Gopika Gita (bhagavata Purana) — Grantha Script

𑌗𑍋𑌪𑍍𑌯 𑌊𑌚𑍁𑌃 ।

𑌜𑌯𑌤𑌿 𑌤𑍇𑌽𑌧𑌿𑌕𑌂 𑌜𑌨𑍍𑌮𑌨𑌾 𑌵𑍍𑌰𑌜𑌃

𑌶𑍍𑌰𑌯𑌤 𑌇𑌨𑍍𑌦𑌿𑌰𑌾 𑌶𑌶𑍍𑌵𑌦𑌤𑍍𑌰 𑌹𑌿 ।

𑌦𑌯𑌿𑌤 𑌦𑍃𑌶𑍍𑌯𑌤𑌾𑌂 𑌦𑌿𑌕𑍍𑌷𑍁 𑌤𑌾𑌵𑌕𑌾-

𑌸𑍍𑌤𑍍𑌵𑌯𑌿 𑌧𑍃𑌤𑌾𑌸𑌵𑌸𑍍𑌤𑍍𑌵𑌾𑌂 𑌵𑌿𑌚𑌿𑌨𑍍𑌵𑌤𑍇 ॥ 1॥

𑌶𑌰𑌦𑍁𑌦𑌾𑌶𑌯𑍇 𑌸𑌾𑌧𑍁𑌜𑌾𑌤𑌸-

𑌤𑍍𑌸𑌰𑌸𑌿𑌜𑍋𑌦𑌰𑌶𑍍𑌰𑍀𑌮𑍁𑌷𑌾 𑌦𑍃𑌶𑌾 ।

𑌸𑍁𑌰𑌤𑌨𑌾𑌥 𑌤𑍇𑌽𑌶𑍁𑌲𑍍𑌕𑌦𑌾𑌸𑌿𑌕𑌾

𑌵𑌰𑌦 𑌨𑌿𑌘𑍍𑌨𑌤𑍋 𑌨𑍇𑌹 𑌕𑌿𑌂 𑌵𑌧𑌃 ॥ 2॥

𑌵𑌿𑌷𑌜𑌲𑌾𑌪𑍍𑌯𑌯𑌾𑌦𑍍𑌵𑍍𑌯𑌾𑌲𑌰𑌾𑌕𑍍𑌷𑌸𑌾-

𑌦𑍍𑌵𑌰𑍍𑌷𑌮𑌾𑌰𑍁𑌤𑌾𑌦𑍍𑌵𑍈𑌦𑍍𑌯𑍁𑌤𑌾𑌨𑌲𑌾𑌤𑍍 ।

𑌵𑍃𑌷𑌮𑌯𑌾𑌤𑍍𑌮𑌜𑌾𑌦𑍍𑌵𑌿𑌶𑍍𑌵𑌤𑍋𑌭𑌯𑌾-

𑌦𑍃𑌷𑌭 𑌤𑍇 𑌵𑌯𑌂 𑌰𑌕𑍍𑌷𑌿𑌤𑌾 𑌮𑍁𑌹𑍁𑌃 ॥ 3॥

𑌨 𑌖𑌲𑍁 𑌗𑍋𑌪𑌿𑌕𑌾𑌨𑌨𑍍𑌦𑌨𑍋 𑌭𑌵𑌾-

𑌨𑌖𑌿𑌲𑌦𑍇𑌹𑌿𑌨𑌾𑌮𑌨𑍍𑌤𑌰𑌾𑌤𑍍𑌮𑌦𑍃𑌕𑍍 ।

𑌵𑌿𑌖𑌨𑌸𑌾𑌰𑍍𑌥𑌿𑌤𑍋 𑌵𑌿𑌶𑍍𑌵𑌗𑍁𑌪𑍍𑌤𑌯𑍇

