3.10 Aranyakanda - Dashama Sargah

ॐ

3.10 அரண்யகாண்ட - தஶம ஸர்கஃ

Valmiki Tamil

ஶ்ரீமத்வால்மீகீய ராமாயணே அரண்யகாண்டம் ।

அத தஶமஸ்ஸர்கஃ ।

வாக்யமேதத்து வைதேஹ்யா வ்யாஹ்ரு'தம் பர்த்ரு'பக்தயா ।

ஶ்ருத்வா தர்மே ஸ்திதோ ராமஃ ப்ரத்யுவாசாத மைதிலீம் ॥ 1 ॥

ஹிதமுக்தம் த்வயா தேவி ஸ்நிக்தயா ஸத்ரு'ஶம் வசஃ ।

குலம் வ்யபதிஶந்த்யா ச தர்மஜ்ஞே ஜநகாத்மஜே ॥ 2 ॥

கிந்து வக்ஷ்யாம்யஹம் தேவி த்வயைவோக்தமிதம் வசஃ ।

க்ஷத்ரியைர்தார்யதே சாபோ நார்தஶப்தோ பவேதிதி ॥ 3 ॥

தே சார்தா தண்டகாரண்யே முநயஸ்ஸம்ஶிதவ்ரதாஃ ।

மாம் ஸீதே ஸ்வயமாகம்ய ஶரண்யாஶ்ஶரணம் கதாஃ ॥ 4 ॥

வஸந்தோ தர்மநிரதா வநே மூலபலாஶநாஃ ।

ந லபந்தே ஸுகம் பீதா ராக்ஷஸைஃ க்ரூரகர்மபிஃ ॥ 5 ॥

காலே காலே ச நிரதா நியமைர்விவிதைர்வநே ।

பக்ஷ்யந்தே ராக்ஷஸைர்பீமைர்நரமாம்ஸோபஜீவிபிஃ ॥ 6 ॥

தே பக்ஷ்யமாணா முநயோ தண்டகாரண்யவாஸிநஃ ।

அஸ்மாநப்யவபத்யேதி மாமூசுர்த்விஜஸத்தமா ॥ 7 ॥

மயா து வசநம் ஶ்ருத்வா தேஷாமேவம் முகாச்ச்யுதம் ।

க்ரு'த்வா சரணஶுஶ்ரூஷாம் வாக்யமேததுதாஹ்ரு'தம் ॥ 8 ॥

ப்ரஸீதந்து பவந்தோ மே ஹ்ரீரேஷா ஹி மமாதுலா ।

யதீத்ரு'ஶைரஹம் விப்ரைருபஸ்தேயைருபஸ்திதஃ ॥ 9 ॥

கிம் கரோமீதி ச மயா வ்யாஹ்ரு'தம் த்விஜஸந்நிதௌ ।

ஸர்வைரேதைஸ்ஸமாகம்ய வாகியம் ஸமுதாஹ்ரு'தா ॥ 10 ॥

ராக்ஷஸைர்தண்டகாரண்யே பஹுபிஃ காமரூபிபிஃ ।

அர்திதாஸ்ஸ்ம த்ரு'டம் ராம பவாந்நஸ்தத்ர ரக்ஷது ॥ 11 ॥

ஹோமகாலேஷு ஸம்ப்ராப்தாஃ பர்வகாலேஷு சாநக ।

தர்ஷயந்தி ஸுதுர்தர்ஷா ராக்ஷஸாஃ பிஶிதாஶநாஃ ॥ 12 ॥

ராக்ஷஸைர்தர்ஷிதாநாம் ச தாபஸாநாம் தபஸ்விநாம் ।

கதிம் ம்ரு'கயமாணாநாம் பவாந்நஃ பரமா கதிஃ ॥ 13 ॥

காமம் தபஃப்ரபாவேந ஶக்தா ஹந்தும் நிஶாசராந் ।

சிரார்ஜிதம் து நேச்சாமஸ்தபஃ கண்டயிதும் வயம் ॥ 14 ॥

பஹுவிக்நம் தபோ நித்யம் துஶ்சரம் சைவ ராகவ ।

தேந ஶாபம் ந முஞ்சாமோ பக்ஷ்யமாணாஶ்ச ராக்ஷஸைஃ ॥ 15 ॥

ததர்த்யமாநாந்ரக்ஷோபிர்தண்டகாரண்யவாஸிபிஃ ।

ரக்ஷ நஸ்த்வம் ஸஹ ப்ராத்ரா த்வந்நாதா ஹி வயம் வநே ॥ 16 ॥

மயா சைதத்வசஶ்ஶ்ருத்வா கார்த்ஸ்ந்யேந பரிபாலநம் ।

ரு'ஷீணாம் தண்டகாரண்யே ஸம்ஶ்ருதம் ஜநகாத்மஜே ॥ 17 ॥

ஸம்ஶ்ருத்ய ச ந ஶக்ஷ்யாமி ஜீவமாநஃ ப்ரதிஶ்ரவம் ।

முநீநாமந்யதா கர்தும் ஸத்யமிஷ்டம் ஹி மே ஸதா ॥ 18 ॥

அப்யஹம் ஜீவிதம் ஜஹ்யாம் த்வாம் வா ஸீதே ஸலக்ஷ்மணாம் ।

ந து ப்ரதிஜ்ஞாம் ஸம்ஶ்ருத்ய ப்ராஹ்மணேப்யோ விஶேஷதஃ ॥ 19 ॥

ததவஶ்யம் மயா கார்யம்ரு'ஷீணாம் பரிபாலநம் ।

அநுக்தேநாபி வைதேஹி ப்ரதிஜ்ஞாய து கிம் புநஃ ॥ 20 ॥

மம ஸ்நேஹாச்ச ஸௌஹார்தாதிதமுக்தந்த்வயாऽநகே ।

பரிதுஷ்டோऽஸ்ம்யஹம் ஸீதே ந ஹ்யநிஷ்டோऽநுஶிஷ்யதே ॥ 21 ॥

ஸத்ரு'ஶம் சாநுரூபம் ச குலஸ்ய தவ சாத்மநஃ ।

ஸதர்மசாரிணீ மே த்வம் ப்ராணேப்யோऽபி கரீயஸீ ॥ 22 ॥

இத்யேவமுக்த்வா வசநம் மஹாத்மா ஸீதாம் ப்ரியாம் மைதிலராஜபுத்ரீம் ।

ராமோ தநுஷ்மாந்ஸஹ லக்ஷ்மணேந ஜகாம ரம்யாணி தபோவநாநி ॥ 23 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அரண்யகாண்டே தஶமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe araṇyakāṇḍam |

