4.39 Kishkindhakanda - Ekonachatvarimsha Sargah

ॐ

4.39 கிஷ்கிந்தாகாண்ட - ஏகோநசத்வாரிம்ஶ ஸர்கஃ

Valmiki Tamil

ஶ்ரீமத்வால்மீகீய ராமாயணே கிஷ்கிந்தாகாண்டம் ।

அத ஏகோநசத்வாரிம்ஶஸ்ஸர்கஃ ।

இதி ப்ருவாணம் ஸுக்ரீவம் ராமோ தர்மப்ரு'தாம் வரஃ ।

பாஹுப்யாம் ஸம்பரிஷ்வஜ்ய ப்ரத்யுவாச க்ரு'தாஞ்ஜலிம் ॥ 1 ॥

யதிந்த்ரோ வர்ஷதே வர்ஷம் ந தச்சித்ரம் பவேத்க்வசித் ।

ஆதித்யோ வா ஸஹஸ்ராம்ஶுஃ குர்யாத்விதிமிரம் நபஃ ॥ 2 ॥

சந்த்ரமா ரஶ்மிபிஃ குர்யாத்ப்ரு'திவீம் ஸௌம்ய நிர்மலாம் ।

த்வத்விதோ வாऽபி மித்ராணாம் ப்ரதிகுர்யாத்பரந்தப ॥ 3 ॥

ஏவம் த்வயி ந தச்சித்ரம் பவேத்யத்ஸௌம்ய ஶோபநம் ।

ஜாநாம்யஹம் த்வாம் ஸுக்ரீவ ஸததம் ப்ரியவாதிநம் ॥ 4 ॥

த்வத்ஸநாதஃ ஸகே ஸங்க்யே ஜேதாऽஸ்மி ஸகலாநரீந் ।

த்வமேவ மே ஸுஹ்ரு'தந்மித்ரம் ஸாஹாய்யம் கர்துமர்ஹஸி ॥ 5 ॥

ஜஹாராத்மவிநாஶாய வைதேஹீம் ராக்ஷஸாதமஃ ।

வஞ்சயித்வா து பௌலோமீமநுஹ்லாதோ யதா ஶசீம் ॥ 6 ॥

ந சிராத்தம் ஹநிஷ்யாமி ராவணம் நிஶிதைஶ்ஶரைஃ ।

பௌலோம்யாஃ பிதரம் த்ரு'ப்தம் ஶதக்ரதுரிவாऽஹவே ॥ 7 ॥

ஏதஸ்மிந்நந்தரே சைவ ரஜஸ்ஸமபிவர்தத ।

உஷ்ணாம் தீவ்ராம் ஸஹஸ்ராம்ஶோஶ்சாதயத்ககநே ப்ரபாம் ॥ 8 ॥

திஶஃ பர்யாகுலாஶ்சாஸந்ரஜஸா தேந மூர்சதா ।

சசால ச மஹீ ஸர்வா ஸஶைலவநகாநநா ॥ 9 ॥

ததோ நகேந்த்ரஸங்காஶைஸ்தீக்ஷ்ணதம்ஷ்ட்ரைர்மஹாபலைஃ ।

க்ரு'த்ஸ்நா ஸஞ்சாதிதா பூமிரஸங்க்யேயைஃ ப்லவங்கமைஃ ॥ 10 ॥

நிமேஷாந்தரமாத்ரேண ததஸ்தைர்ஹரியூதபைஃ ।

கோடீஶதபரீவாரைஃ காமரூபிபிராவ்ரு'தா ॥ 11 ॥

நாதேயைஃ பார்வதீயைஶ்ச ஸாமுத்ரைஶ்ச மஹாபலைஃ ।

ஹரிபிர்மேகநிர்ஹ்ராதைரந்யைஶ்ச வநசாரிபிஃ ॥ 12 ॥

தருணாதித்யவர்ணைஶ்ச ஶஶிகௌரைஶ்ச வாநரைஃ ।

பத்மகேஸரவர்ணைஶ்ச ஶ்வேதைர்மேருக்ரு'தாலயைஃ ॥ 13 ॥

கோடீஸஹஸ்ரைர்தஶபிஃ ஶ்ரீமாந்பரிவ்ரு'தஸ்ததா ।

