devyuvāca
devadeva! mahādeva! trikālajña! maheśvara!
karuṇākara deveśa! bhaktānugrahakāraka! ||
aṣṭottara śataṃ lakṣmyāḥ śrotumicchāmi tattvataḥ ||
īśvara uvāca
devi! sādhu mahābhāge mahābhāgya pradāyakam |
sarvaiśvaryakaraṃ puṇyaṃ sarvapāpa praṇāśanam ||
sarvadāridrya śamanaṃ śravaṇādbhukti muktidam |
rājavaśyakaraṃ divyaṃ guhyād-guhyataraṃ param ||
durlabhaṃ sarvadevānāṃ catuṣṣaṣṭi kalāspadam |
padmādīnāṃ varāntānāṃ nidhīnāṃ nityadāyakam ||
samasta deva saṃsevyaṃ aṇimādyaṣṭa siddhidam |
kimatra bahunoktena devī pratyakṣadāyakam ||
tava prītyādya vakṣyāmi samāhitamanāśśṛṇu |
aṣṭottara śatasyāsya mahālakṣmistu devatā ||
klīṃ bīja padamityuktaṃ śaktistu bhuvaneśvarī |
aṅganyāsaḥ karanyāsaḥ sa ityādi prakīrtitaḥ ||
dhyānaṃ
vande padmakarāṃ prasannavadanāṃ saubhāgyadāṃ bhāgyadāṃ
hastābhyāmabhayapradāṃ maṇigaṇaiḥ nānāvidhaiḥ bhūṣitām |
bhaktābhīṣṭa phalapradāṃ harihara brahmādhibhissevitāṃ
pārśve paṅkaja śaṅkhapadma nidhibhiḥ yuktāṃ sadā śaktibhiḥ ||
sarasija nayane sarojahaste dhavala tarāṃśuka gandhamālya śobhe |
bhagavati harivallabhe manojñe tribhuvana bhūtikari prasīdamahyam ||
oṃ
prakṛtiṃ vikṛtiṃ vidyāṃ sarvabhūta-hitapradām |
Verse 1
śraddhāṃ vibhūtiṃ surabhiṃ namāmi paramātmikām || 1 ||
vācaṃ padmālayāṃ padmāṃ śuciṃ svāhāṃ svadhāṃ sudhām |
Verse 2
dhanyāṃ hiraṇmayayīṃ lakṣmīṃ nityapuṣṭāṃ vibhāvarīm || 2 ||
aditiṃ ca ditiṃ dīptāṃ vasudhāṃ vasudhāriṇīm |
Verse 3
namāmi kamalāṃ kāntāṃ kāmākṣīṃ krodhasambhavām [kāmyāṃ kṣīrodasambhavām] || 3 ||
anugrahapradāṃ buddhi-managhāṃ harivallabhām |
Verse 4
aśokā-mamṛtāṃ dīptāṃ lokaśokavināśinīm || 4 ||
namāmi dharmanilayāṃ karuṇāṃ lokamātaram |
Verse 5
padmapriyāṃ padmahastāṃ padmākṣīṃ padmasundarīm || 5 ||
padmodbhavāṃ padmamukhīṃ padmanābhapriyāṃ ramām |
Verse 6
padmamālādharāṃ devīṃ padminīṃ padmagandhinīm || 6 ||
puṇyagandhāṃ suprasannāṃ prasādābhimukhīṃ prabhām |
Verse 7
namāmi candravadanāṃ candrāṃ candrasahodarīm || 7 ||
caturbhujāṃ candrarūpā-mindirā-minduśītalām |
Verse 8
āhlāda jananīṃ puṣṭiṃ śivāṃ śivakarīṃ satīm || 8 ||
vimalāṃ viśvajananīṃ tuṣṭiṃ dāridryanāśinīm |
Verse 9
prītipuṣkariṇīṃ śāntāṃ śuklamālyāmbarāṃ śriyam || 9 ||
bhāskarīṃ bilvanilayāṃ varārohāṃ yaśasvinīm |
Verse 10
vasundharā mudārāṅgāṃ hariṇīṃ hemamālinīm || 10 ||
dhanadhānyakarīṃ siddhiṃ straiṇasaumyāṃ [sadāsaumyāṃ] śubhapradām |
Verse 11
nṛpaveśmagatāṃ nandāṃ varalakṣmīṃ vasupradām || 11 ||
śubhāṃ hiraṇyaprākārāṃ samudratanayāṃ jayām |
Verse 12
namāmi maṅgalāṃ devīṃ viṣṇuvakṣaḥsthalasthitām || 12 ||
viṣṇupatnīṃ, prasannākṣīṃ nārāyaṇasamāśritām |
Verse 13
dāridryadhvaṃsinīṃ devīṃ sarvopadravavāriṇīm || 13 ||
navadurgāṃ mahākālīṃ brahmaviṣṇuśivātmikām |
Verse 14
trikālajñānasampannāṃ namāmi bhuvaneśvarīm || 14 ||
lakṣmīṃ kṣīrasamudrarāja tanayāṃ śrīraṅgadhāmeśvarīm |
dāsībhūta samastadeva vanitāṃ lokaika dīpāṅkurām ||
śrīmanmanda kaṭākṣa labdha vibhavad-brahmendra gaṅgādharām |
Verse 15
tvāṃ trailokya kuṭumbinīṃ sarasijāṃ vande mukundapriyām || 15 ||
mātarnamāmi! kamale! kamalāyatākṣi!
