸ್ಸೋ॑ಮ॒ಕ್ರಯ॑ಣ್ಯಾ ಸ್ವ॒ಸ್ತಿ ಸೋಮ॑ಸಖಾ॒ ಪುನ॒ರೇಹಿ॑ ಸ॒ಹ ರ॒ಯ್ಯೇತ್ಯಾ॑ಹ ವಾ॒ಚೈವ ವಿ॒ಕ್ರೀಯ॒ ಪುನ॑ರಾ॒ತ್ಮನ್ ವಾಚ॑-ನ್ಧ॒ತ್ತೇ-ಽನು॑ಪದಾಸುಕಾ-ಽಸ್ಯ॒ ವಾಗ್ಭ॑ವತಿ॒ ಯ ಏ॒ವಂ-ವೇಁದ॑ ॥ 53 ॥

(ಸತ॑ನುಂ॒ - ಁವಿಷ್ಣ॑ವ॒ ಇತ್ಯಾ॑ಹ - ಸ॒ಮಾರೋ॑ಹತಿ॒ - ಧ್ಯಾಯ॑ತಿ॒ ತ-ದ್ವಾ॒ಚಾ - ಯಜ॑ಮಾನ-ಸ್ಸ್ಯಾತ್ - ಕರೋತಿ - ಕ್ರೂ॒ರೋ - ವೇದ॑) (ಅ. 7)

ಷಟ್ ಪ॒ದಾನ್ಯನು॒ ನಿ ಕ್ರಾ॑ಮತಿ ಷಡ॒ಹಂ-ವಾಁನ್ನಾತಿ॑ ವದತ್ಯು॒ತ ಸಂ॑ವಁಥ್ಸ॒ರಸ್ಯಾಯ॑ನೇ॒ ಯಾವ॑ತ್ಯೇ॒ವ ವಾಕ್ತಾಮವ॑ ರುನ್ಧೇ ಸಪ್ತ॒ಮೇ ಪ॒ದೇ ಜು॑ಹೋತಿ ಸ॒ಪ್ತಪ॑ದಾ॒ ಶಕ್ವ॑ರೀ ಪ॒ಶವ॒-ಶ್ಶಕ್ವ॑ರೀ ಪ॒ಶೂನೇ॒ವಾವ॑ ರುನ್ಧೇ ಸ॒ಪ್ತ ಗ್ರಾ॒ಮ್ಯಾಃ ಪ॒ಶವಃ॑ ಸ॒ಪ್ತಾ-ಽಽರ॒ಣ್ಯಾ-ಸ್ಸ॒ಪ್ತ ಛನ್ದಾಗ್॑-ಸ್ಯು॒ಭಯ॒ಸ್ಯಾ-ವ॑ರುದ್ಧ್ಯೈ॒ ವಸ್ವ್ಯ॑ಸಿ ರು॒ದ್ರಾ-ಽಸೀತ್ಯಾ॑ಹ ರೂ॒ಪಮೇ॒ವಾಸ್ಯಾ॑ ಏ॒ತ-ನ್ಮ॑ಹಿ॒ಮಾನಂ॒- [ಏ॒ತ-ನ್ಮ॑ಹಿ॒ಮಾನ᳚ಮ್, ವ್ಯಾಚ॑ಷ್ಟೇ॒ ಬೃಹ॒ಸ್ಪತಿ॑ಸ್ತ್ವಾ] 54

-ಁವ್ಯಾಚ॑ಷ್ಟೇ॒ ಬೃಹ॒ಸ್ಪತಿ॑ಸ್ತ್ವಾ ಸು॒ಮ್ನೇ ರ॑ಣ್ವ॒ತ್ವಿತ್ಯಾ॑ಹ॒ ಬ್ರಹ್ಮ॒ ವೈ ದೇ॒ವಾನಾ॒-ಮ್ಬೃಹ॒ಸ್ಪತಿ॒-ರ್ಬ್ರಹ್ಮ॑ಣೈ॒ವಾಸ್ಮೈ॑ ಪ॒ಶೂನವ॑ ರುನ್ಧೇ ರು॒ದ್ರೋ ವಸು॑ಭಿ॒ರಾ ಚಿ॑ಕೇ॒ತ್ವಿತ್ಯಾ॒ಹಾ-ಽಽವೃ॑ತ್ತ್ಯೈ ಪೃಥಿ॒ವ್ಯಾಸ್ತ್ವಾ॑ ಮೂ॒ರ್ಧನ್ನಾ ಜಿ॑ಘರ್ಮಿ ದೇವ॒ಯಜ॑ನ॒ ಇತ್ಯಾ॑ಹ ಪೃಥಿ॒ವ್ಯಾ ಹ್ಯೇ॑ಷ ಮೂ॒ರ್ಧಾ ಯ-ದ್ದೇ॑ವ॒ಯಜ॑ನ॒ಮಿಡಾ॑ಯಾಃ ಪ॒ದ ಇತ್ಯಾ॒ಹೇಡಾ॑ಯೈ॒ ಹ್ಯೇ॑ತ-ತ್ಪ॒ದಂ-ಯಁ-ಥ್ಸೋ॑ಮ॒ಕ್ರಯ॑ಣ್ಯೈ ಘೃ॒ತವ॑ತಿ॒ ಸ್ವಾಹೇ- [ಸ್ವಾಹಾ᳚, ಇತ್ಯಾ॑ಹ॒] 55

-ತ್ಯಾ॑ಹ॒ ಯದೇ॒ವಾಸ್ಯೈ॑ ಪ॒ದಾ-ದ್ಘೃ॒ತಮಪೀ᳚ಡ್ಯತ॒ ತಸ್ಮಾ॑ದೇ॒ವಮಾ॑ಹ॒ ಯದ॑ದ್ಧ್ವ॒ರ್ಯುರ॑ನ॒ಗ್ನಾವಾಹು॑ತಿ-ಞ್ಜುಹು॒ಯಾದ॒ನ್ಧೋ᳚-ಽದ್ಧ್ವ॒ರ್ಯು-ಸ್ಸ್ಯಾ॒-ದ್ರಕ್ಷಾಗ್ಂ॑ಸಿ ಯ॒ಜ್ಞಗ್ಂ ಹ॑ನ್ಯು॒ರ್॒ಹಿರ॑ಣ್ಯಮು॒ಪಾಸ್ಯ॑ ಜುಹೋತ್ಯಗ್ನಿ॒ವತ್ಯೇ॒ವ ಜು॑ಹೋತಿ॒ ನಾನ್ಧೋ᳚-ಽದ್ಧ್ವ॒ರ್ಯು ರ್ಭವ॑ತಿ॒ ನ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಘ್ನನ್ತಿ॒ ಕಾಣ್ಡೇ॑ಕಾಣ್ಡೇ॒ ವೈ ಕ್ರಿ॒ಯಮಾ॑ಣೇ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಜಿಘಾಗ್ಂಸನ್ತಿ॒ ಪರಿ॑ಲಿಖಿತ॒ಗ್ಂ॒ ರಕ್ಷಃ॒ ಪರಿ॑ಲಿಖಿತಾ॒ ಅರಾ॑ತಯ॒ ಇತ್ಯಾ॑ಹ॒ ರಕ್ಷ॑ಸಾ॒-ಮಪ॑ಹತ್ಯಾ [ರಕ್ಷ॑ಸಾ॒-ಮಪ॑ಹತ್ಯೈ, ಇ॒ದಮ॒ಹಗ್ಂ] 56

ಇ॒ದಮ॒ಹಗ್ಂ ರಕ್ಷ॑ಸೋ ಗ್ರೀ॒ವಾ ಅಪಿ॑ ಕೃನ್ತಾಮಿ॒ ಯೋ᳚-ಽಸ್ಮಾ-ನ್ದ್ವೇಷ್ಟಿ॒ ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮ ಇತ್ಯಾ॑ಹ॒ ದ್ವೌ ವಾವ ಪುರು॑ಷೌ॒ ಯ-ಞ್ಚೈ॒ವ ದ್ವೇಷ್ಟಿ॒ ಯಶ್ಚೈ॑ನ॒-ನ್ದ್ವೇಷ್ಟಿ॒ ತಯೋ॑-ರೇ॒ವಾ-ಽನ॑ನ್ತರಾಯ-ಙ್ಗ್ರೀ॒ವಾಃ ಕೃ॑ನ್ತತಿ ಪ॒ಶವೋ॒ ವೈ ಸೋ॑ಮ॒ಕ್ರಯ॑ಣ್ಯೈ ಪ॒ದಂ-ಯಾಁ॑ವತ್ತ್ಮೂ॒ತಗ್ಂ ಸಂ-ವಁ॑ಪತಿ ಪ॒ಶೂನೇ॒ವಾವ॑ ರುನ್ಧೇ॒-ಽಸ್ಮೇ ರಾಯ॒ ಇತಿ॒ ಸಂ ಁವ॑ಪತ್ಯಾ॒ತ್ಮಾನ॑-ಮೇ॒ವಾದ್ಧ್ವ॒ರ್ಯುಃ -[-ಮೇ॒ವಾದ್ಧ್ವ॒ರ್ಯುಃ, ಪ॒ಶುಭ್ಯೋ॒] 57

ಪ॒ಶುಭ್ಯೋ॒ ನಾನ್ತರೇ॑ತಿ॒ ತ್ವೇ ರಾಯ॒ ಇತಿ॒ ಯಜ॑ಮಾನಾಯ॒ ಪ್ರ ಯ॑ಚ್ಛತಿ॒ ಯಜ॑ಮಾನ ಏ॒ವ ರ॒ಯಿ-ನ್ದ॑ಧಾತಿ॒ ತೋತೇ॒ ರಾಯ॒ ಇತಿ॒ ಪತ್ನಿ॑ಯಾ ಅ॒ರ್ಧೋ ವಾ ಏ॒ಷ ಆ॒ತ್ಮನೋ॒ ಯ-ತ್ಪತ್ನೀ॒ ಯಥಾ॑ ಗೃ॒ಹೇಷು॑ ನಿಧ॒ತ್ತೇ ತಾ॒ದೃಗೇ॒ವ ತ-ತ್ತ್ವಷ್ಟೀ॑ಮತೀ ತೇ ಸಪೇ॒ಯೇತ್ಯಾ॑ಹ॒ ತ್ವಷ್ಟಾ॒ ವೈ ಪ॑ಶೂ॒ನಾ-ಮ್ಮಿ॑ಥು॒ನಾನಾಗ್ಂ॑ ರೂಪ॒ಕೃ-ದ್ರೂ॒ಪಮೇ॒ವ ಪ॒ಶುಷು॑ ದಧಾತ್ಯ॒ಸ್ಮೈ ವೈ ಲೋ॒ಕಾಯ॒ ಗಾರ್ಹ॑ಪತ್ಯ॒ ಆ ಧೀ॑ಯತೇ॒ ಽಮುಷ್ಮಾ॑ ಆಹವ॒ನೀಯೋ॒ ಯ-ದ್ಗಾರ್ಹ॑ಪತ್ಯ ಉಪ॒ವಪೇ॑ದ॒ಸ್ಮಿನ್ ಁಲೋ॒ಕೇ ಪ॑ಶ॒ಮಾನ್-ಥ್ಸ್ಯಾ॒-ದ್ಯದಾ॑ಹವ॒ನೀಯೇ॒ ಽಮುಷ್ಮಿ॑ನ್ ಁಲೋ॒ಕೇ ಪ॑ಶು॒ಮಾನ್-ಥ್ಸ್ಯಾ॑ದು॒ಭಯೋ॒ರುಪ॑ ವಪತ್ಯು॒ಭಯೋ॑ರೇ॒ವೈನಂ॑-ಲೋಁ॒ಕಯೋಃ᳚ ಪಶು॒ಮನ್ತ॑-ಙ್ಕರೋತಿ ॥ 58 ॥

(ಮ॒ಹಿ॒ಮಾನ॒ಗ್ಗ್॒ - ಸ್ವಾಹಾ - ಽಪ॑ಹತ್ಯಾ - ಅಧ್ವ॒ರ್ಯು - ಧೀ॑ಯತೇ॒ - ಚತು॑ರ್ವಿಗ್ಂಶತಿಶ್ಚ) (ಅ. 8)

ಬ್ರ॒ಹ್ಮ॒ವಾ॒ದಿನೋ॑ ವದನ್ತಿ ವಿ॒ಚಿತ್ಯ॒-ಸ್ಸೋಮಾ(3) ನ ವಿ॒ಚಿತ್ಯಾ(3) ಇತಿ॒ ಸೋಮೋ॒ ವಾ ಓಷ॑ಧೀನಾ॒ಗ್ಂ॒ ರಾಜಾ॒ ತಸ್ಮಿ॒ನ್॒. ಯದಾಪ॑ನ್ನ-ಙ್ಗ್ರಸಿ॒ತಮೇ॒ವಾಸ್ಯ॒ ತ-ದ್ಯ-ದ್ವಿ॑ಚಿನು॒ಯಾ-ದ್ಯಥಾ॒ ಽಽಸ್ಯಾ᳚ದ್ಗ್ರಸಿ॒ತ-ನ್ನಿ॑ಷ್ಖಿ॒ದತಿ॑ ತಾ॒ದೃಗೇ॒ವ ತದ್ಯನ್ನ ವಿ॑ಚಿನು॒ಯಾ-ದ್ಯಥಾ॒ ಽಕ್ಷನ್ನಾಪ॑ನ್ನಂ-ವಿಁ॒ಧಾವ॑ತಿ ತಾ॒ದೃಗೇ॒ವ ತ-ತ್ಕ್ಷೋಧು॑ಕೋ ಽದ್ಧ್ವ॒ರ್ಯು-ಸ್ಸ್ಯಾ-ತ್ಕ್ಷೋಧು॑ಕೋ॒ ಯಜ॑ಮಾನ॒-ಸ್ಸೋಮ॑ವಿಕ್ರಯಿ॒ನ್-ಥ್ಸೋಮಗ್ಂ॑ ಶೋಧ॒ಯೇತ್ಯೇ॒ವ ಬ್ರೂ॑ಯಾ॒-ದ್ಯದೀತ॑ರಂ॒- [ಬ್ರೂ॑ಯಾ॒-ದ್ಯದೀತ॑ರಮ್, ಯದೀತ॑ರ-] 59

-ಁಯದೀತ॑ರ-ಮು॒ಭಯೇ॑ನೈ॒ವ ಸೋ॑ಮವಿಕ್ರ॒ಯಿಣ॑-ಮರ್ಪಯತಿ॒ ತಸ್ಮಾ᳚-ಥ್ಸೋಮವಿಕ್ರ॒ಯೀ ಕ್ಷೋಧು॑ಕೋ ಽರು॒ಣೋ ಹ॑ ಸ್ಮಾ॒-ಽಽಹೌಪ॑ವೇಶಿ-ಸ್ಸೋಮ॒ಕ್ರಯ॑ಣ ಏ॒ವಾಹ-ನ್ತೃ॑ತೀಯ ಸವ॒ನಮವ॑ ರುನ್ಧ॒ ಇತಿ॑ ಪಶೂ॒ನಾ-ಞ್ಚರ್ಮ॑-ನ್ಮಿಮೀತೇ ಪ॒ಶೂನೇ॒ವಾವ॑ ರುನ್ಧೇ ಪ॒ಶವೋ॒ ಹಿ ತೃ॒ತೀಯ॒ಗ್ಂ॒ ಸವ॑ನಂ॒-ಯಁ-ಙ್ಕಾ॒ಮಯೇ॑ತಾಪ॒ಶು-ಸ್ಸ್ಯಾ॒-ದಿತ್ಯೃ॑ಕ್ಷ॒ತ-ಸ್ತಸ್ಯ॑ ಮಿಮೀತ॒ರ್ಕ್ಷಂ-ವಾಁ ಅ॑ಪಶ॒ವ್ಯ-ಮ॑ಪ॒ಶುರೇ॒ವ ಭ॑ವತಿ॒ ಯ-ಙ್ಕಾ॒ಮಯೇ॑ತ ಪಶು॒ಮಾನ್-ಥ್ಸ್ಯಾ॒ - [ ] 60

-ದಿತಿ॑ ಲೋಮ॒ತಸ್ತಸ್ಯ॑ ಮಿಮೀತೈ॒ತದ್ವೈ ಪ॑ಶೂ॒ನಾಗ್ಂ ರೂ॒ಪಗ್ಂ ರೂ॒ಪೇಣೈ॒ವಾ-ಽಸ್ಮೈ॑ ಪ॒ಶೂನವ॑ ರುನ್ಧೇ ಪಶು॒ಮಾನೇ॒ವ ಭ॑ವತ್ಯ॒ಪಾಮನ್ತೇ᳚ ಕ್ರೀಣಾತಿ॒ ಸರ॑ಸಮೇ॒ವೈನ॑-ಙ್ಕ್ರೀಣಾತ್ಯ॒-ಮಾತ್ಯೋ॒-ಽಸೀತ್ಯಾ॑ಹಾ॒-ಽಮೈವೈನ॑-ಙ್ಕುರುತೇ ಶು॒ಕ್ರಸ್ತೇ॒ ಗ್ರಹ॒ ಇತ್ಯಾ॑ಹ ಶು॒ಕ್ರೋ ಹ್ಯ॑ಸ್ಯ॒ ಗ್ರಹೋ ಽನ॒ಸಾ-ಽಚ್ಛ॑ ಯಾತಿ ಮಹಿ॒ಮಾನ॑-ಮೇ॒ವಾಸ್ಯಾಚ್ಛ॑ ಯಾ॒ತ್ಯನ॒ಸಾ- [ಯಾ॒ತ್ಯನ॒ಸಾ, ಅಚ್ಛ॑] 61

-ಽಚ್ಛ॑ ಯಾತಿ॒ ತಸ್ಮಾ॑-ದನೋವಾ॒ಹ್ಯಗ್ಂ॑ ಸ॒ಮೇ ಜೀವ॑ನಂ॒-ಯಁತ್ರ॒ ಖಲು॒ ವಾ ಏ॒ತಗ್ಂ ಶೀ॒ರ್ಷ್ಣಾ ಹರ॑ನ್ತಿ॒ ತಸ್ಮಾ᳚ಚ್ಛೀರ್ಷಹಾ॒ರ್ಯ॑-ಙ್ಗಿ॒ರೌ ಜೀವ॑ನಮ॒ಭಿ ತ್ಯ-ನ್ದೇ॒ವಗ್ಂ ಸ॑ವಿ॒ತಾರ॒ಮಿತ್ಯತಿ॑-ಚ್ಛನ್ದಸ॒ರ್ಚಾ ಮಿ॑ಮೀ॒ತೇ ಽತಿ॑ಚ್ಛನ್ದಾ॒ ವೈ ಸರ್ವಾ॑ಣಿ॒ ಛನ್ದಾಗ್ಂ॑ಸಿ॒ ಸರ್ವೇ॑ಭಿರೇ॒ವೈನ॒-ಞ್ಛನ್ದೋ॑ಭಿರ್ಮಿಮೀತೇ॒ ವರ್ಷ್ಮ॒ ವಾ ಏ॒ಷಾ ಛನ್ದ॑ಸಾಂ॒-ಯಁದತಿ॑ಚ್ಛನ್ದಾ॒ ಯದತಿ॑ಚ್ಛನ್ದಸ॒ರ್ಚಾ ಮಿಮೀ॑ತೇ॒ ವರ್ಷ್ಮೈ॒ವೈನಗ್ಂ॑ ಸಮಾ॒ನಾನಾ᳚-ಙ್ಕರೋ॒ತ್ಯೇಕ॑ಯೈಕಯೋ॒-ಥ್ಸರ್ಗ॑- [-ಙ್ಕರೋ॒ತ್ಯೇಕ॑ಯೈಕಯೋ॒-ಥ್ಸರ್ಗ᳚ಮ್, ಮಿ॒ಮೀ॒ತೇ] 62

-ಮ್ಮಿಮೀ॒ತೇ ಽಯಾ॑ತಯಾಮ್ನಿಯಾಯಾತಯಾಮ್ನಿಯೈ॒ವೈನ॑-ಮ್ಮಿಮೀತೇ॒ ತಸ್ಮಾ॒ನ್ನಾನಾ॑ವೀರ್ಯಾ ಅ॒ಙ್ಗುಲ॑ಯ॒-ಸ್ಸರ್ವಾ᳚ಸ್ವಙ್ಗು॒ಷ್ಠಮುಪ॒ ನಿ ಗೃ॑ಹ್ಣಾತಿ॒ ತಸ್ಮಾ᳚-ಥ್ಸ॒ಮಾವ॑ದ್ವೀರ್ಯೋ॒-ಽನ್ಯಾಭಿ॑-ರ॒ಙ್ಗುಲಿ॑ಭಿ॒ಸ್ತಸ್ಮಾ॒-ಥ್ಸರ್ವಾ॒ ಅನು॒ ಸ-ಞ್ಚ॑ರತಿ॒ ಯ-ಥ್ಸ॒ಹ ಸರ್ವಾ॑ಭಿ॒ರ್ಮಿಮೀ॑ತ॒ ಸಗ್ಗ್ಶ್ಲಿ॑ಷ್ಟಾ ಅ॒ಙ್ಗುಲ॑ಯೋ ಜಾಯೇರ॒-ನ್ನೇಕ॑ಯೈಕಯೋ॒-ಥ್ಸರ್ಗ॑-ಮ್ಮಿಮೀತೇ॒ ತಸ್ಮಾ॒-ದ್ವಿಭ॑ಕ್ತಾ ಜಾಯನ್ತೇ॒ ಪಞ್ಚ॒ ಕೃತ್ವೋ॒ ಯಜು॑ಷಾ ಮಿಮೀತೇ॒ ಪಞ್ಚಾ᳚ಕ್ಷರಾ ಪ॒ಙ್ಕ್ತಿಃ ಪಾಙ್ಕ್ತೋ॑ ಯ॒ಜ್ಞೋ ಯ॒ಜ್ಞಮೇ॒ವಾವ॑ ರುನ್ಧೇ॒ ಪಞ್ಚ॒ ಕೃತ್ವ॑-ಸ್ತೂ॒ಷ್ಣೀ- [ಕೃತ್ವ॑-ಸ್ತೂ॒ಷ್ಣೀಮ್, ದಶ॒ ಸ-ಮ್ಪ॑ದ್ಯನ್ತೇ॒] 63

-ನ್ದಶ॒ ಸ-ಮ್ಪ॑ದ್ಯನ್ತೇ॒ ದಶಾ᳚ಕ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾನ್ನಾದ್ಯ॒ಮವ॑ ರುನ್ಧೇ॒ ಯ-ದ್ಯಜು॑ಷಾ॒ ಮಿಮೀ॑ತೇ ಭೂ॒ತಮೇ॒ವಾವ॑ ರುನ್ಧೇ॒ ಯ-ತ್ತೂ॒ಷ್ಣೀ-ಮ್ಭ॑ವಿ॒ಷ್ಯ-ದ್ಯ-ದ್ವೈ ತಾವಾ॑ನೇ॒ವ ಸೋಮ॒-ಸ್ಸ್ಯಾ-ದ್ಯಾವ॑ನ್ತ॒-ಮ್ಮಿಮೀ॑ತೇ॒ ಯಜ॑ಮಾನಸ್ಯೈ॒ವ ಸ್ಯಾ॒ನ್ನಾಪಿ॑ ಸದ॒ಸ್ಯಾ॑ನಾ-ಮ್ಪ್ರ॒ಜಾಭ್ಯ॒ಸ್ತ್ವೇತ್ಯುಪ॒ ಸಮೂ॑ಹತಿ ಸದ॒ಸ್ಯಾ॑ನೇ॒ವಾನ್ವಾ ಭ॑ಜತಿ॒ ವಾಸ॒ಸೋಪ॑ ನಹ್ಯತಿ ಸರ್ವದೇವ॒ತ್ಯಂ॑-ವೈಁ [ ] 64

ವಾಸ॒-ಸ್ಸರ್ವಾ॑ಭಿರೇ॒ವೈನ॑-ನ್ದೇ॒ವತಾ॑ಭಿ॒-ಸ್ಸಮ॑ರ್ಧಯತಿ ಪ॒ಶವೋ॒ ವೈ ಸೋಮಃ॑ ಪ್ರಾ॒ಣಾಯ॒ ತ್ವೇತ್ಯುಪ॑ ನಹ್ಯತಿ ಪ್ರಾ॒ಣಮೇ॒ವ ಪ॒ಶುಷು॑ ದಧಾತಿ ವ್ಯಾ॒ನಾಯ॒ ತ್ವೇತ್ಯನು॑ ಶೃನ್ಥತಿ ವ್ಯಾ॒ನಮೇ॒ವ ಪ॒ಶುಷು॑ ದಧಾತಿ॒ ತಸ್ಮಾ᳚-ಥ್ಸ್ವ॒ಪನ್ತ॑-ಮ್ಪ್ರಾ॒ಣಾ ನ ಜ॑ಹತಿ ॥ 65 ॥

(ಇತ॑ರಂ - ಪಶು॒ಮಾನ್-ಥ್ಸ್ಯಾ᳚--ದ್ಯಾ॒ತ್ಯನ॑ಸೋ॒ - ಥ್ಸರ್ಗಂ॑ - ತೂ॒ಷ್ಣೀಗ್ಂ - ಸ॑ರ್ವದೇವ॒ತ್ಯಂ॑-ವೈಁ - ತ್ರಯ॑ಸ್ತ್ರಿಗ್ಂಶಚ್ಚ) (ಅ. 9)

