Dashavatara Stotram (vedantacharya Kritam) — Sinhala Script

දේවෝ නශ්ශුභමාතනෝතු දශධා නිර්වර්තයන්භූමිකාං

රඞ්ගේ ධාමනි ලබ්ධනිර්භරරසෛරධ්යක්ෂිතෝ භාවුකෛඃ .

යද්භාවේෂු පෘථග්විධේෂ්වනුගුණාන්භාවාන්ස්වයං බිභ්රතී

යද්ධර්මෛරිහ ධර්මිණී විහරතේ නානාකෘතිර්නායිකා .. 1 ..

නිර්මග්නශ්රුතිජාලමාර්ගණදශාදත්තක්ෂණෛර්වීක්ෂණෛ-

රන්තස්තන්වදිවාරවින්දගහනාන්යෞදන්වතීනාමපාම් .

නිෂ්ප්රත්යූහතරඞ්ගරිඞ්ඛණමිථඃ ප්රත්යූඪපාථශ්ඡටා-

ඩෝලාරෝහසදෝහලං භගවතෝ මාත්ස්යං වපුඃ පාතු නඃ .. 2 ..

අව්යාසුර්භුවනත්රයීමනිභෘතං කණ්ඩූයනෛරද්රිණා

නිද්රාණස්ය පරස්ය කූර්මවපුෂෝ නිශ්වාසවාතෝර්මයඃ .

යද්වික්ෂේපණසංස්කෘතෝදධිපයඃ ප්රේඞ්ඛෝලපර්යඞ්කිකා-

නිත්යාරෝහණනිර්වෘතෝ විහරතේ දේවස්සහෛව ශ්රියා .. 3 ..

ගෝපායේදනිශං ජගන්ති කුහනාපෝත්රී පවිත්රීකෘත-

බ්රහ්මාණ්ඩප්රලයෝර්මිඝෝෂගුරුභිර්ඝෝණාරවෛර්ඝුර්ඝුරෛඃ .

යද්දංෂ්ට්රාඞ්කුරකෝටිගාඪඝටනානිෂ්කම්පනිත්යස්ථිති-

ර්බ්රහ්මස්තම්බමසෞදසෞ භගවතීමුස්තේවවිශ්වම්භරා .. 4 ..

ප්රත්යාදිෂ්ටපුරාතනප්රහරණග්රාමඃක්ෂණං පාණිජෛ-

රව්යාත්ත්රීණි ජගන්ත්යකුණ්ඨමහිමා වෛකුණ්ඨකණ්ඨීරවඃ .

යත්ප්රාදුර්භවනාදවන්ධ්යජඨරායාදෘච්ඡිකාද්වේධසාං-

යා කාචිත්සහසා මහාසුරගෘහස්ථූණාපිතාමහ්යභෘත් .. 5 ..

ව්රීඩාවිද්ධවදාන්යදානවයශෝනාසීරධාටීභට-

ස්ත්රෛයක්ෂං මකුටං පුනන්නවතු නස්ත්රෛවික්රමෝ වික්රමඃ .

යත්ප්රස්තාවසමුච්ඡ්රිතධ්වජපටීවෘත්තාන්තසිද්ධාන්තිභි-

ස්ස්රෝතෝභිස්සුරසින්ධුරෂ්ටසුදිශාසෞධේෂු දෝධූයතේ .. 6 ..

ක්රෝධාග්නිං ජමදග්නිපීඩනභවං සන්තර්පයිෂ්යන් ක්රමා-

දක්ෂත්රාමිහ සන්තතක්ෂ ය ඉමාං ත්රිස්සප්තකෘත්වඃ ක්ෂිතිම් .

දත්වා කර්මණි දක්ෂිණාං ක්වචන තාමාස්කන්ද්ය සින්ධුං වස-

න්නබ්රහ්මණ්යමපාකරෝතු භගවානාබ්රහ්මකීටං මුනිඃ .. 7 ..

පාරාවාරපයෝවිශෝෂණකලාපාරීණකාලානල-

ජ්වාලාජාලවිහාරහාරිවිශිඛව්යාපාරඝෝරක්රමඃ .

සර්වාවස්ථසකෘත්ප්රපන්නජනතාසංරක්ෂණෛකව්රතී

ධර්මෝ විග්රහවානධර්මවිරතිං ධන්වී සතන්වීතු නඃ .. 8 ..

ඵක්කත්කෞරවපට්ටණප්රභෘතයඃ ප්රාස්තප්රලම්බාදය-

ස්තාලාඞ්කාස්යතථාවිධා විහෘතයස්තන්වන්තු භද්රාණි නඃ .

