1.6 Balakanda - Shashtha Sargah

ॐ

1.6 பாலகாண்ட - ஷஷ்ட ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத ஷஷ்டஸ்ஸர்கஃ ।

. தஸ்யாம் புர்யாமயோத்யாயாம் வேதவித்ஸர்வஸங்க்ரஹஃ ।

தீர்கதர்ஶீ மஹாதேஜாஃ பௌரஜாநபதப்ரியஃ ॥ 1 ॥

இக்ஷ்வாகூணாமதிரதோ யஜ்வா தர்மரதோ வஶீ ।

மஹர்ஷிகல்போ ராஜர்ஷிஸ்த்ரிஷு லோகேஷு விஶ்ருதஃ ॥ 2 ॥

பலவாந்நிஹதாமித்ரோ மித்ரவாந்விஜிதேந்த்ரியஃ ।

தநைஶ்ச ஸங்க்ரஹைஶ்சாந்யைஶ்ஶக்ரவைஶ்ரவணோபமஃ ॥ 3 ॥

யதா மநுர்மஹாதேஜா லோகஸ்ய பரிரக்ஷிதா ।

ததா தஶரதோ ராஜா வஸஞ்ஜகதபாலயத் ॥ 4 ॥

தேந ஸத்யாபிஸந்தேந த்ரிவர்கமநுதிஷ்டதா ।

பாலிதா ஸா புரீ ஶ்ரேஷ்டா இந்த்ரேணேவாமராவதீ ॥ 5 ॥

தஸ்மிந்புரவரே ஹ்ரு'ஷ்டா தர்மாத்மாநோ பஹுஶ்ருதாஃ ।

நராஸ்துஷ்டா தநைஸ்ஸ்வைஸ்ஸ்வைரலுப்தாஸ்ஸத்யவாதிநஃ ॥ 6 ॥

நால்பஸந்நிசயஃ கஶ்சிதாஸீத்தஸ்மிந் புரோத்தமே ।

குடும்பீ யோ ஹ்யஸித்தார்தோऽகவாஶ்வதநதாந்யவாந் ॥ 7 ॥

காமீ வா ந கதர்யோ வா ந்ரு'ஶம்ஸஃ புருஷஃ க்வசித் ।

த்ரஷ்டும் ஶக்யமயோத்யாயாந்நாவித்வாந்ந ச நாஸ்திகஃ ॥ 8 ॥

ஸர்வே நராஶ்ச நார்யஶ்ச தர்மஶீலாஸ்ஸுஸம்யதாஃ ।

உதிதாஶ்ஶீலவ்ரு'த்தாப்யாம் மஹர்ஷய இவாமலாஃ ॥ 9 ॥

நாகுண்டலீ நாமகுடீ நாஸ்ரக்வீ நால்பபோகவாந் ।

நாம்ரு'ஷ்டோ நாநுலிப்தாங்கோ நாஸுகந்தஶ்ச வித்யதே ॥ 10 ॥

நாம்ரு'ஷ்டபோஜீ நாதாதா நாப்யநங்கதநிஷ்கத்ரு'க் ।

நாஹஸ்தாபரணோ வாऽபி த்ரு'ஶ்யதே நாப்யநாத்மவாந் ॥ 11 ॥

நாநாஹிதாக்நிர்நாயஜ்வா ந க்ஷுத்ரோ வா ந தஸ்கரஃ ।

கஶ்சிதாஸீதயோத்யாயாந்ந ச நிர்வ்ரு'த்தஸங்கரஃ ॥ 12 ॥

ஸ்வகர்மநிரதா நித்யம் ப்ராஹ்மணா விஜிதேந்த்ரியாஃ ।

தாநாத்யயநஶீலாஶ்ச ஸம்யதாஶ்ச பரிக்ரஹே ॥ 13 ॥

ந நாஸ்திகோ நாந்ரு'தகோ ந கஶ்சிதபஹுஶ்ருதஃ ।

நாஸூயகோ ந சாऽஶக்தோ நாவித்வாந்வித்யதே ததா ॥ 14 ॥

நாஷடங்கவிதத்ராஸீந்நாவ்ரதோ நாஸஹஸ்ரதஃ ।

