Vishnu Padadi Keshanta Varnana Stotram

ॐ

விஷ்ணு பாதாதி கேஶாந்த வர்ணந ஸ்தோத்ரம்

Vishnu Stotram Tamil

லக்ஷ்மீபர்துர்புஜாக்ரே க்ரு'தவஸதி ஸிதம் யஸ்ய ரூபம் விஶாலம்

நீலாத்ரேஸ்துங்கஶ்ரு'ங்கஸ்திதமிவ ரஜநீநாதபிம்பம் விபாதி ।

பாயாந்நஃ பாஞ்சஜந்யஃ ஸ திதிஸுதகுலத்ராஸநைஃ பூரயந்ஸ்வை-

-ர்நித்வாநைர்நீரதௌகத்வநிபரிபவதைரம்பரம் கம்புராஜஃ ॥ 1 ॥

ஆஹுர்யஸ்ய ஸ்வரூபம் க்ஷணமுகமகிலம் ஸூரயஃ காலமேதம்

த்வாந்தஸ்யைகாந்தமந்தம் யதபி ச பரமம் ஸர்வதாம்நாம் ச தாம ।

சக்ரம் தச்சக்ரபாணேர்திதிஜதநுகலத்ரக்ததாராக்ததாரம்

ஶஶ்வந்நோ விஶ்வவந்த்யம் விதரது விபுலம் ஶர்ம தர்மாம்ஶுஶோபம் ॥ 2 ॥

அவ்யாந்நிர்காதகோரோ ஹரிபுஜபவநாமர்ஶநாத்மாதமூர்தே-

-ரஸ்மாந்விஸ்மேரநேத்ரத்ரிதஶநுதிவசஃஸாதுகாரைஃ ஸுதாரஃ ।

ஸர்வம் ஸம்ஹர்துமிச்சோரரிகுலபுவந ஸ்பாரவிஷ்பாரநாதஃ

ஸம்யத்கல்பாந்தஸிந்தௌ ஶரஸலிலகடாவார்முசஃ கார்முகஸ்ய ॥ 3 ॥

ஜீமூதஶ்யாமபாஸா முஹுரபி பகவத்பாஹுநா மோஹயந்தீ

யுத்தேஷூத்தூயமாநா சடிதி தடிதிவாலக்ஷ்யதே யஸ்ய மூர்திஃ ।

ஸோऽஸிஸ்த்ராஸாகுலாக்ஷத்ரிதஶரிபுவபுஃஶோணிதாஸ்வாதத்ரு'ப்தோ

நித்யாநந்தாய பூயாந்மதுமதநமநோநந்தநோ நந்தகோ நஃ ॥ 4 ॥

கம்ராகாரா முராரேஃ கரகமலதலேநாநுராகாத்க்ரு'ஹீதா

ஸம்யக்வ்ரு'த்தா ஸ்திதாக்ரே ஸபதி ந ஸஹதே தர்ஶநம் யா பரேஷாம் ।

ராஜந்தீ தைத்யஜீவாஸவமதமுதிதா லோஹிதாலேபநார்த்ரா

காமம் தீப்தாம்ஶுகாந்தா ப்ரதிஶது தயிதேவாஸ்ய கௌமோதகீ நஃ ॥ 5 ॥

யோ விஶ்வப்ராணபூதஸ்தநுரபி ச ஹரேர்யாநகேதுஸ்வரூபோ

யம் ஸஞ்சிந்த்யைவ ஸத்யஃ ஸ்வயமுரகவதூவர்ககர்பாஃ பதந்தி ।

சஞ்சச்சண்டோருதுண்டத்ருடிதபணிவஸாரக்தபங்காங்கிதஸ்யம்

வந்தே சந்தோமயம் தம் ககபதிமமலஸ்வர்ணவர்ணம் ஸுபர்ணம் ॥ 6 ॥

விஷ்ணோர்விஶ்வேஶ்வரஸ்ய ப்ரவரஶயநக்ரு'த்ஸர்வலோகைகதர்தா

ஸோऽநந்தஃ ஸர்வபூதஃ ப்ரு'துவிமலயஶாஃ ஸர்வவேதைஶ்ச வேத்யஃ ।

பாதா விஶ்வஸ்ய ஶஶ்வத்ஸகலஸுரரிபுத்வம்ஸநஃ பாபஹந்தா

ஸர்வஜ்ஞஃ ஸர்வஸாக்ஷீ ஸகலவிஷபயாத்பாது போகீஶ்வரோ நஃ ॥ 7 ॥

வாக்பூகைர்யாதிபேதைர்விதுரிஹ முநயோ யாம் யதீயைஶ்ச பும்ஸாம்

காருண்யார்த்ரைஃ கடாக்ஷைஃ ஸக்ரு'தபி பதிதைஃ ஸம்பதஃ ஸ்யுஃ ஸமக்ராஃ ।

குந்தேந்துஸ்வச்சமந்தஸ்மிதமதுரமுகாம்போருஹாம் ஸுந்தராங்கீம்

வந்தே வந்த்யாமஶேஷைரபி முரபிதுரோமந்திராமிந்திராம் தாம் ॥ 8 ॥

யா ஸூதே ஸத்த்வஜாலம் ஸகலமபி ஸதா ஸந்நிதாநேந பும்ஸோ

தத்தே யா தத்த்வயோகாச்சரமசரமிதம் பூதயே பூதஜாதம் ।

தாத்ரீம் ஸ்தாத்ரீம் ஜநித்ரீம் ப்ரக்ரு'திமவிக்ரு'திம் விஶ்வஶக்திம் விதாத்ரீம்

விஷ்ணோர்விஶ்வாத்மநஸ்தாம் விபுலகுணமயீம் ப்ராணநாதாம் ப்ரணௌமி ॥ 9 ॥

யேப்யோऽஸூயத்பிருச்சைஃ ஸபதி பதமுரு த்யஜ்யதே தைத்யவர்கை-

-ர்யேபோ தர்தும் ச மூர்த்நா ஸ்ப்ரு'ஹயதி ஸததம் ஸர்வகீர்வாணவர்கஃ ।

நித்யம் நிர்மூலயேயுர்நிசிததரமமீ பக்திநிக்நாத்மநாம் நஃ

பத்மாக்ஷஸ்யாங்க்ரிபத்மத்வயதலநிலயாஃ பாம்ஸவஃ பாபபங்கம் ॥ 10 ॥