ක්ෂීරං ශර්කරයේව යාභිරපෘථග්භූතාඃ ප්රභූතෛර්ගුණෛ-

රාකෞමාරකමස්වදන්තජගතේ කෘෂ්ණස්ය තාඃ කේලයඃ .. 9 ..

නාථායෛව නමඃ පදං භවතු නශ්චිත්රෛශ්චරිත්රක්රමෛ-

ර්භූයෝභිර්භුවනාන්යමූනිකුහනාගෝපාය ගෝපායතේ .

කාලින්දීරසිකායකාලියඵණිස්ඵාරස්ඵටාවාටිකා-

රඞ්ගෝත්සඞ්ගවිශඞ්කචඞ්ක්රමධුරාපර්යාය චර්යායතේ .. 10 ..

භාවින්යා දශයාභවන්නිහ භවධ්වංසාය නඃ කල්පතාං

කල්කී විෂ්ණුයශස්සුතඃ කලිකථාකාලුෂ්යකූලඞ්කෂඃ .

නිශ්ශේෂක්ෂතකණ්ටකේ ක්ෂිතිතලේ ධාරාජලෞඝෛර්ධ්රුවං

ධර්මං කාර්තයුගං ප්රරෝහයති යන්නිස්ත්රිංශධාරාධරඃ .. 11 ..

ඉච්ඡාමීන විහාරකච්ඡප මහාපෝත්රින් යදෘච්ඡාහරේ

රක්ෂාවාමන රෝෂරාම කරුණාකාකුත්ස්ථ හේලාහලින් .

ක්රීඩාවල්ලව කල්කිවාහන දශාකල්කින්නිති ප්රත්යහං

ජල්පන්තඃ පුරුෂාඃ පුනන්තු භුවනං පුණ්යෞඝපණ්යාපණාඃ ..

විද්යෝදන්වති වේඞ්කටේශ්වරකවෞ ජාතං ජගන්මඞ්ගලං

දේවේශස්යදශාවතාරවිෂයං ස්තෝත්රං විවක්ෂේත යඃ .

වක්ත්රේ තස්ය සරස්වතී බහුමුඛී භක්තිඃ පරා මානසේ

ශුද්ධිඃ කාපි තනෞ දිශාසු දශසු ඛ්යාතිශ්ශුභා ජෘම්භතේ ..

ඉති කවිතාර්කිකසිංහස්ය සර්වතන්ත්රස්වතන්ත්රස්ය ශ්රීමද්වේඞ්කටනාථස්ය වේදාන්තාචාර්යස්ය කෘතිෂු දශාවතාරස්තෝත්රම් .

