5.43 Sundarakanda - Trichatvarimsha Sargah

ॐ

5.43 ஸுந்தரகாண்ட - த்ரிசத்வாரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத த்ரிசத்வாரிம்ஶஸ்ஸர்கஃ ।

ததஸ்ஸ கிங்கராந்ஹத்வா ஹநுமாந்த்யாநமாஸ்திதஃ ।

வநம் பக்நம் மயா சைத்யப்ராஸாதோ ந விநாஶிதஃ ॥ 1 ॥

தஸ்மாத்ப்ராஸாதமப்யேவம் பீமம் வித்வம்ஸயாம்யஹம் ।

இதி ஸஞ்சிந்த்ய மநஸா ஹநுமாந்தர்ஶயந்பலம் ॥ 2 ॥

சைத்யப்ராஸாதமாப்லுத்ய மேருஶ்ரு'ங்கமிவோந்நதம் ।

ஆருரோஹ கபிஶ்ரேஷ்டோ ஹநுமாந்மாருதாத்மஜஃ ॥ 3 ॥

ஆருஹ்ய கிரிஸங்காஶம் ப்ராஸாதம் ஹரியூதபஃ ।

பபௌ ஸ ஸுமஹாதேஜாஃ ப்ரதிஸூர்ய இவோதிதஃ ॥ 4 ॥

ஸம்ப்ரத்ரு'ஷ்ய ச துர்தர்ஷம் சைத்யப்ராஸாதமுத்தமம் ।

ஹநுமாந்ப்ரஜ்வலந்லக்ஷ்ம்யா பாரியாத்ரோபமோऽபவத் ॥ 5 ॥

ஸ பூத்வா ஸுமஹாகாயஃ ப்ரபாவாந்மாருதாத்மஜஃ ।

த்ரு'ஷ்டமாஸ்போடயாமாஸ லங்காம் ஶப்தேந பூரயந் ॥ 6 ॥

தஸ்யாஸ்போடிதஶப்தேந மஹதா ஶ்ரோத்ரகாதிநா ।

பேதுர்விஹங்கமாஸ்தத்ர சைத்யபாலாஶ்ச மோஹிதாஃ ॥ 7 ॥

அஸ்த்ரவிஜ்ஜயதாம் ராமோ லக்ஷ்மணஶ்ச மஹாபலஃ ।

ராஜா ஜயதி ஸுக்ரீவோ ராகவேணாபிபாலிதஃ ॥ 8 ॥

தாஸோऽஹம் கோஸலேந்த்ரஸ்ய ராமஸ்யாக்லிஷ்டகர்மணஃ ।

ஹநுமாந்ஶத்ருஸைந்யாநாம் நிஹந்தா மாருதாத்மஜஃ ॥ 9 ॥

ந ராவணஸஹஸ்ரம் மே யுத்தே ப்ரதிபலம் பவேத் ।

ஶிலாபிஸ்து ப்ரஹரதஃ பாதபைஶ்ச ஸஹஸ்ரஶஃ ॥ 10 ॥

அர்தயித்வா புரீம் லங்காமபிவாத்ய ச மைதிலீம் ।

ஸம்ரு'த்தார்தோ கமிஷ்யாமி மிஷதாம் ஸர்வரக்ஷஸாம் ॥ 11 ॥

ஏவமுக்த்வா விமாநஸ்தஶ்சைத்யஸ்தாந்ஹரியூதபஃ ।

நநாத பீமநிர்ஹ்ராதோ ரக்ஷஸாம் ஜநயந்பயம் ॥ 12 ॥

தேந ஶப்தேந மஹதா சைத்யபாலாஶ்ஶதம் யயுஃ ।

