2.50 Ayodhyakanda - Panchasha Sargah

ॐ

2.50 அயோத்யாகாண்ட - பஞ்சாஶ ஸர்கஃ

Valmiki Tamil

ஶ்ரீமத்வால்மீகீய ராமாயணே அயோத்யாகாண்டம் ।

அத பஞ்சாஶஸ்ஸர்கஃ ।

விஶாலாந் கோஸலாந் ரம்யாந் யாத்வா லக்ஷ்மணபூர்வஜஃ ।

அயோத்யாபிமுகோ தீமாந் ப்ராஞ்ஜலிர்வாக்யமப்ரவீத் ॥ 1 ॥

ஆப்ரு'ச்சே த்வாம் புரீஶ்ரேஷ்டே காகுத்ஸ்தபரிபாலிதே ।

தைவதாநி ச யாநி த்வாம் பாலயந்தி வஸந்தி ச ॥ 2 ॥

நிவ்ரு'த்தவநவாஸஸ்த்வாமந்ரு'ணோ ஜகதீபதேஃ ।

புநர்த்ரக்ஷ்யாமி மாத்ரா ச பித்ரா ச ஸஹ ஸங்கதஃ ॥ 3 ॥

ததோ ருதிரதாம்ராக்ஷோ புஜமுத்யம்ய தக்ஷிணம் ।

அஶ்ருபூர்ணமுகோ தீநோऽப்ரவீஜ்ஜாநபதம் ஜநம் ॥ 4 ॥

அநுக்ரோஶோ தயா சைவ யதார்ஹம் மயி வஃ க்ரு'தஃ ।

சிரம் துஃகஸ்ய பாபீயோ கம்யதாமர்தஸித்தயே ॥ 5 ॥

தேऽபிவாத்ய மஹாத்மாநம் க்ரு'த்வா சாபி ப்ரதக்ஷிணம் ।

விலபந்தோ நரா கோரம் வ்யதிஷ்டந்த க்வசித் க்வசித் ॥ 6 ॥

ததா விலபதாம் தேஷாமத்ரு'ப்தாநாம் ச ராகவஃ ।

அசக்ஷுர்விஷயம் ப்ராயாத்யதார்கஃ க்ஷணதாமுகே ॥ 7 ॥

ததோ தாந்யதநோபேதாந் தாநஶீலஜநாந் ஶிவாந் ।

அகுதஶ்சித்பயாந் ரம்யாம்ஶ்சைத்யயூபஸமாவ்ரு'தாந் ॥ 8 ॥

உத்யாநாம்ரவநோபேதாந் ஸம்பந்நஸலிலாஶயாந் ।

துஷ்டபுஷ்டஜநாகீர்ணாந் கோகுலாகுலஸேவிதாந் ॥ 9 ॥

லக்ஷணீயாந்நரேந்த்ராணாம் ப்ரஹ்மகோஷாபிநாதிதாந் ।

ரதேந புருஷவ்யாக்ரஃ கோஸலாநத்யவர்தத ॥ 10 ॥

மத்யேநமுதிதம் ஸ்பீதம் ரம்யோத்யாநஸமாகுலம் ।

ராஜ்யம் போக்யம் நரேந்த்ராணாம் யயௌ த்ரு'திமதாம் வரஃ ॥ 11 ॥

தத ஸ்த்ரிபதகாம் திவ்யாம் ஶிவதோயாமஶைவலாம் ।

ததர்ஶ ராகவோ கங்காம் புண்யாம்ரு'ஷிநிஷேவிதாம் ॥ 12 ॥