ரேகா லேகாதிவந்த்யாஶ்சரணதலகதாஶ்சக்ரமத்ஸ்யாதிரூபாஃ

ஸ்நிக்தாஃ ஸூக்ஷ்மாஃ ஸுஜாதா ம்ரு'துலலிததரக்ஷௌமஸூத்ராயமாணாஃ ।

தத்யுர்நோ மங்கலாநி ப்ரமரபரஜுஷா கோமலேநாப்திஜாயாஃ

கம்ரேணாம்ரேட்யமாநாஃ கிஸலயம்ரு'துநா பாணிநா சக்ரபாணேஃ ॥ 11 ॥

யஸ்மாதாக்ராமதோ த்யாம் கருடமணிஶிலாகேதுதண்டாயமாநா

தாஶ்ச்யோதந்தீ பபாஸே ஸுரஸரிதமலா வைஜயந்தீவ காந்தா ।

பூமிஷ்டோ யஸ்ததாந்யோ புவநக்ரு'ஹப்ரு'ஹத்‍ஸ்தம்பஶோபாம் ததௌ நஃ

பாதாமேதௌ பாயோஜோதரலலிததலௌ பங்கஜாக்ஷஸ்ய பாதௌ ॥ 12 ॥

ஆக்ராமத்ப்யாம் த்ரிலோகீமஸுரஸுரபதீ தத்க்ஷணாதேவ நீதௌ

யாப்யாம் வைரோசநீந்த்ரௌ யுகபதபி விபத்ஸம்பதோரேகதாமஃ ।

தாப்யாம் தாம்ரோதராப்யாம் முஹுரஹமஜிதஸ்யாஞ்சிதாப்யாமுபாப்யாம்

ப்ராஜ்யைஶ்வர்யப்ரதாப்யாம் ப்ரணதிமுபகதஃ பாதபங்கேருஹாப்யாம் ॥ 13 ॥

யேப்யோ வர்ணஶ்சதுர்தஶ்சரமத உதபூதாதிஸர்கே ப்ரஜாநாம்

ஸாஹஸ்ரீ சாபி ஸங்க்யா ப்ரகடமபிஹிதா ஸர்வவேதேஷு யேஷாம் ।

ப்ராப்தா விஶ்வம்பரா யைரதிவிதததநோர்விஶ்வமூர்தேர்விராஜோ

விஷ்ணோஸ்தேப்யோ மஹத்ப்யஃ ஸததமபி நமோऽஸ்த்வங்க்ரிபங்கேருஹேப்யஃ ॥ 14 ॥

விஷ்ணோஃ பாதத்வயாக்ரே விமலநகமணிப்ராஜிதா ராஜதே யா

ராஜீவஸ்யேவ ரம்யா ஹிமஜலகணிகாலங்க்ரு'தாக்ரா தலாலீ ।

அஸ்மாகம் விஸ்மயார்ஹாண்யகிலஜநமந ப்ரார்தநீயா ஹி ஸேயம்

தத்யாதாத்யாநவத்யா ததிரதிருசிரா மங்கலாந்யங்குலீநாம் ॥ 15 ॥

யஸ்யாம் த்ரு'ஷ்ட்வாமலாயாம் ப்ரதிக்ரு'திமமராஃ ஸம்பவந்த்யாநமந்தஃ

ஸேந்த்ராஃ ஸாந்த்ரீக்ரு'தேர்ஷ்யாஸ்த்வபரஸுரகுலாஶங்கயாதங்கவந்தஃ ।

ஸா ஸத்யஃ ஸாதிரேகாம் ஸகலஸுககரீம் ஸம்பதம் ஸாதயேந்ந-

-ஶ்சஞ்சச்சார்வம்ஶுசக்ரா சரணநலிநயோஶ்சக்ரபாணேர்நகாலீ ॥ 16 ॥

பாதாம்போஜந்மஸேவாஸமவநதஸுரவ்ராதபாஸ்வத்கிரீட-

-ப்ரத்யுப்தோச்சாவசாஶ்மப்ரவரகரகணைஶ்சிந்திதம் யத்விபாதி ।

நம்ராங்காநாம் ஹரேர்நோ ஹரிதுபலமஹாகூர்மஸௌந்தர்யஹாரி-

-ச்சாயம் ஶ்ரேயஃப்ரதாயி ப்ரபதயுகமிதம் ப்ராபயேத்பாபமந்தம் ॥ 17 ॥

ஶ்ரீமத்யௌ சாருவ்ரு'த்தே கரபரிமலநாநந்தஹ்ரு'ஷ்டே ரமாயாஃ

ஸௌந்தர்யாட்யேந்த்ரநீலோபலரசிதமஹாதண்டயோஃ காந்திசோரே ।

ஸூரீந்த்ரைஃ ஸ்தூயமாநே ஸுரகுலஸுகதே ஸூதிதாராதிஸங்கே

ஜங்கே நாராயணீயே முஹுரபி ஜயதாமஸ்மதம்ஹோ ஹரந்த்யௌ ॥ 18 ॥

ஸம்யக்ஸாஹ்யம் விதாதும் ஸமமிவ ஸததம் ஜங்கயோஃ கிந்நயோர்யே

பாரீபூதோருதண்டத்வயபரணக்ரு'தோத்தம்பபாவம் பஜேதே ।

சித்தாதர்ஶம் நிதாதும் மஹிதமிவ ஸதாம் தே ஸமுத்ராயமாநே

வ்ரு'த்தாகாரே விதத்தாம் ஹ்யதி முதமஜிதஸ்யாநிஶம் ஜாநுநீ நஃ ॥ 19 ॥

தேவோ பீதிம் விதாதுஃ ஸபதி விதததௌ கைடபாக்யம் மதும் சா-

-ப்யாரோப்யாரூடகர்வாவதிஜலதி யயோராதிதைத்யௌ ஜகாந ।

வ்ரு'த்தாவந்யோந்யதுல்யௌ சதுரமுபசயம் பிப்ரதாவப்ரநீலா-

-வூரூ சாரூ ஹரேஸ்தௌ முதமதிஶயிநீம் மாநஸே நோ விதத்தாம் ॥ 20 ॥

பீதேந த்யோததே யச்சதுரபரிஹிதேநாம்பரேணாத்யுதாரம்

ஜாதாலங்காரயோகம் ஜலமிவ ஜலதேர்பாடபாக்நிப்ரபாபிஃ ।

ஏதத்பாதித்யதாந்நோ ஜகநமதிகநாதேநஸோ மாநநீயம்