வீரஶ்ஶதவலிர்நாம வாநரஃ ப்ரத்யத்ரு'ஶ்யத ॥ 14 ॥

ததஃ காஞ்சநஶைலாபஸ்தாராயா வீர்யவாந்பிதா ।

அநேகைர்தஶஸாஹஸ்ரைஃ கோடிபிஃ ப்ரத்யத்ரு'ஶ்யத ॥ 15 ॥

ததாऽபரேண கோடீநாம் ஸஹஸ்ரேண ஸமந்விதஃ ।

பிதா ருமாயா ஸம்ப்ராப்தஸ்ஸுக்ரீவஶ்வஶுரோ விபுஃ ॥ 16 ॥

பத்மகேஸரஸங்காஶஸ்தருணார்கநிபாநநஃ ।

புத்திமாந்வாநரஶ்ரேஷ்டஸ்ஸர்வவாநரஸத்தமஃ ॥ 17 ॥

அநேகைர்பஹுஸாஹஸ்ரைர்வாநராணாம் ஸமந்விதஃ ।

பிதா ஹநுமதஶ்ரஶீமாந்கேஸரீ ப்ரத்யத்ரு'ஶ்யத ॥ 18 ॥

கோலாங்கூலமஹாராஜோ கவாக்ஷோ பீமவிக்ரமஃ ।

வ்ரு'தஃ கோடிஸஹஸ்ரேண வாநராணாமத்ரு'ஶ்யத ॥ 19 ॥

ரு'க்ஷாணாம் பீமவேகாநாம் தூம்ரஶ்ஶத்ருநிபர்ஹணஃ ।

வ்ரு'தஃ கோடிஸஹஸ்ராப்யாம் த்வாப்யாம் ஸமபிவர்தத ॥ 20 ॥

மஹாசலநிபைர்கோரைஃ பநஸோ நாம யூதபஃ ।

ஆஜகாம மஹாவீர்யஸ்திஸ்ரு'பிஃ கோடிபிர்வ்ரு'தஃ ॥ 21 ॥

நீலாஞ்ஜநசயாகாரோ நீலோ நாமாऽத யூதபஃ ।

அத்ரு'ஶ்யத மஹாகாயஃ கோடிபிர்தஶபிர்வ்ரு'தஃ ॥ 22 ॥

ததஃ காஞ்சநஶைலாபோ கவயோ நாம யூதபஃ ।

ஆஜகாம மஹாவீர்யஃ பஞ்சபிஃ கோடிபிர்வ்ரு'தஃ ॥ 23 ॥

தரீமுகஶ்ச பலவாந்யூதபோऽப்யாயயௌ ததா ।

வ்ரு'தஃ கோடிஸஹஸ்ரேண ஸுக்ரீவம் ஸமுபஸ்திதஃ ॥ 24 ॥

மைந்தஶ்ச த்விவிதஶ்சோபாவஶ்விபுத்ரௌ மஹாபலௌ ।

கோடிகோடிஸஹஸ்ரேண வாநராணாமத்ரு'ஶ்யதாம் ॥ 25 ॥

கஜஶ்ச பலவாந் வீரஃ கோடிபிஸ்திஸ்ரு'பிர்வ்ரு'தஃ ।

ஆஜகாம மஹாதேஜா ஸுக்ரீவஸ்ய ஸமீபதஃ ॥ 26 ॥

ரு'க்ஷராஜோ மஹாதேஜா ஜாம்பவாந்நாம நாமதஃ ।

கோடிபிர்தஶபிஃ ப்ராப்தஃ ஸுக்ரீவஸ்ய வஶே ஸ்திதஃ ॥ 27 ॥

ருமண்வாந்நாம விக்ராந்தோ வாநரோ வாநரேஶ்வரம் ।

ஆயயௌ பலவாம்ஸ்தூர்ணம் கோடீஶதஸமாவ்ரு'தஃ ॥ 28 ॥

ததஃ கோடிஸஹஸ்ராணாம் ஸஹஸ்ரேண ஶதேந ச ।

ப்ரு'ஷ்டதோऽநுகதஃ ப்ராப்தோ ஹரிபிர்கந்தமாதநஃ ॥ 29 ॥

ததஃ பத்மஸஹஸ்ரேண வ்ரு'தஶ்ஶங்குஶதேந ச ।

யுவராஜோऽங்கதஃ ப்ராப்தஃ பித்ரு'துல்யபராக்ரமஃ ॥ 30 ॥

ததஸ்தாராத்யுதிஸ்தாரோ ஹரிர்பீமபராக்ரமஃ ।

