5.5 Sundarakanda - Panchama Sargah

ॐ

5.5 ஸுந்தரகாண்ட - பஞ்சம ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத பஞ்சமஸ்ஸர்கஃ ।

ததஃ ஸ மத்யங்கதமம்ஶுமந்தம் ஜ்யோத்ஸ்நாவிதாநம் மஹதுத்வமந்தம் ।

ததர்ஶ தீமாந் திவி பாநுமந்தம் கோஷ்டே வ்ரு'ஷம் மத்தமிவ ப்ரமந்தம் ॥ 1 ॥

லோகஸ்ய பாபாநி விநாஶயந்தம் மஹோததிம் சாபி ஸமேதயந்தம் ।

பூதாநி ஸர்வாணி விராஜயந்தம் ததர்ஶ ஶீதாம்ஶுமதாபியாந்தம் ॥ 2 ॥

யா பாதி லக்ஷ்மீர்புவி மந்தரஸ்தா ததா ப்ரதோஷேஷு ச ஸாகரஸ்தா ।

ததைவ தோயேஷு ச புஷ்கரஸ்தா ரராஜ ஸா சாருநிஶாகரஸ்தா ॥ 3 ॥

ஹம்ஸோ யதா ராஜதபஞ்ஜரஸ்தஃ ஸிம்ஹோ யதா மந்தரகந்தரஸ்தஃ ।

வீரோ யதா கர்விதகுஞ்ஜரஸ்த சந்த்ரோऽபி பப்ராஜ ததாம்பரஸ்தஃ ॥ 4 ॥

ஸ்திதஃ ககுத்மாநிவ தீக்ஷ்ணஶ்ரு'ங்கோ மஹாசலஃ ஶ்வேத இவோச்சஶ்ரு'ங்கஃ ।

ஹஸ்தீவ ஜாம்பூநதபத்தஶ்ரு'ங்கோ ரராஜ சந்த்ரஃ பரிபூர்ணஶ்ரு'ங்கஃ ॥ 5 ॥

விநஷ்டஶீதாம்புதுஷாரபங்கோ மஹாக்ரஹக்ராஹவிநஷ்டபங்கஃ ।

ப்ரகாஶலக்ஷ்ம்யாஶ்ரயநிர்மலாங்கஃ ரராஜ சந்த்ரோ பகவாந் ஶஶாங்கஃ ॥ 6 ॥

ஶிலாதலம் ப்ராப்ய யதா ம்ரு'கேந்த்ரோ மஹாரணம் ப்ராப்ய யதா கஜேந்த்ரஃ ।

ராஜ்யம் ஸமாஸாத்ய யதா நரேந்த்ர ஸ்ததாப்ரகாஶோ விரராஜ சந்த்ரஃ ॥ 7 ॥

ப்ரகாஶசந்த்ரோதயநஷ்டதோஷஃ ப்ரவ்ரு'த்தரக்ஷஃ பிஶிதாஶதோஷஃ ।

ராமாபிராமேரிதசித்ததோஷஃ ஸ்வர்கப்ரகாஶோ பகவாந் ப்ரதோஷஃ ॥ 8 ॥

தந்த்ரீஸ்வநாஃ கர்ணஸுகாஃ ப்ரவ்ரு'த்தாஃ ஸ்வபந்தி நார்யஃ பதிபிஃ ஸுவ்ரு'த்தாஃ ।

நக்தஞ்சராஶ்சாபி ததா ப்ரவ்ரு'த்தாஃ விஹர்துமத்யத்புதரௌத்ரவ்ரு'த்தாஃ ॥ 9 ॥

மத்தப்ரமத்தாநி ஸமாகுலாநி ரதாஶ்வபத்ராஸநஸங்குலாநி ।

வீரஶ்ரியா சாபி ஸமாகுலாநி ததர்ஶ தீமாந் ஸ கபிஃ குலாநி ॥ 10 ॥

பரஸ்பரம் சாதிகமாக்ஷிபந்தி புஜாம்ஶ்ச பீநாநதிகம் க்ஷிபந்தி ।

மத்தப்ரலாபாநதிகம் க்ஷிபந்தி மத்தாநி சாந்யோந்யமதிக்ஷிபந்தி ॥ 11 ॥

ரக்ஷாம்ஸி வக்ஷாம்ஸி ச விக்ஷிபந்தி காத்ராணி காந்தாஸு ச விக்ஷிபந்தி ।

ரூபாணி சித்ராணி ச விக்ஷிபந்தி த்ரு'டாநி சாபாநி ச விக்ஷிபந்தி ॥ 12 ॥

ததர்ஶ காந்தாஶ்ச ஸமாலபந்த்ய ஸ்ததா பராஸ்தத்ர புநஃ ஸ்வபந்த்யஃ ।

ஸுரூபவக்த்ராஶ்ச ததா ஹஸந்த்யஃ க்ருத்தாஃ பராஶ்சாபி விநிஃஶ்வஸந்த்ய ॥ 13 ॥

மஹாகஜைஶ்சாபி ததா நதத்பிஃ ஸுபூஜிதைஶ்சாபி ததா ஸுஸத்பிஃ ।

