2.85 Ayodhyakanda - Panchashititama Sargah

ॐ

2.85 அயோத்யாகாண்ட - பஞ்சாஶீதிதம ஸர்கஃ

Valmiki Tamil

ஶ்ரீமத்வால்மீகீய ராமாயணே அயோத்யாகாண்டம் ।

அத பஞ்சாஶீதிதமஸ்ஸர்கஃ ।

ஏவமுக்தஸ்து பரதோ நிஷாதாதிபதிம் குஹம் ।

ப்ரத்யுவாச மஹாப்ராஜ்ஞோ வாக்யம் ஹேத்வர்தஸம்ஹிதம் ॥ 1 ॥

ஊர்ஜிதஃ கலு தே காமஃ க்ரு'தோ மம குரோஸ்ஸகே ।

யோ மே த்வமீத்ரு'ஶீம் ஸேநாமேகோऽப்யர்சிதுமிச்சஸி ॥ 2 ॥

இத்யுக்த்வா து மஹாதேஜா குஹம் வசநமுத்தமம் ।

அப்ரவீத்பரத ஶ்ஶ்ரீமாநநிஷாதாதிபதிம் புநஃ ॥ 3 ॥

கதரேண கமிஷ்யாமி பரத்வாஜாஶ்ரமம் குஹ ।

கஹநோऽயம் ப்ரு'ஶம் தேஶோ கங்காऽநூபோ துரத்யயஃ ॥ 4 ॥

தஸ்ய தத்வசநம் ஶ்ருத்வா ராஜபுத்ரஸ்ய தீமதஃ ।

அப்ரவீத்ப்ராஞ்ஜலிர்வாக்யம் குஹோ கஹநகோசரஃ ॥ 5 ॥

தாஶாஸ்த்வாऽநுऽகமிஷ்யந்தி தந்விநஸ்ஸுஸமாஹிதாஃ ।

அஹம் த்வாநுகமிஷ்யாமி ராஜபுத்ர மஹாயஶஃ ॥ 6 ॥

கச்சிந்நதுஷ்டோ வ்ரஜஸி ராமஸ்யாக்லிஷ்டகர்மணஃ ।

இயம் தே மஹதீ ஸேநா ஶங்காம் ஜநயதீவ மே ॥ 7 ॥

தமேவமபிபாஷந்தமாகாஶ இவ நிர்மலஃ ।

பரதஶ்ஶ்லக்ஷ்ணயா வாசா குஹம் வசநமப்ரவீத் ॥ 8 ॥

மாபூத்ஸ காலோ யத்கஷ்டம் ந மாம் ஶங்கிதுமர்ஹஸி ।

ராகவ ஸ்ஸஹி மே ப்ராதா ஜ்யேஷ்டஃ பிதுஸமோ மதஃ ॥ 9 ॥

தம் நிவர்தயிதும் யாமி காகுத்ஸ்தம் வநவாஸிநம் ।

புத்திரந்யா ந தே கார்யா குஹ ஸத்யம் ப்ரவீமி தே ॥ 10 ॥

ஸ து ஸம்ஹ்ரு'ஷ்டவதந ஶ்ஶ்ருத்வா பரதபாஷிதம் ।

புநரேவாப்ரவீத்வாக்யம் பரதம் ப்ரதி ஹர்ஷிதஃ ॥ 11 ॥

தந்யஸ்த்வம் ந த்வயா துல்யம் பஶ்யாமி ஜகதீதலே ।

அயத்நாதாகதம் ராஜ்யம் யஸ்த்வம் த்யக்துமிஹேச்சஸி ॥ 12 ॥

ஶாஶ்வதீ கலு தே கீர்திர்லோகாநநுசரிஷ்யதி ।

யஸ்த்வம் க்ரு'ச்ச்ரகதம் ராமம் ப்ரத்யாநயிதுமிச்சஸி ॥ 13 ॥

ஏவம் ஸம்பாஷமாணஸ்ய குஹஸ்ய பரதம் ததா ।

பபௌ நஷ்டப்ரபஸ்ஸூர்யோ ரஜநீ சாப்யவர்தத ॥ 14 ॥

ஸந்நிவேஶ்ய ஸ தாம் ஸேநாம் குஹேந பரிதோஷிதஃ ।

ஶத்ருக்நேந ஸஹ ஶ்ரீமாஞ்சயநம் ஸமுபாகமத் ॥ 15 ॥

ராமசிந்தாமய ஶ்ஶோகோ பரதஸ்ய மஹாத்மநஃ ।

உபஸ்திதோ ஹ்யநர்ஹஸ்ய தர்மப்ரேக்ஷஸ்ய தாத்ரு'ஶஃ ॥ 16 ॥

அந்தர்தாஹேந தஹநஸ்ஸந்தாபயதி ராகவம் ।

வநதாஹாபிஸந்தப்தம் கூடோऽக்நிரிவ பாதபம் ॥ 17 ॥

ப்ரஸ்ரு'தஸ்ஸர்வகாத்ரேப்யஸ்ஸ்வேதம் ஶோகாக்நிஸம்பவம் ।

யதா ஸூர்யாம்ஶுஸந்தப்தோ ஹிமவாந் ப்ரஸ்ரு'தோஹிமம் ॥ 18 ॥

த்யாநநிர்தரஶைலேந விநிஶ்ஶ்வஸிததாதுநா ।

தைந்யபாதபஸங்கேந ஶோகாயாஸாதிஶ்ரு'ங்கிணா ॥ 19 ॥

ப்ரமோஹாநந்தஸத்த்வேந ஸந்தாபௌஷதிவேணுநா ।

ஆக்ராந்தோ துஃகஶைலேந மஹதா கைகயீஸுதஃ ॥ 20 ॥

விநிஶ்ஶ்வஸந்வை ப்ரு'ஶதுர்மநாஸ்ததஃ ப்ரமூடஸஞ்ஜ்ஞஃ பரமாபதம் கதஃ ।

ஶமம் ந லேபே ஹ்ரு'தயஜ்வரார்திதோ நரர்ஷபோ யூதஹதோ யதர்ஷபஃ ॥ 21 ॥

குஹேந ஸார்தம் பரதஸ்ஸமாகதோ மஹாநுபாவஸ்ஸஜநஸ்ஸமாஹிதஃ ।

ஸுதுர்மநாஸ்தம் பரதம் ததா புநர்குஹ ஸ்ஸமாஶ்வாஸயதக்ரஜம் ப்ரதி ॥ 22 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அயோத்யாகாண்டே பஞ்சாஶீதிதமஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha pañcāśītitamassargaḥ |