ஸாதத்யேநைவ சேதோவிஷயமவதரத்பாது பீதாம்பரஸ்ய ॥ 21 ॥

யஸ்யா தாம்நா த்ரிதாம்நோ ஜகநகலிதயா ப்ராஜதேऽங்கம் யதாப்தே-

-ர்மத்யஸ்தோ மந்தராத்ரிர்புஜகபதிமஹாபோகஸந்நத்தமத்யஃ ।

காஞ்சீ ஸா காஞ்சநாபா மணிவரகிரணைருல்லஸத்பிஃ ப்ரதீப்தா

கல்யாம் கல்யாணதாத்ரீம் மம மதிமநிஶம் கம்ரரூபாம் கரோது ॥ 22 ॥

உந்நம்ரம் கம்ரமுச்சைருபசிதமுதபூத்யத்ர பத்ரைர்விசித்ரைஃ

பூர்வம் கீர்வாணபூஜ்யம் கமலஜமதுபஸ்யாஸ்பதம் தத்பயோஜம் ।

யஸ்மிந்நீலாஶ்மநீலைஸ்தரலருசிஜலைஃ பூரிதே கேலிபுத்த்யா

நாலீகாக்ஷஸ்ய நாபீஸரஸி வஸது நஶ்சித்தஹம்ஸஶ்சிராய ॥ 23 ॥

பாதாலம் யஸ்ய நாலம் வலயமபி திஶாம் பத்ரபங்க்தீர்நகேந்த்ரா-

-ந்வித்வாம்ஸஃ கேஸராலீர்விதுரிஹ விபுலாம் கர்ணிகாம் ஸ்வர்ணஶைலம் ।

பூயாத்காயத்ஸ்வயம்பூமதுகரபவநம் பூமயம் காமதம் நோ

நாலீகம் நாபிபத்மாகரபவமுரு தந்நாகஶய்யஸ்ய ஶௌரேஃ ॥ 24 ॥

ஆதௌ கல்பஸ்ய யஸ்மாத்ப்ரபவதி விததம் விஶ்வமேதத்விகல்பைஃ

கல்பாந்தே யஸ்ய சாந்த ப்ரவிஶதி ஸகலம் ஸ்தாவரம் ஜங்கமம் ச ।

அத்யந்தாசிந்த்யமூர்தேஶ்சிரதரமஜிதஸ்யாந்தரிக்ஷஸ்வரூபே

தஸ்மிந்நஸ்மாகமந்தஃகரணமதிமுதா க்ரீடதாத்க்ரோடபாகே ॥ 25 ॥

காந்த்யம்பஃபூரபூர்ணே லஸதஸிதவலீபங்கபாஸ்வத்தரங்கே

கம்பீராகாரநாபீசதுரதரமஹாவர்தஶோபிந்யுதாரே ।

க்ரீடத்வாநத்வஹேமோதரநஹநமஹாபாடபாக்நிப்ரபாட்யே

காமம் தாமோதரீயோதரஸலிலநிதௌ சித்தமத்ஸ்யஶ்சிரம் நஃ ॥ 26 ॥

நாபீநாலீகமூலாததிகபரிமலோந்மோஹிதாநாமலீநாம்

மாலா நீலேவ யாந்தீ ஸ்புரதி ருசிமதீ வக்த்ரபத்மோந்முகீ யா ।

ரம்யா ஸா ரோமராஜிர்மஹிதருசிகரீ மத்யபாகஸ்ய விஷ்ணோ-

-ஶ்சித்தஸ்தா மா விரம்ஸீச்சிரதரமுசிதாம் ஸாதயந்தீ ஶ்ரியம் நஃ ॥ 27 ॥

ஸம்ஸ்தீர்ணம் கௌஸ்துபாம்ஶுப்ரஸரகிஸலயைர்முக்தமுக்தாபலாட்யம்

ஶ்ரீவத்ஸோல்லாஸி புல்லப்ரதிநவவநமாலாங்கி ராஜத்புஜாந்தம் ।

வக்ஷஃ ஶ்ரீவ்ரு'க்ஷகாந்தம் மதுகரநிகரஶ்யாமலம் ஶார்ங்கபாணேஃ

ஸம்ஸாராத்வஶ்ரமார்தைருபவநமிவ யத்ஸேவிதம் தத்ப்ரபத்யே ॥ 28 ॥

காந்தம் வக்ஷோ நிதாந்தம் விதததிவ கலம் காலிமா காலஶத்ரோ-

-ரிந்தோர்பிம்பம் யதாங்கோ மதுப இவ தரோர்மஞ்ஜரீம் ராஜதே யஃ ।

ஶ்ரீமாந்நித்யம் விதேயாதவிரலமிலிதஃ கௌஸ்துபஶ்ரீப்ரதாநைஃ

ஶ்ரீவத்ஸஃ ஶ்ரீபதேஃ ஸ ஶ்ரிய இவ தயிதோ வத்ஸ உச்சைஃஶ்ரியம் நஃ ॥ 29 ॥

ஸம்பூயாம்போதிமத்யாத்ஸபதி ஸஹஜயா யஃ ஶ்ரியா ஸந்நிதத்தே

நீலே நாராயணோரஃஸ்தலககநதலே ஹாரதாரோபஸேவ்யே ।

ஆஶாஃ ஸர்வாஃ ப்ரகாஶா விதததபிததச்சாத்மபாஸாந்யதேஜா-

-ஸ்யாஶ்சர்யஸ்யாகரோ நோ த்யுமணிரிவ மணிஃ கௌஸ்துபஃ ஸோऽஸ்துபூத்யை ॥ 30 ॥

யா வாயாவாநுகூல்யாத்ஸரதி மணிருசா பாஸமாநா ஸமாநா

ஸாகம் ஸாகம்பமம்ஸே வஸதி விதததீ வாஸுபத்ரம் ஸுபத்ரம் ।

ஸாரம் ஸாரங்கஸங்கைர்முகரிதகுஸுமா மேசகாந்தா ச காந்தா

மாலா மாலாலிதாஸ்மாந்ந விரமது ஸுகைர்யோஜயந்தீ ஜயந்தீ ॥ 31 ॥

ஹாரஸ்யோருப்ரபாபிஃ ப்ரதிநவவநமாலாஶுபிஃ ப்ராம்ஶுரூபைஃ

ஶ்ரீபிஶ்சாப்யங்கதாநாம் கபலிதருசி யந்நிஷ்கபாபிஶ்ச பாதி ।