ಯ-ತ್ಕ॒ಲಯಾ॑ ತೇ ಶ॒ಫೇನ॑ ತೇ ಕ್ರೀಣಾ॒ನೀತಿ॒ ಪಣೇ॒ತಾಗೋ॑ಅರ್ಘ॒ಗ್ಂ॒ ಸೋಮ॑-ಙ್ಕು॒ರ್ಯಾದಗೋ॑ಅರ್ಘಂ॒-ಯಁಜ॑ಮಾನ॒-ಮಗೋ॑ಅರ್ಘಮದ್ಧ್ವ॒ರ್ಯು-ಙ್ಗೋಸ್ತು ಮ॑ಹಿ॒ಮಾನ॒-ನ್ನಾವ॑ ತಿರೇ॒-ದ್ಗವಾ॑ ತೇ ಕ್ರೀಣಾ॒ನೀತ್ಯೇ॒ವ ಬ್ರೂ॑ಯಾ-ದ್ಗೋಅ॒ರ್ಘಮೇ॒ವ ಸೋಮ॑-ಙ್ಕ॒ರೋತಿ॑ ಗೋಅ॒ರ್ಘಂ-ಯಁಜ॑ಮಾನ-ಙ್ಗೋಅ॒ರ್ಘಮ॑ದ್ಧ್ವ॒ರ್ಯು-ನ್ನ ಗೋರ್ಮ॑ಹಿ॒ಮಾನ॒ಮವ॑ ತಿರತ್ಯ॒ಜಯಾ᳚ ಕ್ರೀಣಾತಿ॒ ಸತ॑ಪಸಮೇ॒ವೈನ॑-ಙ್ಕ್ರೀಣಾತಿ॒ ಹಿರ॑ಣ್ಯೇನ ಕ್ರೀಣಾತಿ॒ ಸಶು॑ಕ್ರಮೇ॒ವೈ- [ಸಶು॑ಕ್ರಮೇ॒ವ, ಏ॒ನ॒-ಙ್ಕ್ರೀ॒ಣಾ॒ತಿ॒ ಧೇ॒ನ್ವಾ ಕ್ರೀ॑ಣಾತಿ॒] 66

-ನ॑-ಙ್ಕ್ರೀಣಾತಿ ಧೇ॒ನ್ವಾ ಕ್ರೀ॑ಣಾತಿ॒ ಸಾಶಿ॑ರಮೇ॒ವೈನ॑-ಙ್ಕ್ರೀಣಾತ್ಯೃಷ॒ಭೇಣ॑ ಕ್ರೀಣಾತಿ॒ ಸೇನ್ದ್ರ॑ಮೇ॒ವೈನ॑-ಙ್ಕ್ರೀಣಾತ್ಯನ॒ಡುಹಾ᳚ ಕ್ರೀಣಾತಿ॒ ವಹ್ನಿ॒ರ್ವಾ ಅ॑ನ॒ಡ್ವಾನ್. ವಹ್ನಿ॑ನೈ॒ವ ವಹ್ನಿ॑ ಯ॒ಜ್ಞಸ್ಯ॑ ಕ್ರೀಣಾತಿ ಮಿಥು॒ನಾಭ್ಯಾ᳚-ಙ್ಕ್ರೀಣಾತಿ ಮಿಥು॒ನಸ್ಯಾವ॑-ರುದ್ಧ್ಯೈ॒ ವಾಸ॑ಸಾ ಕ್ರೀಣಾತಿ ಸರ್ವದೇವ॒ತ್ಯಂ॑-ವೈಁ ವಾ॒ಸ-ಸ್ಸರ್ವಾ᳚ಭ್ಯ ಏ॒ವೈನ॑-ನ್ದೇ॒ವತಾ᳚ಭ್ಯಃ ಕ್ರೀಣಾತಿ॒ ದಶ॒ ಸ-ಮ್ಪ॑ದ್ಯನ್ತೇ॒ ದಶಾ᳚ಕ್ಷರಾ ವಿ॒ರಾಡನ್ನಂ॑-ವಿಁ॒ರಾ-ಡ್ವಿ॒ರಾಜೈ॒ವಾನ್ನಾದ್ಯ॒ಮವ॑ ರುನ್ಧೇ॒ [ರುನ್ಧೇ, ತಪ॑ಸ-ಸ್ತ॒ನೂರ॑ಸಿ] 67

ತಪ॑ಸ-ಸ್ತ॒ನೂರ॑ಸಿ ಪ್ರ॒ಜಾಪ॑ತೇ॒-ರ್ವರ್ಣ॒ ಇತ್ಯಾ॑ಹ ಪ॒ಶುಭ್ಯ॑ ಏ॒ವ ತದ॑ದ್ಧ್ವ॒-ರ್ಯುರ್ನಿ ಹ್ನು॑ತ ಆ॒ತ್ಮನೋ-ಽನಾ᳚ವ್ರಸ್ಕಾಯ॒ ಗಚ್ಛ॑ತಿ॒ ಶ್ರಿಯ॒-ಮ್ಪ್ರ ಪ॒ಶೂನಾ᳚ಪ್ನೋತಿ॒ ಯ ಏ॒ವಂ-ವೇಁದ॑ ಶು॒ಕ್ರ-ನ್ತೇ॑ ಶು॒ಕ್ರೇಣ॑ ಕ್ರೀಣಾ॒ಮೀತ್ಯಾ॑ಹ ಯಥಾ ಯ॒ಜುರೇ॒ವೈತ-ದ್ದೇ॒ವಾ ವೈ ಯೇನ॒ ಹಿರ॑ಣ್ಯೇನ॒ ಸೋಮ॒ಮಕ್ರೀ॑ಣ॒-ನ್ತದ॑ಭೀ॒ಷಹಾ॒ ಪುನ॒ರಾ-ಽದ॑ದತ॒ ಕೋ ಹಿ ತೇಜ॑ಸಾ ವಿಕ್ರೇ॒ಷ್ಯತ॒ ಇತಿ॒ ಯೇನ॒ ಹಿರ॑ಣ್ಯೇನ॒ [ಹಿರ॑ಣ್ಯೇನ, ಸೋಮ॑-] 68

ಸೋಮ॑-ಙ್ಕ್ರೀಣೀ॒ಯಾ-ತ್ತದ॑ಭೀ॒ಷಹಾ॒ ಪುನ॒ರಾ ದ॑ದೀತ॒ ತೇಜ॑ ಏ॒ವಾ-ಽಽತ್ಮ-ನ್ಧ॑ತ್ತೇ॒-ಽಸ್ಮೇ ಜ್ಯೋತಿಃ॑ ಸೋಮವಿಕ್ರ॒ಯಿಣಿ॒ ತಮ॒ ಇತ್ಯಾ॑ಹ॒ ಜ್ಯೋತಿ॑ರೇ॒ವ ಯಜ॑ಮಾನೇ ದಧಾತಿ॒ ತಮ॑ಸಾ ಸೋಮವಿಕ್ರ॒ಯಿಣ॑ಮರ್ಪಯತಿ॒ ಯದನು॑ಪಗ್ರಥ್ಯ ಹ॒ನ್ಯಾ-ದ್ದ॑ನ್ದ॒ಶೂಕಾ॒ಸ್ತಾಗ್ಂ ಸಮಾಗ್ಂ॑ ಸ॒ರ್ಪಾ-ಸ್ಸ್ಯು॑ರಿ॒ದಮ॒ಹಗ್ಂ ಸ॒ರ್ಪಾಣಾ᳚-ನ್ದನ್ದ॒ಶೂಕಾ॑ನಾ-ಙ್ಗ್ರೀ॒ವಾ ಉಪ॑ ಗ್ರಥ್ನಾ॒ಮೀತ್ಯಾ॒ಹಾ-ದ॑ನ್ದಶೂಕಾ॒ಸ್ತಾಗ್ಂ ಸಮಾಗ್ಂ॑ ಸ॒ರ್ಪಾ ಭ॑ವನ್ತಿ॒ ತಮ॑ಸಾ ಸೋಮವಿಕ್ರ॒ಯಿಣಂ॑-ವಿಁದ್ಧ್ಯತಿ॒ ಸ್ವಾನ॒ [ಸ್ವಾನ॑, ಭ್ರಾಜೇತ್ಯಾ॑ಹೈ॒ತೇ] 69

ಭ್ರಾಜೇತ್ಯಾ॑ಹೈ॒ತೇ ವಾ ಅ॒ಮುಷ್ಮಿ॑ನ್ ಁಲೋ॒ಕೇ ಸೋಮ॑ಮರಕ್ಷ॒-ನ್ತೇಭ್ಯೋ-ಽಧಿ॒ ಸೋಮ॒ಮಾ-ಽಹ॑ರ॒ನ್॒. ಯದೇ॒ತೇಭ್ಯಃ॑ ಸೋಮ॒ಕ್ರಯ॑ಣಾ॒-ನ್ನಾನು॑ದಿ॒ಶೇದಕ್ರೀ॑ತೋ-ಽಸ್ಯ॒ ಸೋಮಃ॑ ಸ್ಯಾ॒ನ್ನಾಸ್ಯೈ॒ತೇ॑ ಽಮುಷ್ಮಿ॑ನ್ ಁಲೋ॒ಕೇ ಸೋಮಗ್ಂ॑ ರಕ್ಷೇಯು॒ರ್ಯದೇ॒ತೇಭ್ಯಃ॑ ಸೋಮ॒ಕ್ರಯ॑ಣಾನನುದಿ॒ಶತಿ॑ ಕ್ರೀ॒ತೋ᳚-ಽಸ್ಯ॒ ಸೋಮೋ॑ ಭವತ್ಯೇ॒ತೇ᳚-ಽಸ್ಯಾ॒ಮುಷ್ಮಿ॑ನ್ ಁಲೋ॒ಕೇ ಸೋಮಗ್ಂ॑ ರಕ್ಷನ್ತಿ ॥ 70 ॥

(ಸಶು॑ಕ್ರಮೇ॒ವ - ರು॑ನ್ಧ॒ - ಇತಿ॒ ಯೇನ॒ ಹಿರ॑ಣ್ಯೇನ॒ - ಸ್ವಾನ॒ - ಚತು॑ಶ್ಚತ್ವಾರಿಗ್ಂಶಚ್ಚ) (ಅ. 10)

ವಾ॒ರು॒ಣೋ ವೈ ಕ್ರೀ॒ತ-ಸ್ಸೋಮ॒ ಉಪ॑ನದ್ಧೋ ಮಿ॒ತ್ರೋ ನ॒ ಏಹಿ॒ ಸುಮಿ॑ತ್ರಧಾ॒ ಇತ್ಯಾ॑ಹ॒ ಶಾನ್ತ್ಯಾ॒ ಇನ್ದ್ರ॑ಸ್ಯೋ॒ರುಮಾ ವಿ॑ಶ॒ ದಕ್ಷಿ॑ಣ॒ಮಿತ್ಯಾ॑ಹ ದೇ॒ವಾ ವೈ ಯಗ್ಂ ಸೋಮ॒ಮಕ್ರೀ॑ಣ-ನ್ತಮಿನ್ದ್ರ॑ಸ್ಯೋ॒ರೌ ದಕ್ಷಿ॑ಣ॒ ಆ ಽಸಾ॑ದಯನ್ನೇ॒ಷ ಖಲು॒ ವಾ ಏ॒ತರ್ಹೀನ್ದ್ರೋ॒ ಯೋ ಯಜ॑ತೇ॒ ತಸ್ಮಾ॑ದೇ॒ವಮಾ॒ಹೋದಾಯು॑ಷಾ ಸ್ವಾ॒ಯುಷೇತ್ಯಾ॑ಹ ದೇ॒ವತಾ॑ ಏ॒ವಾ-ನ್ವಾ॒ರಭ್ಯೋ- [ಏ॒ವಾ-ನ್ವಾ॒ರಭ್ಯೋತ್, ತಿ॒ಷ್ಠ॒ತ್ಯು॒-ರ್ವ॑ನ್ತರಿ॑ಕ್ಷ॒-] 71

-ತ್ತಿ॑ಷ್ಠತ್ಯು॒-ರ್ವ॑ನ್ತರಿ॑ಕ್ಷ॒-ಮನ್ವಿ॒ಹೀತ್ಯಾ॑ಹಾ-ನ್ತರಿಕ್ಷದೇವ॒ತ್ಯೋ᳚(1॒) ಹ್ಯೇ॑ತರ್ಹಿ॒ ಸೋಮೋ-ಽದಿ॑ತ್ಯಾ॒-ಸ್ಸದೋ॒-ಽಸ್ಯದಿ॑ತ್ಯಾ॒-ಸ್ಸದ॒ ಆ ಸೀ॒ದೇತ್ಯಾ॑ಹ ಯಥಾಯ॒ಜುರೇ॒ವೈತ-ದ್ವಿ ವಾ ಏ॑ನಮೇ॒ತದ॑ರ್ಧಯತಿ॒ ಯ-ದ್ವಾ॑ರು॒ಣಗ್ಂ ಸನ್ತ॑-ಮ್ಮೈ॒ತ್ರ-ಙ್ಕ॒ರೋತಿ॑ ವಾರು॒ಣ್ಯರ್ಚಾ-ಽಽ ಸಾ॑ದಯತಿ॒ ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಸಮ॑ರ್ಧಯತಿ॒ ವಾಸ॑ಸಾ ಪ॒ರ್ಯಾನ॑ಹ್ಯತಿ ಸರ್ವದೇವ॒ತ್ಯಂ॑-ವೈಁ ವಾಸ॒-ಸ್ಸರ್ವಾ॑ಭಿರೇ॒ವೈ- [ವಾಸ॒-ಸ್ಸರ್ವಾ॑ಭಿರೇ॒ವ, ಏ॒ನ॒-ನ್ದೇ॒ವತಾ॑ಭಿ॒-] 72

-ನ॑-ನ್ದೇ॒ವತಾ॑ಭಿ॒-ಸ್ಸಮ॑ರ್ಧಯ॒ತ್ಯಥೋ॒ ರಕ್ಷ॑ಸಾ॒ಮಪ॑ಹತ್ಯೈ॒ ವನೇ॑ಷು॒ ವ್ಯ॑ನ್ತರಿ॑ಕ್ಷ-ನ್ತತಾ॒ನೇತ್ಯಾ॑ಹ॒ ವನೇ॑ಷು॒ ಹಿ ವ್ಯ॑ನ್ತರಿ॑ಕ್ಷ-ನ್ತ॒ತಾನ॒ ವಾಜ॒ಮರ್ವ॒ಥ್ಸ್ವಿತ್ಯಾ॑ಹ॒ ವಾಜ॒ಗ್ಗ್॒ ಹ್ಯರ್ವ॑ಥ್ಸು॒ ಪಯೋ॑ ಅಘ್ನಿ॒ಯಾಸ್ವಿತ್ಯಾ॑ಹ॒ ಪಯೋ॒ ಹ್ಯ॑ಘ್ನಿ॒ಯಾಸು॑ ಹೃ॒ಥ್ಸು ಕ್ರತು॒ಮಿತ್ಯಾ॑ಹ ಹೃ॒ಥ್ಸು ಹಿ ಕ್ರತುಂ॒-ವಁರು॑ಣೋ ವಿ॒ಕ್ಷ್ವ॑ಗ್ನಿಮಿತ್ಯಾ॑ಹ॒ ವರು॑ಣೋ॒ ಹಿ ವಿ॒ಕ್ಷ್ವ॑ಗ್ನಿ-ನ್ದಿ॒ವಿ ಸೂರ್ಯ॒- [ಸೂರ್ಯ᳚ಮ್, ಇತ್ಯಾ॑ಹ ದಿ॒ವಿ ಹಿ] 73

-ಮಿತ್ಯಾ॑ಹ ದಿ॒ವಿ ಹಿ ಸೂರ್ಯ॒ಗ್ಂ॒ ಸೋಮ॒ಮದ್ರಾ॒ವಿತ್ಯಾ॑ಹ॒ ಗ್ರಾವಾ॑ಣೋ॒ ವಾ ಅದ್ರ॑ಯ॒ಸ್ತೇಷು॒ ವಾ ಏ॒ಷ ಸೋಮ॑-ನ್ದಧಾತಿ॒ ಯೋ ಯಜ॑ತೇ॒ ತಸ್ಮಾ॑ದೇ॒ವಮಾ॒ಹೋದು॒ ತ್ಯ-ಞ್ಜಾ॒ತವೇ॑ದಸ॒ಮಿತಿ॑ ಸೌ॒ರ್ಯರ್ಚಾ ಕೃ॑ಷ್ಣಾಜಿ॒ನ-ಮ್ಪ್ರ॒ತ್ಯಾನ॑ಹ್ಯತಿ॒ ರಕ್ಷ॑ಸಾ॒ಮಪ॑ಹತ್ಯಾ॒ ಉಸ್ರಾ॒ವೇತ॑-ನ್ಧೂರ್ಷಾಹಾ॒ವಿತ್ಯಾ॑ಹ ಯಥಾಯ॒ಜುರೇ॒ವೈತ-ತ್ಪ್ರ ಚ್ಯ॑ವಸ್ವ ಭುವಸ್ಪತ॒ ಇತ್ಯಾ॑ಹ ಭೂ॒ತಾನಾ॒ಗ್॒ ಹ್ಯೇ॑ [ಭೂ॒ತಾನಾ॒ಗ್ಂ॒ ಹಿ, ಏ॒ಷ ಪತಿ॒-ರ್ವಿಶ್ವಾ᳚ನ್ಯ॒ಭಿ] 74

-ಷ ಪತಿ॒-ರ್ವಿಶ್ವಾ᳚ನ್ಯ॒ಭಿ ಧಾಮಾ॒ನೀತ್ಯಾ॑ಹ॒ ವಿಶ್ವಾ॑ನಿ॒ ಹ್ಯೇ᳚(1॒) ಷೋ॑-ಽಭಿ ಧಾಮಾ॑ನಿ ಪ್ರ॒ಚ್ಯವ॑ತೇ॒ ಮಾ ತ್ವಾ॑ ಪರಿಪ॒ರೀ ವಿ॑ದ॒ದಿತ್ಯಾ॑ಹ॒ ಯದೇ॒ವಾದ-ಸ್ಸೋಮ॑ಮಾಹ್ರಿ॒ಯಮಾ॑ಣ-ಙ್ಗನ್ಧ॒ರ್ವೋ ವಿ॒ಶ್ವಾವ॑ಸುಃ ಪ॒ರ್ಯಮು॑ಷ್ಣಾ॒-ತ್ತಸ್ಮಾ॑-ದೇ॒ವಮಾ॒ಹಾಪ॑ರಿಮೋಷಾಯ॒ ಯಜ॑ಮಾನಸ್ಯ ಸ್ವ॒ಸ್ತ್ಯಯ॑ನ್ಯ॒ಸೀತ್ಯಾ॑ಹ॒ ಯಜ॑ಮಾನಸ್ಯೈ॒ವೈಷ ಯ॒ಜ್ಞಸ್ಯಾ᳚ನ್ವಾರ॒ಭೋಂ ಽನ॑ವಚ್ಛಿತ್ತ್ಯೈ॒ ವರು॑ಣೋ॒ ವಾ ಏ॒ಷ ಯಜ॑ಮಾನಮ॒ಭ್ಯೈತಿ॒ ಯ- [ಯತ್, ಕ್ರೀ॒ತ-ಸ್ಸೋಮ॒ ಉಪ॑ನದ್ಧೋ॒ ನಮೋ॑] 75

-ತ್ಕ್ರೀ॒ತ-ಸ್ಸೋಮ॒ ಉಪ॑ನದ್ಧೋ॒ ನಮೋ॑ ಮಿ॒ತ್ರಸ್ಯ॒ ವರು॑ಣಸ್ಯ॒ ಚಕ್ಷ॑ಸ॒ ಇತ್ಯಾ॑ಹ॒ ಶಾನ್ತ್ಯಾ॒ ಆ ಸೋಮಂ॒-ವಁಹ॑ನ್ತ್ಯ॒ಗ್ನಿನಾ॒ ಪ್ರತಿ॑ ತಿಷ್ಠತೇ॒ ತೌ ಸ॒ಭಂವಁ॑ನ್ತೌ॒ ಯಜ॑ಮಾನಮ॒ಭಿ ಸ-ಮ್ಭ॑ವತಃ ಪು॒ರಾ ಖಲು॒ ವಾವೈಷ ಮೇಧಾ॑ಯಾ॒-ಽಽತ್ಮಾನ॑ಮಾ॒ರಭ್ಯ॑ ಚರತಿ॒ ಯೋ ದೀ᳚ಕ್ಷಿ॒ತೋ ಯದ॑ಗ್ನೀಷೋ॒ಮೀಯ॑-ಮ್ಪ॒ಶುಮಾ॒ಲಭ॑ತ ಆತ್ಮನಿ॒ಷ್ಕ್ರಯ॑ಣ ಏ॒ವಾಸ್ಯ॒ ಸ ತಸ್ಮಾ॒-ತ್ತಸ್ಯ॒ ನಾ-ಽಽಶ್ಯ॑-ಮ್ಪುರುಷನಿ॒ಷ್ಕ್ರಯ॑ಣ ಇವ॒ ಹ್ಯಥೋ॒ ಖಲ್ವಾ॑ಹು ರ॒ಗ್ನೀಷೋಮಾ᳚ಭ್ಯಾಂ॒-ವಾಁ ಇನ್ದ್ರೋ॑ ವೃ॒ತ್ರಮ॑ಹ॒ನ್ನಿತಿ॒ ಯದ॑ಗ್ನೀಷೋ॒ಮೀಯ॑-ಮ್ಪ॒ಶುಮಾ॒ಲಭ॑ತ॒ ವಾರ್ತ್ರ॑ಘ್ನ ಏ॒ವಾಸ್ಯ॒ ಸ ತಸ್ಮಾ᳚-ದ್ವಾ॒ಶ್ಯಂ॑-ವಾಁರು॒ಣ್ಯರ್ಚಾ ಪರಿ॑ ಚರತಿ॒ ಸ್ವಯೈ॒ವೈನ॑-ನ್ದೇ॒ವತ॑ಯಾ॒ ಪರಿ॑ ಚರತಿ ॥ 76 ॥

(ಅ॒ನ್ವಾ॒ರಭ್ಯೋಥ್ - ಸರ್ವಾ॑ಭಿರೇ॒ವ - ಸೂರ್ಯಂ॑ - ಭೂ॒ತಾನಾ॒ಗ್॒ ಹ್ಯೇ॑ - ತಿ॒ ಯ - ದಾ॑ಹುಃ - ಸ॒ಪ್ತವಿಗ್ಂ॑ಶತಿಶ್ಚ) (ಅ. 11)

(ಪ್ರಾ॒ಚೀನ॑ವಗ್ಂಶಂ॒ -ಁಯಾವ॑ನ್ತ - ಋಖ್ಸಾ॒ಮೇ - ವಾಗ್ವೈ ದೇ॒ವೇಭ್ಯೋ॑ - ದೇ॒ವಾ ವೈ ದೇ॑ವ॒ಯಜ॑ನಂ - ಕ॒ದ್ರೂಶ್ಚ॒ - ತದ್ಧಿರ॑ಣ್ಯ॒ಗ್ಂ॒ - ಷಟ್ ಪ॒ದಾನಿ॑ - ಬ್ರಹ್ಮವಾ॒ದಿನೋ॑ ವಿ॒ಚಿತ್ಯೋ॒ - ಯ-ತ್ಕ॒ಲಯಾ॑ ತೇ - ವಾರು॒ಣೋ ವೈ ಕ್ರೀ॒ತ-ಸ್ಸೋಮ॒ - ಏಕಾ॑ದಶ)

(ಪ್ರಾ॒ಚೀನ॑ವಗ್ಂಶ॒ಗ್ಗ್॒ - ಸ್ವಾಹೇತ್ಯಾ॑ಹ॒ - ಯೇ᳚-ಽನ್ತ-ಶ್ಶ॒ರಾ - ಹ್ಯೇ॑ಷ ಸಂ - ತಪ॑ಸಾ ಚ॒ - ಯತ್ಕ॑ರ್ಣಗೃಹೀ॒ - ತೇತಿ॑ ಲೋಮ॒ತೋ - ವಾ॑ರು॒ಣಃ - ಷಟ್-ಥ್ಸ॑ಪ್ತತಿಃ )

(ಪ್ರಾ॒ಚೀನ॑ವಗ್ಂ ಶ॒, ಮ್ಪರಿ॑ ಚರತಿ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾಂ ಷಷ್ಠಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyāṃ ṣaṣṭhakāṇḍe prathamaḥ praśnaḥ - somamantrabrāhmaṇanirūpaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

prā॒cīna̭vagṃśa-ṅkaroti devamanu॒ṣyā diśo॒ vya̭bhajanta॒ prācī᳚-nde॒vā da̭kṣi॒ṇā pi॒taraḥ̭ pra॒tīcī᳚-mmanu॒ṣyā̭ udī̭cīgṃ ru॒drā ya-tprā॒cīna̭vagṃśa-ṅka॒roti̭ devalo॒kame॒va ta-dyaja̭māna u॒pāva̭rtate॒ pari̭ śrayatya॒ntarhi̭to॒hi dḙvalo॒ko ma̭nuṣyalo॒kā-nnāsmāllo॒kā-thsvḙtavyami॒vetyā̭huḥ॒ ko hi ta-dveda॒ ya-dya॒muṣmi̭~llo॒ke-'sti̭ vā॒ na veti̭ di॒kṣva̭tī kā॒śān ka̭ro- [di॒kṣva̭tī kā॒śān ka̭roti, u॒bhayo᳚] 1

-tyu॒bhayo᳚-rlo॒kayo̭-ra॒bhiji̭tyai keśaśma॒śru va̭pate na॒khāni॒ ni kṛ̭ntate mṛ॒tā vā e॒ṣā tvaga̭me॒ddhyā ya-tkḙśaśma॒śru mṛ॒tāme॒va tvaca̭ma-me॒ddhyāma̭pa॒hatya̭ ya॒jñiyo̭ bhū॒tvā medha॒mupai॒tyaṅgi̭rasa-ssuva॒rgaṃ-lo~॒kaṃ-ya~nto॒-'phsu dī᳚kṣāta॒pasī॒ prāvḙśayanna॒phsu snā̭ti sā॒kṣāde॒va dī᳚kṣāta॒pasī॒ ava̭ rundhe tī॒rthe snā̭ti tī॒rthe hi te tā-mprāvḙśaya-ntī॒rthe snā̭ti [ ] 2

tī॒rthame॒va sa̭mā॒nānā᳚-mbhavatya॒po᳚-'śñātyantara॒ta e॒va meddhyo̭ bhavati॒ vāsa̭sā dīkṣayati sau॒myaṃ-vai~ kṣauma̭-nde॒vata̭yā॒ soma̭me॒ṣa de॒vatā॒mupai̭ti॒ yo dīkṣa̭te॒ soma̭sya ta॒nūra̭si ta॒nuva̭-mme pā॒hītyā̭ha॒ svāme॒va de॒vatā॒mupai॒tyatho̭ ā॒śiṣa̭me॒vaitāmā śā᳚ste॒ 'gnestṷ̄ṣā॒dhānaṃ̭-vā~॒yorvā̭ta॒pāna̭-mpitṛ॒ṇā-nnī॒vi-roṣa̭dhīnā-mpraghā॒ta [-roṣa̭dhīnā-mpraghā॒taḥ, ā॒di॒tyānā᳚-mprācīnatā॒no] 3