ரராஜ வீரைஶ்ச விநிஃஶ்வஸத்பிஃ ஹ்ரதோ புஜங்கைரிவ நிஃஶ்வஸத்பிஃ ॥ 14 ॥

புத்திப்ரதாநாந் ருசிராபிதாநாந் ஸம்ஶ்ரத்ததாநாந் ஜகதஃ ப்ரதாநாந் ।

நாநாவிதாநாந் ருசிராபிதாநாந் ததர்ஶ தஸ்யாம் புரி யாதுதாநாந் ॥ 15 ॥

நநந்த த்ரு'ஷ்ட்வா ஸ ச தாந் ஸுரூபாந்நாநாகுணாநாத்மகுணாநுரூபாந் ।

வித்யோதமாநாந்ஸ ததாநுரூபாந் ததர்ஶ காம்ஶ்சிச்ச புநர்விரூபாந் ॥ 16 ॥

ததோ வரார்ஹாஃ ஸுவிஶுத்தபாவா ஸ்தேஷாம் ஸ்த்ரியஸ்தத்ர மஹாநுபாவாஃ ।

ப்ரியேஷு பாநேஷு ச ஸக்தபாவா ததர்ஶ தாரா இவ ஸுப்ரபாவாஃ ॥ 17 ॥

ஶ்ரியா ஜ்வலந்தீஸ்த்ரபயோபகூடா நிஶீதகாலே ரமணோபகூடாஃ ।

ததர்ஶ காஶ்சித்ப்ரமதோபகூடா யதா விஹங்காஃ குஸுமோபகூடாஃ ॥ 18 ॥

அந்யாஃ புநர்ஹர்ம்யதலோபவிஷ்டா ஸ்தத்ர ப்ரியாங்கேஷு ஸுகோபவிஷ்டாஃ ।

பர்துஃ ப்ரியா தர்மபரா நிவிஷ்டா ததர்ஶ தீமாந் மதநாபிவிஷ்டாஃ ॥ 19 ॥

அப்ராவ்ரு'தாஃ காஞ்சநராஜிவர்ணாஃ காஶ்சித்பரார்த்யாஸ்தபநீயவர்ணாஃ ।

புநஶ்ச காஶ்சிச்சஶலக்ஷ்மவர்ணாஃ காந்தப்ரஹீணா ருசிராங்கவர்ணாஃ ॥ 20 ॥

ததஃ ப்ரியாந் ப்ராப்ய மநோபிராமாஃ ஸுப்ரீதியுக்தாஃ ப்ரஸமீக்ஷ்யராமாஃ ।

க்ரு'ஹேஷு ஹ்ரு'ஷ்டாஃ பரமாபிராமாஃ ஹரிப்ரவீரஃ ஸ ததர்ஶ ராமாஃ ॥ 21 ॥

சந்த்ரப்ரகாஶாஶ்ச ஹி வக்த்ரமாலாஃ வக்ராக்ஷிபக்ஷ்மாஶ்ச ஸுநேத்ரமாலாஃ ।

விபூஷணாநாம் ச ததர்ஶ மாலாஃ ஶதஹ்ரதாநாமிவ சாருமாலாஃ ॥ 22 ॥

ந த்வேவ ஸீதாம் பரமாபிஜாதாம் பதி ஸ்திதே ராஜகுலே ப்ரஜாதாம் ।

லதாம் ப்ரபுல்லாமிவ ஸாது ஜாதாம் ததர்ஶ தந்வீம் மநஸாபிஜாதாம் ॥ 23 ॥

ஸநாதநே வர்த்மநி ஸந்நிவிஷ்டாம் ராமேக்ஷணாம் தாம் மதநாபிவிஷ்டாம் ।

பர்துர்மநஃ ஶ்ரீமதநுப்ரவிஷ்டாம் ஸ்த்ரீப்யோ வராப்யஶ்ச ஸதா விஶிஷ்டாம் ॥ 24 ॥

உஷ்ணார்திதாம் ஸாநுஸ்ரு'தாஸ்ரகண்டீம் புரா வரார்ஹோத்தமநிஷ்ககண்டீம் ।

ஸுஜாதபக்ஷ்மாமபிரக்தகண்டீம் வநேऽப்ரவ்ரு'த்தாமிவ நீலகண்டீம் ॥ 25 ॥

அவ்யக்தரேகாமிவ சந்த்ரரேகாம் பாம்ஸுப்ரதிக்தாமிவ ஹேமரேகாம் ।

க்ஷதப்ரரூடாமிவ பாணரேகாம் வாயுப்ரபிந்நாமிவ மேகரேகாம் ॥ 26 ॥

ஸீதாமபஶ்யந் மநுஜேஶ்வரஸ்ய ராமஸ்ய பத்நீம் வததாம் வரஸ்ய ।

பபூவ துஃகாபிஹதஶ்சிரஸ்ய ப்லவங்கமோ மந்த இவாசிரஸ்ய ॥ 27 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே பஞ்சமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha pañcamassargaḥ |

