jaya padmapalāśākṣi jaya tvaṃ śrīpatipriye |
Verse 1
jaya mātarmahālakṣmi saṃsārārṇavatāriṇi || 1 ||
mahālakṣmi namastubhyaṃ namastubhyaṃ sureśvari |
Verse 2
haripriye namastubhyaṃ namastubhyaṃ dayānidhe || 2 ||
padmālaye namastubhyaṃ namastubhyaṃ ca sarvade |
Verse 3
sarvabhūtahitārthāya vasuvṛṣṭiṃ sadā kuru || 3 ||
jaganmātarnamastubhyaṃ namastubhyaṃ dayānidhe |
Verse 4
dayāvati namastubhyaṃ viśveśvari namo'stu te || 4 ||
namaḥ kṣīrārṇavasute namastrailokyadhāriṇi |
Verse 5
vasuvṛṣṭe namastubhyaṃ rakṣa māṃ śaraṇāgatam || 5 ||
rakṣa tvaṃ devadeveśi devadevasya vallabhe |
Verse 6
dāridryāttrāhi māṃ lakṣmi kṛpāṃ kuru mamopari || 6 ||
namastrailokyajanani namastrailokyapāvani |
Verse 7
brahmādayo namanti tvāṃ jagadānandadāyini || 7 ||
viṣṇupriye namastubhyaṃ namastubhyaṃ jagaddhite |
Verse 8
ārtihantri namastubhyaṃ samṛddhiṃ kuru me sadā || 8 ||
abjavāse namastubhyaṃ capalāyai namo namaḥ |
Verse 9
cañcalāyai namastubhyaṃ lalitāyai namo namaḥ || 9 ||
namaḥ pradyumnajanani mātastubhyaṃ namo namaḥ |
Verse 10
paripālaya māṃ mātaḥ māṃ tubhyaṃ śaraṇāgatam || 10 ||
śaraṇye tvāṃ prapanno'smi kamale kamalālaye |
Verse 11
trāhi trāhi mahālakṣmi paritrāṇaparāyaṇe || 11 ||
pāṇḍityaṃ śobhate naiva na śobhante guṇā nare |
Verse 12
śīlatvaṃ naiva śobheta mahālakṣmi tvayā vinā || 12 ||
tāvadvirājate rūpaṃ tāvacchīlaṃ virājate |
Verse 13
tāvadguṇā narāṇāṃ ca yāvallakṣmīḥ prasīdati || 13 ||
lakṣmi tvayā'laṅkṛtamānavā ye
pāpairvimuktā nṛpalokamānyāḥ |
guṇairvihīnā guṇino bhavanti
Verse 14
duśśīlinaḥ śīlavatāṃ variṣṭhāḥ || 14 ||
lakṣmīrbhūṣayate rūpaṃ lakṣmīrbhūṣayate kulam |
Verse 15
lakṣmīrbhūṣayate vidyāṃ sarvā lakṣmīrviśiṣyate || 15 ||
lakṣmī tvadguṇakīrtanena kamalā bhūryātyalaṃ jihmatām
rudrādyā ravicandradevapatayo vaktuṃ ca naiva kṣamāḥ |
asmābhistava rūpalakṣaṇaguṇānvaktuṃ kathaṃ śakyate
Verse 16
mātarmāṃ paripāhi viśvajananī kṛtvā mameṣṭaṃ dhruvam || 16 ||
dīnārtibhītaṃ bhavatāpapīḍitaṃ
dhanairvihīnaṃ tava pārśvamāgatam |
kṛpānidhitvānmama lakṣmi satvaraṃ
Verse 17
dhanapradānāddhananāyakaṃ kuru || 17 ||
māṃ vilokya jananī haripriye
nirdhanaṃ tava samīpamāgatam |
dehi me jhaṭiti lakṣmi karāgraṃ
Verse 18
vastrakāñcanavarānnamadbhutam || 18 ||
tvameva jananī lakṣmīḥ pitā lakṣmīstvameva ca |
Verse 19
bhrātā tvaṃ ca sakhā lakṣmīrvidyā lakṣmīstvameva ca || 19 ||
trāhi trāhi mahālakṣmi trāhi trāhi sureśvari |
Verse 20
trāhi trāhi jaganmātaḥ dāridryāttrāhi vegataḥ || 20 ||