ந தீநஃ க்ஷிப்தசித்தோ வா வ்யதிதோ வாऽபி கஶ்சந ॥ 15 ॥

கஶ்சிந்நரோ வா நாரீ வா நாஶ்ரீமாந்நாப்யரூபவாந் ।

த்ரஷ்டும் ஶக்யமயோத்யாயாம் நாபி ராஜந்யபக்திமாந் ॥ 16 ॥

வர்ணேஷ்வக்ர்யசதுர்தேஷு தேவதாதிதிபூஜகாஃ ।

க்ரு'தஜ்ஞாஶ்ச வதாந்யாஶ்ச ஶூரா விக்ரமஸம்யுதாஃ ॥ 17 ॥

தீர்காயுஷோ நராஸ்ஸர்வே தர்மம் ஸத்யம் ச ஸம்ஶ்ரிதாஃ ।

ஸஹிதாஃ புத்ரபௌத்ரைஶ்ச நித்யம் ஸ்த்ரீபிஃ புரோத்தமே ॥ 18 ॥

க்ஷத்ரம் ப்ரஹ்மமுகம் சாஸீத்வைஶ்யாஃ க்ஷத்ரமநுவ்ரதாஃ ।

ஶூத்ராஸ்ஸ்வதர்மநிரதாஸ்த்ரீந்வர்ணாநுபசாரிணஃ ॥ 19 ॥

ஸா தேநேக்ஷ்வாகுநாதேந புரீ ஸுபரிரக்ஷிதா ।

யதா புரஸ்தாந்மநுநா மாநவேந்த்ரேண தீமதா ॥ 20 ॥

யோதாநாமக்நிகல்பாநாம் பேஶலாநாமமர்ஷிணாம் ।

ஸம்பூர்ணா க்ரு'தவித்யாநாம் குஹா கேஸரிணாமிவ ॥ 21 ॥

காம்போஜவிஷயே ஜாதைர்பாஹ்லீகைஶ்ச ஹயோத்தமைஃ ।

வநாயுஜைர்நதீஜைஶ்ச பூர்ணா ஹரிஹயோத்தமைஃ ॥ 22 ॥

விந்த்யபர்வதஜைர்மத்தைஃ பூர்ணா ஹைமவதைரபி ।

மதாந்விதைரதிபலைர்மாதங்கைஃ பர்வதோபமைஃ ॥ 23 ॥

ஐராவதகுலீநைஶ்ச மஹாபத்மகுலைஸ்ததா ।

அஞ்ஜநாதபி நிஷ்பந்நைர்வாமநாதபி ச த்விபைஃ ॥ 24 ॥

பத்ரைர்மந்த்ரைர்ம்ரு'கைஶ்சைவ பத்ரமந்த்ரம்ரு'கைஸ்ததா ।

பத்ரமந்த்ரைர்பத்ரம்ரு'கைர்ம்ரு'கமந்த்ரைஶ்ச ஸா புரீ ।

நித்யமத்தைஸ்ஸதா பூர்ணா நாகைரசலஸந்நிபைஃ ॥ 25 ॥

ஸா யோஜநே ச த்வே பூயஃ ஸத்யநாமா ப்ரகாஶதே ।

யஸ்யாம் தஶரதோ ராஜா வஸந் ஜகதபாலயத் ॥ 26 ॥

தாம் புரீம் ஸ மஹாதேஜா ராஜா தஶரதோ மஹாந் ।

ஶஶாஸ ஶமிதாமித்ரோ நக்ஷத்ராணீவ சந்த்ரமாஃ ॥ 27 ॥

தாம் ஸத்யநாமாம் த்ரு'டதோரணார்கலாம் க்ரு'ஹைர்விசித்ரைருபஶோபிதாம் ஶிவாம் ।

புரீமயோத்யாம் ந்ரு'ஸஹஸ்ரஸங்குலாம் ஶஶாஸ வை ஶக்ரஸமோ மஹீபதிஃ ॥ 28 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே ஷஷ்டஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha ṣaṣṭhassargaḥ |

