(śrīmadbhāgavataṃ 6.16.34-48)
citraketuruvāca |
ajita jitaḥ samamatibhiḥ sādhubhi-
rbhavān jitātmabhirbhavatā |
vijitāste'pi ca bhajatāmakāmātmanāṃ
ya ātmado'tikaruṇaḥ || 34 ||
tava vibhavaḥ khalu bhagavan
jagadudayasthitilayādīni |
viśvasṛjasteṃ'śāṃśāstatra
mṛṣā spardhante pṛthagabhimatyā || 35 ||
paramāṇuparamamahatostva-
mādyantāntaravartī trayavidhuraḥ |
ādāvante'pi ca sattvānāṃ
yaddhruvaṃ tadevāntarāle'pi || 36 ||
kṣityādibhireṣa kilāvṛtaḥ
saptabhirdaśaguṇottarairaṇḍakośaḥ |
yatra patatyaṇukalpaḥ
sahāṇḍakoṭikoṭibhistadanantaḥ || 37 ||
viṣayatṛṣo narapaśavo
ya upāsate vibhūtīrna paraṃ tvām |
teṣāmāśiṣa īśa tadanu
vinaśyanti yathā rājakulam || 38 ||
kāmadhiyastvayi racitā
na parama rohanti yathā karambhabījāni |
jñānātmanyaguṇamaye
guṇagaṇato'sya dvandvajālāni || 39 ||
jitamajita tadā bhavatā
yadāha bhāgavataṃ dharmamanavadyam |
niṣkiñcanā ye munaya ātmārāmā
yamupāsate'pavargāya || 40 ||
viṣamamatirna yatra nṛṇāṃ
tvamahamiti mama taveti ca yadanyatra |
viṣamadhiyā racito yaḥ
sa hyaviśuddhaḥ kṣayiṣṇuradharmabahulaḥ || 41 ||
kaḥ kṣemo nijaparayoḥ
kiyānarthaḥ svaparadruhā dharmeṇa |
svadrohāttava kopaḥ
parasampīḍayā ca tathādharmaḥ || 42 ||
na vyabhicarati tavekṣā yayā
hyabhihito bhāgavato dharmaḥ |
sthiracarasattvakadambeṣvapṛthagdhiyo
yamupāsate tvāryāḥ || 43 ||
na hi bhagavannaghaṭitamidaṃ
tvaddarśanānnṛṇāmakhilapāpakṣayaḥ |
yannāma sakṛcchravaṇātpulkasako'pi
vimucyate saṃsārāt || 44 ||
atha bhagavan vayamadhunā
tvadavalokaparimṛṣṭāśayamalāḥ |
suraṛṣiṇā yaduditaṃ tāvakena
kathamanyathā bhavati || 45 ||
viditamananta samastaṃ tava
jagadātmano janairihācaritam |
vijñāpyaṃ paramaguroḥ kiyadiva
savituriva khadyotaiḥ || 46 ||
namastubhyaṃ bhagavate sakalajaga-
tsthitilayodayeśāya |
duravasitātmagataye
kuyogināṃ bhidā paramahaṃsāya || 47 ||
yaṃ vai śvasantamanu viśvasṛjaḥ śvasanti
yaṃ cekitānamanu cittaya uccakanti |
bhūmaṇḍalaṃ sarṣapāyati yasya mūrdhni
tasmai namo bhagavate'stu sahasramūrdhne || 48 ||
|| iti śrīmadbhāgavatamahāpurāṇe ṣaṣṭhaskandhe ṣoḍaśādhyāyāntargataṃ citraketukṛtaṃ anantastotram ||