evamuktastu bharato niṣādādhipatiṃ guham |

pratyuvāca mahāprājño vākyaṃ hetvarthasaṃhitam || 1 ||

ūrjitaḥ khalu te kāmaḥ kṛto mama gurossakhe |

yo me tvamīdṛśīṃ senāmeko'bhyarcitumicchasi || 2 ||

ityuktvā tu mahātejā guhaṃ vacanamuttamam |

abravīdbharata śśrīmānaniṣādādhipatiṃ punaḥ || 3 ||

katareṇa gamiṣyāmi bharadvājāśramaṃ guha |

gahano'yaṃ bhṛśaṃ deśo gaṅgā'nūpo duratyayaḥ || 4 ||

tasya tadvacanaṃ śrutvā rājaputrasya dhīmataḥ |

abravītprāñjalirvākyaṃ guho gahanagocaraḥ || 5 ||

dāśāstvā'nu'gamiṣyanti dhanvinassusamāhitāḥ |

ahaṃ tvānugamiṣyāmi rājaputra mahāyaśaḥ || 6 ||

kacchinnaduṣṭo vrajasi rāmasyākliṣṭakarmaṇaḥ |

iyaṃ te mahatī senā śaṅkāṃ janayatīva me || 7 ||

tamevamabhibhāṣantamākāśa iva nirmalaḥ |

bharataśślakṣṇayā vācā guhaṃ vacanamabravīt || 8 ||

mābhūtsa kālo yatkaṣṭaṃ na māṃ śaṅkitumarhasi |

rāghava ssahi me bhrātā jyeṣṭhaḥ pitusamo mataḥ || 9 ||

taṃ nivartayituṃ yāmi kākutsthaṃ vanavāsinam |

buddhiranyā na te kāryā guha satyaṃ bravīmi te || 10 ||

sa tu saṃhṛṣṭavadana śśrutvā bharatabhāṣitam |

punarevābravīdvākyaṃ bharataṃ prati harṣitaḥ || 11 ||

dhanyastvaṃ na tvayā tulyaṃ paśyāmi jagatītale |

ayatnādāgataṃ rājyaṃ yastvaṃ tyaktumihecchasi || 12 ||

śāśvatī khalu te kīrtirlokānanucariṣyati |

yastvaṃ kṛcchragataṃ rāmaṃ pratyānayitumicchasi || 13 ||

evaṃ sambhāṣamāṇasya guhasya bharataṃ tadā |

babhau naṣṭaprabhassūryo rajanī cābhyavartata || 14 ||

sanniveśya sa tāṃ senāṃ guhena paritoṣitaḥ |

śatrughnena saha śrīmāñchayanaṃ samupāgamat || 15 ||

rāmacintāmaya śśoko bharatasya mahātmanaḥ |

upasthito hyanarhasya dharmaprekṣasya tādṛśaḥ || 16 ||

antardāhena dahanassantāpayati rāghavam |

vanadāhābhisantaptaṃ gūḍho'gniriva pādapam || 17 ||

prasṛtassarvagātrebhyassvedaṃ śokāgnisambhavam |

yathā sūryāṃśusantapto himavān prasṛtohimam || 18 ||

dhyānanirdharaśailena viniśśvasitadhātunā |

dainyapādapasaṅghena śokāyāsādhiśṛṅgiṇā || 19 ||

pramohānantasattvena santāpauṣadhiveṇunā |

ākrānto duḥkhaśailena mahatā kaikayīsutaḥ || 20 ||

viniśśvasanvai bhṛśadurmanāstataḥ pramūḍhasañjñaḥ paramāpadaṃ gataḥ |

śamaṃ na lebhe hṛdayajvarārdito nararṣabho yūthahato yatharṣabhaḥ || 21 ||

guhena sārdhaṃ bharatassamāgato mahānubhāvassajanassamāhitaḥ |

sudurmanāstaṃ bharataṃ tadā punarguha ssamāśvāsayadagrajaṃ prati || 22 ||

ityārṣe śrīmadrāmāyaṇe vālmīkīya ādikāvye ayodhyākāṇḍe pañcāśītitamassargaḥ ||