|| navamaḥ sargaḥ ||
|| mandamukundaḥ ||
tāmatha manmathakhinnāṃ ratirasabhinnāṃ viṣādasampannām |
Verse 51
anucintitaharicaritāṃ kalahāntaritamuvāca sakhī || 51 ||
|| gītaṃ 18 ||
harirabhisarati vahati madhupavane |
kimaparamadhikasukhaṃ sakhi bhuvane ||
Verse 1
mādhave mā kuru mānini mānamaye || 1 ||
tālaphalādapi gurumatisarasam |
Verse 2
kiṃ viphalīkuruṣe kucakalaśam || 2 ||
kati na kathitamidamanupadamaciram |
Verse 3
mā parihara harimatiśayaruciram || 3 ||
kimiti viṣīdasi rodiṣi vikalā |
Verse 4
vihasati yuvatisabhā tava sakalā || 4 ||
sajalanalinīdalaśītalaśayane |
Verse 5
harimavalokya saphalay nayane || 5 ||
janayasi manasi kimiti gurukhedam |
Verse 6
śṛṇu mama vacanamanīhitabhedam || 6 ||
harirupayātu vadatu bahumadhuram |
Verse 7
kimiti karoṣi hṛdayamatividhuram || 7 ||
śrījayadevabhaṇitamatilalitam |
Verse 8
sukhayatu rasikajanaṃ haricaritam || 8 ||
snigdhe yatparuṣāsi yatpraṇamati stabdhāsi yadrāgiṇi dveṣasthāsi yadunmukhe vimukhatāṃ yātāsi tasminpriye |
Verse 52
yuktaṃ tadviparītakāriṇi tava śrīkhaṇḍacarcā viṣaṃ śītāṃśustapano himaṃ hutavahaḥ krīḍāmudo yātanāḥ || 52 ||
|| iti gītagovinde kalahāntaritāvarṇane mandamukundo nāma navamaḥ sargaḥ ||
Sanskrit — Devanagari (original)
॥ नवमः सर्गः ॥
॥ मन्दमुकुन्दः ॥
तामथ मन्मथखिन्नां रतिरसभिन्नां विषादसम्पन्नाम् ।
अनुचिन्तितहरिचरितां कलहान्तरितमुवाच सखी ॥ 51 ॥
॥ गीतं 18 ॥
हरिरभिसरति वहति मधुपवने ।
किमपरमधिकसुखं सखि भुवने ॥
माधवे मा कुरु मानिनि मानमये ॥ 1 ॥
तालफलादपि गुरुमतिसरसम् ।
किं विफलीकुरुषे कुचकलशम् ॥ 2 ॥
कति न कथितमिदमनुपदमचिरम् ।
मा परिहर हरिमतिशयरुचिरम् ॥ 3 ॥
किमिति विषीदसि रोदिषि विकला ।
विहसति युवतिसभा तव सकला ॥ 4 ॥
सजलनलिनीदलशीतलशयने ।
हरिमवलोक्य सफलय् नयने ॥ 5 ॥
जनयसि मनसि किमिति गुरुखेदम् ।
शृणु मम वचनमनीहितभेदम् ॥ 6 ॥
हरिरुपयातु वदतु बहुमधुरम् ।
किमिति करोषि हृदयमतिविधुरम् ॥ 7 ॥
श्रीजयदेवभणितमतिललितम् ।
सुखयतु रसिकजनं हरिचरितम् ॥ 8 ॥
स्निग्धे यत्परुषासि यत्प्रणमति स्तब्धासि यद्रागिणि द्वेषस्थासि यदुन्मुखे विमुखतां यातासि तस्मिन्प्रिये ।
युक्तं तद्विपरीतकारिणि तव श्रीखण्डचर्चा विषं शीतांशुस्तपनो हिमं हुतवहः क्रीडामुदो यातनाः ॥ 52 ॥
॥ इति गीतगोविन्दे कलहान्तरितावर्णने मन्दमुकुन्दो नाम नवमः सर्गः ॥