1.2 Balakanda - Dvitiya Sargah

ॐ

1.2 பாலகாண்ட - த்விதீய ஸர்கஃ

Valmiki Tamil

ஶ்ரீமத்வால்மீகீய ராமாயணே பாலகாண்டம் ।

அத த்விதீயஸ்ஸர்கஃ ।

நாரதஸ்ய து தத்வாக்யம் ஶ்ருத்வா வாக்யவிஶாரதஃ ।

பூஜயாமாஸ தர்மாத்மா ஸஹஶிஷ்யோ மஹாமுநிஃ ॥ 1 ॥

யதாவத்பூஜிதஸ்தேந தேவர்ஷிர்நாரதஸ்ததா ।

ஆப்ரு'ஷ்ட்வைவாப்யநுஜ்ஞாதஸ்ஸ ஜகாம விஹாயஸம் ॥ 2 ॥

ஸ முஹூர்தம் கதே தஸ்மிந்தேவலோகம் முநிஸ்ததா ।

ஜகாம தமஸாதீரம் ஜாஹ்நவ்யாஸ்த்வவிதூரதஃ ॥ 3 ॥

ஸ து தீரம் ஸமாஸாத்ய தமஸாயா மஹாமுநிஃ ।

ஶிஷ்யமாஹ ஸ்திதம் பார்ஶ்வே த்ரு'ஷ்ட்வா தீர்தமகர்தமம் ॥ 4 ॥

அகர்தமமிதம் தீர்தம் பரத்வாஜ நிஶாமய ।

ரமணீயம் ப்ரஸந்நாம்பு ஸந்மநுஷ்யமநோ யதா ॥ 5 ॥

ந்யஸ்யதாம் கலஶஸ்தாத தீயதாம் வல்கலம் மம ।

இதமேவாவகாஹிஷ்யே தமஸாதீர்தமுத்தமம் ॥ 6 ॥

ஏவமுக்தோ பரத்வாஜோ வால்மீகேந மஹாத்மநா ।

ப்ராயச்சத முநேஸ்தஸ்ய வல்கலம் நியதோ குரோஃ ॥ 7 ॥

ஸ ஶிஷ்யஹஸ்தாதாதாய வல்கலம் நியதேந்த்ரியஃ ।

விசசார ஹ பஶ்யம்ஸ்தத்ஸர்வதோ விபுலம் வநம் ॥ 8 ॥

தஸ்யாப்யாஶே து மிதுநம் சரந்தமநபாயிநம் ।

ததர்ஶ பகவாம்ஸ்தத்ர க்ரௌஞ்சயோஶ்சாருநிஸ்வநம் ॥ 9 ॥

தஸ்மாத்து மிதுநாதேகம் புமாம்ஸம் பாபநிஶ்சயஃ ।

ஜகாந வைரநிலயோ நிஷாதஸ்தஸ்ய பஶ்யதஃ ॥ 10 ॥

தம் ஶோணிதபரீதாங்கம் வேஷ்டமாநம் மஹீதலே ।

பார்யா து நிஹதம் த்ரு'ஷ்ட்வா ருராவ கருணாம் கிரம் ॥ 11 ॥

வியுக்தா பதிநா தேந த்விஜேந ஸஹசாரிணா ।

தாம்ரஶீர்ஷேண மத்தேந பத்ரிணா ஸஹிதேந வை ॥ 12 ॥

ததா து தம் த்விஜம் த்ரு'ஷ்ட்வா நிஷாதேந நிபாதிதம் ।

ரு'ஷேர்தர்மாத்மநஸ்தஸ்ய காருண்யம் ஸமபத்யத ॥ 13 ॥

ததஃ கருணவேதித்வாததர்மோऽயமிதி த்விஜஃ ।

நிஶாம்ய ருததீம் க்ரௌஞ்சீமிதம் வசநமப்ரவீத் ॥ 14 ॥

மா நிஷாத ப்ரதிஷ்டாம் த்வமகமஶ்ஶாஶ்வதீஸ்ஸமாஃ ।

