📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.43 பாலகாண்ட - த்ரிசத்வாரிம்ஶ ஸர்கஃ
1.43 Balakanda - Trichatvarimsha Sargah
Valmiki Tamil
ஶ்ரீமத்வால்மீகீய ராமாயணே பாலகாண்டம் ।
அத த்ரிசத்வாரிம்ஶஸ்ஸர்கஃ ।
தேவதேவே கதே தஸ்மிந் ஸோऽங்குஷ்டாக்ரநிபீடிதாம் ।
க்ரு'த்வா வஸுமதீம் ராம ஸம்வத்ஸரமுபாஸத ॥ 1 ॥
அத ஸம்வத்ஸரே பூர்ணே ஸர்வலோகநமஸ்க்ரு'தஃ ।
உமாபதிஃ பஶுபதீ ராஜாநமிதமப்ரவீத் ॥ 2 ॥
ப்ரீதஸ்தேऽஹம் நரஶ்ரேஷ்ட கரிஷ்யாமி தவ ப்ரியம் ।
ஶிரஸா தாரயிஷ்யாமி ஶைலராஜஸுதாமஹம் ॥ 3 ॥
ததோ ஹைமவதீ ஜ்யேஷ்டா ஸர்வலோகநமஸ்க்ரு'தா ।
ததா ஸாதிமஹத்ரூபம் க்ரு'த்வா வேகம் ச துஸ்ஸஹம் ॥ 4 ॥
ஆகாஶாதபதத்ராம ஶிவே ஶிவஶிரஸ்யுத ।
அசிந்தயச்ச ஸா தேவீ கங்கா பரமதுர்தரா ॥ 5 ॥
விஶாம்யஹம் ஹி பாதாலம் ஸ்ரோதஸா க்ரு'ஹ்ய ஶங்கரம் ।
தஸ்யாவலேபநம் ஜ்ஞாத்வா க்ருத்தஸ்து பகவாந் ஹரஃ ॥ 6 ॥
திரோபாவயிதும் புத்திம் சக்ரே த்ரிநயநஸ்ததா ।
ஸா தஸ்மிந் பதிதா புண்யா புண்யே ருத்ரஸ்ய மூர்தநி ॥ 7 ॥
ஹிமவத்ப்ரதிமே ராம ஜடாமண்டலகஹ்வரே ।
ஸா கதஞ்சிந்மஹீம் கந்தும் நாஶக்நோத்யத்நமாஸ்திதா ॥ 8 ॥
நைவ நிர்கமநம் லேபே ஜடாமண்டலமோஹிதா ।
தத்ரைவாபம்ப்ரமத்தேவீ ஸம்வத்ஸரகணாந் பஹூந் ॥ 9 ॥
தாமபஶ்யந்புநஸ்தத்ர தபஃ பரமமாஸ்திதஃ ।
அநேந தோஷிதஶ்சாபூதத்யர்தம் ரகுநந்தந ॥ 10 ॥
விஸஸர்ஜ ததோ கங்காம் ஹரோ பிந்துஸரஃ ப்ரதி ।
தஸ்யாம் விஸ்ரு'ஜ்யமாநாயாம் ஸப்தஸ்ரோதாம்ஸி ஜஜ்ஞிரே ॥ 11 ॥
ஹ்லாதிநீ பாவநீ சைவ நலிநீ ச ததாऽபரா ।
திஸ்ரஃ ப்ராசீம் திஶம் ஜக்முஃ கங்காஶ்ஶிவஜலாஶ்ஶுபாஃ ॥ 12 ॥
ஸுசக்ஷுஶ்சைவ ஸீதா ச ஸிந்துஶ்சைவ மஹாநதீ ।
திஸ்ரஸ்த்வேதா திஶம் ஜக்முஃ ப்ரதீசீம் து ஶுபோதகாஃ ॥ 13 ॥
ஸப்தமீ சாந்வகாத்தாஸாம் பகீரதமதோ ந்ரு'பம் ।
பகீரதோऽபி ராஜர்ஷிர்திவ்யம் ஸ்யந்தநமாஸ்திதஃ ॥ 14 ॥
ப்ராயாதக்ரே மஹாதேஜா கங்கா தம் சாப்யநுவ்ரஜத் ।
ககநாச்சங்கரஶிரஸ்ததோ தரணிமாஶ்ரிதா ॥ 15 ॥
வ்யஸர்பத ஜலம் தத்ர தீவ்ரஶப்தபுரஸ்க்ரு'தம் ।
மத்ஸ்யகச்சபஸங்கைஶ்ச ஶிம்ஶுமாரகணைஸ்ததா ॥ 16 ॥
பதத்பிஃ பதிதைஶ்சாந்யைர்வ்யரோசத வஸுந்தரா ।
ததோ தேவர்ஷிகந்தர்வா யக்ஷஸித்தகணாஸ்ததா ॥ 17 ॥
வ்யலோகயந்த தே தத்ர ககநாத்காம் கதாம் ததா ।
விமாநைர்நகராகாரைர்ஹயைர்கஜவரைஸ்ததா ॥ 18 ॥
பாரிப்லவகதைஶ்சாபி தேவதாஸ்தத்ர விஷ்டிதாஃ ।
ததத்புததமம் லோகே கங்காபதநமுத்தமம் ॥ 19 ॥
தித்ரு'க்ஷவோ தேவகணாஃ ஸமீயுரமிதௌஜஸஃ ।
ஸம்பதத்பிஸ்ஸுரகணைஸ்தேஷாம் சாபரணௌஜஸா ॥ 20 ॥
ஶதாதித்யமிவாபாதி ககநம் கததோயதம் ।
ஶிம்ஶுமாரோரககணைர்மீநைரபி ச சஞ்சலைஃ ॥ 21 ॥