ஆஶ்ரமைரவிதூரஸ்தைஃ ஶ்ரீமத்பிஸ்ஸமலங்க்ரு'தாம் ।

காலேऽப்ஸரோபிர்ஹ்ரு'ஷ்டாபி ஸ்ஸேவிதாம்போஹ்ரதாம் ஶிவாம் ॥ 13 ॥

தேவதாநவகந்தர்வைஃ கிந்நரைருபஶோபிதாம் ।

நாநாகந்தர்வபத்நீபி ஸ்ஸேவிதாம் ஸததம் ஶிவாம் ॥ 14 ॥

தேவாऽऽக்ரீடஶதாகீர்ணாம் தேவோத்யாநஶதாயுதாம் ।

தேவார்தமாகாஶகமாம் விக்யாதாம் தேவபத்மிநீம் ॥ 15 ॥

ஜலாகாதாட்டஹாஸோக்ராம் பேநநிர்மலஹாஸிநீம் ।

க்வசித்வேணீக்ரு'தஜலாம் க்வசிதாவர்தஶோபிதாம் ॥ 16 ॥

க்வசித் ஸ்திமிதகம்பீராம் க்வசித்வேகஜலாகுலாம் ।

க்வசித்கம்பீரநிர்கோஷாம் க்வசித்பைரவநிஸ்வநாம் ॥ 17 ॥

தேவஸங்காப்லுதஜலாம் நிர்மலோத்பலஶோபிதாம் ।

க்வசிதாபோகபுலிநாம் க்வசிந்நிர்மலவாலுகாம் ॥ 18 ॥

ஹம்ஸஸாரஸஸங்குஷ்டாம் சக்ரவாகோபகூஜிதாம் ।

ஸதா மதைஶ்ச விஹகைரபிஸந்நாதிதாந்தராம் ॥ 19 ॥

க்வசித்தீரருஹைர்வ்ரு'க்ஷைர்மாலாபிரிவஶோபிதாம் ।

க்வசித்புல்லோத்பலச்சந்நாம் க்வசித்பத்மவநாகுலாம் ॥ 20 ॥

க்வசித்குமுதஷண்டைஶ்ச குட்மலைருபஶோபிதாம் ।

நாநாபுஷ்பரஜோத்வஸ்தாம் ஸமதாமிவ ச க்வசித் ॥ 21 ॥

வ்யபேதமலஸங்காதாம் மணிநிர்மலதர்ஶநாம் ।

திஶாகஜைர்வநகஜை ர்மத்தைஶ்ச வரவாரணைஃ ॥ 22 ॥

தேவோபவாஹ்யைஶ்ச முஹுஸ்ஸந்நாதிதவநாந்தராம் ।

ப்ரமதாமிவ யத்நேந பூஷிதாம் பூஷணோத்தமைஃ ॥ 23 ॥

பலைஃ புஷ்பைஃ கிஸலயைர்வ்ரு'தாம் குல்மைர்த்விஜைஸ்ததா ।

ஶிம்ஶுமாரைஶ்ச நக்ரைஶ்ச புஜங்கைஶ்ச நிஷேவிதாம் ॥ 24 ॥

விஷ்ணுபாதச்யுதாம் திவ்யாமபாபாம் பாபநாஶிநீம் ।

தாம் ஶங்கரஜடாஜூடாத்ப்ரஷ்டாம் ஸாகரதேஜஸா ॥ 25 ॥

ஸமுத்ரமஹிஷீம் கங்காம் ஸாரஸக்ரௌஞ்சநாதிதாம் ।

ஆஸஸாத மஹாபாஹுஃ ஶ்ரு'ங்கிபேரபுரம் ப்ரதி ॥ 26 ॥