க்ரு'ஹீத்வா விவிதாநஸ்த்ராந்ப்ராஸாந்கங்காந்பரஶ்வதாந் ॥ 13 ॥

விஸ்ரு'ஜந்தோ மஹாகாயா மாருதிம் பர்யவாரயந் ।

தே கதாபிர்விசித்ராபிஃ பரிகைஃ காஞ்சநாங்கதைஃ ।

ஆஜக்நுர்வாநரஶ்ரேஷ்டம் பாணைஶ்சாதித்யஸந்நிபைஃ ॥ 14 ॥

ஆவர்த இவ கங்காயாஸ்தோயஸ்ய விபுலோ மஹாந் ।

பரிக்ஷிப்ய ஹரிஶ்ரேஷ்டம் ஸ பபௌ ரக்ஷஸாம் கணஃ ॥ 15 ॥

ததோ வாதாத்மஜஃ க்ருத்தோ பீம ரூபம் ஸமாஸ்திதஃ ॥ 16 ॥

ப்ராஸாதஸ்ய மஹந்தஸ்ய ஸ்தம்பம் ஹேமபரிஷ்க்ரு'தம் ।

உத்பாடயித்வா வேகேந ஹநுமாந்பவநாத்மஜஃ ॥ 17 ॥

ததஸ்தம் ப்ராமயாமாஸ ஶததாரம் மஹாபலஃ ।

தத்ர சாக்நிஸ்ஸமபவத்ப்ராஸாதஶ்சாப்யதஹ்யத ॥ 18 ॥

தஹ்யமாநம் ததோ த்ரு'ஷ்ட்வா ப்ராஸாதம் ஹரியூதபஃ ।

ஸ ராக்ஷஸஶதம் ஹத்த்வா வஜ்ரேணேந்த்ர இவாஸுராந் ॥ 19 ॥

அந்தரிக்ஷே ஸ்திதஶ்ஶ்தீமாநிதம் வசநமப்ரவீத் ।

மாத்ரு'ஶாநாம் ஸஹஸ்ராணி விஸ்ரு'ஷ்டாநி மஹாத்மநாம் ॥ 20 ॥

பலிநாம் வாநரேந்த்ராணாம் ஸுக்ரீவவஶவர்திநாம் ।

அடந்தி வஸுதாம் க்ரு'த்ஸ்நாம் வயமந்யே ச வாநராஃ ॥ 21 ॥

தஶநாகபலாஃ கேசித்கேசித்தஶகுணோத்தராஃ ।

கேசிந்நாகஸஹஸ்ரஸ்ய பபூவுஸ்துல்யவிக்ரமாஃ ॥ 22 ॥

ஸந்தி சௌகபலாஃ கேசித்கேசித்வாயுபலோபமாஃ ।

அப்ரமேயபலாஶ்சாந்யே தத்ராஸந்ஹரியூதபாஃ ॥ 23 ॥

ஈத்ரு'க்விதைஸ்து ஹரிபிர்வ்ரு'தோ தந்தநகாயுதைஃ ।

ஶதைஶ்ஶதஸஹஸ்ரைஶ்ச கோடீபிரயுதைரபி ॥ 24 ॥

ஆகமிஷ்யதி ஸுக்ரீவஃ ஸர்வேஷாம் வோ நிஷூதநஃ ।

நேயமஸ்தி புரீ லங்கா ந யூயம் ந ச ராவணஃ ॥ 25 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே த்ரிசத்வாரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha tricatvāriṃśassargaḥ |

