-(ṛ.ve.6.61)
i॒yam̭dadādrabha॒samṛ̭ṇa॒cyuta॒-ndivo᳚dāsaṃ-va~drya॒śvāya̭ dā॒śuṣe᳚ |
yā śaśva᳚ntamāca॒khaśadā᳚va॒sa-mpa॒ṇi-ntā te᳚ dā॒trāṇi̭ tavi॒ṣā sa̭rasvati || 1 ||
i॒yaṃ śuṣme᳚bhirbisa॒khā i̭vāruja॒tsānṷ girī॒ṇā-nta̭vi॒ṣebhi̭rū॒rmibhiḥ̭ |
pā॒rā॒va॒ta॒ghnīmava̭se suvṛ॒ktibhi̭ssara̭svatī॒ mā vi̭vāsema dhī॒tibhiḥ̭ || 2 ||
sara̭svati deva॒nido॒ ni ba̭rhaya pra॒jāṃ-vi~śva̭sya॒ bṛsa̭yasya mā॒yinaḥ̭ |
u॒ta kṣi॒tibhyo॒-'vanī᳚ravindo vi॒ṣame᳚bhyo asravo vājinīvati || 3 ||
praṇo᳚ de॒vī sara̭svatī॒ vāje᳚bhirvā॒jinī᳚vatī |
dhī॒nāma̭vi॒trya̭vatu || 4 ||
yastvā᳚ devi sarasvatyupabrū॒te dhane᳚ hi॒te |
indra॒-nna vṛ̭tra॒tūrye᳚ || 5 ||
tva-nde᳚vi sarasva॒tyavā॒ vāje᳚ṣu vājini |
radā᳚ pū॒ṣeva̭ na-ssa॒nim || 6 ||
u॒ta syā na॒-ssara̭svatī gho॒rā hira᳚ṇyavartaniḥ |
vṛ॒tra॒ghnī va̭ṣṭi suṣṭu॒tim || 7 ||
yasyā᳚ ana॒nto ahrṷtastve॒ṣaśca̭ri॒ṣṇura᳚rṇa॒vaḥ |
ama॒ścara̭ti॒ rorṷvat || 8 ||
sā no॒ viśvā॒ ati॒ dviṣa॒-ssvasṝ᳚ra॒nyā ṛ॒tāva̭rī |
ata॒nnahe᳚va॒ sūryaḥ̭ || 9 ||
u॒ta naḥ̭ pri॒yā pri॒yāsṷ sa॒ptasva̭sā॒ sujṷṣṭā |
sara̭svatī॒ stomyā᳚ bhūt || 10 ||
ā॒pa॒pruṣī॒ pārthi̭vānyu॒ru rajo᳚ a॒ntari̭kṣam |
sara̭svatī ni॒daspā᳚tu || 11 ||
tri॒ṣa॒dhasthā᳚ sa॒ptadhā᳚tuḥ॒ pañca̭ jā॒tā va॒rdhaya᳚ntī |
vāje᳚vāje॒ havyā᳚ bhūt || 12 ||
pra yā ma̭hi॒mnā ma॒hinā᳚su॒ ceki̭te dyu॒mnebhi̭ra॒nyā a॒pasā᳚ma॒pasta̭mā |
ratha̭ iva bṛha॒tī vi॒bhvane᳚ kṛ॒topa॒stutyā᳚ ciki॒tuṣā॒ sara̭svatī || 13 ||
sara̭svatya॒bhi no᳚ neṣi॒ vasyo॒ māpa̭ spharīḥ॒ paya̭sā॒ mā na॒ ā dha̭k |
ju॒ṣasva̭ na-ssa॒khyā ve॒śyā᳚ ca॒ mā tva-tkṣetrā॒ṇyara̭ṇāni ganma || 14 ||
–(ṛ.ve.7.95)
pra kṣoda̭sā॒ dhāya̭sā sasra e॒ṣā sara̭svatī dha॒ruṇa॒māya̭sī॒ pūḥ |
pra॒bāba̭dhānā ra॒thye᳚va yāti॒ viśvā᳚ a॒po ma̭hi॒nā sindhṷra॒nyāḥ || 15 ||