namastubhyaṃ jagaddhātri namastubhyaṃ namo namaḥ |
Verse 21
dharmādhāre namastubhyaṃ namaḥ sampattidāyinī || 21 ||
dāridryārṇavamagno'haṃ nimagno'haṃ rasātale |
Verse 22
majjantaṃ māṃ kare dhṛtvā tūddhara tvaṃ rame drutam || 22 ||
kiṃ lakṣmi bahunoktena jalpitena punaḥ punaḥ |
Verse 23
anyanme śaraṇaṃ nāsti satyaṃ satyaṃ haripriye || 23 ||
etacchrutvā'gastyavākyaṃ hṛṣyamāṇā haripriyā |
Verse 24
uvāca madhurāṃ vāṇīṃ tuṣṭā'haṃ tava sarvadā || 24 ||
śrīlakṣmīruvāca |
yattvayoktamidaṃ stotraṃ yaḥ paṭhiṣyati mānavaḥ |
Verse 25
śṛṇoti ca mahābhāgastasyāhaṃ vaśavartinī || 25 ||
nityaṃ paṭhati yo bhaktyā tvalakṣmīstasya naśyati |
Verse 26
ṛṇaṃ ca naśyate tīvraṃ viyogaṃ naiva paśyati || 26 ||
yaḥ paṭhetprātarutthāya śraddhābhaktisamanvitaḥ |
Verse 27
gṛhe tasya sadā tiṣṭennityaṃ śrīḥ patinā saha || 27 ||
sukhasaubhāgyasampanno manasvī buddhimānbhavet |
Verse 28
putravān guṇavān śreṣṭho bhogabhoktā ca mānavaḥ || 28 ||
idaṃ stotraṃ mahāpuṇyaṃ lakṣmyāgastyaprakīrtitam |
Verse 29
viṣṇuprasādajananaṃ caturvargaphalapradam || 29 ||
rājadvāre jayaścaiva śatroścaiva parājayaḥ |
Verse 30
bhūtapretapiśācānāṃ vyāghrāṇāṃ na bhayaṃ tathā || 30 ||
na śastrānalatoyaughādbhayaṃ tasya prajāyate |
Verse 31
durvṛttānāṃ ca pāpānāṃ bahuhānikaraṃ param || 31 ||
mandurākariśālāsu gavāṃ goṣṭhe samāhitaḥ |
Verse 32
paṭhettaddoṣaśāntyarthaṃ mahāpātakanāśanam || 32 ||
sarvasaukhyakaraṃ nṝṇāmāyurārogyadaṃ tathā |
Verse 33
agastyamuninā proktaṃ prajānāṃ hitakāmyayā || 33 ||
ityagastyaviracitaṃ śrī lakṣmī stotram |
Sanskrit — Devanagari (original)
जय पद्मपलाशाक्षि जय त्वं श्रीपतिप्रिये ।
जय मातर्महालक्ष्मि संसारार्णवतारिणि ॥ 1 ॥
महालक्ष्मि नमस्तुभ्यं नमस्तुभ्यं सुरेश्वरि ।
हरिप्रिये नमस्तुभ्यं नमस्तुभ्यं दयानिधे ॥ 2 ॥
पद्मालये नमस्तुभ्यं नमस्तुभ्यं च सर्वदे ।
सर्वभूतहितार्थाय वसुवृष्टिं सदा कुरु ॥ 3 ॥
जगन्मातर्नमस्तुभ्यं नमस्तुभ्यं दयानिधे ।
दयावति नमस्तुभ्यं विश्वेश्वरि नमोऽस्तु ते ॥ 4 ॥
नमः क्षीरार्णवसुते नमस्त्रैलोक्यधारिणि ।
वसुवृष्टे नमस्तुभ्यं रक्ष मां शरणागतम् ॥ 5 ॥
रक्ष त्वं देवदेवेशि देवदेवस्य वल्लभे ।
दारिद्र्यात्त्राहि मां लक्ष्मि कृपां कुरु ममोपरि ॥ 6 ॥
नमस्त्रैलोक्यजननि नमस्त्रैलोक्यपावनि ।
ब्रह्मादयो नमन्ति त्वां जगदानन्ददायिनि ॥ 7 ॥
विष्णुप्रिये नमस्तुभ्यं नमस्तुभ्यं जगद्धिते ।
आर्तिहन्त्रि नमस्तुभ्यं समृद्धिं कुरु मे सदा ॥ 8 ॥
अब्जवासे नमस्तुभ्यं चपलायै नमो नमः ।
चञ्चलायै नमस्तुभ्यं ललितायै नमो नमः ॥ 9 ॥
नमः प्रद्युम्नजननि मातस्तुभ्यं नमो नमः ।
परिपालय मां मातः मां तुभ्यं शरणागतम् ॥ 10 ॥