பஞ்சபிர்ஹரிகோடீபிர்தூரதஃ ப்ரத்யத்ரு'ஶ்யத ॥ 31 ॥

இந்த்ரஜாநுஃ கபிர்வீரோ யூதபஃ ப்ரத்யத்ரு'ஶ்யத ।

ஏகாதஶாநாம் கோடீநாமீஶ்வரஸ்தைஸ்ஸமாவ்ரு'தஃ ॥ 32 ॥

ததோ ரம்பஸ்த்வநுப்ராப்தஸ்தருணாதித்யஸந்நிபஃ ।

அயுதேநாவ்ரு'தஶ்சைவ ஸஹஸ்ரேண ஶதேந ச ॥ 33 ॥

ததோ யூதபதிர்வீரோ துர்முகோ நாம வாநரஃ ।

ப்ரத்யத்ரு'ஶ்யத கோடீப்யாம் த்வாப்யாம் பரிவ்ரு'தோ பலீ ॥ 34 ॥

கைலாஸஶிகராகாரைர்வாநரைர்பீமவிக்ரமைஃ ।

வ்ரு'தஃ கோடிஸஹஸ்ரேண ஹநுமாந்ப்ரத்யத்ரு'ஶ்யத ॥ 35 ॥

நலஶ்சாபி மஹாவீர்யஸ்ஸம்வ்ரு'தோ த்ருமவாஸிபிஃ ।

கோடீஶதேந ஸம்ப்ராப்தஸ்ஸஹஸ்ரேண ஶதேந ச ॥ 36 ॥

ததோ ததிமுகஶ்ரீமாந்கோடிபிர்தஶபிர்வ்ரு'தஃ ।

ஸம்ப்ராப்தோऽபிமதஸ்தஸ்ய ஸுக்ரீவஸ்ய மஹாத்மநஃ ॥ 37 ॥

ஶரபஃ குமுதோ வஹ்நிர்வாநரோ ரம்ஹ ஏவ ச ।

ஏதே சாந்யே ச பஹவோ வாநராஃ காமரூபிணஃ ॥ 38 ॥

ஆவ்ரு'த்ய ப்ரு'திவீம் ஸர்வாம் பர்வதாம்ஶ்ச வநாநி ச ।

யூதபா ஸ்ஸமநுப்ராப்தா ஸ்தேஷாம் ஸங்க்யா ந வித்யதே ॥ 39 ॥

ஆகதாஶ்ச விஶிஷ்டாஶ்ச ப்ரு'திவ்யாம் ஸர்வவாநராஃ ।

ஆப்லவந்தஃ ப்லவந்தஶ்ச கர்ஜந்தஶ்ச ப்லவங்கமாஃ ।

அப்யவர்தந்த ஸுக்ரீவம் ஸூர்யமப்ரகணா இவ ॥ 40 ॥

குர்வாணா பஹுஶப்தாம்ஶ்ச ப்ரஹ்ரு'ஷ்டா பாஹுஶாலிநஃ ।

ஶிரோபிர்வாநரேந்த்ராய ஸுக்ரீவாய ந்யவேதயந் ॥ 41 ॥

அபரே வாநரஶ்ரேஷ்டாஸ்ஸங்கம்ய ச யதோசிதம் ।

ஸுக்ரீவேண ஸமாகம்ய ஸ்திதாஃ ப்ராஞ்ஜலய ஸ்ததா ॥ 42 ॥

ஸுக்ரீவஸ்த்வரிதோ ராமே ஸர்வாம்ஸ்தாம் வாநரரர்ஷபாந் ।

நிவேதயித்வா தர்மஜ்ஞஃ ஸ்திதஃ ப்ராஞ்ஜலிரப்ரவீத் ॥ 43 ॥

யதாஸுகம் பர்வதநிசரேஷு வநேஷு ஸர்வேஷு ச வாநரேந்த்ராஃ ।

நிவேஶயித்வா விதிவத்பலாநி பலம் பலஜ்ஞஃ ப்ரதிபத்துமீஷ்டே ॥ 44 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே கிஷ்கிந்தாகாண்டே ஏகோநசத்வாரிம்ஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe kiṣkindhākāṇḍam |