ā̭di॒tyānā᳚-mprācīnatā॒no viśvḙṣā-nde॒vānā॒motu॒ rnakṣa̭trāṇā-matīkā॒śāstadvā e॒ta-thsa̭rva deva॒tyaṃ̭-ya~-dvāso॒ ya-dvāsa̭sā dī॒kṣaya̭ti॒ sarvā̭bhire॒vaina̭-nde॒vatā̭bhi-rdīkṣayati ba॒hiḥprā̭ṇo॒ vai ma̭nu॒ṣya̭sta-syāśa̭na-mprā॒ṇo᳚-'śñāti॒ saprā̭ṇa e॒va dī᳚kṣata॒ āśi̭to bhavati॒ yāvā̭ne॒vāsya̭ prā॒ṇastena̭ sa॒ha medha॒mupai̭ti ghṛ॒ta-nde॒vānā॒-mmastṷ pitṛ॒ṇā-nniṣpa̭kva-mmanu॒ṣyā̭ṇā॒-ntadvā [-mmanu॒ṣyā̭ṇā॒-ntadvai, e॒ta-thsa̭rvadeva॒tyaṃ̭] 4

e॒ta-thsa̭rvadeva॒tyaṃ̭-ya~nnava̭nītaṃ॒-ya~nnava̭nītenābhya॒ṅkte sarvā̭ e॒va de॒vatāḥ᳚ prīṇāti॒ pracyṷto॒ vā e॒ṣo᳚-'smāllo॒kādaga̭to devalo॒kaṃ-yo~ dī᳚kṣi॒to᳚ 'nta॒reva॒ nava̭nīta॒-ntasmā॒-nnava̭nītenā॒bhya̭ṅkte 'nulo॒maṃ-ya~jṷṣā॒ vyāvṛ̭ttyā॒ indro̭ vṛ॒trama̭ha॒-ntasya̭ ka॒nīni̭kā॒ parā̭-'pata॒-ttadāñja̭nama-bhava॒dyadā॒ṅkte cakṣṷre॒va bhrātṛ̭vyasya vṛṅkte॒ dakṣi̭ṇa॒-mpūrva॒mā-'ṅktḙ [dakṣi̭ṇa॒-mpūrva॒mā-'ṅkte᳚, sa॒vyagṃ hi] 5

sa॒vyagṃ hi pūrva̭-mmanu॒ṣyā̭ ā॒ñjate॒ na ni dhā̭vate॒ nīva॒ hi ma̭nu॒ṣyā̭ dhāva̭nte॒ pañca॒ kṛtva॒ ā-'ṅkte॒ pañcā᳚kṣarā pa॒ṅktiḥ pāṅkto̭ ya॒jño ya॒jñame॒vāva̭ rundhe॒ pari̭mita॒māṅkte 'pa̭rimita॒gṃ॒ hi ma̭nu॒ṣyā̭ ā॒ñjate॒ satṷ̄la॒yā-''ṅkte- 'pa̭tūlayā॒ hi ma̭nu॒ṣyā̭ ā॒ñjate॒ vyāvṛ̭ttyai॒ yadapa̭tūlayāñjī॒ta vajra̭ iva syā॒-thsatṷ̄la॒yā-''ṅktḙ mitra॒tvāye- [mitra॒tvāya̭, indro̭] 6

-ndro̭ vṛ॒trama̭ha॒nthso᳚-'(1॒)po᳚-'(1॒)bhya̭-mriyata॒ tāsāṃ॒-ya~nmeddhyaṃ̭-ya~॒jñiya॒gṃ॒ sadḙva॒māsī॒-ttada॒poda̭krāma॒-tte da॒rbhā a̭bhava॒n॒. yadda̭rbhapuñjī॒laiḥ pa॒vaya̭ti॒ yā e॒va meddhyā̭ ya॒jñiyā॒-ssadḙvā॒ āpa॒stābhi̭re॒vaina̭-mpavayati॒ dvābhyā᳚-mpavayatya-horā॒trābhyā̭me॒vaina̭-mpavayati tri॒bhiḥ pa̭vayati॒ traya̭ i॒me lo॒kā e॒bhire॒vainaṃ̭-lo~॒kaiḥ pa̭vayati pa॒ñcabhiḥ̭ [pa॒ñcabhiḥ̭, pa॒va॒ya॒ti॒ pañcā᳚kṣarā] 7

pavayati॒ pañcā᳚kṣarā pa॒ṅktiḥ pāṅkto̭ ya॒jño ya॒jñāyai॒vaina̭-mpavayati ṣa॒ḍbhiḥ pa̭vayati॒ ṣaḍvā ṛ॒tava̭ ṛ॒tubhi̭re॒vaina̭-mpavayati sa॒ptabhiḥ̭ pavayati sa॒pta chandāgṃ̭si॒ chando̭bhire॒vaina̭-mpavayati na॒vabhiḥ̭ pavayati॒ nava॒ vai purṷṣe prā॒ṇā-ssaprā̭ṇame॒vaina̭-mpavaya॒tyeka̭vigṃśatyā pavayati॒ daśa॒ hastyā̭ a॒ṅgula̭yo॒ daśa॒ padyā̭ ā॒tmaika̭vi॒gṃ॒śo yāvā̭ne॒va purṷṣa॒sta-mapa̭rivarga- [purṷṣa॒sta-mapa̭rivargam, pa॒va॒ya॒ti॒ ci॒tpati̭stvā] 8

-mpavayati ci॒tpati̭stvā punā॒tvityā̭ha॒ mano॒ vai ci॒tpati॒rmana̭sai॒vaina̭-mpavayati vā॒kpati̭stvā punā॒tvityā̭ha vā॒caivaina̭-mpavayati de॒vastvā̭ savi॒tā pṷnā॒tvityā̭ha savi॒tṛpra̭sūta e॒vaina̭-mpavayati॒ tasya̭ te pavitrapate pa॒vitrḙṇa॒ yasmai॒ ka-mpu॒ne taccha̭keya॒mityā̭-hā॒-''śiṣa̭me॒vaitāmā śā᳚ste || 9 ||

(a॒tī॒kā॒śān ka̭ro॒tya - vḙśaya-nti॒rtha snā̭ti - praghā॒to - ma̭nu॒ṣyā̭ṇā॒-ntadvā - ā-'ṅktḙ - mitra॒tvāya̭ - pa॒ñcabhi॒ - rapa̭rivarga - ma॒ṣṭāca̭tvārigṃśacca) (a. 1)

yāva̭nto॒ vai de॒vā ya॒jñāyāpṷnata॒ ta e॒vābha̭va॒n॒. ya e॒vaṃ-vi~॒dvān. ya॒jñāya̭ punī॒te bhava̭tye॒va ba॒hiḥ pa̭vayi॒tvā-'ntaḥ pra pā̭dayati manuṣyalo॒ka e॒vaina̭-mpavayi॒tvā pū॒ta-ndḙvalo॒ka-mpra ṇa̭ya॒tyadī᳚kṣita॒ eka॒yā-''hu॒tyetyā̭hu-ssru॒veṇa॒ cata̭sro juhoti dīkṣita॒tvāya̭ sru॒cā pa̭ñca॒mī-mpañcā᳚kṣarā pa॒ṅktiḥ pāṅkto̭ ya॒jño ya॒jñame॒vāva̭ rundha॒ ākū᳚tyai pra॒yuje॒-'gnaye॒ [pra॒yuje॒-'gnaye᳚, svāhetyā॒hā] 10

svāhetyā॒hā-''kū᳚tyā॒ hi purṷṣo ya॒jñama॒bhi pra̭yu॒ṅkte yaje॒yeti̭ me॒dhāyai॒ mana̭se॒-'gnaye॒ svāhetyā̭ha me॒dhayā॒ hi mana̭sā॒ purṷṣo ya॒jñama̭bhi॒gaccha̭ti॒ sara̭svatyai pū॒ṣṇe᳚-'gnaye॒ svāhetyā̭ha॒ vāgvai sara̭svatī pṛthi॒vī pū॒ṣā vā॒caiva pṛ̭thi॒vyā ya॒jña-mprayṷṅkta॒ āpo̭ devī-rbṛhatī-rviśvaśambhuva॒ ityā̭ha॒ yā vai varṣyā॒stā [yā vai varṣyā॒stāḥ, āpo̭ de॒vī-rbṛ̭ha॒tī-] 11

āpo̭ de॒vī-rbṛ̭ha॒tī-rvi॒śvaśa̭bhuṃvo~॒ yade॒ta-dyaju॒rna brū॒yā-ddi॒vyā āpo-'śā᳚ntā i॒maṃ-lo~॒kamā ga̭ccheyu॒rāpo̭ devī-rbṛhatī-rviśvaśambhuva॒ ityā̭hā॒smā e॒vainā̭ lo॒kāya̭ śamayati॒ tasmā᳚cchā॒ntā i॒maṃ-lo~॒kamā ga̭cchanti॒ dyāvā̭pṛthi॒vī ityā̭ha॒ dyāvā̭pṛthi॒vyorhi ya॒jña u॒rva̭ntari̭kṣa॒-mityā̭hā॒ntari̭kṣe॒ hi ya॒jño bṛha॒spati̭rno ha॒viṣā̭ vṛdhā॒- [ha॒viṣā̭ vṛdhātu, ityā̭ha॒ brahma॒ vai] 12

-tvityā̭ha॒ brahma॒ vai de॒vānā॒-mbṛha॒spati॒-rbrahma̭ṇai॒vāsmai̭ ya॒jñamava̭ rundhe॒ yad- brū॒yā-dvi̭dhe॒riti̭ yajñasthā॒ṇumṛ̭cche-dvṛdhā॒tvityā̭ha yajñasthā॒ṇume॒va pari̭ vṛṇakti pra॒jāpa̭ti-rya॒jñama̭sṛjata॒ so᳚-'smā-thsṛ॒ṣṭaḥ parāṃ̭ai॒-thsa pra yaju॒ravlī̭nā॒-tpra sāma॒ tamṛguda̭yaccha॒-dyadṛgu॒daya̭ccha॒-ttadau᳚-dgraha॒ṇasyau᳚-dgrahaṇa॒tva mṛ॒cā [mṛ॒cā, ju॒ho॒ti॒ ya॒jñasyodya̭tyā] 13

jṷhoti ya॒jñasyodya̭tyā anu॒ṣṭup-chanda̭sā॒-muda̭yaccha॒dityā̭-hu॒stasmā̭danu॒ṣṭubhā̭ juhoti ya॒jñasyodya̭tyai॒ dvāda̭śa vāthsaba॒ndhānyuda̭yaccha॒-nnityā̭hu॒-stasmā᳚d- dvāda॒śabhi̭-rvāthsabandha॒vido̭ dīkṣayanti॒ sā vā e॒ṣarga̭nu॒ṣṭug-vāga̭nu॒ṣṭug-yade॒taya॒rcā dī॒kṣaya̭ti vā॒caivaina॒gṃ॒ sarva̭yā dīkṣayati॒ viśvḙ de॒vasya̭ ne॒turityā̭ha sāvi॒tryḙtena॒ marto̭ vṛṇīta sa॒khya- [sa॒khyam, ityā̭ha] 14

-mityā̭ha pitṛdeva॒tyai̭tena॒ viśvḙ rā॒ya i̭ṣuddhya॒sītyā̭ha vaiśvade॒vyḙtena̭ dyu॒mnaṃ-vṛ~̭ṇīta pu॒ṣyasa॒ ityā̭ha pau॒ṣṇyḙtena॒ sā vā e॒ṣarkhsa̭rvadeva॒tyā̭ yade॒taya॒rcā dī॒kṣaya̭ti॒ sarvā̭bhire॒vaina̭-nde॒vatā̭bhirdīkṣayati sa॒ptākṣa̭ra-mpratha॒ma-mpa॒dama॒ṣṭākṣa̭rāṇi॒ trīṇi॒ yāni॒ trīṇi॒ tānya॒ṣṭāvupa̭ yanti॒ yāni̭ ca॒tvāri॒ tānya॒ṣṭau yada॒ṣṭākṣa̭rā॒ tena̭ [tena̭, gā॒ya॒trī yadekā̭daśākṣarā॒] 15

gāya॒trī yadekā̭daśākṣarā॒ tena̭ tri॒ṣṭugya-ddvāda̭śākṣarā॒ tena॒ jaga̭tī॒ sā vā e॒ṣarkhsarvā̭ṇi॒ chandāgṃ̭si॒ yade॒taya॒rcā dī॒kṣaya̭ti॒ sarvḙbhire॒vaina॒-ñchando̭bhirdīkṣayati sa॒ptākṣa̭ra-mpratha॒ma-mpa॒dagṃ sa॒ptapa̭dā॒ śakva̭rī pa॒śava॒-śśakva̭rī pa॒śūne॒vāva̭ rundha॒ eka̭smāda॒kṣarā॒danā᳚pta-mpratha॒ma-mpa॒da-ntasmā॒-dya-dvā॒co-'nā᳚pta॒-ntanma̭nu॒ṣyā̭ upa̭ jīvanti pū॒rṇayā̭ juhoti pū॒rṇa i̭va॒ hi pra॒jāpa̭tiḥ pra॒jāpa̭te॒rāptyai॒ nyṷ̄nayā juhoti॒ nyṷ̄nā॒ddhi pra॒jāpa̭tiḥ pra॒jā asṛ̭jata pra॒jānā॒gṃ॒ sṛṣṭyai᳚ || 16 ||

(a॒gnaye॒ - tā - vṛ̭dhātvṛ॒ - cā - sa॒khyaṃ - tena̭ - juhoti॒ - pañca̭daśa ca) (a. 2)

ṛ॒-khsā॒me vai de॒vebhyo̭ ya॒jñāyā-'ti̭ṣṭhamāne॒ kṛṣṇo̭ rū॒pa-ṅkṛ॒tvā- 'pa॒kramyā̭tiṣṭhatā॒-ntḙ-'manyanta॒ yaṃ-vā~ i॒me ṷpāva॒rthsyata॒-ssa i॒da-mbha̭viṣya॒tīti॒ te upā̭mantrayanta॒ te a̭horā॒trayo᳚-rmahi॒māna̭-mapani॒dhāya̭ de॒vānu॒pāva̭rtetāme॒ṣa vā ṛ॒co varṇo॒ yacchu॒kla-ṅkṛ̭ṣṇāji॒nasyai॒ṣa sāmno॒ ya-tkṛ॒ṣṇamṛ̭khsā॒mayo॒-śśilpe᳚ stha॒ ityā̭harkhsā॒me e॒vā-'va̭ rundha e॒ṣa [e॒vā-'va̭ rundha e॒ṣaḥ, vā ahno॒] 17

vā ahno॒ varṇo॒ yacchu॒kla-ṅkṛ̭ṣṇāji॒nasyai॒ṣa rātri̭yā॒ ya-tkṛ॒ṣṇaṃ-ya~de॒vaina̭yo॒statra॒ nya̭kta॒-ntade॒vāva̭ rundhe kṛṣṇāji॒nena̭ dīkṣayati॒ brahma̭ṇo॒ vā e॒ta-drū॒paṃ-ya~-tkṛ̭ṣṇāji॒na-mbrahma̭ṇai॒vaina̭-ndīkṣayatī॒mā-ndhiya॒gṃ॒ śikṣa̭māṇasya de॒vetyā̭ha yathāya॒jure॒vaita-dgarbho॒ vā e॒ṣa ya-ddī᳚kṣi॒ta ulbaṃ॒-vā~saḥ॒ prorṇṷte॒ tasmā॒- [tasmā᳚t, garbhāḥ॒ prāvṛ̭tā] 18

-dgarbhāḥ॒ prāvṛ̭tā jāyante॒ na pu॒rā soma̭sya kra॒yādapo᳚rṇvīta॒ ya-tpu॒rā soma̭sya kra॒yāda̭porṇvī॒ta garbhāḥ᳚ pra॒jānā᳚-mparā॒pātṷkā-ssyuḥ krī॒te some-'po᳚rṇute॒ jāya̭ta e॒va tadatho॒ yathā॒ vasī̭yāgṃ sa-mpratyaporṇu॒te tā॒dṛge॒va tadaṅgi̭rasa-ssuva॒rgaṃ-lo~॒kaṃ-ya~nta॒ ūrjaṃ॒-vya~̭bhajanta॒ tato॒ yada॒tyaśi̭ṣyata॒ te śa॒rā a̭bhava॒nnūrgvai śa॒rā yaccha̭ra॒mayī॒ [yaccha̭ra॒mayī᳚, mekha̭lā॒] 19

mekha̭lā॒ bhava॒tyūrja̭me॒vāva̭ rundhe maddhya॒ta-ssanna̭hyati maddhya॒ta e॒vāsmā॒ ūrja̭-ndadhāti॒ tasmā᳚nmaddhya॒ta ū॒rjā bhṷñjata ū॒rdhvaṃ-vai~ purṷṣasya॒ nābhyai॒ meddhya̭-mavā॒cīna̭-mame॒ddhyaṃ-ya~nma̭ddhya॒ta-ssa॒naṃhya̭ti॒ meddhya̭-ñcai॒vāsyā̭me॒ddhya-ñca॒ vyāva̭rtaya॒tīndro̭ vṛ॒trāya॒ vajra॒-mprāha̭ra॒-thsa tre॒dhā vya̭bhava॒-thsphyastṛtī̭ya॒gṃ॒ ratha॒stṛtī̭yaṃ॒-yū~pa॒stṛtī̭yaṃ॒- [-yūpa॒stṛtī̭ya॒m, ye᳚-'nta-śśa॒rā] 20

-~ye᳚-'nta-śśa॒rā aśī᳚ryanta॒ te śa॒rā a̭bhava॒-ntaccha॒rāṇāgṃ̭ śara॒tvaṃ-va~jro॒ vai śa॒rāḥ, kṣu-tkhalu॒ vai ma̭nu॒ṣya̭sya॒ bhrātṛ̭vyo॒ yaccha̭ra॒mayī॒ mekha̭lā॒ bhava̭ti॒ vajrḙṇai॒va sā॒kṣā-tkṣudha॒-mbhrātṛ̭vya-mmaddhya॒to-'pa̭ hate tri॒vṛ-dbha̭vati tri॒vṛdvai prā॒ṇastri॒vṛta̭me॒va prā॒ṇa-mma̭ddhya॒to yaja̭māne dadhāti pṛ॒thvī bha̭vati॒ rajjṷ̄nāṃ॒-vyā~vṛ̭tyai॒ mekha̭layā॒ yaja̭māna-ndīkṣayati॒ yoktrḙṇa॒ patnī᳚-mmithuna॒tvāya̭ [ ] 21

ya॒jño dakṣi̭ṇāma॒bhya̭ddhyāya॒-ttāgṃ sama̭bhava॒-ttadindro̭-'cāya॒-thso̭-'manyata॒ yo vā i॒to ja̭ni॒ṣyate॒ sa i॒da-mbha̭viṣya॒tīti॒ tā-mprāvi̭śa॒-ttasyā॒ indra̭ e॒vājā̭yata॒ so̭-'manyata॒ yo vai madi॒to 'pa̭ro jani॒ṣyate॒ sa i॒da-mbha̭viṣya॒tīti॒ tasyā̭ anu॒mṛśya॒ yoni॒mā-'cchi̭na॒-thsā sū॒tava̭śā-'bhava॒-tta-thsū॒tava̭śāyai॒ janma॒ [janma̭, tāgṃ haste॒ nya̭veṣṭayata॒] 22

tāgṃ haste॒ nya̭veṣṭayata॒ tā-mmṛ॒geṣu॒ nya̭dadhā॒-thsā kṛ̭ṣṇaviṣā॒ṇā- 'bha̭va॒dindra̭sya॒ yoni̭rasi॒ mā mā̭ higṃsī॒riti̭ kṛṣṇaviṣā॒ṇā-mpra ya̭cchati॒ sayo̭nime॒va ya॒jña-ṅka̭roti॒ sayo̭ni॒-ndakṣi̭ṇā॒gṃ॒ sayo̭ni॒mindragṃ̭ sayoni॒tvāya̭ kṛ॒ṣyai tvā̭ susa॒syāyā॒ ityā̭ha॒ tasmā̭dakṛṣṭapa॒cyā oṣa̭dhayaḥ pacyante supippa॒lābhya॒-stvauṣa̭dhībhya॒ ityā̭ha॒ tasmā॒doṣa̭dhayaḥ॒ phala̭-ṅgṛhṇanti॒ yaddhastḙna [yaddhastḙna, ka॒ṇḍū॒yeta̭] 23

kaṇḍū॒yeta̭ pāmana॒-mbhāvṷkāḥ pra॒jā-ssyu॒rya-thsmayḙta nagna॒-mbhāvṷkāḥ kṛṣṇaviṣā॒ṇayā̭ kaṇḍūyate-'pi॒gṛhya̭ smayate pra॒jānā᳚-ṅgopī॒thāya॒ na pu॒rā dakṣi̭ṇābhyo॒ netoḥ᳚ kṛṣṇaviṣā॒ṇāmava̭ cṛte॒dya-tpu॒rā dakṣi̭ṇābhyo॒ netoḥ᳚ kṛṣṇaviṣā॒ṇā-ma̭vacṛ॒te-dyoniḥ̭ pra॒jānā᳚-mparā॒pātṷkā syānnī॒tāsu॒ dakṣi̭ṇāsu॒ cātvā̭le kṛṣṇaviṣā॒ṇā-mprāsya̭ti॒ yoni॒rvai ya॒jñasya॒ cātvā̭laṃ॒-yo~niḥ̭ kṛṣṇaviṣā॒ṇā yonā̭ve॒va yoni̭-ndadhāti ya॒jñasya̭ sayoni॒tvāya̭ || 24 ||

(ru॒ndha॒ e॒ṣa - tasmā᳚ - cchara॒mayī॒ - yūpa॒stṛtī̭yaṃ - mithuna॒tvāya॒ - janma॒ - hastḙnā॒ - 'ṣṭāca̭tvārigṃśacca) (a. 3)

vāgvai de॒vebhyo 'pā᳚krāma-dya॒jñāyāti̭ṣṭhamānā॒ sā vana॒spatī॒-nprāvi̭śa॒-thsaiṣā vāgvana॒spati̭ṣu vadati॒ yā dṷndu॒bhau yā tūṇa̭ve॒ yā vīṇā̭yāṃ॒-ya~-ddī᳚kṣitada॒ṇḍa-mpra॒yaccha̭ti॒ vāca̭me॒vāva̭ rundha॒ audṷbaṃro bhava॒tyūrgvā ṷdu॒baṃra॒ ūrja̭me॒vāva̭ rundhe॒ mukhḙna॒ sammi̭to bhavati mukha॒ta e॒vāsmā॒ ūrja̭-ndadhāti॒ tasmā᳚-nmukha॒ta ū॒rjā bhṷñjate [ ] 25

krī॒te somḙ maitrāvaru॒ṇāya̭ da॒ṇḍa-mpra ya̭cchati maitrāvaru॒ṇo hi pu॒rastā̭-dṛ॒tvigbhyo॒ vācaṃ̭-vi~॒bhaja̭ti॒ tāmṛ॒tvijo॒ yaja̭māne॒ prati̭ ṣṭhāpayanti॒ svāhā̭ ya॒jña-mmana॒setyā̭ha॒ mana̭sā॒ hi purṷṣo ya॒jñama̭bhi॒gaccha̭ti॒ svāhā॒ dyāvā̭pṛthi॒vībhyā॒ -mityā̭ha॒ dyāvā̭pṛthi॒vyorhi ya॒jña-ssvāho॒rora॒-ntari̭kṣā॒ -dityā̭hā॒ntari̭kṣe॒ hi ya॒jña-ssvāhā̭ ya॒jñaṃ-vā~tā॒dā ra̭bha॒ ityā̭hā॒-'yaṃ- [ityā̭hā॒-'yam, vāva yaḥ pava̭te॒] 26

-~vāva yaḥ pava̭te॒ sa ya॒jñastame॒va sā॒kṣādā ra̭bhate mu॒ṣṭī ka̭roti॒ vācaṃ̭-ya~cchati ya॒jñasya॒ dhṛtyā॒ adī᳚kṣiṣṭā॒ya-mbrā᳚hma॒ṇa iti॒ trirṷpā॒g॒śvā̭ha de॒vebhya̭ e॒vaina॒-mprā-''ha॒ triru॒ccairu॒bhaye᳚bhya e॒vaina̭-ndevamanu॒ṣyebhyaḥ॒ prā-''ha॒ na pu॒rā nakṣa̭trebhyo॒ vācaṃ॒-vi~ sṛ̭je॒-dyatpu॒rā nakṣa̭trebhyo॒ vācaṃ̭-vi~sṛ॒je-dya॒jñaṃ-vi~cchi̭ndyā॒- [-~vicchi̭ndyāt, udi̭teṣu॒] 27

