📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.26 பாலகாண்ட - ஷட்விம்ஶ ஸர்கஃ
1.26 Balakanda - Shadvimsha Sargah
Valmiki Tamil
ஶ்ரீமத்வால்மீகீய ராமாயணே பாலகாண்டம் ।
அத ஷட்விம்ஶஸ்ஸர்கஃ ।
முநேர்வசநமக்லீபம் ஶ்ருத்வா நரவராத்மஜஃ ।
ராகவஃ ப்ராஞ்ஜலிர்பூத்வா ப்ரத்யுவாச த்ரு'டவ்ரதஃ ॥ 1 ॥
பிதுர்வசநநிர்தேஶாத்பிதுர்வசநகௌரவாத் ।
வசநம் கௌஶிகஸ்யேதி கர்தவ்யமவிஶங்கயா ॥ 2 ॥
அநுஶிஷ்டோऽஸ்ம்யயோத்யாயாம் குருமத்யே மஹாத்மநா ।
பித்ரா தஶரதேநாஹம் நாவஜ்ஞேயம் ஹி தத்வசஃ ॥ 3 ॥
ஸோऽஹம் பிதுர்வசஶ்ஶ்ருத்வா ஶாஸநாத்ப்ரஹ்மவாதிநஃ ।
கரிஷ்யாமி ந ஸந்தேஹஸ்தாடகாவதமுத்தமம் ॥ 4 ॥
கோப்ராஹ்மணஹிதார்தாய தேஶஸ்யாஸ்ய ஸுகாய ச ।
தவ சைவாப்ரமேயஸ்ய வசநம் கர்துமுத்யதஃ ॥ 5 ॥
ஏவமுக்த்வா தநுர்மத்யே பத்வா முஷ்டிமரிந்தமஃ ।
ஜ்யாஶப்தமகரோத்தீவ்ரம் திஶஶ்ஶப்தேந நாதயந் ॥ 6 ॥
தேந ஶப்தேந வித்ரஸ்தாஸ்தாடகாவநவாஸிநஃ ।
தாடகா ச ஸுஸங்க்ருத்தா தேந ஶப்தேந மோஹிதா ॥ 7 ॥
தம் ஶப்தமபிநித்யாய ராக்ஷஸீ க்ரோதமூர்சிதா ।
ஶ்ருத்வா சாப்யத்ரவத்வேகாத்யதஶ்ஶப்தோ விநிஸ்ஸ்ரு'தஃ ॥ 8 ॥
தாம் த்ரு'ஷ்ட்வா ராகவஃ க்ருத்தாம் விக்ரு'தாம் விக்ரு'தாநநாம் ।
ப்ரமாணேநாதிவ்ரு'த்தாம் ச லக்ஷ்மணம் ஸோऽப்யபாஷத ॥ 9 ॥
பஶ்ய லக்ஷ்மண யக்ஷிண்யா பைரவம் தாருணம் வபுஃ ।
பித்யேரந் தர்ஶநாதஸ்யா பீரூணாம் ஹ்ரு'தயாநி ச ॥ 10 ॥
ஏநாம் பஶ்ய துராதர்ஷாம் மாயாபலஸமந்விதாம் ।
விநிவ்ரு'த்தாம் கரோம்யத்ய ஹ்ரு'தகர்ணாக்ரநாஸிகாம் ॥ 11 ॥
ந ஹ்யேநாமுத்ஸஹே ஹந்தும் ஸ்த்ரீஸ்வபாவேந ரக்ஷிதாம் ।
வீர்யம் சாஸ்யாம் கதிம் சாபி ஹநிஷ்யாமீதி மே மதிஃ ॥ 12 ॥
ஏவம் ப்ருவாணே ராமே து தாடகா க்ரோதமூர்சிதா ।
உத்யம்ய பாஹூ கர்ஜந்தீ ராமமேவாப்யதாவத ॥ 13 ॥
விஶ்வாமித்ரஸ்து ப்ரஹ்மர்ஷிர்ஹுங்காரேணாபிபர்த்ஸ்யதாம் ।
ஸ்வஸ்தி ராகவயோரஸ்து ஜயம் சைவாப்யபாஷத ॥ 14 ॥
உத்தூந்வாநா ரஜோ கோரம் தாடகா ராகவாவுபௌ ।
ரஜோமோஹேந மஹதா முஹூர்தம் ஸா வ்யமோஹயத் ॥ 15 ॥
ததோ மாயாம் ஸமாஸ்தாய ஶிலாவர்ஷேண ராகவௌ ।
அவாகிரத்ஸுமஹதா ததஶ்சுக்ரோத ராகவஃ ॥ 16 ॥
ஶிலாவர்ஷம் மஹத்தஸ்யாஶ்ஶரவர்ஷேண ராகவஃ ।
ப்ரதிஹத்யோபதாவந்த்யாஃ கரௌ சிச்சேத பத்ரிபிஃ ॥ 17 ॥
ததஶ்சிந்நபுஜாம் ஶ்ராந்தாமப்யாஶே பரிகர்ஜதீம் ।
ஸௌமித்ரிரகரோத்க்ரோதாத்த்ரு'தகர்ணாக்ரநாஸிகாம் ॥ 18 ॥