யத்க்ரௌஞ்சமிதுநாதேகமவதீஃ காமமோஹிதம் ॥ 15 ॥

15 தஸ்யைவம் ப்ருவதஶ்சிந்தா பபூவ ஹ்ரு'தி வீக்ஷதஃ ।

ஶோகார்தேநாஸ்ய ஶகுநேஃ கிமிதம் வ்யாஹ்ரு'தம் மயா ॥ 16 ॥

சிந்தயந்ஸ மஹாப்ராஜ்ஞஶ்சகார மதிமாந்மதிம் ।

ஶிஷ்யம் சைவாऽப்ரவீத்வாக்யமிதம் ஸ முநிபுங்கவஃ ॥ 17 ॥

பாதபத்தோऽக்ஷரஸமஸ்தந்த்ரீலயஸமந்விதஃ ।

ஶோகார்தஸ்ய ப்ரவ்ரு'த்தோ மே ஶ்லோகோ பவது நாந்யதா ॥ 18 ॥

ஶிஷ்யஸ்து தஸ்ய ப்ருவதோ முநேர்வாக்யமநுத்தமம் ।

ப்ரதிஜக்ராஹ ஸம்ஹ்ரு'ஷ்டஸ்தஸ்ய துஷ்டோऽபவத்குருஃ ॥ 19 ॥

ஸோऽபிஷேகம் ததஃ க்ரு'த்வா தீர்தே தஸ்மிந்யதாவிதி ।

தமேவ சிந்தயந்நர்தமுபாவர்தத வை முநிஃ ॥ 20 ॥

பரத்வாஜஸ்ததஶ்ஶிஷ்யோ விநீதஶ்ஶ்ருதவாந்முநேஃ ।

கலஶம் பூர்ணமாதாய ப்ரு'ஷ்டதோऽநுஜகாம ஹ ॥ 21 ॥

ஸ ப்ரவிஶ்யாஶ்ரமபதம் ஶிஷ்யேண ஸஹ தர்மவித் ।

உபவிஷ்டஃ கதாஶ்சாந்யாஶ்சகார த்யாநமாஸ்திதஃ ॥ 22 ॥

ஆஜகாம ததோ ப்ரஹ்மா லோககர்தா ஸ்வயம் ப்ரபுஃ ।

சதுர்முகோ மஹாதேஜா த்ரஷ்டும் தம் முநிபுங்கவம் ॥ 23 ॥

வால்மீகிரத தம் த்ரு'ஷ்ட்வா ஸஹஸோத்தாய வாக்யதஃ ।

ப்ராஞ்ஜலிஃ ப்ரயதோ பூத்வா தஸ்தௌ பரமவிஸ்மிதஃ ॥ 24 ॥

பூஜயாமாஸ தம் தேவம் பாத்யார்க்யாஸநவந்தநைஃ ।

ப்ரணம்ய விதிவச்சைநம் ப்ரு'ஷ்ட்வாऽநாமயமவ்யயம் ॥ 25 ॥

அதோபவிஶ்ய பகவாநாஸநே பரமார்சிதே ।

வால்மீகயே மஹர்ஷயே ஸந்திதேஶாஸநம் ததஃ ॥ 26 ॥

ப்ரஹ்மணா ஸமநுஜ்ஞாதஸ்ஸோऽப்யுபாவிஶதாஸநே ।

உபவிஷ்டே ததா தஸ்மிந்ஸர்வலோகபிதாமஹே ।

தத்கதேநைவ மநஸா வால்மீகிர்த்யாநமாஸ்திதஃ ॥ 27 ॥

பாபாத்மநா க்ரு'தம் கஷ்டம் வைரக்ரஹணபுத்திநா ।

யஸ்தாத்ரு'ஶம் சாருரவம் க்ரௌஞ்சம் ஹந்யாதகாரணாத் ॥ 28 ॥

ஶோசந்நேவ முஹுஃ க்ரௌஞ்சீமுபஶ்லோகமிமம் புநஃ ।

ஜகாவந்தர்கதமநா பூத்வா ஶோகபராயணஃ ॥ 29 ॥

தமுவாச ததோ ப்ரஹ்மா ப்ரஹஸந்முநிபுங்கவம் ।

ஶ்லோக ஏவ த்வயா பத்தோ நாத்ர கார்யா விசாரணா ॥ 30 ॥