शरण्ये त्वां प्रपन्नोऽस्मि कमले कमलालये ।
त्राहि त्राहि महालक्ष्मि परित्राणपरायणे ॥ 11 ॥
पाण्डित्यं शोभते नैव न शोभन्ते गुणा नरे ।
शीलत्वं नैव शोभेत महालक्ष्मि त्वया विना ॥ 12 ॥
तावद्विराजते रूपं तावच्छीलं विराजते ।
तावद्गुणा नराणां च यावल्लक्ष्मीः प्रसीदति ॥ 13 ॥
लक्ष्मि त्वयाऽलङ्कृतमानवा ये
पापैर्विमुक्ता नृपलोकमान्याः ।
गुणैर्विहीना गुणिनो भवन्ति
दुश्शीलिनः शीलवतां वरिष्ठाः ॥ 14 ॥
लक्ष्मीर्भूषयते रूपं लक्ष्मीर्भूषयते कुलम् ।
लक्ष्मीर्भूषयते विद्यां सर्वा लक्ष्मीर्विशिष्यते ॥ 15 ॥
लक्ष्मी त्वद्गुणकीर्तनेन कमला भूर्यात्यलं जिह्मताम्
रुद्राद्या रविचन्द्रदेवपतयो वक्तुं च नैव क्षमाः ।
अस्माभिस्तव रूपलक्षणगुणान्वक्तुं कथं शक्यते
मातर्मां परिपाहि विश्वजननी कृत्वा ममेष्टं ध्रुवम् ॥ 16 ॥
दीनार्तिभीतं भवतापपीडितं
धनैर्विहीनं तव पार्श्वमागतम् ।
कृपानिधित्वान्मम लक्ष्मि सत्वरं
धनप्रदानाद्धननायकं कुरु ॥ 17 ॥
मां विलोक्य जननी हरिप्रिये
निर्धनं तव समीपमागतम् ।
देहि मे झटिति लक्ष्मि कराग्रं
वस्त्रकाञ्चनवरान्नमद्भुतम् ॥ 18 ॥
त्वमेव जननी लक्ष्मीः पिता लक्ष्मीस्त्वमेव च ।
भ्राता त्वं च सखा लक्ष्मीर्विद्या लक्ष्मीस्त्वमेव च ॥ 19 ॥
त्राहि त्राहि महालक्ष्मि त्राहि त्राहि सुरेश्वरि ।
त्राहि त्राहि जगन्मातः दारिद्र्यात्त्राहि वेगतः ॥ 20 ॥
नमस्तुभ्यं जगद्धात्रि नमस्तुभ्यं नमो नमः ।
धर्माधारे नमस्तुभ्यं नमः सम्पत्तिदायिनी ॥ 21 ॥
दारिद्र्यार्णवमग्नोऽहं निमग्नोऽहं रसातले ।
मज्जन्तं मां करे धृत्वा तूद्धर त्वं रमे द्रुतम् ॥ 22 ॥
किं लक्ष्मि बहुनोक्तेन जल्पितेन पुनः पुनः ।
अन्यन्मे शरणं नास्ति सत्यं सत्यं हरिप्रिये ॥ 23 ॥
एतच्छ्रुत्वाऽगस्त्यवाक्यं हृष्यमाणा हरिप्रिया ।
उवाच मधुरां वाणीं तुष्टाऽहं तव सर्वदा ॥ 24 ॥
श्रीलक्ष्मीरुवाच ।
यत्त्वयोक्तमिदं स्तोत्रं यः पठिष्यति मानवः ।
शृणोति च महाभागस्तस्याहं वशवर्तिनी ॥ 25 ॥
नित्यं पठति यो भक्त्या त्वलक्ष्मीस्तस्य नश्यति ।
ऋणं च नश्यते तीव्रं वियोगं नैव पश्यति ॥ 26 ॥
यः पठेत्प्रातरुत्थाय श्रद्धाभक्तिसमन्वितः ।
गृहे तस्य सदा तिष्टेन्नित्यं श्रीः पतिना सह ॥ 27 ॥
सुखसौभाग्यसम्पन्नो मनस्वी बुद्धिमान्भवेत् ।
पुत्रवान् गुणवान् श्रेष्ठो भोगभोक्ता च मानवः ॥ 28 ॥
इदं स्तोत्रं महापुण्यं लक्ष्म्यागस्त्यप्रकीर्तितम् ।
विष्णुप्रसादजननं चतुर्वर्गफलप्रदम् ॥ 29 ॥
राजद्वारे जयश्चैव शत्रोश्चैव पराजयः ।
भूतप्रेतपिशाचानां व्याघ्राणां न भयं तथा ॥ 30 ॥
न शस्त्रानलतोयौघाद्भयं तस्य प्रजायते ।
दुर्वृत्तानां च पापानां बहुहानिकरं परम् ॥ 31 ॥
मन्दुराकरिशालासु गवां गोष्ठे समाहितः ।
पठेत्तद्दोषशान्त्यर्थं महापातकनाशनम् ॥ 32 ॥
सर्वसौख्यकरं नॄणामायुरारोग्यदं तथा ।
अगस्त्यमुनिना प्रोक्तं प्रजानां हितकाम्यया ॥ 33 ॥
इत्यगस्त्यविरचितं श्री लक्ष्मी स्तोत्रम् ।