viśuddhaṃ paraṃ saccidānandarūpaṃ
guṇādhāramādhārahīnaṃ vareṇyam |
mahāntaṃ vibhāntaṃ guhāntaṃ guṇāntaṃ
Verse 1
sukhāntaṃ svayaṃ dhāma rāmaṃ prapadye || 1 ||
śivaṃ nityamekaṃ vibhuṃ tārakākhyaṃ
sukhākāramākāraśūnyaṃ sumānyam |
maheśaṃ kaleśaṃ sureśaṃ pareśaṃ
Verse 2
nareśaṃ nirīśaṃ mahīśaṃ prapadye || 2 ||
yadāvarṇayatkarṇamūle'ntakāle
śivo rāma rāmeti rāmeti kāśyām |
tadekaṃ paraṃ tārakabrahmarūpaṃ
Verse 3
bhaje'haṃ bhaje'haṃ bhaje'haṃ bhaje'ham || 3 ||
mahāratnapīṭhe śubhe kalpamūle
sukhāsīnamādityakoṭiprakāśam |
sadā jānakīlakṣmaṇopetamekaṃ
Verse 4
sadā rāmacandraṃ bhaje'haṃ bhaje'ham || 4 ||
kvaṇadratnamañjīrapādāravindaṃ
lasanmekhalācārupītāmbarāḍhyam |
mahāratnahārollasatkaustubhāṅgaṃ
Verse 5
nadaccañcarīmañjarīlolamālam || 5 ||
lasaccandrikāsmeraśoṇādharābhaṃ
samudyatpataṅgendukoṭiprakāśam |
namadbrahmarudrādikoṭīraratna
Verse 6
sphuratkāntinīrājanārādhitāṅghrim || 6 ||
puraḥ prāñjalīnāñjaneyādibhaktān
svacinmudrayā bhadrayā bodhayantam |
bhaje'haṃ bhaje'haṃ sadā rāmacandraṃ
Verse 7
tvadanyaṃ na manye na manye na manye || 7 ||
yadā matsamīpaṃ kṛtāntaḥ sametya
pracaṇḍaprakopairbhaṭairbhīṣayenmām |
tadāviṣkaroṣi tvadīyaṃ svarūpaṃ
Verse 8
sadāpatpraṇāśaṃ sakodaṇḍabāṇam || 8 ||
nije mānase mandire sannidhehi
prasīda prasīda prabho rāmacandra |
sasaumitriṇā kaikayīnandanena
Verse 9
svaśaktyānubhaktyā ca saṃsevyamāna || 9 ||
svabhaktāgragaṇyaiḥ kapīśairmahīśai-
-ranīkairanekaiśca rāma prasīda |
namaste namo'stvīśa rāma prasīda
Verse 10
praśādhi praśādhi prakāśaṃ prabho mām || 10 ||
tvamevāsi daivaṃ paraṃ me yadekaṃ
sucaitanyametattvadanyaṃ na manye |
yato'bhūdameyaṃ viyadvāyutejo
Verse 11
jalorvyādikāryaṃ caraṃ cācaraṃ ca || 11 ||
namaḥ saccidānandarūpāya tasmai
namo devadevāya rāmāya tubhyam |
namo jānakījīviteśāya tubhyaṃ
Verse 12
namaḥ puṇḍarīkāyatākṣāya tubhyam || 12 ||
namo bhaktiyuktānuraktāya tubhyaṃ
namaḥ puṇyapuñjaikalabhyāya tubhyam |
namo vedavedyāya cādyāya puṃse
Verse 13
namaḥ sundarāyendirāvallabhāya || 13 ||
namo viśvakartre namo viśvahartre
namo viśvabhoktre namo viśvamātre |
namo viśvanetre namo viśvajetre