தாமூர்மிகலிலாவர்தாமந்வவேக்ஷ்ய மஹாரதஃ ।

ஸுமந்த்ரமப்ரவீத்ஸூதமிஹைவாத்ய வஸாமஹே ॥ 27 ॥

அவிதூராதயம் நத்யா பஹுபுஷ்பப்ரவாலவாந் ।

ஸுமஹாநிங்குதீவ்ரு'க்ஷோ வஸாமோऽத்ரைவ ஸாரதே ॥ 28 ॥

த்ரக்ஷ்யாம ஸ்ஸரிதாம் ஶ்ரேஷ்டாம் ஸம்மாந்யஸலிலாம் ஶிவாம் ।

தேவதாநவகந்தர்வம்ரு'கமாநுஷபக்ஷிணாம் ॥ 29 ॥

லக்ஷ்மணஶ்ச ஸுமந்த்ரஶ்ச பாடமித்யேவ ராகவம் ।

உக்த்வா தமிங்குதீவ்ரு'க்ஷம் ததோபயயதுர்ஹயைஃ ॥ 30 ॥

ராமோऽபியாய தம் ரம்யம் வ்ரு'க்ஷமிக்ஷ்வாகுநந்தநஃ ।

ரதாதவாதரத்தஸ்மாத்ஸபார்ய ஸ்ஸஹலக்ஷ்மணஃ ॥ 31 ॥

ஸுமந்த்ரோऽப்யவதீர்யாஸ்மாந்மோசயித்வா ஹயோத்தமாந் ।

வ்ரு'க்ஷமூலகதம் ராமமுபதஸ்தே க்ரு'தாஞ்ஜலிஃ ॥ 32 ॥

தத்ர ராஜா குஹோ நாம ராமஸ்யாத்மஸமஸ்ஸகா ।

நிஷாதஜாத்யோ பலவாந் ஸ்தபதிஶ்சேதி விஶ்ருதஃ ॥ 33 ॥

ஸ ஶ்ரு'த்வா புருஷவ்யாக்ரம் ராமம் விஷயமாகதம் ।

வ்ரு'த்தைஃ பரிவ்ரு'தோऽமாத்யைஃ ஜ்ஞாதிபிஶ்சாப்யுபாகதஃ ॥ 34 ॥

ததோ நிஷாதாதிபதிம் த்ரு'ஷ்ட்வா தூராதுபஸ்திதம் ।

ஸஹ ஸௌமித்ரிணா ராம ஸ்ஸமாகச்சத்குஹேந ஸஃ ॥ 35 ॥

தமார்தஸ்ஸம்பரிஷ்வஜ்ய குஹோ ராகவமப்ரவீத் ।

யதாऽயோத்யா ததேயம் தே ராம கிம் கரவாணி தே ॥ 36 ॥

ஈத்ரு'ஶம் ஹி மஹாபாஹோ கஃ ப்ராப்ஸ்யத்யதிதிம் ப்ரியம் ।

ததோ குணவதந்நாத்யமுபாதாய ப்ரு'தக்விதம் ॥ 37 ॥

அர்க்யம் சோபாநயத்க்ஷிப்ரம் வாக்யம் சேதமுவாச ஹ ।

ஸ்வாகதம் தே மஹாபாஹோ தவேயமகிலா மஹீ ॥ 38 ॥

வயம் ப்ரேஷ்யா பவாந்பர்தா ஸாது ராஜ்யம் ப்ரஶாதி நஃ ।

பக்ஷ்யம் போஜ்யம் ச பேயம் ச லேஹ்யஞ்சேதமுபஸ்திதம் ॥ 39 ॥

ஶயநாநி ச முக்யாநி வாஜிநாம் காதநம் ச தே ।