-dudi̭teṣu॒ nakṣa̭treṣu vra॒ta-ṅkṛ̭ṇu॒teti॒ vācaṃ॒-vi~ sṛ̭jati ya॒jñavra̭to॒ vai dī᳚kṣi॒to ya॒jñame॒vābhi vācaṃ॒-vi~ sṛ̭jati॒ yadi̭ visṛ॒je-dvai᳚ṣṇa॒vīmṛca॒manṷ brūyā-dya॒jño vai viṣṇṷrya॒jñenai॒va ya॒jñagṃ sa-nta̭noti॒ daivī॒-ndhiya̭-mmanāmaha॒ ityā̭ha ya॒jñame॒va tanmra̭dayati supā॒rā no̭ asa॒dvaśa॒ ityā̭ha॒ vyṷṣṭime॒vāva̭ rundhe [rundhe, bra॒hma॒vā॒dino̭ vadanti] 28

brahmavā॒dino̭ vadanti hota॒vya̭-ndīkṣi॒tasya̭ gṛ॒hā(3) i na ho̭ta॒vyā(3)miti̭ ha॒virvai dī᳚kṣi॒to yajjṷhu॒yā-dyaja̭mānasyāva॒dāya̭ juhuyā॒-dyanna jṷhu॒yā-dya̭jñapa॒rura॒ntari̭yā॒dye de॒vā mano̭jātā mano॒yuja॒ ityā̭ha prā॒ṇā vai de॒vā mano̭jātā mano॒yuja॒steṣve॒va pa॒rokṣa̭-ñjuhoti॒ tanneva̭ hu॒ta-nnevāhṷtagg sva॒pantaṃ॒-vai~ dī᳚kṣi॒tagṃ rakṣāgṃ̭si jighāgṃsantya॒gniḥ - [jighāgṃsantya॒gniḥ, khalu॒ vai] 29

khalu॒ vai ra̭kṣo॒hā-'gne॒ tvagṃ su jā̭gṛhi va॒yagṃ su ma̭ndiṣīma॒hītyā̭hā॒gni-me॒vādhi॒pā-ṅkṛ॒tvā sva̭piti॒ rakṣa̭sā॒mapa̭hatyā avra॒tyami̭va॒ vā e॒ṣa ka̭roti॒ yo dī᳚kṣi॒ta-ssvapi̭ti॒ tvama̭gne vrata॒pā a॒sītyā̭hā॒gnirvai de॒vānāṃ᳚-vra~॒tapa̭ti॒-ssa e॒vainaṃ̭-vra~॒tamā la̭bhaṃya~ti de॒va ā martye॒ṣvetyā̭ha de॒vo [de॒vaḥ, hyḙṣa sa-nmartyḙṣu॒] 30

hyḙṣa sa-nmartyḙṣu॒ tvaṃ-ya~॒jñeṣvīḍya॒ ityā̭hai॒tagṃ hi ya॒jñeṣvīḍa॒te-'pa॒ vai dī᳚kṣi॒tā-thsṷṣu॒puṣa̭ indri॒ya-nde॒vatāḥ᳚ krāmanti॒ viśvḙ de॒vā a॒bhi māmā-'va̭vṛtra॒-nnityā̭-hendri॒yeṇai॒vaina̭-nde॒vatā̭bhi॒-ssa-nna̭yati॒ yade॒ta-dyaju॒rna brū॒yā-dyāva̭ta e॒va pa॒śūna॒bhi dīkṣḙta॒ tāva̭nto-'sya pa॒śavaḥ̭ syū॒ rāsveya̭- [pa॒śavaḥ̭ syū॒ rāsveya̭t, so॒mā-'' bhūyo̭] 31

-thso॒mā-'' bhūyo̭ bha॒retyā॒hā-pa̭rimitāne॒va pa॒śūnava̭ rundhe ca॒ndrama̭si॒ mama॒ bhogā̭ya bha॒vetyā̭ha yathādeva॒tame॒vaināḥ॒ prati̭ gṛhṇāti vā॒yave᳚ tvā॒ varṷṇāya॒ tveti॒ yade॒vame॒tā nānṷdi॒śedaya̭thādevata॒-ndakṣi̭ṇā gamaye॒dā de॒vatā᳚bhyo vṛścyeta॒ yade॒vame॒tā a̭nudi॒śati̭ yathādeva॒tame॒va dakṣi̭ṇā gamayati॒ na de॒vatā᳚bhya॒ ā [na de॒vatā᳚bhya॒ ā, vṛ॒ścya॒te॒ devī̭rāpo] 32

vṛ̭ścyate॒ devī̭rāpo apā-nnapā॒dityā̭ha॒ yadvo॒ meddhyaṃ̭-ya~॒jñiya॒gṃ॒ sadḙva॒-ntadvo॒ mā-'va̭ kramiṣa॒miti॒ vāvaitadā॒hācchi̭nna॒-ntantṷ-mpṛthi॒vyā anṷ geṣa॒mityā̭ha॒ setṷme॒va kṛ॒tvā-'tyḙti || 33 ||

(bhu॒ñja॒te॒ - 'yaṃ - chi̭ndyā-d- rundhe॒ - 'gni - rā̭ha de॒va - iya̭-d- de॒vatā᳚bhya॒ ā - traya̭strigṃśacca) (a. 4)

de॒vā vai dḙva॒yaja̭na-maddhyava॒sāya॒ diśo॒ na prājā̭na॒-nte᳚(1॒)-'nyo᳚-'nyamupā̭dhāva॒-ntvayā॒ pra jā̭nāma॒ tvayeti॒ te-'di̭tyā॒gṃ॒ sama̭ddhrayanta॒ tvayā॒ pra jā̭nā॒meti॒ sā-'bra̭vī॒-dvaraṃ̭-vṛ~ṇai॒ matprā̭yaṇā e॒va vo̭ ya॒jñā madṷdayanā asa॒nniti॒ tasmā̭dādi॒tyaḥ prā̭ya॒ṇīyo̭ ya॒jñānā̭mādi॒tya ṷdaya॒nīyaḥ॒ pañca̭ de॒vatā̭ yajati॒ pañca॒ diśo̭ di॒śā-mprajñā᳚tyā॒ [di॒śā-mprajñā᳚tyai, atho॒ pañcā᳚kṣarā] 34

atho॒ pañcā᳚kṣarā pa॒ṅktiḥ pāṅkto̭ ya॒jño ya॒jñame॒vāva̭ rundhe॒ pathyāg̭ sva॒stima̭yaja॒-nprācī̭me॒va tayā॒ diśa॒-mprājā̭nanna॒gninā̭ dakṣi॒ṇā somḙna pra॒tīcīgṃ̭ savi॒trodī̭cī॒-madi̭tyo॒rdhvā-mpathyāg̭ sva॒stiṃ ~ya̭jati॒ prācī̭me॒va tayā॒ diśa॒-mpra jā̭nāti॒ pathyāg̭ sva॒stimi॒ṣṭvā-'gnīṣomaṷ yajati॒ cakṣṷṣī॒ vā e॒te ya॒jñasya॒ yada॒gnīṣomau॒ tābhyā̭me॒vānṷ paśya- [paśyati, a॒gnīṣomā̭-vi॒ṣṭvā] 35

-tya॒gnīṣomā̭-vi॒ṣṭvā sa̭vi॒tāraṃ̭-ya~jati savi॒tṛpra̭sūta e॒vānṷ paśyati savi॒tāra̭mi॒ṣṭvā-'di̭tiṃ-ya~jatī॒yaṃ-vā~ adi̭tira॒syāme॒va pra̭ti॒ṣṭhāyānṷ paśya॒tyadi̭timi॒ṣṭvā mā̭ru॒tīmṛca॒manvā̭ha ma॒ruto॒ vai de॒vānāṃ॒-vi~śo̭ devavi॒śa-ṅkhalu॒ vai kalpa̭māna-mmanuṣyavi॒śamanṷ kalpate॒ ya-nmā̭ru॒tīmṛca̭ma॒nvāha̭ vi॒śā-ṅkḷptyai᳚ brahmavā॒dino̭ vadanti prayā॒java̭dananūyā॒ja-mprā̭ya॒ṇīya̭-ṅkā॒rya̭-manūyā॒java̭- [-manūyā॒java̭t, a॒pra॒yā॒ja-mṷdaya॒nīya॒] 36

-daprayā॒ja-mṷdaya॒nīya॒-mitī॒me vai pra̭yā॒jā a॒mī a̭nūyā॒jā-ssaiva sā ya॒jñasya॒ santa̭ti॒sta-ttathā॒ na kā॒rya̭mā॒tmā vai pra̭yā॒jāḥ pra॒jā-'nṷ̄yā॒jā ya-tpra̭yā॒jā-na̭ntari॒yādā॒tmāna̭ma॒-ntari̭yā॒-dyada̭nūyā॒jā-na̭ntari॒yā-tpra॒jāma॒ntari̭yā॒dyataḥ॒ khalu॒ vai ya॒jñasya॒ vita̭tasya॒ na kri॒yate॒ tadanṷ ya॒jñaḥ parā̭ bhavati ya॒jña-mpa̭rā॒bhava̭ntaṃ॒-ya~ja̭mā॒no-'nu॒ [-~yaja̭mā॒no-'nṷ, parā̭ bhavati] 37

parā̭ bhavati prayā॒java̭de॒vā-nṷ̄yā॒java̭-tprāya॒ṇīya̭-ṅkā॒rya̭-mprayā॒java̭danūyā॒java̭-dudaya॒nīya॒-nnā-''tmāna̭manta॒reti॒ na pra॒jā-nna ya॒jñaḥ pa̭rā॒bhava̭ti॒ na yaja̭mānaḥ prāya॒ṇīya̭sya niṣkā॒sa ṷdaya॒nīya̭ma॒bhi nirva̭pati॒ saiva sā ya॒jñasya॒ santa̭ti॒ryāḥ prā̭ya॒ṇīya̭sya yā॒jyā̭ ya-ttā ṷdaya॒nīya̭sya yā॒jyāḥ᳚ ku॒ryā-tparāṃ̭a॒muṃ-lo~॒kamā ro̭he-tpra॒māyṷka-ssyā॒dyāḥ prā̭ya॒ṇīya̭sya puro-'nuvā॒kyā᳚stā ṷdaya॒nīya̭sya yā॒jyāḥ᳚ karotya॒sminne॒va lo॒ke prati̭ tiṣṭhati || 38 ||

(prajñā᳚tyai - paśyatya - nūyā॒java॒ - dyaja̭mā॒no-'nṷ - puronuvā॒kyā᳚stā - a॒ṣṭau ca̭) (a. 5)

ka॒drūśca॒ vai sṷpa॒rṇī cā᳚-''tmarū॒payo̭raspardhetā॒gṃ॒ sā ka॒drū-ssṷpa॒rṇīma̭jaya॒-thsā-'bra̭vī-ttṛ॒tīya̭syāmi॒to di॒vi soma॒stamā ha̭ra॒ tenā॒-''tmāna॒-nniṣkrī̭ṇī॒ṣvetī॒yaṃ-vai~ ka॒drūra॒sau sṷpa॒rṇī chandāgṃ̭si sauparṇe॒yā-ssābra̭vīda॒smai vai pi॒taraṷ pu॒trā-nbi̭bhṛta-stṛ॒tīya̭syāmi॒to di॒vi soma॒stamā ha̭ra॒ tenā॒-''tmāna॒-nniṣkrī̭ṇī॒ṣve- [niṣkrī̭ṇī॒ṣva, iti̭ mā] 39

-ti̭ mā ka॒drūra̭voca॒diti॒ jaga॒tyuda̭pata॒-ccatṷrdaśākṣarā sa॒tī sā 'prā᳚pya॒ nya̭vartata॒ tasyai॒ dve a॒kṣarḙ amīyetā॒gṃ॒ sā pa॒śubhi̭śca dī॒kṣayā॒ cā-'ga̭ccha॒-ttasmā॒jjaga̭tī॒ chanda̭sā-mpaśa॒vya̭tamā॒ tasmā᳚-tpaśu॒manta̭-ndī॒kṣopa̭ namati tri॒ṣṭuguda̭pata॒-ttrayo̭daśākṣarā sa॒tī sā 'prā᳚pya॒ nya̭vartata॒ tasyai॒ dve a॒kṣarḙ amīyetā॒gṃ॒ sā dakṣi̭ṇābhiśca॒ [dakṣi̭ṇābhiśca, tapa̭sā॒] 40

tapa̭sā॒ cā-'ga̭ccha॒-ttasmā᳚-ttri॒ṣṭubho̭ lo॒ke māddhya̭ndine॒ sava̭ne॒ dakṣi̭ṇā nīyanta e॒ta-tkhalu॒ vāva tapa॒ ityā̭hu॒rya-ssva-ndadā॒tīti̭ gāya॒tryuda̭pata॒ccatṷrakṣarā sa॒tya̭jayā॒ jyoti̭ṣā॒ tama̭syā a॒jā-'bhya̭rundha॒ tada॒jāyā̭ aja॒tvagṃ sā soma॒-ñcā-''ha̭racca॒tvāri̭ cā॒kṣarā̭ṇi॒ sā-'ṣṭākṣa̭rā॒ sama̭padyata brahmavā॒dino̭ vadanti॒ [brahmavā॒dino̭ vadanti, kasmā᳚-thsa॒tyā-] 41

kasmā᳚-thsa॒tyā-dgā̭ya॒trī kani̭ṣṭhā॒ chanda̭sāgṃ sa॒tī ya̭jñamu॒kha-mparī̭yā॒yeti॒ yade॒vāda-ssoma॒mā-'ha̭ra॒-ttasmā᳚-dyajñamu॒kha-mparyai॒-ttasmā᳚-tteja॒svinī̭tamā pa॒dbhyā-ndve sava̭ne sa॒magṛ̭hṇā॒-nmukhe॒naikaṃ॒-ya~nmukhḙna sa॒magṛ̭hṇā॒-ttada̭dhaya॒-ttasmā॒-ddve sava̭ne śu॒kra̭vatī prātassava॒na-ñca॒ māddhya̭ndina-ñca॒ tasmā᳚-ttṛtīya sava॒na ṛ̭jī॒ṣama॒bhi ṣṷṇvanti dhī॒tami̭va॒ hi manya̭nta [hi manya̭nte, ā॒śira॒mava̭ nayati] 42

ā॒śira॒mava̭ nayati saśukra॒tvāyātho॒ sa-mbha̭ratye॒vaina॒-ttagṃ soma̭-māhri॒yamā̭ṇa-ṅgandha॒rvo vi॒śvāva̭saḥ॒ parya̭muṣṇā॒-thsa ti॒sro rātrīḥ॒ pari̭muṣito-'vasa॒-ttasmā᳚-tti॒sro rātrīḥ᳚ krī॒ta-ssomo̭ vasati॒ te de॒vā a̭bruva॒n-thstrīkā̭mā॒ vai ga̭ndha॒rvā sstri॒yā niṣkrī̭ṇā॒meti॒ te vāca॒gg॒ striya॒meka̭hāyanī-ṅkṛ॒tvā tayā॒ nira̭krīṇa॒n-thsā ro॒hi-drū॒pa-ṅkṛ॒tvā ga̭ndha॒rvebhyo̭- [ga̭ndha॒rvebhyaḥ̭, a॒pa॒kramyā̭tiṣṭha॒-tta-dro॒hito॒] 43

-'pa॒kramyā̭tiṣṭha॒-tta-dro॒hito॒ janma॒ te de॒vā a̭bruva॒nnapa̭ yu॒ṣmadakra̭mī॒-nnāsmānu॒-pāva̭rtate॒ vi hva̭yāmahā॒ iti॒ brahma̭ gandha॒rvā ava̭da॒nnagā̭ya-nde॒vā-ssā de॒vā-ngāya̭ta u॒pāva̭rtata॒ tasmā॒-dgāya̭nta॒gg॒ striyaḥ̭ kāmayante॒ kāmṷkā ena॒gg॒ striyo̭ bhavanti॒ ya e॒vaṃ-ve~dātho॒ ya e॒vaṃ-vi~॒dvānapi॒ janyḙṣu॒ bhava̭ti॒ tebhya̭ e॒va da̭datyu॒ta ya-dba॒huta̭yā॒ [ya-dba॒huta̭yāḥ, bhava॒ntyeka̭hāyanyā] 44

bhava॒ntyeka̭hāyanyā krīṇāti vā॒caivaina॒gṃ॒ sarva̭yā krīṇāti॒ tasmā॒deka̭hāyanā manu॒ṣyā̭ vācaṃ̭-va~da॒ntyakṷ̄ṭa॒yā 'ka̭rṇa॒yā-' kā̭ṇa॒yāślo̭ṇa॒yā 'sa̭ptaśaphayā krīṇāti॒ sarva̭yai॒vaina̭-ṅkrīṇāti॒ yacchve॒tayā᳚ krīṇī॒yā-ddu॒ścarmā॒ yaja̭māna-ssyā॒dya-tkṛ॒ṣṇayā̭-'nu॒stara̭ṇī syā-tpra॒māyṷko॒ yaja̭māna-ssyā॒dya-ddvi̭rū॒payā॒ vārtra̭ghnī syā॒-thsa vā॒-'nya-ñji̭nī॒yā-ttaṃ-vā~॒-'nyo ji̭nīyādaru॒ṇayā̭ piṅgā॒kṣyā krī̭ṇātye॒tadvai soma̭sya rū॒pagg svayai॒vaina̭-nde॒vata̭yā krīṇāti || 45 ||

(niṣkrī̭ṇīṣva॒ - dakṣi̭ṇābhiśca - vadanti॒ - manya̭nte-gandha॒rvebhyo̭-ba॒huta̭yāḥ-piṅgā॒kṣyā-daśa̭ ca ) (a. 6)

taddhira̭ṇyamabhava॒-ttasmā̭da॒dbhyo hira̭ṇya-mpunanti brahmavā॒dino̭ vadanti॒ kasmā᳚-thsa॒tyāda̭na॒sthikḙna pra॒jāḥ pra॒vīya̭nte 'stha॒nvatī᳚rjāyanta॒ iti॒ yaddhira̭ṇya-ṅghṛ॒tḙ-'va॒dhāya̭ ju॒hoti॒ tasmā̭dana॒sthikḙna pra॒jāḥ pra vī̭yante 'stha॒nvatī᳚rjāyanta e॒tadvā a॒gneḥ pri॒ya-ndhāma॒ ya-dghṛ॒ta-ntejo॒ hira̭ṇyami॒yantḙ śukra ta॒nūri॒daṃ-va~rca॒ ityā̭ha॒ satḙjasame॒vaina॒gṃ॒ sata̭nu- [sata̭num, ka॒ro॒tyatho॒] 46

-ṅkaro॒tyatho॒ sa-mbha̭ratye॒vainaṃ॒-ya~daba̭ddhama-vada॒ddhyā-dgarbhāḥ᳚ pra॒jānā᳚-mparā॒pātṷkā-ssyurba॒ddhamava̭ dadhāti॒ garbhā̭ṇā॒-ndhṛtyai̭ niṣṭa॒rkya̭-mbaddhnāti pra॒jānā᳚-mpra॒jana̭nāya॒ vāgvā e॒ṣā ya-thso̭ma॒kraya̭ṇī॒ jūra॒sītyā̭ha॒ yaddhi mana̭sā॒ java̭te॒ ta-dvā॒cā vada̭ti dhṛ॒tā mana॒setyā̭ha॒ mana̭sā॒ hi vāgdhṛ॒tā juṣṭā॒ viṣṇa̭va॒ ityā̭ha [ ] 47

ya॒jño vai viṣṇṷ rya॒jñāyai॒vainā॒-ñjuṣṭā᳚-ṅkaroti॒ tasyā᳚ste sa॒tyasa̭vasaḥ prasa॒va ityā̭ha savi॒tṛ-pra̭sūtāme॒va vāca॒mava̭ rundhe॒ kāṇḍḙkāṇḍe॒ vai kri॒yamā̭ṇe ya॒jñagṃ rakṣāgṃ̭si jighāgṃsantye॒ṣa khalu॒ vā ara̭kṣohataḥ॒ panthā॒ yo᳚-'gneśca॒ sūrya̭sya ca॒ sūrya̭sya॒ cakṣu॒rā-'rṷhama॒gnera॒kṣṇaḥ ka॒nīni̭kā॒mityā̭ha॒ ya e॒vāra̭kṣohataḥ॒ panthā॒stagṃ sa॒māro̭hati॒ [sa॒māro̭hati, vāgvā e॒ṣā] 48

vāgvā e॒ṣā ya-thso̭ma॒kraya̭ṇī॒ cida̭si ma॒nā-'sītyā̭ha॒ śāstye॒vainā̭me॒ta-ttasmā᳚cchi॒ṣṭāḥ pra॒jā jā̭yante॒ cida॒sītyā̭ha॒ yaddhi mana̭sā ce॒taya̭te॒ ta-dvā॒cā vada̭ti ma॒nā-'sītyā̭ha॒ yaddhi mana̭sā-'bhi॒gaccha̭ti॒ ta-tka॒roti॒ dhīra॒sītyā̭ha॒ yaddhi mana̭sā॒ dhyāya̭ti॒ ta-dvā॒cā [ ] 49

vada̭ti॒ dakṣi̭ṇā॒-'sītyā̭ha॒ dakṣi̭ṇā॒ hyḙṣā ya॒jñiyā॒-'sītyā̭ha ya॒jñiyā̭me॒vainā᳚-ṅkaroti kṣa॒triyā॒sītyā̭ha kṣa॒triyā॒ hyḙṣā 'di̭tirasyubha॒yata̭śśī॒rṣṇītyā̭ha॒ yade॒vā-''di॒tyaḥ prā̭ya॒ṇīyo̭ ya॒jñānā̭mādi॒tya ṷdaya॒nīya॒-stasmā̭de॒vamā̭ha॒ yadaba̭ddhā॒ syādaya̭tā syā॒dya-tpa̭diba॒ddhā-'nu॒stara̭ṇī syā-tpra॒māyṷko॒ yaja̭māna-ssyā॒- [yaja̭māna-ssyāt, ya-tka̭rṇagṛhī॒tā] 50

-dya-tka̭rṇagṛhī॒tā vārtra̭ghnī syā॒-thsa vā॒-'nya-ñji̭nī॒yā-ttaṃ-vā~॒-'nyo ji̭nīyānmi॒trastvā̭ pa॒di ba̭ddhnā॒tvityā̭ha mi॒tro vai śi॒vo de॒vānā॒-ntenai॒vainā᳚-mpa॒di ba̭ddhnāti pū॒ṣā-'ddhva̭naḥ pā॒tvityā̭he॒yaṃ-vai~ pū॒ṣemāme॒vāsyā̭ adhi॒pāma̭ka॒-ssama̭ṣṭyā॒ indrā॒yā-ddhya̭kṣā॒yetyā॒hendra̭me॒vāsyā॒ addhya̭kṣa-ṅkaro॒- [addhya̭kṣa-ṅkaroti, anṷ tvā mā॒tā] 51

-tyanṷ tvā mā॒tā ma̭nyatā॒manṷ pi॒tetyā॒hā-nṷmatayai॒vaina̭yā krīṇāti॒ sā dḙvi de॒vamacche॒hītyā̭ha de॒vī hyḙṣā de॒va-ssoma॒ indrā̭ya॒ soma॒mityā॒hendrā̭ya॒ hi soma̭ āhri॒yate॒ yade॒ta-dyaju॒rna brū॒yā-tparā᳚cye॒va so̭ma॒kraya̭ṇīyā-dru॒drastvā-'' va̭rtaya॒tvityā̭ha ru॒dro vai krū॒ro [ru॒dro vai krū॒raḥ, de॒vānā॒-ntame॒vāsyai̭] 52

de॒vānā॒-ntame॒vāsyai̭ pa॒rastā᳚-ddadhā॒tyāvṛ̭ttyai krū॒rami̭va॒ vā e॒ta-tka̭roti॒ ya-dru॒drasya̭ kī॒rtaya̭ti mi॒trasya̭ pa॒thetyā̭ha॒ śāntyai̭ vā॒cā vā e॒ṣa vi krī̭ṇīte॒ ya-sso̭ma॒kraya̭ṇyā sva॒sti soma̭sakhā॒ puna॒rehi̭ sa॒ha ra॒yyetyā̭ha vā॒caiva vi॒krīya॒ puna̭rā॒tman vāca̭-ndha॒tte-'nṷpadāsukā-'sya॒ vāgbha̭vati॒ ya e॒vaṃ-ve~da̭ || 53 ||

(sata̭nuṃ॒ - ~viṣṇa̭va॒ ityā̭ha - sa॒māro̭hati॒ - dhyāya̭ti॒ ta-dvā॒cā - yaja̭māna-ssyāt - karoti - krū॒ro - veda̭) (a. 7)

ṣaṭ pa॒dānyanu॒ ni krā̭mati ṣaḍa॒haṃ-vā~nnāti̭ vadatyu॒ta saṃ̭va~thsa॒rasyāya̭ne॒ yāva̭tye॒va vāktāmava̭ rundhe sapta॒me pa॒de jṷhoti sa॒ptapa̭dā॒ śakva̭rī pa॒śava॒-śśakva̭rī pa॒śūne॒vāva̭ rundhe sa॒pta grā॒myāḥ pa॒śavaḥ̭ sa॒ptā-''ra॒ṇyā-ssa॒pta chandāg̭-syu॒bhaya॒syā-va̭ruddhyai॒ vasvya̭si ru॒drā-'sītyā̭ha rū॒pame॒vāsyā̭ e॒ta-nma̭hi॒mānaṃ॒- [e॒ta-nma̭hi॒māna᳚m, vyāca̭ṣṭe॒ bṛha॒spati̭stvā] 54

-~vyāca̭ṣṭe॒ bṛha॒spati̭stvā su॒mne ra̭ṇva॒tvityā̭ha॒ brahma॒ vai de॒vānā॒-mbṛha॒spati॒-rbrahma̭ṇai॒vāsmai̭ pa॒śūnava̭ rundhe ru॒dro vasṷbhi॒rā ci̭ke॒tvityā॒hā-''vṛ̭ttyai pṛthi॒vyāstvā̭ mū॒rdhannā ji̭gharmi deva॒yaja̭na॒ ityā̭ha pṛthi॒vyā hyḙṣa mū॒rdhā ya-ddḙva॒yaja̭na॒miḍā̭yāḥ pa॒da ityā॒heḍā̭yai॒ hyḙta-tpa॒daṃ-ya~-thso̭ma॒kraya̭ṇyai ghṛ॒tava̭ti॒ svāhe- [svāhā᳚, ityā̭ha॒] 55