மச்சந்தாதேவ தே ப்ரஹ்மந் ப்ரவ்ரு'த்தேயம் ஸரஸ்வதீ ।

ராமஸ்ய சரிதம் ஸர்வம் குரு த்வம்ரு'ஷிஸத்தம ॥ 31 ॥

தர்மாத்மநோ குணவதோ லோகே ராமஸ்ய தீமதஃ ।

வ்ரு'த்தம் கதய தீரஸ்ய யதா தே நாரதாச்ச்ருதம் ॥ 32 ॥

ரஹஸ்யம் ச ப்ரகாஶம் ச யத்வ்ரு'த்தம் தஸ்ய தீமதஃ ।

ராமஸ்ய ஸஹஸௌமித்ரேஃ ராக்ஷஸாநாம் ச ஸர்வஶஃ ॥ 33 ॥

வைதேஹ்யாஶ்சைவ யத்வ்ரு'த்தம் ப்ரகாஶம் யதி வா ரஹஃ ।

தச்சாப்யவிதிதம் ஸர்வம் விதிதம் தே பவிஷ்யதி ॥ 34 ॥

ந தே வாகந்ரு'தா காவ்யே காசிதத்ர பவிஷ்யதி ।

குரு ராமகதாம் புண்யாம் ஶ்லோகபத்தாம் மநோரமாம் ॥ 35 ॥

யாவத் ஸ்தாஸ்யந்தி கிரயஸ்ஸரிதஶ்ச மஹீதலே ।

தாவத்ராமாயணகதா லோகேஷு ப்ரசரிஷ்யதி ॥ 36 ॥

யாவத்ராமாயணகதா த்வத்க்ரு'தா ப்ரசரிஷ்யதி ।

தாவதூர்த்வமதஶ்ச த்வம் மல்லோகேஷு நிவத்ஸ்யஸி ॥ 37 ॥

இத்யுக்த்வா பகவாந்ப்ரஹ்மா தத்ரைவாந்தரதீயத ।

ததஸ்ஸஶிஷ்யோ பகவாந்முநிர்விஸ்மயமாயயௌ ॥ 38 ॥

தஸ்ய ஶிஷ்யாஸ்ததஸ்ஸர்வே ஜகுஶ்ஶ்லோகமிமம் புநஃ ।

முஹுர்முஹுஃ ப்ரீயமாணாஃ ப்ராஹுஶ்ச ப்ரு'ஶவிஸ்மிதாஃ ॥ 39 ॥

ஸமாக்ஷரைஶ்சதுர்பிர்யஃ பாதைர்கீதோ மஹர்ஷிணா ।

ஸோऽநுவ்யாஹரணாத்பூயஶ்ஶ்லோகஶ்ஶ்லோகத்வமாகதஃ ॥ 40 ॥

தஸ்ய புத்திரியம் ஜாதா வால்மீகேர்பாவிதாத்மநஃ ।

க்ரு'த்ஸ்நம் ராமாயணம் காவ்யமீத்ரு'ஶைஃ கரவாண்யஹம் ॥ 41 ॥

உதாரவ்ரு'த்தார்தபதைர்மநோரமைஃ ததாஸ்ய ராமஸ்ய சகாரகீர்திமாந் ।

ஸமாக்ஷரைஶ்ஶ்லோகஶதைர்யஶஸ்விநோ யஶஸ்கரம் காவ்யமுதாரதீர்முநிஃ ॥ 42 ॥

ததுபகதஸமாஸஸந்தியோகம் ஸமமதுரோபநதார்தவாக்யபத்தம் ।

ரகுவரசரிதம் முநிப்ரணீதம் தஶஶிரஸஶ்ச வதம் நிஶாமயத்வம் ॥ 43 ॥

இத்யார்ஷே ஶ்ரீமத்ராமாயணே வால்மீகீய ஆதிகாவ்யே பாலகாண்டே த்விதீயஸ்ஸர்கஃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha dvitīyassargaḥ |