பாஹுல்யேநைவ பத்தாஞ்ஜலிபுடமஜிதஸ்யாபியாசாமஹே த-

-த்வந்தார்திம் பாததாம் நோ பஹுவிஹதிகரீம் பந்துரம் பாஹுமூலம் ॥ 32 ॥

விஶ்வத்ராணைகதீக்ஷாஸ்ததநுகுணகுணக்ஷத்ரநிர்மாணதக்ஷாஃ

கர்தாரோ துர்நிரூபஸ்புடகுணயஶஸா கர்மணாமத்புதாநாம் ।

ஶார்ங்கம் பாணம் க்ரு'பாணம் பலகமரிகதே பத்மஶங்கௌ ஸஹஸ்ரம்

பிப்ராணாஃ ஶஸ்த்ரஜாலம் மம ததது ஹரேர்பாஹவோ மோஹஹாநிம் ॥ 33 ॥

கண்டாகல்போத்கதைர்யஃ கநகமயலஸத்குண்டலோத்தைருதாரை-

-ருத்யோதைஃ கௌஸ்துபஸ்யாப்யுருபிருபசிதஶ்சித்ரவர்ணோ விபாதி ।

கண்டாஶ்லேஷே ரமாயாஃ கரவலயபதைர்முத்ரிதே பத்ரரூபே

வைகுண்டீயேऽத்ர கண்டே வஸது மம மதிஃ குண்டபாவம் விஹாய ॥ 34 ॥

பத்மாநந்தப்ரதாதா பரிலஸதருணஶ்ரீபரீதாக்ரபாகஃ

காலே காலே ச கம்புப்ரவரஶஶதராபூரணே யஃ ப்ரவீணஃ ।

வக்த்ராகாஶாந்தரஸ்தஸ்திரயதி நிதராம் தந்ததாரௌகஶோபாம்

ஶ்ரீபர்துர்தந்தவாஸோத்யுமணிரகதமோநாஶநாயாஸ்த்வஸௌ நஃ ॥ 35 ॥

நித்யம் ஸ்நேஹாதிரேகாந்நிஜகமிதுரலம் விப்ரயோகாக்ஷமா யா

வக்த்ரேந்தோரந்தராலே க்ரு'தவஸதிரிவாபாதி நக்ஷத்ரராஜிஃ ।

லக்ஷ்மீகாந்தஸ்ய காந்தாக்ரு'திரதிவிலஸந்முக்தமுக்தாவலிஶ்ரீ-

-ர்தந்தாலீ ஸந்ததம் ஸா நதிநுதிநிரதாநக்ஷதாந்ரக்ஷதாந்நஃ ॥ 36 ॥

ப்ரஹ்மந்ப்ரஹ்மண்யஜிஹ்மாம் மதிமபி குருஷே தேவ ஸம்பாவயே த்வாம்

ஶம்போ ஶக்ர த்ரிலோகீமவஸி கிமமரைர்நாரதாத்யாஃ ஸுகம் வஃ ।

இத்தம் ஸேவாவநம்ரம் ஸுரமுநிநிகரம் வீக்ஷ்ய விஷ்ணோஃ ப்ரஸந்ந-

-ஸ்யாஸ்யேந்தோராஸ்ரவந்தீ வரவசநஸுதாஹ்லாதயேந்மாநஸம் நஃ ॥ 37 ॥

கர்ணஸ்தஸ்வர்ணகம்ரோஜ்ஜ்வலமகரமஹாகுண்டலப்ரோததீப்ய-

-ந்மாணிக்யஶ்ரீப்ரதாநைஃ பரிமிலிதமலிஶ்யாமலம் கோமலம் யத் ।

ப்ரோத்யத்ஸூர்யாம்ஶுராஜந்மரகதமுகுராகாரசோரம் முராரே-

-ர்காடாமாகாமிநீம் நஃ ஶமயது விபதம் கண்டயோர்மண்டலம் தத் ॥ 38 ॥

வக்த்ராம்போஜே லஸந்தம் முஹுரதரமணிம் பக்வபிம்பாபிராமம்

த்ரு'ஷ்ட்வா த்ரஷ்டும் ஶுகஸ்ய ஸ்புடமவதரதஸ்துண்டதண்டாயதே யஃ ।

கோணஃ ஶோணீக்ரு'தாத்மா ஶ்ரவணயுகலஸத்குண்டலோஸ்ரைர்முராரேஃ

ப்ராணாக்யஸ்யாநிலஸ்ய ப்ரஸரணஸரணிஃ ப்ராணதாநாய நஃ ஸ்யாத் ॥ 39 ॥

திக்காலௌ வேதயந்தௌ ஜகதி முஹுரிமௌ ஸஞ்சரந்தௌ ரவீந்தூ

த்ரைலோக்யாலோகதீபாவபிதததி யயோரேவ ரூபம் முநீந்த்ராஃ ।

அஸ்மாநப்ஜப்ரபே தே ப்ரசுரதரக்ரு'பாநிர்பரம் ப்ரேக்ஷமாணே

பாதாமாதாம்ரஶுக்லாஸிதருசிருசிரே பத்மநேத்ரஸ்ய நேத்ரே ॥ 40 ॥

பாதாத்பாதாலபாதாத்பதகபதிகதேர்ப்ரூயுகம் புக்நமத்யம்

யேநேஷச்சாலிதேந ஸ்வபதநியமிதாஃ ஸாஸுரா தேவஸங்காஃ ।

ந்ரு'த்யல்லாலாடரங்கே ரஜநிகரதநோரர்தகண்டாவதாதே

காலவ்யாலத்வயம் வா விலஸதி ஸமயா வாலிகாமாதரம் நஃ ॥ 41 ॥

லக்ஷ்மாகாராலகாலிஸ்புரதலிகஶஶாங்கார்தஸந்தர்ஶமீல-

-ந்நேத்ராம்போஜப்ரபோதோத்ஸுகநிப்ரு'ததராலீநப்ரு'ங்கச்சடாபே ।

லக்ஷ்மீநாதஸ்ய லக்ஷ்யீக்ரு'தவிபுதகணாபாங்கபாணாஸநார்த-

-ச்சாயே நோ பூரிபூதிப்ரஸவகுஶலதே ப்ரூலதே பாலயேதாம் ॥ 42 ॥

ரூக்ஷஸ்மாரேக்ஷுசாபச்யுதஶரநிகரக்ஷீணலக்ஷ்மீகடாக்ஷ-