வித்யுத்பிரிவ விக்ஷிப்தமாகாஶமபவத்ததா ।
பாண்டரைஸ்ஸலிலோத்பீடைஃ கீர்யமாணைஸ்ஸஹஸ்ரதா ॥ 22 ॥
ஶாரதாப்ரைரிவாகீர்ணம் ககநம் ஹம்ஸஸம்ப்லவைஃ ।
க்வசித்த்ருததரம் யாதி குடிலம் க்வசிதாயதம் ॥ 23 ॥
விநதம் க்வசிதுத்தூதம் க்வசித்யாதி ஶநைஶ்ஶநைஃ ।
ஸலிலேநைவ ஸலிலம் க்வசிதப்யாஹதம் புநஃ ॥ 24 ॥
முஹுரூர்த்வமுகம் கத்வா பபாத வஸுதாதலம் ।
தச்சங்கரஶிரோப்ரஷ்டம் ப்ரஷ்டம் பூமிதலே புநஃ ॥ 25 ॥
வ்யரோசத ததா தோயம் நிர்மலம் கதகல்மஷம் ।
தத்ர தேவர்ஷிகந்தர்வா வஸுதாதலவாஸிநஃ ॥ 26 ॥
பவாங்கபதிதம் தோயம் பவித்ரமிதி பஸ்ப்ரு'ஶுஃ ।
ஶாபாத்ப்ரபதிதா யே ச ககநாத்வஸுதாதலம் ॥ 27 ॥
க்ரு'த்வா தத்ராபிஷேகம் தே பபூவுர்கதகல்மஷாஃ ।
தூதபாபாஃ புநஸ்தேந தோயேநாத ஸுபாஸ்வதா ॥ 28 ॥
புநராகாஶமாவிஶ்ய ஸ்வாந் லோகாந் ப்ரதிபேதிரே ।
முமுதே முதிதோ லோகஸ்தேந தோயேந பாஸ்வதா ॥ 29 ॥
க்ரு'தாபிஷேகோ கங்காயாம் பபூவ விகதக்லமஃ ।
பகீரதோऽபி ராஜார்ஷிர்திவ்யம் ஸ்யந்தநமாஸ்திதஃ ।
ப்ராயாதக்ரே மஹாதேஜாஸ்தம் கங்கா ப்ரு'ஷ்டதோऽந்வகாத் ॥ 30 ॥
தேவாஸ்ஸர்ஷிகணாஃ ஸர்வே தைத்யதாநவராக்ஷஸாஃ ॥ 31 ॥
கந்தர்வயக்ஷப்ரவராஸ்ஸகிந்நரமஹோரகாஃ ।
ஸர்வாஶ்சாப்ஸரஸோ ராம பகீரதரதாநுகாம் ॥ 32 ॥
கங்காமந்வகமந் ப்ரீதாஸ்ஸர்வே ஜலசராஶ்ச யே ।
யதோ பகீரதோ ராஜா ததோ கங்காயஶஸ்விநீ ॥ 33 ॥
ஜகாம ஸரிதாம் ஶ்ரேஷ்டா ஸர்வபாபப்ரணாஶிநீ ।
ததோ ஹி யஜமாநஸ்ய ஜஹ்நோரத்புதகர்மணஃ ॥ 34 ॥
கங்கா ஸம்ப்லாவயாமாஸ யஜ்ஞவாடம் மஹாத்மநஃ ।
தஸ்யாவலேபநம் ஜ்ஞாத்வா க்ருத்தோ யஜ்வா து ராகவ ॥ 35 ॥
அபிபச்ச ஜலம் ஸர்வம் கங்காயாஃ பரமாத்புதம் ।
ததோ தேவாஸ்ஸகந்தர்வா ரு'ஷயஶ்ச ஸுவிஸ்மிதாஃ ॥ 36 ॥
பூஜயந்தி மஹாத்மாநம் ஜஹ்நும் புருஷஸத்தமம் ।
கங்காம் சாபி நயந்தி ஸ்ம துஹித்ரு'த்வே மஹாத்மநஃ ॥ 37 ॥
ததஸ்துஷ்டோ மஹாதேஜாஶ்ஶ்ரோத்ராப்யாமஸ்ரு'ஜத் புநஃ ॥ 38 ॥
தஸ்மாஜ்ஜஹ்நுஸுதா கங்கா ப்ரோச்யதே ஜாஹ்நவீதிச ।
ஜகாம ச புநர்கங்கா பகீரதரதாநுகா ।
ஸாகரம் சாபி ஸம்ப்ராப்தா ஸா ஸரித்ப்ரவரா ததா ॥ 39 ॥
ரஸாதலமுபாகச்சத்ஸித்த்யர்தம் தஸ்ய கர்மணஃ ।
பகீரதோऽபி ராஜர்ஷிஃ கங்காமாதாய யத்நதஃ ।
பிதாமஹாந் பஸ்மக்ரு'தாநபஶ்யத்தீநசேதநஃ ॥ 40 ॥
அத தத்பஸ்மநாம் ராஶிம் கங்காஸலிலமுத்தமம் ।
ப்லாவயத்தூதபாப்மாநஸ்ஸ்வர்கம் ப்ராப்தா ரகூத்தம ॥ 41 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே த்ரிசத்வாரிம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha tricatvāriṃśassargaḥ |
devadeve gate tasmin so'ṅguṣṭhāgranipīḍitām |
kṛtvā vasumatīṃ rāma saṃvatsaramupāsata || 1 ||