-tyā̭ha॒ yade॒vāsyai̭ pa॒dā-dghṛ॒tamapī᳚ḍyata॒ tasmā̭de॒vamā̭ha॒ yada̭ddhva॒ryura̭na॒gnāvāhṷti-ñjuhu॒yāda॒ndho᳚-'ddhva॒ryu-ssyā॒-drakṣāgṃ̭si ya॒jñagṃ ha̭nyu॒r॒hira̭ṇyamu॒pāsya̭ juhotyagni॒vatye॒va jṷhoti॒ nāndho᳚-'ddhva॒ryu rbhava̭ti॒ na ya॒jñagṃ rakṣāgṃ̭si ghnanti॒ kāṇḍḙkāṇḍe॒ vai kri॒yamā̭ṇe ya॒jñagṃ rakṣāgṃ̭si jighāgṃsanti॒ pari̭likhita॒gṃ॒ rakṣaḥ॒ pari̭likhitā॒ arā̭taya॒ ityā̭ha॒ rakṣa̭sā॒-mapa̭hatyā [rakṣa̭sā॒-mapa̭hatyai, i॒dama॒hagṃ] 56

i॒dama॒hagṃ rakṣa̭so grī॒vā api̭ kṛntāmi॒ yo᳚-'smā-ndveṣṭi॒ ya-ñca̭ va॒ya-ndvi॒ṣma ityā̭ha॒ dvau vāva purṷṣau॒ ya-ñcai॒va dveṣṭi॒ yaścai̭na॒-ndveṣṭi॒ tayo̭-re॒vā-'na̭ntarāya-ṅgrī॒vāḥ kṛ̭ntati pa॒śavo॒ vai so̭ma॒kraya̭ṇyai pa॒daṃ-yā~̭vattmū॒tagṃ saṃ-va~̭pati pa॒śūne॒vāva̭ rundhe॒-'sme rāya॒ iti॒ saṃ ~va̭patyā॒tmāna̭-me॒vāddhva॒ryuḥ -[-me॒vāddhva॒ryuḥ, pa॒śubhyo॒] 57

pa॒śubhyo॒ nāntarḙti॒ tve rāya॒ iti॒ yaja̭mānāya॒ pra ya̭cchati॒ yaja̭māna e॒va ra॒yi-nda̭dhāti॒ tote॒ rāya॒ iti॒ patni̭yā a॒rdho vā e॒ṣa ā॒tmano॒ ya-tpatnī॒ yathā̭ gṛ॒heṣṷ nidha॒tte tā॒dṛge॒va ta-ttvaṣṭī̭matī te sape॒yetyā̭ha॒ tvaṣṭā॒ vai pa̭śū॒nā-mmi̭thu॒nānāgṃ̭ rūpa॒kṛ-drū॒pame॒va pa॒śuṣṷ dadhātya॒smai vai lo॒kāya॒ gārha̭patya॒ ā dhī̭yate॒ 'muṣmā̭ āhava॒nīyo॒ ya-dgārha̭patya upa॒vapḙda॒smin ~lo॒ke pa̭śa॒mān-thsyā॒-dyadā̭hava॒nīye॒ 'muṣmi̭n ~lo॒ke pa̭śu॒mān-thsyā̭du॒bhayo॒rupa̭ vapatyu॒bhayo̭re॒vainaṃ̭-lo~॒kayoḥ᳚ paśu॒manta̭-ṅkaroti || 58 ||

(ma॒hi॒māna॒gg॒ - svāhā - 'pa̭hatyā - adhva॒ryu - dhī̭yate॒ - catṷrvigṃśatiśca) (a. 8)

bra॒hma॒vā॒dino̭ vadanti vi॒citya॒-ssomā(3) na vi॒cityā(3) iti॒ somo॒ vā oṣa̭dhīnā॒gṃ॒ rājā॒ tasmi॒n॒. yadāpa̭nna-ṅgrasi॒tame॒vāsya॒ ta-dya-dvi̭cinu॒yā-dyathā॒ ''syā᳚dgrasi॒ta-nni̭ṣkhi॒dati̭ tā॒dṛge॒va tadyanna vi̭cinu॒yā-dyathā॒ 'kṣannāpa̭nnaṃ-vi~॒dhāva̭ti tā॒dṛge॒va ta-tkṣodhṷko 'ddhva॒ryu-ssyā-tkṣodhṷko॒ yaja̭māna॒-ssoma̭vikrayi॒n-thsomagṃ̭ śodha॒yetye॒va brṷ̄yā॒-dyadīta̭raṃ॒- [brṷ̄yā॒-dyadīta̭ram, yadīta̭ra-] 59

-~yadīta̭ra-mu॒bhayḙnai॒va so̭mavikra॒yiṇa̭-marpayati॒ tasmā᳚-thsomavikra॒yī kṣodhṷko 'ru॒ṇo ha̭ smā॒-''haupa̭veśi-ssoma॒kraya̭ṇa e॒vāha-ntṛ̭tīya sava॒namava̭ rundha॒ iti̭ paśū॒nā-ñcarma̭-nmimīte pa॒śūne॒vāva̭ rundhe pa॒śavo॒ hi tṛ॒tīya॒gṃ॒ sava̭naṃ॒-ya~-ṅkā॒mayḙtāpa॒śu-ssyā॒-dityṛ̭kṣa॒ta-stasya̭ mimīta॒rkṣaṃ-vā~ a̭paśa॒vya-ma̭pa॒śure॒va bha̭vati॒ ya-ṅkā॒mayḙta paśu॒mān-thsyā॒ - [ ] 60

-diti̭ loma॒tastasya̭ mimītai॒tadvai pa̭śū॒nāgṃ rū॒pagṃ rū॒peṇai॒vā-'smai̭ pa॒śūnava̭ rundhe paśu॒māne॒va bha̭vatya॒pāmante᳚ krīṇāti॒ sara̭same॒vaina̭-ṅkrīṇātya॒-mātyo॒-'sītyā̭hā॒-'maivaina̭-ṅkurute śu॒kraste॒ graha॒ ityā̭ha śu॒kro hya̭sya॒ graho 'na॒sā-'ccha̭ yāti mahi॒māna̭-me॒vāsyāccha̭ yā॒tyana॒sā- [yā॒tyana॒sā, accha̭] 61

-'ccha̭ yāti॒ tasmā̭-danovā॒hyagṃ̭ sa॒me jīva̭naṃ॒-ya~tra॒ khalu॒ vā e॒tagṃ śī॒rṣṇā hara̭nti॒ tasmā᳚cchīrṣahā॒rya̭-ṅgi॒rau jīva̭nama॒bhi tya-nde॒vagṃ sa̭vi॒tāra॒mityati̭-cchandasa॒rcā mi̭mī॒te 'ti̭cchandā॒ vai sarvā̭ṇi॒ chandāgṃ̭si॒ sarvḙbhire॒vaina॒-ñchando̭bhirmimīte॒ varṣma॒ vā e॒ṣā chanda̭sāṃ॒-ya~dati̭cchandā॒ yadati̭cchandasa॒rcā mimī̭te॒ varṣmai॒vainagṃ̭ samā॒nānā᳚-ṅkaro॒tyeka̭yaikayo॒-thsarga̭- [-ṅkaro॒tyeka̭yaikayo॒-thsarga᳚m, mi॒mī॒te] 62

-mmimī॒te 'yā̭tayāmniyāyātayāmniyai॒vaina̭-mmimīte॒ tasmā॒nnānā̭vīryā a॒ṅgula̭ya॒-ssarvā᳚svaṅgu॒ṣṭhamupa॒ ni gṛ̭hṇāti॒ tasmā᳚-thsa॒māva̭dvīryo॒-'nyābhi̭-ra॒ṅguli̭bhi॒stasmā॒-thsarvā॒ anu॒ sa-ñca̭rati॒ ya-thsa॒ha sarvā̭bhi॒rmimī̭ta॒ saggśli̭ṣṭā a॒ṅgula̭yo jāyera॒-nneka̭yaikayo॒-thsarga̭-mmimīte॒ tasmā॒-dvibha̭ktā jāyante॒ pañca॒ kṛtvo॒ yajṷṣā mimīte॒ pañcā᳚kṣarā pa॒ṅktiḥ pāṅkto̭ ya॒jño ya॒jñame॒vāva̭ rundhe॒ pañca॒ kṛtva̭-stū॒ṣṇī- [kṛtva̭-stū॒ṣṇīm, daśa॒ sa-mpa̭dyante॒] 63

-ndaśa॒ sa-mpa̭dyante॒ daśā᳚kṣarā vi॒rāḍannaṃ̭-vi~॒rā-ḍvi॒rājai॒vānnādya॒mava̭ rundhe॒ ya-dyajṷṣā॒ mimī̭te bhū॒tame॒vāva̭ rundhe॒ ya-ttū॒ṣṇī-mbha̭vi॒ṣya-dya-dvai tāvā̭ne॒va soma॒-ssyā-dyāva̭nta॒-mmimī̭te॒ yaja̭mānasyai॒va syā॒nnāpi̭ sada॒syā̭nā-mpra॒jābhya॒stvetyupa॒ samṷ̄hati sada॒syā̭ne॒vānvā bha̭jati॒ vāsa॒sopa̭ nahyati sarvadeva॒tyaṃ̭-vai~ [ ] 64

vāsa॒-ssarvā̭bhire॒vaina̭-nde॒vatā̭bhi॒-ssama̭rdhayati pa॒śavo॒ vai somaḥ̭ prā॒ṇāya॒ tvetyupa̭ nahyati prā॒ṇame॒va pa॒śuṣṷ dadhāti vyā॒nāya॒ tvetyanṷ śṛnthati vyā॒name॒va pa॒śuṣṷ dadhāti॒ tasmā᳚-thsva॒panta̭-mprā॒ṇā na ja̭hati || 65 ||

(ita̭raṃ - paśu॒mān-thsyā᳚--dyā॒tyana̭so॒ - thsargaṃ̭ - tū॒ṣṇīgṃ - sa̭rvadeva॒tyaṃ̭-vai~ - traya̭strigṃśacca) (a. 9)

ya-tka॒layā̭ te śa॒phena̭ te krīṇā॒nīti॒ paṇe॒tāgo̭argha॒gṃ॒ soma̭-ṅku॒ryādago̭arghaṃ॒-ya~ja̭māna॒-mago̭arghamaddhva॒ryu-ṅgostu ma̭hi॒māna॒-nnāva̭ tire॒-dgavā̭ te krīṇā॒nītye॒va brṷ̄yā-dgoa॒rghame॒va soma̭-ṅka॒roti̭ goa॒rghaṃ-ya~ja̭māna-ṅgoa॒rghama̭ddhva॒ryu-nna gorma̭hi॒māna॒mava̭ tiratya॒jayā᳚ krīṇāti॒ sata̭pasame॒vaina̭-ṅkrīṇāti॒ hira̭ṇyena krīṇāti॒ saśṷkrame॒vai- [saśṷkrame॒va, e॒na॒-ṅkrī॒ṇā॒ti॒ dhe॒nvā krī̭ṇāti॒] 66

-na̭-ṅkrīṇāti dhe॒nvā krī̭ṇāti॒ sāśi̭rame॒vaina̭-ṅkrīṇātyṛṣa॒bheṇa̭ krīṇāti॒ sendra̭me॒vaina̭-ṅkrīṇātyana॒ḍuhā᳚ krīṇāti॒ vahni॒rvā a̭na॒ḍvān. vahni̭nai॒va vahni̭ ya॒jñasya̭ krīṇāti mithu॒nābhyā᳚-ṅkrīṇāti mithu॒nasyāva̭-ruddhyai॒ vāsa̭sā krīṇāti sarvadeva॒tyaṃ̭-vai~ vā॒sa-ssarvā᳚bhya e॒vaina̭-nde॒vatā᳚bhyaḥ krīṇāti॒ daśa॒ sa-mpa̭dyante॒ daśā᳚kṣarā vi॒rāḍannaṃ̭-vi~॒rā-ḍvi॒rājai॒vānnādya॒mava̭ rundhe॒ [rundhe, tapa̭sa-sta॒nūra̭si] 67

tapa̭sa-sta॒nūra̭si pra॒jāpa̭te॒-rvarṇa॒ ityā̭ha pa॒śubhya̭ e॒va tada̭ddhva॒-ryurni hnṷta ā॒tmano-'nā᳚vraskāya॒ gaccha̭ti॒ śriya॒-mpra pa॒śūnā᳚pnoti॒ ya e॒vaṃ-ve~da̭ śu॒kra-ntḙ śu॒kreṇa̭ krīṇā॒mītyā̭ha yathā ya॒jure॒vaita-dde॒vā vai yena॒ hira̭ṇyena॒ soma॒makrī̭ṇa॒-ntada̭bhī॒ṣahā॒ puna॒rā-'da̭data॒ ko hi teja̭sā vikre॒ṣyata॒ iti॒ yena॒ hira̭ṇyena॒ [hira̭ṇyena, soma̭-] 68

soma̭-ṅkrīṇī॒yā-ttada̭bhī॒ṣahā॒ puna॒rā da̭dīta॒ teja̭ e॒vā-''tma-ndha̭tte॒-'sme jyotiḥ̭ somavikra॒yiṇi॒ tama॒ ityā̭ha॒ jyoti̭re॒va yaja̭māne dadhāti॒ tama̭sā somavikra॒yiṇa̭marpayati॒ yadanṷpagrathya ha॒nyā-dda̭nda॒śūkā॒stāgṃ samāgṃ̭ sa॒rpā-ssyṷri॒dama॒hagṃ sa॒rpāṇā᳚-ndanda॒śūkā̭nā-ṅgrī॒vā upa̭ grathnā॒mītyā॒hā-da̭ndaśūkā॒stāgṃ samāgṃ̭ sa॒rpā bha̭vanti॒ tama̭sā somavikra॒yiṇaṃ̭-vi~ddhyati॒ svāna॒ [svāna̭, bhrājetyā̭hai॒te] 69

bhrājetyā̭hai॒te vā a॒muṣmi̭n ~lo॒ke soma̭marakṣa॒-ntebhyo-'dhi॒ soma॒mā-'ha̭ra॒n॒. yade॒tebhyaḥ̭ soma॒kraya̭ṇā॒-nnānṷdi॒śedakrī̭to-'sya॒ somaḥ̭ syā॒nnāsyai॒tḙ 'muṣmi̭n ~lo॒ke somagṃ̭ rakṣeyu॒ryade॒tebhyaḥ̭ soma॒kraya̭ṇānanudi॒śati̭ krī॒to᳚-'sya॒ somo̭ bhavatye॒te᳚-'syā॒muṣmi̭n ~lo॒ke somagṃ̭ rakṣanti || 70 ||

(saśṷkrame॒va - rṷndha॒ - iti॒ yena॒ hira̭ṇyena॒ - svāna॒ - catṷścatvārigṃśacca) (a. 10)

vā॒ru॒ṇo vai krī॒ta-ssoma॒ upa̭naddho mi॒tro na॒ ehi॒ sumi̭tradhā॒ ityā̭ha॒ śāntyā॒ indra̭syo॒rumā vi̭śa॒ dakṣi̭ṇa॒mityā̭ha de॒vā vai yagṃ soma॒makrī̭ṇa-ntamindra̭syo॒rau dakṣi̭ṇa॒ ā 'sā̭dayanne॒ṣa khalu॒ vā e॒tarhīndro॒ yo yaja̭te॒ tasmā̭de॒vamā॒hodāyṷṣā svā॒yuṣetyā̭ha de॒vatā̭ e॒vā-nvā॒rabhyo- [e॒vā-nvā॒rabhyot, ti॒ṣṭha॒tyu॒-rva̭ntari̭kṣa॒-] 71

-tti̭ṣṭhatyu॒-rva̭ntari̭kṣa॒-manvi॒hītyā̭hā-ntarikṣadeva॒tyo᳚(1॒) hyḙtarhi॒ somo-'di̭tyā॒-ssado॒-'syadi̭tyā॒-ssada॒ ā sī॒detyā̭ha yathāya॒jure॒vaita-dvi vā ḙname॒tada̭rdhayati॒ ya-dvā̭ru॒ṇagṃ santa̭-mmai॒tra-ṅka॒roti̭ vāru॒ṇyarcā-'' sā̭dayati॒ svayai॒vaina̭-nde॒vata̭yā॒ sama̭rdhayati॒ vāsa̭sā pa॒ryāna̭hyati sarvadeva॒tyaṃ̭-vai~ vāsa॒-ssarvā̭bhire॒vai- [vāsa॒-ssarvā̭bhire॒va, e॒na॒-nde॒vatā̭bhi॒-] 72

-na̭-nde॒vatā̭bhi॒-ssama̭rdhaya॒tyatho॒ rakṣa̭sā॒mapa̭hatyai॒ vanḙṣu॒ vya̭ntari̭kṣa-ntatā॒netyā̭ha॒ vanḙṣu॒ hi vya̭ntari̭kṣa-nta॒tāna॒ vāja॒marva॒thsvityā̭ha॒ vāja॒gg॒ hyarva̭thsu॒ payo̭ aghni॒yāsvityā̭ha॒ payo॒ hya̭ghni॒yāsṷ hṛ॒thsu kratu॒mityā̭ha hṛ॒thsu hi kratuṃ॒-va~rṷṇo vi॒kṣva̭gnimityā̭ha॒ varṷṇo॒ hi vi॒kṣva̭gni-ndi॒vi sūrya॒- [sūrya᳚m, ityā̭ha di॒vi hi] 73

-mityā̭ha di॒vi hi sūrya॒gṃ॒ soma॒madrā॒vityā̭ha॒ grāvā̭ṇo॒ vā adra̭ya॒steṣu॒ vā e॒ṣa soma̭-ndadhāti॒ yo yaja̭te॒ tasmā̭de॒vamā॒hodu॒ tya-ñjā॒tavḙdasa॒miti̭ sau॒ryarcā kṛ̭ṣṇāji॒na-mpra॒tyāna̭hyati॒ rakṣa̭sā॒mapa̭hatyā॒ usrā॒veta̭-ndhūrṣāhā॒vityā̭ha yathāya॒jure॒vaita-tpra cya̭vasva bhuvaspata॒ ityā̭ha bhū॒tānā॒g॒ hyḙ [bhū॒tānā॒gṃ॒ hi, e॒ṣa pati॒-rviśvā᳚nya॒bhi] 74

-ṣa pati॒-rviśvā᳚nya॒bhi dhāmā॒nītyā̭ha॒ viśvā̭ni॒ hye᳚(1॒) ṣo̭-'bhi dhāmā̭ni pra॒cyava̭te॒ mā tvā̭ paripa॒rī vi̭da॒dityā̭ha॒ yade॒vāda-ssoma̭māhri॒yamā̭ṇa-ṅgandha॒rvo vi॒śvāva̭suḥ pa॒ryamṷṣṇā॒-ttasmā̭-de॒vamā॒hāpa̭rimoṣāya॒ yaja̭mānasya sva॒styaya̭nya॒sītyā̭ha॒ yaja̭mānasyai॒vaiṣa ya॒jñasyā᳚nvāra॒bhoṃ 'na̭vacchittyai॒ varṷṇo॒ vā e॒ṣa yaja̭mānama॒bhyaiti॒ ya- [yat, krī॒ta-ssoma॒ upa̭naddho॒ namo̭] 75

-tkrī॒ta-ssoma॒ upa̭naddho॒ namo̭ mi॒trasya॒ varṷṇasya॒ cakṣa̭sa॒ ityā̭ha॒ śāntyā॒ ā somaṃ॒-va~ha̭ntya॒gninā॒ prati̭ tiṣṭhate॒ tau sa॒bhaṃva~̭ntau॒ yaja̭mānama॒bhi sa-mbha̭vataḥ pu॒rā khalu॒ vāvaiṣa medhā̭yā॒-''tmāna̭mā॒rabhya̭ carati॒ yo dī᳚kṣi॒to yada̭gnīṣo॒mīya̭-mpa॒śumā॒labha̭ta ātmani॒ṣkraya̭ṇa e॒vāsya॒ sa tasmā॒-ttasya॒ nā-''śya̭-mpuruṣani॒ṣkraya̭ṇa iva॒ hyatho॒ khalvā̭hu ra॒gnīṣomā᳚bhyāṃ॒-vā~ indro̭ vṛ॒trama̭ha॒nniti॒ yada̭gnīṣo॒mīya̭-mpa॒śumā॒labha̭ta॒ vārtra̭ghna e॒vāsya॒ sa tasmā᳚-dvā॒śyaṃ̭-vā~ru॒ṇyarcā pari̭ carati॒ svayai॒vaina̭-nde॒vata̭yā॒ pari̭ carati || 76 ||

(a॒nvā॒rabhyoth - sarvā̭bhire॒va - sūryaṃ̭ - bhū॒tānā॒g॒ hyḙ - ti॒ ya - dā̭huḥ - sa॒ptavigṃ̭śatiśca) (a. 11)

(prā॒cīna̭vagṃśaṃ॒ -~yāva̭nta - ṛkhsā॒me - vāgvai de॒vebhyo̭ - de॒vā vai dḙva॒yaja̭naṃ - ka॒drūśca॒ - taddhira̭ṇya॒gṃ॒ - ṣaṭ pa॒dāni̭ - brahmavā॒dino̭ vi॒cityo॒ - ya-tka॒layā̭ te - vāru॒ṇo vai krī॒ta-ssoma॒ - ekā̭daśa)

(prā॒cīna̭vagṃśa॒gg॒ - svāhetyā̭ha॒ - ye᳚-'nta-śśa॒rā - hyḙṣa saṃ - tapa̭sā ca॒ - yatka̭rṇagṛhī॒ - teti̭ loma॒to - vā̭ru॒ṇaḥ - ṣaṭ-thsa̭ptatiḥ )

(prā॒cīna̭vagṃ śa॒, mpari̭ carati)

|| hariḥ̭ om ||

|| kṛṣṇa yajurvedīya taittirīya saṃhitāyāṃ ṣaṣṭhakāṇḍe prathamaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहितायां षष्ठकाण्डे प्रथमः प्रश्नः - सोममन्त्रब्राह्मणनिरूपणं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

प्रा॒चीन॑वग्ंश-ङ्करोति देवमनु॒ष्या दिशो॒ व्य॑भजन्त॒ प्राची᳚-न्दे॒वा द॑क्षि॒णा पि॒तरः॑ प्र॒तीची᳚-म्मनु॒ष्या॑ उदी॑चीग्ं रु॒द्रा य-त्प्रा॒चीन॑वग्ंश-ङ्क॒रोति॑ देवलो॒कमे॒व त-द्यज॑मान उ॒पाव॑र्तते॒ परि॑ श्रयत्य॒न्तर्हि॑तो॒हि दे॑वलो॒को म॑नुष्यलो॒का-न्नास्माल्लो॒का-थ्स्वे॑तव्यमि॒वेत्या॑हुः॒ को हि त-द्वेद॒ य-द्य॒मुष्मि॑ँल्लो॒के-ऽस्ति॑ वा॒ न वेति॑ दि॒क्ष्व॑ती का॒शान् क॑रो- [दि॒क्ष्व॑ती का॒शान् क॑रोति, उ॒भयो᳚] 1

-त्यु॒भयो᳚-र्लो॒कयो॑-र॒भिजि॑त्यै केशश्म॒श्रु व॑पते न॒खानि॒ नि कृ॑न्तते मृ॒ता वा ए॒षा त्वग॑मे॒द्ध्या य-त्के॑शश्म॒श्रु मृ॒तामे॒व त्वच॑म-मे॒द्ध्याम॑प॒हत्य॑ य॒ज्ञियो॑ भू॒त्वा मेध॒मुपै॒त्यङ्गि॑रस-स्सुव॒र्गं-लोँ॒कं-यँन्तो॒-ऽफ्सु दी᳚क्षात॒पसी॒ प्रावे॑शयन्न॒फ्सु स्ना॑ति सा॒क्षादे॒व दी᳚क्षात॒पसी॒ अव॑ रुन्धे ती॒र्थे स्ना॑ति ती॒र्थे हि ते ता-म्प्रावे॑शय-न्ती॒र्थे स्ना॑ति [ ] 2

ती॒र्थमे॒व स॑मा॒नाना᳚-म्भवत्य॒पो᳚-ऽश्ञात्यन्तर॒त ए॒व मेद्ध्यो॑ भवति॒ वास॑सा दीक्षयति सौ॒म्यं-वैँ क्षौम॑-न्दे॒वत॑या॒ सोम॑मे॒ष दे॒वता॒मुपै॑ति॒ यो दीक्ष॑ते॒ सोम॑स्य त॒नूर॑सि त॒नुव॑-म्मे पा॒हीत्या॑ह॒ स्वामे॒व दे॒वता॒मुपै॒त्यथो॑ आ॒शिष॑मे॒वैतामा शा᳚स्ते॒ ऽग्नेस्तू॑षा॒धानं॑-वाँ॒योर्वा॑त॒पान॑-म्पितृ॒णा-न्नी॒वि-रोष॑धीना-म्प्रघा॒त [-रोष॑धीना-म्प्रघा॒तः, आ॒दि॒त्याना᳚-म्प्राचीनता॒नो] 3

आ॑दि॒त्याना᳚-म्प्राचीनता॒नो विश्वे॑षा-न्दे॒वाना॒मोतु॒ र्नक्ष॑त्राणा-मतीका॒शास्तद्वा ए॒त-थ्स॑र्व देव॒त्यं॑-यँ-द्वासो॒ य-द्वास॑सा दी॒क्षय॑ति॒ सर्वा॑भिरे॒वैन॑-न्दे॒वता॑भि-र्दीक्षयति ब॒हिःप्रा॑णो॒ वै म॑नु॒ष्य॑स्त-स्याश॑न-म्प्रा॒णो᳚-ऽश्ञाति॒ सप्रा॑ण ए॒व दी᳚क्षत॒ आशि॑तो भवति॒ यावा॑ने॒वास्य॑ प्रा॒णस्तेन॑ स॒ह मेध॒मुपै॑ति घृ॒त-न्दे॒वाना॒-म्मस्तु॑ पितृ॒णा-न्निष्प॑क्व-म्मनु॒ष्या॑णा॒-न्तद्वा [-म्मनु॒ष्या॑णा॒-न्तद्वै, ए॒त-थ्स॑र्वदेव॒त्यं॑] 4