-ப்ரோத்புல்லத்பத்மமாலாவிலஸிதமஹிதஸ்பாடிகைஶாநலிங்கம் ।

பூயாத்பூயோ விபூத்யை மம புவநபதேர்ப்ரூலதாத்வந்த்வமத்யா-

-துத்தம் தத்புண்ட்ரமூர்த்வம் ஜநிமரணதமஃகண்டநம் மண்டநம் ச ॥ 43 ॥

பீடீபூதாலகாந்தே க்ரு'தமகுடமஹாதேவலிங்கப்ரதிஷ்டே

லாலாடே நாட்யரங்கே விகடதரதடே கைடபாரேஶ்சிராய ।

ப்ரோத்தாட்யைவாத்மதந்த்ரீப்ரகடபடகுடீம் ப்ரஸ்புரந்தீம் ஸ்புடாங்கம்

பட்வீயம் பாவநாக்யாம் சடுலமதிநடீ நாடிகாம் நாடயேந்நஃ ॥ 44 ॥

மாலாலீவாலிதாம்நஃ குவலயகலிதா ஶ்ரீபதேஃ குந்தலாலீ

காலிந்த்யாருஹ்ய மூர்த்நோ கலதி ஹரஶிரஃஸ்வர்துநீஸ்பர்தயா நு ।

ராஹுர்வா யாதி வக்த்ரம் ஸகலஶஶிகலாப்ராந்திலோலாந்தராத்மா

லோகைராலோக்யதே யா ப்ரதிஶது ஸததம் ஸாகிலம் மங்கலம் நஃ ॥ 45 ॥

ஸுப்தாகாராஃ ப்ரஸுப்தே பகவதி விபுதைரப்யத்ரு'ஷ்டஸ்வரூபா

வ்யாப்தவ்யோமாந்தராலாஸ்தரலமணிருசா ரஞ்ஜிதாஃ ஸ்பஷ்டபாஸஃ ।

தேஹச்சாயோத்கமாபா ரிபுவபுரகுருப்லோஷரோஷாக்நிதூம்யாஃ

கேஶாஃ கேஶித்விஷோ நோ விததது விபுலக்லேஶபாஶப்ரணாஶம் ॥ 46 ॥

யத்ர ப்ரத்யுப்தரத்நப்ரவரபரிலஸத்பூரிரோசிஷ்ப்ரதாந-

-ஸ்பூர்த்யாம் மூர்திர்முராரேர்த்யுமணிஶதசிதவ்யோமவத்துர்நிரீக்ஷ்யா ।

குர்வத்பாரேபயோதி ஜ்வலதக்ரு'ஶஶிகாபாஸ்வதௌர்வாக்நிஶங்காம்

ஶஶ்வந்நஃ ஶர்ம திஶ்யாத்கலிகலுஷதமஃபாடநம் தத்கிரீடம் ॥ 47 ॥

ப்ராந்த்வா ப்ராந்த்வா யதந்தஸ்த்ரிபுவநகுருரப்யப்தகோடீரநேகா

கந்தும் நாந்தம் ஸமர்தோ ப்ரமர இவ புநர்நாபிநாலீகநாலாத் ।

உந்மஜ்ஜந்நூர்ஜிதஶ்ரீஸ்த்ரிபுவநமபரம் நிர்மமே தத்ஸத்ரு'க்ஷம்

தேஹாம்போதிஃ ஸ தேயாந்நிரவதிரம்ரு'தம் தைத்யவித்வேஷிணோ நஃ ॥ 48 ॥

மத்ஸ்யஃ கூர்மோ வராஹோ நரஹரிணபதிர்வாமநோ ஜாமதக்ந்யஃ

காகுத்ஸ்தஃ கம்ஸகாதீ மநஸிஜவிஜயீ யஶ்ச கல்கிர்பவிஷ்யந் ।

விஷ்ணோரம்ஶாவதரா புவநஹிதகரா தர்மஸம்ஸ்தாபநார்தாஃ

பாயாஸுர்மாம் த ஏதே குருதரகருணாபாரகிந்நாஶயா யே ॥ 49 ॥

யஸ்மாத்வாசோ நிவ்ரு'த்தாஃ ஸமமபி மநஸா லக்ஷணாமீக்ஷமாணாஃ

ஸ்வார்தாலாபாத்பரார்தவ்யபகமகதநஶ்லாகிநோ வேதவாதாஃ ।

நித்யாநந்தம் ஸ்வஸம்விந்நிரவதிவிமலஸ்வாந்தஸங்க்ராந்தபிம்ப-

-ச்சாயாபத்யாபி நித்யம் ஸுகயதி யமிநோ யத்ததவ்யாந்மஹோ நஃ ॥ 50 ॥

ஆபாதாதா ச ஶீர்ஷாத்வபுரிதமநகம் வைஷ்ணவம் யஃ ஸ்வசித்தே

தத்தே நித்யம் நிரஸ்தாகிலகலிகலுஷ ஸந்ததாந்தஃ ப்ரமோதம் ।

ஜுஹ்வஜ்ஜிஹ்வாக்ரு'ஶாநௌ ஹரிசரிதஹவிஃ ஸ்தோத்ரமந்த்ராநுபாடை-

-ஸ்தத்பாதாம்போருஹாப்யாம் ஸததமபி நமஸ்குர்மஹே நிர்மலாப்யாம் ॥ 51 ॥

மோதாத்பாதாதிகேஶஸ்துதிமிதிரசிதா கீர்தயித்வா த்ரிதாம்ந

பாதாப்ஜத்வந்த்வஸேவாஸமயநதமதிர்மஸ்தகேநாநமேத்ய ।

உந்முச்யைவாத்மநைநோநிசயகவசக பஞ்சதாமேத்ய பாநோ-

-ர்பிம்பாந்தர்கோசர ஸ ப்ரவிஶதி பரமாநந்தமாத்மஸ்வரூபம் ॥ 52 ॥

இதி ஶ்ரீமத்பரமஹம்ஸபரிவ்ராஜகாசார்யஸ்ய ஶ்ரீகோவிந்தபகவத்பூஜ்யபாதஶிஷ்யஸ்ய ஶ்ரீமச்சங்கரபகவதஃ க்ரு'தௌ ஶ்ரீ விஷ்ணு பாதாதிகேஶாந்தவர்ணண ஸ்தோத்ரம் ஸம்பூர்ணம் ।