𑌸𑌖 𑌉𑌦𑍇𑌯𑌿𑌵𑌾𑌨𑍍𑌸𑌾𑌤𑍍𑌵𑌤𑌾𑌂 𑌕𑍁𑌲𑍇 ॥ 4॥

𑌵𑌿𑌰𑌚𑌿𑌤𑌾𑌭𑌯𑌂 𑌵𑍃𑌷𑍍𑌣𑌿𑌧𑍁𑌰𑍍𑌯 𑌤𑍇

𑌚𑌰𑌣𑌮𑍀𑌯𑍁𑌷𑌾𑌂 𑌸𑌂𑌸𑍃𑌤𑍇𑌰𑍍𑌭𑌯𑌾𑌤𑍍 ।

𑌕𑌰𑌸𑌰𑍋𑌰𑍁𑌹𑌂 𑌕𑌾𑌨𑍍𑌤 𑌕𑌾𑌮𑌦𑌂

𑌶𑌿𑌰𑌸𑌿 𑌧𑍇𑌹𑌿 𑌨𑌃 𑌶𑍍𑌰𑍀𑌕𑌰𑌗𑍍𑌰𑌹𑌮𑍍 ॥ 5॥

𑌵𑍍𑌰𑌜𑌜𑌨𑌾𑌰𑍍𑌤𑌿𑌹𑌨𑍍𑌵𑍀𑌰 𑌯𑍋𑌷𑌿𑌤𑌾𑌂

𑌨𑌿𑌜𑌜𑌨𑌸𑍍𑌮𑌯𑌧𑍍𑌵𑌂𑌸𑌨𑌸𑍍𑌮𑌿𑌤 ।

𑌭𑌜 𑌸𑌖𑍇 𑌭𑌵𑌤𑍍𑌕𑌿𑌙𑍍𑌕𑌰𑍀𑌃 𑌸𑍍𑌮 𑌨𑍋

𑌜𑌲𑌰𑍁𑌹𑌾𑌨𑌨𑌂 𑌚𑌾𑌰𑍁 𑌦𑌰𑍍𑌶𑌯 ॥ 6॥

𑌪𑍍𑌰𑌣𑌤𑌦𑍇𑌹𑌿𑌨𑌾𑌂 𑌪𑌾𑌪𑌕𑌰𑍍𑌶𑌨𑌂

𑌤𑍃𑌣𑌚𑌰𑌾𑌨𑍁𑌗𑌂 𑌶𑍍𑌰𑍀𑌨𑌿𑌕𑍇𑌤𑌨𑌮𑍍 ।

𑌫𑌣𑌿𑌫𑌣𑌾𑌰𑍍𑌪𑌿𑌤𑌂 𑌤𑍇 𑌪𑌦𑌾𑌮𑍍𑌬𑍁𑌜𑌂

𑌕𑍃𑌣𑍁 𑌕𑍁𑌚𑍇𑌷𑍁 𑌨𑌃 𑌕𑍃𑌨𑍍𑌧𑌿 𑌹𑍃𑌚𑍍𑌛𑌯𑌮𑍍 ॥ 7॥

𑌮𑌧𑍁𑌰𑌯𑌾 𑌗𑌿𑌰𑌾 𑌵𑌲𑍍𑌗𑍁𑌵𑌾𑌕𑍍𑌯𑌯𑌾

𑌬𑍁𑌧𑌮𑌨𑍋𑌜𑍍𑌞𑌯𑌾 𑌪𑍁𑌷𑍍𑌕𑌰𑍇𑌕𑍍𑌷𑌣 ।

𑌵𑌿𑌧𑌿𑌕𑌰𑍀𑌰𑌿𑌮𑌾 𑌵𑍀𑌰 𑌮𑍁𑌹𑍍𑌯𑌤𑍀-

𑌰𑌧𑌰𑌸𑍀𑌧𑍁𑌨𑌾𑌽𑌽𑌪𑍍𑌯𑌾𑌯𑌯𑌸𑍍𑌵 𑌨𑌃 ॥ 8॥

