3.66 Aranyakanda - Shatshashtitama Sargah

ॐ

3.66 அரண்யகாண்ட - ஷட்ஷஷ்டிதம ஸர்கஃ

Valmiki Tamil

ஶ்ரீமத்வால்மீகீய ராமாயணே அரண்யகாண்டம் ।

அத ஷட்ஷஷ்டிதமஸ்ஸர்கஃ ।

தம் ததா ஶோகஸந்தப்தம் விலபந்தமநாதவத் ।

மோஹேந மஹதாவிஷ்டம் பரித்யூநமசேதநம் ॥ 1 ॥

ததஸ்ஸௌமித்ரிராஶ்வாஸ்ய முஹூர்தாதிவ லக்ஷ்மணஃ ।

ராமம் ஸம்போதயாமாஸ சரணௌ சாபிபீடயந் ॥ 2 ॥

மஹதா தபஸா ராம மஹதா சாபி கர்மணா ।

ராஜ்ஞா தஶரதேநாஸி லப்தோऽம்ரு'தமிவாமரைஃ ॥ 3 ॥

தவ சைவ குணைர்பத்தஸ்த்வத்வியோகாந்மஹீபதிஃ ।

ராஜா தேவத்வமாபந்நோ பரதஸ்ய யதாஶ்ருதம் ॥ 4 ॥

யதி துஃகமிதம் ப்ராப்தம் காகுத்ஸ்த ந ஸஹிஷ்யஸே ।

ப்ராக்ரு'தஶ்சால்பஸத்த்வஶ்ச இதரஃ கஸ்ஸஹிஷ்யதி ॥ 5 ॥

துஃகிதோ ஹி பவாந்லோகாம்ஸ்தேஜஸா யதி தக்ஷ்யதே ।

ஆர்தாஃ ப்ரஜா நரவ்யாக்ர க்வ நு யாஸ்யந்தி நிர்வ்ரு'திம் ॥ 6 ॥

லோகஸ்வபாவ ஏவைஷ யயாதிர்நஹுஷாத்மஜஃ ।

கதஶ்ஶக்ரேண ஸாலோக்யமநயஸ்தம் ஸமஸ்ப்ரு'ஶத் ॥ 7 ॥

மஹர்ஷிர்யோ வஸிஷ்டஸ்து யஃ பிதுர்நஃ புரோஹிதஃ ।

அஹ்நா புத்ரஶதம் ஜஜ்ஞே ததைவாஸ்ய புநர்ஹதம் ॥ 8 ॥

யா சேயம் ஜகதாம் மாதா தேவீ லோகநமஸ்க்ரு'தா ।

அஸ்யாஶ்ச சலநம் பூமேர்த்ரு'ஶ்யதே ஸத்யஸம்ஶ்ரவ ॥ 9 ॥

யௌ தர்மௌ ஜகதாம் நேத்ரௌ யத்ர ஸர்வம் ப்ரதிஷ்டிதம் ।

ஆதித்யசந்த்ரௌ க்ரஹணமப்யுபேதௌ மஹாபலௌ ॥ 10 ॥

ஸுமஹாந்த்யபி பூதாநி தேவாஶ்ச புருஷர்ஷப ।

ந தைவஸ்ய ப்ரமுஞ்சந்தி ஸர்வபூதாநி தேஹிநஃ ॥ 11 ॥

ஶக்ராதிஷ்வபி தேவேஷு வர்தமாநௌ நயாநயௌ ।

ஶ்ரூயேதே நரஶார்தூல ந த்வம் ஶோசிதுமர்ஹஸி ॥ 12 ॥

நஷ்டாயாமபி வைதேஹ்யாம் ஹ்ரு'தாயாமபி சாநக ஶோசிதும் நார்ஹஸே வீர யதாந்யஃ ப்ராக்ரு'தஸ்ததா ॥ 13 ॥

