5.1 - Savitrani Juhoti Prasutyai - Krishna Yajurveda Taittiriya Samhita Pathah — Kannada Script

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಪ್ರಥಮಃ ಪ್ರಶ್ನಃ - ಉಖ್ಯಾಗ್ನಿಕಥನಂ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಸಾ॒ವಿ॒ತ್ರಾಣಿ॑ ಜುಹೋತಿ॒ ಪ್ರಸೂ᳚ತ್ಯೈ ಚತುರ್ಗೃಹೀ॒ತೇನ॑ ಜುಹೋತಿ॒ ಚತು॑ಷ್ಪಾದಃ ಪ॒ಶವಃ॑ ಪ॒ಶೂನೇ॒ವಾ-ಽವ॑ ರುನ್ಧೇ॒ ಚತ॑ಸ್ರೋ॒ ದಿಶೋ॑ ದಿ॒ಕ್ಷ್ವೇ॑ವ ಪ್ರತಿ॑ ತಿಷ್ಠತಿ॒ ಛನ್ದಾಗ್ಂ॑ಸಿ ದೇ॒ವೇಭ್ಯೋ ಽಪಾ᳚-ಽಕ್ರಾಮ॒-ನ್ನ ವೋ॑ ಭಾ॒ಗಾನಿ॑ ಹ॒ವ್ಯಂ-ವಁ॑ಕ್ಷ್ಯಾಮ॒ ಇತಿ॒ ತೇಭ್ಯ॑ ಏ॒ತಚ್ಚ॑ತು-ರ್ಗೃಹೀ॒ತಮ॑-ಧಾರಯ-ನ್ಪುರೋ-ಽನು ವಾ॒ಕ್ಯಾ॑ಯೈ ಯಾ॒ಜ್ಯಾ॑ಯೈ ದೇ॒ವತಾ॑ಯೈ ವಷಟ್ಕಾ॒ರಾಯ॒ ಯಚ್ಚ॑ತುರ್ಗೃಹೀ॒ತ-ಞ್ಜು॒ಹೋತಿ॒ ಛನ್ದಾಗ್॑ಸ್ಯೇ॒ವ ತ-ತ್ಪ್ರೀ॑ಣಾತಿ॒ ತಾನ್ಯ॑ಸ್ಯ ಪ್ರೀ॒ತಾನಿ॑ ದೇ॒ವೇಭ್ಯೋ॑ ಹ॒ವ್ಯಂ-ವಁ॑ಹನ್ತಿ॒ ಯ-ಙ್ಕಾ॒ಮಯೇ॑ತ॒ [ಯ-ಙ್ಕಾ॒ಮಯೇ॑ತ, ಪಾಪೀ॑ಯಾನ್-ಥ್ಸ್ಯಾ॒ದಿತ್ಯೇಕೈ॑ಕ॒-] 1

ಪಾಪೀ॑ಯಾನ್-ಥ್ಸ್ಯಾ॒ದಿತ್ಯೇಕೈ॑ಕ॒-ನ್ತಸ್ಯ॑ ಜುಹುಯಾ॒-ದಾಹು॑ತೀಭಿರೇ॒ವೈನ॒ಮಪ॑ ಗೃಹ್ಣಾತಿ॒ ಪಾಪೀ॑ಯಾ-ನ್ಭವತಿ॒ ಯ-ಙ್ಕಾ॒ಮಯೇ॑ತ॒ ವಸೀ॑ಯಾನ್-ಥ್ಸ್ಯಾ॒ದಿತಿ॒ ಸರ್ವಾ॑ಣಿ॒ ತಸ್ಯಾ॑-ಽನು॒ದ್ರುತ್ಯ॑ ಜುಹುಯಾ॒ದಾಹು॑ತ್ಯೈ॒ವೈನ॑ಮ॒ಭಿ ಕ್ರ॑ಮಯತಿ॒ ವಸೀ॑ಯಾ-ನ್ಭವ॒ತ್ಯಥೋ॑ ಯ॒ಜ್ಞಸ್ಯೈ॒ವೈಷಾ-ಽಭಿಕ್ರಾ᳚ನ್ತಿ॒ರೇತಿ॒ ವಾ ಏ॒ಷ ಯ॑ಜ್ಞಮು॒ಖಾ-ದೃದ್ಧ್ಯಾ॒ ಯೋ᳚-ಽಗ್ನೇರ್ದೇ॒ವತಾ॑ಯಾ॒ ಏತ್ಯ॒ಷ್ಟಾವೇ॒ತಾನಿ॑ ಸಾವಿ॒ತ್ರಾಣಿ॑ ಭವನ್ತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರೋ᳚- [ಗಾ॑ಯ॒ತ್ರಃ, ಅ॒ಗ್ನಿಸ್ತೇನೈ॒ವ] 2

-ಽಗ್ನಿಸ್ತೇನೈ॒ವ ಯ॑ಜ್ಞಮು॒ಖಾದೃದ್ಧ್ಯಾ॑ ಅ॒ಗ್ನೇರ್ದೇ॒ವತಾ॑ಯೈ॒ ನೈತ್ಯ॒ಷ್ಟೌ ಸಾ॑ವಿ॒ತ್ರಾಣಿ॑ ಭವ॒ನ್ತ್ಯಾಹು॑ತಿರ್ನವ॒ಮೀ ತ್ರಿ॒ವೃತ॑ಮೇ॒ವ ಯ॑ಜ್ಞಮು॒ಖೇ ವಿಯಾ॑ತಯತಿ॒ ಯದಿ॑ ಕಾ॒ಮಯೇ॑ತ॒ ಛನ್ದಾಗ್ಂ॑ಸಿ ಯಜ್ಞಯಶ॒ಸೇನಾ᳚ ಽರ್ಪಯೇಯ॒ಮಿತ್ಯೃಚ॑ಮನ್ತ॒ಮಾ-ಙ್ಕು॑ರ್ಯಾ॒ಚ್ಛನ್ದಾಗ್॑ಸ್ಯೇ॒ವ ಯ॑ಜ್ಞಯಶ॒ಸೇನಾ᳚ ಽರ್ಪಯತಿ॒ ಯದಿ॑ ಕಾ॒ಮಯೇ॑ತ॒ ಯಜ॑ಮಾನಂ-ಯಁಜ್ಞಯಶ॒ಸೇನಾ᳚-ಽರ್ಪಯೇಯ॒ಮಿತಿ॒ ಯಜು॑ರನ್ತ॒ಮ-ಙ್ಕು॑ರ್ಯಾ॒-ದ್ಯಜ॑ಮಾನಮೇ॒ವ ಯ॑ಜ್ಞಯಶ॒ಸೇನಾ᳚-ಽರ್ಪಯತ್ಯೃ॒ಚಾ ಸ್ತೋಮ॒ಗ್ಂ॒ ಸಮ॑ರ್ಧ॒ಯೇ- [ಸಮ॑ರ್ಧ॒ಯೇತಿ॑, ಆ॒ಹ॒ ಸಮೃ॑ದ್ಧ್ಯೈ] 3

-ತ್ಯಾ॑ಹ॒ ಸಮೃ॑ದ್ಧ್ಯೈ ಚ॒ತುರ್ಭಿ॒ರಭ್ರಿ॒ಮಾ ದ॑ತ್ತೇ ಚ॒ತ್ವಾರಿ॒ ಛನ್ದಾಗ್ಂ॑ಸಿ॒ ಛನ್ದೋ॑ಭಿರೇ॒ವ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತ್ಯಾ॑ಹ॒ ಪ್ರಸೂ᳚ತ್ಯಾ ಅ॒ಗ್ನಿರ್ದೇ॒ವೇಭ್ಯೋ॒ ನಿಲಾ॑ಯತ॒ ಸ ವೇಣು॒-ಮ್ಪ್ರಾ-ಽವಿ॑ಶ॒-ಥ್ಸ ಏ॒ತಾಮೂ॒ತಿಮನು॒ ಸಮ॑ಚರ॒-ದ್ಯ-ದ್ವೇಣೋ᳚-ಸ್ಸುಷಿ॒ರಗ್ಂ ಸು॑ಷಿ॒ರಾ-ಽಭ್ರಿ॑ರ್ಭವತಿ ಸಯೋನಿ॒ತ್ವಾಯ॒ ಸ ಯತ್ರ॑ಯ॒ತ್ರಾ-ಽವ॑ಸ॒-ತ್ತ-ತ್ಕೃ॒ಷ್ಣಮ॑ಭವ-ತ್ಕಲ್ಮಾ॒ಷೀ ಭ॑ವತಿ ರೂ॒ಪಸ॑ಮೃದ್ಧ್ಯಾ ಉಭಯತಃ॒, ಕ್ಷ್ಣೂರ್ಭ॑ವತೀ॒ತಶ್ಚಾ॒-ಽ-ಮುತ॑ಶ್ಚಾ॒-ಽರ್ಕಸ್ಯಾ-ವ॑ರುದ್ಧ್ಯೈ ವ್ಯಾಮಮಾ॒ತ್ರೀ ಭ॑ವತ್ಯೇ॒ತಾವ॒ದ್ವೈ ಪುರು॑ಷೇ ವೀ॒ರ್ಯಂ॑-ವೀಁ॒ರ್ಯ॑ಸಮ್ಮಿ॒ತಾ ಽಪ॑ರಿಮಿತಾ ಭವ॒ತ್ಯ-ಪ॑ರಿಮಿತ॒ಸ್ಯಾ-ಽ ವ॑ರುದ್ಧ್ಯೈ॒ ಯೋ ವನ॒ಸ್ಪತೀ॑ನಾ-ಮ್ಫಲ॒ಗ್ರಹಿ॒-ಸ್ಸ ಏ॑ಷಾಂ-ವೀಁ॒ರ್ಯಾ॑ವಾ-ನ್ಫಲ॒ಗ್ರಹಿ॒ರ್ವೇಣು॑-ರ್ವೈಣ॒ವೀ ಭ॑ವತಿ ವೀ॒ರ್ಯ॑ಸ್ಯಾ ವ॑ರುದ್ಧ್ಯೈ ॥ 4 ॥

(ಕಾ॒ಮಯೇ॑ತ - ಗಾಯ॒ತ್ರೋ᳚ - ಽರ್ಧ॒ಯೇತಿ॑ - ಚ - ಸ॒ಪ್ತವಿಗ್ಂ॑ಶತಿಶ್ಚ) (ಅ. 1)

ವ್ಯೃ॑ದ್ಧಂ॒-ವಾಁ ಏ॒ತ-ದ್ಯ॒ಜ್ಞಸ್ಯ॒ ಯದ॑ಯ॒ಜುಷ್ಕೇ॑ಣ ಕ್ರಿ॒ಯತ॑ ಇ॒ಮಾಮ॑ಗೃಭ್ಣ-ನ್ರಶ॒ನಾ-ಮೃ॒ತಸ್ಯೇತ್ಯ॑ಶ್ವಾಭಿ॒ಧಾನೀ॒ಮಾ ದ॑ತ್ತೇ॒ ಯಜು॑ಷ್ಕೃತ್ಯೈ ಯ॒ಜ್ಞಸ್ಯ॒ ಸಮೃ॑ದ್ಧ್ಯೈ॒ ಪ್ರತೂ᳚ರ್ತಂ-ವಾಁಜಿ॒ನ್ನಾ ದ್ರ॒ವೇತ್ಯಶ್ವ॑-ಮ॒ಭಿ ದ॑ಧಾತಿ ರೂ॒ಪಮೇ॒ವಾ-ಽಸ್ಯೈ॒ತ-ನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ಯು॒ಞ್ಜಾಥಾ॒ಗ್ಂ॒ ರಾಸ॑ಭಂ-ಯುಁ॒ವಮಿತಿ॑ ಗರ್ದ॒ಭ-ಮಸ॑ತ್ಯೇ॒ವ ಗ॑ರ್ದ॒ಭ-ಮ್ಪ್ರತಿ॑ ಷ್ಠಾಪಯತಿ॒ ತಸ್ಮಾ॒ದಶ್ವಾ᳚-ದ್ಗರ್ದ॒ಭೋ-ಽಸ॑ತ್ತರೋ॒ ಯೋಗೇ॑ಯೋಗೇ ತ॒ವಸ್ತ॑ರ॒ಮಿತ್ಯಾ॑ಹ॒ [ತ॒ವಸ್ತ॑ರ॒ಮಿತ್ಯಾ॑ಹ, ಯೋಗೇ॑ಯೋಗ] 5

ಯೋಗೇ॑ಯೋಗ ಏ॒ವೈನಂ॑-ಯುಁಙ್ಕ್ತೇ॒ ವಾಜೇ॑ವಾಜೇ ಹವಾಮಹ॒ ಇತ್ಯಾ॒ಹಾನ್ನಂ॒-ವೈಁ ವಾಜೋ-ಽನ್ನ॑ಮೇ॒ವಾವ॑ ರುನ್ಧೇ॒ ಸಖಾ॑ಯ॒ ಇನ್ದ್ರ॑ಮೂ॒ತಯ॒ ಇತ್ಯಾ॑ಹೇನ್ದ್ರಿ॒ಯಮೇ॒ವಾವ॑ ರುನ್ಧೇ॒ ಽಗ್ನಿರ್ದೇ॒ವೇಭ್ಯೋ॒ ನಿಲಾ॑ಯತ॒ ತ-ಮ್ಪ್ರ॒ಜಾಪ॑ತಿ॒ರನ್ವ॑ವಿನ್ದ-ತ್ಪ್ರಾಜಾಪ॒ತ್ಯೋ-ಽಶ್ವೋ ಽಶ್ವೇ॑ನ॒ ಸ-ಮ್ಭ॑ರ॒ತ್ಯನು॑ವಿತ್ತ್ಯೈ ಪಾಪವಸ್ಯ॒ಸಂ-ವಾಁ ಏ॒ತ-ತ್ಕ್ರಿ॑ಯತೇ॒ ಯಚ್ಛ್ರೇಯ॑ಸಾ ಚ॒ ಪಾಪೀ॑ಯಸಾ ಚ ಸಮಾ॒ನ-ಙ್ಕರ್ಮ॑ ಕು॒ರ್ವನ್ತಿ॒ ಪಾಪೀ॑ಯಾ॒ನ್॒.- [ಪಾಪೀ॑ಯಾನ್, ಹ್ಯಶ್ವಾ᳚-ದ್ಗರ್ದ॒ಭೋ-ಽಶ್ವ॒-] 6

-ಹ್ಯಶ್ವಾ᳚-ದ್ಗರ್ದ॒ಭೋ-ಽಶ್ವ॒-ಮ್ಪೂರ್ವ॑-ನ್ನಯನ್ತಿ ಪಾಪವಸ್ಯ॒-ಸಸ್ಯ॒ ವ್ಯಾವೃ॑ತ್ತ್ಯೈ॒ ತಸ್ಮಾ॒ಚ್ಛ್ರೇಯಾಗ್ಂ॑ಸ॒-ಮ್ಪಾಪೀ॑ಯಾ-ನ್ಪ॒ಶ್ಚಾದನ್ವೇ॑ತಿ ಬ॒ಹುರ್ವೈ ಭವ॑ತೋ॒ ಭ್ರಾತೃ॑ವ್ಯೋ॒ ಭವ॑ತೀವ॒ ಖಲು॒ ವಾ ಏ॒ಷ ಯೋ᳚-ಽಗ್ನಿ-ಞ್ಚಿ॑ನು॒ತೇ ವ॒ಜ್ರ್ಯಶ್ವಃ॑ ಪ್ರ॒ತೂರ್ವ॒ನ್ನೇಹ್ಯ॑ವ॒-ಕ್ರಾಮ॒ನ್ನ-ಶ॑ಸ್ತೀ॒ರಿತ್ಯಾ॑ಹ॒ ವಜ್ರೇ॑ಣೈ॒ವ ಪಾ॒ಪ್ಮಾನ॒-ಮ್ಭ್ರಾತೃ॑ವ್ಯ॒ಮವ॑ ಕ್ರಾಮತಿ ರು॒ದ್ರಸ್ಯ॒ ಗಾಣ॑ಪತ್ಯಾ॒ದಿತ್ಯಾ॑ಹ ರೌ॒ದ್ರಾ ವೈ ಪ॒ಶವೋ॑ ರು॒ದ್ರಾದೇ॒ವ [ ] 7

ಪ॒ಶೂ-ನ್ನಿ॒ರ್ಯಾಚ್ಯಾ॒-ಽಽತ್ಮನೇ॒ ಕರ್ಮ॑ ಕುರುತೇ ಪೂ॒ಷ್ಣಾ ಸ॒ಯುಜಾ॑ ಸ॒ಹೇತ್ಯಾ॑ಹ ಪೂ॒ಷಾ ವಾ ಅದ್ಧ್ವ॑ನಾಗ್ಂ ಸನ್ನೇ॒ತಾ ಸಮ॑ಷ್ಟ್ಯೈ॒ ಪುರೀ॑ಷಾಯತನೋ॒ ವಾ ಏ॒ಷ ಯದ॒ಗ್ನಿರಙ್ಗಿ॑ರಸೋ॒ ವಾ ಏ॒ತಮಗ್ರೇ॑ ದೇ॒ವತಾ॑ನಾ॒ಗ್ಂ॒ ಸಮ॑ಭರ-ನ್ಪೃಥಿ॒ವ್ಯಾ-ಸ್ಸ॒ಧಸ್ಥಾ॑ದ॒ಗ್ನಿ-ಮ್ಪು॑ರೀ॒ಷ್ಯ॑-ಮಙ್ಗಿರ॒ಸ್ವ-ದಚ್ಛೇ॒ಹೀತ್ಯಾ॑ಹ॒ ಸಾಯ॑ತನಮೇ॒ವೈನ॑-ನ್ದೇ॒ವತಾ॑ಭಿ॒-ಸ್ಸ-ಮ್ಭ॑ರತ್ಯ॒ಗ್ನಿ-ಮ್ಪು॑ರೀ॒ಷ್ಯ॑-ಮಙ್ಗಿರ॒ಸ್ವ- ದಚ್ಛೇ॑ಮ॒ ಇತ್ಯಾ॑ಹ॒ ಯೇನ॑ [ ] 8

ಸ॒ಙ್ಗಚ್ಛ॑ತೇ॒ ವಾಜ॑ಮೇ॒ವಾಸ್ಯ॑ ವೃಙ್ಕ್ತೇ ಪ್ರ॒ಜಾಪ॑ತಯೇ ಪ್ರತಿ॒ಪ್ರೋಚ್ಯಾ॒ಗ್ನಿ-ಸ್ಸ॒ಮ್ಭೃತ್ಯ॒ ಇತ್ಯಾ॑ಹುರಿ॒ಯಂ-ವೈಁ ಪ್ರ॒ಜಾಪ॑ತಿ॒ಸ್ತಸ್ಯಾ॑ ಏ॒ತಚ್ಛ್ರೋತ್ರಂ॒-ಯಁದ್ವ॒ಲ್ಮೀಕೋ॒-ಽಗ್ನಿ-ಮ್ಪು॑ರೀ॒ಷ್ಯ॑-ಮಙ್ಗಿರ॒ಸ್ವ-ದ್ಭ॑ರಿಷ್ಯಾಮ॒ ಇತಿ॑ ವಲ್ಮೀಕವ॒ಪಾಮುಪ॑ ತಿಷ್ಠತೇ ಸಾ॒ಕ್ಷಾದೇ॒ವ ಪ್ರ॒ಜಾಪ॑ತಯೇ ಪ್ರತಿ॒ಪ್ರೋಚ್ಯಾ॒-ಽಗ್ನಿಗ್ಂ ಸ-ಮ್ಭ॑ರತ್ಯ॒ಗ್ನಿ-ಮ್ಪು॑ರೀ॒ಷ್ಯ॑-ಮಙ್ಗಿರ॒ಸ್ವ-ದ್ಭ॑ರಾಮ॒ ಇತ್ಯಾ॑ಹ॒ ಯೇನ॑ ಸ॒ಗಞ್ಚ್ಛ॑ತೇ॒ ವಾಜ॑ಮೇ॒ವಾಸ್ಯ॑ ವೃ॒ಙ್ಕ್ತೇ ಽನ್ವ॒ಗ್ನಿರು॒ಷಸಾ॒ಮಗ್ರ॑- [-ಽನ್ವ॒ಗ್ನಿರು॒ಷಸಾ॒ಮಗ್ರ᳚ಮ್, ಅ॒ಖ್ಯ॒ದಿತ್ಯಾ॒ಹಾ-] 9

-ಮಖ್ಯ॒ದಿತ್ಯಾ॒ಹಾ-ನು॑ಖ್ಯಾತ್ಯಾ ಆ॒ಗತ್ಯ॑ ವಾ॒ಜ್ಯದ್ಧ್ವ॑ನ ಆ॒ಕ್ರಮ್ಯ॑ ವಾಜಿ-ನ್ಪೃಥಿ॒ವೀಮಿತ್ಯಾ॑ಹೇ॒ಚ್ಛತ್ಯೇ॒ವೈನ॒-ಮ್ಪೂರ್ವ॑ಯಾ ವಿ॒ನ್ದತ್ಯುತ್ತ॑ರಯಾ॒ ದ್ವಾಭ್ಯಾ॒ಮಾ ಕ್ರ॑ಮಯತಿ॒ ಪ್ರತಿ॑ಷ್ಠಿತ್ಯಾ॒ ಅನು॑ರೂಪಾಭ್ಯಾ॒-ನ್ತಸ್ಮಾ॒ದನು॑ರೂಪಾಃ ಪ॒ಶವಃ॒ ಪ್ರಜಾ॑ಯನ್ತೇ॒ ದ್ಯೌಸ್ತೇ॑ ಪೃ॒ಷ್ಠ-ಮ್ಪೃ॑ಥಿ॒ವೀ ಸ॒ಧಸ್ಥ॒ಮಿತ್ಯಾ॑ಹೈ॒ಭ್ಯೋ ವಾ ಏ॒ತಂ-ಲೋಁ॒ಕೇಭ್ಯಃ॑ ಪ್ರ॒ಜಾಪ॑ತಿ॒-ಸ್ಸಮೈ॑ರಯ-ದ್ರೂ॒ಪಮೇ॒ವಾಸ್ಯೈ॒-ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ ವ॒ಜ್ರೀ ವಾ ಏ॒ಷ ಯದಶ್ವೋ॑ ದ॒-ದ್ಭಿರ॒ನ್ಯತೋ॑ದದ್ಭ್ಯೋ॒ ಭೂಯಾಂ॒-ಲೋಁಮ॑ಭಿರುಭ॒ಯಾದ॑ದ್ಭ್ಯೋ॒ ಯ-ನ್ದ್ವಿ॒ಷ್ಯಾ-ತ್ತಮ॑ಧಸ್ಪ॒ದ-ನ್ಧ್ಯಾ॑ಯೇ॒-ದ್ವಜ್ರೇ॑ಣೈ॒ವೈನಗ್ಗ್॑ ಸ್ತೃಣುತೇ ॥ 10 ॥

(ಆ॒ಹ॒ - ಪಾಪೀ॑ಯಾನ್ - ರು॒ದ್ರಾದೇ॒ವ - ಯೇನಾ - ಽಗ್ರಂ॑ - ಁವ॒ಜ್ರೀ ವೈ - ಸ॒ಪ್ತದ॑ಶ ಚ) (ಅ. 2)

ಉತ್ಕ್ರಾ॒ಮೋ-ದ॑ಕ್ರಮೀ॒ದಿತಿ॒ ದ್ವಾಭ್ಯಾ॒ಮುತ್ಕ್ರ॑ಮಯತಿ॒ ಪ್ರತಿ॑ಷ್ಠಿತ್ಯಾ॒ ಅನು॑ರೂಪಾಭ್ಯಾ॒-ನ್ತಸ್ಮಾ॒ದನು॑ರೂಪಾಃ ಪ॒ಶವಃ॒ ಪ್ರಜಾ॑ಯನ್ತೇ॒ ಽಪ ಉಪ॑ ಸೃಜತಿ॒ ಯತ್ರ॒ ವಾ ಆಪ॑ ಉಪ॒ ಗಚ್ಛ॑ನ್ತಿ॒ ತದೋಷ॑ಧಯಃ॒ ಪ್ರತಿ॑ ತಿಷ್ಠ॒ನ್ತ್ಯೋಷ॑ಧೀಃ ಪ್ರತಿ॒ತಿಷ್ಠ॑ನ್ತೀಃ ಪ॒ಶವೋ-ಽನು॒ ಪ್ರತಿ॑ ತಿಷ್ಠನ್ತಿ ಪ॒ಶೂನ್. ಯ॒ಜ್ಞೋ ಯ॒ಜ್ಞಂ-ಯಁಜ॑ಮಾನೋ॒ ಯಜ॑ಮಾನ-ಮ್ಪ್ರ॒ಜಾಸ್ತಸ್ಮಾ॑ದ॒ಪ ಉಪ॑ ಸೃಜತಿ॒ ಪ್ರತಿ॑ಷ್ಠಿತ್ಯೈ॒ ಯದ॑ದ್ಧ್ವ॒ರ್ಯು-ರ॑ನ॒ಗ್ನಾವಾಹು॑ತಿ-ಞ್ಜುಹು॒ಯಾದ॒ನ್ಧೋ᳚ ಽದ್ಧ್ವ॒ರ್ಯು- [-ಽದ್ಧ್ವ॒ರ್ಯುಃ, ಸ್ಯಾ॒-ದ್ರಕ್ಷಾಗ್ಂ॑ಸಿ] 11

-ಸ್ಸ್ಯಾ॒-ದ್ರಕ್ಷಾಗ್ಂ॑ಸಿ ಯ॒ಜ್ಞಗ್ಂ ಹ॑ನ್ಯು॒ರ್॒ಹಿರ॑ಣ್ಯಮು॒ಪಾಸ್ಯ॑ ಜುಹೋತ್ಯಗ್ನಿ॒ವತ್ಯೇ॒ವ ಜು॑ಹೋತಿ॒ ನಾನ್ಧೋ᳚-ಽದ್ಧ್ವ॒ರ್ಯುರ್ಭವ॑ತಿ॒ ನ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಘ್ನನ್ತಿ॒ ಜಿಘ॑ರ್ಮ್ಯ॒ಗ್ನಿ-ಮ್ಮನ॑ಸಾ ಘೃ॒ತೇನೇತ್ಯಾ॑ಹ॒ ಮನ॑ಸಾ॒ ಹಿ ಪುರು॑ಷೋ ಯ॒ಜ್ಞಮ॑ಭಿ॒ಗಚ್ಛ॑ತಿ ಪ್ರತಿ॒ಕ್ಷ್ಯನ್ತ॒-ಮ್ಭುವ॑ನಾನಿ॒ ವಿಶ್ವೇತ್ಯಾ॑ಹ॒ ಸರ್ವ॒ಗ್ಗ್॒ ಹ್ಯೇ॑ಷ ಪ್ರ॒ತ್ಯ-ಙ್ಕ್ಷೇತಿ॑ ಪೃ॒ಥು-ನ್ತಿ॑ರ॒ಶ್ಚಾ ವಯ॑ಸಾ ಬೃ॒ಹನ್ತ॒ಮಿತ್ಯಾ॒ಹಾ-ಽಲ್ಪೋ॒ ಹ್ಯೇ॑ಷ ಜಾ॒ತೋ ಮ॒ಹಾ- [ಮ॒ಹಾನ್, ಭವ॑ತಿ॒] 12

-ನ್ಭವ॑ತಿ॒ ವ್ಯಚಿ॑ಷ್ಠ॒ಮನ್ನಗ್ಂ॑ ರಭ॒ಸಂ-ವಿಁದಾ॑ನ॒ಮಿತ್ಯಾ॒ಹಾ ಽನ್ನ॑ಮೇ॒ವಾ-ಽಸ್ಮೈ᳚ ಸ್ವದಯತಿ॒ ಸರ್ವ॑ಮಸ್ಮೈ ಸ್ವದತೇ॒ ಯ ಏ॒ವಂ-ವೇಁದಾ ಽಽತ್ವಾ॑ ಜಿಘರ್ಮಿ॒ ವಚ॑ಸಾ ಘೃ॒ತೇನೇತ್ಯಾ॑ಹ॒ ತಸ್ಮಾ॒-ದ್ಯ-ತ್ಪುರು॑ಷೋ॒ ಮನ॑ಸಾ-ಽಭಿ॒ಗಚ್ಛ॑ತಿ॒ ತ-ದ್ವಾ॒ಚಾ ವ॑ದತ್ಯ ರ॒ಕ್ಷಸೇತ್ಯಾ॑ಹ॒ ರಕ್ಷ॑ಸಾ॒ಮಪ॑ಹತ್ಯೈ॒ ಮರ್ಯ॑ಶ್ರೀ-ಸ್ಸ್ಪೃಹ॒ಯ-ದ್ವ॑ರ್ಣೋ ಅ॒ಗ್ನಿರಿತ್ಯಾ॒ಹಾ-ಪ॑ಚಿತಿಮೇ॒ವಾ-ಽಸ್ಮಿ॑-ನ್ದಧಾ॒ತ್ಯ-ಪ॑ಚಿತಿಮಾ-ನ್ಭವತಿ॒ ಯ ಏ॒ವಂ- [ಯ ಏ॒ವಮ್, ವೇದ॒ ಮನ॑ಸಾ॒ ತ್ವೈ] 13

-ಁವೇದ॒ ಮನ॑ಸಾ॒ ತ್ವೈ ತಾಮಾಪ್ತು॑ಮರ್ಹತಿ॒ ಯಾಮ॑ದ್ಧ್ವ॒ರ್ಯುರ॑-ನ॒ಗ್ನಾವಾಹು॑ತಿ-ಞ್ಜು॒ಹೋತಿ॒ ಮನ॑ಸ್ವತೀಭ್ಯಾ-ಞ್ಜುಹೋ॒ತ್ಯಾಹು॑ತ್ಯೋ॒ರಾಪ್ತ್ಯೈ॒ ದ್ವಾಭ್ಯಾ॒-ಮ್ಪ್ರತಿ॑ಷ್ಠಿತ್ಯೈ ಯಜ್ಞಮು॒ಖೇ ಯ॑ಜ್ಞಮುಖೇ॒ ವೈ ಕ್ರಿ॒ಯಮಾ॑ಣೇ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಜಿಘಾಗ್ಂ ಸನ್ತ್ಯೇ॒ತರ್ಹಿ॒ ಖಲು॒ ವಾ ಏ॒ತ-ದ್ಯ॑ಜ್ಞಮು॒ಖಂ-ಯಁರ್ಹ್ಯೇ॑ನ॒-ದಾಹು॑ತಿ-ರಶ್ಞು॒ತೇ ಪರಿ॑ ಲಿಖತಿ॒ ರಕ್ಷ॑ಸಾ॒ಮಪ॑ಹತ್ಯೈ ತಿ॒ಸೃಭಿಃ॒ ಪರಿ॑ ಲಿಖತಿ ತ್ರಿ॒ವೃದ್ವಾ ಅ॒ಗ್ನಿರ್ಯಾವಾ॑ನೇ॒ವಾ-ಽಗ್ನಿಸ್ತಸ್ಮಾ॒-ದ್ರಕ್ಷಾ॒ಗ್॒ಸ್ಯಪ॑ ಹನ್ತಿ [ಹನ್ತಿ, ಗಾ॒ಯ॒ತ್ರಿ॒ಯಾ ಪರಿ॑] 14