𑌤𑌵 𑌕𑌥𑌾𑌮𑍃𑌤𑌂 𑌤𑌪𑍍𑌤𑌜𑍀𑌵𑌨𑌂

𑌕𑌵𑌿𑌭𑌿𑌰𑍀𑌡𑌿𑌤𑌂 𑌕𑌲𑍍𑌮𑌷𑌾𑌪𑌹𑌮𑍍 ।

𑌶𑍍𑌰𑌵𑌣𑌮𑌙𑍍𑌗𑌲𑌂 𑌶𑍍𑌰𑍀𑌮𑌦𑌾𑌤𑌤𑌂

𑌭𑍁𑌵𑌿 𑌗𑍃𑌣𑌨𑍍𑌤𑌿 𑌤𑍇 𑌭𑍂𑌰𑌿𑌦𑌾 𑌜𑌨𑌾𑌃 ॥ 9॥

𑌪𑍍𑌰𑌹𑌸𑌿𑌤𑌂 𑌪𑍍𑌰𑌿𑌯 𑌪𑍍𑌰𑍇𑌮𑌵𑍀𑌕𑍍𑌷𑌣𑌂

𑌵𑌿𑌹𑌰𑌣𑌂 𑌚 𑌤𑍇 𑌧𑍍𑌯𑌾𑌨𑌮𑌙𑍍𑌗𑌲𑌮𑍍 ।

𑌰𑌹𑌸𑌿 𑌸𑌂𑌵𑌿𑌦𑍋 𑌯𑌾 𑌹𑍃𑌦𑌿𑌸𑍍𑌪𑍃𑌶𑌃

𑌕𑍁𑌹𑌕 𑌨𑍋 𑌮𑌨𑌃 𑌕𑍍𑌷𑍋𑌭𑌯𑌨𑍍𑌤𑌿 𑌹𑌿 ॥ 10॥

𑌚𑌲𑌸𑌿 𑌯𑌦𑍍𑌵𑍍𑌰𑌜𑌾𑌚𑍍𑌚𑌾𑌰𑌯𑌨𑍍𑌪𑌶𑍂𑌨𑍍

𑌨𑌲𑌿𑌨𑌸𑍁𑌨𑍍𑌦𑌰𑌂 𑌨𑌾𑌥 𑌤𑍇 𑌪𑌦𑌮𑍍 ।

𑌶𑌿𑌲𑌤𑍃𑌣𑌾𑌙𑍍𑌕𑍁𑌰𑍈𑌃 𑌸𑍀𑌦𑌤𑍀𑌤𑌿 𑌨𑌃

𑌕𑌲𑌿𑌲𑌤𑌾𑌂 𑌮𑌨𑌃 𑌕𑌾𑌨𑍍𑌤 𑌗𑌚𑍍𑌛𑌤𑌿 ॥ 11॥

𑌦𑌿𑌨𑌪𑌰𑌿𑌕𑍍𑌷𑌯𑍇 𑌨𑍀𑌲𑌕𑍁𑌨𑍍𑌤𑌲𑍈-

𑌰𑍍𑌵𑌨𑌰𑍁𑌹𑌾𑌨𑌨𑌂 𑌬𑌿𑌭𑍍𑌰𑌦𑌾𑌵𑍃𑌤𑌮𑍍 ।

𑌘𑌨𑌰𑌜𑌸𑍍𑌵𑌲𑌂 𑌦𑌰𑍍𑌶𑌯𑌨𑍍𑌮𑍁𑌹𑍁-

𑌰𑍍𑌮𑌨𑌸𑌿 𑌨𑌃 𑌸𑍍𑌮𑌰𑌂 𑌵𑍀𑌰 𑌯𑌚𑍍𑌛𑌸𑌿 ॥ 12॥

𑌪𑍍𑌰𑌣𑌤𑌕𑌾𑌮𑌦𑌂 𑌪𑌦𑍍𑌮𑌜𑌾𑌰𑍍𑌚𑌿𑌤𑌂

𑌧𑌰𑌣𑌿𑌮𑌣𑍍𑌡𑌨𑌂 𑌧𑍍𑌯𑍇𑌯𑌮𑌾𑌪𑌦𑌿 ।