காமரூபதரா ஸத்யஃ க்ரு'த்வா ரூபாண்யநேகஶஃ ।
அந்தர்தாநம் கதா யக்ஷீ மோஹயந்தீவ மாயயா ॥ 19 ॥
அஶ்மவர்ஷம் விமுஞ்சந்தீ பைரவம் விசசார ஹ ।
ததஸ்தாவஶ்மவர்ஷேண கீர்யமாணௌ ஸமந்ததஃ ॥ 20 ॥
த்ரு'ஷ்ட்வா காதிஸுதஶ்ஶ்ரீமாநிதம் வசநமப்ரவீத் ।
அலம் தே க்ரு'ணயா ராம பாபைஷா துஷ்டசாரிணீ ॥ 21 ॥
யஜ்ஞவிக்நகரீ யக்ஷீ புராவர்ததி மாயயா ।
வத்யதாம் தாவதேவைஷா புரா ஸந்த்யா ப்ரவர்ததே ॥ 22 ॥
ரக்ஷாம்ஸி ஸந்த்யாகாலேஷு துர்தர்ஷாணி பவந்தி வை ।
இத்யுக்தஸ்து ததா யக்ஷீ அஶ்மவ்ரு'ஷ்ட்யாபிவர்ஷதீம் ॥ 23 ॥
தர்ஶயந் ஶப்தவேதித்வம் தாம் ருரோத ஸ ஸாயகைஃ ।
ஸா ருத்தா ஶரஜாலேந மாயாபலஸமந்விதா ॥ 24 ॥
அபிதுத்ராவ காகுத்ஸ்தம் லக்ஷ்மணம் ச விநேதுஷீ ।
தாமாபதந்தீம் வேகேந விக்ராந்தாமஶநீமிவ ॥ 25 ॥
ஶரேணோரஸி விவ்யாத ஸா பபாத மமார ச ।
தாம் ஹதாம் பீமஸங்காஶாம் த்ரு'ஷ்ட்வா ஸுரபதிஸ்ததா ॥ 26 ॥
ஸாது ஸாத்விதி காகுத்ஸ்தம் ஸுராஶ்ச ஸமபூஜயந் ।
உவாச பரமப்ரீத ஸ்ஸஹஸ்ராக்ஷஃ புரந்தரஃ ॥ 27 ॥
ஸுராஶ்ச ஸர்வே ஸம்ஹ்ரு'ஷ்டா விஶ்வாமித்ரமதாப்ருவந் ।
முநே கௌஶிக பத்ரம் தே ஸேந்த்ராஸ்ஸர்வே மருத்கணாஃ ॥ 28 ॥
தோஷிதாஃ கர்மணாऽநேந ஸ்நேஹம் தர்ஶய ராகவே ।
ப்ரஜாபதேர்ப்ரு'ஶாஶ்வஸ்ய புத்ராந் ஸத்யபராக்ரமாந் ॥ 29 ॥
தபோபலப்ரு'தோ ப்ரஹ்மந் ராகவாய நிவேதய ।
பாத்ரபூதஶ்ச தே ப்ரஹ்மம்ஸ்தவாநுகமநே த்ரு'தஃ ॥ 30 ॥
கர்தவ்யம் ச மஹத்கர்ம ஸுராணாம் ராஜஸூநுநா ।
ஏவமுக்த்வா ஸுராஸ்ஸர்வே ஹ்ரு'ஷ்டா ஜக்முர்யதாகதம் ॥ 31 ॥
விஶ்வாமித்ரம் புரஸ்க்ரு'த்ய ததஸ்ஸந்த்யா ப்ரவர்ததே ।
ததோ முநிவரஃ ப்ரீதஸ்தாடகாவததோஷிதஃ ॥ 32 ॥
மூர்த்நி ராமமுபாக்ராய இதம் வசநமப்ரவீத் ।
இஹாத்ய ரஜநீம் ராம வஸேம ஶுபதர்ஶந ॥ 33 ॥
ஶ்வஃ ப்ரபாதே கமிஷ்யாமஸ்ததாஶ்ரமபதம் மம ।
விஶ்வாமித்ரவசஃ ஶ்ருத்வா ஹ்ரு'ஷ்டோ தஶரதாத்மஜஃ ॥ 34 ॥
உவாஸ ரஜநீம் தத்ர தாடகாயா வநே ஸுகம் ।
முக்தஶாபம் வநம் தச்ச தஸ்மிந்நேவ ததாஹநி ॥ 35 ॥
ரமணீயம் விபப்ராஜ யதா சைத்ரரதம் வநம் ।
நிஹத்ய தாம் யக்ஷஸுதாம் ஸ ராமஃ ப்ரஶஸ்யமாநஸ்ஸுரஸித்தஸங்கைஃ ।
உவாஸ தஸ்மிந்முநிநா ஸஹைவ ப்ரபாதவேலாம் ப்ரதிபோத்யமாநஃ ॥ 36 ॥
இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே ஷட்விம்ஶஸ்ஸர்கஃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ṣaḍviṃśassargaḥ |
munervacanamaklībaṃ śrutvā naravarātmajaḥ |