nāradasya tu tadvākyaṃ śrutvā vākyaviśāradaḥ |

pūjayāmāsa dharmātmā sahaśiṣyo mahāmuniḥ || 1 ||

yathāvatpūjitastena devarṣirnāradastadā |

āpṛṣṭvaivābhyanujñātassa jagāma vihāyasam || 2 ||

sa muhūrtaṃ gate tasmindevalokaṃ munistadā |

jagāma tamasātīraṃ jāhnavyāstvavidūrataḥ || 3 ||

sa tu tīraṃ samāsādya tamasāyā mahāmuniḥ |

śiṣyamāha sthitaṃ pārśve dṛṣṭvā tīrthamakardamam || 4 ||

akardamamidaṃ tīrthaṃ bharadvāja niśāmaya |

ramaṇīyaṃ prasannāmbu sanmanuṣyamano yathā || 5 ||

nyasyatāṃ kalaśastāta dīyatāṃ valkalaṃ mama |

idamevāvagāhiṣye tamasātīrthamuttamam || 6 ||

evamukto bharadvājo vālmīkena mahātmanā |

prāyacchata munestasya valkalaṃ niyato guroḥ || 7 ||

sa śiṣyahastādādāya valkalaṃ niyatendriyaḥ |

vicacāra ha paśyaṃstatsarvato vipulaṃ vanam || 8 ||

tasyābhyāśe tu mithunaṃ carantamanapāyinam |

dadarśa bhagavāṃstatra krauñcayoścārunisvanam || 9 ||

tasmāttu mithunādekaṃ pumāṃsaṃ pāpaniścayaḥ |

jaghāna vairanilayo niṣādastasya paśyataḥ || 10 ||

taṃ śoṇitaparītāṅgaṃ veṣṭamānaṃ mahītale |

bhāryā tu nihataṃ dṛṣṭvā rurāva karuṇāṃ giram || 11 ||

viyuktā patinā tena dvijena sahacāriṇā |

tāmraśīrṣeṇa mattena patriṇā sahitena vai || 12 ||

tadā tu taṃ dvijaṃ dṛṣṭvā niṣādena nipātitam |

ṛṣerdharmātmanastasya kāruṇyaṃ samapadyata || 13 ||

tataḥ karuṇaveditvādadharmo'yamiti dvijaḥ |

niśāmya rudatīṃ krauñcīmidaṃ vacanamabravīt || 14 ||

mā niṣāda pratiṣṭhāṃ tvamagamaśśāśvatīssamāḥ |

yatkrauñcamithunādekamavadhīḥ kāmamohitam || 15 ||

15 tasyaivaṃ bruvataścintā babhūva hṛdi vīkṣataḥ |

śokārtenāsya śakuneḥ kimidaṃ vyāhṛtaṃ mayā || 16 ||

cintayansa mahāprājñaścakāra matimānmatim |

śiṣyaṃ caivā'bravīdvākyamidaṃ sa munipuṅgavaḥ || 17 ||

pādabaddho'kṣarasamastantrīlayasamanvitaḥ |

śokārtasya pravṛtto me śloko bhavatu nānyathā || 18 ||

śiṣyastu tasya bruvato munervākyamanuttamam |

pratijagrāha saṃhṛṣṭastasya tuṣṭo'bhavadguruḥ || 19 ||

so'bhiṣekaṃ tataḥ kṛtvā tīrthe tasminyathāvidhi |

tameva cintayannarthamupāvartata vai muniḥ || 20 ||

bharadvājastataśśiṣyo vinītaśśrutavānmuneḥ |

kalaśaṃ pūrṇamādāya pṛṣṭhato'nujagāma ha || 21 ||

sa praviśyāśramapadaṃ śiṣyeṇa saha dharmavit |

upaviṣṭaḥ kathāścānyāścakāra dhyānamāsthitaḥ || 22 ||

ājagāma tato brahmā lokakartā svayaṃ prabhuḥ |