𑌚𑌰𑌣𑌪𑌙𑍍𑌕𑌜𑌂 𑌶𑌨𑍍𑌤𑌮𑌂 𑌚 𑌤𑍇

𑌰𑌮𑌣 𑌨𑌃 𑌸𑍍𑌤𑌨𑍇𑌷𑍍𑌵𑌰𑍍𑌪𑌯𑌾𑌧𑌿𑌹𑌨𑍍 ॥ 13॥

𑌸𑍁𑌰𑌤𑌵𑌰𑍍𑌧𑌨𑌂 𑌶𑍋𑌕𑌨𑌾𑌶𑌨𑌂

𑌸𑍍𑌵𑌰𑌿𑌤𑌵𑍇𑌣𑍁𑌨𑌾 𑌸𑍁𑌷𑍍𑌠𑍁 𑌚𑍁𑌮𑍍𑌬𑌿𑌤𑌮𑍍 ।

𑌇𑌤𑌰𑌰𑌾𑌗𑌵𑌿𑌸𑍍𑌮𑌾𑌰𑌣𑌂 𑌨𑍃𑌣𑌾𑌂

𑌵𑌿𑌤𑌰 𑌵𑍀𑌰 𑌨𑌸𑍍𑌤𑍇𑌽𑌧𑌰𑌾𑌮𑍃𑌤𑌮𑍍 ॥ 14॥

𑌅𑌟𑌤𑌿 𑌯𑌦𑍍𑌭𑌵𑌾𑌨𑌹𑍍𑌨𑌿 𑌕𑌾𑌨𑌨𑌂

𑌤𑍍𑌰𑍁𑌟𑌿𑌰𑍍𑌯𑍁𑌗𑌾𑌯𑌤𑍇 𑌤𑍍𑌵𑌾𑌮𑌪𑌶𑍍𑌯𑌤𑌾𑌮𑍍 ।

𑌕𑍁𑌟𑌿𑌲𑌕𑍁𑌨𑍍𑌤𑌲𑌂 𑌶𑍍𑌰𑍀𑌮𑍁𑌖𑌂 𑌚 𑌤𑍇

𑌜𑌡 𑌉𑌦𑍀𑌕𑍍𑌷𑌤𑌾𑌂 𑌪𑌕𑍍𑌷𑍍𑌮𑌕𑍃𑌦𑍍𑌦𑍃𑌶𑌾𑌮𑍍 ॥ 15॥

𑌪𑌤𑌿𑌸𑍁𑌤𑌾𑌨𑍍𑌵𑌯𑌭𑍍𑌰𑌾𑌤𑍃𑌬𑌾𑌨𑍍𑌧𑌵𑌾-

𑌨𑌤𑌿𑌵𑌿𑌲𑌙𑍍𑌘𑍍𑌯 𑌤𑍇𑌽𑌨𑍍𑌤𑍍𑌯𑌚𑍍𑌯𑍁𑌤𑌾𑌗𑌤𑌾𑌃 ।

𑌗𑌤𑌿𑌵𑌿𑌦𑌸𑍍𑌤𑌵𑍋𑌦𑍍𑌗𑍀𑌤𑌮𑍋𑌹𑌿𑌤𑌾𑌃

𑌕𑌿𑌤𑌵 𑌯𑍋𑌷𑌿𑌤𑌃 𑌕𑌸𑍍𑌤𑍍𑌯𑌜𑍇𑌨𑍍𑌨𑌿𑌶𑌿 ॥ 16॥

𑌰𑌹𑌸𑌿 𑌸𑌂𑌵𑌿𑌦𑌂 𑌹𑍃𑌚𑍍𑌛𑌯𑍋𑌦𑌯𑌂

𑌪𑍍𑌰𑌹𑌸𑌿𑌤𑌾𑌨𑌨𑌂 𑌪𑍍𑌰𑍇𑌮𑌵𑍀𑌕𑍍𑌷𑌣𑌮𑍍 ।