śrī viṣṇu hṛt-kamalavāsini! viśvamātaḥ!
kṣīrodaje kamala komala garbhagauri!
Verse 16
lakṣmī! prasīda satataṃ samatāṃ śaraṇye || 16 ||
trikālaṃ yo japet vidvān ṣaṇmāsaṃ vijitendriyaḥ |
dāridrya dhvaṃsanaṃ kṛtvā sarvamāpnot-yayatnataḥ |
devīnāma sahasreṣu puṇyamaṣṭottaraṃ śatam |
Verse 17
yena śriya mavāpnoti koṭijanma daridrataḥ || 17 ||
bhṛguvāre śataṃ dhīmān paṭhet vatsaramātrakam |
aṣṭaiśvarya mavāpnoti kubera iva bhūtale ||
dāridrya mocanaṃ nāma stotramambāparaṃ śatam |
Verse 18
yena śriya mavāpnoti koṭijanma daridrataḥ || 18 ||
bhuktvātu vipulān bhogān ante sāyujyamāpnuyāt |
prātaḥkāle paṭhennityaṃ sarva duḥkhopa śāntaye |
Verse 19
paṭhantu cintayeddevīṃ sarvābharaṇa bhūṣitām || 19 ||
iti śrī lakṣmyaṣṭottaraśatanāmastotraṃ sampūrṇaṃ
Sanskrit — Devanagari (original)
देव्युवाच
देवदेव! महादेव! त्रिकालज्ञ! महेश्वर!
करुणाकर देवेश! भक्तानुग्रहकारक! ॥
अष्टोत्तर शतं लक्ष्म्याः श्रोतुमिच्छामि तत्त्वतः ॥
ईश्वर उवाच
देवि! साधु महाभागे महाभाग्य प्रदायकम् ।
सर्वैश्वर्यकरं पुण्यं सर्वपाप प्रणाशनम् ॥
सर्वदारिद्र्य शमनं श्रवणाद्भुक्ति मुक्तिदम् ।
राजवश्यकरं दिव्यं गुह्याद्-गुह्यतरं परम् ॥
दुर्लभं सर्वदेवानां चतुष्षष्टि कलास्पदम् ।
पद्मादीनां वरान्तानां निधीनां नित्यदायकम् ॥
समस्त देव संसेव्यं अणिमाद्यष्ट सिद्धिदम् ।
किमत्र बहुनोक्तेन देवी प्रत्यक्षदायकम् ॥
तव प्रीत्याद्य वक्ष्यामि समाहितमनाश्शृणु ।
अष्टोत्तर शतस्यास्य महालक्ष्मिस्तु देवता ॥
क्लीं बीज पदमित्युक्तं शक्तिस्तु भुवनेश्वरी ।
अङ्गन्यासः करन्यासः स इत्यादि प्रकीर्तितः ॥
ध्यानं
वन्दे पद्मकरां प्रसन्नवदनां सौभाग्यदां भाग्यदां
हस्ताभ्यामभयप्रदां मणिगणैः नानाविधैः भूषिताम् ।
भक्ताभीष्ट फलप्रदां हरिहर ब्रह्माधिभिस्सेवितां
पार्श्वे पङ्कज शङ्खपद्म निधिभिः युक्तां सदा शक्तिभिः ॥
सरसिज नयने सरोजहस्ते धवल तरांशुक गन्धमाल्य शोभे ।
भगवति हरिवल्लभे मनोज्ञे त्रिभुवन भूतिकरि प्रसीदमह्यम् ॥
ॐ
प्रकृतिं विकृतिं विद्यां सर्वभूत-हितप्रदाम् ।
श्रद्धां विभूतिं सुरभिं नमामि परमात्मिकाम् ॥ 1 ॥
वाचं पद्मालयां पद्मां शुचिं स्वाहां स्वधां सुधाम् ।
धन्यां हिरण्मययीं लक्ष्मीं नित्यपुष्टां विभावरीम् ॥ 2 ॥
अदितिं च दितिं दीप्तां वसुधां वसुधारिणीम् ।
