5.3 Sundarakanda - Tritiya Sargah

ॐ

5.3 ஸுந்தரகாண்ட - த்ரு'தீய ஸர்கஃ

Valmiki Tamil

ஶ்ரீமத்வால்மீகீய ராமாயணே ஸுந்தரகாண்டம் ।

அத த்ரு'தீயஸ்ஸர்கஃ ।

ஸ லம்பஶிகரே லம்பே லம்பதோயதஸந்நிபே ।

ஸத்த்வமாஸ்தாய மேதாவீ ஹநுமாந் மாருதாத்மஜஃ ॥ 1 ॥

நிஶி லங்காம் மஹாஸத்த்வோ விவேஶ கபிகுஞ்ஜரஃ ।

ரம்யகாநநதோயாட்யாம் புரீம் ராவணபாலிதாம் ॥ 2 ॥

ஶாரதாம்புதரப்ரக்யைர்பவநைருபஶோபிதாம் ।

ஸாகரோபமநிர்கோஷாம் ஸாகராநிலஸேவிதாம் ॥ 3 ॥

ஸுபுஷ்டபலஸம்புஷ்டாம் யதைவ விடபாவதீம் ।

சாருதோரணநிர்யூஹாம் பாண்டுரத்வாரதோரணாம் ॥ 4 ॥

புஜகாசரிதாம் குப்தாம் ஶுபாம் போகவதீமிவ ।

தாம் ஸ வித்யுத்கநாகீர்ணாம் ஜ்யோதிர்மார்கநிஷேவிதாம் ॥ 5 ॥

மந்தமாருதஸஞ்சாராம் யதேந்த்ரஸ்யாமராவதீம் ।

ஶாதகும்பேந மஹதா ப்ராகாரேணாபிஸம்வ்ரு'தாம் ॥ 6 ॥

கிங்கிணீஜாலகோஷாபிஃ பதாகாபிரலங்க்ரு'தாம் ।

ஆஸாத்ய ஸஹஸா ஹ்ரு'ஷ்டஃ ப்ராகாரமபிபேதிவாந் ॥ 7 ॥

விஸ்மயாவிஷ்டஹ்ரு'தயஃ புரீமாலோக்ய ஸர்வதஃ ।

ஜாம்பூநதமயைர்த்வாரைர்வைடூர்யக்ரு'தவேதிகைஃ ॥ 8 ॥

வஜ்ரஸ்படிகமுக்தாபிர்மணிகுட்டிமபூஷிதைஃ ।

தப்தஹாடகநிர்யூஹை ராஜதாமலபாண்டுரைஃ ॥ 9 ॥

வைடூர்யக்ரு'தஸோபாநைஃ ஸ்பாடிகாந்தரபாம்ஸுபிஃ ।

சாருஸஞ்ஜவநோபேதைஃ கமிவோத்பதிதைஃ ஶுபைஃ ॥ 10 ॥

க்ரௌஞ்சபர்ஹிணஸங்குஷ்டைஃ ராஜஹம்ஸ நிஷேவிதைஃ ।

தூர்யாபரணநிர்கோஷைஃ ஸர்வதஃ ப்ரதிநாதிதாம் ॥ 11 ॥

வஸ்வௌகஸாராப்ரதிமாம் தாம் வீக்ஷ்ய நகரீம் ததஃ ।

கமிவோத்பதிதும் காமாம் ஜஹர்ஷ ஹநுமாந் கபிஃ ॥ 12 ॥

தாம் ஸமீக்ஷ்ய புரீம் ரம்யாம் ராக்ஷஸாதிபதேஃ ஶுபாம் ।