atha ekonacatvāriṃśassargaḥ |

iti bruvāṇaṃ sugrīvaṃ rāmo dharmabhṛtāṃ varaḥ |

bāhubhyāṃ sampariṣvajya pratyuvāca kṛtāñjalim || 1 ||

yadindro varṣate varṣaṃ na taccitraṃ bhavetkvacit |

ādityo vā sahasrāṃśuḥ kuryādvitimiraṃ nabhaḥ || 2 ||

candramā raśmibhiḥ kuryātpṛthivīṃ saumya nirmalām |

tvadvidho vā'pi mitrāṇāṃ pratikuryātparantapa || 3 ||

evaṃ tvayi na taccitraṃ bhavedyatsaumya śobhanam |

jānāmyahaṃ tvāṃ sugrīva satataṃ priyavādinam || 4 ||

tvatsanāthaḥ sakhe saṅkhye jetā'smi sakalānarīn |

tvameva me suhṛtanmitraṃ sāhāyyaṃ kartumarhasi || 5 ||

jahārātmavināśāya vaidehīṃ rākṣasādhamaḥ |

vañcayitvā tu paulomīmanuhlādo yathā śacīm || 6 ||

na cirāttaṃ haniṣyāmi rāvaṇaṃ niśitaiśśaraiḥ |

paulomyāḥ pitaraṃ dṛptaṃ śatakraturivā'have || 7 ||

etasminnantare caiva rajassamabhivartata |

uṣṇāṃ tīvrāṃ sahasrāṃśośchādayadgagane prabhām || 8 ||

diśaḥ paryākulāścāsanrajasā tena mūrchatā |

cacāla ca mahī sarvā saśailavanakānanā || 9 ||

tato nagendrasaṅkāśaistīkṣṇadaṃṣṭrairmahābalaiḥ |

kṛtsnā sañchāditā bhūmirasaṅkhyeyaiḥ plavaṅgamaiḥ || 10 ||

nimeṣāntaramātreṇa tatastairhariyūthapaiḥ |

koṭīśataparīvāraiḥ kāmarūpibhirāvṛtā || 11 ||

nādeyaiḥ pārvatīyaiśca sāmudraiśca mahābalaiḥ |

haribhirmeghanirhrādairanyaiśca vanacāribhiḥ || 12 ||

taruṇādityavarṇaiśca śaśigauraiśca vānaraiḥ |

padmakesaravarṇaiśca śvetairmerukṛtālayaiḥ || 13 ||

koṭīsahasrairdaśabhiḥ śrīmānparivṛtastadā |

vīraśśatavalirnāma vānaraḥ pratyadṛśyata || 14 ||

tataḥ kāñcanaśailābhastārāyā vīryavānpitā |

anekairdaśasāhasraiḥ koṭibhiḥ pratyadṛśyata || 15 ||

tathā'pareṇa koṭīnāṃ sahasreṇa samanvitaḥ |

pitā rumāyā samprāptassugrīvaśvaśuro vibhuḥ || 16 ||

padmakesarasaṅkāśastaruṇārkanibhānanaḥ |

buddhimānvānaraśreṣṭhassarvavānarasattamaḥ || 17 ||

anekairbahusāhasrairvānarāṇāṃ samanvitaḥ |

pitā hanumataśraśīmānkesarī pratyadṛśyata || 18 ||

golāṅgūlamahārājo gavākṣo bhīmavikramaḥ |

vṛtaḥ koṭisahasreṇa vānarāṇāmadṛśyata || 19 ||

ṛkṣāṇāṃ bhīmavegānāṃ dhūmraśśatrunibarhaṇaḥ |

vṛtaḥ koṭisahasrābhyāṃ dvābhyāṃ samabhivartata || 20 ||

mahācalanibhairghoraiḥ panaso nāma yūthapaḥ |

ājagāma mahāvīryastisṛbhiḥ koṭibhirvṛtaḥ || 21 ||

nīlāñjanacayākāro nīlo nāmā'tha yūthapaḥ |

adṛśyata mahākāyaḥ koṭibhirdaśabhirvṛtaḥ || 22 ||

tataḥ kāñcanaśailābho gavayo nāma yūthapaḥ |