ಗಾಯತ್ರಿ॒ಯಾ ಪರಿ॑ ಲಿಖತಿ॒ ತೇಜೋ॒ ವೈ ಗಾ॑ಯ॒ತ್ರೀ ತೇಜ॑ಸೈ॒ವೈನ॒-ಮ್ಪರಿ॑ಗೃಹ್ಣಾತಿ ತ್ರಿ॒ಷ್ಟುಭಾ॒ ಪರಿ॑ ಲಿಖತೀನ್ದ್ರಿ॒ಯಂ-ವೈಁ ತ್ರಿ॒ಷ್ಟು-ಗಿ॑ನ್ದ್ರಿ॒ಯೇಣೈ॒ವೈನ॒-ಮ್ಪರಿ॑ ಗೃಹ್ಣಾತ್ಯನು॒ಷ್ಟುಭಾ॒ ಪರಿ॑ ಲಿಖತ್ಯನು॒ಷ್ಟು-ಫ್ಸರ್ವಾ॑ಣಿ॒ ಛನ್ದಾಗ್ಂ॑ಸಿ ಪರಿ॒ಭೂಃ ಪರ್ಯಾ᳚ಪ್ತ್ಯೈ ಮದ್ಧ್ಯ॒ತೋ॑-ಽನು॒ಷ್ಟುಭಾ॒ ವಾಗ್ವಾ ಅ॑ನು॒ಷ್ಟು-ಪ್ತಸ್ಮಾ᳚-ನ್ಮದ್ಧ್ಯ॒ತೋ ವಾ॒ಚಾ ವ॑ದಾಮೋ ಗಾಯತ್ರಿ॒ಯಾ ಪ್ರ॑ಥ॒ಮಯಾ॒ ಪರಿ॑ ಲಿಖ॒ತ್ಯಥಾ॑-ಽನು॒ಷ್ಟುಭಾ-ಽಥ॑ ತ್ರಿ॒ಷ್ಟುಭಾ॒ ತೇಜೋ॒ ವೈ ಗಾ॑ಯ॒ತ್ರೀ ಯ॒ಜ್ಞೋ॑ ಽನು॒ಷ್ಟುಗಿ॑ನ್ದ್ರಿ॒ಯ-ನ್ತ್ರಿ॒ಷ್ಟು-ಪ್ತೇಜ॑ಸಾ ಚೈ॒ವೇನ್ದ್ರಿ॒ಯೇಣ॑ ಚೋಭ॒ಯತೋ॑ ಯ॒ಜ್ಞ-ಮ್ಪರಿ॑ ಗೃಹ್ಣಾತಿ ॥ 15 ॥

(ಅ॒ನ್ಧೋ᳚-ಽದ್ಧ್ವ॒ರ್ಯು - ರ್ಮ॒ಹಾನ್ - ಭ॑ವತಿ॒ ಯ ಏ॒ವಗ್ಂ - ಹ॑ನ್ತಿ - ತ್ರಿ॒ಷ್ಟುಭಾ॒ ತೇಜೋ॒ ವೈ ಗಾ॑ಯ॒ತ್ರೀ - ತ್ರಯೋ॑ದಶ ಚ) (ಅ. 3)

ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವ ಇತಿ॑ ಖನತಿ॒ ಪ್ರಸೂ᳚ತ್ಯಾ॒ ಅಥೋ॑ ಧೂ॒ಮ-ಮೇ॒ವೈತೇನ॑ ಜನಯತಿ॒ ಜ್ಯೋತಿ॑ಷ್ಮನ್ತ-ನ್ತ್ವಾ-ಽಗ್ನೇ ಸು॒ಪ್ರತೀ॑ಕ॒-ಮಿತ್ಯಾ॑ಹ॒ ಜ್ಯೋತಿ॑ರೇ॒ವೈತೇನ॑ ಜನಯತಿ॒ ಸೋ᳚-ಽಗ್ನಿರ್ಜಾ॒ತಃ ಪ್ರ॒ಜಾ-ಶ್ಶು॒ಚಾ-ಽಽರ್ಪ॑ಯ॒-ತ್ತ-ನ್ದೇ॒ವಾ ಅ॑ರ್ಧ॒ರ್ಚೇನಾ॑-ಶಮಯಞ್ಛಿ॒ವ-ಮ್ಪ್ರ॒ಜಾಭ್ಯೋ-ಽಹಿಗ್ಂ॑ ಸನ್ತ॒ಮಿತ್ಯಾ॑ಹ ಪ್ರ॒ಜಾಭ್ಯ॑ ಏ॒ವೈನಗ್ಂ॑ ಶಮಯತಿ॒ ದ್ವಾಭ್ಯಾ᳚-ಙ್ಖನತಿ॒ ಪ್ರತಿ॑ಷ್ಠಿತ್ಯಾ ಅ॒ಪಾ-ಮ್ಪೃ॒ಷ್ಠಮ॒ಸೀತಿ॑ ಪುಷ್ಕರಪ॒ರ್ಣಮಾ [ಪುಷ್ಕರಪ॒ರ್ಣಮಾ, ಹ॒ರ॒ತ್ಯ॒ಪಾಂ-ವಾಁ] 16

ಹ॑ರತ್ಯ॒ಪಾಂ-ವಾಁ ಏ॒ತ-ತ್ಪೃ॒ಷ್ಠಂ-ಯಁ-ತ್ಪು॑ಷ್ಕರಪ॒ರ್ಣಗ್ಂ ರೂ॒ಪೇಣೈ॒ವೈನ॒ದಾ ಹ॑ರತಿ ಪುಷ್ಕರಪ॒ರ್ಣೇನ॒ ಸ-ಮ್ಭ॑ರತಿ॒ ಯೋನಿ॒ರ್ವಾ ಅ॒ಗ್ನೇಃ ಪು॑ಷ್ಕರಪ॒ರ್ಣಗ್ಂ ಸಯೋ॑ನಿಮೇ॒ವಾಗ್ನಿಗ್ಂ ಸಮ್ಭ॑ರತಿ ಕೃಷ್ಣಾಜಿ॒ನೇನ॒ ಸಮ್ಭ॑ರತಿ ಯ॒ಜ್ಞೋ ವೈ ಕೃ॑ಷ್ಣಾಜಿ॒ನಂ-ಯಁ॒ಜ್ಞೇನೈ॒ವ ಯ॒ಜ್ಞಗ್ಂ ಸಮ್ಭ॑ರತಿ॒ ಯ-ದ್ಗ್ರಾ॒ಮ್ಯಾಣಾ᳚-ಮ್ಪಶೂ॒ನಾ-ಞ್ಚರ್ಮ॑ಣಾ ಸ॒ಮ್ಭರೇ᳚-ದ್ಗ್ರಾ॒ಮ್ಯಾ-ನ್ಪ॒ಶೂಞ್ಛು॒ಚಾ-ಽರ್ಪ॑ಯೇ-ತ್ಕೃಷ್ಣಾಜಿ॒ನೇನ॒ ಸಮ್ಭ॑ರತ್ಯಾರ॒ಣ್ಯಾನೇ॒ವ ಪ॒ಶೂ- [ಪ॒ಶೂನ್, ಶು॒ಚಾ-ಽರ್ಪ॑ಯತಿ॒] 17

-ಞ್ಛು॒ಚಾ-ಽರ್ಪ॑ಯತಿ॒ ತಸ್ಮಾ᳚-ಥ್ಸ॒ಮಾವ॑-ತ್ಪಶೂ॒ನಾ-ಮ್ಪ್ರ॒ಜಾಯ॑ಮಾನಾನಾ-ಮಾರ॒ಣ್ಯಾಃ ಪ॒ಶವಃ॒ ಕನೀ॑ಯಾಗ್ಂಸ-ಶ್ಶು॒ಚಾ ಹ್ಯೃ॑ತಾ ಲೋ॑ಮ॒ತ-ಸ್ಸಮ್ಭ॑ರ॒ತ್ಯತೋ॒ ಹ್ಯ॑ಸ್ಯ॒ ಮೇದ್ಧ್ಯ॑-ಙ್ಕೃಷ್ಣಾಜಿ॒ನ-ಞ್ಚ॑ ಪುಷ್ಕರಪ॒ರ್ಣ-ಞ್ಚ॒ ಸಗ್ಗ್ ಸ್ತೃ॑ಣಾತೀ॒ಯಂ-ವೈಁ ಕೃ॑ಷ್ಣಾಜಿ॒ನಮ॒ಸೌ ಪು॑ಷ್ಕರಪ॒ರ್ಣ-ಮಾ॒ಭ್ಯಾ-ಮೇ॒ವೈನ॑-ಮುಭ॒ಯತಃ॒ ಪರಿ॑ಗೃಹ್ಣಾತ್ಯ॒-ಗ್ನಿರ್ದೇ॒ವೇಭ್ಯೋ॒ ನಿಲಾ॑ಯತ॒ ತಮಥ॒ರ್ವಾ-ಽನ್ವ॑ಪಶ್ಯ॒ದಥ॑ರ್ವಾ ತ್ವಾ ಪ್ರಥ॒ಮೋ ನಿರ॑ಮನ್ಥದಗ್ನ॒ ಇ- [ನಿರ॑ಮನ್ಥದಗ್ನ॒ ಇತಿ॑, ಆ॒ಹ॒ ಯ ಏ॒ವೈನ॑-] 18

-ತ್ಯಾ॑ಹ॒ ಯ ಏ॒ವೈನ॑-ಮ॒ನ್ವಪ॑ಶ್ಯ॒-ತ್ತೇನೈ॒ವೈನ॒ಗ್ಂ॒ ಸಮ್ಭ॑ರತಿ॒ ತ್ವಾಮ॑ಗ್ನೇ॒ ಪುಷ್ಕ॑ರಾ॒ದಧೀತ್ಯಾ॑ಹ ಪುಷ್ಕರಪ॒ರ್ಣೇ ಹ್ಯೇ॑ನ॒ಮುಪ॑ಶ್ರಿತ॒-ಮವಿ॑ನ್ದ॒-ತ್ತಮು॑ ತ್ವಾ ದ॒ದ್ಧ್ಯಙ್ಙೃಷಿ॒ರಿತ್ಯಾ॑ಹ ದ॒ದ್ಧ್ಯಙ್ ವಾ ಆ॑ಥರ್ವ॒ಣ-ಸ್ತೇ॑ಜ॒ಸ್ವ್ಯಾ॑ಸೀ॒-ತ್ತೇಜ॑ ಏ॒ವಾಸ್ಮಿ॑-ನ್ದಧಾತಿ॒ ತಮು॑ ತ್ವಾ ಪಾ॒ಥ್ಯೋ ವೃಷೇತ್ಯಾ॑ಹ॒ ಪೂರ್ವ॑ಮೇ॒ವೋದಿ॒ತ-ಮುತ್ತ॑ರೇಣಾ॒ಭಿ ಗೃ॑ಣಾತಿ [ಗೃ॑ಣಾತಿ, ಚ॒ತ॒ಸೃಭಿ॒-ಸ್ಸಮ್ಭ॑ರತಿ] 19

ಚತ॒ಸೃಭಿ॒-ಸ್ಸಮ್ಭ॑ರತಿ ಚ॒ತ್ವಾರಿ॒ ಛನ್ದಾಗ್ಂ॑ಸಿ॒ ಛನ್ದೋ॑ಭಿರೇ॒ವ ಗಾ॑ಯ॒ತ್ರೀಭಿ॑ರ್ಬ್ರಾಹ್ಮ॒ಣಸ್ಯ॑ ಗಾಯ॒ತ್ರೋ ಹಿ ಬ್ರಾ᳚ಹ್ಮ॒ಣ-ಸ್ತ್ರಿ॒ಷ್ಟುಗ್ಭೀ॑ ರಾಜ॒ನ್ಯ॑ಸ್ಯ॒ ತ್ರೈಷ್ಟು॑ಭೋ॒ ಹಿ ರಾ॑ಜ॒ನ್ಯೋ॑ ಯ-ಙ್ಕಾ॒ಮಯೇ॑ತ॒ ವಸೀ॑ಯಾನ್-ಥ್ಸ್ಯಾ॒ದಿತ್ಯು॒ಭಯೀ॑ಭಿ॒ಸ್ತಸ್ಯ॒ ಸಮ್ಭ॑ರೇ॒-ತ್ತೇಜ॑ಶ್ಚೈ॒ವಾ-ಽಸ್ಮಾ॑ ಇನ್ದ್ರಿ॒ಯ-ಞ್ಚ॑ ಸ॒ಮೀಚೀ॑ ದಧಾತ್ಯಷ್ಟಾ॒ಭಿ-ಸ್ಸಮ್ಭ॑ರತ್ಯ॒ಷ್ಟಾಕ್ಷ॑ರಾ ಗಾಯ॒ತ್ರೀ ಗಾ॑ಯ॒ತ್ರೋ᳚ ಽಗ್ನಿರ್ಯಾವಾ॑ನೇ॒ವಾ-ಽಗ್ನಿಸ್ತಗ್ಂ ಸಮ್ಭ॑ರತಿ॒ ಸೀದ॑ ಹೋತ॒ರಿತ್ಯಾ॑- -ಹ ದೇ॒ವತಾ॑ ಏ॒ವಾಸ್ಮೈ॒ ಸಗ್ಂ ಸಾ॑ದಯತಿ॒ ನಿ ಹೋತೇತಿ॑ ಮನು॒ಷ್ಯಾ᳚ನ್-ಥ್ಸಗ್ಂ ಸೀ॑ದ॒ಸ್ವೇತಿ॒ ವಯಾಗ್ಂ॑ಸಿ॒ ಜನಿ॑ಷ್ವಾ॒ ಹಿ ಜೇನ್ಯೋ॒ ಅಗ್ರೇ॒ ಅಹ್ನಾ॒ಮಿತ್ಯಾ॑ಹ ದೇವ ಮನು॒ಷ್ಯಾನೇ॒ವಾ-ಽಸ್ಮೈ॒ ಸಗ್ಂಸ॑ನ್ನಾ॒-ನ್ಪ್ರಜ॑ನಯತಿ ॥ 20

(ಐ - ವ ಪ॒ಶೂ - ನಿತಿ॑ - ಗೃಣಾತಿ - ಹೋತ॒ರಿತಿ॑ - ಸ॒ಪ್ತವಿಗ್ಂ॑ಶತಿಶ್ಚ) (ಅ. 4)

ಕ್ರೂ॒ರಮಿ॑ವ॒ ವಾ ಅ॑ಸ್ಯಾ ಏ॒ತ-ತ್ಕ॑ರೋತಿ॒ ಯ-ತ್ಖನ॑ತ್ಯ॒ಪ ಉಪ॑ ಸೃಜ॒ತ್ಯಾಪೋ॒ ವೈ ಶಾ॒ನ್ತಾ-ಶ್ಶಾ॒ನ್ತಾಭಿ॑ರೇ॒ವಾ-ಽಸ್ಯೈ॒ ಶುಚಗ್ಂ॑ ಶಮಯತಿ॒ ಸ-ನ್ತೇ॑ ವಾ॒ಯುರ್ಮಾ॑ತ॒ರಿಶ್ವಾ॑ ದಧಾ॒ತ್ವಿತ್ಯಾ॑ಹ ಪ್ರಾ॒ಣೋ ವೈ ವಾ॒ಯುಃ ಪ್ರಾ॒ಣೇನೈ॒ವಾಸ್ಯೈ᳚ ಪ್ರಾ॒ಣಗ್ಂ ಸ-ನ್ದ॑ಧಾತಿ॒ ಸ-ನ್ತೇ॑ ವಾ॒ಯುರಿತ್ಯಾ॑ಹ॒ ತಸ್ಮಾ᳚-ದ್ವಾ॒ಯುಪ್ರ॑ಚ್ಯುತಾ ದಿ॒ವೋ ವೃಷ್ಟಿ॑ರೀರ್ತೇ॒ ತಸ್ಮೈ॑ ಚ ದೇವಿ॒ ವಷ॑ಡಸ್ತು॒ [ವಷ॑ಡಸ್ತು, ತುಭ್ಯ॒ಮಿತ್ಯಾ॑ಹ॒] 21

ತುಭ್ಯ॒ಮಿತ್ಯಾ॑ಹ॒ ಷಡ್ವಾ ಋ॒ತವ॑ ಋ॒ತುಷ್ವೇ॒ವ ವೃಷ್ಟಿ॑-ನ್ದಧಾತಿ॒ ತಸ್ಮಾ॒-ಥ್ಸರ್ವಾ॑ನೃ॒ತೂನ್. ವ॑ರ್ಷತಿ॒ ಯ-ದ್ವ॑ಷಟ್ಕು॒ರ್ಯಾ-ದ್ಯಾ॒ತಯಾ॑ಮಾ-ಽಸ್ಯ ವಷಟ್ಕಾ॒ರ-ಸ್ಸ್ಯಾ॒ದ್ಯನ್ನ ವ॑ಷಟ್ಕು॒ರ್ಯಾ-ದ್ರಕ್ಷಾಗ್ಂ॑ಸಿ ಯ॒ಜ್ಞಗ್ಂ ಹ॑ನ್ಯು॒ರ್ವಡಿತ್ಯಾ॑ಹ ಪ॒ರೋಕ್ಷ॑ಮೇ॒ವ ವಷ॑-ಟ್ಕರೋತಿ॒ ನಾಸ್ಯ॑ ಯಾ॒ತಯಾ॑ಮಾ ವಷಟ್ಕಾ॒ರೋ ಭವ॑ತಿ॒ ನ ಯ॒ಜ್ಞಗ್ಂ ರಕ್ಷಾಗ್ಂ॑ಸಿ ಘ್ನನ್ತಿ॒ ಸುಜಾ॑ತೋ॒ ಜ್ಯೋತಿ॑ಷಾ ಸ॒ಹೇತ್ಯ॑ನು॒ಷ್ಟುಭೋಪ॑ ನಹ್ಯತ್ಯನು॒ಷ್ಟು- [ನಹ್ಯತ್ಯನು॒ಷ್ಟುಪ್, ಸರ್ವಾ॑ಣಿ॒ ಛನ್ದಾಗ್ಂ॑ಸಿ॒] 22

-ಫ್ಸರ್ವಾ॑ಣಿ॒ ಛನ್ದಾಗ್ಂ॑ಸಿ॒ ಛನ್ದಾಗ್ಂ॑ಸಿ॒ ಖಲು॒ ವಾ ಅ॒ಗ್ನೇಃ ಪ್ರಿ॒ಯಾ ತ॒ನೂಃ ಪ್ರಿ॒ಯಯೈ॒ವೈನ॑-ನ್ತ॒ನುವಾ॒ ಪರಿ॑ ದಧಾತಿ॒ ವೇದು॑ಕೋ॒ ವಾಸೋ॑ ಭವತಿ॒ಯ ಏ॒ವಂ-ವೇಁದ॑ ವಾರು॒ಣೋ ವಾ ಅ॒ಗ್ನಿರುಪ॑ನದ್ಧ॒ ಉದು॑ ತಿಷ್ಠ ಸ್ವದ್ಧ್ವರೋ॒ರ್ಧ್ವ ಊ॒ ಷುಣ॑ ಊ॒ತಯ॒ ಇತಿ॑ ಸಾವಿ॒ತ್ರೀಭ್ಯಾ॒ಮು-ತ್ತಿ॑ಷ್ಠತಿ ಸವಿ॒ತೃಪ್ರ॑ಸೂತ ಏ॒ವಾಸ್ಯೋ॒ರ್ಧ್ವಾಂ-ವಁ॑ರುಣಮೇ॒ನಿಮು-ಥ್ಸೃ॑ಜತಿ॒ ದ್ವಾಭ್ಯಾ॒-ಮ್ಪ್ರತಿ॑ಷ್ಠಿತ್ಯೈ॒ ಸ ಜಾ॒ತೋ ಗರ್ಭೋ॑ ಅಸಿ॒ [ಗರ್ಭೋ॑ ಅಸಿ, ರೋದ॑ಸ್ಯೋ॒ರಿತ್ಯಾ॑ಹೇ॒ಮೇ] 23

ರೋದ॑ಸ್ಯೋ॒ರಿತ್ಯಾ॑ಹೇ॒ಮೇ ವೈ ರೋದ॑ಸೀ॒ ತಯೋ॑ರೇ॒ಷ ಗರ್ಭೋ॒ ಯದ॒ಗ್ನಿ-ಸ್ತಸ್ಮಾ॑-ದೇ॒ವಮಾ॒ಹಾಗ್ನೇ॒ ಚಾರು॒ರ್ವಿಭೃ॑ತ॒ ಓಷ॑ಧೀ॒ಷ್ವಿತ್ಯಾ॑ಹ ಯ॒ದಾ ಹ್ಯೇ॑ತಂ-ವಿಁ॒ಭರ॒ನ್ತ್ಯಥ॒ ಚಾರು॑ತರೋ॒ ಭವ॑ತಿ॒ ಪ್ರ ಮಾ॒ತೃಭ್ಯೋ॒ ಅಧಿ॒ ಕನಿ॑ಕ್ರದ-ದ್ಗಾ॒ ಇತ್ಯಾ॒ಹೌಷ॑ಧಯೋ॒ ವಾ ಅ॑ಸ್ಯ ಮಾ॒ತರ॒ಸ್ತಾಭ್ಯ॑ ಏ॒ವೈನ॒-ಮ್ಪ್ರಚ್ಯಾ॑ವಯತಿ ಸ್ಥಿ॒ರೋ ಭ॑ವ ವೀ॒ಡ್ವ॑ಙ್ಗ॒ ಇತಿ॑ ಗರ್ದ॒ಭ ಆ ಸಾ॑ದಯತಿ॒ [ಆ ಸಾ॑ದಯತಿ, ಸ-ನ್ನ॑ಹ್ಯತ್ಯೇ॒ವೈನ॑-] 24

ಸ-ನ್ನ॑ಹ್ಯತ್ಯೇ॒ವೈನ॑-ಮೇ॒ತಯಾ᳚ ಸ್ಥೇ॒ಮ್ನೇ ಗ॑ರ್ದ॒ಭೇನ॒ ಸಮ್ಭ॑ರತಿ॒ ತಸ್ಮಾ᳚-ದ್ಗರ್ದ॒ಭಃ ಪ॑ಶೂ॒ನಾ-ಮ್ಭಾ॑ರಭಾ॒ರಿತ॑ಮೋ ಗರ್ದ॒ಭೇನ॒ ಸ-ಮ್ಭ॑ರತಿ॒ ತಸ್ಮಾ᳚-ದ್ಗರ್ದ॒ಭೋ-ಽಪ್ಯ॑ನಾಲೇ॒ಶೇ-ಽತ್ಯ॒ನ್ಯಾ-ನ್ಪ॒ಶೂ-ನ್ಮೇ᳚ದ್ಯ॒ತ್ಯನ್ನ॒ಗ್ಗ್॒ ಹ್ಯೇ॑ನೇನಾ॒-ಽರ್ಕಗ್ಂ ಸ॒ಮ್ಭರ॑ನ್ತಿ ಗರ್ದ॒ಭೇನ॒ ಸಮ್ಭ॑ರತಿ॒ ತಸ್ಮಾ᳚-ದ್ಗರ್ದ॒ಭೋ ದ್ವಿ॒ರೇತಾ॒-ಸ್ಸನ್ ಕನಿ॑ಷ್ಠ-ಮ್ಪಶೂ॒ನಾ-ಮ್ಪ್ರಜಾ॑ಯತೇ॒-ಽಗ್ನಿರ್ಹ್ಯ॑ಸ್ಯ॒ ಯೋನಿ॑-ನ್ನಿ॒ರ್ದಹ॑ತಿ ಪ್ರ॒ಜಾಸು॒ ವಾ ಏ॒ಷ ಏ॒ತರ್ಹ್ಯಾರೂ॑ಢ॒- [ಏ॒ತರ್ಹ್ಯಾರೂ॑ಢಃ, ಸ ಈ᳚ಶ್ವ॒ರಃ ಪ್ರ॒ಜಾ-ಶ್ಶು॒ಚಾ] 25

-ಸ್ಸ ಈ᳚ಶ್ವ॒ರಃ ಪ್ರ॒ಜಾ-ಶ್ಶು॒ಚಾ ಪ್ರ॒ದಹಃ॑ ಶಿ॒ವೋ ಭ॑ವ ಪ್ರ॒ಜಾಭ್ಯ॒ ಇತ್ಯಾ॑ಹ ಪ್ರ॒ಜಾಭ್ಯ॑ ಏ॒ವೈನಗ್ಂ॑ ಶಮಯತಿ॒ ಮಾನು॑ಷೀಭ್ಯ॒ಸ್ತ್ವಮ॑ಙ್ಗಿರ॒ ಇತ್ಯಾ॑ಹ ಮಾನ॒ವ್ಯೋ॑ ಹಿ ಪ್ರ॒ಜಾ ಮಾ ದ್ಯಾವಾ॑ಪೃಥಿ॒ವೀ ಅ॒ಭಿ ಶೂ॑ಶುಚೋ॒ ಮಾ-ಽನ್ತರಿ॑ಕ್ಷ॒-ಮ್ಮಾ ವನ॒ಸ್ಪತೀ॒ನಿತ್ಯಾ॑ಹೈ॒ಭ್ಯ ಏ॒ವೈನಂ॑-ಲೋಁ॒ಕೇಭ್ಯಃ॑ ಶಮಯತಿ॒ ಪ್ರೈತು॑ ವಾ॒ಜೀ ಕನಿ॑ಕ್ರದ॒ದಿತ್ಯಾ॑ಹ ವಾ॒ಜೀ ಹ್ಯೇ॑ಷ ನಾನ॑ದ॒-ದ್ರಾಸ॑ಭಃ॒ ಪತ್ವೇ- [ಪತ್ವೇತಿ, ಆ॒ಹ॒ ರಾಸ॑ಭ॒ ಇತಿ॒] 26

-ತ್ಯಾ॑ಹ॒ ರಾಸ॑ಭ॒ ಇತಿ॒ ಹ್ಯೇ॑ತಮೃಷ॒ಯೋ-ಽವ॑ದ॒-ನ್ಭರ॑ನ್ನ॒ಗ್ನಿ-ಮ್ಪು॑ರೀ॒ಷ್ಯ॑ಮಿತ್ಯಾ॑ಹಾ॒-ಽಗ್ನಿಗ್ಗ್ ಹ್ಯೇ॑ಷ ಭರ॑ತಿ॒ ಮಾ ಪಾ॒ದ್ಯಾಯು॑ಷಃ ಪು॒ರೇತ್ಯಾ॒ಹಾ-ಽಽಯು॑ರೇ॒ವಾ-ಽಸ್ಮಿ॑-ನ್ದಧಾತಿ॒ ತಸ್ಮಾ᳚-ದ್ಗರ್ದ॒ಭ-ಸ್ಸರ್ವ॒ಮಾಯು॑ರೇತಿ॒ ತಸ್ಮಾ᳚-ದ್ಗರ್ದ॒ಭೇ ಪು॒ರಾ-ಽಽಯು॑ಷಃ॒ ಪ್ರಮೀ॑ತೇ ಬಿಭ್ಯತಿ॒ ವೃಷಾ॒-ಽಗ್ನಿಂ-ವೃಁಷ॑ಣ॒-ಮ್ಭರ॒ನ್ನಿತ್ಯಾ॑ಹ॒ ವೃಷಾ॒ ಹ್ಯೇ॑ಷ ವೃಷಾ॒-ಽಗ್ನಿರ॒ಪಾ-ಙ್ಗರ್ಭಗ್ಂ॑ - [ವೃಷಾ॒-ಽಗ್ನಿರ॒ಪಾ-ಙ್ಗರ್ಭ᳚ಮ್, ಸ॒ಮು॒ದ್ರಿಯ॒-] 27

ಸಮು॒ದ್ರಿಯ॒-ಮಿತ್ಯಾ॑ಹಾ॒-ಽಪಾಗ್ ಹ್ಯೇ॑ಷ ಗರ್ಭೋ॒ ಯದ॒ಗ್ನಿರಗ್ನ॒ ಆ ಯಾ॑ಹಿ ವೀ॒ತಯ॒ ಇತಿ॒ ವಾ ಇ॒ಮೌ ಲೋ॒ಕೌ ವ್ಯೈ॑ತಾ॒ಮಗ್ನ॒ ಆ ಯಾ॑ಹಿ ವೀ॒ತಯ॒ ಇತಿ॒ ಯದಾಹಾ॒ ಽನಯೋ᳚ರ್ಲೋ॒ಕಯೋ॒-ರ್ವೀತ್ಯೈ॒ ಪ್ರಚ್ಯು॑ತೋ॒ ವಾ ಏ॒ಷ ಆ॒ಯತ॑ನಾ॒ದಗ॑ತಃ ಪ್ರತಿ॒ಷ್ಠಾಗ್ಂ ಸ ಏ॒ತರ್ಹ್ಯ॑ದ್ಧ್ವ॒ರ್ಯು-ಞ್ಚ॒ ಯಜ॑ಮಾನ-ಞ್ಚ ದ್ಧ್ಯಾಯತ್ಯೃ॒ತಗ್ಂ ಸ॒ತ್ಯಮಿತ್ಯಾ॑ಹೇ॒ಯಂ-ವಾಁ ಋ॒ತಮ॒ಸೌ [ ] 28

ಸ॒ತ್ಯಮ॒ನಯೋ॑ರೇ॒ವೈನ॒-ಮ್ಪ್ರತಿ॑ ಷ್ಠಾಪಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತ್ಯದ್ಧ್ವ॒ರ್ಯುರ್ನ ಯಜ॑ಮಾನೋ॒ ವರು॑ಣೋ॒ ವಾ ಏ॒ಷ ಯಜ॑ಮಾನಮ॒ಭ್ಯೈತಿ॒ ಯದ॒ಗ್ನಿರುಪ॑ನದ್ಧ॒ ಓಷ॑ಧಯಃ॒ ಪ್ರತಿ॑ ಗೃಹ್ಣೀತಾ॒ಗ್ನಿಮೇ॒ತ-ಮಿತ್ಯಾ॑ಹ॒ ಶಾನ್ತ್ಯೈ॒ ವ್ಯಸ್ಯ॒ನ್ ವಿಶ್ವಾ॒ ಅಮ॑ತೀ॒ರರಾ॑ತೀ॒-ರಿತ್ಯಾ॑ಹ॒ ರಕ್ಷ॑ಸಾ॒ಮಪ॑ಹತ್ಯೈ ನಿ॒ಷೀದ॑-ನ್ನೋ॒ ಅಪ॑ ದುರ್ಮ॒ತಿಗ್ಂ ಹ॑ನ॒ದಿತ್ಯಾ॑ಹ॒ ಪ್ರತಿ॑ಷ್ಠಿತ್ಯಾ॒ ಓಷ॑ಧಯಃ॒ ಪ್ರತಿ॑ಮೋದದ್ಧ್ವ- [ಪ್ರತಿ॑ಮೋದದ್ಧ್ವಮ್, ಏ॒ನ॒ಮಿತ್ಯಾ॒ಹೌಷ॑ಧಯೋ॒] 29

-ಮೇನ॒ಮಿತ್ಯಾ॒ಹೌಷ॑ಧಯೋ॒ ವಾ ಅ॒ಗ್ನೇರ್ಭಾ॑ಗ॒ಧೇಯ॒-ನ್ತಾಭಿ॑ರೇ॒ವೈನ॒ಗ್ಂ॒ ಸಮ॑ರ್ಧಯತಿ॒ ಪುಷ್ಪಾ॑ವತೀ-ಸ್ಸುಪಿಪ್ಪ॒ಲಾ ಇತ್ಯಾ॑ಹ॒ ತಸ್ಮಾ॒ದೋಷ॑ಧಯಃ॒ ಫಲ॑-ಙ್ಗೃಹ್ಣನ್ತ್ಯ॒ ಯಂ-ವೋಁ॒ ಗರ್ಭ॑ ಋ॒ತ್ವಿಯಃ॑ ಪ್ರ॒ತ್ನಗ್ಂ ಸ॒ಧಸ್ಥ॒ಮಾ-ಽಸ॑ದ॒ದಿತ್ಯಾ॑ಹ॒ ಯಾಭ್ಯ॑ ಏ॒ವೈನ॑-ಮ್ಪ್ರಚ್ಯಾ॒ವಯ॑ತಿ॒ ತಾಸ್ವೇ॒ವೈನ॒-ಮ್ಪ್ರತಿ॑ಷ್ಠಾಪಯತಿ॒ ದ್ವಾಭ್ಯಾ॑ಮು॒ಪಾವ॑ಹರತಿ॒ ಪ್ರತಿ॑ಷ್ಠಿತ್ಯೈ ॥ 30 ॥

(ಅ॒ಸ್ತ್ವ॒ - ನು॒ಷ್ಟು - ಬ॑ಸಿ - ಸಾದಯ॒ತ್ಯಾ - ರೂ॑ಢಃ॒-ಪತ್ವೇತಿ॒-ಗರ್ಭ॑-ಮ॒ಸೌ - ಮೋ॑ದದ್ಧ್ವಂ॒ - ದ್ವಿಚ॑ತ್ವಾರಿಗ್ಂಶಚ್ಚ) (ಅ. 5)