ए॒त-थ्स॑र्वदेव॒त्यं॑-यँन्नव॑नीतं॒-यँन्नव॑नीतेनाभ्य॒ङ्क्ते सर्वा॑ ए॒व दे॒वताः᳚ प्रीणाति॒ प्रच्यु॑तो॒ वा ए॒षो᳚-ऽस्माल्लो॒कादग॑तो देवलो॒कं-योँ दी᳚क्षि॒तो᳚ ऽन्त॒रेव॒ नव॑नीत॒-न्तस्मा॒-न्नव॑नीतेना॒भ्य॑ङ्क्ते ऽनुलो॒मं-यँजु॑षा॒ व्यावृ॑त्त्या॒ इन्द्रो॑ वृ॒त्रम॑ह॒-न्तस्य॑ क॒नीनि॑का॒ परा॑-ऽपत॒-त्तदाञ्ज॑नम-भव॒द्यदा॒ङ्क्ते चक्षु॑रे॒व भ्रातृ॑व्यस्य वृङ्क्ते॒ दक्षि॑ण॒-म्पूर्व॒मा-ऽङ्क्ते॑ [दक्षि॑ण॒-म्पूर्व॒मा-ऽङ्क्ते᳚, स॒व्यग्ं हि] 5

स॒व्यग्ं हि पूर्व॑-म्मनु॒ष्या॑ आ॒ञ्जते॒ न नि धा॑वते॒ नीव॒ हि म॑नु॒ष्या॑ धाव॑न्ते॒ पञ्च॒ कृत्व॒ आ-ऽङ्क्ते॒ पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञमे॒वाव॑ रुन्धे॒ परि॑मित॒माङ्क्ते ऽप॑रिमित॒ग्ं॒ हि म॑नु॒ष्या॑ आ॒ञ्जते॒ सतू॑ल॒या-ऽऽङ्क्ते- ऽप॑तूलया॒ हि म॑नु॒ष्या॑ आ॒ञ्जते॒ व्यावृ॑त्त्यै॒ यदप॑तूलयाञ्जी॒त वज्र॑ इव स्या॒-थ्सतू॑ल॒या-ऽऽङ्क्ते॑ मित्र॒त्वाये- [मित्र॒त्वाय॑, इन्द्रो॑] 6

-न्द्रो॑ वृ॒त्रम॑ह॒न्थ्सो᳚-ऽ(1॒)पो᳚-ऽ(1॒)भ्य॑-म्रियत॒ तासां॒-यँन्मेद्ध्यं॑-यँ॒ज्ञिय॒ग्ं॒ सदे॑व॒मासी॒-त्तद॒पोद॑क्राम॒-त्ते द॒र्भा अ॑भव॒न्॒. यद्द॑र्भपुञ्जी॒लैः प॒वय॑ति॒ या ए॒व मेद्ध्या॑ य॒ज्ञिया॒-स्सदे॑वा॒ आप॒स्ताभि॑रे॒वैन॑-म्पवयति॒ द्वाभ्या᳚-म्पवयत्य-होरा॒त्राभ्या॑मे॒वैन॑-म्पवयति त्रि॒भिः प॑वयति॒ त्रय॑ इ॒मे लो॒का ए॒भिरे॒वैनं॑-लोँ॒कैः प॑वयति प॒ञ्चभिः॑ [प॒ञ्चभिः॑, प॒व॒य॒ति॒ पञ्चा᳚क्षरा] 7

पवयति॒ पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञायै॒वैन॑-म्पवयति ष॒ड्भिः प॑वयति॒ षड्वा ऋ॒तव॑ ऋ॒तुभि॑रे॒वैन॑-म्पवयति स॒प्तभिः॑ पवयति स॒प्त छन्दाग्ं॑सि॒ छन्दो॑भिरे॒वैन॑-म्पवयति न॒वभिः॑ पवयति॒ नव॒ वै पुरु॑षे प्रा॒णा-स्सप्रा॑णमे॒वैन॑-म्पवय॒त्येक॑विग्ंशत्या पवयति॒ दश॒ हस्त्या॑ अ॒ङ्गुल॑यो॒ दश॒ पद्या॑ आ॒त्मैक॑वि॒ग्ं॒शो यावा॑ने॒व पुरु॑ष॒स्त-मप॑रिवर्ग- [पुरु॑ष॒स्त-मप॑रिवर्गम्, प॒व॒य॒ति॒ चि॒त्पति॑स्त्वा] 8

-म्पवयति चि॒त्पति॑स्त्वा पुना॒त्वित्या॑ह॒ मनो॒ वै चि॒त्पति॒र्मन॑सै॒वैन॑-म्पवयति वा॒क्पति॑स्त्वा पुना॒त्वित्या॑ह वा॒चैवैन॑-म्पवयति दे॒वस्त्वा॑ सवि॒ता पु॑ना॒त्वित्या॑ह सवि॒तृप्र॑सूत ए॒वैन॑-म्पवयति॒ तस्य॑ ते पवित्रपते प॒वित्रे॑ण॒ यस्मै॒ क-म्पु॒ने तच्छ॑केय॒मित्या॑-हा॒-ऽऽशिष॑मे॒वैतामा शा᳚स्ते ॥ 9 ॥

(अ॒ती॒का॒शान् क॑रो॒त्य - वे॑शय-न्ति॒र्थ स्ना॑ति - प्रघा॒तो - म॑नु॒ष्या॑णा॒-न्तद्वा - आ-ऽङ्क्ते॑ - मित्र॒त्वाय॑ - प॒ञ्चभि॒ - रप॑रिवर्ग - म॒ष्टाच॑त्वारिग्ंशच्च) (अ. 1)

याव॑न्तो॒ वै दे॒वा य॒ज्ञायापु॑नत॒ त ए॒वाभ॑व॒न्॒. य ए॒वं-विँ॒द्वान्. य॒ज्ञाय॑ पुनी॒ते भव॑त्ये॒व ब॒हिः प॑वयि॒त्वा-ऽन्तः प्र पा॑दयति मनुष्यलो॒क ए॒वैन॑-म्पवयि॒त्वा पू॒त-न्दे॑वलो॒क-म्प्र ण॑य॒त्यदी᳚क्षित॒ एक॒या-ऽऽहु॒त्येत्या॑हु-स्स्रु॒वेण॒ चत॑स्रो जुहोति दीक्षित॒त्वाय॑ स्रु॒चा प॑ञ्च॒मी-म्पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञमे॒वाव॑ रुन्ध॒ आकू᳚त्यै प्र॒युजे॒-ऽग्नये॒ [प्र॒युजे॒-ऽग्नये᳚, स्वाहेत्या॒हा] 10

स्वाहेत्या॒हा-ऽऽकू᳚त्या॒ हि पुरु॑षो य॒ज्ञम॒भि प्र॑यु॒ङ्क्ते यजे॒येति॑ मे॒धायै॒ मन॑से॒-ऽग्नये॒ स्वाहेत्या॑ह मे॒धया॒ हि मन॑सा॒ पुरु॑षो य॒ज्ञम॑भि॒गच्छ॑ति॒ सर॑स्वत्यै पू॒ष्णे᳚-ऽग्नये॒ स्वाहेत्या॑ह॒ वाग्वै सर॑स्वती पृथि॒वी पू॒षा वा॒चैव पृ॑थि॒व्या य॒ज्ञ-म्प्रयु॑ङ्क्त॒ आपो॑ देवी-र्बृहती-र्विश्वशम्भुव॒ इत्या॑ह॒ या वै वर्ष्या॒स्ता [या वै वर्ष्या॒स्ताः, आपो॑ दे॒वी-र्बृ॑ह॒ती-] 11

आपो॑ दे॒वी-र्बृ॑ह॒ती-र्वि॒श्वश॑भुंवोँ॒ यदे॒त-द्यजु॒र्न ब्रू॒या-द्दि॒व्या आपो-ऽशा᳚न्ता इ॒मं-लोँ॒कमा ग॑च्छेयु॒रापो॑ देवी-र्बृहती-र्विश्वशम्भुव॒ इत्या॑हा॒स्मा ए॒वैना॑ लो॒काय॑ शमयति॒ तस्मा᳚च्छा॒न्ता इ॒मं-लोँ॒कमा ग॑च्छन्ति॒ द्यावा॑पृथि॒वी इत्या॑ह॒ द्यावा॑पृथि॒व्योर्हि य॒ज्ञ उ॒र्व॑न्तरि॑क्ष॒-मित्या॑हा॒न्तरि॑क्षे॒ हि य॒ज्ञो बृह॒स्पति॑र्नो ह॒विषा॑ वृधा॒- [ह॒विषा॑ वृधातु, इत्या॑ह॒ ब्रह्म॒ वै] 12

-त्वित्या॑ह॒ ब्रह्म॒ वै दे॒वाना॒-म्बृह॒स्पति॒-र्ब्रह्म॑णै॒वास्मै॑ य॒ज्ञमव॑ रुन्धे॒ यद्- ब्रू॒या-द्वि॑धे॒रिति॑ यज्ञस्था॒णुमृ॑च्छे-द्वृधा॒त्वित्या॑ह यज्ञस्था॒णुमे॒व परि॑ वृणक्ति प्र॒जाप॑ति-र्य॒ज्ञम॑सृजत॒ सो᳚-ऽस्मा-थ्सृ॒ष्टः परां॑ऐ॒-थ्स प्र यजु॒रव्ली॑ना॒-त्प्र साम॒ तमृगुद॑यच्छ॒-द्यदृगु॒दय॑च्छ॒-त्तदौ᳚-द्ग्रह॒णस्यौ᳚-द्ग्रहण॒त्व मृ॒चा [मृ॒चा, जु॒हो॒ति॒ य॒ज्ञस्योद्य॑त्या] 13

जु॑होति य॒ज्ञस्योद्य॑त्या अनु॒ष्टुप्-छन्द॑सा॒-मुद॑यच्छ॒दित्या॑-हु॒स्तस्मा॑दनु॒ष्टुभा॑ जुहोति य॒ज्ञस्योद्य॑त्यै॒ द्वाद॑श वाथ्सब॒न्धान्युद॑यच्छ॒-न्नित्या॑हु॒-स्तस्मा᳚द्- द्वाद॒शभि॑-र्वाथ्सबन्ध॒विदो॑ दीक्षयन्ति॒ सा वा ए॒षर्ग॑नु॒ष्टुग्-वाग॑नु॒ष्टुग्-यदे॒तय॒र्चा दी॒क्षय॑ति वा॒चैवैन॒ग्ं॒ सर्व॑या दीक्षयति॒ विश्वे॑ दे॒वस्य॑ ने॒तुरित्या॑ह सावि॒त्र्ये॑तेन॒ मर्तो॑ वृणीत स॒ख्य- [स॒ख्यम्, इत्या॑ह] 14

-मित्या॑ह पितृदेव॒त्यै॑तेन॒ विश्वे॑ रा॒य इ॑षुद्ध्य॒सीत्या॑ह वैश्वदे॒व्ये॑तेन॑ द्यु॒म्नं-वृँ॑णीत पु॒ष्यस॒ इत्या॑ह पौ॒ष्ण्ये॑तेन॒ सा वा ए॒षर्ख्स॑र्वदेव॒त्या॑ यदे॒तय॒र्चा दी॒क्षय॑ति॒ सर्वा॑भिरे॒वैन॑-न्दे॒वता॑भिर्दीक्षयति स॒प्ताक्ष॑र-म्प्रथ॒म-म्प॒दम॒ष्टाक्ष॑राणि॒ त्रीणि॒ यानि॒ त्रीणि॒ तान्य॒ष्टावुप॑ यन्ति॒ यानि॑ च॒त्वारि॒ तान्य॒ष्टौ यद॒ष्टाक्ष॑रा॒ तेन॑ [तेन॑, गा॒य॒त्री यदेका॑दशाक्षरा॒] 15

गाय॒त्री यदेका॑दशाक्षरा॒ तेन॑ त्रि॒ष्टुग्य-द्द्वाद॑शाक्षरा॒ तेन॒ जग॑ती॒ सा वा ए॒षर्ख्सर्वा॑णि॒ छन्दाग्ं॑सि॒ यदे॒तय॒र्चा दी॒क्षय॑ति॒ सर्वे॑भिरे॒वैन॒-ञ्छन्दो॑भिर्दीक्षयति स॒प्ताक्ष॑र-म्प्रथ॒म-म्प॒दग्ं स॒प्तप॑दा॒ शक्व॑री प॒शव॒-श्शक्व॑री प॒शूने॒वाव॑ रुन्ध॒ एक॑स्माद॒क्षरा॒दना᳚प्त-म्प्रथ॒म-म्प॒द-न्तस्मा॒-द्य-द्वा॒चो-ऽना᳚प्त॒-न्तन्म॑नु॒ष्या॑ उप॑ जीवन्ति पू॒र्णया॑ जुहोति पू॒र्ण इ॑व॒ हि प्र॒जाप॑तिः प्र॒जाप॑ते॒राप्त्यै॒ न्यू॑नया जुहोति॒ न्यू॑ना॒द्धि प्र॒जाप॑तिः प्र॒जा असृ॑जत प्र॒जाना॒ग्ं॒ सृष्ट्यै᳚ ॥ 16 ॥

(अ॒ग्नये॒ - ता - वृ॑धात्वृ॒ - चा - स॒ख्यं - तेन॑ - जुहोति॒ - पञ्च॑दश च) (अ. 2)

ऋ॒-ख्सा॒मे वै दे॒वेभ्यो॑ य॒ज्ञाया-ऽति॑ष्ठमाने॒ कृष्णो॑ रू॒प-ङ्कृ॒त्वा- ऽप॒क्रम्या॑तिष्ठता॒-न्ते॑-ऽमन्यन्त॒ यं-वाँ इ॒मे उ॑पाव॒र्थ्स्यत॒-स्स इ॒द-म्भ॑विष्य॒तीति॒ ते उपा॑मन्त्रयन्त॒ ते अ॑होरा॒त्रयो᳚-र्महि॒मान॑-मपनि॒धाय॑ दे॒वानु॒पाव॑र्तेतामे॒ष वा ऋ॒चो वर्णो॒ यच्छु॒क्ल-ङ्कृ॑ष्णाजि॒नस्यै॒ष साम्नो॒ य-त्कृ॒ष्णमृ॑ख्सा॒मयो॒-श्शिल्पे᳚ स्थ॒ इत्या॑हर्ख्सा॒मे ए॒वा-ऽव॑ रुन्ध ए॒ष [ए॒वा-ऽव॑ रुन्ध ए॒षः, वा अह्नो॒] 17

वा अह्नो॒ वर्णो॒ यच्छु॒क्ल-ङ्कृ॑ष्णाजि॒नस्यै॒ष रात्रि॑या॒ य-त्कृ॒ष्णं-यँदे॒वैन॑यो॒स्तत्र॒ न्य॑क्त॒-न्तदे॒वाव॑ रुन्धे कृष्णाजि॒नेन॑ दीक्षयति॒ ब्रह्म॑णो॒ वा ए॒त-द्रू॒पं-यँ-त्कृ॑ष्णाजि॒न-म्ब्रह्म॑णै॒वैन॑-न्दीक्षयती॒मा-न्धिय॒ग्ं॒ शिक्ष॑माणस्य दे॒वेत्या॑ह यथाय॒जुरे॒वैत-द्गर्भो॒ वा ए॒ष य-द्दी᳚क्षि॒त उल्बं॒-वाँसः॒ प्रोर्णु॑ते॒ तस्मा॒- [तस्मा᳚त्, गर्भाः॒ प्रावृ॑ता] 18

-द्गर्भाः॒ प्रावृ॑ता जायन्ते॒ न पु॒रा सोम॑स्य क्र॒यादपो᳚र्ण्वीत॒ य-त्पु॒रा सोम॑स्य क्र॒याद॑पोर्ण्वी॒त गर्भाः᳚ प्र॒जाना᳚-म्परा॒पातु॑का-स्स्युः क्री॒ते सोमे-ऽपो᳚र्णुते॒ जाय॑त ए॒व तदथो॒ यथा॒ वसी॑याग्ं स-म्प्रत्यपोर्णु॒ते ता॒दृगे॒व तदङ्गि॑रस-स्सुव॒र्गं-लोँ॒कं-यँन्त॒ ऊर्जं॒-व्यँ॑भजन्त॒ ततो॒ यद॒त्यशि॑ष्यत॒ ते श॒रा अ॑भव॒न्नूर्ग्वै श॒रा यच्छ॑र॒मयी॒ [यच्छ॑र॒मयी᳚, मेख॑ला॒] 19

मेख॑ला॒ भव॒त्यूर्ज॑मे॒वाव॑ रुन्धे मद्ध्य॒त-स्सन्न॑ह्यति मद्ध्य॒त ए॒वास्मा॒ ऊर्ज॑-न्दधाति॒ तस्मा᳚न्मद्ध्य॒त ऊ॒र्जा भु॑ञ्जत ऊ॒र्ध्वं-वैँ पुरु॑षस्य॒ नाभ्यै॒ मेद्ध्य॑-मवा॒चीन॑-ममे॒द्ध्यं-यँन्म॑द्ध्य॒त-स्स॒नंह्य॑ति॒ मेद्ध्य॑-ञ्चै॒वास्या॑मे॒द्ध्य-ञ्च॒ व्याव॑र्तय॒तीन्द्रो॑ वृ॒त्राय॒ वज्र॒-म्प्राह॑र॒-थ्स त्रे॒धा व्य॑भव॒-थ्स्फ्यस्तृती॑य॒ग्ं॒ रथ॒स्तृती॑यं॒-यूँप॒स्तृती॑यं॒- [-यूप॒स्तृती॑य॒म्, ये᳚-ऽन्त-श्श॒रा] 20

-ँये᳚-ऽन्त-श्श॒रा अशी᳚र्यन्त॒ ते श॒रा अ॑भव॒-न्तच्छ॒राणाग्ं॑ शर॒त्वं-वँज्रो॒ वै श॒राः, क्षु-त्खलु॒ वै म॑नु॒ष्य॑स्य॒ भ्रातृ॑व्यो॒ यच्छ॑र॒मयी॒ मेख॑ला॒ भव॑ति॒ वज्रे॑णै॒व सा॒क्षा-त्क्षुध॒-म्भ्रातृ॑व्य-म्मद्ध्य॒तो-ऽप॑ हते त्रि॒वृ-द्भ॑वति त्रि॒वृद्वै प्रा॒णस्त्रि॒वृत॑मे॒व प्रा॒ण-म्म॑द्ध्य॒तो यज॑माने दधाति पृ॒थ्वी भ॑वति॒ रज्जू॑नां॒-व्याँवृ॑त्यै॒ मेख॑लया॒ यज॑मान-न्दीक्षयति॒ योक्त्रे॑ण॒ पत्नी᳚-म्मिथुन॒त्वाय॑ [ ] 21

य॒ज्ञो दक्षि॑णाम॒भ्य॑द्ध्याय॒-त्ताग्ं सम॑भव॒-त्तदिन्द्रो॑-ऽचाय॒-थ्सो॑-ऽमन्यत॒ यो वा इ॒तो ज॑नि॒ष्यते॒ स इ॒द-म्भ॑विष्य॒तीति॒ ता-म्प्रावि॑श॒-त्तस्या॒ इन्द्र॑ ए॒वाजा॑यत॒ सो॑-ऽमन्यत॒ यो वै मदि॒तो ऽप॑रो जनि॒ष्यते॒ स इ॒द-म्भ॑विष्य॒तीति॒ तस्या॑ अनु॒मृश्य॒ योनि॒मा-ऽच्छि॑न॒-थ्सा सू॒तव॑शा-ऽभव॒-त्त-थ्सू॒तव॑शायै॒ जन्म॒ [जन्म॑, ताग्ं हस्ते॒ न्य॑वेष्टयत॒] 22

ताग्ं हस्ते॒ न्य॑वेष्टयत॒ ता-म्मृ॒गेषु॒ न्य॑दधा॒-थ्सा कृ॑ष्णविषा॒णा- ऽभ॑व॒दिन्द्र॑स्य॒ योनि॑रसि॒ मा मा॑ हिग्ंसी॒रिति॑ कृष्णविषा॒णा-म्प्र य॑च्छति॒ सयो॑निमे॒व य॒ज्ञ-ङ्क॑रोति॒ सयो॑नि॒-न्दक्षि॑णा॒ग्ं॒ सयो॑नि॒मिन्द्रग्ं॑ सयोनि॒त्वाय॑ कृ॒ष्यै त्वा॑ सुस॒स्याया॒ इत्या॑ह॒ तस्मा॑दकृष्टप॒च्या ओष॑धयः पच्यन्ते सुपिप्प॒लाभ्य॒-स्त्वौष॑धीभ्य॒ इत्या॑ह॒ तस्मा॒दोष॑धयः॒ फल॑-ङ्गृह्णन्ति॒ यद्धस्ते॑न [यद्धस्ते॑न, क॒ण्डू॒येत॑] 23

कण्डू॒येत॑ पामन॒-म्भावु॑काः प्र॒जा-स्स्यु॒र्य-थ्स्मये॑त नग्न॒-म्भावु॑काः कृष्णविषा॒णया॑ कण्डूयते-ऽपि॒गृह्य॑ स्मयते प्र॒जाना᳚-ङ्गोपी॒थाय॒ न पु॒रा दक्षि॑णाभ्यो॒ नेतोः᳚ कृष्णविषा॒णामव॑ चृते॒द्य-त्पु॒रा दक्षि॑णाभ्यो॒ नेतोः᳚ कृष्णविषा॒णा-म॑वचृ॒ते-द्योनिः॑ प्र॒जाना᳚-म्परा॒पातु॑का स्यान्नी॒तासु॒ दक्षि॑णासु॒ चात्वा॑ले कृष्णविषा॒णा-म्प्रास्य॑ति॒ योनि॒र्वै य॒ज्ञस्य॒ चात्वा॑लं॒-योँनिः॑ कृष्णविषा॒णा योना॑वे॒व योनि॑-न्दधाति य॒ज्ञस्य॑ सयोनि॒त्वाय॑ ॥ 24 ॥

(रु॒न्ध॒ ए॒ष - तस्मा᳚ - च्छर॒मयी॒ - यूप॒स्तृती॑यं - मिथुन॒त्वाय॒ - जन्म॒ - हस्ते॑ना॒ - ऽष्टाच॑त्वारिग्ंशच्च) (अ. 3)

वाग्वै दे॒वेभ्यो ऽपा᳚क्राम-द्य॒ज्ञायाति॑ष्ठमाना॒ सा वन॒स्पती॒-न्प्रावि॑श॒-थ्सैषा वाग्वन॒स्पति॑षु वदति॒ या दु॑न्दु॒भौ या तूण॑वे॒ या वीणा॑यां॒-यँ-द्दी᳚क्षितद॒ण्ड-म्प्र॒यच्छ॑ति॒ वाच॑मे॒वाव॑ रुन्ध॒ औदु॑बंरो भव॒त्यूर्ग्वा उ॑दु॒बंर॒ ऊर्ज॑मे॒वाव॑ रुन्धे॒ मुखे॑न॒ सम्मि॑तो भवति मुख॒त ए॒वास्मा॒ ऊर्ज॑-न्दधाति॒ तस्मा᳚-न्मुख॒त ऊ॒र्जा भु॑ञ्जते [ ] 25

क्री॒ते सोमे॑ मैत्रावरु॒णाय॑ द॒ण्ड-म्प्र य॑च्छति मैत्रावरु॒णो हि पु॒रस्ता॑-दृ॒त्विग्भ्यो॒ वाचं॑-विँ॒भज॑ति॒ तामृ॒त्विजो॒ यज॑माने॒ प्रति॑ ष्ठापयन्ति॒ स्वाहा॑ य॒ज्ञ-म्मन॒सेत्या॑ह॒ मन॑सा॒ हि पुरु॑षो य॒ज्ञम॑भि॒गच्छ॑ति॒ स्वाहा॒ द्यावा॑पृथि॒वीभ्या॒ -मित्या॑ह॒ द्यावा॑पृथि॒व्योर्हि य॒ज्ञ-स्स्वाहो॒रोर॒-न्तरि॑क्षा॒ -दित्या॑हा॒न्तरि॑क्षे॒ हि य॒ज्ञ-स्स्वाहा॑ य॒ज्ञं-वाँता॒दा र॑भ॒ इत्या॑हा॒-ऽयं- [इत्या॑हा॒-ऽयम्, वाव यः पव॑ते॒] 26

-ँवाव यः पव॑ते॒ स य॒ज्ञस्तमे॒व सा॒क्षादा र॑भते मु॒ष्टी क॑रोति॒ वाचं॑-यँच्छति य॒ज्ञस्य॒ धृत्या॒ अदी᳚क्षिष्टा॒य-म्ब्रा᳚ह्म॒ण इति॒ त्रिरु॑पा॒ग्॒श्वा॑ह दे॒वेभ्य॑ ए॒वैन॒-म्प्रा-ऽऽह॒ त्रिरु॒च्चैरु॒भये᳚भ्य ए॒वैन॑-न्देवमनु॒ष्येभ्यः॒ प्रा-ऽऽह॒ न पु॒रा नक्ष॑त्रेभ्यो॒ वाचं॒-विँ सृ॑जे॒-द्यत्पु॒रा नक्ष॑त्रेभ्यो॒ वाचं॑-विँसृ॒जे-द्य॒ज्ञं-विँच्छि॑न्द्या॒- [-ँविच्छि॑न्द्यात्, उदि॑तेषु॒] 27

-दुदि॑तेषु॒ नक्ष॑त्रेषु व्र॒त-ङ्कृ॑णु॒तेति॒ वाचं॒-विँ सृ॑जति य॒ज्ञव्र॑तो॒ वै दी᳚क्षि॒तो य॒ज्ञमे॒वाभि वाचं॒-विँ सृ॑जति॒ यदि॑ विसृ॒जे-द्वै᳚ष्ण॒वीमृच॒मनु॑ ब्रूया-द्य॒ज्ञो वै विष्णु॑र्य॒ज्ञेनै॒व य॒ज्ञग्ं स-न्त॑नोति॒ दैवी॒-न्धिय॑-म्मनामह॒ इत्या॑ह य॒ज्ञमे॒व तन्म्र॑दयति सुपा॒रा नो॑ अस॒द्वश॒ इत्या॑ह॒ व्यु॑ष्टिमे॒वाव॑ रुन्धे [रुन्धे, ब्र॒ह्म॒वा॒दिनो॑ वदन्ति] 28