नमामि कमलां कान्तां कामाक्षीं क्रोधसम्भवाम् [काम्यां क्षीरोदसम्भवाम्] ॥ 3 ॥
अनुग्रहप्रदां बुद्धि-मनघां हरिवल्लभाम् ।
अशोका-ममृतां दीप्तां लोकशोकविनाशिनीम् ॥ 4 ॥
नमामि धर्मनिलयां करुणां लोकमातरम् ।
पद्मप्रियां पद्महस्तां पद्माक्षीं पद्मसुन्दरीम् ॥ 5 ॥
पद्मोद्भवां पद्ममुखीं पद्मनाभप्रियां रमाम् ।
पद्ममालाधरां देवीं पद्मिनीं पद्मगन्धिनीम् ॥ 6 ॥
पुण्यगन्धां सुप्रसन्नां प्रसादाभिमुखीं प्रभाम् ।
नमामि चन्द्रवदनां चन्द्रां चन्द्रसहोदरीम् ॥ 7 ॥
चतुर्भुजां चन्द्ररूपा-मिन्दिरा-मिन्दुशीतलाम् ।
आह्लाद जननीं पुष्टिं शिवां शिवकरीं सतीम् ॥ 8 ॥
विमलां विश्वजननीं तुष्टिं दारिद्र्यनाशिनीम् ।
प्रीतिपुष्करिणीं शान्तां शुक्लमाल्याम्बरां श्रियम् ॥ 9 ॥
भास्करीं बिल्वनिलयां वरारोहां यशस्विनीम् ।
वसुन्धरा मुदाराङ्गां हरिणीं हेममालिनीम् ॥ 10 ॥
धनधान्यकरीं सिद्धिं स्त्रैणसौम्यां [सदासौम्यां] शुभप्रदाम् ।
नृपवेश्मगतां नन्दां वरलक्ष्मीं वसुप्रदाम् ॥ 11 ॥
शुभां हिरण्यप्राकारां समुद्रतनयां जयाम् ।
नमामि मङ्गलां देवीं विष्णुवक्षःस्थलस्थिताम् ॥ 12 ॥
विष्णुपत्नीं, प्रसन्नाक्षीं नारायणसमाश्रिताम् ।
दारिद्र्यध्वंसिनीं देवीं सर्वोपद्रववारिणीम् ॥ 13 ॥
नवदुर्गां महाकालीं ब्रह्मविष्णुशिवात्मिकाम् ।
त्रिकालज्ञानसम्पन्नां नमामि भुवनेश्वरीम् ॥ 14 ॥
लक्ष्मीं क्षीरसमुद्रराज तनयां श्रीरङ्गधामेश्वरीम् ।
दासीभूत समस्तदेव वनितां लोकैक दीपाङ्कुराम् ॥
श्रीमन्मन्द कटाक्ष लब्ध विभवद्-ब्रह्मेन्द्र गङ्गाधराम् ।
त्वां त्रैलोक्य कुटुम्बिनीं सरसिजां वन्दे मुकुन्दप्रियाम् ॥ 15 ॥
मातर्नमामि! कमले! कमलायताक्षि!
श्री विष्णु हृत्-कमलवासिनि! विश्वमातः!
क्षीरोदजे कमल कोमल गर्भगौरि!
लक्ष्मी! प्रसीद सततं समतां शरण्ये ॥ 16 ॥
त्रिकालं यो जपेत् विद्वान् षण्मासं विजितेन्द्रियः ।
दारिद्र्य ध्वंसनं कृत्वा सर्वमाप्नोत्-ययत्नतः ।
देवीनाम सहस्रेषु पुण्यमष्टोत्तरं शतम् ।
येन श्रिय मवाप्नोति कोटिजन्म दरिद्रतः ॥ 17 ॥
भृगुवारे शतं धीमान् पठेत् वत्सरमात्रकम् ।
अष्टैश्वर्य मवाप्नोति कुबेर इव भूतले ॥
दारिद्र्य मोचनं नाम स्तोत्रमम्बापरं शतम् ।
येन श्रिय मवाप्नोति कोटिजन्म दरिद्रतः ॥ 18 ॥
भुक्त्वातु विपुलान् भोगान् अन्ते सायुज्यमाप्नुयात् ।
प्रातःकाले पठेन्नित्यं सर्व दुःखोप शान्तये ।
पठन्तु चिन्तयेद्देवीं सर्वाभरण भूषिताम् ॥ 19 ॥
इति श्री लक्ष्म्यष्टोत्तरशतनामस्तोत्रं सम्पूर्णं