ವಾ॒ರು॒ಣೋ ವಾ ಅ॒ಗ್ನಿರುಪ॑ನದ್ಧೋ॒ ವಿ ಪಾಜ॒ಸೇತಿ॒ ವಿಸ್ರಗ್ಂ॑ಸಯತಿ ಸವಿ॒ತೃಪ್ರ॑ಸೂತ ಏ॒ವಾಸ್ಯ॒ ವಿಷೂ॑ಚೀಂ-ವಁರುಣಮೇ॒ನಿಂ-ವಿಁಸೃ॑ಜತ್ಯ॒ಪ ಉಪ॑ ಸೃಜ॒ತ್ಯಾಪೋ॒ ವೈ ಶಾ॒ನ್ತಾ-ಶ್ಶಾ॒ನ್ತಾಭಿ॑ರೇ॒ವಾಸ್ಯ॒ ಶುಚಗ್ಂ॑ ಶಮಯತಿ ತಿ॒ಸೃಭಿ॒ರುಪ॑ ಸೃಜತಿ ತ್ರಿ॒ವೃದ್ವಾ ಅ॒ಗ್ನಿರ್ಯಾವಾ॑ನೇ॒ವಾ-ಗ್ನಿಸ್ತಸ್ಯ॒ ಶುಚಗ್ಂ॑ ಶಮಯತಿ ಮಿ॒ತ್ರ-ಸ್ಸ॒ಗ್ಂ॒ಸೃಜ್ಯ॑ ಪೃಥಿ॒ವೀಮಿತ್ಯಾ॑ಹ ಮಿ॒ತ್ರೋ ವೈ ಶಿ॒ವೋ ದೇ॒ವಾನಾ॒-ನ್ತೇನೈ॒ವೈ- [ದೇ॒ವಾನಾ॒-ನ್ತೇನೈ॒ವ, ಏ॒ನ॒ಗ್ಂ॒ ಸಗ್ಂ ಸೃ॑ಜತಿ॒] 31

-ನ॒ಗ್ಂ॒ ಸಗ್ಂ ಸೃ॑ಜತಿ॒ ಶಾನ್ತ್ಯೈ॒ ಯದ್ಗ್ರಾ॒ಮ್ಯಾಣಾ॒-ಮ್ಪಾತ್ರಾ॑ಣಾ-ಙ್ಕ॒ಪಾಲೈ᳚-ಸ್ಸಗ್ಂಸೃ॒ಜೇ-ದ್ಗ್ರಾ॒ಮ್ಯಾಣಿ॒ ಪಾತ್ರಾ॑ಣಿ ಶು॒ಚಾ-ಽರ್ಪ॑ಯೇದರ್ಮಕಪಾ॒ಲೈ-ಸ್ಸಗ್ಂ ಸೃ॑ಜತ್ಯೇ॒ತಾನಿ॒ ವಾ ಅ॑ನುಪಜೀವನೀ॒ಯಾನಿ॒ ತಾನ್ಯೇ॒ವ ಶು॒ಚಾ-ಽರ್ಪ॑ಯತಿ॒ ಶರ್ಕ॑ರಾಭಿ॒-ಸ್ಸಗ್ಂ ಸೃ॑ಜತಿ॒ ಧೃತ್ಯಾ॒ ಅಥೋ॑ ಶ॒ನ್ತ್ವಾಯಾ॑ ಜಲೋ॒ಮೈ-ಸ್ಸಗ್ಂ ಸೃ॑ಜತ್ಯೇ॒ಷಾ ವಾ ಅ॒ಗ್ನೇಃ ಪ್ರಿ॒ಯಾ ತ॒ನೂರ್ಯದ॒ಜಾ ಪ್ರಿ॒ಯಯೈ॒ವೈನ॑-ನ್ತ॒ನುವಾ॒ ಸಗ್ಂ ಸೃ॑ಜ॒ತ್ಯಥೋ॒ ತೇಜ॑ಸಾ ಕೃಷ್ಣಾಜಿ॒ನಸ್ಯ॒ ಲೋಮ॑ಭಿ॒-ಸ್ಸಗ್ಂ - [ಲೋಮ॑ಭಿ॒-ಸ್ಸಮ್, ಸೃ॒ಜ॒ತಿ॒ ಯ॒ಜ್ಞೋ ವೈ] 32

ಸೃ॑ಜತಿ ಯ॒ಜ್ಞೋ ವೈ ಕೃ॑ಷ್ಣಾಜಿ॒ನಂ-ಯಁ॒ಜ್ಞೇನೈ॒ವ ಯ॒ಜ್ಞಗ್ಂ ಸಗ್ಂ ಸೃ॑ಜತಿ ರು॒ದ್ರಾ-ಸ್ಸ॒ಭೃತ್ಯ॑ ಪೃಥಿ॒ವೀಮಿತ್ಯಾ॑ಹೈ॒ತಾ ವಾ ಏ॒ತ-ನ್ದೇ॒ವತಾ॒ ಅಗ್ರೇ॒ ಸಮ॑ಭರ॒-ನ್ತಾಭಿ॑ರೇ॒ವೈನ॒ಗ್ಂ॒ ಸಮ್ಭ॑ರತಿ ಮ॒ಖಸ್ಯ॒ ಶಿರೋ॒-ಽಸೀತ್ಯಾ॑ಹ ಯ॒ಜ್ಞೋ ವೈ ಮ॒ಖಸ್ತಸ್ಯೈ॒ತ-ಚ್ಛಿರೋ॒ ಯದು॒ಖಾ ತಸ್ಮಾ॑ದೇ॒ವಮಾ॑ಹ ಯ॒ಜ್ಞಸ್ಯ॑ ಪ॒ದೇ ಸ್ಥ॒ ಇತ್ಯಾ॑ಹ ಯ॒ಜ್ಞಸ್ಯ॒ ಹ್ಯೇ॑ತೇ [ ] 33

ಪ॒ದೇ ಅಥೋ॒ ಪ್ರತಿ॑ಷ್ಠಿತ್ಯೈ॒ ಪ್ರಾ-ಽನ್ಯಾಭಿ॒-ರ್ಯಚ್ಛ॒ತ್ಯನ್ವ॒ನ್ಯೈ-ರ್ಮ॑ನ್ತ್ರಯತೇ ಮಿಥುನ॒ತ್ವಾಯ॒ ತ್ರ್ಯು॑ದ್ಧಿ-ಙ್ಕರೋತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷಾಂ-ಲೋಁ॒ಕಾನಾ॒ಮಾಪ್ತ್ಯೈ॒ ಛನ್ದೋ॑ಭಿಃ ಕರೋತಿ ವೀ॒ರ್ಯಂ॑-ವೈಁ ಛನ್ದಾಗ್ಂ॑ಸಿ ವೀ॒ರ್ಯೇ॑ಣೈ॒ವೈನಾ᳚-ಙ್ಕರೋತಿ॒ ಯಜು॑ಷಾ॒ ಬಿಲ॑-ಙ್ಕರೋತಿ॒ ವ್ಯಾವೃ॑ತ್ತ್ಯಾ॒ ಇಯ॑ತೀ-ಙ್ಕರೋತಿ ಪ್ರ॒ಜಾಪ॑ತಿನಾ ಯಜ್ಞಮು॒ಖೇನ॒ ಸಮ್ಮಿ॑ತಾ-ನ್ದ್ವಿಸ್ತ॒ನಾ-ಙ್ಕ॑ರೋತಿ॒ ಯಾವಾ॑ಪೃಥಿ॒ವ್ಯೋರ್ದೋಹಾ॑ಯ॒ ಚತುಃ॑ಸ್ತನಾ-ಙ್ಕರೋತಿ ಪಶೂ॒ನಾ-ನ್ದೋಹಾ॑ಯಾ॒ಷ್ಟಾಸ್ತ॑ನಾ-ಙ್ಕರೋತಿ॒ ಛನ್ದ॑ಸಾ॒-ನ್ದೋಹಾ॑ಯ॒ ನವಾ᳚ಶ್ರಿ-ಮಭಿ॒ಚರ॑ತಃ ಕುರ್ಯಾ-ತ್ತ್ರಿ॒ವೃತ॑ಮೇ॒ವ ವಜ್ರಗ್ಂ॑ ಸ॒ಮ್ಭೃತ್ಯ॒ ಭ್ರಾತೃ॑ವ್ಯಾಯ॒ ಪ್ರಹ॑ರತಿ॒ ಸ್ತೃತ್ಯೈ॑ ಕೃ॒ತ್ವಾಯ॒ ಸಾ ಮ॒ಹೀಮು॒ಖಾಮಿತಿ॒ ನಿ ದ॑ಧಾತಿ ದೇ॒ವತಾ᳚ಸ್ವೇ॒ವೈನಾ॒-ಮ್ಪ್ರತಿ॑ಷ್ಠಾಪಯತಿ ॥ 34 ॥

(ತೇನೈ॒ವ - ಲೋಮ॑ಭಿ॒-ಸ್ಸ - ಮೇ॒ತೇ - ಅ॑ಭಿ॒ಚರ॑ತ॒ - ಏಕ॑ವಿಗ್ಂಶತಿಶ್ಚ) (ಅ. 6)

ಸ॒ಪ್ತಭಿ॑ರ್ಧೂಪಯತಿ ಸ॒ಪ್ತ ವೈ ಶೀ॑ರ್ಷ॒ಣ್ಯಾಃ᳚ ಪ್ರಾ॒ಣಾ-ಶ್ಶಿರ॑ ಏ॒ತ-ದ್ಯ॒ಜ್ಞಸ್ಯ॒ ಯದು॒ಖಾ ಶೀ॒ರ್॒ಷನ್ನೇ॒ವ ಯ॒ಜ್ಞಸ್ಯ॑ ಪ್ರಾ॒ಣಾ-ನ್ದ॑ಧಾತಿ॒ ತಸ್ಮಾ᳚-ಥ್ಸ॒ಪ್ತ ಶೀ॒ರ್॒ಷ-ನ್ಪ್ರಾ॒ಣಾ ಅ॑ಶ್ವಶ॒ಕೇನ॑ ಧೂಪಯತಿ ಪ್ರಾಜಾಪ॒ತ್ಯೋ ವಾ ಅಶ್ವಃ॑ ಸಯೋನಿ॒ತ್ವಾಯಾ-ದಿ॑ತಿ॒ಸ್ತ್ವೇತ್ಯಾ॑ಹೇ॒ಯಂ-ವಾಁ ಅದಿ॑ತಿ॒ರದಿ॑ತ್ಯೈ॒ವಾದಿ॑ತ್ಯಾ-ಙ್ಖನತ್ಯ॒ಸ್ಯಾ ಅಕ್ರೂ॑ರಙ್ಕಾರಾಯ॒ ನ ಹಿ ಸ್ವ-ಸ್ಸ್ವಗ್ಂ ಹಿ॒ನಸ್ತಿ॑ ದೇ॒ವಾನಾ᳚-ನ್ತ್ವಾ॒ ಪತ್ನೀ॒ರಿತ್ಯಾ॑ಹ ದೇ॒ವಾನಾಂ॒- [ದೇ॒ವಾನಾ᳚ಮ್, ವಾ ಏ॒ತಾ-ಮ್ಪತ್ನ॒ಯೋ-ಽಗ್ರೇ॑-ಽ] 35

-ಁವಾ ಏ॒ತಾ-ಮ್ಪತ್ನ॒ಯೋ-ಽಗ್ರೇ॑-ಽ-ಕುರ್ವ॒-ನ್ತಾಭಿ॑ರೇ॒ವೈನಾ᳚-ನ್ದಧಾತಿ ಧಿ॒ಷಣಾ॒ಸ್ತ್ವೇತ್ಯಾ॑ಹ ವಿ॒ದ್ಯಾ ವೈ ಧಿ॒ಷಣಾ॑ ವಿ॒ದ್ಯಾಭಿ॑-ರೇ॒ವೈನಾ॑-ಮ॒ಭೀನ್ಧೇ॒ ಗ್ನಾಸ್ತ್ವೇತ್ಯಾ॑ಹ॒ ಛನ್ದಾಗ್ಂ॑ಸಿ॒ ವೈ ಗ್ನಾ ಶ್ಛನ್ದೋ॑ಭಿ-ರೇ॒ವೈನಾಗ್॑ ಶ್ರಪಯತಿ॒ ವರೂ᳚ತ್ರಯ॒ಸ್ತ್ವೇತ್ಯಾ॑ಹ॒ ಹೋತ್ರಾ॒ ವೈ ವರೂ᳚ತ್ರಯೋ॒ ಹೋತ್ರಾ॑ಭಿರೇ॒ವೈನಾ᳚-ಮ್ಪಚತಿ॒ ಜನ॑ಯ॒ಸ್ತ್ವೇತ್ಯಾ॑ಹ ದೇ॒ವಾನಾಂ॒-ವೈಁ ಪತ್ನೀ॒- [ಪತ್ನೀಃ᳚, ಜನ॑ಯ॒ಸ್ತಾಭಿ॑-] 36

-ರ್ಜನ॑ಯ॒ಸ್ತಾಭಿ॑-ರೇ॒ವೈನಾ᳚-ಮ್ಪಚತಿ ಷ॒ಡ್ಭಿಃ ಪ॑ಚತಿ॒ ಷಡ್ವಾ ಋ॒ತವ॑ ಋ॒ತುಭಿ॑ರೇ॒ವೈನಾ᳚-ಮ್ಪಚತಿ॒ ದ್ವಿಃ ಪಚ॒ನ್ತ್ವಿತ್ಯಾ॑ಹ॒ ತಸ್ಮಾ॒-ದ್ದ್ವಿ-ಸ್ಸಂ॑ವಁಥ್ಸ॒ರಸ್ಯ॑ ಸ॒ಸ್ಯ-ಮ್ಪ॑ಚ್ಯತೇ ವಾರು॒ಣ್ಯು॑ಖಾ-ಽಭೀದ್ಧಾ॑ ಮೈ॒ತ್ರಿಯೋಪೈ॑ತಿ॒ ಶಾನ್ತ್ಯೈ॑ ದೇ॒ವಸ್ತ್ವಾ॑ ಸವಿ॒ತೋ-ದ್ವ॑ಪ॒ತ್ವಿತ್ಯಾ॑ಹ ಸವಿ॒ತೃಪ್ರ॑ಸೂತ ಏ॒ವೈನಾ॒-ಮ್ಬ್ರಹ್ಮ॑ಣಾ ದೇ॒ವತಾ॑ಭಿ॒ರು-ದ್ವ॑ಪ॒ತ್ಯಪ॑ದ್ಯಮಾನಾ ಪೃಥಿ॒ವ್ಯಾಶಾ॒ ದಿಶ॒ ಆ ಪೃ॒ಣೇ- [ಆ ಪೃ॒ಣ, ಇತ್ಯಾ॑ಹ॒] 37

-ತ್ಯಾ॑ಹ॒ ತಸ್ಮಾ॑ದ॒ಗ್ನಿ-ಸ್ಸರ್ವಾ॒ ದಿಶೋ-ಽನು॒ ವಿಭಾ॒ತ್ಯುತ್ತಿ॑ಷ್ಠ ಬೃಹ॒ತೀ ಭ॑ವೋ॒ರ್ಧ್ವಾ ತಿ॑ಷ್ಠ ಧ್ರು॒ವಾ ತ್ವಮಿತ್ಯಾ॑ಹ॒ ಪ್ರತಿ॑ಷ್ಠಿತ್ಯಾ ಅಸು॒ರ್ಯ॑-ಮ್ಪಾತ್ರ॒ಮನಾ᳚ಚ್ಛೃಣ್ಣ॒ಮಾ-ಚ್ಛೃ॑ಣತ್ತಿ ದೇವ॒ತ್ರಾ-ಽಕ॑ರಜಕ್ಷೀ॒ರೇಣಾ-ಽಽಚ್ಛೃ॑ಣತ್ತಿ ಪರ॒ಮಂ-ವಾಁ ಏ॒ತ-ತ್ಪಯೋ॒ ಯದ॑ಜಕ್ಷೀ॒ರ-ಮ್ಪ॑ರ॒ಮೇಣೈ॒ವೈನಾ॒-ಮ್ಪಯ॒ಸಾ-ಽಽಚ್ಛೃ॑ಣತ್ತಿ॒ ಯಜು॑ಷಾ॒ ವ್ಯಾವೃ॑ತ್ತ್ಯೈ॒ ಛನ್ದೋ॑ಭಿ॒ರಾ ಚ್ಛೃ॑ಣತ್ತಿ॒ ಛನ್ದೋ॑ಭಿ॒ರ್ವಾ ಏ॒ಷಾ ಕ್ರಿ॑ಯತೇ॒ ಛನ್ದೋ॑ಭಿರೇ॒ವ ಛನ್ದಾ॒ಗ್॒ಸ್ಯಾ ಚ್ಛೃ॑ಣತ್ತಿ ॥ 38 ॥

(ಆ॒ಹ॒ ದೇ॒ವಾನಾಂ॒ - ಁವೈ ಪತ್ನೀಃ᳚ - ಪೃಣೈ॒ - ಷಾ - ಷಟ್ ಚ॑) (ಅ. 7)

ಏಕ॑ವಿಗ್ಂಶತ್ಯಾ॒ ಮಾಷೈಃ᳚ ಪುರುಷಶೀ॒ರ್॒ಷ-ಮಚ್ಛೈ᳚ತ್ಯಮೇ॒ದ್ಧ್ಯಾ ವೈ ಮಾಷಾ॑ ಅಮೇ॒ದ್ಧ್ಯ-ಮ್ಪು॑ರುಷಶೀ॒ರ್॒ಷ-ಮ॑ಮೇ॒ದ್ಧ್ಯೈರೇ॒ವಾ-ಸ್ಯಾ॑-ಮೇ॒ದ್ಧ್ಯ-ನ್ನಿ॑ರವ॒ದಾಯ॒ ಮೇದ್ಧ್ಯ॑-ಙ್ಕೃ॒ತ್ವಾ ಽಽಹ॑ರ॒ತ್ಯೇಕ॑ವಿಗ್ಂಶತಿ-ರ್ಭವನ್ತ್ಯೇಕವಿ॒ಗ್ಂ॒ಶೋ ವೈ ಪುರು॑ಷಃ॒ ಪುರು॑ಷ॒ಸ್ಯಾ-ಽಽಪ್ತ್ಯೈ॒ ವ್ಯೃ॑ದ್ಧಂ॒-ವಾಁ ಏ॒ತ-ತ್ಪ್ರಾ॒ಣೈರ॑ಮೇ॒ದ್ಧ್ಯಂ-ಯಁ-ತ್ಪು॑ರುಷಶೀ॒ರ್॒ಷಗ್ಂ ಸ॑ಪ್ತ॒ಧಾ ವಿತೃ॑ಣ್ಣಾಂ-ವಁಲ್ಮೀಕವ॒ಪಾ-ಮ್ಪ್ರತಿ॒ ನಿ ದ॑ಧಾತಿ ಸ॒ಪ್ತ ವೈ ಶೀ॑ರ್ಷ॒ಣ್ಯಾಃ᳚ ಪ್ರಾ॒ಣಾಃ ಪ್ರಾ॒ಣೈರೇ॒ವೈನ॒-ಥ್ಸಮ॑ರ್ಧಯತಿ ಮೇದ್ಧ್ಯ॒ತ್ವಾಯ॒ ಯಾವ॑ನ್ತೋ॒ [ಯಾವ॑ನ್ತಃ, ವೈ ಮೃ॒ತ್ಯುಬ॑ನ್ಧವ॒-] 39

ವೈ ಮೃ॒ತ್ಯುಬ॑ನ್ಧವ॒-ಸ್ತೇಷಾಂ᳚-ಯಁ॒ಮ ಆಧಿ॑ಪತ್ಯ॒-ಮ್ಪರೀ॑ಯಾಯ ಯಮಗಾ॒ಥಾಭಿಃ॒ ಪರಿ॑ಗಾಯತಿ ಯ॒ಮಾದೇ॒ವೈನ॑-ದ್ವೃಙ್ಕ್ತೇ ತಿ॒ಸೃಭಿಃ॒ ಪರಿ॑ಗಾಯತಿ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಭ್ಯ ಏ॒ವೈನ॑ಲ್ಲೋ॒ಕೇಭ್ಯೋ॑ ವೃಙ್ಕ್ತೇ॒ ತಸ್ಮಾ॒-ದ್ಗಾಯ॑ತೇ॒ ನ ದೇಯ॒-ಙ್ಗಾಥಾ॒ ಹಿ ತ-ದ್ವೃ॒ಙ್ಕ್ತೇ᳚ ಽಗ್ನಿಭ್ಯಃ॑ ಪ॒ಶೂನಾ ಲ॑ಭತೇ॒ ಕಾಮಾ॒ ವಾ ಅ॒ಗ್ನಯಃ॒ ಕಾಮಾ॑ನೇ॒ವಾವ॑ ರುನ್ಧೇ॒ ಯ-ತ್ಪ॒ಶೂ-ನ್ನಾ-ಽಽಲಭೇ॒ತಾ-ಽನ॑ವರುದ್ಧಾ ಅಸ್ಯ [ ] 40

ಪ॒ಶವಃ॑ ಸ್ಯು॒ರ್ಯ-ತ್ಪರ್ಯ॑ಗ್ನಿಕೃತಾನು-ಥ್ಸೃ॒ಜೇ-ದ್ಯ॑ಜ್ಞವೇಶ॒ಸ-ಙ್ಕು॑ರ್ಯಾ॒-ದ್ಯ-ಥ್ಸಗ್ಗ್॑ಸ್ಥಾ॒ಪಯೇ᳚-ದ್ಯಾ॒ತಯಾ॑ಮಾನಿ ಶೀ॒ರ್॒ಷಾಣಿ॑ ಸ್ಯು॒ರ್ಯ-ತ್ಪ॒ಶೂನಾ॒ಲಭ॑ತೇ॒ ತೇನೈ॒ವ ಪ॒ಶೂನವ॑ ರುನ್ಧೇ॒ ಯ-ತ್ಪರ್ಯ॑ಗ್ನಿಕೃತಾನು-ಥ್ಸೃ॒ಜತಿ॑ ಶೀ॒ರ್ಷ್ಣಾ-ಮಯಾ॑ತಯಾಮತ್ವಾಯ ಪ್ರಾಜಾಪ॒ತ್ಯೇನ॒ ಸಗ್ಗ್ ಸ್ಥಾ॑ಪಯತಿ ಯ॒ಜ್ಞೋ ವೈ ಪ್ರ॒ಜಾಪ॑ತಿರ್ಯ॒ಜ್ಞ ಏ॒ವ ಯ॒ಜ್ಞ-ಮ್ಪ್ರತಿ॑ಷ್ಠಾಪಯತಿ ಪ್ರ॒ಜಾಪ॑ತಿಃ ಪ್ರ॒ಜಾ ಅ॑ಸೃಜತ॒ ಸ ರಿ॑ರಿಚಾ॒ನೋ॑-ಽಮನ್ಯತ॒ ಸ ಏ॒ತಾ ಆ॒ಪ್ರೀರ॑ಪಶ್ಯ॒-ತ್ತಾಭಿ॒ರ್ವೈ ಸ ಮು॑ಖ॒ತ [ಸ ಮು॑ಖ॒ತಃ, ಆ॒ತ್ಮಾನ॒ಮಾ ಽಪ್ರೀ॑ಣೀತ॒] 41

ಆ॒ತ್ಮಾನ॒ಮಾ ಽಪ್ರೀ॑ಣೀತ॒ ಯದೇ॒ತಾ ಆ॒ಪ್ರಿಯೋ॒ ಭವ॑ನ್ತಿ ಯ॒ಜ್ಞೋ ವೈ ಪ್ರ॒ಜಾಪ॑ತಿ-ರ್ಯ॒ಜ್ಞಮೇ॒ವೈತಾಭಿ॑ರ್ಮುಖ॒ತ ಆ ಪ್ರೀ॑ಣಾ॒ತ್ಯ-ಪ॑ರಿಮಿತಛನ್ದಸೋ ಭವ॒ನ್ತ್ಯಪ॑ರಿಮಿತಃ ಪ್ರ॒ಜಾಪ॑ತಿಃ ಪ್ರ॒ಜಾಪ॑ತೇ॒ರಾಪ್ತ್ಯಾ॑ ಊನಾತಿರಿ॒ಕ್ತಾ ಮಿ॑ಥು॒ನಾಃ ಪ್ರಜಾ᳚ತ್ಯೈ ಲೋಮ॒ಶಂ-ವೈಁ ನಾಮೈ॒ತಚ್ಛನ್ದಃ॑ ಪ್ರ॒ಜಾಪ॑ತೇಃ ಪ॒ಶವೋ॑ ಲೋಮ॒ಶಾಃ ಪ॒ಶೂನೇ॒ವಾ-ಽವ॑ ರುನ್ಧೇ॒ ಸರ್ವಾ॑ಣಿ॒ ವಾ ಏ॒ತಾ ರೂ॒ಪಾಣಿ॒ ಸರ್ವಾ॑ಣಿ ರೂ॒ಪಾಣ್ಯ॒ಗ್ನೌ ಚಿತ್ಯೇ᳚ ಕ್ರಿಯನ್ತೇ॒ ತಸ್ಮಾ॑ದೇ॒ತಾ ಅ॒ಗ್ನೇಶ್ಚಿತ್ಯ॑ಸ್ಯ [ಅ॒ಗ್ನೇಶ್ಚಿತ್ಯ॑ಸ್ಯ, ಭ॒ವ॒ನ್ತ್ಯೇಕ॑ವಿಗ್ಂ ಶತಿಗ್ಂ] 42

ಭವ॒ನ್ತ್ಯೇಕ॑ವಿಗ್ಂ ಶತಿಗ್ಂ ಸಾಮಿಧೇ॒ನೀರನ್ವಾ॑ಹ॒ ರುಗ್ವಾ ಏ॑ಕವಿ॒ಗ್ಂ॒ಶೋ ರುಚ॑ಮೇ॒ವ ಗ॑ಚ್ಛ॒ತ್ಯಥೋ᳚ ಪ್ರತಿ॒ಷ್ಠಾಮೇ॒ವ ಪ್ರ॑ತಿ॒ಷ್ಠಾ ಹ್ಯೇ॑ಕವಿ॒ಗ್ಂ॒ಶ-ಶ್ಚತು॑ರ್ವಿಗ್ಂಶತಿ॒ಮನ್ವಾ॑ಹ॒ ಚತು॑ರ್ವಿಗ್ಂಶತಿರರ್ಧಮಾ॒ಸಾ-ಸ್ಸಂ॑ವಁಥ್ಸ॒ರ-ಸ್ಸಂ॑ವಁಥ್ಸ॒ರೋ᳚-ಽಗ್ನಿರ್ವೈ᳚ಶ್ವಾನ॒ರ-ಸ್ಸಾ॒ಕ್ಷಾದೇ॒ವ ವೈ᳚ಶ್ವಾನ॒ರಮವ॑ ರುನ್ಧೇ॒ ಪರಾ॑ಚೀ॒ರನ್ವಾ॑ಹ॒ ಪರಾ॑ಙಿವ॒ ಹಿ ಸು॑ವ॒ರ್ಗೋ ಲೋ॒ಕ-ಸ್ಸಮಾ᳚ಸ್ತ್ವಾ-ಽಗ್ನ ಋ॒ತವೋ॑ ವರ್ಧಯ॒ನ್ತ್ವಿತ್ಯಾ॑ಹ॒ ಸಮಾ॑ಭಿರೇ॒ವಾ-ಽಗ್ನಿಂ-ವಁ॑ರ್ಧಯ- [-ಽಗ್ನಿಂ-ವಁ॑ರ್ಧಯತಿ, ಋ॒ತುಭಿಃ॑ ಸಂವಁಥ್ಸ॒ರಂ-ವಿಁಶ್ವಾ॒] 43

-ತ್ಯೃ॒ತುಭಿಃ॑ ಸಂವಁಥ್ಸ॒ರಂ-ವಿಁಶ್ವಾ॒ ಆ ಭಾ॑ಹಿ ಪ್ರ॒ದಿಶಃ॑ ಪೃಥಿ॒ವ್ಯಾ ಇತ್ಯಾ॑ಹ॒ ತಸ್ಮಾ॑ದ॒ಗ್ನಿ-ಸ್ಸರ್ವಾ॒ ದಿಶೋ-ಽನು॒ ವಿಭಾ॑ತಿ॒ ಪ್ರತ್ಯೌ॑ಹತಾಮ॒ಶ್ವಿನಾ॑ ಮೃ॒ತ್ಯುಮ॑ಸ್ಮಾ॒ದಿತ್ಯಾ॑ಹ ಮೃ॒ತ್ಯುಮೇ॒ವಾ-ಽಸ್ಮಾ॒ದಪ॑ ನುದ॒ತ್ಯುದ್ವ॒ಯ-ನ್ತಮ॑ಸ॒ಸ್ಪರೀತ್ಯಾ॑ಹ ಪಾ॒ಪ್ಮಾ ವೈ ತಮಃ॑ ಪಾ॒ಪ್ಮಾನ॑ಮೇ॒ವಾಸ್ಮಾ॒ದಪ॑ ಹ॒ನ್ತ್ಯಗ॑ನ್ಮ॒ ಜ್ಯೋತಿ॑ರುತ್ತ॒ಮ-ಮಿತ್ಯಾ॑ಹಾ॒-ಽಸೌ ವಾ ಆ॑ದಿ॒ತ್ಯೋ ಜ್ಯೋತಿ॑ರುತ್ತ॒ಮ-ಮಾ॑ದಿ॒ತ್ಯಸ್ಯೈ॒ವ ಸಾಯು॑ಜ್ಯ-ಙ್ಗಚ್ಛತಿ॒ ನ ಸಂ॑ವಁಥ್ಸ॒ರಸ್ತಿ॑ಷ್ಠತಿ॒ ನಾಸ್ಯ॒ ಶ್ರೀಸ್ತಿ॑ಷ್ಠತಿ॒ ಯಸ್ಯೈ॒ತಾಃ ಕ್ರಿ॒ಯನ್ತೇ॒ ಜ್ಯೋತಿ॑ಷ್ಮತೀ-ಮುತ್ತ॒ಮಾಮನ್ವಾ॑ಹ॒ ಜ್ಯೋತಿ॑ರೇ॒ವಾಸ್ಮಾ॑ ಉ॒ಪರಿ॑ಷ್ಟಾ-ದ್ದಧಾತಿ ಸುವ॒ರ್ಗಸ್ಯ॑ ಲೋ॒ಕಸ್ಯಾನು॑ಖ್ಯಾತ್ಯೈ ॥ 44 ॥

(ಯಾವ॑ನ್ತೋ - ಽಸ್ಯ - ಮುಖ॒ತ - ಶ್ಚಿತ್ಯ॑ಸ್ಯ - ವರ್ಧಯ - ತ್ಯಾದಿ॒ತ್ಯೋ᳚ - ಽಷ್ಟಾವಿಗ್ಂ॑ಶತಿಶ್ಚ) (ಅ. 8)

ಷ॒ಡ್ಭಿರ್ದೀ᳚ಕ್ಷಯತಿ॒ ಷಡ್ವಾ ಋ॒ತವ॑ ಋ॒ತುಭಿ॑ರೇ॒ವೈನ॑-ನ್ದೀಕ್ಷಯತಿ ಸ॒ಪ್ತಭಿ॑ರ್ದೀಕ್ಷಯತಿ ಸ॒ಪ್ತ ಛನ್ದಾಗ್ಂ॑ಸಿ॒ ಛನ್ದೋ॑ಭಿರೇ॒ವೈನ॑-ನ್ದೀಕ್ಷಯತಿ॒ ವಿಶ್ವೇ॑ ದೇ॒ವಸ್ಯ॑ ನೇ॒ತುರಿತ್ಯ॑-ನು॒ಷ್ಟುಭೋ᳚ತ್ತ॒ಮಯಾ॑ ಜುಹೋತಿ॒ ವಾಗ್ವಾ ಅ॑ನು॒ಷ್ಟು-ಪ್ತಸ್ಮಾ᳚-ತ್ಪ್ರಾ॒ಣಾನಾಂ॒-ವಾಁಗು॑ತ್ತ॒ಮೈ- ಕ॑ಸ್ಮಾದ॒ಕ್ಷರಾ॒ದನಾ᳚ಪ್ತ-ಮ್ಪ್ರಥ॒ಮ-ಮ್ಪ॒ದ-ನ್ತಸ್ಮಾ॒-ದ್ಯ-ದ್ವಾ॒ಚೋ-ಽನಾ᳚ಪ್ತ॒-ನ್ತನ್ಮ॑ನು॒ಷ್ಯಾ॑ ಉಪ॑ ಜೀವನ್ತಿ ಪೂ॒ರ್ಣಯಾ॑ ಜುಹೋತಿ ಪೂ॒ರ್ಣ ಇ॑ವ॒ ಹಿ ಪ್ರ॒ಜಾಪ॑ತಿಃ [ಪ್ರ॒ಜಾಪ॑ತಿಃ, ಪ್ರ॒ಜಾಪ॑ತೇ॒ರಾಪತ್ಯೈ॒] 45