ब्रह्मवा॒दिनो॑ वदन्ति होत॒व्य॑-न्दीक्षि॒तस्य॑ गृ॒हा(3) इ न हो॑त॒व्या(3)मिति॑ ह॒विर्वै दी᳚क्षि॒तो यज्जु॑हु॒या-द्यज॑मानस्याव॒दाय॑ जुहुया॒-द्यन्न जु॑हु॒या-द्य॑ज्ञप॒रुर॒न्तरि॑या॒द्ये दे॒वा मनो॑जाता मनो॒युज॒ इत्या॑ह प्रा॒णा वै दे॒वा मनो॑जाता मनो॒युज॒स्तेष्वे॒व प॒रोक्ष॑-ञ्जुहोति॒ तन्नेव॑ हु॒त-न्नेवाहु॑तग्ग् स्व॒पन्तं॒-वैँ दी᳚क्षि॒तग्ं रक्षाग्ं॑सि जिघाग्ंसन्त्य॒ग्निः - [जिघाग्ंसन्त्य॒ग्निः, खलु॒ वै] 29

खलु॒ वै र॑क्षो॒हा-ऽग्ने॒ त्वग्ं सु जा॑गृहि व॒यग्ं सु म॑न्दिषीम॒हीत्या॑हा॒ग्नि-मे॒वाधि॒पा-ङ्कृ॒त्वा स्व॑पिति॒ रक्ष॑सा॒मप॑हत्या अव्र॒त्यमि॑व॒ वा ए॒ष क॑रोति॒ यो दी᳚क्षि॒त-स्स्वपि॑ति॒ त्वम॑ग्ने व्रत॒पा अ॒सीत्या॑हा॒ग्निर्वै दे॒वानां᳚-व्रँ॒तप॑ति॒-स्स ए॒वैनं॑-व्रँ॒तमा ल॑भंयँति दे॒व आ मर्त्ये॒ष्वेत्या॑ह दे॒वो [दे॒वः, ह्ये॑ष स-न्मर्त्ये॑षु॒] 30

ह्ये॑ष स-न्मर्त्ये॑षु॒ त्वं-यँ॒ज्ञेष्वीड्य॒ इत्या॑है॒तग्ं हि य॒ज्ञेष्वीड॒ते-ऽप॒ वै दी᳚क्षि॒ता-थ्सु॑षु॒पुष॑ इन्द्रि॒य-न्दे॒वताः᳚ क्रामन्ति॒ विश्वे॑ दे॒वा अ॒भि मामा-ऽव॑वृत्र॒-न्नित्या॑-हेन्द्रि॒येणै॒वैन॑-न्दे॒वता॑भि॒-स्स-न्न॑यति॒ यदे॒त-द्यजु॒र्न ब्रू॒या-द्याव॑त ए॒व प॒शून॒भि दीक्षे॑त॒ ताव॑न्तो-ऽस्य प॒शवः॑ स्यू॒ रास्वेय॑- [प॒शवः॑ स्यू॒ रास्वेय॑त्, सो॒मा-ऽऽ भूयो॑] 31

-थ्सो॒मा-ऽऽ भूयो॑ भ॒रेत्या॒हा-प॑रिमिताने॒व प॒शूनव॑ रुन्धे च॒न्द्रम॑सि॒ मम॒ भोगा॑य भ॒वेत्या॑ह यथादेव॒तमे॒वैनाः॒ प्रति॑ गृह्णाति वा॒यवे᳚ त्वा॒ वरु॑णाय॒ त्वेति॒ यदे॒वमे॒ता नानु॑दि॒शेदय॑थादेवत॒-न्दक्षि॑णा गमये॒दा दे॒वता᳚भ्यो वृश्च्येत॒ यदे॒वमे॒ता अ॑नुदि॒शति॑ यथादेव॒तमे॒व दक्षि॑णा गमयति॒ न दे॒वता᳚भ्य॒ आ [न दे॒वता᳚भ्य॒ आ, वृ॒श्च्य॒ते॒ देवी॑रापो] 32

वृ॑श्च्यते॒ देवी॑रापो अपा-न्नपा॒दित्या॑ह॒ यद्वो॒ मेद्ध्यं॑-यँ॒ज्ञिय॒ग्ं॒ सदे॑व॒-न्तद्वो॒ मा-ऽव॑ क्रमिष॒मिति॒ वावैतदा॒हाच्छि॑न्न॒-न्तन्तु॑-म्पृथि॒व्या अनु॑ गेष॒मित्या॑ह॒ सेतु॑मे॒व कृ॒त्वा-ऽत्ये॑ति ॥ 33 ॥

(भु॒ञ्ज॒ते॒ - ऽयं - छि॑न्द्या-द्- रुन्धे॒ - ऽग्नि - रा॑ह दे॒व - इय॑-द्- दे॒वता᳚भ्य॒ आ - त्रय॑स्त्रिग्ंशच्च) (अ. 4)

दे॒वा वै दे॑व॒यज॑न-मद्ध्यव॒साय॒ दिशो॒ न प्राजा॑न॒-न्ते᳚(1॒)-ऽन्यो᳚-ऽन्यमुपा॑धाव॒-न्त्वया॒ प्र जा॑नाम॒ त्वयेति॒ ते-ऽदि॑त्या॒ग्ं॒ सम॑द्ध्रयन्त॒ त्वया॒ प्र जा॑ना॒मेति॒ सा-ऽब्र॑वी॒-द्वरं॑-वृँणै॒ मत्प्रा॑यणा ए॒व वो॑ य॒ज्ञा मदु॑दयना अस॒न्निति॒ तस्मा॑दादि॒त्यः प्रा॑य॒णीयो॑ य॒ज्ञाना॑मादि॒त्य उ॑दय॒नीयः॒ पञ्च॑ दे॒वता॑ यजति॒ पञ्च॒ दिशो॑ दि॒शा-म्प्रज्ञा᳚त्या॒ [दि॒शा-म्प्रज्ञा᳚त्यै, अथो॒ पञ्चा᳚क्षरा] 34

अथो॒ पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञमे॒वाव॑ रुन्धे॒ पथ्याग्॑ स्व॒स्तिम॑यज॒-न्प्राची॑मे॒व तया॒ दिश॒-म्प्राजा॑नन्न॒ग्निना॑ दक्षि॒णा सोमे॑न प्र॒तीचीग्ं॑ सवि॒त्रोदी॑ची॒-मदि॑त्यो॒र्ध्वा-म्पथ्याग्॑ स्व॒स्तिं ँय॑जति॒ प्राची॑मे॒व तया॒ दिश॒-म्प्र जा॑नाति॒ पथ्याग्॑ स्व॒स्तिमि॒ष्ट्वा-ऽग्नीषोमौ॑ यजति॒ चक्षु॑षी॒ वा ए॒ते य॒ज्ञस्य॒ यद॒ग्नीषोमौ॒ ताभ्या॑मे॒वानु॑ पश्य- [पश्यति, अ॒ग्नीषोमा॑-वि॒ष्ट्वा] 35

-त्य॒ग्नीषोमा॑-वि॒ष्ट्वा स॑वि॒तारं॑-यँजति सवि॒तृप्र॑सूत ए॒वानु॑ पश्यति सवि॒तार॑मि॒ष्ट्वा-ऽदि॑तिं-यँजती॒यं-वाँ अदि॑तिर॒स्यामे॒व प्र॑ति॒ष्ठायानु॑ पश्य॒त्यदि॑तिमि॒ष्ट्वा मा॑रु॒तीमृच॒मन्वा॑ह म॒रुतो॒ वै दे॒वानां॒-विँशो॑ देववि॒श-ङ्खलु॒ वै कल्प॑मान-म्मनुष्यवि॒शमनु॑ कल्पते॒ य-न्मा॑रु॒तीमृच॑म॒न्वाह॑ वि॒शा-ङ्कॢप्त्यै᳚ ब्रह्मवा॒दिनो॑ वदन्ति प्रया॒जव॑दननूया॒ज-म्प्रा॑य॒णीय॑-ङ्का॒र्य॑-मनूया॒जव॑- [-मनूया॒जव॑त्, अ॒प्र॒या॒ज-मु॑दय॒नीय॒] 36

-दप्रया॒ज-मु॑दय॒नीय॒-मिती॒मे वै प्र॑या॒जा अ॒मी अ॑नूया॒जा-स्सैव सा य॒ज्ञस्य॒ सन्त॑ति॒स्त-त्तथा॒ न का॒र्य॑मा॒त्मा वै प्र॑या॒जाः प्र॒जा-ऽनू॑या॒जा य-त्प्र॑या॒जा-न॑न्तरि॒यादा॒त्मान॑म॒-न्तरि॑या॒-द्यद॑नूया॒जा-न॑न्तरि॒या-त्प्र॒जाम॒न्तरि॑या॒द्यतः॒ खलु॒ वै य॒ज्ञस्य॒ वित॑तस्य॒ न क्रि॒यते॒ तदनु॑ य॒ज्ञः परा॑ भवति य॒ज्ञ-म्प॑रा॒भव॑न्तं॒-यँज॑मा॒नो-ऽनु॒ [-ँयज॑मा॒नो-ऽनु॑, परा॑ भवति] 37

परा॑ भवति प्रया॒जव॑दे॒वा-नू॑या॒जव॑-त्प्राय॒णीय॑-ङ्का॒र्य॑-म्प्रया॒जव॑दनूया॒जव॑-दुदय॒नीय॒-न्ना-ऽऽत्मान॑मन्त॒रेति॒ न प्र॒जा-न्न य॒ज्ञः प॑रा॒भव॑ति॒ न यज॑मानः प्राय॒णीय॑स्य निष्का॒स उ॑दय॒नीय॑म॒भि निर्व॑पति॒ सैव सा य॒ज्ञस्य॒ सन्त॑ति॒र्याः प्रा॑य॒णीय॑स्य या॒ज्या॑ य-त्ता उ॑दय॒नीय॑स्य या॒ज्याः᳚ कु॒र्या-त्परां॑अ॒मुं-लोँ॒कमा रो॑हे-त्प्र॒मायु॑क-स्स्या॒द्याः प्रा॑य॒णीय॑स्य पुरो-ऽनुवा॒क्या᳚स्ता उ॑दय॒नीय॑स्य या॒ज्याः᳚ करोत्य॒स्मिन्ने॒व लो॒के प्रति॑ तिष्ठति ॥ 38 ॥

(प्रज्ञा᳚त्यै - पश्यत्य - नूया॒जव॒ - द्यज॑मा॒नो-ऽनु॑ - पुरोनुवा॒क्या᳚स्ता - अ॒ष्टौ च॑) (अ. 5)

क॒द्रूश्च॒ वै सु॑प॒र्णी चा᳚-ऽऽत्मरू॒पयो॑रस्पर्धेता॒ग्ं॒ सा क॒द्रू-स्सु॑प॒र्णीम॑जय॒-थ्सा-ऽब्र॑वी-त्तृ॒तीय॑स्यामि॒तो दि॒वि सोम॒स्तमा ह॑र॒ तेना॒-ऽऽत्मान॒-न्निष्क्री॑णी॒ष्वेती॒यं-वैँ क॒द्रूर॒सौ सु॑प॒र्णी छन्दाग्ं॑सि सौपर्णे॒या-स्साब्र॑वीद॒स्मै वै पि॒तरौ॑ पु॒त्रा-न्बि॑भृत-स्तृ॒तीय॑स्यामि॒तो दि॒वि सोम॒स्तमा ह॑र॒ तेना॒-ऽऽत्मान॒-न्निष्क्री॑णी॒ष्वे- [निष्क्री॑णी॒ष्व, इति॑ मा] 39

-ति॑ मा क॒द्रूर॑वोच॒दिति॒ जग॒त्युद॑पत॒-च्चतु॑र्दशाक्षरा स॒ती सा ऽप्रा᳚प्य॒ न्य॑वर्तत॒ तस्यै॒ द्वे अ॒क्षरे॑ अमीयेता॒ग्ं॒ सा प॒शुभि॑श्च दी॒क्षया॒ चा-ऽग॑च्छ॒-त्तस्मा॒ज्जग॑ती॒ छन्द॑सा-म्पश॒व्य॑तमा॒ तस्मा᳚-त्पशु॒मन्त॑-न्दी॒क्षोप॑ नमति त्रि॒ष्टुगुद॑पत॒-त्त्रयो॑दशाक्षरा स॒ती सा ऽप्रा᳚प्य॒ न्य॑वर्तत॒ तस्यै॒ द्वे अ॒क्षरे॑ अमीयेता॒ग्ं॒ सा दक्षि॑णाभिश्च॒ [दक्षि॑णाभिश्च, तप॑सा॒] 40

तप॑सा॒ चा-ऽग॑च्छ॒-त्तस्मा᳚-त्त्रि॒ष्टुभो॑ लो॒के माद्ध्य॑न्दिने॒ सव॑ने॒ दक्षि॑णा नीयन्त ए॒त-त्खलु॒ वाव तप॒ इत्या॑हु॒र्य-स्स्व-न्ददा॒तीति॑ गाय॒त्र्युद॑पत॒च्चतु॑रक्षरा स॒त्य॑जया॒ ज्योति॑षा॒ तम॑स्या अ॒जा-ऽभ्य॑रुन्ध॒ तद॒जाया॑ अज॒त्वग्ं सा सोम॒-ञ्चा-ऽऽह॑रच्च॒त्वारि॑ चा॒क्षरा॑णि॒ सा-ऽष्टाक्ष॑रा॒ सम॑पद्यत ब्रह्मवा॒दिनो॑ वदन्ति॒ [ब्रह्मवा॒दिनो॑ वदन्ति, कस्मा᳚-थ्स॒त्या-] 41

कस्मा᳚-थ्स॒त्या-द्गा॑य॒त्री कनि॑ष्ठा॒ छन्द॑साग्ं स॒ती य॑ज्ञमु॒ख-म्परी॑या॒येति॒ यदे॒वाद-स्सोम॒मा-ऽह॑र॒-त्तस्मा᳚-द्यज्ञमु॒ख-म्पर्यै॒-त्तस्मा᳚-त्तेज॒स्विनी॑तमा प॒द्भ्या-न्द्वे सव॑ने स॒मगृ॑ह्णा॒-न्मुखे॒नैकं॒-यँन्मुखे॑न स॒मगृ॑ह्णा॒-त्तद॑धय॒-त्तस्मा॒-द्द्वे सव॑ने शु॒क्र॑वती प्रातस्सव॒न-ञ्च॒ माद्ध्य॑न्दिन-ञ्च॒ तस्मा᳚-त्तृतीय सव॒न ऋ॑जी॒षम॒भि षु॑ण्वन्ति धी॒तमि॑व॒ हि मन्य॑न्त [हि मन्य॑न्ते, आ॒शिर॒मव॑ नयति] 42

आ॒शिर॒मव॑ नयति सशुक्र॒त्वायाथो॒ स-म्भ॑रत्ये॒वैन॒-त्तग्ं सोम॑-माह्रि॒यमा॑ण-ङ्गन्ध॒र्वो वि॒श्वाव॑सः॒ पर्य॑मुष्णा॒-थ्स ति॒स्रो रात्रीः॒ परि॑मुषितो-ऽवस॒-त्तस्मा᳚-त्ति॒स्रो रात्रीः᳚ क्री॒त-स्सोमो॑ वसति॒ ते दे॒वा अ॑ब्रुव॒न्-थ्स्त्रीका॑मा॒ वै ग॑न्ध॒र्वा स्स्त्रि॒या निष्क्री॑णा॒मेति॒ ते वाच॒ग्ग्॒ स्त्रिय॒मेक॑हायनी-ङ्कृ॒त्वा तया॒ निर॑क्रीण॒न्-थ्सा रो॒हि-द्रू॒प-ङ्कृ॒त्वा ग॑न्ध॒र्वेभ्यो॑- [ग॑न्ध॒र्वेभ्यः॑, अ॒प॒क्रम्या॑तिष्ठ॒-त्त-द्रो॒हितो॒] 43

-ऽप॒क्रम्या॑तिष्ठ॒-त्त-द्रो॒हितो॒ जन्म॒ ते दे॒वा अ॑ब्रुव॒न्नप॑ यु॒ष्मदक्र॑मी॒-न्नास्मानु॒-पाव॑र्तते॒ वि ह्व॑यामहा॒ इति॒ ब्रह्म॑ गन्ध॒र्वा अव॑द॒न्नगा॑य-न्दे॒वा-स्सा दे॒वा-न्गाय॑त उ॒पाव॑र्तत॒ तस्मा॒-द्गाय॑न्त॒ग्ग्॒ स्त्रियः॑ कामयन्ते॒ कामु॑का एन॒ग्ग्॒ स्त्रियो॑ भवन्ति॒ य ए॒वं-वेँदाथो॒ य ए॒वं-विँ॒द्वानपि॒ जन्ये॑षु॒ भव॑ति॒ तेभ्य॑ ए॒व द॑दत्यु॒त य-द्ब॒हुत॑या॒ [य-द्ब॒हुत॑याः, भव॒न्त्येक॑हायन्या] 44

भव॒न्त्येक॑हायन्या क्रीणाति वा॒चैवैन॒ग्ं॒ सर्व॑या क्रीणाति॒ तस्मा॒देक॑हायना मनु॒ष्या॑ वाचं॑-वँद॒न्त्यकू॑ट॒या ऽक॑र्ण॒या-ऽ का॑ण॒याश्लो॑ण॒या ऽस॑प्तशफया क्रीणाति॒ सर्व॑यै॒वैन॑-ङ्क्रीणाति॒ यच्छ्वे॒तया᳚ क्रीणी॒या-द्दु॒श्चर्मा॒ यज॑मान-स्स्या॒द्य-त्कृ॒ष्णया॑-ऽनु॒स्तर॑णी स्या-त्प्र॒मायु॑को॒ यज॑मान-स्स्या॒द्य-द्द्वि॑रू॒पया॒ वार्त्र॑घ्नी स्या॒-थ्स वा॒-ऽन्य-ञ्जि॑नी॒या-त्तं-वाँ॒-ऽन्यो जि॑नीयादरु॒णया॑ पिङ्गा॒क्ष्या क्री॑णात्ये॒तद्वै सोम॑स्य रू॒पग्ग् स्वयै॒वैन॑-न्दे॒वत॑या क्रीणाति ॥ 45 ॥

(निष्क्री॑णीष्व॒ - दक्षि॑णाभिश्च - वदन्ति॒ - मन्य॑न्ते-गन्ध॒र्वेभ्यो॑-ब॒हुत॑याः-पिङ्गा॒क्ष्या-दश॑ च ) (अ. 6)

तद्धिर॑ण्यमभव॒-त्तस्मा॑द॒द्भ्यो हिर॑ण्य-म्पुनन्ति ब्रह्मवा॒दिनो॑ वदन्ति॒ कस्मा᳚-थ्स॒त्याद॑न॒स्थिके॑न प्र॒जाः प्र॒वीय॑न्ते ऽस्थ॒न्वती᳚र्जायन्त॒ इति॒ यद्धिर॑ण्य-ङ्घृ॒ते॑-ऽव॒धाय॑ जु॒होति॒ तस्मा॑दन॒स्थिके॑न प्र॒जाः प्र वी॑यन्ते ऽस्थ॒न्वती᳚र्जायन्त ए॒तद्वा अ॒ग्नेः प्रि॒य-न्धाम॒ य-द्घृ॒त-न्तेजो॒ हिर॑ण्यमि॒यन्ते॑ शुक्र त॒नूरि॒दं-वँर्च॒ इत्या॑ह॒ सते॑जसमे॒वैन॒ग्ं॒ सत॑नु- [सत॑नुम्, क॒रो॒त्यथो॒] 46

-ङ्करो॒त्यथो॒ स-म्भ॑रत्ये॒वैनं॒-यँदब॑द्धम-वद॒द्ध्या-द्गर्भाः᳚ प्र॒जाना᳚-म्परा॒पातु॑का-स्स्युर्ब॒द्धमव॑ दधाति॒ गर्भा॑णा॒-न्धृत्यै॑ निष्ट॒र्क्य॑-म्बद्ध्नाति प्र॒जाना᳚-म्प्र॒जन॑नाय॒ वाग्वा ए॒षा य-थ्सो॑म॒क्रय॑णी॒ जूर॒सीत्या॑ह॒ यद्धि मन॑सा॒ जव॑ते॒ त-द्वा॒चा वद॑ति धृ॒ता मन॒सेत्या॑ह॒ मन॑सा॒ हि वाग्धृ॒ता जुष्टा॒ विष्ण॑व॒ इत्या॑ह [ ] 47

य॒ज्ञो वै विष्णु॑ र्य॒ज्ञायै॒वैना॒-ञ्जुष्टा᳚-ङ्करोति॒ तस्या᳚स्ते स॒त्यस॑वसः प्रस॒व इत्या॑ह सवि॒तृ-प्र॑सूतामे॒व वाच॒मव॑ रुन्धे॒ काण्डे॑काण्डे॒ वै क्रि॒यमा॑णे य॒ज्ञग्ं रक्षाग्ं॑सि जिघाग्ंसन्त्ये॒ष खलु॒ वा अर॑क्षोहतः॒ पन्था॒ यो᳚-ऽग्नेश्च॒ सूर्य॑स्य च॒ सूर्य॑स्य॒ चक्षु॒रा-ऽरु॑हम॒ग्नेर॒क्ष्णः क॒नीनि॑का॒मित्या॑ह॒ य ए॒वार॑क्षोहतः॒ पन्था॒स्तग्ं स॒मारो॑हति॒ [स॒मारो॑हति, वाग्वा ए॒षा] 48

वाग्वा ए॒षा य-थ्सो॑म॒क्रय॑णी॒ चिद॑सि म॒ना-ऽसीत्या॑ह॒ शास्त्ये॒वैना॑मे॒त-त्तस्मा᳚च्छि॒ष्टाः प्र॒जा जा॑यन्ते॒ चिद॒सीत्या॑ह॒ यद्धि मन॑सा चे॒तय॑ते॒ त-द्वा॒चा वद॑ति म॒ना-ऽसीत्या॑ह॒ यद्धि मन॑सा-ऽभि॒गच्छ॑ति॒ त-त्क॒रोति॒ धीर॒सीत्या॑ह॒ यद्धि मन॑सा॒ ध्याय॑ति॒ त-द्वा॒चा [ ] 49

वद॑ति॒ दक्षि॑णा॒-ऽसीत्या॑ह॒ दक्षि॑णा॒ ह्ये॑षा य॒ज्ञिया॒-ऽसीत्या॑ह य॒ज्ञिया॑मे॒वैना᳚-ङ्करोति क्ष॒त्रिया॒सीत्या॑ह क्ष॒त्रिया॒ ह्ये॑षा ऽदि॑तिरस्युभ॒यत॑श्शी॒र्ष्णीत्या॑ह॒ यदे॒वा-ऽऽदि॒त्यः प्रा॑य॒णीयो॑ य॒ज्ञाना॑मादि॒त्य उ॑दय॒नीय॒-स्तस्मा॑दे॒वमा॑ह॒ यदब॑द्धा॒ स्यादय॑ता स्या॒द्य-त्प॑दिब॒द्धा-ऽनु॒स्तर॑णी स्या-त्प्र॒मायु॑को॒ यज॑मान-स्स्या॒- [यज॑मान-स्स्यात्, य-त्क॑र्णगृही॒ता] 50

-द्य-त्क॑र्णगृही॒ता वार्त्र॑घ्नी स्या॒-थ्स वा॒-ऽन्य-ञ्जि॑नी॒या-त्तं-वाँ॒-ऽन्यो जि॑नीयान्मि॒त्रस्त्वा॑ प॒दि ब॑द्ध्ना॒त्वित्या॑ह मि॒त्रो वै शि॒वो दे॒वाना॒-न्तेनै॒वैना᳚-म्प॒दि ब॑द्ध्नाति पू॒षा-ऽद्ध्व॑नः पा॒त्वित्या॑हे॒यं-वैँ पू॒षेमामे॒वास्या॑ अधि॒पाम॑क॒-स्सम॑ष्ट्या॒ इन्द्रा॒या-द्ध्य॑क्षा॒येत्या॒हेन्द्र॑मे॒वास्या॒ अद्ध्य॑क्ष-ङ्करो॒- [अद्ध्य॑क्ष-ङ्करोति, अनु॑ त्वा मा॒ता] 51

-त्यनु॑ त्वा मा॒ता म॑न्यता॒मनु॑ पि॒तेत्या॒हा-नु॑मतयै॒वैन॑या क्रीणाति॒ सा दे॑वि दे॒वमच्छे॒हीत्या॑ह दे॒वी ह्ये॑षा दे॒व-स्सोम॒ इन्द्रा॑य॒ सोम॒मित्या॒हेन्द्रा॑य॒ हि सोम॑ आह्रि॒यते॒ यदे॒त-द्यजु॒र्न ब्रू॒या-त्परा᳚च्ये॒व सो॑म॒क्रय॑णीया-द्रु॒द्रस्त्वा-ऽऽ व॑र्तय॒त्वित्या॑ह रु॒द्रो वै क्रू॒रो [रु॒द्रो वै क्रू॒रः, दे॒वाना॒-न्तमे॒वास्यै॑] 52

दे॒वाना॒-न्तमे॒वास्यै॑ प॒रस्ता᳚-द्दधा॒त्यावृ॑त्त्यै क्रू॒रमि॑व॒ वा ए॒त-त्क॑रोति॒ य-द्रु॒द्रस्य॑ की॒र्तय॑ति मि॒त्रस्य॑ प॒थेत्या॑ह॒ शान्त्यै॑ वा॒चा वा ए॒ष वि क्री॑णीते॒ य-स्सो॑म॒क्रय॑ण्या स्व॒स्ति सोम॑सखा॒ पुन॒रेहि॑ स॒ह र॒य्येत्या॑ह वा॒चैव वि॒क्रीय॒ पुन॑रा॒त्मन् वाच॑-न्ध॒त्ते-ऽनु॑पदासुका-ऽस्य॒ वाग्भ॑वति॒ य ए॒वं-वेँद॑ ॥ 53 ॥

(सत॑नुं॒ - ँविष्ण॑व॒ इत्या॑ह - स॒मारो॑हति॒ - ध्याय॑ति॒ त-द्वा॒चा - यज॑मान-स्स्यात् - करोति - क्रू॒रो - वेद॑) (अ. 7)