tatassa kiṅkarānhatvā hanumāndhyānamāsthitaḥ |

vanaṃ bhagnaṃ mayā caityaprāsādo na vināśitaḥ || 1 ||

tasmātprāsādamapyevaṃ bhīmaṃ vidhvaṃsayāmyaham |

iti sañcintya manasā hanumāndarśayanbalam || 2 ||

caityaprāsādamāplutya meruśṛṅgamivonnatam |

āruroha kapiśreṣṭho hanumānmārutātmajaḥ || 3 ||

āruhya girisaṅkāśaṃ prāsādaṃ hariyūthapaḥ |

babhau sa sumahātejāḥ pratisūrya ivoditaḥ || 4 ||

sampradhṛṣya ca durdharṣaṃ caityaprāsādamuttamam |

hanumānprajvalanlakṣmyā pāriyātropamo'bhavat || 5 ||

sa bhūtvā sumahākāyaḥ prabhāvānmārutātmajaḥ |

dhṛṣṭamāsphoṭayāmāsa laṅkāṃ śabdena pūrayan || 6 ||

tasyāsphoṭitaśabdena mahatā śrotraghātinā |

peturvihaṅgamāstatra caityapālāśca mohitāḥ || 7 ||

astravijjayatāṃ rāmo lakṣmaṇaśca mahābalaḥ |

rājā jayati sugrīvo rāghaveṇābhipālitaḥ || 8 ||

dāso'haṃ kosalendrasya rāmasyākliṣṭakarmaṇaḥ |

hanumānśatrusainyānāṃ nihantā mārutātmajaḥ || 9 ||

na rāvaṇasahasraṃ me yuddhe pratibalaṃ bhavet |

śilābhistu praharataḥ pādapaiśca sahasraśaḥ || 10 ||

ardayitvā purīṃ laṅkāmabhivādya ca maithilīm |

samṛddhārtho gamiṣyāmi miṣatāṃ sarvarakṣasām || 11 ||

evamuktvā vimānasthaścaityasthānhariyūthapaḥ |

nanāda bhīmanirhrādo rakṣasāṃ janayanbhayam || 12 ||

tena śabdena mahatā caityapālāśśataṃ yayuḥ |

gṛhītvā vividhānastrānprāsānkhaṅgānparaśvathān || 13 ||

visṛjanto mahākāyā mārutiṃ paryavārayan |

te gadābhirvicitrābhiḥ parighaiḥ kāñcanāṅgadaiḥ |

ājaghnurvānaraśreṣṭhaṃ bāṇaiścādityasannibhaiḥ || 14 ||

āvarta iva gaṅgāyāstoyasya vipulo mahān |

parikṣipya hariśreṣṭhaṃ sa babhau rakṣasāṃ gaṇaḥ || 15 ||

tato vātātmajaḥ kruddho bhīma rūpaṃ samāsthitaḥ || 16 ||

prāsādasya mahantasya stambaṃ hemapariṣkṛtam |

utpāṭayitvā vegena hanumānpavanātmajaḥ || 17 ||

tatastaṃ bhrāmayāmāsa śatadhāraṃ mahābalaḥ |

tatra cāgnissamabhavatprāsādaścāpyadahyata || 18 ||

dahyamānaṃ tato dṛṣṭvā prāsādaṃ hariyūthapaḥ |

sa rākṣasaśataṃ hattvā vajreṇendra ivāsurān || 19 ||

antarikṣe sthitaśśtīmānidaṃ vacanamabravīt |

mādṛśānāṃ sahasrāṇi visṛṣṭāni mahātmanām || 20 ||

balināṃ vānarendrāṇāṃ sugrīvavaśavartinām |

aṭanti vasudhāṃ kṛtsnāṃ vayamanye ca vānarāḥ || 21 ||

daśanāgabalāḥ kecitkeciddaśaguṇottarāḥ |

kecinnāgasahasrasya babhūvustulyavikramāḥ || 22 ||

santi caughabalāḥ kecitkecidvāyubalopamāḥ |

aprameyabalāścānye tatrāsanhariyūthapāḥ || 23 ||

īdṛgvidhaistu haribhirvṛto dantanakhāyudhaiḥ |

śataiśśatasahasraiśca koṭībhirayutairapi || 24 ||

āgamiṣyati sugrīvaḥ sarveṣāṃ vo niṣūdanaḥ |

neyamasti purī laṅkā na yūyaṃ na ca rāvaṇaḥ || 25 ||

ityārṣe śrīmadrāmāyaṇe vālmīkīya ādikāvye sundarakāṇḍe tricatvāriṃśassargaḥ ||