ಪ್ರ॒ಜಾಪ॑ತೇ॒ರಾಪ್ತ್ಯೈ॒ ನ್ಯೂ॑ನಯಾ ಜುಹೋತಿ॒ ನ್ಯೂ॑ನಾ॒ದ್ಧಿ ಪ್ರ॒ಜಾಪ॑ತಿಃ ಪ್ರ॒ಜಾ ಅಸೃ॑ಜತ ಪ್ರ॒ಜಾನಾ॒ಗ್ಂ॒ ಸೃಷ್ಟ್ಯೈ॒ ಯದ॒ರ್ಚಿಷಿ॑ ಪ್ರವೃ॒ಞ್ಜ್ಯಾ-ದ್ಭೂ॒ತಮವ॑ ರುನ್ಧೀತ॒ ಯದಙ್ಗಾ॑ರೇಷು ಭವಿ॒ಷ್ಯದಙ್ಗಾ॑ರೇಷು॒ ಪ್ರವೃ॑ಣಕ್ತಿ ಭವಿ॒ಷ್ಯ ದೇ॒ವಾವ॑ ರುನ್ಧೇ ಭವಿ॒ಷ್ಯದ್ಧಿ ಭೂಯೋ॑ ಭೂ॒ತಾ-ದ್ದ್ವಾಭ್ಯಾ॒-ಮ್ಪ್ರವೃ॑ಣಕ್ತಿ ದ್ವಿ॒ಪಾ-ದ್ಯಜ॑ಮಾನಃ॒ ಪ್ರತಿ॑ಷ್ಠಿತ್ಯೈ॒ ಬ್ರಹ್ಮ॑ಣಾ॒ ವಾ ಏ॒ಷಾ ಯಜು॑ಷಾ॒ ಸಮ್ಭೃ॑ತಾ॒ ಯದು॒ಖಾ ಸಾ ಯದ್ಭಿದ್ಯೇ॒ತಾ-ಽಽರ್ತಿ॒ಮಾರ್ಚ್ಛೇ॒- [-ಽಽರ್ತಿ॒ಮಾರ್ಚ್ಛೇ᳚ತ್, ಯಜ॑ಮಾನೋ] 46

-ದ್ಯಜ॑ಮಾನೋ ಹ॒ನ್ಯೇತಾ᳚-ಽಸ್ಯ ಯ॒ಜ್ಞೋ ಮಿತ್ರೈ॒ತಾಮು॒ಖಾ-ನ್ತ॒ಪೇತ್ಯಾ॑ಹ॒ ಬ್ರಹ್ಮ॒ ವೈ ಮಿ॒ತ್ರೋ ಬ್ರಹ್ಮ॑ನ್ನೇ॒ವೈನಾ॒-ಮ್ಪ್ರತಿ॑ಷ್ಠಾಪಯತಿ॒ ನಾ-ಽಽರ್ತಿ॒ಮಾರ್ಚ್ಛ॑ತಿ॒ ಯಜ॑ಮಾನೋ॒ ನಾಸ್ಯ॑ ಯ॒ಜ್ಞೋ ಹ॑ನ್ಯತೇ॒ ಯದಿ॒ ಭಿದ್ಯೇ॑ತ॒ ತೈರೇ॒ವ ಕ॒ಪಾಲೈ॒-ಸ್ಸಗ್ಂ ಸೃ॑ಜೇ॒-ಥ್ಸೈವ ತತಃ॒ ಪ್ರಾಯ॑ಶ್ಚಿತ್ತಿ॒ರ್ಯೋ ಗ॒ತಶ್ರೀ॒-ಸ್ಸ್ಯಾನ್ಮ॑ಥಿ॒ತ್ವಾ ತಸ್ಯಾವ॑ ದದ್ಧ್ಯಾ-ದ್ಭೂ॒ತೋ ವಾ ಏ॒ಷ ಸ ಸ್ವಾ- [ಏ॒ಷ ಸ ಸ್ವಾಮ್, ದೇ॒ವತಾ॒ಮುಪೈ॑ತಿ॒] 47

-ನ್ದೇ॒ವತಾ॒ಮುಪೈ॑ತಿ॒ ಯೋ ಭೂತಿ॑ಕಾಮ॒-ಸ್ಸ್ಯಾದ್ಯ ಉ॒ಖಾಯೈ॑ ಸ॒ಮ್ಭವೇ॒-ಥ್ಸ ಏ॒ವ ತಸ್ಯ॑ ಸ್ಯಾ॒ದತೋ॒ ಹ್ಯೇ॑ಷ ಸ॒ಮ್ಭವ॑ತ್ಯೇ॒ಷ ವೈ ಸ್ವ॑ಯ॒ಮ್ಭೂರ್ನಾಮ॒ ಭವ॑ತ್ಯೇ॒ವ ಯ-ಙ್ಕಾ॒ಮಯೇ॑ತ॒ ಭ್ರಾತೃ॑ವ್ಯಮಸ್ಮೈ ಜನಯೇಯ॒ಮಿತ್ಯ॒-ನ್ಯತ॒ಸ್ತಸ್ಯಾ॒-ಽಽಹೃತ್ಯಾ-ಽವ॑ ದದ್ಧ್ಯಾ-ಥ್ಸಾ॒ಕ್ಷಾದೇ॒ವಾಸ್ಮೈ॒ ಭ್ರಾತೃ॑ವ್ಯ-ಞ್ಜನಯತ್ಯಮ್ಬ॒ರೀಷಾ॒ದನ್ನ॑ ಕಾಮ॒ಸ್ಯಾವ॑ ದದ್ಧ್ಯಾದಮ್ಬ॒ರೀಷೇ॒ ವಾ ಅನ್ನ॑-ಮ್ಭ್ರಿಯತೇ॒ ಸಯೋ᳚ನ್ಯೇ॒ವಾನ್ನ॒- [ಸಯೋ᳚ನ್ಯೇ॒ವಾನ್ನ᳚ಮ್, ಅವ॑ ರುನ್ಧೇ॒] 48

-ಮವ॑ ರುನ್ಧೇ॒ ಮುಞ್ಜಾ॒ನವ॑ ದಧಾ॒ತ್ಯೂರ್ಗ್ವೈ ಮುಞ್ಜಾ॒ ಊರ್ಜ॑ಮೇ॒ವಾಸ್ಮಾ॒ ಅಪಿ॑ ದಧಾತ್ಯ॒ಗ್ನಿರ್ದೇ॒ವೇಭ್ಯೋ॒ ನಿಲಾ॑ಯತ॒ ಸ ಕ್ರು॑ಮು॒ಕ-ಮ್ಪ್ರಾ-ಽವಿ॑ಶ-ತ್ಕ್ರುಮು॒ಕಮವ॑ ದಧಾತಿ॒ ಯದೇ॒ವಾಸ್ಯ॒ ತತ್ರ॒ ನ್ಯ॑ಕ್ತ॒-ನ್ತ ದೇ॒ವಾವ॑ ರುನ್ಧ॒ ಆಜ್ಯೇ॑ನ॒ ಸಂ-ಯೌಁ᳚ತ್ಯೇ॒ತದ್ವಾ ಅ॒ಗ್ನೇಃ ಪ್ರಿ॒ಯ-ನ್ಧಾಮ॒ ಯದಾಜ್ಯ॑-ಮ್ಪ್ರಿ॒ಯೇಣೈ॒ವೈನ॒-ನ್ಧಾಮ್ನಾ॒ ಸಮ॑ರ್ಧಯ॒ತ್ಯಥೋ॒ ತೇಜ॑ಸಾ॒ [ತೇಜ॑ಸಾ, ವೈ ಕ॑ಕನ್ತೀ॒ಮಾ ದ॑ಧಾತಿ॒] 49

ವೈ ಕ॑ಙ್ಕತೀ॒ಮಾ ದ॑ಧಾತಿ॒ ಭಾ ಏ॒ವಾವ॑ ರುನ್ಧೇ ಶಮೀ॒ಮಯೀ॒ಮಾ ದ॑ಧಾತಿ॒ ಶಾನ್ತ್ಯೈ॒ ಸೀದ॒ ತ್ವ-ಮ್ಮಾ॒ತುರ॒ಸ್ಯಾ ಉ॒ಪಸ್ಥ॒ ಇತಿ॑ ತಿ॒ಸೃಭಿ॑ರ್ಜಾ॒ತಮುಪ॑ ತಿಷ್ಠತೇ॒ ತ್ರಯ॑ ಇ॒ಮೇ ಲೋ॒ಕಾ ಏ॒ಷ್ವೇ॑ವ ಲೋ॒ಕೇಷ್ವಾ॒ವಿದ॑-ಙ್ಗಚ್ಛ॒ತ್ಯಥೋ᳚ ಪ್ರಾ॒ಣಾನೇ॒ವಾ-ಽಽತ್ಮ-ನ್ಧ॑ತ್ತೇ ॥ 50 ॥

( ಪ್ರ॒ಜಾಪ॑ತಿ--ರ್ ಋಚ್ಛೇ॒ಥ್ - ಸ್ವಾ - ಮೇ॒ವಾನ್ನಂ॒ - ತೇಜ॑ಸಾ॒ - ಚತು॑ಸ್ತ್ರಿಗ್ಂಶಚ್ಚ) (ಅ. 9)

ನ ಹ॑ ಸ್ಮ॒ ವೈ ಪು॒ರಾ-ಽಗ್ನಿರಪ॑ರಶುವೃಕ್ಣ-ನ್ದಹತಿ॒ ತದ॑ಸ್ಮೈ ಪ್ರಯೋ॒ಗ ಏ॒ವರ್ಷಿ॑ರಸ್ವದಯ॒-ದ್ಯದ॑ಗ್ನೇ॒ ಯಾನಿ॒ ಕಾನಿ॒ ಚೇತಿ॑ ಸ॒ಮಿಧ॒ಮಾ ದ॑ಧಾ॒ತ್ಯಪ॑ರಶುವೃಕ್ಣ-ಮೇ॒ವಾಸ್ಮೈ᳚ ಸ್ವದಯತಿ॒ ಸರ್ವ॑ಮಸ್ಮೈ ಸ್ವದತೇ॒ ಯ ಏ॒ವಂ-ವೇಁದೌದು॑ಮ್ಬರೀ॒ಮಾ ದ॑ಧಾ॒ತ್ಯೂರ್ಗ್ವಾ ಉ॑ದು॒ಮ್ಬರ॒ ಊರ್ಜ॑ಮೇ॒ವಾಸ್ಮಾ॒ ಅಪಿ॑ ದಧಾತಿ ಪ್ರ॒ಜಾಪ॑ತಿರ॒ಗ್ನಿ-ಮ॑ಸೃಜತ॒ ತಗ್ಂ ಸೃ॒ಷ್ಟಗ್ಂ ರಕ್ಷಾಗ್॑- [ಸೃ॒ಷ್ಟಗ್ಂ ರಕ್ಷಾಗ್ಂ॑ಸಿ, ಅ॒ಜಿ॒ಘಾ॒ಗ್ಂ॒ಸ॒ನ್ಥ್ಸ ಏ॒ತ-] 51

-ಸ್ಯಜಿಘಾಗ್ಂಸ॒ನ್ಥ್ಸ ಏ॒ತ-ದ್ರಾ᳚ಕ್ಷೋ॒ಘ್ನಮ॑ಪಶ್ಯ॒-ತ್ತೇನ॒ ವೈ ಸರಕ್ಷಾ॒ಗ್॒ಸ್ಯಪಾ॑-ಽಹತ॒ ಯ-ದ್ರಾ᳚ಕ್ಷೋ॒ಘ್ನ-ಮ್ಭವ॑ತ್ಯ॒ಗ್ನೇರೇ॒ವ ತೇನ॑ ಜಾ॒ತಾ-ದ್ರಕ್ಷಾ॒ಗ್॒ಸ್ಯಪ॑ ಹ॒ನ್ತ್ಯಾಶ್ವ॑ತ್ಥೀ॒ಮಾ ದ॑ಧಾತ್ಯಶ್ವ॒ತ್ಥೋ ವೈ ವನ॒ಸ್ಪತೀ॑ನಾಗ್ಂ ಸಪತ್ನಸಾ॒ಹೋ ವಿಜಿ॑ತ್ಯೈ॒ ವೈಕ॑ಙ್ಕತೀ॒ಮಾ ದ॑ಧಾತಿ॒ ಭಾ ಏ॒ವಾವ॑ ರುನ್ಧೇ ಶಮೀ॒ಮಯೀ॒ಮಾ ದ॑ಧಾತಿ॒ ಶಾನ್ತ್ಯೈ॒ ಸಗ್ಂಶಿ॑ತ-ಮ್ಮೇ॒ ಬ್ರಹ್ಮೋದೇ॑ಷಾ-ಮ್ಬಾ॒ಹೂ ಅ॑ತಿರ॒ಮಿತ್ಯು॑ತ್ತ॒ಮೇ ಔದು॑ಮ್ಬರೀ [ಔದು॑ಮ್ಬರೀ, ವಾ॒ಚ॒ಯ॒ತಿ॒ ಬ್ರಹ್ಮ॑ಣೈ॒ವ] 52

ವಾಚಯತಿ॒ ಬ್ರಹ್ಮ॑ಣೈ॒ವ ಕ್ಷ॒ತ್ರಗ್ಂ ಸಗ್ಗ್ ಶ್ಯ॑ತಿ ಕ್ಷ॒ತ್ರೇಣ॒ ಬ್ರಹ್ಮ॒ ತಸ್ಮಾ᳚-ದ್ಬ್ರಾಹ್ಮ॒ಣೋ ರಾ॑ಜ॒ನ್ಯ॑ವಾ॒ನತ್ಯ॒ನ್ಯ-ಮ್ಬ್ರಾ᳚ಹ್ಮ॒ಣ-ನ್ತಸ್ಮಾ᳚-ದ್ರಾಜ॒ನ್ಯೋ᳚ ಬ್ರಾಹ್ಮ॒ಣವಾ॒ನತ್ಯ॒ನ್ಯಗ್ಂ ರಾ॑ಜ॒ನ್ಯ॑-ಮ್ಮೃ॒ತ್ಯುರ್ವಾ ಏ॒ಷ ಯದ॒ಗ್ನಿರ॒ಮೃತ॒ಗ್ಂ॒ ಹಿರ॑ಣ್ಯಗ್ಂ ರು॒ಕ್ಮಮನ್ತ॑ರ॒-ಮ್ಪ್ರತಿ॑ಮುಞ್ಚತೇ॒ ಽಮೃತ॑ಮೇ॒ವ ಮೃ॒ತ್ಯೋರ॒ನ್ತರ್ಧ॑ತ್ತ॒ ಏಕ॑ವಿಗ್ಂಶತಿನಿರ್ಬಾಧೋ ಭವ॒ತ್ಯೇಕ॑ವಿಗ್ಂಶತಿ॒ರ್ವೈ ದೇ॑ವಲೋ॒ಕಾ ದ್ವಾದ॑ಶ॒ ಮಾಸಾಃ॒ ಪಞ್ಚ॒ರ್ತವ॒ಸ್ತ್ರಯ॑ ಇ॒ಮೇ ಲೋ॒ಕಾ ಅ॒ಸಾವಾ॑ದಿ॒ತ್ಯ [ಅ॒ಸಾವಾ॑ದಿ॒ತ್ಯಃ, ಏ॒ಕ॒ವಿ॒ಗ್ಂ॒ಶ ಏ॒ತಾವ॑ನ್ತೋ॒ ವೈ] 53

ಏ॑ಕವಿ॒ಗ್ಂ॒ಶ ಏ॒ತಾವ॑ನ್ತೋ॒ ವೈ ದೇ॑ವಲೋ॒ಕಾಸ್ತೇಭ್ಯ॑ ಏ॒ವ ಭ್ರಾತೃ॑ವ್ಯಮ॒ನ್ತರೇ॑ತಿ ನಿರ್ಬಾ॒ಧೈರ್ವೈ ದೇ॒ವಾ ಅಸು॑ರಾ-ನ್ನಿರ್ಬಾ॒ಧೇ॑-ಽಕುರ್ವತ॒ ತನ್ನಿ॑ರ್ಬಾ॒ಧಾನಾ᳚-ನ್ನಿರ್ಬಾಧ॒ತ್ವ-ನ್ನಿ॑ರ್ಬಾ॒ಧೀ ಭ॑ವತಿ॒ ಭ್ರಾತೃ॑ವ್ಯಾನೇ॒ವ ನಿ॑ರ್ಬಾ॒ಧೇ ಕು॑ರುತೇ ಸಾವಿತ್ರಿ॒ಯಾ ಪ್ರತಿ॑ಮುಞ್ಚತೇ॒ ಪ್ರಸೂ᳚ತ್ಯೈ॒ ನಕ್ತೋ॒ಷಾಸೇತ್ಯುತ್ತ॑ರಯಾ ಽಹೋರಾ॒ತ್ರಾಭ್ಯಾ॑ಮೇ॒ವೈನ॒-ಮುದ್ಯ॑ಚ್ಛತೇ ದೇ॒ವಾ ಅ॒ಗ್ನಿ-ನ್ಧಾ॑ರಯ-ನ್ದ್ರವಿಣೋ॒ದಾ ಇತ್ಯಾ॑ಹ ಪ್ರಾ॒ಣಾ ವೈ ದೇ॒ವಾ ದ್ರ॑ವಿಣೋ॒ದಾ ಅ॑ಹೋರಾ॒ತ್ರಾಭ್ಯಾ॑ಮೇ॒ವೈನ॑ಮು॒ದ್ಯತ್ಯ॑ [ ] 54

ಪ್ರಾ॒ಣೈರ್ದಾ॑ಧಾ॒ರಾ ಽಽಸೀ॑ನಃ॒ ಪ್ರತಿ॑ಮುಞ್ಚತೇ॒ ತಸ್ಮಾ॒ದಾಸೀ॑ನಾಃ ಪ್ರ॒ಜಾಃ ಪ್ರಜಾ॑ಯನ್ತೇ ಕೃಷ್ಣಾಜಿ॒ನಮುತ್ತ॑ರ॒-ನ್ತೇಜೋ॒ ವೈ ಹಿರ॑ಣ್ಯ॒-ಮ್ಬ್ರಹ್ಮ॑ ಕೃಷ್ಣಾಜಿ॒ನ-ನ್ತೇಜ॑ಸಾ ಚೈ॒ವೈನ॒-ಮ್ಬ್ರಹ್ಮ॑ಣಾ ಚೋಭ॒ಯತಃ॒ ಪರಿ॑ಗೃಹ್ಣಾತಿ॒ ಷಡು॑ದ್ಯಾಮಗ್ಂ ಶಿ॒ಕ್ಯ॑-ಮ್ಭವತಿ॒ ಷಡ್ವಾ ಋ॒ತವ॑ ಋ॒ತುಭಿ॑ರೇ॒ವೈನ॒-ಮುದ್ಯ॑ಚ್ಛತೇ॒ ಯ-ದ್ದ್ವಾದ॑ಶೋದ್ಯಾಮಗ್ಂ ಸಂವಁಥ್ಸ॒ರೇಣೈ॒ವ ಮೌ॒ಞ್ಜ-ಮ್ಭ॑ವ॒ತ್ಯೂರ್ಗ್ವೈ ಮುಞ್ಜಾ॑ ಊ॒ರ್ಜೈವೈನ॒ಗ್ಂ॒ ಸ ಮ॑ರ್ಧಯತಿ ಸುಪ॒ರ್ಣೋ॑-ಽಸಿ ಗ॒ರುತ್ಮಾ॒ನಿತ್ಯವೇ᳚ಕ್ಷತೇ ರೂ॒ಪಮೇ॒ವಾಸ್ಯೈ॒ತನ್ಮ॑ಹಿ॒ಮಾನಂ॒-ವ್ಯಾಁಚ॑ಷ್ಟೇ॒ ದಿವ॑-ಙ್ಗಚ್ಛ॒ ಸುವಃ॑ ಪ॒ತೇತ್ಯಾ॑ಹ ಸುವ॒ರ್ಗಮೇ॒ವೈನಂ॑-ಲೋಁ॒ಕ-ಙ್ಗ॑ಮಯತಿ ॥ 55 ॥

(ರಕ್ಷಾ॒ಗ್॒ಸ್ಯೌ - ದು॑ಬಂರಿ - ಆದಿ॒ತ್ಯ - ಉ॒ದ್ಯತ್ಯ॒ - ಸಂ - ಚತು॑ರ್ವಿಗ್ಂಶತಿಶ್ಚ) (ಅ. 10)

ಸಮಿ॑ದ್ಧೋ ಅ॒ಞ್ಜನ್ ಕೃದ॑ರ-ಮ್ಮತೀ॒ನಾ-ಙ್ಘೃ॒ತಮ॑ಗ್ನೇ॒ ಮಧು॑ಮ॒-ತ್ಪಿನ್ವ॑ಮಾನಃ । ವಾ॒ಜೀ ವಹ॑ನ್ ವಾ॒ಜಿನ॑-ಞ್ಜಾತವೇದೋ ದೇ॒ವಾನಾಂ᳚-ವಁಕ್ಷಿ ಪ್ರಿ॒ಯಮಾ ಸ॒ಧಸ್ಥ᳚ಮ್ ॥ ಘೃ॒ತೇನಾ॒ಞ್ಜನ್ಥ್ಸ-ಮ್ಪ॒ಥೋ ದೇ॑ವ॒ಯಾನಾ᳚-ನ್ಪ್ರಜಾ॒ನನ್ ವಾ॒ಜ್ಯಪ್ಯೇ॑ತು ದೇ॒ವಾನ್ । ಅನು॑ ತ್ವಾ ಸಪ್ತೇ ಪ್ರ॒ದಿಶಃ॑ ಸಚನ್ತಾಗ್ ಸ್ವ॒ಧಾಮ॒ಸ್ಮೈ ಯಜ॑ಮಾನಾಯ ಧೇಹಿ ॥ ಈಡ್ಯ॒ಶ್ಚಾಸಿ॒ ವನ್ದ್ಯ॑ಶ್ಚ ವಾಜಿನ್ನಾ॒ಶುಶ್ಚಾಸಿ॒ ಮೇದ್ಧ್ಯ॑ಶ್ಚ ಸಪ್ತೇ । ಅ॒ಗ್ನಿಷ್ಟ್ವಾ॑ [ಅ॒ಗ್ನಿಷ್ಟ್ವಾ᳚, ದೇ॒ವೈರ್ವಸು॑ಭಿ-ಸ್ಸ॒ಜೋಷಾಃ᳚] 56

ದೇ॒ವೈರ್ವಸು॑ಭಿ-ಸ್ಸ॒ಜೋಷಾಃ᳚ ಪ್ರೀ॒ತಂ-ವಁಹ್ನಿಂ॑-ವಁಹತು ಜಾ॒ತವೇ॑ದಾಃ ॥ ಸ್ತೀ॒ರ್ಣ-ಮ್ಬ॒ರ್॒ಹಿ-ಸ್ಸು॒ಷ್ಟರೀ॑ಮಾ ಜುಷಾ॒ಣೋರು ಪೃ॒ಥು ಪ್ರಥ॑ಮಾನ-ಮ್ಪೃಥಿ॒ವ್ಯಾಮ್ । ದೇ॒ವೇಭಿ॑ರ್ಯು॒ಕ್ತಮದಿ॑ತಿ-ಸ್ಸ॒ಜೋಷಾ᳚-ಸ್ಸ್ಯೋ॒ನ-ಙ್ಕೃ॑ಣ್ವಾ॒ನಾ ಸು॑ವಿ॒ತೇ ದ॑ಧಾತು ॥ ಏ॒ತಾ ಉ॑ ವ-ಸ್ಸು॒ಭಗಾ॑ ವಿ॒ಶ್ವರೂ॑ಪಾ॒ ವಿಪಕ್ಷೋ॑ಭಿ॒-ಶ್ಶ್ರಯ॑ಮಾಣಾ॒ ಉದಾತೈಃ᳚ । ಋ॒ಷ್ವಾ-ಸ್ಸ॒ತೀಃ ಕ॒ವಷ॒-ಶ್ಶುಮ್ಭ॑ಮಾನಾ॒ ದ್ವಾರೋ॑ ದೇ॒ವೀ-ಸ್ಸು॑ಪ್ರಾಯ॒ಣಾ ಭ॑ವನ್ತು ॥ ಅ॒ನ್ತ॒ರಾ ಮಿ॒ತ್ರಾವರು॑ಣಾ॒ ಚರ॑ನ್ತೀ॒ ಮುಖಂ॑-ಯಁ॒ಜ್ಞಾನಾ॑ಮ॒ಭಿ ಸಂ॑ವಿಁದಾ॒ನೇ । ಉ॒ಷಾಸಾ॑ ವಾಗ್ಂ [ಉ॒ಷಾಸಾ॑ ವಾಮ್, ಸು॒ಹಿ॒ರ॒ಣ್ಯೇ ಸು॑ಶಿ॒ಲ್ಪೇ] 57

ಸುಹಿರ॒ಣ್ಯೇ ಸು॑ಶಿ॒ಲ್ಪೇ ಋ॒ತಸ್ಯ॒ ಯೋನಾ॑ವಿ॒ಹ ಸಾ॑ದಯಾಮಿ ॥ ಪ್ರ॒ಥ॒ಮಾ ವಾಗ್ಂ॑ ಸರ॒ಥಿನಾ॑ ಸು॒ವರ್ಣಾ॑ ದೇ॒ವೌ ಪಶ್ಯ॑ನ್ತೌ॒ ಭುವ॑ನಾನಿ॒ ವಿಶ್ವಾ᳚ । ಅಪಿ॑ಪ್ರಯ॒-ಞ್ಚೋದ॑ನಾ ವಾ॒-ಮ್ಮಿಮಾ॑ನಾ॒ ಹೋತಾ॑ರಾ॒ ಜ್ಯೋತಿಃ॑ ಪ್ರ॒ದಿಶಾ॑ ದಿ॒ಶನ್ತಾ᳚ ॥ ಆ॒ದಿ॒ತ್ಯೈರ್ನೋ॒ ಭಾರ॑ತೀ ವಷ್ಟು ಯ॒ಜ್ಞಗ್ಂ ಸರ॑ಸ್ವತೀ ಸ॒ಹ ರು॒ದ್ರೈರ್ನ॑ ಆವೀತ್ । ಇಡೋಪ॑ಹೂತಾ॒ ವಸು॑ಭಿ-ಸ್ಸ॒ಜೋಷಾ॑ ಯ॒ಜ್ಞ-ನ್ನೋ॑ ದೇವೀರ॒ಮೃತೇ॑ಷು ಧತ್ತ ॥ ತ್ವಷ್ಟಾ॑ ವೀ॒ರ-ನ್ದೇ॒ವಕಾ॑ಮ-ಞ್ಜಜಾನ॒ ತ್ವಷ್ಟು॒ರರ್ವಾ॑ ಜಾಯತ ಆ॒ಶುರಶ್ವಃ॑ । 58

ತ್ವಷ್ಟೇ॒ದಂ-ವಿಁಶ್ವ॒-ಮ್ಭುವ॑ನ-ಞ್ಜಜಾನ ಬ॒ಹೋಃ ಕ॒ರ್ತಾರ॑ಮಿ॒ಹ ಯ॑ಕ್ಷಿ ಹೋತಃ ॥ ಅಶ್ವೋ॑ ಘೃ॒ತೇನ॒ ತ್ಮನ್ಯಾ॒ ಸಮ॑ಕ್ತ॒ ಉಪ॑ ದೇ॒ವಾಗ್ಂ ಋ॑ತು॒ಶಃ ಪಾಥ॑ ಏತು । ವನ॒ಸ್ಪತಿ॑-ರ್ದೇವಲೋ॒ಕ-ಮ್ಪ್ರ॑ಜಾ॒ನನ್ನ॒ಗ್ನಿನಾ॑ ಹ॒ವ್ಯಾ ಸ್ವ॑ದಿ॒ತಾನಿ॑ ವಕ್ಷತ್ ॥ ಪ್ರ॒ಜಾಪ॑ತೇ॒ಸ್ತಪ॑ಸಾ ವಾವೃಧಾ॒ನ-ಸ್ಸ॒ದ್ಯೋ ಜಾ॒ತೋ ದ॑ಧಿಷೇ ಯ॒ಜ್ಞಮ॑ಗ್ನೇ । ಸ್ವಾಹಾ॑ಕೃತೇನ ಹ॒ವಿಷಾ॑ ಪುರೋಗಾ ಯಾ॒ಹಿ ಸಾ॒ದ್ಧ್ಯಾ ಹ॒ವಿರ॑ದನ್ತು ದೇ॒ವಾಃ ॥ 59 ॥

(ಅ॒ಗ್ನಿಷ್ಟ್ವಾ॑ - ವಾ॒ - ಮಶ್ವೋ॒ - ದ್ವಿಚ॑ತ್ವಾರಿಗ್ಂಶಚ್ಚ) (ಅ. 11)

(ಸಾ॒ವಿ॒ತ್ರಾಣಿ॒ - ವ್ಯೃ॑ದ್ಧ॒ - ಮುತ್ಕ್ರಾ॑ಮ - ದೇ॒ವಸ್ಯ॑ ಖನತಿ - ಕ್ರೂ॒ರಂ -ಁವಾ॑ರು॒ಣಃ - ಸ॒ಪ್ತಭಿ॒ - ರೇಕ॑ವಿಗ್ಂಶತ್ಯಾ - ಷ॒ಡ್ಭಿ - ರ್ನ ಹ॑ ಸ್ಮ॒ - ಸಮಿ॑ದ್ಧೋ ಅ॒ಞ್ಜ - ನ್ನೇಕಾ॑ದಶ )

(ಸಾ॒ವಿ॒ತ್ರಾ - ಣ್ಯುತ್ಕ್ರಾ॑ಮ - ಕ್ರೂ॒ರಂ -ಁವಾ॑ರು॒ಣಃ - ಪ॒ಶವಃ॑ ಸ್ಯು॒ - ರ್ನ ಹ॑ ಸ್ಮ॒ - ನವ॑ಪಞ್ಚಾ॒ಶತ್)

(ಸಾ॒ವಿ॒ತ್ರಾಣಿ॑, ಹ॒ವಿರ॑ದನ್ತು ದೇ॒ವಾಃ)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಪ್ರಥಮಃ ಪ್ರಶ್ನ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya saṃhitāyā-mpañcamakāṇḍe prathamaḥ praśnaḥ - ukhyāgnikathanaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

sā॒vi॒trāṇi̭ juhoti॒ prasū᳚tyai caturgṛhī॒tena̭ juhoti॒ catṷṣpādaḥ pa॒śavaḥ̭ pa॒śūne॒vā-'va̭ rundhe॒ cata̭sro॒ diśo̭ di॒kṣvḙva prati̭ tiṣṭhati॒ chandāgṃ̭si de॒vebhyo 'pā᳚-'krāma॒-nna vo̭ bhā॒gāni̭ ha॒vyaṃ-va~̭kṣyāma॒ iti॒ tebhya̭ e॒tacca̭tu-rgṛhī॒tama̭-dhāraya-npuro-'nu vā॒kyā̭yai yā॒jyā̭yai de॒vatā̭yai vaṣaṭkā॒rāya॒ yacca̭turgṛhī॒ta-ñju॒hoti॒ chandāg̭sye॒va ta-tprī̭ṇāti॒ tānya̭sya prī॒tāni̭ de॒vebhyo̭ ha॒vyaṃ-va~̭hanti॒ ya-ṅkā॒mayḙta॒ [ya-ṅkā॒mayḙta, pāpī̭yān-thsyā॒dityekai̭ka॒-] 1

pāpī̭yān-thsyā॒dityekai̭ka॒-ntasya̭ juhuyā॒-dāhṷtībhire॒vaina॒mapa̭ gṛhṇāti॒ pāpī̭yā-nbhavati॒ ya-ṅkā॒mayḙta॒ vasī̭yān-thsyā॒diti॒ sarvā̭ṇi॒ tasyā̭-'nu॒drutya̭ juhuyā॒dāhṷtyai॒vaina̭ma॒bhi kra̭mayati॒ vasī̭yā-nbhava॒tyatho̭ ya॒jñasyai॒vaiṣā-'bhikrā᳚nti॒reti॒ vā e॒ṣa ya̭jñamu॒khā-dṛddhyā॒ yo᳚-'gnerde॒vatā̭yā॒ etya॒ṣṭāve॒tāni̭ sāvi॒trāṇi̭ bhavantya॒ṣṭākṣa̭rā gāya॒trī gā̭ya॒tro᳚- [gā̭ya॒traḥ, a॒gnistenai॒va] 2