rāghavaḥ prāñjalirbhūtvā pratyuvāca dṛḍhavrataḥ || 1 ||
piturvacananirdeśātpiturvacanagauravāt |
vacanaṃ kauśikasyeti kartavyamaviśaṅkayā || 2 ||
anuśiṣṭo'smyayodhyāyāṃ gurumadhye mahātmanā |
pitrā daśarathenāhaṃ nāvajñeyaṃ hi tadvacaḥ || 3 ||
so'haṃ piturvacaśśrutvā śāsanādbrahmavādinaḥ |
kariṣyāmi na sandehastāṭakāvadhamuttamam || 4 ||
gobrāhmaṇahitārthāya deśasyāsya sukhāya ca |
tava caivāprameyasya vacanaṃ kartumudyataḥ || 5 ||
evamuktvā dhanurmadhye badhvā muṣṭimarindamaḥ |
jyāśabdamakarottīvraṃ diśaśśabdena nādayan || 6 ||
tena śabdena vitrastāstāṭakāvanavāsinaḥ |
tāṭakā ca susaṅkruddhā tena śabdena mohitā || 7 ||
taṃ śabdamabhinidhyāya rākṣasī krodhamūrchitā |
śrutvā cābhyadravadvegādyataśśabdo vinissṛtaḥ || 8 ||
tāṃ dṛṣṭvā rāghavaḥ kruddhāṃ vikṛtāṃ vikṛtānanām |
pramāṇenātivṛddhāṃ ca lakṣmaṇaṃ so'bhyabhāṣata || 9 ||
paśya lakṣmaṇa yakṣiṇyā bhairavaṃ dāruṇaṃ vapuḥ |
bhidyeran darśanādasyā bhīrūṇāṃ hṛdayāni ca || 10 ||
enāṃ paśya durādharṣāṃ māyābalasamanvitām |
vinivṛttāṃ karomyadya hṛtakarṇāgranāsikām || 11 ||
na hyenāmutsahe hantuṃ strīsvabhāvena rakṣitām |
vīryaṃ cāsyāṃ gatiṃ cāpi haniṣyāmīti me matiḥ || 12 ||
evaṃ bruvāṇe rāme tu tāṭakā krodhamūrchitā |
udyamya bāhū garjantī rāmamevābhyadhāvata || 13 ||
viśvāmitrastu brahmarṣirhuṅkāreṇābhibhartsyatām |
svasti rāghavayorastu jayaṃ caivābhyabhāṣata || 14 ||
uddhūnvānā rajo ghoraṃ tāṭakā rāghavāvubhau |
rajomohena mahatā muhūrtaṃ sā vyamohayat || 15 ||
tato māyāṃ samāsthāya śilāvarṣeṇa rāghavau |
avākiratsumahatā tataścukrodha rāghavaḥ || 16 ||
śilāvarṣaṃ mahattasyāśśaravarṣeṇa rāghavaḥ |
pratihatyopadhāvantyāḥ karau ciccheda patribhiḥ || 17 ||
tataśchinnabhujāṃ śrāntāmabhyāśe parigarjatīm |
saumitrirakarotkrodhāddhṛtakarṇāgranāsikām || 18 ||
kāmarūpadharā sadyaḥ kṛtvā rūpāṇyanekaśaḥ |
antardhānaṃ gatā yakṣī mohayantīva māyayā || 19 ||