அநுத்தமாம்ரு'த்தியுதாம் சிந்தயாமாஸ வீர்யவாந் ॥ 13 ॥

நேயமந்யேந நகரீ ஶக்யா தர்ஷயிதும் பலாத் ।

ரக்ஷிதா ராவணபலைருத்யதாயுததாரிபிஃ ॥ 14 ॥

குமுதாங்கதயோர்வாபி ஸுஷேணஸ்ய மஹாகபேஃ ।

ப்ரஸித்தேயம் பவேத்பூமிர்மைந்தத்விவிதயோரபி ॥ 15 ॥

விவஸ்வதஸ்தநூஜஸ்ய ஹரேஶ்ச குஶபர்வணஃ ।

ரு'க்ஷஸ்ய கேதுமாலஸ்ய மம சைவ கதிர்பவேத் ॥ 16 ॥

ஸமீக்ஷ்ய து மஹாபாஹூ ராகவஸ்ய பராக்ரமம் ।

லக்ஷ்மணஸ்ய ச விக்ராந்தமபவத் ப்ரீதிமாந் கபிஃ ॥ 17 ॥

தாம் ரத்நவஸநோபேதாம் கோஷ்டாகாராவதம்ஸகாம் ।

யந்த்ராகாரஸ்தநீம்ரு'த்தாம் ப்ரமதாமிவ பூஷிதாம் ॥ 18 ॥

தாம் நஷ்டதிமிராம் தீப்தைர்பாஸ்வரைஶ்ச மஹாக்ரு'ஹைஃ ।

நகரீம் ராக்ஷஸேந்த்ரஸ்ய ஸ ததர்ஶ மஹாகபிஃ ॥ 19 ॥

த ஸா ஹரிஶார்தூலம் ப்ரவிஶந்தம் மஹாபலம் ।

நகரீ ஸ்வேந ரூபேண ததர்ஶ பவநாத்மஜம் ॥ 20 ॥

ஸா தம் ஹரிவரம் த்ரு'ஷ்ட்வா லங்கா ராவணபாலிதா ।

ஸ்வயமேவோத்திதா தத்ர விக்ரு'தாநநதர்ஶநா ॥ 21 ॥

புரஸ்தாத்கபிவர்யஸ்ய வாயுஸூநோரதிஷ்டத ।

முஞ்சமாநா மஹாநாதமப்ரவீத்பவநாத்மஜம் ॥ 22 ॥

கஸ்த்வம் கேந ச கார்யேண இஹ ப்ராப்தோ வநாலய ।

கதயஸ்வேஹ யத்தத்த்வம் யாவத்ப்ராணா தரந்தி தே ॥ 23 ॥

ந ஶக்யம் கல்வியம் லங்கா ப்ரவேஷ்டும் வாநர த்வயா ।

ரக்ஷிதா ராவணபலைரபிகுப்தா ஸமந்ததஃ ॥ 24 ॥

அத தாமப்ரவீத்வீரோ ஹநுமாநக்ரதஃ ஸ்திதாம் ।

கதயிஷ்யாமி தே தத்த்வம் யந்மாம் த்வம் பரிப்ரு'ச்சஸி ॥ 25 ॥

கா த்வம் விரூபநயநா புரத்வாரேऽவதிஷ்டஸி ।

கிமர்தம் சாபி மாம் ருத்த்வா நிர்பர்த்ஸயஸி தாருணா ॥ 26 ॥

ஹநுமத்வசநம் ஶ்ருத்வா லங்கா ஸா காமரூபிணீ ।