-'gnistenai॒va ya̭jñamu॒khādṛddhyā̭ a॒gnerde॒vatā̭yai॒ naitya॒ṣṭau sā̭vi॒trāṇi̭ bhava॒ntyāhṷtirnava॒mī tri॒vṛta̭me॒va ya̭jñamu॒khe viyā̭tayati॒ yadi̭ kā॒mayḙta॒ chandāgṃ̭si yajñayaśa॒senā᳚ 'rpayeya॒mityṛca̭manta॒mā-ṅkṷryā॒cchandāg̭sye॒va ya̭jñayaśa॒senā᳚ 'rpayati॒ yadi̭ kā॒mayḙta॒ yaja̭mānaṃ-ya~jñayaśa॒senā᳚-'rpayeya॒miti॒ yajṷranta॒ma-ṅkṷryā॒-dyaja̭māname॒va ya̭jñayaśa॒senā᳚-'rpayatyṛ॒cā stoma॒gṃ॒ sama̭rdha॒ye- [sama̭rdha॒yeti̭, ā॒ha॒ samṛ̭ddhyai] 3

-tyā̭ha॒ samṛ̭ddhyai ca॒turbhi॒rabhri॒mā da̭tte ca॒tvāri॒ chandāgṃ̭si॒ chando̭bhire॒va de॒vasya̭ tvā savi॒tuḥ pra̭sa॒va ityā̭ha॒ prasū᳚tyā a॒gnirde॒vebhyo॒ nilā̭yata॒ sa veṇu॒-mprā-'vi̭śa॒-thsa e॒tāmū॒timanu॒ sama̭cara॒-dya-dveṇo᳚-ssuṣi॒ragṃ sṷṣi॒rā-'bhri̭rbhavati sayoni॒tvāya॒ sa yatra̭ya॒trā-'va̭sa॒-tta-tkṛ॒ṣṇama̭bhava-tkalmā॒ṣī bha̭vati rū॒pasa̭mṛddhyā ubhayataḥ॒, kṣṇūrbha̭vatī॒taścā॒-'-muta̭ścā॒-'rkasyā-va̭ruddhyai vyāmamā॒trī bha̭vatye॒tāva॒dvai purṷṣe vī॒ryaṃ̭-vī~॒rya̭sammi॒tā 'pa̭rimitā bhava॒tya-pa̭rimita॒syā-' va̭ruddhyai॒ yo vana॒spatī̭nā-mphala॒grahi॒-ssa ḙṣāṃ-vī~॒ryā̭vā-nphala॒grahi॒rveṇṷ-rvaiṇa॒vī bha̭vati vī॒rya̭syā va̭ruddhyai || 4 ||

(kā॒mayḙta - gāya॒tro᳚ - 'rdha॒yeti̭ - ca - sa॒ptavigṃ̭śatiśca) (a. 1)

vyṛ̭ddhaṃ॒-vā~ e॒ta-dya॒jñasya॒ yada̭ya॒juṣkḙṇa kri॒yata̭ i॒māma̭gṛbhṇa-nraśa॒nā-mṛ॒tasyetya̭śvābhi॒dhānī॒mā da̭tte॒ yajṷṣkṛtyai ya॒jñasya॒ samṛ̭ddhyai॒ pratū᳚rtaṃ-vā~ji॒nnā dra॒vetyaśva̭-ma॒bhi da̭dhāti rū॒pame॒vā-'syai॒ta-nma̭hi॒mānaṃ॒-vyā~ca̭ṣṭe yu॒ñjāthā॒gṃ॒ rāsa̭bhaṃ-yu~॒vamiti̭ garda॒bha-masa̭tye॒va ga̭rda॒bha-mprati̭ ṣṭhāpayati॒ tasmā॒daśvā᳚-dgarda॒bho-'sa̭ttaro॒ yogḙyoge ta॒vasta̭ra॒mityā̭ha॒ [ta॒vasta̭ra॒mityā̭ha, yogḙyoga] 5

yogḙyoga e॒vainaṃ̭-yu~ṅkte॒ vājḙvāje havāmaha॒ ityā॒hānnaṃ॒-vai~ vājo-'nna̭me॒vāva̭ rundhe॒ sakhā̭ya॒ indra̭mū॒taya॒ ityā̭hendri॒yame॒vāva̭ rundhe॒ 'gnirde॒vebhyo॒ nilā̭yata॒ ta-mpra॒jāpa̭ti॒ranva̭vinda-tprājāpa॒tyo-'śvo 'śvḙna॒ sa-mbha̭ra॒tyanṷvittyai pāpavasya॒saṃ-vā~ e॒ta-tkri̭yate॒ yacchreya̭sā ca॒ pāpī̭yasā ca samā॒na-ṅkarma̭ ku॒rvanti॒ pāpī̭yā॒n॒.- [pāpī̭yān, hyaśvā᳚-dgarda॒bho-'śva॒-] 6

-hyaśvā᳚-dgarda॒bho-'śva॒-mpūrva̭-nnayanti pāpavasya॒-sasya॒ vyāvṛ̭ttyai॒ tasmā॒cchreyāgṃ̭sa॒-mpāpī̭yā-npa॒ścādanvḙti ba॒hurvai bhava̭to॒ bhrātṛ̭vyo॒ bhava̭tīva॒ khalu॒ vā e॒ṣa yo᳚-'gni-ñci̭nu॒te va॒jryaśvaḥ̭ pra॒tūrva॒nnehya̭va॒-krāma॒nna-śa̭stī॒rityā̭ha॒ vajrḙṇai॒va pā॒pmāna॒-mbhrātṛ̭vya॒mava̭ krāmati ru॒drasya॒ gāṇa̭patyā॒dityā̭ha rau॒drā vai pa॒śavo̭ ru॒drāde॒va [ ] 7

pa॒śū-nni॒ryācyā॒-''tmane॒ karma̭ kurute pū॒ṣṇā sa॒yujā̭ sa॒hetyā̭ha pū॒ṣā vā addhva̭nāgṃ sanne॒tā sama̭ṣṭyai॒ purī̭ṣāyatano॒ vā e॒ṣa yada॒gniraṅgi̭raso॒ vā e॒tamagrḙ de॒vatā̭nā॒gṃ॒ sama̭bhara-npṛthi॒vyā-ssa॒dhasthā̭da॒gni-mpṷrī॒ṣya̭-maṅgira॒sva-dacche॒hītyā̭ha॒ sāya̭taname॒vaina̭-nde॒vatā̭bhi॒-ssa-mbha̭ratya॒gni-mpṷrī॒ṣya̭-maṅgira॒sva- dacchḙma॒ ityā̭ha॒ yena̭ [ ] 8

sa॒ṅgaccha̭te॒ vāja̭me॒vāsya̭ vṛṅkte pra॒jāpa̭taye prati॒procyā॒gni-ssa॒mbhṛtya॒ ityā̭huri॒yaṃ-vai~ pra॒jāpa̭ti॒stasyā̭ e॒tacchrotraṃ॒-ya~dva॒lmīko॒-'gni-mpṷrī॒ṣya̭-maṅgira॒sva-dbha̭riṣyāma॒ iti̭ valmīkava॒pāmupa̭ tiṣṭhate sā॒kṣāde॒va pra॒jāpa̭taye prati॒procyā॒-'gnigṃ sa-mbha̭ratya॒gni-mpṷrī॒ṣya̭-maṅgira॒sva-dbha̭rāma॒ ityā̭ha॒ yena̭ sa॒gañccha̭te॒ vāja̭me॒vāsya̭ vṛ॒ṅkte 'nva॒gniru॒ṣasā॒magra̭- [-'nva॒gniru॒ṣasā॒magra᳚m, a॒khya॒dityā॒hā-] 9

-makhya॒dityā॒hā-nṷkhyātyā ā॒gatya̭ vā॒jyaddhva̭na ā॒kramya̭ vāji-npṛthi॒vīmityā̭he॒cchatye॒vaina॒-mpūrva̭yā vi॒ndatyutta̭rayā॒ dvābhyā॒mā kra̭mayati॒ prati̭ṣṭhityā॒ anṷrūpābhyā॒-ntasmā॒danṷrūpāḥ pa॒śavaḥ॒ prajā̭yante॒ dyaustḙ pṛ॒ṣṭha-mpṛ̭thi॒vī sa॒dhastha॒mityā̭hai॒bhyo vā e॒taṃ-lo~॒kebhyaḥ̭ pra॒jāpa̭ti॒-ssamai̭raya-drū॒pame॒vāsyai॒-tanma̭hi॒mānaṃ॒-vyā~ca̭ṣṭe va॒jrī vā e॒ṣa yadaśvo̭ da॒-dbhira॒nyato̭dadbhyo॒ bhūyāṃ॒-lo~ma̭bhirubha॒yāda̭dbhyo॒ ya-ndvi॒ṣyā-ttama̭dhaspa॒da-ndhyā̭ye॒-dvajrḙṇai॒vainagg̭ stṛṇute || 10 ||

(ā॒ha॒ - pāpī̭yān - ru॒drāde॒va - yenā - 'graṃ̭ - ~va॒jrī vai - sa॒ptada̭śa ca) (a. 2)

utkrā॒mo-da̭kramī॒diti॒ dvābhyā॒mutkra̭mayati॒ prati̭ṣṭhityā॒ anṷrūpābhyā॒-ntasmā॒danṷrūpāḥ pa॒śavaḥ॒ prajā̭yante॒ 'pa upa̭ sṛjati॒ yatra॒ vā āpa̭ upa॒ gaccha̭nti॒ tadoṣa̭dhayaḥ॒ prati̭ tiṣṭha॒ntyoṣa̭dhīḥ prati॒tiṣṭha̭ntīḥ pa॒śavo-'nu॒ prati̭ tiṣṭhanti pa॒śūn. ya॒jño ya॒jñaṃ-ya~ja̭māno॒ yaja̭māna-mpra॒jāstasmā̭da॒pa upa̭ sṛjati॒ prati̭ṣṭhityai॒ yada̭ddhva॒ryu-ra̭na॒gnāvāhṷti-ñjuhu॒yāda॒ndho᳚ 'ddhva॒ryu- [-'ddhva॒ryuḥ, syā॒-drakṣāgṃ̭si] 11

-ssyā॒-drakṣāgṃ̭si ya॒jñagṃ ha̭nyu॒r॒hira̭ṇyamu॒pāsya̭ juhotyagni॒vatye॒va jṷhoti॒ nāndho᳚-'ddhva॒ryurbhava̭ti॒ na ya॒jñagṃ rakṣāgṃ̭si ghnanti॒ jigha̭rmya॒gni-mmana̭sā ghṛ॒tenetyā̭ha॒ mana̭sā॒ hi purṷṣo ya॒jñama̭bhi॒gaccha̭ti prati॒kṣyanta॒-mbhuva̭nāni॒ viśvetyā̭ha॒ sarva॒gg॒ hyḙṣa pra॒tya-ṅkṣeti̭ pṛ॒thu-nti̭ra॒ścā vaya̭sā bṛ॒hanta॒mityā॒hā-'lpo॒ hyḙṣa jā॒to ma॒hā- [ma॒hān, bhava̭ti॒] 12

-nbhava̭ti॒ vyaci̭ṣṭha॒mannagṃ̭ rabha॒saṃ-vi~dā̭na॒mityā॒hā 'nna̭me॒vā-'smai᳚ svadayati॒ sarva̭masmai svadate॒ ya e॒vaṃ-ve~dā ''tvā̭ jigharmi॒ vaca̭sā ghṛ॒tenetyā̭ha॒ tasmā॒-dya-tpurṷṣo॒ mana̭sā-'bhi॒gaccha̭ti॒ ta-dvā॒cā va̭datya ra॒kṣasetyā̭ha॒ rakṣa̭sā॒mapa̭hatyai॒ marya̭śrī-sspṛha॒ya-dva̭rṇo a॒gnirityā॒hā-pa̭citime॒vā-'smi̭-ndadhā॒tya-pa̭citimā-nbhavati॒ ya e॒vaṃ- [ya e॒vam, veda॒ mana̭sā॒ tvai] 13

-~veda॒ mana̭sā॒ tvai tāmāptṷmarhati॒ yāma̭ddhva॒ryura̭-na॒gnāvāhṷti-ñju॒hoti॒ mana̭svatībhyā-ñjuho॒tyāhṷtyo॒rāptyai॒ dvābhyā॒-mprati̭ṣṭhityai yajñamu॒khe ya̭jñamukhe॒ vai kri॒yamā̭ṇe ya॒jñagṃ rakṣāgṃ̭si jighāgṃ santye॒tarhi॒ khalu॒ vā e॒ta-dya̭jñamu॒khaṃ-ya~rhyḙna॒-dāhṷti-raśñu॒te pari̭ likhati॒ rakṣa̭sā॒mapa̭hatyai ti॒sṛbhiḥ॒ pari̭ likhati tri॒vṛdvā a॒gniryāvā̭ne॒vā-'gnistasmā॒-drakṣā॒g॒syapa̭ hanti [hanti, gā॒ya॒tri॒yā pari̭] 14

gāyatri॒yā pari̭ likhati॒ tejo॒ vai gā̭ya॒trī teja̭sai॒vaina॒-mpari̭gṛhṇāti tri॒ṣṭubhā॒ pari̭ likhatīndri॒yaṃ-vai~ tri॒ṣṭu-gi̭ndri॒yeṇai॒vaina॒-mpari̭ gṛhṇātyanu॒ṣṭubhā॒ pari̭ likhatyanu॒ṣṭu-phsarvā̭ṇi॒ chandāgṃ̭si pari॒bhūḥ paryā᳚ptyai maddhya॒to̭-'nu॒ṣṭubhā॒ vāgvā a̭nu॒ṣṭu-ptasmā᳚-nmaddhya॒to vā॒cā va̭dāmo gāyatri॒yā pra̭tha॒mayā॒ pari̭ likha॒tyathā̭-'nu॒ṣṭubhā-'tha̭ tri॒ṣṭubhā॒ tejo॒ vai gā̭ya॒trī ya॒jño̭ 'nu॒ṣṭugi̭ndri॒ya-ntri॒ṣṭu-pteja̭sā cai॒vendri॒yeṇa̭ cobha॒yato̭ ya॒jña-mpari̭ gṛhṇāti || 15 ||

(a॒ndho᳚-'ddhva॒ryu - rma॒hān - bha̭vati॒ ya e॒vagṃ - ha̭nti - tri॒ṣṭubhā॒ tejo॒ vai gā̭ya॒trī - trayo̭daśa ca) (a. 3)

de॒vasya̭ tvā savi॒tuḥ pra̭sa॒va iti̭ khanati॒ prasū᳚tyā॒ atho̭ dhū॒ma-me॒vaitena̭ janayati॒ jyoti̭ṣmanta-ntvā-'gne su॒pratī̭ka॒-mityā̭ha॒ jyoti̭re॒vaitena̭ janayati॒ so᳚-'gnirjā॒taḥ pra॒jā-śśu॒cā-''rpa̭ya॒-tta-nde॒vā a̭rdha॒rcenā̭-śamayañchi॒va-mpra॒jābhyo-'higṃ̭ santa॒mityā̭ha pra॒jābhya̭ e॒vainagṃ̭ śamayati॒ dvābhyā᳚-ṅkhanati॒ prati̭ṣṭhityā a॒pā-mpṛ॒ṣṭhama॒sīti̭ puṣkarapa॒rṇamā [puṣkarapa॒rṇamā, ha॒ra॒tya॒pāṃ-vā~] 16

ha̭ratya॒pāṃ-vā~ e॒ta-tpṛ॒ṣṭhaṃ-ya~-tpṷṣkarapa॒rṇagṃ rū॒peṇai॒vaina॒dā ha̭rati puṣkarapa॒rṇena॒ sa-mbha̭rati॒ yoni॒rvā a॒gneḥ pṷṣkarapa॒rṇagṃ sayo̭nime॒vāgnigṃ sambha̭rati kṛṣṇāji॒nena॒ sambha̭rati ya॒jño vai kṛ̭ṣṇāji॒naṃ-ya~॒jñenai॒va ya॒jñagṃ sambha̭rati॒ ya-dgrā॒myāṇā᳚-mpaśū॒nā-ñcarma̭ṇā sa॒mbhare᳚-dgrā॒myā-npa॒śūñchu॒cā-'rpa̭ye-tkṛṣṇāji॒nena॒ sambha̭ratyāra॒ṇyāne॒va pa॒śū- [pa॒śūn, śu॒cā-'rpa̭yati॒] 17

-ñchu॒cā-'rpa̭yati॒ tasmā᳚-thsa॒māva̭-tpaśū॒nā-mpra॒jāya̭mānānā-māra॒ṇyāḥ pa॒śavaḥ॒ kanī̭yāgṃsa-śśu॒cā hyṛ̭tā lo̭ma॒ta-ssambha̭ra॒tyato॒ hya̭sya॒ meddhya̭-ṅkṛṣṇāji॒na-ñca̭ puṣkarapa॒rṇa-ñca॒ sagg stṛ̭ṇātī॒yaṃ-vai~ kṛ̭ṣṇāji॒nama॒sau pṷṣkarapa॒rṇa-mā॒bhyā-me॒vaina̭-mubha॒yataḥ॒ pari̭gṛhṇātya॒-gnirde॒vebhyo॒ nilā̭yata॒ tamatha॒rvā-'nva̭paśya॒datha̭rvā tvā pratha॒mo nira̭manthadagna॒ i- [nira̭manthadagna॒ iti̭, ā॒ha॒ ya e॒vaina̭-] 18

-tyā̭ha॒ ya e॒vaina̭-ma॒nvapa̭śya॒-ttenai॒vaina॒gṃ॒ sambha̭rati॒ tvāma̭gne॒ puṣka̭rā॒dadhītyā̭ha puṣkarapa॒rṇe hyḙna॒mupa̭śrita॒-mavi̭nda॒-ttamṷ tvā da॒ddhyaṅṅṛṣi॒rityā̭ha da॒ddhyaṅ vā ā̭tharva॒ṇa-stḙja॒svyā̭sī॒-tteja̭ e॒vāsmi̭-ndadhāti॒ tamṷ tvā pā॒thyo vṛṣetyā̭ha॒ pūrva̭me॒vodi॒ta-mutta̭reṇā॒bhi gṛ̭ṇāti [gṛ̭ṇāti, ca॒ta॒sṛbhi॒-ssambha̭rati] 19

cata॒sṛbhi॒-ssambha̭rati ca॒tvāri॒ chandāgṃ̭si॒ chando̭bhire॒va gā̭ya॒trībhi̭rbrāhma॒ṇasya̭ gāya॒tro hi brā᳚hma॒ṇa-stri॒ṣṭugbhī̭ rāja॒nya̭sya॒ traiṣṭṷbho॒ hi rā̭ja॒nyo̭ ya-ṅkā॒mayḙta॒ vasī̭yān-thsyā॒dityu॒bhayī̭bhi॒stasya॒ sambha̭re॒-tteja̭ścai॒vā-'smā̭ indri॒ya-ñca̭ sa॒mīcī̭ dadhātyaṣṭā॒bhi-ssambha̭ratya॒ṣṭākṣa̭rā gāya॒trī gā̭ya॒tro᳚ 'gniryāvā̭ne॒vā-'gnistagṃ sambha̭rati॒ sīda̭ hota॒rityā̭- -ha de॒vatā̭ e॒vāsmai॒ sagṃ sā̭dayati॒ ni hoteti̭ manu॒ṣyā᳚n-thsagṃ sī̭da॒sveti॒ vayāgṃ̭si॒ jani̭ṣvā॒ hi jenyo॒ agre॒ ahnā॒mityā̭ha deva manu॒ṣyāne॒vā-'smai॒ sagṃsa̭nnā॒-npraja̭nayati || 20

(ai - va pa॒śū - niti̭ - gṛṇāti - hota॒riti̭ - sa॒ptavigṃ̭śatiśca) (a. 4)

krū॒rami̭va॒ vā a̭syā e॒ta-tka̭roti॒ ya-tkhana̭tya॒pa upa̭ sṛja॒tyāpo॒ vai śā॒ntā-śśā॒ntābhi̭re॒vā-'syai॒ śucagṃ̭ śamayati॒ sa-ntḙ vā॒yurmā̭ta॒riśvā̭ dadhā॒tvityā̭ha prā॒ṇo vai vā॒yuḥ prā॒ṇenai॒vāsyai᳚ prā॒ṇagṃ sa-nda̭dhāti॒ sa-ntḙ vā॒yurityā̭ha॒ tasmā᳚-dvā॒yupra̭cyutā di॒vo vṛṣṭi̭rīrte॒ tasmai̭ ca devi॒ vaṣa̭ḍastu॒ [vaṣa̭ḍastu, tubhya॒mityā̭ha॒] 21

tubhya॒mityā̭ha॒ ṣaḍvā ṛ॒tava̭ ṛ॒tuṣve॒va vṛṣṭi̭-ndadhāti॒ tasmā॒-thsarvā̭nṛ॒tūn. va̭rṣati॒ ya-dva̭ṣaṭku॒ryā-dyā॒tayā̭mā-'sya vaṣaṭkā॒ra-ssyā॒dyanna va̭ṣaṭku॒ryā-drakṣāgṃ̭si ya॒jñagṃ ha̭nyu॒rvaḍityā̭ha pa॒rokṣa̭me॒va vaṣa̭-ṭkaroti॒ nāsya̭ yā॒tayā̭mā vaṣaṭkā॒ro bhava̭ti॒ na ya॒jñagṃ rakṣāgṃ̭si ghnanti॒ sujā̭to॒ jyoti̭ṣā sa॒hetya̭nu॒ṣṭubhopa̭ nahyatyanu॒ṣṭu- [nahyatyanu॒ṣṭup, sarvā̭ṇi॒ chandāgṃ̭si॒] 22

-phsarvā̭ṇi॒ chandāgṃ̭si॒ chandāgṃ̭si॒ khalu॒ vā a॒gneḥ pri॒yā ta॒nūḥ pri॒yayai॒vaina̭-nta॒nuvā॒ pari̭ dadhāti॒ vedṷko॒ vāso̭ bhavati॒ya e॒vaṃ-ve~da̭ vāru॒ṇo vā a॒gnirupa̭naddha॒ udṷ tiṣṭha svaddhvaro॒rdhva ū॒ ṣuṇa̭ ū॒taya॒ iti̭ sāvi॒trībhyā॒mu-tti̭ṣṭhati savi॒tṛpra̭sūta e॒vāsyo॒rdhvāṃ-va~̭ruṇame॒nimu-thsṛ̭jati॒ dvābhyā॒-mprati̭ṣṭhityai॒ sa jā॒to garbho̭ asi॒ [garbho̭ asi, roda̭syo॒rityā̭he॒me] 23

roda̭syo॒rityā̭he॒me vai roda̭sī॒ tayo̭re॒ṣa garbho॒ yada॒gni-stasmā̭-de॒vamā॒hāgne॒ cāru॒rvibhṛ̭ta॒ oṣa̭dhī॒ṣvityā̭ha ya॒dā hyḙtaṃ-vi~॒bhara॒ntyatha॒ cārṷtaro॒ bhava̭ti॒ pra mā॒tṛbhyo॒ adhi॒ kani̭krada-dgā॒ ityā॒hauṣa̭dhayo॒ vā a̭sya mā॒tara॒stābhya̭ e॒vaina॒-mpracyā̭vayati sthi॒ro bha̭va vī॒ḍva̭ṅga॒ iti̭ garda॒bha ā sā̭dayati॒ [ā sā̭dayati, sa-nna̭hyatye॒vaina̭-] 24

sa-nna̭hyatye॒vaina̭-me॒tayā᳚ sthe॒mne ga̭rda॒bhena॒ sambha̭rati॒ tasmā᳚-dgarda॒bhaḥ pa̭śū॒nā-mbhā̭rabhā॒rita̭mo garda॒bhena॒ sa-mbha̭rati॒ tasmā᳚-dgarda॒bho-'pya̭nāle॒śe-'tya॒nyā-npa॒śū-nme᳚dya॒tyanna॒gg॒ hyḙnenā॒-'rkagṃ sa॒mbhara̭nti garda॒bhena॒ sambha̭rati॒ tasmā᳚-dgarda॒bho dvi॒retā॒-ssan kani̭ṣṭha-mpaśū॒nā-mprajā̭yate॒-'gnirhya̭sya॒ yoni̭-nni॒rdaha̭ti pra॒jāsu॒ vā e॒ṣa e॒tarhyārṷ̄ḍha॒- [e॒tarhyārṷ̄ḍhaḥ, sa ī᳚śva॒raḥ pra॒jā-śśu॒cā] 25

-ssa ī᳚śva॒raḥ pra॒jā-śśu॒cā pra॒dahaḥ̭ śi॒vo bha̭va pra॒jābhya॒ ityā̭ha pra॒jābhya̭ e॒vainagṃ̭ śamayati॒ mānṷṣībhya॒stvama̭ṅgira॒ ityā̭ha māna॒vyo̭ hi pra॒jā mā dyāvā̭pṛthi॒vī a॒bhi śṷ̄śuco॒ mā-'ntari̭kṣa॒-mmā vana॒spatī॒nityā̭hai॒bhya e॒vainaṃ̭-lo~॒kebhyaḥ̭ śamayati॒ praitṷ vā॒jī kani̭krada॒dityā̭ha vā॒jī hyḙṣa nāna̭da॒-drāsa̭bhaḥ॒ patve- [patveti, ā॒ha॒ rāsa̭bha॒ iti॒] 26

-tyā̭ha॒ rāsa̭bha॒ iti॒ hyḙtamṛṣa॒yo-'va̭da॒-nbhara̭nna॒gni-mpṷrī॒ṣya̭mityā̭hā॒-'gnigg hyḙṣa bhara̭ti॒ mā pā॒dyāyṷṣaḥ pu॒retyā॒hā-''yṷre॒vā-'smi̭-ndadhāti॒ tasmā᳚-dgarda॒bha-ssarva॒māyṷreti॒ tasmā᳚-dgarda॒bhe pu॒rā-''yṷṣaḥ॒ pramī̭te bibhyati॒ vṛṣā॒-'gniṃ-vṛ~ṣa̭ṇa॒-mbhara॒nnityā̭ha॒ vṛṣā॒ hyḙṣa vṛṣā॒-'gnira॒pā-ṅgarbhagṃ̭ - [vṛṣā॒-'gnira॒pā-ṅgarbha᳚m, sa॒mu॒driya॒-] 27

samu॒driya॒-mityā̭hā॒-'pāg hyḙṣa garbho॒ yada॒gniragna॒ ā yā̭hi vī॒taya॒ iti॒ vā i॒mau lo॒kau vyai̭tā॒magna॒ ā yā̭hi vī॒taya॒ iti॒ yadāhā॒ 'nayo᳚rlo॒kayo॒-rvītyai॒ pracyṷto॒ vā e॒ṣa ā॒yata̭nā॒daga̭taḥ prati॒ṣṭhāgṃ sa e॒tarhya̭ddhva॒ryu-ñca॒ yaja̭māna-ñca ddhyāyatyṛ॒tagṃ sa॒tyamityā̭he॒yaṃ-vā~ ṛ॒tama॒sau [ ] 28

sa॒tyama॒nayo̭re॒vaina॒-mprati̭ ṣṭhāpayati॒ nā-''rti॒mārccha̭tyaddhva॒ryurna yaja̭māno॒ varṷṇo॒ vā e॒ṣa yaja̭mānama॒bhyaiti॒ yada॒gnirupa̭naddha॒ oṣa̭dhayaḥ॒ prati̭ gṛhṇītā॒gnime॒ta-mityā̭ha॒ śāntyai॒ vyasya॒n viśvā॒ ama̭tī॒rarā̭tī॒-rityā̭ha॒ rakṣa̭sā॒mapa̭hatyai ni॒ṣīda̭-nno॒ apa̭ durma॒tigṃ ha̭na॒dityā̭ha॒ prati̭ṣṭhityā॒ oṣa̭dhayaḥ॒ prati̭modaddhva- [prati̭modaddhvam, e॒na॒mityā॒hauṣa̭dhayo॒] 29

-mena॒mityā॒hauṣa̭dhayo॒ vā a॒gnerbhā̭ga॒dheya॒-ntābhi̭re॒vaina॒gṃ॒ sama̭rdhayati॒ puṣpā̭vatī-ssupippa॒lā ityā̭ha॒ tasmā॒doṣa̭dhayaḥ॒ phala̭-ṅgṛhṇantya॒ yaṃ-vo~॒ garbha̭ ṛ॒tviyaḥ̭ pra॒tnagṃ sa॒dhastha॒mā-'sa̭da॒dityā̭ha॒ yābhya̭ e॒vaina̭-mpracyā॒vaya̭ti॒ tāsve॒vaina॒-mprati̭ṣṭhāpayati॒ dvābhyā̭mu॒pāva̭harati॒ prati̭ṣṭhityai || 30 ||

(a॒stva॒ - nu॒ṣṭu - ba̭si - sādaya॒tyā - rṷ̄ḍhaḥ॒-patveti॒-garbha̭-ma॒sau - mo̭daddhvaṃ॒ - dvica̭tvārigṃśacca) (a. 5)

vā॒ru॒ṇo vā a॒gnirupa̭naddho॒ vi pāja॒seti॒ visragṃ̭sayati savi॒tṛpra̭sūta e॒vāsya॒ viṣṷ̄cīṃ-va~ruṇame॒niṃ-vi~sṛ̭jatya॒pa upa̭ sṛja॒tyāpo॒ vai śā॒ntā-śśā॒ntābhi̭re॒vāsya॒ śucagṃ̭ śamayati ti॒sṛbhi॒rupa̭ sṛjati tri॒vṛdvā a॒gniryāvā̭ne॒vā-gnistasya॒ śucagṃ̭ śamayati mi॒tra-ssa॒gṃ॒sṛjya̭ pṛthi॒vīmityā̭ha mi॒tro vai śi॒vo de॒vānā॒-ntenai॒vai- [de॒vānā॒-ntenai॒va, e॒na॒gṃ॒ sagṃ sṛ̭jati॒] 31

