dhyānam
umākānte ramākānte eṣāmāsī-nmatissamā |
namāmi dīkṣitendrāṃ stān nayaṣaṭka-viśāradām ||
vedhoharīśvarastutyāṃ vihartrīṃ vindhyabhūdhare |
haraprāṇeśvarīṃ vande hantrīṃ vibudhavidviṣām || 1 ||
abhyarthanena sarasīruhasambhavasya
tyaktvoditā bhagavadakṣipidhānalīlām |
viśveśvarī vipadapākamane purastāt
mātā mamāstu madhukaiṭabhayornihantrī || 2 ||
prāṅnirjareṣu nihatairnijaśaktileśaiḥ
ekībhavadbhiruditā'khilalokaguptyai |
sampannaśastranikarā ca tadāyudhasthaiḥ
mātā mamāstu mahiṣāntakarī purastāt || 3 ||
prāleyaśailatanayā tanukāntisampat
kośoditā kuvalayacchavicārudehā |
nārāyaṇī namadabhīpsitakalpavallī
suprītimāvahatu śumbhaniśumbhahantrī || 4 ||
viśveśvarīti mahiṣāntakarīti yasyāḥ
nārāyaṇītyapi ca nāmabhiraṅkitāni |
sūktāni paṅkajabhuvā ca surarṣibhiśca
dṛṣṭāni pāvakamukhaiśca śivāṃ bhaje tām || 5 ||
utpattidaityahananastavanātmakāni
saṃrakṣakāṇyakhilabhūtahitāya yasyāḥ |
sūktānyaśeṣanigamāntavidaḥ paṭhanti
tāṃ viśvamātaramajasramabhiṣṭavīmi || 6 ||
ye vaipracittapunarutthitaśumbhamukhyaiḥ
durbhikṣaghorasamayena ca kāritāsu |
āviṣkṛtāstrijagadārtiṣu rūpabhedāḥ
tairambikā samabhirakṣatu māṃ vipadbhyaḥ || 7 ||
sūktaṃ yadīyamaravindabhavādi dṛṣṭaṃ
āvartya devyanupadaṃ surathaḥ samādhiḥ |
dvāvapyavāpaturabhīṣṭamananyalabhyaṃ
tāmādidevataruṇīṃ praṇamāmi mūrdhnā || 8 ||
māhiṣmatītanubhavaṃ ca ruruṃ ca hantuṃ
āviṣkṛtairnijarasādavatārabhedaiḥ |
aṣṭādaśāhatanavāhatakoṭisaṅkhyaiḥ
ambā sadā samabhirakṣatu māṃ vipadbhyaḥ || 9 ||
etaccaritramakhilaṃ likhitaṃ hi yasyāḥ
sampūjitaṃ sadana eva niveśitaṃ vā |
durgaṃ ca tārayati dustaramapyaśeṣaṃ
śreyaḥ prayacchati ca sarvamumāṃ bhaje tām || 10 ||
yatpūjanastutinamaskṛtibhirbhavanti
prītāḥ pitāmaharameśaharāstrayo'pi |
teṣāmapi svakaguṇairdadatī vapūṃṣi
tāmīśvarasya taruṇīṃ śaraṇaṃ prapadye || 11 ||
kāntāramadhyadṛḍhalagnatayā'vasannāḥ
magnāśca vāridhijale ripubhiśca ruddhāḥ |
yasyāḥ prapadya caraṇau vipadastaranti
sā me sadā'stu hṛdi sarvajagatsavitrī || 12 ||
bandhe vadhe mahati mṛtyubhaye prasakte
vittakṣaye ca vividhe ya mahopatāpe |
yatpādapūjanamiha pratikāramāhuḥ
sā me samastajananī śaraṇaṃ bhavānī || 13 ||
bāṇāsuraprahitapannagabandhamokṣaḥ
tadbāhudarpadalanāduṣayā ca yogaḥ |
prādyumninā drutamalabhyata yatprasādāt
sā me śivā sakalamapyaśubhaṃ kṣiṇotu || 14 ||
pāpaḥ pulastyatanayaḥ punarutthito māṃ
adyāpi hartumayamāgata ityudītam |
yatsevanena bhayamindirayā'vadhūtaṃ
tāmādidevataruṇīṃ śaraṇaṃ gato'smi || 15 ||
yaddhyānajaṃ sukhamavāpyamanantapuṇyaiḥ
sākṣāttamacyuta parigrahamāśvavāpuḥ |
gopāṅganāḥ kila yadarcanapuṇyamātrāḥ
sā me sadā bhagavatī bhavatu prasannā || 16 ||
rātriṃ prapadya iti mantravidaḥ prapannān
udbodhya mṛtyuvadhimanyaphalaiḥ pralobhya |
buddhvā ca tadvimukhatāṃ pratanaṃ nayantīṃ
ākāśamādijananīṃ jagatāṃ bhaje tām || 17 ||
deśakāleṣu duṣṭeṣu durgācandrakalāstutiḥ |
sandhyayoranusandheyā sarvāpadvinivṛttaye || 18 ||
iti śrīmadapayyadīkṣitaviracitā durgācandrakalāstutiḥ ||