śrīvidye śivavāmabhāganilaye śrīrājarājārcite
śrīnāthādigurusvarūpavibhave cintāmaṇīpīṭhike |
śrīvāṇīgirijānutāṅghrikamale śrīśāmbhavi śrīśive
Verse 1
madhyāhne malayadhvajādhipasute māṃ pāhi mīnāmbike || 1 ||
cakrasthe'capale carācarajagannāthe jagatpūjite
ārtālīvarade natābhayakare vakṣojabhārānvite |
vidye vedakalāpamaulividite vidyullatāvigrahe
Verse 2
mātaḥ pūrṇasudhārasārdrahṛdaye māṃ pāhi mīnāmbike || 2 ||
koṭīrāṅgadaratnakuṇḍaladhare kodaṇḍabāṇāñcite
kokākārakucadvayoparilasatprālambahārāñcite |
śiñjannūpurapādasārasamaṇīśrīpādukālaṅkṛte
Verse 3
maddāridryabhujaṅgagāruḍakhage māṃ pāhi mīnāmbike || 3 ||
brahmeśācyutagīyamānacarite pretāsanāntasthite
pāśodaṅkuśacāpabāṇakalite bālenducūḍāñcite |
bāle bālakuraṅgalolanayane bālārkakoṭyujjvale
Verse 4
mudrārādhitadaivate munisute māṃ pāhi mīnāmbike || 4 ||
gandharvāmarayakṣapannaganute gaṅgādharāliṅgite
gāyatrīgaruḍāsane kamalaje suśyāmale susthite |
khātīte khaladārupāvakaśikhe khadyotakoṭyujjvale
Verse 5
mantrārādhitadaivate munisute māṃ pāhī mīnāmbike || 5 ||
nāde nāradatumburādyavinute nādāntanādātmike
nitye nīlalatātmike nirupame nīvāraśūkopame |
kānte kāmakale kadambanilaye kāmeśvarāṅkasthite
Verse 6
madvidye madabhīṣṭakalpalatike māṃ pāhi mīnāmbike || 6 ||
vīṇānādanimīlitārdhanayane visrastacūlībhare
tāmbūlāruṇapallavādharayute tāṭaṅkahārānvite |
śyāme candrakalāvataṃsakalite kastūrikāphālike
Verse 7
pūrṇe pūrṇakalābhirāmavadane māṃ pāhi mīnāmbike || 7 ||
śabdabrahmamayī carācaramayī jyotirmayī vāṅmayī
nityānandamayī nirañjanamayī tattvammayī cinmayī |
tattvātītamayī parātparamayī māyāmayī śrīmayī
Verse 8
sarvaiśvaryamayī sadāśivamayī māṃ pāhi mīnāmbike || 8 ||
iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau mīnākṣī stotram |
Sanskrit — Devanagari (original)
श्रीविद्ये शिववामभागनिलये श्रीराजराजार्चिते
श्रीनाथादिगुरुस्वरूपविभवे चिन्तामणीपीठिके ।
श्रीवाणीगिरिजानुताङ्घ्रिकमले श्रीशाम्भवि श्रीशिवे
मध्याह्ने मलयध्वजाधिपसुते मां पाहि मीनाम्बिके ॥ 1 ॥
चक्रस्थेऽचपले चराचरजगन्नाथे जगत्पूजिते
आर्तालीवरदे नताभयकरे वक्षोजभारान्विते ।
विद्ये वेदकलापमौलिविदिते विद्युल्लताविग्रहे
मातः पूर्णसुधारसार्द्रहृदये मां पाहि मीनाम्बिके ॥ 2 ॥
कोटीराङ्गदरत्नकुण्डलधरे कोदण्डबाणाञ्चिते
कोकाकारकुचद्वयोपरिलसत्प्रालम्बहाराञ्चिते ।
शिञ्जन्नूपुरपादसारसमणीश्रीपादुकालङ्कृते
मद्दारिद्र्यभुजङ्गगारुडखगे मां पाहि मीनाम्बिके ॥ 3 ॥
ब्रह्मेशाच्युतगीयमानचरिते प्रेतासनान्तस्थिते
पाशोदङ्कुशचापबाणकलिते बालेन्दुचूडाञ्चिते ।
बाले बालकुरङ्गलोलनयने बालार्ककोट्युज्ज्वले
मुद्राराधितदैवते मुनिसुते मां पाहि मीनाम्बिके ॥ 4 ॥
गन्धर्वामरयक्षपन्नगनुते गङ्गाधरालिङ्गिते
गायत्रीगरुडासने कमलजे सुश्यामले सुस्थिते ।
खातीते खलदारुपावकशिखे खद्योतकोट्युज्ज्वले
मन्त्राराधितदैवते मुनिसुते मां पाही मीनाम्बिके ॥ 5 ॥
नादे नारदतुम्बुराद्यविनुते नादान्तनादात्मिके
नित्ये नीललतात्मिके निरुपमे नीवारशूकोपमे ।
कान्ते कामकले कदम्बनिलये कामेश्वराङ्कस्थिते
मद्विद्ये मदभीष्टकल्पलतिके मां पाहि मीनाम्बिके ॥ 6 ॥
वीणानादनिमीलितार्धनयने विस्रस्तचूलीभरे
ताम्बूलारुणपल्लवाधरयुते ताटङ्कहारान्विते ।
श्यामे चन्द्रकलावतंसकलिते कस्तूरिकाफालिके
पूर्णे पूर्णकलाभिरामवदने मां पाहि मीनाम्बिके ॥ 7 ॥
शब्दब्रह्ममयी चराचरमयी ज्योतिर्मयी वाङ्मयी
नित्यानन्दमयी निरञ्जनमयी तत्त्वम्मयी चिन्मयी ।
तत्त्वातीतमयी परात्परमयी मायामयी श्रीमयी
सर्वैश्वर्यमयी सदाशिवमयी मां पाहि मीनाम्बिके ॥ 8 ॥
इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छङ्करभगवतः कृतौ मीनाक्षी स्तोत्रम् ।