ājagāma mahāvīryaḥ pañcabhiḥ koṭibhirvṛtaḥ || 23 ||

darīmukhaśca balavānyūthapo'bhyāyayau tadā |

vṛtaḥ koṭisahasreṇa sugrīvaṃ samupasthitaḥ || 24 ||

maindaśca dvividaścobhāvaśviputrau mahābalau |

koṭikoṭisahasreṇa vānarāṇāmadṛśyatām || 25 ||

gajaśca balavān vīraḥ koṭibhistisṛbhirvṛtaḥ |

ājagāma mahātejā sugrīvasya samīpataḥ || 26 ||

ṛkṣarājo mahātejā jāmbavānnāma nāmataḥ |

koṭibhirdaśabhiḥ prāptaḥ sugrīvasya vaśe sthitaḥ || 27 ||

rumaṇvānnāma vikrānto vānaro vānareśvaram |

āyayau balavāṃstūrṇaṃ koṭīśatasamāvṛtaḥ || 28 ||

tataḥ koṭisahasrāṇāṃ sahasreṇa śatena ca |

pṛṣṭhato'nugataḥ prāpto haribhirgandhamādanaḥ || 29 ||

tataḥ padmasahasreṇa vṛtaśśaṅkuśatena ca |

yuvarājo'ṅgadaḥ prāptaḥ pitṛtulyaparākramaḥ || 30 ||

tatastārādyutistāro harirbhīmaparākramaḥ |

pañcabhirharikoṭībhirdūrataḥ pratyadṛśyata || 31 ||

indrajānuḥ kapirvīro yūthapaḥ pratyadṛśyata |

ekādaśānāṃ koṭīnāmīśvarastaissamāvṛtaḥ || 32 ||

tato rambhastvanuprāptastaruṇādityasannibhaḥ |

ayutenāvṛtaścaiva sahasreṇa śatena ca || 33 ||

tato yūthapatirvīro durmukho nāma vānaraḥ |

pratyadṛśyata koṭībhyāṃ dvābhyāṃ parivṛto balī || 34 ||

kailāsaśikharākārairvānarairbhīmavikramaiḥ |

vṛtaḥ koṭisahasreṇa hanumānpratyadṛśyata || 35 ||

nalaścāpi mahāvīryassaṃvṛto drumavāsibhiḥ |

koṭīśatena samprāptassahasreṇa śatena ca || 36 ||

tato dadhimukhaśrīmānkoṭibhirdaśabhirvṛtaḥ |

samprāpto'bhimatastasya sugrīvasya mahātmanaḥ || 37 ||

śarabhaḥ kumudo vahnirvānaro raṃha eva ca |

ete cānye ca bahavo vānarāḥ kāmarūpiṇaḥ || 38 ||

āvṛtya pṛthivīṃ sarvāṃ parvatāṃśca vanāni ca |

yūthapā ssamanuprāptā steṣāṃ saṅkhyā na vidyate || 39 ||

āgatāśca viśiṣṭāśca pṛthivyāṃ sarvavānarāḥ |

āplavantaḥ plavantaśca garjantaśca plavaṅgamāḥ |

abhyavartanta sugrīvaṃ sūryamabhragaṇā iva || 40 ||

kurvāṇā bahuśabdāṃśca prahṛṣṭā bāhuśālinaḥ |

śirobhirvānarendrāya sugrīvāya nyavedayan || 41 ||

apare vānaraśreṣṭhāssaṅgamya ca yathocitam |

sugrīveṇa samāgamya sthitāḥ prāñjalaya stadā || 42 ||

sugrīvastvarito rāme sarvāṃstāṃ vānarararṣabhān |

nivedayitvā dharmajñaḥ sthitaḥ prāñjalirabravīt || 43 ||

yathāsukhaṃ parvatanijhareṣu vaneṣu sarveṣu ca vānarendrāḥ |

niveśayitvā vidhivadbalāni balaṃ balajñaḥ pratipattumīṣṭe || 44 ||

ityārṣe śrīmadrāmāyaṇe vālmīkīya ādikāvye kiṣkindhākāṇḍe ekonacatvāriṃśassargaḥ ||