ekā᳚ceta॒tsara̭svatī na॒dīnāṃ॒ śuci᳚rya॒tī gi॒ribhya॒ ā sa̭mu॒drāt |
rā॒yaśceta᳚ntī॒ bhuva̭nasya॒ bhūre᳚rghṛ॒ta-mpayo᳚ duduhe॒ nāhṷṣāya || 16 ||
sa vā᳚vṛdhe॒ naryo॒ yoṣa̭ṇāsu॒ vṛṣā॒ śiśu᳚rvṛṣa॒bho ya॒jñiyā᳚su |
sa vā॒jina᳚-mma॒ghava̭dbhyo dadhāti॒ vi sā॒taye᳚ ta॒nva᳚-mmāmṛjīta || 17 ||
u॒ta syā na॒-ssara̭svatī juṣā॒ṇopa̭ śravatsu॒bhagā᳚ ya॒jñe a॒sminn |
mi॒tajñṷbhirnama॒syai᳚riyā॒nā rā॒yā yu॒jā ci॒dutta̭rā॒ sakhi̭bhyaḥ || 18 ||
i॒mā juhvā᳚nā yu॒ṣmadā namo᳚bhiḥ॒ prati॒ stomaṃ᳚ sarasvati juṣasva |
tava॒ śarma᳚npri॒yata̭me॒ dadhā᳚nā॒ upa̭ stheyāma śara॒ṇa-nna vṛ॒kṣam || 19 ||
a॒yamṷ te sarasvati॒ vasi̭ṣṭho॒ dvārā᳚vṛ॒tasya̭ subhage॒ vyā᳚vaḥ |
vardha̭ śubhre stuva॒te rā᳚si॒ vājā̭nyū॒ya-mpā᳚ta sva॒stibhi॒-ssadā᳚ naḥ || 20 ||
(ṛ.ve.7.96)
bṛ॒hadṷ gāyiṣe॒ vaco᳚-'su॒ryā᳚ na॒dīnā᳚m |
sara̭svatī॒minma̭hayā suvṛ॒ktibhi॒sstomai᳚rvasiṣṭha॒ roda̭sī || 21 ||
u॒bhe yatte᳚ mahi॒nā śṷbhre॒ andha̭sī adhikṣi॒yanti̭ pū॒ravaḥ̭ |
sā no᳚ bodhyavi॒trī ma॒rutsa̭khā॒ coda॒ rādho᳚ ma॒ghonā᳚m || 22 ||
bha॒dramidbha॒drā kṛ̭ṇava॒tsara̭sva॒tyaka̭vārī cetati vā॒jinī᳚vatī |
gṛ॒ṇā॒nā ja̭madagni॒vatstṷvā॒nā ca̭ vasiṣṭha॒vat || 23 ||
ja॒nī॒yanto॒ nvagra̭vaḥ putrī॒yantaḥ̭ su॒dāna̭vaḥ |
sara̭svantaṃ havāmahe || 24 ||
ye te᳚ sarasva ū॒rmayo॒ madhṷmanto ghṛta॒ścutaḥ̭ |
tebhi᳚rno-'vi॒tā bha॒va || 25 ||
pī॒pi॒vāṃsaṃ॒ sara̭svata॒-sstanaṃ॒-yo~ vi॒śvada̭rśataḥ |
bha॒kṣī॒mahi̭ pra॒jāmiṣam᳚ || 26 ||
(ṛ.ve.2.41.16)
ambi̭tame॒ nadī᳚tame॒ devi̭tame॒ sara̭svati |
a॒pra॒śa॒stā i̭va smasi॒ praśa̭stimamba naskṛdhi || 27 ||
tve viśvā᳚ sarasvati śri॒tāyūṃ᳚ṣi de॒vyām |
śu॒naho᳚treṣu matsva pra॒jā-nde᳚vi didiḍḍhi naḥ || 28 ||
