(ṛ.1.10.15.1)
udī̭ratā॒mava̭ra॒ utparā̭sa॒ unma̭dhya॒māḥ pi॒taraḥ̭ so॒myāsaḥ̭ |
asuṃ॒-ya~ ī॒yura̭vṛ॒kā ṛ̭ta॒jñāste no̭-'vantu pi॒taro॒ havḙṣu || 01
i॒da-mpi॒tṛbhyo॒ namo̭ astva॒dya ye pūrvā̭so॒ ya upa̭rāsa ī॒yuḥ |
ye pārthi̭ve॒ raja॒syā niṣa̭ttā॒ ye vā̭ nū॒naṃ sṷvṛ॒janā̭su vi॒kṣu || 02
āha-mpi॒tṝnsṷvi॒datrāṃ̭ avitsi॒ napā̭ta-ñca vi॒krama̭ṇa-ñca॒ viṣṇoḥ̭ |
ba॒rhi॒ṣado॒ ye sva॒dhayā̭ su॒tasya॒ bhaja̭nta pi॒tvasta i॒hāga̭miṣṭhāḥ || 03
barhi̭ṣadaḥ pitara ū॒tya(1॒̭ )rvāgi॒mā vo̭ ha॒vyā ca̭kṛmā ju॒ṣadhva̭m |
ta ā ga॒tāva̭sā॒ śanta̭me॒nāthā̭ na॒-śśaṃ-yo~ra̭ra॒po da̭dhāta || 04
upa̭hūtāḥ pi॒taraḥ̭ so॒myāso̭ barhi॒ṣyḙṣu ni॒dhiṣṷ pri॒yeṣṷ |
ta ā ga̭mantu॒ ta i॒ha śrṷva॒ntvadhi̭ bruvantu॒ tḙ-'vantva॒smān || 05
ācyā॒ jānṷ dakṣiṇa॒to ni॒ṣadye॒maṃ-ya~॒jñama॒bhi gṛ̭ṇīta॒ viśvḙ |
mā hiṃ̭siṣṭa pitaraḥ॒ kena̭ cinno॒ yadva॒ āgaḥ̭ puru॒ṣatā॒ karā̭ma || 06
āsī̭nāso aru॒ṇīnā̭mu॒pasthḙ ra॒yi-ndha̭tta dā॒śuṣe॒ martyā̭ya |
pu॒trebhyaḥ̭ pitara॒stasya॒ vasvaḥ॒ pra ya̭cchata॒ ta i॒horja̭-ndadhāta || 07
ye naḥ॒ pūrvḙ pi॒taraḥ̭ so॒myāso̭-'nūhi॒re so̭mapī॒thaṃ-va~si̭ṣṭhāḥ |
tebhi̭rya॒ma-ssaṃ̭rarā॒ṇo ha॒vīṃṣyu॒śannu॒śadbhiḥ̭ pratikā॒mama̭ttu || 08
ye tā̭tṛ॒ṣurdḙva॒trā jeha̭mānā hotrā॒vida॒-sstoma̭taṣṭāso a॒rkaiḥ |
āgnḙ yāhi suvi॒datrḙbhira॒rvāṅ sa॒tyaiḥ ka॒vyaiḥ pi॒tṛbhi̭rgharma॒sadbhiḥ̭ || 09
ye sa॒tyāso̭ havi॒rado̭ havi॒ṣpā indrḙṇa de॒vai-ssa॒ratha॒-ndadhā̭nāḥ |
āgnḙ yāhi sa॒hasra̭-ndevava॒ndaiḥ paraiḥ॒ pūrvaiḥ̭ pi॒tṛbhi̭rgharma॒sadbhiḥ̭ || 10
agni̭ṣvāttāḥ pitara॒ eha ga̭cchata॒ sadaḥ̭sada-ssadata supraṇītayaḥ |
a॒ttā ha॒vīṃṣi॒ praya̭tāni ba॒rhiṣyathā̭ ra॒yiṃ sarva̭vīra-ndadhātana || 11
tvama̭gna īli॒to jā̭tave॒do-'vā̭ḍḍha॒vyāni̭ sura॒bhīṇi̭ kṛ॒tvī |
prādāḥ̭ pi॒tṛbhyaḥ̭ sva॒dhayā॒ te a̭kṣanna॒ddhi tva-ndḙva॒ praya̭tā ha॒vīṃṣi̭ || 12
ye ce॒ha pi॒taro॒ ye ca॒ neha yāṃśca̭ vi॒dma yā~ ṷ ca॒ na pra̭vi॒dma |
tvaṃ-ve~̭ttha॒ yati॒ te jā̭taveda-ssva॒dhābhi̭rya॒jñaṃ sukṛ̭ta-ñjuṣasva || 13
ye a̭gnida॒gdhā ye ana̭gnidagdhā॒ madhyḙ di॒va-ssva॒dhayā̭ mā॒daya̭nte |
tebhiḥ̭ sva॒rālasṷnītime॒tāṃ-ya~̭thāva॒śa-nta॒nva̭-ṅkalpayasva || 14
