kalitakanakacelaṃ khaṇḍitāpatkucelaṃ
galadhṛtavanamālaṃ garvitārātikālam |
kalimalaharaśīlaṃ kāntidhūtendranīlaṃ
vinamadavanaśīlaṃ veṇugopālamīḍe || 1 ||
vrajayuvativilolaṃ vandanānandalolaṃ
karadhṛtaguruśailaṃ kañjagarbhādipālam |
abhimataphaladānaṃ śrījitāmartyasālaṃ
vinamadavanaśīlaṃ veṇugopālamīḍe || 2 ||
ghanatarakaruṇāśrīkalpavallyālavālaṃ
kalaśajaladhikanyāmodakaśrīkapolam |
pluṣitavinatalokānantaduṣkarmatūlaṃ
vinamadavanaśīlaṃ veṇugopālamīḍe || 3 ||
śubhadasuguṇajālaṃ sūrilokānukūlaṃ
ditijatatikarālaṃ divyadārāyitelam |
mṛdumadhuravacaḥśrī dūritaśrīrasālaṃ
vinamadavanaśīlaṃ veṇugopālamīḍe || 4 ||
mṛgamadatilakaśrīmedurasvīyaphālaṃ
jagadudayalayasthityātmakātmīyakhelam |
sakalamunijanālīmānasāntarmarālaṃ
vinamadavanaśīlaṃ veṇugopālamīḍe || 5 ||
asuraharaṇakhelanaṃ nandakotkṣepalīlaṃ
vilasitaśarakālaṃ viśvapūrṇāntarālam |
śucirucirayaśaśśrīdhikkṛta śrīmṛṇālaṃ
vinamadavanaśīlaṃ veṇugopālamīḍe || 6 ||
svaparicaraṇalabdha śrīdharāśādhipālaṃ
svamahimalavalīlājātavidhyaṇḍagolam |
gurutarabhavaduḥkhānīka vāḥpūrakūlaṃ
vinamadavanaśīlaṃ veṇugopālamīḍe || 7 ||
caraṇakamalaśobhāpālita śrīpravālaṃ
sakalasukṛtirakṣādakṣakāruṇya helam |
rucivijitatamālaṃ rukmiṇīpuṇyamūlaṃ
vinamadavanaśīlaṃ veṇugopālamīḍe || 8 ||
śrīveṇugopāla kṛpālavālāṃ
śrīrukmiṇīlolasuvarṇacelām |
kṛtiṃ mama tvaṃ kṛpayā gṛhītvā
srajaṃ yathā māṃ kuru duḥkhadūram || 9 ||
iti śrī veṇugopālāṣṭakam |