caturmukho mahātejā draṣṭuṃ taṃ munipuṅgavam || 23 ||

vālmīkiratha taṃ dṛṣṭvā sahasotthāya vāgyataḥ |

prāñjaliḥ prayato bhūtvā tasthau paramavismitaḥ || 24 ||

pūjayāmāsa taṃ devaṃ pādyārghyāsanavandanaiḥ |

praṇamya vidhivaccainaṃ pṛṣṭvā'nāmayamavyayam || 25 ||

athopaviśya bhagavānāsane paramārcite |

vālmīkaye maharṣaye sandideśāsanaṃ tataḥ || 26 ||

brahmaṇā samanujñātasso'pyupāviśadāsane |

upaviṣṭe tadā tasminsarvalokapitāmahe |

tadgatenaiva manasā vālmīkirdhyānamāsthitaḥ || 27 ||

pāpātmanā kṛtaṃ kaṣṭaṃ vairagrahaṇabuddhinā |

yastādṛśaṃ cāruravaṃ krauñcaṃ hanyādakāraṇāt || 28 ||

śocanneva muhuḥ krauñcīmupaślokamimaṃ punaḥ |

jagāvantargatamanā bhūtvā śokaparāyaṇaḥ || 29 ||

tamuvāca tato brahmā prahasanmunipuṅgavam |

śloka eva tvayā baddho nātra kāryā vicāraṇā || 30 ||

macchandādeva te brahman pravṛtteyaṃ sarasvatī |

rāmasya caritaṃ sarvaṃ kuru tvamṛṣisattama || 31 ||

dharmātmano guṇavato loke rāmasya dhīmataḥ |

vṛttaṃ kathaya dhīrasya yathā te nāradācchrutam || 32 ||

rahasyaṃ ca prakāśaṃ ca yadvṛttaṃ tasya dhīmataḥ |

rāmasya sahasaumitreḥ rākṣasānāṃ ca sarvaśaḥ || 33 ||

vaidehyāścaiva yadvṛttaṃ prakāśaṃ yadi vā rahaḥ |

taccāpyaviditaṃ sarvaṃ viditaṃ te bhaviṣyati || 34 ||

na te vāganṛtā kāvye kācidatra bhaviṣyati |

kuru rāmakathāṃ puṇyāṃ ślokabaddhāṃ manoramām || 35 ||

yāvat sthāsyanti girayassaritaśca mahītale |

tāvadrāmāyaṇakathā lokeṣu pracariṣyati || 36 ||

yāvadrāmāyaṇakathā tvatkṛtā pracariṣyati |

tāvadūrdhvamadhaśca tvaṃ mallokeṣu nivatsyasi || 37 ||

ityuktvā bhagavānbrahmā tatraivāntaradhīyata |

tatassaśiṣyo bhagavānmunirvismayamāyayau || 38 ||

tasya śiṣyāstatassarve jaguśślokamimaṃ punaḥ |

muhurmuhuḥ prīyamāṇāḥ prāhuśca bhṛśavismitāḥ || 39 ||

samākṣaraiścaturbhiryaḥ pādairgīto maharṣiṇā |

so'nuvyāharaṇādbhūyaśślokaśślokatvamāgataḥ || 40 ||

tasya buddhiriyaṃ jātā vālmīkerbhāvitātmanaḥ |

kṛtsnaṃ rāmāyaṇaṃ kāvyamīdṛśaiḥ karavāṇyaham || 41 ||

udāravṛttārthapadairmanoramaiḥ tadāsya rāmasya cakārakīrtimān |

samākṣaraiśślokaśatairyaśasvino yaśaskaraṃ kāvyamudāradhīrmuniḥ || 42 ||

tadupagatasamāsasandhiyogaṃ samamadhuropanatārthavākyabaddham |

raghuvaracaritaṃ munipraṇītaṃ daśaśirasaśca vadhaṃ niśāmayadhvam || 43 ||

ityārṣe śrīmadrāmāyaṇe vālmīkīya ādikāvye bālakāṇḍe dvitīyassargaḥ ||