-na॒gṃ॒ sagṃ sṛ̭jati॒ śāntyai॒ yadgrā॒myāṇā॒-mpātrā̭ṇā-ṅka॒pālai᳚-ssagṃsṛ॒je-dgrā॒myāṇi॒ pātrā̭ṇi śu॒cā-'rpa̭yedarmakapā॒lai-ssagṃ sṛ̭jatye॒tāni॒ vā a̭nupajīvanī॒yāni॒ tānye॒va śu॒cā-'rpa̭yati॒ śarka̭rābhi॒-ssagṃ sṛ̭jati॒ dhṛtyā॒ atho̭ śa॒ntvāyā̭ jalo॒mai-ssagṃ sṛ̭jatye॒ṣā vā a॒gneḥ pri॒yā ta॒nūryada॒jā pri॒yayai॒vaina̭-nta॒nuvā॒ sagṃ sṛ̭ja॒tyatho॒ teja̭sā kṛṣṇāji॒nasya॒ loma̭bhi॒-ssagṃ - [loma̭bhi॒-ssam, sṛ॒ja॒ti॒ ya॒jño vai] 32

sṛ̭jati ya॒jño vai kṛ̭ṣṇāji॒naṃ-ya~॒jñenai॒va ya॒jñagṃ sagṃ sṛ̭jati ru॒drā-ssa॒bhṛtya̭ pṛthi॒vīmityā̭hai॒tā vā e॒ta-nde॒vatā॒ agre॒ sama̭bhara॒-ntābhi̭re॒vaina॒gṃ॒ sambha̭rati ma॒khasya॒ śiro॒-'sītyā̭ha ya॒jño vai ma॒khastasyai॒ta-cchiro॒ yadu॒khā tasmā̭de॒vamā̭ha ya॒jñasya̭ pa॒de stha॒ ityā̭ha ya॒jñasya॒ hyḙte [ ] 33

pa॒de atho॒ prati̭ṣṭhityai॒ prā-'nyābhi॒-ryaccha॒tyanva॒nyai-rma̭ntrayate mithuna॒tvāya॒ tryṷddhi-ṅkaroti॒ traya̭ i॒me lo॒kā e॒ṣāṃ-lo~॒kānā॒māptyai॒ chando̭bhiḥ karoti vī॒ryaṃ̭-vai~ chandāgṃ̭si vī॒ryḙṇai॒vainā᳚-ṅkaroti॒ yajṷṣā॒ bila̭-ṅkaroti॒ vyāvṛ̭ttyā॒ iya̭tī-ṅkaroti pra॒jāpa̭tinā yajñamu॒khena॒ sammi̭tā-ndvista॒nā-ṅka̭roti॒ yāvā̭pṛthi॒vyordohā̭ya॒ catuḥ̭stanā-ṅkaroti paśū॒nā-ndohā̭yā॒ṣṭāsta̭nā-ṅkaroti॒ chanda̭sā॒-ndohā̭ya॒ navā᳚śri-mabhi॒cara̭taḥ kuryā-ttri॒vṛta̭me॒va vajragṃ̭ sa॒mbhṛtya॒ bhrātṛ̭vyāya॒ praha̭rati॒ stṛtyai̭ kṛ॒tvāya॒ sā ma॒hīmu॒khāmiti॒ ni da̭dhāti de॒vatā᳚sve॒vainā॒-mprati̭ṣṭhāpayati || 34 ||

(tenai॒va - loma̭bhi॒-ssa - me॒te - a̭bhi॒cara̭ta॒ - eka̭vigṃśatiśca) (a. 6)

sa॒ptabhi̭rdhūpayati sa॒pta vai śī̭rṣa॒ṇyāḥ᳚ prā॒ṇā-śśira̭ e॒ta-dya॒jñasya॒ yadu॒khā śī॒r॒ṣanne॒va ya॒jñasya̭ prā॒ṇā-nda̭dhāti॒ tasmā᳚-thsa॒pta śī॒r॒ṣa-nprā॒ṇā a̭śvaśa॒kena̭ dhūpayati prājāpa॒tyo vā aśvaḥ̭ sayoni॒tvāyā-di̭ti॒stvetyā̭he॒yaṃ-vā~ adi̭ti॒radi̭tyai॒vādi̭tyā-ṅkhanatya॒syā akrṷ̄raṅkārāya॒ na hi sva-ssvagṃ hi॒nasti̭ de॒vānā᳚-ntvā॒ patnī॒rityā̭ha de॒vānāṃ॒- [de॒vānā᳚m, vā e॒tā-mpatna॒yo-'grḙ-'] 35

-~vā e॒tā-mpatna॒yo-'grḙ-'-kurva॒-ntābhi̭re॒vainā᳚-ndadhāti dhi॒ṣaṇā॒stvetyā̭ha vi॒dyā vai dhi॒ṣaṇā̭ vi॒dyābhi̭-re॒vainā̭-ma॒bhīndhe॒ gnāstvetyā̭ha॒ chandāgṃ̭si॒ vai gnā śchando̭bhi-re॒vaināg̭ śrapayati॒ varū᳚traya॒stvetyā̭ha॒ hotrā॒ vai varū᳚trayo॒ hotrā̭bhire॒vainā᳚-mpacati॒ jana̭ya॒stvetyā̭ha de॒vānāṃ॒-vai~ patnī॒- [patnīḥ᳚, jana̭ya॒stābhi̭-] 36

-rjana̭ya॒stābhi̭-re॒vainā᳚-mpacati ṣa॒ḍbhiḥ pa̭cati॒ ṣaḍvā ṛ॒tava̭ ṛ॒tubhi̭re॒vainā᳚-mpacati॒ dviḥ paca॒ntvityā̭ha॒ tasmā॒-ddvi-ssaṃ̭va~thsa॒rasya̭ sa॒sya-mpa̭cyate vāru॒ṇyṷkhā-'bhīddhā̭ mai॒triyopai̭ti॒ śāntyai̭ de॒vastvā̭ savi॒to-dva̭pa॒tvityā̭ha savi॒tṛpra̭sūta e॒vainā॒-mbrahma̭ṇā de॒vatā̭bhi॒ru-dva̭pa॒tyapa̭dyamānā pṛthi॒vyāśā॒ diśa॒ ā pṛ॒ṇe- [ā pṛ॒ṇa, ityā̭ha॒] 37

-tyā̭ha॒ tasmā̭da॒gni-ssarvā॒ diśo-'nu॒ vibhā॒tyutti̭ṣṭha bṛha॒tī bha̭vo॒rdhvā ti̭ṣṭha dhru॒vā tvamityā̭ha॒ prati̭ṣṭhityā asu॒rya̭-mpātra॒manā᳚cchṛṇṇa॒mā-cchṛ̭ṇatti deva॒trā-'ka̭rajakṣī॒reṇā-''cchṛ̭ṇatti para॒maṃ-vā~ e॒ta-tpayo॒ yada̭jakṣī॒ra-mpa̭ra॒meṇai॒vainā॒-mpaya॒sā-''cchṛ̭ṇatti॒ yajṷṣā॒ vyāvṛ̭ttyai॒ chando̭bhi॒rā cchṛ̭ṇatti॒ chando̭bhi॒rvā e॒ṣā kri̭yate॒ chando̭bhire॒va chandā॒g॒syā cchṛ̭ṇatti || 38 ||

(ā॒ha॒ de॒vānāṃ॒ - ~vai patnīḥ᳚ - pṛṇai॒ - ṣā - ṣaṭ ca̭) (a. 7)

eka̭vigṃśatyā॒ māṣaiḥ᳚ puruṣaśī॒r॒ṣa-macchai᳚tyame॒ddhyā vai māṣā̭ ame॒ddhya-mpṷruṣaśī॒r॒ṣa-ma̭me॒ddhyaire॒vā-syā̭-me॒ddhya-nni̭rava॒dāya॒ meddhya̭-ṅkṛ॒tvā ''ha̭ra॒tyeka̭vigṃśati-rbhavantyekavi॒gṃ॒śo vai purṷṣaḥ॒ purṷṣa॒syā-''ptyai॒ vyṛ̭ddhaṃ॒-vā~ e॒ta-tprā॒ṇaira̭me॒ddhyaṃ-ya~-tpṷruṣaśī॒r॒ṣagṃ sa̭pta॒dhā vitṛ̭ṇṇāṃ-va~lmīkava॒pā-mprati॒ ni da̭dhāti sa॒pta vai śī̭rṣa॒ṇyāḥ᳚ prā॒ṇāḥ prā॒ṇaire॒vaina॒-thsama̭rdhayati meddhya॒tvāya॒ yāva̭nto॒ [yāva̭ntaḥ, vai mṛ॒tyuba̭ndhava॒-] 39

vai mṛ॒tyuba̭ndhava॒-steṣāṃ᳚-ya~॒ma ādhi̭patya॒-mparī̭yāya yamagā॒thābhiḥ॒ pari̭gāyati ya॒māde॒vaina̭-dvṛṅkte ti॒sṛbhiḥ॒ pari̭gāyati॒ traya̭ i॒me lo॒kā e॒bhya e॒vaina̭llo॒kebhyo̭ vṛṅkte॒ tasmā॒-dgāya̭te॒ na deya॒-ṅgāthā॒ hi ta-dvṛ॒ṅkte᳚ 'gnibhyaḥ̭ pa॒śūnā la̭bhate॒ kāmā॒ vā a॒gnayaḥ॒ kāmā̭ne॒vāva̭ rundhe॒ ya-tpa॒śū-nnā-''labhe॒tā-'na̭varuddhā asya [ ] 40

pa॒śavaḥ̭ syu॒rya-tparya̭gnikṛtānu-thsṛ॒je-dya̭jñaveśa॒sa-ṅkṷryā॒-dya-thsagg̭sthā॒paye᳚-dyā॒tayā̭māni śī॒r॒ṣāṇi̭ syu॒rya-tpa॒śūnā॒labha̭te॒ tenai॒va pa॒śūnava̭ rundhe॒ ya-tparya̭gnikṛtānu-thsṛ॒jati̭ śī॒rṣṇā-mayā̭tayāmatvāya prājāpa॒tyena॒ sagg sthā̭payati ya॒jño vai pra॒jāpa̭tirya॒jña e॒va ya॒jña-mprati̭ṣṭhāpayati pra॒jāpa̭tiḥ pra॒jā a̭sṛjata॒ sa ri̭ricā॒no̭-'manyata॒ sa e॒tā ā॒prīra̭paśya॒-ttābhi॒rvai sa mṷkha॒ta [sa mṷkha॒taḥ, ā॒tmāna॒mā 'prī̭ṇīta॒] 41

ā॒tmāna॒mā 'prī̭ṇīta॒ yade॒tā ā॒priyo॒ bhava̭nti ya॒jño vai pra॒jāpa̭ti-rya॒jñame॒vaitābhi̭rmukha॒ta ā prī̭ṇā॒tya-pa̭rimitachandaso bhava॒ntyapa̭rimitaḥ pra॒jāpa̭tiḥ pra॒jāpa̭te॒rāptyā̭ ūnātiri॒ktā mi̭thu॒nāḥ prajā᳚tyai loma॒śaṃ-vai~ nāmai॒tacchandaḥ̭ pra॒jāpa̭teḥ pa॒śavo̭ loma॒śāḥ pa॒śūne॒vā-'va̭ rundhe॒ sarvā̭ṇi॒ vā e॒tā rū॒pāṇi॒ sarvā̭ṇi rū॒pāṇya॒gnau citye᳚ kriyante॒ tasmā̭de॒tā a॒gneścitya̭sya [a॒gneścitya̭sya, bha॒va॒ntyeka̭vigṃ śatigṃ] 42

bhava॒ntyeka̭vigṃ śatigṃ sāmidhe॒nīranvā̭ha॒ rugvā ḙkavi॒gṃ॒śo ruca̭me॒va ga̭ccha॒tyatho᳚ prati॒ṣṭhāme॒va pra̭ti॒ṣṭhā hyḙkavi॒gṃ॒śa-ścatṷrvigṃśati॒manvā̭ha॒ catṷrvigṃśatirardhamā॒sā-ssaṃ̭va~thsa॒ra-ssaṃ̭va~thsa॒ro᳚-'gnirvai᳚śvāna॒ra-ssā॒kṣāde॒va vai᳚śvāna॒ramava̭ rundhe॒ parā̭cī॒ranvā̭ha॒ parā̭ṅiva॒ hi sṷva॒rgo lo॒ka-ssamā᳚stvā-'gna ṛ॒tavo̭ vardhaya॒ntvityā̭ha॒ samā̭bhire॒vā-'gniṃ-va~̭rdhaya- [-'gniṃ-va~̭rdhayati, ṛ॒tubhiḥ̭ saṃva~thsa॒raṃ-vi~śvā॒] 43

-tyṛ॒tubhiḥ̭ saṃva~thsa॒raṃ-vi~śvā॒ ā bhā̭hi pra॒diśaḥ̭ pṛthi॒vyā ityā̭ha॒ tasmā̭da॒gni-ssarvā॒ diśo-'nu॒ vibhā̭ti॒ pratyaṷhatāma॒śvinā̭ mṛ॒tyuma̭smā॒dityā̭ha mṛ॒tyume॒vā-'smā॒dapa̭ nuda॒tyudva॒ya-ntama̭sa॒sparītyā̭ha pā॒pmā vai tamaḥ̭ pā॒pmāna̭me॒vāsmā॒dapa̭ ha॒ntyaga̭nma॒ jyoti̭rutta॒ma-mityā̭hā॒-'sau vā ā̭di॒tyo jyoti̭rutta॒ma-mā̭di॒tyasyai॒va sāyṷjya-ṅgacchati॒ na saṃ̭va~thsa॒rasti̭ṣṭhati॒ nāsya॒ śrīsti̭ṣṭhati॒ yasyai॒tāḥ kri॒yante॒ jyoti̭ṣmatī-mutta॒māmanvā̭ha॒ jyoti̭re॒vāsmā̭ u॒pari̭ṣṭā-ddadhāti suva॒rgasya̭ lo॒kasyānṷkhyātyai || 44 ||

(yāva̭nto - 'sya - mukha॒ta - ścitya̭sya - vardhaya - tyādi॒tyo᳚ - 'ṣṭāvigṃ̭śatiśca) (a. 8)

ṣa॒ḍbhirdī᳚kṣayati॒ ṣaḍvā ṛ॒tava̭ ṛ॒tubhi̭re॒vaina̭-ndīkṣayati sa॒ptabhi̭rdīkṣayati sa॒pta chandāgṃ̭si॒ chando̭bhire॒vaina̭-ndīkṣayati॒ viśvḙ de॒vasya̭ ne॒turitya̭-nu॒ṣṭubho᳚tta॒mayā̭ juhoti॒ vāgvā a̭nu॒ṣṭu-ptasmā᳚-tprā॒ṇānāṃ॒-vā~gṷtta॒mai- ka̭smāda॒kṣarā॒danā᳚pta-mpratha॒ma-mpa॒da-ntasmā॒-dya-dvā॒co-'nā᳚pta॒-ntanma̭nu॒ṣyā̭ upa̭ jīvanti pū॒rṇayā̭ juhoti pū॒rṇa i̭va॒ hi pra॒jāpa̭tiḥ [pra॒jāpa̭tiḥ, pra॒jāpa̭te॒rāpatyai॒] 45

pra॒jāpa̭te॒rāptyai॒ nyṷ̄nayā juhoti॒ nyṷ̄nā॒ddhi pra॒jāpa̭tiḥ pra॒jā asṛ̭jata pra॒jānā॒gṃ॒ sṛṣṭyai॒ yada॒rciṣi̭ pravṛ॒ñjyā-dbhū॒tamava̭ rundhīta॒ yadaṅgā̭reṣu bhavi॒ṣyadaṅgā̭reṣu॒ pravṛ̭ṇakti bhavi॒ṣya de॒vāva̭ rundhe bhavi॒ṣyaddhi bhūyo̭ bhū॒tā-ddvābhyā॒-mpravṛ̭ṇakti dvi॒pā-dyaja̭mānaḥ॒ prati̭ṣṭhityai॒ brahma̭ṇā॒ vā e॒ṣā yajṷṣā॒ sambhṛ̭tā॒ yadu॒khā sā yadbhidye॒tā-''rti॒mārcche॒- [-''rti॒mārcche᳚t, yaja̭māno] 46

-dyaja̭māno ha॒nyetā᳚-'sya ya॒jño mitrai॒tāmu॒khā-nta॒petyā̭ha॒ brahma॒ vai mi॒tro brahma̭nne॒vainā॒-mprati̭ṣṭhāpayati॒ nā-''rti॒mārccha̭ti॒ yaja̭māno॒ nāsya̭ ya॒jño ha̭nyate॒ yadi॒ bhidyḙta॒ taire॒va ka॒pālai॒-ssagṃ sṛ̭je॒-thsaiva tataḥ॒ prāya̭ścitti॒ryo ga॒taśrī॒-ssyānma̭thi॒tvā tasyāva̭ daddhyā-dbhū॒to vā e॒ṣa sa svā- [e॒ṣa sa svām, de॒vatā॒mupai̭ti॒] 47

-nde॒vatā॒mupai̭ti॒ yo bhūti̭kāma॒-ssyādya u॒khāyai̭ sa॒mbhave॒-thsa e॒va tasya̭ syā॒dato॒ hyḙṣa sa॒mbhava̭tye॒ṣa vai sva̭ya॒mbhūrnāma॒ bhava̭tye॒va ya-ṅkā॒mayḙta॒ bhrātṛ̭vyamasmai janayeya॒mitya॒-nyata॒stasyā॒-''hṛtyā-'va̭ daddhyā-thsā॒kṣāde॒vāsmai॒ bhrātṛ̭vya-ñjanayatyamba॒rīṣā॒danna̭ kāma॒syāva̭ daddhyādamba॒rīṣe॒ vā anna̭-mbhriyate॒ sayo᳚nye॒vānna॒- [sayo᳚nye॒vānna᳚m, ava̭ rundhe॒] 48

-mava̭ rundhe॒ muñjā॒nava̭ dadhā॒tyūrgvai muñjā॒ ūrja̭me॒vāsmā॒ api̭ dadhātya॒gnirde॒vebhyo॒ nilā̭yata॒ sa krṷmu॒ka-mprā-'vi̭śa-tkrumu॒kamava̭ dadhāti॒ yade॒vāsya॒ tatra॒ nya̭kta॒-nta de॒vāva̭ rundha॒ ājyḙna॒ saṃ-yau~᳚tye॒tadvā a॒gneḥ pri॒ya-ndhāma॒ yadājya̭-mpri॒yeṇai॒vaina॒-ndhāmnā॒ sama̭rdhaya॒tyatho॒ teja̭sā॒ [teja̭sā, vai ka̭kantī॒mā da̭dhāti॒] 49

vai ka̭ṅkatī॒mā da̭dhāti॒ bhā e॒vāva̭ rundhe śamī॒mayī॒mā da̭dhāti॒ śāntyai॒ sīda॒ tva-mmā॒tura॒syā u॒pastha॒ iti̭ ti॒sṛbhi̭rjā॒tamupa̭ tiṣṭhate॒ traya̭ i॒me lo॒kā e॒ṣvḙva lo॒keṣvā॒vida̭-ṅgaccha॒tyatho᳚ prā॒ṇāne॒vā-''tma-ndha̭tte || 50 ||

( pra॒jāpa̭ti--r ṛcche॒th - svā - me॒vānnaṃ॒ - teja̭sā॒ - catṷstrigṃśacca) (a. 9)

na ha̭ sma॒ vai pu॒rā-'gnirapa̭raśuvṛkṇa-ndahati॒ tada̭smai prayo॒ga e॒varṣi̭rasvadaya॒-dyada̭gne॒ yāni॒ kāni॒ ceti̭ sa॒midha॒mā da̭dhā॒tyapa̭raśuvṛkṇa-me॒vāsmai᳚ svadayati॒ sarva̭masmai svadate॒ ya e॒vaṃ-ve~daudṷmbarī॒mā da̭dhā॒tyūrgvā ṷdu॒mbara॒ ūrja̭me॒vāsmā॒ api̭ dadhāti pra॒jāpa̭tira॒gni-ma̭sṛjata॒ tagṃ sṛ॒ṣṭagṃ rakṣāg̭- [sṛ॒ṣṭagṃ rakṣāgṃ̭si, a॒ji॒ghā॒gṃ॒sa॒nthsa e॒ta-] 51

-syajighāgṃsa॒nthsa e॒ta-drā᳚kṣo॒ghnama̭paśya॒-ttena॒ vai sarakṣā॒g॒syapā̭-'hata॒ ya-drā᳚kṣo॒ghna-mbhava̭tya॒gnere॒va tena̭ jā॒tā-drakṣā॒g॒syapa̭ ha॒ntyāśva̭tthī॒mā da̭dhātyaśva॒ttho vai vana॒spatī̭nāgṃ sapatnasā॒ho viji̭tyai॒ vaika̭ṅkatī॒mā da̭dhāti॒ bhā e॒vāva̭ rundhe śamī॒mayī॒mā da̭dhāti॒ śāntyai॒ sagṃśi̭ta-mme॒ brahmodḙṣā-mbā॒hū a̭tira॒mityṷtta॒me audṷmbarī [audṷmbarī, vā॒ca॒ya॒ti॒ brahma̭ṇai॒va] 52

vācayati॒ brahma̭ṇai॒va kṣa॒tragṃ sagg śya̭ti kṣa॒treṇa॒ brahma॒ tasmā᳚-dbrāhma॒ṇo rā̭ja॒nya̭vā॒natya॒nya-mbrā᳚hma॒ṇa-ntasmā᳚-drāja॒nyo᳚ brāhma॒ṇavā॒natya॒nyagṃ rā̭ja॒nya̭-mmṛ॒tyurvā e॒ṣa yada॒gnira॒mṛta॒gṃ॒ hira̭ṇyagṃ ru॒kmamanta̭ra॒-mprati̭muñcate॒ 'mṛta̭me॒va mṛ॒tyora॒ntardha̭tta॒ eka̭vigṃśatinirbādho bhava॒tyeka̭vigṃśati॒rvai dḙvalo॒kā dvāda̭śa॒ māsāḥ॒ pañca॒rtava॒straya̭ i॒me lo॒kā a॒sāvā̭di॒tya [a॒sāvā̭di॒tyaḥ, e॒ka॒vi॒gṃ॒śa e॒tāva̭nto॒ vai] 53

ḙkavi॒gṃ॒śa e॒tāva̭nto॒ vai dḙvalo॒kāstebhya̭ e॒va bhrātṛ̭vyama॒ntarḙti nirbā॒dhairvai de॒vā asṷrā-nnirbā॒dhḙ-'kurvata॒ tanni̭rbā॒dhānā᳚-nnirbādha॒tva-nni̭rbā॒dhī bha̭vati॒ bhrātṛ̭vyāne॒va ni̭rbā॒dhe kṷrute sāvitri॒yā prati̭muñcate॒ prasū᳚tyai॒ nakto॒ṣāsetyutta̭rayā 'horā॒trābhyā̭me॒vaina॒-mudya̭cchate de॒vā a॒gni-ndhā̭raya-ndraviṇo॒dā ityā̭ha prā॒ṇā vai de॒vā dra̭viṇo॒dā a̭horā॒trābhyā̭me॒vaina̭mu॒dyatya̭ [ ] 54

prā॒ṇairdā̭dhā॒rā ''sī̭naḥ॒ prati̭muñcate॒ tasmā॒dāsī̭nāḥ pra॒jāḥ prajā̭yante kṛṣṇāji॒namutta̭ra॒-ntejo॒ vai hira̭ṇya॒-mbrahma̭ kṛṣṇāji॒na-nteja̭sā cai॒vaina॒-mbrahma̭ṇā cobha॒yataḥ॒ pari̭gṛhṇāti॒ ṣaḍṷdyāmagṃ śi॒kya̭-mbhavati॒ ṣaḍvā ṛ॒tava̭ ṛ॒tubhi̭re॒vaina॒-mudya̭cchate॒ ya-ddvāda̭śodyāmagṃ saṃva~thsa॒reṇai॒va mau॒ñja-mbha̭va॒tyūrgvai muñjā̭ ū॒rjaivaina॒gṃ॒ sa ma̭rdhayati supa॒rṇo̭-'si ga॒rutmā॒nityave᳚kṣate rū॒pame॒vāsyai॒tanma̭hi॒mānaṃ॒-vyā~ca̭ṣṭe॒ diva̭-ṅgaccha॒ suvaḥ̭ pa॒tetyā̭ha suva॒rgame॒vainaṃ̭-lo~॒ka-ṅga̭mayati || 55 ||

(rakṣā॒g॒syau - dṷbaṃri - ādi॒tya - u॒dyatya॒ - saṃ - catṷrvigṃśatiśca) (a. 10)

sami̭ddho a॒ñjan kṛda̭ra-mmatī॒nā-ṅghṛ॒tama̭gne॒ madhṷma॒-tpinva̭mānaḥ | vā॒jī vaha̭n vā॒jina̭-ñjātavedo de॒vānāṃ᳚-va~kṣi pri॒yamā sa॒dhastha᳚m || ghṛ॒tenā॒ñjanthsa-mpa॒tho dḙva॒yānā᳚-nprajā॒nan vā॒jyapyḙtu de॒vān | anṷ tvā sapte pra॒diśaḥ̭ sacantāg sva॒dhāma॒smai yaja̭mānāya dhehi || īḍya॒ścāsi॒ vandya̭śca vājinnā॒śuścāsi॒ meddhya̭śca sapte | a॒gniṣṭvā̭ [a॒gniṣṭvā᳚, de॒vairvasṷbhi-ssa॒joṣāḥ᳚] 56

de॒vairvasṷbhi-ssa॒joṣāḥ᳚ prī॒taṃ-va~hniṃ̭-va~hatu jā॒tavḙdāḥ || stī॒rṇa-mba॒r॒hi-ssu॒ṣṭarī̭mā juṣā॒ṇoru pṛ॒thu pratha̭māna-mpṛthi॒vyām | de॒vebhi̭ryu॒ktamadi̭ti-ssa॒joṣā᳚-ssyo॒na-ṅkṛ̭ṇvā॒nā sṷvi॒te da̭dhātu || e॒tā ṷ va-ssu॒bhagā̭ vi॒śvarṷ̄pā॒ vipakṣo̭bhi॒-śśraya̭māṇā॒ udātaiḥ᳚ | ṛ॒ṣvā-ssa॒tīḥ ka॒vaṣa॒-śśumbha̭mānā॒ dvāro̭ de॒vī-ssṷprāya॒ṇā bha̭vantu || a॒nta॒rā mi॒trāvarṷṇā॒ cara̭ntī॒ mukhaṃ̭-ya~॒jñānā̭ma॒bhi saṃ̭vi~dā॒ne | u॒ṣāsā̭ vāgṃ [u॒ṣāsā̭ vām, su॒hi॒ra॒ṇye sṷśi॒lpe] 57

suhira॒ṇye sṷśi॒lpe ṛ॒tasya॒ yonā̭vi॒ha sā̭dayāmi || pra॒tha॒mā vāgṃ̭ sara॒thinā̭ su॒varṇā̭ de॒vau paśya̭ntau॒ bhuva̭nāni॒ viśvā᳚ | api̭praya॒-ñcoda̭nā vā॒-mmimā̭nā॒ hotā̭rā॒ jyotiḥ̭ pra॒diśā̭ di॒śantā᳚ || ā॒di॒tyairno॒ bhāra̭tī vaṣṭu ya॒jñagṃ sara̭svatī sa॒ha ru॒drairna̭ āvīt | iḍopa̭hūtā॒ vasṷbhi-ssa॒joṣā̭ ya॒jña-nno̭ devīra॒mṛtḙṣu dhatta || tvaṣṭā̭ vī॒ra-nde॒vakā̭ma-ñjajāna॒ tvaṣṭu॒rarvā̭ jāyata ā॒śuraśvaḥ̭ | 58

tvaṣṭe॒daṃ-vi~śva॒-mbhuva̭na-ñjajāna ba॒hoḥ ka॒rtāra̭mi॒ha ya̭kṣi hotaḥ || aśvo̭ ghṛ॒tena॒ tmanyā॒ sama̭kta॒ upa̭ de॒vāgṃ ṛ̭tu॒śaḥ pātha̭ etu | vana॒spati̭-rdevalo॒ka-mpra̭jā॒nanna॒gninā̭ ha॒vyā sva̭di॒tāni̭ vakṣat || pra॒jāpa̭te॒stapa̭sā vāvṛdhā॒na-ssa॒dyo jā॒to da̭dhiṣe ya॒jñama̭gne | svāhā̭kṛtena ha॒viṣā̭ purogā yā॒hi sā॒ddhyā ha॒vira̭dantu de॒vāḥ || 59 ||

(a॒gniṣṭvā̭ - vā॒ - maśvo॒ - dvica̭tvārigṃśacca) (a. 11)

(sā॒vi॒trāṇi॒ - vyṛ̭ddha॒ - mutkrā̭ma - de॒vasya̭ khanati - krū॒raṃ -~vā̭ru॒ṇaḥ - sa॒ptabhi॒ - reka̭vigṃśatyā - ṣa॒ḍbhi - rna ha̭ sma॒ - sami̭ddho a॒ñja - nnekā̭daśa )

(sā॒vi॒trā - ṇyutkrā̭ma - krū॒raṃ -~vā̭ru॒ṇaḥ - pa॒śavaḥ̭ syu॒ - rna ha̭ sma॒ - nava̭pañcā॒śat)

(sā॒vi॒trāṇi̭, ha॒vira̭dantu de॒vāḥ)

|| hariḥ̭ om ||

|| kṛṣṇa yajurvedīya taittirīya saṃhitāyā-mpañcamakāṇḍe prathamaḥ praśna-ssamāptaḥ ||

Sanskrit — Devanagari (original)

कृष्ण यजुर्वेदीय तैत्तिरीय संहिताया-म्पञ्चमकाण्डे प्रथमः प्रश्नः - उख्याग्निकथनं

ओ-न्नमः परमात्मने, श्री महागणपतये नमः,

श्री गुरुभ्यो नमः । ह॒रिः॒ ओम् ॥

सा॒वि॒त्राणि॑ जुहोति॒ प्रसू᳚त्यै चतुर्गृही॒तेन॑ जुहोति॒ चतु॑ष्पादः प॒शवः॑ प॒शूने॒वा-ऽव॑ रुन्धे॒ चत॑स्रो॒ दिशो॑ दि॒क्ष्वे॑व प्रति॑ तिष्ठति॒ छन्दाग्ं॑सि दे॒वेभ्यो ऽपा᳚-ऽक्राम॒-न्न वो॑ भा॒गानि॑ ह॒व्यं-वँ॑क्ष्याम॒ इति॒ तेभ्य॑ ए॒तच्च॑तु-र्गृही॒तम॑-धारय-न्पुरो-ऽनु वा॒क्या॑यै या॒ज्या॑यै दे॒वता॑यै वषट्का॒राय॒ यच्च॑तुर्गृही॒त-ञ्जु॒होति॒ छन्दाग्॑स्ये॒व त-त्प्री॑णाति॒ तान्य॑स्य प्री॒तानि॑ दे॒वेभ्यो॑ ह॒व्यं-वँ॑हन्ति॒ य-ङ्का॒मये॑त॒ [य-ङ्का॒मये॑त, पापी॑यान्-थ्स्या॒दित्येकै॑क॒-] 1

पापी॑यान्-थ्स्या॒दित्येकै॑क॒-न्तस्य॑ जुहुया॒-दाहु॑तीभिरे॒वैन॒मप॑ गृह्णाति॒ पापी॑या-न्भवति॒ य-ङ्का॒मये॑त॒ वसी॑यान्-थ्स्या॒दिति॒ सर्वा॑णि॒ तस्या॑-ऽनु॒द्रुत्य॑ जुहुया॒दाहु॑त्यै॒वैन॑म॒भि क्र॑मयति॒ वसी॑या-न्भव॒त्यथो॑ य॒ज्ञस्यै॒वैषा-ऽभिक्रा᳚न्ति॒रेति॒ वा ए॒ष य॑ज्ञमु॒खा-दृद्ध्या॒ यो᳚-ऽग्नेर्दे॒वता॑या॒ एत्य॒ष्टावे॒तानि॑ सावि॒त्राणि॑ भवन्त्य॒ष्टाक्ष॑रा गाय॒त्री गा॑य॒त्रो᳚- [गा॑य॒त्रः, अ॒ग्निस्तेनै॒व] 2

-ऽग्निस्तेनै॒व य॑ज्ञमु॒खादृद्ध्या॑ अ॒ग्नेर्दे॒वता॑यै॒ नैत्य॒ष्टौ सा॑वि॒त्राणि॑ भव॒न्त्याहु॑तिर्नव॒मी त्रि॒वृत॑मे॒व य॑ज्ञमु॒खे विया॑तयति॒ यदि॑ का॒मये॑त॒ छन्दाग्ं॑सि यज्ञयश॒सेना᳚ ऽर्पयेय॒मित्यृच॑मन्त॒मा-ङ्कु॑र्या॒च्छन्दाग्॑स्ये॒व य॑ज्ञयश॒सेना᳚ ऽर्पयति॒ यदि॑ का॒मये॑त॒ यज॑मानं-यँज्ञयश॒सेना᳚-ऽर्पयेय॒मिति॒ यजु॑रन्त॒म-ङ्कु॑र्या॒-द्यज॑मानमे॒व य॑ज्ञयश॒सेना᳚-ऽर्पयत्यृ॒चा स्तोम॒ग्ं॒ सम॑र्ध॒ये- [सम॑र्ध॒येति॑, आ॒ह॒ समृ॑द्ध्यै] 3