Roman (IAST) Transliteration

lakṣmībharturbhujāgre kṛtavasati sitaṃ yasya rūpaṃ viśālaṃ

nīlādrestuṅgaśṛṅgasthitamiva rajanīnāthabimbaṃ vibhāti |

pāyānnaḥ pāñcajanyaḥ sa ditisutakulatrāsanaiḥ pūrayansvai-

-rnidhvānairnīradaughadhvaniparibhavadairambaraṃ kamburājaḥ || 1 ||

āhuryasya svarūpaṃ kṣaṇamukhamakhilaṃ sūrayaḥ kālametaṃ

dhvāntasyaikāntamantaṃ yadapi ca paramaṃ sarvadhāmnāṃ ca dhāma |

cakraṃ taccakrapāṇerditijatanugaladraktadhārāktadhāraṃ

śaśvanno viśvavandyaṃ vitaratu vipulaṃ śarma dharmāṃśuśobham || 2 ||

avyānnirghātaghoro haribhujapavanāmarśanādhmātamūrte-

-rasmānvismeranetratridaśanutivacaḥsādhukāraiḥ sutāraḥ |

sarvaṃ saṃhartumicchorarikulabhuvana sphāraviṣphāranādaḥ

saṃyatkalpāntasindhau śarasalilaghaṭāvārmucaḥ kārmukasya || 3 ||

jīmūtaśyāmabhāsā muhurapi bhagavadbāhunā mohayantī

yuddheṣūddhūyamānā jhaṭiti taṭidivālakṣyate yasya mūrtiḥ |

so'sistrāsākulākṣatridaśaripuvapuḥśoṇitāsvādatṛpto

nityānandāya bhūyānmadhumathanamanonandano nandako naḥ || 4 ||

kamrākārā murāreḥ karakamalatalenānurāgādgṛhītā

samyagvṛttā sthitāgre sapadi na sahate darśanaṃ yā pareṣām |

rājantī daityajīvāsavamadamuditā lohitālepanārdrā

kāmaṃ dīptāṃśukāntā pradiśatu dayitevāsya kaumodakī naḥ || 5 ||

yo viśvaprāṇabhūtastanurapi ca hareryānaketusvarūpo

yaṃ sañcintyaiva sadyaḥ svayamuragavadhūvargagarbhāḥ patanti |

cañcaccaṇḍorutuṇḍatruṭitaphaṇivasāraktapaṅkāṅkitasyaṃ

vande chandomayaṃ taṃ khagapatimamalasvarṇavarṇaṃ suparṇam || 6 ||

viṣṇorviśveśvarasya pravaraśayanakṛtsarvalokaikadhartā

so'nantaḥ sarvabhūtaḥ pṛthuvimalayaśāḥ sarvavedaiśca vedyaḥ |

pātā viśvasya śaśvatsakalasuraripudhvaṃsanaḥ pāpahantā

sarvajñaḥ sarvasākṣī sakalaviṣabhayātpātu bhogīśvaro naḥ || 7 ||

vāgbhūgairyādibhedairviduriha munayo yāṃ yadīyaiśca puṃsāṃ

kāruṇyārdraiḥ kaṭākṣaiḥ sakṛdapi patitaiḥ sampadaḥ syuḥ samagrāḥ |

kundendusvacchamandasmitamadhuramukhāmbhoruhāṃ sundarāṅgīṃ

vande vandyāmaśeṣairapi murabhiduromandirāmindirāṃ tām || 8 ||

yā sūte sattvajālaṃ sakalamapi sadā sannidhānena puṃso

dhatte yā tattvayogāccaramacaramidaṃ bhūtaye bhūtajātam |

dhātrīṃ sthātrīṃ janitrīṃ prakṛtimavikṛtiṃ viśvaśaktiṃ vidhātrīṃ

viṣṇorviśvātmanastāṃ vipulaguṇamayīṃ prāṇanāthāṃ praṇaumi || 9 ||

yebhyo'sūyadbhiruccaiḥ sapadi padamuru tyajyate daityavargai-

-ryebho dhartuṃ ca mūrdhnā spṛhayati satataṃ sarvagīrvāṇavargaḥ |

nityaṃ nirmūlayeyurnicitataramamī bhaktinighnātmanāṃ naḥ

padmākṣasyāṅghripadmadvayatalanilayāḥ pāṃsavaḥ pāpapaṅkam || 10 ||

rekhā lekhādivandyāścaraṇatalagatāścakramatsyādirūpāḥ

snigdhāḥ sūkṣmāḥ sujātā mṛdulalitatarakṣaumasūtrāyamāṇāḥ |

dadyurno maṅgalāni bhramarabharajuṣā komalenābdhijāyāḥ

kamreṇāmreḍyamānāḥ kisalayamṛdunā pāṇinā cakrapāṇeḥ || 11 ||

yasmādākrāmato dyāṃ garuḍamaṇiśilāketudaṇḍāyamānā

dāścyotantī babhāse surasaridamalā vaijayantīva kāntā |

bhūmiṣṭho yastathānyo bhuvanagṛhabṛhat‍stambhaśobhāṃ dadhau naḥ

pātāmetau pāyojodaralalitatalau paṅkajākṣasya pādau || 12 ||

ākrāmadbhyāṃ trilokīmasurasurapatī tatkṣaṇādeva nītau

yābhyāṃ vairocanīndrau yugapadapi vipatsampadorekadhāmaḥ |

tābhyāṃ tāmrodarābhyāṃ muhurahamajitasyāñcitābhyāmubhābhyāṃ

prājyaiśvaryapradābhyāṃ praṇatimupagataḥ pādapaṅkeruhābhyām || 13 ||

yebhyo varṇaścaturthaścaramata udabhūdādisarge prajānāṃ

sāhasrī cāpi saṅkhyā prakaṭamabhihitā sarvavedeṣu yeṣām |

prāptā viśvambharā yairativitatatanorviśvamūrtervirājo

viṣṇostebhyo mahadbhyaḥ satatamapi namo'stvaṅghripaṅkeruhebhyaḥ || 14 ||

viṣṇoḥ pādadvayāgre vimalanakhamaṇibhrājitā rājate yā

rājīvasyeva ramyā himajalakaṇikālaṅkṛtāgrā dalālī |

asmākaṃ vismayārhāṇyakhilajanamana prārthanīyā hi seyaṃ

dadyādādyānavadyā tatiratirucirā maṅgalānyaṅgulīnām || 15 ||

yasyāṃ dṛṣṭvāmalāyāṃ pratikṛtimamarāḥ sambhavantyānamantaḥ

sendrāḥ sāndrīkṛterṣyāstvaparasurakulāśaṅkayātaṅkavantaḥ |

sā sadyaḥ sātirekāṃ sakalasukhakarīṃ sampadaṃ sādhayenna-

-ścañcaccārvaṃśucakrā caraṇanalinayoścakrapāṇernakhālī || 16 ||

pādāmbhojanmasevāsamavanatasuravrātabhāsvatkirīṭa-

-pratyuptoccāvacāśmapravarakaragaṇaiścintitaṃ yadvibhāti |

namrāṅgānāṃ harerno haridupalamahākūrmasaundaryahāri-

-cchāyaṃ śreyaḥpradāyi prapadayugamidaṃ prāpayetpāpamantam || 17 ||

śrīmatyau cāruvṛtte karaparimalanānandahṛṣṭe ramāyāḥ