உவாச வசநம் க்ருத்தா பருஷம் பவநாத்மஜம் ॥ 27 ॥

அஹம் ராக்ஷஸராஜஸ்ய ராவணஸ்ய மஹாத்மநஃ ।

ஆஜ்ஞாப்ரதீக்ஷா துர்தர்ஷா ரக்ஷாமி நகரீமிமாம் ॥ 28 ॥

ந ஶக்யா மாமவஜ்ஞாய ப்ரவேஷ்டும் நகரீ த்வயா ।

அத்ய ப்ராணைஃ பரித்யக்தஃ ஸ்வப்ஸ்யஸே நிஹதோ மயா ॥ 29 ॥

அஹம் ஹி நகரீ லங்கா ஸ்வயமேவ ப்லவங்கம ।

ஸர்வதஃ பரிரக்ஷாமி ஹ்யேதத்தே கதிதம் மயா ॥ 30 ॥

லங்காயா வசநம் ஶ்ருத்வா ஹநுமாந் மாருதாத்மஜஃ ।

யத்நவாந்ஸ ஹரிஶ்ரேஷ்டஃ ஸ்திதஶ்ஶைல இவாபரஃ ॥ 31 ॥

ஸ தாம் ஸ்த்ரீரூபவிக்ரு'தாம் த்ரு'ஷ்டவா வாநரபுங்கவஃ ।

ஆபபாஷேऽத மேதாவீ ஸத்த்வவாந் ப்லவகர்ஷபஃ ॥ 32 ॥

த்ரக்ஷ்யாமி நகரீம் லங்காம் ஸாட்டப்ராகாரதோரணாம் ।

நிர்விஶங்கமிமம்லோகம் பஶ்யந்த்யாஸ்தவஸாம்ப்ரதம் ।

இத்யர்தமிஹ ஸம்ப்ராப்தஃ பரம் கௌதூஹலம் ஹி மே ॥ 33 ॥

வநாந்யுபவநாநீஹ லங்காயாஃ காநநாநி ச ।

ஸர்வதோ க்ரு'ஹமுக்யாநி த்ரஷ்டுமாகமநம் ஹி மே ॥ 34 ॥

தஸ்ய தத்வசநம் ஶ்ருத்வா லங்கா ஸா காமரூபிணீ ।

பூய ஏவ புநர்வாக்யம் பபாஷே பருஷாக்ஷரம் ॥ 35 ॥

மாமநிர்ஜித்ய துர்புத்தே ராக்ஷஸேஶ்வரபாலிதாம் ।

ந ஶக்யமத்ய தே த்ரஷ்டும் புரீயம் வாநராதம ॥ 36 ॥

ததஃ ஸ கபிஶார்தூலஸ்தாமுவாச நிஶாசரீம் ।

த்ரு'ஷ்ட்வா புரீமிமாம் பத்ரே புநர்யாஸ்யே யதாகதம் ॥ 37 ॥

ததஃ க்ரு'த்வா மஹாநாதம் ஸா வை லங்கா பயாவஹம் ।

தலேந வாநரஶ்ரேஷ்டம் தாடயாமாஸ வேகிதா ॥ 38 ॥

ததஃ ஸ கபிஶார்தூலோ லங்கயா தாடிதோ ப்ரு'ஶம் ।

நநாத ஸுமஹாநாதம் வீர்யவாந் பவநாத்மஜஃ ॥ 39 ॥

ததஃ ஸம்வர்தயாமாஸ வாமஹஸ்தஸ்ய ஸோऽங்குலீஃ ।

முஷ்டிநாऽऽபிஜகாநைநாம் ஹநுமாந் க்ரோதமூர்சிதஃ ॥ 40 ॥