ஏவம் ப்ருவாணம் து குஹம் ராகவஃ ப்ரத்யுவாச ஹ ॥ 40 ॥

அர்சிதாஶ்சைவ ஹ்ரு'ஷ்டாஶ்ச பவதா ஸர்வதா வயம் ।

பத்ப்யாமபிகமாச்சைவ ஸ்நேஹஸந்தர்ஶநேந ச ॥ 41 ॥

புஜாப்யாம் ஸாது பீநாப்யாம் பீடயந்வாக்யமப்ரவீத் ।

திஷ்ட்யா த்வாம் குஹ பஶ்யாமி ஹ்யரோகம் ஸஹ பாந்தவைஃ ।

அபி தே குஶலம் ராஷ்ட்ரே மித்ரேஷு ச தநேஷு ச ॥ 42 ॥

யத்த்விதம் பவதா கிஞ்சித்ப்ரீத்யா ஸமுபகல்பிதம் ।

ஸர்வம் ததநுஜாநாமி ந ஹி வர்தே ப்ரதிக்ரஹே ॥ 43 ॥

குஶசீராஜிநதரம் பலமூலாஶிநம் ச மாம் ।

வித்தி ப்ரணிஹிதம் தர்மே தாபஸம் வநகோசரம் ॥ 44 ॥

அஶ்வாநாம் காதநேநாஹமர்தீ நாந்யேந கேநசித் ।

ஏதாவதாऽத்ர பவதா பவிஷ்யாமி ஸுபூஜிதஃ ॥ 45 ॥

ஏதே ஹி தயிதா ராஜ்ஞஃ பிதுர்தஶரதஸ்ய மே ।

ஏதைஸ்ஸுவிஹிதைரஶ்வை பவிஷ்யாம்யஹமர்சிதஃ ॥ 46 ॥

அஶ்வாநாம் ப்ரதிபாநம் ச காதநம் சைவ ஸோऽந்வஶாத் ।

குஹஸ்தத்ரைவ புருஷாம் ஸ்த்வரிதம் தீயதாமிதி ॥ 47 ॥

ததஶ்சீரோத்தராஸங்கஃ ஸந்த்யாமந்வாஸ்ய பஶ்சிமாம் ।

ஜலமேவாததே போஜ்யம் லக்ஷ்மணேநாऽऽஹ்ரு'தம் ஸ்வயம் ॥ 48 ॥

தஸ்ய பூமௌ ஶயாநஸ்ய பாதௌ ப்ரக்ஷால்ய லக்ஷ்மணஃ ।

ஸபார்யஸ்ய ததோऽப்யேத்ய தஸ்தௌ வ்ரு'க்ஷமுபாஶ்ரிதஃ ॥ 49 ॥

குஹோऽபி ஸஹ ஸூதேந ஸௌமித்ரிமநுபாஷயந் ।

அந்வஜாக்ரத்ததோ ராமமப்ரமத்தோ தநுர்தரஃ ॥ 50 ॥

ததா ஶயாநஸ்ய ததோऽஸ்ய தீமதோ யஶஸ்விநோ தாஶரதேர்மஹாத்மநஃ ।

அத்ரு'ஷ்டதுஃகஸ்ய ஸுகோசிதஸ்ய ஸா ததாவ்யதீயாய சிரேண ஶர்வரீ ॥ 51 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே அயோத்யாகாண்டே பஞ்சாஶஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha pañcāśassargaḥ |