atha saṃvatsare pūrṇe sarvalokanamaskṛtaḥ |
umāpatiḥ paśupatī rājānamidamabravīt || 2 ||
prītaste'haṃ naraśreṣṭha kariṣyāmi tava priyam |
śirasā dhārayiṣyāmi śailarājasutāmaham || 3 ||
tato haimavatī jyeṣṭhā sarvalokanamaskṛtā |
tadā sātimahadrūpaṃ kṛtvā vegaṃ ca dussaham || 4 ||
ākāśādapatadrāma śive śivaśirasyuta |
acintayacca sā devī gaṅgā paramadurdharā || 5 ||
viśāmyahaṃ hi pātālaṃ srotasā gṛhya śaṅkaram |
tasyāvalepanaṃ jñātvā kruddhastu bhagavān haraḥ || 6 ||
tirobhāvayituṃ buddhiṃ cakre trinayanastadā |
sā tasmin patitā puṇyā puṇye rudrasya mūrdhani || 7 ||
himavatpratime rāma jaṭāmaṇḍalagahvare |
sā kathañcinmahīṃ gantuṃ nāśaknodyatnamāsthitā || 8 ||
naiva nirgamanaṃ lebhe jaṭāmaṇḍalamohitā |
tatraivābambhramaddevī saṃvatsaragaṇān bahūn || 9 ||
tāmapaśyanpunastatra tapaḥ paramamāsthitaḥ |
anena toṣitaścābhūdatyarthaṃ raghunandana || 10 ||
visasarja tato gaṅgāṃ haro bindusaraḥ prati |
tasyāṃ visṛjyamānāyāṃ saptasrotāṃsi jajñire || 11 ||
hlādinī pāvanī caiva nalinī ca tathā'parā |
tisraḥ prācīṃ diśaṃ jagmuḥ gaṅgāśśivajalāśśubhāḥ || 12 ||
sucakṣuścaiva sītā ca sindhuścaiva mahānadī |
tisrastvetā diśaṃ jagmuḥ pratīcīṃ tu śubhodakāḥ || 13 ||
saptamī cānvagāttāsāṃ bhagīrathamatho nṛpam |
bhagīratho'pi rājarṣirdivyaṃ syandanamāsthitaḥ || 14 ||
prāyādagre mahātejā gaṅgā taṃ cāpyanuvrajat |
gaganācchaṅkaraśirastato dharaṇimāśritā || 15 ||
vyasarpata jalaṃ tatra tīvraśabdapuraskṛtam |
matsyakacchapasaṅghaiśca śiṃśumāragaṇaistadā || 16 ||
patadbhiḥ patitaiścānyairvyarocata vasundharā |
tato devarṣigandharvā yakṣasiddhagaṇāstadā || 17 ||
vyalokayanta te tatra gaganādgāṃ gatāṃ tathā |
vimānairnagarākārairhayairgajavaraistadā || 18 ||
pāriplavagataiścāpi devatāstatra viṣṭhitāḥ |
tadadbhutatamaṃ loke gaṅgāpatanamuttamam || 19 ||
didṛkṣavo devagaṇāḥ samīyuramitaujasaḥ |
sampatadbhissuragaṇaisteṣāṃ cābharaṇaujasā || 20 ||
śatādityamivābhāti gaganaṃ gatatoyadam |
śiṃśumāroragagaṇairmīnairapi ca cañcalaiḥ || 21 ||
vidyudbhiriva vikṣiptamākāśamabhavattadā |
pāṇḍaraissalilotpīḍaiḥ kīryamāṇaissahasradhā || 22 ||