ஸ்த்ரீ சேதி மந்யமாநேந நாதிக்ரோதஃ ஸ்வயம் க்ரு'தஃ ।

ஸா து தேந ப்ரஹாரேண விஹ்வலாங்கீ நிஶாசரீ ॥ 41 ॥

பபாத ஸஹஸா பூமௌ விக்ரு'தாநநதர்ஶநா ।

ததஸ்து ஹநுமாந் ப்ராஜ்ஞஸ்தாம் த்ரு'ஷ்ட்வா விநிபாதிதாம் ॥ 42 ॥

க்ரு'பாம் சகார தேஜஸ்வீ மந்யமாநஃ ஸ்த்ரியம் து தாம் ।

ததோ வை ப்ரு'ஶஸம்விக்நா லங்கா ஸா கத்கதாக்ஷரம் ॥ 43 ॥

உவாசாகர்விதம் வாக்யம் ஹநூமந்தம் ப்லவங்கமம் ।

ப்ரஸீத ஸுமஹாபாஹோ த்ராயஸ்வ ஹரிஸத்தம ॥ 44 ॥

ஸமயே ஸௌம்ய திஷ்டந்தி ஸத்த்வவந்தோ மஹாபலாஃ ।

அஹம் து நகரீ லங்கா ஸ்வயமேவ ப்லவங்கம ॥ 45 ॥

நிர்ஜிதாஹம் த்வயா வீர விக்ரமேண மஹாபல ।

இதம் து தத்யம் ஶ்ரு'ணு வை ப்ருவந்த்யா மே ஹரீஶ்வர ॥ 46 ॥

ஸ்வயம்புவா புரா தத்தம் வரதாநம் யதா மம ।

யதா த்வாம் வாநரஃ கஶ்சித்விக்ரமாத்வஶமாநயேத் ॥ 47 ॥

ததா த்வயா ஹி விஜ்ஞேயம் ரக்ஷஸாம் பயமாகதம் ।

ஸ ஹி மே ஸமயஃ ஸௌம்ய ப்ராப்தோऽத்ய தவ தர்ஶநாத் ॥ 48 ॥

ஸ்வயம்பூ விஹிதஃ ஸத்யோ ந தஸ்யாஸ்தி வ்யதிக்ரமஃ ।

ஸீதாநிமித்தம் ராஜ்ஞஸ்து ராவணஸ்ய துராத்மநஃ ॥ 49 ॥

ரக்ஷஸாம் சைவ ஸர்வேஷாம் விநாஶஃ ஸமுபாகதஃ ।

தத்ப்ரவிஶ்ய ஹரிஶ்ரேஷ்ட புரீம் ராவணபாலிதாம் ॥ 50 ॥

விதத்ஸ்வ ஸர்வகார்யாணி யாநி யாநீஹ வாஞ்சஸி ।

ப்ரவிஶ்ய ஶாபோபஹதாம் ஹரீஶ்வர ஶுபாம் புரீம் ராக்ஷஸமுக்யபாலிதாம் ।

யத்ரு'ச்சயா த்வம் ஜநகாத்மஜாம் ஸதீம் விமார்க ஸர்வத்ர கதோ யதாஸுகம் ॥ 51 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே ஸுந்தரகாண்டே த்ரு'தீயஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha tṛtīyassargaḥ |