Roman (IAST) Transliteration

devo naśśubhamātanotu daśadhā nirvartayanbhūmikāṃ

raṅge dhāmani labdhanirbhararasairadhyakṣito bhāvukaiḥ |

yadbhāveṣu pṛthagvidheṣvanuguṇānbhāvānsvayaṃ bibhratī

yaddharmairiha dharmiṇī viharate nānākṛtirnāyikā || 1 ||

nirmagnaśrutijālamārgaṇadaśādattakṣaṇairvīkṣaṇai-

rantastanvadivāravindagahanānyaudanvatīnāmapām |

niṣpratyūhataraṅgariṅkhaṇamithaḥ pratyūḍhapāthaśchaṭā-

ḍolārohasadohalaṃ bhagavato mātsyaṃ vapuḥ pātu naḥ || 2 ||

avyāsurbhuvanatrayīmanibhṛtaṃ kaṇḍūyanairadriṇā

nidrāṇasya parasya kūrmavapuṣo niśvāsavātormayaḥ |

yadvikṣepaṇasaṃskṛtodadhipayaḥ preṅkholaparyaṅkikā-

nityārohaṇanirvṛto viharate devassahaiva śriyā || 3 ||

gopāyedaniśaṃ jaganti kuhanāpotrī pavitrīkṛta-

brahmāṇḍapralayormighoṣagurubhirghoṇāravairghurghuraiḥ |

yaddaṃṣṭrāṅkurakoṭigāḍhaghaṭanāniṣkampanityasthiti-

rbrahmastambamasaudasau bhagavatīmustevaviśvambharā || 4 ||

pratyādiṣṭapurātanapraharaṇagrāmaḥkṣaṇaṃ pāṇijai-

ravyāttrīṇi jagantyakuṇṭhamahimā vaikuṇṭhakaṇṭhīravaḥ |

yatprādurbhavanādavandhyajaṭharāyādṛcchikādvedhasāṃ-

yā kācitsahasā mahāsuragṛhasthūṇāpitāmahyabhṛt || 5 ||

vrīḍāviddhavadānyadānavayaśonāsīradhāṭībhaṭa-

straiyakṣaṃ makuṭaṃ punannavatu nastraivikramo vikramaḥ |

yatprastāvasamucchritadhvajapaṭīvṛttāntasiddhāntibhi-

ssrotobhissurasindhuraṣṭasudiśāsaudheṣu dodhūyate || 6 ||

krodhāgniṃ jamadagnipīḍanabhavaṃ santarpayiṣyan kramā-

dakṣatrāmiha santatakṣa ya imāṃ trissaptakṛtvaḥ kṣitim |

datvā karmaṇi dakṣiṇāṃ kvacana tāmāskandya sindhuṃ vasa-

nnabrahmaṇyamapākarotu bhagavānābrahmakīṭaṃ muniḥ || 7 ||

pārāvārapayoviśoṣaṇakalāpārīṇakālānala-

jvālājālavihārahāriviśikhavyāpāraghorakramaḥ |

sarvāvasthasakṛtprapannajanatāsaṃrakṣaṇaikavratī

dharmo vigrahavānadharmaviratiṃ dhanvī satanvītu naḥ || 8 ||

phakkatkauravapaṭṭaṇaprabhṛtayaḥ prāstapralambādaya-

stālāṅkāsyatathāvidhā vihṛtayastanvantu bhadrāṇi naḥ |

kṣīraṃ śarkarayeva yābhirapṛthagbhūtāḥ prabhūtairguṇai-

rākaumārakamasvadantajagate kṛṣṇasya tāḥ kelayaḥ || 9 ||

nāthāyaiva namaḥ padaṃ bhavatu naścitraiścaritrakramai-

rbhūyobhirbhuvanānyamūnikuhanāgopāya gopāyate |

kālindīrasikāyakāliyaphaṇisphārasphaṭāvāṭikā-

raṅgotsaṅgaviśaṅkacaṅkramadhurāparyāya caryāyate || 10 ||

bhāvinyā daśayābhavanniha bhavadhvaṃsāya naḥ kalpatāṃ

kalkī viṣṇuyaśassutaḥ kalikathākāluṣyakūlaṅkaṣaḥ |

niśśeṣakṣatakaṇṭake kṣititale dhārājalaughairdhruvaṃ

dharmaṃ kārtayugaṃ prarohayati yannistriṃśadhārādharaḥ || 11 ||

icchāmīna vihārakacchapa mahāpotrin yadṛcchāhare

rakṣāvāmana roṣarāma karuṇākākutstha helāhalin |

krīḍāvallava kalkivāhana daśākalkinniti pratyahaṃ

jalpantaḥ puruṣāḥ punantu bhuvanaṃ puṇyaughapaṇyāpaṇāḥ ||

vidyodanvati veṅkaṭeśvarakavau jātaṃ jaganmaṅgalaṃ

deveśasyadaśāvatāraviṣayaṃ stotraṃ vivakṣeta yaḥ |

vaktre tasya sarasvatī bahumukhī bhaktiḥ parā mānase

śuddhiḥ kāpi tanau diśāsu daśasu khyātiśśubhā jṛmbhate ||

iti kavitārkikasiṃhasya sarvatantrasvatantrasya śrīmadveṅkaṭanāthasya vedāntācāryasya kṛtiṣu daśāvatārastotram |

Sanskrit — Devanagari (original)