śāradābhrairivākīrṇaṃ gaganaṃ haṃsasamplavaiḥ |
kvaciddrutataraṃ yāti kuṭilaṃ kvacidāyatam || 23 ||
vinataṃ kvaciduddhūtaṃ kvacidyāti śanaiśśanaiḥ |
salilenaiva salilaṃ kvacidabhyāhataṃ punaḥ || 24 ||
muhurūrdhvamukhaṃ gatvā papāta vasudhātalam |
tacchaṅkaraśirobhraṣṭaṃ bhraṣṭaṃ bhūmitale punaḥ || 25 ||
vyarocata tadā toyaṃ nirmalaṃ gatakalmaṣam |
tatra devarṣigandharvā vasudhātalavāsinaḥ || 26 ||
bhavāṅgapatitaṃ toyaṃ pavitramiti paspṛśuḥ |
śāpātprapatitā ye ca gaganādvasudhātalam || 27 ||
kṛtvā tatrābhiṣekaṃ te babhūvurgatakalmaṣāḥ |
dhūtapāpāḥ punastena toyenātha subhāsvatā || 28 ||
punarākāśamāviśya svān lokān pratipedire |
mumude mudito lokastena toyena bhāsvatā || 29 ||
kṛtābhiṣeko gaṅgāyāṃ babhūva vigataklamaḥ |
bhagīratho'pi rājārṣirdivyaṃ syandanamāsthitaḥ |
prāyādagre mahātejāstaṃ gaṅgā pṛṣṭhato'nvagāt || 30 ||
devāssarṣigaṇāḥ sarve daityadānavarākṣasāḥ || 31 ||
gandharvayakṣapravarāssakinnaramahoragāḥ |
sarvāścāpsaraso rāma bhagīratharathānugām || 32 ||
gaṅgāmanvagaman prītāssarve jalacarāśca ye |
yato bhagīratho rājā tato gaṅgāyaśasvinī || 33 ||
jagāma saritāṃ śreṣṭhā sarvapāpapraṇāśinī |
tato hi yajamānasya jahnoradbhutakarmaṇaḥ || 34 ||
gaṅgā samplāvayāmāsa yajñavāṭaṃ mahātmanaḥ |
tasyāvalepanaṃ jñātvā kruddho yajvā tu rāghava || 35 ||
apibacca jalaṃ sarvaṃ gaṅgāyāḥ paramādbhutam |
tato devāssagandharvā ṛṣayaśca suvismitāḥ || 36 ||
pūjayanti mahātmānaṃ jahnuṃ puruṣasattamam |
gaṅgāṃ cāpi nayanti sma duhitṛtve mahātmanaḥ || 37 ||
tatastuṣṭo mahātejāśśrotrābhyāmasṛjat punaḥ || 38 ||
tasmājjahnusutā gaṅgā procyate jāhnavītica |
jagāma ca punargaṅgā bhagīratharathānugā |
sāgaraṃ cāpi samprāptā sā saritpravarā tadā || 39 ||
rasātalamupāgacchatsiddhyarthaṃ tasya karmaṇaḥ |
bhagīratho'pi rājarṣiḥ gaṅgāmādāya yatnataḥ |
pitāmahān bhasmakṛtānapaśyaddīnacetanaḥ || 40 ||
atha tadbhasmanāṃ rāśiṃ gaṅgāsalilamuttamam |
plāvayaddhūtapāpmānassvargaṃ prāptā raghūttama || 41 ||
ityārṣe śrīmadrāmāyaṇe vālmīkīya ādikāvye bālakāṇḍe tricatvāriṃśassargaḥ ||
InfoLyter.in — Sacred Vedic Knowledge Portal · Free forever