saundaryāḍhyendranīlopalaracitamahādaṇḍayoḥ kānticore |

sūrīndraiḥ stūyamāne surakulasukhade sūditārātisaṅghe

jaṅghe nārāyaṇīye muhurapi jayatāmasmadaṃho harantyau || 18 ||

samyaksāhyaṃ vidhātuṃ samamiva satataṃ jaṅghayoḥ khinnayorye

bhārībhūtorudaṇḍadvayabharaṇakṛtottambhabhāvaṃ bhajete |

cittādarśaṃ nidhātuṃ mahitamiva satāṃ te samudrāyamāne

vṛttākāre vidhattāṃ hyadi mudamajitasyāniśaṃ jānunī naḥ || 19 ||

devo bhītiṃ vidhātuḥ sapadi vidadhatau kaiṭabhākhyaṃ madhuṃ cā-

-pyāropyārūḍhagarvāvadhijaladhi yayorādidaityau jaghāna |

vṛttāvanyonyatulyau caturamupacayaṃ bibhratāvabhranīlā-

-vūrū cārū harestau mudamatiśayinīṃ mānase no vidhattām || 20 ||

pītena dyotate yaccaturaparihitenāmbareṇātyudāraṃ

jātālaṅkārayogaṃ jalamiva jaladherbāḍabāgniprabhābhiḥ |

etatpātityadānno jaghanamatighanādenaso mānanīyaṃ

sātatyenaiva cetoviṣayamavataratpātu pītāmbarasya || 21 ||

yasyā dāmnā tridhāmno jaghanakalitayā bhrājate'ṅgaṃ yathābdhe-

-rmadhyastho mandarādrirbhujagapatimahābhogasannaddhamadhyaḥ |

kāñcī sā kāñcanābhā maṇivarakiraṇairullasadbhiḥ pradīptā

kalyāṃ kalyāṇadātrīṃ mama matimaniśaṃ kamrarūpāṃ karotu || 22 ||

unnamraṃ kamramuccairupacitamudabhūdyatra patrairvicitraiḥ

pūrvaṃ gīrvāṇapūjyaṃ kamalajamadhupasyāspadaṃ tatpayojam |

yasminnīlāśmanīlaistaralarucijalaiḥ pūrite kelibuddhyā

nālīkākṣasya nābhīsarasi vasatu naścittahaṃsaścirāya || 23 ||

pātālaṃ yasya nālaṃ valayamapi diśāṃ patrapaṅktīrnagendrā-

-nvidvāṃsaḥ kesarālīrviduriha vipulāṃ karṇikāṃ svarṇaśailam |

bhūyādgāyatsvayambhūmadhukarabhavanaṃ bhūmayaṃ kāmadaṃ no

nālīkaṃ nābhipadmākarabhavamuru tannāgaśayyasya śaureḥ || 24 ||

ādau kalpasya yasmātprabhavati vitataṃ viśvametadvikalpaiḥ

kalpānte yasya cānta praviśati sakalaṃ sthāvaraṃ jaṅgamaṃ ca |

atyantācintyamūrteścirataramajitasyāntarikṣasvarūpe

tasminnasmākamantaḥkaraṇamatimudā krīḍatātkroḍabhāge || 25 ||

kāntyambhaḥpūrapūrṇe lasadasitavalībhaṅgabhāsvattaraṅge

gambhīrākāranābhīcaturataramahāvartaśobhinyudāre |

krīḍatvānadvahemodaranahanamahābāḍabāgniprabhāḍhye

kāmaṃ dāmodarīyodarasalilanidhau cittamatsyaściraṃ naḥ || 26 ||

nābhīnālīkamūlādadhikaparimalonmohitānāmalīnāṃ

mālā nīleva yāntī sphurati rucimatī vaktrapadmonmukhī yā |

ramyā sā romarājirmahitarucikarī madhyabhāgasya viṣṇo-

-ścittasthā mā viraṃsīccirataramucitāṃ sādhayantī śriyaṃ naḥ || 27 ||

saṃstīrṇaṃ kaustubhāṃśuprasarakisalayairmugdhamuktāphalāḍhyaṃ

śrīvatsollāsi phullapratinavavanamālāṅki rājadbhujāntam |

vakṣaḥ śrīvṛkṣakāntaṃ madhukaranikaraśyāmalaṃ śārṅgapāṇeḥ

saṃsārādhvaśramārtairupavanamiva yatsevitaṃ tatprapadye || 28 ||

kāntaṃ vakṣo nitāntaṃ vidadhadiva galaṃ kālimā kālaśatro-

-rindorbimbaṃ yathāṅko madhupa iva tarormañjarīṃ rājate yaḥ |

śrīmānnityaṃ vidheyādaviralamilitaḥ kaustubhaśrīpratānaiḥ

śrīvatsaḥ śrīpateḥ sa śriya iva dayito vatsa uccaiḥśriyaṃ naḥ || 29 ||

sambhūyāmbhodhimadhyātsapadi sahajayā yaḥ śriyā sannidhatte

nīle nārāyaṇoraḥsthalagaganatale hāratāropasevye |

āśāḥ sarvāḥ prakāśā vidadhadapidadhaccātmabhāsānyatejā-

-syāścaryasyākaro no dyumaṇiriva maṇiḥ kaustubhaḥ so'stubhūtyai || 30 ||

yā vāyāvānukūlyātsarati maṇirucā bhāsamānā samānā

sākaṃ sākampamaṃse vasati vidadhatī vāsubhadraṃ subhadram |

sāraṃ sāraṅgasaṅghairmukharitakusumā mecakāntā ca kāntā

mālā mālālitāsmānna viramatu sukhairyojayantī jayantī || 31 ||

hārasyoruprabhābhiḥ pratinavavanamālāśubhiḥ prāṃśurūpaiḥ

śrībhiścāpyaṅgadānāṃ kabalitaruci yanniṣkabhābhiśca bhāti |

bāhulyenaiva baddhāñjalipuṭamajitasyābhiyācāmahe ta-

-dvandhārtiṃ bādhatāṃ no bahuvihatikarīṃ bandhuraṃ bāhumūlam || 32 ||

viśvatrāṇaikadīkṣāstadanuguṇaguṇakṣatranirmāṇadakṣāḥ

kartāro durnirūpasphuṭaguṇayaśasā karmaṇāmadbhutānām |

śārṅgaṃ bāṇaṃ kṛpāṇaṃ phalakamarigade padmaśaṅkhau sahasraṃ

bibhrāṇāḥ śastrajālaṃ mama dadhatu harerbāhavo mohahānim || 33 ||

kaṇṭhākalpodgatairyaḥ kanakamayalasatkuṇḍalotthairudārai-

-rudyotaiḥ kaustubhasyāpyurubhirupacitaścitravarṇo vibhāti |

kaṇṭhāśleṣe ramāyāḥ karavalayapadairmudrite bhadrarūpe

vaikuṇṭhīye'tra kaṇṭhe vasatu mama matiḥ kuṇṭhabhāvaṃ vihāya || 34 ||

padmānandapradātā parilasadaruṇaśrīparītāgrabhāgaḥ

kāle kāle ca kambupravaraśaśadharāpūraṇe yaḥ pravīṇaḥ |

vaktrākāśāntarasthastirayati nitarāṃ dantatāraughaśobhāṃ