oṃ śānti॒-śśānti॒-śśāntiḥ̭ |
Sanskrit — Devanagari (original)
(ऋ.1.10.15.1)
उदी॑रता॒मव॑र॒ उत्परा॑स॒ उन्म॑ध्य॒माः पि॒तरः॑ सो॒म्यासः॑ ।
असुं॒-यँ ई॒युर॑वृ॒का ऋ॑त॒ज्ञास्ते नो॑-ऽवन्तु पि॒तरो॒ हवे॑षु ॥ 01
इ॒द-म्पि॒तृभ्यो॒ नमो॑ अस्त्व॒द्य ये पूर्वा॑सो॒ य उप॑रास ई॒युः ।
ये पार्थि॑वे॒ रज॒स्या निष॑त्ता॒ ये वा॑ नू॒नं सु॑वृ॒जना॑सु वि॒क्षु ॥ 02
आह-म्पि॒तॄन्सु॑वि॒दत्रां॑ अवित्सि॒ नपा॑त-ञ्च वि॒क्रम॑ण-ञ्च॒ विष्णोः॑ ।
ब॒र्हि॒षदो॒ ये स्व॒धया॑ सु॒तस्य॒ भज॑न्त पि॒त्वस्त इ॒हाग॑मिष्ठाः ॥ 03
बर्हि॑षदः पितर ऊ॒त्य(1॒॑ )र्वागि॒मा वो॑ ह॒व्या च॑कृमा जु॒षध्व॑म् ।
त आ ग॒ताव॑सा॒ शन्त॑मे॒नाथा॑ न॒-श्शं-योँर॑र॒पो द॑धात ॥ 04
उप॑हूताः पि॒तरः॑ सो॒म्यासो॑ बर्हि॒ष्ये॑षु नि॒धिषु॑ प्रि॒येषु॑ ।
त आ ग॑मन्तु॒ त इ॒ह श्रु॑व॒न्त्वधि॑ ब्रुवन्तु॒ ते॑-ऽवन्त्व॒स्मान् ॥ 05
आच्या॒ जानु॑ दक्षिण॒तो नि॒षद्ये॒मं-यँ॒ज्ञम॒भि गृ॑णीत॒ विश्वे॑ ।
मा हिं॑सिष्ट पितरः॒ केन॑ चिन्नो॒ यद्व॒ आगः॑ पुरु॒षता॒ करा॑म ॥ 06
आसी॑नासो अरु॒णीना॑मु॒पस्थे॑ र॒यि-न्ध॑त्त दा॒शुषे॒ मर्त्या॑य ।
पु॒त्रेभ्यः॑ पितर॒स्तस्य॒ वस्वः॒ प्र य॑च्छत॒ त इ॒होर्ज॑-न्दधात ॥ 07
ये नः॒ पूर्वे॑ पि॒तरः॑ सो॒म्यासो॑-ऽनूहि॒रे सो॑मपी॒थं-वँसि॑ष्ठाः ।
तेभि॑र्य॒म-स्सं॑ररा॒णो ह॒वींष्यु॒शन्नु॒शद्भिः॑ प्रतिका॒मम॑त्तु ॥ 08
ये ता॑तृ॒षुर्दे॑व॒त्रा जेह॑माना होत्रा॒विद॒-स्स्तोम॑तष्टासो अ॒र्कैः ।
आग्ने॑ याहि सुवि॒दत्रे॑भिर॒र्वाङ् स॒त्यैः क॒व्यैः पि॒तृभि॑र्घर्म॒सद्भिः॑ ॥ 09
ये स॒त्यासो॑ हवि॒रदो॑ हवि॒ष्पा इन्द्रे॑ण दे॒वै-स्स॒रथ॒-न्दधा॑नाः ।
आग्ने॑ याहि स॒हस्र॑-न्देवव॒न्दैः परैः॒ पूर्वैः॑ पि॒तृभि॑र्घर्म॒सद्भिः॑ ॥ 10
अग्नि॑ष्वात्ताः पितर॒ एह ग॑च्छत॒ सदः॑सद-स्सदत सुप्रणीतयः ।
अ॒त्ता ह॒वींषि॒ प्रय॑तानि ब॒र्हिष्यथा॑ र॒यिं सर्व॑वीर-न्दधातन ॥ 11
त्वम॑ग्न ईलि॒तो जा॑तवे॒दो-ऽवा॑ड्ढ॒व्यानि॑ सुर॒भीणि॑ कृ॒त्वी ।
प्रादाः॑ पि॒तृभ्यः॑ स्व॒धया॒ ते अ॑क्षन्न॒द्धि त्व-न्दे॑व॒ प्रय॑ता ह॒वींषि॑ ॥ 12
ये चे॒ह पि॒तरो॒ ये च॒ नेह यांश्च॑ वि॒द्म याँ उ॑ च॒ न प्र॑वि॒द्म ।
त्वं-वेँ॑त्थ॒ यति॒ ते जा॑तवेद-स्स्व॒धाभि॑र्य॒ज्ञं सुकृ॑त-ञ्जुषस्व ॥ 13
ये अ॑ग्निद॒ग्धा ये अन॑ग्निदग्धा॒ मध्ये॑ दि॒व-स्स्व॒धया॑ मा॒दय॑न्ते ।
तेभिः॑ स्व॒रालसु॑नीतिमे॒तां-यँ॑थाव॒श-न्त॒न्व॑-ङ्कल्पयस्व ॥ 14
ॐ शान्ति॒-श्शान्ति॒-श्शान्तिः॑ ।