tataḥ sa madhyaṅgatamaṃśumantaṃ jyotsnāvitānaṃ mahadudvamantam |

dadarśa dhīmān divi bhānumantaṃ goṣṭhe vṛṣaṃ mattamiva bhramantam || 1 ||

lokasya pāpāni vināśayantaṃ mahodadhiṃ cāpi samedhayantam |

bhūtāni sarvāṇi virājayantaṃ dadarśa śītāṃśumathābhiyāntam || 2 ||

yā bhāti lakṣmīrbhuvi mandarasthā tathā pradoṣeṣu ca sāgarasthā |

tathaiva toyeṣu ca puṣkarasthā rarāja sā cāruniśākarasthā || 3 ||

haṃso yathā rājatapañjarasthaḥ siṃho yathā mandarakandarasthaḥ |

vīro yathā garvitakuñjarastha candro'pi babhrāja tathāmbarasthaḥ || 4 ||

sthitaḥ kakudmāniva tīkṣṇaśṛṅgo mahācalaḥ śveta ivoccaśṛṅgaḥ |

hastīva jāmbūnadabaddhaśṛṅgo rarāja candraḥ paripūrṇaśṛṅgaḥ || 5 ||

vinaṣṭaśītāmbutuṣārapaṅko mahāgrahagrāhavinaṣṭapaṅkaḥ |

prakāśalakṣmyāśrayanirmalāṅkaḥ rarāja candro bhagavān śaśāṅkaḥ || 6 ||

śilātalaṃ prāpya yathā mṛgendro mahāraṇaṃ prāpya yathā gajendraḥ |

rājyaṃ samāsādya yathā narendra stathāprakāśo virarāja candraḥ || 7 ||

prakāśacandrodayanaṣṭadoṣaḥ pravṛttarakṣaḥ piśitāśadoṣaḥ |

rāmābhirāmeritacittadoṣaḥ svargaprakāśo bhagavān pradoṣaḥ || 8 ||

tantrīsvanāḥ karṇasukhāḥ pravṛttāḥ svapanti nāryaḥ patibhiḥ suvṛttāḥ |

naktañcarāścāpi tathā pravṛttāḥ vihartumatyadbhutaraudravṛttāḥ || 9 ||

mattapramattāni samākulāni rathāśvabhadrāsanasaṅkulāni |

vīraśriyā cāpi samākulāni dadarśa dhīmān sa kapiḥ kulāni || 10 ||

parasparaṃ cādhikamākṣipanti bhujāṃśca pīnānadhikaṃ kṣipanti |

mattapralāpānadhikaṃ kṣipanti mattāni cānyonyamadhikṣipanti || 11 ||

rakṣāṃsi vakṣāṃsi ca vikṣipanti gātrāṇi kāntāsu ca vikṣipanti |

rūpāṇi citrāṇi ca vikṣipanti dṛḍhāni cāpāni ca vikṣipanti || 12 ||

dadarśa kāntāśca samālabhantya stathā parāstatra punaḥ svapantyaḥ |

surūpavaktrāśca tathā hasantyaḥ kruddhāḥ parāścāpi viniḥśvasantya || 13 ||

mahāgajaiścāpi tathā nadadbhiḥ supūjitaiścāpi tathā susadbhiḥ |

