murārikāyakālimālalāmavāridhāriṇī
tṛṇīkṛtatriviṣṭapā trilokaśokahāriṇī |
mano'nukūlakūlakuñjapuñjadhūtadurmadā
Verse 1
dhunotu me manomalaṃ kalindanandinī sadā || 1 ||
malāpahārivāripūrabhūrimaṇḍitāmṛtā
bhṛśaṃ prapātakapravañcanātipaṇḍitāniśam |
sunandanandanāṅgasaṅgarāgarañjitā hitā
Verse 2
dhunotu me manomalaṃ kalindanandinī sadā || 2 ||
lasattaraṅgasaṅgadhūtabhūtajātapātakā
navīnamādhurīdhurīṇabhaktijātacātakā |
taṭāntavāsadāsahaṃsasaṃsṛtā hi kāmadā
Verse 3
dhunotu me manomalaṃ kalindanandinī sadā || 3 ||
vihārarāsakhedabhedadhīratīramārutā
gatā girāmagocare yadīyanīracārutā |
pravāhasāhacaryapūtamedinīnadīnadā
Verse 4
dhunotu me manomalaṃ kalindanandinī sadā || 4 ||
taraṅgasaṅgasaikatāñcitāntarā sadāsitā
śaranniśākarāṃśumañjumañjarīsabhājitā |
bhavārcanāya cāruṇāmbunādhunā viśāradā
Verse 5
dhunotu me manomalaṃ kalindanandinī sadā || 5 ||
jalāntakelikāricārurādhikāṅgarāgiṇī
svabharturanyadurlabhāṅgasaṅgatāṃśabhāginī |
svadattasuptasaptasindhubhedanātikovidā
Verse 6
dhunotu me manomalaṃ kalindanandinī sadā || 6 ||
jalacyutācyutāṅgarāgalampaṭāliśālinī
vilolarādhikākacāntacampakālimālinī |
sadāvagāhanāvatīrṇabhartṛbhṛtyanāradā
Verse 7
dhunotu me manomalaṃ kalindanandinī sadā || 7 ||
sadaiva nandanandakeliśālikuñjamañjulā
taṭotthaphullamallikākadambareṇusūjjvalā |
jalāvagāhināṃ nṛṇāṃ bhavābdhisindhupāradā
Verse 8
dhunotu me manomalaṃ kalindanandinī sadā || 8 ||
Sanskrit — Devanagari (original)
मुरारिकायकालिमाललामवारिधारिणी
तृणीकृतत्रिविष्टपा त्रिलोकशोकहारिणी ।
मनोऽनुकूलकूलकुञ्जपुञ्जधूतदुर्मदा
धुनोतु मे मनोमलं कलिन्दनन्दिनी सदा ॥ 1 ॥
मलापहारिवारिपूरभूरिमण्डितामृता
भृशं प्रपातकप्रवञ्चनातिपण्डितानिशम् ।
सुनन्दनन्दनाङ्गसङ्गरागरञ्जिता हिता
धुनोतु मे मनोमलं कलिन्दनन्दिनी सदा ॥ 2 ॥
लसत्तरङ्गसङ्गधूतभूतजातपातका
नवीनमाधुरीधुरीणभक्तिजातचातका ।
तटान्तवासदासहंससंसृता हि कामदा
धुनोतु मे मनोमलं कलिन्दनन्दिनी सदा ॥ 3 ॥
विहाररासखेदभेदधीरतीरमारुता
गता गिरामगोचरे यदीयनीरचारुता ।
प्रवाहसाहचर्यपूतमेदिनीनदीनदा
धुनोतु मे मनोमलं कलिन्दनन्दिनी सदा ॥ 4 ॥
तरङ्गसङ्गसैकताञ्चितान्तरा सदासिता
शरन्निशाकरांशुमञ्जुमञ्जरीसभाजिता ।
भवार्चनाय चारुणाम्बुनाधुना विशारदा
धुनोतु मे मनोमलं कलिन्दनन्दिनी सदा ॥ 5 ॥
जलान्तकेलिकारिचारुराधिकाङ्गरागिणी
स्वभर्तुरन्यदुर्लभाङ्गसङ्गतांशभागिनी ।
स्वदत्तसुप्तसप्तसिन्धुभेदनातिकोविदा
धुनोतु मे मनोमलं कलिन्दनन्दिनी सदा ॥ 6 ॥
जलच्युताच्युताङ्गरागलम्पटालिशालिनी
विलोलराधिकाकचान्तचम्पकालिमालिनी ।
सदावगाहनावतीर्णभर्तृभृत्यनारदा
धुनोतु मे मनोमलं कलिन्दनन्दिनी सदा ॥ 7 ॥
सदैव नन्दनन्दकेलिशालिकुञ्जमञ्जुला
तटोत्थफुल्लमल्लिकाकदम्बरेणुसूज्ज्वला ।
जलावगाहिनां नृणां भवाब्धिसिन्धुपारदा
धुनोतु मे मनोमलं कलिन्दनन्दिनी सदा ॥ 8 ॥