aśmavarṣaṃ vimuñcantī bhairavaṃ vicacāra ha |
tatastāvaśmavarṣeṇa kīryamāṇau samantataḥ || 20 ||
dṛṣṭvā gādhisutaśśrīmānidaṃ vacanamabravīt |
alaṃ te ghṛṇayā rāma pāpaiṣā duṣṭacāriṇī || 21 ||
yajñavighnakarī yakṣī purāvardhati māyayā |
vadhyatāṃ tāvadevaiṣā purā sandhyā pravartate || 22 ||
rakṣāṃsi sandhyākāleṣu durdharṣāṇi bhavanti vai |
ityuktastu tadā yakṣī aśmavṛṣṭyābhivarṣatīm || 23 ||
darśayan śabdavedhitvaṃ tāṃ rurodha sa sāyakaiḥ |
sā ruddhā śarajālena māyābalasamanvitā || 24 ||
abhidudrāva kākutsthaṃ lakṣmaṇaṃ ca vineduṣī |
tāmāpatantīṃ vegena vikrāntāmaśanīmiva || 25 ||
śareṇorasi vivyātha sā papāta mamāra ca |
tāṃ hatāṃ bhīmasaṅkāśāṃ dṛṣṭvā surapatistadā || 26 ||
sādhu sādhviti kākutsthaṃ surāśca samapūjayan |
uvāca paramaprīta ssahasrākṣaḥ purandaraḥ || 27 ||
surāśca sarve saṃhṛṣṭā viśvāmitramathābruvan |
mune kauśika bhadraṃ te sendrāssarve marudgaṇāḥ || 28 ||
toṣitāḥ karmaṇā'nena snehaṃ darśaya rāghave |
prajāpaterbhṛśāśvasya putrān satyaparākramān || 29 ||
tapobalabhṛto brahman rāghavāya nivedaya |
pātrabhūtaśca te brahmaṃstavānugamane dhṛtaḥ || 30 ||
kartavyaṃ ca mahatkarma surāṇāṃ rājasūnunā |
evamuktvā surāssarve hṛṣṭā jagmuryathāgatam || 31 ||
viśvāmitraṃ puraskṛtya tatassandhyā pravartate |
tato munivaraḥ prītastāṭakāvadhatoṣitaḥ || 32 ||
mūrdhni rāmamupāghrāya idaṃ vacanamabravīt |
ihādya rajanīṃ rāma vasema śubhadarśana || 33 ||
śvaḥ prabhāte gamiṣyāmastadāśramapadaṃ mama |
viśvāmitravacaḥ śrutvā hṛṣṭo daśarathātmajaḥ || 34 ||
uvāsa rajanīṃ tatra tāṭakāyā vane sukham |
muktaśāpaṃ vanaṃ tacca tasminneva tadāhani || 35 ||
ramaṇīyaṃ vibabhrāja yathā caitrarathaṃ vanam |
nihatya tāṃ yakṣasutāṃ sa rāmaḥ praśasyamānassurasiddhasaṅghaiḥ |
uvāsa tasminmuninā sahaiva prabhātavelāṃ pratibodhyamānaḥ || 36 ||
ityārṣe śrīmadrāmāyaṇe vālmīkīya ādikāvye bālakāṇḍe ṣaḍviṃśassargaḥ ||
InfoLyter.in — Sacred Vedic Knowledge Portal · Free forever