atha daśamassargaḥ |

vākyametattu vaidehyā vyāhṛtaṃ bhartṛbhaktayā |

śrutvā dharme sthito rāmaḥ pratyuvācātha maithilīm || 1 ||

hitamuktaṃ tvayā devi snigdhayā sadṛśaṃ vacaḥ |

kulaṃ vyapadiśantyā ca dharmajñe janakātmaje || 2 ||

kintu vakṣyāmyahaṃ devi tvayaivoktamidaṃ vacaḥ |

kṣatriyairdhāryate cāpo nārtaśabdo bhavediti || 3 ||

te cārtā daṇḍakāraṇye munayassaṃśitavratāḥ |

māṃ sīte svayamāgamya śaraṇyāśśaraṇaṃ gatāḥ || 4 ||

vasanto dharmaniratā vane mūlaphalāśanāḥ |

na labhante sukhaṃ bhītā rākṣasaiḥ krūrakarmabhiḥ || 5 ||

kāle kāle ca niratā niyamairvividhairvane |

bhakṣyante rākṣasairbhīmairnaramāṃsopajīvibhiḥ || 6 ||

te bhakṣyamāṇā munayo daṇḍakāraṇyavāsinaḥ |

asmānabhyavapadyeti māmūcurdvijasattamā || 7 ||

mayā tu vacanaṃ śrutvā teṣāmevaṃ mukhāccyutam |

kṛtvā caraṇaśuśrūṣāṃ vākyametadudāhṛtam || 8 ||

prasīdantu bhavanto me hrīreṣā hi mamātulā |

yadīdṛśairahaṃ viprairupastheyairupasthitaḥ || 9 ||

kiṃ karomīti ca mayā vyāhṛtaṃ dvijasannidhau |

sarvairetaissamāgamya vāgiyaṃ samudāhṛtā || 10 ||

rākṣasairdaṇḍakāraṇye bahubhiḥ kāmarūpibhiḥ |

arditāssma dṛḍhaṃ rāma bhavānnastatra rakṣatu || 11 ||

homakāleṣu samprāptāḥ parvakāleṣu cānagha |

dharṣayanti sudurdharṣā rākṣasāḥ piśitāśanāḥ || 12 ||

rākṣasairdharṣitānāṃ ca tāpasānāṃ tapasvinām |

gatiṃ mṛgayamāṇānāṃ bhavānnaḥ paramā gatiḥ || 13 ||

kāmaṃ tapaḥprabhāvena śaktā hantuṃ niśācarān |

cirārjitaṃ tu necchāmastapaḥ khaṇḍayituṃ vayam || 14 ||

bahuvighnaṃ tapo nityaṃ duścaraṃ caiva rāghava |

tena śāpaṃ na muñcāmo bhakṣyamāṇāśca rākṣasaiḥ || 15 ||

tadardhyamānānrakṣobhirdaṇḍakāraṇyavāsibhiḥ |

rakṣa nastvaṃ saha bhrātrā tvannāthā hi vayaṃ vane || 16 ||

mayā caitadvacaśśrutvā kārtsnyena paripālanam |

ṛṣīṇāṃ daṇḍakāraṇye saṃśrutaṃ janakātmaje || 17 ||

saṃśrutya ca na śakṣyāmi jīvamānaḥ pratiśravam |

munīnāmanyathā kartuṃ satyamiṣṭaṃ hi me sadā || 18 ||

apyahaṃ jīvitaṃ jahyāṃ tvāṃ vā sīte salakṣmaṇām |

na tu pratijñāṃ saṃśrutya brāhmaṇebhyo viśeṣataḥ || 19 ||

tadavaśyaṃ mayā kāryamṛṣīṇāṃ paripālanam |

anuktenāpi vaidehi pratijñāya tu kiṃ punaḥ || 20 ||

mama snehācca sauhārdādidamuktantvayā'naghe |

parituṣṭo'smyahaṃ sīte na hyaniṣṭo'nuśiṣyate || 21 ||

sadṛśaṃ cānurūpaṃ ca kulasya tava cātmanaḥ |

sadharmacāriṇī me tvaṃ prāṇebhyo'pi garīyasī || 22 ||

ityevamuktvā vacanaṃ mahātmā sītāṃ priyāṃ maithilarājaputrīm |

rāmo dhanuṣmānsaha lakṣmaṇena jagāma ramyāṇi tapovanāni || 23 ||

ityārṣe śrīmadrāmāyaṇe vālmīkīya ādikāvye araṇyakāṇḍe daśamassargaḥ ||