sa lambaśikhare lambe lambatoyadasannibhe |

sattvamāsthāya medhāvī hanumān mārutātmajaḥ || 1 ||

niśi laṅkāṃ mahāsattvo viveśa kapikuñjaraḥ |

ramyakānanatoyāḍhyāṃ purīṃ rāvaṇapālitām || 2 ||

śāradāmbudharaprakhyairbhavanairupaśobhitām |

sāgaropamanirghoṣāṃ sāgarānilasevitām || 3 ||

supuṣṭabalasampuṣṭāṃ yathaiva viṭapāvatīm |

cārutoraṇaniryūhāṃ pāṇḍuradvāratoraṇām || 4 ||

bhujagācaritāṃ guptāṃ śubhāṃ bhogavatīmiva |

tāṃ sa vidyudghanākīrṇāṃ jyotirmārganiṣevitām || 5 ||

mandamārutasañcārāṃ yathendrasyāmarāvatīm |

śātakumbhena mahatā prākāreṇābhisaṃvṛtām || 6 ||

kiṅkiṇījālaghoṣābhiḥ patākābhiralaṅkṛtām |

āsādya sahasā hṛṣṭaḥ prākāramabhipedivān || 7 ||

vismayāviṣṭahṛdayaḥ purīmālokya sarvataḥ |

jāmbūnadamayairdvārairvaiḍūryakṛtavedikaiḥ || 8 ||

vajrasphaṭikamuktābhirmaṇikuṭṭimabhūṣitaiḥ |

taptahāṭakaniryūhai rājatāmalapāṇḍuraiḥ || 9 ||

vaiḍhūryakṛtasopānaiḥ sphāṭikāntarapāṃsubhiḥ |

cārusañjavanopetaiḥ khamivotpatitaiḥ śubhaiḥ || 10 ||

krauñcabarhiṇasaṅghuṣṭaiḥ rājahaṃsa niṣevitaiḥ |

tūryābharaṇanirghoṣaiḥ sarvataḥ pratināditām || 11 ||

vasvaukasārāpratimāṃ tāṃ vīkṣya nagarīṃ tataḥ |

khamivotpatituṃ kāmāṃ jaharṣa hanumān kapiḥ || 12 ||

tāṃ samīkṣya purīṃ ramyāṃ rākṣasādhipateḥ śubhām |

anuttamāmṛddhiyutāṃ cintayāmāsa vīryavān || 13 ||

neyamanyena nagarī śakyā dharṣayituṃ balāt |

rakṣitā rāvaṇabalairudyatāyudhadhāribhiḥ || 14 ||

kumudāṅgadayorvāpi suṣeṇasya mahākapeḥ |

prasiddheyaṃ bhavedbhūmirmaindadvividayorapi || 15 ||

vivasvatastanūjasya hareśca kuśaparvaṇaḥ |

ṛkṣasya ketumālasya mama caiva gatirbhavet || 16 ||

samīkṣya tu mahābāhū rāghavasya parākramam |

lakṣmaṇasya ca vikrāntamabhavat prītimān kapiḥ || 17 ||

tāṃ ratnavasanopetāṃ koṣṭhāgārāvataṃsakām |

yantrāgārastanīmṛddhāṃ pramadāmiva bhūṣitām || 18 ||

tāṃ naṣṭatimirāṃ dīptairbhāsvaraiśca mahāgṛhaiḥ |

nagarīṃ rākṣasendrasya sa dadarśa mahākapiḥ || 19 ||

tha sā hariśārdūlaṃ praviśantaṃ mahābalam |

nagarī svena rūpeṇa dadarśa pavanātmajam || 20 ||

sā taṃ harivaraṃ dṛṣṭvā laṅkā rāvaṇapālitā |

svayamevotthitā tatra vikṛtānanadarśanā || 21 ||

purastātkapivaryasya vāyusūnoratiṣṭhata |

muñcamānā mahānādamabravītpavanātmajam || 22 ||

kastvaṃ kena ca kāryeṇa iha prāpto vanālaya |

kathayasveha yattattvaṃ yāvatprāṇā dharanti te || 23 ||

na śakyaṃ khalviyaṃ laṅkā praveṣṭuṃ vānara tvayā |

rakṣitā rāvaṇabalairabhiguptā samantataḥ || 24 ||

atha tāmabravīdvīro hanumānagrataḥ sthitām |

kathayiṣyāmi te tattvaṃ yanmāṃ tvaṃ paripṛcchasi || 25 ||

kā tvaṃ virūpanayanā puradvāre'vatiṣṭhasi |

kimarthaṃ cāpi māṃ ruddhvā nirbhartsayasi dāruṇā || 26 ||

hanumadvacanaṃ śrutvā laṅkā sā kāmarūpiṇī |

uvāca vacanaṃ kruddhā paruṣaṃ pavanātmajam || 27 ||