i॒mā brahma̭ sarasvati ju॒ṣasva̭ vājinīvati |
yā te॒ manma̭ gṛtsama॒dā ṛ̭tāvari pri॒yā de॒veṣu॒ juhva̭ti || 29 ||
(ṛ.ve.1.3.10)
pā॒va॒kā na॒-ssara̭svatī॒ vāje᳚bhirvā॒jinī᳚vatī |
ya॒jñaṃ-va~̭ṣṭu dhi॒yāva̭suḥ || 30 ||
co॒da॒yi॒trī sū॒nṛtā᳚nā॒-ñceta᳚ntī sumatī॒nām |
ya॒jña-nda̭dhe॒ sara̭svatī || 31 ||
ma॒ho arṇa॒-ssara̭svatī॒ pra ce᳚tayati ke॒tunā᳚ |
dhiyo॒ viśvā॒ vi rā᳚jati || 32 ||
(ṛ.ve.10.17.7)
sara̭svatī-ndeva॒yanto᳚ havante॒ sara̭svatīmadhva॒re tā॒yamā᳚ne |
sara̭svatīṃ su॒kṛto᳚ ahvayanta॒ sara̭svatī dā॒śuṣe॒ vārya᳚-ndāt || 33 ||
sara̭svati॒ yā sa॒rathaṃ᳚-ya~॒yātha̭ sva॒dhābhi̭rdevi pi॒tṛbhi॒rmada᳚ntī |
ā॒sadyā॒sminba॒rhiṣi̭ mādayasvānamī॒vā iṣa॒ ā dhe᳚hya॒sme || 34 ||
sara̭svatīṃ॒-yā~-mpi॒taro॒ hava᳚nte dakṣi॒ṇā ya॒jñama̭bhi॒nakṣa̭māṇāḥ |
sa॒ha॒srā॒rghami॒lo atra̭ bhā॒gaṃ rā॒yaspoṣaṃ॒-ya~ja̭māneṣu dhehi || 35 ||
(ṛ.ve.5.43.11)
ā no᳚ di॒vo bṛ̭ha॒taḥ parva̭tā॒dā sara̭svatī yaja॒tā ga᳚ntu ya॒jñam |
hava᳚-nde॒vī jṷjuṣā॒ṇā ghṛ॒tācī᳚ śa॒gmā-nno॒ vāca̭muśa॒tī śṛ̭ṇotu || 36 ||
(ṛ.ve.2.32.4)
rā॒kāma॒haṃ su॒havāṃ᳚ suṣṭu॒tī hṷve śṛ॒ṇotṷ na-ssu॒bhagā॒ bodha̭tu॒ tmanā᳚ |
sīvya॒tvapaḥ̭ sū॒cyācchi̭dyamānayā॒ dadā᳚tu vī॒raṃ śa॒tadā᳚yamu॒kthyam᳚ || 37 ||
yāste᳚ rāke suma॒tayaḥ̭ su॒peśa̭so॒ yābhi॒rdadā᳚si dā॒śuṣe॒ vasū᳚ni |
tābhi᳚rno a॒dya su॒manā᳚ u॒pāga̭hi sahasrapo॒ṣaṃ sṷbhage॒ rarā᳚ṇā || 38 ||
sinī᳚vāli॒ pṛthṷṣṭuke॒ yā de॒vānā॒masi॒ svasā᳚ |
ju॒ṣasva̭ ha॒vyamāhṷta-mpra॒jā-nde᳚vi didiḍḍhi naḥ || 39 ||
yā sṷbā॒hu-ssva᳚ṅgu॒ri-ssu॒ṣūmā᳚ bahu॒sūva̭rī |
tasyai᳚ vi॒śpatnyai᳚ ha॒vi-ssi̭nīvā॒lyai jṷhotana || 40 ||
yā gu॒ṅgūryā si̭nīvā॒lī yā rā॒kā yā sara̭svatī |
i॒ndrā॒ṇīma̭hva ū॒taye᳚ varuṇā॒nīṃ sva॒staye᳚ || 41 ||
oṃ śānti॒-śśānti॒-śśāntiḥ̭ ||