-त्या॑ह॒ समृ॑द्ध्यै च॒तुर्भि॒रभ्रि॒मा द॑त्ते च॒त्वारि॒ छन्दाग्ं॑सि॒ छन्दो॑भिरे॒व दे॒वस्य॑ त्वा सवि॒तुः प्र॑स॒व इत्या॑ह॒ प्रसू᳚त्या अ॒ग्निर्दे॒वेभ्यो॒ निला॑यत॒ स वेणु॒-म्प्रा-ऽवि॑श॒-थ्स ए॒तामू॒तिमनु॒ सम॑चर॒-द्य-द्वेणो᳚-स्सुषि॒रग्ं सु॑षि॒रा-ऽभ्रि॑र्भवति सयोनि॒त्वाय॒ स यत्र॑य॒त्रा-ऽव॑स॒-त्त-त्कृ॒ष्णम॑भव-त्कल्मा॒षी भ॑वति रू॒पस॑मृद्ध्या उभयतः॒, क्ष्णूर्भ॑वती॒तश्चा॒-ऽ-मुत॑श्चा॒-ऽर्कस्या-व॑रुद्ध्यै व्याममा॒त्री भ॑वत्ये॒ताव॒द्वै पुरु॑षे वी॒र्यं॑-वीँ॒र्य॑सम्मि॒ता ऽप॑रिमिता भव॒त्य-प॑रिमित॒स्या-ऽ व॑रुद्ध्यै॒ यो वन॒स्पती॑ना-म्फल॒ग्रहि॒-स्स ए॑षां-वीँ॒र्या॑वा-न्फल॒ग्रहि॒र्वेणु॑-र्वैण॒वी भ॑वति वी॒र्य॑स्या व॑रुद्ध्यै ॥ 4 ॥

(का॒मये॑त - गाय॒त्रो᳚ - ऽर्ध॒येति॑ - च - स॒प्तविग्ं॑शतिश्च) (अ. 1)

व्यृ॑द्धं॒-वाँ ए॒त-द्य॒ज्ञस्य॒ यद॑य॒जुष्के॑ण क्रि॒यत॑ इ॒माम॑गृभ्ण-न्रश॒ना-मृ॒तस्येत्य॑श्वाभि॒धानी॒मा द॑त्ते॒ यजु॑ष्कृत्यै य॒ज्ञस्य॒ समृ॑द्ध्यै॒ प्रतू᳚र्तं-वाँजि॒न्ना द्र॒वेत्यश्व॑-म॒भि द॑धाति रू॒पमे॒वा-ऽस्यै॒त-न्म॑हि॒मानं॒-व्याँच॑ष्टे यु॒ञ्जाथा॒ग्ं॒ रास॑भं-युँ॒वमिति॑ गर्द॒भ-मस॑त्ये॒व ग॑र्द॒भ-म्प्रति॑ ष्ठापयति॒ तस्मा॒दश्वा᳚-द्गर्द॒भो-ऽस॑त्तरो॒ योगे॑योगे त॒वस्त॑र॒मित्या॑ह॒ [त॒वस्त॑र॒मित्या॑ह, योगे॑योग] 5

योगे॑योग ए॒वैनं॑-युँङ्क्ते॒ वाजे॑वाजे हवामह॒ इत्या॒हान्नं॒-वैँ वाजो-ऽन्न॑मे॒वाव॑ रुन्धे॒ सखा॑य॒ इन्द्र॑मू॒तय॒ इत्या॑हेन्द्रि॒यमे॒वाव॑ रुन्धे॒ ऽग्निर्दे॒वेभ्यो॒ निला॑यत॒ त-म्प्र॒जाप॑ति॒रन्व॑विन्द-त्प्राजाप॒त्यो-ऽश्वो ऽश्वे॑न॒ स-म्भ॑र॒त्यनु॑वित्त्यै पापवस्य॒सं-वाँ ए॒त-त्क्रि॑यते॒ यच्छ्रेय॑सा च॒ पापी॑यसा च समा॒न-ङ्कर्म॑ कु॒र्वन्ति॒ पापी॑या॒न्॒.- [पापी॑यान्, ह्यश्वा᳚-द्गर्द॒भो-ऽश्व॒-] 6

-ह्यश्वा᳚-द्गर्द॒भो-ऽश्व॒-म्पूर्व॑-न्नयन्ति पापवस्य॒-सस्य॒ व्यावृ॑त्त्यै॒ तस्मा॒च्छ्रेयाग्ं॑स॒-म्पापी॑या-न्प॒श्चादन्वे॑ति ब॒हुर्वै भव॑तो॒ भ्रातृ॑व्यो॒ भव॑तीव॒ खलु॒ वा ए॒ष यो᳚-ऽग्नि-ञ्चि॑नु॒ते व॒ज्र्यश्वः॑ प्र॒तूर्व॒न्नेह्य॑व॒-क्राम॒न्न-श॑स्ती॒रित्या॑ह॒ वज्रे॑णै॒व पा॒प्मान॒-म्भ्रातृ॑व्य॒मव॑ क्रामति रु॒द्रस्य॒ गाण॑पत्या॒दित्या॑ह रौ॒द्रा वै प॒शवो॑ रु॒द्रादे॒व [ ] 7

प॒शू-न्नि॒र्याच्या॒-ऽऽत्मने॒ कर्म॑ कुरुते पू॒ष्णा स॒युजा॑ स॒हेत्या॑ह पू॒षा वा अद्ध्व॑नाग्ं सन्ने॒ता सम॑ष्ट्यै॒ पुरी॑षायतनो॒ वा ए॒ष यद॒ग्निरङ्गि॑रसो॒ वा ए॒तमग्रे॑ दे॒वता॑ना॒ग्ं॒ सम॑भर-न्पृथि॒व्या-स्स॒धस्था॑द॒ग्नि-म्पु॑री॒ष्य॑-मङ्गिर॒स्व-दच्छे॒हीत्या॑ह॒ साय॑तनमे॒वैन॑-न्दे॒वता॑भि॒-स्स-म्भ॑रत्य॒ग्नि-म्पु॑री॒ष्य॑-मङ्गिर॒स्व- दच्छे॑म॒ इत्या॑ह॒ येन॑ [ ] 8

स॒ङ्गच्छ॑ते॒ वाज॑मे॒वास्य॑ वृङ्क्ते प्र॒जाप॑तये प्रति॒प्रोच्या॒ग्नि-स्स॒म्भृत्य॒ इत्या॑हुरि॒यं-वैँ प्र॒जाप॑ति॒स्तस्या॑ ए॒तच्छ्रोत्रं॒-यँद्व॒ल्मीको॒-ऽग्नि-म्पु॑री॒ष्य॑-मङ्गिर॒स्व-द्भ॑रिष्याम॒ इति॑ वल्मीकव॒पामुप॑ तिष्ठते सा॒क्षादे॒व प्र॒जाप॑तये प्रति॒प्रोच्या॒-ऽग्निग्ं स-म्भ॑रत्य॒ग्नि-म्पु॑री॒ष्य॑-मङ्गिर॒स्व-द्भ॑राम॒ इत्या॑ह॒ येन॑ स॒गञ्च्छ॑ते॒ वाज॑मे॒वास्य॑ वृ॒ङ्क्ते ऽन्व॒ग्निरु॒षसा॒मग्र॑- [-ऽन्व॒ग्निरु॒षसा॒मग्र᳚म्, अ॒ख्य॒दित्या॒हा-] 9

-मख्य॒दित्या॒हा-नु॑ख्यात्या आ॒गत्य॑ वा॒ज्यद्ध्व॑न आ॒क्रम्य॑ वाजि-न्पृथि॒वीमित्या॑हे॒च्छत्ये॒वैन॒-म्पूर्व॑या वि॒न्दत्युत्त॑रया॒ द्वाभ्या॒मा क्र॑मयति॒ प्रति॑ष्ठित्या॒ अनु॑रूपाभ्या॒-न्तस्मा॒दनु॑रूपाः प॒शवः॒ प्रजा॑यन्ते॒ द्यौस्ते॑ पृ॒ष्ठ-म्पृ॑थि॒वी स॒धस्थ॒मित्या॑है॒भ्यो वा ए॒तं-लोँ॒केभ्यः॑ प्र॒जाप॑ति॒-स्समै॑रय-द्रू॒पमे॒वास्यै॒-तन्म॑हि॒मानं॒-व्याँच॑ष्टे व॒ज्री वा ए॒ष यदश्वो॑ द॒-द्भिर॒न्यतो॑दद्भ्यो॒ भूयां॒-लोँम॑भिरुभ॒याद॑द्भ्यो॒ य-न्द्वि॒ष्या-त्तम॑धस्प॒द-न्ध्या॑ये॒-द्वज्रे॑णै॒वैनग्ग्॑ स्तृणुते ॥ 10 ॥

(आ॒ह॒ - पापी॑यान् - रु॒द्रादे॒व - येना - ऽग्रं॑ - ँव॒ज्री वै - स॒प्तद॑श च) (अ. 2)

उत्क्रा॒मो-द॑क्रमी॒दिति॒ द्वाभ्या॒मुत्क्र॑मयति॒ प्रति॑ष्ठित्या॒ अनु॑रूपाभ्या॒-न्तस्मा॒दनु॑रूपाः प॒शवः॒ प्रजा॑यन्ते॒ ऽप उप॑ सृजति॒ यत्र॒ वा आप॑ उप॒ गच्छ॑न्ति॒ तदोष॑धयः॒ प्रति॑ तिष्ठ॒न्त्योष॑धीः प्रति॒तिष्ठ॑न्तीः प॒शवो-ऽनु॒ प्रति॑ तिष्ठन्ति प॒शून्. य॒ज्ञो य॒ज्ञं-यँज॑मानो॒ यज॑मान-म्प्र॒जास्तस्मा॑द॒प उप॑ सृजति॒ प्रति॑ष्ठित्यै॒ यद॑द्ध्व॒र्यु-र॑न॒ग्नावाहु॑ति-ञ्जुहु॒याद॒न्धो᳚ ऽद्ध्व॒र्यु- [-ऽद्ध्व॒र्युः, स्या॒-द्रक्षाग्ं॑सि] 11

-स्स्या॒-द्रक्षाग्ं॑सि य॒ज्ञग्ं ह॑न्यु॒र्॒हिर॑ण्यमु॒पास्य॑ जुहोत्यग्नि॒वत्ये॒व जु॑होति॒ नान्धो᳚-ऽद्ध्व॒र्युर्भव॑ति॒ न य॒ज्ञग्ं रक्षाग्ं॑सि घ्नन्ति॒ जिघ॑र्म्य॒ग्नि-म्मन॑सा घृ॒तेनेत्या॑ह॒ मन॑सा॒ हि पुरु॑षो य॒ज्ञम॑भि॒गच्छ॑ति प्रति॒क्ष्यन्त॒-म्भुव॑नानि॒ विश्वेत्या॑ह॒ सर्व॒ग्ग्॒ ह्ये॑ष प्र॒त्य-ङ्क्षेति॑ पृ॒थु-न्ति॑र॒श्चा वय॑सा बृ॒हन्त॒मित्या॒हा-ऽल्पो॒ ह्ये॑ष जा॒तो म॒हा- [म॒हान्, भव॑ति॒] 12

-न्भव॑ति॒ व्यचि॑ष्ठ॒मन्नग्ं॑ रभ॒सं-विँदा॑न॒मित्या॒हा ऽन्न॑मे॒वा-ऽस्मै᳚ स्वदयति॒ सर्व॑मस्मै स्वदते॒ य ए॒वं-वेँदा ऽऽत्वा॑ जिघर्मि॒ वच॑सा घृ॒तेनेत्या॑ह॒ तस्मा॒-द्य-त्पुरु॑षो॒ मन॑सा-ऽभि॒गच्छ॑ति॒ त-द्वा॒चा व॑दत्य र॒क्षसेत्या॑ह॒ रक्ष॑सा॒मप॑हत्यै॒ मर्य॑श्री-स्स्पृह॒य-द्व॑र्णो अ॒ग्निरित्या॒हा-प॑चितिमे॒वा-ऽस्मि॑-न्दधा॒त्य-प॑चितिमा-न्भवति॒ य ए॒वं- [य ए॒वम्, वेद॒ मन॑सा॒ त्वै] 13

-ँवेद॒ मन॑सा॒ त्वै तामाप्तु॑मर्हति॒ याम॑द्ध्व॒र्युर॑-न॒ग्नावाहु॑ति-ञ्जु॒होति॒ मन॑स्वतीभ्या-ञ्जुहो॒त्याहु॑त्यो॒राप्त्यै॒ द्वाभ्या॒-म्प्रति॑ष्ठित्यै यज्ञमु॒खे य॑ज्ञमुखे॒ वै क्रि॒यमा॑णे य॒ज्ञग्ं रक्षाग्ं॑सि जिघाग्ं सन्त्ये॒तर्हि॒ खलु॒ वा ए॒त-द्य॑ज्ञमु॒खं-यँर्ह्ये॑न॒-दाहु॑ति-रश्ञु॒ते परि॑ लिखति॒ रक्ष॑सा॒मप॑हत्यै ति॒सृभिः॒ परि॑ लिखति त्रि॒वृद्वा अ॒ग्निर्यावा॑ने॒वा-ऽग्निस्तस्मा॒-द्रक्षा॒ग्॒स्यप॑ हन्ति [हन्ति, गा॒य॒त्रि॒या परि॑] 14

गायत्रि॒या परि॑ लिखति॒ तेजो॒ वै गा॑य॒त्री तेज॑सै॒वैन॒-म्परि॑गृह्णाति त्रि॒ष्टुभा॒ परि॑ लिखतीन्द्रि॒यं-वैँ त्रि॒ष्टु-गि॑न्द्रि॒येणै॒वैन॒-म्परि॑ गृह्णात्यनु॒ष्टुभा॒ परि॑ लिखत्यनु॒ष्टु-फ्सर्वा॑णि॒ छन्दाग्ं॑सि परि॒भूः पर्या᳚प्त्यै मद्ध्य॒तो॑-ऽनु॒ष्टुभा॒ वाग्वा अ॑नु॒ष्टु-प्तस्मा᳚-न्मद्ध्य॒तो वा॒चा व॑दामो गायत्रि॒या प्र॑थ॒मया॒ परि॑ लिख॒त्यथा॑-ऽनु॒ष्टुभा-ऽथ॑ त्रि॒ष्टुभा॒ तेजो॒ वै गा॑य॒त्री य॒ज्ञो॑ ऽनु॒ष्टुगि॑न्द्रि॒य-न्त्रि॒ष्टु-प्तेज॑सा चै॒वेन्द्रि॒येण॑ चोभ॒यतो॑ य॒ज्ञ-म्परि॑ गृह्णाति ॥ 15 ॥

(अ॒न्धो᳚-ऽद्ध्व॒र्यु - र्म॒हान् - भ॑वति॒ य ए॒वग्ं - ह॑न्ति - त्रि॒ष्टुभा॒ तेजो॒ वै गा॑य॒त्री - त्रयो॑दश च) (अ. 3)

दे॒वस्य॑ त्वा सवि॒तुः प्र॑स॒व इति॑ खनति॒ प्रसू᳚त्या॒ अथो॑ धू॒म-मे॒वैतेन॑ जनयति॒ ज्योति॑ष्मन्त-न्त्वा-ऽग्ने सु॒प्रती॑क॒-मित्या॑ह॒ ज्योति॑रे॒वैतेन॑ जनयति॒ सो᳚-ऽग्निर्जा॒तः प्र॒जा-श्शु॒चा-ऽऽर्प॑य॒-त्त-न्दे॒वा अ॑र्ध॒र्चेना॑-शमयञ्छि॒व-म्प्र॒जाभ्यो-ऽहिग्ं॑ सन्त॒मित्या॑ह प्र॒जाभ्य॑ ए॒वैनग्ं॑ शमयति॒ द्वाभ्या᳚-ङ्खनति॒ प्रति॑ष्ठित्या अ॒पा-म्पृ॒ष्ठम॒सीति॑ पुष्करप॒र्णमा [पुष्करप॒र्णमा, ह॒र॒त्य॒पां-वाँ] 16

ह॑रत्य॒पां-वाँ ए॒त-त्पृ॒ष्ठं-यँ-त्पु॑ष्करप॒र्णग्ं रू॒पेणै॒वैन॒दा ह॑रति पुष्करप॒र्णेन॒ स-म्भ॑रति॒ योनि॒र्वा अ॒ग्नेः पु॑ष्करप॒र्णग्ं सयो॑निमे॒वाग्निग्ं सम्भ॑रति कृष्णाजि॒नेन॒ सम्भ॑रति य॒ज्ञो वै कृ॑ष्णाजि॒नं-यँ॒ज्ञेनै॒व य॒ज्ञग्ं सम्भ॑रति॒ य-द्ग्रा॒म्याणा᳚-म्पशू॒ना-ञ्चर्म॑णा स॒म्भरे᳚-द्ग्रा॒म्या-न्प॒शूञ्छु॒चा-ऽर्प॑ये-त्कृष्णाजि॒नेन॒ सम्भ॑रत्यार॒ण्याने॒व प॒शू- [प॒शून्, शु॒चा-ऽर्प॑यति॒] 17

-ञ्छु॒चा-ऽर्प॑यति॒ तस्मा᳚-थ्स॒माव॑-त्पशू॒ना-म्प्र॒जाय॑मानाना-मार॒ण्याः प॒शवः॒ कनी॑याग्ंस-श्शु॒चा ह्यृ॑ता लो॑म॒त-स्सम्भ॑र॒त्यतो॒ ह्य॑स्य॒ मेद्ध्य॑-ङ्कृष्णाजि॒न-ञ्च॑ पुष्करप॒र्ण-ञ्च॒ सग्ग् स्तृ॑णाती॒यं-वैँ कृ॑ष्णाजि॒नम॒सौ पु॑ष्करप॒र्ण-मा॒भ्या-मे॒वैन॑-मुभ॒यतः॒ परि॑गृह्णात्य॒-ग्निर्दे॒वेभ्यो॒ निला॑यत॒ तमथ॒र्वा-ऽन्व॑पश्य॒दथ॑र्वा त्वा प्रथ॒मो निर॑मन्थदग्न॒ इ- [निर॑मन्थदग्न॒ इति॑, आ॒ह॒ य ए॒वैन॑-] 18

-त्या॑ह॒ य ए॒वैन॑-म॒न्वप॑श्य॒-त्तेनै॒वैन॒ग्ं॒ सम्भ॑रति॒ त्वाम॑ग्ने॒ पुष्क॑रा॒दधीत्या॑ह पुष्करप॒र्णे ह्ये॑न॒मुप॑श्रित॒-मवि॑न्द॒-त्तमु॑ त्वा द॒द्ध्यङ्ङृषि॒रित्या॑ह द॒द्ध्यङ् वा आ॑थर्व॒ण-स्ते॑ज॒स्व्या॑सी॒-त्तेज॑ ए॒वास्मि॑-न्दधाति॒ तमु॑ त्वा पा॒थ्यो वृषेत्या॑ह॒ पूर्व॑मे॒वोदि॒त-मुत्त॑रेणा॒भि गृ॑णाति [गृ॑णाति, च॒त॒सृभि॒-स्सम्भ॑रति] 19

चत॒सृभि॒-स्सम्भ॑रति च॒त्वारि॒ छन्दाग्ं॑सि॒ छन्दो॑भिरे॒व गा॑य॒त्रीभि॑र्ब्राह्म॒णस्य॑ गाय॒त्रो हि ब्रा᳚ह्म॒ण-स्त्रि॒ष्टुग्भी॑ राज॒न्य॑स्य॒ त्रैष्टु॑भो॒ हि रा॑ज॒न्यो॑ य-ङ्का॒मये॑त॒ वसी॑यान्-थ्स्या॒दित्यु॒भयी॑भि॒स्तस्य॒ सम्भ॑रे॒-त्तेज॑श्चै॒वा-ऽस्मा॑ इन्द्रि॒य-ञ्च॑ स॒मीची॑ दधात्यष्टा॒भि-स्सम्भ॑रत्य॒ष्टाक्ष॑रा गाय॒त्री गा॑य॒त्रो᳚ ऽग्निर्यावा॑ने॒वा-ऽग्निस्तग्ं सम्भ॑रति॒ सीद॑ होत॒रित्या॑- -ह दे॒वता॑ ए॒वास्मै॒ सग्ं सा॑दयति॒ नि होतेति॑ मनु॒ष्या᳚न्-थ्सग्ं सी॑द॒स्वेति॒ वयाग्ं॑सि॒ जनि॑ष्वा॒ हि जेन्यो॒ अग्रे॒ अह्ना॒मित्या॑ह देव मनु॒ष्याने॒वा-ऽस्मै॒ सग्ंस॑न्ना॒-न्प्रज॑नयति ॥ 20

(ऐ - व प॒शू - निति॑ - गृणाति - होत॒रिति॑ - स॒प्तविग्ं॑शतिश्च) (अ. 4)

क्रू॒रमि॑व॒ वा अ॑स्या ए॒त-त्क॑रोति॒ य-त्खन॑त्य॒प उप॑ सृज॒त्यापो॒ वै शा॒न्ता-श्शा॒न्ताभि॑रे॒वा-ऽस्यै॒ शुचग्ं॑ शमयति॒ स-न्ते॑ वा॒युर्मा॑त॒रिश्वा॑ दधा॒त्वित्या॑ह प्रा॒णो वै वा॒युः प्रा॒णेनै॒वास्यै᳚ प्रा॒णग्ं स-न्द॑धाति॒ स-न्ते॑ वा॒युरित्या॑ह॒ तस्मा᳚-द्वा॒युप्र॑च्युता दि॒वो वृष्टि॑रीर्ते॒ तस्मै॑ च देवि॒ वष॑डस्तु॒ [वष॑डस्तु, तुभ्य॒मित्या॑ह॒] 21

तुभ्य॒मित्या॑ह॒ षड्वा ऋ॒तव॑ ऋ॒तुष्वे॒व वृष्टि॑-न्दधाति॒ तस्मा॒-थ्सर्वा॑नृ॒तून्. व॑र्षति॒ य-द्व॑षट्कु॒र्या-द्या॒तया॑मा-ऽस्य वषट्का॒र-स्स्या॒द्यन्न व॑षट्कु॒र्या-द्रक्षाग्ं॑सि य॒ज्ञग्ं ह॑न्यु॒र्वडित्या॑ह प॒रोक्ष॑मे॒व वष॑-ट्करोति॒ नास्य॑ या॒तया॑मा वषट्का॒रो भव॑ति॒ न य॒ज्ञग्ं रक्षाग्ं॑सि घ्नन्ति॒ सुजा॑तो॒ ज्योति॑षा स॒हेत्य॑नु॒ष्टुभोप॑ नह्यत्यनु॒ष्टु- [नह्यत्यनु॒ष्टुप्, सर्वा॑णि॒ छन्दाग्ं॑सि॒] 22

-फ्सर्वा॑णि॒ छन्दाग्ं॑सि॒ छन्दाग्ं॑सि॒ खलु॒ वा अ॒ग्नेः प्रि॒या त॒नूः प्रि॒ययै॒वैन॑-न्त॒नुवा॒ परि॑ दधाति॒ वेदु॑को॒ वासो॑ भवति॒य ए॒वं-वेँद॑ वारु॒णो वा अ॒ग्निरुप॑नद्ध॒ उदु॑ तिष्ठ स्वद्ध्वरो॒र्ध्व ऊ॒ षुण॑ ऊ॒तय॒ इति॑ सावि॒त्रीभ्या॒मु-त्ति॑ष्ठति सवि॒तृप्र॑सूत ए॒वास्यो॒र्ध्वां-वँ॑रुणमे॒निमु-थ्सृ॑जति॒ द्वाभ्या॒-म्प्रति॑ष्ठित्यै॒ स जा॒तो गर्भो॑ असि॒ [गर्भो॑ असि, रोद॑स्यो॒रित्या॑हे॒मे] 23

रोद॑स्यो॒रित्या॑हे॒मे वै रोद॑सी॒ तयो॑रे॒ष गर्भो॒ यद॒ग्नि-स्तस्मा॑-दे॒वमा॒हाग्ने॒ चारु॒र्विभृ॑त॒ ओष॑धी॒ष्वित्या॑ह य॒दा ह्ये॑तं-विँ॒भर॒न्त्यथ॒ चारु॑तरो॒ भव॑ति॒ प्र मा॒तृभ्यो॒ अधि॒ कनि॑क्रद-द्गा॒ इत्या॒हौष॑धयो॒ वा अ॑स्य मा॒तर॒स्ताभ्य॑ ए॒वैन॒-म्प्रच्या॑वयति स्थि॒रो भ॑व वी॒ड्व॑ङ्ग॒ इति॑ गर्द॒भ आ सा॑दयति॒ [आ सा॑दयति, स-न्न॑ह्यत्ये॒वैन॑-] 24

स-न्न॑ह्यत्ये॒वैन॑-मे॒तया᳚ स्थे॒म्ने ग॑र्द॒भेन॒ सम्भ॑रति॒ तस्मा᳚-द्गर्द॒भः प॑शू॒ना-म्भा॑रभा॒रित॑मो गर्द॒भेन॒ स-म्भ॑रति॒ तस्मा᳚-द्गर्द॒भो-ऽप्य॑नाले॒शे-ऽत्य॒न्या-न्प॒शू-न्मे᳚द्य॒त्यन्न॒ग्ग्॒ ह्ये॑नेना॒-ऽर्कग्ं स॒म्भर॑न्ति गर्द॒भेन॒ सम्भ॑रति॒ तस्मा᳚-द्गर्द॒भो द्वि॒रेता॒-स्सन् कनि॑ष्ठ-म्पशू॒ना-म्प्रजा॑यते॒-ऽग्निर्ह्य॑स्य॒ योनि॑-न्नि॒र्दह॑ति प्र॒जासु॒ वा ए॒ष ए॒तर्ह्यारू॑ढ॒- [ए॒तर्ह्यारू॑ढः, स ई᳚श्व॒रः प्र॒जा-श्शु॒चा] 25

-स्स ई᳚श्व॒रः प्र॒जा-श्शु॒चा प्र॒दहः॑ शि॒वो भ॑व प्र॒जाभ्य॒ इत्या॑ह प्र॒जाभ्य॑ ए॒वैनग्ं॑ शमयति॒ मानु॑षीभ्य॒स्त्वम॑ङ्गिर॒ इत्या॑ह मान॒व्यो॑ हि प्र॒जा मा द्यावा॑पृथि॒वी अ॒भि शू॑शुचो॒ मा-ऽन्तरि॑क्ष॒-म्मा वन॒स्पती॒नित्या॑है॒भ्य ए॒वैनं॑-लोँ॒केभ्यः॑ शमयति॒ प्रैतु॑ वा॒जी कनि॑क्रद॒दित्या॑ह वा॒जी ह्ये॑ष नान॑द॒-द्रास॑भः॒ पत्वे- [पत्वेति, आ॒ह॒ रास॑भ॒ इति॒] 26

-त्या॑ह॒ रास॑भ॒ इति॒ ह्ये॑तमृष॒यो-ऽव॑द॒-न्भर॑न्न॒ग्नि-म्पु॑री॒ष्य॑मित्या॑हा॒-ऽग्निग्ग् ह्ये॑ष भर॑ति॒ मा पा॒द्यायु॑षः पु॒रेत्या॒हा-ऽऽयु॑रे॒वा-ऽस्मि॑-न्दधाति॒ तस्मा᳚-द्गर्द॒भ-स्सर्व॒मायु॑रेति॒ तस्मा᳚-द्गर्द॒भे पु॒रा-ऽऽयु॑षः॒ प्रमी॑ते बिभ्यति॒ वृषा॒-ऽग्निं-वृँष॑ण॒-म्भर॒न्नित्या॑ह॒ वृषा॒ ह्ये॑ष वृषा॒-ऽग्निर॒पा-ङ्गर्भग्ं॑ - [वृषा॒-ऽग्निर॒पा-ङ्गर्भ᳚म्, स॒मु॒द्रिय॒-] 27

समु॒द्रिय॒-मित्या॑हा॒-ऽपाग् ह्ये॑ष गर्भो॒ यद॒ग्निरग्न॒ आ या॑हि वी॒तय॒ इति॒ वा इ॒मौ लो॒कौ व्यै॑ता॒मग्न॒ आ या॑हि वी॒तय॒ इति॒ यदाहा॒ ऽनयो᳚र्लो॒कयो॒-र्वीत्यै॒ प्रच्यु॑तो॒ वा ए॒ष आ॒यत॑ना॒दग॑तः प्रति॒ष्ठाग्ं स ए॒तर्ह्य॑द्ध्व॒र्यु-ञ्च॒ यज॑मान-ञ्च द्ध्यायत्यृ॒तग्ं स॒त्यमित्या॑हे॒यं-वाँ ऋ॒तम॒सौ [ ] 28

स॒त्यम॒नयो॑रे॒वैन॒-म्प्रति॑ ष्ठापयति॒ ना-ऽऽर्ति॒मार्च्छ॑त्यद्ध्व॒र्युर्न यज॑मानो॒ वरु॑णो॒ वा ए॒ष यज॑मानम॒भ्यैति॒ यद॒ग्निरुप॑नद्ध॒ ओष॑धयः॒ प्रति॑ गृह्णीता॒ग्निमे॒त-मित्या॑ह॒ शान्त्यै॒ व्यस्य॒न् विश्वा॒ अम॑ती॒ररा॑ती॒-रित्या॑ह॒ रक्ष॑सा॒मप॑हत्यै नि॒षीद॑-न्नो॒ अप॑ दुर्म॒तिग्ं ह॑न॒दित्या॑ह॒ प्रति॑ष्ठित्या॒ ओष॑धयः॒ प्रति॑मोदद्ध्व- [प्रति॑मोदद्ध्वम्, ए॒न॒मित्या॒हौष॑धयो॒] 29

-मेन॒मित्या॒हौष॑धयो॒ वा अ॒ग्नेर्भा॑ग॒धेय॒-न्ताभि॑रे॒वैन॒ग्ं॒ सम॑र्धयति॒ पुष्पा॑वती-स्सुपिप्प॒ला इत्या॑ह॒ तस्मा॒दोष॑धयः॒ फल॑-ङ्गृह्णन्त्य॒ यं-वोँ॒ गर्भ॑ ऋ॒त्वियः॑ प्र॒त्नग्ं स॒धस्थ॒मा-ऽस॑द॒दित्या॑ह॒ याभ्य॑ ए॒वैन॑-म्प्रच्या॒वय॑ति॒ तास्वे॒वैन॒-म्प्रति॑ष्ठापयति॒ द्वाभ्या॑मु॒पाव॑हरति॒ प्रति॑ष्ठित्यै ॥ 30 ॥

(अ॒स्त्व॒ - नु॒ष्टु - ब॑सि - सादय॒त्या - रू॑ढः॒-पत्वेति॒-गर्भ॑-म॒सौ - मो॑दद्ध्वं॒ - द्विच॑त्वारिग्ंशच्च) (अ. 5)

वा॒रु॒णो वा अ॒ग्निरुप॑नद्धो॒ वि पाज॒सेति॒ विस्रग्ं॑सयति सवि॒तृप्र॑सूत ए॒वास्य॒ विषू॑चीं-वँरुणमे॒निं-विँसृ॑जत्य॒प उप॑ सृज॒त्यापो॒ वै शा॒न्ता-श्शा॒न्ताभि॑रे॒वास्य॒ शुचग्ं॑ शमयति ति॒सृभि॒रुप॑ सृजति त्रि॒वृद्वा अ॒ग्निर्यावा॑ने॒वा-ग्निस्तस्य॒ शुचग्ं॑ शमयति मि॒त्र-स्स॒ग्ं॒सृज्य॑ पृथि॒वीमित्या॑ह मि॒त्रो वै शि॒वो दे॒वाना॒-न्तेनै॒वै- [दे॒वाना॒-न्तेनै॒व, ए॒न॒ग्ं॒ सग्ं सृ॑जति॒] 31