ahaṃ rākṣasarājasya rāvaṇasya mahātmanaḥ |

ājñāpratīkṣā durdharṣā rakṣāmi nagarīmimām || 28 ||

na śakyā māmavajñāya praveṣṭuṃ nagarī tvayā |

adya prāṇaiḥ parityaktaḥ svapsyase nihato mayā || 29 ||

ahaṃ hi nagarī laṅkā svayameva plavaṅgama |

sarvataḥ parirakṣāmi hyetatte kathitaṃ mayā || 30 ||

laṅkāyā vacanaṃ śrutvā hanumān mārutātmajaḥ |

yatnavānsa hariśreṣṭhaḥ sthitaśśaila ivāparaḥ || 31 ||

sa tāṃ strīrūpavikṛtāṃ dṛṣṭavā vānarapuṅgavaḥ |

ābabhāṣe'tha medhāvī sattvavān plavagarṣabhaḥ || 32 ||

drakṣyāmi nagarīṃ laṅkāṃ sāṭṭaprākāratoraṇām |

nirviśaṅkamimaṃlokaṃ paśyantyāstavasāmpratam |

ityarthamiha samprāptaḥ paraṃ kautūhalaṃ hi me || 33 ||

vanānyupavanānīha laṅkāyāḥ kānanāni ca |

sarvato gṛhamukhyāni draṣṭumāgamanaṃ hi me || 34 ||

tasya tadvacanaṃ śrutvā laṅkā sā kāmarūpiṇī |

bhūya eva punarvākyaṃ babhāṣe paruṣākṣaram || 35 ||

māmanirjitya durbuddhe rākṣaseśvarapālitām |

na śakyamadya te draṣṭuṃ purīyaṃ vānarādhama || 36 ||

tataḥ sa kapiśārdūlastāmuvāca niśācarīm |

dṛṣṭvā purīmimāṃ bhadre punaryāsye yathāgatam || 37 ||

tataḥ kṛtvā mahānādaṃ sā vai laṅkā bhayāvaham |

talena vānaraśreṣṭhaṃ tāḍayāmāsa vegitā || 38 ||

tataḥ sa kapiśārdūlo laṅkayā tāḍito bhṛśam |

nanāda sumahānādaṃ vīryavān pavanātmajaḥ || 39 ||

tataḥ saṃvartayāmāsa vāmahastasya so'ṅgulīḥ |

muṣṭinā''bhijaghānaināṃ hanumān krodhamūrchitaḥ || 40 ||

strī ceti manyamānena nātikrodhaḥ svayaṃ kṛtaḥ |

sā tu tena prahāreṇa vihvalāṅgī niśācarī || 41 ||

papāta sahasā bhūmau vikṛtānanadarśanā |

tatastu hanumān prājñastāṃ dṛṣṭvā vinipātitām || 42 ||

kṛpāṃ cakāra tejasvī manyamānaḥ striyaṃ tu tām |

tato vai bhṛśasaṃvignā laṅkā sā gadgadākṣaram || 43 ||

uvācāgarvitaṃ vākyaṃ hanūmantaṃ plavaṅgamam |

prasīda sumahābāho trāyasva harisattama || 44 ||

samaye saumya tiṣṭhanti sattvavanto mahābalāḥ |

ahaṃ tu nagarī laṅkā svayameva plavaṅgama || 45 ||

nirjitāhaṃ tvayā vīra vikrameṇa mahābala |

idaṃ tu tathyaṃ śṛṇu vai bruvantyā me harīśvara || 46 ||

svayambhuvā purā dattaṃ varadānaṃ yathā mama |

yadā tvāṃ vānaraḥ kaścidvikramādvaśamānayet || 47 ||

tadā tvayā hi vijñeyaṃ rakṣasāṃ bhayamāgatam |

sa hi me samayaḥ saumya prāpto'dya tava darśanāt || 48 ||

svayambhū vihitaḥ satyo na tasyāsti vyatikramaḥ |

sītānimittaṃ rājñastu rāvaṇasya durātmanaḥ || 49 ||

rakṣasāṃ caiva sarveṣāṃ vināśaḥ samupāgataḥ |

tatpraviśya hariśreṣṭha purīṃ rāvaṇapālitām || 50 ||

vidhatsva sarvakāryāṇi yāni yānīha vāñchasi |

praviśya śāpopahatāṃ harīśvara śubhāṃ purīṃ rākṣasamukhyapālitām |

yadṛcchayā tvaṃ janakātmajāṃ satīṃ vimārga sarvatra gato yathāsukham || 51 ||

ityārṣe śrīmadrāmāyaṇe vālmīkīya ādikāvye sundarakāṇḍe tṛtīyassargaḥ ||