Verse 14
namo viśvapitre namo viśvamātre || 14 ||
namaste namaste samastaprapañca-
-prabhogaprayogapramāṇapravīṇa |
madīyaṃ manastvatpadadvandvasevāṃ
Verse 15
vidhātuṃ pravṛttaṃ sucaitanyasiddhyai || 15 ||
śilāpi tvadaṅghrikṣamāsaṅgireṇu
prasādāddhi caitanyamādhatta rāma |
narastvatpadadvandvasevāvidhānā-
Verse 16
-tsucaitanyametīti kiṃ citramatra || 16 ||
pavitraṃ caritraṃ vicitraṃ tvadīyaṃ
narā ye smarantyanvahaṃ rāmacandra |
bhavantaṃ bhavāntaṃ bharantaṃ bhajanto
Verse 17
labhante kṛtāntaṃ na paśyantyato'nte || 17 ||
sa puṇyaḥ sa gaṇyaḥ śaraṇyo mamāyaṃ
naro veda yo devacūḍāmaṇiṃ tvām |
sadākāramekaṃ cidānandarūpaṃ
Verse 18
manovāgagamyaṃ paraṃ dhāma rāma || 18 ||
pracaṇḍapratāpaprabhāvābhibhūta-
-prabhūtārivīra prabho rāmacandra |
balaṃ te kathaṃ varṇyate'tīva bālye
Verse 19
yato'khaṇḍi caṇḍīśakodaṇḍadaṇḍam || 19 ||
daśagrīvamugraṃ saputraṃ samitraṃ
sariddurgamadhyastharakṣogaṇeśam |
bhavantaṃ vinā rāma vīro naro vā
Verse 20
suro vā'maro vā jayetkastrilokyām || 20 ||
sadā rāma rāmeti rāmāmṛtaṃ te
sadārāmamānandaniṣyandakandam |
pibantaṃ namantaṃ sudantaṃ hasantaṃ
Verse 21
hanūmantamantarbhaje taṃ nitāntam || 21 ||
sadā rāma rāmeti rāmāmṛtaṃ te
sadārāmamānandaniṣyandakandam |
pibannanvahaṃ nanvahaṃ naiva mṛtyo-
Verse 22
-rbibhemi prasādādasādāttavaiva || 22 ||
asītāsametairakodaṇḍabhūṣai-
-rasaumitrivandyairacaṇḍapratāpaiḥ |
alaṅkeśakālairasugrīvamitrai-
Verse 23
-rarāmābhidheyairalaṃ daivatairnaḥ || 23 ||
avīrāsanasthairacinmudrikāḍhyai-
-rabhaktāñjaneyāditattvaprakāśaiḥ |
amandāramūlairamandāramālai-
Verse 24
-rarāmābhidheyairalaṃ daivatairnaḥ || 24 ||
asindhuprakopairavandyapratāpai-
-rabandhuprayāṇairamandasmitāḍhyaiḥ |
adaṇḍapravāsairakhaṇḍaprabodhai-
Verse 25
-rarāmābhidheyairalaṃ daivatairnaḥ || 25 ||
hare rāma sītāpate rāvaṇāre
kharāre murāre'surāre pareti |
lapantaṃ nayantaṃ sadākālamevaṃ
Verse 26
samālokayālokayāśeṣabandho || 26 ||
namaste sumitrāsuputrābhivandya
namaste sadā kaikayīnandaneḍya |
namaste sadā vānarādhīśavandya
Verse 27
namaste namaste sadā rāmacandra || 27 ||
