Arjuna Krita Shri Durga Stotram — Devanagari Script

Verse 1

नमस्ते सिद्धसेनानि आर्ये मन्दरवासिनि ।
कुमारि कालि कापालि कपिले कृष्णपिङ्गले ॥ 1 ॥

namaste siddhasenāni ārye mandaravāsini |
kumāri kāli kāpāli kapile kṛṣṇapiṅgale || 1 ||

Verse 2

भद्रकालि नमस्तुभ्यं महाकालि नमोऽस्तु ते ।
चण्डि चण्डे नमस्तुभ्यं तारिणि वरवर्णिनि ॥ 2 ॥

bhadrakāli namastubhyaṃ mahākāli namo'stu te |
caṇḍi caṇḍe namastubhyaṃ tāriṇi varavarṇini || 2 ||

Verse 3

कात्यायनि महाभागे करालि विजये जये ।
शिखिपिञ्छध्वजधरे नानाभरणभूषिते ॥ 3 ॥

kātyāyani mahābhāge karāli vijaye jaye |
śikhipiñchadhvajadhare nānābharaṇabhūṣite || 3 ||

Verse 4

अट्टशूलप्रहरणे खड्गखेटकधारिणि ।
गोपेन्द्रस्यानुजे ज्येष्ठे नन्दगोपकुलोद्भवे ॥ 4 ॥

aṭṭaśūlapraharaṇe khaḍgakheṭakadhāriṇi |
gopendrasyānuje jyeṣṭhe nandagopakulodbhave || 4 ||

Verse 5

महिषासृक्प्रिये नित्यं कौशिकि पीतवासिनि ।
अट्टहासे कोकमुखे नमस्तेऽस्तु रणप्रिये ॥ 5 ॥

mahiṣāsṛkpriye nityaṃ kauśiki pītavāsini |
aṭṭahāse kokamukhe namaste'stu raṇapriye || 5 ||

Verse 6

उमे शाकम्भरि श्वेते कृष्णे कैटभनाशिनि ।
हिरण्याक्षि विरूपाक्षि सुधूम्राक्षि नमोऽस्तु ते ॥ 6 ॥

ume śākambhari śvete kṛṣṇe kaiṭabhanāśini |
hiraṇyākṣi virūpākṣi sudhūmrākṣi namo'stu te || 6 ||

Verse 7

वेदश्रुतिमहापुण्ये ब्रह्मण्ये जातवेदसि ।
जम्बूकटकचैत्येषु नित्यं सन्निहितालये ॥ 7 ॥

vedaśrutimahāpuṇye brahmaṇye jātavedasi |
jambūkaṭakacaityeṣu nityaṃ sannihitālaye || 7 ||

Verse 8

त्वं ब्रह्मविद्या विद्यानां महानिद्रा च देहिनाम् ।
स्कन्दमातर्भगवति दुर्गे कान्तारवासिनि ॥ 8 ॥

tvaṃ brahmavidyā vidyānāṃ mahānidrā ca dehinām |
skandamātarbhagavati durge kāntāravāsini || 8 ||

Verse 9

स्वाहाकारः स्वधा चैव कला काष्ठा सरस्वती ।
सावित्री वेदमाता च तथा वेदान्त उच्यते ॥ 9 ॥

svāhākāraḥ svadhā caiva kalā kāṣṭhā sarasvatī |
sāvitrī vedamātā ca tathā vedānta ucyate || 9 ||

Verse 10

कान्तारभयदुर्गेषु भक्तानां चालयेषु च ।
नित्यं वससि पाताले युद्धे जयसि दानवान् ॥ 10 ॥

kāntārabhayadurgeṣu bhaktānāṃ cālayeṣu ca |
nityaṃ vasasi pātāle yuddhe jayasi dānavān || 10 ||

Verse 11

त्वं जम्भनी मोहिनी च माया ह्रीः श्रीस्तथैव च ।
सन्ध्या प्रभावती चैव सावित्री जननी तथा ॥ 11 ॥

tvaṃ jambhanī mohinī ca māyā hrīḥ śrīstathaiva ca |
sandhyā prabhāvatī caiva sāvitrī jananī tathā || 11 ||

Verse 12

तुष्टिः पुष्टिर्धृतिर्दीप्तिश्चन्द्रादित्यविवर्धिनी ।
भूतिर्भूतिमतां सङ्ख्ये वीक्ष्यसे सिद्धचारणैः ॥ 12 ॥

tuṣṭiḥ puṣṭirdhṛtirdīptiścandrādityavivardhinī |
bhūtirbhūtimatāṃ saṅkhye vīkṣyase siddhacāraṇaiḥ || 12 ||

Verse 13

स्तुतासि त्वं महादेवि विशुद्धेनान्तरात्मना ।
जयो भवतु मे नित्यं त्वत्प्रसादाद्रणाजिरे ॥ 13 ॥

stutāsi tvaṃ mahādevi viśuddhenāntarātmanā |
jayo bhavatu me nityaṃ tvatprasādādraṇājire || 13 ||

इति श्रीमन्महाभारते भीष्मपर्वणि त्रयोविंशोऽध्याये अर्जुन कृत श्री दुर्गा स्तोत्रम् ।