gururguṇavaro goptā gocaro gopatipriyaḥ |
guṇī guṇavatāṃ śreṣṭho gurūṇāṃ gururavyayaḥ || 1 ||
jetā jayanto jayado jīvo'nanto jayāvahaḥ |
āṅgīraso'dhvarāsakto vivikto'dhvarakṛtparaḥ || 2 ||
vācaspatirvaśī vaśyo variṣṭho vāgvicakṣaṇaḥ |
cittaśuddhikaraḥ śrīmān caitraḥ citraśikhaṇḍijaḥ || 3 ||
bṛhadratho bṛhadbhānurbṛhaspatirabhīṣṭadaḥ |
surācāryaḥ surārādhyaḥ surakāryahitaṅkaraḥ || 4 ||
gīrvāṇapoṣako dhanyo gīṣpatirgiriśo'naghaḥ |
dhīvaro dhiṣaṇo divyabhūṣaṇo devapūjitaḥ || 5 ||
dhanurdharo daityahantā dayāsāro dayākaraḥ |
dāridryanāśako dhanyo dakṣiṇāyanasambhavaḥ || 6 ||
dhanurmīnādhipo devo dhanurbāṇadharo hariḥ |
āṅgīrasābjasañjātaḥ āṅgīrasakulodbhavaḥ || 7 ||
sindhudeśādhipo dhīmān svarṇavarṇaścaturbhujaḥ |
hemāṅgado hemavapurhemabhūṣaṇabhūṣitaḥ || 8 ||
puṣyanāthaḥ puṣyarāgamaṇimaṇḍalamaṇḍitaḥ |
kāśapuṣpasamānābhaḥ kalidoṣanivārakaḥ || 9 ||
indrādidevodeveśo devatābhīṣṭadāyakaḥ |
asamānabalaḥ sattvaguṇasampadvibhāsuraḥ || 10 ||
bhūsurābhīṣṭado bhūriyaśaḥ puṇyavivardhanaḥ |
dharmarūpo dhanādhyakṣo dhanado dharmapālanaḥ || 11 ||
sarvavedārthatattvajñaḥ sarvāpadvinivārakaḥ |
sarvapāpapraśamanaḥ svamatānugatāmaraḥ || 12 ||
ṛgvedapārago ṛkṣarāśimārgapracārakaḥ |
sadānandaḥ satyasandhaḥ satyasaṅkalpamānasaḥ || 13 ||
sarvāgamajñaḥ sarvajñaḥ sarvavedāntavidvaraḥ |
brahmaputro brāhmaṇeśo brahmavidyāviśāradaḥ || 14 ||
samānādhikanirmuktaḥ sarvalokavaśaṃvadaḥ |
sasurāsuragandharvavanditaḥ satyabhāṣaṇaḥ || 15 ||
namaḥ surendravandyāya devācāryāya te namaḥ |
namaste'nantasāmarthya vedasiddhāntapāragaḥ || 16 ||
sadānanda namaste'stu namaḥ pīḍāharāya ca |
namo vācaspate tubhyaṃ namaste pītavāsase || 17 ||
namo'dvitīyarūpāya lambakūrcāya te namaḥ |
namaḥ prahṛṣṭanetrāya viprāṇāṃ pataye namaḥ || 18 ||
namo bhārgavaśiṣyāya vipannahitakāriṇe |
namaste surasainyānāṃ vipattitrāṇahetave || 19 ||
bṛhaspatiḥ surācāryo dayāvān śubhalakṣaṇaḥ |
lokatrayaguruḥ śrīmān sarvagaḥ sarvatovibhuḥ || 20 ||
sarveśaḥ sarvadātuṣṭaḥ sarvadaḥ sarvapūjitaḥ |
akrodhano muniśreṣṭho nītikartā jagatpitā || 21 ||
viśvātmā viśvakartā ca viśvayonirayonijaḥ |
bhūrbhuvodhanadātā ca bhartājīvo mahābalaḥ || 22 ||
bṛhaspatiḥ kāśyapeyo dayāvān śubhalakṣaṇaḥ |
abhīṣṭaphaladaḥ śrīmān śubhagraha namo'stu te || 23 ||
bṛhaspatiḥ surācāryo devāsurasupūjitaḥ |
ācāryodānavāriśca suramantrī purohitaḥ || 24 ||
kālajñaḥ kālṛgvettā cittagaśca prajāpatiḥ |
viṣṇuḥ kṛṣṇaḥ sadāsūkṣmaḥ pratidevojjvalagrahaḥ || 25 ||
iti śrī bṛhaspati aṣṭottaraśatanāma stotram |