𑌬𑍃𑌹𑌦𑍁𑌰𑌃 𑌶𑍍𑌰𑌿𑌯𑍋 𑌵𑍀𑌕𑍍𑌷𑍍𑌯 𑌧𑌾𑌮 𑌤𑍇

𑌮𑍁𑌹𑍁𑌰𑌤𑌿𑌸𑍍𑌪𑍃𑌹𑌾 𑌮𑍁𑌹𑍍𑌯𑌤𑍇 𑌮𑌨𑌃 ॥ 17॥

𑌵𑍍𑌰𑌜𑌵𑌨𑍗𑌕𑌸𑌾𑌂 𑌵𑍍𑌯𑌕𑍍𑌤𑌿𑌰𑌙𑍍𑌗 𑌤𑍇

𑌵𑍃𑌜𑌿𑌨𑌹𑌨𑍍𑌤𑍍𑌰𑍍𑌯𑌲𑌂 𑌵𑌿𑌶𑍍𑌵𑌮𑌙𑍍𑌗𑌲𑌮𑍍 ।

𑌤𑍍𑌯𑌜 𑌮𑌨𑌾𑌕𑍍 𑌚 𑌨𑌸𑍍𑌤𑍍𑌵𑌤𑍍𑌸𑍍𑌪𑍃𑌹𑌾𑌤𑍍𑌮𑌨𑌾𑌂

𑌸𑍍𑌵𑌜𑌨𑌹𑍃𑌦𑍍𑌰𑍁𑌜𑌾𑌂 𑌯𑌨𑍍𑌨𑌿𑌷𑍂𑌦𑌨𑌮𑍍 ॥ 18॥

𑌯𑌤𑍍𑌤𑍇 𑌸𑍁𑌜𑌾𑌤𑌚𑌰𑌣𑌾𑌮𑍍𑌬𑍁𑌰𑍁𑌹𑌂 𑌸𑍍𑌤𑌨𑍇𑌷

𑌭𑍀𑌤𑌾𑌃 𑌶𑌨𑍈𑌃 𑌪𑍍𑌰𑌿𑌯 𑌦𑌧𑍀𑌮𑌹𑌿 𑌕𑌰𑍍𑌕𑌶𑍇𑌷𑍁 ।

𑌤𑍇𑌨𑌾𑌟𑌵𑍀𑌮𑌟𑌸𑌿 𑌤𑌦𑍍𑌵𑍍𑌯𑌥𑌤𑍇 𑌨 𑌕𑌿𑌂𑌸𑍍𑌵𑌿𑌤𑍍

𑌕𑍂𑌰𑍍𑌪𑌾𑌦𑌿𑌭𑌿𑌰𑍍𑌭𑍍𑌰𑌮𑌤𑌿 𑌧𑍀𑌰𑍍𑌭𑌵𑌦𑌾𑌯𑍁𑌷𑌾𑌂 𑌨𑌃 ॥ 19॥

𑌇𑌤𑌿 𑌶𑍍𑌰𑍀𑌮𑌦𑍍𑌭𑌾𑌗𑌵𑌤 𑌮𑌹𑌾𑌪𑍁𑌰𑌾𑌣𑍇 𑌪𑌾𑌰𑌮𑌹𑌂𑌸𑍍𑌯𑌾𑌂 𑌸𑌂𑌹𑌿𑌤𑌾𑌯𑌾𑌂

𑌦𑌶𑌮𑌸𑍍𑌕𑌨𑍍𑌧𑍇 𑌪𑍂𑌰𑍍𑌵𑌾𑌰𑍍𑌧𑍇 𑌰𑌾𑌸𑌕𑍍𑌰𑍀𑌡𑌾𑌯𑌾𑌂 𑌗𑍋𑌪𑍀𑌗𑍀𑌤𑌂 𑌨𑌾𑌮𑍈𑌕𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥

Roman (IAST) Transliteration

gopya ūcuḥ |

jayati te'dhikaṃ janmanā vrajaḥ

śrayata indirā śaśvadatra hi |

dayita dṛśyatāṃ dikṣu tāvakā-

stvayi dhṛtāsavastvāṃ vicinvate || 1||

śaradudāśaye sādhujātasa-

tsarasijodaraśrīmuṣā dṛśā |

suratanātha te'śulkadāsikā

varada nighnato neha kiṃ vadhaḥ || 2||

viṣajalāpyayādvyālarākṣasā-

dvarṣamārutādvaidyutānalāt |

vṛṣamayātmajādviśvatobhayā-

dṛṣabha te vayaṃ rakṣitā muhuḥ || 3||

na khalu gopikānandano bhavā-

nakhiladehināmantarātmadṛk |

vikhanasārthito viśvaguptaye

sakha udeyivānsātvatāṃ kule || 4||

viracitābhayaṃ vṛṣṇidhurya te

caraṇamīyuṣāṃ saṃsṛterbhayāt |

karasaroruhaṃ kānta kāmadaṃ

śirasi dhehi naḥ śrīkaragraham || 5||

vrajajanārtihanvīra yoṣitāṃ

nijajanasmayadhvaṃsanasmita |

bhaja sakhe bhavatkiṅkarīḥ sma no

jalaruhānanaṃ cāru darśaya || 6||

praṇatadehināṃ pāpakarśanaṃ

tṛṇacarānugaṃ śrīniketanam |

phaṇiphaṇārpitaṃ te padāmbujaṃ

kṛṇu kuceṣu naḥ kṛndhi hṛcchayam || 7||

madhurayā girā valguvākyayā

budhamanojñayā puṣkarekṣaṇa |

vidhikarīrimā vīra muhyatī-

radharasīdhunā''pyāyayasva naḥ || 8||

tava kathāmṛtaṃ taptajīvanaṃ

kavibhirīḍitaṃ kalmaṣāpaham |

śravaṇamaṅgalaṃ śrīmadātataṃ

bhuvi gṛṇanti te bhūridā janāḥ || 9||

prahasitaṃ priya premavīkṣaṇaṃ

viharaṇaṃ ca te dhyānamaṅgalam |

rahasi saṃvido yā hṛdispṛśaḥ

kuhaka no manaḥ kṣobhayanti hi || 10||

calasi yadvrajāccārayanpaśūn

nalinasundaraṃ nātha te padam |

śilatṛṇāṅkuraiḥ sīdatīti naḥ

kalilatāṃ manaḥ kānta gacchati || 11||

dinaparikṣaye nīlakuntalai-

rvanaruhānanaṃ bibhradāvṛtam |

ghanarajasvalaṃ darśayanmuhu-

rmanasi naḥ smaraṃ vīra yacchasi || 12||

praṇatakāmadaṃ padmajārcitaṃ

dharaṇimaṇḍanaṃ dhyeyamāpadi |

caraṇapaṅkajaṃ śantamaṃ ca te

ramaṇa naḥ staneṣvarpayādhihan || 13||

suratavardhanaṃ śokanāśanaṃ

svaritaveṇunā suṣṭhu cumbitam |

itararāgavismāraṇaṃ nṛṇāṃ

vitara vīra naste'dharāmṛtam || 14||

aṭati yadbhavānahni kānanaṃ

truṭiryugāyate tvāmapaśyatām |

kuṭilakuntalaṃ śrīmukhaṃ ca te

jaḍa udīkṣatāṃ pakṣmakṛddṛśām || 15||

patisutānvayabhrātṛbāndhavā-

nativilaṅghya te'ntyacyutāgatāḥ |

gatividastavodgītamohitāḥ

kitava yoṣitaḥ kastyajenniśi || 16||

rahasi saṃvidaṃ hṛcchayodayaṃ

prahasitānanaṃ premavīkṣaṇam |

bṛhaduraḥ śriyo vīkṣya dhāma te

muhuratispṛhā muhyate manaḥ || 17||

vrajavanaukasāṃ vyaktiraṅga te

vṛjinahantryalaṃ viśvamaṅgalam |

tyaja manāk ca nastvatspṛhātmanāṃ

svajanahṛdrujāṃ yanniṣūdanam || 18||

yatte sujātacaraṇāmburuhaṃ staneṣa

bhītāḥ śanaiḥ priya dadhīmahi karkaśeṣu |

tenāṭavīmaṭasi tadvyathate na kiṃsvit

kūrpādibhirbhramati dhīrbhavadāyuṣāṃ naḥ || 19||

iti śrīmadbhāgavata mahāpurāṇe pāramahaṃsyāṃ saṃhitāyāṃ

daśamaskandhe pūrvārdhe rāsakrīḍāyāṃ gopīgītaṃ nāmaikatriṃśo'dhyāyaḥ ||

Sanskrit — Devanagari (original)