śrībharturdantavāsodyumaṇiraghatamonāśanāyāstvasau naḥ || 35 ||

nityaṃ snehātirekānnijakamituralaṃ viprayogākṣamā yā

vaktrendorantarāle kṛtavasatirivābhāti nakṣatrarājiḥ |

lakṣmīkāntasya kāntākṛtirativilasanmugdhamuktāvaliśrī-

-rdantālī santataṃ sā natinutiniratānakṣatānrakṣatānnaḥ || 36 ||

brahmanbrahmaṇyajihmāṃ matimapi kuruṣe deva sambhāvaye tvāṃ

śambho śakra trilokīmavasi kimamarairnāradādyāḥ sukhaṃ vaḥ |

itthaṃ sevāvanamraṃ suramuninikaraṃ vīkṣya viṣṇoḥ prasanna-

-syāsyendorāsravantī varavacanasudhāhlādayenmānasaṃ naḥ || 37 ||

karṇasthasvarṇakamrojjvalamakaramahākuṇḍalaprotadīpya-

-nmāṇikyaśrīpratānaiḥ parimilitamaliśyāmalaṃ komalaṃ yat |

prodyatsūryāṃśurājanmarakatamukurākāracoraṃ murāre-

-rgāḍhāmāgāminīṃ naḥ śamayatu vipadaṃ gaṇḍayormaṇḍalaṃ tat || 38 ||

vaktrāmbhoje lasantaṃ muhuradharamaṇiṃ pakvabimbābhirāmaṃ

dṛṣṭvā draṣṭuṃ śukasya sphuṭamavataratastuṇḍadaṇḍāyate yaḥ |

ghoṇaḥ śoṇīkṛtātmā śravaṇayugalasatkuṇḍalosrairmurāreḥ

prāṇākhyasyānilasya prasaraṇasaraṇiḥ prāṇadānāya naḥ syāt || 39 ||

dikkālau vedayantau jagati muhurimau sañcarantau ravīndū

trailokyālokadīpāvabhidadhati yayoreva rūpaṃ munīndrāḥ |

asmānabjaprabhe te pracuratarakṛpānirbharaṃ prekṣamāṇe

pātāmātāmraśuklāsitarucirucire padmanetrasya netre || 40 ||

pātātpātālapātātpatagapatigaterbhrūyugaṃ bhugnamadhyaṃ

yeneṣaccālitena svapadaniyamitāḥ sāsurā devasaṅghāḥ |

nṛtyallālāṭaraṅge rajanikaratanorardhakhaṇḍāvadāte

kālavyāladvayaṃ vā vilasati samayā vālikāmātaraṃ naḥ || 41 ||

lakṣmākārālakālisphuradalikaśaśāṅkārdhasandarśamīla-

-nnetrāmbhojaprabodhotsukanibhṛtatarālīnabhṛṅgacchaṭābhe |

lakṣmīnāthasya lakṣyīkṛtavibudhagaṇāpāṅgabāṇāsanārdha-

-cchāye no bhūribhūtiprasavakuśalate bhrūlate pālayetām || 42 ||

rūkṣasmārekṣucāpacyutaśaranikarakṣīṇalakṣmīkaṭākṣa-

-protphullatpadmamālāvilasitamahitasphāṭikaiśānaliṅgam |

bhūyādbhūyo vibhūtyai mama bhuvanapaterbhrūlatādvandvamadhyā-

-dutthaṃ tatpuṇḍramūrdhvaṃ janimaraṇatamaḥkhaṇḍanaṃ maṇḍanaṃ ca || 43 ||

pīṭhībhūtālakānte kṛtamakuṭamahādevaliṅgapratiṣṭhe

lālāṭe nāṭyaraṅge vikaṭatarataṭe kaiṭabhāreścirāya |

proddhāṭyaivātmatandrīprakaṭapaṭakuṭīṃ prasphurantīṃ sphuṭāṅgaṃ

paṭvīyaṃ bhāvanākhyāṃ caṭulamatinaṭī nāṭikāṃ nāṭayennaḥ || 44 ||

mālālīvālidhāmnaḥ kuvalayakalitā śrīpateḥ kuntalālī

kālindyāruhya mūrdhno galati haraśiraḥsvardhunīspardhayā nu |

rāhurvā yāti vaktraṃ sakalaśaśikalābhrāntilolāntarātmā

lokairālokyate yā pradiśatu satataṃ sākhilaṃ maṅgalaṃ naḥ || 45 ||

suptākārāḥ prasupte bhagavati vibudhairapyadṛṣṭasvarūpā

vyāptavyomāntarālāstaralamaṇirucā rañjitāḥ spaṣṭabhāsaḥ |

dehacchāyodgamābhā ripuvapuraguruploṣaroṣāgnidhūmyāḥ

keśāḥ keśidviṣo no vidadhatu vipulakleśapāśapraṇāśam || 46 ||

yatra pratyuptaratnapravaraparilasadbhūrirociṣpratāna-

-sphūrtyāṃ mūrtirmurārerdyumaṇiśatacitavyomavaddurnirīkṣyā |

kurvatpārepayodhi jvaladakṛśaśikhābhāsvadaurvāgniśaṅkāṃ

śaśvannaḥ śarma diśyātkalikaluṣatamaḥpāṭanaṃ tatkirīṭam || 47 ||

bhrāntvā bhrāntvā yadantastribhuvanagururapyabdakoṭīranekā

gantuṃ nāntaṃ samartho bhramara iva punarnābhinālīkanālāt |

unmajjannūrjitaśrīstribhuvanamaparaṃ nirmame tatsadṛkṣaṃ

dehāmbhodhiḥ sa deyānniravadhiramṛtaṃ daityavidveṣiṇo naḥ || 48 ||

matsyaḥ kūrmo varāho narahariṇapatirvāmano jāmadagnyaḥ

kākutsthaḥ kaṃsaghātī manasijavijayī yaśca kalkirbhaviṣyan |

viṣṇoraṃśāvatarā bhuvanahitakarā dharmasaṃsthāpanārthāḥ

pāyāsurmāṃ ta ete gurutarakaruṇābhārakhinnāśayā ye || 49 ||

yasmādvāco nivṛttāḥ samamapi manasā lakṣaṇāmīkṣamāṇāḥ

svārthālābhātparārthavyapagamakathanaślāghino vedavādāḥ |

nityānandaṃ svasaṃvinniravadhivimalasvāntasaṅkrāntabimba-

-cchāyāpatyāpi nityaṃ sukhayati yamino yattadavyānmaho naḥ || 50 ||

āpādādā ca śīrṣādvapuridamanaghaṃ vaiṣṇavaṃ yaḥ svacitte

dhatte nityaṃ nirastākhilakalikaluṣa santatāntaḥ pramodam |

juhvajjihvākṛśānau haricaritahaviḥ stotramantrānupāṭhai-

-statpādāmbhoruhābhyāṃ satatamapi namaskurmahe nirmalābhyām || 51 ||

modātpādādikeśastutimitiracitā kīrtayitvā tridhāmna

pādābjadvandvasevāsamayanatamatirmastakenānamedya |

unmucyaivātmanainonicayakavacaka pañcatāmetya bhāno-

-rbimbāntargocara sa praviśati paramānandamātmasvarūpam || 52 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī viṣṇu pādādikeśāntavarṇaṇa stotraṃ sampūrṇam |