த்வவ்திதா ந ஹி ஶோசந்தி ஸததம் ஸத்யதர்ஶிநஃ ।

ஸுமஹத்ஸ்வபி க்ரு'ச்ச்ரேஷு ராமாநிர்விண்ணதர்ஶநாஃ ॥ 14 ॥

தத்த்வதோ ஹி நரஶ்ரேஷ்ட புத்த்யா ஸமநுசிந்தய ।

புத்த்யா யுக்தா மஹாப்ராஜ்ஞா விஜாநந்தி ஶுபாஶுபே ॥ 15 ॥

அத்ரு'ஷ்டகுணதோஷாணாமத்ருவாணாம் து கர்மணாம் ।

நாந்தரேண க்ரியாம் தேஷாம் பலமிஷ்டம் ப்ரவர்ததே ॥ 16 ॥

த்வமேவ ஹி புரா ராம மாமேவம் பஹுஶோऽந்வஶாஃ ।

அநுஶிஷ்யாத்தி கோ நு த்வாமபி ஸாக்ஷாத்ப்ரு'ஹஸ்பதிஃ ॥ 17 ॥

புத்திஶ்ச தே மஹாப்ராஜ்ஞ தேவைரபி துரந்வயா ।

ஶோகேநாபிப்ரஸுப்தம் தே ஜ்ஞாநம் ஸம்போதயாம்யஹம் ॥ 18 ॥

திவ்யம் ச மாநுஷம் ச த்வமாத்மநஶ்ச பராக்ரமம் ।

இக்ஷ்வாகுவ்ரு'ஷபாவேக்ஷ்ய யதஸ்வ த்விஷதாம் வதே ॥ 19 ॥

கிம் தேந ஸர்வநாஶேந க்ரு'தேந புருஷர்ஷப ।

தமேவ த்வம் ரிபும் பாபம் விஜ்ஞாயோத்தர்துமர்ஹஸி ॥ 20 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே ஷட்ஷஷ்டிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha ṣaṭṣaṣṭitamassargaḥ |

taṃ tathā śokasantaptaṃ vilapantamanāthavat |

mohena mahatāviṣṭaṃ paridyūnamacetanam || 1 ||

tatassaumitrirāśvāsya muhūrtādiva lakṣmaṇaḥ |

rāmaṃ sambodhayāmāsa caraṇau cābhipīḍayan || 2 ||

mahatā tapasā rāma mahatā cāpi karmaṇā |

rājñā daśarathenāsi labdho'mṛtamivāmaraiḥ || 3 ||

tava caiva guṇairbaddhastvadviyogānmahīpatiḥ |

rājā devatvamāpanno bharatasya yathāśrutam || 4 ||

yadi duḥkhamidaṃ prāptaṃ kākutstha na sahiṣyase |

prākṛtaścālpasattvaśca itaraḥ kassahiṣyati || 5 ||

duḥkhito hi bhavānlokāṃstejasā yadi dhakṣyate |

ārtāḥ prajā naravyāghra kva nu yāsyanti nirvṛtim || 6 ||

lokasvabhāva evaiṣa yayātirnahuṣātmajaḥ |

gataśśakreṇa sālokyamanayastaṃ samaspṛśat || 7 ||

maharṣiryo vasiṣṭhastu yaḥ piturnaḥ purohitaḥ |

ahnā putraśataṃ jajñe tathaivāsya punarhatam || 8 ||

yā ceyaṃ jagatāṃ mātā devī lokanamaskṛtā |

asyāśca calanaṃ bhūmerdṛśyate satyasaṃśrava || 9 ||

yau dharmau jagatāṃ netrau yatra sarvaṃ pratiṣṭhitam |

ādityacandrau grahaṇamabhyupetau mahābalau || 10 ||

sumahāntyapi bhūtāni devāśca puruṣarṣabha |

na daivasya pramuñcanti sarvabhūtāni dehinaḥ || 11 ||

śakrādiṣvapi deveṣu vartamānau nayānayau |

śrūyete naraśārdūla na tvaṃ śocitumarhasi || 12 ||

naṣṭāyāmapi vaidehyāṃ hṛtāyāmapi cānagha śocituṃ nārhase vīra yathānyaḥ prākṛtastathā || 13 ||

tvavdidhā na hi śocanti satataṃ satyadarśinaḥ |

sumahatsvapi kṛcchreṣu rāmānirviṇṇadarśanāḥ || 14 ||

tattvato hi naraśreṣṭha buddhyā samanucintaya |

budhdyā yuktā mahāprājñā vijānanti śubhāśubhe || 15 ||

adṛṣṭaguṇadoṣāṇāmadhruvāṇāṃ tu karmaṇām |

nāntareṇa kriyāṃ teṣāṃ phalamiṣṭaṃ pravartate || 16 ||

tvameva hi purā rāma māmevaṃ bahuśo'nvaśāḥ |

anuśiṣyāddhi ko nu tvāmapi sākṣādbṛhaspatiḥ || 17 ||

buddhiśca te mahāprājña devairapi duranvayā |

śokenābhiprasuptaṃ te jñānaṃ sambodhayāmyaham || 18 ||

divyaṃ ca mānuṣaṃ ca tvamātmanaśca parākramam |

ikṣvākuvṛṣabhāvekṣya yatasva dviṣatāṃ vadhe || 19 ||

kiṃ tena sarvanāśena kṛtena puruṣarṣabha |

tameva tvaṃ ripuṃ pāpaṃ vijñāyoddhartumarhasi || 20 ||

ityārṣe śrīmadrāmāyaṇe vālmīkīya ādikāvye araṇyakāṇḍe ṣaṭṣaṣṭitamassargaḥ ||