viśālān kosalān ramyān yātvā lakṣmaṇapūrvajaḥ |

ayodhyābhimukho dhīmān prāñjalirvākyamabravīt || 1 ||

āpṛcche tvāṃ purīśreṣṭhe kākutsthaparipālite |

daivatāni ca yāni tvāṃ pālayanti vasanti ca || 2 ||

nivṛttavanavāsastvāmanṛṇo jagatīpateḥ |

punardrakṣyāmi mātrā ca pitrā ca saha saṅgataḥ || 3 ||

tato rudhiratāmrākṣo bhujamudyamya dakṣiṇam |

aśrupūrṇamukho dīno'bravījjānapadaṃ janam || 4 ||

anukrośo dayā caiva yathārhaṃ mayi vaḥ kṛtaḥ |

ciraṃ duḥkhasya pāpīyo gamyatāmarthasiddhaye || 5 ||

te'bhivādya mahātmānaṃ kṛtvā cāpi pradakṣiṇam |

vilapanto narā ghoraṃ vyatiṣṭhanta kvacit kvacit || 6 ||

tathā vilapatāṃ teṣāmatṛptānāṃ ca rāghavaḥ |

acakṣurviṣayaṃ prāyādyathārkaḥ kṣaṇadāmukhe || 7 ||

tato dhānyadhanopetān dānaśīlajanān śivān |

akutaścidbhayān ramyāṃścaityayūpasamāvṛtān || 8 ||

udyānāmravanopetān sampannasalilāśayān |

tuṣṭapuṣṭajanākīrṇān gokulākulasevitān || 9 ||

lakṣaṇīyānnarendrāṇāṃ brahmaghoṣābhināditān |

rathena puruṣavyāghraḥ kosalānatyavartata || 10 ||

madhyenamuditaṃ sphītaṃ ramyodyānasamākulam |

rājyaṃ bhogyaṃ narendrāṇāṃ yayau dhṛtimatāṃ varaḥ || 11 ||

tata stripathagāṃ divyāṃ śivatoyāmaśaivalām |

dadarśa rāghavo gaṅgāṃ puṇyāmṛṣiniṣevitām || 12 ||

āśramairavidūrasthaiḥ śrīmadbhissamalaṅkṛtām |

kāle'psarobhirhṛṣṭābhi ssevitāmbhohradāṃ śivām || 13 ||

devadānavagandharvaiḥ kinnarairupaśobhitām |

nānāgandharvapatnībhi ssevitāṃ satataṃ śivām || 14 ||

devā''krīḍaśatākīrṇāṃ devodyānaśatāyutām |

devārthamākāśagamāṃ vikhyātāṃ devapadminīm || 15 ||

jalāghātāṭṭahāsogrāṃ phenanirmalahāsinīm |

kvacidveṇīkṛtajalāṃ kvacidāvartaśobhitām || 16 ||

kvacit stimitagambhīrāṃ kvacidvegajalākulām |

kvacidgambhīranirghoṣāṃ kvacidbhairavanisvanām || 17 ||

devasaṅghāplutajalāṃ nirmalotpalaśobhitām |

kvacidābhogapulināṃ kvacinnirmalavālukām || 18 ||

haṃsasārasasaṅghuṣṭāṃ cakravākopakūjitām |

sadā madaiśca vihagairabhisannāditāntarām || 19 ||

kvacittīraruhairvṛkṣairmālābhirivaśobhitām |

kvacitphullotpalacchannāṃ kvacitpadmavanākulām || 20 ||

kvacitkumudaṣaṇḍaiśca kuḍmalairupaśobhitām |

nānāpuṣparajodhvastāṃ samadāmiva ca kvacit || 21 ||

vyapetamalasaṅghātāṃ maṇinirmaladarśanām |

diśāgajairvanagajai rmattaiśca varavāraṇaiḥ || 22 ||

devopavāhyaiśca muhussannāditavanāntarām |

pramadāmiva yatnena bhūṣitāṃ bhūṣaṇottamaiḥ || 23 ||

phalaiḥ puṣpaiḥ kisalayairvṛtāṃ gulmairdvijaistathā |

śiṃśumāraiśca nakraiśca bhujaṅgaiśca niṣevitām || 24 ||

viṣṇupādacyutāṃ divyāmapāpāṃ pāpanāśinīm |

tāṃ śaṅkarajaṭājūṭādbhraṣṭāṃ sāgaratejasā || 25 ||

samudramahiṣīṃ gaṅgāṃ sārasakrauñcanāditām |

āsasāda mahābāhuḥ śṛṅgiberapuraṃ prati || 26 ||

tāmūrmikalilāvartāmanvavekṣya mahārathaḥ |