rarāja vīraiśca viniḥśvasadbhiḥ hrado bhujaṅgairiva niḥśvasadbhiḥ || 14 ||

buddhipradhānān rucirābhidhānān saṃśraddhadhānān jagataḥ pradhānān |

nānāvidhānān rucirābhidhānān dadarśa tasyāṃ puri yātudhānān || 15 ||

nananda dṛṣṭvā sa ca tān surūpānnānāguṇānātmaguṇānurūpān |

vidyotamānānsa tadānurūpān dadarśa kāṃścicca punarvirūpān || 16 ||

tato varārhāḥ suviśuddhabhāvā steṣāṃ striyastatra mahānubhāvāḥ |

priyeṣu pāneṣu ca saktabhāvā dadarśa tārā iva suprabhāvāḥ || 17 ||

śriyā jvalantīstrapayopagūḍhā niśīthakāle ramaṇopagūḍhāḥ |

dadarśa kāścitpramadopagūḍhā yathā vihaṅgāḥ kusumopagūḍhāḥ || 18 ||

anyāḥ punarharmyatalopaviṣṭā statra priyāṅkeṣu sukhopaviṣṭāḥ |

bhartuḥ priyā dharmaparā niviṣṭā dadarśa dhīmān madanābhiviṣṭāḥ || 19 ||

aprāvṛtāḥ kāñcanarājivarṇāḥ kāścitparārthyāstapanīyavarṇāḥ |

punaśca kāścicchaśalakṣmavarṇāḥ kāntaprahīṇā rucirāṅgavarṇāḥ || 20 ||

tataḥ priyān prāpya manobhirāmāḥ suprītiyuktāḥ prasamīkṣyarāmāḥ |

gṛheṣu hṛṣṭāḥ paramābhirāmāḥ haripravīraḥ sa dadarśa rāmāḥ || 21 ||

candraprakāśāśca hi vaktramālāḥ vakrākṣipakṣmāśca sunetramālāḥ |

vibhūṣaṇānāṃ ca dadarśa mālāḥ śatahradānāmiva cārumālāḥ || 22 ||

na tveva sītāṃ paramābhijātāṃ pathi sthite rājakule prajātām |

latāṃ prapullāmiva sādhu jātāṃ dadarśa tanvīṃ manasābhijātām || 23 ||

sanātane vartmani sanniviṣṭāṃ rāmekṣaṇāṃ tāṃ madanābhiviṣṭām |

bharturmanaḥ śrīmadanupraviṣṭāṃ strībhyo varābhyaśca sadā viśiṣṭām || 24 ||

uṣṇārditāṃ sānusṛtāsrakaṇṭhīṃ purā varārhottamaniṣkakaṇṭhīm |

sujātapakṣmāmabhiraktakaṇṭhīṃ vane'pravṛttāmiva nīlakaṇṭhīm || 25 ||

avyaktarekhāmiva candrarekhāṃ pāṃsupradigdhāmiva hemarekhām |

kṣataprarūḍhāmiva bāṇarekhāṃ vāyuprabhinnāmiva megharekhām || 26 ||

sītāmapaśyan manujeśvarasya rāmasya patnīṃ vadatāṃ varasya |

babhūva duḥkhābhihataścirasya plavaṅgamo manda ivācirasya || 27 ||

ityārṣe śrīmadrāmāyaṇe vālmīkīya ādikāvye sundarakāṇḍe pañcamassargaḥ ||