षट् प॒दान्यनु॒ नि क्रा॑मति षड॒हं-वाँन्नाति॑ वदत्यु॒त सं॑वँथ्स॒रस्याय॑ने॒ याव॑त्ये॒व वाक्तामव॑ रुन्धे सप्त॒मे प॒दे जु॑होति स॒प्तप॑दा॒ शक्व॑री प॒शव॒-श्शक्व॑री प॒शूने॒वाव॑ रुन्धे स॒प्त ग्रा॒म्याः प॒शवः॑ स॒प्ता-ऽऽर॒ण्या-स्स॒प्त छन्दाग्॑-स्यु॒भय॒स्या-व॑रुद्ध्यै॒ वस्व्य॑सि रु॒द्रा-ऽसीत्या॑ह रू॒पमे॒वास्या॑ ए॒त-न्म॑हि॒मानं॒- [ए॒त-न्म॑हि॒मान᳚म्, व्याच॑ष्टे॒ बृह॒स्पति॑स्त्वा] 54

-ँव्याच॑ष्टे॒ बृह॒स्पति॑स्त्वा सु॒म्ने र॑ण्व॒त्वित्या॑ह॒ ब्रह्म॒ वै दे॒वाना॒-म्बृह॒स्पति॒-र्ब्रह्म॑णै॒वास्मै॑ प॒शूनव॑ रुन्धे रु॒द्रो वसु॑भि॒रा चि॑के॒त्वित्या॒हा-ऽऽवृ॑त्त्यै पृथि॒व्यास्त्वा॑ मू॒र्धन्ना जि॑घर्मि देव॒यज॑न॒ इत्या॑ह पृथि॒व्या ह्ये॑ष मू॒र्धा य-द्दे॑व॒यज॑न॒मिडा॑याः प॒द इत्या॒हेडा॑यै॒ ह्ये॑त-त्प॒दं-यँ-थ्सो॑म॒क्रय॑ण्यै घृ॒तव॑ति॒ स्वाहे- [स्वाहा᳚, इत्या॑ह॒] 55

-त्या॑ह॒ यदे॒वास्यै॑ प॒दा-द्घृ॒तमपी᳚ड्यत॒ तस्मा॑दे॒वमा॑ह॒ यद॑द्ध्व॒र्युर॑न॒ग्नावाहु॑ति-ञ्जुहु॒याद॒न्धो᳚-ऽद्ध्व॒र्यु-स्स्या॒-द्रक्षाग्ं॑सि य॒ज्ञग्ं ह॑न्यु॒र्॒हिर॑ण्यमु॒पास्य॑ जुहोत्यग्नि॒वत्ये॒व जु॑होति॒ नान्धो᳚-ऽद्ध्व॒र्यु र्भव॑ति॒ न य॒ज्ञग्ं रक्षाग्ं॑सि घ्नन्ति॒ काण्डे॑काण्डे॒ वै क्रि॒यमा॑णे य॒ज्ञग्ं रक्षाग्ं॑सि जिघाग्ंसन्ति॒ परि॑लिखित॒ग्ं॒ रक्षः॒ परि॑लिखिता॒ अरा॑तय॒ इत्या॑ह॒ रक्ष॑सा॒-मप॑हत्या [रक्ष॑सा॒-मप॑हत्यै, इ॒दम॒हग्ं] 56

इ॒दम॒हग्ं रक्ष॑सो ग्री॒वा अपि॑ कृन्तामि॒ यो᳚-ऽस्मा-न्द्वेष्टि॒ य-ञ्च॑ व॒य-न्द्वि॒ष्म इत्या॑ह॒ द्वौ वाव पुरु॑षौ॒ य-ञ्चै॒व द्वेष्टि॒ यश्चै॑न॒-न्द्वेष्टि॒ तयो॑-रे॒वा-ऽन॑न्तराय-ङ्ग्री॒वाः कृ॑न्तति प॒शवो॒ वै सो॑म॒क्रय॑ण्यै प॒दं-याँ॑वत्त्मू॒तग्ं सं-वँ॑पति प॒शूने॒वाव॑ रुन्धे॒-ऽस्मे राय॒ इति॒ सं ँव॑पत्या॒त्मान॑-मे॒वाद्ध्व॒र्युः -[-मे॒वाद्ध्व॒र्युः, प॒शुभ्यो॒] 57

प॒शुभ्यो॒ नान्तरे॑ति॒ त्वे राय॒ इति॒ यज॑मानाय॒ प्र य॑च्छति॒ यज॑मान ए॒व र॒यि-न्द॑धाति॒ तोते॒ राय॒ इति॒ पत्नि॑या अ॒र्धो वा ए॒ष आ॒त्मनो॒ य-त्पत्नी॒ यथा॑ गृ॒हेषु॑ निध॒त्ते ता॒दृगे॒व त-त्त्वष्टी॑मती ते सपे॒येत्या॑ह॒ त्वष्टा॒ वै प॑शू॒ना-म्मि॑थु॒नानाग्ं॑ रूप॒कृ-द्रू॒पमे॒व प॒शुषु॑ दधात्य॒स्मै वै लो॒काय॒ गार्ह॑पत्य॒ आ धी॑यते॒ ऽमुष्मा॑ आहव॒नीयो॒ य-द्गार्ह॑पत्य उप॒वपे॑द॒स्मिन् ँलो॒के प॑श॒मान्-थ्स्या॒-द्यदा॑हव॒नीये॒ ऽमुष्मि॑न् ँलो॒के प॑शु॒मान्-थ्स्या॑दु॒भयो॒रुप॑ वपत्यु॒भयो॑रे॒वैनं॑-लोँ॒कयोः᳚ पशु॒मन्त॑-ङ्करोति ॥ 58 ॥

(म॒हि॒मान॒ग्ग्॒ - स्वाहा - ऽप॑हत्या - अध्व॒र्यु - धी॑यते॒ - चतु॑र्विग्ंशतिश्च) (अ. 8)

ब्र॒ह्म॒वा॒दिनो॑ वदन्ति वि॒चित्य॒-स्सोमा(3) न वि॒चित्या(3) इति॒ सोमो॒ वा ओष॑धीना॒ग्ं॒ राजा॒ तस्मि॒न्॒. यदाप॑न्न-ङ्ग्रसि॒तमे॒वास्य॒ त-द्य-द्वि॑चिनु॒या-द्यथा॒ ऽऽस्या᳚द्ग्रसि॒त-न्नि॑ष्खि॒दति॑ ता॒दृगे॒व तद्यन्न वि॑चिनु॒या-द्यथा॒ ऽक्षन्नाप॑न्नं-विँ॒धाव॑ति ता॒दृगे॒व त-त्क्षोधु॑को ऽद्ध्व॒र्यु-स्स्या-त्क्षोधु॑को॒ यज॑मान॒-स्सोम॑विक्रयि॒न्-थ्सोमग्ं॑ शोध॒येत्ये॒व ब्रू॑या॒-द्यदीत॑रं॒- [ब्रू॑या॒-द्यदीत॑रम्, यदीत॑र-] 59

-ँयदीत॑र-मु॒भये॑नै॒व सो॑मविक्र॒यिण॑-मर्पयति॒ तस्मा᳚-थ्सोमविक्र॒यी क्षोधु॑को ऽरु॒णो ह॑ स्मा॒-ऽऽहौप॑वेशि-स्सोम॒क्रय॑ण ए॒वाह-न्तृ॑तीय सव॒नमव॑ रुन्ध॒ इति॑ पशू॒ना-ञ्चर्म॑-न्मिमीते प॒शूने॒वाव॑ रुन्धे प॒शवो॒ हि तृ॒तीय॒ग्ं॒ सव॑नं॒-यँ-ङ्का॒मये॑ताप॒शु-स्स्या॒-दित्यृ॑क्ष॒त-स्तस्य॑ मिमीत॒र्क्षं-वाँ अ॑पश॒व्य-म॑प॒शुरे॒व भ॑वति॒ य-ङ्का॒मये॑त पशु॒मान्-थ्स्या॒ - [ ] 60

-दिति॑ लोम॒तस्तस्य॑ मिमीतै॒तद्वै प॑शू॒नाग्ं रू॒पग्ं रू॒पेणै॒वा-ऽस्मै॑ प॒शूनव॑ रुन्धे पशु॒माने॒व भ॑वत्य॒पामन्ते᳚ क्रीणाति॒ सर॑समे॒वैन॑-ङ्क्रीणात्य॒-मात्यो॒-ऽसीत्या॑हा॒-ऽमैवैन॑-ङ्कुरुते शु॒क्रस्ते॒ ग्रह॒ इत्या॑ह शु॒क्रो ह्य॑स्य॒ ग्रहो ऽन॒सा-ऽच्छ॑ याति महि॒मान॑-मे॒वास्याच्छ॑ या॒त्यन॒सा- [या॒त्यन॒सा, अच्छ॑] 61

-ऽच्छ॑ याति॒ तस्मा॑-दनोवा॒ह्यग्ं॑ स॒मे जीव॑नं॒-यँत्र॒ खलु॒ वा ए॒तग्ं शी॒र्ष्णा हर॑न्ति॒ तस्मा᳚च्छीर्षहा॒र्य॑-ङ्गि॒रौ जीव॑नम॒भि त्य-न्दे॒वग्ं स॑वि॒तार॒मित्यति॑-च्छन्दस॒र्चा मि॑मी॒ते ऽति॑च्छन्दा॒ वै सर्वा॑णि॒ छन्दाग्ं॑सि॒ सर्वे॑भिरे॒वैन॒-ञ्छन्दो॑भिर्मिमीते॒ वर्ष्म॒ वा ए॒षा छन्द॑सां॒-यँदति॑च्छन्दा॒ यदति॑च्छन्दस॒र्चा मिमी॑ते॒ वर्ष्मै॒वैनग्ं॑ समा॒नाना᳚-ङ्करो॒त्येक॑यैकयो॒-थ्सर्ग॑- [-ङ्करो॒त्येक॑यैकयो॒-थ्सर्ग᳚म्, मि॒मी॒ते] 62

-म्मिमी॒ते ऽया॑तयाम्नियायातयाम्नियै॒वैन॑-म्मिमीते॒ तस्मा॒न्नाना॑वीर्या अ॒ङ्गुल॑य॒-स्सर्वा᳚स्वङ्गु॒ष्ठमुप॒ नि गृ॑ह्णाति॒ तस्मा᳚-थ्स॒माव॑द्वीर्यो॒-ऽन्याभि॑-र॒ङ्गुलि॑भि॒स्तस्मा॒-थ्सर्वा॒ अनु॒ स-ञ्च॑रति॒ य-थ्स॒ह सर्वा॑भि॒र्मिमी॑त॒ सग्ग्श्लि॑ष्टा अ॒ङ्गुल॑यो जायेर॒-न्नेक॑यैकयो॒-थ्सर्ग॑-म्मिमीते॒ तस्मा॒-द्विभ॑क्ता जायन्ते॒ पञ्च॒ कृत्वो॒ यजु॑षा मिमीते॒ पञ्चा᳚क्षरा प॒ङ्क्तिः पाङ्क्तो॑ य॒ज्ञो य॒ज्ञमे॒वाव॑ रुन्धे॒ पञ्च॒ कृत्व॑-स्तू॒ष्णी- [कृत्व॑-स्तू॒ष्णीम्, दश॒ स-म्प॑द्यन्ते॒] 63

-न्दश॒ स-म्प॑द्यन्ते॒ दशा᳚क्षरा वि॒राडन्नं॑-विँ॒रा-ड्वि॒राजै॒वान्नाद्य॒मव॑ रुन्धे॒ य-द्यजु॑षा॒ मिमी॑ते भू॒तमे॒वाव॑ रुन्धे॒ य-त्तू॒ष्णी-म्भ॑वि॒ष्य-द्य-द्वै तावा॑ने॒व सोम॒-स्स्या-द्याव॑न्त॒-म्मिमी॑ते॒ यज॑मानस्यै॒व स्या॒न्नापि॑ सद॒स्या॑ना-म्प्र॒जाभ्य॒स्त्वेत्युप॒ समू॑हति सद॒स्या॑ने॒वान्वा भ॑जति॒ वास॒सोप॑ नह्यति सर्वदेव॒त्यं॑-वैँ [ ] 64

वास॒-स्सर्वा॑भिरे॒वैन॑-न्दे॒वता॑भि॒-स्सम॑र्धयति प॒शवो॒ वै सोमः॑ प्रा॒णाय॒ त्वेत्युप॑ नह्यति प्रा॒णमे॒व प॒शुषु॑ दधाति व्या॒नाय॒ त्वेत्यनु॑ शृन्थति व्या॒नमे॒व प॒शुषु॑ दधाति॒ तस्मा᳚-थ्स्व॒पन्त॑-म्प्रा॒णा न ज॑हति ॥ 65 ॥

(इत॑रं - पशु॒मान्-थ्स्या᳚--द्या॒त्यन॑सो॒ - थ्सर्गं॑ - तू॒ष्णीग्ं - स॑र्वदेव॒त्यं॑-वैँ - त्रय॑स्त्रिग्ंशच्च) (अ. 9)

य-त्क॒लया॑ ते श॒फेन॑ ते क्रीणा॒नीति॒ पणे॒तागो॑अर्घ॒ग्ं॒ सोम॑-ङ्कु॒र्यादगो॑अर्घं॒-यँज॑मान॒-मगो॑अर्घमद्ध्व॒र्यु-ङ्गोस्तु म॑हि॒मान॒-न्नाव॑ तिरे॒-द्गवा॑ ते क्रीणा॒नीत्ये॒व ब्रू॑या-द्गोअ॒र्घमे॒व सोम॑-ङ्क॒रोति॑ गोअ॒र्घं-यँज॑मान-ङ्गोअ॒र्घम॑द्ध्व॒र्यु-न्न गोर्म॑हि॒मान॒मव॑ तिरत्य॒जया᳚ क्रीणाति॒ सत॑पसमे॒वैन॑-ङ्क्रीणाति॒ हिर॑ण्येन क्रीणाति॒ सशु॑क्रमे॒वै- [सशु॑क्रमे॒व, ए॒न॒-ङ्क्री॒णा॒ति॒ धे॒न्वा क्री॑णाति॒] 66

-न॑-ङ्क्रीणाति धे॒न्वा क्री॑णाति॒ साशि॑रमे॒वैन॑-ङ्क्रीणात्यृष॒भेण॑ क्रीणाति॒ सेन्द्र॑मे॒वैन॑-ङ्क्रीणात्यन॒डुहा᳚ क्रीणाति॒ वह्नि॒र्वा अ॑न॒ड्वान्. वह्नि॑नै॒व वह्नि॑ य॒ज्ञस्य॑ क्रीणाति मिथु॒नाभ्या᳚-ङ्क्रीणाति मिथु॒नस्याव॑-रुद्ध्यै॒ वास॑सा क्रीणाति सर्वदेव॒त्यं॑-वैँ वा॒स-स्सर्वा᳚भ्य ए॒वैन॑-न्दे॒वता᳚भ्यः क्रीणाति॒ दश॒ स-म्प॑द्यन्ते॒ दशा᳚क्षरा वि॒राडन्नं॑-विँ॒रा-ड्वि॒राजै॒वान्नाद्य॒मव॑ रुन्धे॒ [रुन्धे, तप॑स-स्त॒नूर॑सि] 67

तप॑स-स्त॒नूर॑सि प्र॒जाप॑ते॒-र्वर्ण॒ इत्या॑ह प॒शुभ्य॑ ए॒व तद॑द्ध्व॒-र्युर्नि ह्नु॑त आ॒त्मनो-ऽना᳚व्रस्काय॒ गच्छ॑ति॒ श्रिय॒-म्प्र प॒शूना᳚प्नोति॒ य ए॒वं-वेँद॑ शु॒क्र-न्ते॑ शु॒क्रेण॑ क्रीणा॒मीत्या॑ह यथा य॒जुरे॒वैत-द्दे॒वा वै येन॒ हिर॑ण्येन॒ सोम॒मक्री॑ण॒-न्तद॑भी॒षहा॒ पुन॒रा-ऽद॑दत॒ को हि तेज॑सा विक्रे॒ष्यत॒ इति॒ येन॒ हिर॑ण्येन॒ [हिर॑ण्येन, सोम॑-] 68

सोम॑-ङ्क्रीणी॒या-त्तद॑भी॒षहा॒ पुन॒रा द॑दीत॒ तेज॑ ए॒वा-ऽऽत्म-न्ध॑त्ते॒-ऽस्मे ज्योतिः॑ सोमविक्र॒यिणि॒ तम॒ इत्या॑ह॒ ज्योति॑रे॒व यज॑माने दधाति॒ तम॑सा सोमविक्र॒यिण॑मर्पयति॒ यदनु॑पग्रथ्य ह॒न्या-द्द॑न्द॒शूका॒स्ताग्ं समाग्ं॑ स॒र्पा-स्स्यु॑रि॒दम॒हग्ं स॒र्पाणा᳚-न्दन्द॒शूका॑ना-ङ्ग्री॒वा उप॑ ग्रथ्ना॒मीत्या॒हा-द॑न्दशूका॒स्ताग्ं समाग्ं॑ स॒र्पा भ॑वन्ति॒ तम॑सा सोमविक्र॒यिणं॑-विँद्ध्यति॒ स्वान॒ [स्वान॑, भ्राजेत्या॑है॒ते] 69

भ्राजेत्या॑है॒ते वा अ॒मुष्मि॑न् ँलो॒के सोम॑मरक्ष॒-न्तेभ्यो-ऽधि॒ सोम॒मा-ऽह॑र॒न्॒. यदे॒तेभ्यः॑ सोम॒क्रय॑णा॒-न्नानु॑दि॒शेदक्री॑तो-ऽस्य॒ सोमः॑ स्या॒न्नास्यै॒ते॑ ऽमुष्मि॑न् ँलो॒के सोमग्ं॑ रक्षेयु॒र्यदे॒तेभ्यः॑ सोम॒क्रय॑णाननुदि॒शति॑ क्री॒तो᳚-ऽस्य॒ सोमो॑ भवत्ये॒ते᳚-ऽस्या॒मुष्मि॑न् ँलो॒के सोमग्ं॑ रक्षन्ति ॥ 70 ॥

(सशु॑क्रमे॒व - रु॑न्ध॒ - इति॒ येन॒ हिर॑ण्येन॒ - स्वान॒ - चतु॑श्चत्वारिग्ंशच्च) (अ. 10)

वा॒रु॒णो वै क्री॒त-स्सोम॒ उप॑नद्धो मि॒त्रो न॒ एहि॒ सुमि॑त्रधा॒ इत्या॑ह॒ शान्त्या॒ इन्द्र॑स्यो॒रुमा वि॑श॒ दक्षि॑ण॒मित्या॑ह दे॒वा वै यग्ं सोम॒मक्री॑ण-न्तमिन्द्र॑स्यो॒रौ दक्षि॑ण॒ आ ऽसा॑दयन्ने॒ष खलु॒ वा ए॒तर्हीन्द्रो॒ यो यज॑ते॒ तस्मा॑दे॒वमा॒होदायु॑षा स्वा॒युषेत्या॑ह दे॒वता॑ ए॒वा-न्वा॒रभ्यो- [ए॒वा-न्वा॒रभ्योत्, ति॒ष्ठ॒त्यु॒-र्व॑न्तरि॑क्ष॒-] 71

-त्ति॑ष्ठत्यु॒-र्व॑न्तरि॑क्ष॒-मन्वि॒हीत्या॑हा-न्तरिक्षदेव॒त्यो᳚(1॒) ह्ये॑तर्हि॒ सोमो-ऽदि॑त्या॒-स्सदो॒-ऽस्यदि॑त्या॒-स्सद॒ आ सी॒देत्या॑ह यथाय॒जुरे॒वैत-द्वि वा ए॑नमे॒तद॑र्धयति॒ य-द्वा॑रु॒णग्ं सन्त॑-म्मै॒त्र-ङ्क॒रोति॑ वारु॒ण्यर्चा-ऽऽ सा॑दयति॒ स्वयै॒वैन॑-न्दे॒वत॑या॒ सम॑र्धयति॒ वास॑सा प॒र्यान॑ह्यति सर्वदेव॒त्यं॑-वैँ वास॒-स्सर्वा॑भिरे॒वै- [वास॒-स्सर्वा॑भिरे॒व, ए॒न॒-न्दे॒वता॑भि॒-] 72

-न॑-न्दे॒वता॑भि॒-स्सम॑र्धय॒त्यथो॒ रक्ष॑सा॒मप॑हत्यै॒ वने॑षु॒ व्य॑न्तरि॑क्ष-न्तता॒नेत्या॑ह॒ वने॑षु॒ हि व्य॑न्तरि॑क्ष-न्त॒तान॒ वाज॒मर्व॒थ्स्वित्या॑ह॒ वाज॒ग्ग्॒ ह्यर्व॑थ्सु॒ पयो॑ अघ्नि॒यास्वित्या॑ह॒ पयो॒ ह्य॑घ्नि॒यासु॑ हृ॒थ्सु क्रतु॒मित्या॑ह हृ॒थ्सु हि क्रतुं॒-वँरु॑णो वि॒क्ष्व॑ग्निमित्या॑ह॒ वरु॑णो॒ हि वि॒क्ष्व॑ग्नि-न्दि॒वि सूर्य॒- [सूर्य᳚म्, इत्या॑ह दि॒वि हि] 73

-मित्या॑ह दि॒वि हि सूर्य॒ग्ं॒ सोम॒मद्रा॒वित्या॑ह॒ ग्रावा॑णो॒ वा अद्र॑य॒स्तेषु॒ वा ए॒ष सोम॑-न्दधाति॒ यो यज॑ते॒ तस्मा॑दे॒वमा॒होदु॒ त्य-ञ्जा॒तवे॑दस॒मिति॑ सौ॒र्यर्चा कृ॑ष्णाजि॒न-म्प्र॒त्यान॑ह्यति॒ रक्ष॑सा॒मप॑हत्या॒ उस्रा॒वेत॑-न्धूर्षाहा॒वित्या॑ह यथाय॒जुरे॒वैत-त्प्र च्य॑वस्व भुवस्पत॒ इत्या॑ह भू॒ताना॒ग्॒ ह्ये॑ [भू॒ताना॒ग्ं॒ हि, ए॒ष पति॒-र्विश्वा᳚न्य॒भि] 74

-ष पति॒-र्विश्वा᳚न्य॒भि धामा॒नीत्या॑ह॒ विश्वा॑नि॒ ह्ये᳚(1॒) षो॑-ऽभि धामा॑नि प्र॒च्यव॑ते॒ मा त्वा॑ परिप॒री वि॑द॒दित्या॑ह॒ यदे॒वाद-स्सोम॑माह्रि॒यमा॑ण-ङ्गन्ध॒र्वो वि॒श्वाव॑सुः प॒र्यमु॑ष्णा॒-त्तस्मा॑-दे॒वमा॒हाप॑रिमोषाय॒ यज॑मानस्य स्व॒स्त्यय॑न्य॒सीत्या॑ह॒ यज॑मानस्यै॒वैष य॒ज्ञस्या᳚न्वार॒भों ऽन॑वच्छित्त्यै॒ वरु॑णो॒ वा ए॒ष यज॑मानम॒भ्यैति॒ य- [यत्, क्री॒त-स्सोम॒ उप॑नद्धो॒ नमो॑] 75

-त्क्री॒त-स्सोम॒ उप॑नद्धो॒ नमो॑ मि॒त्रस्य॒ वरु॑णस्य॒ चक्ष॑स॒ इत्या॑ह॒ शान्त्या॒ आ सोमं॒-वँह॑न्त्य॒ग्निना॒ प्रति॑ तिष्ठते॒ तौ स॒भंवँ॑न्तौ॒ यज॑मानम॒भि स-म्भ॑वतः पु॒रा खलु॒ वावैष मेधा॑या॒-ऽऽत्मान॑मा॒रभ्य॑ चरति॒ यो दी᳚क्षि॒तो यद॑ग्नीषो॒मीय॑-म्प॒शुमा॒लभ॑त आत्मनि॒ष्क्रय॑ण ए॒वास्य॒ स तस्मा॒-त्तस्य॒ ना-ऽऽश्य॑-म्पुरुषनि॒ष्क्रय॑ण इव॒ ह्यथो॒ खल्वा॑हु र॒ग्नीषोमा᳚भ्यां॒-वाँ इन्द्रो॑ वृ॒त्रम॑ह॒न्निति॒ यद॑ग्नीषो॒मीय॑-म्प॒शुमा॒लभ॑त॒ वार्त्र॑घ्न ए॒वास्य॒ स तस्मा᳚-द्वा॒श्यं॑-वाँरु॒ण्यर्चा परि॑ चरति॒ स्वयै॒वैन॑-न्दे॒वत॑या॒ परि॑ चरति ॥ 76 ॥

(अ॒न्वा॒रभ्योथ् - सर्वा॑भिरे॒व - सूर्यं॑ - भू॒ताना॒ग्॒ ह्ये॑ - ति॒ य - दा॑हुः - स॒प्तविग्ं॑शतिश्च) (अ. 11)

(प्रा॒चीन॑वग्ंशं॒ -ँयाव॑न्त - ऋख्सा॒मे - वाग्वै दे॒वेभ्यो॑ - दे॒वा वै दे॑व॒यज॑नं - क॒द्रूश्च॒ - तद्धिर॑ण्य॒ग्ं॒ - षट् प॒दानि॑ - ब्रह्मवा॒दिनो॑ वि॒चित्यो॒ - य-त्क॒लया॑ ते - वारु॒णो वै क्री॒त-स्सोम॒ - एका॑दश)

(प्रा॒चीन॑वग्ंश॒ग्ग्॒ - स्वाहेत्या॑ह॒ - ये᳚-ऽन्त-श्श॒रा - ह्ये॑ष सं - तप॑सा च॒ - यत्क॑र्णगृही॒ - तेति॑ लोम॒तो - वा॑रु॒णः - षट्-थ्स॑प्ततिः )

(प्रा॒चीन॑वग्ं श॒, म्परि॑ चरति)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहितायां षष्ठकाण्डे प्रथमः प्रश्न-स्समाप्तः ॥