गोप्य ऊचुः ।

जयति तेऽधिकं जन्मना व्रजः

श्रयत इन्दिरा शश्वदत्र हि ।

दयित दृश्यतां दिक्षु तावका-

स्त्वयि धृतासवस्त्वां विचिन्वते ॥ 1॥

शरदुदाशये साधुजातस-

त्सरसिजोदरश्रीमुषा दृशा ।

सुरतनाथ तेऽशुल्कदासिका

वरद निघ्नतो नेह किं वधः ॥ 2॥

विषजलाप्ययाद्व्यालराक्षसा-

द्वर्षमारुताद्वैद्युतानलात् ।

वृषमयात्मजाद्विश्वतोभया-

दृषभ ते वयं रक्षिता मुहुः ॥ 3॥

न खलु गोपिकानन्दनो भवा-

नखिलदेहिनामन्तरात्मदृक् ।

विखनसार्थितो विश्वगुप्तये

सख उदेयिवान्सात्वतां कुले ॥ 4॥

विरचिताभयं वृष्णिधुर्य ते

चरणमीयुषां संसृतेर्भयात् ।

करसरोरुहं कान्त कामदं

शिरसि धेहि नः श्रीकरग्रहम् ॥ 5॥

व्रजजनार्तिहन्वीर योषितां

निजजनस्मयध्वंसनस्मित ।

भज सखे भवत्किङ्करीः स्म नो

जलरुहाननं चारु दर्शय ॥ 6॥

प्रणतदेहिनां पापकर्शनं

तृणचरानुगं श्रीनिकेतनम् ।

फणिफणार्पितं ते पदाम्बुजं

कृणु कुचेषु नः कृन्धि हृच्छयम् ॥ 7॥

मधुरया गिरा वल्गुवाक्यया

बुधमनोज्ञया पुष्करेक्षण ।

विधिकरीरिमा वीर मुह्यती-

रधरसीधुनाऽऽप्याययस्व नः ॥ 8॥

तव कथामृतं तप्तजीवनं

कविभिरीडितं कल्मषापहम् ।

श्रवणमङ्गलं श्रीमदाततं

भुवि गृणन्ति ते भूरिदा जनाः ॥ 9॥

प्रहसितं प्रिय प्रेमवीक्षणं

विहरणं च ते ध्यानमङ्गलम् ।

रहसि संविदो या हृदिस्पृशः

कुहक नो मनः क्षोभयन्ति हि ॥ 10॥

चलसि यद्व्रजाच्चारयन्पशून्

नलिनसुन्दरं नाथ ते पदम् ।

शिलतृणाङ्कुरैः सीदतीति नः

कलिलतां मनः कान्त गच्छति ॥ 11॥

दिनपरिक्षये नीलकुन्तलै-

र्वनरुहाननं बिभ्रदावृतम् ।

घनरजस्वलं दर्शयन्मुहु-

र्मनसि नः स्मरं वीर यच्छसि ॥ 12॥

प्रणतकामदं पद्मजार्चितं

धरणिमण्डनं ध्येयमापदि ।

चरणपङ्कजं शन्तमं च ते

रमण नः स्तनेष्वर्पयाधिहन् ॥ 13॥

सुरतवर्धनं शोकनाशनं

स्वरितवेणुना सुष्ठु चुम्बितम् ।

इतररागविस्मारणं नृणां

वितर वीर नस्तेऽधरामृतम् ॥ 14॥

अटति यद्भवानह्नि काननं

त्रुटिर्युगायते त्वामपश्यताम् ।

कुटिलकुन्तलं श्रीमुखं च ते

जड उदीक्षतां पक्ष्मकृद्दृशाम् ॥ 15॥

पतिसुतान्वयभ्रातृबान्धवा-

नतिविलङ्घ्य तेऽन्त्यच्युतागताः ।

गतिविदस्तवोद्गीतमोहिताः

कितव योषितः कस्त्यजेन्निशि ॥ 16॥

रहसि संविदं हृच्छयोदयं

प्रहसिताननं प्रेमवीक्षणम् ।

बृहदुरः श्रियो वीक्ष्य धाम ते

मुहुरतिस्पृहा मुह्यते मनः ॥ 17॥

व्रजवनौकसां व्यक्तिरङ्ग ते

वृजिनहन्त्र्यलं विश्वमङ्गलम् ।

त्यज मनाक् च नस्त्वत्स्पृहात्मनां

स्वजनहृद्रुजां यन्निषूदनम् ॥ 18॥

यत्ते सुजातचरणाम्बुरुहं स्तनेष

भीताः शनैः प्रिय दधीमहि कर्कशेषु ।

तेनाटवीमटसि तद्व्यथते न किंस्वित्

कूर्पादिभिर्भ्रमति धीर्भवदायुषां नः ॥ 19॥

इति श्रीमद्भागवत महापुराणे पारमहंस्यां संहितायां

दशमस्कन्धे पूर्वार्धे रासक्रीडायां गोपीगीतं नामैकत्रिंशोऽध्यायः ॥