. tasyāṃ puryāmayodhyāyāṃ vedavitsarvasaṅgrahaḥ |

dīrghadarśī mahātejāḥ paurajānapadapriyaḥ || 1 ||

ikṣvākūṇāmatiratho yajvā dharmarato vaśī |

maharṣikalpo rājarṣistriṣu lokeṣu viśrutaḥ || 2 ||

balavānnihatāmitro mitravānvijitendriyaḥ |

dhanaiśca saṅgrahaiścānyaiśśakravaiśravaṇopamaḥ || 3 ||

yathā manurmahātejā lokasya parirakṣitā |

tathā daśaratho rājā vasañjagadapālayat || 4 ||

tena satyābhisandhena trivargamanutiṣṭhatā |

pālitā sā purī śreṣṭhā indreṇevāmarāvatī || 5 ||

tasminpuravare hṛṣṭā dharmātmāno bahuśrutāḥ |

narāstuṣṭā dhanaissvaissvairalubdhāssatyavādinaḥ || 6 ||

nālpasannicayaḥ kaścidāsīttasmin purottame |

kuṭumbī yo hyasiddhārtho'gavāśvadhanadhānyavān || 7 ||

kāmī vā na kadaryo vā nṛśaṃsaḥ puruṣaḥ kvacit |

draṣṭuṃ śakyamayodhyāyānnāvidvānna ca nāstikaḥ || 8 ||

sarve narāśca nāryaśca dharmaśīlāssusaṃyatāḥ |

uditāśśīlavṛttābhyāṃ maharṣaya ivāmalāḥ || 9 ||

nākuṇḍalī nāmakuṭī nāsragvī nālpabhogavān |

nāmṛṣṭo nānuliptāṅgo nāsugandhaśca vidyate || 10 ||

nāmṛṣṭabhojī nādātā nāpyanaṅgadaniṣkadhṛk |

nāhastābharaṇo vā'pi dṛśyate nāpyanātmavān || 11 ||

nānāhitāgnirnāyajvā na kṣudro vā na taskaraḥ |

kaścidāsīdayodhyāyānna ca nirvṛttasaṅkaraḥ || 12 ||

svakarmaniratā nityaṃ brāhmaṇā vijitendriyāḥ |

dānādhyayanaśīlāśca saṃyatāśca parigrahe || 13 ||

na nāstiko nānṛtako na kaścidabahuśrutaḥ |

nāsūyako na cā'śakto nāvidvānvidyate tadā || 14 ||

nāṣaḍaṅgavidatrāsīnnāvrato nāsahasradaḥ |

na dīnaḥ kṣiptacitto vā vyathito vā'pi kaścana || 15 ||

kaścinnaro vā nārī vā nāśrīmānnāpyarūpavān |

draṣṭuṃ śakyamayodhyāyāṃ nāpi rājanyabhaktimān || 16 ||

varṇeṣvagryacaturtheṣu devatātithipūjakāḥ |

kṛtajñāśca vadānyāśca śūrā vikramasaṃyutāḥ || 17 ||

dīrghāyuṣo narāssarve dharmaṃ satyaṃ ca saṃśritāḥ |

sahitāḥ putrapautraiśca nityaṃ strībhiḥ purottame || 18 ||

kṣatraṃ brahmamukhaṃ cāsīdvaiśyāḥ kṣatramanuvratāḥ |

śūdrāssvadharmaniratāstrīnvarṇānupacāriṇaḥ || 19 ||

sā tenekṣvākunāthena purī suparirakṣitā |

yathā purastānmanunā mānavendreṇa dhīmatā || 20 ||

yodhānāmagnikalpānāṃ peśalānāmamarṣiṇām |

sampūrṇā kṛtavidyānāṃ guhā kesariṇāmiva || 21 ||

kāmbhojaviṣaye jātairbāhlīkaiśca hayottamaiḥ |

vanāyujairnadījaiśca pūrṇā harihayottamaiḥ || 22 ||

vindhyaparvatajairmattaiḥ pūrṇā haimavatairapi |

madānvitairatibalairmātaṅgaiḥ parvatopamaiḥ || 23 ||

airāvatakulīnaiśca mahāpadmakulaistathā |

añjanādapi niṣpannairvāmanādapi ca dvipaiḥ || 24 ||

bhadrairmandrairmṛgaiścaiva bhadramandramṛgaistathā |

bhadramandrairbhadramṛgairmṛgamandraiśca sā purī |

nityamattaissadā pūrṇā nāgairacalasannibhaiḥ || 25 ||

sā yojane ca dve bhūyaḥ satyanāmā prakāśate |

yasyāṃ daśaratho rājā vasan jagadapālayat || 26 ||

tāṃ purīṃ sa mahātejā rājā daśaratho mahān |

śaśāsa śamitāmitro nakṣatrāṇīva candramāḥ || 27 ||

tāṃ satyanāmāṃ dṛḍhatoraṇārgalāṃ gṛhairvicitrairupaśobhitāṃ śivām |

purīmayodhyāṃ nṛsahasrasaṅkulāṃ śaśāsa vai śakrasamo mahīpatiḥ || 28 ||

ityārṣe śrīmadrāmāyaṇe vālmīkīya ādikāvye bālakāṇḍe ṣaṣṭhassargaḥ ||