देवो नश्शुभमातनोतु दशधा निर्वर्तयन्भूमिकां

रङ्गे धामनि लब्धनिर्भररसैरध्यक्षितो भावुकैः ।

यद्भावेषु पृथग्विधेष्वनुगुणान्भावान्स्वयं बिभ्रती

यद्धर्मैरिह धर्मिणी विहरते नानाकृतिर्नायिका ॥ 1 ॥

निर्मग्नश्रुतिजालमार्गणदशादत्तक्षणैर्वीक्षणै-

रन्तस्तन्वदिवारविन्दगहनान्यौदन्वतीनामपाम् ।

निष्प्रत्यूहतरङ्गरिङ्खणमिथः प्रत्यूढपाथश्छटा-

डोलारोहसदोहलं भगवतो मात्स्यं वपुः पातु नः ॥ 2 ॥

अव्यासुर्भुवनत्रयीमनिभृतं कण्डूयनैरद्रिणा

निद्राणस्य परस्य कूर्मवपुषो निश्वासवातोर्मयः ।

यद्विक्षेपणसंस्कृतोदधिपयः प्रेङ्खोलपर्यङ्किका-

नित्यारोहणनिर्वृतो विहरते देवस्सहैव श्रिया ॥ 3 ॥

गोपायेदनिशं जगन्ति कुहनापोत्री पवित्रीकृत-

ब्रह्माण्डप्रलयोर्मिघोषगुरुभिर्घोणारवैर्घुर्घुरैः ।

यद्दंष्ट्राङ्कुरकोटिगाढघटनानिष्कम्पनित्यस्थिति-

र्ब्रह्मस्तम्बमसौदसौ भगवतीमुस्तेवविश्वम्भरा ॥ 4 ॥

प्रत्यादिष्टपुरातनप्रहरणग्रामःक्षणं पाणिजै-

रव्यात्त्रीणि जगन्त्यकुण्ठमहिमा वैकुण्ठकण्ठीरवः ।

यत्प्रादुर्भवनादवन्ध्यजठरायादृच्छिकाद्वेधसां-

या काचित्सहसा महासुरगृहस्थूणापितामह्यभृत् ॥ 5 ॥

व्रीडाविद्धवदान्यदानवयशोनासीरधाटीभट-

स्त्रैयक्षं मकुटं पुनन्नवतु नस्त्रैविक्रमो विक्रमः ।

यत्प्रस्तावसमुच्छ्रितध्वजपटीवृत्तान्तसिद्धान्तिभि-

स्स्रोतोभिस्सुरसिन्धुरष्टसुदिशासौधेषु दोधूयते ॥ 6 ॥

क्रोधाग्निं जमदग्निपीडनभवं सन्तर्पयिष्यन् क्रमा-

दक्षत्रामिह सन्ततक्ष य इमां त्रिस्सप्तकृत्वः क्षितिम् ।

दत्वा कर्मणि दक्षिणां क्वचन तामास्कन्द्य सिन्धुं वस-

न्नब्रह्मण्यमपाकरोतु भगवानाब्रह्मकीटं मुनिः ॥ 7 ॥

पारावारपयोविशोषणकलापारीणकालानल-

ज्वालाजालविहारहारिविशिखव्यापारघोरक्रमः ।

सर्वावस्थसकृत्प्रपन्नजनतासंरक्षणैकव्रती

धर्मो विग्रहवानधर्मविरतिं धन्वी सतन्वीतु नः ॥ 8 ॥

फक्कत्कौरवपट्टणप्रभृतयः प्रास्तप्रलम्बादय-

स्तालाङ्कास्यतथाविधा विहृतयस्तन्वन्तु भद्राणि नः ।

क्षीरं शर्करयेव याभिरपृथग्भूताः प्रभूतैर्गुणै-

राकौमारकमस्वदन्तजगते कृष्णस्य ताः केलयः ॥ 9 ॥

नाथायैव नमः पदं भवतु नश्चित्रैश्चरित्रक्रमै-

र्भूयोभिर्भुवनान्यमूनिकुहनागोपाय गोपायते ।

कालिन्दीरसिकायकालियफणिस्फारस्फटावाटिका-

रङ्गोत्सङ्गविशङ्कचङ्क्रमधुरापर्याय चर्यायते ॥ 10 ॥

भाविन्या दशयाभवन्निह भवध्वंसाय नः कल्पतां

कल्की विष्णुयशस्सुतः कलिकथाकालुष्यकूलङ्कषः ।

निश्शेषक्षतकण्टके क्षितितले धाराजलौघैर्ध्रुवं

धर्मं कार्तयुगं प्ररोहयति यन्निस्त्रिंशधाराधरः ॥ 11 ॥

इच्छामीन विहारकच्छप महापोत्रिन् यदृच्छाहरे

रक्षावामन रोषराम करुणाकाकुत्स्थ हेलाहलिन् ।

क्रीडावल्लव कल्किवाहन दशाकल्किन्निति प्रत्यहं

जल्पन्तः पुरुषाः पुनन्तु भुवनं पुण्यौघपण्यापणाः ॥

विद्योदन्वति वेङ्कटेश्वरकवौ जातं जगन्मङ्गलं

देवेशस्यदशावतारविषयं स्तोत्रं विवक्षेत यः ।

वक्त्रे तस्य सरस्वती बहुमुखी भक्तिः परा मानसे

शुद्धिः कापि तनौ दिशासु दशसु ख्यातिश्शुभा जृम्भते ॥

इति कवितार्किकसिंहस्य सर्वतन्त्रस्वतन्त्रस्य श्रीमद्वेङ्कटनाथस्य वेदान्ताचार्यस्य कृतिषु दशावतारस्तोत्रम् ।