-न॒ग्ं॒ सग्ं सृ॑जति॒ शान्त्यै॒ यद्ग्रा॒म्याणा॒-म्पात्रा॑णा-ङ्क॒पालै᳚-स्सग्ंसृ॒जे-द्ग्रा॒म्याणि॒ पात्रा॑णि शु॒चा-ऽर्प॑येदर्मकपा॒लै-स्सग्ं सृ॑जत्ये॒तानि॒ वा अ॑नुपजीवनी॒यानि॒ तान्ये॒व शु॒चा-ऽर्प॑यति॒ शर्क॑राभि॒-स्सग्ं सृ॑जति॒ धृत्या॒ अथो॑ श॒न्त्वाया॑ जलो॒मै-स्सग्ं सृ॑जत्ये॒षा वा अ॒ग्नेः प्रि॒या त॒नूर्यद॒जा प्रि॒ययै॒वैन॑-न्त॒नुवा॒ सग्ं सृ॑ज॒त्यथो॒ तेज॑सा कृष्णाजि॒नस्य॒ लोम॑भि॒-स्सग्ं - [लोम॑भि॒-स्सम्, सृ॒ज॒ति॒ य॒ज्ञो वै] 32

सृ॑जति य॒ज्ञो वै कृ॑ष्णाजि॒नं-यँ॒ज्ञेनै॒व य॒ज्ञग्ं सग्ं सृ॑जति रु॒द्रा-स्स॒भृत्य॑ पृथि॒वीमित्या॑है॒ता वा ए॒त-न्दे॒वता॒ अग्रे॒ सम॑भर॒-न्ताभि॑रे॒वैन॒ग्ं॒ सम्भ॑रति म॒खस्य॒ शिरो॒-ऽसीत्या॑ह य॒ज्ञो वै म॒खस्तस्यै॒त-च्छिरो॒ यदु॒खा तस्मा॑दे॒वमा॑ह य॒ज्ञस्य॑ प॒दे स्थ॒ इत्या॑ह य॒ज्ञस्य॒ ह्ये॑ते [ ] 33

प॒दे अथो॒ प्रति॑ष्ठित्यै॒ प्रा-ऽन्याभि॒-र्यच्छ॒त्यन्व॒न्यै-र्म॑न्त्रयते मिथुन॒त्वाय॒ त्र्यु॑द्धि-ङ्करोति॒ त्रय॑ इ॒मे लो॒का ए॒षां-लोँ॒काना॒माप्त्यै॒ छन्दो॑भिः करोति वी॒र्यं॑-वैँ छन्दाग्ं॑सि वी॒र्ये॑णै॒वैना᳚-ङ्करोति॒ यजु॑षा॒ बिल॑-ङ्करोति॒ व्यावृ॑त्त्या॒ इय॑ती-ङ्करोति प्र॒जाप॑तिना यज्ञमु॒खेन॒ सम्मि॑ता-न्द्विस्त॒ना-ङ्क॑रोति॒ यावा॑पृथि॒व्योर्दोहा॑य॒ चतुः॑स्तना-ङ्करोति पशू॒ना-न्दोहा॑या॒ष्टास्त॑ना-ङ्करोति॒ छन्द॑सा॒-न्दोहा॑य॒ नवा᳚श्रि-मभि॒चर॑तः कुर्या-त्त्रि॒वृत॑मे॒व वज्रग्ं॑ स॒म्भृत्य॒ भ्रातृ॑व्याय॒ प्रह॑रति॒ स्तृत्यै॑ कृ॒त्वाय॒ सा म॒हीमु॒खामिति॒ नि द॑धाति दे॒वता᳚स्वे॒वैना॒-म्प्रति॑ष्ठापयति ॥ 34 ॥

(तेनै॒व - लोम॑भि॒-स्स - मे॒ते - अ॑भि॒चर॑त॒ - एक॑विग्ंशतिश्च) (अ. 6)

स॒प्तभि॑र्धूपयति स॒प्त वै शी॑र्ष॒ण्याः᳚ प्रा॒णा-श्शिर॑ ए॒त-द्य॒ज्ञस्य॒ यदु॒खा शी॒र्॒षन्ने॒व य॒ज्ञस्य॑ प्रा॒णा-न्द॑धाति॒ तस्मा᳚-थ्स॒प्त शी॒र्॒ष-न्प्रा॒णा अ॑श्वश॒केन॑ धूपयति प्राजाप॒त्यो वा अश्वः॑ सयोनि॒त्वाया-दि॑ति॒स्त्वेत्या॑हे॒यं-वाँ अदि॑ति॒रदि॑त्यै॒वादि॑त्या-ङ्खनत्य॒स्या अक्रू॑रङ्काराय॒ न हि स्व-स्स्वग्ं हि॒नस्ति॑ दे॒वाना᳚-न्त्वा॒ पत्नी॒रित्या॑ह दे॒वानां॒- [दे॒वाना᳚म्, वा ए॒ता-म्पत्न॒यो-ऽग्रे॑-ऽ] 35

-ँवा ए॒ता-म्पत्न॒यो-ऽग्रे॑-ऽ-कुर्व॒-न्ताभि॑रे॒वैना᳚-न्दधाति धि॒षणा॒स्त्वेत्या॑ह वि॒द्या वै धि॒षणा॑ वि॒द्याभि॑-रे॒वैना॑-म॒भीन्धे॒ ग्नास्त्वेत्या॑ह॒ छन्दाग्ं॑सि॒ वै ग्ना श्छन्दो॑भि-रे॒वैनाग्॑ श्रपयति॒ वरू᳚त्रय॒स्त्वेत्या॑ह॒ होत्रा॒ वै वरू᳚त्रयो॒ होत्रा॑भिरे॒वैना᳚-म्पचति॒ जन॑य॒स्त्वेत्या॑ह दे॒वानां॒-वैँ पत्नी॒- [पत्नीः᳚, जन॑य॒स्ताभि॑-] 36

-र्जन॑य॒स्ताभि॑-रे॒वैना᳚-म्पचति ष॒ड्भिः प॑चति॒ षड्वा ऋ॒तव॑ ऋ॒तुभि॑रे॒वैना᳚-म्पचति॒ द्विः पच॒न्त्वित्या॑ह॒ तस्मा॒-द्द्वि-स्सं॑वँथ्स॒रस्य॑ स॒स्य-म्प॑च्यते वारु॒ण्यु॑खा-ऽभीद्धा॑ मै॒त्रियोपै॑ति॒ शान्त्यै॑ दे॒वस्त्वा॑ सवि॒तो-द्व॑प॒त्वित्या॑ह सवि॒तृप्र॑सूत ए॒वैना॒-म्ब्रह्म॑णा दे॒वता॑भि॒रु-द्व॑प॒त्यप॑द्यमाना पृथि॒व्याशा॒ दिश॒ आ पृ॒णे- [आ पृ॒ण, इत्या॑ह॒] 37

-त्या॑ह॒ तस्मा॑द॒ग्नि-स्सर्वा॒ दिशो-ऽनु॒ विभा॒त्युत्ति॑ष्ठ बृह॒ती भ॑वो॒र्ध्वा ति॑ष्ठ ध्रु॒वा त्वमित्या॑ह॒ प्रति॑ष्ठित्या असु॒र्य॑-म्पात्र॒मना᳚च्छृण्ण॒मा-च्छृ॑णत्ति देव॒त्रा-ऽक॑रजक्षी॒रेणा-ऽऽच्छृ॑णत्ति पर॒मं-वाँ ए॒त-त्पयो॒ यद॑जक्षी॒र-म्प॑र॒मेणै॒वैना॒-म्पय॒सा-ऽऽच्छृ॑णत्ति॒ यजु॑षा॒ व्यावृ॑त्त्यै॒ छन्दो॑भि॒रा च्छृ॑णत्ति॒ छन्दो॑भि॒र्वा ए॒षा क्रि॑यते॒ छन्दो॑भिरे॒व छन्दा॒ग्॒स्या च्छृ॑णत्ति ॥ 38 ॥

(आ॒ह॒ दे॒वानां॒ - ँवै पत्नीः᳚ - पृणै॒ - षा - षट् च॑) (अ. 7)

एक॑विग्ंशत्या॒ माषैः᳚ पुरुषशी॒र्॒ष-मच्छै᳚त्यमे॒द्ध्या वै माषा॑ अमे॒द्ध्य-म्पु॑रुषशी॒र्॒ष-म॑मे॒द्ध्यैरे॒वा-स्या॑-मे॒द्ध्य-न्नि॑रव॒दाय॒ मेद्ध्य॑-ङ्कृ॒त्वा ऽऽह॑र॒त्येक॑विग्ंशति-र्भवन्त्येकवि॒ग्ं॒शो वै पुरु॑षः॒ पुरु॑ष॒स्या-ऽऽप्त्यै॒ व्यृ॑द्धं॒-वाँ ए॒त-त्प्रा॒णैर॑मे॒द्ध्यं-यँ-त्पु॑रुषशी॒र्॒षग्ं स॑प्त॒धा वितृ॑ण्णां-वँल्मीकव॒पा-म्प्रति॒ नि द॑धाति स॒प्त वै शी॑र्ष॒ण्याः᳚ प्रा॒णाः प्रा॒णैरे॒वैन॒-थ्सम॑र्धयति मेद्ध्य॒त्वाय॒ याव॑न्तो॒ [याव॑न्तः, वै मृ॒त्युब॑न्धव॒-] 39

वै मृ॒त्युब॑न्धव॒-स्तेषां᳚-यँ॒म आधि॑पत्य॒-म्परी॑याय यमगा॒थाभिः॒ परि॑गायति य॒मादे॒वैन॑-द्वृङ्क्ते ति॒सृभिः॒ परि॑गायति॒ त्रय॑ इ॒मे लो॒का ए॒भ्य ए॒वैन॑ल्लो॒केभ्यो॑ वृङ्क्ते॒ तस्मा॒-द्गाय॑ते॒ न देय॒-ङ्गाथा॒ हि त-द्वृ॒ङ्क्ते᳚ ऽग्निभ्यः॑ प॒शूना ल॑भते॒ कामा॒ वा अ॒ग्नयः॒ कामा॑ने॒वाव॑ रुन्धे॒ य-त्प॒शू-न्ना-ऽऽलभे॒ता-ऽन॑वरुद्धा अस्य [ ] 40

प॒शवः॑ स्यु॒र्य-त्पर्य॑ग्निकृतानु-थ्सृ॒जे-द्य॑ज्ञवेश॒स-ङ्कु॑र्या॒-द्य-थ्सग्ग्॑स्था॒पये᳚-द्या॒तया॑मानि शी॒र्॒षाणि॑ स्यु॒र्य-त्प॒शूना॒लभ॑ते॒ तेनै॒व प॒शूनव॑ रुन्धे॒ य-त्पर्य॑ग्निकृतानु-थ्सृ॒जति॑ शी॒र्ष्णा-मया॑तयामत्वाय प्राजाप॒त्येन॒ सग्ग् स्था॑पयति य॒ज्ञो वै प्र॒जाप॑तिर्य॒ज्ञ ए॒व य॒ज्ञ-म्प्रति॑ष्ठापयति प्र॒जाप॑तिः प्र॒जा अ॑सृजत॒ स रि॑रिचा॒नो॑-ऽमन्यत॒ स ए॒ता आ॒प्रीर॑पश्य॒-त्ताभि॒र्वै स मु॑ख॒त [स मु॑ख॒तः, आ॒त्मान॒मा ऽप्री॑णीत॒] 41

आ॒त्मान॒मा ऽप्री॑णीत॒ यदे॒ता आ॒प्रियो॒ भव॑न्ति य॒ज्ञो वै प्र॒जाप॑ति-र्य॒ज्ञमे॒वैताभि॑र्मुख॒त आ प्री॑णा॒त्य-प॑रिमितछन्दसो भव॒न्त्यप॑रिमितः प्र॒जाप॑तिः प्र॒जाप॑ते॒राप्त्या॑ ऊनातिरि॒क्ता मि॑थु॒नाः प्रजा᳚त्यै लोम॒शं-वैँ नामै॒तच्छन्दः॑ प्र॒जाप॑तेः प॒शवो॑ लोम॒शाः प॒शूने॒वा-ऽव॑ रुन्धे॒ सर्वा॑णि॒ वा ए॒ता रू॒पाणि॒ सर्वा॑णि रू॒पाण्य॒ग्नौ चित्ये᳚ क्रियन्ते॒ तस्मा॑दे॒ता अ॒ग्नेश्चित्य॑स्य [अ॒ग्नेश्चित्य॑स्य, भ॒व॒न्त्येक॑विग्ं शतिग्ं] 42

भव॒न्त्येक॑विग्ं शतिग्ं सामिधे॒नीरन्वा॑ह॒ रुग्वा ए॑कवि॒ग्ं॒शो रुच॑मे॒व ग॑च्छ॒त्यथो᳚ प्रति॒ष्ठामे॒व प्र॑ति॒ष्ठा ह्ये॑कवि॒ग्ं॒श-श्चतु॑र्विग्ंशति॒मन्वा॑ह॒ चतु॑र्विग्ंशतिरर्धमा॒सा-स्सं॑वँथ्स॒र-स्सं॑वँथ्स॒रो᳚-ऽग्निर्वै᳚श्वान॒र-स्सा॒क्षादे॒व वै᳚श्वान॒रमव॑ रुन्धे॒ परा॑ची॒रन्वा॑ह॒ परा॑ङिव॒ हि सु॑व॒र्गो लो॒क-स्समा᳚स्त्वा-ऽग्न ऋ॒तवो॑ वर्धय॒न्त्वित्या॑ह॒ समा॑भिरे॒वा-ऽग्निं-वँ॑र्धय- [-ऽग्निं-वँ॑र्धयति, ऋ॒तुभिः॑ संवँथ्स॒रं-विँश्वा॒] 43

-त्यृ॒तुभिः॑ संवँथ्स॒रं-विँश्वा॒ आ भा॑हि प्र॒दिशः॑ पृथि॒व्या इत्या॑ह॒ तस्मा॑द॒ग्नि-स्सर्वा॒ दिशो-ऽनु॒ विभा॑ति॒ प्रत्यौ॑हताम॒श्विना॑ मृ॒त्युम॑स्मा॒दित्या॑ह मृ॒त्युमे॒वा-ऽस्मा॒दप॑ नुद॒त्युद्व॒य-न्तम॑स॒स्परीत्या॑ह पा॒प्मा वै तमः॑ पा॒प्मान॑मे॒वास्मा॒दप॑ ह॒न्त्यग॑न्म॒ ज्योति॑रुत्त॒म-मित्या॑हा॒-ऽसौ वा आ॑दि॒त्यो ज्योति॑रुत्त॒म-मा॑दि॒त्यस्यै॒व सायु॑ज्य-ङ्गच्छति॒ न सं॑वँथ्स॒रस्ति॑ष्ठति॒ नास्य॒ श्रीस्ति॑ष्ठति॒ यस्यै॒ताः क्रि॒यन्ते॒ ज्योति॑ष्मती-मुत्त॒मामन्वा॑ह॒ ज्योति॑रे॒वास्मा॑ उ॒परि॑ष्टा-द्दधाति सुव॒र्गस्य॑ लो॒कस्यानु॑ख्यात्यै ॥ 44 ॥

(याव॑न्तो - ऽस्य - मुख॒त - श्चित्य॑स्य - वर्धय - त्यादि॒त्यो᳚ - ऽष्टाविग्ं॑शतिश्च) (अ. 8)

ष॒ड्भिर्दी᳚क्षयति॒ षड्वा ऋ॒तव॑ ऋ॒तुभि॑रे॒वैन॑-न्दीक्षयति स॒प्तभि॑र्दीक्षयति स॒प्त छन्दाग्ं॑सि॒ छन्दो॑भिरे॒वैन॑-न्दीक्षयति॒ विश्वे॑ दे॒वस्य॑ ने॒तुरित्य॑-नु॒ष्टुभो᳚त्त॒मया॑ जुहोति॒ वाग्वा अ॑नु॒ष्टु-प्तस्मा᳚-त्प्रा॒णानां॒-वाँगु॑त्त॒मै- क॑स्माद॒क्षरा॒दना᳚प्त-म्प्रथ॒म-म्प॒द-न्तस्मा॒-द्य-द्वा॒चो-ऽना᳚प्त॒-न्तन्म॑नु॒ष्या॑ उप॑ जीवन्ति पू॒र्णया॑ जुहोति पू॒र्ण इ॑व॒ हि प्र॒जाप॑तिः [प्र॒जाप॑तिः, प्र॒जाप॑ते॒रापत्यै॒] 45

प्र॒जाप॑ते॒राप्त्यै॒ न्यू॑नया जुहोति॒ न्यू॑ना॒द्धि प्र॒जाप॑तिः प्र॒जा असृ॑जत प्र॒जाना॒ग्ं॒ सृष्ट्यै॒ यद॒र्चिषि॑ प्रवृ॒ञ्ज्या-द्भू॒तमव॑ रुन्धीत॒ यदङ्गा॑रेषु भवि॒ष्यदङ्गा॑रेषु॒ प्रवृ॑णक्ति भवि॒ष्य दे॒वाव॑ रुन्धे भवि॒ष्यद्धि भूयो॑ भू॒ता-द्द्वाभ्या॒-म्प्रवृ॑णक्ति द्वि॒पा-द्यज॑मानः॒ प्रति॑ष्ठित्यै॒ ब्रह्म॑णा॒ वा ए॒षा यजु॑षा॒ सम्भृ॑ता॒ यदु॒खा सा यद्भिद्ये॒ता-ऽऽर्ति॒मार्च्छे॒- [-ऽऽर्ति॒मार्च्छे᳚त्, यज॑मानो] 46

-द्यज॑मानो ह॒न्येता᳚-ऽस्य य॒ज्ञो मित्रै॒तामु॒खा-न्त॒पेत्या॑ह॒ ब्रह्म॒ वै मि॒त्रो ब्रह्म॑न्ने॒वैना॒-म्प्रति॑ष्ठापयति॒ ना-ऽऽर्ति॒मार्च्छ॑ति॒ यज॑मानो॒ नास्य॑ य॒ज्ञो ह॑न्यते॒ यदि॒ भिद्ये॑त॒ तैरे॒व क॒पालै॒-स्सग्ं सृ॑जे॒-थ्सैव ततः॒ प्राय॑श्चित्ति॒र्यो ग॒तश्री॒-स्स्यान्म॑थि॒त्वा तस्याव॑ दद्ध्या-द्भू॒तो वा ए॒ष स स्वा- [ए॒ष स स्वाम्, दे॒वता॒मुपै॑ति॒] 47

-न्दे॒वता॒मुपै॑ति॒ यो भूति॑काम॒-स्स्याद्य उ॒खायै॑ स॒म्भवे॒-थ्स ए॒व तस्य॑ स्या॒दतो॒ ह्ये॑ष स॒म्भव॑त्ये॒ष वै स्व॑य॒म्भूर्नाम॒ भव॑त्ये॒व य-ङ्का॒मये॑त॒ भ्रातृ॑व्यमस्मै जनयेय॒मित्य॒-न्यत॒स्तस्या॒-ऽऽहृत्या-ऽव॑ दद्ध्या-थ्सा॒क्षादे॒वास्मै॒ भ्रातृ॑व्य-ञ्जनयत्यम्ब॒रीषा॒दन्न॑ काम॒स्याव॑ दद्ध्यादम्ब॒रीषे॒ वा अन्न॑-म्भ्रियते॒ सयो᳚न्ये॒वान्न॒- [सयो᳚न्ये॒वान्न᳚म्, अव॑ रुन्धे॒] 48

-मव॑ रुन्धे॒ मुञ्जा॒नव॑ दधा॒त्यूर्ग्वै मुञ्जा॒ ऊर्ज॑मे॒वास्मा॒ अपि॑ दधात्य॒ग्निर्दे॒वेभ्यो॒ निला॑यत॒ स क्रु॑मु॒क-म्प्रा-ऽवि॑श-त्क्रुमु॒कमव॑ दधाति॒ यदे॒वास्य॒ तत्र॒ न्य॑क्त॒-न्त दे॒वाव॑ रुन्ध॒ आज्ये॑न॒ सं-यौँ᳚त्ये॒तद्वा अ॒ग्नेः प्रि॒य-न्धाम॒ यदाज्य॑-म्प्रि॒येणै॒वैन॒-न्धाम्ना॒ सम॑र्धय॒त्यथो॒ तेज॑सा॒ [तेज॑सा, वै क॑कन्ती॒मा द॑धाति॒] 49

वै क॑ङ्कती॒मा द॑धाति॒ भा ए॒वाव॑ रुन्धे शमी॒मयी॒मा द॑धाति॒ शान्त्यै॒ सीद॒ त्व-म्मा॒तुर॒स्या उ॒पस्थ॒ इति॑ ति॒सृभि॑र्जा॒तमुप॑ तिष्ठते॒ त्रय॑ इ॒मे लो॒का ए॒ष्वे॑व लो॒केष्वा॒विद॑-ङ्गच्छ॒त्यथो᳚ प्रा॒णाने॒वा-ऽऽत्म-न्ध॑त्ते ॥ 50 ॥

( प्र॒जाप॑ति--र् ऋच्छे॒थ् - स्वा - मे॒वान्नं॒ - तेज॑सा॒ - चतु॑स्त्रिग्ंशच्च) (अ. 9)

न ह॑ स्म॒ वै पु॒रा-ऽग्निरप॑रशुवृक्ण-न्दहति॒ तद॑स्मै प्रयो॒ग ए॒वर्षि॑रस्वदय॒-द्यद॑ग्ने॒ यानि॒ कानि॒ चेति॑ स॒मिध॒मा द॑धा॒त्यप॑रशुवृक्ण-मे॒वास्मै᳚ स्वदयति॒ सर्व॑मस्मै स्वदते॒ य ए॒वं-वेँदौदु॑म्बरी॒मा द॑धा॒त्यूर्ग्वा उ॑दु॒म्बर॒ ऊर्ज॑मे॒वास्मा॒ अपि॑ दधाति प्र॒जाप॑तिर॒ग्नि-म॑सृजत॒ तग्ं सृ॒ष्टग्ं रक्षाग्॑- [सृ॒ष्टग्ं रक्षाग्ं॑सि, अ॒जि॒घा॒ग्ं॒स॒न्थ्स ए॒त-] 51

-स्यजिघाग्ंस॒न्थ्स ए॒त-द्रा᳚क्षो॒घ्नम॑पश्य॒-त्तेन॒ वै सरक्षा॒ग्॒स्यपा॑-ऽहत॒ य-द्रा᳚क्षो॒घ्न-म्भव॑त्य॒ग्नेरे॒व तेन॑ जा॒ता-द्रक्षा॒ग्॒स्यप॑ ह॒न्त्याश्व॑त्थी॒मा द॑धात्यश्व॒त्थो वै वन॒स्पती॑नाग्ं सपत्नसा॒हो विजि॑त्यै॒ वैक॑ङ्कती॒मा द॑धाति॒ भा ए॒वाव॑ रुन्धे शमी॒मयी॒मा द॑धाति॒ शान्त्यै॒ सग्ंशि॑त-म्मे॒ ब्रह्मोदे॑षा-म्बा॒हू अ॑तिर॒मित्यु॑त्त॒मे औदु॑म्बरी [औदु॑म्बरी, वा॒च॒य॒ति॒ ब्रह्म॑णै॒व] 52

वाचयति॒ ब्रह्म॑णै॒व क्ष॒त्रग्ं सग्ग् श्य॑ति क्ष॒त्रेण॒ ब्रह्म॒ तस्मा᳚-द्ब्राह्म॒णो रा॑ज॒न्य॑वा॒नत्य॒न्य-म्ब्रा᳚ह्म॒ण-न्तस्मा᳚-द्राज॒न्यो᳚ ब्राह्म॒णवा॒नत्य॒न्यग्ं रा॑ज॒न्य॑-म्मृ॒त्युर्वा ए॒ष यद॒ग्निर॒मृत॒ग्ं॒ हिर॑ण्यग्ं रु॒क्ममन्त॑र॒-म्प्रति॑मुञ्चते॒ ऽमृत॑मे॒व मृ॒त्योर॒न्तर्ध॑त्त॒ एक॑विग्ंशतिनिर्बाधो भव॒त्येक॑विग्ंशति॒र्वै दे॑वलो॒का द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्य [अ॒सावा॑दि॒त्यः, ए॒क॒वि॒ग्ं॒श ए॒ताव॑न्तो॒ वै] 53

ए॑कवि॒ग्ं॒श ए॒ताव॑न्तो॒ वै दे॑वलो॒कास्तेभ्य॑ ए॒व भ्रातृ॑व्यम॒न्तरे॑ति निर्बा॒धैर्वै दे॒वा असु॑रा-न्निर्बा॒धे॑-ऽकुर्वत॒ तन्नि॑र्बा॒धाना᳚-न्निर्बाध॒त्व-न्नि॑र्बा॒धी भ॑वति॒ भ्रातृ॑व्याने॒व नि॑र्बा॒धे कु॑रुते सावित्रि॒या प्रति॑मुञ्चते॒ प्रसू᳚त्यै॒ नक्तो॒षासेत्युत्त॑रया ऽहोरा॒त्राभ्या॑मे॒वैन॒-मुद्य॑च्छते दे॒वा अ॒ग्नि-न्धा॑रय-न्द्रविणो॒दा इत्या॑ह प्रा॒णा वै दे॒वा द्र॑विणो॒दा अ॑होरा॒त्राभ्या॑मे॒वैन॑मु॒द्यत्य॑ [ ] 54

प्रा॒णैर्दा॑धा॒रा ऽऽसी॑नः॒ प्रति॑मुञ्चते॒ तस्मा॒दासी॑नाः प्र॒जाः प्रजा॑यन्ते कृष्णाजि॒नमुत्त॑र॒-न्तेजो॒ वै हिर॑ण्य॒-म्ब्रह्म॑ कृष्णाजि॒न-न्तेज॑सा चै॒वैन॒-म्ब्रह्म॑णा चोभ॒यतः॒ परि॑गृह्णाति॒ षडु॑द्यामग्ं शि॒क्य॑-म्भवति॒ षड्वा ऋ॒तव॑ ऋ॒तुभि॑रे॒वैन॒-मुद्य॑च्छते॒ य-द्द्वाद॑शोद्यामग्ं संवँथ्स॒रेणै॒व मौ॒ञ्ज-म्भ॑व॒त्यूर्ग्वै मुञ्जा॑ ऊ॒र्जैवैन॒ग्ं॒ स म॑र्धयति सुप॒र्णो॑-ऽसि ग॒रुत्मा॒नित्यवे᳚क्षते रू॒पमे॒वास्यै॒तन्म॑हि॒मानं॒-व्याँच॑ष्टे॒ दिव॑-ङ्गच्छ॒ सुवः॑ प॒तेत्या॑ह सुव॒र्गमे॒वैनं॑-लोँ॒क-ङ्ग॑मयति ॥ 55 ॥

(रक्षा॒ग्॒स्यौ - दु॑बंरि - आदि॒त्य - उ॒द्यत्य॒ - सं - चतु॑र्विग्ंशतिश्च) (अ. 10)

समि॑द्धो अ॒ञ्जन् कृद॑र-म्मती॒ना-ङ्घृ॒तम॑ग्ने॒ मधु॑म॒-त्पिन्व॑मानः । वा॒जी वह॑न् वा॒जिन॑-ञ्जातवेदो दे॒वानां᳚-वँक्षि प्रि॒यमा स॒धस्थ᳚म् ॥ घृ॒तेना॒ञ्जन्थ्स-म्प॒थो दे॑व॒याना᳚-न्प्रजा॒नन् वा॒ज्यप्ये॑तु दे॒वान् । अनु॑ त्वा सप्ते प्र॒दिशः॑ सचन्ताग् स्व॒धाम॒स्मै यज॑मानाय धेहि ॥ ईड्य॒श्चासि॒ वन्द्य॑श्च वाजिन्ना॒शुश्चासि॒ मेद्ध्य॑श्च सप्ते । अ॒ग्निष्ट्वा॑ [अ॒ग्निष्ट्वा᳚, दे॒वैर्वसु॑भि-स्स॒जोषाः᳚] 56

दे॒वैर्वसु॑भि-स्स॒जोषाः᳚ प्री॒तं-वँह्निं॑-वँहतु जा॒तवे॑दाः ॥ स्ती॒र्ण-म्ब॒र्॒हि-स्सु॒ष्टरी॑मा जुषा॒णोरु पृ॒थु प्रथ॑मान-म्पृथि॒व्याम् । दे॒वेभि॑र्यु॒क्तमदि॑ति-स्स॒जोषा᳚-स्स्यो॒न-ङ्कृ॑ण्वा॒ना सु॑वि॒ते द॑धातु ॥ ए॒ता उ॑ व-स्सु॒भगा॑ वि॒श्वरू॑पा॒ विपक्षो॑भि॒-श्श्रय॑माणा॒ उदातैः᳚ । ऋ॒ष्वा-स्स॒तीः क॒वष॒-श्शुम्भ॑माना॒ द्वारो॑ दे॒वी-स्सु॑प्राय॒णा भ॑वन्तु ॥ अ॒न्त॒रा मि॒त्रावरु॑णा॒ चर॑न्ती॒ मुखं॑-यँ॒ज्ञाना॑म॒भि सं॑विँदा॒ने । उ॒षासा॑ वाग्ं [उ॒षासा॑ वाम्, सु॒हि॒र॒ण्ये सु॑शि॒ल्पे] 57

सुहिर॒ण्ये सु॑शि॒ल्पे ऋ॒तस्य॒ योना॑वि॒ह सा॑दयामि ॥ प्र॒थ॒मा वाग्ं॑ सर॒थिना॑ सु॒वर्णा॑ दे॒वौ पश्य॑न्तौ॒ भुव॑नानि॒ विश्वा᳚ । अपि॑प्रय॒-ञ्चोद॑ना वा॒-म्मिमा॑ना॒ होता॑रा॒ ज्योतिः॑ प्र॒दिशा॑ दि॒शन्ता᳚ ॥ आ॒दि॒त्यैर्नो॒ भार॑ती वष्टु य॒ज्ञग्ं सर॑स्वती स॒ह रु॒द्रैर्न॑ आवीत् । इडोप॑हूता॒ वसु॑भि-स्स॒जोषा॑ य॒ज्ञ-न्नो॑ देवीर॒मृते॑षु धत्त ॥ त्वष्टा॑ वी॒र-न्दे॒वका॑म-ञ्जजान॒ त्वष्टु॒रर्वा॑ जायत आ॒शुरश्वः॑ । 58

त्वष्टे॒दं-विँश्व॒-म्भुव॑न-ञ्जजान ब॒होः क॒र्तार॑मि॒ह य॑क्षि होतः ॥ अश्वो॑ घृ॒तेन॒ त्मन्या॒ सम॑क्त॒ उप॑ दे॒वाग्ं ऋ॑तु॒शः पाथ॑ एतु । वन॒स्पति॑-र्देवलो॒क-म्प्र॑जा॒नन्न॒ग्निना॑ ह॒व्या स्व॑दि॒तानि॑ वक्षत् ॥ प्र॒जाप॑ते॒स्तप॑सा वावृधा॒न-स्स॒द्यो जा॒तो द॑धिषे य॒ज्ञम॑ग्ने । स्वाहा॑कृतेन ह॒विषा॑ पुरोगा या॒हि सा॒द्ध्या ह॒विर॑दन्तु दे॒वाः ॥ 59 ॥

(अ॒ग्निष्ट्वा॑ - वा॒ - मश्वो॒ - द्विच॑त्वारिग्ंशच्च) (अ. 11)

(सा॒वि॒त्राणि॒ - व्यृ॑द्ध॒ - मुत्क्रा॑म - दे॒वस्य॑ खनति - क्रू॒रं -ँवा॑रु॒णः - स॒प्तभि॒ - रेक॑विग्ंशत्या - ष॒ड्भि - र्न ह॑ स्म॒ - समि॑द्धो अ॒ञ्ज - न्नेका॑दश )

(सा॒वि॒त्रा - ण्युत्क्रा॑म - क्रू॒रं -ँवा॑रु॒णः - प॒शवः॑ स्यु॒ - र्न ह॑ स्म॒ - नव॑पञ्चा॒शत्)

(सा॒वि॒त्राणि॑, ह॒विर॑दन्तु दे॒वाः)

॥ हरिः॑ ओम् ॥

॥ कृष्ण यजुर्वेदीय तैत्तिरीय संहिताया-म्पञ्चमकाण्डे प्रथमः प्रश्न-स्समाप्तः ॥