sumantramabravītsūtamihaivādya vasāmahe || 27 ||

avidūrādayaṃ nadyā bahupuṣpapravālavān |

sumahāniṅgudīvṛkṣo vasāmo'traiva sārathe || 28 ||

drakṣyāma ssaritāṃ śreṣṭhāṃ sammānyasalilāṃ śivām |

devadānavagandharvamṛgamānuṣapakṣiṇām || 29 ||

lakṣmaṇaśca sumantraśca bāḍhamityeva rāghavam |

uktvā tamiṅgudīvṛkṣaṃ tadopayayaturhayaiḥ || 30 ||

rāmo'bhiyāya taṃ ramyaṃ vṛkṣamikṣvākunandanaḥ |

rathādavātarattasmātsabhārya ssahalakṣmaṇaḥ || 31 ||

sumantro'pyavatīryāsmānmocayitvā hayottamān |

vṛkṣamūlagataṃ rāmamupatasthe kṛtāñjaliḥ || 32 ||

tatra rājā guho nāma rāmasyātmasamassakhā |

niṣādajātyo balavān sthapatiśceti viśrutaḥ || 33 ||

sa śṛtvā puruṣavyāghraṃ rāmaṃ viṣayamāgatam |

vṛddhaiḥ parivṛto'mātyaiḥ jñātibhiścābhyupāgataḥ || 34 ||

tato niṣādādhipatiṃ dṛṣṭvā dūrādupasthitam |

saha saumitriṇā rāma ssamāgacchadguhena saḥ || 35 ||

tamārtassampariṣvajya guho rāghavamabravīt |

yathā'yodhyā tatheyaṃ te rāma kiṃ karavāṇi te || 36 ||

īdṛśaṃ hi mahābāho kaḥ prāpsyatyatithiṃ priyam |

tato guṇavadannādyamupādāya pṛthagvidham || 37 ||

arghyaṃ copānayatkṣipraṃ vākyaṃ cedamuvāca ha |

svāgataṃ te mahābāho taveyamakhilā mahī || 38 ||

vayaṃ preṣyā bhavānbhartā sādhu rājyaṃ praśādhi naḥ |

bhakṣyaṃ bhojyaṃ ca peyaṃ ca lehyañcedamupasthitam || 39 ||

śayanāni ca mukhyāni vājināṃ khādanaṃ ca te |

evaṃ bruvāṇaṃ tu guhaṃ rāghavaḥ pratyuvāca ha || 40 ||

arcitāścaiva hṛṣṭāśca bhavatā sarvathā vayam |

padbhyāmabhigamāccaiva snehasandarśanena ca || 41 ||

bhujābhyāṃ sādhu pīnābhyāṃ pīḍayanvākyamabravīt |

diṣṭyā tvāṃ guha paśyāmi hyarogaṃ saha bāndhavaiḥ |

api te kuśalaṃ rāṣṭre mitreṣu ca dhaneṣu ca || 42 ||

yattvidaṃ bhavatā kiñcitprītyā samupakalpitam |

sarvaṃ tadanujānāmi na hi varte pratigrahe || 43 ||

kuśacīrājinadharaṃ phalamūlāśinaṃ ca mām |

viddhi praṇihitaṃ dharme tāpasaṃ vanagocaram || 44 ||

aśvānāṃ khādanenāhamarthī nānyena kenacit |

etāvatā'tra bhavatā bhaviṣyāmi supūjitaḥ || 45 ||

ete hi dayitā rājñaḥ piturdaśarathasya me |

etaissuvihitairaśvai bhaviṣyāmyahamarcitaḥ || 46 ||

aśvānāṃ pratipānaṃ ca khādanaṃ caiva so'nvaśāt |

guhastatraiva puruṣāṃ stvaritaṃ dīyatāmiti || 47 ||

tataścīrottarāsaṅgaḥ sandhyāmanvāsya paścimām |

jalamevādade bhojyaṃ lakṣmaṇenā''hṛtaṃ svayam || 48 ||

tasya bhūmau śayānasya pādau prakṣālya lakṣmaṇaḥ |

sabhāryasya tato'bhyetya tasthau vṛkṣamupāśritaḥ || 49 ||

guho'pi saha sūtena saumitrimanubhāṣayan |

anvajāgrattato rāmamapramatto dhanurdharaḥ || 50 ||

tathā śayānasya tato'sya dhīmato yaśasvino dāśarathermahātmanaḥ |

adṛṣṭaduḥkhasya sukhocitasya sā tadāvyatīyāya cireṇa śarvarī || 51 ||

ityārṣe śrīmadrāmāyaṇe vālmīkīya ādikāvye ayodhyākāṇḍe pañcāśassargaḥ ||