prasīda prasīda pracaṇḍapratāpa
prasīda prasīda pracaṇḍārikāla |
prasīda prasīda prapannānukampin
Verse 28
prasīda prasīda prabho rāmacandra || 28 ||
bhujaṅgaprayātaṃ paraṃ vedasāraṃ
mudā rāmacandrasya bhaktyā ca nityam |
paṭhansantataṃ cintayansvāntaraṅge
Verse 29
sa eva svayaṃ rāmacandraḥ sa dhanyaḥ || 29 ||
iti śrīmacchaṅkarācārya kṛtaṃ śrī rāma bhujaṅgaprayāta stotram |
Sanskrit — Devanagari (original)
विशुद्धं परं सच्चिदानन्दरूपं
गुणाधारमाधारहीनं वरेण्यम् ।
महान्तं विभान्तं गुहान्तं गुणान्तं
सुखान्तं स्वयं धाम रामं प्रपद्ये ॥ 1 ॥
शिवं नित्यमेकं विभुं तारकाख्यं
सुखाकारमाकारशून्यं सुमान्यम् ।
महेशं कलेशं सुरेशं परेशं
नरेशं निरीशं महीशं प्रपद्ये ॥ 2 ॥
यदावर्णयत्कर्णमूलेऽन्तकाले
शिवो राम रामेति रामेति काश्याम् ।
तदेकं परं तारकब्रह्मरूपं
भजेऽहं भजेऽहं भजेऽहं भजेऽहम् ॥ 3 ॥
महारत्नपीठे शुभे कल्पमूले
सुखासीनमादित्यकोटिप्रकाशम् ।
सदा जानकीलक्ष्मणोपेतमेकं
सदा रामचन्द्रं भजेऽहं भजेऽहम् ॥ 4 ॥
क्वणद्रत्नमञ्जीरपादारविन्दं
लसन्मेखलाचारुपीताम्बराढ्यम् ।
महारत्नहारोल्लसत्कौस्तुभाङ्गं
नदच्चञ्चरीमञ्जरीलोलमालम् ॥ 5 ॥
लसच्चन्द्रिकास्मेरशोणाधराभं
समुद्यत्पतङ्गेन्दुकोटिप्रकाशम् ।
नमद्ब्रह्मरुद्रादिकोटीररत्न
स्फुरत्कान्तिनीराजनाराधिताङ्घ्रिम् ॥ 6 ॥
पुरः प्राञ्जलीनाञ्जनेयादिभक्तान्
स्वचिन्मुद्रया भद्रया बोधयन्तम् ।
भजेऽहं भजेऽहं सदा रामचन्द्रं
त्वदन्यं न मन्ये न मन्ये न मन्ये ॥ 7 ॥
यदा मत्समीपं कृतान्तः समेत्य
प्रचण्डप्रकोपैर्भटैर्भीषयेन्माम् ।
तदाविष्करोषि त्वदीयं स्वरूपं
सदापत्प्रणाशं सकोदण्डबाणम् ॥ 8 ॥
निजे मानसे मन्दिरे सन्निधेहि
प्रसीद प्रसीद प्रभो रामचन्द्र ।
ससौमित्रिणा कैकयीनन्दनेन
स्वशक्त्यानुभक्त्या च संसेव्यमान ॥ 9 ॥
स्वभक्ताग्रगण्यैः कपीशैर्महीशै-
-रनीकैरनेकैश्च राम प्रसीद ।
नमस्ते नमोऽस्त्वीश राम प्रसीद
प्रशाधि प्रशाधि प्रकाशं प्रभो माम् ॥ 10 ॥
त्वमेवासि दैवं परं मे यदेकं
सुचैतन्यमेतत्त्वदन्यं न मन्ये ।
यतोऽभूदमेयं वियद्वायुतेजो
जलोर्व्यादिकार्यं चरं चाचरं च ॥ 11 ॥
नमः सच्चिदानन्दरूपाय तस्मै
नमो देवदेवाय रामाय तुभ्यम् ।
नमो जानकीजीवितेशाय तुभ्यं
नमः पुण्डरीकायताक्षाय तुभ्यम् ॥ 12 ॥
नमो भक्तियुक्तानुरक्ताय तुभ्यं
नमः पुण्यपुञ्जैकलभ्याय तुभ्यम् ।
नमो वेदवेद्याय चाद्याय पुंसे
नमः सुन्दरायेन्दिरावल्लभाय ॥ 13 ॥
नमो विश्वकर्त्रे नमो विश्वहर्त्रे
नमो विश्वभोक्त्रे नमो विश्वमात्रे ।
नमो विश्वनेत्रे नमो विश्वजेत्रे
नमो विश्वपित्रे नमो विश्वमात्रे ॥ 14 ॥
नमस्ते नमस्ते समस्तप्रपञ्च-
-प्रभोगप्रयोगप्रमाणप्रवीण ।
मदीयं मनस्त्वत्पदद्वन्द्वसेवां
विधातुं प्रवृत्तं सुचैतन्यसिद्ध्यै ॥ 15 ॥
शिलापि त्वदङ्घ्रिक्षमासङ्गिरेणु
प्रसादाद्धि चैतन्यमाधत्त राम ।
नरस्त्वत्पदद्वन्द्वसेवाविधाना-
-त्सुचैतन्यमेतीति किं चित्रमत्र ॥ 16 ॥
पवित्रं चरित्रं विचित्रं त्वदीयं
नरा ये स्मरन्त्यन्वहं रामचन्द्र ।
भवन्तं भवान्तं भरन्तं भजन्तो
लभन्ते कृतान्तं न पश्यन्त्यतोऽन्ते ॥ 17 ॥
स पुण्यः स गण्यः शरण्यो ममायं
नरो वेद यो देवचूडामणिं त्वाम् ।
सदाकारमेकं चिदानन्दरूपं
मनोवागगम्यं परं धाम राम ॥ 18 ॥
प्रचण्डप्रतापप्रभावाभिभूत-
-प्रभूतारिवीर प्रभो रामचन्द्र ।
बलं ते कथं वर्ण्यतेऽतीव बाल्ये
यतोऽखण्डि चण्डीशकोदण्डदण्डम् ॥ 19 ॥
दशग्रीवमुग्रं सपुत्रं समित्रं
सरिद्दुर्गमध्यस्थरक्षोगणेशम् ।
भवन्तं विना राम वीरो नरो वा
सुरो वाऽमरो वा जयेत्कस्त्रिलोक्याम् ॥ 20 ॥
सदा राम रामेति रामामृतं ते
सदाराममानन्दनिष्यन्दकन्दम् ।
पिबन्तं नमन्तं सुदन्तं हसन्तं
हनूमन्तमन्तर्भजे तं नितान्तम् ॥ 21 ॥
सदा राम रामेति रामामृतं ते
सदाराममानन्दनिष्यन्दकन्दम् ।
पिबन्नन्वहं नन्वहं नैव मृत्यो-
-र्बिभेमि प्रसादादसादात्तवैव ॥ 22 ॥
असीतासमेतैरकोदण्डभूषै-
-रसौमित्रिवन्द्यैरचण्डप्रतापैः ।
अलङ्केशकालैरसुग्रीवमित्रै-
-ररामाभिधेयैरलं दैवतैर्नः ॥ 23 ॥
अवीरासनस्थैरचिन्मुद्रिकाढ्यै-
-रभक्ताञ्जनेयादितत्त्वप्रकाशैः ।
अमन्दारमूलैरमन्दारमालै-
-ररामाभिधेयैरलं दैवतैर्नः ॥ 24 ॥
असिन्धुप्रकोपैरवन्द्यप्रतापै-
-रबन्धुप्रयाणैरमन्दस्मिताढ्यैः ।
अदण्डप्रवासैरखण्डप्रबोधै-
-ररामाभिधेयैरलं दैवतैर्नः ॥ 25 ॥
हरे राम सीतापते रावणारे
खरारे मुरारेऽसुरारे परेति ।
लपन्तं नयन्तं सदाकालमेवं
समालोकयालोकयाशेषबन्धो ॥ 26 ॥
नमस्ते सुमित्रासुपुत्राभिवन्द्य
नमस्ते सदा कैकयीनन्दनेड्य ।
नमस्ते सदा वानराधीशवन्द्य
नमस्ते नमस्ते सदा रामचन्द्र ॥ 27 ॥
प्रसीद प्रसीद प्रचण्डप्रताप
प्रसीद प्रसीद प्रचण्डारिकाल ।
प्रसीद प्रसीद प्रपन्नानुकम्पिन्
प्रसीद प्रसीद प्रभो रामचन्द्र ॥ 28 ॥
भुजङ्गप्रयातं परं वेदसारं
मुदा रामचन्द्रस्य भक्त्या च नित्यम् ।
पठन्सन्ततं चिन्तयन्स्वान्तरङ्गे
स एव स्वयं रामचन्द्रः स धन्यः ॥ 29 ॥
इति श्रीमच्छङ्कराचार्य कृतं श्री राम भुजङ्गप्रयात स्तोत्रम् ।